\id 2CO - Nambikuára NT [nab] (Brazil) -2011 bd 
\h 2 Korĩntios 
\toc1 2 Korĩntios 
\toc2 2 Korĩntios 
\toc3 2 Co 
\mt1 2 Korĩntios 
\c 1  
\p  
\v 1 Pau²lah³lo²na¹xai²na² ũ³wha²li¹le¹nx2ta¹wa². A²kxã³nxa² Txa²wã¹sũ̱³na² hi²sen³su² ĩ³sa²si¹hã³ũ¹sa³na²hẽ³la². Sa³ha²kxai³ Je³su² Kris²tu³jah¹lai²na² wãn³txai³tã² ĩ³hen³txi³jah¹lo²sa¹wa². Txa²wã¹sũ̱³na² a²ten³jau³su² ha²kxai³ hxi²kan¹txi³lot3sa³na²hẽ³la². Wxa²nũ̱³ka̱³txa² Ko³rĩn²to²thĩ³na² yxau²xai³lyah³lxin¹tũ̱³ka̱³txi³ ĩ³nxa² ũ³wha²li¹la³kxi¹nx2ti³nha¹wa². Txa²wã¹sũ̱³na² wãn³txa² yxo²ĩ²yah³lxin¹tũ̱³ka̱³txi³ ĩ³nxa² ũ³wha²li¹la³kxi¹nx2ti³nha¹wa². Te²yã¹nxe³sxã³ Kre²sa²ko³xan¹tũ̱³ka̱³txi³ ĩ³nxa² Sũ̱³na² wãn³txa² yxo²ĩ²yah³lxin¹tũ̱³ka̱³txi³ ĩ³nxa² ain³kxi²sah¹lxi³hẽ¹la². Ti³mo²jah³lai²na² txa²wã¹lon³yah³lo²su² yxau³ya³sain¹nũn³na³la². 
\p  
\v 2 Nxa¹ha²kxai³ Txa²wã¹sũ̱³na² Si³yxau³tãu³a² Txa²wã¹wĩ³nu²su² Jah¹lai²nãn²tu̱³ Je³su² Kris²tu³jah¹la² Txa²wã¹hxi²kan¹ta² Si³yxau³jah¹lo²su² Jah¹lai²nãn²tu̱³ nxe³ya³sxã³ kãin² thãi³ti³la² a³lxi²nx2ti³si¹hi² wxa²nxũ²kwa̱i³nãu³a² ã³nhãu²no³txa²lxi³si¹hi² nxe³nx2ti³si¹ha¹jau³su² ten³sa³nha²wa². 
\s1 Pau²lah³lai²li² Txa²wã¹sũ̱³na² sa²nẽn¹kxi²jau³su² 
\p  
\v 3 Txa²wã¹sũ̱³na² Si³yxau³jah¹la² sa²nẽn¹kxi²a³sah¹lxi³wxa². A²nxe³jah¹la² Je³su² Kris²tu³jah¹la² Txa²wã¹hxi²kan¹ta² Si³yxau³jah¹lo²su² ha²kxai³ nxe³te²a² A²wĩ³nai²la¹wa². Wi¹lhin¹sxã³ thãi³ti³la² sa²hau³kot3si¹nhẽ³jah¹lo²su² ha²kxai³ sa²ye³kwẽ²kxi²nẽ³jah¹lo²su² ha²kxai³ nxe³jah¹lai²la¹wa².  
\v 4 Nxe³sxã³ ĩ²li³tãu³a¹ khãuh³lxa³thin¹ki̱³ju³ta² sa²ye³kwẽ²kxi²nẽ³na³la². Nxe³na¹ju³tan¹te²kxa³ya̱³kxai³la¹ a²nũ²a² ã̱³xai²na² khãuh³lxa³thi¹nain¹ju³ta² sa²ye³kwẽ²kxain¹nũn³ki̱³tu¹wa².  
\v 5 Kris²tu³jah¹lai²na² wãn³txa² yxo²ĩ²ki̱³sa²kxai³ khãuh³lxa³txi³nẽ³ju³ta² kãin² yũ³nẽ³na³la². Nxe³kxan²ti³ Kris²tu³jah¹la² sa²ye³kwẽ²kxi²nẽ³ju³ta² kãin² ũ³hũ¹nẽ³nũn³na³la².  
\v 6-7 Txa²wã¹sũ̱³na² sa²ye³kwẽ²kxi¹nx2ti³jau³xa² ĩ³hen³txi² ko̱³nxe³ti³ kãi³yah³lxin¹ju³ta² ã³wa²su¹ti³hi¹txa²lxi³jau³xa² ĩ³hen³txi² nxe³nx2ta¹ti³ai¹ti²tu³wa². Nxe³nx2ta¹ju³tan¹te²kxa³ya̱³lhu² kxã³nxai³tã² khãuh³lxa³ti³sain¹sĩn¹na²hẽ³la². Yxãn¹ta¹ khãuh³lxa³ti³sain¹sĩn¹kxan²ti³ Txa²wã¹sũ̱³na² hi²sen³kxai³lu² sa²ye³kwẽ²kxi²sa²sĩn¹na²hẽ³la². Nxe³sa²sĩn¹ju³tan¹te²kxa³ya̱n³tu̱³ti¹ ã³non²ta³kxi¹nx2ti³sĩ¹na¹ju³ta³nũ³a² yũ³tu¹wa². Khãuh³lxa³ti³sain¹sĩn¹ju³tai³tã² Txa²wã¹sũ̱³nai²na² sa²ye³kwẽ²kxi²sa²sĩn¹na²hẽ³la². Jã¹nxe³sxã³ khãuh³lxa³ti³nx2tain¹kxai²nãn²tu̱³ Txa²wã¹sũ̱³na² sa²ye³kwẽ²kxi²sa²sĩn¹kxai³ jã¹nxe³sxã³ sa²ye³kwẽ²kxi¹nx2ti³nũn³tu¹wa². 
\p  
\v 8 Jã¹nxa¹jut3su² A²si³a³ko³xa² yxau²xai³la¹hĩ¹nai³tã¹ju³tai³tã² ĩ³yau¹ũ¹nx2ta¹tu¹wa². Ye³khãuh³lxa³ti³sain¹ju³tai³tã² ĩ³yau¹ũ¹nx2ta¹tu¹wa². Ya³lo³txi³ti³hex1sa²nxa³hẽ¹la². Ya³lu²sa²te³lxa²nãn³khih³ na¹hẽ¹la².  
\v 9 Su²lhã³sain¹ju³ta³nũ³a² ã²la² ĩ³yĩ¹li²sain¹na²hẽ³la². Ai³lã²nũ²: 
\p — Wã²nxũ̱h¹ ã³nhxi²kat1sa²ju³ta³nũ³la³ yũ³sa²nxa³lho³na¹. Nha¹jau³su² nxa¹hẽ¹la². Txa²wã¹sũ̱³na² Si³yxau³jah¹la² so¹lxi³ a²nũ²a² ya³lu²te²a² ka³te̱n³su² ĩ³sa²yxau³ti³hit1jah¹la² so¹lxi³ yxo²ĩ²a¹hẽ³la².  
\v 10 A²nxe³jah¹la² hi²sen³kxai³lu² ya³lu²sa²ju³ta³nũ³a² ã³non²ta³kxi²sxã³ so¹xi²sa³hẽ¹la². Sa²ju³taix3 jãx1sa²ju³ta³nũ³a² yxo²ĩ²sxã³ wah³nxe³na¹wa².  
\v 11 Txa²wã¹sũ̱³na² ĩ³ye³kxi²nũ¹sah²lxin¹kxai²nãn²tu̱³ ã³non²ta³kxi²nũ¹sah¹lxi³nhi¹lxa². Nxe³sah¹lxin¹kxai²nãn²tu̱³ Txa²wã¹sũ̱³na² sa²kxai³lu² ain³kxi²nẽ³tu¹wa². Nxe² ain³kxi²nẽ³kxai²nãn²tu̱³ ã³non²ta³kxi²sa²ju³ta² e³lxah²lxi³tu¹wa². E³lxah²lxi³ha²kxai³ a²nũ²a² ka³lxa¹txi³ Txa²wã¹sũ̱³na² kãin² sa²nẽn¹kxain¹tu¹wa². 
\s1 Pau²lah³lai²li² a²ten³ju³ta³nũ³a² ĩ³ã̱³lxa³tot3jau³su² 
\p  
\v 12 Jã¹nxa¹jut3su² wxa²ha³tih³xan¹tũ̱³ka̱³txi³ ĩ³nxai²na² e³yah³lxin¹jau³kxai³lu¹: 
\p — Pau²lah³lai²li² Sũ̱³na² ĩ²sxã³ ĩ³so¹jah¹lai²kxai³ wain³txi³ kãi³xa³xã¹. Nxe³yah³lxin¹jau³su² ha²kxai³ kxã³nxa² kãi³a¹ju³tai³tã² ĩ³ye³kxi¹nx2ta¹tu¹wa². E³lxah²lxi³sxã³ o²la³kxi²na¹tai¹ti²tu³wa². A²nũ²a²nãu³xa² ã̱³xa² o²la³kxi²nũ¹hai¹na¹ju³tain²ti³ wxa²yen³nãu³a² o²la³kxi²nũh¹nx2ta¹ju³tain²ti³ nxe² kãi³a¹tai¹ti²tu³wa². òla² kãi²non³sxã³ o²la³kxi²nũh¹nx2ta¹tai¹ti²tu³wa². Wã²nxũ̱h¹ txa²hoh³lxi³sa²ju³khai³lxa³ ti³he¹nx2nxa³wa². Txa²wã¹sũ̱³na² thãi³ti³la² a³lxi²sa³ha²kxai³ wain³txi³ kãi³i² txa²ẽ¹nãu³ai²na² wi¹le³kxi²nha²sxã³ kãi³i² nxe³nũh¹nx2ta¹tai¹ti²tu³wa². Nxe³na¹ju³tai²li² ĩ³ka³li³kxi²nha¹nha²wa².  
\v 13-14 Nxe³sxã³ wãn³txa² ũ³wha²li¹lhã³ũ¹nx2ta¹jau³xai³tã² a²yxo²ha³kxa¹ hxi²kan¹txi³ e³lai²na¹ ĩ²yah³lxi¹nha²kxai³ a²si³yxau³tãu³khai³xa² ã³ne³wxe³yah³lxi¹nha²kxai³ nxe³yah³lxi¹lxa². Kxã³nxai³tã² ha³lo²a² o²la³kxi²nũh¹nx2ta¹ju³tai²na² jũ¹nxe² ã³ne³wxe³nũ¹sah¹lxi¹lxa². Nxe³sah³lxi¹nha²kxai³ kxã³nãu³a¹ Je³su²jah³la² Txa²wã¹hxi²kan¹ta² Si³yxau³jah¹la² wa̱³li²sxã³ a³ka³nxi²tãu³a¹ e³lxah²lxi³ju³ta²khai³xa² kãin² ã³ne³wxe³nũ¹sah¹lxin¹tu¹wa². Te²yã¹nxe³sxã³ Sũ̱³na² sa²nẽn¹kxi²nũ¹yhah³lxin¹kxa² yã¹nxe² sa²nẽn¹kxi²nũ³na¹tu¹wa². 
\p  
\v 15 Nxe³sxã³: 
\p — Jau¹xai²na² ya²la³lhu²ji¹xã¹. Nxe³nx2ta¹jau³su² a²wi¹lhĩ¹na² wxã³sxã³ ĩ²nx2ta¹ju³ta² ten³sa³hẽ¹la².  
\v 16 Nxe³na¹ha²kxai³: 
\p — Ma³se³to²na²ko³xa² ai³na¹tãu³a² ã³nĩ²xai³ai¹na¹tũ¹xã¹. ówa̱³li²na¹tãu³a² ã³yit1sxã³ ĩ²ai¹na¹tũ¹xã¹. Nxa¹kxai²nãn²tu̱³ ye³ha¹li¹tãu³su² ĩ³ka³lih³ti³hi¹tain¹to³ha¹tũ¹xã¹. Nxe³na¹kxai²nãn²tu̱³ Ju³te²a²ko³xa² ai³na¹ju³ta³nũ³a² ã³non²ta³kxi²sain¹tũ¹xã¹. Nxa¹hẽ¹la². Na¹ta¹ wxã³sĩ²nx2ti³nxa³tai¹ti²tu³wa².  
\v 17 Nxe³to³ta¹ wãn³txa² u²lxan¹jau³su² ha³ta̱³nxe³sa²sxã³ ã³nhxi²kat1sa²nxa³ha²kxai³ wãn³txai²li² e³kxi¹nx2ta¹jau³xai³tã² ĩ³ya¹tũ²la² hãi¹sxã³ yxau³sxã³ wah³nxe³na¹hẽ³la². Jã¹nxa¹ju³ta² kwa²e³sxã³ ã³a¹jut3su² hĩ̱³na¹te²la¹xã³? Yuh³xai²nãn¹jah¹la² yã¹nxe² a̱in³nha²hĩ̱³na¹te²la¹xã³? Jã¹nxe³sxã³: 
\p — Nxe²kãi³a¹tũ¹xã¹. Na¹jau³su² na¹ta¹ ĩ³ya¹ta¹ka³tu̱³ ka³nxa³ha²ta³a²sa¹: 
\p — Nxẽ²nxa³lho³na¹. Na¹jau³su² nxe²kãi³a¹jah¹lo²su² hĩ̱³na¹te²la¹xã³?  
\v 18 Hai³txi³ nxe³te²txã³wa². Txa²wã¹sũ̱³na² ĩ²sa²ha²kxai³ wãn³txi³khai³xa² so¹lxi³ e³a¹wa². Yxo²ĩ²ki̱³jau³xai²la¹wa².  
\v 19 Jã¹nxe³sxã³ Je³su² Kris²tu³jah¹la² Txa²wã¹sũ̱³na² Tah²su² ha²kxai³ ĩ³yau¹ũ¹nx2ti³nha¹tai¹ti²tu³wa². Txai²na² Si²lah³la² Ti³mo²jah³la² nxe³sĩn¹sxã³ ĩ³yau¹ũ¹nx2ti³nha¹tai¹ti²tu³wa². A²nxe³jah¹la² Je³su² Kris²tu³jah¹lai²nãn²tu̱³ ĩ³wã̱³wã̱³txi³ki̱³jah¹lo²sxa³wa². Yxo²ĩ²ki̱³jah¹lai²la¹wa².  
\v 20 Kxã³nhxĩ¹nu¹tai²na² Txa²wã¹sũ̱³nu¹tai²na² hi²sen³su² Ju³te²a² nũ̱³ka̱³txa² ĩ³yau¹ũ³ta¹hxai²ti³ai¹ti²tu³wa². Ha³lo²a² wxã³ju³ta²nũ³a² ĩ³yau¹ũ³ta¹hxai²ti³ai¹ti²tu³wa². Hã²wxãn³txa³ jau³jau¹xu¹tai²na² a²yxo²ha³kxa¹ Je³su²jah¹la² hxi²ka² we¹ta³lun²ta¹hxai²ti³ai¹ti²tu³wa². Nxe³sxã³ hĩ¹nai²na² Je³su²jah³la² we¹ju³tai³tã² a²nũ²a²nãu³xa² ĩ³hen³txi³sĩ¹na¹wa². Nxe³sĩ¹na¹ha²kxai³ Txa²wã¹sũ̱³na² sa²nẽn¹kxi²ya³sain¹na³la².  
\v 21 Nxe³sxã³ Txa²wã¹sũ̱³na² hi²sen³kxai³lu² ĩ³yau¹ũ¹nhẽ³nha²wa². Je³su² Kris²tu³jah¹la² ka³te̱³na² wi¹tãu³a¹ yxau²sa²tẽ³ti³hi¹tẽ³ju³ta² ĩ³yau¹ũ¹nhẽ³nha²wa². Te²yã¹nxũn³sxã³ Txa²wã¹sũ̱³na² hi²sen³kxai³lu² ĩ²sxã³ ĩ³so¹nẽ³jah¹lo²su² na³la². Jã¹nxe³jut3su² txa²wã¹ẽ¹nãu³a² ã³nxũ²kwa̱i³lxũ¹nẽ³nha²wa².  
\v 22 Txa²yen³kxa² yen³kxi³ha¹kxa² tẽ³sxã³ txa²ĩ³lxa² ũ³wha²li¹lhẽ¹te²sa¹wa². Nxe³na¹kxai²nãn²tu̱³ a²nũ²a² ĩ²li³te²su² te²na² ĩ²kxai²nãn²tu̱³ a²ẽ¹nãn¹jau³kxai³lu¹: 
\p — Jah¹lai²na² a²yen³kxi³sin²tã¹. A²ĩ³lxa² sa²hẽ¹tin²tã¹. Nxe³hĩ̱³nx2na³la². Te²yã¹nxe³sxã³ Txa²wã¹sũ̱³na² hi²sen³su² A²yãu³ka³txi³khai³xa² ĩ³sa²si¹hã³ũ¹nhẽ³na²hẽ³la². Nxe³nẽ³lha²kxai³ a²nũ²a² ã̱³xai²na² ĩ²nẽ³lhxã³ a²ẽ¹nãn¹jau³kxai³lu¹: 
\p — Txa²wã¹sũ̱³na² sa³wi³ha³lxi³yhen²tã¹. Sũ̱³na² Yãu³ka³jxah¹la² nxũ²kwa̱i³yxaun³tã¹. Nxe³nẽ³nha²ha²kxai³ yen³kxa² ũ³hũ¹nhẽ³kxi³nũ³a² ya²la³tu̱³ a³la³kxi²ki̱³tã³la². 
\p  
\v 23 Jã¹nxa¹jau³su² wãn³txi³khai³xa² e³a¹wa². Txa²wã¹sũ̱³na² ĩ²sa²na³la². Txa²ẽ¹na² ĩ²sa²jah¹lai²la¹wa². Wxã³sxã³ ĩ²nx2ta¹ju³ta² ten³khaix1sa³nha²wa². Nxe³yãn¹ta¹ wxã³na¹kxai²nãn²tu̱³ ko̱³nxe³ti³ kãi³yah³lxin¹ju³ta² ĩ³kwa̱i²kxi¹nx2ti³hĩ̱³na¹wa². Nxe³nx2ta¹kxai²nãn²tu̱³ ĩ³ãin²ta³lxi²nx2ti³hĩ̱³na¹wa². Nxe³ju³tai²na² ten³sa²nxa³hẽ¹la². Jã¹nxe³nx2ta¹kxa²ya̱n³ti³su² Ko³rĩn²to²thĩ³na² ai³na¹ju³ta³nũ³a² ã³na¹la³kxi²nha¹hẽ³la².  
\v 24 Yxo²ĩ²yah³lxin¹ju³ta² kwa³na³nx2ti³nxa³lho³la². Nũ³kxũn³txi³ yxo²ĩ²yah³lxi¹nhẽ³la². Yxah³lxi¹nha²kxai³ ĩ³ka³li³yhah³lxin¹ju³ta³nũ³a² kãi³ũh¹nx2ta¹wa². 
\c 2  
\p  
\v 1 Jã¹nxa¹jau³su²: 
\p — Ko̱³nxe³ti³ kãi³ain¹kxai³tã² sa²hau³ko³tũ¹hai¹nxa³ha²kxai³ ĩ³kwa̱i²kxai¹na¹hẽ³na¹. Nxai¹na¹kxe³su² ĩ³ãin²ta³lxai¹na¹hẽ³na¹. Jã¹xai¹na¹ha³tã¹. Nxa¹jau³su² nxa¹hẽ¹la².  
\v 2 Nxe³sxã³ ĩ³ãin²ta³lxi²nx2ta¹kxai²nãn²tu̱³ ka³lih³kxi²sain¹te²a² yũ³ai¹nhĩ̱²nxa³wa². Wxãi²na² so¹lxi³ ĩ³ãin²ta³lxi²nx2ta¹tũ̱³ka̱³txi³ ĩ³nxai²na² so¹lxi³ ĩ³ka³li³kxi²sah¹lxi³hĩ̱³nxa¹lxa².  
\v 3 Jã¹nxe³na¹jau³su² ũ³wha²li¹la¹hẽ³la². Wxã³sxã³ ĩ³ka³lih³kxi²sah¹lxa³nha²kxai³ hãi¹sxã³ ĩ³ãin²ta³lxi²sah¹lxi¹nha²kxai³ sah²lxin¹kxa²ya̱n³txi³su² nxa¹hẽ³la². Nxe³sxã³ ka³li³ha¹kxai²nãn²tu̱³ ka³lih³yah³lhi³nũ³nhĩ̱³nxa¹lxa³. Nxe³ju³ju¹tai²na² ĩ²te²sa¹wa².  
\v 4 Jã¹nxe³na¹ju³kxai³lu² ha³te̱h³nxã³nxa² ũ³wha³li¹la³kxi¹nx2ta¹txã³nxai³tã² ãin²ti³sxã³ nã̱n³ti³ten³khaix1sa³hẽ¹la². Hxi²waun³ta³kxi²nha²khai¹nxe³nx2ta¹hẽ¹la². Ĩ³ãin²txi³te³ji¹khi³. Nxe³nx2ta¹hẽ¹la². Yxãn¹ta¹ a³lxi²nx2ta¹ju³ta² so¹lxi³ ĩ³yau¹ũ¹te³lhxã³ nxe³nx2ta¹hẽ¹la². 
\s1 Ko̱³nxe³ti³ kãi³ũh¹nx2ti³kxe³su² ne³wã²na³yah³lxin¹jau³su² 
\p  
\v 5 A²nxe³jah¹lai²kxai³lu² ko̱³nxe³ti³ kãi³jah¹lai²kxai³lu² ĩ³ãin²ta³kxi²khaix1na¹hẽ¹la². Jã¹nxe³sxã³ ĩ³ãin²ta³kxi²nx2ti³nũn³na²hẽ³la². Nxe³nx2ti³kxe³su² ũ̱n³txi³ ĩ³kwa̱i²kxi²yah³lxi³txa³hẽ¹la². Thãi³ti³la²sxã³ ĩ³ye³kxain¹yah³lxi³hẽ¹la².  
\v 6 Kxã³kxai³ ĩ³wait1si¹hain¹yah³lxin¹jau³su² ã²na³la².  
\v 7 Nxe³ha²kxai³la¹ hĩ¹nai²kxai³la¹ ko̱³nxe³ti³ kãi³ju³tai³tã² nxe³wã²na³txain¹yah³lxi³hẽ¹la². Ĩ³nxũ²kwa̱i³lxũ¹nxe³txain¹yah³lxi³hẽ¹la², hxi²ye¹ta³lxi³txi³kxa²ya̱n³ti³sa³.  
\v 8 Jã¹nxe³jut3su² a³lxain¹yah³lxin¹jau³su² ĩ³yau¹ũ³txain¹yah³lxi³hẽ¹la².  
\v 9 Jã¹nxa¹jut3su² ha³te̱h³nxã³nxa² ũ³wha³li¹la³kxi¹nx2ta¹tai¹ti²tu³wa². Wain³txi³ sa²yxo²wet1sah³lxin¹ju³ta² ĩ²nxa²lxi³te³lhxã³ nxe³ye¹nx2ta¹wa².  
\v 10 Ko̱³nxe³ti³ kãi³ju³tai³tã² ne³wa²na³yah³lxin¹kxai²nãn²tu̱³ te²yã¹nxe² ne³wã²na³nũ³na¹tu¹wa². Yxo²ĩ²tũ̱³ka̱³txi³ ĩ³nxai²na² ĩ³ãin²ta²kxi²nha²sxã³ yxau²xai³lah²lxan³jau³su² ne³wã²na³nũ³na¹tu¹wa². Kris²tu³jah¹la² ye³na² nxe³ye¹nx2ta¹wa².  
\v 11 Sa³ta³na²jah¹la² ko̱³nxe³ti³ kãi³sa̱in³si¹nhẽ³ju³ta³nũ³a² ã³ne³wxe³nũh¹ki̱³tã³la². A²nxe³jah¹la² Sa³ta³na²jah¹lai²li² ĩ³ki³ha¹kxi²nẽ³kxa²ya̱n³txi³su² ko̱³nxe³ti³ kãi³ju³txai¹tã² ne³wã²na³kxi²nũ³na¹wa². 
\s1 Pau²lah³lai²li² hxi²waun³ta³kxi²jau³su² 
\p  
\v 12 Nxa²ha¹te¹ Tro³a²te²thĩ³na² ã³wi¹ha¹hĩ¹nai³tã² Kris²tu³jah¹lai²na² wãn³txa² wi¹jau³xa² ĩ³yau¹ũ¹te³lhxã³ nxa¹hĩ¹nai³tã² o²la³kxi²na¹ju³ta³nũ³a² ã²la² ãu¹la³kxi²sa³na²hẽ³la². 
\p — Wi¹lhit1sxã³ o²la³kxi²na¹tũ¹xã¹.  
\v 13 Na¹ta¹ hxi²waun³txi³sa³hẽ¹la². Ti²to³jah¹la² txa²wã¹lon³yah³lo²su² kxah³la² ha²kxai³ ĩ³ha¹txi²sa²nxa³ha²kxai³ hxi²waun³txi³khaix1sa³hẽ¹la². Nxe³ha²kxai³ ã³waix3sxã³ Ma³se³to²na²ko³nãu³a² ai³na¹hẽ³la². 
\s1 Je³su²jah³la² ĩ³ka³lih³kxi²nẽ³jau³su² 
\p  
\v 14 Kxã³nhxĩ¹nai³tã² Ro³ma²no²ko³nãu³a² yxau²xai³lain¹tũ̱³ka̱³txi³nãu³xa² he¹lain¹to³ta¹hxai²ti³ai¹ti²tu³wa². Nxe³ka³tu̱³ta¹ ã²la² nũ³kxũn³te²na² sa²kxai³lu² a²ko̱¹ko̱¹nũ̱³ka̱³txa² sa²yu³lho¹tain¹ta¹hxai²ti³ai¹ti²tu³wa². Hã²wxãn³txa³ ĩ³xi²tãu³a² sa²yu³lho¹tũ̱³ka̱³txai²na² tẽ³nũ²la² a²ha³lo²khai³xa² ã³nxai³nũ²la² a²nũ̱³ka̱³txi³khai³xa² wã²nã³ũ¹hain¹to³ta¹hxai²ti³ai¹ti²tu³wa². Ka³lih³kxi²nyhain¹to³ta¹hxai²ti³ai¹ti²tu³wa². Nxain¹kxa²yã¹nxe³jut3sũ³nxe² a²nũ²a² sa²yu³lho¹kxa²yãx1sĩ¹na¹wa². Je³su²jah³lai²na² sa²kxai³lu² nũ³kxũn³jah¹la² yã¹nx2na³la². A²kxã³nxai³tã² ko̱³nxe³ti³ kãi³ju³ta² so¹lxi³ yxau²xai³sĩ¹na¹ju³kxai³lu² sa²yu³lhot1sa²sĩn¹jut3sũ̱³na³la². Nxe³hĩ¹nãn¹te²tu̱³ Je³su²jah³la² sa²yxo²wet1si¹hai¹na¹jau³nũ³su² a²nũ²a² a²yxo²ha³kxa¹ ĩ³yau¹ũ¹hain¹to³hxai²na¹hẽ³la². Jã¹nxe³nha¹hĩ¹nãn¹te²tu̱³ Je³su²jah³la² sa²yxo²wet1sĩ¹na¹kxai²nãn²tu̱³ ka³li³sa²to³sĩ¹nha²wa². Nxe³sĩ¹na¹jau³su² Txa²wã¹sũ̱³na² sa²nẽn¹kxi²to³sĩ¹na¹wa². Te²yã¹nxũn³ju³ta² Je³su²jah³lai²na² wãn³txa² wi¹jau³xa² tẽ³sxã³ sxi²jen³ti³nãu³xa² ã³nxai² ĩ²li³je³na² ã³nxai² nxe³sĩ¹na¹tãu³a² Je³su² Kris²tu³jah¹lai²na² wãn³txa² wi¹jau³xai²na² sa²kxai³lu² ĩ̱³yau³xa² wi¹lũ³jau³hũ̱³na³la². To¹nha²ki̱³jau³hũ̱³na³la². Nxe³kxe³su² a²nũ²a² u²lyxau³kxan²ti³ ĩ̱³nxũn³so¹ai¹nhĩ̱³nx2na³la². Jã¹nxe³kxe³hũ̱³nxe² Txa²wã¹sũ̱³na² wãn³txa² ĩ³yau¹ũ³sĩ¹na¹tãu³a² a²nũ²a² a²yxo²ha³kxa¹ jau³jau¹xai²na² ĩ³tih³nxain¹sĩ¹nhxai²na¹hẽ³la².  
\v 15 Jã¹nxe³jut3su² Txa²wã¹sũ̱³na² a²yen³nãu³a² yã¹nxũn³sĩ¹na¹wa². Ha³nxe²a² wi¹lũ³tho³xa² yã¹nxe³sĩ¹na¹wa². A²nxe³tho³tho¹xai²na² sa²kxai³lu² a²nũ²a² a²yxo²ha³kxa¹ ĩ³nxũn³so¹ain¹te²ju²hẽ³la². Te²yã¹nxe³kxe³hũ̱³nxe² a²nũ²a² a²yxo²ha³kxa¹ ĩ²sain¹to³sĩn¹na³la². Je³su²jah³lai²na² wãn³txa² sa²yxo²wet1sĩ¹na¹ju³ta² ĩ²sain¹sĩn¹na³la². Ko̱³nxe³ti³ kãi³ju³ta² yo³ha² wxa²wa²su¹te²nãu³xa² ĩ²sain¹sĩ¹nha²kxai³ ko̱³nxe³ti³ ĩ³yĩ¹li²hũ¹te²nãu³xa² ĩ²sain¹sĩ¹nha²kxai³ nxe³sain¹to³sĩn¹na³la².  
\v 16 Ko̱³nxe³ti³ ĩ³yĩ¹li²hũ¹nẽ³te²su² te²a² ko̱³tũ³nũ¹hain¹sĩ¹na¹wa². Yxãn¹ta¹ ko̱³nxe³ti³ kãi³ju³ta² yo³ha² wxa²wa²su¹te²nãu³su² te²a² wi¹lũ³nũ¹hain¹sĩ¹na¹wa². Nxe³ju³tai²na¹ ĩh¹te²ta̱³ Txa²wã¹sũ̱³na² wãn³txa² wain³txi³ ĩ³yau¹ũ¹si¹jau³su² hxi²kan¹te²la³ hĩ̱³ki̱³te²la¹xã³?  
\v 17 Txa²wã¹sũ̱³na² wãn³txa² yau³ã̱³lxi³ti³ ĩ³hen³txi³te²sa²sĩ¹nxa³wa² yen³kxih³te³la³ka³. Yxãn¹ta¹ Txa²wã¹sũ̱³na² hi²sen³kxai³lu² ĩ³sa²si¹hã³sa²tũ̱³ka̱³txi³su² sĩ¹na¹wa². Nxe³sĩ¹na¹ha²kxai³ e³lxah¹ ĩ³hen³txain¹jah¹lo²nãu³su² nha¹wa², Txa²wã¹sũ̱³na² ĩ²nẽ³lha²kxai³la². Kris²tu³jah¹la² ã³nũ²kxi²sa²sĩ¹nha²kxai³ yxau²xai³sĩ¹na¹wa². 
\c 3  
\s1 Txa²wã¹sũ̱³na² Yãu³ka³jxah¹la² ũh³ti³hit1tẽ³jau³su² 
\p  
\v 1 Nxe²e³kxi²sĩ¹na¹kxai²nãn²tu̱³ kwa² ĩ²sa²nẽn¹kxi²nha²hĩ̱³nha¹te²la¹xã³? Sa²nẽn¹kxi²si¹sah²lxin¹ju³tan¹txã³nxa² ten³sa²hĩ̱³sĩn¹te²la¹xã³? Sa²nẽn¹kxi²si¹sain¹sĩn¹txã³nxa² ũ³hũ¹nx2ti³te³lhxã³ nxe³txã³nxũ³a² ten³sa²hĩ̱³sĩn¹te²la¹xã³? Nxe²kãi³jah¹lo²su² jah¹la² ĩ²yah³lxin¹to³hxai¹nhẽ³la². Hai³txi³ jah¹la² yãx1sĩ¹nxa³wa².  
\v 2-3 A²nũ²a² wãn³txa² ũ³sa²si¹hã³ki̱³jau³xa² yã¹nx2na³la². Kxã³nhxĩ¹nai³tã² nxe³te²ju²hẽ³la². A²nũ²a² hxi²ka² a²nũ²a² wãn³txa² ũ³wha²li¹te²ju²hẽ³la². Nxe³ka³tu̱³ a²nũ²a² ã̱³xa² hxi²ka² ũ³sa²si¹hã³ki̱³te²ju²hẽ³la². A²nxe³jau³xai²na² ũ³sa²si¹hã³ki̱³jau³xan¹txã³nxa² txah³lxa³ka³lo³su² te²ju²hẽ³la². Nxe³ka³lo³ai²na² tẽ³sxã³ tĩn²ta²yau³xa² ũ³wha²li¹te²ju²hẽ³la². Kxã³nxai³tã² nxe³te²ju²hẽ³la². Nxe³ju³ta² yã¹nxe³kxe³hũ̱³sxã³ wãn³txa² ĩ³wxi²ka¹txa²lxi³si¹sah²lxin¹jau³su² yã¹yxah³lxi¹lxa². A²nũ²a² ĩ²li³te²a² ĩ²jau³xa² yã¹yxah³lxi¹lxa². Ĩ²nx2ti³kxai²nãn²tu̱³ wain³txi³ yxau²xai³yah³lxin¹ju³ta² ĩ²nx2ti³tu¹wa². Ĩ²nx2ti³sxã³ ĩ³ye³kxi²te³nah¹lxi¹: 
\p — Pau²lah³lai²li² ya²la³tu̱³ Sũ̱³na² ĩ³sa²si¹hã³jah¹lai²la¹xã¹. Ko³rĩn²to²thĩ³nãn¹tũ̱³ka̱³txai²na² a²ko̱³nxe³ti³ kãi³ju³ta² ã³na¹ha²kxai³ wain³txi³ kãi³sxã³ yxau³si¹jau³su² ĩ³yau¹ũ³ye²sain¹na³na¹. Nxe²e³kxi²hĩ̱³nx2na³la². Jã¹nxe³sxã³ Kris²tu³jah¹la² hxi²ka² ũ³wha²li¹jau³xai²la¹wa². Nxe³sxã³ txai²na¹xai²na² jau¹xai²na² ũ³sa²si¹hã³jah¹lo²sa¹wa². Jã¹nxe³jut3sũ̱³nxe² kãi³sxã³ txah³lxa³ka³lo³la³ hai³txi³ ũ³wha²li¹nxa³wa². Yxãn¹ta¹ a²nũ²a² ẽ¹nãu³a¹ ũ³wha²li¹la³kxi²na¹wa². Te²yã¹nxũn³sxã³ tĩn²ta²yau³xa² tẽ³sxã³ ũ³wha²li¹nxa³wa². Yxãn¹ta¹ Txa²wã¹sũ̱³na² Yãu³ka³jxah¹la² ka³te̱n³su² yxau²sa²tẽ³jah¹la² hi²sen³su² a²nũ²a² a²ẽ¹nãu³ai²na² ĩ³yau¹ũ³nhẽ³jah¹lo²su² na³la². 
\p  
\v 4 Kris²tu³jah¹la² ã³nũ²kxi²sxã³ yxau²sa²tẽ³sĩ¹na¹ha²kxai³ Txa²wã¹sũ̱³na² yxo²ĩ²sĩ¹na¹wa². Nxe³ha²kxai³ e³kxi¹nx2ta¹wa².  
\v 5 Txa²hxi²ka¹na¹ju³ta² yũ³sa²nxa³wa². 
\p — Hxi²ka¹na¹xã¹. Na¹kxai²nãn²tu̱³ ki³ha¹kxi²nha¹jau³su² hĩ̱³nx2na³la². Txa²wã¹sũ̱³na² hi²sen³su² ĩ³hxi²kat1ti³hit1sa³na²hẽ³la².  
\v 6 A²nxe³jah¹lai²na² hi²sen³kxai³lu² wãn³txa² tah²yau³xa² ĩ³ye³ĩ³yxo²ka²la¹hũ³nyhu¹kxi³jau³xa² ĩ³yau¹ũ¹nhẽ³na²hẽ³la². Nxe³jau³xai²na² a²nũ²a² a²ẽ¹nãu³ai²na² ã³wa²su¹tũ¹nhẽ³jau³xai²la¹wa². A²nxe³jau³xai²na² a²nũ²a² yxo²ha³kxa¹ ĩ³yau¹ũ³nyhu¹si¹ja³ki̱³jau³nũ³su² ĩ³hxi²ka¹tẽ³na²hẽ³la². Kxã³nxai³tãn¹jau³xai³tã² wãn³txa² yxo²ha³kxa¹ sa²yxo²we¹thxa³ki̱³sxa³kxai²nãn²tu̱³ ya³lu²ju³ta² so¹lxi³ yũ³nẽ³lhĩ̱³nx2na³la². Yxãn¹ta¹ wãn³txa² tah²yau³xai²li² yxo²ĩ²ki̱³kxai²nãn²tu̱³ ka³te̱³na² wi¹tãu³la³ yũ³ki̱³tã³la². \fig |src="CO00838B.TIF" size="span" copy="© 1978 David C. Cook Publishing Co." ref="2 Korintios 3.6" \fig* 
\p  
\v 7 Moi³se²ah³lu¹tai²na² wãn³txu¹tai²na² au³jau³xu¹tai²na² hxi²kan¹ti³ sa²yxo²we¹thxa³ki̱³sxa³jau³xai²la¹wa², wi¹jau³su² kxan²ti³na³. Tah³lxi³ka³lo³a² tẽ³sxã³ ũ³wha²li¹ta¹hxai²ti³ai¹ti²tu³wa². Nxe³te³na¹ Moi³se²ah³lu¹tai²na² jau¹xu¹tai²na² so¹hĩ¹nu¹tai²na² ĩ³ye³ha²te¹ta³lxi³ta¹hxai²ti³ai¹ti²tu³wa². Nxe³ju³tan¹te²kxa³ya̱³lhu² a²sa³wi³ha³lxi³su² te²kxai³lu² hxi²kan¹txi³ a²ye³na² ten³sa²tã³ain¹ta¹hxai²nxa³ti³ai¹ti²tu³wa², a²wxi²kin³ti³ton³ju³ta² kãi²nha²kxai³la².  
\v 8 Nxe³kxa²ha³tih³xan²tu̱³ tah²yau³xa² ĩ³ye³ĩ³yxo²ka²la¹hũ³nyhu¹kxi³jau³xa² ĩ³yau¹ũ¹nhẽ³ju³tan¹te²kxa³ya̱³lhu² Sũ̱³na² Yãu³ka³jxah¹la² nxũ²kwa̱i³yxau³nẽ³na³la². Nxe³ju³tan¹te²kxa³ya̱³lhu² Txa²wã¹sũ̱³nu¹tai²na² a²wi¹ju³ta² ã²la² kãi²non³ye²ha²kxai³ ã³sen³sai²na³la².  
\v 9 Moi³se²ah³lu¹tai²na² wãn³txa² au³hxai²hĩ¹nau³tẽx1tãn¹jau³xa² kãin² wxi²kin³ti³ton³khaix1ta¹hxai²ti³ai¹ti²tu³wa², hxi²kan¹ti³ sa²yxo²we¹thxa³ki̱³jau³sxa³kxan²ti³na³. Nxe³yãn¹ta¹ Txa²wã¹sũ̱³na² Yãu³ka³jxah¹la² ã²la² kãin² wxi²kin³ti³ton³na³la². Txa²wã¹ko̱³nxe³ti³ kãi³ki̱³ju³ta² ã³wa²su¹tẽ³ju³tan¹te²kxa³ya̱³lhu² kãin² wxi²kin³ti³ton³na³la².  
\v 10 Jã¹nxe³jut3su² a²wxi²kin³ti³ton³ju³tu¹tai²nãn¹ju³ta² kãin²khai¹nxe³hxai²hĩ¹nau³tẽx1ta² ĩ³kãi²nxa³tot3tã³la². Txa²wã¹sũ̱³na² A²yãu³ka³jxah¹la² a²wxi²kin³ti³ton³ju³ta² kãin² ã³sen³sai²na³la².  
\v 11 Jã¹nxe³ju³kxai³la¹ Moi³se²ah³lu¹tai²na² wãn³txa² ne³ki³son³na³la². Nxe³ju³tan¹te²kxa³ya̱³lhu² a²wxi²kin³ti³ton³ju³ta² ã³jũ¹nxo¹tã³la². Yxãn¹ta¹ te²yã¹nxe³jut3sũ̱³nxe² Txa²wã¹sũ̱³na² Yãu³ka³jxah¹la² nxũ²kwa̱i³yxau³sa²tẽ³nẽ³na³la². Nxe³ju³tan¹te²kxa³ya̱³tu̱³ a²wxi²kin³ti³ton³ju³ta² kãi²no̱n³na³la². Kãin²sa²tẽ³tu¹wa². 
\p  
\v 12 Nxe³jau³jau¹xai²na² yxo²ĩ²a¹ha²kxai³ wxi²kan¹txi³ e³a¹wa².  
\v 13 Moi³se²ah³lu¹tai²na² kãi³hxai²kxau³tẽx1 jãx1sĩ¹nxa³wa². Moi³se²ah³lu¹ta²kxai³lu² I³sa³e² a²nũ̱³ka̱³txa² ĩ³ye³kxi²te³lhxã³ ã³tĩ̱³ain¹kxai²nãn²tu̱³ jah¹lu¹ta²kxai³lu² wã²la²ka³lo³a² tẽ³sxã³ ũ³yhe³tĩ¹nha²ta¹hxai²ti¹ai¹ti²tu³wa². Yxãn¹ta¹ ũ³yhe³tĩ¹nhã²nxa³kxai²nãn²tu̱³ ĩ³ye³ha²te¹tẽ³ju³ta² ĩ³jũ¹nxon¹ju³ta² e³la¹ ĩ²ai¹nhĩ̱³nx2na³la².  
\v 14 Nxe³hĩ¹nãn¹te²tu̱³ txa²wã¹ye³na² wã²la² ũ³yhe³tĩ̱¹kxi²nha²sxã³ yxau²xai³ki̱³jut3sũ̱³nxe² txa²wã¹ẽ¹nãu³ai²na² a³la³kxi²hĩ̱³ki̱³sxa³wa². Moi³se²ah³lu¹tai²na² wãn³txa² so¹lxi³ ain³kxai¹nha²kxai³ ã³wa²su¹tẽ³lhĩ̱³nx2nxa³wa². Kris²tu³jah¹la² ã³nũ²kxi²sxã³ yxau³hĩ¹na¹ sa²ye³than²kxi²nha²ki̱³jut3sũ̱³sxã³ a³la³kxi²ta³lu²nhĩ̱³ki̱³tã³la².  
\v 15 Jã¹nxain¹ju³ta² Moi³se²ah³lu¹tai²na² wãn³txa² ĩ²ain¹ju³tu¹tai²nãn¹jau³xa² ĩ²ai¹nhxai²kxai³ jã¹nxain¹kxai²nãn²tu̱³ a²ye³na² ũ³yhe³tĩ̱¹kxi²nha²sxã³ yxau²xai³te²hũ̱³sxã³ a²ẽ¹na² a³la³kxi²ta³lu²nai¹nhĩ̱³nx2nxa³wa².  
\v 16 Te²yã¹nxe³sxã³ ko̱³nxe³ti³ kãi³ki̱³ju³ta² ã³na¹hxa³ki̱³kxai²nãn²tu̱³ wã²la² sa²sai¹kxi²nha²ki̱³jut3sũ³nxe² txa²wã¹ẽ¹na² ã³wa²su¹tẽ³tu¹wa². Je³su²jah³lai²na² wãn³txa² yxo²ĩ²ki̱³sa²kxai³ txa²wã¹ẽ¹nãu³a² ã³wa²su¹tẽ³tu¹wa². Txa²wã¹sũ̱³na² wãn³txa² au³hxai²tẽx1tãn¹jau³xai³tã² nxe³te³nah¹lxi¹: 
\p — Moi³se²ah³lu¹tai²na² sa²kxai³lu² Txa²wã¹hxi²kan¹ta² Si³yxau³jah¹la² ã³yxo²o³tũ¹kxai²nãn²tu̱³ ũ³yhe³tĩ¹kxi²nha²ka³lo³a³ sa²ye³than²kxi²nha²ta¹hxai²hẽ¹li¹. Nxe³ta¹hxai²hẽ¹la².  
\v 17 A²nxe³sxã³ Txa²wã¹hxi²kan¹ta² Si³yxau³jah¹lain²txi³ Txa²wã¹sũ̱³na² Yãu³ka³jxah¹lain²txi³ te²ain²txi²na³la². Jã¹nxe³ha²kxai³ Txa²wã¹sũ̱³na² Yãu³ka³txa² nxũ²kwa̱i³yxau³nẽ³nha²kxai³ ã³wa²sut1sxã³ yxau³ki̱³tã³la².  
\v 18 Wã²la²ka³lo³a² yen³kxa² ĩ³tĩ¹kxi²ka³lo³a² yã¹nx2na³la². Nxe³ta³ka³lo³ai²na² sa²than²kxi²kxai²nãn²tu̱³ yen³kxai²na² e³lxah¹ ĩ²ki̱³te²jai¹ti²tu³wa². Nxe³kxa² yã¹nxe³sxã³ Je³su²jah³lai²na² wãn³txa² yxo²ĩ²te²ki̱³na¹xai²na² sa²kxai³lu² Sũ̱³na² a²wi¹ju³ta² e³lxah¹ ũ³ka̱¹nha²ye²ki̱³tã³la². Te²yã¹nxe³sxã³ es³pe²ya²ka³lo³a² ĩ²nha²ki̱³jut3sũ̱³nxe² Txa²wã¹sũ̱³na² a²wi¹ju³ta² e³lah²lxi³ ye²ki̱³tã³la². Nxe³ki̱³sa²kxai³ Sũ̱³na² Yãu³ka³jxah¹lai²li² nxu²kwa̱i³yxau³nũ¹nhẽ³na³la². Nxe³ki̱³ju³tan¹te²kxa³ya̱n³tu̱³ti¹ Txa²wã¹sũ̱³na² yã¹nxe³ki̱³tã³la². 
\c 4  
\s1 Txa²wã¹sũ̱³na² wãn³txa² nũ³kxũ³nha²kxai³ txa²wã¹nũ²ai²na² nũ³kxũ³nxa³ha²kxai³ nxe³jau³su² 
\p  
\v 1 Jãx1nha¹jut3su² Txa²wã¹sũ̱³na² wi¹lhin¹sxã³ thãi³ti³la² sa²hau³kot3sa²sĩ¹nha²kxai³ wa³ka³li³yu³tai²li² Sũ̱³na² wãn³txa² ĩ³hen³txain¹sĩ¹na¹ju³tai²li² nxe³ti³hit1sa²sĩn¹na²hẽ³la². Nxe³ti³hit1sa²sĩn¹ju³tan¹te²kxa³ya̱³lhu² nxũ²kwa̱i³lxũ¹sa²tẽ³nha¹wa².  
\v 2 Nxe³sa²sĩ¹nha²kxai³ hãi³a² ko̱³nxe³ti³ kãi³sĩn¹te²txã³wa². Ãu²li²thin¹nha¹ju³ta² kãi³sĩn¹te²txã³wa². A²nũ²a² ã̱³xa² ã³ke³tũ¹sĩn¹te²txã³wa². Txa²wã¹sũ̱³na² wãn³txa² ko̱³nxe³ti³ yau³xã̱³lxi³ ĩ³yat3sĩn¹te²txã³wa². Nxe³ha²kxai³ hãi¹nxe³sxã³ ya²la³tu̱³ju³ta² so¹lxi³ o²la³kxi²sĩn¹te²sa¹wa². Nxe³nha¹jut3su² Txa²wã¹sũ̱³na² yen³nãu³a¹ wi¹kãi³nha¹ju³ta² a²nũ²a² yxo²ha³kxa¹ a³la³kxain¹jau³su² ĩ²sain¹sĩn¹na³la².  
\v 3-4 Kris²tu³jah¹lai²na² a²wxi²kin³ti³ton³ju³tain²txi³ Txa²wã¹sũ̱³na² a²wxi²kin³ti³ton³ju³tain²txi³ nxe²na³la². Nxe³ju³tai²na² Kris²tu³jah¹lai²na² wãn³txa² wã³nxĩn¹jau³xai²na² ĩ³hen³txi³ki̱³kxai²nãn²tu̱³ txa²wã¹ẽ¹na² sa²hau³ko³tũ¹nhẽ³jau³xa² ĩ³hen³txi³ki̱³tã³la². Ha³lo²a² ĩ³ha²te¹kxi²nẽ³jut3sũ̱³nxe² Kris²tu³jah¹lai²na² wãn³txa²kxai³lu² txa²wã¹ẽ¹nãu³ai²na² ĩ³la³kxi²ti³hi¹tẽ³na³la². Nxe³yãn¹ta¹ Kris²tu³jah¹lai²na² wãn³txa² ĩ³hen³txi³ki̱³sxa³kxai²nãn²tu̱³ a²nũ²a² ko̱³nxe³ti³ ĩ³yĩ¹li²ju³ta³nũ³a² yũ³te²nũ̱³ka̱³txai²na² so¹lxi³ wãn³txai²na² Kris²tu³jah¹lai²na² wãn³txa² yũ³ai¹nxa³lho³la². A²nxe³tũ̱¹ka̱³txai²na² sa²kxai³lu² Sa³ta³na²jah¹la² yuh³xan¹ko̱³xai²na² a²sũ̱³nu²su² ki³lxo³nha²jah¹lai²na² hi²sen³su² wã²la² ã³ye³tĩ¹jut3sũ³nxe² wãn³txai²na² sa²no¹te²ju²hẽ³la², yxo²ĩ²ain¹kxa²ya̱n³txi³sa³.  
\v 5 Jã¹nxa¹jut3su² wãn³txa² ĩ³yau¹ũ¹nx2ti³sĩ¹na¹jau³xai³tã² hai³txi³ txa²wãn³txi³khai³xa² sa²wxi²ka¹txa²lxi³sĩ¹nxa³tai¹ti²tu³wa². Yxãn¹ta¹ Je³su² Kris²tu³jah¹la² Txa²wã¹hxi²kan¹ta² Si³yxau³jah¹lo²su² ha²kxai³ nxe³jah¹lai²na² wãn³txa² so¹lxi³ sa²wxi²kat1txa²lxi³sĩ¹na¹tai¹ti²tu³wa². Hai³txi³ wxa²hxi²kan¹jah¹lo²su² sĩ¹nxa³wa². Kwa² wa³kon³kxi¹nx2ti³sĩ¹na¹wa², Je³su² Kris²tu³jah¹la² a²nũ²kxi²sxã³ yxau³nha¹ha²kxai³la².  
\v 6 A²kxã³nxu¹tai²na² Txa²wã¹sũ̱³na² wãn³txi³kxai³lu¹ e³kxi²te³nah¹lxi¹: 
\p — Ka³nxah³ju³ta² ĩ³ha²te¹tu¹wi¹. Nxe³ta¹hxai²ti³ai¹ti²tu³wa². A²nxe³jah¹lain²txi³ txa²wã¹ẽ¹nãu³ai²na² ĩ³ha²te¹tũ¹nhẽ³jah¹lain²txi²na³la². Txa²wã¹sũ̱³na² wxi²kin³ti³ton³ju³ta² a³la³kxi²nũh¹nhẽ³te³lhxã³ txa²wã¹ẽ¹na² ĩ³ha²te¹tẽ³na³la². Txa²wã¹sũ̱³na² wxi²kin³ti³ton³ju³tai²na² Kris²tu³jah¹la² wxi²kin³ti³ton³ju³tain²txi²na³la². Nxe³sxã³ Kris²tu³jah¹lai²na² wxi²kin³ti³ton³ju³ta² ĩ²ki̱³kxai²nãn²tu̱³ Txa²wã¹sũ̱³na² wxi²kin³ti³ton³ju³ta² ĩ²nũn³ki̱³tã³la². 
\p  
\v 7 Txa²wã¹sũ̱³na² wãn³txa² ĩ³yau¹ũ³sĩ¹na¹jau³su² Txa²wã¹sũ̱³na² hi²sen³kxai³lu² ĩ³hxi²kat1sa²sĩn¹na²hẽ³la². Nũ³kxũn³sa²sĩn¹nxa³kxan²ti³ Sũ̱³na² wãn³txa² ĩ³yau¹ũ³sĩn¹to³ha¹wa². Nxe³sxã³ Txa²wã¹sũ̱³na² nũ³kxũn³ju³ta² a²nũ²a²nãu³xa² ĩ³yau¹ũ³si¹hai¹na¹jau³su² nũ³kxũ³nxa³ju³ta² yũ³sĩ¹na¹wa². Kwa³ta³lẽ³na² kxĩh³nxẽ¹nhũ̱³sĩ¹na¹wa². Txa²wã¹sũ̱³na² so¹lxi³ nũ³kxũn³jah¹lai²la¹wa². Nxe³sxã³ Sũ̱³na² wãn³txa² ĩ³yau¹ũ³si¹sĩ¹na¹jau³su² wxi²kan¹txi³ ĩ³ye³ti³hit1sa²sĩn¹na³la².  
\v 8 A²nũ²a² ã̱³xa² ye³ka³lxa¹txi³ ã³sa²ki³wa³ti³kxi²sxã³ khãuh³lxa³ti³sain¹kxan²ti³ hai³txi³ ã³nhxi²kat1sai¹nxa³hẽ³la². Wã̱³wã̱³ta³kxi²nha¹to³ha¹kxan²ti³ hai³txi³ yxo²ĩ²a¹ju³ta² ã³na¹la³kxi²nha²nxa³hẽ³la².  
\v 9 Ko¹ko¹sain¹tũ̱³ka̱³txa² ka³lxa¹khai¹xain¹kxan²ti³ hai³txi³ txa²ya̱³lxa² hxan³kxi²sa²nxa³hẽ³la². Ĩ³yĩx1tot3sxã³ ã³na¹sain¹to³kxan²ti³ hai³txi³ ya³lu²sa²nxa³hẽ³la².  
\v 10 Je³su²jah³la² ya³lu²kxi²nẽ³ju³ta² ĩ³yau¹ũ³ai¹na¹ha²kxai³ a³lan²ta² hãi¹nxe³ti³xa¹ su²lhã³te³lhxã³ sain¹to³nha²hẽ³la². Yxãn¹ta¹ Kris²tu³jah¹la² ka³te̱n³su² ĩ³sa²yxau³si¹jah¹lai²nãn²tu̱³ ĩ³hxi²kat1sa²ju³ta² ĩ²sai¹nha²kxai³ hai³txi³ hxi²kan¹txi³ su²lhã³sai¹nxa³hẽ³la².  
\v 11 Je³su²jah³la² yxo²ĩ²ai¹nxa³tũ̱³ka̱³txai²na² sa²kxai³lu² Je³su²jah³lai²na² wãn³txa² ĩ³yau¹ũ³ai¹na¹ju³ta² te³nai¹nxa³wa². Nxai¹nxa³ha²kxai³ su²lhã³sain¹ju³ta² so¹lxi³ o²la³kxi²sain¹na³la². Nxe³yãn¹ta¹ Kris²tu³jah¹la² ĩ³hxi²kat1sa²ju³ta² ĩ²sain¹na³la². Nxe³sxã³ Txa²wã¹sũ̱³na² ĩ³ye³kxi²sa²te³nah¹lxi¹: 
\p — Khãuh³lxa³txi³nxain¹tu¹wi¹. Nxain¹tãu³ãn²tu̱³ta¹ ĩ³nxũ²kwa̱i³lxũ¹txi³nxa²ha¹tu¹wi¹. Nxe³nxa²ha¹kxai²nãn²tu̱³ nxe³na¹ju³ta² ĩ²ain¹tu¹wi¹. Jã¹nxe³nxa²ha¹ju³tai²li² wain³na³li¹. Txa²wã¹sũ̱³na² nxe³sa²to³nha³la².  
\v 12 Nxe³ha²kxai³ Je³su² Kris²tu³jah¹lai²na² wãn³txa² ĩ³yau¹ũ³nx2ta¹ha²kxai³ khãuh³lxa³txi³nha²sxã³ ya³lu²na¹ju³ta³nũ³a² yũ³khai¹nx2na³la². Nxe³nha¹ju³tai²nãn¹ta¹kxa²ya̱³lhu² khãuh³lxa³txi³nha¹ha²kxai³ wxa²ẽ¹nãu³ai²na² ka³te̱³na² wi¹tãu³la³ yũ³sxã³ yxau³yah³lxi¹lxa². 
\p  
\v 13 A²kxã³nxa² Txa²wã¹sũ̱³na² wãn³txa² ũ³wha³li¹ta¹hxai²hẽ¹la². Ũ3wha³li¹te³nah¹lxi¹: 
\p — Txa²wã¹sũ̱³na² wãn³txa² yxo²ĩ²a¹wi¹. Nxa¹ha²kxai³ jau³jau¹xai²na² ĩ³yau¹ũ³jah¹lo²sa¹wi¹. Nxe³ta¹hxai²hẽ¹la². Te²u¹jã¹nxũ³na¹ha²kxai³ Txa²wã¹sũ̱³na² wãn³txa² yxo²ĩ²a¹ha²kxai³ jau¹xain²txi³ ĩ³yau¹ũ¹jah¹lo²su²nũ³na¹wa².  
\v 14 Nxe³na¹ha²kxai³ Txa²wã¹sũ̱³na² hi²sen³kxai³lu² Je³su²jah³la² Txa²wã¹hxi²kan¹ta² Si³yxau³jah¹lo²su² ha²kxai³ nxe³jah¹la² sa²kxai³lu² a²kxã³nxa² ka³te̱n³su² ĩ³sa²yxau³xi²si¹ta¹hxai²ti³ai¹ti²tu³wa². Nxe³kxa² yã¹nxe³sxã³ kã³nãu³a¹ Je³su²jah³la² ka³te̱n³su² ĩ³sa²yxau³xi²ti³hit1sxai²kxai³ jã¹nxe² ka³te̱n³su² ĩ³sa²yxau³xi²ti³hit1sa²nũn³tu¹wa². Nxe³sa³kxai²nãn²tu̱³ txai²na² wxa²nũ̱³ka̱³txai²na² nxe³sxã³ ã³sa²so¹xi²nẽ³lhxã³ a²yxau³ju³khai³xa² ũh³wxe²xai³nẽ³tu¹wa².  
\v 15 Jã¹nxa¹jut3su² khãuh³lxa³ti³hit1sa²ju³tai³tã² ĩ³yau¹ũ¹nx2ti³jau³xai²la¹wa², nũ³kxũn³sxã³ yxo²ĩ²si¹nx3ti³jau³sa³. Nxe³kxai²nãn²tu̱³ Txa²wã¹sũ̱³na² thãi³ti³la² a³lxi²nẽ³kxe³su² txa²wã¹nũ̱³ka̱³txi³ki̱³na¹xai²na² ã³ka³lxa¹ton³sxã³ thãi³ti³la² a³lxi²nẽ³tu¹wa². Nxe³nẽ³kxai²nãn²tu̱³ Txa²wã¹sũ̱³na² sa²nẽn¹kxi²yah³lxin¹ju³tai²li² ã³kãi²non³khai¹tu¹wa². Nxe³kxai²nãn²tu̱³ta¹ Txa²wã¹sũ̱³na² wxi²kin³ti³ton³ju³tai²li² ã³kãi²non³nũn³tu¹wa². 
\s1 Yxo²ĩ²nha¹kxe³su² ka³te̱n³ti³ yxau²xai³ki̱³jau³su² 
\p  
\v 16 Jã¹nxe³jut3su² yxo²ĩ²ki̱³ju³ta² hxi²tha²on³ki̱³sxa³lho³la². Txa²wã¹sĩ̱³na² ko̱³nxe³ton³nẽ³kxan²ti³ txa²wã¹wi¹tãu³a² a³lan²ta² hãi¹nxe³ti³xa¹ ã³ta²ho³tẽ³na³la².  
\v 17 Jã¹nxe³ju³kxai³lu¹ khãuh³lxa³tẽ³nha²ki̱³ju³ta² kãi²nxa³wa². Kxãn³nãu³a¹ ne³ki³son³tu¹wa². Nxe³tãu³a¹ Txa²wã¹sũ̱³na² a²wxi²kin³ti³ton³ju³ta² nxe³ti³hi¹tẽ³ju³tai²li² yxau²sa²tẽ³si¹nhẽ³tu¹wa².  
\v 18 Nxe³ki̱³sa²kxai³ yen³kxa² txa²wã¹yen³na² ĩ²ki̱³kxa² ten³sa²tã³sxã³ ĩ²sxã³ yxo²kwa̱in³ki̱³sxa³wa². Yxãn¹ta¹ hxi²kan¹txi³ ĩ²ki̱³sxa³kxa² yxo²kwa̱in³ki̱³tã³la². Nxe³sxã³ ĩ²ki̱³ki³ai²na² kxãn³su² yxau²xai³te²sxa³yu²hẽ³la². Yxãn¹ta¹ hxi²kan¹txi³ ĩ²ki̱³sxa³kxa² ã²la² kãn³su² yxau²sa²tẽ³tu¹wa². 
\c 5  
\p  
\v 1 Txa²wã¹nũ²a²nãu³ai²na² sxi²hũ̱³na³la². Sxi²hai²li² tĩ³non³kxai²nãn²tu̱³ sxi²ha² txa²hĩ³na² wẽ̱³no̱n³te³lhxã³ txon³ki̱³te²jai¹ti²tu³wa². Te²yã¹nxe³ki̱³hũ̱³nxe² txa²wã¹nũ²ai²na² hĩ¹na² hin¹te²ki̱³na¹xai²na² yah³lon¹nẽ³tu¹wa². Yah³lon¹sxã³ ya³lu²ki̱³kxai²nãn²tu̱³ nũ¹ka³na¹ oh³nãu³a¹ Txa²wã¹sũ̱³na² hi²sen³kxai³lu² tah²sĩ̱³na² sa²ta²lho³tẽ³tu¹wa². Wã²nxũ̱h¹ we¹tẽ³tu¹wa². Nxe³nẽ³kxai²nãn²tu̱³ hai³txi³ sĩ̱n³khon³ti³nẽ³ju³ta³nũ³la³ yũ²nxa³lho³la². Hãi¹sxã³ wi¹yxau³sa²tẽ³ki̱³tu¹wa², oh³xan¹ko³nãu³a¹sa³.  
\v 2 Nxe³ha²kxai³ oh³xan¹te²a² a²sĩ̱³na² sa²wẽ̱³not3sa²ju³ta³nũ³a² wah³nxe³khaix1na¹wa². Yxo²kwa̱in³sxã³ wah³nxe³na¹wa².  
\v 3 Nxe³ha²kxai³ oh³xan¹te²a² a²sĩ̱³khai³nũ³a² sa²wẽ̱³not3sa²ju³ta³nũ³a² yũ³hĩ¹na² yuh³xan¹ta³sĩ̱³khai³su² na¹ju³ta² yũ²nxa³lho³la². A²yãu³ka³txi³khai³xa² so¹lxi³ nũ¹he¹ju³ta³la³ yũ²nxa³lho³la². Oh³xan¹te²a² a²sĩ̱³na² txah²sĩ̱³na² sa²wẽ̱³not3sa²ju³ta³nũ³a² yũ³tu¹wa².  
\v 4 Jã¹nxa¹ha²kxai³ ti¹a² yxau²xai³la¹tãu³a² yuh³xan¹ta³sĩ̱³na² sĩ̱³nxe³sxã³ yxau²xai³la¹tãu³a² ãin²ta³kxi²nha²sxã³ wahx3na¹wa². Khãuh³lxa³txi³khaix1nha²sxã³ yxau²xai³la¹ha²kxai³ ãin²ta³kxi²nha²sxã³ wahx3na¹wa². 
\p — Txa²sĩ̱³khai³xa² ã³na¹a¹tũ¹xã¹. Nxe²nxa³wa². Yxãn¹ta¹: 
\p — Oh³xan¹ta² sĩ̱³na² so¹lxi³ ã³wẽ̱³no³ta¹tũ¹xã¹. Nxa¹nha²wa². Te²yã¹nxe³sxã³ ka³te̱³na² wi¹tãu³a² sa²kxai³lu² yuh³xai²nãn¹ta³ko³xai²na² sĩ̱³nai²na² sa²sai¹kxa²hxat3tẽ³tu¹wa².  
\v 5 Txa²wã¹sũ̱³na² hi²sen³kxai³lu² txah²sĩ̱³na² wẽ̱³no³tẽ³sĩ̱n³nũ³a² ãu¹la³kxi²sa³na²hẽ³la². Jah¹lain²txi³ Txa²wã¹sũ̱³na² Yãu³ka³jxah¹la² ũ³hũ¹sa³na²hẽ³la². Txa²wã¹sĩ̱³na² tah²sĩ̱³na² ũ³hũ¹sa²ju³ta² ya²la³tu̱³ a³la³kxi²si¹nhẽ³jau³nũ³ai²la¹wa². 
\p  
\v 6 Nxe³kxan²ti³ ya³lo³txi³khaix1sxã³ yxau²xai³lhxã³ wah³nxe³na¹wa². Yuh³xai²na² yxau²xai³la¹tãu³a² yuh³xan¹ta³sĩ̱³na² sĩ̱n³nxe³ha¹ju³ta² yxau²xai³la¹ju³tai²na² Txa²wã¹sũ̱³na² yxau³tãu³a² un²ta³kxi²na³la². Nxe³kxa²ha³ta̱³nxãn²ti³ ya³lo³txi³khaix1sxã³ yxau²xai³lhxã³ wah³nxa¹wa².  
\v 7 Nxe³ha²kxai³ yxo²ĩ²nha¹ju³tai²na² so¹lxi³ yxau²xai³la¹wa². Hai³txi³ txa²ye³na² ĩ²a¹ju³ta² yxau²xai³nxa³wa².  
\v 8 Nxe³ha²kxai³ ya³lo³txi³khaix1sa³nha²wa². Yuh³xan¹ta³sĩ̱³na² sĩ̱n³nxe³ha¹ju³ta² ã³na¹sxã³ ã³tĩ¹kxi²nha²ti³ten³sa³nha²wa². Na¹kxai²nãn²tu̱³ nxe³hĩ¹na² Txa²wã¹sũ̱³na² yxau³ju³ta² ai³sxã³ yxau²xai³la¹ju³ta² so¹lxi³ ten³sa³nha²wa².  
\v 9 Yxãn¹ta¹ kwa²hãi¹nxe² ĩ³ka³lih³sa²ju³ta² ten³sa²nxa³nha²wa². Txa²wã¹sũ̱³na² ĩ³ka³lih³kxi²na¹ju³ta² so¹lxi³ ten³sa³nha²wa². Ti¹ai²na² yuh³xan¹ta³sĩ̱³na² sĩ̱n³nxe³sxã³ yxau²xai³ta̱³nxa² oh³nãu³nũ¹ka³na¹ yxau²xai³ta̱³nxa² ĩ²li³je³na¹ yxau²xai³la¹kxan²ti³ Txa²wã¹sũ̱³na² ĩ³ka³lih³kxi²na¹ju³ta² so¹lxi³ ten³sa³nha²wa².  
\v 10 Nxe³ha²kxai³ kã³nãu³a¹ Kris²tu³jah¹la² yen³nãu³a¹ ã³ka̱¹nha²ye²ki̱³tu¹wa². óka̱¹nha²ye²ki̱³tãu³a¹ o²la³kxi²ki̱³ju³ta² ĩ²li³nẽ³tu¹wa². Nxe³ki̱³kxai²nãn²tu̱³ wi¹jut3su² ta̱³nxa² ko̱³nxe³jut3su² ta̱³nxa² a³ya³txi²xai³nẽ³tu¹wa². Yuh³xan¹ko³xai²na² yxau³ki̱³tãu³a² o²la³kxi²ki̱³ju³ta² yo³ha² a³ya³ti³nẽ³tu¹wa². 
\s1 Txa²wã¹sũ̱³na² a²ya̱³lhu²ti³hi¹tẽ³jau³su² 
\p  
\v 11 Nxe³ha²kxai³ Txa²wã¹sũ̱³na² yen³nãu³a¹ o²la³kxi²ki̱³kxa² yo³ha² a³ya³ti³nẽ³ju³ta² yũ³ki̱³sa²kxai³ Txa²wã¹sũ̱³na² o²nẽ³na³la². Nxe³ju³tan¹te²kxa³ya̱³lhu² Kris²tu³jah¹la² yxo²ĩ²si¹jau³su² a²nũ²a² a²yxo²ha³kxa¹ ĩ³hen³txai¹na¹wa². Nxe³na¹ju³tai²li² wain³txi³ kãi³ye²nha¹kxe³su² Txa²wã¹sũ̱³na² yen³nãu³a² e³lxah²lxi²na³la². Te²yã¹nxe² wxa²yen³nãu³a² e³lxah²lxi³ye²nũn³te²sĩ³lxi²na³la².  
\v 12 Nxe³na¹ha²kxai³ txai²na² sa²kxai³lu² wi¹kãi³a¹ju³ta² yxo²kãin²txi³ ĩ³ye³xa³lho³la². Nxe²nxa³ha²kxai³ Sũ̱³na² ĩ³kaix1so¹tũ̱³ka̱³txi³su² ki³lxo³te²nãu³xa² ĩ³lxa³thi¹nai¹nxa³wa². Wãn³txa² wi¹le³kxi²nũ¹hain¹jau³xa² so¹lxi³ yxo²kwa̱i³no³tain¹na³la². Yxãn¹ta¹ Sũ̱³na² wãn³txa² a̱u³txi³ a²ẽ¹nãu³ai²na² ĩ³sa²hẽ²txa³lxai¹nxa³wa². A²nxe³tũ̱¹ka̱³txai²li² wxã³nũh¹nx2tain¹kxai²nãn²tu̱³ a̱u³txi³ a²ẽ¹nãu³ai²na² ĩ³sa²hẽ²txa³lxi³ju³ta² ĩ²ai¹nxa³ha²kxai³ ko̱³nxe³te²lot3sain¹ta¹hẽ¹la². Nxain¹kxai²nãn²tu̱³ wain³txi³ kãi³sĩ¹na¹ju³ta² ĩ³ye³sxã³ ĩ³wa²lũ³xain¹yah³lxin¹kxai²nãn²tu̱³ ko̱³nxe³ti³ kãi³ain¹ju³ta² e³lxah²lxi³ ĩ³yau¹ũ³ain¹yah³lxi³hĩ̱³nxa¹lxa².  
\v 13 A²nxe³tũ̱³ka̱³txai²na² a²ha³tih³xai²na² wãn³txi³kxai³lu¹: 
\p — Pau²lah³lai²li² wen¹te²hũ̱³jah¹lai²la¹wi¹. A²hoh³lxi³su² nxa³wi¹. Nxain¹jau³su² ta¹hẽ¹la². Nxe³to³ta¹ wen¹te²hũ̱³jah¹lo²sa¹kxan²ti³ Txa²wã¹sũ̱³na² a²ten³jau³su² kãi³a¹wa². Jã¹nxe³sxã³ tũ̱¹ka̱³txai²na² wxa²nũ̱³ka̱³txi³ ã̱³xai²na² ã¹ha² ha³tih³xai²na² wãn³txi³kxai³lu¹: 
\p — Pau²lah³lai²li² kheh¹khai¹nxe³ha²kxai³ a²nũ²a² ã³ke³tũ¹ain¹na³li¹. Nxain¹jau³su² ta¹hẽ¹la². Nxe³ain¹kxan²ti³ wã²nxũ̱h¹ o²la³kxin²nxa³wa². Hxi²nũ¹nx2ti³te³lhxã³ o²la³kxi²na¹wa².  
\v 14 Kris²tu³jah¹la² a³lxi²nẽ³ju³tan¹te²kxa³ya̱³lhu² ã³wa³kxẽn³ta³sxã³ yxau³ki̱³tã³la². Nxe³sxã³ a²nũ²a² ka³na³ka³na³jah¹la² so¹lxi³ nxe³te²a² hi²sen³su² a²nũ²a² yxo²ha³kxa¹ ya³lu²kxi²nũh¹nẽ³ta¹hxai²ti³ai¹ti²tu³wa². Nxe³ju³tan¹te²kxa³ya̱³lhu² a²nũ²a² yxo²ha³kxa¹ ya³lu²te²lo³tẽ³ta¹hxai²ti³ai¹ti²tu³wa².  
\v 15 Nxe³ha²kxai³ a²nũ²a² yxo²ha³kxa¹ ya³lu²kxi²nũ¹nhẽ³lha²kxai³ hai³txi³ wã²nxũ̱h¹lxi³sxã³ o²la³kxi²nẽ³ju³ta² so¹lxi³ yũ³hĩ̱³ki̱³sxa³wa². Yxãn¹ta¹ ya³lu²kxi²nũ¹nhẽ³jah¹la² so¹lxi³ yxau³nxũh¹hĩ̱³ki̱³tã³la². A²nxe³jah¹lai²li² ya³lu²kxi²nũh¹nẽ³lhãn²ka³tu̱³ hã²wxãn³txa³ Txa²wã¹sũ̱³na² hi²sen³kxai³lu² ka³te̱n³su² ĩ³sa²yxau³xi²ti³hi¹tũ¹nhẽ³ta¹hxai²ti³ai¹ti²tu³wa², txa²wã¹ẽ¹nãu³ai²na² wxa²wa²su¹tẽ³te³lha³ka². 
\p  
\v 16 Nxe³ha²kxai³ nxe³hĩ¹nãn¹te²tu̱³ yuh³xai²nãn¹jah¹la² yã¹nxe³sxã³ a²nũ²a² te²li² a³la³kxi²ju³ta² ĩ³yĩ¹lin²nxa³lho³la². A²kxã³nxa² te²yã¹nxe² Kris²tu³jah¹la² ĩ³yĩ¹li²ha¹hẽ³la². Yxãn¹ta¹ hĩ¹nai²li² nxe²nxa³lho³la².  
\v 17 Nxe³sxã³ Kris²tu³jah¹la² ã³nũ²kxi²sxã³ yxau²xai³ki̱³kxai²nãn²tu̱³ txa²wã¹ẽ¹nãu³ai²na² tah²lo³tẽ³na³la². Nxe³hĩ¹nãn¹te²tu̱³ ko̱³nxe³ti³ kãi³sxã³ yxau²xai³ki̱³ju³tai³tã² ã³na¹ki̱³tã³la². Ha³lo²a² tah²lxi³ sa²wẽ̱³no³tũ¹nhẽ³na³la².  
\v 18 Txa²wã¹sũ̱³na² hi²sen³kxai³lu² we¹tẽ³jah¹lai²la¹wa². We¹tẽ³te³na¹ Kris²tu³jah¹la² a²hxi²ka² sa²ta²lho³tẽ³na²hẽ³la². A²kxã³nxai³tã² a²ko̱¹ko̱¹su² ki̱³tai¹ti²tu³wa². Nxe³ki̱³kxan²ti³ sa²ta²lho³tẽ³lhĩ¹nai²na¹ a²ya̱³lhu²ti³hit1tẽ³na³la². Nxe³kxa²yu³su² Sũ̱³na² ko¹ko¹nũ̱³ka̱³txa² ĩ³sa²si¹hã³kxi²nẽ³na³la². Ĩ³sa²si¹hã³kxi²nẽ³lha²kxai³ Kris²tu³jah¹la² ya̱³lxi²hain¹ki̱³ju³ta³nũ³a² ĩ²hen³txain¹te³lhxã³ kwa³na³nẽ³na³la².  
\v 19 Ĩ³sa²si¹hã³kxi²nẽ³jau³xa²sa¹, Kris²tu³jah¹la² ã³nũ²kxi²sxã³ yxau²xai³lain¹kxai²nãn²tu̱³ Txa²wã¹sũ̱³na² ya̱³lxi²ti³hi¹tain¹tu¹wa². Nxain¹kxai²nãn²tu̱³ ko̱³nxe³ti³ kãi³ain¹ju³ta² yxo²ha³kxa¹ ne³wã²na³kxi²ti³hi¹tain¹tu¹wa². Nxa²ha¹te¹ txai²na¹xai²na² nxe³ti³hit1sa²te³nah¹lxi¹, a²nũ²a² yxo²ha³kxa¹ ĩ³yau¹ũ¹hai¹na¹ju³ta² ten³si¹hain¹jau³su² kwa³na³sa³na²hẽ³la². 
\p  
\v 20 Kris²tu³jah¹la² ĩ³sa²si¹hã³sa³ha²kxai³ ĩ³ye³kxi¹nx2ta¹wa². Txa²wã¹sũ̱³nu²khai³xa² ĩ³ye³kxi¹nx2ti³kxa² yã¹nxe² e³kxi¹nx2ta¹wa². Txa²wã¹sũ̱³na² hi²sen³kxai³lu² ã³ya̱³lxi¹nx2ti³te³lhxã³ nx2na³la². Sa²yxo²ã³ah³lxi³txa³hẽ¹la².  
\v 21 Nxe³sxã³ Kris²tu³jah¹la² ko̱³nxe³ti³ kãi³ti³hex1ta¹hxai²nxa³ti³ai¹ti²tu³wa². Nxe³kxan²ta² Txa²wã¹sũ̱³na² hi²sen³kxai³lu² ko̱³nxe³ti³ kãi³ki̱³kxa² yo³ha² so²hxa³kxi²nẽ³jah¹lo²su² ti³hi¹ta¹hxai²ti³ai¹ti²tu³wa², Kris²tu³jah¹la²sa³. Nxe³ha²kxai³ txa²wã¹ki̱³na¹xai²na² sa²kxai³lu² Kris²tu³jah¹la² a²nũ²kxi²sxã³ yxau³nũ¹ki̱³kxai²nãn²tu̱³ Txa²wã¹sũ̱³na² yen³nãu³a¹ wain³te²lo³tẽ³na³la². 
\c 6  
\p  
\v 1 Jã¹nxe³jut3su² Txa²wã¹sũ̱³na² ya̱³lxi³nũ¹sa²sĩn¹na²hẽ³la². Nxe³nũ¹sa²sĩ¹nha²kxai³ Sũ̱³na² a²wa³ka³la² wa³kon³kxi²sĩ¹na¹wa², ĩ³hxi²kat1sa²sĩ¹nha²kxai³la². Nxe³sa²sĩ¹nha²kxai³ wxãi²kxai³ Txa²wã¹sũ̱³na² kãin² thãi³ti³la² a³lxi¹nx2ti³ju³ta² kwa² ã³na¹yah³lxi³txa³hẽ¹la².  
\v 2 Nxe³yah³lxi¹nha²kxai³ Txa²wã¹sũ̱³na² wãn³txa² ain³kxi¹jah³lxi³hẽ¹la². Nxe³te³nah¹lxi¹: 
\q1 — Wi¹lĩ²nx2ti³tãu³a² ain³kxi¹nx2ta¹wi¹. Nxe³ha²kxai³ ã³non²ta³kxi¹nx2ta¹je³nãu³wa³kxa² wxa²ko̱³nxe³ti³ kãi³yah³lxin¹ju³ta² ã³wa²su¹txa²lxa¹wi¹. 
\m Txa²wã¹sũ̱³na² nxe³tah¹hxai²hẽ¹la². Nxe³ha²kxai³ wi¹lain³kxi²sah¹lxi³hẽ¹la². Hĩ¹na¹ Txa²wã¹sũ̱³na² ã³non²ta³kxi¹nx2ti³ju³ta² yũ²na³la². Wxa²ẽ¹nãu³ai²na² sa²wa²su¹txa²lxi³ju³ta² hĩ¹na² yũ²na³la². 
\p  
\v 3 Jã¹nxe³jut3su² ha²kxai³ ko̱³nxe³ti³ o²la³kxi³na¹ju³ta² a³ya³ti³kxa²ya̱n³txi³su² wi¹ju³ta² so¹lxi³ kãi³a¹wa². Nxe³ha²kxai³ Txa²wã¹sũ̱³na² wãn³txa² ĩ³wã̱³wã̱³txi²si¹hai¹na¹ju³ta² ten³sa²nxa³nha²wa².  
\v 4 Ha³lo²a² ĩ²li³ju³ta² ĩ³ha¹txi²na¹kxai²nãn²tu̱³ Sũ̱³na² wãn³txai²na² so¹lxi³ wain³txi³ sa²yxo²we¹ti³ten³sa³nha²wa². Nxe³na¹ju³tan¹te²kxa³ya̱³lhu² Sũ̱³na² sa³wit3su² ye²na¹kxe³su² ĩ²kxi¹xi²sah¹lxin¹tu¹wa². Ha³lo²a² ĩ²li³ju³ta² wi¹ta̱³nxa² ko̱³ta̱³nxa² nxe³ju³ta² nxe³khauh²sa³kxai²nãn²tu̱³ ya³lo³txi²sa³nha²wa². A²nũ²a² sa²kxai³lu² Sũ̱³na² wãn³txa² sa²yxo²ã³te²a² nxe³te²a² sa²kxai³lu² ko̱n³ton³kxi²sai¹nha²kxai³, txa²wa³ka³la² sa³te̱¹ju³ta³lot3sa³ha²kxai³, ha³lo²a² hxi²kan¹sa²nxa³kxe³su² hxi²ka̱u³ka̱ut3sa³ha²kxai³, Nxe³sa³kxan²ti³ ya³lo³txi²sa³nha²wa².  
\v 5 Kãin² ĩ³wait1sai¹nha²kxai³ ye³ka³lxa¹txi³ sxi²ha² kan²thĩ³na² ũ³tĩ¹kxi²sai¹nha²kxai³, a²nũ²a² ko̱³nxe³thin¹tũ̱³ka̱³txa² ã³nhai¹nha³kxi²sai¹nha²kxai³ khãuhx3sai¹nha²kxai³ nxe³sain¹to³hxai²na²hẽ³la². Te²yã¹nxe³sxã³ Txa²wã¹sũ̱³na² wa³ka³la² wa³kon³sxã³ hxi²tha³khaix1sa²to³ha²kxai³ wa³ka³lai²li² kãi³a³lan²to³ha¹ha²kxai³ he³ja³lut2sa²to³ha²kxai³ nxe² yxau²xai³lhxai²na¹hẽ³la².  
\v 6 Wi¹lhin¹sxã³ kãi³a¹ha²kxai³ Txa²wã¹sũ̱³na² wa³ka³la² e³la¹ kãi³a¹wa². Txa²wã¹sũ̱³na² wãn³txa² wi¹jau³xa² wxi²kan¹txi³ ĩ³hen³txi³na¹wa². Ya³nãn³ta³ki²la²sxã³ o²la³kxi²na¹wa². A²nũ²a² yxo²ha³kxa¹ thãi³ti³la² ã³non²ta³kxai¹na¹wa². Txa²wã¹sũ̱³na² Yãu³ka³jxah¹la² nxũ²kwa̱i³yxau³sa²na³la². Kris²tu³jah¹lai²na² wãn³txa² yxo²ĩ²tũ̱³ka̱³txa² yxo²ha³kxa¹ a³lxi²nyhu¹a¹wa².  
\v 7 Txa²wã¹sũ̱³na² wãn³txa² so¹lxi³ ya²la³lyau³xa² so¹lxi³ ĩ³hen³txi³na¹wa². Txa²wã¹sũ̱³na² ĩ³hxi²kat1sa³na²hẽ³la². Ĩ³nu³kxũ̱n³ti³sa³na²hẽ³la². Nxe³sa³ha²kxai³ so³ta²to² te²hũ̱³na¹wa². Nxe³tũ̱³ka̱³txai²na² sa²kxai³lu² ha³lo²a² ha³nxeh³lxi³ju³ta² ĩ³ha¹txain¹kxai²nãn²tu̱³ nũ³kxũn³txi³ he¹kxi² wai³nxa³ju³ta² ĩ²ain¹kxai²nãn²tu̱³ sa²wai³kxi²te³lhxã³ o²la³kxi² nxain¹te²ju²hẽ³la². Te²a² yã¹nxe³jut3sũ̱³nxe² Txa²wã¹sũ̱³nai²li² ĩ³hxi²kat1sa³ha²kxai³ ko̱³nxe³ju³ta² ã³na¹la³kxi²la² nxe² sa²tẽ³a¹wa². Nxe³ha²kxai³ a²wi¹ju³ta² so¹lxi³ sa²wai³kxi²so¹na¹wa².  
\v 8 A²nũ²a² ĩ²li³te²a² sa²nẽn¹kxi²sain¹ta̱³nxa² sa²yxo²ã³ta̱³nxa² nxe³sa³kxan²ti³ Txa²wã¹sũ̱³na² sa²yxo²ã³nxa³wa². Te²yã¹nxe² ko̱³nxe³ti³ e³kxi²ta̱³nxa² wi¹le³kxi²ta̱³nxa² nxe³sa³kxan²ti³ Txa²wã¹sũ̱³na² sa²yxo²ã³nxa³wa². Jã¹nxe³sxã³ ya²la³lyau³xa² so¹lxi³ e³a¹kxan²ti³: 
\p — Jah¹lai²li² a²nũ²a² ã³ke³tũ¹jah¹lai²la¹wi¹. Nxe² ki³ha¹kxi²sain¹sxã³ nxe³sain¹toh³na³la². Nxe³sain¹kxan²ti³ Txa²wã¹sũ̱³na² sa²yxo²ã³nxa³wa².  
\v 9 Tũ̱¹ka̱³txa² a²ha³tih³xa² ĩ²sai¹nxa³hẽ³la². Yxãn¹ta¹ nũ̱³ka̱³txi³ ã̱³xa² ĩ²sain¹na²hẽ³la². A²ha³tih³xai²na² ya³lu²ye²na¹ju³ta² ĩ²sain¹na²hẽ³la². Yxãn¹ta¹ ka³te̱n³su² yxau³ye¹nx2ta¹tai¹ti²tu³wa². Khãuh³lxa³ti³sain¹kxan²ti³ hai³txi³ ya³lun²nxa³hẽ³la².  
\v 10 Ĩ³ãin²ta³kxi²sain¹kxan²ti³ a̱u³txi³ ka³li³sa³nha²wa². Yen³kxi³khai³xa² yũ³sa²nxa³kxan²ti³ oh³xai²nãn¹ta² yen³kxa² ũ³hũ¹sa²kxi³sa¹wa², Txa²wã¹sũ̱³na² ũ³yhe³wãx3sa²ju³ta²sa³. Yen³kxi³khai³xa² yũ³sa²nxa³kxan²ti³ nũ¹ka³na¹ oh³xai²nãn¹ta² yen³kxa² yũ³khaix1na¹wa². 
\p  
\v 11 Ko³rĩn²to²thĩ³na² yxau³yah³lxin¹te² ĩ³nxa² txa²wã³tã̱³syah¹lxi¹lxa². Nxe³jah³lxi³wxa². E³la¹ e³kxi¹nx2ta¹wa². A³lxi²khai¹nxe³nx2ta¹nha²wa².  
\v 12 Txa²ẽ¹nãu³ai²na² a̱u³txi³ a³lxi¹nx2ta¹ju³ta² ũh³wxe³nũh¹nx2ta¹nha²wa². Jã¹nxe³sa²sxã³ wxãi²na² sa²kxai³lu² a³lxi²syah¹lxin¹ju³ta² ũh³wxe³nũ¹syah¹lxa³lxa².  
\v 13 Txa²wẽ³ha³lxa² yã¹nxe² e³kxi¹nx2ta¹wa². A³lxi¹nx2ta¹kxai²yã¹nxe² a³lxi²sah¹lxi³hẽ¹la². 
\s1 Yxo²ĩ²xa³te²la³ ã³ya̱³lxi²ki̱³jau³su² 
\p  
\v 14 Txa²wã¹sũ̱³na² wãn³txa² yxo²ĩ²xa³te²a² ã³ya̱³lxi²nyhu¹ah³lxi³txa³hẽ¹la². A²nũ²a² wain³txi³ kãi³te²na² ko̱³nxe³ti³ kãi³te²na² nxe³sxã³ ya̱³lxi³nyhu¹sxã³ yxau³te²sxa³yu²hẽ³la². Te²yã¹nxe³sxã³ a²nũ²a² ha²te¹ta² a²wa³kxẽn³yah³la² ka³nxah³ta² a²wa³kxẽn³yah³la² nxe³sxã³ hxi²kan¹txi³ ya̱³lxi²nyhu¹sxã³ ai³te²sxa³yu²hẽ³la².  
\v 15 Te²yã¹nxe³sxã³ Kris²tu³jah¹la² sa²kxai³lu² Sa³ta³na²jah¹la² sa²kxai³lu² hxi²kan¹txi³ ya̱³lxi³nyha¹te²sxa³yu²hẽ¹la². Kris²tu³jah¹la² wãn³txa² yxo²ĩ²jah¹lai²na² a²ẽ¹nãn¹jau³xa² ha³na³ka³lxi³ni² yxo²ĩ²xa³jah¹lai²na² a²ẽ¹nãn¹jau³la³ ha³na³ka³lxi³ni² nxe³te²ju²hẽ³la².  
\v 16 Txa²wã¹sũ̱³na² sxi²ha² ã³wi¹hain¹to³te²a² ha³na³ka³lxi³nha²kxai³ Txa²wã¹sũ̱³nu²su² ki³lxo³nxe³te²a² sxi²ha² ã³wi¹hain¹to³te²a² ha³na³ka³lxi³nha²kxai³ te²ju²hẽ³la². Nxe³sxã³ yxo²ĩ²ki̱³tũ̱³ka̱³txi³ki̱³na¹xai²na² sa²kxai³lu² Txa²wã¹sũ̱³na² sxi²ha² ka³te̱n³su² thĩ³nhũ̱³ki̱³tã³la². Nxe³sxã³ Txa²wã¹sũ̱³na² sa²kxai³lu² e³kxi²ta¹hxai²ti³ai¹ti²tu³wa². E³kxi²te³nah¹lxi¹: 
\q1 — Tũ̱¹ka̱³txai²na² ya̱³lxi²hain¹sxã³ nxũ²kwa̱i³yxau³ai¹na¹tu¹wi¹. Na¹kxai²nãn²tu̱³ A²sũ̱³nu²su² yai¹na¹tu¹wi¹. Nxe³te²nãu³xa² Txa²sa³wi³ha³lxi³su² ti³hi¹tai¹na¹tu¹wi¹. 
\m Nxe³ta¹hxai²ti³ai¹ti²tu³wa².  
\v 17 Te²yã¹nxe³jau³xa² Ju³te²a² nũ̱³ka̱³txu¹tai²na² a²ne³nxẽ³na² ãh¹e³te³nah¹lxi¹: 
\q1 — Yxo²ĩ²xa³tũ̱³ka̱³txai²na² kãi³hxai²kxai³ jã¹xah³lxi³ta̱³lxi¹. Ko̱³nxe³ju³ta² wxa²wxai³yah³lxi³txa³hẽ¹li¹. Wxa²wxai³yah²lxan³kxai²nãn²tu̱³ wi¹lhin¹sxã³ ĩ²nx2ta¹tu¹wi¹. 
\q1  
\v 18 Wi¹lhin¹sxã³ ĩ²nx2ta¹kxai²nãn²tu̱³ wxa²wĩ³nu²su² ye¹nx2ta¹tu¹wi¹. Nxe³sxã³ txa²wẽ³ha³lxi³lot3txa²lxa¹tu¹wi¹. Txai²na¹xai²na² Sũ̱³na² nũ³kxũn³khaix1nxe³sxã³ A²si³yxau³kah³lo²na¹xai²na² e³kxi¹nx2ta¹wi¹. 
\m Nxe³ta¹hxai²ti³ai¹ti²tu³wa². 
\c 7  
\p  
\v 1 Txa²ya̱³lxi³yah³lxi¹lxa². A³lxi¹nx2ta¹wa². Jau¹xai²na² ha³kxa¹ ain³kxi²ki̱³jau³xai²la¹wa². Txa²wã¹nũ²a² ko̱³nxe³ti³ kãi³ki̱³ju³ta² ã³na¹i², txa²wã¹ẽ¹nãu³ai²na² ko̱³nxe³ti³ a̱in³nha¹jau³xa² ã³na¹i² Txa²wã¹sũ̱³na² wãn³txa² so¹lxi³ sa²yxo²wet1sxã³ yxau²xai³li² nxe³a³sah¹lxi³wxa². Nxe³ki̱³kxai²nãn²tu̱³ txa²wã¹nũ²a²nãu³a² whãi²na¹ wxa²hxan³kxa²ti³sxã³ wxe²xai³nẽ³tu¹wa². Txa²wã¹sũ̱³na² kãin² sa²nẽn¹kxi²a³sah¹lxi³wxa². 
\s1 Pau²lah³la² ĩ³ka³li³kxi²jau³su² 
\p  
\v 2 Jã¹nxe³ju³kxai³lu¹ wxa²ẽ¹nãu³ai²na² wi¹lhit1sxã³ yxo²ĩ²nha²ya³sah¹lxi³hẽ¹la². Ko̱³nxe³te²lot3sain¹te²na² ain³kxain¹yah³lxi³txa³hẽ¹la². Wxa²nũ̱³ka̱³txi³ ĩ³nxa² ĩ²li³te²a³ hai³txi³ ko̱³nxe³ti³ kãi³ũh¹nx2ti³nxa³ha²kxai³ hai³txi³ ĩ³ki³ha¹kxi²sxã³ ĩ³tih³nxe³nx2ta¹ju³ta³la³ yũ²nxa³ha²kxai³ hai³txi³ ã³ke³tũ¹nx2ti³sxã³ wxa²yen³kxa² kãi³so¹kxi¹nx2ta¹ju³ta³la³ yũ²nxa³ha²kxai³ nxe³nx2ta¹tai¹ti²tu³wa².  
\v 3 Nxe³na¹jau³xai²li² ko̱³nxe³ti³ ĩ³yĩ¹li¹nx2ta¹ju³ta² ten³te²txã³wa². òla² e³kxi¹nx2ta¹la². A³lxi¹nx2ta¹wa². ónũ²kxi²sxã³ yxau³ki̱³kxa² yã¹nxe³sxã³ a̱in³sa²tẽ³kxi¹lxa¹nx2ta¹wa², wi¹yxau³ta̱³nxa² ya³lu²ta̱³nxa² nxe³na¹kxan²ti³na².  
\v 4 Yxo²ĩ²nx2ta¹wa². Kãin² ĩ³sa²nẽn¹kxi¹nx2ta¹nha²wa². Sa²ye³kwẽ²kxi²sah¹lxin¹nha²wa². Khãuh³lxa³ti³khaix1sain¹kxan²ti³ txa²ẽ¹na² a̱u³txi³ ka³li³ha¹ju³ta² wa³kxih³ wxe³nha¹wa². 
\p  
\v 5 Nxa²ha¹te¹ Ma³se³to²na²ko³xai²na² ã³wih¹sxã³ ai³lha²thet3ta¹hĩ¹nãn¹te²tu̱³ ĩ³ye¹nxi²na¹ju³ta² yũ³tu³nxa³hẽ³la². Yxo²xũn³txi³ ĩ³kwa̱i²kxi²sa²te²a² yũ³ha²kxai³ txa²ẽ¹nãu³ai²na² a̱u³txi³ yuh³lxi³khaix1sa³hẽ¹la².  
\v 6 Nxe³na¹ka³tu̱³ Txa²wã¹sũ̱³na² sa²kxai³lu² a²nũ²a² yu̱h³lxi³te²a² ã³non²ta³kxi²jah¹lai²la¹wa². Jã¹nxe³sa³hẽ¹la². Ti²to³jah¹lai¹tã² wxã³hĩ¹na¹ ĩ³ya³lot3ti²lot3sai¹nhẽ¹la².  
\v 7 Nxe³kxa²yu³su² wxa²ha³ta̱³nxa² ĩ³hen³txi³sain¹na²hẽ³la². Ti²to³jah¹la² sa²ye³kwẽ²kxi²sah¹lxin¹ju³ta²nũ³a² ĩ³hen³txi³sain¹na²hẽ³la². Ne³kan²kxi²sah¹lxi³ta¹hxã³nhẽ¹la². Ĩ³ye³ĩ³yon²ta³kxi²sa²te³lhxã³ sah¹lxi³ta¹hĩ¹nhẽ¹la². Nxe³sah³lxin¹jut3su² ka³lih³khaix1sa³hẽ¹la². 
\p  
\v 8 Txa²ha³te̱h³nxã³nxai³tã² ũ³wha²li¹la¹txã³nxai³tã² ĩ³ãin²ta³lxi³nx2ta¹kxan²ti³ ũ³wha²li¹la¹hĩ¹na¹ hai³txi³ yu̱³tã̱³lxi³ti³ e³kxi²nha²nxa³hẽ¹la². A²hĩ¹na¹ ĩ³ãin²ta³lxai¹na¹tũ¹xã¹. Nxa¹hẽ¹la². A²nxe³txã³nxa² txa²ha³te̱h³nxã³nxai³tã² yan¹nãu³a¹ ha³la³jen¹nãu³a¹ ĩ³ãin²ta³lxi³nx2ta¹jau³xa² ain³kxi²na¹hĩ¹na¹ ũ³wha²li¹la¹ju³ta³nũ³a² yu̱³tã̱³lxi³ti³ e³kxi²nha¹hẽ¹la².  
\v 9 Nxe³na¹ta¹ hĩ¹na² ka³li³sa³nha²wa². Txa²ha³te̱h³nxã³nxai³tã² ĩ³ãin²ta³lxi³nx2ta¹jau³xa² ĩ³ka³li³sa²nxa³hẽ¹la². Yxãn¹ta¹ ĩ³ãin²ta³lxi³jah³lxin¹ju³tan¹te²kxa³ya̱³lhu² yu̱³tã̱³lxi³ti³ a̱in³nyha¹lxi³ta¹hĩ¹nhẽ¹la². Txa²wã¹sũ̱³na² hi²sen³su² ĩ³ãin²ta³lxi³nx2ti³na²hẽ³la², ko̱³nxe³ti³ kãi³yah³lxin¹ju³tai³tã² ã³na¹si¹yhah³lxin¹jau³sa². Nxe³ha²kxai³ ũ³wha²li¹la³kxi¹nx2ta¹jau³xai³tã² wain³na²hẽ³la².  
\v 10 Txa²wã¹sũ̱³na² hxi²ka² ĩ³ãin²ta³kxi²nẽ³na³la², ko̱³nxe³ti³ kãi³ki̱³ju³ta² ã³na¹si¹nhẽ³jau³sa². óna¹ki̱³kxai²nãn²tu̱³ txa²wã¹ẽ¹nãu³ai²na² wxa²hau³ko³tẽ³lhĩ̱³nx2na³la². Nxe³ju³tai²li² ka³lih³kxi²sa²na³la². Yxãn¹ta¹ yuh³xai²nãn¹jah¹la² hxi²ka² ĩ³ãin²ta³kxi²nẽ³kxai²nãn²tu̱³ hai³txi³ a²ko̱³nxe³ti³ kãi³ki̱³ju³ta² ã³na¹hĩ̱³ki̱³sxa³wa². Nxe³sxã³ Txa²wã¹sũ̱³na² ha³lo²a² ã³wih¹ju³ta³nũ³a² yũ²nxa³lho³la².  
\v 11 Txa²wã¹sũ̱³na² sa²kxai³lu² ĩ³ãin²ta³lxi³nx2ti³ju³tan¹te²kxa³ya̱³lhu² wxi²kan¹txi³ a̱in³nyhah¹lxi³ta¹hi¹nhẽ¹la². Hã²wxãn³txa³ ko̱³nxe³ti³ kãi³ju³tai²li² ã³wa²sut1sxã³ yxau³yah³lxin¹kxe³su² wã²nã³ũh¹sah¹lxi³ta¹hi¹nhẽ¹la². Ĩ³ãu²lxah¹lxi³ta¹hi¹nhẽ¹la². Txa²wã¹sũ̱³na² ĩ³a̱n³ta³kxi¹nx2ti³kxa²ya̱n³txi³su² hxi²waun³txi³yah³lxi³ta¹hi¹nhẽ¹la². Ne³kan²kxi²sah¹lxi³ta¹hxã³nhẽ¹la². Wã²nxũ̱h¹ hxi²kan¹txi³ wi¹lhau³kot3jah³lxi³ta¹hi¹nhẽ¹la². Ko̱³nxe³ti³ kãi³jah¹lai¹tã² ĩ³wait1si¹yhah³lxin¹jau³su² o²la³kxi²yah³lxi³ta¹hi¹nhẽ¹la². Ju¹tai²na² a²yxo²ha³kxa¹ Txa²wã¹sũ̱³na² kãi³si¹nx2ti³na²hẽ³la². òla² sa²yxo²we¹jah³lxi³ta¹hi¹nhẽ¹la². 
\p  
\v 12 Nxe³na¹ha²kxai³ a²kxã³nxa² ũ³wha²li¹la³kxi¹nx2ta¹tai¹ti²tu³wa². Ko̱³nxe³ti³ kãi³jah¹la² sa²wai³wai³jut3su² ta̱³nxa² khãuh³lxa³tẽ³nh²jah¹la² ĩ³tih³nxe³nx2ti³jut3su² ta̱³nxa² ũ³wha²li¹lhũ³nx2ti³nxa³hẽ³la². Yxãn¹ta¹ Txa²wã¹sũ̱³na² yen³nãu³a¹ txa²wãn³txa² e³kxi¹nx2ta¹jau³xai²na² sa²wai³wait3sxã³ sa²yxo²wet1sah³lxin¹ju³ta² e³lxah²lxi³ye¹nx2ti³si¹ha¹jau³su² nxe³nx2ta¹tai¹ti²tu³wa².  
\v 13 Nxe³na¹jau³su² sa²ye³kwẽ²kxi²sah¹lxin¹nha²wa². Nxe³sah¹lxin¹ju³tan¹te²kxa³ya̱³kxai³la¹ Ti²to³jah¹la² ka³lih³kxi²la²nha² wxã³ha²kxai³ ka³lih³khaix1sa²nũn³nha²wa². Jah¹lai²na² hxi²waun³ta³kxi²nx2ti³ju³tai³tã² ã³wxe̱³nũh¹yah³lxi¹lxa².  
\v 14 A²kxã³nxa² wxa²ha³ta̱³nxa² wi¹le³kxi²khai¹nxũ¹hai¹na¹hẽ³la². Nxe³na¹kxan²ta² ĩ³ãin²ta³kxi²si¹sah¹lxa³nhẽ¹la². Wãn³txa² e³kxi¹nx2ta¹jau³xai³tã² ya²la³lyau³xa² so¹lxi³ e³kxi¹nx2ta¹tai¹ti²tu³wa². Te²yã¹nxe³sxã³ ĩ³hen³txi³nũh¹nx2tai¹na¹jau³xa² ya²la³tu̱³je¹nx2ti³na³la².  
\v 15 Sa²yxo²we¹tain¹yah³lxi³ta¹hi¹nhẽ¹la². Sũ̱³na² wãn³txa² sa²yxo²ã³ti³ten³yah³lxi³ta¹hxa³nhẽ¹la². Nxe³ha²kxai³ a³lxi²nx2ti³ju³ta² ã²la² kãi²non³na³la².  
\v 16 Jã¹nxe³na¹jut3su² ka³lih³khaix1sa³nha²wa². Ha³lo²a² ĩ²li³ju³ta² hxi²ka¹ka¹nha²la² txa²yen³nãu³a² yxau³yah³lxi¹lxa². 
\c 8  
\s1 Txa²wã¹yen³kxa² wã²nhũh¹jau³su² 
\p  
\v 1 Ju¹ta³la³ nxe³ha²kxai³ Ma³se³to²na²ko³nãu³ai²na² yxo²ĩ²tũ̱³ka̱³txi³nãu³xai²na² kãi³ain¹ju³ta² ĩ³yau¹ũ³nx2ta¹tu¹wa². Txa²wã¹sũ̱³na² kãin² thãi³ti³la² a³lxi²ju³ta² ĩ³yau¹ũ³nx2ta¹tu¹wa².  
\v 2 A²ẽ¹nãu³ai²na² khãuh³lxa³tẽ³nha²khaix1nhai¹nha²kxai³ ko̱³ton³khai¹xain¹ta¹hẽ¹la². Nxe³kxan²ti³ a̱u³txi³ ka³lih³si¹jau³su² hxi²kxã̱u³sxã³ ũ³hũ¹ain¹ta¹xa³hẽ¹la². Yen³kxa² hxi²txa³yain¹kxan²ti³ ũ³yho³hi²txã³nxa² hxi²kxã̱u³sxã³ wã²nhũ¹nyhain¹ta¹xa³hẽ¹la².  
\v 3 Yen³kxa² yũ³ain¹kxa² wã²nhũ¹nyhain¹ta¹hẽ¹la². Nxe³nyhain¹kxa²yu³su² ya³lo³txi³khai¹nxe³sxã³ ã²la² kãin² ũ³hũ¹nyhain¹ta¹hẽ¹la². Ya²la³tu̱³tã³la². Kwa³na³ain¹nxa³kxan²ti³ ya³lo³txi³nyhain¹ta¹hẽ¹la².  
\v 4 Nxe³sxã³ e³kxi²sain¹te³nah¹lxi¹: 
\p — Txa²wã¹sũ̱³na² yxo²ĩ³ain¹te²a² Ju³te²a²ko³xan¹te²a² ã³non²ta³kxi²ti³ten³sa²sĩn¹nha²wi¹. Nxe³sain¹na²hẽ³la². Nxe³jau³xa² ye³ka³lxa¹txi³ e³kxi²sain¹to³nha²hẽ³la².  
\v 5 Nxe³ain¹nũ²la² ten³si¹hai¹na¹kxa²yu³su² Txa²wã¹sũ̱³nai²li² sa²yxo²wet1sãn²nũ²la² hã²wxãn³txa³ sa²yxo²wet1sain¹nũn³na²hẽ³la², Txa²wã¹sũ̱³na² ten³jau³su² ha²kxai³la².  
\v 6 Nxa²ha¹te¹ nxai¹nha²kxai³ Ti²to³jah¹la² sa²kxai³lu² yen³kxa² ĩ³sa²si¹hã³ ã³si³wxe³jah¹lai²na² ĩ³ye³kxi²na¹te³nah¹lxi¹: 
\p — Ko³rĩn²to²thĩ³na² ã³nxai³txu¹li¹. Yen³kxa² wã²nhũh¹sxã³ ũ³hũ¹nyhain¹te³na³li¹. Yen³kxi³ txa²te²nãu³xa² a³lxi²nũn²ta³kxi²tũ̱³ka̱³txi³su² ha²kxai³ ũ³hũ¹nyhain¹te³na³li¹. Nxe³ha²kxai³ ã³nxai³sxã³ ĩ²txai¹nũ¹li¹. Nxe³na¹hẽ³la².  
\v 7 Nxe³ju³tai²li² a²nũ²a² yxo²ha³kxa¹ ã³sen³sai¹ain¹yah³lxi¹lxa². Yxo²ĩ²yah³lxin¹kxa² kãi²nha²kxai³, Txa²wã¹sũ̱³na² wãn³txa² kãin² ĩ³hen³txi³yah³lxi¹nha²kxai³ a²hoh³lxi³su² khai¹yxah³lxi¹nha²kxai³, a²nũ²a² ã̱³xa² ã³non²ta³kxi²ju³ta² ten³khai¹yxah³lxi¹nha²kxai³, a³lxi²khaix1syah¹lxi¹nha²kxai³, nxe³ju³tai²na² yxo²ha³kxa¹ ã³sen³sai¹ain¹yah³lxi¹lxa². Nxe³ha²kxai³ ã²la² kãi²non³sxã³ a²nũ²a² ã̱³xa² wxa²yen³kxa² wã²nhũ¹ain¹yah³lxin¹ju³ta² ten³sa³nha²wa². 
\p  
\v 8 Na¹jau³jau¹xai²na² kwa³na³nx2ti³nxa³lho³la². Yxãn¹ta¹ yxo²ĩ²tũ̱³ka̱³txai²li² ya³lo³txi³khai¹xain¹ju³ta² ĩ³yau¹ũ¹nx2ti³te³lhxã³ ye¹nx2ta¹wa². Nxe³nx2ta¹kxai²nãn²tu̱³ ya²la³tu̱³ kãin² a³lxi²ta̱³nxa² jũ¹nxe² so¹lxi³ a³lxi²ta̱³nxa² sah¹lxin¹ju³ta² a³ya³ti¹nx2ta¹tu¹wa².  
\v 9 Txa²wã¹hxi²kan¹ta² Si³yxau³jah¹la² Je³su² Kris²tu³jah¹lo²su² te²kxai³lu² kã³nxai³kxai³ Txa²wã¹sũ̱³na² yxau³ju³ta² yxau³ya³ta¹hxai²ti³ai¹ti²tu³wa². Txa²wã¹sũ̱³na² yen³kxa² ha³kxa¹ yũ³ya³ta¹hxai²ti³ai¹ti²tu³wa². Yxãn¹ta¹ kãin² thãi³ti³la² a³lxi²nẽ³nha²kxai³ yen³kxai²li² a³lxi²nxa³ha²kxai³ ha³lo²ai²na² a³lxi²nxa³ha²kxai³, ju¹tai²na² a²yxo²ha³kxa¹ ã³na¹nũ²la² yen³kxi³txa²jah¹la² yã¹nxe³sxã³ a³ka³nxi²sxã³ wxã³nũ¹nhẽ³ta¹hxai²ti³ai¹ti²tu³wa². Yen³kxa² ã³na¹ũ¹nhẽ³ta¹hxai²ti³ai¹ti²tu³wa². Nxe³ha²kxai³ yen³kxi³sih¹nx2ti³jau³su² nxe³nx2ti³kxe³su² yen³kxih³yah³lxi¹lxa². Nxe³nx2ti³sxã³ yen³kxi³ txa²ta¹hxai²ti³ai¹ti²tu³wa², Je³su²jah³la²sa³. 
\p  
\v 10 Jã¹nxa¹ju³tai²li² kwẽ³ko³nhĩ¹nai³tã² yen³kxa² wã²nhũ¹sxã³ ũ³sa²si¹hã³yah³lxin¹ju³ta² ã³si³wxe³yah³lxin¹tai¹ti²tu³wa². Yah³lxi¹nha²kxai³ hĩ¹na² ta³lun²yah³lxin¹kxai²nãn²tu̱³ wain³te²sĩ³lxih³na³la². A²wi¹lhĩ¹na² wxãi²na² so¹lxi³ Ju³te²a²ko³xan¹te²a² yxo²ĩ²tũ̱³ka̱³txa² wxa²yen³kxa² wã²nhũ¹sxã³ ũ³sa²si¹hã³yah³lxi³ta¹hĩ¹nhẽ¹la². Hai³txi³ a²nũ²a² ã̱³xai²na² sa²kxai³lu² yen³kxa² wã²nhũ¹nyhain¹ta¹hxai²nxa³ti³ai¹ti²tu³wa².  
\v 11 Yxah³lxin¹ju³ta² yen³kxa² wã²nhũ¹ain¹yah³lxin¹ju³ta² ã³na¹ah³lxi³txa³hẽ¹la². A²wi¹lhĩ¹na² ya³lo³jah¹lxin¹kxu¹ jã¹nxe³jah³lxi³hẽ¹la². Ũ3yho³hi²txã³nxa² yũ³yah³lxin¹kxa² yã¹nxe³sxã³ wã²nhũ¹txai¹yah³lxi³hẽ¹la².  
\v 12 Jã¹nxe³sxã³: 
\p — Yo³hi²ki³a² yũ³na¹kxa² wã²nhũ¹ai¹na¹tũ¹xã¹. Yxah³lxin¹kxai²nãn²tu̱³ wxa²ẽ¹nãu³ai²na² ten³yah³lxin¹ju³ta³nũ³a² Txa²wã¹sũ̱³na² ĩ²nx2ti³tu¹wa². Wi¹lhit1sxã³ ĩ²nx2ti³tu¹wa². Yũ³nx2ti³xa³kxe³su² Txa²wã¹sũ̱³na² ĩ³ãin²txi³si¹nxa²lxi³xa³lho³la². 
\p  
\v 13-14 Jã¹nxe³ju³kxai³lu² kãin² wa³ka³li³yu³ta³lo³txa²lxi³ha²kxai³ a²nũ²a² ã̱³xa² wa³ka³la² ã³wa²sut1sxã³ yxau³ai¹nha²kxai³ nxe³ju³ju¹tai²li² wai³nhĩ̱³nx2nxa³wa². Ten³te²txã³wa². Yxãn¹ta¹ wxãi²na² yen³kxa² yũ³yah³lxi¹nha²kxai³ wã²nhũ¹ain¹yah³lxin¹ju³ta² hĩ¹na² wain³na³la². Nxe³yah³lxin¹kxai²nãn²tu̱³ kã³nãu³a¹ yen³kxi³txa²yah³lxin¹kxai²nãn²tu̱³ yen³kxa² yũ³ain¹te²a² te²yã¹nxe² ã³non²ta³kxi²xi¹nx2tain¹tu¹wa². Nxe³ki̱³kxai²nãn²tu̱³ a²yxo²ha³kxa¹ hau³kon³txi³hĩ̱³ki̱³tã³la².  
\v 15 Te²yã¹nxe³jau³xa² Txa²wã¹sũ̱³na² wãn³txa² ũ³wha²li¹jau³xai²na² nxe³te³nah¹lxi¹: 
\q1 — Yain³txa² kãin² wxa²so¹te²su² te²a² hai³txi³ wã³kon³ta¹hxai²nxa³hẽ¹li¹. Te²yã¹nxe³sxã³ jũ¹nxa² so¹lxi³ wxa²so¹te²su² te²a² yain³txa² taut3ton³ta¹hxai²nxa³hẽ¹li¹. 
\m Nxe³yain¹ta¹hxai²hẽ¹la². 
\s1 Ti²to³jah¹la² he¹jau³su² 
\p  
\v 16 Jã¹nxa¹jut3su² Ti²to³jah¹la² txai²yã¹nxe² kãi³nũn³na³la². ónon²ta³kxi¹nx2ta¹ju³ta² ten³sa²hxai²kxai³ jãx1jah¹lo²su² nũn³na³la². Nxe³ju³tai²li² Txa²wã¹sũ̱³na² sa²nẽn¹kxi²to³ha¹wa².  
\v 17 A²nxe³jah¹lai²li² ain³kxi²sa³na²hẽ³la². Nxe³sa³kxa²yu³su²: 
\p — Tũ̱¹ka̱³txai²li² ã³non²ta³kxi²na¹tũ¹xã¹. Nxe³nũh¹nx2ti³jau³su² ha²kxai³ wi¹lhi¹nha²kxai³ wxã³sĩ²nx2ti³ju³ta³nũ³a² wã²nxũ̱h¹ ãu¹la³kxi¹nx2ti³na³la², Ti²to³jah¹la²sa³.  
\v 18 Nxe³nx2ti³kxai²nãn²tu̱³ tĩ̱³nx2ti³kxai²nãn²tu̱³ txa²ya̱³lxa² ĩ³sa²si¹hã³nũn³na¹tu¹wa². A²nxe³jah¹lai²li² txa²wã³tã̱³yah³lai²la¹wa². Txa²wã¹sũ̱³na² yxo²ĩ²tũ̱³ka̱³txi³nãu³xa² yxo²ha³kxa¹ nxe²e³kxain¹te³nah¹lxi¹: 
\p — Txa²wã¹sũ̱³na² wãn³txa² ĩ³hen³txi³jah¹lai²la¹wi¹. Sa²nẽn¹kxain¹ki̱³tu¹wi¹. Nxe³ain¹na³la².  
\v 19 Nxe³kxa²yu³su² yxo²ĩ²tũ̱³ka̱³txa² hxi²ka² ĩ²sxã³ sa²so¹ain¹na²hẽ³la². ósi³tẽ³kxi²sa²sĩn¹si¹jau³su² ĩ²sxã³ sa²so¹ain¹na²hẽ³la². Ũ3yho³hi²ki³a² tẽ³sxã³ wã²nhũ¹ain¹jah¹lo²nũ³su² ã³si³tẽ³kxi²sa²sĩn¹tu¹wa². Nxe³kxai²nãn²tu̱³ Txa²wã¹sũ̱³na² sa²nẽn¹kxi²sĩ¹na¹tu¹wa². Te²yã¹nxe³sxã³ a³lxi²sxã³ ã³non²ta³kxi²waun¹nyhu¹ki̱³ju³ta² ĩ²nẽ³lain¹tu¹wa². 
\p  
\v 20 Nxe² ai³lya³sain¹sĩn¹kxai²nãn²tu̱³ a²nũ²a² ĩ²li³te²a² ko̱³nxe³te²lot3sain¹sĩn¹jau³nũ³a² yũ³hĩ̱³nx2nxa³wa². Yxo²ĩ²sain¹sĩ¹nhĩ̱³nx2na³la². Ũ3yho³hi²ki³a² ki³ka³lxa¹txi³ tẽ³lxi²nha¹ha²kxai³ ko̱³nxe³ti³ ĩ³kwa̱i²kxi²sain¹sĩn¹kxa²ya̱n³txi³su² txa²wã¹lon³nãu³xa² ã³si³tẽ³kxi²sain¹sĩn¹tu¹wa².  
\v 21 Wain³txi³ kãi³ũ¹nha¹ju³ta² ten³sa²sĩ¹nha²wa². Txa²wã¹sũ̱³na² ye³nãin²txi³ a²nũ²a²nãu³xa² ye³nãin²txi³ e³la¹ wain³txi³ kãi³ũ¹sĩ¹na¹ju³ta² ten³sa²sĩn¹nha²wa². 
\p  
\v 22 Jã¹nxe³ju³kxai³la¹ wxã³ye¹nx2ti³tãu³a² txa²wã³tã̱³xa² ã̱³xai²na² ã³si³tẽ³la³kxain¹sxã³ sa²si¹hã³nũ³na¹tu¹wa². Kris²tu³jah¹lai²na² wãn³txa² sa²yxo²we¹jah¹lo²su² na³la². ónon²ta³kxi¹nx2ti³ju³ta² so¹lxi³ ten³jah¹lo²su² na³la². Ju¹tai²li² ĩ²sxã³ yxau²xai³la¹ha²kxai³ ya²la³tu̱³tã³la². Jã¹nxe³sxã³ wi¹le³kxi¹nx2ta¹jau³su² yxo²ĩ²ha²kxai³ wxã³sĩ²nx2ti³ju³ta³nũ³a² ten³khaix1nx2na³la², ã³non²ta³kxi¹nx2ti³te³lha³ka³.  
\v 23 Nxe³nxa²ha¹te¹ Ti²to³jah¹la² sa²kxai³lu² ĩ²ũ³sa²jah¹lai²la¹wa². Wa³kon³kxi²ya³sain¹na²hẽ³la². Nxa²ha¹te¹ a²wã³tã̱³xai²na² ã³si³tẽ³la³kxain¹te²na² sa²kxai³lu² yxo²ĩ²tũ̱³ka̱³txi³nãu³xa² ũ³sa²si¹hã³jah¹lo²su² yah³na³la². Kris²tu³jah¹la² sa²nẽn¹kxi²yah³na³la².  
\v 24 Nxe³ju³ta² a³lxi¹tain¹yah³lxi³hẽ¹la². Yah³lxin¹kxai²nãn²tu̱³ yxo³ĩ²tũ̱³ka̱³txi³nãu³xai²na² a²yxo²ha³kxa¹ a³lxi²sah¹lxin¹ju³ta² e³la¹ ĩ²ain¹nũn³tu¹wa². Te²yã¹nxũn³sxã³ sa²nẽn¹kxi²si¹nx2ta¹jau³su² ĩ³ye³kxai¹na¹jau³xai³tã² ya²la³tu̱³je¹nx2ti³tu¹wa². 
\c 9  
\s1 Yxo²ĩ²tũ̱³ka̱³txi³ki̱³nãu³xa² ĩ²ũ³ũh¹ki̱³jau³su² 
\p  
\v 1 Yxo²ĩ²tũ̱³ka̱³txa² Ju³te²an¹ko³xa² yxau³te²nãu³xa² ã³non²ta³kxi²si¹hain¹yah³lxin¹jau³su² ũ³wha²li¹la³kxi¹nx2ti³xa³lho³la². Txa²wãn³txa² yũ³sa²nxa³wa². òla² e³kxi¹nx2ta¹tai¹ti²tu³wa².  
\v 2 ónon²ta³kxain¹yah³lxin¹ju³ta² ten³yah³lxi¹lxa². Ju¹tai²li² ĩ²te²sa¹wa². Nxe³ha²kxai³ Ma³se³to²na²ko³xan¹te²nãu³xa² yxo²ĩ²tũ̱³ka̱³txa² yxau³te²nãu³xai²na² nxe²e³kxai¹na¹hẽ³la². E³kxai¹na¹te³nah¹lxi¹: 
\p — Txa²wã¹lon³ti³nãu³xa² Kre²sa²ko³xan¹te²nãu³xa² yo³hi²ki³a² wã²nhũ¹te³lhxã³ Ju³te²an¹te²a² yxo²ĩ²tũ̱³ka̱³txa² nxe³ain¹na²hẽ³li¹, kwẽ³kxi³hĩ¹nai³tã²su¹. Nxai¹na¹jau³su² ain³kxi¹nx2tai¹nha²kxai³ kãin² ka³li³hain¹na²hẽ³la². Wxãi²yã¹nxe² kãi³ti³te³nain¹nũn³na²hẽ³la².  
\v 3 Jã¹nxa¹jut3su² txa²wã³tã̱³nãu³xai³tã² ũ³sa²si¹hã³ũ¹nx2ta¹tu¹wa². Nxe³na¹ju³tan¹te²kxa³ya̱³tu̱³ta¹ wãn³txa² wi¹le³kxi¹nx2ta¹jau³xai³tã²: 
\p — Ya²la³tu̱³tã³li¹. Nxe³yah³lxin¹tu¹wa². Nxe³ha²kxai³ ũ³yho³hi²ki̱³ki³nũ³a² wã²nhũ¹yah³lxin¹ki³nũ³a² ãu¹la³kxi²ta³lun²yah³lxin¹tu¹wa². Ju¹tai²li² nxe² yxo²ĩ²nx2ta¹wa².  
\v 4 Nxe³yãn¹tah¹lxi³na¹ nxe²nxa³ke³la³te²kxai³la¹ Ma³se³to²na²ko³xan¹te²a² wxã³jah¹la²nãu³xa² ã³si³tẽ³la³kxi²sa³kxai²nãn²tu̱³ ãu¹la³kxi² ta³lun²yah²lxan³ke³la³te²kxai³ ãu²li²sa²sĩ¹nhĩ̱³nx2na³la². Nxe³sa²sĩn¹kxan²ti³ ãu²li²khaix1yah³lxi³nũ³nhĩ̱³nxa¹lxa². Yxo²ĩ²nx2ti³sĩ¹na¹ha²kxai³ ãu²li²khaix1yah³lxi³hĩ̱³nxa¹lxa².  
\v 5 Jã¹nxe³na¹jut3su² txa²wã³tã̱³nãu³xa² ĩ³sa²si¹hã³ ne³ka²ta¹hai¹na¹hẽ³la². Yen³kxa² wã²nhũ¹yah³lxin¹ki³nũ³a² hau³ko³te³lhxã³ wxã³ain¹tu¹wa². A²kxã³nxai³tã² e³kxain¹yah³lxin¹kxa² hau³ko³je²yah³lxin¹kxai²nãn²tu̱³ ta³lun²ye²yah³lxi¹nha²kxai³ ũ³wha¹yah³lxin¹tu¹wa². Yah³lxin¹kxai²nãn²tu̱³ wxã³na¹hĩ¹na² ũ³nhũ²ka̱¹yah³lxi³hĩ̱³nxa¹lxa². Nxe³yah³lxin¹kxai²nãn²tu̱³ wã²nxũ̱h¹lxi³sxã³ ũ³nhũ²kxi²yah³lxin¹ju³ta² hxi²kxã̱u³sxã³ wã²nhũ¹yah²lxan³ju³ta² e³lxah²lxi³tu¹wa². Kwa³na³nx2ti³nxa³ju³ta² e³lxah²lxi³tu¹wa². 
\p  
\v 6 Txa²wã¹e³kxi²nyhu¹kxi³jau³xai³tã³ ain³kxi¹xi²nha¹jxah³lxi³hẽ¹la². Ain³kxi¹xi²nhyah¹lxin¹te³nah¹lxi¹: 
\p — Yain³txa³ki³a² tẽ³sxã³ hxi²kxã̱u³txi³ ũ³whĩ̱¹ki̱³kxai²nãn²tu̱³ kxã³nãu³a¹ jũ¹nxa² so¹hĩ̱³ki̱³tã³li¹. Yxãn¹ta¹ yain³txa³ki³a² hxi²kxã̱u³ki̱³sxa³kxe³tu̱³ ũ³whĩ̱¹ki̱³kxai²nãn²tu̱³ kxã³nãu³a¹ yain³txa² kãin² so¹hĩ̱³ki̱³tã³li¹. Nxe³hxai²tai¹tu³wa². Nxe³kxa² yã¹nxe³sxã³ jũ¹nxa² so¹lxi³ wã²nhũ¹yah³lxin¹kxai²nãn²tu̱³ kxã³nãu³a¹ jũ¹nxa² so¹lxi³ so¹yah³lxin¹tu¹wa².  
\v 7 Te²yã¹nxe³sxã³ ĩ²li³te²a² a²wãn³txi³kxai³lu¹: 
\p — Txa²yen³kxa² wã²nhũh¹nxa²sa²nxa³nhai¹. Nxẽn¹ke³la³te²kxai³ wxa²yen³kxa² wã²nhũh¹txa³hẽ¹la². Te²yã¹nxe³nũn³nũ²la² a²nũ²ai²li² wxã³sxã³ kwa³na³nxa²kxai²nãn²tu̱³ wet1txa³hẽ¹la². Yxãn¹ta¹ wxa²ẽ¹nãu³ai²na²: 
\p — Wi¹lhin¹sxã³ wã²nhũ¹ai¹na¹tũ¹xã¹. Nxẽn¹kxai²nãn²tu̱³ Txa²wã¹sũ̱³na² a³lxi²nxa²tu¹wa². Ju¹tai²na² so¹lxi³ Txa²wã¹sũ̱³na² ten³na³la².  
\v 8 Txa²wã¹sũ̱³na² hi²sen³su² yen³kxa² wi¹kxa² whãi²na¹ hxi²kan¹txi³ ũ³hũ¹nx2ti³tu¹wa². Ten³nxa²lxi³kxa² ũ³hũ¹nx2ti³sãn²sxã³ ãh¹ kãin² ũ³hũ¹nx2ti³ju³ta³nũ³a² hxi²ka¹nhĩ̱³nx2na³la². Nxe³kxai²nãn²tu̱³ wxa²yen³kxa²: 
\p — Wã²nhũ¹ai¹na¹tũ¹xã¹. Nxĩn¹kxai²nãn²tu̱³ hxi²ka¹nhĩ̱³nxa¹lxa². Nxẽn¹kxan²ti³ hai³txi³ hxan³kxi¹nx2ti³xa³lho³la².  
\v 9 Jã¹nxe³jut3su² Txa²wã¹sũ̱³na² wha²li¹txã³nxai³tã² nxe³te³nah¹lxi¹: 
\q1 — A²nũ²a² wi¹lhin¹te²a² a²yen³kxi³khai³xa² tẽ³sxã³ wi¹lhit1sxã³ wã²nhũ²xai³te²ju²hẽ³li¹. Yen³kxi³txa²te²a² wã²nhũ²xai³te²ju²hẽ³li¹. Hai³txi³ ã³na¹sxã³ wã²nhũ²ti³hex1nx2nxa³wi¹. Nxe³ju³tan¹te²kxa³ya̱³kxai³lu² wain³txi³ kãi³sxã³ yxau²xai³lha²tẽ³ain¹tu¹wi¹. 
\m Nxe³ta¹hxai²ti³ai¹ti²tu³wa². 
\p  
\v 10 Te²yã¹nxe³sxã³ Txa²wã¹sũ̱³na² hi²sen³kxai³lu² yain³ta³ki³a² ũ³whĩ̱¹ki³ai²na² ũ³hũ² yain³tũ̱³xa² ĩ³yain³kxi²ki̱³tũ̱³xa² ũ³hũ² nxe³nẽ³jah¹lai²la¹wa². Te²yã¹nxe³kxe³hũ̱³nxe² ũ³whĩ̱¹ki̱³kxa² yã¹nxe³kxe³hũ̱³nxe² yen³kxa² ũ³hũ²xai³nẽ³na³la². Nxe³nẽ³lha²kxai³ yen³kxa² ã²la² ka³lxa¹txi³ wã²nhũh¹ a²nũ²a² ka³lxa¹txi³ ã³non²ta³kxi² yah³lxin¹tu¹wa².  
\v 11 Txa²wã¹sũ̱³nu²su² te²kxai³lu² yen³kxi³ti³hit1txa²lxi³tu¹wa². Nxe³nxa²lxi³ha²kxai³ a²nũ²a² ka³lxa¹te²a² ã³non²ta³kxain¹yah³lxi³hĩ̱³nxa¹lxa². Nxe³yah³lxin¹kxai²nãn²tu̱³ ũ³yho³hi²ki³a² txa²hxi²ka² ũ³sa²si¹hã³ũh¹sah²lxin¹ki³nũ³a² ĩ²sxã³ ã³ne³wxe³ain¹na³na¹. Nxe³sxã³ Txa²wã¹sũ̱³na² sa²kxai³lu² sa²nẽn¹kxi²nyhain¹tu¹wa².  
\v 12 Nxe³sxã³ ũ³yho³hi²ki³ai²li² ũ³sa²si¹hã³ũh¹ah³lxin¹ki³ai²li² ũ³hũ¹ta³lun²yah³lxin¹kxai²nãn²tu̱³ ka³lih³khai¹xain¹tu¹wa². Txa²wã¹sũ̱³na² yxo²ĩ²tũ̱³ka̱³txa² yen³kxi³txa²tũ̱³ka̱³txai²li² so¹kxi²nx2tain¹tu¹wa². Nxe³nx2tain¹kxa²yu³su² Txa²wã¹sũ̱³na² kãin² sa²nẽn¹kxi²khaix1xain¹tu¹wa².  
\v 13 Nxe² kãi³yah³lxin¹kxai²nãn²tu̱³ Kris²tu³jah¹lai²na² wãn³txa² wi¹jau³xa² sa²yxo²wet1sxã³ yxau³yah³lxin¹ju³ta² ĩ²nx2tain¹tu¹wa². Wxa²yen³kxi³khai³xa² tẽ³sxã³ a²nũ²a² a²yxo²ha³kxa¹ Ju³te²an¹te²a² yxo²ĩ²te²la³ ta̱³nxa² a²nũ²a² ã̱³xa² ta̱³nxa² hxi²kxã̱u³xa³sxã³ wã²nhũ¹yah³lxin¹ju³ta² ĩ²nx2tain¹nũn³tu¹wa². Nxe³nx2tain¹ju³tan¹te²kxa³ya̱³lhu² Txa²wã¹sũ̱³na² sa²nẽn¹kxain¹tu¹wa².  
\v 14 Jã¹yxah³lxin¹ju³kxai³lu² a³lxi¹nx2tain¹tu¹wa². A³lxi¹nx2tai¹nha²kxai³ Txa²wã¹sũ̱³na² kãin² thãi³ti³la² a³lxi²nx2tain¹ju³ta² ĩ³hen³txi³nũ¹nx2tain¹tu¹wa². Jã¹nxe³jut3su² Txa²wã¹sũ̱³na² sa²kxai³lu² a³lxi¹nx2ti³ha²kxai³ sa²nẽn¹kxain¹tu¹wa², Txa²wã¹sũ̱³na²sa³.  
\v 15 Jã¹nxe³jut3su² Txa²wã¹sũ̱³na² a³lxi²nẽ³ju³ta² kãin²khaix1na³la². A³lxi¹nẽ³lha²kxai³ a²ki³lha³lxa² Je³su² Kris²tu³jah¹la² ya³lu²kxi²si¹nhẽ³jau³su² ĩ³sa²si¹hã³ũ¹nhẽ³ta¹hxai²ti³ai¹ti²tu³wa². A²nxe³jau³xai²na² a²si³yxau³tãu³khai³xa² kũ³we²ki²la² kãin² ã³ne³wxe³ki̱³sxa³lho³la². Jã¹nxe³jut3su² ha²kxai³ sa²nẽn¹kxi²khaix1nũ¹ha¹wa². 
\c 10  
\s1 Pau²lah³la² ĩ³hxi²ka¹si¹jau³su² 
\p  
\v 1 Ju¹ta³la³ nxe³ha²kxai³ txai²li² Pau²lah³lo²na¹xai²na² ko̱³nxe³te²lot3sah¹lxin¹te² ĩ³nxai²na² thãi³ti³la² e³kxi¹nx2ta¹wa². Kris²tu³jah¹la² thãi³ti³la² e³kxi²kxa² yã¹nxe² e³kxi¹nx2ta¹wa². Wã²nxũ̱h¹ e³lyah¹lxin¹te³nah¹lxi¹: 
\p — Pau²lah³lai²na² wxã³sxã³ e³kxi²nẽ³tãu³a¹ wi¹lhit1sxã³ e³kxi² thãi³ti³la² e³kxi² nxe³nẽ³na³li¹. Yxãn¹ta¹ u¹nxũh¹yxau³tãu³a¹ yxo²xũ̱n³txi³ e³kxi²nẽ³na³li¹. Sah¹lxin¹jau³su² nxe³sah¹lxin¹jah¹lo²sa¹wa².  
\v 2 Nxe³na¹ha²kxai³ wxã³sĩ²nx2ta¹tãu³a² nũh¹ĩ²jah¹lxi³hẽ¹la². Yxo²xũ̱n³txi³ ĩ³ye³sxã³ wxã³na¹ju³ta² ten³sa²nxa³nha²wa². Yxãn¹ta¹ wxa²ha³tih³ ĩ³nxai²na² wãn³txa² ain³kxi¹nx2ta¹hẽ³la². Ain³kxi¹nx2ta¹te³nah¹lxi¹: 
\p — Pau²lah³lai²li² yuh³xai²nãn¹te²a² wãn³txa² sa²yxo²we¹jah¹lai²la¹wi¹. Yen³kxa² kãin² so¹kxi²si¹jau³su² Sũ̱³na² wãn³txa² ĩ³yau¹ũ³hain¹na²hẽ³li¹. Yah³lxin¹jau³xa² e³kxi²sah¹lxi³ta¹hi¹nhẽ¹la². Jã¹nxe³na¹ha²kxai³ wxã³na¹tãu³a² ya²la³tu̱³kxai²nãn²tu̱³ wxi²kan¹txi³ yxo²xũ̱n³txi³ ĩ³ye³kxi¹nx2ta¹tu¹wa².  
\v 3 Nxe³na¹jut3su² yuh³xai²nãn¹ta³ko³xai²na² hĩ¹na¹ he¹a¹kxan²ti³ hai³txi³ yuh³xai²nãn¹jah¹la² yã¹nxe³sxã³ yxau²xai³te²txã³wa².  
\v 4 Yuh³xai²nãn¹te²na² a²wã³nxĩn¹ju³khai³xa² tẽ³sxã³ he¹kxi²te²txã³wa². Yxãn¹ta¹ Txa²wã¹sũ̱³na² a²wã³nxĩn¹ju³khai³xa² ĩ³hxi²kat1sa³ha²kxai³ Sa³ta³na²jah¹la² ha³lo²a² wxi²kan¹txi³ e³sxã³ ã³na¹a¹wa². Hxi²kan¹txi³ ĩ³wa²lũ³xi²sai¹nxa³wa².  
\v 5 Wãn³txa² ki³han³jau³xai²na² sa²kxai³lu² Txa²wã¹sũ̱³na² wãn³txa² yxo²ĩ²xa³jau³xai²na² sa²kxai³lu² ĩ³ye³sxã³te²sa¹wa². Ĩ³ye³sxã³a¹kxai²nãn²tu̱³ ka³nahx2nxe³sxã³ yxau³si¹hain¹tu¹wa². Ka³nahx2nxe³sxã³ yxau³si¹hain¹kxai²nãn²tu̱³ Kris²tu³jah¹lai²na² wãn³txa² sa²yxo²wet1sa²tẽ³ain¹txai²lã¹. Nxe³na¹nha²wa².  
\v 6 Hã²wxãn³txa³ sa²yxo²wet1sxã³ yxau³yah³lxi³sã²nĩn¹ka³tu̱³ hã²wxãn³txa³ wxa²nũ̱³ka̱³txi³ ĩ³nxai²na² Txa²wã¹sũ̱³na² sa²yxo²ã³ah³lxin¹ju³ta² a³ya³txi²na¹kxai²nãn²tu̱³ ĩ³wai¹txa²lxa¹ju³ta² yũ³tu¹wa². 
\p  
\v 7 Nxe³yãn¹ta¹ wxãi² ĩ³nxai²na² sa²kxai³lu² ĩ²sah¹lxin¹sxã³ kãi³ye¹nx2ta¹ju³ta² ĩ³yĩ¹li²sah¹lxi³ta¹hi¹nhẽ¹la². Nxe³sah¹lxin¹te³nah¹lxi¹: 
\p — Pau²lah³lai²li² wxi²kan¹sxã³ nũ³kxũn³jah¹lo²sxa³wi¹. Nxe³yãn¹ta¹ Kris²tu³jah¹la² hxi²ka² wxi²kan¹txi³ ĩ³hxi²kat1sa³na²hẽ³li¹. Nxe³yah³lxi¹nha²kxai³ wxãi²yã¹nxe³sxã³ Kris²tu³jah¹la² hxi²ka² wxi²kan¹txi³ ĩ³hxi²kat1te²lot3sa²nũn³na²hẽ³la².  
\v 8 A²kxã³nxa² e³kxi¹nx2ta¹tai¹ti²tu³wa². E³kxi¹nx2ta¹te³nah¹lxi¹: 
\p — Kris²tu³jah¹la² hi²sen³kxai³lu² ĩ³hxi²kat1sa³na²hẽ³li¹. Ju¹tai²li² yxo²kãin²txi³ e³kxi¹nx2ta¹wi¹. Nxa¹jau³su² e³kxi¹nx2ta¹tai¹ti²tu³wa². Nxe²e³kxi¹nx2ta¹kxan²ti³ hai³txi³ ãu²li²to³nha¹ju³ta² yũ²nxa³wa². Nxe³yãn¹ta¹ Kris²tu³jah¹la² yxo²ĩ²yah³lxin¹kxe³su² ã²la² kãi²non³sih¹nx2ti³jau³su² ĩ³hxi²kat1sa³na²hẽ³la². Hai³txi³ ã³na¹hxa³nx2ta¹ju³ta³la³ te³nxa³wa².  
\v 9 O²nx2ti³te³lhxã³ ũ³wha²li¹la³kxi¹nx2ti³nxa³hẽ³la². Ju¹tai²li² ten³te²txã³wa².  
\v 10 Nxe³sxã³ wxa²ha³tih³ ĩ³nxai²na² wãn³txi³kxai³lu¹, e³lxah²lxin¹te³nah¹lxi¹: 
\p — Pau²lah³lai²na² wãn³txa² a²ha³te̱h³nxã³nxãn¹jau³xai²li² yxo²xũ̱n³khaix1nx2na³li¹. Yxãn¹ta¹ txa²wã¹yen³nãu³a¹ wxã³sxã³ ĩ³ye³kxi²nẽ³kxai²nãn²tu̱³ hai³txi³ yxo²xũ³nxa³wi¹. Wãn³txa² e³kxi²nẽ³jau³xai²li² kwa²hãi¹nx2na³li¹. Nxe³nyhu¹yah³lxi³ta¹hi¹nhẽ¹la².  
\v 11 Nxa²ha¹te¹ jah¹lai²na² wãn³txa² ĩ³wa²lũ³xi²na¹te³nah¹lxi¹: 
\p — Wxã³sĩ²nx2ta¹tãu³a² u²lxi³ ũ³wha²li¹lhxã³ ũ³hũ¹nx2ta¹jau³xain²txi³ txa²wãn³txain²txi³ e³kxi¹nx2ta¹tu¹wi¹. Hai³txi³ yau³ã̱³lxi³ yũ³sa²nxa³wi¹. Nxe³na¹jau³xa² ĩ³ye³kxi¹nx2ta¹wa². 
\p  
\v 12 Jã¹nxe³ju³kxai³lu² wxa²ha³tih³ ĩ³nxa² wxi²kan¹ki³lxo³nha²yah³lxin¹ta²wa². Wã²nxũ̱h¹ ĩ²nha²sxã³: 
\p — Ĩ²li³ju³ta² kãi³a¹ju³ta² wain³txi³ kãi³a¹xã¹. Nxe³yah³lxin¹ta²wa². Kwa²toh³lxa³ti³su² yah³lxin¹ta²wa². óne³wxe³yah²lxa³lxa². Wxa²nũ̱³ka̱³txa² ha³tih³ ĩ³nxai²na² kãi³yah³lxin¹ju³ta² ã³nhau³ko³txa²lxi³sxã³ kãi³te²txã³wa².  
\v 13 Hai³txi³ wã²nxũ̱h¹lxi³sxã³ hxi²kan¹kãi²non³ki³lxo³nxa¹ju³ta² yxo²kãin²txi³ e³te²txã³wa². Txa²wã¹sũ̱³na² a²ten³si¹sa²ju³ta² so¹lxi³ yxo²kãin²txi³ e³te²sa¹wa². Nxe³sxã³ ten³si¹sa²ju³ta³nũ³ai²na² sa²kxai³lu² Kris²tu³jah¹lai²na² wãn³txa² ĩ³hen³txi¹nx2ta¹ju³ta³nũ³a² ten³sa²na³la², Txa²wã¹sũ̱³na²sa³.  
\v 14 Nxe³nx2ta¹jau³su² Kris²tu³jah¹lai²na² wãn³txa² ĩ³hen³txi³nx2ta¹kxai²nãn²tu̱³ Txa²wã¹sũ̱³na² ten³si¹sa²ju³ta² kãi³a¹tu¹wa². A²kxã³nxa² txai²na² so¹lxi³ wxã³na¹tai¹ti²tu³wa². Wxã³na¹nũ²la² Kris²tu³jah¹lai²na² wãn³txa² ĩ³hen³txi¹nx2ta¹tai¹ti²tu³wa².  
\v 15 Jã¹nxa¹jut3su² hai³txi³ a²nũ²a² ã̱³xa² wa³ka³la² ã³wih¹sxã³ o²la³kxi²hĩ̱³nx2nxa³wa². Wa³ka³la² ã³wih¹sxã³ o²la³kxin²nxa³ju³ta² yxo²kãin² e³sa²nxa³nha²wa². Txa²wã¹sũ̱³na² kwa³na³si¹sa²nxa³ju³ta² yxo²kãin² e³sa²nxa³nha²wa². Nxe³sa²nxa³ha²kxai³ yxo²ĩ²yah³lxin¹ju³ta² ã²la² kãi²non³ju³ta³nũ³su² ten³sa³ha²kxai³, Kris²tu³jah¹lai²na² wãn³txa² ĩ³hen³txi³nx2ta¹ju³ta² ã²la² kãi²non³ju³ta³nũ³su² ten³sa³ha²kxai³, nxe³sa³nha²wa². Txa²wã¹sũ̱³na² ten³si¹sa²ju³ta³nũ³a² so¹lxi³ ten³sa³nha²wa².  
\v 16 Nxe³sa³kxai²nãn²tu̱³ ha³lo²a² yxau³yah³lxin¹ko³xa² ko³xã̱³xa² ã²la² ya¹nãn¹ta²ko³nãu³a¹ ai³sxã³ Txa²wã¹sũ̱³na² wãn³txa² wi¹jau³xa² ĩ³hen³txain¹te³lhxã³ ai³hĩ̱³na¹wa². Nxe³na¹kxai²nãn²tu̱³ a²nũ²a² ã̱³xa² wa³ka³la² yxo²kãin²e³hĩ̱³nxã²nxa³wa². O²la³kxi²na¹kxa² so¹lxi³ yxo²kãin²txi³ e³hĩ̱³na¹wa². 
\p  
\v 17 Jã¹nxe³jut3su² Txa²wã¹sũ̱³na² wha²li¹txã³nxai³tã² a²kxã³nxãn¹jau³xa² nxe³te³nah¹lxi¹: 
\p — A²nũ²a² ĩ²li³te²a² yxo²kãin²txi³ e³ti³ten³kxai²nãn²tu̱³ Txa²wã¹sũ̱³na² o²la³kxi²ju³ta² so¹lxi³ sa²nẽn¹kxi²jau³xa² yxo²kãin²txi³ e³kxi¹txai¹lxi¹. Nxe³ta¹hxai²ti³ai¹ti²tu³wa².  
\v 18 Jã¹nxe³jut3su² nũ¹txa̱i²na² e³kxi²nha¹kxai²nãn²tu̱³: 
\p — Wi¹kãi³a¹xã¹. Nũ¹ta²wãn³txa² wxi²kan¹jau³sxa³wa². Yxãn¹ta¹ Txa²wã¹sũ̱³na² wãn³txa²: 
\p — Wi¹lo²la³kxi¹lxi¹. Nxe³sa³kxai²nãn²tu̱³ wxi²kan¹jau³su² hĩ̱³nx2na³la². 
\c 11  
\s1 Txa²wã¹sũ̱³na² ĩ²sxã³ ĩ³so¹ki³lxo³tũ̱³ka̱³txa² ĩ³yau¹ũ³jau³su² 
\p  
\v 1 Toh³lxa³ti³hũ̱³jau³su² e³kxi¹nx2ta¹tu¹wa². Ya³nãn³ta³ki²la²sxã³ wi¹lain³kxi²sah¹lxi³hẽ¹la². Txa²ẽ¹nãn¹jau³xa² ĩ³ye³kxi¹nx2ta¹kxai²nãn²tu̱³ ya³nãn³ta³ki²la²sxã³ wi¹lain³kxi²sah¹lxi³hẽ¹la².  
\v 2 Hxi²waun³txi³nũh¹nx2ta¹nha²wa². Kris²tu³jah¹la² a³lxi²yah³lxin¹sxã³ yxo²ĩ²yah³lxin¹ju³ta² so¹lxi³ ten³sa³nha²wa². Txu¹hai²na² kah³ne³ta¹ka³lxai²na² sa²kxai³lu² in³txa² te²hi²te³lhxã³ jah¹lai²na² so¹lxi³ a³lxi²nha²ya³te²ju²hẽ³la². In³txa² ã̱³xa² a³lxi²te²sxa³yu²hẽ³la². Nxe³te²yã¹nxe³sxã³ Kris²tu³jah¹la² so¹lxi³ a³lxi²nũh¹yah³lxin¹ju³ta² wain³na³la². Txa²wã¹sũ̱³na² a²ten³ju³ta² ju¹tain²txi²na³la². Nxe³jau³jau¹xai²na² ã³na¹yah³lxin¹kxa²ya̱n³txi³su² hxi²waun³ta³kxi¹nx2ta¹nha²wa².  
\v 3 A²kxã³nhxĩ¹nu¹ta²kxai³lu² Sa³ta³na²jah¹lu¹tai²na² txih³xu¹ta²kxai³lu² ã³nxũ²kwa̱i³wih¹ta¹hxai²ti³ai¹ti²tu³wa². ónxũ²kwa̱i³wih¹ka³tu̱³ti¹ E²va³ka³lxu¹ta²kxai³lu² ĩ³ki³ha¹kxi²ta¹hxai²ti³ai¹ti²tu³wa². Nxe³nũ²la² ko̱³nxe³ti³ kãi³ta¹hxai²ti³ai¹ti²tu³wa². Jãx1ju³ta² ko̱³nxe³ti³ kãi³yah³lxin¹kxa²ya̱n³ti³su² nxe³nx2ta¹nha²wa². Kris²tu³jah¹la² so¹lxi³ yxo²ĩ²yah³lxin¹ju³ta² ten³sa³nha²wa².  
\v 4 Nxe³yãn¹ta¹ te²yã¹yxah³lxa³lxa². A²nũ²a² ĩ²li³te²a² wxã³sxã³ tah²yau³xa² ĩ³yau¹ũ³nx2ti³ke³la³te²kxai³ Je³su²jah¹la² ã̱³lxi³jah¹la² ĩ³ye³kxi¹nx2ti³nxa³jah¹la²nũ³a² ĩ³yau¹ũ¹nx2ti³ke³la³te²kxai³ wi¹lhin¹sxã³ yxo²ĩ²yah³lxi³hĩ̱³nxa¹lxa². Te²yã¹nxe³sxã³ Txa²wã¹sũ̱³na² Yãu³ka³txa² a²nxũ²kwa̱i³yxau³nx2ti³tai¹ti²tu³wa². Yxãn¹ta¹ yãu³ka³txa² ã̱³xa² ĩ³yau¹ũ¹nx2ti³ke³la³te²kxai³ sa²so¹nuh¹yah³lxi³hĩ̱³nxa¹lxa². Te²yã¹nxũn³sxã³ txa²wã¹ẽ¹nãu³ai²na² sa²hau³ko³tũ¹nhẽ³jau³nũ³su² ĩ³yau¹ũ¹nx2ta¹tai¹ti²tu³wa². Yxãn¹ta¹ wãn³txa² yau³ã̱³xa² e³kxi¹nx2ti³ke³la³te²kxai³ ã³kãi³so¹yah²lxi³hĩ̱³nxa¹lxa². 
\p  
\v 5 Nxe²e³kxi¹nx2tain¹tũ̱³ka̱³txa² Txa²wã¹sũ̱³na² wãn³txi³su² ki³lxo³tũ̱³ka̱³txai²li² hai³txi³ ã³sen³so¹sai¹nxa³wa². Hxi²kan¹jah¹lo²su²nũn³na¹wa².  
\v 6 Wxa²ne³nxẽ³na² wi¹lã³ne̱³wih¹nx2ti³xa³kxan²ti³ wxi²kan¹txi³ e³jah¹lo²sa¹wa². Ye³ka³lxa¹txi³ e³kxi¹nx2ti³to³ha¹tai¹ti²tu³wa². Wãn³txa² wain³jau³xa² so¹lxi³ e³a¹ju³ta² a³ya³txa³kxi²nũh¹sah¹lxin¹tai¹ti²tu³wa². 
\p  
\v 7 Txa²wã¹sũ̱³na² wãn³txa² wi¹jau³xa² ĩ³hen³txi³nx2ta¹hĩ¹nai³tã² hai³txi³ ũ³yho³hi²sah¹lxin¹ju³ta² ten³sa²nxa³tai¹ti²tu³wa². Nxe³nx2ta¹ju³tai³tã² ĩ³jũ¹nxot1sa³ha²kxai³ wxãi²na² so¹lxi³ ĩ³kãi²not3txa²lxa¹ha²kxai³ nxe³nx2ta¹tai¹ti²tu³wa². Jã¹nxe³ju³ta² wxa²ẽ¹nãn¹jau³la³ ko̱³nxe³ti³ kãi³nxa²lxi³hĩ̱³na¹te²la¹xã³? Hai³txi³ ti³he¹nxe³nx2ti³nxa³tai¹ti²tu³wa².  
\v 8 Nxe³sxã³ Txa²wã¹sũ̱³na² wãn³txa² ĩ³hen³txi³nx2ta¹hĩ¹nai³tã² yxo²ĩ²tũ̱³ka̱³txi³nãu³xa² ã̱³xa³ a²yen³kxa² wã²nhũh¹sain¹na²hẽ³la². Yxau³ya³sain¹sxã³ Txa²wã¹sũ̱³na² wãn³txa² ĩ³hen³txain¹nxa³kxan²ti³ a²yen³kxa² wã²nhũh¹sain¹na²hẽ³la². Wxa²nũ̱³ka̱³txi³ ĩ³nxai²na² a²yen³kxa² wã²nhũh¹sah²lxan³tai¹ti²tu³wa². Nxe³sxã³ a²nũ²a² ã̱³xa² a²yen³kxa² so¹kxai¹na¹ha²kxai³ wxa²nũ̱³ka̱³txa² Sũ̱³na² wãn³txa² ĩ³hen³txi¹nx2ta¹ha²kxai³ nxe³ye¹nx2ta¹tai¹ti²tu³wa².  
\v 9 Te²yã¹nxe³sxã³ yxau³ya³sain¹ti̱³kxai³lu² Sũ̱³na² wãn³txa² ĩ³yau¹ũ¹nx2ta¹hĩ¹nai³tã² yxo²ĩ²tũ̱³ka̱³txa² Ma³se³to²na²ko³xan¹te²nãu³xai²li² yen³kxa² wã²nhũh¹sain¹na²hẽ³la². Yxãn¹ta¹ wxa²nũ̱³ka̱³txi³ ĩ³nxa² a²yen³kxa² ĩ³yai³nũ³nxa²lxi³nxa³tai¹ti²tu³wa². Jã¹nxe³sxã³ yan¹nãu³a¹ a²yen³kxa² a²yo³ha² ai³nxũ³nxa²lxi³nxa³lho³la². Nxe³ha²kxai³ wãt3txa²lxa¹ju³ta² ten³sa²nxa³nha²wa².  
\v 10 Jã¹nxa¹jut3su² Kre²sa²ko³xa² hãi¹nxe³ti³xa¹ kãi³ũh¹nx2ti³te³lhxã³ ai³lha²thet3ta¹tãu³a² Txa²wã¹sũ̱³na² wãn³txa² wi¹jau³xa² ĩ³hen³txi³nx2ti³te³lhxã³ ai³lha²thet3ta¹tãu³a² hai³txi³ wxa²yen³kxa² wã²nhũh¹sah¹lxin¹ju³ta² ten³sa²nxa³nha²wa². Kris²tu³jah¹lai²na² wãn³txa² ya²la³tu̱³ jau³xan²tu̱³ nxũ²kwa̱i³yxau³sa³ha²kxai³ nxe²e³kxi¹nx2ta¹wa².  
\v 11 Jã¹nxa¹jut3su² ĩh¹nxe³kxa²ya̱n³ti³ta̱³ nxe²kãi³nx2ti³hĩ̱³na¹te²la¹xã³? A³lxi¹nx2ti³hĩ̱³nxã²nxa³te²la¹xã³? Hai³txi³ ti³he¹nxe²nxa³wa². A³lxi²khaix1nxe³nx2ta¹nha²wa². Ju¹tai²na² Txa²wã¹sũ̱³na² ĩ²nẽ³nha²wa². Nxe³ha²kxai³ ya²la³tu̱³tã³la². 
\p  
\v 12 Jã¹nxa¹jut3su² kãi³hxai²na¹kxai³ jã¹nxa¹tu¹wa². Txa²wã¹sũ̱³na² ĩ³kaix1so¹tũ̱³ka̱³txi³su² ki³lxo³tũ̱³ka̱³txa² kwa² sa²nẽn¹kxi²nhain¹kxa²ya̱n³txi³su² na¹ha²kxai³: 
\p — Pau²lah³lai¹tã² kãi³hxai²kxai³ jãx1sĩ¹na¹wi¹. Ain¹jau³nũ³su² kxa²ya̱n³txi³su² nxa¹ha²kxai³ nxe³ye¹nx2ta¹wa².  
\v 13 Jã¹nxe³tũ̱³ka̱³txai²li² ya²la³tu̱³ki³lxo³tũ̱³ka̱³txai²la¹wa². A²wa³ka³li³yu³khai³xa² ã³ke³tũ¹nx2tain¹na³la². Ĩ³xã̱³lxi³ti³lot3sxã³ Kris²tu³jah¹lai²li² ĩ³kaix1so¹tũ̱³ka̱³txi³su² ki³lxo³nxain¹na³la². Yxãn¹ta¹ ã³ke³tũ¹nxa²lxain¹na³la². Nxe³ju³tai²li² sa²nẽn¹kxi¹nx2ta¹jut3su² ti³he¹nx2nxa³wa².  
\v 14 Nxe³yãn¹ta¹ Sa³ta³na²jah¹lai²na² hi²sen³su² ĩ³xã̱³lxi³to³nha²te²ju²hẽ³la². Oh³xan¹jah¹la² a²ha²tet1jah¹lo²hũ̱³sxã³ ĩ³xã̱³lxa³ti³lo³nha²te²ju²hẽ³la², Sa³ta³na²jah¹la²sa³.  
\v 15 Te²yã¹nxe³sxã³ Sa³ta³na²jah¹la² a²sa³wi³ha³lxa² yã¹nxe³sxã³ ĩ³ã̱³lxa³ti³lxo³nha²yain¹nũn³na³la². Wain³txi³ kãi³tũ̱³ka̱³txi³su² ki³lxo³nhain¹na³la². Nxe³kxan²ti³ nxe² o²la³kxi²ki³lxo³nhain¹kxan²ti³ kãi³ain¹ju³ta² a³ya³txi²tu¹wa². Ko̱³nxe³ti³ kãi³ain¹kxa² yo³ha² ĩ³wai¹txain¹ju³ta² yũ³ain¹tu¹wa². 
\s1 Pau²lah³lai²na² khãuh³lxa³thin¹kxi³jau³su² 
\p  
\v 16 Jã¹nxa¹jut3su² we¹na¹ki³lxo³syah¹lxi³txa³hẽ¹la². Yxãn¹ta¹ nxe² e³yah³lxin¹kxai²nãn²tu̱³ toh³lxi² e³kxi¹nx2ta¹ha³ta²wa². Ain³kxi²sah¹lxi³hẽ¹la². Yxo²kãin²txi³ e³kxi¹nx2ta¹tu¹wa².  
\v 17 Toh³lxi² e³a¹jau³xai²na² hai³txi³ Txa²wã¹sũ̱³na² ĩ³yau¹ũ³sa²jau³sxa³wa². Ya²la³tu̱³ kwa²toh³lxi² e³a¹tu¹wa².  
\v 18 Yuh³xai²nãn¹te²a² yen³kxa² yxo²kãin²e³ain¹te³ju²hẽ³la². Te²yã¹nxe³sxã³ yxo²kãin²e³nũn³na¹tu¹wa².  
\v 19 A²hoh³lxi³su² khai¹yxah³lxi³ta¹hi¹nhẽ¹la². Nxe³yah³lxin¹kxan²ti³ toh³lxa² e³tũ̱³ka̱³txai²li² wi¹lain³kxi²yah³lxi³ta¹hi¹nhẽ¹la².  
\v 20 Yxo²xũ̱n³txi³ kwa³na³nx2tai¹nha²kxai³ ĩ²ũ³nx2tai¹nxa³kxan²ti³ ũ³yho³hain¹yah³lxi¹nha²kxai³ ĩ³ki³ha¹kxi²nx2tai¹nha²kxai³ ĩ³kãi²nxa³tot3sih¹nxa²lxain¹jau³su² nxe³nx2tai¹nha²kxai³ wxa²yxo²su²nxa²lxai¹nha²kxai³ nxe³nx2tain¹ta¹hẽ¹la². Nxe³nx2tai¹nha²kxai³ hai³txi³ wa³lxĩ³nha²yain¹yah³lxi³ta¹hxã³nhẽ¹la².  
\v 21 Te²yã¹nxe² kãi³ũh¹nx2ta¹ju³ta² ya³lo³txi³ti³hex1sa²nxa³tai¹ti²tu³wa². Nxe³jau³jau¹xai²na² e³kxi¹nx2ta¹ha²kxai³ ãu²li²to³nha¹nha²wa². Nxe³yãn¹ta¹ toh³lxa² e³kxi¹nx2ta¹wa². Yuh³xai²nãn¹te²a² yen³kxa² yxo²kãin²txi³ e³sa²tẽ³ain¹ke³la³te²kxai³ hxi²kan¹txi³ e³ain¹kxa² yã¹nxũn³na¹wa².  
\v 22 E³bre²a² nũ̱³ka̱³txi³su² si¹hain¹te²la¹xã³? Te²yãx1te²su² nũn³na¹wa². I³sa³e² nũ̱³ka̱³txi³su² si¹hain¹te²la¹xã³? Te²yãx1te²su² nũn³na¹wa². A³bra³ãu²ah³la² a²ne³tah²nãu³su² si¹hain¹te²la¹xã³? Te²yã¹nxe² A³bra³ãu²ah³la² a²ne³tah²nãu³su² na¹wa².  
\v 23 Kris²tu³jah¹lai²na² wãn³txa² sa²yxo²we¹tain¹te³la¹xã³? Te²yã¹nxũ³na¹wa². Yxãn¹ta¹ ã²la² kãi²non³sxã³ sa²yxo²wet1sa²sen³sai¹ai¹na¹kxah³lo²sa¹wa², toh³lxi³sxã³ e³a¹kan²ti³na³. Ĩ³kãi²non³sxã³ wa³ko³na¹ha²kxai³, ã²la² ye³ka³lxa¹txi³ sxi²ha² kan²thĩ³na² ũ³tĩ¹kxi²sain¹to³ha²kxai³, nxe³sain¹toh³na³la². Ye³ka³lxa¹txi³ ĩ³wait1sai¹nha²kxai³ khãuh³lxa³txa² ya²lut1sa²te³lhxã³ sai¹nha²kxai³ sain¹toh³na³la².  
\v 24 Po¹na² wã²la² we¹tĩh³na² tẽ³sxã³ ĩ³ta³lo³wait1sain¹na²hẽ³la². Ye³ka³lxa¹txi³ 39 nxe² ĩ³ta³lo³wait1sain¹na²hẽ³la². Te²yã¹nxe³sxã³ ye³ha¹li¹ ye³ha¹li¹ ka³na³ki¹ nxe² ĩ³ta³lo³wai²ta³kxi²sain¹na²hẽ³la², Ju³te²a² nũ̱³ka̱³txa² txa²nũ̱³ka̱³txi³khai³xa² a²ha³tih³xa²nãu³xa² ten³sai¹nxa³ha²kxai³la³.  
\v 25 Jã¹nxe³sxã³ ro³ma²no² nũ̱³ka̱³txa² hi³sa³ka³txa² tẽ³sxã³ ĩ³sun²ta³kxi²sain¹toh³na²hẽ³la². Ye³ha¹li¹ ka³na³ki¹ ĩ³sun²ta³kxi²sain¹na²hẽ³la². Ye³ka³na³ka³nat3sxã³ tah³lxa³kxa² tẽ³xain¹sxã³ ã³nan³sa²sxã³ ã³ya²lu¹ti³ten³sain¹na²hẽ³la². Ĩ̱³ye³nai²li² ai³la¹tãu³a² na³vi²o²tẽ³na² ã³ne³hẽ²kxi² ai³na¹tãu³a² ã³ni³sa²wih¹sxã³ ã³nxũ̱t1sa³hẽ¹la². Ye³ha¹li¹ ka³na³ki¹ ã³nxũ̱t1sa²to³hẽ¹la². Nxe³na¹hĩ¹na² ka³nxah³ta² whãi²na¹ a³lan²ta² whãi²na¹ ne³ho²kxa² ho³ha³sain¹to³ha¹hẽ³la².  
\v 26 Ha³lo²a² ã³nxai³lha²the³ta¹tãu³a² ha³nxeh³lxi³ju³ta² ĩ³ha¹txi²sa²to³nha²hẽ³la². Ka³wã³lxa² yxo²ha³ti³lhi³a¹tãu³a² kãi²nhũx3sxã³ ã³nxũt1sa²sxã³ ĩ³lo³nxe³ti³ten³sa³ha²kxai³, a²nũ²a² kuh³lxa³thin¹te²nãu³xa² ã³tĩ̱³sain¹sxã³ yen³kxa² kãi³kxi²hxat3sai¹nha²kxai³ Ju³te²a² nũ̱³ka̱³txa² txa²nũ̱³ka̱³txi³khai³sai¹nha²kxai³ ha³lo²a² ha³nxeh³lxi³ju³ta² ai³la¹ha²kxai³, Ju³te²a² nũ̱³ka̱³txi³sxa³te²nãu³xa² te²yã¹nxe³si¹sai¹nha²kxai³ nxe³sain¹to³nha²hẽ³la². Ha³lo²a² ĩ²li³je³na² ha³nxeh³lxi³ju³ta² ĩ³ha¹txi²to³ha¹hẽ³la². Sxi²je³na² ĩ³ha¹txi² kwa²ha³lo²a² ĩ²li³je³na² ĩ³ha¹txi² ĩ̱³ye³na² ũ̱n³je³na² ĩ³ha¹txi² nxe³sxã³ ha³nxeh³lxi³ju³ta² ka³lxa¹txi³ ĩ³ha¹txi²to³ha¹hẽ³la². Txa²ya̱³lhxu²ki³lxo³nha²te²a² ha³nxeh³lxi³ju³ta² ai³lhi¹sain¹na²hẽ³la².  
\v 27 Kãin² wa³ko³na¹ha²kxai³ kãi²nhxi²thah³sa²ha²kxai³ sa²to³nha²hẽ³la². Ye³te³nxa² a³la²ni²to³ha¹ha²kxai³ he³ja³lu²sa²to³ha²kxai³ ya̱³lxu²ja³lu²sa²to³ha²kxai³ a̱³lxi³ta̱n³ya³lu²sa²to³ha²kxai³, yain³txi³txa²sa²to³ha²kxai³ wãn²txa³ yũ³sa²to³hxa³ha²kxai³ nxe³sa²to³nha²hẽ³la².  
\v 28 Nxe³sa³kxa²yu³su² yxo²ĩ²tũ̱³ka̱²txi³nãu³xa² ha³kxa¹ ĩ³hau³ko³tũ¹hai¹na¹ju³ta² hxi²waun³txi³sa²to³nha²wa². \fig |src="HK00332B.TIF" size="span" copy="Horace Knowles ©The British & Foreign Bible Society, 1954, 1967, 1972, 1995." ref="2 Korintios 11.28" \fig* 
\v 29 Txa²wã¹sũ̱³na² wãn³txa² yxo²ĩ²te²a² wain³txi³ kãi³xa³kxai²nãn²tu̱³ jah¹lain²txi³ txai²na¹xain²txi³ nxe³sxã³ ãin²ta³kxi²nha²ya³ha¹nha²wa². Ko̱³nxe³ti³ kãi³kxai²nãn²tu̱³ jah¹lain²txi³ txai²na¹xain²txi³ ĩ³ãin²ta³kxi²nha²ya³ha¹nha²wa². 
\p  
\v 30 Jã¹nxa¹jut3su² yxo²kãin²e³a¹ke³la³te²kxai³ txa²hxi²kan¹sa²nxa³ju³ta² so¹lxi³ yxo²kãin²e³hĩ̱³na¹wa².  
\v 31 Txa²wã¹sũ̱³na² sa²kxai³lu² ĩ³ki³ha¹kxi¹nx2ti³nxa³ju³ta² ĩ²sa³jah¹lai²la¹wa². A²nxe³jah¹lai²li² Je³su²jah³la³ Txa²wã¹hxi²kan¹ta² Si³yxau³jah¹lo²su² ha²kxai³ a²nxe³jah¹la² A²wĩ³na² Si³yxau³jah¹lo²su² na³la². A²nxe³jah¹la² sa²nẽn¹kxi²sa²tẽ³to³ha¹wa².  
\v 32 Nxa²ha¹te¹ a²kxã³nxai³tã² Ta³mas²ko²thĩ³na² yxau³na¹hĩ¹nai³tã² thĩ¹na² a²wa³kxẽn³yah³la² hi²sen³su² sxih²yxo²a² a³li³ta³yxo²a² whãi³na¹ ĩ²sa²tẽ³kxi²si¹hain¹jau³su² kwa³na³ain¹ta¹hẽ¹la². Txai²na² ũ³tĩ̱¹kxi²sa²te³lhxã³ kwa³na³ain¹ta¹hẽ¹la². A²nxe³jah¹lai²na² sa²kxai³lu² A³re²jah³la² ha³lo²a² hxi²kan¹khaix1jah¹lai²na² wãn³txa² sa²yxo²wet1si¹hain¹jau³su² nxe² kãi³ain¹ta¹hẽ¹la².  
\v 33 Jã¹nxa¹jut3su² Txa²ya̱³lxi³nãu³xa² ã³non²ta³kxi²sain¹na²hẽ³la². ónon²ta³kxi²sain¹te³nah¹lxi¹, sxi²jen³nai²na² ki³tã̱¹kxi²nha²je³na² nxe³sxã³ kĩ³tan¹ta²yxo²a² sa²so¹sain¹nũ²la² ha³ti²a² kũ̱³ni³nha² ũ³ki³kũ²kxi²sain¹nũ²la² ũ³whi¹hit3sain¹nũ²la² win¹ta²te²lxi³ sxi²ti²ta³lo³kxa² tẽ³sxã³ ũ³ha³lo²sa²tã³kat3sain¹na²hẽ³la². Nxe³sai¹nha²kxai³ ih³sau³nai¹na¹hẽ³la². \fig |src="HK00332B.TIF" size="span" copy="Horace Knowles revised by Louise Bass © The British & Foreign Bible Society, 1994." ref="2 Korintios 11.33" \fig* 
\c 12  
\s1 Pau²lah³lai²na² hxi²sxã³nho³tẽx3jut3sũ̱³ju³ta² 
\p  
\v 1 Ãh¹lxi³ yxo²kãin²e³a¹tu¹wa², toh³lxi³jau³hũ̱³kxan²ti³na². Yxãn¹ta¹ hxi²sxã³nho³tẽx3jut3sũ̱³ju³ta² ĩ²a¹ju³ta² ĩ³ye³kxi¹nx2ta¹tu¹wa². Yen³kxa² ĩ³yau¹ũ³sa²ju³ta² ĩ³ye³kxi¹nx2ta¹tu¹wa².  
\v 2 Ĩ³ye³kxi¹nx2ta¹ka³tu̱³ti¹ kwẽ³kxa² ye³ka³lxa¹txi³ hxi²ka² hxan³sxã³ ye³ha¹li¹ ye³ha¹li¹ wxa²sa³wa²la³kxi²xi²nũn³sxã³ nxe² kwẽ³ko³nhĩ¹nai³tã² in³txa² Kris²tu³jah¹la² wãn³txa² yxo²ĩ²jah¹la² in³txai²li² ĩ²a¹hẽ³la². Ĩ²a¹jah¹lai²na² sa²kxai³lu² oh³xan¹ko³xa² kĩ³khaix1ko³xai²na² Txa²wã¹sũ̱³na² yxau³ju³khai³xa² ka³la³sĩ²nũ²nha²wa². Nxe³ju³tai²li² a²nũ²khai³xa² ka³la³si¹hĩ̱³te²la¹ku² hãi¹sxã³ hxi²sxã³nho³tẽx3jut3sũ̱³ju³ta² ĩ²te²tũ²nha²ku² nxa¹nha²wa². Txa²wã¹sũ̱³na² so¹lxi³ a³la³kxi²jah¹lai²la¹wa².  
\v 3 Jã¹nxe³sxã³ jah¹lai²li² oh³nãn¹ko³xa² Txa²wã¹sũ̱³na² yxau³ju³khai³xa² ka³la³sĩ²nũ²nha²wa². A²nũ²khai³xa² ka³la³sxã³ ĩ²te²tũ²nha²ku² hxi²sxã³nho³tẽx3jut3sũ̱³ju³ta² ĩ²hĩ̱³te²tũ²nha²ku² nxa¹nha²wa². Txa²wã¹sũ̱³na² so¹lxi³ ko̱³nh²jah¹lai²la¹wa².  
\v 4 A²nxe³jah¹lai²na² sa²kxai³lu² wãn³txa² wa³nũt3jau³su² ain³kxi²nũ²nha²wa². A²nxe³jah¹lxain²ti³na¹wa². A²nxe³jau¹xai²na² a²nũ²a² wãn³txa² hxi²kan¹txi³ ĩ³yau¹ũ¹jau³sxa³nũ²nha²wa². A²nũ²a² wãn³txa² hxi²kan¹txi³ e³xa³nũ²nha²wa².  
\v 5 Jã¹nxa¹jau³su² ju¹tai²li² yxo²kãin² e³kxi²na¹tu¹wa². Yxãn¹ta¹ txai²na¹xai²na² o²la³kxi²na¹ju³khai³xa² e³ũh¹nxa³nha²wa². Ha³lo²a² hxi²ka¹nhã²nxa³ju³ta² so¹lxi³ ĩ³yau¹ũ¹te³lhxã³ e³kxi²hĩ̱³na¹wa².  
\v 6 Nxe³yãn¹ta¹ yxo²kãin² e³ti³ten³sa³ke³la³te²kxai³ hai³txi³ kwa²toh³lxi³jau³su² hĩ̱³nx2nxa³wa². Ya²la³lyau³su² ha²kxai³ kwa²toh³lxi³jau³su² hĩ̱³nx2nxa³wa². Yxãn¹ta¹ yxo²kãin² e³ũh¹nha²sa²nxa³nha²wa². Ha³lo²a² ĩ²a¹ju³ta² so¹lxi³ wãn³txa² ain³kxi²na¹jau³xa² so¹lxi³ e³a¹tu¹wa². Na¹kxai²nãn²tu̱³ a²nũ²a² ĩ²sain¹kxai²nãn²tu̱³ kãi³a¹ju³ta² wain³txi³ a³la³kxi²nũh¹sain¹tu¹wa². Ju¹tai²li² ten³sa³nha²wa². 
\p  
\v 7 Nxe³na¹ta¹ yen³kxa² wi¹khai¹nxe³te²a² ĩ²nha¹hẽ³la². Nxe³na¹ha²kxai³ yxo²kãin²khaix1nxe³sxã³ e³a¹kxa²ya̱n³txi³su² txa²sĩ̱³na² ã³nĩx3ton³sa²ju³ta² yũ³nha¹nha²wa². Sa³ta³na²jah¹la² hxi²ka² ĩ³tot3sa³na²hẽ³la². Yxo²kãin²khaix1nxe³sxã³ e³a¹kxa²ya̱n³txi³su² ĩ³ton³sxã³ yxau²xai³la¹wa².  
\v 8 Jã¹nxe³sa²ju³tai²li² ye³ha¹li¹ ka³na³ki¹ Txa²wã¹sũ̱³na² e³kxi²to³ha¹hẽ³la². Ĩ³ta³ka³txa² ĩ³ton³sa²ka³txa² ã³ku̱t3si¹ha¹jau³su² e³kxi²to³ha¹hẽ³la².  
\v 9 Nxe³nxa²ha¹te¹ ĩ³wa²lũ³xi²sa³te³nah¹lxi¹ Txa²wã¹sũ̱³na² e³kxi²sa³te³nah¹lxi¹: 
\p — Kãin² thãi³ti³la² a³lxi¹nxa²ha¹ju³ta² ãh¹ kãi²non³na³li¹. Yu³tã̱³xa² yũ²nxa³kxan²ti³ ãn²na³li¹. Nxe³sa²jut3su² ha²kxai³ hxi²kan¹nxã²nxa³kxai²nãn²tu̱³ txa²hxi²ka¹na¹ju³tai²li² ãh¹ kãi²non³na³li¹. Nxe³sa³na²hẽ³la². Nxe³sa²ju³tan¹te²kxa³ya̱³lhu² ka³li³sa³nha²wa². Ka³li³sa³ha²kxai³ txa²hxi²kan¹sa²nxa³ju³ta² yxo²kãin² e³to³ha¹tu¹wa². Jã¹nxe³sa³kxai²nãn²tu̱³ Kris²tu³jah¹la² a²hxi²kan¹khai³ju³ta² nxũ²kwa̱i³yxau²xai³lha³tu¹wa².  
\v 10 Nxe³na¹jut3su² Kris²tu³jah¹lai²na² wãn³txa² ĩ³hen³txi³na¹ha²kxai³ ka³li³sxã³ yxau²xai³la¹wa². Txa²sĩ̱³na² ã³nhxi²kat1sa²nxa³ju³kxai²lẽ¹. Ko̱³nxe³ti³ e³kxi²sain¹ju³ta² yũ³sa³ju³kxai²lẽ¹. Yen³kxa² yũ³sa²nxa³ju³kxai²lẽ¹. Txa²wã¹sũ̱³na² wãn³txa² yxo²ĩ²a¹ha²kxai³ khãuh³lxa³te³sain¹ju³kxai²lẽ¹. Ha³lo²a² ko̱³ton³kxi²sa²ju³kxai²lẽ¹. Nxe³ju³ta² yxo²ha³kxa¹ ka³li³sxã³ yxau²xai³la¹wa². Nxe³sxã³ txa²sĩ̱³nai²na² ã³nhxi²kat1sa²nxa³kxai²nãn²tu̱³ Kris²tu³jah¹la² ĩ³hxi²kat1ti³hit1sa²na³la². 
\s1 Pau²lah³la² hxi²waun³ta³kxi²jau³su² 
\p  
\v 11 Nxa²ha¹te¹ toh³lxa³ti³yah³la² yã¹nxe² e³a¹wa². Yxãn¹ta¹ wxãi² ĩ³nxa² wã²nxũ̱h¹lxi³yah³lxi¹lxa². Wi¹le³kxi²nũh¹sah²lxin¹ke³la³te²kxai³ wai³nhĩ̱³nx2na³la². Yxãn¹ta¹ sah²lxa³lxa². Tũ̱¹ka̱³txain²txi³ Txa²wã¹sũ̱³na² wãn³txi³su² ki³lxo³tũ̱³ka̱³txain²txi³ hai³txi³ ne³ka³ta²sai¹nxa³wa², txai²li² kãi²ti³he¹nxẽ²nxa³kxan²ti³na².  
\v 12 Txa²wã¹sũ̱³na² wãn³txa² ya²la³lyau³xa² ĩ³yau¹ũ³na¹jah¹lo²su² te²sa¹kxe³su² wã²nã³ũ¹nx2ta¹tai¹ti²tu³wa². Ya³nãn³ta³ki²la²sxã³ kãi³ũh¹nx2ta¹tai¹ti²tu³wa². Wã³nxĩn¹sxã³ o²la³kxi²na¹ju³ta² ĩ²yah³lxi¹nha²kxai³, on²ta³kxi¹nx2ta¹ju³ta² ĩ²yah³lxi¹nha²kxai³, Txa²wã¹sũ̱³na² ĩ³hxi²ka¹ti³hit1sa²ju³ta² ĩ²yah³lxi¹nha²kxai³, sah¹lxin¹tai¹ti²tu³wa². A²nxe³jut3su² ã³ye³yxo²nũ¹sa²na³la².  
\v 13 Yxo²ĩ²tũ̱³ka̱³txa² ã̱³xai²na² a²yxo²ha³kxa¹ wi¹kãi³ũ¹hai¹na¹ha²kxai³ wxãi² ĩ³nxai²na² so¹lxi³ ko̱³nxe³ti³ kãi³ũh¹nx2ta¹ha²kxai³ nxe³nx2ti³hĩ̱³na¹te²la¹xã³? Ti³he¹nxe²nxa³wa². Tũ̱¹ka̱³txi³nãu³xain²txi³ wxa²nũ̱³ka̱³txain²txi³ te²yã¹nxe² kãi³ũh¹nx2ta¹tai¹ti²tu³wa². Hãi¹nxe³sxã³ kwa² hxi²tha³txa²lxi³nx2ti³kxa²ya̱n³ti³su² yen³kxa² yũ³yah³lxin¹kxa² wã²nhũh¹sah¹lxin¹jau³nũ³a² ĩ³ye³kxi¹nx2ti³nxa³tai¹ti²tu³wa². Ju¹tai²na² ne³wã²na³ya³sah¹lxi³hẽ¹la². 
\p  
\v 14 Ye³ha¹li¹ wxã³sĩ²nx2ta¹tai¹ti²tu³wa². Jã¹nxe³te³lhxã³ ãu¹la³kxi² ta³lu²ni¹nx2ta¹wa². Nxa¹kxai²nãn²tu̱³ wxa²yen³kxa² wã²nhũh¹sah¹lxin¹ju³ta³nũ³a² e³kxi¹nx2ti³nxa³lho³la². Ũ3yho³hi²sah¹lxin¹txã³nxa² ten³sa²nxa³nha²wa². Wxãi² ĩ³nxa² whãi²na¹ ten³nxa²lxa¹nha²wa², Sũ̱³na² wãn³txa² yxo²ĩ²sxã³ yxau²xai³lyah³lxin¹si¹jau³sa². A²wĩ³nu²su² ta̱³nxa² a²hã³ka³nũ²su² ta̱³nxa² nxe³te²kxai³lu² a²wẽ³ha³lxi³khai³xa² yen³kxa² ũh³kxi³nũ³a² hau³kot3sxã³ ũ³nyhain¹te²ju²hẽ³la². Hai³txi³ wẽ³ha³lxi³su² te²kxai³lu² a²wĩ³na² ta̱³nxa² a²hã³ka³na² ta̱³nxa² sa²hau³kot3sxã³ ũ³nyhain¹te²sxa³yu²hẽ³la². Nxe³te²sẽ¹la². Txa²wẽ³ha³lxa² yã¹yxah³lxi¹lxa².  
\v 15 Nxe³kxa²yã¹nxe² txa²yen³kxa² ha³kxa¹ ũ³hau³ko³tũh¹nx2ta¹kxan²ti³ ĩ³ka³li³hĩ̱³na¹wa², hxi²kxũ³na¹ju³ta² hxan³kxi²sa³kxan²ti³na². Nxe³na¹ha²kxai³ a³lxi¹nx2ta¹ju³ta² ĩ³kãi²no³tũh¹nx2ta¹wa². Nxe³nx2ta¹ta¹ a³lxi²sah¹lxin¹ju³ta² ĩ³kãi²nxa³to³je¹nx2ti³na³la². 
\p  
\v 16 Nxe³sxã³ yxau³ya³sah¹lxi¹nhĩ¹nai³tã³ kwa²hi²tha³txa²lxi³nxa³tai¹ti²tu³wa². Nxe³nx2ti³nxa³kxan²ti³ wxa²nũ̱³ka̱³txa² a²ha³tih³ ĩ³nxa² wãn³txi³kxai³lu¹ e³kxah²lxin¹te³nah¹lxi¹: 
\p — Pau²lah³lai²li² ĩ³ki³ha¹kxi²nẽ³na³li¹. Wãn³txa² ka²yãu¹ka²yãu¹jau³xa² e³kxi²nẽ³lain¹na²hẽ³li¹. Nxe³sa²yah³lxi³ta¹hi¹nhẽ¹la².  
\v 17 In³txai²li² ĩ³ki³ha¹kxi¹nx2ti³sxã³ wxa²yen³kxa² kwa² sa²so¹kxi¹nx2ti³si¹jau³su² ũ³sa²si¹hã³ũh¹nx2ta¹lhai¹la²? Hai³txi³ ti³hex1ye¹nx2ti³nxa³hẽ³la².  
\v 18 Kxã³nhxĩ¹nai³tã² Ti²to³jah¹la² ũ³sa²si¹hã³ũh¹nx2ta¹tai¹ti²tu³wa². In³txa² yxo²ĩ²nũn³te²a² ã³si³tẽ³kxi²si¹ha¹jau³su² ũ³sa²si¹hã³a¹hẽ³la². Jã¹nxe³hĩ¹nai³tã² ĩ³ki³ha¹kxi¹nx2ti³sxã³ wxa²yen³kxa² kwa²sa²so¹kxi¹nx2ti³ta¹lhai¹la²? Ti³he¹nxe²nxa³wa². Txa²ẽ¹nãn¹jau³xain²txi³ Ti²to³jah¹la² a²ẽ¹nãn¹jau³xain²txi³ yxa³ha¹wa². Yxa³ha¹ha²kxai³ ya²la³lyau³xa² sa²yxo²wet1sxã³ kãi³sĩ¹na¹tai¹ti²tu³wa². 
\p  
\v 19 — Ĩ³ye³ĩ³wa³lxĩn³nẽ³jau³xa² e³kxi²ti³ten³ji¹xã¹. Yah³lxin¹jau³su² yxãn¹ta¹ ten³sa²sĩ¹nxa³nha²wa². Kris²tu³jah¹lai²na² wãn³txa² ĩ³yau¹ũ³sa²sĩn¹jau³xa² so¹lxi³ ĩ³ye³kxi¹nx2ta¹wa². Txa²wã¹sũ̱³na² yen³nãu³a² e³kxi¹nx2ta¹wa². A³lxi¹nx2ta¹wa². Kris²tu³jah¹lai²na² wãn³txa² yxo²ĩ²kãi²non³yah³lxin¹ju³ta² so¹lxi³ ten³sa²sĩn¹nha²wa².  
\v 20 Wxã³sĩ²nx2ta¹kxai²nãn²tu̱³ ĩ³ã̱³lxa³ti³nha²hĩ̱³txa²nãn³khih³ nxe³nx2ta¹nha²wa². Nxe³nx2ta¹kxai²nãn²tu̱³ ã̱³lxi²ye¹nx2ti³nũ³nhĩ̱³na¹wa². Hxi²waun³txi³sa³nha²wa². Wxã³sĩ²nx2ta¹kxai²nãn²tu̱³ ko̱³nxe³ti³ kãi³yah³lxin¹ju³ta² yũ³te³lxã²nãn³khih³ nxe³nx2ta¹nha²wa². Kwa² wãn³txa² ĩ³ye³sxã³ ĩ³yi²yi²lhon¹ta³kxi²nyhu¹ah³lxi³hĩ̱³nxãn¹ji¹ku¹. A²nũ²a² ã̱³xa² yen³kxa² ko̱³nxe³ti³ yxo²kwa̱in³kxi²nyhu¹ah³lxi³hĩ̱³nxãn¹ji¹ku¹. Ĩ³yxaih²kxi²nyhu¹ah³lxi³hĩ̱³nxãn¹ji¹ku¹. Kãin²ki³lxo³nha²sxã³ ĩ³hait2ta³lxi³nyhu¹ah³lxi³hĩ̱³nxãn¹ji¹ku¹. A²nũ²a² ã̱³xa² o̱³nxa³ti³lon³sxã³ ĩ³ye³kxi²nyhu¹ah³lxi³hĩ̱³nxãn¹ji¹ku¹. Ko̱³nxe³ti³ hãi³a² ĩ³he³son³kxi²nyhu¹ah³lxi³hĩ̱³nxãn¹ji¹ku¹. Ĩ³kãin²ti³nha²ki³lxo³nxe² ĩ³ye³kxi²nha²yah³lxi³hĩ̱³nxãn¹ji¹ku¹. A̱n³txi³sxã³ ã³nhai²ta³lxi²nyhu¹ah³lxi³hĩ̱³nxãn¹ji¹ku¹. Nxe³nx2ta¹nha²wa².  
\v 21 Hxi²waun³ta³kxi¹nx2ta¹nha²wa². Wa̱³li²na¹tãu³a¹ Txa²wã¹sũ̱³na² yen³nãu³a¹ ĩ³ãin²ta³kxi²nũh¹sah¹lxin¹kxa²ya̱n³txi³su² nxe³nx2ta¹nha²wa². A²kxã³nxa² ko̱³nxe³ti³ kãi³yah³lxin¹tai¹ti²tu³wa². Txu¹ha² ã̱³xa² ta̱³nxa² in³txa² ã̱³xa² ta̱³nxa² ũ³whĩn¹ta³kxi²nyhu¹ah³lxin¹tai¹ti²tu³wa². Ĩ²li³ju³ta¹ ko̱³nxe³thin¹txi³khaix1sxã³ o²la³kxi²yah³lxin¹tai¹ti²tu³wa². Nxe²kãi³yah³lxin¹ta¹ hai³txi³ ĩ³ãin²ta³kxi²nha²sxã³ ã³na¹yah²lxan³ka²ya̱n³txi³su² hxi²waun³ta³kxi¹nx2ta¹nha²wa². 
\c 13  
\s1 Pau²lah³lai²na² wãn³txa² a²ne³ki³san¹jau³su² 
\p  
\v 1 Ye³ha¹li¹ wxã³sxã³ ĩ²nx2ta¹tai¹ti²tu³wa². Jã¹nxa¹tu¹wa². Nxe³sxã³ Txa²wã¹sũ̱³na² ũ³wha²li¹txã³nxai³tã² nxe³te³nah¹lxi¹: 
\p — A²nũ²a² ĩ²li³te²a² ko̱³nxe³ti³ kãi³ju³ta² a³ti²te³lhxã³ yah³lxin¹kxai²nãn²tu̱³ a²nũ²a² ha¹li¹ ta̱³nxa² ha¹li¹ ka³na³ki¹ ta̱³nxa² jau¹xain²txi³ ĩ³yau¹ũ¹nx2tain¹kxai²nãn²tu̱³ a²wãn³txai²na² ĩ³ye³yxo²nũ¹nyhain¹kxai²nãn²tu̱³ nxe³hĩ¹na² so¹lxi³ a²nũ²a² ko̱³nxe³ti³ ĩ³yĩ¹li²tai¹nhẽ³li¹. Nxe³ta¹hxai²ti³ai¹ti²tu³wa².  
\v 2 A²kxã³nxa² wxã³na¹hĩ¹nai³tã² e³kxi¹nx2ta¹tai¹ti²tu³wa². Ko̱³nxe³ti³ kãi³te² ĩ³nxa² e³kxi¹nx2ta¹tai¹ti²tu³wa². Yxo²ha³kxa¹ ain³kxi²sah²lxin¹jau³su² tai¹ti²tu³wa². Jã¹nxe³nx2ta¹tu¹wa². Nxe³nx2ta¹te³nah¹lxi¹: 
\p — Wxã³sĩ²xi¹nx2ta¹kxai²nãn²tu̱³ wxãi²nãu¹ ĩ³nxa² a²yxo²ha³kxa¹ ĩ³a̱n³ta³kxi¹nx2ta¹tu¹wi¹. Ko̱³nxe³ti³ kãi³yah³lxin¹te²a² ĩ³wai²txa³lxi³nx2ta¹tu¹wi¹. Nxe³nx2ta¹nha²wa².  
\v 3 Nxe³nx2ta¹kxai²nãn²tu̱³ Kris²tu³jah¹lai²na² wãn³txa² ĩ³ye³kxi¹nx2ti³ju³ta² ya²la³tu̱³ ĩ²yah³lxin¹tu¹wa². A²nxe³jah¹lai²li² Kris²tu³jah¹lai²li² hxai²yah³lxi³kxi²nxa³wa². Nũ³kxũn³khaix1nxe³ju³tai²li² wxa²ye³na² wã²nã³ũ¹nx2ti³tu¹wa².  
\v 4 A²kxã³nxai³tã² Kris²tu³jah¹lai²na² yuh³xan¹ko³xa² yxau³hĩ¹nai³tã² a²hxi²kan¹ju³ta² ã³na¹hĩ¹nai³tã² ko̱³nxe³thin¹tũ̱³ka̱³txa² sa²kxai³lu² ĩ³hxi²kĩ¹la³kxain¹ta¹hxai²hẽ¹la². Nxe³nũ²la² hã²wxãn³txa³ Txa²wã¹sũ̱³na² hi²sen³kxai³lu² ka³te̱n³su² ĩ³sa²yxau³xi²ti³hi¹ta¹hxai²ti³ai¹ti²tu³wa². Nxe³hĩ¹nãn¹te²tu̱³ Txa²wã¹sũ̱³na² ĩ³nũ³kxũn³ti³ta¹hxai²hẽ¹la². Te²yã¹nxe³sxã³ Kris²tu³jah¹la² hxa̱i²ya³lxi³kxi²kxa² yã¹nxe³sxã³ ha̱i²ya³lxi³kxi²nũ³na¹wa². Yxãn¹ta¹ ĩ³nxũ²kwa̱i³lxũ¹txi³sa²ju³ta² nxũ²kwa̱i³yxau³sa²na³la², Txa²wã¹sũ̱³na² ĩ³hxi²kat1sa²ha²kxai³la². ónon²ta³kxi¹nx2ti³te³lhxã³ nxe³nx2ta¹wa². 
\p  
\v 5 Wã²nxũ̱h¹ ĩ²xai³nha¹jah³lxi³hẽ¹la². Kris²tu³jah¹la² yxo²ĩ²ah³lxin¹ju³ta² wã²nxũ̱h¹ ĩ²sa²tẽ³kxi²xai³nyha¹jah³lxi³hẽ¹la². Kris²tu³jah¹la² hi²sen³kxai³lu² nxũ²kwa̱i³yxau²xai³nx2ti³na³la². Kwa² yxo²ĩ²yah³lxin¹ju³ta³la³ nxe³yah²lxan³kxai²nãn²tu̱³ nxũ²kwa̱i³yxau³sa²tẽ³nx2ti³na³la². Ju¹tai²li² ĩ²yah³lxi¹lxa².  
\v 6 Te²yã¹nxũn³sxã³ Kris²tu³jah¹lo²su² nxũ²kwa̱i³yxau³nx2ti³kxa² yã¹nxe³sxã³ nxũ²kwa̱i³yxau³sa²nũn³na³la².  
\v 7 Te²yã¹nxũn³sxã³ Sũ̱³na² ĩ³kaix1so¹jah¹lo²su² na¹ha²kxai³ yxo²xũn³sxã³ ĩ³kwa̱i²kxi¹nx2ta¹ju³ta² hxi²ka¹nhĩ̱³na¹wa². Nxe³na¹ha²kxai³ nũh¹ĩ²jah¹lxi³hẽ¹la². Txai²na² wxã²nxa³ta̱³lxa¹ ko̱³nxe³ti³ kãi³jah¹lai¹tã² wain³txi³ ĩ³hau³ko³tũh¹jah¹lxi³sã²nhẽ³la². Wxã³sxã³ yxo²xũn³txi³ ĩ³kwa̱i²kxi¹nx2ta¹kxa²ya̱n³txi³su² nxe³ye¹nx2ta¹wa².  
\v 8 Nxe³ha²kxai³: 
\p — Ya²la³lyau³xa² ã³a¹tũ¹xã¹. Na¹kxan²ti³ hxi²kan¹txi³ ã³sa²sĩ¹nxa³nha²wa². Wain³txi³ ã³non²ta³kxi²sa²sih¹nx2ta¹ju³ta² so¹lxi³ ten³sa²sĩn¹nha²wa².  
\v 9 Nxe³na¹ha²kxai³ txai²na² hxa̱i²ya³lxi³kxi²ye²sa³ha²kxai³ wxãi²na³ ĩ³nxai²na² nũ³kxũn³ye²yah³lxi¹nha²kxai³ ka³lih³sa³nha²wa². Jã¹nxe³sxã³ Txa²wã¹sũ̱³na² e³kxi²to³ha¹wa². E³kxi²na¹te³nah¹lxi¹: 
\p — Ko³rĩn²to² tũ̱³ka̱³txai²na² wi¹lĩ²txai¹nhẽ³li¹. Jũ¹nxa² sa²yxo²we¹txain¹na³li¹. Yxãn¹ta¹ ã²la² nũ³kxũn³sxã³ sa²yxo²we¹txain¹ju³ta³nũ³a² ten³sa³nhai¹. Nxe³na¹jau³xa² Txa²wã¹sũ̱³na² e³kxi²to³ha¹wa².  
\v 10 Jã¹nxe³na¹jut3su² ũ³wha²li¹lye¹nx2ta¹wa². Ne³ka³ta²sxã³ ũ³sa²si¹hã³ũ¹nx2ta¹tu¹wa². Nxa¹kxai²nãn²tu̱³ wxã³na¹tãu³a² yxo²xũn³txi³ e³kxi¹nx2ta¹ju³ta² ten³sa²hĩ̱³nx2nxa³wa². Txa²wã¹sũ̱³na² ĩ³hxi²kat1sa³kxan²ti³ yxo²xũn³txi³ e³kxi¹nx2ta¹ju³ta² ten³sa²nxa³nha²wa². Yxãn¹ta¹ ã²la² nũ³kxũn³ kãi²non³sxã³ yxo²ĩ²ah³lxin¹kxi³nũ³a² ĩ³hxi²kat1sa³na²hẽ³la². Hai³txi³ ã³na¹nx2ti³ju³ta³nũ³a² ten³sa²nxa³nha²wa². 
\p  
\v 11 Nxa²ha¹te¹ txa²wã³tã̱³nãu³xãi³. ówa²su¹ta¹tu¹wa². Ka³lih³sxã³ yxau²xai³jah¹lxi³hẽ¹la². Txa²wãn³txai²li² sa²yxo²wet1sah¹lxi³hẽ¹la². Sa²ye³kwẽ²kxi²waun¹nyha¹jah³lxi³hẽ¹la². Wi¹yxo²we¹nyhu¹sxã³ yxau²xai³jah¹lxi³hẽ¹la². Hãu²non³sxã³ yxau²xai³jah¹lxi³hẽ¹la². Nxe³sxã³ Txa²wã¹sũ̱³na² sa²kxai³lu² a³lxi²waun¹nyhu¹ki̱³ju³ta² ũ³hũ¹nẽ³jah¹lo²su² te²kxai³lu² sa²hãu²no³tẽ³ju³ta² ũ³hũ¹nẽ³jah¹lo²su² te²kxai³lu² ã³si³tẽ³kxi¹nx2ti³tu¹wa². 
\p  
\v 12 Txa²wã¹sũ̱³na² wãn³txa² yxo²ĩ²ah³lxi¹nha²kxai³ ĩ³yxo²sai¹la²kxi²nyha¹ju³ah³lxi³hẽ¹la². 
\p  
\v 13 Ti¹ai²li² yxo²ĩ²tũ̱³ka̱³txa² a²yxo²ha³kxa¹ a²ha³ta̱³nxa² ĩ³sa²si¹hã³ũh¹nx2tain¹na³la².  
\v 14 Nxe³na¹jut3su² Je³su² Kris²tu³jah¹lai²na² Txa²wã¹hxi²kan¹ta² Si³yxau³jah¹lo²su² ha²kxai³ kãin² thãi³ti³la² a³lxi¹nx2ti³si¹ha¹jau³su² te³ni² Txa²wã¹sũ̱³na² a³lxi¹nx2ti³si¹ha¹jau³su² te³ni² Txa²wã¹sũ̱³na² Yãu³ka³jxah¹la² a²nũ²kxi²sxã³ yxau³nũh¹nx2ti³si¹ha¹jau³su² te³ni² sa³nha²wa². Txai²li² Pau²lah³lo²na¹xai²na² nxe³ye¹nx2ta¹wa². Ta³lu²na¹wa².