\id MAT - Nakanai NT [nak] -Papua New Guinea 1983 (DBL 2014) \h E MATIU \toc1 La Valolo Ale Taritigi E Matiu Kekesia \toc2 Matiu \toc3 Mat \mt1 LA VALOLO ALE TARITIGI E MATIU KEKESIA \c 1 \s1 La isaisa giteu e tutubule Iesus Kraist \r (Luk 3:23-28) \p \v 1 Egiteu la maratatila aleie, egiteu la hilile Iesus Kraist, egite veipalea te la maratatila te Devit, eia e tubule Abraham isasa sesele: \li1 \v 2 E Abraham, e latula e Aisak, \li1 e Aisak, e latula e Iakob, \li1 e Iakob, e latula e Iuda, egiteu vitau me taitari. \li1 \v 3 E Iuda, e latula ilua e Pares me Sera, \li1 e tila girua e Tamar. \li1 E Pares, e latula e Hesron, \li1 e Hesron, e latula e Ram, \li1 \v 4 e Ram, e latula e Aminadab, \li1 e Aminadab, e latula e Nahason \li1 e Nahason, e latula e Salmon, \li1 \v 5 e Salmon, e latula e Boas, \li1 me tilale Boas ele, la isala e Rahab. \li1 E Boas, e latula e Obed, \li1 me tilale Obed ele, la isala e Rut. \li1 E Obed, e latula e Iesi, \li1 \v 6 e Iesi, e latula e Devit, \li1 eia la mulugaluga tegiteu e Iuda alaura. \li1 E Devit, e latula e Solomon, \li1 me tilale Solomon ele, eia puli muga e Uria. \li1 \v 7 E Solomon, e latula e Rehoboam, \li1 e Rehoboam, e latula e Abaisa, \li1 e Abaisa, e latula e Asa, \li1 \v 8 e Asa, e latula e Iehosapat, \li1 e Iehosapat, e latula e Iorim, \li1 e Iorim, e latula e Usia, \li1 \v 9 e Usia, e latula e Iotam, \li1 e Iotam, e latula e Ahas, \li1 e Ahas, e latula e Hesekaia, \li1 \v 10 e Hesekaia, e latula e Manasa, \li1 e Manasa, e latula e Amon, \li1 e Amon, e latula e Iosaia, \li1 \v 11 e Iosaia, e latula e Iekonaia. \li1 Te la imamala te Iekonaia me egiteu e taitarila, egite \li1 Asiria lapu taro egiteu e Iuda soio te la kilisi oio la \li1 mautu e Babilon. \li1 \v 12 Mulimuli te la imamala la viligila alele, e Iekonaia \li1 eia goio savu e latula e Salatiel, \li1 e Salatiel, e latula e Serababel, \li1 \v 13 e Serababel, e latula e Abiuda, \li1 e Abiuda, e latula e Eliakim, \li1 e Eliakim, e latula e Asor, \li1 \v 14 e Asor, e latula e Sadok, \li1 e Sadok, e latula e Akim, \li1 e Akim, e latula e Liuda, \li1 \v 15 e Liuda, e latula e Lieser, \li1 e Lieser, e latula e Matan, \li1 e Matan, e latula e Iakob, \li1 \v 16 e Iakob, e latula e Iosep, \li1 e rutula e Maria ale e tilale Iesus, \li1 egite toila e Kraist. \p \v 17 Egiteu la karakara te Abraham, kara tegiteu la karakara te Devit, egite la tuvu savulusa gete vaa. Goio, sokoa te Devit, kara te la imamala ale egite Iuda goilo te la pulolou la kilisi oio e Babilon, egite tai la tuvu savulusa gete vaa. Soko loua te la imamala la viligila oio e Babilon, kara te Kraist, egite tai la tuvu savulusa gete vaa. \s1 E Maria pigo e Iesus Kraist \r (Luk 2:1-7) \p \v 18 La veimulipolola ale te la piligole Iesus Kraist, eia maie: La vei robola oio pouti ale e Iosep ge puli e Maria, egira ge taulai, eala moli egira souka vipou tomi, e Maria savuti mai la vibalavala te La Kalulu La Marokala. \v 19 E Iosep, eia la tahalo sesele, eia kama koramulia veia eia ge mahela taro e rutula e Maria, eia gabutatalea veia eia ge tou kokovu molia, la vuhula eia savuti. \p \v 20 E Iosep so gabutatala molia mai ele veia egira me Maria ge vipou baa, eia goio mavuta te la logo, e angelo isasa loata te La Uru eia goio sibitala tavua, eia veiala maie mago “Iosep, eme e tubule Devit isasa sesele. Eme umala ge mahelale e rutumu, eme ge puli molia, eia ge e rutumu sesele. Eme ge loloa, ale e rutumu savu, la tahalo isasa kama la vuhula, ouka, ale la vuhula te La Kalulu La Marokala, eia pigi robotia, eia vibalavala e latulale. \v 21 E rutumu eia ge taposa e latula, eia ge hatamale, eme ge toi la isala e Iesus, la masova la isa aleie eia maie: eia ge vimahuli egiteu la valalua tetala, eia ge vimavulaha egiteu taro la vulovulo la iruru ale egite igigoa.” \p \v 22 La vikararala te angelo soio te Iosep ale mai ele, eia vipuru moliti la merera te la bilalaha te La Uru ale pala, ale eia veia maie \v 23 “La sobe isa bisi ge savu, eia ge pigo e latula ge hatamale, egite ge toi la isala e Manuel.” Me la masova la isa aleie eia maie: La Tahalo Uru eia vipou tomiti letatou. \p \v 24 Tio e Iosep goio hagolo, eia goio tilimulia mai ale e angelo te La Tahalo Uru veitiala, eia goio puli e rutula e Maria, \v 25 eala moli egira kama vipou tomi kara ale eia pigo e latula. La imamala te Maria goio sibitala, eia goio taposa e latula e hatamale, e Iosep goio toi la isala e Iesus. \c 2 \s1 Egite la tahalo la mari hari lalai e Iesus \p \v 1 E Iesus, e tilala taposea oio la mautu e Betlehem, oio la gale e Iudea, te la imamala ale e Herod pou la mulugaluga te la gale alele. E Iesus sibitala kaluvu, egiteu la tahalo la mari isahari loio te la gale isa malau ale la haro porosile ovola, egite hiliti, egite goio goale e Ierusalem veia ge hari lalai e Iesus ele veia egite ge hiloa. Egite goio guvi oio e Ierusalem, \v 2 egite goio tahi egiteu la valalua mago “La pepeso ale e tilala so tapaposea, eia ge la mulugaluga tegiteu la valalua e Iuda, eia oiove? Amite hiloti la irovilala tetala, la matatabu uru, eia porosile, amite gomaie veia ge sagege roboa ge vaisalea.” \p \v 3 Eala moli la mulugaluga e Herod, eia tai lolo la tilahi tegiteu ele, la gabutatalala tetala marapa, me egiteu tai la valalua e Ierusalem, egite marapa. \v 4 Tio, e Herod goio baha tavu egiteu la mulugaluga tegiteu e pris, egite la valalua la mari tai ale mari tataho la viputumulila tegite Iuda, egite goio pou vikapopo, e Herod goio tahi egiteu mago “Mave, egite ururu vikara mave te la guluvi te Kraist, e tilala ge taposea oiove?” \v 5 Egite loloa mai ele, egite goio veiala mago “E Kraist, eia ge sibitala oio la mautu e Betlehem te la gale e Iudea, mai la merera te la bilalaha te La Uru eia kekesia maie: \li1 \v 6 Maura Betlehem ele te la gale e Iudea, \li1 la valalua veia eme la mautu bulalahu moli isasa, \li1 eala moli eme la kalia la mautu sesele, \li1 la vuhula la mulugaluga ale uru sesele, \li1 e tilala ge taposea oio taume. \li1 La tahalo ale, eia ge vibaumuli \li1 la maratatila taku sesele, \li1 la valalua me hatavivile e Israel.” \p \v 7 Eala moli e Herod eia lolo la merera tegiteu ele, eia goio tahi keke moli egiteu la valalua la mari ale loio la mautu malau mago “La matatabu ale amuto hiloa, amuto mulimulia somai, eia sibitala alisa?” \v 8 Goio, egite koli la tilahi tetalale, eia goio baha taro egiteu veia egite ge goio e Betlehem, eia veia giteu mago “Amuto goio paa mulia, mai amuto sivutitia, amuto ge gomai, amuto ge veiagu, la vuhula eau tai ge goio ge lotu tavua.” \p \v 9 Tio egite loloti la merera te Herod mai ele, egite goio tuga, egite tilimulimuli molia la matatabu ale egite hilotia lomuli la porosesile la mata la haro te la gale tegiteuo, la matatabu ele eia mamuga egiteu, eia goio magiri matata moli oio la varu la luma soatao, ale la pepeso e tilala taposea oio volale. \v 10 Ale egite hiloa la matatabu eia vituria giteu la gauru mai ele, egite sagege pepeho seseleti. \v 11 Egite goio guvi, egite goio tiroro soilo la luma, egite goio hiloa la pepeso, egira me tilala e Maria, egite goio toto tulu otalo, egite togoa, egite lotu tavua. Egite goio lao la palo tegiteu, egite goio abia la pepeso la vaabila tegiteu, egite abiale tilala, egite abiala la gold, la paura ale malia tataho, me la bululu la obu ale mali vivili tataho tai. \v 12 Tio, egite goio mavuta, egite taga, te la logo La Tahalo Uru mera taro egiteu veia egite umala ge beu rivua veia ge veiale Herod te la pepeso ale e tilala taposatia. Eala egite kati roromuli e Herod, egite goio polo te la gauru isapolo, egite goio beu rivu loua te la mautu tegiteu. \s1 E Iosep, e Maria, e latu girua, egite hele soio e Gipto \p \v 13 Mulimuli, egite la valalua la mari goio tuga, e Iosep goio mavuta, eia hilo e angelo isasa eia sibitala tavua, eia veiala mago “Amula me rutumu hiliti, bokoa e latu muluale, amuto ge tuga, amuto hele soio e Gipto. Amuto ge pou oio la gale e Giptole kara te ale eau ge veiamu, la vuhula e Herod veia ge paa muli la pepeso aleiele, eia ge bilia eia ge peho.” \v 14 Tio, e Iosep goio hiliti moli te la logo ale, eia puli molia e rutula e Mariale, e latu girua, egite hiliti, tuga, goio e Gipto. \v 15 E Iosep me rutula, e latu girua, egite pou oio e Gipto kara ale e Herod peho. Mai ele, la merera te la bilalaha te La Uru ale pala eia puru sesele, la mererale eia veia maie “Eau tola tavu e latugu loio e Gipto eia ge gomai.” \s1 E Herod bili egiteu la pepeso \p \v 16 Tio, e Herod ga pou taitali egiteu la tahalo la mari veia egite ge beua ge veiala la pepeso ale e tilala taposea, egite kamati beua soio tetala. La hatela mamasi, eia igo totolo, eia goio baha la valalua isahari soio e Betlehem me soio te la maututula ale hagagavi oio e Betlehem veia egite ge bili taro egiteu la pepeso ale hatamalemale, egiteu ale la leavala tegiteu souka ilua, mai la vikararala tegiteu la tahalo la mari egite veiala pala te la imamala ale la matatabu ale virovi la piligole Kraist eia sibitala ovola. \v 17 Eia mai sesele la merera te La Uru eia veipalea te la bilalaha tetala e Ieremaia, la merera aleiele eia puru seseleti, eia maie: \li1 \v 18 Oio e Rama egite lolo la tilali, la kilaku, \li1 e Rakel eia taitali legiteu e latatula, \li1 la valalua me hatavivile egite kama koramulia veia \li1 egite ge vimalu e Rakel, ouka viruru, \li1 la vuhula eia kamati hilo la mata giteu e latatulale. \s1 E Iosep, e rutula e Maria, e latu girua, egite beua loio e Gipto \p \v 19 Tio, e Herod goio peho, me mulimuli te la pileho tetalale e Iosep goio mavuta, e angelo isasa sibitala tavua, \v 20 eia goio veiala mago “Eme ge hiliti, pulia e rutumu me latumu, amuto ge beua soio la gale e Israel, la vuhula la tahalo ale eia veia ge bili e latumu, eia pehoti.” \p \v 21 Tio e Iosep loloa mai ele, eia goio hiliti, eia pulia e rutula, e latula, egite beua soio e Israel. \v 22 Eala moli e Iosep goio lolo la valolo maie e Arkelas e latule Herod eia koliti e tamala, eia la mulugaluga oio e Iudea, eala e Iosep eia taga la goiola te la gale alele. Eala moli la tilaga te Iosep isasa, eia mavuta, eia tagea La Tahalo Uru veiala eia ge polo gale ge goio e Galilea. \v 23 Tio, egite me rutula me latu girua, egite tuga, egite goio pou oio e Nasaret. Eia puru muli sesele la merera tegiteu la bilalaha te La Uru ale pala, egite veitia maie “Egite ge toia veia e Kraist eia la tau Nasaret.” \c 3 \s1 La valolo te Ioanes la tahalo la vuluhi \r (Mark 1:1-8; Luk 3:1-18; Ioanes 1:19-28) \p \v 1 Te la leavala alele, e Ioanes la tahalo la vuluhi, eia guvi, eia valolo oata te la rorobo oio la gale e Iudea, \v 2 la valolo tetala eia maie “Eia taritigi amuto ge vulo la gabutatalala tamutou, amuto ge piligi taro la iruru tamutou, amuto ge vuvulo, la vuhula la pulolou la matagaga te La Uru eia hagagavi moliti.” \v 3 E Ioanes, eia la tahalo ale la bilalaha ale pala, e Aisaia, eia veipalati la merera ovola maie “La golu la tahalo isasa eia tatola loio la hohoi, eia vei maie: Amuto ge ili paa la gauru te La Uru, amuto ge vimatata tomi la gauru tetala.” \p \v 4 La kairobola te Ioanes la kulikuli la kamel, la kisipou tetala la kulikuli la kau, la ilali tetala moli e pogo, eia liliu moli la magu oio te la tia la hohoi. \v 5 Eia la tahalo ale isapolo sesele, la valalua usu te la mautu e Ierusalem, te la gale e Iudea, me te la maututula ale hagagavi la lalu e Iordan, egite goio te Ioanes, egite lolo la valolo tetala. \v 6 Egite goio veipala la iruru tegiteu, e Ioanes goio vuhi egiteu oio la lalu e Iordan. \p \v 7 La haro isasa e Ioanes hilo egiteu e pariseo usu, egiteu e sadiusi\f + \fr 3:7 \ft Egiteu e pariseo la karakara isa uru ale egite gabu vauru agi sesele la imoimo la merera tomi te Moses, me la merera usu tegiteu lou, ale egite valimuli la merera te Moses oio vola. Egiteu e Iuda bukeke pasi la merera tegite pariseo, eia vituri papai egiteu ele. Egiteu e sadiusi, ale la karakara isa tegiteu e pris me tegiteu tai la tahalo la mari isahari lou. Eala moli egiteu e sadiusi kama usu mai egiteu e pariseo. Egiteu e sadiusi gabu tikumu sekela la buk ale ilima e Moses kekesia (La Vipoupoula kara ale E Diuteronomi), la merera isahari lou ouka. Eala la vulovulo giteu me la vimari tai tegite eia isapolo te la merera tegiteu e pariseo, egite vigima baololi mai ele.\f* tai usu, egite guvi vikapopo veia ge lolo la valolo tetala, eia goio veia giteu “Amuto la valalua me hatavivile, la vulovulo mutou kama kokora sesele, amuto veia ge hele taro la igototolola ale tivura pepeho te La Uru ale ge sibitala robo amutou. Amuto veia ge hele taroa mai e taive eia hele taro la hohoi ale tululu, veia amuto ge gomai ge vuhi maroka! \v 8 Amuto ge vulo pala muga la vulovulo mutou, la vulo mutou ge taritigi te la mata La Uru, tio amuto ge koramulia mai ele ge abi la vuluhi mai ale amuto mavulahati te la iruru tamutou. \v 9 Amuto umala ge gabutatala marapa te la gabutatalala tamutou veia e tubu mutou e Abraham, eala La Tahalo Uru eia lege sisigi le amutou! Eau vei seselea mutou, La Tahalo Uru eia koramulia ge vikara soio tegiteu la uatati ale tabuli otalo te la magasale, eia ge visibitala egiteu mai e tutubule Abraham, ale eme veia eme e tubule Abraham, ale la golu bulalahu moli. \v 10 Eala moli amuto ge matagagati veia La Tahalo Uru eia mai ale tau lalahatia la pemu tetala soio te la vuhu la obobu tomi, mai la obobu ale la vavua giteu kama taritigi, eia ge tolo taro egiteu ge pigi egiteu sotalo te la havi, eia ge goho ge kaluvu. \v 11 Eia sesele, la vuluhi taku eia kama tikumu, eau vuhi moli le amutou la lalu moli veia ge vimavulaha taro la iruru tamutou, eala moli ale mulimuli taku, la vagagarila tetala muga taku, eau togo pepehoa, eau kama koramulia ge tuga hagagavi soio te la balila. Eia ge abia mutou La Kalulu La Marokala, amuto ge gabu seselea oilo te la ilo mutou tomi isasasa eia ge tivura mai la havi. \v 12 La Uru ele, eia raragiti veia ge hilovi la vulovulo la valalua me hatavivile tomi, isa kama ge hele, eia ge hilovi la vulovulo gatou, veia egiteu ale taritigi eia ge puli egiteu hagagavi soio te la balila, eala moli egiteu ale kama kokora, eia ge pigi egiteu sotalo te la havi ale karerere, la kaluvula ge ouka.” \s1 E Ioanes vuhi e Iesus \r (Mark 1:9-11; Luk 3:21-22) \p \v 13 Goio, te la imamala moli aleie, e Iesus hiliti loio e Galilea, eia goio la lalu e Iordan veia e Ioanes ge vuhia. \v 14 Eala moli e Ioanes veia ge mera taroa, eia veiale Iesus mago “Eia koramulia eme ge vuhi eau, eau kama koramulia veia eau ge vuhime, ouka. Eala moli eme gomai taku veia ge vuhi omai taku e!” \p \v 15 E Iesus goio koli la merera te Ioanes mago “Korati, eme ge igoa mai ale eau veitiamu, etala ge vipuru la masasagala tomi te La Tahalo Uru ale eia veia eau ge mulimuli la vulovulo tomi ale matata koramulia la igogolu taku.” Tio e Ioanes loloa mai ele, eia goio mulimuli la masasagala te Iesus, eia goio vuhia. \p \v 16 E Ioanes vuhi e Iesus kaluvu, e Iesus goio hiliti, magiri, eia taga soata, eia hilo la mori eia kopeti, eia hilo La Kalulu La Tahalo Uru eia mai la malu la uku, eia gotalo tetala. \v 17 Goio la golu La Tahalo Uru tola loata te la mori maie mago “Ale e Latugu la riau, eau sagege pepeho sesele leia.” \c 4 \s1 E Satan tovo lalai e Iesus \r (Mark 1:12-13; Luk 4:1-13) \p \v 1 Goio, La Kalulu La Marokala eia baha taro e Iesus soata la hohoi veia eia ge pou muga ovola, e Satan ge tovo lalaia. \v 2 Tio e Iesus pou mai alele, eia kama ali, eia kama liu, eia peremu moli maie, la logo savulu vaato, eia vitolo sesele. \v 3 Goio e Satan sibitala tavua, eia veiala mago “Mai eme e Latu La Tahalo Uru sesele, eme ge vulo egiteu la uatati aleie, eia ge sibitala mai la bret.” \p \v 4 Eala moli e Iesus goio ule baoliala mago “Eala moli La Buk Tabu eia toia maie ‘La ilali ale etato ali bibibia, eia kama koramulia ge vimahuli la kalulu gatou, eala moli la valalua ge mahuli moli te la vikararala tomi te La Tahalo Uru, ale egite loloa te la harela, egite goio taua te la ilo giteu.’” \p \v 5 E Iesus veiale Satan mai ele kaluvu, goio e Satan pulia soio e Ierusalem, egira goio goata te la varu la luma la lotu oata pepeho, egira magiri oata ovola. \v 6 Tio e Satan goio veiala mago “Mai eme e Latu La Tahalo Uru sesele, taritigi eme ge raga sotalo, la vuhula La Buk Tabu eia veia maie ‘La Tahalo Uru ge baha taro egiteu la angelo tetala soio taume, egite ge sakoli sae molime soata te la lima giteu, la vahamu kama ge putua te la uati.’” \p \v 7 Goma, e Iesus koli lou la vikararala te Satan mago “Eia sesele, La Buk Tabu eia veia mai ele, eala moli la vikararala te La Buk Tabu isa tai eia toi loua maie ‘Eme umala ge tovo lalai La Tahalo Uru, eia La Uru taume.’” \p \v 8 Tio, e Satan goio puli loua soio, egira goio tuga goata te la gove isa uru, la varula goata pepeho, egira magiri oata, egira mata sotalo te la maututula. e Satan goio turiala la maututula me la galegale, eia marasa pepeho. \v 9 Tio eia goio veiale Iesus mago “Mai eme ge toto tulu otalole, eme ge lotu tavuau, tio la papaga tomi ale eme hilotia, eau ge abiamu, eme ge taholea.” \p \v 10 Eala moli e Iesus putu oli louala mago “Satan, eme ge hele taroau, la vuhula La Buk Tabu eia toia maie ‘Amuto ge lotu tavu moli La Tahalo Uru sekela, eia La Uru mutou, amuto ge togo moli eia sekela.’” \p \v 11 Tio, e Satan goio hiliti taro e Iesus, eia tuga. Goma egiteu la angelo goio sibitala tavu e Iesus ele, egite vitahoala. \s1 E Iesus soko la igogolu tetala \r (Mark 1:14-15; Luk 4:14-15) \p \v 12 Goio, e Iesus loloti la rerele Ioanes veia e Herod vagoilotia te la luma la kilisi, tio eia hiliti veia ge goio la gale e Galilea. \v 13 Eia goio hiliti taro la mautu e Nasaret ale eia mou ovola, eia goio pou oio e Kapernaum, eia la mautu isasa eia hagagavi moli la magolilo e Galilea, oio te la gale la magasa ilua, isa te Sebulon, isa te Naptali. \v 14 Me ale eia goio pou mai ele, eia vipuru sesele la merera te Aisaia ale eia veipalea te La Buk Tabu Ale Pala maie: \li1 \v 15 Taritigi pepeho soio te la gale ilua \li1 e Sebulon, e Naptali, \li1 oio te la gauru ale golau la mago, \li1 te la hararele Iordan loio, \li1 la gale moli e Galilea \li1 ale la valalua la maligoma usu pou ovola. \li1 \v 16 La valalua me hatavivile ale pou te la maligoma, \li1 la matagaga uru sibitalati tegiteu, egite hilotia. \li1 Egiteu tomi ale pouti te la mautu la maligoma \li1 oio moli te la miau la lulu la pileho, \li1 la matagaga uru eia paga veiti egiteu, \li1 egite pouti te la matagaga. \p \v 17 Te la leavala moli alele, e Iesus soko la valolo, eia veia giteu la valalua me hatavivile tomi maie “La pulolou la matagagala te La Tahalo Uru eia hagagaviti ge sibitala, taritigi amuto ge piligi taro la iruru tamutou, amuto ge vuvulo.” \s1 E Iesus tola egiteu la tahalo la ilapu la vuo taho vaa \r (Mark 1:16-20; Luk 5:1-11) \p \v 18 Goma, la haro isasa, e Iesus tatuga te la parava oio la magolilo e Galilea, eia hilo egirua e tau me tari ilua, e Saimon, ale egite toila e Pita, e tabarala tai e Andrew. Egira vovuo oio la magolilo, ale la igogolu moli tegirua ale egira ababi la uati ovola. \v 19 Goio e Iesus hilo egirua mai ele, eia goio veia girua mago “Amula gomai, amulua ge tilimuli eau. Eau ge vimari le amulua te la pululi la valalua me hatavivile soio te la matagaga.” \v 20 Tio oio moli ovola egira hiliti taro molia la vuo tegirua, egira goio tilimulia. \p \v 21 E Iesus goio tuga lou soio, eia goio poga lou egira e tau me tari ilua, e Iakob me Ioanes, e tama girua e Sebedi, egite me tama girua oio poupou te la uaga, egite holoholo la vuo tegiteu, e Iesus goio tola egirua. \v 22 Oio moli ovola egira hiliti taro molia la uaga tegiruale, hiliti taro tai e tama girua, egira goio tilimuli e Iesus. \s1 E Iesus pou tavu la igogolu tetala \r (Luk 6:17-19) \p \v 23 E Iesus goio valolo tatuga te la maututula te la gale e Galilea, eia vimari la valalua me hatavivile oio te la luma la lotu te la maututula isasasa, eia valolo egiteu te la valolo ale taritigi te la guluvi la pulolou la matagagala te La Tahalo Uru, eia vimahuli tai egiteu te la mata la ilea tomi ale igo barabara egiteu. \v 24 Tio e Iesus igogolu mai ele, la rerela taliti soio te la maututula tomi oio la gale e Siria, egite lolo la rerela mai ele, egite bolea egiteu tomi ale lea barabara, la vovo giteu ligiligi, egiteu tai ale la hitu ale kama kokora pou tegiteu, egiteu ale e dododo igoa, egiteu tai ale la tuha giteu maubati, eia goio vimahuli tomi egiteu. \v 25 Tio la valalua tomi me hatavivile e Galilea, egiteu tai ale loio la gale e Dekapolis, egiteu tai ale loio e Ierusalem, egiteu tai ale loio e Iudea, egiteu tai ale loio la galele Iordan loio, egiteu tomi la valalua me hatavivile mapaiti ele goio hiliti, egite tilimuli e Iesus. \c 5 \s1 E Iesus valolo oata te la varu la gove \p \v 1 E Iesus hilo la valalua me hatavivile mapaiti tilimulia, eia goio tie soata te la gove, eia goio pou otalo. Goio egiteu la valalua la vimari tetala tilimulia soio, egite goio tetala, pou, \v 2 eia goio soko la vimari soio tegiteu maie: \s1 La pulolou la balavala te La Tahalo Uru \r (Luk 6:20-23) \p \v 3 “La valalua me hatavivile ale rovitia veia egite pou la savelela te la kalulu giteu, egite balava seseleti, la vuhula egite sau tolati la pulolou la matagagala te La Tahalo Uru. \p \v 4 “Egiteu ale igoie egite pou moli la iloburukola te la pulolou tegiteu omai te la maututula, egite balava seseleti, la vuhula La Tahalo Uru ge vitahoa giteu. \p \v 5 “Egiteu ale vibisi la isa giteu veia egiteu la bilalaha moli te La Uru, egite balava seseleti, la vuhula La Tahalo Uru ge sugu taro la maututula tomi me la magasa tomi soio tegiteu. \p \v 6 “Egiteu ale vagari tavu la vulovulo ale matata, mai la tahalo ale vitolo eia masaga la ilali, me la tahalo ale malehu eia masaga la lalu, egiteu aleie balava seseleti, la vuhula mulimuli egite ge maru tataho. \p \v 7 “Egiteu ale egite rovi sesele la vulovulo la gilogo, egite balava seseleti, la vuhula La Tahalo Uru ge gogo tai egiteu. \p \v 8 “Egiteu ale la gabutatalala tegiteu maroka sesele, egite balava seseleti, la vuhula egite ge hilo sesele La Tahalo Uru. \p \v 9 “Egiteu ale egite vimalu tataho la valalua me hatavivile veia egite tomi ge vipuhi tigi tataho, egiteu aleie balava seseleti, la vuhula La Tahalo Uru ge toi legiteu e latatula sesele. \p \v 10 “Egiteu ale poga la iligiligi oio te la vulovulo giteu ale matata, ale la valalua gima egiteu ovola, egiteu aleie balava seseleti, la vuhula egite sau tolati la pulolou la matagagala te La Tahalo Uru. \p \v 11 “Mai la valalua me hatavivile hilo amutou, egite viligi tai amuto, egite vikara barea mutou te la vulovulo mutou ale taritigi, ale egite ge igoa mutou maie, amuto balava seseleti. \v 12 Taritigi amuto ge sagege moli, amuto ge lege sisigi, la vuhula amuto sau tolati la mapa ale uru sesele eia tabuli taitali amutou oata te la ilo la lage, la vuhula egite viligi tai egiteu la bilalaha te La Uru, egite igo gegeru tai egiteu mai ele te la imamala ale pala.” \s1 La tahalo te Kraist eia mai la mimila, eia mai tai la matagaga \r (Mark 9:50; Luk 14:34-35) \p \v 13 Tio e Iesus goio vei taia giteu la vikarara la tilovo isa te la vulovulo la vipuhi tigila maie “Amutou ale taku, amuto mai la mimila ale igo malama la ilali. Amuto ge veipala la vulovulogu soio te la valalua me hatavivile, me oio vola la pulolou te la valalua me hatavivile te la maututula eia ge taritigi. Eala moli mai la mimila ale etato lotoa eia kati mamasi tigi, la gauru ouka oio ale etato koramulia ge igo mamasi loua ovola. Eia kati koramulia ge vimalama la ilali, eala egite ge tigitaroa, la valalua me hatavivile ge soa kuru molila la vaha giteu. \p \v 14 “Amutou ale taku, amuto la matagaga te la maututula. Mai la mautu isasa egite mou oata te la varu la gove, eia kama koramulia veia la mautu ale eia ge tabuli kokovu te la mata la valalua, ouka. La mata giteu ge tolo tatolea ovola. Mai tai amutou ale taku, la valalua ge hilo amutou, egite ge matagaga. \v 15 Mai tai la valalua ge vitagu la lam tegiteu, egite kama ge tau robo loua veia la luma ge maligoma lou, ouka. Egite vitagua, egite haratili saea oata, me oio vola egiteu ale pou oio te la lumale, egite ge matagaga. \v 16 Tio mai tai ele, eia taritigi pepeho veia amuto ge pou mai la matagaga taku soio te la valalua me hatavivile, la vulovulo mutou ale taritigi eia ge mai ale paga vei la valalua me hatavivile tomi, egite ge hilo la vulovulo mutou ale taritigi ele, egite ge vaisale pepeho e Tama mutou oata te la ilo la lage. \s1 La merera la viputumulila te La Tahalo Uru \p \v 17 “Amuto umala gabutatalea veia eau sibitala omai veia eau ge vali boru la viputumulila te Moses me la vimari tai tegiteu la bilalaha ale pala, ouka. Eau sibitala moli veia ge vipuru la merera te ururu tomi ele. \v 18 Eau vei seselea mutou, kara te la mori me la magasa ge kokovu, la merera isa oilo te la kekesi te ururu kama ge kokovu. La mata la pen isa bisi oio vola, la mata la buk isa tai, kama ge kokovu, ouka viruru. Eia ge tabuli moli kara ale La Tahalo Uru ge igo seselea, eia ge pusese muli tomia ge kaluvu. \v 19 Eala eia matagaga tai mai ele veia mai la tahalo isasa eia ge polo la merera isa bisi oilo te la viputumulila te ururu, me eia tovo tai la valalua ovola veia egite tai ge poloa, eia ge la tahalo bulalahu moli oio te la pulolou la matagagala te La Tahalo Uru. Eala moli la tahalo ale ge tilimuli tomi la viputumulila te ururu me eia tovo tataho tai la valalua ovola, veia egite ge roromuli tataho la merera te La Uru, la tahalo alele la isala ge uru pepeho te la pulolou la matagagala te La Tahalo Uru. \v 20 Ale eau vei seselea mutou, mai la vulovulo mutou eia kama ge muga tegiteu e pariseo me tegiteu la mulugaluga tamutou, amuto kama koramulia ge goilo te la pulolou la matagagala te La Tahalo Uru. \s1 La vimari te la vulovulo la hate mamasila \p \v 21 “Amuto rovitia veia la merera te Moses alaurati te ururu veia maie ‘Amuto umala ge bilibili la tahalo veia eia ge peho, mai isasa ge bili isa la tahalo, amuto ge vimagiria te la vigagiala.’ \v 22 Eala moli eau ge veia mutou maie: Mai la tahalo isasa la hatela mamasiale tabarala, eia tai ge magiri te la vigagiala. Mai isasa ge vile mamago sesele e tabarala mago ‘Eme paua viruru’, taritigi la tahalo ale ge rovia veia eia hagagaviti ge vilua te la havi ale uru la kaluvula ge ouka. \p \v 23 “Mai eme ge abi la vaabila taume soio te La Tahalo Uru oio te la luma la lotu, me eme gabutala rivu la iruru taume ale magiriti kabili tamulua me tabaramu, \v 24 taritigi eme ge piligi muga la vaabila taume, eme ge goio te tabaramu, amula ge vimatata muga la iruru ale magiri kabili tamulua, tio mulimuli eme ge goio abia la vaabila taume soio te la luma la lotu, eme ge abia La Tahalo Uru. \p \v 25 “Mai la tahalo isasa veia ge veipalame te la luma la vigagiala, taritigi eme ge igo harari moli, ale amula so vitilimuli te la gauru, taritigi amula ge lapu matagaga muga la merera tamulua. La vuhula la tahalo alele eia souka ge vagoilome te la tahalo la ilolo la vigagiala, eia ge bahame soio te la luma la kilisi, egite ge kapi robome oilo vola, eme ge koratio. \v 26 Ale eau vei seselea mutou, eme kama ge vulo taro la igototolola te La Tahalo Uru kara ale eme ge vimatata la iruru tomi taume ale vipou baa amulua me eia ale veipalatime soio te la viputumulila. \s1 La vimari te la vulovulo la igo gegeru la taulaila \p \v 27 “Amuto rovitia veia la merera te Moses eia pouti palati kara igoie, eia maie ‘Amuto umala ge igo gegeru la taulaila.’ \v 28 Eala moli eau veia mutou maie veia mai eme ge hilo isasa la tavile, la hatemu raga tavua, eme mai ale igoti la iruru vikapopo leia oilo te la gabutatalala taume. \v 29 Mai la matamu te la galemu e gata eia ge virurume, taritigi eme ge suba taroa, ge pigia, la vuhula eia taritigi veia la vovomu bakisi moli ge vilua, la vovomu tomi souka ge vilua te la havi ale uru la kaluvula ge ouka, ale La Uru ge pigi egiteu la tahalo la iruru sotalo vola. \v 30 Mai tai la limamu e gata ge virurume, taritigi eme ge barautu taroa, ge pigia, la vuhula eia taritigi veia la limamu moli isasa ge vilua, la vovomu tomi souka ge vilua te la havi ale uru la kaluvula ge ouka, ale La Uru ge pigi egiteu la tahalo la iruru sotalo vola. \s1 Etato umala ge vipou baa te la taulaila \r (Matiu 19:9; Mark 10:11-12; Luk 16:18) \p \v 31 “La merera te Moses isa lou soio te ururu, eia pouti palati kara igoie, eia maie ‘Mai ge la tahalo isasa eia masagea veia ge tou e rutula, taritigi eia ge vimatata muga la vipou baala tegirua me rutula oio te la vigagiala, eia ge matagaga mai ele veia la tavilele eia pala taulai, e haruala toutia.’ \v 32 Eala moli la merera taku te la taulaila eia isapolo te aleie, eia maie: Mai la tahalo isasa eia ge tou bulalahu moli e rutula, eala moli e rutula kama ruru te la tahalo isasa, la tahalo alele eia viruru taiti e rutula, la vuhula mulimuli e rutula ge taulai polo lou, ale eia mai ale ruruti soio te la tahalo isapolo ale kama e haruala, la vuhula la taulaila eia tikumu. Mai tai la tahalo isasa eia ge puli la tavile ale e haruala toutia, eia tai poloti la viputumulila te La Tahalo Uru te la taulaila. \s1 La vimari te la vituri la lima soata \p \v 33 “La merera isa lou te Moses eia pouti palati te tutubu mutou kara igoie, eia maie ‘Amuto umala ge vituri bulalahu moli la lima mutou soata veia amuto ge giriri vagari la visigolola tamutou. Mai amuto vituri la lima mutou soata, amuto ge vikara sesele, amuto umala ge visigolo lou te la merera ale sesele amuto veitia te la mata La Tahalo Uru, eia tikumu.’ \v 34 Eala moli la merera taku te la vituri la lima soata, eia maie: Amuto umala ge vituri la lima mutou soata te la mori veia la merera tamutou eia sesele oata te la ilo la lage, umala viruru, la vuhula la ilo la lage ale la pulolou la uru te La Tahalo Uru, amuto umala ge toi tatavua. \v 35 Amuto umala tai ge turi sotalo te la magasa veia la merera tamutou eia sesele, umala viruru, la vuhula la magasa eia la muli la vaha La Tahalo Uru ale eia vitahobo la vahala ovola. Umala tai veia amuto ge vituri la lima mutou soio la mautu uru e Ierusalem, umala viruru, la vuhula eia la mautu la marokala te La Uru gatou ale vagari. \v 36 Umala tai veia amuto ge turi soata te la gama mutoue, umala viruru, la vuhula eme la tahalo bulalahu moli, mai eme sisiti, eme kama koramulia veia ge vulo la ivumu isa veia eia ge parakukuru lou, me mai tai la ivumu soukama sisi, eme kama koramulia veia ge vulo la ivumu isa veia eia ge kea, eala la merera taume ale eme toi seselea oata te la gamamu, eia mai la merera bulalahu moli, eia kama tikumu. \v 37 Eala moli la merera la vitikumula tamutou soio tegiteu e tabarabara mutou ge matata moli maie: Mai eme ge vei mago ‘Elo’ tio eme ge vitikumu la merera taume maie mago ‘Ee, eia sesele.’ Me mai eme ge vei mago ‘Ouka’ tio la vitikumu la merera taume ge maie mago ‘Ouka, eia ouka viruru.’ Mai la merera isasa eme ge toia eia ge tovosele solagu te aleie, ale la visigolola ale loio te Satan. \s1 La vimari te la kolibara la iruru \r (Luk 6:29-30) \p \v 38 “La merera isa lou te Moses soio te ururu, eia tabuli moli kara igoie, eia maie ‘Amuto ge koli la mataliso la tahalo isasa me la matalisole isasa, amuto ge koli la livo la tahalo isasa me la livole isasa.’ \v 39 Eala moli la vimari taku ovola eia isapolo te aleie. Ale eau veia mutou te la kolibara la iruru maie: Mai egite ge sabala la galemu e gata, eme ge vulo lou, egite ge sabala tai la galemu e meru. \v 40 Mai la tahalo isasa eia ge veipalame te la luma la vigagiala veia ge vikaluvu la golugolu tomi taume, veia ge lagi taro tai leme la lavalava ale eme kisia te la kabilimu, taritigi eme ge abiala la golugolu tomi taumele, la lavalava, la kairobola tai taume, eia ge vitugea, korati ele. \v 41 Mai isa ge totolo tavume veia amula ge vitilimuli te la gauru veia eme ge boleala la tabule tetala ale tikumu veia amula ge tuga mai ele la baa malau bakisi, tio eia taritigi veia amula ge vitilimuli moli, eme ge boleala la tabule tetala la baa malau kara polo la baa ale eia totolo tavume ovola veia eme ge kolia. \v 42 Mai la tahalo isasa eia ge kakame la paga isasa taume veia eme ge abiala, eme umala vitoutouala, taritigi eme ge abi moliala. Mai la tahalo isasa eia masagea veia ge abi muga la golu isa taume, me la uati ilua tai taume, veia ge abi rivuamu mulimuli, eme umala ge kisu taroa, eme ge abi moliala mai ale eia masagea. \s1 Etato ge gogo moli egiteu ale gima etatou \r (Luk 6:27-28,32-36) \p \v 43 “La merera te Moses palati te tubu mutou kara igoie eia maie ‘Amuto ge gogo e tabara mutou, me amuto ge vile egiteu la gima tamutou.’ \v 44 Eala moli la merera taku soio tamutou eia kama mai aleie. La merera taku eia maie, veia taritigi amuto ge gogo egiteu ale gima amutou, amuto ge kaka tavu La Tahalo Uru veia eia ge suli egiteu ale igo gegeru amutou. \v 45 Mai amuto ge tilimulia maie, amuto ge e latatu La Tahalo Uru, e Tama mutou ale pou oata te la ilo la lage, eia baha la haro, eia paga vei la valalua ale kama kokora, egiteu la valalua ale taritigi tai. Eia visibitala tai la hura, eia pu sotalo tavu egiteu la valalua ale matata eia suli egiteu, me eia pu sotalo, eia suli tai egiteu la valalua ale kama matata. \v 46 Mai amuto ge gogo moli egiteu ale gogo amutou, La Tahalo Uru kama ge abia mutou la mapa te la vulo mutou aleie, la vuhula egiteu la tahalo la iruru tai igigoa mai ele, mai egiteu la valalua la ilabi la takes. \v 47-48 Eia mai tai aleie, mai amuto ge la haro molia giteu e tabarabara mutou, la vulo mutou aleie eia isapolo mave? Egiteu la valalua la maligoma igigo tai la vulo giteu mai ele. Eala moli eau masagea veia amuto ge maroka viviu te la vulovulo mutou, mai e Tama mutou oata te la ilo la lage, eia maroka viviu. \c 6 \s1 La gauru la visuli soio tegiteu ale pou la savelela \p \v 1 “Amuto ge baumuli amutou, amuto umala ge igo la vulovulo mutou ale taritigi soio te la mata giteu la valalua me hatavivile veia egite ge hiloa, veia egite ge vei tataho amutou veia amutou la tahalo me la tavile la lotu sesele. Mai amuto ge igoa mai ele, amuto kama ge sau tola la mapa la vulovulo mutou ale taritigi ele oata te La Tahalo Uru. \p \v 2 “Mai amuto ge suli egiteu ale pou la savelela la vaabila tamutou, amuto umala ge veipalea mai la tahalo ale pusu la vaivai, veia la rere mutou ge tali. Mai egiteu la valalua la visigologolola, egite igoa oilo te la luma la lotu, oio tai te la mata vasosole la gauru, veia la valalua me hatavivile ge vaisale egiteu. Ale eau vei seselea mutou, la mapa giteu eiala moli ele, mai la vei tatahola, egite sau tola kaluvutia. Oata te La Tahalo Uru egiteu la mapa ge ouka. \v 3 Eala moli mai amuto ge suli egiteu ale pou la savelela, umala virere taitali la isamu ovola veia ge veipala la vulomu ale eme igoa giteu, taritigi eme ge igo kokovu molia. \v 4 Eala eia matagaga mai ele veia eau masagea veia la visuli tamutou eia ge tabuli kokovu tataho mai ele, isa kama ge rovia. Mai ge mai ele, La Tahalo Uru eia rovia la igogolu tomi ale amuto igo kokovua, eia ge kolia soio tamutou mai la vulo mutou ale taritigi ele. \s1 La gauru la kilaka \r (Luk 11:2-4) \p \v 5 “Mai amuto masagea veia amuto ge kaka, amuto umala ge igoa mai egite la valalua la visigologolola, egite magiri oilo te la luma la lotu, oio tai te la mata vasosole la gauru, veia la valalua me hatavivile ge hilo egiteu, eala moli eau vei seselea mutou, la mapa giteu eiala moli ele, mai la vei tatahola, egite sau tola kaluvutia, la mapa giteu isa lou ge ouka, \v 6 Eala moli mai amuto masagea veia amuto ge kaka, amuto ge goilo te la luma tamutou isasasa, amuto ge goilo te la kapiutu ale soililo kililili, amuto ge kapi robo la mata, amuto ge pou kokovu mai ele ge kaka tavu e Tama mutou, ale etato kama hililoa. Me e Tama mutou eia hilohilo la igogolu tomi ale etato igo kokovua, eia ge hilome, eia ge vibalavame. \v 7 Mai amuto ge kaka, amuto umala ge vikara bulalahu mai egite la valalua ale egite kama rovi la lotu, la vuhula egite gabutalea veia la kilaka tegiteu ale malau pepeho, La Tahalo Uru ge lolo egiteu. \v 8 Amuto umala mulimuli la vulovulo giteu ele, la vuhula e Tama mutou eia rovitia la golugolu tomi me la visuli tomi ale amuto savelea. Amuto souka kaka, eala moli eia rovitia veia ge suli amutou oio vola. \p \v 9 “Mai amuto ge pou te la kilaka, amuto ge kaka maie: \li1 Tama miteu, eme pou oata te la ilo la lage, \li1 taritigi amite ge togo la isamu, \li1 \v 10 taritigi veia la valalua me hatavivile tomi \li1 ge roromuli la masasagala taume, \li1 mai tai egiteu la angelo oata te la ilo la lage \li1 egite roromuli tatahome. \li1 \v 11 Taritigi eme ge abia miteu la ilali \li1 ale koramuli amiteu te la haro ale igoie. \li1 \v 12 Eme ge vimavulaha amiteu te la iruru tamiteu \li1 mai sesele amiteu vimavulaha egiteu \li1 ale igoti la iruru soio tamiteu. \li1 \v 13 Eme umala ge sugu taro amiteu \li1 soio te la gima tamiteu, \li1 eia soukama ge tovo lalai la tautaulailo tamite. \li1 Eala moli eme ge vimahuli amiteu \li1 taro la limale Satan. \li1 (La Viputumulila taume, la vagagarila taume, \li1 la matagagala taume, eme sekela moli sau tolea, \li1 la tapasila ge ouka. Amen.) \p \v 14 “Mai sesele amuto ge vimavulaha taro la iruru tegiteu la valalua me hatavivile ale egite igotia soio tamutou, e Tama mutou oata te la ilo la lage eia ge vimavulaha taro tai la iruru tamutou ale amuto igotia. \v 15 Eala moli mai amuto kama ge vimavulaha taro la iruru te la valalua me hatavivile, e Tama mutou tai kama ge vimavulaha taro tai la iruru tamutou. \s1 La vulovulo la peremula \p \v 16 “Mai amuto ge peremu veia ge vitikumu lou la kilaka me la lotu tamutou soio te La Tahalo Uru mai ele, amuto umala ge mata miale mai egiteu la tahalo la visigologolola. Egite mata miale veia la valalua me hatavivile ge hilo egiteu veia egite peremu, egite vei tataho egiteu ovola veia egite la tahalo la lotu sesele. Eala moli eau vei seselea mutou, la mapa giteu eiala moli ele, egite sau tolatia, mai la vei tatahola te la valalua me hatavivile, egite kati ge sau tola lou la mapa te la peremula tegiteu, oukati. \v 17 Eala moli la vimari taku ovola, eia maie: Mai eme ge peremu veia eme ge vitikumu la kilaka taume, taritigi eme ge litu la lagumu, eme ge abiri la ivumu, sibili, \v 18 eme ge mata kaseka mai ele veia egite ge hilome veia eme kama peremu, eala moli e Tama mutou oata, ale etato kama hililoa, eia ge hiloa, eia rovia. La Tahalo Uru ale hililo la igogolu tomi ale etato igo kokovua, eia moli ge kolia soio taume mai la vulomu ale taritigi ele. \s1 La tilalau ale sesele \r (Luk 12:33-34) \p \v 19 “Amuto umala ge vagari veia ge tau vikapopo la golugolu ale taritigi te la mahulila tamutou ale igoie omai te la maututula veia ge suli la mahulila tamutou mai ele. La vuhula la iraragila tamutou ale maie ge kaleso, la sasabe me kososuke tai ge koroa, egite la tahalo la pakalila tai ge sile soilo la luma ge pakali taia, eme kati ge sau tolea. \v 20 Eala moli eia taritigi pepeho veia amuto ge tau vikapopo la iraragila ale koramuli la pulolou tamutou oata te la ilo la lage, la vuhula la tilalau te la kalulu mutou mai ele, eia sesele, eia kama ge kaleso, e kososuke me la sasabe tai kama ge koroa, la tahalo la pakalila tai kama ge sile la luma ge goilo ge pakalia, la vuhula eia la tilalau ale tabuli talime oata te la ilo la lage, eia kama ge kaluvu. \v 21 Eala moli la gabutatalala taume eia ge tivura moli soio te la mautu ale la iraragila taume tabuli oio vola. \s1 La mata gatou eia la matagaga te la vovo gatou \r (Luk 11:34-36) \p \v 22 “La mata gatou, eia la matagaga te la vovo gatou, mai la mata gatou eia matagaga tigi, eia maiti la vovo gatou tomi eia matagaga tataho, etato maroka tigi. \v 23 Eala moli mai la mata gatou eia kama matagaga, eia mai ale igo maligoma la vovo gatou tomi, etato kama koramulia ge maroka. Me mai tai ele, mai la mari taume oilo te la gabutatalala taume eia kama la mari ale sesele, mai la matagaga te la kalulu, ale la matamu mai ale masosori moli, eme pou te la maligoma. Tio me la maligoma taume ele eia ge uru pepeho! \s1 Etato kama koramulia ge gabu vauru La Uru veia ge gabu vauru tai la ilabi la uati \r (Luk 12:22-31; 16:13) \p \v 24 “Eia kama koramulia veia la tahalo isasa eia ge la bilalaha te la mulugaluga ilua. La vuhula eia ge roromuli isasa, me isasa eia ge muku pilea. Me eia ge suli tataho la igogolu te isasa, me isasa eia ge igo silaha taroa. Mai tai ele, amuto kama koramulia veia amuto ge la bilalaha te La Tahalo Uru, eala moli la gabutatalala tamutou ge uru te la ilabi la uati. \s1 Etato ge piligi taro la vulovulo la hate ragala me la gabutala papaila \p \v 25 “Eala, la vimari taku soio tamutou eia maie: Umala amuto ge gabutala papai te la pulolou tamutou te la mahulila ale amuto sau tolea omai te la maututula, veia amuto ge vei mago ‘Etato ge abi la ilali ove? Etato ge liu la rova?’ Eala moli amuto umala gabutatala papapai te la mahulila te la vovo mutou veia amuto la kairobola ouka. La mahulila moli ale amuto sau tolatia eia taritigi, la gabutala papaila tamutou te la paa muli la ilali, eia ge vailo buruko lou amutou, amuto kamati ge pou la sagegela te la mahulila ale taritigi La Tahalo Uru abitia mutou. La kulikuli tai ale etato kisia te la kabili gatou, eia mai la golu bulalahu moli. La vovo gatou moli ale etato vagari veia ge tovo roboa, eia la paga ale sesele, eia taritigi, eala moli la kulikuli ale ge kisia me la kairobola tai, eia la golu bulalahu. \v 26 Mai amuto ge hilo egiteu la malumalu, egite kama galugalu la ilali, egite kama ababi la ilali veia ge tau raragia veia egite ge alia te la imamala la vitolo. Eala moli e Tama mutou oata eia ababia giteu la ilali, me amuto gabutala mave, La Tahalo Uru eia kama ge gabu vauru amutou kara polo la vibaumulila tetala soio tegiteu la malumalu, ia? \v 27 Ere tamutou eia koramulia veia ge gabutatala la mahulila tetala veia eia ge solo loua veia eia ge mahuli malau lou bakisi? Ouka gologolo. Etato mahuli moli oio te la masasagala te Tama gatou. \p \v 28 “Me ilava amuto gabutala vagarito la kairobola tamutou ale amuto ge kaia veia amuto ge abi la kairobola ale taritigi oiove veia ge tokoromo la vovo mutou ovola e? Mai amuto ge gabutala la sese la obobu ale oio te la tia la hohoi, egite kama igo isa la igogolu, egite kusi bulalahu moli, \v 29 eala moli eau veia mutou, la tokoromola tegiteu eia marasa pepeho kara polo la marasa la tokoromola te la uru e Solomon alaurati. \v 30 Eia sesele, igoie la obu eia sese, mai galigeli la sesela ge talulu, egite ge pigia sotalo te la havi. Me amuto gabutala mave, amuto soioge veia La Tahalo Uru eia kama ge abia mutou la tokoromola me la kairobola ale koramuli la mahulila tamutou, veia la vibaumulila tetala soio tamutou eia kama ge kara polo la vibaumulila tetala soio te la sese la obobu, ia? La vuhula amuto kama la golu bulalahu mai egiteu la sese la obobu ale sese moli bakisi goio talulu lou. Amuto kama tahola la tautaulailo ale uru te la gabutatalala tamutou, ouka gologolo, la tautaulailo tamutou eia bisi agi! \v 31 Eala eau kama masagea veia amuto ge gabutala papai mago ‘Etato ge abi la ilali ove? Etato ge liu la rova? Etato ge abi tai la kairobola oiove?’. \v 32 Eia kama koramulia veia amuto ge gabutala papai mai ele, la vuhula egiteu la valalua la maligoma moli egite gabu tikumu la ilali, la lalu me la tokoromola tegiteu maie. Eala moli e Tama mutou oata, eia rovitia la savelela tamutou, me la golu ale mave amuto gege ovola. \v 33 Eala moli la golu isa moli sekela eia tikumu kara polo egiteu la golugolu tomi aleie, veia amuto ge paa muli vagari seselea veia amuto ge taholea, eia maie: Taritigi amuto ge rovi pala muga la pulolou la matagagala te La Tahalo Uru, me la vulovulola tai ale matata, tiele eia ge abia mutou la ilali, la lalu, la kulikuli tai, ale koramuli la pulolou tamutou. \v 34 Eala amuto umala ge gabutala papai la haro ale galigeli veia amuto ge mahuli mave ovola, la vuhula amuto soukama ge bole la iloburukola ale uru pepeho, la vuhula la gabutala papaila te la haro isasa eia koramuliti la haro moli aleie, ale galigeli ge la gabutala papaila ale isapolo lou ge sibitala koramuli la haro ale galigeli. Eala amuto ge pou moli la sagegela te la haroharo tomi, umala ge gabutala papai. \c 7 \s1 Umala tomu sasasae la vulovulo giteu e tabarabara mutou \r (Luk 6:37-38,41-42) \p \v 1 “Amuto umala tomu sasasae la vulovulo giteu e tabarabara mutou ale amuto muku pilea. \v 2 La vuhula la merera moli ale amuto ubiti la valalua oio vola, la merera moli alele La Tahalo Uru ge putu oli loua soio tamutou, eia ge ubi lou le amutou oio vola. La gabutatalala taume ale eme tomu sasae la vulovulole tabaramu ovola, La Tahalo Uru ge tomu sasae rivu lou la vulovulomu tai te la gabutatalala taume lou ele ale eme veia eme taritigi ovola. \v 3 Ilava eme hilo la moromoro isa bisi oio te la matalisole tabaramu, me eme kama hilo vutia la moromoro ale uru mai la bautu la obu, ale oio te la matalisomu ele, ia? \v 4 La matamu oiole paho la moromoro ale uru pepeho, ilava eme ge hiliti ge veiale tabaramu mago ‘Tabaragu, eme gomai, eau ge rauvei la moromoro oio te la matamu ele’? \v 5 Eme la tahalo la visigolola sesele, taritigi eme ge rauvei pala muga la moromoro uru oio la matamu ele, tio la matamu ge matagaga tataho koramulia eme ge hilo tigia la moromoro ale bakisi oio te la matale tabaramu ele. \p \v 6 “Umala amuto ge abia giteu la paia la ilali ale taritigi, mai la tahalo ale veia ge suli legiteu la valalua ale kama kokora la merera te La Uru ale maroka viviu, egite goio vile loua. Mai tai ele amuto umala pipigia giteu la bolobolo la tuali veia egite ge tokoromola, la vuhula egite ge soa kurua. Mai tai egite la paia, egite ge vulo liliu ge tolo lou amutou ale abia giteu la paga ale marokale. \s1 La tahalo ale vagari la kilaka \r (Luk 11:9-13) \p \v 7 “Mai amuto ge kaka tavu La Tahalo Uru, eia ge abia mutou la paga ale amuto kakea soio tetala. Mai la tahalo isasa eia ge vagari veia ge paa muli La Tahalo Uru veia ge rovia, eia ge sivuti seselea. Mai isasa eia ge ligiligi la mata veia ge kope sesele soilo veia ge pou te la pulolou la matagagala te La Uru, ale La Tahalo Uru ge kope seseleala la mata, eia ge tiroro soilo. \v 8 La vuhula la valalua me hatavivile tomi ale egite vagari la kilaka soio te La Tahalo Uru, egite ge sau tola sesele la mapa la kilaka tegiteu. Egiteu tai ale vagari la paa muli La Tahalo Uru, egite ge sivuti seselea. Egiteu tai ale vagari la iligi la mata, La Tahalo Uru ge kope seselea giteu. \p \v 9 “Ere tahalo sesele kabili tamutou, mai e latula ge kakea la ilali, eia ge abi moliale latula la uati veia e latula ge ali molia la uati ele? \v 10 Mai e latumu isasa tai ge kakame e tamala veia eme ge abiala la ia, mave eme ge abiala la pase? Ouka gologolo, eia kama koramuli viruru. \v 11 Mai tai ele, mai amutou la valalua ale kama kokora, eala moli amuto ababiale latatu mutou la ilali me la vaabila ale taritigi, amuto ge rovi tigi taia veia e Tama mutou oata te la ilo la lage, eia ge abi taia mutou la visuli me la vaabila ale taritigi pepeho, mai amuto ge kakea tetala. \v 12 La vulovulo tomi ale amuto masagea veia la valalua me hatavivile tomi egite ge igoa soio tamutou, tiele la vulovulo moli alele amuto ge igo taia giteu, ale la vuhu la viputumulila sesele te Moses alaura, me la vuhu la merera tomi tegiteu la bilalaha ale pala eia pala eia mai tai ele. \s1 La mata ale goilo te la mautu la mahulila eia bisi moli \r (Luk 13:24) \p \v 13 “Igo tigi amutou, amuto ge tiroro moli te la mata ale kapilikia, la vuhula la mata ale gotalo te la havi ale uru la kaluvula ge ouka, la mata ale eia uru, me la gauru oio vola eia matata, la valalua me hatavivile mapaiti oio polopolo ovola. \v 14 Eala moli la gauru ale goio la mautu la mahulila, eia bisi moli, la mata tai ale tirororo soilo vola, eia kapilikia, la valalua me hatavivile isasasa moli egite ge sivutia ge tiroro soilo vola. \s1 Etato ge baumuli etatou tegiteu la tahalo la visigologolola \r (Luk 6:43-44) \p \v 15 “Amuto ge baumuli tigi amutou tegiteu la tahalo la visigologolola, egite gomai visigolo amutou la vulovulo giteu isahari ale taritigi, egite vipuhi tataho la valalua me hatavivile tomi, eala moli te la gabutatalala tegiteu oilo egite mororosi mai la paia hou, egite masagea veia ge igo gegeru amutou. \v 16 Amuto ge rovi tigi egiteu te la vulovulo giteu ale egite veipalea. Mave, etato ge lulu la vavua la vaen te la mota ale ororoa e dahe, ia? Ouka, etato tai ge lulu la keme oio te la kaluga, ia? Ouka gologolo. \v 17 Mai tai ele, la obu ale tubu tataho, mai eia ge vua, la vavuala eia taritigi tataho, eala moli la obu ale posa rama eia ge vua, la vavuala kama taritigi. \v 18 La obu ale taritigi eia kama koramulia veia eia ge vua la vavuala kama ge kokora. Mai la obu tai ale kama kokora, mai eia ge vua, la vavuala tai kama koramulia veia ge taritigi, ouka viruru. \v 19 La obobu tomi ale egite kama vua tigi, la vavua giteu kama taritigi, La Tahalo Uru ge tolo taro egite, eia ge pigi egiteu sotalo te la havi. \v 20 Eala eia matagaga mai ele veia mai amuto ge hilo tigi la vavua la igogolu tegiteu la tahalo la visigologolola ale vimari gegeru amutou te la gauru ale kama sesele, tiele oio moli te la vavua giteu amuto ge rovi tataho egiteu te la vulovulo giteu ale egite veipalea te la mahulila tegiteu, me te la vavua la igogolu tai tegiteu ele. \p \v 21 “La valalua me hatavivile usu egite toi tataho la isagu maie mago ‘Eme La Uru taku sesele!’ Eala moli usu tegiteu ele ge galo te la tirorola soilo te la pulolou la matagagala te La Tahalo Uru. Eala moli egiteu la valalua me hatavivile tomi ale egite tilimuli sesele la masasagala te Tete, ale pou oata te la ilo la lage, egiteu moli alele ge goilo te la pulolou la matagagala tetala. \v 22 Te la haro la viputumulila te La Tahalo Uru, la valalua usu me egite hatavivile tai usu, egite ge hiliti, egite ge tahiau mago ‘Tahalo Uru, mave, eme kama hilo la igogolu tamiteu palae? Amite veipala la merera taume soio te la valalua me hatavivile, amite kumuli taro tai egiteu la hituhitu ale kama korakora te la vagagari la isamu, amite igo tai la golu la karutula usu tai lou ale isapolo sesele. Mave, eme kama gabutala amiteu, ia?’ \v 23 Eala moli te la haro alele eau ge sile pala molia soio tegiteu mago ‘Eau kama rovi gologolo amutou bakisi, ouka virurue, amutou la valalua me hatavivile la iruru, taritigi amuto ge hele taro eau gageie!’ \s1 La vikarara la tilovo te la tahalo ilua ale tigi la luma \r (Luk 6:47-49) \p \v 24 “Eala moli la tahalo ale ge lolo la merera taku tomi aleie, me eia ge roromulia veia ge tilimuli sesele tomia, eia mai ale vimagiriti la mahulila tetala oio te la uati. Mai la tahalo isasa, eia gabutatalea veia ge tigi la luma, eia goio vimagiri la luma tetala oata te la hate la uati. \v 25 La hura uru pu, la lalalu tomi hae, visogo tatavu, la lolovi tai sibitala vagari veia ge umu tavuvu la lumale, eala moli ouka, la luma kama tagogoro, la vuhula la tahalo ale tigia, eia vimagiritia oata te la hate la uati isa uru, la uati uru ele eia igo vagari la vuhu la sosole la luma tetala otalo te la magasa. \v 26 Eala moli mai la tahalo ale eia lolo la merera taku, eala moli eia kama gabu tikumua veia ge roromulia, eia mai sesele la tahalo ale paua, eia tigi la luma tetala oio te la magasa la mago. \v 27 La hura pu, la lalalu tomi tai hae, visogo tatavu, la lolovi uru tai sibitala veia ge umu tavuvu la luma, tiele la lumale tagogorotio, eia tagogoro sesele moli gotalo la magasa.” \p \v 28 Tio, e Iesus goio vikaluvu la merera tetala soio te la valalua me hatavivile, egiteu tomi loloa mai ele, egite karutu sesele te la merera tetala, \v 29 la vuhula eia kama tovo bulalahu egiteu mai egiteu la tahalo la mari ale mamuga egiteu, ouka, eia tovo egiteu mai la tahalo ale sau tola la mari ale tikumu sesele. \c 8 \s1 E Iesus vimaroka la vovo la tahalo isasa ale sereka gegeru \r (Mark 1:40-45; Luk 5:12-16) \p \v 1 E Iesus purusu loata te la gove ale eia valolo la valalua me hatavivile ovola, eia gotalo, la valalua me hatavivile mapaiti sesele egite tilimulia soio. \v 2 Tio la tahalo isasa, la vovola sereka gegeru, eia loio tegiteu la valalua me hatavivilele, eia tuga loio goio magiri te la lagule Iesus ele, eia goio toto tulu otalo, eia lagu tugu, togoa. Eia veiale Iesus mago “Tahalo Uru, mai eme masagea, eme koramulia ge vimaroka la vovogu.” \p \v 3 Goio, e Iesus sau te la vovo la tahalo ale serekale, eia veiala mago “Eau masagea, la vovomu ge maroka lou.” Tio oio moli ovola la serekale kokovu, la vovo la tahalole marokatio. \v 4 Goio e Iesus tutu toleala mago “Eme ge baumulime, eme umala ge veveiale isasa ale eau vimarokati lou la vovomu, umala. Eme ge goio moli te pris, eme ge vahilo leia la vovomu ele. Eme ge vahari la vaabila mai te la tahalo ale la vovola marokati lou, mai la merera te Moses veia, eme ge vaharia soio te la luma la lotu, eme ge igo la vaabila taume soio te La Tahalo Uru, la valalua me hatavivile tomi ge rovia veia la sereka taume kaluvuti, la vovomu marokati.” \s1 E Iesus vimahuli la bilalaha te la mulugaluga te ami isasa \r (Luk 7:1-10) \p \v 5 Tio, e Iesus goio la mautu e Kapernaum, la mulugaluga te la tala la tahalo la vaubi salatu sasa eia goio sibitala oio te Iesus veia ge kaka la visuli oio tetala, eia veiala mago \v 6 “Tahalo Uru, la bilalaha taku isasa eia lea, eia tabuli oio te la luma, la tatuhala mauba tomiti, la iligiligi tai uru pepeho.” \p \v 7 Goio, e Iesus goio veiala mago “Eau ge goio ge vimahulia.” \p \v 8 Eala moli la mulugalugale goio veiale Iesus mago “Tahalo Uru, eau kama la tahalo ale taritigi veia eme ge goilo te la luma taku, taritigi eme ge toi moli la merera soio te la bilalaha taku, eia ge mahuli. \v 9 Ale eau veia mai ele la vuhula eau rovi la vulovulo la iroromulila, eau la bilalaha tegiteu la uru taku, me eau tai babaha egiteu la tahalo la vaubi ale otalo taku. Mai eau ge baha isasa, eia ge tuga moli, eia kama ge tou, mai tai eau ge tola isasa veia eia ge gomai taku, eia ge roromuli moli, eia ge gomai taku, tio me mai eau ge vei taiale isasa mago ‘Eme ge igo la igogolu aleie’, eia ge igo molia.” \p \v 10 Tio, e Iesus goio lolo la merera tetala maie, eia karutu sesele, eia goio veia giteu la valalua me hatavivile egite tilimuliale, mago “Eau vei seselea mutou, eau souka sivuti la tau Israel isasa la tautaulailo tetala ge uru mai la tautaulailo te la tahalo aleie. \v 11 Ale eau veia mutou, mulimuli la valalua usu ge lomuli, usu tai ge loale malau, egite ge vikapopo me Aisak, me Iakob te la pou vikapopola oata te la pulolou la matagagala te La Tahalo Uru. \v 12 Eala moli la valalua me hatavivile e Israel ale te La Tahalo Uru sesele, egite lolo palati la merera tetala, egite rovi tomitia, usu tegiteu ele kama tilimuli tigi la masasagala te La Uru, eala eia ge pitaro egiteu sogala, egite ge pou te la maligoma ale uru, me oio vola egite ge tali pepeho, egite ge koro magegege, ge melimeli la togo giteu.” \p \v 13 Goio, e Iesus vikara kaluvu soio tegiteu mai ele, eia goio veia la mulugalugale mago “Eme ge tuga, La Tahalo Uru ge igoa mai sesele ale eme tautaulailoti ovola.” Tio oio moli ovola te la mata la haro moli alele, la bilalaha tetala eia mahuli. \s1 E Iesus vimahuli e loale Pita ale hatavile \r (Mark 1:29-31; Luk 4:38-39) \p \v 14 Tio, e Iesus goilo te la luma te Pita, eia hilo e loale Pita oilo mamavuta moli oio te la mulila, la vovola tivura pepeho. \v 15 E Iesus hiloa mai ele, eia goio sau moli te la limala, tio la ilea tetala goio kaluvu, la vovola maigi lou, eia goio hiliti, eia raragiale Iesus la ilali. \s1 La valalua me hatavivile usu e Iesus vimahuli egiteu \r (Mark 1:32-34; Luk 4:40-41) \p \v 16 Goio, la paga maulaviti, egite la valalua isahari goio guvi, egite vahari egiteu e tabarabara giteu isahari ale la hituhitu ale kama kokora pou oio tegiteu, egite vahari egiteu usu ale lea mai ele. e Iesus goio kumuli taro molia egiteu la hituhitu ale egite igo barati la mahulila tegiteu ele, eia ge vikara vakasa moli maie soio tegiteu, oio moli ovola egiteu la hituhitu ge hele. Eia goio vimahuli tai egiteu tomi ale lea. \v 17 Me la igogolu ale e Iesus igoa mai ele, eia vipuru sesele la merera te la bilalaha e Aisaia ale eia veipalea pala maie: \li1 La Uru vimahuliti etatou, \li1 eia bole taroti la ilea tegatou tomi. \s1 La vikararala soio tegiteu ale masagea veia ge tilimuli e Iesus \r (Luk 9:57-62) \p \v 18 E Iesus hilo la lolo la valalua me hatavivile uru egite magiri galilia, tio eia goio veia giteu la valalua la vimari tetala veia egite ge goio te la gale la magolilo loio. \v 19 Tio la tahalo la mari isasa eia goio te Iesus, eia veiala mago “Tahalo La Vimari, eau ge mulimulime soio te la maututula tomi ale eme ge goio vola.” \p \v 20 Eala moli e Iesus baoliala soio mago “Egiteu la paia hou, la hova giteu isasasa otalo te la magasa, egite momou oio vola, me egiteu la malumalu tai oata te la baa, la loa giteu tai isasasa oata te la obobu egite mamavuta oio vola, eala moli eau e Latu La Tahalo, eau la muligu ouka ale eau ge mavuta oio vola, ouka sesele.” \p \v 21 Goio, la tahalo isa tegiteu la valalua la vimari te Iesus ele, eia goio te Iesus, eia kaka e Iesus mago “Tahalo Uru, eau ge tilimulime, eala moli eau kakame veia eau ge pou tali muga e tete ge peho, tio eau ge mulimulime.” \p \v 22 Eala moli e Iesus goio veiala mago “Korale, egiteu ale so popou te la maligoma, egite mai ale pehoti, egiteu moli ele ge ulai la pileleho giteu ele. Taritigi eme ge gomai, eme ge tilimuli eau.” \s1 E Iesus mera taro la lolovi me la mago \r (Mark 4:35-41; Luk 8:22-25) \p \v 23 Tio, goma, e Iesus vikapopo me egiteu la valalua la vimari tetala, egite hiliti, egite goio sae te la uaga veia ge polo soio te la gale la magolilo loio. \v 24 Egite goio soko la tuluga mai ele, egite so kabili posa moli, egite karutu la ave uru sesele eia sibitala, la mago tai gasi pepeho, eia hagagaviti ge pigi robo la uagale, eala moli e Iesus kama gabua, eia oio mavuta moli. \v 25 Eala moli egiteu la valalua tetala goio paloa, egite veiala mago “Tahalo Uru, eme ge suli etatou, etato ge sululu gageie!” \p \v 26 Goio, e Iesus kolia soio tegiteu mago “Amuto tataga la rova e? La tautaulailo tamuto bakisi ouka e?” Tio eia vikara soio tegiteu mai ele, eia goio hiliti, eia mera taro la lolovi me la mago, me oio moli ovola la lolovi goio tabou, la mago goio malilo. \p \v 27 Tio, egite la valalua tetala hiloa, la gabutatalala tegiteu marapa, egite goio vitahi baololi lou egiteu mago “La tahalo aleie, eia mave? Ere tahalo maito, la lolovi me la mago egira roromulito la vikararala tetala e?” \s1 E Iesus kumuli taro la hituhitu ale kama kokora \r (Mark 5:1-20; Luk 8:26-39) \p \v 28 Tio, e Iesus mite goio guvi oio te gale la magolilo e Galilea loio, oio te la gale sesele tegiteu e Gadarea. Egite so guguvi moli ele, egira la tahalo ilua ale la hituhitu ale kama kokora pou tegirua, egira loio te la liba, egira gomai poga tavu e Iesus. Eala moli egira taho luale, egira hate vuraga sesele, la valalua me hatavivile kamati tilimuli la gauru aleiele, egite souka ge poga egirua. \v 29 Eala moli egira goio tola agagi oata maie mago “Eme e Latu La Tahalo Uru, eme masagea ge igo amilua mave? Eia soukama la imamala la viputumulila, eala moli eme guviti veia ge viligi hari amilua, ia?” \p \v 30 Eala moli la karakara la bolo isa uru soio malau bakisi, egite la bolobolo magirigiri, egite alali. \v 31 Goio egite la hituhitu goio kaka gogogo e Iesus mago “Mai eme ge kumuli taro amiteu gageie, taritigi eme ge baha taro moli amiteu soio, amite ge goilo tegiteu la karakara la bolobolo aleie.” \p \v 32 Goma, e Iesus lolo la kilaka tegiteu mai ele, eia goio kumuli taro egiteu mago “Tuga!” Tio egiteu la hituhitu ale kama kokorale, egite goio hele taro egira taho luale, egite goio goilo tegiteu la bolobolole. Tio egiteu la bolobolole goio hele mata veveiti, egite goio hele bura sotalo te la vai, egite goio tilomu tomi olau la mago, egite peho tomitio. \v 33 Goma, egite la valalua ale vibaumuli la bolobolole, egite goio hele, egite goluma te la mautu. Egite goio valolo egiteu la valalua me hatavivile, egite gilemuli taia giteu te la igogolu ale e Iesus igotia soio tegirua taho lua ale la hituhitu pou tegira, ale eia vimahuli egirua. \v 34 Tio egiteu tomi la valalua me hatavivile te la mautu ale uru ele, egite hiliti, egite goio paa muli e Iesus veia ge hiloa. Egite goio poga e Iesus soio, egite kaka gogogo vagaria veia eia ge hiliti taro la gale tegiteu, eia ge goio te la gale isapolo. \c 9 \s1 E Iesus vimahuli la tahalo isasa la vovola mauba tomi moli \r (Mark 2:1-12; Luk 5:17-26) \p \v 1 Tio, goio, e Iesus me egiteu la valalua tetala goio sae lou te la uaga tegiteu, egite goio beu rivua soio te la gale la magolilo loio te la mautu tetala sesele. \v 2 Eia gomai la mautu tetala sesele mai ele, goio la valalua isahari gomai, egite bole la tahalo isasa soio te Iesus, eia lea, la vovola mauba tomi moli, egite vitabulia te la mulila. Eala moli e Iesus hilo egiteu la valaluale, la tautaulailo tegiteu soio tetala uru sesele, tio eia goio veia la tahalo ale leale mago “Latugu, eme ge sagege pepeho, la vuhula la iruru tomi taume eia mavulaha taroti eme!” \p \v 3 Eala moli egite la tahalo la mari isahari ale egite vimari la valalua la merera te Moses, egite oio magirigiri, egite loloa e Iesus eia vikara mai ele egite goio vei loua giteu mago “A ge, la tahalo aleie eia vikara gegerua La Tahalo Uru!” \p \v 4 Eala moli e Iesus rovitia la gabutatalala tegiteu ele eia goio veia giteu mago “Ilava amuto gabutatala la gabutatalala ale kama kokora mai ele oilo te la tia mutou? \v 5 Amuto veia la igogolu ale mave eia tikumu, veia eau ge veia la tahalo ale lea maie mago ‘La iruru tomi taume eia mavulaha taroti eme!’ Uka mai eau ge veiala mago ‘Eme ge hiliti, eme ge tuga’? Oilo te la vikararala iluale, amuto veia la merera ale mave sesele ge tikumu, veia eia ge vagari tai veia isa ge igoa? \v 6 Ale eia kama vagari veia eme ge toia soio te isasa veia la iruru tetala mavulaha taroti eia, eala moli eau masagea veia amuto ge rovia veia eau e Latu La Tahalo, eau sau tola la vagagarila omai te la maututula koramulia veia eau ge vimavulaha la iruru, eala eau veia ge vahilo le amutou gageie la vagagarila taku ele.” Tio eia veia giteu la merera tetala mai ele kaluvu, eia goio veia la tahalo ale leale mago “Eme ge hiliti, eme ge abi la mulimu, eme ge goio te la luma taume.” \v 7 Tio oio moli ovola la tahalole eia goio hiliti, tuga, eia goio te la luma tetala. \v 8 Eala moli la valalua me hatavivile tomi egite hiloa mai ele, egite taga, egite goio vaisale pepeho La Tahalo Uru ale eia sugu tarotia la tahalo la vovo isasa la vagagarila tetala ale uru sesele mai ele. \s1 E Iesus tola e Matiu veia eia ge tilimulia \r (Mark 2:13-17; Luk 5:27-32) \p \v 9 Goio, e Iesus hiliti taro la mautu tetalale, eia tatuga te la gauru, eia goio poga la tahalo isasa eia poupou oio te la luma ale la valalua pipigi la takes oio vola, la isala e Matiu. Tio e Iesus hiloa eia oio popou, eia goio veiala mago “Eme gomai, eme ge tilimuli eau.” Tio oio moli ovola e Matiu goio hiliti, eia tilimuli e Iesus. \p \v 10 Goio, egira vitilimuli soio te la luma te Matiu, egira pou. Tio egira alali oio te la luma te Matiu ele, egiteu la tahalo la ilabi la takes, me egiteu la valalua la iruru tai, egite loio sibitala, egite pou vikapopo me Iesus me egiteu la valalua la vimari tetala, egite ali vikapopo. \v 11 Goma, egiteu e pariseo isahari goio hiloa mai ele, egite goio veia giteu la valalua la vimari te Iesus mago “Ilava la tahalo la vimari tamutou eia ali vikapopo legiteu la valalua ale kama kokora, mai egiteu la tahalo la ilabi la takes, me egiteu la valalua la iruru tai, e?” \p \v 12 Tio, e Iesus goio lolo la vikararala tegiteu ele, eia goio veia giteu mago “Eau ali vikapopo me egiteu ele, la vuhula egiteu la tahalo la savelela, mai la tahalo ale mahuli tigi moli, eia kama lea, eia kama ge goio te dokta, egiteu moli ale lea, egite ge goio te la tahalo ale ge vimahuli egiteu. \v 13 Eala moli amutou e pariseole, amuto kama rovi bakisi la gilogo. Mai amuto ge goio ge vimari tigi lou te la merera te La Buk Tabu Ale Pala ale veia maie ‘Eau masaga moli la gilogo, eau kama masaga la vaabila ale amutou gutua oata te la poro.’ Eau gomai moli veia eau ge tola egiteu la valalua me hatavivile la iruru somai taku, ge vimahuli egiteu, eau kama gomai veia ge tola egiteu ale la vulovulo giteu matatata.” \s1 La vulovulo la peremula \r (Mark 2:18-22; Luk 5:33-39) \p \v 14 Goio, la valalua la vimari te Ioanes la tahalo la vuluhi, egite isahari tegiteu ele goio te Iesus, egite tahia mago “Ilava amiteu ale mulimuli e Ioanes, me egiteu e pariseo tai, amite vitikumu lou la lotu tamiteu soio te La Tahalo Uru me la vulovulo la peremula, eala moli egiteu la valalua la vimari taume egite kama peremu?” \p \v 15 Goio, e Iesus baolia giteu mago “Mai la tahalo isasa eia raragati ge taulai, eala moli eia so pou vikapopo me egiteu e tabarabarala, mave egite ge sagege roboa, uka egite ge ilo buruko? Ouka, egite kama ge ilo buruko, la vuhula la riau tegiteu la taulai halaba soloio pou vikapopo me egiteu ele, eala egite ge sagege moli. Eala moli mai mulimuli la valalua ge puli taro legiteu la tahalo tegiteu ele, eia kati ge pou vikapopo me egiteu e tabarabarala, te la haro moli alele egite ge ilo buruko, egite ge peremu, vigumu.” \p \v 16 Tio, e Iesus vikara kaluvu mai ele, eia goio vei loua giteu la vikarara la tilovo isa lou, te la valolo ale taritigi te la pulolou la matagagala te La Tahalo Uru eia sibitalati, eia tovoa soio te la kulikuli ale halaba maie mago “La tavile isasa eia kama ge abi la gale la kulikuli isa ale halaba, veia ge sahi robo la kulikuli ale mumugu, ouka, la vuhula ale halaba souka ge lapu botoa, me la kulikuli ale mumugu eia ge masile uru lou. Mai tai ele la valolo taku ale halaba eia kama koramulia veia ge vikapopo la valolo ale pala, eia mumugu. \v 17 Mai tai la tahalo isasa eia kama ge sigili la vaen ale halaba eia vagari, eia saesae, eia kama ge sahoa te la kulikuli la mee ale palati, eia kamati vagari. Mai eia ge sigilia ovola, la vaen ale halabale ge sae, la kulikuli la mee ge masile, la vaen ge pagegele, la kulikuli me la vaen tai ge kama kokora. Taritigi pepeho veia la vaen ale halaba, egite ge sigilia te la kulikuli la mee ale halaba, tio la vaen me la kulikuli tai ge taritigi tomi moli mai ele, mai la tahalo ale ge vulo halaba eia ge koramulia mai ele ge sau tola la merera taku ale halaba.” \s1 E Iesus vimahuli la tavile ilua \r (Mark 5:21-43; Luk 8:40-56) \p \v 18 Tio, e Iesus so vikarakara soio tegiteu ele, la tahalo la baumuli la luma la lotu tegiteu e Iuda eia sibitala, eia goio te Iesus, eia toto tulu otalo, lagu tugu, togo e Iesus mai ele, eia veiala mago “E latugu bisi hatavile oio lea bara sesele, eia hagagaviti ge peho, eala moli mai eme ge gomai, eme ge sau te la vovola, eia ge mahuli.” \v 19 Tio e Iesus loloa mai ele, eia goio hiliti, egira me la tahalole goio vitilimuli, egite la valalua la vimari tetala tai egite tilimuli egirua. \p \v 20 Goio, egira so tatuga moli ele, la tavile isa oio, la ilea la taio sibitala bibibi moli soio tetala palati, eia kama kaluvu la leavala savulusati gete lua. La tavilele tuga moli goio hagagavi moli te la pokele Iesus, eia goio pilau keke molia la gilesu la lavalava te Iesus ele. \v 21 Eala moli oilo te la gabutatalala tetala, la tavilele eia gabutalea maie “Mai eau ge pilau moli la gilesu la lavalava tetala, la ilea taku ge kaluvu.” \p \v 22 Eala moli e Iesus goio vulo gele rivu sotilu la pokela, eia hilo la tavilele, eia goio veiala mago “Latugu, eme umalati gabutatala papapai te la ilea taume uru ele, eme ge vagari moli, la vuhula la tautaulailo taume ale uru pepeho somai taku, eia vimahulitime.” Tio me oio moli ovola la tavilele goio mahuli. \p \v 23 Goma, e Iesus mira me la tau Iuda uru ele, egira goio vitilimuli soio la luma tetale, eia goio goilo te la luma tetalale, eia hilo la valalua me hatavivile mapaiti oio, egite pipigi la tilali mai la vulovulo giteu e Iuda lou, isahari pupusu e vigogo, isahari taitali, egite igo galololole. \v 24 Goio e Iesus mera taro egiteu mago “Amuto magiri ogala, la tavile bisi ele eia kama peho sesele, ale eia mavuta moli.” Eala moli egite lolo la vikararala te Iesus mai ele, egite goio lege vahi seselea. \v 25 Goio egite baha taro tomia la valalua me hatavivile kaluvu, tio e Iesus goio goilo te la ilo la luma ale la tavile bisi tabuli oilo vola, eia goio sau te la limala, la tavile bisi ele goio hilititio. \v 26 Tio me oio volale la rerele Iesus tali lahuti soio te la maututula tomi te la gale alele. \s1 E Iesus vimatagaga la mata kea ilua \p \v 27 Goio, e Iesus hiliti taro la mautu alele, eia tuga, la mata kea ilua goio tilimulia, egira goio tolea e Iesus mago “Emei e tubule Devit uru ele, eme ge gogo amilua!” \p \v 28 E Iesus goio goilo te la luma, egira la mata kea iluale tilimulia goilo tetala, e Iesus goio veia girua mago “Amula tautaulailo sesele taku veia eau koramulia ge vimatagaga la mata mulua, ka ouka?” \p Goio, egira koliala mago “Meie, Tahalo Uru!” \p \v 29 Tio, e Iesus goio sau te la mata girua, eia veia girua mago “La Tahalo Uru ge vimatagaga la mata mulua mai sesele la tautaulailo tamuluale!” \v 30 Tio oio moli ovola la mata girua goio matagaga, e Iesus goio tutu tolea girua mago “Amula ge baumuli tigi amulua, amula umala ge veipala la paga ale eau igotia soio tamulua igoie.” \v 31 Eala moli egira gali sogala, egira goio veipalea giteu la valalua me hatavivile tomi, la rerele Iesus taliti soio te la maututula tomi te la gale alele. \s1 E Iesus vimahuli la tahalo isasa la harela vikamu robo \p \v 32 E Iesus miteu goio gali sogala, la valalua isahari goio puli lou la tahalo isasa soio te Iesus, la hitu ale kama kokora pou tetala, la harela vikamu robo, eia kama vigagia. \v 33 E Iesus goio kumuli taro la hitu ale igo paueale, la tahalole goio vikaratio, tio la valalua me hatavivile goio hiloa, egite karutu pepeho, egite vei mago “A ge, alaurati kara igoie, etato kama hilo la paga isasa sibitala maie omai e Israel, ouka gologolo.” \p \v 34 Eala moli egiteu e pariseo isahari hiloa mai ele, egite goio vikara maie mago “Ale eia koramulia mai ele ge kumuli taro la hituhitu, la vuhula la mulugaluga tegiteu la hituhitu ale kama korakora eia pou tetala, eia abiala la vagagarila tetalale.” \s1 E Iesus gogo la valalua me hatavivile \p \v 35 E Iesus goio valolo tatuga te la maututula tomi, eia goilo te la mautu tegiteu isasasa, eia valolo la valalua me hatavivile oilo te la lumaluma la lotu tegiteu, eia valolo egiteu te la valolo ale taritigi te la pulolou la matagagala te La Tahalo Uru, eia vimahuli egiteu la mata la ilea tomi me la mata la iligiligi tomi ale igo bara la vovo giteu. \v 36 Eia goio hilo la lolo la valalua me hatavivile uru pepepeho, eia gogo sesele egiteu, la vuhula la gabutatalala tegiteu marapa, la pulolou tegiteu kama taritigi viruru, egite mai moliti egiteu la sip ale la tahalo la vibaumuli tegiteu ouka, egite paua vulovulo moli, egite tuga marapa lalahu. \v 37 Tio eia hilo egiteu mai ele, eia gogo pepeho egiteu la valalua la vimari tetala mago “Eia sesele, la ilali orivo te la mahuma matuhati, eia usu pepeho, eala moli la valalua ale igogolu orivo te la mahuma, egite kama usu. \v 38 Taritigi amuto ge kaka vagari e Taho La Mahuma eia ge baha taro la valalua me hatavivile usu lou ale ge luku la ilali tetala ale matuhati orivo te la mahuma tetala, egite ge vagari veia ge vagoilo la valalua me hatavivile mapaiti te la pulolou la matagagala tetala.” \c 10 \s1 La isaisa giteu la valalua la vimari te Iesus \r (Mark 3:13-19; Luk 6:12-16) \p \v 1 Goma, e Iesus goio tola vikapopo egiteu la valalua tetala ale savulusa gete lua, eia abia giteu la vagagarila tetala veia egite ge kumuli taro la hituhitu ale kama korakora, egite ge vimahuli tai egiteu ale lea te la mata la ilea tomi me te la mata la iligiligi tomi tai ale usu. \v 2 Eala moli la isaisa giteu la valalua la vimari te Iesus ale savulusa gete luale, egite maie: \li1 La mulugala, e Saimon, la isala isa lou e Pita, \li1 egira me tabarala e Andrew; \li1 e Iakob mira me tabarala e Ioanes, \li1 e tama girua e Sebedi; \li1 \v 3 e Pilip mira me Batolomeas; \li1 e Tomas mira me Matiu, ale ababi la uati la takes; \li1 e Iakob ale e tamala e Alpias, \li1 egira me Tadeas; \li1 \v 4 e Saimon ale egite veia eia la tahalo \li1 la hate paririla; \li1 e Iudas Iskariot tai, ale mulimuli sugu taro \li1 e Iesus soio tegiteu la gima. \s1 E Iesus baha egiteu la valalua la vimari tetala soio te la igogolu \r (Mark 6:7-13; Luk 9:1-6) \p \v 5 Goio, e Iesus baha taro egiteu la valalua la vimari tetala ale savulusa gete lua soio te la igogolu, eia viteteli egiteu, eia veia giteu mago “Amuto umala ge goio tegiteu la valalua ale isapolo, mai egiteu ale kama e Iuda, me egiteu e Sameria tai ele. \v 6 Taritigi amuto ge goio moli tegiteu la valalua e Israel, egite mai la sip ale ruruti soio la hohoi, amuto ge valolo muga egiteu ele. \v 7 Amuto ge goio tegiteu, amuto ge valolo egiteu maie ‘La pulolou la matagagala te La Tahalo Uru oata, eia hagagaviti ge sibitala.’ \v 8 Tiele amuto ge vimahuli egiteu ale lea, amuto ge vimahuli tai egiteu ale pehoti, egiteu tai ale sereka gegeru, amuto ge vimaroka egiteu, amuto ge kumuli taro tai egiteu la hituhitu ale kama korakora. Eala moli la vagagarila ale amuto sau tolea, eau abi molia mutou, eala eia taritigi veia amuto tai ge suli bulalahu moli la valalua me hatavivile tomi oio vola. \v 9 Amuto umala ababi la uati veia amuto ge tamamasia te la tuluga tamutou. \v 10 Amuto umala palavavai la palo te la tuluga tamutou, la kairobola ilua tai ge umala, la silipa te la tulugaluga umala, la toho tai ge umala. Amuto umala ge gabutala papai la vibaumulila tamutou, la vuhula amuto igogolu, me egiteu ale abi la visuli tamutou ge abia mutou la ilali ale eia mai la mapa mutou. \p \v 11 “Mai amuto ge goilo te la mautu isasa, taritigi amuto ge mata tigi, veia mai amuto ge rovi tigi la tahalo isasa te la mautu alele eia taritigi, eia la tahalo sesele, tio amuto ge pou oio te la luma tetala, amuto ge mou oio tetala kara te la haro ale amuto ge bula taro la mautu alele. \v 12 Mai amuto ge tiroro soilo te la luma isasa, taritigi amuto ge toi pala muga la vibalavala te La Uru soio te la lumale, \v 13 eala moli mai egite la valalua la luma alele egite kama taritigia mutou, tio amuto ge abi rivu lou la merera la vibalavala tamutou ele. \v 14 Mai tai la tahalo isasa eia kama puli amutou soilo te la luma tetala, veia eia kama ge lolo tai la merera tamutou, taritigi amuto ge hiliti taroa la luma alele me la mautu tai alele, amuto ge kuvali taro la magasa la mautu alele otalo te la vaha mutou, ale amuto ge hiliti taro la mautu tegiteu ele. \v 15 Eau vei seselea mutou, te la haro la viputumulila te La Uru la kolibarala soio te la mautu alele eia ge uru sesele, eia ge kara polo la iligiligi te la mautu ale kama kokora ilua e Sodom me Gomora. \s1 La imamala la iligiligi me la tovolalaila mulimuli ge sibitala \r (Mark 13:9-13; Luk 21:12-17) \p \v 16 “Taritigi amuto ge lolo tigi la merera taku. Eau baha taro amutou mai egiteu la sip ale egite ge pou kabili tegiteu la karakara la paia hou. Taritigi amuto ge baumuli tigi amutou, la gabutatalala tamutou tai ge taritigi pepeho, la vulovulo ale kama kokora isa umala ge oio tamutou. \v 17 Amuto ge baumuli tigi amutou tegiteu la valalua la gima, la vuhula egite ge tuha tavu amutou veia ge veipala amutou soio te la luma la vigagiala, egite ge vagari tai veia ge kumamasi vulo amutou oilo te la luma la lotu tegiteu. \v 18 Egite ge lao tola amutou, ge lapu amutou soio tegiteu la mulugaluga, soio tegiteu la uru tomi tai, amuto ge magiri te la vigagiala oio te la lagu giteu ele, la vuhula amuto valolo te la isagu. Eala moli oio vola la valolo taku eia ge vavava soio tegiteu la uru tomi, egite ge loloa, egiteu la valalua la maligoma ge rovi eau. \v 19 Eala moli mai egite ge lapu amutou soio te la luma la vigagiala, amuto umala tataga veia ge makuku mago ‘Etato ge vikara mave? Etato ge vei lava e?’ \v 20 La vuhula te la haro moli alele eia kama ge amutou moli ale ge vigagia, ouka, La Kalulule Tama mutou eia ge vikarakara oio tamutou ele. \p \v 21 “Te la imamala la viligila, mai la tahalo ale kama rovi eau, eia ge veipala e tabarala soio te la vigagiala, egite ge bilia eia ge peho, la vuhula eia la tahalo taku. Mai tai ele egiteu la valalua isahari ge sugu taro tai e latatu giteu, veia egite la gima ge bili egiteu. Mai tai ele egiteu la valalua me hatavivile ale kama kokora, egite ge hiliti, egite ge sugu taro e tama giteu me tila giteu soio te la pileho. \p \v 22 “Mai tai ele la valalua me hatavivile tomi, egite ge vile sesele amutou, la vuhula egite rovia veia amuto sau tola la isagu, eala moli egiteu ale magiri vagari kara te la tapasi la maututula, La Tahalo Uru ge vimahuli egiteu. \v 23 Mai amuto ge goio te la mautu isasa, eala moli egite viligi amutou, amuto ge hele soio la mautu isapolo. Ale eau vei seselea mutou, amuto kama ge vikaluvu la valolo tamutou te la maututula tomi omai e Israel pala muga te la guluvi te Latu La Tahalo. \p \v 24 “E guliliki la vimari eia kama uru te la tahalo la vimari tetala, la bilalaha tai eia kama oata te la mulugaluga tetala. \v 25 Eia koramuli molia veia e guliliki la vimari eia ge sovei la tahalo la vimari tetala, mai tai la bilalaha eia ge sovei la vulovulo la mulugaluga tetala. Mai eau, eau la mapala tamutou, egite la gima toiti leau e Bielsebul, mai la mulugaluga tegiteu la hituhitu ale kama korakora, tio eia matagaga tai mai ele veia mai egite ge vileau mai ele, la vilile tegiteu soio tamutou ale taku eia ge kara polo lou la vilile ale egite vileau oio vola, la vuhula amutou la bilalaha taku. \s1 Etato ge taga moli La Tahalo Uru sekela \r (Luk 12:2-7) \p \v 26 “Amuto umala ge tataga egiteu la valalua la gima taku, la vuhula la gabutatalala tomi ale egite tau kokovua, eia kama pala te la mahulila ale igoie, mulimuli eia ge magiri palala, eia ge matagaga tomi. La gabutatalala tomi ale egite tau kokovua, mulimuli eia ge magiri palala. \v 27 La merera ale eau mai ale veia mutou te la logo, amuto ge veipalea te la haro, la merera tai ale eau mai ale sigilia mutou, amuto ge veipala molia te la tia la mautu. \v 28 Amuto umala ge tataga egiteu ale egite ge bili la mahulila te la vovo mutou, la vuhula egite kama koramulia ge bili tai la kalulu mutou, ouka. Amuto ge taga moli La Tahalo Uru sekela, la vuhula eia koramulia veia ge bili la mahulila tamutou te la vovo, vikapopo tai la mahulila te la kalulu tai, eia koramulia ge pigi amutou sotalo te la havi ale uru, la kaluvula ge ouka. \v 29 La Tahalo Uru eia ge baumuli amutou te la gima. Mai la valalua egite ge masagea ge loto la malu ilua bisisi, egite kama ge pigi la uati uru, egite ge pigi la uati ilua moli. La mapa giteu la malumalu kama uru, eala moli La Tahalo Uru eia gabutatala egiteu la malumalu tomi, isa bisi kama ge boru sotalo la magasa, mai eia kama ge la masasagala te Tama mutou mai ele. \v 30 Mai amutou tai, eia gabu tikumu seseleti amutou ale tetala, kara polo la gabutatalala tetala soio tegiteu la malumalu, mai eia gigi tomiti la ivu mutou bisisi tomi isasasa oata te la gama mutou ele kaluvu. \v 31 Eala moli ele, amuto umala ge tataga, la vuhula eia gabu tikumu amutou, kara polo la gabutatalala tetala soio tegiteu la malumalu bisisi ale eia vibaumuli tataho soio tegite. \s1 Etato ge veipala tataho molia veia etatou te Kraist \r (Luk 12:8-9) \p \v 32 “Mai isa kabili tamutou la valalua me hatavivile taku eia ge vagari, veia eia kama ge mahela taro eau, veia eia ge veipala molia soio te la valalua me hatavivile veia eia taku sesele, tio eau tai ge veipala la isala oata te la lagule Tete veia eia taku seseleti. \v 33 Eala moli mai isa ge mahela taroau veia eia kama taku, tio eau tai ge mahela taro tai eia oata te la lagule Tete veia eau kama rovi eia. \s1 E Iesus veia la valolo tetala ge vipou gagima la valalua me hatavivile \r (Luk 12:51-53; 14:26-27) \p \v 34 “Amuto umala ge gabutalea veia eau sibitala omai te la maututula veia eau ge vikaluvu la vulovulo la vaubila me la vigagimala omai te la magasa, ouka. Eau sibitala moli mai la tahalo ale ababi la gata te la vaubila. \v 35 Eau sibitala veia ge veipala la valolo ale isapolo viruru eia ge vipou gagima la valalua me hatavivile maie: \li1 Mai la tahalo isa ge roromuliau, \li1 e latula ge hiliti ge gima lou e tamala mai ele. \li1 Mai la tavile isa tai ge roromuliau, \li1 e latula ge hiliti ge gima rivu lou e tilala. \li1 Mai tai la tavile ale taulaiti, \li1 eia ge gima lou e uala ale hatavile mai eia ge taku. \li1 \v 36 Egiteu e valalua mutou lou, \li1 egite ge sibitala mai la gima sesele tamutou ale taku. \p \v 37 “Mai la tahalo me la tavile ale masagea veia ge tilimuliau, eala moli eia gabutala papai te la merera taku ale vagari ele, eia goio hate tola lou, me oio vola eia vagari veia ge vitotoko lou me tamala me tilala ale kama roviau, eia goio poke taroau, ale eia kama koramulia ge taku. Mai tai ele, la tahalo ale ge gabu vauru e latula, me oio vola eia ge poke taroau, ale tai ele eia kama koramulia ge taku. \v 38 Mai sesele tai la tahalo isasa eia veia ge taku, eala moli eia kama masagea veia ge bole la tauvalautu tetala, veia ge mai ale bole la iligiligi ale uru mai tai eau, ale tai ele eia kama koramulia veia ge taku. \v 39 Mai la tahalo isasa eia gabutalea veia ge tilimuliau, eala moli eia sigirobo lou eia, veia eia ge hate robo lou la mahulila tetala, tio mai eia ge vagari veia ge sau tola la mahulila tetala lou mai alele, eia ge peho, eala moli la tahalo ale ge sugu taro moli la mahulila tetala soio te la igogolu taku, la tahalo alele ge sau tola la mahulila ale sesele. \s1 La tahalo ale ge sau tola la mapa ale taritigi \r (Mark 9:41) \p \v 40 “Mai la tahalo isasa eia ge rara tavu amutou ale valolo te la isagu, eia ge suli amutou mai ele, eia mai ale suli eau, me mai isasa ge suli eau, eia mai ale suli tai e Tete ale baheau somai. \v 41 Mai isasa eia ge hilo la bilalaha te La Uru eia ge sibitala te la mautu tetala, me la tahalole ge rara tavua ge pulia soio te la luma tetala ge sulia, la tahalo alele eia ge abi la mapa ale taritigi te Tete mai la mapa la bilalaha sesele. Mai isasa eia ge hilo la tahalo isasa ale la vulovulola matata, eia ge guvi te la mautu tetala, me la tahalole ge rara tavua ge pulia soio te la luma tetala ge sulia, tio la tahalo tai alele ge abi tai la mapa te Tete mai la mapa la tahalo ale matata. \v 42 Mai tai isasa ge gogo e maura miteu bisisi ale eau babaha egiteu soio te la igogolu taku, me eia ge hilo isasa eia guvi te la mautu tetala, eia malehu, me eia ge gogoa la vuhula eia la tahalo taku isale, me oio vola eia ge abi moliala la lalu maigi veia eia ge liua, tio eau vei seselea mutou, la tahalo alele eia ge sau tola sesele la vibalavala te La Tahalo Uru mai la mapa la vulovulola ale taritigi ele.” \c 11 \s1 E Ioanes baha isahari la valalua la vimari tetala soio te Iesus \r (Luk 7:18-35) \p \v 1 Tio, e Iesus viteteli kaluvu la valalua la vimari tetala ale savulusa gete lua te la igogolu, tio eia hiliti taro la mautu alele, eia goio tuga, eia valolo tatuga oio te la gale e Galilea, eia vimari la valalua me hatavivile te la maututula oio te la gale alele, eia valolo egiteu te la valolo ale taritigi te la pulolou la matagagala te La Tahalo Uru. \p \v 2 Eala moli te la imamala alele, e Ioanes la tahalo la vuluhi, eia pou te la luma la kilisi, eia lolo la rere la igogolu te Iesus ale eia igoa soio te la valalua me hatavivile, eia goio baha isahari la valalua la vimari tetala soio te Iesus. \v 3 Egite goio tahi e Iesus mago “Soioge eme e Kraist, la bilalaha ale uru, La Tahalo Uru veia ge bahea, e Ioanes vikara matagagati ovola veia eia ge guvi. Soioge eme eiala guvitie, ia? Uka amite ge pou tali la tahalo isapolo eia souka guvi, ia?” \p \v 4 Tio, e Iesus lolo la tilahi tegiteu mai ele, eia goio koli la vikararala soio tegiteu mago “Taritigi amuto ge tuga, amuto ge beu rivu loua soio te Ioanes, amuto ge veiala te la merera taku tomi ale amuto lolotia, la igogolu taku tomi tai ale amuto hilotia. \v 5 Egiteu la mata kea, la mata giteu mata pulalati, egiteu ale la vaha giteu mauba, egite tuga tigiti, egiteu tai ale la vovo giteu sereka, egite marokati, egiteu ale la gavusa giteu vou, egite loloti, egiteu ale pehoti, egite mahuliti lou, me la valalua me hatavivile la morivava, egite loloti la valolo ale taritigi. \v 6 Mai la tahalo isasa la tautaulailo tetala eia salala moli soio taku, eiale balava seseleti, la vuhula eia kama hate tola lou veia ge tahi taroau.” \p \v 7 Goio, egite la valalua la vimari te Ioanes lolo la merera te Iesus kaluvu, egite goio tuga, tio egite so tatugati ele, e Iesus goio soko la vikararala soio te la lolo la valalua me hatavivile ale magirigiri ele, eia lapu matagaga la gabutatalala tegiteu te Ioanes ele, eia veia giteu mago “Pala amuto goata la hohoi veia ge lolo la valolo te Ioanes, amuto soioge gabutalea veia amuto ge hilo lava? Amuto gabutalea veia e Ioanes ge la tahalo bulalahu, la tiala viviu mai la viro ale la lolovi tubu ovola eia tavu lele, ia? \v 8 Mai ge ouka, amuto soioge goata la hohoi veia ge hilo la rova sesele? Amuto soioge veia ge hilo la tahalo isasa ale eia kairobola la kairobola ale marasa pepeho, ia? Ouka gologolo, e Ioanes kama mai ele, egiteu ale kairobola la kairobola ale marasa pepeho, egite kama pou oio la hohoi, egite pou te la luma te la uru. \v 9 Ioge, amuto pala goata la hohoi veia ge malelei e Ioanes, amuto soioge gabutalea veia ge hilo la rova sesele, e? Amuto soioge gabutala seselea veia ge hilo la bilalaha te La Uru isa uru, ia? Meie, e Ioanes eia la bilalaha isasa, ale eau ge veia mutou, eia uru sesele tegiteu la bilalaha tomi. \v 10 La tahalo moli ale, La Buk Tabu eia valolotila pala maie: \li1 Eiau La Tahalo Uru, \li1 eau baha taroti la bilalaha taku, \li1 eia ge mamuga, \li1 eia ge raragi la gauru te La Uru. \p \v 11 Ale eau vei seselea mutou, egite tomi la valalua la vovo ale e tatila giteu pigo egite omai te la maututula, egiteu tomi bisi te Ioanes la tahalo la vuluhi. Eala moli te la pulolou la matagagala te La Tahalo Uru, mai la tahalo bulalahu moli ale ge tiroro soilo vola, eia ge uru te Ioanes. \v 12 Sokoa pala te la imamala la valolo te Ioanes, kara igoie, la valalua me hatavivile mapaiti egite vagari veia ge toa pepe tavua soilo te la pulolou la matagagala te La Tahalo Uru veia egite ge sau tolea, me egiteu ale vagari pepeho sau tola seseletia mai ele. \v 13 Egiteu la bilalaha tomi vikarati ovola, me la merera la viputumulila tai te Moses eia vikarati ovola, veia ge veipala la masasagala te La Uru somai tamutou la valalua me hatavivile, kara ale e Ioanes sibitala. \v 14 Mai amuto ge matagaga sesele te la merera taku te la vuhu la guluvi te Ioanes ele, eia mai sesele la bilalaha uru e Lias ale La Buk Tabu veia eia ge sibitala rivu lou. \v 15 Mai ere la gavusala ge oio te la ilolo la merera, taritigi eia ge lolo la merera taku alele. \p \v 16 “Amutou la tuvu la valalua me hatavivile te la imamala ale igoie, eau ge tovo amutou soio te la rova, veia amuto ge matagaga te la vulovulo mutou ale amuto igigoa e? Amuto soioge mai sesele egiteu e gulikiliki ale egite pou te la tia la mautu, egite tatola egiteu e tabarabara giteu mago \v 17 ‘Amite katu la mabu, amuto kama masaga ge tilia! Amite pipigi la tilali, amuto kama taitali!’ \v 18 Tiele e Ioanes eia sibitala omai, eia vigumu, eia kama liliu la vaen, me amuto hiloa mai ele, amuto ubila la merera mago ‘A ge, la hitu ale kama kokora pouti oio taume!’ \v 19 Mai mulimuli tai e Latu La Tahalo goio sibitala, eia ali marumaru moli, eia liliu la vaen, eala moli amuto goio vikara maie mago ‘A ge, la tahalo ale eia kali sogomu pasi, me eia la tahalo la iliu la vaen tai, eia e vikilipi tegiteu la valalua la ilabi la takes, me egiteu la tahalo la iruru tai.’ Eala moli amuto kalamea papapai mai ele, amuto soioge la tahalo la mari, ia? La merera te La Uru eia soioge tabuli matagaga tamutou la valalua tetala, ia?” \s1 E Iesus ilo buruko legiteu la maututula isahari ale kama vuvulo \r (Luk 10:13-15) \p \v 20 Goma, e Iesus soko lou la vigagiala tetala, eia goio vile egiteu la maututula ale eia igo usuti la golu la karutula tetala oilo vola, eala moli egite kama gabutatala rivu lou la iruru tegiteu veia ge vuvulo, ouka viruru. \v 21 Tiele e Iesus goio veia maie mago “Maura miteu la mautu ilua e Korasin, e Betsaida. Mai eau ge igoti la golu la karutula te la mautu ilua e Saidon me Taia mai ale eau igo palatia kabili tamutou, egite la valalua me hatavivile te la mautu ale kama kokora iluale, egite soioge ge vuvulo seseleti, egite ge baharuti la iloburukola, egite ge vuloti la gabutatalala tegiteu. \v 22 Eala moli eau veia mutou, te la haro la viputumulila te La Uru, la mautu ilua e Saidon me Taia kama ge ligi pepeho mai amutou ele. \v 23 Mai amutou tai la valalua me hatavivile la mautu e Kapernaum, amuto soioge veia La Uru ge puli amutou soata tetala, ia? Ge ouka gologolo, eia ge pigi moli amutou sotalo te la havi ale uru, la kaluvula ge ouka. Mai eau ge igoti la golu la karutula oilo te la mautu e Sodom mai eau igo palatia kabili tamutou e Kapernaum ele, la valalua e Sodom soioge ge vuvulo seseleti. \v 24 Ale eau vei seselea mutou, te la haro la viputumulila te La Uru, e Sodom ge mavulaha bakisi, eala moli amuto ge bukeke seselea, maura miteu!” \s1 La vikarara la tilovo te la bulole la tabule ale tikumu \r (Luk 10:21-22) \p \v 25 Goio, e Iesus soko la kilaka soata te La Tahalo Uru, eia vaisalea mago “Tete, eau vaisale sesele eme, la vuhula eme La Uru oata te la mori, eme La Uru tai otalo te la magasa. La mari taume uru sesele, eme tau kokovua legiteu la tahalo la mari me egiteu la tahalo la pakakasala, eme veipala molia soio tegiteu e latatumu bisisi ale mulimuli seseleme. \v 26 Ale la masasagala taume sesele, Tete. \p \v 27 “E Tete sugu tarotiagu la golugolu tomi veia eau ge vibaumuli ovola. Isa kama ge rovi sesele la vulovulole Latula, e Tete moli. Me isa tai kama ge rovi e Tete, eau moli e Latula, me egiteu tai ale eau masagea veia ge veipala e Tete soio tegiteu. \p \v 28 “Amutou tomi la valalua me hatavivile ale amuto bolebole, amuto huguhugu, la iruru tamutou eia tikumu mai la tabule me la tabala ale uru pepeho, amuto ge gomai taku, eau ge vimaila amutou. \v 29 Amuto ge roromuli eau mai la bilalaha taku sesele, amuto ge vimari omai taku sekela, la vuhula la gabutatalala taku eia malilo tataho, me eau vibisi tai eau soio te la valalua, tiele omai taku amuto ge sivuti la mailala ale uru sesele te la kalulu mutou isasasa. \v 30 La vuhula la tabule taku eia taritigi, eia mavulaha moli.” \c 12 \s1 La vimari te Iesus te la masova la haro tabu \r (Mark 2:23-28; Luk 6:1-5) \p \v 1 Tio, mulimuli, te la haro tabu isasa, e Iesus mite me la valalua la vimari tetala, egite tatuga te la tia la mahuma la kon, egite la valalua la vimari tetala goio vitolo, egite goio putu isahari la balepa la kon\f + \fr 12:1 \ft La kon tegiteu e Iuda, eia ge matua, la balepala bisi moli mai la balepa la vit ale egite vovokakea galugalua. La vavua la kon tegiteu ele, etato toila la vit.\f* veia ge alia. \v 2 Eala moli egiteu e pariseo isahari goio hilo egite la valalua la vimari te Iesus ele, egite goio veiale Iesus mago “Ae, la vulovulo ale, egite la valalua la vimari taume egite igo popoti la haro tabu.” \p \v 3 Tio, e Iesus goio veia giteu mago “Mave, amuto souka gigi vuti la veimulipolola te Devit, te La Buk Tabu Ale Pala, ia? Te la imamalale, e Devit mite me la valalua tetala, egite vitolo. \v 4 Egite goilo te la luma la lotu, egite kaka e pris la ilali, eia abia giteu la bret la vahililola te La Tahalo Uru ale tabuli oilo te la luma la lotu. La bret alele, eia tikumu sesele veia la tahalo bulalahu ge alia, egiteu moli e pris, egite alalia. \v 5 Me amuto soioge soukama gigi taia te la viputumulila te ururu, egite abia giteu e pris la igogolu te la haro tabu veia egite ge vahari la vaabila soilo te la luma la lotu, ge gutua oata la poro. Te la viputumulila tamutou egite mai ale ruruti, eala moli te la gabutatalala te La Tahalo Uru egiteu la iruru ouka. \v 6 Eia taritigi eau ge veia mutou, eau guviti omai, me la igogolu taku eia muga te la igogolu tegiteu e pris oilo la luma la lotu. \v 7 Eala moli mai amuto ge rovi tigi la masova la merera te La Buk Tabu Ale Pala ale veia maie: \li1 Eiau La Uru, eau kama masaga la vaabila, \li1 eau masaga moli la vulovulo la gilogo. \p Mai amuto ge rovi tigi la masova la mererale, amuto kamati ge kaua giteu la valalua taku veia egite igo la iruru, ouka. \v 8 Eau e Latu La Tahalo, eau la mulugaluga te la haro tabu.” \s1 E Iesus vimahuli la tahalo isasa la limala pakuku \r (Mark 3:1-6; Luk 6:6-11) \p \v 9 Tio, e Iesus hiliti taro la mahumale, eia goio goluma, eia goilo te la luma la lotu te la mautu alele. \v 10 Eia hilo la tahalo isasa oio, la limala pakuku. Eala moli egiteu e pariseo so papaa la gauru ale egite ge vitilo e Iesus ovola, egite goio tahi gologoloa la tilahi isa maie mago “Mave, te la viputumulila te ururu, eia taritigi moli veia etato ge vimahuli egiteu la ilea te la haro tabu, ia, uka mave?” \p \v 11 Eala moli e Iesus goio tahi rivu lou egiteu mago “Mai la tahalo isasa kabili tamutou ele, eia tahola isasa la sip, mai la sip tetala ge raga sotalo te la lulu te la haro tabu, amuto kama ge lapu rivua soata te la haro tabu moli, ia? \v 12 La sip eia la golu bulalahu, la tahalo eia uru te la sip, eala eia taritigi moli veia te la haro tabu etato ge vimahuli egiteu ale lea.” \p \v 13 Tio, eia veia giteu la merera tetala mai ele kaluvu, eia goio vulo soio te la tahalo ale la limala pakukuo, eia veiala mago “Eme ge limarara.” Tio la tahalole goio limarara, la limala taritigiti maiti la lima ale isao. \v 14 Tio egite pariseo hiloa, egite hiliti moli gogala, egite goio pou vikapopo, egite viputumulimuli e Iesus veia egite ge bilia. \s1 E Iesus eia la bilalaha sesele te La Tahalo Uru \p \v 15 Eala moli e Iesus rovitia veia egiteu e pariseo masagea veia ge bilia, eia goio hiliti taroa la mautu alele, eia tuga. La valalua me hatavivile usu goio tilimulia, e Iesus goio vimahuli egiteu tomi ale lea kabili tegiteu ele. \v 16 Eia tutu tolea giteu veia egite umala ge veipalala eia, \v 17 eia vipuru seseletia mai ele la merera isasa te La Tahalo Uru ale e Aisaia veipalea te La Buk Tabu Ale Pala maie: \li1 \v 18 Male ge, la tahalo ale, \li1 eia la bilalaha taku sesele, \li1 eau hilo vutia, eau masaga pasia, \li1 eau sagege pepeho sesele leia. \li1 Eau ge pigi robola la kalulugu, \li1 eia ge veipala la vulovulo ale matata soio tegiteu \li1 la valalua me hatavivile ale pou te la maligoma. \p \v 19 Eia ge la tahalo la tia madidila sesele, eia kama ge vaigigo, eia kama ge kahararea giteu la valalua me hatavivile te la tia la mautu. \v 20 Eala moli eia ge veipala tai la gilogo, mai la tahalo me la tavile ale kama magiri vagari taku, egite mai la viro ale tavulele, hagagaviti eia ge putua, eala moli la bilalaha taku eia kama ge igo gegeru egiteu ale mai ele veia egite ge boru, ouka, eia ge suli moli egite. La tahalo me la tavile ale kama magiri vagari taku, eia mai la havi ale mamateti, eala moli la bilalaha taku eia kama ge vai mate la tautaulailo tegiteu, ouka, eia ge suli moli egiteu kara te la imamala ale la valolo ale taritigi eia ge puru te la igogolu tetala, eia ge bolehoho la vulovulo ale kama kokora, la valalua me hatavivile tomi tetala ge magiri vagari. \v 21 Egiteu ale igoie kama rovi la matagaga, egite mulimuli ge roromuli la merera te La Uru, egite ge rovia veia la bilalaha taku eia koramulia ge vimahuli sesele egiteu. \s1 Egite kauale Iesus veia eia igogolu vikapopo le Bielsebul \r (Mark 3:20-30; Luk 11:14-23) \p \v 22 Goma, egite la valalua me hatavivile isahari goio puli la tahalo isasa soio te Iesus, la hitu ale kama kokora pou tetala, eia mata kea, la harela tikumu, eia kama vigagia. Tio e Iesus goio vimahulia, la matala ilua goio matagaga, eia goio vikara. \v 23 Tio la valalua me hatavivile usu egite hiloa mai ele, egite karutu, egite goio vei mago “La tahalo aleie, eia soioge e tubule Devit sesele ale ge guvi ge vimahuli etatou la valalua me hatavivile tetala, ia, uka eia soioge ere?” \p \v 24 Eala moli egiteu e pariseo loloa mai ele, egite vei mago “Oio moli te la vagagarila te la mulugaluga tegiteu la hituhitu, e Bielsebul moli sekela, la tahalo ale eia kumuli tataro egiteu la hituhitu ele.” \p \v 25 Eala moli e Iesus rovitia la gabutatalala tegiteu ele, eia goio veia giteu la vikarara la tilovo isa oio vola mago “Mai la valalua la vaubi te la uru isasa ge vaubi rivu lou megiteu lou, egite ge kaluvu. Mai tai la mautu isasa, mai la karakara tai isa, mai egite ge vaubi baoli lou, la valalua alele ge marapa, egite ge sululu. \v 26 Eia mai tai aleie, e Satan, mai eia ge kumuli taro e Satan lou, eia mai ale vaubi rivu lou me eia, la vagagarila tetala ge kaluvu. \v 27 Eala moli amuto tai veiagu veia eau kumuli taro la hituhitu te la vagagarila te Bielsebul, eala moli eau ge tahi amutou, mai la valalua tamutou la haro isahari egite tai kumuli taro egiteu la hituhitu, mave, egite igoa te la vagagari lere? Tiele, la vulovulo giteu la valalua tamutou lou eia tomu sasaeti la vulovulo mutou ele. \v 28 Eala moli La Kalulu La Tahalo Uru eia pouti taku, me te la vagagarila tetalale eau kumuli taro la hituhitu. Eala eia koramulia mai ele veia amuto ge matagaga veia la pulolou la matagagala te La Tahalo Uru eia sibitalati omai tamutoue. \p \v 29 “Mai tai eau ge tovoa soio te Satan mai la tahalo isa eia vagari sesele. Igo mave isa ge goilo la luma tetala veia ge seri taro la golugolu tetala e? Ge ouka viruru, taritigi veia mai isa masagea veia ge bolehoho e Satan, eia ge kisi tola mugea, mulimuli eia ge goilo la luma tetala ge seri taro la golugolu oilo vola. Mai eau, eau lagi taro le Satan e maura miteu la valalua me hatavivile ale la hituhitu ale kama korakora igo gegeruti egiteu, eau mai ale saeti soata la luma te Satan, eau seri taroti la golugolu tetala. \p \v 30 “Mai la tahalo isa eia kama tao loio taku, alele eia mai ale gima eau. La tahalo ale kama visuli soio te la valalua me hatavivile taku, eia mai ale igo gegeru moli egiteu. \v 31 Taritigi eau ge veia mutou la merera ale tikumu maie: La mata la iruru tomi ale la valalua me hatavivile igigoa, La Tahalo Uru eia koramulia ge vimavulaha taro legiteu. Eala moli mai isasa eia ge vikara barea La Kalulu La Marokala, la iruru tetala ale tikumu viruru ele, La Tahalo Uru kama ge vimavulaha taro leia, mai te la mahulila omai te la maututula, me te la mahulila oata te la ilo la lage, la iruru uru tetalale ge tabuli moli, eia ge vure ovola. \v 32 Mai isasa ge vile e Latu La Tahalo, la iruru tetalale La Tahalo Uru ge koramulia ge vimavulaha taro leia, eala moli mai isasa ge tahi vile La Kalulu La Marokala, La Tahalo Uru kama ge vimavulaha la iruru aleiele, ouka viruru, eia tikumu, eia kama ge vimavulaha taroa te la mahulila omai te la maututula, me te la mahulila tai ale ge mulimuli oata te la ilo la lage. \s1 La vikarara la tilovo te la obu ale kama posa tigi \r (Luk 6:43-45) \p \v 33 “Mai la obu isasa eia tubu tigi tataho, eia ge vua, la vavuala ge taritigi tataho, mai la obu isasa eia kama tubu tigi, eia ge vua, la vavuala tai kama ge taritigi. La valalua me hatavivile tomi egite rovi la obobu tomi oio te la vavua giteu, mai la obu ale taritigi, la obu ale kama kokora tai. \v 34 Amutou la valalua me hatavivile te la tuvu ale igoie, la vulovulo mutou kama kokora sesele, amuto mai la pase ale vuraga, ale totolo, egite bilibili la valalua, la vuhula la vulovulo mutou lou eia igo gegeru la valalua me hatavivile taku. Amuto koramulia ge veipala la merera ale taritigi mave e? Ouka gologolo, la vuhula amuto kama kokora. La gabutatalala ale tabuli kokovu oilo te la tilalau tamutou oilo, ale amuto ge veipalea te la hare mutou mai la irovilala sesele te la vulovulo mutou. \v 35 La tahalo ale taritigi, la gabutatalala tetala oilo te la tiala eia volu te la gabutatalala ale taritigi, eia veipala la vulovulo ale taritigi. La tahalo ale kama kokora, la gabutatalala tetala oilo te la tiala eia volu te la gabutatalala ale kama kokora, eia veipala la vulovulo ale kama kokora. \v 36 Eala moli eau ge veia mutou, te la haro la viputumulila te La Uru, La Tahalo Uru ge tahi muli lou la bautu la merera tomi isasasa ale amuto veipala bulalahua te la mahulila tamutou igoie. \v 37 La merera ale amuto veipalea te la mahulila ale igoie, eia mai ale veipala la pulolou tamutou ale ge mulimuli: Oio moli te la merera tamutou lou La Tahalo Uru ge rovia veia amuto veipala la vulovulo ale maroka, veia amuto ge vulo taro la igototolola tetala, uka amuto veipala la vulovulo ale kama kokora veia amuto ge vure.” \s1 La valalua kaka e Iesus la irovilala te la vagagarila tetala \r (Mark 8:11-12; Luk 11:29-32) \p \v 38 Goma, egite la tahalo la vimari te la merera te Moses, vikapopo tai me egiteu e pariseo isahari, egite goio veiale Iesus mago “Tahalo la vimari, amite masagea veia eme ge igo isasa la irovilala te la vagagarila taume, amite ge hiloa.” \p \v 39 Goio, e Iesus koli la vikararala tegiteu mago “Amutou la valalua me hatavivile la vareagila. Amutou tomi la tuvu ale igoie, amutou la valalua me hatavivile la iruru, amuto ge hilo la irovilala, eala moli eau kama ge virovi le amutou, eala moli La Tahalo Uru ge vahilo le amutou la irovilala isa moli sekela mai la irovilala te la bilalaha e Iona. \v 40 Alaura e Iona la ia isa uru sogomua, eia pou oilo la ilo la ia la logo itolu, me eau tai e Latu La Tahalo, eau ge tabuli te la lulu la pileho la logo itolu. \v 41 Eala moli eau veia mutou, te la haro la viputumulila te La Uru, la vareagila tegiteu la valalua me hatavivile e Nineva, eia kama ge mata mai ale tikumu mai la vareagila tamutou la valalua me hatavivile te la tuvu ale igoie. Egiteu e Nineva ge mai ale mata muli tai la iruru tamutou, la vuhula egite lolo la merera te La Uru ale e Iona valolo egiteu ovola, egite vuvulo, eala moli amutou la valalua me hatavivile ale igoie, amuto hiloti la bilalaha isa ale uru te Iona eala moli amuto kama masaga ge loloa, mai eiaue. \v 42 Sesele, te la haro la viputumulila te La Uru, la tavile uru, la mulugaluga te la gale e Siba, eia ge hiliti loio la mautu tetala ale malau otalo e Aprika, eia ge gomai, la vulovulola ale taritigi eia ge mai ale tomu sasae la vulovulo mutou igoie, ale amutou vareagagi, la vuhula la tavile uru alele eia pala tuga malau veia ge lolo la mari te Solomon, eala moli amutou, amuto hilotiau, eau uru te Solomon, eala moli amuto kama loloau. \s1 La hitu ale kama kokora eia beu rivu loua \r (Luk 11:24-26) \p \v 43 “Mai la hitu ale kama kokora eia hele taroti la tahalo isasa, eia tuga goio te la hohoi, la lalu ouka ovola, eia papaa la mulila veia eia ge pou oio vola. Eala moli mai eia kama ge koramulia mai ele veia ge sivuti la baa ale taritigi ale ge igo la mulila ovola, eia goio vikara maie mago \v 44 ‘Kora, eau ge beu rivu loua soio te la muligu ale eau hele tarotia.’ Tio eia hiliti tuga goio eia sivuti lou la mulila eia kavelevele moli, egite sapa tatahotia, egite vimatatatia, eia taritigi pepeho. \v 45 Tio eia hiloa mai ele, eia sagege pepeho, eia tuga goio puli lou egiteu e tabarabarala taho vitu la hitu ale kama korakora lou, la vulovulo giteu taho vitu ele eia muga tetala te la igo bara giteu la valalua, egite vitilimuli gomai, egite goilo te la tahalo alele, mai la muli la hitu ale pou muga ovolae. Tio la tapasi la tahalo ale, eia kama kokora sesele, pala eia taritigi bakisi, eala moli eia goio vilua seseleti. Me eia ge mai tai aleie tamutou la valalua me hatavivile igoie, ale amuto vulo gologolo bakisi veia ge vulo halaba, amuto ge gotigu rivu lou, la tapasi mutou ge kama kokora sesele.” \s1 E Iesus toi egiteu ale e tatilala me tabarabarala sesele \r (Mark 3:31-35; Luk 8:19-21) \p \v 46 E Iesus so vikarakara soio te la valalua me hatavivile, eala moli e tilala me egiteu e tabarabarala sibitalati, egite ogala magiri taitalia veia egite ge vikara soio tetala. \v 47 Tio la tahalo isasa goio veiale Iesus mago “Ale e tilamu me egiteu e tabarabaramu egite ogala, egite magiri taitalime, egite masagea veia amutou ge vikara.” \p \v 48 Eala moli e Iesus goio veia la tahalole mago “Amuto veia e tila ere? Amuto veia egiteu e tabarabaragu ere?” \v 49 E Iesus vikara soio tegiteu mai ele kaluvu, eia goio turi la limala soio tegiteu la valalua la vimari tetala, eia goio veia giteu la valalua me hatavivile ale magirigiri ele mago “Male ge, egiteu aleie e tatilagu, e tabarabaragu. \v 50 La vuhula la tahalo me la tavile ale ge roromuli tataho la masasagala te Tete oata te la ilo la lage, alele eia e tabaragu, eia e hatavilegu, eia e tilagu.” \c 13 \s1 La vikarara la tilovo te la tahalo la gilalu \r (Mark 4:1-9; Luk 8:4-8) \p \v 1 E Iesus vikaluvu la vimari tetala soio tegiteu la valalua me hatavivile, eia goio gali taroa la lumale, eia gogala, eia goio pou olau la parava. \v 2 Eala moli la valalua me hatavivile usu pepeho goio sibitala roboa oio volao, e Iesus goio sae te la uaga, la uaga pati lala moli mai lolauo, e Iesus pou ovola, la valalua me hatavivile egite magiri loilo la parava. \v 3 E Iesus vikara soilo tegiteu, eia vimari legiteu la vikararala usu, eia goio veia giteu la vikarara la tilovo, mago “La tahalo isasa eia gorivo, eia pigi bura la vavua la vit orivo te la mahuma, \v 4 eia pigi burea mai ele, la vavua la vit ele isahari paru sotalo te la tia la gauru, la malumalu isahari egite lovo loio gotalo alia. \v 5 Isahari egite paru sotalo la magasa ale oata te la hate la uatati, la magasa alele kama usu, la vavua la vit ele kusi hari moli, kama tabaa. \v 6 Eala moli la haro porosile goata eia agia la vit ele, eia magolu, la vuhula la uala kama hari malau sotalo, eia magolu, peho. \v 7 Tio la vavua la vit isahari lou egite paru sotalo te la vuhule dahe ale ororoa, eia kusi goata, eala moli e dahe viri roboa, eia kama kusi tigi soata. \v 8 Eala moli la vavua la vit isahari lou paru sotalo te la magasa ale taritigi tataho, la vit ale eia goio kusi tataho sesele, eia goata, eia goio vua tataho, la balepa la vit ale, isahari uru bakisi, isahari uru sesele lou ovola, isahari lou uru makapipila pepeho. \v 9 La tahalo me la tavile ale la gavusala oiole te la ilolo la merera, taritigi eia ge lolo la vikarara la tilovo alele veia eia ge vimari ovola.” \s1 E Iesus vimari legiteu la valalua me hatavivile la vikarara la tilovo \r (Mark 4:10-12; Luk 8:9-10) \p \v 10 Goma, egiteu la valalua la vimari te Iesus goio tetala, egite tahia mago “Ilava eme veia giteu la vimari te la vikarara la tilovo moli e?” \p \v 11 E Iesus goio koli la tilahi tegiteu mago “Amutou, amuto pou te la baligu, eau veipalatia mutou la mari te la pulolou la matagagala te La Tahalo Uru, ale tabuli kokovu, eala moli egiteu la valalua me hatavivile kama rovia. \v 12 Mai la tahalo isasa eia tautaulailo te La Tahalo Uru, la mari bakisi ale eia sau tolea La Tahalo Uru ge vauru loua. Eala moli la tahalo ale kama tautaulailo, eia kama sau tola la mari uru, La Tahalo Uru ge abi taro lou leia ale bakisi eia sau tolea. \v 13 Tiele eau vimari egiteu ale so popou te la maligoma la vikarara la tilovo moli veia egiteu moli ale matagaga bakisi te la kalulu giteu ge loloa, egite ge abi tigi la masovala, eia ge suli egiteu, eala moli egiteu ale vareagi kama ge abi tigia. Mai La Buk Tabu Ale Pala eia veia maie: \li1 Egite hilo la paga isahari, \li1 eala moli egite kama hilo tigia. \li1 Egite lolo tai la merera bakisi, \li1 eala moli egite kama rovi tigi la masovala. \p \v 14 Tiele, oio vola la merera te la bilalaha e Aisaia te la Buk Tabu Ale Pala eia puru seseleti tegiteu, ale eia veia maie: \li1 Amuto ge lolo bibibi la merera taku, \li1 eala moli amuto kama ge rovi la masovala. \li1 Amuto ge hilo bibibi la igogolu te la limagu, \li1 eala moli amuto kama ge gabu tikumua. \li1 \v 15 La vuhula la gabutatalala tamutou la valalua \li1 me hatavivile taku, eia tagarati, \li1 la gavusa mutou vouti, \li1 amuto mata bubuu moliti. \li1 \v 16 Mai eia kama ge maie, \li1 amuto ge matagaga leau, \li1 amuto ge lolo tataho tai la merera taku, \li1 la gabutatalala tai tamutou ge taritigi somai taku, \li1 veia eau ge vimahuli amutou. \p Eia sesele, la merera te Aisaia, eia mai moli ele, eala moli amutou ale taku, amuto balava seseleti, la vuhula la mata mutou matagagati, la gavusa mutou tai kopeti, koramulia amuto ge lolo la merera. \v 17 Eau vei seselea mutou, amuto balava sesele viruru, la vuhula egiteu la bilalaha ale pala, me egiteu e ururu tai mapaiti alaura, ale la vulovulo giteu matata sesele, egite tali tavu La Tahalo Uru veia egite ge hilo sesele e Kraist, veia egite ge lolo tai la golula, eala moli ouka, amutou moli ale igoie pouti te la vibalavala ale uru sesele oio volale. \s1 E Iesus lubea giteu la masova la vikarara la tilovo te la tahalo la gilalu \r (Mark 4:13-20; Luk 8:11-15) \p \v 18 “Amuto ge loloa, eau ge lubea mutou la masova la vikarara la tilovo te la tahalo la gilalu. \v 19 Mai la valalua me hatavivile ale egite lolo la merera ale veipala la pulolou la matagagala te La Tahalo Uru, eala moli egite kama abi tigi la masovala, la vuhula e Satan goilo tegiteu, eia igo gegeru la gabutatalala tegiteu, eia abi taroa la merera te La Tahalo Uru ale eia galutia te la tia giteu ele. Alele egite mai la vavua la vit ale paru te la pepe la gauru. \v 20 Eala moli la vavua la vit isahari paru te la magasa ale rumorumoa, alele eia mai la tahalo ale eia lolo moli la merera, eia sagege pepeho ovola, \v 21 eala moli la uala ouka, eia kusi goata, eia kama mahuli tabaa. Mai la valalua la gima ge taho talu la merera te La Tahalo Uru, egite ge vailo buruko la tahalo alele, egite ge igo tai la iruru soio tetala, kama tabaa la tahalo alele la tautaulailo tetala boruti. \v 22 La vavua la vit isahari tai paru te la vuhule dahe, eia mai la tahalo ale eia lolo la merera te La Tahalo Uru, eala moli la mari papaila te la mahulila ale igoie omai te la maututula, me la lulu golola tai te la masasagala tavu la uati, eia viri robo la merera te La Tahalo Uru ale so kukusi moli te la tiala, eia kati kusi tigi, la vavuala ouka, eia kama vua. \v 23 Eala moli la vavua la vit ale paru te la magasa ale taritigi, eia kusi tataho sesele, eia mai egiteu ale lolo la merera te La Tahalo Uru, egite matagaga moli te la masovala, egite roromuli tatahoa. Te la mahulila tegiteu isasasa egite ge veipala la vavuala, isahari vua uru makapipila pepeho, isahari vua uru pepeho sesele, isahari lou vua uru moli bakisi.” \s1 La vikarara la tilovo te la hohoi ale kusi robo la mahuma \p \v 24 Goma, e Iesus goio vei loua giteu la vikarara la tilovo isa lou mago “La pulolou la matagagala te La Tahalo Uru eia mai la tahalo isasa ale pigi bura la vavua la vit ale taritigi orivo te la mahuma tetala. \v 25 La igogolu tetala kaluvu, eia goluma, pou, la paga logo eia goio mavuta, tio te la logo la gima te la tahalo alele goio sibitala, eia goio pigi bura la vavua la obu ale kama kokora oio te la mahuma la vit tetalale, eia goio tuga. \v 26 Tio mulimuli la vit goio kusi goata eia vua, tio egite goio hilo vutia la obu ale kama kokora egira vimagiri tomi la vit ele. \v 27 Mulimuli egite la valalua la igogolu egite goio veia la tahalo la mahumale mago ‘Tahalo uru, amite rovia eme galu la vavua la vit ale taritigi oio la mahuma taume, igo mave la obu ale kama kokora egira vikusi vikapopoti lou e?’ \p \v 28 “Tio eia lolo la vikararala tegiteu mai ele, eia goio veia giteu mago ‘La gima taku isasa oio ge galutia mai ele.’ \p “Tio, egite la valalua la igogolu tetala goio tahia mago ‘Mave, eme masagea amite ge lipu lulu taroa la obu ale kama kokora, ia?’ \p \v 29 “Eia goio veia giteu mago ‘Umala, la vuhula amuto souka ge lipu lulu la vit vikapopo la obu ale kama kokorale. \v 30 Korale, egira ge vikusi tomi kara mulimuli la vit ge matuha. Tio mulimuli mai la vit ge matuha, eau ge baha amutou la valalua la igogolu, amuto ge lipu lulu taro mugea la obu ale kama kokorale, amuto ge tau olua ge kisi tolea, la tabalala ge selua te la havi. Amuto ge selua mai ele kaluvu, amuto ge goio ge abi la vavua la vit ale taritigi, amuto ge tau vikapopoa oio te la luma taku.’” \s1 La vikarara la tilovo ilua lou \r (Mark 4:30-32; Luk 13:18-21) \p \v 31 Goma, e Iesus goio vei loua giteu la vikarara la tilovo isasa lou maie mago “La pulolou la matagagala te La Tahalo Uru eia mai la vavua la obu ale bisi kokori moli, la tahalo isasa abia eia galua oio te la mahuma tetala. \v 32 La vavua la obu ale eia galutiale, eia kama uru mai la vavua la obobu isahari, ouka, eia bisi kokori moli, eala moli eia kusi uru goata, eia muga tomi te la ilali tomi ale oilo la tia la mahumale, eia uru goata pigi borebore, la malumalu usu popou oio vola, igo la tiloa giteu.” \p \v 33 Goma, eia goio veia giteu la vikarara la tilovo isa lou mago “La pulolou la matagagala te La Tahalo Uru eia mai tai la is ale visogo la palava. La tavile isasa eia abi bakisi la is, eia goio vivulo tomila la palava usu sesele, la palavale goio sogo tataho sesele koramulia veia la tavilele ge igo la bret ale usu pepeho oio vola.” \s1 E Iesus valolo te la vikarara la tilovo moli \r (Mark 4:33-34) \p \v 34 Eala moli la merera tomi ale e Iesus valolo egiteu la valalua me hatavivile ovolae, eia vei molia giteu la vikarara la tilovo. Eia kama veia giteu la merera ale isapolo, ouka, eia veipala molia giteu la merera la tovomulila moli. \v 35 Eala moli la merera te la bilalaha te La Tahalo Uru isasa alaura, eia puru seseleti te la vulovulole Iesus ale eia valolo egiteu te la vikarara la tilovo moli. La merera alele eia maie: \li1 Eiau La Uru, eau mulimuli ge soko la vikararala, \li1 eau ge veipala isahari la vikarara la tilovo, \li1 eau ge veipala la merera ale tabuli kokovu \li1 alaurati te la vipoupoula karati igoie. \s1 La masova la vikarara la tilovo te la obu ale kama kokora eia kusi robo la mahuma \p \v 36 Goio, e Iesus hiliti taro la valalua me hatavivile usu ale lolo la vikararala tetalale, eia goio la luma, pou. Eala moli egite la valalua la vimari tetala goio tetala, egite tahia mago “Taritigi eme ge lubea miteu la masova la vikarara la tilovo te la obu ale kama kokora eia kusi robo la mahuma.” \p \v 37 Goio, e Iesus veia giteu mago “La tahalo ale pigi bura la vavua la vit eia mai e Latu La Tahalo. \v 38 La mahuma, eia mai la maututula omai te la magasa, me la vavua la vit, alele la valalua me hatavivile ale e latatu La Tahalo Uru sesele, egite pouti te la maututula. La obu ale kama kokora, alele la valalua me hatavivile te Satan. \v 39 La gima ale pigi bura la vavua la obu ale kama kokora te la tia la mahuma, alele e Satan. Tio la haro ale egite la valalua la igogolu goio abi la ilali ovolae, ge tau vikapopoa, alele la tapasi la maututula. Egiteu la tahalo la igogolu ale ge abi la ilali orivo, egiteu la angelo. \v 40 Me la haro ale egite ge tau vikapopo la obu ale kama kokora ge selua te la havi, tio eia mai moli te la tapasi la maututulale. \v 41 La vuhula te la haro moli ale, e Latu La Tahalo ge baha taro egiteu la angelo tetala loata, egite ge lipu lulu la vuhu la iruru tomi, vikapopo tai la valalua me hatavivile ale pou te la iruru, \v 42 egiteu la angelo ge pigi egiteu sotalo te la havi ale uru, me oio vola egite ge kaukaku, egite ge koro magegege, ge melimeli la togo giteu. \v 43 Eala moli te la haro alele egiteu la valalua me hatavivile la marokala, egite ge matagaga pepeho mai la mata la haro, oio te la bali La Tahalo Uru. Mai ere la gavusala ge oio te la ilolo la merera, taritigi eia ge lolo la vikararala alele. \s1 La vikarara la tilovo te la tahalo ale sivuti la mani \p \v 44 “La pulolou la matagagala te La Tahalo Uru, eia mai sesele la mani ale tabuli kokovu, taritigi amuto ge vagari tavua mai la tahalo ale vagari la paa muli la mani. Mai la tahalo isa ge ulai kokovu la mani, eala moli la tahalo isapolo ge sivutia, la tahalo ale sivutia ge igo mave? Eia ge ulai kokovu polo loua, eia ge vahari la papaga tomi tetala soio tegiteu la valalua la iloto, egite ge lotoa, eia ge abi la mani uru mai ele, ge vaharia soio te taho la magasale, eia ge loto poloa, me oio vola eia ge sagege pepeho, la vuhula eia balavati la mani uru pepeho ale tabuli kokovu te la magasa ale eia lototiale. Mai tai ele, amuto ge vagari tavu la matagagala te La Tahalo Uru mai la tahalo ale vagari tavu la paa muli la mani. \s1 La vikarara la tilovo te la hatotolu la tuali ale la mapala uru \p \v 45 “La pulolou la matagagala te La Tahalo Uru, eia mai la tahalo ale la igogolu tetala la paa muli la mata la vuliti tomi mai la tuali, eia vilotolotoa. \v 46 La haro isasa la tahalo ale eia goio hilo isasa la hatotolu la tuali ale marasa pepeho. Tio eia goio vahari tomi la golugolu tetala soio tegiteu la valalua la iloto, egite loto tomia, eia goio abi la uati ale egite lotolao, eia goio loto la hatotolu la tuali ale marasa pepehole, la mapala uru sesele. La vuhula eia masaga pepeho seselea veia eia moli sekela ge taholea, mulimuli isa ge loto poloa tetala, eia ge poga la uati uru sesele oio vola. Taritigi tai veia amuto ge vagari tavu la matagagala te La Tahalo Uru mai la tahalo ale vagari tavu la paa muli la vuliti. \s1 La vikarara la tilovo te la vuo \p \v 47 “La pulolou la matagagala te La Tahalo Uru eia mai la vuo ale la valalua rarea, la mata la ia tomi goio tilo ovola. \v 48 Egite goio lapu la vuole, eia volu sesele la ia, egite goio lapua soilo la parava, egite goio pou, egite hilovi tavu molia la ia ale taritigi, egite tau vikapopoa, ale kama kokorao egite pigia. \v 49 Tio te la tapasi la maututula, eia ge mai seselele, egiteu la angelo loata ge sibitala, egite ge hilovi taro egiteu la valalua me hatavivile la iruru ale kabili tegiteu ale maroka. \v 50 Egite ge hilovi taro egiteu la valalua la iruru vikapopo egiteu ale taritigi ele, ge pigi egiteu sotalo te la havi ale uru, me oio vola egite ge kaukaku, egite ge koro magegege, ge melimeli la togo giteu.” \s1 La vikarara la tilovo te la tahalo ale tahola la golugolu usu \p \v 51 Goma, e Iesus goio tahi egiteu la valalua la vimari tetala mago “Mave, amuto abi tigitia la masova la vikararala tomi aleie, ka ouka?” \p Egite goio koliala mago “Meie, amite matagagati ovola.” \p \v 52 Tio, e Iesus loloa veia egite rovitia mai ele, eia goio veia giteu mago “Egiteu la tahalo la mari te la viputumulila te Moses, mai egite ge vimari tigiti te la pulolou la matagagala te La Tahalo Uru, egite mai la tahalo uru isasa ale tahola la vuliti usu. Eia ge vagogala la golugolu tetala ale taritigi ele loilo te la luma tetala, eia vibulea sogala, isahari la vuliti ale halaba, mai la merera taku ale halaba, isahari tai la vuliti ale palati, mai la merera te Buk Tabu Ale Pala. Mai amutou la tahalo la mari te la pulolou la matagagala te La Tahalo Uru sesele, amuto ge valolo la merera tetala tomi.” \s1 Egiteu e Nasaret piagale e Iesus \r (Mark 6:1-6; Luk 4:16-30) \p \v 53 Goma, e Iesus vikara kaluvu soio tegiteu la valalua la vimari tetala, la vikarara la tilovo tetala kaluvu tomiti, eia goio hiliti taro la mautu alele, eia tuga, \v 54 eia goio beu loua soio te la mautu tetala sesele e Nasaret. Eia goio valolo egiteu la valalua me hatavivile te la merera te La Tahalo Uru oilo te la luma la lotu tegiteu. Egite lolo la vimari tetala mai ele, egite karutu, egite goio vei mago “La mari ale, la golu la karutula tai ale veipala la vagagarila te La Tahalo Uru, eia abia love? \v 55 La tahalo ale, e tamala e Iosep moli la tahalo la kilatulatu. E tilala e Maria moli, la tavile tegatou isale. Egiteu e tabarabarala e Iakob, e Iosep, e Saimon, e Iudas, etato rovi tomiti egiteu. \v 56 Egiteu e hatavilevilela tai omai tegatoue. Eala moli la tahalo ale eia mata mai ale isapolo sesele, la vagagarila tetalale, la mari tai uru, eia soioge abia love?” \v 57 Egite vikara mai ele, eala moli egite muku pilea, egite vikara kukumuala. \p Eala moli e Iesus goio veia giteu mago “Mai la bilalaha te La Tahalo Uru ge sibitala, la valalua me hatavivile te la mautu ale sogala egite ge togo seselea, eala moli oio te la mautu tetala sesele ouka, e valaluala ge muku pilea.” \v 58 Tiele e Iesus kama igo usu la golu la karutula ale isapolo kabili tegiteu ele, la vuhula egite kama tautaulailo tetala. \c 14 \s1 La pileho te Ioanes la tahalo la vuluhi \r (Mark 6:14-29; Luk 9:7-9) \p \v 1 Te la imamalale, e Herod, eia la mulugaluga te la gale e Galilea, eia lolo la rere la igogolu te Iesus, \v 2 eia lolo la rerele Iesus mai ele, eia karutu, eia veia giteu la bilalaha tetala mago “Ale soioge e Ioanes la tahalo la vuluhi, eiala mahuli rivuti, eala eia igoti la igogolu ale vagari eia isapolo sesele mai ele, ia?” \v 3 Eia veia giteu la bilalaha tetala mai ele, la vuhula eia taga, la vuhula pala eia vagoilo e Ioanes te la luma la kilisi, me mulimuli ovola eia bili taroa, eala eia lolo la rerele Iesus, eia veia e Ioanes moli ele mahuli rivuti lou, eia taga pepeho. Eala moli la vuhu la iruru te Herod ale eia igotiale Ioanes, eia maie: Pala e Herod eia ovo e tarila e Pilip, eia puli e rutula la isala e Herodias. \v 4 Me oio vola e Ioanes eia kahare bibibiale Herod mago “Eia kama taritigi veia eme ovo e tarimu, eme puli lou e rutula, la iruru aleie eia tikumu sesele, eme poloti la merera te Moses oio te la iruru taumele.” \v 5 Tiele e Herod masaga pepehoa veia ge bili e Ioanes, eala moli eia taga la valalua me hatavivile, la vuhula egite gabu tikumu e Ioanes veia eia la bilalaha te La Tahalo Uru isasa. \p \v 6 Goma, te la haro isasa egiteu la valalua isahari pou vikapopo me Herod, egite igo la ilali la piligo tetala ale virovi la logo ale e tilala taposea oio vola. Te la haro alele e latule Herodias la sobe, eia tilia te la lagu giteu, e Herod hiloa, eia isu pepehoa. \v 7 Eia goio toi la merera ale tikumu soio tetala veia la golugolu tomi ale mave mave eia ge kakea oio tetala, eia ge abi seseleala. \v 8 Goio la tavile bisi ele tahi matagaga e tilala te la merera te Herod ele, e tilala karasukua veia eia ge kaka la gamale Ioanes. Tio eia goilo rivu lou te Herod, eia veiala mago “Gageie eme ge abi moliagu la gamale Ioanes, eme ge taua te la tia, eme ge abiagu.” \v 9 Tio e Herod loloa mai ele, la ilola ruru, la vuhula eia gabutala la merera tetala ale eia toi seseletia soata, eia mahela legiteu la valalua tomi ale egite pou vikapopo te la ilali, eia kama koramulia ge putu lulu lou la tiloiloi te la sobele. \v 10 Tio e Herod goio baha egiteu la bilalaha tetala, egite goio te la luma la kilisi, egite vali utu la lohole Ioanes, \v 11 egite goio abia la gamalale, taua te la tia, vaharia soio te la sobele, eia goio hugua, eia vaharia soio te tilala. \v 12 Mulimuli egite la valalua la vimari te Ioanes goio bole taroa la maule Ioanes soio te la liba, egite goio ulaia, egite ulai kaluvua, egite goio beu rivua soio, egite goio veiale Iesus. \s1 E Iesus vaali egiteu la valalua salatu savulu lima \r (Mark 6:30-44; Luk 9:10-17; Ioanes 6:1-14) \p \v 13 E Iesus loloti la rerele Ioanes mai ele veia e Herod bilitia, eia goio sae la uaga, eia tuga goio te la tasi ale tabou, la valalua ouka oio vola. Eala moli la valalua me hatavivile te la maututula te la gale ale, egite hilo la tuluga tetala mai ele, egite goio tilimulia soio, egite visale moli la parava veia ge poga tavua oio te la gale la magolilo loio. \v 14 E Iesus goio poru, eia hilo egiteu mapaiti pou taitalia, eia gogo pepeho egiteu, eia goio vimahuli egiteu la ilalea tegiteu. \p \v 15 Tio, la paga goio maulavi, egite la valalua la vimari tetala goio tetala, egite veiala mago “Ale la baa bulalahu moli, la paga tai maulaviti, taritigi eme ge baha taro egiteu, egite ge tuga soio te la maututula, egite ge lotoa giteu bakisi la ilali. \p \v 16 Eala moli e Iesus goio veia giteu mago “Egiteu ge tuga ge igo lava e? Amuto ge abia giteu la ilali.” \p \v 17 Eala moli egite koli la merera tetala mago “Amite la ilali kama usu, la bret ilima moli, la ia ilua moli oioe.” \p \v 18 Goma, e Iesus goio veia giteu mago “Amuto abiagu somai la bret ilimale, la ia tai iluale.” \v 19 Tio eia goio veia giteu la valalua me hatavivile veia egite ge pou otalo, eia goio abi la bret ilimao, la ia ilua, eia goio taga soata la mori, eia vei tataho La Tahalo Uru te la ilali ale, eia goio tovia la bret ilimale, eia goio abia giteu la valalua la vimari tetala, egite goio vitabari la valalua me hatavivile ovola. \v 20 Egiteu tomi ele ali maru, egite ali kaluvu, egite goio tau vikapopo la makarakara giteu ale egite ali piligia, egite tovoa te la kelakela makapilapila savulusa gete lua, eia volu sesele. \v 21 Eala moli la giligi giteu la valalua ale e Iesus vaali egiteu, la giligi giteu mai salatu savulu lima, eala moli egiteu e hatavivile me egite gulikiliki mapaiti tai oio. \s1 E Iesus tatuga loata te la kulikuli la mago \r (Mark 6:45-52; Ioanes 6:15-21) \p \v 22 Goma, e Iesus veia giteu la valalua la vimari tetala veia egite ge sae la uaga, egite ge mamuga soio la gale la magolilo loio, veia eia ge pou muga, eia ge baha taro egiteu la valalua me hatavivile. \v 23 Tio egite goio tuga, e Iesus goio baha taro la valalua me hatavivile, egite tugatio, e Iesus goio tuga soata te la popoiti veia eia ge pou muga oata ovola, ge kaka. La paga mata roroviti, e Iesus sekela oio popou, \v 24 eala moli la valalua la vimari tetala egite olau seseleti la tia la mago, la gasi uru pigi robo la uaga, la vuhula la lolovi uru sesele tali lolagu. \p \v 25 Goma, eia hagagaviti la paga ge utupola, e Iesus sibitala tavu egiteu, eia tuga moli oata te la kulikuli la mago. \v 26 Goio la valalua la vimari tetala egite hilo e Iesus eia tatuga mai ele, egite taga pepeho, egite vei mago “A ge, la hitu isale!” Tiele egite hiloa mai ele, egite kakuraha gegeru. \p \v 27 Eala moli e Iesus goio vikara pala soio tegiteu mago “Amuto ge vagari, ale eau molie, amuto umala ge taga.” \p \v 28 Goma, e Pita loloa eia vikara mai ele, eia goio veiala soio mago “Tahalo Uru, mai eme e Iesus sesele, eme ge veiagu veia eau tai ge tuga oata te la kulikuli la mago, ge goio taumele.” \p \v 29 Goma, e Iesus veiala mago “Gomai.” \p \v 30 Tio, e Pita goio purusu sotalo la mago, eia soko la tuluga soio te Iesus. Eala moli eia goio hiloa veia la lolovi vagari pepeho, eia ga tilomulomuti, eia goio tali tavu e Iesus mago “Tahalo Uru, eme ge vimahuliaue!” \p \v 31 Tio, oio moli ovola e Iesus goio lapu rivu loua soata, eia veiala mago “Eme la tautaulailo kama uru, ilava eme kama gabu tikumu la vagagarila taku veia eau ge sau tolame, ia?” \p \v 32 Goio, egira goio sae soata la uaga, la lolovi goio taboutio. \v 33 Goio egite la valalua la vimari te Iesus tomi ele egite goio lotu tavua, egite veiala mago “Eme e Latu La Tahalo Uru sesele!” \s1 E Iesus vimahuli egiteu la ilea usu oio e Genesaret \r (Mark 6:53-56) \p \v 34 Goma, e Iesus mite me la valalua la vimari tetala, egite vore utu la magolilo, egite goio poru oio te la galele Genesaret. \v 35 Eala moli egite la valalua me hatavivile tomi te la maututula ale hagagavi te la gale ale, egite rovitia veia e Iesus guviti ele, egite goio baha la vikararala soio te la maututula tomi te la gale alele, egite goio bolea egiteu ale lea soio te Iesus. \v 36 Egite goio kaka gogogo vagari e Iesus veia egite la ilalea ge pilau moli la gilesu la lavalava tetala, egite ge mahuli. Me egiteu tomi ale pilau la lavalava tetalale, egite goio mahuli tataho sesele mai ele. \c 15 \s1 La merera te La Tahalo Uru eia muga te la merera te ururu alaura \r (Mark 7:1-13) \p \v 1 Goma, egiteu e pariseo isahari, egiteu tai la tahalo la mari te la merera te Moses, egite hiliti loio e Ierusalem, egite goio te Iesus, egite tahia mago \v 2 “Igo mave egite la valalua la vimari taume egite kama tilimuli la vulovulo giteu e ururu? Mai egite ge ali, egite kama litu pala muga la lima giteu mai la irovilala veia la ilali tegiteu eia maroka moli, egite kama igoa mai ele, egite poloti la merera te ururu.” \p \v 3 Eala moli e Iesus putu oli lou la merera tegiteu mago “Amutou tai, amuto tilimuli moli la vulovulo giteu e ururu tamutou alaura, amuto tau loua oata te la merera te La Tahalo Uru. \v 4 Mai la merera te La Tahalo Uru eia veia maie: Amuto ge togo e tila mutou, e tama mutou tai, mai e guliliki ale eia gilo e tilala me tamala, amuto ge bilia. \v 5 Eala moli amuto goio vuloti loua, amuto veia mai la tahalo isasa eia tahola la uati koramulia, eia ge suli e tilala me tamala oio vola. Eala moli te la merera tamutou, amuto veia mai eia ge veiale tilala me tamala mago ‘Ale eau veia ge abia mulua veia ge suli le amulua, eau abitia La Uru’, tio amuto veia mai eia ge toi la merera ale mai ele soio tegirua, \v 6 tio eia kamati ge suli egirua te la iraragila tetalale. Ale amuto tao taluti la merera te La Tahalo Uru sotalo, amuto vagoatati la vulovulo giteu e ururu tamutou, la vulovulo giteu soatati. \v 7 Maura miteu la tahalo la visigologolola amutoue! La bilalaha e Aisaia eia rovi tigi sesele amutou ale eia vei pala la merera maie: \li1 \v 8 Egiteu la valalua aleie veia egite togo eau, \li1 eala moli egite togo moliau \li1 te la hare giteu moli ogala, \li1 la gabutatalala tegiteu oilo te la tia giteu, \li1 eia malau taro eau. \li1 \v 9 Egite veia egite lotu tavu sesele eau, \li1 eala moli la lotu tegiteu somai taku \li1 eia la golu bulalahu moli, \li1 la merera tai tegiteu ale egite vimari \li1 la valalua me hatavivile ovola, \li1 eia la merera la vovo moli, eia la golu bulalahu.” \s1 La vulovulo ale kama kokora sibitala loilo te la tia gatou \r (Mark 7:14-23) \p \v 10 Goma, e Iesus goio tola egiteu la valalua me hatavivile soio tetala, eia veia giteu mago “Amuto tomi ge lolo la merera taku, ge gabutala muli la masovala. \v 11 Mai la ilali ale egiteu e pariseo magiri robo etatou ovola veia eia la rivu gatou, mai etato ge alia, eia kama viruru etatou veia la vulovulo gatou kati ge maroka. Eala moli la gabutatalala ale kama kokora, eia tabuli oilo la tia gatou, eia ge gogala, ale moli ele visibitala la iruru ale igo mumugu la vulovulo gatou.” \p \v 12 Tio, e Iesus vimari egiteu mai ele kaluvu, egiteu la valalua la vimari goio tetala, egite veiala mago “Eme kama rovia veia oio te la vimari taume bakisi ele, egiteu e pariseo isahari loloa, egite mahela, egite igo totolo?” \p \v 13 Eala moli e Iesus goio kolia soio tegiteu mago “Egiteu la obobu tomi ale kusi bulalahu, e Tete kama galu egiteu, eia ge lipu lulu taro lou egiteu. \v 14 Egiteu e pariseo korale! Egiteu mata keati! Umala lololo egiteu, egite souka viruru amuto! Mai la mata kea isa ge tata e tabarala la mata kea isa lou soio la gauru, egira tomi ge boru sotalo la lulu!” \p \v 15 Eala moli e Pita lolo la vikararala te Iesus ele, eia goio veiala mago “Eme ge lubea miteu la masova la vikarara la tilovo alele!” \p \v 16 Goio, e Iesus koli la merera tetala mago “Ia, la mari taume so boto, eia soukama uru te la mari tegiteu e tabarabaramu ele! \v 17 Male, la ilali ale etato alalia, eia goilo moli la tia gatou, mulimuli eia goio kokovu lou. \v 18 Eala moli la merera ale sibitala te la hare gatou, eia veipala la gabutatalala tegatou ale tabuli oilo la tia gatou. Ale moli ele igo gegeru amutou veia amuto kama maroka. \v 19 Egiteu la vulovulo ale kama kokora ale sibitala loilo te la tia mutou, egiteu la mata la iruru tomi ale maie: la bilili la tahalo; la igo gegeru la taulaila; la mata bulakalakala; la ilosa; la pakalila; la visigologolola; la mera kukumula. \v 20 Egiteu la iruru tomi alele igo mumugu amutou veia amuto kama maroka. La magiri robola ale mave mave tegiteu e pariseo eia la golu bulalahu moli. Mai egite veia mai etato ge ali, etato ge litu pala muga bakisi la lima gatou mai la irovilala, veia la ilali ge maroka moli ge goilo te la tia gatou veia etato souka ge mumugu, ale egite vimari amutou mai ele, egite visigolo pasi. La gabutatalala tamutou moli oilo ale kama kokora, eia ge gogala, ale moli ele ge igo mumugu la vulovulo mutou.” \s1 La tavile Kenan isasa la tautaulailo tetala uru sesele \r (Mark 7:24-30) \p \v 21 Goma, e Iesus goio hiliti taro la mautu ale, eia goio la gale la mautu ilua, e Taia me Saidon. \v 22 Goio la tavile Kenan isasa ale mou oio vola eia tuga tavu e Iesus, eia tatola soio tetala maie mago “Tahalo Uru, emei e tubule Devit ele, eme ge gogo eaue! e latugu oio kati kokora, la hitu saeti tetala, igo gegerutiae!” \p \v 23 Eala moli e Iesus makovu moli, eia kama koli la vikararala te la tavilele. Goio egite la valalua la vimari te Iesus tutu toleala mago “Amite silahati leia, eia tali muli moliti etatoue. Mai eme ge suli mugea, ge baha taro loua!” \p \v 24 Eala moli e Iesus veia giteu mago “E Tete baheau veia eau ge suli muga egiteu e Israel, ale egite mai la sip ale ruruti soio la hohoi.” \p \v 25 Eala moli la tavile goio toto tulu otalo oio te la lagule Iesus, eia tali tavua mago “Tahalo Uru, eme ge suliaue!” \p \v 26 Tio, e Iesus loloa mai ele, eia goio veiala mago “La tahalo ale vaalali e latatula, eia kama ge lagi taro lou legiteu la ilali ale eia vaali egiteu ovola, veia ge pigia la paia. Mai la visuli taku eia koramuli moli egiteu e Israel, eia kama tamutou ale logala!” \p \v 27 Eala moli la tavile koli tataho la merera tetala mago “Eia sesele, Tahalo Uru, eala moli amite la paia ge pou otalo la uluva la poro la ilali tamutou e Israel, amite ge ali la makara mutoue.” \p \v 28 Tio, e Iesus loloa mai ele, eia veiala mago “Tavile kokora, eme la tavile la tautaulailo sesele! Eia ge sibitala moli mai ale eme masagea.” Tio oio moli ovolale la hitu hele taro e latula, eia taritigitio. \s1 E Iesus vimahuli egiteu la ilea usu oio e Galilea \p \v 29 Tio, e Iesus goio hiliti taro la mautu alele, eia goio hagagavi la magolilo e Galilea, eia goio tie soata te la varu la gove isa oio volae, eia pou oata ovolao. \v 30 Goma la valalua me hatavivile mapaiti egite goio sibitala tavua oata te la govele, egite vahari egiteu la ilalea soio te Iesus, egiteu ale vaha gegeru, egiteu ale mata kea, egiteu ale gulugulu, egiteu ale paua, la ilalea usu tai mai ele. Egite bole egiteu soio te Iesus, egite goio vitabuli egiteu hagagavi te la balile Iesus, eia goio vimahuli egiteuo. \v 31 Tio egiteu la valalua me hatavivilele, egite hilo la igogolu te Iesus ale eia vimahuli egiteu ale lea, egite karutu sesele, la vuhula egiteu ale paua, egite vikarati lou, egiteu ale la vaha giteu makoko, egite tuga matatati, egiteu ale vaha gegeru, egite tuga tigiti, egiteu ale mata kea, la mata giteu matagagati. Tio egite hiloa mai ele, egite goio vaisaleti la isa La Tahalo Uru, La Uru tegiteu e Israel. \s1 E Iesus vaali egiteu la valalua salatu savulu vaa \r (Mark 8:1-10) \p \v 32 Goma, e Iesus tola egiteu la valalua la vimari soio tetala, eia goio veia giteu mago “Eau gogo pasi egiteu la valalua me hatavivile aleie, la vuhula la haro itoluti egite pouti omai taku, egite kama ali bakisi. Eau kama masagea ge baha taro egiteu soio te la maututula tegiteu, la vuhula la mata giteu souka ge maligoma la vitolola te la gauru, egite ge peho parava la vitolola te la gauru.” \p \v 33 Eala moli egiteu la valalua la vimari tetala goio veiala mago “Ale la baa bulalahu moli, la mautu isa ouka. Etato ge loto la ilali oiove veia etato ge abia giteu la valalua me hatavivile ale usuto e?” \p \v 34 Goma, e Iesus goio tahi egiteu mago “La bret iriva oio?” \p Tio egite veiala mago “La bret ivitu moli, la ia ilua bisisi tai, kama usu.” \p \v 35 Eala moli e Iesus goio veia giteu la valalua me hatavivile veia egite ge pou. \v 36 Eia goio abia la bret ale ivitu ele, la ia ilua bisisio, eia goio kaka tavu La Tahalo Uru, eia vei tatahoa te la ilali ele, eia goio tovi momomo la ilali tegiteu ele, eia abia giteu la valalua tetala, egite goio vitabari legiteu la valalua me hatavivile ovola. \v 37 Egiteu tomi ali, egite maru taroa, goio egite la valalua la vimari te Iesus goio tau vikapopo la makara giteu la valalua me hatavivilele, egite tovoa te la kela ivitu ale ururu makapilapila. \v 38 Eala moli la giligi giteu la valaluale eia mai salatu savulu vaa, me egiteu e hatavivile, egiteu e gulikiliki tai usu oio tai tegiteu ele. \v 39 Tio e Iesus goio baha taro egiteu tomi ele, egite goio tuga. E Iesus mite me la valalua la vimari tetala egite goio sae te la uaga, egite tuga goio la gale e Magadan. \c 16 \s1 Egiteu e pariseo, e sadiusi, egite masagea veia ge hilo la irovilala \r (Mark 8:11-13; Luk 12:54-56) \p \v 1 Goma, egiteu e pariseo, egiteu e sadiusi tai isahari, egite goio te Iesus, egite masagea veia egite ge tovo lalaia, egite goio tetala, egite veiala veia eia ge vahilo legiteu la irovilala isasa ale loata sesele te la mori, mai la igogolu isasa te la limala ale isapolo sesele. \p \v 2 Eala moli e Iesus veia giteu mago “La irovilala mapaiti oio veia amuto ge mata kilala ovola veia eau e Kraist, eau sibitalati. Hiloa, mai la paga ge maulavi, la mori sala tataho, e gusi magegese, amuto ge vei mago ‘Hilage, la maulavi isa taritigi pepeho, la hura ka ge pu.’ \v 3 Mai tai amuto hagolo te la kavikoki, la haro goio porosile, amuto hilo la mori eia parakukuru, tio amuto vei mago ‘La hura ge pu gageie, la lolovi tai soioge ge vagari.’ Ealale, amuto hilo la irovilala oata te la mori, amuto mata kilala tavutia, amuto rovi tataho la masovala. Me ilava amuto kama rovi tigi tai la imamala ale igoie, me la irovilala tomi tai oio vola, veia amuto ge mata kilala tavua, ia? \v 4 Amutou la tuvu la valalua me hatavivile ale igoie, amuto kama kokora, amutou la valalua me hatavivile la iruru. Amuto karasuku eau veia eau ge vahilo le amutou la golu la karutula, eala moli ouka, eau kama ge igo isa la irovilala te la vagagarila taku veia amuto ge hiloa. Eala moli mulimuli amuto ge hilo la irovilala isasa mai la irovilala ale sibitala te Iona, eia tabuli kokovu la logo itolu, eau tai ge igo tai mai ele, eau ge mahuli rivu lou. Amuto ge hilo la irovilala alele, isa lou ouka.” Tio eia veia giteu la vikararala ale tivura sesele mai ele kaluvu, eia goio hiliti taro egiteu, eia tuga. \s1 La vikarara la tilovo te la is ale visogo la palava \r (Mark 8:14-21) \p \v 5 Goma, e Iesus sae muli egiteu la valalua la vimari tetala, egite vore polo soio te la gale la magolilo loio, eala moli egiteu la valalua tetala kama gabutala la ilali, egite tamamasi la bret isa moli te la tuluga tegiteu ele. \v 6 E Iesus goio veia giteu mago “Amuto ge baumuli tigi amutou te la is tegiteu e pariseo, tegiteu e sadiusi tai.” \p \v 7 Eala moli egiteu la valalua la vimari tetala vipigi vulo lou la merera tetalale kabili tegiteu lou, egite vikara mago “Eia soioge veia gatou maie la vuhula etato kama abi la bret.” \p \v 8 Eala moli e Iesus roviti la vikara kukumula tegiteu, eia goio veia giteu mago “Amutou la valalua aleie, la tautaulailo tamutou kama uru. Ilava amuto vikara kukumu veia amuto kama abi la bret? \v 9 Amuto soukama rovi tigi la vibaumulila taku veia eia taritigi sesele, ia? Amuto kamati gabutatala la bret ale ilima moli pala, egite la valalua salatu savulu lima alia? Amuto vikapopo la makarakara giteu, eia usu pepeho sesele. \v 10 Oio tai te la bret ale ivituo, amuto kamati gabutatala egiteu la valalua salatu savulu vaa eau vaali egiteu ovola, egite maru taro loua, la makarakara giteu tai usu? \v 11 Ale eau veia mutou te la is tegiteu e pariseo, me tegiteu e sadiusi tai, ale eau kama tovo amutou te la bret veia ge igo totolo lou amutou ale amuto vaula la ilali te la tuluga tegatou. Ilava amuto kama gabutala tigia la vikararala taku e? Ale eau tovo moli amutou te la is ale visogo la palava, mai la visigologolola tegiteu e pariseo me tegiteu e sadiusi, eia vali sogo la valalua me hatavivile mapaiti.” \p \v 12 Tio, eia lubea giteu la masova la merera tetala mai ele, egite matagagati veia eia kama mera taro egiteu te la is sesele ale egite vivuloa vikapopo la palava, eala moli eia mera taro egiteu veia egite umala ge lolo la vimari tegiteu e pariseo me tegiteu e sadiusi tai ele. \s1 E Pita rovitia veia e Iesus eia e Kraist sesele la tahalo la vimahuli \r (Mark 8:27-30; Luk 9:18-21) \p \v 13 Tio, e Iesus mite me la valalua la vimari tetala, egite goio tuga lou soio, egite goio guvi te la gale e Sisaria Pilipai. Egite goio guvi ovolae, e Iesus goio tahi egiteu la valalua tetala mago “La valalua, egite veia eau ere?” \p \v 14 Tio, egite goio koli la tilahi tetala mago “Isahari, egite veia eme e Ioanes la tahalo la vuluhi. Isahari egite veia eme e Lias. Isahari lou veia eme e Ieremaia. Isahari tai kama rovia, egite vei molia veia eme la bilalaha te La Tahalo Uru isasa.” \p \v 15 Tio, e Iesus goio tahi rivu lou egiteu mago “Me amutou, amuto veia eau erei e?” \p \v 16 Tio, e Saimon Pita goio koli la tilahi tetala mago “Eme e Kraist, e Latu La Tahalo Uru, eia moli sekela mahuli.” \p \v 17 Tio, e Iesus loloa mai ele, eia goio vei tataho e Pita mago “Saimon, e latule Iona, eme balava seseleti, la vuhula la tahalo la vovo isasa kama sile palea soio taume mai ele, e Tete moli oata te la ilo la lage eia veipalea te la gabutatalala taume. \v 18 Eau veiamu, eau ge toi la isamu sesele e Pita, la masovala mai ‘la uati ale uru’ me eau ge vahiliti la lotu taku loata te la hate la uati urue, eala moli la vagagarila te Satan kama ge koramulia veia ge bolehohoa. \v 19 Eau ge abiamu la ki ale eme ge kopea giteu la valalua me hatavivile mapaiti la mata ale goilo te la balile Tete, eme ge sau tolea, veia la merera ale eme ge kisia omai te la maututula, e Tete tai ge kisia oata tetala, me la merera ale eme ge lubea omai te la maututula, e Tete tai ge lube taia oata te la ilo la lage.” \v 20 Tio eia vikara matagaga soio tegiteu mai ele kaluvu, eala moli eia tutu tola taia giteu veia egite umala muga ge veipaleale isasa veia eia e Kraist. \s1 E Iesus vikara matagaga te la pileleho tetala \r (Mark 8:31–9:1; Luk 9:22-27) \p \v 21 Goio, soko molia te la haro ale, e Iesus goio lube tatahoa giteu la valalua la vimari tetala veia la masasagala te Tamala soio tetala eia maie veia eia ge goio muga e Ierusalem, me oio vola egiteu la mulugaluga tegiteu e pris, egiteu e ururu tegiteu e Iuda tai, vikapopo me egiteu la tahalo la mari te la merera te Moses, egiteu tomi la mulugaluga alele, egite ge viligi pepehoa, egite ge bilia, eia ge peho, la haro itolu ge polo, eia ge mahuli rivu lou. \p \v 22 Tio e Iesus vikara matagagea giteu mai ele kaluvu, e Pita goio pulia soio, egira magiri gale, e Pita goio igo totolo e Iesuso, eia veiala mago “La vikararala tomi ale eme veitiae, La Tahalo Uru ge magiri robo loua, eia kama koramulia egite ge igo gegerume mai ele!” \p \v 23 Eala moli e Iesus goio magiri, eia vulo gele tavu e Pita, eia veiala mago “Emei e Satan! Taritigi eme ge hele taro eau. Eme souka ge igo marapa la gabutatalala taku gageie, la vuhula eme kama gabutatala la masasagala te La Tahalo Uru, ouka viruru, eme gabutatala moli la vulovulo te la maututula.” \p \v 24 Tio, eia veiale Pita la vikararala ale tivura sesele mai ele kaluvu, eia goio vei loua giteu la valalua la vimari tetala mago “Mai la tahalo isasa eia masagea veia ge mulimuliau, eia umala ge mulimuli la masasagala tetala. Eau ge ligi oata te la tauvalautu, tiele eia taritigi veia la tahalo me la tavile ale taku, eia ge raragi tai veia eia tai ge ligi mai eau. \v 25 La vuhula mai la tahalo isasa eia ge hate robo la mahulila tetala veia eia kama ge sugu taroa somai taku, la mahulila tetala ge kokovu taro leia. Mai tai la tahalo taku sesele eia ge sugu taro la mahulila tetala somai te la igogolu taku, la tahalo ale ge sivuti la mahulila ale sesele, la kaluvula ge ouka. \v 26 Tiele, mai la tahalo isasa eia ge sau tola moli la golugolu mapaiti, la uati tai uru omai te la mahulila ale igoie, eala moli la kalulula ge vilua, la golugolu tetala, la uati uru tetala tai ele, eia kama ge vimahulia. La golugolu tetala ale eia taholeale, eia ge sulia mave? Etato ge loto rivu lou la kalulu gatou la rova e? \v 27 Amuto ge magiri vagari, la vuhula eau e Latu La Tahalo, eau ge guvi vikapopo la matagaga uru loata te Tete, vikapopo tai me egiteu la angelo tetala. Te la haro alele eau ge koli la vulovulo la valalua me hatavivile tomi te la vulovulo giteu ale egite igotia. \v 28 La merera taku soio tamutou eia sesele viruru, isahari oio tamutou ele, egite kama ge peho hari, egite ge hilo e Latu La Tahalo, eau ge sibitala, eau ge visibitala la pulolou la matagagala te Tete.” \c 17 \s1 La vovole Iesus eia vulo, eia mata sapolo te la hililo te Pita miteu \r (Mark 9:2-13; Luk 9:28-36) \p \v 1 Tio, la haro iuolo polo, e Iesus goio puli e Pita, e Iakob, mira me tabarala e Ioanes, egite tie soata te la varu la gove isasa, la varu la govele eia tovosele, eia goata pepeho. Egite tie soata ovola mai ele, egite goio pou. \v 2 Tio egite pou oata te la govele, la vovole Iesus eia vulotio, eia mata sapolotio te la hililo te Pita miteu, la tirarola matagaga pepeho mai sesele la mata la haro, la kulikuli tetala eia sasima pepeho, eia kea lovolovo sesele viruru. \v 3 Goio e Moses mira me Lias egira sibitala, goio egite me Iesus vikarakara. \p \v 4 Tio, e Pita goio veiale Iesus mago “Tahalo Uru, etato pou omaie, amite hiloti la paga ale isapolo seseleti ele, eia taritigi pepeho, tiele mai eme ge masagea eau ge tigi la kale itolu omaie, isasa taume, isasa ge te Moses, isasa ge te Lias.” \p \v 5 Tio, e Pita so vikarakara mai ele, la tuluvu la mori isa gotalo pigi robo egiteu ele, la magala uru pepeho. Goio la golu La Tahalo Uru tatola loilo te la tuluvu la mori ele mago “Ale e Latugu la riau, eau sagege pepeho sesele leia, taritigi amuto ge roromuli molia!” \p \v 6 Eala moli egite la valalua la vimari te Iesus taho tolue, egite lolo la golu La Tahalo Uru mai ele, egite goio boru sotalo la magasa, la vuhula egite taga pepeho. \v 7 Eala moli e Iesus goio tegiteu, eia sau te la vovo giteu, eia veia giteu mago “Amuto hiliti, amuto umala tataga.” \v 8 Tio egite goio hiliti, egite ga mata galilili, egite kama hilo isasa la tahalo, ouka, egite hilo moli e Iesus sekela moli oio popou. \p \v 9 Goma, egite goio hiliti, egite purusu loata gotalo, e Iesus tutu tolea giteu mago “La paga ale amuto hilotia, amuto umala ge veipalea la tahalo isasa, eia ge kora moli mai ele, kara te la haro ale e Latu La Tahalo ge mahuli rivu taro la lulu la pileho.” \p \v 10 Eala moli egite goio tahi loua mago “Igo mave egite la tahalo la mari te la merera te Moses, egite veia e Lias eia ge sibitala rivu muga, me e Kraist ge mulimuli?” \p \v 11 E Iesus goio koli la tilahi tegiteu mago “La tilahi tamutou eia sesele, e Lias eia ge sibitala pala muga, eia ge vimatata pala muga la gabutatalala te la valalua me hatavivile e Israel. \v 12 Eala moli eau ge veia mutou, e Lias eia sibitalati, eala moli la valalua kama mata kilala tavua, egite mulimuli moli la gabutatalala tegiteu soio tetala, egite igo gegeruao. Eia ge mai tai ele te Latu La Tahalo, eia ge gabu la iligiligi me la tahi vilela tegiteu la valalua me hatavivile ale gimeau.” \v 13 Tiele e Iesus veia giteu mai ele, egite la valalua la vimari tetala egite rovitia veia eia veia giteu te Ioanes la tahalo la vuluhi. \s1 E Iesus kumuli taro la hitu ale kama kokora loilo te guliliki isa bisi \r (Mark 9:14-29; Luk 9:37-43) \p \v 14 Tio, goio, e Iesus me egiteu taho tolu e Pita, e Iakob, e Ioanes, egite goio beu rivu loua sotalo tegiteu la valalua me hatavivile mapaiti ale egite pou tali e Iesus ele. Goio la tahalo isasa goio te Iesus, eia toto tulu otalo te la lagule Iesus, eia veiala mago \v 15 “Tahalo Uru, taritigi eme ge gogo e latugu bisi hatamale, e dododo igigoa, eia ligi pepeho, la ilea tetalale ge sibitala tavua, eia ge bili mumugu la vovola otalo te la magasa, eia boru vaka usu sotalo te la havi, sotalo tai te la lalu. \v 16 Eau vaharitia soio tegiteu la valalua taume, eala moli egite kama igo seselea veia egite ge vimahulia, egite kama koramulia.” \p \v 17 Tio, e Iesus lolo la vikararala tetalale, eia hate mamasi, eia goio igo totolo egiteu la valalua me hatavivilele mago “Ko, amuto la tuvu ale igoie, amuto ouka pasi, eau silaha pepeho seseleti la pulolou taku omai kabili tamutoue! La leavala iriva lou eau ge pou omai tamutou veia eau ge bukeke la tikumu la vulovulo mutou e? Amuto ge puliagu somai e guliliki ele!” \v 18 Tio egite goio puli e guliliki ele soio te Iesus, e Iesus gusia la hitu ale pou te maura, eia goio hele taroa e guliliki ele, me oio moli ovola la ilea tetala kaluvutio. \p \v 19 Goio, egite la valalua la vimari te Iesus goio tetala, egite tahia mago “La vuhula la rova sesele ale amite kama koramuli la kumuli taro la hitu ale pou te guliliki ele?” \p \v 20 Tio e Iesus goio koli la tilahi tegiteu mago “La vuhula amuto kama tautaulailo sesele te La Tahalo Uru, la tautaulailo tamutou eia bisi moli, kama uru. Eau vei seselea mutou, mai amuto ge tahola la tautaulailo ale bakisi moli mai la vavua la obu ale bisi kokori moli, amuto ge koramuli la igogolu tomi ale vagari, eia isapolo. Amuto ge koramulia ge vikara soio te la gove veia eia ge hiliti taro la mulila eia ge tasuku soio la baa ale isapolo, tio eia ge sibitala mai sesele ale amuto veitia, la gove uru ele ge tasuku, la vuhula amutou kaka te la tautaulailo sesele. [ \v 21 Eala moli la hitu ale vagari sesele mai ale eau so kumuli tataro moliao, eia isapolo, la gauru isa lou ouka veia etato ge kumuli taro la hitu ale kama kokora sesele mai ele, la kilaka moli sekela, vikapopo la peremula tai ale ge vitikumu la kilaka tegatou.]” \s1 La ilua la vikara matagagala te Iesus te la pileleho tetala \r (Mark 9:30-32; Luk 9:43-45) \p \v 22 Goma, e Iesus miteu me la valalua la vimari tetala, egite so popou oio la gale e Galilea, la haro isasa e Iesus goio veia giteu la valalua tetala mago “Isa ge sugu taro e Latu La Tahalo soio tegiteu la valalua la gima, \v 23 egite ge biliau, eau ge peho, la haro itolu ge polo, eau ge mahuli rivu lou.” Tiele egite la valalua tetala lolo la merera tetala mai ele, egite ilo burukotio, la ilo giteu ruru seseleti. \s1 E Iesus pigi la uati soio te la luma la lotu \p \v 24 Mulimuli e Iesus miteu me la valalua la vimari tetala egite goio guvi oio e Kapernaum, egiteu la valalua la ilabi la uati te la luma la lotu egite goio te Pita, egite tahia mago “Mave, la tahalo la vimari taume eia soioge kama lotoloto la takes te la luma la lotu, ia, uka mave?” \p \v 25 Tio, e Pita loloa mai ele, eia goio veia giteu mago “Ouka, La Uru miteu eia lotoloto tai la takes te la luma la lotu.” \p Eala moli e Pita goio beu rivu loua soilo te Iesus, e Iesus goio vikara pala muga soio tetala, eia tahia mago “Pita, eau ge tahime la gabutatalala taume. Mave, egiteu la mulugaluga omai te maututula, egite ge vibukeke e valalua giteu lou la piligi la takes soio tegiteu, uka egite ge kaka la uati tegiteu moli ale logala?” \p \v 26 Tio, e Pita goio koliala mago “Egite ge abi la uati tegiteu moli ale logala, kama te valalua giteu lou, ouka.” \p Goio, e Iesus sile pala la merera soio tetala mago “Tiele, mai moli ele eau tai e Latu La Uru, eau kama ge ligi la piligi la takes soio te la luma la lotu te Tete. \v 27 Eala moli egiteu ale kaka etala la uati soukama ge igo totolo, eala eau ge bahame, eme ge abi la string taume, eme ge magiri olau la parava, eme ge pigi la string taumele, mai la ia isasa ale eme lapu palea, eme lapu mamugea, eme ge kiki tola la kasasala, eia ge hare palala, eme ge sivuti la uati isa oilo la ilola koramulia veia eme ge abia giteu te la iloto la takes tegalua tomi.” \c 18 \s1 Ere ge uru te la pulolou la matagagala te La Tahalo Uru? \r (Mark 9:33-37; Luk 9:46-48) \p \v 1 Goio, e Iesus me Pita so vikarakarale, egiteu la valalua la vimari te Iesus goio tetala, egite tahia mago “Amite veia ge rovia, ere isasa eia ge uru te la pulolou la matagagala te La Tahalo Uru?” \p \v 2 Tio, e Iesus lolo la tilahi tegiteu mai ele, eia goio tolea e guliliki isa bisi, eia vimagiri posea kabili tegiteu. \v 3 Eia goio veia giteu mago “Ale eau vei seselea mutou, mai amuto kama ge vulo la vulovulo mutou, me la gabutatalala tamutou ge sibitala maroka mai e guliliki bisi ele, amuto kama koramulia ge goilo te la pulolou la matagagala te La Tahalo Uru, ge ouka viruru. \v 4 Mai la tahalo isasa eia ge vibisi lou eia mai e guliliki bisi ele, eia moli ele koramuli sesele la tiroro soilo te la pulolou la matagagala te La Tahalo Uru. \v 5 Mai la tahalo me la tavile tai ale taku, eia ge suli tigi tai isa e guliliki bisi mai e guliliki aleie, veia ge mulimuli tataho la vulovulogu mai ele, tiele eia mai tai ale eia suli eaue. \s1 La vulovulo ale kama kokora eia magiri robo la iroromulila tegatou \r (Mark 9:42-48; Luk 17:1-2) \p \v 6 “Mai la tahalo isasa ge viruru isasa tegiteu e gulikiliki bisisi ale roromuliau, eia ge vilua te la igototolola te La Tahalo Uru. Eia ge taritigi tetala veia mai eia soukama igo la iruru tetalale, mai egiteu e tabarabarala ge lao tola mugea, egite ge pitotoia la lohola la uati isa uru, ge pigia olau te la tia la utu, la vuhula eia souka ge igo la iruru tetala ale uru pepehole. Ale la vovola moli ge vilua, la kalulula ge mahuli. \v 7 Maura miteu la valalua me hatavivile omai te la maututula, la vuhula egite volu la vulovulo tomi ale kama kokora eia ge vitilo egiteu ale taku. Eia sesele la iruru tomi ge sibitala, kama ge kaluvu, eala moli egiteu ale viruru egiteu e latatugu ge vilua sesele. \v 8 Mai la limamu me la vahamu eia ge virurume, eia taritigi eme ge barautu taroa ge pigia, la vuhula eme ge vulo taro la viluala mai ele, la limamu me la vahamu isa moliti, eala moli la vovomu mahuliti. Kama taritigi veia la vovomu tomi ge vilua te la havi ale uru, la kaluvula ge ouka. \v 9 Mai tai la matamu isasa eia ge virurume, taritigi eme ge suba taroa ge pigia, eia taritigi moli veia eme ge mata kea galesa moli, eme ge tiroro soilo te la mahulila ale sesele la tapasila ge ouka. Eala moli eia kama taritigi mai la matamu ilua tomi soloio, eme so popou te la iruru, tiele la vovomu tomi ge gotalo te la havi ale uru, la kaluvula ge ouka. \s1 La vikarara la tilovo te la sip ale ruru soio la hohoi \r (Luk 15:3-7) \p \v 10 “Amuto ge baumuli tigi amutou, amuto souka ge vile isa tegiteu bisisi ale roromuliau veia egite la golu bulalahu moli te la mata mutou. Eau veia mutou, egiteu tahola e angelo tegiteu te la vibaumulila tegiteu isasasa me egiteu la angelo la vibaumulilale, egite pou sesele te la balile Tete oata te la ilo la lage.[ \v 11 Eia sesele moli veia e Latu La Tahalo eia gomai te la maututula veia ge vimahuli la valalua me hatavivile ale ruruti soio te la vulovulo ale kama kokora.] \p \v 12 “Amuto gabua mave? Mai la tahalo isasa eia tahola la sip salatu sasa, me isasa eia ge ruru, la tahalo alele eia kama ge paa mulia, ia? Ouka, eia ge piligi egiteu la sip ale savulu ualasiu gete ualasiu ele, eia ge paa muli ale isa moli sekela eia ruruo. \v 13 Ale eau veia mutou, mai e tahola ge sivutia la sip ale isasa moli ruruo, eia ge sagege pepeho ale isa moli eia sivutiale. La sagegela tetala ge uru kara polo la sagegela tetala tegiteu la sip ale savulu ualasiu gete ualasiu, ale egite kama ruru ele. \v 14 Tiele eia mai tai e Tama mutou ale oata te la ilo la lage, eia kama masagea veia isasa tegiteu e guliliki bisisi ale roromuliau veia eia ge ruru, ouka, eia ge paa muli vagari egiteu, eia kama masaga viruru veia isasa ge vilua. \s1 La gauru la vimatatala te tabara gatou ale eia ruru \p \v 15 “Mai e tabaramu isasa eia ge igo la iruru isasa soio taume, taritigi eme ge tuga tavua soio, amula sekela moli ge pou, eme ge vikara gogomeala la merera ale taritigi, eme ge veiala la iruru tetala mai ele. Tiele mai eia ge lolome, alele eme puli rivuti e tabaramu ele loio te la iruru, amula ge vipuhi tigi tataho lou. \v 16 Eala moli mai e tabaramu kama roromuli la merera taume, eme ge puli la tahalo isa lou, uka ilua, amuto ge goio tetala, amutou tomi ge vipigi vulo mugea la iruru tetala, veia egira ale taho lua lou ele ge koramulia ge sivuti sesele la vuhu la iruru tetala veia eia igo seseletia ka ouka. La vuhula La Buk Tabu Ale Pala eia veia maie veia taho lua uka taho tolu tomi ge vitikumu lou la merera tegiteu ale puli e tabara giteu isasa soio te la vigagiala. \v 17 Eala moli mai e tabaramu ale igo la iruru soio taume ele, eia kama masagea veia ge lolo la merera tamutou taho tolu mai ele, amuto ge veipala la iruru tetala soio te la valalua me hatavivile la lotu te la pou vikapopola tegiteu, egite tomi ge loloa. Tiele mai eia kama ge roromuli la viputumulila tegiteu tomi maie, taritigi amuto ge kisu taro molia mai la tahalo ale kama rovi la lotu. Mai tai la tahalo ale egiteu e Rom bahea te la ilabi la takes tamutou, eia ge la tahalo ale kama kokora te la milatalata tamutou mai ele, la vuhula eia vareagi. \p \v 18 “Eau ge veia mutou, la iruru tomi ale amuto la valalua me hatavivile ale taku ge pou vikapopo ge viputumulia veia eia la iruru sesele ale egite isa igo seseletia, tio La Tahalo Uru tai oata te la ilo la lage ge kisi tai la merera tamutou ele. Mai tai la iruru tomi ale amutou ale taku ge viputumulia veia eia kama sesele, tio La Tahalo uru tai oata te la ilo la lage eia ge vimavulaha taro la iruru alele, la vuhula eia kama sesele. \p \v 19 “Me eau ge vei taia mutou lou la merera ale taritigi maie veia mai ge taho lua tamutou ale taku omai te la maututula, mai amula taho lua moli ge kisi la merera, la gabutatalala tamulua isa moliti mai ele, tiele amula goio kaka vagari tavuau ovolao, tio e Tete oata te la ilo la lage ge igo seselea soio tamulua mai la kilaka tamulua, ale amula kisitiale. \v 20 La vuhula, eia sesele viruru mai taho lua uka taho tolu ale taku, mai egite ge pou vikapopo te la isagu, eau tai ge pou vikapopo me egiteu ele.” \s1 La vikarara la tilovo te la bilalaha ale kama gogo e tabarala \p \v 21 Goma, e Pita goio te Iesus, eia tahia mago “Tahalo Uru, mai e tabaragu eia ge igo la iruru somai taku, me eia ge igoa vaka usu mai ele, tiele eau ge hilo taro la iruru tetala vaka riva seseleti veia eau kama ge gabutalea? Soioge vaka vitu moli mai ele, ia, mulimuli eau ge goio ge koli bara loua soio tetala e?” \p \v 22 Eala moli e Iesus goio koli la tilahi tetala mago “Ouka, eia kama mai ele. Eme kama ge hilo taro la iruru te tabaramu soio taume veia ge vaka vitu moli, eala moli la iruru tetala soio taume koramulia savulu vitu gete vitu eme ge hilo taro molia. \p \v 23 “Tiele, eia matagaga tai mai ele veia la pulolou la matagagala te La Tahalo Uru, eau ge tovoa soio te la mulugaluga isasa ale eia veia ge karasuku egiteu la bilalaha tetala ale egite dinau soio tetala, veia egite ge koli hari la uati tetalale. \v 24 Tio la bilalaha tetala isa oio, e maura la dinau tetala uru pepeho sesele koramuli e kina la milion savulu sasa, egite goio lapua soilo te la uru tetala, egite vimagiria te la vigagiala te la dinau ale uru tetalale. \p \v 25 “Eala moli la tahalo alele eia la uati ouka veia eia ge koli la dinau tetala. Tiele la uru goio veia giteu la valalua tetala mago ‘Amuto ge seri taro la golugolu tomi tetala, ge vipou tai egiteu me rutula me egiteu e latatula te la igogolu la bilalaha, veia eia ge koli la dinau tetala mai ele.’ \p \v 26 “Tio e maura la tahalo alele eia loloa mai ele, eia goio toto tulu sotalo te la lagu la uru ele, eia tali tavua mago ‘Tahalo Uru, eme ge gogo eau, eme ge abiagu la baa bakisi, eau ge koli tomi la dinau taku soio taume.’ \v 27 Tio la uru tetala loloa mai ele, eia goio gogoa, eia goio piligia, eia goio piligi tai la dinau tetala, eia mavulahati. \p \v 28 “Eala moli la bilalahale goio gali sogala, eia goio hilo e tabarala isasa la bilalaha tai ele, eia la dinau isa tai soio te la tahalo ale so mavulaha moliti ele. Tio eia goio lao tola mata bukiki la lohola, eia veiala mago ‘Eme ge koli tomi la uati ale eme pala abia taku.’ \p \v 29 “Tiele e tabarala loloa mai ele, eia goio toto tulu sotalo, eia kaka gogogo vagaria mago ‘Eme ge abiagu bakisi la baa, eau ge kolia soio taume la dinau taku ele.’ \p \v 30 “Eala moli la bilalahale kama masaga, ouka, eia goio veipala e tabaralale, egite vagoiloa te la luma la kilisi kara te ale eia ge koli kaluvu la dinau tetala. \p \v 31 “Tio, egiteu e tabarabara girua la valalua la bilalaha te la uru, egite hiloa mai ele, egite igo totolo sesele, egite tuga goio veipala tomia la mulugaluga tegiteu ale tomi eia igotia soio te tabara giteu ele. \p \v 32 “Tio, la mulugaluga tegiteu goio tolea la bilalaha tetalale, eia veiala mago ‘Eme la tahalo isasa, la vulovulomu kama kokora sesele. Pala eme tali tavuau, eau vimavulaha taro leme la dinau taume uruo, \v 33 eau gogome, me ilava eme kama masaga ge gogo tai e tabaramu mai ale eau gogotimei ele!’ \v 34 Tiele eia igo totolo pepeho mai ele, eia goio sugu taroa soio tegiteu ale vibaumuli te la luma la kilisi, egite vagoiloa ovola, eia ge pou kara te ale eia ge koli kaluvu la dinau tetala. \p \v 35 “Tiele, mai amuto kama ge hilo taro sesele la iruru te tabara mutou ale egite igoa soio tamutou, veia ge vimavulaha sesele egiteu oilo te la gabutatalala tamutou sesele, e Tete ge koli bara seselea mutou la iruru tomi ale amuto igotia.” \c 19 \s1 Etato umala ge vipou baa te la taulaila \r (Mark 10:1-12) \p \v 1 E Iesus vikara kaluvu soio tegiteu la valalua la vimari tetala, eia goio hiliti taro la gale e Galilea, eia goio beua soio te la gale e Iudea te la gale la lalu e Iordan loio. \v 2 Goio, la valalua me hatavivile mapaiti egite tilimuli e Iesus soio vola, eia goio vimahuli egiteu la ilalea kabili tegiteu ele. \p \v 3 Eala moli egiteu e pariseo isahari goio te Iesus, veia egite ge tovo lalai la mari tetala veia ge vitiloa. Tiele egite goio tahia mago “Te la viputumulila te ururu tegatou e Iuda, eia koramulia veia la tahalo ge tou e rutula, uka ge ouka?” \p \v 4 E Iesus goio koli la tilahi tegiteu mago “Soioge amuto soukama gigi la merera te La Buk Tabu Ale Pala, ia, ale eia veia maie veia te la siloko la vipoupoula, La Tahalo Uru ‘vipou la muluga la tahalo, la muluga la tavile tai’, \v 5 eia vipou egirua mai ele kaluvu, eia goio vikara lou mago ‘Eia koramulia veia la tahalo ge hiliti taro e tamala me tilala, egira me rutula ge vipou tomi moli, egira ge isa moli.’ \v 6 Tiele egira kamati mai ale ilua, ouka, egira isa moliti. Eala eia matagaga mai ele veia la taulaila ale La Tahalo Uru kisitia, eia kama koramulia veia la tahalo la vovo isasa ge lube loua, ouka viruru.” \p \v 7 Tio, egite lolo la vikararala te Iesus mai ele, egite goio tahi suku loua mago “Me igo mave e Moses veia eia taritigi mai egiteu ge masagea ge tou e rutu giteu, egite ge kekesi la galalau la vipou baala te la taulaila, ge abiale rutu giteu, ge baha taroa mai ele, eia ge tuga?” \p \v 8 Goio, e Iesus goio putu oli rivu loua soio tegiteu mago “E Moses abia mutou la gauru mai ele, la vuhula egiteu e tutubu mutou la tahalo la vareagila. Eia silahati la vulovulo giteu, eia goio kekesia giteu la tururi alele. Eala moli alaura seseleti te tubu mutou seseleti te la vuhu, la vulovulo ale maie veia amuto ge tou e rutu mutou maie, eia ouka viruru sesele. \v 9 Ale eau ge veia mutou, mai e rutu la tahalo isasa eia kama igo isasa la iruru soio te la tahalo isapolo, eala moli e haruala tou bulalahu molia, eia goio puli polo isasa la tavile, la tahalo alele eia igo gegeruti la taulaila tegira me rutula, eia ruruti.” \p \v 10 Tio, egiteu la valalua la vimari tetala lolo la vikararala te Iesus mai ele, egite karutu, egite goio veiala mago “A ge, mai la viputumulila te la taulaila eia vagari pepeho mai ele, eia soioge taritigi veia la visau limala te la taulaila ge umala, etato ge samura moli, etato souka ruru.” \p \v 11 Eala moli e Iesus goio kolia giteu mago “Eia sesele, eala moli la vimari tomi ale, eia kama koramuli la valalua tomi. Eia ge koramuli moli egiteu ale La Tahalo Uru vimari sesele egiteu ovola. \v 12 La valalua isahari kama koramuli la taulaila, palati te la bibisi giteu ale e tila giteu pigo egiteu, egite maiti ele. Eala moli la valalua isahari lou, egite igotia giteu mai ele, veia egite umala ge taulai. Me isahari tai egite tou la taulaila veia ge gabu tikumu La Tahalo Uru moli sekela, veia egite ge vagari tavu la igogolu te la pulolou la matagagala te La Tahalo Uru. Mai isasa ge vagari koramulia eia ge roromuli la viputumulila ale vagari mai ele te la taulaila, taritigi eia ge sau tolea, eia ge igo seselea mai ale eau veitiae.” \s1 E Iesus sagege robo egiteu e gulikiliki \r (Mark 10:13-16; Luk 18:15-17) \p \v 13 Goma, egiteu e hatavivile isahari goio puli egiteu e latatu gite soio te Iesus veia eia ge tau la limala oata te la gama giteu e guliliki bisisi ele, veia eia ge kaka La Tahalo Uru la vibalavala soio tegiteu, eala moli egite la valalua la vimari tetala, egite igo totolo egiteu e hatavivilele veia ge umala. \v 14 Eala moli e Iesus hiloa mai ele, eia goio veia giteu mago “Amuto umala ge mera taro egiteu e guliliki bisisi ele, egite korale, egite ge gomai moli taku, la vuhula la vulovulo giteu maroka koramuli sesele la pulolou la matagagala te La Tahalo Uru, egiteu ale mamaie egite sau tola seseleti la pulolou la matagagala te Tete.” \v 15 Tio eia goio tau la limala ilua oata te la gama giteu, eia toi la vibalavala soio tegiteu, eia goio hiliti taro lou la mautu alele, eia goio tuga. \s1 La hatamalelaba isasa ale tahola la vuliti \r (Mark 10:17-31; Luk 18:18-30) \p \v 16 Goma, la tahalo isasa goio te Iesus, eia tahia mago “Tahalo La Vimari, eau ge igo la rova veia eau ge sau tola la mahulila sesele, ale la kaluvula ge ouka?” \p \v 17 E Iesus goio veiala mago “Ilava eme tahi eau la vulovulo ale taritigi e? Isasa moli sekela oio ale la vulovulola taritigi, La Tahalo Uru moli sekela. Mai eme masagea veia ge sau tola la mahulila sesele, ale la kaluvula ge ouka, taritigi eme ge roromuli la tururi tomi te La Tahalo Uru.” \p \v 18 Eala moli la tahalole goio tahi rivu lou e Iesus mago “Eala moli eme soioge veia la tururi ale mave sesele?” \p \v 19 Tio, e Iesus goio koliala mago “La viputumulila tomi maie: Umala bili peho la tahalo; umala igo gegeru la taulaila; umala pakalikali; umala pipigi la merera la visigologolola; gogo e tamamu me tilamu, roromuli tataho egirua; eme ge gogo egiteu e tabarabaramu mai sesele ale eme gogo rivu lou emei.” \p \v 20 Tio, la hatamalelabale goio veiale Iesus mago “La tururi tomi alele eau tilimulitia, ale mave soloio eau souka rovia, eau so savelea e?” \p \v 21 E Iesus koliala mago “Mai eme masagea veia la vulovulomu ge maroka tataho seseleti te la milatalata te la Tahalo Uru, taritigi eme ge abi tomi la golugolu taume, eme ge vaharia soio tegiteu la valalua la iloto, veia egite ge lotoa, mulimuli eme ge abi la uati tomi alele, eme ge suli legiteu la valalua me hatavivile ale egite pou la savelela. Tiele eme ge sau tola la vuliti te la kalulu oata te la bali La Tahalo Uru. La golugolu tomi taumele ge kaluvu, eme ge gomai ge tilimuli eau.” \p \v 22 Tio, la hatamalelabale eia lolo la merera te Iesus mai ele, eia ilo buruko sesele, la vuhula eia la tahalo la vuliti, la golugolu tetala ale eia taholea eia usu sesele. \p \v 23 Goio, e Iesus goio veia giteu la valalua la vimari tetala mago “Eau ge veia mutou, eia ge vagari pasi veia la tahalo la vuliti ge tiroro soilo te la pulolou te la bali La Tahalo Uru. \v 24 Eia sesele, mai la kamel isasa eia veia ge tovo lalai veia ge polo te la mata la lili la silahi, ale ge vagari tetala. Eala moli mai la tahalo la vuliti veia ge tiroro soilo te la pulolou la matagagala te La Tahalo Uru, ale ge vagari pepeho sesele tetala.” \p \v 25 Tio, egite la valalua la vimari tetalale, egite lolo la vimari te Iesus alele, egite karutu, egite gabutala papapai, egite goio tahi rivu loua mago “Mai ge mai ele, ere tahalo sesele ge koramulia ge sau tola la mahulila sesele oata te La Tahalo Uru?” \p \v 26 Eala moli e Iesus goio mata tavu egiteu, eia veia giteu mago “Eia sesele, la tahalo la vovo eia kama koramulia veia ge sau tola la mahulila ale sesele mai te la vagagarila tetala lou. Eala moli La Tahalo Uru eia koramulia ge igo sesele la papaga tomi, eia ge vimahuli amutou.” \p \v 27 Tio, e Pita loloa mai ele, eia goio veiala mago “Hiloa, amite hiliti taro moliti la papaga tamiteu tomi, amite mulimulitime, eme ge abia miteu la rova sesele veia amite ge taholea?” \p \v 28 Tio, e Iesus lolo la tilahi te Pita mai ele, eia goio veia giteu la valalua la vimari tetala tomi ele mago “Eau vei seselea mutou, mulimuli e Latu La Tahalo ge pou te la pulolou la uru tetala, eia ge visibitala maroka lou la mori me la magasa, te la imamala alele amuto la valalua savulusa gete lua ale taku sesele, amuto tai ge pou te la pulolou la uru, amuto ge vipou la maratatilale Israel ale savulusa gete lua te la viputumulila, ge mata muli la vulovulo giteu veia egite maroka ka ouka. \v 29 Mai egiteu la valalua me hatavivile tomi ale egite gabu tikumu la igogolu la valolo te la isagu, egite hiliti taroti la luma tegiteu, e tabarabara giteu, e hatavilevile giteu, e tatama giteu, e tatila giteu, e latatu giteu, la magasa tai tegiteu ale egite taholea, La Tahalo Uru ge kolia soio tegiteu, la golugolu tegiteu ge usu pepeho, eia ge abi taia giteu la mahulila ale sesele, la kaluvula ge ouka. \v 30 La valalua me hatavivile usu ale igoie egite pou la balavala, mulimuli egite ge pou la mahelala, me la valalua me hatavivile taku usu ale igoie egite pou moli la savelela, mulimuli egite ge pou sesele te la balavala. \c 20 \s1 La vikarara la tilovo tegiteu la bilalaha ale igogolu te la mahuma la vaen \p \v 1 “La pulolou la matagagala te La Tahalo Uru eia mai sesele la tahalo isasa, eia tahola la mahuma la vaen isa uru, te la kavikoki bisi eia hiliti goio puli isahari la valalua veia egite ge igogolu te la mahuma la vaen tetala. \v 2 Eia goio veia giteu veia eia ge loto legiteu la mapa ale taritigi, koramuli la igogolu te la haro isasa, eia goio baha taro egiteu soio te la mahuma la vaen tetalae. \p \v 3 “Goma, te la mata la haro ualasiu te la kavikoki, eia goio kavovou soio la tia la mautu, eia hilo egiteu la valalua isahari, egite pou bulalahu moli, la igogolu ouka, \v 4 eia goio veia giteu mago ‘Amuto tai ge gorivo la mahuma taku, amuto ge igogolu, eau ge abia mutou la mapa ale koramuli amutou te la igogolu tamutoue.’ \v 5 Tio egite loloa mai ele, egite goio tuga. \p “Goio te la mata la haro savulusa gete lua te la haro, te la mata la haro tai itolu te la maulavi, eia goio kavovou lou soio la tia la mautu, eia igo loua mai ele, veia ge baha egiteu isahari soio te la igogolu, veia eia ge loto tigi tai egiteu ele. \v 6 Goio, te la mata la haro ilima lou te la maulavi, eia goio gogala lou, eia hilo vuti lou egiteu isahari oio, egite magiri bulalahu moli, la igogolu ouka. Tio e taho la mahumale goio tahi egiteu mago ‘Amuto igo mave, la haro isa uru igoie, amuto kama igogolu bakisi, amuto pou bulalahu moli, amuto igo mave?’ \p \v 7 “Tio, egite koliala soio mago ‘La vuhula la tahalo isasa kama abia miteu la igogolu.’ \p “Goio, e taho la mahumale eia loloa mai ele, eia goio veia giteu mago ‘Ioge, amutou tai ge gorivo ge igogolu te la mahuma la vaen taku.’ \p \v 8 “Tio, la paga logologoti, e taho la mahuma goio tolea la tahalo ale baumuli egiteu la valalua la igogolu ele, eia veiala mago ‘Eme ge tola egiteu la valalua la igogolu, eme ge abia giteu la mapa giteu, tio mai eme ge abia giteu la mapa, eme ge sokoa tegiteu ale guvi mulimuli kililili, kara tegiteu ale egite guvi pala, egite guvi mamuga.’ \v 9 Tio egiteu la valalua ale egite soko la igogolu te la maulavi, mai te la mata la haro ilima moli ele, egite sibitala, egite goio abi la mapa giteu, egite abi la mapa ale taritigi koramuli la igogolu mai te la haro isasa. \v 10 Eala moli egite la valalua la igogolu ale egite guvi pala, egite soko sesele la igogolu te la kavikoki bisi, egite goio sibitala, egite gabutalea veia egite ge abi la mapa giteu eia ge uru bakisi tegiteu ale guvi mulimuli, eala moli ouka, egite abi la mapa ale visauru moli. \v 11 Egite hilo la mapa giteu eia visauru moli me egiteu ale egite guvi mulimuli, egite igo totolotia e taho la mahumao. \v 12 Egite goio tahia mago ‘Egiteu ale guvi moli te la maulavi, egite kama igogolu tabaa, egite igogolu moli la mata la haro isa moli, me ilava la mapa giteu visauru moli tamiteu e? Amiteu, amite soko sesele la igogolu te la kavikoki sesele, la igogolu tamiteu vagari pepeho, la haro kue vavaga amite, la maholo mite pusi.’ \p \v 13 “Tio, egite tahia maie, eia goio koli la tilahi tegiteu soio, eia vikara soio te la tahalo tegiteu isale, mago ‘Tabaragu, eau kama igo gegerume, ouka, etala vigia igoiti veia la mapa ge koramuli la haro isasa. \v 14 Taritigi eme ge abi moli la mapamu mai ale etala veitia, eme ge tuga. Eau masaga molia veia ge loto tai la tahalo ale guvi mulimuli kililili la mapa ale taritigi mai tai emei ele, la mapa mulua ge visauru moli. \v 15 Igo mave, eme soioge veia eau umala ge mulimuli la masasagala taku te la uati taku lou, ia? Ale amuto soioge maisu totolo la vuhula eau igoa mai la gilogo soio tamutou tomi, eala amuto mera kukukumu ele.’ \p \v 16 “Tiele, eia ge mai seseleti aleie, egiteu ale goilo mulimuli te la pulolou la matagagala te La Tahalo Uru, eia ge vauru egiteu, egite ge muga. Egiteu ale vimuga soilo vola, La Tahalo Uru ge vibisi lou egiteu, egite ge sotigu kililili.” \s1 La itolu la vikara matagagala te Iesus te la pileleho tetala \r (Mark 10:32-34; Luk 18:31-34) \p \v 17 Tio, e Iesus mite me la valalua la vimari tetala, egite tatuga te la gauru veia ge goata e Ierusalem, e Iesus puli egiteu ale savulusa gete lua tetala soio veia ge vikara moli soio tegiteu sekela, egite so tatugale, eia goio veia giteu mago \v 18 “Hiloa, etato ge goata e Ierusalem, egite la gima taku ge sugu taro e Latu La Tahalo soio tegiteu la mulugaluga tegiteu e pris, me egiteu la tahalo la mari te la merera te Moses, egite ge vimagiriau te la vigagiala, egite ge kisi la merera veia ge bili taroau, \v 19 egite ge sugu taro eau soio tegiteu la valalua isapolo ale kama la maratatila e Iuda, egite ge tahi vileau, egite ge kumamasiau, egite ge biliau, eau ge peho, eala moli la haro itolu ge polo, eau ge mahuli rivu lou.” \s1 E tilale Iakob me Ioanes masagea veia e Iesus ge vauru e latula ilua \r (Mark 10:35-45) \p \v 20 Goio, e Iesus vikara kaluvu soio tegiteu mai ele, e rutule Sebedi goio pulia e latula ilua e Iakob mira me Ioanes soio te Iesus, eia goio toto tulu te la lagule Iesus veia ge veipala la kilaka tetala soio tetala. \v 21 Goio, e Iesus tahia mago “Eme masaga lava?” \p Eia goio veiale Iesus mago “Mai mulimuli eme ge pou la pulolou la uru taume, eme ge vauru egirua e latugu iluale, isa ge pou te galemu e gata, isa ge pou te la galemu e meru.” \p \v 22 Tio, eia veiale Iesus la merera tetala mai ele, e Iesus goio koli la kilaka tegiteu mago “Amuto kama rovi tigi la paga ale amuto kaka tavua. Mave, amula koramulia ge liu tai te la kap la iligiligi ale eau tai ge liu ovola, ia?” \p Goio, egira kolia soio te Iesus mago “Ee, amila koramulia.” \p \v 23 Tio, e Iesus goio veia girua mago “Eia sesele, amula ge liu tai te la kap la iligiligi ale eau ge liu ovola, eala moli ere ge pou te la galegu e gata, ere ge pou te la galegu e meru, la viputumulila aleie kama taku, ouka, la paga te Tete, la pulolou alele eia raragitia tegiteu ale eia hiloviti egiteu veia egite ge pou sesele ovola.” \p \v 24 Goio, egiteu ale savulusa lou la valalua te Iesus ele, egite lolo vuti la kilaka tegira tau me tario, egite igo totolo egirua. \v 25 Eala moli e Iesus goio tola vikapopo egiteu soio tetala, eia goio veia giteu mago “Amuto rovia egite la mulugaluga tegiteu la valalua la maligoma, egite vipou la valalua me hatavivile tegiteu te la viputumulila ale vagari pepeho, me egiteu la ururu tegiteu vauru sesele egiteu lou, egite vibisi lou la valalua me hatavivile tegiteu mai ele. \v 26 Eala moli la vulovulo ale mai ele amuto kama ge tilimulia, ouka, mai isasa tamutou masagea veia eia ge la mulugaluga tamutou, taritigi eia ge suli amutou tomi mai la bilalaha ale bisi sesele tamutou tomi. \v 27 Mai isasa masagea veia ge urua mutou, taritigi veia eia ge mai moli la bilalaha tamutou tomi. \v 28 E Latu La Tahalo eia mai tai moli alele, eia kama sibitala veia la valalua me hatavivile ge sulia, eia guvi moli veia ge suli amutou tomi, veia ge sugu taro tai la mahulila tetala veia ge rou rivu lou la valalua me hatavivile mapaiti ale egite pou te la kilisi te Satan.” \s1 E Iesus vimatagaga la mata kea ilua \r (Mark 10:46-52; Luk 18:35-43) \p \v 29 Goio, e Iesus miteu me la valalua la vimari tetala, egite hiliti taro e Ieriko, la lolo la valalua me hatavivile uru egite tilimulia. \v 30 Tio egira taho lua la mata girua mata kea, egira pou hagagavi te la pepe la gauru, egira goio loloa veia e Iesus loio tatuga, egira goio tola agi oata mago “Tahalo Uru, emei e tubule Devit ele, taritigi eme ge gogo amilua!” \p \v 31 Eala moli la valalua me hatavivile ale usu ele, egite mera taro egirua veia egira ge makovu, eala moli egira tola agi lou oata mago “Tahalo Uru, eme e tubule Devit ele, taritigi eme ge gogo amilua!” \p \v 32 Tio, e Iesus lolo egirua, eia goio magiri, eia tola egirua soio tetala, eia goio tahi egirua mago “Amula masagea veia eau ge suli amulua mave?” \p \v 33 Egira goio veiala mago “Tahalo Uru, amila masagea veia la mata milua ge matagaga.” \p \v 34 Tio e Iesus goio gogo pepeho egirua, eia goio sau la mata girua, oio moli ovola la mata girua matagaga, egira goio tilimuli e Iesus soio. \c 21 \s1 E Iesus goilo la mautu e Ierusalem mai la mapala isasa \r (Mark 11:1-11; Luk 19:28-40; Ioanes 12:12-19) \p \v 1 Tio, e Iesus mite me la valalua la vimari tetala, egite tuga goio hagagavi te la mautu uru e Ierusalem, egite goio sibitala te la mautu e Betpage, hagagavi moli te la vai la gove bisi e Oliva. E Iesus goio baha taro la tahalo tetala ilua, \v 2 eia veia girua mago “Amulua goio te la mautu ale bisi mamugale, amula ge goilo vola, amula ge sivuti isasa e donki, egira me latula, egite vuvu tolati egirua, egira oiole magirigiri, amula ge lube egirua ge tata egirua somai taku. \v 3 Mai isa ge tahi amulua mago ‘Amula ge vagoveia?’ amula ge veiala mago ‘La Uru masaga egirua’, tio eia ge loloa mai ele, eia ge veia mulua veia amula ge tata molia somai taku.” \p \v 4 Eala moli la merera tomi alele, eia Iesus toia veia ge vipuru sesele la merera te la bilalaha ale pala, ale eia veia maie: \li1 \v 5 Amuto la valalua me hatavivile e Ierusalem, \li1 male ge, La Uru mutou eia loiole, \li1 eia vibisi lou eia, \li1 eia pou oata te la pogale donki isasa, \li1 e donki ale so tutubu moli. \p \v 6 Goio, egira taho lua ale e Iesus baha egirua, egira goio tilimuli seselea mai ale e Iesus veitia giruao, \v 7 egira goio sivuti sesele e donki iluale, egira goio tata e donki ele vikapopo me latula, egira goio rara la kairobola tegirua oata te la pogala, e Iesus goio pagi sae soata ovola, eia soko la tuluga veia ge goilo e Ierusalem. \v 8 Goio la valalua me hatavivile usu oio magirigiri, egite hiloa e Iesus loiole, egite goio ava la kairobola tegiteu otalo te la gauru, usu tai egite goio vali la halala la obobu, egite taua otalo te la gauru. \v 9 Tio la valalua me hatavivile, isahari mamuga, isahari mulimuli, egite mimimi, kakusa, egite tatola maie: \li1 La tahalo la vimahuli tegatou guviti, \li1 e tubule Devit uru ele! \li1 La Tahalo Uru abitiala la vagagarila tetala, \li1 eia bahatia somai veia eia ge vimahuli etatou, \li1 La Tahalo Uru ge vibalavea, \li1 taritigi pepeho soata tetala! \p \v 10 Goio, e Iesus goio sibitala oilo te la mautu e Ierusalem, la valalua me hatavivile tomi karutu pepeho, egite goio tahi egiteu mago “La tahalo ale guvi mai la mulugaluga isa urue, eia ere tahalo sesele e?” \p \v 11 Eala moli la valalua me hatavivile ale so guguvi vikapopo me Iesus ele, egite goio veia giteu mago “Ale e Iesus, la bilalaha te La Uru ale loio la mautu e Nasaret oio la gale e Galilea.” \s1 E Iesus kumuli taro egiteu ale vilotoloto oilo la luma la lotu \r (Mark 11:15-19; Luk 19:45-48; Ioanes 2:13-22) \p \v 12 Goio, e Iesus mite me la valalua la vimari tetala goio goilo la luma la lotu, e Iesus hilo egiteu la valalua ale egite vilotoloto oilo volale, eia goio kumuli taro egiteu. Eia goio vulo tugu la poroporo la iloto tegiteu la tahalo la giligi la uati, eia vulo tugu tai la pulolou tegiteu ale vipou la malumalu veia la valalua me hatavivile ge lotoa. \v 13 Eia goio veia giteu mago “La Buk Tabu eia veia maie ‘La luma taku eia la luma la kilaka te la valalua me hatavivile tomi’, eala moli amuto vulotia eia mai la luma tegiteu la valalua la pakalila.” \p \v 14 Tiele, e Iesus goilo te la luma la lotu mai ele, eia goio pou, tio egiteu ale mata kea, egite tai ale la vaha giteu kamati kokora, egite tuga kikihi, egiteu tomi ele goio tetala, eia vimahuli egiteu, egite posa tahalo lou. \v 15 Eala moli egiteu e pariseo, me egiteu la valalua la mari tai, egite hiloa la igogolu ale isapolo mai ele eia igoa oilo te la luma la lotu, egite lolo tai egiteu e gulikiliki egite tatola oilo te la luma la lotu mago “Taritigi soio te tubule Devit!” tio egite loloa mai ele, egite igo totolo. \p \v 16 Goio, egite goio tahia mago “Ae, eme loloti la merera ale egite veia, ia?” \p Goio, e Iesus kolia soio tegiteu mago “Ee, eau lolotia. Mave, amuto soioge souka gigia te La Buk Tabu Ale Pala ale eia veia maie ‘Tahalo Uru, eme vahiliti tatahoti la isamu oio te la hare giteu e gulikiliki bisisi!’ La merera alele amuto soioge kama rovia, ia?” \p \v 17 Tiele eia putu oli la merera tegiteu mai ele, eia goio hiliti, eia goio gali taro egiteu sogala te la mautu, eia goio tuga goio te la mautu e Betani, eia goio pou ovola, mavutao. \s1 E Iesus mera tavu la obu, eia magolu \r (Mark 11:12-14,20-24) \p \v 18 Mai galigeli te la kavikoki bisi, e Iesus mite me la valalua la vimari tetala, egite beua loio e Betani, egite tatuga te la gauru, e Iesus goio vitolo. \v 19 Tio egite tatuga te la gauru mai ele, eia goio hilo isa la obu ale mai la keme, goio, egite tuga goio e Iesus masagea veia ge logoala isa la vavuala, veia ge alia, eala moli ouka, la galagalala moli usu, la vavuala ouka. Tio e Iesus hiloa mai ele, eia igo totolo, eia mera tavua mago “Kara igoie, eme kamati ge vua lou, ouka viruruti.” Tio e Iesus vikara tavu la obu mai ele, oio moli ovola eia goio magolu. \p \v 20 Tio, egite la valalua tetala hiloa mai ele, la vule giteu paru, egite goio tahia mago “Igo mave la obue eia magolu hari moli maie?” \p \v 21 E Iesus goio koli la tilahi tegiteu mago “Eau vei seselea mutou, mai amuto ge tautaulailo vagari te La Tahalo Uru, mai la gabutatalala tamuto kama ge ilua, amuto tai ge koramulia ge igoa mai ale eau igotia soio te la obu ele, me la igogolu usu tai ale kara polo la igogolu alele, amuto ge igo taia, mai amuto ge vikara soio te la gove mago ‘Eme ge tasuku ge magiri olau te la tia la mago’, tio La Tahalo Uru ge visibitala seselea mai ale amuto toitia. \v 22 Eia sesele viruru veia mai amuto ge tautaulailo vagari, la vavua la kilaka tamutou amuto ge sau tola seselea.” \s1 Egite tahi e Iesus te la vuhu la viputumulila tetala \r (Mark 11:27-33; Luk 20:1-8) \p \v 23 E Iesus mite me la valalua la vimari tetala, egite guvi lou oio e Ierusalem, egite goilo te la luma la lotu, e Iesus goio vimari la valalua me hatavivile oilo vola. Tio egite la mulugaluga tegiteu e pris, vikapopo tai me egiteu e ururu tegite Iuda, egite tomi goio te Iesus, egite tahia mago “La igogolu tomi ale eme igigoa, ere veiamu veia eme ge igoa e?” \p \v 24 Goio, e Iesus kolia soio tegiteu mago “Eau tai ge tahi amutou la tilahi isasa. Mai amuto ge koli la tilahi taku, eau tai ge veia mutou la vuhu la viputumulila taku ale eau igogolu ovola. Tio la tilahi taku eia maie: Ere sesele baha e Ioanes veia eia ge vuhi la valalua me hatavivile? La Tahalo Uru bahea, uka la tahalo la vovo isasa bahea?” \p \v 25 Tio, egite loloa mai ele, egite goio vipigi vulo loua kabili tegiteu maie mago “Mai etato ge kolia veia La Tahalo Uru bahea, eia soioge ge tahi rivu lou etatou veia ilava etato kama lolo vulai tavua. \v 26 Eala moli mai etato ge koliala veia la tahalo la vovo moli isasa soioge baha e Ioanes, la kilolilale eia kama ge taritigi, la vuhula la valalua me hatavivile tomi veia e Ioanes eia la bilalaha te La Uru, eala egite ge igo totolo mai etato ge tahi taro loua.” \p \v 27 Tio, la gabutatalala tegiteu marapa mai ele, egite goio koli la merera te Iesus mago “Amite kama rovia.” \p Tiele, e Iesus goio koli tataho loua giteu soio mago “Eau tai kama ge veipalea mutou te la vuhu la viputumulila taku ale eau igogolugolu ovola.” \s1 La vikarara la tilovo te la tahalo isasa e latula ilua \p \v 28 Goio, e Iesus goio veia giteu mago “Eau ge veia mutou la vikarara la tilovo isasa, me amuto soioge ge gabutala mave ovola? La tahalo isasa e latula ale hatamale ilua, eia goio te latula isasa, eia veiala mago ‘Latugu, eau masagea veia eme ge gorivo, eme ge vulalaiagu.’ \v 29 Tio e latula goio veiala mago ‘Eau kama masaga.’ Eala moli mulimuli eia goio gabutatala rivu lou, eia tuga. \v 30 Goio e tama girua goio veiale tarila veia eia ge gorivo ge vulalaiala, me tarila goio veiale tamala mago ‘Ioge tete, eau ge tuga’, eala moli eia visigolo, eia kama gorivo. \v 31 Tiele la tilahi taku soio tamutou eia maie veia ere tegirua e guliliki taho luale tilimuli la masasagala te tamala e?” \p Egite goio veiale Iesus mago “Ale la mulugale, la vuhula eia tou muga e tamala, eala moli eia goio gabutala rivu lou, eia roromuli e tamala, eia gorivo.” \p Goio, e Iesus veia giteu mago “Tiele, eau vei seselea mutou, omai egiteu la valalua ale vibukeke le amutou la piligi la takes soio te Rom, me egiteu la tavile la gauru tai ale kama korakora, egiteu usu roromulitiau, egite pepeti amutou soilo te la pulolou la matagagala te La Tahalo Uru. \v 32 Mai e Ioanes la tahalo la vuluhi eia pala guvi veia ge vahilo le amutou la gauru ale matata, amuto kama masaga ge loloa, amuto veia eia la tahalo la visigologolola, eala moli egiteu la valalua la ilabi la takes, me egiteu la tavile la gauru, egite gabu tikumu la valolo te Ioanes, egite goio roromulia. Eala moli amuto hilo egiteu usu vuvulo, amuto kama sovei egiteu veia amuto tai ge vuvulo veia ge roromuli e Ioanes mai egiteu.” \s1 La vikarara la tilovo tegiteu la bilalaha ale baumuli gegeru la mahuma la vaen \r (Mark 12:1-12; Luk 20:9-19) \p \v 33 Goio, e Iesus goio vei loua giteu mago “La vikarara la tilovo isa lou amuto ge loloa, eia maie: La tahalo isasa eia tahola la gale la magasa isa uru. La haro isasa eia goio lamoa, mulimuli eia toloa, mulimuli eia goio galu la vavua la vaen oio vola. Eia galu la vavua la vaen kaluvu, mulimuli eia goio bigomu robo la mahuma tetala, eia goio gula tai la muli la vaen la uati, veia mai mulimuli la vaen tetala ge vua, eia ge toa perepere la vavua la vaen oilo vola, eia ge sigili la bulula. Eia tigi tai la kale la pahutula oata veia ge lago robo la mahuma tetalale, mulimuli eia goio tola taro egiteu la valalua isahari veia egite ge baumuli la mahuma tetalale, veia mulimuli eia ge suli egiteu bakisi la vavuala. Eia tola taro egiteu mai ele, eia goio hiliti, eia tuga goio te la gale isa malau, eia poutio. \v 34 Tio mulimuli, te la imamala la vulua la vaen, eia baha la bilalaha isahari tetala soio te la valalua ale baumuli la mahuma veia eia ge abi bakisi la mapa la mahuma tetalale. \p \v 35 “Eala moli egiteu la valalua ale baumuli la mahumale, egite goio lao tola egiteu la bilalaha, egite goio kue isasa, isa lou egite bilia eia peho, isasa egite dumula la uati. \v 36 Tio e taho la mahuma loloa mai ele, eia goio baha taro egiteu la bilalaha usu lou, kama ilua moli mai ale eia bahatia palao. Eala moli egiteu la valalua ale baumuli la mahuma tetala goio igo gegeru tai egiteu ele. \v 37 Tio mulimuli kililili e taho la mahumale eia baha taro e latula. Eia e latula isa lou ouka, ale isa moli ele, la riau. Eia gabutalea maie mago ‘Soioge egite ge togo e latugu.’ \p \v 38 “Eala moli egiteu ale baumuli la mahumale, egite kisiti la merera veia ge bili e latula, egite vei maie ‘Soioge e latulale mulimuli ge abi la golugolu te tamala tomi, ia? Ioge etato ge bilia, mulimuli etato ge balava la mahuma te tamalale.’ \v 39 Tiele egite kisiti la merera ale kama kokora mai ele, egite goio lao tola e latula, egite bili pehoa, egite pigia sogala la poke la bigomu, tabulio, korao.” \p \v 40 Tio, e Iesus gilemulia giteu kaluvu mai ele, eia goio tahi egiteu mago “Mave, mai mulimuli e taho la mahuma ge sibitala oio tegiteu ale biliti e latulale, eia ge kolia giteu mave?” \p \v 41 Goio, egite koliale Iesus soio mago “Maura mite, eia ge sulu tomi egiteu. Eia ge abia giteu la valalua ale isapolo la mahumale, egite ge baumulia. Te la imamala la vaen eia ge vua, egite ge abiala la mapala.” \p \v 42 Tio, e Iesus loloa mai ele, eia goio vei loua giteu mago “Eia sesele, amuto matagagati te la masova la vikarara la tilovole, eala moli amuto kama gigia te La Buk Tabu Ale Pala la vikarara la tilovo te Kraist, ale mulimuli eia ge guvi, egite ge muku pilea, ia? La merera ale, eia veia maie: \li1 La sosole ale egite la tahalo la tiligi la luma \li1 piligitia, egite hilovi tarotia, \li1 igoie la sosole ale eia magiriti maiti \li1 la sosole magiri isa uru, \li1 ale sau tola la tikukumu la luma tomi. \li1 La Uru eia igoti la pagale, \li1 etato hiloa veia eia taritigi pepeho sesele. \p \v 43 “Ale eau vei seselea mutou, La Tahalo Uru eia abitia mutou la baa koramulia veia amuto ge tiroro soilo te la pulolou la matagagala tetala, eala moli eia ge kapi robo lou amutou, eia ge vagoilo moli egiteu ale koramulia ge visibitala la vavua la tautaulailo ale sesele te la vulovulo giteu ale taritigi.[ \v 44 Eia sesele e Kraist eia maiti la sosole magiri isa uru, me mai isa ge boru talu la sosole te La Tahalo Uru, la tatuhala ge putua lahu. Mai tai la sosole te La Tahalo Uru eia ge hiliti tavu la tahalo isasa veia ge kuea, eia ge kue pere seselea.]” \p \v 45 Tio, egiteu la mulugaluga tegiteu e pris, me egite tai e pariseo, egite lolo la vikarara la tilovo isahari te Iesus mai ele, egite rovitia veia eia ubi legiteu la merera tetalale. \v 46 Eala egite masagea veia egite ge lao tola e Iesus, eala moli egite taga la valalua me hatavivile, la vuhula egiteu tomi usu gabutalea veia e Iesus eia la bilalaha sesele te La Tahalo Uru. \c 22 \s1 La vikarara la tilovo te la ilali la taulaila \r (Luk 14:15-24) \p \v 1 Goma, e Iesus goio vikara lou soio tegiteu la valalua me hatavivile, eia vimari lou legiteu la vikarara la tilovo isahari lou, eia veia giteu mago \v 2 “La pulolou la matagagala te La Tahalo Uru eia mai sesele la tahalo isa uru, e latula ale hatamale eia taulai, e tamalale igo isa uru la ilali la taulaila tetala. \v 3 Eia goio baha taro egiteu la bilalaha tetala veia egite ge vikara matagaga soio tegiteu la valalua me hatavivile ale eia masaga egiteu veia egite ge guvi te la ilali la taulaila te latulale. Tio egite la bilalaha igo seselea mai la uru tegiteu baha egiteu ovola, eala moli egiteu ale eia baha tavu egiteu kama guvi. \p \v 4 “Goio, la tahalo uru ele goio baha lou egiteu la bilalaha isahari lou, eia veia giteu mago ‘Amuto ge veia giteu la valalua me hatavivile ale eau baha tavu egiteu veia eau raragiti la ilali ale uru sesele, mago: Eau laoti la kau usu pasi, la ilali tomi amite raragitia oio, taritigi amuto ge gomai te la ilali la vitirorola.’ \p \v 5 “Tio, egite la bilalaha goio veia giteu maie, eala moli egite silaha, egite kama masaga ge guvi, egite goio paroatio, egite isahari gorivo te la mahuma, egite isahari goio tuga tavu la igogolu tegiteu isahari. \v 6 Eala moli isahari lou goio sau tola molia egiteu la bilalaha te la tahalo uru ele, egite kue egite, egite bili peho egiteu. \v 7 Goio la tahalo uru ele eia igo totolotio, eia goio baha taro egiteu la valalua la vaubi tetala, egite goio sulu tomi egiteu la tahalo la bilili ele, egite sulu egiteu kaluvu, egite selua la mautu tegiteu ele. \p \v 8 “Goio, la tahalo uru ele goio vei loua giteu la bilalaha tetala mago ‘La ilali la vitirorola eia oio raragiti, eala moli la valalua ale eau baha tavu egiteu, la vulo giteu kama taritigi, egite tou la gomaila, egite kama koramulia la pulolou omai taku. \v 9 Eala eau veia ge baha lou amutou, amuto ge goio te la mata la gauru tomi, amuto ge hilo isahari la valalua, amuto ge tola egiteu, ge puli egite somai te la ilali taku.’ \v 10 Tio eia veia giteu mai ele, egite la bilalaha tetala goio tuga lahutio, soio te la gauru tomio, egite hilo egiteu la valalua me hatavivile, isahari taritigi, isahari kama kokora, egite goio puli egiteu tomi somai te la luma ale egite igo la ilali la taulaila oio vola. \p \v 11 “Tio, egite la valalua me hatavivile goio pou, la tahalo uru ele eia goio goilo, eia hilo egiteu, eia goio hilo isasa la tahalo, eia kama kai la kairobola ale egiteu ale pou te la ilali la vitirorola ge kaia. \v 12 Tiele la tahalo uru ele goio tahia mago ‘Tabaragu, eme la kairobola ouka ale koramuli la pulolou te la ilali la vitirorola. Eme soioge goilo mave, egite kama magiri robome e?’ Eala moli e maura kama koli la merera tetala. \p \v 13 “Tio, la tahalo uru ele goio veia giteu la bilalaha tetala mago ‘Amuto ge lao tolea, amuto ge kisi la limala ilua, la vahala iluao, amuto ge bolea soio, pigia sogala, eia ge tabuli oio te la maligoma uru ale egiteu ale pou ovola egite ge koro magegege, ge melimeli la togo giteu.’ \p \v 14 “Tiele me eia matagaga tai mai ele veia La Tahalo Uru eia tola tavu la valalua me hatavivile usu mapaiti, eala moli isahari moli vuvulo veia egite ge lolo vulai tavua, me La Tahalo Uru hiloviti egiteu, veia egite ge tiroro soilo te la pulolou la matagagala tetala.” \s1 Egite tahi lalai e Iesus te la piligi la takes soio te Sisa \r (Mark 12:13-17; Luk 20:20-26) \p \v 15 Goio, egiteu e pariseo lolo la vikarara la tilovo tomi te Iesus mai ele kaluvu, egite igo totolo, egite goio gali sogala, egite goio pou, egite viputumuli la gauru ale egite ge vitilo e Iesus te la merera tetala lou veia egite ge lao tolea. \v 16 Tio egite viputumulia mai ele veia egite ge baha isahari la tahalo la vimari tegiteu, vikapopo me egiteu la bilalaha isahari te Herod, veia ge tahi e Iesus isahari la tilahi ale egite ge vitiloa oio vola. Tio egite goio tahia mago “Tahalo la vimari, amite rovia eme la tahalo sesele, eme kama makovu taitali egiteu la mulugaluga isasa. Eme vimari sesele egiteu la valalua mai la merera te La Tahalo Uru sesele. La merera taume eia isa moli somai tamiteu tomi. \v 17 Tiele amite masagea veia eme ge veipalea miteu la gabutatalala taume sesele te la piligi la takes soio te Sisa. Mave, eia koramuli taia veia etato e Iuda ge pigi la uati la takes soio te Sisa, ka ge ouka?” \p \v 18 Tio, egite tahia mai ele, eala moli e Iesus rovi palatia la visigolola tegiteu soio tetala, eia goio veia giteu mago “Maura miteu, amutou la tahalo la visigologolola sesele! Ilava amuto veia ge tovo lalai veia ge vitiloau mai ele, ia? \v 19 Abiagu isa la uati oiole ale amuto lololoto la takes ovola.” Tio egite goio abiala isa la uati tegiteu e Rom ele, \v 20 eia goio tahi egiteu mago “Ale la halulule ereie, me la kekesi tai oio vola tere?” \p \v 21 Tio, egite goio koliala mago “Ale la halulule Sisa, la kekesi tai te Sisa oio volale.” \p Goio, e Iesus koli tataho la merera soio tegiteu maie mago “Taritigi mai la paga te Sisa amuto ge abi rivuale Sisa, me la paga te La Tahalo Uru, amuto ge abia La Tahalo Uru.” \v 22 Tio egite loloa mai ele, egite karutu pepeho, egite tomi goio hiliti, tuga taroa. \s1 Egiteu e sadiusi tahi lalai e Iesus te la mahuli rivula \r (Mark 12:18-27; Luk 20:27-40) \p \v 23 Goio, te la haro moli lou ale, egiteu e sadiusi tai isahari goio te Iesus. La vimari tegiteu la valaluale, egite tahi taro la mahuli rivula veia etato ge peho, etato kati ge mahuli rivu lou. Tio egite gomai te Iesus veia ge tahi lalaia isa la tilahi te la vimari tegiteu ele. \v 24 Egite goio tahia mago “Tahalo la vimari, e Moses eia kekesi la merera maie veia mai la tahalo isasa eia ge peho taro e rutula, eia kama savu isa e latula, e tarila ge puli e rutule tuala ale eia peho taroa, eia ge savu isa e latula ge igo la kilolile tuala ale pehoti. \v 25 Tio, pala egiteu e tau me taitari egite taho vitu pou oio tamiteu. E tua giteu eia taulai, eia kama savu isa e latula, eia peho, e tarila ale bali tavua eia goio puli e rutule tualale. \v 26 Tio e tarila goio igo lou maio, eia peho e latula ouka. La itolula tai igo maio, egite tomi mai molio, egite peho tomi kara te tari giteu la bilaruru la ivitula, e latu giteu isa ouka. \v 27 Goio, egite tomi goio peho, mulimuli la tavilele tai goio peho, \v 28 Tiele la tilahi tamiteu oio volale, eia maie veia mai te la mahulila ale mulimuli, la tavilele ge rutule ere tegiteu sesele? La vuhula egiteu taho vitu tomi ele, egite pulitia.” \p \v 29 Tio, e Iesus lolo la tilahi tegiteu mai ele, eia goio veia giteu mago “Amuto ruruti, la vuhula amuto kama rovi bakisi la merera te La Buk Tabu. Amuto kama rovi bakisi tai la vagagarila te La Tahalo Uru tai. Eala amuto vikara bulalahu mai ele. \v 30 Te la mahuli rivula ale mulimuli, la taulaila ge oukati. Egite ge pou moli mai egiteu la angelo ale oata te la ilo la lage. \v 31 Eala moli la merera tamutou ale amuto tahi taro la mahuli rivula veia etato ge peho, etato kama ge mahuli rivu lou, eau ge vikara bakisi te ale. Soioge amuto souka gigi la merera te La Tahalo Uru te La Buk Tabu ale eia vimari amutou maie: \li1 \v 32 Eau La Uru te Abraham, \li1 eau La Uru te Aisak, \li1 eau La Uru te Iakob. \p Eala, te la merera alele eia matagaga moli veia egiteu tomi ele kama peho, la kalulu giteu mahulihuli. La Tahalo Uru eia kama La Uru giteu moli ale pehoti, eia La Uru giteu ale mahulihuli.” \p \v 33 Goio, egiteu la valalua me hatavivile ale usu egite oio magirigiri, egite lolo la vimari te Iesus ale tikumu mai alele, egite karutu pepeho. \s1 La merera te La Tahalo Uru ale muga sesele \r (Mark 12:28-34; Luk 10:25-28) \p \v 34 Goma, egiteu e pariseo lolo vutitia veia e Iesus putu olitia la merera tegiteu e sadiusi, egite goio pou vikapopo, egite tabari isasa tegiteu veia ge tovo lalai la mari te Iesus la tilahi tegiteu isasa. \v 35 Tio la tahalo tegiteu ele eia la tahalo la mari sesele te la merera te Moses, eia goio tahi lalai e Iesus mago \v 36 “Tahalo la mari, la merera te La Tahalo Uru ale mave eia muga sesele te la merera tomi ale eia bahatia somai tegatou e?” \p \v 37 Goio, e Iesus koli la tilahi tetala mago “La merera ale muga sesele eia maie: \li1 Etato ge masaga tavu sesele La Tahalo Uru, \li1 La Uru gatou, \li1 etato ge masaga tavu seselea \li1 te la kalulu gatou tomi, \li1 te la gabutatalala tomi tegatou, \li1 te la ilo gatou tomi tai. \p \v 38 Tio la merera te La Tahalo Uru aleie eia uru sesele, eia muga tegiteu la merera tomi. \v 39 Me la iluala eia ga mai tai lou ele, egira vitotoko moli, eia maie: \li1 Etato ge gogo egiteu e tabarabara gatou \li1 la valalua me hatavivile tomi \li1 mai sesele ale etato gogo rivu lou \li1 etatou isasasa. \p \v 40 Tiele la merera ale iluae, egira mai la vuhu la merera tomi te Moses, me la vuhu la merera tomi tegiteu la bilalaha tai.” \s1 E Iesus tahi egiteu e pariseo te Kraist veia e Devit uru tetala mave \r (Mark 12:35-37; Luk 20:41-44) \p \v 41 Tio, egiteu e pariseo so popou vikapopole, e Iesus goio tahi egiteu mago \v 42 “La gabutatalala tamutou soio te Kraist, eia mave? e Kraist ge sibitala te la maratatila ale mave tegatou e Iuda, e tubula ge ere sesele?” \p Tio, egite goio koli la merera tetala mago “E Kraist, eia e tubule Devit.” \p \v 43 Goio, e Iesus tahi rivu lou egiteu mago “Me mai e Devit ge uru me Kraist ge bisi, ilava sesele etato gigia te La Buk Tabu te la merera te Devit, La Kalulu La Marokala suli la merera tetala, eia goio vikara soio te Kraist, eia toile Kraist veia eia La Uru tetala. La merera te Devit ele etato gigia, eia maie: \li1 \v 44 La Tahalo Uru eia vikara soio te La Uru taku mago \li1 ‘Eme ge pou omai te la baligu, te la galegu e gata, \li1 kara te ale eau ge vipou egiteu la gima taume \li1 otalo te la uluva la vahamu, \li1 eme ge soa kuru egiteu.’ \p \v 45 Oio te la mererale, e Devit moli eia toila e Kraist ‘La Uru taku’, eala moli mai e Devit ge e tubule Kraist mai amuto veia, mave sesele eia ge gabutalea veia eia bisi moli me Kraist eia uru tetala?” \p \v 46 Tio, e Iesus tahi egiteu la tilahi ale viri pasi mai ele, eala moli isa tegiteu kama koramulia veia ge koli la vikararala te Iesus, ouka viruru. Sokoa te la haro alele, egite tagatia e Iesus, egite kamati tahi loua la tilahi isa lou, oukati. \c 23 \s1 La pakakasala tegiteu la tahalo la mari me tegiteu e pariseo \r (Mark 12:38-39; Luk 11:43,46; 20:45-46) \p \v 1 Goio, e Iesus goio valolo la valalua me hatavivile usu ale magirigiri vikapopo me egiteu la valalua la vimari tetala, eia veia giteu mago \v 2 “Egiteu la tahalo la mari, vikapopo me egiteu e pariseo, egite abiti la mulile Moses, \v 3 eala eia taritigi veia amuto ge lolo vulai tavu la merera tegite, eala moli la vulovulo giteu ale egite igigoa, amuto umala tilimulimulia, la vuhula egite kama mulimuli seselea mai la merera ale egite vimari amutou ovola. \v 4 Egite vibole la valalua me hatavivile la tabule ale tikumu pepeho, mai la imoimo la merera usu ale egite veia etato ge tilimulia, eala moli egite kama masaga veia ge koli egiteu, veia egite ge lube tataho la merera te La Tahalo Uru, veia ge bole suli la valalua me hatavivile bakisi te la bulole la tikumu la merera ale usu egite vipou egiteu oio vola. \p \v 5 “La vulovulo giteu tomi ale egite igigoa, egite igoa veia la valalua me hatavivile ge hiloa veia egiteu la tahalo sesele. Egite abi la kekesi la merera te Moses, egite pilu tatahoa, egite kisia oata te la varu giteu, egite kaia te la lima giteu tai mai la sasa veia eia ge suli egiteu. La krobola tegiteu ale egite kaia te la kilaka, eia malalau sotalo la magasa. \v 6 Egite masagea veia egite ge pou mamuga te la mata la valalua te la ilali ale uru, egite masaga taia veia egite ge pou mamuga te la mata la valalua me hatavivile oilo te la luma la lotu. \v 7 Egite masagea veia la valalua me hatavivile ge laharoa giteu oluma te la tia la mautu, me egite masaga taia veia la valalua me hatavivile ge togo tataho egiteu, ge toi legiteu ‘Tahalo la vimari’. \v 8 Eala moli amutou la valalua umala ge toitoi le amutou maie ‘Tahalo la vimari’ la vuhula la tahalo isa moli sekela eia la tahalo la vimari tamutou, me amutou tomi amuto vitau me tabara moli. \v 9 Me amuto umala tai ge toi bububu moli la tahalo isasa omai te mahulila te la vovo veia ‘e tete’, la vuhula e Tama mutou isa moli sekela, La Tahalo Uru oata te la ilo la lage. \v 10 Me egite umala ge toile amutou ‘tahalo uru’, la vuhula la uru mutou isa moli sekela, e Kraist. \v 11 Mai isasa eia la mulugaluga tamutou, alele eia mai la bilalaha moli tamutou. \v 12 Mai la tahalo isasa, eia ge vauru lou eia, la isala vavava, La Tahalo Uru ge vibisi loua. Eala moli mai la tahalo isasa eia vibisi lou eia, La Tahalo Uru ge vauru loua.” \s1 E Iesus vile egiteu la tahalo la visigologolola ale viruru la valalua me hatavivile \r (Mark 12:40; Luk 11:39-42,44,52; 20:47) \p \v 13 “Amutou la tahalo la mari te la merera te Moses, amutou tai e pariseo, e maura miteu, amuto ge vilua, la vuhula amutou la tahalo la visigologolola. Amuto magiri robo legiteu la valalua me hatavivile la gauru ale egite ga goilo vola veia ge pou te la pulolou la matagagala te La Tahalo Uru. Amuto kama masagea veia ge tiroro soilo vola, ilava amuto magiri robo lou egiteu ale masagea ge goilo, ia? \p [ \v 14 “Amutou la tahalo la mari te la merera te Moses, amutou tai e pariseo, e maura miteu, amuto ge vilua, la vuhula amutou la tahalo la visigologolola! Amuto pakalikali la luma me la magasa tegiteu e hatavivile la baharu, amuto goio lotu, amuto visigolo la kilaka ale malau veia amuto ge tau robo lou la iruru tamutou. Tiele mulimuli La Tahalo Uru ge vilai sesele amutou, la iligiligi tamutou ge kara polo la iligiligi tegiteu la valalua me hatavivile bulalahu.] \p \v 15 “Amutou la tahalo la mari te la merera te Moses, amutou tai e pariseo, e maura miteu, amuto ge vilua, la vuhula amutou la tahalo la visigologoloa! Amuto polo soio la gale ale malau sesele veia ge puli isahari la valalua soilo te la lotu e Iuda, egite isahari goio tilimuli amutou mai ele, egite muga sesele amutou te la vulovulo ale kama kokora ale amuto vimari legiteu ovola. \p \v 16 “E maura miteu, amutou mai la mata kea, amuto vituri gegerua giteu la valalua me hatavivile la gauru. Te la vimari tamutou, amuto veia mai la tahalo isasa eia ge vikara sesele oata, mai eia ge toi la luma la lotu veia ge vitikumu lou la merera tetala mai ele, amuto veia la vikararala tetalale eia kama tikumu. Eala moli amuto goio vimari papai lou egiteu veia mai isasa ge vikara, mai eia ge toi la vuliti ale oilo la luma la lotu, tio te la vimari tamutou ele, amuto veia la merera moli alele tikumu, eia mai ale kisi roboti la merera tetala tomi. \v 17 E maura miteu, amuto paua, amuto mata kea! Mave, amuto soioge veia la luma la lotu eia la golu bulalahu moli, me la vuliti ale egite taua oilo vola veia eia ge suli la lotu tegiteu, ale moli ele tikumu, ia? Ouka gologolo. La luma la lotu moli, eia vitikumu la vuliti ale egite taua oilo vola. \p \v 18 “Me la merera tamutou isa lou, veia mai la tahalo isasa eia ge vikara sesele oata, eia ge toi la poro oilo la luma la lotu ale egiteu gugutu la vaabila soio te La Tahalo Uru oio vola, amuto veia la merera alele eia kama tikumu. Eala moli mai isasa ge vikara sesele oata, eia ge toi la vaabila ale tabuli oata la poro, amuto veia la merera moli alele eia tikumu, eia mai ale kisi roboti la merera tetala tomi. \v 19 Amuto veia mai ele, amuto mata kea sesele! Mave, amuto veia la poro ale egite gugutu la vaabila soio te La Tahalo Uru oio vola, eia la golu bulalahu moli, me la vaabila ale egite taua oata ovola, ale moli ele tikumu, ia? \p \v 20 “Mai ale, mai amuto ge vikara sesele oata, amuto toi la poro oilo la luma la lotu, ale amuto mai ale toi vikapopoti la vaabila ale tabuli te la porobe, veia eia ge vitikumu la merera tamutoue. \v 21 Mai tai amuto ge vikara sesele oata, amuto toi la luma la lotu, ale amuto mai ale toi vikapopoti la isa La Uru tai, veia eia ge vitikumu la merera tamutou, la vuhula ale la luma tetala ale eme toitiale. \v 22 Mai tai amuto ge vikara sesele oata te la ilo la lage, ale amuto mai ale toiti la pulolou te La Uru, vikapopo sesele me La Tahalo Uru ale eia popou oio vola, eala la vikararala tamutou mai ele, eia tikumu bara sesele, eala moli amuto toi bulalahu molia. \p \v 23 “Amutou la tahalo la mari te la merera te Moses, amutou tai e pariseo, e maura miteu, amuto ge vilua, la vuhula amutou la tahalo la visigologolola. La ilali ale bisi kokori moli amuto ge tabaria, la bautula ge savulu sasa, isa amuto ge abia La Tahalo Uru, ualasiu ge tamutou. Amuto igigoa mai ele, amuto mulimuli seselea mai la imoimo la merera tomi te Moses, taritigi pepeho, eala moli la merera usu lou ale tikumu pepeho, La Tahalo Uru eia veitia gatou oio vola, amuto piligitia, mai la merera te la vulovulo ale taritigi, la gilogo, la iroromulila. Taritigi amuto ge tilimuli tomi la merera te La Tahalo Uru, ale tikumu, ale kama tikumu tai, la merera tomi. \v 24 Amutou maiti la mata kea. Amuto vituri gegerua giteu la valalua me hatavivile la gauru. Ale amuto gabutatala vagari la imoimo la merera tomi ale bisisi, eala moli amuto piligi lou la merera ale tikumu, ale amutou mai sesele la tahalo ale abi taro la pakeso la lamo ale bisi kokori moli oilo te la lalu ale eia veia ge liua, eala moli eia goio liu, eia viliu tomi la pupuso uru vikapopo la lalu. La vuhula amuto vagari moli veia ge roromuli la imoimo la merera te La Tahalo Uru tomi ale bisisi, eala moli amuto mata sosoli lou la merera tetala ale tikumu. \p \v 25 “Amutou la tahalo la mari te la merera te Moses, amutou tai e pariseo, e maura miteu, amuto ge vilua, la vuhula amutou la tahalo la visigologolola! Te la vulovulo mutou, amuto hihi tataho la kulikuli la kap tamutou, la plet, veia eia ge maroka sesele, eala moli la rova amuto taua oilo vola veia amuto ge alia? Amuto igo volu molila la vavua la iruru tamutou, mai la pakalila me la ilisu tavu la golugolu te la tahalo isapolo. \v 26 Amutou e pariseo, amuto mata kea sesele! Taritigi amuto ge igo maroka muga la ilo la kap oilo, mai la tahalo ale la ilola maroka. Mulimuli la kulikuli la kap ale logala, amutou ge igo marokea, mai la tahalo ale tilimuli sesele la imoimo la viputumulila tomi. \p \v 27 “Amutou la tahalo la mari te la merera te Moses, amutou tai e pariseo, e maura miteu, amuto ge vilua, la vuhula amutou la tahalo la visigologolola! Amutou mai sesele la liba ale egiteu e hatavivile sapa bibibia, eia maroka. Eala moli la rova sesele tabuli oilo vola? Eia volu la tatuha giteu ale pehoti, la papaga ale mavulu. \v 28 Tio eia mai sesele eau veitia, la valalua me hatavivile hilo amutou, egiteu veia amutou taritigi, eala moli oilo te la tilalau te la tia mutou oilo, eia volu sesele la visigologolola me la vareagila. \s1 La Tahalo Uru ge koli bara la iruru tegiteu la tahalo la visigologolola \r (Luk 11:47-51) \p \v 29 “Amutou la tahalo la mari te la merera te Moses, amutou tai e pariseo, e maura miteu, amuto ge vilua, la vuhula amutou la tahalo la visigologolola! Amuto igo la simen te la liba giteu la bilalaha te La Tahalo Uru ale pala, veia ge vitokoromo tataho tai la liba giteu la valalua la marokala te La Tahalo Uru. \v 30 Amuto vikara maie mago ‘Mai ge amite ge mahuli pala te la imamala tegiteu e tutubu miteu, amite kama ge suli egiteu veia amite ge bili egiteu la bilalaha.’ \v 31 Tiele amuto veipalea mai ele veia amutou e tutubu giteu sesele la valalua ale bili egiteu la bilalaha te La Tahalo Uru. \v 32 Ioge, taritigi amuto ge vikaluvu pasi la igogolu ale kama kokora egiteu e tutubu mutou sokotia. \p \v 33 “Hilage, amutou la valalua ale kama kokora sesele, amuto mai e taive ale vuraga, eia pou kokovu te la pepe la gauru, veia ge totolo la valalua ale polopolo, eia igo gegeru egiteu. Amuto kama ge vulo taro la igototolola te La Tahalo Uru, ouka viruru, eia ge pigi amutou sotalo te la havi ale uru, la kaluvula ge ouka. \v 34 Eau veia mutou, eau ge baha taro isahari la bilalaha, isahari la valalua la mari tai te la merera taku, egite tai isahari ale ge vimari tataho le amutou te La Buk Tabu, egite ge goio tamutou, eala moli amuto ge lao tola egite, isahari amuto ge bili egiteu, isahari lou amuto ge katu egiteu oata te la tauvalautu, isahari lou amuto ge kumamasi vulo egiteu oilo te la luma la lotu, amuto ge basimuli egiteu, egite ge hele marapa, amuto ge paa muli vagari lou egiteu oio te la maututula tomi veia ge lao tola egiteu. \v 35 Tiele la iruru tamutou eia uru pepehoti, la kasoso giteu la valalua me hatavivile la marokala, ale la valalua ale kama kokora bili taroti egiteu, eia ge pagegele volu amutou, sokoa alaurati ale egite bili e Abel, eia la tahalo la marokala taku, kara alalavi, ale egiteu e valalua mutou egite bili e Sekaraia ale e latule Berakaia, oilo moli te la luma la lotu ale eia magiri te la poro la gulutu la vaabila. La tikumu la iruru tomi aleie eia ge tabuli tamutou. \v 36 Eau vei seselea mutou, la mapa la iligiligi te la iruru tomi aleie, eia ge puru sesele tamutou la tuvu ale igoie, la vuhula amuto raragiti veia ge igo la iruru soio te la bilalaha te La Tahalo Uru, eia ge kara polo la iruru tomi ale egiteu e tutubu mutou igoa soio tegiteu la bilalaha tomi ale pala. \s1 E Iesus tali vurai e Ierusalem \r (Luk 13:34-35) \p \v 37 “Maura, Ierusalem, amutou la valalua me hatavivile e Ierusalem, amuto bili taro moli egiteu la bilalaha te La Uru, amuto dumu legiteu la uati, ale La Tahalo Uru baha egiteu somai tamutou. Vaka usuti eau ilo buruko le amutou, eau gabutalea veia eau ge tola tavu egiteu e latatumu veia eau ge sigirobo egiteu mai e kukureko eia rara robo legiteu e latatula la palapalala. Eala moli amuto kama masaga. \v 38 Hiloa, ale la mautu tamutou ge sululu sapa, eia ge kavelevele moli, \v 39 amuto kamati ge hilo lou la matagu kara te la haro ale eau ge guvi loata, me amuto ge tola maie ‘La Uru ge vibalava la bilalaha tetala!’” \c 24 \s1 La vikararala te Iesus te la luma la lotu veia egiteu la gima ge loke taroa \r (Mark 13:1-2; Luk 21:5-6) \p \v 1 Goma, e Iesus mite me la valalua la vimari tetala, egite hiliti, egite goio tuga taro la luma la lotu, egite so gogalagala molie, egiteu la valalua la vimari tetala veia eia ge kavovou muga bakisi ge hilo egiteu la lumaluma ale marasa oilo te la bigomu te la luma la lotu ele. \v 2 Eala moli e Iesus goio veia giteu mago “Amuto hilo egiteu la lumaluma tomi ururuo? Eau vei seselea mutou, mulimuli la valalua la gima tegatou e Iuda ge sibitala, egite ge loke momomo taroa, me la uatati ale ururu ovola, egite kati ge vitabuli tatalu lou, egite ge tabuli marapa tomi.” \s1 La iloburukola me la iligiligi ge sibitala \r (Mark 13:3-13; Luk 21:7-19) \p \v 3 Mulimuli, e Iesus oio popou oata te la gove bisi e Oliva, egiteu moli la valalua la vimari tetala goio tetala, egite tahi kokovua mago “Eme ge vei matagagea miteu la leavala ale mave sesele eia ge sibitala mai eme veitia, veia la gima ge loke taro la luma la lotu. La irovilala tai ale mave ge sibitala veia amite ge rovia veia eme hagagaviti ge sibitala rivu lou omai, te la tapasi la maututula?” \p \v 4 Tio, e Iesus goio koli la tilahi tegiteu mago “Amuto ge vibaumuli amutou, isasa souka ge visigolo amutou. \v 5 La vuhula la valalua usu ge sibitala, egite ge toi la isagu soio tamutou veia egiteu e Kraist sesele, eala moli ouka, egiteu alele egite ge visigolo la valalua me hatavivile mapaiti. \p \v 6 “Mai mulimuli amuto ge lolo la tilali la ruruga me la rere la ruruga tai ge tali soio te la maututula, amuto umala ge karutula, la papaga tomi ale mai ele egite ge sibitala pala muga, eala moli la tapasi la maututula eia souka. \v 7 La maratatila isahari ge hiliti tavu la maratatila isapolo, egite ge vaubi. La gale isasa ge hiliti tavu la gale isapolo, egite ge vaubi tai mai ele. Te la baa isahari la vitolo uru ge sibitala, e malugulugu tai ge umu oio te la gale isahari. \v 8 Eala moli alele eia mai moli la siloko la iligi la piligo, eia kama ge kaluvu hari. \p \v 9 “Te la imamala alele, egite la valalua ge viligi pepeho amutou, egite ge sugu taro amutou soio tegiteu la gima ale ge bili amutou. Te la galegale tomi la valalua me hatavivile te la maratatila tomi, egite ge vile amutou, la vuhula amuto roromuli eau. \v 10 Te la imamala moli alele, la valalua me hatavivile usu la tautaulailo tegiteu ge boru, egite ge sugu taro e tabarabara giteu soio tegiteu la gima taku, egite ge vitahi taro baololi tai egiteu. \v 11 Egiteu la tahalo la visigologolola tai usu ge sibitala veia ge valolo gegeru la valalua me hatavivile te la merera te La Tahalo Uru, eala moli egite kama ge loio sesele tetala, egite la tahalo la visigologolola moli, egite ge visigolo la valalua me hatavivile mapaiti. \v 12 La vulovulo la vareagila eia ge sibitala uru pepeho, eala la valalua me hatavivile usu kati ge rovi la gilogo. \v 13 Eala moli ere tahalo, ere tavile eia ge magiri vagari moli kara te la tapasi la maututula, tio La Tahalo Uru ge vibalavala la mahulila ale sesele, la kaluvula ge ouka. \v 14 Me la valolo ale taritigi te la pulolou la matagagala te La Tahalo Uru eia ge polo galili la maututula tomi, la valalua me hatavivile tomi ge lolo pala mugea mai ele, tio mulimuli ovolale la tapasi la maututula ge sibitala. \s1 Egiteu la gima ge vahiliti isa la irovilala ale kama kokora sesele \r (Mark 13:14-23; Luk 21:20-24) \p \v 15 “Te la imamala ale hagagavi te la tapasi la maututula, amuto ge hilo la puigolo isa uru ale kama kokora, mai la halulu la tahalo, la bilalaha ale pala e Daniel eia kekesi matagaga ovola. Tio egite la valalua la gima ge vimagiria oilo te la luma la lotu oio e Ierusalem. Ale egite igo mumugu la luma la lotu mai ele, la iruru ale eia tikumu sesele. La puigolole, eia kama kokora viruru. Mai amuto ge hiloa mai ele, amuto ge rovia veia eia kama ge tabaa, la mautu e Ierusalem ge sululu.” (Mai isa ge gigi la mererale, taritigi eia ge rovi tigi la masovala.) \v 16 “Te la haro moli alele, eia taritigi veia egiteu ale pou oio la gale e Iudea, egite ge hele soata te la goegove. \v 17 Mai la tahalo isasa eia ge pou ogala te la matabala la luma, eia umalati ge tiroro soilo te la luma tetala veia eia ge abi muga la golugolu tetala, taritigi veia eia ge hele moli. \v 18 Mai tai la tahalo isa ge orivo, taritigi veia eia umala ge beu tavu lou la kulikuli tetala ale eia tau taroa te la baa isasa, eia soukama ge igo madidi mai ele, eia ge vilua. \v 19 E maura miteu e hatavivile ale savulatu te la haro alele, me egiteu tai e hatavivile ale visususu e latu giteu la pepeso, egite kama koramulia ge hele. \v 20 Eala moli eia taritigi tai veia amuto ge kaka vagari La Tahalo Uru veia eia ge gogo amutou, veia la viligila ale, eia kama ge sibitala tavu amutou te la leavala la maigi, \v 21 La vuhula la imamala ale, eia ge vagari pepeho, pala te la siloko la vipoupoula, karati igoie, la iligiligi kama sibitala vagari sesele mai eia ge sibitala te la tapasila. Mulimuli tai la viligila kama ge vagari sesele mai tai ale. \v 22 Eia sesele, mai La Tahalo Uru kama ge barautu boto la viligila ale, la tahalo isa kama ge mahuli utu. Eala moli eia hiloviti isahari la valalua me hatavivile tetala sesele veia egite ge mahuli utu, eia ge barautu boto la viligila ale, la vuhula eia gogo rivu egiteu ale tetalale, veia ge vimahuli egiteu. \v 23 Mai te la imamala ale, la tahalo isa eia ge veia mutou mago ‘Male, ale e Kraist sibitalatie!’ Uka isa ge vei mago ‘Hiloa, e Kraist oiole!’ umala amuto ge lolo egiteu ele, \v 24 la vuhula egiteu la tahalo la visigologolola isahari ge guvi veia egiteu e Kraist. Isahari tai ge sibitala, egite ge veia egiteu la bilalaha te La Tahalo Uru, egite ge igo la irovilala me la golu la karutula tai isahari ale isapolo sesele veia ge visigolo amutou veia la vagagarila te La Tahalo Uru eia pou tegiteu, la vuhula egite masaga ge tutugolo amutou ale te La Tahalo Uru sesele, eala moli egite kama ge koramulia. \v 25 Tiele, amuto matagagati, la vuhula eau vei matagaga palatia mutou ele. \p \v 26 “Eala moli mai egiteu isahari ge veia mutou mago ‘Male, e Kraist sibitalati oata la hohoi!’ amuto umala goio vola. Mai tai egite ge veia mutou mago ‘Hiloa, e Kraist omaie, amite sivutitia oilo la lumae!’ amuto umala tautaulailo te la merera tegiteu ele. \v 27 La guluvi te Latu La Tahalo, eia ge isapolo te aleie, eia ge sibitala mai la sima ale eia ge sima lomuli te la porosile la haro eia ge karigaga te la iroro la haro loale, la guluvi te Latu La Tahalo ge mai seselele. \v 28 Amuto ge rovi tigi la irovilala tomi, mai la pileleho ge tabuli te la baa isasa, eia mavulu, e loauru ge sibitala ovola veia ge alia, eia mai la irovilala veia la pileleho oio tabulibuli ele. \s1 La guluvi te Latu La Tahalo \r (Mark 13:24-27; Luk 21:25-28) \p \v 29 “Mulimuli la viligila tomi alele ge kaluvu, la mata la haro me la taio ge kuma, egite la matatabu oata te la mori ge paru sotalo, la mori oata eia ge malugu bebebe moli. \v 30 Goio la irovilala te Latu La Tahalo ge sibitala oata te la mori, la valalua me hatavivile te la maratatila tomi otalo te la maututula, egite ge hiloa, egite ge tali, goio egite ge hilo e Latu La Tahalo eia ge sibitala loata te la tuluvu la mori eia ge gotalo, vikapopo la vagagarila tetala ale uru pepeho, me la matagaga tai ale uru sesele. \v 31 La vaivai ge tali, eia ge baha egiteu la angelo tetala soio te la igaga la magasa tomi, egite ge puli vikapopo la valalua me hatavivile tomi ale eia hiloviti egiteu veia egite ge tetala, egite ge loio la igaga la magasa tomi ge goio vikapopo tetala. \s1 La vikarara la tilovo te la obu ale taro eia tututu rivu lou \r (Mark 13:28-31; Luk 21:29-33) \p \v 32 “Amuto ge abi la vimari bakisi te la obu ale taro. Mai eia taroti, eia ge tutuvu rivu lou, tio amuto ge rovia veia eia mahatiti, la leavala kaluvuti. \v 33 Tio mai moli ele amuto ge hilo la irovilala tomi ale eau veitia mutou ovola, egite ge sibitala, tio amuto ge rovia veia La Uru eia hagagaviti, ogala moli te la matapiro. \v 34 Eau vei seselea mutou, egite la tuvu ale igoie, isahari tegiteu soukama ge peho, la papaga tomi aleie ge sibitala. \v 35 La mori me la magasa egira mulimuli ge kokovu, eala moli la merera taku kama ge kokovu. \s1 Isa kama ge rovi la haro ale e Kraist ge sibitala ovola \r (Mark 13:32-37; Luk 17:26-30,34-36) \p \v 36 “Eala moli te la haro alele, eia la haro la karutula sesele, isasa kama ge rovi la haro aleiele, me la mata la haro tai oio vola. Egiteu la angelo tai oata te la ilo la lage, egite tai kama rovia. Eau tai kama rovia, La Tahalo Uru moli sekela eia rovia. \v 37 La vulovulo ale kama kokora ale egite igoa te la imamala te Noa, la vulovulo giteu la valalua me hatavivile ge mai tai lou ele te la imamala ale e Latu La Tahalo ge guvi rivu lou ovola. \v 38 Palati te la imamala te Noale, la lalalu souka tutupusi te la maututula, la valalua alali, egite liliu, egite taulalai, kara sesele te la haro ale e Noa eia tiroro soilo te la uaga uru makapipila tetala, eia kapi robo. \v 39 La valalua me hatavivile kama rovi la viluala ale hagagaviti ge sibitala tavu egiteu, egite kavovou bulalahu moli, egite karutu la lalalu tutupusi te la maututula tomi, la lalalu sogo robo la valalua me hatavivile me gulikiliki tomi, egite sululu sapa tomi moli. Tiele eia ge mai tai aleiele te la guluvi te Kraist, eia ge guvi karutu sesele. \v 40 Mai la tahalo ilua egira ge gorivo la mahuma, egiteu la angelo ge puli isa, e tabarala ge korao. \v 41 Mai tai la tavile ilua egira ge pou vikapopo la ilisile bau, egiteu la angelo ge puli isa, e tabarala ge korao. \p \v 42 “Eia taritigi pepeho veia amuto tomi ge raragi tigi, amuto ge lago tataho, la vuhula amuto kama rovia veia La Uru mutou eia ge sibitala te la haro ale mave. \v 43 Taritigi amuto ge gabutala tigi la merera aleie, mai e taho la luma, eia kama rovia veia la tahalo la pakalila eia ge sibitala te la mata la haro ale mave sesele veia ge sae soata la luma ge pakali, eala moli e taho la luma eia pahutu tataho veia la tahalo la pakalila souka ge sibitala ge sile tavu la luma ge pakali la golugolu tetala. \v 44 Tiele amuto ge raragi tataho mai ele te la guluvi te Kraist, la vuhula eia ge sibitala karutu te la mata la haro ale amuto kama raragi ovola. \s1 La vikarara la tilovo te la bilalaha ale taritigi me la bilalaha ale kama kokora \r (Luk 12:41-48) \p \v 45 “Mai amuto ge pou tataho mai la bilalaha ale taritigi, eia gabutala tigi, eia baumuli tataho la igogolu tetala ale la uru tetala tabariala veia eia ge tabaria giteu la bilalaha tomi la ilali tegiteu te la haroharo tomi. \v 46 Mai la uru tetala ge guvi, eia ge hiloa veia eia igo sesele la igogolu mai ale eia veitia pala, eia ge vibalava seselea. \v 47 Ale eau vei seselea mutou, la uru tetala ge sugu taro tomiala la golugolu tetala tomi veia eia ge baumuli tomia. \v 48 Eala moli mai la tahalo la igogolu ale kama kokora eia ge gabutalea maie mago ‘La uru taku eia kama koramulia ge sibitala hari, eia ge tabaa muga’, \v 49 tiele eia ge pou tavu moli la kulue giteu la bilalaha tomi ale egite otalo tetala, eia ge alali, liliu vikapopo me egiteu la valalua ale liu galololo. \v 50 Eala moli la uru tetala goio guvi karutu, eia ge sivuti la iruru tetala mai ele, \v 51 eia ge lubi vulo gegeru seselea, eia ge pitaroa sotalo te mautu la iligiligi veia eia ge pou vikapopo legiteu la tahalo la visigologolola ovola, eia ge gabu la iligiligi ale uru pepeho, egite ge koro magegege, ge melimeli la togo giteu. \c 25 \s1 La vikarara la tilovo tegiteu la sobe savulu sasa \p \v 1 “Te la haro ale la pulolou la matagagala te La Tahalo Uru ge sibitala, amuto ge hiloa eia ge mai sesele la sobe ale savulusa, egite abi la lam tegiteu isasasa te la logo veia egite ge pololaha la taulai halaba. \v 2 Eala moli egite la sobe ale savulu sasale, egite ilima kama gabutatala tigi, egite ilima lou la tavile la mari. \v 3 Egiteu ale ilima la gabutatalala tegiteu boto, egite hiliti abi la lam tegiteu, eala moli egite kama abi la karasin veia egite ge sigilia te la lam tegiteu mai eia ge mate. \v 4 Eala moli egiteu ale ilima egite la tavile la mari, la gabutatalala tegiteu malau, egite abi la lam tegiteu, egite abi tai la karasin ale egite ge sigilia ovola. \v 5 Tio egite tomi hiliti tuga, egite goio la luma ale egite ge pou tali la taulai halaba ovola, egite goio vola, egite pou. Egite pou, pou, pou, eala moli la taulai halaba eia kama guvi hari, egite hatavivile ale savulu sasale egite pou, egite mata tutulu, egite goio mavuta. \p \v 6 “Tio, goio te la logo uru valiposa, la tahalo isa loio tatola, eia vei mago ‘Mutou, hiliti, la taulai halaba eia loiotie, amuto ge hagolo ge polo utua soio la gauruo, amuto ge pulia soluma.’ \p \v 7 “Tio, egite tomi e hatavivilele goio hagolo, egite hiliti, raragia la lam tegiteu isasasa. \v 8 Eala moli egiteu ale ilima la gabutatalala tegiteu boto, egite karutu ale la karasin tegiteu kaluvuti, egite goio tali tavu egiteu ale ilima la tavile la mario, mago ‘Amuto ge sigilia miteu bakisi la karasin somai la lam tamiteue, eia mamateti, la karasin ouka!’ \p \v 9 “Eala moli egite hatavivile ale ilima la tavile la mario, egite goio koli la merera tegiteu mago ‘Eala moli ouka, la karasin bakisie eia kama ge koramuli etatou tomi, taritigi amuto ge goio ge loto mugea mutou bakisi la karasin ale ge koramulia la lam tamutou.’ \p \v 10 “Tio, egite hatavivile ale ilima la gabutatalala tegiteu boto, egite goio tuga goio veia ge loto, eala moli egite karutu, la tahalo ale taulai halabale goio guvi sesele oluma. Egiteu ale ilima la tavile la mario, egite goio raragi la lam tegiteu, egite goio tiroro soilo la luma vikapopo me la taulai halaba, egite goilo tomi te la ilali la taulaila, la mulugaluga goio kapi la mata. \p \v 11 “Mulimuli egite hatavivile ale ilima, la gabutatalala tegiteu boto, egite goio guvi, egite tutu la mata, egite tola soilo mago ‘Tahalo uru, eme ge kope amiteu.’ \p \v 12 “Eala moli eia goio veia giteu mago ‘Eau kama rovi sesele amutou, amuto tuga.’ \p \v 13 “Tiele, la guluvi te la pulolou la matagagala te La Tahalo Uru eia mai tai ele, amuto ge raragi tigi, amuto ge lago tataho, la vuhula amuto kama rovi la haro alele, me la mata la haro tai, ale eia ge guvi oio vola. \s1 La vikarara la tilovo tegiteu la bilalaha ale abi la uati ale egite ge igogolu ovola \r (Luk 19:11-27) \p \v 14 “La guluvi te la pulolou la matagagala te La Tahalo Uru eia ge mai sesele tai la tahalo isasa, eia raragi veia ge tuga soio te la mautu isasa malau, eia goio tola egiteu la bilalaha tetala, eia goio visaua la lima giteu la golugolu tetala tomi, la magasa tai, la lumaluma, la igogolu tetala tomi, egite sau tolea. \v 15 Eia vitabari legiteu la uati tetala: la mulugala eia abiala la mani ale uru sesele mai e kina salatu savulu lima, la iluala eia abiala la mani ale uru tai mai e kina salatu savulu lua, la itolula eia abiala e kina salatu savulusa moli. Eia tabari tatahoa giteu mai ele, veia egite ge igogolu muga oio vola, ge paa muli la uati isahari lou tetala ovola, la vuhula eia rovi la vagagari giteu taho tolu ele. Goio eia vitabari legiteu kaluvu, mulimuli eia goio hiliti tuga. \p \v 16 “Eia tuga, la bilalaha ale eia abiala e kina salatu savulu limao, eia tuga goio igogolu vagari te la uati ale eia sau toleao, eia sivuti lou e kina salatu savulu lima oata ovola, eia vitau tomi. \v 17 Me la tahalo tai ale sau tola e kina salatu savulu luao, eia tai igogolu maio, eia sivuti lou e kina salatu savulu lua, eia vitau tomi lou. \v 18 Eala moli ale sau tola e kina salatu savulu sasa molio, eia tuga goio oli la lulu sotalo te la magasa, eia goio tau kokovu la uati te la mulugaluga tetala otalo te la luluo. \p \v 19 “Tio, la tasi goio tabaa pepehoti, la mulugaluga tegiteu la bilalaha taho tolu alele eia goio sibitala, eia masagea veia eia ge vimatata la uati ale eia abia giteu la bilalaha tetala. \v 20 La tahalo ale eia abi e kina salatu savulu lima, eia goio te la mulugaluga tetala, eia veiala mago ‘Tahalo uru, eme abiagu e kina salatu savulu lima, eau igogolutila, eau sivuti lou e kina salatu savulu lima oata ovola, eala eau vaharia somai taume.’ \p \v 21 “Tio, la mulugaluga tetala loloa mai ele, eia sagege pepeho, eia goio veiala mago ‘La igogolu taume taritigi pasi, eme la tahalo sesele, eme baumuli tataho la igogolu taume, eme igo sesele la igogolu ale bisi, ale eau ge vaurume gageie, eme ge baumuli la igogolu ale uru, eme gomai pou te la baligue, etala ge vipou tomi la sagegela ale uru pepeho.’ \p \v 22 “Goio, la tahalo tai ale eia abi e kina salatu savulu lua, eia goio tai te la mulugaluga tetala, eia veiala mago ‘Tahalo uru, eme abiagu e kina salatu savulu lua, eau igogolutila, eau sivuti lou e kina salatu savulu luati loue, eialae.’ \p \v 23 “Tio, la mulugaluga tetala loloa mai ele, eia sagege pepeho, eia goio veiala mago ‘La igogolu taume taritigi pasi, eme la tahalo sesele, eme baumuli tataho la igogolu taume, eme igo sesele la igogolu ale bisi, ale eau ge vaurume gageie, eme ge baumuli la igogolu ale uru, eme gomai pou te la baligue, etala ge vipou tomi la sagegela ale uru pepeho.’ \p \v 24 “Goio, mulimuli e maura la tahalo ale eia abi moli e kina salatu savulu sasa molio, eia tai goio sibitala oio te la mulugaluga tetala, eia veiala mago ‘Tahalo uru, eau rovitia veia eme la tahalo isa ale hate tuu, eme kama igogolu, eme baha moli amiteu, amite lamolamo, galugalu, eala moli eme abi tomi la vavua la igogolu tamiteu, eme abi la uati uru taume ovola. \v 25 Tiele eau rovi la vulovulomu mai ele, eau makuku sesele lemei, eau ulai kokovu la uati taume ale e kina salatu savulu sasale, eia souka kokovu. Ale eme guvitie, eau isitia, eau abitia, eala eau ge abi rivuamu la uati taume, male tiele, eme ge abia.’ \p \v 26 “Eala moli la mulugaluga tetala loloa mai ele, la hatela mamasi sesele, eia goio veiala mago ‘Eme la tahalo isa kama kokora sesele, la igogolu taume kama taritigi, eme tuha malulu pasi, eia sesele eme rovi la vulovulogu veia eau la tahalo isa ale hate tuu, eau kama igogolu, eau baha moli amutou, amuto lamolamo, galugalu, eala moli eau abi tomi la vavua la igogolu tamutou, eau abi la uati uru taku ovola. \v 27 Eme rovia la vulovulogu mai ele, ilava sesele eme kama vahari la uati taku soio tegiteu la valalua ale vibaumuli la uati, veia eau ge beua, eau ge abi rivu loua vikapopo la uati ilua ale ge sibitala loata ovola?’ \p \v 28 “Tiele, la mulugaluga tetala igo totolo pepeho mai ele, eia goio veia giteu la bilalaha tetala mago ‘Amuto ge abi taro leia la uati ale e kina salatu savulu sasale, ge abiale tabarala ale sau tolati e kina salatu salatu sasae. \v 29 La vuhula la tahalo ale sau tolati la golu ale taritigi, eau ge vauru lou la vibalavala soio tetala, eia ge balava pepeho sesele. Eala moli la tahalo ale kama sau tola isa la paga, ale bakisi e maura taholea, eau ge abi taro lou leia. \v 30 Eala moli amuto ge lao tola la tahalo ale kama kokorale, amuto ge kumuli taro seselea sogala te la maligoma ale uru sesele, ale egiteu ale pou ovola egite koro magegege, egite melimeli la togo giteu.’ \s1 E Kraist ge mata muli la vulovulo la valalua me hatavivile \p \v 31 “Mulimuli e Latu La Tahalo eia ge sibitala vikapopo la matagaga ale uru pepeho, vikapopo tai me egiteu la angelo tetala, eia ge pou te la pulolou la uru tetala. \v 32 Egiteu la maratatila la valalua me hatavivile tomi te la maututula te la galegale tomi, egite ge sibitala vikapopo oio te la lagula, eia ge tabari egiteu la malosu ge ilua, mai sesele la tahalo la vibaumuli la sip eia tabari egiteu la sip isapolo me la mee isapolo. \v 33 E Kraist ge vipou egiteu la sip oio te la galela e gata, me egiteu la me e soio te la galela e meru. \p \v 34 “La Uru ge veia giteu ale pou oio te la galela e gata maie ‘Amutou ge gomai, e Tete vibalavati amutou, amuto ge pou te la mautu la marokala ale e Tete raragitia palati te la siloko la maututula veia eia ge tamutou. \v 35 La vuhula pala eau vitolo, amuto vituha toro eau, amuto abiagu la ilali. Pala eau malehu, amuto sahoagu la lalu, eau liua. Pala eau pou la mosi, amuto puliau soilo te la luma tamutou. \v 36 Pala eau savelea la kulikuli, amuto goio abiagu la kulikuli, eau lea, amuto baumuliau, eau pou oilo te la luma la kilisi, amuto goio hari lalai eau.’ \p \v 37 “Eala moli egiteu la valalua me hatavivile ale taritigi ele, egite ge tahia mago ‘Tahalo Uru, te la haro ale mave sesele, amite hilome eme vitolo, amite vituha torome, amite abiamu la ilali e? Te la haro tai ale mave eme malehu, amite sahoamu la lalu, eme liua e? \v 38 Te la haro tai ale mave eme pou la mosi, amite pulime soilo te la luma tamiteu e? Me te la haro ale mave eme la kulikuli ouka, amite abiamu la kulikuli e? \v 39 Te la haro ale mave eme lea, uka eme pou oilo te la luma la kilisi, amite hari lalaime?’ \p \v 40 “Tio, La Uru ge koli la vikararala tegiteu maie ‘Ale eau vei seselea mutou, la visuli ale eme suli e tabaragu isa ovola, mai la tahalo bulalahu moli ale kama posa tahalo, amuto goio sulia, ale amuto kama suli moli eia, amuto mai ale igo seselea somai taku.’ \p \v 41 “Eala moli La Uru ge vikara soio tegiteu ale pou oio te la limala e meru, eia ge veia giteu maie ‘Amutou la valalua me hatavivile ale kama kokora, La Tahalo Uru ge vilai sesele amutou! Amuto ge hele taroau gageie, amuto ge gotalo te la havi ale uru, la kaluvula ge ouka, ale La Tahalo Uru raragitia veia ge vilai e Satan vikapopo me egiteu la angelo tetala oio vola. \v 42 La vuhula pala eau vitolo, amuto kama abiagu bakisi la ilali veia eau ge tuha torola. Eau malehu, amuto kama sahoagu la lalu veia eau ge liua. \v 43 Pala eau pou la mosi, amuto kama puliau soilo te la luma tamutou. La kulikuli taku ouka, amuto kama abiagu la kulikuli. Eau lea, eau pou oilo te la luma la kilisi, amuto kama hari lalaiau bakisi veia amuto ge tiloho lalai eau bakisi, ouka viruru.’ \p \v 44 “Tio, egiteu la valalua me hatavivile ale kama kokorale, egite ge koli la merera tetala, egite ge tahia maie ‘Tahalo Uru, te la haro ale mave sesele amite hilome eme vitolo, eme malehu, me eme la mosi, eme la kulikuli tai ouka, eme lea, me eme pou oilo te la luma la kilisi, veia amite kama sulime bakisi e?’ \p \v 45 “Tio, La Uru ge koli lou la merera tegiteu maie ‘Ale eau vei seselea mutou, la visuli ale eme vitoua, eme kama suli e tabaragu isa ovola, mai la tahalo bulalahu moli ale kama posa tahalo, amuto kama sulia, ale amuto kama suli tai eau, amuto mai ale tou sesele eau!’ \p \v 46 “Tiele, eia ge sile palea giteu kaluvu mai ele, me egiteu ale kama kokorale eia ge baha taro egiteu soio te la viligila ale uru, la kaluvula ge ouka, eala moli egiteu ale taritigi, la vulovulo giteu maroka tomi moli, eia ge vimahuli sesele egiteu, egite ge sau tola la mahulila ale kama ge kaluvu.” \c 26 \s1 Egiteu la mulugaluga viputumulia veia egite ge bili e Iesus \r (Mark 14:1-2; Luk 22:1-2; Ioanes 11:45-53) \p \v 1 E Iesus vimari egiteu la valalua me hatavivile kaluvu, eia goio veia giteu la valalua la vimari tetala mago \v 2 “Amuto rovia, la haro ilua moliti soloio te La Ilali La Poloselela, te la haro ale egite la valalua la gima ge lao tola e Latu La Tahalo ge katu tolea oata te la tauvalautu.” \p \v 3 Goio, egiteu la mulugaluga tegiteu e pris, vikapopo me egiteu la mulugaluga tegiteu la valalua e Israel, egite goio pou vikapopo oio te la luma te Kaiapas, eia la mulugaluga tegiteu e pris. \v 4 Goio, egite pou vikapopo mai ele, egite viputumuli la gauru isa veia egite ge lao tola kokovu e Iesus ovola veia egite ge bilia eia ge peho. \v 5 Eala moli isahari tegiteu goio vikara maie mago “Etato umala ge lao tolea te la haro La Ilali La Poloselela, la vuhula egiteu la valalua me hatavivile ge usu omai e Ierusalem, egite masaga pepeho e Iesus ele, egite soukama ge soko la vikuela, la mautu ge masua.” \s1 La tavile isasa tigitaro la lalu la abirila oata te la gamale Iesus \r (Mark 14:3-9; Ioanes 12:1-8) \p \v 6 Goio, e Iesus oio popou te la luma te Saimon oio la mautu e Betani. Me la tahalo ale e Saimon, la vovola pala sereka gegeru. \v 7 Tio e Iesus oio popou, la tavile isa loio, eia vahari la botol la bulu la obu isasa. La lalu aleie eia mali vivili tataho pasi, la mapala tai uru sesele. Eala moli la tavilele goio voropola molia la botol bisi ele, eia abia goio tigitaroa oata te la gamale Iesus ale eia popou te la ilali. \v 8 Tio egiteu la valalua la vimari tetala, egite hiloa, egite igo totolo, egite goio vitahi baololi lou egiteu mago “Ilava eia tigitaro bulalahu molia la lalu ale? \v 9 La lalu alele la mapala uru pasi, koramulia veia etato ge abi la uati uru ovola ge suli legiteu la valalua ale pou la savelela.” \p \v 10 Eala moli e Iesus rovitia veia egite vikara kukukumu mai ele, eia goio tahi egiteu mago “Ilava amuto igo totolo la tavilele? Eia igoti la irovilala ale taritigi pepeho somai taku. \v 11 La valalua me hatavivile ale pou la savelela, egite ge omai tamutou la leavala tomi, eala moli eau kama ge pou tabaa lou omai tamutoue. \v 12 Ale eia tigitaro la lalu ale mali vivilie oata te la gamague, eia mai ale raragi mugati la vovogu te la pileho taku. \v 13 Eau vei seselea mutou, oio te la galegale tomi ale egite ge veipala la valolo ale taritigi, tio te la galegale tomi ele egite ge veipala tai la irovilala ale la tavilele eia igotiagu. La visuli uru tetala somai taku ge mahuli moli mai ele.” \s1 E Iudas veia eia ge sugu taro e Iesus soio tegiteu la valalua la gima \r (Mark 14:10-11; Luk 22:3-6) \p \v 14 Goio, isa tegiteu la valalua te Iesus ale savulusa gete lua, eia moli ale egite toila e Iudas Iskariot, eia goio hiliti taro egiteu, eia goio tegiteu la mulugaluga tegiteu e pris, \v 15 eia goio tahi egiteu mago “Mai eau ge sugu taro e Iesus soio tamutou, amuto ge lotoau la uati iriva sesele?” Tio egite loloa mai ele, egite goio abiala e kina savulu tolu. \v 16 Goio sokoa te la haro moli alele e Iudas goio sokoa veia ge sivuti isa la gauru ale eia ge sugu taro e Iesus soio tegiteu. \s1 E Iesus mite ali La Ilali La Poloselela \r (Mark 14:12-21; Luk 22:7-14,21-23; Ioanes 13:21-30) \p \v 17 Tio, ale la siloko la haro te La Ilali La Poloselela, egite la valalua la vimari te Iesus goio tetala, egite tahia mago “Mave, eme masagea veia amite ge raragiamu La Ilali La Poloselela oiove?” \p \v 18 E Iesus lolo la tilahi tegiteu mai ele, eia goio kolia mago “Amuto ge goilo la mautu uru e Ierusalem, amuto ge goio te la tahalo ale amuto ge hiloa eia oio pou taitali amutou, amuto ge veiala maie ‘La Tahalo La Vimari baha la merera maie mago: La haro la pileho taku eia hagagaviti, eau masagea veia amiteu me la valalua la vimari taku ge ali La Ilali La Poloselela oio te la luma taume.’” \v 19 Tio egite la valalua la vimari tetala goio igo seselea mai e Iesus veia giteu ele, egite goio raragi La Ilali La Poloselela. \p \v 20 La paga maulavi, e Iesus me egiteu la valalua tetala ale savulusa gete lua, egite goio pou raragi te la ilali. \v 21 Egite goio alali, e Iesus goio veia giteu mago “Eau vei seselea mutou, isa oio kabili tamutou ele ge sugu taroau soio tegiteu la gima taku.” \p \v 22 Tio, egite loloa mai ele, egite tomi ilo buruko, egite isasa goio tahia mago “Tahalo Uru, eme soioge kama veia eau ia? Eau ale ouka!” \p \v 23 Tio, e Iesus goio veia giteu mago “Eiala moli ele amilua vitivu vikapopo, eia moli eiala ge sugu taro eaue. \v 24 E Latu La Tahalo eia ge poga tavu la pileho mai sesele La Buk Tabu veipalea. Eala moli e maura la tahalo ale ge sugu taro e Latu La Tahalo, eia ge taritigi pepeho tetala mai e tilala kama ge pigoa.” \p \v 25 Tio, e Iudas ale ge sugu taroa, eia goio tahia mago “Tahalo La Vimari, eme soioge kama veia eau, ia?” \p E Iesus goio kolia soio tetala mago “Eme molie, eiala eme veitiale.” \s1 E Iesus mite pou vikapopo te la tapasi la ilali tetala \r (Mark 14:22-26; Luk 22:14-20; 1 Korin 11:23-25) \p \v 26 Egite oio alali, e Iesus goio abi la bret isa, eia vaisale La Tahalo uru ovola, eia goio tovia giteu la valalua la vimari tetala. Eia veia giteu mago “Amuto abia, amuto ge alia, ale la mailigu.” \p \v 27 Goio, eia abi isa la kap la vaen, eia vaisale La Tahalo Uru ovola, eia goio abia giteu, eia veia gite mago “Amuto tomi ge liu ovola. \v 28 Ale la kasosogu ale mai la irovilala ale amuto ge rovia veia la merera te La Tahalo Uru me la igogolu taku, eia sesele. La kasosogu ge pagegele, eia ge vimahuli la valalua me hatavivile usu, la vuhula oio te la pileho taku eau ge vimavulaha egiteu te la iruru tegite. \v 29 Eau vei seselea mutou, eau kati ge liu lou la vaen kara te ale eau ge liu la vaen ale halaba vikapopo le amutou, oata te la balile Tete.” \p \v 30 Tio, e Iesus goio veia giteu mai ele, egite goio bau isa la bilau la vaisalela. Egite bau kaluvu, egite hiliti, tuga. Egite tuga, egite goio la gove bisi e Oliva, egite pouo. \s1 E Iesus vei matagaga pala mugeale Pita veia eia ge tahi taroa \r (Mark 14:27-31; Luk 22:31-34; Ioanes 13:36-38) \p \v 31 Goio, e Iesus veia giteu la valalua la vimari tetala mago “Galogo moli, amuto tomi ge taga taroau, mai la merera te La Buk Tabu eia veia La Tahalo Uru vikara maie: \li1 La tahalo la vibaumuli la sip taku, \li1 eau ge bilia eia ge peho, \li1 egiteu la sip tomi ge hele bura. \p \v 32 Egite ge biliau, eala moli eau ge mahuli rivu lou, eau ge mamuga soio e Galilea, amuto ge mulimuli.” \p \v 33 Tio, e Pita goio hiliti, eia veiale Iesus mago “Egiteu tomi ele ge taga tarome, eau moli ge ouka.” \p \v 34 Eala moli e Iesus goio koliala mago “Eau vei seseleamu, galogo e kukureko souka ge tali, eme ge tahi taroau vaka tolu.” \p \v 35 Eala moli e Pita giriri vagari mago “Mai egite ge bilime, egite ge bili tai eau, egite ge bili tomi etalua, eau kama ge tahi tarome.” Tio egite tomi la valalua la vimari tetala, egite vei taiale Iesus mai ele. \s1 E Iesus pou te la kilaka oio la malilo e Getesemane \r (Mark 14:32-42; Luk 22:39-46) \p \v 36 Goio, e Iesus mite me la valalua la vimari tetala, egite goio la malilo ale egite toila e Getesemane. Tio e Iesus goio veia giteu la valalua tetalale mago “Amuto ge poue, eau ge pou soiole, ge kaka muga bakisi.” \v 37 Eia puli egiteu ale taho tolu e Pita, e Iakob, e Ioanes egite tomi ele goio tilimulia, eala moli e Iesus eia ilo buruko seseleti, la gabutatalala tetala marapa viruru. \v 38 Eia goio veia giteu mago “Eau ilo buruko pepeho pasi mai ale eau ge peho. Amuto ge pou omaie, eau ge goio ge kaka, amuto ge lagolago omaie.” \p \v 39 Tio, e Iesus tuga moli bakisi soio, eia gotalo mavuta lagu tugu, eia kaka maie “Tete, mave, eia kama koramulia veia eme ge abi taro leau la iloburukola ale pogeaue? Eala moli umala ge tilimuli la masasagala taku, ge tilimuli moli la masasagala taume.” \p \v 40 Tio, eia kaka mai ele, eia goio beua soio tegiteu taho tolu, eia hilo egiteu oio mavutati. Eia goio veiale Pita mago “Mave, amuto kama koramulia ge pou taliau la mata la haro isa moli, ia? \v 41 Taritigi amuto ge pahutu tataho, amuto ge vagari tai la kilaka, e Satan souka ge tovo lalai amutou. Soioge la kalulu mutou oilo eia vagari, eala moli la vovo mutou kama vagari.” \p \v 42 Tio, eia goio hiliti taro lou egiteu, eia goio kaka lou, mago “Tete, mai eia kama koramulia veia eme ge abi taro leau la iligiligi ale eme vipouau ovola, eala moli eau ge bole molia, eau ge tilimuli molia mai la masasagala taume.” \p \v 43 Tio, eia goio beu loua soio tegiteu taho tolu, eia sivuti egiteu oio mavutati lou, la vuhula egite mata tutulu pepeho. \v 44 Tio eia hiloa veia egite mavutale, eia goio beua, eia kaka lou la vakatolula, eia kaka lou mai ale igoitio. \p \v 45 Tio, mulimuli eia beu loua soio tegiteu taho tolu, egite so mamavuta, eia ilo buruko, eia goio palo egiteu, eia veia giteu mago “Amuto mavutati lou, ia? Ko, amuto maila tataho ele, la mata la haro guviti ale la gima ge sugu taro e Latu La Tahalo soio tegiteu la valalua ale kama kokora. \v 46 Hiliti, etato ge tuga! Hiloa, la tahalo ale ge veipaleau gageie eia loio sibitalati ele!” \s1 E Iudas sugu taro e Iesus soio tegiteu la valalua la gima \r (Mark 14:43-50; Luk 22:47-53; Ioanes 18:3-12) \p \v 47 E Iesus so vikarakara soio tegiteu la valalua la vimari tetala taho tolue, e Iuda sibitala robo egiteu, e Iudas moli ale isa tegiteu la valalua te Iesus ale savulusa gete lua. Eia sibitala vikapopo la valalua usu ale egiteu la mulugaluga tegiteu e pris me egiteu la ururu baha egiteu ele. Egite ababi la voviso, la obobu. \v 48 Eala moli e Iudas vei loho mugatia giteu mago “Amuto ge hilo la tahalo ale amila ge vigau, me eiala moli ele. Amuto ge lao tolea, amuto ge sau tola tigia ge pulia soio.” \v 49 Tio e Iudas goio sele tavu moli e Iesus, eia veiala mago “La logo sesele, tahalo uru!” Tio eia goio vigaua. \p \v 50 Eala moli e Iesus goio veiale Iudas mago “Tabaragu, taritigi eme ge igo hari molia mai la gabutatalala taume ale eme gomai veia ge igoa.” \p Tio, egite hiloa e Iudas vigau e Iesus mai ele, egite goio lao tolea. \v 51 Eala moli la tahalo isa te Iesus ale magiri hagagavi ele, eia kamu tavu molia la viso tetala, eia goio barautu taro la gavusa la bilalaha te la mulugaluga tegiteu e pris isasa. \p \v 52 Tio, e Iesus hiloa mai ele, eia goio veiala mago “Eme ge sugu rivu lou la viso taume soio te la mulila. Egiteu tomi ale vaubi me la viso, egite ge poga tavu la pileho te la viso lou. \v 53 Mave, eme kama rovia veia eau koramulia ge kaka e Tete, eia ge baha taro egiteu la angelo usu pepeho sesele, egite ge gomai ge taho loio taku. \v 54 Eala moli mai eau ge vulo taro la viluala mai ele, la merera te La Buk Tabu somai taku eia kati ge puru tigi ale eia veia egite ge lao toleau, ge biliau, eau ge peho.” \p \v 55 Tio, e Iesus goio vulo soio tegiteu la valalua ale gomai veia ge lao tolea, eia veia giteu mago “Eau la tahalo isa, eau vahiliti la vaubila, ia? Ale amuto gomai, amuto ababi la voviso, la obobu, veia ge lao toleau. La haroharo tomi eau pou oio te la luma la lotu, eala moli amuto kama lao toleau. \v 56 Eala moli la iruru ale amuto igotiale, eia vipuru seseleti la merera tegiteu la bilalaha ale pala, ale egite kekesia te La Buk Tabu.” Tio eia veia giteu la merera tetala mai ele, egite la valalua la vimari tetala tomi egite hiliti, hele taroa. \s1 Egite vimagiri e Iesus te la vigagiala tegiteu la mulugaluga \r (Mark 14:53-65; Luk 22:54-55,63-71; Ioanes 18:13-14,19-24) \p \v 57 Goio, egiteu ale lao tola e Iesus ele, egite goio lapua soio te la luma te Kepas, eia la mulugaluga tegiteu e pris. Eala moli oio te la luma tetalale egiteu la valalua la mari te la merera te Moses, vikapopo tai me egiteu e ururu, egite vikapopoti oio poupou. \v 58 Eala moli egite lapu e Iesus soilo volale, e Pita tauale Iesus ebikoka. Eia tiroro moli te la mata la bigomu ale goilo te la luma te Kepas ele, eia goio pou vikapopo legiteu la valalua la vagari robo la luma, egite pou vikapopo mai ele, e Pita veia ge pou muga ge rovia veia la rova egite ge igoa soio te Iesus. \p \v 59 Tio, egiteu la mulugaluga tegiteu e pris, vikapopo tai me egiteu e ururu tomi, egite paa la tahalo isahari ale ge kauale Iesus isahari la merera te la vulovulola ale eia igigoa, veia ge visigolo mai ele veia eia la tahalo la iruru, egite ge koramulia mai ele veia ge bilia. Tio la valalua usu sibitala veia ge ubi le Iesus la vikarara la visigolola isahari, \v 60 eala moli egiteu la mulugaluga kama sivuti isa la tahalo ale eia koramulia ge veipala la merera ale tikumu sesele veia egite ge bilia ovola. \p Tio, egite paa muli la tahalo isahari mai ele goio egira taho lua hiliti, \v 61 egira vei mago “La tahalo ale pala amila loloa eia veia maie ‘Eau ge lobe la luma la lotu te La Tahalo Uru, la haro itolu ge polo, eau ge vimagiri loua.’” \p \v 62 Tio, la mulugaluga tegiteu e pris eia hiliti, eia goio tahi e Iesus mago “Mave, eme la kiloli la merera isa soio tegirua, ka ouka? La vuhu la merera tegirua ale egira virere taliti leme ovola eia soioge mave?” \v 63 Eala moli e Iesus makovu moli, eia kama koli la merera tetala. \p Tio, la mulugaluga tegiteu e pris goio tahi loua mago “Ale eau tahi seseleme, veia eme ge vikara sesele te la isa La Tahalo Uru ale eia sekela moli mahuli, eme e Kraist e Latu La Tahalo Uru, ka ouka, ia?” \p \v 64 E Iesus goio veiala mago “Meie, eiala moli ele eme veitiale. Ale eau veia mutou tomi ele, mulimuli amuto ge hilo e Latu La Tahalo eia ge pou te la gale La Tahalo Uru e gata, eia ge loata la tuluvu la mori, eia ge gomai.” \p \v 65 Tio, la mulugaluga tegiteu e pris eia lolo la vikararala te Iesus mai ele, la hatela mamasi sesele, eia sile la kairobola tetala mai la irovilala soio tegiteu veia eia igo totolo pepeho pasi. Eia goio veia giteu mago “Etato kama ge tola lou isa lou la tahalo ale ge veipala la iruru tetala. Hiloa, amuto lolo seseletia, eia toi bulalahu la isa La Tahalo Uru, eia veia eia sesele e latulae, eia tikumu pasi. \v 66 Tio amuto gabutatala mave sesele ovolale?” \p Tio, egiteu e ururu tomi kolia soio tetala mago “Eia tikumu. Eia koramulia veia etato ge bilia eia ge peho.” \p \v 67 Tio, isahari tegiteu goio kavurasi volu la lagula, egite kuea. Egite isahari goio sabala la galela, \v 68 egite goio tahia mago “Eme e Kraist, ioge eme ge vikara matagaga ere kueti emei ele?” \s1 E Pita tahi taro e Iesus \r (Mark 14:66-72; Luk 22:56-62; Ioanes 18:15-18,25-27) \p \v 69 Tio, e Pita so popou ogala, la tavile isa bisi, eia la bilalaha te la mulugaluga tegiteu e pris, eia goio veia giteu ale popou ele mago “Eia tai pala eia vikapopo le Iesus la tau Galilea.” \p \v 70 Eala moli e Pita tahi taroa te la mata giteu la valalua tomi, eia vei mago “Ouka, eau kama rovi la merera ale eme veveiale.” \p \v 71 Eia veiala mai ele, eia goio gali sogala te la mata la bigomu ale goilo te la lumale, tio la tavile isa lou hiloa, eia goio veia giteu la valalua me hatavivile ale egite magiri hagagavi ele, mago “La tahalo aleie, eia pala vikapopo le Iesus la tau Nasaret.” \p \v 72 Eala moli e Pita goio tahi taro lou, eia vei mago “Sesele oata, eau kama rovi la tahalo alele!” \p \v 73 Tio, kama tabaa, la valalua isahari, ale egite magiri hagagavi te Pitale, egite goio tetala, egite veiala mago “Eia sesele, eme ge isa tegiteu la valalua te Iesus ele, eme vikarakara mai sesele egiteu la valalua e Galilea, eala amite rovitia veia eme isa tegiteu ele.” \p \v 74 Tio, e Pita goio giriri, veia mai la merera tetala eia kama sesele La Tahalo Uru ge bilia, eia vei mago “Sesele oata, eau ale kama rovi la tahalo ale amuto veveiale, ouka viruru.” Tio eia vikara mai ele kaluvu, e kukureko goio tali. \p \v 75 Tio, e Pita goio loloa e kukureko eia taliti ele, eia gabutala rivu lou la merera ale e Iesus veitiala, ale eia veitiala mago “E kukureko souka ge tali, eme ge tahi taro eau vaka tolu veia eme kama rovi eau.” Tio e Pita gabutala rivu la merera ale e Iesus veiala mai ele, eia ilo buruko pepeho, eia goio gali sogala, eia tali pepehotio. \c 27 \s1 Egite tutuale Iesus soio te Pailat \r (Mark 15:1; Luk 23:1-2; Ioanes 18:28-32) \p \v 1 Tio, hagolo mamaga mai galigeli te la kavikoki bisi, egiteu la mulugaluga tegiteu e pris, vikapopo me egiteu e ururu tegiteu e Iuda, egite viputumuli la gauru ale egite ge ali la ilo giteu e Rom ale baumuli egiteu ele, veia egite ge bili e Iesus eia ge peho. \v 2 Tio egite viputumulia kaluvu mai ele, egite goio kisi tolea, egite goio lapua soio, egite goio tutua soio te Pailat. \s1 E Iudas peho \r (La Bilalaha 1:18-19) \p \v 3 Ale e Iudas hiloa veia egite vimagiriti e Iesus te la vigagiala ale tivura pepeho, eia gabutala rivu lou la iruru tetala ale eia sugu taro e Iesus soio tegiteu la gimale, eia ilo burukotio. Eia goio vibeu rivua e kina ale savulu tolu egite loto leia, eia abia giteu la mulugaluga tegiteu e pris me egiteu e ururu, eia veia giteu mago \v 4 “Eau ruruti, eau veipalati la tahalo la marokala soio te la pileho, eia la iruru ouka.” \p Eala moli egite goio koliala soio mago “Ale eme veia miteu mai ele ilava? Aleie kama la iruru tamiteu, ouka, aleie la iruru sesele taume.” \p \v 5 Tio, e Iudas goio abi la uati ele, eia pigia sotalo, oilo la luma la lotu moli ele, eia tuga. Eia goio gali sogala, abi la mota, eia goio hou rivu lou eia, eia goio peho. \p \v 6 Eala moli egiteu la mulugaluga tegiteu e pris, egite goio abi la uati ale eia pigitia oilo la luma la lotu, egite vei mago “La uati aleie la mapa la tahalo ale egite ge bilia. Etato kama koramulia ge tau vikapopoa te la uati la luma la lotu.” \v 7 Goio egite viputumuli la uati alele, egite veia ge loto la gale la magasa isasa ovola, ale egite toila la magasa la kuvo, veia ge igo la liba tegiteu la mosi mai egite ge peho oio e Ierusalem. \v 8 Eala, kara igoie, egite toi la isa la gale la magasale “La magasa la kasoso” la vuhula egite lotola la uati te Iudas ele. \v 9 Tiele eia vipuru seseleti la merera te Ieremaia, la bilalaha ale pala, ale eia veipalea te La Buk Tabu Ale Pala maie: \li1 Egite abi la uati ale savulu toluo, \li1 la vuhula la valalua e Israel toitia mai ele \li1 veia la mapa la riau tegiteu ge mai moli ele, \li1 \v 10 egite abi la uati alele, \li1 egite loto la magasa la kuvo ovolae, \li1 mai La Uru eia veitiagu la bilalaha tetala ovolale. \s1 E Iesus magiri te la vigagiala oio te Pailat \r (Mark 15:2-5; Luk 23:3-5; Ioanes 18:33-38) \p \v 11 Goio, egite vimagiri e Iesus te la lagule Pailat, e Pailat goio tahia mago “Mave, eme sesele la mulugaluga tegiteu e Iuda, ia?” \p Tio, e Iesus koliala mago “Eia mai moli ale eme veitiale.” \p \v 12 Tio, egite la mulugaluga tegiteu e pris, me egiteu e ururu tai, egite hiliti, egite ubi le Iesus la merera usu, eala moli eia kama koli la merera tegiteu. \v 13 Tio e Pailat goio tahi loua mago “Eme kama lolo la merera usu ale egite ubi leme ovola? Mave, eme la kiloli la merera tegiteu ouka?” \v 14 Eala moli e Iesus kamati koli lou isa la merera veia eia ge giriri veia eia la iruru ouka. Tio e Pailat hiloa veia eia vagari mai ele, eia karutu sesele. \s1 E Pailat baha taro e Iesus soio te la pileho \r (Mark 15:6-15; Luk 23:13-25; Ioanes 18:39–19:16) \p \v 15 Eala moli te La Ilali La Poloselela, te la leavalavala tomi, la mulugaluga tegiteu e Rom ale baumuli egiteu e Iudale, mai e Pailat moli ele, eia ge lube isa la tahalo ale egiteu e Rom kapi roboa, mai la masasagala moli te la valalua me hatavivile, egite ge toi isa la tahalo, tio eia ge goio lubea giteu ge igo bakisi la sagegela te la pougolula tegiteu e Iuda mai ele. \v 16 Eala moli te la imamala alele, la tahalo isasa ale kama kokora sesele, la rerela taliti soio te la maututula tomi, eia pou te la luma la kilisi, la isala e Barabas. \v 17 Tio la valalua me hatavivile egite goio pou vikapopo, e Pailat goio tahi egiteu mago “Amuto masagea veia eau ge lubea mutou ere? Eau ge lubea mutou e Barabas, uka eau ge lubea mutou e Iesus ale egite toila e Kraist?” \v 18 Eala moli eia tahi egiteu mai ele, la vuhula eia gabutalea veia soioge egiteu la mulugaluga moli igo totolo e Iesus, la valalua me hatavivile ouka. Eia veia ale la valalua me hatavivile masaga pepeho e Iesus, egite kati masaga egiteu la mulugaluga, tio egiteu la mulugaluga goio veipalatia te la viputumulila. Eala moli e Pailat gabutalea veia la valalua me hatavivile ge masagea veia eia ge lubea giteu e Iesus ele. \p \v 19 E Pailat goio pou te la pulolou la viputumulila tetala, e rutula baha la merera soio tetala maie “Eme umala ge igo la paga isasa soio te la tahalo aleie, la vuhula eia la iruru ouka. Alalogo eau mavuta, eau tagea, eau hiloa, la ilogu ruru seseleti leia.” La vikararala te rutule Pailat soio te haruala eia mai ele. \p \v 20 Eala moli egite la mulugaluga tegiteu e pris, me egiteu e ururu, egite vahiliti la gabutatalala tegiteu la valalua me hatavivile veia egite ge kaka e Pailat veia eia ge lube e Barabas, veia egite ge karasuku tai e Pailat veia eia ge baha taro e Iesus soio te la pileho. \p \v 21 Tio, oio volale, e Pailat goio tahi egiteu mago “Amuto masagea veia eau ge lubea mutou ere tegirua taho luale?” \p Goio, la valalua me hatavivile koliala soio mago “E Barabas.” \p \v 22 Tio, e Pailat loloa mai ele, eia goio tahi lou egiteu mago “Me e Iesus ale egite toila e Kraist, eau ge igo la rova soio tetala?” \p Tio, egite koliala soio mago “Katua oata te la tauvalautu!” \p \v 23 Tio, e Pailat goio tahi egiteu mago “Ilava, eia igo la iruru ale mave?” \p Eala moli egite goio tola agi pepeho lou, egite karasukua mago “Katu molia te la tauvalautu!” \p \v 24 Tio, e Pailat hiloa mai ele veia egite kati koramulia ge loloa, eia taga veia la mautu soukama ge mata dadua, mai la valalua ge hiliti ge sokoa la masuala, tio eia hiloa mai ele, eia goio litu la limala oio te la mata la valalua me hatavivile tomi mai la irovilala soio tegiteu veia mai eia ge baha e Iesus soio te la pileho, eia kama la iruru tetala, eia la iruru moli tegiteu lou. Eia litu la limala mai ele, eia goio veia giteu mago “Eau ge baha la tahalo aleie soio te la pileho, ale la paga tamutou, amuto sesele igoa, eau la iruru ouka ovola.” \p \v 25 Egiteu la valalua me hatavivile loloa mai ele, egite goio koli la merera te Pailat mago “Bili molia, mai eia ge la iruru sesele, taritigi veia la kilolila ge puru tamiteu me te latatu miteu tai mulimuli.” \p \v 26 Tio, e Pailat goio lube e Barabas soio tegiteu, eia baha e Iesus soio tegiteu e soldia, egite kumamasi vuloa. Egite kumamasi vuloa kaluvu, e Pailat goio sugu taroa soio te la lima giteu e soldia ale ge vaharia soio ge katua te la tauvalautu. \s1 Egite la valalua la vaubi lege vahi e Iesus \r (Mark 15:16-20; Ioanes 19:2-3) \p \v 27 Tio, egite la valalua la vaubi te Pailat ele, egite goio vagoilo e Iesus te la luma te gavman, tio egite la valalua la vaubi egite tomi goio vikapopo oio tetala. \v 28 Egite goio kai taro leia la kairobola tetala, egite goio vikaila la kairobola isasa ale magesegese, mai la irovilala te la mulugaluga, \v 29 egite goio viri e dahe, igo la kisivaru tetala ovola, taua oata te la gamala. Egite abi tai la viro, egite goio taua te la limala e gata, egite goio toto tulu otalo te la lagula, egite vaisale gologolo molia mago “Taritigi sesele, eme uru ele, eme la mulugaluga tegiteu e Iudale!” \v 30 Egite goio kavurasi volua, egite goio abi lou la virole, egite kumamasi la gamala ovola. \v 31 Tio egite lege vahia kaluvu mai ele, egite goio kai taro leia la kairobola ale magesegeseo, egite goio vikai leia la kairobola tetala sesele, tio egite goio tatea sogala, egite lapua soio veia ge katu tolea te la tauvalautu. \s1 Egite katu tola e Iesus oata te la tauvalautu \r (Mark 15:21-32; Luk 23:26-43; Ioanes 19:17-27) \p \v 32 Tio, egiteu la valalua la vaubi goio lapua soio te la pileho mai ele, egite tatuga te la gauru, egite goio poga la tahalo isasa loio la mautu e Sairini, la isala e Saimon. Egite goio tolo tavua veia eia ge bole la tauvalautu te Iesus. \v 33 Egite tuga mai ele, egite goio sibitala oio la popoiti isa bisi ale egite toila e Golgota, la masovala maie “la gama la tahalo”. \v 34 Tio oio volale egite goio abiale Iesus la lalu la vaen ale egite vulo tomila la marasin bakisi eia ama pasi, eia ge suli la iligiligi tetala, tio eia goio liu lalaia, eala moli eia goio tou loua. \p \v 35 Egite goio katu tolatia oata te la tauvalautuo, egite goio vipigi vulovulola la satu veia egite ge vitabari legiteu la kairoborobola tetala. \v 36 Tio egite goio pou otalo, egite goio lagu tugu tavu roboa mai ele. \v 37 Eala moli oata te la gama la tauvalautu egite kekesi la iruru ale egite veia eia igoa, egite kekesia maie: ALE LA MULUGALUGA TEGITEU E IUDA. \v 38 Tio oio te balile Iesus egite vagoata la tahalo ilua, egira la tahalo la pakalila, isa te galela e gata, isa te la galela e meru. \v 39 Tio egite la valalua me hatavivile ale egite tatuga te la gauru, egite timu rororo, egite lugulugu la gama giteu, \v 40 egite vilea mago “Olo, eme ale eme veia ge lobe la luma la lotu urue, eme veia ge vimagiri moli loua la haro itolue, ioge eme ge suli lou emei, mai eme e Latu La Tahalo Uru sesele, eme ge hele taro la tauvalautu ele, eme ge sivo sotalo!” \p \v 41 Tio, mai tai ele, egiteu la mulugaluga tegiteu e pris, vikapopo me egiteu la tahalo la mari te la merera te Moses, me egiteu e ururu tai, egite vikara paliliala egite vei mago \v 42 “Eia suli egiteu ale isapolo, eala moli eia kama koramulia veia ge suli rivu lou eia. Eia la mulugaluga tegatou e Israel, ia? Ioge, taritigi veia eia ge sivo taro la tauvalautu, etato ge hiloa mai ele, etato ge tautaulailo tetala veia eia e Kraist sesele. \v 43 Eia tautaulailo te La Uru veia eia e Latu La Tahalo Uru sesele, ioge etato ge hilo gabutoa veia e tamala ge masagea veia ge vimahulia gageie ka ouka!” \v 44 Tio mai tai ele egirua ale taho lua la tahalo la pakalila, egite vagoata egirua vikapopo me Iesus, egira tai tahi vile e Iesus mai ele. \s1 E Iesus peho \r (Mark 15:33-41; Luk 23:44-49; Ioanes 19:28-30) \p \v 45 Goio, la haro hugutolatia oata, eala moli la mata la haro goio kokovu, la maligoma uru sibitala, eia goio pigi roboti la babaa tomi, kara te la mata la haro itolu te la maulavi. \v 46 Tio te la mata la haro alele, e Iesus robe vagari oata mago “Eloi, eloi, lama sabaktani?” La masova la merera aleie eia maie “La Uru taku, La Uru taku, ilava eme hele taroau?” \p \v 47 Tio, egite isahari ale oio magirigiri, egite loloa eia tatola mai ele, egite vei mago “Eia tatola e Lias.” \p \v 48 Oio moli ovolale, la tahalo isa hari loio, eia abi la pagolu, eia saho la vaen ale ama, eia goio vituria soata te la harele Iesus veia eia ge liua. \v 49 Eala moli egiteu ale magirigiri ele mera taroa, egite vei mago “Mala, etato ge pou muga ge hilo gabutoa veia e Lias ge guvi ge sulia, ka ouka.” \p \v 50 Goma, e Iesus goio tovosugu, eia paru pasitio. \p \v 51 Tio, oio moli ovolale, la kulikuli ale uru oilo la luma la lotu ale uru oio e Ierusalem, egite Iuda rara valautu robo la ilo la luma la lotu oio vola, eia goio masile loata kara otalo, la galela iluati, goio e malugulugu isa uru tai umu, la uatati isahari ale ururu egite goio mapola tomi. \v 52 Me la liba giteu la valalua me hatavivile sesele te La Tahalo Uru ale egite peho palati, la liba giteu usu ele goio hare palala, egite goio mahuli rivu lou. \v 53 Egite hiliti loio la liba, tuga lalahu, me mulimuli ale e Iesus goio mahuli rivu lou, egite goluma la mautu uru e Ierusalem, la valalua me hatavivile usu hilo egiteu mai ele. \p \v 54 Goio, la mulugaluga tegiteu la valalua la vaubi, vikapopo me egiteu la valalua tetalale, ale egite magiri lago roborobo e Iesus, egite hilo e malugulugu umu, egite hilo la golu la karutula usu sibitala mai ele, egite makuku, egite taga pepeho, egite vei mago “Meie, eia sesele, la tahalo aleie eia e Latu La Tahalo Uru ge!” \p \v 55 Eala moli egiteu e hatavivile usu tai oio, egite pala tilimuli e Iesus loio e Galilea, egite susulia, egite magiri malau bakisi loio, egite maleleleia. \v 56 La isa giteu isahari ele maie: e Maria Magdala, mira me taola tai e tilale Iakob me Iosep, me isa lou e tilale Iakob me Ioanes, egirua e latule Sebedi ele. \s1 E Iosep ulai e Iesus \r (Mark 15:42-47; Luk 23:50-56; Ioanes 19:38-42) \p \v 57 La paga maulaviti, la tahalo isa uru goio guvi, la isala e Iosep, la mautu tetala e Arimatea, eia la tahalo la vuliti isasa, eala moli eia la tahalo isa tai ale roromulimuli sesele la valolo te Iesus. \v 58 Tio e Iosep ele goio guvi, eia goio te Pailat, eia kaka e Pailat la pilelehole Iesus veia ge ulaia, e Pailat goio baha egiteu la bilalaha tetala, egite goio bole la pilelehole Iesus, egite abiale Iosep. \v 59 Tio e Iosep goio bolea soio, eia goio avu tatahola la kulikuli ale kakea, eia halaba tataho, \v 60 eia avua kaluvu, goio eia vagoilo la pilelehole Iesus ele te la liba ale egite olitia te la vai la maitete. La liba alele eia so halaba moli, e Iosep eia so raragi molia veia eia ge la liba tetala sesele, eala moli eia goio vagoilo la pilelehole Iesus ovolao. Eia vagoilo kaluvua mai ele, eia goio baha egiteu la valalua tetala, egite goio buli robo la mata la libale la uati isa uru. Tio eia igoa mai ele kaluvu, eia goio tuga. \v 61 Eala moli e Maria Magdala egira me taola ale e tilale Iakob, egira popou, lago roboa la libale Iesus ele. \s1 Egiteu la valalua la vaubi vagari roborobo la libale Iesus \p \v 62 Tio, mai galigeli, la siloko la haro te La Ilali La Poloselela eia kaluvuti ele, egiteu la mulugaluga tegiteu e pris, vikapopo tai me egiteu e pariseo, egite goio te Pailat, egite goio veiala mago \v 63 “Tahalo uru, amite gabutala la merera te la tahalo la visigololale, ale eia so mahulihuli eia veia maie ‘Eau ge tabuli te la liba la haro itolu, mulimuli eau ge mahuli rivu lou.’ \v 64 Eala amite veia eia taritigi veia eme ge baha egiteu la valalua taume, egite ge igo vagari la mata la liba, kara te la haro itolu ge polo, la vuhula egiteu la valalua te Iesus souka gomai ge bole pakali la pilelehola, egite ge visigolo lou la valalua me hatavivile veia eia mahuli rivuti lou lotalo la liba. La visigolola aleie, eia souka igo marapa la valalua me hatavivile, la marapala ge uru kara polo la marapala ale sibitala te la merera la visigolola te Iesus ale eia valolo pala muga la valalua me hatavivile ovola.” \p \v 65 Tio, e Pailat gabu tikumu la merera tegiteu ele, eia goio veia giteu mago “Ioge, amuto ge abi isahari la valalua taku, amuto ge vagari robo la mata la libale Iesus ele, amuto ge igo seselea.” \v 66 Tiele egite goio igo vagari la mata la libale, egite vimagiri egiteu la valalua la vaubi isahari tai ovola veia egite ge vagari roboa. \c 28 \s1 E Iesus mahuli rivu lou \r (Mark 16:1-10; Luk 24:1-12; Ioanes 20:1-10) \p \v 1 Tio, la haro tabu tegiteu e Iuda kaluvuti, mai galigeli te la kavikoki bisi, te la muluga la haro te la vik aleie, e Maria Magdala mira me taola e tilale Iakob, egira goio sulaga tavu la libale Iesus veia ge hiloa. \p \v 2 Egira goio guvi, e malugulugu isa uru umu, e angelo te La Uru loata te la mori, sivo sotalo, gotalo te la libale, eia buli taro molia la uati ele, eia goio pou oata ovolao. \v 3 Egira hiloa, la tirarola sasima, la kairobola tetala kea lovolovo sesele. \v 4 Egite la valalua ale vagari robo la libale, egite tai hiloa, egite taga pepeho, la vovo giteu paririri, malugulugu, egite boru sotalo, egite mavuta mai ale peho. \p \v 5 Tio, e angelo goio veia girua la tavile iluale maie mago “Amula umala tataga, eau rovia amula paa mulimuli e Iesus, ale egite katu tolea oata te la tauvalautu. \v 6 Amula hiloa, eia kati omaie, eia mahuli rivuti lou, mai ale eia veitia giteu la valalua tetala pala, taritigi amula ge gomai amula ge hilo la mulila ale egite vitabulia ovola. \v 7 Taritigi tai veia amula ge tuga hari, amula ge veia giteu la valalua tetala maie ‘Eia mahuli rivuti lou taro la liba, eia mamugati soio la gale e Galilea, amuto ge mulimuli, amuto ge hiloa oio te la gale alele.’ Tiele eau veitia mulua mai ele, amula lolotia.” \p \v 8 Tio, la tavile iluale, egira hari moli veia ge beua soluma veia ge veipalea giteu la valalua te Iesus ele, egira taga, eala moli egira sagege tai, egira sele molia goluma. \v 9 Egira tatuga te la gauru, e Iesus goio pala tavu egirua, eia veia girua mago “Kavikoki!” Egira goio boru lagu tugu, egira sau te la vahala, lotu tavua. \v 10 Goio e Iesus veia girua mago “Amula umala tataga. Amula ge goio ge veia giteu e tabarabaragu veia egite ge goio e Galilea, egite ge hiloau oio te la gale alele.” \s1 La veipalala tegiteu la valalua la vaubi ale vagari robo la liba \p \v 11 Egira la tavile iluale tatuga, egite la valalua la vaubi ale egite vagari robo la libale Iesus, egite goluma te la mautu uru, egite goio veia giteu la mulugaluga tegiteu e pris la veipalala tegiteu. \v 12 Tio egiteu la mulugaluga tegiteu e pris loloa mai ele, egite goio pou vikapopo me egiteu e ururu, egite viputumuli la gauru tegiteu isasa, egite goio abia giteu la valalua la vaubi la uati uru, \v 13 egite goio tutu tola vagaria giteu mago “Amuto ge vigia maie ‘Alalogo amite mata tutulu, amite mavuta, egite la valalua la vimari tetala gomai, egite bole pakalitia. \v 14 Mai e Pailat ge loloa mai ele, amite ge mera gogomeala, eia kama ge igo totolo amutou.’” \v 15 Tio egite la valalua la vaubi goio abia la uati ele, egite goio tilimulia mai la vikararala tegiteu ele, goio la rerela taliti soio tegiteu e Iuda, me la vikararala aleie palati karati igoie eia soloio moli tegiteu e Iuda. \s1 E Iesus abia giteu la valalua la vimari tetala la igogolu \r (Mark 16:14-18; Luk 24:36-49; Ioanes 20:19-23; La Bilalaha 1:6-8) \p \v 16 Goio, egite la valalua la vimari te Iesus ale savulusa gete sasa, egite tuga goio e Galilea, egite goio guvi oio te la gove bisi ale e Iesus veia giteu veia egite ge goio vola. \v 17 Egite goio hilo e Iesus, egite lotu tavua, eala moli isahari tegiteu ele kama tautaulailo sesele veia ale e Iesus sesele ale egite hiloale. \v 18 Eala moli e Iesus goio tuga tavu egiteu soio, eia goio vikara soio tegiteu maie “La Tahalo Uru eia sugu taroti la vagagarila tetala tomi somai taku, ale loata te la mori, ale otalo tai te la maututula. \v 19 Eala, eia taritigi veia amuto ge tuga, amuto ge valolo la valalua me hatavivile te la maratatila tomi te la galegale tomi veia egite ge roromuliau, amuto ge vuhi egiteu te la isale Tete, me Latula me La Kalulu La Marokala. \v 20 Amuto ge tovo tigi tai egiteu veia egite ge roromuli tomi la merera ale eau veitia mutou ovola. Eau ge pou sesele tamutou te la haroharo tomi, kara te la tapasi la maututula.”