\id COL - Nakanai NT [nak] -Papua New Guinea 1983 (DBL 2014) 
\h E KOLOSE 
\toc1 Ale La Merera Te Pol Eia Kekesia Giteu E Kolose 
\toc2 Kolose 
\toc3 Kol 
\mt1 ALE LA MERERA TE POL EIA KEKESIA GITEU E KOLOSE  
\c 1  
\p
\v 1-2 Eiau e Pol, La Tahalo Uru hiloviau veia eau ge la bilalaha te Iesus Kraist. Amila me tabara gatou e Timoti, amila kekesia mutou tomi la valalua me hatavivile te La Tahalo Uru ale oio te la mautu e Kolose. Amutou e tabarabara milua te la isale Iesus Kraist, amuto sau tola tatahoti la merera te La Tahalo Uru. La Tahalo Uru, e Tama gatou, eia ge vibalava le amutou la gilogo tetala, la tia mutou oilo ge malilo tataho.   
\s1 La kilaka la sagegela te Pol  
\p
\v 3 Eau kama maila te la gabutatalala taku soio tamutou, te la kilaka tavu La Tahalo Uru, e Tamale Iesus Kraist La Uru gatou, veia eau ge toi taritigi pepeho soata tetala  
\v 4 ale eau lolotia veia amuto sau tola tomiti la merera te La Uru gatou e Iesus Kraist, me amuto puhi tigiti egiteu la valalua me hatavivile tomi te La Tahalo Uru.  
\v 5 Amuto igo seselea mai ele, la vuhula amuto gabu tikumuti la merera te La Tahalo Uru ale eia ge vibalava amutou te la pulolou la sagegela ale oata tetala. Alele amuto lolotia pala, ale amuto lolo la valolo ale taritigi te la merera te Kraist ale sesele.  
\v 6 Me la merera ale amuto lolotiale, la rerela taliti, eia vavavati soio te la maututula tomi. Igoie, eia mai ale vuati soio tegiteu la valalua me hatavivile tomi, maiti ale pala eia vua oio tamutou, amuto lolo vutitia me amuto matagagati te la masova la gilogo te La Tahalo Uru ele.  
\v 7 Me e Papras, ale valolo matagaga amutou, eia la tahalo isa taritigi pepeho, eia igogolu tataho. Eia oioti tamutou ele, eia abi la muligu te la igogolu te Kraist soio tamutou, ale eau kama koramulia ge goiole.  
\v 8 Eia gilemulitia miteu ale amuto vitau me tabara tataho te la matagaga te La Kalulu La Marokala.   
\p
\v 9 Mai alele, eau kamati maila te la kilaka ale eau loloti la veipalala tamutou ale taritigi ele. Eau kaka La Tahalo Uru veia eia ge vivolu la gabutatalala tamutou veia amuto ge rovi tataho la masasagala tetala. Mai alele amuto ge volu sesele la mari me la matagaga tomi te La Kalulu La Tahalo Uru.  
\v 10 Oio volale amuto ge koramulia ge pou tataho mai la masasagala te La Tahalo Uru, amuto ge visagege La Uru mutou mai ele. La vulovulo tomi ale taritigi ge vua pepeho oio tamutou, me amuto ge sagaiti tataho te la mari te La Tahalo Uru.  
\v 11 La vagagarila te La Tahalo Uru ge vivagari sesele tai amutou veia ale e Satan ge tovo lalai amutou, amuto ge magiri vagari moli, la vuhula la vagagarila te La Uru eia kama bisi, eia koramuli e Satan.  
\v 12 Amuto ge vei tataho e Tama gatou te la sagegela uru, la vuhula eia vimarokati amutou, me eia koramulia mai ele veia amuto ge tahola sesele la vibalavala ale uru eia tau raragitia veia ge abia gatou la valalua me hatavivile tetala ale pouti te la matagaga.  
\v 13 Etatou la valalua me hatavivile tetala sesele, la vuhula eia lapu rivuti etatou taro la maligoma ale pala pigi robo etatou, eia vagoiloti etatou te la pulolou la matagagala te Latula, la riau tetala.  
\v 14 E Iesus ele, eia lube taroti etatou te la kilisi te Satan, ale eia vimavulaha taroti letatou la iruru tegatou.   
\s1 E Kraist sekela moli uru  
\p
\v 15 E Kraist, eia mai La Tahalo Uru lou ele, ale etato hiloa, etato rovia e Tamala mai moli ele, ale etato la tahalo la vovo kama koramulia ge hiloa. E Kraist, eia uru tai te la papaga tomi moli.  
\v 16 Ale pala La Tahalo Uru vipou la magasa me la mori me la papaga tomi, e Latula tai oio igogolu vikapopo leia. Mai te la vagagarila te Kraist ele, la golugolu tomi sibitala ale etato hiloa. Egiteu la uru tai ale pou la mulugaluga oata te la mori, mai egiteu la angelo, egite sibitala te la vagagarila te Kraist moli. La Tahalo Uru vipou egiteu la golugolu tomi veia e Kraist ge tahola egiteu.  
\v 17 La Tahalo Uru souka vipou la mori me la magasa, e Kraist oioti. Eia la vuhu la golugolu tomi.  
\v 18 La valalua me hatavivile te la lotu tetala, egiteu mai la limala, la vahala me la matala. Me e Kraist, eia la gama giteu. Eia la vuhu la lotu sesele, eia vimahulia. Eia la siloko la mahuli rivula, pala muga tetala isa kama mahuli rivu lou. Me mai ele, La Tahalo Uru vipoua veia eia ge la mulugaluga te la golugolu tomi.  
\v 19 La vuhula La Tahalo Uru masagea veia e Latula ge mai sesele eia, eia ge abi la gabutatalala te Tamala tomi me la vulovulola tomi ale maroka.  
\v 20 Eia veia la pileho te Latula ge barautu taro la maligoma, veia la golugolu tomi, me egiteu tomi tai ale omai te la maututula, me egiteu ale oata tai te la mori, egiteu me La Tahalo Uru kati ge vipou baa te la vulovulo la iruru. Me eia igo seselea mai ele, e Latula pehoti oata te la tauvalautu, la kasosola pagegeleti, me te la gilogo tetala uru ele, etato kati vaubi soio te La Tahalo Uru te la vulovulo gatou ale kama kokora.   
\p
\v 21 Pala, amuto pou malau taro La Tahalo Uru, amuto pou mai la gima tetala, la vulovulo mutou eia kama kokora.  
\v 22 Eala moli igoie, ale e Latula peho roboti amutou, la vovola ligiti le amutou, amuto goilo seseleti te La Tahalo Uru. Me eia igoa mai ele veia amuto ge magiri te la lagula, la vigagiala ge ouka, la vuhula amuto marokati.  
\v 23 Eala moli taritigi amuto ge magiri vagari moli, ge gabu tikumu sekela moli la valolo te Kraist ale amuto loloa pala veia eia sesele, veia eia ge vimahuli amutou. Me la merera te Kraist alele, eia vavavati soio te la maututula tomi, me eau e Pol, eau la bilalaha te la merera tomi alele.   
\s1 La valolo soio te la valalua la maligoma eia vagari  
\p
\v 24 Eau sagege moli ale eau gabu la iligiligi oio te la igogolu la valolo te la merera te Iesus. La vuhula la iligiligi soio tamutou la valalua me hatavivile te la lotu tetala, eia visauru me la iligiligi te Kraist soio tamutou me la iligiligi taku tai ale eau gabua. Eala moli la iligiligi taku, eia souka koramuli la tabarila te La Tahalo Uru somai taku.  
\v 25 La Tahalo Uru bahatiau veia eau ge la bilalaha tamutou la valalua me hatavivile te la lotu tetala, ale eia sugu tarotiagu la igogolu la valolo soio tamutou la valalua la maligoma veia amuto ge lolo tatahoa.  
\v 26 Me la merera tetala, alaurati kara igoie eia tabuli kokovu, eala moli igoie La Tahalo Uru veipalatia gatou la valalua me hatavivile tetala.  
\v 27 Me ale la masasagala tetala mai alele, veia la valalua la maligoma tai ge sau tola la vibalavala tetala ale uru, eia tabuli kokovu oilo te la merera tetala. Me la merera ale tabuli kokovu ele, la masovala eia maie veia e Kraist mou oilo taume, ale moli ele eme ge sau tola la mahulila ale sesele, la kaluvula ge ouka.   
\p
\v 28 Me mai moli ele amite valolo la valalua me hatavivile tomi te la merera te Kraist ele. Amite karasusuku amutou, amite vimari tataho tai amutou la valalua la maligoma tomi ele, veia amuto ge sau tola la mari ale uru sesele mai alele, me oilo vola amuto tomi ge mai ale sagaiti te Kraist.  
\v 29 Me la igogolu aleie, eau vavala pepeho ovola veia amuto tomi ge matagaga. Eau igogolu vagari mai ele, eala moli eau kama kebo, la vuhula e Kraist eia abitiagu la vagagarila tetala ale uru, amila igogolu vikapopo.   
\c 2  
\p
\v 1 Eau masagea veia amuto ge matagaga ale eau igogolu vagari veia la merera te Kraist eia ge mai ale lako tola sesele te la gabutatalala tamutou me tegiteu la valalua me hatavivile e Laodisea tai. Mai alele amutou la valalua me hatavivile tomi ale soukama roviau, amuto ge matagaga tai ale eau kebo.  
\v 2 Eau suli amutou mai ele veia ge vivagari amutou, veia amuto ge vipuhi tigi moli, ge vigogo baoli amutou, mai ale amuto igigoa. Eau veia ge viteteli tai amutou veia amuto ge rovi sesele La Tahalo Uru, me oilo vola amuto ge balava sesele. Mai alele amuto ge rovi la merera tetala ale eia pala tabuli kokovu, ale eia baha e Kraist somai tegatou. Me e Kraist moli ele, eia ge kope la mari me la merera te La Tahalo Uru ale sesele eia pala tabuli kokovu.  
\v 3 La mari me la merera te La Tahalo Uru ale sesele tomi ele, e Kraist moli ge abia mutou, amuto ge sau tolea mai la vuliti ale ge suli la pulolou tamutou.  
\v 4 Me eau viteteli amutou mai ele, la vuhula eau kama masagea egiteu la valalua la visigologolola ge ali lou la ilo mutou la merera ale isapolo, amuto loloa eia malama te la gavusa mutou.  
\v 5 Sesele, eau kama goio tamutou, eala moli oio te la gabutatalala taku eau mai ale pou tomi le amutou ele, me eau lege sisigi ale eau hilotia veia amuto pou tataho, amuto magiri vagari ale amuto sau tola la merera te Kraist, amuto kama igo papai.   
\s1 La mahulila ale vikapopo le Kraist eia koramuli sesele etatou  
\p
\v 6 Ale amuto pala sau tola e Kraist Iesus mai La Uru mutou sesele, alele amuto ge mahuli vikapopo leia.  
\v 7 La ua mutou ge gotalo sesele te la magasa ale taritigi, mai te Kraist ele. Taritigi e Kraist ge la vuhu mutou tomi isasasa. Mai alele la merera tetala ale e Papras tovo le amutou ovola, eia ge mai ale sau tola amutou, la tia mutou oilo ge volu sesele la vaisalela soio te Kraist.   
\p
\v 8 Eala moli eia taritigi veia amuto ge vibaumuli tigi, la vuhula la valalua la visigologolola soukama vagoilo lou amutou te la kilisi veia ge kisi tola le amutou la mari papaila tegiteu mai la merera te la vovo moli, la mari te la magasa, kama la merera te Kraist.   
\p
\v 9 Oilo te Kraist, La Tahalo Uru eia sibitala mai la tahalo. La vulovulo La Tahalo Uru me la gabutatalala tetala, eia oio tomiti te Kraist ele.  
\v 10 Me amutou ale tetalati, eia abi tomitia mutou la mahulila ale sesele. E Kraist, eia uru oata tegiteu la angelo tomi.   
\p
\v 11 Ale amuto te Kraist, la irovilala tetala eia oioti tamutou mai moli la irovilala tegiteu e Iuda pala, ale egiteu koro la vovo giteu veia egiteu te La Tahalo Uru. Eala moli la irovilala te Kraist, la tahalo la vovo kama igoa. E Kraist moli igoa ale eia kai taroti le amutou la vulovulo la vovo ale kama kokora.  
\v 12 Amutou ale te Kraist, ale egite vuhi le amutou te la isala, la vulovulo mutou ale kama kokora mai ale tabuli vikapopo le Kraist otalo te la lulu la pileho. Ale amuto vuhi kaluvuti, mai e Kraist hiliti taro la pileho, amuto tai hiliti taroti la vulovulo ale kama kokora. La vuhula amuto gabu tikumuti la vagagarila te La Tahalo Uru veia eia igo seseletia pala mai ele, eia vimahuli rivu e Iesus taro la pileho.  
\v 13 Pala, amuto pou mai ale pehoti, la vuhula amutou la tahalo la iruru, me amuto tai kama abi la irovilala oio te la vovo mutou veia La Tahalo Uru hilovi amutou mai egiteu e Iuda. Eala moli La Tahalo Uru vimahuliti amutou, ale eia vimavulaha taroti letatou la iruru tomi tegatou.  
\v 14 La merera te ururu eia baraututia veia eia kati ge kisi etatou. La kekesi te Moses tomi ale tomu sasasae la vulovulo gatou, La Tahalo Uru eia tautia otalo te la uluva la tauvalautu te Iesus.  
\v 15 Me te la pileho te Iesus te la tauvalautu, La Tahalo Uru eia bolehoho egiteu ale te Satan eia soa kuru sesele egiteu veia la valalua me hatavivile tomi ge rovia veia egite kaluvuti.   
\s1 Umala roromulimuli la merera la visigologolola  
\p
\v 16 E Kraist, eia baraututi la merera te ururu. Eala eia kama koramulia veia amuto ge roromuli egiteu ale tou la ilali isahari veia eia la lelea mutou, umala alalia, veia la vulovulo alele ge vimahuli amutou. Umala tai amuto ge roromuli egiteu ale vauru bububu la papaga isahari mai la tilogo te la haro tabu, uka egite gabu tikumu la taio ale halaba eia rere tala, veia ge la golu bulalahu mai alele ge vimahuli amutou mai amuto ge lotu tavua, ouka gologolo. Umala roromulimuli la merera tegiteu.  
\v 17 Egiteu la paga bulalahu mai alele, egite kama matagaga, eala moli etato rovitia veia la matagaga ale sesele, eia e Kraist moli sekela, kama la merera la visigologolola.   
\p
\v 18 Egite isahari oio tamutou ele gabu tikumu pasi egiteu la angelo, egite vilelele egiteu, veia isahari uru, isahari kama uru, egite lotu tatavu egiteu mai aleie. Egite ge veia mutou mago “Mai amuto kama ge roromuli la merera tamiteu, amuto kama ge sau tola la vibalavala te La Tahalo Uru.” Alele egite visigolo amutou, umala lololo egiteu. Egite pakakasa te la vulovulo giteu isahari, mai la peremula, veia egiteu la tahalo sesele. Umala lololo egiteu. Egite vitikumu lou la merera tegiteu la hililo tegiteu veia La Tahalo Uru visibitalea tavu egiteu, eala moli umala lololo egiteu. Egite pakakasa moli, egite tilimuliti la vulovulo la vovo ale kama kokora,  
\v 19 egite kati sau tola e Kraist. E Kraist, eia la obu la lotu, eala moli egite mai ale kusi sekelati. Eala moli la obula eia sau tola la halala tomi, eia vimahulia, eia tubu tataho mai la masasagala te La Tahalo Uru sesele.   
\s1 Etato mai ale peho vikapopoti me Kraist  
\p
\v 20 Amuto mai ale peho tomiti le Kraist, la vulovulo la vovo ale kama kokora eia kati kisi tola amutou. Tio mai ge mai ele, igo mave amuto gotigu rivuti lou veia ge gabu tikumu la merera tegiteu ale vei mago  
\v 21 “Umala alali la pagale, umala liliu la pagale, umala tai ge pilau la papaga ale mamaie!”  
\v 22 La papaga tomi alele ge kokovu lou. Me la merera tomi ovola, eia la vimari me la magiri robola te la vovo moli.  
\v 23 Sesele, etato hiloa, eia mata mai la paga ale sesele, la merera alele. La vuhula mai egite ge igoa, egite ge igoa me la tilogo, ge vibisi tai egiteu, ge peremu galolo tai mai ele. Eala moli egite vagari gologolo moli, kara ale la gabutatalala la iruru ge sibitala ge tovo lalai egiteu, tio egite boru moliti.   
\c 3  
\s1 Etato mahuli rivu vikapopoti me Kraist  
\p
\v 1 Ale La Tahalo Uru vimahuli seseleti amutou vikapopo me Kraist, taritigi amuto ge gabutatala vagari moli la vulovulo te la mautu la marokala, ale e Kraist eia goatati ovola, eia pouti la pulolou la uru oio te la bali La Tahalo Uru te la galela e gata.  
\v 2 Gabutatala sekela moli la tilalau tetala oata, kama ale omai te la magasa,  
\v 3 la vuhula amuto mai ale pehoti, amuto kati koramulia ge tilimuli la vulovulo ale omai. Me La Tahalo Uru, eia sigiroboti amutou veia amuto ge mahuli sesele oata tetala vikapopo me Kraist.  
\v 4 E Kraist ele, eia la vuhu la mahulila tamutou. Eia ge beu rivu loua loata, eia ge puli amutou soio tetala, amuto ge pou tomi leia te la matagaga tetala ale uru.   
\s1 Etato mai ale vulo halaba seseleti  
\p
\v 5 Eia taritigi amuto ge piligi taro la vulovulo la vovo ale kama kokora, eia so mahulihuli oilo tamutou, la vuhula amuto mulimuli ge goata ge pou tomi le Kraist te la matagaga. Egite la vulovulo la vovo ale kama kokorale, egiteu maie: la para osaosala, la mata bulakalakala, me la ilisu tavu la golu te tabaramu tai. La vuhula mai eme ge pou tegiteu la mata la iruru alele, eme mai ale lotu tavutia la paga ale eme isu tavua.  
\v 6 Egiteu tomi la vulovulo alele ge vahiliti la igototolola te La Tahalo Uru.  
\v 7 Ale pala amuto pou te la maligoma, amuto tilimuli bulalahu la vulovulo tomi alele, la vuhula la valalua me hatavivile tomi igigoa.  
\v 8 Eala moli amuto ge piligi taro la vulovulo ale kama kokora, mai la mata la iruru tomi mai la igototolola, la hate mamasila, la iligo marapala, la vikara kukumula, me la gililo tai.  
\v 9 Umala tai veia amuto ge visigolo egiteu e tabarabara mutou. Ale amuto peho taro la vulovulo mutou ale pala, amuto mai ale kai taroti egiteu la iruru tomi ele.  
\v 10 Amuto mai ale kai halabati la vulovulo ale taritigi, eme la tahalo me la tavile ale halaba seseleti, La Tahalo Uru puitime mai lou eia, veia eme ge rovi sesele eia.  
\v 11 Mai alele eia kama koramulia veia amuto ge vilelele amutou veia isa eia la tau Grik, eia la tahalo la mari mai ele, veia isa lou ge veia eia la tau Iuda, La Tahalo Uru hilovi seselea. Me eia kama koramuli taia veia isa ge toia mai ele veia isa egite koroti la vovola, me isa egite kama koro la vovola, veia isa lou eia la tau rorobo, me isa eia la tahalo la maligoma, veia ge veia mai ele veia isa eia la bilalaha moli, me isa eia uru. Etato umalati ge vilelele etatou mai ele, la vuhula e Kraist eia isa moli sekela, eia la vuhu la golugolu tomi, la papaga tomi eia sau tola tomi moli egiteu.   
\s1 La vulovulo la gilogo  
\p
\v 12 Amutou la valalua me hatavivile te La Tahalo Uru. Eia gogo amutou, eia hilovi amutou veia amutou tetala. Eala, eia taritigi amuto ge soveia. Amuto ge kai la vulovulo la marokala maie:  
\li1 Eme ge suli egiteu e tabarabaramu.  
\li1 Eme ge vibaumuli tataho soio tegiteu  
\li1 la valalua me hatavivile.  
\li1 Eme ge togo tai egiteu.  
\li1 Eme ge vipuhi tigi egiteu e tabarabaramu tomi.  
\li1 Eme ge kimoso taro la iruru  
\li1 ale egite igoa soio taume.   
\p
\v 13 Amuto ge vibaumuli baoli tataho amutou. Mai isa eia igoti la iruru soio taume, eme ge vimavulaha taro leia la iruru tetalale. Amuto ge igo sesele molia mai ele, mai lou e Iesus eia vimavulaha eme te la iruru taume.  
\v 14 Eala moli la vulovulo isa moli eia uru, eia ge sau tola egiteu la vulovulo tomi ale taritigi ele, mai la gilogo moli. La vuhula, la gilogo, eia ge vipuru tataho la vulovulo la marokala tomi ele.   
\p
\v 15 Mai eme ge gabua veia la tiamu oilo eia malilo tataho te la gilogo te Kraist, eala eme ge rovia veia la vulovulomu eia matata. La vuhula La Tahalo Uru eia tola vikapopoti amutou veia amuto ge vipuhi tigi, la tia mutou tomi ge malilo tataho. Me taritigi pepeho tai veia amuto ge pou tavu moli la vaisalela soata te La Tahalo Uru.  
\v 16 La merera la valolo te Kraist ge mahuli oilo te la tia mutou, amuto ge sau tolea mai la vuliti. Amuto ge vimari baololi le amutou la mari te Kraist ale tikumu, ge vitovo baololi tai le amutou mai ele la merera tetala ale sesele. Taritigi pepeho tai veia amuto ge bau bibibi la bilalau la lotu, ge vaisale La Tahalo Uru ovola, la sagegela uru ge oio te la tia mutou mai ele.  
\v 17 La igogolu tomi ale amuto igoa, taritigi amuto ge igo molia te la vagagarila te Iesus, La Uru gatou, me oio moli ovola amuto ge toi taritigi pepeho soata te La Tahalo Uru, e Tama gatou.   
\s1 La pulolou tegatou e tau me latatu  
\p
\v 18 Amutou e hatavivile, taritigi amuto ge roromulimuli egiteu e hararua mutou, ale la tabarila te Kraist soio tamutou mai ele.   
\p
\v 19 Me amutou la valalua, taritigi amuto ge vibaumuli tataho egiteu e ruturutu mutou, umala amuto ge igo tototolo egiteu.   
\p
\v 20 Amutou e gulikiliki, taritigi amuto ge roromulimuli egiteu e tatama mutou, e tatila mutou te la merera tomi ale egite tovo amutou ovola, la vuhula La Uru ge hiloa veia amuto roromuli tatataho, eia ge lege sisigi le amutou.   
\p
\v 21 Eala moli amutou la valalua me hatavivile, umala amuto ge mera kahararea giteu a latatu mutou, egite soukama ge ilo buruko.   
\s1 Amuto umala mata tototoku te la bilaha  
\p
\v 22 Taritigi amuto ge roromuli egiteu ale babaha amutou. Taritigi amuto ge roromuli egiteu te la papaga tomi ale egite babaha amutou ovola, amuto umala ge tau moli la marasala veia ge tuga gologolo moli, veia egite ge hilome veia eme roromuli sesele egiteu, egite ge masagame mai ele. Eala moli eia ge taritigi pepeho mai amuto ge rutu sesele, la vuhula la vulovulo la iroromulila eia veipala la tilogo soio te Kraist.  
\v 23 Amuto ge igogolu tataho mai e Kraist moli bahame, kama la tahalo la vovo,  
\v 24 la vuhula e Kraist ge vibalava amutou mulimuli mai la tilau tetala soio te la valalua me hatavivile tetala. La Uru mutou eia e Kraist moli, kama la tahalo la vovo isasa.  
\v 25 Mai isa ge igo la iruru, La Tahalo Uru ge kolia soio tetala, kama ge gabu tikumu isasa veia eia uru, veia eia umala ge viligia, ouka.   
\c 4  
\p
\v 1 Amutou e ururu ge baha titigi egiteu la bilalaha tamutou. Amuto ge baumuli tataho egiteu, la vuhula La Uru mutou tomi eia oio, eia pou oata te la ilo la lage, eia hililo amutou.   
\s1 La vulovulo la kilaka  
\p
\v 2 Amuto ge pou tavu sesele la kilaka, amuto ge mata kaseka, ge kaka moli me la sagegela te la tia mutou.  
\v 3 Me amuto ge kaka tai La Tahalo Uru veia eia ge abia miteu la baa ale koramulia veia amite ge valolo tataho egiteu la valalua me hatavivile ale omai te la merera te Kraist ale pala tabuli kokovu. La merera moli aleie, eau palati la valolola, me eala egite vagoiloau te la luma la kilisi.  
\v 4 Amuto ge kaka veia La Tahalo Uru ge suliau, la valolo taku ge matagaga tataho, la vuhula ale la tabarila taku.   
\p
\v 5 Amuto ge vibaumuli la vulovulo mutou soio tegiteu la valalua me hatavivile ale kama goilo te Kraist. Amuto ge raragi tataho veia ge vahilo legiteu la gauru te Kraist.  
\v 6 La merera tamutou tavu egiteu ge mai ale malama, amuto ge vikara tataho, me mai egite ge tahi amutou la tilahi te la gauru te Kraist, amuto ge raragi moliti mai ele veia ge koli seselea soio tegiteu tomi isasasa.   
\s1 La tapasi la merera  
\p
\v 7 E tabara gatou sesele, e Tikikas, eia ge gilemulia mutou te la pulolou taku omai. Eia la tahalo la valolo sesele, amila vaigogolu kapopo te la bilaha te La Uru.  
\v 8 Eala eau bahea soio tamutou ele veia eia ge gilemulia mutou te la pulolou taku omai, eia ge vivagari amutou ovola.  
\v 9 Eau baha egirua me Onesimas, eia tai e tabara gatou sesele, eia isa tamutou ele, eia la tahalo isa taritigi pepeho. Egira me Tikikas ele ge gilemuli tatahoa mutou la pulolou taku.   
\p
\v 10 E Aristakas, ale pou tomi leau te la luma la kilisi, eia veia mutou la haro sesele soio tamutou, egira me Mark ale e tamisale Banabas. Me e Mark ele, amuto lolotia la merera taku pala veia mai eia ge guvi oio tamutou ele, amuto ge rara tavu seselea, ge vararapua.  
\v 11 Me e tabara gatou uru, e Iesus Iastas, eia tai toia mutou la haro. Me tegiteu e Iuda tomi ale goiloti te Kraist, egiteu taho tolu moli ele suliau te la igogolu la valolo te la pulolou la matagagala te La Tahalo Uru ale halaba. E Aristakas, e Mark, e Iastas, egite taho tolu moli ele suli pepehoau te la igogolu taku ele.  
\v 12 Me e Papras tai veia mutou la haro. Eia isasa tai tamiteu ale omai, la bilalaha sesele te Kraist Iesus. Eia sau tola sesele le amutou la kilaka tetala te la haroharo tomi veia La Tahalo Uru ge vivagari amutou, amuto ge rovi tataho la masasagala tetala, amuto ge sagaiti sesele ale amuto ge roromuli tomi moli la merera tetalale.  
\v 13 Eau rovitia, la tahalo ale e Papras ele, eia igogolu vagari veia amutou la valalua me hatavivile e Kolose, la valalua me hatavivile e Laodisea, me la valalua me hatavivile e Hirapolis tai, veia amuto tomi ele ge matagaga tataho te la merera te Kraist, me eau veipalea mutou mai ele, amuto ge rovia.  
\v 14 E maura e Luk tai, e dokta taku ale taritigi, egira me Dimas veia mutou la haro.   
\p
\v 15 Amuto ge laharoa giteu e tabarabaragu oio la mautu e Laodisea, amuto ge vei taia la tavile uru e Nimpa, me egiteu la valalua me hatavivile ale lotu oio te la luma tetala, veia eau e Pol toi la haro sesele soio tegiteu.   
\p
\v 16 Amuto ge gigi kaluvu la merera taku ele, amuto ge vaharia soio tegiteu la valalua me hatavivile te la lotu oio la mautu uru e Laodisea, egite ge gigi taia, me amuto ge gigi tai la leta ale eau kekesia giteu e Laodiseale.   
\p
\v 17 Amuto ge vei taiale Akipas mago “Eme ge vagari, eme ge vikaluvu sesele la igogolu ale La Tahalo Uru tabaratiamu.”   
\p
\v 18 Te la tapasi la merera tomi maie, eau e Pol sau tola la pen, eau kekesia mutou te la limagu sesele. Eau toia mutou la kavikoki, me la haro, me la maulavi, me la logo soio tamutou tomi. Amuto ge gabu tikumua ale eau so popou te la luma la kilisi omaie!  
\p Taritigi la gilogo te La Tahalo Uru eia ge pou tamutou tomi. Eala moli ele, kaluvuti.  
\cls Eau e Pol.