\id 1PE - Nakanai NT [nak] -Papua New Guinea 1983 (DBL 2014) 
\h 1 PITA 
\toc1 Ale La Muluga La Merera Te Pita 
\toc2 1 Pita 
\toc3 1 Pit 
\mt1 ALE LA MULUGA LA MERERA TE PITA  
\c 1  
\p
\v 1 Eiau e Pita, eau la bilalaha te Iesus Kraist, eau kekesia mutou la valalua me hatavivile ale pou la mosi kabili tegiteu la maututula e Pontas, e Galesia, e Kapadosia, e Esia me Bitinia.  
\v 2 La Tahalo Uru, e Tama gatou, eia hiloviti amutou alaurati, veia amuto ge tetala, La Kalulu La Marokala eia visibitala halaba seseleti amutou, La Tahalo Uru eia vuhi amutou me la kasosole Iesus Kraist, veia amuto ge roromuli seselea. Taritigi la gilogo me la vibalavala te La Tahalo Uru eia ge volu sesele tamutou, la tia mutou oilo ge malilo tataho.   
\s1 La mahulila ale taritigi oata te La Tahalo Uru  
\p
\v 3 Etato ge vaisale La Tahalo Uru, la vuhula eia gogo sesele etatou, eia abia gatou la mahulila ale halaba oio te Latula e Iesus Kraist. La Tahalo Uru vahiliti rivu e Kraist te la pileho, eia vagoilo etatou te la maratatila tetala. Ale la golu la sagegela tegatou, la vuhula etato mulimuli ge sau tola la mahulila ale kama ge kaluvu.  
\v 4 E Tama gatou, La Tahalo Uru, eia oio sau tola la vibalavala ale la sasabe me kososuke kama koramulia ge koroa. La vaabila tetala alele, eia kama ge kaleso, me eia kama ge mata milololo. La Tahalo Uru tau tolea veia eia ge tegatou e latatula.  
\v 5 La vibalavala tetala alele, eia ge tamutou ale La Tahalo Uru bigomu roboti amutou te la vagagarila tetala, eia raragitia veia ge veipalea te la tapasi la haro, ale e Kraist ge beu rivua somai.  
\v 6 Taritigi amuto ge sagege, me la sagegela tamutou eia ge uru sesele te la vibalavala tamutou aleie. La iligiligi, la tovolalaila me la iloburukola ale amuto sau tolea igoie, eia kama ge tabaa, ouka.  
\v 7 La iligiligi, la tovolalaila me la iloburukola ale poga tavu amutou igoie, eia tovo lalai moli la vagagarila me la tautaulailo tamutou. Mai la gold, egite gutua te la havi, eia sali, egite goio abi taro la mumugu ovola, tio la tautaulailo tamutou tai eia mai ele. La Tahalo Uru eia mata taro moli la tovolalaila, veia eia ge viligi muga amutou, veia la tautaulailo tamutou, eia ge sibitala mai la gold ale maroka sesele, veia la tautaulailo tamutou eia ge mai la vuliti ale koramuli sesele eia. Mai la tautaulailo tamutou ge magiri vagari te la tovolalaila me la iligiligi tomi ale igoie, amuto ge sau tola la vibalavala ale uru sesele te la haro ale e Kraist ge beua somai.  
\v 8 Amuto soukama hilo e Iesus Kraist me la mata mutou, eala moli la tia mutou eia masaga seselea. Amuto kama hililoa, eala moli amuto tautaulailo tetala. Kara igoie la tia mutou volu me la sagegela ale isapolo sesele. La sagegela alele, eia loata te la ilo la lage.  
\v 9 Me oio moli ovola, amuto sokoti la sau tola la mahulila ale taritigi, eia kama ge kaluvu lou, la vuhula amuto tautaulailo te Kraist.  
\v 10 La vimahuli ale La Tahalo Uru eia abitia mutou, egiteu la bilalaha ale pala, egite vagari sesele veia ge sivuti la vuhula, egite vigia mulimulia, eala moli la gabutatalala tegiteu eia boto ovola.  
\v 11 Egite vagari veia ge rovi la imamala ale mave la vibalavala alele ge guvi, veia ge rovi tai la irovilala ale mave la pagale ge guvi ovola me eia ge tavu ereire. La Kalulu La Marokala, eia veipalea giteu la iligiligi ale e Iesus ge bolea oata te la tauvalautu, me la mahuli la sagegela tai ale e Iesus ge sau tolea mulimuli. Eala egite vagari veia ge sivuti la masovala, eala moli egite boto ovola.  
\v 12 Eala moli La Tahalo Uru eia veipalea soio tegiteu la bilalaha tetalale veia la vikararala tegiteu eia kama ge suli egiteu lou, eia ge suli moli amutou ale igoie. La vuhula la merera tegiteu eia kama uru te la mahulila tegiteu. La papaga tomi ale egite vikara mulimulia, eia sibitalati tamutou igoie. Amuto balava seseleti, la vuhula La Kalulu La Marokala eia vei matagagea giteu la bilalaha ale pala la merera tetala, eia igoie valolo amutou te la vagagarila te La Tahalo Uru. Egiteu la bilalaha ale pala, egiteu tai la angelo, egite masaga pepehoa veia ge rovi tai bakisi la vuhu la papaga aleie.   
\s1 La Uru masagea veia etato ge pou te la vulovulo ale maroka  
\p
\v 13 Ioge, amuto ge raragi tigi la gabutatalala tamutou. Amuto ge mata kaseka, la tautaulailo tamutou ge magiri vagari te la vibalavala ale amuto ge sau tolea te la haro ale e Iesus Kraist ge sibitala.  
\v 14 Amuto ge roromuli La Tahalo Uru, la vuhula amuto e latatula. Amuto umala ge beu tavu lou la vulovulo ale kama taritigi, amuto igigoa pala, la vuhula amuto matagagati, amuto roviti la merera te La Uru.  
\v 15 Amuto ge maroka viviu te la vulovulo mutou, la vuhula La Tahalo Uru ale maroka viviu, eia tolati amutou soio tetala.  
\v 16 Mai la merera te La Buk Tabu Ale Pala eia veia maie “La vulovulo mutou ge maroka viviu, mai eau tai maroka.”   
\p
\v 17 La Tahalo Uru ale amuto tatolale Tama mutou, eia kama togo isasa la tahalo. Eia la tahalo la mata mulimuli la vulovulo la valalua me hatavivile tomi. Amuto ge togoa te la mahulila tamutou aleie.  
\v 18 Amuto ge gabutala tigia. La Tahalo Uru eia loto rivu lou amutou loio te la vulovulo mutou ale e tutubu mutou tilimulimulia, eala moli eia kama loto amutou me la vuliti bulalahu moli, ouka.  
\v 19 La Tahalo Uru, eia loto rivu lou amutou taro la limale Satan, te la kasosole Kraist moli, E Kraist, eia mai e latu la sip ale maroka, la kakali me la mumugu ouka oio tetala, eia peho robo amutou tomi.  
\v 20 La Tahalo Uru, eia raragiti e Kraist alaurati, mamuga te la siloko la vipoupoula, veia ge rou rivu amutou soio tetala. Igoie, amuto hiloti la vibalavala tetala aleie somai tamutou, amuto sau tolatia.  
\v 21 Oio te Kraist, amuto tautaulailo te la Tahalo Uru, la vuhula La Tahalo Uru vahiliti rivuti e Kraist loio te la pileho, me Kraist sau tolati la pulolou la mapala oata. La igogolu tetala ale vagari ele, eia vitikumu lou la merera tetala, veia eia koramuli seselea veia la tautaulailo tamutou ge magiri vagari soio La Tahalo Uru moli sekela.   
\s1 Taritigi etato ge gogo egiteu e tabarabara gatou  
\p
\v 22 La iroromulila tamutou me la tautaulailo tamutou soio te Kraist, eia vahalabati la kalulu mutou me la mahulila tamutou tai, la gilogo te Kraist eia mahuli seseleti te la tia mutou. Eala eia taritigi pepeho veia amuto ge vagari tavu sesele la vulovulo la gilogo, veia amuto ge visuli baoli tataho me egiteu e tabarabara mutou, veia amuto ge vigogo baoli sesele tai me egiteu tomi.  
\v 23 Amuto sibitala halabati te la merera la mahulila ale kama ge kokovu. La mahulila ale amuto sau tolea, e tama mutou me tila mutou kama visibitalea. La mahulila ale loata te La Tahalo Uru, eia kama ge kaluvu. Mai la merera te La Buk Tabu Ale Pala eia veia maie:   
\li1
\v 24 La vovo la valalua me hatavivile tomi,  
\li1 eia mai moli la galagala la obu ale pepeka,  
\li1 mulimuli eia talulu lou, me la golugolu tomi  
\li1 ale la valalua me hatavivile igogolu ovola,  
\li1 eia mai la sese la obu.  
\li1 La sese la obu eia marasa,  
\li1 eala moli kama tabaa eia talulu lou,   
\li1
\v 25 eala moli la merera tomi te La Tahalo Uru,  
\li1 eia magiri mai la tori.  
\p Mai la valolo ale taritigi, amuto lolotiao.   
\c 2  
\s1 E Kraist eia la sosole la luma te La Tahalo Uru  
\p
\v 1 Taritigi amuto ge piligi taro la vulovulo la iruru tomi, umala amuto ge pou tavu la gabutatalala ale kama kokora soio tegiteu e tabarabara mutou. Umala amuto ge visigolo, umala amuto ge tutugolo veia amuto taritigi, umala amuto ge hate saga tavu la golugolu tegiteu ale isapolo, umala tai veia amuto ge veimulimuli egiteu e tabarabara mutou.  
\v 2 Eala moli amuto ge tuha tavu vagari moli la merera te La Tahalo Uru, mai la pepeso eia tuha tavu la susule tilala veia ge susua. Mai amuto ge liu bibibi la merera te La Tahalo Uru, amuto ge tubu tataho, la kalulu mutou ge mahuli.  
\v 3 La vuhula, amuto mai ale tomu lalaiti la gilogo te La Tahalo Uru veia eia malama.   
\p
\v 4 Taritigi veia amuto ge tuga tavu La Uru, eia magiri mai la tori, eia mahuli. Egiteu la valalua la iruru egite muku piletia veia eia kama taritigi, eala moli La Tahalo Uru hilovitia veia eia la riau sesele tetala.  
\v 5 Me amutou tai ale tetala, taritigi amuto ge sugu taro la mahulila tamutou soio te La Uru, amuto ge mai la sosole la luma tetala, eia ge vimagiri amutou, amuto ge la tahalo la marokala ale ge sau tola la lotu tetala, amuto ge vaisale bibibi seselea te la isale Iesus, eia ge isu la vaisalela tamutou ele.   
\p
\v 6 Mai sesele la merera te La Tahalo Uru te La Buk Tabu Ale Pala, eia tovo mulia giteu e Iuda te la guluvi te Latula mulimuli, eia veia maie:  
\li1 Hiloa, eau hiloviti isa la sosole ale taritigi,  
\li1 veia te la mautu tegiteu  
\li1 la valalua me hatavivile taku,  
\li1 eau ge tigi la luma.  
\li1 Mai isa ge gabu tikumu la sosole taku  
\li1 veia eia ge vimahulia, eia kama ge galo,  
\li1 la vuhula la sosole la luma taku eia vagari sesele.   
\p
\v 7 La sosole te La Tahalo Uru, eia mata mai ale taritigi tamutou ale tautaulailo tetala, eala moli egiteu ale kama gabu tikumua, egite ge hilo la merera te La Tahalo Uru isa lou, eia ge puru soio tegiteu. Te La Buk Ale Pala, La Tahalo Uru viteteli egiteu e Iuda ale sau tola la igogolu tetala, eia veia giteu maie:  
\li1 La sosole ale amutou la valalua la tiligi la luma taku, amuto muku piletia veia eia kama kokora,  
\li1 eia igoie magiriti kabili,  
\li1 eia bole tomiti la tikumu la igogolu taku.   
\li1
\v 8 Eala moli egiteu ale kama lolo  
\li1 la merera te La Tahalo Uru,  
\li1 egite ge tutuaki ovola, egite ge boru.  
\p Sesele, egite kama lolo La Tahalo Uru, egite kati vahiliti tigi la igogolu tetala, la vuhula egite touti la merera tetala, eala egite viluati, la viputumulila te La Tahalo Uru ale magiri palati te la silokola eia mai ale puruti soio tegiteu.  
\v 9 Eala moli amutou ale tetala, amuto kama mai egiteu alele, ouka. La Tahalo Uru, eia hiloviti amutou veia amutou la maratatila tetala sesele. Amutou la tahalo me la tavile ale maroka te La Tahalo Uru, amutou la valalua me hatavivile la matagaga, amutou tetala seseleti. Eia hiloviti amutou veia amuto ge veipala la igogolu tetala ale uru, eia tola taro amutou loio te la maligoma veia amuto ge pou la balavala te la matagaga tetala ale taritigi pepeho sesele.  
\v 10 Pala, amuto kama la valalua me hatavivile tetala, amuto logala moli, eala moli eia tolati amutou soilo veia amuto ge tetala seseleti. Pala, amuto kama rovi la gilogo tetala, eala moli igoie amuto sau tolatia, amuto matagaga tatahoti ovola.   
\s1 Etatou la bilalaha moli te La Tahalo Uru  
\p
\v 11 Amuto tabarabaragu, amuto pou la mosi moli omai te la mahulila te la vovo, eala eau kaka vagari sesele amutou veia amuto umala ge gotigu rivu lou veia ge pou tavu lou egiteu la vulovulo te la vovo ale kama kokora, la vuhula egiteu la vulovulo alele mai ale vaubi bibibi soio te la kalulu mutou veia ge bilia.  
\v 12 Amuto rovia, amuto pou kabili tegiteu la valalua la maligoma, eala eia taritigi pepeho veia la pulolou tamutou ge maroka tataho veia mai mulimuli egite ge saupupu amutou, egite ge mata kilala tigi te la vulovulo mutou ale taritigi, egite ge vuvulo, egite tai ge vaisale La Tahalo Uru te la haro ale eia ge beu loua.   
\p
\v 13 Taritigi amuto ge pou tataho, amuto ge gabutala tigia veia amutou la valalua me hatavivile te La Uru, amuto ge roromuli tataho egiteu la valalua tomi ale oata tamutou, egiteu la mulugaluga tomi ale sau tola e gavman te la isale Sisa, eia la uru mutou omai te la maututula.  
\v 14 Amuto ge roromuli tai egiteu la mulugaluga tomi, mai egiteu e mesistret ale pou te la kiloli la iruru soio tegiteu ale kama kokora, egite pou tai te la vei tatahola soio tegiteu la valalua me hatavivile ale taritigi.  
\v 15 Amuto ge pou tataho mai ale eau veitia mutou ele, la vuhula la masasagala te La Tahalo Uru soio tamutou, eia maie: Eia masagea veia la vulovulo mutou ale taritigi eia ge taho robo la vikara bububula tegiteu la valalua me hatavivile ale gima la valolo te Kraist ale taritigi.   
\p
\v 16 Amutou la valalua me hatavivile te Kraist moli sekela, eala amuto kati ligi lou te la merera te la tahalo isasa, eala moli amuto umala ge gabutatalea veia amuto ge mulimuli bulalahu la gabutatalala tamutou isasasa. Eia kama koramuli taia veia amuto ge pou kokovu te la vulovulo isahari ale kama kokora, veia amuto mavulahati te la merera te ururu, eala amuto ge mulimuli bulalahu la gabutatalala tamutou. Eala moli eia taritigi pepeho veia amuto ge pou tataho mai la bilalaha te La Tahalo Uru sesele.  
\v 17 Togo la valalua me hatavivile tomi, vipuhi tigi tataho me egiteu la valalua me hatavivile tomi te Kraist, gabu tikumu La Tahalo Uru, sau tola tai la tilogo ale uru soio te la mulugaluga te gavman tamutou.   
\s1 Etato ge sovei e Kraist  
\p
\v 18 Mai la igogolu taume eia la igogolu la bilalaha, eme ge roromuli tataho la merera tomi te la uru taume, eme ge togoa. Mai eia ge taritigiamu, eme ge togoa, mai eia ge kaharare taiamu eme ge togoa, eme kama ge tou.  
\v 19 Mai eme ge igoa maie, La Tahalo Uru ge vibalavame, la vuhula oio te la vulovulomu ale taritigi, ale eme kama vikara papai te la kaharela te la uru taume, eme veipalatia mai ele veia eme rovi la masasagala te La Tahalo Uru tavume.  
\v 20 Mai eme ge vareagagi moli, la uru taume ge kuemei, me eala eia kama koramulia veia eme ge vei tataho loume veia eme magiri vagari, la vuhula eia kueme te la kiloli la vareagila taume lou. Eala moli mai eme ge pou tataho, me la uru taume ge kue bulalahu molime mai te la igototolola tetala lou, ale La Tahalo Uru ge hiloa, eia ge vibalavame oio vola, la vuhula eme pou makovu moli te la iligiligi.  
\v 21 Ale la tilola te La Tahalo Uru tavu etatou mai ele, veia etato ge pou makovu moli te la viligiligila mai e Kraist. Eia gabu la iligiligi ale uru veia ge turia gatou la gauru ale taritigi oio vola, veia etato ge mulimuli la vulovulola ale taritigi.  
\v 22 Eia la iruru ouka oio tetala, eia kama rovi la vikarara la visigologolola tai.  
\v 23 Ale egite goio vikara bareala, eia kama koli la merera tegiteu. Eia gabu la iligiligi ale uru pepeho, eala moli eia kama igo totolo egiteu veia ge koli bara la iruru tegiteu soio tetala. Eala moli eia sugu taro moli la mahulila tetala soio te La Tahalo Uru ale matata, eia ge mata muli la vulovulo la valalua me hatavivile tomi.  
\v 24 E Iesus, eia bole la iruru tegatou tomi oata te la tauvalautu, eia gabu la iligiligi ale uru pepeho veia etato ge vulo taro sesele la vulovulo la iruru, veia etato ge rovi la vulovulo ale matata te la mahulila tegatou. La iligiligi ale te Iesus, me la kasosola ale pagegele, eia vimahuliti amutou.  
\v 25 Amuto pala ruru vulovulo moli mai egiteu la sip ale kavovou bulalahu moli, la gabutatalala tegiteu ouka, egite ruru soio la hohoi. Eala moli te la imamala ale igoie, amuto beutia soio te La Tahalo La Vibaumuli tamutou, eia La Tahalo La Vibaumulila te la kalulu mutou tomi isasasa, eia ge sau tola amutou.   
\c 3  
\s1 La pulolou te tau me rutu  
\p
\v 1 Amuto hatavivile tai ale te Kraist, taritigi pepeho veia amuto ge roromuli tataho egiteu e hararua mutou. Mai isa soukama tautaulailo te la merera te La Uru, eia soioge ge hilo e rutula eia pou tataho sesele, eia ge vulo la tiala soio te Kraist. La vigagiala te rutula soio tetala ge ouka,  
\v 2 eia ge hilo moli e rutula, veia eia la tavile ale maroka sesele, eia volu sesele la vulovulo la tilogo, tio eia ge hiloa mai ele, eia ge vulo la gabutatalala tetala soio te Kraist.  
\v 3 La tokoromola tamutou e hatavivile umala ge la tokoromola te la vovo veia amuto ge mali la ivu mutou, veia amuto ge kai tai la mamako, veia amuto ge kisi la lavalava ale marasa tai, umala.  
\v 4 Eala moli la kalulu mutou oilo ge veipala la tokoromola te La Uru, mai la vulovulo ale taritigi, eia kama ge kaluvu, amuto ge pou makovu tataho, La Tahalo Uru ge sau tolame mai la vuliti tetala sesele.  
\v 5 La tokoromola ale maie, mai la tokoromola te la vulovulo ale taritigi, egiteu e hatavivile la marokala alaura te ururu, egite sau tola sesele la merera te La Tahalo Uru, egite vitokoromo lou egiteu te la vulovulo ale taritigi mai ele. Egite roromuli tataho e hararua giteu,  
\v 6 mai e Sera, eia roromuli tataho e Abraham, eia toia veia eia la uru tetala. Tio mai amuto hatavivile ge pou tataho mai tai e Serale, amuto ge mai e tutubule Sera sesele, mai amuto ge pou tigi, la gabutala papaila ge ouka oio tamutou.   
\p
\v 7 Amutou la valalua tai, taritigi amuto ge pou tataho moli vikapopo me egiteu e ruturutu mutou. Amuto ge toro tegiteu, amuto ge gabutatala tigia veia egite kama vagari mai amutou la valalua. Amuto ge togo egiteu, la vuhula egite tai ge sau tola la mahulila te Kraist ale halaba. Mai amuto ge togo egiteu mai ele, la paga isa kama ge koramulia ge magiri robo la gauru la kilaka tamutou.   
\s1 Etatou ale te Kraist ge vipuhi tigi tataho  
\p
\v 8 La tapasi la merera taku soio tamutou te la pulolou tamutou ale te Kraist, eia maie: Amuto ge vipuhi tigi tataho, amuto ge vigogo baoli le amutou, amuto ge vitau me tabara sesele te Kraist. Amuto ge volu moli te la vulovulo la mutelela me la tilogo veia ge pou tataho mai ele.  
\v 9 Mai isa ge igo la iruru soio taume, eme umala ge kolia soio tetala. Mai isa ge vikara bareamu, eme umala ge vikara gegeru rivu louala. Eme ge toi moli la merera la vibalavala te La Uru soio tetala, la vuhula La Tahalo Uru eia tolati amutou la tahalo me la tavile la iruru soio tetala veia amuto ge sau tola la vibalavala, eala eia koramuli taia mai ele veia eme ge toi la vibalavala soio tegiteu e tabarabara mutou ale igo la iruru soio tamutou.  
\v 10 Mai la merera te la Buk Tabu Ale Pala eia veia maie:  
\li1 Mai isa ge masaga la pulolou ale taritigi  
\li1 veia la mahulila tetala ge malau,  
\li1 taritigi eia ge vibaumuli la harela  
\li1 veia la merera la visigologolola  
\li1 me la vikararala ale kama kokora  
\li1 ge ouka oio tetala.   
\li1
\v 11 Taritigi eia ge poke taro  
\li1 la vulovulo ale kama kokora,  
\li1 veia eia ge pou moli te la vulovulo ale taritigi.  
\li1 Taritigi tai veia eia ge pou makovu tataho,  
\li1 eia ge vagari veia eia ge vimalu la pulolou tegiteu  
\li1 me tabarabarala tomi.   
\li1
\v 12 La vuhula la mata La Uru  
\li1 eia oio moli tegiteu ale taritigi,  
\li1 veia eia ge suli egiteu.  
\li1 La gavusa La Uru eia oio kope moli  
\li1 soio te la kilaka tegiteu ale matata.  
\li1 Eala moli eia ge poke taro egiteu  
\li1 ale pou te la vulovulo ale kama kokora.   
\s1 Etato ge poke taro la tahi vilevilela tegiteu la gima te Kraist  
\p
\v 13 Mai amuto ge vagari tavu la vulovulo ale taritigi, ere ge igo bara amutou? Ge ouka ge,  
\v 14 eala moli mai amuto ge poga la iligiligi tegiteu ale vile la gauru ale taritigi, ale La Uru ge hiloa, eia ge vibalava sesele amutou oio vola. Umala amuto ge taga egiteu la valalua, umala amuto ge gabutatala papai tegiteu ale gima la gauru te Kraist.  
\v 15 Eala moli te la kalulu mutou tomi isasasa, amuto ge togo La Uru mutou, e Kraist, veia mai isa ge tahime te la vuhu la sagegela taume me la mahulila sesele ale eme sau tolea, eme ge raragi tataho mai ele veia ge lubeala la gauru.  
\v 16 Eala moli la vikararala tamutou ale mai ele, eia ge vikapopo me la tilogo me la vulovulo la mutelela, amuto umala ge gabutatala papai. Mai amuto ge igo seselea mai ele, mai la valalua me hatavivile ge vikara kukumua mutou te la pulolou tamutou te Kraist veia eia kama taritigi, egite ge hilo la vulovulo mutou ale taritigi, egite ge mahela pepeho te la vikara kukumula tegiteu ele soio tamutou.  
\v 17 Mai la masasagala te La Uru soio tamutou veia amuto isahari ge ligi te la vulovulo ale taritigi ale la valalua me hatavivile isahari ge vilea, eia koramuli seselea veia amuto ge tilimuli molia mai la masasagala tetalale. Eala moli eia kama taritigi veia etatou ale te Kraist ge gabu la iligiligi te la kiloli la vulovulo gatou ale kama kokora, mai etato ge ruru sesele. Umala etato ge pou te la iruru mai ele.  
\v 18 E Kraist, eia peho roboti etatou veia ge vimavulaha etatou taro la iruru. La pileho tetala, eia koramuli etatou tomi, me la iruru tomi tai tegatou. Eia la tahalo ale maroka, eala moli eia peho robo etatou la tahalo la iruru, veia ge puli rivu etatou soio te La Tahalo Uru. Egite bili la vovola, eala moli La Tahalo Uru vimahuli la kalulula.  
\v 19 Te la vagagarila te La Kalulu La Marokala eia goio valolo la kalulu giteu ale pou te la kilisi otalo te la mautu la pileho,  
\v 20 egiteu ale tou la merera te La Tahalo Uru alaurati te la imamala te Noa. La Tahalo Uru eia pou tali egiteu veia ge vulo la gabutatalala tegiteu soio tetala, eia abia giteu la baa malau ale e Noa paha la uaga oio vola, eala moli egite kama lololo, la silogo uru goio sibitala, me egiteu taho ualu moli, mai la karakara te Noa moli, egite sekela moli mahuli utu kabili te la lalu ale sogole.  
\v 21 Me la lalu ale, eia magiri mai la irovilala te la lalu la vuluhi te la isale Kraist, ale egite vuhi amutou oio vola veia amuto ge mahuli. Kama la lalu la pupurula ale ge vuhi maroka la vovo gatou, eala moli eia la irovilala te la lalu sesele ale vuhi halaba la vulovulo gatou me la kalulu gatou veia etato ge magiri maroka te la lagu La Tahalo Uru. Ale egite vuhi amutou te la isale Kraist, la lalu ale eia kopea mutou la gauru soio te la mahulila ale halaba, mai tai ale e Kraist, eia pala mahuli rivu lou taro la pileho, eia kopea gatou tomi la gauru soio te Tamala veia etato tai ge mahuli rivu lou.  
\v 22 E Kraist ele, eia goatati te la ilo la lage, eia oio pouti te la gale La Tahalo Uru e gata, me egiteu la angelo tomi me egiteu tomi tai ale sau tola la viputumulila oata te la ilo la lage, egiteu tomi pouti otalo te la uluvala, egite oio roromulimulia.   
\c 4  
\s1 Etato ge magiri vagari te la iligiligi mai e Kraist, etato ge bolehoho la vulovulo la iruru  
\p
\v 1 E Kraist, eia gabu la iligiligi ale uru pepeho, mai ele amuto tai ge mai e Kraist, amuto ge magiri vagari te la iligiligi, la vuhula mai amuto ge bolehoho la iligiligi, amuto ge koramuli taia mai ele veia amuto ge bolehoho la vulovulo la iruru.  
\v 2 Kara ale amuto ge peho, amuto ge tilimuli moli la masasagala te La Tahalo Uru sekela, amuto kati ge mulimuli la masasagala te la vovo ale kama kokorale.  
\v 3 Pala muga amuto pou te la vulovulo la iruru, me ale igoie eia koramulitia veia amuto umalati ge gotigu rivurivu lou ovola, veia amuto ge igo lou egiteu la vulovulo alele, mai egiteu ale pou te la maligoma. Egite igo la iruru tomi mai ele: egite valalololo egiteu e hatavivile, egite vaosa tatavu mai ele; la gabutatalala tegiteu eia volu sesele te la vulovulo ale kama kokora; egite liu paua; egite igo galololo; egite mulimuli la vulovulo tomi ale kama kokora viruru; egite lotu tatavu la puigolo.  
\v 4 Egite la valalua la maligoma, egite hilo amutou mai ele veia amuto kati vikapopo legiteu te la vulovulo tomi ale kama kokorale, egite karutu sesele, egite goio vile amutou.  
\v 5 Eala moli la imamala ge sibitala ale egite ge pou te la vigagiala te la lagu La Uru, eia pou raragiti veia ge mata muli la vulovulo la valalua me hatavivile tomi, egiteu ale mahulihuli me egiteu tai ale pehoti.  
\v 6 Eia sesele, egite tai ale pehoti, egite loloti la valolo te Kraist ale eia gotalo tegiteu te la mautu la pileho, eia valolo egite. La Uru valolo egiteu mai ele veia egite tai ge koramulia ge mahuli rivu lou. La vovo giteu eia ule magasati te la kiloli la iruru ale egite igigoa omai te la mahulila tegiteu te la vovo, eala moli mai egite ge lolo la merera te La Tahalo Uru, me egite ge roromulia, la kalulu giteu ge mahuli rivu lou.   
\s1 Etato la tahalo te Kraist ge veipala la gilogo tetala  
\p
\v 7 La tapasi la maututula eia hagagaviti, eala eia taritigi pepeho veia amuto ge pou tataho, la gabutatalala tamutou ge matagaga moli, veia amuto ge koramuli sesele la kilaka.  
\v 8 Amuto ge vipuhi tigi tataho, la vuhula la vulovulo la gilogo eia koramulia ge pigi robo la iruru usu oio kabili tamutou ele.  
\v 9 Amuto ge baumuli tataho egiteu e tabarabara mutou ale pou vikapopo le amutou, umala amuto ge mata taro egiteu me umala tai ge totou egiteu, veia amuto ge gabutatala gegeru soio tegiteu, umala.  
\v 10 La Tahalo Uru, eia abitia mutou tomi isasasa la vaabila te la kalulu mutou, ale koramuli la visuli soio te la igogolu te la lotu, eala eia taritigi veia amuto tomi ge igo seselea mai la tabarila tetala soio tamutou isasasa. Amuto tomi ge vahiliti la igogolu te la gilogo tetala.  
\v 11 Mai isa ge rovi la vikararala, eia ge valolo amutou te la merera te La Uru. Mai isa ge rovi la visuli, eia ge visuli soio tegiteu e tabarabarala ale te Kraist mai te la vagagarila te La Tahalo Uru sesele, veia la valalua me hatavivile ge hiloa, egite ge vaisale La Tahalo Uru te la isale Iesus Kraist. Etato ge vaisale moli e Kraist te la matagaga tetala me la vagagarila tetala tai ale uru, kama ge maila, la kaluvula ge ouka. Amen.   
\s1 Etato tai ge bole la iligiligi mai e Kraist  
\p
\v 12 Amuto tabarabaragu, umala amuto ge karutu te la tovolalaila ale vagari, eia sibitala tavuti amutou te la imamala ale igoie, amuto ligi pepeho oio vola. Amuto umala karuturutu veia la tovolalaila alele eia la paga ale isapolo sesele.  
\v 13 Eala moli amuto ge sagege moli, la vuhula amutou e tabarabarale Kraist sesele te la gilabu la iligiligi ale uru mai ele. Mai amuto ge ligi mai eia, mulimuli amuto ge pou vikapopo tai leia te la matagaga ale uru, te la haro ale eia ge sibitala ovola.  
\v 14 Mai egiteu la gima ge vikara gegerua mutou, ale eia taritigi pepeho, la vuhula eia matagagati mai ele veia La Kalulu La Matagaga te La Tahalo Uru eia pouti oio tamutou.  
\v 15 Eia kama taritigi veia amutou ale te Kraist ge gabu la iligiligi me la mahelala te la vareagila tamutou lou. Mai amuto ge igo egiteu la mata la iruru tomi ale mai la bilili, me la pakalila, amuto ge poga la mahelala me la iligiligi ovola. Mai tai amuto ge gabu vauru amutou, amuto ge poga la mahelala ovola. Eala moli etatou ale te Kraist umala ge mai ele.  
\v 16 Mai amuto ge gabu la iligiligi me la mahelala, taritigi eia ge la iligiligi me la mahelala te la isale Kraist moli, kama te la kiloli la iruru ale amuto igoa. Mai amuto ge ligi te la isale Kraist, umala amuto ge mahela, amuto ge vaisale moli La Tahalo Uru, ale eia abitia mutou la isale Latula veia amuto ge koramulia mai ele veia amuto ge gabu la iligiligi ovola.   
\p
\v 17 La imamala eia koramuliti ale la haro la viputumulila te La Tahalo Uru eia ge guvi, me etatou ale tetala ge vimuga soio te la vigagiala. Me eia ge vagari muga bakisi tegatou ale marokati, me la viputumulila tetala tai eia soioge ge vagari pepeho pasi soio tegiteu ale tou la valolo te Kraist.  
\v 18 Mai la merera te La Buk Tabu Ale Pala eia veia maie:  
\li1 Eia koramulia veia la tahalo ale maroka  
\li1 eia ge mahuli utu te la gilogo te La Tahalo Uru.  
\li1 Eala moli egiteu la tahalo la maligoma  
\li1 ale pou oio te la iruru, egite ge hele sove?   
\p
\v 19 Eala, eau veia mutou maie veia eia koramuli seselea veia amutou ale igoie gabu la iligiligi mai la tabarila te La Tahalo Uru soio tamutou, amuto ge tautaulailo vagari, amuto ge sau tola vagari la vulovulo ale taritigi. La Tahalo Uru eia ge hiloa mai ele, eia ge vimahuli sesele amutou, la vuhula eia vagari, eia la vuhu la golugolu tomi me la vikarakarala tetala tai eia sesele tomi moli kaluvu.   
\c 5  
\s1 Amutou e ururu ge vibaumuli tigi egiteu la valalua me hatavivile te La Tahalo Uru  
\p
\v 1-2 Eau kaka gogogo amutou e ururu ale vibaumuli te la lotu te Kraist, amuto ge vibaumuli tataho egiteu la sip te La Tahalo Uru. Amuto ge loloau, eau tai la uru te la lotu tetala, eau hilo seseleti la iligiligi te Kraist te la matagu sesele, eau tai mulimuli ge pou vikapopo le amutou oio te la matagaga tetala ale uruo, ale eia ge veipalea somai tegatou ale tetala. Amuto ge vibaumuli tataho egiteu la sip te La Tahalo Uru, mai egiteu la valalua me hatavivile me egiteu e gulikiliki ale pou te la uluva mutou te la lotu te Kraist, amuto ge vibaumuli sesele egiteu ele. Kama la igogolu la iloburukola veia La Uru vibukeketi le amutou oio vola, eala moli amuto ge igoa te la bilaha moli te La Uru, eia ge lege sisigi le amutou oio vola. Kama la igogolu te la mapa veia eme ge masaga pepeho la uati ale egite ge loto le amutou oio vola, eala moli amuto ge vagari tavu moli la igogolu la visuli soio tegiteu la sip tetala.  
\v 3 Amuto umala ge kahare tavu egiteu veia amuto sekela ge vikara, veia egite ge makovu moli. Eala moli amuto ge pou tataho te la mata giteu, egite ge sovei amutou te la vulovulo mutou ale taritigi ele.  
\v 4 Mai mulimuli La Tahalo La Vibaumuli Sesele, eia ge sibitala, mai e Kraist ele, tio eia ge abia mutou la vuliti ale sesele, eia kama ge kaluvu lou, mai la mapa la igogolu tamutou soio tegiteu la sip tetala.   
\p
\v 5 Taritigi amutou e maure bisisi, amuto ge roromuli tataho la merera tegiteu e ururu. Taritigi tai veia amutou la valalua te Kraist tomi ge pou makovu tataho moli veia amuto ge volu sesele me la vulovulo ale taritigi, mai la visuli baolila kabili tamutou lou, la vuhula La Tahalo Uru eia kama masaga la tahalo la vareagila, eala moli eia gogo sesele la tahalo la iroromulila.  
\v 6 Amutou tomi, amuto pou moli te la lima La Uru, eia mamuga amutou, eala eia koramuli seselea veia amuto tomi isasasa ge vibisi lou amutou te la lagula veia eia ge gogo amutou, eia ge vahiliti lou amutou mai te la masasagala tetala sesele.  
\v 7 La iloburukola me la gabutala papaila tomi, amuto ge sugu taro tomiala, eia ge bolea, la vuhula eia vibaumuli tataho amutou ale tetala.  
\v 8 Amuto ge mata kaseka, amuto ge mata rara, la vuhula la gima tamutou, eia oio tuga vulovulo mai la laion ale mororosi pepeho, eia mata galilili veia ge sivuti isa la tahalo te Kraist veia ge toloa ge alia.  
\v 9 Taritigi amuto ge magiri vagari, amuto ge matagaga moli veia egiteu e tabarabara mutou tomi te Kraist te la maututula tomi, egite tai ligi mai amutou ele.  
\v 10 Eala moli la iligiligi ale amuto gabua igoie, eia kama ge tabaa, La Tahalo Uru, eia la vuhu la gilogo, eia ge vahiliti lou amutou, amuto ge magiri vagari sesele te la isale Kraist, la vuhula eia tolati amutou soilo te la pulolou la matagaga tetala, vikapopo le Latula.  
\v 11 Me La Tahalo Uru, eia ge igo seselea mai ele, la vuhula eia moli sekela sau tola la maututula, la magasa, la valalua me hatavivile tomi. La vagagarila tetala eia kama ge kaluvu, eia sesele.   
\s1 La tapasi la merera  
\p
\v 12 La merera taku bakisi ele, eau toitoia, e tabaragu uru e Silvanus, eia kekesia mutou ovola, veia amuto ge gigi tatahoa. Me te la merera taku alele, eau gabutatalea veia ge karasuku amutou, veia amuto ge sau tola sesele la gilogo te La Tahalo Uru, ale eau valoloti le amutou ovola, eia ge vimahuli sesele amutou. Taritigi amuto ge magiri vagari sesele te la merera alele.   
\p
\v 13 Egiteu e tabarabara mutou te Kraist ale pou oio la mautu e Babilon, egite veia mutou la haro. Amutou tomi la valalua me hatavivile te La Tahalo Uru. Eia visati le amutou ale pou te la maututula vikapopo tai legiteu ale omai veia amuto tomi ge tetala sesele. E latugu tai, e Mark, eia veia mutou la haro.  
\v 14 Taritigi amuto ge vilapu lima te la isale Kraist, mai la vulovulo gatou ale rovi la gilogo tetala. La vibalavala tetala ale uru sesele, eia ge pou tamutou tomi ale tetala, la tia mutou tomi oilo ge malilo tigi tataho.  
\cls Eau e Pita.