\id GAL - Nakanai NT [nak] -Papua New Guinea 1983 (DBL 2014) 
\h E GALESIA 
\toc1 Ale La Merera Te Pol Eia Kekesia Giteu E Galesia 
\toc2 Galesia 
\toc3 Gal 
\mt1 ALE LA MERERA TE POL EIA KEKESIA GITEU E GALESIA  
\c 1  
\p
\v 1-2 Eiau e Pol, eau kekesia mutou la valalua me hatavivile te la lotu tomi te Iesus Kraist ale oio la gale e Galesia. Amite me egiteu e tabarabara gatou ale omai takue, amite toi la haro sesele soio tamutou la valalua me hatavivile sesele te Kraist. E Iesus Uru ele, eia hiloviau veia eau ge la bilalaha tetala. La tahalo la vovo isasa kama baheau, ouka. E Iesus Kraist moli, egira me La Tahalo Uru e Tamala, eia vimahuli taro loua lotalo te la lulu la pileho.  
\v 3 Oio te la isa girua eau toi la vibalavala te La Tahalo Uru soio tamutou veia amuto tomi ge gabu tikumu la gilogo tetala ale uru, la tia mutou oilo ge malilo tataho.   
\p
\v 4 E Iesus Uru eia tomo bururuti letatou, eia piligiti la mahulila tetala veia eia ge sabubu taro la iruru tegatou, eia ge lube taro etatou te la mari papaila ale viri roboti etatou te la imamala la vareagila tegatou ale etato mahulihuli ovola igoie. La vuhula la masasagala te Tamala veia e Latula ge suli etatou,  
\v 5 eala etato vauruti la isala, sokotia alaura, eia ge kara mulimulito, kama ge kaluvu, amen.   
\s1 La valolo ale taritigi eia isa moli sekela  
\p
\v 6 Eau karutu sesele le amutou, la vuhula amuto poke taro hari moli La Tahalo Uru ale tola palati amutou soio te la matagaga te la gilogo uru te Iesus, igoie amuto lagu tavu moliti la valolo ale isapoloti.  
\v 7 Eia sesele, la valolo la mahulila eia isa moliti, eala moli egiteu la tahalo la visigologolola isahari oio kabili tamutou, egite masagea veia egite ge vulo gegeru loua la merera te Kraist Iesus ele.  
\v 8-9 Eala moli mai isa ge valolo le amutou la merera ale isapolo, kama la valolo ale amite valolo mugati le amutou ovola, eia ge vilua. Mai ge e angelo isasa ge valolo ruruti amutou, veia mai amiteu la bilalaha isasa tai ge valolo ruruti amutou, eia ge vilua moli. Amuto ge taua la varu mutou!  
\v 10 Me amuto gabutatala mave la merera taku? Amuto isahari soioge so gabutatala veia eau mera gogomea mutou la merera ale malama? Ouka gologolo, eau vikara, eau gabutatala moli La Tahalo Uru sekela. Mai eau ge masagea veia la valalua ge lege sisigi leau, eau ge pou tavu la igogolu isapolo ale kama la igogolu la bilalaha te Kraist Iesus, eala moli ge ouka.   
\s1 La Tahalo Uru sekela hilovi e Pol te la igogolu la valolo tetala  
\p
\v 11-12 Eala moli amuto tabarabaragu, taritigi pepeho amuto ge rovia veia la valolo ale taritigi, ale eau valolo palati amutou ovola, eia kama la merera bulalahu veia eau loloa te la tahalo la vovo, eia tai kama la vimari te la vovo ale isasa ge tovo leau ovola. Ouka, e Iesus Kraist sekela moli veipalatiagu la merera la mahulila tetalale, eia tikumu sesele.   
\p
\v 13 Amuto soioge lolotia la vulovulogu ale pala. Eau la tau Iuda sesele. Eau viligi pepeho egiteu la valalua la lotu te La Tahalo Uru, eau vagari veia ge sulu egiteu, veia ge barautu la valolo te Iesus veia eia ge kaluvu.  
\v 14 La vulovulo la lotu tamite Iuda, eau lagu tavu tomitia, eau mugati egiteu tomi la tuvu taku, eau tilimuli vagari la vulovulo giteu e ururu tamiteu e Iuda.   
\p
\v 15 Eala moli e tila souka taposa eau, La Tahalo Uru hiloviti eau, eia tola tavuau te la gilogo tetala ale uru, eia masagea  
\v 16 veia te la mahulila taku eia ge veipala la vulovulole Latula, veia eau ge valolo egiteu la valalua me hatavivile ale pou te la maligoma, egite ge rovia la merera la mahulila tetala ale uru ele. Eau loloa eia tola tavuau mai ele, eau kama magiri lou veia amila me la tahalo isasa ge vipigi vulo mugala, ouka.   
\p
\v 17 Eau tai kama goata e Ierusalem veia ge veipalea soio tegiteu ale pou palati te la igogolu la bilalaha. Eala moli eau sele molia goilo te la gale tegiteu e Arab, eau pouo, mulimuli eau sele polo loua, beu rivu loua soio la mautu e Damaskas lou.  
\v 18 Me ale la leavala itolu poloti eau goata e Ierusalem veia ge hari lalai e Pita, eau mavuta oio tetala la logo savulusa gete lima,  
\v 19 eau kama hilo lou isahari egiteu la bilalaha, eala moli e Iakob moli ale e tarile Iesus La Uru gatou.   
\p
\v 20 Me la merera tomi taku alele eau vei seselea mutou, eau kama visigolo, eia sesele oata te La Tahalo Uru.  
\v 21 Me mulimuli ovola eau goio valolo oio te la gale ilua, e Siria, e Silisia,  
\v 22 eala moli egiteu la valalua la lotu te Kraist oio la gale e Iudea, egite soukato rovi sesele la tirarogu.  
\v 23-24 Eala moli egite lolo molia veia la tahalo la gima tegiteu eia vulo sapoloti, eia oio valololoti la merera la mahulila ale eia pala veia ge barautu taroa. Egite lolo moli la vulovulogu ale halabati ele, egite bole vauru moli la isa La Tahalo Uru ovola.   
\c 2  
\s1 La viputumulila tegite la bilalaha oio e Ierusalem  
\p
\v 1 Tio, eau pou te la igogolu la valolo mai ele la leavala savulusa gete vaa, eau goata lou e Ierusalem, amite me Banabas, e Taitas tai.  
\v 2 Eau goata tegiteu ele, la vuhula La Tahalo Uru veipalatiagu veia eau ge goiole. Amite me egite la mulugaluga la lotu goio pou vikapopo, eau vei matagagea giteu la valolo ale taritigi ale eau valolo egiteu la valalua la maligoma ale kama e Iuda ovola. Eau vei matagagea giteu e ururu ele la valolo taku mai ele, la vuhula eau makuku, egite soukama ge barautu la valolo taku veia eia la valolo ale isapolo, la valolo taku uru eau kebo seseleti ovola, egite soukama ge pileau veia eau valolo bububu. Egite soukama veia eau kama tilimuli la merera tomi tamiteu e Iuda. Egite soioge masagea veia ge la tahalo te Kraist eia ge koro tai la vovola mai la merera te Moses alaura somai tamiteu la valalua e Iuda.  
\v 3 Eala moli e tarigu bisi e Taitas, eia tai oio, eia la tau Grik, eala moli egite la mulugalugale kama lapua veia eia ge koro la vovola mai la irovilala tamite Iuda, ouka.  
\v 4 Sesele, egite la tahalo isapolo isahari goilo tamiteu veia egiteu e tabarabara gatou la valalua te Iesus, eala moli ouka. Egite vagari veia ge koro la vovole Taitas ele. Egite goilo keke moliti te la kivung la lotu veia ge lolo vutia la merera ale taritigi, ale etato pou mai e taitarile Kraist, etato kati pou te la kilisi te la mari papaila te la merera tegiteu e ururu. Egite masagea veia ge lapu rivu lou etatou soio te la kilisi ale tikumu ale, ia?  
\v 5 Eala moli eau vagari pepeho veia ge sau tolea mutou la merera la mahulila te Iesus ale sesele, eala eau kama mera gogomea giteu bakisi veia ge egite ge koro lalai la vovole maura e tabara gatou bisi e Taitas ele.   
\p
\v 6 Me oilo vola, egite la mulugaluga te la lotu kama tau isahari lou la merera loata te la valolo taku ale eau valololola. Eala moli eau kama gabu tikumua veia egite uru, ouka. La vuhula La Tahalo Uru kama puhi tigi moli la valalua isahari mai alele veia ge vauru egiteu. Eala moli egite la uru te la lotu vitikumu loua la valolo taku veia eia koramuli.  
\v 7 Egite hilo vuti seselea veia La Tahalo Uru turiau veia eau ge valolo egiteu la valalua ale kama koro la vovo giteu, mai sesele lou eia turi e Pita veia eia ge valolo egiteu e Iuda, egiteu ale koro sesele la vovo giteuo.  
\v 8 La Tahalo Uru moli ale baha e Pita veia eia ge valolo egiteu ele, eia baha tai eau veia eau ge valolo egiteu ale pou te la maligoma.   
\p
\v 9 Tio, me oio moli ovolale egite taho tolu, e Iakob, e Pita, e Ioanes, egite la sosole la lotu itolu seselele, amila me Banabas vilapu lima tegiteu ele, veia la merera tamiteu ge pou mai alele, egite masaga molia veia amite ge visuli baoli te la igogolu la valolo. Amila ge valolo egiteu ale kama e Iuda, egite pou te la maligoma, me egiteu taho tolu veia ge valolo egiteu la valalua e Iuda, egite ale abiti la irovilala te la vovo giteu.  
\v 10 Eala moli egiteu taho tolu ele vagari moliti la paga isasa veia amite ge gabutatala egiteu ale pou la savelela, ge susuli egiteu. Me ale tai ele eau masaga pepehoa veia ge visuli tai soio tegiteu mai ele.   
\s1 E Pol vimatata lou la vulovulole Pita  
\p
\v 11 Eala moli ale e Pita gotalo la mautu e Antiok, eau vitetelia, la vuhula eia ruru,  
\v 12 la vuhula eia pou palati tamiteu, eia ali vikapopo la valalua tomi. Eala moli egite la valalua isahari te Iakob guvi, ale gabu tikumu la vulovulo la kiroro la vovo la tahalo, me oio vola egite kama vaali vikapopo legiteu ale kama koro la vovo giteu. Ale egite guvi maie, e Pita kati vaali tomi legiteu ale kama e Iuda, egite kama koro la vovo giteu, la vuhula eia mahela legiteu la valalua te Iakob ele, veia egite souka ge igo totoloa.  
\v 13 Goio egite Iuda tomi ale oilo te la lotu te Iesus, egite tilimuli la vulovulo ale halaba te la visigologolola te Pitale, me oilo vola egite viruruti e Banabas tai ele.   
\p
\v 14 Eala moli ale eau hiloa veia egite kati tilimuli la gauru ale sesele te la valolo ale taritigi te Iesus, eau goio magiri te la lagu giteu tomi, eau veiale Pita mago “Eme la tau Iuda, eala moli eme palati kamati tilimuli la vulovulole ururu tegatou e Iuda, eme la vulovulomu maiti la tahalo ale logala, eme kamati mai la tau Iuda. Me igo mave eme kama vaali tomi legiteu ale logala veia ge lapu lou egiteu soilo te la vulovulo le ururu tegatou?”   
\s1 Etatou ge sibitala maroka te la merera te Iesus moli  
\p
\v 15 Amiteu, e tila miteu visibitala amiteu oilo te la maratatila e Iuda, kama la maratatila ale isapolo logala, tegiteu la valalua la iruru.  
\v 16 Eala moli amite rovitia veia etatou la tahalo la vovo, etato kama sibitala maroka mai te la vagagari gatou ale etato tilimuli sesele la merera tomi me la vulovulo le ururu tomi, ouka. Eala moli etato ge gabu tikumu la merera te Iesus Kraist, ge sau tola molia, ale moli ele etato ge vulo marokala. Etato tomi pala kama rovia e Iesus, amite tai vulo la gabutatalala tamiteu tavua mai amutou ele. Eala igoie etato tomi sau tola vagari la merera tetalale, ale moli ele ge igo maroka etatou, la tilimuli la merera te ururu tai kama ge vimahuli isasa, me la vagagari gatou tai kama ge koramulia ge igo maroka lou etatou.   
\p
\v 17 Mai etato gabu tikumu la merera te Kraist veia eia ge vimahuli sesele etatou, eala moli etato ge goio ge vulo liliu lou veia la gauru ale eia kama sesele la vuhula etato kama koro pala muga la vovo gatou, ale etato gabutatala maie, etato soioge veipalatia mai alele veia etato ruruti, eia mai ale la valolo te Iesus eia vitiloti etatoue! Eala moli ale la pauala alele!  
\v 18 Mai eau ge toi halaba lou la merera ale eau tau tarotia, eau veipalatia mai alele veia eau la tahalo la iruru sesele.  
\v 19 La merera te Moses eia turitiagu la gauru ale pala te La Tahalo Uru, me la gauru alele eia viri. Eala eau poke tarotia, eia kati mahuli oilo la gabutatalala taku.  
\v 20 Ale e Iesus peho robo eau te la tauvalautu, eia abi taroti la vulovulogu ale pala. La paga isa oukati lou, e Iesus moli oilo te la gabutatalala taku. Eau sau tola moli la merera te Iesus, eau gabu tikumu molia veia eia e Latu La Tahalo Uru sesele, eia gogoau, eia peho roboau veia ge vimahuliau.  
\v 21 Eau kama koramulia ge igo marapa lou la gilogo tetala ale uru ele somai taku. Mai la merera te ururu ge koramulia ge vimahuli etatou, igo mave e Iesus ge peho bulalahu moli letatou?   
\c 3  
\s1 Egite ge tilimuli la viputumulila te Moses, uka la valolo te Iesus?  
\p
\v 1 E maura miteu e Galesiale! Isa soioge igo pauati le amutou la ilubulubu isasa, ia? Amutou moli ele ale pala amite vei matagaga tataho molia mutou la pilehole Iesus oata te la tauvalautu, eala moli amuto poke taro hari loua!  
\v 2 Eau veia ge tahi moli le amutou la tilahi isa sekela maie: Pala La Tahalo Uru sugu tarotia mutou La Kalulu La Marokala, mave, eia abia mutou la vaabila tetala uru ele la vuhula amuto lagu tavu la imoimo la merera tomi te Moses, ia? Ouka. Eia visagege moli le amutou ale amuto roromuli la merera te Iesus ale amite valoloti le amutou ovola.  
\v 3 Me igo mave amuto igo paua moliti maie veia la paga ale amuto galutia te la kalulu, amuto veia ge lusi taro loua te la vulovulo la vovo?  
\v 4 Mave, la visuli te La Tahalo Uru ale amuto hilotia ale amuto vulo halaba te Kraist pala, kara igoie, la visuli tetala ale uru ele amuto soioge kama gabu tikumua, ia? Ouka, ale eau viteteli moli amutou, eau rovia amuto soioge gabu tikumu seselea.  
\v 5 Mave, amuto veia La Tahalo Uru vibalavalava le amutou La Kalulu La Marokala, eia igigo tai la golu la karutula kabili tamutou, la vuhula eia sagege ale amuto tilimuli tataho la merera tomi te Moses, ia? Ouka, ale eia suliti le amutou mai ele, la vuhula amuto tautaulailoti te la valolo ale pala amite valoloti le amutou ovola.   
\p
\v 6 Eia mai moli ale la Buk Tabu Ale Pala eia veitia te Abraham maie “Eia gabu tikumu la merera te La Tahalo Uru, La Uru hilotia, eia veia eia maroka, eia tetalati.”  
\v 7 Taritigi amuto ge matagaga veia egite ale gabu tikumu la merera te La Tahalo Uru, egiteu ele e tutubule Abraham moli.  
\v 8 Egite ururu ale kekesi La Buk Tabu Ale Pala, egite hilo pala mugatia veia La Tahalo Uru mulimuli ge vimaroka lou la vulovulo la valalua la maligoma te la merera tetala moli. Me mai moli ale La Tahalo Uru vikara pala mugati soio te Abraham mago “Oilo te la hilimu eau ge hilovi isasa ale ge suli la valalua tomi ale kama e Iuda, egite pou te la maligoma.”  
\v 9 Ale, etato ge rovia veia egiteu ale gabu tikumu la merera tomi te La Tahalo Uru veia eia sesele, egite ge poga la vibalavala ale uru mai tai e Abraham ele, la tahalo la tautaulailo.   
\p
\v 10 Eala moli egiteu ale tovo lalaia veia ge visagege La Tahalo Uru oilo te la tilimuli la imoimo la merera tomi te Moses, La Uru ge vilai egiteu, la vuhula La Buk Tabu Ale Pala eia toi tai loua maie mago “La Tahalo Uru ge vilai egiteu ale kama tilimuli tomi la imoimo la merera tomi te Moses.” Me etato ge boto.  
\v 11 Ouka, la merera te Moses kama ge vimahuli etatou veia etato ge maroka, la vuhula La Buk Tabu Ale Pala eia toi loua veia “La tahalo la maroka eia sivuti la mahulila ale eia gabu tikumu la merera te La Uru veia eia sesele.”  
\v 12 Eala moli la merera te Moses eia kama la paga ale vahilo letatou La Tahalo Uru veia etato ge gabu tikumua, ouka, la vuhula La Buk Tabu Ale Pala eia toi loua veia “La tahalo ale ge tilimuli tomi moli la merera te Moses, eia ge sivuti la mahulila oilo te la tautaulailo tetala mai alele.”   
\p
\v 13 Eala moli e Kraist rou rivu lou etatou taroti la igototolola te La Tahalo Uru ale eia veia ge vilai etatou ale boto te la iroromuli la imoimo la merera tomi te Moses. La vuhula e Kraist, eia abi la muli gatou, La Tahalo Uru vilaitia te la iruru tegatou ale egite katua oata te la tauvalautu, la vuhula La Buk Tabu Ale Pala eia vei tai maie veia “La Tahalo Uru ge vile la tahalo ale egite ge vahilitia oata.”  
\v 14 La Tahalo Uru igoti la la gauru mai alele, ale e Iesus peho robo la valalua me hatavivile tomi, la vuhula la masasagala tetala veia oio moli te Kraist Iesus la merera ale taritigi, eia toitia alaura soio te Abraham, eia ge puru somai tai tamutou la valalua me hatavivile ale pou te la maligoma. Eia igoa mai ele veia etato tomi ge koramulia ge sau tola la merera tetala, eia ge visibitala La Kalulu La Marokala somai tegatou mai ale eia veitia pala.   
\s1 La merera te Moses eia guvi mulimuli  
\p
\v 15 Amuto tabarabaragu, eau ge tovo mulia mutou te la vulovulo isasa ale etato rovitia mai te la tilau. La tahalo ge tau la tilau soio te tabarala, egira umala ge polo loua.  
\v 16 La Tahalo Uru, eia lova le Abraham la merera tetala ale tikumu veia la vibalavala tetala ale uru ge sibitala tetala me oilo tai te la hilila. Me mai moli ele eia koramulia veia etato ge rovia veia la merera te La Tahalo Uru alele eia puru seseleti somai te Iesus, eia kama tegite la karakara tetala tomi mai ale eia veitia veia \it oilo\it* te la hilila, isa ge sibitala ale ge vibalava la valalua me hatavivile te la maututula tomi.  
\v 17 Eala moli eau masagea veia amuto ge matagaga veia la merera te La Tahalo Uru alele, eia tabuli pala mugati, me la merera te Moses eia sibitala mulimuli moli te la pokela, mai la leavala salatu vaa savulu tolu poloti eia sibitala.  
\v 18 Me ale La Tahalo Uru lovatiale Abraham, la merera ale sibitala mulimuli te la pokelale eia kama koramulia ge tabuli loata ovola veia etato ge balava te la merera te Moses, ouka. La merera ale tikumu la merera moli ale La Tahalo Uru lova pala mugatiale Abraham veia etato tomi ge balava oio vola.   
\s1 La masova la merera te Moses  
\p
\v 19 Tio, mai la merera ale sibitala pala mugati, eia moli tikumu, la vuhula lava La Tahalo Uru tau lou la merera lou te Moses veia ge vikapopo la merera ale pala? La Tahalo Uru gabutatalea veia la leavala usu ge polo muga kabili te la imamala tegite ururu kara te ale la merera tetala ge puru, eia veia ge suli la valalua me hatavivile veia ge toi palea giteu la vuhu la iruru tomi, veia egiteu kama ge paua ovola. La mererale, La Tahalo Uru abia giteu la angelo tetala, egite sigiliale Moses, eia goio abia giteu la valalua me hatavivile e Israel.  
\v 20 Eala moli ale La Tahalo Uru lova le Abraham la merera tetala, la tahalo isa lou me e angelo isasa tai kama oio.  
\v 21 Mai alele etato koramulia veia ge sivutia veia la merera te Moses eia bisi? Ouka. La merera te Moses eia tikumu, eia loio seseleti te La Uru, eala moli La Tahalo Uru kama vipoua veia eia ge vimahuli etatou.  
\v 22 Eala moli taritigi etato ge rovia veia la vulovulo la iruru eia kisiti etatou tomi, mai La Buk Ale Pala eia veitia. Mai alele etato kama koramulia ge suli lou etatou, ouka. La vibalavala te La Tahalo Uru ale eia lovatiale Abraham pala, eia ge puru moli somai tegatou ale e Kraist igo maroka etatou, ale tautaulailo tetala.   
\p
\v 23 La imoimo la merera te Moses tomi eia kisiti etatou, kara la matagaga la valolo te Kraist eia sibitalati.  
\v 24 La Tahalo Uru vipou la merera te Moses veia eia ge turia gatou la gauru soio te Kraist, veia mai etato ge tautaulailo ovola, etato ge vulo maroka te la isale Kraist ele.  
\v 25 Eala ale la matagaga sibitalati, la merera te Moses eia kati kisi robo etatou.   
\p
\v 26 Ale etato tautaulailo te Iesus, etato sibitalati mai e latatu La Tahalo Uru sesele.  
\v 27 Amuto abiti la vuluhi tetala, eala amuto mai ale kai halabati la vulovulole Iesus ale taritigi ele.  
\v 28 Eala amuto umalati ge toi tabaribari amutou veia ale la tau Iuda, ale la tau Grik, me ale la tahalo la vuliti, ale la morivava, me ale la tahalo, eau ge lolo molia, veia egite hatavivile eau kama ge lolo egiteu. Etato visauru moli oilo te la maratatila te Kraist Iesus.  
\v 29 Mai eme ge tetala, eme maiti e tubule Abraham ale ge abi sesele la vibalavala te La Tahalo Uru ale eia lovatiala pala.   
\c 4  
\p
\v 1 Me la masova la merera tomi taku eia maie: Etato pou seseleti mai e latatu La Tahalo Uru, la vibalavala te Tama gatou uru ele, etato tomi taholatia. Eala moli mai etato so popou otalo la uluva la merera te Moses, eia so lago roborobo etatou, ale etato so mai moli e guliliki ale soukama uru, eia soukama abi la mulile tamala, eia la bilalaha moli tegite ururu.  
\v 2 Egite ururu ge vibaumuli e guliliki ale so bisi mai ele, kara ale eia ge sagaiti sesele.  
\v 3 Me etato tai mai moli ele, ale etato soukama sagaiti te la merera te La Tahalo Uru, etato so tilimulimuli moli la masasagala te la vovo mai la vitolola, la malehula.  
\v 4 Eala moli ale la imamala puruti ale La Tahalo Uru veia ge visibitala e Latula, eia baha e Kraist veia la sobe e Maria ge taposea, eia tai la tahalo la vovo mai etatou, eia pou otalo te la uluva la merera te ururu mai tai lou etatou.  
\v 5 Eala moli eia sibitala veia ge rou rivu lou etatou ale etato so popou te la uluva la merera tomi te ururu ale turi etatou veia etatou la tahalo la iruru. E Iesus sibitala mai alele veia ge puhi tigi etatou mai e tabarabarala sesele, etato tomi ge e latatu La Tahalo Uru sesele.  
\v 6 Me etato ge rovi molia mai ele veia etatou e latatu La Tahalo Uru sesele, la vuhula eia sigilitia gatou La Kalulule Latula eia voluti te la gabutatalala tegatou, eia veipalea te la hare gatou, etato toia maie soio tetala mago “Tete, Tete!”  
\v 7 Eala etato rovitia veia etatou e latatula, etato kamati pou la kilisi te la vulovulo la vovo ale kama kokora. Me ale eia vagoiloti etatou veia etatou e latatula seseleti, eala etato rovi taia veia eia ge gigi tai etatou oilo te la tabarila te latatula tomi.   
\s1 E Pol gabu pepeho egiteu e Galesia  
\p
\v 8 Amuto pala kama rovi sesele La Tahalo Uru, amuto gabutatala moli egiteu la papaga mai la taua me la hitu, me egiteu ale kama vagari, egite la golu bububu.  
\v 9 Eala moli ale igoie amuto sivuti La Tahalo Uru, mai ale eia gogo amutou, eia lagu tavuti amutoue, igo mave amuto veia ge gotigu rivu lou ge gabu tikumu lou egiteu la golu bububu ale pou bulalahu kama susuli amutou e? Amuto soioge veia ge goilo rivu lou te la kilisi te la vulovulo ale kama kokora te la vovo lou, ia?  
\v 10 Amuto gabu tikumu la taio ale halaba, me la poke la leavala ale halaba, veia amuto ge hate saga te la lotu la visigologolola te la imamala tomi ale tikumu tamutou mai alele. Amuto ouka pasi!  
\v 11 Eau soioge valolo bulalahu moli amutou, ia?   
\p
\v 12 Amuto tabarabaragu, eau kaka gogogo amutou veia amuto ge sovei eau. Amuto pala kama pou la kilisi te la vulovulo miteu e Iuda, me eau la tau Iuda, eau piligi taitia, ale igoie eau mai lou amutoue! Taritigi amuto ge sovei eau, amuto ge pou gale te la kilisi te la vulovulole ururu tamite Iuda, amuto umala ge goilo lou la bigomu aleiele veia ge pou la kilisi lou. Pala eau pou tamutou, amuto baumuli tatahoau, eala eau veia amuto soioge ge gabu tikumu la merera taku.  
\v 13 Ale eau valolo pala muga amutou, eau pou tamutou la vuhula la ilea uru bebetoleau.  
\v 14 Eau lea, amuto kebo la vibaumulila soio taku. Eau vorati, eala moli amuto kama malago leau, amuto rara tavu moliau mai e angelo isasa ale loata te La Tahalo Uru. Amuto vararapuau mai eau e Kraist Iesus loue!  
\v 15 Me ale igoie amuto mai ale bareti lou, amuto kati sagege mai ale pala! Mai ale eau veia, la vulovulo mutou ale pala, ale amuto ge hiloau eau posa vorati, amuto ge vagari veia ge baumuli tatahoau, kara ale amuto ge igo posa tahalo louau.  
\v 16 Eala moli igoie amuto vulo sapoloti. Mave, amuto soioge kati masageau, teale eau valolo le amutou la merera ale sesele te Kraist, ia?   
\p
\v 17 Egiteu la tahalo la visigologolola, egite vagari veia ge ali la ilo mutou, eala moli egite kama igigoa veia ge suli amutou, ouka. Egite masaga molia veia amuto ge pileau.  
\v 18 Ale etato ge gabu tikumu la valolo te la tahalo halaba, mai la valolo tetala ge sesele, eia taritigi moli mai alele. Mai eau tai kama ge oio tamutou, la golu isa ouka, amuto ge laba gele tataho la valolo tomi. Eala moli taritigi amuto ge gabutatala tigi muga la vuhu la vikararala tomi ale amuto ge loloa.   
\p
\v 19 Amuto latatugu, eau pala valolo amutou, eau mai ale veipala halaba amutou soilo te la mahulila te Iesus ale halaba. Ale amuto gotigu rivuti lou, eau ge mai ale ge ligi lou ale eau ge veipala halaba lou amutou mai la piligo halaba. Me oio vola, eau soioge ge gabu la iligiligi ale uru oio te la igogolu alele, kara ale la vulovulo mutou ge poga sesele la vulovulole Kraist.  
\v 20 Mai eau ge oio tamutou ele! Mai eau ge oiole, eau kamati ge gusia mutou. Mai eau ge oiole, eau ge mera gogoma tataho molia mutou taro la vareagila tamutou ele! Eau ilo buruko sesele le amutou ele.   
\s1 La tilovo te la tavile uru ilua, e Hagar, e Sera  
\p
\v 21 Ioge, amuto isahari ele masagea veia ge beu loua ge pou lou te la uluva la merera te ururu, tio eau veia ge tahi lalai amutou veia amuto rovia tataho la masova la merera tomi te ururu, ka ouka?  
\v 22 La masovala eia maie: E tubu miteu e Iuda, e Abraham, e latula ale hatamale ilua, isa eia savua te la bilalaha tetala e Hagar, isa eia savua te rutula sesele e Sera.  
\v 23 Ale sibitala bulalahu e latule Hagar moli. Eala moli ale e latule Sera, eia savua, la vuhula La Tahalo Uru toiti la merera ale tikumu soio te Abraham, veia e rutula ge savu e latula.  
\v 24 Me ale la tilovo tegatou, etato ge rovia maie: Egirua la tavile iluale e Abraham savua giruale, egira la tilovo te la tilau la mata te La Uru ilua. Mai la merera ale La Tahalo Uru veiale Moses oio la gove uru e Sinai, oio la gale tegite Arab, ale mai la tavile la bilalaha, eia pou te la kilisi te Abraham. Me e latula tai ale eia savua, me egiteu e tutubula ale mulimuli, egite tomi ge mai e Hagar ale pou te la kilisi.  
\v 25 Mai e Hagar ele, eia tovoa gatou la gove uru e Sinai, mai tai lou la valalua e Iuda, egite mai ale pou te la kilisi te la merera te Moses.   
\p
\v 26 Eala moli egiteu ale tautaulailo te Iesus, la pulolou tegiteu eia isapolo te aleie, la pulolou tegiteu eia mavulaha sesele, eia kama la pulolou la kilisi, ouka. Ale eia tovoa gatou mai e rutule Abraham sesele, e Sera ale visibitala amiteu tomi e tutubula, mai tai lou etatou tomi ale goiloti te Iesus.  
\v 27 Mai la merera te La Buk Tabu Ale Pala eia veia maie:  
\li1 Eme ale varirobo ele, ale e latumu ouka,  
\li1 eme ge sagege!  
\li1 Kakusa la sagegela,  
\li1 eme ale soukama gabu la iligi la piligo,  
\li1 la vuhula eme ge pigo.  
\li1 Eme ale varirobo, eme ge pigo pepeho,  
\li1 la giligi giteu e latatumu ge usu,  
\li1 me la tavile ale e haruamu oiole,  
\li1 e latatumu kama ge usu.   
\p
\v 28 Me mai moli ele, amutou e tabarabaragu ele, mai e Aisak e latule Abraham eia sibitala moli oilo te la merera ale La Tahalo Uru toiale tamala, mai lou amutou ale balava la merera te La Tahalo Uru ale eia toi taitia soio tamutou ele.  
\v 29 Me etato rovia veia e latule Hagar eia vile e maura e latule Abraham sesele, me mai moli ale igoie egiteu ale vagari tavu la merera te Moses, egite vilevile etatou ale tilimuli e Iesus, etato ale sau tolati La Kalulu La Marokala.   
\p
\v 30 Me mai La Buk Tabu Ale Pala eia veipala taitia maie “Pitaro la tavile la bilalahale, vikapopo me egira me latula, e latula bisi ele umala ge abi la mulile tamala mai e latula sesele, ale e rutula sesele taposea!”  
\v 31 Me oilo vola etato ge rovia veia etato kama abi la mulile latule Hagar, la bilalaha ale pou te la kilisi, veia etato tai ge pou te la kilisi, ouka. Etato mai moli e latule Sera, ale e rutule Abraham sesele, etato pou la balavala, mai e latu La Tahalo Uru sesele.   
\c 5  
\s1 Umalati beu loua soilo te la kilisi  
\p
\v 1 Ale e Kraist lubeti etatou taro la kilisi, eia kama veia etato ge gotigu rivu lou ge pou lou te la kilisi ele. Amuto ge magiri vagari, egite umalati ge kisi amutou mai la paia ale egite vuvu la gogo te la lohola!  
\v 2 Eau e Pol, eau veia mutou maie: Amuto umala ge pou varumurumu veia egite ge koro la vovo mutou, veia la gauru ale ge vimahuli amutou. Mai amuto ge varumu tali egiteu veia ge igo seselea mai ale egite veia, la pilehole Kraist kati ge suli amutou.  
\v 3 Tio me eau veia ge mera taro vagari lou amutou. Mai egite ge koro la vovo mutou, amuto mai ale goiloti lou veia amuto ge pou te la kilisi te la merera tomi tegite ururu. Mai amuto ge hilovi la merera isasa veia ge igoa, tio amuto oilo tomiti ovolale.  
\v 4 Eala moli mai amuto ge igo mai ele, veia la merera te ururu ge vimaroka lou amutou veia eia ge vimahuli amutou, amuto mai ale vipou baati lou me Kraist, amuto boruti.  
\v 5 Eala moli etato ale te Kraist, etato abiti la vimarokala te La Kalulula, me etato sau tola vagariti la merera tetala ale eia veia ge vimaroka etatou.  
\v 6 Ale etato goiloti te Kraist, etato tetalati. Eia kama gabu tikumua veia ale koroti la vovola, ale isa ouka. La golu isa moli eia uru te la gabutatalala tetala: ale etato gabu tikumu la merera tetala, veia te la vulovulo gatou etato ge veipala la gilogo tetala.   
\p
\v 7 Ale pala amuto soko la tuluga tamutou soio te Kraist, amuto mata kaseka pasi te la tuluga. Me ale igoie eau hiloa amuto mai ale tutuakiti lou, amuto kati tilimuli tataho la gauru ale sesele. Ere sogi amutou?  
\v 8 Eala moli eau rovia la tahalo ale viruru amutou kama La Tahalo Uru ale tola pala muga amutou soio tetala, ouka!  
\v 9 La visigolola eia mai ale ubi tatubati amutou tomie!  
\v 10 Eala moli etato isa moli te la isale Iesus, me oio vola eau rovia veia amuto ge beu loua te la gauru ale matata, me la tahalo ale viruru amutou ele, La Tahalo Uru ge vilai taia.   
\p
\v 11 Amuto tabarabaragu, amuto ge lolo somai taku, egiteu la tahalo la visigologolola, egite saupupupu eau veia la haro isahari eau soloio te la valolo mai te la kiroro la vovo la tahalo! Me mai ge mai ale, la vuhula lava egite Iuda oio gagima moliaue, mai eau ge soloio moli te la vimari ale egite masagea! Eala moli eau te la valolo moli te la tauvalautu, ale egite malagotila.  
\v 12 Mai amuto ge veia giteu la tahalo la visigologolola ale igo gegeru amutou ele veia ge egite ge barautu rivu bakisi la vovo giteu loue! La vovo gatou ale egite veia ge koro taroale, egite ge koro rivu lou tegiteu, eia ge paru tomi molitio!   
\s1 La vulovulo La Kalulu eia isapolo te la vulovulo la vovo  
\p
\v 13 Amuto tabarabaragu, La Tahalo Uru tolati amutou veia ge vagoilo amutou te la pulolou la mavulahala, amuto kamati ge pou lou te la kilisi. Eala moli isasa umala ge toia maie veia “Taritigi pepeho, eau ge tilimuli moli la masasagala taku te la vovo, la vuhula La Tahalo Uru kama kisi leau la merera usu.” Ouka, etato umala ge gabutatala mai aleiele. Eala moli taritigi amuto ge visuli baololi te la igogolu tomi, ge vipuhi tigi moli te la gilogo te La Tahalo Uru.  
\v 14 La vuhula, la merera te Moses tomi, la masovala isa moli maie veia “Amuto ge gogo tavu moli egiteu e tabarabara mutou mai lou ale amuto gogo rivu lou amutou ele.”  
\v 15 Eala moli mai amuto ge vaigo totolo, amuto ge igo marapa lou la pulolou tamutou ale taritigi ele, amuto mai ale ge sulu rivu lou amutou ele!   
\p
\v 16 Tiele, eau ge tutu tola loua mutou maie: Mai La Kalulu La Marokala ge magiri mamuga te la lagu mutou, amuto kamati ge vulo gele tavu la vulovulo la vovo ale kama kokora.  
\v 17 La vulovulo la vovo ale kama kokorale, me la vulovulo La Kalulu, egira kama visauru, egira isapolo seseleti, egira vaubi bibibi moli. Me oio volale amuto ge matagaga tigi veia la haro usu etato kama tilimuli sesele la gabutatalala tegatou ale taritigi, la vuhula oio moli te la vulovulo la vovo ale kama kokora, eia soloio mahulihuli oilo tegatou.  
\v 18 Eala moli mai La Kalulu La Marokala eia ge mamugame, eme kati ge pou lou te la uluva la merera te Moses.   
\p
\v 19 Eala moli mai amuto ge tilimuli la vulovulo la vovo isahari ale kama kokora, la iruru ge sibitala, eia ge tabuli matagaga te la valalua me hatavivile tomi maie: la iligo la iruru soio te la tavile, la para osaosala, la mata bulakalakala, la gililo,  
\v 20 la lotu tavu la puigolo, la savula, la vikokuela, la vaigigola, la ilo maliki tavu la golu te tabaramu, la igototolola, la vareagila, la vigiriri tatavula, la vipou baala,  
\v 21 la ilo lago la paga te tabaramu, la iliu pauala, me la iligo galolola. Eala moli eau mera taro vagari lou amutou tegiteu la iruru tomi alele. Egiteu ale vagari tavu egiteu la vulovulo alele, egite kama koramulia ge sau tola la pulolou la matagagala te La Tahalo Uru, ouka viruru.   
\p
\v 22 Eala moli la vavua La Kalulu La Marokala ale eia visibitalea te la mahulila tegatou, eia maie: La gilogo, la sagegela, la vipuhi tigila, la tilogo, la mutelela, la vulovulo ale taritigi, la vikara seselela,  
\v 23 la vaigo tigila, la vulo taro la vulovulo la vovo ale kama kokora. Isa kama koramulia veia ge magiri robo egiteu la vulovulo alele!  
\v 24 La vulovulo mutou te la vovo ale kama kokora, mai amuto kama ge sugu taroa soata te la tauvalautu te Iesus, ge poke taroa, amuto kama koramulia ge veia amutou te Kraist, ouka.   
\p
\v 25 La Kalulu La Marokala, eia vimahuli etatou tomi, eala eia taritigi etato ge pou te la uluvala veia eia ge mamuga etatou.  
\v 26 Etato umalati ge pou tavu lou la vulovulo la vareagila, veia ge etato ge karasusuku la valalua me hatavivile veia ge la masasagala tegatou ge tabuli loata te la masasagala tegiteu e tabarabara gatou ele, umalati.   
\c 6  
\s1 Etato ge suli egiteu e tabarabara gatou ale ruru  
\p
\v 1 Amuto tabarabaragu, mai isa tamutou ge boru te la iruru, taritigi veia amutou ale rovi La Kalulu La Marokala oilo te la gabutatalala tamutou, amuto ge vahiliti gogogo loua, la vuhula amuto kama rovia gaisa e Satan ge tovo lalai amutou me amuto tai ge boru.  
\v 2 Taritigi amuto ge vigogo baoli moli le amutou, me oilo vola amuto roromuliti la merera te Kraist soio tamutou.  
\v 3 Mai isa tamutou ele eia vei tataho sesele lou eia, eia visigolo, la vuhula egiteu ale gabutatala mai ele, egiteu la golu bububu.  
\v 4 Mai amuto tomi isasasa ge mata muli la vulovulo mutou lou, me mai eme hilo la vulovulomu isa eia taritigi, tio ale eme ge veipalea. Eme umala ge vei muli la vulovulole tabaramu veia eme ge vikara kukumuala,  
\v 5 la vuhula etato tomi ge bole la tikumu la vibaumulila te la vulovulo gatou lou.   
\p
\v 6 Mai amuto pou te la uluva la vimari te la tahalo isasa, amuto ge suli leia la ilali me la uati, la vuhula eia suli le amutou la merera te Kraist.  
\v 7 Umala amuto ge visigolo lou amutou veia eia koramulia veia etato la tahalo la vovo ge visigolo La Tahalo Uru. Mai etato ge galu la ilali ale kama kokora, la vavuala tai ge kama kokora. Me mai etato ge galu la ilali ale taritigi, la vavuala tai ge taritigi.  
\v 8 Mai eme ge vagari tavu la vulovulo la vovo ale kama kokora, eme ge poga sesele lou la viluala te la kalulumu. Eala moli mai eme ge vagari tavu la vulovulo La Kalulu La Marokala, eme ge poga sesele la mahulila ale sesele, la kaluvula ge ouka.  
\v 9 Eala etato umala ge bare taro la vulovulo ale taritigi, la vuhula mai etato ge vagari tavua, etato ge sau tola lou la mapa la vulovulo gatou ale taritigi ele.  
\v 10 Mai alele eia taritigi veia etato ge pou raragi veia ge suli egiteu e tabarabara gatou ale rovi e Kraist, me egiteu ale logala tai.   
\s1 La tapasi la merera  
\p
\v 11 Male, la tapasi la merera taku, amuto ge laba gele tavua, eau sesele kekesila la limagu, la mata la buk eia ururu.  
\v 12 Egiteu ale vagari veia ge koro la vovo mutou mai la irovilala te la tau Iuda, egite gabutatala rivu lou egiteu, veia egite Iuda ge vei tataho egiteu. Egite veia ge vulo taro mai ele la iligiligi me la vilile ale egiteu la gima ge viligi egiteu ale tilimuli sesele la gauru te Kraist ovola, mai egiteu tomi ale rovia veia la pileho tetala sekela moli oata te la tauvalautu, eia ge vimahuli etatou.  
\v 13 Egite hilovi la kiroro la vovo veia ge gabu tikumua, eala moli la merera te Moses ale usu lou egite kama gabutatalea, egite polo molia. Egite masagea veia amuto usu ge goilo tegiteu, egite ge vauru lou la isa giteu ovola.  
\v 14 Eala moli eau, eau kama ge vei tataho rivu lou eau, eala moli la paga isa moli eau ge vei tataho molia, la tauvalautu te Iesus Kraist, La Uru gatou. La vuhula, ale eau rovi tatahoti la pileho tetala, eau kamati gabutatala la vulovulo la vovo ale kama kokora. Me la vulovulo la vovo tai eia kamati mai ale puliau soio te la iruru.  
\v 15 La kiroro la vovo, ale la golu bulalahu moli. La golu isa sekela moli eia tikumu, la mahulila ale halaba te Kraist.   
\p
\v 16 Amutou ale tilimuli la valolo te Kraist, taritigi La Tahalo Uru ge igo malilo tataho la gabutatalala tamutou, amuto ge gabu la gilogo tetala ale uru, mai tai egiteu la valalua me hatavivile tomi ale tetala sesele.   
\p
\v 17 Me mulimuli te la poke la kekesi taku aleie, eau kama masaga viruru veia la vareagila ge sibitala lou. Amuto umalati ge vailo buruko eau mai ele. Eau viluati, eau vora moliti la igogolu te la valolo te la isale Iesus.  
\v 18 Amutou tabarabaragu, la gilogo te Iesus Kraist, La Uru gatou ge pou te la kalulu mutou tomi isasasa. Eala moli ele.  
\cls Eau e Pol.