\id PHP - Biblica® Open Ndebele Contemporary Bible
\ide UTF-8
\h AbaseFiliphi
\toc1 Incwadi KaPhawuli KwabaseFiliphi
\toc2 AbaseFiliphi
\toc3 Flp
\mt2 Incwadi KaPhawuli
\mt1 KwabaseFiliphi
\c 1
\p
\v 1 UPhawuli loThimothi, inceku zikaKhristu uJesu,
\b
\p Lakubo bonke abangcwele kuKhristu uJesu eFiliphi kanye lababonisi labadikoni:
\b
\p
\v 2 Umusa lokuthula okuvela kuNkulunkulu uBaba leNkosini uJesu Khristu kakube kini.
\b
\s1 Ukubonga Lokukhuleka
\p
\v 3 Ngiyambonga uNkulunkulu wami izikhathi zonke lapho ngilikhumbula. 
\v 4 Emikhulekweni yami yonke ngilikhulekela lonke, ngihlezi ngikhuleka ngokuthokoza 
\v 5 ngenxa yokuhlanganyela kwenu evangelini kusukela ngosuku lwakuqala kuze kube khathesi, 
\v 6 ngilethemba lokuthi lowo owaqalisa umsebenzi omuhle kini uzawuqhubekisela phambili kuze kube lusuku lukaKhristu uJesu.
\p
\v 7 Kuqondile ukuthi ngicabange ngokunjalo ngenxa yenu lonke, njengoba ngilani enhliziyweni yami njalo lanxa ngibotshiwe kumbe ngivikela ivangeli loba ngiliqinisa, lonke lihlanganyela lami emuseni kaNkulunkulu. 
\v 8 UNkulunkulu angafakaza ukuthi lonke ngilifiselani ngothando lukaKhristu uJesu.
\p
\v 9 Umkhuleko wami ngowokuthi uthando lwenu lwande kokuphela ekwazini lasekuzikeni kokuqedisisa 
\v 10 ukuze lenelise ukubona okuhle njalo lihlambuluke lingabi lasici kuze kube lusuku lukaKhristu, 
\v 11 ligcwele izithelo zokulunga ezibuya ngoJesu Khristu ekudunyisweni lasekubongweni kukaNkulunkulu.
\s1 Ukubotshwa KukaPhawuli Kuqhubekelisa Ivangeli Phambili
\p
\v 12 Bazalwane, ngifuna ukuba lazi ukuthi okwenzakale kimi kusizile impela ekuqhubekeliseni ivangeli phambili. 
\v 13 Ngalokho, sekube sobala kubo bonke abalindi besigodlo lakwabanye bonke ukuthi ngibotshelwe uKhristu. 
\v 14 Ngenxa yokubotshwa kwami, abazalwane abanengi sebelethemba eNkosini njalo sebelesibindi esikhulu sokutshumayela ilizwi likaNkulunkulu bengelakwesaba.
\p
\v 15 Kuliqiniso ukuthi abanye batshumayela uKhristu ngenxa yomona lombango kodwa abanye ngenxa yesifiso esihle. 
\v 16 Laba benza lokhu ngothando bekwazi ukuthi ngifakwe lapha ukuba ngivikele ivangeli. 
\v 17 Abakuqala batshumayela ngoKhristu ngokuzikhukhumeza, bengeqotho, becabanga ukuthi bangangidalela uhlupho ngisekubotshweni. 
\v 18 Kodwa-ke, kusizani pho? Into eqakathekileyo yikuthi ngezindlela zonke, ingabe kuyinjongo engalunganga loba eyeqiniso, uKhristu uyatshunyayelwa. Njalo ngenxa yalokhu mina ngiyathokoza.
\p Yebo, ngizaqhubeka ngithokoza, 
\v 19 ngoba ngiyazi ukuthi ngemikhuleko yenu langosizo lukaMoya kaJesu Khristu, okwenzakale kimi kuzaletha ukukhululwa kwami. 
\v 20 Ngokutshiseka ngilindele njalo ngithemba ukuthi angiyikuyangeka langayiphi indlela, kodwa ngizakuba lesibindi esaneleyo ukuze kuthi khathesi njengenjwayelo uKhristu uzakudunyiswa emzimbeni wami, loba ngokuphila kumbe ngokufa. 
\v 21 Ngoba kimi, ukuphila kunguKhristu lokufa kuyinzuzo. 
\v 22 Nxa ngingaqhubeka ngiphila emzimbeni, lokhu kuzakutsho umsebenzi olezithelo kimi. Kodwa-ke, kuyini engizakukhetha? Angazi! 
\v 23 Ngiphakathi kwakho kokubili: Ngifisa ukusuka ngibe loKhristu, okungcono kakhulu; 
\v 24 Kodwa kuyasweleka kakhulu kini ukuba ngibe ngilokhu ngiphila kulumzimba. 
\v 25 Sengikholwe lokhu, ngiyakwazi ukuthi ngizakuba khona, njalo ngizaqhubeka ngilani lonke ngenxa yokuthuthuka kwenu lokuthokoza ekukholweni, 
\v 26 ukuze kuthi ngokuba lani kwami futhi, ukuthokoza kwenu kuKhristu uJesu kuzakwanda ngenxa yami.
\s1 Impilo Efanele Ivangeli
\p
\v 27 Loba kusenzakalani, lina ziphatheni ngendlela efanele ivangeli likaKhristu. Ngakho, langabe ngiyeza ukuzalibona loba ngizwe nje kuphela ngani ngingekho, ngizakwazi ukuba liqinile ngaMoya munye, lilwela ukholo lwevangeli njengomuntu munye, 
\v 28 kungekho kwethuswa langayiphi indlela yilabo abaliphikisayo. Lokhu kuyisibonakaliso kubo ukuthi bazachithwa, kodwa lina lizasindiswa nguNkulunkulu. 
\v 29 Ngoba kunikelwe kini ngenxa kaKhristu kungasikukholwa kuye kuphela, kodwa lokumhluphekela, 
\v 30 njengoba lilwisa hlupho lunye elabona ngilalo, lakhathesi liyezwa ukuba ngilokhu ngilalo.
\c 2
\s1 Ukulingisela Ukuthobeka KukaKhristu
\p
\v 1 Nxa kukhona okukhuthazayo ngokuhlangana loKhristu, nxa kulenduduzo evela ethandweni lwakhe, nxa kulobudlelwano loMoya, nxa kulozwelo lesihawu, 
\v 2 phelelisani intokozo yami ngokuba ngqondo nye, lilothando lunye, limunye emoyeni njalo linjongo yinye. 
\v 3 Lingenzi lutho ngokuzikhukhumeza loba ukuziphakamisa okuyize. Kodwa ngokuthobeka khangelani abanye njengabangcono kulani 
\v 4 lingazikhathaleli izifiso zenu lodwa kodwa likhathalele lezifiso zabanye.
\p
\v 5 Ekuphilisaneni kwenu, isimo sengqondo yenu kumele sifanane lesikaKhristu uJesu,
\q1
\v 6 Yena okwathi ngemvelo enguNkulunkulu,
\q2 kacabanganga ukulingana loNkulunkulu
\q2 kuyilutho olungafinyelelwa,
\q1
\v 7 kodwa wazithoba,
\q2 wathatha isimo senceku,
\q2 yena elesimo somuntu.
\q1
\v 8 Wathi ebunjwe wabonakala njengomuntu,
\q2 wazehlisa
\q2 walalela kwaze kwaba sekufeni,
\q3 ukufa kwasesiphambanweni!
\b
\q1
\v 9 Ngakho-ke, uNkulunkulu wamphakamisela endaweni ephezulu kakhulu,
\q2 wamnika ibizo elingaphezu kwamabizo wonke,
\q1
\v 10 ukuba amadolo wonke aguqe ebizweni likaJesu,
\q2 ezulwini lasemhlabeni kanye langaphansi komhlaba,
\q1
\v 11 lezindimi zonke zivume ukuthi uJesu Khristu uyiNkosi,
\q2 kube ludumo lukaNkulunkulu uYise.
\s1 Ukucwebezela Njengezinkanyezi
\p
\v 12 Ngakho-ke, bangane bami abathandekayo, njengoba lihlezi lilalela kungayisikho ukuthi ngikhona kuphela kodwa ikakhulu nxa ngingekho, qhubekani lisebenzela ukusindiswa kwenu ngokwesaba langokuthuthumela 
\v 13 ngoba nguNkulunkulu osebenzayo phakathi kwenu ukuba lifune njalo lenze okumthokozisayo.
\p
\v 14 Yenzani konke kungela kusola kumbe ukuphikisana 
\v 15 ukuze libe ngabantwana bakaNkulunkulu abangelasici labahlambulukileyo, abamsulwa phakathi kwesizukulwane esonakeleyo lesixhwalileyo, lina elicwebezela phakathi kwaso liletha ukukhanya emhlabeni 
\v 16 ligagadlela ilizwi lokuphila. Ngalokho ngizazincoma ngosuku lukaKhristu ukuthi kangigijimelanga kumbe ngasebenzela ize. 
\v 17 Kodwa lanxa ngithululwa njengomnikelo wokunathwa phezu komhlatshelo lenkonzo evela ekukholweni kwenu, ngiyathaba ngithokoza lani lonke. 
\v 18 Ngakho-ke, lani njalo thabani lithokoze lami.
\s1 UThimothi Lo-Ephafrodithusi
\p
\v 19 Ngiyethemba eNkosini uJesu ukuba ngizathuma uThimothi kini masinyane ukuba lami ngithokoze lapho ngisamukela izindaba ngani. 
\v 20 Kangilaye omunye onjengaye, othakazelela inhlalakahle yenu ngobuqotho. 
\v 21 Ngoba abantu bonke bazifunela okwabo, hatshi okukaJesu Khristu. 
\v 22 Kodwa lina liyakwazi ukuthi uThimothi usezifakazele ngoba njengendodana eloyise usesebenze lami emsebenzini wevangeli. 
\v 23 Ngakho-ke, ngithemba ngizamthuma masinyane lapho sengibonile ukuba izinto zingihambela njani. 
\v 24 Njalo ngiyathemba eNkosini ukuthi lami uqobo ngizakuza masinyane.
\p
\v 25 Kodwa ngibona kufanele ukuthi ngimthume kini futhi u-Ephafrodithusi, umzalwane wami, obambisane lami umsebenzi lolibutho kanye lami, oyisithunywa senu futhi, elamthumayo ukuthi angisize ngendingeko zami. 
\v 26 Ngoba uyalilangatha lonke njalo ukhathazekile njengoba lezwa ukuthi wayegula. 
\v 27 Ngempela wayegula njalo waphose wafa. Kodwa uNkulunkulu waba lesihawu kuye, kungayisikho kuye kuphela kodwa lakimi ukuba angiphephise osizini phezu kosizi. 
\v 28 Ngakho-ke, ngitshisekela kakhulu ukumthuma ukuze kuthi lapho limbona futhi lithokoze lami ngikhathazeke okunganeno. 
\v 29 Mamukeleni eNkosini ngokuthokoza okukhulu njalo libahloniphe abantu abanjengaye 
\v 30 ngoba waphosa wafela umsebenzi kaKhristu, wafaka impilo yakhe engozini ukuze angiphe usizo elingangiphanga lona.
\c 3
\s1 Akulathemba Emzimbeni
\p
\v 1 Okokucina, bazalwane, thokozani eNkosini! Akusihlupho kimi ukulilobela ngezinto ezifanayo futhi ngoba lokho kuyisivikelo kini. 
\v 2 Qaphelani izinja lezo, abantu labo abenza okubi lalabo abalimaza umzimba. 
\v 3 Ngoba thina yithi abokusokwa, thina esikhonza uNkulunkulu ngoMoya wakhe, esiziqhenya ngoKhristu uJesu njalo esingabeki ithemba kokwenyama 
\v 4 lanxa nje mina ngokwami ngilezizatho zethemba elinjalo.
\p Nxa kulomuntu ocabanga ukuthi ulezizatho zokuthemba okwenyama, mina ngilezinengi: 
\v 5 ngasokwa ngosuku lwesificaminwembili, ngingowako-Israyeli, owesizwana sakoBhenjamini, umHebheru wamaHebheru; ngokomthetho, ngingumFarisi; 
\v 6 ngokutshiseka, ngahlukuluza ibandla; ngokulunga okugxile emthethweni, angilacala.
\p
\v 7 Kodwa loba kuyini okwakuyinzuzo kimi khathesi ngikubala njengokulahlekelwa ngenxa kaKhristu. 
\v 8 Phezu kwalokho, konke ngikubona kuyize lapho kulinganiswa lobukhulu obumangalisayo bokwazi uKhristu Jesu iNkosi yami esengilahlekelwe yizinto zonke ngenxa yakhe. Ngikubona kuyimfucuza ukuze ngizuze uKhristu 
\v 9 njalo ngitholakale kuye, ngingelakulunga okungokwami okuvelela emthethweni, kodwa lokho kungenxa yokukholwa kuKhristu, ukulunga okuvela kuNkulunkulu njalo okungokukholwa. 
\v 10 Ngifuna ukumazi uKhristu lamandla okuvuka kwakhe ekufeni lobudlelwano bokuhlanganyela ekuhluphekeni kwakhe, ngibe njengaye ekufeni, 
\v 11 ukuze ngenye indlela, ngithole ukuvuka kwabafileyo.
\p
\v 12 Akusikuthi sengikuzuzile konke lokhu loba ukuthi sengiphelelisiwe kodwa ngilwisa ukuba ngibambe lokho uKhristu Jesu angibambela khona. 
\v 13 Bazalwane, angikazibali njengosekubambile lokho. Kodwa yinye into engiyenzayo, ngiyakukhohlwa okusemuva ngizama ngamandla ukufinyelela kokuphambili, 
\v 14 ngilwisa ukuthi ngiyefinyelela ekucineni ukuba ngithole umvuzo uNkulunkulu angibizela wona ezulwini ngoKhristu uJesu.
\s1 Ukulingisa Isibonelo SikaPhawuli
\p
\v 15 Sonke thina esesiphelele kumele sikhangele izinto ngengqondo enjalo. Nxa kokunye licabanga ngokwehlukileyo, lalokho uNkulunkulu uzakwenza kucace kini. 
\v 16 Kuphela nje kasiqhubekeni ngalokho esesikuzuzile.
\p
\v 17 Bazalwane, hlanganyelani labanye ekulandeleni isibonelo sami, libananzelele labo abaphila ngokwesibonelo esalitshengisa sona. 
\v 18 Ngoba, njengoba ngangihlala ngilitshela kuqala lakhathesi ngiyatsho futhi langezinyembezi ukuthi abanengi baphila njengezitha zesiphambano sikaKhristu. 
\v 19 Isiphetho sabo yikubhubha, unkulunkulu wabo yisisu sabo, lodumo lwabo lusehlazweni labo. Ingqondo yabo isezintweni zasemhlabeni. 
\v 20 Kodwa elethu ikhaya lisezulwini. Njalo simlindele ngokutshiseka uMsindisi evela khonale, iNkosi uJesu Khristu, 
\v 21 yena okuzakuthi ngamandla amenza abeke izinto zonke ngaphansi kwakhe, uzaguqula imizimba yethu elesimo esiphansi ibe njengomzimba wakhe olenkazimulo.
\c 4
\s1 Isicelo Sokuma Ngesibindi Lokubambana
\p
\v 1 Ngakho-ke bazalwane bami, lina engilithandayo lengilikhumbulayo, liyintokozo yami lomqhele wami, kumele liqine kanjalo eNkosini bangane abathandekayo!
\p
\v 2 Ngiyamncenga uYuwodiya loSintikhe ukuba bavumelane eNkosini. 
\v 3 Ngiyakucela mhlobo wami oqotho, siza abesifazane labo abasebenza lami kanzima ngenxa yevangeli, kanye loKlementi labanye engisebenza labo, abalamabizo abo asencwadini yokuphila.
\s1 Ukukhuthaza Kokucina
\p
\v 4 Thokozani eNkosini kokuphela. Ngiyatsho futhi ngithi: Thokozani! 
\v 5 Ukuthobeka kwenu kakubonakale kubo bonke. INkosi isiseduze. 
\v 6 Lingakhathazeki kodwa ngazo zonke izikhathi bikani izicelo zenu kuNkulunkulu ngokukhuleka, ngokuncenga langokubonga. 
\v 7 Ukuthula kukaNkulunkulu okudlula ukuqedisisa konke kuzabusa inhliziyo zenu lezingqondo zenu kuKhristu uJesu.
\p
\v 8 Okokucina bazalwane, konke okuliqiniso, lokulesithunzi, lokulungileyo, lokuhlambulukileyo, lokuhle, lokubukekayo, nxa ulutho luluhle kakhulu loba lubongeka, cabangani ngezinto ezinje. 
\v 9 Loba kuyini elikufundileyo loba elikwamukeleyo loba elikuzwileyo kuvela kimi, loba elikubonileyo kimi, kwenzeni. UNkulunkulu wokuthula uzakuba lani.
\s1 Ukubonga Izipho Zabo
\p
\v 10 Ngiyathokoza kakhulu eNkosini ngokuthi khathesi selize lavuselela ukungikhathalela kwenu. Impela kade likhathazeka kodwa lingelalo ithuba lokukubonakalisa. 
\v 11 Kangitsho lokhu ngenxa yokuthi ngiyaswela ngoba sengafunda ukwaneliseka kuyo yonke imimo. 
\v 12 Ngiyakwazi ukuba ukuswela kuyini njalo ngiyakwazi ukuba kuyini ukuba lokunengi. Sengafunda imfihlo yokwaneliseka kuzozonke izimo, langabe ngiyasutha loba ngilambile, loba ngilokunengi kumbe ngiswela. 
\v 13 Ngingazenza zonke izinto ngaye onginika amandla.
\p
\v 14 Kodwa kwakukuhle ukuthi lihlanganyele lami ekuhluphekeni kwami. 
\v 15 Phezu kwalokho, lina bantu baseFiliphi liyakwazi ukuthi ensukwini elaqala ngazo ukwazi ivangeli ngesikhathi ngisuka eMasedoniya, akukho lalinye ibandla elahlanganyela lami endabeni yokupha lokwamukela ngaphandle kwenu kuphela; 
\v 16 ngoba langesikhathi ngiseThesalonika langithumela usizo kanengi lapho ngidinga uncedo. 
\v 17 Akusikuthi ngifuna isipho kodwa ngifuna okuzakuba yinzuzo kini. 
\v 18 Sengamukele umvuzo ogcweleyo lodlulisileyo; ngiphiwe okwaneleyo njengoba khathesi sengamukele ku-Ephafrodithusi izipho elazithumelayo. Zingumnikelo wephunga elimnandi, umhlatshelo owamukelekayo lothokozisa uNkulunkulu. 
\v 19 UNkulunkulu wami uzakugcwalisa konke ukuswela kwenu ngenkazimulo yenotho yakhe kuKhristu uJesu.
\p
\v 20 Udumo kalube kuNkulunkulu uBaba kuze kube nini lanini. Ameni.
\b
\s1 Ukuvalelisa
\p
\v 21 Bingelelani bonke abangcwele abakuKhristu.
\p Abazalwane abalami bayalibingelela.
\p
\v 22 Abangcwele bonke bayalibingelela, ikakhulu labo abangabendlu kaKhesari.
\b
\p
\v 23 Umusa weNkosi uJesu Khristu kawube lomoya wenu.