\id EPH  
\h Epesus 
\toc1 Sasuri Paulus hia dhèu parcaya ètu Epesus 
\toc2 Epesus 
\toc3 Ef 
\mt2 Sasuri Paulus  
\mt2 hia dhèu parcaya ètu  
\mt1 Epesus  
\c 1  
\s1 Lii mahoꞌo  
\p
\v 1 Lii mahoꞌo nèti jaꞌa, Paulus. Jaꞌa suri sasuri ne, hia miu aaꞌi-aaꞌi mi, dhu jꞌajꞌi le dhèu unu Yesus Kristus ètu kota Epesus,\f + \fr 1:1 \ft Abhu sasuri lii Yunani cahagꞌe dhu ra suri boe “ètu kota Epesus”. Nèti èèna ka, dhèu dꞌèlu-mèu cahagꞌe pangee, na, sasuri neꞌe nèti Paulus hia mi dhèu sarani aaꞌi-aaꞌi ètu mia-mia.\f* aa dhu taha ètu dꞌara mamuri mola-mèci madhutu dadꞌèi Na. Nèngu mesa Na ka dhu pua-paleha jaꞌa madhutu dadꞌèi Ama Lamatua.\x + \xo 1:1 \xt Lii Lolo nèti Dhèu Pajuu-paleha 18:19-21, 19:1\x*   
\p
\v 2 Ama Lamatua ne, Ama èdhi. Aa Yesus Kristus, Kètu èdhi. Jaꞌa manèngi sèna ka Rèngu padꞌelo dꞌara hua iia Ra ho miu mamuri dènge mera-milu.   
\s1 Paulus koa-kio Ama Lamatua dènge Yesus Kristus  
\p
\v 3 Koa-kio mi Ama Lamatua! Nèngu ka Ama nèti Kètu èdhi, Yesus Kristus. Te Ama Lamatua pala-bagi le mi èdhi mèngi-nale aaꞌi-aaꞌi nèti sorga, lula èdhi jꞌajꞌi le dhèu unu Yesus Kristus.   
\p
\v 4 Te lodꞌo rai-haha dhae jꞌajꞌi mèka, Ama Lamatua sue aa hagꞌe nare le èdhi, sèna ka jꞌajꞌi dhèu unu Yesus Kristus. Na dꞌèi sèna ka èdhi mamuri mola-mèci. Dènge sèmi èèna, dhèu bisa boe pasala èdhi.  
\v 5 Nèngu ka dhu pamaꞌète mema karèi nèti uru ka, ho dedꞌe èdhi jꞌajꞌi ana Na, lula Yesus Kristus. Neꞌe ne ka dhu pakarejꞌe dꞌara Na.  
\v 6 Nèti èèna ka, èdhi koa-kio Ne. Te Nèngu padꞌelo le dꞌara hua iia Na mi èdhi, ho èdhi bisa mamuri paꞌèci dènge Ana pasue Na.   
\p
\v 7 Masi ka èdhi uru èèna mamuri mola-mèci boe madhutu jꞌara mamuri Ama Lamatua, te ngaa Na padꞌelo dꞌara hua iia Na, aa hia Ana Na mai, sèna ka pasuti raa Na toke madhe. Dènge jꞌara neꞌe, Ana Na sui nare èdhi nèti sasala-sasigo èdhi.\x + \xo 1:7 \xt Kolose 1:14\x*  
\v 8 Lula Na dutu-bhori sasue Na mi èdhi, Nèngu pasaraa dꞌara èdhi kahèi, ka bisa teꞌa mèu dadꞌèi dꞌara Na.  
\v 9 Uru èèna, Ama Lamatua dhae peka aaꞌi mèka dadꞌèi dꞌara Na mi dhèu rai-haha ne. Te ngaa limuri ne, madhutu dadꞌèi Na, Na hia le èdhi teꞌa, peka na, karèi nèti uru ka, Na pamaꞌète nare le ho neo pake Yesus Kristus sèna ka padame dhèu rai-haha dènge Ama Lamatua.  
\v 10 Aa, pe dꞌai lodꞌo na, Yesus Kristus jꞌajꞌi Kètu ho uri aaꞌi ngaa-ngaa ètu rai-haha dènge ètu sorga.   
\p
\v 11-12 Lula èdhi dhu paꞌèki le dènge Kristus, nèti èèna ka èdhi abhu pusaka kahèi nèti Ama Lamatua. Te karèi nèti uru jꞌara ka, Na hagꞌe nare jiꞌi dhèu Yahudi, ho jꞌajꞌi dhèu unu Na. Dadꞌèi Nèngu ka, neo pake jiꞌi ho bhoke jꞌara hia dhèu-dhèu leo, sèna ka dhèu aaꞌi-aaꞌi bisa parcaya Kristus. Aaꞌi-aaꞌi se jꞌajꞌi, madhutu ngaa dhu Na pamaꞌète nare le. Dènge jꞌara ne, èdhi aaꞌi-aaꞌi ti bisa dedꞌe padedha-dedha risi hari, kolongara Ama Lamatua.   
\p
\v 13 Lula jiꞌi bhoke le jꞌara, nèti èèna ka miu nèti suku leo bisa mai jꞌajꞌi dhèu unu Kristus, sadꞌi miu parcaya Lii Lolo Beꞌa Na dhu mola. Te Lii Lolo Beꞌa èèna ka dhu pamamuri miu.  
\p Ladhe miu parcaya sèmi èèna, miu sèmi mere kahèi Roh Ama Lamatua dhu Mola-Mèci dhu Na moa mema le. Te Roh Lamatua Mola-Mèci ne, nuka sèmi cap ho patadha, peka na, miu tareꞌa-reꞌa jꞌajꞌi le dhèu unu Lamatua.  
\v 14 Roh Mola-Mèci neꞌe jꞌajꞌi mi jaminan kahèi, dhu peka na, pe Ama Lamatua hia aaꞌi mèu-mèu dhu Na moa mema sèra, toke Na sui nare èdhi, sèna ka jꞌajꞌi dhèu unu Na. Nèti èèna ka, èdhi koa-kio dadedha Na.   
\s1 Paulus sabajꞌa hia dhèu Epesus  
\p
\v 15 Jaꞌa tadèngi ae le, jꞌara-jꞌara lalèka miu mi Kètu èdhi, Yesus Kristus, aa nèti sasue miu mi dhèu parcaya sèra. Nèti èèna ka,  
\v 16 jaꞌa loe boe manèngi makasi mi Ama Lamatua.  
\v 17 Jaꞌa sabajꞌa, peka na, “Ama Pasue! Ama ku, Ama Lamatua nèti Kètu jaꞌa, Yesus Kristus. Aa Ama ku ka dhu kapai risi aaꞌi. Jaꞌa manèngi sèna ka Ama hia Roh Ama mi dhèu Epesus, ho reꞌa jꞌara-jꞌara dhu lèke, aa bisa tadhe Ama mèu risi hari.  
\v 18 Jaꞌa manèngi ho Ama Lamatua bhoke ngangee dènge pasaraa dꞌara ra, sèna ka bisa reꞌa aaꞌi ngaa dhu Ama padhadha neo hia si. Jaꞌa neo kahèi sèna ka rèngu reꞌa pusaka dhu Ama moa neo hia si bèli-camèdꞌa. Te pusaka èèna kabꞌua titu kèna.  
\v 19 Jaꞌa manèngi kahèi, ho Ama bhoke jꞌara hia si, sèna ka bisa reꞌa mèu koasa Ama dhu dedha risi èèna. Te Ama pake koasa èèna, ho soru-bara dhèu parcaya dhu unu Ama sèra.  
\v 20 Te koasa Ama Lamatua èèna, risi aaꞌi mèu-mèu. Nèti koasa neꞌe ka Na pamamuri Kristus nèti mamadhe Na. Hèia Ama Lamatua dedꞌe Kristus asa sorga, ka hia Ne madhèdi ètu era dhu kabꞌua risi eele, ètu baboa gꞌana Na.\x + \xo 1:20 \xt Lii Sodꞌa Koa-Kio 110:1\x*  
\v 21 Nèngu dedha risi nèti aaꞌi-aaꞌi dhu ètu rai-haha dènge ètu sorga. Te Nèngu dedha risi nèti koasa aaꞌi-aaꞌi, aa dènge dhu rèdꞌu paredha aaꞌi-aaꞌi ra. Na kèpe koasa Na dhu risi nèti aaꞌi-aaꞌi sèra, mesa boe doe neꞌe ne di. Te Na nèdꞌu koasa ne taruu toke dꞌai mia-mia.  
\v 22 Ama Lamatua unu Na ka dhu tao sèna ka aaꞌi-aaꞌi se pahaha iisi mi Kristus. Aa Nèngu kahèi dedꞌe Kristus jꞌajꞌi Kètu, sèna ka uri aaꞌi-aaꞌi dhu paꞌèki dènge dhèu parcaya sèra.\x + \xo 1:22 \xt Lii Sodꞌa Koa-Kio 8:6\x*  
\v 23 De ladhe Na jꞌajꞌi Kètu, èdhi dhèu parcaya jꞌajꞌi nuka sèmi ngiꞌu Na. Bèli-camèdꞌa èdhi ka dhu sabꞌa paꞌèle aaꞌi mèu sasabꞌa dhu Na pakako lodꞌo Na ètu rai-haha ne era. Te Nèngu ka dènge koasa ho pajꞌajꞌi aaꞌi mèu-mèu madhutu dadꞌèi Ama Lamatua.”\x + \xo 1:23 \xt Kolose 1:18\x*  
\p Lii sabajꞌa jaꞌa sèmi neꞌe ka hia miu.   
\c 2  
\s1 Dhèu dhu parcaya Yesus Kristus abhu mamuri hiu  
\p
\v 1 Uru èèna, miu sisu paredha Ama Lamatua, aa adꞌu-ue rupa-rupa sasala. Nèti èèna ka Lamatua peka na, miu nuka sèmi dhèu dhu madhe le.  
\v 2 Uru èèna, mamuri miu madhutu dadꞌèi rai-haha ne, dènge dadꞌèi dhèu aae nidhu. Toke dꞌai sange neꞌe, nidhu loe boe dadugu-rariu dhèu rai-haha, sèna ka palabꞌa dènge Ama Lamatua.  
\v 3 Uru èèna, èdhi mamuri sèmi èèna kahèi, ka ngaa dhu èdhi rasa do, pangee do, èdhi tao madhutu dadꞌèi dꞌara di. Te èdhi dhèu bhelu, èci èèna ka dènge dhèu rai-haha aaꞌi-aaꞌi. Nèti èèna ka Ama Lamatua nasa titu kèna dènge èdhi,  
\v 4-5 aa pangee na, èdhi nuka sèmi dhèu madhe kahèi dhu cèri eele nèti Nèngu. Masi ka sèmi èèna, te ngaa dꞌara Na laꞌe boe lula Na sue èdhi titu kèna. Nèti èèna ka, Na padꞌelo dꞌara hua iia Na, aa pua Yesus Kristus mai sèna ka pala-bagi mamuri hiu hia èdhi. De Lamatua ka dhu hia mamuri mi èdhi lula dꞌara hua iia Na.\x + \xo 2:4-5 \xt Kolose 2:13\x*  
\v 6 Yesus Kristus madhe, te ngaa Ama Lamatua pamamuri hari Ne. Hèia Lamatua dedꞌe Ne ho nèdꞌu paredha ètu sorga. Lamatua tao sèmi èèna kahèi mi dedha èdhi, Na pala-bagi mamuri hiu mi èdhi, hèia Na dedꞌe èdhi, ka tèdꞌu paredha sama-sama dènge Kristus ètu sorga.  
\v 7 Nèti èèna ka, mulai nèti doe neꞌe, dꞌai mia-mia laꞌe, Ama Lamatua padꞌelo dꞌara sasue Na ae-ae, dènge dꞌara hua iia Na dhu risi aaꞌi èèna, lula èdhi parcaya Yesus Kristus.  
\v 8-9 Ropa miu parcaya Kristus, Ama Lamatua hia miu mamuri, lula dꞌara hua iia Na. Na hia mamuri sèmi èèna, baku pangee, na, Nèngu bꞌala ngaa dhu miu tao. Lula mamuri èèna jꞌajꞌi hadia dhu Na hia iia dꞌara mi miu. Nèti èèna ka, miu baku padedha iisi nèti ngaa dhu miu tao.\x + \xo 2:8-9 \xt Titus 3:5\x*  
\v 10 Èdhi mamuri, lula Ama Lamatua ka dhu pajꞌajꞌi èdhi. Hèia Yesus Kristus hia èdhi mamuri hiu, sèna ka èdhi tao jꞌara-jꞌara dhu beꞌa, dhu Lamatua pamaꞌète nare le karèi nèti uru ka.   
\s1 Ama Lamatua sèmi nare dhèu nèti suku aaꞌi-aaꞌi  
\p
\v 11 Aꞌari aaꞌi-aaꞌi! Miu meꞌa le, na, dhèu Yahudi kèpe paꞌèra-èra atora suna rèngu, aa ra pusi-pahae boe miu dhèu Yahudi boe, lula moꞌo boe madhutu atora èèna! Madhutu iia-iia na, atora suna ne dhoka nèti ngiꞌu aae di, nèti boe dꞌara dhèu.  
\v 12 Lodꞌo miu dhae parcaya mèka Yesus Kristus, miu dènge mèka hak ho jꞌajꞌi dhèu unu Ama Lamatua. Te uru èèna, miu dhae maso mèka asa dꞌara lii pajaji Ama Lamatua dhu Na paꞌèki tèke mi Abraham, aa dènge ana-èpu na. Lodꞌo èèna, miu mamuri ètu rai-haha, te ngaa bisa boe maena mi Ama Lamatua, lula miu jꞌajꞌi dhèu leo rai kara era,  
\v 13 dhu cèri nèti Lamatua. Te ngaa limuri ne, Yesus Kristus bhoke nare le jꞌara, sèna ka miu bisa paꞌèki dènge Ama Lamatua. Te Kristus madhe sèna ka cuhi dꞌara Lamatua, ho miu bisa padame dènge Ne, aa bisa jꞌajꞌi dhèu unu Na.   
\p
\v 14 Uru èèna, jiꞌi dhèu Yahudi ngoꞌo boe mamuri dame dènge miu dhèu leo rai kara. Nuka sèmi kadidhi dhu hagꞌe eele èdhi. Te ngaa lula mamadhe Yesus ètu ajꞌu palolo-palèbha, ka Na paguri eele le kadidhi èèna, sèna ka èdhi dhu uru èèna pamusu, bisa padame hari ho jꞌajꞌi mi ca suku.  
\v 15 Te uru èèna, dhèu Yahudi tenge jꞌara ho pake atora agama rèngu sèna ka pabeꞌa dènge Ama Lamatua. Te ngaa ropa Yesus Kristus madhe, Na paꞌele iie le jꞌara dhui, aa bhoke jꞌara hiu, sèna ka dhèu Yahudi dènge dhèu leo kara, dua-dua ra bisa mamuri pabeꞌa dènge Ama Lamatua. Dènge sèmi èèna, rèngu aaꞌi-aaꞌi ra paꞌèki jꞌajꞌi mi ca suku dhu hiu, dhu mamuri mera-milu.\x + \xo 2:15 \xt Kolose 2:14\x*  
\v 16 De Kristus madhe ètu ajꞌu palolo-palèbha sèna ka tao dua suku sèra jꞌajꞌi mi èci, aa nèti hari si asa Ama Lamatua. Te Kristus palaho eele aaꞌi le ngaa dhu uru èèna tao rèngu ho pamusu.\x + \xo 2:16 \xt Kolose 1:20\x*  
\v 17 Nèngu mai asa rai-haha ne, nèti Lii Lolo Beꞌa hia dhèu Yahudi dènge dhèu leo kara sèra, dhu lole na, “Uru èèna miu mamuri pamusu, te ngaa limuri ne abhu le jꞌara sèna ka miu bisa mamuri padame èci dènge èci.”\x + \xo 2:17 \xt Yesaya 57:19\x*  
\v 18 De jiꞌi dhèu Yahudi dènge miu dhèu Yahudi boe, aaꞌi-aaꞌi ti abhu jꞌara ho lati asa Ama Lamatua èdhi, lula Yesus bhoke le jꞌara hia èdhi aaꞌi-aaꞌi ti. Aa Roh Ama Lamatua dhu Mola-Mèci padꞌelo jꞌara mi èdhi aaꞌi-aaꞌi ti kahèi.   
\s1 Dhèu unu Yesus Kristus nuka sèmi èmu sabajꞌa  
\p
\v 19 Lula paꞌue-ai Yesus Kristus, nèti èèna ka miu dhèu Yahudi boe jꞌajꞌi heka dhèu leo rai kara dhu dènge boe hak ngaa-ngaa. Te limuri ne, miu unu le hak ho jꞌajꞌi ana kabarai sorga, lula Ama Lamatua dedꞌe le miu jꞌajꞌi ana-èpu Na.  
\v 20 Neꞌe ne, nuka sèmi Ama Lamatua neo patitu èmu cue. Na patitu hadhu dhu padhèdi uru, nuka Yesus Kristus. Hèia Na tao fanderen, nuka dhèu rèti lii padhai Na dènge dhèu pajuu-paleha Na. Ka Na padhèdi hadhu se pagodꞌo-godꞌo ètu dedha sèra aaꞌi-aaꞌi. Hadhu se, nuka èdhi aaꞌi-aaꞌi ti dhu jꞌajꞌi le ana-èpu Na.  
\v 21 Èmu ne titu èra bia, lula hadhu se dhu pagodꞌo si dènge beꞌa ètu dedha hadhu dhu padhèdi uru sèra. Aa èmu èèna nèbhu-nèbhu asa kapai, ka dhèu lasi asa dꞌara èmu èèna, sèna ka manèngi-mangajꞌi mi Ama Lamatua.  
\v 22 De limuri ne, Ama Lamatua tao sèna ka miu dhèu Yahudi boe kahèi jꞌajꞌi nuka sèmi hadhu, sama-sama dènge jiꞌi dhèu Yahudi. Ama Lamatua padhèdi pagodꞌo-godꞌo èdhi aaꞌi-aaꞌi ti, ho jꞌajꞌi era pea Roh Na.   
\c 3  
\s1 Paulus nèti Lii Lolo Beꞌa asa dhèu Yahudi boe  
\p
\v 1 Lula Ama Lamatua hagꞌe boe dhèu Yahudi dènge dhèu Yahudi boe, nèti èèna ka Na pua jaꞌa, Paulus, ho lole Lii Lolo Beꞌa Yesus Kristus dènge miu dhèu Yahudi boe ètu dꞌara kota Epesus. Jaꞌa pakako le sasabꞌa jaꞌa, toke jaꞌa jꞌajꞌi ana bèdho.  
\v 2 Tatu miu meꞌa kahèi, na, Ama Lamatua pua-paleha jaꞌa mai, lula Na neo padꞌelo dꞌara hua iia Na mi miu.  
\v 3 Uru èèna, mema Ama Lamatua dhae peka mèka dènge dhèu rai-haha ne, lula-nèti ngaa dhu Na pamaꞌète hia mi dhèu dhu Yahudi boe. Te ngaa limuri ne, Nèngu peka le dènge jaꞌa, jꞌara ne aaꞌi-aaꞌi ra. Aa neꞌe ne, jaꞌa dhu suri pababꞌa-babꞌa le ètu sasuri ne hia miu.  
\v 4 Ladhe miu baca mere, tatu miu bisa meꞌa kahèi dadꞌèi Ama Lamatua mi Yesus Kristus, dhu Na bhoke hia jaꞌa.  
\v 5 Te uru èèna, dhèu rai-haha reꞌa mèka dadꞌèi Na. Te ngaa limuri ne, Na pake le Roh Na, sèna ka peka dadꞌèi Na mi dhèu rèti lii padhai Na, dènge dhèu pajuu-paleha Na.  
\v 6 Te karèi nèti uru ka, Ama Lamatua pamaꞌète le sèmi neꞌe: ladhe dhèu Yahudi boe parcaya Lii Lolo Beꞌa Yesus Kristus, rèngu bisa jꞌajꞌi kahèi ana-ana Ama Lamatua, sama sèmi dhèu Yahudi sèra. Nèti èèna ka, limuri ne èdhi aaꞌi-aaꞌi ti paꞌaꞌari le, aa èdhi sama-sama bisa abhu mèngi-nale nèti Ama èdhi, Ama Lamatua.   
\p
\v 7 Ama Lamatua padꞌelo dꞌara hua iia Na, ka hagꞌe nare jaꞌa jꞌajꞌi dhèu pajuu-paleha Na. Aa Na pangèdꞌu koasa Na mi jaꞌa kahèi, sèna ka pakako sasabꞌa Na.  
\v 8 Nèti dhèu unu Lamatua aaꞌi-aaꞌi, jaꞌa ne haha dꞌai seli. Masi ka sèmi èèna, te ngaa Lamatua hagꞌe nare jaꞌa, ho pakako sasabꞌa Na dhu kapai risi eele èèna. Dadꞌèi Na sèna ka jaꞌa lole dènge dhèu Yahudi boe, lula-nèti dꞌara hua iia Yesus Kristus dhu dènge boe too-lane.  
\v 9 Te karèi nèti Ama Lamatua pajꞌajꞌi rai-haha ne, dadꞌèi Na neo hia Kristus mai èèna, dhu pahuni era. Te ngaa limuri ne, Nèngu neo, sèna ka jaꞌa lole dènge dhèu aaꞌi-aaꞌi, ho ra reꞌa mèu dadꞌèi Na èèna.  
\v 10 Te dadꞌèi Na èèna, dꞌèlu-mèu risi eele. Hèia Nèngu neo pake dhèu unu Na, ho padꞌelo mamèu Na mi koasa-koasa dhu leo, aa mi aaꞌi-aaꞌi dhu rèdꞌu paredha ètu dedha-liru.  
\v 11 Lodꞌo dhu Na pajꞌajꞌi mèka rai-haha ne, Nèngu pamaꞌète nare le neo bhoke jꞌara ho patabuli eele dhèu rai-haha nèti koasa sasala-sasigo ra. Nèti èèna ka, Na pake Kètu èdhi, Yesus Kristus, sèna ka tao madhutu sèmi èèna.  
\v 12 Nèti èèna ka, èdhi dhu parcaya Yesus Kristus, parluu heka madhaꞌu padhai lii dènge Ama Lamatua. Te Nèngu dhu pakabhèle mema ai Na, sèna ka sèmi nare èdhi lodꞌo mia èèna ka.   
\p
\v 13 Sanèdꞌe, ee! Jaꞌa jꞌèra lula lalau-laloꞌo miu dhèu Yahudi boe. Masi ka sèmi èèna, te ngaa dꞌara miu mage èra boe kahèi. Jaꞌa pasae kore jꞌajꞌèra ne, lula neo paꞌèra miu ho sèmi mere babeꞌa na.   
\s1 Paulus sabajꞌa manèngi makasi mi Ama Lamatua  
\p
\v 14 Lodꞌo dhu jaꞌa ngee kèdhi dꞌara hua iia Ama Lamatua dhu risi eele èèna, hèia jaꞌa patitu kètu urutuu ho manèngi makasi.  
\v 15 Te aꞌari aaꞌi-aaꞌi ètu rai-haha dènge ètu sorga unu dhoka Ama èci di, nuka Ama Lamatua.   
\q1
\v 16 Jaꞌa sabajꞌa sèna ka Na hia mèngi-nale ae-ae mi dedha miu, madhutu dadꞌèi dꞌara Na dhu hua iia risi èèna.  
\q1 Aa jaꞌa manèngi kahèi ho Na hia Roh Na, dènge koasa Na, sèna ka paꞌèra dꞌara miu.   
\q1
\v 17 Jaꞌa manèngi ho Yesus Kristus pea ètu dꞌara miu, lula miu parcaya Ne taruu.  
\q1 Aa jaꞌa sabajꞌa kahèi sèna ka miu mamuri paꞌèki dènge sasue Na, nuka sèmi ana aajꞌu asa èra, lula amo na maso marèma asa dꞌara rai.\x + \xo 3:17 \xt Kolose 2:7\x*   
\q1
\v 18-19 Jaꞌa sabajꞌa kahèi ho miu dènge dhèu unu Lamatua aaꞌi-aaꞌi bisa meꞌa mèu sasue Kristus dhu dhèu rai-haha ne dꞌèu rare boe. Te sasue ne, kapai titu kèna, taleo titu kèna, marèma titu kèna, aa ae titu kèna!  
\q1 Jaꞌa sabajꞌa kahèi sèna ka miu rasa sasue Na, toke sasue ne maso papènu dꞌara dènge mamuri miu.\x + \xo 3:18-19 \xt Kolose 1:19, 2:9-10\x*   
\q1
\v 20 Koasa Ama Lamatua kapai titu kèna, risi aaꞌi nèti dhu èdhi manèngi dènge dhu èdhi bisa ngee. Aa Na pake koasa Na dhu kapai aae èèna, ho sabꞌa ètu dꞌara èdhi.  
\v 21 Nèti èèna ka, èdhi dhu paꞌèki le dènge Kristus, ti dedꞌe Ne padedha-dedha! Koa-kio Ne taruu, mulai nèti doe neꞌe, toke dꞌai mia-mia laꞌe. Neꞌe ka dhu lèke!   
\c 4  
\s1 Dhèu unu Lamatua Yesus hudꞌi mamuri dꞌara èci nuka sèmi rèngu jꞌajꞌi ngiꞌu Na  
\p
\v 1 Jaꞌa pakako le sasabꞌa Lamatua jaꞌa, toke jaꞌa jꞌajꞌi ana bèdho. De limuri ne jaꞌa pamako miu, sèna ka mamuri mola madhutu dadꞌèi Ama Lamatua, lula Na paroa nare le miu, sèna ka jꞌajꞌi dhèu unu Na.  
\v 2 Nèti èèna ka, miu hudꞌi mamuri dènge pahaha iisi, aa pamahoꞌo èci dènge èci. Miu hudꞌi taha mere dꞌara, aa tadhe mèu èci dènge èci, ho mamuri pasue dhu tareꞌa. Ladhe nèti miu, abhu dhu tenge lii langu dènge angalai na, baku tèka dꞌara dènge ne kahèi.\x + \xo 4:2 \xt Kolose 3:12-13\x*  
\v 3 Tenge jꞌara ho muri dame èci dènge èci, lula Roh Ama Lamatua dhu èki le miu jꞌajꞌi mi èci.  
\v 4 Te dhèu unu Yesus Kristus dhu jꞌajꞌi le èci, nuka sèmi ngiꞌu Kristus unu Na. Aa rèngu aaꞌi-aaꞌi ra sèmi rare le Roh Lamatua dhu dhoka èci èèna di. Aa rèngu aaꞌi-aaꞌi ra sanao-maena dhoka mi Ama Lamatua di, lula Nèngu ka dhu paroa nare si ho jꞌajꞌi dhèu unu Na.   
\q1
\v 5 Lamatua èdhi, dhoka èci di;  
\q1 Parcaya èdhi, dhoka ca jꞌara di,  
\q2 sèna ka bisa padame dènge Ne.  
\q1 Aa èdhi aaꞌi-aaꞌi ti abhu sarani,  
\q2 sèna ka paꞌèki dènge Ne.   
\q1
\v 6 Ama Lamatua, dhoka èci di,  
\q2 Aa Ama èdhi, dhoka Nèngu di.  
\q1 Dhoka Nèngu di dhu paredha èdhi aaꞌi-aaꞌi ti.  
\q1 Dhoka Nèngu di dhu bera-bera dènge èdhi.  
\q1 Aa Nèngu mesa Na di dhu mamuri ètu dꞌara èdhi.   
\s2 Kristus hia rupa-rupa sasabꞌa-laꞌa, sèna ka dhèu unu na asa èra  
\p
\v 7 Te ngaa Yesus Kristus pala-bagi le koasa Na mi èdhi, sèna ka èdhi èci-èci ka pakako sasabꞌa Na.  
\v 8 Nèti èèna ka Sasuri Ama Lamatua, peka na,  
\q1 “Nèngu caꞌe laꞌe asa era dedha,  
\q2 sèna ka Na pamusu ètu èèna toke segi.  
\q1 Hèia ère nèti dhèu ae-ae dhu lèke taha,  
\q1 aa papala hadia mi dhèu rai-haha.”\x + \xo 4:8 \xt Lii Sodꞌa Koa-Kio 68:18\x*   
\p
\v 9 (Sanèdꞌe lii-lii dhu peka na, “Nèngu caꞌe laꞌe”. Ladhe Na caꞌe laꞌe, sasoa na, uru èèna Na puru nèdhi le asa rai-haha ne.  
\v 10 De Dhèu dhu puru mai èèna, nuka Kristus. Te Nèngu caꞌe hari asa sorga, sèna ka bisa uri aaꞌi dhu ètu dedha-liru dènge ètu rai-haha.)  
\v 11 Kristus dhu pangèdꞌu koasa mi dhèu unu Na, sèna ka ra pakako sasabꞌa-laꞌa dhu Na pala-bagi hia rèngu. Abhu cahagꞌe dhu Na hia si koasa ho jꞌajꞌi dhèu pajuu-paleha Na; cahagꞌe jꞌajꞌi dhèu rèti lii padhai Na; cahagꞌe jꞌajꞌi sèmi ca dhèu ama sa,\f + \fr 4:11 \ft Ètu neꞌe, sasuri lii Yunani suri, peka na, “dhèu madhenga badha”. Sasoa na, ca dhèu dhu uri aa lalau-laloꞌo dhèu unu Kristus, sama sèmi ca dhèu madhenga badha uri aa ladhe-leru badha na.\f* ho lalau-laloꞌo dhèu unu Kristus; cahagꞌe jꞌajꞌi dhèu dꞌèlu-mèu ho ajꞌa dhèu unu Na; aa cahagꞌe hari jꞌajꞌi dhèu dhu tema rèti Lii Lolo Beꞌa asa era-era dhu hiu.  
\v 12 Ca dhèu-dhèu ka sèmi rare sasabꞌa ra, sèna ka paꞌèra dhèu-dhèu parcaya ho aaꞌi-aaꞌi ra bisa pakako sasabꞌa Lamatua. Dènge jꞌara neꞌe, èdhi aaꞌi-aaꞌi ti dhu parcaya Yesus Kristus asa tabha èra,  
\v 13-14 toke èdhi aaꞌi-aaꞌi ti parcaya dꞌara èci. Aa èdhi aaꞌi-aaꞌi ti tadhe tareꞌa-reꞌa Ana Ama Lamatua. Èdhi sèmi heka ana iiki, lula èdhi madhutu mola-mola le jꞌara Nèngu, aa jꞌajꞌi le dhèu dhu mamuri madhutu dadꞌèi Na. Ladhe èdhi mamuri ka sèmi èèna, èdhi sèmi heka koha dhu dènge boe uli, ka madhutu dhoka rii di. Te ladhe dhèu kapodꞌe-kabèli mai ajꞌa pagoa èdhi, ra tao rare boe.  
\v 15 Te ngaa èdhi dènge lii mako lole dhoka ngaa dhu lèke hia mi aꞌari èdhi sèra, lula èdhi sue rèngu. Aa ladhe èdhi mamuri sèmi èèna ètu dꞌara ngaa èèna ka, èdhi jꞌajꞌi ca ropa dènge Kristus. Te Nèngu ne Kètu èdhi dhu uri èdhi.  
\v 16 Aa èdhi jꞌajꞌi nuka sèmi ngiꞌu Na. Sama sèmi ngiꞌu dhèu èci, dhu dènge musi madha, hèbꞌa, kacui-aai, aa haga, ladhe sabꞌa sama-sama madhutu sasabꞌa ra èci-èci, na, ngiꞌu na asa tabha èra. Sèmi èèna kahèi dènge dhèu unu Yesus Kristus sèra. Ladhe èdhi pasue aa soru-bara èci dènge èci, tatu èdhi aaꞌi-aaꞌi ti asa tabha èra kahèi.\x + \xo 4:16 \xt Kolose 2:19\x*   
\s1 Tèke eele jꞌara mamuri dhui, sèna ka madhutu mamuri hiu  
\p
\v 17 Nanene paie-iie, ngaa dhu jaꞌa neo peka, lula Kètu jaꞌa, Yesus Kristus ka dhu nori jaꞌa. Miu mamuri ia ka sèmi dhèu dhu tadhe boe Ama Lamatua. Lula ngaa dhu ra tao sèra madhutu dhoka gagoa ra.  
\v 18 Rèngu raga leli, nuka sèmi dhèu kako ètu dꞌara maroga. Ra mamuri pacèri nèti Ama Lamatua, lula ra kètu hadhu, aa pusi-pahae boe Ne.  
\v 19 Rèngu reꞌa heka makae. Nèti èèna ka, ra madhutu dhoka dadꞌèi dꞌara ho adꞌu-ue jꞌara makae dènge mamuri kajꞌalu. Te ngaa reꞌa boe roca kahèi.   
\p
\v 20 Te ngaa dhèu ajꞌa-nori boe miu jꞌara mamuri Kristus sèmi èèna!  
\v 21 Te, ngaa dhu miu meꞌa le lula-nèti Yesus Kristus, aꞌajꞌa èèna ka dhu mola. Tatu miu tadèngi le!  
\v 22 De tèke eele jꞌara mamuri miu dhu dhui èèna! Te ladhe miu mamuri kajꞌalu madhutu dadꞌèi dhèu rai-haha, na, miu dhu lèke le tipu. Miu dènge heka hak mamuri sèmi uru èèna.\x + \xo 4:22 \xt Kolose 3:9\x*  
\v 23 Te ngaa hudꞌi laa Ama Lamatua tao dꞌara dènge ngangee miu jꞌajꞌi hiu,  
\v 24 ho miu jꞌajꞌi dhèu hiu, madhutu ropa Na. Nèti èèna ka, miu hudꞌi padꞌelo ku dꞌara hiu miu, dhu mola-mèci dènge mera-milu.\x + \xo 4:24 \xt Lii Lolo dhu Uru Tèka 1:26, Kolose 3:10, Roma 12:1-2\x*   
\p
\v 25 De limuri ne, loe eele ka nèti kapodꞌe-kabèli! Padhai lii èci dènge èci dhu mola, te èdhi dhu paꞌèki le jꞌajꞌi mi èci, nuka sèmi ngiꞌu èci dhu dènge musi madha, hèbꞌa, kacui-aai, aa dènge haga.\x + \xo 4:25 \xt Sakaria 8:16\x*  
\v 26 Ladhe nasa, baku adꞌu sasala kahèi. Hua iia miu pabeꞌa hari! Baku tèke nanasa toke lodꞌo cèna!\x + \xo 4:26 \xt Lii Sodꞌa Koa-Kio 4:4\x*  
\v 27 Dènge jꞌara ne, dhèu aae nidhu bisa boe dadugu-rariu miu. Baku golo ne!  
\v 28 Dhèu dhu dꞌèi manaꞌu, ae eele ka! Beꞌa risi dhèu sèmi sèra sabꞌa pake kacui-aai unu ra, sèna ka rui-jꞌajꞌèra na soru-bara dhèu dhu unu aadꞌo sèra.  
\v 29 Ladhe padhai lii, na, baku hia lii karehe, masi ka ca hèbꞌa doko-doko di! Hua iia risi padhai lii dhu beꞌa di. Aa holo dhèu sèna ka ra soru-bara dènge beꞌa, aa paꞌèra dꞌara si.  
\v 30 Baku papèdꞌa dꞌara Roh Ama Lamatua, te Nèngu pea ètu dꞌara miu. Aa Na cap nare miu, peka na, miu jꞌajꞌi le dhèu unu Ama Lamatua. Roh Na jꞌajꞌi mi tadha, peka na, toke dꞌai èle rai-haha ne, Ama Lamatua sui nare miu, sèna ka mamuri taruu dènge Ne.  
\v 31 De baku tèka dꞌara dènge dhèu leo! Bqku kadhi ngutu dènge dhèu! Baku panasa! Baku patao-palaha! Baku padhai kakoli paꞌele iie kolongara dhèu! Aa baku adꞌu-ue jꞌara bhabhelu dhu leo-leo hèi!  
\v 32 Te ngaa beꞌa risi mi pasue, aa tao jꞌara dhu beꞌa èci dènge èci. Miu hudꞌi pabhèlu eele ku sasala dhèu, aa hia si abho, sama sèmi Ama Lamatua saku eele sasala miu, lula miu paꞌèki le dènge Kristus.\x + \xo 4:32 \xt Kolose 3:13\x*   
\c 5  
\s1 Mamuri pasue dènge mamuri mola-mèci  
\p
\v 1 Miu ana pasue Ama Lamatua. Nèti èèna ka, miu hudꞌi madhutu ku dadꞌèi Na.  
\v 2 Aa miu hudꞌi mamuri pasue ku èci dènge èci, sama sèmi Kristus sue miu. Te Na soro le ngiꞌu Na, ho madhe gati èdhi. Dènge jꞌara neꞌe, Nèngu jꞌajꞌi nuka sèmi badha sogo-tagu dhu ra tunu ka hèu mèngi, sèna ka pakarejꞌe dꞌara Ama Lamatua.\x + \xo 5:2 \xt Kalua nèti Masir 29:18, Lii Sodꞌa Koa-Kio 40:6\x*   
\p
\v 3 Miu dhèu mola-mèci unu Ama Lamatua kahèi. De baku mamuri dènge dꞌara kajꞌalu! Baku ngee madha jꞌara kajꞌalu kahèi! De baku tao jꞌara karehe dènge dhèu dhu jꞌajꞌi boe dhèu èmu-kamali èu! Baku mangaꞌa dèu ngara!  
\v 4 Baku padhai lii kajꞌalu! Aa baku padhai lii leli! Te dhèu unu Ama Lamatua, ladhe padhai lii sèmi sèra, lèke boe. Hua iia risi miu padhai lii beꞌa aa manèngi makasi mi Lamatua.  
\v 5 Sanèdꞌe paie-iie! Te Ama Lamatua nare boe dhèu dhu mamuri kajꞌalu, aa dhèu dhu tao jꞌara karehe dènge dhèu dhu jꞌajꞌi boe dhèu èmu-kamali nèngu! Rèngu bisa boe jꞌajꞌi dhèu unu Kristus, aa Ama Lamatua jꞌajꞌi boe Dhèu Aae rèngu. Ama Lamatua sèmi nare boe kahèi dhèu dhu mangaꞌa dèu ngara, lula rèngu seti eele Ne, ka ra pakabꞌua risi jꞌara dhu leo sèra.   
\s1 Mamuri ètu dꞌara saraa  
\p
\v 6 Mage dhèu pagoa miu dènge padhai lii hèbꞌa hua, peka na, “Mamuri kajꞌalu ciki di, ngaa-ngaa tao boe, we!” Te tatu Ama Lamatua nasa mi dhèu dhu mamuri madhutu boe dadꞌèi Na.  
\v 7 Nèti èèna ka, baku paꞌèki ngiꞌu dènge dhèu sèmi sèra.  
\v 8 Uru èèna, miu nuka sèmi dhèu dhu mamuri ètu dꞌara maroga, lula miu tadhe mèka Ama Lamatua. Te ngaa limuri ne, Na hia le saraa, sèna ka tao miu jꞌajꞌi ana-ana Na. Nèti èèna ka, miu hudꞌi mamuri ètu dꞌara saraa Na.  
\v 9 Te dhèu dhu mamuri taruu ètu dꞌara saraa, dhèu ne tao jꞌara dhu beꞌa, mamuri mola, aa leko-monya boe.  
\v 10 Tenge taruu jꞌara ho pakarejꞌe dꞌara Ama Lamatua, lula Nèngu ne Dhèu Aae èdhi.  
\v 11 Baku paꞌèki ngiꞌu dènge dhèu dhu mamuri ètu dꞌara maroga. Te tatao ra, gaguna aadꞌo. De mi pasanèdꞌe si, aa bhoke paledꞌa sasala-sasigo ra.  
\v 12 Te, ngaa dhu ra adꞌu-ue pahuni-pacubꞌi, kajꞌalu titu kèna, toke èdhi makae, ladhe neo padhai lii jꞌara-jꞌara sèra.  
\v 13 Jaꞌa pakasame sèmi neꞌe: ladhe dhèu dꞌelo mèdha èci ètu dꞌara maroga, tatu dhèu bisa rèdhi mèu.  
\v 14 Sèmi èèna kahèi, ladhe èdhi peka paledꞌa jꞌara bhelu dhu dhèu adꞌu-ue, nèngu bisa neꞌa, na, jꞌara dhu na adꞌu-ue ne, karehe. Abhu lii sodꞌa èci, peka na,  
\q1 “Wee! Miu dhu bhèjꞌi, kèdꞌi ka!  
\q2 Miu dhu madhe, mamuri hari ka!  
\q1 Te Kristus neo hia saraa mi miu.”   
\s1 Mamuri dꞌara èci dènge Roh Lamatua  
\p
\v 15 Nèti èèna ka, miu èci-èci parisa paie mamuri mi, sèna ka baku sèmi dhèu goa. Beꞌa risi pake ngangee dhu beꞌa nèti Ama Lamatua.  
\v 16 Limuri ne dhèu loe boe tao jꞌara-jꞌara bhabhelu. De ladhe abhu lodꞌo tao jꞌara dhu beꞌa, na baku pamata!\x + \xo 5:16 \xt Kolose 4:5\x*  
\v 17 Pangee paie-iie, ho meꞌa mèu dadꞌèi Lamatua èdhi, sèna ka baku mi goa.   
\p
\v 18 Baku mahu, te, ngaa dhu miu minu èèna ka dhu uli miu, sèna ka tao jꞌara dhu karehe. Te ngaa bhoke dꞌara miu, sèna ka Roh Ama Lamatua dhu Mola-Mèci èèna ka dhu uli miu.  
\v 19 De padhai lii èci dènge èci pake Lii Holo-Nori Ama Lamatua, mèti lii koa-kio mi Nèngu, aa mèti lii sodꞌa dhu miu abhu nèti Roh Mola-Mèci Na. Aa ladhe sodꞌa, baku dhoka ètu hèbꞌa di, te ngaa koa-kio Ama Lamatua dènge dꞌara kateme.  
\v 20 Te Yesus Kristus jꞌajꞌi le Kètu èdhi, aa Ama Lamatua dhu tao le jꞌara-jꞌara ae titu kèna hia èdhi. Nèti èèna ka, èdhi baku loe manèngi makasi mi Lamatua.\x + \xo 5:20 \xt Kolose 3:16-17\x*   
\s2 Dhèu parcaya aaꞌi-aaꞌi hudꞌi mamuri èci nanene èci  
\p
\v 21 Miu aaꞌi-aaꞌi mi, hudꞌi mamuri èci nanene èci. Dènge jꞌara neꞌe, miu pakabꞌua Yesus Kristus.   
\s2 Èci hudꞌi nanene èci, nuka sèmi: dhèu èmu-kamali sèra  
\p
\v 22 Bhèni dhu dènge dhèu èmu! Miu hudꞌi mamuri nanene dhèu èmu mi, sama sèmi miu nanene Yesus Kristus, Kètu miu.  
\v 23 Te dhèu èmu miu èèna, nuka sèmi kètu nèti miu bhèni se. Aa Yesus Kristus kahèi jꞌajꞌi Kètu nèti dhèu unu Na. Te Nèngu ka dhu bhoke jꞌara ho dhèu abhu mamuri.\x + \xo 5:23 \xt Kolose 3:18, 1 Petrus 3:1\x*  
\v 24 Nèti èèna ka, dhèu unu Kristus hudꞌi mamuri nanene paie-iie Nèngu. De sèmi èèna kahèi, bhèni dhu dènge dhèu èmu, hudꞌi nanene pabeꞌa-beꞌa ku dhèu èmu na, ètu madha jꞌara aaꞌi-aaꞌi ra.   
\p
\v 25 Mone dhu dènge le dhèu èmu, sèmi èèna kahèi! Miu hudꞌi sue dhèu èmu miu, èci èèna ka dènge Kristus sue dhèu unu Na, toke Na soro ngiꞌu Na, sèna ka madhe gati rèngu.\x + \xo 5:25 \xt Kolose 3:19, 1 Petrus 3:7\x*  
\v 26 Nèngu tao sèmi èèna ka, ho rèngu jꞌajꞌi mola-mèci ètu madha Ama Lamatua, lula rèngu madhutu le Lii Holo-Nori Na, aa sarani le.  
\v 27 Dhèu unu Yesus Kristus èci èèna ka dènge bhèni dhu neo kabꞌi dhu pagaa iisi na, te dhèu mone dhu neo kabꞌi èèna neo mai nare ne. Sama sèmi èèna kahèi, Kristus neo mai nare dhèu unu Na sèra. Nèti èèna ka, rèngu hudꞌi mamuri dènge beꞌa aa mola-mèci, toke abhu boe sasala ciki sa.   
\p
\v 28 Èci èèna kahèi dènge mone dhu dènge dhèu èmu! Miu hudꞌi sue ku dhèu èmu mi, nuka sèmi miu sue ngiꞌu miu mesa mi. Te ladhe dhèu mone sue dhèu èmu na, sasoa na, nèngu sue ngiꞌu nèngu unu na.  
\v 29 Abhu boe dhèu dhu sue boe ngiꞌu na. Te ngaa na lalau-laloꞌo ngiꞌu na pabeꞌa-beꞌa, sèmi Yesus ladhe-leru dhèu unu Na paie-iie,  
\v 30 lula èdhi nuka sèmi ngiꞌu Nèngu.  
\v 31 Ètu dꞌara Sasuri Mola-Mèci suri, peka na, “Nèti èèna ka, dhèu mone hudꞌi tèke eele ku ina-ama na, ho laꞌe mamuri dꞌara èci dènge dhèu èmu-kamali na, te dua ra jꞌajꞌi le èci.”\x + \xo 5:31 \xt Lii Lolo dhu Uru Tèka 2:24\x*  
\v 32 Te mamuri pasue dhèu èmu-kamali ne, Lamatua bhoke le ètu dꞌara Lii Holo-Nori Na nèti uru ka mai. Jꞌara neꞌe ne, ka dhu kapai. Te ngaa limuri ne, èdhi teꞌa kahèi, na, Lii Holo-Nori ne padꞌelo sasue Kristus mi dhèu unu Na sèra.  
\v 33 De dhèu mone hudꞌi sue ku dhèu èmu na, nuka sèmi sue ngiꞌu nèngu unu na. Aa dhèu bhèni hudꞌi pakabꞌua ku dhèu èmu na.   
\c 6  
\s2 Èci hudꞌi nanene èci, nuka sèmi: ana-ana dènge ina-ama ra  
\p
\v 1 Sèmi èèna kahèi ana-ana! Miu hudꞌi mamuri nanene ku ina-ama mi, te èèna ka dhu pamèci dènge dadꞌèi dꞌara Lamatua èdhi.\x + \xo 6:1 \xt Kolose 3:20\x*  
\v 2 Ètu dꞌara Sasuri Mola-Mèci Ama Lamatua, suri tèke le, peka na, “Èu hudꞌi pakabꞌua ku ina dènge ama mu.” Neꞌe ne lii paredha Ama Lamatua dhu uru tèka, dhu dènge lii pajaji.  
\v 3 Te lodꞌo Lamatua hia paredha èèna, Nèngu moa kahèi, peka na, “Ladhe èu tao madhutu sèmi èèna, pe èu abhu mèngi-nale ae-ae, aa mamuri èu madhii-manèro.”\x + \xo 6:3 \xt Kalua nèti Masir 20:12, Lole Hari Jꞌara-jꞌara Mamuri 5:16\x*   
\p
\v 4 Sèmi èèna kahèi, ina-ama sèra! Miu baku ènyi aa lii taka leli ana-ana miu, te aadꞌo na, ra nasa ka ra parui. Beꞌa risi miu lalau-laloꞌo si paie-iie, aa nori si nèti ana iiki mai ho madhutu jꞌara Lamatua. Ladhe ra tao sala, nori si dènge beꞌa madhutu dadꞌèi Lamatua.\x + \xo 6:4 \xt Kolose 3:21\x*   
\s2 Èci hudꞌi nanene èci, nuka sèmi: dhèu sabꞌa dènge lamatua ra  
\p
\v 5 Sèmi èèna kahèi dènge dhèu-dhèu sabꞌa! Miu hudꞌi madhaꞌu ku dènge lamatua dhu paredha miu ètu rai-haha ne, aa nanene ne. Baku sabꞌa dènge dꞌara cabèka, te ngaa madhutu dadꞌèi lamatua dènge dꞌara kateme, nuka sèmi miu madhutu dadꞌèi Kristus dènge beꞌa.  
\v 6 Te miu dhèu sabꞌa unu Kristus. De ètu rai-haha ne miu baku sadꞌi sabꞌa di, lula lamatua dhu ladhe miu. Te ngaa sabꞌa dènge dꞌara majꞌèni hia lamatua mi, masi ka nèngu aadꞌo ètu madha. Te èèna ka dhu madhutu dadꞌèi Ama Lamatua.  
\v 7 De sabꞌa sasabꞌa miu dènge dꞌara kateme hia lamatua miu ètu rai-haha ne, nuka sèmi miu sabꞌa hia Ama Lamatua, Kètu èdhi.  
\v 8 Lula èdhi teꞌa, na, bèli-camèdꞌa Ama Lamatua bꞌala hia dhèu dhu tao jꞌara beꞌa. Masi ka rèngu dhèu sabꞌa do, lamatua do, ènu do, ènu boe do, Nèngu bꞌala aaꞌi mèu-mèu si.\x + \xo 6:8 \xt Kolose 3:22-25\x*   
\p
\v 9 Sèmi èèna kahèi, lamatua sèra! Baku miu jꞌege pamadhaꞌu leli dhèu dhu sabꞌa hia miu sèra. Te rèngu dènge Lamatua ètu sorga kahèi, èci èèna ka dènge miu. Ama Lamatua ladhe boe rèhu dhèu, te ngaa Na nanene dhèu cee èèna ka. Masi ka lamatua do, dhèu sabꞌa do, Na nanene si aaꞌi-aaꞌi.\x + \xo 6:9 \xt Lole Hari Jꞌara-jꞌara Mamuri 10:17, Kolose 3:25, 4:1, Yakobis 5:4\x*   
\s1 Pake rèka nèti Ama Lamatua, sèna ka titu dènge èra  
\p
\v 10 Nanene pabeꞌa-beꞌa lii padhai jaꞌa dhu limuri tèka ne. Miu hudꞌi kèpe paꞌèra-èra ku parcaya miu mi Ama Lamatua, lula Nèngu ka Kètu miu, aa koasa Na dhu dedha risi eele aaꞌi si. Èèna na dhu bisa paꞌèra miu!  
\v 11 Sordadꞌu dènge rèka ho labꞌa musu ra. Sèmi èèna kahèi, Lamatua neo pake miu sèmi sordadꞌu. Te Nèngu neo miu labꞌa aaꞌi jꞌara-jꞌara bhelu-katubꞌa dhu dhèu aae nidhu adꞌu-ue. Nèti èèna ka, miu hudꞌi paꞌèra ku, sèna ka pake aaꞌi rèka nèti Ama Lamatua.  
\v 12 Te èdhi ètu dꞌara pamusu! Èdhi labꞌa boe musu dhèu rai-haha, te ngaa èdhi labꞌa koasa bhabhelu dhu èdhi tèdhi boe, labꞌa dhu rèdꞌu paredha, labꞌa koasa maroga, aa labꞌa jꞌara-jꞌara bhelu-katubꞌa.  
\v 13 De miu hudꞌi paꞌèra pake rèka aaꞌi-aaꞌi nèti Ama Lamatua sèna ka bèli-camèdꞌa, ropa dꞌai lodꞌo-lodꞌo bhabhelu-katubꞌa, miu bisa labꞌa taruu. Te ladhe miu taha, miu bisa segi.   
\p
\v 14 De miu hudꞌi titu paꞌèra-èra! Parcaya dhoka Lii Holo-Nori Lamatua dhu lèke, te èèna nuka sèmi miu dhu bori dhari hake sordadꞌu.\f + \fr 6:14 \ft Ladhe sordadꞌu Roma se neo pake rèka, na, rèngu pake uuru ku kodho dꞌara. Hèia ra pake dhari hake, sèna ka kodho dꞌara baku parai. Èèna na, heka ra pake rèka sordadꞌu kèna.\f* Mamuri mola, te èèna sama sèmi miu silu kodho bèsi paꞌabhe kakara.\x + \xo 6:14 \xt Yesaya 11:5, 59:17\x*  
\v 15 Paꞌèra ho lami peka-padhai Lii Lolo Beꞌa dhu padꞌelo jꞌara, sèna ka dhèu bisa mamuri padame dènge Ama Lamatua, te èci èèna ka dènge miu pake salapa sordadꞌu.\x + \xo 6:15 \xt Yesaya 52:7\x*  
\v 16 Parcaya taruu mi Lamatua, te parcaya èèna sama sèmi mèdha èci dhu sordadꞌu pake ho sili iisi nèti rèka musu. Dènge parcaya sèmi èèna, miu bisa pamadhe ai ètu isi kataki nidhu bhelu, dhu ra siri mi miu.  
\v 17 Kèpe paꞌèra-èra lalèka miu dhu peka na, miu unu le mamuri nèti Ama Lamatua, te èèna sèmi sordadꞌu pake solo bèsi. Kèpe paꞌèra-èra Lii Holo-Nori Ama Lamatua nèti Roh Na dhu Mola-Mèci, te èèna sama sèmi sordadꞌu dhu kèpe samala.\x + \xo 6:17 \xt Yesaya 59:17\x*   
\p
\v 18 Ladhe miu neo titu èra, na, miu baku loe sabajꞌa pake koasa nèti Roh Mola-Mèci Ama Lamatua. Jꞌaga taruu aa baku bhèlu sabajꞌa hia dhèu unu Lamatua buli mia-mia.  
\v 19 Aa baku bhèlu kahèi sabajꞌa hia jaꞌa. Manèngi sèna ka Ama Lamatua hia kahèi lii holo-nori Na, sèna ka jaꞌa bisa peka mola-mola naneo Na mi dhèu leo.\x + \xo 6:19 \xt Kolose 4:4\x*  
\v 20 Masi ka jaꞌa jꞌajꞌi ana bèdho, te ngaa Lamatua Yesus pua-paleha jaꞌa, sèna ka jꞌajꞌi mi ai gꞌana Nèngu. De sabajꞌa hia jaꞌa, ho jaꞌa baku madhaꞌu padhai dhu lèke, te èèna ka dhu jꞌajꞌi sasabꞌa-laꞌa jaꞌa!   
\s1 Paulus suri paꞌèle sasuri na  
\p
\v 21 Jaꞌa dꞌèi sèna ka miu meꞌa mèu mamuri jaꞌa. Nèti èèna ka, jaꞌa pua Tikikus dhiu asa miu. Nèngu ne, aꞌari pasue jaꞌa, aa na majꞌèni pakako sasabꞌa Kètu èdhi, Yesus Kristus.\x + \xo 6:21 \xt Lii Lolo nèti Dhèu Pajuu-paleha 20:4, 2 Timotius 4:12\x*  
\v 22 Hudꞌi laa na lole jꞌara-jꞌara mamuri èdhi ètu neꞌe. Aa jaꞌa neo, sèna ka na paꞌèra dꞌara miu kahèi.\x + \xo 6:22 \xt Kolose 4:7-8\x*   
\p
\v 23 Jaꞌa manèngi Ama èdhi, Ama Lamatua, dènge Kètu èdhi, Yesus Kristus, ho tao miu mamuri padame èci dènge èci, aa pasue èci dènge èci, lula miu parcaya mi Rèngu.  
\v 24 Jaꞌa manèngi-mangajꞌi kahèi, sèna ka Kètu èdhi, Kristus padꞌelo dꞌara hua iia Na mi dhèu aaꞌi-aaꞌi dhu sue Ne taruu.  
\p Sasuri jaꞌa, dꞌai sange neꞌe ka.  
\q2 Saloom,  
\q2 Paulus