\id JHN - Nakanai NT [nak] -Papua New Guinea 1983 (DBL 2014) \h E IOANES \toc1 La Valolo Ale Taritigi E Ioanes Kekesia \toc2 Ioanes \toc3 Ion \mt1 LA VALOLO ALE TARITIGI E IOANES KEKESIA \c 1 \s1 La Vikarara La Mahulila eia sibitala mai la tahalo \p \v 1 Alaura te baruata, te la silokola sesele, La Vikarara La Mahulila eia pouti, me La Vikarara La Mahulila egira vipou tomi me La Tahalo Uru, eala moli egira me La Tahalo Uru visauru sesele. \v 2 Te la silokola egira vipou tomi me La Tahalo Uru. \v 3 Eia sesele vipou la papaga tomi, la paga isa kama gege veia eia kama vipoua, ouka. \v 4 Me la mahuli eia pou tetala, la mahulila aleie, eia la matagaga te la valalua me hatavivile tomi. \v 5 Eala moli la matagaga eia paga vei la maligoma, me la maligoma kama koramulia ge pigi roboa. \p \v 6 Tio, la tahalo isasa, eia guvi, ale e Ioanes la tahalo la vuluhi. La Tahalo Uru sesele baha taroa somai. \v 7 Ale eia guvi veia ge valolo te la matagaga veia la valalua tomi ge roromulia. \v 8 Eala moli eia kama la matagaga, eia guvi moli veia ge valolo te la matagaga. \p \v 9 La Vikarara La Mahulila, eia la matagaga sesele veia ge vimatagaga la valalua me hatavivile tomi isasasa te la maututula. \v 10 Sesele, eia vipou tomiti la golugolu tomi, mulimuli eia gomai pouti otalo te la maututulae, eala moli egite la valalua me hatavivile tomi te la maututula kama mata kilala tetala veia eia ere tahalo. \v 11 Ale eia gomai tavuti egiteu e valaluala sesele e Iuda, eala moli egiteu e valaluala igo piagale molia. \v 12 Eala moli egiteu la valalua me hatavivile tomi te la maututula tomi ale taho tavu eia, me ale egite toro sesele te la isala, eia ge puhi tigi egiteu veia egite ge goilo mai e latatu La Tahalo Uru sesele. \v 13 La vuhula egite kama sibitala mai e latatu La Tahalo Uru te la gabutatalala me la masasagala te la vovo, ouka. La Tahalo Uru sesele barivei egiteu veia egite ge e latatula sesele. \p \v 14 Tio, La Vikarara La Mahulila eia sibitala mai la tahalo, me eia mahuli vikapopoti etatoue. Me ale amite hilo la marasala mai e Latu La Tahalo Uru sesele. La gilogo me la merera ale sesele, eia volu oio tetala. \v 15 Eala e Ioanes valolo boboboe ovola mago “Male, la tahalo ale pala eau veia mutou tetala maie ‘La tahalo ale ge mulimuli taku, eia uru tamilua, la vuhula eia mahuli palati, eau souka sibitala.’” \v 16 Oio tetala etato tomi sau tolati la vibalavala te La Uru. La gilogo ale, eia la gilogo ale kara polo sesele te la gilogo ale pala. \v 17 La vuhula maie: E Moses eia la vuhu la vikarara la viputumulila, eala moli e Iesus Kraist eia la vuhu la gilogo me la vikarara la seselela. \v 18 Eala moli la tahalo isa souka hilo gologolo La Tahalo Uru, ouka sesele. E Latula sekela moli ale vipou tomi le Tamala, eia veipala tigi seselea gatou La Tahalo Uru veia etato ge rovia. \s1 La valolo te Ioanes la tahalo la vuluhi \r (Matiu 3:1-12; Mark 1:1-8; Luk 3:1-18) \p \v 19 Tio, la haro isasa, egiteu la mulugaluga tegite Iuda baha taro isahari tegiteu e pris vikapopo me la karakara te Levi isahari loio e Ierusalem veia egite ge tahi tigi e Ioanes mago “Eme ere tahalo sesele?” \p \v 20 Goio, e Ioanes kama hare robo, eia sile pala seselea giteu maie “Eau kama e Kraist ale La Uru bahea.” \p \v 21 Goma, egite tahi vulo loua mago “Me eme ere sesele? Soioge eme e Lias, ia?” \p E Ioanes vei mago “Ouka.” \p \v 22 Tio, egite veiala mago “Me eme ere sesele? La vuhula amite goio ge vei tigia giteu ale bahati amiteu somaie. Eme ge veia miteu mave taume?” \p \v 23 Goma, e Ioanes vei mulia giteu te la merera te Aisaia, la bilalaha ale pala, mago “Eau la golu la tahalo isasa eia tatola loio te la hohoi mago ‘Ili paa la gauru te La Uru.’” \p \v 24 Goio, egiteu e pariseo isahari ale egiteu la mulugaluga baha egiteu soio te Ioanes, \v 25 egite goio tahia mago “Mai eme kama e Kraist, me eme kama e Lias, me eme kama la bilalaha te La Uru ale amite pou taitalia, ilava eme vuvuhi la valalua, e?” \p \v 26 Tio, e Ioanes goio vei matagaga seselea giteu mago “Ale eau vuvuhi moli le amutou la lalu, eala moli isasa oio kabili tamutou la valalua, amuto kama rovia, \v 27 eia ge mulimuli taku, me eau kama koramulia ge tuga hagagavi soio la balila.” \p \v 28 La vikararala tomi aleie, egite veveia oio la mautu e Betani, te la hararele Iordan loio. Te la baa ale, e Ioanes eia vuvuhi la valalua ovolao. \s1 E Latu La Sip ale La Tahalo Uru bahea \p \v 29 Goio, mai galigeli maie, e Ioanes hilo e Iesus tatuga somai tetala, eia turitia giteu ele mago “Malele, amuto ge hilo e Latu La Sip te La Tahalo Uru, ale ge abi taro la iruru tomi te la valalua me hatavivile te la maututula tomi. \v 30 Eia moli ale eau vei matagagea mutou tetala mago ‘Isasa ge mulimuli taku, eia uru tamilua, la vuhula eia mahuli pala taku.’ \v 31 Eau vuvuhi moli le amutou la lalu, veia eau ge vei matagagea mutou e Iuda tetala. Kara igoie, eau kama rovi la tahalo alele, tio eau hilotiae.” \p \v 32 Tio, e Ioanes eia vei matagagea giteu maie mago “Eau hilo sesele La Kalulu La Marokala eia sivo loata te la mori mai la malu la uku, eia goio pou tetala. \v 33 Sesele, eau pala kama rovia, eala moli La Tahalo Uru ale baha eau, eia veiagu mago ‘Mai eme ge hilo La Kalulu La Marokala eia ge lovo sotalo, eia ge toa tetalao, eiala moli ele, eia ge vuhi le amutou La Kalulu La Marokala.’ \v 34 Ale eau hilotia, me eau valoloti leia veia eia e Latu La Tahalo Uru.” \s1 E Iesus tola la muluga la valalua la vimari tetala \p \v 35 Goio, mai galigeli lou, egite me la valalua la vimari te Ioanes ilua magirigiri, \v 36 e Ioanes hilo lou e Iesus loio tatuga, eia vei lou mago “Male go, amula ge hilo e Latu La Sip te La Tahalo Uru!” \p \v 37 Tio, egira la tahalo la vimari tetala lolo la vikararala ale eia veitia mai ele, egira goio tilimuli moliti e Iesus ele. \v 38 Goio, e Iesus ga vulo gele, eia hilo egirua mulimuli tetala, eia tahiti egirua mago “Amula paa mulimuli la rova?” \p Egira koliala mago “Rabai.” (La masova la isa ale Rabai, eia mai Tahalo La Vimari.) Mago “La luma taume oiove?” \p \v 39 Tio, e Iesus veia girua mago “Amula gomai ge hiloa.” Tiele egira tilimulitia soio te la luma ale eia popou ovolao, egira pou muga ovolale, la vuhula la paga maulaviti mai la mata la haro ivaati. \p \v 40 Oilo tegirua ale taho lua egira lolo la vikararala te Ioanes me egira tilimuli e Iesus, isa tegira la isala e Andrew, eia e tabarale Saimon Pita. \v 41 Tio e Andrew hari, eia goio paa muli muga e tabarala e Saimon, eia goio veiala mago “Amite hiloti e Mesaia.” (La masova la isa ale mai e Kraist.) \p \v 42 Goio, e Andrew pulia soio te Iesus. Ale e Iesus hilo molia mai ele, eia varutu moliala mago “Emei, eme Saimon, e latule Ioanes, eau ge toi lou lemei e Kepas.” (Me te la merera e Grik, la isa ale e Kepas, eia mai “e Pita” me la masovala eia maie “Eme vagari mai la uati”.) \s1 E Iesus tola e Pilip mira me Nataniel \p \v 43 Goio, mai galigeli, e Iesus masagea ge goio e Galilea, eia mata vuti e Pilip, eia tolatiao mago “Eme ge tilimuliau.” \p \v 44 E Pilip, eia la tahalo ale loio e Betsaida, te la mautu te Andrew me tabarala e Pita. \v 45 Tio e Pilip goio hilo vuti e Nataniel, eia varutu moliala mago “Amite hiloti la tahalo ale e Moses kekesiti leia oilo te La Buk Tabu Ale Pala, mai tai la kekesi tegiteu la bilalaha ale pala vikara ovola. La isala e Iesus, eia la tau Nasaret, eia e latule Iosep.” \p \v 46 Eala moli e Nataniel ule rivu louala mago “La paga ale taritigi isa ge loio la mumugu la mautu e Nasaret, ia?” \p Eala moli e Pilip horo suku tavu molia mago “Eme gomai, eme ge hiloa.” \p \v 47 Goma, e Iesus ga pigi la matala soio, eia hilo moliti e Nataniel tatuga soio tetala, eia varututiala mago “Ale la tau Iuda sesele, eia kama rovi la visigologolola.” \p \v 48 Tiele e Nataniel karutu sesele, eia goio tahi rivu e Iesus mago “Eme rovi hariau mave?” \p Goma e Iesus tala paleala mago “Ale e Pilip souka tolamei, eau hilome eme pou te la miau la obu uruo.” \p \v 49 Tio, e Nataniel koliale Iesus mago “Tahalo La Vimari, eme e Latu La Tahalo Uru sesele, eme la uru tamiteu e Israel!” \p \v 50 Goio, e Iesus vei louala mago “Ale eme rovitia mai ele, la vuhula eau veitiamu veia eau hilotime eme popou te la vuhu la obu, ia? Ale ge mulimuli eme ge hilo la vagagarigu ale kara polo agi te aleie.” \v 51 Goma e Iesus vei louala mago “Ale eau vei seseleamu maie veia mulimuli amuto ge hilo la ilo la lage eia ge kope, tio egiteu la angelo te La Tahalo Uru ge saesae soata, ge sosivo lou, gotalo te Latu La Tahalo.” \c 2 \s1 La ilali la taulaila oio e Kena \p \v 1 Goio, la haro itolu polo, egiteu la mautu e Kena igo la pougolu la taulaila isa oio te la mautu tegiteu, te la gale Galilea. E tilale Iesus tai goio te la ilali la taulailale. \v 2 Egite tola tai e Iesus me la valalua la vimari tetala veia egite ge goio tai te la pougolula aleiele. \v 3 Goma, la vaen tegiteu kaluvuti, e tilale Iesus goio veiale Iesus mago “A ge, la vaen tegite kaluvuti.” \p \v 4 Eala moli e Iesus vei rivuale tilala mago “Tila, ilava eme karasukuau e? La imamala la igogolu taku souka pou.” \p \v 5 Goio, e tilala veia giteu la bilalaha mago “Amuto ge igo tomi la rovarova ale eia ge veia mutou ovola.” \p \v 6 Tio, la sospen la simen iuolo ururu sesele oio tabuli hagagavi. La sospen ale tegiteu e Iuda te la pupurula mai la vulovulo giteu, egite uru mai la galon savulu lua uka savulu tolu te isasasa tegiteu. \p \v 7 Goio, e Iesus baha egiteu la bilalaha mago “Amuto ge sigili la lalu soio te la sospen iuolole.” Tio egite goio sahoa, eia volu tutui sesele. \p \v 8 Tio, goio e Iesus veia giteu la bilalaha mago “Ioge, amuto saho la lalu, abia soio te la mulugaluga tegiteu la bilalaha.” \p Goma, egite vagoioa tetala, \v 9 eia ga liu lalai la lalu ele, eia vuloti mai la vaen, eia kama rovia veia egite abia love. Eala moli egiteu la bilalaha, egite rovia. Goma la mulugaluga tegiteu ele, eia tola la tahalo ale taulaio, \v 10 eia goio veiala mago “Male ge, la valalua tomi, mai egite ge igo la ilali, egite vimamuga la vaen ale taritigi soio te la valalua, veia egite ge liu pala mugea, ale kama taritigi agi eia ge mulimuli. Eala moli la gahome, eme tau tola molia la vaen ale taritigi karati ale eme abi talatiae.” \p \v 11 Tio, ale la siloko la golu la karutula e Iesus igo sokoa. Eia igoa oio e Kena te la gale Galilea. Eia veipala la vagagarila tetala soio tegiteu. Tio egiteu la valalua la vimari tetala, egite tautau tola molia te la gabutatalala tegiteu, te la paga ale e Iesus igotiale. \p \v 12 Goma, ale kaluvuti, mulimuli ovola e Iesus mite me tilala me tabarabarala vikapopo me egiteu la valalua la vimari tetala, egite golau e Kapernaum. Goio egite pou muga bakisi ovolao. \s1 E Iesus tagu lobe egiteu ale lotoloto te la luma la lotu \r (Matiu 21:12-13; Mark 11:15-17; Luk 19:45-46) \p \v 13 Goio, mulimuli la ilali la pougolula tegiteu e Iuda egite toia veia La Ilali La Poloselela, eia hagagaviti, e Iesus goata e Ierusalem. \v 14 Eia goilo te la luma la lotu, eia sivuti moliti egiteu la valalua la vagago la kau me la sip me la malu tai. Eia goio hilo lou egiteu ale vagago la mani, egite popou te la poroporo tegiteuo. \v 15 Goma e Iesus kamu tavu molia la mota, eia basimuli tomiti la valalua oilo te la luma la lotu vikapopo la sipsip me la kau tegiteu ele sogalao. Eia hugu tavu tai molia la valalua ale vago tataro la mani ele, eia pigi lahu la mani me eia buli hatataga lahua la poroporo tegiteu ele. \v 16 Tiele eia goio vei taia giteu la valalua ale vilotoloto la malumalu mago “A ge, amuto ge abi taro lahu la malumalu ale sogala. Ilava amuto masagea ge vulo la luma te Tete veia eia ge mai la luma la iloto?” \p \v 17 Tio, oio moli ovolale, la valalua la vimari tetala, egite gabutala la vikararala te La Buk Tabu Ale Pala, eia veia maie: “Eau vagari sesele veia la luma taume eia ge maroka!” \p \v 18 Eala moli egiteu e Iuda hiloa mai ele, egite veiala mago “Eme ere veia eme ge basimuli amiteu maie? Mai eme la tahalo isapolo isasa, eme ge vahilo le amiteu la golu la karutula, amite ge hiloa.” \p \v 19 Tio, e Iesus koli molia giteu mago “Mai amuto ge lobe taro la luma la lotu aleie, la haro itolu moli eau ge vimagiri rivu loua.” \p \v 20 Tiele, egiteu e Iuda hate mamasi sesele, egite vauleala mago “Ko, la luma ale egite tigila la leavala savulu vaa gete uolo, ale eme veia ge vimagiri rivu moli loua te la haro itolu moli, ia?” \v 21 Eala moli la luma la lotu ale e Iesus veia mai ele, eia tovo mulia te la vovola. \v 22 La vuhula ge mulimuli La Tahalo Uru ge vahiliti loua te la lulu la pileho, me te la imamala alele, egiteu la valalua la vimari tetala, egite gabutala rivu lou la vikararala tetalale, me oio vola egite tautaulailo vagari sesele te la vikararala te La Tahalo Uru te La Buk Tabu Ale Pala eia mai ale Iesus veitiale. \s1 E Iesus eia matagaga te la gabutatalala te la valalua tomi \p \v 23 Goio, e Iesus popou oio e Ierusalem te la haro La Ilali La Poloselelao, egite la valalua me hatavivile usu tautaulailo tetala, la vuhula egite hiloti la golugolu la karutula tomi ale eia igotia. \v 24 Eala moli e Iesus kama sugu taro eia soio te la lima giteu, la vuhula eia roviti la tia giteu tomi ele. \v 25 Eia kama koramulia veia isasa ge vei muli louala te la vulovulo la valalua isasasa, la vuhula la gabutatalala te la valalua tomi eia magiri matagaga tetala. \c 3 \s1 E Iesus me Nikodimas vikarakara \p \v 1 La tahalo isasa tegiteu e pariseo, eia la mulugaluga isa tai tegiteu e Iuda, la isala e Nikodimas. \v 2 Eia goio te Iesus te la logo, eia goio veiala mago “Tahalo La Vimari, amite rovime veia eme la tahalo la vimari loata te La Tahalo Uru. La tahalo isa ouka koramulia ge igo egiteu la golu la karutula ale eme igigo egiteue, mai La Tahalo Uru kama ge sulia.” \p \v 3 Goio, e Iesus koli la vikararala tetala mago “Ale eau vei seseleamu, mai isasa kama ge sibitala halaba sesele mai ale e tilala pigo halabea, eia kama koramulia ge rovi la pulolou la matagagala te La Tahalo Uru.” \p \v 4 Tio, e Nikodimas karutu, eia tahi rivu e Iesus mago “Alele ge mave mai la tahalo uruti? Eia ge goilo rivu lou te la ilole tilala, ge pigo loua?” \p \v 5 Goma, e Iesus koli rivuala mago “Male, eia mai sesele ge: Mai isasa masagea veia ge sibitala halaba, eia ge gabutala rivu lou la iruru tetala, eia ge abi la vuluhi te la lalu, eia ge abi la vuluhi tai te La Kalulu La Marokala. Mai ge ouka, eia kama koramulia ge goilo te la pulolou la matagagala te La Tahalo Uru. \v 6 Mai etato sibitala halaba te la vovo, ale etato te la vovo moli, eala moli mai etato ge sibitala halaba te La Kalulu La Marokala, ale etato sibitala halaba sesele te la kalulu gatou. \v 7 Nikodimas, umala eme ge karutu te la vikararala ale eau vei mugatiamu ovola mago ‘Ge visibitala halaba tomi lou amutou ele.’ \v 8 Eia mai sesele la lolovi ale tilimuli la masasagala tetala soio te la baa ale eia vavaia sovolao. Eme ge lolo moli la tilalila, eme kama rovia veia eia vavaia love, me eia vavaia sovei ele. Tiele eia mai tai moli egiteu ale La Kalulu La Marokala eia visibitala halaba egiteu ele.” \p \v 9 Eala moli e Nikodimas tahi tigi lou e Iesus mago “Etato ge igo sesele la paga alele mave?” \p \v 10 Tio, goma e Iesus ule baolitialao mago “A ge, eme la mulugaluga tegite Iuda, eala moli eme kama ababi la masova la vikarakarala tomi aleie, ia? \v 11 Male, eau ge vei louamu la seselela maie: Amite la bilalaha, amite valololo te la papaga ale amite rovia, me amite hilo taitia, eala moli amuto kama gabu tikumua veia la merera tamiteu eia sesele, amuto kisu taro molia. \v 12 Ale eau vikarakara la tilovo tavu amutou te la papaga moli ale lotalo te la magasa, amuto kama rovirovi la masovala. Me mai ge eau ge sele tavu molia mutou te la papaga loata te la ilo la lage, amuto ge rovi la seselela mave? Ge ouka gologolo. \v 13 Eala moli la tahalo isa souka toa oata la mautu la marokala, e Latu La Tahalo moli eia pou mugati ovolao, me ale eia bula tarotia sotalo la magasae. \v 14 Eia ge mai ale e Moses vituriti la puigolole taive soata oio te la hohoio, veia egiteu ale pepeho, mai egite ge mata tavua, egite ge mahuli, tio e Latu La Tahalo tai ge mai moli ele, egite ge vahilitia soata veia eia ge vimahuli amutou. \v 15 Tio mai la valalua me hatavivile ge tautaulailo tetala, egite ge sau tola la mahulila ale la kaluvula ge ouka. \p \v 16 “La Tahalo Uru eia gogo sesele pasi la valalua me hatavivile te la maututula tomi, mai ele eia sugu taro moliti e Latula La Riau veia egiteu tomi ale ge tautaulailo tetala, egite kama ge vilua te la kalulu giteu me te la vovo giteu tai, egite ge sau tola moli la mahulila ale la kaluvula ge ouka. \v 17 Teale La Tahalo Uru kama baha taro e Latula sotalo te la maututula veia ge igo gegeru la valalua me hatavivile te la kiloli la iruru, ouka. Eia igoa veia ge vimahuli tomi egiteu. \v 18 Tiele, mai isasa ge tautaulailo soio tetala, eia kama ge magiri te la viputumulila, ge ouka. Eala moli mai isasa kama tautaulailo te Latula La Riau, eia mai ale tiloti te la igototolola te La Uru te la kiloli la iruru, ale eia ge visibitalea te la viputumulila tetala mulimuli. \v 19 Male, la vuhu la viputumulila eia maie: La matagaga eia paga veiti la maligoma, eala moli la valalua me hatavivile so masaga moli la maligoma, la vuhula, la matagaga soukama ge veipala la vulovulo giteu ale kama kokorale. \v 20 La vuhula egiteu tomi ale igo la vulovulo ale kama kokora, egite gima la matagaga. Eala egite kama masagea veia ge magiri soio te la matagaga te La Uru. \v 21 Eala moli egiteu la valalua me hatavivile ale la vulovulo giteu eia taritigi, egiteu moli ge masaga la matagaga, la vulovulo giteu ge magiri matagaga maie veia La Tahalo Uru vimagiri tomiti legiteu te la igogolu ale egite igigoa.” \s1 E Ioanes valolo matagaga le Iesus \p \v 22 Goio, mulimuli e Iesus me la valalua la vimari tetala, egite hiliti soio te la gale e Iudea, egite pou muga oio tegiteu ele, e Iesus vuvuhi egiteu la valalua me hatavivile ovolao. \v 23 Eala moli e Ioanes tai vuvuhi la valalua me hatavivile oio la mautu isapolo loale, e Inon, hagagavi moli e Selim, la vuhula la lalalu usu ovolale. Tio la valalua me hatavivile goio guvi bibibi tavua, eia ge vuvuhi egiteu ovolale. \v 24 Te la imamala aleiele, e Herod souka vagoilo e Ioanes te la luma la kilisi. \p \v 25 Te la haro isasa, egiteu la valalua la vimari te Ioanes, me la tau Iuda isasa, egite goio vigiriri mulimuli la masova la vuluhi. \v 26 Goio egite la valalua la vimari te Ioanes goio rivu lou tetala, egite valoloa mago “Tahalo La Vimari, la tahalo ale amula vipou tomi muga oio te la hararele Iordan loio, eme valolo matagaga taiti leia, amite hiloti la valalua me hatavivile oio tala tautavua, eia oio vuvuhi tai egiteuo.” \p \v 27 Eala moli e Ioanes goio putu rivu loua giteu mago “Isasa kama koramulia ge igo bulalahu isa la igogolu mai ele, mai La Tahalo Uru kama sugu taroala loata la ilo la lage. \v 28 Mai ale amuto lolotia eau vei pala mugatia mutou ovola mago ‘Eau kama e Kraist, eala moli eau ge valolo mamuga moli tetalale.’ \v 29 Male, eau ge tovo mulia mutou te la gabutatalala taku soio tetala maie: Mai la tahalo isa taulai halaba, goio e vikilipi tetala eia loloa, eia sagege pepeho ovolale. Mai tai igoie, la valalua me hatavivile tomi ititia soio te Iesuso, eia mai ale puli halabati egiteu ele, male la tiagu eia volu seseleti la sagegela. \v 30 Eia gomai, la isala ge vavava, eau ge siroro rivurivu sotalo. \p \v 31 “La tahalo ale loata, eia muga sesele. Me la tahalo ale lotalo te la magasa, eia la tahalo lotalo te la magasa moli, eia tai vevei moli la papaga ale te la magasa molie. La tahalo ale loata te la ilo la lage eia muga sesele. \v 32 Tiele me eia valolo te la papaga ale eia hililoa, me te la papaga ale eia lololo taia. Eala moli isa kama roromuli la valolo tetalale. \v 33 Tio mai isasa ge sau tola sesele la vikararala tetala, tio eia veipalea mai ele veia la vikarakarala te La Tahalo Uru eia sesele pasi. \v 34 Eia sesele, la tahalo ale La Tahalo Uru baha tarotia somaie, eia valolo te la vikararala te La Tahalo Uru, la vuhula La Kalulu La Uru eia oio volu tetala, La Tahalo Uru abi seseleala. \v 35 La vuhula e Tamala masaga sesele e Latula, mai ele eia piligi taroti la golugolu tomi soio te la barabara la limalale. \v 36 La tahalo me la tavile ale tautaulailo sesele te Latu La Tahalo Uru, tetala la mahuli ale la kaluvula ge ouka. Eala moli mai isa kama ge roromuli la golule Latu La Uru, e maura ge galo sesele, la igototolola te La Tahalo Uru ge pou tetala, la kaluvula ge ouka.” \c 4 \s1 E Iesus me la tavile Sameria vikarakara \p \v 1 Goio, mulimuli egite pariseo lolo la vikararala isa maie veia la valalua me hatavivile tomi tala tavuti e Iesus veia eia ge vuhi egiteu, me Ioanes oukati. Me eia sesele, egiteu ale veia ge abi la vuluhi oio te Ioanes kati usu, la valalua me hatavivile usu goio mulimuliti e Iesus. \v 2 Eala moli e Iesus sesele kama vuvuhi egiteu, la valalua la vimari moli tetala vuvuhi egiteu mai ele. \v 3 Goma e Iesus rovitia veia egite pariseo loloti la rerela mai ele veia la valalua mapaiti mulimulitia, eia hiliti taro e Iudea, me eia goio beu rivu loua soio e Galilea. \v 4 Eala moli la gauru ale eia polo ovola, eia polo posa oio e Sameria. \v 5 Tio eia goio mulimuli la gauru alele, eia goio sibitala te la mautu isa te la gale Sameria, la isala e Saika. La mautu ale, eia hagagavi te la bautu la magasa ale e Iakob visati le latula e Iosep, \v 6 me la mata la lalu la vilelo te Iakob eia ovolale. Goma e Iesus la vahala obati bakisi te la tuluga la gauru, eia masagea ge maila muga oio te la harare la vilelole, la vuhula la haro hugu tola taitia. \p \v 7 Goio, la tavile Sameria isa guvi veia ge saho la lalu ele, goma e Iesus veiala mago “A ge, eau omai malehu pasi!” \v 8 Eala moli egite la valalua la vimari tetala golumati te la mautu veia ge lotoa giteu bakisi la ilali. \p \v 9 Tio, la tavile Sameriale karutu, eia goio koli rivuale Iesus mago “A ge, ilava eme kakeau la lalu veia eme ge liu, emeiele la tau Iuda, me eau lomai e Sameriae.” La vuhula egiteu e Iuda vitau gagima megiteu e Sameriale. \p \v 10 Eala moli e Iesus baoli rivu moliala mago “Mai eme ge roviti la vaabila te La Tahalo Uru, me la tahalo tai ale kakakame la lalue, tiele eme ge kaka taiau la lalu la mahulila, eau ge sugu taro seseleamu!” \p \v 11 Goio, la tavile koli rivu louale Iesus mago “Tahalo Uru, eme la baket la silalaho ouka, me la lalu tai eia otalo malau, la lalu la mahulila alele, eme ge abia love, e? \v 12 Mave, eme soioge gabutatalea veia eme uru te tubu gatou e Iakob ale olia miteu la vilelo aleie, me eia tai liliua alaurati, me egiteu la kau, la sip me la mee tetala tomi tai liliu ovola. Eme soioge uru tetala, ia?” \p \v 13 Goma, e Iesus koli rivu tataho loua la tavilele mago “Eala moli egite tomi ale liliu la lalu alele, egite ge malehu lou. \v 14 Me egiteu moli ale ge liu te la lalu ale eau ge abia giteu, egite kamati ge malehu lou, oukati. La lalu ale eau ge abia giteu, eia ge sogo uraura sesele, eia ge velo te la tia giteu ge pagegele, mai la mahulila ale sesele, la kaluvula ge ouka lou.” \p \v 15 Tiele, la tavile goio kaka gogoti e Iesus mago “Tahalo uru, eau masagea eme ge abiagu la lalu alele, eau ge liua, eau kati ge malelehu lou, me eau umalati ge tuga malalau lou somai ge sasaho la lalu aleie.” \p \v 16 Goma, e Iesus veia loua la tavilele mago “Taritigi eme ge goio tola muga e haruamu, amula ge gomai loue.” \p \v 17 Tiele, la tavilele ga visigoloa mago “Eau ale e haruagu ouka.” \p Eala moli e Iesus sile pala molitia te la matala mago “Eme vikara sesele veia e haruamu ouka, \v 18 la vuhula e haruamu ilimati, me ale amula vipou totomi igoiele kama e haruamu sesele, eala la vikararala taume eia sesele ale eme giriri veia e haruamu ouka.” \p \v 19 Tio, e maura la tavilele alatototo moliti ele, eia goio varutu molitiale Iesus mago “Tahalo uru, ale eau rovitia veia eme la bilalaha te La Tahalo Uru. \v 20 Ale alaura egiteu e tutubu gatou e Iuda me Sameria tomi lotulotu moli omai te la gove aleie, eala moli amutou e Iuda vuloti lou la merera veia ge lotulotu moliti oata e Ierusalem.” \p \v 21 Goma, e Iesus ava tatahotiala la vikararala mago “Tavile kokora, taritigi eme ge matagaga tigi te la masova la vikararala takue, la vuhula la imamala ge sibitala, amuto kati ge lotu tavu e Tama gatou omai te la gove aleie, me oata e Ierusalem ge ouka taiti. \v 22 La vuhula amutou e Sameria lotu tavu La Tahalo Uru, eala moli amuto kama rovi tigi la vulovulola. Me amiteu e Iuda, amite lotu tavu La Tahalo Uru ale amite rovi seselea, la vulovulola eia matagagati tamiteu, la vuhula la vimahuli te La Tahalo Uru eia ge loio seseleti tamiteu e Iuda. \v 23 Tio la imamala ale etato tomi ge lotu moli me la seselela, egite veia eia hagagaviti ge guvi, eiala eau veiamu eia guvi seseletie, veia la valalua me hatavivile la lotu sesele, egite ge lotu tavu e Tama giteu, la kalulu giteu ge tivura, la lotu tegiteu eia ge sesele. \v 24 La vuhula, La Tahalo Uru eia la kalulu, eala mai la valalua ge lotu tavua, taritigi egite ge lotu sesele te la kalulu giteu, me te la vulovulo ale seseleto.” \p \v 25 Tiele, la tavilele vei moliti mago “Eau rovitia veia La Riau te La Tahalo Uru ge sibitala, ale egite toi taia veia e Kraist, mai eia ge guvitio, eia ge valolo etatou te la merera ale sesele tomi.” \p \v 26 Goma, e Iesus vei tataho molitia la tavilele mago “Me eau moli ale eau etala omai vikarakarae.” \p \v 27 Tio, ale eia vikara pasi moli mai ele, egite la valalua la vimari tetala loio guvi moliti ele, egite karutu sesele, la vuhula egira vikarati me la tavilele, eala moli isa kama tahia mago “Eme masaga la rova te la tavile ale?” uka mago “Ilava amula vikarakara me la tavile alele?” \p \v 28 Goma, la tavilele hiliti taro moliti la baket tetalao, eia hari soio te la tia la mautu ele, eia vei lahutia giteu la valalua me hatavivile mago \v 29 “Mutou, amuto gomai muga, amuto ge hilo la tahalo isasa, eia veipala tomiti la vulovulogu ale eau igigoa alauratio, kara igoie, eia rovi tomitia, soioge e Kraist moli ge eialae, ia?” \v 30 Tio egite lolo molia mai ele, egite hiliti, gogala, egite tugati soio te Iesus veia ge hiloa. \p \v 31 Goma, egite la valalua la vimari tetala veiala mago “Tahalo La Vimari, taritigi eme ge ali muga.” \p \v 32 Eala moli eia ule rivu loua giteu mago “La ilali taku ale eau ge alia, amuto kama rovia.” \p \v 33 Goio, egite la valalua la vimari tetalale vitahi baololi moliti egiteu mago “Soioge isa ge abitiala la ilali, ia?” \p \v 34 Goma, e Iesus tala palatia giteu ele mago “Male, la ilali taku eiala molie ge, veia eau ge tilimuli moli la gabutatalala te ale bahatiau somaie, me eau ge igo sesele tomi moli la igogolu tetalale, mai la tabarila taku sesele. \v 35 Mai moli ale amuto veveia mago ‘La taio ge ivaa lou, tio etato ge lukuluku.’ Male go, amuto ge mata muga soio te la mahuma, la ilali oio vola matuha tomiti ele. \v 36 La tahalo la ilukulukula eia ge sau tola la mapala, eia mai la tahalo ale ruku ololu la ilali ale ge tabuli tola, la kaluvula ge uka lou. Tiele, la tahalo la gilalu me la tahalo la ilukulukula, egira tomi ge sagege vikapopo ovolale. \v 37 Ale eia ge mai la sesele la vikararala ale maie ‘La tahalo isasa galugalu, me isasa lukuluku.’ \v 38 Mai eau bahati amutou la valalua taku soio te la ilabi la valalua ale amuto kama valolo egiteu pala, amuto mai ale luku la mavo ale amuto kama galua, egite isapolo vuragaragea, tamuto moli ge la vavua la igogolu tegiteu la bilalaha taku ale palao.” \p \v 39 Tio, egiteu e Sameria usu, egite loloti la vikararala te la tavile ale eia veitia giteu maie “Eia sile pala tomitiagu la vulovulogu ale eau igigoa sokoa alauratio,” egite loloa mai ele, egite usu goio tautaulailo tetala. \v 40 Tiele egiteu la valalua e Sameriale usu goio kaka e Iesus veia eia ge pou muga oio tegiteu bakisi. Tio e Iesus vipou tomi legiteu la haro ilua oio te la mautu aleiele. \v 41 Egite la valalua usu lolo la vikararala te Iesus ele, egite goio tau la ilo giteu soio tetala. \v 42 Egite goio veia la tavilele mago “Ale amite tautaulailotie, kama la vuhula moli te la vikararala moli taumele, ouka, la vuhula amite lolo sesele taiti la vikararala te la harela, me amite rovi seseletia veia la tahalo moli aleie, eia La Tahalo La Vimahuli te la valalua me hatavivile te la maututula tomie.” \s1 E Iesus vimahuli e latu la bilalaha te gavman isasa \p \v 43 Goio, la haro ilua e Iesus poutia oio e Sameria eia goma hiliti polo lou soata e Galilea. \v 44 Me la gale aleie, e Iesus sesele vikara matagagati ovola pala veia la bilalaha te La Tahalo Uru, la valalua te la mautu tetala sesele kama ge gabu tikumua. Me la mautu tetala sesele oio la gale Galileale. \v 45 Eala moli e Iesus goio sibitala oio e Galilea, la valalua te la gale alele, egite sagege robo seselea, la vuhula egite hiloti la igogolu tetala tomi ale eia igotia oata e Ierusalem, te La Ilali La Poloselelao, la vuhula egite tai pou oio vola. \p \v 46 Goma, eia goio lou e Kena te la gale Galilea, te la mautu ale eia vuloti la lalu mai la vaen ovolao. Tio la tahalo isa oio, eia la bilalaha te gavman, e latula isa hatamale eia lea pasi oio la mautu e Kapernaum. \v 47 Goio la bilalaha te gavman ele, eia loloti la rerele Iesus veia eia hiliti taroti e Iudea, me eia guviti oio e Galilea. Tio eia goio kaka e Iesus veia eia ge goio ge vimahuli e latula, ale hagagavi pepehotio. \p \v 48 Goio, e Iesus veiala mago “Mai amutou la valaluale kama ge hilo la golugolu la karutulao, amuto kama masaga ge tautaulailo te La Tahalo Uru.” \p \v 49 Eala moli la bilalaha toto suku tavu moli e Iesus ele mago “Tahalo uru, eme ge igo hari, la vuhula e maura e latugu bisi soukama ge peho.” \p \v 50 Goma, e Iesus vei molitialale mago “Eme ge tuga, e latumu bisi ele mahuliti lou.” \p Tio, la tahalole roromuli la vikararala te Iesus ele, eia tugatio. \v 51 Eala moli mai galigeli, eia so tatuga te la gauru, eia goio poga molitia egiteu la valalua la igogolu tetala, me egite veitiala mago “E latumu oio mahuliti.” \p \v 52 Goma, eia tahi tigi lou egiteu ele mago “Eia soko la mahulila te la mata la haro ale mave sesele?” \p Egite goio veiala mago “Alalavi te la mata la haro isasa, la ilea eia kaluvu taroa.” \p \v 53 Tio, e tamale eia bisi ele rovi molia mago “Me alalavi sesele te la mata la haro moli alele e Iesus veiagu mago ‘E latumu eia mahuliti lou.’” Goio, eia tauti la ilola te Iesus, vikapopo me egiteu la valalua la igogolu tetalale. \p \v 54 Tiele, ale la ilua la golu la karutula e Iesus igoa oio e Galilea, me alele eia igoa ale eia so guguvi rivu lou loio e Iudea. \c 5 \s1 E Iesus vimahuli la tahalo isasa te la vilelo oio e Betesda \p \v 1 Tio, e Iesus igogolu tapasi mugati mai ele oio e Galilea, eia goata lou e Ierusalem, te la haro la pougolula isasa tegiteu e Iuda. \v 2 Eala moli oio e Ierusalemo, la vilelo la purupurula isa bisi eia tivura bakisi, eia tabuli hagagavi moli te la mata tegiteu la sipsip, egite goililo la mautu e Ierusalem ovola, me te la merera e Hibru egite toia maie “Betesda”. Me oio te la harare la vilelole, la matabala ilima ovolale. \v 3 Eala moli la matabala ilimale, egite volu sesele me egiteu la ilalea vikapopo me egite ale matakakea, me egite tai ale gulugulu, [egite mavuta taitali moli la vilelole mai eia ge bolebole soata. \v 4 La vuhula te la imamala isahari e angelo te La Uru eia sosivo sotalo te la vilelo, eia ge visasuea la vilelole. Tiele mai la vilelole ge so bolebole mai ele, egite ale lalea ge vipepe lagi sotalo ovolale, tio ale ge loso pala sotalo volao, eia ge mahuli. Eala moli mai erese ilea ale mave, eia ge mahuli moli ele.] \p \v 5 Eala moli e maura la tahalo isa oio mamavuta te la matabalale, eia lea tabaa seseleti koramuli la leavala savulu tolu gete ualu. \v 6 Goio e Iesus hilo vuti e maura la tahalo eia mamavuta molitio, eia rovitia veia eia lea tabaa seseleti. Goma e Iesus tahia mago “Soioge eme masagea ge mahuli taro lou la ilea taumele, ia?” \p \v 7 Tio, la tahalo ale leale koli molitiale Iesus mago “Tahalo uru, mai la vilelo ge bole, la tahalo taku isa ouka ale ge bokoau sotalo vola veia ge vitagu loso eau ovolale. Sesele, eau ga tovo lalai la tuluga sotalole, isa ge supepe moliau, ge tagu loso pala, eau ele oukatio.” \p \v 8 Goio, e Iesus vei molialale mago “Eme ge hiliti, eme ge pilu la mulimu ele, eme ge tuga,” \v 9 Tiele oio moli ovolale la vovola eia taritigi lou, eia goio hiliti moli, eia abi la mulila, eia tugatio. \p Eala moli la haro alele eia la haro tabu. \v 10 Tio egite Iuda isahari hiloa mai ele, egite goio veia la tahalo ale mahuliti ele mago “Eme kama rovia veia igoie la haro tabu, ia? Eia kama koramulia veia eme ge ababi la mulimu mai ele te la haro tabu.” \p \v 11 Eala moli la tahalole koli rivu loua giteu ele mago “Me la tahalo ale vimahuliaue, eia veiagu maie ‘Abi la mulimu ele, eme ge tuga.’” \p \v 12 Tio, egite tahi rivu lou la tahalole mago “Ere tahalo veiamu la vikararala aleiele?” \p \v 13 Eala moli la tahalo ale mahuli taroti la ileale, eia kama rovi e Iesus ele, la vuhula la valalua me hatavivile usu sesele oio te la baa aleio, me e Iesus tai tugati. \p \v 14 Goio, mulimuli e Iesus poga lou la tahalole oio te la luma la lotuo, eia goma vei tigiala maie “Loloa, ale eme mahulitie, umalati eme ge igo lou la iruru. La vuhula la iligiligi ale kama kokora isa uru souka ge poga loumei ele.” \p \v 15 Tio, la tahalole tugatio, eia goio veia giteu e Iuda mago “Ale e Iesus moli ale vimahuliti eaue.” \s1 E Latu La Tahalo Uru eia koramuli sesele la igogolu ale uru \p \v 16 Ealati egiteu e Iuda sokoti la gilimale Iesus ovolale, la vuhula veia e Iesus igo popoti la haro tabu ele. \v 17 Eala moli e Iesus ule rivu loua giteu ele mago “E Tete eia igogolu moli palati kara igoie, eia kama maila, eau tai ge igogolu moli mai eia.” \v 18 Tio egite Iuda loloa mai ele, la hate giteu mamasiti, egite vagari pepehotio veia ge bili peho e Iesus. Kama la vuhula moli ale eia igo popo moli la haro tabu ele, la vuhula eia vei taia veia eia e Latu La Tahalo Uru seseleto. Te la vikararala aleie, egite veia eia mai ale vauru sesele eia mai egira visauru sesele me La Tahalo Uru. \p \v 19 Tio, goio e Iesus koli la vikararala tegiteu ele, eia veipala seselea veia eia e Latu La Tahalo Uru mago “Ale eau veia seselea mutou, e Latu La Tahalo Uru, eia kama igo bulalahu la paga isa te la gabutatalala tetala moli. Ouka, la igogolu ale e Tamala igigoao, eia tai igigoa mai ele. \v 20 E Tamala masaga sesele e Latula, eia sugu taro tomiti la igogolu soio tetalale. Eala moli eia ge sugu taro louala la papaga ale ge kara polo te ale eia igotiale. Tio la gabutatalala tamutou ge marapa ovolale. \v 21 Eia mai moli ale e Tete vahiliti lou egiteu ale pepehole, me e Latula tai ge abia la valalua la mahulila te la masasagala tetalatole. \v 22 Eala moli e Tete kama ge vimagiri isasa te la vigagiala, la vuhula eia sugu taroti la viputumulila tomi soio te Latula, \v 23 veia la valalua tomi ge togo e Latulale, mai moli ale egite togoti e Tamalao. Mai isa kama togo e Latulao, eia veipalea mai ele veia eia kama togo tai e Tamala, ale baha tarotia somaie. \p \v 24 “Eala moli eau vei seselea mutou maie veia mai isasa eia lolo la vikararala taku, me eia roromuli tai La Tahalo Uru ale baha tarotiau somaie, ale eia sau tolati la mahulila ale kama ge kaluvu, me eia kama ge magiri lou te la viputumulilao, oukati, eia mahuli taroti la pilehole. \v 25 Male, eia vei seselea mutou, la imamala hagagaviti ge sibitala, eala moli eia sibitala seseletie, veia egiteu ale pehoti, egite ge lolo lou la golule Latu La Tahalo Uru. Tiele egiteu ale ge roromuliao, egite ge sau tola la mahulila ale sesele. \v 26 La vuhula la mahulila eia oio te Tamalao. Eala moli eia sugu taroti la vagagarila soio te Latulale, tio e Latula abiti la mahulilale, eia sovei viruruti e Tamalao. \v 27 Sesele, la isala e Latu La Tahalo, eala e Tamala sugu tarotiala la viputumulila veia eia ge vimagiri la valalua tomi te la vigagiala, la vuhula eia la tahalo la vovo eala moli la iruru ouka oio tetala, eala moli eia rovi la mata la iruru tomi ale etato la tahalo la vovo igigoa, eia koramulia mai ele veia ge mata muli la iruru tomi. \p \v 28 “Eala moli umala amuto ge karuturutu te la merera aleie. Mai la imamala ge sibitalao, egiteu tomi ale pehoti, egite ge lolo la golule Latu La Uru, tio egite ge hiliti taro la lulu la pileho. \v 29 Tiele egiteu ale la vulovulo gite eia taritigi, egite ge goio te la mautu la mahulila, eala moli egiteu ale la vulovulo gite eia kama kokorao, egite ge hiliti moli ele, egite ge magiri te la viputumulila. \s1 La merera usu eia vitikumu lou la merera ale e Iesus veia \p \v 30 “Eala moli eau kama igigo la paga isa te la gabutatalala taku moli. Eau lololo moli soio te Tete, tio eau igo tai la viputumulila mai ele soio te la valalua. Eala moli la viputumulila taku eia matata sesele. La vuhula eau kama igogolu te la gabutatalala taku moli. Eau tilimuli sesele la gabutatalala te ale baha taroau somaie. \p \v 31 “Eala moli mai eau ge valolo rivu lou leau, la valolo taku eia kama ge mata mai ale tali tikumu. \v 32 Eala moli la tahalo isapolo oio ale ge valololo leiaue, eau rovia veia la valolo tetala eia sesele. \v 33 Eia mai ale pala amuto baha tavu e Ioanes la tahalo la vuluhi me eia gomai veipalati la merera ale sesele veia eau e Kraist, me la merera tetalale amuto tomi lolotia. \v 34 Eala moli eau kama gabutala agi isasa mai eia valolo matagaga leau mai ele, ouka, la vuhula la merera te la tahalo la vovo isasa eia kama tikumu mai la merera te La Tahalo Uru. Eau masaga molia veia La Tahalo Uru eia ge abi rivu lou amutou soio tetala, eia ge vimahuli amutou, eala eau karasuku amutou mai ele veia amuto ge gabu tikumu la merera te Ioanes ale eia vei matagagea mutou veia eau e Kraist sesele. \v 35 E Ioanes, eia mai la lam ale vimatagaga la valalua tomi, ale amuto loloa bakisi la valolo tetalale, amuto sagege ovola, ale amuto masagea veia amuto ge sagege taro moli bakisi te la matagaga tetalale. \v 36 Eala moli la merera ale kara polo la merera te Ioanes, la valologu ale igoie. La vuhula la igogolu tomi ale e Tete abitiagu veia eau ge igo tomiao, eiala omai eau igigoae. Tiele la igogolu tomi ale eau igigoae, eia vei matagagea la valalua maie veia e Tete baha taroau somaie. \v 37 Eia sesele, e Tete bahatiau somaie, me eia valolo matagaga taiti leau. Eala moli amuto kama roromuli gologoloa bakisi. Ouka sesele molie. La vuhula amuto kama rovi e Tete, me amuto kama mata kilala tavu eia. \v 38 Me la vikararala tetala tai eia kama pou tamutou ele. La vuhula amuto kama roromuli la vikararala te la tahalo ale La Tahalo Uru bahatia somaie, eala amuto veipalea mai ele veia amuto kama rovi e Tete. \v 39 Amuto gigigi moli La Buk Tabu, me amuto veia la vikararala ovola eia ge abia mutou la mahulila ale la kaluvula ge ouka louo. Eala moli la vikarakarala tomi oilo te La Buk Tabu ele, eia valolo matagaga sesele leau. \v 40 Eala moli amuto kama masaga ge gomai taku veia amuto ge abi la mahulila omai takue. \p \v 41 “Eala moli la veitatahola te la valalua eau kama masagea. \v 42 La vuhula eau roviti amutou ele, veia la gilogo te La Tahalo Uru eia kama pou oilo tamutou. \v 43 Mai ge la tahalo isapolo ge visibitala la isalato maie, amuto ge karutu la vikararala tetala, amuto ge roromuli molia. Eala moli eau ga veipala la isale Tete, amuto kama roromuli gologoloa bakisie. \v 44 Sesele, amuto vitogo baololi amutou, eala moli la sagegela ale loio te La Tahalo Uruo, amuto so gege ovola, goio amuto ge koramulia mave veia ge visagege eia? \p \v 45 “Umala amuto ge gabua veia eau ge veipala amutou soio te Tete, ge ouka. Me la tahalo ale ge veipala la vulovulo mutou e Moses moli ele, la tahalo moli ale amuto tatau la ilo mutou soio te la merera tetala veia eia ge vimahuli amutou. Eala moli la merera te Moses lou eia ge tomu sasae la vulovulo mutou ale kama kokorale. \v 46 Tio mai amuto ge roromuliti la merera te Moses, mai amuto ge roromuli la vikararala taku taie. La vuhula eia kekesi tola moli la merera ale puru seseleti omai taku, te la guluvi taku omai me la igogolu ale eau igigoa. \v 47 Eala moli ale amuto kama roromuli la kekesi la merera tetalao, amuto ge roromuli tai la vikarakarala taku mave e?” \c 6 \s1 E Iesus vaali maru la valalua salatu savulu lima \r (Matiu 14:13-21; Mark 6:30-44; Luk 9:10-17) \p \v 1 Tio, mulimuli ovolale, e Iesus goio hiliti polo soio te la gale la magolilo e Galilea loio, ale egite toi taila veia la magolilo e Taibirias. \v 2 Goio la valalua me hatavivile usu tilimulitia, la vuhula egite hiloti la golu la karutula usu ale eia igotia soio tegiteu ale laleao. \v 3 Eala moli e Iesus me egiteu la valalua la vimari tetalale, egite goata muga la gove isasa, egite pou muga oata ovolao. \v 4 Tio La Ilali La Poloselela tegiteu e Iuda eia hagagavi taiti te la imamala aleiele. \p \v 5 Goma, e Iesus ga pigi la matala soio mai ele, eia hilo moliti la valalua me hatavivile ale ititia soio tetalao, eia goma veiale Pilip mago “Etato ge loto la ilali ove ge abia giteu, egite ge alia e?” \v 6 E Iesus vei moli mai ele veia ge tovo lalai moli e Pilip ele, eala moli eia rovi la gauru ale eia ge igoa soio te la valalua me hatavivilele. \p \v 7 Goma, e Pilip vei molitiale Iesus mago “Eala moli la ilali ale veia etato ge lotola e kina salatu savulu lua, eia kama ge koramuli la valalua me hatavivile ale maito la moromoro ge alia.” \p \v 8 Goio, la tahalo la vimari te Iesus isasa, e Andrew, eia e tabarale Saimon Pita, eia goma vei moliale Iesus ele mago \v 9 “E guliliki isa omaie, eia sau tola la bret ilima me la ia ilua, eala moli eia kama ge koramuli egiteu ale usuto maie.” \p \v 10 Goma, e Iesus veia giteu la valalua tetalale mago “Amuto ge veia giteu la valalua me hatavivile tomi ge pou otalo”, la vuhula la baa alele eia taritigi tataho, me egite goio pou otalo, la giligi giteu la valalua tomi ele koramuli salatu savulu limato. \v 11 Tio goma egite pou tomiti otalole, e Iesus abiti la bret ale ilima te gulilikio, eia goio toi moli la visalela kaluvu, eia goio barere legiteu la valalua me hatavivileo. Eia goio igo taia mai ele te la ia iluao. Eia barere tomiti legiteu ele mai la masasagala tegiteu isasasa. \p \v 12 Egite tomi ali maru tataho sesele, goio e Iesus veia giteu la valalua la vimari tetala mago “Amuto goio abi vikapopo tomi la makarakara giteuo, eia souka ge kama kokora bulalahu moli.” \p \v 13 Tio egite goio vikapopo tomia, me egite tovo loua te la kela savulusa gete lua ale ururu makapilapila, egite volu. \p \v 14 Tiele, la valalua me hatavivile hiloti la golu la karutula aleie, egite goio vikara maie mago “Ale eia soioge la bilalaha te La Tahalo Uru, eia uru sesele, ale La Buk Tabu Ale Pala veipala la guluvi tetala veia eia ge gomai te la maututula!” \v 15 Tio egite vikara mai ele, eala moli e Iesus roviti la gabutatalala giteu la valalua mai ele, veia egite masagea veia ge sau tolea ge vimagiria veia eia ge la uru giteu. Ale eia rovi la gabutatalala tegiteu mai ele, eia goio hiliti taro egiteu, eia goata lou la rorobo, eia goio pou sekela te la baa bulalahu moli isasa. \s1 E Iesus tatuga loata te la kulikuli la mago \r (Matiu 14:22-23; Mark 6:45-52) \p \v 16 Goio, te la maulavi, egiteu la valalua la vimari te Iesus gotalo lou la magolilo e Galilea, \v 17 egite goio sae te la uaga, veia egite ge goio te la gale loio, la mautu e Kapernaum ovola. Eala moli la paga logologoti, e Iesus soukato goio tegiteu ele, tio egite goio soko la tuluga tegiteuo. \v 18 Eala moli la lolovi uru sibitalati, me la mago hiliti taiti. \v 19 Goio egite voreti mai la kilomita ivaati uka ilimati maio, goma egite hilo moliti e Iesus tatuga loata te la kulikuli la magole soio hagagavi te la uaga tegiteu ele. Tiele egite tagatio. \v 20 Eala moli e Iesus veia giteu soio mago “Ale eau molie ge. Amuto umala ge tataga.” \v 21 Goio egite ga visaea te la uagale, eala moli egite ga karutu maie, egite oilo porutio te la mautu ale egite veia ge goio ovolale. \s1 La valalua me hatavivile usu paa mulimuli e Iesus \p \v 22 Tio, mai galigeli ovolale, la valalua me hatavivileo, egite soloio te la gale la magolilo loio. Egite rovitia veia alalavi la uaga isa moli tabuli oiole, isa oukati lou, eala moli e Iesus tai kama visae tomi me egiteu la valalua la vimari tetala tai ele, egite sekela moli tuga mai ele. \v 23 Eala moli la uaga isahari tai tegiteu loio e Taibirias, egite goio hagagavi te la baa ale e Iesus vaali maru la valalua me hatavivile ovolao. \v 24 Goma egite la valalua me hatavivile mapaiti paa mulimuli e Iesus me la valalua la vimari tetala oio te la baa alele. Tio egite goio sae tegiteu la uagaga ale so guguvie, egite abia tugati soio e Kapernaum, ge paa muli e Iesus soio volao. \s1 E Iesus eia la ilali la mahulila \p \v 25 Goio, egite sivutiti e Iesus oio te la gale loio, egite goma tahia mago “Tahalo La Vimari, eme gomaiti alisa e?” \p \v 26 Goma, e Iesus baolia giteu soio mago “Ale eau vei seselea mutou maie, amuto kama gabutatala moli la golu la karutula ale amuto hilotia te la limagu, veia amuto ge gomai ge hiloaue, ouka. La vuhula amuto maru sesele te la ilali ale eau abitia mutouo, eala amuto gomai paa mulimuliaue. \v 27 Umala amuto ge vagari tatavu la ilali ale parara bulalahu moli. Taritigi amuto ge vagari tavu moli la ilali ale ge tabuli tola sesele, eia mai la ilali te la kalulu mutou, la vuhula eia la ilali te la mahulila ale la kaluvula ge ouka lou. La vuhula la ilali aleie, e Latu La Tahalo moli koramulia ge abia mutou ovola. Mai e Tete, eia La Tahalo Uru sesele, eia abitiagu la vagagarila tetala tomi mai ele veia eau ge vimahuli amutou.” \p \v 28 Goio, egite veiala mago “Ila, amite ge igo lava, veia amite ge igo la igogolu te La Tahalo Uru sesele e?” \p \v 29 Goma, e Iesus ule baoli loua giteu ele mago “La igogolu te La Tahalo Uru eia maie, veia amuto ge roromuli la bilalaha ale La Tahalo Uru bahatia somai tamutoue, amuto ge taua la ilo mutou soio tetala.” \p \v 30 Tiele, egite goio tahi vulo loua mago “Ere golu la karutula eme ge igoa veia amite ge hiloa me amite ge roromuli la vikararala taumele veia eia sesele, e? \v 31 Ale pala egite tutubu miteu aliti la ilali ale egite toila la mana oio te la hohoi, mai La Buk Tabu veitia, veia ‘Eia abitia giteu la ilali ale loata la ilo la lage, veia egite la valalua tetala ge alia.’” \p \v 32 Goma, e Iesus vei loua giteu ele mago “Eala moli eau vei seselea mutoue, kama e Moses abia mutou la ilali ale loata la ilo la lagele, ouka. E Tete sesele abia mutou la ilali aleiele loata la ilo la lage. \v 33 Male, la ilali ale e Tete abiao, eia purusuti loata la ilo la lage, eia gotaloti, me eia abia giteu la valalua me hatavivile te la maututula la mahulila.” \p \v 34 Tiele, egite goma kaka gogogoti e Iesus mago “Tahalo uru, taritigi eme ge abi bibibi molia miteu la ilali aleiele.” \p \v 35 Goma, e Iesus vei loua giteu ele mago “Male ge, eau sesele la ilali la mahuli ele. Mai isa ge gomai takue, eia kama ge vitolo lou. Mai tai la tahalo ale tautaulailo sesele taku, eia kama ge malehu lou. \v 36 Eala moli mai eau veipala mugatia mutou veia amuto hilotiau, eala moli amuto kama tautaulailo bakisi takue. \v 37 Tio egiteu tomi ale e Tete sugu tarotiagu egiteuo, me egite ge gomai takue, tiele eau kama ge piligi lou egiteu, ge oukati. \v 38 La vuhula eau kama sivo sotalo te la maututula veia eau ge tilimuli la gabutatalala taku moli, ouka. Eau sivo sotaloe veia eau ge tilimuli moli la gabutatalala te Tete ale baha tarotiau somaie. \v 39 Male ge, la gabutatalala te ale bahatiau sotalo eia maie veia egiteu tomi la valalua me hatavivile ale eia sugu taroti egiteu somai takue, eau kama ge piligi taro isasa, ouka. Eau ge vahiliti tomi egiteu te la tapasi la haro te la tapasi la maututulao. \v 40 Eala moli la gabutatalala te Tete eia maie veia mai egiteu ale hilo e Latula me egiteu roromuliao, egite ge sau tola la mahulila ale la kaluvula ge ouka lou. Eau ge vahiliti egiteu te la tapasi la maututula tomi ele.” \p \v 41 Eala moli ale e Iesus veia giteu mago “Eau sesele la ilali ale hiliti loata la ilo la lage, me eia gotalotie,” ale eia veitia mai ele, egiteu e Iuda igo totolotio, me egite vikara galolotialao. \v 42 Egite goma vitahi baololi egiteu mago “Mave, ale e Iesus, e latule Iosep moli. Etato rovi moli e tamala me tilalae. Ale ilava eia vei lou maie ‘Eau hiliti taroti la ilo la lage, me eau guviti otalo la maututula e?’” \p \v 43 Goio, e Iesus ule baoli loua giteu ele mago “Umala amuto ge vigavusa gere rivu lou amutou mai ele. \v 44 La vuhula la tahalo isa kama koramulia ge gomai bububu moli takue, ouka. Ale e Tete sesele baha taroau somaie, mai eia ge lapu rivu isa la tahalo, eia ge gomai taku, tiele me eau ge vahiliti la tahalo alele te la tapasi la maututula. \v 45 Eia mai la vikararala oio te la buk tegiteu la bilalaha te La Uru ale pala, La Tahalo Uru eia ge vimari la valalua me hatavivile tomi. Tiele me egiteu tomi ale matagaga te la vikararala te Tete, me egite roromuliao, tio me egite ge gomai tavu eau. \v 46 Eala moli la tahalo isa souka hilo e Tete. La tahalo moli ale vipou tomi muga La Tahalo Uruo, me eia hiliti taroa somaie, eia moli hiloti e tama gatouo, mai eau sekela molie. \v 47 Male eau vei seselea mutou maie veia la tahalo ale roromuliaue, eia ge sau tola la mahulila ale sesele, la kaluvula ge ouka lou. \v 48 Eau sesele la ilali la mahulila. \v 49 Ale palao, e tutubu mutou egite aliti la mana oio te la hohoi, goio egite peho taro tomitia. \v 50 Eala moli la ilali aleie, eia loata sesele te la ilo la lage, me eia gotalotie. Mai ge la tahalo ale ali la ilali aleie, eia kama ge peho lou. \v 51 Eau la ilali la mahulila ale sivo loata te la ilo la lage sotalo la maututulae. Mai isasa ge ali la ilali aleie, eia ge sau tola la mahulila ale seselele. Male ge, la ilali ale eau ge abia giteu ale roromuliau, eia la vovogu. Eau sugu taroa veia la valalua me hatavivile te la maututula egite ge abi la mahulilale.” \p \v 52 Tio, egite Iudale viputugere baololi lou egiteu ele mago “La tahalo ale ge abia gatou mave la mailila veia etato ge alia e?” \p \v 53 Goio, e Iesus veia loua giteu ele mago “Ale eau ge vei seselea mutoue, mai amuto kama ge ali la vovole Latu La Tahalo, me amuto kama ge liu tai la kasosogue, amuto ge galo sesele te la mahulila ale sesele. \v 54 La tahalo ale ge ali la mailigu, me eia ge liu tai la kasosogue, eia ge sau tola la mahulila ale kama ge kaluvu lou, eau ge vahiliti loua te la tapasi la maututula tomi ele. \v 55 La vuhula maie, la mailigu eia la ilali sesele, me la kasosogu eia la lalu la ililiu sesele tai. \v 56 Tio mai la tahalo ge ali la mailigu, me eia ge liu tai la kasosogu, eia pouti taku, me eau ge pou tai tetalale. \v 57 E Tete sau tola la mahulila, me eia baha tarotiau somaie, me ale eau vimahuli te la vagagarile Tete. Eia ge mai tai ele te la tahalo ale ge ali la mailigu, eia ge sau tola la mahulila, me la vagagarila omai takue. \v 58 Eau la ilali ale loata la ilo la lage, eia kama mai la ilali ale egite tutubu mutou alitia me egiteu pehoti lou, la vuhula la ilali tegiteu eia kama koramuli la vimahuli. Mai ge isa ge ali la ilali aleie, eia ge sau tola la mahulila ale la kaluvula ge ouka lou.” \v 59 Me la vimari tomi aleie, e Iesus vimari egiteu oilo te la luma la lotu oio e Kapernaum. \s1 La valalua usu veia egite kati ge mulimuli e Iesus \p \v 60 Goio, egiteu la valalua usu ale egite tilimulimuli e Iesus, egite loloti la vikararala aleie, egite goio vikara maie mago “La vikararala ale, eia vagari pasi, ere koramulia ge loloa e?” \p \v 61 Eala moli oilo te la tiale Iesus eia roviti egiteu la valalua tetala, egite oio vikara kukukumu te la vikararala aleiele. Eia goma veia giteu ele mago “Mave, la vikararala ale eia igo gegeruti la gabutatalala tamutou, ia? \v 62 Eia ge mave mai amuto ge hilo e Latu La Tahalo ge goata rivu lou te la mautu ale eia hiliti taro mugea palao, e? \v 63 Eala moli La Kalulu La Marokala moli, eia vimahulihuli, la vagagari gatou te la vovo eia kama koramulia ge vimahuli etatou bakisi. Male la vikararala ale eau abitia mutoue, eia la merera te La Kalulu me te La Mahulila. \v 64 Eala moli amuto isahari kama roromulia.” E Iesus veia giteu mai ele, la vuhula eia rovi palati ere tegiteu ele kama roromuli seselea, me eia rovi taiti la tahalo ale ge sugu taroa soio te la lima giteu la gima tai. \v 65 Goma eia vei loua giteu mago “La vuhu la vikararala ale eau veitia mutou maie, mai e Tete kama abia la tahalo isasa la vagagarila, eia kama koramulia veia ge gomai lou takue.” \p \v 66 Tio, te la vikararala aleie, egiteu la valalua la vimari tetala usu, egite igo sulupu ovolale, egite kamati tilimuli loua. \p \v 67 Goma, e Iesus veia giteu la valalua tetala ale savulusa gete lua mago “Soioge amuto tai masagea ge hele taroau, ia?” \p \v 68 Goio, e Saimon Pita koli rivuala mago “Tahalo Uru, amite ge goio lou tere? Me taume moli la vikarara la mahulila ale la kaluvula ge ouka. \v 69 La vuhula amite matagaga seseleti, me amite rovitia veia eme moli La Tahalo La Maroka te La Tahalo Uru ele.” \p \v 70 Goma, e Iesus ule baoli loua giteu ele mago “Eia sesele, eau hiloviti amutou ale savulusa gete lua veia amuto ge taku, eala moli isa oilo tamutou ele, eia la tahalo te Satan seseleti.” \v 71 Me ale eia vikara mai ele, e Iesus pigi vevei maie te Iudas, e latule Saimon Iskariot, eia isa kabili tegiteu la valalua la vimari ale savulusa gete lua, eia moli ele ale ge sugu taro e Iesus soio te la valalua la gima veia egite ge biliale. \c 7 \s1 Egiteu e tabarabarale Iesus kama gabu tikumu la igogolu tetala \p \v 1 Goio, mulimuli ovolale, e Iesus hiliti polo soio te la gale e Galileao, la vuhula egiteu e Iuda masagea ge bili pehoa. Eala eia kama masagea ge tatuga lou oio te la gale e Iudeale. \v 2 Tio la haro la pougolula tegiteu e Iuda isasa ale egite toila veia la haro uru te la luma la sel, eia hagagaviti. Ale la haro ale egite virovilala la imamala ovola ale egiteu e tutubu giteu bula taroti e Gipto, egite mavuta ututu oio te la hohoi. Tio la haro la pougolulale eia hagagaviti, e Iesus eia goio te la mautu tetala. \v 3 Goma egiteu e tabarabarale Iesus veiala mago “Taritigi eme ge hiliti taro la mautu aleie, me eme ge goio la mautu e Iudea, eme ge igo la igogolu taume oio e Ierusalem te la ilali la pougolula, la valalua usu taume ge hilo la golu la karutula isahari ale eme ge igoa, egite ge togome. \v 4 Mai eme masagea veia la reremu ge tali, eme umala ge igo kokovu la igogolu taumele, eme ge igoa te la mata la valalua tomi me hatavivile, egite ge hiloa.” \v 5 Egite tabarabarala pigi malikiala mai ele, la vuhula egite kama tautaulailo soio tetalale. \p \v 6 Goma, e Iesus koli baoli loua giteu mago “Eala moli la imamala taku eia souka sibitala. Ale igoie eia so la imamala tomi tamutou eia koramulia amuto ge goata e Ierusalem ovola, mai la masasagala moli tamutou isasasa, la vuhula ale amuto ge goata e Ierusalem, amuto kama ge gabutatala isa la paga ovola, \v 7 la vuhula la valalua kama gima amutou. Egite gima moliau, la vuhula eau tatuga te la mata giteu ale la vulovulo giteu ale egite igigoa eia kama taritigio. \v 8 Amuto moli goio hilo la pougolula tamutou ele, eau kama ge goio muga ovolale. La imamala taku souka sibitala.” \v 9 E Iesus veia giteu la vikararala aleie, eia goio pou oio e Galileale, eia kati goata muga e Ierusalem. \s1 E Iesus hilo la logo la pougolula te la luma la sel \p \v 10 Tio, egite tabarabarale Iesus tugati soio te la pougolulao, mulimuli eia tai hiliti, tuga. Eala moli eia kama polo palala, eia polo kokovu moli soio volale. \v 11 Goio, egiteu e Iuda paa mulimulia oio te la pougolulale, egite goio tahi la valalua mago “La tahalo ale e Iesus, eia oiove?” \p \v 12 Tiele, egite la valalua me hatavivile viputugere mulitiao, goma isahari egite vevei mago “Eia la tahalo ale taritigi.” \p Eala moli isahari egite vevei mago “Ouka, eia la tahalo la visigolo giteu la valalua me hatavivile.” \v 13 Eala moli egite taga egiteu la mulugaluga tegiteu e Iudale, eala egite isa kama tagu pala la vikararale Iesus ele te la mata la valalua tomi. \p \v 14 Eala moli oio kabili posa sesele te la imamala te la pougolulale, e Iesus goilo te la luma la lotu, eia vimari egiteu la valalua me hatavivile. \v 15 Tio egiteu la mulugaluga karutu seselela, goma egite vitahi baoli lou egiteu mago “La tahalo ale, eia mata mai la tahalo la mari, eala moli eia abi la mari aleie oiove?” \p \v 16 Goma, e Iesus ule baoli loua giteu ele mago “La vikararala ale eau vimarile amutoue, eia kama la vikararala taku, ouka. Ale la vikararala te La Tahalo Uru sesele, eia bahatiau somaie. \v 17 Mai ge la tahalo isasa eia masagea ge roromuli la golu La Tahalo Uru ele, tio eia ge matagaga sesele te la vikararala ale eau veitia mutoue, veia la vikararala aleie eia te La Tahalo Uru, kama te la gabutatalala moli taku. Eia ge koramulia ge hilovi tigi la merera taku mai ele, veia eia sesele ka ouka. \v 18 Mai isasa eia vevei la vikararala te la gabutatalala tetala moli, eia masagea ge vauru rivu lou eiale. Eala moli la tahalo ale masagea ge vahiliti la isa la tahalo ale bahea somaie, mai eau, La Tahalo Uru baha sesele eau somaie, la vikararala te la bilalaha ale maie, eia ge sesele tomi moli, la iruru isa ouka oio tetalale. \v 19 Ale pala, e Moses abitia mutou la vikarara la viputumulila te La Uru, eala moli amuto kama tilimuli la merera tetalale. Ilava sesele amuto ale poloti la merera ale amuto masagea veia ge bili pehoau ale mulimuli seselea?” \p \v 20 Goio, egite la valalua me hatavivile koli louale Iesus mago “Soioge la hitu ale kama kokora oio pouti taume. Amite isa kama masagea veia ge bilime.” \p \v 21 Goma, e Iesus vei loua giteu ele mago “Eau igoti la golu la karutula isa moli sekela pala, eala moli la gabutatalala tamuto eia marapa lahuti ovolale, ale eau vimahuli la tahalo te la haro tabu. \v 22 Ale pala e Moses eia abitia mutou la irovilala te la kiroro la vovo, eala moli alele kama la gabutatalala moli te Moses ele, alele eia loio sesele te tutubu mutou ale alaura seseleti pala muga te Moses. Goio amuto gabu tikumu la merera te Moses ele te la kiroro la vovo, amuto goio korokoro lou la vovo giteu e latatu mutou ale hatamalemale te la haro tabu moli lou. \v 23 Me oio vola amuto gabua veia amuto togo tigi sesele la viputumulila te Moses mai ele veia amuto umala ge polo la baa mulimuli te la piligo te latu mutou ale hatamalemale, mai la merera te Moses veia, amuto ge goio ge koro moli la vovola te la haro tabu. Ale eau igo tigi la vovo la tahalo isasa te la haro tabu, amuto goma igo totoloau ilava e? \v 24 Umala amuto ge mata muli la vulovulogu mai te la gabutatalala moli tamutou te la vovo. Taritigi amuto ge mata muli tigi la vulovulogu mai te la gabutatalala ale loio te La Uru, amuto ge matagaga tataho te la igogolu taku mai ele.” \s1 La valalua masagea ge rovia veia e Iesus eia e Kraist ka ouka \p \v 25 Goio, la valalua me hatavivile e Ierusalem isahari vitahi baoli lou egiteu mago “Ale ere? Soioge la tahalo ale egite la mulugaluga masagea ge bili pehoa, ia? \v 26 Male, hiloa, eia sile palala moliti la vikararala tetalale, egite kama tolo ololi la vikararala tetala bakisi ele. Soioge egite la mulugaluga oio rovia veia eia e Kraist, La Riau te La Uru, ia? \v 27 Eala moli etato rovi sesele la mautu te la tahalo aleie. Ale mai ge Kraist ge sibitala, la tahalo isasa kama ge rovi la mautu tetalale, ale eia soioge kama e Kraist sesele.” \p \v 28 Eala moli e Iesus goio soko lou la vimari soio tegiteu la valalua me hatavivile, eia vikara vagari sesele, eia vei boboboea giteu mago “Amuto veia amuto rovi eau, ia? Me la mautu tai takuo, amuto veia amuto rovia, ia? Eala moli kama la gabutatalala moli taku ale eau ge gomaie, e Tete sesele ale la vulovulola eia sesele, eia baheau somaie. Eala moli amuto kama rovi e Tete. \v 29 Eau moli rovi eiale, la vuhula amila vipou tomi, me eia baha taroau somaie.” \p \v 30 Tiele, egite lolo la vikararala tetala mai ele, egite igo totolo, egite masagea veia ge lao tolea, eala moli isa kama sau tavua. La vuhula la imamala tetala souka sibitala. \v 31 Eala moli la valalua me hatavivile usu roromulitiao, egite goio vikara maie mago “Mai ge e Kraist ge guvi, eia soioge ge igo la golu la karutula isahari ge kara polo te ale e Iesus igigotia e? Ge ouka gologolo. E Iesus eia ge Kraist sesele ge!” \s1 Egiteu la mulugaluga veia ge lao tola e Iesus \p \v 32 Tio, egiteu e pariseo loloti egiteu la valalua vei lahuti la vikarakarala te Iesus mai ele, goma egite la mulugaluga tegiteu e pris me egiteu e pariseo tai goio baha isahari egiteu la tahalo la vagari robola te la luma la lotu veia egite ge goio ge lao tola e Iesus ele. \v 33 Goma e Iesus veia giteu mago “Eau kama ge pou tabaa lou omai tamutoue, eau ge beu rivu loua soio te ale baha taroau somaie. \v 34 Goma amuto ge paa mulimuliau, eala moli amuto kama ge sivutiau. Amuto kama koramuli taia ge hilo la mautu ale eau ge goio volao.” \p \v 35 Tio, egiteu e Iuda ale magirigiri ele, egite loloa eia vikara mai ele, egite vitahi baoliti egiteu ele mago “Eia ge gove sesele veia etato kama ge sivutiale? Soioge eia ge goio tegiteu e Iuda isahari ale mou oio te la maututula tegiteu e Grik, ia, me eia ge vimari egiteu e Grik oio vola, ia? \v 36 Ale eia veitia mai ele ‘Amuto kama koramulia ge sivutiau’, ale la masovala soioge mave? Me ale tai eia vikara maie mago ‘La mautu ale eau ge goio vola amuto kama rovia’, tio la vikararala ale eia mave sesele, e?” \s1 E Iesus eia la lalu la mahulila \p \v 37 Goio, la tapasi la haro la pougolula guvi, ale eia la haro ale uru sesele tegiteu la haroharo tomi te la pougolulale, e Iesus goio magiri, eia goio tatola mago “Mai la tahalo isasa eia pepeho la malehula, eia gomai ge liu omai takue. \v 38 Eia ge mai la vikararala te La Buk Tabu Ale Pala eia veitia maie ‘La tahalo ale roromuliau, la mata la lalu la mahuli usu ge saisali loio te la ilolale.’” \v 39 Tio me ale e Iesus vikara mai ele, eia la vikarara la tilovo te La Kalulu La Marokala ale la valalua ale tautaulailo tetala, egite mulimuli ge sau tolea, la vuhula eia soukama beua soata te la pulolou la matagagala tetala, eala eia soukama vibalava legiteu La Kalulu La Marokala. \s1 La gabutatalala te la valalua kamati isasa te Iesus \p \v 40 Goio, la valalua me hatavivile isahari lolo la vikararala aleie, egite vei mago “Sesele, ale la bilalaha ale uru sesele ale La Buk Tabu Ale Pala veia ge sibitala pala muga te Kraist.” \p \v 41 Eala moli isahari tai, egite vei mago “Ale e Kraist sesele ge!” \p Eala moli isahari goio tahi taro egiteu mago “Mave, amuto veia e Kraist ge sibitala loio e Galilea, ia? \v 42 Mave, La Buk Tabu kama veia gatou veia e Kraist la hilile Devit, me eia ge sibitala oio la mautu e Betlehem, te la mautu ale e Devit pou mugati ovola alaurati te ururu?” \v 43 Tio me egiteu la valaluale, la gabutatalala tegiteu kamati visauru oio te Iesus ele, isahari veia eia e Kraist sesele, isahari ouka. \v 44 Egite isahari masagea ge lao tolea, eala moli isa kama sau tavua. \s1 Egite la mulugaluga kama tautaulailo te Iesus veia eia e Kraist \p \v 45 Tio, goio, egiteu la tahalo la vagari robola te la luma la lotu ale egiteu la mulugaluga bahati egiteu veia ge lao tola e Iesus, egite goio beu rivu loua soio tegiteu la mulugaluga tegiteu e pris. Egiteu e pris goio tahi egiteu mago “Mave, amuto kama lao tolea, ge lapua somai tamiteu e?” \p \v 46 Eala moli egite koli la vikararala tegiteu e pris maie mago “Alaurati kara igoie, la tahalo isa souka vevei la vikararala ale taritigi sesele mai la tahalo aleie.” \p \v 47 Goio, egiteu e pariseo ule baoli loua giteu ele mago “Soioge eia ge visigolo taiti amutou, ia? \v 48 Mave, amuto hiloti isasa oilo tamiteu la mulugaluga, oilo kabili tai tamiteu e pariseo, isasa tamiteu roromuliti la tahalo alele, ia? Ouka sesele, \v 49 eala moli egiteu la valalua me hatavivile bulalahu moli ale kama rovi la merera te Moses, egiteu ale kama kokora sesele te la mata La Tahalo Uru.” \p \v 50 Goma, e Nikodimas ale pala eia goio te Iesus te la logo veia ge tahi kokovua la tilahi tetala, eia isasa tegiteu e pariseo ele, eia veia giteu mago \v 51 “Mave, la vikarara la viputumulila tegatou e Iuda eia veia eia koramulia veia etato ge vilai la tahalo ale soukama magiri te la vigagiala veia ge veipala muga la vuhu la iruru tetala veia eia ruru sesele ka ouka?” \p \v 52 Eala moli egite goio koli rivuale Nikodimas ele mago “Soioge eme tai goiloti tegiteu la valalua e Galilea, ia, eme soioge vuloti mai la tau rorobo, veia eme ge taho loio te Iesus ele, ia? Taritigi eme ge gigi tigi la merera te La Buk Tabu, me eme ge matagagati veia la bilalaha te La Uru kama ge sibitala loio e Galileale.” Tio egite igo totolo e Nikodimas mai ele. \p [ \v 53 Goio, egiteu la valalua ale gomai e Ierusalem te la ilali la pougolula, egite hiliti goio tuga beu rivu loua soio te la maututula tegiteu tomi. \c 8 \s1 E Iesus eia suli la tavile la iruru \p \v 1 Tio, egiteu la valalua tomi tugati, eala moli e Iesus goio muga te la gove bisi e Oliva. \v 2 Goio mai galigeli te la kavikoki sasaha, eia goio beua soio e Ierusalem, eia goilo lou te la luma la lotu. Goma egite la valalua me hatavivile tomi ititia soio tetalao. Tiele eia pou me eia vimari egiteuo. \v 3 Tio egiteu la tahalo la mari me egiteu e pariseo goio laputi isa la tavile soio te Iesus, egite vimagiri posatia kabili tegiteu la valalua tomi. La tavile ale, egite hilo vutitia, eia taulaiti, eala moli eia igoti la iruru vikapopo la tahalo isasa. \v 4 Goma egite veiale Iesus mago “Tahalo La Vimari, la tavile ale, egite sivutitia, eia taulai, eala moli eia mavuta tomi la tahalo isapolo kama e haruala. \v 5 Oilo te la merera la viputumulila, e Moses veia gatou veia mai isa ge igoa maie, etato ge dumu pehoa me la uati. Eme ge vei la rova ovola e?” \v 6 Eala moli egite tahia maie veia ge tovo lalai e Iesus ovolale veia ge vitiloa veia mai eia ge toi isa la merera ale polo la merera te Moses, egite ge kotiala. \p Eala moli e Iesus pou lagu tugu moli me eia kekekesi otalo te la magasa me la kuku la limala. \v 7 Goio egite tahi suku loua, tiele e Iesus hiliti moli ele, eia magiri, eia goio veia giteu mago “Mai la tahalo isa kabili tamutou ele eia souka igo isa la iruru, eia ge soko la ulubi la tavile ale me la uati.” \v 8 Goma e Iesus pou lagu tugu lou, me eia kekesi lou me la kuku la limala otalo la magasao. \p \v 9 Tio, egite loloa mai ele, egite gali seseke moliti ele. Egite la mulugaluga sokoa giteu, mulimuli egiteu ale isahario, kara te ale mulimuli kililili tegiteu ele. Egite hele taro moliti e Iesus oiole me la tavile oio magirigiri te la lagulao. \p \v 10 Goma, e Iesus magiri, eia goio veia la tavilele mago “Tavile kokora, egite govei tomiti ele? Mave, isa kamati vimagirime te la vigagiala, ia?” \p \v 11 Goma, la tavile veiale Iesus mago “Tahalo uru, isa oukati oio ale ge ubi leau la merera.” \p Goio, e Iesus veiala mago “Eau tai kama ge vimagiri eme te la vigagiala. Eme ge tuga, eala moli eme umalati ge igigo lou isa la iruru.”] \s1 E Iesus eia la matagaga te la maututula tomi \p \v 12 La haro isa lou e Iesus goio vimari lou egiteu la valalua me hatavivile maie mago “Eau, eau la matagaga te la maututula. La tahalo ale ge tilimuliau, eia kama ge tatuga te la maligoma, ouka, eia ge sau tola la matagaga la mahulilale.” \p \v 13 Tiele, egiteu e pariseo loloa mai ele, egite goio veiala mago “Eme valolo rivurivu lou lemei ele, eala la valolo taume eia kama sesele, la merera taume eia kama tikumu.” \p \v 14 Goio, e Iesus ule baoli loua giteu ele mago “Eia sesele, eau valolo rivu lou leau me la vikararala takue, eala moli la vikararala taku eia sesele. La vuhula maie: Eau rovi la mautu ale eau hiliti tarotia somaie, me eau rovi tai la mautu ale eau masagea ge goio volao. Eala moli amuto kama rovi la mautu sesele taku. Ale eau ge gove, amuto kama rovi taia. \v 15 Amuto veia amutou la tahalo la mari, eala moli la vuhu la viputumulila tamutou la mari te la vovo moli. Eau, eau kama igigo isa la viputumulila te la tahalo isasa. \v 16 Eala moli mai eau ge vimagiri isasa te la vigagiala, la viputumulila taku soio tetala eia ge matata moli, la vuhula kama eau moli, ouka, e Tete ale bahatiau somaie, eia igogolu vikapopo me eaue. \v 17 La vikararala ale amuto veia te la mari tamutou, eia magiri te la viputumulila tamutou maie, mai taho lua egira ge veipala la vikararala, me la vikararala tegirua eia visauru moli, amuto veia mai ele veia la vikararala tegirua eia sesele. \v 18 Ioge, me eau, eau valolo lou leau, goma e Tete ale bahatiau somaie, eia tai valolo leaue, eala amilua taho lua tomiti la vikararala tamilua isa moliti, eala moli amuto kama gabu tikumua veia eia sesele!” \p \v 19 Tio, egite lolo la vikararala tetala mai ele, egite goio tahi rivu loua mago “Me e tamamu ove, e?” \p Goma, e Iesus ule baoli loua giteu ele mago “Mai amuto kama roviau, eala amuto kama rovi e Tetele. Mai ge amuto ge rovitiau, tiele me amuto ge rovi tai e Teteo.” \v 20 Tio e Iesus veia la vikararala ale oilo te la luma la lotu, oio hagagavi moli la baa ale egite Iuda pipigi la uati tegiteu te la visuli te la lotu, la vuhula eia pou oio vola, eia vimari egiteu la valalua me hatavivile. Eala moli isasa tegiteu la mulugaluga kama lao tolea, la vuhula la imamala tetala soukama sibitala. \s1 E Iesus veia eia ge goio la mautu ale egite kama koramulia ge goio vola \p \v 21 Goio, e Iesus hiliti, eia soko lou la vikararala soio tegiteu la valalua me hatavivile me egiteu la mulugaluga tai, eia veia giteu mago “Male, eau ge tuga, amuto kamati ge hilo louau, la iruru tamutou ale amuto igigoa, eia soloio. Tio amuto ge peho, la iruru tamutou soloio kisi tola vagari amutou. Amuto kama koramulia ge goio te la mautu ale eau ge goio volao.” \p \v 22 Tiele, egiteu e Iuda goio vitahi baoli lou egiteu mago “Ilava sesele eia veia maie ‘Amuto kama koramulia ge goio te la mautu ale eau ge goio volao’? Soioge eia ge bili rivu lou eia, ia?” \p \v 23 Goma, eia veia giteu mago “Amuto la tahalo moli la magasa, eau ouka, eau loata te la mori, eau kama la tahalo la magasa mai amutou. \v 24 Mai ale eau vei mugatia mutou veia amuto ge vilua te la iruru tamutou ele, mai ge amuto kama ge tautaulailo taku sekela, tiele amuto ge peho, la iruru tamutou soloio kisi tatola amutou ele.” \p \v 25 Tio, egite lolo la vikararala te Iesus mai ele, egite goio tahi rivu loua mago “Eme ere tahalo, e?” \p Goma, e Iesus ule baoli loua giteu mago “Eau moli la tahalo mai ale eau vei mugatia mutouo. \v 26 Male, la vikarakarala usu eau masagea ge veia mutou te la vulovulo mutou ale amuto igigoa. Eau mulimuli ge mata muli la vulovulo mutou tomi mai la tahalo la viputumulila sesele. Eala moli eia ale baheau somai, la vulovulola eia sesele. Tiele la vikararala tomi ale eau loloa tetalao, eiala eau valolo egiteu la valalua me hatavivile te la maututula.” \p \v 27 Eia veia giteu mai ele, eala moli egite kama matagaga veia eia veveia giteu ele te Tamalao. \v 28 Tio goio e Iesus veitia giteu mago “Mulimuli amuto ge bili tarotiau e Latu La Tahalo, tiele te la imamala alele amuto ge mata kilalati veia eau e Kraist, me amuto ge rovi taia veia eau kama igo bulalahu la paga isa te la gabutatalala taku moli, ouka. La vikarakarala tomi ale eau veveia mutou ele, e Tete moli vei mulimuliagu mai ele. \v 29 E Tete sesele baha taroau somaie, me eia pou takue. Eia kama hele tataroau, veia eau sekela moli ge igogolu, ouka. La igogolu tomi ale eau igigoae, eia sagege sesele ovolale.” \v 30 Tiele ale eia veitia maie, la valalua me hatavivile usu goio tautaulailo tetalao. \s1 La merera la mahulila te Iesus eia ge lube etatou taro la kilisi te Satan \p \v 31 Goio, e Iesus veia giteu e Iuda ale tautia la ilo giteu soio tetala veia la merera tetala eia sesele, eia veia giteu mago “Mai ge amuto ge pou sesele te la vikararala takue, amuto ge la valalua la vimari taku seselele. \v 32 Tiele amuto ge rovi la merera la mahuli ale sesele, me la merera ale seselele eia ge lube amutou taro la kilisi ale kisi tola amutou, amuto ge mavulaha sesele.” \p \v 33 E Iesus veia giteu mai ele, eala moli egite goio veiala mago “Amiteu la hilile Abraham. Amite souka pou mai la bilalaha oio te la tahalo isasa veia eia ge kisi tola amiteu mai te la iligo la masasagala tetala. Ilava eme vei maie veia ‘Amuto ge pou sauba, la kilisi ge ouka’?” \p \v 34 Goma, e Iesus koli la vikararala tegiteu ele mago “Ale eau ge vei seselea mutoue ge, egiteu la valalua me hatavivile tomi ale egite igigo la iruru, egite pouti te la kilisi te la vulovulo ale kama kokorale. \v 35 La bilalaha, eia kama pou tatola te la uluva la luma te la uru tetala. Eala moli eau e Latule Tete, eau ge pou tola te la uluva la luma te Tete sesele, \v 36 tiele mai eau e Latula ge vagoilo amutou taku, ale amuto ge sauba seselele, amuto ge pou mai e latatu La Uru sesele, la vuhula eau lubeti amutou te la kilisi. \v 37 Eau roviti amutou veia amuto la hilile Abraham. Eala moli amuto masagea ge bili pehoau, la vuhula la vikarakarala taku eia kama pou sesele te la ilo mutou ele. \v 38 Eau valolo te la papaga ale eau hiloa oio te Tete. Mai amutou tai, amuto mulimuli la merera tomi te tama mutou e Satan ale kama kokorale.” \s1 E Iesus ubi legiteu la merera veia egiteu e latatule Satan \p \v 39 Goio, egite koli la vikararala te Iesus mago “E tama miteu e Abraham.” \p Eala moli e Iesus vei loua giteu mago “Mai amutou e latatule Abraham sesele, tiele me amuto ge abi la vulovulole Abrahamo, eala moli ouka. \v 40 Male, eau vimarimari le amutou te la vikarakarala ale sesele, eau loloa te La Tahalo Uruo, eala moli amuto masagea ge bili pehoaue. Eala moli e Abraham kama igigoa mai ele. \v 41 Ale amuto igigo mai la vulovulole tama mutou ale kama kokora.” \p Goio, egite vei louala mago “Ko, e tatila miteu kama savu amiteu te la gauru. Amiteu e tama miteu isa moli, La Tahalo Uru.” \p \v 42 Goma, e Iesus vei loua giteu mago “Mai ge amutou e latatu La Tahalo Uru seseleo, amuto ge masageau, la vuhula eau loio seseleti te Tete, eau gomai tamutoue. Eau kama gomai te la masasagala taku moli, ouka. Eia sesele baha taroau somaie. \v 43 Ilava amuto kama matagaga tigi te la vikarakarala taku e? La vuhu la vareagila tamutou ele eia loio te Satan moli, eia sugu roboti la hova la gavusa mutou, eala amuto kama matagaga tigi te la merera taku. \v 44 Amutou e latatule tama mutou e Satan. Eala amuto vagari sesele veia ge tilimuli la masasagala te la tiale tama mutou ele. Alaurati eia la tahalo la bili peho la valalua, me eia kama tilimuli la vulovulo ale matata, la vuhula la vulovulo la visigologolola moli eia oio volu tetala. Eia la tahalo la visigolola sesele, me eia e tama la vulovulo la visigologololale. \v 45 Eala moli eau veipalala la vikararala ale sesele, eala moli amuto kama roromuli la vikararala takue. \v 46 Ere tahalo isa kabili tamutou ele eia koramulia ge toi pala isasa la iruru omai taku, e? Eala moli mai eau valolo me la vikararala ale sesele, ilava amuto kama roromuli la vikararala taku, e? \v 47 Egiteu e latatu La Tahalo Uru sesele, egite roromuli la vikarakarala te La Tahalo Uru ele. Amuto kama tetala, eala amuto kama roromulimuli la vikarakarala tetalale.” \s1 E Iesus veia pala muga te la imamala te Abraham, eia oioti \p \v 48 Goio, egiteu e Iuda koli la vikararala tetala mago “A ge, amite veia eme la mumugu la tau Sameria moli ge! La hitu ale kama kokora isa oio pou taumele. Eala la vikararala tamiteu palati taumele eia sesele moli, eme la tahalo la pauala moli.” \p \v 49 Goma, e Iesus koli lou la vikararala tegiteu ele mago “Eau la hitu ale kama kokora isa kama pou takue, ouka. Eau togo e Tete, eala moli amuto kama togoau, amuto vile pasiau. \v 50 Eau kama vaisale rivurivu lou eau. La Tahalo isasa moli sekela masagea ge vauruau, La Uru moli ale la vuhu la viputumulila tomi. Eia ge mata muli la gabutatalala tamutou somai taku, \v 51 me eau vei seselea mutou maie veia mai ge la tahalo isasa eia ge roromuli tigi la vikararala taku, tetala ge la mahulila ale sesele, eia kama ge peho lou.” \p \v 52 Tiele, egiteu e Iuda loloa mai ele, egite goio vei louala mago “Ale amite rovi seseletimei ele, la hitu ale kama kokora isa pouti taumele. E tama miteu e Abraham pehoti, me egiteu la bilalaha te La Uru ale pala tai peho tomitio. Ale eme veitia maie ‘Mai la tahalo isasa ge roromuli la vikarakarala taku, eia kama ge peho lou!’ \v 53 Ale mave, e? Soioge eme uru te tubu gatou e Abraham, ia? Eia pehoti, me egiteu la bilalaha ale pala tai peho tomitio. Eme soioge veia eme ere?” \p \v 54 Goio, e Iesus koli loua giteu mago “Mai eau ge vaisale rivu lou la isagu, la isagu ge la golu bulalahu moli. Eala moli e Tete sesele vahiliti la isagu. Ale moli amuto totoia veia eia La Tahalo Uru tamutouo, eala moli amuto kama rovi eia. \v 55 Eau moli rovi tigia. Mai eau ge veia maie veia eau kama rovi e Tete, eau tai ge la tahalo la visigolola mai amutou ele. Eala moli eau rovi seselea, me eau roromuli tigi sesele la vikararala tetalale. \v 56 E tubu mutou e Abraham, eia sagege seseleeia eia ge hilo la guluvi taku. Goma eia hilotia, me eia sagege pepeho seseleti ovolale.” \p \v 57 Goio, egiteu e Iuda veiala mago “Mave, la leavala taume souka savulu lima, soioge eme hiloti e Abraham, ia?” \p \v 58 Goma, e Iesus veia giteu mago “Ale eau vei seselea mutou, ale alaura te baruata e Abraham souka sibitala, te la imamala alele eau pouti.” \p \v 59 Tiele, egite lolo la vikararala tetala mai ele, egite goio abi la uati veia ge ubi leia. Eala moli e Iesus eia paru keke taro moli egiteu ele, eia galiti sogalao. \c 9 \s1 E Iesus igo mata pulala la mata kea isasa \p \v 1 Tio, goio, e Iesus tatugale, eia goma hilo la tahalo isasa, eia mata kea, e tilala pigoa la matala mata kea moli mai ele. \v 2 Goma egite la valalua la vimari te Iesus goio tahia mago “Tahalo La Vimari, ere igo la iruru, la tahalo ale, uka e tamala me tilala, la vuhula e tilala taposea la matala mata keati mai ele?” \p \v 3 Goma, e Iesus koli la tilahi tegiteu ele mago “Ale veia la tahalo aleie, uka e tamala me tilala igo la iruru, ouka, eia mai moli ele veia ge sile pala la igogolu te La Tahalo Uru oio te la tahalole. \v 4 Ale igoie la matagaga taku bakisi soloio, etato ge igigo la igogolu te La Tahalo Uru, la vuhula sesela ale eia baheau somai eialale. Hagagaviti la maligoma ge sibitala lou, me etato tomi rovia veia mai la paga ge logoti, la valalua me hatavivile kati tuga tavu la igogolu. \v 5 Mai ale eau so popou omai te la maututula, eau la matagaga te la maututula tomi ele.” \p \v 6 Tio, eia vikara kaluvu moli mai ele, goma eia abi la magasa, goio eia kavurasi soio volao, eia bubutia te la mata la tahalole. \v 7 Goio eia baha taro la tahalole mago “Hari, eme goio pupuru oio la vilelo la pupurula e Siloam.” Me la isa la lalu aleie, te la merera tegiteu la masovala maie “egite bahatime”. Tio eia goio pupurutio, ale eia ga beu rivua mai ele, la matala mata pulalatio. \p \v 8 Tiele, egiteu la valalua la mautu tetala, me egiteu ale hililoa palao, ale eia kakaka egiteu la uatio, egite goio vitahi baololi moliti egiteu ele mago “Mave, ale soioge la tahalo moli ale popou kakaka la valalua me hatavivile la uati, ia?” \p \v 9 Goma, egite vikau vulotilao, isahari tegiteu veveia maie mago “Meie, la tahalola moli ele.” \p Eala moli isahari tegiteu mata pupupuhi louale, egite vei mago “Ouka, kama ge eiale, soioge isapolo, eala moli la taba la lagu girua ge isa moli ele.” \p Eala moli la tahalo loio varutu molitia giteu ele mago “Me eau molie.” \p \v 10 Goma, egite tahia mago “Me la matamu mata pulalati lou ele mave e?” \p \v 11 Eia goio veia mulia giteu ele mago “Me la tahalo ale egite totoila e Iesuso, eia ato la magasa, me eia vivulo tomila la kaputela, eia goma bubua te la matague. Goio eia baheau soio la vilelo la pupurula, e Siloam, veia eau ge pupuru ovola, tio eau tuga soio, eau goio pupuru, eala la matagu mata pulalati loue, me eau rovi tomiti la golugolu tomi ale etato ale matagaga hililoa.” \p \v 12 Goio, egite tahia mago “Me la tahalola oveiti?” \p Eia koli loua giteu mago “Eau kama rovia.” \p \v 13 Tio, egite puli e maura soio tegiteu e pariseo. \v 14 Eala moli la haro alele, eia la haro tabu, ale e Iesus abi la pilika goio igo mata pulala la mata la tahalo ovolale. \v 15 Goma egiteu e pariseo tahi loua mago “Me la matamu mata pulala mave e?” \p Goio, eia vei muli loua giteu ele mago “Eia bubu la magasa la pilika oio te la matagu, eau goio vuhi taroa, eala la matagu mata pulalatie.” \p \v 16 Tiele, egiteu e pariseo isahari loloa mai ele, egite goio vikara maie mago “La tahalo ale, La Tahalo Uru kama bahea somaie, la vuhula eia oio kama togo la haro tabu ge, ale eia vimahuli egiteu oio vola.” \p Eala moli isahari tegiteu vei mago “Mave, eia koramuli la tahalo la iruru isa ge igoto la golu la karutula ale maie?” Tiele, la gabutatalala tegiteu kamati visauru ele, egite vaubiti la merera mai ele, egiteu la malosu ilua. \p \v 17 Goio, egite tahi vulo lou la tahalo ale pala mata keale, mago “Eme ge vei mave te la tahalo ale vimatagagati la matamu ele?” \p Eia goma veia giteu mago “Ale eia isa tegiteu la bilalaha te La Uru.” \p \v 18 Eia sesele, la tahalo ale pala mata kea, eala moli la matala oio mata pulalati ele, eala moli egiteu e Iuda veia eia kama sesele, kara ale egite tolati e tamala me tilala soio tegiteu, me egira vikara matagaga soio tegiteu. \v 19 Goma egite tahi egirua mago “Ale e latu mulua, ia? Soioge eme e tilala taposea eia mata kea moli maio, me ale amula ge vei mave oio tetalale? Me eia igo mave ale eia mata pulalati lou ele?” \p \v 20 Goio, e tamala me tilala koli loua giteu ele mago “Eia sesele, la tahalo ale eia e latu milua sesele, me amila rovi taia veia te la piligo tetala kara igoie eia mata kea mai ele. \v 21 Eala moli ale igoie eia mata pulalati, amila kama rovi la vuhula, me la tahalo ale igoa, amila kama rovi taia. Eia uruti, taritigi amuto ge tahia, eia ge vei mulia mutou ovola.” \v 22 Me egira vikara moli mai ele, la vuhula egira taga egiteu e Iudao, la vuhula egiteu la mulugaluga tauti la vigagiala maie veia mai ge la tahalo isasa ge veia e Iesus eia e Kraist, egite ge pitaroa veia eia kati ge lotulotu tomi legiteu e Iuda lou. \v 23 Tiele la vuhula eiala e tamala me tilala vei molitia giteu mai ele mago “Eia uruti, amuto ge tahia.” \p \v 24 Tio, egiteu e pariseo goio tola lou la tahalo ale la matala mata kea palale, goma egite tutu toleala mago “Eme ge vei tataho moli la isa La Tahalo Uruo, la vuhula la tahalo ale e Iesus, amite rovia veia eia la tahalo ale kama kokora isale, eala eme umalati ge vaisalea te la paga ale eme veia eia igotiamu.” \p \v 25 Eala moli la tahalole eia goma ule baoli molia giteu ele mago “Mai ge eia la tahalo la iruru ka ouka, alele eau kama rovia. La paga isasa moli eau rovitia eia maie, pala la matagu mata kea, me ale igoie la matagu mata pulalati loue.” \p \v 26 Goio, egite tahi vulo loua mago “Eia igo sesele lava oio taume ele, goma la matamu mata pulalati mai ele, e?” \p \v 27 Goma, eia koli totolo rivu loua giteu mago “Eau veitia mutoue, amuto kama masagea ge loloa. Ilava amuto masagea ge lolo loua e? Soioge amuto tai masagea veia amuto ge la valalua tetala, ia, eala amuto tahi susukuaue?” \p \v 28 Goio, egite gilotiao, egite veiala mago “Me eme moli la tahalo tetalale. Amite ale la valalua la vimari te Moses moli. \v 29 Amite rovi seselea veia La Tahalo Uru eia abi moliale Moses la vikarakarala, isa lou ouka, me la tahalo ale eia love, amite kama rovia.” \p \v 30 Goma, la tahalole koli loua giteu mago “La paga ale eia isapolo sesele! Amuto kama rovia veia eia sibitala love, eala moli eia igo mata pulalati la matague. \v 31 Etato tomi rovitia veia La Tahalo Uru eia kama ge lolo la vikararala te la tahalo la iruru isasa. Eala moli mai la tahalo isa ge lotu sesele tavu La Tahalo Uruo, me eia tilimuli tigi la gabutatalala tetalao, tio La Tahalo Uru ge lolo la vikarakarala tetalale. \v 32 Ale sokoa alaurati karati igoie, etato souka lolo la rere la tahalo isasa veia e tilala taposea me eia mata keati maie, goio la tahalo isasa ge igo mata pulala lou la matala mai ele. \v 33 Mai ge La Tahalo Uru kama ge baha la tahalo ale somaie, soioge eia kama ge igo la igogolu isa ale uru mai aleie.” \p \v 34 Tio, egite lolo la vikararala tetala mai ele, la hate giteu mamasi seseleala, egite goio koli louala mago “A ge, e tilamu savume te la gauru, me eme tai la tahalo la iruru sesele! Ale eme masagea ge vimari amiteue, ia?” Goma egite gusi kaluvu moliala mai ele, egite goio kumuli tarotiao. \s1 La merera la tilovo tegiteu ale mamata me egiteu ale mata kea \p \v 35 Goio, e Iesus lolotia veia egite pitaroti la tahalole sogalao, eia goio pogea, me eia veiala mago “Mave, eme tautaulailoti te Latu La Tahalo, ka ouka?” \p \v 36 Goma, eia veiale Iesus mago “Tahalo uru, e Latu La Tahalole ere? Eme ge veipaleagu tio eau ge tautaulailo tetalao.” \p \v 37 Goio, e Iesus veiala mago “Me male eme hilotiae. La tahalo moli male amula vikarakara ge!” \p \v 38 Tio, la tahalole goio veiale Iesus mago “Tahalo Uru, eau tautaulailo taumele.” Goma eia toto tulu sotalo, eia lagu tugu moliti me eia lotu tavu moliti e Iesuso. \p \v 39 Goma e Iesus veiala “Eau gomai te la maututula veia ge vimatagaga la valalua me hatavivile. Tiele mai egiteu ale kama mamatao, mai egiteu ale la maligoma eia pigi robo la kalulu giteu, eau ge vimatagaga egite, me egiteu ale veia egite mamatao, eau ge vahilo legiteu la maligoma uru ale pigi robo egiteu, egite ge rovia veia egiteu la mata kea moli.” \p \v 40 Eala moli egiteu e pariseo isahari oio hagagavi moli ele, egite lolo tai la vikararala aleie, egite goma tahitia mago “Mave, soioge eme veia amiteu tai mata kea, ia?” \p \v 41 Goio, e Iesus veia giteu mago “Mai amuto ge mata keale, amuto la iruru ge ouka. Eala moli amuto vei tataho lou la mari tamutou veia la mata mutou oio mamatale, amuto rovi tataho la gauru, tiele amuto veitia mai ele, la merera tamutou lou eia tomu sasae la vulovulo mutou ale amuto igigoa, la vuhula amuto matagagati te la merera te La Tahalo Uru. Amutou la iruru uru oio, amutou souka mavulaha.” \c 10 \s1 La vikarara la tilovo te la bigomu la sip \p \v 1 Goio, e Iesus toi isa la vikarara la tilovo maie “Ale eau vei seselea mutou, mai la tahalo isa eia kama tiroro logala te la mata la bigomu, eia goio sae utu moli la bigomu ele, me eia goilo, la tahalo ale mai ele, eia la tahalo la pakalila, me la tahalo la paruutula tai ele. \v 2 Eala moli la tahalo ale tiroro sesele logala te la mata giteu la sipuo, eia la tahalo la vibaumuli tegiteu la sip seselele. \v 3 La tahalo la vibaumuli la mata, eia kokopea la tahalole la mata. Me egiteu la sip, egite rovi sesele la golulale. Eia tatola sesele la isa giteu la sip tetalale, eia goio pulipuli egiteu sogalao. \v 4 Mai eia tola tomiti egiteu la sip ale tetala sogalao, tio eia goio mamuga egiteu, tiele me egiteu la sip tai ele, egite rovi sesele la golulale, eala egite tilimulimulia mai ele. \v 5 Egite kama ge tilimuli la tahalo isapolo, ouka. Egite helehele moli leia, la vuhula egite lolo kosi la golu la tahalo ale isapolo.” \v 6 Eala moli e Iesus veia giteu la vikarara la tilovo aleie, me egite kama matagaga te la masova la merera ale eia veitia giteu ovolale. \s1 E Iesus eia la kalia la tahalo la vibaumuli la sip \p \v 7 Tio, egite kama matagaga te la masova la merera la tilovo te la vibaumuli la sip, goio e Iesus lubea giteu la masovala maie mago “Ale eau vei seselea mutou, eau sesele, eau la mata tegiteu la sip ele. \v 8 Mai egite tomi ale vimuga takuo, egite visigolo moli amutou te la merera ale egite vimari le amutou ovolao, egite mai la tahalo la pakalila sesele. Eala moli egiteu la sip taku kama lololo egiteu ele. \v 9 Eau sesele la mata la goililola. Mai ge isa ge gomai muga taku, me eia ge goilo la ilo la bigomu taku, La Tahalo Uru ge vimahulia me eia ge sigiroboa. Eia ge goililo, me eia ge gogalagala, tio eia ge sivuti la ilali, eia ge pou tataho seseletio. \v 10 La tahalo la pakalila eia kama guvi bulalahu, eia guguvi moli te la pakali giteu la sip me la bili peho giteu, me te la igo marapa giteu ele. Eala moli eau, eau guvi veia egiteu la sip taku ge sau tola la mahulila, me la mahulila alele eia ge volu sesele te la tia giteu. \p \v 11 “Eau la kalia la tahalo la vibaumuli la sip. La tahalo la vibaumuli la sip ale taritigi, eia sugu taro la mahulila tetala veia ge vimahuli egiteu la sip tetala. \v 12 La tahalo ale igogolu moli te la mapa, me eia kama la tahalo la vibaumuli la sip tetala sesele, eia kama e taho giteu la sip seselele, eia ge hilo la paia hou ale mororosi sesele eia ge gali tavu egiteu la sip ele, eia ge hele taro moli egiteu. Tiele me la paia hou ge barautu lahu egiteu la sip ele, eia ge kumuli bura lahuti egiteuo. \v 13 La vuhula maie la tahalo alele eia igogolu moli te la mapa, eia kama gabutatala egiteu la sip ele. \p \v 14 “Eau, eau moli la kalia la tahalo la vibaumuli giteu la sip. Eau rovi egiteu la sip ale taku, me egiteu la sip ale taku tai rovi eaue, \v 15 mai moli e Tete roviau, me eau rovi tai e Tete. Eau ge sugu taro la mahulila taku veia ge vimahuli egiteu la sip taku. \v 16 Eala moli egiteu la sip taku isahari souka goilo te la bigomu. Eau ge vagoilo tai egiteu, me egite ge lolo la golugu. Tio egiteu ge la karakara la sip ale ge isa moliti, me la tahalo la vibaumuli giteu tai ge isa moliti. \v 17 Me la vuhula sesele ale e Tete gogoau eia maie: Eau sugu taro la mahulila taku, eala moli eau ge mahuli lou. \v 18 La tahalo isa kama abi taro la mahulila taku, ouka. Te la masasagala taku moli, eau sugu taro la mahulila taku ele. La vuhula eau sau tola la vagagarila veia eau ge sugu taro la mahulila takue, me eau ge mahuli rivu tai lou. La vikararala ale, eau abi seselea loio te Tete.” \p \v 19 Tio, egiteu e Iuda loloa e Iesus eia vikara mai ele, la gabutatalala tegite kamati isa moli oio vola, egiteu la malosu iluati, isahari veia la merera tetala eia taritigi, isahari veia eia kama kokora. \v 20 Tiele la valalua usu egite goio veia maie “Ale la hitu ale kama kokora isa oio pouti tetalale, eala eia pauati mai ele. Ilava amuto roromulia, e?” \p \v 21 Eala moli isahari lou egite vei mago “La tahalo ale la hitu ge pou tetala, eia kama koramulia ge vevei la vikarakarala ale tikukumu mai aleie. Mave, la hitu koramuli tai eia ge igo mata pulala la mata giteu ale mata kea, ia?” \s1 Egiteu e Iuda muku pile seseleti e Iesus \p \v 22 Mulimuli la haro goio sibitala ale egiteu e Iuda ge igo isa la pougolula oata e Ierusalem, la haro alele egite virovilala muli lou la haro ale pala egite kope lou la mata la luma la lotu uruo. Ale la leavala, la maigi uru pepeho oio vola. \v 23 E Iesus eia pou oio e Ierusalem, eia tatuga oilo la matabala te Solomon oio te la luma la lotu ale uruo. \v 24 Tiele egite Iuda goio magiri galilitiao, me egite tahia mago “Mave, eme masagea ge igo maraparapa moli la gabutatalala tamiteu te la tau robomu, ia? Mai eme e Kraist, taritigi eme ge vei matagagea miteu ovola.” \p \v 25 Goio, e Iesus veia giteu mago “Me eau veitia mutoue, eala moli amuto kama tautaulailo ovola. La igogolu tomi ale eau igigoa te la isale Teteo, eia veipala la isagu ele veia eau e Kraist sesele. \v 26 Eala moli amuto kama la karakara la sip taku, eala amuto kama roromulimuli la merera taku ele. \v 27 Egiteu la sip taku, egite lololo la golugu, me eau rovi egiteu, me egite tilimulimuli eaue. \v 28 Tio eau ge abia giteu la mahulila ale sesele, la kaluvula ge ouka. Egite kama ge peho lou, me isa kama ge lapu taro lou egiteu lomai te la limague. \v 29 E Tete ale sugu taroti egiteu somai takue, la vagagarila tetala eia uru sesele, me eia kama koramulia isasa ge lagi taro lou egiteu loio te la limale Tete. \v 30 Amila me Tete isa moli.” \p \v 31 Goio, egiteu e Iuda loloa eia vikara mai ele, egite goio abi la uatati veia ge ubi leia. \v 32 Goma e Iesus veia giteu mago “Eau sile palati la igogolu te Tete ale taritigie, eala moli amuto gabutatala ere igogolu lou male amuto masagea ge ubi leau la uati e?” \p \v 33 Goio, egiteu e Iuda koli louala mago “Amite kama ge ubi eme te la igogolu ale taritigi, ouka. Te la vikara barala soio te La Tahalo Uru moli. Eme la tahalo bulalahu moli, eala moli eme veia eme La Tahalo Uru.” \p \v 34 Goma, e Iesus koli rivu loua giteu mago “Eia mave? La kekesi oilo te la merera tamutou, te ururu tamutou tai, eia maie ‘Amuto la uru mai taiau.’ \v 35 Ale egiteu la valalua ale la merera te La Tahalo Uru goioti tegiteu palao, eia toi legiteu la uru veia egite la uru mai tai eia. La vikararala te La Buk Tabu eia kama galo gologoloe. \v 36 Eala moli e Tete sesele raragitiau me eia baha tarotiau somai te la maututula. Male, eau ge veia mutou maie ‘Eau e Latu La Tahalo Uru’ me ilava amuto ule papai louagu la merera veia eau vikara baratia La Tahalo Uru e? \v 37 Amuto kama ge gabu tikumu bulalahu eau, eala moli eau igoti isahari la golu la karutula, eala eia koramulia veia amuto ge roromuliau. \v 38 Eala moli mai amuto kama masaga ge roromuli la merera taku, taritigi amuto ge gabu tikumu la igogolu ale isapolo ale eau igoa te la limagu, veia amuto ge rovia mai ele veia e Tete pou taku, me eau vikapopoti le Tete.” \p \v 39 Goio, egite loloa la vikararala tetala mai ele, egite igo totolo pepeho ovola, egite ga lao tolea, eala moli eia paru keke taro moli egiteu ele, eia tugatio. \p \v 40 Tio, e Iesus goio beu rivu loua soio te la galele Iordan loio, eia goio tulu polo la lalu e Iordan ele, me eia goio sibitala te la baa ale e Ioanes vuvuhi la valalua ovolao. Tiele eia goio pou te la gale alele. \v 41 Goio la valalua me hatavivile usu goio tetala, me egite vikara maie mago “Sesele e Ioanes kama igo isa la golu la karutula, eala moli la vikarakarala tomi ale e Ioanes totoia te la tahalo aleie, eia sesele tomi moli.” \v 42 Me ale e Iesus pou oio te la gale alele, la valalua usu egite tautaulailoti oio tetalale veia egite ge tilimulia. \c 11 \s1 E Lasaras peho \p \v 1 La tahalo isasa ale e Iesus rovia, la isala e Lasaras, eia lea. Me la mautu tetala e Betani, ale la mautu te Maria me tabarala e Marta. \v 2 Ale e Maria moli ale vipupuru la vaha La Uru e Iesus me la lalu ale mali vivili tataho, la mapala uru sesele, me eia sorobi tagara la vahala me la ivula ale malalauo. Me e Maria moli aleie, eiala e hatamalela e Lasaras eia leao. \v 3 Goma egirua e hatavilevilela iluale baha la vikararala soio te Iesus mago “Tahalo Uru, la tahalo ale eme puhi titigiae, eia omaie lalea.” \p \v 4 Goio, e Iesus loloa mai ele, eia goio vei mago “Ale La Tahalo Uru visibitala la ileale soio te Lasaras, la vuhula kama te la pileho veia e Lasaras ge pehola, ouka. La vuhula veia eia ge veipala la vagagari La Tahalo Uru ele, me la valalua tai ge vaisale e Latu La Tahalo Uru oio vola.” \v 5 E Iesus eia masaga sesele e maura e Marta mira me tabarala e Maria, me hatamale girua tai e Lasaras ele. \v 6 Goma e Iesus loloti e Lasaras oio leati mai ele, eala moli eia pou muga lou la haro ilua oio te la mautu ale eia popou ovolao. \v 7 Mulimuli eia goio veia giteu la valalua la vimari tetala mago “Etato ge beu rivua soio e Iudea.” \p \v 8 Goio, egite la valalua la vimari tetala veiala mago “Tahalo La Vimari, umala ge, la paga souka tabaa, egiteu e Iuda ga ubi mugati leme la uatio. Ale eme masagea ge goio lou te la baa aleio, ia?” \p \v 9 Goma, e Iesus ule baoli loua giteu ele mago “Mave, la mata la haro eia paga vei la babaa tomi la mata la haro savulusa gete lua te la haroharo tomi. Eala la baa ale malau eia koramulia etato ge tuga tataho ovola, kama ge tutuaki. \v 10 Eala moli mai la paga ge logo, etato kamati ge tuga tigi, la vuhula la paga maligomati.” \v 11 Tio eia veia giteu la merera la tilovo kaluvu mai ele, eia goio vei loua giteu mago “E tabara gatou e Lasaras, eia oio mavutati, eala moli eau ge goio ge paloa.” \p \v 12 Goio, egite la valalua la vimari te Iesus veiala mago “Tahalo Uru, mai eia ge mavuta, eia soioge mahuli tataho lou.” \v 13 La vuhula egite veia e Iesus vevei la mavutala mai ale te la logo, eala moli ale e Iesus toi la mavutala, la masovala maie veia e Lasaras oio pehoti. \p \v 14 Goma, e Iesus hiloa veia egite kama abi tigi la masova la merera tetalae, eia goio sile palatia giteu mago “E Lasaras oio pehoti, \v 15 me eau sagege pepeho ale eau kama goio hari tetala, la vuhula eau gabutatala amutou veia mai amuto ge hilo la igogolu taku isa ale uru sesele, la tautaulailo tamutou ge magiri vagari sesele. Gomai, etato ge goio tetala.” \p \v 16 Goio, e Tomas ale egite totoi taila e Didimas, eia veitia giteu la valalua la vimari te Iesus tomi ele mago “Ioge, etato ge tuga, etato ge peho vikapopo me eia oio e Iudeao!” \s1 E Iesus eia la vuhu la mahuli rivula me eia la vuhu la mahulila tai ale sesele \p \v 17 Goio, e Iesus hiliti, eia tuga goio e Iudea. Eia goio sibitala oio, eia rovitia veia e Lasaras tabuliti la logo ivaati te la lulu la pileho. \v 18 Eala moli la mautu e Betani ele, eia hagagavi moli soio e Ierusalem, mai la kilomita ilua moli. \v 19 Me te la pilehole Lasaras ele, egiteu la valalua me hatavivile Iuda mapaiti goio te Marta me Maria veia egite ge lolohugu egirua te hatamale gira ale pehoti ele. \v 20 Goma e Marta lolotia veia e Iesus loio tatuga te la gauru, eia goio polo lahea soio te la gauru ele. E Maria moli oio popou te la lumao. \p \v 21 Goma, e Marta veiale Iesus mago “Tahalo Uru, mai eme ge pou omaie, soioge e hatamalegu kama ge peho maie. \v 22 Eala moli ale gageie taie, eau rovia veia mai eme ge kaka tavu La Tahalo Uru te la paga isasa ale eme masagea veia eia ge igoamu, eia ge abi moliamu.” \p \v 23 Goio, e Iesus veiala mago “E hatamalemu ge mahuli rivu lou.” \p \v 24 Goma, e Marta veiala mago “Eau rovia veia eia ge mahuli lou te la tapasi la maututula, te la imamala ale la valalua me hatavivile tomi ge hiliti lou ovolao.” \p \v 25 Goio, e Iesus vei louala mago “Eau la vuhu la mahuli rivula, me la vuhu la mahulila tai ale sesele, eau molie. La tahalo ale ge tautaulailo takue, mai eia ge peho, eiala moli eia ge mahuli rivu lou. \v 26 Egite tomi ale mahulihuli, me egite tautaulailo takue, egite kama ge peho, ouka. Egite ge mahuli mai la tori. Mave, eme matagaga te la vikararala taku, e?” \p \v 27 Goma, e Marta veiale Iesus mago “Eia sesele Tahalo Uru, eau matagaga sesele veia eme e Kraist, eme e Latu La Tahalo Uru. Eme la tahalo ale La Tahalo Uru veitia veia eia ge bahea somai te la maututula.” \s1 E Iesus tali \p \v 28 Goio, e Marta vei kaluvu moliale Iesus la vikararala tetala mai ele, eia goio tolati e tabarala e Mariao. Eia goio puli gale e Maria, me eia vei keke moliala mago “Male, La Tahalo La Vimari oio popouo, eia tatola emei.” \v 29 Goma e Maria lolo molia mai ele, eia hiliti harari moli, eia goioti te Iesuso. \v 30 Eala moli e Iesus souka goluma la mautu, eia soloio moli la baa ale e Marta goio mugati tetala ovolao. \v 31 Tiele egiteu e Iuda ale vipou totomi e Maria oilo te la luma ale egiteu lolohugu ele, egite hilo moli e Maria hiliti paripari moliti, eia gali sogalao, egite tilimulitiao. Egite gabua veia eia ge goio ge taitali oio te la liba. \p \v 32 E Maria goio sibitala te la baa ale e Iesus popou ovolale, eia hilo moliti e Iesus ele. Eia goio toto tulu, eia veiala mago “Tahalo Uru, mai eme ge omaie, e hatamalegu eia kama ge peho.” \p \v 33 Goio, e Iesus hiloa eia taitali, me egiteu e Iuda tai ale tilimuli egiteu tali tai ele, eia tai goio talitio. Eia gabu sesele la iloburukola te la ilola, eia gogo sesele e Lasaras ale pehoti ele, \v 34 eia goio tahi egiteu mago “Amuto ulaia oiove, e?” \p Egite goio veiala mago “Tahalo Uru, eme gomai ge hiloa.” \p \v 35 Goio, e Iesus loloa mai ele, eia goio tali. \p \v 36 Tiele, egiteu e Iuda hiloa mai ele, egite vei mago “Hiloa, eia gogo sesele e Lasaras ele.” \p \v 37 Goma, isahari tegiteu goio vikara lou mago “Me la tahalo ale eia igo mata pulala la mata la tahalo ale mata keao, me ilava eia kama masagea ge gomai hari ge vimahuli la tahalo ale, eia umala ge pepeho, e?” \s1 E Iesus vimahuli lou e Lasaras \p \v 38 E Iesus gabu lou la iloburukola ale uru pepeho, eia goio la lulu la pileho. Eala moli la lulu aleie, egite olia te la vai la maitete, me la uati isa uru egite buli robo la mata la lulu ele. \v 39 Goio e Iesus veia giteu mago “Amuto buli taroa la uati ele!” \p Eala moli e Marta, ale e hatavile la tahalo ale pehole, eia veiale Iesus mago “Tahalo Uru, la haro ivaa poloti, soioge eia ge maliati.” \p \v 40 Goio, e Iesus veiala mago “Mave, eau vei mugatiamu ovola maie, mai eme ge tautaulailo taku, eme ge hilo la vagagarila te La Tahalo Uruo.” \p \v 41 Tio, egite goio buli taro la uatio, goma e Iesus eia taga soata, me eia vei mago “Tete, eau vei tataho emei, la vuhula eme loloti la kilaka taku. \v 42 Eau rovia veia eme lolo bibibi la kilaka taku. Eala moli eau gabutatala la valalua me hatavivile omai magiri hagagavi, me egite loloti la vikararala aleie. La vuhula egite ge rovi seselea veia eme baheau somaie.” \p \v 43 Eia vikara kaluvu mai ele, eia goio tola vagari mago “Lasaras, eme gogala!” \v 44 Tio la tahalo ale pehole, eia hiliti me eia gali sogala. La vahala ilua me la limala, egite viri robola la kulikuli, la lagula tai egite avu roboa. \p Goio, e Iesus veia giteu mago “Amuto ge lubea, eia ge tuga tataho lou.” \s1 Egite la mulugaluga kisi la vikararala veia egite ge bili peho e Iesus \r (Matiu 26:1-5; Mark 14:1-2; Luk 22:1-2) \p \v 45 Tio, egiteu la valalua e Iuda usu, ale egite goio lolohugu e Mariao, egite hilo la paga ale e Iesus igotia, eia vimahuli rivuti lou e Lasaras taro la pileho, egite goio tautaulailo seseleti tetalao. \v 46 Eala moli egite isahari goio tegiteu e pariseole, goio veia giteu la paga ale e Iesus igotiale. \v 47 Tiele egite la mulugaluga tegiteu e pris, me egiteu e pariseo tai, egite goio pou vikapopo, me egite vei mago “Etato ge igo mave sesele, e? La tahalo ale e Iesus eia igo usuti la golu la karutula, \v 48 mai ge etato ge mata soli molia veia eia ge igigo molia mai ele, la valalua tomi ge tilimuli tomia. Me egiteu e Rom ge gomai ge igo gegeru la luma la lotu tegatou urue, vikapopo me egiteu la valalua tai tegatoue.” \p \v 49 Eala moli isa tegiteu ele, la isala e Kaiapas, eia la mulugaluga tegiteu e pris te la leavala alele, eia goio hiliti, eia veia giteu mago “A ge, amuto kama rovi isa la paga. \v 50 Ilava amuto gabutatala papai te la tahalo ale? Eia taritigi moli veia la tahalo isa moli ge peho, me la valalua me hatavivile tomi ge mahuli. Eia kama taritigi veia etato e Iuda tomi ge vilua te la lima giteu e Rom.” \p \v 51 Eala moli eia kama veia maie te la gabutatalala tetala moli, ouka. Eia la mulugaluga tegiteu e pris te la leavala aleiele, me eia goio toi laha la vikararala mai ele te Iesus veia eia ge peho ge vimahuli egiteu e Iudale. La Tahalo Uru sesele visibitala la mererale te la harele Kaiapas ele, veia e Iesus ge peho robo la valalua e Iuda. \v 52 Eala moli kama egiteu e Iuda moli ele, ouka, ale eia ge peho veia ge vikapopo tomi e latatu La Tahalo Uru ale pou lalahu te la maututula tomi, ge vagoilo egiteu te Tamala, veia egiteu ge isa moli. \v 53 Goio e Kaiapas vikara vagari, goio egite sokoti la vikarara la bili pehole Iesus te la haro moli aleiele. \p \v 54 Tiele, e Iesus kati pou palala lou te la mata giteu e Iudale, eia goio hele soata la hohoi te la mautu la rorobo isa egite toila e Praim. Tio me eia goio pou muga ovola vikapopo megiteu la valalua la vimari tetala. \p \v 55 Goio, la imamala La Ilali La Poloselela tegiteu e Iuda eia hagagaviti. Eala moli la haro la pougolulale souka sibitala, egite la valalua usu te la maututula ge muga soata e Ierusalem, ge igo la vulovulo isahari tegiteu e Iuda te la vimaroka la tahalo, pala muga te la imamala la Poloselela. \v 56 Tiele egite masagea ge paa muli e Iesus oio e Ierusalem ele. Egite goio magiri oilo te la luma la lotu, me egite vitahi baololi egiteu ele mago “Amuto gabutatala mave? Eia ge gomai te la pougolula, ka ge ouka?” \v 57 Eala moli egiteu la mulugaluga tegiteu e pris, me egiteu e pariseo tai, egite tutu tolatia giteu la valalua veia mai isa ge hilo vuti e Iesus te la baa ale mave, eia ge goio ge veipalea giteu veia egite ge goio ge lao tolea ge lapua soio te la vigagiala. \c 12 \s1 E Maria vipupuru la vahale Iesus me la bulu la obu ale mali vivili tataho \r (Matiu 26:6-13; Mark 14:3-9) \p \v 1 Goio, la haro iuolo soloio veia egiteu e Iuda ge igo la pougolula te La Ilali La Poloselelale, e Iesus mite me la valalua la vimari tetala, egite goio e Betani. Eia la mautu te Lasaras, la tahalo ale e Iesus vahiliti taroa la lulu la pileho. \v 2 Goio egite igoale Iesus la ilali oio te la mautu alele. Goma e Maria ubibi la ilali ele, e Lasaras oio vipou tomi legiteu la valalua ale ali vikapopo le Iesus te la ilali ele. \v 3 Goio e Maria abi isasa la botol la bulu la obu ale mali vivili tataho, la mapala uru, eia goio tigitaro tomia soio te la vahale Iesus, eia goio vipupuru la vahale Iesus ele, eia vipupurua kaluvu, eia goio sorobi tagarala me la ivula ale malau pepehole. Me la malia la bulu la obu ale eia tigi tarotiale, eia mali vivili sesele oilo te la ilo la lumale. \p \v 4 Goma, isasa tegiteu la valalua la vimari te Iesus, e Iudas moli ale mulimuli ge sugu taro e Iesus soio te la lima giteu la gima, eia hiliti, eia goio tahi egiteu mago \v 5 “Ilava etato kama abi la bulu la obu ale la mapala uru pepehole, ge vaharia soio tegiteu la valalua la ilotoloto, veia egite ge lotoa? La lalu ale la mapala uru sesele, koramulia etato ge abi e kina salatu vitu ovola, etato ge suli egiteu la valalua ale pou la savelela te la uati ale uru ele.” \v 6 E Iudas vikara mai ele, eala moli eia kama gabutatala egiteu la morivava, ouka, eia gabutatala moli veia ge pakalia, la vuhula eia baumuli la tilalau la uati tegiteu ele, me eia pakalikali tai ovolale. \p \v 7 Goma, e Iesus veia giteu la valalua la vimari tetala mago “Amuto ge mata soli la tavile aleie, ale eia mai ale mulimuli seseleti la vulovulo la abiri la tahalo ale pehoti, eia raragiti la vovogu te la haro ale egite ge ulaiau te la lulu la pileho. \v 8 Egiteu la valalua la morivava, egite ge pou omai tamutou la leavalavala tomi, eala moli eau kama ge pou tabaa lou omai tamutoue.” \s1 Egite la mulugaluga tegite pris kisi la vikararala veia ge bili e Lasaras \p \v 9 Tio, egiteu la valalua e Iuda usu, egite lolotia veia e Iesus sibitalati oio la mautu e Betani, tio egite goio tetala ovola, egite veia ge hiloa, ge hilo tai e Lasaras ale egite loloti la rerela veia e Iesus vahilititia taro la lulu la pileho. \v 10 Egiteu la mulugaluga tegiteu e pris, egite hiloa veia la valalua ititia soio te Iesus me Lasaras, la hate giteu mamasi, egite goio kisi la merera veia ge bili e Lasaras, mai tai egite viputumulitia veia ge bili e Iesus tai ele. \v 11 La vuhula egiteu e Iuda usu gabu tikumuti la igogolu ale uru e Iesus igigoa, egite kati roromuli egiteu e pris ale mamuga egiteu te la lotu tegiteu. \s1 E Iesus goilo e Ierusalem mai la tirorola te la uru sesele \r (Matiu 21:1-11; Mark 11:1-11; Luk 19:28-40) \p \v 12 La valalua me hatavivile usu, egite guviti veia egite ge hilo la pougolu La Poloselela, egite oio pou tomitio. Goio mai galigeli egite loloa veia e Iesus masaga taia veia ge goio tai e Ierusalem ele. \v 13 Tiele egite goio abi la veveve la liliu, me egite goio polo lahea soio te la gauruo. Goio egite tatola mago \li1 “Hosana! \li1 Etato ge vaisale la isa la tahalo \li1 ale visibitala la merera te La Uru! \li1 La Tahalo Uru ge balava sesele \li1 la mulugaluga tegatou e Israel!” \p \v 14 Goio, e Iesus goio paa muli isa e donki, me eia goio pou ovolale. Eia mai La Buk Tabu Ale Pala eia veitia maie: \li1 \v 15 Amuto la valalua e Israel, \li1 umala amuto ge tataga La Uru mutou; \li1 Hiloa eia loiole, \li1 eia pouti oata te latule donki, \li1 eialati loiole. \p \v 16 Eala moli egiteu la valalua la vimari tetala, egite kama rovia veia La Buk Tabu eia vikarati te Iesus ele, ale eia ge guvi oio e Ierusalem mai La Tahalo La Vimahuli sesele tegiteu. Eala moli mulimuli e Iesus beutia soata te Tamala, eia sau tolati la tokoromola tetala, tio te la imamala alele egite gabutala lou la vikararala te La Buk Tabu ale veitia tetalale. Me egite ge gabutala muli lou la vaisalela te la valalua soio tetala ale eia goilo e Ierusalem ele, veia la merera te La Buk Tabu eia puru seseleti ovola. \p \v 17 Eala moli la valalua usu virere taliti e Iesus ale eia vimahuli e Lasaras taro la lulu la pileho, \v 18 tio la valalua me hatavivile usu lolo lahuti la golu la karutula ale eia igotiao, egite goio paa mulia soio te la gauru ele. \v 19 Tio egiteu e pariseo hiloa mai ele, egite goio vikara mulia kabili tegiteu lou mago “Ealale, etato tovo lalaitia la gauru usu ale ge magiri robo la tahalo ale, eala moli amite kama koramulia. La valalua me hatavivile tomi iti sapatia soio tetala, egite tilimulitiao.” \s1 Egiteu e Grik isahari masagea ge hilo e Iesus \p \v 20 La valalua me hatavivile tomi usu egite goatati e Ierusalem ge igo la lotu tavu La Tahalo Uru te la haro la pougolula te La Ilali La Poloselela. Egite Grik tai isahari tilimuli egiteu soata e Ierusalem ele. \v 21 Goma egiteu e Grik goio te Pilip, egite veiala mago “Tahalo uru, amite masagea ge hilo e Iesus.” \v 22 Tio e Pilip goio veiale Andrew la kilaka tegiteu ele, goma e Andrew me Pilip goio veitiale Iesuso. \p \v 23 Goio, e Iesus koli la vikararala tegirua mago “La imamala sibitalati ale e Latu La Tahalo ge beua soata la ilo la lage, eia ge sau tola la tokoromola tetala oata. \v 24 Ale eau vei seselea mutou, mai la vavua la kon eia kama ge paru sotalo la magasa, ge parara, eia kama ge kusi, eia ge tabuli sekela moli mai ele, eala moli mai eia ge paru sesele soio te la magasa ale taritigi, ge parara, tiele eia ge koramulia mai ele veia ge kusi, eia ge vua pepeho seselele. \v 25 Mai isasa ge gabu vauru moli la mahulila tetalao, la mahulila tetala ge kokovu taroa. Eala moli la tahalo ale poke taro moli la mahulila tetala omai te la magasa, eia ge sau tola la mahulila tetalale, eia ge abi la mahulila ale kama ge kaluvu lou. \v 26 Tiele mai isasa ge bole la igogolu takue, eia ge tilimuli eau. Me la bilalaha taku eia ge vikapopo eau te la mautu ale eau ge pou ovolao. Mai la tahalo ge la tahalo la igogolu sesele taku, e Tete ge vibalavea. \s1 E Iesus vikara matagaga te la pileho tetala \p \v 27 “Ale igoie, eau taga, la vovogu pariri, eala moli eau ge kaka mave, eia koramulia veia eau ge kaka maie mago ‘Tete, eme ge vimahuli eau te la paga ale ge sibitala taku gageie’? Ouka, la vuhula eau kama masagea ge posa maveve taro la igogolu aleie, la vuhula la igogolu taku sesele ale eau gomai tavua eiala eau poga tavutiae igoie. \v 28 Tete, eia taritigi veia gageie moli eme ge vauru la isamu omai te la igogolu ale eau ge igoa taume!” \p Goio, e Iesus vikara mai ele kaluvu, me oio moli ovolale la golule isasa eia vikara loata te la ilo la lage mago “Eau vauruti la isagu kaluvuti, me eau ge igo loua gageie.” \v 29 Goma la valalua me hatavivile ale magiri hagagavi oio tetalale, egite loloa mai ele, egite vei mago “Ge, la mori kumuti.” Eala moli isahari egite vei mago “Ouka, e angelo isasa vikarakara soio tetala.” \p \v 30 Goio, e Iesus eia koli la vikararala tegiteu mago “La vikararala ale kama sibitala veia ge suliau, ouka. Eia sibitala veia ge suli la gabutatalala tamutou ele. \v 31 Gageie La Tahalo Uru ge soko la siloko la viputumulila tetala veia ge mata muli la vulovulo la valalua me hatavivile te la maututula. Me gageie tai eia ge kumuli taro e Satan ale eia pou la mulugaluga te la maututula. \v 32 Ale igoie eau so popou omai te la maututula, eala moli mulimuli egite ge lao toleau, egite ge vahilitiau te la tauvalautu, egite ge bili pehoau. Me oio vola eau ge puli la valalua me hatavivile tomi somai takue.” \v 33 Ale e Iesus vikara maie veia ge vei matagagea giteu te la pileho tetalale. \p \v 34 Goio, la valalua me hatavivile koli la vikararala tetalale, egite vei mago “Amite rovi la vikararala te ururu tamiteu eia veia e Kraist ge pou, la kaluvula ge ouka. Me ale mave eme veia eme e Kraist eala moli eme goio vikara lou maie ‘Egite ge vahiliti e Latu La Tahalo, ge katua soata te la tauvalautu’? Eme soioge vikara te Kraist ale mave, eme veia eia ere?” \p \v 35 Goma, e Iesus veia giteu mago “La matagaga kama ge pou tabaa omai tamutoue. Me ale igoie amuto so sau tatola la matagaga, goio amuto ge tatuga te la matagaga. La vuhula la maligoma souka ge pigi robo amutou. Mai la tahalo tatuga te la maligoma, eia kama hilo tigi la gauru. \v 36 Ale igoie amuto so sau tatola la matagaga, taritigi amuto ge tautaulailo te la matagagale, tiele amuto ge posa tahalo sesele mai e latatu la matagaga.” Tio e Iesus vikara kaluvu moli ele, eia goio paru keke taro moli egiteu ele, eia polo kokovuti legiteuo. \s1 Egiteu e Iuda usu kama tautaulailo te Iesus \p \v 37 Sesele, e Iesus igoti la golu la karutula usu te la mata giteu, eala moli egite kama tautaulailo soio tetalale. \v 38 Tiele eia mai sesele la vikararala te la bilalaha ale pala e Aisaia, eia puruti ele, ale eia veia maie: \li1 Tahalo Uru, ere roromuliti la merera taume \li1 ale amite la bilalaha veitia giteu ovola? \li1 Egite ge hilo la igogolu ale vagari te la limamu, \li1 eala moli egite kama masaga ge gabu tikumu \li1 la bilalaha taume. \p \v 39 Goio, la vikararala te Aisaia eia matagaga pepeho mai ele veia egite ge tou e Kraist, mai la merera tetala isa lou eia veia maie: \li1 \v 40 La Tahalo Uru eia avu roboti la mata giteu, \li1 eia vivagariti la tia giteu mai la uati. \li1 Eala egite kama koramulia ge matagaga \li1 te la mata giteu, \li1 Me egite kama ge gabutala tigi tai \li1 te la tia giteu ele, \li1 veia egite ge gabutala rivu la iruru tegiteu, \li1 veia eau ge vimahuli egiteu. \p \v 41 Me la merera te Aisaia eia matagaga tataho mai ele la vuhula e Aisaia hiloti la marasala te Kraist, eala eia goio veipala la merera tetala mai ele. \p \v 42 Sesele, egite la mulugaluga usu tautaulailo tetala, eala moli egite taga egiteu e pariseo, egite kama veipala la tautaulailo tegiteu ele. La vuhula egite gabutatala maie veia egiteu la mulugaluga soukama ge pitaro egiteu loilo te la luma la lotu veia egite umalati ge lotulotu. \v 43 Eala egite gabu vauru moli la veitatahola te la valalua, egite kama gabu tikumu la veitatahola te La Tahalo Uru veia mai egite ge vaisale e Latula, eia ge vaisale tai egite. \s1 La vikararala te Kraist eia ge vimagiri etatou te la viputumulila \p \v 44 Goio, e Iesus tola vagari oata, veia egite tomi ge loloa, eia veia giteu mago “La tahalo ale tautaulailo taku, eia mai ale tautaulailo tamilua me La Tahalo Uru ale bahatiau somaie. \v 45 La tahalo ale hilotiau, eia hilo taiti e Tete ale bahati eau somaie. \v 46 Ale eau gomaie, eau mai la matagaga te la maututula veia la valalua tomi ge roromuli eau, egite kamati ge pou te la maligoma. \p \v 47 “Mai la tahalo isasa eia lolo la vikarakarala taku me eia kama tilimuliao, eau kama ge veiala isasa la merera, la vuhula eau kama gomai veia eau ge magiri mai la tahalo la viputumulila te la valalua otalo te la magasae, ouka. Eau gomai veia ge vimahuli moli egiteu. \v 48 La tahalo ale eia poke taro eau, me eia kama roromuli la vikararala takue, isa oio pou talia ale ge vimagiria te la viputumulila. La vikarara la mahulila moli ale eau valoloti le amutou ovola, eia ge tomu sasae la vulovulo la tahalo ale touti la merera taku, te la tapasi la haro ale la vigagiala te La Tahalo Uru ge magiri ovola. \v 49 La vikarakarala ale kama te la gabutatalala taku moli, ouka. E Tete sesele ale baha taroti eau somaie, eia sesele veveiagu la vikarakarala tomi ale eau ge veveia, me eau ge valolololale. \v 50 Male eau rovi seselea veia la vikarakarala te Tete ele eia visibitala la mahulila ale la kaluvula ge ouka lou. Mai tai la vikarakarala tomi ale eau veveiae, eau tilimulimulia mai ale e Tete vei mulimuliagu ovolale.” \c 13 \s1 E Iesus vuhi la vaha giteu la valalua la vimari tetala \p \v 1 Goio, la haro la pougolula te La Ilali La Poloselela eia hagagaviti, veia mai galigeli egite ge pou sesele ovola, e Iesus rovitia veia la imamala eia guviti veia eia ge hiliti taro la maututula, eia ge goata lou te Tamala. Eala moli eia gogo sesele la valalua me hatavivile ale tetala seseleti omai te la maututula, eia gogo sesele egiteu kara ale eia pehole, eala eia masagea veia ge igo isa uru la irovilala soio tegiteu. \p \v 2 Goma, te la maulavi e Iesus me egiteu la valalua la vimari tetala vipou kapopo te la ilali. Eala moli e Satan vagoilo kaluvutia la gabutatalala tetala ale kama kokora te la tiale Iudas Iskariot, e latule Saimon, veia eia ge sugu taro e Iesus soio te la lima giteu la gimao. \v 3 Eala moli e Iesus rovitia veia e Tamala sugu taro tomitiala la vagagarila tetala tomi soio te la limala. Me eia rovi taitia maie veia La Tahalo Uru sesele bahatia sotaloe, me eia ge beu rivu loua soata te La Tahalo Uruo. \v 4 Goma e Iesus hiliti taro la ilali ele, eia kai taro la kairobola tetalale, eia goio abi isa la lavalava, eia kisia te la kabilila. \v 5 Eia igoa mai ele, eia goio abi isasa la dis, eia sigili la lalu sovolale, tio eia sokoti la vuluhi la vaha giteu la valalua la vimari tetala, me eia sorobi tagarala me la lavalava ale eia kisia te la kabililao. \p \v 6 Eia igigoa mai ele kara oio te Saimon Pita, goma e Pita veiala mago “Tahalo Uru, mave, eme ge vuhi tai la vahague, ia?” \p \v 7 Goio, e Iesus koli la vikararala tetalale mago “La paga ale eau igotia igoie, eme kama rovia, eala moli eme ge rovia mulimulito.” \p \v 8 Tiele, e Pita goio vei louala mago “Eme kama ge vuhi la vahague. Umala sesele.” \p Goma, e Iesus ule baoli louala mago “Mai eau kama ge vuhi emei, eme kamati ge taku.” \p \v 9 Tio, e Pita loloa mai ele, eia goio veiale Iesus mago “Ioge, Tahalo Uru, taritigi eme kama ge vuhi moli la vahagu ele, eme ge vuhi la limagu me la gamagu taie.” \p \v 10 Eala moli e Iesus vei louala mago “Amuto marokati. La tahalo ale pupuruti, eia maroka moli, eala moli taritigi eau ge vuhi moli la vaha mutou, amuto ge maroka sapa viruruti. Sesele, amuto marokati, eala moli kama amuto tomi ele.” \v 11 Me ale eia vikara mai ele, la vuhula eia rovi palati la tahalo ale ge veipalea soio tegiteu la gima. Eala eia vei la vikararala aleie “Kama amuto tomi marokale.” \p \v 12 Tio, e Iesus vuhi kaluvuti la vaha giteu ele, eia goio kai lou la kairobola tetalao, eia goio pou rivu lou, eia goma tahi egiteu ele mago “Soioge amuto ge matagagati te la paga ale eau igotia soio tamutoue, ia? \v 13 Sesele, amuto totoi leau veia Tahalo La Vimari, me Tahalo Uru, me eia taritigi ale amuto totoiau mai ele, la vuhula eau La Uru mutou sesele ale vimari le amutou la gauru la matagaga. \v 14 Tiele amuto matagagati veia eau La Tahalo La Vimari tamutou, La Uru mutou sesele, eau vuhiti la vaha mutou ele mai la igogolu te la bilalaha bulalahu moli. Eia taritigi tai veia amuto ge vuhi tai la vaha giteu e tabarabara mutouo. \v 15 Eau vimariti le amutou la vulovulo aleie, goma amuto tai ge igigo la vulovulo ale maie soio te la valalua me hatavivile taku, amuto ge mai la bilalaha moli tegiteu. \v 16 Ale eau vei seselea mutou, la bilalaha eia kama oata te la uru tetala ale babahea. La tahalo ale tuga te la igogoluo, eia kama uru te la tahalo ale bahea. \v 17 Mai amuto ge rovi tigi la masova la merera taku aleie, me amuto ge igo seselea veia ge vibisi lou amutou mai ale eau vibisiti eau te la mata mutou igoie, tio amuto ge pou la balavala ovola, la vuhula amuto roromuliti La Uru mutou mai ele. \p \v 18 “Eala moli la vimari aleie, eau kama veveia mai ele tamutou tomi. Eau rovi amutou ale eau hiloviti amutou veia ge taku sesele. Eala moli eia ale kama taku, eia igogolu moli mai ele veia ge vipuru sesele la merera te La Buk Tabu Ale Pala eia veia maie: \li1 La tahalo ale vaali tomi leauo, \li1 eia tao taluti eau me la vahalale. \p \v 19 Ale eia soukama igoa, eala moli eau veipala mugatia mutou ovolae. Tiele mai eia ge sibitala mai eau veitiae, tio amuto ge taua la ilo mutou takue veia eau moli la tahalo ale loio seseleti te La Tahalo Uru veia ge vimahuli amutou. \v 20 Ale eau vei seselea mutou, mai isasa eia roromuli la tahalo ale eau bahea te la valolo ale taritigi, eia mai ale roromuli seseleti eaue, me eia roromuli taiti La Tahalo Uru ale bahatiau somai te la maututula.” \s1 E Iesus veipalea veia e Iudas ge sugu taroa soio tegiteu la gima \r (Matiu 26:20-25; Mark 14:17-21; Luk 22:21-23) \p \v 21 Ale e Iesus veiti la merera aleie la vuhula la kalulula eia gabuti la tikumula ale uru pepeho. Eia goma tala pala molitia, eia goio veia giteu la valalua tetalale mago “Ale eau ge veipalea mutoue veia isasa moli oilo tamutou ele, eia ge veipala eau soio tegiteu la gima veia egite ge sivuti eau.” \p \v 22 Tiele, ale eia veitia maie, egiteu la valalua la vimari tetalale vimata tatavu moliti, egite kama rovia veia eia vevei ere tegiteu ele. \v 23 La tahalo la vimari isasa, e Iesus masaga seselea, eia pou hagagavi sesele te Iesus, \v 24 goma e Saimon Pita tuhu mapatiale, eia goio veiala mago “Eme ge tahia mago ‘Ale eme vevei ere mai ele?’” \p \v 25 Goma, la tahalo la vimari ele eia tasuku hagagavi sesele soio te Iesus, eia goio tahia mago “Ale eme vevei ere mai ele?” \p \v 26 Goma, e Iesus koli rivuala mago “Ale eau ge bubu la bautu la bret te la bulu la ilali, me eau ge abialao, la tahalo moli ele.” Tio eia goio abi la bautu la breto, me eia vuhia te la bulu la ilalio, eia goio abiale Iudas Iskariot e latule Saimon ele. \v 27 Tio ale e Iudas abiti la bautu la ilali alele, e Satan goilo tetala. \p Goma e Iesus veiala mago “La igogolu ale eme masagea ge igoa, eme ge igo hari molia.” \v 28 Eala moli egite tomi ale pou te la ilali ele, isa kama rovi la masova la vikararala ale e Iesus veiale Iudas mai ele. \v 29 Isahari, egite gabutalea veia e Iudas eia baumuli la tilalau la uati tegiteu, egite gabua veia e Iesus soioge veveiala eia ge loto isahari la ilali ale egite ge alia te la pougolula uka eia veveiala veia ge abia giteu la morivava bakisi la uati. \v 30 Goio, e Iudas ali kaluvu moli la bautu la ilali ele, eia goio igo harari moli, eia galiti sogalao. La paga tai logoti. \s1 La merera te La Uru ale halaba \p \v 31 Goio, e Iudas galiti sogalao, e Iesus goma vei mago “Ale gageie e Latu La Tahalo ge abi la tokoromola tetala mai la matagaga te Tamala sesele. La valalua usu ge vaisale La Tahalo Uru te la igogolu ale eau ge igoa gageie. \v 32 Ale La Tahalo Uru ge abiagu gageie la tokoromola ale tetala sesele. \v 33 Amutou e latatugu, eau ge vipou tomi le amutou bakisi moli, kamati ge tabaa, mulimuli amuto ge papaa eau. Mai pala eau veitia giteu la mulugalugao, mai ale igoie eau vei taitia mutou ovola maie veia amuto kama koramulia ge goio la mautu ale eau ge goio vola. \p \v 34 “Male ge, eau ge abia mutou la merera isa ale halaba sesele maie: Amuto ge vipuhi tigi legiteu e tabarabara mutou, ge gogo sesele egite. Mai ale eau puhi tatahoti amutou, eau gogo amutou, amuto ge gogo tai egiteu e tabarabara mutou ele. \v 35 Tiele mai amuto ge igo seselea mai ale eau veitia mutou ele, la valalua tomi ge rovia maie veia amutou la valalua la vimari taku sesele, la vuhula amuto vipuhi tigi tataho seseleti.” \s1 E Iesus veiale Pita veia eia ge tahi taroa vaka tolu \r (Matiu 26:31-35; Mark 14:27-31; Luk 22:31-34) \p \v 36 Goio, e Saimon Pita tahi e Iesus mago “Tahalo Uru, eme ge gove?” \p Goma e Iesus ule baoliala mago “Eala moli la mautu ale eau ge govolao, eme kama koramulia ge tilimuliau sovolao. Sesele, eala moli eme ge tilimuliau soio vola mulimuli.” \p \v 37 Goio, e Pita vei louale Iesus mago “Tahalo Uru, ilava eau kama koramulia ge tilimulime gageie? Eau ge sugu taro la mahulila taku tai veia ge taho loio taume!” \p \v 38 Goma, e Iesus koli rivu louala mago “Eme ge sugu taro la mahulila taume veia ge suliau, ia? Ale eau vei seseleamu, e kukureko souka ge tali, eme ge tahi taroti eau vaka tolu veia eme kama roviau.” \c 14 \s1 E Iesus eia la gauru te la valalua soio te Tamala \p \v 1 Goio, e Iesus veia ge viteteli lou egiteu la valalua tetala, eia goio veia giteu mago “Amuto umala ge ilo buruko, amuto ge taua la ilo mutou te La Tahalo Uru me amuto ge tautaulailo tai takue. \v 2 Oio te la luma te Tete la kapiututula usu, mai eia kama ge mai ele, eau ge veipalatia mutou ovola maio. \v 3 Ale eau ge goio ge raragi la muli mutou. Tio mai eau ge raragi kaluvuti la muli mutouo, eau ge beu loua somai ge puli amutou soio taku veia amuto ge pou vikapopo leau oio vola. Eia ge mai ele, la mautu ale eau ge pou ovolao, amuto tai ge vikapopo leau ovolao. \v 4 Amuto roviti la gauru la mautu ale eau ge govolao.” \p \v 5 Tio, eia vikara kaluvu mai ele, e Tomas goio tahia mago “Tahalo Uru, eme ge gove? Amite kama rovia. Me amite ge rovi la gaurula mave?” \p \v 6 Goma, e Iesus vei mulitialale mago “Eau sesele la gauru, me eau tai la merera ale sesele, me eau la vuhu la mahulila. Isasa kama koramulia ge sibitala oio te Tete te la gauru isapolo, ouka. Omai moli taku sekelae. \v 7 Eala moli mai amuto rovitiaue, tio amuto ge rovi tai e Teteo. Ale sokotia igoie amuto rovitia, me amuto hilo taitiae.” \p \v 8 Goio, e Pilip veiala mago “Tahalo Uru, eme ge veipala e Tamamu somai tamiteu, tio amite ge sagege moli mai ele, amite ge la kilaka isa lou ge ouka.” \p \v 9 Goma, e Iesus veiala mago “Mave, Pilip, eau pou tabaa seseleti vikapopo le amutoue, eme soukato roviau, ia? Mai isa hiloti eaue, eia hilo taiti e Tete. Ilava eme vei lou maie ‘Veipalea miteu e Tamamu’? \v 10 Soioge eme souka matagaga leau veia eau pou te Tete, me e Tete pou taku e? La vikarakarala ale eau ababia mutou ele, kama te la gabutatalala taku moli. E Tete pou taku, me eia igigo la igogolu tetalale. \v 11 Taritigi amuto ge tautaulailo te la vikararala ale maie: Eau pou te Tete, me e Tete pou takue. Mai eia ge vagari tamutou veia amuto ge tautaulailo te aleie, eia koramuli molia veia amuto ge gabutala la igogolu tomi ale eau igotiao, ale moli ele amuto ge tautaulailo taku ovola. \v 12 Ale eau vei seselea mutoue, mai isasa ge tautaulailo takue, tiele la igogolu tomi ale eau igigoae, eia tai koramulia ge igoa. Eala moli eia ge igo lou isahari ale uru, eia ge kara polo te ale eau igotiae, la vuhula eau ge goio te Tete, \v 13 me la golugolu tomi ale amuto ge kaka tavua oilo te la isagu, eau ge igoa mai ele, me amuto tomi ge vaisale sesele e Tete oio te la visuli taku ale uru soio tamutou. \v 14 Mai te la isagu, amuto ge kaka tavu eau veia ge igo la golu isasa, eau ge igo molia mai ele. \s1 E Iesus veia eia ge baha La Kalulu La Marokala somai \p \v 15 “Mai amuto ge gogo seseleau, amuto ge tilimuli tigi la viputumulila taku ele. \v 16 Tio eau ge kaka soio te Tete, eia ge sugu taroa mutou la tahalo la visuli ale isapolo veia eia ge vivagari amutou, me eia ge vipou tomi le amutou la kaluvula ge ouka. \v 17 Ale eia La Kalulu La Marokala sesele, eia ge puli amutou soio te la gauru ale sesele. Egite la valalua me hatavivile te la maututula ale kama rovi eau, egite kama koramulia ge sau tola La Kalulu La Marokala. Egite kama koramulia ge hiloa, me egite kama rovi taia. Eala moli amuto ale taku rovia. Eia ge vipou tomi le amutou, me eia ge goilo tamutou, eia ge mahuli oilo tamutou ele. \p \v 18 “Ale eau ge hiliti taro amutoue, amuto kama ge la tulagola mai e guliliki ale e tamala me tilala ouka. Eau ge gomai lou tamutou. \v 19 Male bakisi moliti, la valalua me hatavivile kati ge hilo louau, eala moli amutou ale taku ge hilo louau, la vuhula eau pou te la mahulila, me amuto ge pou tai te la mahulila ale eau ge abia mutou. \v 20 Te la imamala alele, ale eau ge mahuli rivu lou ovolao, amuto ge rovi seselea veia eau pou te Tete, me amuto ge pou taku, me eau ge pou tamutou. \v 21 Mai la tahalo ale sau tola la merera taku me eia roromuli seseleao, la tahalo alele eia veipalea oio te la vulovulola ale taritigi veia eia gogo seseleau. Me la tahalo ale gogo eauo, e Tete ge gogo taia. Me eau tai ge gogoa, eau ge pala tavua, eia ge hilo seseleau.” \p \v 22 Ale e Iesus veitia maie, goio e Iudas (kama e Iudas Iskariot) eia veiale Iesus mago “Tahalo Uru, ilava eme ge magiri pala te la mata miteu, me eme kama masagea ge magiri pala te la mata giteu la valalua me hatavivile ale kama taume?” \p \v 23 Goio, e Iesus koli la vikararala tetala mago “Mai la tahalo isa eia ge gogoau, eia ge roromuli sesele la vikararala taku, tiele e Tete ge gogo tai la tahalo alele, me amila ge goio tetala, amila ge pou moli tetalao, kamati ge hele taro loua. \v 24 Eala moli la tahalo ale kama gogoau, eia kama ge tilimuli titigi la vikararala taku veia eia ge roromulia. Eala moli la vikararala ale amuto loloa taku, eia kama taku moli, la vikararalale eia loio seseleti te Tete ale bahatiau somaie. \p \v 25 “Ale eau so vipou tomi le amutou, me eau veitia mutou la vimari tomi aleie veia amuto ge rovia. \v 26 Eala moli La Tahalo La Visuli sesele tamutou, eia La Kalulu La Marokala. Eia ge abi la muligu, e Tete ge bahea somai tamutou. Tiele eia ge vimari le amutou te la mari te la kalulu mutou, me la vimari tetalale eia ge usu sesele. Me eia ge vimatagaga tai la gabutatalala tamutou, tio amuto ge gabutala lou la vikararala tomi taku ale eau veveia mutou ovolale. \v 27 Ale eau ge tuga taro amutou, La Kalulu La Marokala eia ge vitahoa mutou, la tia mutou oilo ge malilo tataho. Mai la tia mutou ge malilo tataho omai taku, amuto kamati ge rovi la iloburukola. Ale eau kama toi bulalahua soio tamutou mai la toi tigila te la valalua ale omai te la maututula, ouka sesele. Ale taku eia la merera ale sesele viruru moli, taritigi veia la ilo mutou umala ge buruko veia amuto ge taga. \v 28 Amuto loloti la vikararala ale eau veitia mutou ovola maie ‘Eau ge tuga taro amutou, eau ge beu loua somai tamutou’. Mai ge amuto ge gogoau, tiele amuto ge sagege te la tuluga taku soio te Tete, la vuhula e Tete uru me eia muga taku, eala mai amuto ge taku sesele amuto ge matagaga veia eau ge beu loua soio te Tete ale baha tavutiau, eala eia taritigi veia amuto ge sagege moli. \v 29 La merera tomi ale, eia soukama sibitala mai ale eau veitia, eiala moli ale eau veipala mugea mutou ovola, tio mai mulimuli eia ge sibitalao, amuto ge matagaga sesele. \p \v 30 “Eau kati koramulia ge veia mutou la merera usu lou, la vuhula e Satan ale la mulugaluga te la maututula, eia loiole, la imamala taku eia hagagaviti. Eala moli eia kama koramulia ge vipolo galeau te la igogolu ale eau ge igoa gageie. \v 31 Eala moli eau vagari moli veia la valalua me hatavivile te la maututula tomi ge rovia veia eau gogo e Tete, me eau igo la igogolu sesele mai ale e Tete veitiagu ovola. Ioge, amuto ge hiliti, etato ge tuga.” \c 15 \s1 E Iesus eia la obu la vaen \p \v 1 Goio, e Iesus vei lou isasa la vikarara la tilovo te la obu la vaen maie “Eiau, eau la kabili la obu sesele, me e Tete, eia e taho la mahuma la obu ele. \v 2 Egite la halalagu ale kama tau la vavua giteuo, e Tete ge vali taro egiteu, eala moli egiteu la halalagu ale tau la vavua giteu, eia rauvevei egiteu veia egite ge vua pepeho lou. \v 3 Me amutou ale taku, amuto marokati te la vikarakarala ale eau veitia mutou ovolale. \v 4 Ioge, amuto ge pou taku, me eau ge pou tamutou. La vuhula, mai la halala la obu eia kama ogitola oio te la kabili la obulao, eia kama koramulia ge tau la vavuala. Eia mai tai ele soio tamutou, mai amuto kama ge pou taku. \p \v 5 “Eau la kabili la obu, me amuto la halalagu. Ale pou taku, me eau tai pou tetalao, eia ge vua pepeho. La vuhula mai etato ge vipou baa taro, amuto kama koramulia ge igo sesele la paga isasa. \v 6 Mai isasa eia kama pou takue, tiele e Tete ge pigi galea mai la halala la obu ale egite vali tarotia, eia ge tabuli moli ge magolu, e Tete ge tau vikapopoa ge pigia soio te la havi, eia ge karere. \v 7 Mai amuto ge pou takue, me la vikararala taku eia ge pou tai tamutou ele, tio amuto ge kaka tavu la paga ale amuto masageao, e Tete ge sugu taro molia mutou. \v 8 Mai amuto ge tau usu la vavua mutou, tiele, la isale Tete ge vavava ovolale. Tio amuto ge pou mai la valalua la vimari taku. \p \v 9 “E Tete gogotiau, mai tai eau gogoti amutoue. Me amuto ge pou moliti oio te la gilogo taku ele. \v 10 Mai amuto ge roromuli sesele la merera takue, amuto ge pou oio te la uluva la gilogo taku. Eia mai moli eiaue, eau roromuli sesele la merera tomi te Teteo, eala eau pou seseleti oilo te la gilogo tetalae. \v 11 La vikararala ale, eau veitia mutou ovolae, veia la sagegela taku eia ge pou sesele tamutou ele, veia la sagegela taku tai eia ge volu sesele oilo te la tia mutou la valalua taku. \v 12 Male, la merera taku ale tikumu sesele eia maie veia amuto ge vipuhi tigi sesele, amuto ge vigogo baoli mai ale eau gogoti amutou, eau puhi tataho sesele amutoue. \v 13 Eala moli mai la tahalo isasa eia ge sugu taroti la mahulila tetala veia ge suli e tabarabaralao, la vulovulo la gilogo isa oukati lou veia ge kara polo ovolale. \v 14 Amuto ge e tabarabaragu sesele, mai amuto ge igo sesele la igogolu tomi ale eau bahati amutou ovolale. \v 15 Tiele eau kamati ge toi lou amutou veia amutou la bilalaha moli taku, la vuhula la bilalaha, eia kama rovi la gabutatalala te la mulugaluga tetala ale eia babahea oio volae, tetala la igogolu la bilalaha moli veia ge igo moli la masasagala te la mulugaluga tetala. Eala moli sokoa igoie, kara ale mulimuli, eau toiti le amutou e tabarabaragu, la vuhula la merera tomi ale eau loloa te Tete, eau veitia mutou ovolale, amuto rovi tomitia. \v 16 Amuto kama hilovi tavuau, ouka. Eau moli, eau hilovi tavuti amutou, veia amutou ge taku. Me eau tabariti amutou soio te la igogolu la valolo taku veia amuto ge tuga, amuto ge tau la vavua mutou, me la vavua mutou eia ge tai tola. Tiele mai amuto ge kaka la paga isa te la isagu, e Tete ge abia mutou. \v 17 La viputumulila taku eau abi loua mutou, eia maie veia amuto ge vipuhi tigi tataho me egiteu e tabarabara mutou, amuto ge pou tataho te la vigogo baolila sesele.” \s1 La valalua ale kama rovi e Kraist ge gima egiteu la valalua tetala \p \v 18 Goio, e Iesus veia giteu mago “Mai la valalua te la maututula, ale egite kama roviau, mai egite ge gima amutou ale taku, taritigi amuto ge rovia veia egite gima pala taiti eaue. \v 19 Sesele mai amuto ge la tahalo bulalahu moli ale kama roviau, tiele egite la valalua me hatavivile te la maututula ale tilimuli moli la gabutatalala te la vovo, egite ge masaga pepeho amutou ele. Eala moli amuto kama mai egiteu, ouka, eala la valalua me hatavivile te la maututula ge gima sesele amutou, la vuhula amutou isapolo, amutou taku, eau hiloviti amutou taro la vulovulo te la maututula ale kama kokora. \v 20 Eala moli amuto ge gabutala tigi la vikararala ale eau veitia mutou ovola maie veia la bilalaha eia kama oata te la uru tetala. Eau La Uru mutou me egite vileau, eala eia matagaga tai mai ele veia egite ge vile tai amutou ale bisisi taku. Mai egite ge loloti la vikararala takue, egite ge lolo tai la vikararala tamutou. Eala moli ouka. \v 21 Egite ge viligi sesele amutou, ge vile amuto, la vuhula egite kama rovi e Tete veia eia baha eau somaie. Tiele egite ge gima sesele amutou, la vuhula amutou taku. \v 22 Sesele, mai eau kama ge guvi omai veia ge vikara matagaga soio tegiteuo, tio la iruru kama ge pou tegiteu, la vuhula egite vava bububu moli, la matagaga ouka. Eala moli ale igoie egite loloti la valolo taku, la matagaga eia sibitalati tegiteu, eala moli egite kama masaga ge sau tolea, eala egiteu la iruru ale uru pepeho pouti oio tegiteuo. La gauru isa oukati lou veia ge tau robo la iruru tegiteu. \v 23 La tahalo ale gima eaue, eia gima taiti e Tete. \v 24 Sesele, mai eau kama ge igo la igogolu tomi ale pala egite kama hilo isasa eia igoa oio tegiteu, mai la golu la karutula ale uru sesele, mai egite kama ge hilo la igogolu taku kabili tegiteu mai ele, egite la iruru ge ouka. Ale egite hilotia, eala moli egite kama gabu tikumua, egite goio gima moli amila tomi me Tete. \v 25 Te la vulovulo ale egite igotiae, eia igo puruti la vikararala te ururu tegiteu la valalua e Iuda lou, te la merera la viputumulila tegiteu ale pala, eia vikara matagaga te la pulolou te Kraist omai te la maututula maie: La valalua gima bulalahu moli eau, la vuhula ouka. \p \v 26 “Eala moli la tahalo ale ge vivagari amutou, eia oio so vipou toitomi me Tete, tio eau ge goio ge bahea somai tamutou. Eia La Kalulu La Marokala, eia la vuhu la visuli tamutou, eia la vuhu la merera tomi ale sesele. Eia ge gomai tamutou, eia loio seseleti te Tete. Eia ge lapu matagaga la gabutatalala tamutou te la vuhu la igogolu tomi ale eau igotia. \v 27 Eala moli amuto tai ge vikara matagaga te la vuhu la igogolu taku, amuto ge valolo la valalua me hatavivile veia amutou taku, la vuhula amuto pouti taku palati ale eau soko la igogolu ovolao, karati igoie.” \c 16 \p \v 1 Goio, e Iesus vei loua giteu la valalua tetala mago “La vikarakarala ale eau veitia mutoue, eia ge vivagari amutou veia amuto umala ge tutuloku. \v 2 Mulimuli egiteu e Iuda ge pitaro amutou loilo te la lumaluma la lotu oio te la maututula. Goio, la imamala alele ge sibitala, egiteu ale ge bili peho amutouo, egite ge gabua veia egite igo titigi la igogolu te La Tahalo Uru mai ele, eala moli oukae. \v 3 Egite ge igo la viligila ale mai ele soio tamutou, la vuhula egite kama rovi amila me Tete. \v 4 Eala moli eau vei matagagatia mutou ovolae. Mulimuli mai ge la imamala alele ge sibitala, amuto ge loho molitia solagu, la vuhula eau vei palatia mutoue. \s1 La igogolu te La Kalulu La Marokala \p “Ale pala eau kama veia mutou la iligiligi tomi ale, veia amuto ge ligi ovola, la vuhula eau so pou vikapopo amutoue. \v 5 Eala moli ale eau ge goio te Tete ale bahati eau somaie, amuto kama ge gabutatala papai veia amuto ge rovi la vuhu la tuluga taku veia amuto ge tahiau mago ‘Eme ge gove?’ \v 6 Amuto oiole ilo buruko moliti te la vikarakarala ale eau veitia mutou ovolae. \v 7 Eala moli ale eau vei seselea mutoue, mai ge eau ge tuga taro amutou, ale eia ge taritigi sesele tamutou, la vuhula mai eau kama ge tuga, la tahalo ale ge vivagari amutouo, mai La Kalulu La Marokala ale eau veitia mutou ovolao, eia kama ge gomai tamutoue. Tio mai eau ge tuga, tiele eau ge baha taroa somai tamutoue. \v 8 Mai eia ge gomai, eia ge sile pala seselea la mata giteu la valalua te la maututula ale egiteu kama tetala, veia egite ge rovi tigi la iruru tegiteu, egite ge rovi tigi tai la vulovulo ale matata, me egite ge matagaga tai veia la haro la viputumulila te La Tahalo Uru, eia ge guvi. \v 9 Ale eau toitia la iruru tegiteu, eia mai la vareagila tegiteu ale egite kama masagea ge roromuliau. \v 10 Omai taku amuto hilo seseleti la vulovulo ale matata, la vuhula eau ge beu loua soata te Tete, amuto kati ge hilo louau, eala moli e Tete ge vagoiloau mai la tahalo la marokala tetala sesele. \v 11 Me ale eau veitia te la viputumulila, eau veia mai ele la vuhula e Satan eia mai ale viluati te la viputumulila te La Tahalo Uru ale ge puru te la pileho taku, eia la mulugaluga te la maututula, eala moli eia la vagagarila oukati. \p \v 12 “Eau la vikararala omai usu veia eau ge veia mutou ovola, eala moli amuto kama koramulia ge gabutala tomia gageie. \v 13 Mulimuli mai La Kalulu La Marokala ale la vuhu la merera tomi ale sesele, eia ge gomai tamutou, eia ge tata amutou soio te la merera tomi ale sesele, eia kama ge veia mutou la vikarakarala ale tetala moli, ouka. Eia ge veipala moli la vikarakarala ale eia loloa te Tete, eia ge veipalea mutou la papaga ale ge sibitala mulimulio. \v 14 Eia ge ababi la vikararala taku, eia ge tovo tataho amutou ovola, tiele me eia ge vitokoromo eau ovolale. \v 15 La papaga tomi te Tete eia sugu tarotiagu. Eala eau veitia mutou veia La Kalulu La Marokala eia ge abi la vikarakarala taku, eia ge veveia mutou ovolale. \s1 La iloburukola eia ge vulo mai la sagegela \p \v 16 “Bakisi moliti amuto kamati ge hilo lou eau, eala moli eia kama ge tabaa, amuto ge hilo lou eaue.” \p \v 17 Goio, egite la valalua la vimari tetala lolo la vikararala tetala mai ele, egite isahari goio vitahi baololi lou egiteu mago “Mave, la masova la vikararala ale eia veitia gatoue, eia soioge mave? Ale eia vei maie ‘Bakisi moliti amuto kamati ge hilo lou eau, eala moli eia kama ge tabaa amuto ge hilo lou eau’ me eia vei taitia maie ‘Eau ge goio te Tete’, \v 18 mave, la masova la merera tetalale, eia mave sesele? Etato oio kama rovi la masova la vikararala ale eia veitia mai ele.” \p \v 19 Goio, e Iesus rovitia veia egite masagea ge tahiale, eia goio veia giteu mago “Amuto vitahi baololi amutou te la vikararala ale eau veia maie veia ‘Bakisi moliti amuto kamati ge hilo eau, eala moli eia kama ge tabaa, amuto ge hilo lou eau’? \v 20 Ale eau ge vei seselea mutou maie veia amuto ge tali pepeho, amuto ge ilo buruko sesele, eala moli la valalua me hatavivile te la maututula, ale egite kama taku, egite ge sagege pepeho ale eau ge vilua. Eala moli la iloburukola ale amuto ale taku ge gabua, eia ge vulo, la sagegela ge uru sesele tamutou ele. \v 21 Mai la tavile ale ga tapaposati, eia rovi la haro la piligo tetala eia sibitalati ele, eia ilo buruko te la iligiligi la piligole. Eala moli mai eia taposati e latulao, eia kamati gabutala lou la iligiligi ele. Oukati. Eia sagege seseleti te latula ale eia visibitalatia. \v 22 Tio la merera aleie, eia mai tai tamutoue. Ale igoie la ilo mutou eia buruko, eala moli eau ge hilo lou amutou, la tia mutou eia ge sagege lou, isa kamati ge abi taro le amutou la sagegela ale amuto ge gabuale. \v 23 Tiele te la imamala alele, amuto kama ge tahi louau te la paga isasa. Ale eau vei seselea mutoue, mai amuto ge kaka e Tete la paga isasa, eia ge abia mutou, la vuhula amuto kakati te la isagu. \v 24 Ale pala amuto souka kaka isa la paga te la isague, la vuhula eau souka goata rivu lou te Tete. Ale igoie amuto matagagati, taritigi veia amuto ge kaka, me e Tete ge abia mutou la paga ale amuto masagea, veia eia ge visibitala sesele la sagegela ale uru oio te la tia mutou. \s1 E Iesus veia eia bolehohoti la vulovulo te la maututula \p \v 25 “Ale eau vikarakarati soio tamutou te la vikarara la tilovo molie, eala moli mulimuli eau kamati ge vimari lou amutou te la vikarara la tilovo, eau ge sile pala molia mutou la vulovulole Tetele. \v 26 Te la imamala alele, amuto ge kaka te la isagu, me Tete ge suli amutou, la vuhula amutou taku. Eala moli eau kama veia mutou veia eau moli ge kaka e Tete veia eia ge suli amutou. \v 27 E Tete ge gabu tikumu la kilaka tamutou, la vuhula eia gogo tai amutou ale taku, eia masagea veia ge suli amutou, la vuhula amuto gogoau me amuto rovi taia veia eia sesele baha eau. \v 28 Mai ale pala eau vipou tomi le Tete, me eau hiliti taroa somai la maututulae, tio eau ge hiliti taro lou la maututulae, eau ge beu loua soio te Teteo.” \p \v 29 Goio, la valalua la vimari tetala veiala mago “Ale eme kamati vikara la tilovo lou, eme sile pala sesele molitiae. \v 30 Ale igoie amite rovi seseletia veia eme la vuhu la mari tomi, me eme kama koramulia veia ge pou tali la tilahi te la tahalo isasa, me amite rovi sesele taia veia eme sibitala loio te La Tahalo Uru, me eme gomaie.” \p \v 31 Goma, e Iesus goio koli baoli loua giteu ele mago “Ale amuto matagaga seseleti, ia? Amuto tautaulailo seseleti taku. \v 32 Ale la imamala alele eia hagagaviti ge sibitala, male eia sibitalatie, me amuto ge hele bura taro eau soio te la mautu tamutou isasasao, eau sekela moliti ge poue. Eala moli eau kama ge pou sekela, e Tete ge vipou tomi leaue. \v 33 Eau masagea veia amuto ge pou taku, me amuto ge sau tola la vimalumalu takue. La valalua ale kama roviau, egite ge viligi amutou, la ilo mutou kama ge buruko, la vuhula eau bolehohoti egiteu.” \c 17 \s1 E Iesus kaka tegiteu la valalua la vimari tetala \p \v 1 Tio, e Iesus vei kaluvu tomiti la vikarakarala alele, eia goio taga soata la mori, eia kaka maie “Tete, la mata la haro taku eia sibitalati. Taritigi eme ge vitokoromo eau, e Latumu, veia eau ge vitokoromo rivu lou emei te la pileho taku. \v 2 La vuhula eme abitiagu eau e Latumu la merera ale taritigi veia eau ge baumuli la valalua me hatavivile tomi ale tautaulailo, veia eau ge vimahuli egiteu ale eme hiloviti egiteu veia egite ge taku. \v 3 Me la mahulila ale seselele, ale la kaluvula ge ouka, eia maie veia egiteu ale taku ge rovi seseleme veia eme sekela moli La Tahalo Uru ale sesele, me egite ge rovi tataho tai eau mai ele veia eau e Kraist ale eme baha tarotiau somaie. \v 4 Male, eau vitokoromoti la isamu ale uru makapipila omai te la maututula. La igogolu ale eme abitiagu veia eau ge igoa, eau igo sesele tomitiae. \v 5 Tete, eau masagea veia eme ge vitokoromo tai lou leau la vitokoromola ale eme visati leau alaurati te baruatao, ale la maututula souka sibitala. \p \v 6 “Eau veipalati la isamu soio tegiteu la valalua te la maututula ale eme sugu taroti egiteu somai taku veia egite ge taku. Egiteu taume, eala moli eme sugu taro moli egiteu somai takue, me egite roromuliti la vikarakarala taume. \v 7 Ale igoie egite rovitia veia la vagagarila tomi taku eia loio moli taume sekela. \v 8 La vuhula eau veitia giteu la vikarakarala taume ale eme abitiaguo, egite roromulitia, me egite rovi seselea mai ele veia eau sibitala loio taumele, me eme baha taro seseleti eau somaie. \v 9 Ale eau kakame tegiteu aleie, eau kama kakame tegiteu la valalua me hatavivile te la maututula, ale egite kama rovi eau. Eau kakame tegiteu moli ale eme sugu taroti egiteu somai takue, la vuhula egiteu aleie taume sesele. \v 10 La vagagarila taku tomi eia loio taume. Me la vagagarila tomi taumele eia taku, me eia veipalea veia eau e Latumu sesele ale marasa. \v 11 Ale eau kamati ge pou lou omai te la maututulae, eala moli egiteu ale taku so popoue, me eau ge goio taumele, egite ge savelea la visuli taume. Tete, eme La Tahalo La Marokala, eme ge baumuli tigi egiteu ale eme abitiagu egiteue, egite ge magiri vagari te la isagu ale eme visati leau, me egite ge sovei etalua ale etala isa molie. \v 12 Ale eau pou omai tegiteue, eau baumuli tigiti egiteu, la vuhula eme sugu taroti egiteu somai taku, taritigi eme ge baumuli egiteu te la vagagarila te la isamu ale eme vauru eau ovola. Eau sigirobo egiteu veia egite isasa kama ge vilua, eala moli ale isa moli sekela viluati, alele eia vipuru seseleti la merera te La Buk Tabu Ale Pala ale veia la tahalo ale ge sugu taroau eia ge vilua. Eia e latule Satan moli. \p \v 13 “Ale eau ge goio taumele, la vikarakarala ale eau veveia omai te la maututulae, veia egiteu ale taku ge loloa, egite ge sau tola la sagegela taku ale uru sesele te la tia giteue. \v 14 Eau veitia giteu la vikarakarala taume, eala moli la valalua ale kama roviau, egite ge gima egiteu ale taku, la vuhula egiteu ale taku kama mai egiteu ale kama roviau. Mai tai eau, la vulovulogu eia kama mai la vulovulo giteu la valalua ale kama kokora, egiteu ale te la maututula egite kama rovi eau. \v 15 Ale eau kama kakame veia eme ge abi taro egiteu lotalo te la maututulae, ouka, eau kaka moli veia eme ge sigirobo egiteu te la igo gegerula te Satan. \v 16 La vuhula egiteu me la valalua ale kama roviau, egite kama visauru, mai tai eau, eau kama visauru megiteu la valalua ale kama taku. \v 17 Taritigi eme ge vimaroka egiteu te la merera taume ale sesele, la vuhula la merera taume eia sesele tomi moli. \v 18 Mai ale eme bahatiau somai te la maututulao, mai eau tai bahati egiteu soio te la maututula te la igogolu la valolo ale taritigi. \v 19 Eau sugu taro la mahulila taku soio taume veia oio vola egite ge magiri vagari te la marokala, me egite ge la valalua taume sesele mai tai eau. \p \v 20 “Eau kama kaka moli eme tegiteue, eau kaka tai eme tegiteu ale ge lolo la valolo tegiteu me egite ge roromuliau ovola. \v 21 Eau masagea veia egite tomi ge isa moli, mai ale eme pou taku, me eau pou taume, tiele egite ge mai tai ele veia egite ge pou tegalua, veia la valalua me hatavivile te la maututula ge rovia veia eme bahatiau somaie. \v 22 Me la vibalavala ale uru seselele, ale eme abiagu veia etala ge isa moli, tio eau abitia giteu ale taku veia egite tai ge isa moli mai etalua isa moli. \v 23 Eau pou tegiteu, eme pou taku, ale eau masagea veia ge puhi tigi egiteu veia egite ge isa moli veia oio vola la valalua te la maututula ge rovia veia eme baha eau somaie, me eme gogo egiteu, mai ale eme gogo taiti eau. \p \v 24 “Tete, egiteu ale eme sugu taroti egite somai takue, eau masaga egite ge vipou tomi eau oata te la mautu ale eau ge pou ovolale, veia egite ge hilo la tokoromola taku ale eme abitiaguo, ale eme gogotiau alaurati ale eme souka vipou la magasa me la mori. \v 25 Tete, eme sekela moli matata, la maututula tomi kama rovime, eala moli eau rovime, me egite aleie, mai egiteu ale taku sesele, egite rovia veia eme bahati eau somaie. \v 26 Eau veipalatia giteu la isamu, eala moli eau ge vei loua giteu veia la gilogo ale eme gogoti leaue, eia ge pou tai tegiteu, me eau tai, eau ge pou sesele tegiteu ele.” \c 18 \s1 Egiteu la valalua la gima lao tola e Iesus \r (Matiu 26:47-56; Mark 14:43-50; Luk 22:47-53) \p \v 1 Goio, e Iesus kaka kaluvu moli mai ele, egiteu me la valalua la vimari tetala goio tuga, egite tulu polo la lalu isa la isala e Kidron, la malilo isa oiole, egite me la valalua tetala goilo vola. \p \v 2 Eala moli e Iudas, ale ge sugu taro e Iesus soio tegiteu la gima, eia rovi tai la malilo alele, la vuhula la haro usu e Iesus me la valalua tetala goio volale. \v 3 Tio e Iudas goio puli egiteu la valalua la vaubi isahari, me egiteu la bilalaha tai isahari tegiteu la mulugaluga tegiteu e pris, me tegiteu e pariseo, me egite goio te la baa alele. Egite ababi la lam, la selu, me la papaga isahari te la vaubila tai mai la viso me la gata. \p \v 4 Eala moli e Iesus rovi tomiti la igo barala ale egiteu la valalua la gima ge igoa soio tetala te la haro alele, eia goio hagagavi tegiteuo, eia tahi egiteu mago “Amuto ga paa mulimuli ere?” \p \v 5 Goma, egite koliala mago “Amite paa mulimuli e Iesus la tau Nasaretio.” \p Goio, e Iesus veia molitia giteu ele mago “Me eiau molie.” Tiele e Iudas tai ale veipalatia soio tegiteu la gimale, eia oio vimagiri tomi legiteu ele. \v 6 Eala moli ale e Iesus veitia giteu mago “Me eiau molie” tio egite buru sosouti sotigu ele, egite boruti sotalo la magasao. \p \v 7 Tio, eia goio tahi rivu lou egiteu mago “Amuto ga paa mulimuli sesele ere?” \p Goio, egite vei louala mago “E Iesus la tau Nasaret.” \p \v 8 Goio, e Iesus vei moli loua giteu ele mago “Me eau veitia mutou veia eiau molie. Mai amuto paa mulimuli eaue, amuto ge mata taro moli la valalua takue, egite ge tuga.” \v 9 Ale eia vei maie veia la merera tetala ale pala ge puru sesele oio vola, ale eia vei mugatia pala mago “Egiteu ale eme sugu taroti egiteu somai takue, egite isasa kamati ge kokovu.” \p \v 10 Goio, e Saimon Pita eia sau tavu moli la viso la vaubila tetalao, eia goma barautu taro moli la gavusa la bilalaha te la mulugaluga tegiteu e pris, te la galela e gatao. La isa la bilalahale, e Malkas. \v 11 Goma e Iesus veiale Pita mago “Eme ge sugu rivu lou la viso taume te la mulilale. Mave, eme veia ge taho loio taku veia egite kama ge lao toleau, ia? Eme soioge veia eau kama ge igoa gageie la igogolu ale uru e Tete bahati eau ovola, e?” \s1 Egite vimagiri e Iesus te la vigagiala oio te la lagule Anas \p \v 12 Tio, egite la valalua la vaubi ele, me la mapala tegiteuo, vikapopo me egiteu la bilalahale, egite laoti e Iesus, goio egite kisi tola la limala la mota. \v 13 Goio egite lapu mugea soio te Anas, eia e loale Kepas ale la mulugaluga tegiteu e pris te la leavala aleiele. \v 14 Me e Kepas ele, eia la tahalo ale vei mugatia giteu e Iuda pala veia eia taritigi veia la tahalo isa moli sekela ge peho robo la valalua me hatavivile tomi ele. \s1 E Pita tahi taro e Iesus \r (Matiu 26:69-70; Mark 14:66-68; Luk 22:55-57) \p \v 15 Goma, e Saimon Pita mira me la tahalo la vimari te Iesus isa lou, egira mulimuli e Iesus. Eala moli la mulugaluga tegiteu e pris, eia rovitia la tahalo la vimari te Iesus ele, me eia koramulia ge tiroro vikapopo me Iesus soilo te la mautu te la mulugaluga uru tegiteu e pris ele. \v 16 Eala moli e Pitale magirigiri moli oio te la mata la bigomu ale goilo te la mautu ele. Eala moli la tahalo la vimari te Iesus ale la mulugaluga tegiteu e pris roviao, eia gogala lou, eia goio veia la tavile ale baumuli la matao veia e Pita ge goilo, tio eia goio pulia soilo. \p \v 17 Tiele, la tavile ale baumuli la matale, eia mata kosi e Pitale, eia goma tahia mago “Eme tai soioge isasa lou la tahalo la vimari te la tahalo ale e Iesus, ia?” \p Eala moli eia tahi taro mago “Eiau ouka.” \p \v 18 Goio, egiteu la bilalaha tegiteu e pris isu la havi, la vuhula la maigi uru pasi, me egite magiri galili la havi ele, egite malululu, me e Pita tai oio tegiteu, malululu ele. \s1 E Anas tahi e Iesus te la vuhu la valolo tetala \r (Matiu 26:59-66; Mark 14:55-64; Luk 22:66-71) \p \v 19 Tio, goio e Anas ale la mulugaluga tegiteu e pris, eia goio tahiti e Iesus tegiteu la valalua la vimari tetalale, me la vuhu la valolo tetala ale eia vimarimari legiteu la valalua ovolao. \p \v 20 Goma, e Iesus veiala mago “Eau vikarakara matagaga sesele oio te la lumaluma la lotu tomi te la maututula te la mata giteu la valalua tomi. Me eau vimarimari bibibi la valalua me hatavivile te la luma la lotu uru tai oio e Ierusalem, ale amutou e Iuda tomi goio vikapopo tai ovolao, eau kama vei kokovu la vikararala isasa. \v 21 Ilava eme tahiau? Eme ge tahi egiteu ale lolo la vikararala taku ale eau veveia giteu ovolao, egite rovi la valolo taku ale eau veitia giteu ovola.” \p \v 22 Tiele, ale eia veitia maie, la tahalo la vagari robola tegiteu e pris isasa, eia sabala la galele Iesus, eia goio veiala mago “Ilava eme koli la vikararala te la mulugaluga uru tegiteu e pris mai ele, e?” \p \v 23 Goma, e Iesus veiala mago “Mai eau ruruti te la vikararala takue, taritigi eme ge veipala la iruru taku. Eala moli mai la vikararala taku eia sesele moli, ilava eme sabala la galegu e?” \p \v 24 E Iesus magirigiri ele, la limala kisia, goio e Anas baha taroa soio te loala e Kepas, ale la mulugaluga sesele tegiteu e pris. \s1 E Pita tahi taro lou e Iesus \r (Matiu 26:71-75; Mark 14:69-72; Luk 22:58-62) \p \v 25 Goma, e Pita magirigiri, eia malululu la havi, egite goio tahia mago “Soioge eme tai isa tegiteu la valalua la vimari te la tahalo ale e Iesus, ia?” \p Eala moli e Pita goio tahi taro mago “Eau ale ouka.” \p \v 26 Goio, kama tabaa la bilalaha te la mulugaluga tegiteu e pris isasa, eia la karakara te la bilalaha ale e Pita barautu taroti la gavusalao, eia vei mago “Eia sesele, eau hilo tai emei, eme vikapopo me la tahalo aleie oio te la malilo ale amite lao tolea oio volao.” \p \v 27 Goma, e Pita tahi taro lou mago “Ouka.” Tio e kukureko talitio. \s1 Egite vimagiri e Iesus te la vigagiala oio te la lagule Pailat \r (Matiu 27:1-2,11-14; Mark 15:1-5; Luk 23:1-5) \p \v 28 Tio, goio te la kavikoki sasaha, egite puli e Iesus loio te Kepas ele, soio te la luma te gavman tegiteu e Rom ale uru. Eala moli egiteu e Iuda kama goilo te la lumale, la vuhula egiteu e Rom kama tegiteu e Iuda, me egiteu e Iuda gabutatalea veia mai egite ge hagagavi tegiteu e Rom, egite ge mata mai ale mumugu la haro La Ilali La Poloselela ale tikumu sesele. Mai la vulovulo giteu ge mumugu mai ele, egite kama koramulia ge ali La Ilali La Poloselela vikapopo legiteu e tabarabara giteu. \v 29 Eala egite kama goilo la luma te gavman, egite magiri moli ogalao, e Pailat gali tavu egiteu sogala, eia tahi egiteu mago “Amuto masagea ge vimagiri la tahalo ale te la vigagiala te la rova?” \p \v 30 Goma, egite koliala mago “Mai ge la tahalo ale eia kama ge la tahalo la iligo la iruru, amite kama ge vaharia somai taume maie.” \p \v 31 Goma, e Pailat veia giteu mago “Amuto pulia soio, me amuto ge igo la viputumulila soio tetala mai te la merera te ururu tamutou e Iuda lou.” \p Eala moli egiteu e Iuda vei louala mago “Amutou e Rom magiri roboti amiteu e Iuda veia amite umala ge bili peho la tahalo.” \v 32 Tiele me la merera tegiteu aleie, eia vipuru seseleti la vikararala ale e Iesus vei mugatia te la pileho tetala veia egite la gima ge katua oata te la tauvalautu. \p \v 33 Goio, e Pailat goilo lou te la luma te gavman, eia tola e Iesus soilo tetala, eia goio tahia mago “Eme la uru tegiteu e Iuda, ia?” \p \v 34 Eala moli e Iesus koliala mago “Soioge alele la gabutatalala taume sesele, uka egiteu ale isapolo vei mulitiamu ovola?”\f + \fr 18:34 \ft Ale la tilahi te Pailat, eia matagaga mai ele veia e Pailat kama rovia la gabutatalala tegiteu e Iuda ale egite pou tali la tahalo la vimahuli tegiteu. Eia gabutala molia veia e Iesus soukama veia eia la uru giteu e Iuda ale ge tovo lalaia veia ge vahiliti la ruruga soio tegiteu e Rom veia ge basimuli taro egiteu loio la gale e Iudea.\f* \p \v 35 Goma, e Pailat ule baoli louala mago “Mave, eau la tau Iuda, ia, veia eau ge gabutala muli la merera la vigiriri tautavula tamutou lou? Egiteu e valaluamu lou, me egiteu e pris te la lotu tamutou e Iuda lou, egite kisime, me egite vaharime somai takue. Eme igoti la iruru ale mave sesele ale egite igo totolome ovola e?” \p \v 36 Goio, e Iesus ule baoli louala mago “La viputumulila taku ale eau ge mamuga la valalua taku, eia kama la viputumulila ale ge puru omai te la magasa. Hiloa, mai eau ge te la vahiliti la vaubi veia eau ge pou la mulugaluga te la maututula, eau kama ge mata sosoli egiteu e Iuda veia egite ge lao tola eau. Eau ge baha moli egiteu la valalua taku veia egite ge vaubi roboau. La viputumulila taku, eia kama lotaloo la magasa veia eme ge hiloa omai te la maututula mai la pulolou te la mulugaluga isasa, ouka gologolo.” \p \v 37 Tiele, e Pailat loloa mai ele, eia goio vei louale Iesus mago “Eala moli eme vikara maie veia eme la uru isasa, ia?” \p \v 38 Goma, e Pailat goio tahi loua mago “Eala moli la merera ale sesele eia mave?” \s1 E Pailat veia ge katu tola e Iesus oata te la tauvalautu \r (Matiu 27:15-31; Mark 15:6-20; Luk 23:13-25) \p Tio, e Pailat vikara kaluvu moli ele, eia gogala lou tegiteu e Iudale, eia goio veia giteu mago “Eau kama tahi vuti isasa la iruru oio tetalao. \v 39 Eala moli la vulovulo mutou isasa maie veia eau ge lube taroa mutou isasa la tahalo la kilisi te La Ilali La Poloselela. Mave, soioge amuto masagea veia eau ge lube la uru mutou e Iuda soio tamutou ele, ia?” \p \v 40 Eala moli egite lolo la vikararala te Pailat mai ele, egite goio tola vagari rivu lou soio tetala mago “Alele ouka! Eme ge lube e Barabas!” Me etato rovia veia e Barabas eia la tahalo isasa eia pala vahiliti la vaubila soio te gavman. \c 19 \p \v 1 Goio, e Pailat puli e Iesus soio, goma la valalua tetala goio kumamasi vulotiao. \v 2 Tio egite la valalua la vaubi goio viri e dahe, veia ge igo la kisivaru tetala, egite goio taua te la gamalao, me egite goio vikai leia la kairobola ale magesegese mai la irovilala te la mulugaluga. \v 3 Egite ge goio ge magiri moli oio te la lagulale, egite ge pigi malikiala mago “Tahalo kokora, eme la uru tegiteu e Iuda!” Tio egite goio sabalea la galelale. \p \v 4 Goio, e Pailat gogala lou tegiteu, eia veia giteu mago “Ale eau pulia mutou sogalae, veia amuto ge rovia veia eau kama tahi vuti isasa la iruru oio tetalae.” \v 5 Goma e Iesus gali sogala, la kisivarule dahe oata te la gamala, la kairobola ale magesegese oio te la pokela. Goio e Pailat vei mago “Male, amuto ge hilo la tahalo aleie!” \p \v 6 Tio, egiteu la mulugaluga tegiteu e pris, me egiteu la tahalo la vagari robola tegiteu, egite hiloale, egite tatola mago “Katu tolea te la tauvalautu, katu tolea te la tauvalautu!” \p Eala moli e Pailat goio veia giteu mago “Amuto moli ge tatea soio, amuto ge katu tolea te la tauvalautu. Eau kama sivuti isasa la iruru oio tetalale.” \p \v 7 Goma, egiteu e Iuda koli la vikararala tetala mago “Amite omai la viputumulila isasa tabuliti, me la viputumulilale eia maie veia mai isasa ge toia veia eia e Latu La Tahalo Uru, la valalua ge bilia eia ge peho.” \p \v 8 Goio, e Pailat loloa mai ele, eia taga pepeho seseleti. \v 9 Eia goio puli rivu lou e Iesus soilo te la luma te gavman, goma eia tahi matagaga e Iesus mago “Eme love sesele?” Eala moli e Iesus kama koli la vikararala tetalale. \v 10 Goio e Pailat veiala mago “Mave, eme kama kolikoli la vikararala takue? Eme kama rovia veia egite abitiagu la viputumulila, eau koramulia ge lubemei, me eau koramuli taia veia ge baha eme soio, egite ge katu tolame te la tauvalautu? Soioge eme souka rovi aleie, ia?” \p \v 11 Goio, e Iesus ule baoliala soio mago “Mai La Tahalo Uru oata kama ge abiamu la vagagarila, eme kama koramulia ge bolehoho eau. Eau magiri moli omai te la lagumu te la masasagala moli te La Tahalo Uru, la vuhula la tahalo taku isasa eia sugu tarotiau somai te la limamu, me la iruru tetala eia kara polo sesele te la iruru taumele.” \p \v 12 Goma, e Pailat lolotia mai ele, eia ga gabutala vulovuloti veia ge lube e Iesus, eala moli egiteu e Iuda loio tatola moli mago “Mai eme ge lubea, ale eme veipalea mai ele veia eme kama la tahalo te Sisa, la vuhula mai isasa veia eia la uru, eiala moli eia la gima te Sisa!” \p \v 13 Tio, e Pailat lolotia mai ele, eia goio puliti e Iesus sogalao. Me eia goio pou te la pulolou la ilololo la merera, egite tigi saea oata, me la baale egite igo robo tatahola la uatati ale bolabola, me la isa la baale te la merera e Hibru egite toila “e Gabata”. \v 14 Tiele la haro aleiele la haro la iraragi la ilali te La Ilali La Poloselela, tio la haro hugutolatia, goma e Pailat goio veia giteu e Iudale mago “Male, ale la uru tamutou.” \p \v 15 Eala moli egite lolotia mai ele, goio egite tola lahutio mago “Lapua soio, lapua soio, katu tolea te la tauvalautu!” \p Goma, e Pailat veia giteu mago “Me eau ge katu tola moli la uru mutou oata te la tauvalautu e?” \p Goio, egite la mulugaluga tegiteu e pris ule baoliala mago “Amiteu la uru miteu isa moli e Sisa, isa oukati lou.” \p \v 16 Tiele, e Pailat goio sugu tarotia giteu e Iesus ele, veia egite ge katu tolea te la tauvalautu. \s1 Egite katu tola e Iesus te la tauvalautu \r (Matiu 27:32-44; Mark 15:21-32; Luk 23:26-43) \p Tio, egiteu la tahalo la vaubila tegiteu e Rom goio puli e Iesus soio. \v 17 Eia gali sogala la mautu e Ierusalem, eia bole la tauvalautu tetala loio la mautu ele, soio te la popoiti isasa egite toila veia La Gama La Tahalo, la isala te la merera e Hibru egite toila “e Golgota.” \v 18 Me oio moli te la baa aleiele, egite katu tola e Iesus te tauvalautu, me egite katu tola tai taho lua oio te la galela iluao, me e Iesus kabili. \p \v 19 Goio, e Pailat kekesi isa la vikararala tai veia ge taua oata te la gama la tauvalautu ele, eia kekesi la vikararala maie: \s1 E IESUS LA TAU NASARET, LA URU GITEU E IUDA. \p \v 20 Eala moli la baa ale egite katu tola e Iesus te la tauvalautuo, eia hagagavi moli te la mautu. Tiele egiteu e Iuda usu goio gigigi la vikararala alele. La vuhula e Pailat kekesi la vikararala alele te la merera tegiteu e Hibru, tegiteu e Rom tai, me la vikarakarala tai e Grik. \v 21 Goma egite la mulugaluga tegiteu e pris ale tegiteu e Iuda goio veiale Pailat mago “A ge, eme umala ge kekesia mai ele veia ‘La Uru tegiteu e Iuda’ umala. Eme ge kekesi molia maie ge ‘La tahalo ale eia veia maie: Eau La Uru giteu e Iuda.’” \p \v 22 Goio, e Pailat ule baolia giteu ele mago “La vikararala ale eau kekesitia, eau kekesitia, kama ge vulo loua.” \p \v 23 Tio, egiteu e soldia katu tolati e Iesus te la tauvalautuo, egite goio abi la lavalava me la papaga tomi tetala, egite tau mulila la tilalau ivaao, egite goio barerele giteu. Egite goio abi tai la kairobola tetala, eala moli eia la silahi ouka ovola veia egite ge silea ovola, eia viruru moli loata abia gotalo la gilesulao. \p \v 24 Tio, egite la valalua la vaubi ele hiloa mai ele veia eia la silahi ouka ovola, egite vei mago “Etato kama ge silea, etato ge pigi la satu, etato ge rovirovi gabu molia veia ale ge tere.” Tiele egite igoa mai ele veia la vikarara te La Buk Tabu Ale Pala eia ge puru sesele ale veitia maie: \li1 Egite barereti la lavalava taku, \li1 me egite vipigi vulovulo moliti la kairobola takuo. \p Tiele me egite la valalua la vaubi igo sesele taia mai ele. \p \v 25 Eala moli e tilale Iesus me tabarala, e Maria ale rutule Klopas, vikapopo me e taola, e Maria Magdala, egite oio magirigiri hagagavi te la tauvalautu te Iesus ele. \v 26 Goma e Iesus hiloti e tilalale vikapopo me la tahalo la vimari ale eia masaga seseleao, e Iesus goio veiale tilala mago “Tavile uru, male ale magirigiri ele e latumu molie.” \v 27 Tio eia goio vulo tavu lou la tahalo la vimari tetalale, mago “Male, alele e tilamu.” Tiele la tahalo la vimari ele pulia soio te la luma tetalao, eia soko la baumulila. \s1 E Iesus peho \r (Matiu 27:45-56; Mark 15:33-41; Luk 23:44-49) \p \v 28 E Iesus rovitia veia la igogolu tomi tetala eia kaluvuti, tio eia goio vipuru isa lou la merera te La Buk Tabu mago “Eau malehu pasie.” \v 29 Goma la botol isa oio tabulibuli ele, eia volu la bulu la vaen ale ama. Tiele egite goio sigilia soio te la pagolu,\f + \fr 19:29 \ft Ale La Buk Tabu toi seselea mai la bebera ale masaga, ale olau la mago, egiteu e Iuda ababia te la tao tilomu la lalu oio vola, eala moli etato kama rovia la vulovulo aleiele.\f* egite goio vituria soata te la harelao. \v 30 Goio e Iesus liua, eia goma vei mago “Eia kaluvuti.” Tiele la gamala mapakulitio, eia goio pehotio. \s1 Egite ubi la karusurusule Iesus \p \v 31 Tiele, ale la haro la iraragila te La Ilali La Poloselela. Ale la haro lima, mai galigeli eia la haro tabu ale uru sesele tegiteu e Iuda, eala egiteu e Iuda kama masaga veia la vovo giteu taho tolu ele ge titili lou oata la tauvalautu ele. Tio egite goio veiale Pailat veia eia ge baha la merera soio tegiteu e soldia veia egite ge putu loto la vaha giteuo, veia egite ge peho hari mai ele, veia ge visivo taro egiteu loata la tauvalautu ele. \v 32 Tio egite la valalua la vaubi goio putu loto la vaha girua ale taho lua, egite katu tola egirua te la tauvalautu oio te la galele Iesus iluale. \v 33 Eala moli egite goio te Iesuso, egite ga hiloao, eia pehoti, tio egite kamati putu loto la vahalale. \v 34 Eala moli la tahalo la vaubi isasa goio ubi la karusurusule Iesus ele la gata, goio la kasosola me la lalu salitio. \v 35 Me ale egite ubia mai ele, eau ale hilo seselea, me eau valololae, veia amutou ale ge loloa mulimuli ge tautaulailo ovola. Me eau rovia veia la vikararala tomi taku eia sesele, la vuhula eau hilo seseletila la matagu. \v 36 Me egite kama putu loto la vahala, egite ubi moli la karusurusula, ale egite igo molia mai ele veia la merera tomi te La Buk Tabu Ale Pala eia ge puru sesele ale eia veia maie: \li1 Egite kama ge putu loto isa la tuhala. \p \v 37 Me isa lou la merera oio vola eia veia maie: \li1 Egite siroga muliti la tahalo ale egite ubiao. \s1 Egite ulai e Iesus \r (Matiu 27:57-61; Mark 15:42-47; Luk 23:50-56) \p \v 38 Tio, goio mulimuli bakisi e Iosep la tau Arimatea, eia la tahalo la vimari te Iesus isasa, eia tilimuli kokovu e Iesus, la vuhula eia taga egiteu e Iudao, eia goio te Pailat, eia kaka la pilelehole Iesus oio te Pailatio. Goma e Pailat veia eia taritigi moli mai ele veia e Iosep ge abia, tio e Iosep loloa mai ele, eia goio bole taroa. \v 39 Tiele e Nikodimas, ale pala eia goio te Iesus te la logo, eia tai vikapopo le Iosep, eia abi la bulu la obu ale mali vivili tataho, la mapala uru, eia abi usu la bulu la obu ele\f + \fr 19:39 \ft Ale egite toia veia eia abi usu la bulu la obu aleie, ale La Buk Tabu toi sesele la tikumula ovola veia etato ge rovia veia eia abi usu sesele la pagale, eia soioge pigi la uati uru sesele, la vuhula la tikumula mai la kilogram 34, eia ga visauru me la tikumu la bek la raes isasa. La bulu la obu ale, eia mai sesele la gris, eala moli egite vivulo tomi la obu ilua, ale isa egite toila \+it e alos\+it*, me ale isa lou egite toila \+it e mer\+it*. Egiteu e Iuda abiribirila la vovo giteu ale pehoti ovola veia egite kama ge mavulu harari.\f* veia ge abiri la vovole Iesus ovola mai la vulovulo giteu e Iuda ale egite igoa soio te la tahalo ale pehoti. \v 40 Goio e Iosep mira me Nikodimas ele, egira goio bole la pilelehole Iesus soio, egira abiri la vovola la bulu la obu ele, egira goio avu robola la kulikuli isahari ale egite sile malalaua, mai la vulovulo giteu e Iuda lou te la ulalai giteu ale pehoti. \v 41 Ale oio tai te la baa ale egite katu tola e Iesus te la tauvalautuo, la malilo isa ovolale, me la lulu la pileho isa uru ovolale, egite olia te la vai la maitete, egite souka ulai la tahalo isasa ovola. \v 42 Tio egira goio bole la pilelehole Iesus soio, egite vitabulia oilo vola, la vuhula eia hagagavi moli, me ale la paga maulaviti, egira gabutatalea veia la pilelehole Iesus souka ge tabuli bulalahu te la haro tabu ale ge sokoa te la logo moli aleie.\f + \fr 19:42 \ft Ale la haro tabu pala muga te La Ilali La Poloselela, me eia tikumu tegiteu e Iuda mai ele, me eia tikumu tai veia la pileleho umala ge tabuli bulalahu te la haro tabu.\f* \c 20 \s1 E Iesus mahuli rivu lou \r (Matiu 28:1-8; Mark 16:1-8; Luk 24:1-12) \p \v 1 Goio, te la haro ale mulimuli te la haro tabu, e Maria Magdala goio sibitala oio te la lulu la pileho te Iesus, te la utupolapolala, eia souka matagaga sesele, eia hilo la uati eia kati tabuli robo lou la mata la lulu la pilehole. \v 2 Tiele eia hari soio te Saimon Pitao, egira me la tahalo la vimari ale e Iesus masaga seselea, eia goio veia girua mago “Egite bole taroti la pileleho La Uru loio te la lulu la pilehole, amite kama rovia veia egite tautia oiove.” \p \v 3 Tio, e Pita me la tahalo la vimari ale isasao, egira hiliti taro moli la mautu ele, egira tugati soio te la lulu la pileho. \v 4 Egira harari vikapopo tomi, eala moli la tahalo la vimari isao, eia hari mamuga, eia goio guvi pala te la lulu la pilehole. \v 5 Eia goio tiloho soilole, eia hilo moli la kulikuli oio tabulibulio, eia kama goilo. \v 6 Eala moli e Saimon Pita, eia guvi mulimuli ele, eia goio luu soilo te la lulu la pilehole, eia hilo isahari la kulikuli oio tabulibulio. \v 7 Eala moli la kulikuli ale egite avu robo la lagule Iesus ovola, eia oio tabuli tataho moli mai ale isa pilutia, eia tabuli sapolo. \v 8 Tio la tahalo la vimari ale vimugao, eia tai goilo hilo taia me eia tautaulailo ovola veia e Iesus mahuliti lou. \v 9 Eala moli egira soukama matagaga te la vikararala te La Buk Tabu ale veia e Iesus eia ge mahuli taro la lulu la pileho. \s1 E Iesus sibitala tavu e Maria Magdala \p \v 10 Goio, egira la tahalo la vimari te Iesus iluale goio beu rivu loua soio te la luma tegiruao. \v 11 Eala moli e Maria ogala magirigiri te la mata la lulu la pilehole, eia taitali. Ale eia taitali mai ele, eia tiloho soilo te la lulu la pilehole. \v 12 Eia goio hilo e angelo ilua, egira kai la kairobola ale kakea, egira pou te la mulile Iesus ale e Iosep alalavio vitabuli la pilelehole Iesus ovolao. Isa pou loata la gamala, isa lotalo la kupahala. \v 13 Goio egira veiale Mariale mago “Tavile kokora, eme taitali ilava?” \p Tio, eia goio kolia girua mago “La vuhula egite bole taroti la pileleho La Uru taku, me eau kama rovia veia egite vitabulitia oiove.” \v 14 Tiele ale eia vei molia mai ele, eia ga vulo gelele, eia hilo moliti e Iesus magirigiri, eia kama rovia veia e Iesus ele. \p \v 15 Goma, e Iesus veiala mago “Tavile kokora, eme taitali ilava? Eme paa mulimuli ere?” \p E Maria loloa mai ele, eia gabu molia veia eia la tahalo la vibaumuli la malilole, eia goio veiala mago “Tahalo uru, mai eme boletia, eme ge veiagu veia eme vitabulitia oiove, ila eau ge goio ge abi la pilelehola soio te la mautu tetalao.” \p \v 16 Goma, e Iesus tolea mago “Maria!” \p Goio, e Maria vuvulo me eia tola te la vikararala e Hibru mago “Rabonai.” Me la merera ale, la masovala maie “Tahalo La Vimari.” \p \v 17 Goio, e Iesus veiala mago “Eme umala ge sasau taku, la vuhula eau souka goata te Tete, eme ge goio tegiteu e tabarabaragu, eme ge veia giteu la merera taku mago ‘Eau ge goata te Tete, me te Tama mutou tai, eau ge goio te La Tahalo Uru taku, me La Tahalo Uru tamutou tai.’” \p \v 18 Goio, e Maria tuga goio veia giteu la valalua la vimari mago “Eau hiloti La Uru.” Eia goio veia giteu te la vikarakarala ale e Iesus veitiala ovolao. \s1 E Iesus sibitala tavu egiteu la valalua la vimari tetala \r (Matiu 28:16-20; Mark 16:14-18; Luk 24:36-49) \p \v 19 Goio, te la maulavi, te la haro moli lou ale mulimuli te la haro tabu, egite la valalua la vimari te Iesus tagati egiteu e Iudao, egite kapi robo tomi la mata la luma ale egite popou ovolale. Goma e Iesus sibitala tavu lou egiteu, eia veia giteu mago “La vimalumalu ge pou tamutou.” \v 20 Tiele eia vei molia giteu mai ele, eia goio vahilo legiteu la limala me la karusurusulao, tio egite la valalua la vimari hiloti La Uru ele, egite sagegetio. \p \v 21 Goma, e Iesus vei loua giteu mago “La vimalumalu ge pou tamutou. Mai ale e Tete bahati eau somaie, ale eau tai ge baha tai amutoue.” \p \v 22 Tio, eia vei molia giteu mai ele, eia goio pusu la galala soio tegiteu ele, me eia veia giteu mago “Amuto ge sau tola La Kalulu La Marokala. \v 23 Mai ge amuto ge vimavulaha la iruru te isasa, ale eia ge mavulaha seseleti te la iruru tetalale. Eala moli mai amuto ge magiri robo isasa veia kama ge vimavulaha taro leia la iruru, tiele la iruru tetala eia ge tabuli moli mai ele.” \s1 E Iesus sibitala tavu e Tomas \p \v 24 Tio, e Tomas, ale egite totoi taila e Didimas, eia isa tegiteu la valalua la vimari te Iesus ale savulusa gete lua, eia kama pou vikapopo me egiteu ele, ale e Iesus sibitala tavuti egiteu ele. \v 25 Goma eia goio guvi tegiteu ele, egite veiala mago “Amite hiloti La Uru.” \p Eala moli e Tomas veia giteu mago “Mai ge eau kama ge hilo la mata la nil ilua te la limalao, mai tai eau kama ge sugu la kukugu soilo volao, me eau kama ge masese la limagu te la mata la gata oio te la karusurusula, eau kama ge tautaulailo veia eia mahuliti lou veia amuto hilotiale.” \p \v 26 Goio, mulimuli la haro iuolo poloti ele, egiteu la valalua la vimari te Iesus vipou kapopo lou oio te la luma ale egite pou muga ovolao, me e Tomas tai oio vipou tomiti legiteu ele. Egite kapi robo tomiti la mata la lumale, goio e Iesus sibitala tavuti egiteuo, eia magiri kabili tegiteu, eia vei mago “La vimalumalu eia ge pou tamutou.” \v 27 Tio eia goio veiale Tomas mago “Eme ge sugu la kuku la limamu ele somai, eme ge hilo la limague, la mataa nil ovola. Me eme ge sugu la limamu somaie, eme ge masesea te la karusurusugue. Eme umalati ge tahi tataro, taritigi eme ge tautaulailo moli veia ale eau sesele, eau mahuliti lou.” \p \v 28 Goma, e Tomas koli molitiale Iesus ele mago “Eme La Uru taku! Eme La Tahalo Uru taku sesele!” \p \v 29 Goio, e Iesus ule baoliala mago “Ale eme hiloti eaue, eme tautaulailoti veia ale eau sesele, eala moli egiteu ale kama hiloau, me egite tautaulailo moli veia eau mahuliti lou, egiteu alele ge balava sesele te la tautaulailo tegiteu ale uru mai ele.” \s1 La vuhula ale e Ioanes kekesiti la buk aleie \p \v 30 Sesele, e Iesus igo la igogolu la karutula usu te la mata giteu la valalua la vimari tetalale, eala moli eau kama kekesi tomia omai te la buk aleie. \v 31 Eala moli egite ale eau kekesitiae, veia amuto ge matagaga sesele te Iesus veia eia e Kraist, e Latu La Tahalo Uru. Tiele mai amuto ge tautaulailo sesele tetala, eia ge vimahuli amutou te la vagagarila, te la isala ale uru seselele. \c 21 \s1 Egiteu la valalua la vimari ivitu hilo e Iesus \p \v 1 Goio, mulimuli lou, e Iesus sibitala tavu lou egiteu la valalua la vimari tetala oio te la magolilo e Taibirias, ale egite toi taila e Galilea. Ale eia sibitala tavu egiteu mai aleie: \v 2 La haro isasa egiteu la valalua la vimari taho vitu oio popou, egiteu ele la isaisa giteulae: e Saimon Pita; e Tomas ale egite totoi taila e Didimas; e Nataniel, la tau Galilea, eia loio sesele la mautu e Kena; e latule Sebedi iluao; me la tahalo la vimari taho lua lou. \v 3 Egiteu alele pou vikapopo, e Saimon Pita goio hiliti, eia veia giteu mago “Eau goio ge lapu la ia.” \p Goma, egite veiala mago “Muga, etato tomi.” Tio egite tuga, egite goio sae te la uaga tegiteuo, egite goio vuo, eala moli te la logo alele, egite kama abi gologolo isa la ia. \p \v 4 Tio, egite oio vovuo, goma la paga ga utupolapolati ele, e Iesus goio magirigiri oilo la paravao, eala moli egite la valalua la vimari tetala kama rovia veia e Iesus ele. \p \v 5 Goma, e Iesus tola soio tegiteu mago “Amutou bisisi ele, amuto abiti isahari la ia?” \p Eala moli egite koliala mago “Ouka.” \p \v 6 Goma, eia goio ule baoli loua giteu ele mago “Amuto ge tau la vuo te la gale la uagale, loio te la lima e gatao, tio amuto ge lapu isahari la ia.” Goma egite goio igo molia mai ale eia veitia giteuo, egite tau la vuo sotalo, egite abi pepehoti la iao, egite visikakala la ilapu la vuo soata, eia tikumu pepeho. \p \v 7 Goma, la tahalo la vimari ale e Iesus masaga seseleao, eia veiale Pita mago “Ale La Uru ele!” Tio e Saimon Pita loloa mai ele ale egite veia “La Uru ele”, tio eia goio kai la kairobola tetala ale eia kai tarotiale, la vuhula eia igogolu bulalahu moli, eia goio raga purusu sotalo la magole, eia puru soilo. \v 8 Tiele egite la valalua la vimari taho uolo, egite vore moli soilo, egite lapu molia la vuole, la vuhula egite kama malau taro la parava, la baala eia koramuli molia la lovala savulu lima. \v 9 Goma egite goiloti la paravale, egite goio hilo vuti moliti la havi oio, la ia oio volao, me la bret tai oio tabulibuli ele. \p \v 10 Goma, e Iesus veia giteu mago “Amuto ge abi isahari la ia ale amuto so lapulapuale somai.” \p \v 11 Goio, e Saimon Pita pagi raga moli soata te la uagale, eia goio lapu pasiti la vuo soilo la paravao. La vuo eia volu me la ia ale ururu usu, la giligila eia koramuli mai salatusa savulu lima gete tolu, eala moli la vuo kama masile. \v 12 Goma e Iesus veia giteu mago “Amuto gomai ali.” Eala moli egite la valalua la vimari ele isa kama tahia mago “Eme ere?” La vuhula egite rovitia veia ale La Uru moli ele. \v 13 Goma e Iesus abi isahari la ia, eia tabari legiteule, vikapopo me la bret taio. \v 14 Ale e Iesus mahuli taroti la pileho, eia sibitala tavu la valalua la vimari tetala la vaka tolula aleie. \s1 E Iesus veiale Pita veia eia ge vibaumuli la valalua me hatavivile tetala \p \v 15 Egite ali kaluvutio, goma e Iesus veiale Saimon Pita mago “Saimon, latule Ioanes, soioge eme moli ge la gilogo taume somai taku, eia kara polo te la gilogo tegiteu ale isahari ele, ia?” \p Goio, e Pita veiala mago “Meie, Tahalo Uru, eme rovia veia eau e tabaramu sesele.” \p Goma, e Iesus veiala mago “Eme ge valivali egiteu e latatu la sip taku.” \p \v 16 Goio, la vaka luala, e Iesus goio tahi loua mago “Saimon, latule Ioanes, eme soioge gogo seseleau, ia?” \p Goio, e Pita vei rivu louala mago “Meie, Tahalo Uru, eme rovia veia eau e tabaramu sesele.” \p Goma, e Iesus vei louala mago “Eme ge baumuli egiteu la sip taku.” \p \v 17 Goio, la vaka tolula lou eia tahi loua mago “Saimon, latule Ioanes, mave, eme soioge e tabaragu sesele, ka ouka?” \p Goma, la ilole Pita eia burukoti, la vuhula e Iesus tahitia vaka toluti, me ale la vaka tolula eia toi molia maie mago “Mave, eme soioge e tabaragu sesele, ka ouka?” Tiele eia goma veiale Iesus mago “Tahalo Uru, eme rovi la papaga tomi, me eme rovia veia eau e tabaramu sesele.” \p Goma, e Iesus veiala mago “Eme ge valivali egiteu la sip taku. \v 18 Eau vei seseleamu, alaura eme so hatamalelabao, eme sesele kisi la lavalava te la kabilimu, eme tatuga te la baa ale eme masagea ge goio volao. Eala moli mulimuli eme ge uru, la limamu ge rara palapala, la tahalo isapolo ge kisi la lavalava soio taume, eia ge pulime soio te la baa ale eme kama masagea ge goio volao.” \v 19 Eala moli ale e Iesus veiala mai ele, eia mai ale pigi vei soio te Pita veia eia ge rovi la pileho tetala ale ge mulimuli, veia egiteu la valalua la gima ge bilia, eia ge sugu taro la mahulila tetala mai la vaabila soio te La Uru mai la vaisalela ale uru sesele. Goio, e Iesus vei kaluvutiala la merera la tilovo mai ele, eia goio vei louale Pita mago “Eme ge tilimuli eau.” \s1 La vikararala te la tahalo la vimari ale e Iesus masaga seselea \p \v 20 Goio, e Pita vulo gelele, eia goio hilo la tahalo la vimari ale e Iesus masaga seselea, eia tilimulimuli egirua. La tahalo moli ale pala, egite alalio, me eia pou tahobo te la magorole Iesuso, eia goio vei mago “Tahalo Uru, ere ge sugu taro eme te la lima giteu la gimao?” Tiele la tahalo la vimari moli aleie eia mulimuli e Iesus mira me Pita soiole. \v 21 Goio e Pita hiloa eia loiole, eia goio tahi e Iesus mago “Tahalo Uru, la tahalo ale, la pileho tetala tai ge mave?” \p \v 22 Goma, e Iesus koliala mago “Mai eau masagea veia eia ge mahuli moli kara ale eau ge beua somai, ale kama la paga taume. Taritigi eme ge mulimuli moliau mai ale eau veitiamu.” \p \v 23 Tio, mulimuli, la vikararala te Iesus aleie, eia para piraramoti soio tegiteu la valalua tomi ale tilimuli eia, veia la tahalo la vimari ale, eia kama ge peho. Eala moli e Iesus kama veia maie veia eia kama ge peho, ale la vikararala tetala oio vola eia vei molia maie mago “Mai eau masagea veia eia ge mahuli moli kara ale eau ge beu loua somai, ale kama la paga taume.” \p \v 24 Sesele, la tahalo la vimari moli ale valoloti la papaga aleie, eia moli eiala kekesi taia, me etato rovia veia la valolo tetalae, eia sesele viruru. \s1 La tapasi la merera \p \v 25 Sesele, la igogolu usu tai lou e Iesus igotiao, mai ge kekesi tola egiteu tomi isasasao, eau gabua veia la maututula tomi eia kama koramuli la bubuku ale ge kekesi tola la veimuli polola tomi te la igogolu te Iesus ele veia ge taua ovola.