\id PHP - Nambikuára NT [nab] (Brazil) -2011 bd 
\h Filipẽnses 
\toc1 Filipẽnses 
\toc2 Filipẽnses 
\toc3 Fp 
\mt1 Filipẽnses 
\c 1  
\p  
\v 1 Pau²lah³lo²na¹xai²na² Ti³mo²jah³la² nxe³sxã³ Je³su² Kris²tu³jah¹lai²na² a²sa³wi³ha³lxi³su² sĩ¹na¹wa². Je³su² Kris²tu³jah¹la² ã³nũ²nxi²sxã³ ai³sĩ¹na¹ha²kxai³ Je³su²jah³lai²na² wãn³txa² a²wa³ka³li³lot3sĩ¹na¹wa². Nxe³sĩ¹na¹ha²kxai³ txai²li² Pau²lah³lo²na¹xai²na² wãn³txa² ũ³wha²li¹lhxã³ ũ³hũ²xai³nx2ti³sĩ¹na¹wa². Fi³li³po²thĩ³na² yxau²xai³yah³lxin¹te² ĩ³nxa², Txa²wã¹sũ̱³na² wãn³txa² sa²yxo²we¹tũ̱³ka̱³txi³su² te² ĩ³nxa² Je³su² Kris²tu³jah¹la² ã³nũ²nxi²sxã³ yxau³yah³lxin¹te² ĩ³nxa² nxe³yah³lxin¹te² ĩ³nxa² ain³kxi¹sah¹lxi³hẽ¹la². Je³su²jah³lai²na² wãn³txa² yxo²ĩ²tũ̱³ka̱³txa² a²hxi²kan¹te²nãu³xa² ain³kxi² yxo²ĩ²tũ̱³ka̱³txa² ĩ²ũ³te²nãu³xa² ain³kxi² nxe³sah¹lxi³hẽ¹la². 
\p  
\v 2 Nxe³nha¹ha²kxai³ Txa²wã¹wĩ³na² Txa²wã¹sũ̱³na² Si³yxau³jah¹lai²na² sa²kxai³lu² Je³su² Kris²tu³jah¹la² Txa²wã¹hxi²kan¹jah¹lai²na² nxe³ya³sxã³ kãin² thãi³ti³la² a³lxi¹nx2ti³si¹hi² wxa²nxũ²kwa̱i³nãu³a² ã³nhãu²no³txa²lxi³si¹hi² nxe³nx2ti³si¹jau³su² ten³ya³sa³nha²wa². 
\s1 Pau²lah³lai²li² Txa²wã¹sũ̱³na² ĩ³ye³kxi²jau³su² 
\p  
\v 3 Wxa²nũ̱³ka̱³txi³ ĩ³nxai²na² ĩ²xi¹nx2ti³to³ha¹kxai²nãn²tu̱³ hãi¹nxe³to³ta¹ Txa²wã¹sũ̱³na² sa²nẽn¹kxi²to³ha¹wa².  
\v 4 Txa²wã¹sũ̱³na² e³kxi²na¹tãu³a² wxa²nũ̱³ka̱³txi³ ĩ³nxai²na² hãi¹nxe³ti³ ĩ³nxai²na² e³kxi²to³ha¹wa². Txa²wã¹sũ̱³na² e³kxi²na¹tãu³a² ka³lih³kxi²la²nha²sxã³ e²kxi³to³ha¹wa².  
\v 5 A²wi¹lhĩ¹nai³tã² kwẽn¹ta² wxã³sxã³ ĩ³hen³txi³nx2ta¹hĩ¹nai³tã² Txa²wã¹sũ̱³na² wãn³txa² wi¹jau³xa² ĩ³hen³txi³nx2ta¹hĩ¹nai³tã² ã³non²ta³kxi²sah¹lxin¹tai¹ti²tu³wa². Nxe³hĩ¹nãn¹te²tu̱³ te²yã¹nxe³sah³lxi¹nhẽ¹la². A²nxe³ju³tai²li² ka²li¹sah¹lxin¹nha²wa².  
\v 6 Jã¹nxe³sxã³ Txa²wã¹sũ̱³na² hi²sen³su² wxa²ẽ¹na² sa²hau³ko³tũ¹nhẽ³jah¹lai²la¹wa². Te²yã¹nxe³sxã³ ã³non²ta³kxi²xai³sxã³ sa²hau³ko³ta³lun²nxa²lxi³tu¹wa². Je³su² Kris²tu³jah¹la² a³ka³nxi²sxã³ wa̱³li²tãu³a¹ sa²hau³ko³ta³lun²nxa²lxi³tu¹wa². Ju¹tai²li² ya²la³lai²la¹wa². Ĩ²te²sa¹wa².  
\v 7 Txa²ẽ¹nãu³ai²na² ĩ²xi¹nx2ti³to³ha¹wa². Kxã³nhxĩ¹nai³tã³ yãn³ta² tĩ¹kxi¹sai¹nxa³hĩ¹nai³tã² wa²su¹wa²su¹yxau³na¹hĩ¹nai³tã² ã³non²ta³kxi²sah¹lxi¹nha²kxai³, hã²wxãn³txa³ sxi²ha² kan²thĩ³na² ũ³tĩ̱¹kxi²sai¹nha²kxai³ yxau²xai³la¹hĩ¹nai³tã² ã³non²ta³kxi²sah¹lxi¹nha²kxai³, sah¹lxin¹tai¹ti²tu³wa². Txa²wã¹sũ̱³na² wãn³txa² wi¹jau³xa² ya²la³lyau³xa² wxi²kan¹txi³ ĩ³tih³nxe³ai¹na¹hĩ¹nai³tã² ã³non²ta³kxi²sah¹lxi¹nha²kxai³ a²nũ²a² yxo²ĩ²ai¹nxa³te²na² Je³su²jah³lai²na² wãn³txa² yxo²ĩ²ain¹si¹ha¹jau³su² ĩ³ye³kxai¹na¹hĩ¹nai³tã² ã³non²ta³kxi²sah¹lxi¹nha²kxai³ nxe³sah¹lxi¹nhẽ¹la². Jã¹nxe³sah³lxi¹lxa². Nxe³sah¹lxi¹nha²kxai³ a³lxi²nx2ta¹ju³ta² wain³na³la².  
\v 8 Je³su² Kris²tu³jah¹la² a³lxi²sa²na³la². Txa²ẽ¹nãu³ai²na² whãi²na¹ a̱u³txi³ a³lxi²sa²tẽ³sa²na³la². A³lxi²sa²kxa² yã¹nxe² a³lxi¹nx2ta¹wa². Ya²la³tu̱³ a³lxi²khaix1nxe³nx2ta¹wa². Txa²wã¹sũ̱³na² yen³nãu³a² e³kxi¹nx2ta¹wa². 
\p  
\v 9 Nxe³sxã³ Txa²wã¹sũ̱³na² e³kxi²na¹tãu³a² nxe² e³kxi²na¹te³nah¹lxi¹: 
\p — Sũ̱³na² nxe³txi¹. Fi³li³po²thĩ³na² yxo²ĩ²nxain¹tũ̱³ka̱³txa² a³lxi²nxain¹na³li¹. Nxe³ju³ta² ã²la² kãi²non³sxã³ kãi³ũh¹txai¹nhẽ³li¹. Nxe³ai¹nĩn¹ka³tu̱³ wxa²wãn³txa² ã³ne³wxe³nũh¹nxain¹ju³ta² ã²la² kãi²no³nha²kxai³ wxa²wãn³txa² a²si³yxau³jau³xa² wxi²kan¹txi³ a³la³kxi²nũ¹nha²kxai³ nxe³nxa²si¹hai¹na¹jau³su² e³kxi¹nxa²ha¹wi¹. Nxa¹jau³su² Txa²wã¹sũ̱³na² e³kxi²to³ha¹wa².  
\v 10 Jã¹nxe³sxã³ Fi³li³po²thĩ³na² yxau²xai³yah³lxin¹te² ĩ³nxai²na² nxe³yah³lxin¹kxai²nãn²tu̱³ ha³lo²a² ã²la² wi¹ju³ta² ĩ²sxã³ sa²so¹yah³lxin¹tu¹wa². Hã²wxãn³txa³ Kris²tu³jah¹la² a³ka³nxi²sxã³ wa̱³li²tãu³a¹ ko̱³nxe³ti³ kãi³yah³lxin¹ju³ta² yũ³nx2ti³xa³ha²kxai³ ha³lo²a² ĩ³ãu²lxin¹nx2ti³ju³ta² yũ³nx2ti³xa³ha²kxai³ nxe³nx2ti³tu¹wa².  
\v 11 Nxe³nx2ti³kxai²nãn²tu̱³ Je³su² Kris²tu³jah¹la² hi²sen³kxai³lu² wxa²ẽ¹nãu³ai²na² sa²kxai³lu² yen³kxa² wi¹te²a² ã²la² kãi²non³sxã³ ũ³hũ¹nx2ti³tu¹wa². Nxe³nx2ti³kxai²nãn²tu̱³ Txa²wã¹sũ̱³na² sa²nẽn¹kxi²yah³lxin¹tu¹wa². 
\s1 Kris²tu³jah¹la² sa²yxo²we¹ki̱³jau³su² 
\p  
\v 12 Txa²wã³tã̱³nãu³xãi³. Wãn³txa² ĩ³yau¹ũ¹nx2ta¹tu¹wa². Txa²wã¹sũ̱³na² wãn³txa² wi¹jau³xa² ã²la² kãi²non³sxã³ ha³ta̱³nxe³na³la². Khãuh³lxa³tot3sain¹kxan²ti³ wãn³txai²li² wi¹la³ ha³ta̱³nxe³nha³la².  
\v 13 So³ta²to² nũ̱³ka̱³txa² ĩ²yxau³nũ¹sain¹tũ̱³ka̱³txa² a³la³kxi²nũh¹sain¹na³la². Kris²tu³jah¹lai²na² wãn³txa² sa²yxo²we¹ta¹ha²kxai³ kxã³kxai³ ũ³tĩ¹kxi²sain¹ju³ta² a³la³kxi²nũh¹sain¹na³la². Nxe³sain¹kxe³su² a²nũ²a² a²yxo²ha³kxa¹ ĩ²sain¹na³la².  
\v 14 Nxe³ha²kxai³ yxo²ĩ²tũ̱³ka̱³txa² ĩ²sai¹nha²kxai³ tĩ¹kxi²nha²sxã³ yxau³na¹ju³ta²kxai³ ĩ²sai¹nha²kxai³ Txa²wã¹sũ̱³nu²su² te²kxai³lu² ĩ³nxũ²kwa̱i³lxũ¹nyhain¹na²hẽ³la². Ĩ³nxũ²kwa̱i³lxũ¹sxã³ Txa²wã¹sũ̱³na² wãn³txa² wi¹jau³xa² kãin² ĩ³hen³txain¹na²hẽ³la². Hai³txi³ ko̱n³ton³tai¹nxa³hẽ³la².  
\v 15 Ha³tih³xan¹tũ̱³ka̱³txai²na² ĩ²sai¹nha²kxai³ a²ẽ¹nãn¹jau³kxai³lu¹: 
\p — Txa²wã¹sũ̱³na² wãn³txa² ĩ³yau¹ũ³ai¹na¹tũ¹xã¹. Wxi²kan¹khai¹nxe³sxã³ Pau²lah³la² ã³sen³sai¹a¹tũ¹xã¹. Ain¹jau³su² nxe³nyhai¹nhxai²na²hẽ³la². Nxe³kxa²yu³su² ĩ³ye³ĩ³yi²yi²lhon¹ta³kxi²nyhai¹nhxai²na²hẽ³la². Nxe³nyhain¹kxan²ti³ Txa²wã¹sũ̱³na² wãn³txa² ĩ³hen³txain¹na³la². Nxe³yãn¹ta¹ nũ̱³ka̱³txi³ ã̱³xai²na² sa²kxai³lu² a²ẽ¹nãn¹jau³kxai³lu¹: 
\p — Txa²wã¹sũ̱³na² ĩ³ka³lit3ju³ta² so¹lxi³ kãi³a¹tũ¹xã¹. Ain¹jau³su² nxe² Sũ̱³na² wãn³txa² wi¹lhin¹sxã³ ĩ³hen³txain¹na³la².  
\v 16 A²nxe³tũ̱³ka̱³txai²li² a³lxi²sai¹nha²kxai³ nxe² kãi³ũ¹hain¹na³la². Txa²wã¹sũ̱³na² ĩ³kaix1so¹sa²ju³tai³tã² ĩ²sain¹na³la². Ĩ²sxã³ ĩ³kaix1so¹sa³ha²kxai³ sxi²ha² kan²thĩ³na² ũ³tĩ̱¹kxi²sxã³ wxe³sain¹kxan²ti³ Txa²wã¹sũ̱³na² wãn³txa² wi¹jau³xa² ya²la³lyau³sa²kxe³su² wxi²kan¹txi³ ĩ³tih³nxe³na¹ju³ta² a²yxo²ha³kxa¹ Txa²wã¹sũ̱³na² kwa³na³si¹sa²jau³su² ĩ²sain¹na³la².  
\v 17 Nũ̱³ka̱³txi³ ã̱³nũ̱³ka̱³txin³na² e³kxi¹nx2ta¹tũ̱³ka̱³txin³na² hi²sen³su² Je³su²jah³lai²na² wãn³txa² ko̱³txi³ ĩ³hen³txain¹na³la², ã³sen³sai¹ain¹te³lha³ka². Nxe² kãi³ain¹kxe³su¹: 
\p — Pau²lah³lai²li² tĩ¹kxa² wxe³ain¹tãu³a² khãuhx3nha²ju³ta² kãi²not3ti³hi¹ta¹tũ¹xã¹. A²nũ²a²nãu³xa² txa²wãn³txa² so¹lxi³ ain³kxi²sain¹sĩn¹kxai²nãn²tu̱³ Pau²lah³la²kxai³ ĩ³ãin²ta³kxain¹tũ¹xã¹. A²ẽ¹nãn¹jau³la² ain¹na³la². 
\p  
\v 18 Nxe³sain¹kxan²ti³ ĩ³ãin²ta³kxi²nhã²nxa³wa². Je³su²jah³lai²na² wãn³txa² ã²la² kãi²non³sxã³ ha³ta̱³nxe³ju³ta² ten³sa³nha²wa². Ko̱³te³ain¹ta̱³nxa² wain³txi³ e³ain¹ta̱³nxa² nxe³kxan²ti³ Je³su²jah³lai²na² wãn³txa² ha³ta̱³nxe³na³la². Ju³tai²li² ka³li³sa³nha²wa². Ka³li³sxã³ yxau²xai³la¹tu¹wa².  
\v 19 Jã¹nxe³na¹ju³ta² kan²txi³ tĩ̱¹kxi²sain¹ju³tai²li² ye³jen¹na² ã³wa²su¹kxi²sa³tu¹wa². Wxa²nũ̱³ka̱³txai²na² sa²kxai³lu² Txa²wã¹sũ̱³na² kãin² ĩ³ye³kxi²yxo²nũh¹sah³lxi¹nha²kxai³ Je³su² Kris²tu³jah¹la² A²yãu³ka³jxah¹la² ã³non²ta³kxi²sa³ha²kxai³ nxe³sa²kxe³su² ã³wa²su¹kxi²sxã³ yxau³na¹tu¹wa². Tĩ̱¹kxi²sain¹thĩ³na² a³li³a¹tu¹wa².  
\v 20 Txa²ẽ¹na² a̱u³txi³ ten³sa²kxe³su², Je³su² Kris²tu³jah¹la² ĩ³sa²nẽn¹kxi²ti³ten³sa³nha²wa². Ka³te̱n³su² yxau³na¹jut3su² ta̱³nxa² ya³lu²na¹jut3su² ta̱³nxa² nxe³na¹kxan²ti³ txa²nũ²nãu³xai²na² whãi²na¹ ĩ³ya³lo³txi³khaix1nxe³sxã³ Je³su² Kris²tu³jah¹la² ĩ³sa²nẽn¹kxi²ti³ten³sa³nha²wa². Ĩ³nxũ²kwa̱i³lxũ¹txi³hxai²na¹kxai³ jã¹nxa¹ju³ta² ten³sa³nha²wa². Hxi²tha²on³sxã³ ã³na¹nxa³lho³la². Ju¹ta² ten³sa³nha²wa².  
\v 21 Nxe³sxã³ txai²na² sa²kxai³lu² hin¹sxã³ yxau³na¹tãu³a² Kris²tu³jah¹la² sa²yxo²we¹ta¹ju³ta² so¹lxi³ ten³sa³nha²wa². Yxãn¹ta¹ ya³lu²na¹kxai²nãn²tu̱³ ã²la² wi¹la³ yxau³hĩ̱³na¹wa².  
\v 22 Nxe³yãn¹ta¹ ka³te̱n³su² hin¹sxã³ yxau³na¹kxai²nãn²tu̱³ wi¹kãi³a¹ju³ta³nũ³a² yũ³tu¹wa². Nxe³na¹ha²kxai³ ĩh¹nxe³nah¹lxon³ku². Ka³te̱n³su² yxau³na¹ta̱³nxa² ya³lu²na¹ta̱³nxa² nxe³hĩ̱³na¹te²la¹ku². Nxa¹nha²wa².  
\v 23 Ju³tha¹li¹ ĩ²sxã³ sa²so¹na¹ju³ta² yũ²na³la². Txa²hi¹nxai³la¹ju³ta² ã³na¹sxã³ Kris²tu³jah¹la² yxau³ju³ta² ã³wi¹hũ³ha¹ju³ta² ten³khaix1sa³nha²wa². Wi¹kãi²no³nhĩ̱³nx2na³la².  
\v 24 Nxe³yãn¹ta¹ ã³non²ta³kxi¹nx2ta¹ju³ta³nũ³a² yuh³xai²nãn¹ko³xai²na² ãh¹ hi¹nxai³la¹tu¹wa².  
\v 25 Nxe³na¹ju³ta² a³la³kxi²na¹jau³su² ãh¹yxau³ya³nx2ta¹tu¹wa². Yxau³ya³nx2ta¹kxe³su² kãi²non³ yxo²ĩ²si¹nx2ta¹jau³su² ha²kxai³ wxa²ẽ¹nãu³ai²na² a̱u³txi³ kãi²non³ ka³lih³si¹nx2ta¹jau³su² ha²kxai³ yxau³ya³nx2ta¹tu¹wa².  
\v 26 Nxe³sxã³ wa̱³li²sxã³ ĩ²xi¹nx2ta¹kxai²nãn²tu̱³ yuh³xai²nãn¹ko³xai²na² Je³su² Kris²tu³jah¹la² ã³nũ²kxi²sxã³ yxau³yah³lxi¹nha²kxai³ kãin² ka³lih³yah³lxin¹tu¹wa². Sxi²ha² kan²thĩ³na² a³li³sxã³ ĩ³xi²na¹ju³ta³nũ³a² ĩ²sah¹lxi¹nha²kxai³ ka³lih³nxa²lxi³tu¹wa².  
\v 27 Nxa²ha¹te¹ Kris²tu³jah¹lai²na² wãn³txai²na² wain³txi³ sa²yxo²wet1sxã³ kãi³jah¹lxi³hẽ¹la². Yxah³lxin¹kxai²nãn²tu̱³ wxã³sĩ²nx3ti³ta̱³nxa² wxã³sĩ²nx2ti³nxa³ta̱³nxa² nxa¹kxan²ti³ wxa²ha³ta̱³nxa² ain³kxi¹nx2ta¹tu¹wa². óten³nxa²lxi³ju³ta³nũ³a² a²nũ²a² ka³na³ka³na³te²hũ̱³nxe² ain³kxi²nha² hin¹yah³lxin¹ju³ta³nũ³a² ain³kxi¹nx2ta¹tu¹wa². Nxe³yah³lxin¹ju³tan¹te²kxa³ya̱³lhu² wain³txi³ ã³non²ta³kxi²nyhu¹sxã³ o²la³kxi², Je³su² Kris²tu³jah¹lai²na² wãn³txa² yxo²ĩ²yah³lxin¹jau³xa² a²nũ²a² yxo²ha³kxa¹ ĩ³yau¹ũ³nyhu¹i² nxe³yah³lxin¹ju³ta³nũ³a² ain³kxi¹nx2ta¹tu¹wa².  
\v 28 Wxa²ko̱¹ko̱¹nũ̱³ka̱³txa² Sũ̱³na² wãn³txa² yxo²ĩ²xa³tũ̱³ka̱³txa² yu̱h³lxah³lxi³txa³hẽ¹la². Yu̱h³lxah²lxan³kxai²nãn²tu̱³ tũ̱¹ka̱³txai²li² Sũ̱³na² wãn³txai²na² sa²yxo²ã³ain¹kxe³su² ko̱³nxe³ti³ kãi³nha²ju³ta³nũ³a² ĩ³yĩ¹li²jau³nũ³a² so¹lxi³ e³lxah¹ a³la³kxain¹tu¹wa². Te²yã¹nxũn³sxã³ wxãi²na² sa²kxai³lu² ka³te̱³na² wi¹tãu³la³ yũ³yah³lxin¹kxe³su² e³lxah¹ a³la³kxain¹nũn³tu¹wa². Txa²wã¹sũ̱³na² hxi²ka² kãi³ũh¹nx2ti³tu¹wa².  
\v 29 Je³su² Kris²tu³jah¹la² yxo²ĩ²yah³lxin¹ju³ta² ĩ³hxi²ka¹txa²lxi³na³la². Yxo²ĩ²yah³lxi¹nha²kxai³ Je³su²jah³lai²na² wãn³txa² te³nai¹nxa³te²nãu³xa² kwĩ²ti³ti³hi¹txa²lxain¹kxe³su² yũ³yah³lxin¹tu¹wa². Ju¹tai²na² a²yxo²ha³kxa¹ Txa²wã¹sũ̱³na² ten³ju³ta² ã³kãi³te²ju²hẽ³la².  
\v 30 Jã¹nxe³sxã³ Je³su²jah³lai²na² wãn³txa² te³nai¹nxa³te²nãu³xa²kxai³lu² khãuh³lxa³ti³sain¹ti³ai¹ti²tu³wa². Jã¹nxe³sain¹to³nha³la². Nxe³sain¹kxa² yã¹nxe³sxã³ khãuh³lxa³ti³nx2tain¹nũn³tu¹wa², Je³su²jah³lai²na² wãn³txa² ĩ³yau¹ũ¹yhah¹lxi¹nha²kxai³la². 
\c 2  
\s1 Kris²tu³jah¹la² a²hxi²kan¹khaix1nxe³nha²ju³ta² ã³na¹jau³su² 
\p  
\v 1 Nxa²ha¹te¹ Kris²tu³jah¹la² ã³nũ²kxi²sxã³ yxau³yah³lxi¹nha²kxai³ ã³non²ta³kxi¹nx2ti³ti³ai¹ti²tu³wa². A³lxi¹nx2ti³ha²kxai³ ĩ³nxũ²kwa̱i³lxũ¹nũh¹nx2ti³ti³ai¹ti²tu³wa². Sũ̱³na² Yãu³ka³jxah¹la² ain³kxi²nha² hin¹yah³lxin¹ti³ai¹ti²tu³wa². A³lxi²waun¹nyhu¹ah³lxin¹ti³ai¹ti²tu³wa².  
\v 2 Nxe³yah³lxi¹nha²kxai³ a̱in³nha² sa²ha³te¹jah³lxi³txa³hẽ¹la². A³lxi²sa²tẽ³nyha¹jah¹lxi³hẽ¹la². A²nũ²a² ka³na³ka³na³ju³ta² yã¹nxe² ain³kxi²nha² hin¹jah¹lxi³hẽ¹la². A²nũ²a² ka³na³ka³na³ju³ta² yã¹nxe² o²la³kxi²nha² kãi³jah³lxi³hẽ¹la². Yah³lxin¹kxai²nãn²tu̱³ kãin² ka³lih³ti³sah¹lxin¹tu¹wa².  
\v 3 Wxa²yan³txi³nũ³a² so¹lxi³ o²la³kxah¹lxi³txa³hẽ¹la². Toh³lxa² e³sxã³ kwa² kãin²ki³lxo³xah³lxi³txa³hẽ¹la². Win¹ta²te²lxi³ thãi³ti³la² ĩ³ye³ũ¹nha¹jah³lxi³hẽ¹la². Wxa²ẽ¹nãu³ai²na²: 
\p — Hxi²kan¹txi³ ã³sen³sai¹ai¹na¹xã¹. Nxe³nyhu¹ah³lxi³txa³hẽ¹la².  
\v 4 Wxa²yan³txi³nũ³a² so¹lxi³ ĩ²sxã³ kãi³yah³lxi³txa³hẽ¹la². A²nũ²a² ã̱³xa² a²yan³txa² ĩ²sxã³ ã³non²ta³kxi²waun¹nha¹jah³lxi³hẽ¹la². 
\p  
\v 5 Je³su² Kris²tu³jah¹la² a̱in³nha²hxai²kxai³ jã¹nxa² a̱in³nha¹jah³lxi³nũ³nhẽ¹la². 
\q1  
\v 6 A²nxe³jah¹la² Txa²wã¹sũ̱³nu²khai³su² ta¹hxai²ti³ai¹ti²tu³wa². Nxe³kxan²ti³ Txa²wã¹sũ̱³na² a²nũ³kxũn³ju³ta² hãix1te²ten³ti³ya³ta¹hxai²ti³ai¹ti²tu³wa². Nxe³ya³kxan²ti³ wã²nxũ̱h¹ ĩ³nũ̱³kxũn³te³lhxã³ o²la³kxi²nha²ya³ta¹hxai²nxa³ti³ai¹ti²tu³wa². 
\q1  
\v 7 Nxe²nxa³ka³tu̱³ta¹ Txa²wã¹sũ̱³nu²khai³su² kxan²ti³ wã²nxũ̱h¹ nũ³kxũn³khai¹nxe³kxe³su² ã³na¹ta¹hxai²ti³ai¹ti²tu³wa². Nxe³nũ²la² a²nũ²a² kwa²wa³ka³lxi³lon³te²a² wen¹ta¹hxai²ti³ai¹ti²tu³wa². Nxe³sxã³ a²nũ²khai³hũ̱³nxe² yxau³ta¹hxai²ti³ai³ti²tu³wa². A²nũ²khai³su² ye²ta¹hxai²ti³ai¹ti²tu³wa². 
\q1  
\v 8 A²nũ²khai³su² ye²nũ²la² Txa²wã¹sũ̱³na² wãn³txa² win¹ta²te²lxi³ thãi³ti³la² sa²yxo²we¹sa²tẽ³ta¹hxai²ti³ai¹ti²tu³wa². Sa²yxo²we¹ton³sxã³ kãi³ta¹ ya³lu²ju³ta³nũ³a² yũ³kxan²ti³ sa²yxo²we¹txa³kxe³tu̱³ yũ³ta¹hxai²nxa³ti³ai¹ti²tu³wa². Nxe³sxã³ ũ³hxi²kĩ¹la³kxi²sxã³ su²lhã³ain¹ta¹hxai²ti³ai¹ti²tu³wa². 
\q1  
\v 9 Txa²wã¹sũ̱³na² wãn³txa² win¹ta²te²lxi³ thãi³ti³la² sa²yxo²wet1sxã³ ya³lu²kxi²nẽ³lha²kxai³ Txa²wã¹sũ̱³na² hi²sen³kxai³lu² Je³su²jah³la² tẽ³sxã³ kãin²ti³hit1sxã³ a²ĩ³lxi³la² kãin²khaix1nxe³jau³xa² ĩ³yĩ¹li²ta¹hxai²ti³ai¹ti²tu³wa². òla² kãin²te²a² ĩ³lxa² ĩ³kãi²not3sa²so¹ta¹hxai²nxa³ti³ai¹ti²tu³wa². 
\q1  
\v 10 Nxe³sxã³ kãin²ti³hi¹tha²kxai³ oh³xan¹tũ̱³ka̱³txa² ha³kxa¹ yuh³xan¹tũ̱³ka̱³txa² ha³kxa¹ ya³lun¹txi³tũ̱³ka̱³txa² ha³kxa¹ ã³ka³ti³wxe³nũh¹hain¹sxã³ sa²nẽn¹kxain¹tu¹wa². 
\q1  
\v 11 Nxe³sxã³ e³kxain¹te³nah¹lxi¹, a²nũ²a² yxo²ha³kxa¹ ĩ³yau¹ũ³hain¹te³nah¹lxi¹: 
\p — Je³su² Kris²tu³jah¹lai²li² Txa²wã¹hxi²kan¹jah¹lo²khai³xai²la¹wi¹. Txa²wã¹sũ̱³nu³khai³xai²la¹wi¹. Nxe³ha²kxai³ Txa²wã¹sũ̱³na² Si³yxau³jah¹la² ĩ³sa²nẽn¹kxi²a³sah¹lxi³wxi¹. 
\m Nxe³ain¹tu¹wa². 
\s1 Hi³ka²ta² yã¹nxe³kxe³hũ̱³nxe²ki̱³jau³su² 
\p  
\v 12 Jã¹nxa¹jut3su² ain³kxi²sah¹lxi³hẽ¹la². A³lxi¹nx2ta¹wa². A²kxã³nxa² yxau³ya³nhẽ³lhĩ¹nai³tã² txa²wãn³txa² wain³txi³ sa²yxo²wet1sah³lxin¹tai¹ti²tu³wa². Te²yã¹nxe³sxã³ u²lyxau³na¹tãu³a² kxan²ti³ sa²yxo²wet1sah¹lxi³hẽ¹la². òla² kãi²non³sxã³ Kris²tu³jah¹lai²na² wãn³txa² sa²yxo²we¹jah¹lxi³hẽ¹la². Txa²wã¹sũ̱³na² sa²nẽn¹kxi²yah³lxin¹ju³ta² so¹lxi³ kãi³jah¹lxi³hẽ¹la². Ko̱³nxe³ti³ kãi³yah³lxin¹kxa²ya̱n³txi³su² wi¹lĩ²jah¹lxi³hẽ¹la².  
\v 13 Txa²wã¹sũ̱³na² hi²sen³su² a²ten³kxi³nũ³a² kãi³yah³lxin¹ju³ta² ã³nhi²ka¹txa²lxi³jah¹lai²la¹wa². Nxe³nx2ti³ha²kxai³ hxi²kan¹txi³ sa²yxo²wet1jah³lxi³hĩ̱³nxa¹lxa². Nxe³sxã³ Txa²wã¹sũ̱³na² ka³li¹jah¹lxi³hĩ̱³nxa¹lxa². 
\p  
\v 14 Wa³ka³lxa² kãi³yah³lxin¹kxe³su² ĩ³kwa̱i²kxi²sxã³ kãi³yah³lxi³txa³hẽ¹la². Kwa² ĩ³ye³ĩ³yi²lhon¹ta³kxah¹lxi³txa³hẽ¹la².  
\v 15 Nxe³yah³lxin¹kxai²nãn²tu̱³ ko̱³nxe³ti³ kãi³yah³lxin¹ju³ta³la³ yũ³yah²lxa³nha²kxai³ wxa²ẽ¹nãu³ai²na² wi¹ju³ta² so¹lxi³ yũ³yah³lxi¹nha²kxai³ nxe³yah³lxin¹tu¹wa². A²nũ²a²nãu³xa² Sũ̱³na² wãn³txa² te³nai¹nxa³te²nãu³xa² a²wãn³txai²na² wai³nxa³jau³xa² e³ih² ĩ³ki³ha¹kxi¹nx2ti³te³lhxã³ o²la³kxi² nxain¹te²jai¹ti²tu³wa². Nxe³nx2tain¹kxan²ti³ Txa²wã¹sũ̱³na² wẽ³ha³lxi³syah¹lxi¹nha²kxai³ wi¹ju³ta² so¹lxi³ kãi³jah¹lxi³hẽ¹la². Nxe³yah³lxin¹kxai²nãn²tu̱³ Hi³ka²ta² sa²kxai³lu² sa²ko¹kot1sa²tẽ³te²ju²hẽ³la². Jã¹nxe³kxa² yã¹xah³lxi³hĩ̱³nxa¹lxa². Te²yã¹nxe³sxã³ a²nũ²a² yuh³xai²nãn¹te²a² Sũ̱³na² wãn³txa² te³nai¹nxa³te²a² wãn³txa² wain³jau³xa² ka³te̱n³yau³xa² ĩ³yau¹ũ³yah³lxi¹nha²kxai³ sa²ko²ko²kxain¹yah³lxi³hĩ̱³nxa¹lxa².  
\v 16 Nxe²kãi³yah³lxin¹kxai²nãn²tu̱³ Kris²tu³jah¹la² hi²sen³su² ko̱³nxe³ti³ kãi³ki̱³ju³ta² yũ³ta̱³nxa² yũ²nxa³ta̱³nxa² a³ya³txi²tãu³a¹ nxe³hĩ¹na¹ ka³li¹ti³sah¹lxi³hĩ̱³nxa¹lxa². Nxe³sah²lxin¹ka³tu̱³ta¹ kãi³ũh¹nx2ta¹ju³tai³tã² wa³kon³kxi¹nx2ta¹ju³tai³tã² Kris²tu³jah¹la² ĩ²sxã³ ĩ³ye³kxi²sain¹tu¹wa²: 
\p — Kwa²hãi¹nxe² kwa² hxi²tha³nhxa²nxa³hẽ³li¹. Nxe³sain¹tu³wa². 
\p  
\v 17 A²nũ²a² Sũ̱³na² wãn³txa² we¹txa³te²nãu³xa² su²lhã³sai¹nha³ta²wa². Txa²ti³ha²yau³xa² ha³li³kxa² hxat3sa²sxã³ su²lhã³sai¹nha³ta²wa², Sũ̱³na² wãn³txa² ĩ³hen³txi¹nx2ta¹ha²kxai³la². Jã¹nxe³sain¹kxa² ha³ta̱³nxãn²txi³ ka³li³ha¹tu¹wa². Sũ̱³na² a²ten³jut3su² we¹ta¹kxe³su² ĩ²sain¹kxai²nãn²tu̱³ Sũ̱³nu²kxai³lu² wi¹lxo³kxi²na¹tu¹wa².  
\v 18 Te²yã¹nxe³sxã³ ĩ³ka³li³ha³sah¹lxi³nũ³nhẽ¹la², su²lhã³sain¹kxan²ti³na². 
\s1 Ti³mo²jah³la² E³pa³fro³ti²jah³la² sxã³ wxã³nũn³jau³su² 
\p  
\v 19 Je³su²jah³la² Txa²wã¹hxi²kan¹jah¹la² ĩ³hxi²kat1sa³kxai²nãn²tu̱³ Ti³mo²jah³lai¹tã² ĩ²nx2ti³te³lhxã³ ĩ³sa²si¹hã³a¹tu¹wa². Nxa¹kxai²nãn²tu̱³ wxa²ha³ta̱³nxa² ain³kxi²nx2ta¹tu¹wa². Ain³kxi²nx2ta¹kxai²nãn²tu̱³ ĩ³ya³lo³ti²sah¹lxin¹tu¹wa².  
\v 20 Nxe³sxã³ txa²sa³wi³ha³lxi³nã³nãu³xa² jah¹la² so¹lxi³ wi¹la³non²ta³kxi¹nx2ti³jah¹lai²la¹wa². A³lxi¹nx2ta¹kxa² yã¹nxe² a³lxi¹nx2ti³na³la².  
\v 21 Txa²sa³wi³ha³lxa² ã̱³xa² hãi¹nxe³ti³xa¹ a²wa³ka³lxa³yan³txa² so¹lxi³ te³nain¹na³la². Yxãn¹ta¹ jah¹la² ti³he¹nx2nxa³wa². Je³su² Kris²tu³jah¹la² sa²yxo²wet1sxã³ kãi³ju³ta² ten³na³la².  
\v 22 Txa²wã¹sũ̱³na² wãn³txa² sa²yxo²ã³xa³tai¹ti²tu³wa². Wi¹kãi³ju³ta² so¹lxi³ o²la³kxi²tai¹ti²tu³wa². A²wĩ³nu²su² a²ki³lha³lhxu² wi¹wa³kon³ya³te²ju²hẽ³la². Nxe³kxa² yã¹nxe² jah¹lai²na² txai²na² kãi³ya³ha¹wa². Txa²wã¹sũ̱³na² wãn³txa² wi¹jau³xa² ĩ³hen³txi³ya³ha¹tai¹ti²tu³wa². Ju¹tai²li² ĩ²yah³lxin¹tai¹ti²tu³wa².  
\v 23 A²nxe³jah¹lai²li² Ti³mo²jah³lai¹tã² ĩ³sa²si¹hã³ũh¹nx2ta¹tu¹wa². Sxi²ha² kan²thĩ³na² tĩ¹kxi²ta³lun²sain¹ju³ta³nũ³a² txa²nũ² ĩ²sãn²sxã³ ĩ³sa²si¹hã³ũh¹nx2ta¹tu¹wa².  
\v 24 Nxa²ha¹te¹ txai²na² sa²kxai³lu² wxã³sĩ²nx2ta¹ju³ta² ya̱u³son³na³la². Txa²wã¹hxi²kan¹jah¹la² ĩ³hxi²kat1sa³kxai²nãn²tu̱³ wa³su³txi³ wxã³na¹tu¹wa². 
\p  
\v 25 Nxe³na¹ha²kxai³ txa²wã¹lon³yah³lai²na² E³pa³fro³ti²jah³la² ĩ³sa²si¹hã³xi²nũ³na¹tu¹wa². So³ta²to²jah¹lai²la¹wa². Wi¹wa³kon³kxi²ya³sain¹na²hẽ³la². Nũ³kxũn³txi³ o²la³kxi²ya³sain¹na²hẽ³la². A²kxã³nxa² ã³non²ta³kxi²si¹sxã³ ĩ³sa²si¹hã³ũh¹sah¹lxin¹tai¹ti²tu³wa². Hĩ¹na² ã³na¹ũ³xi¹nx2ta¹tu¹wa².  
\v 26 A²nxe³jah¹la² ĩ²nxa²lxi³ju³ta² ten³khaix1nx2na³la². Ĩ³ton³kxi²ju³tai³tã² ain³kxah¹lxi³ta¹hi¹nhẽ¹la². Nxe³kxah¹lxi¹nha²kxai³ hxi²waun³ta³kxi¹nx2ti³ta¹hẽ¹la².  
\v 27 Ya²la³tu̱³ ĩ³ton³khaix1na²hẽ³la². Ya³lu²ti³ten³khaix1na²hẽ³la². Yxãn¹ta¹ Txa²wã¹sũ̱³na² wi¹lhin¹sxã³ thãi³ti³la² sa²hau³ko³tã²hẽ³la². Nxe³kxa²yu³su² wi¹lhin¹sxã³ thãi³ti³la² sa²hau³kot3sa²nũ³nhẽ¹la². Nxe³sxã³ ya³lu²si²hain¹ke³la³te²kxai³ ã²la² kãi²non³sxã³ ĩ³ãin²txi³khaix1sa²hĩ̱³nx2na³la². Yxãn¹ta¹ ti³he¹nxe²nxa³hẽ³la².  
\v 28 Nxe³na¹jut3su² ĩ³sa³si¹hã³ũh¹xi¹nx2ta¹ju³ta² ten³khaix1sa³nha²wa². Nxe³na¹kxai²nãn²tu̱³ ĩ²ain¹yah³lxin¹kxai²nãn²tu̱³ ka³lih³kxi¹nx2ti³tu¹wa². Nxe³sxã³ ĩ³ãin²ta³kxi²sa²ju³ta² ã³wa²sut1sa³tu¹wa².  
\v 29 Ĩ³xi²kxai²nãn²tu̱³ wi¹lhin¹sxã³ hen³txi³txain¹yah³lxi³hẽ¹la². Txa²wã¹hxi²kan¹jah¹la² yxo²ĩ²nũ³nha²kxai³ txa²wã¹lon³yah³lai²la¹wa². Jah¹la² yãx1te²he³la³ka² wi¹lhen³txi³txain¹yah³lxi³hẽ¹la².  
\v 30 Jã¹nxe³sxã³ Kris²tu³jah¹la² wãn³txa² sa²yxo²we¹tha²kxai³ ya³lu²te³lhxã³ nxa²hẽ³la². Wxãi²na² wxã³sxã³ ã³non²ta³kxi²sah²lxin¹kxe³su² hxi²kan¹yah³lxa³nha²kxai³ ã³si³wẽ̱³no³txa²lxi³na²hẽ³la². 
\c 3  
\s1 Kris²tu³jah¹la² so¹lxi³ yxo²ĩ²ki̱³tã³la² 
\p  
\v 1 Jã¹nxe³jut3su² nxe³nx2ta¹wa². Txa²wã³tã̱³nãu³xãi³. A³lxi¹nx2ta¹nha²wa². Txa²wã¹hxi²kan¹jah¹la² ã²la² kãi²non³sxã³ ĩ³ka³lih³kxi¹nx2ti³ju³ta² ten³nxa²lxa¹nha²wa². òla² ũ³wha²li¹lye¹nx2ta¹la². Nxe² ĩ³yau¹ũ³xi¹nx2ta¹kxai²nãn²tu̱³ ãu²li²sa²nxa³nha²wa². Wi¹lhin¹sxã³ yxau³si¹nx2ta¹jau³su² ũ³wha²li¹lye¹nx2ta¹wa².  
\v 2 Ko̱³nxe³ti³ kãi³tũ̱³ka̱³txa² wi¹lĩ²khai¹nxe³jah¹lxi³hẽ¹la². Ĩ³ki³ha¹kxi¹nx2tai¹nha³ta²wa². Ĩ³lxa³thin¹ti³he¹xai¹nxa³wa². A²nũ²nãu³ai²na² ũ³whi²lho¹nha²sxã³ ũ³kho³nyhain¹na³la².  
\v 3 A²kxã³nhxĩ¹nu¹tai²na² Moi³se²ah³lo²nu¹tai²na² kwa³na³nẽ³jau³xai²li² ã³si³wxe³ta¹hxai²ti³ai¹ti²tu³wa². Nxe³sxã³ in³txa² wãi³lxa² wẽ³sa² tẽ³sxã³ ũ³sa³si³tũ³ko¹kxã¹si¹nhẽ³jau³su² e³kxi²nẽ³ta¹hxai²ti³ai¹ti²tu³wa². Nxe³jau³xu¹tai²na² txa²wã¹kxi³na¹xai²na² so¹lxi³ Ju³te²a² nũ̱³ka̱³txi³ki̱³na¹xai²na² so¹lxi³ wain³txi³ sa²yxo²we¹ki̱³tã³la². Sa²yxo²we¹ki̱³kxan²ti³ yen³kxa² ã²la² wi¹khai¹nxe³te²a² yũ³ki̱³tã³la². Txa²wã¹sũ̱³na² Yãu³ka³jxah¹la² ĩ³hxi²ka¹tẽ³lha²kxai³ Sũ̱³nu²kxai³lu² sa²nẽn¹kxi²ki̱³tã³la². Je³su² Kris²tu³jah¹la² ã³nũ²nxi²sxã³ yxau³kxi²nẽ³lha²kxai³ ka³li³sxã³ yxau³ki̱³tã³la². Yuh³xai²nãn¹te² yen³kxa² hai³txi³ yxo²ĩ²ki̱³sxa³wa².  
\v 4 Nxe³sxã³ yuh³xai²nãn¹te² yen³kxa² yxo²ĩ²ki̱³ke³la³te²kxai³ txai²li² ã²la² ã³sen³sai¹sxã³ yxo²ĩ²hĩ̱³na¹wa². A²nũ²a² yxo²ha³kxa¹ ã³sen³sai¹ai¹nhĩ̱³na¹wa².  
\v 5 Txa²wẽ³sĩ¹na² txo¹na¹hĩ¹nai³tã² kwẽn¹ta² a³li³la¹ha¹hĩ¹nai³tã² a³la²ni²sxã³ ye³ha¹li¹ ye³ha¹li¹ ye³ha¹li¹ ye³ha¹li¹ a³la²ni²ju³ta² hau³hau³kon³sxã³ ũ³sa³si³tũ³ko¹kxã¹sa³na²hẽ³la². I³sa³e²ah¹lo²sa¹wa². Nxe² a³li³lah¹sxã³ txon¹jah¹lo²su² te²sa¹wa². Bẽn³ja³mĩ² nũ̱³ka̱³txi³yah³lo²sa¹wa². Txa²wĩ³na²nãu³xai²na² yxo²ha³kxa¹ E³bre²a² nũ̱³ka̱³txi³nãu³sain¹na³la². Nxe³nxa²ha¹te¹ Moi³se²ah³lo²nu¹tai²na² wãn³txa² sa²yxo²we¹kxe³su² a²ha³tih³nũ̱³ka̱³txai²li² fa³ri³se²a² nũ̱³ka̱³txi³sa¹wa². 
\p  
\v 6 — Moi³se²ah³lo²nu¹tai²na² wãn³txa² wain³txi³ kãi³a¹tũ¹xã¹. Na¹ju³tan¹te²kxa³ya̱³lhu² Je³su²jah¹lai²na² wãn³txa² yxo²ĩ²sxã³ yxau²xai³tũ̱³ka̱³txa² khãuh³lxa³tin³txai¹na¹hẽ³la². Nxe³kxa²yu³su² Txa²wã¹sũ̱³na² wãn³txa² kwa³na³nẽ³jau³xai³tã² wã³ko³nxa³te²tu̱³ sa²yxo²we¹thxai²na¹hẽ³la². A²nũ²a² ĩ²li³te²la³ hxi²kan¹txi³ ko̱³te³kxi²sa²nxa³hẽ¹la². Jã¹nxe³te²su² hxai²na¹hẽ³la².  
\v 7 Nxa²ha¹te¹ Kris²tu³jah¹lai²na² wãn³txa² yxo²ĩ² ã³si³wxe³na¹hĩ¹na¹ yen³kxai³tã² hãi¹nxe³ti³xa¹ ã³na¹a¹hẽ³la². 
\p — A²kxã³nxa² a³lxi²ti³ tẽ³a¹hẽ³na¹. Na¹jau³su² hĩ¹na² yxo²kwa̱in³te²txã³wa².  
\v 8 Yen³kxa² yxo²ha³kxa¹ ã³na¹sxã³ yen³kxa² ã²la² wi¹te²a² so¹lxi³ ten³te²sa¹wa². Je³su² Kris²tu³jah¹la² Txa²wã¹hxi²kan¹jah¹lo²su² ha²kxai³ nxe³jah¹la² ĩ²sa²tẽ³kxi²na¹ju³ta² ã²la² ã³sen³sai²na³la². Nxe³na¹ha²kxai³ yen³kxa² ã̱³xai²li² ko̱³nxe³kxe³su² ã³na¹a¹ha²kxai³ Kris²tu³jah¹la² sa³wit3su² na¹ju³ta² so¹lxi³ ten³sa³nha²wa².  
\v 9 Nxe³sxã³ ã³nũ²nxi²sxã³ yxau²xai³nha¹ju³ta² ten³sa³nha²wa². A²wi¹lhĩn¹khaix1ju³khai³xa² wi¹lhit1sain¹na²hẽ³la². Nxe³te³nah¹lxi¹. Hai³txi³ Txa²wã¹sũ̱³na² kwa³na³jau³xu¹tai²na² sa²yxo²we¹ta¹kxe³su² wi¹lhit1sai¹nxa³hẽ³la². Yxãn¹ta¹ Kris²tu³jah¹la² yxo²ĩ²a¹kxe³su² wi¹lhit1sain¹na²hẽ³la².  
\v 10 Jã¹nxe³sxã³ yxo²ĩ²a¹kxai²nãn²tu̱³ Kris²tu³jah¹la² ĩ²yxau²xai³la¹tu¹wa². Kris²tu³jah¹la² a²wã³nxĩn¹ju³khai³xa² ka³te̱n³su² ĩ³sa²yxau³xi²sxã³ yau²xai³ju³khai³xa² ã³ne³wxe² yxau²xai³la¹tu¹wa². Kris²tu³jah¹lo²kxai³lu² Sũ̱³na² wãn³txa² sa²yxo²we¹tha²kxai³ ye³khãuh³lxa³thin¹khaix1ta¹hxai²ti³ai¹ti²tu³wa². Nxe³kxa² yã¹nxe³sxã³ Sũ̱³na² wãn³txa² sa²yxo²we¹ti³ten³sa³nha²wa², khãuh³lxa³txi³sain¹kxan²ti³na². Jã¹nxe³sxã³ Kris²tu³jah¹lo²kxai³lu² A²wĩ³na²khai³xa² wãn³txa² sa²yxo²we¹tha²kxai³ ya³lu²kxi²nẽ³ta¹hxai²ti³ai¹ti²tu³wa². Nxe³kxa² yã¹nxe³sxã³ Sũ̱³na² wãn³txa² so¹lxi³ sa²yxo²we¹ti³ten³sa³nha²wa², ya³lu²na¹ju³ta³nũ³a² yũ³ti³hit1sain¹kxan²ti³na².  
\v 11 Jã¹nxe³na¹kxe³nũ³su² ka³te̱n³su² ĩ³sa²yxau³xi²si¹sa²jau³nũ³su² a²ya³la³tu̱³ ũ³hũ¹sa³tu¹wa². Jã¹nxe³sxã³ Sũ̱³na² ha³lo²ai²na² yxau²sa²tẽ³si¹sa³tu¹wa². 
\s1 Kris²tu³jah¹lai²na² wãn³txa² sa²yxo²wet1sa²sai¹na¹ju³ta² 
\p  
\v 12 Jã¹nxe³na¹jau³su² txa²wãn³txa² e³nxa³jau³xa²sa¹: 
\p — Ko̱³nxe³ti³ kãi³a¹ju³ta² yũ³ti³he¹nxa³wi¹. Wi¹ju³ta² so¹lxi³ kãi³te²sa¹wi¹. Nxe³na¹jau³su² hxi²kan¹txi³ e³nxa³wa². Yxãn¹ta¹ Kris²tu³jah¹la² a³lxi²sa²ju³ta² yxau²xai³te²sa¹wa². Nxe³te²sa¹ha²kxai³ wain³txi³ sa²yxo²wet1sa²sai¹na¹ju³ta² ten³khaix1sa³nha²wa².  
\v 13 Txa²wã³tã̱³nãu³xãi³. 
\p — Wi¹kãi³sa²sai¹na¹xã¹. Na¹jau³la³ e³ti³he¹nxe²nxa³tai¹ti²tu³wa². Nxe³na¹ta¹ ko̱³nxe³ti³ kãi³a¹hĩ¹nai³tã² ha³nãu³ha² hxan³na³la². Yon³nãu³ai³tã² kãi³a¹ju³tai³tã² ne³wã²na³a¹ha²kxai³ yan¹nãu³a¹ wi¹kãi³a¹ju³ta³nũ³a² a̱in³nha¹ha²kxai³ Sũ̱³na² wãn³txa² so¹lxi³ sa²yxo²we¹ta¹ju³ta³nũ³a² a̱in³nha¹ha²kxai³ nxe³na¹nha²wa².  
\v 14 Sa³nxe³la³kxi³nãu³xa² kwa² ã³ni³hain¹ju³ta² yã¹nx2na³la². ónih³sxã³ ã³ne³ka²ta¹ta³lun²kxi³nũ³su² o²la³kxain¹nĩn²ta²wa². óne³ka²ta¹ta³lun²jah¹lai²na² sa²kxai³lu² hi³yãu³sa³kxa² tĩh³na² ũ³nhe³hẽ¹nhain¹te²ju²hẽ³la². Te²yã¹nxũn³te²sa¹wa². Oh³nãu³a¹ Je³su² Kris²tu³jah¹la² ĩ³kaix1sa²ju³ta³nũ³a² wah³nxe³na¹wa². Txa²wã¹sũ̱³na² ten³si¹sa²jau³nũ³a² wah³nxe³na¹wa². Nxe³sa³kxai²nãn²tu̱³ Txa²wã¹sũ̱³na² hxi²ki³kxai³lu² ka³te̱³na² wi¹tãu³a² ã³wi¹ha¹ju³ta³nũ³a² ĩ³ye³kxi²sain¹tu¹wa². 
\p  
\v 15 Nxe³sxã³ ye³kan¹sxã³ yxo²ĩ²te²ki̱³na¹xai²na² ye³kan¹sxã³ ha̱in³nha²ki̱³ju³ta² so¹lxi³ wain³na³la². Kris²tu³jah¹lai²na² a²ten³jau³su² a³la³kxi²ki̱³sa²kxai³ nxe³jau³jau¹xain²txi³ sa²yxo²wet1sxã³ kãi³jah³lxi³hẽ¹la². Yxãn¹ta¹ nxe²nxa³kxe³su² te²a² yũ³kxai²nãn²tu̱³ Txa²wã¹sũ̱³na² hi²sen³su² e³lai²na¹ ĩ³yau¹ũ¹nx2ti³tu¹wa².  
\v 16 Jã¹nxe³ki̱³sa²kxai³ Sũ̱³na² wãn³txa² wain³txi³ sa²yxo²wet1sxã³ kãi³ki̱³kxa² yã¹xa³sah¹lxi³wxa².  
\v 17 Txa²wã³tã̱³nãu³xãi³. Kãi³a¹kxai³ yã¹nxe² kãi³yah³lxin¹tai¹ti²tu³wa². Te²yã¹nxe² wain³txi³kãi³jah¹lxi³hẽ¹la². Nxa¹ju³kxai³la¹ txai²yã¹nxa² kãi³te²na² a²e³jau³xa² sa²yxo²we¹jah³lxi³hẽ¹la².  
\v 18 Txa²wã¹sũ̱³na² wãn³txa² yxo²ĩ²ki³lxo³te²a² yũ²na³la². Nxe³te²na² sa²kxai³lu² Kris²tu³jah¹lai²na² ĩ³hxi²kĩ¹la²kxi²sxã³ ĩ³ya²lut1jah¹lai¹tã² yxo²kwĩn¹kxain¹na³la². Ko̱¹ko̱¹so¹nain¹na³la². Nxe³nx2ti³to³ha¹tai¹ti²tu³wa². Nxe³ju³tai²li² ĩ³ãin²ta³kxi²nha²khaix1nxe³sxã³ nã̱n³sxã³ ĩ³hen³txi¹nx2ta¹wa².  
\v 19 A²nxe³tũ̱³ka̱³txai²li² ha³lo²a² ha³nxe²a² i̱³ju³ta³nũ³a² ko̱³nxe³ti³ ĩ³yĩ¹li²hain¹tu¹wa², Txa²wã¹sũ̱³na²sa³. A²nxe³tũ̱³ka̱³txai²li² Txa²wã¹sũ̱³nu²khai³xa² sa²yxo²we¹tai¹nxa³wa². A²ẽ¹nãn¹jau³khai³xa² ten³nyhain¹kxa² so¹lxi³ sa²yxo²wet1sxã³ kãi³ain¹na³la². Kuh³lxa³thin¹sxã³ kãi³ain¹kxan²ti³ ãu²li²ju³ta² yũ³ai¹nxa³wa². Nxe³yãn¹ta¹ ju¹tai²li² yxo²kãin²txi³ e³ain¹na³la². Yuh³xai²nãn¹te² yen³kxa² so¹lxi³ a̱in³nhai¹nhxai²na²hẽ³la². A²nxe³tũ̱³ka̱³txai²li² Txa²wã¹sũ̱³na² hxi²ka² ko̱³nxe³ti³ ĩ³yĩ¹li²hain¹tu¹wa². Nxain¹ju³tan¹te²kxa³ya̱³lhu² ha³lo²a² ha³nxe²a² i̱³ju³ta³nãu³a² ĩ³hau³hau²na²sa²tẽ³ũ¹hain¹tu¹wa².  
\v 20 Nxe³nxa²ha¹te¹ txa²wã¹ki̱³nãu³xai²na² yxo²ĩ²tũ̱³ka̱³txi³ki³nãu¹xai²na² sa²kxai³lu² oh³xai²nãn¹ko³xai²li² txa²wã¹ha³lo²khai³su² na³la². Nxe³sxã³ yuh³xan¹ko³xai²li² yxau³sxã³ hin¹sxã³ wah³nxe³ki̱³tã³la². Txa²wã¹ẽ¹na² sa²hau³kot3jah¹lai²na² Je³su² Kris²tu³jah¹lai²na² Txa²wã¹hxi²kan¹jah¹lo²su² ha²kxai³ nxe³jah¹la² wxã³sxã³ a³ka³nxi²sxã³ wa̱³li²ju³ta³nũ³a² wah³nxe³ki̱³tã³la².  
\v 21 A²nxe³jah¹la² hi²sen³kxai³lu² ã³wa̱³li²tãu³a² txa²wã¹nũ²nãu³ai²na² hxi²tha³nhẽ³kxan²ti³ ya³lu²ju³ta² yũ³nẽ³kxan²ti³ sĩ̱³nã̱³lxi³ tah²lxi³sĩ̱³ti³hi¹tẽ³tu¹wa². Nxe³sxã³ Kris²tu³jah¹la² a²nũ²nãu³xai²li² wxi²kin³ti³ton³kxa² yã¹nxe² sĩ̱³nã̱³lxi³ti³hi¹tẽ³tu¹wa². Nũ³kxũn³khaix1jah¹lai²la¹wa². Ha³lo²ai²na² ha³kxa¹ a²wa³kxẽn³su² na³la². Nxe³ju³kxai³lu² Je³su² Kris²tu³jah¹la² hi²sen³su² a²nũ³kxũn³ju³txai²li² sĩ̱³nã̱³lxi³ti³hi¹tẽ³tu¹wa². 
\c 4  
\s1 Kris²tu³jah¹lai²na² wãn³txa² yxo²ĩ²sxã³ yxau²xai³ki̱³jau³su² 
\p  
\v 1 Jã¹nxe³jut3su² kan²txi³ yxo²ĩ²yah³lxi¹nha²kxai³ ĩ³sa²nẽn¹kxi¹nx2ta¹wa². Nxe³sxã³ Kris²tu³jah¹lai²na² wãn³txa² yxo²ĩ²sxã³ yxau²xai³lyah³lxin¹tai¹ti²tu³wa². Te²yã¹nxe³jah³lxi³hẽ¹la². Txa²wã³tã̱³nãu³sah¹lxi¹lxa². A³lxi¹nx2ta¹wa². Ne³kan²kxi²ti³hex1nxe³nx2ti³nxa³nha²wa². Ka²li¹txi²sah¹lxin¹nha²wa². Nxe³ye¹nx2ta¹wa². 
\p  
\v 2 Nxa²ha¹te¹ E³vo³ti²a³ka³lxãi³. Sĩ³ti²ka³kxa³lxãi³, Nxe³jah³nxa². Kris²tu³jah¹lai²na² wãn³txa² yxo²ĩ²ya³hi¹nha²kxai³ hãu²non³sxã³ yxau³a³nha¹jah³he¹na².  
\v 3 Nxa²ha¹te¹ wxãi²na² yxo²ĩ²tũ̱³ka̱³txa² ã³non²ta³kxi²khaix1nxe³jah¹lo³ ĩ³nxa² txu¹ti³nãu³xin³ti² ĩ³wai³txai¹nhẽ³la². Nxe³sxã³ txu¹ti³nãu³xin³ti² Kle³mẽ²te²yah³la², txa²ya̱³lxi³nãu³xa² yxo²ha³kxa¹ wi¹lo²la³kxain¹na²hẽ³la². Txa²wã¹sũ̱³na² wãn³txa² ĩ³yau¹ũ³hain¹kxa² wi¹wa³ko³nain¹na²hẽ³la². Nxain¹ju³tan¹te²kxa³ya̱³lhu² Txa²wã¹sũ̱³na² ha³te̱h³nxã³nxa² oh³nãu³a² ka³te̱n³su² yxau²xai³te²nu³a² ha³te̱h³nxã³nxa² ã²la² ũ³wha²li¹la³kxi²na²hẽ³la². 
\p  
\v 4 Txa²wã¹sũ̱³na² wãn³txa² yxo²ĩ²tũ̱³ka̱³txi³ ĩ³nxa² kãin² ka³lih³jah¹lxi³hẽ¹la². Jã¹nxe² e³kxi¹nx2ti³sxã³ ka³li³sa²tẽ³jah¹lxi³hẽ¹la². 
\p  
\v 5 Thãi³ti³la² kãi³ũh¹nhya¹ju³ah³lxi³hẽ¹la². Txa²wã¹sũ̱³na² a³ka³nxi²sxã³ wa̱³li²ju³ta³nũ³a² nxe³je³nãu³wa³kxi³lon³na³la².  
\v 6 Ha³lo²a² he¹yah³lxin¹ju³ta³nũ³a² hxi²waun³txi³yah³lxi³txa̱³lxa². Nxe³yãn¹ta¹ yen³kxa² ĩ²li³ju³ta² a²ten³nxa²lxi³ju³ta² nũ¹hĩ²sxã³ Txa²wã¹sũ̱³na² ĩ³ye³kxi¹txai¹yah³lxi³hẽ¹la². Nxe³yah³lxin¹kxai²nãn²tu̱³ ain³kxi¹nx2ti³jau³nũ³su² yxo²ĩ²jah³lxi³hẽ¹la². Nxe³yah³lxi³to³hin¹kxai²nãn²tu̱³ ĩ³ka³lih³kxi¹nx2ti³jau³nũ³su² ĩ³hen³txi³jah¹lxi³hẽ¹la², Txa²wã¹sũ̱³na²sa³.  
\v 7 Yxah³lxin¹ju³tan¹te²kxa³ya̱³lhu² Txa²wã¹sũ̱³na² hãun²ju³ta² ũ³hũ¹nx2ti³tu¹wa². A²nxe³ju³ta² a²nũ²a² hxi²kan¹txi³ ã³ne³wxe³ye²hĩ̱³ki̱³sxa³wa². Txa²wã¹sũ̱³na² hãu²no³nha²ki̱³ju³ta² ũ³hũ¹nẽ³jah¹lai²la¹wa². A²nxe³sxã³ Je³su² Kris²tu³jah¹la² ã³nũ²nxi²sxã³ yxau³ya³nx2ti³ha²kxai³ wxa²ẽ¹nãu³ai²na² hãu²nũh¹sa²tẽ³nx2ti³tu¹wa². 
\p  
\v 8 Jã¹nxe³na¹jut3su² txa²wã³tã̱³syah¹lxi¹lxa². A̱in³nhyah¹lxin¹kxe³su² ĩ²khaix1nha¹jah³lxi³hẽ¹la². Ha³lo²a² wi¹ju³ta³nũ³a² yũ³ta̱³nxa² sa²nẽn¹kxi²nẽ³kxe³nũ³a² yũ³ta̱³nxa² nxe³kxai²nãn²tu̱³ a̱in³nha²sxã³ ĩ²khaix1nha¹je²jah³lxi³hẽ¹la². Nxe³te³nah¹lxi¹, ha³lo²a² wain³te²lo³ju³ta² so¹lxi³ ha³lo²a² wi¹lhin¹ki̱³kxe³nũ³a² so¹lxi³ Txa²wã¹sũ̱³na² ye³na² ta̱³nxa² a²nũ²a² ye³na² ta̱³nxa² wain³ye²ki̱³kxa² so¹lxi³ ha³lo²a² ko̱³ti³he¹nxa³kxa² so¹lxi³ ha³lo²a² a³lxi²si¹nhẽ³kxe³nũ³a² so¹lxi³ ha³lo²a² wi¹le³kxi²ki̱³ju³ta³nũ³a² so¹lxi³ nxe³te² he³la³kxa² a̱in³nha¹je¹jah³lxi³hẽ¹la².  
\v 9 Txa²wãn³txa² e³so¹kxi²sah³lxin¹jau³xai²na² a²yxo²ha³kxa¹ sa²yxo²wet1sah¹lxi³hẽ¹la². Txa²wãn³txain²txi³ kãi³a¹ju³tain²txi³ sa²yxo²wet1sah¹lxi³hẽ¹la². Nxe³yah³lxin¹kxai²nãn²tu̱³ Txa²wã¹sũ̱³na² hãu²non³ju³ta² wa³kxi³nxe³sxã³ ã³si³tẽ³la³kxi²xai³nx2ti³tu¹wa². 
\s1 Pau²lah³lai²na² wi¹lxo³kxi²jau³su² 
\p  
\v 10 Nxe³nxa²ha¹te¹ hĩ¹nai²li² ã³non²ta³kxi²sah¹lxin¹ju³ta² ã³si³wxe³xi²yah³lxi¹nhẽ³la². A²kxã³nxai³tã² te²yã¹nxe² ã³non²ta³kxi²sah¹lxin¹tai¹ti²tu³wa². Nxe³nũ²la² hxi²ka¹yah³lxa³nha²kxai³ hãi¹nxa¹sah¹lxin¹tai¹ti²tu³wa². 
\p — Wxãi²li² ten³nxa²sĩn¹nxa³nhai¹. Nxe³yah²lxa³nhẽ³la². Yxãn¹ta¹: 
\p — Hxi²kan¹txi³ ã³non²ta³kxi¹nx2ti³nxa³nhai¹. Sah¹lxi¹nhẽ³la². Yxãn¹ta¹ hĩ¹na² te²yãx1sah¹lxi¹lxa². Nxe³sah¹lxi¹nha²kxai³ Kris²tu³jah¹la² ã³nũ²nxi²sxã³ yxau³ya³sa³ha²kxai³ ĩ³ka³lih³khaix1sa³nha²wa².  
\v 11 Yxãn¹ta¹ yen³kxi³txa²sa²kxe³su¹ nxe²nxa³nha²wa². Ha³lo²a² ĩ²li³ju³ta³nũ³a² ka³lih³kxi²la²nha² yxau²xai³nha¹nha²wa².  
\v 12 Yen³kxa² yũ³sa²nxa³kxe³su² ĩ²a¹ha²kxai³ yen³kxa² tau³ton³kxi²sa²kxe³su² ĩ²a¹ha²kxai³ te²sa¹wa². Nxe³ha²kxai³ ha³lo²a² ĩ²li³je³na² hi¹na¹kxan²ti³ ha³lo²a² ĩ²li³ju³ta² ĩ³ha¹txi²na¹ha²kxai³ ka³lih³kxi²nha¹nha²wa², ũ³kxi²sa²jut3su² ta̱³nxa² he³ja³lu²sa²jut3su² ta̱³nxa² yen³kxi³ha¹kxe³su² ta̱³nxa² yen³kxi³txa²sa²kxe³su² ta̱³nxa² nxe³kxan²ti³ ka³lih³kxi²la²nha¹nha²wa².  
\v 13 Kris²tu³jah¹la² ã³nũ²nxi²sxã³ yxau³ya³sa²kxe³su² ĩ³hxi²kat1sa³ha²kxai³ ha³lo²a² ĩ²li³ju³ta² wxã³nũh¹sa²kxan²ti³ hxi²ka¹na¹wa². 
\p  
\v 14 Nxe³na¹kxan²ti³ khãuh³nha¹ju³tai³tã² ã³non²ta³kxi²sah¹lxin¹tai¹ti²tu³wa². Ju¹tai²li² wain³na³la².  
\v 15 Kxã³nxai³tã² Ma³se³to²na²ko³xa² a³li³a¹hĩ¹nai³tã² a²wi¹lhĩ¹na² wxã³sxã³ Txa²wã¹sũ̱³na² wãn³txa² wi¹jau³xa² ĩ³hen³txi¹nx2ta¹hĩ¹nai³tã² wxa²nũ̱³ka̱³txi³nãu³ ĩ³nxa² Fi³li³po²thĩ³na² yxau³yah³lxin¹te² ĩ³nxa² so¹lxi³ ã³non²ta³kxi²sah¹lxin¹tai¹ti²tu³wa².  
\v 16 A²kxã³nxa² Te³sa³lo²ni³ka²thĩ³na² yxau³na¹hĩ¹nai³tã² yen³kxi³txa²kxe³sã¹. Sah¹lxin¹jau³su² wxa²nũ̱³ka̱³txai²na² sa²kxai³lu² yen³kxi³khai³xa² wã²nhũh¹sxã³ ĩ³sa²si¹hã³xi²sah¹lxi³to³hin¹tai¹ti²tu³wa². 
\p  
\v 17 — Kwa²hãi¹te³lhxã³ yen³kxa² yxo²kwa̱in³kxai¹na¹nha¹. Hai³txi³ te²txã³wa². Wi¹kãi³sa²tot1jah³lxin¹ju³ta³nũ³a² ten³sa³nha²wa². Yxah³lxin¹kxai²nãn²tu̱³ ka³lih³khaix1sah¹lxin¹tu¹wa².  
\v 18 Jã¹nxa¹jut3su² ũ³yho³hi²ki³a² ũ³sa²si¹hã³sah¹lxin¹kxa² a²yxo²ha³kxa¹ so¹kxi¹nx2ta¹hẽ³la². So¹kxi¹nx2ta¹ha²kxai³ yen³kxa² wã³kon³kxi²sa³ju³ta² yũ³na¹wa². E³pa³fro³ti²jah³la² wxã³na²hẽ³la². Wxã³nũ²la² wxa²yen³kxa² ũ³hũ¹ah³lxin¹kxa² ũ³hũ¹sa³na²hẽ³la². Nxe³ha²kxai³ hĩ¹nai²li² yen³kxa² tau³ton³nha²wa². Nxe² kãi³ũ¹sah¹lxin¹ju³tai²li² ha³nxe²a² wi¹lũ³tho³xa² yã¹nxe³hĩ̱³nx2na³la². Txa²wã¹sũ̱³na² ĩ³nxũ̱n³so¹nũh¹nx2ti³kxa² yã¹nx2na³la². Nxe³tho³xa² Txa²wã¹sũ̱³na² ĩ³nxũ̱n³so¹kxai²nãn²tu̱³ ĩ³ka³li³lhxun¹na³la². Te²yã¹nxe³sxã³ wi¹kãi³ũh¹sah¹lxin¹ju³tai²li² ĩ³ka³li³lhxun¹nũn³na³la². Ĩ³ka³li³lhxu¹nha²kxai³ wi¹lhit1sxã³ ĩ²nxa²lxi³na³la².  
\v 19 Jã¹nxe³jut3su² tau³ton³kxi¹nx2ti³kxe³su² Txa²wã¹sũ̱³na² hi²sen³su² ũ³hũ¹nx2ti³tu¹wa². Je³su² Kris²tu³jah¹la² ã³nũ²nxi²sxã³ yxau³ya³nx2ti³ha²kxai³ tau³ton³kxi¹nx2ti³ju³ta² ũ³hũ¹nx2ti³tu¹wa². Je³su² Kris²tu³jah¹la² sa²kxai³lu² oh³nãn¹ta³ yen³kxa² kãin² yũ³ha²kxai³ nxe² ũh¹nx2ti³tu¹wa².  
\v 20 Nxe³ha²kxai³ Txa²wã¹sũ̱³na² Si³yxau³jah¹lai²li² Txa²wã¹wĩ³nu²su² ha²kxai³ nxe³jah¹lai²li² wxi²kin³ti³ton³ju³ta² ã²la² kãi²non³ju³ta² ten³sa³nha²wa². Hai³txi³ ne³ki³so³nxa³ju³ta³nũ³su² yũ³ti³he¹nxa³lho³la². Nxe³ju³ta² ye¹nx2ta¹wa². 
\s1 Pau²lah³lai²na² a²ne³ki³san¹jau³su² 
\p  
\v 21 Je³su² Kris²tu³jah¹la² yxo²ĩ²yah³lxin¹te²nãu³ ĩ³nxa² Txa²wã¹sũ̱³na² a²sa³wi³ha³lxi³syah¹lxin¹te²nãu³ ĩ³nxa² nxe³sxã³ txa²ha³ta̱³nxa² wi¹lhen³txi¹nx2ta¹wa². Txa²wã¹lon³ti³tãu³xai²na² yxau³ya³sain¹tũ̱³ka̱³txi³nãu³xai²na² a²ha³ta̱³nxa² wi¹lhen³txi¹nx2ti³nũn³ya³sain¹na³la².  
\v 22 Ro²ma²thĩ³nãn¹ko³xa² kãin²ko³xai²na² a²wa³kxẽn³yah³lai²na² sxi²ha² yxau³tũ̱³ka̱³txi³nãu³xa² Txa²wã¹sũ̱³na² wãn³txa² yxo²ĩ²tũ̱³ka̱³txai²na² sa²kxai³lu² a²ha³ta̱³nxa² wi¹lhen³txi¹nx2ti³nũn³ya³sain¹na³la². Txa²wã¹sũ̱³na² yxo²ĩ²tũ̱³ka̱³txa² a²yxo²ha³kxa¹ te²yã¹nxe³nũh¹nx2ti³nũn³ya³sain¹na³la². 
\p  
\v 23 Jã¹nxe³jut3su² Je³su² Kris²tu³jah¹la² Txa²wã¹hxi²kan¹ta² Si³yxau³jah¹lo²su² ha²kxai³ nxe³jah¹la² kãin² thãi³ti³la² a³lxi¹nx2ti³ju³ta² ten³sa³nha²wa². Jã¹nxa¹jau³su² txai²li² Pau²lah³lo²na¹xai²na² nxe³ye¹nx2ta¹wa².