\id 2TI - Nakanai NT [nak] -Papua New Guinea 1983 (DBL 2014) \h 2 TIMOTI \toc1 Ale La Ilua La Merera Te Pol Eia Kekesiale Timoti \toc2 2 Timoti \toc3 2 Tim \mt1 ALE LA ILUA LA MERERA TE POL EIA KEKESIALE TIMOTI \c 1 \p \v 1-2 Tavu e Timoti, e latugu sesele te la isale Iesus, \p Eiau e Pol, eau kekesiamu, La Tahalo Uru visati leau la igogolu la valolo te Kraist Iesus, eia baha eau veia eau ge valolo la valalua me hatavivile tomi te la mahulila ale sesele, etato sau tolea te la isale Kraist. \p Taritigi La Tahalo Uru, egira me Latula e Iesus Kraist, egira ge vibalava leme la gilogo ale uru, eme ge pou la sagegela, la tiamu oilo ge malilo tataho. \s1 Etato umala ge mahela la valolo te Kraist \p \v 3 Eau ge pou te la kilaka, eau ge vei tataho sesele La Tahalo Uru te la vulovulomu ale taritigi pepeho ele, Timoti. La merera tomi te La Tahalo Uru, eau tilimuli tomi molia mai tai egiteu e tutubugu ale pala kara igoie. Eau kama gabutatala isa la paga oio vola, eau tilimuli tomi moli la merera tetala. \v 4 Eau so gabutatala ale etala vahele taro pala, la masalimu puruti, me alele eau masaga pepehoa veia etala ge vipou tomi lou, la tiagu ge volu sesele la sagegela. \v 5 Eau so gabutatala tai ale eme la tahalo te Kraist sesele, mai e tubumu pala e Lois, egira me tilamu e Unis, egira tomi la tavile te Kraist sesele, me eau rovia eme tai soioge sau tola vagari la merera tetala mai tai lou e tilamu me tubumu ele. \v 6 Eala eau vahiliti lou la gabutatalala taume veia eme ge mai ale pusu karere lou La Kalulu La Marokala ale La Tahalo Uru abitiamu pala te la haro ale eau sau te la varumu, eau kaka robome, eia visivo robo leme la vagagarila tetalale. \v 7 Eau masaga veia eme ge magiri vagari mai ele, la vuhula oilo te la visuli te La Kalulu La Marokala, La Tahalo Uru kama masagea veia etato ge rovi la tilaga, ouka. Eia masaga molia veia etato ge vagari, ge vipuhi tigi me egiteu la valalua tomi, ge baumuli tataho tai la vulovulo gatou tomi veia etato ge la tahalo me la tavile tetala sesele. \p \v 8 Mai ele, umala eme ge mahela veia eme kama ge veipala la isale Kraist. Eme ge umala tai ge mahela leau, ale eau pou te la kilisi, la vuhula la kilisi taku la kilisi moli te la isala. Eala moli eme ge suli tai eau te la igogolu la valolo te la isala, me eme ge gabu tai la iligiligi, eala moli La Tahalo Uru ge suli leme la vagagarila. \v 9 Eia vimahuli etatou, eia visati letatou veia etato ge tetala sesele. Me alele eia kama igoa mai la kiloli la vulovulo gatou ale taritigi, ouka, la vuhula etatou tomi la tahalo la iruru. Eala moli eia gogo etatou, eia vagoilo etatou mai e latatula sesele, te la gabutatalala moli tetala ale eia veia ge igoa. La gilogo tetala ale uru ele, eia tabuli raragi moli oio te la gabutatalala tetala pala mugati te la siloko la maututula, \v 10 me igoie eia tabuli matagagati ale e Kraist Iesus, la tahalo la vimahuli tegatou, eia barautu taro la vagagari la lulu la pileho, eia visibitala la valolo tetala ale taritigi, eia vimahuli etatou. \v 11 Me la valolo tetala moli ele, La Tahalo Uru eia visati leau ovola veia eau ge veipalea, mai la igogolugolu te la valolo me la vimari. \v 12 Eala la valalua la gima viligiau. Eala moli eau kama mahela, la vuhula eau matagagati veia La Tahalo La Vimahuli taku eia ge sigiroboau, eau ge taritigi moli kara la haro ale eia ge beu rivu loua loata. \p \v 13 Timoti, eme ge sau tola vagari la merera tomi ale eau abitiamu, umala eme ge gabu taroa, eme ge tilimuli tomia mai ale eau veitiamu ovola, mai te la tautaulailo me la gilogo ale sesele eme sau tolea oio te Kraist Iesus. \v 14 Eme ge sau tola la merera la mahuli aleie te la vagagari La Kalulu La Marokala ale mahuli oilo taume. \p \v 15-16 Eme rovia la valalua usu oio la gale Esia egite sigolo taro eau, egite kama masageau, e Pigelas me Hemogenis egira taho lua tegite ale. Egite tomi alele hele taroau, eala moli e Onesiporas me latatula puhi tigi eau, te la haro usu e Onesiporas toto obuau. Taritigi pepeho veia La Tahalo Uru ge vibalava seselea, la vuhula e Onesiporas kama mahela leau te la pulolou la kilisi taku. \v 17-18 Te la haro ale e Onesiporas guvi oio e Rom, eia paa muli vagariau kara eia sivutiau. Eme rovi tai la vulovulole Onesiporas ale taritigi eia igoagu oio Epesas. La Tahalo Uru moli ge koliale Onesiporas ele la vibalavala ale uru te la haro ale La Uru ge beu rivua loata. \c 2 \s1 La tahalo la vaubila te Kraist \p \v 1 Latugu, eme ge magiri vagari te la gilogo te Kraist Iesus, \v 2 me la merera tomi ale eme lolotia omai taku kabili te la mata giteu la valalua me hatavivile usu, eme ge totoli poloa soio tegiteu la valalua ale magiri vagari te la tautaulailo tegite te Kraist Iesus, mulimuli egite ge vimari la valalua me hatavivile isahari lou oio vola. \v 3 Eme ge bole tai la iligiligi mai la tahalo la vaubila te Kraist Iesus ale taritigi sesele, mai moli ale eau igotiao. \v 4 La tahalo ale magiri sesele te la vaubila, eia kamati ge tilimulimuli la vulovulo la valalua bulalahu te la maututula, ouka, eia masaga molia veia ge visagege moli la uru tetala ale bahea soio te la vaubila. \v 5 La tahalo ale hari te la vipepepela eia kama ge abi la vibalavala mai eia kama ge tilimuli la gauru te la hirari. Tio me mai tai ele, mai eme ge tilimuli sesele la gauru la igogolu te La Uru, mulimuli La Uru ge vibalavame. \v 6 Eia matata moli veia la tahalo ale igogolu vagari te la mahuma tetala, eia ge ali pala muga la ilali ale sibitala te la igogolu te la limala. \v 7 Mai eme ge gabutatala muli la masova la vikarara la tilovo ale itolu ale eau veitiamu, La Uru ge vimatagaga la gabutatalala taume te la merera tetala. \p \v 8 Te la gabutatalala taume eme ge sau tola la valolo ale taritigi te Iesus Kraist, ale ale eau valololola, eia maie: Eia sibitala te la hilile Devit, eia igogolu kabili tegatou. La igogolu tetala goio kaluvu, egite la valalua la gima bilia, eala moli eia mahuli rivu lou taro la pileho. \v 9 Te la valolo ale taritigi ele, egite la valalua ale kama kokora pigi eau soilo la luma la kilisi, egite kisi tai la limagu me la vahagu la sen mai la tahalo la pakalila, eala moli la merera tomi te La Tahalo Uru egite kama kisi tolea, ouka. \v 10 Eau kama taga la kilisi tegiteu aleie, ouka, la vuhula eau masagea veia egite tomi ale La Tahalo Uru hiloviti egiteu veia egite ge tetala, egite tomi ge sau tola la mahulila me la vibalavala oio te Kraist Iesus. \p \v 11 La merera isa eau ge veia mutou ovola, eia sesele viruru: \li1 Mai etato vipeho tomiti le Kraist \li1 te la mahuli te la vovo gatou, \li1 etato ge mahuli tomi tai leia; \li1 \v 12 Mai etato ge magiri vagari \li1 te la tovolalaila tomi, \li1 tio etato ge vipou tomi leia \li1 te la pulolou la mulugalugala tetala; \li1 Eala moli mai etato ge veia etato kama rovi e Kraist, \li1 eia tai ge tahi taro etatou; \li1 \v 13 Te la haro usu etato ge boru \li1 te la tautaulailo tegatou, \li1 eala moli La Uru kama koramulia \li1 veia eia ge sigolo taro etatou, ouka gologolo, \li1 la vuhula La Uru eia kama la tahalo la visigologolola, \li1 eia kama koramulia veia ge tahi taro lou \li1 la merera tetala ale eia veitia gatou ovola. \s1 La tahalo la igogolu sesele \p \v 14 Eme ge viteteli la valalua me hatavivile taume te la isa La Uru, veia umala egite ge vaigo mulimuli la merera bulalahula ale kama ge suli egiteu isasa. La vulolo ale maie, eia ge igo gegeru la valalua ale tiloti ovola. \v 15 Eme ge mai la tahalo ale kama mahela la igogolu tetala. Eme ge sugu taro eme soio te La Tahalo Uru, eia ge hilome, eia ge vei tataho seseleme, la vuhula eme la tahalo la igogolu tetala sesele. Eme kama ge mahela, eme ge rovi tigi la ilube la masova la merera tetala ale sesele soio te la valalua me hatavivile. \v 16 Eme ge magiri gale taro la merera bulalahula te la vulovulo la maututula, la merera aleie eia vipou baa la valalua me hatavivile taro La Tahalo Uru. \v 17 La merera bulalahula ale kama taritigi ele, eia mai la kakali ale mavulu, eia kama kaluvu harari, eia ge igo gegeru la vovo gatou tomi. Egira la tahalo ilua ale igigo la vulovulo aleie, egira la isa girua e Himenais me Piletas. \v 18 Egira aleie kamati tilimulimuli la gauru ale sesele te La Uru, egira valolo veia la kalulu giteu ale pehoti, ulaitia, egite hiliti rivuti mai e Iesus Kraist, veia la mahuli rivula te la tapasi la maututula ge oukati. La visigolola tegirale, eia viboruti la tautaulailo tegiteu la valalua me hatavivile isahari. \v 19 Eala moli la merera te La Tahalo Uru eia magiri mai la tori, me oio te la tori ale, la kekesi ilua tabuli maie: “La Uru rovi tomi egiteu ale tetala” me “La tahalo uka la tavile ale veia eia te La Uru, taritigi eia umalati ge igigo la vulovulo ale kama taritigi.” \p \v 20 Eau ge veiamu la vikarara la tilovo isa maie: Oilo te la luma te la tahalo la vuliti, la golugolu ovola usu. Etato kama ge hilo moli la plet, la kap me la kela bulalahu moli ale la mapa giteu kama uru, etato ge hilo tai la tuali me la vuliti tai oio te la lumale, la vuhula eia la luma te la tahalo la vuliti. Tio la golugolu ale isahari, egite loto bulalahu moli egiteu te la igogolu me la ilali. Eala la golugolu isahari lou, egite mai la vuliti moli, egite puia eia marasa sesele, veia ge vitokoromo la ilo la luma, isahari te la ilali ale uru, isahari te la tilivu la ilali tegite la moimosi, eala moli isahari lou egite kama taritigi, egite te la tilau la maroa moli. \v 21 Me la masova la merera ale, eia maie: Mai eme ge baumuli tigi la vulovulomu veia ge maroka te la mata La Tahalo Uru, eme ge mai la vuliti ale taritigi, egite tau poloa te la igogolu ale tikumu, eia marasa pepeho, eia maroka viviu. La Tahalo Uru masaga moli egiteu ale maroka, ale koramuli la igogolu tetala. \p \v 22 Eme ge pigia sotigu la pokemu la vulovulo la hatamalelaba me la tavile halaba ale kama taritigi. Eme ge tilimuli moli la vulovulo ale te la matagaga, ale te la tautaulailo, ale te la gilogo me ale te la hate tolala me la vipuhi tigila. La vulovulomu ge mai tegiteu ale la tia gite halaba te la mata La Tahalo Uru, egiteu ale la tia gite volu la sagegela me la kilaka bibibila soata te La Tahalo Uru. \v 23 Eau ge tutu tola louamu veia eme ge sulai tomi la merera bulalahula ale la valalua vaubi baololi ovola. La merera ale maie kama taritigi, la vaigo totolola sibitatala oio vola. \v 24 La bilalaha te La Tahalo Uru eia umala ge la tahalo la igototolola. La bilalaha te La Tahalo Uru, eia ge la tahalo la gilogo, me la tahalo la visuli te la valalua me hatavivile tomi, eia ge la tahalo la tilovo la merera ale taritigi, eia ge la tahalo la tia madidila sesele. \v 25 Eia ge suli egiteu ale ruru te la gauru ale sesele, veia ge sivuti la masova la merera sesele, eia ge suli tataho egiteu ale te la vulovulo la gilogo. Mai eme ge suli egiteu ale ruru te la gauru la gilogo maie, tio La Tahalo Uru ge igogolu oilo te la tia giteu, egite ge vuvulo, ge rovi la merera la seselela. \v 26 La mata gite la valalua me hatavivile usu kamati matagaga, la vuhula e Satan lapu legiteu la vuo tetala. La visuli taume ale taritigi ge lube egiteu, la gabutatalala tegiteu ge sibitala lou, egite ge hele taro e Satan, egite kati ge roromulia. \c 3 \s1 Te la tapasi la maututula la vulovulo usu ale kama taritigi ge guvi \p \v 1 Gabutala muli tigi aleie! Te la imamala ale hagagavi la tapasi la maututula, la vulovulo ale kama taritigi ge sibitala vagari, eia ge la haro ale vagari pepeho tegiteu la valalua ale taritigi. \v 2 La valalua me hatavivile ge vauru rivu lou egiteu, egite kama ge gogo e tabara gite, Egite ge masaga tavu moli la uati, egite ge vei tataho moli egiteu lou, egite ge pakakasa, egite ge tahi vilevile egiteu e tabarabara giteu. Egite ge tou e tama giteu me tila giteu. Mai isa ge suli egiteu, egite kama ge kolia. La tia giteu kama ge taritigi, egite kama ge masaga la lotu tavu La Tahalo Uru, la vulovulo giteu ge mavulu sesele. \v 3 Egiteu la valalua, e hatavivile me gulikiliki, la tia gite ge vagari mai la uati, isa tegite kama ge rovi la gilogo, egite ge la valalua la visigologolola sesele, la hare gite ge volu me la visigologolola. \v 4 Egite ge masaga moli la vikokuela me la vaubila. Egite ge tahi vile la vulovulo ale matata, egite ge la tahalo me la tavile la vareagila sesele, egite ge vauru rivu lou egiteu, egite ge masaga moli la kavovoula, egite kama ge masaga la mari me la visuli te La Tahalo Uru. \v 5 Egite ge lotulotu, eala moli la lotu tegite ge ogala moli la kulikulila, la lotu sesele te La Kalulu La Marokala eia kama tabuli te la tia giteu. Timoti, eia taritigi pepeho veia eme ge magiri gale taro egiteu alele. \p \v 6 Isahari tegiteu alali la ilo giteu e hatavivile ale kama magiri vagari, la tia giteu voluti lou te la gabutatala la iruru ale egite igotia pala te la imamala ale egite soukama rovi e Kraist. Egite kama vavala veia ge kisi tola egiteu e hatavivile aleie la merera la visigologolola tegiteu aleie, la vuhula la tia giteu eia viuviu moli, egite kama magiri vagari. \v 7 Egite kama koramuli ge sivuti la merera ale sesele, la vuhula egite tilimulimuli la merera usu pepeho tegite la valalua bulalahu moli. \v 8 Egiteu la tahalalo ale, egite mai e Ianes me Iambres, la tahalo la ule papai la merera iluale pala te la imamala te Moses. La tahalo iluale magiri robo e Moses te la tilola te La Tahalo Uru ale eia bahea veia eia ge puli taro egiteu la valalua e Israel loio e Gipto. Egiteu la tahalalo ale maie, egite muku pile la merera ale sesele, la gabutatalala tegiteu kama kokora, egite visigologolo moli la lotu tegiteu soio te La Uru. \v 9 Egite alele kama koramulia veia egite ge tau kokovu la vulovulo giteu, la valalua tomi ge hilo pupuhi sesele la iruru tegiteu. La iruru tegite ge veipala lou egiteu, mai moli la iruru te Ianes me Iambres ale eia veipala rivu lou egirua. \s1 Eme ge sau tola vagari la merera te La Tahalo Uru \p \v 10 Eala moli eme hilo eau, la vulovulogu kama mai egiteu alele, ouka. Eme rovi la tilovo ale eau abia gite la valalua me hatavivile. Eme rovi la vulovulogu tomi, la masasagala taku tai ale vagari te la tilimuli moli la gauru te La Uru. Eme rovi la tautaulailo taku, ale eau magiri vagari te la haroharo tomi ale la gima tovo lalai eau. Eme rovi tai la gilogo taku, la vagagarila taku tai te la igogolu te La Uru. \v 11 Eme rovia veia la haro usu egite la gima igo bara eau, la vuhula eau valolo la isa La Uru, eme rovi la iligiligi ale sibitala tavuau oio e Antiok, oio e Aikoniam me oio e Listra tai. Eala moli La Uru vimahuliau taro la papaga tomi ale veia ge igo bara la mahulila taku. \v 12 Eia sesele, egite tomi ale masagea veia ge mahuli vikapopo me Iesus Kraist, egite la gima ale kama kokora ge viligi sesele egiteu. \v 13 Egiteu la valalua la gima ge hiliti vagari sesele, egite ge vauru lou la vulovulo giteu te la iruru, egite ge vitilo baoli egiteu te la merera la visigologolola tegiteu ale kama kokorale. \v 14 Eala moli eme e Timoti, taritigi eme ge sau tola vagari moli la merera te Kraist ale eme toroti ovola pala te la bibisimu kara igoie, la vuhula eme rovia veia ale la merera te Kraist sesele ale amiteu, e tilamu me tubumu tai vimari leme ovola. \v 15 Eme tai palati te la bibisimu kara igoie, eme rovi tomi moliti la merera te La Buk Tabu Ale Pala, ale koramulia ge vituriamu la gauru la mahulila ale etatou ale tautaulailo te Kraist Iesus sau tolea oio tetala. Eala eia taritigi pepeho veia eme ge sau tola moli la vimari tomi te Kraist ale eme rovitia. \v 16 La merera tomi te La Buk Ale Pala, eia loio seseleti te La Tahalo Uru, eala la merera tomi te La Buk Tabu eia ge suli etatou, mai te la vimari ale taritigi, la vitetelila, me la vimatata la iruru. La merera te La Buk Tabu tai, eia koramulia ge tovo etatou te la pulolou la marokala, \v 17 veia la tahalo ale te La Tahalo Uru sesele, eia ge magiri vagari, la savelela ouka oio te la kalulula, eia koramulia ge magiri totora sesele oio te la igogolu tomi te Kraist ale taritigi. \c 4 \s1 E Pol tutu tola vagariale Timoti veia eia ge valolo la merera te La Tahalo Uru \p \v 1-2 Timoti, eau tutu tola vagariamu veia eme ge valolo la valalua me hatavivile La Merera te La Tahalo Uru. Ale eau tutu tola vagari seselea soio taume. La Tahalo Uru rovia, egira me Kraist Iesus ale mulimuli ge sibitala lou omai, eia ge mata muli la vulovulo la valalua tomi, egiteu ale mahulihuli, me egiteu tai ale pehoti. Ale la guluvi tetala eia hagagaviti, eia ge visibitala la viputumulila tetala me la pulolou la matagagala tetala omai te la maututula, eala eau vagari veia eme ge valolo la valalua me hatavivile La Merera tetala. Eme ge vagari veia ge tao talu la vulovulo ale kama kokora oio tegiteu; la valolo taume eia ge tivura veia egite ge gabu tikumua; eme ge karasuku tai egiteu veia egite ge sau tola sesele e Kraist. La igogolu taume ale eau abiamue, eme ge igo tataho seselea, eme umala ge piligi haria mai la valalua kama ge abi tigi la valolo taume, eme ge tovo tataho egiteu. Eme kama ge pou tali la imamala ale egite raragiti ge lolome, ouka, eme ge valolo moli, te la haroharo tomi. \v 3 La vuhula la imamala mulimuli ge sibitala ale la valalua kamati ge masaga la merera ale sesele te la vimari te Kraist. Egite ge vimagiri egiteu la tahalo la valolo usu ale kama sesele veia ge lolo moli la merera tegiteu ale egite veia eia malama moli. \v 4 Egite kati ge masaga ge lolo la merera ale sesele, egite ge polo gale soio te la merera la visigologolola. \v 5 Eala moli taritigi pepeho veia eme e Timoti, eme la tahalo te Kraist sesele, eme ge hilovi tigi la merera tomi veia eia sesele ka ouka. Eme kama ge gabutatala papai maie veia eme ge gabu la iligiligi me la savelela te la igogolu taume. Eme ge la tahalo la valolo sesele, eme kama ge gabutatala isa lou la paga, la igogolu taume te la valolo te Kraist ele, eme ge igo sesele tomia. \s1 La igogolu te Pol eia hagagavi ge kaluvu \p \v 6 Timoti, eau gabutatalea veia la imamala taku eia hagagaviti. Hiloa, la mahulila taku eau sugu tarotia soio te la igogolu la valolo. La kasosogu eia mai ale pagegeleti, mai sesele ale egiteu e pris te la luma la lotu egite tigi taro volu la poro la vaabila me la kasoso la sip me la kau. La imamala hagagaviti ale eau ge tuga tarome Timoti. \v 7 Eala moli eau rovia la igogolu taku eia sesele, eau vaubi vagari sesele te Kraist, eau taho loio sesele tetala, eau vagari pepeho te la igogolu ale eia visati leau ovola, eau sau tola sesele la tautaulailo taku soio te Kraist. \v 8 Eala eau pou tali moli la vibalavala te La Uru ale eia ge abiagu te la kiloli la vulovulogu ale matatale, eia ge abiagu te la tapasi la maututula, la vuhula eia la tahalo la viputumulila ale matata sesele, eia rovitia veia la igogolu taku eia sesele. Me eia kama ge eau moli sekela ale ge sau tola la vibalavala tetalale, ouka. Etato tomi ale loho tavu la guluvi tetala veia eia ge gomai harari, etato tomi ge sau tola la vibalavala tetala mulimuli. \s1 La tapasi la merera \p \v 9 Timoti, taritigi eme ge tovo lalai veia eme ge gomai hari, \v 10 eau la tahalo ouka omai ale ge toto obuau, ouka gologolo. La vuhula e Demas sigolo tarotiau, eia masaga moli la mari papaila te la maututula, eia heleti soio e Tesalonaika, E Kresens tai tugati, eia goio e Galesia, e Taitas tai kati pou omai, eia oioti e Dalmatia. \v 11 E Luk moli sekela pou omai taku. Taritigi eme ge puli e Mark vikapopo leme, amula ge gomai, la vuhula la tahalo ale eia suli pepehoau te la igogolu taku te la valolo. \v 12 E Tikikas tai kati pou omai, eau bahatia soio Epesas. \v 13 Ale eme ge gomai, eme ge abi tai la kairobola taku ale eau tapa taroa oio te la luma te Kapas oio e Troas, eme ge abi tai egiteu la buk tomi taku, ale tai egite kekesia te la kulikuli la kau, egite pipia, la buk tomi tai aleie eme ge abi seselea somai, eau masaga pepehoa. \p \v 14 La tahalo isa oiole, e Aleksanda, eia la tahalo ale pui la puigolo te la bras, eia pala igo gegeru sesele la igogolu taku, eia gima pasiau. Ale la vulovulolale, La Uru ge koli seselea soio tetala. \v 15 Eala moli eau masagea veia eme baumuli tatahome tetalale, la vuhula eia vaubi vagari sesele soio te la merera te Kraist. \p \v 16 Ale egiteu e Rom vahariau soilo te la vigagiala te la muluga la vigagiala ale egite vimagiriau ovola, isa kama magiri vikapopo leau veia ge vitikumu lou la merera taku veia eia sesele. Egiteu tomi e tabarabaragu te Kraist ale omaie, egite sigolo taroau, egite hele. Egite korale, taritigi La Uru umala ge gabutatala la iruru tegiteu ele. \v 17 Eala moli ale eau magiri te la vigagiala, La Uru eia magiri sesele te la baligu, eia vivagariau, veia la valolo te Kraist ge sibitala tataho te la haregu, eau kama ge taga, veia egiteu la valalua la maligoma tomi ale kama e Iuda, egite ge lolo la valolo ale taritigi te Kraist. Eala la vikararala taku eia tubuti, egite kama biliau, egite kama vilai taiau, eau mahuli utu moli, mai e Daniel pala eia mahuli taro la hare giteu la laion, egite kama toloa, tio eau tai mahuli utu mai e Daniel ele. \v 18 Eau rovia, La Uru ge vimahuliau taro la viluala tomi ale e Satan ge tovo lalaia veia ge visibitala tavuau. La Uru ge vahariau soata te la pulolou la marokala tetala oata te la ilo la lage, eau ge pou tataho ovola. Taritigi pepeho soata tetala, eia moli sekela la matagaga, etato ge vaisale molia, kama ge maila, la kaluvula ge ouka. Amen. \p \v 19 Taritigi amuto ge toi la haro sesele soio te Priska mira me Kuila, me egiteu tomi la karakara te Onesiporas tai. \v 20 E Rastas eia soloio e Korin, me eau tuga taro e Tropimas oio e Miletas, eia lea. \v 21 Timoti, eme ge tovo lalai vagaria veia ge gomai te la mahati, eia soukama ge leavala, eme kati ge polo tigi te la tia la utu. E tabaramu e Iubiulas tai omai eia toi la haro sesele soio taume, egite me Piudens, e Lainas, e Klodia, me egiteu e tabarabaramu tomi te Kraist ale omaie, egite tomi toi la haro sesele soio taume. \v 22 Timoti, taritigi pepeho veia La Uru ge pou taume, eia ge vivagari la kalulumu, taritigi tai veia la gilogo tetala ale uru eia ge pou tai taume. Kaluvuti. \cls Eau e Pol.