\id 1TH  
\h 1 Tesalonika 
\toc1 1 Tesalonika Sasuri Paulus ka èci hia dhèu sarani ètu kota Tesalonika 
\toc2 1 Tesalonika 
\toc3 1Tes 
\mt1 1 Tesalonika  
\mt2 Sasuri Paulus ka èci  
\mt2 hia dhèu sarani ètu kota Tesalonika  
\c 1  
\s1 Lii mahoꞌo nèti Paulus si  
\p
\v 1 Lii mahoꞌo nèti jaꞌa Paulus, dènge angalai jaꞌa Silas dènge Timotius.  
\p Sasuri ne, jiꞌi paꞌadhu hia miu dhèu sarani aaꞌi-aaꞌi mi ètu kota Tesalonika. Miu ka dhu pamaꞌète mere le, ho madhutu Ama Lamatua èdhi, dènge Kètu èdhi, Yesus Kristus.  
\p Jiꞌi manèngi, sèna ka Ama Lamatua padꞌelo dꞌara hua iia Na hia miu, ho miu mamuri dènge mera-milu.\x + \xo 1:1 \xt Lii Lolo nèti Dhèu Pajuu-paleha 17:1\x*   
\s1 Paulus manèngi makasi lula dhèu Tesalonika parcaya taruu  
\p
\v 2 Jiꞌi loe boe manèngi makasi mi Ama Lamatua, lula parcaya miu. Mèu-mèda jiꞌi sabajꞌa hia miu aaꞌi-aaꞌi mi.  
\v 3 Jiꞌi sanèdꞌe sasabꞌa dhu miu sabꞌa, lula miu parcaya Ama Lamatua, aa sue Ne. Miu loe boe nèti jꞌara èèna, lula era sarai miu ka Lamatua Yesus. Jiꞌi loe boe kahèi ngèti jꞌara seꞌe aaꞌi-aaꞌi asa katanga madha Ama Lamatua.   
\p
\v 4 Aꞌari aaꞌi-aaꞌi! Jiꞌi ngeꞌa Ama Lamatua sue miu. Nèti èèna ka, Na hagꞌe nare miu jꞌajꞌi dhèu Nèngu.  
\v 5 Uru èèna, lodꞌo jiꞌi dhiu asa Tesalonika, jiꞌi peka-padhai dènge miu Lii Lolo Beꞌa Ama Lamatua. Lodꞌo èèna, miu pasa dhilu paie-iie ho nanene lii padhai lii jiꞌi. Miu mesa boe dhoka nanene lii jiꞌi di, te ngaa miu mèdhi unu mi kahèi koasa Ama Lamatua nèti Roh Na dhu Mola-Mèci èèna. Jꞌara èèna ka dhu tao miu tareꞌa-reꞌa sèmi mere Lii Lolo Beꞌa èèna. Lodꞌo èèna, miu mèdhi unu mi jꞌara mamuri jiꞌi dhu tasa mera mia, sèna ka meꞌa tareꞌa-reꞌa, jꞌara-jꞌara Lamatua.  
\v 6 Lula miu pamaꞌète mere le ho madhutu dadꞌèi Lamatua, nèti èèna ka miu mamuri madhutu tatao jiꞌi, aa madhutu jꞌara mamuri Lamatua Yesus kahèi. Te ngaa lodꞌo miu heka sèmi mere Lii Lolo Beꞌa èèna, abhu dhèu dhu pasusa miu. Masi ka sèmi èèna, te ngaa dꞌara miu kalau boe-karèto boe, lula Roh Lamatua dhu Mola-Mèci pakarejꞌe dꞌara miu.\x + \xo 1:6 \xt Lii Lolo nèti Dhèu Pajuu-paleha 17:5-9\x*   
\p
\v 7 Dènge sèmi èèna, miu padꞌelo jꞌara hia dhèu parcaya aaꞌi-aaꞌi ètu propensi Makedonia dènge propensi Akaya.  
\v 8 Mesa boe ètu sèi di. Te Lii Lolo Beꞌa Lamatua dhu pale-lème le Tesalonika nèti miu seꞌe ka toke mia-mia. De jiꞌi peka ngaa hari, lula dhèu aaꞌi-aaꞌi tadèngi le lalèka miu mi Lamatua.  
\v 9 Ètu mia-mia dhèu palolo, peka na, miu uru na sèmi mere jiꞌi dènge dꞌara kateme. Ka miu core eele mèdha-mèdha sogo-tagu mi, hèia mai madhutu Lamatua dhu tareꞌa-reꞌa. Te miu meꞌa le, na, Lamatua èèna nuka Ama Lamatua dhu mamuri. Nèti èèna ka, èdhi aaꞌi-aaꞌi ti madhutu Ne.  
\v 10 Rèngu palolo kahèi, na, miu tatae mamai Ana Ama Lamatua nèti sorga, nuka Yesus. Uru èèna dhèu pamadhe Ne, te ngaa Ama Lamatua ka dhu pamamuri hari Ne. Lodꞌo Ama Lamatua huku dhèu rai-haha ne, na, Lamatua Yesus ka dhu pakajꞌèu èdhi nèti nanasa Ama Lamatua.   
\c 2  
\s1 Paulus sanèdꞌe sasabꞌa na ètu Tesalonika  
\p
\v 1 Aꞌari aaꞌi-aaꞌi! Miu aaꞌi-aaꞌi mi meꞌa le lodꞌo jiꞌi dhiu sabꞌa ètu Tesalonika, èi kabhèsu jiꞌi suti boe iia dꞌara.  
\v 2 Miu sanèdꞌe kahèi lodꞌo jiꞌi dhiu mèka asa Tesalonika, dhèu nèti kota Pilipi dhu tao le pasusa dènge pajꞌèra jiꞌi. Te ngaa lula Lamatua paꞌèra dꞌara jiꞌi, ka jiꞌi bani lole Lii Lolo Beꞌa Lamatua dènge miu, masi ka dhèu ae dhu pamusu dènge jiꞌi.\x + \xo 2:2 \xt Lii Lolo nèti Dhèu Pajuu-paleha 16:19-24, 17:1-9\x*  
\v 3 Lodꞌo èèna, jiꞌi ngèti Lii Lolo Beꞌa hia miu asa Tesalonika, ngèti boe lii ajꞌa-nori dhu koe-kapengo. Te jiꞌi dhiu tao boe pagoa dènge pakapodꞌe-kabèli miu.   
\p
\v 4 Aadꞌo! Uru èèna jiꞌi dhiu dènge dꞌara mola. Ama Lamatua mesa Na dhu pajꞌujꞌu jiꞌi, ho ngèti Lii Lolo Beꞌa Na asa miu. Jiꞌi se neo boe pakarejꞌe dꞌara dhèu rai-haha, te ngaa pakarejꞌe dꞌara Lamatua, te Nèngu ka dhu patigi nèdhi dꞌara jiꞌi, sèna ka neꞌa, mola do koe.   
\p
\v 5 Miu meꞌa kahèi, na, jiꞌi se hèbꞌa mènyi boe, ngaa hari tenge leto ca doi sa nèti miu. Ama Lamatua dhu neꞌa dꞌara jiꞌi.  
\v 6 Sasabꞌa jiꞌi ne tenge boe lii koa-kadꞌiri nèti dhèu rai-haha, do nèti miu, aa nèti dhèu leo kara kahèi.  
\v 7 Jiꞌi se dhèu pajuu-paleha Kristus. Jiꞌi dènge hak kahèi, tao ngiꞌu sama sèmi dhèu aae-dhèu kapai, te ngaa jiꞌi ngoꞌo boe padedha iisi sèmi èèna. Lodꞌo sèra, jiꞌi tao ngiꞌu jiꞌi èci èèna ka dènge ana iiki ètu talora aae miu. Jiꞌi padꞌelo sasue mi dedha miu kahèi, nuka sèmi ina dhu pasusu ana na.  
\v 8 Jiꞌi dhiu ho mesa boe dhoka ngèti Lii Lolo Beꞌa hia miu di, te ngaa jiꞌi soro iisi kateme aae kahèi, lula jiꞌi sue miu seli eele.   
\p
\v 9 Aꞌari aaꞌi-aaꞌi! Ele boe miu sanèdꞌe era, jiꞌi sabꞌa dhu ngeꞌa boe jꞌèra mèu-mèda, ho abhu unu mi ngangaꞌa-nganginu. Te jiꞌi dꞌèi boe pajꞌèra miu lodꞌo ngèti Lii Lolo Beꞌa asa miu.  
\v 10 Miu mèdhi unu mi, sèmi èèna kahèi Ama Lamatua, ropa dhu jiꞌi bera-bera dènge miu aaꞌi-aaꞌi mi dhu parcaya le, jiꞌi mamuri dènge dꞌara mola, dhu tao boe sala ngaa-ngaa.  
\v 11 Miu meꞌa kahèi, jiꞌi lalau-laloꞌo miu, èci èèna ka dènge ama matana ladhe-leru ana-ana na,  
\v 12 nuka sèmi: paꞌèra dꞌara miu aaꞌi-aaꞌi mi, pasanèdꞌe dènge pamako miu sèna ka mamuri dhu mèci, ho pakarejꞌe dꞌara Lamatua. Te Nèngu ka jꞌajꞌi Dhèu Aae, dhu paroa le miu sèna ka jꞌajꞌi ana kabarai Na, aa abhu pakabꞌua bera-bera dènge Nèngu.   
\s1 Lamatua sabꞌa ètu dꞌara miu  
\p
\v 13 Jiꞌi maꞌète boe manèngi makasi mi Ama Lamatua, lula lodꞌo miu tadèngi lii lolo nèti jiꞌi, miu sèmi mere boe lii holo-nori nèti dhèu rai-haha, te ngaa Lii Holo-Nori èèna kapua na nèti Ama Lamatua. Nèngu unu Na ka dhu sabꞌa ètu dꞌara miu dhèu parcaya.   
\p
\v 14 Aꞌari aaꞌi-aaꞌi! Miu heka madhutu jꞌara Lamatua kèna, te ngaa dhèu-dhèu miu pasusa le miu. De miu se abhu jꞌajꞌèra èci èèna ka dènge dhèu parcaya ètu propensi Yudea, dhu dhèu Yahudi rèngu mesa ra pajꞌèra rèngu lula ra lèka Yesus Kristus.\x + \xo 2:14 \xt Lii Lolo nèti Dhèu Pajuu-paleha 17:5\x*   
\p
\v 15 Abhu dhèu Yahudi dhu pusi-pahae boe dadꞌèi Ama Lamatua. Nèti èèna ka, ropa Ama Lamatua pua dhèu rèti lii padhai Na mai asa rèngu, ka rèngu pajꞌèra dènge hake pamadhe si. Ra pamadhe Lamatua Yesus dènge jꞌara sèmi èèna kahèi. Limuri ne, ra tenge jꞌara ho babèga eele jiꞌi kahèi. Rèngu pamusu dènge dhèu aaꞌi-aaꞌi ra, ka Ama Lamatua dꞌèi boe rèngu.\x + \xo 2:15 \xt Lii Lolo nèti Dhèu Pajuu-paleha 9:23,29, 13:45,50, 14:2,5,19, 17:5,13, 18:12\x*  
\v 16 Ngaa hari, ra tenge jꞌara ae-ae sèna ka jiꞌi pakako ia ka Lii Lolo Beꞌa hia dhèu leo. Dhèu Yahudi se roꞌo boe ho Lamatua pala-bagi mamuri hia dhèu leo kara kahèi. Dènge jꞌara èèna ka, sasala rèngu sèmi tao udhu sa. Hèia Ama Lamatua nasa, ka huku si.   
\s1 Paulus neo paraga hari dènge dhèu sarani ètu Tesalonika  
\p
\v 17 Aꞌari aaꞌi-aaꞌi! Masi ka èdhi pakajꞌèu, te ngaa pakajꞌèu boe ètu dꞌara. Jiꞌi tenge-tenge jꞌara, ho ladhe abhu lodꞌo dhu taleo, jiꞌi dhiu hari paꞌasu-pareo dènge miu, te dꞌara jiꞌi neo ae le.  
\v 18 Jaꞌa mesa ku neo ae le kahèi dhiu pangadꞌo dènge miu, te ngaa dhèu aae nidhu loe boe bhabhae jaꞌa.  
\v 19 Miu meꞌa, nga tao ka jiꞌi neo dhiu paraga dènge miu, sina ma? Lula jiꞌi maena miu. Miu ka dhu pakarejꞌe dènge paꞌadhu dꞌara jiꞌi. Ladhe miu aadꞌo, cee hari ka dhu kèpe paꞌèra kolongara Lamatua Yesus! Ladhe Lamatua lèpa hari mai, dꞌara jiꞌi taleo, lula miu seꞌe ka.  
\v 20 Mema tareꞌa! Miu seꞌe se ka dhu pakabꞌua sasabꞌa jiꞌi aa pataleo dꞌara jiꞌi.   
\c 3  
\s1 Paulus pamaꞌète sèna ka Timotius laꞌe asa Tesalonika  
\p
\v 1-2 Sèna ka miu meꞌa, ca hari ni jiꞌi kako tèke eele miu èèna, madhutu boe dadꞌèi jiꞌi. Jiꞌi neo ae le dhiu paraga dènge miu, te ngaa bisa mèka. Lula jiꞌi ngoꞌo heka mate panèbhu, hèia jiꞌi pamaꞌète le ho pua Timotius dhiu. Te ngaa jaꞌa dènge Silas pea ètu kota Atena. Timotius ne aꞌari jiꞌi. Nèngu ne angalai jiꞌi ètu dꞌara sasabꞌa-laꞌa, dhu bera-bera pakako Lii Lolo Beꞌa Lamatua Yesus. Jiꞌi pua na dhiu, ho na ajꞌa miu aa paꞌèra dꞌara miu, sèna ka miu asa parcaya èra Ama Lamatua.\x + \xo 3:1-2 \xt Lii Lolo nèti Dhèu Pajuu-paleha 17:15\x*  
\v 3 Dènge jꞌara neꞌe, ladhe miu paraga dènge sasusa, dꞌara miu roe boe. Kèpe paꞌèra-èra lalèka miu. Te miu meꞌa le, dhèu cee dhu parcaya Kristus, tatu na paraga dènge jꞌajꞌèra.  
\v 4 Ca hari ni, lodꞌo jiꞌi dènge miu era, jiꞌi pasanèdꞌe le miu, peka na, dhèu cee dhu parcaya Lamatua Yesus, bèli-camèdꞌa paraga dènge rupa-rupa sasusa. Limuri ne jꞌajꞌi le, si!   
\p
\v 5 Lula jaꞌa susa titu kèna nèti jꞌajꞌèra miu seꞌe ka, nèti èèna ka jaꞌa pua Timotius dhiu asa Tesalonika, ho jiꞌi ngeꞌa mèu kèna, miu parcaya era Lamatua, do aadꞌo. Te jaꞌa mage-mage, dhèu aae nidhu dadugu miu, ho miu soro kabodho mi Lamatua. Ladhe jꞌajꞌi ka sèmi èèna, sasabꞌa jiꞌi uru sèra, ele iie dꞌara!   
\s1 Timotius lèpa nèti Tesalonika  
\p
\v 6 Lai-lai ne, Timotius lèpa hari mai nèti Tesalonika. Ka nèti lii dhu pakarejꞌe dꞌara jiꞌi. Na lolo, na, miu parcaya Kristus era, aa miu èci pasue dènge èci. Na peka kahèi, na, miu ngee jiꞌi sèmi mia dhu jiꞌi sanèdꞌe miu kahèi.\x + \xo 3:6 \xt Lii Lolo nèti Dhèu Pajuu-paleha 18:5\x*   
\p
\v 7-8 Aꞌari aaꞌi-aaꞌi! Masi ka ètu neꞌe jiꞌi ako rasa bia, lula abhu susa ae nèti mia-mia, te ngaa ropa tadèngi lii lolo Timotius, ka dꞌara jiꞌi tareꞌa-reꞌa abhu karejꞌe. Lula limuri ne jiꞌi ngeꞌa le miu parcaya Lamatua era.   
\s1 Paulus sabajꞌa hia dhèu sarani ètu Tesalonika  
\p
\v 9 De jiꞌi manèngi makasi ae-ae mi Lamatua dènge dꞌara dhu karejꞌe titu kèna, lula miu madhutu Ne taruu.  
\v 10 Mèu-mèda jiꞌi loe boe sabajꞌa sèna ka catèka sa èdhi paraga hari. Jiꞌi neo ajꞌa miu sèna ka pamèci dꞌara miu ètu jꞌara mamuri Lamatua.   
\p
\v 11 Jiꞌi sanao sèna ka Ama Lamatua èdhi, aa Kètu èdhi, Yesus Kristus, bhoke jꞌara sèna ka jiꞌi dhiu paraga hari dènge miu.  
\v 12 Jiꞌi manèngi sèna ka Lamatua hia miu asa pasue risi eele hari. Nuka sèmi èèna kahèi miu dènge dhèu aaꞌi-aaꞌi ra asa pasue, sèmi dhu jiꞌi sue miu.  
\v 13 Dènge sèmi èèna Lamatua paꞌèra dꞌara miu, ho mamuri mola dènge mera-milu, toke bèli-camèdꞌa Lamatua Yesus lèpa hari mai dènge dhèu unu Na, miu bisa titu kahèi ètu katanga madha Ama Lamatua èdhi, dènge dui heka sasala-sasigo.   
\c 4  
\s1 Jꞌara mamuri dhu pamahoꞌo dꞌara Ama Lamatua  
\p
\v 1 De aꞌari, sèmi neꞌe ka! Jiꞌi pamako miu sèna ka miu mamuri pamahoꞌo dꞌara Ama Lamatua, sèmi dhu jiꞌi ajꞌa le miu. Mema mamuri miu madhutu le jꞌara sèra aaꞌi-aaꞌi, te ngaa lula èdhi jꞌajꞌi le dhèu unu Lamatua Yesus, ka jiꞌi manèngi miu ho tenge jꞌara dhu beꞌa risi hari.  
\v 2 Miu aaꞌi-aaꞌi mi meꞌa le ngaa dhu jiꞌi ajꞌa miu, pake koasa nèti Lamatua Yesus.  
\v 3 Dadꞌèi Ama Lamatua nuka: mamuri mola-mèci! Baku mamuri kajꞌalu ètu dꞌara paꞌèci bhèni-mone.  
\v 4 Miu hudꞌi meꞌa lalau ngiꞌu miu unu mi, sèna ka mamuri mola-mèci ho dhèu pakabꞌua miu.\f + \fr 4:4 \ft Lii Yunani peka na, “Miu èci-èci ka hudꞌi meꞌa lalau ‘era kanata’ miu unu mi.” ‘Era kanata’ ètu nèi, sasoa na bisa ‘ngiꞌu aae’ do ‘ngiꞌu (diri)’. Abhu kahèi dhu peka na, ètu ayat neꞌe, ‘era kanata’ sasoa na, ‘dhèu èmu’. Ladhe sèmi èèna, sasoa ayat ne, peka na, “Mamuri mola dènge dhèu èmu èu”.\f*  
\v 5 Baku mamuri madhutu dadꞌèi dꞌara mi, sèmi dhèu dhu dhae tadhe mèka Ama Lamatua.  
\v 6 Mage abhu dhèu dhu neo tao karehe, aa neo tenge oto dhu risi nèti dhèu dhu sama-sama parcaya Ama Lamatua. Te Ama Lamatua ka, Kètu dhu èèna na bꞌala bhabhelu-katubꞌa aaꞌi-aaꞌi sèra. Jꞌara seꞌe, jiꞌi peka le dènge miu pèri-pèri hari, aa pasanèdꞌe le miu karèi nèti uru ka.  
\v 7 Te Ama Lamatua paroa nare le èdhi sèna ka jꞌajꞌi mi dhèu unu Na. Madhutu dadꞌèi Na, èdhi hudꞌi mamuri dènge mola-mèci, baku dènge kajꞌalu, sèmi dhèu dhu tao jꞌara makae. Baku sèmi èèna!  
\v 8 Nèti èèna ka, dhèu cee ka dhu madhutu boe lii holo-nori ne, nèngu èèna sèmi boe jiꞌi, aa tule eele Ama Lamatua kahèi dhu hia le miu Roh Na dhu Mola-Mèci.   
\p
\v 9 Madhutu ngangee jaꞌa, suri hari ia ka hia miu jꞌara-jꞌara pasue aꞌari dènge aꞌari, lula Ama Lamatua mesa Na ka dhu peka le, na, miu hudꞌi pasue ku èci dènge èci.  
\v 10 Jiꞌi tadèngi le, miu sue aꞌari aaꞌi-aaꞌi ètu propensi Makedonia nèi. Te ngaa aꞌari aaꞌi-aaꞌi! Jiꞌi manèngi sèna ka miu sue dhèu leo risi eele hari.  
\v 11 Tenge jꞌara sèna ka miu mamuri dènge mera-milu. Baku soro iisi sa dꞌara lii langu dhèu leo, te ngaa èci-èci ka laladhe mamuri na. Miu hudꞌi sabꞌa tenge ngangaꞌa-nganginu dènge kacui-aai miu mesa mi. Baku maena dhèu leo. Seꞌe se jiꞌi pasanèdꞌe le miu, karèi nèti uru ka.  
\v 12 Ladhe miu mamuri sèmi èèna, miu pabia boe dhèu leo. Ladhe dhèu dhu lèka boe Kristus rèdhi miu mamuri sèmi èèna, tatu ra peka na, “Waa! Dhèu dhu madhutu Lamatua Yesus sèra, mamuri ra mola tareꞌa, nga!”   
\s1 Mamai hari Lamatua Yesus  
\p
\v 13 Aꞌari! Limuri ne, jaꞌa neo peka ngaa èci, sèna ka miu meꞌa mèu, jꞌara-jꞌara lula-nèti dhèu madhe. Èdhi teꞌa, na, dhèu dhu madhe le, bèli-camèdꞌa, na mamuri hari. De ladhe nèti dhèu unu Lamatua èci madhe, miu baku tao ngiꞌu mi jꞌèra nuka sèmi dhèu leo dhu reꞌa boe jꞌara èèna.  
\v 14 Te èdhi teꞌa, na, Yesus dhu madhe le, ka Ama Lamatua pamamuri hari Ne. De ladhe sèmi èèna, tatu Ama Lamatua pamamuri hari kahèi dhèu parcaya dhu madhe sèra, aa oru nare si aaꞌi-aaꞌi ra bera-bera dènge Lamatua Yesus.   
\p
\v 15-17 De ladhe Lamatua Yesus mai hari, Na puru nèti sorga asa rai-haha ne, èèna na dènge paredha dhu lii mèdhu aae. Ka kètu kapai nèti ana-ana pajuu ètu sorga hia paredha ho tiu tèbhe. Hèia dhèu unu Lamatua dhu madhe sèra, mamuri hari. Ka rèngu dènge èdhi dhu mamuri era, lèke dedꞌe asa raꞌi-liru, ho aaꞌi-aaꞌi ti soru mamai Lamatua Yesus. Èle èèna na, èdhi aaꞌi-aaꞌi ti mamuri paꞌèci dènge Ne taa-taa.\x + \xo 4:15-17 \xt 1 Korintus 15:51-52\x*  
\p Mi nanene pabeꞌa-beꞌa, lula ngaa dhu jiꞌi peka ne, Lamatua unu Na ka dhu peka-padhai.  
\v 18 De ladhe sèmi èèna, miu hudꞌi paꞌèki lii ajꞌa-nori ne, sèna ka paꞌèra dꞌara miu èci dènge èci.   
\c 5  
\s2 Paꞌèra ho sèmi mamai Lamatua  
\p
\v 1 De aꞌari aaꞌi-aaꞌi! Jiꞌi suri ia ka laa, peka na, mamai Lamatua lèke hake pèri, do tanggal pèri.  
\v 2 Lula miu aaꞌi-aaꞌi mi meꞌa, na, mamai Na dènge sahèka, sèmi dhèu manaꞌu dhu mai re mèda.\x + \xo 5:2 \xt Mateos 24:43, Lukas 12:39, 2 Petrus 3:10\x*  
\v 3 Lodꞌo èèna, dhèu ae dhu madhèdi mau-mau, te ngaa cagꞌagꞌa laa paraga dènge jꞌajꞌèra. Mamai Na sama kahèi dènge dhèu bhèni dhu cagꞌagꞌa laa kabake pèdꞌa neo nara iisi. Ladhe paraga le jꞌara neꞌe, èdhi pakajꞌèu iisi tasamia hari! Èci èèna ka dènge mamai Lamatua.   
\p
\v 4-6 Aꞌari aaꞌi-aaꞌi! Mage dhoka mamai Na nuka sèmi dhèu manaꞌu dhu mai re talora mèda, lèke dènge miu dhu bhèjꞌi luu. Mage lèke miu sèmi èèna kahèi! Èdhi mamuri heka ètu dꞌara maroga, sèmi dhèu leo dhu bhèjꞌi luu era. De èdhi dhu lèka le Lamatua Yesus, mamuri le ètu dꞌara saraa, ti paꞌèra soru mamai Ne, aa jꞌaga paie mamuri èdhi. Jꞌara seꞌe aaꞌi-aaꞌi miu meꞌa le!  
\v 7 Te dhèu dhu bhèjꞌi, na, bhèjꞌi re mèda. Aa dhèu dhu mahu, na, mahu re mèda.  
\v 8 Te ngaa miu baku sèmi èèna, lula èdhi dhu mamuri le ètu dꞌara saraa. Miu hudꞌi jꞌaga paie mamuri miu. Ladhe miu parcaya taruu Lamatua aa mamuri pasue, èèna sama sèmi sordadꞌu dhu pake kodho bèsi dhu paꞌabhe kakara. Aa ladhe miu maena taruu mi Lamatua Yesus dhu hia miu pakajꞌèu nèti nanasa Ama Lamatua, èci èèna ka dènge sordadꞌu dhu paꞌabhe kètu na dènge solo bèsi.\x + \xo 5:8 \xt Yesaya 59:17, Epesus 6:13-17\x*   
\p
\v 9 Ama Lamatua hagꞌe boe èdhi ho Na huku ti. Te ngaa Na hagꞌe èdhi sèna ka abhu mamuri, sadꞌi èdhi lèka Kètu èdhi, Yesus Kristus.  
\v 10 Te Na madhe le gati èdhi. De ladhe Na lèpa hari mai, èdhi mamuri taa-taa dènge Ne, masi ka èdhi madhe le, do mamuri era.  
\v 11 Nèti èèna ka, pake lii-lii jaꞌa seꞌe, sèna ka hia karejꞌe dènge paꞌèra èci dènge èci, sèmi dhu miu tao le karèi nèti uru èèna ka.   
\s1 Paulus ajꞌa-nori dhèu sarani ètu Tesalonika  
\p
\v 12 Aꞌari aaꞌi-aaꞌi! Sanèdꞌe ho pakabꞌua ina-ama dhu jꞌajꞌi kètu ètu jumaꞌat. Te rèngu sèra sabꞌa dhu reꞌa boe jꞌèra hia miu, aa pasanèdꞌe miu, sèna ka miu baku manahu asa dꞌara sasala.  
\v 13 Padꞌelo sasue miu dènge ra, sèna ka reꞌa, na, miu pakabꞌua si, lula rèngu sabꞌa bia hia miu. Mamuri dame èci dènge èci.   
\p
\v 14 Aꞌari aaꞌi-aaꞌi! Abhu pèri-pèri jꞌara era dhu jiꞌi neo pasanèdꞌe miu: dhèu dhu bai-eedꞌa sèra, peka si sèna ka ra sabꞌa dènge dꞌara majꞌèni. Dhu dꞌara roe, paꞌèra si. Dhu haha, sarimu mere si. Taha dꞌara aa lii mako mi dhèu aaꞌi-aaꞌi ra.   
\p
\v 15 Sanèdꞌe, bhabhelu baku bꞌala dènge bhabhelu. Te ngaa tenge jꞌara sèna ka tao beꞌa dènge dhèu aaꞌi-aaꞌi ra. Baku tao beꞌa dhoka dènge dhèu èdhi di, te ngaa dènge dhèu leo kara kahèi.   
\p
\v 16 Pakarejꞌe dꞌara taruu.  
\v 17 Sabajꞌa mèu-mèda.  
\v 18 Sadꞌi paraga dènge ngaa èèna ka, jꞌajꞌèra, do karejꞌe-karae, manèngi makasi mi Lamatua. Te Ama Lamatua dꞌèi dhèu aaꞌi-aaꞌi dhu madhutu Yesus Kristus tao sèmi èèna.   
\p
\v 19 Baku magee sasabꞌa Roh Lamatua.  
\v 20 Ladhe abhu ca dhèu nèti talora dhèu parcaya dhu peka na, nèngu abhu le lii moa nèti Ama Lamatua, mage miu pusi-pahae boe lii padhai na!  
\v 21 Te ngaa miu hudꞌi kanucu ku paie-iie lii èèna mai tareꞌa nèti Lamatua, do aadꞌo. Ladhe tareꞌa, na, madhutu.  
\v 22 Te ngaa pakajꞌèu nèti ngaa-ngaa dhu karehe.   
\s1 Paulus paꞌèle sasuri na  
\p
\v 23-24 Jaꞌa sabajꞌa manèngi Ama Lamatua ho pamèu dꞌara dènge mamuri miu aaꞌi-aaꞌi mi. Nèngu èèna ka dhu uri ho èdhi bisa mamuri dame èci dènge èci. Dènge jꞌara sèmi èèna, ladhe dꞌai lodꞌo mamai hari Lamatua èdhi, Yesus Kristus, miu bisa titu ètu katanga madha Na dènge ngiꞌu aae miu, dꞌara miu, dènge samanga miu dhu dènge boe sasala ngaa-ngaa. Jꞌara na sèmi èèna ka! Te Lamatua Yesus dhu paroa miu jꞌajꞌi dhèu unu Na, dhu monya boe. Ngaa dhu Na peka, Na tao madhutu sama sèmi èèna ka. De èèna na, Na lere nèti miu dènge mola-mèci asa katanga madha Ama Lamatua.   
\p
\v 25 Aꞌari aaꞌi-aaꞌi! Baku bhèlu manèngi-mangajꞌi hia jiꞌi ètu neꞌe.   
\p
\v 26 Jaꞌa manèngi sèna ka miu hia lii mahoꞌo jiꞌi kahèi mi dhèu sarani aaꞌi-aaꞌi ètu sèra!   
\p
\v 27 Jaꞌa manèngi dènge kolongara Lamatua Yesus, ho miu baca hia jumaꞌat aaꞌi-aaꞌi ra isi sasuri jaꞌa ne.   
\p
\v 28 Jaꞌa manèngi sèna ka Kètu èdhi, Yesus Kristus, padꞌelo dꞌara hua iia Na mi dedha miu aaꞌi-aaꞌi mi.  
\p Dꞌai sange neꞌe ka.  
\q3 Saloom,  
\q3 Paulus