\id HEB - Nakanai NT [nak] -Papua New Guinea 1983 (DBL 2014) \h E HIBRU \toc1 La Merera Tavu Egiteu E Hibru \toc2 Hibru \toc3 Hib \mt1 LA MERERA TAVU EGITEU E HIBRU \c 1 \s1 La Tahalo Uru baha taro e Latula, eia veipala la merera te Tamala somai te la maututula \p \v 1 Alaurati, La Tahalo Uru, eia veipala la merera tetala soio tegiteu e ururu tegatou e Iuda, eia baha taro egiteu la bilalaha tetala vaka usu, eia tovo lalai tai la gauru usu veia eia ge vei matagagea giteu la valalua tetala la gabutatalala tetala. \v 2 Eala moli te la imamala ale igoie, La Uru baha taroti e Latula, eia veipalati la merera tetala somai tegatou. Oio te la limale Latula sesele, La Tahalo Uru eia vipou la golugolu tomi. La Uru hiloviti e Latula veia eia ge tahola la golugolu tomi ale eia vipoutia. \v 3 Eia la matagaga ale uru te Tamala, la vulovulola tomi eia mai te Tamala sesele, eia sau tola la mori me la magasa mai la masasagala tetala sekela moli oio te la merera tetala ale vagari. Eia peho roboti etatou, me oio te la igogolu tetalale, eia vimaroka etatou la valalua me hatavivile tomi te la iruru. La igogolu tetala tomi alele kaluvuti, igoie eia pou oata te la pulolou la mulugaluga oio te la bali La Tahalo Uru. \s1 E Latu La Uru eia urua giteu la angelo \p \v 4 Eia sesele viruru veia La Tahalo Uru eia vipou e Latula veia eia ge urua giteu la angelo. Ale eia toiti leia veia eia e Latula, eia vitikumu seseleti la isala mai ele veia eia sekela moli uru, egiteu la angelo tomi bisi tetala. \v 5 Mai la merera te La Buk Tabu Ale Pala, La Uru eia veiale Latula maie: \li1 Emei e Latugu, \li1 Eiau e Tamamu, eau veipalatimei. \p Me la merera ale tikumu mai ele, La Uru eia soukama veiale angelo isasa oio vola veia eia ge e Latula. Me la merera te La Buk Tabu Ale Pala isa lou, La Uru eia vikara matagaga te Latula, eia veia maie: \li1 Eiau ge e Tamala. \li1 Eia ge e Latugu. \p Eala moli la merera ale tikumu mai ele, La Tahalo Uru eia soukama veiale angelo isasa oio vola, ouka. \p \v 6 Mai la vikararala te La Tahalo Uru isa lou, eia raragiti veia ge baha taro e Latula la posolagu somai te la maututula, eia goio vikara maie: \li1 La Tahalo Uru vipou egiteu la angelo veia \li1 egite ge sele tatavu la igogolu tetala \li1 mai la lolovi. \p \v 7 Eala moli egiteu la angelo, egite la bilalaha tetala, me La Uru veia maie tegiteu ele: \li1 Amuto raga tatavu la igogolu te La Uru, \li1 mai la kalamea la havi ale karerere. \p \v 8 Eala moli mai oio te Latula, La Tahalo Uru kama vikara mai ele, eia vitikumu lou la merera tetala soio te Latula maie: \li1 La pulolou taume te la pulolou la mulugaluga, \li1 eia ge magiri moli mai ele, la kaluvula ge ouka. \li1 Eme vibaumuli matata tataho moli \li1 egiteu la valalua taume, \li1 \v 9 eme masaga la vulovulo ale matata, \li1 eme vile sesele la vulovulo ale kama kokora. \li1 Eala La Uru taume eia hilovitime, eia vaurutime \li1 veia ge vipoume te la sagegela ale uru sesele, \li1 kara polo la sagegela ale la valalua ge gabua. \p \v 10 Mai la merera te La Tahalo Uru isa lou soio te Latula eia veia maie: \li1 La Uru, \li1 Te la silokola eme vipou la magasa tomi, \li1 te la limamu sesele tai, eme vipou la mori. \li1 \v 11 La mori me la magasa mulimuli ge kokovu, \li1 eia ge mai la lavalava ale mumugu, \li1 eala moli eme La Uru ge magiri moli mai ele, \li1 eme kama ge kaluvu. \li1 \v 12 Eme ge pipi kurumu la mori me la magasa \li1 mai la lavalava ale eme kai taroa, \li1 eala moli eme kama ge vulo sapolo lou, \li1 la imamala taume kama ge kaluvu. \p \v 13 Mai La Tahalo Uru, eia soukama vikara soio te angelo isa tetala, mago: \li1 Eme gomai, eme ge pou te la pulolou la uru \li1 oio te la baligu te la galegu e gata, \li1 kara ale eau ge pigi egiteu la gima taume \li1 sotatalo te la uluva la vahamu, \li1 eme ge soa kuru egiteu. \p \v 14 Tio, me mave oio tegiteu la angelo? La Tahalo Uru eia soioge vipou egiteu te la igogolu ale mave? Egiteu la kalululu moli, egite susuli moli te la igogolu te La Tahalo Uru. Eia baha taro egiteu somai veia egite ge susuli etatou la valalua me hatavivile tetala, etato ale mulimuli ge pou te la mahulila tetala ale sesele. \c 2 \s1 La vimahuli te La Tahalo Uru eia tikumu sesele \p \v 1 Taritigi pepeho veia etato ge laba gele tataho tavu la merera ale sesele te La Tahalo Uru, ale etato loloa palati kara igoie, etato soukama ge mulimuli bulalahu la merera la visigologolola. \v 2 La merera te La Tahalo Uru eia veia giteu la angelo tetala, me egite veipalea somai tegatou la valalua la vovo, eia sesele tomi moli, mai isa ge poloa eia ge vure. \v 3 Mai ge mai ele, etatou la tahalo la vovo moli, etato ge hele sove mai etato ge tou la merera la vimahuli te La Uru ale taritigi seselele? La merera la vimahuli alele, La Uru veipala mugea, me egiteu ale loloa te la harela, egite vei tikumu loua, kara igoie etato tomi rovitia. \v 4 Me La Uru goio vitikumu lou la merera tegiteu la bilalaha tetala te la golu la karutula me la irovilala tai te la vagagarila. Eia abi taia giteu la vaabila te La Kalulu La Marokala, mai te la masasagala tetala, ale ge koramuli egiteu te la igogolu la valolo tetala veia la valalua me hatavivile ge gabu tikumu la merera tegiteu ale valolo te Latula. \s1 E Iesus eia la vuhu la vimahuli te La Tahalo Uru \p \v 5 Mai la pulolou la matagagala te La Uru, ale eia visibitalatia te Latula, ale la viputumulila ale halaba mai ale eau vei matagagatia oatale, ale eau veia e Latula ge pou la mulugaluga omai te la maututula. La Tahalo Uru eia kama vipou egiteu la angelo veia egite ge vibaumuli la pulolou la matagagala tetala, ouka, e Latula sekela moli eia vipoua veia eia ge la mulugaluga oio vola. \v 6 Mai la merera te La Buk Tabu lou, eia veia maie: \li1 Tahalo Uru, amiteu la tahalo la vovo moli, \li1 amite taritigi oiove veia eme ge gabu tikumu amiteu? \li1 \v 7 Eme vipou amiteu veia amite ge maroka bakisi \li1 mai egiteu la angelo, \li1 \v 8 eme vauru amiteu, veia amite ge vibaumuli \li1 te la golugolu tomi ale eme vipoua. \p Mai la vikararala alele, eia veia La Uru vipou etatou la tahalo la vovo veia etato “ge vibaumuli te la golugolu tomi”. Eala moli etato pou la marapala, etato kama mamuga la golugolu tomi mai la lolovi me la hura me la mago veia ge vibaumuli ovola. \v 9 Eala moli etato ge hilo e Iesus, eia la tahalo la vovo mai etatou, La Uru pala vibisi golo mugea bakisi veia eia ge bisi tegiteu la angelo veia eia ge pou muga mai la tahalo la vovo, veia oio moli te la gilogo te La Uru ale uru, eia ge peho robo etatou la valalua me hatavivile tomi. Eia roromuli e Tamala, eia goio poga tavu la pileho, eala igoie e Tamala vauru seseletia. \p \v 10 Mai eia vipouti e Latula te la iligiligi mai ele, eia matata moli, la vuhula eia moli la vuhu la golugolu tomi, me eia viputumulia veia ge vimaroka e Latula mai ele, me oio vola etato usu goiloti, igoie etato pouti mai e taitarile Iesus, eia la vuhu la vimahuli tegatou, etato pou vikapopo le Iesus te la matagaga tetala ale uru. \v 11 Etato tomi e latatu La Tahalo Uru. E Iesus eia vimaroka etatou, eala eia kama mahela veia ge toi letatou veia etato e taitarila. \v 12 Mai la merera te La Uru te La Buk Tabu Ale Pala isa lou, eia veia maie: \li1 Eau ge veipala la isamu \li1 soio tegiteu e tabarabaragu. \li1 Eau ge vaisaleme te la mata giteu \li1 la valalua me hatavivile tomi. \p \v 13 Mai la merera isa lou tai, eia veia maie: \li1 Eau ge tau la ilogu soio te La Uru. \p Me la merera isa lou, eia veia maie: \li1 La Uru, \li1 Eau omai popou, \li1 eiau, vikapopo legiteu e latatumu, \li1 ale eme vipouti egiteu te la uluvagu. \p \v 14 Egiteu e latatulale, egite la tahalo la vovo. E Iesus eia abi tai la vovo gatou veia oio te la pileho tetala eia ge soa kuru e Satan ale vipou etatou te la pileho. \v 15 Eia peho robo etatou, me etatou ale pala pou te la miau la lulu la pileho, eia lubeti etatou taro la kilisi alele, etato kati tagea. \p \v 16 Mai eia matagagati mai ele veia La Uru, eia kama visuli egiteu la angelo mai ele, ouka, la visuli alele eia puru somai tegatou la valalua la vovo, mai La Buk Tabu Ale Pala eia veia, eia suli “etatou la hilile Abraham.” \v 17 Eala e Iesus, La Tahalo Uru vipoua mai sesele etatou e tabarabarala, veia eia ge igo sesele la igogolu tetala te la gilogo, veia eia ge magiri moli kabili te la baa gatou me La Uru mai la mulugaluga tegiteu e pris, veia ge sugu taroa La Uru la iruru tomi te la valalua me hatavivile veia La Uru ge vimavulaha taroa. Me la igogolu alele, e Iesus igo seselea, la vuhula eia la tahalo la vovo mai etatou, eia la vuhu la gilogo sesele. \v 18 Eia la tahalo la vovo mai sesele etatou, eia ligi te la tovolalaila mai tai etatou, eala igoie eia koramulia ge suli etatou tegiteu la tovolalaila ale etato gaugabua. \c 3 \s1 E Iesus eia uru tegirua me Moses \p \v 1 Amuto tabarabaragu ale maroka, amutou ale La Uru tolati amutou veia amuto mulimuli ge pou oata tetala sesele, eau masagea veia la gabutatalala tamutou ge magiri vagari te Iesus, eia e pris ale uru, La Tahalo Uru baha taroa somai veia eia ge sau tola la lotu tegatou. \v 2 La igogolu tomi aleie, e Tamala hilovitia oio vola, eia igo sesele tomitia mai tai e Moses pala, ale eia vibaumuli tataho la valalua me hatavivile te La Uru. \v 3 Eala moli e Iesus, eia uru tegirua me Moses. Mai la vikarara la tilovo tegiruale, mai la tahalo isasa ge tigi la luma ale taritigi pepeho, la valalua ge hiloa, egite kama ge vei tataho la lumale, ouka, egite ge vei tataho moli la tahalo ale tigia. Mai e Iesus, eia tigi la luma te La Tahalo Uru, mai la pulolou la matagagala tegatou la valalua tetala, eala moli e Moses, eia mai la sosole moli oilo vola. Eala eia matagagati mai ele veia e Iesus moli, eia uru tegirua me Moses. \v 4 Eia sesele, La Uru vipou la papaga tomi, me la luma tetalale, eia sesele tigia. \v 5 Me oio te la luma tetalale, e Moses igogolu tataho mai la bilalaha sesele. Eia veipala muga la merera te La Uru ale mulimuli sibitala matagagati oio te Iesus. \v 6 Eala moli mai e Kraist, eia igogolu tataho pasi mai la masasagala te Tamala sesele, eia la mulugaluga tegatou la bilalaha tomi ale igogolu oio te la luma te Tamala. Mai etato ge magiri vagari veia la merera tetala eia ge puru sesele somai tegatou, ale eia veia eia ge vimahuli sesele etatou, tio eia ge sau tola etatou, etato ge magiri mai la luma tetala. \s1 La tahalo la vareagila eia kama ge goilo te la pulolou la mailala te La Uru \p \v 7 Mai la vikararala te La Kalulu La Marokala eia vei loua maie: \li1 Gageie, mai amuto ge lolo La Uru ge vikara, \li1 \v 8 amuto umala ge lolo tataroa, \li1 mai egiteu e tutubu mutou alaura, \li1 te la imamala la vareagila tegiteu. \li1 Egiteu hele taro la pulolou la kilisi oio e Gipto, \li1 egite goio lolo taro la merera te La Uru, \li1 egite bula vulovulo te la hohoi la leavala savulu vaa, \li1 eme tovo lalai egiteu mai ele. \li1 \v 9 Egite igo susuku la vareagila tegiteu mai ele \li1 somai taku, eau suli tatataho egiteu, \li1 egite kama gabu tikumu la visuli taku \li1 ale taritigi tavu egiteu. \li1 \v 10 Eala eau pala igo totolo egiteu \li1 e tutubu mutou ele, eau vikara soio tegiteu maie \li1 “Egite kama gabu tikumuau bakisi, \li1 egite kama rovi la gauru taku.” \li1 \v 11 Eala eau goio toi la merera ale tikumu maie \li1 “Egite kamati ge goilo te la pulolou la mailala taku.” \s1 Etato umala ge lolo taro la merera te La Uru mai egiteu e Israel \p \v 12 Amuto tabarabaragu, amuto ge mata rara, la gabutatalala ale kama kokora soukama ge viruru rivu lou amutou, amuto soukama ge kisu taroau, La Tahalo Uru, ale eau sekela moli magiri. \v 13 Amuto umala ge mai ele. Eala moli amuto ge viteteli baoli lou amutou te la haroharo tomi, mai la merera te La Buk Tabu Ale Pala eau toitia oata veia “gageie” amuto ge lolo La Uru. Mai amuto ge igo seselea mai ele, la vulovulo ale kama kokora eia kama ge vitilo amutou, amuto kama ge poke taroau. \v 14 Mai etato ge sau tola moli la vikararala te La Uru ale etato loloa palati mai ele, kara te la tapasila, tio etato koramulia ge pou sesele mai e taitarile Kraist. \v 15 Mai la merera te Devit te La Buk Tabu Ale Pala ale eau toi palatia oatale: \li1 Gageie, mai amuto ge lolo La Uru ge vikara, \li1 amuto umala ge lolo tataroa, \li1 mai egiteu e tutubu mutou alaura, \li1 te la imamala la vareagila tegiteu. \p \v 16 Me egiteu la tahalo la vareagila ale lolo taro la merera te La Uru, egiteu ere? Egiteu tomi moli ale e Moses puli taro egiteu loio e Gipto. \v 17 Me egiteu moli ele, egite vahiliti la igototolola te La Uru te la vulovulo giteu ale kama kokorale. La igototolola tetala eia tabuli oio tegiteu la leavala savulu vaa, egite pou tavu moli la iruru, egite tomi peho, la vovo giteu tomi parara bulalahu moli te la hohoi, egite kora. \v 18 Me oio moli tegiteu la valalua la vareagila alele, La Uru toiti la merera ale tikumu maie: \li1 Egite kamati ge goilo te la pulolou la mailala taku. \p \v 19 Eala etato matagagati mai ele veia egite kama koramulia veia ge goilo te la pulolou la balavala tetalale, la vuhula egite kama tau la ilo giteu soio tetala, egite vareagagi moli. \c 4 \s1 La pulolou la mailala ale taritigi oio te La Uru \p \v 1 Amuto ge mata rara, la vuhula la merera te La Uru eia so magirigiri, ale etato ge goilo te la pulolou la mailala tetala, eala amuto ge mata rara, amuto soukama ge boru posa, amuto ge galo te la tirorola soilo vola. \v 2 La vuhula etato tai lolotia la valolo ale taritigi te la hare giteu la bilalaha tetala, mai tai egiteu e tutubu gatou alaura. Eala moli la merera te La Uru kama suli tigi egiteu, la vuhula egite kama taua te la ilo giteu. \v 3 Eala moli etatou ale tautaulailo sesele oio vola, etato ge goilo sesele te la pulolou la mailala te La Uru. Mai la merera te La Buk Tabu Ale Pala isa lou eia veia maie: \li1 Te la igototolola taku \li1 eau toiti la merera ale tikumu veia \li1 “egite kati ge goilo te la pulolou la mailala taku.” \p Eala eia matagagati veia etatou moli ale tautaulailo tetala, etato sekela moli ge goilo. Eia sesele, La Uru raragiti la pulolou alele palati te la vipoupoula tetala, eala moli egiteu e tutubu gatou vareagi lou. \v 4 Mai la merera te La Buk Tabu Ale Pala isa lou, La Uru vikara te la ivitu la haro la vipoupoula tetala, eia veia maie: \li1 Te la ivitu la haro, \li1 La Tahalo Uru maila taro \li1 la igogolu tomi tetala. \p Eala eia matagagati mai ele veia eia raragitia la pulolou la mailala tetala ale etato ge pou oio vola. \v 5 Eala moli isa tegiteu e tutubu gatou kama goilo vola, mai la merera te La Buk Tabu Ale Pala mai ale eau toitia igoiti, eau ge toi loua maie: \li1 Egite kamati ge goilo \li1 te la pulolou la mailala taku. \p \v 6 Egiteu alele, egite lolo la valolo ale taritigi te La Uru, eala moli egite goio vareagi lou, tio egite galoti. Eala moli eia matagaga moli tegatou igoie veia La Uru viputumulitia veia isahari ge goilo sesele tetala. \v 7 Oio moli ovolale, eia matagagati veia La Uru eia tauti la mata veia etato ge goilo tetala. Mai te la merera te La Buk Tabu Ale Pala, ale eau toitia oatale, mai eia toitia mago “gageie”. La merera ale “gageie” ele, etato pogea oio te la merera te Devit ale sibitala mulimuli seseleti te la imamala la vareagila tegiteu, eia veia maie: \li1 Gageie, mai amuto ge lolo La Uru ge vikara, \li1 amuto umala ge lolo tataroa. \p \v 8 La imamala ale egite soko la vareagila ovola la imamala te Moses moli. Goio, mulimuli e Iosua goio koli e Moses, eia puli egiteu soio te la gale ale La Uru abia giteu. Eala moli ale la pulolou te la vovo moli, eala eia matagagati veia e Iosua tai kama vahari sesele egiteu soio te la pulolou la mailala sesele te La Uru. Mai la tilau te La Uru te la pulolou la mailala tetala eia ge puru sesele tomiti te la tirorola tegiteu e Israel soio te la gale ale La Uru abitia giteu, mai ge mai ele, tio La Uru kamati ge koramulia ge tau loua giteu la tilau isa lou ale eia veia ge vibalava la valalua tetala te la mahulila ale mulimuli. \v 9 Eala eia matagagati veia la mailala ale taritigi mai la mailala te la haro tabu, eia soloio, eia pou taitali etatou la valalua tetala. \v 10 Mai etato ge goilo sesele oio vola, etato ge maila tataho taro la igogolu, mai tai La Tahalo Uru, eia vipou kaluvu la golugolu tomi, eia goio maila tai ovola. \v 11 Eala, eia taritigi pepeho veia etato tomi ge vagari veia ge goilo sesele ge sau tola la pulolou la mailala tetalale, etato isa umala ge sovei la vulovulo giteu e ururu gatou ale pala, veia etato ge vareagi, etato soukama ge galo te la pulolou la balavala te La Uru ale taritigi pepeho. \p \v 12 La merera te La Uru eia kara pepeho mai la viso ale egite meli la galela tomi ilua, eia vagari, eia mahuli. Eia kama mai la viso tegatou la valalua, eia kara pepeho pasi, eia ge barautu etatou, eia ge tagu sesele la hate gatou, la tilalau te la tia gatou, me te la gabutatalala tai tegatou oilo, eia ge veipalea. Eia ge ubi sesele la vuhu la mahulila tegatou mai ele, eia ge veipala la vulovulo gatou tomi ale tabuli kokovu, eia ge tomu sasae la vulovulo gatou oio vola. \v 13 La paga isa omai te la magasa, me oata tai te la mori, ale La Uru vipouti egiteu, eia kama ge tabuli kokovu te la milatalata te La Uru. La papaga tomi tabuli matagaga moli tetala, etato tomi ge magiri te la viputumulila oio te la lagula. \s1 E Iesus eia e pris ale uru sesele \p \v 14 Oio moli ovolale, eia taritigi pepeho veia etato ge sau tola vagari la tautaulailo tegatou tavu La Uru ale etato magiriti ovola, la vuhula La Tahalo Uru kama mata taro etatou, ouka, eia baha taro e Latula e Iesus somai tegatou, eia vipoua mai e pris ale uru sesele, eia bole taroti la iruru tegatou tomi soio te Tamala, e Tamala goio vimavulaha etatou taro la iruru tomi ale etato igotia. \v 15 E pris ale uru tegatou ele, eia kama malau taro etatou, eia rovi tomi la pulolou tegatou me la vulovulo la iruru tomi ale etato igigoa. Eia pala muga gabu la tovolalaila tomi mai tai etatou, eala moli eia kama boru. \v 16 Eala, eia koramuli sesele veia etato kama ge taga, etato ge tuga tavu molia, soio te la pulolou la uru te Tamala, etato ge poga la gilogo oio vola. Eia ge abia gatou la visuli ale uru te la gilogo tetala, koramulia etato ge bolehoho la iloburukola tomi. \c 5 \s1 E Iesus, eia e pris ale uru tegatou, eia koramuli seselea ge vimahuli etatou \p \v 1 La tabari la igogolu soio te la mulugaluga tegiteu e pris, eia maie: La Tahalo Uru ge hilovi isa la tahalo, eia ge magiri kabili te La Uru me la valalua, eia ge ababi la vaabila tegiteu la valalua soilo te la luma la lotu. Eia ge rou rivu lou egiteu mai ele taro la kolibarala te La Uru te la vulovulo giteu ale kama kokora. \p \v 2 Me eia matagagati mai ele veia La Uru, eia vipou la tahalo la iruru mai tai etatou, te la igogolu aleie, eala e pris tai ele, eia koramulia ge gogo etatou ale paua, ale etato igigo la iruru. \v 3 Eia rou rivu lou etatou vikapopo tai leia, la vuhula eia tai la tahalo la iruru, eia kama magiri vagari. \p \v 4 Me eia matagaga tai veia la tahalo isasa kama ge vauru rivu lou eia veia eia ge la mulugaluga tegiteu e pris, ouka. La Tahalo Uru sekela moli eia ge hilovi tavua, mai sesele alaura te la imamala te Moses, eia tola e Aron te la igogolu alele. \v 5 Me eia matagaga tai mai ele veia e Kraist kama vauru rivu lou eia veia eia ge pou mai la mulugaluga tegiteu e pris, ouka. La Tahalo Uru moli vaurua, ale eia veiala mago: \li1 Eme e Latugu. \li1 Igoie eau veipalati eme. \p \v 6 Me oio te la merera isa lou tai te La Buk Tabu Ale Pala, La Uru eia veia maie: \li1 Eau vipoutime te la igogolule pris, \li1 eme ge sau tola la igogolu aleie kara mulimuli, \li1 la kaluvula ge ouka. \li1 Eme e pris ale uru sesele mai e Melkisedek alaura. \p \v 7 E Iesus, eia uru mai ele, eala moli etato tomi rovitia veia te la pulolou tetala pala omai te la maututula, eia tali tavu e Tamala me la kilaka ale vagari pepeho sesele veia eia ge vimahulia taro la pileho. Me e Tamala loloa, la vuhula e Iesus eia la tahalo la tilogo sesele tavu La Uru. \v 8 Eia e Latula sesele, eala moli e Tamala vipoua te la iligiligi, e Iesus goio igo seselea, eia roromuli tataho e Tamala. \v 9 E Tamala hiloa mai ele veia e Latula eia la tahalo sesele, eia goio vipoua veia eia ge la vuhu la mahulila sesele tegatou tomi ale roromulia. \v 10 Eia toitia veia eia ge e pris ale uru mai e Melkisedek, ale eia e pris ale uru alaura te la imamala te Abraham. \s1 Etato umala ge mai la pepeso ale kama koramuli la ilali ale vagari \p \v 11 Eau la merera usu lou te Melkisedek mirua me Kraist ele veia ge vimari le amutou ovola, eala moli eia vagari pasi veia eau ge lubea mutou, la vuhula amuto kama abi tigi la vimari. \v 12 Amuto pou la leavala usuti te la matagaga te Kraist, eia koramuli seselea veia amuto tomi ge vimari lou egiteu ale isapolo ovola. Eala moli ouka, amuto pou moli la savelela te la kalulu mutou, koramuli isa ge vimari halaba lou le amutou la siloko la vimari te la gauru te Kraist. Amuto koramuli moli la susu, amuto kama koramuli la ilali ale vagari. \v 13 Mai eme so sususu, eia matagagati mai ele veia eme so la pepeso, eme kama koramulia ge hilovi tigi la gauru ale taritigi me la gauru ale kama kokora. \v 14 Eala moli la ilali ale vagari, mai la merera te La Uru ale tikumu, eia koramuli sesele egiteu ale sagaititi te la merera te La Uru, egiteu ale pou tavu moli la vulovulole Kraist veia egite ge koramulia ge hilovi tigi mai ele la gauru ale taritigi me la gauru ale kama kokora. \c 6 \s1 Etato ge vagari veia ge sau tola la merera te La Uru \p \v 1 Umala amuto ge pou tola moli te la siloko la vimari te la valolo ale taritigi te Kraist. Taritigi amuto ge suku moli solagu, amuto ge sagaiti sesele te la merera tomi tetala ale tikumu. Umala amuto ge pou susuku agi te la merera tomi ale egite valolo pala muga amutou ovola veia amuto ge vulo halaba, veia amuto ge hele taro mai ele la vulovulo ale kama kokora te la pileho, veia amuto ge tautaulailo te La Tahalo Uru. \v 2 Umala amuto ge pou tabaa lou te la siloko la valolo veia amuto ge abi la vuluhi, veia egite ge sau tai te la varu mutou, ge visivo La Kalulu La Marokala sotalo tamutou mai ele. La vimari tai te la mahuli rivula lou me la kiloli la iruru tai ale La Uru ge igoa mulimuli, amuto umalati ge pou tabaa ovola. La merera tomi alele, amuto rovitia. \v 3 Taritigi amuto ge tasuku moli solagu te la merera tomi te Kraist ale tikumu. Mai La Tahalo Uru ge suli la vikararala taku, tio amuto ge hilo sesele la masova la merera te Kraist ale tikumu oio te la vimari taku tavu amutou gageie. \p \v 4 Eala moli la valalua me hatavivile isahari, egite pala goilo halaba te la matagaga te La Uru, igoie egite boruti. Ale pala egite hiloti la vaabila tetala, eia taritigi pepeho, egite gabu tai La Kalulu La Marokala, eia suli egiteu. \v 5 La merera tetala tai, egite loloa, eia malama, eia taritigi. La igogolu tai ale vagari te La Uru te la imamala ale solagu, egite hiloa veia eia hilititi. Egite hilo tomiti la vibalavala te La Uru mai ele, eala moli egite goio piligi loua. \v 6 Me egiteu ale boru posa mai ele, egite kamati ge koramulia ge gabutala rivu lou la iruru tegiteu, veia ge vuvulo lou la vaka luala, ouka gologolo. La vuhula, oio te la vulo giteu ale mai ele, egite mai ale katu tola rivu lou e Latu La Uru oata te la tauvalautu veia la valalua ge lege vahi loua. \p \v 7 Mai la vimari aleie, eau ge tovoa te la magasa la mahuma ale la hura pu tolea, eia goio visibitala la ilali ale taritigi soio tegiteu ale galugalu oio vola, tio eia matagagati mai ele veia la magasale, La Uru vibalavalavea. \v 8 Eala moli mai la magasale eia popopo moli, eia matagaga mai ele veia la magasale eia kama kokora, e tahola ge igo gegerua, eia ge selua, kati ge galugalu lou oio vola. \p \v 9 Amuto tabarabaragu, la merera tomi alele eia tikumu sesele, eala moli eau rovia veia amuto taritigi moli, la tahi vilela taku ele eia kama ge poga amutou, la vuhula amuto pou tola te la balavala te la vimahuli te La Uru. \v 10 La Uru, eia matata, eia kama ge vaula la igogolu tomi tamutou oio tetala. Oio te la vulovulo mutou ale taritigi, ale amuto susuli moli egiteu la valalua tetala, amuto veipalatia veia amuto masaga sesele eia. \v 11 Eau masaga pepehoa veia amuto ge vagari moli mai ele, kara la tapasila, veia la vibalavala te La Uru ale amuto pou taitalia, eia ge puru sesele tamutou. \v 12 Umala amuto ge mata silaha te la igogolu te Kraist, amuto ge sovei egiteu la tahalo la tautaulailo sesele, ale egite kama piligi taro harari la merera te Kraist. Mai ge mai ele, amuto mulimuli ge tahola vikapopo legiteu ale taritigi ele, la vibalavala te La Uru, ale eia veia ge abi seselea gatou ale etato tetalati. \s1 La merera la vibalavala te La Uru eia sesele viruru \p \v 13 Etato ge sau tola vagari la merera te La Uru, la vuhula eia sesele tomi moli, eia ge puru. Mai la merera te La Uru soio te Abraham. La Uru masagea veia ge vitikumu lou la merera tetala soio te Abraham, eala moli eia ge toi la isale ere? Ouka, isa lou kama vagari mai eia, tio eia goio toi rivu lou eia maie: \li1 \v 14 Eau ge vibalava eme, \li1 La hilimu mulimuli ge usu pepeho. \p \v 15 Tio eia veiale Abraham la merera ale tikumu mai ele, e Abraham goio pou, mulimuli eia hilo la siloko la vibalavala te La Uru soio tetala, mai eia veipala e latula sesele e Isak ale ge abi la mulila. \p \v 16 Mai etato la tahalo la vovo ge toi la merera ale tikumu, etato ge vitikumu lou la merera tegatou te la isa La Tahalo Uru, veia la merera tegatou eia sesele tomi moli, tio la tahi tarola ge oukati. \v 17 Mai La Tahalo Uru tai, eia masagea veia ge toi la merera ale tikumu sesele soio te Abraham, tio eia goio vitikumu loua veia eia sesele viruru. Tio me oio moli ovolale, igoie etato rovitia veia eia ge vibalava sesele etatou la valalua tetala, eia kati ge hate tola lou. \p \v 18 Eala, eia matagagati mai ele veia La Uru eia toiti la merera, me eia vitikumuti loula la isala veia eia sesele moli. Me eia kati koramuli eia ge visigolo veia ge vulo lou la merera ale eia toitia, me ale eia vitikumutila la isala. Eala, eia koramuli seselea veia etato ale hele tavutia veia eia ge vimahuli etatou, etato ge mata kaseka, etato ge vagari moli kama ge taga, la vuhula la merera la vibalavala tetala tavu etatou, eia sesele viruru. \v 19 Etato ge kisi vagari la kalulu gatou te la merera tetala, mai la tahalo ale kisi la uaga te la mota la poutatolala ale tikumu pepeho. La mota ale sau tola etatou ele, eia kisi vagari etatou soio te Iesus. E Iesus eia magiri soilo kililili sesele te la baa la marokala sesele, ale la kulikuli ale uru tili roboa, oata te Tamala. \v 20 La baale, eia vimuga soilo vola, veia ge taho robo etatou veia etato ge mavulaha. Eala eia mai seseleti e pris ale uru, mai e Melkisedek alaura, me la igogolu tetalale, la kaluvula ge oukati. \c 7 \s1 E Melkisedek eia e pris ale uru sesele. \p \v 1 E Melkisedek, eia la mulugaluga te la mautu e Salem alaura. Me la igogolu tetala isa lou, eia e pris te La Tahalo Uru oata. Te la imamala ale, e Abraham goio bolehoho egiteu e suara ivaa te la gale ivaa vikapopo legiteu la valalua la vaubila tegiteu. E Abraham vaubi kaluvuti, eia beua loio la vaubila, e Melkisedek goio paga tavua, eia toi la vibalavala te la Uru soio te Abraham ele. \v 2 Tio e Abraham loloa, eia goio abi la golugolu tomi ale egite abi taroti legiteu la gima, eia goio tabaria, la lolola savulu sasa, eia abiale Melkisedek la lolola isa, tetala ualasiu. \p Me la isa ale “Melkisedek”, la masovala mai “la vulovulo ale matata”, eala etato matagagati veia e Melkisedek eia la mulugaluga isa, la vulovulola matata sesele. Me la isa la mautu e Salem, ale eia pou la mulugaluga ovola, la masovala mai “La valalua pou tigi tataho, kama gabutatala papai.” \v 3 Oio te La Buk Tabu Ale Pala etato kama hilo la isale tamale Melkisedek, la isale tilala, la isa giteu e tutubula isa tai. Etato kama hiloa veia isa taposea, veia la tahalo tai ale eia peho. Eia oio moli popou, mai e Latu La Tahalo Uru tai e Kraist, eia e pris ale uru, la kaluvula ouka. \p \v 4 Eia sesele viruru veia e Melkisedek, eia la tahalo isa uru pepeho: \p (a) Mai etato hiloa te la veimulipolola ovola veia e Abraham tabari la golugolu tetala la lolola savulu sasa, eia goio abiale Melkisedek la lolola isa mai ele, te la golugolu ale egite seri taro legiteu la valalua ale eia bolehoho egiteu te la vaubila. \v 5 Te la imamala ale mulimuli te Abraham, La Uru hilovi la maratatila isa tegiteu e Israel, mai la hilile Levi, veia egite ge pou mai e pris tegiteu e Israel tomi. Me eia vagari taia giteu e Israel veia la maratatila la valalua tomi ge susuli legiteu e pris la ilali me la vaabila isahari tai, la vuhula egiteu e tabarabara giteu moli ele. \v 6 Me e Melkisedek ele eia kama te la hilile Levi, eala moli la viputumulila tomi alele, te la imamala te Melkisedek la merera alele eia soukama pou, eala moli e Abraham abi seseleale Melkisedek la vaabila ale uru. Eala eia matagaga mai ele veia e Melkisedek eia la tahalo isa uru sesele, la vuhula e Abraham eia kama la tahalo bulalahu, eia tai la tahalo te La Tahalo Uru, ale uru sesele, eala moli eia togo sesele e Melkisedek ele. \p (b) Mai e Melkisedek tai, eia toi la vibalavala te La Tahalo Uru soio te la uru giteu e Israel e Abraham ele. \v 7 Me etato tomi rovia veia la tahalo ale toi la vibalavala, eia uru te la tahalo ale abi la vibalavala loio tetalale. Eala, eia matagagati mai ele veia e Melkisedek eia la tahalo isa uru sesele, la vuhula eia toi la vibalavala soio te Abraham. \p (c) \v 8 Mai e Melkisedek tai ele, etato hilotia te La Buk Tabu Ale Pala veia eia mahuli moli, eia kama peho. Eala moli egiteu e pris te la hilile Levi, egiteu la tahalo la vovo moli, eala moli la valalua togo egiteu, egite ababia giteu la vaabila. Mai e Melkisedek eia mahuli moli eia kama peho, eala eia matagagati veia eia uru tegiteu e pris te la hilile Levi, eia la tahalo isa uru sesele. \p (d) \v 9-10 Mai e Levi, eia e tubu giteu e pris tomi te la valalua e Israel, me e tubule Levi e Abraham. Eala oio te la vulovulole tubula e Abraham ele, e Levi eia mai ale togo e Melkisedek, eia mai ale abiala la vaabila, la vuhula e tubula sesele igoa. Eala eia matagaga veia e Melkisedek, eia uru tegirua me Levi, eia la tahalo isa uru sesele. \p (e) \v 11 Mai e Kraist guvi, eia e pris ale uru sesele mai e Melkisedek, eia kama e pris ale bisi mai e pris te la hilile Levi. Oio tegiteu e pris te la hilile Levi, La Tahalo Uru eia abia giteu e Israel la merera tetala. Mai etato ge koramulia ge vulo maroka oio te la merera tegiteu e pris te la hilile Levi, ilava sesele La Uru vipou e Kraist, eia e pris ale uru sesele mai e Melkisedek, veia eia ge vimahuli etatou? Ouka, egiteu e pris te la vovo moli mai e Aron, egite tomi boto, e Melkisedek sekela moli eia e pris ale uru sesele mai e Kraist. \p \v 12 Mai e Kraist, La Uru visibitalea veia eia ge e pris ale isapolo tegiteu e pris ale pala, eala eia koramuli moli la viputumulila ale halaba tai ge sibitala vikapopo leia. \v 13 Mai e Kraist, eia te la hilile Iuda, kama te la hilile Levi, me egiteu la hilile Iudale, isa tegiteu kama abi la igogolule pris. \p \v 14 La Uru, eia te la hilile Iuda sesele, me e Moses kama veia giteu bakisi veia egite ge abi la igogolule pris. \s1 E Iesus, eia isa e pris ale uru mai e Melkisedek, la kaluvula ge ouka \p \v 15 Oio te Kraist, La Tahalo Uru eia igoti la gauru ale halaba. Eia matagaga mai ele, la vuhula e Kraist, eia e pris ale uru sesele, eia guvi halaba te la igogolu tetalale vikapopo la isala ale uru sesele mai la isale Melkisedek. \v 16 Eia kama sau tola la igogolule pris oio te la viputumulila ale pala ale La Uru toia soio tegiteu e pris te la hilile Levi, veia egite te la hilile Levi moli ge sau tola la igogolule pris. Eia sau tola la igogolule pris oio te la vagagarila tetala sekela, ale eia bolehoho la pileho. \v 17 Mai La Buk Tabu Ale Pala eia veia maie: \li1 Eau vipoutime te la igogolule pris, \li1 eme ge sau tola la igogolu aleie, \li1 kara mulimuli, la kaluvula ge ouka, \li1 eme e pris ale uru sesele mai e Melkisedek alaura. \p \v 18 La viputumulila ale pala, La Uru kolitia, la vuhula eia boto, eia kama vagari, \v 19 la merera te Moses eia kama koramulia ge vimaroka etatou isasa, ouka gologolo. Eala moli igoie, la viputumulila ale taritigi sesele, eia sibitalati, eia muga te ale pala. La viputumulila ale halabale, mai etato la valalua la mumugu ge sau tolea, etato ge koramuli seselea ge tasuku hagagavi soio te La Uru ale maroka. \p \v 20 La viputumulila ale halaba te Kraist, eia kama sibitala bulalahu! La Tahalo Uru toi la merera ale tikumu sesele ale eia vipou e Kraist te la igogolule pris. Egiteu e pris te la vovo, egite goilo bulalahu moli te la igogolu tegiteu, la merera ale tikumu ouka. \v 21 Eala moli La Uru veiale Iesus maie: \li1 Eau La Uru, eau toi seseleti la merera, \li1 eau kama ge hate tola lou: \li1 “Eau vipoutime te la igogolule pris, \li1 eme ge sau tola la igogolu aleie, \li1 kara mulimuli, la kaluvula ge ouka.” \p \v 22 Me oio moli te la merera te La Uru ale tikumu seselele, e Kraist eia koramulia ge sau tola sesele etatou ale tetala, la vuhula la merera ale halaba eia taritigi pepeho sesele, la visuli ovola eia kara polo la visuli te la merera te Moses. \p \v 23 Egiteu la mulugaluga tegiteu e pris ale pala, mai isa ge peho taro la igogolu, egite ge hilovi isa ale ge abi la mulila, la igogolu tegiteu ge mahuli moli mai ele. \v 24 Mai e Iesus eia mahuli moli, eia kama ge peho, isa kama koramulia ge kolia te la igogolu tetala. \v 25 Eala eia matagagati mai ele veia e Kraist, eia koramulia ge vimahuli sesele etatou tomi ale tautaulailo tetala veia eia oio mahuli moli, veia eia ge puli etatou soio te Tamala, eia ge taho robo etatou te la merera tetala soio te La Tahalo Uru. \p \v 26 Eala, eia matagagati mai ele veia e Iesus eia e pris ale uru sesele me la igogolu tetalale eia koramuli sesele etatou, ale etato pou la savelela te la kalulu gatou. Eia la tahalo isa, eia maroka, eia la iruru tai ouka, eia maroka sesele tegatou tomi la valalua la iruru. E Tamala vaurua, eia pulia soata tetala te la ilo la lage. \v 27 Eia kama mai la mulugaluga tegiteu e pris te la vovo, veia ge vahari la vaabila soio te la luma la lotu te la haroharo tomi, veia ge pigi robo la iruru tetala vikapopo la iruru tegiteu la valalua tomi. Eia peho roboti etatou, veia ge vimavulaha etatou tomi taro la iruru tegatou. \v 28 La merera te Moses, eia vipou la mulugaluga tegiteu e pris mai la tahalo la vovo moli, eia kama vagari, eia rovi la iruru me la pileho. Eala moli mulimuli te la merera te Moses, La Uru eia goio toi la merera tetala ale tikumu sesele, eia vipou e Latula te la igogolule pris, ale eia hilovitia veia eia la tahalo la marokala sesele tetala, la kaluvula ge ouka. \c 8 \s1 E Iesus eia e pris tegatou oata te la ilo la lage \p \v 1 La masova la merera tomi taku eia maie: Etato tahola seseleti e pris ale uru, eia maroka sesele, eia pou te la pulolou la uru oio te la bali La Uru e gata, oata te la ilo la lage. \v 2 Me e pris tegatou ele, eia mai ale magiri te la baa ale maroka viruru oilo sesele kabili te la luma la lotu,\f + \fr 8:2 \ft Te la galevilale, La Buk Tabu toila veia “la luma la lotu la sel”, mai la luma la lotu ale egiteu e Israel lotulotu ovola alaurati te la imamala te Moses, ale egite bula vulovulo te la hohoi la leavala savulu vaa.\f* eia rou roborobo la iruru tegatou oilo vola. Eala moli la luma la lotu sesele aleiele, La Uru moli tigia, kama la tahalo la vovo. \p \v 3 La merera te Moses pala, eia vipou la mulugaluga tegiteu e pris veia eia ge vaharihari la vaabila tomi te la valalua, mai la ilali me la kalia, veia ge vituria soata te La Tahalo Uru. Eala eia koramuli tai veia e pris tegatou, e Iesus, eia tai ge vahari la vaabila, ale eia sugu taro sesele la mahulila tetala. \v 4 Mai e Iesus ge pou moli omai te la maututula, eia kama ge koramuli ge sau tola la igogolule pris mai te la maratatila te Levi. La vuhula egiteu e pris ale la merera te Moses visati legiteu te la igogolu alele, egite oio igogoluti, egite vaharihari la vaabila tomi te la valalua soilo te la luma la lotu. Eala moli la igogolu tegiteu alele, eia mai la irovilala moli te la igogolule pris ale sesele, oata te la ilo la lage. \v 5 Etato rovia veia eia la irovilala sesele mai ele, la vuhula la siloko la luma la lotu tegiteu e Iuda, e Moses kama igo bulalahua, la masovala sesele oio, mai la masova la igogolu tai te Kraist ale igoie. La Tahalo Uru veiale Moses eia ge igoa, eia la luma la sel moli, la vuhula egite so bula vulovulo. Eala moli La Uru tutu toleale Moses maie mago “Eme ge vibaumuli tigi, eme ge igo moli la luma taku mai te la imoimo la merera taku tomi ale eau turitiamu ovola, ale etala vikarakara pala oata te la varu la gove Sinai.” \v 6 Eala moli la igogolu te Kraist oata te la ilo la lage, eia muga sesele te la igogolu ale egiteu e pris te la vovo igoa oilo te la luma la lotu. Me la viputumulila ale halaba tai, ale e Kraist taho robo etatou soio te La Tahalo Uru, la merera alele eia muga te la merera ale pala, la vuhula oio vola La Uru eia toitia gatou la merera ale tikumu veia eia ge vibalava sesele letatou la mahulila ale sesele la kaluvula ge ouka. \s1 La merera te Kraist ale halaba eia muga te la merera te Moses ale pala \p \v 7 La merera te Moses ale pala, La Uru kolitia. Mai la merera te Moses ge koramuli ge vimaroka etatou, La Tahalo uru kama ge viputumuli la merera ale halaba veia ge kolia, eala moli ouka, la merera ale pala, eia kama koramuli ge vimahuli isasa, eala La Uru eia kolitia. \v 8 La Tahalo Uru hilotia veia la valalua tomi, egite ruruti, me la merera te Moses eia kama vimaroka tigi la vulovulo giteu, tio eia hiloa mai ele, eia goio veia giteu la merera maie: \li1 Eau La Uru, eau vikara maie: \li1 La imamala mulimuli ge sibitala \li1 ale eau ge toi la merera ale halaba \li1 soio te la valalua e Israel me la valalua e Iuda. \li1 \v 9 Eau ge toi la merera ale halaba, \li1 eia kama ge mai la merera ale eau toia \li1 soio te ururu tamutou te la imamala \li1 ale eau puli egiteu taro la pulolou \li1 la iligiligi loio e Gipto. \li1 La merera ale halaba eia ge isapolo te ale pala, \li1 la vuhula la merera ale pala, \li1 egite polotia, egite kisu taroau. \li1 Eiau, La Uru, eau veia. \li1 \v 10 Me la merera ale halaba ale eau ge toia \li1 soio te la valalua e Israel eia ge maie: \li1 Te la imamala ale mulimuli, eau La Uru, \li1 eau ge vagoilo la vulovulogu ale matata \li1 soilo te la gabutatalala tegiteu, \li1 eau ge mai ale kekesi tolea oilo te la tia giteu, \li1 egite ge rovia. \li1 Eau ge La Uru giteu, egiteu ge la valalua taku. \li1 \v 11 Isa kati ge karasuku e tabarala mago \li1 “Taritigi eme ge roromuli La Uru, \li1 eme ge matagaga tetala.” \li1 Egite kati ge karasuku baoli lou legiteu mai ele, \li1 la vuhula egite tomi ge matagagati taku. \li1 Egiteu ale bisisi tomi, \li1 egiteu tomi tai ale ururu, \li1 egite tomi moli ge roviau. \li1 \v 12 Eau ge vimavulaha egiteu taro \li1 la vareagila tegiteu tomi, \li1 eau kati ge gabutatala lou la iruru tegiteu. \p \v 13 Mai la merera tomi alele te La Buk Tabu Ale Pala, La Uru eia toitia veia eia halaba, eala oio moli ovola la merera ale pala, la vagagarila oukati ovola. Me la paga ale mumuguti mai ele, eia kati ge tabuli tabaa lou, eia hagagaviti ge kokovu, mai la merera tetala tai ale palale, eia kaluvuluvuti, ale halaba moli eia magiriti. \c 9 \s1 La vuhu la lotu ale pala eia la kasoso giteu la kalia moli \p \v 1 La merera ale pala, La Uru toitiale Moses, la vulovulo oilo vola usu te la lotu tegiteu e Iuda. Me la luma la lotu tai oio vola, ale egite tigia, eia oio. \v 2 La luma la lotu tegiteu e Iuda alaura, egite tigila la sel, la vuhula egite so bula vulovuloa. La golugolu la lotu tegiteu usu oilo vola. Egiteula maie: \p (a) Oilo te la luma la lotu, la kapiutu ilua oio. \p (b) La kapiutu ale sogalagala, egite toila “La Baa Ale Maroka”. \p (c) Oilo te la baa ale maroka, la golugolu isahari oio, la magirigiri la kandel, la limala ivitu, me la poro tai, ale la bret ale egite toila la bret la vahililola te La Uru eia tabuli loata ovola. \p (d) \v 3 Oilo kabili sesele, la kapiutu isa lou oio, egite rara robola la kulikuli, eia tili roboa. La kapiutu ele, egite toila “La Baa Ale Maroka Viruru”. \p (e) Oilo te La Baa Ale Maroka Viruru ele, la golugolu isahari oio. \v 4 La poro la lotu ale mememe tataho, egite igola la gold, eia oilo vola. \p (f) Loata te la porole, egite vitabuli la bulu la obu ale egite virokoa, la sosobula malia tataho. \p (g) La bokis isa uru tai oio, egite igola la gold, la mapala uru pepeho, egite toila “La bokis ale sau tola la merera te La Uru”. \p (h) Oilo te la bokis ale sau tola la merera te La Uru, la golugolu isahari tai te la lotu tegiteu oio. Isa, eia la kap ale egite igola la gold, la ilali ale isapolo oilo vola, eia la ilali ale La Uru vaalali legiteu e Israel alaura ovola ale egite vibula vulovuloa oio te la hohoi. La ilali ale, egite toila “e mana”. \p (i) Oilo tai te la bokis ale sau tola la merera te La Uru, la toho te Aron tai oio. La toho ale, alaura e Aron mira me tuala e Moses, egira mamuga egiteu la valalua e Israel, La Uru vikusi la toho tetala, eia tututuvu mai la irovilala soio te la valalua veia egite ge gabu tikumu la merera te Aron. \p (j) La baga ilua tai ale bolabola tabuli oilo te la bokis ale sau tola la merera te La Uru, la tururi savulu sasa te La Uru, e Moses kekesi tolea oio vola. \p (k) \v 5 La mata la bokis ale sau tola la merera te La Uru eia mememe tataho, egite igola la gold, egite toila veia eia “La vuhu la gilogo te La Uru”. \p (l) Te la baa ale loata te la bokis ale sau tola la merera te La Uru, la halulule angelo ilua bisisi oio, egite puia, la palapala girua pigi robo la mata la bokis, egite toi legirua “e angelo ilua ale vibaumuli la tokoromola te La Uru”. \p Egite la vulovulo la lotu tegiteu e Israel usu pepeho mai ele, eala moli eau kama koramulia ge lube tomia, la vuhula la vimari usu lou soloio ale eau ge lubea mutou. \p \v 6 Mai la golugolu tomi ge raragi tatahoti mai ale eau toitia, tio egiteu e pris ge goilo te La Baa Ale Maroka eia logala moli, egite ge igogolu oilo vola. \v 7 Eala moli La Baa Ale Maroka Viruru, ale oilo kabili sesele, eia isapolo, la mulugaluga moli tegiteu e pris ge goilo vola, ge vakasa moli te leavala isasa. Eia ge abi muga la kasoso la kalia ale egite bilitia, eia ge vali mugea sotalo te la mata la bokis te la merera te La Uru. La kasoso alele eia ge mai ale pigi robo tomi la iruru tetala me tegiteu la valalua, mai egiteu la iruru ale egite gabutatalea, me egiteu la iruru tai ale egite igotia, egite kama gabutatalea. \v 8 Me oio te la lavalava ale rara robo La Baa Ale Maroka Viruru, la vimari oioti ovola. Mai La Kalulu La Marokala, eia vimari etatou oio vola veia la gauru ale goilo sesele te La Uru, la vulovulo la lotu ale pala eia so tabuli roboa, mai la merera ale halaba te Kraist eia soukama koli la merera ale pala te Moses. \v 9 La kapiutu tai ale logala, eia mai la irovilala tai ale koramuli etatou ale igoie, eia tovo etatou te la imamala ale pala kara igoie veia la vaabila tomi ale la mulugaluga tegiteu e pris ge vahararia soio te La Uru oilo te la kapiutu alele, eia kama koramulia ge vimaroka la tia giteu la valalua. \v 10 La vulovulo la lotu ale pala, eia la imoimola usu oio, egite mulimuli bulalahu molia, mai la lelea giteu, la vuluhi maroka tai, egiteu la imoimo la merera tomi te la vibaumuli moli te la vovo gatou. La merera tomi alele, eia kama tubu, eia vibaumuli gologolo moli egiteu mai ele, kara la imamala ale La Uru visibitala la gauru tetala ale halaba, oio te Kraist. \s1 La vuhu la lotu ale halaba eia la kasosole Kraist moli \p \v 11 E Kraist, eia guviti omai te la maututula veia ge sau tola la igogolule pris ale uru, veia ge vibalava letatou la matagaga te Tamala, mai ale igoie etato pouti ovola. Eia goiloti te la luma la lotu ale oata te la ilo la lage. La lumale, eia uru, eia maroka, la tahalo la vovo isa kama tigia, eia kama la paga te la magasa. Me te la luma la lotu ale seselele, eia igo la igogolu tetala oilo vola. \v 12 Eia kama goilo mai e pris te la vovo, veia ge vahari la kasoso la kalia, ouka. Eia tiroro soilo sesele te la kapiutu ale maroka viruru, eia rou robo tomiti la iruru tegatou oilo vola, veia la kalulu gatou kati ge peho. Me la kasoso ale eia vaharia, eia pigi robo etatou ovola, eia la kasosola moli te la pileho tetala. \p \v 13 Te la vulovulo la lotu ale pala, egiteu e pris ge bili la kau ale la togo, uka la mee, egite ge abi la kasosola ge lugu volu la vovo giteu la valalua ale egite poloti la merera te La Uru veia la kasoso alele ge pigi robo la iruru tegiteu mai ele. E latu la kau tai, egite ge bilia ge gutua, egite ge abi la buburola, ge vali robo tai la vovo giteu la tahalo la iruru ovola. Me oio te la vulovulo la kasoso me la buburo mai ele, egite ge vimaroka egiteu, koramuli egite ge magiri maroka te la lotu. Eala moli egite kama ge maroka sesele, la vulovulo alele eia logala moli. \v 14 Eala moli e Kraist, La Kalulu La Uru eia vivagaria, eia sugu taro la mahulila tetala soio te La Uru mai la vaabila ale maroka sesele, eala eia matagagati veia la kasosola eia koramulia ge vuhi maroka la kalulu gatou, etato kati ge gabutatala papai la iruru ale lapu etatou soio te la pileho, etato ge mavulaha, etato ge pou mai la bilalaha ale maroka sesele te La Tahalo Uru, ale eia moli sekela mahuli. \p \v 15 Eala, eia matagagati veia e Kraist, eia vahariti la merera ale halaba, me la merera alele, La Uru toitia somai tegatou veia eia sesele viruru, veia eia ge tola tavu la valalua me hatavivile tomi, veia isahari ge goilo ge sau tola la mahulila ale sesele, la kaluvula ge ouka, mai egiteu ale eia hiloviti egiteu. La vuhula e Kraist, eia peho robo etatou veia ge rou rivu lou etatou taro la iruru. Etato kati poga tavu la pileho ovola, mai la viputumulila te Moses ale pala, eia veia giteu e Israel ovola te la imamala ale e Kraist soukama guvi. Te la merera ale palale, etato poga tavu moli la pileho ovola. \p \v 16 Tio, la vimari alele, eau ge tovo mulia te la vulovulo giteu e Israel isasa te la pileho. Mai la tahalo isa eia gabutatalea veia eia ge peho, eia ge goio ge kekesi tola muga la isaisa giteu ereireila veia mulimuli te la pileho tetala egite ge tahola la golugolu tetala. Eala moli la merera tetalale, eia kati ge puru kara ale eia ge peho sesele. \v 17 Eia ge peho, tio egiteu e valaluala ge balava la golugolu tetala mai eia kekesitia. \v 18 Me la pileho, la irovilala ovola, la kasoso moli. Me etato matagagati veia te la merera te Moses ale pala, La Uru kama vimavulaha bulalahu la valalua te la iruru tegiteu, ouka, la kasoso la kalia moli ge pigi robo egiteu, egite ge pou la balavala oio moli te la pileho giteu la kalia isahari mai ele. \v 19 Mai te la siloko la vulovulo giteu alele alaura, e Moses veipala kaluvuti la tururi tomi te La Tahalo Uru soio tegiteu la valalua e Israel, eia goio bili isahari e latu la kau me la mee isahari tai veia ge igo la irou ovola. Eia goio saho la kasoso giteu la kalia mai ele, eia goio vuloa vikapopo la lalu. Eia goio abi la obu bisi mai la malalia, eia goio palavivila la kula ale magegese, eia vuhia sotalo te lalu me kasosole. Tio eia goio lugu robo la buk la merera te La Uru, me la vovo giteu la valalua tai oio vola. \v 20 Tio eia goio veia giteu mago “La kasoso alele, eia la irovilala moli te la merera te La Uru soio tamutou ale eia veia amuto umala ge poloa.” \v 21 Goio, e Moses lugu tai la kasoso soio te la luma la lotu, me soio te la golugolu tomi tai ale tabuli oilo te la luma la lotu tegiteu. \v 22 Mai la merera te La Uru eia veia, soioge la golugolu tomi moli te la lotu tegiteu e Israel ale pala, eia koramuli la kasoso ge vuhi maroka mugea. Mai eia matagaga mai ele veia mai la kasoso kama ge pagegele, La Uru kama koramulia ge sabubu taro la iruru tegiteu la valalua me hatavivile. \s1 La kasosole Kraist eia sabubu taro la iruru tegatou tomi \p \v 23 La golugolu tomi te la lotu tegiteu e Israel ale pala, egiteu mai la irovilala moli te la golugolu la lotu sesele ale oata la ilo la lage. Mai la golugolu te la lotu omai te la magasa, mai la vaabila la kasoso la kalia moli, eia vimarokea. Eala moli la golugolu te la lotu sesele oata, la vaabila ale isapolo sesele eia vuhi marokea, mai la kasosole Kraist sesele. \v 24 La vuhula e Kraist, eia kama goilo te la luma la lotu ale etatou la valalua tigia, ouka, eia goata sesele te la ilo la lage, eia taho robo etatou oio te la lagu La Uru sesele. \v 25-26 Eia kama igo mai la mulugaluga tegiteu e pris veia ge goilo la leavalavala tomi te la kapiutu ale maroka viruru veia ge vahari la kasoso giteu la kalia. Mai ge mai ele, eia ge mata mai e Kraist ge ligi vaka usu sokoa la vipoupoula, kara igoie. Eala moli ouka, te la tapasi la imamala ale igoie, eia peho roboti etatou, eia goilo vakasa moli te Tamala, eia vahari la kasosola sesele mai la vaabila ale ge sabubu taro la iruru tomi tegatou ale lapu etatou soio te la pileho. \p \v 27 Etatou la valalua me hatavivile, La Uru veitia veia etato ge poga tavu la pileho vakasa moli, mulimuli ge pou te la vigagiala tetala. \v 28 Mai tai ele, e Kraist eia goio te la pileho vakasa moli veia ge peho robo la iruru te la valalua me hatavivile usu. Me eia ge sibitala rivu lou la vaka luala. Eia kama ge sibitala veia ge vahari taro lou la iruru te la valalua, ouka. La igogolu alele, eia igotia. Ale eia ge sibitala moli somai, eia ge vahari la mahulila ale sesele somai tegiteu ale pou taitali la guluvi tetala. \c 10 \s1 La vaabila te la lotu ale pala eia kama sabubu taro la iruru \p \v 1 La vulovulo la lotu tegiteu e Israel ale pala, eia kama veipala tigi la gilogo te La Uru. La merera ale pala, eia mai la halulu la vibalavala moli te La Uru. La iraragila tetala ale taritigi pepeho, eia soloio, eia souka sibitala, la vuhula e Kraist souka. Te la viputumulila ale pala, egiteu e pris ge vaharari la kasoso giteu la kalia soilo te la luma la lotu te la leavalavala tomi, eala moli eia kama vimaroka sesele egiteu la valalua ale gomai te la lotu veia egite ge mahuli, ouka. \v 2 Mai la vaabila tegiteu soio te La Uru ge vimahuli sesele egiteu, egite kati ge vavala lou la vahari la vaabila te la leavalavala tomi. La vulovulo alele, mai eia ge sesele, la valalua la lotu tomi, egite ge sibitala maroka tomiti ovola, egite kati ge gabutatala papai la iruru tomi ale egite igotia. \v 3 Eala moli ouka, la vuhula te la leavalavala tomi, ale la mulugaluga tegiteu e pris ge vahari la kasoso giteu la kalia soilo te la luma la lotu, eia mai ale vahiliti lou la gabutatalala tegiteu la valalua te la iruru tomi ale egite igotia, egite goio gabu tikumuti loua. \v 4 La vuhula la kasoso la kalia eia kama koramulia ge sabubu taro la iruru. \v 5 Mai e Kraist, eia so guguvi moli omai te la maututula, eia goio vikara maie mago: \li1 Tahalo Uru, eme kamati masaga egiteu la vaabila \li1 mai la ilali me la kasoso giteu giteu la kalia, \li1 eala moli eme raragiti la vovogu \li1 veia eau ge tabuli sesele oata te la poro \li1 oilo la luma taume \li1 mai la kalia sesele ale egite bilia. \li1 \v 6 Sesele, la kalia ale egite gutua, \li1 me egiteu la vaabila tomi te la sabubu la iruru \li1 mai la ilali me la kasoso la kalia, \li1 la vaabila tomi alele, eme kati lege sisigila. \li1 \v 7 Eau hiloa mai ele, eau veia maie mago \li1 “Tahalo Uru, eau omai raragiti \li1 veia ge tilimuli la masasagala taume, \li1 eau ge piligi la mahulila taku, \li1 mai La Buk Tabu Ale Pala eia veitia.” \p \v 8 Me la merera te Kraist alele, eia mai ale ilua. La mulugala, eia veia maie “Egiteu la vaabila mai la ilali me la kasoso giteu la kalia, la kalia tai ale gutua, me egiteu la vaabila tomi te la sabubu la iruru, mai la ilali me la kasoso, eme kamati masagea, eme kati lege sisigi tai ovola.” Eala moli la vaabila tomi alele, la merera te Moses eia vagari veia egiteu e Israel ge vaharia soio te La Uru. \p \v 9 Goio, la ilua la merera te Kraist, eia goio veia maie: “Eau omai raragiti veia ge tilimuli la masasagala taume.” Tio me eia matagagati mai ele veia eia abi taroti la muluga la merera, eia goio kolila la ilua le merera alele, veia la pileho tetala ge magiri te la muli giteu la vaabila te la lotu ale pala. \v 10 Ale, e Iesus igo seselea veia ge tilimuli sesele la masasagala te Tamala. Me oio te la vulovulolale etato tomi sibitala maroka, la vuhula e Iesus eia magiri vagari, eia piligi la mahulila tetala. La vovola, eia maiti la vaabila ale egiteu e pris vaharia soilo te la luma la lotu, la kasosola eia pagegeleti, eia sabubu taroti la iruru tegatou tomi. \s1 La kasosole Kraist eia koramuli seselea ge sabubu taro la iruru \p \v 11 Te la haroharo tomi, egiteu e pris tomi ge magiri te la lotu, egite ge igo bibibi la igogolu tegiteu mai ele, egite ge vituri la vaabila soio te La Uru. Eala moli egiteu la vaabila te la lotu ale pala, egite kama koramulia ge sabubu taro la iruru te la valalua. \v 12 Eala moli e pris ale uru tegatou eia oio. Eia vahariti la vaabila ale tikumu sesele veia te la pileho tetala ale vakasa moli sekela, la iruru tomi te la valalua ge kaluvu. Eia igo la igogolu tetala tomi kaluvuti, La Tahalo Uru goio vaurua, eia goio pulia soata tetala, eia goio vipoua te la balila e gata. \v 13 Eia oio popou, eia pou tali la imamala ale mulimuli, ale e Tamala ge pigi egiteu la gima tetala sotalo te la vahala, eia ge soa kurukuru egiteu. \v 14 Eia maila tatahoti mai ele, la vuhula oio te la vaabila tetala isa sekela moli ale tikumu, eia vimatatati la vulovulo la valalua tomi tetala, ale igoie eia vimarokati egiteu, egite kati ge pou tavu lou la vulovulo ale kama kokora, la vuhula La Tahalo Uru eia susuli egiteu. \p \v 15 Me la igogolu te Kraist mai ele, La Kalulu La Marokala tai eia oio vitikukumua te la merera tetala, mai la merera tetala ale pala muga eia veia maie: \li1 \v 16 Te la imamala ale mulimuli, \li1 eau La Uru, eau ge kisi la merera \li1 ale tikumu sesele soio tegiteu e Israel. \li1 Eau ge vagoilo la vulovulogu ale matata \li1 soilo te la gabutatalala tegiteu la valalua taku, \li1 eau ge kekesi tolea oilo te la tia giteu, \li1 egite ge rovia. \p \v 17 Tio La Kalulu La Marokala eia vikara kaluvu mai ele, eia goio tasuku lou la merera tetala maie: \li1 Eau kati ge gabutatala lou la iruru me la vareagila tegiteu. \p \v 18 Me eia matagagati mai ele veia mai La Tahalo Uru ge vimavulahati la valalua me hatavivile taro la iruru tomi tegiteu, egite kati ge vahari lou la vaabila ale ge pigi robo la iruru tegiteu. \s1 Etato ge tasuku hagagavi soio te La Tahalo Uru \p \v 19-20 Amuto tabarabaragu, ale igoie etato mai ale goilo te la luma la lotu, la kulikuli ale pala rara robo La Baa Ale Maroka Viruru, eia kati magiri robo lou etatou. La Baa Ale Maroka viruru ele, la gauru ale halaba kopeti soilo vola, mai la pileho te Kraist eia kopetia, etato ge tiroro moli soilo, etato ge sau tola la mahulila ale sesele oilo vola. La kasosole Iesus eia pigi roboti etatou, etato ge goilo moli, etato kama ge taga. \v 21 E Iesus eia magiri mai e pris ale uru tegatou, eia vibaumuli la luma la lotu te La Tahalo Uru. \v 22 Eala igoie eia koramulia veia etato ge goilo ge magiri hagagavi soio te La Tahalo Uru. Etato kama ge gabutatala papai, etato ge tautaulailo moli te la kasosole Iesus ale La Uru pigi roboti letatou ovola, eia vuhi marokati etatou mai ele, mai la vuluhi te la lalu ale maroka sesele. \v 23 Etato ge sau tola vagari moli lou la merera tetala ale eia veia ge vimahuli etatou, la vuhula La Tahalo Uru moli toitia gatou la merera alele, eia vikara sesele, eia kama ge hate robo loua. \p \v 24 Etatou ale tetala, taritigi etato ge karasuku vibaoli letatou veia etato ge vipuhi tigi, veia etato ge veipala tai la vulovulo la mutelela kabili tegatou. \p \v 25 Etato isasa umala ge piligi la pou vikapopola te la lotu te Kraist, mai egite isahari igoie kamati pou vikapopo legiteu e tabarabara giteu te la lotu. Taritigi etato ge viteteli letatou te la merera ale taritigi te Kraist. La vulovulo alele, etato ge vagari ovola, la vuhula etato hilotia veia la haro la guluvi te La Uru eia hagagaviti. \s1 Etato umala ge kisu taro e Latu La Tahalo Uru \p \v 26 La Tahalo Uru, eia vimatagagati etatou, eala moli mai etato ge pou tavu la iruru lou, la vaabila oukati lou oio ale ge koramulia ge rou rivu lou etatou te la iruru ale etato igigoa. \v 27 Etato ge poga tavu moli la viluala te la iruru tegatou, me la havi tai ale tivura pepeho, ale La Tahalo Uru ge selu taro egiteu la gima tetala oio vola. \v 28 Alaura, mai isa ge tou la merera te Moses, eia koramuli molia veia taho lua uka taho tolu moli ge ubi leia la merera, tio egite ge bili taro la tahalo la iruru alele, eia ge peho, egite kama ge gogoa. \v 29 La viputumulila ale pala, eia mai ele. Me mave, amuto gabutatalea veia te la viputumulila ale halaba, mai la tahalo ge tou la merera te Kraist, eia la viluala ge ouka? Mai eme ge tou la merera te Kraist, eme mai ale soa kuru e Latu La Tahalo Uru. Eme mai ale vile tai la kasosola ale vitikumu la gilogo tetala te la viputumulila ale halaba. La kasosolale eia pagegele, eia vimarokatime, eme goio vile loua. Eme igo mahela La Kalulu La Marokala, ale vahari la gilogo te La Uru somai tegatou. Etato ge igo egiteu la iruru alele, etato ge vilua. \v 30 La vuhula etato rovitia veia La Tahalo Uru moli eia vikara pala maie: \li1 La kiloli la iruru, ale la igogolu taku sekela, \li1 eau ge igo sesela. \p Me la merera tetala isa lou eia veia maie: \li1 La Uru ge mata muli la vulovulo giteu \li1 la valalua me hatavivile tetala. \p \v 31 Me eia matagagati mai ele veia eia kama kokora viruru veia eme ge poga tavu la viputumulila ale vagari te La Tahalo Uru, ale eia moli sekela mahuli. \s1 Etato ge magiri vagari te la tautaulailo soio te Kraist \p \v 32 Amuto ge gabutatala rivu lou la imamala ale pala, ale amuto so lololo halaba la merera la matagaga. Egiteu la valalua la gima te Kraist viligi pepeho amutou te la imamala alele, eala moli egite kama bolehoho amutou, amuto magiri vagari moli. \v 33 La haro isahari egite vimagiri amutou te la lagu giteu la valalua tomi, egite vile amutou, egite gima sesele amutou mai ele. Eala moli amuto toto obu tai egiteu e tabarabara mutou ale poga tavu la iligiligi mai ele. \v 34 Isahari tamutou pou te la luma la kilisi, amuto gogo egiteu, amuto suli tai egite. Egiteu la valalua la gima te Kraist, egite seri taro la golugolu tamutou, amuto sagege moli, la vuhula amuto rovia veia la vuliti ale sesele eia oio raragitia mutou. \v 35 Pala amutou la valalua me hatavivile ale magiri vagari sesele, umala amuto ge piligi lou la vulovulo mutou alele. Mai amuto ge magiri vagari, La Uru ge kolia soio tamutou la vibalavala tetala ale uru. \v 36 Mai amuto masagea veia ge sau tola sesele la vibalavala te La Tahalo Uru ale eia veitia gatou ovola veia ge abi seselea gatou, mai amuto masagea veia ge sau tola seselea, taritigi amuto ge magiri vagari, ge mulimuli sesele la masasagala tomi te La Tahalo Uru. \v 37 Taritigi pepeho veia etato tomi ge magiri vagari sesele, la vuhula eia kama ge tabaa, veia e Kraist ge guvi, mai la merera te La Tahalo Uru eia veia maie: \li1 La Uru ge guvi mai te la tilau taku. \li1 Eia ge guvi sesele, eia kama ge igo makoko. \li1 \v 38 Eala moli La Riau taku, eia ge mahuli moli \li1 te la tautaulailo tetala somai taku. \li1 Eala moli mai eia ge taga taro \li1 la iligiligi te la igogolu taku, \li1 eau kama ge lege sisigi leia. \p \v 39 La Buk Tabu Ale Pala eia veia mai ele, eala moli etato kama mai egiteu ale taga taro la iligiligi te la igogolu te La Tahalo Uru, egite goio poga tavu la viluala mai ele. Etato la tahalo me la tavile la tautaulailo sesele, La Uru eia ge vimahuli sesele etatou ale tetala. \c 11 \s1 La vulovulo la tautaulailo \p \v 1 La vulovulo la tautaulailo, eia mave? Mai eme la tahalo la tautaulailo, la merera ale eme veia eia ge puru, eme ge sau tola seselea, kama ge piligia. La paga ale eme veia eia sesele, eala moli eme soukama hiloa, eme ge toro moli ovola, kama ge silaha. La vulovulo la tautaulailo, eia mai moli ele. \v 2 Egiteu e ururu tegiteu e Israel alaura, egite usu pou tavu moli la vulovulo la tautaulailo, La Tahalo Uru vei tataho sesele egiteu oio vola. La vulovulo la tautaulailo, etato ge gigia te La Buk Tabu Ale Pala maie: \s1 La vipoupoula \p \v 3 Mai etato ge gabutatala la siloko la vipoupoula, etato tautaulailo te La Tahalo Uru veia oio moli te la vagagari la merera tetala, eia vipou la magasa me la mori tomi. Me eia matagagati mai ele veia la golugolu tomi ale etato igoie rovia, La Uru kama puila la paga ale etato hiloa me la mata gatou, ouka, eia pui molila me la vagagarila sekela ale etato kama hiloa. \s1 E Abel \p \v 4 Mai etato ge gabutatala e Abel, eia la tahalo la tautaulailo sesele, la vaabila tetala soio te La Tahalo Uru eia muga te la vaabila te tuala e Kain. La Tahalo Uru hiloa mai ele veia e Abel, eia abiala la vaabila ale taritigi pepeho, veia eia tau seseleti la ilola soio tetala, tio eia goio vei tataho sesele la vaabila tetala, eia goio toia veia e Abel eia la tahalo ale matata. Me e Abel eia pehoti, eala moli la vulovulola ale taritigi te la tautaulailo tetala, etato gigia te La Buk Tabu Ale Pala, etato rovia, la vulovulola mai ale tovo etatou kara igoie. \s1 E Enok \p \v 5 Mai etato ge gabutatala la tautaulailo te Enok. La Uru puli mahulihuli molia soata tetala, eia kama gabu la pileho. Egite paa mulia, eia oio ouka, la vuhula La Tahalo Uru pulitia soata tetala. Me e Enok, ale eia so popou omai te la maututula, eia la tahalo la tautaulailo sesele, la vulovulolale La Tahalo Uru lege sisigi sesele ovola, eia vei tataho seselea. \v 6 Mai etato masagea veia La Uru ge lege sisigi tai letatou, taritigi etato ge gabu tikumua veia eia oio mahuli, veia eia ge vibalava egiteu ale vagari tavua. Eala, eia matagaga veia mai etato ge tasuku soio tetala vikapopo me la tautaulailo ale sesele, eia ge lege sisigi letatou. \s1 E Noa \p \v 7 Mai etato ge gabutatala la tautaulailo te Noa. La Uru sibitala tavua, eia vei matagageala veia eia ge sulu sapa egiteu la valalua me hatavivile te la maututula tomi. E Noa gabu tikumua, eia taga, eia goio paha la uaga ale ge vimahuli egiteu la karakara tetala. Eia kama tahi taro la merera te La Uru veia la vilualale eia soukama hiloa, eia soioge kama ge igo seselea. Ouka, eia gabu tikumua, eia roromuli moli La Uru. Me te la tautaulailo te Noa ale taritigi, La Uru hiloa veia la vulovulole Noa, eia muga sesele te la vulovulo giteu la valalua tomi, ale egite tou la merera tetala. La Tahalo Uru hiloa veia e Noa eia la tahalo la tautaulailo, eia goio vagoiloa tetala, eia vimarokea, veia eia ge la tahalo tetala sesele. \s1 E Abraham \p \v 8 Mai etato ge gabutatala la tautaulailo te Abraham. La Uru tolea veia eia ge hiliti taro la mautu tetala, eia ge bula soio la gale malau, ale La Uru mulimuli ge abiala. E Abraham, eia la tahalo la tautaulailo sesele, eia lolo la tilola te La Uru tavua mai ele, eia roromulia, eia hiliti, tuga. Eala moli eia kama rovi la gale ale eia ge goio vola, eia tuga te la tilola te La Uru moli. \v 9 Eia goio mou mai la mosi oio te la gale isapolo ale La Uru veia ge abiala, eia kama gabutatala papai, la vuhula eia la tahalo la tautaulailo. Eia momou moli te la luma la sel, eia bula vulovulo, mai e latula tai e Isak, me tubula tai mulimuli e Iakob, egite tomi pou la mosi moli. Eala moli egite tomi ele vikapopo le Abraham, La Tahalo Uru vagoilo egiteu tetala veia ge vimaroka egiteu, veia egite tomi ge la tahalo tetala sesele. \v 10 E Abraham, eia la mautu ouka, eala moli eia taua la ilola te la mautu ale sesele, La Tahalo Uru sekela ilia, veia La Uru mulimuli ge pulia soata te la mahulila ale sesele. \s1 E Sera \p \v 11 Mai etato ge gabutatala la tautaulailo ale uru te rutule Abraham tai, e Sera. La Uru veiala veia eia ge savu, eala moli eia uru pepehoti, me eia varirobo tai. Eala moli eia gabu tikumu la merera te La Uru veia eia ge puru sesele, eia goio savu. Eia goio pigo e latu girua me Abraham, la isala e Isak. \v 12 Eala, eia matagagati tegatou mai ele veia loio moli te haruala e Abraham, eia uru pepehoti, hagagaviti ge peho, egiteu la hilila ale usu sesele goio sibitala. La giligi giteu e tutubula mulimuli eia usu pepeho mai la magasa la mago, mai tai egiteu la matatabu oata te la mori. \s1 Egiteu e ururu tomi ele, egite la tahalo me la tavile la tautaulailo sesele \p \v 13 Egiteu e ururu tomi ele, egite sau tola moli la merera te La Uru, egite goio peho, la vavua la merera ale egite sau tolea, egite kamati hiloa. Egite hilo molia te la gabutatalala tegiteu, eia so malau, eia soukama sibitala, eala moli egite sagege moli oio vola. Egite matagaga tai mai ele veia egite mou la mosi moli omai te la maututula, eia kama la mautu tegiteu sesele, egite lobali, la mautu tegiteu sesele soloio. \v 14 Egiteu ale gabutatala mai ele, la vulovulo giteu eia veipalea veia egite tautaulailo te la mautu tegiteu sesele, ale egite mulimuli ge taholea. \v 15 Mai egite ge gabutatala rivu soio te la mautu ale egite hiliti tarotia, eia koramulia veia egite ge beua. \v 16 Eala moli ouka, la gabutatalala tegiteu eia vagari solagu te la mautu ale sesele, eia taritigi pepeho, eia muga tegiteu la maututula ale omai te la magasa, eia oata te la ilo la lage. La Tahalo Uru, eia hilo la vulovulo giteu ale taritigi, eia lege sisigi moli oio vola, me eia kama mahela tai veia egite ge toia soio tetala mago “Eme La Uru taku”, la vuhula eia oio raragiti la mautu tegiteu. \s1 E Abraham lou \p \v 17 Mai etato ge gabutatala muga lou la tautaulailo te Abraham. La Tahalo Uru veiala veia eia ge bili e latula e Isak, ge igo la vaabila soio tetala oio vola. Tio La Uru tovo lalai la tautaulailo te Abraham mai ele, eia goio igo seselea, eia visae e latula la riau soata te la poro veia ge bilia. \v 18 Eala moli pala muga, La Tahalo Uru eia veipalatiale Abraham te latula e Isak mago “Oio te latumu moli, egiteu e tutubumu ge sibitala.” Eia lolotia mai ele, eala moli eia roromuli La Uru, eia veia ge bili e latula, veia ge vaabila soio te La Uru ovola. \v 19 Eia kama gabutatala papai, la vuhula eia gabu tikumu La Tahalo Uru veia eia koramuli seselea ge vimahuli rivu lou egiteu ale pehoti. Me etato rovia veia e Abraham so varapalapala moli la viso veia ge bili e Isak, La Uru vahilo leia la sip ale ge abi la mulile Isak oata te la poro, eia mai ale vimahuli sesele e latule Abraham taro la pileho, eia mahuli. \s1 E Isak \p \v 20 Mai etato ge gabutatala tai la tautaulailo te Isak. Oio moli te la tautaulailo tetala ale uru, e Isak, eia hagagaviti ge peho, eia goio toi la vibalavala soio te latula ilua, e Iakob, e Sau. Me eia matagagati mai ele veia eia gabu tikumu la merera te La Tahalo Uru, la vuhula eia kama toia soio tegirua la merera ale ge puru harari moli, ouka, eia toi la vibalavala ale ge puru mulimulito. \s1 E Iakob \p \v 21 Mai etato ge gabutatala tai la tautaulailo te Iakob. Eia hagagaviti ge peho, eia sau la toho tetala, eia goio hiliti soata. Me oio moli te la tautaulailo tetala ale vagari sesele, eia goio lagu tugu, eia lotu tavu La Uru, eia goio toi la vibalavala soio te tubula, e latule Iosep ilua. \s1 E Iosep \p \v 22 Mai etato ge gabutatala tai la tautaulailo te Iosep. Eia uru pepehoti, hagagaviti ge peho, eala moli eia tautaulailo vagari te la merera te La Tahalo Uru, eia goio veipala mugatia veia La Uru mulimuli ge puli la valalua e Israel taro la kilisi loio e Gipto. La gabutatalala tetala kama ilua, eia goio veia giteu la merera veia mai egite ge tuga, egite ge bole taro tai la tatuhala loio e Gipto, ge ulai polo seselea oio la mautu tegiteuo. \s1 E tamale Moses, egira me tilala \p \v 23 Mai etato ge gabutatala tai la tautaulailo te tamale Moses me tilala. E Parao toitia giteu la valalua e Israel maie veia mai egite ge pigo e latatu giteu ale hatamalemale, egiteu e Gipto ge bili taro egiteu. Eala moli e tilale Moses mira me tamala, egira hilo e latu girua veia eia posa tahalo, egira kamati taga e Parao, egira tautaulailo sesele te La Uru, egira goio tau kokovua la taio itolu, egiteu e Gipto kamati bilia. \s1 E Moses \p \v 24 Mai etato ge gabutatala tai la tautaulailo te Moses. Eia so la pepeso, e latule Parao la sobe patua, eia goio sagaiti, eala moli eia kama masagea veia egite ge toi leia veia eia e tubule Parao isa ale e latula la sobe patua. \v 25 Eia veia ge ligi vikapopo legiteu e tabarabarala la valalua te La Tahalo Uru, egite la valalua e Israel, eia kama masagea veia ge ruru veia ge kisu taro la valalua tetala veia ge pou tataho muga vikapopo legiteu e Gipto ale patua. \v 26 Eia veia ge gabu la mahelala mai e Kraist vikapopo la valalua te La Uru, eia kama gabu tikumu la vuliti tegiteu e Gipto, la vuhula eia gabutatala sesele solagu te la vibalavala te La Uru soio tegiteu ale tau sesele la ilo giteu soio tetala. \p \v 27 Oio te la tautaulailo te Moses ale uru sesele, eia hele taro e Gipto, eia kama taga la igototolola te la mulugaluga, e Parao. Eia vagari moli, la vuhula eia mai ale hilo seseleti La Uru ale la valalua la vovo kama hiloa. \p \v 28 Oio te la tautaulailo tetala ale uru sesele tai, e Moses tilimuli tomi la merera te La Uru, eia veia giteu e Israel veia egite ge bubu la kasosole latu la sip oata te la mata la luma tegiteu tomi isasasa. E angelo ale La Uru babahea te la bilili, eia ge polo te la logo, eia ge bili e latatu giteu e Gipto la posolagu, eala moli eia ge hilo la kasoso la sip oio te la mata la luma tegiteu e Israel, eia ge polo sele molia, eia kama ge bili e latatu giteu isa oio vola. \v 29 Egite hele taro e Gipto, egite polo te la mago ale la isala “e Magegese”, egite polo kabili te la gale la mago ale mamarati, la vuhula egite tautaulailo te La Uru. Egiteu e Gipto ga basimuli egiteu soio, la gale la mago iluale, egira goio visogo tavu lou, egiteu la valalua e Gipto tomi tilomutio. \s1 La imamala te Iosua \p \v 30 Mai etato ge gabutatala tai la tautaulailo te la valalua e Israel te la imamala te Iosua. Egite gali tavu la valalua ale mou te la gale ale La Uru abitia giteu e Israel, egite goio polo galili la bigomu la mautu e Ieriko la haro ivitu mai La Uru veitia giteu, goio la bigomu ale uru ele, eia goio tagogoro tomitio. \s1 E Rahab \p \v 31 Mai etato ge gabutatala tai la tautaulailo te la tavile la gauru, e Rahab, oio la mautu e Ieriko. Eia suli egirua taho lua ale e Iosua baha taro muga egirua soilo te la mautu veia egira ge kedi soio la mautu e Ieriko ele. Eia suli egirua, eala eia kama vilua vikapopo legiteu la valalua la maligoma tomi ale mou oio la mautu e Ieriko ele. \s1 Egiteu la tahalo me la tavile la tautaulailo te La Buk Tabu Ale Pala, egite mapaiti \p \v 32 Me eau ge vei loua mutou lava te la vulovulo la tautaulailo? Eia matagaga tomi moli. Mai eau ge kekesi la veimulipolola tegiteu la tahalo me la tavile la tautaulailo tomi, la buk alele ge malau agi. Egiteu alele, la isa giteu maie: \li1 e Gideon, \li1 e Barak, \li1 e Samson, \li1 e Iepta, \li1 e Devit, \li1 e Samuel, \li1 me egiteu la bilalaha tomi te La Uru, ale pala. \p \v 33 Egiteu alele, te la tautaulailo moli tegiteu, egite bole la igogolu tomi ale vagari maie: \p Isahari, egite bolehoho la maututula isahari ale vagari te la vaubila, egite goio vibaumuli tataho la maututula ale egite bolehohoa, me La Uru eia vibalava egiteu te la igogolu tegiteu ele, mai ale eia veitia giteu ovola. \p Isahari, egite poga la laion, la tautaulailo tegiteu kisi la harela, eia kamati barautu egiteu. \p \v 34 Isahari, egiteu la valalua la gima te La Uru, egite pigi egiteu sotalo te la havi, eala moli egite kama kauko ovola, egite mai ale igo mate loua. \p Isahari, egite vulo taro la gata tegiteu la gima. \p Egite isahari ale ga posa maveve, egite goio vahiliti vagari lou la vaubila, egite goio bolehoho la valalua la vaubi mapaiti, mai egiteu la valalua la maligoma ale gali tavu egiteu. \p \v 35 Isahari la tahalo me la tavile la tautaulailo, egite gabutatala la iloburukola ale uru pepeho, egite pou tali moli la visuli te La Uru maie: \p Egite hatavivile isahari ale e latatu giteu pehoti, La Uru goio vimahuli rivu lou egiteu, abi rivua giteu e latatu giteu ele. \p Isahari, la valalua la gima lao tola egiteu, egite viligi gegeru la vovo giteu. Eala moli egite kama gabutatala la hilele, egite peho moli te la viligila ale uru, egite la gima igoa giteu. Egite veia La Uru ge vimahuli rivu lou egiteu te la mahuli rivula ale muga sesele, oata te la ilo la lage. \p \v 36 Isahari, la valalua la gima kulumai vulo egiteu, egite lubi vulo tai la vovo giteu, egite gabu la mahelala ale uru pepeho, ale la valalua magiri malelei egiteu te la iligiligi ale uru mai ele. \p Isahari lou, la valalua la gima lao tola egiteu, kisi la lima giteu me la vaha giteu la sen, vagoilo egiteu mai ele te la luma la kilisi, koratio. \p \v 37 Isahari, la valalua la gima dumu legiteu la uati. \p Isahari, la valalua la gima lao tola egiteu, egite abi la so, egite goio barautu lua la kabili giteu. \p Isahari, la valalua la gima barautu legiteu la viso la vaubi, egite peho. \p Isahari, egite la kulikuli ale taritigi ouka, egite tatuga, egite kisi moli la kulikuli la kau me la kulikuli la mee te la kabili giteu. Egite la uati ouka, la valalua igo gegeru egiteu, viligi pepeho egite. \v 38 Eala moli la vulovulo giteu la valalua te La Uru, eia maroka, eia muga sesele la vulovulo giteu la valalua te la maututula ale egite vile egiteu. \p Isahari, egite hele lahulahu te la hohoi, isahari hele soata la goegove, egite mavuta kokovu te la lulu me te la vavi la magasa. \p \v 39 Me egiteu tomi ele, La Uru vei tataho la tautaulailo tegiteu ale egite magiri vagari. Eala moli egite kama sau tola sesele la vavua la merera te La Uru soio tegiteu te la mahulila tegiteu, ale egite so mahulihuli, ouka. \v 40 La Tahalo Uru eia masagea veia egite ge peho muga, veia egite ge pou tali muga etatou ale ge mulimuli. Eia veia etato tomi ge vikapopo ge sibitala maroka tataho, eia ge vipuru la merera tomi tetala somai tegatou, vikapopo legiteu. \c 12 \s1 Etato ge mata moli solagu te Iesus sekela \p \v 1 Etatou ale te Kraist, etato mai ale harari te la vipepepela. Egiteu la tahalo la tautaulailo ale alaura kara igoie, egite mapaiti, egite mai ale malelei, egite magiri galili etatou veia ge hiloa veia etato ge hari tigi, ka ouka. Taritigi etato ge kai taro la papaga ale vitikumu la kabili gatou, mai la vulovulo la iruru ale kisi tola etatou, etato ge hari tigi te la vipepepela, ale e Kraist vipou etatou ovola, etato kama ge geho. \v 2 Taritigi tai veia etato ge vagari veia ge mata moli solagu te Iesus sekela. Eia la vuhu la lotu sesele tegatou, eia visibitala la tautaulailo tegatou, me eia ge vitapasi tai la igogolu tetalale, eia ge vimaroka etatou tomi ale tetala. Eia gabutatala moli la sagegela uru ale mulimuli ge puru oio tetala, eia goio poga tavu la iligiligi oata te la tauvalautu. Eia kama gabutatala la mahelala ovola, eia gabu muga la iligiligi mai ele, mulimuli eia goio pou la pulolou la uru oio te la bali La Tahalo Uru, te la galela e gata. \s1 La Tahalo Uru eia viteteli etatou veia ge vimatata la vulovulo gatou \p \v 3 Taritigi amuto ge gabutatala la tautaulailo te Iesus, ale eia magiri vagari te la tahivilela tegiteu la valalua la iruru. Mai amuto ge gabutatala vagaria mai ele, amuto kama ge maveve veia ge peho posa, amuto ge vagari moli. \v 4 Eia sesele, amuto vaubi vagariti soio te la vulovulo la iruru, eala moli la kasoso mutou souka pagegele mai e Kraist. \v 5 Mave, amuto soioge vautila la merera te La Uru te La Buk Tabu Ale Pala, ale eia karasuku amutou mai e latatula sesele? Te la merera alele, La Uru eia veia gatou maie: \li1 Latugu, eme umala ge gabutatala \li1 la vitetelila te La Uru \li1 veia eia la golu bulalahu. \li1 Umala eme ge ilo buruko mai eia ge vilaime \li1 te la iruru ale eme igotia. \li1 \v 6 La vuhula, mai La Uru ge gogome \li1 veia eme tetala seseleti, ale eia ge vilaime. \li1 Mai eia ge gabutatalea veia eme mai e latula sesele, \li1 tiele eia ge mai ale lubi vulome \li1 veia ge vitetelime mai ele. \p \v 7 Amuto ge magiri vagari te la iligiligi veia eia mai la vitetelila te La Tahalo Uru soio tamutou, ale eia igoti amutou mai e latatula sesele. Etato tomi te la bibisi gatou, etato gabu la vitetelila te tama gatou. \v 8 Mai eme kama gabu la iligiligi te la vitetelila, ale eia veipalea mai ele veia e tilamu mai ale savume te la gauru, eme mai e guliliki ale e tamala ouka. \v 9 Etato tomi e tama gatou te la vovo oio, egite viteteli etatou te la bibisi gatou, etato togo tai egiteu oio vola. Mai etato togo tatahoti e tama gatou te la vovo mai ele, taritigi pepeho tai veia etato ge roromuli tataho e tama gatou te la kalulu, etato ge sau tola la mahulila ale sesele. \v 10 Egiteu e tatama gatou, egite viteteli etatou te la bibisi gatou mai la gabutatalala tegiteu moli, eala moli La Tahalo Uru eia viteteli etatou te la vulovulola ale maroka, veia etato ge sibitala maroka mai eia. \v 11 La vitetelila, eia la paga isa, eia ligi pasi, etato kama sagege ovola. Eala moli mulimuli etato ge hiloa veia la vavuala ale sesele eia sibitalati, mai la gilogo me la vulovulo ale matata, eia ge kusi tataho te la mahulila tegatou isasa, ale La Uru viteteli etatou. \s1 Etato ge magiri vagari \p \v 12 Taritigi la lima mutou ge sau tola vagari lou te la igogolu te Kraist. Taritigi tai veia amuto ge magiri vagari te la isala. \v 13 Mata tigi la gauru ale matata, mai la merera te Kraist moli sekela, amuto ge mulimulia. Mai amuto ge polo tataho mai ele, tio la vaha mutou ale oba, eia ge vagari lou. Tuga tigi, la vaha mutou soukama peru, amuto ge tuga suka. \p \v 14 Amuto ge vagari veia amuto ge vipuhi tigi me egiteu la valalua tomi. Taritigi la vulovulo mutou ge maroka tai. Mai amuto kama ge maroka, amuto kama ge hilo La Uru. \v 15 Amuto ge vibaumuli tigi amutou tomi veia isa tamutou umala ge galo te la vibalavala te la gilogo te La Tahalo Uru soio tamutou. Amuto ge vibaumuli tigi tai veia isa tamutou umala ge vulo mai la obu ale kama kokora, eia soukama ge kusi kabili tamutou, ge igo gegeru amutou usu. \v 16 Isa tamutou umala ge tilimuli la vulovulo ale kama kokora. Isa tai umala ge kisu taro La Uru mai e Sau alaura. E maura vitolo, eia goio sugu taro bububu moli la vibalavala te la pulolou la posolagu, e tarila e Iakob lotola la ilali. \v 17 La veimulipolola alele, etato tomi rovia. Mulimuli e Sau goio gabutatala rivu lou, eia tali tavu e tamala veia ge abi rivu la vibalavala tetala, eala moli oukati. Eia kama koramulia ge vulo la gabutatalala te tamala, e tamala goio kisu taroa, eia kati toi la vibalavala soio tetala, e maura galo. \s1 Etato mai ale magiri te la vai la gove ale maroka, e Saion \p \v 18 Etato igoie mai ale magiri la sagegela te la vai la gove ale maroka e Saion. Etato kama mai egiteu e Israel alaura, ale egite magiri la tilaga oio te la vai la gove e Sinai. \p La gove e Sinai, eia la gove ale otalo te la magasa, eia kama la gove la irovilala mai te la igogolu te la kalulu, mai e Sinai. \p La gove e Sinai, eia karerere, egite Israel tagea. \p Oio vola la maligoma, la gauku, la hura, eia magiri, eia kama kokora sesele. \p \v 19 Oio vola, egite lolo la vaivai eia tali, egite goio lolo la golu La Uru eia vikara, egite tali tavua veia eia ge makovu, \v 20 la vuhula la merera tetala eia tikumu bara, egite kama koramulia, ale eia veia giteu maie “La gove alele, eia maroka. Mai la tahalo isasa eia ge toa ovola, veia mai la bolo isa tai ge toa ovola, amuto ge dumula la uati, eia ge peho.” \p \v 21 E Moses tai hiloa, eia taga pepeho, eia goio vikara maie mago “Eau taga pepeho, la vovogu pariri moliti.” \p \v 22 Eala moli la gove ale etato igoie mai ale magiri ovola, eia la gove e Saion. La mautu sesele te La Tahalo Uru, e Ierusalem ale maroka, eia magiri oio vola. Eia oata la ilo la lage, eia la mautu te La Tahalo Uru, ale eia moli sekela mahuli. \p Oio te la mautu te La Uru, amuto magiri vikapopo legiteu la angelo mapaiti sesele, egite magiri moli la sagegela oio te la lagu La Uru. \p \v 23 Oio te la mautu alele, la valalua la lotu te La Uru sesele egite pou vikapopo ovola, eia mai ale vauru tomi egiteu mai la posolagu, eia kekesi tola tomiti la isaisa giteu. \p Oio tai te la mautu alele, amuto pogati La Tahalo Uru, eia ge mata muli la vulovulo la valalua tomi. \p Oio tai te la mautu alele, amuto pogati la kalulu giteu la valalua tomi te La Uru, egiteu ale pehoti alaura kara igoie, La Uru eia vimarokati egiteu. \p \v 24 Oio tai te la mautu alele, amuto pogati e Iesus, eia ale magiri kabili tegatou me La Tahalo Uru, veia ge vahari la merera ale halaba eia ge vimahuli etatou. \p Oio te la mautu alele, amuto pogati la kasosole Iesus ale eia lugu robo letatou ovola, la kasosolale eia veipala la merera ale halaba te La Uru. La merera ale halabale, eia la merera la mahuli. Eia kama mai la merera ale loio te la kasosole Abel mai La Buk Tabu Ale Pala veia la kasosole Abel eia mai ale tola soio te La Uru veia eia koli la iruru te tuala ale eia bilia. La kasosole Iesus eia kama mai ele. La kasosole Abel, eia veipala moli la pileho, eala moli la kasosole Iesus eia taritigi pepeho, eia veipala la gilogo te La Tahalo Uru. \s1 Etato ge vibaumuli tigi etatou \p \v 25 La tahalo ale vikara soio tamutou, eia La Uru moli e Kraist, eala eia taritigi pepeho veia amuto ge vibaumuli tigi amutou veia amuto tomi ge roromulia. Egiteu e Israel alaura, egite tou la merera te La Uru ale e Moses veia giteu, egite peho tomi, isa kama mahuli utu. Eala moli igoie, amuto kama lolo la merera te la tahalo la vovo, mai egiteu ele. Amuto lolo seseleti la golu La Uru ale tali loata te la mori. Eala eia taritigi pepeho veia etato ge matagaga veia mai etato ge tou la merera tetala ale tikumu ele, etato tai ge peho, isa kama ge hele. \v 26 Alaura, La Uru eia vikara loata te la gove e Sinai, la golula lugu la magasa tomi. Eala moli eia veitia gatou maie “Eau mulimuli ge lugu lou la magasa, me la mori tai ale loata eau ge lugua.” \v 27 Me te la merera alele, eia mai ale toitia veia eia ge lugu taro tomi egiteu la papaga ale kama magiri vagari, mai egite la golu bulalahu moli te la maututula. Egiteu la papaga moli ale sesele, egite ge magiri. \v 28 Tio me eia matagagati mai ele veia la mautu ale eia ababia gatou, eia la paga ale sesele te la kalulu, eia kama ge taumu, eia ge magiri vagari moli. Taritigi etato ge vaisale pepeho La Tahalo Uru, etato ge lotu tavua, etato ge togo seselea. \v 29 La vuhula La Uru gatou eia mai la havi, eia ge selu taro egiteu tomi ale kama taritigi. \c 13 \s1 Etato ge vipuhi tigi \p \v 1 Taritigi amuto ge vipuhi tigi te la haroharo tomi. Amuto ge vitau me tabara sesele te la lotu te Kraist. \v 2 Taritigi amuto ge rara tavu tai egiteu la mosi ale guvi tavu amutou, umala vaula la vulovulo alele. Pala, egiteu la valalua isahari te La Tahalo Uru, egite vibaumuli egiteu la angelo isahari, egite kama rovia veia egiteu la tahalo la vovo moli. \v 3 Taritigi tai veia amuto ge gabutatala egiteu ale te Kraist, egite pou te la luma la kilisi. Egite oio ligi, taritigi amuto tai, amuto ge ligi vikapopo legiteu. Gabutatala tai egiteu ale la valalua la gima igo gegeru egiteu. Egite ligi, taritigi amutou tai ge ligi vikapopo legiteu. \p \v 4 Taritigi amuto ge togo la pulolou tegiteu ale tau me rutu, umala igo gegegeru la taulaila, la vuhula La Tahalo Uru eia ge vilai sesele egiteu ale egite mata bulakalaka, egiteu ale ovovo, egiteu tai ale taulai sasasaro. \v 5 Umala gabu tikumu la uati veia ge hari olu la vuliti te la mahulila tamutou te la vovo. Amuto umala ge gabutatala papai, amuto ge sagege moli la uati me la ilali bakisi ale amuto taholea. La vuhula La Tahalo Uru moli, eia ge vibaumuli amutou, mai la merera tetala ale eia veia gatou maie: \li1 Eau kama ge hele taro amutou ale taku. \li1 Eau kama ge piligi taro amutou. \p \v 6 Eala eia koramulia veia etato ge vagari moli, etato ge vikara maie mago: \li1 La Uru, eia susuli eau. \li1 Eau kama ge pariri. \li1 Eau kama ge taga la valalua. \s1 Etato ge mulimuli la vulovulo giteu la bilalaha te Kraist \p \v 7 Taritigi amuto ge gabutatala egiteu la mulugaluga tamutou, egiteu la bilalaha te Kraist ale pala egite veitia mutou la merera te La Tahalo Uru. Amuto ge hilo la vavua la valolo giteu ele, amuto ge sovei la vulovulo giteu ale egite tautaulailo vagari te Kraist. \p \v 8 La vulovulole Iesus Kraist, eia kama vuvulo. Alalavi, igoie, galigeli, kara ale mulimuli, la vulovulola eia visauru moli. \v 9 Eala amuto umala ge mata sosoli egiteu la valalua la visigologolola veia egite ge tutugolo amutou, amuto ge ruru soio te la vimari tomi ale isapolo, ale kama te Kraist sesele. Mai la vimari te la irovilala tomi te la lotu, ale egite karasuku etatou ovola veia etato ge gabu tikumua, mai la ilali isahari ale ge igo la rivu gatou ovola, mai la vimari tai ale mave ale mave, la merera tomi alele eia kama ge vimahuli la kalulu giteu ale mulimuli. \s1 La vaabila ale La Tahalo Uru masagea \p \v 10 Etatou ale te Kraist, etato tahola la luma la lotu isa sekela moli ale sesele, me la poro la vaabila oilo vola tai isa sekela moli. Me la vaabila ale tabuli oata te la poro, eia pigi robo etatou moli ale te Kraist. La vaabila alele, eia kama tegiteu ale gabu tikumu la lotu tegiteu e Iuda. \p \v 11 Te la lotu tegiteu e Iuda, la mulugaluga tegiteu e pris, eia ge abi la kasoso giteu la kalia ale egite bilia, eia ge vaharia soilo te La Baa Ale Maroka Viruru oilo te la luma la lotu, veia la kasoso alele eia ge pigi robo la iruru tomi te la valalua. Eala moli la vovo giteu la kalia ale egiteu bilitia, egite ge bolea sogala la mautu, egite ge selu taroa. \v 12 Mai e Iesus tai, egite lao tolea, egite lapua sogala la mautu, egite bilia oio te la matapiro la mautu e Ierusalem, la valalua e Iuda toutia. Eia gabu la iligiligi ale uru sesele, veia la kasosola ge pagegele, eia ge pigi robo etatou tomi ale tetala, eia ge vimaroka etatou. \v 13 Eala eia koramuli seselea veia etatou tai ale tetala ge pou logala la mautu mai e Kraist, veia etato ale tetala ge gabu suli eia te la mahelala ale eia gabutia. \v 14 La vuhula, la mautu ale etato mou ovola, eia kama la golu sesele, eia kama ge magiri tabaa. Etato so mamata solagu te la mautu ale sesele, eia ge sibitala mulimuli. \p \v 15 E Iesus, eia ge suli la lotu tegatou, etato ge vaisale bibibi La Tahalo Uru, mai la vaabila tegatou ale maroka soio tetala. Etato ge vaisale bibibi molia mai ele veia eia sekela moli La Uru, me etatou la valalua me hatavivile tetala sesele. \v 16 Me la vaabila isa lou tai ale La Tahalo Uru masaga pepehoa, amuto umala ge vaula, ale amuto ge mulimuli la vulovulo la mutelela, me amuto ge suli tai egiteu la valalua ale pou la savelela. \p \v 17 Taritigi amuto ge mulimuli tataho la merera tegiteu la mulugaluga tamutou, amuto ge roromuli egite. Egite kama vibaumuli bulalahu amutou, La Tahalo Uru moli mata mulimuli la igogolu tegiteu, eala egite igogolu tataho. Amuto ge roromuli tataho egiteu, egite ge sagege pepeho la igogolu tegiteu mai ele, egite kama ge ligi la vulovulo mutou. Mai amuto ge vareagi, la pulolou tamutou kama ge taritigi, la vareagila eia kama ge suli amutou. \s1 La kilaka la visuli \p \v 18 Eau kaka gogogo amutou, veia amuto ge pou te la kilaka, veia amuto ge sau tola amiteu la tahalo la vibaumuli te la lotu te Kraist oio te la kilaka tamutou ele. Amite kama gabutatala papai te la igogolu tamiteu, amite tovo lalai vagari veia ge pou tigi, la iruru ouka. \v 19 Eala, eiau tai ale kekesi la buk ale, eau kaka gogogo vagari amutou veia amuto ge kaka La Tahalo Uru veia eia ge vahari harari rivuau somai tamutou, etato ge vikapopo lou. \p \v 20-21 Taritigi pepeho tai veia La Tahalo Uru ale sau tola etatou te la pulolou ale taritigi, eia ge vauru la gabutatalala me la tautaulailo ale taritigi soio tamutou, veia etato tomi ge igogolu tataho mai la masasagala tetala sesele. La vagagari la kasosole Latula ale sau tola la merera la mahuli tetala ale kama ge kaluvu, eia vimahuli rivu lou La Uru gatou e Kraist taro la pileho veia eia ge vibaumuli tataho etatou ale tetala. Taritigi tai veia La Tahalo Uru ge igogolu oilo te la tia mutou veia ge visibitala la vulovulo tomi ale taritigi, eia ge lege sisigi le amutou oio vola. La merera tomi alele, eau kakea te la isale Iesus Kraist, tetala ge la vaisalela ale uru sesele, la kaluvula ge ouka. Amen. \s1 La tapasi la merera \p \v 22 Amuto tabarabaragu, taritigi amuto ge gabu tikumu la merera tomi ale eau veitia mutou te la kekesi taku ele, la vuhula la merera taku ele, eia kama malau, eia boto moli. \p \v 23 Taritigi amuto ge matagaga veia e tabara gatou e Timoti, eia kati pou te la luma la kilisi, egite lubetia. Mai eia ge gomai hari taku, soioge amila tomi ge hari lalai amutou. \p \v 24 Amuto ge laharoa giteu la mulugaluga tomi te la lotu te Kraist, me la valalua me hatavivile tomi tai ale tetala. Egiteu e tabarabara gatou te la isale Kraist ale pou oio la gale e Itali, egite tai toi la haro sesele soio tamutou. \v 25 La gilogo te La Tahalo Uru eia ge pou tamutou tomi. La vikararala taku bakisi eala moli ele, kaluvuti.