\id 2PE - Naasioi NT [nas] -Papua New Guinea 1994 (web 2014) 
\h 2 PIITA 
\toc1 Aneꞌ Keneꞌka-naneꞌ Piitai Daarivuuꞌnaneꞌ 
\toc2 2 Piita 
\toc3 2Pit 
\mt2 Aneꞌ Keneꞌka-naneꞌ  
\mt1 PIITAI  
\mt2 Daarivuuꞌnaneꞌ  
\c 1  
\ms1 Tampara Aarumo-koo Biaꞌantamarira Oreng Biikaang Kara Sirakaapuampiai  
\mr (1:1–3:18)  
\s1 Baito-koo Kani-antarariaing  
\p
\v 1 Aung tee aneꞌ karavoto˜ ninge Saimoniꞌ Piitai daariamang Jiisuuꞌ Karistooꞌ bakaang botovotonaaꞌke, eeꞌnoko tee bakaang kara-okomui-nka ning. Diiꞌ eeꞌning daarirerompimang tee aung amuriiꞌ masikaꞌanta niiꞌpinaꞌ nariꞌ otoꞌderurining Jiisuuꞌ Karistooꞌ bakaang aarumo koontoꞌkoo kuunge oko-antamuruꞌnung, eeꞌnara niikaang Kumponing eeꞌnoko Domang-anta.  
\v 2 Tee biraanke eeꞌnoko mooa diiꞌkoo beremparavaing Kumponing tampaꞌ kenkumperi otoriko eeꞌnoko tee niikaang ovoring Jiisuuꞌ.  
\v 3 Aiꞌ tee tee niiꞌke tee tampaꞌ kenkumpampiko teie tee teieta bakaang iriꞌ pankaing-eta ookara kapooꞌnanka makosinaꞌ amuriaing tampaꞌ domamariri siompampiaing-koo. Aiꞌ teie bakaang meenasi eeꞌnoko bakaang tampara aarumo niiꞌ ninka nariꞌ oroꞌanta-koo bokumuruꞌ.  
\v 4 Eeꞌnoko teeꞌ nkomurima teing bakei pankeng avuavuꞌnanka mooꞌdopa amuruꞌ tero maraka-antamuruꞌning. Kansiꞌ bakaang deraꞌketa mmarumpiaꞌnaang amuruꞌ, tero karaaꞌampiko doomamurikoꞌnung-eta bera Kumponing-pinaꞌ nariꞌ datamori oꞌnoriai.  
\v 5 Teeꞌkoo eeꞌnaꞌkoo diiꞌ aaꞌnaꞌ paararariaing diikaang masikaꞌanta ninka tampaꞌ otoꞌkoo, eeꞌnoko teeꞌ tampaꞌ otori Kumponing tampaꞌ kenkumperi otoriaing.  
\v 6 Eeꞌnoko teeꞌ noruꞌeritaaꞌ diikaang mono bakaang pia dakaꞌperi tanatarariai. Eeꞌnoko teieta napoꞌ teeꞌ nariꞌ nko-koo pinkaꞌdariri otorimaatoai, eeꞌnoko pinkaꞌdarima Kumponing-koo arariri otoriaing.  
\v 7 Eeꞌnoko Kumponing-koo arariri otori teing diiꞌmaikororiꞌkoo napoꞌ navurariri otoriai, eeꞌnoko teeꞌ navurariri otoritaaꞌ piaa oroꞌantaverimatoai.  
\v 8 Eeꞌkoo, teing aing aarumo oroꞌantaveri otoaing deekoꞌ eeꞌnoko diiꞌkoo berempari otoai, teinge tee diiꞌ tanataruriaing tamung sinangropanuka iriꞌ oꞌdariꞌneeng-koo tee Ovoring Jiisuuꞌ Karistooꞌ noruꞌeri.  
\v 9 Aiꞌ tee naning aing eeꞌning otoꞌevuaukaꞌnung tee kaputuꞌ, noruꞌ apukung, eeꞌnoko noruꞌuaꞌ otong teie tee urikeng oreng aarumonanka-ita kiiroraaꞌantavuuꞌnaꞌ.  
\v 10 Teeꞌkoo, diiꞌ mmaikoriꞌ, okoꞌokoruriaing tee Kumponinge miruꞌduri bokururuꞌnung taaꞌniꞌantarariri. Teeꞌ eeꞌnaꞌ nkorariaining deekoꞌ diiꞌ teing duaꞌdariaukaꞌning.  
\v 11 Eeꞌnoko diiꞌ teing maneenaꞌ onkeonkeꞌduriaing teka eeꞌnooꞌka paning-koo niikaang Ovoring Domang-antai Jiisuuꞌ Karistooꞌke teeꞌ nariꞌ taremurimato-ainooꞌka.   
\s1 Tampara Doorenang Masikeeari Otoinaꞌ  
\p
\v 12 Teeꞌkoo ninge maroita uatepa noruꞌantarampimatoaing diiꞌ teing aing ookara kapooꞌnanka naurampimaing, bane diiꞌke noruꞌerioꞌ eeꞌnoko tee kara masikung otoꞌderurimaung-koo imaꞌdariri otorikooꞌ.  
\v 13 Eeꞌ noruꞌamaang, makosi ninge diiꞌ enang ning aung mono ninka oꞌnoitaaꞌ tee ninge diiꞌ tante-antarampimatoai napoꞌ noruꞌantarampima.  
\v 14 Ninge eeꞌ noruꞌansitaaꞌ: Batei tee nkaang mono tontaꞌuainaꞌmung dueꞌari otong teeꞌ nariꞌ niikaange Ovoring Jiisuuꞌ Karistooꞌke naumuuꞌnaꞌ.  
\v 15 Teeꞌkoo ninge aaꞌnaꞌ tautaurampimang ning tenkenanko tee diiꞌ makosiri otoriainaꞌ aing kapooꞌnanka napoꞌ noruꞌkoo batei piaroriaining-koo.  
\v 16 Niikaang Ovoring Jiisuuꞌ Karistooꞌ iriꞌ ninka pouꞌnaꞌkoong minkunaa naurampiruꞌnung kumponaang-koo biꞌaravaꞌ, nantoonge aavamaari minkuaapeuꞌning-koo, teka niiꞌke tee niikaange dutai ooampiruꞌnung minkuampimaung teeꞌ meenasi ninka daurarong˜ otomanooꞌketa neramparuꞌnaꞌ.  
\v 17 Aiꞌ tenang teie tee pankaing-anta eeꞌnoko meenasi Bauma Kumponing-eta nkavuko teie auronge narunge karavuuꞌ teketa paning-eta daurarompari bakaang meenasi oroꞌantavumanooꞌketa eeꞌ minkuvuma,  
\q1 “Aung tee nnuring ninge piaavamaung. Eeꞌnara-koo ning tampaꞌ dotumaramaung.” \rq (Maatiuꞌ 17:5)\rq*   
\p
\v 18 Aung kara anaare niiꞌke paning-eta poko taaravampiruꞌ, aiꞌ niiꞌ teing tee ninka nariꞌ oꞌnoruꞌning teke meekamii-koo.  
\v 19 Eeꞌnoko nakaro-nupoong˜ urikupoong biikaang kara Jiisuuꞌke dupe-antavuioꞌ aaꞌnaꞌ masikung oroꞌparioꞌ kompampiri otong niikaang kara puring-anta-koo. Diiꞌ tee noruꞌ eꞌmaniri otoriaing tee-koo biikaang kara-koo tee-pinaꞌ araka mutaananooꞌke arakavaramaung-pinaꞌ noruꞌeritaaꞌ bera taneꞌpuko tee maatara daaꞌaravainooꞌke basi diikaang domang-koo.  
\v 20 Tutunaꞌ tee aung tasiꞌperira eꞌmaniriaing Daari Meekung-koo: Ookara kara Daari Meekung-koo nakaro-nupoonge tarampeeaakoꞌning˜ teing nantoonge biiꞌka siraꞌkoo makosi deeaing.  
\v 21 Aiꞌ nanaare otoaꞌ naninung pia-ita tavoꞌkuuꞌnaare Daari Meekung-koo, teka Tanuaang Meekunge karantavuriko˜ Kumponing-eta nantoonge minkuaama daariaakoꞌ.   
\c 2  
\s1 Tositosinuka Nakaro-nupoong˜ Keraꞌpariainaꞌ  
\r (Jud 1:4-13)  
\p
\v 1 Teka niiꞌning nakaro-nupoong daang Kumponing-etaining tamparima daaꞌarikoꞌ Juꞌnupoong-koo meuꞌke, eeꞌnoko napoꞌ teeꞌ nariꞌ daang-koonanka nau-antanuka daaꞌariainge diiꞌkoo meuꞌke. Teeꞌ nkoarima nantoong makenge orari-antavaariaing biikaning noruꞌketa daang nau-antavaarima, biikaang Ovoring teing mooꞌuruꞌnung sipai. Teeꞌkoo biiꞌka namuꞌke orari-anta kuneꞌaavaing.  
\v 2 Aꞌnooꞌ tee mmauꞌke siompaariaing biikaang aarumo amutemuriiꞌ maimaiaꞌnanka-poꞌnung. Teketaꞌ teing teeꞌ nkoariko tevung Karistooꞌnung kara masikung sionavung niiꞌninge orakaꞌ minkuaavaing.  
\v 3 Eeꞌnoko teeꞌ nkoarima mooniꞌ barang-koo okovuriai kara menaankavarima. Nka tee teie Simpeꞌnkoi˜ tuutunang˜ miruꞌevuruꞌnung nempari otong. Teing orari-antavuriainge keeroorovuri otong.   
\p
\v 4 Niiꞌke noruꞌampiri otong teeꞌ nkoaravainooꞌ aaꞌnung-koo: Niiꞌning koosinunanka orakaꞌ nkoariko tamung oovuriaruuꞌ, teka kansiꞌkoo tumang duaꞌuruꞌ isipoꞌ masipoꞌ mutaananooꞌ doonko teke daiꞌariri otorooꞌnaang bera simpeꞌuriainaꞌmung-koo basi.  
\v 5 Napoꞌ urikavarang orara aarumo ninka nariꞌ kansiꞌ maantoꞌaakoꞌning tamung oovuriaruuꞌ, teka doua-koo minki-antavurira opuruꞌ, Nooaꞌ narung deekoꞌ aarumo koontoꞌ daankivukoꞌnung domampuuꞌ, niiꞌning nantoong ˜kenaanka-taa ninka nariꞌ.  
\v 6 Napoꞌ osi pankeng kevuntuꞌka Sodom eeꞌnoko Komoraꞌ sipung deeng-antavuretuꞌ otorearooꞌnaang tampureta damaꞌnavarange Kumponing siompaavaukaꞌninge nkovuriainaꞌ ooaavaꞌnaang.  
\v 7 Eeꞌnoko teka napoꞌ naning koontoꞌ, Looteꞌ, domang-antavuuꞌ, tee eeꞌnara orakaꞌ deeꞌokoꞌnung teing oreng Sodom-nupoong maimaiaꞌnaꞌ nkoariko.  
\v 8 Tee eeꞌnara naning koontoꞌ deempari domang mankiꞌokoꞌnung teing tee ninka otorokoꞌning boto-koo kuung otoroaꞌpinaꞌ noruꞌai nkoarikoꞌning ninka doong kante oovurima eeꞌnoko teing-koo taaravuma.  
\v 9 Teeꞌ nkovuruꞌnaꞌkoo tee siraꞌpari otong tee Ovoring noruꞌkui otong nantoong tee siompaamaing parapaara arikung-eta domang-antanaꞌkoo eeꞌnoko napoꞌ teing siompaavaukaꞌning kiimatavuriiꞌnaang pinkaꞌuri otoꞌnaꞌkoo bera teꞌmung simpeꞌuriainaꞌmung-koo basi.  
\v 10 Deepoꞌ masipoꞌ bakei kiimatavuriaing teing nau-antanuka daang Kumponing-etaining tamparimaing. Mono bakaang pia orara deraꞌ siompaamaing Ovoring tompimpai.   
\p
\v 11 Aing amuriiꞌ nantoong derareranuka, boreꞌ kapanuka, anutua avoreaavaꞌ avutevuꞌari dauraronanka orakaꞌ minkuaarimaing, teka teing ookara noruꞌpoꞌnupoong, bane koosinunanka deekoꞌ, teeꞌ nkoariaung. Bane teing koosinunanka nantoong-koo dau basinaꞌ iriꞌ eeꞌnoko iirakutapoꞌnupoonge orakaꞌ minkuaarima tuumpiaariaung biikaning kare-nupoong Ovoring-koo uroꞌkanooꞌke.  
\v 12 Teka aing tosi nkonuka kauꞌ karenaumonanka-pinaꞌ oroꞌnuka, noruꞌ papaaravari otoꞌnuka, matauropanuka, tamung doonko tavuꞌkoo makosinanka-pinaꞌ oroꞌnuka. Noruꞌaavaꞌ pooreꞌ nkoaamaing. Biikaang deraꞌke booꞌantavuriko keraꞌpariaining.  
\v 13 Tee tee eeꞌnara biikaang mooꞌ orara orakaꞌ nkoarikoꞌnung-koo, aaꞌnoma: doong ookutunaꞌmung maiaꞌoroaꞌ tamung sirakuraꞌ mono bakaang pia orara siong-koo keiꞌorokooꞌ. Teing teing diiꞌ ninka nariꞌ otori diikaang miring orari-antaraarimaung eeꞌnoko diikaang navunavu daang deeng-antavaakooꞌ. Diiꞌ ninka nariꞌ Ovoring bakaang taamang naierima aavaraarikooꞌ moru-pinaꞌ noruꞌai.  
\v 14 Biikaang duta tee karakaraaꞌke maantoꞌnuka manikuꞌkoo, orara aarumo besiꞌui otoꞌnuka, aruaruꞌnuka daꞌdeng duaꞌantavaarimaing, eeꞌnoko biikaang domang aarumo okoꞌoko-koo bareari otoꞌnukai. Kumponinge barakosiꞌniiꞌnuka teing.  
\v 15 Koontoꞌnavung sipaara pooariruꞌning. Tee nakaronara Baalamu, Beeoo bauring, bakanavung siompaamaing, mooniꞌ nka-koo piavora orakaꞌ nkoaruꞌnung.  
\v 16 Teka tee bakaang doonkiiꞌke amakoi naning-pinaꞌ karoma orokovuuꞌnung danto nariꞌ orakaꞌ nkoaraꞌneeng-koo, tee nakaronara bakaang aarumo kanukanuꞌ potevui.   
\p
\v 17 Teing daang-koong nau-antanuka tee tee-pinaꞌ ntong dakau-pinaꞌ oroꞌnuka, eeꞌnoko napoꞌ tee kamoꞌ dovinge avitoitoi nkavui nanumaung-pinaꞌ oroꞌnukai, Kumponinge mutaananooꞌ tumang masipoꞌ miruꞌevuruꞌning teke otoꞌkoo.  
\v 18 Aiꞌ teing daang pankaing-antavarima buiaꞌarimaing maimaiaꞌnaꞌ nkoarima, eeꞌnoko baankaꞌ nempaama mono bakaang piai beana-antavaakooꞌ niiꞌning nantoong teing-eta oraruꞌkiai otoromanavitu-eta kooꞌariko biꞌanta-koo.  
\v 19 Opampaarima tuumpi-eta unaavoroi otoroaining tampaarimaung, teka teing biiꞌka deraꞌantanameng-koo daiꞌariri otoroi, aiꞌ aming kapooꞌ tee naning kuung deempui otoing-koo, tee tee, tee-koo eeꞌnung-koo daiꞌari otong.  
\v 20 Eeꞌnoko enang teing aaꞌnaꞌ daiꞌariri otorong, ioꞌ teieta kansiꞌ bakaang aarumo orara-ita mmariaara, tee niikaang Ovoring eeꞌnoko Domang-anta Jiisuuꞌ Karistooꞌ siompaakotaaꞌ, teketa napoꞌ enang kuung duaꞌarira daiꞌaririnamuꞌ oramuꞌ. Tutunaꞌnamuꞌ divuꞌui otong.  
\v 21 Baruꞌ tampaꞌnaꞌ deeaꞌ tee teing koontoꞌnavung-koo noruꞌkaavarupeuꞌnung-koo, eeꞌnoko bakei orakaꞌ tutung noruꞌaara napoꞌ bereꞌariring-koo teieta doorenang aaꞌnaꞌ tampara, Karistooꞌketaing boto meekung tutung taaravauꞌnung-eta.  
\v 22 Tee teeꞌ teing-koo nkoaramaung tee niikaang mirumiruꞌ tampui otoinaꞌ, aaꞌpumanaꞌ, “Mosiꞌke tee napoꞌ bakaang kurinaꞌkoo toroarama maaꞌumaung,” niiꞌnaꞌ eeꞌ, “Pooroꞌ duuꞌpaako napoꞌ metoꞌkoo novuuaramaung.”   
\c 3  
\s1 Ovoring Poainaꞌmung-koo Keekooꞌdariaukaꞌ  
\p
\v 1 Aung aneꞌ karavoto keneꞌka-naneꞌ diiꞌ mmaikoriꞌ masikupoong daarirerompimang. Eeꞌnoko aing-koo ookaneꞌka-koo ninge diikaang noruꞌ tante-antarampimang nariꞌ piturariaꞌ otoriiꞌnaang.  
\v 2 Teeꞌkoo aing kapooꞌ unampansi naurampimang teinge urikupoonge nakaro-nupoonge Kumponing-etaininge miruꞌai minkuauꞌning napoꞌ norunoruꞌeriai eeꞌnoko niikaang Ovoring Domang-anta bakaang boto nariꞌ tero niiꞌke kara okomuri nkanukai naurarampiruꞌnaꞌ.  
\v 3 Aming-koo teeꞌ naurampimang? Nnaꞌ doong asiꞌ dueꞌuko teing nantoonge tee bakei benkentaariaining diiꞌ, biikaang mono-koong pia siompai.  
\v 4 Aaꞌpaavaing, “Tee napoꞌ toroaravaing tamparuꞌnung arerai? Aiꞌ teing niikakatauro teeꞌ nariꞌ naumaarikoꞌning boorouꞌnooꞌketa ookara kapooꞌ nariꞌ otong kansiꞌ pupuꞌaruꞌnooꞌketa otomanaꞌ.”  
\v 5 Teka teeꞌ minkuaama narung kapooꞌ maroita beiꞌbeiꞌaamaung aaꞌnouꞌnung: Kumponinge karoko paning tavoꞌaruꞌ tero, eeꞌnoko kansiꞌ pirung-eta bakoarara taꞌnamparuꞌ.  
\v 6 Napoꞌ Kumponing karoko tee kansiꞌ tero otokoꞌnung douai pirung-pinaꞌ dunkumpura orarivuuꞌ Nooaꞌ bakaang batei-koo.  
\v 7 Eeꞌnoko tenaarei eeꞌnaarei napoꞌ paning eeꞌnoko kansiꞌ enang otomatomaing ntaꞌke paroꞌkoo miruꞌura sipuuꞌ, eeꞌnoko teka pinkaꞌui otong bera teꞌmung doong nantoong oreng simpeꞌurira keraꞌantavuriainaꞌmung-koo basi.   
\p
\v 8 Teka ee mmaikoriꞌ, beiꞌbeiꞌeriaukaꞌ aung kapooꞌ: Ovoring-koo tee mareꞌ kivora daakuꞌ naꞌmung doong-pinaꞌ otong, eeꞌnoko naꞌmung doong tee mareꞌ kivora daakuꞌpinaꞌ otong.  
\v 9 Ovoringe tee bakaang maraka-anta dupe-koo tamung anaꞌaravaung niiꞌninge tampaamanaꞌ. Teka teie piaavuri nempuri otong teing beiꞌbeiꞌarimaing-koo naning narung keraꞌparaꞌneeng-koo, teka ookara bereꞌariiꞌnaang piavorora batei makosinooꞌ avuriiꞌnaang.   
\s1 Kansiꞌ Eeꞌnoko Paning Paaꞌaravainaꞌ Ovoring Toroarako  
\p
\v 10 Aiꞌ teꞌmung Ovoring bakanaꞌmung bateinanaꞌmung teꞌmung bakiaaꞌ nko-pinaꞌ poainaꞌmung, eeꞌnoko tenang paning kurunkurunkaanang paaꞌaravai eeꞌnoko ookara kapooꞌ paning-koonanka ntaꞌke taivurira taꞌdaꞌpurira ntong deeng-antavuriaing, eeꞌnoko kansiꞌ teing ninka bakaning nko-nkonanka naroꞌka parosinampurira opuriaing.  
\v 11 Enang tee diiꞌ aing-koo ookara kapooꞌnanka-koo bakei okiꞌnooꞌ biꞌdariaukaꞌ taivurira taraꞌpuriaining noruꞌeritaaꞌ, eeꞌnoko meekaꞌdariri Kumponing-koo arariri otoriai.  
\v 12 Teeꞌ nariꞌ nemperi Kumponing poainaꞌmung duerueꞌantaveri otoriai, teꞌmung eeꞌnaꞌmung Kumponinge paning paroꞌuko taraꞌpura tuuvuainaꞌmung, teing ookara kapooꞌnanka teke otoromaing nariꞌ.  
\v 13 Teka tee kapooꞌ masikung nempampiri oꞌnorimaung tee paning eeꞌnoko kansiꞌ nerakeng tavoꞌkureaing maraka-antamuruꞌnaꞌ, teꞌ aarumo koontoꞌ narung otoainooꞌ.   
\s1 Taremariri Ovoring Nempampimaatoaing  
\p
\v 14 Teeꞌkoo diiꞌ mmaikoriꞌ masikupoong, teꞌmung nemperimaing deentariko eeꞌ naurampimang, purintariri otoriaing kuꞌmiꞌdopanuka, niiꞌnooꞌ tuumpi otoriaing, Kumponinge tee ninka mooa-koo otoꞌnuka meuꞌduriainaꞌ.  
\v 15 Eeꞌnoko noruꞌeriaing aming-koo teeꞌ pankaroong nemurimaunge. Tee aaꞌ batei amurima bakaang doorenang domang-anta-koong noruꞌanta-koo teeꞌ nemurimaung. Teeꞌ eeꞌnaꞌ niiꞌmaikoꞌ piaavampimaunge, Paulaꞌke daarirerurima naururuꞌnaꞌ Kumponinge onou avuioꞌ.  
\v 16 Ookara karavoto bakaning-koo teeꞌ nariꞌ daarivukooꞌ. Aꞌnooꞌ tee niiꞌning kapooꞌ teing-koo karavotonanka-koo ivekeng otong noruꞌkoo, eeꞌnoko teinge noruꞌdopanukai teing mareꞌaama biiꞌka orari-antavarimaung teeꞌ napoꞌ niiꞌning Daari Meekung-kooning kara mareꞌaamanaꞌ nariꞌ.  
\v 17 Teeꞌkoo diiꞌke mmaikoriꞌ masikupoonge tutung aing eeꞌ oroꞌ kapooꞌnanka tasiꞌperira tarerariri otoriaing boto siompaavaininge taapoꞌke barantaariꞌneenga kara koontoꞌ deeaung nauraarima eꞌmantoma dekopiꞌantaraari.  
\v 18 Teka deto duꞌduriaing Karistooꞌ noruꞌkoo, tee niikaang Ovoring Domang-anta, eeꞌnoko bakaang piaa nka-koo. Tee eeꞌnara meenasi ookara okovui otoaing enang-eta deto bera teꞌmung doong oparavaukaꞌnaꞌmung. Eeꞌ, teeꞌ nariꞌ.