\id 2TI - Naasioi NT [nas] -Papua New Guinea 1994 (web 2014) 
\h 2 TIMOTI 
\toc1 Aneꞌ Keneꞌka-naneꞌ Timoti Paulaꞌke Daarievuuꞌnaneꞌ 
\toc2 2 Timoti 
\toc3 2Tim 
\mt2 Aneꞌ Keneꞌka-naneꞌ  
\mt1 TIMOTI  
\mt2 Paulaꞌke Daarievuuꞌnaneꞌ  
\c 1  
\ms1 Timoti Paaravarama Mataaꞌi Deemparavaing Kumponing Bakaang Mintoong-koo  
\mr (1:1–4:22)  
\p
\v 1 Ninge Paulaꞌke aung karavoto˜ daariamang, Jiisuuꞌ Karistooꞌkoong kara-okomui-nkai Kumponinge maromuuꞌnaꞌ nantoong nauaramaꞌnaang maraka-antamuruꞌnaꞌ bakaang domaang amuriiꞌnaang Jiisuuꞌ Karistooꞌkoo kuung oꞌnoriko.  
\v 2 Daꞌanko, Timoti-anko daariamang, daꞌ nnuring-pinaꞌ piaaramaung-anko. Biraanke eeꞌnoko mooa daꞌkoo otoaing Kumponing Neuma-itaing eeꞌnoko teieta Ovoring Jiisuuꞌ Karistooꞌ.   
\s1 Paulaꞌ Bakanaꞌ Siompei Maiaꞌdoaukaꞌ Tampara Doorenang Siraꞌpema  
\p
\v 3 Ninge kunsimarama amutemuꞌkoo noruꞌdama Kumponing-koo tampara tampamaung, tee eeꞌnara tampaꞌ domange noruꞌmarama ninge mintoompevomaung, teeꞌ mmataraange nkoauꞌnaꞌ.  
\v 4 Bakei napoꞌ aaꞌnaꞌ daꞌ oo-koo piamomaung, ooramira dei tampaꞌ deeꞌmopeuꞌ, aiꞌ ninge tee norunoruꞌamaung dakaang taꞌdu tuuruuꞌnung tenang siꞌmeeretuꞌnang.  
\v 5 Napoꞌ noruꞌdankooꞌ daꞌ koontoꞌ baitorarakoꞌnaꞌ, tee eeꞌnamuriiꞌ baito teni daite Lois otoꞌevukoꞌ eeꞌnoko teni dauko Iunes. Enang tasiꞌpansi oꞌnong daꞌkoo eeꞌnung-koo otong tee temuriiꞌ baito.  
\v 6 Teeꞌkoo enang ninge noruꞌantaramaang maiaꞌ sipei dakaang nko-nko aaꞌnaꞌ nkoveaing tee avuavuꞌ Kumponinge aruuꞌnung kompei, eeꞌnarai aruuꞌnung teꞌmung ninge tankaꞌ panteꞌdantuꞌnaꞌmung.  
\v 7 Aiꞌ Kumponinge tee tanuaang avorompeꞌkoong amuriaꞌ, teka tee tanuaang purintoꞌkoong amuruꞌnung, piaa-koong eeꞌnoko toomoosiari otoꞌkoong.   
\p
\v 8 Tee tee maiaꞌdoaukaꞌnung niikaang Ovoring siraꞌkoo; ning-koo teeꞌ, bane ning bakaang daiꞌnisi oꞌnoko. Makosi Kumponinge teeꞌ nariꞌ puring-antamureko daꞌ teeꞌ nariꞌ niꞌninka sisikeera kompampeainge tee tampara doorenang-koo.  
\v 9 Teie eeꞌnarai domamuruꞌ eeꞌnoko bokumuruꞌ meekaꞌmariri otoꞌkoo, kapooꞌ tampara nkoampiruꞌnung-koo deeaꞌ, teka tamung biraankemuriiꞌnaang baka marovuuꞌnung-koo. Tero aung kansiꞌ mmeꞌ nkoaravaruko-ita Kumponinge biraankemuriiꞌnaang bamuruꞌ tee-koo Jiisuuꞌ Karistooꞌkoo.  
\v 10 Eeꞌnoko enang tee biraankemuriainaꞌ siraꞌpuing Jiisuuꞌ Karistooꞌ niikaang domang-anta oroꞌantavura. Teie eeꞌnarai booꞌ bakaang iriꞌ opuraiꞌnange booꞌ puruꞌnavung eeꞌnoko domaang nkanavung taung sirakaꞌantamemuring tee doorenang tampara dooremurima.  
\v 11 Eeꞌnoko teie napoꞌ ning aung eeꞌnara doorenang tampara berempamaꞌnaang bamuuꞌ, ning kara-daanki, kara-okomui-nka eeꞌnoko kara-nau deeng-antamui.  
\v 12 Teeꞌkoo bamuuꞌnaꞌ tampaꞌ nkomaramaung-koo ninge sisikeera kuneꞌamaang. Nka tee maiaꞌmoaung, aiꞌ bakei tampaꞌ noruꞌansi oꞌnong tee naning ninge masikaꞌantavamaung, eeꞌnoko napoꞌ tampaꞌ noruꞌansi otong tee tee makosi ookaanka tare-koo bera doong asiranaꞌmung, aaꞌning: teing mankiꞌnanka avontuꞌning eeꞌnoko napoꞌ tee mankiꞌ eeꞌnarai ning bamui amuuꞌ, tampara kara nau-anta-koo.  
\v 13 Enang dake tee tee kara nau-antavaramanaꞌ paaravei nariꞌ nau-antaveriai, eeꞌnoko Jiisuuꞌ Karistooꞌkoo kuung otomatoai eeꞌnara masikaꞌantavema eeꞌnoko nantoong piaaverima.  
\v 14 Tareveaing tee kara masikung tee Tanuaang Meekunge niiꞌkoo otomatomaunge masikaꞌantaruma aruuꞌnung.   
\s1 Onesiporas Tampaꞌ Eꞌmanuuꞌnaꞌ  
\p
\v 15 Dake noruꞌei otong teing teing ookara Eesia-nameensiꞌnupoong ning-eta mmariauꞌning. Teing-koo niiꞌnung Pisilas eeꞌnoko niiꞌnung Emosenis.  
\v 16 Kumponinge piaavuriaing Onesiporas bakanava-kooning, teie amutemuꞌpie boira-antamukoꞌ ning.  
\v 17 Tee tee maiaꞌoaꞌ ning ioꞌmai daiꞌmarioꞌ, teka tenang Roomaꞌ poraiꞌnange teie bakei aaꞌnaꞌ ning oo-koo piavora besiꞌmura peꞌnumuuꞌ.  
\v 18 Ovoringe kong-antavuaing tee piaa bakaang teꞌmung doong asiꞌnaꞌmung. Dake tampaꞌ noruꞌei otong avutevuꞌari tampaꞌ pakumuuꞌnaꞌ Epeses-namono-koo.   
\c 2  
\s1 Arikung Kuneꞌema Naning Piikonung-pinaꞌ Iriꞌ Oꞌdaravaukaꞌ  
\p
\v 1 Aung ee daꞌ nnuring, purintaravaing iriꞌ nkavei, tee iriꞌ Jiisuuꞌ Karistooꞌkoo kuung otoko biraankerui arumaung.  
\v 2 Eeꞌnoko tee minkunaa ning-koo taaraveruꞌnung mmauꞌ ninka tee eeꞌnara masikaꞌantaveri pareꞌeriai nantoong-koo kara tare baukonuka-koo botoverima napoꞌ niiꞌning nau-antavaariiꞌnaang.  
\v 3 Kuneꞌeaing nariꞌ tee sisikeera ninge kuneꞌamanaꞌ iriꞌ oꞌdaravaꞌ daꞌ naning tampara kare-koo tavuꞌkoo piikonung-pinaꞌ Jiisuuꞌ Karistooꞌnung deentari.  
\v 4 Naning piikonung noruꞌ paakavaravaung, teka bakaang ovoring dotu-antavuainaꞌ nariꞌ otomaung.  
\v 5 Naning deikooꞌkoo kuaꞌparamaung tee siompumaung tee deikooꞌ bakaang aarumo narung. Siompuarui dei makotuarupeuꞌ mooꞌ nka-koo.  
\v 6 Eeꞌnoko napoꞌ tee eeꞌnara naning mintoong bauko tee tutunaꞌning-koo naikumaung poreꞌomaatoma.  
\v 7 Norunoruꞌeaing teing kapooꞌ ninge nauransining. Ovoringe tee tasiꞌantaruaing miruꞌnooꞌ teing ookara-koo.   
\p
\v 8 Eeꞌnoko napoꞌ norunoruꞌeaing tee Jiisuuꞌ Karistooꞌ daaꞌaruꞌnung bouꞌnooꞌketa tee eeꞌnara Deevitaꞌ bakanamuiaang-koong pouꞌnung tee-pinaꞌ doorenang ninge siraꞌpamaunge minkuvui otoinaꞌ.  
\v 9 Tee eeꞌnara doorenang ninge sisikeera kuneꞌankooꞌ siraꞌpama, kakuuꞌ dovang kaki-antamaakooꞌ bakiaaꞌ nko-pinaꞌ. Nka tee karakara Ovoring bakaang kakuuꞌ kaki-antavaavaung, beremparamaung.  
\v 10 Teeꞌkoo amutemuriiꞌ sisikeera toraꞌkoo tauraꞌmarama iriꞌ oꞌmaravaung teinge nantoonge Kumponinge miruꞌniiꞌnankai taaravaavainaꞌ teing napoꞌ Jiisuuꞌ Karistooꞌkoo kuung otoroi domang-anta kompaavaꞌnaang meenasi otoi otoꞌ mantaꞌpai.  
\v 11 Aung kara kenavampimaung masikung:  
\q1 Niiꞌ tee ninka nariꞌ moompira  
\q1 Napoꞌ tee ninka nariꞌ domamariaing.   
\q1
\v 12 Eꞌmanampiri sisikeera toraꞌpampira  
\q2 Tee ninka nariꞌ nantoong tarearampiaing.  
\q2 Nka niiꞌ tee-koo penkemariko  
\q2 Napoꞌ tee niiꞌkoo penkemparavaing.   
\q1
\v 13 Nka niiꞌ eꞌmanampiaruko tee-koo  
\q2 Tee bakaang kara-koo eꞌmanui otoaing,  
\q2 Aiꞌ bakaang aarumo tampara-koo  
\q2 penkemparavarupeuꞌ.   
\s1 Kara Masikung Narung Pakupakupoꞌnung; Niiꞌnamuriiꞌkoo Konteroaing  
\p
\v 14 Dake noruꞌantaveriaing tee kara nauransinaꞌ. Ovoringe oorurioꞌ botoveriaing eeꞌ: Dontaꞌdariri otoriai kara-koo tataꞌnanka-ita. Teeꞌ tataꞌkoo tampaꞌ deeaꞌ. Nantoonge taaravaama tee orari-antavaripeuꞌ.  
\v 15 Paarararavai daka matauari otoꞌkoo Kumponinge makosi-antaruainaꞌ, naning matau-pinaꞌ, dakaang nko-nko-koo maiaꞌkoo makosi deeaung-pinaꞌ. Teeꞌ kompeaing tee minkunaa Kumponing-etaing kara masikung makosinaꞌ miruꞌ koontoꞌ siraꞌpei.  
\v 16 Dontaꞌdari otoaing temuriiꞌ Kumponing-nung deeaung naampa-ita. Teie tee nantoong barampuriaing tee-koo taung oovunavung-koo Kumponing-ankoita.  
\v 17 Teie biikaang kara tee deraꞌpinaꞌ maaꞌuriaing deraꞌke naning domantooꞌ otoko maaꞌumanaꞌ. Teing teeꞌ oroꞌning-koonaanka niiꞌnaanka Haimenias eeꞌnoko Pailitas.  
\v 18 Tenaanka taung masikavung bekoiꞌuretuꞌnaanka aaꞌpurema, “Kumponinge ookara nantoong booꞌketa daaꞌuruꞌ tero.” Teeꞌ minkuvurema niiꞌning biikaang masikaꞌanta orari-antavuretuꞌ.  
\v 19 Nka tee aung kara masikung teing-koo nantoong-koo Kumponing masikaꞌantavaamaing-koo aaꞌnaꞌ dateꞌpari otomaung natuku tankanung-pinaꞌ ivekung tekaꞌpaama eeꞌ daariaapeuꞌnung-pinaꞌ, “Ovoringe noruꞌui otong teing bakaning, eeꞌnoko ookara Kumponing bakaang miring tampaama masikaꞌantavaamaing koontoꞌ bereꞌariaing orara aarumo-ita.”   
\p
\v 20 Tee tee aarumonanka tee eeꞌpinaꞌ otong: Naning bakanava-koo aretereng otorong, niiꞌning kapang-koo aaꞌnaꞌ sisisiisi-koo nkoniiꞌ, eeꞌnoko niiꞌning koiꞌkoo eeꞌnoko kansiꞌkoo nkoniiꞌ. Teing-koo niiꞌning kapooꞌ tampara masikung bantoꞌning eeꞌnoko niiꞌning tamunsiꞌning.  
\v 21 Eeꞌpinaꞌ: Naning tee tampareng-pinaꞌ baka kiiroraaꞌari dei tamunsiꞌnung aarumo-ita enang tee kapooꞌ tampara bantoꞌnareng-pinaꞌ deemparapeuꞌ; napoꞌ meekaꞌpari otopeuꞌ, bakaang pankaing pakuvupeuꞌnaꞌ maamuari otopeuꞌ tampamuriau nko-nko nko-koo.  
\v 22 Tee tee enang dontaꞌdari otoai nemaaꞌ biikaang karakaraaꞌketa. Toꞌbii-antarari otoai teꞌaape: nariari otoꞌ, masikaꞌanta, piaa eeꞌnoko mooa, teing Ovoring-koo baitoarimaing ninka nariꞌ otoritaaꞌ tampaꞌ nariꞌ nko-koo piavoromaing ninka.  
\v 23 Nauꞌka pakuraravaukaꞌ tee-koo minkuminku-koo daang-koonanka-koo kanuꞌaapenung-koo. Noruꞌei otong temuriiꞌ aarumoi turang-anta basi-antavumaung.  
\v 24 Ovoring bakaning botovotonaaꞌnuka turang nkonuka deeaukaꞌ. Teing nauꞌka navunavuroꞌnuka otoroaing ootukunung-koo, tampaꞌ sirakaꞌantanuka, iira noruꞌaavaing, napoꞌ biikaning kare-nupoong koong-antavaarimaatoai domang boimporoi.  
\v 25 Aiꞌ pa Kumponinge napoꞌ toro-antavuriai eeꞌnoko noruꞌaavai tee kara masikung.  
\v 26 Eeꞌnoko teeꞌkoo mmariaavaing teieta Sietaniꞌ bakaang baankaꞌketa biꞌantavurimaung-eta bakaang noruꞌ siong-koo.   
\c 3  
\s1 Avoꞌavoroꞌ Doong Asiꞌnaꞌmung-aapenaꞌmung-koong  
\p
\v 1 Nka enang tasiꞌpeai aung: Doong asiraning-koo tavoꞌkuaing batei arikananka.  
\v 2 Aꞌnooꞌ eeꞌ oroꞌnanka otoroaing: nantoong biiꞌka piaavarimaing, mooniꞌ piaavaamaing, biiꞌka daangamparimaing, daang pankaing-pinaꞌ noruꞌnanka, kara oreng minkunuka, taarapii-kananka biumaraang-koo, kapooꞌkoo tampara minkuaavaing, meekaꞌpariaing,  
\v 3 nantoong baaꞌpinaꞌ noruꞌaarimaing, pinau noruꞌaavaing, miring orari-antananka, tooreerenuka, irinsianuka, tampara aarumo tavaamaing,  
\v 4 tooꞌde-nupoong, tutung tampara noruꞌ uraantavaavaing, kirokainuka-pinaꞌ noruꞌarimaing, biiꞌka tampaꞌ deeꞌanta-koo nariꞌ piavoroma Kumponing tampaꞌ deeꞌanta-koo piavoroaing, tang dootuuꞌarimaing nka Kumponing daang-antavaakooꞌ;  
\v 5 Temuriiꞌ nantoong-eta tontaꞌdari otoaing.  
\v 6 Teing-koo niiꞌnariong tee pavanankai tamung koinaamaung manikuꞌ aruaruꞌnanka biikaang kara-koo biꞌantavaariiꞌnaang, manikuꞌ orara aarumo ninka mankiꞌoromaing, noruꞌ avitoitoi eearimaing kapooꞌnanka amutemuriiꞌ karaaꞌaama.  
\v 7 Bane arera naning arekeeꞌ oroꞌ poko tee taaravaapeuꞌ, nka tasiꞌpaavarupeuꞌ kapooꞌ masikung.  
\v 8 Tero tee Janis naankai Jampiris turampurekoꞌ tee Moosesi, eeꞌnoko teeꞌ nariꞌ teinge tooꞌdempaamaung ookara kapooꞌ masikananka. Teing donkaang tunsi deraꞌnukai eeꞌnoko baito tosiroꞌkoong otoꞌevoroining.  
\v 9 Eeꞌnoko Janis naanka Jampiris namuꞌke duaꞌaretuꞌnaꞌ teeꞌ nariꞌ napoꞌ teing tamung apupoꞌ basiarira duaꞌariaing nantoong ookarai ooaarioꞌ.   
\s1 Kara Masikunge Kumponing-etainge Tampaꞌ Noruꞌeko Tarerui Otoaing.  
\p
\v 10 Enang tee dake ning noruꞌmeing apeꞌ: kara nauarankoꞌnaꞌ, nkomaramanaꞌ, nkaang domang toꞌbii-antamaramanaꞌ, nkaang masikaꞌanta, kapuumari oꞌnomanaꞌ, nkaang piaa, eꞌmanansi oꞌnomanaꞌ, arikananka kuneꞌamanaꞌ, sisikeera kuneꞌamanaꞌ, napoꞌ orakaꞌ nkomauꞌnaꞌ teka Antiokiꞌka eeꞌnoko napoꞌ Aikoniamiꞌka eeꞌnoko Liisiraꞌka, aremuriau turanturang eꞌmanansi toraꞌpantuꞌnaꞌ;  
\v 11 Eeꞌnoko noruꞌei otong ookara teing-eta Ovoringe mooꞌmuuꞌ domamuuꞌnaang.  
\v 12 Teeꞌ nariꞌ masikaꞌ ookara Kumponinge marovurimanaꞌ otoꞌkoo piavoromaing nantoonge orakaꞌnko kuneꞌaavaing, teing Jiisuuꞌ Karistooꞌkoo otoromaing.  
\v 13 Tenang eeꞌnang oreng nantoong daang Kumponinge botonisinuka tamparimaing aaꞌnaꞌ baruꞌnooꞌ oraruꞌkiaavaing nantoong tosiaarima eeꞌnoko biiꞌka tositosi masikaꞌantavaama.  
\v 14 Teka dake siompeaing tee kapooꞌ daꞌ bareraruꞌnung eeꞌnoko ivekaꞌdoi masikaꞌantaveuꞌnung. Dake niiꞌ tampaꞌ noruꞌmeri otong kara naurampiruꞌning.  
\v 15 Eeꞌnoko daꞌ tootoꞌnooꞌketa noruꞌeuꞌ Dariraari Meekananka teing daꞌ tampaꞌ nau-anta-kooning noruꞌantarupeuꞌning Jiisuuꞌ Karistooꞌke domantuainaꞌ baitorarako.  
\v 16 Ootukunung Daari Meekung Kumponinge amuruꞌnung, Kumponinge uaampuriko daariauꞌnung, eeꞌnoko tee makosi nau-anta-koo, orara aarumo tasiꞌanta-koo, domang koong-anta-koo, eeꞌnoko tampara aarumo siong-koo kakeꞌiiari.  
\v 17 Kumponinge teeꞌ karantavurikoꞌ aaꞌnooꞌnaang: Bakaning meekupoong makosininge maantoꞌantavarira amutemuriiꞌ nko-nko tamparananka tavoꞌantavaavaꞌnaang.   
\c 4  
\s1 Timotiꞌke Paulaꞌ Pariꞌantavura Doorenang Tampara Iriꞌoi Daankivuai  
\p
\v 1 Kumponinge oomuresioꞌ eeꞌnoko Jiisuuꞌ Karistooꞌke, teie ookara nantoong simpeꞌuriainge, domantooꞌnuka eeꞌnoko boorouꞌning, ninge eeꞌ botoramaang daꞌ, noruꞌampiritaaꞌ Karistooꞌ tee napoꞌ ovorimpari oroꞌparavaing:  
\v 2 Iriꞌantavei siraꞌpeaing tee kara ootukunung batei-koo, oranang eeꞌnoko tampanang. Arooꞌantaveriai, tautaueriai eeꞌnoko tampaꞌ mantomperitaaꞌ nau-antaveriai.  
\v 3 Teeꞌ nariꞌ bointui uaaroaukaꞌ eeꞌ noruꞌei: Bateinang tee dueꞌumaang nantoong kontekontevoroainooꞌ kara masikung taara-koo. Niiꞌnamuriiꞌ kara taara-koo tariiꞌoroma mmauꞌ kara-naunuka bokuaariiꞌnaang teing ninka nariꞌ karaaꞌeemaing.  
\v 4 Teeꞌkoo kara masikung-eta akovetei bereꞌariiꞌnaang eeꞌnoko pooariiꞌnaang kumponaananka-koo biꞌariri.  
\v 5 Nka tee daꞌ pinkaꞌdari otoaing, baike noruꞌeaukaꞌ, kara nkavei nanuꞌkoo purintaravai, tampaꞌ dupeveai dakaang nko-nko pakupaku-koong, ninge nkaang dupeansinaꞌ.   
\p
\v 6 Aiꞌ ninge dupeamira tee makosi tamaavaing dueꞌka, nka tee Ovoring-koo pareka-pinaꞌ noruꞌmari otong. Tee doong ning tenkenampainaꞌmung dueꞌumaang.  
\v 7 Ning piikonung deekoꞌ orara aarumo ninka tameerema puruꞌmuaruꞌ. Deikooꞌkoo kuaꞌmaruꞌnung-pinaꞌ iriꞌmoi tampaꞌ botu basimaring, kara masikung masikaꞌantavampimaung pinkaꞌansi.  
\v 8 Enang-eta deto nkaang mooꞌ nerang-koong tee maamuari otomatoaing, eeꞌnoko tee taaꞌniꞌanta Kumponinge koontoꞌnuka tammurimaing-koong. Tee eeꞌnara tee teie Ovoringe koontoꞌke bireꞌurimaunge kong-antamuainung teꞌmung eeꞌnaꞌmung makosinaꞌmung, eeꞌnoko ning narung deeaꞌ, teka napoꞌ tee avuriaing teing ookara karaaꞌai ooaavaꞌnaang nempaamaing.   
\s1 Paulaꞌke Timoti Tee-anko Daꞌdeng Poꞌkoo Bokuvuuꞌnaꞌ  
\p
\v 9 Paaraveaing ning-anko poꞌkoo daꞌdeng.  
\v 10 Aming-koo, nnaꞌ Deemasie tee aung kapooꞌnanka kansiꞌkoong aaꞌnaꞌ karaaꞌura siꞌmuieeng; siꞌmuraiꞌnang Tesalonaikaꞌ beieenung. Napoꞌ Keresen Kalesia-nameensiꞌaape beiee; Taitas napoꞌ Damesia-nameensiꞌaape beiee;  
\v 11 Tikikas Epeses-aape botoansinung; Luukeꞌ narung niꞌninka oꞌnoreng;  
\v 12 Teeꞌkoo Maakaꞌ bokuera daꞌninka poreai; tee eeꞌnara nkaang pakupaku tampara.  
\v 13 Mononopaꞌ nkavei poai nkaang, Kaapas-anko sipantuꞌ Toroasi-navuntuꞌka, eeꞌnoko buukunanka, nka baruꞌnooꞌ teing ivekeng boromakaꞌkoong dopaꞌkooning.  
\v 14 Aleksandaꞌke, teie koopaꞌ taꞌnampumaunge, orari-antamuuꞌ. Ovoringe makuꞌevuaing tee bakaang nko-nko orara-koong.  
\v 15 Nka tee-koo daꞌ tareraravaing, aiꞌ teie aaꞌnaꞌ tooꞌdevumang niikaang minkunaa kara simpeꞌnupoong˜ anko.  
\v 16 Tero tuumpimaako tutunaꞌnang kara dimpaꞌanko naninge pakumuaꞌ ning. Ookarai siꞌmauꞌ. Orakaꞌ nkomauꞌnaꞌkoo Kumponinge piaavuri tontaꞌevuriaing ninge tontaꞌevoronsinaꞌ.  
\v 17 Nka bane siꞌmaioꞌ Ovoring tee ning-koo dueꞌ otouꞌ, eeꞌnoko puring-antamuuꞌ tampaꞌ siraꞌpamaꞌnaang tee kara ookara, ootukununge avotevoraꞌnupoonge taaravaavaꞌnaang. Teeꞌkoo domamuuꞌ tee-pinaꞌ laioni-koo karang-eta pasiꞌmupeuꞌnung-pinaꞌ.  
\v 18 Ovoringe tee ning mooꞌmuaing teieta ootukunung orarananka-ita, ning tampaꞌ domang-antamuainaꞌ paning-koo oꞌnooꞌnaang teie tarevumanooꞌ. Bakaang meenasi teeꞌ nariꞌ otoaing ootukunung doong-koo. Ee, teeꞌ nariꞌ.   
\s1 Siꞌnooraꞌnaare  
\p
\v 19 Tampaꞌ tamperiaing Pirisikaꞌdaring-koo eeꞌnoko Akuila baꞌung, eeꞌnoko Onesiporas bakanava-kooning.  
\v 20 Irasitas Koorin-navuntuꞌ otoko sipantuꞌ. Eeꞌnoko Toropimas siipavoko Mailitas-navuntuꞌka sipantuꞌ.  
\v 21 Paaraveaing ning-anko poꞌkoo daꞌdeng narung, doving orara bakaang batei tavoꞌkuma avoꞌduꞌneeng. Iubiulas dovange Piudenis, Lainas eeꞌnoko Kolodia eeꞌnoko ookara niiraꞌmainkaange tampara tampaing daꞌkoo.   
\p
\v 22 Tee Ovoring Jiisuuꞌ Karistooꞌ dakaang tanuaang ninka otoremaatoaing. Tee biraanke tee daꞌkoo otomatoaing.  
\p Masikung.