\id PHP  
\h Pilipi 
\toc1 Sasuri Paulus hia dhèu parcaya ètu kota Pilipi 
\toc2 Pilipi 
\toc3 Flp 
\mt2 Sasuri Paulus  
\mt2 hia dhèu parcaya ètu kota  
\mt1 Pilipi  
\c 1  
\s1 Lii mahoꞌo nèti Paulus si  
\r (Lii Lolo nèti Dhèu Pajuu-paleha 16:12)  
\p
\v 1 Sasuri ne, nèti jaꞌa, Paulus. Aa angalai jaꞌa, Timotius paꞌadhu hia miu lii mahoꞌo kahèi. Jiꞌi dua mi se, ana sabꞌa nèti Yesus Kristus.  
\p Jiꞌi paꞌadhu sasuri ne, hia mi dhèu unu Ama Lamatua dhu parcaya Yesus Kristus ètu kota Pilipi. Jiꞌi neo kahèi, ho dhèu dhu jꞌajꞌi kètu jumaꞌat dènge dhèu dhu soru-bara kètu jumaꞌat sèra, reꞌa mèu isi sasuri neꞌe.   
\p
\v 2 Ama Lamatua èèna, Ama èdhi. Aa Yesus Kristus èèna, Kètu èdhi. Jiꞌi manèngi sèna ka Rèngu padꞌelo dꞌara hua iia Ra mi miu, ho bisa mamuri dènge mera-milu.   
\s1 Paulus sabajꞌa ho Lamatua jꞌaga dhèu unu Na sèra ètu kota Pilipi  
\p
\v 3 Masi ka nèbhu le jaꞌa paraga heka dènge miu, te ngaa jaꞌa bhèlu boe miu! Lodꞌo-lodꞌo jaꞌa sanèdꞌe miu, jaꞌa manèngi makasi mi Lamatua, lula miu parcaya Ne taruu.  
\v 4 Lodꞌo jaꞌa sabajꞌa hia miu, dꞌara jaꞌa karejꞌe-karae,  
\v 5 lula karèi nèti hiu-hiu miu sèmi mere Lii Lolo Beꞌa Lamatua, miu pakako taruu sasabꞌa Na, sama-sama dènge jaꞌa.  
\v 6 Èèna jꞌajꞌi mi tadha, peka na, Ama Lamatua mulai sabꞌa ètu dꞌara miu kèna. Aa jaꞌa keꞌa tareꞌa, na, Lamatua pakako taruu sasabꞌa Na dhu beꞌa èèna, toke pamèci aaꞌi mèu-mèu, toke dꞌai lodꞌo Yesus Kristus mai hari.   
\p
\v 7 Mema lèke tareꞌa ladhe jaꞌa sue miu, lula dꞌara jaꞌa dhu paꞌèki le dènge miu karèi nèti uru ka. Ca hari nèi, miu sabꞌa le bera-bera dènge jaꞌa, lodꞌo jaꞌa lole dènge dhèu Lii Lolo Beꞌa Lamatua, aa ropa jaꞌa dhaa mi dhèu dhu labꞌa Lii Lolo Beꞌa èèna. Masi ka jaꞌa maso bui, te ngaa miu hari boe nèti baboa jaꞌa.  
\v 8 Ama Lamatua dhu neꞌa, na, dꞌara jaꞌa neo taruu paraga dènge miu. Te sasue jaꞌa mi dedha miu, èci èèna ka dènge sasue Yesus Kristus.   
\p
\v 9-10 De jaꞌa sabajꞌa hia miu sèmi neꞌe ka: jaꞌa manèngi ho miu asa tabha pasue èci dènge èci. Jaꞌa manèngi kahèi sèna ka Ama Lamatua hia miu meꞌa mèu, mia dhu beꞌa, sèna ka miu mamuri mola-mèci. Pe dꞌai lodꞌo Kristus pamaꞌète lii langu dhèu aaꞌi-aaꞌi, Na peka na, miu sala boe ngaa-ngaa,  
\v 11 lula Nèngu mesa Na ka dhu tao dꞌara miu mola-mèci, ho bisa mamuri mola. Dènge mamuri mola sèmi èèna ka, dhèu leo dedꞌe padedha-dedha aa koa-kio kolongara Ama Lamatua.   
\s1 Masi ka èdhi abhu sasusa, te ngaa èdhi parcaya taruu Lamatua Yesus  
\p
\v 12 Aꞌari pasue aaꞌi-aaꞌi! Jaꞌa dꞌèi sèna ka miu meꞌa, na, abhu dhèu dhu pasusa jaꞌa, toke pamaso jaꞌa asa dꞌara bèdho. Te ngaa teꞌa boe, na, Lii Lolo Beꞌa Lamatua pale-lème le ètu mia-mia,  
\v 13 toke sordadꞌu dhu madhenga èmu dhèu aae, dènge dhèu leo aaꞌi-aaꞌi reꞌa, na, jaꞌa maso bui lula madhutu Yesus Kristus.\x + \xo 1:13 \xt Lii Lolo nèti Dhèu Pajuu-paleha 28:30\x*  
\v 14 Ka dhèu unu Ama Lamatua ètu seꞌe se rèdhi, na, Lamatua ka dhu tao jꞌara èèna lodꞌo jaꞌa ètu dꞌara bui ne. Nèti èèna ka, rèngu asa tabha bani, toke reꞌa heka madhaꞌu. Hèia ra padhai paledꞌa-ledꞌa Lii Holo-Nori Lamatua ètu mia-mia.   
\p
\v 15-17 Ètu neꞌe abhu dua rupa dhèu dhu majꞌèni ajꞌa jꞌara-jꞌara lula-nèti Kristus. Nèti èèna ka, abhu dhu sabꞌa dènge dꞌara mola, aa abhu dhu sabꞌa dènge dꞌara koe-kapengo. Dhu sabꞌa dènge dꞌara mola, rèngu beꞌa dènge jaꞌa. Dhèu se reꞌa mèu, na, jaꞌa dui sasusa ne, lula pakako sasabꞌa jaꞌa, dhu hari boe kabodho ciki sa.  
\p Te ngaa dhu sabꞌa dènge dꞌara koe-kapengo, dꞌèi boe dhèu risi nèti rèngu aa tenge kolongara di. Rèngu pamae-pamanyèla dhèu-dhèu parcaya, sadꞌi abhu dhèu dhu madhutu ra. Te ra tenge jꞌara ho bisa padedha iisi ra, peka na, rèngu risi jaꞌa. Rèngu pangee, na, ladhe abhu dhèu dhu madhutu rèngu, èèna na asa tabha pajꞌèra jaꞌa ètu dꞌara bui.   
\p
\v 18 Te ngaa hudꞌi rèngu sène! Jaꞌa pusi-pahae boe, ladhe dhèu ajꞌa dènge dꞌara mola, do aadꞌo. Sadꞌi dhu rèngu ajꞌa, dhoka lula-nèti Yesus Kristus di! Èèna ka dhu pakarejꞌe dꞌara jaꞌa.  
\p Aa jaꞌa karejꞌe tareꞌa-reꞌa,  
\v 19 lula jaꞌa keꞌa, na, miu sabajꞌa hia jaꞌa, aa Roh Yesus Kristus dhu soru-bara jaꞌa. Nèti èèna ka, jaꞌa keꞌa, na, lèpa lodꞌo limuri, aaꞌi-aaꞌi se èle dènge sodꞌa-mole!  
\v 20 Masi ka jaꞌa muri do, madhe do, ngaa-ngaa tao boe. Sadꞌi Ama Lamatua pake jaꞌa, sèna ka dedꞌe padedha-dedha kolongara Yesus Kristus, aa ajꞌa mola-mola lula-nèti Nèngu, toke abhu boe ngaa èci sa dhu pamakae jaꞌa. Seꞌe se ka dhu jaꞌa sanao karèi nèti uru, toke doe neꞌe ne.   
\p
\v 21-23 Te jaꞌa pangee sèmi neꞌe ka: ladhe jaꞌa mamuri, na, hudꞌi laa paꞌèki dènge Kristus, aa pakako taruu sasabꞌa-laꞌa Na. Èèna ka dhu beꞌa. Te ngaa ladhe jaꞌa madhe, jaꞌa oto risi hari, lula jaꞌa tèke eele rai-haha ne, aa mamuri hari ho pea paꞌèci dènge Kristus ètu sorga. Nèti èèna ka, dꞌara jaꞌa kajari, aa keꞌa boe mia ka dhu beꞌa risi eele!  
\v 24 De sèmi neꞌe ka laa! Lula miu parluu jaꞌa era ètu neꞌe, beꞌa risi jaꞌa pea paꞌèci dènge miu ètu rai-haha ne.  
\v 25 Jaꞌa keꞌa, na, mamuri jaꞌa madhera era, sèna ka paraga hari dènge miu. Te Lamatua neo ho jaꞌa paꞌèra dꞌara miu, hèia miu asa lèka Ne dènge dꞌara karejꞌe.  
\v 26 De bèli-camèdꞌa miu dedꞌe padedha-dedha kolongara Yesus Kristus, lula Na bhoke le jꞌara sèna ka jaꞌa lèpa paꞌasu-pareo hari dènge miu.   
\s1 Mamuri mola taruu  
\p
\v 27-28 Masi ka tasa mera mia, mamuri miu hudꞌi lèke ku, te miu dhèu unu Lamatua. De miu hudꞌi mamuri dhu mèci ku, aa tao madhutu Lii Lolo Beꞌa Yesus Kristus dhu peka le dènge miu. Aa ladhe bèli-camèdꞌa jaꞌa lèpa hari dhiu pangadꞌo dènge miu, do tadèngi dhoka lii nèti dhèu di, peka na, miu mamuri mola, na, dꞌara jaꞌa karejꞌe. Te jaꞌa bisa keꞌa, na, miu dhu mamuri dꞌara èci, lula paꞌèki dènge Roh èci di. Aa bisa keꞌa, na, miu paꞌèra ho pakako sama-sama Lii Lolo Beꞌa Lamatua Yesus, sèna ka dhèu leo parcaya kahèi. Aa miu meꞌa boe madhaꞌu kahèi, masi ka abhu dhèu dhu labꞌa miu. Neꞌe ne jꞌajꞌi mi tadha hia musu, na, Ama Lamatua neo lalèta eele si. Te ngaa Ama Lamatua hia miu mamuri, ho bèli-camèdꞌa miu mamuri taruu dènge Nèngu.  
\v 29 Te, lula Ama Lamatua dꞌara hua iia risi, nèti èèna ka Na bhoke le jꞌara, sèna ka miu bisa parcaya Kristus, aa jꞌajꞌi dhèu unu Na. Mesa boe parcaya di, te ngaa Lamatua soro tèke miu abhu sasusa kahèi, lula miu madhutu Nèngu.  
\v 30 Te dhu jaꞌa tadèngi, abhu dhèu ètu sèra dhu labꞌa miu, lula miu pakako Lii Lolo Beꞌa Kristus. Sanèdꞌe, te ca hari ni rèngu labꞌa le jaꞌa kahèi, toke dꞌai doe neꞌe ne.\x + \xo 1:30 \xt Lii Lolo nèti Dhèu Pajuu-paleha 16:19-40\x*   
\c 2  
\s1 Èdhi hudꞌi pahaha iisi nuka sèmi Yesus Kristus  
\p
\v 1 Aꞌari pasue aaꞌi-aaꞌi, unu Yesus Kristus! Na pangèdꞌu le miu jꞌara beꞌa ae-ae. De miu bisa paꞌèra dꞌara èci dènge èci. Miu bisa holo dhu mai nèti sasue miu. Miu bisa mamuri pabeꞌa èci dènge èci, lula Roh Lamatua dhu sabꞌa ètu talora aae miu. Aa miu bisa padꞌelo rasa kasia miu dènge dꞌara beꞌa èci dènge èci.  
\v 2 Ladhe miu tao sèmi èèna, na, dꞌara jaꞌa karejꞌe kea rae-rae. Risi-risi hari, ladhe miu pasue dènge dꞌara èci, mamuri ètu ca jꞌara, aa mere lii èci ètu dꞌara sasabꞌa-laꞌa.  
\v 3 Baku tao ngaa-ngaa dhu tenge dhoka paꞌoto ngiꞌu èu risi nèti dhèu leo. Aa baku pangee, na, èu risi nèti dhèu leo. Te pamone do pabhèni èu èèna, dènge boe kolo-kapua. Te ngaa èdhi hudꞌi pahaha iisi ku, sèna ka teꞌa, na, dhèu leo risi nèti èdhi.  
\v 4 Aa baku dhoka uri mamuri miu mesa-mesa mi. Te ngaa èdhi hudꞌi ladhe kahèi, ngaa dhu dhèu leo parluu.   
\p
\v 5 Te dꞌara èdhi hudꞌi sama ku sèmi dꞌara Yesus Kristus.   
\q1
\v 6 Masi ka Nèngu ca ropa dènge Ama Lamatua,  
\q2 aa Nèngu Kètu èdhi kahèi, èci èèna ka dènge Ama Lamatua,  
\q1 te ngaa Na tèke eele hak Na,  
\q2 aa pake boe dadedha dènge kapai Na.   
\q1
\v 7 Hèia Na puru mai asa rai-haha ne,  
\q2 ca ropa dènge dhèu rai-haha.  
\q2 Na tèke eele hak Na aaꞌi-aaꞌi,  
\q3 sèna ka tao iisi Na jꞌajꞌi nuka sèmi ènu sa.   
\q1
\v 8 Mesa boe jꞌajꞌi dhèu haha dꞌai seli di,  
\q2 te ngaa Na tao ngiꞌu Na jꞌajꞌi dhèu dhu laku-laku boe kahèi,  
\q3 sèna ka tao madhutu dadꞌèi Ama Lamatua.  
\q2 Masi ka ra pamadhe Ne ètu ajꞌu palolo-palèbha, Na sèmi nare kahèi,  
\q3 aa madhe, nuka sèmi dhèu bhelu.   
\q1
\v 9 Lula Nèngu pahaha iisi sèmi èèna,  
\q2 nèti èèna ka Ama Lamatua dedꞌe Ne padedha-dedha.  
\q1 Aa pangèdꞌu Ne ngara dhu kapai aae.  
\q2 Te abhu boe ngara èci sa dhu kapai aae risi nèti Nèngu.   
\q1
\v 10 Ama Lamatua dedꞌe padedha-dedha ngara Na èèna,  
\q2 sèna ka dhèu aaꞌi-aaꞌi pakabꞌua Ne.  
\q3 Nuka: dhèu ètu dedha-liru,  
\q3 dènge dhèu ètu rai-haha ne.  
\q3 Dhèu mamuri dènge dhèu madhe.  
\q2 Bèli-camèdꞌa dhèu aaꞌi-aaꞌi patitu kètu urutuu, ho pahaha iisi mi Nèngu.   
\q1
\v 11 Aa bèli-camèdꞌa dhèu aaꞌi-aaꞌi peka na, “Yesus Kristus èèna, tareꞌa-reꞌa Lamatua!”  
\q2 Dènge sèmi èèna, rèngu koa-kio Ama Lamatua kahèi.\x + \xo 2:11 \xt Yesaya 45:23\x*   
\s1 Èdhi nuka sèmi hua-hètu dhu pasaraa rai-haha  
\p
\v 12 Aꞌari pasue aaꞌi-aaꞌi! Nanene paie-iie! Uru èèna, lodꞌo jaꞌa pea ètu kota Pilipi era, miu nanene lii padhai jaꞌa, ka miu madhutu jꞌara mola Ama Lamatua. Limuri ne, èdhi pahagꞌa, te ngaa jaꞌa manèngi ho miu titu èra ètu dꞌara mamuri mola. Sanèdꞌe, te ladhe miu nanene boe Nèngu, bèli-camèdꞌa pe mèdhi unu mi! Lula Nèngu ka dhu patalale miu nèti koasa sasala-sasigo mi. Hèia miu mamuri dhu mèci, te miu jꞌajꞌi le dhèu unu Na.  
\v 13 Te Ama Lamatua mesa Na ka dhu sabꞌa ètu dꞌara miu. Nèngu ka dhu bhoke jꞌara, sèna ka miu neo nanene Ne. Aa Nèngu ka dhu hia koasa kahèi, ho miu dꞌèi sabꞌa pakarejꞌe dꞌara Na.   
\p
\v 14 De ladhe sadꞌi miu tao ngaa èèna ka, na, baku kaꞌuu-kamuki, aa baku pasibha dꞌara lii.  
\v 15 Tao sèmi èèna, sèna ka miu jꞌajꞌi dhèu dhu dꞌara mola-mèci, aa dhèu dhu dènge boe sasala. Miu mamuri ètu dꞌara talora aae dhèu bhelu dènge dhèu kapodꞌe-kabèli. Te ngaa baku madhutu si! Te mamuri miu hudꞌi mola-mèci ku, lula miu ana-ana Lamatua. Hèia mamuri miu hudꞌi heo ku, ho padꞌelo jꞌara hia rèngu, nuka sèmi hua-hètu dhu pasaraa ètu dꞌara maroga.\x + \xo 2:15 \xt Lole Hari Jꞌara-jꞌara Mamuri 32:5\x*  
\v 16 Hèia miu mamuri mola dènge pakako Lii Holo-Nori Lamatua. Dènge sèmi èèna, bèli-camèdꞌa miu tao dꞌara jaꞌa kea rae-rae, lodꞌo Yesus Kristus lèpa hari mai. Aa rui-jꞌajꞌèra jaꞌa core eele boe iia dꞌara, te ngaa dènge kabꞌua.   
\p
\v 17-18 Te ngaa ladhe sèmi jaꞌa dutu paꞌèle aaꞌi mèu-mèu mamuri jaꞌa, ho jꞌajꞌi nuka sèmi korban èi anggor, sèna ka miu bisa parcaya asa èra, aa pakako sasabꞌa Lamatua, jaꞌa sèmi kore mamadhe dènge karejꞌe. [Èèna nuka sèmi ama agama tiko èi anggor ètu mei korban, ho pahaha iisi mi Lamatua.] Dènge jꞌara ne, èdhi bisa sama-sama karejꞌe, lula korban ne, iia dꞌara boe.\x + \xo 2:17-18 \xt Sensus 28:7\x*   
\s1 Sasabꞌa Timotius  
\p
\v 19 Jaꞌa sanao, nèbhu heka, Lamatua Yesus bhoke jꞌara, ho jaꞌa pua Timotius dhiu, sèna ka na paꞌèra dꞌara miu. Èle èèna, na lèpa hari mai sa neꞌe, ho na lolo dènge jaꞌa kakako miu, aa pakarejꞌe dꞌara jaꞌa.  
\v 20 Jaꞌa pua boe dhèu leo, dhoka Timotius di, lula nèngu ne dꞌara èci dènge jaꞌa. Aa na sue tareꞌa-reꞌa miu.  
\v 21 Nèngu ne, sama boe dènge aꞌari dhu leo sèra. Te rèngu sèra pangee dhoka ngiꞌu rèngu unu ra, te ngaa uri boe ngaa-ngaa dhu pamèci hia Yesus Kristus.  
\v 22 Te ngaa miu meꞌa le, na, Timotius sabꞌa dꞌai madhe, pakako sasabꞌa Ama Lamatua. Na sabꞌa dènge jaꞌa nuka sèmi ana dhu sabꞌa hia ama na. Jiꞌi dua mi laꞌa peka-padhai Lii Lolo Beꞌa Lamatua Yesus ètu mia-mia.  
\v 23 Ladhe rèngu pamaꞌète rare ku lii langu jaꞌa, jaꞌa heka pua Timotius dhiu asa miu kèna.  
\v 24 Te ngaa limuri ne, Lamatua paꞌèra dꞌara jaꞌa, na, nèbhu heka jaꞌa bisa dhiu paraga dènge miu.   
\s1 Sasabꞌa Epaproditus  
\p
\v 25 Uru èèna, lodꞌo jaꞌa ètu dꞌara jꞌajꞌèra era, miu pua aꞌari èdhi Epaproditus mai ladhe-leru jaꞌa. Na pakako sasabꞌa Lamatua sama-sama dènge jaꞌa, nuka sèmi ca dhèu sordadꞌu dhu majꞌèni madhutu paredha komedhaa na. Te ngaa neꞌe ne, jaꞌa neo pua na lèpa hari asa miu.  
\v 26 Te dꞌara na neo ae le nèdhi miu. Aa na ngee miu, lula neꞌa, na, miu tadèngi le nèngu dhu pèdꞌa.  
\v 27 Mema lèke tareꞌa. Ca hari ni, na pèdꞌa aae oe madhe. Te ngaa Ama Lamatua sue ne, aa Lamatua sue jaꞌa kahèi, ka Na puri-paꞌèle Epaproditus, sèna ka jaꞌa baku asa susa.  
\v 28 Nèti èèna ka, jaꞌa neo pua hari na lèpa, ho bisa paraga hari dènge miu dènge dꞌara karejꞌe-karae. Ladhe sèmi èèna, dꞌara jaꞌa heka mau kèna.  
\v 29-30 De miu hudꞌi sèmi mere ne dènge beꞌa, te nèngu ne dhèu unu Lamatua. Aa miu hudꞌi pakabꞌua ku dhèu aaꞌi-aaꞌi ra dhu ca ropa dènge ne. Te nèngu pakako sasabꞌa Kristus, toke oe madhe. Aa nèngu hari boe kabodho ciki sa, lula na neo soru-bara jaꞌa, gati miu. De sèmi mere hari ne dènge dꞌara karejꞌe.   
\c 3  
\s1 Ama Lamatua sèmi nare dhèu, lula ra parcaya Yesus Kristus  
\p
\v 1 Aꞌari aaꞌi-aaꞌi! Nanene paie-iie! Dꞌara miu hudꞌi karejꞌe ku, lula miu paꞌèki dènge Kristus. Masi ka jaꞌa suri pahari-pahari, te ngaa jaꞌa roca boe pasanèdꞌe miu sèna ka baku lèke tipu!   
\p
\v 2 Baku pamudꞌe dènge dhèu kapodꞌe-kabèli, dhu laka-seti dhèu, peka na, “Miu hudꞌi suna ku, ho jꞌajꞌi tadha, na, miu se dhèu unu Lamatua.” Madhutu iia-iia na, Lamatua paredha boe sèmi èèna! Rèngu sala le èèna! Te ngaa masi ka sèmi èèna, ra bata-magèla dhèu nuka sèmi busa pakadhi sa.  
\v 3 Te rèngu peka, na, Lamatua sèmi nare dhèu lula rèngu suna. Te ngaa èèna sala! Èdhi teꞌa le, na, Lamatua sèmi nare dhèu lula ra parcaya Yesus. Ka dhèu dhu tareꞌa-reꞌa unu Lamatua, nuka èdhi dhu parcaya Yesus! Èdhi dhu pahaha iisi mi Nèngu, madhutu Roh Na dhu Mola-Mèci. Èdhi ka dhu dedꞌe padedha-dedha Yesus Kristus, lula Na bhoke nare le jꞌara, ho èdhi bisa jꞌajꞌi dhèu unu Lamatua. Te èdhi bisa boe abhu mamuri, lula madhutu tatao dhèu rai-haha di.   
\p
\v 4 Uru èèna, jaꞌa pangee dhu èci èèna ka dènge rèngu kahèi, peka na, dhèu bisa jꞌajꞌi dhèu unu Lamatua, sadꞌi ra suna. Madhutu iia-iia na, sèra sa sasabꞌa dhèu rai-haha di! Ladhe neo padhue sasabꞌa dhèu rai-haha, na, jaꞌa bisa padhai lii padedha iisi risi nèti dhèu aaꞌi-aaꞌi, lula uru èèna sasabꞌa jaꞌa lèke mola-mola dènge atora agama dhèu Yahudi aaꞌi-aaꞌi.  
\v 5-6 Madhutu atora agama, ina-ama jaꞌa suna jaꞌa, ropa jaꞌa dꞌai aru lodꞌo. Jaꞌa ne dhèu Yahudi tareꞌa-reꞌa, lula jꞌajꞌajꞌi jaꞌa nèti suku Benyamin, ana-èpu nèti baki Israꞌel. Jaꞌa majꞌèni titu kèna, madhutu mola-mola atora aaꞌi-aaꞌi nèti partei agama Parisi, toke abhu boe ca dhèu sa dhu bisa pasala jaꞌa. Risi-risi hari, jaꞌa dꞌèi titu kèna, pajꞌèra dhèu-dhèu dhu madhutu Kristus, lula madhutu aꞌabhu jaꞌa, na, dhèu se rai eele le atora agama èdhi.\x + \xo 3:5-6 \xt Roma 11:1, Lii Lolo nèti Dhèu Pajuu-paleha 8:3, 22:4, 23:6, 26:5,9-11\x*   
\p
\v 7-8 Te ngaa nèbhu-nèbhu, ka ngangee jaꞌa kabèli, ropa jaꞌa madhutu Kristus. De limuri ne, jaꞌa padedha heka iisi dènge jꞌara mamuri dhu uru sèra, lula dènge heka sasoa ngaa-ngaa hia mi mamuri jaꞌa. Madhutu aꞌabhu jaꞌa, na, dhu dedha risi nuka: jaꞌa tadhe Kristus, Kètu jaꞌa èèna. Jꞌara leo aaꞌi-aaꞌi ra, nuka sèmi mamumu di.  
\v 9 Jaꞌa neo mamuri paꞌèki dènge Yesus Kristus. Te masi ka jaꞌa madhutu aaꞌi atora agama Yahudi, tatu mèka Ama Lamatua sèmi nare jaꞌa. Aa masi ka jaꞌa pangee, na, ngiꞌu jaꞌa mola, tatu boe Lamatua sèmi nare jaꞌa kahèi. Te ngaa jaꞌa hudꞌi parcaya ku Kristus, heka Ama Lamatua sèmi nare jaꞌa kèna, peka na, “Lula Kristus saku eele le sasala èu, nèti èèna ka èu jꞌajꞌi mola-mèci.”   
\p
\v 10 Ka dadꞌèi jaꞌa sèmi neꞌe: jaꞌa neo tadhe pamèu-mèu Kristus. Jaꞌa neo keꞌa mèu kahèi koasa Ama Lamatua dhu Na pake ho pamamuri hari Yesus Kristus nèti mamadhe Na. Ladhe sèmi abhu dhèu dhu neo pajꞌèra jaꞌa, lula jaꞌa madhutu Kristus, na, hudꞌi nèngu sène. Te dhèu pajꞌèra Kristus kahèi. Aa ladhe abhu dhèu neo pamadhe jaꞌa, lula jaꞌa lalau-laloꞌo dhèu leo, na, jaꞌa sèmi kore kahèi. Te Kristus madhe hia jaꞌa sèmi èèna kahèi.  
\v 11 Aa ladhe jaꞌa madhe, pe Nèngu pamamuri hari jaꞌa kahèi.   
\s1 Èdhi paꞌèra ngiꞌu, ho madhutu jꞌara Lamatua dènge tareꞌa-reꞌa  
\p
\v 12-13 Aꞌari aaꞌi-aaꞌi! Jaꞌa neo titu kèna madhutu jꞌara mamuri Kristus dènge dadꞌèi Na aaꞌi-aaꞌi. Te ngaa ladhe peka dhu mola-mola, jaꞌa tao lèke mèka sèmi èèna. Nèti èèna ka, jaꞌa paꞌèra ngiꞌu, lula Yesus Kristus hagꞌe nare le jaꞌa ho madhutu Ne. Jaꞌa nuka sèmi dhèu dhu rai paꞌèra-èra, sèna ka bisa dꞌai lane. De jaꞌa rai mola-mola asa madha, dhu kabibꞌa boe kabodho, ho ngee jꞌara uru sèra. Jaꞌa pabhèlu eele aaꞌi si.  
\v 14 Te ngaa jaꞌa rai pamèdhu-mèdhu toke dꞌai lane, sèna ka abhu piala. Hadia jaꞌa èèna nuka: bèli-camèdꞌa Ama Lamatua sèmi nare jaꞌa ètu sorga, lula jaꞌa parcaya Yesus Kristus.   
\p
\v 15 De jaꞌa manèngi ho miu aaꞌi-aaꞌi mi dhu mamuri sega dènge amo dhu èra ètu dꞌara Kristus, bisa dꞌara èci dènge jꞌara se aaꞌi-aaꞌi ra. Te ngaa ladhe abhu dhu ngee leo, na, hudꞌi laa Ama Lamatua pajꞌujꞌu jꞌara dhu hua iia hia nèngu.  
\v 16 Te ngaa masi ka sèmi èèna, èdhi hudꞌi kèpe paꞌèra-èra ku, aa tao palèke jꞌara aaꞌi-aaꞌi dhu Lamatua ajꞌa le èdhi.   
\p
\v 17 Aꞌari aaꞌi-aaꞌi! Miu hudꞌi laladhe ku jꞌara mamuri jaꞌa sèna ka tao madhutu. Miu cahagꞌe ètu sèra, jꞌara mamuri èci èèna ka dènge jaꞌa. Te ngaa miu dhu leo bisa laladhe nèti rèngu, sèna ka tao madhutu sèmi èèna kahèi.\x + \xo 3:17 \xt 1 Korintus 4:16, 11:1\x*  
\v 18 Baku pamudꞌe dènge dhèu ae dhu labꞌa Kristus aa dhu sèmi boe dènge beꞌa mamadhe Na ètu ajꞌu palolo-palèbha. Jꞌara mamuri unu ra ka dhu peka na, rèngu labꞌa Kristus. Jaꞌa peka kèdhi le miu lula-nèti dhèu dhu ca ropa dènge rèngu, te ngaa limuri ne jaꞌa pasanèdꞌe hari miu dènge pahaa èi madha.  
\v 19 Te bèli-camèdꞌa Lamatua tule eele si, hèia pèci si asa dꞌara ai naraka, lula dꞌara rèngu dhu paꞌèki boe dènge Ne. Rèngu mamuri dhoka ètu dꞌara bhabhelu-katubꞌa di, aa tenge jꞌara sèna ka pakasee dꞌara iisi unu ra, toke ra padedha iisi dènge bhabhelu rèngu sèra. Dhèu sèra dhu reꞌa heka makae. Ngangee rèngu nuka sèmi dhèu dhu tadhe boe Lamatua.   
\p
\v 20 Miu baku madhutu si, te ngaa madhutu la jiꞌi. Lula èdhi jꞌajꞌi dhèu unu Lamatua, dhu dènge hak jꞌajꞌi ana-ana kabarai sorga. Limuri ne èdhi tatae Kètu èdhi, Yesus Kristus. Te bèli-camèdꞌa Na lèpa hari mai nèti sorga, ho pakajꞌèu èdhi nèti nanasa Ama Lamatua.  
\v 21 Èèna na, Kristus ubꞌa ngiꞌu èdhi dhu roe dhu bisa madhe ne, jꞌajꞌi mi ngiꞌu hiu dhu madhe boe nuka sèmi ngiꞌu Na dhu èra aae èèna. Na ubꞌa ngiꞌu aae èdhi ne, pake koasa Na dhu kapai seli eele èèna. Aa Na pake kahèi koasa èèna, sèna ka tao aaꞌi-aaꞌi dhu ètu mia-mia, ho madhutu paredha Na.   
\c 4  
\p
\v 1 Aꞌari pasue aaꞌi-aaꞌi! Nèti seꞌe se, ka jaꞌa manèngi ho miu mamuri mola taruu, aa baku koe-kapengo. Jaꞌa neo taruu kèdhi miu. Te miu se ka dhu jꞌajꞌi parcaya nèti rui-jꞌajꞌèra jaꞌa. Miu pamahoꞌo dènge pakarejꞌe dꞌara jaꞌa. Aa jaꞌa bisa boti kètu, lula miu.   
\s1 Lamatua neo paꞌèra dꞌara èdhi, ladhe èdhi mamuri mola taruu  
\p
\v 2 Jaꞌa manèngi sèna ka bhèni dhèu dua sèra, nuka Yodia dènge Sinteke, ho loe eele ka nèti patao-palaha. Rèngu hudꞌi padame ku, ho pabeꞌa èci dènge èci. Lula Lamatua rèngu èci di, nèti èèna ka paꞌèki rèngu èci dènge èci.   
\p
\v 3 Angalai, ee! Jaꞌa manèngi ho èu uri ku ana hèni èdhi bhèni dhèu dua sèra, toke ra pabeꞌa hari. Te uru èèna, rèngu sabꞌa rèdhi le, ho soru-bara jaꞌa ètu peka-padhue dènge dhèu Lii Lolo Beꞌa Lamatua. Rèngu sabꞌa rèdhi sèmi èèna kahèi sama-sama dènge Klemens, dènge angalai dhu leo. Ngara rèngu aaꞌi-aaꞌi ra suri le ètu dꞌara sasuri Lamatua dhu suri ngara-ngara dhèu dhu bèli-camèdꞌa mamuri sama-sama dènge Ne ètu sorga.   
\p
\v 4 Lula miu jꞌajꞌi le dhèu unu Lamatua, nèti èèna ka dꞌara miu hudꞌi karejꞌe ku mèda-mèu. Jaꞌa peka hari catèka: pakarejꞌe taruu dꞌara miu!   
\p
\v 5 Dꞌara miu hudꞌi mahoꞌo kahèi dènge dhèu aaꞌi-aaꞌi ra. Aa baku bhèlu, peka na, Lamatua Yesus nèbhu heka mai hari.  
\v 6 Ladhe miu paraga dènge jꞌajꞌèra, na, baku dꞌara miu roe dènge ngaa èci sa. Te ngaa sabajꞌa ho manèngi Ama Lamatua soru-bara miu ètu madha jꞌara aaꞌi-aaꞌi ra. Aa aaꞌi-aaꞌi dhu miu manèngi se, baku bhèlu manèngi makasi mi Lamatua.  
\v 7 Ladhe miu tao sèmi èèna, pe Lamatua pamau dꞌara miu. Mema dhèu rai-haha ne, reꞌa mèu mèka dꞌara dhu mau, dhu èdhi abhu nèti Lamatua. Te ngaa, lula miu parcaya Yesus Kristus, Lamatua dhu pamau dꞌara miu, neo jꞌaga miu sèna ka dꞌara dènge ngangee miu baku kajari.   
\p
\v 8 Aꞌari aaꞌi-aaꞌi! Jꞌara na sèmi neꞌe ka: baku ngee dhu rupa-rupa. Te ngaa jꞌaga ngangee miu, sèna ka ngee jꞌara-jꞌara dhu pamèci dènge dꞌara Lamatua, aa ngee jꞌara-jꞌara dhu beꞌa, dhu pakarejꞌe dꞌara dhèu leo. Miu hudꞌi ngee dhu mola dènge dhu mola-mèci. Ngee jꞌara-jꞌara dhu lèke, dènge dhu hua iia. Tenge jꞌara ho ra pakabꞌua dhèu leo kahèi. Tenge jꞌara ho padꞌelo jꞌara-jꞌara dhu hua iia. Aa baku loe pangee nèti jꞌara dhu beꞌa se aaꞌi-aaꞌi ra.  
\v 9 Jaꞌa ajꞌa-nori le miu madhutu jꞌara mamuri Lamatua. Mamuri miu kahèi hudꞌi madhutu jꞌara mamuri jaꞌa, aa tao madhutu aaꞌi-aaꞌi dhu jaꞌa padhue-padhai aa dhu tao kèdhi le. Ladhe miu madhutu sèmi èèna, na, Ama Lamatua paꞌèra dꞌara miu, sèna ka dꞌara miu karejꞌe-karae, aa bisa mamuri dènge mera-milu.   
\s1 Paulus manèngi makasi lula dhèu Pilipi soru-bara ne  
\p
\v 10 Jaꞌa manèngi makasi dènge koa-kio Ama Lamatua, lula miu bhèlu boe jaꞌa. Jaꞌa keꞌa, na, uru èèna miu dhu sanèdꞌe taruu jaꞌa, te ngaa abhu mèka lodꞌo ho bara jaꞌa.  
\v 11 Jaꞌa pangee boe manèngi miu ngaa-ngaa. Te jaꞌa kura kèdhi mèka ngaa-ngaa èci sa, lula jaꞌa dhu tema le mamuri dènge ngaa dhu jaꞌa unu.  
\v 12 Jaꞌa mamuri kèdhi le dènge boe ngaa-ngaa. Jaꞌa mamuri kèdhi le kahèi dènge katei-kabheca. Jaꞌa paraga le dènge kabake manganga, dènge kabake bècu. Ètu dꞌara ngaa èèna ka, jaꞌa dhu keꞌa kore le rasia na ho bisa taha mamuri.  
\v 13 Te jaꞌa bisa tago kore aaꞌi jꞌara sèra, lula Kristus ka dhu paꞌèra jaꞌa!   
\p
\v 14 Masi ka tasa mera mia èèna, jaꞌa manèngi makasi, lula miu padꞌelo le dꞌara beꞌa miu, aa soru-bara jaꞌa ètu dꞌara jꞌajꞌèra.  
\v 15 Uru èèna, ropa jaꞌa kèdꞌi eele nèti propensi Makedonia, ho laku pakako Lii Lolo Beꞌa Lamatua asa era leo, dhodhoka miu di nèti kota Pilipi dhu ogo-oru jaꞌa. Jumaꞌat leo sèra, aadꞌo. Te ngaa miu dhu meꞌa le lii lolo èèna.  
\v 16 Lodꞌo dhu jaꞌa ètu kota Tesalonika èèna, miu paꞌadhu doi catèka-dua hari, ho soru-bara jaꞌa.\x + \xo 4:16 \xt 2 Korintus 11:9, Lii Lolo nèti Dhèu Pajuu-paleha 17:1\x*  
\v 17 Limuri ne, baku pangee, na, jaꞌa neo manèngi ngaa-ngaa nèti miu. Te jaꞌa neo sèna ka Lamatua pala-bagi miu mèngi-nale, lula miu dꞌara beꞌa dènge jaꞌa.  
\v 18 Jaꞌa sèmi kore le nèti Epaproditus, aaꞌi-aaꞌi dhu miu paꞌadhu mai bara jaꞌa. Seꞌe se jꞌajꞌi mi berkat hia jaꞌa, toke dꞌai sange neꞌe, jaꞌa kura boe ngaa-ngaa. Seꞌe se jꞌajꞌi nuka sèmi korban tunu dhu hèu mèngi, ho pahaha iisi mi Ama Lamatua. Aa Lamatua sèmi nare korban èèna, lula pakarejꞌe dꞌara Nèngu.\x + \xo 4:18 \xt Kalua nèti Masir 29:18\x*   
\p
\v 19 Ama Lamatua dhu jaꞌa pahaha iisi èèna, kaja seli eele. Aa neꞌa mèu ngaa dhu miu parluu. De Na padꞌelo dꞌara hua iia Na, aa pala hia miu mèngi-nale dhu risi eele, lula miu dhu paꞌèki tèke le dènge Yesus Kristus.  
\v 20 De hudꞌi laa èdhi dedꞌe padedha-dedha taruu kolongara Ama Lamatua toke dꞌai mia-mia laꞌe. Neꞌe ne ka dhu lèke mola-mola!   
\s1 Paulus suri paꞌèle sasuri na  
\p
\v 21 Jaꞌa paꞌadhu lii mahoꞌo jaꞌa hia dhèu aaꞌi-aaꞌi dhu madhutu Yesus Kristus ètu kota Pilipi.  
\p Angalai jaꞌa ètu seꞌe se, hia miu lii mahoꞌo kahèi.   
\p
\v 22 Dhèu parcaya aaꞌi-aaꞌi ètu kota Roma ne, hia lii mahoꞌo kahèi.  
\p Sèmi èèna kahèi dènge aꞌari sèra dhu sabꞌa ètu dꞌara èmu dhèu aae kapai ne. Ra paꞌadhu lii mahoꞌo hia miu kahèi.   
\p
\v 23 Jaꞌa manèngi sèna ka Kètu èdhi, Yesus Kristus, padꞌelo dꞌara hua iia Na mi miu aaꞌi-aaꞌi mi.  
\q2 Sasuri jaꞌa tèja mi neꞌe ka,  
\q2 Paulus