\id JON - Biblica® Open Ndebele Contemporary Bible
\ide UTF-8
\h UJona
\toc1 UJona
\toc2 UJona
\toc3 Jon
\mt1 UJona
\c 1
\s1 UJona Ubalekela \nd UThixo\nd*
\p
\v 1 Ilizwi \nd likaThixo\nd* lafika kuJona indodana ka-Amithayi lathi: 
\v 2 “Hamba uye edolobheni elikhulu laseNiniva utshumayele ngokulisola kakhulu, ngoba ububi balo sebufinyelele kimi.”
\p
\v 3 Kodwa uJona wabalekela \nd uThixo\nd* waqonda eThashishi. Wehla waya eJopha, lapho afica khona umkhumbi owawusiya kuleyondawo. Eseyikhuphile imali yokugada, wangena umkhumbi waqonda eThashishi yena ebalekela \nd uThixo\nd*.
\p
\v 4 \nd UThixo\nd* wathumela isiphepho elwandlwe, kwaphenquka isavunguzane esasingathi sizawubhidliza umkhumbi. 
\v 5 Bonke abagwedli bawo besaba, ngulowo lalowo wakhala kunkulunkulu wakhe. Baphosela imithwalo elwandle ukuze baphungule ubunzima bomkhumbi.
\p Kodwa uJona wayehlele endlwaneni engaphansi, emkhunjini, walala khona ubuthongo bukabhuka. 
\v 6 Induna yomkhumbi yaya kuye yathi, “Ungalala njani? Vuka ubize unkulunkulu wakho! Mhlawumbe yena uzasizwa ukuze singabhubhi.”
\p
\v 7 Abagwedli basebecebisana bathi, “Wozani, senze inkatho ukuze sibone ukuthi ngubani osibangele uhlupho lolu.” Bayenza inkatho, yadla uJona. 
\v 8 Basebembuza bathi, “Akusitshele, ngubani osibangele lonke lolu uhlupho na? Wenza msebenzi bani na? Uvela ngaphi? Ungowakuliphi ilizwe? Ungowasiphi isizwe na?”
\p
\v 9 Waphendula wathi, “NgingumHebheru, ngikhonza \nd uThixo\nd*, uNkulunkulu wasezulwini, owenza ulwandle kanye lomhlabathi.”
\p
\v 10 Lokhu kwabethusa, babuza bathi, “Wenzeni pho?” (Babekwazi ukuthi ubalekela \nd uThixo\nd* ngoba wayevele esebatshelile.)
\p
\v 11 Ulwandle lwaselulokhu luqubuka lusiya phambili ngamandla. Ngakho basebembuza bathi, “Senzeni kuwe ukuze ulwandle luthule singalimali na?”
\p
\v 12 Waphendula wathi, “Ngiqukulani lingiphosele elwandle, luzathula. Ngiyazi ukuthi kungumlandu wami okwenze isiphepho esikhulu kangaka sehlela phezu kwenu.”
\p
\v 13 Kodwa amadoda azama ngamandla ukugwedlela emuva emhlabathini. Kodwa behluleka ngoba ulwandle lwaselusidla amahabula okudlula kuqala. 
\v 14 Khonapho basebekhala \nd kuThixo\nd* bathi, “Oh, \nd Thixo\nd*, ungasiyekeli sife ngoba sibulele indoda le. Ungasibeki umlandu wokubulala umuntu ongelacala, ngoba wena, Oh \nd Thixo\nd*, wenzile njengokufisa kwakho.” 
\v 15 Basebethatha uJona bamphosela olwandle, ulwandle lwase luthula ukugubhaza. 
\v 16 Lokhu kwenza amadoda lawo amesabe kakhulu \nd uThixo\nd*, asesenza umhlatshelo \nd kuThixo\nd* enza izifungo kuye.
\s1 Umkhuleko KaJona
\p
\v 17 Kodwa \nd uThixo\nd* waletha inhlanzi enkulukazi yamginya uJona, uJona wahlala phakathi kwenhlanzi insuku ezintathu lobusuku obuthathu.
\c 2
\nb
\v 1 Ephakathi kwenhlanzi uJona wakhuleka \nd kuThixo\nd* uNkulunkulu wakhe. 
\v 2 Wathi:
\q1 “Ekuhluphekeni kwami ngambiza \nd uThixo\nd*,
\q2 wangiphendula.
\q1 Ngisekujuleni kwengcwaba ngacela uncedo,
\q2 wena wakulalela ukukhala kwami.
\q1
\v 3 Wangiphosela ezinzikini,
\q2 phakathi emathunjini enlwandle,
\q2 amagagasi agubhazela emaceleni wonke;
\q1 wonke amagagasi akho
\q2 lezimpophoma zawo kwangisibekela.
\q1
\v 4 Ngathi, ‘Sengixotshiwe
\q2 ebusweni bakho;
\q1 kodwa ngizakhangela njalo
\q2 ethempelini lakho elingcwele.’
\q1
\v 5 Indonga zamanzi zaziqonde ukungimbokotha,
\q2 ngangihanqwe yinziki;
\q2 inkunkuma yotshani bolwandle yangithandela ekhanda.
\q1
\v 6 Ngagalula ngatshona empandeni zezintaba;
\q2 umhlaba ongaphansi wangivalela okwaphakade.
\q1 Kodwa wena wayikhupha impilo yami egodini,
\q2 wena \nd Thixo\nd*, Nkulunkulu wami.
\b
\q1
\v 7 Lapho impilo yami yayisincipha,
\q2 ngakhumbula wena, \nd Thixo\nd*,
\q1 umkhuleko wami waphakamela kuwe,
\q2 ethempelini lakho elingcwele.
\b
\q1
\v 8 Labo ababambelela ezithombeni
\q2 ezingelamsebenzi balahlekelwa ngumusa ongaba ngowabo.
\q1
\v 9 Kodwa mina, ngizakuthi ngihlabela ingoma yokubonga
\q2 ngenze umhlatshelo kuwe.
\q1 Engikufungileyo ngizakugcwalisa.
\q2 Insindiso ivela \nd kuThixo.”\nd*
\p
\v 10 \nd UThixo\nd* walaya inhlanzi, yona yase imhlanza uJona emhlabathini owomileyo.
\c 3
\s1 UJona Uya ENiniva
\p
\v 1 Ilizwi \nd likaThixo\nd* laselifika kuJona ngokwesibili lathi: 
\v 2 “Hamba uye edolobheni elikhulu laseNiniva uyotshumayela kulo ilizwi engikunika lona.”
\p
\v 3 UJona walilalela ilizwi \nd likaThixo\nd*, waya eNineve. Phela iNiniva yayilidolobho elikhulu kakhulu, ukulethekela lonke kwakuthatha insuku ezintathu. 
\v 4 Ngelanga lokuqala, uJona wangena phakathi komuzi. Wamemezela wathi, “Kusele insuku ezingamatshumi amane kuphela ukuba iNiniva ichithwe.” 
\v 5 Abantu beNiniva babekholwa kuNkulunkulu. Bamemezela ukuthi kuzilwe ukudla, njalo bonke kusukela komkhulu kusiya komncinyane bavunula amasaka.
\p
\v 6 Ilizwi selifikile enkosini yaseNiniva, yasukuma esihlalweni sayo sobukhosi, yakhumula izembatho zayo zobukhosi, yazembathisa isaka yahlala phansi ebhuqwini. 
\v 7 Yase ikhupha isimemezelo eNiniva esithi:
\pmo “Ngomthetho wenkosi lezikhulu zayo:
\pm Akungavunyelwa muntu kumbe inyamazana, imihlambi yenkomo loba eyezimvu ukuthi ithinte ulutho oludliwayo; makungavunyelwa kudle kumbe kunathe. 
\v 8 Kodwa akuthi umuntu loba yinyamazana kwembathe amasaka. Wonke umuntu kamemeze ngokukhawuleza kuNkulunkulu. Kabadele izindlela zabo zobubi lobudlwangudlwangu babo. 
\v 9 Ngubani okwaziyo na? Mhlawumbe uNkulunkulu angadeda kuthi ngesihawu sakhe aphenduke elakeni lwakhe olwesabekayo ukuze singabhubhi.”
\p
\v 10 Kwathi uNkulunkulu esebonile abakwenzayo ukuthi baguquka ezindleleni zabo zobubi, wabazwela isihawu kazabe esabehlisela incithakalo ayesonge ngayo.
\c 4
\s1 Ukunengwa KukaJona Ngesihawu \nd SikaThixo\nd*
\p
\v 1 Kodwa uJona wacaphuka kakhulu wazonda. 
\v 2 Wakhuleka \nd kuThixo\nd* wathi, “Awu \nd Thixo\nd*, kakusikho lokhu yini engakutshoyo ngisesekhaya? Yikho okwangenza ngaphangisa ukubalekela eThashishi. Ngangikwazi ukuthi unguNkulunkulu olomusa lesihawu, ophuza ukuthukuthela njalo ogcwele uthando, uNkulunkulu odedayo ongasoze ehlise ukuhlupheka. 
\v 3 Khathesi-ke \nd Thixo\nd*, susa ukuphila kwami, ngoba kungcono kimi ukufa kulokuphila.”
\p
\v 4 Kodwa \nd uThixo\nd* waphendula wathi, “Kambe ubona ulelungelo na lokuthi uzonde?”
\p
\v 5 UJona waphuma wayahlala endaweni ethile ngempumalanga kwedolobho. Wazenzela khonapho idunjana wahlala emthunzini walo walindela ukubona okwakuzakwenzakala edolobheni lelo. 
\v 6 Kwasekusithi \nd uThixo\nd* uNkulunkulu wakhulisa isihlahla esilamahlamvu kuJona samenzela umthunzi ekhanda lakhe ukuze ahlaliseke. UJona wathaba kakhulu ngaleli ivini. 
\v 7 Kodwa emathathakusa ngelanga elilandelayo uNkulunkulu wathumela impehlane, eyaphehla isihlahla sacina sibuna. 
\v 8 Kwathi ilanga seliphumile uNkulunkulu wathumela umoya wempumalanga ohaqazayo, ilanga lavutha phezu kwekhanda likaJona waze waqaleka. Wafisa ukufa, wathi, “Kungcono kimi ukuthi ngife kulokuthi ngiphile.”
\p
\v 9 Kodwa uNkulunkulu wathi kuJona, “Ulelungelo na lokuthi uzonde ngenxa yesihlahla?”
\p UJona wathi, “Yebo. Ngizonde kakhulu, kuthi kangife.”
\p
\v 10 Kodwa \nd uThixo\nd* wathi, “Uyazihlupha ngesihlahla lesi loba ungazange usinakekele loba usikhulise. Lihlume ngobusuku laphinde lafa ngobusuku. 
\v 11 Kodwa iNiniva ilabantu abeqa izinkulungwane ezilikhulu elilamatshumi amabili abangehlukanisiyo isandla sabo sokudla kwesenxele, lenkomo ezinengi njalo. Bekungafanelanga yini na ukuthi ngilinqinekele idolobho elikhulu kangaka?”