\id 2TH - Naasioi NT [nas] -Papua New Guinea 1994 (web 2014) 
\h 2 TESALONAIKAꞌ 
\toc1 Aneꞌ kenaanka-naneꞌ Tesalonikaꞌnupoong Paulaꞌke Daarievuruꞌnaneꞌ 
\toc2 2 Tesalonikaꞌ 
\toc3 2Tes 
\mt2 Aneꞌ kenaanka-naneꞌ  
\mt1 TESALONAIKAꞌnupoong  
\mt2 Paulaꞌke Daarievuruꞌnaneꞌ  
\imt1 Kara Baavootunanka Aneꞌkooning  
\ip 1:1 Paulaꞌke Doong Asi-koo Nau-antavuruꞌnaꞌ  
\ip 3:1 Paulaꞌke Botovuruꞌnaꞌ Teing Mintoong-koo Kontevoromaing Daaꞌaariiꞌnaang  
\c 1  
\ms1 Paulaꞌke Doong Asi-koo Nau-antavuruꞌnaꞌ  
\mr (1:1–2:17)  
\p
\v 1 Tee ning Paulaꞌ. Sailas naankai Timoti pakumuresitaaꞌ daarirerompimang diiꞌ Kumponing eeꞌnoko Ovoring Jiisuuꞌ Karistooꞌ beekaning dootuuꞌnupoong Tesalonaikaꞌke otorimaing. Maikoriꞌ Kumponinge biraankeruri mooa ninka otoriiꞌnaang.  
\v 2 Biraanke eeꞌnoko mooa diiꞌkoo otoaing Kumponing Niuma-itaing eeꞌnoko teieta Ovoring Jiisuuꞌ Karistooꞌ.   
\s1 Paulaꞌke Tampara Tampuuꞌnaꞌ Kumponing-koo Tampaꞌ Donkonaioꞌ Oovurira  
\p
\v 3 Mmaikoriꞌ ee, niiꞌke tee nauꞌka tampara tampampimaung Kumponing diiꞌkoo. Teeꞌ nariꞌ makosinaꞌ nko-koo, aiꞌ diikaang masikaꞌanta tampaꞌ dupui otomaung-koo, eeꞌnoko tee diikaang piaa diiꞌka bereng-antaverimaung-koo.  
\v 4 Teeꞌkoo niiꞌ doturotumarimaung siraꞌanta-koo Kumponing bakaning dootuuꞌnupoong-koo osi kantenaꞌ. Nauarampimaung diiꞌ purintariri eeꞌnoko baitorariri otorimaung-koo tenang nantoonge turantaarima poreꞌantaraariko.   
\s1 Kumponinge Niiꞌ Simpeꞌmurimaung Aarumo Koontoꞌkoo  
\p
\v 5 Aung eeꞌnara taaꞌniꞌanta Kumponing aarumo koontoꞌkoo simpeꞌanta-koong, aaꞌnoko teie nerirurimang makosi-antaruriiꞌnaang tee-koo bakaang muuꞌkoo kuung beꞌkoo baike ninka kaviꞌerimaung-koo.  
\v 6 Teka teie enang kiimata makosinaꞌ maamu-antavui otong teing-koo nantoong diiꞌ orakaꞌ nkoraarimaing-koo, meroꞌanta-koo.  
\v 7 Tee taaꞌniꞌanta napoꞌ eeꞌ oroꞌ: Teie aaꞌ niiꞌ orakaꞌ nko-nko-ita unaa-anta amurima diiꞌ napoꞌ unaa-antaruriainge poreꞌanta toraꞌperimaing, teꞌmung Ovoring Jiisuuꞌ tavoꞌaravainaꞌmung;  
\v 8 Teka tee tavoꞌaravaing paning-eta teing ninka bakaning koosinung˜ purintoꞌnanka ninka ntaꞌ aaꞌnaꞌ urumpari mero-anta-koo teing Kumponing noruꞌaavaing eeꞌnoko teing Ovoring Jiisuuꞌ bakaang kara tampara siompaavaing.  
\v 9 Kiimata avuriaing eeꞌ oroꞌ: Ovoringe bakaang dutakanooꞌketa bataꞌuriai, bakaang iirakuta-koong meenasi ooaavaukaꞌnung eeꞌnoko orari-anta kompaavaing oparavaukaꞌnung.  
\v 10 Teeꞌ nkoaravaing teꞌmung poainaꞌmung meenasi nkavuuꞌnaang teing-etaꞌ bakaning meekupoong-eta, deto basi-antavai masikaꞌantavaamaing-eta. Diiꞌ tee-pinaꞌ teing-koo meuꞌ otoriainge aiꞌ diiꞌke tee masikaꞌantaveruꞌnung tee, kara bakaang diiꞌ naurarampirioꞌ niiꞌke.   
\p
\v 11 Poainaꞌmung noruꞌampima niiꞌke niikaang Kumponing-koo kunsirerorompimaung diiꞌ teie dupe-antaruriiꞌnaang miruꞌduruꞌnaꞌ eeꞌnoko napoꞌ dupe-antareruriaing bakaang iriꞌke teing tampara aarumonanka eeꞌnoko nko-nkonanka Kumponing masikaꞌanta-itaning daruerimaing.  
\v 12 Teeꞌ nariꞌ tee miring niikaang Ovoring Jiisuuꞌ bakaang pankaimparaaꞌnaang diiꞌkoo kuunge, eeꞌnoko diiꞌ teeꞌ nariꞌ tee-koo, bakaang piaae makosinaꞌ niikaang Kumponing eeꞌnoko Ovoring Jiisuuꞌ Karistooꞌ.   
\c 2  
\s1 Jiisuuꞌ Poainaꞌmung Dueꞌuko Naning Orara Tavoꞌaravainaꞌ  
\p
\v 1 Enang napoꞌ diiꞌ niiꞌmaikororiꞌ naurampimang niikaang Ovoring Jiisuuꞌ Karistooꞌ napoꞌ toroaravaing-koo eeꞌnoko tee niikaang naronaroꞌ tee, kuneꞌampiaing-koong.  
\v 2 Aaꞌnaꞌ pia-antararampimaang diiꞌ niiꞌmaikororiꞌ paapaaꞌdarima domang puraaniriaukaꞌ niiꞌnamuriiꞌ kara tavoꞌarako, Ovoring bakaang doong tavoꞌkuing, poing, tampaako, bane Tanuaang Meekunge karantanuka˜ tamparima aiꞌ daankiarima minkuaako dootuuꞌkoo aiꞌ karavoto-koo˜ minkuaako ning-etaing tampaama.  
\v 3 Teeꞌ avutevuꞌai tosiraariko masikaꞌantavereriaukaꞌ. Eeꞌ noruꞌeriai, kenaanka kapooꞌ nkoaravaruko Ovoring bakaang doong tavoꞌkuaukaꞌnung, aaꞌnoko tutung mmauꞌke Kumponing-eta bereꞌarima tooꞌdempaavai eeꞌnoko tee naning Kumponing-nung Boto Meekung daang-anta-koo piavoainung oroꞌparavaing, teenooꞌ tee mosianung kuuntuꞌuaing.  
\v 4 Tee eeꞌnara naning taarapiika deto basi tamparavaing ookara ovontung-koo nantoonge boontuaarimaing-koo. Ovontung turampuriainge bera dootuuꞌnava pankava Kumponing-nava koinuraiꞌnange baꞌnamparara eeꞌ minkuvuaing: “Ning tee Kumponing.”  
\v 5 Aung kara tero naurampiruꞌ diiꞌ ninka oꞌnoritaaꞌ, aiꞌ ampaꞌdoruꞌnunge?  
\v 6 Diiꞌke tee noruꞌeri otong tee doomoꞌui otomaung. Teie doomoꞌui otooꞌnaang bera tee bateinang Kumponinge tauraꞌpuko oroꞌparavainaꞌmung.  
\v 7 Aꞌnooꞌ tee taarapiika aarumo enang makensiꞌnaꞌ nko-nkoaramang doomoꞌuioꞌ bera Kumponinge tee doomoꞌui otomaung daateꞌuainaꞌmung.  
\v 8 Karistooꞌ eeꞌnara aaꞌnaꞌ araka-poꞌnung tavoꞌkura paroꞌuuꞌnaang bakaang domaange karang-eta, eeꞌnoko teka bake-antavuai bakaang aarumo.   
\p
\v 9 Enang napoꞌ naurampiaing tee-koo naning taarapiika Kumponing-nung Boto Meekung daang-anta-koo piavoainung-koo;  
\v 10 Sietaniꞌke eeꞌnarai tee taarapiika tavoꞌantavuuꞌnaang tee ninka bakaang iriꞌ amutemuriiꞌ taaꞌniꞌanta tositosi-koong, taꞌnimpaariiꞌ, eeꞌnoko amutemuriiꞌ aarumo orarananka tosi-koong duaꞌanta-koo teing paaꞌarimaing kasiaavaruma tee kara masikung domampuripeuꞌnung.  
\v 11-12 Teeꞌkoo, kasiaavaruko Kumponinge tauraꞌpuaing tositosi pankaing teing-koo tavoꞌaraaꞌnaang, daang-koong masikaꞌantavaako ookara kiimata-kooning tampuriainaꞌ, orara aarumo piavoroma kara masikung masikaꞌantavaavaruko.   
\s1 Kumponinge Diiꞌ Miruꞌduruꞌnung Domang-anta-koo  
\p
\v 13 Niiꞌmaikororiꞌ ee, Ovoringe piaaruri otorining, teka niiꞌke tampaꞌ tampampiaing Kumponing-koo diiꞌ eeꞌning-koo. Aiꞌ diiꞌ teing Kumponinge tanturuꞌning tutunaꞌnooꞌketa domantariiꞌnaang Tanuaang Meekunge meekaꞌantarurioꞌ eeꞌnoko diiꞌke kara masikung masikaꞌ antaverima.  
\v 14 Kumponinge temuriiꞌ otootoꞌkoo bokururuꞌ tee doorenang tampara daankiampiko diiꞌkoo. Diiꞌ bokururuꞌnung nkaveriiꞌnaang tee meenasi niikaang Ovoring Jiisuuꞌ Karistooꞌ bakaang.  
\v 15 Teeꞌkoo diiꞌ niiꞌmaikororiꞌ purintariri tampaꞌ donkoniri otoriai, komperi otoriaing tee kara masikung niiꞌke naurarampiruꞌ ookenge daankimarima eeꞌnoko karavoto-koo daariampima.   
\p
\v 16 Tee niikaang Ovoring Jiisuuꞌ Karistooꞌ eeꞌnoko Niuma Kumponing piaamaarimanakang eeꞌnoko biraanke-antamaari domang kuaaꞌanta boturopa amaarinakang, kapooꞌ tampara-koo neng-antamaarima – enang tee tekange eeꞌnakange domang kuaaꞌantaraariai.  
\v 17 Diiꞌke ookara kapooꞌ tamparananka minku-koo eeꞌnoko nko-koo iriꞌantaraariaing.   
\c 3  
\ms1 Paulaꞌke Botovuruꞌnaꞌ Teing Mintoong-koo Kontevoromaing Daaꞌaariiꞌnaang  
\mr (3:1-18)  
\s1 Paulaꞌke Niaꞌuruꞌnaꞌ Kunsievaariiꞌnaang Bakaning Pakupaku-nupoong Nariꞌ  
\p
\v 1 Niiꞌmaikororiꞌ ee, asiꞌnanaare anaare: Diiꞌke kunsi-koo pakumereriai Ovoring bakaang kara iriꞌnarung beremparara kuung deempuriainaꞌ teeꞌpinaꞌ diiꞌkoo meuꞌke nkoaruꞌnaꞌ.  
\v 2 Eeꞌnoko napoꞌ kunsi-koo pakumereriai Kumponinge pakumuriainaꞌ teing nantoonge oravoonge tamaariꞌneeng. Aiꞌ ookarai tee masikaꞌantavaavaung.  
\v 3 Ovoringe tee diiꞌ siꞌduriaukaꞌnung, puring-antaruriaing eeꞌnoko ueeng-antaruriaing tee orara-koo.  
\v 4 Eeꞌnoko tee niiꞌke noruꞌdarampiri otong diiꞌke tampaꞌ nkoverimaung eeꞌnoko teeꞌ nariꞌ nkoverimatoaing teeꞌ nariꞌ naurarampiruꞌnaꞌ, diiꞌ Ovoring-koo kuung otorimaung-koo.  
\v 5 Ovoringe koonturiaing diikaang domang Kumponing bakaang piaa tasiꞌperira oroꞌantaveriainaꞌ eeꞌnoko Karistooꞌ bakaang pinkapinkaꞌ napoꞌ tasiꞌperima nariꞌ nkoveriiꞌnaang toroaravainaꞌmung nemperi.   
\s1 Paulaꞌke Ookara Nantoong Tampaꞌ Mintoong-koo Botovuruꞌnaꞌ  
\p
\v 6 Niiꞌmaikororiꞌ ee, enang niiꞌke naurarampimaang diiꞌ tee-koo Ovoring Jiisuuꞌ Karistooꞌ bakaang miring-koo kuunge: Tontaꞌdariri otoriai teing-eta niiꞌning diiꞌmaikororiꞌ kakapotonuka, kakeꞌiirariri mintoontariainaꞌ naurarampiruꞌnung-koo kantoꞌpariaing-eta.  
\v 7 Diiꞌke tee noruꞌeri otong niiꞌkoo biꞌantarariainaꞌ. Niiꞌ teing kakapotonuka deeaꞌ diiꞌ ninka oꞌnoritaaꞌ  
\v 8 Niiꞌ teing niiꞌnunge tamung bauꞌmuriarukoꞌning mooꞌdopai, teka niiꞌ aaꞌnaꞌ mintoomarikoꞌ doong eeꞌnoko muung niiꞌke diiꞌ mankiꞌantararampiarooꞌnaang.  
\v 9 Tee makosi diiꞌke niiꞌ tamung bauꞌkoo, nka niikaang mintoong niiꞌke nkoampikoꞌnung tee diiꞌke ooveri niiꞌkoo biꞌantarariiꞌnaang.  
\v 10 Tenang diiꞌ niiꞌ ninka nariꞌ oꞌnoritaaꞌ niiꞌke tee teeꞌ nariꞌ napoꞌ tautaurarampiruꞌ eeꞌpinaꞌ: Naning kakaruaꞌoaing tee taamang-koo doꞌdeꞌeriaukaꞌ.  
\v 11 Teeꞌ naurarampimaang taarararampira diiꞌkoo niiꞌning teing kakapotonuka tamung niiꞌning biikaning mintoong-koo papuraankaꞌantaverererimaing, diikaning mintoong nkosiiriaꞌ.  
\v 12 Enang tee temuriiꞌ nantoong niiꞌke botorarampima tautaurarampimaang Ovoring Jiisuuꞌ Karistooꞌkoo kuunge mintoontariiꞌnaang dooroontariri. Diikaang iriꞌketaꞌ taamaniriaing.  
\v 13 Diiꞌ niiꞌmaikororiꞌ iriꞌ oꞌdariaukaꞌ tee-koo nko-nko tampara-koo.  
\v 14 Naning tee kupiꞌoko taara-koo aung kara niiꞌke minkuampiring aneꞌ karavotonaneꞌkoo noruꞌerira tontaꞌdariaing tee-ankoita, eeꞌnoko maiaꞌoaing tee.  
\v 15 Karenung pinaꞌ noruꞌeriaukaꞌnung tee, teka tautaueriaing tee-pinaꞌ diiꞌmaikoꞌ.   
\s1 Siꞌnooraꞌnaare  
\p
\v 16 Enang tee Ovoring mooa okovenung eeꞌnarai mooa aruriaing uatepa ootukunung taung-koo. Tee diiꞌ ookara ninka otoriaing.   
\p
\v 17 Enang tee, ninge Paulaꞌke napoꞌ tampara minkurampimang anaare ninge koontoꞌ daariama nkaang birenge miring taaꞌniꞌantamari. Tee taaꞌniꞌanta ookara karavotonaneꞌpi-koo taaꞌniꞌantamaramaung nkanaꞌ daarimaramanaꞌ.   
\p
\v 18 Tee biraanke niikaang Ovoring Jiisuuꞌ Karistooꞌ bakaang diiꞌ ninka nariꞌ otomatoaing. Eeꞌ, teeꞌ nariꞌ.