\id JAS - Nakanai NT [nak] -Papua New Guinea 1983 (DBL 2014) 
\h E IAKOB 
\toc1 Ale La Merera Te Iakob, Eia Kekesia Giteu La Valalua Me Hatavivile Te Kraist 
\toc2 Iakob 
\toc3 Iak 
\mt1 ALE LA MERERA TE IAKOB, EIA KEKESIA GITEU LA VALALUA ME HATAVIVILE TE KRAIST  
\c 1  
\p
\v 1 Eiau e Iakob, eau la bilalaha te La Tahalo Uru, me te Latula e Iesus Kraist tai, La Uru gatou. Eau kekesia mutou la valalua me hatavivile tomi tetala, amuto hele le egiteu la gima te Kraist, amuto hele burati soio te la galegale tomi. Eau toi la haro sesele soio tamutou tomi ele.   
\s1 La tovolalaila eia vivagari etatou  
\p
\v 2 Amuto tabarabaragu, mai la iloburukola ge sibitala tavu amutou, taritigi amuto ge sagege moli.  
\v 3 Mai eme ge toro te la merera te Kraist, ale eme ge bolehoho la tovolalaila mai ele, me eme kama ge ilo buruko harari, eme ge la tahalo me la tavile ale vagari sesele.  
\v 4 Mai amuto ge magiri vagari mai ele, me amuto kama ge vulo liliu lou, amuto ge sibitala maroka tataho, amuto ge la tahalo me la tavile sesele te Kraist.   
\s1 La kilaka eia la toro gatou  
\p
\v 5 Mai isa tamutou eia rovia veia la mari tetala eia boto, taritigi eia ge kaka La Tahalo Uru, La Tahalo Uru ge abiala la mari ale sesele, eia kama ge hate roboa, la vuhula eia la tahalo la mutelela.  
\v 6 Eala moli mai eme pou te la kilaka, eme umala ge ilo lalua, eme ge kukukumu moli la kilaka taume veia La Tahalo Uru ge abi seseleamu. Mai eme ge ilo lalua, eme mai la uaga ale la mago pigi lokelokea.  
\v 7-8 Me la tahalo ale gabutala lalua mai ele, eia la tahalo la visigologolola, La Tahalo Uru kama ge vibalavea mai la kilaka tetalale, eia kama ge abiala isa la paga, ouka.   
\s1 La morivava me la tahalo la vuliti  
\p
\v 9 Mai la tahalo te Kraist isa eia la morivava, taritigi eia ge matagaga mai ele veia oio te la lagu La Tahalo Uru, eia la tahalo sesele, alele eia taritigi veia eia ge sagege moli te la savelela tetala.  
\v 10 Mai la tahalo te Kraist isa lou, eia la tahalo la vuliti, mai eia ge matagagati veia te la lagu La Tahalo Uru eia la golu bulalahu moli, taritigi eia ge sagege mai ele, la vuhula eia rovitia veia la uati tetala kama ge vimahulia. Eia ge pakuku mai la sese la obu. La lolovi ge vai taroa, eia ge paru.  
\v 11 La tahalo la vuliti, eia mai la sese la gelegele. La haro ge agi titili, la sese la gelegele eia ge pakuku, eia goio paru bulalahu molitio, etato kati hilo la marasala. Me taritigi etato ge matagaga sesele mai ele veia la tahalo la vuliti eia ge peho taro la igogolu tetala ale eia vagari tautavuale.   
\s1 La tovolalaila  
\p
\v 12 Mai la tahalo te Kraist eia ge poga la tovolalaila mai la savelela me la ilea, ale eia ge sagege, la vuhula mai eia ge bolehohoa, La Tahalo Uru ge vibalavala la mahulila ale sesele ale eia raragitia veia ge abia giteu la valalua me hatavivile tetala.  
\v 13 Mai isa eia gabua veia la iloburukola eia laputia soio te la iruru, ale eia umala ge veia La Tahalo Uru tovo lalaia, ouka. La vuhula La Tahalo Uru kama rovi la tovolalaila, eala eia kama tovo lalai etatoue.  
\v 14 Eala moli taritigi etato ge rovia veia etatou lou visibitala la tovolalaila somai tegatou, ale etato vagari moli veia ge tilimuli moli la masasagala te la vovo, me alele etato tiloti ovola.  
\v 15 La gabutatalala tegatou, eia mai seselele, eia ge visibitala la iruru usu somai tegatou, me la iruru, mai eia ge vulo uru, eia ge visibitala la vavuala mai la pileho somai tegatou.   
\p
\v 16 Amuto tabarabaragu, amuto taritigi, umala amuto ge tilo harari moli te la visigologolola.  
\v 17 La paga tomi ale taritigi, eia maroka, eia loata te La Tahalo Uru. E Tama gatou, eia la vuhu la matagaga, eia visivoti egiteu la vibalavala tetala ale taritigi sotalo tegatou, eia kama koramulia ge vulo loua veia ge pigi robo lou letatou la maligoma, ouka.  
\v 18 Te la masasagala moli tetala eia visibitala etatou mai e latatula sesele. Eia veipala moli etatou te la merera tetala ale sesele, eia visibitala etatou mai ele, veia etato ge mamuga egiteu la papaga tomi ale eia vipoutia, etato ge pou mai e latatula sesele.   
\s1 La iroromulila  
\p
\v 19 Amuto tabarabaragu, taritigi amuto ge gabutatala tigi. Amuto tomi ge vagari la ilaba gelela, eala moli amuto umala ge igo totolo harari, umala ge toi harari la merera soio tegiteu e tabarabara mutou.  
\v 20 La vuhula, la igototolola tegatou eia kama ge vimahuli etatou isasa veia etatou ge vulo maroka mai la masasagala te La Tahalo Uru.  
\v 21 Tio mai alele, eia taritigi amuto ge poke taro la vulovulo tomi ale kama kokorale, amuto umala ge gilogilo, umala ge mata bulakalaka, mai egiteu la valalua isahari. Eala moli amuto ge sau tola la merera te La Tahalo Uru ale eia galutia te la tia mutou ele, eia kusiti, la vuhula la merera tetalale eia koramulia ge vimahuli amutou.   
\p
\v 22 Eala moli amuto umala ge lolo bulalahu moli la merera te Kraist. Amuto ge tovo mulia mai ale amuto lolotiale.  
\v 23 Mai ge ouka, amuto mai sesele la tahalo ale hilo la tirarola te la titiro,  
\v 24 me eia tuga soio eia goio vauti lou la tirarolale eia mave.  
\v 25 Eala moli amuto ge mata muli la sesele la merera te La Tahalo Uru, eia maroka sesele, eia lube etatou taro la kilisi te Satan. Amuto ge hiloa mai ele, amuto ge tovo muli seselea. Amuto umala ge vaula la tilovo alele, amuto umala tai ge silaha taroa, mai ele amuto ge poga sesele la vibalavala oio te la pulolou tamutou.   
\p
\v 26 Mai isa tamutou eia veia eia la tahalo la lotu, eala moli eia la tahalo la vikara papaila, ale eia visigolo, eia kama rovi la lotu.  
\v 27 La vulovulo la lotu sesele ale maroka te la gabutatalala te La Tahalo Uru, eia maie: Eme ge baumuli egiteu ale pou la savelela mai egiteu e hatavivile la baharu ale e harua giteu pehoti, egiteu la tulagola tai. Eme ge baumuli eme, la vulovulo la maututula ale kama kokora eia soukama lapume soio te la iruru veia eme ge gotigu rivu lou, la vulovulomu kati ge kokora.   
\c 2  
\s1 Etato umala ge toi tabaribari la valalua me hatavivile  
\p
\v 1 Amuto tabarabaragu, etatou ale gabu tikumu e Iesus Kraist, eia kama taritigi veia etato ge toi tabaribari la valalua me hatavivile veia isahari taritigi, isahari ouka.  
\v 2 Mai la tahalo la vuliti isasa eia ge lotu tomi le amutou, me amuto hiloa eia tokoromo tataho. Mai tai la morivava isa eia guvi veia ge lotu tomi le amutou, me amuto hiloa la lavalava tetala eia masile kurakura lalahu.  
\v 3 Mai amuto ge togo la tahalo la vuliti, amuto ge veiala mago “Male, eme ge pou la pulolou ale taritigi ele” me amuto goio ge vei louale maura la morivava mago “Eme ge magiri gale” uka “Eme pou otalo la magasale”,  
\v 4 ale amuto ruruti, la vuhula amuto toi tabariti lou la valalua mai ele, amuto mata muliti la vulovulo la valalua, eala moli la gabutatalala tamutou eia kama taritigi, eia kama kokora.   
\p
\v 5 Amuto tabarabaragu, amuto ge laba gele tavuau! La Tahalo Uru visati legiteu la valalua la morivava veia egite ge tahola la vuliti mai la merera tetala. La merera tetalale, mai egite ge toro ovola, egite ge pou la balavala te la pulolou la matagagala tetala mai la merera tetala eia vei seseletia, mai etatou ale puhi tigi sesele La Tahalo Uru.  
\v 6 La Tahalo Uru, eia ge vauru egiteu la morivava mai ele, eala moli amuto la valalua goio vile mumugu lou egiteu! Hiloa, egiteu ale viligi amutou, egite visigolo amutou te la merera tomi tegiteu, egiteu alele la valalua la vuliti moli!  
\v 7 Egiteu la tahalo la vuliti moli eiala vikara barea la isa la riau tegatou e Kraist ale amuto abiti la vuluhi te la isala.  
\v 8 Mai amuto ge roromuli la merera te La Tahalo Uru te La Buk Tabu Ale Pala, la merera ale tikumu ale, eia veia maie “Eme ge gogo e tabaramu mai ale eme gogo rivu lou emei.” La merera alele, mai eme roromulia, ale eme la tahalo sesele, eme kama ruru.  
\v 9 Eala moli mai eme ge toi tabaribari la valalua me hatavivile, ale eme ruruti, eme poloti la merera te La Tahalo Uru.  
\v 10 Ale eme ge polo la tururi tetala isa moli mai ele, ale eme mai ale boruti, La Tahalo Uru ge vilai eme mai ale eme poloti la merera tetala tomi.  
\v 11 La vuhula eia toi la merera usu somai tegatou, mai umala ovo tataro le tabaramu e rutula, umala bilibili, la merera tomi moli mai ele. Mai eme ge pou tataho te la taulaila, eala moli eme bili e tabaramu, alele eme la tahalo la iruru, me la merera ale eme kama poloa eia kama ge vimahulime, ale moli eme polotia eia ge vitilome, eme ge vilua.   
\p
\v 12 Taritigi la vulovulo mutou tomi, la merera tomi tai tamutou, eia ge taritigi moli mai sesele la vulovulo la tahalo ale pou te la matagaga, mai la vulovulo la tahalo ale rovitia veia mulimuli La Tahalo Uru ge mata muli la vulovulo gatou tomi oio te la matagaga tetala ale uru.  
\v 13 Mai eme kama rovi la gilogo, La Tahalo Uru kama ge gogo emei. Eala moli mai eme la tahalo la gilogo sesele, ale La Tahalo Uru ge gogome, eia kamati ge kolia soio taume mai la iruru tomi ale eme igotia, ale eme poloti la merera tetala.   
\s1 La tahalo te Kraist ale kama rovi la gilogo, eia lotu bulalahu moli  
\p
\v 14 Amuto tabarabaragu, mai isa tamutou eia veia eia tautaulailo te Kraist, eala moli eia kama suli tigi egiteu la valalua me hatavivile tomi, la lotu tetala eia la golu bulalahu moli. La merera tetala ale eia veia eia tautaulailo te Kraist, ale la golu bulalahu, eia kama ge vimahulia.  
\v 15 Mai egite la valalua me hatavivile te Kraist isahari oio, egite pou la savelela, la lavalava ouka, la ilali ouka,  
\v 16 ale eia kama koramulia veia eme ge veia giteu mago “Amuto tuga, amuto ge baumuli tigi amutou, amuto souka lea!” Mai etato ge vikara bulalahu mai ele, etato toi bulalahu la vikararala ale taritigi soio tegiteu, eala moli etato kama ge suli egiteu bakisi la ilali me la kulikuli, ale etato galo seseleti.  
\v 17 Mai eme veia eme la tahalo la tautaulailo, eala moli eme kama suli egiteu e tabarabaramu, tiele la tautaulailo taume te Kraist eia la golu bulalahu, eia la vavuala ouka, eia pehoti.   
\p
\v 18 Eala moli isa soioge ge koli la merera taku maie, mago “Isahari, egite la tahalo la kilaka soio te La Tahalo Uru, me isahari egite la tahalo la visuli soio te la valalua me hatavivile.” Eala moli eau ge koli la merera tetalale maie, mago “Etato ge hilo la vavua la merera tegirua. Ale kaka moli me eia kama igo isa la igogolu ale taritigi, etato kama ge hilo isa la vavuala. Ale la tahalo la visuli, etato ge rovia veia eia roromuli sesele e Iesus, la vuhula la vavuala usu tetala etato ge hiloa.”   
\p
\v 19 Amuto umala ge vei tatataho rivu lou amutou veia amuto togo sesele La Tahalo Uru. Egiteu la hituhitu tai ale kama kokora, egite gabu tikumu La Tahalo Uru mai ele, eala moli la vovo giteu pariri tai leia.   
\p
\v 20 Mave, la masova la merera taku, amuto isahari soioge souka abi tigia, ia? Ale eau tovoa soio te la tahalo ale tautaulailo te Kraist, eala moli eia kama suli egiteu e tabarabarala, amuto masagea veia eau ge vahilo le amutou la sesele la merera alele, ia? Ioge, eau ge vituri mulia mutou la pagale.  
\v 21 E tubu gatou e Abraham alaura, eia kisi e latula la posolagu, e Isak, oata te la poro veia ge bilia mai la vaabila soio te La Tahalo Uru. Eia roromuli La Tahalo Uru mai ele, tio La Tahalo Uru lege sisigi leia, eia toia mai ele veia e Abraham eia la tahalo la marokala tetala.  
\v 22 Etato hilo taia te La Buk Tabu Ale Pala veia e Abraham, eia tautaulailo sesele te La Tahalo Uru, eia roromuli taia, la gabutatalala tetala ale iluale magiri vikapopo moli. La igogolu tomi tetala, eia mai ale vitikumu la gabutatalala tetala soio te La Tahalo Uru veia eia ge maroka.  
\v 23 Mai la merera te La Buk Tabu eia puru seseleti soio tetalale, ale eia veia maie “E Abraham, eia roromuli seseleti La Tahalo Uru, me La Tahalo Uru hiloa mai ele veia la tahalo ale eia maroka.” Mai alele, La Tahalo Uru vagoiloa mai la tahalo tetala seseleti.  
\v 24 Ale etato ge matagaga mai ele veia la visuli tegatou soio te La Tahalo Uru, mai tai ale soio te la valalua me hatavivile tomi, eia ge vimahuli etatou, etato me La Tahalo Uru kati ge vipou baa. Eia kama mai ale etato tautaulailo bulalahu te Kraist, ouka. Etato ge pou tavu tai la igogolu la visuli, me La Tahalo Uru ge masaga etatou mai ele, ale eia masaga tavu tai e Abraham alaura.   
\p
\v 25 Mai tai la tavile uru te La Buk Tabu Ale Pala, e Rahab, eia la tavile la gauru, eia suli egirua taho lua ale e Iosua baha taro muga egirua soilo te la mautu e Ieriko veia egira ge kedi soio la mautu alele. La valalua la pahutuhutula veia ge lao tola egirua, eala moli e Rahab goio tau kokovu egira oio te la luma tetala, eia goio visigolo egiteu, eia baha taro egiteu soio la gale ale isapolo, koratio. Eia la tavile ale kama kokora, eala moli eia suli egira taho lua la bilalaha te La Tahalo Uru mai ele, La Tahalo Uru hiloa, eia toia veia eia la tavile la marokala.  
\v 26 Etato rovia veia, mai la kalulu gatou ge hele taro la vovo gatou, etato mai ale pehoti. Tio mai tai la tautaulailo tegatou, mai eia kama ge magiri vikapopo me la igogolu la visuli, mai te la gilogo te La Tahalo Uru, ale la tautaulailo tegatou eia mai ale pehoti.   
\c 3  
\s1 Etato ge baumuli tigi la hare gatou  
\p
\v 1 Amuto tabarabaragu, taritigi amuto umala ususu ge vagari tavu la igogolu la vimari te la merera te Kraist soio te la valalua me hatavivile te la lotu, la vuhula la igogolu alele eia vagari, eia tikumu. Amiteu ale igogoluti ovola, La Tahalo Uru ge mata muli sesele la vulovulo miteu, eala moli amutou la valalua bulalahu, amuto ge mavulaha bakisi.  
\v 2 Etato tomi boruti te la iruru, eala moli la tahalo ale baumuli tigi la kalameala, la harela ka ruru, etato ge rovia mai ele veia eia la tahalo sesele, eia kama igo lalahu, eia la tahalo la tilogo, eia baumuli tataho la vulovulola. Mai la paga ale bisi moli, eia koramuli la igogolu isa uru.   
\p
\v 3 Mai etato ge vuvu la gogo soio te la maisu la kau, etato koramulia ge tatea soio, mai te la masasagala tegatou. La kalamea gatou, eia mai tai ele, eia bisi moli, eala moli eia vagari.  
\v 4 Mai tai la ilau la uaga. Mai la uaga isa uru, la lolovi tai ge vagari, eala moli la vore la ilau te la lima gatou, eia kama uru, eala moli eia ge au tataho moli la uaga tegatou soio te la tasi ale etato masagea ge poru ovola.  
\v 5 Mai la kalamea gatou tai, eia bisi moli, eia kama uru, eala moli eia veipala la merera ale tikumu.  
\v 6 La kalamea gatou, eia mai tai sesele la havi. Mai la pasisiri la havi isa bisi moli, eia ge tubu soio te la obu isa, la hohoi tomi ele ge kahatio. Mai moli ele la kalamea gatou eia mai sesele la havi. La iruru tomi, egite sibitala te la hare gatou, eia ge visibitala la iruru soio tegatou mai ele, ale la kalamea gatou veipalatia, mulimuli etato goio igo seselea mai la hare gatou eia toitia. Eala eia matagaga mai ele veia la kalamea gatou eia mai sesele la havi. La havi alele, eia loio sesele te la mautu te Satan, la havi ale uru karerere oio vola. La hare gatou eia koramulia ge igo hate mamasi la hate giteu la valalua me hatavivile.   
\p
\v 7 Etatou la valalua, etato koramulia ge vimalu egiteu la bolobolo me la malumalu,  
\v 8 eala moli etato kama koramulia ge vimalu la kalamea gatou. Eia la gima sesele, eia tilalia moli te la haroharo tomi kama maila, eia mai ale igo gegeru egiteu e tabarabara gatou te la merera la visigologolola me la veimulimulila.   
\p
\v 9 Te la hare gatou, etato toitoi la vaisalela soata te Tama gatou, goio kama tabaa etato goio gilo lou egiteu e tabarabara gatou ale La Tahalo Uru pui egiteu mai sesele la tirarola.  
\v 10 Mai alele, etato rovitia veia la vaisalela me la gililo tomi eia sibitala vikapopo moli te la hare gatou, la kalamea gatou eia mai ale vasosoleti mai la kalameale vareki. Amuto tabarabaragu, eau veia mutou, la vulovulo gatou alele eia kama taritigi.  
\v 11 Mave, eia koramuli etato ge hiloa te la lalu isasa, la lalu oio vola ge ilua, ale maigi isasa, ale milamila tai ge isa, egira ge sibitala vikapopo moli? Ouka.  
\v 12 Amuto tabarabaragu, eau vei seselea mutou, la keme, eia kama koramulia veia la vavuala ge sibitala mai la gaiva. Me la vavua la vaen eia kama koramulia ge sibitala mai la keme. Mai alele, eia kama koramulia veia te la lalu ale milamila, etato ge pogea ovola la lalu ale maigi, etato ge liua, ouka. Mai tai ele eia matagaga moliti veia eia kama taritigi veia la merera ale taritigi me la merera ale kama kokora, eia ge sibitala vikapopo te la hare gatou.   
\s1 La merera ale sesele, eia loio moli te La Tahalo Uru  
\p
\v 13 Mai isa tamutou eia veia eia la tahalo ale taritigi, veia eia la tahalo la mari, amuto ge mata muli la vulovulola veia eia taritigi, ka ouka, veia eia la tahalo la tilogo, me eia la tahalo la mari, ka ouka.  
\v 14 Eala moli, mai isa tamutou eia la tahalo la igototolola, eia maisu tototolo, eia tai para muraha, eia umala ge visigolo veia eia la tahalo la mari.  
\v 15 La mari tetala oio te la vulovulola ale mai ele, eia kama loata te La Tahalo Uru, ouka. Alele eia la mari moli te la vulovulo la vovo, eia loio moli te Satan.  
\v 16 Mai la tahalo ale eme sivuti la pakakasala me la maisu totolola oio tetala, oio te la tahalo moli alele eme ge sivuti tai la vareagila me la vulovulo tai ale kama kokora oio moli tetalale.  
\v 17 Eala moli la mari ale loata te La Tahalo Uru, eia maroka sesele, eia visibitala la vulovulo gatou ale taritigi tataho maie:  
\li1 etato ge pou tataho,  
\li1 etato kama ge la tahalo la igototolola;  
\li1 etato ge mutele sesele;  
\li1 etato ge lolo vulai tataho;  
\li1 la gilogo eia ge volu sesele oio tegatou,  
\li1 eia ge visibitala la vavuala ale taritigi;  
\li1 etato ge visuli sesele soio te la valalua me hatavivile  
\li1 tomi, etato kama ge toi tabaribari egiteu;  
\li1 etato ge sau tola vagari la lotu,  
\li1 etato kama ge lotu bulalahu moli, ouka,  
\li1 etato ge lotu sesele.   
\p
\v 18 Me la vavuala ale taritigi, ale la tahalo ale taritigi ge galua, eia ge kusi, eia ge vua mai la vulovulo ale maroka sesele.   
\c 4  
\s1 Etato ge kisu taro la vulovulo ale kama kokora te la vovo  
\p
\v 1 Amuto oiole vaigigo, la vulovulo mutou alele la rova vahilitia? La vulovulo mutou lou eia vahilitia, ale la gabutatalala tamutou ilalua, la tia mutou oilo kama malilo, eala amuto vaigigo mai ele.  
\v 2 Amuto hate saga tavu la golugolu tegiteu e tabarabara mutou, amuto loho tavua mai ele, la vuhula amuto kama taholea, amuto vaigo totolo, amuto gabutatala moli la vikokuela, la bilili. La paga ale amuto masagea, amuto kama taholea, la vuhula amuto kama kaka La Tahalo Uru ovola.  
\v 3 Eala moli ale amuto kaka la paga isasa oio te La Tahalo Uru, me eia kama abia mutou, amuto ge matagaga mai ele veia la kilaka tamutou eia kama sesele, amuto kaka bulalahu moli la paga ale amuto isu molia, amuto kama kaka La Tahalo Uru la paga ale tikumu, eia ge suli sesele la kalulu mutou.   
\p
\v 4 La Tahalo Uru puliti amutou soio tetala, eala moli amuto mai ale taulai sasasaroti lou soio te la vulovulo ale kama kokora te la vovo. Amuto kama rovia veia mai isa ge hate saga tavu moli la vulovulo ale kama kokora te la vovo, alele eia mai ale gimati La Tahalo Uru. Mai isa ge masaga tavu la vulovulo ale kama kokora te la vovo, eia vileti La Tahalo Uru mai ele, La Tahalo Uru tai ge kolia soio tetala mai la vulovulola lou.  
\v 5 Taritigi amuto ge matagaga tigi veia la merera te La Buk Tabu Ale Pala eia kama vikara bulalahu ale eia veia maie “La Tahalo Uru, eia vipou la kalulula oilo tegatou veia etato ge vagari tavu sesele la vulovulo ale maroka veia etato ge te Kraist moli sekela.”  
\v 6 La Tahalo Uru eia veipalatia la gilogo tetala somai tegatou, me oio volale eia koramuli seselea veia etato ge roromulia. Mai La Buk Tabu Ale Pala eia vei tai loua maie:  
\li1 La Tahalo Uru ge magiri robo la tahalo la vareagila,  
\li1 eala moli la tahalo la mahelala eia ge gogoa,  
\li1 eia ge vimahulia.   
\p
\v 7 Mai alele, eia koramuli seselea veia etato ge roromuli moli La Tahalo Uru, etato ge magiri robo tai e Satan, eia ge hele taro etatou mai ele.  
\v 8 Etato ge pou hagagavi moli soio te La Tahalo Uru, eia ge gomai hagagavi tegatou. Taritigi tai veia amuto la tahalo la iruru, amuto ge vulo halaba la vulovulo mutou, eia ge maroka. Amuto la tahalo la visigologolola ge vulo halaba tai la gabutatalala tamutou oilo.  
\v 9 Taritigi amuto ge tali pepeho soata te la iloburukola te la iruru tamutou. Amutou ale lege sisigi, taritigi amuto ge tali. Amutou ale sagege, taritigi amuto ge ilo bubuli.  
\v 10 Taritigi pepeho veia amuto ge vibisi lou amutou te la lagu La Tahalo Uru, amuto kamati ge pakakasa. Mai ge mai ele, eia ge vauru amutou.   
\s1 Etato umala ge tomu sasae la vulovulo giteu e tabarabara gatou  
\p
\v 11 Amuto tabarabaragu, umala amuto ge mera kukumua mutou. Mai isa ge mera kukumuale tabarala, me eia ge vile tai egiteu la valalua mai ele, eia mai ale vikara gegeru soio te la merera tegatou e Iuda ale taritigi, e Moses kekesitia, la vuhula eia tomu sasae la vulovulole tabarala, eia vauru rivu lou eia veia eia ge abi la muli La Tahalo Uru te la igogolu tetala ale eia ge vimagiri etatou te la vigagiala. Eia matagaga moli veia la merera te Moses eia tabuli palati kara igoie te la iligo tigi la vulovulo gatou. Ale amuto vagari veia ge tomu sasae la vulovulole tabaramu, amuto kamati togo la igogolu te la merera te Moses, amuto polotia.  
\v 12 La Tahalo Uru sekela vipou la merera ale tikumu somai tegatou la valalua me hatavivile. Me La Tahalo Uru sekela tai eia ge mata muli la vulovulo gatou, isa lou ge ouka. La Tahalo Uru sekela moli eia ge vimahuli etatou. Me La Tahalo Uru sekela moli koramulia ge koli bara la iruru tegatou. Eme ere veia eme ge tomu sasae la vulovulole tabaramu?   
\s1 Etato umala ge vareagia La Tahalo Uru  
\p
\v 13 Egiteu oio isahari tamutou ele vikara maie “Gai, uka galigeli, etato ge kavovou soio la mautu e tibo, etato ge mou muga oio vola la leavala isasa, etato ge galu la liu, ge poga bakisi la uati mai ele, ge paa muli la uati tegatou eia ge uru mai ele.” Eala moli eia taritigi pepeho veia amutou ale vikara mai ele, amuto ge lolo la merera taku.  
\v 14 Etato la tahalo la vovo kama koramulia ge rovi la mahulila tegatou ale galigeli veia eia ge mave. La mahulila tegatou eia mai la veto, eia sibitala te la kavikoki, la haro goata, eia kokovu lou, etato kamati hiloa.  
\v 15 Eala eia taritigi veia amuto ge vikara maie “Mai La Uru ge masagea, etato ge mahuli tabaa bakisi, etato ge vahiliti la igogolu ale maio, ale maie.”  
\v 16 Eala moli amuto kama gabutatala mai ele. Amuto pakakasa moli, amuto vauru lou amutou, amuto ruruti.  
\v 17 Mai alele, eia taritigi amuto ge matagaga veia mai la tahalo isasa eia rovi la vulovulo ale taritigi, eala moli eia kama igoa, la tahalo ale eia ruruti.   
\c 5  
\s1 La merera soio tegiteu la tahalo la vuliti  
\p
\v 1 La merera taku isa lou eia goio tamutou ale tahola la uati uru. Taritigi amuto ge sokoa veia amuto ge pigi la tilali, la ilo mutou ge vaulo, la vuhula la iloburukola eia ge sibitala robo amutou, amuto ge ilo ruru sesele.  
\v 2 La vuliti tamutou ele, eia ge mai ale kalesoti, la lavalava tamutou kamati ge kokora, la sasabe me kusuke ge koro lahua.  
\v 3 La uati ale amuto tau olutiale, eia tai ge kama kokora, eia ge veipala la vulovulo mutou mai ele, eia ge vikaluvu tai la mahulila te la vovo mutou mai la havi ale gutu la obu. La imamala ale igoie, eia hagagaviti ge la tapasi la haro, eala moli amuto tau oluti la vuliti veia eia ge suli amutou.  
\v 4 Hiloa, amuto pala baha egiteu la valalua soio te la igogolu tamutou, eala moli amuto kamati loto tigi egiteu, egite oio taliti soata te La Tahalo Uru, ale eia moli sekela vagari, eia lolotia.  
\v 5 Amuto mahuli tabaati, amuto pou moli la sagegela, amuto kama savelea isa la paga, amuto pou tataho moli, eala moli amuto kama gabutatala e tabarabara mutou. Amuto pou tatahoti, amuto ali maru, la kabili mutou tubu tataho mai la bolo ale la kabilila tubu, egite raragiti veia ge laoa, ge oloa, me amuto tai ge poga tavu la viluala mai la bolole.  
\v 6 Amuto kama kokora, amuto laputi egiteu ale kama ruru soilo te la vigagiala, amuto kaua giteu la merera usu, amuto mai ale biliti egiteu, eala moli egite kama vagari veia ge magiri robo amutou.   
\s1 Etato ge vagari moli ge pou tali la guluvi te Kraist  
\p
\v 7 Amuto tabarabaragu, taritigi amuto ge magiri vagari moli, amuto kama ge gabutatala papai, kara ale La Uru ge beu rivu loua somai, eia ge vimatata la iruru tomi. Amuto rovitia, la tahalo ale tuhakala, eia ge galu la ilali, eia ge pou tali la hura me la haro ale ge vikusi la ilali tetala orivo la mahuma. Eia pou tabaa mai ele, kara la ilali ge kusi.  
\v 8 Amutou tai, taritigi amuto ge vagari moli, amuto ge toro moli te Kraist, la vuhula la haro ale eia ge beu rivu loua somai te la maututula, eia hagagaviti.  
\v 9 Umala tai veia amuto ge silaha taro egiteu e tabarabara mutou te la vareagila tegiteu veia ge vikara kukumua giteu, la vuhula amutou tai la tahalo la iruru, me La Tahalo Uru soukama ge tomu sasae la vulovulo mutou tai. La Uru eia oioti te la matapiro, bakisi moliti eia ge goluma, eia ge mata muli la vulovulo gatou la valalua me hatavivile tomi.   
\p
\v 10-11 Amuto tabarabaragu, etato rovitia veia la tahalo ale magiri vagari, La Tahalo Uru ge vibalavea. Mai egiteu la bilalaha te La Tahalo Uru ale alaura, egite magiri vagari, egite veipala la merera te La Tahalo Uru soio te la valalua me hatavivile. La valalua vile egiteu, eala moli egite magiri vagari moli te la isa La Uru. Mai tai la tahalo ale e Iob, la iloburukola uru eia sibitala roboa, eala moli eia magiri vagari, mulimuli La Tahalo Uru goio vibalava seselea. Etato tomi tai rovia mai ele veia La Tahalo Uru, eia la tahalo la gilogo sesele.   
\s1 Etato umala ge toi bulalahu la isa La Tahalo Uru veia ge vitikumu la merera tegatou  
\p
\v 12 Amuto tabarabaragu, la merera isa ale tikumu eau masagea veia amuto ge matagaga ovola veia amuto umala ge vikara ge toi la isa La Tahalo Uru soio te la merera tamutou veia ge vitikumu loua mai ele. Amuto umala ge vitikumu la merera tamutou veia ge toi sesele soata te La Tahalo Uru, veia amuto ge toi la paga isa tai omai te la magasa. Mai amuto ge toi moli mago “Elo”, ale la masovala ge “elo” moli, kama ge vulo loua. Mai tai amuto ge toi moli mago “Ouka”, ale la masovala tai ge “ouka”, kama ge vulo loua. Mai amuto ge toi bulalahu moli la isa La Uru, me amuto ge visigolo lou, ale amuto ruruti me La Tahalo Uru ge vilai sesele amutou te la iruru tamutou ele.   
\s1 La kilaka ale vagari, etato ge hilo la vavuala  
\p
\v 13 Mave, isa oio kabili tamutou ele, eia bukeke la iloburukola ale uru? Taritigi eia ge kaka tavu La Tahalo Uru. Mai isa oio gabu la sagegela, taritigi veia eia ge vaisale La Uru te la bilau la sagegela.  
\v 14 Mave, isa oio tamutou, eia lea? Taritigi eia ge baha tavu egiteu la ururu te la lotu, egite ge goio tetala. Te la isale Kraist, egite ge bubu la abirila soio te la varula, egite ge vitikumu la kilaka tegiteu soio te La Tahalo Uru mai ele, veia eia ge vimahulia.  
\v 15 Mai egite ge kaka sesele, egite kama ge ilo lalua, la ilea ge mahuli lou, La Uru ge vimahulia. Me mai la iruru isa oio tetala soloio tabulibuli, ale tai La Uru ge vimavulaha taro leia.  
\v 16 Eala eia taritigi pepeho veia amuto ge veipala baololi la iruru tamutou, amuto ge suli baoli tai le amutou la kilaka mai ele, amuto ge mahuli lou. La kilaka te la tahalo ale matata, eia vagari, eia koramuli ge vimahuli la valalua me hatavivile tomi usu.   
\p
\v 17 E Lisa, eia la tahalo la vovo mai moli etatoue. Eala moli eia kaka vagari veia la hura umalati ge pupu, eia kama pu la leavala itolu, la taio iuolo.  
\v 18 Mulimuli eia goio kaka lou, la hura goio pu lou, la ilali orivo goio kusi lou. Eala eia matagaga moli mai ele veia la kilaka ale sesele, eia vagari.   
\s1 La tahalo ale eia puli rivu e tabarala loio te la iruru, eia taritigi  
\p
\v 19 Amuto tabarabaragu, mai isa tamutou eia ge ruru, me e tabarala isa ge puli rivu loua soio te la gauru ale taritigi, la igogolu ale, eia taritigi pepeho.  
\v 20 Taritigi eia ge rovia mai ele veia eia vimahuli taroti e tabarala loio te la pileho, me la iruru tomi te tabaralale eia mavulaha tarotia. Eala moli ele.  
\cls Eau e Iakob.