\id 1JN - Nakanai NT [nak] -Papua New Guinea 1983 (DBL 2014) \h 1 IOANES \toc1 Ale La Muluga La Merera Te Ioanes \toc2 1 Ioanes \toc3 1 Ion \mt1 ALE LA MULUGA LA MERERA TE IOANES \c 1 \s1 La merera la vimahulila \p \v 1 La tahalo ale eau veia mutou ovola, eia La Merera te La Tahalo Uru, eia vimahuli etatou. Palati te la siloko la maututula, kara igoie, eia oio mahuli. La tahalo ale, pala amila vikavovou tomi, eau hilo seselea, eau rovi seseleti la vulovulola, pala amila tai vaali vikapopo te la haroharo tomi. \v 2 La tahalo alele eia sibitala palati, amiteu la valalua tetala hilo seselea, me amite veipalea mutou igoie veia amuto tai ge rovia. Eia te la silokola eia vipou tomi le Tamala. Eia goio hiliti taro lou e Tamala, eia gomai te la maututula, amite hilo seselea. La tahalo ale, eia mahuli mai la tori, eia kama rovi la pileho. \v 3 Eau e Ioanes, eau hilo seselea, eau lolo tai la merera tetala, me ale igoie eau ge veipalea mutou la papaga tomi ale eia vimari le amiteu ovola, veia etato tomi ge rovia. Eau pou otalo te la uluva La Tahalo Uru, eia e Tamagu, me Latula e Iesus Kraist, eia e tabaragu, eia vagoilo etatou te Tamala veia etato tomi ge vitau me tabara sesele. \v 4 La merera tetala eia taritigi, ale igoie eau abi taia mutou veia etato tomi ge sau tolea, veia oio vola etato tomi ge sagege tavua, la sagegela tegatou ge uru sesele. \s1 Etato ge tatuga te la matagaga \p \v 5 La merera ale eau lolotia te Kraist, eau goio vei loua mutou ovola, eia maie: La Tahalo Uru, eia la matagaga, etato kama koramulia ge sivuti bakisi la maligoma oio tetala. \v 6 Eala mai etato veia etatou tetala, eala moli etato soloio te la maligoma, etato visigolo, la vuhula la vulovulo gatou me la merera tegatou ale etato veveia, eia kama visauru. \v 7 Eala moli mai la matagaga te La Tahalo Uru ale uru sesele ge volu oio tegatou, ale etato ge vipuhi tigi tataho sesele, etato ge la maratatila tetala, etato ge tetalati, me la kasosole Iesus e Latula eia ge vuhi taro la iruru tegatou, etato ge maroka. \p \v 8 Eala moli mai etato veia etato la iruru ouka, ale etato visigolo pepeho pasi, etatou tomi la tahalo la iruru. \v 9 Eala moli mai la iruru tegatou eia oio tabuli te la tia gatou isasasa, etato ge veipalea soio te La Tahalo Uru, eia ge vimavulaha taro letatou la iruru tegatou ele, eia ge vimaroka la tia gatou oilo. Ale La Tahalo Uru ge igo seselea, eia kama rovi la visigologolola. \v 10 Mai etato veia etatou la iruru ouka, etato mai ale veia La Tahalo Uru, veia eia la tahalo la visigologolola, la vuhula eia toitia veia etatou tomi la tahalo la iruru. Eala moli mai etato veia etatou la iruru ouka, la valalua ge rovia mai ele veia etato kama rovi la merera te Kraist. \c 2 \s1 E Kraist eia tao robo etatou oio te Tamala \p \v 1 Amuto latatugu te la lotu te Kraist, eau mera taro amutou veia amuto umalati ge igigo la iruru. Eala moli mai isasa tegatou ge boru, la riau e Iesus Kraist, eia oio te la balile Tamala, eia ge taho robo etatou, veia e Tamala kama ge koli la iruru somai tegatou. \v 2 Eia peho roboti etatou, e Tamala sugu taroa veia la kasosola ge pagegele, eia ge vuhi taro la iruru tegatou la valalua me hatavivile te la maututula tomi. \p \v 3 Mai etato ge roromuli la merera tomi te La Tahalo Uru, ale etato ge matagaga mai ele veia etatou tetalati. \v 4 Mai isasa eia ge vei mago “Eau te La Tahalo Uru” eala moli oilo te la vulovulola etato ge rovia veia eia kama tilimuli la merera tetala, ale etato ge matagaga mai ele veia la tahalo ale eia visigolo, la merera ale sesele eia kama rovia. \p \v 5 Eala moli mai etato ge roromuli tomi la merera te La Tahalo Uru, etato ge tahai sesele ovola, me etato ge hagagavi sesele tetala mai ele. \v 6 Mai etato veia etato pou seseleti te la uluva La Tahalo Uru, taritigi etato ge sovei sesele la vulovulole Kraist. Mai ge mai ele, etato ge rovia veia etatou la tahalo me la tavile sesele te Kraist. \s1 La irovilala te La Tahalo Uru ale tabuli oio tegatou \p \v 7 Amuto tabarabaragu, eau kama ge vei loua mutou la merera isasa ale halaba, ouka. La merera taku moli ale palati, amuto rovitia, sokotia pala te la siloko la lotu te Kraist, kara igoie, amite valolo moli le amutou la merera isasa moli, ale etato ge sovei e Kraist, etato ge vipuhi tigi tataho moli. \v 8 Eala moli ale pala etato kama matagaga sesele, eala igoie amuto lolo la merera taku, eia mai ale halaba sesele. La paga mai ale utupolati, la matagaga te La Tahalo Uru ale sesele eia mai ale pagati, la vuhula etato hiloti e Kraist, etato kai vuvulo seseleti. \p \v 9 Mai etato veia etato pouti te la matagaga, eala moli etato oio so gagima moli egiteu e tabarabara gatou, ale etato oio so popou moli te la maligoma. \v 10 Eala moli mai etato ge puhi tigi tataho egiteu e tabarabara gatou, ale etato ge rovia mai ele veia etato pouti te la matagaga. Mai alele, la iruru isasa kama koramulia ge tabuli lou oio tegatou veia ge igo boru e tabara gatou isasa, umala. \v 11 Eala moli mai etato oio so gagima moli egiteu e tabarabara gatou, ale etato soloio te la maligoma. Mai etato ge tatuga te la maligoma, etato ge vava bububu moli, la vuhula la maligoma eia igo mata keati la mata gatou, etato vava bububu moliti mai ele. \p \v 12 Amutou e taitarigu te la lotu te Kraist, La Tahalo Uru eia vimavulaha taroti le amutou la iruru tamutou te la isale Kraist, eala eau kekesi matagagea mutoue. \v 13 Amutou e ururu, amuto rovi e Kraist, amuto matagagati veia alaurati te la silokola, kara igoie, eia oio. Eala eau kekesia mutoue, la vuhula amuto lolo vulai tataho. Eau vei tataho sesele tai amutou la valalua halaba, la vuhula amuto bolehohoti e Satan, eala eau kekesi taia mutoue, veia ge karasuku lou amutou veia amuto ge magiri vagari moli. E maura miteu bisisi, amuto rovi tatahoti e Tama mutou, eala eau kekesi taitia mutou ele. \v 14 Amutou ururu, amuto rovi e Kraist, amuto matagagati veia alaurati te la silokola, kara igoie, eia oio, eala eau kekesia mutou ele. Amutou la valalua halaba, amuto vagari, la vuhula la merera te La Tahalo Uru amuto sau tolatia, amuto bolehohoti e Satan. Eala eau kekesia mutou la merera takue veia amuto ge pou tataho ovola. \p \v 15 Amuto umala ge isu tautavu moli la vulovulo te la vovo, me la mari papaila tai umala amuto ge vagari tatavua. Mai amuto ge isu tatavu moli la vulovulo te la vovo, eia matagagati mai ele veia amuto kama rovi la gilogo te Tama gatou. \v 16 La vuhula, la vulovulo ale kama kokora te la vovo eia kama loio te Tama gatou, eia loio moli te Satan, la mulugaluga te la maututula. Egiteu la vulovulo te la vovo, egiteu maie: Etato hate saga tavu la golu ale etato masagea ge abia; etato mata bulakalaka, osaosa; etato vareagagi tai, kama lololo. \v 17 Eala moli la masasagala tomi ale etato gabutatala tomia me etato vagari tatavua omai te la mahulila tegatou ale igoie, eia ge kaluvu, mai la golugolu tomi tai ale igoie etato rovia omai te la magasae, eia mulimuli ge kaluvu, eala moli la tahalo ale roromuli la merera te La Tahalo Uru, eia ge mahuli mai la tori, la kaluvula ge ouka. \s1 La vulovulo giteu ale gima e Kraist \p \v 18 Amuto taitarigu te la lotu te Kraist, la tapasi la maututula eia hagagaviti, eala amuto matagagati veia la tahalo ale ge gima e Kraist, eia ge sibitala, eala moli eia sesele, egiteu la valalua la gima te Kraist, egite isahari sibitala kaluvuti. Eala eau rovitia mai ele veia la tapasi la maututula eia hagagaviti. \v 19 Egiteu la gima te Kraist isahari loioti tegatou la valalua me hatavivile te Kraist, eala moli ale pala egite pou tomi letatoue, egite lotu bulalahu moli, egite kama te Kraist sesele. Mai egite ge te Kraist sesele, egite kama ge hele taro etatou ale tetala. Ale egite kama pou tola tegatou, etato matagagati mai ele veia egite kama tegatou sesele, egite isapolo. \p \v 20 Eala moli amutou, La Tahalo Uru vimatagagati la kalulu mutou, me igoie eau kekesia mutou mai la tahalo ale roviti la gauru ale sesele. \v 21 Amuto matagagati, amuto kamati paua, amuto koramulia ge mata muli la vuhu la merera tomi ale amuto loloa veia eia sesele ka ouka. \v 22 Me la tahalo la visigologolola sesele, eia ere? Eia la tahalo ale tahi taro e Iesus veia eia kama e Kraist, veia eia kama La Riau ale loata te La Tahalo Uru. La tahalo ale visigolo mai ele, eia tahi taro La Tahalo Uru, e Tama gatou. \v 23 Mai etato ge rovi sesele La Tahalo Uru, etato kama koramulia ge tahi taro e Latula. Mai etato ge rovi sesele e Latula, ale etato rovi tai e Tamala. \p \v 24 Taritigi amuto ge sau tola la merera ale amite la bilalaha valoloti le amutou ovola te la siloko la lotu oio tamutou. Umala amuto ge piligi posea. Mai la merera alele eia so mahulihuli oio tamutou, ale amuto so mahulihuli vikapopo me La Tahalo Uru me Latula, \v 25 eia ge vimahuli amutou mai la merera tetala ale eia vei seseletia mutou ovola. \p \v 26 Eau kekesi matagagea mutou te la vulovulo giteu ale egite masagea veia ge viruru amutou, \v 27 eala moli La Kalulu La Marokala eia soloio tamutou, la tahalo la vovo isa kama ge vimari le amutou la merera ale isapolo, ouka. La Kalulu La Tahalo Uru eia vimariti le amutou la merera tomi ale sesele, eia kama visigolo, eia vikara sesele, me amuto ge sau tola sesele e Kraist, mai La Kalulu La Tahalo Uru eia vimariti le amutou ovola. \p \v 28 Ioge, amuto latatugu te la lotu te Kraist, taritigi amuto ge sau tola sesele La Uru, eia ge guvi rivu lou, me omai te la maututula etato kama ge mahela lou leia. \v 29 E Kraist, eia maroka sesele, eala eia taritigi pepeho mai ele veia etato ge matagaga veia la tahalo ale la vulovulola maroka sesele mai te Kraist, eia e latu La Tahalo Uru sesele. \c 3 \s1 Etatou e latatu La Tahalo Uru sesele \p \v 1 Hilage, e Tama gatou isu seseleti etatou ale tetala, eia toi moliti letatou veia etatou e latatula. Me eia sesele tai mai ele, etatou ale te Kraist, etatou e latatu La Tahalo Uru. La valalua me hatavivile ale logala, egite kama rovia, eala egite kama matagaga veia etatou e latatu La Tahalo Uru, la vuhula egite muku pile etatou mai tai pala egite muku pile e Kraist. \p \v 2 Amuto tabarabaragu, etatou e latatu La Tahalo Uru sesele, etato balavati, eala moli la vibalavala te La Tahalo Uru ale mulimuli, etato soukama rovia, ale eia ge vagoilo etatou te la pulolou la sagegela oio te la balila. E Kraist ge gomai lou, etato ge hilo seselea, etato ge vulo sesele mai eia. \v 3 Mai etato ge sau tola la merera alele, etato ge maroka mai sesele e Kraist. \p \v 4 Mai etato ge ruruti, etato poloti la merera te La Tahalo Uru. La iruru, eia sibitala te la vulovulo la vareagila ale etato kama lololo la merera te La Uru. \v 5 Eala moli e Kraist gomai veia ge vimavulaha taro letatou la iruru tegatou ale etato igigoa. Me eia la iruru isa ouka oio tetala, eia maroka viviu. \v 6 Mai ele, mai etato ge sau tolati e Kraist, etato kati ge pou tavu lou la iruru. Eala moli mai etato ge lagu tavu moli la iruru, ale eia matagaga moli veia etato kama rovi e Kraist, etato soukama hilo seselea. \p \v 7 Amuto taitarigu te la lotu te Kraist, igo tigi, egite la tahalo la visigologolola souka viruru amutou. Mai la vulovulo mutou ge maroka, amuto tai ge maroka mai e Kraist. \v 8 Mai eme ge lagu tavu moli la iruru, eia ge matagaga moli mai ele veia eme te Satan, la vuhula sokoa la silokola, kara igoie, e Satan eia pou tavu moli la iruru. Me la vuhu la guluvi te Latu La Tahalo Uru eia maie, veia eia ge vikaluvu sesele la vulovulole Satan omai te la maututula. \p \v 9 Mai eme la tahalo isa veia eme e latu La Tahalo Uru sesele, eme kamati ge lagu tavu la iruru, la vuhula la vulovulomu eia maiti la vulovulo La Tahalo Uru. Mai La Tahalo Uru ge e Tamamu sesele, eme kamati koramulia ge lagu tavu lou la iruru. \v 10 Egiteu ale e latatu La Tahalo Uru, me egiteu ale latatule Satan, etato hilovi tigi egiteu maie: Mai egiteu kama ge pou tavu la vulovulo ale maroka, eia matagagati mai ele veia egiteu kama e latatu La Tahalo Uru, egiteu e latatule Satan moli. Mai tai la tahalo ale kama puhi tigi e tabarala, eia tai veipalea mai ele veia eia kama e latu La Tahalo Uru. \s1 Amuto ge vipuhi tigi \p \v 11 La merera te Kraist ale pala te la siloko la lotu kara igoie eia maie: Etatou ale tetala, eia taritigi veia etato ge vipuhi tigi tataho. \v 12 Etato umala ge mai e Kain ale e latule Adam, eia la tahalo te Satan sesele, eia bili e tarila e Abel. Me ilava eia bili taro e tarila e? La vuhula e tarila la tahalo isa la vulovulola taritigi, eala moli e Kain, eia la tahalo la iruru. \p \v 13 Amuto tabarabaragu, ale egiteu la valalua me hatavivile ale kama te Kraist, egite ge vile amutou, amuto umala ge karutu. \v 14 Etatou ale te Kraist, etato mai ale saga poloti soio te la mautu la mahulila, etato kati pou te la mautu la pileho. Etato rovitia mai ele veia etato pouti te la matagaga, la vuhula etato puhi tigiti egiteu e tabarabara gatou. Mai isasa eia kama vipuhi tigi mai ele, ale eia soloio te la mautu la pileho me la maligoma. \v 15 Mai isa ge gima e tabarala, ale eia mai ale bilitia, me amuto rovia veia la tahalo la bilili, eia kama sau tola gologolo la mahulila ale sesele, la kaluvula ge ouka. \v 16 E Iesus Kraist, eia sugu tarotia gatou la mahulila tetala, eia peho roboti etatou, eala etato matagagati te la vulovulo la gilogo me la vipuhi tigila tai mai ele. Taritigi pepeho veia etato tai ge sugu taro la mahulila tegatou veia ge lapu rivu egiteu e tabarabara gatou taro la limale Satan. \v 17 Mai la tahalo te Kraist isasa eia tahola ilua la uati, me eia hilo e tabarala isa ale pou la savelela, eala moli eia hate tuu robo molia, eia kama gogoa, la tahalo ale, eia kama koramulia ge vei mago “La gilogo te La Tahalo Uru, eau sau tolatia.” Ouka, eia kama ge koramulia ge vikara mai ele, la vuhula eia la gilogo ouka. \p \v 18 Amuto taitarigu te la lotu te Kraist, la gilogo ale etato sau tolea te Kraist, eia umala ge la vikararala bulalahu moli. Mai etato veia etato rovi sesele la gilogo te La Tahalo Uru, taritigi etato ge gogo sesele egiteu e tabarabara gatou, egite ge hilo la visuli tegatou, egite ge gabu tikumu la vulovulo gatou veia eia sesele. \s1 La tahalo ale rovi sesele e Kraist, eia kamati koramulia ge taga La Tahalo Uru \p \v 19 Mai la igogolu tegatou ge taritigi mai te la igogolu la gilogo, me etato ge vagari mai ele te la visuli soio tegiteu e tabarabara gatou, ale etato ge rovia veia etato pouti te la matagaga, la vuhula la vulovulo gatou matata tomi moli. Eala etato kamati ge taga La Tahalo Uru, mulimuli etato ge magiri te la lagula, etato kama ge pariri, ouka. \v 20 La Tahalo Uru rovi tomi moli la gabutatalala tegatou. Mai etatou ge la tahalo tetala sesele, etato kama ge mahela leia. \v 21 Etato ge magiri te la lagula, etato ge sagege tai la igogolu isahari ale taritigi, etato igotia, etato kama ge taga La Tahalo Uru. \v 22 Etato ale roromulimulia ge abi la visuli tetala ale uru tai mai la vavua la kilaka, la vuhula la igogolu tegatou eia visagegetia. \v 23 Me la merera ale tikumu eia tautia somai tegatou, eia maie: Etato ge sau tola sesele la isale Latula, e Iesus Kraist, etato ge vipuhi tigi tai, mai la merera te Kraist ale eia veitia gatou ovola. \v 24 Mai etato ge roromuli sesele la merera te La Tahalo Uru, etatou ge tetala seseleti, eia ge pou oio tegatou. Etato ge matagaga tai veia La Tahalo Uru eia oioti tegatou, mai etato ge gabu la tivura La Kalulu La Marokala ale eia abitia gatou. \c 4 \s1 Etato ge hilovi tigi la valolo tomi veia eia loio seseleti te La Tahalo Uru ka ouka \p \v 1 Amuto tabarabaragu, amuto umala ge gabu tikumu egiteu tomi ale veia La Kalulu La Marokala eia oio tegiteu. Egite ge valolo mai ele, eala moli amuto ge hilovi tigi la merera tegiteu veia eia loio te La Tahalo Uru ka ouka. La vuhula te la imamala ale igoie, la valalua la visigologolola, egite oioti te la maututula tomi. \v 2 La merera tegiteu, amuto ge hilovia maie: Mai isa ge veia e Iesus Kraist eia sibitala mai la tahalo la vovo, ale amuto ge matagaga mai ele veia la tahalo ale eia rovi La Kalulu La Tahalo Uru. \v 3 Eala moli mai isa ge tahi taro veia e Iesus Kraist, eia kama loio te La Tahalo Uru, la tahalo ale valolo mai ele, eia kama rovi La Kalulu La Tahalo Uru. Ale la kalulule Satan moli eiala vikarakarale, eia gima e Kraist. Amuto lolotia pala veia la gabutatalala la gima te Kraist ale uru sesele ge sibitala, me hiloa eia sibitalati. \p \v 4 Amuto taitarigu te la lotu te Kraist, amuto matagagati, amuto bolehohoti egiteu la gima te Kraist ele. Amuto roviti La Tahalo Uru, eia pouti tamutou, me La Kalulula eia vagari, egiteu la tahalo la visigologolola, egite kama koramulia. \v 5 La vikarakarala tegiteu, eia la mari papaila moli mai la mari te la magasa, me la valalua egite gabu tikumu la merera tegiteu, la vuhula la valalua tai, egite te la magasa moli. \v 6 Eala moli etatou, etato te Kraist. Mai isa ge rovi La Tahalo Uru, eia ge gabu tikumu la merera tegatou. Egiteu ale kama te La Tahalo Uru, egite kama koramulia ge lolo etato. Me mai moli ele etato koramulia ge hilovi la valolo tomi, ge rovia la merera ale sesele, eia loio te La Kalulu La Marokala, ge rovi tai la merera la visigologolola ale loio te Satan. \s1 La Tahalo Uru eia la vuhu la gilogo \p \v 7 Amuto tabarabaragu ele, taritigi etato ge vipuhi tigi moli, la vuhula la vulovulo ale taritigi, eia loio seseleti te La Tahalo Uru. Mai eme la tahalo la gilogo, eia matagaga mai ele veia eme rovi La Tahalo Uru, eme e latula sesele. \v 8 Mai isa kama rovi la gilogo, eia veipalea mai ele veia eia kama rovi La Tahalo Uru, la vuhula La Tahalo Uru eia la vuhu la gilogo. \v 9 Eia veipala la gilogo tetala ale uru sesele mai aleie, eia baha taro e Latula La Riau somai tegatoue veia etato ge sau tola la mahulila ale sesele oio tetala. \v 10 Mai etato masaga tavuti La Tahalo Uru, eala moli la gabutatalala tegatou tavu eia, eia kama tikumu sesele, etato veipalea mai ele veia la tautaulailo tegatou eia la golu bulalahu moli. Eala moli La Tahalo Uru, eia gogo pala mugati etatou, eia sugu taro e Latula veia eia ge peho robo etatou, veia eia ge vimavulaha taro letatou la iruru tegatou. \v 11 Amuto tabarabaragu, La Tahalo Uru eia gogo pepehoti etatou mai ele, eala eia koramulia veia etato ge vipuhi tigi tai mai la gilogo tetala ale uru ele. \v 12 Etato isa soukama hilo La Tahalo Uru, eala moli mai etato ge vipuhi tigi, ale La Tahalo Uru ge pou tegatou, me etato ge maroka tataho mai eia, la valalua me hatavivile ge hilo la vulovulo La Tahalo Uru sesele omai tegatou ale tetala. \p \v 13 Etato matagagati veia etatou tetalati, veia eia pouti tegatou, la vuhula eia abitia gatou La Kalulu La Marokala. \v 14 Amiteu la bilalaha, amite hilo seseleti e Kraist ele, eala amite valolo seseleti leia veia La Tahalo Uru eia baha taro seseleti e Latula somai te la maututula veia eia ge vimahuli etatou la valalua me hatavivile tomi. \v 15 Mai isasa ge veipala la isale Iesus veia eia La Tahalo Uru sesele, tio La Tahalo Uru eia oio pouti te la tahalo alele, me eia la tahalo te La Tahalo Uru seseleti. \p \v 16 Mai moli ele, etatou ale igoie, etato roviti la gilogo te La Tahalo Uru veia eia uru sesele, etato gabu tikumua. La Tahalo Uru eia la vuhu la gilogo tomi. Mai etato ge puhi tigi egiteu la valalua me hatavivile, eia ge matagaga mai ele veia etatou te La Tahalo Uru, me La Tahalo Uru eia tegatou. \v 17 Mai la vulovulo la gilogo ale taritigi mai ele, eia vulo uru oio tegatou, tio te la tapasi la maututula etato ge maroka sesele, me etato ge magiri ge la lagu La Tahalo Uru, etato kama ge mahela, kama ge taga, la vuhula la vulovulo gatou eia maroka tomi moli, mai te Kraist. \v 18 La vulovulo la gilogo eia kama rovi tai la tilaga. La gilogo te Kraist ale sesele eia ge kumuli taro la tilaga, etato kati ge tataga, la vuhula La Tahalo Uru gogoti etatou ale tetala, eia kati ge vilai etatou. Mai etato so tataga La Tahalo Uru, eia matagagati mai ele veia etato soukama rovi tigi la gilogo tetala ale eia ge igo maroka letatou. \v 19 Ale igoie etato rovi la gilogo, la vuhula La Tahalo Uru gogo pala mugati etatou. \v 20 Mai isa eia veia eia rovi La Tahalo Uru, eala moli eia oio gagima moli egiteu e tabarabarala, eia la tahalo la visigologolola. La vuhula, mai etato kama koramulia ge masaga egiteu e tabarabara gatou ale etato hiloti egiteu, etato ge masagea mave La Tahalo Uru ale etato soukama hiloa? \v 21 Me la merera tetala isa ale tikumu sesele eia abitia gatou, eia maie: Mai eme la tahalo me la tavile sesele te La Tahalo Uru, taritigi eme ge puhi tigi egiteu e tabarabaramu, me eme ge puhi tataho egiteu tomi. \c 5 \s1 La tahalo te Kraist eia bolehohoti la vulovulo ale kama kokora te la vovo \p \v 1 Mai isa ge gabu tikumu e Iesus, me eia ge rovia mai ele veia e Iesus eia e Kraist, eia la tahalo la vimahuli sesele tegatou, tio la tahalo alele, eia e latu La Tahalo Uru sesele. Eala eia koramuli taia veia etatou ale masaga La Tahalo Uru ge masaga tai egiteu tomi e latatula, mai egiteu e tabarabara gatou tomi te Kraist. \v 2 Ale etato ge masaga La Tahalo Uru, me etato ge roromuli tai la merera tetala, eia ge matagaga mai ele veia etato ge puhi tigi egiteu e latatula. \v 3 Mai eme masaga La Tahalo Uru, eme ge roromuli tomi moli la merera tetala. Eala moli la merera tetala, eia kama tikumu veia etato ge bolebolea, \v 4 la vuhula etatou ale e latatula sesele, etato bolehohoti la vulovulo ale kama kokora te la vovo. Etato sau tolati e Kraist, etato ge bolehoho la vulovulo ale kama kokora mai ele. \v 5 Me ere sesele la tahalo me la tavile te Kraist ale ge vagari? Egiteu moli ale matagagati veia e Iesus, eia e Latu La Tahalo Uru. \s1 La Tahalo Uru eia veipalati la vuhu la igogolu te Latula \p \v 6 E Iesus Kraist, eia guvi seseleti otalo, me la irovilala tetala ilua: Isasa, eia abi la vuluhi te la lalu, me isasa te la kasosola tai eia pagegele. Mai la vuluhi moli, eia kama tikumu, eala moli ale la kasosola tai pagegele, La Kalulu La Marokala eia veipala matagagea te la gabutatalala tegatou mai ele veia la igogolu te Kraist eia sesele, me La Kalulu La Tahalo Uru eia vikara sesele tai ovola. \v 7 La irovilala itolu oio ale veipalea veia e Iesus e Latu La Tahalo Uru, egiteula maie: \v 8 La Kalulu La Marokala, la lalu la vuluhi, me la kasosola ale pagegele oata te la tauvalautu. Me la masova giteu la irovilala itolu ele eia visauru moli. \v 9 Mai la tahalo la vovo ge vikara, etato ge lolo molia, kama ge gabu tikumua. Eala moli mai La Tahalo Uru ge vikara, ale etato ge gabu tikumu pepehoa. La Tahalo Uru eia veipalati la vuhu la igogolu te Latula, veia eia la tahalo la vimahuli tegatou la valalua me hatavivile tomi. \v 10 Mai isasa eia ge gabu tikumu e Iesus veia eia e Latu La Tahalo Uru sesele, tio la vavua la merera te La Tahalo Uru alele, eia ge tabuli oio tetala. Eala moli mai isasa eia ge tahi taro la merera te La Tahalo Uru aleie, eia mai ale tahi taro La Tahalo Uru veia eia la tahalo la visigologolola. \v 11 Me la merera te La Tahalo Uru oio te Latula eia maie, veia La Tahalo Uru eia abitia gatou la mahulila ale sesele, la kaluvula ge ouka, la vuhula e Latula vimahuliti etatou. \v 12 Mai etato ge te Latula sesele, ale etato sau tolatia mai ele la mahulila ale sesele. Mai etato kama rovi e Latula, etato kama rovi la mahulila ale sesele, etato mai ale pehoti. \s1 Etato sau tolati la mahulila ale sesele, la kaluvula ge ouka \p \v 13 La merera taku tomie, eau kekesia mutou la valalua me hatavivile ale amuto toroti te la isale Kraist veia eia e Latu La Tahalo Uru sesele. Eau kekesia mutou la veimatagagala tomi mai ele veia amuto ge rovi seselea veia amuto sau tolati la mahulila ale la kaluvula ge ouka. \v 14-15 Etato ge magiri moli te la lagu La Tahalo Uru, etato ge kaka la papaga tomi ale etato savelea, etato ge magiri moli, etato kama ge mahela, la vuhula etato rovitia veia la visuli ale mave ale mave etato ge kakea tetala, eia ge sugu taro molia gatou, mai la kilaka tegatou eia ge poga sesele la masasagala tetala. Eia ge lolo moli etatou, me la paga ale etato savelea, etato ge rovia veia eia abi seseletia gatou, etato mai ale sau tolati la vavua la kilaka tegatou, etato soukama hiloa, eala moli etato tautaulailoti oio vola veia etato sau tolatia. \p \v 16 Mai isa tegatou eia ge hilo e tabarala isasa eia igoti la iruru bakisi, mai la iruru moli ale eia kama ge koramulia ge vilua mulia, taritigi eia ge kaka La Tahalo Uru veia eia ge vimahuli la tahalo ale ruruti ele, La Tahalo Uru ge igo seselea, eia ge vimahulia. Sesele, la iruru isa ale tikumu bara eia oio, mai la tilou soio te La Tahalo Uru, etato kama ge koramulia ge kaka robo la iruru alele, ouka. \v 17 Egiteu la iruru tomi tikukumu, eala moli isahari kama bilibili etatou, me eia koramulia veia etato ge kaka roborobo egiteu la mata la iruru tomi alele. \p \v 18 Mai etatou e latu La Tahalo Uru sesele, etato kati ge lagu tavu lou la iruru, la vuhula e Latu La Tahalo Uru, La Riau e Iesus, eia ge sigirobo etatou, e Satan kama ge igo gegeru etatou. \v 19 Etato matagagati veia etato e latatu La Tahalo Uru sesele, eala moli la maututula tomi e Satan voluti ovola, eia kisi tola la valalua me hatavivile. \v 20 Eala moli etato rovi taitia veia e Latu La Tahalo Uru eia guviti omai, eia vimatagagati etatou veia etato ge rovi sesele La Tahalo Uru, etato kama ge tilo te la visigologolola te Satan. Etatou ale tetalati, me te Latula tai e Iesus Kraist, etato rovia veia eia La Tahalo Uru tegatou sesele, la tahalo la vimahuli tegatou tomi isasasa. \p \v 21 Amuto taitarigu te la lotu te Kraist, taritigi amuto ge kisu taro egiteu la lotu ale kama sesele! \cls Eau e Ioanes.