\id COL - Nchane
\ide UTF-8
\h Kolose
\toc1 Ŋwa wù Bol gɛ̀ saŋ fɛ kintaashɛ ki Kolose le
\toc2 Kolose
\toc3 Kol
\mt2 Ŋwa wù Bol gɛ̀ saŋ fɛ kintaashɛ ki
\mt1 Kolose le
\imt Fiɛɛ fì le a Ŋwa wu Kolose wunɛ le
\ip Bol gɛ̀ saŋ ŋwa wunɛ fɛ kintaashɛ ki bamii ba mbɛmɛ ki a kinlaantɛŋ ki Kolose le. Ɛbafla gɛ̀ bee wu ja wu to bɛ saaka wumu wù befe kune kintaashɛ kiyu. Bol mo wu saŋ ŋwa wunɛ no kintaashɛ kiyu gɛ̀ bee a kimbe kì wu gɛ̀ yɛde lɛ be kɛme wu ki wu jîiŋe fɛ ki le. Wu gɛ̀ saŋ ki wu lêesɛ n'yɛyɛ nyume wù nchiɛɛŋ wù le kune bamii ba le ba Kletu.
\iot Bikwɛɛ bi mwɛɛ mù le a Ŋwa wunɛ le
\io 1:1-8 Fɛŋkɛɛ
\io 1:9–2:19 Kune muh wù le Kletu mo lɛme che
\io 2:20–4:6 Kinche kifɛŋ kì le yi Kletu le
\io 4:7-18 Ban'yɛsɛ
\c 1
\p
\v 1 Le mɛ wù Bol, mwa ntuŋ wu Kletu Jiso no Nyo goone. Nle besa Timoti wù mwa bwee wese besabɛŋ. 
\v 2 Ŋwa wunɛ gɛɛne fɛ bɛŋ le booŋ ba bwe wese ba le bamii ba Nyo ba lɛme bo tɛɛme yi Kletu le Kolose. Nyo wù Chiji wese besabɛŋ dûnyɛ fitele fì joŋe fɛ bɛŋ le wu nyâ bɛŋ bɛ nyiɛgee.
\s1 Bol tu wu buune, wu nyaa kiyone Nyo le fɛ bamii ba Kolose le
\p
\v 3 Sege bee buune fɛ bɛŋ le segechii bee nyaa gɛh nyu kiyone Nyo le, wù le Chiji Tada wese besabɛŋ wù Jiso Kletu, 
\v 4 nje bee le be yu wa kune fitele fiena fì bɛŋ le bɛŋ leesɛ yi Kletu Jiso le, bɛ kiŋkoŋɛ ki bɛŋ kɛ̂me fɛ bamii bachii ba le ba Nyo le. 
\v 5 Bee kee lɛ bɛŋ gee noo nje bɛŋ jiiŋe fwe nyu yi fiɛɛ fì Nyo le wu seesɛ wu gɛɛ bɛŋ le fɛwe. Fiɛɛ finɛ le fì bɛŋ gɛ̀ yu wa a jɛ yi Nyo le, yì le nchiɛɛŋ, nyu saaka wù joŋe. 
\v 6 Saaka wunɛ gɛ̀ to fɛ bɛŋ le gɛh yɛɛŋyɛɛŋ no wu too fɛ bamii le yi kikwɛɛ ki nshɛŋ le kichii wu kuuse kinche ki bamii wu ka wu saaŋe wu gɛɛne fwe fwe. Le gɛh yɛɛŋyɛɛŋ no fi gɛ̀ kooshɛ bɛ bɛŋ kɛge juu chì bɛŋ gɛ̀ yu saaka wuyu bɛŋ ka bɛŋ kɛɛ nchiɛɛŋ lɛ Nyo le wu dunyɛ fitele fì joŋe fɛ bamii le. 
\v 7 Bɛŋ gɛ̀ yu saaka wuyu wunɛ a Ɛbafla wù le fitele fiesa, besa bo lɛne yi fiɛɛ le fimimia. Wu le muh wu lɛme wu Kletu, wu jo kijusɛ kesa wu lɛne bɛ fitele fie fichii. 
\v 8 Wu le wu sɛɛŋ wa bee kune kiŋkoŋɛ ki Kiyo ki Nyo le ki ge bɛŋ kɛme fɛ bamii le. 
\v 9 Kɛge juu chì bee gɛ̀ yu kune bɛŋ noo, bee baaŋ lu gɛ ki bee bûune fɛ bɛŋ le gɛ. Bee buune bee lɛge lɛ Nyo yîsɛ bɛŋ bɛ bvufee bvu gê bɛŋ kɛ̂ɛ fiɛɛ fì wu goone. Finɛ lé fi gê fi fê yi bvufee le bvuchii bɛ mwɛɛ mù Kiyo ke le ki ge wa bɛŋ kee.\fig Buune|alt="Praying" src="hk00272c.tif" size="col" loc="Kol 1:9" copy="Horace Knowles" ref="1:9"\fig* 
\v 10 Noo, bɛŋ mo bɛŋ chêe kinche nyu kì kooji Tada le nyume kì wu koŋe wesee. Nɛ bɛŋ doo bɛŋ chee noo, bɛŋ mo bɛŋ gêe chilɛme chì joŋe jé le jé le, bɛŋ kuu bɛŋ gɛɛne fwe yi fiɛɛ fì bɛŋ kee kune Nyo le. 
\v 11 Bee buune tɛ lɛ Nyo wù bvuŋga bvù baaŋ bvuchii le bwe, wu nyâ bɛŋ bɛ bvuŋga bvuchii lɛ bɛŋ tɛ̂ɛme segechii, bɛŋ kâane shɛ́ŋ, bɛŋ gɛ̂ɛne fwe yi fiɛɛ le fichii, bɛŋ lâŋeye, 
\v 12 bɛŋ nyâa kiyone Chiji wese le. Le wu wù le wu ge besabɛŋ kojɛ ki bee kɛ̂mɛ fiɛɛ fì wu le wu seesɛ wa wu gɛɛ fɛ bamii ba le be le, fɛ bvunfoŋ bvù yuude le. 
\v 13 Wu le wu bvusɛ wa besabɛŋ chiaaŋ yi bvuŋga bvu kijibɛ le, wu gɛɛ bee antɛnɛɛ a bvunfoŋ bvu Mwa ye wù le fitele fie le. 
\v 14 Le Mwa ye wunɛ wù wu fe ye ye le fɛ wu sûuŋ besabɛŋ chiaaŋ yi ŋgɛ le nyume nlɛɛshɛ bimbefɛ biɛsa besabɛŋ.
\s1 Kletu le kikwɛɛ ki mwɛɛ munchii
\p
\v 15 Mwa ye wunɛ le lo nfiɛɛnɛ yi Nyo kibɛɛ wù besabɛŋ yɛde gɛ. Le wu wù le mboyɛ wù fwe wu mwɛɛ munchii mù ba gɛ̀ fɛ le. 
\v 16 Nyo gɛ̀ fɛ mwɛɛ munchii fede chiaaŋ ye le, mwɛɛ mù fɛwe bɛ mù fɛkuu, mù ba yɛde mu le, bɛ mù ba yɛde gɛ, kɛnɛ le kfuu chi biyo bì la, kɛnɛ bì kɛme bvuŋga, kɛnɛ bì baaŋ baaŋ, kɛnɛ bì sage. Mwɛɛ munɛ munchii le mù Nyo gɛ̀ fɛ fede chiaaŋ ye le, mu nyume yu fɛ wu le. 
\v 17 Wu gɛ̀ bee wa yu fɛ mwɛɛ munchii to mu nyume yu. Jiji wu mwɛɛ munchii le fɛ mu taashi mu nyu no mu nyume. 
\v 18 Wu le kikwɛɛ ki kintaashɛ ki bamii ba mbɛmɛ kì le ye ye. Le wu wù gɛ̀ kɛ kintaashɛ kinɛ. Le wu wù le muh wù fwe ki wu bû yi kwe le, gɛ wu baaŋ wu ka wu kwe gɛ, wu lɛ yi fiɛɛ le fichii, wu nyûme nsafwe. 
\v 19 Mwɛɛ munɛ nyume noo nje Nyo gɛ̀ koŋ lɛ fiɛɛ fì wu le fi fichii nyûme yi Mwa ye le. 
\v 20 Nyo mo wu ge fede yi Mwa ye le lɛ mwɛɛ munchii kɛnɛ nyume mù fɛkuu kɛnɛ mù fɛwe mu kaasɛ mu tu bɛ wu wù Nyo. Wu gɛ̀ ge nyume kimaaŋ bɛ kilɛmɛ ki Mwa ye ki wu tô bɛ nyiɛgee sege wu gɛ̀ kwe yi kintaaŋ le.
\p
\v 21 No bɛŋ tɛ gɛ̀ shee bɛŋ nyume bɛŋ gasɛ bɛ Nyo, bɛŋ kɛme baŋkwajɛ ba befe kune wu no bɛŋ gɛ̀ gee bimbefɛ. 
\v 22 Geenɛ, mɛɛse Nyo le wu kaasɛ wa wu taashɛ bena bo yi ye yi Mwa ye le wù gɛ̀ tu muh wu wuŋ. Wu gɛ̀ ge finɛ fede yi kwe ye le, wu lɛ bɛŋ ge bɛŋ nyûme a wu wù Nyo fwe bɛŋ yuude bɛŋ kɛme gɛ ŋgilɛ gɛ, bɛŋ nyume jialɛ sɛŋ. 
\v 23 Bɛŋ lé bɛŋ gê bɛŋ nyûme noo nɛ bɛŋ le bɛŋ mɛ gɛh bɛŋ gɛɛne fwe yi fitele fì bɛŋ leese yi ye ye le, bɛŋ nyume bɛŋ chimɛ gɛŋ bɛŋ lɛ̂me bɛŋ tɛ̂ɛme fiɛɛ shiŋshi gɛ bɛŋ yi fiɛɛ fì bɛŋ biji fwe yi fi le fì bɛŋ gɛ̀ yu a saaka wù joŋe le gɛ. Saaka wù joŋe wuyu wunɛ le wù ba gɛ̀ fejɛ wa muh le wuchii wu yi nshɛŋ le fɛnɛ. Le saaka wuyu wunɛ wù mɛ wù Bol nle muh wu lɛme wuyu.
\s1 Lɛme chi Nyo gɛ̀ nya Bol le
\p
\v 24 Nlaŋeye mɛɛse yi baŋgɛ baŋ ba n'yɛne kune bɛŋ. Njode baŋgɛ banɛ yi kikwɛɛ kaŋ le nɛ ki n'yisɛ baŋgɛ ba Kletu gɛ̀ yɛŋ nje kintaashɛ ki bamii ba mbɛmɛ kì le ye ye le. 
\v 25 Nyo le wu gɛɛ mɛ lɛ nlɛ̂ne fɛ kintaashɛ ki bamii ba mbɛmɛ le, ki nfêeji jɛ ye bɛŋ le no yi le yichii. 
\v 26 Jɛ yinɛ le yì gɛ̀ shee yi nyume ba nyilɛ a kiŋgogɛ ki bamii le kichii biluŋ le nchensɛŋ, geenɛ mɛɛse Nyo le wu dunyɛ wa bamii ba le be le. 
\v 27 Nyo gɛ̀ cha ki wu gê lɛ bamii be banɛ kɛ̂ɛ lɛ bamii ba le gɛ Bajuu gɛ lé bo gê bo kɛ̂me bvukugɛ bvù baaŋ bvu saaka wù ba gɛ̀ shee ba nyiile. Saaka wuyu wunɛ le lɛ Kletu le yi ye yene le. Noo, bɛŋ mo bɛŋ jiiŋe fwe ki bɛŋ kɛ̂mɛ bvukugɛ. 
\v 28 Le Kletu wuyu wunɛ wù bee feeji kune wu bamii le bachii. Bee yɛyi bo bɛ bvufee bvuchii bvù Nyo nyaa bee le, bee ka teefe bo, wu lɛ bee ge be leesɛ bo a Nyo jii bo nyûme bo ta bo kojɛ no bamii ba Kletu kɛme ki bo nyûme. 
\v 29 Nɛ fiɛɛ fì mɛ nluume, nlɛne bɛ bvuŋga bvuchii bvù Kletu lɛne yu yi ye yaŋ le.
\c 2
\p
\v 1 Mɛ mo ŋgoone lɛ ŋge bɛŋ ba Kolose kɛ̂ɛ no nluume chuule nje bɛŋ, bɛ nje bamii ba Lawdɛsia mo bamii ba mbɛmɛ bachii ba gɛ̀ baaŋ a yɛŋ gɛ bvushi bwaŋ le gɛ. 
\v 2 Ŋgee noo lɛ muntele mwɛna bena bo yûfe, bɛŋ tâashɛ nyu yi kiŋkoŋɛ le, ki bɛŋ kɛ̂ɛ chuule mwɛɛ munchii no muh kɛ̂me ki wu kêe, wu lɛ bɛŋ mo bɛŋ kɛ̂ɛ kinyilɛ ki Nyo, kì le Kletu. 
\v 3 Nyo le wu nyilɛ nchvu yi bvufee bvuchii bɛ mwɛɛ mù bamii kɛme ki bo kêe kune wu nyu yi Kletu le. 
\v 4 Njɛme finɛ wu lɛ keefɛ muh mu gê wu jâ wu tô bɛ njɛmɛ wù yege wù fɛmu fɛmu wu lɛɛ bɛ bɛŋ gɛ. 
\v 5 Bɛŋ kêe lɛ mo no nle je yì ndefe le fɛ bɛŋ le, nle gɛh besabɛŋ a kiyo le. Nlaŋeye ki n'yɛne no bɛŋ gee mwɛɛ a je yì kooji le, bɛŋ leesɛ fitele yi Kletu le fi tɛɛme chuule.
\s1 Bamii ba Kletu le bo bonɛ wa chiaaŋ yi banchi ba achiji le
\p
\v 6 No bɛŋ le bɛŋ fi wa Kletu Jiso lɛ wu le Tada, bɛŋ mo bɛŋ chêe bɛ wu noo. 
\v 7 Bɛŋ chîmɛ gɛŋ kûu yi wu le, bɛŋ lɛ̂me bɛŋ tɛɛme yi mbɛmɛ wene le gɛh yɛɛŋyɛɛŋ no ba gɛ̀ yɛyɛ bɛŋ, bɛŋ nyâa kiyone Nyo le wesee. 
\v 8 Bɛŋ yɛ̂ne lɛ keefɛ muh tô wu jô bvufee bvù achiji bvù fɛkuu fɛnɛ wu lɛ̂ɛde wu fîiŋ bɛ bɛŋ, bɛŋ tû nfa yi bvu gɛ. Bvufee bvunɛ le bvù bii kinche ki woŋ ki muh wu wuŋ bɛ bvu biyo bì sage woŋ kfunɛ.\f + \fr 2:8 \fr*\ft A jɛ yi Glek le taŋlo fi nyu lɛ: Mwɛɛ mu aju achii mu yi nshɛŋ le fɛnɛ mù bamii bii mu le. Bijɛ ŋwa wu Kolose 2:20.\ft*\f* Gɛ nyume bvù bii no Kletu goone gɛ. 
\v 9 Bɛŋ kêe lɛ no Kletu gɛ̀ tu muh wu wuŋ, fiɛɛ fì Nyo le fi fichii le yi wu le. 
\v 10 Bɛŋ le bɛŋ kɛmɛ wa mwɛɛ munchii no bɛŋ le bɛŋ taashɛ bena ba Kletu. Wu le kikwɛɛ ki mwɛɛ munchii mù kɛme bvuŋga bɛ mù sage. 
\v 11 No bena bo gɛ̀ taashɛ noo, wu chvuu bɛŋ yeh. Gɛ nchvusɛ yeh wunɛ nyu wù ba chvuse bɛ chiaaŋ sege ba suune kijebɛ ki ye yi muh gɛ. Wu wunɛ gee Kletu ki wu sûunɛ nyaŋ yene yi ye yi kimbefɛ. 
\v 12 Sege ba gɛ̀ lêesɛ bɛŋ a joo gɛ̀ bee ba gɛ̀ taashɛ bena ba Kletu ba jiiyɛ. Nyo kaasɛ wu bvusɛ tɛ bɛŋ nje fitele fì bɛŋ gɛ̀ leesɛ yi ye ye le lɛ wu taŋlo wu bvûsɛ tɛ bɛŋ yi kwe le bɛ bvuŋga bvù wu gɛ̀ bvusɛ Kletu yu yi kwe le. 
\v 13 Bɛŋ gɛ̀ shee bɛŋ nyume bɛŋ kwe wa a kiyo le nje banchi ba Nyo ba bɛŋ gɛ̀ ŋgode, ba baaŋ a chvuu gɛ wa tɛ bɛŋ yeh ki wu sûuŋ mwɛɛ mù nyaŋ yi ye yene goone gɛ. Mɛɛse, Nyo le wu ge wa bɛŋ kaasɛ bɛŋ tu yu, wu taashɛ bɛŋ bɛ Kletu. Wu le wu lɛɛshɛ wa bimbefɛ biɛsa bichii. 
\v 14 Wu le wu chiijɛ wa mwɛɛ mù gɛ̀ kaane besabɛŋ a ŋwa wu banchi le mù ba gɛ̀ saŋ kune besabɛŋ. Wu le wu jo mwɛɛ muyu munɛ munchii wu ta yi kintaaŋ le. 
\v 15 Kletu mo wu ŋgode bvuŋga bvu mwɛɛ munchii mù kɛme bvuŋga mu sage, wu bvusɛ mu fɛ waaŋ, wu choosɛ mu, wu mo wu so mu yi kintaaŋ le.
\s Bamii ba Kletu yûge gɛh nyu fiɛɛ fì jɛme wu.
\p
\v 16 Noo, keefɛ bɛŋ ka bɛŋ bɛ̂ɛŋ muh mu sâge bɛŋ kune mwɛɛ mù bɛŋ jii kɛnɛ mù bɛŋ muu kɛnɛ lɛ gɛ bɛŋ gee baŋka gɛ, kɛnɛ nyu ŋka wu kwii wù fwɛŋ, kɛnɛ lɛ gɛ bɛŋ shee yuuŋ gɛ. 
\v 17 Bo gee mwɛɛ munɛ mu nyu gɛh lo kinjiinyi ki fiɛɛ fì lé fi gê fi tô, fiɛɛ fiyu kibɛɛ le Kletu. 
\v 18 Keefɛ bɛŋ bɛ̂ɛŋ bamii bamu sâge bɛŋ bo duu lɛ bɛŋ le bɛŋ jiaa je gɛ. Bamii banɛ le ba duu lɛ bɛŋ jôde bikwɛɛ biɛna fɛkuu no bo jode, nyu gɛ a je yì kooji le gɛ, bo duu lɛ bɛŋ n'yuuse tɛ banchɛndaa ba Nyo no bo yuuse. Bo duu lɛ bo kee mwɛɛ nje bo yɛde mwɛɛ le a bifilɛ le. Bo yuuse gɛh nyu ye yi mwɛɛ mù too fɛ bo fwa, kinyi kiyu sɛŋ. 
\v 19 Bobaa bamii le bo gasɛ wa bɛ Kikwɛɛ kì le Kletu. Kletu le wu wù nyaa bvuŋga ye ye le fɛ yi kûu no Nyo le wu seesɛ lɛ yi kûu. Besabɛŋ le be taashɛ gɛh njɛ no ye yi muh le yi taashɛ bɛ bin'yuŋ mo daa wu bin'yuŋ fɛ yi lɛne chuule 
\v 20 No bɛŋ le bɛŋ kwe wa bena ba Kletu a kimbe ki biyo bì sage yi woŋ kfunɛ le, le nje la wu bɛŋ ka chee gɛh njɛ bɛŋ le bamii ba yi woŋ kfunɛ le? Bɛŋ ka bɛmɛ ki bɛŋ bîi banɛ banchi le nje la? 
\v 21 Bo jade bo leh lo lɛ, “Keefɛ muh jîjɛ finɛ le gɛ. Keefɛ muh môŋ fiege amu gɛ. Keefɛ muh kûŋ finɛ le gɛ.” 
\v 22 Mwɛɛ munɛ munchii le mù bamii gee mu fede lo, nje bo bii banchi ba gɛle bamii le, bo bii no bvufee bvuboo duunyi. 
\v 23 Bamii jade bo tu bo yɛde chuule lɛ bvufee le a banchi bayu banɛ le, no bo duunyi je bo tooŋse bamii ki bo yuuse Nyo, bɛ ki bo shiishi bikwɛɛ fɛkuu mo nyu gɛ a je yì kooji le gɛ bo nyiɛge bɛ ye. Geenɛ, mwɛɛ munɛ gɛ taŋlo mu fih ki mu bvûsɛ muh a mwɛɛ mù mbefe mù nyaŋ yi ye goone le gɛ.
\c 3
\s1 Bamii ba Kletu kɛme kinche kifɛŋ
\p
\v 1 No Nyo gɛ̀ bvusɛ wa bena ba Kletu yi kwe le noo, bɛŋ mo bɛŋ lêesɛ muntele mwɛna nyu mwɛɛ mù fɛwe fɛ Kletu le, Nyo nyu wu shiishɛ wu a kibo ke kinchiɛɛŋ le. 
\v 2 Bɛŋ gɛ̂ɛ bvufee bwena yi mwɛɛ mù fɛwe le. Keefɛ bɛŋ gɛ̂ɛ yi mù fɛkuu le gɛ, 
\v 3 nje bɛŋ le bɛŋ kwe wa, kinche kena le mɛɛse Nyo le wu nyilɛ wa bɛ Kletu yi wu wù Nyo le. 
\v 4 Sege Kletu wù le kinche kena lé wu gê wu bûnɛ, bɛŋ tɛ mo bɛŋ bûnɛ bɛ wu antɛnɛɛ a bvukugɛ bwe. 
\v 5 Fi mo fi nyu lɛ, bɛŋ lɛ̂ɛshɛ lo mwɛɛ njɛ munɛ ye yene le mù le mù fɛkuu fɛnɛ: Le ki jâŋe kinjaŋ bɛ ki kwâji mwɛɛ kune nyiɛŋ yi kinjaŋ, mo ye yi ŋwɛŋe muh, mo ntaŋ ki gêe mwɛɛ mù mbefe, mo ki bvûushi ajii yi mwɛɛ le. Muh wù bvuushi ajii yi mwɛɛ le, mwɛɛ munɛ le mu tu wa nyo wumu fɛ wu le. 
\v 6 Le njɛ kfuu chi munɛ mwɛɛ mù Nyo lé wu gê wu dûnyɛ shɛ́ŋ yì toonyɛ wu nôŋ ŋgɛ yi bamii ba gee mu le. 
\v 7 Gɛ̀ bee fweele bɛŋ gee kfuu chi munɛ mwɛɛ sege bɛŋ gɛ̀ baaŋ bɛŋ chee kfuu chi kɛɛ kinche. 
\v 8 Geenɛ mɛɛse, bɛŋ kɛme ki bɛŋ chînɛ mu le munchii. Bɛŋ chînɛ shɛ́ŋ yì toonyɛ bɛ muntele mù saase mo muntele mù mbefe le. Keefɛ muh chɛ̂ŋe bɛ jee chi muh gɛ. Keefɛ njɛ̂mɛ wù saane bûde jwe wu muh le gɛ. 
\v 9 Keefɛ muh lɛ̂ɛde bɛ mwa bwee gɛ. Bɛŋ kêe lɛ bɛŋ le bɛŋ baa wa ye yì kege bɛ gee che, 
\v 10 bɛŋ jii wa nyu yì fiɛŋ. Yi chinɛ le Nyo wù Nfɛ seese yi segechii wu kuuse yi tuu njɛ ye, wu lɛ bɛŋ kêe wu chuule. 
\v 11 Fɛnɛ gɛ muh mu nyu yeye fɛ muh le gɛ. Gɛ muh ka nyume yu lɛ wu le muh wu Juu, wumu nyume muh wu Glek gɛ. Gɛ muh mu nyume yu lɛ ba le ba chvuu wu yeh muh mu nyume kinshushu gɛ. Gɛ muh mu nyume yu lɛ le wu nchvuuŋ gɛ. Gɛ muh mu nyume yu lɛ wu le nyaŋ yi nchvuuŋ gɛ. Gɛ muh mu nyume yu lɛ wu le nfwa, muh mu nyume gɛ nfwa gɛ. Kletu le fiɛɛ fichii fɛ bo le, wu le yi bo le bachii. 
\v 12 No Nyo le wu baa wa bɛŋ, bɛŋ yuude, wu koŋe bɛŋ, bɛŋ mo bɛŋ kôode yii, bɛŋ gêe gee chì joŋe, bɛŋ shîishi bikwɛɛ biɛna fɛkuu, bɛŋ ka nyûme wɛɛ, bɛŋ kâane shɛ́ŋ. 
\v 13 Bɛŋ jôde muh lɛ muh no wu le, nɛ muh ge la fì shɛ́ŋ toonyɛ muh, wu lɛ̂ɛshɛ lo. No Tada le wu lɛɛshɛ wa biɛna bimbefɛ, bɛŋ tɛ lɛ̂ɛshi bi bamii bamu. 
\v 14 Bɛŋ doo bɛŋ gee mwɛɛ munɛ munchii, bɛŋ tôome kiŋkoŋɛ fwe. Kiŋkoŋɛ le fiɛɛ fì taashi mwɛɛ munchii fɛ mu nyume chuule yi fiɛɛ le fimimia. 
\v 15 Bɛŋ chînɛ nyiɛgee wù jade fɛ Kletu le wu nyûme a muntele mwɛna le, wu dûunyi bɛŋ je. Nyiɛgee wunɛ le wù Nyo gɛ̀ tɛŋɛ bɛŋ lɛ bɛŋ kɛ̂me no bɛŋ le ye yimimia. Bɛŋ nyâa tɛ kiyone Nyo le. 
\v 16 Bɛŋ gɛ̂ɛ jɛ yi Kletu yi nyûme a muntele mwɛna le nɛ chuule, bɛŋ yɛ̂yi bɛŋ ka teefe bikwɛɛ biɛna bɛ bvufee bvuchii. Bɛŋ yɛ̂ɛne bɛŋ nyâa kiyone Nyo le a muntele mwɛna le, bɛ baŋkee ba bude a Ŋwa wu N'yuusɛ le mo baŋkee bamu ba n'yuusɛ, mo ba Kiyo ke nyaa bamii le. 
\v 17 Bɛŋ doo bɛŋ gee fiɛɛ fichii fì bɛŋ gee, kɛnɛ yi njɛmɛ le, kɛnɛ yi gee le, bɛŋ gêe a jee chi Tada Jiso le, bɛŋ nyâa kiyone Nyo wù Chiji le fede yi ye ye le.
\s1 No bamii ba Kletu taŋlo bo chee yéh yiboo le
\p
\v 18 Bikɛse bɛŋ nyâa bikwɛɛ biɛna bilɛɛŋ bena le. Le fiɛɛ fì kooji fì bamii ba Tada Jiso le ki bo gêe. 
\v 19 Bilɛŋsɛ bɛŋ kôŋe bikɛɛ bena. Keefɛ bɛŋ ŋâse bɛ bo gɛ. 
\v 20 Booŋ bɛŋ yûge babwee bena bɛ bachiji bena le yi fiɛɛ le fichii. Nɛ bɛŋ gêe noo, fi joŋe Tada le. 
\v 21 Bachiji booŋ, keefɛ bɛŋ gêe mwɛɛ mù muntele mu booŋ bena saase gɛ. Nɛ bɛŋ gee lo, shɛ́ŋ kwee bo. 
\v 22 Nfa, bɛŋ yûge bachiji bikwɛɛ bena le yi fiɛɛ le fichii. Keefɛ bɛŋ lɛ̂ne bo le gɛh sege ajii aboo le yi ye yene le ki bɛŋ gêe lɛ ye joŋe bo bɛ bɛŋ gɛ. Bɛŋ lɛ̂ne bɛ fitele fimimia, bɛŋ fâane gɛh nyume Tada. 
\v 23 Muh doo wu lɛne fiɛɛ fichii fì wu lɛne, wu mo wu lɛne bɛ fitele fie fichii lɛ wu lɛne nyu Tada le nyume gɛ fɛ muh le gɛ. 
\v 24 Bɛŋ kêe lɛ muh lé wu tô wu kɛ̂mɛ fiɛɛ fì ba le ba seesɛ ba gɛɛ fi le maajɛ we nyu Tada. Le Tada Kletu wù bɛŋ lɛne wu le. 
\v 25 Geenɛ, fɛ bamii ba gee kimbefɛ le Nyo lé wu gê wu lâŋɛ bo yi kimbefɛ kì bo gee le. Gɛ Nyo to wu duunyi yeye yeye fɛ bamii le gɛ.
\c 4
\p
\v 1 Bɛŋ bachiji bikwɛɛ ba kɛme nfa, bɛŋ gêe mwɛɛ bɛ bo a je yì chaaŋ bɛ yì kooji le, bɛŋ tâne lɛ bɛŋ kɛme tɛ wene Chiji Kikwɛɛ fɛwe.
\s1 Ntefɛ yì fɛkimɛsɛ
\p
\v 2 Bɛŋ bachii buune bɛŋ gɛ̂ɛne fwe bɛŋ fwɛ̂ɛne gɛ. Bɛŋ doo bɛŋ bûune bɛŋ lêese bvufee yi fiɛɛ fiyu le, bɛŋ nyâa kiyone Nyo le. 
\v 3 Bɛŋ bûune tɛ fɛ bee le lɛ Nyo gwênyɛ kimbuŋ fɛ jɛ ye le lɛ bee fêeji jɛ yinɛ yì le kinyilɛ kì kune Kletu. Le fiɛɛ fì nle yeh yi ncha le nje fi. 
\v 4 Bɛŋ bûune lɛ nfêeji yi yuude chuule no ŋkɛme ki nfêeji. 
\v 5 Bɛŋ doo bɛŋ gee mwɛɛ bɛ bamii ba le gɛ ba mbɛmɛ gɛ, bɛŋ gee bɛ bvufee. Bɛŋ mône ki bɛŋ gêe mwɛɛ chuule mo nyu yi kife kì la kì bɛŋ kɛme le. 
\v 6 Njɛmɛ wene segechii nyûme wù bonɛ, wù njɛŋe njɛ ŋka, bɛŋ mo bɛŋ kêe ki bɛŋ chvûse fiɛɛ muh le wuchii a je yì kooji le.
\s1 Ban'yɛsɛ
\p
\v 7 Tichiku lé wu sɛ̂ɛŋ fiɛɛ fichii kune mɛ bɛŋ le. Wu le mwa bwee wese besabɛŋ, le tɛ fitele fiesa besabɛŋ. Besa bo lɛne Tada le yi muh le wu mumwaa wu le muh wu lɛme wu lɛne bɛ fitele fie fichii. 
\v 8 Ntune wu fɛ bɛŋ le bɛ ntaŋ wu lɛ wu tô wu gê bɛŋ kɛ̂ɛ no bee le, wu ka wu yûfɛ muntele mwɛna. 
\v 9 Ntune wu bɛ Onisimu wù le muh wene, wù le tɛ mwa bwee wese besabɛŋ wù le fitele fiesa besabɛŋ wu lɛme yi fiɛɛ fi Kletu le wu tɛɛme. Bo lé bo sɛ̂ɛŋ bɛŋ fiɛɛ fichii fì kooshi yanɛ. 
\v 10 Alistaku wù besa wu le yanɛ yeh yi ncha le wu yɛɛse bɛŋ le. Maliku wù mwa chiji Banaba yɛɛse tɛ bɛŋ le. Le wu wù bɛŋ le bɛŋ kɛmɛ wa ntuŋ kune wu. Nɛ wu to lo, bɛŋ fî wu. 
\v 11 Jiso wù ba tɛŋe lɛ Justu yɛɛse tɛ bɛŋ le. Ka gɛh bamii ba batɛde banɛ ba le Bajuu ba besa bo lɛne yi fiɛɛ le fimimia yi bvunfoŋ bvu Nyo le. Bo fii mɛ baaŋ, bo gee fitele fiaŋ jiɛɛ. 
\v 12 Ɛbafla wù le tɛ muh wene, wù lɛne Kletu Jiso le wu yɛɛse tɛ bɛŋ le. Sege wu buune segechii wu kwaji bɛŋ baaŋ, wu lɛge lɛ Nyo gê bɛŋ lɛ̂me bɛŋ tɛɛme njɛ bamii ba ta wa, bɛŋ kee chuule fiɛɛ fichii fì Nyo goone. 
\v 13 Nle n'yɛŋ wa bɛ ajii awaŋ lɛ wu lɛne fɛ bɛŋ le baaŋ mo fɛ bamii ba Lawdɛsia bɛ ba Hiliaboli le. 
\v 14 Luka wù fɛde binchɛŋ bi bamii wù le nsaa yese yi shɛ́ŋ bɛ Dɛma yɛɛse tɛ bɛŋ le. 
\v 15 Bɛŋ nyâ n'yɛsɛ waŋ booŋ ba bwee wese besabɛŋ ba mbɛmɛ ba Lawdɛsia le, bɛ Ninfa bɛ kintaashɛ ki bamii ba mbɛmɛ kì taashi a wu yeh le. 
\v 16 Bɛŋ doo bɛŋ tɛɛŋ ŋwa wunɛ, bɛŋ chîiŋsɛ kintaashɛ ki bamii ba mbɛmɛ ki Lawdɛsia le bo tɛ̂ɛŋ tɛ, bo mo bo yɛ̂ŋ tɛ lɛ ba le ba chîiŋsɛ ŋwa wù le a bo le bɛŋ tɛ̂ɛŋ. 
\v 17 Bɛŋ sɛ̂ɛŋ Alkibu le lɛ wu yɛ̂ŋ lɛ wu le wu mɛ̂sɛ lɛme chì Tada le wu nya chiaaŋ ye le. 
\v 18 N'yɛsɛ wunɛ saŋ mɛ wù Bol bɛ kibo kaŋ. Bɛŋ kwâji lɛ nle yeh yi ncha le. Nyo dûnyɛ fitele fì joŋe fɛ bɛŋ le.