\id 2CO - Nakanai NT [nak] -Papua New Guinea 1983 (DBL 2014) 
\h 2 KORIN 
\toc1 Ale La Ilua La Merera Te Pol Eia Kekesia Giteu E Korin 
\toc2 2 Korin 
\toc3 2 Kor 
\mt1 ALE LA ILUA LA MERERA TE POL EIA KEKESIA GITEU E KORIN  
\c 1  
\p
\v 1 Eiau e Pol, amila me tabara gatou e Timoti, amila kekesia mutou la valalua me hatavivile te La Tahalo Uru ale oio la mautu e Korin, amila kekesi taia mutou la valalua me hatavivile tetala ale pou oio la gale e Akaia. Te la masasagala moli te La Tahalo Uru, eau la bilalaha te Kraist Iesus.  
\v 2 Taritigi pepeho veia La Tahalo Uru, e Tama gatou, egira me Iesus Kraist, La Uru gatou, eia ge baha la gilogo tetala soio tamutou, la tia mutou oilo ge malilo tataho.   
\s1 E Pol vaisale La Tahalo Uru te la visuli tetala  
\p
\v 3 Taritigi etato ge vaisale La Tahalo Uru, eia e Tamale Iesus Kraist, La Uru gatou. Eia la vuhu la gilogo, eia suli tataho etatou te la savelela tomi tegatou.  
\v 4 Mai etato ge poga la iloburukola, eia ge vimalu etatou, veia etato ge suli tai egiteu ale pou la iloburukola, etato ge suli legiteu la gilogo ale taritigi, La Tahalo Uru vagoilotia te la tia gatou.  
\v 5 Mai eau ge gabu la iloburukola mai sesele e Kraist, e Kraist ge hiloa mai ele, eia ge vimaluau te la gilogo tetala ale uru. Mai la iloburukola taku ge uru, la visuli te Kraist tai ge uru somai taku.  
\v 6 Mai eau ge gabu la iligiligi, ale eau ligi moli te la igogolu la valolo ale suli amutou, eia vimahuli amuto. Mai eau ge gabu la visuli te Kraist ale uru, ale eia suli moliau mai ele veia eau ge vagari, veia eau ge suli lou amutou, amuto ge koramulia ge magiri vagari te la iligiligi te la isale Kraist mai tai eau.  
\v 7 Eala moli eau sagege moli ale eau rovia veia amuto ge sau tola vagari e Kraist, la vuhula amuto gabu la iligiligi mai tai eau, eala moli amuto gabu tai la visuli te Kraist ale uru sesele, vikapopo tai leau.   
\p
\v 8 Eau masagea veia amutou e tabarabaragu ele, amuto ge mata kilala tigi te la iligiligi ale uru pepeho eau pogatia, ale eau valolo pala oio la gale Esia. Bakisi moliti la iloburukola ge bolehohoau, eau veia ge peho, la vuhula egite la gima te Kraist vagari pasi.  
\v 9 La tiagu oilo tikumu sesele mai la iloburukola te la tahalo ale egite lao tolea veia ge bilia. Oio vola, La Tahalo Uru eia mata sosoli taro moliau mai ele veia ge viteteliau veia eau ge sau tola sekela eia, veia eau umala ge tovo lalai veia ge magiri moli te la vagagarila taku lou, eala moli eia masagea veia eau ge toro moli tetala sekela, eia ale ge vimahuli etatou taro la pileho.  
\v 10 Goio, La Tahalo Uru eia vimahuli seseleau taro la pileho, eia ge igo molia mai ele, kama ge maila,  
\v 11 mai amuto ge sau tola seseleau te la kilaka. La valalua me hatavivile usu ge hiloa veia la kilaka tamutou eia puru seseleti somai taku, tio egite usu ge vaisale pepeho La Tahalo Uru oio vola, ale eia vibalava sesele la igogolu tamiteu ale valolo te la isala, amite kama vilua.   
\s1 E Pol vei matagagea giteu ale eia kati goio e Korin  
\p
\v 12 La paga isasa eau sagege moli ovola maie: La vulovulogu matata moli, eau kama gabutatala papai te la pulolou taku kabili te la valalua. Eau tai kama igo isa la iruru soio tamutou e Korin. Eau kama gabu tikumu la mari taku, eau tautaulailo te la gilogo te La Tahalo Uru sekela, eau rovi moli la merera ale sesele me la pulolou tetala ale maroka, ale eau valoloti le amutou pala.  
\v 13 Te la merera tomi ale eau kekesitia mutou ovola, eau vikara matagaga moli, eau kama pigi veivei la masovala isahari ale kama matagaga.  
\v 14 Ale igoie amuto mai ale rovi tigitiau bakisi, eala moli eau masagea veia amuto mulimuli ge rovi tataho la vulovulogu tomi, amuto ge lege sisigi leau, mai tai eau, eau ge lege sisigi tai le amutou te la tapasi la haro ale La Uru e Iesus ge beu loua ovola.   
\p
\v 15 Eau kama gabutatala papai soio tamutou. Pala, eau gabutatalea veia amutou e tabarabaragu sesele, eala eau raragi veia ge hari lalai muga amutou, veia amuto ge hiloau vaka lua, amuto ge gabu la sagegela te la guluvi taku soio tamutou, amuto ge gabu la sagegela vaka lua mai ele.  
\v 16 La mulugala, eau gabutatalea veia ale eau ge goio e Masedonia eau ge hilo amutou, me la vaka luala, eau veia ge hilo lou amutou te la bileula taku loio e Masedoniale, veia amuto ge suli la tuluga taku lou soio e Iudea.  
\v 17 Ale eau tovo lalaia veia ge vimatata tataho la tuluga taku mai ele, mave, amuto veia eau gabutatala bulalahu? Amuto ubi leau la merera veia eau visigolo amutou ale eau kati goio tamutou, mave, amuto soioge veia eau tilimuli la masasagala taku moli mai la tahalo bulalahu veia eau ge vei mugea mutou isa la merera, veia mulimuli eau ge vulo loua?  
\v 18 Eau vei seselea mutou oata te La Tahalo Uru veia mai la merera isa ale eau ge veia mutou ovola, eia ge sesele moli mai ale eau veitia mutou pala.  
\v 19 Amite la bilalaha tomi, la vikararala tamiteu eia sesele. Amite me Sailas me Timoti, amite valolo le amutou la merera te Iesus Kraist, eia e Latu La Tahalo Uru, eia kama rovi la visigologolola.  
\v 20 La merera ale mave ale mave La Tahalo Uru ge vei seselea gatou ovola, e Kraist vipuru tomitia, eia sesele tomi moli. Oio moli teale, mai etato ge vaisale La Uru, etato ge kaka moli te isale Kraist, eia ge vitikumu la kilaka tegatou.  
\v 21 La Tahalo Uru sekela eia kisi vagari la tautaulailo tegatou tomi soio te Kraist, veia etato ge magiri vagari. Eia visati le amiteu veia amiteu ge la bilalaha tetala,  
\v 22 eia tauti la irovilala tetala somai tegatou tomi veia etato tetala seseleti, mai eia vibalavati letatou La Kalulu La Marokala, eia volu sesele te la tia gatou, eia abia gatou veia etato ge rovia mai ele veia la vibalavala tetala ale uru sesele eia soloio, etato mulimuli ge sau tolea.   
\p
\v 23 La Tahalo Uru ge rovia veia la vikararala taku eia sesele moli. Ale eau kama guvi hari oio tamutou e Korin, eau gabutatala la vareagila tamutou, eau veia ge abia mutou bakisi la baa veia amuto ge vimatatea, amuto soukama mahela leau.  
\v 24 Eau kama vauruau veia eau sekela ge vahilo le amutou la gauru la tautaulailo te Kraist, la vuhula amuto matuhati. Eala moli eau masaga molia veia etato ge vaigogolu vikapopo, veia amuto ge gabu la sagegela uru te la visuli taku soio tamutou.   
\c 2  
\p
\v 1 Eala, eau hate tola lou, eau veia eau kati ge hari lalai lou amutou veia ge vailo buruko lou amutou mai ale pala.  
\v 2 Mai eau ge vailo buruko amutou, amuto kamati ge koramulia ge visagegeau, eau ge pou moli la iloburukola.  
\v 3 Ale eau pala kekesia mutou la merera la igototolola, eau viteteli moli amutou veia amuto ge piligi la vulovulo mutou ale kama kokora veia eau kati ge ilo buruko le amutou ele. La vuhula eia koramuli seselea veia amutou ale la vavua la valolo taku, amuto ge visagege moliau, amuto kama ge vailo buruko eau te la vulovulo mutou ele. Eau gabutatalea veia mai eau kama ge guvi te la sagegela, amuto tai kama ge koramulia ge sagege. Eala moli eau tai kama koramulia ge sagege mai amuto kama ge sagege vikapopo leau.  
\v 4 Ale eau pala kekesia mutou, la masaligu puri, eau ilo buruko sesele. Eau kama gabutatalea veia ge vailo buruko amutou, eau gabutatala molia veia ge vei matagagea mutou la gilogo taku ale uru soio tamutou.   
\s1 E Pol masagea veia egite ge vimavulaha la tahalo la iruru  
\p
\v 5 Sesele, isa tamutou ele eia vailo buruko etatou. Eau kama masaga veia ge igo mahela eia te la merera taku, eala moli amuto tomi ligi te la vulovulola ale eia igigoa.  
\v 6 Amuto usu muku piletia, eia gabutia, eia koramuliti mai ele.  
\v 7 Taritigi amuto ge vimavulaha taro leia la iruru tetala, ge vikara tataho lou soio tetala, eia soukama peho la mahelala.  
\v 8 Amuto ge vagoiloa mai e tabara mutou lou, ge puhi tataho loua.  
\v 9 Eau pala kekesia mutou veia amuto ge kisu taroa, eau masaga molia veia ge rovia mai ele veia amuto vagari, veia amuto koramulia ge roromuli la merera taku, ka ouka.  
\v 10 Mai amuto ge vimavulaha isasa te la iruru, eau tai ge vimavulahea. Mai la iruru sesele ge magiri, eau ge vimavulaha taro leia la iruru alele, eau kati ge gabutatalea, la vuhula eau la bilalaha te Kraist, me eau masagea veia amuto ge rovi tataho la gilogo tetala,  
\v 11 e Satan soukama ge vitilo etatou. Etato kama paua leia, eia oio raragiti veia ge igo gegeru etatou. Mai amutou la gilogo ge ouka soio te tabara mutou ale ruruti ele, e Satan ge lapu hari amutou taro la gilogo te Kraist.   
\s1 E Pol pala gabu la iloburukola uru oio e Troas  
\p
\v 12 Ale pala eau guvi olau e Troas, veia ge valolo la valalua me hatavivile te la valolo ale taritigi te Kraist oio la mautu uru alele, eau hiloa veia La Uru eia kopeti la gauru veia la igogolu tetala ge hari tataho te la mautu e Troas ele.  
\v 13 Eala moli eau ilo buruko sesele, la vuhula e tabara gatou e Taitas, eia kama pogeau oio la mautu ale, mai amila vitautila, eau la visuli ouka te la igogolu. Eala eau goio tuga, eau tataro egiteu, eau tuga polo lou goio la gale e Masedonia.   
\s1 La vagagari La Tahalo Uru eia vivagari egiteu la bilalaha tetala  
\p
\v 14 Taritigi pepeho soata te La Tahalo Uru! Eia suli bibibi amiteu la bilalaha tetala, amite bolehoho la gima te la vagagarile Kraist moli. Oio te la merera tamiteu la isale Kraist eia sulubula soio te la maututula tomi, mai la malia la malalia, eia mali vivili tataho.  
\v 15 La Tahalo Uru eia hilo la igogolu tamiteu eia mai la malia la sese la obu ale taritigi, la vuhula amite valolo te Kraist soio tegiteu ale e Kraist ge vimahuli egiteu, soio tai tegiteu ale tou la merera tetala, egite goio poga tavu moli la pileho.  
\v 16 Tegiteu ale poga tavu la pileho, la merera te Kraist eia mai la malia la pileho. Eala moli tegiteu ale mahuli, la merera te Kraist eia mali vivili sesele mai la malia la mahulila ale sesele. Ere ge koramuli la igogolu ale uru mai ele, veia ge valolo la merera la mahulila te Kraist?  
\v 17 Egiteu moli ale igogolu sesele mai amiteu la bilalaha. Amite kama valolo bulalahu veia la merera la mahulila te Kraist eia ge mata mai la golu bulalahu moli. La Tahalo Uru sesele baha amiteu, eala amite valolo moli la merera ale sesele, vikapopo la tilogo ale uru, la vuhula amite gabu tikumua veia eia oio lololo amiteu, amite la bilalaha sesele te Kraist.   
\c 3  
\s1 E Pol eia la bilalaha te La Tahalo Uru te la viputumulila ale halaba  
\p
\v 1 Mave, amuto isahari soioge gabutatalea veia eau vauru lou eau te la merera taku, ia? Mave, eau soioge ge guvi vikapopo la merera ale egiteu la mulugaluga isahari te la lotu ge kekesitia veia ge vei tatahoau soio tamutou ovola, ia? Amutou e Korin soioge veia ge suliau te la kekesi la vei tatahola tamutou lou, ale eau ge hiliti taro amutou te la igogolu la valolo, ia? Ouka viruru!  
\v 2 Amite la irovilala isa moli sekela ale ge vei tataho amite, mai amutou lou, mai amutou e Korin ge veipala la vulovulole Kraist, tio la valalua te la maututula tomi ge rovia veia la valolo tamiteu eia sesele.  
\v 3 La irovilala taku ale ge vei tataho la igogolu taku, eia isa moli sekela, mai la irovilala te Kraist ale La Kalulu La Marokala eia taua te la kalulu mutou ale amuto vulo halaba tetala.   
\p
\v 4 Eau kama koramulia ge vikara mai ele mai e Kraist kama ge pou taku. La Tahalo Uru moli eia la vuhu la vagagarila taku te la igogolu tetala.  
\v 5 Eau kama isapolo veia ge koramuli la igogolu ale vagari. La vagagarila taku eia loio seseleti te La Tahalo Uru.  
\v 6 Eia suliau, eau koramulia mai ele veia ge la bilalaha te la merera tetala ale halaba, eia kama la kekesi te la lima, eia la merera moli te La Kalulu La Marokala. Oio te la kekesi la merera te La Tahalo Uru ale e Moses kekesia, etato poga tavu moli la pileho, la vuhula etato tomi boto. Eala moli La Kalulule Kraist eia vimahuli etatou.   
\p
\v 7 Eia sesele, la merera te La Tahalo Uru, e Moses kekesi tolea soio te la hate la uati ale uru. La Tahalo Uru eia sibitala tavu e Moses mai la matagaga ale uru sesele, eia veiala la merera tetalale, e Moses goio kekesia. La lagule Moses tai ele, eia sima te la matagaga La Tahalo Uru. Eia goio purusu loata la gove, la lagula kati sasima sesele, eala moli la valalua e Israel kama koramulia ge mata tola tavua. Mai la merera ale lapu etatou soio te la pileho eia ge guvi te la matagaga ale uru mai ele, mave,  
\v 8 la matagaga te La Kalulu La Marokala eia kama ge uru tavu la matagaga te la merera te Moses ale pala?  
\v 9 La merera te La Tahalo Uru ale pala, etato boru ovola, eia lapu etatou soio te la pileho, la merera alele eia la matagaga, eala moli la merera te Kraist ale vimaroka etatou, eia la matagaga ale uru sesele!  
\v 10 La merera te La Tahalo Uru ale pala, igoie eia mata mai ale mumugu, ale halaba moli eia mata mai ale marasa sesele, eia la matagaga ale uru!  
\v 11 La merera te Moses ale pala, La Tahalo Uru eia viputumulitia veia eia kama ge magiri tabaa, eala moli la matagaga eia oio sesele ovola, la vuhula eia la merera te La Uru. Eala moli la merera ale halaba, eia kama ge kaluvu, eia la matagaga ale uru pepeho sesele te ale pala.   
\p
\v 12 Tio, ale eau sau tola sesele la matagaga te La Tahalo Uru mai ele, eau vagari moli, eau kama rovi la tilaga.  
\v 13 Amite la bilalaha kama mai e Moses, ale eia pigi robo la gamala veia la valalua e Iuda soukama ge hilo la matagagala ale eia kokovuti.  
\v 14 Egiteu e Iudale, kara igoie, egite kama matagaga veia egite ge gabutatala tigi la valolo te Kraist. Mai egite ge lolo la merera te La Tahalo Uru ale pala, egite kama abi tigi la masovala, eia mai la lavalava eia pigi robo la mata giteu. Eala moli la lavalava alele, eia soloio, la vuhula egite kama tautaulailo te Kraist, me Kraist sekela moli ge koramulia ge vimatagaga egiteu.  
\v 15 Mai egite ge lolo la merera te Moses, la lavalava eia mai ale pigi robo la gabutatalala tegiteu.  
\v 16 Eala moli mai isa ge vulo la gabutatalala tetala soio te La Uru, e Kraist ge abi taro la lavalava ale pigi robo la matala.  
\v 17 La Uru, eia La Kalulu La Marokala, mai eia ge pou tegatou, la paga isasa kati kisi tola etatou.  
\v 18 La mata gatou eia matagagati, la maligoma eia kati pigi robo la lagu gatou mai la lavalava. Oio te la lagu gatou la matagaga uru sima tataro mai la matagaga te La Uru. Eia ge pui halaba etatou, etato ge mai sesele eia, vikapopo la matagaga ale uru, eia loio sesele te La Uru, eia La Kalulu La Marokala.   
\c 4  
\s1 La vikarara la tilovo te Pol te la vuliti ale e Kraist balepa roboa  
\p
\v 1 La igogolu la valolo tamiteu la bilalaha, La Tahalo Uru eia abi seselea miteu vikapopo la gilogo me la visuli tetala ale uru pepeho, eala amite kama maveve taroa veia ge piligia.  
\v 2 Amite kama visigolo la valalua veia ge puli egiteu soio te Kraist, mai egite kama masaga. La vulovulo alele eia kama taritigi. Amite kama tutugolo amutou, amite kama vulo tai la merera te La Tahalo Uru veia eia ge sibitala isapolo. Amite pou tataho moli, valolo tataho moli, veia la valalua tomi ge rovia mai ele veia amite igo sesele la igogolu te La Tahalo Uru, eia hilo la igogolu tamiteu, eia rovia eia taritigi moli.  
\v 3 Mai isahari kama ge matagaga te la merera tamiteu, egite kama matagaga mai ele la vuhula egite kama rovi e Kraist, egite mata mai ale ge peho.  
\v 4 E Satan ale sau tola la maututula te la limala, eia pigi robo la gabutatalala tegiteu, egite kati koramulia ge hilo la matagaga te la valolo ale taritigi te Kraist ale la vuhu la mahulila, la vulovulo girua me La Tahalo Uru eia visauru moli.  
\v 5 Mai amite ge valolo, amite kama valolo te la isa miteu veia ge vauru amiteu lou mai ele. Amite valolo moli te la isale Iesus Kraist, eia La Uru gatou, amite valolo moli mai ele, amiteu la bilalaha moli tamutou veia ge puli amutou soio te Iesus veia amuto ge rovi sesele eia.  
\v 6 La Tahalo Uru, eia la vuhu la matagaga, mai la merera tetala te la silokola eia veia maie “Taritigi la matagaga ge vulo robo la maligoma.” Eia vimatagagati la tia gatou oilo veia etato ge hilo sesele la matagaga te La Tahalo Uru oio te la lagule Kraist, veia amite ge matagaga mai ele te la merera tetala ale sesele.   
\p
\v 7 La matagaga tetalale, eia taritigi pepeho mai la vuliti. Eau ge tovo mulia soio te la vuliti ale etato balepa robola la moe.\f + \fr 4:7 \ft Te la vikarara la tilovo alele, e Pol tovo seselea mai te la vulovulo giteu e Iuda lou, ale egite ge sugu kokovu la vuliti soilo la kabala ale egite puila la kuvo. La vulovulo alele etato kama rovia, eala etato tovo mulia te la balepa la vuliti te la moe.\f* Amiteu ale baumuli la merera te La Uru, amite la tahalo la vovo moli, amite kama vagari. Mai la vuliti, egite balepa robola la moe ale kama vagari, la vuliti te La Tahalo Uru eia tabuli tamiteu ale kama vagari, veia la vagagarila ale uru ge pou tamiteu, la valalua ge matagaga mai ele veia ale la vagagarila te La Tahalo Uru sesele.  
\v 8 Amite vavala, eala moli amite kama peho posa. Amite ilo buruko, eala moli amite kama hele.  
\v 9 Egite la valalua te Satan gima pasi amiteu, eala moli La Tahalo Uru kama sigolo taro amite. Egite bili amiteu, eala moli amite kama peho, amite goio mahuli utu lou.  
\v 10 Te la igogolu la valolo, amite poga tavu la pileho mai tai e Kraist, eala eia matagagati tegiteu la valalua tomi veia la vagagarila te Kraist sekela moli eia sigirobo amiteu.  
\v 11 Te la igogolu la valolo te La Uru, amite poga tavu la pileho te la haroharo tomi, eala la vagagarila te Iesus Kraist eia ge matagaga tegiteu la valalua tomi, mai egite ge mata muli la vulovulo miteu.  
\v 12 Te la igogolu la valolo te Kraist, amite hagagavi ge peho, eala moli oilo vola amuto sau tolatia la mahulila ale sesele.   
\p
\v 13 Mai La Buk Tabu Ale Pala eia veipala la merera te Devit maie “Eau veipala la merera te La Uru, la vuhula eau tautaulailo tetala.” Amiteu la bilalaha tai, amite tautaulailo vagari mai tai e Devit ele, eala amite veipala la merera te La Uru.  
\v 14 Etato matagaga moli veia La Tahalo Uru ale vimahuli La Uru e Iesus taro la pileho, eia ge vimahuli tai etatou vikapopo leia, eia ge puli etatou tomi soilo tetala, etato ge pou la balavala oio te la balila.  
\v 15 La iligiligi ale igoie amite la bilalaha gabua, eia ge suli amutou ale pou te la maligoma, veia mai la gilogo tetala eia ge pigi robo la valalua me hatavivile usu, la vaisalela ge uru pepeho soata te La Tahalo Uru.   
\s1 Egiteu la bilalaha ge sau tola la sagegela ale ge koli la iloburukola ale egite gabua  
\p
\v 16 Eala, amite kama piligi la igogolu te Kraist. La imiteu eia mai ale paruti, eala moli te la kalulu miteu, La Uru eia vagoilo halaba la sagegela me la vagagarila oilo vola te la haroharo tomi.  
\v 17 La iloburukola bakisi moli ale amite gabua te la imamala ale igoie, La Uru ge kolia somai tamiteu mai la matagaga tetala ale uru, eia kama ge kaluvu. La vibalavala moli tetalale, eia uru, la iloburukola bakisi ale amite gabua igoie, eia mai la golu bulalahu moli.  
\v 18 Amite kama vagari tavu la paga la vovo ale etato la valalua hiloa me la mata gatou, eia ge kaluvu lou. Amite sugu moli solagu veia ge sau tola la sagegela ale sesele. La balavala alele, la mata gatou kama koramulia ge hiloa, eia la paga la kalulu, eia ge mahuli moli mai ele, la kaluvula ge ouka.   
\c 5  
\s1 La vovo gatou ale mumugu, la vovo gatou ale halaba  
\p
\v 1 Etato rovia veia mai etato ge peho, etato ge tuga taro la vovo gatou, La Tahalo Uru eia ge abia gatou la vovo ale halaba oata tetala, eia kama ge kaluvu.\f + \fr 5:1 \ft La vimari ale, e Pol tovo muli seselea soio te la luma la sel, veia la vovo gatou eia mai la sel, etato ge peho, egite ge pilu la luma tegatou, etato ge goio ge mou te la luma ale halaba, mai la vovo gatou ale halaba, oata te La Tahalo Uru.\f*  
\v 2 Ale igoie etato so mahulihuli, etato gabu la silahala te la vovo gatou, etato gabutatala solagu veia taritigi pepeho etato ge kai hari la vovo gatou ale maroka, oata te la ilo la lage.  
\v 3 Etato kama ge la kalulu bulalahu moli, la vovo gatou tai ale halaba ge oio.  
\v 4 Etato gabu la iligiligi te la vovo gatou ale mumugu, etato robe, etato kama mavulaha, eala moli etato kama masaga la pileho. Eala moli etato vagari moli veia ge hele taro la vovo gatou ale etato taholea igoie, eia ge kokovu te la magasa. Etato vagari moli veia ge kai hari la vovo gatou ale halaba. La vovo gatou ale igoie, eia ge kaluvu te la pileho, la mahulila ale sesele ge koli molia, etato ge kai la vovo gatou ale maroka.  
\v 5 La Tahalo Uru eia raragitia la vovo gatou ale halaba mai ele, etato kama ge balavea te la mapa la igogolu tegatou lou, ouka. La Tahalo Uru sekela ge vibalava letatou ovola me etato rovia eia sesele, la vuhula eia abitia gatou La Kalulu La Marokala, eala etato rovia mai ele veia mulimuli etato ge sau tola la mahulila ale sesele, la kaluvula ge ouka.   
\p
\v 6 Eala, etato sau tola vagari moli la merera te La Uru, ale eia veia ge abia gatou la vovo gatou ale halaba. Etato rovia veia mai etato ge mahuli tabaa te la vovo gatou ale etato taholea te la imamala ale igoie, etato kama ge sau tola hari la pulolou la matagagala oata te La Uru.  
\v 7 Ale, etato rovia te la tautaulailo tegatou. Eia kama la paga ale etato hilotia me la mata gatou, etato gabu tikumua mai ele. Ouka, eia te la tautaulailo moli, etato rovitia te la kalulu gatou.  
\v 8 Etato kama taga la pileho, etato masaga molia veia ge hiliti taro la vovo gatou ale igoie etato taholea, veia ge goio ge pou la sagegela oio te la bali La Uru.  
\v 9 Eala, etato vagari moli veia La Uru ge lege sisigi letatou. Mai etato so mahulihuli, uka etato ge peho, etato la gabutatalala isa moli sekela veia etato ge igo sesele la masasagala te La Uru gatou ge visagegea mai ele.  
\v 10 La vuhula etato matagagati veia etato tomi ge peho, etato tomi ge magiri te la vigagiala oio te la lagule Kraist, eia ge kolia somai tegatou isasasa mai la vulovulo gatou. Egiteu ale taritigi, egite ge pou la balavala. Egiteu ale kama kokora, egite ge pou te la iligiligi. Eala, mai etato so mahulihuli, etato vagari pepeho veia ge igo sesele la masasagala te Kraist veia eia ge lege sisigi letatou.   
\s1 Etato me La Tahalo Uru kati vipou baa, la vuhula e Kraist peho robo etatou  
\p
\v 11 Amiteu la bilalaha, amite taga La Tahalo Uru, amite togo seselea, eala amite igogolu vagari veia ge puli la valalua usu soio tetala. La vuhu la igogolu tamiteu eala moli ele. La Tahalo Uru, eia rovi la gabutatalala tamiteu oilo. Taritigi amutou e Korin tai, te la tia mutou isasasa, amuto ge matagaga moli veia amiteu la bilalaha, amite igogolu sesele tetala, amite kama vauru lou amiteu te la igogolu la valolo te Kraist ele.   
\p
\v 12 Amite kama masagea veia ge tovo lalaia veia ge ali la ilo mutou veia amuto ge vei tataho lou amiteu. Ouka, eau lube molia mutou la vuhu la igogolu tamiteu sesele te Kraist, veia amuto ge koramulia ge putu oli lou la merera tegiteu ale vauru lou egiteu te la valolo la visigologolola.   
\p
\v 13 Mai amuto ge ubi le amiteu la merera veia amite la bilalaha vikara mai la paua, ale amite vagari tavu sekela e Kraist, ioge eia korati mai ele, amite paua moli la sagegela te La Tahalo Uru. Mai tai amite ge vikara mai la tahalo ale gabutatala tigi, ale tai ele amite igoa te Kraist, veia ge vei matagagea mutou la merera tetala.  
\v 14 La paga isa moli eia uru te la gabutatalala tamiteu, mai la gilogo te Kraist somai tegatou. La vuhula, amite matagaga tigi veia la tahalo isa sekela eia peho roboti etatou tomi, e Kraist moli ele. Eala, eia matagaga tai mai ele veia mai etato ge te Kraist, etato mai ale peho taroti la vulovulo gatou ale pala, etato sibitala halabati te la mahulila ale halaba e Kraist abitia gatou.  
\v 15 Etatou ale mahuli halaba tetala, etato umalati ge gabutatala moli la masasagala tegatou te la vovo. Etato ge vagari moli veia ge vahiliti la igogolu te Kraist, la vuhula eia peho robo etatou, eia goio mahuli rivu lou te la vagagari La Tahalo Uru.  
\v 16 Sesele, amite pala gabutatalea veia e Kraist eia la tahalo la vovo moli, eala moli oukati, amite matagagati veia eia isapolo seseleti! Eala amite tutu tolea mutou veia umalati etato ge gabu vauru la vulovulo la valalua mai te la gabutatalala te la vovo moli.  
\v 17 Mai isa ge vulo halaba te Kraist, la vulovulola ge halaba sesele, eia kati ge mai ale pala, La Uru eia mai ale pui halaba seseletia.  
\v 18 Ale la igogolu te La Tahalo Uru sesele. Eia baha e Kraist, e Kraist goio peho robo etatou veia etato kati ge ligi te la kiloli la iruru tegatou, veia etato kati ge vipou baa me La Tahalo Uru, veia etato ge veipala tai la valolo tetala ale taritigi soio te la valalua me hatavivile tomi.  
\v 19 Eia veia la valalua me hatavivile tomi ge matagaga mai ele, veia oio te la pileho te Kraist, etato me La Tahalo Uru ge koramulia ge vipuhi tigi lou, eia kati ge gabutatala la iruru tegatou ale etato igotia. La vikara matagagala alele, La Tahalo Uru eia abi seselea miteu la bilalaha tetala veia amite ge veipalea soio tamutou la valalua me hatavivile te la maututula tomi.  
\v 20 Eia sesele, amite la bilalaha moli tetala, mai amite valolo amutou, La Tahalo Uru eia mai ale vikara gogogo soio tamutou te la hare miteu sesele veia amuto ge vulo halaba te Kraist. Eala, mai amite kaka gogogo amutou veia gageie amuto ge tau sesele la ilo mutou soio te Kraist, amuto me La Tahalo Uru ge vipuhi tigi lou, amuto kati ge vipou baa leia.  
\v 21 Eia sesele, e Kraist, eia la iruru ouka, eala moli La Tahalo Uru eia vimagiria veia eia ge abi la muli gatou, eia vauru la iligiligi soio tetala veia eia sekela ge bole la kiloli la iruru tegatou, veia mai etato ge tautaulailo tetala, la vulovulo La Tahalo Uru ale maroka sesele, eia ge volu sesele tegatou, etato ge sibitala maroka mai eia.   
\c 6  
\s1 Egite la bilalaha ligi sesele te la igogolu la valolo te Kraist  
\p
\v 1 Amiteu la bilalaha, amite vikapopo La Tahalo Uru te la igogolu la valolo te Kraist. Ale amite karasuku amutou veia umala amuto ge gabutatalea veia la gilogo te Kraist soio tamutou veia eia la golu bulalahu.  
\v 2 Mai la merera te La Tahalo Uru te La Buk Tabu Ale Pala, eia veia maie:  
\li1 Amuto tali tavuau te la imamala moli  
\li1 ale eau tautia veia eau ge lolo amutou ovola,  
\li1 me te la imamala ale eau gogoti amutou,  
\li1 eau vimahuliti amutou.  
\p Tio, eau veia mutou e Korin maie: Gageie moli, eia la haro ale La Tahalo Uru ge gogo amutou, taritigi amuto ge sau tola haria, eia ge vimahuli amutou.   
\p
\v 3 Amiteu la bilalaha te Kraist, amite kama masaga ge igo gegeru la tautaulailo tamutou, ouka viruru. Amite vagari veia ge pou tataho moli, la valalua soukama ge hilo la vulovulo miteu isahari ale kama taritigi, egite ge vile la igogolu tamiteu te la valolo te la isale Kraist.  
\v 4 Te la vulovulo miteu tomi, amite vagari veia ge veipalea veia amite la bilalaha sesele te La Tahalo Uru. Amite gabu la iligiligi me la iloburukola ale uru sesele, amite gabutatala marapa te la tahi vilela te la valalua la gima, egite ge vulo robo amiteu, la gauru miteu ouka te la hilele.  
\v 5 Egite kumamasi vulo amiteu, egite kapi robo amiteu oilo te la luma la kilisi. Amite ge valolo, la masua uru ge sibitala. Amite igogolu vagari, amite kama abi tigi la mavutala, amite vitolo tai.  
\v 6 Eala moli te la iloburukola tomi alele, amite pou tataho moli, amite maroka moli, la mari tamiteu eia koramuli tai, amite kama igo totolo harari. La Kalulu La Marokala eia suli amiteu, amite pou moli te la vulovulo la mutelela me la gilogo ale sesele veia ge suli la valalua me hatavivile tomi. Eala, egite hiloa mai ele veia amiteu la bilalaha te La Tahalo Uru sesele.  
\v 7 Egite hilo taia veia la merera tamiteu eia sesele tomi moli, la vagagarila te La Tahalo Uru eia oio tai tamiteu. Amite magiri te la vaubila te la isale Kraist, la gata ale oio te la lima miteu la paga isa moli sekela, la vulovulo ale maroka, eia suli amiteu te la vaubila, eia galiau robo tai amiteu.  
\v 8 Mai egite la valalua ge bole vauru la isa miteu, eia taritigi moli. Mai egite ge vile amiteu, veia amite la tahalo la iruru, ale taritigi moli tai. Egite oso lulu la merera tamiteu veia amite visigolo la valalua me hatavivile, eala moli amite valolo moli la sesele la merera te La Uru.  
\v 9 Egite veia amite la golu bulalahu moli, eala moli La Tahalo Uru eia rovi amiteu veia amiteu la tahalo sesele tetala. Amite viluati, eala moli amite mahuli utu lou. Egite bili amiteu, eala moli amite kama peho.  
\v 10 Amite pou la iloburukola, eala moli amite mai ale sagege moli te la haroharo tomi. Amite mata mai la morivava, eala moli la vuliti tamiteu ale sesele, eia oio. Amite mata mai ale kama tahola isa la paga, eala moli la paga isa uru sesele amite taholea, mai la mahulila me la vibalavala ale uru sesele te Kraist.   
\p
\v 11 Amiteu la bilalaha, amite vikara soio tamutou e Korin, amite kama vei kokovu isa la merera, amite kope moli la tia miteu soio tamutou veia amuto ge rovi sesele amite.  
\v 12 Amite kama tou amutou, eala moli amuto muku pile amiteu veia amite kama koramulia ge pou mai e tabara mutou.  
\v 13 Amuto e latatugu, amuto ge koli tigi la vulovulogu ale taritigi ale eau igoa soio tamutou, amuto ge gogoau, eau ge hagagavi lou tamutou.   
\s1 Etato umala ge hagagavi tegiteu ale pou te la maligoma  
\p
\v 14 Umala amutou ale te Kraist ge vitau me tabara vikapopo legiteu ale kama tautaulailo tetala. Mave, la vulovulo la marokala, me la vulovulo la iruru, egira visauru, ia? Ouka. La matagaga tai, me la maligoma, amuto soioge veia egira koramulia ge vaigogolu vikapopo, ia? Ouka.  
\v 15 Tio e Kraist tai, amuto soioge veia eia ge vitau me tabara tataho vikapopo me Satan, ia? Ouka.  
\v 16 Eala, amuto umala ge tovo lalaia veia ge vikapopo legiteu ale kama rovi e Kraist, la vuhula etatou ale te Kraist, etato mai la luma la lotu te La Tahalo Uru, eia sekela moli mahuli, me la lotu tetala me la lotu te la maligoma, egira kama visauru, egira isapolopolo sesele! Mai La Tahalo Uru eia veitia te La Buk Tabu Ale Pala, eia veia maie:  
\li1 Eau ge mou kabili tegiteu la valalua taku,  
\li1 eau ge tuga vikapopo legiteu,  
\li1 eau ge La Uru tegiteu,  
\li1 egite ge pou mai la valalua  
\li1 me hatavivile taku sesele.   
\p
\v 17 Mai la merera isa lou tai te La Tahalo Uru te La Buk Tabu Ale Pala, eia veia giteu la valalua e Iuda maie:  
\li1 Amuto ge hele taro egiteu ale kama kokora,  
\li1 amuto ge pou gale taro egite!  
\li1 Umala amuto ge pou  
\li1 te la vulovulo giteu ale mumugu.  
\li1 Mai amuto ge maroka mai ele,  
\li1 eau ge vagoilo sesele amutou taku,  
\li1 amuto ge pou te la baligu,   
\li1
\v 18 eau ge e Tama mutou sesele,  
\li1 amuto ge e latatugu.  
\li1 Eau La Uru mutou ale oata,  
\li1 eau moli vagari, mai ale eau veitia mutou.   
\c 7  
\p
\v 1 Amuto tabarabaragu, etato sau tolati la merera ale tikumu te La Tahalo Uru sesele mai alele. Eala, eia koramuli seselea veia etato ge vulo halaba, la vulovulo ale kama kokora umalati ge vimumugu la vulo gatou me la kalulu gatou oilo. Etato ge vagari veia ge pou moli la marokala, mai la pulolou la tilaga me la tilogo ale uru sesele soata te La Tahalo Uru.   
\s1 E Pol sagege legiteu e Korin  
\p
\v 2 Taritigi amuto ge vagoilo lou eau mai e tabara mutou lou. Eau kama visigolo amutou. Eau kama tutugolo amutou te la vulovulogu ale eau igoa. Eau kama igo gegeru tai isasa.  
\v 3 Eau kama ubi le amutou la merera alele veia amuto ge mahela. Mai eau ge mahuli, uka eau ge peho, amuto magiri vagari te la gabutatalala taku, amutou e tabarabaragu sesele.  
\v 4 Ale amutou e Korin ele vulo maroka lou te Kraist, eau sagege sesele le amutou, eau mata kaseka, eau hiliti vagari lou te la igogolu, la vuhula eau rovitia veia amutou la tahalo me la tavile te Kraist sesele, la iligiligi ale eau pogea omai, eia la golu bulalahu moli, la tiagu volu sesele la sagegela tamutou ele.   
\p
\v 5 Ale pala eau guvi oio e Masedonia, la vovogu bare sesele, la vuhula la marapala uru sibitala, egite vaigo somai taku, eau kamati vagari sesele tai te la igogolu, eau taga.  
\v 6 Eala moli La Tahalo Uru, eia la toro giteu ale pou la iloburukola, eia gogoau, eia suli pepehoau, la vuhula eia baha e Taitas, eia poga tavuau oio la gale e Masedoniale, taritigi pepeho sesele.  
\v 7 La guluvi tetala eia taritigi sesele, la merera tetala tai eia taritigi pepeho pasi, la vuhula eia gilemuliagu la visuli uru tamutou soio tetala. Eia veiagu ale amuto gogoa, veia amuto ilo buruko tai la vulovulo mutou ale kama kokora, veia amuto vagari moli ge taho loio taku, tio eau lolotia mai ele, eau sagege pepeho sesele.   
\p
\v 8 Eia sesele, eau pala kekesia mutou, eau mera gurusi seselea mutou, amuto ilo buruko pepeho. Eala moli eau kama ilo buruko ovola, eia la vitetelila moli. Sesele, pala, eau ilo buruko ale eau veia amuto gabuti la mahelala uru te la merera taku,  
\v 9 eala moli eau loloa veia la merera taku eia tubu, amuto goio gabutatala rivu lou la vulovulo mutou ale kama kokora, amuto goio vulo halaba, tio eau loloa mai ele, eau sagege pepeho. Eau kama sagege ale amuto ilo buruko la merera taku, eau sagege moli ale amuto vulo halaba lou. Amuto ilo buruko, la vuhula La Tahalo Uru eia ubi la tia mutou la merera taku, eala la merera taku ele eia kama vipou marapa amutou.  
\v 10 Ale La Tahalo Uru ge vailo buruko etatou mai ele, alele la gauru la vimahulila tetala somai tegatou ale te Kraist, etato umala ge mahela ovola. Eala moli mai la tahalo ale kama rovi e Kraist, eia ge ilo buruko la iruru tetala veia ge vulo la vulovulola, ale eia ilo buruko bulalahu moli. La iloburukola tetala eia kama koramulia ge vimahulia, eia ge visibitala moli la pileho.  
\v 11 Sesele, amuto gabutia la iloburukola, eala moli eia suli moli amutou, ale la igogolu te La Tahalo Uru moli oilo te la tia mutou ele. Ale igoie amuto vulo halaba seseleti. Amuto vagari veia ge pou tigi lou, amuto vagari veia ge piligi taro la iruru. Amuto karutu sesele, amuto taga, amuto gabutatala papai, amuto vagari sesele veia ge vimatata la iruru. Ealale, amuto sibitala marokati lou.  
\v 12 Sesele, eau kekesia mutou, eau vile la tahalo ale igo la iruru kabili tamutou, me la tahalo tai ale eia igo la iruru soio tetala. Eala moli la vuhu la kekesi taku sesele kama oio te la vimatata la pagale. La masasagala taku sesele te la merera taku ale eau pala kekesia mutou, eau veia La Tahalo Uru ge vahilo le amutou veia etato vitau me tabara sesele, amuto puhi tatahoau.  
\v 13 Eala, eau loloa veia amuto vulo marokati lou, eau sagege pepeho pasi, la vuhula etato vitau me tabara tatahoti lou.  
\p Eia sesele, eau sagege pepeho te la merera ale loio tamutou ele, eala moli e tabara gatou e Taitas tai, eia sagege sesele, tio eau hiloa mai ele, eau lege sisigi pasi. Amuto veiala la merera ale taritigi, e maura kati gabutatala papai tamutou ele.  
\v 14 Eau pala veiala la merera usu tamutou veia amutou e tabaragu sesele te Kraist, tio igoie eia hilotia veia la merera taku eia sesele tomi moli, eala eau kamati mahela lou leia tamutou ele. La merera taku soio tamutou eia sesele tomi moli, mai tai ele la merera tomi taku soio te Taitas ele, ale eau vei tataho amutou soio tetala, eia sesele tomi moli tai.  
\v 15 E maura e Taitas, eia gabutatala rivu lou ale eia pala guvi tamutou ele, amuto roromuli molia, amuto lolo vulai tataho, amuto togo molia, amuto gabu tikumu moli la merera tetala, tio ale igoie eia ge gabutatala rivu lou la vulovulo mutou ale taritigi pepeho soio tetalale, eia lege sisigi sesele le amutou.  
\v 16 Ale igoie eau gabutatala la pulolou tamutou e Korin veia eia matata seseleti, eau sagege pepeho pasi, la vuhula eau rovia veia amutou kati ge ruru lou.   
\c 8  
\s1 La tahalo te Kraist eia ge la tahalo la visuli sesele  
\p
\v 1 Amuto tabarabaragu, eau masagea veia amuto ge rovia veia egiteu la valalua la lotu oio e Masedonia, La Tahalo Uru eia suli legiteu la gilogo ale uru.  
\v 2 Egite ligi, e Satan eia tovo lalai vagari egiteu, eala moli egite kama gabutatalea, la tia giteu volu moli la sagegela, egite pou la savelela sesele, eala moli igoie egite la tahalo la mutelela sesele.  
\v 3 Mai la tilau vikapopo la uati etato rararagia veia ge sovea giteu e tabarabara gatou te Kraist oio e Iudea, tio, eau vei seselea mutou, egite Masedonia pou la savelela, eala moli egite pigi uru sesele la vaabila, koramuli la uati bakisi ale egite taholea. Egite kama gabutatala la savelela tegiteu, egite suli pepeho moli e tabarabara giteu te la tilau vikapopo la uati. Isa kama karasuku egiteu,  
\v 4 eala moli egite kaka gogogo amiteu veia amite ge masaga molia veia egite tai ge suli egiteu e tabarabara giteu, mai te la tilau vikapopo la uati.  
\v 5 Amite karutu tai ale egite sugu taro la mahulila tegiteu soio te La Uru, egite goio vulo halaba lou mai ele, eala moli egite goio sugu taro lou egiteu somai tamiteu la bilalaha tai veia la merera ale mave te La Tahalo Uru ale amite ge baha egiteu ovola, egite veia ge igo molia, kama ge tou.  
\v 6 Egite vagari moli mai ele, tio amite goio baha taro e Taitas somai tamutou veia ge kaka lalai tai amutou la uati, la vuhula eia pala soko la igogolu alele soio tamutou. Amite bahea mai ele veia eia ge vikaluvu sesele la igogolu tetalale veia ge vitapasi sesele la gilogo tamutou te la tilau vikapopo la uati.  
\v 7 Amutou la tahalo me la tavile la tautaulailo sesele, la merera me la mari tamutou eia taritigi pepeho moli. Amuto vagari tavu la igogolu te Kraist, me amuto vipuhi tigi tai amiteu la bilalaha tetala. Tio, oio volale, amite kaka gogogo amutou veia amuto ge vagari tai te la gilogo mai la piligi la uati ale ge suli egiteu e tabarabara mutou ale pou la savelela.  
\v 8 Ale eau kama sugu taro amutou ovola. Eau kaka moli amutou veia eau ge hiloa veia amutou la tahalo me la tavile sesele te Kraist mai egiteu e Masedonia, ka ouka?  
\v 9 Amuto rovitia veia la gilogo te Iesus Kraist, La Uru gatou, la gilogo tetala soio tamutou eia uru sesele. Eia pou la balavala sesele oata te Tamala, eala moli eia vibisi lou eia, eia gomai te la maututula, eia pou mai la morivava, veia ge suli amutou mai ele veia ge vauru amutou, veia ge vibalava sesele la kalulu mutou, veia amuto ge pou la balavala sesele.   
\p
\v 10 Tio, la gabutatalala taku soio tamutou te la tilau vikapopo la uati, eia maie: Te la leavala ale kaluvuti ale amuto lolo vuti la savelela tegiteu oio e Iudea, la merera alele eia ubi pala muga la tia mutou e Korin, amuto raga tavu la visuli, egiteu la valalua te Kraist te la maututula isapolo, egite mulimuli sesele tamutou, amuto vimuga sesele te la tilau vikapopo la uati.  
\v 11 Taritigi veia amuto ge vagari tavu loua, amuto ge vikaluvu sesele la tilau vikapopo la uati ale amuto sokotia. La igogolu tamutou oio vola eia ge taritigi mai la vulovulo mutou ale pala, amuto isasasa ge pigi la uati, mai eme la uati uru, eme ge pigi la uati uru, mai eme tahola la uati ale bakisi moli, eme ge pigi moli ilua.  
\v 12 Mai la masasagala tamutou isasasa ge oio sesele ovola, La Uru eia ge lege sisigi moli la vaabila tamutou. Eia kama masaga veia isa ge vavala veia ge pigi la uati uru mai eia la uati ouka. Taritigi amuto isasasa ge vaabila soio tegiteu mai la uati moli bakisi ale amuto taholea.  
\v 13 Eau kama masaga veia egite la valalua te Kraist oio e Iudea ge mavulaha bulalahu, eala moli amutou ale suli egiteu ge vavala. Eau masaga molia veia etatou ale te Kraist ge visauru tomi moli.  
\v 14 Igoie, amuto pou la balavala, eala eia taritigi veia amuto ge suli egiteu ale te Kraist oio e Iudea. Mai mulimuli egite ge pou la balavala, me amuto ge pou la savelela, egite ge suli rivu lou amutou, ge koli la vulovulo mutou ale taritigi soio tegiteu. Eala, etato tomi ge visauru moli mai ele.  
\v 15 Mai la merera te La Buk Tabu Ale Pala te la tabari la ilali tegiteu e Israel eia visauru moli, la merera ale eia veia maie:  
\li1 Eia ale abi la ilali ale uru,  
\li1 eia abi moli la ilali ale koramuli eia.  
\li1 Eala moli mai isa tai abi la ilali ale bakisi moli,  
\li1 eia kama savele, ale bakisi eia abia,  
\li1 eia koramuli sesele eia.   
\s1 E Taitas me egiteu la bilalaha isahari ge goio e Korin  
\p
\v 16 Eau vei tataho sesele La Tahalo Uru ale eia vitivura la gabutatalala te Taitas, eia gogo amutou e Korin mai sesele eau tai gogo amutou.  
\v 17 Eau tahia veia eia ge goio tamutou, eia sagege moli, eia masaga pepehoa. Mai eau kama ge tahia, soioge eia sekela ge vahiliti la gabutatalala alele veia eia ge hari lalai amutou.  
\v 18 La tahalo isasa ale taritigi pepeho sesele, eia ge vikapopo tai le Taitas soio tamutou. Eia e tabara gatou isasa ale la valalua la lotu tomi vaisale seselea veia eia bole la igogolu ale uru te la valolo ale taritigi te Kraist.  
\v 19 Egite hilovi la tahalo alele veia eia ge vikapopo le amiteu la bilalaha, ale amite ge vahari soio e Ierusalem la uati ale amite vitau kapopotia. La uati alele, amite baumulia veia ge vaisale La Uru oio vola veia ge veipalea tai mai ele veia amite masaga molia veia ge suli egiteu ale pou la savelela.  
\v 20 Amuto pigiti la uati uru, eia taritigi pepeho, eala moli amite masaga molia veia ge vibaumuli tataho ovola, egite soukama ge kaua miteu veia amite virurua.  
\v 21 Amite masagea veia ge vibaumuli tataho ovola, veia La Uru me amuto la valalua tai ge hiloa veia amite igo seselea, la iruru ouka.   
\p
\v 22 E tabara gatou uru te Kraist tai ge vitilimuli le Taitas mira soio tamutou ele, eau bahea. Eia veipalatia te la vulovulola veia eia la tahalo te Kraist sesele. Igoie tai eia mai ale veipalatia veia eia gabu tikumu amutou e Korin tai veia amuto sau tola seseleti e Kraist.  
\v 23 E Taitas tai ele, eia e tabaragu sesele te la igogolu te Kraist kabili tamutou. Me egira taho lua tai ale eau veitia mutou ovola, egira la bilalaha sesele ale loio te la valalua me hatavivile tomi te Kraist omai e Masedonia. Egite hilovi seseleti egirua, la vulovulo girua ale taritigi eia veipala la vaisalela ale uru soata te Kraist.  
\v 24 Taritigi amuto ge baumuli tataho egiteu taho tolu e Taitas miteu ele. Mai la vibaumulila ale taritigi amuto ge igoa soio tegiteu, egite ge matagaga sesele te la vuhu la merera taku ale eau vei tataho amutou soio tegite. Mai ge mai ele, la valalua me hatavivile te Kraist te la maututula tomi ge rovia veia eia sesele moli ale eau veia amutou e Korin la valalua te Kraist ale taritigi.   
\c 9  
\s1 La visuli soio tegiteu e tabarabara gatou te Kraist  
\p
\v 1 Amuto rovitia veia la tilau vikapopo la uati eia ge suli egiteu la valalua te La Tahalo Uru ale pou la savelela oio e Iudea. Ale amuto rovitia, eau kama ge lapu malau lou la merera oio vola.  
\v 2 Eau rovia, amuto masaga seselea veia ge pigi la uati veia amuto tai ge suli la vaabila alele. Mai alele eau veitia giteu e Masedonia veia amutou e Korin la tahalo la mutelela sesele. Eau veia giteu maie mago “Egiteu la valalua te Kraist oio e Akaia, me te la mautu e Korin ele, egite raragiti veia ge visuli soio tegiteu e Iuda, la leavala isasa kaluvuti egite pou raragi mai ele.” Eau veia giteu e Masedonia mai ele, egite loloa, egite vagari veia egite tai ge visuli.  
\v 3-4 Eala moli igoie egite boleti la igogolu alele, me amuto piligiti loua. Igo tigi, egiteu e Masedonia isahari soukama ge mulimuliau soio tamutou, egite soukama ge sivutia veia amuto la iraragi la uati ouka, etato tomi ge mahela, la vuhula eau vei tatahoti amutou soio tegite. Eala eau bahati egiteu e tabarabara gatou taho tolu e Taitas miteu, veia egite ge gomai muga tamutou veia ge karasuku amutou te la iraragi la uati, amuto ge raragi tigi, la vuhula eau vei tatahoti amutou soio tegiteu e Masedonia veia amutou la valalua la mutelela sesele, veia la vaabila ale uru ge raragi oio tamutou. Taritigi amuto ge raragi tigi la uati, eau soukama visigolo egiteu te la vei tatahola taku soio tegite, ale eau vei tataho la vulovulo mutou e Korin ele.  
\v 5 Eala, eau baha pala muga egiteu e tabara gatou te Kraist taho tolu, e Taitas mite, veia egite ge muga somai tamutou, ge vahiliti lou la gabutatalala tamutou te la tilau vikapopo la uati veia ge viboru tigi la vipigi vulola oio vola ale pala amuto veia amuto ge pigi la uati ale uru sesele te la visuli tegiteu ale pou la savelela. Eala la iraragila tamutou eia ge pou tataho vikapopo la sagegela ale uru sesele tai. Eala eau veia ge baha pala muga egiteu taho tolu soio tamutou, amuto soukama ge karutu la kilaka la uati taku mulimuli, veia amuto ge igo totolo, ge mahela, la vuhula eau baha mamugati la merera somai.   
\p
\v 6 Gabutatala tigi, la tahalo ale galu la ilali ale usu, eia ge balava la ilali ale usu. Eala moli la tahalo ale galu moli bakisi, eia la ilali kama ge usu. Mai tai ele, mai amuto ge mutele, la kilolila ale uru ge oio, mai ge ouka, amuto kama ge sau tola la kilolila ale taritigi.  
\v 7 Amuto isasasa ge gabutatala tigi muga oilo te la gabutatalala tamutou veia amuto ge vaabila la uati iriva. Kama ge veia amite la bilalaha karasuku amutou ovola. Eia kama la paga tai te la maisu totolola. Eala moli eia taritigi pepeho veia amuto ge pigi la uati la visuli mai te la masasagala moli, la sagegela uru te la tia mutou, La Tahalo Uru ge isu sesele la vulovulo mutou ale taritigi mai ele.  
\v 8 La Tahalo Uru eia koramuli taia ge vauru la gilogo tetala soio tamutou veia amuto ge pou moli la balavala, la savelela ge ouka, la uati uru tai ge oio koramulia veia amuto ge suli la igogolu tomi ale taritigi oio vola.  
\v 9 Mai La Buk Tabu Ale Pala eia veia maie “La Uru eia suli pepeho egiteu ale pou la savelela, la gilogo tetala eia kama ge kaluvu.”  
\v 10 La Tahalo Uru eia visibitala somai tegatou la ilali ale etato galugalua, eia vitubu tai la ilali tegatou te la mahuma, eala eia matagaga moli mai ele veia te la gilogo tetala ale uru eia ge vauru tataho la papaga tomi ale amuto galua, la vulovulo mutou tai te la mutelela eia ge vaurua mai ele. Oio vola amuto ge koramulia ge suli pepeho lou la valalua mapaiti te la merera te La Uru, la vuhula amuto pouti la balavala.  
\v 11 Eia ge vibalava pepeho amutou te la leavalavala tomi, amuto ge koramulia mai ele veia ge suli bibibi la valalua me hatavivile tomi ale pou la savelela, egite usu ge vei tataho sesele La Tahalo Uru te la vaabila tamutou ale amite ge vaharia soio tegiteu.  
\v 12 La vuhula, la visuli tamutou ele, eia kama ge suli moli egiteu ale pou la savelela, eia ge veipala tai la vaisalela soata te La Tahalo Uru, ale egite ge vei tatahoa te la gilogo tamutou ale taritigi sesele.  
\v 13 La valalua usu ge hiloa veia amuto rovi la vulovulo la gilogo, tio egite ge rovia mai ele veia amuto te Kraist sesele, egite ge goio ge vaisale sesele La Tahalo Uru mai ele, la vuhula egite hilotia veia amuto kama veipala bulalahu la valolo ale taritigi te Kraist, amuto roromuli sesele la masovala, amuto rovi sesele la vulovulo la gilogo me la mutelela ale amuto kama vitouale isasa la visuli te la pulolou la balavala tamutou.  
\v 14 Egiteu ale pou la savelela ge pou te la kilaka, egite ge gogo sesele amutou, la vuhula amuto volu sesele la gilogo te La Tahalo Uru.  
\v 15 Taritigi pepeho soata te La Tahalo Uru te la vaabila tetala tavu etatou, ale eia abia gatou e Latula e Kraist. La vaabilala alele, eia uru sesele. Etato la tahalo la vovo isa kama koramulia ge veipala tomi la vuhula, teale eia isapolo viruru. Taritigi pepeho soata tetala te la vaabila tetala ale uru ele.   
\c 10  
\s1 E Pol puta rivu la merera tegiteu ale vile la igogolu tetala  
\p
\v 1 Eau, e Pol, eau kaka gogogo amutou e Korin ele veia amuto ge hele taro la vulovulo la vareagila. Ale eau kaka gogogo amutou te la gilogo te Kraist sesele, eau kama gusia mutou. Eala moli isahari tamutou ele, amuto ubi leau la merera veia mai eau ge oio tamutou, eau vikara gauma amutou, eala moli mai eau ge pou malau, eau ge vikara papai amutou, eau ge vagari la merera. Amutou kauagu mai ele.  
\v 2 Eau kaka gogogo sesele amutou veia mai eau ge guvi tamutou, amuto umala ge karasukuau te la vareagila tamutou veia eau ge vikara vagari, la vuhula eau rovia la valalua isahari tamutou ele, egite gabutatala eau veia eau la golu bulalahu veia eau igogolu moli te la masasagala moli te la vovo. Eau ge guvi, eau ge mera gere sesele egiteu ale kauagu mai ele.  
\v 3-4 Eia sesele, eau la tahalo la vovo moli, eala moli eau vaubi soio te Satan te la vagagarila te Kraist, kama te la vagagarila taku moli te la vovo. La vagagarila te La Tahalo Uru, eia uru sesele, eia koramulia ge bolehoho la vagagarila te Satan. Mai isa ge magiri veia ge oso lulu la merera te Kraist, eau koramulia ge putu oli lou eia.  
\v 5 Mai isa ge vauru lou eia veia eia kama ge lolo la merera te La Tahalo Uru, tio eau ge igo mahela loua te la merera taku. Mai isa ge vareagi, eau ge magiri robo loua, eau ge lapu rivu loua soio te La Tahalo Uru, eia ge vulo halaba lou, eia ge roromuli lou la merera te Kraist. La igogolu tomi alele, eau igo molia te la vagagarila te La Tahalo Uru.  
\v 6 Te la vagagarila te La Tahalo Uru moli eau ge vikaluvu la vareagila tamutou e Korin, amuto ge piligi la vulovulo mutou ale kama kokora, amuto ge goilo halaba lou te Kraist. Eala moli eau raragi moliti veia ge bolehoho lou egiteu la tahalo la vareagila oio tamutou mai egite ge hiliti lou.   
\p
\v 7 Eau masagea veia amuto ge matagaga tigi. Mai isa veia eia te Kraist, taritigi eia ge rovia veia eau e Pol, eau tai te Kraist. Amuto veia eau la golu bulalahu, eala moli la vagagarila te Kraist eia oio sesele taku.  
\v 8 Eau muga sesele amutou. Ale eau vikara mai ele, eau kama vauru lou eau, la vuhula eau la mulugaluga sesele tamutou ele. Ale eau muga amutou, eau te la visuli moli, kama te la viligila veia ge igo gegeru amutou. Eau kama mahela te la pulolou la mulugaluga,  
\v 9 eala eia taritigi amuto ge rovia veia eau kama vikara bulalahu te la merera taku ale eau pala kekesia mutou.  
\v 10 Isahari tamutou egite vikara maie “Eia kekesia gatou, eia la vikararala tikumu mai la merera te la tahalo sesele, eala moli mai eia ge guvi, amuto ge hiloa veia eia la golu bulalahu, la merera tetala tai eia mavulaha.”  
\v 11 Ioge, taritigi egite ge matagaga veia la igototolola taku ale egite gigia te la merera ale eau pala kekesia mutou, egite ge lolo seselea te la haregu mai eau ge guvi tamutou ele.   
\p
\v 12 Eau kama ge vei tataho rivu lou eau veia eau la tahalo sesele mai egiteu la tahalo la visigologolola oio tamutou ale vauru lou egiteu veia egite taritigi. Egite mata muli lou egiteu, eala egite veia egiteu la tahalo sesele. Egite vei tataho rivu lou egiteu mai ele, egite paua viruru!  
\v 13 Eau kama te la vulovulo giteu ale mai ele. Mai eau ge vei tataho rivu lou eau, eau ge vikara sesele mai te la igogolu taku moli ale eau igoa, La Tahalo Uru eia tabaria somai taku, mai tai la vibaumulila soio tamutou e Korin.  
\v 14-15 Ale la tabarila taku sesele, eau kama visigolo veia ge vei tatahoau te la igogolu tegiteu la bilalaha ale isapolo. La vuhula eau vimuga sesele soio tamutou te la valolo ale taritigi te Iesus Kraist, amuto oilo seseleti te la merauala taku ale La Tahalo Uru eia tabaria somai taku. Eia sesele, egite isahari lou igogolu kabili tamutou te la isale Kraist, eia taritigi pepeho moli, eala moli egite kama koramulia ge kau tavua gite veia amutou e Korin kama la valalua taku, la vuhula eau vimuga soio tamutou te la valolo te Kraist. Eala moli eau masaga pepehoa veia la tautaulailo tamutou ge tubu uru, veia eau ge koramulia ge vauru lou la igogolu te Kraist kabili tamutou, mai la tabarila tetala somai taku.  
\v 16 Mai ge mai ele, eau ge koramulia ge vahari la merera te Kraist soio tegiteu la maututula lou ale malau loio tamutou ele, egite soukama loloa. Eala, isa kamati ge koramulia ge uleagu veia eau valolo te la baa tegiteu la bilalaha ale isapolo, veia eau poloti la igagala te la tabarila te La Tahalo Uru somai taku te la igogolu la valolo te Kraist. Eau kama masagea veia ge vei tataho louau te la igogolu te la tahalo isapolo.  
\v 17 Eala moli eau kama gabutatala la vei tatahola. Mai la merera te La Buk Tabu Ale Pala eia veia maie “Mai isa masagea veia ge ababa la isala, taritigi eia ge ababa moli la isa La Uru.”  
\v 18 Etato kama ge sibitala maroka te la vei tatahola tegatou lou, ouka, eala moli mai La Uru ge vei tataho etatou, la valalua ge rovia mai ele veia etatou la tahalo me la tavile te Kraist sesele.   
\c 11  
\s1 E Pol veipala la vulovulo giteu la bilalaha la visigologolola  
\p
\v 1 Te la merera taku ale eau so veveia mutou ovola, ale eau vei tataho lou eau, eau vikara mai la paua. Eala moli eau masagea veia amuto umala ge silaha harari la merera taku kara eau ge veipala tomi la gabutatalala taku.  
\v 2 Eau gabu sesele amutou te la gilabu ale uru mai la gilabu me la iloburukola te La Tahalo Uru sesele. Eau masagea veia amuto ge tau la ilo mutou soio te la tahalo isa sekela, e Kraist moli, mai la sobe eia ge tau la ilola soio te haruala sekela, eia kamati ge osaosa.  
\v 3 Eala moli eau taga, egite la tahalo la visigologolola soukama ge viruru la gabutatalala tamutou, veia amuto kati ge sau tola tigi sesele e Kraist. Amuto soukama ge ruru mai e Eva, e taive visigoloa, eia virurua.  
\v 4 Mai isa ge guvi tamutou, eia ge veia mutou la valolo ale kama sesele te la isale Iesus, amuto masaga harari molia. Mai egite ge vahilo le amutou la igogolu te Satan ale marasa, kama la igogolu te La Kalulu La Marokala, tio amuto gabu tikumu harari molia. Mai egite ge valolo amutou la merera ale isapolo, eia kama la valolo te Kraist sesele mai eau valolo amutou ovola, amuto goio sagege moliti la merera tegiteu ele!  
\v 5 Egiteu ale valolo amutou mai ele, egite veia egiteu la bilalaha te Kraist ale isapolo sesele, eala moli eau kama mahela legiteu.  
\v 6 Eia sesele, la valolo taku eia kama sibitala tataho te la haregu. Mai eau ge valolo, eau mera vavala moli le amutou, eala moli la seselela oio, amuto rovia, la vuhula amuto loloti la valolo taku vaka usu, eau vimariti amutou te la vuhu la merera tomi te La Uru.   
\p
\v 7 Eau valolo amutou pala, eau kama kaka la uati. Mave, amuto soioge veia eau la golu bulalahu, teale amuto kama lotoau te la valolo taku? Tiele, eau soioge ruru ale eau vibisi louau mai ele veia ge vauru amutou te la valolo taku ale taritigi.  
\v 8 Hilage, eau mai ale pakali la uati te la valalua te Kraist oio e Masedonia, la vuhula egite lotoau, eala moli eau kama suli egiteu, eau goio suli moli amutou e Korin la valolo taku.  
\v 9 Eau pou tamutou, eau kama abi bakisi la uati, egiteu e tabarabaragu te Kraist ale loio e Masedonia, egite moli suli leau la uati. Amuto soukama silaha la pulolou taku oio tamutou, eau kama ge kaka la uati veia amuto ge suliau ovola, amuto kama ge vavala leau.  
\v 10 La merera taku tai ele, eau ge veipalea soio te la lotu tomi oio la gale e Akaia, egite tomi ge loloa, egite ge rovia mai ele veia amutou e Korin la tahalo la visigologolola. Sesele oata te Kraist, eau kama ge makovu bakisi ovola.  
\v 11 Eala moli eau kama ge igoa mai ele veia ge gima amutou, ouka. La Tahalo Uru rovia veia eau gogo sesele amutou ele.  
\v 12 Eala moli eau veia ge veipalea veia amuto kama suli leau la uati te la valolo taku, eala eau veia ge barautu taro haria mai ele la merera tegiteu la bilalaha la visigologolola ale ababi la uati te la valolo tegiteu. Eau ge barautu taroa, la vuhula egite veia la igogolu tegiteu eia visauru me la igogolu taku, eala moli eau kama ababi la uati te la valolo taku, ouka sesele.  
\v 13 Egiteu alele, egite la bilalaha la visigologolola sesele, egite tutugolo amutou veia e Kraist baha egiteu, eala moli la igogolu tegiteu eia kama sesele.  
\v 14 Etato umala ge karutu la vulovulo giteu ale kama kokorale, la vuhula etato mata kilalati veia e Satan, eia la tahalo la tutugologolola, eia veia eia e angelo isa te la matagaga.  
\v 15 Eala, eia taritigi pepeho tai mai ele veia etato ge rovia veia egite la bilalaha te Satan tai ge tutugolo etatou veia egiteu la bilalaha te la vulovulo ale maroka. Egite ge poga la kilolila sesele, koramuli la iloto la iruru tegiteu ale tikumu.   
\s1 E Pol veipala la iligiligi ale uru eia gabua te la igogolu te Kraist  
\p
\v 16 Tio, eau vei matagaga loua mutou veia la merera la vei tatahola tomi alele, eia mai le merera la tilovo taku soio tamutou. Eala amuto isa umala ge veia eau paua te la vikararala taku ale eau vei tataho rivu lou eau. Eala moli mai amuto ge vagari veia ge ubi leau la merera veia eau paua, ioge, taritigi amuto ge pou tali mugeau, amuto ge lolo la merera la pauala taku lou, ale eau ge veia mutou gageie, mai la vei tatahola taku ale eau ge vauru louau te la igogolu te Kraist ale eau igoa.  
\v 17 Ale eau kama ge vikara mai te la masasagala te Kraist, eau vikara paua moliau,  
\v 18 la vuhula la valalua usu tamutou ele vei tataho lou egiteu, egite tilimuli la vulovulo ale kama kokora te la vovo mai ele. Tio eau veia eau tai ge vei tataho louau, eau ge tovo lalaia veia ge pepe egiteu, eau soioge ge muga.  
\v 19 Amutou e Korin, amuto soioge la tahalo me la tavile la mari, ia? Mai egiteu la valalua la visigologolola ale vikara paua ge valolo amutou la merera ale usu, amuto kama gabutatala papai ovola. La vuhula amuto la mari uru oio, eala amuto kama koramulia ge gabutatala papai te la mari papaila tegiteu ele, ia?  
\v 20 Mai egite masagea veia ge kisi tola le amutou la merera la visigologolola, amuto sagege moli. Mai tai egite masagea veia ge tutugolo amutou, amuto kama gabutatala papai. Mai egite veia ge abi la uati tamutou, amuto mata sosoli moli egiteu, amuto goio abi molia giteu! Mai egite masagea veia ge vauru lou egiteu, amuto veia eia taritigi moli. Mai isa masagea veia ge vile amutou veia amuto kama rovi sesele isa la paga, amuto sagege moli ovola!  
\v 21 Eau mahela pasi, la vuhula eau kama la tahalo sesele mai egiteu alele! Mai eau ge valolo vagari soio tamutou pala, soioge igoie amuto ge togoau mai amuto togo egiteu ele!  
\p Ioge, la vikararala taku ale pauale, eau ge tasuku loua. Mai isa ge vei tataho loua veia eia la tahalo sesele, eau tai ge koramulia ge vei tataho lou eau mai alele.  
\v 22 Mai egite ge hiliti ge veia egite la tau Hibru, tio eau tai la tau Hibru. Mai egite ge veia egiteu la tau Israel, tio eau tai la tau Israel. Mai egite ge veia egiteu e tutubule Abraham, eau tai e tubule Abraham isa.  
\v 23 Egiteu veia egite la bilalaha te Kraist, ia? Eau tai la bilalaha te Kraist, eala moli eau muga tegiteu te la igogolu taku soio tetala. Hilage, amuto karasukuau mai ele, eau vikara mai ale paua! La igogolu taku, eia vagari sesele te la igogolu tegiteu ele! Egiteu la valalua la gima vagoiloau te la luma la kilisi vaka usu, eala moli egiteu la bilalaha la visigologolola, egite kama kapi robo bibibi egiteu mai eau. Egite lubi vuloau, eala moli egiteu la bilalaha la visigologolola kama ligi pepeho mai ale. Vaka usu eau hagagaviti ge peho, eala moli egiteu la bilalaha la visigologolola ouka.  
\v 24 Vaka lima egiteu e Iuda kumamasiau. Egite lubiau mai ele vaka savulu tolu gete ualasiu mai te la vulovulo giteu ale egite vilai la tahalo la iruru sesele ovola.  
\v 25 Vaka tolu egiteu la valalua e Rom kue leau la obu, vakasa egite dumu leau la uati, vaka tolu eau vilua te sipi olau la tia la mago. Eau tabulibuli molila la obu te la tia la utu la logo isasa.  
\v 26 Eau tuga vulovulo moli, hagagavi eau ge tilomu te la lalu ale hae, hagagavi tai eau ge poga la viluala tegiteu la tahalo la pakalila. Egiteu e valaluagu e Iuda, egite masagea veia ge bili taroau, mulimuli tai egiteu la valalua la maligoma! Mai eau ge valolo oluma, egite masagea veia ge biliau. Mai eau ge tatuga te la tia la hohoi, vaka usu eau hagagaviti ge vilua ovola. Mai eau ge sae tai te sipi, vaka usu eau hagagavi ge vilua. Egiteu la valalua ale goilo gologolo moli te Kraist, egite tai masagea veia ge vibisi lou la igogolu taku.  
\v 27 Eau igogolu vagari, eau kama abi tigi la mavutala. Vaka usu eau peho la vitolola me la malehula. Eau gabu la maigi ale uru, la kairobola ouka, la luma tai ale ge mavuta ovola ouka.  
\v 28 Eala moli la paga isa uru tai te la gabutatalala taku, eau gabu tikumu amutou la valalua me hatavivile te la lotu te Kraist oio te la maututula tomi.  
\v 29 Mai isa ge marapa, eia kamati magiri vagari, eau tai la gabutatalala taku marapa. Mai isa ge tilo te la iruru, eau tai gabu la iloburukola ovola.   
\p
\v 30 Mai eau ge masagea veia ge vei tataho lou eau, taritigi eau ge veipala molia veia eau la tahalo isa ale kama vagari.  
\v 31 Etato ge vaisale La Tahalo Uru, eia e Tamale Iesus Kraist, La Uru gatou, etato ge vaisale molia te la haroharo tomi, la kaluvula ge ouka. Eia moli ge vitikumu la merera taku veia eia sesele tomi moli, eau kama visigolo amutou ale eau ge gilemulia mutou veia  
\v 32 oio e Damaskas, la bilalaha te la uru e Aretas, eia baha la valalua tetala, egite vagari robo la matapiro tomi te la mautu veia ge lao toleau.  
\v 33 Eala moli la valalua te Kraist abi isa uru la kela, eau goilo ovola, egite goio visaririau sotalo loata te la mata la luma ale oio te la igaga la mautu, eau hele.   
\c 12  
\s1 La Tahalo Uru eia vahiloti le Pol la hililo ale uru sesele  
\p
\v 1 Ioge, la vikarara la vei tatahola, ale eau vei tataho rivu lou eau mai la vulovulo mutou e Korin ele, eau veia ge lapu malau loua bakisi. La vikara bulalahula mai alele, eia kama ge suli isa la tahalo, eala moli eau ge vei molia, eau ge vei matagagea mutou tegiteu la hililo me la veipalala ale La Uru veipalatiagu.  
\v 2-3 La Uru eia abiau soata te la ilo la lage, ale eia igoa palati, la leavala savulusa gete vaa poloti.\f + \fr 12:2-3 \ft Ale e Pol pigi veia maie mago “Eau rovi la tahalo isasa te Kraist, La Uru abia soata te la itolu la gale tetala ale soata kililili te la ilo la lage.” Eala moli la masovala maie veia e Pol, eia hiloti la mautu te La Uru.\f* Eia soioge la vovogu tomi moli goata hiloa, uka la kalulugu moli, eau kama rovia, La Tahalo Uru moli rovia.  
\v 4 Eia abiau soata te la mautu la marokala, eau lolo la merera oio vola, eia isapolo sesele, eia kama koramuli etato la tahalo la vovo isa ge veipalea.  
\v 5 Eau koramulia ge vei tataho lou eau te la pagale, eala moli ouka, eau ge veipala molia veia eau la tahalo la vovo moli, eau kama vagari.  
\v 6 Sesele, mai eau ge vei tataho louau te la hililo taku ale eau hiloa oata te la ilo la lage, ale eau kama ge vikara mai la paua, la vuhula eau hilo seselea. Eala moli ouka, eau masaga molia veia amuto ge hilo la pulolou taku ale taritigi, la merera taku tai, amuto ge matagaga moli mai ele veia eau la tahalo te Kraist.   
\s1 E Pol sagege moli la ilea ale igo bare la vovola  
\p
\v 7 La Tahalo Uru, eia vahiloau kaluvu la hililo tetala ale uru, eia goio gabutatala lou veia eau soukama ge igo tataho eau ovola, eala eia goio visibitala isa la ilea somai taku, eia mai ale tatagu la vovogu mai la iri la vihilo, eia sibitala tatavuau te la imamala tomi mai la bilalaha te Satan, eia igo bare seseleau. Eia la ilea sesele, eau kama pigi vevei.  
\v 8 Vaka tolu eau tali tavu La Uru veia eia ge abi taro leau la pagale,  
\v 9 eala moli eia goio veiagu mago “Korale, la gilogo taku soio taume, eia koramulime. Mai eme ge gabua veia eme kama vagagari, ale eme ge koramulia ge gabu tataho la vagagarila taku sesele oio taume.” La Uru eia veiagu mai ele, eala eau ge sagege moli te la ilea ale igo bareau, la vuhula eau ge gabu la vagagarila te Kraist ale pou taku.  
\v 10 Eala, mai eau ge pou te la igogolu te Kraist, eau ge sagege moli ale eau ge gabua veia eau kama vagari. Eau ge sagege moli mai egite la valalua la gima ge vikara bareagu, ge tahi vile taiau. Eau ge sagege moli tai mai eau ge ligi, mai eau ge vavala tai te la igogolu taku te Kraist. La vuhula mai eau ge gabua veia eau kama vagari, tio eau ge koramulia mai ele veia ge magiri vagari moli te la vagagarila te Kraist.   
\s1 E Pol gabutatala marapa soio tegiteu e Korin  
\p
\v 11 Eia sesele, ale eau vei tataho lou eau, eau vikara mai la paua, eala moli la vulovulo mutou e Korin lou eia karasukuau ovola, ale amuto vei tataho amutou veia amutou la tahalo la mari. Eia koramuli molia veia amutou ge vei tatahoau, la vuhula eau suli pepeho amutou. Eia sesele, eau la tahalo bulalahu moli, eala moli la igogolu taku eia kama bisi te la igogolu tegiteu la bilalaha la visigologolola ale amuto gabu tikumu egiteu.  
\v 12 La irovilala tomi te la bilalaha te Kraist, eau igotia kabili tamutou, amuto hiloa, mai la golu la karutula, la igogolu tai ale vagari, eia isapolo sesele, amuto hilotia te la limagu, eau kama silaha, eau igo molia, kama maila.  
\v 13 Eau kama suli moli la valalua la lotu te la maututula ale isapolo, veia oio tamutou eau ge tau moli la marasala, ouka sesele. Eau kaka la uati oio te la maututula, eala moli omai tamutou ouka. Soioge te la vulovulogu alele amuto ge veia eau vibisi amutou mai la tahalo la morivava, ia? Hilage, amuto soioge veia eau ge ruruti ale eau kama abi la uati oio tamutou! Taritigi amuto ge vimavulaha eau te la iruru taku alele!   
\p
\v 14 Eau raragiti veia ge hari lalai lou amutou la vaka tolula. Eala moli amuto kama ge silaha la pulolou taku oio tamutou, la vuhula eau kama masaga la uati tamutou, eau masaga molia veia amuto ge hagagavi lou taku, etato ge vipuhi tigi lou, amuto ge la valalua me hatavivile taku lou. Amuto rovia, e guliliki isa kama koramulia veia ge baumuli e tamala, e tilala la uati. Eala moli e tamala me tilala moli ge baumuli e latu girua.  
\v 15 Eau tai mai ele, eau kama ge pou tali amutou veia amuto ge suli leau la uati, eau moli ge pigi la uati taku tomi, la vagagarila taku tomi tai, veia ge suli amutou. Mai eau ge gogo pepeho amutou mai ele, mave amuto kama ge koramulia ge koli tigi la vulovulogu bakisi ale taritigi ele, veia amuto ge gogo rivu lou eau?   
\p
\v 16 Eala moli isahari tamutou soioge ge vikara maie mago “Eia sesele, e Pol kama kaka la uati veia etato ge ligi la pulolou tetala omai tegatou, eala moli eia tutugolo etatou, eia masaga molia veia etato ge tau vikapopo la uati, eala moli la uati alele, eia tetala moli.”  
\v 17 Ioge, eau veia ge tahi amutou maie: Mave, isa tegiteu ale eau baha egite, eia tutugolo amutou?  
\v 18 Ale pala eau baha e Taitas, eau baha tai e tabara gatou isa lou veia ge tilimulia, mave, e Taitas pakali la uati tamutou? Amila me Taitas tomi roromuli La Kalulu La Marokala, amila tomi rovi la gauru isa moli sekela, ale te Kraist, amila kama koramulia ge pakali.   
\p
\v 19 Eala moli amuto soioge gabutatalea veia eau giriri, ia? Ouka sesele! La Tahalo Uru moli lolo la merera taku veia eia sesele, la vikararala taku tomi la vikararala te la tahalo te Kraist, eau kama vikara veia ge giriri, veia ge suliau, eau vikara moli veia ge viteteli amutou.  
\v 20 Eau gabutatala papai tamutou ele, la vuhula eau gabutatalea veia eau soukama ge guvi, amuto ge soloio te la vulovulo la vareagila, tio amuto ge hilo la vulovulogu tai ale kama kokora mai eau ge igo totolo amutou. Eau makuku, la vuhula eau soukama ge poga la vaigigola, la maisu totolola, la igototolola, la vigagimala, la mera kukumula, la veia mulimulila, la vareagila me la marapala oio tamutou ele.  
\v 21 Eau taga sesele, la vuhula La Tahalo Uru eia soukama ge mata sosoliau veia eau ge poga tavu amutou kabili te la vulovulo mutou ale kama kokorale, eau ge mahela pepeho le amutou, La Tahalo Uru soukama ge vibisiau mai ele. Eau ge guvi, eau soioge ge ilo buruko le amutou la tahalo me la tavile la iruru usu, ale amuto soukama gabutatala rivu lou la iruru tamutou veia ge veipalea soio te La Uru veia amuto ge maroka lou. Amuto usu soioge ge soloio te la iruru tomi ale kama kokora, mai la iligo la iruru soio te la tavile, me la tahalo, la ilosa, la mata bulakalaka, me la vareagila tai.   
\c 13  
\s1 La tapasi la vitetelila te Pol soio tegiteu  
\p
\v 1 Ale eau ge gomai lou tamutou e Korin, eia ge la vaitolu la tuluga taku somai tamutou. Me eau veia ge vei matagagea mutou veia “mai isa masagea veia ge ubi la tahalo la iruru la merera, taritigi egiteu taho lua uka taho tolu ale egite hilo seseleti la iruru tetala, egite ge veipalea, amuto ge rovia veia eia sesele moli mai ele veia eia ruru seseleti.” Ioge, ale ge la vaitolu la mera tarola taku soio tamutou.  
\v 2 Ale pala eau goio tamutou la vaka luala, eau mera taro amutou te la vareagila. Tio, eau soukama goiole, eau veia ge mera taro amutou vakasa lou maie: Mai eau ge guvi tamutou, eau kama ge gogo isa la tahalo me la tavile ale ruru pala, me egiteu tai ale so rururu moli, eau ge igo totolo amutou tomi.  
\v 3 Amuto ge gabu seselea veia la merera te Kraist eia oio sesele taku, isa kati ge tahi taroau. Amuto rovia veia e Kraist eia kama la tahalo bulalahu, eala moli eia igogolu vagari moli kabili tamutou.  
\v 4 Eia sesele, egite katu tolea oata te la tauvalautu, eia mata mai ale kama vagari, eala moli eia igoie mahuliti te la vagagarila te La Tahalo Uru sesele. Eau tai, eau kama vagari, eau la tahalo la vovo moli, eau la tahalo bulalahu, eala moli eau sau tola tomi la vagagarila te La Tahalo Uru koramuli eau ge vimatata la vulovulo mutou e Korin ele.   
\p
\v 5 Taritigi amuto isasasa ge mata muli tigi la vulovulo mutou lou veia amuto soloio te Kraist, ka oukati. Tovo lalai la tautaulailo tamutou isasasa te Kraist ele. Mave, eme mata kilalati veia e Iesus Kraist eia mahuli vikapopo lemeie, eme gabua veia eme tetala? Mai ge ouka, eme soioge boruti!  
\v 6 Eala moli taritigi veia mai eau ge guvi tamutou ele, amuto ge matagaga veia eau, e Pol, eau kama boru, e Kraist eia mahuli moli oio taku.  
\v 7 Eau kaka vagari La Tahalo Uru veia amuto umala ge ruru. Eau kama gabutatala eau veia la valalua ge vei tatahoau ale eau pala valolo amutou, veia igoie amuto pou tataho ovola, ouka. Eau ge sagege moli mai amuto moli ge pou tigi, eala moli eau ge mata mai ale boruti, ale eau ge sagege pepeho moli mai ele.  
\v 8 Eau masaga molia veia la vitetelila taku ge te la vahiliti la vulovulo ale matata, eau kama masaga seselea veia la valolo taku ge vagari mai la igototolola te la tahalo ale vagari veia eau ge mata muli moli la vulovulo mutou tomi ale kama matata.  
\v 9 Eia taritigi pepeho taku veia amuto ge vulo pala muga te la guluvi taku, eau ge guvi, la valolo taku ge mai la valolo ale kama vagari agi tamutou. Eala moli amutou, amuto ge magiri vagari, eala eau kaka La Uru veia amuto ge vulo, amuto ge sibitala maroka lou.  
\v 10 Eau kekesi pala muga soio tamutou veia amuto ge lolo haria, veia amuto ge vuvulo, veia mai eau ge guvi, eau kamati ge tivura lou te la vimatata la iruru. La vuhula La Uru eia kama abiagu la vagagarila me la igogolu tetalale veia eau ge igo gegeru amutou, eala moli eia masaga molia veia eau ge vagari moli, veia ge vivagari la tautaulailo tamutou, amuto ge pou tigi lou.   
\s1 La tapasi la merera  
\p
\v 11 Te la tapasi la merera taku tavu amutou e tabarabaragu ele, eau veia mutou la merera ale taritigi maie: Taritigi amuto ge pou la sagegela; taritigi tai veia amuto ge tovo lalai vagari veia ge maroka mai e Kraist; amuto ge lolo tomi la merera taku, ge roromulia; amuto ge vipuhi tigi tataho. La Tahalo Uru, eia la vuhu la gilogo, eia ge pou tamutou, la tia mutou oilo ge malilo tataho.   
\p
\v 12 Taritigi pepeho veia amuto ge sagege robo tavu egiteu e tabarabara mutou tomi te la isale Kraist.  
\v 13 Egiteu la valalua me hatavivile tomi te La Tahalo Uru ale omai, egite laharo seselea mutou. Taritigi pepeho veia la gilogo te Iesus Kraist, La Uru gatou, eia ge pou tamutou. La visuli uru tai te La Tahalo Uru, amuto ge sau tolea. Taritigi amuto ge gabua veia La Kalulu La Marokala, eia ge pou te la tia mutou tomi. Eala moli ele.  
\cls Eau e Pol.