\id 1TI - Nambikuára NT [nab] (Brazil) -2011 bd 
\h 1 Timoteo 
\toc1 1 Timoteo 
\toc2 1 Timoteo 
\toc3 1 Tm 
\mt1 1 Timoteo 
\c 1  
\p  
\v 1 Pau²lah³lo²na¹xai²na² ũ³wha²li¹le¹nxa²ha¹wa². Je³su² Kris²tu³jah¹la² ĩ³sa²si¹hã³ũ¹sa²jah¹lo²sa¹wa². Je³su² Kris²tu³jah¹lai²na² wãn³txa² ĩ³hen³txi³si¹ha¹jau³su² ĩ³sa²si¹hã³ũ¹sa³na²hẽ³la². Txa²wã¹sũ̱³nu²kxai³lu² txa²wã¹ẽ¹na² sa²hau³ko³tẽ³jah¹la² ĩ³kwa³na³sai¹ni² Je³su² Kris²tu³jah¹la² wah³nxe³ki̱³jah¹la² ĩ³kwa³na³sai¹ni² nxe³sain¹na²hẽ³la².  
\v 2 Nxe³na¹jut3su² Ti³mo²jah³lo²si¹nha²kxai³ ain³kxi²sẽ¹la². Txa²wã¹sũ̱³na² wãn³txa² ain³kxi²sa¹nha²kxai³ txa²wẽ³sũ̱³te²si¹lxa². Nxe³ha²kxai³ Txa²wã¹sũ̱³na² Si³yxau³jah¹la² Txa²wã¹wĩ³nu²su² ha²kxai³ Je³su² Kris²tu³jah¹la² Txa²wã¹hxi²kan¹ta² Si³yxau³jah¹lo²su² ha²kxai³ nxe³ya³sxã³ kãin² thãi³ti³la² a³lxi²nxa²si¹hi² wi¹lhin¹sxã³ thãi³ti³la² sa²hau³ko³txa²si¹hi² wxa²nxũ²kwa̱i³nãu³a² ã³nhãu²no³txa²si¹hi² nxe³nxa²si¹jau³su² ten³sa³nha²wa². 
\s1 Wãn³txa² ki³han³jau³su² ĩ³tih³nxe³nyhain¹jau³su² 
\p  
\v 3-4 Nxe³ha²kxai³ Ma³se³to²na²ko³xa² ai³te³lhxã³ nxa¹hĩ¹nai³tã² e³kxi¹nxa²ha¹tai¹ti²tu³wa². Nxe³nxa²ha¹te³nah¹lxi¹: 
\p — E²fe³so³thĩ³na² hãi¹sxã³ yxau³sẽ¹li¹. A²nũ²a² ĩ²li³te²a² wãn³txa² ki³han³jau³xa² ĩ³tih³nxe³nyhai¹nha³tai¹. Nxe³te²a² ha³ya³kxa² o²la³kxain¹si¹hin¹jau³su² ĩ³ye³kxi¹tai¹nhẽ³li¹. Wãn³txa² ki³han³jau³su² jau³xa² ã³na¹i² wxa²wĩ³na²nãu³xu¹tai²na² he¹ta¹hxai²hẽ¹li¹. Nxe³jau³xai²na² ya²la³tu̱³txa³kxai²nãn²tu̱³ ã³na¹i² nxe³ain¹si¹hin¹jau³su² ĩ³ye³kxi¹tai¹nhẽ³li¹. Nxe³jau³xai²li² a²ẽ¹nãu³ai²na² hxi²kan¹txi³ yxo²ĩ²ki̱³jau³sxa³wa². Yxãn¹ta¹ Txa²wã¹sũ̱³na² wãn³txa² so¹lxi³ hxi²kan¹txi³ yxo²ĩ²ki̱³jau³xai²la¹wa².  
\v 5 Nxe³sxã³ wain³txi³ ĩ³tih³nxain¹ki̱³kxai²nãn²tu̱³ a²ẽ¹nãu³ai²na² wi¹lhin¹ju³ta² so¹lxi³ yũ³ha²kxai³ wain³ye¹nxa²ju³ta² so¹lxi³ kãi³ha²kxai³ Je³su²jah³la² txa²wã¹ẽ¹nãu³a² sa²hau³ko³tẽ³ju³ta² yxo²ĩ²ha²kxai³ ai¹nhĩ̱³nx2na³la². Ain¹kxai²nãn²tu̱³ a³lxi²waun¹nyhu¹ki̱³ju³ta² ã²la² kãi²nhĩ̱³nx2na³la². Ju¹tai²li² ten³sa³nha²wa².  
\v 6 Yxãn¹ta¹ a²nũ²a² ĩ²li³te²a² wãn³txa² toh³lxi³jau³xa² ain³so¹ain¹ka³tu̱³ wãn³txi³khai³xa² sa²kxai³lu² ã³na¹ain¹na²hẽ³la². Kwa²toh³lxi³jau³xa² ĩ³tih³nxain¹te²ju²hẽ³la².  
\v 7 Nxe³sxã³: 
\p — Moi³se²ah³lu¹tai²na² wha²li¹txã³nxu¹tai²na² wãn³txa² ĩ³tih³nxe³jah¹lo²sa¹wi¹. Nxain¹na³la². Nxe³yãn¹ta¹ jau¹xai²na² ĩ³tih³nxain¹jau³xai²na² a³la³kxai¹nxa³ha²kxai³ a²si³yxau³tãu³a² a̱in³nha²nxa³ha²kxai³ nxe³ain¹na³la². 
\p  
\v 8 Ai¹nha²kxai³ Moi³se²ah³lu¹tai²na² wãn³txa² ĩ³tih³nxain¹jau³xu¹tai²na² wain³txi³ sa²yxo²we¹tain¹kxai²nãn²tu̱³ wi¹te²ju²hẽ³la².  
\v 9 Yxãn¹ta¹ wi¹lhin¹tũ̱³ka̱³txi³ki̱³nãu¹xai²na² ĩ³tih³nxe³nẽ³jau³sxa³wa². Yxãn¹ta¹ a²nũ²a² ko̱³nxe³ti³ kãi³te²su² te²na² Txa²wã¹sũ̱³na² ĩ³xa̱n³ta³kxain¹te²su² te²na² a²ẽ¹nãu³ai²na² ĩ³ne̱³wã³nũn³ta³kxi²te²su² te²na² Txa²wã¹sũ̱³na² sa²nẽn¹kxi²nxa³te²su² te²na² Txa²wã¹sũ̱³na² ko̱³nxe³ti³ e³kxi²te²su² te²na² a²wĩ³nu²su² ta̱³nxa² a²hã³ka³nũ²su² ta̱³nxa² ĩ³xa̱n³txa³kxain¹te²su² te²na² a²nũ²a² su²lhã³nyhu¹ki³te²su² te²na² nxe³te²a² yxo²ha³kxa¹ Txa²wã¹sũ̱³na² ĩ³kwa³na³nẽ³jau³xai³tã² ĩ³tih³nxe³jau³nũ³ai²la¹wa².  
\v 10 Te²yã¹nxe³sxã³ tũ̱¹ka̱³txa² te²yã¹xain¹nũn³na³la². Kuh³lxa³thin¹khaix1te²su² te²na² in³txi³su² ta̱³nxa² txu¹su² ta̱³nxa² kuh³lxa³thin¹sxã³ ũ³whĩn¹ta³kxi²nyhu¹ki³te²su² te²na² a²nũ²a² ã̱³xa² nũ³kxũn³txi³ kãi³so¹sxã³ kwa²wa³kon³kxi²si¹jau³su² kwa³na³te²su² te²na² ĩ³ki³ha¹kxi²te²su² te²na² a²nũ²a² ĩ³ki³ha¹kxi²sxã³ ko̱³nxe³ti³ e³kxi²nyhu¹te²su² te²na² wi¹lhin¹jau³xa² yxo²kwĩn¹kxi²te²su² te²na² nxe³te²a² yxo²ha³kxa¹ Moi³se²ah³lu¹tai²na² wãn³txu¹tai²na² ĩ³tih³nxe³jau³xai²la¹wa². Nxe³jau³xai²na² yxo²ha³kxa¹ a²nũ²a² wi¹lhin¹te²a² ã²la² sa²yxo²we¹tain¹te²ju²hẽ³la².  
\v 11 Yxãn¹ta¹ wãn³txa² wxi²kin³ti³ton³khaix1si¹nhẽ³jau³su² yũ³na¹wa². Nxe³jau³xai²na² Txa²wã¹sũ̱³na² Wi¹lhin¹ta² Si³yxau³jah¹la² ũ³hũ¹sa²jau³xai²la¹wa². Txa²wã¹ẽ¹nãu³ai²na² sa²hau³ko³tũ¹nhẽ³jau³xai²la¹wa². Ĩ³tih³nxe³nxa²ha¹jau³xai³ta³lxa²na³la². 
\s1 Je³su² Kris²tu³jah¹la² sa²nẽn¹kxi²jau³su² 
\p  
\v 12 Nxa²ha¹te¹ Je³su² Kris²tu³jah¹la² Txa²wã¹hxi²kan¹ta² Si³yxau³jah¹lo²su² ha²kxai³ sa²nẽn¹kxi²to³ha¹wa². Ĩ³nũ̱³kxũn³txi³sai¹nha²kxai³ ya³nãn³ta³ki²la²sxã³ wi¹kãi³a¹kxe³su² nxe³ye²sa²jau³su² ĩ³kaix1so¹sai¹nha²kxai³ nxe³sain¹na²hẽ³la². Sũ̱³na² wãn³txa² wi¹jau³xa² ĩ³hen³txi³te³lhxã³ ĩ³kaix1so¹sain¹na²hẽ³la².  
\v 13 Nxe³na¹hĩ¹nai³kxai³lu² nxe³na¹hẽ³la². Txa²wã¹sũ̱³na² ko̱³nxe³te²lo³txai¹na¹ha²kxai³ Je³su²jah³la² a²sa³wi³ha³lxa² khãuh³lxa³tai¹na¹ha²kxai³ nũ̱³kxũn³txi³ a̱n³txi³ti³hin¹sxã³ o²la³kxi²na¹ha²kxai³ nxe³na¹hẽ³la². Txa²wã¹sũ̱³na² wãn³txa² ko̱³nha²nxa³ha²kxai³: 
\p — Wain³txi³ kãi³a¹xã¹. Nxa¹jau³tu̱³ ko̱³nxe³ti³ kãi³a¹hẽ³la². Nxe³na¹kxan²ti³ wi¹lhin¹sxã³ thãi³ti³la² sa²hau³kot3sa³na²hẽ³la².  
\v 14 Nxe³sa³nũ²la² Je³su² Kris²tu³jah¹lo²kxai³lu² thãi³ti³la² a³lxi² wa³to²hi²ha²kxai³ wi¹lhin¹khai¹nxe³ha²kxai³ yxo²ĩ²si¹sain¹jau³su² ĩ³yau¹ũ³sai¹ni² a³lxai¹na¹ju³ta³nũ³a² ũ³hũ¹sai¹ni² Je³su² Kris²tu³jah¹la² nxe³sa³na²hẽ³la². ónũ²nxi²sxã³ yxau³a³sa³ha²kxai³ nxe³sa³na²hẽ³la².  
\v 15 Nxe³na¹jut3su² Je³su² Kris²tu³jah¹lo²su² te²kxai³lu² a²nũ²a² yxo²ha³kxa¹ a²ẽ¹nãu³ai²na² sa²hau³ko³txi² ko̱³nxe³ju³ta² wã³ko³txa³te²tu̱³ sa²wa²su¹txi² nxe³te³lhxã³ wxã³na²hẽ³la². Nxe³te²jai¹ti²tu³wa². Txai²li² kxã³nxa² ko̱³nxe³ti³ kãi³ wa³to²hi² jah¹lo²su² na¹hẽ³la². Ki³han³nxa³wa². Wãn³txi³tu̱³ e³a¹wa².  
\v 16 Jã¹nxe³na¹ju³kxai³lu² nxe³na¹kxan²ti³nũ¹ Txa²wã¹sũ̱³na² wi¹lhin¹sxã³ thãi³ti³la² sa²hau³kot3sa³na²hẽ³la². Sa²ju³tan¹te²kxa³ya̱³lhu² Je³su² Kris²tu³jah¹lo²kxai³lu² ya³nãn³ta³ki²la²ha²kxai³la¹ txa²ẽ¹nãu³ai²na² sa²hau³kot3sa³na²hẽ³la². Nxe³ha²kxai³ nxe³hĩ¹nãn¹te²tu̱³ a²nũ²a² ĩ²li³te²a² yxo²ĩ²kxai²nãn²tu̱³ ka³te̱³na² wi¹tãu³a² nxe³ti³hi¹tain¹nũn³tu¹wa².  
\v 17 Nxe³jut3su² Txa²wã¹sũ̱³na² so¹lxi³ Txa²wã¹si³yxau³jah¹lai²la¹wa². A²wi¹lhĩ¹nu¹tai²na² yen³kxa² yũ²nxa³hĩ¹nũ¹tai²nãn¹te²tu̱³ Txa²wã¹sũ̱³na² yxau²sa²tẽ³jah¹lai²la¹wa². Hai³txi³ ya³lu²ju³ta² yũ³jah¹lo²sxa³wa². Ĩ²ki̱³sxa³hĩ¹nu¹tai²nãn¹jah¹lo²su² na³la². Hãi¹nxe² sa²nẽn¹kxi²yxau²xai³ki̱³jah¹lo²su² na³la². 
\p  
\v 18 Nxa²ha¹te¹ Ti³mo²jah³lãi³. Txa²wẽt3si¹lxa². Wãn³txa² e³kxi¹nxa²ha¹jau³xai²na² a̱in³so¹sẽ¹la². Sa²yxo²wet1sẽ¹la². Kxã³nxai³tã² Txa²wã¹sũ̱³na² wãn³txa² e³kxi²tũ̱³ka̱³txai²na² e³kxi²nẽ³lain¹jau³xai³tã² ne³wã²na³txa³hẽ¹la². Ne³wã²na³xan³kxai²nãn²tu̱³ ĩ³nxũ²kwa̱i³lxũ¹txi³nxa²tu¹wa². Nxe³nxa²ha²kxai³ Txa²wã¹sũ̱³na² wa³ka³li³yu³ta² wain³txi³ o²la³kxin¹tu¹wa².  
\v 19 óna¹sxã³ yxo²ĩ²nxã²nxa³lho³la². Wxa²ẽ¹nãu³ai²na² wain³txi³ ĩ³ye³kxi²nha¹tu¹wa². Nxe³to³ta¹ a²nũ²a² ĩ²li³te²a² Sũ̱³na² wãn³txai²li² nxe³wã²na³ai¹nha²kxai³ yxo²ĩ²ain¹ju³ta² ne³wã²na³ain¹na²hẽ³la².  
\v 20 I³me³ne²u²jah¹la² A³le³syãn²trah¹la³ nxe³ya³sxã³ te²yã¹nxe² kãi³ain¹na²hẽ³la². Ai¹nha²kxai³ Sa³ta³na²jah¹la² hxi²ka² ũ³hũ¹ai¹na¹hẽ³la². Nxai¹na¹ha²kxai³ Txa²wã¹sũ̱³na² a²ĩ³lxa² ko̱³nxe³ti³ e³kxain¹jau³xa² ã³na¹si¹hai¹na¹jau³sa². 
\c 2  
\s1 Txa²wã¹sũ̱³na² ĩ³ye³kxi²ki̱³ju³ta² ĩ³yau¹ũ³jau³su² 
\p  
\v 1 Ju²ta³la³ nxa²ha¹te¹ Txa²wã¹sũ̱³na² e³kxi²yxau²xai³txa²hẽ³la². Nxe²e³kxin¹te³nah¹lxi¹: 
\p — Jah¹lai²li² hxi²ka¹nai¹nxa³wi¹. ónon²ta³kxi¹txai¹nhẽ³li¹. Nxe³ta̱³nxa²: 
\p — Jah¹lai²li² wi¹lĩ²txai¹nhẽ³li¹. Nxe³ta̱³nxa²: 
\p — Jah¹la² a²ẽ¹nãu³ai²na² sa²hau³ko³txai¹nhẽ³li¹. Nxe³ta̱³nxa²: 
\p — Jah¹lai²li² ã³non²ta³kxai¹nĩn¹tai¹ti²tu³wi¹. Wi¹lhin¹khaix1ni¹lxi¹. Sa²nẽn¹kxi¹nxa²ha¹wi¹. Nxe³ta̱³nxa² nxe³txain¹to³hẽ¹la². A²nũ²a² yxo²ha³kxa¹ nxe³nũh¹txai¹nhẽ³la².  
\v 2 Nxe³sxã³ kwa³na³nẽ³tũ³ka̱³txa² Txa²wã¹hxi²kan¹ti³nãu³xã² yxo²ha³kxa¹ Sũ̱³na² nxe²e³kxi¹txai¹nhẽ³la². Nxẽ¹kxai²nãn²tu̱³ ha³lo²a² sa²hãu²no³ti² txa²wã¹ẽ¹nãu³ai²na² sa²hãu²no³ti² nxe³kxai²nãn²tu̱³ wi¹yxau³hĩ̱³ki̱³tã³la². Nxẽ¹kxai²nãn²tu̱³ wi¹lhin¹sxã³ yxau² wi¹lhen³txi³nyhu¹sxã³ yxau² nxe³hĩ̱³ki̱³tã³la².  
\v 3 Nxe³ki̱³kxai²nãn²tu̱³ wi¹lhĩ̱³nx2na³la². Txa²wã¹sũ̱³na²kxai³lu² txa²wã¹ẽ¹nãu³ai²na² sa²hau³ko³tẽ³jah¹la²kxai³lu² ka³lih³khai¹nxe³hĩ̱³nx2na³la².  
\v 4 Nxe³ha²kxai³ a²nũ²a² yxo²ha³kxa¹ a²ko̱³nxe³ju³ta² wxa²wa²su¹txũ¹hai¹ni² wãn³txa² ya²la³lyau³xa² a³la³kxi²si¹hai¹ni² nxain¹ju³ta³nũ³a² Txa²wã¹sũ̱³na² a²ten³ju³tai²la¹wa².  
\v 5 Txa²wã¹sũ̱³na² ka³na³ka³na³tã³la². Te²yã¹nxe³sxã³ a²nũ²a² ka³na³ka³na³te²a² Je³su² Kris²tu³jah¹la² so¹lxi³ a²nũ²nãu³xai²na² Txa²wã¹sũ̱³na² yen³nãu³a² ĩ²sa²si³tẽ³kxi²nẽ³jah¹lai²la¹wa². A²nũ²a² ã̱³xa² hxi²kan¹te²sxa³yu²hẽ³la².  
\v 6 A²nxe³jah¹la² wã²nxũ̱¹hĩ²nha²sxã³ ya³lu²kxi²nẽ³ta¹hxai²ti³ai¹ti²tu³wa². Nxe³jau³xai²li² ha³lo²a² ã³nhau³ko³thĩ¹nai³tã² Txa²wã¹sũ̱³na² sa²kxai³lu² a²nũ²nãu³xa² hãi¹nxe³ti³xa¹ wã³ko³nxa³te²tu̱³ ĩ³yau¹ũ³nhẽ³te³lhxã³ ta¹hxai²ti³ai¹ti²tu³wa².  
\v 7 A²nxe³jau³xai²na² ĩ³yau¹ũ¹hain¹te³lhxã³ ĩ³kaix1so¹sa³na²hẽ³la². Sa³ha²kxai³ a²nũ²a² Ju³te²a² nũ̱³ka̱³txi³sxa³te²a² a²yxo²ha³kxa¹ wãn³txa² ya²la³lyau³xa² wãn³txa² yxo²ĩ²si¹nhẽ³lain¹jau³nũ³a² ĩ³hen³txi³sa²sãn²nũ²la² ĩ³sa²si¹hã³sa³na²hẽ³la². Ki³han³nxa³wa². Wãn³txi³su² ĩ³ye³a¹wa². 
\p  
\v 8 Jã¹nxe³jut3su² in³txi³nãu³xa² ha³lo²a² ĩ²li³je³na² he¹ain¹tãu³a² Txa²wã¹sũ̱³na² ĩ³ye³kxain¹ju³ta² ten³sa³nha²wa². A²ẽ¹nãu³ai²na² wi¹lhi¹nha²kxai³ wxa²hxi²ka²la¹nha²sxã³ e³kxi²nxain¹ju³ta² ten³sa³nha²wa². Jã¹nxe³sxã³ a²ẽ¹nãu³ai²na² ĩ³xa̱n³txi³ju³ta² yũ²nxa³ha²kxai³ ko̱³txi³ wã²nxũ̱¹ha̱in³nha²ju³ta² yũ²nxa³ha²kxai³ ain¹ju³ta² ten³sa³nha²wa². 
\p  
\v 9 Te²yã¹nxe³sxã³ txu¹ti³nãu³xa² sa²kxai³lu² wã²la² wi¹khaix1ka³lo³a² ũ³whi²kxi²nhain¹kxai²nãn²tu̱³ hxi²kan¹jut3sxa³wa². Te²yã¹nxe³sxã³ kãi³ta³kxẽ¹ha² a³lxi²khaix1tĩh³na² ũ³yhxe²ta³hẽ¹nha² ta̱³nxa² ou²ra³ka² a³lxi²ki³ai²na² a²ne³kxĩ̱³sa² ũ³nhe³kũ¹nha² ta̱³nxa² nxain¹ju³tai²na² whãi²na¹ hxi²kan¹jut3sxa³wa². A²nũ²a² kwa² ĩ²kxain¹sxã³ ĩ³sa²nẽ¹kxain¹ju³ta² wai³nxa³wa². Yxãn¹ta¹ wã²la² kwa² wi¹ka³lo³a² wi¹lhau³ko³nha²ka³lo³a² wain³na³la².  
\v 10 Yxãn¹ta¹ wi¹lhin¹ye²te²a² yen³kxa² wi¹lo²la³kxi²kxai²nãn²tu̱³ ã²la² wai³nhĩ̱³nx2na³la².  
\v 11 Te²yã¹nxe³sxã³ txu¹ha² wãn³txa² wi¹jau³xa² ĩ³tih³nxain¹kxai²nãn²tu̱³ ka³nah²nxe³sxã³ yxau³sxã³ ain³kxain¹kxai²nãn²tu̱³ wai³nhĩ̱³nx2na³la².  
\v 12 Yxãn¹ta¹ txu¹sa²te²kxai³lu² in³txa² ĩ³tih³nxe³ta̱³nxa² ĩ³kwa³na³ta̱³nxa² nxe³ju³tai²na² ten³sa²nxa³nha²wa². Wai³nxa³wa². Hãi¹sxã³ ka³nah²nxe³sxã³ yxau³sxa̱in³kxi²kxai²nãn²tu̱³ wai³nhĩ̱³nx2na³la².  
\v 13 Nxe³ha²kxai³ a²wi¹lhĩ¹nu¹ta²kxai³lu² A³tãu²ah³lu¹tai²na² txa²nũ² we¹ta¹hxai²ti³ai¹ti²tu³wa². Hã²wxãn³txa³ E²va³ka³lxu¹tai²kxai³lu² we¹tũn³ta¹hxai²ti³ai¹ti²tu³wa², Txa²wã¹sũ̱³na² hxi²ka²sa². Hã²wxãn³txa³ Sa³ta³na²jah¹lai²na² hi²sen³su² ta¹ka³lxi³nu¹ta²kxai³ ĩ³ki³ha¹kxi²ta¹hxai²ti³ai¹ti²tu³wa².  
\v 14 Te²yã¹nxe³sxã³ A³tãu²ah³lu¹tai²na² hai³txi³ ã³ke³tũ¹ta¹hxai²nxa³ti³ai¹ti²tu³wa². Yxãn¹ta¹ txu¹ha³ka³lxai²na² ã³ke³tũ¹ju³tan¹te²kxa³ya̱³lhu² ko̱³nxe³ti³ kãi³ta¹hxai²ti³ai¹ti²tu³wa².  
\v 15 Jã¹nxe³sxã³ wẽ³sa² a³li³lah¹tãu³a² txu¹ha² khãuhx3nha²te²jai¹ti²tu³wa². Yxãn¹ta¹ Txa²wã¹sũ̱³na² wãn³txa² yxo²ĩ²i² a²nũ²a² a³lxi²waun¹nyhu¹i² ai¹nha²kxai³ a²ẽ¹nãu³ai²na² a²ko̱³nxe³ju³ta² ã³wa²su¹tu¹wa². 
\c 3  
\s1 Yxo²ĩ²tũ̱³ka̱³txa² a²hxi²kan¹te²nãu³xa² 
\p  
\v 1 Nxa²ha¹te¹ txa²wã¹nũ̱³ka̱³txi³ki̱³na¹xai²na² yxo²ĩ²tũ̱³ka̱³txi³ki̱³na¹xai²na² a²hxi²kan¹ti³su² ki̱³ju³ta² ten³ki̱³kxai²nãn²tu̱³ wi¹lhĩ̱³nx2na³la². Wai³nhĩ̱³nx2na³la². Ki³han³nxa³wa².  
\v 2 Nxe³ki̱³kxai²nãn²tu̱³ a²hxi²kan¹ti³su² ki̱³ju³ta² ten³ki̱³kxai²nãn²tu̱³ wi¹lhin¹ki̱³ju³ta² kãin² yũ³ki̱³sa²kxai³ a²nũ²a² ã̱³xa² ĩ²li³te²a² hxi²kan¹txi³ ko̱³nxe³ti³ e³kxi²nẽ³lai¹nhĩ̱³nx2nxa³wa². Nxe³nẽ³lai¹nha²kxai³ txu¹ha² ka³na³ka³na³te²a² so¹lxi³ tẽ³i² wain³txi³ wã²nxũ¹ha̱in³nha² txa²wã¹o²la³kxi²ki̱³ju³ta² wain³txi³ kãi³i² a²hoh³lxi³su² a²nũ²a² yxo²ha³kxa¹ wi¹le³kxi² nxe³ne̱³lhĩ̱³nx2na³la². Te²yã¹nxe³sxã³ a²nũ²a² u²lxi³ wxã³kxai²nãn²tu̱³ wi¹lhin¹sxã³ yain³txa² wã²nhũ¹hĩ̱³ki̱³tã³la². Te²yã¹nxe³sxã³ wãn³txa² ã³ne³wxe²nxa³te²a² wxã³kxai²nãn²tu̱³ hxi²kan¹txi³ ĩ³yau¹ũ³hĩn³ki̱³tã³la².  
\v 3 Jã¹nxe³ju³kxai³lu² yain³jau³xa² ũ̱n³jau³xa² ĩ³na²sxã³ wen¹ki̱³sxa³ha²kxai³ txa²wã¹nũ̱³ka̱³txa² kwa² ã³nhe¹kxi²nyhu¹ki̱³sxa³ha²kxai³ nxe³hĩ̱³ki̱³tã³la². Te²yã¹nxe³sxã³ a²nũ²a² hãi¹nxe³ti³xa¹ wi¹lhin¹sxã³ ĩ²ha²kxai³ hãu²non³sxã³ yxau³ha²kxai³ yen³kxa² yxo²kwa̱in³nẽ³lxa³ha²kxai³ nxe³hĩ̱³ki̱³tã³la².  
\v 4 Te²yã¹nxe³sxã³ txa²wã¹sxi²ha² yxau³tũ̱³ka̱³txa² yxo²ha³kxa¹ hxi²kan¹txi³ hau³kot3sĩ̱³ki̱³tã³la². Txa²wã¹wẽ³ha³lxa² wain³txi³ ĩ³tih³nxe³ki̱³sa²kxai³ wain³txi³ sa²yxo²we¹tẽ³lai¹nhĩ̱³nx2na³la².  
\v 5 Nxe³ha²kxai³ txa²wã¹wẽ³ha³lxa² hxi²kan¹txi³ hau³ko³ki̱³sxa³kxai²nãn²tu̱³ yxo²ĩ²ki̱³tũ̱³ka̱³txi³ki̱³na¹xai²na² hxi²kan¹txi³ ĩ³hau³kot3hĩ̱³ki̱³sxa³wa².  
\v 6 A²nxe³jah¹la² kwẽn¹tai²na¹ yxo²ĩ² ã³si³wxe³kxai²nãn²tu̱³ hxi²kan¹txi³ ĩ³hau³ko³tẽ³lxa³lho³la². Nxe³ke³la³te²kxai³: 
\p — Kãin² yxo²ĩ²te²sa¹wi¹. Ain¹jau³su² nxe³kxai²nãn²tu̱³ a²ẽ¹nãu³a² ĩ³yxo²kãin²ti³nha²sxã³ ko̱³nxe³ti³ kãi³hĩ̱³nx2na³la². Nxe³ju³tan¹te²kxa³ya̱³lhu² Sa³ta³na²jah¹la² ko̱³nxe³ti³ ĩ³yĩ¹li²kxa² yã¹nxe³sxã³ ko̱³nxe³ti³ ĩ³yĩ¹li²nũn³tu¹wa², Txa²wã¹sũ̱³na² hxi²ka²sa³.  
\v 7 Nxe³kxa²yu³su² a²nũ²a² yxo²ĩ²ai¹nxa³te²a² wi¹le³ai¹nxa³kxai²nãn²tu̱³ Sa³ta³na²jah¹la² hi²sen³su² yxo²ĩ²tũ̱³ka̱³txai²na² ko̱³nxe³te²lo³jau³su² ha³ta̱³nxe³ha³ta²wa². 
\s1 Yxo²ĩ²tũ̱³ka̱³txa² ĩ²ũ³te²nãu³xa² 
\p  
\v 8 Txa²wã¹nũ̱³ka̱³txi³ki̱³na¹xa² yen³kxa² wã²nhũ¹ki̱³ju³ta² o²la³kxi²ti³ten³ki̱³kxai²nãn²tu̱³ txa²wã¹yxau²xai³ki̱³tãu³a² wi¹lhin¹sxã³ yxau³ye² yau³ka³na³ka³nat3sxã³ a²ya³la³lyau³tu̱³ e³i² yain³jau³xa² ũn³jau³xa² ĩ³na²sxã³ we¹nxa³i² yen³kxa² kwa² yxo²kwa̱i³nxa³i² nxe³hĩn³ki̱³tã³la².  
\v 9 Txa²wã¹ẽ¹nãu³ai²na² a̱u³txi³ Je³su² Kris²tu³jah¹la² tah²lxi³ we¹tẽ³jah¹la² nxe³te²na² wãn³txa² so¹lxi³ sa²yxo²so¹sxã³ kãi³te²la³ hĩ̱³nx2na³la².  
\v 10 A²nxe³jah¹la² wa³ka³la² ã̱³xa² o²la³kxi²sãn²sxã³ a̱in³sxã³ ĩ²ain¹ki̱³kxai²nãn²tu̱³ wi¹li² wai³ni² nxe²na³na¹ ki̱³kxai²nãn²tu̱³ hai³txi³ a²ko̱³nxe³ti³ kãi³ain¹ju³ta² ĩ²ki̱³sxa³kxai²nãn²tu̱³ nxe³hĩ¹na¹ yen³kxa² wã²nhũ²xai³ki̱³ju³ta² o²la³kxi²ki̱³kxai²nãn²tu̱³ wai³nhĩ̱³nx2na³la².  
\v 11 Nxa²ha¹te¹ te²yã¹nxe³sxã³ txu¹ti³nãu³xa² a²yxau²xai³lain¹tãu³a² wi¹lhin¹sxã³ yxau³ain¹ye²ha²kxai³ wãn³txa² ya²la³lyau³xa² so¹lxi³ e³ha²kxai³ yain³jau³xa² ũn³jau³xa² ĩ³na²sxã³ we¹nxa³ha²kxai³ a²wa³ka³li³yu³ta² wain³txi³ o²la³kxi²ha²kxai³ nxe³hĩ̱³nx2na³la².  
\v 12 A²nxe³jah¹lai²na² yen³kxa² wã²nhũ¹xai³ki̱³ju³ta² o²la³kxi²jah¹la² sa²kxai³lu² txu¹ha² ka³na³ka³na³ta² so¹lxi³ tẽ³ha²kxai³ a²wẽ³ha³lxai²na² whãi²na¹ wain³txi³ ĩ³tih³nxe³ha²kxai³ nxe³hĩ̱³nx2na³la². Nxe³sxã³ a²sxi²ha² yxau³ju³ta² wain³txi³ ĩ³hau³ko³tũ¹hĩ̱³nx2na³la².  
\v 13 Nxe³ha²kxai³ ju¹tai²na² ha³kxa¹ wain³txi³ o²la³kxi²ki̱³kxai²nãn²tu̱³ wxa²nũ̱³ka̱³txai²na² wi¹le³kxi²nyhai¹nhĩ̱³nx2na³la². Nxe³nyhain¹ju³tan¹te²kxa³ya̱³lhu² Je³su² Kris²tu³jah¹lai²na² wãn³txa² wxi²kan¹ton³sxã³ ĩ³tih³nxai¹nhĩ̱³nx2na³la². 
\s1 óno¹sa²tẽ³kxi²nẽ³jau³su² 
\p  
\v 14 Nxe³na¹jau³su² ũ³wha²li¹le¹nxa²ha¹wa². Ki³han³nxa³wa². Ye³jen¹na² wxã³sxã³ ĩ²nxa²ha¹ju³ta² ten³khaix1sa³nha²wa².  
\v 15 Nxe³na¹ta¹ hxi²kan¹sa²nxa³ke³la³te²kxai³ wãn³txa² ĩ³yau¹ũ¹nxa²ha¹jau³xai²li² ã²la² a³la³kxi²hĩ̱³nxa¹lxa². Je³su²jah³lai²na² wãn³txa² yxo²ĩ²tũ̱³ka̱³txa² wain³txi³ yxau²xai³lain¹ju³ta² wi¹wi¹nxe² ĩ³hau³ko³tũ¹hai¹nhĩ̱³nxa¹lxa². A²nxe³tũ̱¹ka̱³txai²li² Txa²wã¹sũ̱³na² ka³te̱n³yah¹la² a²sa³wi³ha³lxai²la¹wa². Ya²la³lyau³xan²tu̱³ Sũ̱³na² wãn³txi³su² ye²ha²kxai³ a̱in³kxi²yxau²xai³tũ̱³ka̱³txai²la¹wa².  
\v 16 Ya²la³tu̱³ Txa²wã¹sũ̱³na² ã³ne³hi¹kxi³ju³ta² wa³lxe³ju³tai²la¹wa². Nxe³ta¹ Je³su²jah³la² ã³nhxi²ka¹tẽ³jah¹lai²la¹wa². 
\q1 A²nxe³jah¹la² a²nũ²khai³hũ̱³nxe² a³ka³nxi²ta¹hxai²ti³ai¹ti²tu³wa². 
\q1 Te²yã¹nxe³sxã³ Txa²wã¹sũ̱³na² Yãu³ka³txi³su² Jah¹lo²su² te²a² wi¹lhin¹sa²sai¹ye²kxe³su² ĩ³tih³nxe³nẽ³ta¹hxai¹ti³ai¹ti²tu³wa². 
\q1 Te²yã¹nxe³sxã³ oh³xan¹tũ̱³ka̱³txa² ĩ²ain¹ta¹hxai²ti³ai¹ti²tu³wa². 
\q1 Je³su²jah³la² sa³wi³ha³lxa² Sũ̱³na² wãn³txa² wi¹jau³xa² a²nũ²a² yxo²ha³kxa¹ ĩ³hen³txain¹ta¹hxai²ti³ai¹ti²tu³wa². 
\q1 A²nũ²a² ha³lo²a² ĩ²li³ko³xa² yxau³kxan²ti³ yxo²ĩ²yah³lxi³ta¹hxai²ti³ai¹ti²tu³wa². 
\q1 Nxe³te²kxa³kxa¹ oh³nãu³nũ¹ka³na¹ wa̱³li² ka³la³xi²ta¹hxai²ti³ai¹ti²tu³wa². 
\c 4  
\s1 Wãn³txa² ya²la³lha²ki³lxo³nxe³ki³jau³su² ĩ³tih³nxe³te²nãu³xa² 
\p  
\v 1 Jau¹xai²na² Txa²wã¹sũ̱³na² Yãu³ka³txi³su² jah¹la² wi¹wi¹nxe² ĩ³yau¹ũ³nẽ³na²hẽ³la². Nxe³te³nah¹lxi¹ kxãn³nãu³a¹ yxo²ĩ²tũ̱³ka̱³txi³nãu³xai²na² a²ha³tih³xa² Txa²wã¹sũ̱³na² wãn³txa² sa²yxo²ã³ain¹tu¹wa². A²nxe³te²a² sa²yxo²ã³ain¹ka³tu̱³ wãn³txa² a²ta³a² ko̱³nxe³jah¹la² ã³ke³tũ¹ain¹jau³su² ain³kxain¹tu¹wa². Nxain¹kxai²nãn²tu̱³ a²ta³a² nũ̱³ka̱³txa² wãn³txa² ĩ³tih³nxain¹jau³xa² ki³han³jau³xan²tu̱³ yxo²ĩ²sxã³ sa²yxo²we¹tain¹tu¹wa².  
\v 2 Jã¹nxe³sxã³ ki³han³jau³xai²li² ĩ³tih³nxain¹te²na² sa²kxai³lu² ki³han³jau³xa² so¹lxi³ ĩ³tih³nxain¹tu¹wa². Ĩ³tih³nxain¹kxan²ti³nũ¹ ãin²ti³sxã³ ĩ²ã³ain¹ju³ta² te³nai¹nxa³lho³la².  
\v 3 A²nxe³te²a² nxe²e³kxain¹tu¹wa². Nxe³ain¹te³nah¹lxi¹: 
\p — Txu¹ha² so¹ki̱³ju³ta² wai³nxa³wi¹. Nũh¹yxau³ju³ta² so¹lxi³ wain³na³li¹. Te²yã¹nxe³sxã³ ka³yxuh³xa² sĩ̱³na² wã²nhĩ²yah³lxi³txa³hẽ¹li¹. Nxe³jau³su² nxe³ain¹tu¹wa². Yxãn¹ta¹ ki³han³jau³xai²la¹wa². Je³su² Kris²tu³jah¹la² yxo²ĩ²ki̱³kxai²nãn²tu̱³ wãn³txa² wain³jau³xa² sa²yxo²we¹ki̱³kxai²nãn²tu̱³ yain³txi³su² ta̱³nxa² ka³yxuh³sxu² ta̱³nxa² te²a² a²whãi²na¹ wi¹na³la². Txa²wã¹sũ̱³na² hxi²ki³kxai³lu² we¹te²ju²hẽ³la². Nxe³ha²kxai³ wã²nhĩ²kxi²sxã³ Sũ̱³na² ĩ³ka³lih³kxi²nẽ³jau³su² e³kxi²ki̱³kxai²nãn²tu̱³ wain³na³la².  
\v 4 Nxe³ha²kxai³ Txa²wã¹sũ̱³na² ka³yxuh³xa² we¹kxa² a²yxo²ha³kxa¹ wi¹te²ju²hẽ³la². Nxe³kxe³su² ĩ³ha¹txi²ki̱³kxai²nãn²tu̱³ Sũ̱³na² ĩ³wi¹lxo³kxi²nẽ³jau³su² ĩ³ye³kxi²ki̱³kxai²nãn²tu̱³ en²ki̱³ju³ta² wai³nxa³wa².  
\v 5 Yxãn¹ta¹ e³kxi²ki̱³te³nah¹lxi¹: 
\p — Txa²sũ̱³nãi³. Ka³yxuh³xai²li² ũ³hũ¹sa²nhĩ¹kxa² wi¹lxo³kxi²sa²sĩ¹nĩ¹nha²wi¹. Nxe³ki̱³kxai²nãn²tu̱³ Sũ̱³na² yen³nãu³a² wi¹lye²ha²kxai³ ĩ³wi¹lxo³kxi²nẽ³jau³su² ĩ³ye³kxi²ki̱³sa²kxai³ ka³yxuh³xa² wã²nhĩ²ki̱³ju³ta² wain³na³la². 
\s1 Je³su² Kris²tu³jah¹la² wain³txi³ ã³si³tẽ³kxi²ki̱³jau³su² 
\p  
\v 6 Nxe³jut3su² jau¹xai²na² yxo²ha³kxa¹ txa²wã³tã̱³nãu³xa² ĩ³yau¹ũ¹txai¹nhẽ³la². Nxẽ¹kxai²nãn²tu̱³ Je³su² Kris²tu³jah¹la² wain³txi³ ã³si³tẽ³kxin¹tu¹wa². Txa²wã¹sũ̱³na² wãn³txa² wain³txi³ yxo²ĩ² ĩ³tih³nxe³nxain¹jau³xa² wain³txi³ ã³ne³wxe² nxẽ¹kxai²nãn²tu̱³ ã²la² kãi²non³sxã³ yxo²ĩ²sxã³ yxau²xai³lin¹tu¹wa².  
\v 7 Nxe³yãn¹ta¹ wãn³txa² ya²la³tu̱³txa³jau³xa² ain³kxi²ti³he¹txa³hẽ¹la². Yxãn¹ta¹ wãn³txa² wi¹jau³xa² so¹lxi³ sa²yxo²we¹te³lhxã³ kãin² o²la³kxi¹sẽ¹la².  
\v 8 Txa²wã¹nũ²ai²li² sxĩ³nxũn³te³lhxã³ o²la³kxi²ki̱³kxai²nãn²tu̱³ jũ¹nxe² wi¹na³la². Yxãn¹ta¹ Txa²wã¹sũ̱³na² wãn³txa² nũ̱³kxũn³txi³ sa²yxo²we¹ki̱³kxai²nãn²tu̱³ ã²la² wi¹na³la². Nxe³ki̱³sĩ¹nãn¹te²tu̱³ txa²wã¹ẽ¹nãu³ai²na² ka³lih³ki̱³tã³la². Nxe³ki̱³ka³tu̱³ta¹ kxãn³nãu³a¹ ka³lih³khaix1nxe³ki̱³tu¹wa².  
\v 9 Jau¹xai²na² ya²la³tu̱³jau³xai²la¹wa². A²nũ²a² yxo²ha³kxa¹ ain³kxi²sxã³ yxo²ĩ²ki̱³jau³xai²la¹wa².  
\v 10 Jau¹xai²na² Txa²wã¹sũ̱³na² ka³te̱n³su² yxau³jah¹la² a²wãn³txi³khai³xai²la¹wa². Je³su²jah³la² wãn³txa² yxo²ĩ²ki̱³sa²kxai³ txa²wã¹ẽ¹nãu³ai²na² sa²hau³ko³tẽ³jah¹lai²la¹wa². A³ka³nxi²ju³ta² wah³nxe² yxau³ki̱³tã³la². Nxe³ha²kxai³ khãuh³lxa³txi³nẽ³lain¹kxan²ti³ a²nũ²a² yxo²ha³kxa¹ ain³kxi²te³lhxã³ o²la³kxi²sxã³ ĩ³hen³txain¹ki̱³tã³la². 
\p  
\v 11 Nxe³jut3su² a²nũ²a² yxo²ha³kxa¹ jau¹xai²na² ĩ³yau¹ũ¹txai¹nhẽ³la².  
\v 12 Nxa²ha¹te¹ sa³nxe³lxa³kxi³sin¹kxan²ti³ yah³lon¹nxã²nxa³kxan²ti³ ĩ³ãin²txi³sxã³ hxi²waun³txi³txa³hẽ¹la². Yxo²ĩ²tũ̱³ka̱³txa² yxo²ha³kxa¹ ĩ²nxai¹nha²kxai³ ĩ³tih³nxai¹nĩn¹jah¹lo²sin¹tu¹wa². Wãn³txa² wain³jau³xa² so¹lxi³ ĩ³ye³i² wain³ju³ta² so¹lxi³ o²la³kxi²nyhu¹i² a³lxi²waun¹nyhu¹i² Txa²wã¹sũ̱³na² wãn³txa² kan²txi³ sa²yxo²we¹txi² wxa²ẽ¹nãu³ai²nãn¹jau³xa² Txa²wã¹sũ̱³na² wãn³txa² yã¹nxe³jau³xa² wã²nxũ̱¹ha̱in³nha² nxe³sẽ¹la².  
\v 13 Ye³jen¹na² wxã³na¹tu¹wa². Hĩ¹na² hxi²kan¹sa²nxa³nha²wa². Nxe³sa²nxa³hĩ¹nai²na¹ wxãi²na² sa²kxai³lu² a²nũ²a² yxo²ha³kxa¹ sa²nũ³tai¹nhẽ³la². Nẽn¹kxai²nãn²tu̱³ Txa²wã¹sũ̱³na² ha³te̱h³nxã³nxa² ĩ²sxã³ ĩ³ye³kxi¹tai¹nhẽ³la². Wãn³txai²li² wain³txi³ sa²yxo²wet1si¹hain¹jau³su² ĩ³yau¹ũ¹txai¹nhẽ³la². Wãn³txa² wa³lxe³jau³xa² ĩ²in¹kxai²nãn²tu̱³ wain³txi³ ĩ³tih³nxe³txai¹nhẽ³la².  
\v 14 Txa²wã¹sũ̱³na² ĩ³hxi²ka¹txa²ju³ta² nxe³wãn²txa³hẽ¹la². Ain³kxi¹xi²khaix1nxe³sẽ¹la². Kxã³nhxĩ¹nai³tã² yxo²ĩ²te²a² hxi²kan¹txi³nãu³xa² a²hxi²ka² wxa²ne³hẽ¹nhain¹tai¹ti²tu³wa². Nxe³nxain¹te³nah¹lxi¹: 
\p — Txa²wã¹sũ̱³na² ĩ³hxi²ka¹txa²ju³ta² hĩ¹na² ã³si³wxe²na³li¹. Nxain¹tai¹ti²tu³wa².  
\v 15 Nxe³jau³xai²na² ĩ²khai¹nxe³sẽ¹la². Wãn³txa² yxo²ha³kxa¹ sa²yxo²we¹txa²hẽ³la². Nxẽn¹kxai²nãn²tu̱³ wxa²nũ̱³ka̱³txai²na² wain³txi³ kãi³in¹ju³ta² ĩ²nxain¹tu¹wa².  
\v 16 Ĩ²nxai¹nha²kxai³ wãn³txa² e³in¹jau³xa² wi¹lĩ²ĩ¹nha²kxai³ ĩ³yau¹ũ¹hai¹nĩn¹jau³xa² wi¹lĩ²ĩ¹nha²kxai³ nxe³sẽ¹la². Ko̱³nxe³ti³ o²la³kxin¹kxa²ya̱n³txi³sa². Nxẽn¹kxai²nãn²tu̱³ wxa²nũ̱³ka̱³txa² yxo²ha³kxa¹ Txa²wã¹sũ̱³na² wãn³txa² yxo²ĩ²ah³lxin¹kxai²nãn²tu̱³ wxa²ẽ¹nãu³ai²na² sa²hau³ko³ta²lxi³tu¹wa². 
\c 5  
\s1 Yxo²ĩ²tũ̱³ka̱³txa² wi¹kãi³waun¹nyhu¹kxi³jau³su² 
\p  
\v 1 Nxa²ha¹te¹ in³txa² yah³lon¹te²su² te²a² yxo²xũn³sxã³ ĩ³kwa̱i²kxain¹txa³hẽ¹la². Wxa²wĩ³na² hũ̱³nxe² ĩ³tih³nxe³txai¹nhẽ³la². Sa³nxe³la³ku³su² te²a² wxa²lon³hũ̱³nxe³ ĩ³tih³nxe³txai¹nhẽ³la².  
\v 2 Te²yã¹nxe³sxã³ txu¹ha² a̱³ka³lxon¹te²a² wxa²hã³ka³na² hũ̱³nxẽ¹nha²kxai³ wãin²ta²su² te²a² wxa²ha³lĩn³ta³ka³lxu³hũ̱³nxẽ¹nha²kxai³ nxẽn¹ka³tu̱³ ĩ³tih³nxe³txai¹nhẽ³la². Ko̱³nxe³jau³su² e³kxi²nha²txa³hẽ¹la². 
\p  
\v 3 Wã³ha³te³sa³ka³lxu³khai³xa² wi¹lĩ²txai¹nhẽ³la². Yen³kxa² wxa²hau³kot3sxã³ wã²nhũ¹txai¹nhẽ³la².  
\v 4 Yxãn¹ta¹ a̱³ka³lxon¹ta¹ka³lxa² wã³ha³te³son³ta¹ka³lxa² sa²kxai³lu² a²wẽ³ha³lxa² yũ³ta̱³nxa² a²sa³wi³ha³lxa² yũ³ta̱³nxa² ĩ²txa²sã²nhẽ³la². Yũ³kxai²nãn²tu̱³ nxe³tũ̱³ka̱³txai²li² wi¹lĩ²txai¹lxa². Nxe³te²na² hxi²ki³kxai³lu² sa²hau³ko³tain¹ju³ta² a²ha³lo²ai²la¹wa². Kxã³nhxĩ¹nai³tã² kãi²nxa³sxã³ txo¹nai¹nxa³hĩ¹nai³tã² a²ha³ka³na² hxi²ka² sa²hau³ko³tain¹te²ju²hẽ³la². Nxe³kxa²ha³tih³xan²tu̱³ hĩ¹nai²na² wẽ³ha³lxa² hxi²ki³kxai³lu² wã²ha³te³son³ta¹ka³lxa² hxi²nũn¹ sa²wa̱³li²ju³ta² wain³na³la², Txa²wã¹sũ̱³na² yen³nãu³a²sa³.  
\v 5 Jã¹nxe³jut3su² wã³ha³te³son³ta¹ka³lxu³khai³xa² a²sa³wi³ha³lxa² yũ²nxa³ha²kxai³ Txa²wã¹sũ̱³na² a³ka³nxi²ju³ta² wah³nxe²na³la². ónhxi²ka¹nxa³ju³ta² ĩ³ye³kxi²na³la². Nxe³sxã³ ka³nxah³ta² ĩ³ye³kxi² a³lan²ta² ĩ³ye³kxi² nxe²na³la², Txa²wã¹sũ̱³na² ne³nxẽ³na²sa³.  
\v 6 Yxãn¹ta¹ wã²nxũ̱h¹ta¹ka³lxa² so¹lxi³ ĩ³ka³lih¹ti²nha²kxai²nãn²tu̱³ Sũ̱³na² ĩ³ye³kxi²toh³xa³kxai²nãn²tu̱³ nxe³ta¹ka³lxai²na² a²ẽ¹nãu³ai²na² ya³lu²te²hũ̱³nxe² yxau²xai³te²ju²hẽ³la².  
\v 7 A²nxe³jut3su² jau¹xai²na² yxo²ha³kxa¹ wxa²nũ̱³ka̱³txai²li² ĩ³tih³nxe³txai¹nhẽ³la². Nxai¹nĩn¹kxai²nãn²tu̱³ a²nũ²a² ã̱³xa² hxi²kan¹txi³ ko̱³nxe³ti³ e³ai¹nxa³lho³la².  
\v 8 A²nxe³jut3su² a²yah³la²nãu³su² ta̱³nxa² a²xa³ka³lxu²nãu³su² ta̱³nxa² a²nũ̱³ka̱³txa² sa²hau³ko³tai¹nxa³kxai²nãn²tu̱³ Je³su² Kris²tu³jah¹la² wãn³txa² e²nai¹nhĩ̱³nx2na³la². Je³su²jah³lai²na² wãn³txa² yxo²ĩ²xa³te²a² wi¹wa³to²hi²hĩ̱³nx2na³la². 
\p  
\v 9 Jã¹nxe³ju³kxai³la¹ wã³ha³te³son¹ta¹ka³lxa² ye³ka³lxa¹txi³ kwẽ³kon³sxã³ txa²wã¹hxi²ka² hxan³sxã³ ye³ha¹li¹ ye³ha¹li¹ ye³ha¹li¹ wxa²sa²wa²la³kxi²xi²nũn³sxã³ kwẽ³kon³sxã³ 60 nxe² kwẽ³kon³sxã³ yxau²xai³ta¹ka³lxa² so¹lxi³ a²ĩ³lxa² ũ³wha²li¹lhxã³ ã³nhau³ko³txai¹nhẽ³la². A²nxe³ta¹ka³lxa² kxã³nxai³kxai³ in³txa² ka³na³ka³na³te²a² so¹nhya¹sxã³ yxau²xai³lah³na²hẽ³la².  
\v 10 A²nxe³ta¹ka³lxa²kxai³la¹ wi¹ju³ta² so¹lxi³ kãi³ha²kxai³ a²nũ²a² yxo²ha³kxa¹ wi¹le³kxi² kxã³nhxĩ¹nai³kxai³ wẽ³ha³lxa² wi¹wain³txi³ wãi²lo³ti² a²nũ²a² ha³la³ka³lxa³lon³te³lhxã³ wxã³kxai²nãn²tu̱³ ũ³nyhai¹ti² a²nũ²a² yxo²ĩ²te²a² wxa²yu̱³hi̱n³ta³kxi² a²nũ²a² khãuh³lxa³thin¹te²a² ã³non²ta³kxi² wi¹lo²la³kxi²ju³ta² so¹lxi³ kãi³i² nxe³ta¹ka³lxa² ĩ³lxa² so¹lxi³ ũ³wha²li¹lhxã³ ũ³hau³ko³tai¹nhẽ³la². 
\p  
\v 11 Yxãn¹ta¹ txu¹ha² wã³ha³te³son³ta¹ka³lxa² kwa² a̱³ka³lxo¹nxa³ta¹ka³lxa² ĩ³lxa² ũ³wha²li¹txa³hẽ¹la². Nxe³ta¹ka³lxa² ye³jen¹nãu³a² in³txa² yxo²kwa̱i³nai¹nha²kxai³ Je³su²jah³la² wãn³txa² a³lxi²nxa³ha²kxai³ in³txa² ã¹so¹hĩ̱³nx2na³la².  
\v 12 Nxe³kxai²nãn²tu̱³ a²wãn³tai³tã² e³kxi²jau³xai³tã² sa²yxo²ã³ha²kxai³ wã²nxũ̱h¹lxi³hĩ̱³nx2na³la².  
\v 13 Nxain¹kxai²nãn²tu̱³ sxi²ha² ai³lha²thet3sxã³ u³txi³ wa³ko³nai¹nhĩ̱³nx2na³la². Nxe³sxã³ kwa²wãn³txa² ya²la³lhxa³jau³xa² kwa² hen³txai¹nhĩ̱³nx2na³la². Nain¹kxa²yu³su² wxa²nũ̱³ka̱³txa² ĩ³ki³ha¹kxi²sxã³ ko̱³txe²lo³nx2tai¹nhĩ̱³nx2na³la².  
\v 14 Nxe³jut3su² ha²kxai³ wã³ha³te³sa³ka³lxa² a̱³ka³lxo¹nxa³te²a² e³kxai¹na¹te³nah¹lxi¹: 
\p — In³txa² ã¹so¹txu¹ni¹. Wẽ³nhĩn¹kxai²nãn²tu̱³ wẽ³sa² wi¹we¹txa²hẽ³ni¹. Wxa²sxi²ha² wi¹lhau³ko³txa²hẽ³ni¹. Nĩn¹kxai²nãn²tu̱³ hxi²kan¹txi³ ko̱³nxe³te²lo³txa²nxa³lho³ni¹. Nxai¹nhĩ̱³na¹wa².  
\v 15 Jã¹nxe³jut3su² wã³ha³te³son³ta¹ka³lxa² a²ha³tih³xa² Txa²wã¹sũ̱³na² wãn³txa² sa²yxo²ã³ha²kxai³ Sa³ta³na²jah¹lai²na² wãn³txa² sa²yxo²we¹tha²kxai³ nxe³hĩ̱³nx2na³la².  
\v 16 Jã¹nxe³jut3su² txu¹ha² a̱³ka³lxo¹nxa³te²a² hi²sen³su² a̱³ka³lxon¹te²na² a²hã³ka³nũ²su² ta̱³nxa² a²hã̱i³nũ²su² ta̱³nxa² ka³te̱n³su² yxau³kxai²nãn²tu̱³ nxe³te²a² sa²kxai³lu² wi¹lhau³ko³txai¹lxa². Nxain¹kxai²nãn²tu̱³ yxo²ĩ²tũ̱³ka̱³txai²na² sa²kxai³lu² wã³ha³te³son³ta¹ka³lxu³khai³xa² so¹lxi³ wi¹lhau³ko³tai¹nhĩ̱³nx2na³la². 
\p  
\v 17 Nxa²ha¹te¹ wxa²hxi²kan¹txi³nãu³xa² wi¹lo²la³kxain¹kxai²nãn²tu̱³ sa²nẽn¹kxi²sxã³ ũ³yho³hai¹nĩn¹ju³ta² wai³nhĩ̱³nx2na³la². Txa²wã¹sũ̱³na² wãn³txa² wain³txi³ ĩ³tih³nxe³ha²kxai³ wa³lxe³jau³xa² ĩ³yau¹ũ¹ha²kxai³ nxain¹kxai²nãn²tu̱³ nxe³txai¹nhẽ³la².  
\v 18 Txa²wã¹sũ̱³na² ũ³wha²li¹txã³nxai³tã² e³te³nah¹lxi¹: 
\p — Po¹nai²li² yain³ta³ki³a² ti̱³lo³te³lhxã³ ti̱³ha³te³kxi²xai³tãu³a² sa²yxo²tai³txa³hẽ¹li¹. Jã¹nxe³sxã³ yau³xã̱³xa²sa¹: 
\p — A²nũ²a² wa³kon³kxi²nẽ³lain¹kxai²nãn²tu̱³ ũ³yho³hain¹ki̱³ju³ta² wain³na³li¹. Txa²wã¹sũ̱³na² ũ³wha²li³txã³nxai³tã² nxe³ta¹hxai²ti³ai¹ti²tu³wa².  
\v 19 A²nũ²a² wxã³sxã³ wxa²hxi²kan¹te²a² ko̱³nxe³ti³ e³kxi²kxai²nãn²tu̱³ ain³kxi²txa³hẽ¹la². A²nũ²a² ka³na³ka³na³te²a² wxã³kxan²ti³ ain³kxain¹txa³hẽ¹la². Yxãn¹ta¹ a²nũ²a² ha¹li¹ ka³na³ki² nxe²e³kxain¹kxai²nãn²tu̱³ ain³kxi¹txai¹nhẽ³la².  
\v 20 Wxa²nũ̱³ka̱³txai²na² ha³tih³xa² ko̱³nxe³ti³ kãi³ain¹to³kxai²nãn²tu̱³ ã³nũ²kxi¹txai¹nhẽ³la². Ai¹nĩn¹kxai²nãn²tu̱³ jah¹la² e³lai²na¹ ĩ³kwa̱i²kxi¹txai¹nhẽ³la², a²nũ²a² ka³lxa¹txi³ ko̱³nxe³ti³ kãi³ain¹kxa²ya̱n³ti³sa². Nxe³sxã³ wi¹kãi³ain¹tu¹wa². 
\p  
\v 21 Nxe³na¹jut3su² jau¹xai²na² a²yxo²ha³kxa¹ sa²yxo²we¹txa²hẽ³la². Wãn³txa² yau³jũ¹jau³su² kxan²ti³ sa²yxo²ã³txa³hẽ¹la². A²nũ²a² ĩ²li³te²a² sa²yxo²ã³si¹nxain¹jau³su² ĩ³ye³kxi¹nxa²kxan²ti³ ain³kxain¹txa³hẽ¹la², hxi²kan¹jah¹lo²su² kxan²ti³na². Nxe³jau³xai²li² ĩ³kwa³na³nxa²ha¹wa². Txa²wã¹sũ̱³na² Si³yxau³jah¹lai²na² a²ye³na² Je³su² Kris²tu³jah¹la² Txa²wã¹hxi²kan¹ta² Si³yxau³jah¹lai²na² a²ye³na² oh³xan¹tũ̱³ka̱³txa² wi¹lhin¹te²ai²na² a²ye³na² ĩ²sain¹jau³su² ĩ³ye³kxi¹nxa²ha¹wa².  
\v 22 Wxa²hxi²kan¹ti³su² te²a² ĩ²sxã³ sa²so¹ti³ten³nxa²kxai²nãn²tu̱³ wa³su³txa³hẽ¹la². Jũ¹nxe² ha³lo³kxit1sã²nhẽ³la², ko̱³nxe³ti³ kãi³ju³ta² kãi³yxau²xai³te²sa² kxa²ya̱n³txi³sa². Nxe³te²su² kxai²nãn²tu̱³ wxãin²txi³ a²hxi²ki³te²la³nũ³nhĩ̱³nxa¹lxa². 
\p  
\v 23 Wxa²ẽ¹nãu³ai²na² ĩ³ton³nxa²to³ha²kxai³ ĩ̱³yau³xa² so¹lxi³ ĩ³na²txa³hẽ¹la². Yxãn¹ta¹ u²va²yau³xa² jũ¹nxe² ĩ³na¹sẽ¹la². 
\p  
\v 24 Jã¹nxe³jut3su² a²nũ²ai²li² ko̱³nxe³ti³ kãi³sxã³ yxau²xai³te²na² sa²kxai³lu² a²wã³ki³kxai³ e³lxah²lxi³ ha²kxai³ a²wã³ki³kxai³ hãi³a² kãi³ha²kxai³ nxe³te²ju²hẽ³la². E³lxah²lxi³sxã³ kãi³ain¹kxai²nãn²tu̱³ wxãi²kxai³ hxi²kan¹ti³ ĩ³kwa̱i²kxai¹nhĩ̱³nxa¹lxa². Yxãn¹ta¹ hãi³a² kãi³ain¹kxai²nãn²tu̱³ a²yan¹nãu³a² so¹lxi³ ko̱³nxe³ti³ kãi³ain¹ju³ta² e³lxah²lxi³tu¹wa².  
\v 25 Te²yã¹nxe³sxã³ a²nũ²a² wi¹kãi³te²na² sa²kxai³lu² a²wã³ki³kxai³ e³lxah²lxi³ ha²kxai³ a²wã³ki³kxai³ a²yan¹nãu³a² so¹lxi³ wi¹kãi³ain¹ju³ta² e³lxah²lxi³tu¹wa². 
\c 6  
\p  
\v 1 A²nũ²a² a²wa³kxẽn³yah³lo²lot3sxã³ yxau²xai³te²na² sa²kxai³lu² wi¹wa³kon³kxi²ha²kxai³ a²hxi²kan¹jah¹lo²khai³xa² ĩ³sa²nẽn¹kxi²ha²kxai³ nxe³txai¹nhẽ³la². Nxain¹kxai²nãn²tu̱³ a²nũ²a² ĩ²li³te²a² Txa²wã¹sũ̱³na² ĩ³lxa² ta̱³nxa² a²wãn³txa² ĩ³yau¹ũ¹nxa²ha¹jau³xa² ta̱³nxa² ko̱³nxe³te²lo³te²a² yũ²nxa³lho³la².  
\v 2 Te²yã¹nxe³sxã³ a²wa³kxẽn³yah³lai²li² Txa²wã¹sũ̱³na² wãn³txa² sa²yxo²we¹kxai²nãn²tu̱³ a²wa³kxẽn³yah³lo²lot3sxã³ yxau²xai³jah¹lai²na² hi²sen³kxai³lu² nxe³te³nah¹lxi¹: 
\p — Kwa³na³sa²jah¹la² Je³su²jah³lai²na² wãn³txa² sa²yxo²we¹jah¹lo²su² nũ³nha²kxai³ txa²wã³tã̱³xai²la¹wi¹. Nxe³ha²kxai³ wi¹wa³kon³nxa³kxan²ti³ wain³na³li¹. Nxe³jau³su² kxai²nãn²tu̱³ wai³nxa³wa². Yxãn¹ta¹ yxo²ĩ²jah¹lo²su² nũ³nha²kxai³ ã²la² nũ̱³kxũn³txi³ ã²la² wi¹wi¹nxe² wa³kon³kxain¹ju³ta² wain³na³la². A²wa³kxẽn³yah³lai²li² Je³su²jah³lai²na² Wãn³txa² yxo²ĩ²ha²kxai³ txa²wã³tã̱³su² hĩ̱³nx2na³la². Jã¹nxe³jau³jau¹xai²li² ĩ³tih³nxe³txai¹nhẽ³la². 
\s1 Wãn³txa² ya²la³lyau³xa² ĩ³tih³nxe³jau³su² 
\p  
\v 3 Jã¹nxe³na¹jau³su² a²nũ²a² ĩ²li³te²a² wãn³txa² yau³xã̱³xa² tẽ³sxã³ wxã³kxai²nãn²tu̱³ ĩ²khai¹nxet3sã²nhẽ³la². Je³su² Kris²tu³jah¹la² Txa²wã¹hxi²kan¹ta² Si³yxau³jah¹lai²na² wãn³txain²txi³ wãn³txa² ĩ³tih³nxe³nxa²ha¹jau³xa² wi¹lhin¹sxã³ yxau²xai³ki̱³jau³xa² wãn³txain²txi³ hãix1jau³xa²yãx1te²jai¹ti²tu³wa². Yxãn¹ta¹ kwẽn¹tai²na² wxã³jah¹lai²na² wãn³txa² yau³xã̱³lxi³ti³ e³kxai²nãn²tu̱³ ain³kxain¹txa³hẽ¹la².  
\v 4 A²nxe³jah¹la² wãn³txa² yxo²kãin²e³jah¹lai²la¹wa². Hai³txi³ ã³ne³wxe³ti³he¹xai¹nhĩ̱³nx2nxa³wa². A²wãn³txa² so¹lxi³ kwa² toh¹lxe¹hĩ̱³nx2na³la². Nxe²e³kxai²nãn²tu̱³ ĩ³xa̱n³ta³kxi²nyhu¹i² ĩ³kãi²non³nha²si¹jau³su² yxo²xũn³txi³ ĩ³ye³kxi² kwa²he¹kxi²nyhu¹i² ko̱³nxe³te²lo³kxi²nyhu¹i² a²nũ²a² ã̱³xa² yxo²ĩ²xa³sxã³ ĩ³wã̱³wã̱³ta³kxi²nyhu¹i² nxe³jah¹lo²su² hĩ̱³nx2na³la².  
\v 5 Jã¹nxe³te²a² a²ẽ¹nãu³ai²na² ko̱³nxe³ti³ a̱in³nha²ju³ta² so¹lxi³ yũ³ha²kxai³ wãn³txa² ya²la³lyau³xa² ĩ³tih³nxai¹nxa³ha²kxai³ nxe³ju³tan¹te²kxa³ya̱³lhu² a̱n³ta³txi³ ĩ³ye³ye³kxi²nyhu¹ain¹na³la². 
\p — Kãin² yen³kxi³nha²te³lhxã³ yxo²ĩ²a¹tũ¹xã¹. Nxe³jau³su² nxe³hĩ̱³nx2na³la².  
\v 6 Jã¹nxe³jut3su² Txa²wã¹sũ̱³na² wãn³txa² yxo²ĩ²ki̱³kxai²nãn²tu̱³ txa²wã¹ẽ¹nãu³ai²na² wi¹lhin¹sxã³ hãu²no³nha²hĩ̱³ki̱³tã³la². Nxe³ju³tai²li² yen³kxi³nha²ju³ta² ã³wa²to²hi²sxã³ wi¹la² ai²na³la².  
\v 7 Nxe³sxã³ kxã³nxai³tã² txa²wã¹wẽ³sĩ¹nai³tã² yen³kxa² tẽ³sxã³ a³li³lah¹kxi³sxa³tai¹ti²tu³wa². Te²yã¹nxe³sxã³ yah³lon¹sxã³ ya³lu²ki̱³tãu³a¹ yen³kxa² tẽ³ki̱³sxa³lho³la².  
\v 8 Nxe³ha²kxai³ yain³txa² yũ³ki̱³sa²kxai³ sxi²ha² yũ³ki̱³sa²kxai³ nxe³ki̱³te²a² so¹lxi³ ãn³nhĩ̱³nx2na³la².  
\v 9 Yxãn¹ta¹ yen³kxa² yxo²kwa̱in³jah¹la² sa²kxai³lu² ko̱³nxe³ti³ wã²nxũ̱¹ha̱in³nha² ã³si³wxe³hĩ̱³nx2na³la². Nxain¹kxai²nãn²tu̱³ hã²wxãn³txa³ tĩh³nai²li² ko̱³nxe³ti³ a̱in³nhain¹tĩh³na² ai³kxai²nãn²tu̱³ khãuh³lxa³thin¹sa²tẽ³tu¹wa².  
\v 10 Jã¹nxe³sxã³ yen³kxa² yxo²kwa̱in³kxi²ki̱³kxai²nãn²tu̱³ ko̱³nxe³ju³ta² ka³lxa¹txi³ wxã³kxi²nẽ³na³la². Jã¹nxe³jut3su² yxo²ĩ²tũ̱³ka̱³txa² a²ha³tih³xa² yen³kxa² kãin² yxo²kwa̱i³nai¹nha²kxai³ Txa²wã¹sũ̱³na² wãn³txa² sa²yxo²ã³ain¹na²hẽ³la². Nxe³ai¹nha²kxai³ kuh³lxa³thin¹khai¹xain¹na²hẽ³la². 
\s1 Pau²lah³la² a²yxo²wãn³txa² Ti³mo²jah³la² ĩ³yau¹ũ³jau³su² 
\p  
\v 11 Yxãn¹ta¹ wxãi²na² sa²kxai³lu² Txa²wã¹sũ̱³na² sa³wit3si¹nha²kxai³ ju¹tai²na² yxo²ha³kxa¹ ã³na¹txa²hẽ³la². Nxĩn¹kxai²nãn²tu̱³ wain³ju³ta² so¹lxi³ ãn³ten³txa²hẽ³la². Wi¹lhin¹ju³ta² so¹lxi³ kãi³txa²hẽ³la². Txa²wã¹sũ̱³na² wãn³txa² kan²txi³ yxo²ĩ²txa²hẽ³la². A²nũ²a² yxo²ha³kxa¹ a³lxi²khai¹nxe³tai¹nhẽ³la². Ko̱³nxe³ti³ e³kxi¹nxain¹kxan²ti³ ya³nãn³ta³ki²la²sxã³ wain³txi³ kãi³txa²hẽ³la². Hãi¹sxã³ thãi³ti³la² wi¹kãi³txai¹nhẽ³la².  
\v 12 A²nũ²a² nũ̱³kxũn³txi³ ã³nhe¹kxi²nyhu¹kxa² yã¹nxe³sxã³ nũ̱³kxũn³txi³ ã³nhe¹kxit1sxã³ ko̱³nxe³ju³ta² ã³na¹txa²hẽ³la². Txa²wã¹sũ̱³na² wãn³txa² ka³te̱n³yau³xa² hxi²ki³kxa² yã¹nxe³sxã³ ain³so¹khai¹nxe³sẽ¹la². Nxe³sih¹nxa²jau³su² Txa²wã¹sũ̱³na² ĩ²sxã³ ĩ³so¹nxa²tai¹ti²tu³wa². Nxe³sxã³ kxã³nhxĩ¹nai³tã² yxo²ĩ² ã³si³wxe¹ĩ¹nhĩ¹nai³tã² a²nũ²a² ka³lxa¹txi³ ĩ³hen³txai¹nĩn¹tai¹ti²tu³wa². Te²yã¹nxe² ãh¹ o²la³kxi¹to³hẽ¹la².  
\v 13-14 Nxe³na¹jau³su² wãn³txa² e³kxi¹nxa²ha¹jau³xai²li² a²yxo²ha³kxa¹ sa²yxo²we¹txa²hẽ³la². Nxĩn¹kxai²nãn²tu̱³ ko̱³nxe³te²lo³txa²ju³ta² yũ²nxa³lho³la². Nxe³jau³xai²li² txa²wãn³txi³sxa³wa². Txa²wã¹sũ̱³na² wãn³txai²la¹wa². Je³su² Kris²tu³jah¹la² wxã²nxa³ta̱³lxa¹ nxe²kãi³txa²hẽ³la². Jau¹xa² yxo²ha³kxa¹ Txa²wã¹sũ̱³na² Si³yxau³jah¹la² ka³te̱n³yu³ta² ũ³hũ¹nẽ³lain¹jah¹la² ĩ²nxa²na³la². Te²yã¹nxe³sxã³ Je³su² Kris²tu³jah¹la² a²wãn³txa² ka³te̱n³yau³xa² sa²kxai³lu² Põn³si³o³ Pi³la²jah³lai¹tã² ĩ³hen³txi³te³nai¹ti²tu³wa². Jã¹nxe³sxã³ Je³su² Kris²tu³jah¹lain²txi³ ĩ²nxãn²nũn³na³la².  
\v 15 Jã¹nxe³jut3su² ye³jen¹na² Kris²tu³jah¹la² a³ka³nxi²tãu³a² wã²nã³ũ¹nhẽ³lain¹tu¹wa². Txa²wã¹sũ̱³na² Si³yxau³jah¹la² wi¹lhin¹khaix1jah¹la² kãin²khaix1nx2na³la². òla² kãin² ã³sen³sai¹jah¹la² yũ²nxa³wa². Nũ̱³kxũn³khaix1jah¹lai²la¹wa². A²nũ²a² a²wa³kxẽ³nxa² kãin²na³la². Yxãn¹ta¹ jah¹lai²na² sa²kxai³lu² a²wa³kxẽn³ti³nãu³xai²na² yxo²ha³kxa¹ a²wa³kxẽ³nxa² a²si³yxau³jah¹lo²la²na³la².  
\v 16 Jah¹lai²na² so¹lxi³ ya³lu²ju³ta² yũ³ti³hex1jah¹lo²sxa³wa². Ha²te¹ti³hũ̱³ju³ta² so¹lxi³ yxau²xai³jah¹lai²la¹wa². Ka³nxah³ju³ta² yũ³jah¹lo²sxa³wa². A²nũ²a² hxi²kan¹txi³ ĩ²nxũ̱n³kxi²ti³he¹nxe³hĩ̱³ki̱³sxa³wa². A²nũ²a² ĩ²ti³he¹jah¹lo²sxa³wa². Hxi²kan¹txi³ ĩ²ki̱³sxa³jah¹lo²su² na³la². A²nũ²a² yxo²ha³kxa¹ sa²nẽn¹kain¹tu¹wa². Nũ̱³kxũn³ju³ta² ne³ki³son³sxã³ hxan³kxi²nxa³lho³la². Nxe³te²sẽ¹la². 
\p  
\v 17 Nxa²ha¹te¹ hĩ¹na²su² a²nũ²a² yen³kxih³khaix1te²a² e³kxi¹txai¹nhẽ³la². E³kxai¹nĩn¹te³nah¹lxi¹: 
\p — A²nũ²a² yen³kxi³txa²te²a² nxe²e³kxain¹yah³lxi³txa³hẽ¹li¹. “Txai²na² kãin²te²sa¹wi¹. Wxa²nũ̱³ka̱³txa² kãi²nxa³wi¹.” Nxe³yah³lxin¹jau³su² e³yah³lxi³txa³hẽ¹li¹. Yen³kxa² wa³su³txi³ hxan³kxi¹nx2ti³ha³tai¹. Yxãn¹ta¹ Txa²wã¹sũ̱³na² yxo²ĩ²jah³lxi³hẽ¹li¹. Yah³lxin¹kxai²nãn²tu̱³ wxa²ẽ¹nãu³ai²na² sa²hau³ko³txa²lxi³tu¹wi¹. Nxe³yah³lxin¹kxai²nãn²tu̱³ ka³lih³kxi²txi³ wi¹lhin¹yah³lxi¹nha²kxai³ yen³kxa² yxo²kwa̱in³yah²lxan³tho³li¹.  
\v 18 Yah³lxi¹nha²kxai³ wi¹lhin¹kxi³ju³ta² so¹lxi³ o²la³kxi¹jah³lxi³hẽ¹li¹. Wxa²yen³kxa² a³lxi²nxa³sxã³ wã²nhũ¹txai¹yah³lxi³hẽ¹li¹.  
\v 19 Yah³lxin¹kxai²nãn²tu̱³ kxãn³nãu³a¹ kxan²ti³ ka³te̱n³su² yxau³ki̱³tãu³a¹ yen³kxa² wi¹ju³ta³nũ³a² kãin²yũ³tu¹wi¹. Nxe²e³kxi¹txai¹nhẽ³la². \fig |src="cn01894B.tif" size="span" copy="© 1978 David C. Cook Publishing Co." ref="1Timoteo 6.19" \fig* 
\p  
\v 20 Ti³mo²jah³lãi³. Txa²wã¹sũ̱³na² wãn³txa² e³kxi¹nxa²jau³xa² yxo²ha³kxa¹ sa²yxo²we¹txa²hẽ³la². A²nũ²a² ã̱³xa² toh³lxa³te³ain¹jau³xa² ĩ³wa²lũ³xain¹txa³hẽ¹la². 
\p — A²hoh³lxi³sa¹wi¹. Ain¹kxan²ti³ ã³ne³wxe³ai¹nxa³ha²kxai³ ĩ³wa²lũ³xain¹txa³hẽ¹la².  
\v 21 A²nũ²a² nxe²kãi³te²a² yũ²na³la². Kãi³sxã³ Je³su²jah³lai²na² wãn³txa² ã³na¹ain¹na²hẽ³la². Jã¹nxẽn¹kxa²ya̱n³ti³su² na¹jau³xai²li² ĩ³ye³ye¹nxa²ha¹wa². Txa²wã¹sũ̱³na²kxai³lu² kãin² thãi³ti³la² a³lxi¹nxa²ju³ta² ten³sa³nha²wa². Txai²na² Pau²lah³lo²na¹xai²na² ta³lun²ye¹nxa²ha¹wa².