\id 1TI  
\h 1 Timotius 
\toc1 1 Timotius Sasuri Paulus ka èci hia angalai na Timotius 
\toc2 1 Timotius 
\toc3 1Tim 
\mt1 1 Timotius  
\mt2 Sasuri Paulus ka èci  
\mt2 hia angalai na Timotius  
\c 1  
\s1 Lii mahoꞌo  
\p
\v 1-2 Timotius dhu beꞌa.  
\p Lii mahoꞌo nèti jaꞌa, Paulus. Ama Lamatua dedꞌe le jaꞌa jꞌajꞌi dhèu pajuu-paleha Yesus Kristus. Aa Lamatua Yesus, era sanao-maena dhu hia èdhi mamuri taa-taa dènge Nèngu, lula Ama Lamatua pakajꞌèu èdhi nèti koasa sasala-sasigo.  
\p Timotius! Èu ne, nuka sèmi ana matana jaꞌa, lula jaꞌa ka dhu padꞌelo jꞌara ka èu parcaya Kristus. Jaꞌa sabajꞌa sèna ka Ama Lamatua èdhi, dènge Kètu èdhi, Yesus Kristus, padꞌelo dꞌara hua iia Rèngu, aa hia èu mamuri dènge mera-milu.\x + \xo 1:1-2 \xt Lii Lolo nèti Dhèu Pajuu-paleha 16:1\x*   
\s1 Baku pamudꞌe dènge dhèu dhu ajꞌa lii lolo lèke boe  
\p
\v 3 Uru èèna, dua ti ètu kota Epesus. Lodꞌo jaꞌa neo laku asa propensi Makedonia, jaꞌa manèngi èu ho pea ètu Epesus. Te lodꞌo èèna, abhu dhèu dhu pabꞌingu dhèu sarani sèra dènge ajꞌa jꞌara-jꞌara dhu lèke boe. De jaꞌa manèngi sèna ka èu lamu kai si, ho ra loe eele ka.  
\v 4 Aa dhèu sèra core eele lodꞌo iia dꞌara kahèi lasi palolo nanuku, pabꞌala lii dènge kapodꞌe-kabèli nèti bèi-baki toke lai ana lai èpu. Jꞌara sèmi sèra, dhoka hia dhèu patao-palaha, aa hia boe ra mamuri dènge parcaya mi Ama Lamatua.   
\p
\v 5 Jaꞌa holo èu, sèna ka èu ajꞌa dhèu parcaya sèra ho mamuri pasue èci dènge èci kahèi. Sasue ra hudꞌi mai nèti dꞌara dhu mèu, nèti ngangee dhu mola, aa nèti parcaya dhu koe-kapengo boe.  
\v 6 Te ngaa abhu mese cahagꞌe dhu kako sala le jꞌara, ra tèke eele lii holo-nori. Hèia lasi core eele lodꞌo iia dꞌara dènge padhue-padhai jꞌara-jꞌara dhu dènge boe kolo-kapua.  
\v 7 Rèngu padedha iisi ra, peka na, rèngu mese dhu ajꞌa madhutu atora Musa. Ra tao iisi ra sèmi mese aae, te ngaa reꞌa boe ngaa dhu rèngu ajꞌa-nori èèna.   
\p
\v 8 Èdhi aaꞌi-aaꞌi ti teꞌa, huku Musa èèna beꞌa, sadꞌi èdhi pake ne madhutu dadꞌèi Ama Lamatua.  
\v 9 Atora sèra suri boe hia mi dhèu dhu mamuri mola le. Te ngaa pala mi dhèu palabꞌa, dhu dꞌèi boe nanene paredha, dhu mamuri pakajꞌèu nèti Lamatua, dhu dꞌèi adꞌu-ue bhelu-katubꞌa, dhu pusi-pahae boe Lamatua, dhu pamudꞌe jꞌara-jꞌara dhu hua iia, dhu tuka pamadhe dhèu, dènge dhu pamadhe ina dènge ama ra.  
\v 10 Atora sèra suri kahèi hia dhèu kajeo dènge bhèni do dènge mone, aa mone dhu tao jꞌara makae dènge mone, dhu rai rèti dhèu ho sui dènge doi-dhari, dhèu dhu kapodꞌe-kabèli, dhu jꞌajꞌi sakasii omo koso, aa hia dhèu aaꞌi-aaꞌi dhu dꞌèi palabꞌa lii ajꞌa dhu lèke.  
\v 11 Aꞌajꞌa dhu lèke sèra, mai nèti Lii Lolo Beꞌa Ama Lamatua dhu Na pangèdꞌu mi jaꞌa. Aa Lamatua èèna, Ama Lamatua dhu kapai risi eele. Nèti èèna ka, dhèu dedꞌe Ne padedha-dedha.   
\s1 Manèngi makasi mi Ama Lamatua, lula dꞌara Na hua iia  
\p
\v 12 Jaꞌa manèngi makasi ae-ae mi Kètu èdhi, Yesus Kristus, lula Na lèka jaꞌa, ka Na hia jaꞌa bisa pakako sasabꞌa Na.  
\v 13-14 Masi ka uru èèna, jaꞌa dꞌèi padhai paꞌele iie kolongara Yesus, aa pajꞌèra dhèu-dhèu dhu madhutu jꞌara mamuri Na. Jaꞌa dꞌèi ènyi raruri si. Bhabhelu jaꞌa sèmi èèna, lula uru èèna, jaꞌa keꞌa boe ngaa dhu jaꞌa tao, aa parcaya mèka Yesus Kristus. Te ngaa Ama Lamatua core eele boe jaꞌa. Ka Na padꞌelo sasue Na mi jaꞌa.\x + \xo 1:13-14 \xt Lii Lolo nèti Dhèu Pajuu-paleha 8:3, 9:4-5\x* Mia hari Kètu èdhi, Yesus Kristus, loe boe padꞌelo dꞌara hua iia Na mi jaꞌa! Nèngu hia mèngi-nale dhu ae hia jaꞌa, sèna ka jaꞌa bisa parcaya Ne, aa jaꞌa bisa sue dhèu leo kahèi nuka sèmi Nèngu sue jaꞌa.   
\p
\v 15 Èdhi biasa tadèngi le, peka na, “Yesus Kristus mai le asa rai-haha, ho pala-bagi mamuri mi dhèu dhu adꞌu-ue sasala.” Mema tareꞌa sèmi èèna! Nèti dhèu aaꞌi-aaꞌi ra dhu adꞌu-ue sasala, jaꞌa ka dhu bhelu risi eele.  
\v 16 Masi ka jaꞌa bhelu sèmi èèna, te ngaa Ama Lamatua huku boe jaꞌa. Te nare jaꞌa jꞌajꞌi mi tadha sena ka padꞌelo sasue Yesus Kristus mi dhèu dhu bhelu risi eele, nuka sèmi jaꞌa neꞌe ne. Dènge jꞌara neꞌe ka, dhèu leo dhu tao sala sèra bisa parcaya Ne kahèi, ka ra abhu mamuri taa-taa dènge Ne.   
\q1
\v 17 Koa-kio kolongara Lamatua!  
\q2 Lula dhoka Nèngu di, Ama Lamatua;  
\q3 dhu leo aadꞌo!  
\q1 Nèngu ne, Dhèu Aae dhu paredha taa-taa.  
\q2 Mamuri Na dènge boe too-lane.  
\q2 Mamadhe aadꞌo ètu Nèngu.  
\q2 Dhèu bisa boe rèdhi Ne dènge musi madha.  
\q1 Pakabꞌua dènge koa-kio aaꞌi-aaꞌi hia mi Nèngu di!  
\q2 Tareꞌa-reꞌa sèmi èèna.   
\p
\v 18 Ana Timotius dhu beꞌa! Jaꞌa neo peka dènge èu ngaa dhu hudꞌi èu tao ku ètu dꞌara sasabꞌa-laꞌa èu. Aaꞌi-aaꞌi se, madhutu ngaa dhu dhèu rèti lii padhai Lamatua peka tèke le lula-nèti èu ne. Ladhe èu madhutu lii seꞌe dènge mola-mola, èu sèmi ca dhèu sordadꞌu dhu bisa pamusu dènge beꞌa, ho labꞌa bhabhelu-katubꞌa.  
\v 19 Kèpe paꞌèra-èra lalèka èu mi Yesus Kristus. Aa jꞌaga paie, sèna ka dꞌara èu mola taruu. Te abhu kahèi dhèu leo dhu roꞌo heka nanene dꞌara iiki ra, dhu paꞌele iie parcaya rèngu, nuka sèmi kapa rage nare hadhu aae.  
\v 20 Himeneus dènge Aleksander si, ra sèmi èèna ka! Nèti èèna ka, jaꞌa soro le rèngu asa dhèu aae nidhu. Jaꞌa tao sèmi èèna, sèna ka ajꞌa si loe eele pakarehe kolongara Lamatua,   
\c 2  
\s1 Atora pakaboko dhèu sarani  
\p
\v 1 Dhu uru tèka miu tao: jaꞌa manèngi miu sabajꞌa hia dhèu aaꞌi-aaꞌi. Ladhe miu mangajꞌi mi Ama Lamatua, manèngi sèna ka Na ladhe-leru dhèu aaꞌi-aaꞌi ètu dꞌara jꞌajꞌèra. Aa manèngi makasi, lula Na tao le babeꞌa mi rèngu aaꞌi-aaꞌi ra.  
\v 2 Sabajꞌa sèmi èèna kahèi hia dhèu aae-dhèu aae, dènge dhèu dhu rèdꞌu paredha. Dènge jꞌara neꞌe èdhi bisa mamuri mera-milu, dènge dame, madhutu dadꞌèi Lamatua, mamuri pamèci dènge dhèu dhu pahaha iisi mi Lamatua.  
\v 3 Manèngi-mangajꞌi sèmi èèna ka dhu beꞌa. Jꞌara neꞌe ne ka pakarejꞌe dꞌara Lamatua, dhu hia èdhi mamuri.  
\v 4 Dadꞌèi Lamatua ka dhèu aaꞌi-aaꞌi ra abhu mamuri, aa reꞌa mia ka dhu lèke. Nuka sèmi:   
\q1
\v 5 Ama Lamatua èèna, dhoka èci di.  
\q2 Aa kalete dhoka èci di dhu padame èdhi dhèu rai-haha dènge Ama Lamatua, nuka, Yesus Kristus.  
\q2 Aa Yesus tareꞌa-reꞌa dhèu rai-haha.   
\q1
\v 6 Na soro iisi Na, ho sui èdhi aaꞌi-aaꞌi ti nèti sasala-sasigo èdhi.  
\p Lèke dènge lodꞌo na, ka Ama Lamatua bhoke le pasaraa lii lolo beꞌa èèna hia dhèu aaꞌi-aaꞌi.  
\v 7 Hèia Ama Lamatua hagꞌe nare jaꞌa jꞌajꞌi dhèu pajuu-paleha Na, sèna ka laku peka-padhai dènge dhèu Yahudi boe ètu mia-mia, aa nori si sèna ka ra parcaya Lamatua Yesus, dènge mamuri madhutu jꞌara dhu lèke. Ngaa dhu jaꞌa peka ne, tareꞌa-reꞌa sèmi èèna. Jaꞌa leko-monya boe.\x + \xo 2:7 \xt 2 Timotius 1:11\x*   
\p
\v 8 Dadꞌèi jaꞌa sèmi neꞌe ka: ladhe ètu mia-mia miu pakaboko ho manèngi-mangajꞌi, hudꞌi dènge ku dꞌara dhu mola-mèci. Baku panasa. Baku patao-palaha. Ladhe sabajꞌa, bisa dedꞌe kacui-aai asa Ama Lamatua, ho jꞌajꞌi mi tadha, peka na, dꞌara miu mola-mèci tareꞌa-reꞌa.   
\p
\v 9-10 Dadꞌèi jaꞌa kahèi ladhe dhèu-dhèu bhèni reꞌa lalau iisi ra pake mèdha-papake dhu pantas. Dhu tao bhèni jꞌajꞌi bhèni iia, lula boe nèti pasaraga rèu kètu, do pake mèdha-papake dhu kabꞌua aae dhu nèti makae, do pake risi eele mèdha hualaa, doi pudhi dènge mutiara.\x + \xo 2:9-10 \xt 1 Petrus 3:3\x* Te dhu tao bhèni sèra jꞌajꞌi bhèni iia, nuka dꞌara dhu hua iia, aa rèngu tao dhoka jꞌara dhu beꞌa. Èèna ka pamèci dènge dhèu bhèni dhu pahaha iisi mi Ama Lamatua.  
\v 11 Ladhe dhèu sarani pakaboko ho nanene lii holo-nori, na, bhèni sa kahèi madhutu atora, sèna ka pasa dhilu ra beꞌa-beꞌa ho nanene lii holo-nori dènge dꞌara kateme. Baku pagagai sèna ka tao maruru.  
\v 12 Madhutu ngangee jaꞌa, lèke boe ladhe dhèu bhèni dedꞌe ngiꞌu ra ho paredha aa ajꞌa dhèu mone. Beꞌa risi bhèni sèra taha dꞌara.  
\v 13 Te Ama Lamatua pajꞌajꞌi uuru Adam, heka Hawa kèna.\x + \xo 2:13 \xt Lii Lolo dhu Uru Tèka 2:7, 2:21-22\x*  
\v 14 Aa Adam dhu uru boe lèke agꞌo nèti dhèu aae nidhu, te ngaa dhèu bhèni. Karèi nèti lodꞌo èèna, dhèu rai-haha mulai labꞌa paredha Ama Lamatua.\x + \xo 2:14 \xt Lii Lolo dhu Uru Tèka 3:1-6\x*  
\v 15 Masi ka sèmi èèna, te ngaa dhèu bhèni abhu mamuri lula rèngu rara iisi ana. Sadꞌi rèngu parcaya tareꞌa-reꞌa mi Kristus, mamuri pasue, mamuri dènge dꞌara mola-mèci, aa mamuri madhutu jꞌara dhu lèke.   
\c 3  
\s1 Atora ho dedꞌe ca dhèu kètu jumaꞌat  
\p
\v 1 Mema tareꞌa sèmi lii dhèu, dhu peka na, “Dhèu dhu neo jꞌajꞌi kètu jumaꞌat, nèngu hagꞌe nare le sasabꞌa èci dhu hua iia titu kèna.”  
\v 2 Kètu jumaꞌat èèna, hudꞌi dhèu dhu kolongara beꞌa. Nèngu hudꞌi satia dènge dhèu èmu na ca dhèu di. Nèngu hudꞌi taha nare dꞌara na, dhèu dhu patao-palaha boe, dhu dhèu pakabꞌua ne, dhu dꞌèi bhoke babèdho èmu ho dhèu lasi pangadꞌo dènge ne, aa bisa ajꞌa-nori dhèu leo.  
\v 3 Baku dhèu dhu tema mahu, baku dhèu dhu nasa dènge kacui-aai malai. Dhu lèke ka, dhèu dhu dꞌara hua iia, dhu dꞌèi tenge dame, aa dhu mangaꞌa boe doi-dhari.  
\v 4 Nèngu hudꞌi neꞌa uri dꞌara èmu na dènge beꞌa. Ana-ana na reꞌa pakabꞌua dènge dꞌèi nanene ne.  
\v 5 Te ladhe dhèu èèna neꞌa boe lalau-laloꞌo dꞌara èmu na, na, tasa mera mia nèngu bisa ladhe-leru jumaꞌat Lamatua.   
\p
\v 6 Beꞌa risi, pili dhèu dhu mamuri palèke dènge dadꞌèi Kristus. De baku dedꞌe kètu jumaꞌat nèti dhèu dhu parcaya nèbhu mèka mi Yesus. Te èèna na, rèngu sèra bisa padedha iisi malai. Mage dhoka Lamatua huku si, sama sèmi Lamatua huku dhèu aae nidhu.  
\v 7 Dhèu dhu jꞌajꞌi kètu jumaꞌat sèra hudꞌi dhèu dhu rai lesa reꞌa pakabꞌua ne kahèi. Dènge sèmi èèna nèngu makae boe. Aa dhèu aae nidhu bisa boe pabèbhe ne kahèi.\x + \xo 3:7 \xt Titus 1:6-9\x*   
\s1 Dhèu dhu soru-bara kètu jumaꞌat  
\p
\v 8 Sèmi èèna kahèi dènge dhèu dhu soru-bara kètu jumaꞌat. Rèngu sèra hudꞌi dhèu dhu dènge kolongara beꞌa, dhèu dhu heꞌo kajari boe, dhu tema boe rinu mahu, aa dhu dꞌèi boe raꞌe aꞌoto ae-ae.  
\v 9 Dꞌara rèngu hudꞌi mola-mèci, aa rèngu hudꞌi kèpe paꞌèra ku Lii Holo-Nori dhu Lamatua bhoke pasaraa hia èdhi, dhèu parcaya seꞌe.  
\v 10 Ladhe paie-iie mamuri dènge sasabꞌa ra. Ladhe abhu boe sasala si, heka dedꞌe si ho soru-bara kètu jumaꞌat sèra.   
\p
\v 11 Sèmi èèna kahèi dènge dhèu èmu ra. Rèngu sèra hudꞌi bhèni dhu mamuri madhutu madha jꞌara dènge tatao dhu beꞌa. Mage dhèu dhu tema padhai-kakoli paꞌele iie kolongara dhèu leo. Rèngu hudꞌi dhèu dhu reꞌa taha rare dꞌara, aa dhèu lèka si kahèi.   
\p
\v 12 Aa dhu soru-bara kètu jumaꞌat sèra hudꞌi mone dhu satia dènge dhèu èmu na ca dhèu di. Nèngu èèna hudꞌi neꞌa uri dꞌara èmu na, aa uri ana-ana na dènge beꞌa.  
\v 13 Rèngu dhu lalau-laloꞌo dhèu sarani dènge beꞌa, tatu dhèu asa pakabꞌua si. Aa rèngu asa bani, dènge boe madhaꞌu lole parcaya rèngu mi Yesus Kristus.   
\s1 Kapua nèti lalèka èdhi  
\p
\v 14-15 Timotius! Jaꞌa sanao sèna ka nèbhu boe jaꞌa dhiu ngadꞌo èu. Ladhe jaꞌa pakai, do ako nena ciki, na, ele boe sasuri ne dꞌai uuru èu. Sasuri ne jaꞌa suri ho peka dènge èu, na, dhèu unu Lamatua sèra hudꞌi ra mamuri tasa mera mia ku. Baku bhèlu, peka na, Lamatua èèna, Ama Lamatua dhu mamuri. Dhèu unu Na nuka sèmi èmu dhu dènge era padhèdi, aa dènge agarii talora dhu èra. Èmu sèmi èèna ka dhu titu èra, sama sèmi dhèu unu Lamatua dhu kèpe paꞌèra Lii Holo-Nori Ama Lamatua dhu tareꞌa, aa rèngu bisa bara ho pakako dènge beꞌa.   
\p
\v 16 Lamatua pasabhoka le rahasia dhu kapai nèti lalèka èdhi. Kapua na sèmi neꞌe ka:  
\q1 Kristus èèna, ca Dhèu dhu Ama Lamatua hagꞌe nare le karèi nèti uru ka.  
\q1 Aa Kristus èèna mai le asa rai-haha ne, pake rupa dhèu rai-haha sèmi èdhi.  
\q2 Roh Lamatua ka dhu jꞌajꞌi sakasii, peka na, Yesus èèna, nuka Kristus.  
\q1 Aa ana pajuu Lamatua ètu sorga sèra rèdhi Na kahèi.  
\q1 Ama Lamatua dhu dedꞌe nèti le asa sorga,  
\q2 ka nedhe padedha-dedha Ne.  
\q1 Lii Lolo Na pale-lème le suku-suku ètu rai-haha ne.  
\q2 Ètu mia-mia ètu rai-haha ne, dhèu aaꞌi-aaꞌi parcaya le Nèngu.  
\p Kapua lalèka èdhi sèmi èèna ka!   
\c 4  
\s1 Baku pamudꞌe dènge dhèu dhu ajꞌa pakapodꞌe dhèu sarani  
\p
\v 1 Te ngaa neꞌe ne, Roh Ama Lamatua dhu peka paledꞌa le, na, bèli-camèdꞌa dhèu sarani cahagꞌe patalale eele ngaa dhu èdhi parcaya. Ho lasi madhutu roh-roh dhu sala aa dhu leko-monya, aa lasi madhutu lii holo-nori nidhu bhelu sèra.  
\v 2 Dhèu dhu mai nori sèmi sèra, padhai lii leo, tao leo. Dhèu sèra mema dhèu dhu kapodꞌe-kabèli! Dhèu sèra sa, dꞌara iiki ra dhu bèdhu le.  
\v 3 Ra ajꞌa dhèu, baku paleo èmu. Aa ra ajꞌa dhèu luri rupa-rupa ngangaꞌa. Te ngaa Ama Lamatua ka dhu tao ngangaꞌa-nganginu sèra, ho ladhe dhèu parcaya raꞌa, rèngu manèngi makasi mi Nèngu. Te rèngu reꞌa mia dhu lèke.  
\v 4 Ngaa aaꞌi-aaꞌi dhu Ama Lamatua tao sèra, tareꞌa-reꞌa beꞌa. De baku luri rupa-rupa. Dhèu hudꞌi sèmi rare aaꞌi-aaꞌi sèra dènge manèngi makasi mi Lamatua.  
\v 5 Te èdhi teꞌa, na, Lii Holo-Nori Ama Lamatua dènge lii manèngi-mangajꞌi èdhi sèra ka pamèu si.   
\s1 Dhèu sabꞌa dhu beꞌa nèti Lamatua Yesus  
\p
\v 6 Timotius! Pasanèdꞌe jꞌara seꞌe aaꞌi-aaꞌi mi aꞌari èdhi dhèu parcaya sèra. Ladhe èu tao madhutu sèmi èèna, èu jꞌajꞌi dhèu sabꞌa dhu beꞌa nèti Yesus Kristus. Lii Holo-Nori Ama Lamatua sèra ka dhu tao èu parcaya Ne, aa hia meꞌa mèu, mia ka lii holo-nori dhu lèke. Èu kèpe paꞌèra-èra le Lii Holo-Nori Lamatua sèra! Sèra nuka sèmi ngangaꞌa dhu paꞌèra ngiꞌu èu.  
\v 7 Baku core eele lodꞌo iia dꞌara dènge palolo omo koso dhu lèke boe dènge dadꞌèi Ama Lamatua. Baku pusi-pahae dènge lii lolo bhèni heka dhu nèti laluri rupa-rupa. Beꞌa risi paꞌèra taruu ngiꞌu dènge dꞌara èu pabeꞌa-beꞌa, sèna ka mamuri madhutu dadꞌèi Lamatua ètu madha jꞌara aaꞌi-aaꞌi.   
\q1
\v 8 Olaraga paꞌèra ngiꞌu na, beꞌa.  
\q2 Masi ka babeꞌa na ciki ooꞌe di.  
\q1 Te ngaa paꞌèra ngiꞌu dènge dꞌara ho mamuri madhutu dadꞌèi Lamatua ètu jꞌara aaꞌi-aaꞌi sèra,  
\q2 babeꞌa na ae seli eele.  
\q1 Babeꞌa na  
\q2 mesa boe mamuri ètu rai-haha deo neꞌe di,  
\q3 te ngaa mamuri lèpa limuri kahèi.   
\p
\v 9 Lii seꞌe se, lèke tareꞌa-reꞌa! De tèke paie mi dꞌara, ho baku bhèlu eele.  
\v 10 Èdhi tao era maena mi Ama Lamatua dhu mamuri. Nèngu na ka dhu hia mamuri mi dhèu aaꞌi-aaꞌi, risi-risi mi èdhi dhu parcaya Na. Nèti èèna ka, èdhi sabꞌa dènge dꞌara kateme.   
\p
\v 11 Nori lii seꞌe aaꞌi-aaꞌi. Aa pua dhèu sèra ho madhutu lii holo-nori sèra.  
\v 12 Baku soro tèka dhèu sèra pahae boe èu, lula èu ana ngèru era. Èu hudꞌi jꞌajꞌi conto hia dhèu parcaya sèra, nèti lii padhai èu, nèti kakako èu, nèti dꞌara sasue èu mi dedha dhèu, nèti parcaya èu mi Yesus Kristus, dènge mamuri èu dhu mola-mèci.  
\v 13 Ètu dꞌara miu tatae mamai jaꞌa, baku bhèlu baca Lii Holo-Nori Lamatua hia mi dhèu parcaya sèra. Paꞌèra dꞌara si, aa nori si paie-iie.   
\p
\v 14 Pake pabeꞌa-beꞌa karunya dhu Lamatua pangèdꞌu le mi èu, dhu èu sèmi lodꞌo kètu-kètu jumaꞌat sabajꞌa dènge tao kacui-aai mi dedha kètu èu. Lodꞌo èèna, rèngu peka lii moa Lamatua kahèi lula-nèti jꞌara mamuri dènge sabꞌa-laꞌa èu. De baku soro tèke karunya dhu èu abhu èèna.  
\v 15 Pakako dènge majꞌèni jꞌara sèra. Sèna ka dhèu aaꞌi-aaꞌi ra ladhe rèdhi mamuri dènge sabꞌa-laꞌa èu asa beꞌa.  
\v 16 Jꞌaga sèna ka èu mamuri dènge mola. Aa jꞌaga sèna ka èu loe boe ajꞌa dhu lèke jꞌara. Ladhe èu paꞌèra dènge jꞌara sèra, pe Lamatua bhoke jꞌara hia èu, dènge dhèu-dhèu dhu nanene lii padhai èu, sèna ka miu pakajꞌèu nèti bhabhelu-katubꞌa.   
\c 5  
\s1 Tatao Timotius mi dhèu sarani  
\p
\v 1 Baku tao lii sakaa dènge dhèu mone dhu heka risi nèti èu. Te ngaa dènge lii mako, nuka sèmi èu padhai lii dènge ama mu. Aa mi dhèu dhu ngèru risi, paꞌèra dꞌara si, tao nuka sèmi ari mu.  
\v 2 Sèmi èèna kahèi mi dhèu bhèni dhu heka risi sèra. Padhai lii dènge rèngu, nuka sèmi èu padhai lii dènge ina mu. Aa ladhe padhai lii dènge ana bhèni ngèru, tao si nuka sèmi ana hèni èu. Dꞌara èu hudꞌi mola dènge si.   
\s1 Bhèni balu  
\p
\v 3-5 Dhèu sarani hudꞌi soru-bara bhèni balu dhu dènge heka aꞌari sèna ka ladhe-leru si. Te ngaa bhèni balu dhu ana-èpu era, na, rèngu ka dhu hudꞌi ladhe-leru ne. Ajꞌa si, sèna ka reꞌa bꞌala sasue ina ra dhu rèngu abhu sèra. Dènge sèmi èèna ka, rèngu sabꞌa hia Ama Lamatua, ho pakarejꞌe dꞌara Na. Te ngaa bhèni balu dhu tareꞌa-reꞌa mamuri mesa di, nèngu dènge boe ca dhèu sa dhu ladhe-leru ne. Nèngu dhoka maena mi Ama Lamatua di. Mèu-mèda na manèngi sasue Ama Lamatua. Dhèu sarani hudꞌi ladhe-leru ku bhèni balu sèmi sèra sa.   
\p
\v 6 Te ngaa bhèni balu dhu dꞌèi dhoka mamuri na karejꞌe-karae di, masi ka na mamuri era, te ngaa dènge heka kabꞌua, sama sèmi dhèu dhu madhe le.   
\p
\v 7 Pasanèdꞌe jꞌara seꞌe aaꞌi-aaꞌi mi dhèu sarani sèra, sèna ka dhèu leo baku paꞌele iie kolongara rèngu.   
\p
\v 8 Aa ladhe abhu dhèu dhu roꞌo boe ladhe-leru aꞌari na, risi-risi hari isi èmu na, èèna sama sèmi nèngu pèci eele lalèka nèngu mi Lamatua. Nèngu bhelu risi nèti dhèu dhu tadhe boe Ama Lamatua.   
\p
\v 9 Ladhe neo dedꞌe bhèni balu ho soru-bara kètu jumaꞌat, jꞌara na sèmi neꞌe ka: umur nèngu bisa boe kura nèti 60 tèu; uru na nèngu satia dènge dhèu èmu na ca dhèu di;  
\v 10 dhèu reꞌa, na, nèngu ca dhèu dhu tema tao babeꞌa mi dhèu; dhu ladhe-leru ana-ana na dènge beꞌa; dhu bhoke tèke kacui-aai ho leru dhèu leo; dhu soru-bara dhèu parcaya sèra ètu dꞌara sasabꞌa, masi ka dhu samaa èèna ka; dhu dꞌèi soru dhèu ètu dꞌara sasusa; aa dhu bhori mema ho soru-bara ètu madha jꞌara dhu beꞌa.   
\p
\v 11 Baku pili bhèni balu dhu ngèru era, ho sabꞌa ètu dꞌara jumaꞌat. Te mage dhoka cèu ètu dꞌara na, ho neo hari leo-èmu. Ladhe sèmi èèna, rèngu se abhu heka lodꞌo dhu taleo, ho lalau dhèu sarani dènge beꞌa.  
\v 12 Te ladhe lodꞌo dhu rèngu pake hia jumaꞌat èèna kura, èci èèna ka dènge rèngu paꞌele iie lii pajaji rèngu ètu katanga madha Lamatua. Èèna na, dhèu pasala si.  
\v 13 Mage dhoka rèngu bai-eedꞌa, aa maso-kalua èmu dhèu, padhai-kakedꞌu paꞌele iie kolongara dhèu. Aa dhu karehe risi eele hari, rèngu soro iisi asa dꞌara lii langu dhèu leo, dènge padhai dhu lèke boe.  
\v 14 Beꞌa risi eele, bhèni balu dhu ngèru era leo hari èmu, sèna ka rara iisi, aa ladhe-leru dꞌara èmu rèngu. Dènge sèmi èèna, dhèu dhu pamusu dènge èdhi abhu boe jꞌara ho paꞌele iie kolongara èdhi.  
\v 15 Abhu bhèni balu ngèru cahagꞌe dhu kako sala jꞌara. Rèngu se madhutu jꞌara dhèu aae nidhu.   
\p
\v 16 Ladhe abhu bhèni dhu parcaya Lamatua, dhu aꞌari ra jꞌajꞌi le bhèni balu, na, bhèni ne hudꞌi ladhe-leru ku bhèni balu èèna. Baku soro tèke hia jumaꞌat ladhe-leru. Dènge jꞌara sèmi èèna jumaꞌat bisa ladhe-leru bhèni balu dhu leo, dhu tareꞌa-reꞌa dènge heka aꞌari.   
\s1 Tatao dhu pakabꞌua kètu jumaꞌat  
\p
\v 17 Dhèu dhu ladhe-leru jumaꞌat dènge beꞌa, miu hudꞌi pakabꞌua risi ne, aa bꞌae gaji dènge beꞌa. Risi-risi rèngu dhu sabꞌa dènge dꞌara kateme, ho lole pataraa Lii Holo-Nori Lamatua, aa ajꞌa jꞌara mamuri dhu lèke.  
\v 18 Te dhu suri ètu dꞌara Sasuri Mola-Mèci Lamatua, peka na, “Ladhe pake sapi jꞌèli puru are nèti huri, mage mi kape hèbꞌa na kahèi, sèna ka bisa naꞌa.” Aa dhu suri kahèi, peka na, “Cee ka dhu sabꞌa, na, nèngu hudꞌi abhu gaji ku.”\x + \xo 5:18 \xt Lole Hari Jꞌara-jꞌara Mamuri 25:4, Mateos 10:10, Lukas 10:7\x*   
\p
\v 19 Ladhe abhu dhèu dhu galaa kètu jumaꞌat, baku sadꞌi sèmi mere di! Hudꞌi abhu ku dua do tèlu sakasii dhu lii èci, heka mi sèmi mere ho parisa ne.\x + \xo 5:19 \xt Lole Hari Jꞌara-jꞌara Mamuri 17:6, 19:15\x*  
\v 20 Ladhe miu kai ne, te ngaa na mamuri taruu madhutu dꞌara sasala èèna, kai hari ne ètu madha jumaꞌat. Dènge jꞌara sèmi èèna, dhèu leo bani boe madhutu tatao èèna.   
\p
\v 21 Pakako aaꞌi atora seꞌe mi jumaꞌat dhu hagꞌe boe, aa baku bia cabèka. Jaꞌa pangèdꞌu sasabꞌa neꞌe mi dꞌara kacui-aai èu, ètu katanga madha Ama Lamatua dènge Yesus Kristus. Ana pajuu dhu Ama Lamatua hagꞌe nare ètu sorga, jꞌajꞌi sakasii kahèi!   
\p
\v 22 Baku pamèri dedꞌe dhèu jꞌajꞌi kètu jumaꞌat. Ladhe uuru ku paie-iie ne. Te ladhe miu dedꞌe sadꞌi ngara di, hèia dhèu ne tao sala, na, miu pasae sasala èèna kahèi, lula tatao na. Jꞌaga paie ngiꞌu èu sèna ka mamuri mola taruu.   
\p
\v 23 Jaꞌa tadèngi èu kabake pèdꞌa taruu. Beꞌa risi nèti deo neꞌe, èu pabꞌali èi dènge anggor ciki tao sèmi èi naꞌi. Baku minu dhoka èi iia di.   
\p
\v 24 Ladhe paie-iie! Abhu sasala dhèu dhu cèu mema. Rèngu dꞌai mèka madha hakim, te ngaa dhèu aaꞌi-aaꞌi dhu reꞌa le èèna. Te ngaa abhu dhèu leo kahèi dhu nèbhu-nèbhu ku, heka sasala ra cèu kèna.  
\v 25 Sèmi èèna kahèi dènge dhèu dhu tao beꞌa sèra. Abhu mema dhu ledꞌa. Te ngaa cahagꞌe pahuni-pahuni tao dhu beꞌa. Te ngaa masi ka sèmi èèna, ngaa dhu rèngu tao sèra, nèbhu-nèbhu cèu asa liꞌu kahèi. Bisa boe pahuni tatao dhu beꞌa.   
\c 6  
\s1 Ènu dènge lamatua na  
\p
\v 1 Abhu lamatua dhu ènu na parcaya Lamatua Yesus. Rèngu hudꞌi pakabꞌua lamatua ra, sèna ka dhèu leo abhu boe jꞌara ho padhai lii pamanahu kolongara Ama Lamatua, aa pamudꞌe dènge lii ajꞌa-nori èdhi.  
\v 2a Abhu ènu dhu lamatua na parcaya le Lamatua Yesus. Ènu ne bisa boe pahaha lamatua na, lula lamatua na dhu parcaya Lamatua Yesus. Masi ka tasamia èèna ka, rèngu hudꞌi lalau ku pabeꞌa risi hari lamatua ra, lula rèngu dènge rèngu sèra aaꞌi-aaꞌi ra, dhèu parcaya dhu hudꞌi mamuri pasue ku.   
\s1 Lii ajꞌa-nori dhu sala, dènge aꞌoto dhu beꞌa  
\p
\v 2b Timotius! Ajꞌa aaꞌi-aaꞌi se, aa paꞌèra dꞌara dhèu sarani sèra, sèna ka tao madhutu aaꞌi-aaꞌi ra.  
\v 3 Lii ajꞌa-nori èdhi dhu lèke èèna, jꞌajꞌi kapua nèti dꞌara mamuri èdhi dhu pakarejꞌe dꞌara Lamatua. Te ngaa dhèu dhu nori leo nèti lii ajꞌa seꞌe, dhèu sèra dhu core eele le lii Lamatua Yesus Kristus dhu lèke.  
\v 4 Dhèu sèmi èèna, padedha iisi, te ngaa goa. Papèdꞌa rèngu ka dꞌèi dhoka tenge lii langu, aa pabꞌala dꞌara lii. Jꞌara seꞌe se ka dhu tao dhèu ho: tèka dꞌara, patao-palaha, paꞌele iie kolongara dhèu leo, aa pangee dhu lèke boe mi dhèu leo.  
\v 5 Dhèu sèmi seꞌe, loe boe patao-palaha. Ngangee ra karehe bia. Reꞌa heka mia ka dhu beꞌa.  
\p Rèngu ngee, ladhe rèngu majꞌèni dènge jꞌara-jꞌara agama, rèngu bisa jꞌajꞌi dhèu kaja-suꞌi.   
\p
\v 6 Mema, agama bisa hia aꞌoto mi dhèu. Te mamuri dènge Lamatua èèna ka dhu hia dhèu karejꞌe nèti ngaa dhu rèngu unu. Èèna, heka agama dhu lèke kèna.  
\v 7 Sanèdꞌe paie-iie! Lodꞌo rara iisi èdhi, èdhi tèti boe ngaa-ngaa èci sa asa rai-haha ne. Aa ladhe lodꞌo madhe, tèti boe ngaa-ngaa èci sa kahèi nèti rai-haha ne.  
\v 8 De sadꞌi dènge ngangaꞌa, mèdha-papake sèra sa nia le!   
\p
\v 9 Te ngaa dhèu dhu neo kaja, mudꞌa titu kèna lèke dadugu-rariu rupa-rupa, aa lèke sasii gꞌana-kariu, lula rèngu pangee dhoka mèdha-panyau di. Jꞌara seꞌe se ka dhu paꞌele iie mamuri rèngu.  
\v 10 Te sue doi-dhari, èèna jꞌajꞌi mi amo nèti rupa-rupa bhabhelu. Abhu dhèu cahagꞌe magèle dhoka doi-dhari di, toke ra pakajꞌèu nèti parcaya ra dhu lèke. Hèia rèngu mesa ra paꞌele iie mamuri ra.   
\s1 Kèpe paꞌèra-èra parcaya èu  
\p
\v 11 Timotius! Èu ne, dhèu unu Ama Lamatua. De pakajꞌèu iisi nèti bhabhelu-katubꞌa aaꞌi-aaꞌi. Mamuri mola-mèci. Mamuri madhutu dadꞌèi Lamatua ètu madha jꞌara aaꞌi-aaꞌi ra. Parcaya taruu mi Yesus Kristus. Sue dhèu aaꞌi-aaꞌi ra. Paꞌèra ètu dꞌara jꞌajꞌèra. Mamuri dꞌara beꞌa dènge dhèu aaꞌi-aaꞌi ra.  
\v 12 Sabꞌa paꞌèra-èra dènge dꞌara kateme, sèna ka pakako lii holo-nori aaꞌi-aaꞌi dhu èdhi parcaya. Lamatua paroa le èu, ho abhu mamuri taa-taa. De liku paꞌèra-èra mamuri èèna, baku patalale eele. Aa èu dhu peka le ètu madha dhèu ae, lula-nèti parcaya èu mi Lamatua Yesus.  
\v 13-14 De nèti deo neꞌe, jaꞌa manèngi èu paꞌèki lii pajaji sèmi neꞌe: tao madhutu lii paredha aaꞌi-aaꞌi nèti Lamatua Yesus. Baku sisu èci sa hèi, sèna ka dhèu baku rèdhi sasala èu. Tao madhutu aaꞌi-aaꞌi ra dènge mola-mola toke lodꞌo mamai hari Kètu èdhi, Yesus Kristus. Jaꞌa manèngi èu jaji sèmi èèna ètu madha Ama Lamatua. Nèngu ka dhu hia le samanga mi dhu mamuri aaꞌi-aaꞌi ra. Jaꞌa manèngi kahèi èu jaji sèmi èèna ètu madha Yesus Kristus. Nèngu dhu peka paledꞌa le, lula-nèti ngiꞌu Nèngu, ètu madha gubernur Pontius Pilatus.\x + \xo 6:13-14 \xt Yohanis 18:37\x*   
\q1
\v 15 Lamatua Yesus dhu kapai risi, Nèngu ka dhu nèdꞌu koasa!  
\q2 Nèngu èèna, Dhèu Aae Kapai nèti dhèu aae aaꞌi-aaꞌi ra.  
\q2 Aa Nèngu èèna, Lamatua Kapai nèti lamatua aaꞌi-aaꞌi ra.  
\q1 Ropa dꞌai lodꞌo na,  
\q2 Lamatua paledꞌa aaꞌi-aaꞌi si.   
\q1
\v 16 Dhoka Nèngu mesa Na di, dhu madhe boe.  
\q2 Nèngu mamuri ètu dꞌara saraa dhu dhèu rai-haha taha boe laladhe.  
\q3 Abhu boe dhèu èci sa ladhe rèdhi Ne.  
\q1 Lii-lii pakabꞌua dhodhoka mi Nèngu di!  
\q2 Koasa aaꞌi-aaꞌi, ètu kacui-aai Na, toke dꞌai mia-mia!  
\q3 Dꞌai sange neꞌe ka! Tareꞌa!   
\s1 Lii pasanèdꞌe hia dhèu kaja  
\p
\v 17 Peka mi dhèu kaja ètu rai-haha ne, ho rèngu baku padedha iisi, aa baku dhoka maena mèdha-panyau rèngu di. Te mèdha-panyau sèra, bèli-camèdꞌa èla aaꞌi. De dhu lèke ka, maena dhoka mi Ama Lamatua dhu mamuri di. Te Nèngu ka dhu pala-bagi èdhi ngaa-ngaa dhu èdhi parluu, sèna ka èdhi mamuri dènge karejꞌe.  
\v 18 Peka dènge ra, ho pake kakaja sèra sèna ka tao dhu beꞌa. Rèngu hudꞌi majꞌèni tao dhu beꞌa. Rèngu hudꞌi bhoke kacui-aai ho soru-bara dhèu leo, aa dꞌèi pala-bagi mèngi-nale dhu rèngu abhu nèti Lamatua.  
\v 19 Hèia ra pakaboko mèdha-panyau ho jꞌajꞌi mi kapua dhu èra, hia mamuri ra bèli-camèdꞌa. Ka rèngu unu mamuri dhu dènge kabꞌua.   
\s1 Paulus paꞌèle sasuri na  
\p
\v 20 Timotius! Jꞌaga paie aaꞌi-aaꞌi dhu Ama Lamatua pangèdꞌu le mi èu. Baku lamu padhai lii dhu dènge boe kolo-kapua. Baku padhai lii kajꞌalu dhu pakabꞌua boe Ama Lamatua. Sanèdꞌe, ee! Te abhu dhèu dhu pangee, na, rèngu dhèu dꞌèlu-mèu. Te ngaa ‘mamèu’ rèngu sèra dhu hèbꞌa hua. Baku lamu pabꞌala lii padhai dènge ra.  
\v 21 Abhu dhèu cahagꞌe lèka lii ajꞌa-nori dhu kapodꞌe-kabèli sèra, toke ra sero eele nèti parcaya ra dhu lèke mi Ama Lamatua.  
\p Jaꞌa manèngi sèna ka Ama Lamatua padꞌelo dꞌara hua iia Na mi dedha èu dènge angalai mu si aaꞌi-aaꞌi ra.  
\q2 Saloom,  
\q2 Paulus