\id 1CO - Nakanai NT [nak] -Papua New Guinea 1983 (DBL 2014) 
\h 1 KORIN 
\toc1 Ale La Muluga La Merera Te Pol Eia Kekesia Giteu E Korin 
\toc2 1 Korin 
\toc3 1 Kor 
\mt1 ALE LA MULUGA LA MERERA TE POL EIA KEKESIA GITEU E KORIN  
\c 1  
\p
\v 1 Eiau e Pol, eau kekesia mutou la valalua me hatavivile la lotu te La Tahalo Uru oio te la mautu uru e Korin. Amila me tabara gatou te la igogolu te Kraist, e Sostenes, amila toi la haro sesele soio tamutou. La Tahalo Uru, te la masasagala tetala moli, eia toleau soio te la igogolu te la valolo te Kraist Iesus veia eau ge la bilalaha tetala.  
\v 2 Eau kekesia mutou ale te Kraist oio e Korin, La Tahalo Uru eia hiloviti amutou, eia vimaroka amutou, la vuhula amuto tomi te Kraist. Amutou la valalua me hatavivile te La Tahalo Uru sesele, la vuhula eia visati le amutou. Mai la valalua me hatavivile tai te la maututula tomi ale egite lotu tavu La Uru gatou e Iesus Kraist, etatou tomi la valalua me hatavivile tetala ale maroka.  
\v 3 La Tahalo Uru, eia e Tama gatou tomi, egira me La Uru gatou e Iesus Kraist, egira ge vibalava le amutou la gilogo ale uru, la tia mutou tomi oilo ge malilo tataho.   
\s1 E Pol toi la vibalavala te Kraist soio tegiteu  
\p
\v 4 Eau kama ge maila te la kilaka, eau ge vaisale moli La Tahalo Uru te la vaabila tomi tetala ale eia vaurua soio tamutou ale sau tola e Kraist Iesus.  
\v 5 Amuto taholati la vuliti mai te la merera te La Tahalo Uru, me la mari tetala ale uru tai, e Kraist abitia mutou.  
\v 6 Amuto sau tola sesele la merera te Kraist ale amite pala valoloti amutou ovola,  
\v 7 eala igoie amuto kama galo bakisi te la vibalavala tomi te Kraist soio tegatou ale tetala. Amuto pou tataho moli, amuto pou tali la haro ale La Uru gatou e Iesus Kraist eia ge sibitala lou.  
\v 8 Eia ge sau tola sesele amutou, eia kama ge maila te la igogolu tetalale. Me te la tapasi la haro, ale La Uru gatou e Iesus Kraist ge beu loua somai ovola, amuto ge magiri moli la marokala, amuto kamati ge gabu la igototolola te La Tahalo Uru.  
\v 9 La merera tomi alele, amuto ge sau tolea, La Tahalo Uru eia vikara sesele. Eia tolati amutou veia amuto ge pou moli la sagegela vikapopo le Latula, e Iesus Kraist, La Uru gatou.   
\s1 La valalua la lotu kati vipuhi tigi  
\p
\v 10 Amuto tabarabaragu te la isale Kraist, eau kaka gogogo amutou veia amuto umalati ge vaigo. Taritigi la merera tamutou ge isa moli, amuto ge vipuhi tigi sesele, la gabutatalala tamutou ge isa moli, la marapala ouka.   
\p
\v 11 Amuto tabarabaragu, eau rovitia veia amuto oio vaigo, la vuhula egiteu la karakara te Kloe isahari, egite loio la mautu tamutou, egite gomai Epesas, egite pogeau, egite veipaleagu veia la vaigigola sibitalati kabili tamutou.  
\v 12 Mai la merera tamutou eia kamati visauru, la merera tamutou isapolopoloti. Isa ge veia maie “Eau tilimuli e Pol.” Isa lou ge hiliti, eia ge putu olia, eia ge veia maie “Eau tilimuli e Apolos.” Goio, isa lou ge hiliti, eia ge veia maie “Eau tilimuli e Pita.” Goio, isa lou ge goio ge vikara maie “Eau tilimuli moli e Kraist.”  
\v 13 Mave, amuto soioge vilagilagi le Kraist veia ge vitabari letatou ale tetala mai ele, ia? Mave, soioge eau e Pol, eau peho robo amutou oata te la tauvalautu, ia? Mave, egite soioge vuhi le amutou te la isagu veia amuto ge taku moli, kama ge te Kraist, ia?  
\v 14-15 Ale amuto vikara papai mai ele, eau sagege pepeho ale eau kama vuhi isahari tamutou, isa kati ge koramulia ge kau loua mutou veia amuto isahari abi la vuluhi te la isagu. e Krispas mira me Gaias moli, eau vuhi egirua,  
\v 16 me eia sesele, eau vuhi tai e Stepanas me egite la karakara tetala, eala moli eau soioge kama vuhi isahari lou, eau kamati gabutatala tigia.  
\v 17 E Kraist kama baheau te la vuluhi, ouka, eia baheau veia eau ge valolo la valalua me hatavivile tomi te la maututula la valolo ale taritigi te Kraist. Oio te la merera tetalale, eia kama baheau veia eau ge valolo ovola vikapopo me la mari te la vovo. Mai la merera te la pileho te Latula oata te la tauvalautu, eau soukama ge igoa mai la merera bulalahu ale kama vagari, mai eau ge valolo ovola mai la mari te la vovo.   
\s1 E Kraist sekela moli veipala la mari te La Tahalo Uru  
\p
\v 18 La valolo te la pileho te Kraist, egiteu ale poga tavu la pileho, egite loloa mai la merera bulalahu moli, la vuhula egite kama rovi la mahulila tetala. Eala moli tegatou ale eia vimahuliti etatou, la merera te la pileho te Kraist, eia la vagagari La Tahalo Uru somai tegatou.  
\v 19 Mai te la merera te La Buk Tabu Ale Pala, La Uru eia veia maie:  
\p La merera tegiteu la valalua la mari, eau ge barautua.  
\p Eau ge igo marapa la mari tegiteu la tahalo la mari.   
\p
\v 20 Mai ge mai ele, la tahalo la mari, eia ge vikara mave? Me egiteu ale gigi bibibi la merera ale mave ale mave veia ge rovi la vuhu la papaga tomi, egite ge vei lou lava e? Egiteu tai ale lapu malalau la merera veia ge vikara muli la vuvuhu la papaga tomi, egite ge vei mave? La Tahalo Uru eia veipalatia veia la mari tegiteu tomi ele, eia la golu bulalahu.   
\p
\v 21 La valolo te la pileho te Kraist, ale amite la bilalaha tetala valolo ovola, eia mata mai sesele la merera bulalahu tegiteu la tahalo la vovo. La Tahalo uru, te la mari tetala moli, eia viputumulitia veia etato la valalua kama ge rovi eia te la mari tegatou lou te la vovo. Ouka, eia toitia veia ge vimahuli la valalua te la merera te la pileho te Latula, eia mata mai la merera bulalahu moli tegiteu la tahalo la mari.  
\v 22 Egiteu e Iuda, egite gabu tikumu sekela la irovilala loata te La Uru. Egiteu e Grik, egite gabu tikumu sekela la mari te la vovo.  
\v 23 Eala moli amiteu la bilalaha te Kraist, amite veipala moli la pileho te Kraist oata te la tauvalautu, me la mererale egiteu e Iuda vilea, me egiteu e Grik lege vahia.  
\v 24 Eala moli tegatou la valalua e Iuda me la valalua e Grik tomi ale La Tahalo Uru tolati etatou soio tetala, la mererale eia tikumu, eia la merera la mahuli moli te Kraist, eia veipala la vagagari La Tahalo Uru, eia veipala tai la mari tetala ale uru.  
\v 25 Mai la merera ale la valalua veia la merera bulalahu moli ale La Tahalo Uru toitia, eia muga sesele te la merera la mari tomi te la valalua. Mai la merera tai te La Tahalo Uru ale mata mai la merera bulalahu ale kama vagari, la vagagari la merera tetalale, eia muga sesele te la vagagari giteu la valalua.   
\p
\v 26 Amuto tabarabaragu, eau masagea veia amuto ge gabutatala muga bakisi sotigu te la pulolou tamutou ale pala, te la imamala ale La Tahalo Uru so baha tatavu amutou. Pala, amuto mai ale so goilo halaba te Kraist, amuto kama vauru lou amutou, amuto kama vei tataho amutou veia amutou la tahalo la mari, veia la valalua tomi tai ge togo amutou.  
\v 27 La Tahalo Uru, te la masasagala tetala moli, eia hilovi amutou ale la valalua veia amuto la golu bulalahu, eia hilovi amutou veia ge vauru amutou, veia amuto ge veipala la merera tetala me la vulovulola tai ale taritigi. Eia gabutatalea mai ele veia amutou ale la golu bulalahu ge vibisi egiteu la tahalo la mari, veia amutou tai ale kama vagari ge vibisi egiteu ale vagari, egite ge gabu la mahelala ale uru pepeho.  
\v 28 Eia hilovi amutou la tahalo me la tavile bulalahu moli, ale la valalua vile amutou, eia igoa veia la vulovulo mutou ge vikaluvu tomiti la viputumulila tegiteu ale veia egiteu sekela magiri.  
\v 29 La Tahalo Uru viputumulitia veia ge igoa mai ele, veia la tahalo la vovo isasa kama ge magiri te la lagula te la vagagarila lou, veia ge vei tataho rivu lou la vulovulola soio te La Uru.  
\v 30 Eala moli amutou, La Tahalo Uru eia puliti amutou soio tetala veia amuto ge pou vikapopo tomi me Iesus Kraist. Eia vipou e Latula veia eia sekela ge vahilo letatou la gauru te La Tahalo Uru, veia oio moli te la pileho te Kraist etato ge sau tola la mari ale sesele te La Tahalo Uru, mai la vulovulo ale matata, la pulolou la marokala, me la mahuli ale sesele tai.  
\v 31 Mai la merera te La Uru te La Buk Tabu Ale Pala, eia veia maie:  
\li1 Mai isa masagea veia ge vei tataho rivu loua,  
\li1 Taritigi eia ge veipala moli la igogolu  
\li1 ale La Uru igotia oilo te la kalulula.   
\c 2  
\s1 La valolo te Pol, eia valolo moli te la pileho te Iesus Kraist sekela  
\p
\v 1 Amuto tabarabaragu, eau kama guvi pala tamutou veia ge ali la ilo mutou la merera usu ale malama, me la mari ale uru tai te la vovo, eau kama valolo amutou oio vola. Eau veipala molia mutou la merera ale sesele te La Tahalo Uru.  
\v 2 Eau guvi tavu amutou pala, eau gabutatalea veia ge vei molia mutou la mari isa moli sekela, mai te Kraist, me la pileho tetala.  
\v 3 Ale eau sibitala omai tamutou e Korin pala, la vovogu pariri, eau taga,  
\v 4 eau kama valolo le amutou la vikarara la mari ale tikumu. Eala moli La Kalulu La Marokala, eia goio vitikumu la merera taku soio tamutou  
\v 5 veia la tautaulailo tamutou eia ge magiri te la sosole ale sesele mai te la vagagari La Tahalo Uru, kama la mari te la vovo.   
\s1 La mari ale sesele te La Tahalo Uru, La Kalulu La Marokala moli eia vimatagaga etatou ovola  
\p
\v 6 Mai eau ge valolo la valalua ale la gabutatalala tegiteu te Kraist eia matuhati, eau ge valolo legiteu la merera ale tikumu. Eala moli eia kama la mari te la vovo ale eau valolola, eia kama la mari tai tegiteu e ururu ale vibaumuli la maututula te la imamala ale igoie. Egite mulimuli ge kaluvu, la vagagari giteu ge ouka.  
\v 7 La mari ale eau valolo ovola, eia la mari te La Tahalo Uru sesele, eia pala tabuli kokovu, eia tau kokovua veia la valalua kama ge hiloa, kara la imamala ale igoie. La merera ale, eia raragitia pala seseleti te la silokola, eia soukama vipou la maututula.  
\v 8 Egiteu la mulugaluga isa omai te la maututula, egite kama rovi la masova la merera tetala aleie. Mai egite ge matagaga ovola, egite kati ge katu tola La Uru gatou La Riau oata te la tauvalautu.  
\v 9 Mai La Buk Tabu Ale Pala eia veia maie:  
\li1 La vibalavala ale la valalua la vovo  
\li1 kama koramulia ge hiloa te la mata giteu,  
\li1 kama ge lolo taia te la gavusa giteu,  
\li1 la vibalavala ale isapolo viruru mai ele,  
\li1 isa kama koramulia ge gabutatalea,  
\li1 La Tahalo Uru eia raragitia tegiteu ale gogoa,  
\li1 egite sulia.   
\p
\v 10 Eala moli la valolo ale taritigi, La Tahalo Uru eia veipalatia somai tegatou te la vimatagagala te La Kalulu La Marokala. La Kalulu La Marokala, eia mata muli la vuhu la merera tomi, la gabutatalala tai te La Tahalo Uru ale tikumu, eia tabuli kokovu, La Kalulu La Marokala eia mata mulimuli taia, eia veipalatia somai tegatou.  
\v 11 Mai etato la valalua la vovo, la kalulu gatou moli isasasa sekela eia rovi tomi la tilalau tegatou isasasa oilo, mai tai ele La Kalulu La Marokala moli sekela eia rovi la gabutatalala te La Tahalo Uru.  
\v 12 Etato igoie kama tahola la matagaga te la vovo moli, etato tahola tai la matagaga te La Kalulu La Marokala, ale La Tahalo Uru bahea somai veia etato ge matagaga tomi la vibalavala tetala somai tegatou.   
\p
\v 13 Eala, etatou ale te Kraist, etato kama vikara bulalahu mai te la vimari te la vovo moli. La Kalulu La Marokala moli eia vimari letatou la merera tetala ale sesele, etato goio tovo lou egiteu ale La Kalulu La Marokala eia pou tegiteu.   
\p
\v 14 Eala moli la tahalo ale kama pou te la matagaga te La Kalulu La Marokala, eia kama koramulia ge mata kilala tigi tegiteu la vibalavala ale La Kalulu La Marokala eia abia gatou. Eia kama rovi tigia, eia veia eia la golu bulalahu moli, la vuhula la mari ale, eia matagaga moli tegiteu ale La Kalulu La Marokala eia vimatagagati egiteu.  
\v 15 La tahalo ale La Kalulu La Marokala eia pou tetala, eia koramulia ge mata muli la vulovulo la valalua tomi, eala moli la tahalo ale kama te Kraist, eia kama ge koramulia ge mata muli la vulovulo la tahalo te La Uru veia ge matagaga ovola, la vuhula etatou ale te La Uru, etato pouti te la matagaga.  
\v 16 Mai La Buk Tabu Ale Pala eia veia maie:  
\li1 Ere ge koramulia ge rovi  
\li1 la gabutatalala te La Uru?  
\li1 Ere ge koramulia ge suli leia la merera?  
\p Eala moli etatou ale tetala, etato sau tolati la gabutatalala te Kraist, eala egiteu ale pou te la maligoma, egite kama rovi la vuhu la vulovulo miteu, la vuhula egite kama rovi e Kraist.   
\c 3  
\s1 Egiteu tomi la bilalaha te La Tahalo Uru, egite visauru tomi moli  
\p
\v 1 Amuto tabarabaragu, amuto pala kama mata mai la tahalo ale La Kalulu La Marokala eia pou tetala. Eau kama koramulia veia ge vimari sesele amutou te la merera te La Uru ale tikumu. Eau vimari moli amutou mai la tahalo la vovo moli, mai e guliliki ale soukama sagaiti sesele te la merera te Kraist.  
\v 2 Eau mai ale abi molia mutou la susu, kama la ilali ale vagari, la vuhula amuto kama koramuli la merera ale vagari. Kara igoie tai, amuto soukama raragi tigi veia ge lolo la merera ale vagari,  
\v 3 la vuhula amuto so mulimuli la vulovulo te la vovo ale kama kokora. Mai amuto ge maisu totolo, amuto goio vaigo mai ele, la vulovulo mutou ele eia veipalea veia amutou la tahalo la vovo moli, amuto mai ale mulimuli moliti la vulovulo te la vovo ale kama kokora.  
\v 4 Mai isa ge vei mago “Eau mulimuli e Pol”, goio isa lou goio hiliti mago “Eau mulimuli e Apolos”, tio la vulovulo mutou ele eia veipalea veia la vulovulo mutou eia maiti la vulovulo te la vovo ale kama kokora.   
\p
\v 5 Amiteu la uru tomi te la lotu te Kraist, amite la bilalaha moli te La Tahalo Uru. E Apolos, eia ere? Eia isapolo mave? Eau, e Pol, eau tai, eau isapolo mave? Amite la bilalaha tomi moli te Kraist, ale pala amite vahiliti la gabutatalala tamutou, amuto goio tau la ilo mutou soio te Kraist. Amiteu la bilalaha tomi isasasa, amite igo la igogolu ale La Tahalo Uru tabaria somai tamiteu.  
\v 6 Eau mamuga galugalu la vavuala, mai la merera te Kraist eau valolo amutou ovola, e Apolos mulimuli tigi tataro la lalu oio vola, eala moli La Tahalo Uru sekela moli vibalavea, eia kusi mai la obu sesele, kama eau, kama e Apolos.  
\v 7 Ere galugalu, ere vibaumulimuli, ale la golu bulalahu moli, etato umala ge toi tabaribari egiteu mai ele, egiteu ale igogolu te Kraist. Etato ge gabu tikumu La Tahalo Uru sekela, la vuhula eia moli vikusi la merera ale etato galua.   
\p
\v 8 La tahalo ale galugalu, la tahalo ale vibaumulimuli, egira visauru moli, La Tahalo Uru ge kolia soio tegirua mai te la igogolu ale egira igotia.  
\v 9 La vuhula, amiteu la bilalaha tomi, amite vaigogolu vikapopo moli te la igogolu te La Tahalo Uru, me amutou la valalua me hatavivile te Kraist, amuto mai la mahuma te La Tahalo Uru, ale amite vulalai ovola.  
\s1 La igogolu te la lotu te Kraist eia mai la tiligi la luma  
\p Amutou mai tai la luma te La Tahalo Uru.  
\v 10 Te la gilogo tetala, eau mai ale soko la tiligi la luma tetala oio tamutou, ale eau valolo amutou. Eau mai ale oli taro moli la sosolela, goio igoie la tahalo isa lou tigi la luma soata ovola. Eala moli etato tomi ge vibaumuli tigi, etato soukama tigi gegeru la luma te La Uru, mai ale etato vimari gegeru la valalua me hatavivile.  
\v 11 La vuhula la luma tetala, la sosolela e Iesus Kraist moli sekela, La Tahalo Uru vipoua mai ele, la sosolela isa lou ouka.  
\v 12 Tio la sosole la luma oioti, etato ge tigi la luma ale mave loata ovola? Mai isa ge tigi la luma me la papaga ale vagari, veia mai isa tai ge tigi la luma me la obu bulalahu moli ale kama vagari,\f + \fr 3:12 \ft Sesele, te la galevilale, e Pol tovo la tiligi la luma soio tegiteu la papaga isahari ale vagari mai la gold, la silva, me la daimond, me la papaga isahari ale kama vagari mai la obu me la barema. Ale tegatou la papaga ale vagari eia mai la paebro, la kapa, me la plang. Etatou la gold, la silva, me la daimond ouka te la tiligi la luma. \f*  
\v 13 tio la igogolu alele eia ge magiri matagaga te la tapasi la haro ale e Kraist ge gomai lou ovola. e Kraist ge mata muli la igogolu tegatou tomi soio te la lotu tetala, la viputumulila tetalale eia ge tululu mai la havi, eia ge selu taro la igogolu tomi tegatou ale kama sesele.  
\v 14 Mai la tahalo ge tigi la luma la papaga ale vagari, eia kama ge tululu. Tio e Kraist ge hiloa mai ele veia eia sesele, eia ge vibalava la tahalo ale la igogolu tetala eia taritigi mai ele.  
\v 15 Eala moli la igogolu ale kama sesele, la havi ge alia, eia ge kaluvu, la tahalo la igogolu alele, eia ge mahuli utu, eala moli mai la gilogo te Kraist ge ouka, bakisi moliti eia ge mai ale peho kabili te la havi.   
\s1 Etatou la valalua me hatavivile la lotu, la tia gatou eia mai la luma ale maroka te La Tahalo Uru  
\p
\v 16 Amutou la valalua me hatavivile la lotu te Kraist, la tia mutou eia mai la luma la lotu ale maroka te La Tahalo Uru. La Kalulu La Marokala te La Tahalo Uru, eia mou oilo te la kalulu mutou isasasa. La vimari tomi alele, amuto soioge soukama matagaga ovola, ia?  
\v 17 Mai la tahalo isasa ge vimumugu la tia mutou la valalua me hatavivile te Kraist, me amuto goio marapa, amuto vaigo, tio La Tahalo Uru ge igo gegeru tai eia, eia ge vure. La luma la lotu te La Tahalo Uru, eia la paga ale maroka sesele, me amutou ale tetala, amuto magiri mai la irovilala moli mai la luma la lotu tetala sesele. Eala, eia tikumu viruru veia isa ge tovo lalaia veia ge igo gegeru la pulolou ale taritigi tamutou ale te Kraist.   
\s1 Etato umala ge gabu tikumu la mari te la vovo  
\p
\v 18 Taritigi amuto ge gabutatala tigi, amuto soukama tutugolo rivu lou amutou veia la mari tamutou eia la paga ale sesele. Mai isa ge gabutatalea veia eia la tahalo la mari, mai te la mari te la vovo moli, tio taritigi eia ge vulo la gabutatalala tetala, eia ge vulo mai la tahalo ale la valalua te la vovo veia eia la mari ouka, tio eia ge sau tola sesele mai ele la mari ale uru te La Tahalo Uru.  
\v 19 La vuhula, la mari te la vovo, eia la golu bulalahu te la mata La Tahalo Uru. Mai La Buk Tabu Ale Pala eia veia maie “La Uru vititilo egiteu la tahalo la mari te la mari papaila tegiteu lou.”  
\v 20 Me la merera te La Buk Tabu isa lou eia veia maie “La Uru, eia rovia veia la gabutatalala tegiteu la tahalo la mari, eia la golu bulalahu moli.”   
\p
\v 21 Tio, taritigi pepeho mai ele veia isa tamutou umalati ge vei tataho la mari te la tahalo la vovo isasa. Amuto kama ge ligi la paa muli la mari, la merera, me la papaga tomi, la vuhula amuto taholatia.  
\v 22 Eau, e Pol, e Apolos tai, me Pita, La Uru abitia mutou amiteu taho tolu ele veia amite ge suli amutou. La magasa tomi, la maututula tomi, eia sugu taro tomitia mutou veia amuto ge taholea. La mahulila ale amuto taholea, eia la mahulila moli te Kraist. Mai tai amuto ge peho, la pileho eia kope moli la mata ale amuto ge goio tetala. La imamala ale pala, la imamala ale mulimuli, amuto mamuga ovola, la vuhula amuto pou la mulugaluga vikapopo me Kraist.  
\v 23 Amuto te Kraist tomi moliti, me Kraist, La Tahalo Uru sesele sau tolea, eia tetalati.   
\c 4  
\s1 La Uru sekela mata muli la igogolu tegiteu la bilalaha tetala  
\p
\v 1 La Uru moli sekela ge mata muli la igogolu tamilua me Apolos, amutou e Korin ge ouka! Taritigi amuto ge gabutatala amilua veia amila la bilalaha moli te Kraist, amila veipala la merera tetala ale pala tabuli kokovu, amila veipalea soio tamutou, igoie amuto matagagati.  
\v 2 Mai la bilalaha, la gabutatalala isa uru moli oio ale etato ge mata muli la vulovulola oio vola, veia eia roromuli la uru tetala, ka ouka?  
\v 3 Mai eau, e Pol, amutou e Korin, amuto gabutatalea veia eau igogolu tigi, ka ouka? Eau kama gabu tikumu la gabutatalala tamutou, me la gabutatalala tai tegiteu la valalua la vovo isahari lou te la igogolu taku, ouka gologolo. Eau tai kama ge mata muli rivu lou la igogolu taku veia ge vei tataho eau, ouka.  
\v 4 Sesele, eau kama gabutatala papai te la igogolu te Kraist ale eau igoa, eala moli la gabutatalala taku tai ele, eia la gabutatalala bulalahu moli mai la gabutatalala tomi te la vovo. La Uru sekela ge mata muli la igogolu taku veia eia taritigi, ka ouka.  
\v 5 Taritigi pepeho veia amuto ge vibaumuli tigi, amuto umala ge tomu sasae la igogolu te la tahalo te Kraist. Amuto ge pou tali moli la haro ale La Uru ge gomai lou, la vuhula la matagaga tetala ge veipala la gabutatalala tegatou tomi ale etato tau kokovua, me la vulovulo gatou tomi tai. Te la haro moli alele, mai isa ge la bilalaha ale sesele, La Tahalo Uru ge vaisalea.   
\p
\v 6 Amuto tabarabaragu, la merera taku tomi ele, eau mai ale toitia somai tamilua me Apolos veia amuto ge matagaga tigi, la vuhula amuto vaigo muli amilua. Amuto umalati ge toi tabaribari amiteu la bilalaha te Kraist. Amuto ge gabutatala tigi, amuto kamati ge vei tataho la tahalo la valolo isa veia ge vaurua mai ele, veia e tabarala isa lou te la valolo te Kraist amuto ge vilea.  
\v 7 Ere veia mutou veia amuto ge tomu sasae la igogolu tamiteu la bilalaha? Mai amuto la mari ge oio, ere abia mutou la mari ale? Amuto kama ge tahola isa la paga mai La Tahalo Uru eia kama ge abia mutou. Mai ge mai ele, mave sesele amuto vauru rivu lou amutou, veia amuto vulo uru te la mari me la vagagari mutou lou?   
\p
\v 8 Amuto Korin ele, amutou kama savele isa la paga, ia? Amuto soioge la tahalo la vuliti te la kalulu mutou, ia? Amuto pouti la pulolou la uru, amiteu la bilalaha te Kraist ouka, ia? Eau masaga seselea veia amutou ge la uru sesele mai ale amuto veia. La vuhula amiteu la bilalaha, La Tahalo Uru eia vauruti amiteu, me amite masagea veia amuto tai ge pou tomi sesele le amiteu te la pulolou la vibalavala tetala.   
\p
\v 9 Mai amiteu la bilalaha ge uru mai amutou! La Tahalo Uru eia soioge sugu taroti amiteu sotigu kililili mai la tahalo la kilisi ale egite ge lapua soio te la pileho. Egiteu la valalua ale vagari robo amiteu, egite mai ale mamuga, egite lapulapu amiteu la bilalaha mai la maroa, la valalua tomi me egiteu la angelo tai, egite malelei amiteu te la mahelala tamiteu ele.   
\p
\v 10 La valalua ubi le amiteu la bilalaha te Kraist la merera veia amite kama gabutatala vauru isa la paga lou, e Kraist moli, eala amite mata mai la paua. Eala moli amutou, amuto mata mai la tahalo la mari sesele te Kraist! Amite maveve, amuto vagari! La valalua togo amutou, eala moli egite vile amite.  
\v 11 Kara igoie, amite gabu moli la vitolola, amite la ilali ouka, la lalu tai ouka, la lavalava tai ouka, egite kue gegeru amiteu, amite tuga vulovulo, la luma ouka, la mautu tai tamiteu ouka.  
\v 12 Amite igogolu vagari, amite ali moli te la vagagari miteu lou, isa kama suli amiteu. Egite ge gilo amiteu, amite ge toi rivu moli la vibalavala soio tegiteu. Egite vile amiteu, eala moli amite magiri vagari moli, amite kama piligi la igogolu te Kraist veia la valalua ge masaga lou amite.  
\v 13 Egite vikara kukumua miteu, amite koli molila la merera ale taritigi. Kara igoie, amite mai seseleti la maroa, ale egite sapa taroa.   
\s1 Taritigi egite Korin ge abi tavu la vulovulole Pol  
\p
\v 14 Eau kama kekesia mutou veia ge igo mahela amutou, eala moli eau masagea veia ge viteteli tigi amutou mai e latatugu sesele  
\v 15 Eau valolo amutou pala te la valolo ale taritigi te Kraist, eau vagoilo amutou te la lotu te Kraist mai la tahalo eia visibitala e latula. Egiteu ale ge vimari le amutou la gauru te Kraist soioge mapaiti, eala moli e tama mutou te Kraist Iesus isa moli sekela, eiau.  
\v 16 Oio vola, eala eau karasuku amutou veia amuto ge abi tavu la vulovulogu.  
\v 17 Eala eau bahati e latugu e Timoti soio tamutou, eia la tahalo sesele te La Uru, eau isu pepehoa. Eia ge vahiliti lou la gabutatalala tamutou te la gauru te Kraist Iesus ale eau mulimulia, eia visauru moli me la vimari taku tomi soio tegiteu la valalua me hatavivile la lotu tomi te Kraist, oio te la galegale tomi, ale eau valolo egiteu ovola.   
\p
\v 18 Isahari tamutou ge hiloa veia eau bahati e Timoti, amuto ge vareagi lou veia eau kamati ge goiole.  
\v 19 Eala moli eia kama ge tabaa, eau tai ge gomai tamutou, mai La Uru ge masagea. Ale eau ge guvi, eau kama ge lolo la merera tegiteu ale vareagi, eau ge hilo moli la vulovulo giteu veia egite magiri te la igogolu ale vagari te La Uru mai la tahalo te Kraist sesele, uka egite soioge la golu bulalahu moli.  
\v 20 La vuhula la pulolou la marokala te La Tahalo Uru, eia kama la merera moli, eia la pulolou la matagaga tetala, me oilo vola etato veipala la vagagarila te La Uru sesele oio te la vulovulo gatou.  
\v 21 Amuto masaga ale mave, veia eau ge gomai ge vilai amutou, uka amuto masagea veia eau ge gomai tamutou vikapopo me la merera ale taritigi, la sagegela moli oio te la tiagu?   
\c 5  
\s1 La iruru isa uru eia magiri oio tegiteu la valalua te Kraist oio e Korin  
\p
\v 1 Eau loloti la vikararala isa tamutou veia oio tamutou la iruru soio te la tavile eia magiri, me la mata la iruru alele egiteu la valalua la maligoma magiri roboa, eala moli amuto mata sosoli molia. Egite veiagu veia isa tamutou eia lolo susu tavu e rutule tamala, eia vimavuta tomi leia.  
\v 2 La iruru oio magiriti, eala moli amuto veia ge vei tataho rivu lou amutou veia amuto taritigi, ia? Mai la tia mutou ge volu moli la iloburukola me la tilali! Mai amuto ge pitaro gale la tahalo ale igoti la iruru alele, eia kati ge pou vikapopo le amutou te la lotu te Kraist.   
\p
\v 3 Eia sesele, eau kama oio tamutou ele, eala moli te la kalulugu eau mai ale pou vikapopoti le amutou, me te la isale Iesus, La Uru gatou, eau mai ale veipalatia la iruru te la tahalo ale, eau toitia veia la iruru tetala eia tikumu.  
\v 4 Mai amuto ge pou vikapopo, eau tai la kalulugu ge pou tomi le amutou. Tio eau tutu tolea mutou veia te la vagagarile Iesus Kraist, La Uru gatou, eia pou vikapopo letatou,  
\v 5 amuto ge pitaro gale la tahalo la iruru alele, eia ge pou malau, eia ge goio ge pou lou te la pulolou la maligoma te Satan. Amuto ge vilaia mai ele veia eia ge gabua, eia ge piligi taro la vulovulola ale kama kokora te la vovo, veia eia ge vuvulo me la kalulula ge mahuli te la haro ale La Uru ge guvi lou ovola.   
\s1 Taritigi amuto ge pitaro gale la valalua la iruru  
\p
\v 6 Eia kama taritigi veia amuto ge vei tataho rivu lou amutou veia la vulovulo mutou taritigi. Mai amuto mata sosoli la iruru kabili tamutou, eia kama ge tabaa, eia ge poloa mutou tomi. Eau ge tovoa soio te la marasin ale visogo la palava. La marasin bakisi moli, eia goio visogo la bret ale uru.  
\v 7 Taritigi amuto ge pigi la paga la visogo la palava ale malipiriti, eia kamati taritigi, mai la vulovulo mutou ale kama kokora. Amuto ge piligia, amuto ge sibitala halaba mai la ilali ale taritigi sesele, la vulovulo mutou ale kama kokora, egite igo gegeru amutou pala, ge oukati. Amuto ge sibitala maroka mai la irovilala te la mahulila ale halaba te La Tahalo Uru, amuto ge maroka mai la bret ale La Uru vibalavea, eia kama sogo, egiteu e Iuda alalia te La Ilali La Poloselela vikapopo e latu la sip ale egite kaoa. e Kraist, eia mai e latu la sip ale peho robo etatou, egite katu tolatia oata te la tauvalautu, eia rou rivuti etatou te la iruru tegatou. Eala igoie etato marokati.  
\v 8 Eala, eia taritigi pepeho veia etato ge pou la sagegela, mai egiteu e Iuda pou la sagegela te La Ilali La Poloselela. La vulovulo gatou ale pala mai la vulovulo la iligo barala me la kolibara la iruru, eia ge kokovu. La vulovulo gatou ale palale, egite igo gegeru etatou, eala moli etato pou te la matagaga te la merera ale sesele, la paga isa kati igo mumugu etatou, etato mata mai la ilali ale taritigi, la vulovulo gatou kamati kama kokora mai la ilali ale mavulu.   
\p
\v 9-11 Ale eau pala kekesia mutou veia amuto umala ge vikapopo legiteu la tahalo la iruru. La masova la merera taku alele eia mai ale eau mera taro amutou tegiteu ale veia egiteu e tabara mutou te Kraist, eala moli egite la iruru soloio. Egiteu pou te la iruru tomi maie: Egite igigo la iruru soio te la tavile; egite hate ololu la golugolu tegiteu; egite lotu tatavu la puigolo; egite mera kukukumu; egite liu galololo; egite tutugologolo la valalua, pakali la uati tegiteu. Te la merera taku ale eau pala kekesia mutou, eau kama gabutatalea veia amuto umala ge vikapopo legiteu la valalua bulalahu moli ale igigo egiteu la iruru alele. Mai ge mai ele, amuto kamati ge koramulia ge pou lou omai te la maututula, la vuhula egiteu la iruru tomi alele, eia volu sesele. Eau mera taro moli amutou tegiteu la tahalo la iruru ale kaua giteu veia egiteu te Kraist. Umala amuto ge hagagavi tegiteu, umalati alali tai tomi legiteu ele.  
\v 12-13 Ale kama la igogolu taku veia eau ge tomu sasae la vulovulo giteu ale logala te la lotu te Kraist. La Tahalo Uru moli ge mata muli la vulovulo giteu ale kama kokora. Eala moli eia koramuli seselea veia amuto ge mata muli la vulovulo giteu ale goiloti te la lotu. Mai La Buk Tabu Ale Pala eia veia maie “Pitaro gale la tahalo la iruru, eia umalati ge pou vikapopo le amutou.”   
\c 6  
\s1 Amuto umala ge kotia giteu la valalua ale e tabara mutou te la lotu te Kraist  
\p
\v 1 Mai isa tamutou la vikararala isa eia magiri kabili tegirua me tabarala isa te la lotu te Kraist, umala eme ge kotiala soio te gavman veia la tahalo ale kama rovi La Tahalo Uru eia ge mata muli la iruru te la tahalo te Kraist. Taritigi amuto ge vimatata la iruru tetala kabili tamutou la valalua la lotu moli.  
\v 2 Mave, amuto kama rovia La Uru eia viputumulitia veia mulimuli etatou la valalua te La Tahalo Uru, etato ge mata muli la vulovulo giteu la valalua tomi? La vimari alele, amuto kama rovia, ia? Mai amuto ge koramuli la igogolu ale tikumu mai ele, mave, amuto kama ge koramulia ge mata muli egiteu la iruru bisisi ale sibitala kabili tamutou te la imamala ale igoie?  
\v 3 Etatou ale te Kraist, etato mulimuli ge mata muli tai la vulovulo giteu tai la angelo te La Uru, me amuto kama rovia, ia? Eala, eia matagaga mai ele veia eia kama vagari tamutou veia amuto ge mata muli la iruru te la tahalo la vovo.  
\v 4 Mave, mai la igototolola eia ge sibitala kabili tamutou, amuto ge vahari egiteu ale vaigo soio te la tahalo ale kama gabu tikumu e Kraist? Amuto soioge veia ge vahari egiteu soio te la tahalo ale etato la valalua te Kraist kama gabu tikumu seselea, eia kama lotulotu?  
\v 5 Eau karasuku amutou mai ele veia amuto ge gabua, amuto ge mahela te la vulo mutou alele. Mave, isa tamutou kama oiole, ale la mari tetala eia taritigi, koramulia veia eia ge vimatata la iruru bakikisi oilo kabili tamutou la valalua te Kraist?  
\v 6 Eala moli oio tamutou ele, la tahalo te Kraist isa, eia ge hiliti, eia ge kotiale tabarala soio te gavman, veia la tahalo ale kama tautaulailo te La Uru, eia ge mata muli la vulovulo mutou ale te Kraist. Eala, amuto kama igo tigi.   
\p
\v 7 Ale eau hiloa amuto vilapulapu le amutou soio te la vigagiala, la vulo mutou alele eia veipalatia mai ele veia amuto kamati kokora. Mai amuto ge pou makovu moli, egiteu ale igo la iruru soio tamutou ge korale.  
\v 8 Eala moli amuto tutugolo egiteu e tabarabara mutou lou te la lotu te Kraist, amuto igo la iruru soio tegiteu.  
\v 9 Mave, amuto soioge kama rovia veia egiteu la tahalo la iruru, La Tahalo Uru eia kama ge puli egiteu soio tetala veia egite ge pou te la balila? La viputumulila ale amuto soioge vautila, ia? Gabutatala tigia, amuto soukama ge ruru. La tahalo la iruru, eia ge galo te la pulolou la balavala te La Uru. Egiteu la tahalo la iruru, egite moli igigo la vulovulo giteu maie: Egite igo valalololo la iruru; egite lotu tavu la puigolo; egite igo gegeru la taulaila; egite vaigo baololi legiteu;  
\v 10 egite pakalikali; egite tau ololu la vuliti tegiteu; egite liu paua; egite gilogilo; egite bilibili. Egiteu tomi la valalua me hatavivile ale igigo la mata la iruru tomi mai ele, La Tahalo Uru eia kama ge puli egiteu soio tetala te la pulolou la balavala oio te la balila.  
\v 11 Isahari tamutou e Korin ele, amuto pala pou tegiteu la iruru ale tikukumu mai eau toitia. Eala moli igoie amuto marokati, la vuhula La Kalulu La Marokala eia vuhi halabati la vulovulo mutou, eia toitia veia amuto maroka, la vuhula amuto tautaulailoti te Iesus Kraist, La Uru gatou.   
\s1 La vulovulo la vovo mutou ale maroka, eia ge vaisale La Uru  
\p
\v 12 Isahari tamutou e Korin ele, amuto vikara maie mago “Eia koramulia veia etatou ale te Kraist ge tilimuli la masasagala tegatou isasasa te la vulovulo tomi ale taritigi te la vovo, la magiri robola ouka.” Me la vikararala tamuto alele, eia sesele, eala moli la vulovulo gatou isahari te la vovo, eia kama suli tigi etatou te la pulolou tegatou te la lotu te Kraist. Eia koramulia veia eau e Pol, eau tai ge vikara maie mago “Eau koramulia ge mulimuli la vulovulo tomi te la vovo”, eala moli eau kama masagea veia la masasagala isa te la vovo ge kisiau.  
\v 13 Isahari tamutou soioge ge koli lou la vikararala taku ele veia La Tahalo Uru vipou la ilali veia etato ge alia, me eia vipou tai la tamusi gatou veia la ilali ge tabuli oilo vola, eala la masasagala tomi te la vovo, etato ge mulimuli molia. Me eia sesele la merera tamutou ele, eala moli La Tahalo Uru mulimuli ge vikaluvu la ilali, me la tamusi gatou tai, eia ge kokovu. La masasagala te la vovo tomi, eia ge kaluvu, ale etato ge peho. Eala, eau tutu tolea mutou veia amuto umala ge gabutatalea veia La Uru vipou etatou veia la tahalo ge abi valalololo egiteu e hatavivile mai te la masasagala moli tetala. Me eia kama vipou egiteu e hatavivile veia egite ge puli valalololo egiteu la valalua. Eala moli eau masagea veia amuto ge matagaga tigi veia La Uru, eia vipou la vovo gatou veia etato ge suli la igogolu tetala, me eia tai ge suli la pulolou tegatou te la mahuli la vovo.  
\v 14 Te la vagagarila ale uru, La Tahalo Uru eia vimahuli rivu lou e Kraist taro la pileho, me eia mulimuli ge vimahuli rivu lou tai etatou tomi.   
\p
\v 15 Mave, amuto kama rovia veia la vovo mutou eia mai la vovole Kraist sesele? Me mave, eau ge abi la vovole Kraist, veia amila me la tavile la gauru ge vimavuta tomi, ia? Ouka gologolo.  
\v 16 Mai isa ge vimavuta tomi la tavile, ale la vovo girua eia visauru moliti, mai La Buk Tabu Ale Pala eia veia maie “Egira ge isa moli.”  
\v 17 Eala moli mai isa ge vikapopo La Uru, la kalulu girua me La Uru ge isa moliti tai.   
\p
\v 18 Eala, eau veia ge viteteli vagari amutou maie: Taritigi amuto ge hele taro la vulovulo la iruru tomi ale eau vimatagagati amutou ovola. Amuto umala ge abi valalololo egiteu e hatavivile, ge umala ge igo gegeru tai la taulaila, la para osaosala me la mata bulakalakala tai ge umala. Egiteu la iruru tomi mai la pakalila, eia mai ale igo marapa moli la pulolou te la valalua, eala moli egiteu la iruru ale eau so totoi egiteu, egiteu mai ale igo gegeru la vovo mutou lou me la kalulu mutou tai oilo, la vuhula kama eme sekela ale igoa, amulua me la tavile tomi.  
\v 19 Mave, amuto soioge kama rovia veia la vovo mutou eia mai la luma la lotu te La Kalulu La Marokala? La Kalulu La Marokala, La Tahalo Uru moli abia mutou, eia pouti tamutou. Amuto kama tahola la vovo mutou veia amuto ge mamuga ovola.  
\v 20 E Iesus, eia peho robo amutou, eia loto rivu lou amutou mai ele taro la limale Satan, eia piligi la mahulila tetala, la mapa mutou eia kama bisi. Eala eia taritigi pepeho veia amuto tomi isasasa ge vibaumuli la vulovulo mutou te la vovo, veia la vulovulo mutou tomi ale amuto igigoa eia ge maroka, la tilogo me la sagegela ale uru sesele ge goata te La Tahalo Uru mai ele.   
\c 7  
\s1 La vulovulo la taulaila  
\p
\v 1 Amuto pala kekesiagu, amuto tahiau la tilahi isahari, tio eau veia ge kolia. Amuto tahiau te la vulovulo la taulaila. Eau veia eia taritigi veia amuto ge samura moli,  
\v 2 eala moli la vulovulo usu ale kama kokora oio te la mautu tamutou, eala eau veia eia taritigi veia amuto la valalua tomi isasasa ge taulai, me amuto hatavivile tomi tai ge taulai.  
\v 3 Amutou la valalua, amuto ge pou mai la vulole tau me rutu vikapopo me rutu mutou, me amutou e hatavivile tai, amuto ge igo sesele la vulo la taulaila vikapopo me harua mutou, kama ge vitoua giteu.  
\v 4 Amutou e hatavivile, la vovo mutou kama tamutou sekela, eia te harua mutou tai. Me amutou la valalua, la vovo mutou kama tamutou sekela, eia te rutu mutou tai.  
\v 5 Amuto ge igo sesele la vulole tau me rutu, kama ge tou, eala moli mai la tahalo me rutula ge viputumulia veia ge mavuta baa la logo isahari veia ge gabu sekela la kilaka, ale tai taritigi. Mulimuli ovola, amuto ge vimavuta tomi lou, e Satan soukama ge vitilo lou amutou, la vuhula amuto kama magiri vagari te la tovolalaila, mai la gabutatala papaila soio te la tavile isapolo.   
\p
\v 6 La merera tomi ale, eau vei molia mutou ovola veia ge suli amutou, eau kama ge kisi amutou ovola veia amuto tomi ge mulimuli sesele tomia, eia te la masasagala moli tamutou isasasa.  
\v 7 La gauru ale taritigi sesele ale eau masaga seselea eia kama mai ele, veia amuto ge vipulipuli. Eau masagea veia amuto tomi ge samura mai eau. Eala moli eia la paga te La Tahalo Uru, eia tabari la masasagala tetala mai la vaabila somai tegatou la valalua me hatavivile, eia isapolopolo, isahari La Uru veia egite ge puli e rutu giteu me harua giteu, isahari ouka.   
\p
\v 8 Isahari tamutou e Korin ele, amuto samura, isahari baharu, e harua mutou pehoti. Eau veia mutou maie: Eia taritigi veia amuto ge pou sekelakela mai ele, mai tai eau.  
\v 9 Eala moli mai la gabutatalala tamutou eia kama magiri vagari, me amuto gabu pepeho lou la vulole tau me rutu mai ele, ioge, eia koramuli taia veia amuto ge taulai. Amuto soukama hate saga tavu e hatavivile me la valalua veia ge puli egiteu, eala eia koramuli taia veia amuto ge taulai, amuto ge pou tigi.   
\p
\v 10 Amutou isahari taulaiti, amuto tomi me rutu mutou rovi e Kraist. Tio eau ge toi la merera isasa te La Tahalo Uru soio tamutou, amuto ge loloa. Eia kama la gabutatalala taku moli ale eau ge veipalea, ouka. La vikararala alele, eia maie: La tavile umala ge tou e haruala veia egira ge vipou baa.  
\v 11 Mai eia ge tou sesele e haruala mai ele, eia ge samura moli, eia umala ge taulai lou, eala moli taritigi tai mai eia ge puli rivu lou e haruala. La tahalo umala tai ge tou e rutula veia egira ge vipou baa.   
\p
\v 12 Me amutou isahari lou, amuto taulai pala muga, mulimuli la lotu te Kraist sibitala, tio eau ge toi la merera isa soio tamutou, amuto ge loloa, eia kama la merera te La Tahalo Uru, eia la gabutatalala taku moli ale eau veipalea. Tio la vikararala alele eia maie: Mai eme la tahalo te kraist, eala moli e rutumu kama tautaulailo, me eia masaga molime mai ele, eme umala ge tou e rutumu ele.  
\v 13 Mai eme la tavile te Kraist, eala moli e haruamu eia kama tautaulailo, me eia masaga molime mai ele, eme umala ge tou e haruamu ele.  
\v 14 La vuhula e haruamu ale eme pulitiale, me e rutu la tahalo te Kraist tai ale eia soukama rovi la lotu, eia mai ale sibitala maroka oio te la tautaulailo taume soio te Kraist. Ale e Kraist toitime veia eme tetalati, tio ale amulua tomi me haruamu me rutumu tomi sibitala marokatio. Mai la viputumulila te la lotu kama ge mai ele, egiteu e latatu mulua ge pou te la maligoma, eala moli ouka, egite maroka te la tautaulailo te tama giteu me tila giteu sekela soio te Kraist.   
\p
\v 15 Eala moli mai eme la tahalo te Kraist, me rutumu ale kama rovi e Kraist eia ge toume, eia ge tuga, ale korati ele. Mai tai la tavile te Kraist tai, mai e haruala ale kama rovi e Kraist, eia ge toua, ge tuga, ale tai taritigi pepeho tai mai ele. La merera la magiri robola te la vipou baala te la taulaila eia kama pou tamutou ele, la vuhula La Tahalo Uru masagea veia etato ge pou tigi moli, la vaigo totolola ge ouka.  
\v 16 La tavile, eia kama koramulia ge rovia veia mai eia ge sau tola e haruala ale kama rovi e Kraist, tio mulimuli la tahalo ale ge vulo la gabutatalala tetala soio te Kraist, eia ge mahuli. Me la tahalo tai, eia kama koramulia ge rovia veia mai eia ge sau tola e rutula ale kama rovi e Kraist, tio mulimuli e rutula tai ge vulo halaba, eia ge mahuli. Eala, mai e haruala me e rutula ale kama rovi e Kraist eia masagea veia ge tuga, korati ele, eia ge tuga moli.   
\s1 Amuto tomi isasasa ge pou tola moli te la pulolou ale La Uru vipoume ovola  
\p
\v 17 Eala moli eau masagea veia amuto tomi isasasa ge pou tola moli te la pulolou tamutou ale La Uru vipouti amutou ovola mai la tabarila tetala soio tamutou, ale amuto pou ovola te la imamala ale eia tola tavu amutou. La viputumulila alele, eau toia soio tegiteu la valalua me hatavivile te la lotu te la maututula tomi.  
\v 18 Mai la tahalo te Kraist isa, egite koroti la vovola mai la irovilala tegiteu e Iuda, taritigi pepeho, eia ge mai moli ele. Mai la tahalo te Kraist isa, egite kama koro la vovola, taritigi pepeho tai, eia ge kora moli mai ele.  
\v 19 Mai egite koroti la vovomu, uka eme la vovomu kama koroa, ale la golu bulalahu. La paga isa moli tikumu, veia etato ge roromuli moli la merera te La Tahalo Uru.  
\v 20 Amuto tomi isasasa ge pou tola moli te la pulolou ale eme pou ovola te la imamala ale La Tahalo Uru tolame soio tetala.  
\v 21-22 Mai eme la bilalaha te la tahalo isasa, eme umala ge gabutatala papai la kilisi taume ele veia la igogolu taume eia vagari, eia kama kokora, la vuhula oio te la mata La Uru eme la tahalo sesele. Mai eme la tahalo la vuliti, te la mata La Uru eme la bilalaha moli tetala. Eala moli mai eme la tahalo la igogolu, me eme ge hilo la gauru ale koramuli eme ge gogala te la pulolou la kilisi taume, eia taritigi tai veia eme ge gogala.  
\v 23 E Kraist peho robo amutou, eia piligi la mahulila tetala, la mapa ale eia lototi amutou ovola eia kama bisi, eala eia taritigi veia amuto umala ge pou la kilisi lou te la gabutatalala te la vovo lou.  
\v 24 Amuto tabarabaragu, amuto ge vipou tomi me La Tahalo Uru, mai te la pulolou tamutou sesele ale amuto pou ovola te la imamala ale eia tola amutou soio tetala.   
\s1 La vimari soio tegiteu ale samura  
\p
\v 25 Amuto tahitiau tegiteu la soesobe me tegiteu hatamale halaba ale e latatu mutou veia eia taritigi egite ge taulai ka ouka? Me eau la merera ouka ale loio sesele te La Tahalo Uru te la kiloli la tilahi tamutou ele. Eala moli La Uru eia gogoau, eia abitiagu la mari tetala, eala eau veia eia koramuli seselea veia amuto ge lolo la merera taku te la vulovulo la taulaila.  
\v 26 Te la imamala ale igoie, la iloburukola uru guviti, teale la valalua la gima vile etatou ale te Kraist. Eala eau veia mai eme la samura, eia taritigi veia eme umala ge taulai.  
\v 27 Sesele mai eme taulaiti, eme kama ge tou e rutumu, eala moli mai eme soukama taulai, taritigi eme ge samura moli mai ele, umala eme ge paa muli muga e rutumu veia ge pulia.  
\v 28 Eala moli mai eme vagari veia ge taulai, me eme ge puli e rutumu, ale la golu isa ouka. Me la sobe tai, mai eia ge vagari veia ge puli e haruala, eia taritigi tai ele. Eala moli egiteu ale taulai, egite ge poga tavu la iloburukola ale uru pepeho te la imamala ale igoie, la vuhula egite la vibaumulila uru soio te latatu giteu. Me eau kama masaga amuto ge ligi pepeho te la vulovulo giteu ale gima e Kraist, mai egite ge viligi amutou.  
\v 29 Amuto tabarabaragu, la masova la merera taku alele, eia maie: La leavala kati usu, La Uru gatou ge beu loua, eala moli la igogolu ale uru soloio. Mai eme taulaiti, taritigi eme ge gabutatala sekela e Kraist, te la gabutatalala taume eme ge mai la tahalo ale kama taulai, eme ge gabu tikumu la igogolu te Kraist.  
\v 30 Mai la pileho tai, umala gabu tikumua. Mai la paga la sagegela, umala gabu tikumu taia. Mai eme ge loto isa la paga, eme kama ge sau tolea mai ale taume sesele.  
\v 31 Mai eme la tahalo ale pou te la igogolu ale uru, la merauala te la igogolu taume, eia umala ge lapu la gabutatalala taume taro e Kraist. La vuhula la pulolou ale etato rovia igoie, eia mai ale kaluvuluvuti.   
\p
\v 32 Eau masaga pepehoa veia amuto kama ge gabutatala papai. La tahalo ale kama taulai, eia ge gabutatala sekela la igogolu te La Uru veia ge visagege eia.  
\v 33 Eala moli la tahalo ale taulaiti, la gabutatalala tetala usu, veia eia ge baumuli e rutula,  
\v 34 eala eia gabutatala papai la igogolu uru, kama te La Uru sekela. Mai la tavile tai ale kama taulai, eia ge gabutatala sekela la igogolu te La Uru veia eia ge la tavile te Kraist sesele, mai te la vulovulola te la vovo, me te la kalulula tai. Eala moli la tavile ale taulaiti, la gabutatalala tetala usu, veia eia ge vibaumuli soio te haruala, eala eia gabutatala papai la igogolu uru, kama ale te Kraist sekela.  
\v 35 Eau vei matagaga molia mutou mai ele veia ge suli amutou, la merera taku ele eia kama ge magiri robo amutou te la taulaila. Eau masaga molia veia amuto ge pou tigi moli, la gabutatalala tamutou ge te La Uru sekela moli.   
\p
\v 36 Mai la tahalo isasa, egite abi robotiala e rutula, eala moli eia soukama puli seselea, me eia vagari veia egira me rutula ge vipou tomi, taritigi veia eia ge laha robo pasia, egira ge vimavuta tomi.  
\v 37 Eala moli mai eme gabutatala sekela e Kraist, me eme vagari sesele veia eme kamati gabutatala egiteu e hatavivile, tio eme umalati ge puli e rutumu ele, la gabutatalala taume tai ele eia taritigi pepeho.  
\v 38 Eala, eia matagagati veia mai isa ge masaga ge taulai, eia taritigi, eala moli mai isa ge pou moli la samura, kati ge taulai, tio la vulolale eia taritigi pepeho pasi.   
\p
\v 39 La tavile ale taulai, eia te haruala moli, mai e haruala ge soloio. Mai e haruala ge peho, eia koramulia veia eia ge taulai lou, eala moli eia ge puli moli la tahalo te Kraist.  
\v 40 Eala moli la gabutatalala taku te alele, eau veia la tavilele eia ge sagege pepeho mai eia ge pou la samura. Eia tikumu taku mai ele, me eau gabutatalea veia la gabutatalala taku ele eia la vimari te La Kalulu La Uru soio tamutou.   
\c 8  
\s1 La vimari te la kalia ale egite vaabila te la lotu la visigologolola  
\p
\v 1 La tilahi isa lou amuto tahiau ovola veia eia koramulia veia etato ale te Kraist ge ali la kalia ale egite vaabila te la lotu la visigologolola, ka umala.  
\p Eia sesele viruru ale amuto veia maie “Etato tomi la tahalo la mari”, eala moli la mari ale uru mai ele, eia vitilo etatou veia etato ge vareagi. Eala moli mai etato ge pou te la gilogo, la vulovulo alele eia sau tola vagari la valalua me hatavivile te Kraist.  
\v 2 Mai isa veia eia la tahalo la mari, eia veipalea mai ele veia eia kama rovi sesele isa la paga.  
\v 3 Eala moli la tahalo ale masaga sesele La Tahalo Uru, la kalulula eia ge mai ale matagagati veia La Uru eia rovi seseletia la tahalo ale, eia tetala.   
\p
\v 4 Ioge, la merera taku te la kalia ale egite vaabila te la lotu la visigologolola, eia maie: Etato tomi rovia veia egiteu la puigolo te la lotu la visigologolola, egite kama sesele. La Uru isa sekela oio, La Tahalo Uru moli ale etato lotu tavua, isa lou ouka.  
\v 5 Eala moli egiteu la valalua la maligoma, egite lotu tavu la uru usu ale egite puia. Etato rovia veia egiteu la puigolo mapaiti oio ale egite la valalua la maligoma lotu tavua, egite veia isahari pou oata la mori, isahari sau tola otalo tai te la maututula la magasa, egite vausu la mari papaila tegiteu mai ele. Eala moli etatou ale te Kraist, etato rovitia veia La Uru isa sekela oio, eia la vuhu la golu tomi, eia vipou etatou veia etato ge suli la igogolu tetala.  
\v 6 La Uru isa sekela oio, e Iesus Kraist, eia vipou la golugolu tomi, eia vimahuli etatou ale tetala.   
\p
\v 7 Eala moli la valalua isahari te Kraist, egite so gabu tikukumu egiteu la uru tomi te la lotu la visigologolola, eala egite gabutatalea veia la kalia ale egite vaabila te la lotu la visigologolola, eia mumugu. La vuhula egite veia la puigolo ale egite abi la ilali soio tetala, egite veia eia sesele. Mai egite ge alia, egite vimumugu la tia giteu, la vuhula la gabutatalala tegiteu kama magiri vagari soio te Kraist sekela.  
\v 8 Eala moli taritigi pepeho veia etato ge matagaga veia mai la vulovulo la magiri robola tomi, mai etato ge mulimulia, eia kama koramulia ge lapu etatou soio te la matagaga. Mai etato ge ali la kalia, uka etato kama ge alia, eia la golu bulalahu moli, eia kama ge vimaroka etatou, me eia kama ge vimumugu tai etatou, eia la golu bulalahu moli.   
\p
\v 9 Eala moli taritigi etato ge gabutatala tigi, la vuhula etato soukama ge alia, me e tabara gatou isa ale eia kama magiri vagari, eia ge boru,  
\v 10 la vuhula eia soukama ge hilo etalua alali la ilali te la lotu la visigologolola ale eia so gabu tikukumua bakisi, eia ge goio ge ali taia. Eala moli ale eia igo gegeruti la tiala mai ele, la vuhula eia so gabu tikukumu la lotu ale egite vaabi la ilali ale oio vola.  
\v 11 Eala, e tabaramu te Kraist ele, ale eia kama magiri vagari, la mari uru taume eia viruruti e tabaramu ale taritigi, e Kraist peho roboa, eia kati taritigi, eia viluati te la kalulula, la vuhula emei.  
\v 12 Mai eme ge igo la iruru soio tegiteu e tabarabara mutou mai ele, me egite ge gabutatala papai te la ilali ale eme alia, eme mai ale viligi egiteu ele, eme mai ale igoti la iruru soio te Kraist.  
\v 13 Mai la ilali ale eau alalia eia ge igo gegeru egiteu e tabarabaragu veia egite ge tilo te la iruru, tio eau kati ge ali la kalia lou, egite soukama ge hiloau, egite ge boru mai ele.   
\c 9  
\s1 La pulolou me la igogolu te la bilalaha te Kraist  
\p
\v 1 Isa kama koramulia ge tahi taroau veia eau kama la bilalaha sesele te Kraist. La mari papaila te la tahalo isasa eia kama koramulia ge sau toleau, eau la bilalaha te Kraist sekela, eau hiloti e Iesus te la matagu sesele, me ale igoie amuto pouti te la matagaga, amuto la vavua la igogolu taku sekela, ale eau valolo amutou te La Uru.  
\v 2 Soioge egiteu ale isapolo ge tahi taroau, eala moli amuto ge ouka ge. La vuhula amuto lolo la valolo taku, amuto vulo la gabutatalala tamutou soio te Kraist, eala amuto magiri mai la irovilala veia eau la bilalaha sesele tetala.   
\p
\v 3 Mai egite isahari ge vikara kukumuagu, eau ge veia giteu maie:  
\v 4 Mave, eau kama la tahalo sesele, veia amuto ge abiagu la ilali me la lalu mai la mapagu te la igogolu taku ale vagari soio tamutou, ia?  
\v 5 Hiloa, eau samura, eala moli mai eau ge taulai, mave, amuto soioge ge veia eau umala ge puli e rutugu tai soio te la maututula ale eau valolo ovola, ia? Egiteu la bilalaha isahari, egite igoa mai ele, egiteu e taitarile Iesus tai, me Pita, egiteu tomi, eala moli eau ge umala, ia?  
\v 6 Soioge amilua me Banabas sekela moli ge paa muli la uati me la ilali tamilua lou te la igogolu, egiteu la bilalaha tomi ouka, amila moli, ia?   
\p
\v 7 Ale kama taritigi mai ele. Mave, la tahalo la vaubila, eia ge loto rivu lou eia te la igogolu tetala te la vaubila? Ouka. Mai la bilalaha tai ale baumuli la mahuma, eia kama ge ali bakisi la ilali ovola? Ouka, eia ge ali moli, la vuhula ale la igogolu te la limalale. Mai ge la bilalaha isa tai eia ge baumuli egiteu la sip me la mee te la tahalo isasa, mave, eia kama ge liu bakisi la susu tegiteu la sip me la mee ale eia baumulimuli egiteu, ia? Ouka, eia ge abi bakisi la mapala te la igogolu tetalale, mai la susu bakisi ale egite me latatula ge liua.  
\v 8 Me la merera ale, eia kama la gabutatalala taku moli te la vovo, la merera te Moses tai alaura te ururu tamiteu e Iuda,  
\v 9 eia veia maie “Umala kisi roborobo la hare la kau ale amuto kisia veia ge suli amutou te la igogolu la mahuma, eia ge ali moli te la mahuma tamutou.” Mave, la merera ale, amuto veia La Tahalo Uru tovo muli etatou la vibaumuli la kau ovola, ia?  
\v 10 Ouka, la merera ale, La Uru eia toia mai la tilovo somai tegatou. La kau, eia la irovilala tamiteu ale igogolu te La Uru. Ale amuto vitoua miteu la mapa, amite mai la kau ale egite kisi robo la harela. Eala, oio vola etato ge matagaga veia amiteu tomi ale igogolu te la mahuma te La Uru, amiteu ale valolo, egiteu tai ale vibaumuli, amite tomi ge abi la mapa miteu te la igogolu ale amite igoa soio tamutou, mai la vavua la mahuma te La Tahalo Uru.  
\v 11 Amite suliti la kalulu mutou, mave, eia kama koramulia veia amite ge pou tali amutou veia amuto ge suli rivu lou amiteu te la savelela tamiteu te la vovo?  
\v 12 Egite isahari oiole ababi la visuli tamutou mai ele, mave, amiteu ale valolo pala muga amutou te la gauru te Kraist, la igogolu tamiteu soioge kama uru tegiteu alele veia amuto ge suli pala muga amiteu, ia? Eala moli korale, pala amite kama abi bakisi la visuli tamutou, me amite kama ge pou tali lou amutou veia amuto ge soko halaba la visuli somai tamiteu mai ele. Amite pou moli la savelela, la vuhula isa soukama ge vile la valolo ale taritigi te Kraist veia amite paa muli moli la uati ovola.   
\p
\v 13 Eia sesele, egiteu ale igogolu te la luma la lotu ale uru oio e Ierusalem, egite alali la ilali ale la valalua vaabila soio te la lotu. Egiteu e pris tai ale vahari egiteu la vaabila soilo te la luma la lotu ge vaabila soio te La Tahalo Uru ovola, egite ge tau gale muga la gale la ilali alele, ale koramuli egiteu, veia ge alia.  
\v 14 Mai tai amiteu te la igogolu la valolo te Kraist, La Uru eia toitia veia amiteu ge abi la visuli tamutou ale amite valolo amutou, koramuli la mahulila tamite.   
\p
\v 15 Eala moli eau kama vauru eau mai ele veia amuto ge suli leau la uati me la ilali. Eau kama kekesia mutou veia amuto ge soko la vulovulo alele somai taku. Isa pala kama suliau, me eau vagari pepeho veia ge pou moli mai ele, la visuli ouka. Mai eau ge peho la vitolola, eala moli eau ge valolo moli amutou te la pulolou la matagagala te Kraist, la visuli ouka.  
\v 16 Eala moli la igogolu alele, eau kama ge vauru lou eau ovola, la vuhula eia la tabarila te La Uru somai taku. Mai eau kama ge igoa, eau ge ilo buruko sesele.  
\v 17 Mai eau ge valolo te la masasagala moli taku, me la valolo taku eia taritigi tamutou, soioge amuto ge lotoau, eala moli eau kama valolo te la masasagala moli taku, eau valolo mai la tabarila te La Uru somai taku, eau la bilalaha moli tetala, la iloto ouka.  
\v 18 La mapagu la sagegela moli, ale eau ge valolo la valalua me hatavivile te la valolo ale taritigi te Kraist. Oio vola la sagegela taku eia uru pepeho, la vuhula mai eau valolo, eau kama igo la igogolu alele veia isa ge suliau te la igogolu te Kraist. Eia koramulia veia eau ge kaka la visuli tamutou te la igogolu alele, eala moli la mapagu la sagegela moli te La Uru taku e Kraist.   
\s1 E Pol eia la bilalaha moli te la valalua me hatavivile tomi te Kraist  
\p
\v 19 Eia sesele, isa kama mamugeau, eala moli eau vibisi louau veia ge puli la valalua me hatavivile usu soio te Kraist, eau igogolu mai la bilalaha tegiteu tomi.  
\v 20 Mai eau ge pou vikapopo legiteu e Iuda, tio te la masasagala taku eau ge mulimuli la vulovulo giteu e Iudale veia ge puli egiteu e Iuda soio te Kraist. Mai la valalua ale logala, ale kama e Iuda, eala moli egite mulimuli la vulovulo giteu e Iuda, mai la merera te Moses tomi, tio mai eau ge pou vikapopo tai legiteu, eau igo mai egiteu ele, veia ge puli egiteu tai soio te Kraist. Eala moli la merera te Moses eia kama kisi toleau, eau pou otalo te la uluva la merera te Kraist sekela.  
\v 21 Mai tai eau ge pou vikapopo legiteu la valalua la maligoma ale kama rovi la merera te Moses, eau ge igo mai egiteu ele te la vulovulo giteu, veia ge puli egiteu soio te Kraist, eala moli oilo vola eau kama ge poke taro la merera te La Uru, la vuhula eau mulimuli la merera te Kraist, eala eau kama ruru te la vulovulo giteu isahari ale kama taritigi.  
\v 22 Mai eau pou tegiteu ale kama magiri vagari te Kraist, tio eau ge gabu tikumu la magiri robola usu te la lotu la visigologolola, mai tai egiteu, veia eau ge suli egiteu tai ale kama vagari, eau ge vivagari lou la tautaulailo tegiteu te Kraist. Eau mulimuli la vulovulo la maratatila la valalua tomi veia egite ge lolo la merera taku, veia eau ge vimahuli isahari mai ele.  
\v 23 Me la vulovulogu alele, eau igigoa veia ge vahiliti la igogolu te la valolo ale taritigi te Kraist, veia eau tai ge pou la balavala oio vola.   
\p
\v 24 Mai eau ge tovoa te la vipepepela. Mai te la vipepepela, egiteu ale vipepepe ge usu, eala moli isa moli sekela ge muga, eia ge sau tola la vaabila ovola. Eala, eia matagaga mai ele veia eia taritigi eme ge vagari te la vipepepela, eme ge igogolu tigi te Kraist, veia eme tai ge sau tola la vaabila tetala.  
\v 25 Mai isa ge gabutatalea veia la haro la pilai eia hagagaviti, tio eia ge goio ge tovo bibibi la hirari veia te la haro la vipepepela eia ge hari tataho, veia ge sau tola la vaabila te la tahalo ale mamuga. La vaabila alele, eia la paga moli ale ge kaluvu lou, eala moli la vaabila te la igogolu te Kraist, eia kama ge kaluvu.  
\v 26 Mai eau e Pol, eau sele tavu la igogolu te Kraist mai la tahalo ale vipepe vagari sesele. Eau vagari te la vikokuela te la isale Kraist, eau kama mai la tahalo ale vikue bulalahu.  
\v 27 Eau vagari veia la kalulugu ge vagari pepeho koramuli la igogolu taku te Kraist ge hari tataho. Eau sau tola vagari la gabutatalala taku, la masasagala te la vovo eia kama mamugeau. La vuhula eau kama masagea veia mai eau ge valolo amutou, eala moli mulimuli eau ge boru posa, me eau kati ge sau tola lou la vaabila te Kraist, eau ge galo.   
\c 10  
\s1 Amuto ge vibaumuli tigi, amuto soukama boru te la tovolalaila te Satan  
\p
\v 1 Amuto tabarabaragu, eau masagea veia ge vahiliti lou la gabutatalala tamutou tegiteu e ururu tamite Iuda alaura te la imamala te Moses, la vuhula egite ururu ele, egiteu mai e tutubu gatou tomi ale te Kraist. Egite gali taro la kilisi oio e Gipto, egite kama rovi la gauru, La Uru goio visibitala la tuluvu la mori isa uru ale ge muga egiteu, egite goio mulimulia mai ele, egite taro polo la mago, egite tugatio.  
\v 2 Egite gabu tikumu sesele la mulugaluga tegiteu, e Moses, la irovilala ilua tai te la vibaumulila te La Tahalo Uru soio tegiteu, mai la tuluvu la mori, me la mago ale mamara, egite tomi hilo la irovilala iluale.  
\v 3 Goio, egite tuga vulovulo te la hohoi, egiteu la ilali ouka, La Uru goio visibitala la ilali tetala soio tegiteu, egite tomi alia.  
\v 4 Egite pehoti la malehula, La Uru visibitala la lalu soio tegiteu, la vuhula la toro giteu oio, eia vikapopo legiteu ele, la kalulule Kraist moli.  
\v 5 Eala moli egite kama masaga ge roromuli tigi La Tahalo Uru, eala eia goio vilai egiteu, egite peho paa tomi moli oio te la hohoi, kaluvu.   
\p
\v 6 La veimulipololale, eia magiri mai la tilovo, veia etato umala ge vagari tavu la vulovulo ale kama kokora mai egiteu la valalua te la imamala te Moses ele.  
\v 7 Umala amuto ge lotu tavu la puigolo mai egiteu. Mai La Buk Tabu Ale Pala eia veia maie “La valalua e Israel, me egite hatavivile tai, egite goio pou te la ilali me la iliu veia ge igo galolo mai egiteu la valalua la maligoma.”  
\v 8 Etato la valalua umala ge igo la iruru soio te la tavile, me amutou e hatavivile tai, amuto umala ge igo la iruru vikapopo la tahalo mai egite Israel isahari igoa te la haro alele. La iruru alele. la kilolila oio, mai te la haro isa moli egite la valalua me hatavivile mapaiti sesele peho.\f + \fr 10:8 \ft E Pol toi seselea veia la giligi giteu ale peho eia ga mata mai 23,000.\f*  
\v 9 Etato umala tai ge vareagia La Tahalo Uru, veia eia kama vikara sesele, mai egite Israel isahari alaura, egite igoa soio te La Uru mai ele, eia silahati legiteu, eia goio visibitala egiteu e taive mapaiti ale bilibili soio tegite, egiteu e taivele goio tolo egiteu, egite pehotio.  
\v 10 Umala tai veia etato ge vikara kukumua giteu la mulugaluga tegatou mai egite Israel tai isahari igotia pala soio te Moses. Egite igoa mai ele, La Uru goio baha e angelo uru tetala ale eia babahea soio te la bilili, eia goio bili taro egiteu ale kama kokorale.   
\p
\v 11 La veimulipolola alele, eia magiri mai la tilovo veia etato ge gigia, veia etatou ale mahuli te la imamala ale igoie, la tapasi la maututula eia hagagaviti, etato ge matagaga tigi, etato kama ge ruru mai egite Israel alaura.  
\v 12 Mai eme la tahalo me la tavile te Kraist sesele, mai eme veia eme magiri vagari mai ele, taritigi eme ge vibaumuli tigi la vulovulomu, eme soukama boru.  
\v 13 Taritigi eme ge matagaga veia egiteu la tovolalaila ale eme gabua, egite kama isapolo. La valalua tomi rovi taia, egite tomi gabutia veia la tovolalailale, eia vagari. Eala moli La Tahalo Uru eia kama ge piligi etatou, eia kama ge sigolo tarome veia la tovolalaila ge vagari agi koramuli eme ge boru, ouka. Mai eme ge gabu la tovolalaila, eia ge vahilo leme la gauru ale eme ge bolehohoa e Satan ovola, eme ge magiri vagari.   
\s1 Umala amuto ge pou te la ilali te la lotu la visigologolola  
\p
\v 14 Amuto tabarabaragu, etato rovitia veia la gilogo te La Uru, eia ge sau tola etatou, eala eau karasuku amutou veia amuto umala ge pou te la lotu la visigologolola, veia ge ali la ilali ale egite vaabila soio te la puigolo, umala. Amuto ge kisu taro sesele la vulovulo alele.   
\p
\v 15 Eau vikara soio tamutou mai la tahalo me la tavile sesele ale koramulia ge lolo tataho la merera taku. Amuto ge mata muli la merera taku, me amuto ge rovi molia mai ele veia eia sesele, eau kama vikara bulalahu.  
\v 16 La ilali te la lotu sesele tegatou ale te Kraist, eia oio, mai la vaen, me la bret tai, ale etato rovilala la pilehole Kraist ovola. La vaen ale etato liliua, eia la irovilala te la pilehole Kraist, mai la kasosola ale pagegele. Etato ge liua, la sagegela ge uru te la tia gatou soata te La Tahalo Uru, la vuhula oio te la kasosole Latula eia vibalavati etatou tomi. La vaen ele, eia mai la irovilala tegatou, veia etato mai ale vitau me taitari me Kraist. Mai la bret tai, ale etato vitovi letatou te la ilali la irovilala te Kraist, etato alia, etato rovia mai ele veia oio te la pilehole Kraist, eia vimahuli etatou vikapopo me eia.  
\v 17 Mai la bret ale etato vitovila, eia isa moli, tio etatou tai ale te Kraist, etato tomi usu, eala moli etato mai ale vikapopo sesele, la vuhula etato tomi visuu la ilali la bret isa sekela, eala etato isa moliti oio te la isala.  
\v 18 Mai tai la vaabila soio te La Tahalo Uru te la lotu tegiteu e Iuda, egiteu ale ali la piligi la ilali ale la valalua vaabila soio te La Tahalo Uru, egite mai ale vikapopoti te la lotu te La Tahalo Uru mai ele, la vuhula egite tomi aliti la ilali tetala.   
\p
\v 19 Eau gabutatala amutou e Korin ale pou te la ilali te la lotu la visigologolola, amuto soukama ge gabutatalea veia eau gabu tikumu la lotu la visigologolola veia eia sesele. Ouka gologolo. Eau kama gabu tikumu egiteu la puigolo ale egite lotu tavua, veia eia sesele, me eau kama gabu tikumu tai la ilali la irou ale la valalua vaabila tegiteu la puigolo ovola.  
\v 20 Eala moli la paga isa eau gabua ovola maie: Egite la valalua la maligoma, te la lotu la visigologolola tegiteu, la ilali ale egite vaabi legiteu la puigolo ovola, egite mai ale rouroua soio tegiteu la hituhitu, kama soio te La Tahalo Uru, me eau kama masaga amuto ge mai ale vikapopo egiteu la hituhitu te la lotu la visigologolola mai ele.  
\v 21 Eia kama koramulia veia amuto ge liu la vaen te la lotu te Kraist, me amuto ge goio ge ali tai te la ilali te la lotu soio tegiteu la hituhitu. Eia kama koramulia veia isa ge ali la ilali la irovilala te la lotu te Kraist, veia ge goio ge ali tai la ilali te la lotu soio tegiteu la hituhitu.  
\v 22 Etato masagea veia etato ge vahiliti la igototolola te La Uru somai tegatou, ale etato ge mulimuli la lotu te la maligoma mai ele, ia? Mave, etato ge vahiliti la igototolola tetala mai ele, etato koramuli eia?   
\s1 La vulovulo mutou umala ge vailo buruko e tabarabara mutou  
\p
\v 23 Eia sesele moli, la merera ale amuto totoia veia eia koramuli etato ale te Kraist ge mulimuli la vulovulo tomi. Eala moli la vulovulo isahari, mai amuto ge mulimuli egiteu, eia kama ge suli la pulolou tegiteu e tabarabara mutou te la lotu te Kraist veia egite ge magiri vagari.  
\v 24 Taritigi etato umala ge gabutatala moli etatou, eala moli etato ge gabutatala muga egiteu e tabarabara gatou veia la vulovulo gatou ale egite hiloa etato mulimulia, eia soukama ge viruru egiteu. Taritigi veia la vulovulo gatou tomi eia ge suli moli egiteu e tabarabara gatou.   
\p
\v 25 Eia koramulia veia amuto ge loto la kalia tomi, amuto kama ge gabutatala papai ovola veia egite soioge vaabila la kaliale soio te la puigolo.  
\v 26 Amuto ge loto molia, ge alia, la vuhula La Buk Tabu Ale Pala, eia veia maie “La papaga tomi ale La Uru vipoua, eia tetala tomi moliti.”  
\v 27 Eala, eia taritigi moli veia mai la tahalo ale kama rovi e Kraist ge baha tavume veia eme ge ali vikapopo leia, eme ge ali la ilali tomi ale eia ge abiamu, eme umala ge gabutatala papai veia la kalia ale eia abiamu eia soioge la irou te la lotu la visigologolola.  
\v 28-29 Eala moli, mai e tabaramu isa te Kraist ge oio, eia rovitia veia la ilali tamuluale egite rou seseletia soio te la puigolo me eia ge mera tarome ovola, tio eme umalati ge alia, la vuhula e tabaramu alele eia soukama ge gabutatala papai ovola veia amula ruruti te la ilalila, me la vulomu alele eia suliti e tabaramu ovola.  
\p Eala moli mai isa soioge ge hiliti, veia ge koli la merera taku maie mago “Ale eia gabutatala papai mai ele, ilava eau ge gabu tikumua veia la vulovulola ge kisi toleau?  
\v 30 Mai eau ge vaisale La Tahalo Uru te la ilali taku, ilava egite ge vileau mai eau ge alia?”  
\v 31 Ouka, eia taritigi pepeho veia la vulovulo mutou tomi ge vaisale La Tahalo Uru.  
\v 32 Eala moli umala amuto isa ge viboru isa la tahalo me la tavile te la lotu, mai la tau Iuda, me la tau Grik, me la valalua me hatavivile te la lotu tomi te La Tahalo Uru, amuto umala ge viboru egiteu veia isa ge gabu la iloburukola oio te la vulovulomu.  
\v 33 Ale la vulogu seselele, ale eau igigoa, veia ge suli la valalua tomi te la vulovulogu tomi veia egite ge magiri vagari. La vuhula eau kama gabutatala moliau, eau gabutatala la valalua me hatavivile tomi, veia egite usu ge sau tola la mahulila ale sesele te Kraist.   
\c 11  
\p
\v 1 Eala, eia taritigi veia amuto ge mulimuli la vulogu, mai eiau, eau mulimuli la vulole Kraist.   
\s1 Taritigi egite hatavivile ge pigi robo la gama giteu te la pulolou tegiteu oilo la luma la lotu  
\p
\v 2 Eau vei tataho sesele amutou e Korin ele, ale amuto sau tola la vulovulo la lotu te Kraist tomi, me la merera tomi ale eau pala vimari le amutou ovola.   
\p
\v 3 Eala moli eau masagea veia amuto ge matagaga veia egite hatavivile ge pigi robo la gama giteu te la pulolou tegiteu oilo la luma la lotu. Mai la viputumulila te la lotu te aleie, eau masagea veia amuto ge matagaga ovola, eia maie: La tahalo, eia mamuga e rutula; me e Kraist, eia mamuga egiteu la valalua; me La Tahalo Uru, eia mamuga e Kraist.  
\v 4 Mai la tahalo ge magiri te la kilaka me la valolo, eala moli eia pigi robo la gamala, tio eia veipalea mai ele veia eia la tilogo ouka soio te la gamala, mai e Kraist ele, la vuhula eia pigi robo la gamala lou.  
\v 5 Mai tai ele, mai la tavile ge magiri te la kilaka me la valolo, me eia kama pigi robo la gamala, ale eia veipalea mai ele veia eia kama togo la gamala, mai egiteu la valalua ale mamuga eia. Ale la paga la mahelala sesele, la mahelala uru oio vola mai la mahelala te la tavile la gauru ale egite sipa taro la ivula, eia la pigi robola te la gamala ouka.  
\v 6 Mai egite hatavivile kama masaga ge pigi robo la gama giteu ale egite pou oilo la luma la lotu, taritigi egite ge sipa taro la ivu giteu ele, egite kamati ge rava. Taritigi egite hatavivile tomi ge pigi robo la gama giteu, la vuhula la mahelala uru pepeho oio vola veia la tavile la pigi robola ge ouka oio te la gamala, mai la tavile tai ale sipa taro tomiti la ivula, eia gabu la mahelala uru pepeho.   
\p
\v 7 Eala moli egiteu la valalua, taritigi egite umala ge pigi robo la gama giteu te la pulolou tegiteu oio la luma la lotu. La vuhula La Tahalo Uru vipou la tahalo veia eia ge mai moli lou eia, veia eia mai la bilalaha tetala. Eala moli la tavile, eia mai la bilalaha te haruala.  
\v 8 Mai etato rovia veia oio te la siloko la vipoupoula, La Tahalo Uru eia kama visibitala la muluga la tahalo loio te la tavile, ouka, eia visibitala la muluga la tavile loio te la tahalo.  
\v 9 Eia kama vipoua veia la tahalo ge suli la tavile, eia vipou la tavile veia eia ge la visuli soio te la tahalo.  
\v 10 Eala, eia matagagati mai ele veia eia koramulia veia la tavile ge pigi robo la gamala mai la irovilala te la vulovulo gatou veia la valalua, egite mamuga eia. Eia tikumu, la vuhula mai etato pou te la lotu, egiteu la angelo oio lago robo etatou. Mai la iroromulila ge ouka te la lotu tegatou, etato ge mahela pepeho legiteu la angelole.   
\p
\v 11 Eala moli la viputumulila te la pulolou te la tahalo me la tavile, eia isapolo lou tegatou ale te Kraist. Mai etatou ale te Kraist, eia taritigi etato ge matagaga veia la tahalo me rutula, egira mai ale visuli baoli, egira kama pou seseke. Etato kama mai egiteu ale kama rovi e Kraist, egite kama totoro te rutu giteu.  
\v 12 Mai la muluga la tavile, eia loio te la tahalo, eia matagaga tai mai ele veia egite hatavivile, egite veipala tai egiteu la valalua mai te la piligo. Eala moli la vuhu gatou tomi, La Tahalo Uru moli, eala eia taritigi pepeho veia la tahalo me la tavile ge visuli baoli.   
\p
\v 13 Taritigi amuto lou ge gabutatala muli la merera taku. Mave, amuto veia eia taritigi moli veia mai la tavile ge magiri te la kilaka me te la valolo, eia kama ge pigi robo la gamala?  
\v 14-15 La valalua me hatavivile tomi rovia veia la ivu la tavile, eia mai la tokoromola ale La Tahalo Uru abiala. Eala moli mai la ivu la tahalo ge tau urua, ale la paga la mahelala sesele. Eala moli eia matagaga tai veia eia taritigi veia la tavile ge pigi robo la gamala mai te la vulovulo miteu.  
\v 16 Eala moli mai isa tamutou ge masagea veia ge putu oli lou la merera taku, eau ge veiala maie veia amite la bilalaha te Kraist isa kama rovi la viputumulila ale isapolo te alele, veia la tavile kama ge pigi robo la gamala te la pulolou tetala oio la luma la lotu. Me egiteu la lotu tomi te Kraist ale oio te la maututula tomi, egite mai tai ele.   
\s1 La ilali la irovilala te la pilehole Kraist, egiteu e Korin igo gegerutia  
\r (Matiu 26:26-29; Mark 14:22-25; Luk 22:14-20)  
\p
\v 17 Tio, eau la vikararala isa lou soio tamutou, eala moli eau kama ge vei tataho amutou oio vola, la vuhula mai amuto ge pou te la lotu, amuto igo gegeru moli la pulolou tamutou ele.  
\v 18 La muluga la merera ale eau loloa tamutou ele, mai amuto pou vikapopo te la lotu, amuto vaigo. Me la merera alele eau veia eia soioge sesele bakisi.  
\v 19 Eia soioge koramuli moli mai ele, la vuhula egiteu la tahalo la mari tamutou ele ge vipepe te la vikararala veia mai egite ge vagari te la hare giteu, eia ge veipalea mai ele veia La Tahalo Uru suli egiteu veia egite ge mamuga amutou.   
\p
\v 20 Mai amuto ge pou vikapopo te la ilali la irovilala te la pilehole Kraist, amuto kama igo seselea mai la ilali le Kraist.  
\v 21 Mai amuto ali, amuto ali sele moli, kama gabutatala egiteu e tabara mutou. Amuto ali kaluvu, amuto isahari so vitotolo, eala moli amuto isahari maruti, amuto paua moli tai te la iliu.  
\v 22 Mai amuto ge ali oio te la luma tamutou isasasa! Amuto soioge vile la valalua la lotu te La Tahalo Uru, veia ge igo mahela egiteu e tabara mutou te Kraist ale pou la savelela, ale egite ge hilo la ilali uru amuto alia te la lotu. Me oio vola, eau ge veia mutou mave? Eau kama ge vei tataho amutou, ouka gologolo!   
\p
\v 23 La masova la ilali la irovilala te la pilehole Kraist, La Uru veipalatia somai tamiteu la bilalaha tetala, me eau pala vei mulitia mutou ovola, eia maie: e Iesus, La Uru gatou, te la logo moli ale e Iudas sugu taroa soio tegiteu la gima, eia abi la bret,  
\v 24 eia vei tataho La Tahalo Uru ovola, eia goio tovi luea, eia goio veia giteu la valalua la vimari tetala mago “La bret ale, eia la mailigu moli ale eau sugu taroa veia ge peho robo amutou. Amuto ge igo moli la ilali la bret mai la irovilala te la pileho taku.”  
\v 25 Tio, mai tai ele, egite ali kaluvu, e Iesus goio abi la kap la vaen, eia goio veia giteu mago “Ale la kasosogu, eia la irovilala ale amuto ge rovia veia la merera te La Tahalo Uru ale halaba, eia sesele moli veia la kasosogu ge pagegele, eia ge vimahuli amutou ale taku. Te la pulolou tomi te la lotu tamutou, ale amuto ge liu la vaen ovola, amuto ge igo molia mai la irovilala sesele te la pulolou taku omai tamutou.”  
\v 26 Me eia veia giteu mai ele, la vuhula la ilali la bret me la iliu la vaen, eia mai ale veipalea veia La Uru, eia peho robo etatou. Etato ge igigo molia mai ele kara ale eia ge beu loua somai.   
\p
\v 27 Mai isa ge ali bulalahu la bret te La Uru, veia mai isa ge liu bulalahu tai la vaen te La Uru, ale eia mai ale igoti la iruru soio te la maili La Uru me soio te la kasoso La Uru tai.  
\v 28 Mai isasa ge pou te la ilali la irovilala te la pilehole Kraist, taritigi pepeho veia eia ge mata muli muga la gabutatalala tomi tetala oilo, veia eia koramulia ge liu vikapopo la tilogo me la gabutatalala ale taritigi, ka ouka.  
\v 29 Mai isa ge ali bulalahu moli, veia ge liu bulalahu moli tai, me eia kama gabu tikumu la maili La Uru me la kasoso La Uru, eia mai ale visibitala la igototolola te La Tahalo Uru soio tetala.  
\v 30 Eala, igoie usu tamutou lalea, me isahari pepeho.  
\v 31 Mai etato ge gabutatala tigi muga, kama ge ali bulalahu, kama ge liu bulalahu, tio etato kati ge poga la kiloli la iruru te La Tahalo Uru somai tegatou.  
\v 32 La Uru, eia viteteli vagari tai etatou, eia ge vimatata la vulovulo gatou veia mulimuli etato soukama ge vilua vikapopo egiteu la valalua la maligoma tomi.   
\p
\v 33 Tio, mai moli ele, amuto tabarabaragu, mai amuto ge pou vikapopo te la ilali la irovilala te la pilehole Kraist, taritigi amuto ge pou muga kara ale amuto tomi sibitalati, tio amuto ge ali vikapopo mai ele, isa kama ge hateka.  
\v 34 Mai isa ge vitolo, taritigi veia eia ge ali muga oio te la luma tetala, eia soukama ge igo gegeru la ilali te La Uru, amuto tomi ge poga la kilolila ovola. Me la merera isahari lou, mai eau ge guvi sesele tamutou, eau ge vimatatea soio tamutou ele.   
\c 12  
\s1 Egiteu la vaabila te La Kalulu La Marokala somai tegatou ale te Kraist  
\p
\v 1 Amuto tabarabaragu, eau masagea veia amuto ge matagaga tigi tegiteu la vaabila te La Kalulu La Marokala mai la tabarila tetala somai tegatou ale te Kraist.   
\p
\v 2 Amuto rovia, ale pala, amuto so popou te la maligoma, egiteu la tahalo la visigologolola te la lotu ale kama sesele, egite lapu bulalahu la gabutatalala tamutou soio tegiteu la puigolo ale kama mahuli, la kalulu giteu ouka, egite viruru amutou.  
\v 3 Amuto kama rovi tigi la gauru te Kraist, eala eau veia ge vei matagagea mutou veia la tahalo ale veipala la merera te La Kalulu La Marokala, amuto ge hilovi tigi la merera tetala maie: Mai eia ge vikara te la vagagari La Kalulu La Marokala sesele, eia kama ge koramulia ge vikara bareale Iesus. Eala moli mai La Kalulu La Marokala kama ge oio tetala, eia kama ge koramulia ge vikara maie veia “E Iesus La Uru taku!” Amuto ge hilovi la merera tegiteu mai ele.   
\p
\v 4 Egiteu la vaabila te La Kalulu La Marokala, ale eia tabaria somai tegatou ale te Kraist, egite isapolopolo, eala moli La Kalulu La Marokala ale la vuhu giteu la visuli tomi ele, eia isa moli sekela.  
\v 5 La igogolu ale etato ge igoa veia ge suli la lotu te La Tahalo Uru, eia isapolopolo, eala moli oilo vola etato la bilalaha te La Uru isa moli sekela.  
\v 6 La visuli somai tegatou ale La Kalulu La Marokala eia abitia gatou ovola veia la vagagari gato ge koramuli la igogolu tetala, la visuli tomi alele eia isapolopolo omai tegatou isasasa, eala moli La Tahalo Uru ale visibitala egiteu la vaabila tomi alele, eia isa moli sekela.   
\p
\v 7 Etatou tomi isasasa, etato sau tola bakikisi la vagagari La Kalulu La Marokala, koramuli la tabarila te La Tahalo Uru somai tegatou veia etato ge suli la valalua me hatavivile tetala ovola.  
\v 8 Mai soio te isasa, La Kalulu La Marokala eia ge abiala la tabarila veia eia ge viteteli tataho la valalua me hatavivile te Kraist. Tio, soio te isa lou La Kalulu La Marokala eia ge tabaria veia eia ge la tahalo la vimari.  
\v 9 Tio, ale isa lou, eia ge abiala la tautaulailo ale uru. Soio te isa lou, eia ge tabaria la vagagarila ale koramulia ge vimahuli egiteu ale lalea.  
\v 10 Tio ale isa lou, eia ge tabaria soio tetala veia eia ge igo la golu la karutula ale ge veipala la vagagarila te La Uru soio te la valalua me hatavivile tomi. Tio soio te isa lou, eia ge visibitala la merera tetala veia eia ge veipalea soio te la valalua me hatavivile te Kraist. Tio isa lou, eia ge tabaria soio tetala veia eia ge la tahalo ale ge hilovi tigi la merera tegiteu ale magiri veia ge veipala la merera te La Uru. Tio soio te isa lou eia ge tabaria la kilaka ale isapolo, eia tululu, la masovala kama tabuli palala, la vuhula eia tivura. Eala moli soio te isa lou eia ge visibitala la mari tetala koramulia eia ge lube la masova la kilaka ale isapolo, eia kama matagaga.  
\v 11 Egiteu la vaabila tomi alele, egite isapolopolo, eala moli egite tomi La Kalulu La Marokala isa moli sekela abia gatou ovola. Eia tabari egiteu la vaabila tomi alele somai tegatou la valalua me hatavivile tetala, mai te la masasagala tetala sekela.   
\s1 La vikarara la tilovo te la vovole Kraist  
\p
\v 12 La vovo gatou tomi isasasa, eia mai ale vitoto sosolo tataho moli, la lima gatou oio, la vaha gatou, la gama gatou, eala moli la vovo gatou isa moli sekela. Tio la vimari alele, eau ge tovoa somai te la pulolou tegatou, ale etato vipuhi tigi tataho, mai ale vikapopo te Kraist.  
\v 13 Egite vuhi etatou te la isale Kraist, etato tomi abi La Kalulu La Marokala, eia vagoilo etatou mai ele te la pulolou ale taritigi te la valalua me hatavivile tetala. Etato kama visauru, isahari la tau Iuda, isahari la tau Grik, isahari la tahalo la vuliti, isahari la tahalo bulalahu moli. Eala moli oio te Kraist etatou visauru moli, etato mai ale vikapopoti oio tetala.   
\p
\v 14 Tio, la tilovo te la vovo gatou veia eia isa moli, eau veia ge lapu matagaga loua te la vimari te la igogolu te la lotu, eia isapolopolo. Mai ale eau veitia, la vovo gatou, la baututula oio vola eia ga mata mai ale usu, eia isapolopolo, eala moli ouka, la vovo gatou isasasa eia vitoto sosolo tataho moli, la vovo gatou eia isa moli.  
\v 15 Mai la vahamu ge hiliti, eia ge mai ale vikara mago “Eau la igogolu kama taritigi, mai eau ge la lima, kora, eau kati oio te la vovole tahogu.” Ale mai la vahamu ge vikara mai ele, eia kama ge paru taro la vovomu, eia soloio, la vuhula eia la vahamu seselele.  
\v 16 Mai tai la gavusamu ge hiliti, eia ge vei mago “Mai la igogolu taku ge taritigi mai la mata, eau la gavusa moli, korale eau kamati oio te la vovole tahogu.” Ale la gavusamu ge vikara mai ele, eia kama ge kaluvu, eia soloio te la vovomu ele, la vuhula la vovomu tomi eia vitoto sosolo tataho, eia isasa moli.  
\v 17 Mai la vovomu tomi ge la mata te la milatalata, eme ge lololo mave? Mai la vovomu tomi ge la gavusa te la ilolo, eme ge asoa mave la malia la paga?  
\v 18 Eala moli la vovo gatou eia kama mai ele, La Tahalo Uru eia pui etatou, eia tabari tataho la igogolu te la baututu la vovo gatou tomi mai te la masasagala tetala sesele.  
\v 19 Mai la igogolu tegiteu ge isa moli, la vovo gatou eia kamati mata mai la tahalo!  
\v 20 Eala moli etato rovitia veia la vovo gatou, la baututula usu, eala moli la vovo gatou isa moli.   
\p
\v 21 Eala, eia matagagati mai ele veia la mata gatou eia kama koramulia ge hiliti tavu la lima gatou veia ge kauala maie mago “Eau moli taritigi, eme ouka.” Mai tai la gama gatou, eia kama koramulia ge hiliti tavu la vaha gatou veia ge tahi taroa veia la igogolu tetala eia isapolo, eala eia kama kokora.  
\v 22 Eala moli etato rovia veia la baututu la vovo gatou ale kama vagari, mai la taraga tegatou, egite muga sesele, la vuhula egite sau tola la mahulila tegatou.  
\v 23 Eia sesele viruru tai veia la baututu la vovo gatou ale kama rava, mai la vuhu gatou la valalua me egite hatavivile tai, etato tau robo tataho legiteu la lavalava, etato mai ale togo egiteu, etato vibaumuli tataho egite.  
\v 24 Eala moli la vovo gatou ale taritigi, mai la lagu gatou, etato kama vibaumuli vagari ovola. Eala eia matagaga mai ele veia La Tahalo Uru eia tabariti egiteu la baututu la vovo gatou veia egite ge vitoto sosolo tataho, me eia vahiliti tai la gabutatalala tegatou veia etato ge togo tataho la vovo gatou ale kama rava.  
\v 25 Eala moli, la vovo gatou tomi isasasa eia mai ale isa moliti, la baututula kama vipou gagima, egite vipuhi tataho moli.  
\v 26 Mai isa ge ilo buruko, egite tomi ge ilo buruko vikapopo leia. Mai isa ge tokoromoti, egite tomi ge sagege vikapopo leia.  
\v 27 Me amutou tomi ele, amuto mai la vovole Kraist, me amuto tomi isasasa la igogolu tamutou oio, te la lotu tetala.   
\p
\v 28 Mai eau veitia veia amutou tomi vikapopo, amuto mai la vovole Kraist, La Tahalo Uru eia visati letatou tomi te la lotu tetala, eia tabaria gatou la igogolu tomi tegatou isahari maie:  
\p La mulugala: isahari, egite la bilalaha, egite valolo la valalua me hatavivile la merera te Kraist;  
\p la vailuala: isahari, egite veipala la merera te La Uru soio te la valalua me hatavivile te Kraist;  
\p la vaitolula: isahari, egite vimari la valalua me hatavivile la gauru te Kraist.  
\p Goio, isahari, egite igigo la golu la karutula ale veipala la vagagari La Tahalo Uru soio te la valalua me hatavivile.  
\p Goio, isahari, egite vimahulihuli egiteu ale lalea.  
\p Goio, isahari, egite visusuli soio te la valalua me hatavivile te Kraist ale pou la savelela.  
\p Goio, isahari, egiteu la tahalo ale vimatatata la lotu te Kraist, egite vibaumuli ovola.  
\p Goio, isahari, egite veipala la merera la kilaka ale isapolo.   
\p
\v 29 La Tahalo Uru, eia kama tabaria veia etato tomi ge la bilalaha tetala ale ge valolo. Eia kama veia etato tomi ge veipala la merera tetala. Eia kama tabaria veia etato tomi ge vimarimari la valalua me hatavivile te la lotu. Etato tomi tai kama igigo la golu la karutula ale veipala la vagagarila tetala.  
\v 30 Etato tomi kama vimahulihuli egiteu ale lalea. Etato tomi kama vikara te la merera la kilaka ale isapolo, eia tivura. Etato tomi tai kama ge lube la merera tegiteu alele.  
\v 31 La Tahalo Uru eia tabari tataho egiteu la vaabila tetala mai ele somai tegatou isasasa, me eia taritigi pepeho veia etato ge vagari ge sau tola egiteu la vaabila ale taritigi tegiteu la vaabila tomi, mai egiteu la vaabila ale vahiliti la valalua me hatavivile tomi. Eala moli omai eau ge vei matagagea mutou la gauru isa ale taritigi pepeho sesele, mai la vulovulo la gilogo.   
\c 13  
\s1 La vulovulo la gilogo  
\p
\v 1 La gauru ale taritigi pepeho sesele, eia maie: Taritigi pepeho veia etato tomi ge rovi la gilogo te la pulolou tegatou isasasa.  
\p Mai eau ge koramulia ge kaka te la mererera ale isapolopolo, mai te la merera tegiteu la angelo tai, eala moli la gilogo ouka oio te la tiagu, eau mai moliti e belo ale tali bububu, la igogolu isa ale taritigi eia kama sibitala te la limagu.   
\p
\v 2 Mai La Tahalo Uru abitiagu la merera tetala veia eau ge veipalea, veia eau ge rovi tai la vuhu la merera tomi tetala me la masovala tai oio vola, veia la tautaulailo taku tai ge uru koramuli eau ge veia la gove veia eia ge tasuku, eala moli eau la gilogo ouka te la tiagu, tio eau la golu bububu moli.   
\p
\v 3 Mai eau sugu taro la golugolu tomi taku soio tegiteu ale pou la savelela, mai eau ge sugu taro tai la vovogu veia egite la gima ge biliau, eala moli eau la gilogo ouka te la tiagu, la vulovulogu ale taritigi ale eau igotiale, eia kama ge suliau bakisi.   
\p
\v 4 Mai eme la tahalo la gilogo, eme kama ge hate pariri veia ge koli la iruru, eme ge rovi moli la vulovulo la mutelela. La tahalo la gilogo, eia kama rovi la maisu totolola, eia tai kama vei tataho rivu lou eia. La tahalo la gilogo eia kama gabu vauru lou eia.  
\v 5 La tahalo la gilogo eia kama igo lalahu, eia kama vareagagi tai, eia kama igo totolo harari, me eia kama gabutatala mulimuli la iruru ale egiteu e tabarabarala igotia soio tetala.  
\v 6 La tahalo la gilogo eia kama sagege mai la iruru ge sibitala, eia masaga moli la vulovulo ale matata.  
\v 7 La tahalo la gilogo, eia kama ge gabu tikumu la iruru te tabarala soio tetala, eia ge mata sosoli taro molia, eia ge lolo moli la merera ale taritigi te tabarala, eia ge magiri vagari mai ele, kama ge silaha, eia ge vagari robo tataho e tabarala.   
\p
\v 8 La gilogo, eia kama ge kaluvu. Mai isa ge veipala la merera te La Tahalo Uru, eia ge kaluvu lou. Mai isa ge kaka te la merera ale isapolo, eia ge maila lou. Mai isa ge rovi la masova la merera te La Tahalo Uru, la mari tetalale ge kokovu lou.  
\v 9 La vuhula etatou la valalua la vovo, la mari tegatou tomi boto. Ale bakisi moli etato rovia, etato veipalea.  
\v 10 Eala moli mai mulimuli e Kraist ge gomai lou, eia ge vimaroka etatou, la mari tegatou kati ge boto, etato kati ge gabu tikumu la mari me la visuli ale igoie etato abia, etato karuturutula veia eia isapolo, ge oukati.  
\v 11 Eau ge tovo mulia somai taku. Mai te la bibisigu, eau la vikararala taku, la gabutatalala taku, la mari taku, eia mai moli e guliliki isa bisi. Eala moli eau goio sagaiti, eau pigia sotigu egiteu la vulovulogu tomi alele, veia eau ge gabutatala mai la tahalo.  
\v 12 Etato igoie pou mai e guliliki, la sesele la merera te La Tahalo Uru, etato hilo molia bakisi mai la halulu gatou ale etato hililoa te la titiro, mai la glas, eala moli etato mulimuli ge matagaga tataho ovola. La mari taku ale eau sau tolea te la vovo, eia boto. La Tahalo Uru, eia rovi la vulovulogu tomi. Eala moli eau mulimuli ge rovi tigi tomi tai la sesele la merera tetala, mai ale igoie eia rovitiau.   
\p
\v 13 La vulovulo itolu moli ale tikumu ge magiri, kama ge kaluvu, egiteu maie:  
\p -etato ge tau la ilo gatou soio te La Tahalo Uru;  
\p -etato ge pou tali la pulolou la matagagala tetala;  
\p -etato ge toro moli te la vulovulo la gilogo.  
\p Eala moli te la vulovulo la merera ale itolu ele, la gilogo moli sekela eia uru tegiteu tomi.   
\c 14  
\s1 La vaabila te La Kalulu La Marokala ale muga sesele  
\p
\v 1 Taritigi amuto ge vagari tavu la vulovulo la gilogo. Eala moli amuto ge masaga tavu tai egiteu la vaabila ale loio te La Kalulu La Marokala, mai la veipala la merera te La Tahalo Uru.  
\v 2-3 La vaabila alele, eia muga tegiteu la vaabila tomi, mai la kilaka te la merera ale isapolo. La vuhula, mai isa ge veipala la merera te La Tahalo Uru, eia ge karasuku la valalua me hatavivile te Kraist oio vola veia egite ge magiri vagari, la iloburukola ouka. Eala moli mai isa ge kaka te la kilaka ale isapolo, eia tululu, la merera oio vola eia isapolo, ale eia kama vikara soio te la valalua me hatavivile, eia vikara moli soio te La Tahalo Uru, eia veipala moli la merera ale kama matagaga, la vuhula la kilaka tetala eia tivura. Eia sesele, la masovala oio, eala moli eia vagari veia etato ge rovia.  
\v 4 Eala, la tahalo ale kaka mai ele, eia suli moli eia, eala moli la tahalo ale veipala la merera te La Tahalo Uru, eia suli la valalua me hatavivile tomi te la lotu.   
\p
\v 5 Eau masagea veia amuto tomi ge rovi la kilaka te la merera ale isapolo, eala moli eau vagari veia amuto ge rovi pala muga la veipala la merera te La Tahalo Uru. La tahalo ale igoa mai ele, eia suli pepeho la lotu, eala moli la tahalo ale kaka te la merera ale isapolo, eia kama suli la lotu, eala moli mai isa ge oio ale ge koramulia ge lube la masova la merera tetala, eia ge taritigi bakisi mai ele, eia ge vei matagagea giteu la valalua me hatavivile te Kraist oio vola, eia ge suli egiteu tomi te la lotu mai ele.   
\p
\v 6 Amuto tabarabaragu, mai eau ge gomai tamutou, me eau ge vikara soio tamutou te la merera ale isapolo moli, amuto kama rovi la masovala, ale kama ge suli amutou bakisi. Eala moli mai eau ge veipala la merera te La Tahalo Uru soio tamutou, ale ge taritigi tamutou. Mai tai eau ge lubea mutou la masova la merera tetala, ale ge taritigi tai ele. Mai la vimari me la vikara matagagala tai te la gauru te Kraist, eia ge suli tai amutou. Eala moli la vikara bulalahula te la merera ale isapolo, eia kama ge suli amutou.   
\p
\v 7 La vimari alele, eau ge tovoa soio te e vigogo. Mai etato ge pusu e vigogo, taritigi etato ge pusu tatahoa. Mai ge ouka, la bilau ale etato pusua, eia kama ge tali tigi te la gavusa giteu ale loloa.  
\v 8 Mai tai la vaivai, mai la mulugaluga isa masagea veia ge tola vikapopo egiteu la valalua tetala, taritigi eia ge pusu tataho la vaivai tetala. Mai ge ouka, egite kama ge lolo tigia, egite kama ge guvi tigi, egite kama ge raragi tigi te la igogolu.\f + \fr 14:8 \ft Ale te la vaivai, e Pol tovo seselea soio te la biugel ale tola egiteu e soldia soio te la vaubila.\f*  
\v 9 Tio la vikara la tilovo iluale, eia goio tamutou. Mai amuto ge vikara, taritigi amuto ge vikara matagaga. Mai amuto ge kaka te la merera ale isapolo, me mai moli ele la kalamea mutou eia kama ge toi tigi la merera ale la valalua rovi la masovala, egite ge rovi la masova la vikararala tamutou mave? Eme mai ale vikara bulalahu soio te la baa.   
\p
\v 10 Omai te la maututula, la merera usu oio, eala moli egiteu tomi la masova giteu oio, koramuli egiteu ale vikarakara ovola ge rovia.  
\v 11 Eala moli mai eau ge la mosi, eau kama ge rovi la masova la merera tegiteu ele. Amila me la tahalo ale vikarakara, amila vipou baa mai la mosi sesele.  
\v 12 Tio mai tai amutou ele, mai amuto ge kaka te la merera ale isapolo, isa kama ge rovi la masovala. Eala moli eau hilotia veia amuto vagari veia ge sau tola egiteu la vaabila isahari te La Kalulu La Marokala. Ioge, eia taritigi pepeho veia amuto ge vagari tavu egiteu la vaabila ale ge karasuku la valalua me hatavivile te la lotu te Kraist, ge suli egiteu mai ele veia egite ge magiri vagari.   
\p
\v 13 Eala, eau veia eia taritigi pepeho veia mai isa ge kaka te la merera ale isapolo, eia ge kaka tai La Tahalo Uru veia eia ge lubeala la masovala, veia eia ge koramulia ge lube loua giteu la valalua me hatavivile ale loloa.  
\v 14 La vuhula, mai eau ge kaka te la merera ale isapolo, la kalulugu moli eia ge toitoi la kilaka alele, eala moli la gabutatalala taku kama oio vola.  
\v 15 Tio mai ge mai ele, eau ge igo la rova sesele ovola? Taritigi la kilaka taku ge ilua, isa te la kalulugu, isa te la gabutatalala taku. La bilau taku tai ge ilua, eau ge bau te la kalulugu, eau ge bau tai te la gabutatalala taku me la merera ale matagaga.  
\v 16 Mai eme ge vaisale La Tahalo Uru te la kalulumu moli, mai te la merera ale isapolo, mai egite isahari ale kama rovi la masovala ge oio, egite ge vaisale tai La Uru vikapopo leme mave? Ge ouka ge! La vuhula egite kama rovi la masova la merera taume.  
\v 17 Eme soioge vaisale tataho La Uru, eala moli la kilaka taume eia kama suli la lotu tegiteu ale lotu vikapopo leme.   
\p
\v 18 Eau tai rovi la kilaka te la merera ale isapolo, eau muga sesele amutou tomi te la kilaka bibibila mai ele. Me oio vola eau vaisale sesele La Tahalo Uru, la vuhula eau masagea.  
\v 19 Eala moli mai ge te la pou vikapopola te la lotu, eau masagea veia ge veipala la merera isahari moli ale ge suli egiteu a tabarabaragu, kama la merera mapaiti ale la masovala ouka.   
\p
\v 20 Amuto tabarabaragu, umalati amuto ge gabutatala mai egiteu e gulikiliki. Sesele, mai te la vulovulo ale kama kokora, la gabutatalala tamutou ovola ge mai la gabutatalala te la pepeso, amuto kama ge rovi la iruru, eala moli te la gabutatalala tamutou te la pulolou tamutou te la lotu, eau masagea veia amuto ge sagaiti sesele.  
\v 21 Mai la merera te La Uru soio te Moses, eia veiala maie:  
\li1 Eau ge baha la merera soio tegiteu  
\li1 la valalua me hatavivile taku,  
\li1 loio tegiteu la maratatila  
\li1 ale la merera tegiteu isapolo.  
\li1 Oio te la hare giteu la mosi  
\li1 eau ge vikara soio tegiteu  
\li1 la valalua me hatavivile taku, eala moli egite kama ge hate saga tavua,  
\li1 egite kama ge loloa.   
\p
\v 22 Tio, me eia matagagati mai ele veia la kilaka te la merera ale isapolo, eia la irovilala moli soio tegiteu ale kama rovi e Kraist, kama tegatou ale tetalati. Eala moli la veipala la merera te La Uru, ale la visuli sesele somai tegatou, kama tegiteu ale so popou te la maligoma.  
\v 23 Eala, mai amuto ge lotu, me amuto tomi ge kaka galolo te la merera ale isapolo, la masovala kama matagaga, mai egiteu ale kama rovi la lotu te Kraist, egiteu ale logala, egite ge goilo ge lolo amuto kaka galololo mai ele, egite ge veia amuto paua sesele.  
\v 24 Eala moli mai amuto ge lotu, me amuto tomi ge igo seselea veia ge veipala tataho la merera te La Uru, mai isa ale logala ge goilo ge lolo la merera tamutou, tio la merera tamuto tomi ele, eia ge ubi la tiala. Eia ge gabutatala rivu lou la iruru tetala,  
\v 25 la vulovulola ale kama kokora eia ge veipala tomia. Eia ge boru lagu tugu, eia ge lotu tavu La Tahalo Uru, eia ge veipala la merera maie mago “La Tahalo Uru, eia omai seseleti kabili tamutou!”   
\s1 La vulovulo ale taritigi te la lotu  
\p
\v 26 Amuto tabarabaragu, amuto ge pou te la lotu, la pulolou tamutou eia ge taritigi mave? Mai amuto ge pou vikapopo, la lotu tamutou ge taritigi maie:  
\li1 Isahari ge bau;  
\li1 isahari ge vimari;  
\li1 isahari ge veipala la merera te La Uru;  
\li1 isahari ge kaka te la merera ale isapolo;  
\li1 isahari ge lube la merera tegiteu ele.  
\p La lotu tamutou eia ge hari mai ele, me la igogolu tomi ele eia ge te la vahiliti la valalua me hatavivile te la lotu te Kraist veia egite ge magiri vagari te la tautaulailo tegiteu soio tetala.  
\v 27 Mai isahari ge kaka te la merera ale isapolo, taritigi taho lua uka taho tolu moli ge vikara, isa pala muga, goio isa, goio isa lou mai ele, la marapala ouka. Taritigi pepeho tai veia isa ge lube la merera tegiteu ele.  
\v 28 Mai la tahalo la ilube la merera tegiteu ge ouka, taritigi egite ge makovu muga, egite ge kaka moli te la gabutatalala tegiteu isasasa, La Tahalo Uru ge loloa mai ele.   
\p
\v 29 Mai te la veipalala la merera te La Tahalo Uru, taritigi taho lua uka taho tolu moli ge vikara, la valalua me hatavivile tomi ge laba gele tavua mai ele veia egite ge mata muli la masovala veia eia la vikararala te La Uru ka ouka.  
\v 30 Mai isa sokoti la vikararala, me isa lou eia gabu tivurati la merera te La Uru oio tetala, taritigi pepeho veia ale magiri ge pou muga, me ale so popou ge hiliti ge abi la mulila.  
\v 31 Amuto tomi ge koramulia ge veipala tataho la merera te La Uru mai ele, la marapala ge ouka, la valalua me hatavivile tomi ge balava te la vimari me la vitetelila tamutou.  
\v 32 Amuto ge vikara tataho mai ele, la vuhula la tahalo ale ge veipala sesele la merera te La Uru, taritigi eia ge baumuli tataho sesele la vulovulola te la pulolou tetala oilo te la luma la lotu.  
\v 33 La vuhula La Tahalo Uru eia kama visibitala la marapala, ouka, eia masaga moli la pulolou ale taritigi, la marapala ouka.  
\p Mai te la pulolou tegiteu la valalua me hatavivile te la lotu te la maututula tomi,  
\v 34 taritigi pepeho veia oio tai tamutou e Korin ele, egite hatavivile ge pou makovu te la lotu, egite umala ge vikara. Egite ge lolo moli la viputumulila tegiteu la valalua, mai la merera te Moses eia veia.  
\v 35 Mai egite la tilahi isa ge oio, taritigi egite ge tahi matagaga e harua giteu oio te la luma tegiteu isasasa. Eia la paga la mahelala ale uru sesele veia la tavile tai ge vipigi vulo la merera oilo la luma la lotu.  
\v 36 Eala moli amuto isahari veia eau visigolo, ia? Mave, la merera te La Tahalo Uru eia loio seseleti tamutou e Korin ele, ia? Amuto moli e Korin lolotia, la maututula isahari lou souka, ia?  
\v 37 Mai isahari tamutou ge la tahalo ale rovi sesele la merera te La Tahalo Uru, egite ge matagaga moli mai ele veia la merera taku eia tikumu, eia loio seseleti te La Uru.  
\v 38 Mai isa kama ge matagaga mai ele, amuto umala ge gabu tikumua veia eia vikara sesele.   
\p
\v 39 Amuto tabarabaragu, la tapasi la merera taku soio tamutou te la vimari tomi alele, eia maie: Taritigi pepeho veia amuto ge vagari veia ge veipala la merera te La Uru, me umala tai veia amuto ge magiri robo egiteu ale kaka te la merera ale isapolo.  
\v 40 Eala moli eia taritigi pepeho veia la lotu tamutou ge hari tataho moli, la marapala ge ouka.   
\c 15  
\s1 E Kraist, eia peho robo etatou, eia goio mahuli rivu lou  
\p
\v 1 Amuto tabarabaragu, eau veia ge vei matagaga loua mutou la valolo ale taritigi te Kraist, ale amuto lolotia, amuto magiri vagari ovola.  
\v 2 La valolo ale taritigi te Kraist moli sekela ge vimahuli amutou, mai amuto ge sau tola seselea mai ale eau valoloti amutou ovola. Mai amuto ge polo la merera ale, amuto veipalea mai ele veia amuto lolo bulalahu molia, amuto soioge tautaulailo bulalahu.   
\p
\v 3 Eala moli la merera ale eau valolo amutou ovola, La Uru eia vimari leau ovola, eau goio veipalea mutou la merera tetalale ale tikumu sesele, me la vuhu la mererale eia maie: e Kraist, eia peho robo etatou te la iruru tegatou, mai La Buk Tabu Ale Pala eia veia.  
\v 4 Egite ulaia, eala moli te la itolu la haro, La Tahalo Uru vimahuli rivu loua taro la pileho, mai tai La Buk Tabu eia veia.  
\v 5 Eia mahuli rivu lou, eia goio sibitala tavu muga e Pita, mulimuli eia goio sibitala tavu egiteu la valalua la vimari tetala savulusa gete lua.  
\v 6 Mulimuli ovola, te la haro isa moli eia goio sibitala tavu egiteu e tabara gatou te Kraist usu, la giligi giteu salatu lima, gegete lou. Igoie egite usu soloio mahuli, eala moli isahari pehoti.  
\v 7 Goio, mulimuli te ale, e Iesus goio sibitala tavu e Iakob, goio eia sibitala tai tavu egiteu la bilalaha tomi tetala,  
\v 8 goio mulimuli ovola eia sibitala tavu tai eau, eala eau mai la bilaruru tegiteu la bilalaha tomi.  
\v 9 Eau bisi tegiteu la bilalaha tomi, eau kama taritigi, kama koramulia veia egite ge toi leau la bilalaha, la vuhula eau pala viligi la valalua me hatavivile te la lotu te Kraist.  
\v 10 Te la gilogo moli te La Tahalo Uru, eia igo halaba eau mai la tahalo tetala sesele. La gilogo tetala alele, eia puruti, la vuhula eau bebetolati la igogolu taku, egite la bilalaha isa kama igogolu vagari mai eau, eala moli eia kama la vagagarigu alele, eia la vagagari la gilogo te La Tahalo Uru moli.  
\v 11 Mai la merera taku, me la merera tegiteu la bilalaha tomi, la valolo tamiteu eia visauru moli, mai te la pilehole Kraist, me la mahuli rivula tetala. La valolo ale amuto toroti ovola, eiala moli ele.   
\s1 La valalua me hatavivile tomi ale pehoti, egite ge mahuli rivu lou  
\p
\v 12 La valolo tamiteu la bilalaha te Kraist, eia maie: e Kraist peho, La Tahalo Uru vimahuli rivu loua taro la pileho. La merera tomi alele amuto rovitia, tio eau veia ge tahi lou amutou, ilava sesele isahari tamutou veia egiteu ale pehoti kamati ge mahuli rivu lou?  
\v 13 Mai etato kama koramulia ge mahuli lou, e Kraist tai kama ge mahuli taro la pileho.  
\v 14 Mai eia ge sesele veia e Kraist kama mahuli taro lou la pileho, amite soioge valolo bububu amutou, me amuto tautaulailo bulalahu te la merera tamiteu ele.  
\v 15 Mai ge mai ele, amiteu la bilalaha, amite mai la tahalo la visigologolola sesele, la vuhula amite valoloti amutou veia La Tahalo Uru vimahuli rivu lou e Kraist taro la pileho. Mai ge la merera tamutou isahari ele ge sesele veia egiteu ale pehoti, egite kati ge mahuli rivu lou, tio amite la bilalaha soioge visigolo seseleti amutou.  
\v 16 La vuhula mai egiteu ale pehoti kamati ge mahuli rivu lou, tio e Kraist tai kama ge mahuli rivu lou.  
\v 17 Mai e Kraist so tabulibuli te la pileho, la tautaulailo tamutou soio tetala eia la golu bulalahu. Amuto mai ale so pou moli te la maligoma, la vuhula la iruru tamutou soloio, e Kraist kama abi taroa, la vuhula amuto veia la mahuli rivula ouka, mai ele e Kraist tai soioge kama mahuli rivu.  
\v 18 Mai eia ge sesele veia egite ale pehoti kati ge mahuli lou, tio egiteu tai ale te Kraist, egite pehoti, egite mai ale peho moli te la maligoma.  
\v 19 Mai la vimahuli te Kraist eia suli moli etatou te la mahulila moli te la vovo, ale la mahuli rivula ouka, tiele etatou la tahalo me la tavile la tautaulailo, etato galo seseleti, la vuhula etato mai ale sau tola la merera bulalahu moli ale mata mai la vimari te la vovo moli.   
\p
\v 20 Eala moli eia sesele viruru veia La Tahalo Uru eia vimahuli seseleti e Kraist taro la pileho, eia vimugati ele, egiteu ale peho ge mulimuli.  
\v 21 Oio te la vareagila te la tahalo isa sekela, e Adam, etato tomi la tahalo la vovo ge ligi te la pileho. Eala moli oio te la tahalo isa sekela tai, e Iesus, la mahulila ale sesele eia sibitala tegatou veia etato ge mahuli taro la pileho.  
\v 22 Mai e Adam, eia visibitala la iruru, me oio vola etato tomi pogati la kilolila mai la pileho. La vuhula etatou tomi la tahalo la vovo mai tai e Adam. Eala moli e Kraist, eia peho robo etatou veia ge vimahuli tomi etatou, mai etato ge tetalati.  
\v 23 Eala moli la vimari tomi alele, la imamala oio vola La Tahalo Uru tabari tatahotia. Pala muga e Kraist mahuli rivu lou. Goio, mai mulimuli eia ge beu rivu loua somai te la maututula, tio etato ale tetala ge mahuli rivu lou mai tai eia.  
\v 24 Eia ge vimahuli kaluvuti etatou mai ele, tio la tapasi la maututula ge sibitala, e Kraist ge sulu sasapa egiteu la gima tomi ale vagari, mai egiteu la valalua me egiteu la angelo tomi tai ale te Satan. Eia ge sugu taro rivuale Tamala la viputumulila tetala ale eia sau tola la maututula ovola, mai la pulolou la matagagala te La Tahalo Uru omai te la magasa.  
\v 25 La vuhula, la imamala ale igoie kara mulimuli la tapasi la maututula, ale la viputumulila te Kraist, eia ge mamuga ovola kara ale eia ge bolehoho egiteu la gima tomi te Tamala.  
\v 26 Me la tapasi la gima ale eia ge bolehohoa, eia ge la pileho moli ale kisi tola etatou, e Kraist ge vikaluvua.  
\v 27 La vuhula La Tahalo Uru veitia veia e Kraist ge soa kuru egiteu la gima tomi veia eia ge sau tola la viputumulila tomi omai te la maututula. Eala moli eia matagagati veia e Kraist kama ge mamuga te Tamala, la vuhula La Tahalo Uru moli pigi la papaga tomi sotalo te la vahale Kraist ele.  
\v 28 Goio, e Kraist ge sau tola la viputumulila tomi mai ele, e Tamala ge abiala la vagagarila tetala, eia ge vagoilo e Latula te la uluvala veia oio moli ovola La Tahalo Uru ge sau tola la maututula me la magasa me la viputumulila tomi moli kaluvu.   
\p
\v 29 Mai eia ge sesele veia egiteu ale pehoti, egite kati ge mahuli rivu lou, ilava tai egiteu la valalua isahari abi la vuluhi te la isa giteu e tabarabara giteu ale pehoti? Egite veia ge vimahuli egiteu mai ele. Ilava tai egite ge vavala mai ele, mai la mahuli rivula ge ouka?   
\p
\v 30 Tio, eau veia ge tahi amutou tai te la igogolu tamiteu la bilalaha. Mai eau ge valolo, eia kama vagari veia egiteu la valalua la gima ge bili taroau, eala moli eau kama taga. Eala moli mai la mahuli rivula ge ouka, tio eau ge taga pepeho egiteu la gima te Kraist ele.  
\v 31 Amuto tabarabaragu, te la igogolu la valolo te Kraist, eau hagagavi ge peho te la haroharo tomi. Eau kama koramulia ge visigolo amutou e latatugu te la isale Kraist Iesus, La Uru gatou. Eia sesele viruru, eau poga tavu la pileho te la haroharo tomi.  
\v 32 Oio Epesas egiteu la valalua la gima vilagilagi leau mai la paia hou ale ge barautu momomo la vovogu. Ilava sesele eau ge gabu la iligi tegiteu ale kama kokora mai ele, mai la valolo taku eia ge la paga te la vovo moli? Mai la mahuli rivula ge ouka, eia koramuli seselea veia etato ge mulimuli la merera tegiteu ale vei mago “Taritigi etato ge ali maru, ge liu tai, la vuhula galigeli etato ge poga tavu la pileho.”  
\v 33 Amuto soukama ge tilo te la merera tegiteu ale vikara mai ele. Taritigi amuto ge gabutatala tai la merera isa lou ale la valalua isahari veveia maie “Mai eme ge vikilipi egiteu la tahalo ale kama kokora, egite ge virurume.”  
\v 34 Taritigi amuto ge gabutatala tigi lou, umalati amuto ge igo la iruru. Amuto isahari ele kama rovi bakisi La Tahalo Uru. Eau ubiti le amutou la mererale veia amuto ge mahela ovola, amuto ge gabua.   
\s1 La vovo gatou te la mahuli rivula ge isapolo  
\p
\v 35 Isahari tamutou soioge ge hiliti veia ge tahiau maie “Egiteu ale pehoti ge mahuli lou mave? La vovo giteu ge mai la rova?”  
\v 36 Eala moli amuto tahi paua moli. La kilolila, eau ge tovoa soio te la vavua la obu ale etato galua. La paga ale etato galua, eia ge peho muga, eia ge parara, mulimuli eia goio vali pola, eia goio kusi lou. Mai ge ouka, eia kama ge mahuli lou.  
\v 37 La paga ale etato galua, eia soukama mata mai la obu ale ge kusi. Ale eme galua, la vavuala moli.  
\v 38 Eme galua, eia goio kusi, tio La Tahalo Uru abiala la tokoromola mai te la masasagala tetala sesele, mai la tabarila tetala soio tegiteu la maratatila la obobu tomi.   
\p
\v 39 Mai la vovo giteu la maratatila la kalia tomi tai, eia isapolopolo. La tahalo, la vovola isa, la bolo la vovola isapolo, la malu tai isapolo tegirua, me la vovo giteu la ia isapolo tegiteu tomi.   
\p
\v 40 Mai egiteu la matatabu ale kusi oata te la ilo la lage, egite kama mai la paga ale omai te la magasa. La matagaga giteu isa, me la tokoromola te la paga omai te la magasa, eia isapolo.  
\v 41 La haro, eia la tokoromola isa, la taio isapolo, egiteu la matatabu isapolo tegirua lou. Me egiteu la matatabu tai ele, egite isapolopolo, la matagaga giteu kama visauru.   
\p
\v 42 Tio, te la mahuli rivula eia ge mai moli ele. La vovo gatou ale egite ulaia, eia ge parara mai la vavua la obu ale tabuli otalo la magasa. Eala moli mai eia ge mahuli rivu lou, eia kati ge rovi la pileho.  
\v 43 Egite ulai la vovo gatou, etato kama rava, etato kama vagari. Eala moli mai etato ge mahuli rivu lou, la vovo gatou eia ge marasa, eia ge vagari.  
\v 44 Ale egiteu mai ale galua, eia la vovo gatou te la magasa moli. Ale La Tahalo Uru ge vimahuli rivu etatou, la vovo gatou ge isapolo, eia ge koramuli sesele la mahulila tegatou te la kalulu.  
\p Mai etato tahola seseleti la vovo gatou te la pulolou omai te la magasa, tio eia matagaga tai mai ele veia etato ge tahola tai la vovo gatou ale isapolo, eia ge koramuli la pulolou tegatou ale ge mulimuli, te la mahulila te la kalulu.  
\v 45 Mai La Buk Tabu Ale Pala eia veia maie “E Adam, eia la muluga la tahalo la vovo, La Tahalo Uru eia vimahulia.” Eala moli e Kraist, eia la kalulu, eia vimahuli etatou.  
\v 46 Tio eia matagaga mai ele veia la mahulila te la kalulu eia kama vimuga, ouka. La mahulila te la tahalo la vovo vimuga, mulimuli la tahalo la vimahuli te la kalulu sibitala, mai e Kraist.  
\v 47 Ale guvi pala muga, La Tahalo Uru puila la magasa moli. Ale mulimuli tetala, eia loata te la ilo la lage, eia la kalulu sesele.  
\v 48 Mai egiteu ale te la vovo moli, egite mai sesele e Adam, la vovo giteu ge vulo mai la magasa lou. Eala moli egiteu ale La Tahalo Uru puliti egiteu, egite mai sesele e Kraist ale loata tetala, egite ge mahuli moli te la kalulu, egite kama ge tabuli te la pileho.  
\v 49 Etato igoie taholati la vovo gatou mai la vovole Adam, eala moli mulimuli etato ge tahola la vovo gatou mai sesele la vovole Kraist.   
\p
\v 50 Amuto tabarabaragu, eau vei seselea mutou, la vovo gatou te la mahulila ale igoie, eia kama koramuli la pulolou la matagagala te La Tahalo Uru. La paga ale ge parara, eia kama koramulia ge sau tola la mahulila ale la kaluvula ge ouka.   
\p
\v 51 Loloa, eau ge lubea mutou la merera ale tikumu, eia taritigi pepeho, eia isapolo sesele. La mererale, eia maie: Isahari tegatou kama ge poga la pileho, eala moli La Uru eia ge beu mugea, eia ge vulo etatou, la vovo gatou ge isapolo koramuli la pulolou la marokala oio tetala.  
\v 52 Eia ge vikarutu molia, mai la sima. La vaivai ale ge veipala la guluvi te Kraist, eia ge tali, egiteu te Kraist ale pehoti ge hiliti taro la lulu, la vovo giteu ge isapolo, etatou tomi ale tetala ge vulo sapolotio.  
\v 53 Mai ele, la vovo gatou ale kama vagari, eia ge kaluvu, La Tahalo Uru ge kolila la vovo gatou ale te la pulolou te la kalulu, eia ge koramuli la mahulila ale sesele, la kaluvula ge ouka.  
\v 54 Tio ale la vovo te la pileho ge vulo mai la vovo ale kama ge peho, oio vola la merera te La Buk Tabu Ale Pala eia ge puru tomi ale eia veia maie:  
\li1 La Tahalo Uru, eia bolehohoti la pileho,  
\li1 eia vikaluvuti la vagagarila.   
\li1
\v 55 La pileho, eia kama ge bolehoho etatou,  
\li1 etato kama ge ligi sesele ovola.   
\p
\v 56 Tio eia matagaga veia la iligiligi te la pileho, eia la iloto la iruru tegatou. Me eia vagari mai ele, la vuhula La Tahalo Uru eia veitia veia la tahalo la iruru eia ge peho.  
\v 57 Eala moli e Iesus Kraist, La Uru gatou, eia peho robo etatou, eia bolehoho la vagagari la iruru ale kisi tola etatou. Taritigi pepeho soata te La Tahalo Uru!   
\p
\v 58 Tio, eau karasuku amutou e tabarabaragu veia amuto ge magiri vagari, amuto ge sau tola sesele la merera te Kraist. Magiri vagari te la igogolu te La Uru, umala mailaila. La vuhula amuto rovitia veia la igogolu tetala, eia la igogolu ale sesele, la igogolu tetala, eia kama la igogolu bulalahu.   
\c 16  
\s1 La tilau vikapopo la uati ale ge suli la lotu oio e Ierusalem  
\p
\v 1 Eau veia ge vikara matagaga soio tamutou te la tilau vikapopo la uati ale ge suli la valalua me hatavivile te La Tahalo Uru oio la gale e Iudea, egite pou la savelela. Amuto ge igo molia mai eau veitia giteu la lotu tomi oio la gale e Galesia veia egite ge igoa.  
\v 2 Te la haro tabu tomi, amuto ge tau raragi la galevi la uati bakisi tamutou isasasa, mai isa pogati la uati uru, eia ge tau raragi la uati ale uru, mai ge ouka, eia ge tau raragi la uati ilua moli. Amuto ge tau raragia mai ele, mai eau ge guvi, amuto kamati ge marapa te la tilau vikapopo la uati.  
\v 3 Ale eau ge gomai tamutou, eau ge kekesi bakisi la vikara matagagala, ge abia giteu la bilalaha ale amuto hiloviti egiteu, eau ge baha egiteu soio e Ierusalem, egite ge vahari tomi la uati tamutou.  
\v 4 Mai la igogolu taku tai bakisi ge oio e Ierusalem koramuli eau tai ge goio vola, egite soioge ge tilimuliau soio e Ierusalem ele.   
\s1 E Pol masagea veia ge hari lalai egiteu e Korin  
\p
\v 5 Eau ge goio muga e Masedonia, mulimuli eau ge goio tamutou ele.  
\v 6 Eau soioge ge pou tabaa bakisi tamutou, kara la leavala ge kaluvu, te la mahati eau ge hiliti taro lou amutou, amuto ge tataro tigiau soio te la tuluga taku lou soio te la gale isahari.  
\v 7 Eau kama masaga ge pariri, ge gomai hari tamutou veia ge pou golo moli, ge tuga lou. Eau veia ge igo seselea mai ale eau veitia, ge pou tabaa sesele, mai La Uru ge masagea.  
\v 8 Eala moli eau veia ge pou tabaa muga omai Epesas, kara te la haro La Pentikos,  
\v 9 la vuhula la gauru omai kopeti ale eau ge vauru la igogolu te Kraist. La igogolu uru omai, egiteu tai ale vigima soio te la igogolu te Kraist, egite tai usu. Eala eau veia ge pou muga omai Epesas ge igogolu vagari muga lou omai.   
\p
\v 10 Mai e Timoti ge hari lalai amutou, amuto ge baumuli tigia, la vuhula eia tai la bilalaha te La Uru mai eau.  
\v 11 Isa umala ge vile e maura. Amuto ge suli tatahoa, amuto ge baha taro tataho taia, veia eia ge gomai rivu lou taku, la vuhula eau pou tali e Timoti miteu me tabarabara gatou te la igogolu te Kraist isahari lou ele, veia egite ge beu loua somai taku.   
\p
\v 12 Tio, la merera isa lou, eia te tabara gatou e Apolos. Eau tutu tola vagariale Apolos ele veia eia ge vikapopo legiteu e tabarabarala te Kraist ale gomai tamutou, eala moli eia kama masaga. Mai eia ge raragi tigi veia ge tuga, eia tai ge gomai tamutou.   
\s1 La tapasi la vikararala  
\p
\v 13 Taritigi amuto ge mata rara, amuto ge magiri vagari te la tautaulailo tamutou soio te Kraist. Amuto ge vagari moli, amuto umala ge taga.  
\v 14 Me amuto ge vipuhi tigi tataho te la isale Kraist, la vulovulo la gilogo ge volu oio tamutou ele.   
\p
\v 15 Amuto rovia veia e Stepanas megiteu la karakara tetala, pala muga te la valalua tomi oio la gale e Akaia, egiteu ele vulo halaba soio te Kraist. Egite suli pepeho la valalua me hatavivile te La Tahalo Uru, egite kama gabutatala isa lou la paga. Eala, eau tutu tola vagaria mutou e tabarabaragu ele,  
\v 16 veia amuto ge roromuli la valalua ale taritigi mai egiteu ele, me egiteu tomi ale visuli baoli legiteu te la igogolu te Kraist.  
\v 17 Ale e Stepanas, e Portunatas me Akaikas gomai hari lalaiau, eau sagege pepeho, la vuhula amuto e Korin kama koramulia ge gomai, eala moli egite taho tolu gilemulitiagu la pulolou tamutou veia la mahulila tamutou eia taritigi moli.  
\v 18 Egite vimata kaseka lou eau, me egite ge beu loua soio tamutou, egite soioge ge vimata kaseka tai amutou. Taritigi etato ge matagaga veia egiteu la tahalo sesele te Kraist, etato ge togo egite.   
\p
\v 19 Egiteu la valalua me hatavivile te la lotu tomi te la gale Esia, egite toi la haro sesele soio tamutou ele. e Kuila mira me Prisila tai, egira veia mutou la haro sesele te la isa La Uru gatou, me egiteu la valalua me hatavivile tomi tai ale lotu vikapopo oio la luma tegirua.  
\v 20 Egiteu tomi e tabarabara mutou te Kraist ale omai Epesas, egite tai toi la haro sesele soio tamutou e Korin. Taritigi amuto ge vilapu lima te la isale Kraist mai la vulovulo gatou ale tetala.   
\p
\v 21 Eau, e Pol, eau kekesi la merera alele me la limagu sesele.   
\p
\v 22 Mai isa kama ge rovi sesele La Uru veia ge pou la tilogo me la gilogo soio tetala, eia ge vilua! La Uru e Iesus, taritigi eme ge gomai hari!   
\p
\v 23 Taritigi la gilogo te La Uru gatou e Iesus, eia ge pou tamutou tomi.  
\v 24 Te la isale Kraist Iesus, eau e Pol tai baha la merera la gilogo taku somai tamutou. Eala moli ele.  
\cls Eau e Pol.