\id HEB - Biblica® Open Ndebele Contemporary Bible
\ide UTF-8
\h AmaHebheru
\toc1 Incwadi KumaHebheru
\toc2 AmaHebheru
\toc3 Heb
\mt1 KumaHebheru
\c 1
\s1 ILizwi Lika Nkulunkulu Lokucina: INdodana Yakhe
\p
\v 1 Kudala uNkulunkulu wakhuluma kubokhokho kanenginengi ngabaphrofethi langezindlela ezehlukeneyo 
\v 2 kodwa ngalezizinsuku zokucina ukhulume kithi ngeNdodana yakhe, ayibeka ukuba yindlalifa yezinto zonke, yona adala ngayo izulu lomhlaba. 
\v 3 INdodana iyikubenyezela kwenkazimulo kaNkulunkulu kanye lomfanekiso wokuba nguye kwakhe uqobo, iqinisa izinto zonke ngelizwi layo elilamandla. Emva kokuba isikufezile ukuhlanjululwa kwezono, yahlala phansi esandleni sokunene sobukhosi ezulwini. 
\v 4 Ngakho yaba ngaphezu kwezingilosi ngoba ibizo eyalithola njengelifa lilikhulu kulelazo.
\s1 INdodana Ingaphezulu Kwezingilosi
\p
\v 5 Ngoba kukuyiphi ingilosi uNkulunkulu ake wathi kuyo:
\q1 “Wena uyiNdodana yami;
\q2 lamhla sengibe nguYihlo”\f + \fr 1.5 \fr*\ft AmaHubo 2.7\ft*\f*?
\m Kumbe njalo wathi,
\q1 “Ngizakuba nguYise,
\q2 yona izakuba yiNdodana yami”\f + \fr 1.5 \fr*\ft 2 USamuyeli 7.14; 1 ImiLando 17.13\ft*\f*?
\m
\v 6 Njalo, lapho uNkulunkulu eletha izibulo lakhe emhlabeni, uthi:
\q1 “Zonke izingilosi zikaNkulunkulu kazimkhonze.”\f + \fr 1.6 \fr*\ft UDutheronomi 32.43\ft*\f*
\m
\v 7 Lapho ekhuluma ngezingilosi uthi,
\q1 “Wenza izingilosi zakhe zibe yimimoya,
\q2 izinceku zakhe zibe ngamalangabi omlilo.”\f + \fr 1.7 \fr*\ft AmaHubo 104.4\ft*\f*
\m
\v 8 Kodwa ngeNdodana uthi,
\q1 “Isihlalo sakho sobukhosi, Oh Nkulunkulu,
\q2 sizakuma nini lanini,
\q1 intonga yokwahlulela okulungileyo
\q2 izakuba yintonga yombuso wakho.
\q1
\v 9 Ukuthandile ukulunga wazonda ububi;
\q2 ngakho uNkulunkulu,
\q1 uNkulunkulu wakho
\q2 usekubeke ngaphezu kwabakhula bakho
\q2 ngokukugcoba ngamafutha entokozo.”\f + \fr 1.9 \fr*\ft AmaHubo 45.6-7\ft*\f*
\m
\v 10 Njalo uthi,
\q1 “Ekuqaleni, Oh Nkosi, wabeka izisekelo zomhlaba,
\q2 lamazulu angumsebenzi wezandla zakho.
\q1
\v 11 Kuzabhubha kodwa wena uzasala;
\q2 konke kuzaguga njengesigqoko.
\q1
\v 12 Uzakugoqa njengesembatho;
\q2 kuzantshintshwa njengesigqoko.
\q1 Kodwa wena uhlala unjalo,
\q2 leminyaka yakho kayiyikuphela.”\f + \fr 1.12 \fr*\ft AmaHubo 102.25-27\ft*\f*
\m
\v 13 Kukuyiphi ingilosi uNkulunkulu ake wathi kuyo:
\q2 “Hlala ngakwesokunene sami;
\q1 ngize ngenze izitha zakho
\q2 zibe yisinyathelo senyawo zakho”\f + \fr 1.13 \fr*\ft AmaHubo 110.1\ft*\f*?
\m
\v 14 Izingilosi kazisimimoya esebenzayo yini, ethunywe ukukhonza labo abazakudla ilifa lokusindiswa na?
\c 2
\s1 Isixwayiso Sokuba Kunanzelelwe
\p
\v 1 Ngakho kufanele siqaphelelisise lokho esikuzwileyo ukuze singaduki. 
\v 2 Ngoba nxa ilizwi elakhulunywa yizingilosi liqinisa njalo konke ukona lokungalaleli kuthole isijeziso sakho esifaneleyo, 
\v 3 pho thina sizaphepha njani nxa singanaki insindiso enkulu kangaka na? Lokhu kusindiswa okwabikwa kuqala yiNkosi, kwafakazwa kithi yilabo abayizwayo. 
\v 4 LoNkulunkulu wakufakaza ngezibonakaliso langezimangaliso ezithile, langezipho zikaMoya oNgcwele ezabiwa ngokwentando yakhe.
\s1 UJesu Wenziwa Waba Njengabafowabo
\p
\v 5 Akusikho ezingilosini abeka khona ngaphansi kwazo ilizwe elizayo esikhuluma ngalo. 
\v 6 Kodwa ikhona indawo lapho omunye ofakaza khona esithi:
\q1 “Uyini umuntu osungaze uzihluphe ngaye na,
\q2 loba indodana yomuntu ukuba uyinanze na?
\q1
\v 7 Wamenza waba mncinyazana kulezingilosi;
\q2 wamethesa umqhele wodumo lobukhosi,
\q2
\v 8 wabeka lezinto zonke ngaphansi kwezinyawo zakhe.”\f + \fr 2.8 \fr*\ft AmaHubo 8.4-6\ft*\f*
\m Ekubekeni izinto zonke ngaphansi kwakhe uNkulunkulu katshiyanga lutho olungekho ngaphansi kwakhe. Kodwa khathesi kasiboni zinto zonke zingaphansi kwakhe. 
\v 9 Kodwa sibona yena, owenziwa waba ngaphansanyana kwezingilosi okwesikhatshana, uJesu, ebekwa umqhele wobukhosi lodumo ngoba wavuma ukufa ukuze kuthi ngomusa kaNkulunkulu ezwe ukufa ngenxa yabantu bonke.
\p
\v 10 Ekuletheni amadodana amanengi enkazimulweni, kwakufanele ukuba uNkulunkulu, yena owenza zonke izinto njalo zabakhona ngenxa yakhe, enze umsunguli wokusindiswa kwabo aphelele ngokuhlupheka kwakhe. 
\v 11 Ngoba lowo owenza abantu babengcwele kanye lalabo abenziwe baba ngcwele ngabendlunye. Ngakho uJesu kakumyangisi ukuba athi bangabafowabo. 
\v 12 Uthi,
\q1 “Ngizamemezela ibizo lakho kubafowethu;
\q2 ngizahlabelela udumo lwakho phambi kwebandla.”\f + \fr 2.12 \fr*\ft AmaHubo 22.22\ft*\f*
\m
\v 13 Njalo uthi,
\q1 “Ngizabeka ithemba lami kuye.”\f + \fr 2.13 \fr*\ft U-Isaya 8.17\ft*\f*
\m Uphinda athi,
\q1 “Mina ngilapha, kanye labantwana uNkulunkulu angiphe bona.”\f + \fr 2.13 \fr*\ft U-Isaya 8.18\ft*\f*
\p
\v 14 Njengoba abantwana belomzimba legazi, laye wahlanganyela ebuntwini babo ukuze kuthi ngokufa kwakhe amchithe lowo ophethe amandla okufa okutsho uSathane, 
\v 15 abakhulule ababesebugqilini impilo yabo yonke ngenxa yokwesaba kwabo ukufa. 
\v 16 Ngoba impela akusizo ingilosi azisizayo kodwa inzalo ka-Abhrahama. 
\v 17 Ngenxa yalokhu kwakumele enziwe afane labafowabo kukho konke ukuze abe ngumphristi omkhulu olesihawu lothembekileyo enkonzweni kaNkulunkulu, lokuba abeyinhlawulo yezono zabantu. 
\v 18 Njengoba laye wahlupheka lapho elingwa, uyenelisa ukubasiza abalingwayo.
\c 3
\s1 UJesu Ungaphezu KukaMosi
\p
\v 1 Ngakho-ke, bafowethu abangcwele, abahlanganyela ekubizweni ezulwini, bekani imicabango yenu kuJesu, umpostoli lomphristi omkhulu esimvumayo. 
\v 2 Wathembeka kulowo owambekayo, njengoMosi owayethembekile kuyo yonke indlu kaNkulunkulu. 
\v 3 UJesu ufunyenwe efanele udumo olukhulu kuloMosi njengomakhi wendlu elodumo olukhulu kulendlu yona ngokwayo. 
\v 4 Ngoba yileyo laleyondlu yakhiwa ngumuntu othize kodwa uNkulunkulu ungumakhi wezinto zonke. 
\v 5 “UMosi wayethembekile njengenceku kuyo yonke indlu kaNkulunkulu,”\f + \fr 3.5 \fr*\ft AmaNani 12.7\ft*\f* efakaza lokho okwakuzatshiwo ensukwini ezizayo. 
\v 6 Kodwa uKhristu uthembekile njengendodana endlini kaNkulunkulu. Njalo thina siyindlu yakhe nxa sibambelela ngesibindi langethemba lethu esizincoma ngakho.
\s1 Isixwayiso Ngokungakholwa
\p
\v 7 Ngakho, njengoba uMoya oNgcwele esithi:
\q1 “Lamuhla nxa lisizwa ilizwi lakhe,
\q2
\v 8 lingazenzi zibe lukhuni inhliziyo zenu,
\q1 njengelakwenza ekuhlamukeni,
\q2 ngesikhathi sokulingwa enkangala,
\q1
\v 9 lapho okhokho benu abangihlola khona bangilinga,
\q2 babona engakwenzayo okweminyaka engamatshumi amane.
\q1
\v 10 Yikho-nje ngasithukuthelela isizukulwane leso,
\q2 njalo ngathi, ‘Inhliziyo zabo zihlezi ziduka,
\q2 njalo kabazazanga izindlela zami.’
\q1
\v 11 Ngakho ngamemezela ngesifungo ekuthukutheleni kwami ngathi,
\q2 ‘Kabayikungena ekuphumuleni kwami.’\f + \fr 3.11 \fr*\ft AmaHubo 95.7-11\ft*\f*”
\p
\v 12 Bonani bazalwane ukuthi kakho omunye wenu olenhliziyo yokona lokungakholwa, ephambukayo kuNkulunkulu ophilayo. 
\v 13 Kodwa khuthazanani insuku zonke kusabizwa ngokuthi lamuhla, ukuze angabikhona owenu oba lukhuni ngenxa yokukhohliswa yisono. 
\v 14 Ngoba sesingabahlanganyelayo kuKhristu nxa sibambelele ngokuqina kuze kuphele ithemba esasilalo kuqala. 
\v 15 Njengoba kutshiwo ukuthi:
\q1 “Lamuhla nxa lisizwa ilizwi lakhe,
\q2 lingazenzi zibe lukhuni inhliziyo zenu
\q2 njengelakwenzayo ekuhlamukeni.”\f + \fr 3.15 \fr*\ft AmaHubo 95.7-8\ft*\f*
\p
\v 16 Babengobani labo abezwayo basebehlamuka na? Akusibo yini bonke labo uMosi abakhupha eGibhithe na? 
\v 17 Njalo ngobani ayebathukuthelele okweminyaka engamatshumi amane na? Akusibo yini labo abonayo, abazidumbu zabo zawela enkangala na? 
\v 18 Ngobani uNkulunkulu abafungela ukuthi kabayikungena ekuphumuleni kwakhe nxa kungayisibo labo abangalalelanga na? 
\v 19 Ngakho siyabona ukuthi babengeke bangene ngenxa yokungakholwa kwabo.
\c 4
\s1 Ukuphumula Kwabantu BakaNkulunkulu NgeSabatha
\p
\v 1 Ngakho-ke, njengoba isithembiso sokungena ekuphumuleni kwakhe silokhu sikhona, kasiqapheleni ukuba kakho phakathi kwenu otholakala engafinyeleli kuso. 
\v 2 Ngoba ivangeli latshunyayelwa kithi njengakubo; kodwa ilizwi abalizwayo lalingelasizo kubo ngoba labo abalizwayo kabalihlanganisanga lokholo. 
\v 3 Thina esakholwayo siyangena kulokho kuphumula njengoba uNkulunkulu etshilo ukuthi:
\q1 “Ngakho ngamemezela ngesifungo
\q2 ekuthukutheleni kwami ngathi,
\q2 ‘Kabayikungena ekuphumuleni kwami.’\f + \fr 4.3 \fr*\ft AmaHubo 95.11\ft*\f*”
\m Kodwa umsebenzi wakhe wapheleliswa ekudalweni komhlaba. 
\v 4 Ngoba kwenye indawo ukhulume ngosuku lwesikhombisa ngala amazwi athi: “Ngakho ngosuku lwesikhombisa uNkulunkulu waphumula kuwo wonke umsebenzi wakhe.”\f + \fr 4.4 \fr*\ft UGenesisi 2.2\ft*\f* 
\v 5 Njalo endimeni engaphezulu uthi, “Kabayikungena ekuphumuleni kwami.”\f + \fr 4.5 \fr*\ft AmaHubo 95.11\ft*\f*
\p
\v 6 Kulokhu kunjalo ukuthi abanye bazangena kulokho kuphumula, lalabo ivangeli elatshunyayelwa kubo kuqala kabangenanga ngenxa yokungalaleli kwabo. 
\v 7 Ngakho uNkulunkulu wabuya wamisa olunye usuku, elubiza ngokuthi Lamuhla, lapho kwathi emva kwesikhathi eside wakhuluma ngoDavida, njengokwakutshiwo mandulo ukuthi:
\q1 “Lamuhla nxa lisizwa ilizwi lakhe,
\q2 lingazenzi zibe lukhuni inhliziyo zenu.”\f + \fr 4.7 \fr*\ft AmaHubo 95.7-8\ft*\f*
\m
\v 8 Ngoba aluba uJoshuwa wayebanikile ukuphumula, ngabe uNkulunkulu kakhulumanga muva ngolunye usuku. 
\v 9 Ngakho kulokhu kukhona ukuphumula kweSabatha kwabantu bakaNkulunkulu; 
\v 10 ngoba loba ngubani ongena ekuphumuleni kukaNkulunkulu uyaphumula lakowakhe umsebenzi njengokwenziwa nguNkulunkulu kowakhe. 
\v 11 Ngakho-ke, kasenzeni imizamo yonke ukuba singene kulokho ukuphumula, ukuze angabikhona ozawiswa yikulandela isibonelo sakhe sokungalaleli.
\p
\v 12 Ilizwi likaNkulunkulu liyaphila njalo liyasebenza. Libukhali kulenkemba esika inxa zombili, ingena ize yehlukanise umphefumulo lomoya, amalunga lomnkantsho; lahlulela imicabango lomumo wenhliziyo. 
\v 13 Kukho konke okudaliweyo akulalutho olufihlakeleyo emehlweni kaNkulunkulu. Konke kwambuliwe kwabekwa obala phambi kwamehlo akhe yena okumele sizibike kuye.
\s1 UJesu UmPhristi Omkhulu
\p
\v 14 Ngakho-ke, njengoba silomphristi omkhulu kakhulu osengene emazulwini, uJesu iNdodana kaNkulunkulu, kasibambeleleni kakhulu okholweni esiluvumayo. 
\v 15 Ngoba kasilamphristi omkhulu onganelisiyo ukusizwela ebuthakathakeni bethu kodwa silaye oseke walingwa ngezindlela zonke njengathi kodwa akazange one. 
\v 16 Kasisondeleni esihlalweni sobukhosi somusa ngesibindi ukuze samukele isihawu njalo sithole umusa wokusisiza ezikhathini zokuswela kwethu.
\c 5
\p
\v 1 Wonke umphristi omkhulu ukhethwa ebantwini abekwe ukuba abamele ezindabeni ezimayelana loNkulunkulu, ukunikela izipho lemihlatshelo yezono. 
\v 2 Ulakho ukubaphatha ngesineke labo abangaziyo abadukayo, njengoba laye uqobo ephethwe yikuba buthakathaka. 
\v 3 Yikho-nje kumele anikele imihlatshelo yezono zakhe kanye leyezono zabantu. 
\v 4 Kakho ozethesa udumo lolu phezu kwakhe; kumele abizwe nguNkulunkulu njengo-Aroni.
\p
\v 5 Ngakho loKhristu kazethesanga udumo lokuba ngumphristi omkhulu. Kodwa uNkulunkulu wathi kuye,
\q1 “Wena uyiNdodana yami;
\q2 lamuhla sengibe nguYihlo.”\f + \fr 5.5 \fr*\ft AmaHubo 2.7\ft*\f*
\m
\v 6 Njalo kwenye indawo uthi,
\q1 “Wena ungumphristi kuze kube nini lanini,
\q2 emkhondweni kaMelikhizedekhi.”\f + \fr 5.6 \fr*\ft AmaHubo 110.4\ft*\f*
\p
\v 7 Ngensuku zokuphila kukaJesu emhlabeni, wakhuleka wacela ngokukhala kakhulu langezinyembezi kuye lowo owayengamphephisa ekufeni njalo wezwakala ngenxa yokuzehlisa kwakhe okuhloniphekayo. 
\v 8 Lanxa wayeyindodana wafunda ukulalela kulokhu ahlupheka ngakho, 
\v 9 kwathi lapho esephelelisiwe, waba ngumthombo wokusindiswa okulaphakade wabo bonke abamlalelayo 
\v 10 wasekhethwa nguNkulunkulu ukuba abe ngumphristi omkhulu, emkhondweni kaMelikhizedekhi.
\s1 Isixwayiso Ngokuhlamuka
\p
\v 11 Kunengi esingakutsho ngalokho kodwa kunzima ukuchaza ngoba liyaphuza ukufunda. 
\v 12 Ngeqiniso, lanxa ngalesisikhathi lifanele ukuba ngabafundisayo, liswela omunye ukuba alifundise amaqiniso okuqala elizwi likaNkulunkulu. Lifuna uchago, hatshi ukudla okuqinileyo! 
\v 13 Lowo ophila ngochago, ulokhu elusane, kayazi imfundiso emayelana lokulunga. 
\v 14 Kodwa ukudla okuqinileyo ngokwabakhulileyo asebazifundisa ukwehlukanisa okuhle kokubi.
\c 6
\p
\v 1 Ngakho kasiyekeleni imfundiso elula ngoKhristu siqhubeke siye ekukhuleni. Kasingasibeki futhi isisekelo sokuphenduka ezenzweni eziholela ekufeni, lezokukholwa kuNkulunkulu, 
\v 2 lemfundiso ngemibhaphathizo, lokubekwa kwezandla, lokuvuka kwabafileyo kanye lokwahlulelwa okulaphakade. 
\v 3 Njalo nxa uNkulunkulu evuma sizakwenza njalo.
\p
\v 4 Akwenzakali kulabo asebake bakhanyiselwa, asebenambithe isipho sasezulwini, asebehlanganyele kuMoya oNgcwele, 
\v 5 asebenambithe ubumnandi belizwi likaNkulunkulu kanye lamandla esikhathi esizayo, 
\v 6 njalo nxa behlamuka ukuba babuyiselwe ekuphendukeni ngoba ekulahlekelweni kwabo bayayibethela futhi esiphambanweni iNdodana kaNkulunkulu beyethesa ihlazo phambi kwabantu bonke. 
\v 7 Umhlabathi onatha izulu elihlezi lisina phezu kwawo loveza isilimo esilusizo kulabo abawulimayo uthola isibusiso sikaNkulunkulu. 
\v 8 Kodwa umhlabathi oveza ameva lokhula kawulasizo njalo usengozini yokuqalekiswa. Ekucineni uzatshiswa.
\p
\v 9 Kodwa lanxa sikhuluma kanje bazalwane abathandekayo, silethemba lezinto ezingcono ngani, izinto ezilokwenza lokusindiswa. 
\v 10 UNkulunkulu ulungile, kasoke awukhohlwe umsebenzi wenu lothando elamtshengisa lona njengoba lasiza abantu bakhe njalo liyaqhubeka libasiza. 
\v 11 Sifuna omunye lomunye wenu abonakalise ukukhuthala lokhu kuze kube sekupheleni ukuze ithemba lenu liqiniseke. 
\v 12 Kasifuni ukuba libe ngamavila kodwa ukuba lilingisele labo okwathi ngokukholwa langokubekezela bathola ilifa lalokhu okwakuthenjisiwe.
\s1 Ubuqotho Besithembiso SikaNkulunkulu
\p
\v 13 Lapho uNkulunkulu esenza isithembiso sakhe ku-Abhrahama, njengoba wayengekho omkhulu ayengafunga ngaye, wafunga ngaye yena ngokwakhe 
\v 14 esithi, “Ngempela ngizakubusisa njalo ngikuphe inzalo enengi.”\f + \fr 6.14 \fr*\ft UGenesisi 22.17\ft*\f* 
\v 15 Ngakho emva kokulinda ngokubekezela, u-Abhrahama wathola okwakuthenjisiwe.
\p
\v 16 Abantu bafunga ngomunye omkhulu kulabo njalo isifungo siqinisa lokho okutshiwoyo siqede lokuphikisana konke. 
\v 17 Njengoba uNkulunkulu wathanda ukuba enze ukungaguquki kwesimo senhloso yakhe kube sobala kuzindlalifa zalokho okwathenjiswayo, wakuqinisa ngesifungo. 
\v 18 UNkulunkulu wenza lokhu ukuze kuthi ngezinto ezimbili ezingaguqulekiyo, uNkulunkulu angeke aqambe amanga ngazo, thina esibaleke sabambelela ethembeni esiliphiwayo sikhuthazeke kakhulu. 
\v 19 Silethemba leli njengensika yemiphefumulo yethu, eliqinileyo njalo eligxilileyo. Lingena endaweni engcwele yangaphakathi ngemva kwamakhetheni 
\v 20 lapho uJesu owahamba phambi kwethu angena khona ngenxa yethu. Usebe ngumphristi omkhulu emkhondweni kaMelikhizedekhi kuze kube nini lanini.
\c 7
\s1 UMelikhizedekhi Umphristi
\p
\v 1 UMelikhizedekhi lo wayeyinkosi yaseSalemu lomphristi kaNkulunkulu oPhezukonke. Wahlangabeza u-Abhrahama evela kwehlula amakhosi, wambusisa, 
\v 2 u-Abhrahama wamnika okwetshumi kwakho konke. Okwakuqala, ibizo elithi Melikhizedekhi litsho ukuthi “Nkosi yokulunga”; lokuthi futhi, “Nkosi yaseSalemu” kutsho ukuthi “Nkosi yokuthula.” 
\v 3 Engelayise loba unina, engelamdabuko, engelakuqala kwensuku loba ukuphela kokuphila njengeNdodana kaNkulunkulu uhlezi engumphristi nini lanini.
\p
\v 4 Ake licabange ukuthi wayemkhulu kangakanani: Lokhokho u-Abhrahama wamnika okwetshumi kwempango! 
\v 5 Khathesi umthetho ufuna abenzalo kaLevi ababa ngabaphristi ukuba baqoqe okwetshumi ebantwini, lokhu kutsho abafowabo lanxa abafowabo beyinzalo ka-Abhrahama. 
\v 6 Umuntu lo kazange alonde umdabuko wakhe usukela kuLevi kodwa waqoqa okwetshumi ku-Abhrahama njalo wambusisa yena lowo owayelezithembiso. 
\v 7 Kakulakuthandabuza ukuthi umuntu omncinyane ubusiswa ngomkhulu. 
\v 8 Kwesinye isehlakalo, okwetshumi kuthathwa ngabantu abafayo kodwa kwesinye isehlakalo kube ngulowo okuthiwe uyaphila. 
\v 9 Umuntu angatsho lokuthi uLevi oqoqa okwetshumi, wanikela okwetshumi ngo-Abhrahama 
\v 10 ngoba lapho uMelikhizedekhi ehlangabeza u-Abhrahama uLevi wayelokhu esesemzimbeni kakhokho wakhe.
\s1 UJesu NjengoMelikhizedekhi
\p
\v 11 Nxa ukuphelela kwakungatholakala ngobuphristi babaLevi njalo ngempela umthetho owaphiwa abantu wasungula lobobuphristi, pho kungani kwakulokhu kudingeka ukuba omunye umphristi abuye evela emkhondweni kaMelikhizedekhi, engasiwemkhondweni ka-Aroni na? 
\v 12 Ngoba lapho kulokuguqulwa kobuphristi, kufanele kube lokuguqulwa komthetho futhi. 
\v 13 Yena lowo okutshiwo lezizinto ngaye ngowesinye isizwana njalo kakho owalesosizwana owake wakhonza e-alithareni. 
\v 14 Ngoba kusobala ukuba iNkosi yethu yadabuka koJuda njalo mayelana lalesosizwana uMosi katshongo lutho ngabaphristi. 
\v 15 Njalo lokhu esesikutshilo kucace kakhulu nxa omunye umphristi onjengoMelikhizedekhi evela, 
\v 16 omunye obe ngumphristi kungayisikho komthetho ngokosendo lwakhe kodwa ngokumayelana lamandla okuphila okungeke kuchithwe. 
\v 17 Ngoba kumenyezelwe ukuthi:
\q1 “Wena ungumphristi kuze kube nini lanini,
\q2 emkhondweni kaMelikhizedekhi.”\f + \fr 7.17 \fr*\ft AmaHubo 110.4\ft*\f*
\p
\v 18 Umthetho wakuqala ubekwe eceleni ngoba wawubuthakathaka njalo ungelasizo 
\v 19 (ngoba umthetho kawenzanga lutho olupheleleyo) ngakho kulethwa ithemba elitsha esisondela ngalo kuNkulunkulu.
\p
\v 20 Njalo kwakungayisikho ngaphandle kwesifungo! Abanye babangabaphristi kungekho sifungo, 
\v 21 kodwa yena waba ngumphristi ngesifungo lapho uNkulunkulu athi kuye:
\q1 “INkosi ifungile
\q2 njalo kayiyikuguqula ingqondo yayo:
\q2 ‘Wena ungumphristi kuze kube nini lanini.’\f + \fr 7.21 \fr*\ft AmaHubo 110.4\ft*\f*”
\m
\v 22 Ngenxa yesifungo lesi, uJesu usebe yisiqiniselo sesivumelwano esingcono.
\p
\v 23 Abaphristi labo sebebanengi njengoba babevinjelwa yikufa ukuba baqhubeke besezikhundleni; 
\v 24 kodwa uJesu uphila kuze kube laphakade, ulobuphristi obuyisimakade. 
\v 25 Ngakho ulamandla okubasindisa ngokupheleleyo labo abeza kuNkulunkulu ngaye ngoba uhlezi ephilela ukubancengela.
\p
\v 26 Umphristi omkhulu onjalo wagcwalisa izinswelo zethu, ongongcwele, ongelasici, lohlanzekileyo, lowehlukaniswe lezoni, lophakanyiselwe ngaphezu kwamazulu. 
\v 27 Hatshi njengabanye abaphristi abakhulu, yena kadingi kunikela imihlatshelo insuku zonke, kuqala eyezono zakhe, kulandele owezono zabantu. Wabenzela umhlatshelo wezono zabo kwaba kanye kuphela lapho ezinikela. 
\v 28 Ngoba umthetho ubeka abantu ababuthakathaka ukuba ngabaphristi abakhulu kodwa isifungo eseza emva komthetho sabeka iNdodana eyenziwe yaba ngepheleleyo kuze kube nininini.
\c 8
\s1 Umphristi Omkhulu Wesivumelwano Esitsha
\p
\v 1 Isiqokoqela salokho esikutshoyo yilesi: Silaye umphristi omkhulu onjalo, owahlala phansi esandleni sokunene kwesihlalo sobukhosi soMkhulu ezulwini, 
\v 2 okhonzayo endaweni engcwele, ithabanikeli eliqotho elamiswa yiNkosi hatshi ngabantu.
\p
\v 3 Umphristi omkhulu ngamunye ubekelwe ukunikela izipho lemihlatshelo, ngakho kwakufanele ukuba lalo abe lolutho alunikelayo. 
\v 4 Aluba wayesemhlabeni wayengayikuba ngumphristi ngoba bevele bekhona abantu abanikela izipho eziphawulwa ngumthetho. 
\v 5 Bakhonza endaweni engcwele engumfanekiso lesithunzi salokho okusezulwini. Yikho-nje uMosi waxwayiswa lapho esezakwakha ithabanikeli ngokuthi: “Qaphela ukuba wenze konke njengalokhu owakutshengiswa entabeni.”\f + \fr 8.5 \fr*\ft U-Eksodasi 25.40\ft*\f* 
\v 6 Kodwa inkonzo uJesu ayemukeleyo ingcono kuleyabo njengesivumelwano yena angumeli waso singcono kulesidala njalo sakhelwe phezu kwezithembiso ezingcono.
\p
\v 7 Ngoba aluba kwakungelalutho olungalunganga kusivumelwano sakuqala leso, akulasizatho esasingadingelwa esinye. 
\v 8 Kodwa uNkulunkulu wathola isici ebantwini wasesithi:
\q1 “Isikhathi siyeza, kutsho iNkosi,
\q2 lapho engizakwenza khona isivumelwano esitsha
\q1 lendlu ka-Israyeli
\q2 kanye lendlu kaJuda.
\q1
\v 9 Kasiyikufana lesivumelwano
\q2 engasenza labokhokho babo
\q1 lapho engababamba khona ngesandla
\q2 ukuba ngibakhuphe eGibhithe,
\q1 ngoba kabaqhubekanga bethembekile esivumelwaneni sami,
\q2 ngasengibadela,
\q2 kutsho iNkosi.
\q1
\v 10 Nansi isivumelwano engizasenza lendlu ka-Israyeli,
\q2 ngemva kwalesosikhathi, kutsho iNkosi.
\q1 Ngizabeka imithetho yami ezingqondweni zabo,
\q2 ngiyilobe ezinhliziyweni zabo.
\q1 Ngizakuba nguNkulunkulu wabo,
\q2 bona babengabantu bami.
\q1
\v 11 Umuntu kasayikufundisa umakhelwane wakhe,
\q2 kumbe umfowabo, esithi, ‘Yazi iNkosi,’
\q1 ngoba bonke bazangazi,
\q2 kusukela komncinyane wabo kusiya komkhulu.
\q1
\v 12 Ngoba ngizabathethelela ububi babo,
\q2 njalo angiyikukhumbula izono zabo futhi.”\f + \fr 8.12 \fr*\ft UJeremiya 31.31-34\ft*\f*
\p
\v 13 Ngokuthi isivumelwano lesi “sitsha” wenze esakuqala sangasasebenzi; futhi okungasasebenzi lokugugileyo kuzanyamalala masinyane.
\c 9
\s1 Inkonzo Ethabanikeleni Lasemhlabeni
\p
\v 1 Isivumelwano sakuqala sasilezimiso zokukhonza kanye lendawo engcwele yasemhlabeni. 
\v 2 Kwakhiwa ithabanikeli. Ekamelweni lalo lakuqala kwakuloluthi lwesibane, letafula kanye lesinkwa esingcwelisiweyo; lokhu kwakubizwa ngokuthi yiNdawo eNgcwele. 
\v 3 Ngemva kwekhetheni lesibili kwakulekamelo elalithiwa yiNdawo eNgcwelengcwele, 
\v 4 eyayile-alithare lokutshisela impepha elalihuqwe ngegolide kanye lomtshokotsho wesivumelwano owawuhuqwe ngegolide. Umtshokotsho wakhona wawulembizanyana yemana, lentonga ka-Aroni eyahlumayo kanye lezibhebhedu zamatshe esivumelwano. 
\v 5 Phezu komtshokotsho kwakulamakherubhi eNkazimulo enze ithunzi phezu kwendawo yomhlatshelo. Kodwa khathesi asingeke silandise okugcweleyo ngalezozinto.
\p
\v 6 Kwathi konke sekulungisiwe kanje, abaphristi bangena njalonjalo ekamelweni langaphandle ukuba benze inkonzo yabo. 
\v 7 Kodwa umphristi omkhulu nguye kuphela owayengena ekamelweni langaphakathi kanye ngomnyaka, njalo kungeke kwenzeke engelagazi alinikelela yena kanye lezono abantu abazenza bengazi. 
\v 8 UMoya oNgcwele wayetshengisa ngalokho ukuthi indlela eya eNdaweni eNgcwelengcwele yayingabonakaliswa nxa ithabanikeli lakuqala lilokhu likhona. 
\v 9 Lokhu kungumfanekiso walesisikhathi, okubonakalisa ukuthi izipho lemihlatshelo okwakunikelwa kwakunganelisi ukuhlambulula izazela zabakhonzayo. 
\v 10 Kuyindaba yokudla lokunatha kuphela kanye lemikhuba eyehlukeneyo yokugeza imilayo yangaphandle komzimba esebenza kuze kufike isikhathi sezimiso ezintsha.
\s1 Igazi LikaKhristu
\p
\v 11 Kwathi lapho uKhristu esefikile njengomphristi omkhulu wezinto ezinhle esezikhona, wadabula phakathi kwethabanikeli elikhulu elipheleleyo elingenziwanga ngabantu, okuyikuthi, kalisingxenye yale indalo. 
\v 12 Kangenanga ngokusebenzisa igazi lembuzi loba elamathole; kodwa wangena kanye kuphela eNdaweni eNgcwelengcwele ngegazi lakhe, esethole ukuhlengwa okulaphakade. 
\v 13 Igazi lembuzi lelenkunzi lemilotha yamathokazi okufafazwa ebantwini abangahlambulukanga ngokomkhuba kuyabangcwelisa ukuba babe ngabahlambulukileyo ngaphandle. 
\v 14 Pho igazi likaKhristu, owazinikela engelasici kuNkulunkulu ngomoya olaphakade, lizazihlambulula kakhulu okungakanani izazela zethu emisebenzini edonsela ekufeni, ukuze sikhonze uNkulunkulu ophilayo!
\p
\v 15 Ngenxa yalokhu uKhristu ungumeli wesivumelwano esitsha ukuze kuthi labo ababiziweyo bathole ilifa elingapheliyo elathenjiswayo njengoba sewafa njengenhlawulo ukuba abakhulule ezonweni abazenzayo esivumelwaneni sakuqala.
\p
\v 16 Mayelana lentando yokwaba ilifa, kuyadingakala ukuba kufakazwe ukufa kwalowo owakwenzayo, 
\v 17 ngoba intando yokwaba ilifa isebenza kuphela lapho kukhona ofileyo; kayisebenzi nxa lowo owayenzayo elokhu esaphila. 
\v 18 Yikho-nje lesivumelwano sakuqala kasifezwanga kungekho gazi. 
\v 19 Kwathi uMosi esememezele imilayo yonke yomthetho ebantwini bonke, wathatha igazi lamathole lelempongo ndawonye lamanzi, lewulu ebomvu kanye lezingatsha zehisophi, wachela umqulu kanye labantu bonke. 
\v 20 Wathi, “Leli ligazi lesivumelwano uNkulunkulu alaye ukuba lisigcine.”\f + \fr 9.20 \fr*\ft U-Eksodasi 24.8\ft*\f* 
\v 21 Ngendlela efanayo wachela ithabanikeli ngegazi kanye lezinto zonke ezisetshenziswayo emikhosini yalo. 
\v 22 Ngempela umthetho uphose ufune ukuba izinto zonke zihlanjululwe ngegazi, njalo kungekho kuchithwa kwegazi akukho ukuthethelela.
\p
\v 23 Ngakho kwakufanele ukuba imifanekiso yezinto zasezulwini zihlanjululwe ngemihlatshelo le kodwa izinto zasezulwini uqobo kube ngemihlatshelo engcono kulale. 
\v 24 Ngoba uKhristu kangenanga endaweni engcwele eyenziwa ngabantu eyayingumfanekiso waleyo eqotho kuphela; yena wangena ezulwini uqobo, ukuba asimele phambi kukaNkulunkulu. 
\v 25 Kangenanga ezulwini ukuba azinikele njalonjalo, njengomphristi omkhulu engena eNdaweni eNgcwelengcwele minyaka yonke legazi elingayisilo lakhe. 
\v 26 Ngakho uKhristu wayezahlupheka kanengi kusukela ekudalweni komhlaba. Kodwa khathesi usebonakale kanye kuphela ekupheleni kwezikhathi ukuba asuse isono ngomhlatshelo onguye. 
\v 27 Njengalokhu umuntu wamiselwa ukufa kanye, kuthi emva kwalokho abhekane lokwahlulelwa, 
\v 28 ngokunjalo uKhristu wanikelwa kanye ukuba asuse izono zabantu abanengi; njalo uzabonakala okwesibili, hatshi ukuthwala isono, kodwa ukuletha ukusindiswa kulabo abamlindeleyo.
\c 10
\s1 Umhlatshelo KaKhristu Kanye Kuphela
\p
\v 1 Umthetho uyisithunzi nje sezinto ezinhle ezizayo kodwa hatshi lokho okuyikho uqobo. Ngenxa yemihlatshelo efanayo ephindwaphindwa kokuphela iminyaka leminyaka ayingeke ibenze baphelele labo abasondela ekukhonzeni. 
\v 2 Aluba wawusanelisa, imihlatshelo yayingayikuyekelwa ukunikelwa na? Ngoba abakhonzayo babezahlanjululwa kube kanye kuphela, njalo babengasayikuzizwa belecala lezono zabo. 
\v 3 Kodwa imihlatshelo iyisikhumbuzo sezono zeminyaka yonke, 
\v 4 ngoba akwenzakali ukuba igazi lenkunzi lelembuzi lisuse izono.
\p
\v 5 Ngakho-ke, uKhristu esefikile emhlabeni wathi:
\q1 “Umhlatshelo lomnikelo kawukufunanga,
\q2 kodwa wena wangilungisela umzimba;
\q1
\v 6 kawuthokozanga
\q2 ngeminikelo yokutshiswa leminikelo yesono.
\q1
\v 7 Ngasengisithi, ‘Ngilapha,
\q2 kulotshiwe ngami emqulwini,
\q1 ngilande ukuzokwenza intando yakho,
\q2 Oh Nkulunkulu.’\f + \fr 10.7 \fr*\ft AmaHubo 40.6-8\ft*\f*”
\m
\v 8 Kuqala wathi, “Imihlatshelo leminikelo, iminikelo yokutshiswa kanye leminikelo yesono kawuyifunanga, njalo kayikuthokozisanga” (lanxa umthetho usithi kayenziwe). 
\v 9 Wabuya wathi, “Ngilapha, ngilande ukuzokwenza intando yakho.” Ususa okokuqala ukuze amise okwesibili. 
\v 10 Njalo ngaleyontando senziwe saba ngcwele ngomhlatshelo womzimba kaJesu Khristu kanye kuphela.
\p
\v 11 Insuku zonke umphristi uyema enze imisebenzi yakhe yenkonzo, anikele njalonjalo imihlatshelo minye, engeke isuse izono. 
\v 12 Kodwa kwathi umphristi lo esenikelele izikhathi zonke umhlatshelo owodwa wezono, wahlala phansi esandleni sokunene sikaNkulunkulu. 
\v 13 Kusukela ngalesosikhathi ulindele izitha zakhe ukuba zibe yisenabelo sakhe, 
\v 14 ngoba ngomhlatshelo owodwa usephelelise nini lanini labo abenziwayo ukuba ngcwele.
\p
\v 15 LoMoya oNgcwele uyafakaza kithi ngalokho. Kuqala uthi:
\q1
\v 16 “Lesi yisivumelwano engizasenza labo
\q2 emva kwalesosikhathi, kutsho iNkosi.
\q1 Ngizafaka imithetho yami ezinhliziyweni zabo
\q2 ngiyilobe lasezingqondweni zabo.”\f + \fr 10.16 \fr*\ft UJeremiya 31.33\ft*\f*
\m
\v 17 Wabuya wengeza wathi:
\q1 “Izono zabo lezenzo zokungabi lomthetho,
\q2 angiyikukhumbula futhi.”\f + \fr 10.17 \fr*\ft UJeremiya 31.34\ft*\f*
\m
\v 18 Nxa lezi sezithethelelwe, kawusekho umhlatshelo wesono.
\s1 Inkuthazo Yokubekezela
\p
\v 19 Ngakho-ke, bazalwane, njengoba silethemba lokungena eNdaweni eNgcwelengcwele ngegazi likaJesu, 
\v 20 ngendlela entsha ephilayo, esiyivulelwe ekhethenini, okuyikuthi umzimba wakhe, 
\v 21 njalo njengoba silomphristi omkhulu ophethe indlu kaNkulunkulu, 
\v 22 kasisondeleni kuNkulunkulu ngezinhliziyo eziqotho ngethemba elipheleleyo lokholo; sibe lezinhliziyo ezicheliweyo ukuba sihlanjululwe isazela secala lemizimba yethu igeziswe ngamanzi ahlanzekileyo. 
\v 23 Kasibambeleleni ngokuqina kulo ithemba esilikholwayo, ngoba lowo owathembisayo uthembekile. 
\v 24 Njalo kasicabangeni ukuba singakhuthazana njani ethandweni lasezenzweni ezinhle. 
\v 25 Kasingakudeli ukuhlangana, njengalokhu abanye abajayele ukukwenza kodwa kasikhuthazaneni ikakhulu njengoba sibona uSuku lusondela.
\p
\v 26 Nxa siqhubeka sisenza izono ngabomu emva kokuba iqiniso sesilazi, kawusekho umhlatshelo wezono, 
\v 27 kodwa umlindelo owesabekayo wokwahlulelwa kuphela kanye lomlilo ovuthayo ozaqothula izitha zikaNkulunkulu. 
\v 28 Owawalayo umthetho kaMosi wafa kungela sihawu ngobufakazi babafakazi ababili kumbe abathathu. 
\v 29 Pho licabanga ukuthi ufanele ukujeziswa kakhulu kangakanani umuntu owanyathela iNdodana kaNkulunkulu ngaphansi konyawo, ophathe igazi lesivumelwano elamenza waba ngcwele njengento engangcwele, lohlambaza uMoya womusa na? 
\v 30 Ngoba thina siyamazi lowo owathi, “Ukuphindisela ngokwami; ngizabuyisela,”\f + \fr 10.30 \fr*\ft UDutheronomi 32.35\ft*\f* njalo wathi, “INkosi izakwahlulela abantu bayo.”\f + \fr 10.30 \fr*\ft UDutheronomi 32.36; AmaHubo 135.14\ft*\f* 
\v 31 Kuyinto eyesabekayo ukuwela ezandleni zikaNkulunkulu ophilayo.
\p
\v 32 Khumbulani insuku zakuqala leziyana emva kokuba selamukele ukukhanya, lapho elaqinisela khona ebunzimeni obukhulu phakathi kokuhlupheka. 
\v 33 Ngezinye izikhathi lenziwa umbukiso wokuhlanjazwa lokuhlukuluzwa; kwathi ngezinye izikhathi lamanyana lalabo ababephathwa kanjalo. 
\v 34 Laba lozwelo kulabo ababesentolongweni, lamukela ngentokozo ukuthunjwa kwempahla yenu, ngoba lalikwazi ukuthi lina lilempahla engcono engapheliyo. 
\v 35 Ngakho lingalilahli ithemba lenu; lizavuzwa ngokunengi.
\p
\v 36 Kuyadingeka ukuba libekezele ukuze kuthi lapho seliyenzile intando kaNkulunkulu, lamukele lokho akuthembisayo. 
\v 37 Ngoba,
\q1 “Ngesikhatshana nje,
\q2 lowo ozayo uzafika
\q2 njalo kasoze aphuze.”
\m
\v 38 Kodwa,
\q1 “Olungileyo wami uzaphila ngokukholwa.
\q2 Angahlehlela emuva,
\q2 kangiyikuthokoza ngaye.”\f + \fr 10.38 \fr*\ft UHabhakhukhi 2.3-4\ft*\f*
\m
\v 39 Kodwa thina kasisibo balabo abahlehlela emuva babhujiswe, kodwa labo abakholwayo basindiswe.
\c 11
\s1 Imisebenzi Yokukholwa
\p
\v 1 Ukukholwa yikuba leqiniso lalokhu esikulindeleyo njalo kuqinisekile ngalokho esingakuboniyo. 
\v 2 Lokhu yikho abendulo abanconywa ngakho.
\p
\v 3 Ngokukholwa siyezwisisa ukuthi izulu lomhlaba kwadalwa ngokulaya kukaNkulunkulu, ngoba okubonakalayo kakwenziwanga ngalokho okwakubonakala.
\p
\v 4 Ngokukholwa u-Abheli wanikela kuNkulunkulu umnikelo omuhle kulokaKhayini. Ngokukholwa wanconywa njengomuntu olungileyo, ngesikhathi uNkulunkulu ekhuluma kuhle ngeminikelo yakhe. Njalo ngokukholwa ulokhu ekhuluma, lanxa sewafa.
\p
\v 5 Ngokukholwa u-Enoki wasuswa kulumhlaba ephila ukuze angakuzwa ukufa: “Kabonakalanga ngoba uNkulunkulu wayesemthethe.”\f + \fr 11.5 \fr*\ft UGenesisi 5.24\ft*\f* Engakathathwa, wayenconywe njengowayethokozise uNkulunkulu. 
\v 6 Kungelakukholwa akweneliseki ukumthokozisa uNkulunkulu ngoba oza kuye kumele akholwe ukuthi ukhona lokuthi uyabanika umvuzo labo abamdinga ngobuqotho.
\p
\v 7 Ngokukholwa uNowa esexwayisiwe ngezinto ezazingakabonakali, ngokwesaba okungcwele wakha umkhumbi ukuba ahlenge abendlu yakhe. Ngokukholwa kwakhe wawulahla umhlaba waba yindlalifa yokulunga okuza ngokukholwa.
\p
\v 8 Ngokukholwa u-Abhrahama esebizelwe ukuba aye endaweni ayezayamukela muva njengelifa lakhe, walalela wahamba, lanxa wayengakwazi lapho ayesiya khona. 
\v 9 Ngokukholwa wahlala elizweni lesithembiso njengesihambi, elizweni elingayisilo lakibo; wahlala emathenteni, njengokwenziwa ngu-Isaka loJakhobe, ababezindlalifa zalelolizwe lesithembiso kanye laye. 
\v 10 Ngoba wayelindele idolobho elilezisekelo, elimcandi walo lomakhi walo nguNkulunkulu. 
\v 11 Ngokukholwa, lanxa u-Abhrahama wayeseluphele loSara eyinyumba, wanikwa amandla okuba lomntwana ngoba wambona njengothembekileyo lowo owayenze isithembiso. 
\v 12 Ngakho-ke, kusukela kulumuntu oyedwa, owayefana lofileyo, kwavela inzalo enengi njengezinkanyezi emkhathini njalo engeke ibalwe njengenhlabathi ekhunjini lolwandle.
\p
\v 13 Abantu bonke laba bafa belokhu bephila ngokukholwa. Kabazamukelanga izinto ezathenjiswayo; bazibona nje kuphela bazithakazelela zikude. Njalo bavuma ukuthi bona babeyizizwe lezihambi emhlabeni. 
\v 14 Abantu abakhuluma izinto ezinje babonakalisa ukuthi bafuna ilizwe elingelabo. 
\v 15 Aluba babecabanga ngelizwe abasuka kulo, babezakuba lethuba lokubuyela. 
\v 16 Kodwa-ke bona babefuna ilizwe elingcono, lona elisezulwini. Ngakho uNkulunkulu akumyangisi ukubizwa ngokuthi unguNkulunkulu wabo, ngoba usebalungisele idolobho.
\p
\v 17 Ngokukholwa, kwathi u-Abhrahama ehlolwa nguNkulunkulu, wanikela u-Isaka njengomhlatshelo. Yena owayamukele izithembiso wayeseseduze ukuba anikele indodana yakhe eyodwa njalo eyiyo kuphela, 
\v 18 lanxa uNkulunkulu wayethe kuye, “isizukulwane sakho sizabalwa ngo-Isaka.”\f + \fr 11.18 \fr*\ft UGenesisi 21.12\ft*\f* 
\v 19 U-Abhrahama wanakana ukuthi uNkulunkulu wayengabavusa abafileyo, njalo nxa kuzekeliswa, wamamukela u-Isaka evela ekufeni.
\p
\v 20 Ngokukholwa u-Isaka wabusisa uJakhobe lo-Esawu ngekusasa labo.
\p
\v 21 Ngokukholwa uJakhobe, esesifa wawabusisa wonke amadodana kaJosefa, wasekhonza eyame phezu kwentonga yakhe.
\p
\v 22 Ngokukholwa uJosefa, isiphetho sakhe sesisondele, walandisa ngokuphuma kwabako-Israyeli eGibhithe njalo walayezela ngamathambo akhe.
\p
\v 23 Ngokukholwa abazali bakaMosi bamfihla izinyanga ezintathu emva kokuzalwa kwakhe, ngoba babona ukuthi wayengasumntwana nje ojayelekileyo, njalo babengawesabi umthetho wenkosi.
\p
\v 24 Ngokukholwa uMosi esekhulile, wala ukuba aziwe njengendodana yendodakazi kaFaro. 
\v 25 Wakhetha ukuphathwa kubi kanye labantu bakaNkulunkulu kulokuba akholise injabulo yesono okwesikhathi esifitshane. 
\v 26 Wakhetha ihlazo ngenxa kaKhristu njengegugu elikhulu kulenotho yaseGibhithe ngoba wayekhangelele umvuzo phambili. 
\v 27 Ngokukholwa wasuka eGibhithe, engalwesabi ulaka lwenkosi; wabekezela ngoba wambona lowo ongabonakaliyo. 
\v 28 Ngokukholwa wagcina iPhasika lokuchelwa kwegazi, ukuze umbulali wamazibulo angawathinti amazibulo ako-Israyeli.
\p
\v 29 Ngokukholwa abantu badabula phakathi koLwandle oluBomvu njengasemhlabathini owomileyo, kodwa kwathi amaGibhithe ezama ukwenzanjalo agalula.
\p
\v 30 Ngokukholwa imiduli yaseJerikho yadilika emva kokuba abantu beyibhode okwensuku eziyisikhombisa.
\p
\v 31 Ngokukholwa uRahabi isifebe, ngoba wamukela inhloli, kabulawanga kanye lalabo ababengalaleli.
\p
\v 32 Kuyini okunye engingakutsho? Kangilasikhathi sokulandisa ngoGidiyoni, loBharakhi, loSamsoni, loJeftha, loDavida, loSamuyeli kanye labaphrofethi, 
\v 33 abanqoba imibuso ngokukholwa benza okulungileyo njalo bathola okwakuthenjisiwe; bona abavala imilomo yezilwane, 
\v 34 bacitsha ukuvutha kwamalangabi, baphepha lasebukhalini benkemba; ubuthakathaka babo baphenduka baba ngamandla; njalo baba lamandla empini bawachitha amabutho ezizweni. 
\v 35 Abesifazane bamukela abafayo babo sebevuselwe ekuphileni futhi. Abanye bahlukuluzwa njalo bala ukukhululwa, ukuze bathole ukuvuka ekufeni okuhle. 
\v 36 Abanye bahozwa batshaywa, kwathi abanye babotshwa ngamaketane bafakwa entolongweni. 
\v 37 Batshaywa ngamatshe, baqunywa ngesaha baba yiziqa ezimbili; babulawa ngenkemba. Bahamba begqoke izikhumba zezimvu lezikhumba zembuzi, beswela, behlukuluzwa, bephathwa kubi, 
\v 38 umhlaba kubo wawungabafanele. Bantula enkangala lasezintabeni lasezimbalwini kanye lasemilindini emhlabathini.
\p
\v 39 Bonke laba banconywa ngokukholwa kwabo, kodwa kakho phakathi kwabo owathola okwakuthenjisiwe. 
\v 40 Thina uNkulunkulu wayesimisele okuhle ukuze kuthi sebe kanye lathi bapheleliswe.
\c 12
\p
\v 1 Ngakho-ke, njengoba sihanqwe lixuku elikhulu kangaka labafakazi, kasikulahleni konke okusivimbelayo kanye lesono esisibopha lula njalo kasigijimeni ngokubekezela kulo umjaho ophawulelwe thina. 
\v 2 Kasikhangeleni kuJesu, uMqalisi loMphelelisi wokukholwa kwethu, okwathi ngentokozo eyayibekwe phambi kwakhe wabekezelela isiphambano, engananzi ihlazo laso, wahlala phansi esandleni sokunene sobukhosi sikaNkulunkulu. 
\v 3 Cabangani ngaye owabekezelela ukuphikiswa okungaka ngabantu abayizoni ukuze lingabi buthakathaka lilahle ithemba.
\s1 UNkulunkulu Ulaya Abantwana Bakhe
\p
\v 4 Ekulweni kwenu lesono, kalimelananga laso kwaze kwaba sebangeni lokuchitha igazi lenu. 
\v 5 Njalo selilikhohliwe lelizwi lokulikhuthaza elikhuluma kini njengamadodana elithi:
\q1 “Ndodana yami, ungeyisi ukulaya kweNkosi.
\q2 Njalo ungalahli ithemba lapho ikukhuza,
\q1
\v 6 ngoba uThixo ulaya labo abathandayo,
\q2 abuye ajezise bonke abamukela njengendodana.”\f + \fr 12.6 \fr*\ft Izaga 3.11-12\ft*\f*
\p
\v 7 Bekezelelani ukuhlupheka njengokulaywa; uNkulunkulu uliphatha njengabantwana bakhe. Kambe yibaphi abantwana abangalaywa nguyise na? 
\v 8 Nxa lingalaywa (umuntu wonke uyalaywa), liyabe lingabantwana abazalwa ngokungekho emthethweni njalo abangasiwo amadodana lamadodakazi uqobo. 
\v 9 Phezu kwalokho, sonke sake saba labobaba abasilayayo njalo sabahlonipha ngenxa yalokho. Pho kufanele sizehlise kakhulu okungakanani kuBaba wemimoya yethu njalo siphile! 
\v 10 Obaba basilaya okwesikhatshana ngababekubona kukuhle, kodwa uNkulunkulu usilaya ukuba sisizakale, ukuba sihlanganyele ebungcweleni bakhe. 
\v 11 Akukho kulaywa okukhanya kukuhle ngalesosikhathi, kodwa kubuhlungu. Kodwa muva, kuletha isivuno sokulunga lokuthula kulabo abafundiswa yikho.
\p
\v 12 Ngakho-ke, qinisani izingalo zenu ezibuthakathaka lamadolo enu axegayo. 
\v 13 “Lungiselani inyawo zenu izindlela ezibekekileyo,”\f + \fr 12.13 \fr*\ft Izaga 4.26\ft*\f* ukuze abaqhulayo bangagogeki, kodwa basiliswe.
\s1 Isixwayiso Ngokwala UNkulunkulu
\p
\v 14 Zamani kakhulu ukuhlalisana ngokuthula labantu bonke lokuba ngcwele; kungekho bungcwele kakho ozayibona iNkosi. 
\v 15 Bonani ukuthi kakho oswela umusa kaNkulunkulu kanye lokuthi akulampande ebabayo ekhulayo ukuba idale uhlupho ingcolise abanengi. 
\v 16 Bonani ukuthi kakho oyisifebe, loba ongakhonzi uNkulunkulu njengo-Esawu okwathi ngenxa yokudla kunye wathengisa amalungelo elifa lakhe okuba lizibulo. 
\v 17 Muva, njengoba lisazi, lapho esefuna ukuzuza isibusiso lesi waliwa. Wayengeke enze kube lokuguquka kwengqondo, lanxa wafuna isibusiso leso ngezinyembezi.
\s1 Intaba Yokwesaba Lentokozo
\p
\v 18 Kalizanga entabeni engathintwayo njalo ebhebha umlilo; ebumnyameni lasekufiphaleni lesiphepho; 
\v 19 ekukhaleni kwecilongo loba ilizwi elinjalo elikhulumayo, okwenza labo abalizwayo bacela ukuba kungabi lelizwi elikhulunywa kubo futhi, 
\v 20 ngoba babengeke bakumele ukulaywa okwakusithi: “Lenyamazana ingathinta intaba, kumele itshaywe ngamatshe.”\f + \fr 12.20 \fr*\ft U-Eksodasi 19.12-13\ft*\f* 
\v 21 Okwabonwayo kwakusesabeka kakhulu uMosi waze wathi, “Ngiyathuthumela ngenxa yokwesaba.”\f + \fr 12.21 \fr*\ft UDutheronomi 9.19\ft*\f*
\p
\v 22 Kodwa lina lize eNtabeni iZiyoni, iJerusalema lasezulwini, umuzi kaNkulunkulu ophilayo. Lize kuzinkulungwane lezinkulungwane zezingilosi ezihlangane ngentokozo 
\v 23 ebandleni lezibulo, ezimabizo azo alotshiwe ezulwini. Lize kuNkulunkulu, umahluleli wabantu bonke, emimoyeni yabantu abalungileyo abaphelelisiweyo, 
\v 24 kuJesu umeli wesivumelwano esitsha, lasegazini elicheliweyo elikhuluma ilizwi elihle kulegazi lika-Abheli.
\p
\v 25 Bonani ukuthi kalimenqabeli lowo okhulumayo. Nxa bengaphephanga lapho benqabela lowo owabaxwayisa emhlabeni, koba kuncane kangakanani kithi, nxa sidela lowo osixwayisa ezulwini na? 
\v 26 Ngalesosikhathi ilizwi lakhe lanyikinya umhlaba, kodwa khathesi usethembisile wathi: “Ngizaphinda njalo futhi nginyikinye, hatshi umhlaba kuphela, kodwa lamazulu futhi.”\f + \fr 12.26 \fr*\ft UHagayi 2.6\ft*\f* 
\v 27 Amazwi la “njalo futhi” atsho ukususwa kwalokho okunganyikinyiswa, okuyikuthi izinto ezadalwayo, ukuze kuthi lokho okungeke kunyikinyiswe kusale.
\p
\v 28 Ngakho-ke, njengoba sisamukela umbuso ongeke unyikinywe, kasibongeni njalo sikhonze uNkulunkulu ngokufaneleyo ngenhlonipho langokwesaba, 
\v 29 ngoba “uNkulunkulu wethu ungumlilo oqothulayo.”\f + \fr 12.29 \fr*\ft UDutheronomi 4.24\ft*\f*
\c 13
\s1 Izixwayiso Zokucina
\p
\v 1 Qhubekani lithandana njengabazalwane. 
\v 2 Lingakhohlwa ukwamukela izihambi ngoba ngokwenza njalo abanye abantu bamukela izingilosi bengazi. 
\v 3 Khumbulani abasentolongweni ngokungathi lani liyizibotshwa kanye labo, kanye lalabo abaphethwe kubi ngokungathi lani uqobo liyahlupheka.
\p
\v 4 Ukuthathana kumele kuhlonitshwe ngumuntu wonke, kuthi lomendlalo wokuthathana uhlale uhlambulukile ngoba uNkulunkulu uzakwahlulela isifebe labo bonke abahlobongayo. 
\v 5 Ekuphileni kwenu xwayani ukuthanda imali lisuthiseke ngalokho elilakho, ngoba uNkulunkulu wathi:
\q1 “Kangisoze ngilitshiye;
\q2 kangisoze ngilidele.”\f + \fr 13.5 \fr*\ft UDutheronomi 31.6\ft*\f*
\m
\v 6 Ngakho siyatsho ngethemba sithi:
\q1 “INkosi ingumsizi wami; kangiyikwesaba.
\q2 Umuntu angenzani kimi na?”\f + \fr 13.6 \fr*\ft AmaHubo 118.6-7\ft*\f*
\p
\v 7 Khumbulani abakhokheli benu, abakhuluma ilizwi likaNkulunkulu kini. Cabangani okwavela endleleni yokuphila kwabo lilingisele ukukholwa kwabo. 
\v 8 UJesu Khristu uyafana izolo lanamhla kanye laphakade.
\p
\v 9 Lingathatheki ngazozonke inhlobo zemfundiso engaziwayo. Kuhle ukuba inhliziyo zethu ziqiniswe ngumusa, hatshi yikudla komkhuba okungelasizo kulabo abakudlayo. 
\v 10 Thina sile-alithare lapho labo abakhonza ethabanikeleni bengelalungelo lokudlela kulo.
\p
\v 11 Umphristi omkhulu uletha igazi lezifuyo eNdaweni eNgcwelengcwele njengomnikelo wesono kodwa izidumbu zazo ziyatshiswa ngaphandle kwezihonqo. 
\v 12 Ngokunjalo uJesu laye wahlupheka ngaphandle kwesango ledolobho ukuba enze abantu bakhe babengcwele ngegazi lakhe. 
\v 13 Ngakho-ke, kasiyeni kuye ngaphandle kwezihonqo silehlazo alithwalayo. 
\v 14 Ngoba lapha kasiladolobho elimiyo njalo, kodwa sidinga idolobho elizayo.
\p
\v 15 Ngakho, ngoJesu kasinikeleni njalonjalo kuNkulunkulu umhlatshelo wokubonga, isithelo sezindebe ezivuma ibizo lakhe. 
\v 16 Njalo lingakhohlwa ukwenza okulungileyo kanye lokwabela abanye ngoba uNkulunkulu uyathokoza ngemihlatshelo enje.
\p
\v 17 Lalelani abakhokheli benu njalo lithobele amandla abo. Bayalilinda njengabantu okumele balandise ngani. Balaleleni ukuze umsebenzi wabo uthokozise njalo ungasindi ngoba lokho akungeke kube lusizo kini.
\p
\v 18 Sikhulekeleni. Sileqiniso ukuthi silesazela esihle njalo sifisa ukuhlala ngobuqotho ngezindlela zonke. 
\v 19 Ikakhulu ngiyalincenga ukuba likhuleke ukuze ngibuyiselwe kini masinyane.
\s1 Izibusiso Lokuvalelisa
\p
\v 20 Sengathi uNkulunkulu wokuthula, owavusa iNkosi yethu uJesu kwabafileyo ngegazi lesivumelwano esingapheliyo, lowoMalusi omkhulu wezimvu, 
\v 21 angalihlomisa ngakho konke okulungele ukwenza intando yakhe, njalo sengathi angasebenza phakathi kwethu lokho okumthokozisayo ngoJesu Khristu, udumo kalube kuye kuze kube nini lanini. Ameni.
\b
\b
\p
\v 22 Bazalwane, ngiyalincenga ukuba libekezelele ilizwi lami lokuqonqosela kwami ngoba ngililobele incwadi emfitshane nje.
\b
\p
\v 23 Ngithanda ukuba likwazi ukuthi umzalwane wethu uThimothi usekhululwe. Angafika masinyane ngizakuza laye sizelibona.
\b
\p
\v 24 Bingelelani bonke abakhokheli benu kanye labantu bakaNkulunkulu bonke.
\p Abavela e-Ithali bayalibingelela.
\b
\p
\v 25 Umusa kawube lani lonke.