\id 1TH - Naasioi NT [nas] -Papua New Guinea 1994 (web 2014) 
\h 1 TESALONAIKAꞌ 
\toc1 Aneꞌ Tutunaꞌnaneꞌ Tesalonikaꞌnupoong Paulaꞌke Daarievuruꞌnaneꞌ 
\toc2 1 Tesalonikaꞌ 
\toc3 1Tes 
\mt2 Aneꞌ Tutunaꞌnaneꞌ  
\mt1 TESALONAIKAꞌnupoong  
\mt2 Paulaꞌke Daarievuruꞌnaneꞌ  
\imt1 Kara Baavootunanka Aneꞌkooning  
\ip 1:1 Paulaꞌ Norunoruꞌarakoꞌnaꞌ Tesalonaikaꞌnupoong-koo  
\ip 4:1 Paulaꞌke Tesalonaikaꞌnupoong Tampara Aarumo-koo Biaꞌoroaing Nauvuruꞌnaꞌ  
\c 1  
\ms1 Paulaꞌ Norunoruꞌarakoꞌnaꞌ Tesalonaikaꞌnupoong-koo  
\mr (1:1–3:13)  
\p
\v 1 Tee ning Paulaꞌ. Sailas naankai Timoti pakumuresitaaꞌ daarirerompimang diiꞌ Niuma Kumponing eeꞌnoko Ovoring Jiisuuꞌ Karistooꞌ beekaning dootuuꞌnupoong Tesalonaikaꞌke otorimaing. Biraanke eeꞌnoko mooa diiꞌkoo otoaing.   
\s1 Paulaꞌ Dotuaruꞌnaꞌ Tampaꞌ Kumponing Masikaꞌantavauꞌnung-koo  
\p
\v 2 Kumponing tampara tampampimaung doong kante diiꞌkoo ookara-koo eeꞌnoko tantarampimaunge diiꞌ niikaang kunsi-koo ookara-koo.  
\v 3 Tenang kunsimarima niikaang Kumponing-koo, tee Niuma-koo, niiꞌ ampaꞌmoriaung aaꞌnong: Kumponing masikaꞌantanaꞌ otoriiꞌnaang poreꞌ komperimaung-koo, nantoong piaaverereriiꞌnaang tuꞌdorimaung-koo, eeꞌnoko niikaang Ovoring Jiisuuꞌ Karistooꞌ toroaravainaꞌmung bateinang-koo doong kante aaꞌnaꞌ noruꞌerimaung-koo.  
\v 4 Niiꞌmaikororiꞌ Kumponinge piaarurimaing, niiꞌke noruꞌampiri otong Kumponinge diiꞌ miruꞌduruꞌ bakaning deentariiꞌnaang.  
\v 5 Aming-koo teeꞌ noruꞌampiri otong? Nnaꞌ tee doorenang tampara tampaꞌ tavoꞌarioꞌ ooampira diiꞌkoo. Tee minkunaa diiꞌkoo tavoꞌampiruꞌnung tamunsiꞌnung deeaꞌ, Tanuaang Meekung bakaang purintoꞌ ninka tavoꞌaruꞌ. Teie tee minkunaa masikung iriꞌoi tasiꞌantaruruꞌ. Eeꞌnoko tee diiꞌke tasiꞌperi niikaang aarumo tampara, napoꞌ tee minkunaa masikung tasiꞌperuꞌ.  
\v 6 Teeꞌkoo diiꞌ niiꞌkoo biꞌantarariri siomperimang tee Ovoring, aaꞌnong bane poreꞌanta kuneꞌerima niikaang minkunaa taaraveruꞌ Tanuaang Meekunge doturotu-antaruriko.  
\v 7 Diiꞌ aaꞌ enang tee aaꞌnaꞌ masikaꞌantaverimaung-koo nantoonge siontaariaining deentaririning ookavoraꞌka-kooninge masikaꞌantavarimainge, aaꞌninge diikanooꞌ Masedoniaꞌnupoonge eeꞌnoko Akaiaꞌnupoonge napoꞌ.  
\v 8 Eeꞌnoko baruꞌ Masedoniaꞌ naanka Akaiaꞌkooning nainge taaravaavaꞌ tee Ovoring bakaang kara diiꞌketa, teka tee diiꞌke Kumponing masikaꞌantaverimanaꞌ doonaanka-koo beremparing-koo niiꞌ kara oꞌnoriaꞌ.  
\v 9 Teing biiꞌka minkuarimaung kapooꞌnanka tavoꞌaruꞌning ooaama diiꞌ beeroꞌdarampiko. Eeꞌ minkuraarimaung: Diiꞌke siperereruꞌ teing diikaning ovontung tositosinanka;  
\v 10 eeꞌnoko bereꞌdariruꞌ tee Kumponing masikung-anko, tee-koo daiꞌdariri siomperiiꞌnaang, tee eeꞌnara domaang okovenung; eeꞌnoko enang neng-antararimaung tee Kumponing Bauring paning-eta toroaravainooꞌkoo. Tee eeꞌnara booꞌketa daaꞌantavuuꞌnung, Jiisuuꞌ, niiꞌ domang-anta tee-koo Kumponing bakaang iira damaꞌ tavoꞌaravaing-koo.   
\c 2  
\s1 Paulaꞌ Tampaꞌ Ooai Otorokoꞌnaꞌ Temuꞌ Tutung Doorevuriko  
\p
\v 1 Diiꞌ niiꞌmaikororiꞌ ooveriko, tee beroveeroꞌ niiꞌke beeroꞌdarampikoꞌnung tamunsiꞌnung deeaꞌ, teka teie tee sinang nkavuuꞌnung.  
\v 2 Diiꞌke noruꞌeri otong niiꞌ tee Pilipai-namono-koo bakei orakaꞌ nkomaarikoꞌ; turamaaruꞌ diiꞌanko mmeꞌ tavoꞌkampiaruko; aaꞌnaꞌ masikaꞌ toraꞌantamaaruꞌ teka. Nka Kumponinge puring-antamurioꞌ nanampira napoꞌ diiꞌ daankirarampiruꞌ tee tampara doorenang, bane napoꞌ aaꞌnaꞌ turamaariko.  
\v 3 Niikaang tautau tee boturopa deeaꞌ; napoꞌ bakiaaꞌ nko-koo minkuampiaꞌ; eeꞌnoko aava nkoampiaꞌ niiꞌke.  
\v 4 Teeo, Kumponinge tee makosinuka tammurira arooꞌmuri botomuruꞌ tee doorenang tampara bereng-antavampiiꞌnaang. Teeꞌkoo niiꞌke enang siraꞌpampimang Kumponinge niikaang noruꞌ paaramurimaung dotu-anta-koo, niiꞌnung naning dotu-anta-koo deeaꞌ.  
\v 5 Diiꞌke tampaꞌ noruꞌmereri otong niiꞌ. Diiꞌkoo kara menaanka minkuampiaꞌ. Eeꞌnoko Kumponinge noruꞌui otong diiꞌ niiꞌke diikaang kapooꞌ okomuriiꞌnaang navurarampiaꞌ niikaang minkunaa dakaꞌpuioꞌ.  
\v 6 Eeꞌnoko napoꞌ niiꞌnung naninge daangamuriarooꞌnaang diiꞌkoo, aing-koonge eeꞌnoko niiꞌning-koonge. Aunooꞌ masikaꞌ niiꞌ Karistooꞌ bakaning kara okovuri nkanuka. Niiꞌ pia-koo dei tee diiꞌke niiꞌ daangamerereripeuꞌ. Nka niiꞌke daangang besiꞌampiaꞌ.  
\v 7 Tamung kaꞌduumariri oꞌnorikoꞌ diiꞌ ninka, nani toireꞌ tanatavurimai-pinaꞌ.  
\v 8 Teeꞌkoo niiꞌke diiꞌ piaararampiri diiꞌ tee doorenang tampara Kumponing-etaing arorompiruꞌ, eeꞌnoko tee narung deeaꞌ, niiꞌ niiꞌka napoꞌ avuꞌkoo makosi-antamarikoꞌ, diiꞌ bakei niiꞌmaikororiꞌ masikeng deentariruꞌnung-koo.   
\p
\v 9 Ee mmaikoriꞌ, diiꞌke masikee-antameripeuꞌ, aiꞌ noruꞌeri otong niiꞌ tee bakei aaꞌnaꞌ poreꞌmorikoꞌ iriꞌ oꞌmarima, birenge mintoomarima doong eeꞌnoko muung niiꞌka bauꞌmariiꞌnaang diiꞌ poreꞌantararampiarooꞌnaang taamang tovang-koo, tee doorenang tampara Kumponing-nung daankiampima.  
\v 10 Diiꞌ teing niiꞌ niikaning sirasiraꞌ nkonuka, Kumponing napoꞌ teeꞌke, niikaang tare diiꞌkoo baito-nupoong-koo kiiroraaꞌ eeꞌnoko koontoꞌ, tuumpi otoaꞌ.  
\v 11-12 Noruꞌeri otong diiꞌke, niiꞌke tee diiꞌ nariꞌ tarerarampikoꞌ teeꞌ biumai toireꞌ tarevurimanaꞌ, tautau ninka domang kuaaꞌantararampiri, dunsirunsi˜antararampiri, eeꞌnoko toꞌbii-antararampiri diiꞌ Kumponing dotu-antanaꞌ otoriiꞌnaang, tee eeꞌnara diiꞌ bokururuꞌnung bakaang muuꞌkoo eeꞌnoko meenasi-koo kuunge otoriiꞌnaang.   
\s1 Tesalonaikaꞌnupoonge Masikaꞌanta Dateꞌpauꞌnaꞌ  
\p
\v 13 Eeꞌnoko niiꞌnung kapooꞌkoo Kumponing tampara minkuampimaung: Tenang diiꞌkoo daankiampiko diiꞌke tee kara niikaang-pinaꞌ noruꞌeriarukoꞌnung, teka tampaꞌ taaraverikoꞌ tee kapooꞌ minkuampiko Kumponing bakaang kara-pinaꞌ, teie eeꞌnunge diikaang domang bereꞌantaruruꞌ tenang diiꞌke masikaꞌantaveriko.  
\v 14 Eeꞌnoko enang diiꞌ teing niiꞌmaikororiꞌ masikeng otorimaing Kumponing bakaning dootuuꞌnupoong Judiaꞌnameensiꞌkoo otoromaing-pinaꞌ nariꞌ Jiisuuꞌ Karistooꞌkoo kuunge, aiꞌ diikanooꞌnupoonge poreꞌantaraarimaunge Juꞌnupoonge poreꞌantavaarikoꞌnaꞌ biikanooꞌnupoong.  
\v 15 Teing eeꞌning tavauꞌning tee Ovoring Jiisuuꞌ eeꞌnoko nakaronuka˜, eeꞌnoko niiꞌ bataꞌmaaruꞌ.  
\v 16 Teeꞌkoo Kumponing iira-antavauꞌ eeꞌnoko nantoong ookara tooꞌdempaaruꞌ niiꞌ avoꞌavoꞌmaarima kara nau-koo teing Juꞌ deeaing domamparipeuꞌnung. Teeꞌ nariꞌ nkoaakotaaꞌ orakaꞌnkoi maantoꞌnuka deempariruꞌ. Tee tee enang asiꞌnamuꞌ Kumponing bakaang iira kuneꞌaavaing.   
\s1 Paulaꞌ Tesalonaikaꞌnupoong Beeroꞌkoo Piavouꞌnaꞌ  
\p
\v 17 Niiꞌmaikororiꞌ ee, niiꞌke tee okiꞌnooꞌ siꞌdarampira birontarampi-kotaaꞌ taung besiꞌampiruꞌ oomeeriiꞌnaang, aaꞌnaꞌ piamorira. Aꞌnooꞌkoo tee noruꞌke siꞌdarampiaꞌ, mono narunge.  
\v 18 Niiꞌ tee diiꞌanko toro-koo piamori otong. Baruꞌ ning Paulaꞌ aaꞌnaꞌ mmauꞌnamuꞌpie diiꞌ oo-koo paaravantuꞌ, nka Sietaniꞌke avoꞌavoꞌukoꞌ.  
\v 19 Diiꞌ beeroꞌkoo piamorimang diiꞌ duaꞌdariꞌneeng-koo noruꞌampiri, aiꞌ damaꞌke tee niikaang Ovoring Jiisuuꞌ Karistooꞌ toroarara aming-koo tampaꞌ noruꞌmuriaing? Aming-koo mooꞌmurira dotu-antamuriaing-pinaꞌ noruꞌampimaung nempampiri? Tee aaꞌ diiꞌkoo eeꞌning-koo oorurira masikaꞌantaveriko.  
\v 20 Diiꞌkoo eeꞌning-koo dotumariri oꞌnorimaung.   
\c 3  
\s1 Paulaꞌ Dotuaruꞌnaꞌ Timoti Toroarara Teing-koo Tampaꞌ Doorevuko  
\p
\v 1 Eeꞌnoko teeꞌkoo niiꞌ baruꞌ nemariarooꞌnaang; teeꞌkoo neeꞌke Sailas naankai arooꞌampesieeng teka Aateni-namono-koo siꞌmureeꞌnaang neeꞌ neeꞌka, eeꞌnoko neeꞌke botoampetuꞌ tee Timoti diiꞌanko.  
\v 2 Timoti tee neeꞌmaikoꞌpinaꞌ, neeꞌ ninka Kumponing-nung botovotonaaꞌ, tampara doorenang Jiisuuꞌ Karistooꞌkoong nau-anta.  
\v 3 Tee botoampetuꞌ puring-antaruriiꞌnaang, eeꞌnoko unaunturiiꞌnaang diiꞌkoo narung paapaaꞌaraꞌneeng-koo poreꞌanta kuneꞌuma. Diiꞌke diiꞌka noruꞌeri otong teeꞌ nariꞌ poreꞌanta kuneꞌampiiꞌnaang Jiisuuꞌke tero tampuuꞌnaꞌ.  
\v 4 Tenang diiꞌ niiꞌ ninka oꞌnori tee napoꞌ niiꞌke naurarampikoꞌ mmeꞌ nkoaravaruko damaꞌke tee niiꞌ turamaariaining, enang ooveriko eeꞌnaꞌ nkomaarimaang.  
\v 5 Teeꞌkoo, nemaravarui, nka namuꞌke botoansieeng tee Timoti diikaang otootoꞌ noruꞌkoo piamora, aaꞌpamira, “Teing arekeeꞌ otorong: Sietaniꞌke paaravuriko mmeꞌ masikaꞌantavai otong Karistooꞌ? Aiꞌ duaꞌariruꞌnunge?” – niikaang nko-nko daang deemparaꞌneenga.  
\v 6 Teka tee Timoti toroarieeng neeꞌanko diiꞌankoita. Eeꞌnoko toroarara tampara minkunaa naumuresieeng diikaang baito-koo eeꞌnoko diikaang piaa. Aaꞌmuresieeng diiꞌke niiꞌ tampaꞌ noruꞌmererima neeꞌ napoꞌ oo-koo aaꞌnaꞌ piarorimaung, teeꞌ nariꞌ neeꞌ diiꞌ oo-koo aaꞌnaꞌ piamoremanaꞌ.  
\v 7 Eeꞌnoko ee niiꞌmaikororiꞌ, teeꞌ taaravampeta tee poreꞌanta eeꞌnoko turang kuneꞌampimaung ampaꞌmorema domang kuaaꞌmoretuꞌ, diikaang baito purimpari otoko tasiꞌpampeta.  
\v 8 Diiꞌ purintariri Kumponing-koo biꞌdariri otoriko niiꞌ Sailas dovang Timoti enang domamariri oꞌnoring.  
\v 9 Enang tee niiꞌke aaꞌnaꞌ tampara minkuampimaung Kumponing-koo diiꞌke Kumponing tampaꞌ siomperiko dotumarimaung-koo.  
\v 10 Aaꞌnaꞌ kunsimarimaung muung eeꞌnoko doong diiꞌ ninka eeꞌning ninka oing oomeeriiꞌnaang. Eeꞌnoko pakurarampiai diiꞌ apukaꞌdariri otoing-koo diikaang baito-koo.   
\p
\v 11 Enang tee Niuma Kumponinge eeꞌnarai eeꞌnoko Ovoring Jiisuuꞌke koong-antavureaing niikaang taung diiꞌ beeroꞌkoo nanampiainavung.  
\v 12 Eeꞌnoko Ovoringe diikaang aarumo piaa-koong pankaꞌantareruriaing bera aaꞌnaꞌ tampaꞌ piaareeriainaꞌ diiꞌ diiꞌka eeꞌnoko ookara nantoong piaaverereriainaꞌ, teeꞌ nariꞌ niiꞌke diiꞌ piaararampimanaꞌ.  
\v 13 Eeꞌnoko teeꞌkoo puring-antaruriai tuumpi otoriaing deentariri otoriainaꞌ meekaꞌdariri niikaang Kumponing eeꞌnoko Niuma-koo uroꞌkanooꞌke tenang Ovoring Jiisuuꞌ Toroaravainang teing ninka ookara bakaning meekupoong ninka.   
\c 4  
\ms1 Paulaꞌke Tesalonaikaꞌnupoong Tampara Aarumo-koo Biaꞌoroaing Nauvuruꞌnaꞌ  
\mr (4:1–5:28)  
\s1 Domang-koong Aarumo Aaꞌning: Kiiroraaꞌ, Piaa, Kakeꞌii  
\p
\v 1 Enang aaꞌ diiꞌ niiꞌmaikororiꞌ niiꞌke diiꞌ pia-antararampimaang unampampiri tee-koo Ovoring Jiisuuꞌ napoꞌ diiꞌ niiꞌkoo barerariaing teeꞌ diiꞌ tampaꞌ otoriainaꞌ Kumponing dotu-antaveri teeꞌ eeꞌnaꞌ enang nkoverimang, nka baruꞌ aaꞌnaꞌ nkoveriaing.  
\v 2 Aꞌnooꞌ tee noruꞌeri otong tee botonanka naurarampiruꞌnung tee-koong Ovoring Jiisuuꞌkoo kuunge.  
\v 3 Tee tee eeꞌnara pia Ovoring bakaang, diiꞌ poterariri meekaꞌantarariiꞌnaang tee-koo aarumo kaukauro nko-koong.  
\v 4 Teeꞌkoo diiꞌke tampaꞌ noruꞌeriaing koontoꞌ narunge baka baꞌaang masikani nampuainaꞌ meekaꞌantarariri toosirariri otoriainaꞌ.  
\v 5 Tamung karaaꞌdeerima siong-antareeriaukaꞌ Kumponing noruꞌaavaing-pinaꞌ.  
\v 6 Niiꞌnung naninge baꞌmaikoꞌ pariꞌuaukaꞌnunge aung kapooꞌkoo. Ovoringe tee temuriiꞌ kapooꞌ ootukunung makuꞌantavumaung, teeꞌ tero koono-antararampiri naurarampiruꞌnaꞌ.  
\v 7 Aiꞌ Kumponinge diiꞌ kuꞌmiꞌkoo miruꞌduriaꞌ, teka kiiroraaꞌdariri otoꞌkoo miruꞌduruꞌnung.  
\v 8 Teeꞌkoo tee naning aung kara masikung dimpaꞌuaing deekoꞌ, naning dimpaꞌuaꞌ, Kumponing eeꞌnara dimpaꞌuing, tee Tanuaang Meekung arurimaung.   
\p
\v 9 Tee-koo piaa, namaiaꞌ piaareerimaung-koo, Kumponinge tero bareruruꞌnung piaareeriiꞌnaang kapooꞌ daari-koo makosi otoaꞌ.  
\v 10 Eeꞌnaꞌ ootukuning diiꞌmaikoriꞌ Masedoniaꞌnameensiꞌnupoong piaaverererimaung, masikaꞌ. Nka enang niiꞌke iriꞌmori unantarampimaang eeꞌ: Diikaang aarumo piaa-koong pankaꞌantaveriaing.  
\v 11 Eeꞌnoko toꞌbii-antarariri kaꞌduuroꞌnuka otoriiꞌnaang niiꞌning biikaang nko-nkonanka-koo papuraankaꞌantaverereriaukaꞌ, teka diiꞌka diikaang, kakeꞌiirariri mintoontariai diiꞌka diikaning birenge, botorarampiruꞌnaꞌ.  
\v 12 Teeꞌ nariꞌ akoviturie tee-koo masikaꞌantaraariaing. Niiꞌnung-koo arooꞌdari ataꞌ naniaukaꞌ.   
\s1 Arekeeꞌ Nkomuriainaꞌ Tenang Jiisuuꞌ Toroarara  
\p
\v 13 Enang tee diiꞌ niiꞌmaikororiꞌ teing Karistooꞌ bakaning boorouꞌning-koo tampaꞌ naurarampiiꞌnaang piamorimang diiꞌ orarun-sirariaukaꞌnaꞌ, teeꞌ niiꞌning nkoarimanaꞌ Karistooꞌkoo nempariaꞌ otoromaing.  
\v 14 Niiꞌke masikaꞌantavampiri otong Jiisuuꞌ tee booꞌparara napoꞌ daaꞌaruꞌ. Teeꞌkoo teeꞌ noruꞌampiri otong Kumponinge Jiisuuꞌ bakaning boorouꞌning napoꞌ tee ninka nariꞌ tavoꞌantavuriaing.  
\v 15 Ovoringe tutung naumuriko diiꞌ nariꞌ naurarampimaang: Niiꞌ teing booroma siꞌmaaruꞌning Ovoring poainaꞌmung-koo damaꞌdue biꞌmariaing boorouꞌning-koo.  
\v 16 Aiꞌ Ovoring eeꞌnara paning-eta siarama aaꞌnaꞌ bokumuriaing koosinung pankaing-pinaꞌ bokuma, Kumponing-etaing tuuviri karoi otoko. Eeꞌnoko Karistooꞌ bakaning boorouꞌning eeꞌnamuꞌ daaꞌariaing tutung.  
\v 17 Teka tenang niiꞌ booroma siꞌmaaruꞌning deto baramuriaing teing ninka kamoꞌkoo kuneꞌkoo tee Ovoring auviꞌaua. Teeꞌ nariꞌ tapoꞌmeerira Ovoring ninka oꞌnoriaing.  
\v 18 Enang tee dunsirunsi˜antareeriaing aunge karai.   
\c 5  
\s1 Nerimariri Oꞌnorimaatoaing, Taꞌning-antanaꞌ Pora Tampaꞌ Oomuriainaꞌ  
\p
\v 1 Niiꞌmaikororiꞌ ee, baruꞌ bateinang poainaꞌmung naurarampiiꞌnaang niaꞌmeriaukaꞌnung diiꞌke.  
\v 2 Aiꞌ diiꞌke tee tampaꞌ noruꞌeri otong Ovoring poainaꞌmung makensiꞌnaꞌmung, bakisipunuka biikaang bateinang-pinaꞌ tenang muunga.  
\v 3 Tenang nantoonge aaꞌpai otoko, “Niiꞌ tampaꞌ oꞌnorimaang mooa-koo,” eeꞌnamuꞌ taꞌning-antanaꞌ biikaang otootoꞌ mooa-poꞌnung turariaravaing. Teeꞌ tee-pinaꞌ manikuꞌ pareaavaꞌnaang taꞌning-antanaꞌ sisikeeravoromanaꞌ; baariꞌaavaukaꞌnung.  
\v 4 Nka diiꞌ niiꞌmaikororiꞌ mutaanang-kooning deeaꞌ. Teꞌmung doong basiarama taꞌning-antaruriaukaꞌnung bakisipung-pinaꞌ.  
\v 5 Diiꞌ ookara tee araka baurukaaꞌ eeꞌnoko doong baurukaaꞌke. Niiꞌ tee mutaanang eeꞌnoko muung-kooning deeaꞌ.  
\v 6 Teeꞌkoo enang aatumpiri otoaukaꞌ teing niiꞌning-pinaꞌ, teka tantemariri oꞌnoriai taremariri.  
\v 7 Muung tee aasiꞌ bakanang, tenang nantoong naikaama kanuꞌarimanang.  
\v 8 Teka niiꞌ nantoong doong-kooning deemariritaaꞌ tee taremariri oꞌnoriaing. Ookara piaavarampiri, Kumponing-etaing kara masikaꞌantavampiri, eeꞌnoko mooꞌmuriainaꞌ aaꞌnaꞌ noruꞌampiri, orara-ita neeꞌmariri oꞌnoriaing naning tavutavuꞌ nko-pinaꞌ bakaang mono neeꞌarapeuꞌnaꞌ mononopaꞌ baakopo dovang ivekeng kurumparama.  
\v 9-10 Aiꞌ Kumponinge tee niiꞌ miruꞌmuriaꞌ teie kiimatamuriiꞌnaang iiravoma, teka domamuriiꞌnaang niikaang Ovoringe, Jiisuuꞌ Karistooꞌke, teie eeꞌnarai niiꞌkoo booꞌparuꞌnunge niiꞌ naroꞌmuriiꞌnaang tee ninka toroaravainaꞌmung-koo, moompiaining eeꞌnoko domamariaining.  
\v 11 Tasiꞌperi? Makosi, tampara aarumo nko-koo domang kuaaꞌantareerima otoriaing, eeꞌnoko puring-antareerima teeꞌpinaꞌ nkorarimatomanaꞌ.   
\s1 Kumponinge Pakumuriaing Tapoꞌmeerira Navumariri Oꞌnoriainaꞌ  
\p
\v 12 Niiꞌmaikororiꞌ ee, niiꞌke enang eeꞌ minkurarampimaang: Masikaꞌantavereriaing teing nantoong Ovoring-koo kuunge diiꞌ pakuraarimaing taung nau-antaraarima koong-antaraari.  
\v 13 Piaaverereriai, pankaing-antaverereri tee-koo eeꞌnung-koo mintoong-koo nkoaamatomaung-koo. Mooa-koo otoriaing.  
\v 14 Niiꞌmaikororiꞌ, eeꞌ nkoveriiꞌnaang botorarampimaang: Koono-antaverereriaing teing kontevoroma ataꞌ nanuꞌnuka, eeꞌnoko teing avoroꞌketa orarunsiarimaing dunsirunsi-antavereriaing. Pakuereriaing teing iriꞌ oparimaing. Bointuri otoriaing ookara ninka.  
\v 15 Tauraꞌperiaukaꞌ orara orarai makuꞌkoo, teka paku baukonuka deentariri otoriaing diiꞌ diiꞌka eeꞌnoko ookara-koo.  
\v 16 Doturoturariri otorimaatoai.  
\v 17 Kunsi-koo uaaroriaukaꞌ.  
\v 18 Bane arekeeꞌ nkoarako tampara tamperiaing Kumponing-koo. Teeꞌ eeꞌnaꞌ nkorariiꞌnaang Kumponinge maroruri otong diiꞌ Jiisuuꞌ Karistooꞌkoo otoriko.  
\v 19 Tanuaang Meekung siriꞌeriaukaꞌ.  
\v 20 Daang tamperiaukaꞌ tee kara Tanuaang Meekunge karanta˜,  
\v 21 nka paaraveriaing ookara kapooꞌnanka tasiꞌperiainooꞌke basi, eeꞌnoko tenang komperiaing kapooꞌnanka masikeng.   
\s1 Asiꞌnanaare  
\p
\v 22 Pote-antarariri otoriaing teing-eta kapooꞌ orarananka-ita.  
\v 23 Teie eeꞌnarai Kumponinge mooa okovosiꞌke meekaꞌantaruriaing, tampaꞌ konturiaing diiꞌ ootukunairue – tanuaang, tunsi, mono – bera Jiisuuꞌ Karistooꞌ poainaꞌmung-koo, koontoꞌ tuumpi otoriaing deentariainaꞌ.  
\v 24 Kumponinge bokururuꞌnunge koontoꞌ siꞌduriaukaꞌnung. Teeꞌ minkuansinaꞌ nariꞌ nkoruriaing.   
\p
\v 25 Niiꞌmaikororiꞌ ee, kunsi-koo pakumereriai.   
\p
\v 26 Diiꞌke teing niiꞌning niiꞌmaikororiꞌ niikaang doturotu nauereriaing bireng batuꞌdeeri Ovoring-koo kuunge.   
\p
\v 27 Ninge aaꞌnaꞌ botorampimang, Ovoring bakaang miring-koo kuunge: Deerueriaing aung karavoto˜ ootukunung niiꞌmaikororiꞌankoi.  
\v 28 Tee biraanke niikaang Ovoring Jiisuuꞌ Karistooꞌ bakaang diiꞌ ninka nariꞌ otomatoaing. Eeꞌ, teeꞌ nariꞌ.