\id PHP - Nakanai NT [nak] -Papua New Guinea 1983 (DBL 2014) 
\h E PILIPAI 
\toc1 Ale La Merera Te Pol Eia Kekesia Giteu E Pilipai 
\toc2 Pilipai 
\toc3 Pil 
\mt1 ALE LA MERERA TE POL EIA KEKESIA GITEU E PILIPAI  
\c 1  
\p
\v 1 Eiau e Pol, amilua me Timoti, amila la bilalaha moli te Iesus Kraist, amila kekesia mutou la valalua me hatavivile te La Tahalo Uru oio la mautu e Pilipai ale amuto rovi tataho e Iesus Kraist. Amutou e ururu, me amutou la tahalo la visuli tai te la lotu ele, amila kekesi taia mutoue.  
\v 2 Amila toi taritigi pepeho soio tamutou veia la gilogo te La Tahalo Uru e Tama gatou, eia ge pou tamutou, la tia mutou oilo ge malilo tataho te la isale Iesus Kraist, La Uru gatou.   
\s1 E Pol sagege robo egiteu  
\p
\v 3 Ale eau gabutala bibibi moli amutou, eau toia taritigi pepeho soata te La Tahalo Uru.  
\v 4 Me ale eau ge kaka veia La Tahalo Uru eia ge suli amutou, eau kaka moli te la sagegela,  
\v 5 la vuhula eau gabutatala rivu lou ale amutou vikapopo leau te la valolo la merera la mahulila, sokoa pala amuto lolo vutia, karati igoie.  
\v 6 Me eau rovitia veia La Tahalo Uru, eia tau sokoti la gilogo tetala oilo te la tia mutou, me eia kama ge maila kara te la haro la bileula te Kraist, ale eia ge vikaluvu tataho la igogolu tetalale oio tamutou ele.   
\p
\v 7 Eia koramuli seselea veia eau ge gabutatala pepeho amutou mai ele, la vuhula eau e tabara mutou sesele. Mai eau ge pou te la luma la kilisi, mai tai eau ge magiri te la vigagiala veia ge toro robo la valolo taku, alele amuto mai ale magiri tomi leau. Etato tomi rovi la gilogo te la Tahalo Uru, ale eia suli etatou.  
\v 8 La Tahalo Uru rovia ale eau gabu pepeho amutou ele, la gilabu taku eia uru sesele mai la gilogo te Iesus Kraist lou.   
\p
\v 9 Mai alele, eau kaka gogogo La Tahalo Uru veia amuto ge vagari veia la gilogo tamutou ge sagaiti, eia ge uru pepeho, veia la merera ale sesele me la mari tai ale tikumu amuto ge hilovi tataho tomi molia,  
\v 10 veia amuto ge rovi tataho la vulovulo ale taritigi. Mai ge mai ele, eia ge suli amutou, la vulovulo mutou ge maroka, amuto ge raragi tataho te la bileula te Kraist,  
\v 11 ale la vavua la vulovulole Kraist ge sibitala tomiti soio tamutou veia la valalua me hatavivile ge hiloa, egite ge vaisale La Tahalo Uru ovola.   
\s1 La kilisi te Pol eia ge vahiliti lou la valolo te Kraist  
\p
\v 12 Me amuto tabarabaragu ele, eau masagea veia amuto ge rovia veia la pulolou taku omai te la kilisi, eia suli pepehoti la vahiliti la valolo te Kraist.  
\v 13 Ale egite kisiti la limagu ilua la sen veia ge vilai leau te la valolo te Kraist, egiteu e soldia tomi te Sisa ale pahutu roboroboau, egite rovia, me egite soldia tai ale e tabarabara giteu ele lolo taitia, la valalua tomi usu.  
\v 14 Me oio te la kilisi taku tai ele, egiteu la valalua me hatavivile te la lotu, egite mata kasekati lou, egite vagari tavu moli la valolo la merera te La Tahalo Uru, egite kati taga.   
\p
\v 15 Sesele, eau rovitia veia isahari tegiteu ele valolo bulalahu veia ge vagoata la vikararala tegiteu oata te la valolo taku veia ge tao taluau, egite veia ge mugeau mai ele. Eala moli egite tai usu valolo sesesele moli veia la isale Iesus moli ge vavava,  
\v 16 la vuhula egite gogo pepehoau, eala egite valolo moli mai lou eaue. Egite rovia veia eau pou te la kilisi veia ge sau tola la valolo te Iesus oio te la lagu giteu ale egite masagea veia ge tao talu la valolo tetala.  
\v 17 Eala moli egiteu ale valolo veia egite ge pepeau, egite masaga molia veia ge vauru lou la isa giteu, egite veia ge vailo buruko lou leau te la kilisi taku.  
\v 18 Eala moli eia taritigi pepeho alele! Mai isa ge valolo, la gabutatalala tetala taritigi, me isa lou ge valolo, la gabutatalala tetala kama kokora, ale la golu isa ouka, la vuhula la isale Iesus Kraist eia mai ale vavavati ovola!  
\p Mai alele eau ge sagege moli,  
\v 19 la vuhula eau rovia veia mulimuli, oio te la vagagari La Kalulu La Marokala, la kilaka tamutou ge lubeau taro la kilisi.  
\v 20 Eala moli eau masaga pepehoa veia eau umala ge taga bububu, veia la pileho soukama ge bolehoho eau. Eau so magiri vagari, me eau masagea veia mai eau ge peho, uka mai eau ge mahuli, eau ge vagari moli me oilo vola la valalua me hatavivile ge hiloa, egite ge bole vauru la isale Kraist.  
\v 21 La vuhula, te la gabutatalala taku, ale eau so mahulihuli, la torogu moli e Kraist sekela. Eala moli mai eau ge peho, eau balava seseleti, la vuhula eau mai ale hiloti e Kraist ele.  
\v 22 Ale eau ge mahuli tabaa lou, eau ge igogolu lou te la valolo. Eala moli ale mave eau ge masaga tavua, la mahulila uka la pileho? La gabutatalala taku mai ale iluati.  
\v 23 Isasa, eau masagea veia ge sele molia ge goio ge pou te la balile Kraist, me la gabutatalala alele eia vagari seseleti,  
\v 24 eala moli la gabutatalala taku isa lou, eia tikumuti taku, veia eau ge sau tola lou la mahulila te la vovo veia eau ge suli lou amutou e tabarabaragu ele!  
\v 25 Ale eau gabu tikumu sekelea, me oio vola eau rovitia veia eau soioge kama ge peho hari, eau ge mahuli tabaa lou vikapopo me amutou ele, eau ge puli lou amutou soio te la sagegela ale uru pepeho lou te Iesus.  
\v 26 Mai amuto ge hiloa veia La Tahalo Uru ge lapu rivu louau taro la pileho, amuto ge vaisale pepeho e Kraist Iesus oio vola, ale eau ge pou tomi lou le amutou ele.   
\s1 Egite ge suli e Pol te la valolo te Kraist  
\p
\v 27 Amuto ge lagu tavu moli la vulovulo ale taritigi veia la valalua me hatavivile ge hilo amutou, egite ge rovia veia amutou te Kraist. Mai alele, mai eau ge gomai tamutou, uka mai eau ge lolo moli la rere mutou ele, eau ge rovia veia amuto magiri vagariti, la gabutatalala tamutou eia isa moliti te la valolo te Kraist, veia amuto vipoke taro tataho moliti te la vaubila te la valolo tetalale.  
\v 28 Amuto kama ge taga egiteu la gima, me oio vola egite ge rovi seselea veia amuto ge sulu egiteu, me La Tahalo Uru ge vimahuli amutou. Ale la irovilala te La Tahalo Uru tavu amutou,  
\v 29 ale eia veia amuto kama ge tautaulailo bulalahu soio tetala, eala moli amuto ge ligi tai, la vuhula amutou te Kraist,  
\v 30 me amuto goiloti te la vaubila te la isala, ale amuto hilotia pala eau vagari tavua, me ale amuto so lololo loua veia eau souka maila taroa.   
\c 2  
\s1 La vulovulo gatou ge maroka mai te Kraist  
\p
\v 1 Mave, isa koramulia ge veia etato kama vitotoko? Ouka. Etato vitau me tabara seseleti, teale etatou tomi te Kraist, eala etato koramulia mai ele ge karasuku baoli etatou te la pou tigila te la isale Iesus. La vuhula etato roviti la gilogo ale uru tetala, etato tomi tai taholati La Kalulu La Marokala, eia suli etatou, me oio vola etato gabutia la gilogo me la mutelela tetala ale uru sesele tavu etatou.  
\v 2 Mai alele, eia taritigi pepeho veia amuto ge visauru moli, amuto ge visuli baololi le amutou, amuto ge vipuhi tigi, veia mai eau ge loloa veia amuto igo seselea mai alele, eau ge sagege pepeho ovola.  
\v 3 Ale te la pulolou tamutou, amuto umala ge vaigigo, amuto umala ge pakakasa.  
\v 4 Eme ge la tahalo la mahelala, eme ge vauru moli e tabaramu, veia eia uru taume. Eme kama ge suli molime, eme ge suli tai egiteu e tabarabaramu.  
\v 5 La gabutatalala tamutou ge mai te Kraist Iesus, me la gabutatalala tetala, eia maie:   
\li1
\v 6 Egira me Tamala mahuliti palati,  
\li1 egira mai ale isa moli.  
\li1 Eala moli eia kama masaga ge pou moli  
\li1 oio te Tamala mai la uru.   
\li1
\v 7 Eala eia vibisi moli lou eia,  
\li1 veia eia ge la tahalo bulalahu.  
\li1 Eia sibitala omai tegatou, eia mai la bilalaha moli,  
\li1 eia vulo mai la tahalo la vovo.   
\li1
\v 8 Me ale eia vulo mai la tahalo la vovo mai ele,  
\li1 eia vibisi moli lou eia  
\li1 veia eia ge poga tavu la pileho,  
\li1 mai la masasagala te Tamala,  
\li1 veia eia ge peho moli oata te la tauvalautu  
\li1 mai la tahalo la iruru.   
\li1
\v 9 Me oio moli ovola e Tamala sagege leia,  
\li1 eia pulia soata veia eia ge pou te la balila.  
\li1 La Tahalo Uru vauru sesele la isala   
\li1
\v 10 veia la valalua me hatavivile  
\li1 te la maututula tomi,  
\li1 egiteu tai ale pou oata te la bali La Tahalo Uru,  
\li1 me egiteu tai ale pou otalo te Satan,  
\v 11 egite tomi ge bole vauru la isale Iesus Kraist  
\li1 veia eia sekela moli uru,  
\li1 veia oio volale la isa La Tahalo Uru sekela moli  
\li1 ge vavava.   
\s1 Etato ge mai la matagaga soio te la valalua me hatavivile  
\p
\v 12 Amuto tabarabaragu, ale pala eau pou oio tamutou ele, amuto roromuli moliau. Me ale igoie eau kati oio tamutou, taritigi amuto ge vagari tavu sesele la vulovulo La Tahalo Uru, ale eia vimahuliti le amutou ovola. Amuto ge igo tigi, etatou la tahalo la vovo moli, etato souka ge gotigu rivu lou.  
\v 13 Etato ge vagari tavu la vulovulo ale taritigi mai ele, la vuhula La Tahalo Uru mahuliti oilo te la tia gatou. Eia igogolu oilo tegatou veia la masasagala tegatou ge poga sesele la masasagala tetala.   
\p
\v 14 Amuto ge vaigogolu tomi, la vikara silalahala ge umala, la tahi tarola tai ge umala.  
\v 15 Mai ge mai ele, egite isa kama koramulia ge veia amutou la tahalo la iruru, me amutou ge e latatu La Tahalo Uru ale maroka, amuto pou kabili tegiteu ale la vulovulo giteu kama matata.  
\v 16 Amuto ge magiri kabili tegiteu mai la matagaga, ale la valalua me hatavivile ge tuga tavua mai ale amuto vituria giteu la merera la mahulila. Mai ge amuto ge igoa mai ele, eau ge lege sisigi le amutou oio te la mata La Tahalo Uru te la haro te Kraist, ale eia ge beu rivu loua, la vuhula oio te la vulovulo mutou mai ele, amuto ge veipalea veia eau kama valolo bulalahu amutou.  
\v 17 Eau kama rovia veia egite ge biliau ka ouka. Soioge la kasosogu ge pagegele, mai ale egite tigi taro la lalu veia ge igo tigi la vaabila ale egite gutua oata te la poro veia la sosobula ge goata te La Tahalo Uru. Amuto tautaulailo seseleti te La Tahalo Uru, me oio volale eau veia la vaabila tamutou soio te La Tahalo Uru, eia la vulovulo mutou ale taritigi ele. Mai eau ge peho, la pileho taku eia ge mai la lalu ale igo tigi la vaabila te la vulovulo mutou, me oio vola eau ge sagege vikapopo le amutou.  
\v 18 Me oio tai ovolale, amuto ge sagege vikapopo tai leau, ale La Tahalo Uru hiloviau veia eau ge piligi la mahulila taku soio tamutou.   
\s1 E Pol veia ge baha e Timoti me Paprodaitas soio tegiteu  
\p
\v 19 Mai La Uru e Iesus ge masagea, eau ge baha hari moli e Timoti soio tamutou ele, eia ge beua somai taku ge gilemuliagu la pulolou tamutou, eau ge mata kaseka lou.  
\v 20 Isa lou omai ouka ale gabu pepeho amutou mai eau, eala moli e maura moli e Timoti ele.  
\v 21 Egite usu gabutatala pepeho moli egiteu lou, isa kama gabu tikumu la igogolu te Kraist.  
\v 22 Eala moli e Timoti ele, amuto rovitia eia sagaiti tavu moli la visuli taku, amila valolo la merera te Kraist, amila vaigogolu tomi mai e tau me latu sesele.  
\v 23 Eala eau masagea veia ge bahea soio tamutou ele, eala moli eau ge pou muga ge hiloa veia egiteu e Rom ge igo la rova somai taku.  
\v 24 Eala moli eau rovia veia soioge kama ge tabaa veia egite ge lubeau me eau sesele ge goiole ge hari lalai amutou, mai la masasagala moli te La Uru, etato ge hilo mugea.   
\p
\v 25 Me e tabara gatou e Paprodaitas tai ele, eia tikumu taku veia eau ge baha rivu taia soio tamutou. Eia la tahalo taku sesele. Amila vaigogolu tomi, amila vipoke tataro moli te la vaubila te Kraist, eia la bilalaha tamutou ale amuto bahea somai veia eia ge suliau.  
\v 26 Eau veia ge baha rivua, la vuhula eia gabu pepeho amutou, me eia ilo buruko ale amuto so gabutatalea veia eia lea, mai ale amuto loloa pala.  
\v 27 Sesele, eia pala lea, hagagaviti eia ge peho, eala moli La Tahalo Uru gogoa, eia vimahulia. Me oio volale La Tahalo Uru eia gogo pepeho tai eau, la vuhula eau kama koramulia veia ge bole la iloburukola isa lou mai e Paprodaitas ge peho taroau.  
\v 28 Eala eau vagari pepeho veia ge baha rivua, veia amuto ge hilo loua, amuto ge sagege pepeho, me oilo vola tai eau kati ge ilo buruko le amutou ele.  
\v 29 Ale eia ge guvi tamutou, amuto ge rara tavua, ge vararapu pepehoa, oilo te la isale Iesus, La Uru gatou. Amuto ge togo sesele egiteu ale mamai e Paprodaitas ele,  
\v 30 la vuhula eia sugu taro la mahulila tetala soio te la igogolu te Kraist veia ge magiri te la muli mutou ale amuto kama koramulia ge gomai, eia suli moliau, eia kama gabutatala eia.   
\c 3  
\s1 La gauru la mahulila eia isa moli sekela  
\p
\v 1 La merera taku isa lou soio tamutou e tabarabaragu ele, eau masagea veia amuto ge sagege bibibi moli te la isa La Tahalo Uru. Eau kama gabutatalea veia la merera ale eau so kekekesi molia mutou oatae, veia umala eau ge vei loua mutou vakasa lou ovola, ouka. La mererale, eia ge lago robo tataho amutou, eia maie:  
\v 2 Amuto ge vibaumuli tigi tegiteu la tahalo la vareagila ale la vulovulo giteu kama kokora. Egiteu moli la tau Iuda ale veia amuto ge koro la vovo mutoue, amuto ge vibaumuli tigi tegiteu ele.  
\v 3 Ale La Tahalo Uru vimaroka etatou, etato abiti la irovilala tetala oio te la vulovulo gatou, kama te la vovo gatou, la vuhula etato lotu tavu seselea oio te la matagaga te La Kalulu La Marokala. Etato sagege moli la matagagala te Kraist Iesus, etato kati gabu tikumu la mari papaila te la vovo.   
\p
\v 4 Mai eau ge masagea veia ge gabu tikumu la merera tegiteu e ururu mai ele, eau kama ge boto. Mai la tau Iuda isahari oiole ale tilimuli sesele la vulovulo giteu e ururu veia ge visagege La Tahalo Uru ovola, eau mamuga sesele tegiteu tomi.  
\v 5 E tila taposeau, eau la tau Iuda sesele, te la hilile Beniamin, hiloa, e tila me tete tai loio la mautu sesele tamite Iuda. La logo iualu polo, egite koro la vovogu mai la irovilala tamite Iuda loue. Me te la imoimo la merera tomi te Moses tai ele, eau mari tomi molia, eau lagu tavua, la vuhula eau e pariseo isasa.  
\v 6 Eala eau pala vagari tavu sesele la viligiligi la valalua me hatavivile te la lotu te Iesus. Eau la vulovulogu taritigi moli te la merera te ururu, eau la iruru isa ouka.   
\p
\v 7 Eala moli oio te la tautaulailo taku ale halaba soio te Iesus, eau poke taro tomitia la pakakasala taku alele, eau kati gabu tikumua veia eau la tahalo isasa, oukati.  
\v 8 Eia sesele moli, la golu isa lou kama ge uru te la gabutatalala taku, eala moli ale eau rovitia veia e Iesus Kraist, eia La Uru taku. Ale eau valolo te la isala, eau kama ilo buruko ale eau kati tahola isa la paga. Eau sibitalati mai la morivava sesele, eala moli eau kama gabutatala papai, teale la paga ale eau taholea eia mai la golu bulalahu moli te la gabutatalala taku, la vuhula eau masaga molia veia eau ge balava sesele oio te Kraist,  
\v 9 veia amila me Iesus ge isa moli.  
\p Eau kamati ge toi eau veia eau taritigi, veia oio moli te la vagagarila taku lou eau sibitala maroka, ale eau lagu tavu la merera te ururu. Eala moli ale eau gabu tikumu la merera te Kraist sekela moli, alele La Tahalo Uru ge koramulia ge igo maroka la vulovulogu.  
\v 10 Me la golu isa sekela moli eau masagea, veia eau ge rovi sesele e Kraist. Me la vagagarila te La Tahalo Uru ale eia vimahuli rivu e Kraist te la pileho tetala, eia ge vivagari tai leau. Ale e Kraist pala gabu la iligiligi te la pileho tetala, eia tubu tai te la vovogu, la vuhula eau tai gabuti la iligiligi ale eau valolo la merera tetala. Me ale e Kraist piligi la mahulila tetala, eau mai tai ele ale eau piligiti la vulovulogu ale pala,  
\v 11 veia eau ge hilo tai la mahuli rivula ale La Tahalo Uru ge vimahuli tai eau taro la pileho.   
\s1 La vikarara la tilovo te la vipepepela  
\p
\v 12 Eala moli eau kama gabutatalea veia eau mai ale sau tolati la vibalavala tomi te Kraist, ouka. Me la igogolu te La Tahalo Uru ale eia ge vimaroka eau, eia souka kaluvu. Eala moli eau mai ale so harari veia ge poga sesele la vibalavala te Kraist, veia eau ge sau tolea mai ale eia sau tola taiti eau.  
\v 13 Amuto tabarabaragu, taritigi amuto ge rovia veia eau kama gabutatalea veia la vibalavala te La Tahalo Uru, eau mai ale abitia. Eala moli eau kati ge gotigu rivu lou, eau vagari moli veia ge hari moli solagu veia ge sau tola la vibalavala ale oio te La Tahalo Uru.  
\v 14 La vuhula eau masaga pepehoa veia la hirari taku ge kaluvu, eau ge sau tola moli la vibalavala te La Tahalo Uru ale eia tola etatou soata tetala veia etato ge sau tola la mahulila ale sesele, e Kraist visibitalea te la pileho tetala oata te la tauvalautu.   
\p
\v 15 Me oio volale, eia koramuli seselea veia etato tomi ale sagaititi te la merera te Kraist ge gabutatala tigi mai ale eau veitia mutou ovola, ale eau tovo mulia mutou te la vipepepela mai ele. Eala moli mai amuto isahari ge tahi taro la merera taku ele, ale la golu isa ouka, la vuhula La Tahalo Uru ge vimatagaga lou amutou ovola.  
\v 16 Mai etato tomi ge hari moli solagu loue, la vulovulo gatou ge maroka moli mai ale etato matagagati ovola, sokoa pala, kara ale igoie.   
\p
\v 17 Amuto tabarabaragu, taritigi amuto ge sovei eau te la vulovulogu ale taritigi. Amuto ge hilovi tigi la valalua me hatavivile ale la vulovulo giteu eia mai seseleti la vulovulogu, amuto ge mai tai egiteu.  
\v 18 La vuhula la vikararala isasa eau veitia mutou vaka usuti pala, me eau ge vei loua mutou gageie, la masaligu pagegeleti lou ovola. Egiteu la valalua me hatavivile isahari te Iesus, la vulovulo giteu eia vuloti mai la vulovulo giteu ale gima e Kraist me la pileho tetala oata te la tauvalautu.  
\v 19 La Tahalo Uru ge vilai egiteu ele, egite ge sululu. Egite gabu tikumu moliti la vulovulo ale kama kokora te la vovo, egite la tahalo la ali pepeila, egite pakakasa, me egite goio vei tataho rivu lou egiteu ovola, egite kama mahelala.  
\v 20 Eala moli etatou ale te Iesus sesele, la mautu tegatou eia oata moli te la mori. Me la tahalo la vimahuli tegatou, eia ge sibitala lou loata, eia e Iesus Kraist moli, La Uru gatou, ale etato pou taitalia.  
\v 21 Eia ge vulo halaba lou la vovo gatou ale kama kokorale, veia etato tomi ge la riau sesele mai lou eia. Ale eia kama vagari tetala, la vuhula eia sau tola la mori me la magasa tomi te la limala.   
\c 4  
\p
\v 1 Tiele, eia taritigi pepeho veia amuto tabarabaragu ale eau gogo amutou, eau gabu pepeho amutou, taritigi amuto ge magiri vagari te Iesus, La Uru gatou.   
\s1 E Pol viteteli egiteu  
\p
\v 2 Eau kaka vagari amulua la tavile uru iluale, e Vodia, e Sintiki, amula ge vipuhi tigi lou te la isale Iesus, La Uru gatou.  
\v 3 Me eau kaka tai eme, e vikilipi taku sesele ale pou oio e Pilipai ele, eme ge suli egirua veia egira kati ge vaigo, la vuhula egira pala vaigogolu vagari vikapopo le amiteu te la valolo te Iesus, mai amiteu me Klement, me egiteu la tahalo la visuli tomi ale la isaisa giteu La Tahalo Uru kekesi tolatia te la buk la mahulila.   
\p
\v 4 Taritigi pepeho veia te la haroharo tomi amuto ge sagegege moli te la isale Iesus, La Uru gatou. Me eau ge vei loua mutou vakasa lou maie veia amuto ge sagege!  
\v 5 Eala moli amuto ge la tahalo la pou makokovula, la tahalo la mutelela tai. Hagagaviti La Uru gatou ge beu rivua.  
\v 6 Amuto umala ge gabutatala papapai te la mahulila tamutou te la paga isasa mai la ilali me la lavalava. Amuto ge vaisale moli La Tahalo Uru, me la paga ale amuto savelea, amuto ge kaka molia tetala.  
\v 7 Me oio moli ovola, La Tahalo Uru ge igo malilo tataho la tia mutou oilo, veia la gabutatalala tamutou ge magiri vagari oio te Iesus Kraist moli sekela, amuto kama ge marapa. La visuli uru ele, etato la tahalo la vovo kama koramulia ge igoa, La Tahalo Uru moli sekela koramulia.   
\p
\v 8 Eala moli la tapasi la merera taku tavu amutou e tabarabaragu ele, eia maie: Amuto ge igo volu la gabutatalala tamutou me la vulovulo ale maroka maie: La vulovulo ale taritigi, la merera ale sesele, me la gauru ale matata. La valalua me hatavivile ge hiloa, egite ge rovia veia la pulolou tamutou eia maroka, eia marasa, egite ge vei tataho amutou te la vulovulo mutou mai ele, me La Tahalo Uru tai ge sagege le amutou.  
\v 9 Amuto ge igo seselea mai ale eau vahiloti le amutou ovola, te la merera taku te la valolo, me te la vulovulogu tai ale eau pala pou oio tamutou. Mai amuto ge igo seselea mai ele, La Tahalo Uru ale igo malilo tataho la tia gatou, eia ge pou tamutou.   
\s1 E Pol vei tataho egiteu te la vaabila tegiteu  
\p
\v 10 Eau sagege pepeho, eau vaisale sesele e Kraist, La Uru gatou, teale igoie amuto gabutalati lou eau. Sesele amuto kama vaula leau, eala moli la gauru ouka veia amuto ge suliau ovola.  
\v 11 Eala moli eau kama ge hateka, la vuhula mai eau ge savele la uati, la pulolou la savelela eau tahaiti ovola, veia mai la uati taku ilua moli eau ge taholea eia ge koramuli moli eau.  
\v 12 Eau sagaititi, eala mai eau ge pou la savelela, veia mai eau ge pou tai la balavala, ale la golu bulalahu. Mai tai eau ge vitolo, uka eau ge maru, ale tai eau kama gabutatalea.  
\v 13 La iloburukola tomi ale eau ge pogea, eau ge bolehohola la vagagirila te Iesus Kraist, eia la tuha magirigu.  
\v 14 Eala moli ale eau pou la savelela, amuto loloa, amuto suliau, taritigi pepeho te alele.  
\v 15 Ale pala, eau so sosoko moli la igogolu la valolo te Kraist, amutou la valalua me hatavivile e Pilipai rovia, la lotu isa lou kama suli leau la vaabila ale eau hiliti taro la gale e Masedonia, amutou moli.  
\v 16 Me mulimuli te la pulolou taku oio e Tesalonaika, kara igoie, amuto sulitiau vaka luati.  
\v 17 Eala moli la vaabila tamutou ele, eau kama gabu tikumua, eau gabu tikumu moli la tilalau ale La Tahalo Uru rararagia veia ge koli la vulovulo mutou alele.  
\v 18 Me igoie eau popou, eau kama savele, la vuhula eau abiti la vaabila tamutou ale e Paprodaitas vahariagu, me eau lege sisigi seseletila. Amuto sugu tarotiagu la vaabila alele, La Tahalo Uru hilotia, eia mai ale amuto vaabi tai soio tetala me eia lege sisigi taila.  
\v 19 Me La Tahalo Uru ge koli pepehoa soio tamutou, la vuhula eia tahola usu pepeho la vuliti, eia ge abi uru loua mutou, teale amutou te Kraist Iesus, me mai amuto ge savele la paga isasa, eia ge abia mutou.   
\p
\v 20 Etato ge toi taritigi pepeho soata te La Tahalo Uru e Tama gatou, kara igoie, kara mulimuli, la kaluvula ge ouka. Amen.   
\s1 E Pol laharoa giteu  
\p
\v 21 Amutou tomi la riau te Iesus ele, amiteu me egiteu e tabarabara mutou ale omai egite taku, amite veia mutou la haro.  
\v 22 Egiteu tomi la riau te Iesus ale omai, egite veia mutou la haro sesele, egite tomi tai la valalua me hatavivile te Iesus omai ale igogolu te la luma te la mulugaluga tegiteu e Rom, egite vei taia mutou la haro.  
\v 23 La gilogo te Iesus Kraist, La Uru gatou, eia ge pou te la kalulu mutou tomi isasasa.  
\cls Eau e Pol.