\id 2PE  
\h 2 Petrus 
\toc1 2 Petrus Sasuri Petrus ka dua dhu heka parcaya Yesus Kristus aa tèke eele agama bèi-baki ra 
\toc2 2 Petrus 
\toc3 2Pet 
\mt1 2 Petrus  
\mt2 Sasuri Petrus ka dua  
\c 1  
\s1 Lii mahoꞌo  
\p
\v 1 Sasuri ne nèti jaꞌa, Simon Petrus.\f + \fr 1:1 \ft Sasuri lii Yunani cahagꞌe suri, peka na, “Simon Petrus”. Cahagꞌe hari suri, “Simeon Petrus”. \ft \+it Simeon\+it* èèna, nèti lii Ibrani. Lii Yunani na, nuka \+it Simon\+it*. Ka dhèu dꞌèlu-mèu peka na, Simon Petrus do Simeon Petrus èèna, nuka ngara nèti dhèu èci.\f* Jaꞌa jꞌajꞌi ana pua-paleha Yesus Kristus. Jaꞌa jꞌajꞌi dhèu pajuu-paleha Na kahèi, dhu Na pua laku asa mia-mia ho lole dènge dhèu lula-nèti Nèngu.  
\p Jaꞌa suri sasuri ne hia miu, dhu parcaya le Yesus Kristus. Lula dꞌara mola Ama Lamatua, ka Na bhoke jꞌara ho miu bisa parcaya Kristus kahèi, sama sèmi jiꞌi. Parcaya ne kabꞌua titu kèna hia èdhi aaꞌi-aaꞌi ti. Kristus èèna jꞌajꞌi Ama Lamatua èdhi, aa Nèngu kahèi jꞌajꞌi Dhèu dhu patalale èdhi nèti koasa sasala-sasigo.   
\p
\v 2 Jaꞌa manèngi sèna ka miu tadhe mèu Ama Lamatua, aa tadhe Kètu èdhi, Yesus, dènge beꞌa. Hudꞌi laa sèna ka Rèngu padꞌelo dꞌara hua iia Ra mi miu, ho miu bisa mamuri dènge dame aa mera-milu èci dènge èci.   
\s1 Lamatua pili nare dhèu unu Na, ka paroa si ho mai asa Nèngu  
\p
\v 3 Yesus dhu dènge koasa èci èèna ka dènge Ama Lamatua. Nèti èèna ka, Yesus papala èdhi aaꞌi-aaꞌi ti ngaa-ngaa dhu èdhi parluu, sèna ka mamuri mola madhutu dadꞌèi Lamatua. Nèngu tao sèmi èèna, lula èdhi tadhe mèu Ne. Aa Na paroa èdhi ho jꞌajꞌi dhèu unu Na, lula dꞌara hua iia dènge dadedha Na.  
\v 4 Yesus hia le èdhi jꞌara aaꞌi-aaꞌi dhu hua iia. Te uru èèna, Na padhadha tèke le ho neo hia jꞌara seꞌe. Lii padhadha Na, aaꞌi-aaꞌi beꞌa titu kèna. Yesus hia aaꞌi mèu-mèu seꞌe mi èdhi, sèna ka dꞌara èdhi bisa sama sèmi dꞌara Lamatua. Aa èdhi bisa lehe tare jꞌara-jꞌara karehe dhu dhèu ètu rai-haha ne dꞌèi adꞌu-ue, lula rèngu mamuri dꞌèi dhoka tao madhutu dadꞌèi unu ra, aa dhu taha rare boe dꞌara ra.   
\p
\v 5 Nèti èèna ka, jaꞌa manèngi sèna ka miu paꞌèra tao jꞌara dhu beꞌa.  
\q1 Mema miu parcaya le Yesus, te ngaa èèna dhae dꞌai mèka.  
\q2 Sabꞌa taruu jꞌara dhu beꞌa.  
\q2 Tadhe Lamatua dènge beꞌa risi hari.   
\q1
\v 6 Te ngaa mage dꞌai dhoka sange èèna di.  
\q2 Patema mamuri ho taha mere dꞌara.  
\q1 Te ngaa sèra dhae dꞌai mèka kahèi.  
\q2 Lodꞌo-lodꞌo miu abhu sasusa, na, miu hudꞌi paꞌèra dꞌara ho baku hari kabodho.  
\q1 Te ngaa tao parisi hari nèti èèna.  
\q2 Tao aaꞌi mèu-mèu madhutu dadꞌèi Lamatua.   
\q1
\v 7 Te ngaa mage dhoka dꞌai sange èèna di.  
\q2 Padꞌelo sasue mi aꞌari èdhi dhèu parcaya sèra.  
\q1 Te ngaa èèna dhae dꞌai mèka kahèi.  
\q2 Te miu hudꞌi mamuri pasue taruu.   
\p
\v 8 Ladhe mamuri miu sèmi sèra ka, aa jꞌara dhu beꞌa asa tabha taruu, na, sèra sa hia miu asa tadhe mèu Kètu èdhi, Yesus Kristus. Te jꞌara dhu beꞌa ele boe iia dꞌara, aa core eele boe lodꞌo kahèi. Te jꞌara beꞌa seꞌe ka dhu tao dꞌara miu ho meꞌa mèu Nèngu.  
\v 9 Ladhe abhu dhèu dhu dꞌèi boe tao sèmi sèra, sasoa na, ngangee nèngu babꞌa. Nèngu nèdhi boe ngaa ètu madha nèngu, nuka sèmi dhèu bèdhu. Te Lamatua dhu saku eele le sasala na, sèna ka dꞌara nèngu bisa mola-mèci. Te ngaa dhèu ne bhèlu eele!   
\p
\v 10 Aꞌari pasue aaꞌi-aaꞌi! Miu limuri ne hudꞌi bori dhari asa paꞌèra. Lamatua hagꞌe nare le miu jꞌajꞌi dhèu unu Na, ka miu lami asa madha Na. De miu hudꞌi padꞌelo ku, na, miu jꞌajꞌi le ana-èpu Na. Ladhe jꞌara dhu jaꞌa peka se tabha taruu ètu mamuri miu, na, miu manahu boe.  
\v 11 Dènge jꞌara ne, Ama Lamatua bagi hia miu jꞌara èci dhu kapai titu kèna. Nuka Na bhoke pataleo jꞌara, dènge pangèdꞌu miu hak, ho sèmi mere Yesus Kristus jꞌajꞌi Dhèu Aae miu, sèna ka miu mamuri toke dꞌai mia-mia dènge Ne. Te Yesus Kristus ne, Kètu èdhi. Aa Nèngu kahèi, Dhèu dhu patalale èdhi nèti koasa sasala-sasigo èdhi.   
\s1 Nga tao ka Petrus pasanèdꞌe sèmi èèna?  
\p
\v 12 Miu meꞌa le jꞌara-jꞌara dhu jaꞌa peka deo sa, aa miu taha paꞌèra, lula miu parcaya ngaa dhu lèke. Masi ka sèmi èèna, te ngaa jaꞌa loe boe pasanèdꞌe miu pahari-pahari, sèna ka miu baku bhèlu eele.  
\v 13 Jaꞌa koꞌo boe ladhe miu pabhèlu eele jꞌara sèra. Jaꞌa dꞌèi pasanèdꞌe miu taruu, sèna ka miu pajiko taruu jꞌara seꞌe se, ètu dꞌara kahadhu miu. Te lodꞌo jaꞌa mamuri ètu rai-haha ne era, mema sala boe ladhe jaꞌa loe boe pasanèdꞌe jꞌara seꞌe mi miu.  
\v 14 Nèbhu heka, jaꞌa madhe, sama sèmi Kètu èdhi, Yesus Kristus peka le dènge jaꞌa. Nèti èèna ka, jaꞌa keꞌa le.  
\v 15 Masi ka bèli-camèdꞌa jaꞌa madhe, te ngaa limuri ne, jaꞌa tenge jꞌara ho miu sanèdꞌe taruu jꞌara seꞌe.   
\s1 Jiꞌi ngèdhi le dadedha Yesus  
\p
\v 16 Ca hari na, jaꞌa dènge angalai jaꞌa lole le dènge miu, lula-nèti Kètu èdhi, Yesus Kristus. Jiꞌi peka kahèi, na, bèli-camèdꞌa ladhe Kristus lèpa hari mai, mamai Nèngu èèna dènge koasa dhu kapai titu kèna. Lèke, si? Dhu jiꞌi lolo se, nanuku boe. Lula jiꞌi lole dhoka dhu jiꞌi ladhe ngèdhi dènge musi madha jiꞌi unu mi! Nèti èèna ka, jiꞌi ngeꞌa, na, dadedha Yesus Kristus ne nuka sèmi dhèu aae kapai sa.  
\v 17-18 Ca tèka, jiꞌi sama-sama dènge Yesus ètu ledhe mola-mèci Lamatua. Hèia Ama Lamatua mesa Na ka dhu peka lula-nèti dadedha Yesus ne. Te lodꞌo èèna, jiꞌi tadèngi lii dhu beꞌa titu kèna mai nèti dedha-liru, peka na,  
\q1 “Neꞌe ne, Ana pasue Jaꞌa.  
\q2 Nèngu ka dhu pakarejꞌe dꞌara Jaꞌa.”\x + \xo 1:17-18 \xt Mateos 17:1-5, Markus 9:2-7, Lukas 9:28-35\x*   
\p
\v 19 Èèna ka dhu tao jiꞌi asa lèka èra lula-nèti jꞌara-jꞌara dhu uru sèra jiꞌi abhu nèti dhèu rèti lii padhai Lamatua. De hua iia risi miu tao madhutu lii moa dhèu seꞌe! Te lii moa rèngu sèra, nuka sèmi labhu èci dhu pasaraa ètu dꞌara maroga. De miu hudꞌi nanene paie-iie ku lii moa se, toke dꞌai Yesus mai hari. Dènge jꞌara neꞌe, miu asa tabha meꞌa mèu. Te èèna na nuka sèmi miu mèdhi uuru ku hua-hètu aae dhimu, hèia lodꞌo heka rea kèna ho pasaraa aaꞌi mèu-mèu.   
\p
\v 20 Sanèdꞌe, te dhèu rèti lii padhai Lamatua peka mema le jꞌara ae-ae. Te ngaa jꞌara-jꞌara dhu rèngu peka-padhai se nèti boe dadꞌèi rèngu.\f + \fr 1:20 \ft Lii Yunani ètu neꞌe bisa tèlu sasoa. 1) Dhèu dhu nèti lii padhai Lamatua madhutu boe dadꞌèi nèngu mesa na; 2) abhu boe ca dhèu sa dhu reꞌa mèu sasoa nèti lii moa aaꞌi-aaꞌi sèra; 3) ladhe èdhi neo teꞌa sasoa lii moa sèra, hudꞌi èdhi pasoro ku dènge Lii Holo-Nori Lamatua aaꞌi-aaꞌi, lula sasoa na nèti boe dadꞌèi dhèu dhu nèti lii padhai Lamatua èèna.\f*  
\v 21 Lula ngaa dhu rèngu suri se, mai boe nèti ngaa dhu rèngu neo padhai lii. Te ngaa mai nèti Ama Lamatua, madhutu ngaa dhu Roh Mola-Mèci Na padꞌelo dènge rèngu.   
\c 2  
\s1 Dhèu dhu ajꞌa kapodꞌe-kabèli  
\p
\v 1 Uru èèna, dhèu Israꞌel cahagꞌe peka na, rèngu dhu jꞌajꞌi dhèu rèti lii padhai Ama Lamatua. Aa te ngaa rèngu se kapodꞌe-kabèli di. Pe miu paraga dènge dhèu sèmi sèra ètu talora aae miu. Te abhu cahagꞌe dhu peka na, rèngu ajꞌa jꞌara-jꞌara Lamatua, te ngaa ra leko-monya di. Rèngu ajꞌa pahuni-pahuni ngangee rèngu dhu karehe. Nèti èèna ka, rèngu bisa pamaso aꞌajꞌa rèngu dhu koe-kapengo sèra. Ladhe miu nanene lii ajꞌa-nori rèngu, bèli-camèdꞌa miu abhu calaka. Rèngu pasili, peka na, Lamatua Yesus èèna, lamatua rèngu boe. Aa te ngaa, Yesus ka dhu sui nare rèngu dènge kabꞌua titu kèna. Lula tatao rèngu sèmi neꞌe ne ka, nèbhu boe rèngu unu ra laho malai.   
\p
\v 2 Masi ka sèmi èèna, te ngaa bèli-camèdꞌa abhu kahèi dhèu ae dhu madhutu rèngu, aa tao leli dhu reꞌa heka makae. Bèli-camèdꞌa dhèu pakarehe aꞌajꞌa dhu lèke, lula tatao rèngu.  
\v 3 Mese dhu kapodꞌe-kabèli sèra mangaꞌa-dèu ngara. Rèngu adꞌu-ue rupa-rupa lii padhai, sèna ka tipu rare doi-dhari miu. Te ngaa baku bhèlu, te Ama Lamatua dhu Pamaꞌète Lii Langu dhu pasaruru nèdhi boe musi madha. Karèi nèti uru ka, Nèngu paꞌèra mema le ho huku si. Bèli-camèdꞌa ra laho aaꞌi.   
\p
\v 4 Conto sèmi, uru èèna, abhu ana pajuu Ama Lamatua cahagꞌe ètu sorga dhu tao sala. Te ngaa Lamatua dhu Pamaꞌète Lii Langu soro tèke boe si. Na pèci si asa dꞌara naraka, aa bèdho si ètu dꞌara Roꞌa Maroga dhu Marèma aae. Rèngu pea taha ètu èèna toke dꞌai lodꞌo lasi asa madha Ama Lamatua.   
\p
\v 5 Sèmi èèna kahèi dènge dhèu dhu mamuri uru-uru sèra. Tèu èèna, rèngu adꞌu-ue bhelu-katubꞌa dènge pusi-pahae boe Ama Lamatua. Te ngaa Lamatua dhu ator le dhèu Na èci dhu dꞌara mola, ngara na Noh, padꞌelo jꞌara sèna ka dhèu bisa mamuri mola. Te ngaa roꞌo boe nanene ne kahèi. Nèti èèna ka, Ama Lamatua hia èi aae lala, ka palaho aaꞌi dhèu dhu pusi-pahae boe Ne. Te ngaa Lamatua hia mamuri dhoka Noh dènge isi èmu na. Rèngu aaꞌi-aaꞌi ra aru dhèu.\x + \xo 2:5 \xt Lii Lolo dhu Uru Tèka 6:1—7:24\x*   
\p
\v 6 Ca tèka hari, dhèu uru-uru sèra ètu kota Sodom dènge kota Gomora, mamuri dhoka adꞌu-ue bhabhelu-katubꞌa. Hèia Ama Lamatua huku si. Nèngu labhu pakèpu aaꞌi si jꞌajꞌi ahu, ka dhèu ètu sèra madhe aaꞌi mèu-mèu. Seꞌe se jꞌajꞌi mi conto hia mi dhèu leo dhu dꞌèi mamuri ètu dꞌara bhabhelu-katubꞌa dènge dhu pusi-pahae boe Ama Lamatua. Rèngu bisa reꞌa mema le mamadhe-mamopo ra, ladhe ele boe hoꞌa.\x + \xo 2:6 \xt Lii Lolo dhu Uru Tèka 19:24\x*  
\v 7 Te ngaa lodꞌo èèna, abhu ca dhèu ngara na Lot, dhu mamuri mola. Nèngu roca le dènge tatao dhu seli-kolane nèti dhèu bhelu seꞌe, dhu roꞌo boe nanene Ama Lamatua. Ka Ama Lamatua pakajꞌèu Lot nèti era èèna.\x + \xo 2:7 \xt Lii Lolo dhu Uru Tèka 19:1-6\x*  
\v 8 Lot ne ca dhèu dhu dꞌèi tao dhu lèke, te ngaa na pea ètu talora aae dhèu Sodom. Bèli-bèli èèna, Lot nèdhi aa tadèngi kahèi rèngu sisu Atora Ama Lamatua. Seꞌe se ka dhu pasusa dꞌara Lot.   
\p
\v 9 Conto sèra sa padꞌelo, peka na, Ama Lamatua neꞌa jꞌara hia mamuri mi dhèu dhu dꞌèi nanene Nèngu, ka Na pakajꞌèu si nèti rupa-rupa dadugu-rariu. Nèngu neꞌa pamanahu hahuku dhu bia kahèi mi dhèu dhu mamuri koe-kapengo. Aa Lamatua tao jꞌara seꞌe toke dꞌai lodꞌo Na pamaꞌète lii langu dhèu aaꞌi-aaꞌi.  
\v 10 Hahuku dhu bia èèna, lèke risi-risi mi dhèu dhu dꞌèi dhoka mamuri kajꞌalu, madhutu dadꞌèi dꞌara ra. Rèngu roꞌo boe nanene ca dhèu sa, aa pahahe dhèu dhu rèdꞌu koasa. Tatu Ama Lamatua huku si.  
\p De mese kapodꞌe-kabèli sèra bani titu kèna, aa padedha iisi seli eele. Rèngu roꞌo boe pakabꞌua aa madhaꞌu boe padhai lii paꞌele iie kolongara Ama Lamatua dènge ana pajuu Na ètu sorga.  
\v 11 Madhutu mola-mola na, ana pajuu Lamatua ètu sorga sèra èra risi nèti rèngu mese-mese kapodꞌe-kabèli se. Masi ka sèmi èèna, te ngaa ana-ana pajuu se padhai lii paꞌele iie boe kolongara mese kapodꞌe-kabèli sèra ètu madha Lamatua rèngu. Aa ra pèci boe sasala asa mese sèra kahèi.   
\p
\v 12 Te ngaa mese kapodꞌe-kabèli sèra reꞌa dhoka padhai lii paꞌele iie jꞌara-jꞌara dhu rèngu mesa ra reꞌa boe. Te rèngu èci èèna ka dènge badha dhu dènge boe ngangee na! Beꞌa risi, kèpe ho palaho eele si! Te kalua aapa rèngu, sèmi èèna ka. Tatu bèli-camèdꞌa rèngu laho aaꞌi, lula tatao rèngu dhu karehe sèra.  
\v 13 Rèngu pajꞌèra ae le dhèu. Pe, Ama Lamatua pasusa rèngu kahèi, lula tatao rèngu dhu lèke boe sèra. Rèngu dꞌèi dhoka tao pesta liar. Ladhe re mèu, rèngu dꞌèi tao leli kahèi, sèna ka dhèu bisa rèdhi bhabhelu rèngu. Rèngu reꞌa boe makae, ka paꞌele iie kolongara miu. Ladhe rèngu raꞌa pesta sama-sama dènge miu, rèngu dꞌèi dhoka neo tao madhutu bhabhelu ra.  
\v 14 Musi madha ra seru lee, ho patangi-tenge dhèu bhèni dhu neo karihu kajꞌalu dènge rèngu. Mamuri rèngu dhoka bhelu-katubꞌa di. Rèngu tenge dhèu dhu parcaya èra boe mi Lamatua, ka pamako si, sèna ka paꞌèci dènge rèngu ho tao bhabhelu. Rèngu mangaꞌa, aa reꞌa boe roca. Tatu Ama Lamatua huku si!\x + \xo 2:14 \xt Lii Lolo dhu Uru Tèka 6:5\x*   
\p
\v 15-16 Mese kapodꞌe-kabèli sèra, uru èèna, rèngu dhèu dhu madhutu jꞌara mola, te ngaa nèbhu-nèbhu ka ra sero eele jꞌara. Dènge sèmi èèna, rèngu sèra nuka sèmi Balaam, ana Bosor.\f + \fr 2:15-16 \ft Sasuri lii Yunani dhu beꞌa risi, peka na, \ft \+it Bosor\+it*. Abhu sasuri dhu leo hari suri peka na, \+it Beor\+it*. Sasuri aaꞌi-aaꞌi ètu dꞌara lii Yunani suri, na, \+it Balaam\+it*. Alkitab lii Idhonesia suri, na, \+it Bileam\+it*.\f* Nèngu ne, dhèu nèti lii padhai Lamatua. Te ngaa nèngu dꞌèi dhoka tenge doi-dhari di, nèti èèna ka na tao jꞌara dhu lèke boe. Ca tèka, Balaam manyaꞌe badha keledꞌei. Keledꞌei dhu bisa boe padhai lii. Te ngaa lodꞌo èèna, Lamatua hia keledꞌei ne padhai lii sama sèmi dhèu! Ka keledꞌei ne kai Balaam, lula bhabhelu na. Dadꞌèi keledꞌei ne, sèna ka Balaam ae eele ka nèti tatao na dhu koe-kapengo, nuka sèmi dhèu hujꞌu sa.\x + \xo 2:15-16 \xt Sensus 22:4-35\x*   
\p
\v 17 Mese kapodꞌe-kabèli sèra, èci èèna ka dènge madha èi dhu guna boe, lula mèti eele. Rèngu cakaraa kahèi dènge bhuru dhu guna boe, lula lai ngèlu tiu eele. Ama Lamatua tao tèke le era dhu maroga aatu-aatu èci, sèna ka taha si.  
\v 18 Te rèngu padhai lii hèbꞌa-hua dhu dènge boe sasoa. Rèngu dadugu dhèu, sèna ka madhutu tao jꞌara dhu lèke-lèke boe. Rèngu dꞌèi pamako dhèu dhu heka lèpa hari asa jꞌara mola, sèna ka tao hari jꞌara karehe.  
\v 19 Dhèu kapodꞌe-kabèli se padhadha, peka na, “Ladhe miu nanene jiꞌi, na, miu neo tao ngaa èèna ka madhutu dadꞌèi miu, na, tao laa!” Te ngaa dhèu dhu peka sèmi sèra sa, sama sèmi ènu dhu bisa boe pakajꞌèu iisi ra nèti bhelu-katubꞌa. Te dhèu dhu soro tèke jꞌara èci ator nèngu, nèngu jꞌajꞌi le ènu ètu jꞌara èèna.  
\v 20 Ladhe neo pakajꞌèu nèti bhabhelu ètu rai-haha dhu pakajꞌalu èdhi, na, èdhi hudꞌi tadhe dènge beꞌa ku Kètu èdhi, Yesus Kristus. Te ngaa ladhe abhu dhu pakajꞌèu nèti Nèngu, hèia paꞌèki hari dènge bhabhelu sama sèmi uru sèra, èèna nuka sèmi bhabhelu sèra ka dhu ator rèngu. Dꞌai lodꞌo limuri, rèngu asa tabha jꞌèra!  
\v 21 Beꞌa risi, ladhe dhèu reꞌa rèdhi mèka jꞌara mola. Te ladhe dhèu reꞌa le jꞌara mamuri dhu lèke, te ngaa ra pakajꞌèu iisi ra, ka tao boe madhutu jꞌara dhu beꞌa dènge dhu mola, dhu Ama Lamatua paredha le mi èdhi, èèna beꞌa boe.  
\v 22 Abhu lii tateꞌa dhu palèke dènge mese kapodꞌe-kabèli se, dhu peka na, “Ladhe busa mèdhu, naꞌe hari mèdhu na.” Dhu leo hari peka na, “Masi ka padiu tare le hahi ciꞌu, te ngaa laꞌe hari loli èi lobho.”\x + \xo 2:22 \xt Lii Hini 26:11\x*   
\c 3  
\s1 Kètu èdhi, Yesus Kristus neo lèpa hari mai  
\p
\v 1 Aꞌari pasue aaꞌi-aaꞌi! Neꞌe ne, sasuri ka dua kèna nèti jaꞌa dhu jaꞌa paꞌadhu hia miu. Ètu dꞌara sasuri dua se, jaꞌa pasanèdꞌe le miu ho bisa pangee jꞌara-jꞌara dhu mola.  
\v 2 Sanèdꞌe paie-iie lii lolo nèti dhèu mola-mèci dhu rèti lii padhai Lamatua uru-uru sèra. Sanèdꞌe kahèi dhèu pajuu-paleha Yesus. Pangee paie ngaa-ngaa dhu Lamatua èdhi paredha mi rèngu ho peka mi miu. Te Nèngu ka dhu patalale miu nèti koasa sasala mi!  
\v 3 Sanèdꞌe sèmi neꞌe: dꞌara lodꞌo èle rai-haha sèra, abhu le dhèu dhu padhèto dꞌara lii, dhu tao leli madhutu dadꞌèi ra. Rèngu padhai lii paꞌele iie aaꞌi jꞌara-jꞌara dhu lèke.\x + \xo 3:3 \xt Yudas 1:18\x*  
\v 4 Dhèu se, peka na, “Baku pusi-pahae! Yesus padhadha, na, Nèngu neo mai hari, do? Ladhe sèmi èèna, Nèngu buli mia? Te karèi nèti bèi-baki èdhi madhe, toke dꞌai doe neꞌe ne, ngaa-ngaa èci sa dhu ubꞌa boe. Ngaa aaꞌi-aaꞌi sama sèmi uru-uru sèra, karèi nèti Ama Lamatua pajꞌajꞌi liru dènge rai-haha.”   
\p
\v 5-7 Te ngaa abhu ca jꞌara dhu dhèu kapodꞌe-kabèli se roꞌo boe sanèdꞌe. Nuka, karèi nèti uru jꞌara ka, Ama Lamatua dhoka padhai lii di, ka liru jꞌajꞌi dènge. Ka Na pajꞌajꞌi èi. Hèia Na hagꞌe èi nèti rai-dedha, ka rai-dedha cèu nèti dꞌara èi. Ladhe Lamatua padhai lii sèmi mia, na, jꞌajꞌi dènge sèmi èèna ka.\x + \xo 3:5-7 \xt Lii Lolo dhu Uru Tèka 1:6-9\x* Nèbhu ae ku, lodꞌo Noh mamuri era, Ama Lamatua pake èi aae lala ho palaho aaꞌi mèu-mèu dhèu ètu rai-haha ne.\x + \xo 3:5-7 \xt Lii Lolo dhu Uru Tèka 7:11\x* Te ngaa limuri ne, Lamatua dhu peka tèke le ngaa dhu bèli-camèdꞌa Na tao ètu dedha-liru dènge rai-haha ne. Limuri ne Lamatua tatae era, te ngaa ropa dꞌai lodꞌo èèna, tatu Na neo tunu pakèpu aaꞌi si. Te Lamatua bèli-camèdꞌa papuru hahuku, sèna ka palaho dhèu dhu pusi-pahae boe Nèngu. Masi ka sèmi èèna, te ngaa dhèu kapodꞌe-kabèli se roꞌo boe reꞌa, na, bèli-camèdꞌa Ama Lamatua tatu tao madhutu ngaa dhu Na peka sèra.   
\p
\v 8 Aꞌari pasue aaꞌi-aaꞌi! Baku bhèlu jꞌara neꞌe. Lamatua èdhi ige boe lodꞌo sama sèmi dhu èdhi ige. Te madhutu Nèngu, na, ca lodꞌo bisa sama sèmi ca riho tèu. Aa ca riho tèu bisa nuka ca lodꞌo doko di.\x + \xo 3:8 \xt Lii Sodꞌa Koa-Kio 90:5\x*  
\v 9 Ladhe Lamatua èdhi pajaji neo tao ngaa èci sa, Na tao pamèci dènge lodꞌo na, aa pamata boe. Abhu dhèu cahagꞌe dhu pangee, na, Nèngu sabꞌa nena di. Madhutu iia-iia na, sèmi boe èèna! Te Na taha dꞌara, ho tatae dꞌai ku lodꞌo na. Dadꞌèi Lamatua èdhi, ho dhèu aaꞌi-aaꞌi hudꞌi ele-hoꞌa ku, sèna ka tèke eele sasala-sasigo ra, hèia lèpa madhutu Nèngu. Te dꞌara Na laꞌe boe, ladhe dhèu pacèri nèti Nèngu.   
\p
\v 10 Te ngaa lodꞌo Kètu èdhi, Yesus Kristus, lèpa hari mai, abhu boe ca dhèu sa dhu reꞌa mema. Te mamai Na dènge sahèka, nuka sèmi dhèu manaꞌu maso asa dꞌara èmu. Lodꞌo èèna, aaꞌi-aaꞌi dhu ètu dedha-liru kèpu aaꞌi mèu-mèu, nuka madha lodꞌo, liru dènge hua-hètu. Aaꞌi-aaꞌi ra ele! Sèmi èèna kahèi, rai-haha ne dènge isi na aaꞌi-aaꞌi. Kèpu eele!\x + \xo 3:10 \xt Mateos 24:43, Lukas 12:39, 1 Tesalonika 5:2, Rai-haha Rupa Hiu 16:15\x*   
\p
\v 11 De ladhe aaꞌi-aaꞌi kèpu ladhu ai sèmi èèna, na, mamuri miu hudꞌi sèmi ngaa sa? Miu hudꞌi paꞌèra-èra mamuri madhutu dadꞌèi Lamatua. Miu hudꞌi mamuri mola-mèci!  
\v 12 Miu hudꞌi tatae mamai Lamatua kahèi. De miu hudꞌi paꞌèra taruu, sèna ka lodꞌo èèna jꞌajꞌi malai risi hari. Lodꞌo èèna, liru kèpu ladhu ai kahèi. Aa ngaa aaꞌi-aaꞌi ètu dedha-liru kèpu toke roe eele aaꞌi si.   
\p
\v 13 Te ngaa èèna na, abhu liru rupa hiu dènge rai-haha rupa hiu. Ama Lamatua dhu moa tèke le sèmi èèna ka. Jꞌara seꞌe se ka dhu èdhi mate tae-tae. Ètu era nèi abhu dhoka dhèu dhu mamuri mola di.\x + \xo 3:13 \xt Yesaya 65:17, 66:22, Rai-haha Rupa Hiu 21:1\x*   
\p
\v 14 De aꞌari pasue aaꞌi-aaꞌi! Lodꞌo miu tatae jꞌara seꞌe se era, miu hudꞌi bori paꞌèra dhari ho jꞌajꞌi dhèu beꞌa madhutu aꞌabhu Ama Lamatua. Dènge sèmi èèna, abhu boe ca dhèu sa dhu bisa pèci sasala asa miu. Paꞌèra sèna ka mamuri padame èci dènge èci.   
\p
\v 15a Te Lamatua èdhi taha dꞌara, ho Nèngu patalale miu nèti koasa sasala-sasigo miu.   
\s1 Petrus suri paꞌèle sasuri na  
\p
\v 15b Aꞌari èdhi Paulus suri nèdhi le hia miu madha jꞌara ae-ae dhu sama hua, si? Lamatua ka dhu hia ne mamèu sèmi èèna, nèti èèna ka nèngu suri madhutu sèmi èèna kahèi.  
\v 16 Lodꞌo-lodꞌo dhu Paulus suri sasuri, na peka kahèi jꞌara seꞌe se. Nèti sasuri na, abhu kahèi dhu èdhi teꞌa tare mèka sasoa na. Abhu kahèi dhèu dhu pakapodꞌe asa jꞌara leo nèti naneo Paulus. Dhèu seꞌe kahèi pakapodꞌe jꞌara-jꞌara dhu leo nèti isi Sasuri Mola-Mèci Lamatua. Dhèu sèra, nuka dhèu bai-eedꞌa dhu roꞌo boe pakanucu Lii Holo-Nori Lamatua dhu lèke, aa rèngu dhèu dhu parcaya èra boe. Dhèu sèmi seꞌe se, bèli-camèdꞌa laho unu ra.   
\p
\v 17 Aꞌari pasue aaꞌi-aaꞌi! Miu meꞌa le jꞌara mamuri nèti mese kapodꞌe-kabèli sèra. De baku pamudꞌe! Te rèngu dꞌèi boe nanene atora èci sa. Rèngu neo cobꞌa ho kapodꞌe miu nèti jꞌara dhu mola. Te ngaa baku soro tèke si segi miu. Miu hudꞌi pakadhii ku lalèka miu.  
\v 18 Beꞌa risi parcaya miu asa tabha èra. Te miu meꞌa le Kètu èdhi, Yesus Kristus ka dhu patalale èdhi nèti koasa sasala-sasigo èdhi. Nèngu neo padꞌelo dꞌara hua iia Na mi dedha miu. Aa Nèngu neo miu tadhe Ne beꞌa risi hari kahèi.  
\p Jaꞌa dꞌèi ladhe dhèu aaꞌi-aaꞌi dedꞌe padedha-dedha Yesus Kristus nèti doe neꞌe toke dꞌai mia-mia laꞌe!\f + \fr 3:18 \ft Sasuri lii Yunani cahagꞌe suri tabha ètu neꞌe, “Amin!”.\f*  
\q2 Saloom,  
\q2 Petrus