\id 2TH - Nambikuára NT [nab] (Brazil) -2011 bd 
\h 2 Tesalonisẽnses 
\toc1 2 Tesalonisẽnses 
\toc2 2 Tesalonisẽnses 
\toc3 2 Ts 
\mt1 2 Tesalonisẽnses 
\c 1  
\p  
\v 1 Pau²lah³lo²na¹xai²na² Si²lah³la² Ti³mo²jah³la² nxe³sĩn¹sxã³ ũ³wha²li¹lhxã³ ũ³hũ²xai³nx2ti³nha¹wa². Wxa²nũ̱³ka̱³txa² Te³sa³lo²ni³ka²thĩ³na² yxau²xai³yah³lxin¹tũ̱³ka̱³txi³ ĩ³nxai²na² Je³su²jah³la² ã³nũ²kxi²sxã³ yxau³yah³lxin¹te² ĩ³nxai²na² ũ³wha²li¹lhxã³ ũ³hũ²xai³nx2ti³nha¹wa². Nxe³nx2ti³nha¹te² ĩ³nxãi²na² sa²kxai³lu² Txa²wã¹sũ̱³na² sa³wi³ha³lxain²txi³ Je³su² Kris²tu³jah¹la² Txa²wã¹hxi²kan¹ta² Si³yxau³jah¹lo²su² ha²kxai³ nxe³jah¹la² sa³wi³ha³lxain²txi³ yah³lxi¹lxa². 
\p  
\v 2 A²nxe³jah¹lo²nãu³xa² kãin² thãi³ti³la² a³lxi¹nx2ti³si¹hi² wxa²nxũ²kwa̱i³nãu³a² ã³nhãu²no³txa²lxi³si¹hi² nxe³nx2ti³si¹jau³su² ten³sa²sĩn¹nha²wa². 
\s1 O²la³kxi²ki̱³kxa² yo³ha² ĩ³yĩ¹li²kxi²nẽ³jau³su² 
\p  
\v 3-4 Txa²wã³tã̱³nãu³xãi³. Ka³li³sa²sĩn¹nha²wa². Txa²wã¹sũ̱³na² wãn³txa² ã²la² nũ̱³kxũn³sxã³ sa²yxo²we¹ti² wxa²nũ̱³ka̱³txai²na² ã²la² kãin² a³lxi²waun¹nyhu¹i² nxe³yah³lxi³sĩn¹ta¹hi¹nhẽ¹la². Yah³lxi¹nha²kxai³ Txa²wã¹sũ̱³na² nxe³sĩ¹na¹te³nah¹lxi¹: 
\p — Sũ̱³nãi³. Tũ̱¹ka̱³txai²li² wxa²wãn³txa² kxan²ti³ sa²yxo²we¹txai¹nha²kxai³ ĩ³sa²nẽn¹kxi¹nxa²sĩ¹na¹nhai¹. Nxe³sĩ¹na¹jau³xa² wain³na³la². Jã¹xah³lxin¹ju³kxai³lu² wxa²nũ̱³ka̱³txa² kãin²khãu³nha² a²nũ²a² ã̱³xa² ĩ³ko̱x1ko̱¹son²ki² nxe³nx2ti³ta¹hai¹nhẽ¹la². Nxe³nx2tain¹kxan²ti³ ha³ya³kxa² Txa²wã¹sũ̱³na² wãn³txa² sa²yxo²we¹txa³i² ĩ³nxũ²kwa̱i³lxũ¹nyhu¹i² yah³lxi³sĩn¹ta¹hi¹nhẽ¹la². Nxe³ju³ta² Txa²wã¹sũ̱³na² wãn³txa² yxo²ĩ²tũ̱³ka̱³txi³nãu³xa² ĩ³hen³txain¹sĩ¹nhxai²na¹hẽ³la². Ju¹tai²li² Txa²wã¹sũ̱³na² sa²nẽn¹kxi²sĩn¹to³ha¹wa². 
\p  
\v 5 Jã¹nxe³jut3su² Txa²wã¹sũ̱³na² wãn³txa² sa²yxo²we¹jah³lxin¹ju³tan¹te²kxa³ya̱³lhu² khãuh³nxa²lxi³ta¹hai¹nhẽ¹la². Nxe³nxa²lxain¹kxan²ti³ Txa²wã¹sũ̱³na² wãn³txa² sa²yxo²wet1 kãi²non³yah³lxi¹nha²kxai³ ĩ³nxũ²kwa̱i³lxũ¹ kãi²non³yah³lxi¹nha²kxai³ nxe³yah³lxi³ta¹hi¹nhẽ¹la². Nxe³yah³lxin¹kxa²yo³su² Txa²wã¹sũ̱³nu²kxai³lu² wain³txi³ ũ³yho³hi¹nx2ti³ju³ta² e³lxah²lxi²na³la². Nxe³sxã³ Txa²wã¹sũ̱³na² ha³lo²ai²na² ã³wi¹yhah³lxin¹ju³ta³nũ³a² wain³te²lo³txa²ti³tu¹wa².  
\v 6 Jã¹nxe³sxã³ Txa²wã¹sũ̱³na² wain³ye²kxe³jau³su² e³kxi¹nx2ti³tu¹wa². Nxe³nx2ti³te³nah¹lxi¹: 
\p — Txa²wãn³txa² sa²yxo²wet1sai¹nxa³tũ̱³ka̱³txa² khãuh³lxa³ti³nx2tain¹na²hẽ³li¹. Yxãn¹ta¹ hã²wxãn³txa³ khãuh³lxa³ti³nx2tain¹kxa² yã¹nxe³sxã³ khãuh³lxa³tain¹nũ³na¹tu¹wi¹. Nxe³nx2ti³tu¹wa².  
\v 7 Nxe³ha²kxai³ Je³su²jah³la² Txa²wã¹hxi²kan¹ta² Si³yxau³jah¹lan²tu̱³ a³ka³nxi²tãu³a¹ oh³xan¹tũ̱³ka̱³txa² nũ̱³kxũn³te²su² te²a² ka³lxa¹txi³ tẽ³la³xi²tu¹wa². Ha³nxe²hũ̱³ju³ta² tẽ³xi²tu¹wa². Nxe³hĩ¹na¹ Txa²wã¹sũ̱³na² hi²sen³kxai³lu² khãuh³lxa³ti³nx2tain¹ju³ta² ã³wa²su¹tũ¹nx2ti³tu¹wa². Jã¹nxe³nx2ti³kxa² yã¹nxe³sxã³ ã³wa²su¹tũ¹sa²nũn³sĩn¹tu¹wa².  
\v 8 Nxe³hĩ¹na² Txa²wã¹sũ̱³na² wãn³txa² e²nain¹te²su² te²a² Je³su²jah³la² Txa²wã¹hxi²kan¹ta² Si³yxau³jah¹la² te²su² te²a² nxe³te²nãu³xa² ko̱³nxe³ti³ kãi³ain¹kxa²yo³ha² ko̱³nxe³te²lo³tain¹tu¹wa².  
\v 9 Nxe³ain¹te³nah¹lxi¹ khãuh³lxa³ti³sa²tẽ³si¹nyhain¹tu¹wa². Txa²wã¹hxi²kan¹ta² Si³yxau³jah¹la² yen³nãu³a² sa²sai¹sa²tẽ³si¹nyhain¹tu¹wa². Jã¹nxain¹jut3su² Txa²wã¹hxi²kan¹ta² Si³yxau³jah¹la² sa²kxai³lu² wxi²kan¹sxã³ ã³waix3sa²tã³si¹ha²kxai³ a²wxi²kin³ti³ton³ju³ta² ĩ²ai¹nxa³ha²kxai³ nxe³si¹hain¹tu¹wa².  
\v 10 Jã¹nxe³ju³kxai³la¹ Txa²wã¹hxi²kan¹ta² Si³yxau³jah¹la²kxai³lu² a³ka³nxi²hĩ¹na² yxo²ĩ²tũ̱³ka̱³txai²na² a²yxo²ha³kxa¹ wxi²kin³ti³to³nain¹tu¹wa². Nxe³kxa²yu³su² kãin² ĩ³sa²nẽn¹kxain¹tu¹wa². Te²yã¹nxe³sxã³ wxãi²nãu¹ ĩ³nxai²na² kxãn³su² Je³su²jah³lai²na² wãn³txa² ĩ³yau¹ũ¹nx2ti³sĩ¹na¹jau³xai³tã² yxo²ĩ²yah³lxin¹tai¹ti²tu³wa². Nxe³yah³lxin¹te² ĩ³nxai²na² te²yã¹nxe³sxã³ wxi²kin³ti³to³ni² ĩ³sa²nẽn¹kxi² nxe³yah³lxain¹nũ³nĩn¹tu¹wa². 
\p  
\v 11 Nxe³jut3su² Txa²wã¹sũ̱³na² e³kxain¹to³sĩ¹nhxain²na²hẽ³la². Jãx1sĩ¹na¹wa². Nxe³ha²kxai³ wxa²ẽ¹nãu³ai²na² wain³txi³ ĩ³tih³nxe³nx2ti³tu¹wa². Wi¹lhin¹sxã³ yxau³yah³lxi³si¹hin¹ja³kxa³nũ³su² Txa²wã¹sũ̱³nu²kxai³lu² ĩ²sxã³ so¹nx2ti³na³la². Nxe³kxe³su² sa²hxi²kat1si¹nxa²lxi³jau³su² Sũ̱³na² ĩ³ye³kxi²sĩn¹to³ha¹wa². Je³su² Kris²tu³jah¹la² yxo²ĩ²yah³lxi¹nha²kxai³ wi¹kãi³ju³ta² so¹lxi³ ten³yah³lxi¹lxa². Jau¹xai²na² yxo²ha³kxa¹ Txa²wã¹sũ̱³na² e³ki²to³sĩ¹nhxai²kxai³ jãx1sĩ¹na¹wa².  
\v 12 Jã¹nxe³sxã³ a²nũ²a² ã̱³xa² wi¹kãi³yah³lxin¹ju³ta² ĩ²nx2tain¹kxai²nãn²tu̱³ Txa²wã¹sũ̱³na² sa²nẽn¹kain¹tu¹wa². Te²yã¹nxe³sxã³ Je³su²jah³la² yxo²ĩ²ye²yah³lxin¹jau³su² sa²nẽn¹kain¹nũn³tu¹wa². Nxe³sxã³ Txa²wã¹sũ̱³na² Je³su² Kris²tu³jah¹la² Txa²wã¹hxi²kan¹ta² Si³yxau³jah¹lan²tu̱³ nxe³ya³sxã³ thãi³ti³la² a³lxi¹nx2tai¹nha²kxai³ ju¹tai²na² yxo²ha³kxa¹ nxe³nx2tain¹tu¹wa². 
\c 2  
\s1 Je³su²jah³la² wa̱³li²ti³wa³kxi³lon³jau³su² 
\p  
\v 1 Txa²wã³tã̱³nãu³xãi³. Je³su² Kris²tu³jah¹la² a³ka³nxi²ju³ta³nũ³a² ĩ³yau¹ũ³hi² ã³yã³nũ²kxi²ki̱³ju³ta³nũ³a² ĩ³yau¹ũ³hi² nxe³nx2ti³nha¹tu¹wa².  
\v 2 Kwa²wãn³txa² yxo²ĩ²yah³lxi³sĩn¹txa³hẽ¹la². Nxe²e³kxi¹nx2tain¹te³nah¹lxi¹: 
\p — Je³su²jah³la² ã²la² a³ka³nxi²na²hẽ³li¹. Jau³su² ta̱³nxa²: 
\p — Hxi²sxã³nho³tẽx3jut3sũ̱³ju³ta² ĩ²a¹hẽ³li¹. òla² a³ka³nxi²na²hẽ³li¹. Jau³su² ta̱³nxa²: 
\p — Txa²wã¹sũ̱³na² wãn³txi³khai³xa² ain³kxi²na¹hẽ³li¹. òla² a³ka³nxi²na²hẽ³li¹. Jau³su² ta̱³nxa², nxe³jau³jau¹xai²na² ain³kxah¹lxin¹kxai²nãn²tu̱³ hxi²waun³txi³sxã³ ĩ³wã̱³wã̱³jah³lxi³sĩn¹txa³hẽ¹la². Ĩ³ki³ha¹kxi¹nx2tain¹sĩ¹nha³ta²wa². Ha³te̱h³nxã³nxa² ĩ³sa²si¹hã³nx2ti³sĩ¹na¹ki³lxo³nxe³tain¹kxan²ti³ we¹tain¹yah³lxi³sĩn¹txa³hẽ¹la².  
\v 3 Wãn³txa² ka³lxa¹txi³ e³kxi¹nx2tain¹kxan²ti³ ain³nyha¹lxi³sĩn¹txa³hẽ¹la². Ĩ³ki³ha¹kxi¹nx2tai¹nha³ta²wa². Nxe³ha²kxai³ a³ka³nxi²ju³ta² wa³su¹txi³ wã²nxa³ta̱³lxa¹ ju³tha¹li¹ wxã³sãn²tu¹wa². 
\p — Txa²wã¹sũ̱³na² ten³ti³hex1sa²nxa³nhai¹. Yxo²kwĩ̱¹ki²sa³nhai¹. A²nũ²a² ka³la¹txi³ nxe²e³kain¹sãn²tu¹wa². Nain¹sãn²ka³tu̱³ a²nũ²a² ka³na³ka³nat3sxã³ ko̱³nxe³thin¹khaix1te²a² wxã³nũn³tu¹wa². Nxe³jah¹lai²li² a²ko̱³nxe³ju³ta² kãin² yũ²na³la². Yxãn¹ta¹ kxã³nãu³a¹ Txa²wã¹sũ̱³na² hi²sen³su² ko̱³nxe³ti³ ĩ³yĩ¹li²nũ¹sxã³ ha³lo²a² i̱³sa²tẽ³ko³xa² ã³na¹sxã³ wxe³ha²kxai³ nxe³te³na¹ i̱³sa²tẽ³si¹tu¹wa², ko̱³nxe³thin¹khaix1jah¹la²sa³.  
\v 4 A²nxe³jah¹lai²na² wãn³txi³kxai³lu¹ ki³ha¹kxi¹nx2ti³te³nah¹lxi¹: 
\p — Txai²li² Sũ̱³na² Si³yxau³jah¹lo²sa¹wi¹. Sũ̱³na² ã̱³xa² yũ³te²sxa³yu²hẽ³li¹. Nxe³nũ²la² Sũ̱³na² sxi²ha² ã³wih¹ka³tu̱³ Sũ̱³na² ã³wxe³ka³lo³a² ã³wxe³tu¹wa². Nxe³nũ²la² sũ̱³nu²su²ki³lxo³tu¹wa². Yxãn¹ta¹ kãin²ki³han³jah¹lo²su²hĩ̱³nx2na³la². 
\p  
\v 5 Jau¹xai²na² yxo²ha³kxa¹ wxã³sxã³ ĩ³ye³kxi¹nx2ti³nha¹tai¹ti²tu³wa².  
\v 6-8 Jã¹nxe³sxã³ ha³lo²a² hau³ko³nhĩ¹na¹ wxã³tu¹wa². Ko̱³nxe³thin¹khaix1jah¹la² wxã³tu¹wa². Jau¹xai²na² ya³nx2ti³nha¹hẽ³la². A²nxe³jah¹la² ko̱³nxe³thin¹khaix1jah¹lai²na² o²la³kxi²ju³ta³nũ³a² ã²la² ãn³si³wxe²na³la². Yxãn¹ta¹ jah¹la² sa²kxai³lu² hĩ¹na² hxi²kan¹txi³ wxã²nxa³lho³la². Jã¹nxe³sxã³ wi¹lhin¹khaix1jah¹la² ã²la² yxau³ya³nhẽ³na³la². Nxe³ha²kxai³ yxau³ya³nhẽ³tãu³a² ko̱³nxe³thin¹khaix1jah¹la² hxi²kan¹txi³ wxã²nxa³lho³la². Yxãn¹ta¹ wi¹lhin¹khaix1jah¹la² ã³sxã³ ã³waix3sãn²ka³tu̱³ hã²wxãn³txa³ ko̱³nxe³thin¹khaix1jah¹la² wxã³tu¹wa².  
\v 9 A²nxe³jah¹la² sa²kxai³lu² Sa³ta³na²jah¹la² ĩ³nũ̱³kxũ³nũ¹hai¹nha²kxai³ wã³nxĩn¹sxã³ o²la³kxi²ki³lxo³tu¹wa².  
\v 10 Nxe³ha²kxai³ ko̱³nxe³tĩh³na² ai³ain¹te²na² yxo²ha³kxa¹ ĩ³ki³ha¹kain¹tu¹wa². Wã³nxĩn¹sxã³ o²la³kxi²ki³lxot3sa²kxai³ ĩ³ki³ha¹kxain¹tu¹wa². Txa²wã¹sũ̱³na² wãn³txa² te³nai¹nxa³ha²kxai³ jau¹xai²na² a³lxai¹nxa³ha²kxai³ a²ẽ¹nãu³ai²na² sa²hau³ko³tai¹nxa³ha²kxai³ nxe³ain¹tu¹wa².  
\v 11 Nxain¹jut3su² ĩ³ki³ha¹kain¹jau³xai²li² sa²yxo²we¹tain¹kxe³su² Txa²wã¹sũ̱³na² ũ³hũ¹ain¹tu¹wa².  
\v 12 Nxain¹ka³tu̱³ tũ̱¹ka̱³txai²na² yxo²ha³kxa¹ ya²la³tu̱³jau³xa² te³nai¹nxa³te²na² a²yxo²ha³kxa¹ ko̱³nxe³ti³ kãi³ki̱³ju³ta² te³nain¹te²na² a²yxo²ha³kxa¹ nxe³sxã³ Txa²wã¹sũ̱³na² hi²sen³su² ã³na¹ain¹tu¹wa². A³ka³nxi²sxã³ wxã³hĩ¹na¹ ã³na¹ain¹tu¹wa². Hãi¹sxã³ ko̱³nxe³ti³ ĩ³yĩ¹li²hai¹nha²kxai³ ko̱³nxe³ti³ kãi³ain¹kxa² yo³ha² ũ³yho³hi²hain¹tu¹wa², Txa²wã¹sũ̱³na² hxi²ka²sa³. 
\s1 Txa²wã¹sũ̱³na² ĩ³kaix1so¹nẽ³jau³su² 
\p  
\v 13 Txa²wã³tã̱³nãu³xãi³. Txa²wã¹hxi²kan¹jah¹la² a³lxi¹nx2ti³na³la². Nxe³nx2ti³ha²kxai³ kã³nhxĩ¹nai³kxai³ Txa²wã¹sũ̱³na² wãn³txa² ya²la³tu̱³ jau³xan²tu̱³ yxo²ĩ² ãn³si³wxe³yah³lxi¹nhĩ¹nai³tã² Txa²wã¹sũ̱³na² hi²sen³su² wxa²ẽ¹nãu³ai²na² sa²hau³kot3sxã³ ĩ²sxã³ ĩ³so¹nx2ti³tai¹ti²tu³wa². Nxe³hĩ¹nai³tã² Txa²wã¹sũ̱³na² Yãu³ka³txa² nxũ²kwa̱i³wi¹nxa²lxi³te³lhxã³ sa²si¹hã³na²hẽ³la². Nxe³jut3su² Txa²wã¹sũ̱³na² ĩ³sa²nẽn¹kxi²to³sĩ¹na¹wa².  
\v 14 Txa²wã¹sũ̱³na² wãn³txa² ĩ³hen³txi³nha¹jau³xai²na² ain³kxah¹lxin¹tai¹ti²tu³wa². Nxe³yah³lxi¹nha²kxai³ jau¹xai²na² ain³kxi²sah¹lxi¹nha²kxai³ kxã¹nãu³a¹ Je³su² Kris²tu³jah¹la² Txa²wã¹hxi²kan¹ta² Si³yxau³jah¹lo²su² te²a² a³ka³nxi²tãu³a¹ a²wxi²kin³ti³ton³khai³ju³ta² wã²nhũ¹nx2ti³tu¹wa².  
\v 15 Txa²wã³tã̱³nãu³xãi³. Txa²wãn³txa² ĩ³yau¹ũ¹nx2ti³nha¹jau³xai²li² wxa²ne³nxẽ³na² ain³kxi²sah¹lxin¹nhĩn¹jau³su² ta̱³nxa² ha³te̱h³nxã³nxa² ĩ³sa²si¹hã³nx2ti³nha¹jau³su² ta̱³nxa² nxe³sxã³ jau¹xai²li² nxe³wã²na³yah³lxi³txa³hẽ¹la². Yxãn¹ta¹ ĩ³nxũ²kwa̱i³lxũ¹sxã³ yxo²ĩ² kan²txi³ sa²yxo²so² nxe³jah³lxi³hẽ¹la². 
\p  
\v 16 A²nxe³jut3su² Je³su² Kris²tu³jah¹la² Txa²wã¹hxi²kan¹ta² Si³yxau³jah¹lo²su² ha²kxai³ Txa²wã¹sũ̱³na² nxe³ya³sxã³ a²nxe³te²a² hi²sen³su² a³lxi²khai¹nxe³lain¹na³la². A³lxi²nẽ³lhxã³ ĩ³nxũ²kwa̱i³lxũ¹txi³nẽ³lain¹na³la². A³ka³nxi²sxã³ wa̱³lain¹ju³ta³nũ³a² wah³nxe³ki̱³tã³la².  
\v 17 Te²yã¹nxe³sxã³ wi¹lo²la³kxah¹lxin¹jut3su² ta̱³nxa² wãn³txa² wi¹jau³xa² wi¹le³yah³lxin¹jut3su² ta̱³nxa² nxe³si¹yhah³lxin¹jau³su² ya³lot3sxã³ nũ̱³kxũn³txi³ ĩ³hxi²ka¹ta³lxi³si¹ha¹jau³su² Txa²wã¹sũ̱³na² e³kxi²ya³to³ha¹wa². 
\c 3  
\s1 Txa²wã¹sũ̱³na² a²ne³nxẽ³na² ĩ³ye³kxi²ah³lxin¹jau³su² 
\p  
\v 1 Txa²wã³tã̱³nãu³xãi³. Txa²wã¹sũ̱³na² e³kxah¹lxin¹tãu³a¹ ne³wã²na³sah¹lxi³sĩn¹txa³hẽ¹la². Nxe³sxã³ ã³nxai³nha¹tãu³a² Sũ̱³na² wãn³txa² wi¹jau³xan²tu̱³ wa³su³txi³ ha³ta̱³nxe³hi² a²nũ²a² yxo²ha³kxa¹ sa²yxo²we¹txi² wxãi²yã¹nxe³kxe³ju³ta² ten³sa²sĩn¹nha²wa².  
\v 2 Jã¹nxe³sxã³ a²nũ²a² kuh³lxa³thin¹te²su² te²a² ko̱³nxe³ti³ kãi³te²su² te²a² nxe³sxã³ Txa²wã¹sũ̱³na² ã³non²ta³kxi²sa²si¹hain¹sĩ¹na¹jau³su² ten³sa²sĩn¹nha²wa², yxo²ĩ²xa³te²a² kãin² yũ³ha²kxai³la². 
\p  
\v 3 Nxe³sa²sĩn¹ju³ta² Je³su² Kris²tu³jah¹la² nũ̱³kxũn³khai¹nxe²na³la². Sa³ta³na²jah¹la² hxi²ka² wxa²wxai³nxa²lxi³kxa²ya̱n³txi³su² ã³non²ta³kxi¹nx2ti³tu¹wa². A²nxũ²kwa̱i³lxũ¹nxa²lxi³tu¹wa². Hai³txi³ sa²yxo²ã³ti³hex1nxe³nx2ti³xa³lho³la².  
\v 4 Nxe³ha²kxai³ Txa²wã¹sũ̱³na² wãn³txa² kwa³na³nx2ti³nha¹jau³xa² a²yxo²ha³kxa¹ we¹jah³lxin¹tai¹ti²tu³wa². Yah³lxi¹nha²kxai³ yan¹nãu³a² ã³na¹yah²lxan³tho³la². Txa²wã¹sũ̱³na² hi²sen³su² ĩ³hxi²ka¹ta²lxi³jah¹lai²la¹wa². 
\p  
\v 5 Jã¹nxe³jut3su² Txa²wã¹sũ̱³na² a³lxi²nẽ³ju³ta² jũ¹nxe² ã³ne³wxe³ki̱³sa²kxai³ Kris²tu³jah¹la² nũ̱³kxũn³txi³ ã³si³tẽ³kxi²ki̱³ju³ta² jũ¹nxe² ã³ne³wxe³ki̱³sa²kxai³ nxe³ki̱³tã³la². Nxe³ki̱³kxan²ti³ ju¹tai²li² ã²la² kãi²non³sxã³ ã³ne³wxe³nx2ti³si¹ha¹jau³su² Txa²wã¹sũ̱³na² e³kxi²to³ha¹wa². 
\s1 U̱³txi³ wa³kon³te²su² kãi³ũ¹hah³lxin¹jau³su² 
\p  
\v 6 Txa²wã³tã̱³nãu³xãi³. Wxa²nũ̱³ka̱³txa² ha³tih³ ĩ³nxai²na² u̱³txi³ wa³ko³nain¹te²su² ta¹hẽ¹la². Te²yã¹xah³lxi³txa³hẽ¹la². A²nxe³jah¹lai²li² txa²wã³tã̱³su² kxan²ti³ te²yã¹nxe² kãi³yah³lxi³txa³hẽ¹la². Nxe³jah¹lai²li² ã³sxã³ u²lxi³ ã³si³tu³lxi²sxã³ yxau³jah¹lxi³hẽ¹la². Te²yã¹nxe³jau³xa² e³kxi¹nx2ti³to³nha¹tai¹ti²tu³wa². Je³su² Kris²tu³jah¹la² Txa²wã¹hxi²kan¹ta² Si³yxau³jah¹lo²kxai³lu² jau³jau¹xai²na² ĩ³kwa³na³sain¹jau³jau¹xain²txi³ ĩ³kwa³na³nx2ti³nha¹wa².  
\v 7 Te²yã¹nxe³ kãi³sĩn¹te²txã³jai¹ti²tu³wa². Nxe³nha¹ha²kxai³ o²la³kxi²nha¹kxa² yã¹nxe³jah³lxi³hẽ¹la².  
\v 8 Wxa²yain³txa² so¹kxi¹nx2ti³nha¹kai³tã² ũ³yho³hi¹nx2ti³nha¹tai¹ti²tu³wa². Na¹ha²kxai³ hãi¹sxã³ wa³ko³na³la²ni²na¹kxan²ti³ yen³kxa² kwa² ũ³hũ¹sah¹lxin¹ju³ta² ten³sĩn¹te²txã³wa². Kwa² hxi²tha³txa²lxa¹kxa²ya̱n³txi³sa².  
\v 9 Wxa²yain³txi³nũ³xa² ai³nxũ̱³nxa²lxi³nha¹ju³ta² hxi²kan¹txi³ kwa³na³nx2ti³sĩ¹nhĩ̱³na¹wa². Yxãn¹ta¹ wain³txi³ ĩ³tih³nxe³nx2ti³te³lhxã³ ye¹nx2ti³nha¹hẽ³la².  
\v 10 Nxe³ki̱³sĩ¹nai³tã² kwa³na³nx2ti³nha¹te³nah¹lxi¹: 
\p — U̱³txi³ wa³kon³te²a² wxa²yain³txa² wã²nhũ¹ain¹yah³lxi³txa³hẽ¹li¹. Nxe³nx2ti³sĩ¹na¹tai¹ti²tu³wa². 
\p  
\v 11 Jã¹nxe³sxã³ wxa²nũ̱³ka̱³txa² ha³tih³ ĩ³nxai²na² u̱³te²a² yũ³ta¹hẽ¹la². Nxe³kxa²yu³su² kwa²he¹ye²nyhain¹to³ta¹hẽ¹la². Nxe³nyhai¹nhxai²na²hẽ³la².  
\v 12 Nxe³tũ̱³ka̱³txai²na² sa²kxai³lu² ĩ³ye³kxi²sxã³ ĩ³kwa³na³ain¹sĩ¹na¹te³nah¹lxi¹, Je³su² Kris²tu³jah¹la² Txa²wã¹hxi²kan¹ta² Si³yxau³jah¹la² nxe³sai¹nha²kxai³ ĩ³kwa³na³ain¹sĩ¹na¹te³nah¹lxi¹: 
\p — U̱³lah³lxi³txa̱³lxi¹. Hãi¹sxã³ ka³nahx2sxã³ wa³kon³yah³lxin¹kxa² yo³ha² yain³sxã³ yxau²xai³jah¹lxi³hẽ¹li¹. Nxe³ain¹to³ha¹wa².  
\v 13 Txa²wã³tã̱³nãu³xãi³. Wi¹lo²la³kxah¹lxin¹ju³ta² hxi²tha³yah³lxi³txa³hẽ¹la². Ĩ³nxũ²kwa̱i³lxũ¹jah¹lxi³hẽ¹la².  
\v 14 Yah³lxin¹ju³ta² a²nũ²a² ĩ²li³te²a² ta²nxã¹nxai²na² wãn³txa² sa²yxo²wet1sah¹lxi³sĩ¹nxãn³kxai²nãn²tu̱³ ĩ²khai¹nxe³tai¹yah³lxi³hẽ¹la². Sa²ye³ya̱¹not3sxã³ ã³jxah¹lxi³hẽ¹la². Ain¹yah³lxin¹kxai²nãn²tu̱³ ãu²li²to³nha²hĩ̱³nx2na³la².  
\v 15 Ain¹yah³lxin¹kxan²ti³ ko̱¹ko̱¹sai¹nxa³wa². Wxa²wã³tã̱³khai³xai²la¹wa². Nxe³ha²kxai³ ĩ³xa̱n³ta³kxai¹yah³lxi³txa³hẽ¹la². 
\s1 Pau²lah³lai²na² a²ne³ki³san¹jau³su² 
\p  
\v 16 Nxe³jut3su² nxe³kxan²ti³ Txa²wã¹sũ̱³na² ã³nhãu²no³tẽ³ju³ta² wxa²ẽ¹nãu³ai²na² kxan²ti³ ĩ³hãu²no³tẽ³lhi¹nha¹jau³su² ĩ³ye³kxain¹sĩ¹na¹wa², Txa²wã¹sũ̱³na²sa³. A²nxe³jah¹la² hi²sen³su² wxa²nũ̱³ka̱³txa² yxo²ha³kxa¹ ã³si³tẽ³kxi¹nx2ti³tu¹wa². 
\p  
\v 17 Jã¹nxe³jut3su² Pau²lah³lo²na¹xai²na² wãn³txa² yxo²ha³kxa¹ txa²hxi²ka² ũ³wha²li¹lhxã³ ũ³hũ¹nx2ta¹wa². Ũ³wha²li¹lhxai²na¹hẽ³ jã¹nxe³sxã³ ũ³wha²li¹le¹nx2ta¹wa². 
\p  
\v 18 Nxe³na¹jut3su² Je³su² Kris²tu³jah¹lai²na² Txa²wã¹hxi²kan¹ta² Si³yxau³jah¹lo²su² ha²kxai³ thãi³ti³la² a³lxi¹nx2ti³ju³ta² ten³sa³nha²wa². Txai²li² Pau²lah³lo²na¹xai²na² ta³lu²na¹wa².