\id MIC - Biblica® Open Ndebele Contemporary Bible
\ide UTF-8
\h UMikha
\toc1 UMikha
\toc2 UMikha
\toc3 Mik
\mt1 UMikha
\c 1
\p
\v 1 Ilizwi \nd likaThixo\nd* elafika kuMikha waseMoreshethi ensukwini zemibuso kaJothamu, loka-Ahazi loHezekhiya, amakhosi akoJuda, umbono awubonayo mayelana leSamariya leJerusalema.
\b
\b
\q1
\v 2 Zwanini lonke lina bantu,
\q2 lalelani, awu wena mhlaba labo bonke abakuwo,
\q1 ukuze \nd uThixo\nd* Wobukhosi afakaze ngawe ekulahla,
\q2 \nd uThixo\nd* esethempelini lakhe elingcwele.
\s1 Ukwahlulelwa KweSamariya LeJerusalema
\q1
\v 3 Khangelani! \nd UThixo\nd* uyeza evela lapho ahlala khona;
\q2 wehlela phansi njalo enyathela ezindaweni eziphakemeyo zomhlaba.
\q1
\v 4 Izintaba ziyancibilika ngaphansi kwakhe,
\q2 lezigodi ziyaqhekezeka phakathi
\q1 njengengcino phansi komlilo,
\q2 lanjengamanzi esehla ngamandla emthezukweni.
\q1
\v 5 Konke lokhu kungenxa yokona kukaJakhobe,
\q2 ngenxa yezono zendlu ka-Israyeli.
\q1 Kuyini ukona kukaJakhobe na?
\q2 AkusiSamariya na?
\q1 Iyini indawo kaJuda ephakemeyo na?
\q2 AkusiJerusalema na?
\b
\q1
\v 6 “Ngakho iSamariya ngizayenza ibe yinqumbi yemfucuza,
\q2 indawo yokuhlanyela izivini.
\q1 Amatshe ayo ngizawathela esigodini
\q2 ngiphendle lezisekelo zayo.
\q1
\v 7 Zonke izithombe zayo zizaphohlozwa;
\q2 zonke izipho zayo zasethempelini zizatshiswa ngomlilo;
\q2 ngizaphahlaza zonke izifanekiso zayo.
\q1 Njengoba yaqoqa izipho zayo
\q2 ngeholo lezifebe,
\q1 zizasetshenziswa njengeholo
\q2 lezifebe futhi.”
\s1 Ukukhala Lokulila
\q1
\v 8 Ngenxa yalokhu ngizakhala ngilile;
\q2 ngizahamba ngezinyawo phansi njalo nginqunu.
\q1 Ngizahlaba umkhulungwane njengekhanka,
\q2 ngikhale njengesikhova.
\q1
\v 9 Ngoba inxeba layo kalelapheki;
\q2 selifikile koJuda.
\q1 Selifike kulo kanye isango labantu bami,
\q2 kanye laseJerusalema uqobo.
\q1
\v 10 Lingakukhulumi eGathi;
\q2 lingakhali lakancane.
\q1 Giqikani ethulini
\q2 eBhethi Ofira.
\q1
\v 11 Dlulani linqunu njalo lilenhloni
\q2 lina elihlala eShafiri.
\q1 Labo abahlala eZawanani
\q2 kabayikuphuma.
\q1 IBhethi-Ezeli iphakathi kokulila;
\q2 ukuvikelwa kwayo kususiwe kini.
\q1
\v 12 Labo abahlala eMarothi bayazijanqa ngobuhlungu,
\q2 belindele usizo
\q1 ngoba umonakalo uvele \nd kuThixo\nd*,
\q2 wafika lasesangweni leJerusalema.
\q1
\v 13 Lina elihlala eLakhishi,
\q2 bophelani amabhiza agijimayo enqoleni.
\q1 Yini elaba yisisusa sesono eNdodakazini yeZiyoni,
\q2 ngoba ukona kuka-Israyeli kwafunyanwa kini.
\q1
\v 14 Ngakho-ke lizanika iMoreshethi Gathi
\q2 izipho zokwehlukana.
\q1 Idolobho lase-Akhizibhi lizabonakalisa inkohliso
\q2 emakhosini ako-Israyeli.
\q1
\v 15 Ngizalilethela umnqobi
\q2 lina elihlala eMaresha.
\q1 Lowo olodumo luka-Israyeli
\q2 uzakuza e-Adulami.
\q1
\v 16 Phucani amakhanda enu likhalela
\q2 abantwabenu elibathandayo;
\q1 ziphuceni libe njengelinqe
\q2 ngoba bazasuka kini baye ekuthunjweni.
\c 2
\s1 Amacebo Abantu LakaNkulunkulu
\q1
\v 1 Maye kulabo abaceba ububi,
\q2 kulabo abaceba ukwenza okubi emibhedeni yabo!
\q1 Ekudabukeni kokusa bayakwenza
\q2 ngoba kusemandleni abo ukukwenza.
\q1
\v 2 Bahawukela amasimu bawathumbe,
\q2 kanye lezindlu, bazithathe.
\q1 Badlelezela umuntu ngomuzi wakhe,
\q2 lomuntu wakibo ngelifa lakhe.
\p
\v 3 Ngakho \nd uThixo\nd* uthi:
\q1 “Ngiceba ukwenza umonakalo kulababantu,
\q2 elingeke liziphephise kuwo.
\q1 Kalisayikuhamba ngokuziqhenya,
\q2 ngoba kuzakuba yisikhathi sencithakalo.
\q1
\v 4 Ngalolosuku abantu bazalihleka;
\q2 bazaliklolodela ngale ingoma yokulila bathi:
\q1 ‘Thina sichithwe okupheleleyo;
\q2 ilifa labantu bami labiwe.
\q1 Uyangithathela!
\q2 Amasimu ethu uwanika abathengisi.’ ”
\b
\q1
\v 5 Ngakho-ke kawuzukuba laye ebandleni \nd likaThixo\nd*
\q2 ozalabela ilizwe ngenkatho.
\s1 Abaphrofethi Bamanga
\q1
\v 6 Abaphrofethi babo bathi, “Lingaphrofethi.
\q2 Lingaphrofethi ngalezizinto;
\q2 ihlazo kaliyikusehlela.”
\q1
\v 7 Wena ndlu kaJakhobe, kufanele yini ukuba kuthiwe,
\q2 “UMoya \nd kaThixo\nd* uzondile na?
\q2 Uyazenza izinto ezinje na?”
\b
\q1 “Amazwi ami kawenzi okulungileyo
\q2 kuye ozindlela zakhe ziqondile na?
\q1
\v 8 Okwamanje abantu bami sebehlamuke
\q2 njengesitha.
\q1 Lihlubula ingubo eligugu
\q2 kulabo abedlulayo linganakile,
\q2 njengabantu abavela empini.
\q1
\v 9 Abesifazane babantu bami liyabaxotsha
\q2 emizini yabo emihle.
\q1 Lisusa isibusiso sami
\q2 kokuphela ebantwaneni babo.
\q1
\v 10 Sukani lihambe!
\q2 Ngoba le akusindawo yenu yokuphumula,
\q1 ngoba ingcolile,
\q2 ichithekile, okungeke kulungiswe.
\q1
\v 11 Nxa umqambi wamanga lomkhohlisi efika athi,
\q2 ‘Ngizaliphrofethela iwayini elinengi lotshwala,’
\q2 uyabe engumphrofethi walababantu nje kuphela!”
\s1 Isithembiso Sokukhululwa
\q1
\v 12 “Impela ngizalibutha lonke, wena Jakhobe;
\q2 impela ngizabaqoqela ndawonye abako-Israyeli abasalayo.
\q1 Ngizabaqoqela ndawonye njengezimvu esibayeni,
\q2 njengomhlambi wezimvu emadlelweni awo;
\q2 indawo ibe lokuphithizela kwabantu.
\q1
\v 13 Lowo ozavula indlela uzahamba phambi kwabo;
\q2 bazafohla isango baphume.
\q1 Inkosi yabo izadlulela phambi kwabo,
\q2 \nd uThixo\nd* abe phambi kwabo.”
\c 3
\s1 Ukukhuzwa Kwabakhokheli Labaphrofethi
\p
\v 1 Lapho-ke mina ngathi,
\q1 “Lalelani lina bakhokheli bakoJakhobe,
\q2 lina babusi bendlu yako-Israyeli.
\q1 Ukulunga akumelanga likwazi na,
\q2
\v 2 lina elizonda okuhle lithande okubi;
\q1 elixebula isikhumba ebantwini bami
\q2 lenyama emathanjeni abo;
\q1
\v 3 lina elibadla inyama abantu bami,
\q2 lihlubule isikhumba sabo
\q2 lichoboze lamathambo abo abe yizicucu;
\q1 elibaqumaquma njengenyama yepani,
\q2 lanjengenyama yembiza?”
\b
\q1
\v 4 Lapho-ke bazakhala \nd kuThixo\nd*,
\q2 kodwa kayikubaphendula.
\q1 Ngalesosikhathi uzabafihlela ubuso bakhe
\q2 ngenxa yobubi ababenzileyo.
\p
\v 5 Nanku okutshiwo \nd nguThixo\nd*:
\q1 “Okunjengabaphrofethi,
\q2 abedukisa abantu bami,
\q1 umuntu angabapha ukudla,
\q2 bamemezela ‘ukuthula’
\q1 nxa engabaphi balungisela
\q2 ukumhlasela ngempi.
\q1
\v 6 Ngakho ubusuku buzakwehlela phezu kwenu, kungekho mibono,
\q2 kanye lomnyama, kungekho kuhlahlula.
\q1 Ilanga lizabatshonela abaphrofethi,
\q2 losuku luzakuba mnyama kubo.
\q1
\v 7 Ababonisayo bazayangeka
\q2 labahlahluli babe lenhloni.
\q1 Bonke bazamboza ubuso babo
\q2 ngoba kungelampendulo evela kuNkulunkulu.”
\q1
\v 8 Kodwa mina ngiphiwe amandla,
\q2 loMoya \nd kaThixo\nd*,
\q2 lokulunga kanye lesibindi,
\q1 ukuba ngitshele uJakhobe ukona kwakhe
\q2 lo-Israyeli isono sakhe.
\b
\q1
\v 9 Zwanini lokhu lina bakhokheli bendlu kaJakhobe,
\q2 lani babusi bendlu ka-Israyeli,
\q1 eleyisa ukulunga
\q2 lihlanekele konke okuqondileyo;
\q1
\v 10 elakha iZiyoni ngokuchitha igazi;
\q2 leJerusalema ngobubi.
\q1
\v 11 Abakhokheli bayo bahlulela ngokufunjathiswa,
\q2 abaphristi bayo bafundisela inhlawulo,
\q2 labaphrofethi bayo baphrofithela imali;
\q1 ikanti bathembele \nd kuThixo\nd* njalo bathi,
\q2 “Kanti \nd uThixo\nd* kakho phakathi kwethu na?
\q2 Akulancithakalo engasehlela.”
\q1
\v 12 Ngakho-ke ngenxa yenu,
\q2 iZiyoni izalinywa njengensimu,
\q1 iJerusalema izakuba yinqwaba yemfucuza,
\q2 intaba yethempeli ibe yindunduma eyande izixukwana.
\c 4
\s1 INtaba \nd KaThixo\nd*
\p
\v 1 Ngezinsuku zokucina
\q1 intaba yethempeli \nd likaThixo\nd* izamiswa
\q2 njengenhloko phakathi kwezintaba;
\q1 izaphakanyiselwa phezu kwezintaba
\q2 njalo izizwe zizabekelela zisiya kuyo.
\p
\v 2 Izizwe ezinengi zizafika zithi,
\q1 “Wozani siye phezu kwentaba \nd kaThixo\nd*,
\q2 siye ethempelini likaNkulunkulu kaJakhobe.
\q1 Uzasifundisa izindlela zakhe,
\q2 ukuze sihambe emikhondweni yakhe.”
\q1 Umthetho uzavela eZiyoni,
\q2 ilizwi \nd likaThixo\nd* livele eJerusalema.
\q1
\v 3 Uzakwahlulela phakathi kwezizwe ezinengi
\q2 alamule lezingxabano zezizwe ezilamandla ezindaweni ezikhatshana.
\q1 Bazakhanda izinkemba zabo zibe yimihlathi yamakhuba,
\q2 lemikhonto yabo ibe zingqamu zokuthena izihlahla.
\q1 Isizwe asiyikuhlomela isizwe ngenkemba
\q2 loba sifundele ukulwa impi futhi.
\q1
\v 4 Umuntu wonke uzahlala ngaphansi kwesihlahla sakhe sevini
\q2 langaphansi kwesihlahla sakhe somkhiwa,
\q1 njalo kakho ozabenza besabe,
\q2 ngoba \nd uThixo\nd* uSomandla usekhulumile.
\q1
\v 5 Zonke izizwe zingahamba
\q2 ebizweni labonkulunkulu bazo;
\q1 thina sizahamba ebizweni \nd likaThixo\nd*
\q2 uNkulunkulu wethu kuze kube laphakade.
\s1 Icebo \nd LikaThixo\nd*
\q1
\v 6 “Ngalolosuku,” kutsho \nd uThixo\nd*,
\q2 “ngizabutha abaqhulayo;
\q1 ngizaqoqa abathunjwayo
\q2 lalabo engabehlisela usizi.
\q1
\v 7 Ngizakwenza abaqhulayo babe yinsalela,
\q2 abaxotshwayo babe yisizwe esilamandla.
\q1 \nd UThixo\nd* uzababusa eNtabeni iZiyoni,
\q2 kusukela ngalolosuku kuze kube nininini.
\q1
\v 8 Wena nqaba yokulinda yomhlambi,
\q2 wena nqaba yeNdodakazi yeZiyoni,
\q1 umbuso wakuqala uzabuyiselwa kuwe;
\q2 ubukhosi buzakuza eNdodakazini yaseJerusalema.”
\b
\q1
\v 9 Kungani khathesi usukhala kakhulu,
\q2 kawulankosi na?
\q1 Umeluleki wakho usebhubhile na,
\q2 ukuba uphathwe yibuhlungu obunjengowesifazane ohelelwayo?
\q1
\v 10 Janqula ngobuhlungu, wena Ndodakazi yeZiyoni,
\q2 njengowesifazane ohelelwayo,
\q1 ngoba khathesi sekumele usuke kulelidolobho
\q2 uyehlala egangeni.
\q1 Uzakuya eBhabhiloni;
\q2 lapho ozahlengwa khona.
\q1 Khonale \nd uThixo\nd* uzakukhulula
\q2 ezandleni zezitha zakho.
\b
\q1
\v 11 Kodwa khathesi izizwe
\q2 ezinengi zikujamele.
\q1 Zithi, “Kangcoliswe,
\q2 lamehlo ethu kawahawukele iZiyoni!”
\q1
\v 12 Kodwa kabayazi
\q2 imicabango \nd kaThixo\nd*;
\q1 kabaliqedisisi icebo lakhe,
\q2 yena obabutha njengezixha zamabele esizeni.
\q1
\v 13 “Sukuma ubhule, wena Ndodakazi yeZiyoni,
\q2 ngoba ngizakupha impondo zensimbi;
\q1 ngizakunika amasondo ethusi,
\q2 njalo uzachoboza izizwe ezinengi.”
\q1 Uzanikela \nd kuThixo\nd* inzuzo yabo eyatholwa ngobuqili
\q2 inotho yabo \nd kuThixo\nd* womhlaba wonke.
\c 5
\s1 Umbusi Othenjisiweyo Ovela EBhethilehema
\q1
\v 1 Hlomisa amabutho akho, wena dolobho lamabutho,
\q2 ngoba sesivinjezelwe.
\q1 Bazatshaya umbusi wako-Israyeli
\q2 esihlathini ngomqwayi.
\b
\q1
\v 2 “Kodwa wena Bhethilehema Efrathi,
\q2 lanxa umncinyane phakathi kwezizwana zakoJuda,
\q1 kuwe kuzavela
\q2 ozakuba ngumbusi wako-Israyeli,
\q1 omdabuko wakhe ngowasekadeni,
\q2 kusukela ezikhathini zendulo.”
\b
\q1
\v 3 Ngakho u-Israyeli uzadelwa
\q2 kuze kube yisikhathi sokuthi lowo ohelelwayo abelethe,
\q1 laba abafowabo bonke baphenduke
\q2 ukuzahlangana labako-Israyeli.
\b
\q1
\v 4 Uzakuma eluse umhlambi wakhe
\q2 ngamandla \nd kaThixo\nd*,
\q2 ngobukhosi bebizo \nd likaThixo\nd* uNkulunkulu wakhe.
\q1 Bazahlala ngokuvikeleka, ngoba lapho
\q2 udumo lwakhe luzafika emikhawulweni yomhlaba.
\b
\q1
\v 5 Uzakuba yikuthula kwabo.
\s1 Ukukhululwa Lokuchithwa
\q2 Lapho umʼAsiriya ehlasela ilizwe lethu
\q2 edabula phakathi kwezinqaba zethu,
\q1 sizamvusela abelusi abayisikhombisa,
\q2 kanye labakhokheli babantu abayisificaminwembili.
\q1
\v 6 Bazabusa ilizwe lase-Asiriya ngenkemba,
\q2 ilizwe likaNimrodi behlome ngenkemba,
\q1 uzasikhulula kumʼAsiriya
\q2 lapho ehlasela ilizwe lethu
\q2 engena phakathi kwemingcele yethu.
\b
\q1
\v 7 Insalela zabakoJakhobe zizakuba
\q2 phakathi kwezizwe ezinengi
\q1 njengamazolo avela \nd kuThixo\nd*,
\q2 lanjengemkhizo phezu kotshani,
\q1 okungalindeli muntu
\q2 kumbe kuhlalele abantu.
\q1
\v 8 Insalela zabakoJakhobe zizakuba phakathi kwezizwe,
\q2 phakathi kwabantu abanengi,
\q1 njengesilwane phakathi kwezinyamazana zegusu,
\q2 lanjengeguqa lesilwane phakathi komhlambi wezimvu,
\q1 esidlithizayo sidabule ekuhambeni kwaso,
\q2 kungekho ongahlenga.
\q1
\v 9 Isandla sakho sizaphakanyiselwa phezulu ngokunqoba izitha zakho,
\q2 njalo zonke izitha zakho zizachithwa.
\p
\v 10 “Ngalolosuku,” kutsho \nd uThixo\nd*,
\q1 “ngizabhubhisa amabhiza enu phakathi kwenu
\q2 ngibhidlize lezinqola zenu zempi.
\q1
\v 11 Ngizachitha amadolobho elizwe lenu
\q2 ngibhidlize lezinqaba zenu zonke.
\q1
\v 12 Ngizachitha ubuthakathi benu
\q2 njalo kalisayikukhunkula futhi.
\q1
\v 13 Ngizachitha izithombe zenu ezabazwayo
\q2 lamatshe enu okukhonza phakathi kwenu;
\q1 kalisayi kuwukhothamela futhi
\q2 umsebenzi wezandla zenu.
\q1
\v 14 Ngizasiphula phakathi kwenu izinsika zenu zika-Ashera,
\q2 ngidilize lamadolobho enu.
\q1
\v 15 Ngizaphindisela ngentukuthelo
\q2 langolaka ezizweni ezingangilalelanga.”
\c 6
\s1 Icala Lika-Israyeli \nd KuThixo\nd*
\p
\v 1 Lalelani okutshiwo \nd nguThixo\nd* ukuthi:
\q1 “Sukumani lilandise indaba yenu phambi kwezintaba;
\q2 amaqaqa kawezwe lokho elikutshoyo.
\b
\q1
\v 2 Zwanini, lina zintaba, icala elethulwa \nd nguThixo\nd*;
\q2 lalelani lina zisekelo zomhlaba ezingulaphakade.
\q1 Ngoba kulecala \nd uThixo\nd* alibeka ebantwini bakhe,
\q2 wethesa u-Israyeli icala.
\b
\q1
\v 3 Bantu bami, ngenzeni kini na?
\q2 Ngilihluphe ngani na? Ngiphendulani.
\q1
\v 4 Ngalikhupha eGibhithe
\q2 ngalikhulula elizweni lobugqili.
\q1 Ngathuma uMosi ukuba alikhokhele
\q2 kanye lo-Aroni loMiriyemu.
\q1
\v 5 Bantu bami, khumbulani
\q2 izicebiso zikaBhalaki inkosi yaseMowabi
\q2 lokuthi uBhalamu indodana kaBheyori waphendula wathini.
\q1 Khumbulani uhambo lwenu kusukela eShithima kusiya eGiligali,
\q2 ukuze lazi imisebenzi elungileyo \nd kaThixo\nd*.”
\b
\q1
\v 6 Kuyini engizakuza lakho phambi \nd kukaThixo\nd*
\q2 ngikhothame phambi kukaNkulunkulu ophakemeyo na?
\q1 Ngizakuza phambi kwakhe ngilomnikelo wokutshiswa,
\q2 ngilamathole alomnyaka owodwa na?
\q1
\v 7 \nd UThixo\nd* angathokoziswa zinqama eziyizinkulungwane,
\q2 izinkulungwane ezilitshumi zemifula yamafutha na?
\q1 Ngizanikela izibulo lami ngenxa yokona kwami,
\q2 isithelo somzimba wami ngenxa yesono somphefumulo wami na?
\q1
\v 8 Ukutshengisile wena muntu okuhle.
\q2 \nd UThixo\nd* ufunani kuwe na?
\q1 Ukwenza okulungileyo lokuthanda umusa
\q2 kanye lokuhamba ngokuzithoba loNkulunkulu wakho.
\s1 Icala Lika-Israyeli Lesijeziso
\q1
\v 9 Lalelani! \nd UThixo\nd* umemezela kulo idolobho,
\q2 lokwesaba ibizo lakho kuyikuhlakanipha,
\q2 “Qaphelani umqwayi laLowo owubekileyo.
\q1
\v 10 Wena ndlu yobubi, kufanele lakhathesi ngiyikhohlwe inotho yakho eyazuzwa ngobubi,
\q2 lehefa elinganelanga, eliqalekisiweyo na?
\q1
\v 11 Ngizamkhulula yini ecaleni umuntu olezilinganiso zobuqili,
\q2 lesaka lezilinganiso zamanga na?
\q1
\v 12 Abantu bakhona abanothileyo balochuku;
\q2 abantu bakhona ngabaqambi bamanga,
\q2 lezilimi zabo zikhuluma inkohliso.
\q1
\v 13 Ngakho sengiqalisile ukukuchitha,
\q2 ukukuqothula ngenxa yezono zakho.
\q1
\v 14 Uzakudla kodwa ungasuthi;
\q2 isisu sakho sizakuba silokhu singelalutho.
\q1 Uzabuthelela kodwa ungalondolozi lutho,
\q2 ngoba lokho okulondolozayo ngizakupha inkemba.
\q1
\v 15 Uzalima kodwa ungavuni;
\q2 uzakhama ama-oliva kodwa amafutha awo ungawagcobi,
\q2 uzakhama amavini kodwa iwayini lawo ungalinathi.
\q1
\v 16 Ugcinile imithetho ka-Omri
\q2 layo yonke imikhutshana yasendlini ka-Ahabi,
\q2 walandela lamasiko abo.
\q1 Ngakho-ke ngizakunikela ekubhujisweni,
\q2 labantu bakho ekubeni yinhlekisa;
\q2 uzathwala ihlazo lezizwe.”
\c 7
\s1 Usizi Luka-Israyeli
\q1
\v 1 Maye ngosizi lwami!
\q1 Nginjengomuntu obutha izithelo zehlobo
\q2 senginjengevini eselivunwe laphela;
\q1 akuselasixha samavini okudliwa,
\q2 kayisekho lemikhiwa yakuqala engiyikhanukayo.
\q1
\v 2 Abathembekileyo babhujisiwe elizweni,
\q2 kakho lamunye umuntu olungileyo oseleyo.
\q1 Abantu bonke bacathamela ukuchitha igazi;
\q2 lowo lalowo uzingela umfowabo ngombule.
\q1
\v 3 Izandla zombili zizingcitshi ekwenzeni okubi;
\q2 umbusi ufuna izipho ngamandla,
\q1 umahluleli wamukela isivalamlomo,
\q2 abalamandla babiza abakufisayo,
\q2 bonke baceba okubi bendawonye.
\q1
\v 4 Ongcono wabo unjengesihlahla sameva,
\q2 oqotho kakhulu mubi kulothango lwameva.
\q1 Usuku uNkulunkulu alethekelela ngalo selufikile,
\q2 usuku lokukhala kophondo lwabalindi.
\q2 Manje sekuyisikhathi sokuphumputheka kwabo.
\q1
\v 5 Ungamethembi umakhelwane;
\q2 ungagwabi ngomngane wakho.
\q1 Lalowo olala umgonile,
\q2 qaphela amazwi akho.
\q1
\v 6 Ngoba indodana idumaza uyise,
\q2 indodakazi ivukela unina,
\q1 umalukazana avukele uninazala,
\q2 izitha zomuntu ngamalunga endlu yakhe.
\b
\q1
\v 7 Kodwa mina ngilindele \nd uThixo\nd* ngethemba,
\q2 ngilindele uNkulunkulu uMsindisi wami;
\q2 uNkulunkulu wami uzangizwa.
\s1 U-Israyeli Uzavuka
\q1
\v 8 Ungaklolodi wena sitha sami!
\q2 Lanxa ngiwile, ngizavuka.
\q1 Lanxa ngihlezi emnyameni,
\q2 \nd uThixo\nd* uzakuba yikukhanya kwami.
\q1
\v 9 Ngenxa yokuba ngonile kuye,
\q2 ngizalumela ulaka \nd lukaThixo\nd*,
\q1 aze angincengele endabeni yami,
\q2 aveze ukungabi lacala kwami.
\q1 Uzangikhuphela phandle ekukhanyeni;
\q2 ngizabona ukulunga kwakhe.
\q1
\v 10 Lapho-ke isitha sami sizakubona,
\q2 njalo sibanjwe zinhloni,
\q1 lowo owathi kimi,
\q2 “Ungaphi \nd uThixo\nd* uNkulunkulu wakho?”
\q1 Lakhathesi uzagxotshwa
\q2 ngezinyawo njengodaka emigwaqweni.
\b
\q1
\v 11 Usuku lokwakhiwa kwemiduli yakho luzafika,
\q2 usuku lokuqhelisa imingcele yakho.
\q1
\v 12 Ngalolosuku abantu bazakuza kuwe
\q2 bevela e-Asiriya lasemadolobheni aseGibhithe,
\q1 njalo kusukela eGibhithe kusiya kuYufrathe,
\q2 kusukela olwandle kusiya olwandle,
\q2 lakusukela entabeni kusiya entabeni.
\q1
\v 13 Umhlaba uzachitheka ngenxa yabahlezi kuwo,
\q2 ngenxa yezenzo zabo.
\s1 Ukukhuleka Lokudumisa
\q1
\v 14 Beluse abantu bakho ngentonga yakho,
\q2 umhlambi welifa lakho,
\q1 ohlala wodwa ehlathini
\q2 emadlelweni avundileyo.
\q1 Kawudle eBhashani laseGiliyadi
\q2 njengasezinsukwini zokuphuma.
\b
\q1
\v 15 “Njengasezinsukwini zokuphuma kwenu eGibhithe,
\q2 ngizabatshengisa izimangaliso zami.”
\b
\q1
\v 16 Izizwe zizabona ziyangeke,
\q2 zemukwe wonke amandla azo.
\q1 Zizabamba imilomo yazo ngezandla,
\q2 lezindlebe zazo zingabe zisezwa.
\q1
\v 17 Zizakhotha uthuli njengenyoka,
\q2 njengezinanakazana ezihuquzela emhlabathini.
\q1 Zizakuza ziqhaqhazela ziphuma emihomeni yazo;
\q2 zizaphendukela \nd kuThixo\nd* uNkulunkulu wethu ngokwesaba,
\q2 njalo lawe zizakwesaba.
\q1
\v 18 Ngubani onguNkulunkulu njengawe,
\q2 oxolela izono athethelele iziphambeko
\q2 zensalela zelifa lakhe na?
\q1 Kawuthukutheli kokuphela
\q2 kodwa uthokoza ngokutshengisa isihawu.
\q1
\v 19 Uzakuba lesihawu kithi futhi;
\q2 uzanyathela izono zethu ngezinyawo
\q2 uphosele bonke ububi bethu ezinzikini zolwandle.
\q1
\v 20 Uzakuba qotho kuJakhobe,
\q2 ubonakalise isihawu sakho ku-Abhrahama,
\q1 njengokuthembisa kwakho ngesifungo kubokhokho bethu
\q2 ensukwini zasendulo.