\id 2TI  
\h 2 Timotius 
\toc1 2 Timotius Sasuri Paulus ka dua hia angalai na Timotius 
\toc2 2 Timotius 
\toc3 2Tim 
\mt1 2 Timotius  
\mt2 Sasuri Paulus ka dua  
\mt2 hia angalai na Timotius  
\c 1  
\s1 Lii mahoꞌo  
\p
\v 1-2 Timotius dhu beꞌa!  
\p Sasuri ne nèti jaꞌa, Paulus, dhu Ama Lamatua mesa Na hagꞌe nare jꞌajꞌi dhèu pajuu-paleha Yesus Kristus. Ra pua jaꞌa ho laku lole nèti mamuri dhu lèke, dhu Lamatua moa le hia dhèu aaꞌi-aaꞌi dhu parcaya Yesus Kristus.  
\p Timotius! Èu dhu jꞌajꞌi le sèmi ana jaꞌa. De jaꞌa manèngi sèna ka Ama Lamatua dènge Kètu èdhi, Yesus Kristus, sue èu, padꞌelo dꞌara hua iia Ra mi èu, aa hia èu mamuri dènge mera-milu.\x + \xo 1:1-2 \xt Lii Lolo nèti Dhèu Pajuu-paleha 16:1\x*   
\s1 Paulus manèngi makasi mi Ama Lamatua  
\p
\v 3 Mèu-mèda jaꞌa sabajꞌa hia èu. Jaꞌa manèngi taruu makasi mi Ama Lamatua, lula èu madhutu taruu Ne. Èu meꞌa! Jaꞌa sabꞌa hia Nèngu dènge dꞌara mola-mèci, èci èèna ka dhu bèi-baki èdhi sèra sabꞌa hia Ne.  
\v 4 Jaꞌa sanèdꞌe lodꞌo èdhi pacèri uru èèna, èu pahaa èi madha. Nèti èèna ka, jaꞌa neo titu kèna paraga hari dènge èu, sèna ka dꞌara jaꞌa karejꞌe.   
\p
\v 5 Jaꞌa ngee kèdhi uru èèna, lodꞌo èu heka parcaya tareꞌa Lamatua Yesus. Parcaya sèmi èèna na dhu amo le ètu dꞌara bèi mu Luisa dènge ina mu Yunike. Aa jaꞌa keꞌa mèu, na, parcaya sèmi èèna muri le ètu dꞌara èu kahèi.\x + \xo 1:5 \xt Lii Lolo nèti Dhèu Pajuu-paleha 16:1\x*   
\s1 Paulus manèngi Timotius sèna ka pake karunya dhu Lamatua hia  
\p
\v 6 Uru èèna, lodꞌo dhu jaꞌa bane ai ètu kètu èu aa sabajꞌa hia èu, lodꞌo èèna kahèi Lamatua hia karunya mi èu, sèna ka èu bisa sabꞌa hia Ne. De neꞌe ne, jaꞌa manèngi sèna ka èu pakaroo hari karunya èu dhu nuka sèmi ai dhu oe madhe sa.  
\v 7 Te Roh Ama Lamatua tao boe èdhi jꞌajꞌi dhèu madhaꞌu. Te ngaa Na tao, sèna ka èdhi jꞌajꞌi dhèu dhu dꞌara èra, dhu teꞌa pasue, aa teꞌa taha tare dꞌara.  
\v 8 De baku makae peka-padhai jꞌara-jꞌara lula-nèti Lamatua èdhi. Aa baku makae lula jaꞌa ne ana bèdho. Te jaꞌa maso bui lula jaꞌa pakako sasabꞌa Na. De ladhe lamu lole Lii Lolo Beꞌa, èu hudꞌi paꞌèra ku iisi, ho dui jꞌajꞌèra nuka sèmi jiꞌi dui. Ladhe èu paraga dènge jꞌajꞌèra sèmi èèna, èèna na Lamatua paꞌèra dꞌara èu.   
\q1
\v 9-10 Lula Lamatua ka dhu patabuli èdhi nèti koasa sasala-sasigo èdhi.  
\q2 Aa Na hagꞌe nare èdhi ho jꞌajꞌi dhèu unu Na dhu mola-mèci.  
\q1 Na padꞌelo dꞌara hua iia Na mi èdhi, lula Na sue èdhi,  
\q2 masi ka èdhi tao boe ngaa-ngaa ho nia sèmi babeꞌa Na.  
\q1 Lodꞌo Lamatua pajꞌajꞌi mèka rai-haha ne, te ngaa pamaꞌète nare le ho hia Yesus Kristus mai,  
\q2 sèna ka Na padꞌelo dꞌara hua iia Na, aa pala mamuri hia èdhi.  
\q1 Ka Yesus Kristus mai le, aa bhoke paledꞌa ngaa dhu uru èèna Ama Lamatua nelu tao,  
\q2 aa padꞌelo dꞌara hua iia Nèngu mi èdhi.  
\q3 Na palaho le koasa mamadhe!  
\q2 Neꞌe ka dhu jꞌajꞌi Lii Lolo Beꞌa!  
\q1 De cee dhu parcaya Lamatua Yesus, madhe heka taa-taa, te ngaa mamuri manèro toke dꞌai mia-mia dènge Ama Lamatua.   
\p
\v 11 Nèti èèna ka, Ama Lamatua dedꞌe nare jaꞌa jꞌajꞌi dhèu pajuu-paleha Yesus Kristus, sèna ka jaꞌa lole Lii Lolo Beꞌa Na, aa ajꞌa-nori dhèu ètu mia-mia.\x + \xo 1:11 \xt 1 Timotius 2:7\x*  
\v 12 Sèra sa ka dhu pajꞌèra jaꞌa ètu dꞌara èmu bèdho ne. Te ngaa jaꞌa makae boe! Lula jaꞌa keꞌa le cee ka dhu jaꞌa parcaya, nuka Lamatua Yesus. Aa jaꞌa keꞌa kahèi, peka na, Nèngu ka dhu pangèdꞌu sasabꞌa neꞌe mi adhe-aai jaꞌa, Nèngu ka dhu bisa jꞌaga sasabꞌa neꞌe, aa Nèngu ka dhu paꞌèra jaꞌa sèna ka pakako sasabꞌa neꞌe, toke Nèngu mai hari.  
\v 13 De madhutu ka, jꞌara mamuri nèti aꞌajꞌa dhu lèke dhu jaꞌa padꞌelo le dènge èu. Ladhe èu parcaya taruu, aa sue dhèu aaꞌi-aaꞌi sèmi èèna, neꞌe peka na, èu jꞌajꞌi le èci dènge Yesus Kristus.  
\v 14 Ama Lamatua pangèdꞌu le ètu dꞌara adhe-aai èu kakaja èci dhu kabꞌua, nuka aꞌajꞌa dhu lèke. De ladhe-leru pabeꞌa kakaja èèna! Pake Roh Ama Lamatua dhu Mola-Mèci dhu ètu dꞌara èdhi, sèna ka hudꞌi laa Na paꞌèra èu ho ladhe-leru kakaja èèna paie-iie.   
\s1 Onesiforus ladhe-leru Paulus ètu dꞌara èmu bèdho  
\p
\v 15 Ele boe èu tadèngi le, na, Figelus, Hermogenes dènge dhèu leo nèti propensi Asia sèra,\f + \fr 1:15 \ft Propensi Asia èèna, limuri ne jꞌajꞌi negara Turki re bèka haa.\f* pusi-pahae heka jaꞌa.  
\v 16-18 Te ngaa Onesiforus leko-leo nèti rèngu. Na pakajꞌèu boe nèti jaꞌa. Èu mesa mu meꞌa, lodꞌo jaꞌa ètu kota Epesus era, nèngu ka dhu ladhe-leru jaꞌa. Limuri ne, na pea ètu kota Roma neꞌe. Ropa na dꞌai neꞌe, na patangi-tenge jaꞌa ètu mia-mia. Ka na abhu jaꞌa ètu dꞌara èmu bèdho ne. Te ngaa na makae boe. Na mai taruu ngadꞌo jaꞌa ho paꞌèra dꞌara jaꞌa.  
\p De jaꞌa manèngi sèna ka Ama Lamatua padꞌelo dꞌara hua iia Na mi Onesiforus dènge aꞌari na aaꞌi-aaꞌi ra. Ladhe lodꞌo èle rai-haha ne, ho Lamatua pamaꞌète lii langu dhèu rai-haha, jaꞌa sanao ho Lamatua pamaꞌète dhu beꞌa hia mi Onesiforus si.   
\c 2  
\s1 Èdhi hudꞌi mamuri ku nuka sèmi sordadꞌu dhu parai eela boe dènge komedhaa  
\p
\v 1 Ana Timotius dhu jaꞌa sue! Yesus Kristus dꞌara hua iia titu kèna. Limuri ne, èu èci le dènge Nèngu. Na paꞌèra èu. De èu meꞌa dhoka sèmi more di!  
\v 2 Uru èèna, jaꞌa ajꞌa le èu ètu madha dhèu ae lula-nèti jꞌara mamuri Lamatua dhu mola. De limuri ne jaꞌa manèngi èu, ho aaꞌi-aaꞌi dhu èu tadèngi nèti jaꞌa, lamu ajꞌa hari hia dhèu dhu èu bisa lèka si. Dhèu sèra hudꞌi bisa lasi ajꞌa hari sèmi èèna kahèi mi dhèu leo.   
\p
\v 3 Èdhi aaꞌi-aaꞌi ti, nuka sèmi sordadꞌu Yesus Kristus. De èdhi pasae jꞌajꞌèra sèmi Nèngu kahèi. Lula èu ne sordadꞌu dhu beꞌa, èu hudꞌi pasae more ku pala unu mu.  
\v 4 Sordadꞌu dhu pakako sasabꞌa bisa boe sabꞌa pabꞌali dènge sasabꞌa dhu leo. Dènge jꞌara sèmi neꞌe, nèngu neꞌa pakarejꞌe dꞌara komedhaa na.   
\p
\v 5 Tare conto leo sèmi olaraga. Ladhe madhutu lomba, hudꞌi madhutu ku atora na. Te ladhe aadꞌo, na, kalua! Bisa boe abhu juara. Sèmi èèna kahèi, ladhe neo pakako sasabꞌa Lamatua, madhutu ku atora Na.   
\p
\v 6 Ladhe kahèi dhèu sabꞌa oka-tedhe. Na sabꞌa dènge tèku rui na ètu dꞌara oka na. De nèngu ka dhu uru tèka abhu hua-hela.  
\v 7 Pangee paie-iie conto sèra. Pe Ama Lamatua hia meꞌa mèu jꞌara sèra aaꞌi-aaꞌi ra.   
\p
\v 8 Pangee pabeꞌa-beꞌa mi Yesus Kristus. Nèngu èèna ana-èpu dhèu aae Daud. Na madhe, te ngaa Ama Lamatua pamamuri Ne. Èèna ka jꞌajꞌi Lii Lolo Beꞌa dhu jaꞌa laku peka-padhai ètu mia-mia.  
\v 9 Lula jaꞌa lole Lii Lolo Beꞌa, èèna ka jaꞌa jꞌèra sèmi neꞌe ne. Risi-risi hari ra èki-karadhe jaꞌa dènge rate, tao jaꞌa sèmi dhèu bhelu-katubꞌa sa. Te ngaa rèngu taha rare boe Lii Lolo Beꞌa Ama Lamatua.  
\v 10 De jaꞌa sadia pasae rupa-rupa jꞌajꞌèra. Sadꞌi dhèu unu Lamatua dhu Na hagꞌe nare sèra abhu mamuri. Pe Ama Lamatua dedꞌe si padedha-dedha, lula rèngu jꞌajꞌi dhèu unu Yesus Kristus.  
\v 11 Aa lii seꞌe mema lèke tareꞌa:  
\q1 “Ladhe èdhi mangaku, na, Kristus madhe ho gati èdhi,  
\q2 èci èèna ka èdhi madhe tèke eele mamuri dhui,  
\q2 hèia èdhi kahèi mamuri bera-bera dènge Ne.   
\q1
\v 12 Ladhe èdhi taha ètu dꞌara jꞌajꞌèra,  
\q2 èdhi tèdꞌu paredha sama-sama dènge Nèngu kahèi.  
\q1 Te ngaa ladhe èdhi pasili Ne,  
\q2 Nèngu pasili èdhi kahèi.\x + \xo 2:12 \xt Mateos 10:33, Lukas 12:9\x*   
\q1
\v 13 Masi ka dꞌara èdhi satia boe,  
\q2 te ngaa Nèngu satia taa-taa,  
\q3 lula Nèngu bisa boe leko-monya. Ngaa dhu Na peka, èèna ka dhu Na tao.”   
\s1 Dhèu sabꞌa dhu Lamatua pakabꞌua  
\p
\v 14 Pasanèdꞌe dhèu parcaya, sèna ka rèngu baku bhèlu jꞌara seꞌe aaꞌi-aaꞌi ra. Kai si dènge kolongara Ama Lamatua, ho ra loe eele ka nèti paꞌuji lii padhai lii. Te aaꞌi-aaꞌi sèra guna boe ngaa-ngaa. Dhodhoka paꞌele iie ngangee nèti dhèu dhu nanene.  
\v 15 Tenge jꞌara dhu beꞌa, sèna ka tao iisi èu nuka sèmi dhèu sabꞌa dhu nia abhu koa nèti Ama Lamatua. Dhèu sèmi èèna parluu boe makae, lula nèngu èèna sabꞌa sasabꞌa na dènge beꞌa. Èu hudꞌi jꞌajꞌi dhèu dhu ajꞌa dènge mola Lii Holo-Nori Lamatua mi dhèu, aa baku dènge koe-kapengo. Lula Lii Holo-Nori Na, mola!  
\v 16 Pakajꞌèu nèti lii padhue dhu dènge boe kolo-kapua, aa nèti lii padhai dhu pakabꞌua boe Lamatua. Te sèra sa dhoka tao dhèu asa bhelu-katubꞌa.  
\v 17 Lii padhai dhu bhelu-katubꞌa sèra pajꞌala sèmi èi papèdꞌa kangker. Lii padhai Himeneus dènge Filetus sèmi sèra ka!  
\v 18 Dua ra ajꞌa sala, peka na, dhèu madhe mamuri aaꞌi hari le. Te ngaa èèna lèke boe! Dènge jꞌara sèmi èèna, rèngu se piku eele nèti ngaa dhu lèke. Ngaa dhu rèngu ajꞌa seꞌe, paꞌele iie parcaya nèti dhèu cahagꞌe.   
\p
\v 19 Te ngaa kapua dhu Ama Lamatua padhèdi nare èèna, kalau-karèto boe. Ètu kapua èèna, dhu suri peka na, “Lamatua tadhe mèu dhèu unu Na,” aa, “Dhèu cee dhu pahaha iisi mi Ama Lamatua, hudꞌi pakajꞌèu ku nèti bhelu-katubꞌa.” Kapua èèna, dhèu unu Lamatua.\x + \xo 2:19 \xt Sensus 16:5\x*   
\p
\v 20-21 Ètu dꞌara èmu dhèu kaja, abhu rupa-rupa mèdha-panyau. Abhu dhu tao nèti hualaa iia dènge hualaa pudhi. Te ngaa abhu kahèi dhu tao nèti ajꞌu dènge rai kalili. Mèdha dhu kabꞌua, lamatua èmu na dꞌèi pake ètu dꞌara iia-aala. Te ngaa mèdha dhu biasa sèra, lamatua èmu makae pake ètu madha dhèu. Sèmi èèna kahèi dènge dhèu rai-haha. Ladhe abhu dhu pakajꞌèu iisi ra nèti bhelu-katubꞌa, nèngu èci èèna ka dènge mèdha-panyau dhu kabꞌua sèra. Lamatua èmu dꞌèi pake ne, lula nèngu dènge gaguna sèna ka tao rupa-rupa sasabꞌa dhu beꞌa.   
\p
\v 22 Ana ngèru sèra manahu malai lula madhutu dadꞌèi ra. Te ngaa èu, Timotius, hudꞌi jꞌaga ngiꞌu mu paie-iie, ho baku madhutu dadꞌèi dꞌara sèmi èèna. Tenge jꞌara ho tao dhu beꞌa taruu. Parcaya taruu Lamatua. Mamuri pasue aa padame dènge dhèu leo. Dhèu aaꞌi-aaꞌi dhu parcaya Lamatua, dhu mamuri dènge dꞌara mola-mèci, rèngu dꞌèi dhoka tao jꞌara dhu beꞌa. De èu, Timotius, hudꞌi mamuri ku sama sèmi rèngu sèra!  
\v 23 Jaꞌa pasanèdꞌe hari èu ca tèka! Baku lamu soro iisi asa dꞌara lii langu dhu dènge boe kolo-kapua. Te sèra sa dhodhoka tao dhèu ho patao-palaha di.  
\v 24 Dhèu dhu sabꞌa hia Lamatua nia boe jꞌajꞌi dhèu dhu tenge lii langu, sina ma? Te ngaa rèngu sèra hudꞌi dꞌara beꞌa dènge dhèu aaꞌi-aaꞌi ra, dhu dꞌèlu-mèu ajꞌa-nori dhèu, dhu taha rare dꞌara ropa paraga dènge dhèu dhu tema tenge lii langu.  
\v 25 Rèngu hudꞌi holo paie-iie dhèu dhu palabꞌa sèra. Dènge sèmi èèna, ele boe Lamatua hia si ele-hoꞌa, hèia ra sèmi rare ngaa dhu lèke.  
\v 26 Hèia ra maseꞌa, ka ra rai nèti kacui-aai dhèu aae nidhu, dhu uru èèna èki si ho madhutu dadꞌèi na.   
\c 3  
\s1 Dꞌai lodꞌo èle rai-haha, dhèu rai-haha jꞌajꞌi sèmi ngaa sa?  
\p
\v 1 Timotius! Ladhe dètu dènge lodꞌo èle rai-haha ne, jꞌajꞌèra na ae titu kèna. Jaꞌa peka mema dènge èu sèmi èèna.  
\v 2 Dhèu dhoka sue ngiꞌu ra, aa mangaꞌa doi-dhari. Rèngu padedha iisi, aa dꞌèi pahaha dhèu leo, dꞌèi pakarehe kolongara Lamatua, dꞌèi boe nanene ina-ama ra, reꞌa boe manèngi makasi, kètu hadhu, dꞌèi boe madha jꞌara Lamatua,  
\v 3 reꞌa boe sue dhèu, dꞌèi boe mamuri padame, dꞌèi paꞌele iie kolongara dhèu, taha rare boe iisi ra, bhelu-katubꞌa dhu risi eele, dꞌèi boe dhu beꞌa,  
\v 4 dꞌèi pahie mone aanga-angalai ra, ngangee babꞌa, aa tao ngiꞌu ra dꞌèlu-mèu risi, madhutu dhoka dadꞌèi dꞌara risi nèti dadꞌèi Lamatua.  
\v 5 Rèngu tao iisi ra dhèu dꞌèlu-mèu, te ngaa dhu mola-mèu lao. Koasa Lamatua abhu boe ètu dꞌara ra. Baku padètu dènge dhèu sèmi sèra kahèi!   
\p
\v 6 Rèngu maso asa dꞌara èmu dhèu dènge rèhu mare, ho lasi kakèjꞌi dꞌara dhèu bhèni dhu èra boe, aa mudꞌa lèke godꞌa. Dhèu bhèni sèmi sèra sa, mamuri ètu dꞌara sasala-sasigo dhu udhu sobhu-sobhu, aa madhutu dhoka rupa-rupa dadꞌèi dꞌara ra.  
\v 7 Ropa ra tadèngi mese hiu mai nori jꞌara dhu hiu, na, rèngu madhutu rii. Te ngaa reꞌa boe hagꞌe mia ka dhu lèke, aa mia dhu sale.  
\v 8 Èu sanèdꞌe era lii lolo Yanes dènge Yamres, si?\f + \fr 3:8 \ft Ngara ‘Yanes dènge Yamres’ abhu boe ètu dꞌara sasuri \ft \+it Lii Moa Uru\+it*. Te ngaa abhu dhèu dꞌèlu-mèu cahagꞌe peka, na, ele boe dua ra dhèu mèu nèti Masir dhu palabꞌa dènge Musa lodꞌo Musa lere nèti dhèu Israꞌel kalua nèti Masir. Baca lii lolo èèna ètu sasuri \+it Kalua nèti Masir\+it* 7:11.\f* Lodꞌo èèna, dua ra palabꞌa dènge Musa. Mese taa limuri seꞌe, tatao ra èci èèna ka. Rèngu palabꞌa dènge lii holo-nori dhu beꞌa. Ngangee ra ele iie le, aa parcaya rèngu lèke boe.  
\v 9 Mese dhu lèke boe sèmi sèra sa, bisa boe taha rare nèbhu. Nèbhu-nèbhu dhèu aaꞌi-aaꞌi reꞌa gagoa rèngu! Nuka sèmi uru èèna dhèu reꞌa kapodꞌe-kabèli lula-nèti Yanes dènge Yamres.   
\s1 Kèpe paꞌèra-èra lii holo-nori dhu èu sèmi more le  
\p
\v 10 Timotius! Èu meꞌa aaꞌi le mamuri jaꞌa. Èu meꞌa aaꞌi ngaa dhu jaꞌa ajꞌa. Èu meꞌa jꞌara mamuri jaꞌa. Èu meꞌa dꞌara dadꞌèi jaꞌa. Èu meꞌa ngaa dhu jaꞌa parcaya. Èu mèdhi unu mu le, jaꞌa taha kore dꞌara, aa sasue jaꞌa mi dhèu. Aa èu meꞌa tasamia jaꞌa taha ètu dꞌara jꞌajꞌèra dènge beꞌa.  
\v 11 Èu meꞌa kahèi ra hake-paparu jaꞌa, aa dui rupa-rupa jꞌajꞌèra. Jaꞌa abhu jꞌajꞌèra sèmi èèna ètu kota Antiokia, Ikonium, dènge Listra. Te ngaa Ama Lamatua patalale eele jaꞌa nèti jꞌara sèra aaꞌi-aaꞌi.\x + \xo 3:11 \xt Lii Lolo nèti Dhèu Pajuu-paleha 13:14-52, 14:1-7,8-20\x*  
\v 12 Mema dhèu aaꞌi-aaꞌi dhu parcaya Yesus Kristus, aa neo mamuri mola-mèci madhutu dadꞌèi Ama Lamatua, tatu dhèu pajꞌèra rèngu.  
\v 13 Ngaa hari, dhèu bhelu dènge dhèu kapodꞌe-kabèli sèra, asa tabha bhelu. Rèngu kapodꞌe-kabhèli ho pamanahu dhèu leo, te ngaa rèngu sèra lèke kapodꞌe kahèi.   
\p
\v 14 Te ngaa èu hudꞌi kèpe paꞌèra-èra lii holo-nori dhu èu abhu le. Aa ngaa dhu èu parcaya èèna, madhutu taruu. Te èèna ka dhu lèke! Èu meꞌa mèu cee ka dhu ajꞌa aaꞌi-aaꞌi sèra mi èu! Èu bisa lèka si!\x + \xo 3:14 \xt 2 Timotius 1:5, 2:2\x*  
\v 15 Karèi nèti èu ana iiki era, èu abhu aꞌajꞌa le isi nèti Sasuri Mola-Mèci Ama Lamatua. Nèti Sasuri seꞌe, èu meꞌa rahasia mamuri dhu lèke, dhu tao èu meꞌa mèu jꞌara mamuri. Nèti èèna ka, èu parcaya Yesus Kristus.  
\v 16 Aaꞌi-aaꞌi dhu ra suri ètu dꞌara Sasuri Mola-Mèci, mema Ama Lamatua ka dhu uri ho dhèu suri sèra. Gaguna Sasuri èèna, nuka: ajꞌa dhèu ngaa dhu lèke, padꞌelo sasala dhèu, ère hari dhèu asa jꞌara dhu mola, aa nori dhèu ho bèli-bèli mamuri madhutu dadꞌèi Lamatua.  
\v 17 Dènge sèmi èèna, Sasuri Mola-Mèci èèna bisa tao pamèci dhèu unu Lamatua sèra, sèna ka rèngu reꞌa sasabꞌa dhu beꞌa aaꞌi-aaꞌi.   
\c 4  
\s1 Lamu peka Lii Holo-Nori Ama Lamatua  
\p
\v 1-2 Bèli-camèdꞌa Yesus Kristus mai hari asa rai-haha ne, ho nèdꞌu paredha nuka sèmi Dhèu Aae. Masi ka dhèu dhu mamuri era, do dhèu dhu madhe le, aaꞌi-aaꞌi ra lasi asa katanga madha Na, sèna ka Na pamaꞌète lii langu ra èci-èci. Nèti èèna ka, ètu madha Ama Lamatua dènge Yesus Kristus, jaꞌa manèngi mi èu ho lamu peka-padhai dènge dhèu-dhèu, Lii Holo-Nori Ama Lamatua. Èu paꞌèra taruu! Baku pangee, na, lodꞌo dhu beꞌa, do aadꞌo. Padꞌelo sasala dhèu, te ngaa kai si pabeꞌa-beꞌa dènge lii mako. Paꞌèra dꞌara dhèu pake lii holo-nori dhu lèke.   
\p
\v 3 Te bèli-camèdꞌa, dhèu roꞌo heka nanene lii holo-nori dhu lèke. Pe ra kaboko rare mese-mese dhu dꞌèlu-mèu padhue-padhai madhutu dadꞌèi ra, sèna ka pabeꞌa roꞌa dhilu ra.  
\v 4 Ra hutu dhilu ra ho tule eele lii holo-nori dhu lèke. Te ngaa pasa dhilu ra, ho nanene lii lolo nanuku dhu leko-monya sèra!   
\p
\v 5 Masi ka tasamia èèna ka, èu hudꞌi taha dꞌara. Paꞌèra ètu dꞌara jꞌajꞌèra. Lamu lole Lii Lolo Beꞌa, sèna ka dhèu sèmi rare Yesus Kristus. Soru-bara dhèu dènge dꞌara kateme, toke paꞌèle sasabꞌa. Baku dènge dꞌara cabèka.   
\p
\v 6 Baku pusi dènge ngiꞌu jaꞌa ne, te lodꞌo mamadhe jaꞌa dètu le. Èci èèna ka dènge galaa dhu isi na oe èle kèna.\f + \fr 4:6 \ft Lodꞌo dhèu Yahudi sèra tao korban ètu Èmu Kapua Manèngi-Mangajꞌi, abhu korban ca macam dhu hudꞌi bhori anggor mi dedha mei korban. Ele boe Paulus pakasame mamuri nèngu nuka sèmi èi anggor dhu bhori oe èle kèna, jꞌajꞌi persembahan hia Lamatua.\f*  
\v 7 Te ngaa jaꞌa segi le ètu dꞌara paꞌuji èèna dènge beꞌa. Jaꞌa rai dꞌai le lane. Jaꞌa madhutu taruu le Yesus Kristus dènge beꞌa.  
\v 8 De neꞌe ne, di èci ka dhu jaꞌa tatae. Nuka piala juara dhu Lamatua tao tèke le hia dhèu aaꞌi-aaꞌi dhu mamuri mola. Lamatua èdhi èèna, nuka Dhèu pamaꞌète lii langu dhu mola. Dhu neꞌa boe bia cabèka. Ladhe dꞌai ka lodꞌo na, Na pangèdꞌu mi jaꞌa piala juara èèna. Te ngaa mesa boe jaꞌa di. Dhèu aaꞌi-aaꞌi dhu sue Ne, aa dhu mate mamai Na, rèngu sèra abhu piala sèmi èèna kahèi.   
\s1 Paulus moa pèri-pèri jꞌara  
\p
\v 9 Timotius! Mai ka lai-lai ngadꞌo jaꞌa!  
\v 10 Te limuri ne jaꞌa kaliu bia. Krekes laꞌe le asa propensi Galati. Aa Titus laꞌe le asa rai Dalmatia. Aa Demas sue risi jꞌara-jꞌara dhu lèke boe ètu rai-haha ne, laꞌe le sa kota Tesalonika.\x + \xo 4:10 \xt Kolose 4:14, Pilmon 24, 2 Korintus 8:23, Galati 2:3, Titus 1:4\x*  
\v 11 Dhodhoka Lukas di dhu pea dènge jaꞌa ètu neꞌe. Tenge more Markus sèna ka dua mi mai palere-lere. Te nèngu èèna bisa ladhe-leru jaꞌa ètu neꞌe.\x + \xo 4:11 \xt Kolose 4:14, Pilmon 24, Lii Lolo nèti Dhèu Pajuu-paleha 12:12, 25, 13:13, 15:37-39, Kolose 4:10\x*  
\v 12 Jaꞌa hia le Tikikus laꞌe asa kota Epesus.\x + \xo 4:12 \xt Lii Lolo nèti Dhèu Pajuu-paleha 20:4, Epesus 6:21-22, Kolose 4:7-8\x*  
\v 13 Ladhe èu mai, baku bhèlu mèti kodho pana jaꞌa dhu tèke eele ètu èmu Karpus ètu kota Troas. Aa baku bhèlu mèti dènge sasuri jaꞌa sèra, risi-risi dhu jaꞌa suri ètu kaꞌuri badha.\x + \xo 4:13 \xt Lii Lolo nèti Dhèu Pajuu-paleha 20:6\x*   
\p
\v 14 Aleksander, tuka tabaga èèna, tao bhelu dhu ciki boe mi dedha jaꞌa. Hudꞌi nèngu sène, te bèli-camèdꞌa, Lamatua ka dhu bꞌala ne, sèmi dhu nèngu tao mi dedha jaꞌa.\x + \xo 4:14 \xt 1 Timotius 1:20, Lii Sodꞌa Koa-Kio 62:12, Roma 2:6\x*  
\v 15 Èu hudꞌi mage-mage ku dènge dhèu èèna, lula nèngu na dꞌèi palabꞌa lii-lii dhu èdhi ajꞌa-nori.   
\p
\v 16 Lodꞌo hiu-hiu jaꞌa titu ètu madha hakim ho siri iisi jaꞌa, abhu boe ca dhèu sa dhu re jaꞌa. Rèngu aaꞌi-aaꞌi ra kako tèke eele jaꞌa mesa ku. Te ngaa hudꞌi rèngu sène! Pe Lamatua pabhèlu eele sasala ra.  
\v 17 Masi ka sèmi èèna, te ngaa Ama Lamatua tèke eele boe jaꞌa. Na paꞌèra jaꞌa, sèna ka jaꞌa bisa peka-padhai Lii Lolo Beꞌa Na dhu pakura boe ciki sa. Jaꞌa lolo sèmi èèna ka mi dhèu Yahudi boe, ho ra nanene Lii Lolo Beꞌa. Aa pakajꞌèu le nèti mamadhe-mamopo.  
\v 18 Aa èèna na Ama Lamatua pakajꞌèu jaꞌa nèti bhabhelu-katubꞌa aaꞌi-aaꞌi ra. Aa lere nèti jaꞌa dènge sodꞌa-mole laku asa sorga. Ètu era nèi, Nèngu ka dhu nèdꞌu paredha.  
\p Lamatua èèna, kapai seli eele! Jaꞌa koa-kio dedꞌe padedha-dedha Ne, dhu maꞌète boe! Tareꞌa sèmi èèna.   
\s1 Paulus katange sasuri na  
\p
\v 19 Baku bhelu mèti lii mahoꞌo jaꞌa mi ina Priskila dènge dhèu èmu na Akila. Sèmi èèna kahèi, mi aꞌari Onesiforus.\x + \xo 4:19 \xt Lii Lolo nèti Dhèu Pajuu-paleha 18:2, 2 Timotius 1:16-17\x*  
\v 20 Erastus pea ètu kota Korintus. Ca hari ni, jaꞌa tèke eele Trofimus ètu kota Miletus, lula na pèdꞌa aae.\x + \xo 4:20 \xt Lii Lolo nèti Dhèu Pajuu-paleha 19:22, Roma 16:23, Lii Lolo nèti Dhèu Pajuu-paleha 20:4, 21:29\x*  
\v 21 Tenge jꞌara sèna ka lodꞌo dꞌai mèka hèru pacuhi, èu dhu dꞌai le neꞌe. Angalai ètu seꞌe se, nuka: Ebolus, Pudes, Linus dènge ina Klaudia paꞌadhu lii mahoꞌo hia miu. Sèmi èèna kahèi, dènge aꞌari dhèu Kristen dhu leo sèra.   
\p
\v 22 Jaꞌa sanao sèna ka Ama Lamatua sama-sama dènge èu taruu. Sèna ka Lamatua padꞌelo dꞌara hua iia Na mi miu aaꞌi-aaꞌi mi.  
\q2 Dꞌai sange neꞌe ka,  
\q2 Paulus