\id 2TI - Nambikuára NT [nab] (Brazil) -2011 bd 
\h 2 Timoteo 
\toc1 2 Timoteo 
\toc2 2 Timoteo 
\toc3 2 Tm 
\mt1 2 Timoteo 
\c 1  
\p  
\v 1 Pau²lah³lo²na¹xai²na² ãh¹ ũ³wha²li¹le¹nxa²ha¹wa². Je³su² Kris²tu³jah¹lai²na² ĩ³sa²si¹hã³ũ¹sa²jah¹lo²sa¹wa². Je³su² Kris²tu³jah¹lai²na² wãn³txai³tã² ĩ³hen³txi³si¹ha¹jau³su² ĩ³sa²si¹hã³ũ¹sa³na²hẽ³la². Ju¹tai²li² Txa²wã¹sũ̱³na² Si³yxau³jah¹la² ten³nũn³jau³sa²na³la². Nxe³ha²kxai³ Je³su² Kris²tu³jah¹la² wãn³txai³tã² ka³te̱n³yau³xa² ũ³hũ¹sa²jau³xai³tã² yxo²ĩ²nũ³na¹kxa² ĩ³yau¹ũ³nxa²te³lhxã³ nxe³ye¹nxa²ha¹wa².  
\v 2 Jã¹nxe³jut3su² Ti³mo²jah³lo²si¹lxa². Ain³kxi²sẽ¹la². Txa²ki³lha³lxi¹lxa². A³lxi¹nxa²ha¹nha²wa². Nxe³ha²kxai³ Txa²wã¹sũ̱³na² Si³yxau³jah¹la² Txa²wã¹wĩ³nu²su² ha²kxai³ Je³su² Kris²tu³jah¹la² Txa²wã¹hxi²kan¹ta² Si³yxau³jah¹lo²su² ha²kxai³ nxe³ya³sxã³ kãin² thãi³ti³la² a³lxi²nxa²si¹hi² wi¹lhin¹sxã³ thãi³ti³la² sa²hau³ko³txa²si¹hi² wxa²nxũ²kwa̱i³nãu³a² ã³nhãu²no³txa²si¹hi² nxe³nxa²si¹ha¹jau³su² ten³sa³nha²wa². 
\s1 Pau²lah³lai²na² ĩ³nxũ²kwa̱i³lxũ¹jau³su² 
\p  
\v 3 Nxe³ha²kxai³ Txa²wã¹sũ̱³na² sa²nẽn¹kxi²to³ha¹wa². Txa²wĩ³nu²nãu³xu¹tai²na² sa²yxo²we¹tain¹kxu¹jã¹nxa¹wa². Ju¹tai²na² so¹lxi³ txa²ten³sa²ju³tai²la¹wa². Nxe³na¹ha²kxai³ ka³nxah³ta² whãi²na¹ a³lan²tãu³a² whãi²na¹ Txa²wã¹sũ̱³na² ĩ³ye³kxi²to³ha¹wa². Nxe³na¹tãu³a² Sũ̱³na² ĩ³nxũ²kwa̱i³lxũ¹txi³nxa²si¹ha¹jau³su² ĩ³ye³kxi²to³ha¹wa².  
\v 4 Nxe³ha²kxai³ ĩ³ãin²txin¹ju³tai³tã² ĩ²nxa²ha¹ha²kxai³ ãh¹ĩ²xi²ti³ten³khai¹nxa²ha¹nha²wa². Ĩ³ka³lih¹nxa²ha¹ju³ta² ten³khaix1sa³nha²wa². Nxe³kxai²nãn²tu̱³ ĩ³ka³li¹ti³san¹tu¹wa².  
\v 5 Txa²wã¹sũ̱³na² wãn³txa² kxan²ti³ sa²yxo²we¹tin¹ju³tai³tã² ĩ²nxa²ha¹wa². A²wi¹lhĩ¹na² wxa²hã̱i³na² Lo³i²ta³ka³lxa² yxo²ĩ²i² wxa²hã³ka³na² Eu³ni²sa³ka³lxa² yxo²ĩ²i² yah³lxi³te²sin¹yu²hẽ³la². Te²yã¹nxe³sxã³ wxãi²kxai³ yxo²ĩ²khai¹nxũ³ni¹lxa².  
\v 6 Kxã³nhxĩ¹nai³kxai³ txa²hxi²ka² wxa²ne³hẽh¹nxa²ha¹tai¹ti²tu³wa². Nxe³nxa²ha¹te³nah¹lxi¹: 
\p — Txa²wã¹sũ̱³na² ã³nhxi²ka¹txa²ju³ta² hĩ¹na² ã³si³wxe²na³li¹. Nxa²ha¹tai¹ti²tu³wa². Nxẽn¹jut3su² Txa²wã¹sũ̱³na² ĩ³hxi²ka¹txa²ju³ta² ain³kxi²xi²khai¹nxe³sẽ¹la². Nxĩn¹kxai²nãn²tu̱³ ĩ³nxũ²kwa̱i³lxũ¹txi³nha¹sẽ¹la².  
\v 7 Txa²wã¹sũ̱³na² Yãu³ka³jxah¹la² nxũ²kwa̱i³yxau³nẽ³na³la². Nxe³ha²kxai³ a²nũ²a² yuh³lxain¹ki̱³ju³ta² yũ²nxa³wa². Te²yã¹nxe³sxã³ ĩ³nũ̱³kxũn³txi³nẽ³na²hẽ³la². A²nũ²a² yxo²ha³kxa¹ a³lxi²wa²so³tẽ³na²hẽ³la². Wi¹la̱in³nha²ti³hit1sain¹na²hẽ³la². 
\p  
\v 8 Nxe³ha²kxai³ Je³su²jah³lai²na² wãn³txa² ĩ³yãu²lxi²txa³hẽ¹la². Te²yã¹nxe³sxã³ sxi²ha² kan²thĩ³na² ũ³tĩ¹kxi²sain¹tai¹ti²tu³wa², Je³su²jah³la² wãn³txa² ĩ³yau¹ũ³hai¹na¹ha²kxai³la². A²nxe³jut3su² ĩ³yãu²lxi²sa²nũn³txa³hẽ¹la². Hãi¹sxã³ ĩ³ya³lo³ti¹sẽ¹la². Nxẽn¹kxai²nãn²tu̱³ Je³su² Kris²tu³jah¹la² wãn³txa² ĩ³yau¹ũ³ai¹nĩn¹tãu³a² khãuh³nxe³sain¹kxa² yã¹nxe² khãuh³nxe³nxain¹kxan²ti³ Txa²wã¹sũ̱³na² hi²sen³su² ĩ³nũ̱³kxũn³txi³nxa²tu¹wa².  
\v 9 A²nxe³jah¹lain²txi³ kxã³nhxĩ¹nai³tã³ txa²wã¹ẽ¹nãu³ai²na² sa²wa²sut1sa²kxai³ ĩ³kaix1tũ³so¹nẽ³lai¹nha²kxai³ nxe³nẽ³lain¹te³nai¹ti²tu³wa², wi¹lhin¹ki̱³sxa³kxan²ti³na². Nũh¹ĩ²sxã³ o²la³kxi²nẽ³nu²hẽ³la². Nxe³sxã³ a³lxi²nẽ³ju³tai²li² wã²nã³ũ¹hi² thãi³ti³la²sxã³ wi¹lĩ²nẽ³lain¹ju³ta² wã²nã³ũ¹hi² nxe³te³lhxã³ nxe³nẽ³lain¹nu²hẽ³la². Nxe³ju³tai²li² txa²wã¹ha³lo²a² yũ²nxa³hĩ¹nu¹tai²kxai³ kãi³ju³ta³nũ³a² a³la³kxi²sxã³ ã²la² nũh¹ĩ²ta¹hxai²hẽ¹la².  
\v 10 Jã¹nxe³ju³kxai³lu² Je³su² Kris²tu³jah¹la² txa²wã¹ẽ¹nãu³a² sa²hau³ko³tẽ³jah¹la² wxã³tai¹ti²tu³wa². Wxã³nũ²la² ya³lu²kxi²nẽ³na²hẽ³la². Ya³lu²kxi²nẽ³lhĩ¹nãn¹te²tu̱³ ya³lu²kxi²ki̱³kxai²nãn²tu̱³ yuh³lxi³nẽ³lxa³lho³la². Je³su²jah³la² ka³te̱n³su² yxau²sa²tẽ³sih¹nẽ³ju³ta² e³lxah²lxi³ ĩ³tih³nxe³nẽ³na²hẽ³la². 
\p  
\v 11 Nxa²ha¹te¹ Je³su² Kris²tu³jah¹la²kxai³lu² ĩ²sxã³ ĩ³so¹sain¹na²hẽ³la². 
\p — Sũ̱³na² wãn³txa² u¹lxa³nãu³a¹ ai³sxã³ ĩ³hen³txi³txai¹nhẽ³li¹. Kwa³na³nxa²ha¹jau³xai²na² ĩ³hen³txi³txai¹nhẽ³li¹. Wãn³txa² wa³le̱³jau³xa² ĩ³tih³nxe³txai¹nhẽ³li¹. Nxe³sain¹na²hẽ³la².  
\v 12 Nxe³na¹jut3su² khãuh³lxa³txi³sa³nha²wa². Nxe³sa³kxan²ti³ ãu²li²sa²nxa³nha²wa². Je³su² Kris²tu³jah¹la² yxo²ĩ²a¹jah¹la² ĩ²te²sa¹wa². Wa³ka³li³yu³ta² ũ³hũ¹sai¹nha²kxai³ ĩ³hxi²kat1sain¹tu¹wa². Nxe³sai¹nhĩ¹nãn¹te²tu̱³ ã³na¹sai¹nxa³lho³la². Je³su²jah³la² ã³wa̱³li²sxã³ a³ka³nxi²nxa³tãu³a² ã³na¹sai¹nxa³lho³la².  
\v 13 Wãn³txai²li² ya²la³tu̱³ jau³xai²li² ĩ³tih³nxe³nxa²ha¹jau³xai²li² ain³so¹sẽ¹la². Ĩ³tih³nxe³nxa²ha¹kxa² yã¹nxe³sẽ¹la². A²nũ²a² yxo²ha³kxa¹ a³lxi¹tai¹nhẽ³la². Je³su² Kris²tu³jah¹la² yxo²ĩ²sxã³ yxau²xai³ki̱³sa²kxai³ ju¹tai²li² ũ³hũ¹nẽ³lain¹tai¹ti²tu³wa².  
\v 14 Txa²wã¹sũ̱³na² Yãu³ka³jxah¹la² ĩ³hxi²ka¹txa²ju³ta² ĩ²khai¹nxe³sẽ¹la². Sa²yxo²ã³txa³hẽ¹la². 
\p  
\v 15 Nxe³nxa²ha¹te¹ a²nũ²a²nãu³xa² A²si³a³ko³xan¹tũ̱³ka̱³txa² yxo²ha³kxa¹ sa²yxo²ã³sain¹na²hẽ³la². Fi³je²lah³la² Her³mo²je³ne³sah³la² te²yã¹nxe² sa²yxo²ã³sain¹na²hẽ³la².  
\v 16 Yxãn¹ta¹ O³ne³si²fo³ro³jah¹la² hai³txi³ ti³he¹xai¹nxa³wa². Nxe³yãn¹ta¹ kwa³thi³la² sa²hxi²ta̱i³nha²sxã³ sxa³na¹kxan²ti³ ãu²li²sai¹nxa³hẽ³la². Ĩ³nxũ²kwa̱i³lxũ¹txi³sain¹to³nha²hẽ³la². Nxe³ha²kxai³ sxi²ha² yxau³tũ̱³ka̱³txa² a²yxo²ha³kxa¹ Txa²wã¹sũ̱³na² thãi³ti³la² wi¹lĩ²ain¹ju³ta² ten³sa³nha²wa².  
\v 17 A²nxe³jah¹la² Ro²ma²thĩ³na² ã³wi¹lhĩ¹nãn¹te²tu̱³ ã³ten³sain¹na²hẽ³la². Ai³lhxã³ ĩ³ha¹txi²sain¹na²hẽ³la².  
\v 18 Te²yã¹nxe³sxã³ E²fe³so³thĩ³na² yxau³nũ³na¹hĩ¹nai³tã² jah¹la²kxai³ kãin² ã³non²ta³kxi²sain¹tai¹ti²tu³wa². Nxe³jut3su² Txa²wã¹hxi²kan¹ta² Si³yxau³jah¹la² a³ka³nxi²tãu³a¹ thãi³ti³la² wi¹lĩ²ain¹ju³ta² ten³sa³nha²wa². 
\c 2  
\s1 Je³su² Kris²tu³jah¹lai²na² wãn³txa² ya³lo³txi³ki̱³jau³su² 
\p  
\v 1 Txa²wẽ³sãi³. Je³su² Kris²tu³jah¹la² ã³nũ²nxi²sxã³ yxau³nĩ¹nha²kxai³ thãi³ti³la² a³lxi¹nxa²ha²kxai³ ĩ³ya³lo³ti¹sẽ¹la².  
\v 2 Wãn³txa² wi¹jau³xa² ĩ³tih³nxe³nxa²ha¹tai¹ti²tu³wa². A²nũ²a² ka³lxa¹te²nãu³xa² ĩ²nẽ³lain¹tai¹ti²tu³wa². A²nxe³jau³xai²na² a²nũ²a² ã̱³xa² ya³nãn³ta³ki²la²sxã³ yxo²ĩ²te²na² ĩ³tih³nxe³txai¹nhẽ³la². Nxe³sxã³ Wain³txi³ o²la³kxin¹kxai²nãn²tu̱³ ãh¹a²nũ²a² ã̱³xa² ĩ³tih³nxe³nyhain¹tu¹wa². 
\p  
\v 3 Nxe³ha²kxai³ kwa³jan³ta² so³ta²to² yã¹nxe³sxã³ khãuh³lxa³txi³nha¹kxan²ti³ Je³su² Kris²tu³jah¹la² wãn³txa² ya³lo³txi¹sẽ¹la².  
\v 4 So³ta²to²jah¹la² yen³kxa² toh³lxi³ta² kwa² o²la³kxi²te²sxa³yu²hẽ³la². Yxãn¹ta¹ a²hxi²kan¹jah³la² a²ten³ju³ta² so¹lxi³ o²la³kxi²te²ju²hẽ³la².  
\v 5 Te²yã¹nxe³jut3su² sa³nxe³la³ki³nãu³xa² sa²kxai³lu² bo²la²nã̱³ka² tẽ³sxã³ kwa²wa³ni̱³lo³nain¹te²jai¹ti²tu³wa². Wain³txi³ wa³ni̱³lo³nain¹kxai²nãn²tu̱³ a²yo³ha² yũ³hĩ̱³nx2na³la². Yxãn¹ta¹ wain³txi³ wa³ni̱³lo³nai¹nxa³kxai²nãn²tu̱³ a²yo³ha² yũ³hĩ̱³nx2nxa³wa².  
\v 6 Te²yã¹nxe³jut3su² hai³sxa² wa³kon³jah¹la² nũ̱³kxũn³txi³ wa³kon³ye²kxai²nãn²tu̱³ kxãn³nãu³a¹ jah¹lai²na² txa²nũ² yain³txa² kãin² so¹hĩ̱³nx2na³la².  
\v 7 Nxe³na¹jut3su² a²si³yxau³tãu³a² ĩ²khai¹nxe³sẽ¹la². Nẽn¹kxai²nãn²tu̱³ Txa²wã¹hxi²kan¹ta² Si³yxau³jah¹la² wain³txi³ ĩ³yau¹ũ³nxa²tu¹wa². 
\p  
\v 8 Nxe³ha²kxai³ Je³su² Kris²tu³jah¹la² ya³lu²sxã³ ka³te̱n³su² ĩ³sa²yxau³xi²jah¹lain²txi³ Ta³vi²yah³lu¹tai²na² a²ne³tah²nãu³su² jah¹lain²txi³ nxe³te²jai¹ti²tu³wa². Ju¹tai²li² wãn³txa² wi¹jau³xa² ĩ³hen³txai¹na¹jau³xai²la¹wa². Txa²wã¹sũ̱³na² kwa³na³sain¹jau³xai²la¹wa².  
\v 9 Nxe³sain¹ju³tan¹te²kxa³ya̱³lhu² hĩ¹na² sxi²ha² kan²thĩ³na² ũ³tĩ̱¹kxi²sain¹thĩ³na² ko̱³nxe³thin¹te²a² ũ³tĩ̱¹kxi²sa²thĩ³na² khãuhx3nha²sxã³ yxau³na¹wa². Sain¹kxan²ti³ Txa²wã¹sũ̱³na² wãn³txa² hxi²kan¹ti³ ũ³tĩ̱¹ki²wxe³kxi³te²sxa³yu²hẽ³la².  
\v 10 Nxe³na¹jut3su² ũ³tĩ̱¹kxi²nha²sxã³ yxau³na¹kxan²ti³ ya³lo³txi²sa³nha²wa². A²nũ²a² ã̱³xa² Txa²wã¹sũ̱³na² ĩ³sxã³ ã³yũ³so¹te²na² Je³su² Kris²tu³jah¹lai²na² wãn³txa² wi¹jau³xa² sa²yxo²we¹tain¹kxai²nãn²tu̱³ kxãn³nãu³a¹ Txa²wã¹sũ̱³na² yxau³ju³ta² wi¹lhin¹sxã³ yxau²xai³lain¹nũn³tu¹wa². Nxe³ju³tai²li² ten³khaix1sa³nha²wa², khãuhx3sa³kxan²ti³na². 
\q1  
\v 11 Jã¹nxe³jut3su² Je³su²jah³lai²na² wãn³txa² yxo²ĩ²ki̱³ju³tan¹te²kxa³ya̱³lhu² khãuhx3nha²sxã³ ya³lu²ki̱³kxan²ti³ kxãn³nãu³a¹ Txa²wã¹sũ̱³na² hxi²ka² ka³te̱n³su² yxau²xai³la³kxi²ki̱³tu¹wa². Wãn³txi³khai³xai²la¹wa². 
\q1  
\v 12 Khãuhx3nha²ki³jut3su² e³nxũ³ki̱³kxai²nãn²tu̱³ kxãn³nãu³a¹ Txa²wã¹sũ̱³nu²su² te²kxai³lu² a³ka³nxi²sxã³ a³wa̱³li²hĩ¹na¹ a²nũ²a² a²yxo²ha³kxa¹ a²hxi²kan¹ta² si³yxau³tãu³lo³tain¹tu¹wa². Nxe³hĩ¹na¹ ã³si³tẽ³kxi²ki̱³sxã³ hxi²kan¹ti³hi¹tẽ³nũn³tu¹wa². 
\q1 Yxãn¹ta¹ hĩ¹na² sa²yxo²ã³ain¹ki̱³kxai²nãn²tu̱³ kxãn³nãu³a¹ sa²yxo²ã³nẽ³nũn³tu¹wa². 
\q1  
\v 13 Yxo²ĩ²nha²ki̱³ju³ta² hxi²tha³nha²sxã³ sa²yxo²ã³nha²ki̱³kxan²ti³ jah¹lai²li² hai³txi³ hxi²tha³nha²sxã³ sa²yxo²ã³nha²jah¹lo³sxa³wa². 
\q1 Wã²nxũ̱h¹ en²nha²jah¹lo²sxa³wa². 
\m Jau¹xai²na² yxo²ha³kxa¹ ya²la³tu̱³jau³xai²la¹wa². 
\s1 Txa²wã¹sũ̱³na² ĩ³ãu²lxin²kxa²ya̱n³txi³su² wi¹wa³kon³ki̱³jau³su² 
\p  
\v 14 Jã¹nxe³jut3su² jau¹xai²na² yxo²ha³kxa¹ ĩ³hen³txi³txai¹nhẽ³la². Txa²wã¹sũ̱³na² hi²sen³kxai³lu² ne³wã²na³ai¹nha³ta²wa². Nxai¹nĩn¹te³nah¹lxi¹: 
\p — Txa²wã¹sũ̱³na² Si³yxau³jah¹la² ĩ²nẽ³na³li¹. Nẽ³lha²kxai³ wãn³txa² toh³lxi³jau³xa² ĩ³ye³ĩ³yi²lhon¹ta³kxi²nyhu¹ah³lxi³txa³hẽ¹li¹, yxo²ĩ²yah³lxin¹ju³ta² ã³na¹yah³lxin¹kxa²ya̱n³ti³su¹. Nxẽn¹jau³su² nxe³txai¹nhẽ³la².  
\v 15 Jã¹nxe³sxã³ wa³ka³li³yu³ta² wi¹lo²la³kxi²jah¹la² yã¹nxe² Txa²wã¹sũ̱³na² wãn³txa² ya²la³lyau³xan²tu̱³ wain³txi³ ĩ³yau¹ũ³txai¹nhẽ³la². Wi¹lo²la³kxin¹kxai²nãn²tu̱³ Txa²wã¹sũ̱³na² yen³nãu³a² ĩ³ãu²lxin¹ju³ta² yũ³nxa²hĩ̱³nx2nxa³wa².  
\v 16 Jã¹nxe³sxã³ wãn³txa² Txa²wã¹sũ̱³na² ko̱³nxe³ti³ e³kxi²jau³xa² ã³na¹i² kwa²toh³lxi³jau³xa² ã³na¹i² nxe³sẽ¹la². Nxe³jau³jau¹xai²na² e³kxi²sxã³ kãi³jah¹la² sa²kxai³lu² ã²la² ko̱³nxe³thin¹sxã³ o²la³kxi²hĩ̱³nx2na³la². Nxe³sxã³ Txa²wã¹sũ̱³na² wãn³txa² sa²yxo²ã³nũ³nhĩ̱³nx2na³la², ko̱³nxe³thin¹jah¹la²sa³.  
\v 17 Jã¹nxe³jut3su² txa²wã¹sĩ̱³na² jũ¹nxĩ³ton³sxã³ ko̱³nxe³ti³ a̱un³kxai²nãn²tu̱³ hĩ³ne³ki³nũ̱³xa² wxa²to̱¹la³kxi²nha²ki̱³sxa³kxai²nãn²tu̱³ ye³jen¹na² kãin² ko̱³nxe³ton³nẽ³lhĩ̱³nx2na³la². Jã¹nxe³jau³su² te²yã¹nxe³sxã³ kãin² ko̱³to³nhĩ̱³nx2na³la². Hi³me³ne²yah³la² Fi³le²to²jah³la² nxe²kãi³ain¹te²ju²hẽ³la².  
\v 18 Ya²la³lyau³xa² ã³na¹ain¹sxã³ ĩ³ki³ha¹kxain¹te³nah¹lxi¹: 
\p — Je³su²jah³la² sa²so¹kxi²nẽ³ju³ta² ã²la² ha³nãu³hi²nẽ³nhai¹. Ain¹jau³su² ha²kxai³ a²nũ²a² nũ̱³kxũn³ti³ yxo²ĩ²xa³te²na² hi²sen³su² Je³su²jah³lai²na² wãn³txa² wã̱³tain¹na²hẽ³la².  
\v 19 Nxa²ha¹te¹ yxo²ĩ²ki̱³ju³ta² a²si³yxau³ju³ta² ya²la³lai²la¹wa². Wxi²kan¹txi³ kan²khai¹nxe²na³la². Nxe³sxã³ Txa²wã¹sũ̱³na² e³kxi²nẽ³te³nah¹lxi¹: 
\p — Yxo²ĩ²sain¹tũ̱³ka̱³txa² yxo²ha³kxa¹ ĩ²xai³te²sa¹wi¹. Te²yã¹nxũn³jau³xa²sa¹: 
\p — Txa²wã¹sũ̱³na² ĩ³lxa² yxo²ĩ²so¹te²a² ko̱³nxa³thin¹ju³ta² ã³na¹tai¹lxi¹. Nxe³sain¹na²hẽ³la². 
\p  
\v 20 Te²yã¹nxe³jut3su² sxi²ha² kãin²thĩ³na² yen³kxih³khaix1te²a² sxi²ha² yen³kxa² wi¹khaix1tẽ³na² yũ³hxai²tai¹ti²tu³wa². Ou²ro²tẽ³na² yũ² pra²ta²tẽ³na² yũ² nhxai²tai¹ti²tu³wa². Te²yã¹nxe³sxã³ kũ³we²ki²la² wi¹lxa³tẽ³na² yũ³nũ³nhxai²tai¹ti²tu³wa². Hi³sa³ka³tẽ¹na² yũ² kxĩh³nũ̱³xẽ¹na² yũ² nhxai²tai¹ti²tu³wa². Te²yã¹nxe³sxã³ yen³kxa² wi¹te²a² ũ³ha¹tẽ³na² yũ² yen³kxa² ko̱³nxe³te²a² ũ³ha¹tẽ³na² yũ² nhxai²tai¹ti²tu³wa².  
\v 21 Jã¹nxe³jut3su² jau¹xai²li² ko̱³nxe³jau³xa² ã³na¹ki̱³kxai²nãn²tu̱³ txa²wã¹ẽ¹nãu³ai²na² wi¹lhxan³ka²ti³nha²ki̱³kxai²nãn²tu̱³ yen³kxa² wi¹tẽ³hũ̱³nẽ³lhĩ̱³nx2na³la². Tẽ¹nai²li² hxan³kxi²tẽn³su² ha²kxai³ Txa²wã¹hxi²kan¹ta² Si³yxau³jah¹la² a²wa³ka³li³yu³khai³xa² wi¹ju³ta³nũ³a² o²la³kxi²ki̱³si¹jau³su² sa²hau³ko³kxi²nẽ³lai¹nhĩ̱³nx2na³la².  
\v 22 Nxa²ha¹te¹ a²nũ²a² sa³nxe³la³ki³su² jah¹la² ko̱³nxe³ti³ kãi³ju³ta² yũ³te²ju²hẽ³la². Jã¹nxe³sxã³ kãi³txa³hẽ¹la². Ju¹tai²li² ã³na¹txa²hẽ³la². Hãi¹sxã³ wi¹ju³ta² so¹lxi³ nũ̱³kxũn³txi³ kãi³txa²hẽ³la². Wain³txi³ o²la³kxi¹sẽ¹la². Yxo²ĩ²khai¹nxe³sẽ¹la². A²nũ²a² yxo²ha³kxa¹ a³lxi²khai¹nxe³txai¹nhẽ³la². Nxe³sxã³ hãu²no³txain¹sxã³ yxau³jah³lxi³hẽ¹la². Nxe³ju³tai²na² yxo²ha³kxa¹ a²ẽ¹nãu³ai²na² wi¹lhin¹sxã³ Txa²wã¹sũ̱³na² wãn³txa² sa²yxo²we¹te²a² nxe² kãi³ai¹nhxai²na²hẽ³la². Jã¹nxe³sẽ¹la².  
\v 23-24 Yxãn¹ta¹ wãn³txa² wa³lxe³jau³xa² hxi²kan¹ti³ ã³ne³wxe²nxa³jau³xa² kwa²ĩ³ye³ki²nyhu¹txa³hẽ¹la², ĩ³xa̱n³ta³kxi²nyhu¹in¹kxa²ya̱n³txi³sa². A²nũ²a² kwa²toh³lxi³te²a² kwa²he¹ki²te³lhxã³ ĩ³ye³ĩ³yi²lhon¹ta³kxi²te²ju²hẽ³la². Yxãn¹ta¹ Txa²wã¹sũ̱³na² sa³wit3su² ti³hex1te²sxa³yu²hẽ³la². A²nũ²a² ã̱³xa² thãi³ti³la² wi¹lhin¹sxã³ ĩ²ũh¹jah¹lai²la¹wa². Wãn³txa² wi¹jau³xa² a²nũ²a² ya³nãn³ta³ki²la²sxã³ wain³txi³ ai²nxa³te²a² hxi²kan¹ti³ ĩ³tih³nxe³hĩ̱³nx2na³la².  
\v 25 Nxe³sxã³ wãn³txa² ya²la³lyau³xa² ã³ne³wxe²nxa³te²a² yxo²xũ̱n³txi³ ĩ³ye³kxi¹nxain¹kxan²ti³ thãi³ti³la²sxã³ Txa²wã¹sũ̱³na² wãn³txa² ĩ³yau¹ũ³txai¹nhẽ³la². Nxai¹nĩn¹kxai²nãn²tu̱³ a²ko̱³nxain¹ju³ta² ã³na¹ain¹ka³tu̱³ Txa²wã¹sũ̱³na² wãn³txa² yxo²ĩ²si¹hai¹nĩn¹jau³su² nxe³te³lhxã³ nxe³txai¹nhẽ³la².  
\v 26 Nxain¹kxai²nãn²tu̱³ Sa³ta³na²jah¹la² tĩh³na² ã³ai¹nhĩ̱³nx2na³la². Nxain¹kxai²nãn²tu̱³ sa²yxo²ã³sain¹te²a² ĩ²ã³nha²sxã³ wi¹lhin¹sxã³ ã³wa̱³li²hĩ̱³nx2na³la², Txa²wã¹sũ̱³na² wãn³txa² sa²yxo²we¹te³lha³ka². 
\c 3  
\s1 Ko̱³nxe³ti³ kãi³te²a² wxã³ju³ta²nũ³an¹jau³su² 
\p  
\v 1 Nxa²ha¹te¹ Je³su² Kris²tu³jah¹la² wa̱³li²ju³ta³nũ³a² ya̱u³so³nhĩ¹na¹ yxo²ĩ²tũ̱³ka̱³txa² khãuh³lxa³ti³khai¹xain¹tu¹wa², ko̱³nxe³ti³ kãi³ain¹te²a² ka³lxa¹ha²kxai³la². Ju¹tai²li² ne³wãn²txa³hẽ¹la².  
\v 2 Nxe³hĩ¹na² a²nũ²khai³xa² so¹lxi³ a³lxi²nha² yen³kxa² so¹lxi³ yxo²kwa̱i³ni² nxe³ain¹tu¹wa². Yxo²ha³txe³ti³ ĩ³ye³kxi²nha² ĩ³kãin²ti³nha²sxã³ ĩ³ye³i² Txa²wã¹sũ̱³na² ĩ³wai³ka³si³nai¹ni² a²wĩ³na² a²hã³ka³na² nxe³ya³sxã³ sa²yxo²ã³ai¹ni² a²nũ²a² ã³non²ta³kxi²kxan²ti³ wi¹lxon³kai¹nxa³i² a²ẽ¹nãu³ai²na² wi¹lhin¹te²lo³ju³ta² te³nxa³i² nxe³ain¹tu¹wa².  
\v 3 Te²yã¹nxe³sxã³ a²nũ²a² ã̱³xa² ĩ³ãin²ta³ki²nyhu¹jau³la³ yũ²nxa³i² a²nũ²a² ã̱³xa² ko̱³nxe³ti³ o²la³kxi²kxai²nãn²tu̱³ ne³wã²na³ai¹nxa³i² ko̱³nxe³ti³ hãi³a² ĩ³he³son³kxi²nyhu¹i² ĩ²li³ju³ta² ko̱³nxe³thin¹sxã³ o²la³kxi² a²nũ²a² ã̱³xa² kãin²khãuh³lxa³txai¹ni² wi¹lhin¹sxã³ o²la³kxi²ju³ta² yxo²kwĩn¹kxi² nxe³ai¹nhĩ̱³nx2na³la².  
\v 4 Te²yã¹nxe³sxã³ a²ya̱³la²te²a² khãuh³lxa³tai¹ni² ĩ³ne³wa³nũ³ta³kxi²sxã³ kãi³i² a²ẽ¹nãu³ai²na² yxo²kãin²e³i² kwa² wa³ni̱³lon³ju³ta² so¹lxi³ te³nha²kxai³ Txa²wã¹sũ̱³na² wãn³txa² te³nxa³i² nxe³ai¹nhĩ̱³nx2na³la².  
\v 5 Nxe³sxã³ Txa²wã¹sũ̱³na² wãn³txa² kwa² sa²yxo²we¹kxan²ti³ a²ẽ¹nãu³ai²na² Txa²wã¹sũ̱³na² nũ̱³kxũn³ju³ta² yxo²ĩ²ai¹nxa³wa². Nxe³jah¹lo²su² kxai²nãn²tu̱³ ã³sxã³ ã³waix3txai¹nhẽ³la².  
\v 6 A²nxe² kãi³te²su² te²a² he³la³kxi³su² te²na² sa²kxai³lu² a²nũ²a² ã̱³xa² sxi²ha² ã³wih¹te²ju²hẽ³la². ówih¹kxai²nãn²tu̱³ txu¹ha² yxau²xai³ta¹ka³lxa² ã³ke³tũ¹ain¹sxã³ wai³nxa³jau³su² ĩ³tih³nxe³te²ju²hẽ³la². A²nxe³ta¹ka³lxa² kxã³nhxĩ¹nai³tã² ko̱³nxe³ti³ kãi³i² kwa² a²ten³jau³su² kãi³i² nxe³te²ju²hẽ³la².  
\v 7 Wãn³txa² tah²yau³xa² wa³nũt3jau³xa² so¹lxi³ ten³kxan²ti³ hai³txi³ a³la³kxi²ti³he¹nxai¹nxa³wa². Ya²la³lyau³xa² a³ti²ti³he¹nxai¹nxa³wa².  
\v 8 Jã¹nxe³sxã³ kxã³nhxĩ¹nu¹tai²kxai³ Ja³ne²sah³lu¹tai²na² Jã³pre²sah³lu¹tai²na² nxe³sxã³ ya²la³lyau³xa² te³nain¹ta¹hxai²nxa³ti³ai¹ti²tu³wa². Nxai¹nha²kxai³ Moi³se²ah³lu¹tai²na² wãn³txa² sa²yxo²ã³ta¹hxai²ti³ai¹ti²tu³wa². A²nxe³jah¹lai²li² te²yã¹nxe³ kãi³ain¹te²la¹wa². Ya²la³lyau³xa² te³nai¹nxa³i² a²hoh³lxi³su² ki³ju³ta² yũ³ai¹nxa³i² nxe³ain¹na³la². Nxe³ain¹kxa²yu³su² Txa²wã¹sũ̱³na² wãn³txa² yxo²ĩ²ki³lxo³xain¹na³la². Nxe³ain¹kxan²ti³ kãin²ki³ha³nain¹na³la².  
\v 9 A²nxe³te²na² ko̱³nxe³ti³ kãi³ain¹ju³tai²li² ye³je¹na² a²nũ²a² yxo²ha³kxa¹ e³lai²na¹ ĩ²ain¹tu¹wa². Ja³ne²sah³lu¹tai²na² Jã³pre²sah³lu¹tai²na² nxe³sxã³ a²ko̱³nxe³ti³ kãi³ain¹ju³ta² e³lai²na¹ ĩ²ain¹ta¹hxai²ti³ai¹ti²tu³wa². Te²u¹jã¹xain¹tu¹wa². 
\s1 Pau²lah³lai²na² wãn³txa² ĩ³yau¹ũ³jau³xa² ne³ki³son³jau³su² 
\p  
\v 10 Nxai¹nha²kxai³ txai²na² sa²kxai³lu² wãn³txa² ĩ³tih³nxai¹na¹ju³ta² ĩ²i² wi¹kãi³a¹ju³ta² ĩ²san¹tai¹ti²tu³wa². A̱in³nha¹jau³xa² yxo²ha³kxa¹ ĩ²i² Je³su²jah³lai²na² wãn³txa² yxo²ĩ²a¹ju³ta² ĩ²i² a²nũ²a² wa³su³txi³ a³la³kxai¹nxa³kxan²ti³ ya³nãn³ta³ki²la²sxã³ ĩ³tih³nxai¹na¹ju³ta² ĩ²i² a²nũ²a² a³lxai¹na¹ju³ta² ĩ²i² a²nũ²a² khãuh³lxa³txi³sain¹kxan²ti³ ã³na¹nxa³sxã³ o²la³kxi²na¹ju³ta² ĩ²i² nxe³na¹ju³ta² yxo²ha³kxa¹ ĩ²san¹tai¹ti²tu³wa².  
\v 11 Te²yã¹nxe³sxã³ kxã³nhxĩ¹nai³tã² Ãn³ti³o³ki²a²thĩ³na² I³ko²ni²a²thĩ³na² Lis²tra²thĩ³na² nxe³sxã³ ã³nxai³na¹hĩ¹nai³tã² ĩ³xa̱n³ta³kxi²khaix1sain¹tai¹ti²tu³wa². Khãuh³lxa³txi³khaix1sai¹nhẽ¹la². Nxe³sain¹kxan²ti³ Txa²wã¹sũ̱³na² hi²sen³su² ã³non²ta³ki²sa³hẽ¹la². Ju¹tai²li² ĩ²san¹tai¹ti²tu³wa².  
\v 12 Jã¹nxe³jut3su² a²nũ²a² ĩ²li³te²su² te²a² Je³su² Kris²tu³jah¹lai²na² wãn³txa² sa²yxo²we¹ti³ten³kxai²nãn²tu̱³ ĩ³xa̱n³ta³kxain¹ju³ta² yũ² khãuh³lxa³thi¹nain¹ju³ta² yũ² nxe³ain¹tu¹wa².  
\v 13 Nxe³sxã³ a²nũ²a² ko̱³nxe³ti³ kãi³te²a² ĩ³ki³ha¹kxi² wã³nxĩn¹ki³lxo³nxe² nxain¹tu¹wa². A²nũ²a² ã³ke³tũ¹ain¹tu¹wa². Yxãn¹ta¹ a²nũ²a² ã̱³xa² ã³wa̱³li²sxã³ ã³ke³tũ¹nyhain¹nũn³tu¹wa². Hĩ¹na² jũ¹nxe² kãi³ain¹na³la². Ye³jen¹nãu³a² ã²la² kãi²non³sxã³ ko̱³nxe³ti³ kãi³ain¹tu¹wa².  
\v 14 Nxain¹kxan²ti³ wxãi²na² sa²kxai³lu² wãn³txa² ya²la³lyau³xa² ĩ³tih³nxe³nxa²sĩ¹na¹jau³xai³tã² yxo²ĩ²so¹sẽ¹la². Sa²yxo²ã³txa³hẽ¹la². Ya²la³lyau³xa² so¹lxi³ ĩ³tih³nxe³nxa²ha¹ju³ta² wi¹la³la³kxi¹lxa².  
\v 15 Wxa²wẽ³sĩ¹nai³tã² Txa²wã¹sũ̱³na² ũ³wha²li¹txã³nxa² ĩ²in¹tai¹ti²tu³wa². Nxe³jau³xai²li² yxo²ĩ²ĩ¹nha²kxai³ wxa²ẽ¹nãu³ai²na² sa²wa²sut1sxã³ wxa²ko̱³nxe³ju³ta² sa²hxan³ka³ti³nxa²tai¹ti²tu³wa², Txa²wã¹sũ̱³na²sa³. Nxe³hĩ¹nãn¹te²tu̱³ Je³su²jah³la² wãn³txa² kan²txi³ sa²yxo²we¹tin¹tai¹ti²tu³wa².  
\v 16 Jã¹nxe³sxã³ kxã³nhxĩ¹nai³tã² a²nũ²a²nãu³u¹tai²na² Txa²wã¹sũ̱³na² wãn³txa² ain³kxi²sxã³ ũ³wha²li¹lain¹ta¹hxai²ti³ai¹ti²tu³wa². Nxe³jau³xa² yxo²ha³kxa¹ wã³ko³nxa³te²tu̱³ Txa²wã¹sũ̱³na² wãn³txai²la¹wa². Nxe³sxã³ jau³jau¹xai²na² tẽ³sxã³ a²nũ²a² ĩ³tih³nxe³i² a²nũ²a² ko̱³nxe³ju³ta² wã²nã³ũ¹hi² ko̱³nxe³ti³ kãi³ju³ta² ĩ³wai³kxa²so¹sxã³ wain³txi³ kãi³ju³ta² ĩ³yau¹ũ³hi² nxe³te³lhxã³ kxi³jau³xai²la¹wa².  
\v 17 Nxe³jau³xai²li² sa²yxo²we¹kxai²nãn²tu̱³ hxi²kan¹ti³ wain³txi³ o²la³kxi²hĩ̱³nx2na³la². Wi¹lo²la³kxi²nũ¹hain¹te³lhxã³ sa²hau³ko³kxi²nẽ³lhĩ̱³nx2na³la². 
\c 4  
\p  
\v 1 Txa²wã¹sũ̱³na² wãn³txa² ĩ³tih³nxe³txai¹nhẽ³la². Wxi²kan¹sxã³ ĩ³ye³kxi¹nxa²ha¹wa². Txa²wã¹sũ̱³na² Si³yxau³jah¹lai²na² Je³su²jah³lai²na² nxe³ya³sxã³ ĩ²yxau³kxi²nẽ³lain¹na³la². Hĩ¹na² ye³jen¹na² Je³su² Kris²tu³jah¹la² wa̱³li²tu¹wa². Wa̱³li²tãu³a² a²nũ²a² ka³te̱n³su² ta̱³nxa² ya³lu²te²su² ta̱³nxa² nxe³te²a² yxo²ha³kxa¹ kãi³ain¹kxai³ jã¹nxe² kãi³ain¹kxa² yo³ha² a³ya³tain¹tu¹wa². Wi¹kãi³ain¹kxai²nãn²tu̱³ txa²wã¹ha³lo²a² a²yxo²ha³kxa¹ Hxi²kan¹ta² Si³yxau³tãu³lo³thĩ¹na¹ wi¹la² kãi³in¹kxa² yo³ha² ũ³yho³hi¹nxa²tu¹wa².  
\v 2 Nxe³ha²kxai³ Txa²wã¹sũ̱³na² wãn³txa² wi¹jau³xa² ya³lo³txi²sxã³ a²nũ²a² ĩ³yau¹ũ³tai¹nhẽ³la². Ain³kxi²te³lhxã³ wxã³ain¹kxai²nãn²tu̱³ ĩ³yau¹ũ³tai¹nhẽ³la². Yxãn¹ta¹ nxai¹nxa³kxan²ti³ ã³sxã³ ĩ³yau¹ũ³hain¹txa³hẽ¹la². Ko̱³nxe³ti³ kãi³ain¹kxai²nãn²tu̱³ ĩ³kwa̱i²kxi¹txai¹nhẽ³la². Yxo²ĩ²nxa²sxã³ hxi²tha³nhain¹kxai²nãn²tu̱³ ya³nãn³ta³ki²la²sxã³ ĩ³nxũ²kwa̱i³lxũ¹sxã³ ĩ³yau¹ũ³txai¹nhẽ³la².  
\v 3 Nxe³sxã³ kxãn³nãu³a¹ wãn³txa² ya²la³lyau³xa² te²nai¹nxa³lho³la². Yxãn¹ta¹ wi¹le³ain¹te²a² so¹lxi³ ĩ³wi¹lxon³kxi²jau³xa² so¹lxi³ te³nain¹tu¹wa². Nxe³ain¹te²su² te²an²tu̱³ ã³yã³nũ²kain¹tu¹wa².  
\v 4 A²nxe³te²na² wãn³txa² ain³kxi²ha²kxai³ wãn³txa² ya²la³lyau³xa² sa²yxo²ã³ain¹tu¹wa². Nxe³sxã³ kwa²wãn³txa² toh³lxi³jau³xa² so¹lxi³ ain³kxain¹tu¹wa².  
\v 5 Nxai¹nha²kxai³ wxãi²na² sa²kxai³lu² wain³txi³ o²la³kxi¹sẽ¹la². Khãuh³lxa³txi³nhãn¹kxan²ti³ ya³lo³txi¹sẽ¹la². Txa²wã¹sũ̱³na² wãn³txa² ĩ³yau¹ũ³ai¹nĩn¹ju³ta² so¹lxi³ kãi³txa²hẽ³la². Je³su²jah³la² wãn³txa² a²nũ²a² yxo²ha³kxa¹ ĩ³yau¹ũ³hain¹si¹jau³su² Txa²wã¹sũ̱³na² kwa³na³nxa²tai¹ti²tu³wa². Txa²wã¹sũ̱³na² kwa³na³nxa²jau³xa² yxo²ha³kxa¹ sa²yxo²we¹txa²hẽ³la². 
\p  
\v 6 Nĩ¹nha²kxai³ txai²na² sa²kxai³lu² ya³lu²te³lhxã³ nxa¹wa². Hai³txi³ kxã³non³nxa³lho³la². Je³su²jah³la² wãn³txa² sa²yxo²we¹te²sa¹wa². Nxa¹ha²kxai³ ka³te̱n³su² yxau²xai³la¹ju³ta² sa²so¹kxi²sai¹nha²kxai³ ya³lu²na¹kxan²ti³ hai³txi³ ka³te̱n³sa¹ju³ta² a³lxi²sa²nxa³nha²wa².  
\v 7 Jã¹nxa¹jut3su² Txa²wã¹sũ̱³na² wãn³txa² kwa³na³sain¹jau³xa² a²yxo²ha³kxa¹ nũ̱³kxũn³txi³ sa²yxo²we¹ta¹hẽ³la². Nxe³na¹ha²kxai³ Je³su²jah³lai²na² wãn³txa² wã³ko³nxa³te²tu̱³ a²nũ²a² ĩ³tih³nxai¹na¹hẽ³la².  
\v 8 Kxãn³nãu³a² wain³txi³ o²la³kxi²na¹kxa² yo³ha² yũ³sa³tu¹wa². Txa²wã¹hxi²kan¹ta² Si³yxau³jah¹la² wain³ju³ta² so¹lxi³ kãi³jah¹la² nxe³te² hi²sen³su² ũ³yho³hi²sa³tu¹wa². Te²yã¹nxe³sxã³ Je³su² Kris²tu³jah¹lai²na² a³ka³nxi²ju³ta² wah³nxain¹te²a² yxo²ha³kxa¹ ũ³yho³hain¹nũn³tu¹wa², Kxãn³nãu³a¹sa². 
\s1 Pau²lah³lai²na² ha³ta̱³nxe³jau³su² 
\p  
\v 9 Nxe³na¹jut3su² wa³su³txi³ wxã³sẽ¹la². Kã̱u³txa³hẽ¹la².  
\v 10 Nxa²ha¹te¹ Te³ma²sah³lai¹tã² a²yan³txi³nũ³a² a³lxi²khai¹nxe³ha²kxai³ ã³sa³na²hẽ³la². Nxe³nũ²la² Te³sa³lo²ni³ka²thĩ³na² ã³waix3tã²hẽ³la². Kre³sẽn²jah³lai¹tã² sa²kxai³lu² Ka³la²si²a²ko³xa² ã³waix3txi² Ti²to³jah¹lai¹tã² sa²kxai³lu² Tal³ma²si²a²ko³xa² ã³waix3txi² nxe³sain¹na²hẽ³la².  
\v 11 Lu²kah³la² so¹lxi³ yxau³ya³sa²na³la². Nxe³ha²kxai³ wxãn¹tãu³a¹ Mar²ko³jah³la² tẽ³sxã³ wxã³sẽ¹la². A²nxe³jah¹la² txa²wa³ka³li³yu³ta² ã³nĩ²ũ³sa²ju³ta² yũ²na³la².  
\v 12 Nxa²ha¹te¹ ti²ki³ko³ah³la² sa²kxai³lu² E²fe³so³thĩ³na² ĩ³sa²si¹hã³ai¹na¹hẽ³la².  
\v 13 Jã¹nxa¹jut3su² Tro³a²te²thĩ³na² Kar²po³jah¹lai²na² sxi²ha² yxau³na¹hĩ¹nai³tã² txa²wã²la³ka³lo³a² ã³a¹ka³lo³nai¹tã² sa²so¹nha²kxai³ txa²ha³te̱h³nxã³nxa² sa²so¹nha²kxai³ ũ³wha²li¹la¹txã³nxa² sa²so¹nha²kxai³ nxe³sxã³ tẽ³sxã³ wxã³sẽ¹la². 
\p  
\v 14 A³le³syãn²trah³la² kwa³thi³la² o²la³kxi²jah¹la² ko̱³nxe³ti³ o²la³kxi²sain¹na²hẽ³la². Nxe³sain¹ju³ta² Txa²wã¹sũ̱³na² hxi²ka² ũ³yho³hi²tu¹wa².  
\v 15 Jã¹nxe³jut3su² wi¹lĩ²khai¹nxe³txai¹nhẽ³la². Txa²wã¹wãn³txa² ĩ³yau¹ũ³ain¹ki̱³jau³xai²na² yxo²kwĩn¹kxi²ha²kxai³ ĩ³hxi²ka¹te³lxa³ju³ta² o²la³kxi²khaix1sĩn¹na²hẽ³la². 
\p  
\v 16 Nxa²ha¹te¹ Ro³ma²no²ko³xa² a²hxi²kan¹jah¹la² ne³nxẽ³na² a²wi¹lhĩ¹na² txa²wa³ka³li³yu³ta² ĩ³yau¹ũ³hai¹na¹hĩ¹nai³tã² a²nũ²la³ hai³txi³ ĩ³yxo²nũn¹sai¹nxa³hẽ³la². A²yxo²ha³kxa¹ ã³sxã³ ã³wait3san³sain¹na²hẽ³la². Nxe³sa²te²sain¹kxan²ti³ Txa²wã¹sũ̱³na² ne³wã²na³ain¹ju³ta² ten³sa³nha²wa².  
\v 17 Sain¹ta¹ Txa²wã¹sũ̱³na² hi²sen³su² ã³non²ta³ki²sxã³ ã³nũ̱³kxũn³tot3sai¹nhẽ¹la². Sai¹nha²kxai³ Txa²wã¹sũ̱³na² wãn³txa² yxo²ha³kxa¹ ĩ³yau¹ũ³hai¹na¹hẽ³la². Ju³te²a² nũ̱³ka̱³txi³sxa³te²a² yxo²ha³kxa¹ ain³kxi²sain¹na²hẽ³la². Nxe³sain¹jut3su² ĩ³ya²lut1sain¹ju³ta² ã³non²ta³kxi²sain¹na²hẽ³la².  
\v 18 Jã¹nxa¹jut3su² hĩ¹na² Txa²wã¹sũ̱³na² ã³non²ta³ki¹xi²sain¹tu¹wa², ko̱³nxe³ti³ o²la³kxi²sain¹tũ̱³ka̱³txa²sa². Sain¹kxai²nãn²tu̱³ Txa²wã¹sũ̱³na² yxau³ju³ta² sa²so¹sxã³ ũ³whxe³sain¹tu¹wa². Jã¹nxe³jut3su² Txa²wã¹sũ̱³na² e³kxi²ya³sah¹lxi³wxa². Nxe²e³kxi²ki̱³te³nah¹lxi¹: 
\p — Wxãi²na² so¹lxi³ kãin²khai¹nxi¹lxi¹. òla² kãin²jah¹lo²su² yũ²nxa³wi¹. Nxe³ki̱³jau³su² e³kxi²ki̱³sxai²na²hẽ³la². Jãx1ki̱³tu¹wa². Te²yã¹nxe³sxã³: 
\p — Jau¹xai²na² wain³khai¹nx2na³li¹. Ya²la³lai²la¹wi¹. Nxe³to³ki̱³tu¹wa². 
\s1 A²nũ²a² ã̱³xa² a²ha³ta̱³nxe³jau³su² 
\p  
\v 19 Jã¹nxe³jut3su² Pri³si²la³ka³lxa² A³kwi²lah³la² nxe³sxã³ txa²ha³ta̱³nxa² ĩ³ye³kxi¹txai¹nhẽ³la². Te²yã¹nxe³sxã³ O³ne³si³fo²rah³la² wẽ³ha³lxi³yu³ta² ĩ³ye³kxi¹txai¹nũ³nhẽ¹la².  
\v 20 E³ras²to³jah³lai¹tã² sa²kxai³lu² Ko³rĩn²to²thĩ³na² ã³ai¹na¹hẽ³la². A³li³xa³hẽ³la². Nxa²ha¹te¹ Tro³fi²mah³lai¹tã² sa²kxai³lu² ĩ³to³nha²kxai³ Mi³le²to²thĩ³na² ã³ai¹na¹hẽ³la².  
\v 21 Jã¹nxe³jut3su² wxãi²na² sa²kxai³lu² kwẽ³ko³nxa³ta̱³lxa¹ ĩ³ya³lo³ti¹sxã³ ã³wxã³sẽ¹la². Nxe³ju³ta²sa¹ Eu³bu²lah³lai¹tã² Pru³tẽn²jah³lai¹tã² Li²no³jah³lai¹tã² Klau²ti³o³jah³lai¹tã² txa²wã¹wã³tã̱³nãu³xa² yxo²ha³kxa¹ a²ha³ta̱³nxa² ĩ³ye³kxi²si¹hai¹na¹jau³su² e³kxi²sain¹na²hẽ³la². 
\p  
\v 22 Je³su² Kris²tu³jah¹la² Txa²wã¹hxi²kan¹ta² Si³yxau³jah¹la² wi¹lĩ²nxa²tu¹wa². Jã¹nxĩn¹jut3su³ Txa²wã¹sũ̱³nu²kxai³lu² thãi³ti³la² a³lxi¹nxa²ju³ta² ten³sa³nha²wa². Txai²li² Pau²lah³lo²na¹xai²na² ta³lun²ye¹nxa²ha¹wa².\fig |src="CN01893b.TIF" size="span" copy="© 1978 David C. Cook Publishing Co." ref="2 Timoteo 4.22" \fig*