\id REV - Nakanai NT [nak] -Papua New Guinea 1983 (DBL 2014) \h LA VEIPALALA \toc1 E Kraist Veipalea Soio Te Ioanes \toc2 Veipalea \toc3 Vei \mt1 E KRAIST VEIPALEA SOIO TE IOANES \c 1 \s1 La siloko la merera \p \v 1 Ale la veipalala ale La Tahalo Uru veipalea soio te Iesus Kraist, veia eia ge vei matagagea giteu la valalua me hatavivile tetala la pulolou tegiteu ale ge mulimuli. E Kraist baha e angelo tetala soio te Ioanes, eia veipala soio tetala la veipalala te La Tahalo Uru. \v 2 E Ioanes, eia igo seselea, eia kekesi tola la papaga tomi eia hiloa. E Ioanes, eia la bilalaha te Iesus sesele, eia valolo la valalua me hatavivile la merera te La Tahalo Uru, la igogolu tomi tai te Iesus ale eia igoa, veia etato ge rovi tataho La Tahalo Uru mai ele. \v 3 La buk ale, mai etato ge gigia, ge gabu tikumua, etato ge sagege, la vuhula la tapasi la haro, eia hagagaviti, etato kamati ge karutula, la vuhula etato loloti la merera alele. \s1 E Ioanes kekesia giteu e ekelesia ivitu \p \v 4 Eau e Ioanes, eau kekesia mutou la valalua me hatavivile te ekelesia ivitu ale oio la gale Esia: \p Taritigi pepeho veia La Tahalo Uru ale mahuli alaura te la silokola kara ale mulimuli, eia ge sigirobo le amutou la gilogo tetala, la tia mutou oilo ge malilo tataho. E angelo ivitu tai ale magiri te la lagula, egite ge baumuli le amutou la gilogo tetala. \v 5 E Iesus Kraist tai, eia ale turi etatou soio te La Tahalo Uru, eia ale la muluga la tahalo ale mahuli taro la pileho, eia ale mamuga te la mulugaluga tomi omai te la maututula, eia tai ele ge baumuli le amutou la gilogo te La Tahalo Uru. \p \v 6 E Iesus, eia suli tataho etatou, eia gogo etato, eia sugu taro la mahulila tetala veia la iruru ale etato igigoa eia kati ge kisi tola etatou. Eia vagoilo etatou te la maratatila tetala veia etato ge lotu tavu bibibi moli e Tamala, La Tahalo Uru. Tio eia koramulia veia la valalua me hatavivile tomi ge rovia veia e Iesus sekela moli vagari, egite ge sagege robo molia, kara igoie, kara ale mulimuli, la vaisalela tegatou tavua eia kama ge kaluvu. Eia sesele. \v 7 Eia ge sibitala loata te la mori, etato tomi ge hiloa. Egiteu ale ubia pala, egite ge hilo tai loua. La valalua me hatavivile te la galegale tomi ge hiloa, egite ge taga pepeho, la vovo giteu ge pariri, egite ge tali. Ealale, eia sesele moliti. \p \v 8 La Tahalo Uru tegatou, eia veia maie “Eau la silokola me la tapasi la golugolu tomi.\f + \fr 1:8 \ft Ale e Ioanes tovoa soio te la mata la buk ilua te la merera tegiteu e Grik, mai e Alpa, me Omega. E Alpa, la masovala “la silokola”, la vuhula eia la muluga la mata la buk tegiteu. Tio “e Omega” la masovala “la tapasila”, la vuhula eia la tapasi la mata la buk te la merera tegiteu ele.\f* Eau La Tahalo Uru, eau oio. Kara alaura la silokola, kara igoie, kara mulimuli, eau oio. Eau sekela moli vagari.” \s1 E Ioanes hilo e Iesus, eia isapolo seseleti \p \v 9 Eau e Ioanes, eau e tabara mutou, etatou tomi la valalua me hatavivile te Kraist. Egiteu la gima tetala tahi vile etatou, eala moli etato oiloti te la uluvala, eia vauruti etatou, etato kati taga, etato vagari moliti. La merera te La Tahalo Uru te la igogolu ale e Iesus igotia, eau valolo la valalua me hatavivile oio vola. Egiteu e Rom hiloa mai ele, egite igo totoloau ovola, egite baha taroau solau la olu e Patmos, egite vilai seseleau te la pulolou la kilisi ovola. \v 10 Tio eau pou oio e Patmos, La Kalulu La Tahalo Uru goio pou taku te la haro tabu isasa, eau loloa la golu la tahalo isasa oio te la pokegu. Eia vikara boboboe, la harela taitali mai la golu la vaivai ale egite pupusua. \v 11 Eia veiagu mago “Eme ge kekesi tola la papaga tomi ale eme ge hiloa gageie. Eme ge kekesi tola mugea mai ele, mulimuli eme ge sovea soio tegiteu e ekelesia ivitu ale oio la galegale isahari, egite ge gigia. La maututula ivitu alele, eia maie: Epesas, e Smirna, e Pergamum, e Taiataira, e Sardis, e Piladelpia, e Laodisea.” \p \v 12 Tio, eau vulo gele veia eau ge hilo la tahalo ale vikarakara. Eau vulo gele mai ele, eau hiloa la selu ivitu, eia karere pepeho pasi. \v 13 Oio kabili te la selu ivitu ele, isa oio magiri, eia mai sesele la tahalo. Eia lavalava malalau sotalo. La kisipou tetala, eia mememe, eia kisia oio te la magorola. \v 14 La ivula oata te la gahola, eia kea lovolovo sesele. La matala ilua karerere mai la havi. \v 15 La vahala ilua mememe moli, la vuhula eia la bras ale halaba sesele. Eia vikara boboboe, la harela taitali mai la lalu ale sali loata, pagegele sotalo te la gove. \v 16 Eia sau tola la matatabu ivitu te la limala e gata. La gata isasa, eia mata kalulusa sesele, eia alapaua te la harela, eia magiri totoge. La tiraro la tahalole eia kea mai la haro ale hugutolatia oata. \p \v 17 Tio, eau hiloa mai ele, eau boru oio te la vahala mai ale peho. Eia goio sau te la vovogu la limala e gata, eia veiagu mago “Umalati tataga. La golugolu tomi, eau moli la vuhula, eau lou ge la vitapasila. \v 18 Eau mahulihuli! Eau pala pehoti, eau mahuliti lou. Eau ge mahulihuli moli, la kaluvugu ge ouka. Eau baumuli la pileho, la mautu tai tegiteu ale pehoti eau baumulia. \v 19 Taritigi eme ge kekesi tola la golugolu ale eme hilotia, me la golugolu tomi tai ale eme ge hiloa gageie. \v 20 Hiloa, mai la matatabu ale ivitu ele, ale eau sau tolala la limagu e gata, la masova la pagale, eia pala kokovu. Me la masova la selu ivitu ale karerere, la masova la pagale, eia tai pala kokovu. Eala moli la masova la paga iluale, eau ge veipaleamu gageie, eme ge rovia. La matatabu ale ivitu ele, la masovalale, eia mai e angelo ale ivitu ale baumuli egiteu e ekelesia ale ivitu, eau toi palatiamu la isa giteu igoie. Me la masova la selu ale ivituo, eia mai moli lou egiteu e ekelesia ale ivitu ele. \c 2 \s1 La merera te Kraist soio te ekelesia oio la mautu Epesas \p \v 1 “Eme ge kekesiale angelo ale baumuli e ekelesia oio la mautu Epesas, eme ge kekesia maie: \p Ale la merera ale loio tetala ale sau tola la matatabu ivitu te la limala e gata, eia tatuga kabili te la selu ivitu. Eia veia mutou la merera maie: \v 2 La igogolu tomi tamutou, eau rovitia. Eau rovitia amuto magiri vagari, amuto kama piligi la igogolu la lotu. Eau rovi taia veia egiteu ale kama kokora, amuto kama mata soli taro egiteu veia egite ge igo gegeru amutou. Egiteu tai ale visigolo veia egiteu la tahalo te Kraist sesele, amuto hilo vutitia la visigolola tegiteu, taritigi pepeho. \v 3 La merera ale taritigi, amuto sau tola molia. Egiteu la gima taku, egite viligiligi amutou, eala moli amuto vagari, amuto kama silaha. Taritigi pepeho. \p \v 4 Eala moli la iruru tamutou isahari, ale eau hilotia, eau ge vei matagagea mutou oio vola: Pala, la lotu guvi halaba oio tamutou, amuto lagu tavuau, amuto sagege pepeho leau, igoie oukati. La vulovulo mutou ale taritigi, amuto pala igoa, amuto piligitia. Amuto boruti. \p \v 5 Taritigi amuto ge gabutala rivu la vulovulo mutou ale pala, amuto ge piligi taro la iruru tamutou, amuto ge gabutala rivu louau. La vulovulo mutou ge mai lou ale pala. Mai ge ouka, eau ge guvi tavu lou amutou, eau ge abi taro le amutou la selu tamutou, amuto kati ge pou lou te la matagaga. \p \v 6 Eala moli la vulo mutou isa lou, eau hilo vutitia, eia taritigi. Amutou putu galeti la visigolola tegiteu ale tilimuli la merera te Nikolas.\f + \fr 2:6 \ft La tahalo isasa oio la gale Esia, la isala e Nikolas, eia pala soko la merera ale kama kokora veia la valalua ge igo bulalahu egite hatavivile, egite ge vauru lou egiteu, egite ge tilimuli tai la masasagala moli tegiteu isasasa.\f* Taritigi pepeho, la vuhula eau tai vile la gabutatalala tegiteu ele. \p \v 7 Mai ere la gavusala ge oio te la ilolo la merera, taritigi eia ge lolo la merera alele, La Kalulu La Tahalo Uru eia veipalea soio te la valalua me hatavivile te la lotu, taritigi eia ge gabu tikumua. Mai amuto ge bolehoho la gima, eau ge veia mutou maie mago ‘Taritigi amuto ge ge goilo ge ali la vavua la obu la mahulila ale oio te la mautu te La Tahalo Uru.’ \s1 La merera te Kraist soio te ekelesia oio la mautu e Smirna \p \v 8 “Eme ge kekesiale angelo ale baumuli e ekelesia oio la mautu e Smirna, eme ge kekesia maie: \p Ale la merera ale loio tetala ale la vuhula me la vitapasila te la golugolu tomi, eia ale pehoti me eia mahuli rivu lou. \v 9 La valalua viligi amutou, me amuto pou la savelela. La iloburukola tamutou ele, eau rovitia. Eala moli amuto tahola la vuliti. La vuliti ele, eia la tilalau ale taritigi oata te La Tahalo Uru. \p Egiteu e Iuda ale rovi la merera te Moses eala moli egite kama mulimulia, egite ubi le amutou la merera ale kama kokora, eau rovitia. Eala moli egiteu tomi ele, egite oiloti te la lotu te Satan, egite kamati mai la tau Iuda. \p \v 10 Amuto umala ge taga la iligiligi ale ge sibitala tavu amutou. E Satan ge tovo lalai amutou, la valalua la gima ge kapi robo isahari tamutou oilo la luma la kilisi veia ge tovo lalai la vagagari mutou. Eala moli la iligiligi alele, eia kama ge tabaa agi,\f + \fr 2:10 \ft La giligi la logo oio vola ge mai ale savulu sasa, eala moli ale eia ga mata mai la irovilala moli veia la iligiligi alele eia kama ge tabaa. \f* eia ge kaluvu lou. Eala moli mai amuto ge vagari kara amuto ge peho, eau ge vibalava le amutou la mahulila ale la kaluvula ge ouka. \p \v 11 Mai ere la gavusala ge oio te la ilolo la merera, taritigi eia ge lolo la merera alele, La Kalulu La Tahalo Uru eia veipalea soio te la valalua me hatavivile te la lotu, eia ge gabu tikumua. Mai amuto ge bolehoho la gima, la kalulu mutou mulimuli kama ge vilua te la ilua la pileho.\f + \fr 2:11 \ft Eme ge sivuti la masova la merera ale \+it la ilua la pileho\+it* oio te la buk ale lou, la bautula 20:14, me la bautula 21:8 tai.\f* \s1 La merera te Kraist soio te ekelesia oio la mautu e Pergamum \p \v 12 “Eme ge kekesiale angelo ale baumuli e ekelesia oio la mautu e Pergamum. Eme ge kekesia maie: \p Ale la merera ale loio tetala ale tahola la gata ale mata kalulusa sesele. \v 13 La mautu uru tamutou, ale amuto momou oio vola, eau rovitia. E Satan moli la mapa la mautu alele. Eala moli amuto kama visauru megiteu, la vuhula amuto veipala la isagu, amuto kama vei kokovua. E tabara mutou e Antipas, ale valolo sesele la valalua me hatavivile la merera taku, egite bilia kabili tamutou, oilo te la mautu uru tamutou, e Satan oio vola, eala moli amuto kama taga, amuto vagari moli. \p \v 14 Eala moli la merera isahari eau ge veia mutou oio vola. Isahari oilo tamutou sau tola la merera te Balam, eia ale pala vahilo le Balak la gauru ale eia viruru la valalua me hatavivile te La Tahalo Uru oio vola, veia egite ge ali la ilali la vaabila ale egite vaabila la taua oio vola me egite ge igo tai la vulovulo giteu ale kama kokora, egite mata bulakalaka, osaosa. \v 15 Mai moli alele, isahari tamutou tai amuto vagari tavu sesele la merera ale kama kokora tegite la valalua te Nikolas. \v 16 Eala, eia taritigi amuto ge vulo la gabutatalala tamutou. Mai ge ouka, eau ge gomai tamutou, eau ge ubi legiteu la tahalo la iruru la gata ale mata kalulusa oio te la haregu. \p \v 17 Mai ere la gavusala ge oio te la ilolo la merera, taritigi eia ge lolo la merera ale La Kalulu La Tahalo Uru eia veipalea soio tegiteu la valalua me hatavivile te la lotu. Mai amuto ge bolehoho la gima, tio eau ge vibalava le amutou la golu ilua ale taritigi: Eau ge abia mutou la ilali te la kalulu mutou, ale tabuli kokovu oio te La Tahalo Uru. Eau ge abi taia mutou isasasa la uati isa bisi ale kakea, la isa mutou isasasa halaba oio vola. La uati alele ge sigirobo amutou, e tahola moli rovi la isala ale La Tahalo Uru kekesia oio vola. \s1 La merera te Kraist soio te ekelesia oio la mautu e Taiataira \p \v 18 “Eme ge kekesiale angelo ale baumuli e ekelesia oio la mautu e Taiataira. Eme ge kekesia maie: \p Ale la merera ale loio te Latu La Tahalo Uru, eia ale la matala karerere mai la havi, la vahala vagari mai la aen ale egite vuloa vikapopo la gold, eia mememe. \v 19 Eau rovi la igogolu tamutou: Amuto suli pepeho e tabarabara mutou; amuto vagari; amuto sau tola la merera taku; amuto igogolu moli, kama silaha. Amuto kama gotigu rivu, amuto golagu moli, amuto vahiliti la lotu. Taritigi pepeho. \p \v 20 Eala moli la paga isa uru eau hilo vutitia oilo te la pulolou tamutou, eau igo totolo amutou oio vola: e Iesebel, la tavile ale kama kokora, eia oio tamutou, me amuto mata sosolia. Eia veia eia veipala la merera te La Tahalo Uru, eala moli eia visigolo. Eia vimari moli le amutou la gauru ale kama kokora; eia karasuku amutou veia amuto ge mata bulakalaka, osaosa, veia tai amuto ge ali la ilali ale egite vaabila la taua oio vola. \v 21 Sesele, la tavilele, eau kama vilai haria, eala moli eia kama masaga ge gabutatala rivu lou la iruru tetala. \v 22 Tio eau ge bebetolea la ilea soio tetala, eia ge tabuli moli te la mulila. Me amutou ale mai ale mavuta vikapopo leia, eau ge igo totolo amutou, mai amuto kama ge piligi taro la vulovulo la tavile ale kama kokorale. \v 23 E latatula, eau ge bili taro egite. Me oilo vola, la valalua me hatavivile te la lotu, egite ge matagaga veia eau ge mata mulimuli la vulovulovulo mutou me la tia mutou oilo isasasa. Eau rovitia la tilalau tamutou tomi, me eau ge abia mutou la mapa: La vulovulo mutou ale kama kokora, eau ge sivutia, eau ge kolia soio tamutou, ge vilai amutou oio vola. \p \v 24 Eala moli eau la merera isapolo soio tavu amutou ale kama oilo te la valalua alele. Amutou la valalua e Taiataira ale kama tilimuli la merera tegiteu ele, ale kama vimari te la merera ale tikumu te Satan, eau kama ge vibukeke le amutou la merera ale usu lou, eala moli la paga isa moli eau ge vagari oio vola: \v 25 Amuto ge sau tola vagari moli la merera taku kara eau ge guvi. \p \v 26 Mai amuto ge bolehoho la gima, amuto ge vagari te la igogolu taku kara ale amuto ge pepeho, eau ge vauru amutou, amuto ge la mulugaluga te la maututula. \v 27 Oio te la lima mutou, amuto ge vagari mai eau, ale e tete vipouau te la igogolu la mulugaluga. Egiteu la valalua ge la golu bulalahu, la vuhula la gata ale eau ge abia mutou, amuto ge kue perepere legiteu oio vola, mai la paga ale kama vagari. \v 28 Eau ge abi taia mutou la matatabu uru e Toko, ale kokovu te la haro, eia goio reretala lou te la maulavi, amuto ge mahuli lou mai ele. \v 29 Mai ere la gavusala ge oio te la ilolo la merera, taritigi eia ge lolo la merera ale la Kalulu La Tahalo Uru veipalea soio te la valalua me hatavivile te la lotu. \c 3 \s1 La merera te Kraist soio te ekelesia oio la mautu e Sardis \p \v 1 “Eme ge kekesiale angelo ale baumuli e ekelesia oio la mautu e Sardis. Eme ge kekesia maie: \p Ale la merera ale loio tetala ale sau tola la kalulu La Tahalo Uru ivitu, me la matatabu tai te La Tahalo Uru ivitu. Eau rovi amutou. La valalua veia amuto oio igogolu, egite veia amutou oio mahulihuli, eala moli eau rovia, amuto mai ale pehoti. \v 2 Amuto ge hagolo. Amuto ge baumuli la vagagari mutou bakisi ale soloio, amuto ge vauru loua, amuto souka peho seseleti. Igo tigi, la vuhula eau hiloti la igogolu tamutou, eia kama taritigi agi te la milatalata te La Tahalo Uru. \v 3 Gabutatala rivu lou la merera ale amuto pala lolotia, amuto lagu tavua. Sau tola moli alele, amuto ge vulo la gabutatalala tamutou, amuto ge gabutatala rivu lou tavu La Tahalo Uru. Mai amuto kama masaga ge hagolo, eau ge vilai amutou, eau ge guvi tavu amutou mai la tahalo la pakalila, amuto kama ge rovi la mata la haro ale eau ge guvi oio vola. \p \v 4 Eala moli isahari soloio tamutou, ale souka igo mumugu la kairobola tegiteu la vulovulo ale kama kokora. Taritigi pepeho, egiteu alele ge kavovou vikapopo leau, la kairobola tegiteu ge kea tataho moli, la vuhula la vulovulo giteu alele, eia koramuli seseleau. \p \v 5 Sesele, amutou ale bolehoho la gima, eau ge abia mutou la kairobola ale kea lovolovo pepeho, amuto ge kaia. La isa mutou ge tabuli oilo te la buk ale eau kekesiti la isaisa giteu ale ge mahuli oio vola, kama ge sabubu taro loua. Mulimuli, eau ge veipalea soio te La Tahalo Uru me egiteu la angelo tetala, veia amutou taku sesele. \v 6 Mai ere la gavusala ge oio te la ilolo la merera, taritigi eia ge lolo la merera ale La Kalulu La Tahalo Uru veipalea soio te la valalua me hatavivile te la lotu. \s1 La merera te Kraist soio te ekelesia oio la mautu e Piladelpia \p \v 7 “Eme ge kekesiale angelo ale baumuli e ekelesia oio la mautu e Piladelpia. Eme ge kekesia maie: \p Ale la merera ale loio te la tahalo ale maroka sesele. La merera taku, eia sesele. Eau la mulugaluga tamutou, mai moli e suara uru e Devit, ale mamuga tegite tutubu giteu e Iuda alaura. Mai la gauru ale eau ge kopea mutou, isa kama koramulia ge kapi robo loua. Mai tai la gauru ale eau ge kapi roboa, isa kama koramulia ge kope loua. \v 8 Eau rovi la vulovulo mutou. Amuto kama magiri vagari, eala moli amuto so tilimulimuli la vimari taku, amuto sau tola moli la merera taku kara igoie. Eala moli, taritigi amuto ge rovia, eau mai ale kopetia mutou la mata, veia amuto ge tiroro soilo ge abi la vagagarila taku. La mata alele, isa kama koramulia ge kapi robo loua ge magiri robo amutou ovola. \v 9 Egiteu ale oilo te la lotu te Satan, egiteu e Iuda ale rovi la merera te Moses, eala moli egite kama mulimulia, eau ge tao talu egiteu sotalo te la vaha mutou, egite ge togo amutou, egite ge veia amutou la valalua me hatavivile taku, ale eau gogo amutou. \v 10 Amuto mulimuli tigi la tutu tolala taku tavu amutou, ale eau veia amuto umala ge gabutatala egiteu ale viligi amutou. Eala eau ge sigirobo amutou te la imamala ale la iligiligi ge pigi robo la maututula tomi, eia ge tovo lalai la vagagari la valalua me hatavivile tomi. \p \v 11 Eia kama ge tabaa, eau ge beua soio tamutou. Sau tola la merera ale amuto rovia eia sesele, isa souka visigolo amutou, me amuto ge galo la mapa ale taritigi ale La Tahalo Uru ge loto amutou mai la iroromulila tamutou tavu eia. \p \v 12 Mai amuto ge bolehoho la gima, eau ge vahiliti amutou mai la sosole la luma te La Tahalo Uru, ale egite igola la uati, amuto ge sau tola la mahulila ale taritigi, vikapopo sesele La Tahalo Uru, amuto ge tetalati. Eau ge kekesi la isa La Tahalo Uru oio te la vovo mutou, eau ge kekesi tai la isa la mautu te La Tahalo Uru, e Ierusalem ale halaba, eia ge loata te la ilo la lage ale La Tahalo Uru popou oio vola. Eau ge kekesi tai soio te la vovo mutou la isa mutou isasasa ale halaba, eau ge toi le amutou. \v 13 Mai ere la gavusala ge oio te la ilolo la merera, taritigi eia ge lolo la merera ale La Kalulu La Tahalo Uru veipalea soio te la valalua me hatavivile te la lotu. \s1 La merera te Kraist soio te ekelesia oio la mautu e Laodisea \p \v 14 “Eme ge kekesiale angelo ale baumuli e ekelesia oio la mautu e Laodisea. Eme ge kekesia maie: \p Ale la merera ale loio tetala ale la vuhu la merera tomi ale sesele. La merera ale sesele moli, eau veipalea. Eau sau tola la golugolu tomi ale La Tahalo Uru vipou egiteu. \v 15 Eau rovi tomiti la igogolu tamutou. Amuto vimarasa moli la igogolu taku, amuto kama piligia veia ge mai ale maigi, eala moli amuto tai kama tivura. Eau masagea veia amuto ge hilovi la gabutatalala tamutou veia amuto ge maigi, uka amuto ge tivura te la igogolu taku. \v 16 Mai alele, amuto kama maigi, amuto kama tivura, eau kamati masaga amutou, eau ge kisu taro sesele amutou. \v 17 La vuhula amuto veia maie ‘Amite tahola la vuliti, amite kama morivava la paga isasa.’ E maura miteu, amuto kama rovia, amuto pou la iloburukola, amuto pou la savelela, amuto kama matagaga, amuto kama mai ale tokoromo, amuto tuga bulalahu moli. \p \v 18 Tio, mai ale, eau ge suli amutou la gabutatalala taku: Taritigi veia amuto ge mai ale lotoa omai taku la vuliti te la kalulu mutou, ale maroka tataho, mai la gold ale egite gutua, eia mememe. Amuto ge lotoa, amuto ge pou la balavala. Taritigi amuto ge mai ale loto tai omai taku la lavalava ale kea lovolovo, la valalua souka ge hilo amutou ale tuga bulalahu, amuto ge mahela. Amuto ge loto tai la marasin te la mata mutou veia amuto ge matagaga lou, kati ge mata kea. \p \v 19 Egiteu ale eau gogo egite, eau viteteli egiteu, eau vilai egiteu, mai la vulovulogu. Tio, oio vola, taritigi amuto ge gabutatala rivu lou la vulovulo mutou, amuto ge ilo buruko, amuto ge vuvulo, amuto ge lolo vulai tavuau. \v 20 Hiloa, eau magiri ogala la mata, eau valolohoka amutou veia ge goilo. Mai isa ge lolo la golugu, ge kopeau, eau ge goilo tetala, amila ge pou vikapopo, amila ge vaali tomi. \p \v 21 Mai amuto ge bolehoho la gima, eau ge veia taritigi amuto ge pou vikapopo leau te la pulolou la mulugaluga, mai sesele lou ale eau pala bolehoho la gima, eau pou vikapopo me tete. \v 22 Mai ere la gavusala ge oio te la ilolo la merera, taritigi eia ge lolo la merera alele, ale La Kalulu La Tahalo Uru veipalea soio te la valalua me hatavivile te la lotu, eia ge gabu tikumua.” \c 4 \s1 La hililo te Ioanes oata te la ilo la lage \p \v 1 E Kraist vikara kaluvuti mai ele, eau karutu, eau hilo la mata la ilo la lage, eia oio kopeti. Tio la muluga la golu la tahalo ale eau loloa eia vikarakara, la golula tali mai la vaivai. Eia veia mago “Eme ge goata tavuau, eau ge vahilo leme la pulolou tegiteu la valalua, ale ge sibitala mulimuli.” \p \v 2 Tio, oio moli ovola, La Kalulu La Tahalo Uru vitivura la tiagu, eau karutu, eau hilo la pulolou te la uru isasa oata te la ilo la lage, la tahalo pou ovola. \v 3 Eau hiloa eia mai la matagaga isa uru. La matagaga uru ele sasima, eia mememe, eia magesegese. La malai la hura, eia grin tataho, eia sivo galili la pulolou uru ele. \v 4 La pulolou te la uru ale savulu lua gete vaa, egite pou galili la pulolou te la uru. Egite ururu ale savulu lua gete vaa, egiteu oio popou oio vola, egite kai la kairobola ale kakea, oata la gama giteu egite tau e vevea ale mememe. \v 5 La sima, eia sibitala loio te la pulolou te la uru. La mori kuraraba, la golu la valalua isahari vikara boboboe. Egiteu la selu ale ivitu, egite magiri mamuga te la lagu La Tahalo Uru. Egiteu la selu ale ivitu ele, egite mai La Kalulu La Tahalo Uru. \v 6 Oio la lagu La Tahalo Uru, eau hilo la mago uru, eia matagaga tataho, eia sasima. Egite la vagari robola te La Tahalo Uru tai ivaa, egite isapolo sesele, egite magiri galili la pulolou te La Tahalo Uru. La mata giteu mapaiti oio te la lagu giteu, oio te la poke giteu tai. \v 7 La muluga la vagari robola eia mai la laion. La vailuala, eia mai la kau ale la togo. La vaitolula, la lagula mai la lagu la tahalo. La vaivaala, eia mai e loauru isasa ale lovolovo.\f + \fr 4:7 \ft La laion, la masovala veia La Tahalo Uru, eia vagari, eia uru. La kau, la masovala veia La Tahalo Uru pou tigi, eia gogo etatou. La tahalo, la masovala veia La Tahalo Uru, la mari tetala oio. E loauru, la masovala veia La Tahalo Uru, eia vikaluvu harari la paga ale eia igoa.\f* \p \v 8 Egiteu la vagari robola ale ivaa, la palapala giteu iuolouolo, la mata giteu usu. Egite kama maila te la bilau te la haro me la logo, egite bau maie: \li1 La Tahalo Uru, La Uru miteu, \li1 eme sekela moli la vagagarila. \li1 Taritigi, taritigi, taritigi pepeho soata taume, \li1 Tahalo La Marokala! \li1 Eme mahuli moli, la kaluvumu ge ouka. \p \v 9 Egiteu la vagari robola ale ivaale, egite ge bau la bilau la vaisalela soio te La Tahalo Uru, eia ale pou te la pulolou te La Uru, eia ge mahuli moli, la kaluvula ge ouka. Egite ge togoa, egite ge vei tatahoa mai ele. \v 10 Egite ururu ale savulu lua gete vaa, egite ge boru lagu tugu te la lagu La Tahalo Uru, egite ge lotu tavua, la vuhula eia uru, eia mahuli moli, la tapasila ge ouka. Egite ge lotu tavua, egite ge pigi e vevea tegiteu sotalo la lagu La Tahalo Uru, egite ge bau maie: \li1 \v 11 Hilage, eme La Tahalo Uru tamiteu, \li1 eia koramulia veia amite ge veipala \li1 la vaisalela me la tilogo soio taume, \li1 la vuhula eme sekela vagari. \li1 La vuhula, eme vipou la golugolu tomi. \li1 Te la masasagala moli taume, \li1 eme visibitala egiteu, egite poutio. \p Tio la bilau la vaisalela tegite ururu tavu La Tahalo Uru, eia mai alele. \c 5 \s1 E Ioanes hilo e Kraist eia abi la buk la kekesi te La Tahalo Uru \p \v 1 Eau mata soio, eau hilo La Tahalo Uru eia popou te la pulolou la uru, oio te la limala e gata eia sau tola la pilipi la buk, la kekesi oio te la lagula me la pokela, egite kisi tolea vaka vitu veia umala isa ge lubea ge hiloa. \v 2 Goio, eau hilo isa e angelo ale vagari, eia vikara boboboe maie mago “Ere tahalo ale taritigi veia eia koramulia eia ge loke la buk ale egite kisi tolea, veia eia ge lubea?” \v 3 Eala moli oilo vola isa ouka oata la mori, isa ouka otalo la magasa ge koramulia ge lube la buk alele. Otalo tegiteu ale pehoti, ouka tai. \p \v 4 Tio, mai alele, eau tali pepeho oio vola, la vuhula isa kama maroka veia ge koramulia ge lube la buk ale egite pipia, ge hilo la kekesi te La Tahalo Uru.\f + \fr 5:4 \ft Ale la masovala veia etato kama ge rovi la paga ale ge guvi mulimuli.\f* \v 5 Eala moli isa tegite ururu ale oio te La Tahalo Uru, eia veiagu mago “Umalati taitali! Male ge, la tahalo isa te la hilile Iuda, eia oio, eia vagari mai la laion, eia ge koramulia gageie! Eia e tubule suara uru e Devit ale pehoti. La uala ale tabuli te la magasa, eia tutuvu halaba lou. Eia sekela moli, eia bolehohoti la gima, eia moli ge loke la buk, ge lubea, ge gigia.” \s1 E Ioanes eia hilo e Latu La Tahalo Uru mai e latu la sip \p \v 6 Tio, la tahalo ale, eia vikara kaluvu mai ele, eau mata soio, oio kabili tegite la vagari robola ivaa ale magiri galili la pulolou te la uru, te la baa kabili tegiteu ele me egite ururu ale pou galili te La Tahalo Uru, eau hilo la tahalo isa, eia mai sesele e latu la sip, eia kasososo mai ale egite so ubibia. Eia oio magirigiri. Oio te la gamala, la komola ivitu, la irovilala la sip ale la togo, eia vagari. La matala tai ivitu. Me la paga iluale, eia mai sesele la kalulu La Tahalo Uru ivitu, ale eia bahea soio te la maututula veia ge igo la igogolu tetala. \p \v 7 Tio, e Latu La Sip, eia goio abi la buk loio te la lima La Tahalo Uru e gata. \v 8 Eia abi kaluvua, egite la vagari robola ivaa ale magiri galili La Tahalo Uru, me egite ururu ale savulu lua gete vaa, egite goio boru lagu tugu te la lagule Latu La Sip ale uru ele. Egite ururu tomi isasasa, egite sau tola la paga la bilau ale egite kokuea mai la gita, eia ge tali tataho. Egite ababi tai isasasa la dis ale egite igola la gold, eia mememe, la tita oio vola. Egite ge vitagua, eia ge mali vivili pasi, la sosobula ge pavu mai sesele moli la kilaka te la valalua me hatavivile te La Tahalo Uru, ale goata tetala. \v 9 Tio, egiteu tomi ele boru lagu tugu, egite bau la bilau isa halaba sesele maie: \li1 Eme koramulia ge abi la buk ge lubea, \li1 la vuhula egite bilitime, la kasosomu puriti, \li1 eia loto roboti la valalua me hatavivile, \li1 eia rou rivu la valalua me hatavivile \li1 te la galegale tomi, te la maratatila tomi, \li1 te la merera tomi. \li1 \v 10 Eme vagoiloti egiteu \li1 la valalua me hatavivile taume \li1 te la maratatila te La Tahalo Uru, \li1 veia egite ge lotu bibibi tavua, \li1 egite ge pou la mulugaluga te la maututula. \s1 Egite vaisale e Latu La Sip \p \v 11 Egite bau kaluvuti, eau mata soio, eau hilo egiteu la angelo, egite magiri galili la pulolou te La Uru ale la vagari robola ivaa me egite ururu magiri galilia, egite baubau. La giligi giteu la taosan salatu savulu robo, egite mapaiti sesele. \v 12 Egiteu la angelo vikara boboboe maie mago: \li1 Taritigi amite ge vaisale \li1 E Latu La Sip ale egite bilitia. \li1 La vagagarila tomi, eia taume. \li1 La papaga tomi, eia taume. \li1 La mari tomi, eia taume. \li1 Eme moli sekela, eme uru. \li1 Eme moli sekela, eme maroka. \li1 Taume moli la vibalavalavala \li1 ale loio te La Tahalo Uru. \p \v 13 Egite vikara kaluvu mai ele, eau lolo la papaga tomi ale La Tahalo Uru vipou egiteu, egite soko la vikararala. Egiteu ale lovolovo oata te la baa; egiteu ale momou otalo te la magasa; egiteu ale olau la mago; egiteu tai ale pehoti, egite tabuli lotalo te la magasa; egiteu tomi ele vikara maie mago: \li1 Etato ge vaisale eia ale pou \li1 te la pulolou te la uru, \li1 etato ge vaisale tai e Latu La Sip. \li1 Tegirua la vibalavala, la marokala, la vagagarila, kara alaura, kara igoie, kara mulimuli, \li1 la kaluvula ge ouka! \p \v 14 Tio, oio moli ovola, la vagari robola ivaa ale magiri galili La Tahalo Uru, egite vikara mago “Eia sesele!” Tio egite ururu goio boru lagu tugu lou, egite lotu tavu La Tahalo Uru. \c 6 \s1 E Latu La Sip eia loke la mota ale kisi la buk \p \v 1 Tio eau hilo e Latu La Tahalo Uru ale egite toi lovua veia e Latu La Sip, eia loke la muluga la mota ale kisi robo la buk te La Tahalo Uru. Goio, eau lolo isa tegite la vagari robola ivaa ale magiri galili La Tahalo Uru, la golula tali mai la mori ale kuraraba, eia veiagu mago “Eme gomai!” \p \v 2 Eia vikara mai ele, eau hilo isa la hos ale kakea, la tahalo ale sae oio vola ababi la gata. La Tahalo Uru abiala e vevea te la uru, tio eia gali soio te la vaubila veia ge sulu la maututula. \p \v 3 Goio, eau hilo e Latu La Sip, eia loke la ilua la mota ale kisi robo la buk te La Tahalo Uru. Goio, la vailua la vagari robola ale magiri oio te La Tahalo Uru, eia vei mago “Eme gomai!” \p \v 4 Tio, oio moli ovola, la hos isa lou sibitala, eia magesegese. La Tahalo Uru mata sosoli la tahalo ale sae oio vola veia eia ge igo paua la valalua, egite ge vaubi gegeru sesele. La Tahalo Uru abiala la viso ale uru sesele te la vaubila. \p \v 5 Tio, e Latu La Sip goio loke lou la itolu la mota ale kisi robo la buk te La Tahalo Uru, eau lolo la vaitolu la vagari robola ale magiri oio te La Tahalo Uru, eia veiagu mago “Eme gomai!” \p \v 6 Tio, oio moli ovola, eau hilo isa la hos, eia parakurukuru, la tahalo ale sae oio vola eia ababi la skel oio te la limala. Goio, eau lolo la paga isa, eia tali mai la golu la tahalo, eia loio kabili te la vagari robola ivaa ale magiri galili La Tahalo Uru, eia vikara te la vitolola ale ge sibitala, eia veia maie “La ilali amuto marula, la mapala ge tivura, mai la kilisi la mavo isasa, koramuli e kina savulu sasa. Eala moli la mapa la ilali isahari ale malama, eia kama ge goata. Amuto ge lotoa, ge alia, amuto kama ge maru!” \p \v 7 Goio, e Latu La Sip goio loke la ivaa la mota ale kisi robo la buk te La Tahalo Uru, eau lolo la vaivaa la vagari robola ale magiri galili La Tahalo Uru, eia veiagu mago “Eme gomai!” \p \v 8 Tio, eau mata soio, eau hilo isa la hos, la vovola tatataroa. La tahalo ale sae oio vola, la isala La Pileho. Mulimuli te la pokela eia mata mai la mautu tegiteu ale pehoti. La tahalo la pileho, eia goio tabari lou egiteu veia egite ge la malosu ivaa ale uru. Tio La Tahalo Uru mata sosoli la tahalo la pileho, veia eia ge sulu la malosu isa uru tegiteu ele. Isahari egite peho la vaubila, isahari, egite peho la ilea, isahari, la laion sulu kokobo egiteu. \p \v 9 Tio, e Latu La Sip goio loke la ilima la mota ale kisi robo la buk te La Tahalo Uru. La poro ale egite kaoa la kalia ale egite vaabila La Tahalo Uru oio vola, eia oio, me lotalo vola eau hilo la kalulu giteu ale la valalua bili egite. Egite pogati la pileho, la vuhula egite baumuli la merera te Kraist, egite veipala sesele la valolo ale taritigi. \v 10 Egite vikara vagari oata sesele mago “Hilage, La Uru miteu, eme moli matata, eme maroka. Gaisa eme ge koli la kasoso miteu ale sali galeti, eme ge kolia soio tegiteu ale otalo te la maututula. La paga tabaati, eme ge koli amiteu gaisa?” \p \v 11 Eala moli La Tahalo Uru eia goio abia giteu isasasa la kairobola ale kakea. Eia veia giteu veia egite ge maila muga lou bakisi, kara te e tabarabara giteu isahari lou, la valalua ale kama kokora ge bili egiteu. La giligi giteu tomi ele ge koramuli la giligi giteu ale La Tahalo Uru masagea, eia ge koramuli La Tahalo Uru ge koli egite. \p \v 12 Goio, e Latu La Tahalo Uru goio loke la iuolo la mota ale kisi robo la buk te La Tahalo Uru. Eau mata soio, eau hilo e malugulugu uru eia umu. La mata la haro, eia vulo parakukuru mai la kamilato. La mata la taio vulo magegese mai la kasoso. \v 13 Egiteu la matatabu oata te la lage paruparu sotalo mai la keme ale talulu la hipu. \v 14 Eau ga mata soata, la mori kokovuti mai la kuriti ale egite pipia. Egite la oluolu me la goegove, egite tasuku vulovulo. \v 15 Tio egiteu la ururu tomi goio taga pepeho, egiteu la mulugaluga, egiteu la tahalo la vuliti, egiteu la mulugaluga tegite ami, la valalua ale ururu, egiteu la valalua bulalahu tai, egite tomi ele hele kokovu soata la goegove. \v 16 Egite tola soata te la goegove mago “Tarobi sotalo, pigi robo amiteu te la lagu La Tahalo Uru ale pou la pulolou te la uru. Pigi robo tai amiteu te la igototolola te Latu La Sip tetala. \v 17 La vuhula, la haro sibitalati ale egira ge vahiliti la igototolola tegirua, egira ge koli la iruru somai tamiteu. Ere ge koramulia ge magiri robo la lagu girua?” \c 7 \s1 Egiteu la valalua e Israel 144,000, egite abi la irovilala te La Tahalo Uru \p \v 1 Goio, eau hilo egiteu la angelo ivaa, egite magiri te la igaga la maututula, isa te la igagala isa, isa te la igagala isa, goio te la igaga la maututula tomi ivaa mai ele. Egite magiri robo la mata la lolovi tomi, la galagala la obobu kati tali karese bakisi, la mago malilo tataho, la babaa tomi tabou moliti, la lolovi ouka. \v 2 Eala moli eau goio hilo e angelo isa lou eia lomulimuli, eia ababi la gome te la limala veia ge tau la irovilala soio tegiteu ale maroka, mai la irovilala te La Tahalo Uru, eia sekela moli mahuli. Eia goio tola soio tegiteu e angelo ivaa ale magiri robo la lolovi, La Uru eia tabariti egiteu veia egite ge igo gegeru la maututula te la lolovi ale uru, ge igo gegeru tai la mago, eia goio tola soio tegiteu, eia veia giteu mago \v 3 “Amuto umala muga ge igo gegeru harari la magasa, la mago me la hohoi te la lolovi uru tamutou, amuto magiri robo mugea! Amite ge tau muga la irovilala soio te la varu giteu ale egiteu te La Tahalo Uru sesele.” \v 4 Goio, eau loloa eia veipala la giligi giteu ale egite ge abi la irovilalale, egite 144,000, egite loio te la hilile Israel tomi. \v 5 Ale loio te la hilile Iuda, la valalua me hatavivile 12,000 egite abi la irovilala; ale loio te la hilile Rupen, la valalua me hatavivile 12,000 egite abi la irovilala; ale loio te la hilile Gad, la valalua me hatavivile 12,000 egite abi la irovilala; \v 6 ale loio te la hilile Aser, la valalua me hatavivile 12,000 egite abi la irovilala; ale loio te la hilile Naptali, la valalua me hatavivile 12,000 egite abi la irovilala; ale loio te la hilile Manasa, la valalua me hatavivile 12,000 egite abi la irovilala; \v 7 ale loio te la hilile Simion, la valalua me hatavivile 12,000 abi la irovilala; ale loio te la hilile Levi, la valalua me hatavivile 12,000 egite abi la irovilala; ale loio te la hilile Isakar, la valalua me hatavivile 12,000 egite abi la irovilala; \v 8 ale loio te la hilile Sebulon, la valalua me hatavivile 12,000 egite la irovilala; ale loio te la hilile Iosep, la valalua me hatavivile 12,000 egite abi la irovilala; ale loio te la hilile Beniamin, la valalua me hatavivile 12,000 egite abi la irovilala. \s1 La valalua me hatavivile mapaiti egite lotu tavu La Tahalo Uru \p \v 9 Tio, eau lolo kaluvuti la merera te angelo mai ele, eau ga mata soio, eau hilo egiteu la valalua me hatavivile mapaiti egite magiri te la lagule Latu La Sip, te la lagu La Tahalo Uru tai, eia oio popou te la pulolou la uru. Isa kama koramulia ge gigi tomi egiteu ele. Egiteu te la maututula tomi, te la maratatila tomi, te la merera tomi tai omai te la magasa. Egite kisi la lavalava ale kea tataho, egite vitilalia la veveve la liu. \v 10 Egite goio tatola oata maie: \li1 La Tahalo Uru tegatou, \li1 eia moli ge vimahuli etatou, \li1 egira me Latu La Sip tetala. \li1 La Tahalo Uru moli sekela \li1 eia pouti te la pulolou la uru. \p \v 11 Goio, egiteu la angelo ale oio magiri galili la pulolou la uru tetala, egiteu la mulugaluga tai, la vagari robola ivaa tai ale magiri oio te la pulolou te La Tahalo Uru, egite tomi ele goio boru lagu tugu, togoa, egite lotu tavua. \v 12 Egite tatola maie: \li1 Amen! Taritigi pepeho soata te La Uru! \li1 Etato vaisalea, eia sekela la vuhu la mari. \li1 Etato vei tatahoa, etato togoa, eia sekela vagari. \li1 Etato ge vaisale molia, la kaluvula ge ouka. Amen! \p \v 13 Goio, la mulugaluga isa goio tahiau mago “Mave, eme rovi egiteu ale lavalavala la kulikuli ale keakea? Egiteu ere? Egite love?” \p \v 14 Goio eau koliala mago “Tahalo uru, eau ale kama rovia, eala moli eme soioge rovia.” \p Goio, eia vei matagageagu mago “Egiteu alele la valalua me hatavivile ale mahuli utu te la viligila ale uru. Egite vuhi marokati la lavalava tegiteu, oio te la kasosole Latu La Sip, egite pouti te la mautu la matagaga tetala. \v 15 Egite magiri moli te la lagu La Tahalo Uru, eia popou la pulolou la uru tetala. Egite lotu tavua te la haroharo me la logologo tomi oio te la luma la lotu tetala. Eia ge sigirobo egiteu. \v 16 Egite kati ge gabu la vitolola, la malehula tai ge ouka. Egite kati ge ligi la haro ale uru, eia paga titili pepeho. \v 17 La vuhula e Latu La Sip, eia magiri te la mata la pulolou la uru te Tamala, eia ge vibaumuli egiteu. Eia ge tata egiteu soio te la babaa ale rorovi tataho, la lalalu oio vola, La Tahalo Uru eia ge sabubu la masasali giteu mai egite ge tali la iloburukola.” \c 8 \s1 E Latu La Sip eia lube la ivitu la mota \p \v 1 Goio, eau hilo e Latu La Sip eia lube la ivitu la mota ale kisi tola la buk te La Tahalo Uru. Eia lube kaluvua, isa kati vikara oata te la ilo la lage, goio tabaa bakisi la mautu tabou moliti. \v 2 Tio eau mata soio, eau hilo egiteu la angelo ivitu ale magiri te la lagu La Tahalo Uru, egite ababi la vaivai te la lima giteu. \v 3 E angelo isa lou eia ababi la plet ale mememe, eia goio magiri te la mata la poro ale egite selu la bulu la obu ale mali vivili ovola, isa goio sigili usuala la bulu la obu, veia eia ge magiri te la poro la lotu, eia ge selua, la sosobula ge pavu soata vikapopo la kilaka tegiteu la valalua me hatavivile te La Tahalo Uru. \v 4 Goio la sosobu goata vikapopo la kilaka tegiteu ele, loio te la plet ale e angelole eia ababia te la limala, eia selu la bulu la obu ovola. \v 5 Goio eia abi la plet tetala, eia tau la kavisosoko la havi ovola, eia goio pigia sotalo te la maututula. La havi goio paru moli sotalo la magasa, la mori goio kuraraba, la sima sima, e malugulugu uru umu. \s1 Egiteu e angelo ivaa pusu la vaivai \p \v 6 Goio, egiteu la angelo ivitu goio raragi veia ge pusu la vaivai tegiteu. \v 7 Goio la mulugala pusu la vaivai tetala, la hura la uatati eia pu vagari loata. La havi me la kasoso tai goio sibitala loata te la mori, gotalo te la magasa. La gale la magasa isa uru sesele, eia tululu, la gale la hohoi tai ale uru pepeho, la gaeke tai la galela isa uru kaha. \p \v 8 Goio, la iluale angelo pusu la vaivai tetala, la gale la magasa isa uru ale mata mai la olu pati ale uru makapipila sesele, eia karerere, La Tahalo Uru pigia sotalo la mago. La gale la mago isa uru eia goio vulo mai la kasoso. \v 9 La iaia me egiteu la golugolu tomi ale mahuli olau la mago, egite usu peho, egiteu e sipi tai ale polopolo olau te la tia la utu, egite usu vilua. \p \v 10 Goio, la itolule angelo pusu la vaivai tetala, tio La matatabu isa uru, eia karerere mai la selu, eia goio paru loata te la ilo la lage, eia gotalo la magasa, eia igo gegeru la lalalu usu. \v 11 La isa la matatabu alele, e Ama, eia igo gegeru la lalalu usu, egite kati maigi egite mamasiti. Egite la valalua me hatavivile mapaiti liua, la vuhula egite la lalu oukati, egite goio peho, la vuhula la lalu kati taritigi, eia ama. \p \v 12 Goio, la ivaale angelo pusu la vaivai tetala, La Tahalo Uru goio bili mate la mata la haro, la galela isa mate, eia bili mate tai la gale la mata la taio isa, egite la matatatabu tai usu eia bili mate egiteu. Te la haro, la paga maligoma, eia tabaa sesele, te la logo tai la taio kamati paga tabaa. \p \v 13 Goio, eau ga mata soio, eau lolo isa uru e loauru eia lovolovo oata, eia tatola maie “Iauo, iauo, maura miteu la valalua me hatavivile, egite ge vilua ge! La vuhula egiteu la angelo taho tolu soloio, egite raragiti veia ge pusu la vaivai tegiteu, la viligila ovola ge kama kokora viruru!” \c 9 \s1 La ilimale angelo pusu la vaivai tetala \p \v 1 Goio, la ilimale angelo, eia pusu la vaivai tetala. Eau hilo isa e angelo mai la matatabu, eia boru loata te la ilo la lage, eia gotalo te la magasa, La Tahalo Uru eia abiala la ki ale ge kope la mata la lulu ale gotalo te la ilo la magasa, la igagala ouka. \v 2 E angelo goio kope soilo, la sosobu la havi uru goio sibitala loilo vola, eia pavu soata, eia pigi robo la mata la haro, la mori eia maligoma. \v 3 Egiteu e komareburu mapaiti lovo loata te la sosobu uru ele, egite gotalo pigi robo la magasa, La Tahalo Uru visibitala egiteu, egite mai e komakilu, egite ge ligiligi la valalua me hatavivile. \v 4 Eia veia giteu veia egite umala ge ali taro la gaekeke me la galagala la obobu, eala moli egite ge ligi moli egiteu ale kama tahola la irovilala te La Tahalo Uru oio te la varu giteu. \v 5 La Tahalo Uru kama abia giteu la vagagarila koramuli egite ge bilibili, ouka, eia baha moli egiteu veia egite ge viligi la valalua me hatavivile la taio ilima, ge kaluvu lou. Eala moli la iligiligi tegiteu, eia uru mai la iligiligile komakilu. \v 6 Te la taio ilimale, la valalua me hatavivile ge tali tavu La Tahalo Uru veia egite ge peho taro la iligiligi alele. Egite ge masagea veia egite ge peho, eala moli ouka, egite ge mahuli moli. \p \v 7 Egiteu e komareburu, egite mata mai la hos ale egite galiau robola la kulikuli la aen te la vaubila, egite lagu maua gegeru pasi. E vevea oio te la gama giteu isasasa, eia mememe. La lagu giteu eia mai moli la lagu la tahalo. \v 8 La ivu giteu eia malau mai la ivu la tavile ale vovo kakea. La togo giteu eia siki mai la togo la laion. \v 9 La gale la aen oio tegiteu isasasa, eia tabuli robo la magoro giteu. Egite lovo, la tilali la palapala giteu eia tali magugulu mai la tilali la vaha giteu la valalua la vaubi, egite gali te la mautu isasa. \v 10 La kiu giteu tai oio, la iririla oio vola, eia mai sesele la kiule komakilu, koramuli egite ge ligiligi la valalua me hatavivile oio vola, la taio ge ilima. \v 11 La mulugaluga tegiteu, e angelo moli te la lulu ale gotalo te la ilo la magasa, la igagala ouka. E angelole, la isala te la merera e Hibru, e Abidon, me te la merera e Grik la isala e Apolion, la masovala “la tahalo la bilili”. \p \v 12 Tio, la muluga la iloburukola eala kaluvuti ele, ilua lou soloio. \s1 La iuolole angelo pusu la vaivai tetala \p \v 13 Goio, la iuolole angelo eia pusu la vaivai tetala. Eau lolo la golule isa eia loio tegiteu la silalau la poro ivaa ale egite tokoromo tatahoa, egite oio te la vai la poro te La Tahalo Uru, eia mememe, egite gutu la vaabila oio vola, eia magiri moli te la lagula. \v 14 La golulale eia goio vikara soio te la iuolole angelo ale ababi la vaivai, mago “Baha taro egiteu la angelo ivaa ale eau magiri robo egiteu oio te la harare la lalu uru e Iupretis.” \v 15 Tio oio moli ovola, egiteu la angelo ivaa La Tahalo Uru raragiti egiteu veia te la haro moli alele egite ge igo gegeru la maututula, egite goio gali soio veia egite ge bili la valalua me hatavivile mapaiti. E ami ale uru sesele loio sibitala, egiteu tomi sae te la hos tegiteu isasasa, \v 16 la giligi giteu la milion salatu lua, egite toi la giligi giteu mai ele, eau loloa. \v 17 Te la hililo taku alele eau hiloa veia egiteu ale sae te la hos, egite mata maie: La gale la aen, egite kisia te la beho giteu, eia tabuli robo la magoro giteu isasasa. La aen tegiteu ele eia halala mai la havi, eia kakisa, eia ialalo tai. La gama giteu la hos tegiteu ele, eia mai la gama la laion. La havi, la sosobu me la malia la tivura, eia sibitala loilo la hare giteu. \v 18 La irovilala itolu ele, eia bili taro egiteu la valalua me hatavivile usu pepeho bakisi, mai la havi, la sosobu me la malia la tivura ale loio la hare giteu la hos tomi. \v 19 La vagagari giteu eia oio te la gala giteu ale loio te la hare giteu ele, oio te la kiu giteu tai, la vuhula la kiu giteu oio, eia mai e taive, la gamala oio, koramuli egite ge totolo veia ge igo gegeru la valalua me hatavivile. \p \v 20 Tio, egiteu la viluala tomi alele sibitala, eala moli la valalua me hatavivile ale mahuli utu, egite kama masaga ge gabutatala rivu lou la iruru tegiteu, mai la lotu tavu la taua, egite kama masaga tai ge piligi la lotu tavu la puigolo ale egite puila la lima giteu, te la golu tomi mai la gold, la silva, la obu, me la uati. Egiteu la papagale kama mahuli veia egite ge mamata, ge lololo, ge tatuga, ouka. \v 21 Eala moli egite la valalua me hatavivile kama masaga tai veia ge piligi la vulovulo giteu mai la bilili, la savula, la maholo, la mata bulakalakala, me la pakalila tai. \c 10 \s1 E angelo abiale Ioanes la buk isa bisi \p \v 1 Tio, mulimuli ovola, eau hilo e angelo isa uru lou, eia vagari pepeho, eia sivo loata la mori. La lavalavala tetala la tuluvu la mori, e vevea tetala la malai la hura moli. La tirarola sima tataro mai la haro. La vahala ilua magiri mai la sosole ilua, eia karerere. \v 2 Oio te la limala isasa eia ababi la buk isa bisi. Eia goio tau la vahala e gata soio, eia toa olau la mago. Goio, eia tau la vahala e meru soio, eia toa oilo la magasa. \v 3 Eia goio tola boboboe, la golula tali mai la laion ale girerere. Eia goio vikara kaluvuti mai ele, la mori goio tali kuraraba vaka vitu, \v 4 eia kama tali kuraraba bulalahu, la masovala oio. Tio eau veia ge kekesi tola la merera alele, eala moli la golu La Uru eia tali loata te la mori, eia veiagu maie “Eme umala ge veipala la merera te la mori eia tali kuraraba vaka vituti ele, umalati kekekesia.” \p \v 5 Goio, e angelo ale eau hiloa eia magiri la vahala isa olau la mago, la vahala isa oilo la magasa, eia goio vituri la limala e gata soata te la mori, eia goio vikara. \v 6 Eia toi la merera ale tikumu sesele oata te La Tahalo Uru, eia moli sekela mahuli, la tapasila ouka. Eia moli sekela vipou la mori, la magasa me la mago, vikapopo la golugolu tomi oilo vola, eia moli sekela vipou egiteu. Te la isa La Uru moli mai ele, e angelo goio vikara, eia toi la merera ale tikumu, mago “La imamala koramuliti, umalati pou tali lou isa la paga. \v 7 Mai la ivitule angelo ge pusu la vaivai tetala, tio la masova la gabutatalala tomi te La Tahalo Uru eia pala tabuli kokovu, eia kama matagaga sesele, eia ge palala, la merera tomi tetala ge puru, mai eia veipalatia oio tegiteu la bilalaha tomi tetala.” \p \v 8 Goio, eau lolo lou la golu La Uru eia tola loata te la mori, eia veiagu mago “Eme tuga soio, eme ge abi la buk ale oio te la limale angelo ale magiri te la mago me la magasale, la buk ale eia oio kopeti, eme goio abia.” \v 9 Tio eau goio tuga soio, eau goio tahi e angelo veia eia ge abiagu la buk bisi ele, eia goio koli la merera taku mago “Eme abia, eme ge alia. Eia ge tabuli gegeru oilo la tiamu mai ale malipiriti, eala moli eia ge malama sesele te la haremu, eia ge malama pepeho mai la magu.” \v 10 Goio eau loloa mai ele, eau abi la buk loio te la limale angelo, eau sogomua, eia malama pepeho, mai sesele la magu, eala moli eia gotalo tabuli oilo te la tiagu, eia malagegeru. \v 11 Tio eau goio ali kaluvua mai ele, e angelo goio veiagu mago “La Tahalo Uru ge abiamu isa lou la vikararala tetala, te la viluala ale ge sibitala tavu egiteu la valalua me hatavivile te la maratatila tomi oio te la galegale tomi, soio tai tegiteu la mulugaluga tegiteu ele. Eia ge veiamu la merera tetala ovola, eme ge veipalea soio te la valalua me hatavivile tomi, egite ge loloa, eme kama ge tou.” \c 11 \s1 La tahalo ilua veipala la merera te La Tahalo Uru \p \v 1 Goio, mulimuli ovola, La Tahalo Uru eia abiagu la viro isa te la ilova la malau la luma, eia veiagu mago “Eme ge tuga soio, eme ge lova la malau la luma taku,\f + \fr 11:1 \ft Ale e Ioanes veia “la luma la lotu”, eia mai la irovilala mai te la valalua me hatavivile tomi ale lotu tavu sesele e Kraist, egite tetala seseleti. Egiteu la valalua la maligoma, egite mai ale magiri te la baa moli ale logala te la luma la lotu, egite vagari veia ge igo gegerua.\f* la malau la poro la gulutu la kalia tai oilo vola, gigi tai egiteu ale oilo lotulotu ovola. \v 2 Eala moli umala eme ge lova la malaula me la bola la baa ale logala te la luma taku ale loilo te la sesega ale sesega roboa, la vuhula la baa alele, egite la valalua la maligoma taholatia, eia kamati taku. Egite oio volu te la mautu la marokala taku, e Ierusalem. Egite ge toa mumugu la mautu taku la taio ge savulu vaa gete lua. \v 3 Eala moli eau ge vipou la bilalaha taku taho lua, egira ge baharu te la iloburukola, egira ge veipala la merera taku oio te la mautu taku ele, kara la logo ge salatu savulusa gete lua, savulu uolo lou.”\f + \fr 11:3 \ft La baa ale la logo 1,260 eia visauru me la baa ale la taio 42 mai egite toitia te la galevila ilua oata. La masovala mai la imamala la iligiligi, mai egite veia te La Buk Tabu Ale Pala, te la buk ale Diuteronomi.\f* \v 4 Egira taho luale, egirua mai la obu la oliv ilua me la selu ilua ale magiri te la lagu La Tahalo Uru, eia La Uru te la maututula tomi. \v 5 Mai isa ge tovo lalaia veia ge igo gegeru egirua, la havi ge raga loio te la hare girua, eia ge selu taro egiteu ale gima egira. Mai isa ge masagea veia ge igo gegeru egirua, eia ge peho te la vagagari la havi ele. \v 6 La vagagari girua eia koramulia ge magiri robo la mori, la hura kati ge pu te la imamala ale egira ge veipala la merera te La Tahalo Uru ovola. Egira koramuli taia veia ge vulo la lalu eia ge sibitala mai la kasoso, egira ge visibitala tai la ilea me la iligiligi tomi mai te la masasagala moli tegirua. \p \v 7 Mai mulimuli la veipalala tegirua ge kaluvuti, la bolo isa uru ale kama kokora sesele, eia ge hiliti lotalo te la lulu ale la igagala ouka, la bolo alele egite toia La Bolo Ale Uru. Eia ge vaubi soio tegirua la bilalaha te La Uru, eia ge bolehoho egira, eia ge bili taro egirua. \v 8 La vovo girua ge tabuli bulalahu moli te la tia la mautu uru ale etato toi lovua veia “e Sodom” me “e Gipto”, eia la mautu la vareagila. Oio tai te la mautu alele, egite pala bili La Uru girua, egite katua oata te la tauvalautu, eia peho. \v 9 La vovo girua ge tabuli te la tia la mautu la logo ivaa. Eala moli egiteu ale loio te la igaga la magasa tomi, mai la valalua te la maututula tomi, te la merera tomi me te la maratatila tomi tai, egite sibitala oio, egite mata soli taro moli la vovo girua, egite kama masaga ge ulai tigi egirua. \v 10 La valalua me hatavivile tomi usu te la maututula, egite ge sagege, egite ge vararapu baololi egiteu, la vuhula egite pala ligi te la karasusukula tegira te la merera te La Tahalo Uru, eala egite sagege pepeho te la pileho girua, la vuhula egira kati ge kaharea loua giteu. \p \v 11 Eala moli eau hiloa egira tabuli mai ele la logo ivaa, goio la lolovi la hare La Tahalo Uru goilo tegirua, egira goio mahuli lou, hiliti, tio egite la valalua taga gegeru lalahu. \v 12 Egira goio lolo la golule isasa eia tola vagari sesele loata te la mori, eia veia girua mago “Amula ge gomai, amula ge goata!” Goio, la tuluvu la mori isa uru goio pigi robo egirua, egira goata la mori oilo vola, egite la gima tegirua magiri hare palala moliti. \p \v 13 Oio moli ovola, e malugulugu isa uru goio sibitala, eia umu la mautu alele, la lumaluma usu pepeho tagogoro, la valalua me hatavivile salatu savulu vitu peho, egiteu ale mahuli utu, egite taga pepeho sesele, egite goio vaisale La Tahalo Uru oata la mori. \p \v 14 Tio, ale la ilua la iloburukola eia kaluvuti ele, la itolula eia oio hagagaviti. \s1 La ivitule angelo pusu la vaivai tetala \p \v 15 Goio, la ivitule angelo eia pusu la vaivai tetala, la golu giteu la angelo isahari tola loata te la ilo la lage, egite tola vagari maie mago “La maututula kati te Satan, La Uru taholati egiteu, egira me Latula e Kraist La Uru, eia ge mamuga la maututula, la vibaumulila tetala ovola eia kama ge kaluvu.” \p \v 16 Goio, egite la uru savulu lua gete vaa, egite oio pou te la pulolou la uru tegiteu oio te la lagu La Tahalo Uru, egite loloa mai ele, egite boru lagu tugu, egite lotu tavua. \v 17 Egite vikara maie mago: \li1 Amite vei tataho seseleme, La Tahalo Uru, \li1 eme sekela vagari. \li1 Eme mahuli palati, eme mahuli igoie, \li1 la kaluvumu ge ouka. \li1 Amite vei tatahome, la vuhula eme hilititi, \li1 eme sokotia veia ge mamuga sesele la maututula. \li1 \v 18 La valalua la maligoma, egite igo totolome, \li1 eala moli ale igoie la imamala \li1 la igototolola taume eia guviti. \li1 Ale la imamala sibitalati \li1 ale eme ge vimahuli rivu lou egiteu ale pehoti, \li1 eme ge mata muli la vulovulo giteu. \li1 Ale la imamala sibitalati \li1 ale eme ge vibalava egiteu la bilalaha taume, \li1 vikapopo legiteu la valalua me hatavivile tomi \li1 ale togo la isamu. \li1 Egiteu ale la tahalo bulalahu, egiteu tai ale ururu, \li1 eme ge vibalava tomi egiteu. \li1 Ale la imamala ale eme ge igo gegeru egiteu \li1 ale igo gegeruti la vipoupoula taume ale eme vipoua. \p \v 19 Goio, egite la uru vikara kaluvu mai ele, eau goio hiloa veia la mata la luma la lotu te La Tahalo Uru oata te la ilo la lage, eia oio kope moli, oilo vola eau hilo la tilalau la golugolu ale maroka te la lotu tetala. Goio la sima sima vevei la baa, la mori tali kuraraba, e malugulugu umu, me la hura la uati eia pu vagari loata. \c 12 \s1 La irovilala ilua sibitala mai la tavile isa uru vikapopo me bogea \p \v 1 Goio, la irovilala isa uru goio sibitala oata te la mori, eau hilo la tavile isa uru, la lavalava tetala eia la matagaga la haro moli, eia magiri loata te la taio, la matatabu savulusa gete lua tabuli oata te la gamala mai e vevea tetala. \v 2 Eia savulatu, eia oio kasisisia, roberobe. \p \v 3 Tio, goio, la irovilala isa uru lou sibitala oata te la mori, eau hilo isa uru e bogea,\f + \fr 12:3 \ft E bogea, eia magiri moli mai la irovilala oio te la vigilemulimulila isahari, egite toila “e dragon”. La havi eia loio te la harela me la maisula, eala moli eia ga mamai sesele e bogea. \f* eia magegese, la gahola ivitu, la komola tai savulu sasa oio, e vevea tai ivitu mai la irovilala te la mulugaluga, egite oio te la gamala tomi isasasa. \v 4 La kiula, eia malau. Eia goio valia soio, eia vali taro egiteu la matatabu usu, egite paru loata te la ilo la lage, gotalo te la magasa. Eia goio magiri te la lagu la tavile uru, veia mai eia ge pigo, eia ge sogomu e latula, eia kama ge mahuli tabaa. \v 5 Goio, la tavile goio pigo e latula hatamale, eia ge muga la maututula te la galegale tomi, eia ge sau tola la irovilala te la mulugaluga oio te la limala, mai la gata isa uru. Eala moli egiteu la angelo guvi, egite goio abi taro le bogea e latula bisi ele, egite goio bokoa soata te La Tahalo Uru eia oio popou te la pulolou la uru tetala. \v 6 Eala moli la tavile uru, eia goio hele soata la hohoi, eia goio tari kokovu oio te la baa isa La Tahalo Uru eia raragitiala, veia egiteu la angelo ge baumulia la logo ge salatu savulusa gete lua, savulu uolo lou.\f + \fr 12:6 \ft La imamala mai la logo 1,260 alele, eia la imamala la viligila ale La Bolo Ale Uru, eia ge muga la maututula ovola.\f* \p \v 7 Goio, la vaubila uru sibitala oata la ilo la lage. E Maikel vikapopo legiteu la angelo tetala, egite vaubi soio te bogea, eia vaubi rivu lou soio tegiteu vikapopo legiteu la angelo tetala ale kama kokora, \v 8 eala moli egiteu ale te Maikel egite bolehoho egiteu ale te bogeale, egite basimuli taro egiteu loata te la ilo la lage. \v 9 E bogeale, eia e Satan moli, etato rovia eia koramulia ge sibitala mai e taive tai. E Satan ele, eia palati te la silokola eia la tahalo la visigologolola ale visigolo la valalua me hatavivile te la maututula tomi. Goio, egite lao tolea, egite pigia sotalo te la maututula, vikapopo legiteu la angelo tetala, egite koratio. \p \v 10 Goio, eau lolo la golu la tahalo isa uru, eia tali loata te la mori, eia vikara maie mago “Igoie, la vimahuli, la viputumulila, me la vagagarila te La Tahalo Uru tegatou eia sibitalati. Igoie eia veipalatia la vagagarila te La Riau tetala e Kraist. La vuhula, la tahalo la visigologolola ale magiri te la lagu La Tahalo Uru tegatou, eia kakaua giteu e tabarabara gatou te la haroharo tomi, la logologo tomi, kama maila, e Satan ele, egite pigitia sotalo, eia kaluvuti. \v 11 Egiteu e tabarabara gatou, egite bolehohotia, la vuhula la vagagari la kasosole Latu La Sip eia oio tegiteu, la merera tai te La Uru ale sesele tomi moli eia oio tegiteu ele, egite veipala molia. Egite raragi moli veia ge sugu taro la mahulila tegiteu, egite kama taga la pileho. \v 12 Taritigi la mautu ale oata la ilo la lage eia ge volu sesele la sagegela, eala moli maura miteu ale pou otalo te la maututula, la vuhula La Gima eia gotaloti tamutou! La tiala volu sesele la igototolola ale uru, eia oio hate mamasi pepeho, la vuhula eia rovitia veia la imamala tetala eia hagagaviti ge kaluvu.” \p \v 13 Goio, la merera alele eia kaluvu, eala moli e Satan eia hilotia veia egite pigitia sotalo la magasa, eia goio basimuli la tavile ale pigoti e latula hatamalele. \v 14 Eala moli La Tahalo Uru goio tau la palapala la tavile ilua ururu sesele, mai la palapalale loauru, veia eia ge lovo soio te la baa ale eia raragitiala soata la hohoi, veia eia ge baumuli molia oio vola, la leavala ge itolu, la taio isahari lou, e bogea kama ge sivutia. \v 15 Goio, e Satan, eia lua taro la lalu uru, eia sali mai la silali, eia veia ge sali taro la tavilele. \v 16 Eala moli la magasa eia suli la tavile, eia goio mapola eia sogomu la lalu ale e bogea lua taroa. \v 17 Goio, e bogea igo totolo pepeho sesele la tavile, eia goio gali soio veia ge vaubi soio tegiteu e latatula isahari lou, mai egiteu ale roromuli la merera te La Tahalo Uru, egite sau tola la vimari te Iesus. \v 18 E bogea veia eia ge vaubi moli soio tegiteu ele, eia goio magiri olau la parava, eia mamata. \c 13 \s1 La bolo ilua ale kama kokora sibitala \p \v 1 Goio, eau ga mata soio, eau hilo la bolo isa uru eia hiliti lotalo te la mago. La komola savulu sasa oio, la gahola ivitu, e vevea savulu sasa mai la irovilala te la mulugaluga, egite oio te la komola isasasa. Oio te la gahola ivitu ele, egiteu la valalua te Satan egite kekesiti la isaisa La Tahalo Uru isahari, La Bolo eia veia ge abi la isa La Tahalo Uru veia ge vauru rivu lou eia ovola. \v 2 Eala moli la bolo alele, eau hiloa eia mai sesele e pusi ale uru, eia vuraga, egite toila e lepat. La pulila ivaale, eia mai la pulile bear.\f + \fr 13:2 \ft E bear, eia la bolo isa ale uru bara, eia totolo, la pulila eia mai la puli la tahalo.\f* La harela, eia mai sesele la hare la laion. E bogea ale eau so hililoa, eia goio sugu taroa la bolo ale kama kokorale la vagagarila tomi, veia eia ge muga la maututula. \v 3 La gamala isa eia kakali, eia ga mata mai egite isa barautu gegerutila la viso, eala moli eia mahuli utu, la kakalila uru ele eia mavuti. La valalua me hatavivile te la maututula tomi, egite hiloa mai ele, egite karutu sesele, egite togoa, egite goio mulimulia. \v 4 Egite goio lotu tavu e bogea, la vuhula eia abitia La Bolo la vagagarila ale uru seselele. Egite lotu tavu tai La Bolo, egite vitahi baoli legiteu mago “Ere ge vagari mai La Bolo, ere ge koramulia ge vaubi soio tetala? Ge ouka ge!” \p \v 5 Tio, La Tahalo Uru eia abia La Bolo la baa mai la taio savulu vaa gete lua veia eia ge pou la mulugaluga ovola, veia eia ge kau tavuala la isa La Tahalo Uru veia eia ge vitahobo la isa La Tahalo Uru soio tetala. \v 6 Tio mai ele, eia goio soko la gililo soio te La Uru, eia vikara bara tai soio te la mautu tetala, vikapopo tai legiteu ale mou ovola. \v 7 Eia la vagagarila oio ale ge vaubi soio tegiteu la valalua me hatavivile te La Tahalo Uru, veia eia ge bolehoho egiteu. Eia muga la maututula tomi, la galegale tomi, la maratatila tomi, me la mererera tomi tai, eia muga ovola. \v 8 Egite tomi ge lotu tavu La Bolo, mai egite tomi ale la isaisa giteu kama tabuli oilo te La Buk La Mahuli te Latu La Sip, mai eia kekesi tolati la isa giteu tomi ale tetala, palati te la vipoupoula, eia tabuli te La Buk tetala, karati igoie. Egiteu ale la isaisa giteu kama oilo te La Buk, mai egiteu tomi ale kama rovi e Kraist, egite ge lotu tavu La Bolo. \p \v 9 Mai ere la gavusala ge oio te la ilolo la merera, taritigi eia ge lolo la merera te La Tahalo Uru te La Buk Tabu Ale Pala, eia veia maie \v 10 “Mai la valalua me hatavivile te La Tahalo Uru ale eia visati legiteu veia la valalua la gima ge vagoilo egiteu te la luma la kilisi, koramuli egite ge goilo moli ge pou te la kilisi. Mai egiteu tai ale La Tahalo Uru eia visati legiteu veia egite ge peho te la gata, egite ge poga tavu sesele la viluala te la gata, egite ge peho.” Eala, mai la valalua me hatavivile te La Tahalo Uru ge hiloa veia la iligiligi me la vaubila eia sibitalati, mai la merera alele eia veitia, tio taritigi egite ge magiri vagari, egite ge tau moli la ilo giteu soio te Kraist. \p \v 11 Goio, eau ga mata lou soio, eau hilo la bolo isa lou, eia hiliti lotalo la magasa. La komola ilua oio te la gamala, mai la komole latu la sip isasa, eala moli eia ababa lou la isala. \v 12 Eala moli la bolo alele, la muluga la bolo eia sugu taro soio tetala la vagagarila tomi veia eia ge magiri te la mulila, eia ge muga la maututula mai ele, veia eia ge vagari tavu moli la valalua me hatavivile tomi veia egite ge lotu tavu La Bolo Ale Uru, eia pala viluati, eia mahuliti lou. \v 13 La ilua la bolo eia goio igo la irovilala isahari, mai la golu la karutula, eia visibitala la havi loata te la mori, eia gotalo te la magasa, egite la valalua hiloa. \v 14 Tio egite hiloa mai ele veia eia igoti la golu la karutula, mai te la vagagari La Bolo Ale Uru, tio eia tutugolo egiteu la valalua me hatavivile tomi otalo te la magasa mai ele, eia veia giteu veia egite ge vahiliti isa uru la puigolo mai la halulu La Bolo Ale Uru, eia pala vilua, eia mahuli utu. Eia veia egite ge pui la puigolo aleie, ge vahilitia, egite ge vaisale La Bolo ovola. \v 15 Goio, egite igo molia mai eia veitia giteu ele, La Tahalo Uru eia mata sosolia veia la ilua la bolo ge vimahuli la puigolo, eia goio igoa mai ele, la puigolo la bolo eia goio hiliti, eia soko la vikararala. Egiteu ale kama lotu tavua, eia goio kapi robo egiteu veia la valalua tetala ge bili taro egite. \v 16 Eia baha egiteu la bilalaha tetala veia egite ge tutulu la irovilala tetala soio te la valalua me hatavivile tomi, mai egiteu ale uru, egiteu ale la tahalo bulalahu, egiteu la tahalo la vuliti, egiteu la bilalaha bulalahu moli tai. Eia veia egite ge tau la irovilala tetala soio te la lima giteu la valalua me hatavivile tomi e gata, mai ge ouka, egite ge taua soio te la varu giteu. \v 17 Tio egite usu tahola la irovilala te La Bolo oio te la vovo giteu, mai la irovilala tetala, mai ge ouka, ge la isala sesele. Mai isa la irovilala ge ouka oio te la vovola, eia kama koramulia ge lotoloto la papaga. \v 18 Eala moli la irovilala te la isala eia isa la pigiveila veia mai egiteu la valalua la mari usu ge koramulia ge gigi tigi la masova la irovilala te La Bolo, la vuhula eia magiri mai la isa la tahalo isasa. Eala moli la irovilala tetala eia maie: 666. \c 14 \s1 La bilau tegiteu ale la kasosole Kraist eia loto rivu lou egiteu taro la limale Satan \p \v 1 Tio, goio, eau ga mata lou soio, eau hilo e Latu La Sip eia magiri oata te la varu la gove e Saion, vikapopo la valalua me hatavivile 144,000, la isale Kraist me Tamala oioti te la varu giteu. \v 2 Goio, eau lolo la bilau isa uru loata la mori, mai la tilali la lalu uru eia raga loata te la varu la gove, gotalo. Eia ga tali tai mai la mori ale tali kuraraba, eau loloa eia ga mai egite gumu te la galamo.\f + \fr 14:2 \ft Ale e Ioanes toi seseletia veia la tilali alele, eia ga tali mai la tilali la harp, eia la paga te la bilau, ale eia ga mai bakisi la gita, eala moli eia isapolo tai te alele.\f* \v 3 Egite magiri te la mata la pulolou la uru te La Tahalo Uru, egite magiri tai te la lagu giteu e ururu, te la lagu giteu tai la vagari robola ivaa ale magiri te la pulolou te La Uru, egite bau la bilau isa ale so halaba, eia isapolo sesele. Eala moli egiteu ale 144,000, egite rovitia, egite babaua. Isa lou kama ge rovi la bilau alele, egiteu moli ale la kasosole Kraist eia pala loto rivu lou egiteu taro la limale Satan te la imamala ale egite so popou te la pulolou la mahulila omai te la maututula. \v 4 Egite maroka sesele, mai egiteu ale kama mavuta tomi la tavile. Egite mulimuli e Latu La Sip veia ge vikapopo leia soio te la babaa tomi ale eia ge goio vola. E Kraist eia loto robo egiteu me la kasosola, eia puli egiteu taro la pulolou kabili te la valalua me hatavivile oio te la maututula, veia egiteu moli sesele ge mahuli. Egite ge magiri te la lagu La Tahalo Uru, egite ge mai la siloko la vaabila soio tetala, veia la valalua me hatavivile usu lou ale maroka ge goilo mulimuli tegiteu ele. \v 5 Egiteu la tahalo me la tavile ale maroka sesele, egite kama rovi bakisi la visigologolola, egiteu la iruru tai ouka oio tegiteu veia isa ge kaua giteu oio vola, ouka viruru. \s1 E angelo itolu sibitala, egite soko la vikararala \p \v 6 Tio, goio, eau ga mata soio, eau hilo isa lou e angelo eia lovo oata te la baa, eia sau tola la valolo ale taritigi eia kama ge kaluvu, veia eia ge veipalea soio te la maututula tomi, te la maratatila tomi, te la galegale tomi, te la mererera tomi tai. \v 7 E angelole, eia oio tatola maie “Taritigi amuto ge togo La Tahalo Uru, ge vaisalea, la vuhula la imamala la viputumulila tetala eia sibitalati. Taritigi amuto ge lotu tavu eia ale vipou la mori, la magasa, la mago, me la lalalu tomi tai.” \p \v 8 Goio, e angelo isa lou sibitala, eia mulimuli la mulugale angelole, eia tatola maie “La mautu uru e Babilon, eia sululu sapati. La mautu ale eia kama kokora, eia pala viliu paua la valalua me hatavivile tomi te la lalu la pauala tetala mai la vulovulola te la iruru tomi tetala. Hiloa, eia sululu sapati.” \p \v 9 Goio, e angelo isa lou sibitala, eia mulimuli la iluale angelole, eia tatola maie “Mai amuto ge abi la irovilala te La Bolo Ale Uru oio te la varu mutou, uka oio te la lima mutou e gata, veia amuto ge lotu tavu tai La Bolo me la puigolo tetala, \v 10 tio amuto ge ligi te la igototolola te La Tahalo Uru, eia kama bisi, eia ge koli seselea soio tamutou la mapa la iruru tamutou ele. La Tahalo Uru ge vimagiri amutou te la lagu giteu la angelo tetala ale maroka, vikapopo le Latu La Sip tetala, eia ge tulu le amutou la havi, amuto ge lai. \v 11 La sosobu la havi la viligila tamutou ele, eia ge paupuvu moli soata, kama ge kaluvu. La mailala ge ouka, la vuhula amuto lotu tavu La Bolo Ale Uru, vikapopo la puigolo tetala, amuto abi tai la irovilala tetala mai la isala, oio te la vovo mutou.” \p \v 12 Eala, eia koramuli seselea mai ele veia egiteu la valalua me hatavivile te La Tahalo Uru, egiteu ale roromuli la merera la viputumulila tomi tetala, egiteu ale magiri vagari tai te Iesus, eia koramulia veia egite ge magiri vagari, egite ge tau sesele la ilo giteu soio te Kraist, la vuhula e angelo veitia veia egiteu ale lotu tavu La Bolo ge vilua, eala eia taritigi veia etatou ale te Kraist ge magiri vagari moli. \p \v 13 Goio, eau lolo la golu la tahalo isasa eia tatola loata la mori, eia veia maie “Eme ge kekesi tola la merera taku maie: Egiteu ale peho te la igogolu te La Uru, egite balavati, sokoa igoie, kara mulimuli, egiteu alele ge pou sesele la balavala. La Kalulu La Marokala eia veia maie tegiteu ele mago ‘Egite ge maila taro tataho la igogolu ale vagari tegiteu, la mapa la visuli tegiteu soio te La Uru eia ge puru tegiteu, eia ge mulimuli egiteu soata te la ilo la lage, eia ge vipou egiteu te la pulolou la balavala oata ovola.’” \s1 La vikarara la tilovo te la ilali orivo eia matuhati \p \v 14 Tio, eau ga mata lou soio, la tuluvu la mori isa uru eia loio sibitala, eia kakea. La tahalo isa popou oio vola, eia la tahalo la kalulu, eala moli eia mata mai la tahalo la vovo, mai egite toia veia “e latu la tahalo.” E vevea mai la irovilala te la mulugaluga eia oata te la gamala, eia mememe tataho. Eia ababi la viso te la limala, eia kara sesele. \v 15 Goio, e angelo isa lou loilo te la luma la lotu, gogala, eia tola soio tetala ale pou te la tuluvu la mori, mago “La ilali otalo te la maututula eia matuhati, eme ge abi la viso taume ele, eme ge gorivo, eme ge ababia.” \v 16 Goio, eia ale pou te la tuluvu la mori, eia abi la viso tetala, eia goio visibitala la viputumulila te la Tahalo Uru otalo te la maututula. \p \v 17 Goio, eau hilo e angelo isa lou eia loilo te la luma la lotu, gogala, eia tai ababi la viso oio te la limala, eia kara pepeho. \p \v 18 Goio, e angelo isa lou goio sibitala, eia e angelo la vibaumuli la havi oilo la luma la lotu, oio te la poro la vaabila, eia hiliti taro la igogolu tetalale, gogala, eia veiale angelo ale ababi la viso ale karale, mago “Eme ge abi la viso taumele, eme ge koro la vavua la vaen otalo te la maututula, la vuhula eia oio maosati.” \v 19 Tio e angelo loloa mai ele, eia goio vali la viso tetala loata te la tia la mahuma, eia koro la vavua la vaen mai ele, goio pigi egite sotalo te la vaha La Tahalo Uru oio te la muli la bilebe la vaen, veia eia ge toa perepere egiteu, mai te la igototolola tetala ale uru sesele, te la kiloli la iruru. \v 20 Eia bebe egiteu mai ele logala te la mautu tetala, la kasoso giteu eia sali soio la baa malau sesele, la malulula sotalo eia ga mai e lovasa, la silali ale eia sogo sesele. \c 15 \s1 Egiteu la angelo ivitu visibitala la iligiligi ivitu \p \v 1 Tio, eau so popou oata te la ilo la lagele, eau goio hilo isa lou la irovilala uru, eau karutu seselela. Egiteu la angelo ivitu loio sibitala, egite ge visibitala la iligiligi ivitu, eia ge la tapasi la viligila te La Tahalo Uru somai te la maututula, la vuhula eia ge vikaluvu la igototolola tetala. \p \v 2 Goio, eau ga mata lou soio, eau hilo la gale la mago eia malilo tataho, eia sima tataro mai la havi. Oio te la parava, eau hilo la valalua me hatavivile mapaiti magiri, egiteu moli ale bolehohoti la vagagarila te La Bolo Ale Uru, egite kama lotu tavu la puigolo tetala, egite kama abi la irovilala tetala oio te la vovo giteu. Egite magirigiri oilo, egite baubau.\f + \fr 15:2 \ft Ale e Ioanes toi seseletia veia oio te la lima giteu, egite ababi la papaga la bilau mai egite toila “la harp”, La Tahalo Uru eia abia giteu.\f* \v 3 Egite bau la bilau te Moses, eia la bilalaha sesele te La Tahalo Uru, egite bau la bilau tegirua me e Latu La Sip, la bilau alele eia maie: \li1 Tahalo Uru, eme sekela vagari, \li1 La igogolu te la limamu eia uru, eia isapolo viruru. \li1 La vulovulomu matata tomi moli. \li1 Eme pou la mulugaluga te la maratatila tomi. \li1 \v 4 Mave, isa ge veia eia kama ge togome, La Uru? \li1 Ouka gologolo. Egite tomi ge vaisaleme. \li1 La vuhula eme moli sekela maroka. \li1 La maratatila tomi te la galegale tomi, \li1 egite ge goio taume, egite ge lotu tavume. \li1 La vuhula, la igogolu taume ale matata tomi moli, \li1 egite hilotia, eia magiri palalati. \p \v 5 Tio, egite bau kaluvuti mai ele, eau goio mata soata te la mori, eau hilo la muli La Tahalo Uru, mai la luma la lotu tetala, eia maroka viruru, eia tikumu veia etato la tahalo la vovo ge tiroro soilo vola, eala moli eau hiloa, eia oio kopeti. \v 6 Goio, egiteu la angelo ivitu loilo te la luma la lotu gogala, egite visibitala la iligiligi ivitu. La lavalava tegiteu eia maroka sesele, eia sasima, egite kisipoula la kisipou ale ialalo tataho, kara oata la magoro giteu. \v 7 Goio, isa tegiteu la vagari robola ivaa ale magiri te la pulolou te La Tahalo Uru, eia goio abia giteu la angelo ivitu la keibulu la vaen ivitu ale mememe tataho, oilo vola la bulu la vaen ale egite ge viliu la valalua me hatavivile ovola, eia ama pasi, mai la igototolola te La Tahalo Uru eia moli sekela mahuli, la kaluvula ge ouka. \v 8 Goio, la luma la lotu eia volu sesele la sosobu, la vuhula la marasala me la vagagarila te La Tahalo Uru eia tivura mai la havi. Isa kama koramulia ge tiroro soilo vola kara ale egiteu la iligiligi tegiteu la angelo ivitu ge kaluvu sapa tomi. \c 16 \s1 La iligiligi ivitu te la igototolola te La Tahalo Uru \p \v 1 Tio, eau goio lolo lou la golu la tahalo isasa loilo la luma la lotu, eia tola soio tegiteu la angelo ivitu, mago “Amuto tuga, amuto tigitaro la vaen ale oilo tegiteu la kei ivitu tamutou ele, eia ge gotalo te la maututula mai la igototolola te La Tahalo Uru.” \p \v 2 Goio, la mulugale angelo eia goio tigitaro volu la maututula la vaen ale oilo te la kei tetala. Oio vola, goio la vovo giteu la valalua me hatavivile tomi ale egite abiti la irovilala te La Bolo Ale Uru oio te la vovo giteu, egite lotu tavua, la vovo giteu tomi ele eia goio sereka. \p \v 3 Goio, la iluale angelo eia goio tigitaro la vaen ale oilo te la kei tetala sotalo te la mago. Tio, la mago goio vulo mai la kasoso, eala moli eia kama rava, eia mai la kasoso la tahalo ale pehoti. Tio goio la iaia me egiteu la golu tomi ale mahuli olau la tia la mago, egite peho. \p \v 4 Goio, la itolule angelo eia goio tigitaro la vaen ale oilo la kei tetala sotalo tegiteu la lalalu, egite vulo mai la kasoso. \v 5 Oio moli ovola, eau lolo e angelo ale vibaumuli la lalalu tomi otalo te la maututula, eia vikara maie mago “La viputumulila taume ele eia matata tomi moli. La vulovulomu tomi moli eia maroka. Alaurati te la silokola eme oio, kara igoie eme oio. \v 6 Egite biliti egiteu la valalua taume, egiteu la bilalaha taume tai, la kasoso giteu puriti, eala eme viliuti legiteu la gima taume la kasosole, ale la mapa giteu!” \v 7 Goio, eau lolo la golule angelo isa lou, eia magiri te la mata la poro la vaabila oilo la luma la lotu, eia koli la mererale mago “Eia sesele, eme La Tahalo Uru, eme moli vagari, la viputumulila taume eia matata tomi moli.” \p \v 8 Goio, la ivaale angelo eia tigitaro volu la mata la haro la vaen ale oilo te la kei tetala, la haro goio agi titili gegeru la vovo giteu la valalua me hatavivile otalo te la magasa. \v 9 La tivura la harole, eia igo gegeru egiteu mai ele, eala moli egite goio gilo moli La Tahalo Uru ale babaha la iligiligi tomi alele. Egite kama masagea veia ge gabutatala rivu la iruru tegiteu, ge vuvulo, veia egite ge vaisalea mai ele, ouka, egite tou. \p \v 10 Goio, la ilimale angelo tigitaro la vaen loio te la kei tetala sotalo te la pulolou la mulugaluga te La Bolo Ale Uru, tio la maligoma uru goio sibitala, eia pigi robo la maututula tomi tetalale. La valalua, la togo giteu visiki tatavu, \v 11 egite gilo tai la isa La Uru, la vuhula egite gabu la iligiligi te la kakali ale uru te la vovo giteu, eia ligi gegeru sesele, eala moli egite kama masaga ge piligi la iruru, ge vuvulo. \p \v 12 Goio, la iuolole angelo tigitaro la vaen tetala sotalo te la lalu uru e Iupretis. La lalula tomi goio sali tomi, eia mamara. Eala, eia koramulia mai ele veia egiteu la mulugaluga te la gale ale lomuli egite ge polo tigi, la valalua la vaubi tegiteu ge polo tataho soale te la vaubila. \p \v 13 Eala moli eau ga mata lou soio, eau hilo la hitu itolu, egite mata mai e pere. Isa loio la harele Bogea, isa loio te la hare La Bolo Ale Uru, me isa lou eia loio te la hare la bilalaha la visigologolola te La Bolo Ale Uru. \v 14 Egiteu e pere ale itolu ele, egiteu la hitu ale kama kokora, la vagagarila te Satan oio tegiteu, egite igigo la irovilala te la vagagarila mai ele, mai la golu la karutula isahari, egite igoa. La igogolu tegiteu veia egite ge tuga soio tegiteu la mulugaluga tomi te la galegale tomi otalo te la maututula veia egite ge tola vikapopo egiteu te la vaubila ale ge sibitala te la tapasi la haro ale La Tahalo Uru, eia moli sekela vagari, eia ge gali tavu egiteu la gima tetala oio vola. \v 15 Mai la vikararala te Kraist eia veia maie “Hiloa, eau ge guvi kokovu moli mai la tahalo la pakalila. La vibalavala taku ge pou tegiteu ale pahutu tigi, mai egiteu ale lavalava moli veia ge raragi tigi. Egite kama ge karutu la viputumulila taku, egite kama ge gabu la mahelala mai la tahalo ale tuga bulalahu moli la lavalava ouka.” \v 16 Goio, egiteu e pere itolu ele, egite tola vikapopo egiteu la mulugaluga soio te la gale isasa ale egite toila te la merera e Hibru mago “e Amagedon.” \p \v 17 Goio, la ivitule angelo eia goio tigitaro la vaen ale oilo te la kei tetala, eia tigitaro molia oata te la baa. Goio, la golule isa mai la golu La Uru, eia tola loilo te la pulolou la mulugaluga tetala oilo te la luma la lotu, eia veia maie mago “Ale kaluvuti, ale la tapasila tiele!” \v 18 Tio oio moli ovola la sima sima, la mori tali kuraraba, e malugulugu isa uru umu tai. Palati te la siloko la vipoupoula, la valalua kama gabu isa e malugulugu maie, kara igoie. Eia kama kokora sesele, eia muga tegiteu e malugulugu tomi. \v 19 La mautu ale uru, eia galipolea la galela itolu, la maututula tomi te la galegale tomi, egite tagogoro. La Tahalo Uru eia kama vaula la iruru tomi te la valalua e Babilon, eia goio sulu sapa la mautu alele, eia viliu legiteu la vaen ale ama, mai la igototolola tetala ale uru sesele. \v 20 Egiteu la olu paipati tomi kokovuti, egite siroro sotalo, egite la goegove tomi tai kokovu. \v 21 Goio, la baututu la aes ale tikumu bara sesele mai la uatati,\f + \fr 16:21 \ft La tikumula, e Ioanes toitia veia eia mai “e talant” isasa, ale mai la tikumu la bek la raes ale uru.\f* egite pu loata te la mori mai la hura, egite gotalo, egite kue egiteu la valalua me hatavivile tomi otalo te la magasa. Egite goio gilo La Tahalo Uru oio vola, la vuhula la viligila alele eia kama kokora bara sesele. \c 17 \s1 La tavile la gauru eia abi la mapa la iruru tetala \p \v 1 Tio, goio, isa tegiteu la angelo ivitu ale igoie egite ababi la kei ivitu, eia goio veiagu mago “Gomai, eau ge vahilo leme la kiloli la iruru te la tavile la gauru ale uru.\f + \fr 17:1 \ft La vulovulo la iligo la iruru oio te la tavile, eia mai la vikarara la tilovo te la iruru mai la lotu tavu la puigolo.\f* La tavile ale, eia la irovilala te la mautu ale kama kokora, egite ilia kabili te la lalu usu. \v 2 Egite la mulugaluga tomi te la maututula, egite igoti la iruru oio tetala, la vulovulola eia igo paua la valalua mai la lalu ale vagarigari, egite tomi liu paua la vaen tetalale.” \v 3 Goio, e angelole eia vahari taro la kalulugu soata la hohoi. Oio vola eau hilo isa uru la tavile eia oio pou sae oata te la poke la bolo isa uru eia magegese, la vovola volu seseleti la merera ale kama kokora, egite kekesia eia vikara barea La Uru. La gahola ivitu, la komola savulu sasa.\f + \fr 17:3 \ft La bolo alele, etato rovitia, la vuhula etato pogea oio te 13:1-10, eia La Bolo Ale Uru, mai la merera la tilovo te la mulugaluga ale uru, eia ge vaubi soio te Kraist, ale egiteu la tahalo la mari isahari kaua veia eia soioge e King Nero.\f* \v 4 La tavile alele, eia kisi la lavalava ale magegese oio te la kabilila, mai la irovilala te la mulugaluga, eia tokoromo tataho pasi mai la tokoromola tomi te la tahalo me la tavile la vuliti. Oio te la limala eia ababi la kakabi, eia volu seseleti la vaen ale kama kokora mai la vulovulola tomi tetala ale kama kokora viruru ale eia vigi la gauru. \v 5 Oio te la varula la kekesi oio, la merera la pigiveila moli, egite kekesi maie: \li1 LA ISAGU E BABILON URU. \li1 EAU VISIBITALA LA IRURU TOMI \li1 MAI LA LOTU LA VISIGOLOGOLOLA TOMI \li1 OIO TE LA MAUTUTULA. \p \v 6 Goio, eau hiloa veia eia liliu, eau pauati la iliu la kasoso giteu la valalua me hatavivile tomi te La Tahalo Uru ale egite la gima biliti egiteu, mai egiteu tomi ale sau tola vagari moli la isale Iesus, egite poga la viluala mai ele. Tio, eau hilo la tavile uru mai ele, eau karutu sesele, eau taga pepeho, eia soukama ge igo gegeru eau. \p \v 7 Goio, e angelole, eia goio tahiau mago “Ilava eme karutu? Eau ge lubeamu la masova la irovilala iluale, mai la tavile uru alele, egira me la bolo eia pou sae oata te la pokela, la gahola ivitu, la komola savulu sasa. \v 8 La bolo alele, eia pala mahuli, eia igoie kati mahuli, eala moli eia ge hiliti lou lotalo la lulu ale malau sotalo, la igagala ouka, eia ge gali soio, eia ge poga la viluala. La valalua me hatavivile te la maututula, egiteu ale la isaisa giteu kama oio te la buk la mahulila pala te la siloko la vipoupoula, kara igoie, egiteu ge hilo La Bolo, egite ge karutu sesele, la vuhula eia pehoti, eala moli eia sibitalati lou. \p \v 9 “Goio, la merera isa lou koramulia veia la tahalo moli ale la gabutatalala tetala malau ge rovi la masovala. La gaho la bolo ale ivitu, egite tovo muli la popoiti ivitu ale la tavile eia pou ovola, mai la mautu egite ilia ovola. Eala moli egite tovo muli tai la mulugaluga ivitu. \v 10 Ilima boruti, eala moli isa soloio, me isa lou tai soukama hiliti. Eia ge sibitala, eia ge pou tabaa moli bakisi. \v 11 Eala moli La Bolo ale pala mahuli, eia igoie kati mahuli, eia isa tegiteu la ivitu giteu, eala moli eia ge hiliti lou mai la la iualu giteu ele, eia tai ge poga tavu la viluala. \p \v 12 “Eala moli la komo la bolo savulu sasao, eme hiloa, egite mai la uru savulu sasa, egite soukama abi la pulolou la mulugaluga tegiteu, eala moli La Tahalo Uru ge abia giteu bakisi la baa, koramuli egite ge pou golo muga bakisi, egite ge muga la maututula vikapopo La Bolo, eala moli eia kama ge tabaa, eia ge mata mai la mata la haro isa moli egite ge pou la mulugaluga te la galegale isahari mai ele. \v 13 Egiteu la igogolu isa moliti, veia egite ge sugu taro soio te La Bolo la vagagari giteu tomi ele veia egite ge vikapopo moli leia. \v 14 Egite ge vaubi soio te Latu La Sip, eala moli eia ge bolehoho egiteu, la vuhula eia la mulugaluga ale uru sesele, eia muga egiteu la ururu tomi. Egiteu la valalua me hatavivile te La Uru ge vaubi vikapopo le Kraist, egiteu ale eia tola egiteu soio tetala, eia visati legiteu mai ele veia egite ge la valalua me hatavivile tetala sesele.” \p \v 15 Goio, e angelole, eia vei taiagu la merera isa lou mago “Egiteu la lalu ale la tavile eia pou kabili tegiteu, egite la irovilala ale tovo muli egiteu la maratatila tomi, la mererera tomi, la valalua me hatavivile tomi tai te la maututula oio la galegale tomi. \v 16 Eala moli La Bolo, vikapopo me egiteu la mulugaluga savulu sasa mai la komola savulu sasale, egite ge vulo la gabutatalala tegiteu, egite ge vile la tavile uru ele, egite ge sile taro la tokoromola tomi tetala, eia ge tabuli bulalahu moli la lavalava ouka, egite ge ali la mailila goio egite ge selu taro la tatuhala. \v 17 La vuhula, La Tahalo Uru eia ge vagoiloa te la gabutatalala tegiteu ele la gabutatalala tetala, veia egite ge tilimuli la masasagala tetala, eala egiteu la mulugaluga tomi ge sugu taro la vagagari giteu soio te La Bolo veia eia ge muga la maututula, kara la merera tomi te La Tahalo Uru ge puru sesele. \v 18 Eala moli la tavile ale eme hilotia, eia la mautu ale uru, eia muga la mulugaluga tomi otalo te la magasa.”\f + \fr 17:18 \ft Eala, la mautu alele, eia mata mai la mautu e Rom, ale egite ilia te la popoiti ivitu. Eala moli eia magiri tai mai la tovomulila te la mautu uru tai ale pala muga te Rom ele, e Babilon. Eala eia mai la vikarara la tilovo te la mari papaila tomi tegatou la valalua me hatavivile.\f* \c 18 \s1 La mautu uru e Babilon sululu sapati \p \v 1 Tio, goio, eau hilo isa lou e angelo eia loatata la mori, la vagagarila te La Uru tomi eia oio tetala, la matagagala paga vei la babaa tomi otalo te la maututula. \v 2 Eia goio tola vagari soio mago “E Babilon eia sululu sapati! La mautu uru eia luliti, egiteu la hituhitu moli ale kama kokora taholatia, egiteu la malumalu mai e kukuku me kausisiri, egite igoti la tilaloa giteu ovola. \v 3 La valalua me hatavivile te la maututula tomi, egite liuti la vaen tetala ale kama kokora, mai la vulovulola ale eia ruru soio te la lotu la visigologolola mai la tavile ale vigi la gauru. Egiteu la mulugaluga tomi otalo te la maututula, egite ruruti oio tetala, la valalua la ilotoloto tomi tai, egite pogati la uati uru oio te la vuliti te la tavile uru ele.” \p \v 4 Goio, eau lolo la golu la tahalo isa lou eia vikara loata te la mori, eia veia maie mago “Amuto la valalua me hatavivile taku, taritigi amuto ge hele taro la mautu alele, amuto soukama ge ruru vikapopo leia, amuto tai soukama ge ligi vikapopo leia te la viligila. \v 5 La vuhula, la iruru tetala egite volu karati oata la mori, La Tahalo Uru eia oio gabutatala egiteu la iruru tetalale. \v 6 Gabutatala tigi egiteu la iruru tetala ale usu amuto ge kolia soio tetala mai egiteu la iruru tetala tai ele. Eia pala goio vauru sesele la vulovulola ale kama kokora, eala eia taritigi veia amuto ge vauru tai la kiloli la iruru soio tetala koramuli la iruru tomi ale eia igotia. Eia mai ale vuloti la vaen ale vagari gegeru sesele te la kakabi tetalale, mai la iruru tetala ale usu, eia kama kokora bara sesele. Ioge, eia taritigi pepeho veia amuto ge koli vagari sesele la iruru tomi tetala, ale eia igotia mutou la valalua taku. \v 7 La mautu alele, mai la tavile uru aleie, eia pala vauru lou la isala, eia vareagi pepeho, eala eia taritigi veia amuto ge vausu la iligiligi soio tetala, koramuli la kiloli la iruru tomi tetala. Amuto ge vilaia, eia ge tali pepeho. Oio te la gabutatalala tetala eia vikara maie ‘Eau la tavile isasa, eau muga sesele la maututula, eau pou te la pulolou la uru, eau sagege moli, eau kama pou mai la baharu, eau kama koramulia ge poga la iloburukola.’ \v 8 Eala, te la merera la vareagila tetalale, eia ge gabu la iloburukola, la iligiligi ale uru ge pigi roboa, La Tahalo Uru ge vaharosasa moli la mautu aleie. La ilea, la pileho, la vitolo, la iligiligi tomi ge igo gegerua, la havi ale uru tai ge selua, la vuhula eia vureti te la viputumulila te La Tahalo Uru, eia vagari pepeho pasi. \p \v 9 “Egiteu la mulugaluga tomi te la maututula te la galegale tomi, egiteu ale igoti la iruru oio te la tavile alele, egite pala pou la balavala vikapopo leia te la vuliti tetala ale uru, mai egite ge hilo la mautu ale e Babilon eia ge tululu, la sosobula uru pavuti soata la mori, egite ge hiloa mai ele, egite ge tali roboa. \v 10 Egite ge taga pepeho la iligiligi ale uru sesele ale sibitalati tetala, egite ge magiri malau, egite ge mata soio, egite ge vikara maie mago ‘E maura, e maura, la mautu uru e Babilon viluati. Eme pala vagari, igoie eme vure hari moliti!’ \p \v 11 “Egiteu la valalua la ilotoloto te la maututula tomi, egite ge tali roboa, la vuhula isa kati ge loto la golugolu tegiteu, \v 12 mai la mata la vuliti tomi mai la gold, la silva, la uatati ale la mapa giteu uru, la tuali, la lavalava ale la mapala uru, isahari magesegese, isahari taitavi tataho, egite toila la silika. La obu tai ale la mapala uru, eia mali vivili tataho pasi, isa kati ge lotoa oio e Babilon ele. Tio la mata la puigolo tomi tai ale egite igola la togo la elepant, ale egite igola la obu ale la mapala uru, ale egite igola la bras, eia mememe, egite igo taila la aen, me la uati tai ale vorivoria egite toila la mabel, eia vagari, la mapala uru. \v 13 Isa kati ge loto la golugolu tegiteu mai alele, me la golugolu tomi tai la mapa giteu uru, mai la sinamon me la lahia te la valimuli la ilali, la paura ale egite selua, la sosobula malia tataho pasi, la bulu la obu tai ale malia tataho, la vaen, la bulu la oliv te la gulutulutu la ilali, la palava, la vit, la kau, la hos vikapopo la karis ale lapulapua, isa kati ge loto egiteu la golugolu tomi alele oio e Babilon. La valalua me hatavivile tai, ale egite pou te la kilisi te la igogolu, eia sesele, pala egite lotoloto tai isahari egiteu la valalua me hatavivile ale egite ge tahola egiteu, eala moli isa kati ge loto lou egiteu te la mautu alele. \p \v 14 “Egiteu la tahalo la ilotoloto, egite ge vikara soio te la mautu alele mago ‘Egiteu la papaga tomi ale eme hate saga tatavua, eia hele tarotime. La vuliti me la tokoromola tomi taume eia kokovu taro tomitime, eme kati ge abi rivua.’ \v 15 Egiteu la tahalo la vuliti, egite pala vahari la golugolu soio taume, egite abi la uati uru oio vola, egite ge magiri malau, egite ge taga pepeho veia egite soukama ge vilua vikapopo la iligo barala oio te la mautu uru ele. \v 16 Egite ge vikara maie mago ‘E maurao, eme la mautu uru ele! Eme kisiti la lavalava ale magegese, eme la tokoromola uru oio, \v 17 eme kaluvu tomiti, La Tahalo Uru vitagarasati emei, la mautu uru e Babilon!’ \p “Goio, egiteu e kapten tomi tegiteu e sipi, vikapopo tai legiteu tomi ale igogolu te sipi, egiteu tai ale sasae ovola, vikapopo tai legiteu tomi ale la igogolu tegiteu eia oio te la igogolu la vahari la papaga te sipi egite ababi la uati ovola, egiteu tomi alele, egite ge magiri malau loio, egite ge mata soio la mautu e Babilon eia oio tululuti. \v 18 Egite ge hiloa mai ele, egite ge hilo la sosobu uru eia paupavu soata, egite ge vikara maie mago ‘Palati kara igoie, la mautu isa oukati lou ale ge uru mai e Babilon!’ \v 19 Egite ge ato volu la vovo giteu la magasa, egite ge pigi la tilali uru maie mago ‘E maura, e maura la mautu uruo! Egite tomi ale tahola e sipi, egite pala poga la vuliti oio vola! La mautu ale, eia vure hari moliti, La Tahalo Uru vitagarasatia!’ \p \v 20 “Egite vikara mai ele, eala moli eia taritigi pepeho veia amutou la angelo tomi oata te la mori, amutou la valalua me hatavivile tomi tai te La Tahalo Uru, vikapopo le amutou la bilalaha tetala tomi, amuto ge sagege, la vuhula La Tahalo Uru eia koliti amutou soio te Babilon te la iruru tomi ale eia igotia mutou.” \p \v 21 Goio, e angelo isa uru sibitala, eia abi la baga isa uru makapipila sesele, eia goio pigia sotalo la tia la mago, eia goio vikara mago “Mai moli ele egite ge pigi la mautu uru e Babilon sotalo, eia ge kokovu, isa kati ge hiloa. \v 22 Isa kati ge lolo lou la bilalau tegiteu la valalua la bilau, egiteu ale baubau oio te la mautu alele, mai egiteu ale gumu, egiteu ale pupusu e vigogo, egiteu ale pupusu tai la vaivai. Egiteu la valalua la igogolu kati ge igogolu kabili te la mautu uru ele. La tilali la ilisi la ilali, isa kati ge loloa oilo vola. \v 23 Isa kati ge hilo la mamaga la lam kabili te la mautu alele. La taulaila ge oukati veia isa ge lolo la taulai halaba, egira me rutula, egira ge vikarakara, oukati. Pala egiteu la tahalo la ilotoloto oio te la mautu alele, egite la uru te la maututula tomi. Te la merera la visigologolola te la mautu e Babilon ele, la maututula tomi ruruti, la merera tetalale eia mai la maholo ale ubi la tia la tavile, eia igo pauea. \v 24 Eala moli la mautu alele eia vureti, la vuhula eia bili egiteu la valalua me hatavivile te La Tahalo Uru, egiteu la bilalaha tai tetala, la kasoso giteu tomi eia pagegeleti oio vola.” \c 19 \s1 La sagegela uru ale la tavile uru vureti \p \v 1 Tio, mulimuli ovola eau goio lolo la mareregola uru pepeho, la valalua me hatavivile usu pepeho, egite pou oata te la ilo la lage, egite tatola maie “Haleluia, taritigi pepeho soata te La Tahalo Uru, eia la vuhu la vimahuli, la vuhu la matagaga, la vuhu la vagagarila, \v 2 la viputumulila tetala eia matata tomi moli. Eia igo gegeruti la tavile la gauru uru, e Babilon, eia pala igo gegeruti egiteu la maututula te la iligo malagola tetala, La Uru goio vilaia, la tavile uru ele eia vureti. La Uru eia koliti egiteu la bilalaha tetala ale la tavile bili egite.” \v 3 Goio, egite tola lou mago “Haleluia, la sosobu la mautu uru ele, eia ge paupavu moli mai ele, eia kamati ge kaluvu.” \v 4 Goio, egiteu la uru savulu lua gete vaa ale pou galili la pulolou te La Uru, vikapopo tai legiteu la vagari robola ivaa ale magiri te la pulolou tetala, egite tomi ele goio boru lagu tugu, egite lotu tavua, eia oio popou te la pulolou la uru tetala, egite tola maie mago “Amen, haleluia, etato ge vaisale moli La Uru!” \s1 La vikarara la tilovo te la ilali la taulaila te Latu La Sip \p \v 5 Goio, eau lolo la golu la tahalo isasa, eia tali loilo te la pulolou la mulugaluga te La Tahalo Uru, mago “Vaisale La Tahalo Uru, amuto la bilalaha tetala, vaisale molia amutou tomi ale togoa, amutou ale ururu, amutou ale bisisi tai.” \v 6 Tio, eia vikara kaluvu mai ele, goio, eau lolo la tilali la golu la valalua me hatavivile mapaiti, eia tali karerere mai la tilali la lalu ale hae, mai tai la mori ale tali kuraraba, egite tatola maie mago “Haleluia, etato ge vaisale La Tahalo Uru tegatou, eia moli sekela uru. \v 7 Etato ge sagege pepeho, etato ge vaurua! La haro la taulaila te Latu La Sip tetala eia guviti.\f + \fr 19:7 \ft E Latu La Sip ale taulai, eia mai e Kraist moli. Me la tavile ale eia pulia, ale la valalua me hatavivile tomi tetala ale lotu tavu seselea. Mai mulimuli e Kraist ge guvi lou, eia ge abi rivu lou egiteu ale tetala, ale mai la taulaila tetala. Eia ge vahari egiteu ale tetala soio te La Mautu La Marokala, egite ge pou tataho moli ovola vikapopo le Kraist ele, la kaluvula ge ouka, mai sesele la tavile ale eia ge vipou tomi le haruala.\f* Male ge, e rutula oio pupuruti, eia tokoromoti, \v 8 La Tahalo Uru eia abitiala la lavalava ale taritigi pepeho, eia mememe, eia halaba tataho pasi!” (Me etato ge rovi taia veia la lavalava ale halabale, la mapala uru, eia mai la vikarara la tilovo te la vulovulo giteu la valalua me hatavivile tomi te La Tahalo Uru ale maroka tomi moli.) \p \v 9 Goio, e angelole eia goio vikara lou somai taku mago “Eme ge kekesi la merera maie: Egiteu tomi balavati, ale La Tahalo Uru eia baha tavuti egiteu veia egite ge guvi te la ilali la taulaila te Latu La Sip tetala, egite balava seseleti!” Eia vikara kaluvu mai ele, eia goio vitapasi la merera somai taku mago “Ale la merera ale sesele viruru te La Tahalo Uru.” \v 10 Tio eau loloa mai ele, eau goio boru lagu tugu oio te vahala veia eau ge lotu tavua mai ele, eala moli eia goio magiri robo louau mago “Umalati, eau la bilalaha moli, vikapopo le amutou me egiteu e tabarabaramu ale amuto sau tola la merera te Iesus. Taritigi eme ge lotu tavu moli La Tahalo Uru!” \p Mai la valolo te la isale Iesus, eia la vagagarila oio, mai tai la merera tegiteu la bilalaha tomi ale pala, eia la merera te La Uru sesele, eia la vagagarila oio. \s1 E Ioanes hilo la tahalo isasa eia pou te la hos ale kakea \p \v 11 Tio, goio, eau hilo la ilo la lage eia oio kopeti, la hos isa uru oio magirigiri, la vovola kakea, la tahalo isa eia pou ovola. La tahalo ale, etato rovia veia eia la tahalo isa eia magiri vagari te la merera te La Tahalo Uru, eia ge vipuru seselea. Eia ge vimatata la iruru tomi, eia ge taho vagari loio te la merera ale matata. \v 12 La matala ilua karerere mai la havi, e vevea usu oio te la gamala mai la irovilala te la mulugaluga. Oio te la vovola la isala oio, eala moli isa kama rovi la masovala, eia moli sekela. \v 13 Eia kisi la lavalava ale magegese, egite vuhitila la kasoso, la isa la tahalo ale “La Merera Te La Tahalo Uru.” \v 14 Egiteu la valalua la vaubi tomi mapaiti ale loata te la mori, egite vikapopo, egite pou te la hos tegiteu isasasa, egite kisi la lavalava ale kea lovolovo sesele, eia maroka tataho, egite goio mulimuli la mulugaluga tegiteu ele. \v 15 Eala moli la tahalo ale, la viso ale kara sesele eia taritotoge te la harela, veia eia ge barautu la valalua me hatavivile te la maututula tomi ovola, oio te la galegale tomi, egite ge peho. La viputumulila tetala eia ge vagari pepeho, la gata isa uru mai la irovilala te la mulugaluga eia ge oio te la limala. Eia ge soa kuru egiteu la valalua la gima veia ge visibitala la igototolola te La Tahalo Uru eia uru pepeho, eia ge vilai egiteu mai ele, eia ge mai la tahalo ale toa perepere la vavua la vaen, la bulula sali. \v 16 Eala moli oio te la lavalava tetala, oio tai te la salala la isala oio, eia maie “La Uru ale uru tegiteu la uru tomi, la mulugaluga ale muga egiteu la mulugaluga tomi.” \p \v 17 Goio, eau hilo e angelo eia magiri te la mata la haro, eia tola vagari soio tegite la malumalu ale lovo te la baa, eia tola soio tegiteu mago “Gomai, amuto ge pou te la ilali te La Tahalo Uru, la ilali uru sesele. \v 18 Amuto ge ali la maili giteu la uru tomi, la maili giteu la mulugaluga tomi tai, egiteu la valalua ale vagari, egiteu la hos, me egiteu ale pou ovola, la valalua me hatavivile tomi, egite la tahalo la vuliti, egiteu la valalua bulalahu, egiteu ale uru, egiteu tai ale bisi, amuto ge ali la maili giteu, amuto ge vikaluvu sesele egiteu tomi ele.” \p \v 19 Tio e angelole eia vikara kaluvu mai ele, goio, eau mata soio, eau hilo La Bolo vikapopo legiteu la mulugaluga tomi te la maututula tomi, egite vikapopo legiteu la valalua la vaubi tegiteu ele, egite vikapopoti veia ge vahiliti la vaubi soio te la tahalo ale pou te la hos vikapopo legiteu la valalua tetala. \v 20 Tio egite goio vaubi, eala moli egiteu ale te Kraist, egite goio lao tola La Bolo, egira me la bilalaha la visigologolola tetala. La bilalaha tetalale eia pala igo la golu la karutula mai la irovilala te la vagagarila te La Bolo. La irovilala tomi alele eia viruruti la valalua tomi usu ale egite abiti la irovilala tetala, egite lotu tavu tai la puigolo tetala. Goio egite lao tola egiruale, egite goio pigi egirua sotalo te la mata la tivura uru ale tululu pepeho. \v 21 Goio, e Kraist bili taro egiteu la valalua te La Bolo, eia sulu legiteu la viso ale taritotoge te la harela, mai la vagagari la merera tetala moli. Goio, e kaokao mapaiti lovo soio, egite ali maru te la maili giteu ale pehoti ele. \c 20 \s1 E Satan pou te la kilisi la leavala 1,000 \p \v 1 Tio, eau ga mata lou soio, eau hilo e angelo eia loatata la ilo la lage, eia ababi la ki ale ge kope la lulu ale gotalo malau sesele, la igagala ouka, eia ababi tai la sen isa uru sesele. \v 2 Eia goio gali tavu e Bogea, mai e Satan ale mai e taive ale palati te la siloko la maututula. Goio eia kisi tola le Satan la sen, veia eia ge korati mai ele la leavala salatu savulu sasa. \v 3 E angelo kisila la sen kaluvu, eia goio pigia sotalo la lulu alele, eia kapi robo la mata, veia e Satan ge tabuli moli oilo vola, eia kati ge tutugolo la valalua me hatavivile te la maututula oio te la galegale tomi, kara la leavala salatu savulu sasa ge polo, mulimuli te la imamala alele, eia ge gogala lou, eala moli eia kama ge tabaa. \p \v 4 Goio, eau hilo la pulolou la uru isahari, vikapopo legiteu la uru ale popou ovola. La Tahalo Uru eia abitia giteu la uru tomi ele la vagagarila koramuli egite ge vipou la valalua la gima otalo te la uluva la viputumulila tegiteu ele, egite ge mata muli la iruru tegiteu. Eau hilo tai la kalulu giteu la valalua me hatavivile tomi te Kraist, ale egiteu la gima barautu taro la gama giteu. La valalua te Satan bili egiteu, la vuhula egite valolo te la merera la matagaga te Kraist, te la merera tomi tai te La Tahalo Uru, egite tai kama lotu tavu La Bolo, egite kama abi la irovilala tetala oio te la varu giteu, uka oio te la lima giteu. Egiteu tomi ale pehoti ele, egite goio mahuli rivu lou, egite pou la mulugaluga vikapopo le Kraist la leavala salatu savulusa. \v 5 (Eala moli egiteu ale kama rovi e Kraist, mai egiteu ale peho moli te la maligoma, egite kama mahuli rivu lou kara ale la leavala salatu savulusa poloti.) Ale egiteu ale te Kraist ge mahuli rivu lou, ale la muluga la mahuli rivula alele. \v 6 Egiteu ale ge mahuli rivu lou ovola, egite balava seseleti, egite maroka. Egite kamati ge gabu la ilua la pileho ale egite la gima te Kraist ge vure ovola, eala moli egite ge pou mai la tahalo me la tavile la visuli moli te la lotu te La Tahalo Uru mira me Kraist. Egite ge pou la mulugaluga vikapopo le Kraist la leavala ge salatu savulusa. \s1 E Satan vure sesele \p \v 7 La leavala ale salatu savulusale ge polo, mulimuli ovola e angelo ge lube e Satan taro la kilisi tetala. \v 8 Eia ge gali sogala, eia ge goio, eia ge tutugolo la valalua me hatavivile te la maututula tomi, oio te la galegale tomi, kara la igaga la magasa tomi. Egiteu la valalua la maligoma tomi, mai egiteu la valalua te la gale ilua ale kama kokora, e Gog mira me Magog, e Satan ge tola vikapopo egiteu tomi veia eia ge vahiliti la vaubi. La giligi giteu eia mata mai la magasa la mago. \v 9 Egite gali soio, egite vulo robo la babaa tomi, egite sugu robo la mautu tegiteu la valalua te La Tahalo Uru, la mautu tetala sesele ale eia isua. Eala moli la havi uru eia paru loata te la mori, eia selu egiteu tomi ale te Satan ele. \v 10 Goio, e Satan, eia ale visigoloti egiteu, e Kraist pigia sotalo la mata la tivura uru ale tululu, ale La Bolo mira me la bilalaha la visigologolola tetala egira tabuliti otalo vola. Oio te la havi uru alele, egira ge gabu moli la iligiligi ale uru sesele, te la haroharo tomi, te la logologo tomi tai, la kaluvula ge ouka. \s1 La viputumulila te La Tahalo Uru te la tapasi la haro \p \v 11 Goio, eau mata soio, eau hilo isa la pulolou la uru, eia kakea, eau hilo tai eia ale pou ovola. La magasa me la mori goio kokovu, la paga isa oukati oio. \v 12 Goio, eau hilo egiteu tomi ale pehoti, egiteu ale ururu, egiteu tai ale bisisi, egite magiri oio te la mata la pulolou tetala. Egiteu la angelo te La Tahalo Uru goio kope isahari la buk veia ge gigia, isa goio kope la buk isa lou, eia la buk la mahulila. Egiteu ale pehoti, La Tahalo Uru eia mata muli la vulovulo giteu oio te la kekesi ale oilo tegiteu la buk tomi alele, ale eia kekesi tolati la vulovulo la valalua me hatavivile tomi oilo vola. \v 13 La mago goio pati taro lou egiteu tomi ale tilomuti oilo vola soata. Goio, La Pileho mira me La Mautu La Viluala Te La Kalulu,\f + \fr 20:13 \ft Egiteu e Iuda, egite toi la isa la mautu alele “e Hades.” Me te la merera e English, egite toila “e Hell.”\f* egira goio visibitala rivu lou egiteu ale pehoti, egite tabuli otalo vola. Goio, La Tahalo Uru eia goio vipou egiteu tomi isasasa te la vigagiala tetala, eia goio mata muli la vulovulo giteu tomi ale egite igigoa pala te la mahulila tegiteu te la vovo. \v 14 Goio, la vagagari La Pileho mira me La Mautu La Viluala Te La Kalulu, e Kraist bolehohoa, eia pigi egirua sotalo te la mata la tivura uru ale tululu. Ale la ilua la pileho, la pileho eia kati ge koramulia ge igo gegeru etatou ale te Kraist. \v 15 Egiteu tomi ale la isa giteu ouka oio te la buk la mahulila, egite tomi gotalo te la mata la tivura ale uru. \c 21 \s1 La mori ale halaba, la magasa tomi tai ale halaba, eia sibitala \p \v 1 Tio, mulimuli ovolale, eau goio hilo la mori ale halaba, la magasa tomi tai ale halaba. La mori ale pala, la magasa tai ale pala, egira kokovuti, la mago tai oukati. \v 2 Eala moli eau hilo la mautu uru ale maroka, mai e Ierusalem ale halaba, eia loatata te la mori, La Tahalo Uru eia visivoa sotalo mai ele, eia marasa mai la tavile ale raragiti ge taulai, eia tokoromo tataho veia ge goio te haruala. \v 3 Goio, eau lolo la golule isasa eia tola loata te la pulolou la mulugaluga te La Tahalo Uru, mago “Eme hiloti la mautu alele? Oio vola La Tahalo Uru eia ge mou vikapopo la valalua me hatavivile. Egite ge tetala, La Tahalo Uru eia ge pou vikapopo legiteu, eia ge La Uru giteu sesele. \v 4 Eia ge sabubu taro la masali giteu mai egiteu ge tali te la iloburukola. La pileho, la tilali, la iligiligi, ge oukati, la vuhula la imamala ale pala, eia kaluvuti.” \p \v 5 Goio, eia ale pou te la pulolou la uru, eia goio vikara mago “Hiloa, eau omai vulo halabati la golugolu tomi!” Eia tagu solo lou la merera tetala mago “Eme ge kekesia maie veia la merera taku ale eau veveiale, eia sesele tomi moliti, eia ge puru.” \p \v 6 Goio, La Uru veiagu la merera tetala maie “La igogolu taku kaluvuti. Eau la silokola me la vitapasila te la golugolu tomi. Mai isa ge malehu, eau ge viliu leia la lalu la vilelo te la mahulila, ge vibalava leia ovola. \v 7 Mai isa ge bolehoho e Satan, eia ge sau tola la vibalavala tomi taku mai alele, eau ge La Uru tetala, eia ge mai e latugu sesele. \v 8 Eala moli egiteu ale tataga, egite tahi taroau, egite piligiau, egite kama ge taku. Egiteu tai ale kama tautaulailo, egiteu ale kama kokora, egiteu ale bilibili, egiteu ale mata bulakalaka, egiteu ale rasirasi, egiteu ale lotu tavu la puigolo, egiteu tomi tai ale visigologolo te la merera tegiteu, egiteu tomi alele ge abi la muli giteu otalo te la mata la tivura, ale la ilua la pileho alele.” \s1 E Ioanes hilo la mautu e Ierusalem ale halaba \p \v 9 Goio, isa tegiteu la angelo ivitu ale pala ababi la kei ale la iligiligi ivitu tabuli oilo vola, isa tegiteu ele eia loio, eia goio veiagu mago “Gomai, eau ge vahilo leme la tavile ale ge taulai, e Latu La Sip eia ge pulia.” \v 10 Goio eia vahari taro la kalulugu soata te la varu la gove isa uru, eia vahilo leau La Mautu Ale Maroka, e Ierusalem, eia loatata te la mori, La Tahalo Uru visivoa sotalo mai ele. \v 11 Eia matagaga pepeho te la matagaga uru te La Tahalo Uru, eia sasima. \v 12 Egite bigomu robo la mautu alele la uatati, la mata oio vola savulusa gete lua, egiteu la angelo tai savulusa gete lua oio vagari robo egiteu la mata tomi alele. Oio tegiteu la mata tomi alele isasasa egite kekesiti la isa giteu la hilile Israel ale savulusa gete lua, la isale isa te la mata isa. \v 13 Te la gale ale lomuli, la mata itolu oio, te la gale ale lolau, la mata itolu; te la gale ale loilo, la mata itolu; te la gale ale loale, la mata itolu tai oio. \v 14 La uati ale ururu ale egite igoti la bigomu uru alele oata ovola, egiteu tai savulusa gete lua, me oio vola egite kekesiti la isa giteu la valalua la vimari te Latu La Sip savulusa gete lua, la isale isa te la uati isa, la isale isa te la uati isa, egite igo tomia mai ele. \p \v 15 E angelo ale amila vikarakara, eia ababi la viro te la limala, eia mememe, egite igola la gold, eia veia ge lova la mautu ovola, vikapopo egiteu la matala me la bigomu tai ale polo galilia. \v 16 La gale la mautu ivaa, eia visauru tomi moli, la malaula me la bolala visauru. E angelo goio abi la viro tetala, eia lova la mautu ovola, eia sivutia veia la malaula, la bolala me la malaula tai ale goatata, eia visauru tomi moli, eia ga mata mai la kilomita salatu savulu lua, salatu vaa lou.\f + \fr 21:16 \ft La baa ale, eia mai la kilomita 2,400, eala moli te la merera e Grik egite toia veia “e stadia” 12,000. \f* \v 17 Goio eia lova la malau la bigomu ale goata gotalo, la lovala ovola savulu vitu,\f + \fr 21:17 \ft Ale la malaula ga mata mai la mita 66 eala moli te merera e Grik egite toia veia “e kubit” 144.\f* mai eme ge lovea mai la lima la tahalo, e angelo tai eia lovea mai ele. \p \v 18 La bigomu la mautu, La Tahalo Uru eia igola la iasper, eia sasima, eala moli la mautu alele, La Tahalo Uru eia igola la gold, eia mememe tataho, eia matagaga tai mai la glas ale maroka tataho. \v 19 La bigomu, eia igola la uati ale kakesa tataho, eia mememe, eala moli la bigomu ele, La Tahalo Uru igoa loata te la uati savulusa gete lua ale egite sau tola vagaria, eia vitokoromo la uati tomi alele la uatati isahari lou ale mememe tataho, la mapa giteu uru sesele. La tokoromola alele eia maie: \li1 La muluga la uati, egite vitokoromola e iasper, eia kakesa; \li1 la ilua la uati, egite vitokoromola e sapaia, eia kakisa; \li1 la itolu la uati, egite vitokoromola e aget, eia kakea; \li1 la ivaa la uati, egite vitokoromola e meral, eia kakesa. \li1 \v 20 la ilima la uati, egite vitokoromola e sardonikis; eia magesegese, kakea; \li1 la iuolo la uati, egite vitokoromola e konilian, eia magesegese; \li1 la ivitu la uati, egite vitokoromola e krisolait, eia ialalo; \li1 la iualu la uati, egite vitokoromola e beril, eia kakesa; \li1 la ualasiu la uati, egite vitokoromola e topas, eia ialalo; \li1 la savulusa la uati, egite vitokoromola e krisopres, eia ialalo, kakesa; \li1 la savulusa getesa la uati, egite vitokoromola e iasinta, eia kakisa; \li1 la savulusa gete lua la uati, egite vitokoromola e ametis, eia magesegese. \p \v 21 Eala moli la mata la bigomu ale savulusa gete lua, egite goilo te la mautu ale marokale, egite vitokoromola la tuali ale kea tatataho, la vuliti sesele. La mata la bigomu isa, ale la tuali isa, la mata isa lou ale la tuali isa lou, la vitokoromola tegiteu la mamata tomi, La Uru eia igoa mai ele. Eala moli la gauru tai ale kabili te la mautu alele, La Tahalo Uru eia igola la gold, eia mememe tataho mai la glas ale maroka sesele. \p \v 22 Eau kama hilo isa la luma la lotu oio te la mautu alele, la vuhula la mautu volu moli la lotu mai la lotu tavu La Tahalo Uru eia moli sekela vagari, mira me Latu La Sip tetala. \v 23 Oio te la mautu alele, la haro me la taio ouka, eia kama savele la matagaga uru mai ele, la vuhula eia matagaga te la matagaga La Tahalo Uru moli, e Latu La Sip tai eia la matagaga ovola. \v 24 La valalua me hatavivile te la maututula tomi ge hilo la matagaga ovola, egite ge rovi la gauru ale taritigi, egiteu la mulugaluga te la maututula te la galegale tomi, egite ge vahari la vuliti tegiteu soilo vola. \v 25 La mata oio te la bigomu te la mautu alele, eia kati ge kapi robo, la vuhula la maligoma ge ouka. \v 26 La vuliti te la maututula te la galegale tomi, egite ge vaharia soilo vola. \v 27 Eala moli la paga isa ale mumugu umala ge goilo vola. Mai egiteu tai ale mulimuli la vulovulo ale kama kokora, egite visigologolo tai, egiteu ale mai ele, egite kama ge koramulia ge goilo vola. Eala moli egiteu moli ale la isaisa giteu oioti te la buk la mahulila te Latu La Sip, egiteu moli ele ge goilo te la pulolou la balavala oilo te la mautu alele. \c 22 \s1 La vikarara la tilovo te la lalu la mahulila me la obu la mahulila tai \p \v 1 Tio, goio, e angelole, eia goio vahilo leau la lalu ale la lalu la mahulila, eia maroka, eia mememe tataho mai la glas, eia sali loata te la pulolou la mulugaluga te La Tahalo Uru, mira me Latu La Sip, \v 2 eia sali mai ele kabili te la tia la mautu e Ierusalem ale halaba. Oio te la harare la lalu, la obu oio kukusi, la obu la mahulila, eia ge tau moli la vavuala te la taio tomi, la taio isa ge polo, eia ge vua, goio la taio isa lou, vua lou, igo molia mai ele la taio ge savulusa gete lua. Eala moli la galagala la obu alele, La Uru ge abia, eia ge bebe la bulula, eia ge viliu la valalua me hatavivile te la maututula tomi ovola te la galegale tomi, eia ge vimahuli egiteu ovola. \v 3 La paga isa ale La Tahalo Uru ge vilea eia oukati oio te la mautu alele. La pulolou la uru moli te La Tahalo Uru, mira me Latu La Sip, eia ge oio te la mautu ale, me egiteu la bilalaha tomi tetala ge lotu tavua oio vola. \v 4 Egite ge hilo sesele la matala, la irovilala tai tetala eia ge oio te la varu giteu ele. \v 5 La maligoma ge oukati. Egite kama ge savele la matagaga, egite kamati ge tali tavu la mata la haro veia eia ge vimatagaga egiteu, oukati, la vuhula La Tahalo Uru moli eia ge vimatagaga egiteu. Egite ge pou te la pulolou la uru vikapopo leia, la kaluvula ge ouka. \s1 E Iesus ge beu hari loua \p \v 6 Tio, goio, e angelole, eia goio veiagu mago “La merera tomi alele eia sesele moli, eia koramulia veia eme ge sau tola tomia. La Tahalo Uru ale pala vahiliti egiteu la bilalaha tetala, eia bahati e angelo tetala veia eia ge vahilo legiteu la bilalaha tetala te la imamala ale igoie, la papaga tomi ale hagagaviti ge sibitala.” \p \v 7 Eala moli e Kraist tai veia maie “Eau, La Uru, eau ge beu hari loua! Egiteu ale sau tola la merera tomi ale omai te la buk alele, egite ge balava sesele.” \p \v 8 Eala moli eau, e Ioanes, eau lolo sesele la merera tomi alele, la papaga tomi tai oilo vola, eau hilo seseleti egiteu. Ale eau loloa mai ele, eau hilo taia mai ele, eau goio boru lagu tugu te la lagule angelo ale vahilo leau ovola, eau veia ge lotu tavua mai ele. \v 9 Eala moli eia goio magiri roboau, eia veiagu mago “Umalati! Eau la bilalaha moli, vikapopo tai le amutou me egiteu e tabarabaramu la bilalaha tomi ale pala, me egiteu tomi ale sau tola la merera ale oilo te la buk alele. Taritigi eme ge lotu tavu moli La Tahalo Uru!” \p \v 10 Goio, e angelole eia goio vei louagu la merera tetala maie mago “Umala eme ge tau roborobo la merera te la buk alele, la vuhula la imamala hagagaviti ale la merera tomi alele ge puru. \v 11 Eia koramuli molia veia egiteu ale igigo la iruru, egite ge ruru moli. Egiteu tai ale igo gegegeru egite ge pou moli te la vulovulo giteu alele. Eala moli amutou ale taritigi, amuto ge sau tola vagari la vulovulo ale taritigi, egiteu la tahalo la iruru korale, egite ge igo molia mai la masasagala tegiteu. Amutou ale maroka, taritigi amuto ge pou moli te la vulovulo mutou ale maroka. La vuhula, la imamala eia hagagaviti ale La Uru ge beu loua.” \p \v 12 Eala moli la vikararala te Iesus, eia veia maie “Eau ge beu hari loua somai. Eau ge vahari la vibalavala taku, eau ge kolia soio te la valalua me hatatavivile tomi mai la vulovulo giteu lou. \v 13 Eau la silokola me la tapasila te la papaga tomi, la papaga tomi, eau vipoua, la papaga tomi tai, eau ge vikaluvua.” \p \v 14 Egiteu ale vuhi maroka la lavalava tegiteu, egite balavati, mai egiteu ale pou la marokala te la isale Kraist. Oio vola egite ge koramulia ge ali la vavua la obu la mahulila, egite ge koramuli taia veia ge tiroro soilo te La Mautu Te La Uru. \v 15 Egiteu ale ge pou ogala, egiteu la tahalo la vareagila, egite kama ge goilo, egiteu ale igo gegegeru, egiteu ale rasirasi, egiteu ale mata bulakalaka, egiteu ale bilibili, egiteu ale lotu tatavu la puigolo, egiteu tomi tai ale vagari tatavu la vulovulo la visigologolola. \p \v 16 “Eau, e Iesus, eau bahati e angelo taku veia eia ge veia mutou la valalua me hatavivile la lotu taku la merera tomi alele. Eau te la hilile Devit, eau la matagaga ale uru mai e Toko ale reretala te la kavikoki.” \p \v 17 La Kalulu La Marokala, egira me rutule Latu La Sip, mai egiteu ale te La Uru, egira veia maie mago “Gomai te La Uru!” Taritigi tai veia amutou ale ge lolo la merera alele, amuto tai ge vikara mai ele mago “Gomai te La Uru!” Mai isa peho la malehula, eia masagea mai ele veia ge liu, eia koramuli seselea veia eia ge goio te La Uru veia eia ge abi la vaabila ale La Uru eia sugu tarotia gatou, mai la lalu la mahulila. \s1 La tapasi la merera \p \v 18 Eau, e Ioanes, eau mera taro vagari sesele amutou tomi ale lolo la merera ale omai te la buk alele, eia veipala la papaga tomi ale ge sibitala mulimuli, eau mera taro amutou veia mai isa ge vagoilo lou la merera isahari loata ovola, La Tahalo Uru eia ge vilaia te la iligiligi tomi ale eia veipalea te la buk aleie. \v 19 Mai tai isasa eia ge abi taro isahari la merera oilo vola, La Tahalo Uru eia ge abi taro leia la tabarila tetala te la vavua la obu la mahulila, veia eia kati ge pou tai te La Mautu La Marokala, mai la balavala tomi ale eia veipalea oilo te la buk aleie. \p \v 20 Eia ale veipalati la merera tomi ale, eia vikara maie mago “Eia sesele, eiau e Iesus, eau ge beu hari loua.” Ioge, eia taritigi pepeho veia eme ge gomai hari, Iesus, eme La Uru miteu. \v 21 Taritigi tai veia la gilogo te Iesus, La Uru gatou, eia ge pou tamutou la valalua me hatavivile tetala. Amen.