\id TIT TIT- Ndamba Bible version \ide UTF-8 \h TITUSI \toc1 Baluwa ya Pauli kwa Titusi \toc2 Titusi \toc3 Tit \mt2 BALUWA YA PAULI KWA \mt1 TITUSI \imt ULONGULELU \ip Chitabu cha Titusi ndi chimu ya sila baluwa mchechi sha Pauli shayandikili kwilata mundu mweni weka hela yayilatili lipinga lya vandu yivamjumilili Kilistu ha. Baluwa singi ndatu ndi 1Timotewu na 2Timotewu na Filimoni. Pauli amyandikilili Titusi, lakini ayandikili kucha wula akudayila yipikanishiwi na vandu vatangalili. Tukuwesha kumanya naha mweni pahimulili jumu yaki kucha ndundami, Titusi amanyili kala chilongu achi. Pamongapa Pauli ayandikili baluwa ayi gati ya myaka milongu sita na mitatu na milongu sita na muhanu kukandila pawonikili Yesu. \ip Pauli amlayili Titusi kulongosha mipinga ya vandu yivamjumilili Kilistu yivaveli muliwunguli lya Kileti. Pauli ayandikili baluwa ayi kwilata kumlagha Titusi mukushawula na kuvawula filongosi va mipinga ya yivamjumilili Kilistu. Avalayili ngimu wuwula wamlayili mubaluwa ya Timotewu. Baluwa yaki yikusasambula ndambu filongosi wa mipinga ya yivamjumilili Kilistu yivadayiliwa kuva na unofu mkomi. Vandu yivamjumilili Kilistu na filongosi vawu va majuva ava vakudayiliwa vavi ndemindemi kulembesha kwa chiganu kusighala muunofu mkomi wuudayiliwa kwa vala yivavelili muulongoshi. \iot Fivelili mugati kwa chikata, \io Pauli akumlagha Titusi kuvashawula filongosi yivamtama Chapanga mungalilu yawu yonda. Sula ya 1:1-16. \io Pambeli kandi mweni amlayili Titusi kuvawula vandu kwikala ngalilu ya kumtama Chapanga mungalilu yawu. Sula ya 2:1-3:11. \io Mbelu, Pauli akuyandika filongu fya kumalilila. Sula ya 3:12-15. \c 1 \p \v 1 Nenga Pauli ndumindumi wa Chapanga na ndundami wa Yesu Kilistu. Nenga shawuliwa kuwudindasha ujumilwa wa yivashawuliwili na Chapanga na kuvalongosha vawumanyi unakaka wa kwikala ndambu ya kumunowesha Chapanga. \p \v 2 Weni ndi wukutugayila shuvililu ya unofu wa jola, Chapanga akudeta udesi ha, atujangili ngalilu ya unofu chipindi mlima waveli wakali kulumbiwa, \v 3 na pachifikili chipindi cheni, alangushili muunjagila waki wawulandulili ngimu Malawu va Chapanga, mlowola wetu. \p \v 4 Ngukuyandikila yuwi Titusi, mwana wangu wa nakaka muujumilwa wutuveli na yuwi. \p Kufuma kwa Chapanga tati wetu na Kufuma kwa Yesu Kilistu Mlowola wetu ngukuluvila usangi na kusika kufuma kwa Chapanga. \s Chichuku cha Titu kula Kileti \p \v 5 Ngakulekili kuliwunguli lya Kileti kwanongwa ugolikeshi yila milandu yivelili yikali kupela na kuvashawula vavaha filongosi muchipinga cha yivamjumilili Kilistu mumbwani shosi. Kotoo kwivasuwa findikulayilili, \v 6 mvaha yalongosha chipinga cha vandu yivamjumila Kilistu ghavi mundu yangajila mbatiwa na yaveli na mwehi yumu hela na vana vaki vavi yivamjumila Yesu, vakotoo kuva na nditi na vangajila kupikana. \v 7 Mvaha chilongosi wa chipinga cha yivamjumila Kilistu yalolela filongu fya vandu ndi muwolukela wa chichuku cha Chapanga, ghavi mundu yangajila mbatiwa. Akotoo kuva na chinyuku, akotoo kuva na maya, akotoo kuva njayila, akotoo kuva muna ndewu na akotoo kuva yayikungashila mali kwa deha ya chindipa. \v 8 Ila ghavi yalibushila vandu na yadayila milandu ya usangi, yagola fyadayila Chapanga na mng'alili na yagola ngimu wufidayiliwa na yawesha kwilongosha mweni. \v 9 Awukamuli unjagila wula nakaka kucha ndambu wulilu yetu. Ndi daweshi kuvadindasha vengi kwa ng'ulilu ya nakaka na kulangusha wafu wa vala yivalimba ngu'lilu ayi. \p \v 10 Kwanongwa kuvaveli vandu vatangalili munu yivafumili mudeha ya Vayawudi, vala yivavalema filongosi na kuvajanga vandu kwa upufi wawu. \v 11 Uvapeshi filongu fyawu, kwanongwa vakuyashinganya nyumba yosi kwa kuwula findu fingajila kujumiliwa kuwuliwa, vakugola nahawu kwanatilu ya wafu ya kupata mbiya. \v 12 Hata mbuyi vawu yumu yaveli Mkileti, adetili, “Vakileti majuva vosi vakudetaya udesi, kandi vava kucha vang'ongolu va wafu, vabafu na vagata!” \v 13 Na mweni adetili nakaka, kwanongwa ayi, ukudayiliwa uvalakalili nendu, ili vavi na ujumilwa wa nakaka. \v 14 Vakotoo kuyendilela kukamulila himusi sha Chiyawudi singajila chindu na Malawu va vandu yivafuma kwa vandu yivalemili unakaka. \v 15 Kila chindu ching'alili kwa vandu vang'alili, lakini kwahela chindu chivelili ching'alili chivi kwa vala yivangajila kuva vang'alili na vangajila ujumilwa, kwa hala shawu na natilu sipighashiwa. \v 16 Vandu kucha ava vakwijuma vamumanya Chapanga, lakini ndambu yivagola vakumlema. Ndi vandu yivakalalisha munu na vanalukilu, vakujakwa ha kwa chindu chochosi chinofu. \c 2 \s Ng'ulilu ya nakaka \p \v 1 Lakini yuwi wukudayiliwa kulandula findu yifilinga ng'ulilu ya nakaka. \v 2 Wuvawombeli vavaha vaweshi kwilongosha veni mungalilu yawu na luhunja na vashishamoyu vakudayiliwa kuva muujumilwa nakaka utami na uwunilifu. \p \v 3 Wuwula wula wuvawombeli vadala vagogolu vavi vandu yivagola findu yifimunowesha Chapanga, vakotoo kuva vajongisheli awu vanjayila va difwayi, ila vakudayiliwa kuwula milandu ya nyanyi. \v 4 Ili uweshi kuvawula vakavali yivahetiwili vavatami vabambu vawu na vana vawu, \v 5 vaweshi kwilongosha veni mungalilu yawu ng'alili na vavi vasangi, vadimi nyumba shawu na vavapikani vabambu vawu, ili lulayilayi lwa Chapanga lukotoo kubedaliwa. \p \v 6 Wuwula wuvawombeli fijana vaweshi kwilongosha veni mufindu fyosi. \v 7 Mung'ulili yaku wuvi chilangushilu mufigoli na uvakoli na kuvajumila mufigoli fya usangi. Mung'ulilu yaku wuvi wanakaka na ungajila machwegha. \v 8 Filongu fyaku fivi fya nakaka na fingajila uvifyi ili yivakulimba vapati chindipa pavapota cha wafu cha kukudetela. \p \v 9 Wuvawombeli vavanda vavapikani vabambu vawu na kuvanowesha mumilandu yosi. Vakotoo kulimbana nawu, \v 10 awu kuhija findu fyawu. Vavi chilangushilu kucha veni vasangi na vajumilwa majuva vosi, kwanongwa fyavagola fyosi vakufigayila jumu ya nyanyi ng'ulilu yimwilata Chapanga mlowola wetu. \p \v 11 Nongwa usangi wa Chapanga wugubutuliwa ili wuyeghi ulowolu kwa vandu vosi. \v 12 Usangi wa Chapanga wukutuwula kuwuleka wafu wosi na dobukelu ya mumlima awu wa ponopa, tuweshi kwilongosha twaveni na twikali ngalilu nofu yidayiliwa na kumunowesha Chapanga mungalilu yetu, \v 13 kunu patuvetela shuvililu ya nemusi ya Chapanga chipindi pawufumbuka ukomi wa Chapanga mkomi na Mlowola wetu Yesu Kilistu. \v 14 Ayitawulili mweni kwanongwa yetu ili atukomboli kufuma muwafu wosi na kutugola vandu vang'alili yivavelili vaki mweni, vandu yivavelili na luhujulu lwa kugola usangi. \p \v 15 Topi, wuvawuli vandu milandu ayi na kwa uwesu waku wosi kunu ukuvatinusha na kuvakayika vandu vaku. Mundu akotoo kukubedala. \c 3 \s Ngalilu ya Chikilistu \p \v 1 Wuvagoli vandu vavi na ngumbungumbu vavatundamili vatavala na yivavelili na uwesu, vavapikani na kuva ndemindemi kugola milandu yosi ya usangi. \v 2 Wuvawombeli vakotoo kumujowola mundu yoyonda, ila vayikali kwa kusika na kujova, majuva vosi vavi vashishamoyu kwa mundu yoyonda. \v 3 Kwanongwa chipindi chimu yufwi twavelili vapufi, vanalukilu na kujangiwa. Twavelili vavanda va hujulu sha kufitama na kusekilela findu fyosi finofu. Twayikalili na uvifyi na weyi, vandu vatunyekwili na yufwi twinyekwa. \v 4 Lakini chipindi usangi na utami wa Chapanga, Mlowola wetu pawugubutuliwili, \v 5 katulowola kwanongwa tugola usangi ha ila kwa lusungu lwaki hela, kwa deha ya Mfuki Mng'alili katugola tuvi vana vaki kwa kuwoneka mwanja wa pili na kutugayila ngalilu ya shonu kwa kutuwofuwa kwa machi. \v 6 Chapanga atugayilili Mfuki Mng'alili kwa usangi kupitila Yesu Kilistu Mlowola wetu, \v 7 kwa usangi waki tujumiliwi kuva goleki kwa Chapanga na kupokela unofu wa jola wutushuvilila. \v 8 Detelu ayi ndi ya nakaka. \p Ngukudayila ukombikeshi milandu ayi, ili vala yivamjumila Chapanga vavi na bayililu ya kugola fya usangi afi findu fya nyanyi na fivatanga vandu. \v 9 Lakini wuyilyepi na malimbanu va chipufi na kutambula matawa vatangalili va vambuyi na milandu yivayilata Malawu va Chapanga vamupili Musa. Milandu ayi ya nyanyi ha na yikuvatanga vandu ha. \v 10 Mundu yagola vandu vayibavi umukayiki mwanja wumu na wa pili, pambeli umuleki. \v 11 Kumanya kucha mundu ngimu ayu kalewuka na sambi shaki sikulangusha kucha kavifya. \s Naghililu ya mbelu \p \v 12 Pandimulayishili Alitema awu Tukiku kwa yuwi, kimbaniki wisi unoli kula Nikopoli, kwanongwa namula dandiyikali aku chipindi cha lupepu. \v 13 Kamali kumtanga mundu wa Malawu Sena na Apolu ili vaweshi kukanda myanja yawu na kombikeshi vapati findu fyosi fivadayila. \v 14 Vandu vetu vakudayiliwa vayiwuli kwitawula veni kugola findu fya usangi ili vaweshi kupata fivadayila mungalilu majuva vosi na vakotoo kwikala ngalilu chakachaka hela. \p \v 15 Vandu vosi yivavelili pamu na nenga vakukujambusha. Muvajambushi vandu yivamjumila Kilistu vayetu muujumilwa yivatutama. \p Nguvadadavila kwa Chapanga mwavosi avapi usangi waki.