\id TIT - Naasioi NT [nas] -Papua New Guinea 1994 (web 2014) 
\h TAITAS 
\toc1 Aneꞌ Taitas Paulaꞌke Daarievuuꞌnaneꞌ 
\toc2 Taitas 
\toc3 Tai 
\mt2 Aneꞌ  
\mt1 TAITAS  
\mt2 Paulaꞌke Daarievuuꞌnaneꞌ  
\c 1  
\ms1 Baito Puring-antaveri Biikaang Aarumo Koong-antaveriai Kiritiꞌnamuiꞌkoo  
\mr (1:1–3:15)  
\p
\v 1 Ning Paulaꞌ tee Kumponing bakaang botovotonaaꞌ eeꞌnoko kara-okomui-nka Jiisuuꞌ Karistooꞌ bakaang. Kumponinge botomuuꞌnung bakaning teie miruꞌuruꞌning tampaꞌ masikaꞌanta-koo pakuaramaꞌnaang eeꞌnoko tee kara masikung koompari otoko kato nau-antavaranko tampaꞌ tasiꞌpai siompaama Kumponing dotu-antanaꞌ otoroaing, domampariri ookara batei-koo otoroainaꞌ nooruupiariainaꞌ;  
\v 2 Aaꞌnoko teie Kumponinge tosiaravaunge tee domaang oparavaung amuriiꞌnaang maraka-antavuuꞌ tero urikamuꞌ, kansiꞌ pupuꞌaravaruko.  
\v 3 Eeꞌnoko bakaang bateinang miruꞌuuꞌnung masikung-koo teie Kumponinge niikaang Domang-antai tee-koong domaang oparavaung amuriaing-koong kara siraꞌpuuꞌ bakaang doorenang tampara-koo, eeꞌnoko ning tee arooꞌmui botomuuꞌnung tee daankiamaꞌnaang.   
\p
\v 4 Daꞌ Taitas nnuring masikung tee-koo kara-koo nariꞌ masikaꞌantavampimaung-koo daarireromaang. Biraanke eeꞌnoko mooa daꞌkoo otoaing Kumponing Niuma-itaing eeꞌnoko teieta Ovoring Jiisuuꞌ Karistooꞌ, niikaang Domang-anta.   
\s1 Urantanuka Eeꞌ Miruꞌeriaing  
\p
\v 5 Ninge daꞌ Kiritiꞌnamuiꞌketa tenkenama eeꞌ nkoveeꞌnaang siꞌdantuꞌnung: Dake koong-antaveeꞌnaang teing kapooꞌnanka koontoꞌ deeaing teka, eeꞌnoko napoꞌ dootuuꞌkoo urantanuka miruꞌeriai ookara osinanka-koo teeꞌ naurantuꞌnaꞌ.  
\v 6 Teing urantanuka tuumpi otoroaukaꞌnaꞌ otoroai. Nampeesi-koo narunge nani nampui otoai. Napoꞌ biurukaaꞌ Karistooꞌkoo baito-nupoong otoroai, eeꞌnoko niiꞌninge tuumpiaaripeuꞌnooꞌ otoroaukaꞌ aaꞌning-koo: tooreere eeꞌnoko meumeeva.  
\v 7 Tee naning Kumponing bakanavitu tanatavurimaung tee tuumpinooꞌ dopa, aiꞌ tee tee Kumponing bakaang tarenara. Aing aaꞌning nkovuaꞌ otoai: boreꞌke deere, daꞌdeng iira, nainai purintoꞌ nai-koo keiꞌ, tavuꞌ bauko, eeꞌnoko okoꞌoko.  
\v 8 Teka aing eeꞌ oroꞌnanka oroꞌantavumaatoai: Damisimainku bakaang pava-koo bokuvurimatoai, tampenanka-koo dotuaramaung, matauari otoꞌ, koompari otoꞌ, eeꞌnoko baka meekaꞌpari otoꞌ tareari otomatoai.  
\v 9 Napoꞌ teie tee kara tosinooꞌdopa pinkaꞌui otomatoai teeꞌ nariꞌ barearuꞌnaꞌ. Teeꞌ otoi minkunaa koontoꞌ nau-antavurima nantoong puring-antavurimatoai, eeꞌnoko teing tee kara penkempaamaing okoraꞌ nenkeꞌui daang tampaamanooꞌ siraꞌpumaatoai.   
\s1 Kiritiꞌnamuiꞌkoo Daang minkunukai Mmauꞌke Baito-koo Orari-antavaarikoꞌnaꞌ  
\p
\v 10 Aiꞌ teke Kiritiꞌke dootuuꞌkoo kuunge nantoong karinga taarapiikanuka otorong, daang minkunuka eeꞌnoko tosi baukonukai, baruꞌnooꞌ teing Juꞌnupoong dopaꞌ totoꞌnavitu teeꞌ oroꞌnuka.  
\v 11 Bake-antaveriai, aiꞌ teinge tee akatekang karikaꞌdaantu naroꞌka orari-antavaarimaung kapooꞌ makosi deeaing nau-antavaarima mooniꞌ tamung barang-koo makotuaꞌnaꞌ.  
\v 12 Teeꞌ nariꞌ Kiritiꞌnamuiꞌkoong nakaronunge˜ niiꞌnung nauvuma aaꞌpuuꞌnaꞌ, “Kiritiꞌnamuiꞌnupoong doong kante tosi baukonuka, biikoori oreng, taamang-koo okoꞌokonuka kavuroonku.”  
\v 13 Tee aung kara teie siraꞌpuuꞌnung teing daang minkunuka otoromanaꞌ masikung. Teeꞌkoo teing tee daang minku siompaamaing karai aaꞌnaꞌ naaramperiaing tee minkunaa masikaꞌantavampimaung siong-koo purimpariainaꞌ.  
\v 14 Juꞌnupoong biikaang kumponaang sipaavai! Teing biikaang botonanka tamung nantoong-etaning siompaama kara masikung-eta bereꞌariaukaꞌ.  
\v 15 Baa naning Karistooꞌkoo kuunge domang kiiroraaꞌari otoi tee ookara kapooꞌ teie makosinaꞌ nko-koo noruꞌumaing teing makosining. Teka baa-koo naning domang orara-koo, masikaꞌanta otoaung-koo, tee kansiꞌkoo kapooꞌ otoaꞌ bakaang domang kiiroraaꞌantavupeuꞌnung, bane arekeeꞌ oroꞌ toomo siompuma. Kumponinge tee bakaang domang eeꞌnoko noruꞌ naroꞌka orakaꞌ nariꞌ oovui otooꞌnaang.  
\v 16 Teeꞌ oroꞌnuka teing biiꞌka Kumponing noruꞌai otoining sirakuraꞌ tampaarimaing, teka teinge orakaꞌ nkoaama penkempaakooꞌ tee. Bakei Kumponing-koo maremaare nkonuka, meumeevanuka, eeꞌnoko kapooꞌ tampara nko-koo makosinuka deeaꞌ.   
\c 2  
\s1 Tautau Pankareuꞌaape-naare  
\p
\v 1 Teka dake deekoꞌ otootoꞌkoo makosinaꞌ Karistooꞌ bakanaꞌ masikaꞌ nau-antaveriai.  
\v 2 Aaꞌnoko teing donkaang pankareuꞌ kapooꞌkoo baruꞌ keiꞌoroi kanuꞌariaukaꞌ, teka toꞌbiivui noruꞌ ninka matauariri otoroai, tuumpiaariarupeuꞌnaꞌ biikaang masikaꞌanta-koo, piaa-koo eeꞌnoko kato purimpari otoꞌkoo.  
\v 3 Napoꞌ manikuꞌ pankareuꞌ teeꞌ nariꞌ Kumponing bakaning-pinaꞌ neriariri otoromaatoai, ukuusiariaꞌ eeꞌnoko nainai purintoꞌkoo biꞌariaꞌ.  
\v 4-5 Napoꞌ teinge manikuꞌ pankareuꞌke teing neraiꞌ nampeesiniiꞌnuka tampeng naing nau-antavaarimaatoai, aing aaꞌning: Biiꞌunkaampi biurukaaꞌ ninka nariꞌ piaa, matauariri otoꞌkoo, meekaꞌpariri, kakeꞌii-nupoong tampaꞌnko, eeꞌnoko biiꞌunkaampi-koo boong deempariri otoromaatoai, Kumponing bakaang kara oovuninge dimpaꞌaavaukaꞌnaꞌ.   
\s1 Tautau Nemaaꞌaape-naare  
\p
\v 6 Napoꞌ teeꞌ nariꞌ naueriai teing nemaaꞌ matauariri otoroainaꞌ.  
\v 7 Eeꞌnoko mintoontarama ookara batei-koo kapooꞌ tampeng naing nkovemaatoaing teinge siontaavainaꞌ, eeꞌnoko dakaang naunau-koo aing eeꞌ oroꞌ oroꞌantavemaatoai: kara pitumeeva, aarumo aaꞌnaꞌ arooꞌdari minkunaꞌ, eeꞌnoko noruꞌ toꞌbiivui otomaung nantoonge pooreꞌkoo makosi deeaung.  
\v 8 Eeꞌnoko dake teeꞌ nariꞌ nkoveko niiꞌ minkuminkurumaarimaing maiaꞌoroaing, kapooꞌ orara niiꞌ minkumaaripeuꞌnung otoaruko.   
\s1 Tautau Botovotonaaꞌnuka-aape-naare  
\p
\v 9 Napoꞌ teing botovotonaaꞌnuka teeꞌ nariꞌ naueriai biikaning ovontunanka-koo boong deempariri otoroainaꞌ, eeꞌnoko dotu-antavaarimaatoai ookara kapooꞌnanka nkoaavaining-koo, kara bariꞌaavaꞌ eeꞌnoko bakiaaꞌ nkoaavaꞌ.  
\v 10 Eeꞌ naueriaing, “Tampaꞌ nariꞌ nkorarimatoai diikaning ovontunge tampaꞌ noruꞌdaarira arooꞌdaariainaꞌ ookara kapooꞌ nko-koo.” Teeꞌ naueriaing, aiꞌ teing botovotonaaꞌ koontoꞌnaꞌ otoroko deekoꞌ ookara nantoonge tampaꞌ taaravaavaing tee kara nauarampimaung Kumponing niikaang domang-anta-koong.  
\v 11 Aiꞌ Kumponing bakaang piaa nantoong domang-anta-koong tee tero oroꞌantavuuꞌnung ookara nantoong-koo.  
\v 12 Eeꞌnoko teie bakaang piaae niiꞌ kakeꞌii-antamurimaung aꞌ kansiꞌkoo oꞌnoritaaꞌ aaꞌnooꞌnaang: Kumponing piavoaꞌnaꞌ aarumo dimpaꞌkoo, kansiꞌaapening karakaraaꞌ nariꞌ, eeꞌnoko mataumariri otoꞌkoo, koomariri, Kumponing dotu-antanaꞌ.  
\v 13 Eeꞌnoko teeꞌ nariꞌ oꞌnorimaatoai tee biraanke nempampimaung noruꞌampima aaꞌnoaing: tee Jiisuuꞌ Karistooꞌ niikaang Kumponing eeꞌnoko Domang-anta nerampari tenang oroꞌparavai.  
\v 14 Tee baka niiꞌkoo avaruꞌnung niiꞌ boorimurira teing-eta orara aarumonanka-ita unaa-antamuriiꞌnaang eeꞌnoko kiiroraaꞌantamurira bakaning nantoong meekupoong deemuriai tampaꞌnko narung-koo dompirompiꞌnuka.   
\p
\v 15 Teeꞌ nariꞌ koontoꞌ botoveri nau-antaverimatoaing aing kapooꞌnanka, tautauerima kontevoroaꞌ siompaavaꞌnaang. Naninge niiꞌnunge daang-antaruaukaꞌ.   
\c 3  
\s1 Tampara Aarumo-koo Imaꞌmariri Oꞌnoriainaꞌ Kumponinge Tampaꞌ Nkomurioꞌ  
\p
\v 1 Nau-antaveriaing teing dakaning nantoong ovontung-koo boong otoroainaꞌ, siompaarima teing, amutemuriiꞌ tampeng nko-nko nko-koo maamuariri.  
\v 2 Naning orakaꞌ minkuaavaꞌ otoroai, turanturang baariꞌai, banainge otoroai, eeꞌnoko nantoong ookara-koo navurariri otorimaatoai.  
\v 3 Aiꞌ niiꞌ Karistooꞌ bakaning teing tero oꞌnorikoꞌnaꞌ sipampiruꞌning aaꞌning-eta: kanuꞌmarima taarapiikamarikoꞌ akoꞌke niiꞌning ninka poo-antamaariko, amutemuriiꞌ karakaraaꞌkoo biꞌmariri doturotu besiꞌampima. Niikaang batei tamung keraꞌpampikoꞌ aaꞌning-koo: orakaꞌ noruꞌ eeꞌnoko mamairo, nantoonge munteꞌmaariko napoꞌ niiꞌka munteꞌmeerima.  
\v 4 Teka tenang bakaang piaa eeꞌnoko avusiroꞌari otoꞌ aarumo siraꞌpuuꞌnang tee-koo batei-koo Kumponinge domamuruꞌ.  
\v 5 Teie domamuruꞌnooꞌ niiꞌ tee koontoꞌnuka oꞌnori kapooꞌ tampara niiꞌka nkoampiruꞌnung-koo deeaꞌ, teka baka bakaang piaa-eta duuꞌmuri meekaꞌantamurima domamuruꞌnung, aaꞌnoma napoꞌ pontoꞌantamurima tee ninka Tanuaang Meekung nerakaꞌantamuruꞌ.  
\v 6-7 Eeꞌ, tee Tanuaang Meekung niiꞌkoo dau mmauꞌantavui piampuuꞌnung tee-koo niikaang domang-anta Jiisuuꞌ Karistooꞌkoo kuunge niiꞌ Kumponing ninka naroong-antamuriiꞌnaang teie piaamurira, eeꞌnoko barenku domaang oparavaukaꞌnung-koong nempampimaung okomuriiꞌnaang.   
\p
\v 8 Tee-koo kapooꞌkoo nauansing-koo arooꞌdaravaing makosi daꞌ Taitas. Daꞌ tee teing-koo aing-koo kapooꞌkoo derarari otooꞌnaang piamomaang, dakaning nantoong Kumponing masikaꞌantavaamaing kakeꞌiiariri otorooꞌnaang tampara nko-nko-koo. Aing teing kapooꞌ booꞌanta, nantoong ookara paku-antaning.  
\v 9 Teka aing aaꞌning-eta dontaꞌdariri otoriai: nianiaꞌ makuꞌpaaꞌkoo, pokapokaꞌ, boorouꞌning biikaning mirinanka depeto parapara-koong minkunaa, eeꞌnoko karakarai turang, Juꞌ biikaang toomonanka tataꞌeema. Aiꞌ aing teing tamunsiꞌning eeꞌnoko naning pakuvuarupeuꞌ.  
\v 10 Naning tee nantoong-koo pokapokaꞌ nkovuaing deekoꞌ tautaueai eeꞌnoko kemuꞌkai nkovuko deekoꞌ napoꞌ tautaueai;  
\v 11 Teketa beemuꞌpinamuꞌkoo tamung doonko sipeai tee, eeꞌ noruꞌei: Aung tee naning koompaaꞌ, oreng aarumoi maantoꞌ, baka tuutunamparing.   
\s1 Paulaꞌke Taitas Tee-anko Poꞌkoo Bokuvuuꞌnaꞌ  
\p
\v 12 Tenang ninge tenaanka Atemasi naanka eeꞌnoko Tikikas daꞌanko botoampeko tampaꞌ aaꞌnaꞌ paarararavaing ning kuneꞌkoo teka Nikopolisia, aiꞌ ning tee tenang kamaari bakanang teke otoꞌkoo darumari oꞌnong.  
\v 13 Napoꞌ aaꞌnaꞌ pia-antaveriaing dakanavitu teinge tampaꞌ neriaareaing tenaanka aaꞌnoko tee boto nau-anta Siinasi eeꞌnoko Apolos paku-koo beekaang nanunanuꞌkoo. Eeꞌnoko kokoiravererima beekaang nanunanuꞌkoo makosining mooniꞌ averereriaing.  
\v 14 Eeꞌnoko teeꞌ pakuaarema noruꞌ nkavaavai kakeꞌiiariainaꞌ tampara nko-nko nko-koo, baata teing aaꞌnaꞌ piaaruꞌnuka pakuaarimaatoainaꞌ, eeꞌnoko biikaang otootoꞌ sinampoꞌnung deempari otoaing.   
\p
\v 15 Aing ookara niiꞌ ninka nariꞌ oꞌnorimainge biikaang tampaꞌ tang diiꞌanko botoaamang. Niikaang tampaꞌ tang nauereriaing teing niiꞌmarang baito-koo kuunge. Tee biraanke tee diiꞌ ookara ninka otomatoaing. Eeꞌ, teeꞌ nariꞌ.