\id 2JN - Naasioi NT [nas] -Papua New Guinea 1994 (web 2014) 
\h 2 JOONI 
\toc1 Aneꞌ Keneꞌka-naneꞌ Joonie Daarivuuꞌnaneꞌ 
\toc2 2 Jooni 
\toc3 2Jon 
\mt2 Aneꞌ Keneꞌka-naneꞌ  
\mt1 JOONIE  
\mt2 Daarivuuꞌnaneꞌ  
\c 1  
\ms1 Kumponing Bakaang Kara Pinkaꞌampiri Oovunaꞌ Kareaamaing Beiꞌbeiꞌarampiai  
\mr (1:1-13)  
\p
\v 1 Aung aneꞌ karavoto˜ ninge dootuuꞌkoo urantai daariamang daꞌ eeꞌnani ovorinaang Kumponinge miruꞌduuꞌnani-anko eeꞌnoko teing daurukaaꞌ.\f + \fr 1:1 \ft Ani ovorinaang nani masikani deeaꞌ pa. Navitu dootuuꞌnavitu miruꞌui teeꞌ daarivuuꞌ deeꞌma, baurukaaꞌ teing dootuuꞌnupoong miruꞌui.\f*  
\v 2 Diiꞌdovo tevo ninge aaꞌnaꞌ masikaꞌ piaarampimanavo eeꞌnoko ning narunge deeaꞌ, teka teing nariꞌ tee kara masikung noruꞌaining, aiꞌ tee kara masikung niiꞌ ookara-koo dupui otomaung eeꞌnoko teeꞌ nariꞌ niiꞌ ninka otomatoai ookara doong-koo.   
\p
\v 3 Teie Kumponing Niumai tee ninka Bauring Jiisuuꞌ Karistooꞌ ninka aaꞌning oko-antamaariaing: biraanke mooꞌdopa, piaa unaa-anta, eeꞌnoko mooa, tee ninka kara masikung eeꞌnoko tee aarumo piaa.   
\s1 Piaa Masikung Siompampimatoai  
\p
\v 4 Ning tee bakei dotumaramang ninge ooaramira niiꞌning teing-koo daurukaaꞌkoo tampaꞌ siompaako tee kara masikung, teeꞌ eeꞌnaꞌ nariꞌ Niumai botomuruꞌnaꞌ.  
\v 5 Eeꞌnoko enang tee aaꞌdamaang daꞌ eeꞌnani, niiꞌ ookara narunaꞌ narunaꞌ piaameerimatoai. Aung tee nerakung boto deeaꞌ daꞌ daarireromaatomaung, teka tee aung tee boto tutuntoma-ita otoꞌmemurimaung: Narunaꞌ narunaꞌ piaameeriaing.  
\v 6 Kumponing-koo piaa eeꞌ siraꞌkoo makosi: Niiꞌke teeꞌ nkoampiaing tee kapooꞌ naumurimaung. Eeꞌnoko teie tee niiꞌ tutuntoma-ita narunaꞌ narunaꞌ piaameerimatooꞌnaang naumuruꞌ.   
\s1 Karistooꞌ Bakaang Kara Tampaꞌ Pinkaꞌampiaing  
\p
\v 7 Bakei, mmauꞌ nantoong tosi nkonuka aunge kansiꞌke avitoitoi nanaamaung, teing tanaꞌeriko penkemparima aaꞌpaamaing, “A, tee Jiisuuꞌ Karistooꞌ naning-naumpui poaruuꞌnung.” Teing teing eeꞌning tosi nkonuka eeꞌnoko Karistooꞌkoo tooꞌde-nupoonge teing.  
\v 8 Tarerariri otoriai tee kapooꞌ poreꞌdorimaung nkaveriaruꞌneenga, aaꞌnaꞌ teka ootukuarioꞌ tee mooꞌ nkaveriai.  
\v 9 Baa tee naning Karistooꞌ bakaang naunau divuꞌui niiꞌnung siompumaung tee Kumponing bakaning-koo narung deeaꞌ, teka baa tee naning tee kara pinkaꞌui otoing tee, tee tekang ookakang beekaning-koo narung deempari otong aaꞌnoko Bauma eeꞌnoko tee Bauring.  
\v 10 Niiꞌnung naning oovunamuriiꞌ naunau ninka diiꞌanko poko deekoꞌ diikanooꞌ pava-koo bokueriaukaꞌ, eeꞌnoko onkeonkeꞌeriaukaꞌ.  
\v 11 Baa tee naning tee onkeonkeꞌuaing tee, tee bakaang orakaꞌ nko-koo kantoꞌparamaung.   
\s1 Jooni Teing Oo-koo Piavouꞌnaꞌ  
\p
\v 12 Ning tee kapooꞌnanka mmauꞌ diiꞌ daarirerompipeuꞌning otoꞌmemung, teka ninge teing ookara aneꞌkoo daari-koo piamoaꞌ. Teka eeꞌ noruꞌamaang diiꞌanko pa dueꞌka mora oing oomeeri karompiaing doturotue maantoꞌmuriainaꞌ.  
\v 13 Teinge toireꞌke teni daꞌmaikoꞌ Kumponinge miruꞌuuꞌnani baurukaaꞌke tampaꞌ tang daꞌanko botoaamang. Otoko, ee.