\id 1TH - Nambikuára NT [nab] (Brazil) -2011 bd 
\h 1 Tesalonisẽnses 
\toc1 1 Tesalonisẽnses 
\toc2 1 Tesalonisẽnses 
\toc3 1 Ts 
\mt1 1 Tesalonisẽnses 
\c 1  
\p  
\v 1 Pau²lah³lo²na¹xai²na² Si²lah³la² Ti³mo²jah³la² nxe³sĩn¹sxã³ ũ³wha²li¹lhxã³ ũ³hũ²xai³nx2ti³nha¹wa². Wxa²nũ̱³ka̱³txa² Te³sa³lo²ni³ka²thĩ³na² yxau²xai³yah³lxin¹tũ̱³ka̱³txi³ ĩ³nxai²na² Je³su²jah³la² ã³nũ²kxi²sxã³ yxau²xai³lyah³lxin¹te² ĩ³nxai²na² ũ³wha²li¹lhxã³ ũ³hũ²xai³nx2ti³nha¹wa². Nxe³nx2ti³nha¹te² ĩ³nxai²na² sa²kxai³lu² Txa²wã¹sũ̱³na² a²sa³wi³ha³lxain²txi³ Je³su² Kris²tu³jah¹la² Txa²wã¹hxi²kan¹ta² Si³yxau³jah¹lo²su² ha²kxai³ nxe³jah¹la² a²sa³wi³ha³lxain²txi³ yah³lxi¹lxa². Nxe³nx2ti³nha¹ha²kxai³ Txa²wã¹sũ̱³na² kãin² thãi³ti³la² a³lxi¹nx2ti³si¹hi² wxa²nxũ²kwa̱i³nãu³a² ã³nhãu²no³txa²lxi³si¹hi² nxe³nx2ti³si¹nha¹jau³su² ten³sa²sĩn¹nha²wa². 
\s1 Te³sa³lo²ni³ka²thĩ³nãn¹tũ̱³ka̱³txa² yxo²ĩ²ain¹jau³su² 
\p  
\v 2 Yxo²ĩ²sxã³ yxau²xai³yah³lxin¹jau³su² Txa²wã¹sũ̱³na² e³kxi²to³sĩ¹na¹wa². E³kxi²sĩ¹na¹jau³xa²sa¹: 
\p — Sũ̱³na² nxet3si¹lxi¹. Yxo²ĩ²sxã³ yxau²xai³lai¹nha²kxai³ ĩ³sa²nẽn¹kxi²nxa²sĩ¹na¹wi¹. Nxe³sĩn¹to³ha¹wa².  
\v 3 Yxo²ĩ²yah³lxi¹nhĩ¹nãn¹te²tu̱³ Sũ̱³na² wãn³txa² wi¹jau³xa² a²nũ²a² yxo²ha³kxa¹ ĩ³yau¹ũ¹te³lhxã³ o²la³kxah¹lxi¹lxa². Sũ̱³na² a³lxi²yah³lxin¹jau³su² wi¹lo²la³kxi²yah³lxi¹lxa². Je³su² Kris²tu³jah¹la² a³ka³nxi²sxã³ wa̱³li²ju³ta³nũ³a² thãi³ti³la² wah³yxah³lxi¹lxa². Nxe³yah³lxin¹kxe³su² ĩ²sĩn¹te²sa¹wa². Txa²wã¹sũ̱³na² e³kxi²sĩn¹na¹tãu³a² sa²wa²lho¹xi²sxã³ ĩ²sĩn¹to³ha¹wa². \fig |src="HK086D.tif" size="span" copy="Horace Knowles ©The British & Foreign Bible Society, 1954, 1967, 1972, 1995." ref="1Tesalonicẽnses 1.3" \fig* 
\v 4 Nxe³sxã³ yxo²ĩ²yah³lxi¹nha²kxai³ txa²wã³tã̱³xa² yã¹xah³lxi¹lxa². Txa²wã¹sũ̱³na² a³lxi¹nx2ti³ha²kxai³ ĩ²sxã³ ã³yũ³so¹nx2ti³sin²ta²wa². Nxe³ju³tai²li² ĩ²sĩn¹te²sa¹wa².  
\v 5 Sũ̱³na² wãn³txa² wi¹jau³xai²li² ĩ³yau¹ũ³nx2ti³sĩ¹na¹jau³xai³tã² kwa² wãn³txi³su² te²sxa³yu²hẽ³la². Txa²wã¹sũ̱³na² A²yãu³ka³jxah¹la² a²wãn³txain²txi²na³la². Nxe³jau³xai²li² wã³nxĩn¹jau³su² ha²kxai³ ya²la³tu̱³jau³xai²la¹wa². Yxau³ya³nx2ti³sĩ¹na¹hĩ¹nai³tã² wain³txi³ o²la³kxi²nũh¹nx2ti³sĩ¹na¹ju³ta² ĩ²yah³lxin¹tai¹tu³wa².  
\v 6 Yxau³sĩ¹na¹kxa² yã¹nxe² yxau³yah³lxi¹nha²kxai³ Je³su²jah³la² yxau³hxai²kxai³ jã¹nxe² yxau³yah³lxi¹nha²kxai³ nxe³yah³lxin¹tai¹ti²tu³wa². Nxe³sxã³ khãuhx3nyhah¹lxin¹kxan²ti³ wxa²ẽ¹nãu³ai²na² ka³lih³yah³lxin¹tai¹ti²tu³wa². Sũ̱³na² Yãu³ka³jxah¹la² ĩ³ka³li¹ti¹nx2ti³tai¹ti²tu³wa².  
\v 7 Nxe³yah³lxin¹kxa²yu³su² Ma³se³to²na²ko³xa² yxau³te²a² Kre²sa²ko³xa² yxau³te²a² nxe³sxã³ Je³su²jah³lai²na² wãn³txa² yxo²ĩ²ain¹te²nãu³xai²na² ĩ²kxi¹nx2tain¹ta¹hẽ¹la². Nxe³ju³tan¹te²kxa³ya̱³lhu² yxo²ĩ²yah³lxin¹kxa² yã¹nxe² yxo²ĩ²ain¹nũn³ta¹hẽ¹la².  
\v 8 Nxe² yxo²ĩ²yah³lxi¹nhĩ¹nai³tãn¹te²tu̱³ Sũ̱³na² wãn³txa² wi¹jau³xa² u²lxi³ ha³ta̱³nxe³ta¹hẽ¹la². Ma³se³to²na²ko³xa² Kre²sa²ko³xa² ya¹nãn¹ta³ko³xa² jau¹xai²li² yxo²ĩ²yah³lxin¹kxe³su² ha³ta̱³nxe³ta¹hẽ¹la². Nxe³jut3su² ha²kxai³ u²lxi³ ai³ain¹kxan²ti³ ã²la² ain³kxain¹ta¹hẽ¹la². Ĩ³ye³kxain¹sĩ¹nxa³ta̱³lxa¹ wxa²wãn³txa² ã²la² ain³kxi¹nx2tain¹ta¹hẽ¹la².  
\v 9 Jã¹nxe³tũ̱³ka̱³txai²na² sa²kxai³lu² wã²nxũ̱h¹ ĩ³hen³txi³sain¹sĩ¹na²hẽ³la². Wxã³sxã³ ĩ²nx2ti³nha¹hĩ¹nai³tãn¹jau³xa² ĩ³yau¹ũ³sain¹sĩn¹na²hẽ³la². Txah³lxa³kxa³txai²li² Sũ̱³nu²sa²ki³lxo³ka³txai²li² ã³yah³lxi¹nha²kxai³ nxe³sxã³ hã²wxãn³txa³ Txa²wã¹sũ̱³na² Si³yxau³tãu³a² so¹lxi³ ya²la³tu̱³ te²an²tu̱³ ka³te̱n³su² te²an²tu̱³ sa²yxo²we¹jah³lxin¹jau³xai³tã² e³kxi²sain¹sĩ¹na²hẽ³la².  
\v 10 Jã¹nxe³ju³kxai³lu² Je³su²jah³la² Sũ̱³na² Tah²si²ha²kxai³ ã¹jah¹lai²li² oh³nãu³a¹ a³ka³nxi²ju³ta³nũ³a² wah³nxe³yah³lxin¹ju³ta² ĩ³yau¹ũ¹sain¹sĩn¹na²hẽ³la². Nxe³jah¹lain²txi³ kxã³nhxĩ¹nai³tã² txa²wã¹ha³lo²a² yxau³hĩ¹nai³tã² ya³lu²ha²kxai³ Txa²wã¹sũ̱³na² hi²sen³kxai³lu² ka³te̱n³su² ĩ³sa²yxau³xi²na²hẽ³la². Nxe³ju³tan¹te²kxa³ya̱³lhu² txa²wã¹ko̱³nxe³ti³ kãi³ki̱³ju³ta² a²wa³ha² so¹kxi²nẽ³na²hẽ³la². So¹kxi²nẽ³lha²kxai³ Sũ̱³na² ko̱³nxe³ti³ ĩ³yĩ¹li²nẽ³ju³ta³nũ³a² wxa²wa²su¹kxi²nẽ³tu¹wa². Jã¹nxe³ju³kxai³lu² ul²yxau³tũ̱³ka̱³txai²na² sa²kxai³lu² jau¹xai²na² ĩ³hen³txai¹yah³lxin¹jau³xa² ĩ³yau¹ũ³sain¹sĩn¹na²hẽ³la². 
\c 2  
\s1 Te³sa³lo²ni³ka²thĩ³na² Pau²lah³la² o²la³kxi²jau³su² 
\p  
\v 1 Jã¹nxe³ju³kxai³la¹ wxã³sĩ¹na¹hĩ¹nai³tã² ĩ³tih³nxe³nx2ti³sĩ¹na¹tai¹ti²tu³wa². Kwa²wãn³ti³su² ĩ³tih³nxe³nx2ti³sĩn¹nxa³tai¹ti²tu³wa². Nxe³sxã³ ain³kxi²sah¹lxi³nhĩ¹nha²kxai³ sa²yxo²wet1sah¹lxi³nhĩ¹nhẽ³la².  
\v 2 A²kxã³nxa² Fi³li³po²thĩ³na² ai³sĩ¹na¹ti³ai¹ti²tu³wa². Nxe³hĩ¹nai³tãn²tu̱³ Sũ̱³na² wãn³txa² wi¹jau³xa² ĩ³yau¹ũ³ain¹sĩ¹na¹hẽ³la². Nxe³tãu³ãn²tu̱³ta¹ Sũ̱³na² wãn³txa²kxai³lu² e²nai¹nha²kxai³ ye³khãuh³lxa³ti³sain¹sĩn¹na²hẽ³la². Hã²wxãn³txa³ ã³waix3tũ²la² wxã³sĩ¹na¹tai¹ti²tu³wa². Wxã³sĩ¹na¹ka³tu̱³ Sũ̱³na² wãn³txain²txi³ ya³lo³txi²sxã³ ĩ³yau¹ũ³nx2ti³sĩ¹na¹tai¹ti²tu³wa². Sũ̱³na² wãn³txa² e²nain¹te²a² wa³ka³ti³lot3sain¹sĩn¹kxan²ti³ Txa²wã¹sũ̱³nu²kxai³lu² ĩ³ya³lo³ti²te²lot3sa²sĩ¹nha²kxai³ Sũ̱³na² wãn³txa²kxai³lu² ĩ³yau¹ũ³nx2ti³sĩ¹na¹tai¹ti²tu³wa².  
\v 3 Ĩ³yau¹ũ³nx2ti³sĩ¹na¹hĩ¹nai³tã² wãn³txa² wain³jau³xa² ã³na¹sxã³ ã³waix3si¹yhah³lxin¹jau³su² kãi³ũh¹nx2ti³sĩn¹nxa³ha²kxai³ ko̱³nxe³ti³ kãi³si¹yhah³lxin¹jau³su² kãi³ũh¹nx2ti³sĩn¹nxa³ha²kxai³ ã³ke³tũ¹si¹yhah³lxin¹jau³su² kãi³ũh¹nx2ti³sĩn¹nxa³ha²kxai³ nxe³nx2ti³sĩ¹na¹tai¹ti²tu³wa².  
\v 4 Nxe³yãn¹ta¹ kã³nxai³kai³lu² Txa²wã¹sũ̱³na² hi²sen³su² ĩ²sxã³ sa²so¹sa²sĩn¹te³nah¹lxi¹: 
\p — Wxãi²na² txa²wãn³txa² wi¹jau³xa² ĩ³yau¹ũ¹sih¹nx2tai¹na¹jau³su² ĩ³sa²si¹hã³nx2ta¹tu¹wi¹. Sain¹sĩ¹nha²kxai³ Sũ̱³na² wãn³txa² so¹lxi³ ĩ³yau¹ũ¹nx2ti³sĩ¹na¹tai¹ti²tu³wa². Txa²wã¹sũ̱³na² wi¹lĩ²sa²sĩn¹ju³ta² so¹lxi³ ten³sa²sĩ¹nha²kxai³ a²nũ²a² so¹lxi³ kwa² ĩ³wi¹lxo³kxi²sain¹sĩn¹ju³ta³la³ ten³sa²sĩ¹nxa³ha²kxai³ sĩ¹na¹hẽ³la², Txa²wã¹sũ̱³na² hi²sen³su² txa²wã¹ẽ¹nãu³ai²nãn¹jau³xa² ĩ³ye³sxã³ ĩ³sai¹ki̱³sxa³jau³xa² a³la³kxi²nẽ³lha²kxai³la².  
\v 5 Kwa²hãi¹nxe² wi¹le¹nx2ti³sĩ¹nxa³kxe³su² nxe³sĩn¹nxa³tai¹ti²tu³wa². Te²yã¹nxe³sxã³ ĩ³yau¹ũ¹nx2ti³sĩ¹na¹kxa² yo³ha² ten³sĩn¹nxa³tai¹ti²tu³wa². Jã¹nxe³nha¹jau³xai²na² yxo²ha³kxa¹ Txa²wã¹sũ̱³na² ĩ²sain¹sĩn¹nha²wa², ĩ³ki³ha¹kxi¹nx2ti³sĩ¹na¹kxa²ya̱n³ti³sa².  
\v 6 Jã¹nxe³jut3su² wxa²nũ̱³ka̱³txai²la³ ta̱³nxa² a²nũ²a² ã̱³su² ta̱³nxa² kwa² sa²nẽn¹ki²sah¹lxi³nhĩn¹ju³ta² a²nũ²a² ten³sa²sĩn¹nxa³tai¹ti²tu³wa². Kris²tu³jah¹la² ĩ³sa²si¹hã³sa²sĩn¹tai¹ti²tu³wa². Nxe³ha²kxai³ yxo²xũ̱n³jau³xa² hxi²kan¹txi³ e³kxi¹nx2ti³sĩ¹nhĩ̱³na¹wa². Yxãn¹ta¹ ten³sa²sĩn¹nxa³hẽ¹la².  
\v 7 Sa²sĩn¹nxa³ha²kxai³ txu¹ha² a²wẽ³sa³khai³xa² a³lxi²sxã³ wi¹wi¹nxe³ sa²hau³ko³kxa² a²su³su³yau³xa² ũ³hũ¹te²ju²hẽ³la². Nxe³kxa²yã¹nxe³sxã³ wi¹wi¹nxe² thãi³ti³la² Sũ̱³na² wãn³txai²na² ĩ³yau¹ũ¹nx2ti³sĩ¹na¹hẽ³la².  
\v 8 A³lxi²khai¹nxe³nx2ti³sĩ¹na¹wa². Nxe³ha²kxai³ Sũ̱³na² wãn³txa² wi¹jau³xa² ĩ³yau¹ũ¹nx2ti³sĩ¹na¹tai¹ti²tu³wa². Ya³lu²ye¹nx2ti³sĩ¹na¹kxan²ti³ ã³nx2ti³sĩ¹nhĩ̱³nxãn²nxa³wa².  
\v 9 Txa²wã³tã̱³nãu³xãi³. Wxa²nũ̱³ka̱³txa² he¹ya³nx2ti³sĩ¹na¹ju³tai³tã² ain³kxi¹xi²nha¹jah³lxi³hẽ¹la². Nxe³sxã³ Sũ̱³na² wãn³txa² wi¹jau³xa² ĩ³yau¹ũ³nx2ti³te³lhxã³ wxã³sĩ¹na¹tai¹ti²tu³wa². Nxe³sĩ¹na¹ka³tu̱³ta¹ a³lan²ta² yxo²ha³kxa¹ ka³nxah³ta² yxo²ha³kxa¹ wa³ka³li³yu³khai³xa² nũ̱³kxũn³txi³ wa³kon³sĩ¹na¹tai¹ti²tu³wa², yen³kxa² wã²nhũ²hxat3sah¹lxi³nhĩn¹kxa²ya̱n³txi³sa². 
\p  
\v 10 Sũ̱³na² ye³na² ko̱³nxe³ti³ o²la³kxi²sĩ¹nxa³ha²kxai³ wxa²ye³na² yxo²ĩ²yah³lxin¹tũ̱³ka̱³txai²nãn¹ta² ye³na² ko̱³nxe³ti³ o²la³kxi²sĩ¹nxa³ha²kxai³ sĩ¹na¹tai¹ti²tu³wa². Hxi²kan¹sxã³ wain³ju³ta² so¹lxi³ o²la³kxi²nha¹tai¹ti²tu³wa². Ko̱³nxe³te²lot3sain¹sĩn¹ju³ta³la³ yũ²nxa³tai¹ti²tu³wa². Ju¹tai²li² Txa²wã¹sũ̱³na² ĩ²sa²nũn³sĩn¹nha²wa².  
\v 11 A²wĩ³nu²su² a²wãi³lxi³khai³xa² wi¹lĩ³tih³nxe² ĩ³nxũ²kwa̱i³lxũ¹txi² nxe³ũh¹te²ju²hẽ³la². Nxe³kxa²yã¹nxe³sxã³ Sũ̱³na² wãn³txa² wi¹jau³xa² ĩ³tih³nxe³nx2ti³ha²kxai³ ĩ³nxũ²kwa̱i³lxũ¹jau³su² ĩ³ye³kxi¹nx2ti³ha²kxai³ wãn³txa² yxo²ha³kxa¹ sa²hxi²kãu²lxa³ki²la² ĩ³yau¹ũ¹nx2ti³ha²kxai³ nxe³jau³xai²na² whãi²na¹ nxe³sĩ¹na¹tai¹ti²tu³wa².  
\v 12 Ĩ³tih³nxe³nx2ti³sĩ¹na¹te³nah¹lxi¹: 
\p — Txa²wã¹sũ̱³na² wãn³txa² sa²yxo²we¹jah³lxi³si¹nhẽ³li¹. Nxe³nha¹jau³su² ĩ³ya³lo³txa²lxi³to³nha¹ha²kxai³ ĩ³tih³nxe³nx2ti³sĩ¹na¹tai¹ti²tu³wa². Nxe³nha¹jau³xai²li² we¹jah³lxin¹kxai²nãn²tu̱³ yxau²xai³lyah³lxin¹kxe³su² Txa²wã¹sũ̱³na² ĩ³ka²li¹jah³lxin¹tu¹wa². Nxe³kxa²yu³su² kxãn³nãu³a¹ wxi²kin³ti³ton³sxã³ ĩ³hxi²kat1sxã³ ã³wa³kxẽn³to³tẽ³nũ³nhĩ¹na¹ ka²li¹txa²lxi³sxã³ Sũ̱³na² ha³lo²a² yxau³kxah¹lxin¹tu¹wa². 
\p  
\v 13 Sũ̱³na² wãn³txa² wi¹jau³xa² ĩ³yau¹ũ¹nx2ti³sĩ¹na¹hĩ¹nai³tã² nxe²e³kah¹lxin¹te³nah¹lxi¹: 
\p — Jau¹xai²na² a²nũ²a² wãn³txi³sxa³wi¹. Sũ̱³na² wãn³txi³khai³xai²la¹wi¹. Yxo²ĩ²nha¹nhai¹. Nxe²e³kxah¹lxin¹jau³su² ha²kxai³ Sũ̱³na² sa²nẽn¹kxi²to³nha¹hẽ³la². Jau¹xai²na² yxo²ĩ²yah³lxi¹nhĩ¹nãn¹te²tu̱³ wxa²ẽ¹nãu³ai²na² nũ̱³kxũn³txi³ sa²hau³ko³txa²lxi³na³la².  
\v 14-15 Txa²wã³tã̱³nãu³xãi³. Wxa²nũ̱³ka̱³txa² ha³tih³xa² hxi²ka² Te³sa³lo²ni³ka²thĩ³na² yxau³te² ĩ³nxa² khãuh³lxa³ti³nx2tain¹tai¹ti²tu³wa². Te²u¹jã¹nxe³sxã³ ha³la³je¹nhĩ¹nai³kxai³ Ju³te²an¹ko³xan¹tũ̱³ka̱³txai²na² wã²nxũ̱h¹lxi³sxã³ yxo²ĩ²tũ̱³ka̱³txa² khãuhx3nhyain¹tai¹ti²tu³wa². Nxe³tũ̱³ka̱³txa² ko̱³nxe³ti³ kãi³ain¹tai¹ti²tu³wa². Nxe³tũ̱³ka̱³txai²na² hi²sen³kxai³lu² kãn³kxai³ Sũ̱³na² wãn³txa² ĩ³hen³txi³tũ̱³ka̱³txai³tã² su²lhã³ai¹ni² Je³su²jah³lai²na² Txa²wã¹hxi²kan¹ta² Si³yxau³jah¹lai²na² su²lhã³i² nxain¹tai¹ti²tu³wa². Te²yã¹nxũn³sxã³ tũ̱¹ka̱³txain²txi³ khãuh³lxa³thit1sain¹sĩn¹nũn³na²hẽ³la². Sũ̱³na² wãn³txa² sa²yxo²we¹tai¹nxa³tũ̱³ka̱³txai²lẽ¹. Hãi¹sxã³ a²nũ²a² a²yxo²ha³kxa¹ a²ko̱¹ko̱¹nũ̱³ka̱³txai²la¹wa².  
\v 16 Jã¹nxain¹kxa²yu³su² Ju³te²a² nũ̱³ka̱³txi³sxa³te²a² ĩ²li³te²a¹ Sũ̱³na² wãn³txa² wi¹jau³xa² ain³kxi²sain¹sĩn¹sxã³ ko̱³nxe³ti³ kãi³ain¹kxa²yo³ha² ã³wa²su¹tũ¹hain¹te³na¹ ko¹ko¹nũ̱³ka̱³txa² hi²sen³kxai³lu² ã³nhxi²kat1sa²sĩ¹nxa³kxe³su² o²la³kxi²sai³nain¹na²hẽ³la². Nxe³ju³tan¹te²kxa³ya̱³lhu² ko̱³nxe³ti³ kãi³ain¹ju³ta² ã²la² kãi²non³na³la². Nxe³ju³tan¹te²kxa³ya̱n³tu̱³ti¹ Txa²wã¹sũ̱³na² kãin²xa̱n³txi²na³la². Ye³khãuh³lxa³tain¹ju³ta³nũ³a² ã²la² kãi²non³sxã³ yũ³ain¹tu¹wa². 
\s1 Pau²lah³la² Te³sa³lo²ni³ka²thĩ³nãn¹tũ̱³ka̱³txa² ĩ²xi²lxun¹jau³su² 
\p  
\v 17 Txa²wã³tã̱³nãu³xãi³. Kxãn³su² ã³sxã³ wai³ta²lxi³sĩ¹na¹kxan²ti³ ãh¹ĩ²xi²ti³ten³khai¹nxe³nx2ti³sĩ¹na¹hẽ¹la². Ne³kan¹ti³hex1sa²sĩ¹nxa³hẽ¹la². Ul²yxau¹sĩ¹na¹kxan²ti³ ne³wã²nxa²lxi³sĩ¹nxa³hẽ¹la². Nxe³sĩ¹nxa³ha²kxai³ wa̱³li²sĩ¹na¹ju³ta³nũ³a² ne³wa³kon³nha²sĩ¹na¹hẽ³la².  
\v 18 Ĩ²xi²ti³ten³khai¹nxe³nx2ti³sĩ¹na¹hẽ¹la², txai²na¹xai²na² Pau²lah³lo²na¹xai²na²sa³. Yxãn¹ta¹ Sa³ta³na²jah¹la² hxi²kat1sa²sĩn¹to³hxa³hẽ¹la².  
\v 19-20 Nxe³kxan²ti³ a²yan¹nãu³a¹ Je³su²jah³lai²na² wãn³txa² nũ̱³kxũn³txi³ sa²yxo²we¹ta² yxau²xai³lyah³lxin¹ju³ta² yxo²ĩ²nx2ta¹nha²wa². Nxe³ha²kxai³ Je³su²jah³la² Txa²wã¹hxi²kan¹jah¹la² a³ka³nxi²tãu³a¹ ka²li¹txi³sah¹lxi³nhĩn¹tu¹wa². Nxe³ha²kxai³ Je³su²jah³la² e³kxi²sain¹sĩn¹tu¹wa². E³kxi²sain¹sĩn¹te³nah¹lxi¹: 
\p — Wain³txi³ o²la³kxi²yah³lxin¹tai¹ti²tu³wi¹. Txa²wãn³txa² wi¹jau³xa² a²nũ²a² yxo²ha³kxa¹ ĩ³hen³txain¹yah³lxin¹tai¹ti²tu³wi¹. Nxe³sain¹sĩn¹tu¹wa². Jã¹nxe³ju³kxai³lu² sa²yxo²we¹jah³lxi¹nha²kxai³ yxo²kãin²txi³ ĩ³hen³txain¹sĩ¹na¹wa². Ka²li¹txi³khaix1sah¹lxi³nhi¹lxa². 
\c 3  
\p  
\v 1 Nxe³nxa²ha¹te¹: 
\p — Ha³ta̱³nxe³nyha¹lxi³te²sin¹ji¹xã¹. Nxe³nx2ta¹ta¹ yah²lxa³nha²kxai³la¹ Ti³mo²jah³la² sa²si¹hã³ain¹sĩ¹na¹hẽ³la². Nxe³sĩ¹na¹nũ²la² A³te²nas²thĩ³na² yxau³sxã³ wah³nxain¹sĩ¹na¹hẽ³la².  
\v 2 A²nxe³jah¹lai²li² Ti³mo²jah³lai²li² Je³su²jah³lai²na² wãn³txa² yxo²ĩ²jah¹lo²su² ha²kxai³ ã³si³tẽ³kxi²sa²sxã³ wa³kon³ya³sa²jah¹lo²su² ha²kxai³ txai²yã¹nxe³sxã³ Sũ̱³na² wãn³txa² wi¹jau³xa² ĩ³yau¹ũ¹jah¹lai²la¹wa². A²nxe³jah¹la²kxai³la¹ ĩ³nxũ²kwa̱i³lxũ¹nxa²lxi³te³lhxã³ ũ³sa²si¹hã³sĩ¹na¹hẽ³la². Ĩ³nxũ²kwa̱i³lxũ¹nxa²lxi³kxai²nãn²tu̱³ ã²la² kãi²non³sxã³ Je³su²jah³lai²na² wãn³txa² yxo²ĩ²yah³lxin¹tu¹wa².  
\v 3 Nxe³sxã³ khãuh³lxa³thin¹sxã³ ai³yah³lxin¹ju³tai³tã² Txa²wã¹sũ̱³na² a²ten³jau³su² na³la². Nxe³jut3su² ha²kxai³ Je³su²jah³lai²na² wãn³txa² ĩ³wã̱³wã̱³ta³kxah¹lxi³txa³hẽ¹la². Nxe³ju¹tai²na² ã²la² a³la³kxi²yah³lxi³te²si¹lxa².  
\v 4 Jã¹nxe³ju³ta² wxa²yu³ta² yxau³ya³nx2ti³sĩ¹na¹hĩ¹nai³tã² nxe³nx2ti³sĩ¹na¹te³nah¹lxi¹: 
\p — Khãuh³nxẽ³lain¹ju³ta³nũ³a² kãin² yũ³nẽ³lha³tai¹. Nxe³nx2ti³sĩ¹na¹tai¹ti²tu³wa². Nxe³nha¹te³na¹ ya²la³tu̱³ wxã³sĩn¹tai¹ti²tu³wa².  
\v 5 Nxe³nũ²la² wah³nxa² hxi²tha³nha¹ha²kxai³ Sũ̱³na² wãn³txa² kan²txi³ sa²yxo²we¹tain¹te²nha²ku² Sa³ta³na²jah¹lai²na² sa²kxai³lu² ĩ³hxi²tha³tai¹nha²kxai³ sa²yxo²ã³ain¹te²nha²ku² kwa²ĩ³yau¹ũ¹ai¹na¹te²nha²ku² nxa¹jau³su² Ti³mo²jah³la² sa²si¹hã³sĩ¹na¹tai¹ti²tu³wa². 
\p  
\v 6 Nxe³nũ²la² Ti³mo²jah³la²kxai³lu² ĩ³xi²sxã³ ĩ³hen³txi³sa²sĩ¹nha²kxai³ ka³li³sa²sĩn¹nha²wa². Sũ̱³na² wãn³txa² yxo²ĩ²khai¹yxah³lxi¹nha²kxai³ a³lxi²waun¹nyha¹lxi¹nha²kxai³ wa̱³li²si¹sah¹lxin¹sĩn¹jau³su² ten³khai¹yxah³lxi¹nha²kxai³ nxe³sah¹lxi³nhĩ¹nha²kxai³ wxa²ẽ¹nãu³ai²na² a̱in³sxã³ ain³kxi²xi¹nx2ti³to³tãu³a² ĩ³ka³li³kxah¹lxi³to³hi¹nha²kxai³ nxe³sxã³ ka³lih³khaix1sa²sĩn¹nha²wa². Te²yã¹nxe³sxã³ ĩ²nx2ti³sĩ¹na¹ju³ta² ten³khaix1sa²nũn³sĩn¹nha²wa².  
\v 7 Txa²wã³tã̱³nãu³xãi³. Sũ̱³na² wãn³txa² kan²txi³ yxo²ĩ²yah³lxi¹nha²kxai³ ĩ³nxũ²kwa̱i³lxũ¹khaix1sah¹lxi³nhĩ¹nhẽ¹la². Khãuh³lxa³ti³khaix1sain¹sĩn¹kxan²ti³ ka²li¹txi²sah¹lxi³nhĩ¹nhẽ¹la².  
\v 8 Sũ̱³na² wãn³txa² nũ̱³kxũn³txi³ sa²yxo²we¹jah³lxi¹nha²kxai³ ĩ³nxũ²kwa̱i³lxũ¹khaix1nha²sxã³ yxau²xai³sĩ¹na¹wa².  
\v 9 Nxe³ha²kxai³ wxa²ha³ta̱³nxãn¹jau³xai²na² ain³kxi²sĩ¹na¹ha²kxai³ ka²li¹txi³sah¹lxi³nhĩ¹nhẽ¹la². Nxe³sxã³ ĩ³hen³txi³sain¹sĩ¹nha²kxai³ Txa²wã¹sũ̱³na² sa²nẽn¹kxi²khaix1sĩ¹na¹wa².  
\v 10 Ka³nxah³ta² ĩ³hen³txi² a³lan²ta² ĩ³hen³txi² to³sĩ¹na¹wa². 
\p — Sũ̱³nãi³. Te³sa³lo²ni³ka²thĩ³nãn¹tũ̱³ka̱³txa² ãh¹ĩ²ti³ten³khaix1sa²sĩn¹nhai¹. Wa̱³li²sĩ¹na¹ju³ta² ĩ³hxi²kat1sa²sãn²sĩ¹nhẽ³li¹. Wxa²wãn³txa² yxo²ĩ²ain¹na²hẽ³li¹. Jã¹nxain¹sxã³ yxo²ĩ²wa³to²hi²si¹hai¹nha¹jau³su² ten³sa²sĩn¹nhai¹. Wxa²wãn³txa² taut3ton³jau³xai²na² wã³ko³nxa³te²tu̱³ wa̱³li²sxã³ ĩ³hen³txain¹sĩ¹na¹jau³nũ³su² ten³sa²sĩn¹nhai¹. Nxe³yah³lxi³sĩn¹to³ha¹wa². 
\p  
\v 11 Jã¹nxe³ju³ta² Txa²wã¹sũ̱³na² Si³yxau³jah¹la² hi²sen³kxai³lu² Je³su²jah³la² Txa²wã¹hxi²kan¹jah¹lo²kxai³lu² nxe³ya³sxã³ wa̱³li²nha¹ju³ta³nũ³a² sa²hau³kot3sa²sĩn¹ju³ta³nũ³a² ten³sa²sĩn¹nha²wa².  
\v 12 A³lxi²waun¹nyhah¹lxin¹ju³ta² ã²la² kãi²non³ju³ta² ten³sa²sĩ¹nha²kxai³ a²nũ²a² yxo²ha³kxa¹ a³lxi²nyhu¹si¹nx2ta¹jau³su² ten³sa²sĩ¹nha²kxai³ a³lxi¹nx2ti³sĩ¹na¹kxa² yã¹nxe² a³lxi²waun¹nha¹jah³lxi³sxã³ nxe³si¹nx2ta¹jau³su² Sũ̱³na² e³kxi²sĩn¹to³ha¹wa².  
\v 13 Jã¹nxe³nx2ti³jut3su² ha²kxai³ Txa²wã¹sũ̱³na² hi²sen³kxai³lu² ĩ³nxũ²kwa̱i³lxũ¹txi³nx2ti³tu¹wa². Hã²wxãn³txa³nũ² kxã³nãu³a¹ Je³su²jah³la² Txa²wã¹hxi²kan¹ta² Si³yxau³jah¹la² wxa²kan³sxã³ wa̱³li²tu¹wa². Wa̱³li²kxai²nãn²tu̱³ a²sa³wi³ha³lxi³nãu³xa² yxo²ĩ²te²nãu³xai²na² ã³si³tẽ³la³kxain¹tu¹wa². Nxain¹kxai²nãn²tu̱³ Txa²wã¹sũ̱³na² Si³yxau³jah¹la² Txa²wã¹wĩ³nu²su² ha²kxai³ nxe³te²a² yen³nãu³a¹ wain³te²lo³je¹nx2ti³ha²kxai³ wi¹lhin¹te²lo³je¹nx2ti³ha²kxai³ nxe³ye¹nx2ti³tu¹wa². 
\c 4  
\s1 Txa²wã¹sũ̱³na² ĩ³ka³li³kxi²sxã³ yxau²xai³ki̱³jau³su² 
\p  
\v 1 Txa²wã³tã̱³nãu³xãi³. Txa²wã¹sũ̱³na² ĩ³ka³li³kxi²sxã³ yxau³sxã³ kãi³yah³lxin¹ju³ta² ã²la² ĩ³yau¹ũ¹nx2ti³nha¹tai¹ti²tu³wa². Je³su²jah³la² Txa²wã¹hxi²kan¹jah¹la² ĩ³yau¹ũ¹sa²sĩn¹jau³xa² jau¹xain²txi³ ĩ³yau¹ũ¹nx2ti³nha¹tai¹ti²tu³wa². Sa²yxo²we¹jah³lxin¹kaix3 jã¹nxe³sxã³ ã²la² nũ³kxũn³txi³ sa²yxo²we¹ta² wa³to²hi¹jah³lxi³hẽ¹la². Thãi³ti³la² e³kxi¹nx2ti³sĩ¹na¹wa².  
\v 2 Nxe³jau³xai²li² Je³su²jah³la² Txa²wã¹hxi²kan¹jah¹la² ĩ³tih³nxe³jau³xain²txi³ ĩ³yau¹ũ¹nx2ti³nha¹tai¹ti²tu³wa².  
\v 3 A²nxe³jau³xai²na² Txa²wã¹sũ̱³na² a²ten³jau³xai²la¹wa². Nxe³te³nah¹lxi¹: 
\p — Txa²wãn³txa² yxo²ha³kxa¹ wi¹lĩ²nha²sxã³ sa²yxo²we¹thxa³jah¹lxi³hẽ¹li¹. Ko̱³nxe³thin¹sxã³ ũ³whĩn¹ta³kxi²nyhu¹ah³lxin¹ju³ta² ã³na¹hxa³jah¹lxi³hẽ¹li¹. Nxe³nx2tain¹na³la².  
\v 4 Wxa²ẽ¹nãu³ai²na² wi¹lhin¹sxã³ wã²nxũ̱h¹ha̱in³nha¹jah³lxi³hẽ¹la². Yah³lxin¹kxai²nãn²tu̱³ txu¹su² ta̱³nxa² in³txi³su² ta̱³nxa² ko̱³nxe³thin¹sxã³ o²la³kxi²yah²lxan³tho³la². Nxe³ha²kxai³ a²nũ²ai²na² sa²kxai³lu² txu¹su² ta̱³nxa² in³txi³su² ta̱³nxa² so¹yhu¹sxã³ tẽ³khaix1yhu¹te²a² so¹lxi³ ũ³whĩn¹ti³kxai²nãn²tu̱³ wai³nhĩ̱³nx2na³la². Yxãn¹ta¹ a²nũ²a² ã̱³xa² ũ³whĩn¹ti³kxai²nãn²tu̱³ ko̱³nxe³ti³ kãi³hĩ̱³nx2na³la². Te²yã¹nxe³sxã³ in³txai²li² txu¹txa²jah¹lai²li² txu¹ha² ã̱³xa³ka³lxa² ũ³whĩn¹ti³kxai²nãn²tu̱³ wai³nhĩ̱³nx2nxa³wa². Ko̱³nxe³ti³ kãi³hĩ̱³nx2na³la².  
\v 5 Nxe³ju³tai²li² Ju³te²a² nũ̱³ka̱³txi³sxa³te²nãu³xa² ko̱³nxe³thin¹sxã³ o²la³kxi²nyhu¹ain¹te²ju²hẽ³la², Txa²wã¹sũ̱³na² wãn³txa² ĩ²ai¹nxa³ha²kxai³la². A²nxe³ju³tai²li² Txa²wã¹sũ̱³na² yxo²kwĩ̱¹kxi²ju³tai²la¹wa².  
\v 6 Te²yã¹nxe³ju³ta² a²nũ²a² ã̱³xa² ã³ke³tũ¹sxã³ a²sxe³xa² ũ³whĩn¹ti³yah³lxi³txa³hẽ¹la². Yxãn¹ta¹ nxe³yah³lxin¹kxai²lẽ¹. Txa²wã¹sũ̱³na² hxi²ki³kxai³lu² ĩ³wait1sxã³ ĩ³khãuh³nxe³nx2ti³tu¹wa². Nxe³jau³xai²li² Sũ̱³na² wãn³txi³su² ha²kxai³ e³lai²na¹ e³kxi¹nx2ti³sĩn¹to³ha¹hẽ³la².  
\v 7 Jã¹nxe³jut3su² txa²wã¹ẽ¹nãu³ai²na² ko̱³nxe³ti³ o²la³kxi²si¹ki̱³jau³su² ĩ³kaix1so¹nẽ³lxa³tai¹ti²tu³wa², Txa²wã¹sũ̱³na²sa³. Yxãn¹ta¹ Txa²wã¹sũ̱³na² sa³wi³ha³lxa² yã¹nxe² o²la³kxi²si¹ki̱³jau³su² nxe³nẽ³lain¹tai¹ti²tu³wa².  
\v 8 Nxe³jau³xai²li² e³kxi¹nx2ta¹jau³xai²na² ĩ²li³te²a² en²sxã³ sa²yxo²ã³yah³lxin¹kxai²nãn²tu̱³ hai³txi³ kwa²wãn³txi³khai³su² en²sxã³ sa²yxo²ã³yah³lxi³hĩ̱³nx2nxã³lxa². Txa²wã¹sũ̱³na² wãn³txi³khai³su² en²sxã³ sa²yxo²ã³yah³lxi³hĩ̱³nxa¹lxa². Nxe³kxa²yu³su² Txa²wã¹sũ̱³na² Yãu³ka³jxah¹la² nxũ²kwa̱i³yxau³nx2ti³jah¹la² en²sxã³ sa²yxo²ã³yah³lxi³hĩ̱³nxa¹lxa². Nxe³jut3su² Txa²wã¹sũ̱³na² hi²sen³kxai³lu² A²yãu³ka³jxah¹la² ũ³hũ¹nx2ti³jah¹lai²la¹wa². 
\p  
\v 9 Nxa²ha¹te¹ yxo²ĩ²yah³lxin¹te² ĩ³nxa² a³lxi²waun¹nyhah¹lxin¹ju³ta² a³la³kxi²yah³lxi¹lxa². Txa²wã¹sũ̱³na² hi²sen³kxai³lu² jau¹xain²txi³ ã²la² ĩ³yau¹ũ¹nx2ti³tai¹ti²tu³wa².  
\v 10 Txa²wã³tã̱³nãu³xãi³. Yxo²ĩ²tũ̱³ka̱³txa² Ma³se³to²na²ko³xan¹te²a² hãi¹nxe³ti³xa¹ a³lxi²nũ¹hain¹yah³lxi³ta¹hi¹nhẽ¹la². Ĩ³a³lxi² kãin²non³tain¹yah³lxi³hẽ¹la². Thãi³ti³la² e³kxi¹nx2ti³sĩ¹na¹wa².  
\v 11 Ha³nxeh³lxa³ti³nha²sxã³ yxau³ya³nyhu¹ah³lxi³txa³hẽ¹la². Jã¹nxe³sxã³ a²nũ²a² ã̱³xa² a²wa³ka³li³yu³ta² wxa²wxai³kxi²yhu¹ah³lxi³txa³hẽ¹la². Wi¹yxau³yah³lxin¹ju³ta² a²yen³kxa² wã²nxũ̱h¹lxi³ wa³kon³sxã³ so¹jah³lxi³hẽ¹la². Nxe³jau³xa² whãi²na¹ kwa³na³nxa²lxa¹jau³xai³txa³lxi²na³la². Wi¹wi¹nxe² ãn³ten³jah¹lxi³sxã³ kãi³jah³lxi³hẽ¹la².  
\v 12 Jã¹nxe³sxã³ nxe³yah³lxin¹kxai²nãn²tu̱³ Txa²wã¹sũ̱³na² wãn³txa² yxo²ĩ²xa³te²a² sa²nẽn¹ki¹nx2tain¹tu¹wa². Nxe³nx2tai¹nha²kxai³ wxa²yen³kxa² hxan³kxi¹nx2ti³xa³lho³la². 
\s1 Txa²wã¹hxi²kan¹ta² Si³yxau³jah¹la² a³ka³nxi²sxã³ wa̱³li²jau³su² 
\p  
\v 13 Txa²wã³tã̱³nãu³xãi³. Wãn³txa² tah²yau³xa² ĩ³tih³nxe³nx2ti³sĩ¹na¹tu¹wa². A²nũ²a² Je³su²jah³lai²na² wãn³txa² yxo²ĩ²te²ki̱³nãu¹xai²na² ya³lu²ki̱³ju³ta² ĩ³yau¹ũ¹nx2ti³sĩ¹na¹tu¹wa². Nxe³ju³ta²sa¹ ya³lu²ki̱³kxai²nãn²tu̱³ kãin² ãin²ti³yah³lxi³txa³hẽ¹la². A²nũ²ai²li² Je³su²jah³lai²na² wãn³txa² yxo²ĩ²xa³te²su² te²a² Je³su²jah³lai²li² a³ka³nxi²ju³ta³nũ³a² wah³nxai¹nxa³ha²kxai³ kãin² ĩ³ãin²ta³kxi²nha²ha²kxai³ nxe³hĩ̱³nx2na³la². Ta¹ wxãi²na² ti³he¹yxah³lxan³tho³la².  
\v 14 Nxe³ha²kxai³ kã³nhxĩ¹nai³kxai³ Je³su²jah³la² ya³lu²ta¹hxai²ti³ai¹ti²tu³wa². Nxe³to³ta¹ a²nũ²khai³su² ka³te̱n³su² ĩ³sa²yxau³xi²ta¹hxai²ti³ai¹ti²tu³wa². Jau¹xai²na² ya²la³tu̱³ yxo²ĩ²ki̱³tã³la². Jã¹nxe³kxe³hũ̱³nxe² yxo²ĩ²sxã³ ya²lun¹ti³tũ̱³ka̱³txai²na² yxo²ha³kxa¹ Txa²wã¹sũ̱³na² ka³te̱n³su² tẽ³xi²tu¹wa², Je³su²jah³la² a³ka³nxi²tãu³a²sa³. Jau¹xai²li² hxi²kan¹txi³ yxo²ĩ²nũn³ki̱³tã³la². 
\p  
\v 15 Nxe³hĩ¹na¹ a³ka³nxi²tãu³ Sũ̱³na² wãn³txa² yxo²ĩ²sxã³ ya²lun¹ti³tũ̱³ka̱³txa² txa²nũ² a²nũ²khai³su² tẽ³sxã³ ĩ³ka³te̱n³su² ti³hit1sxã³ a³ka³nxi²tu¹wa². Txai²na¹xai²na¹ ka³te̱n³su² yxau³te²ki̱³nãu¹xai²na² ã³sxã³ ne³ka³ta²nẽ³lain¹tu¹wa². A²nxe³jau³xai²na² Txa²wã¹sũ̱³na² wãn³txi³khai³xai²la¹wa².  
\v 16 Jã¹nxe³ju³kxai³lu² Txa²wã¹hxi²kan¹ta² Si³yxau³jah¹la² kãin² ĩ³kaix1sxã³ a³ka³nxi² oh³xan¹jah¹la² a²hxi²kan¹te²su² te²a² kãin² wxa¹ni² Txa²wã¹sũ̱³na² wãi²lhũ̱³ka³txa² wxa²no²la³kxi² nxe³sxã³ a³ka³nxi²tu¹wa². Je³su²jah³lai²na² wãn³txa² yxo²ĩ²sxã³ ya²lun¹ti³tũ̱³ka̱³txa² ka³te̱n³su² ĩ³sa²yxau³sxã³ ka³la³nũ¹hain¹sãn²tu¹wa². \fig |src="BK00180B.TIF" size="span" copy="by Louise Bass ©The British & Foreign Bible Society, 1994." ref="1Tesalonicẽnses 4.16" \fig* 
\v 17 Nxe³hĩ¹na¹ txa²wã¹ki̱³nãu¹xai²na² yxo²ĩ²ki̱³tũ̱³ka̱³txi³ki̱³nãu¹xai²na² yuh³xan¹ko³xa² ka³te̱n³su² yxau³tũ̱³ka̱³txi³ki̱³nãu¹xai²na² sa²so¹xi²nẽ³lha²kxai³ ĩ³ka³la³si¹nhẽ³tu¹wa². Nxe³ti̱³kxai³lu² oh³sĩ̱³nãu³a¹ yxo²ĩ²sxã³ ya²lun¹ti³tũ̱³ka̱³txai²na² kwẽn¹ta¹ a²nũ²khai³su² ka³te̱n³su² ĩ³sa²yxau³sxã³ ka³la³nũ¹hain¹tũ̱³ka̱³txai²na² Txa²wã¹hxi²kan¹ta² Si³yxau³jah¹la² kwẽn¹ta² a³ka³nxi²ya³hain¹tũ̱³ka̱³txai²na² ĩ³ha¹txain¹ki̱³tu¹wa². Nxe³ki̱³sĩ¹nãn¹te²tu̱³ Txa²wã¹hxi²kan¹ta² Si³yxau³jah¹la² yxau²xai³la³kxi²ki̱³tu¹wa². ósxã³ yxau²xai³ti³hex1ki̱³sxa³lho³la².  
\v 18 Nxe³ju³tai²li² wãn³txi³khai³xai²la¹wa². Ki³han³nxa³wa². Nxe³jut3su² ĩ³nxũ²kwa̱i³lxũ¹nyhu¹te³lhxã³ ĩ³yau¹ũ³nha¹jah³lxi³hẽ¹la². Je³su²jah³la² wãn³txa² yxo²ĩ²te²na² ya³lu²ju³ta² ĩ³ãin²txi¹nx2ti³kxa²ya̱n³txi³su² jau¹xai²na² ĩ³yau¹ũ¹jah³lxi³hẽ¹la². 
\c 5  
\s1 Txa²wã¹hxi²kan¹ta² Si³yxau³jah¹la² wa̱³li²ju³ta³nũ³a² ĩ³yau¹ũ³nẽ³jau³su² 
\p  
\v 1 Txa²wã³tã̱³nãu³xãi³. Txa²wã¹hxi²kan¹ta² Si³yxau³jah¹la² wxã³ju³ta²nũ³su² jau³su² ã²la² ĩ³ye³kxi¹nx2ti³sĩ¹na¹ten¹tu³wa². Nxe³ha²kxai³ ĩ³ka³la³ki³txi³wa³ka² ũ³wha²li¹la³kxi¹nx2ti³sĩn¹nxa³lho³la². Wa³su¹txi³ wxã³ha²kxai³ ũ³wha²li¹la³kxi¹nx2ti³sĩn¹nxa³lho³la².  
\v 2 Nxe³jut3su² a²nũ²ai²li² yen³kxa² kãi³kxi²te²la³ wxã³kxai²nãn²tu̱³ wa³su¹txi³ wxã³te²ju²hẽ³la². Nxe³kxa² yã¹nxe³te²hũ̱³nxe² Txa²wã¹hxi²kan¹ta² Si³yxau³jah¹la² wa³su³txi³ wxã³tu¹wa². Ka³nxah³ti³na² ta̱³nxa² a³lan²tãu³ai²la² ta̱³nxa² wa³su³txi³ wxã³tu¹wa². Nxe³jut3su² ha²kxai³ wi¹lĩ²jah¹lxi³hẽ¹la². A²nxe³jau³xai²na² ha³kxa¹ ã²la² ĩ²yah³lxin¹jau³su² te²jai¹ti²tu³wa². Ne³wãn²yah³lxi³txa³hẽ¹la².  
\v 3 Nxe³ha²kxai³ a²nũ²a² yxo²ĩ²xa³te²a² e³ain¹jau³nũ³a² e³ain¹te³nah¹lxi¹: 
\p — Yen³kxa² ha³kxa¹ wa²su¹wa²su¹nain¹na³li¹. Ha³lo²a² wi¹lhãu²non³na³li¹. Ai¹nhĩ¹na¹ ha³lo²a² ko̱³ju³ta³la³ wxã³yain¹tu¹wa². Txa²wã¹sũ̱³na² wa³su³txi³ wxã³tãu³a² ko̱³nxe³ti³ ĩ³yĩ¹lain¹tu¹wa². Nxain¹kxai²nãn²tu̱³ hxi²kan¹txi³ ĩ³hãi³ai¹nxa³lho³la². Txu¹ha² wẽh³ni³khaix1te²a² yã¹nxe³nũ³nhĩ̱³nx2na³la². Ta¹ka³lxai²na² nxe² e³te³nah¹lxi¹: 
\p — Txai²na² wẽh³nĩn²nxa³xĩ¹. Ain¹kxan²ti³ ye³jen¹nãu³a² wẽ³sai²na² ya²la³tu̱³ a³li³lah¹hĩ̱³nx2na³la². Nxe³kxa² yã¹nxe³ti³hũ̱³nxe³ ya²la³tu̱³ a³ka³nxi²tu¹wa².  
\v 4 Txa²wã³tã̱³nãu³xãi³. Ju¹tai²li² wi¹ko̱³nyhah¹lxi¹lxa². Wxa²ẽ¹nãu³ai²na² ĩ³ye³ka²nah¹nẽ³jut3sũ̱³ju³ta² yũ³yah²lxan³tho³la². Yah²lxa³nha²kxai³ Txa²wã¹hxi²kan¹ta² Si³yxau³jah¹la² wxã³ju³ta²nũ³a² ĩ³wã̱³wã̱³jah²lxan³tho³la². A²nũ²a² yen³kxa² kãi³kxi²sxã³ sa²no¹kxi²nẽ³jah¹la² wa³su³txi³ wxã³ti³hũ̱³nxe² Txa²wã¹hxi²kan¹ta² Si³yxau³jah¹la² wa³su³txi³ wxã³tu¹wa².  
\v 5 Nxe³yãn¹ta¹ Je³su²jah³lai²na² wãn³txa² yxo²ĩ²yah³lxi¹nha²kxai³ a³lan²ta² wẽ³ha³lxi³hũ̱³yah³lxi¹lxa². Ka³nxah³ta² wẽ³ha³lxi³hũ̱³yah³lxa³lxa².  
\v 6 Nxe³ki̱³jut3su² Txa²wã¹hxi²kan¹ta² Si³yxau³jah¹la² a³ka³nxi²ju³ta³nũ³a² ye³ten³ki̱³jut3sũ̱³nxe² wahx3yah³sah¹lxi³hẽ¹la². Ãu³xi²ya³sah¹lxi³txa³hẽ¹la². Wi¹lĩ²sxã³ yxau³ya³sah¹lxi³hẽ¹la².  
\v 7 Ka³nxa³hi²tãu³a² ãu³xi²ta̱³nxa² ũn³jau³xa² ĩ³na²sxã³ wen¹ta̱³nxa² ain¹te²ju²hẽ³la².  
\v 8 Jã¹nxe³sxã³ kwa³jan³ta² so³ta²to²nãu³xa² a²wã²la²ka³lo³a² kwa³thi³la³ka³lo³a² ũ³whi²kxi²nyhain¹te²ju²hẽ³la². Kwa³thi³la² a²ha³la³san¹ka³lo³an²tu̱³ ũ³whi²kxi²nha² kwa³thi³la² ũ³nhe³hẽ¹nha²ka³lo³an²tu̱³ ũ³nhe³hẽ¹nha² nxe³ain¹te²ju²hẽ³la². Nxain¹ju³tan¹te²kxa³ya̱n³tu̱³ ã³nhe¹lain¹kxai²nãn²tu̱³ ũ³hĩx1to³nyhai¹nhĩ̱³nx2nxa³wa². Jã¹nxe³kxe³hũ̱³nxe² nxe³te²ki̱³na¹xai²na² a³lan²ti³hũ̱³ju³ta² yxau³ki̱³te²ki̱³na¹xai²na² Je³su²jah³lai²na² wãn³txa² yxo²ĩ²sxã³ yxau²xai³ki̱³sa²kxai³ a³lxi²waun¹nyhu¹sxã³ yxau²xai³ki̱³sa²kxai³ Je³su²jah³la² txa²wã¹ko̱³nxe³ti³ kãi³ki̱³ju³ta² ã³wa²su¹tẽ³jah¹la² a³ka³nxi²ju³ta³nũ³a² yxo²ĩ²sxã³ yxau²xai³ki̱³sa²kxai³ nxe² yxau²sa²te³a³sah¹lxi³hẽ¹la².  
\v 9 Kxã³nxai³tã² txa²wã¹ẽ¹nãu³ai²na² ã³wa²su¹kxi²nẽ³lhĩ¹nai³tã² hai³txi³ ko̱³nxe³ti³ ĩ³yĩ¹li²si¹nhẽ³jau³nũ³su² ũh³wxe³kxi²nẽ³lxa³hẽ³la². Yxãn¹ta¹ Je³su² Kris²tu³jah¹la² Txa²wã¹hxi²kan¹ta² Si³yxau³jah¹lo²su² ha²kxai³ nxe³jah¹la² ko̱³nxe³ti³ kãi³ki̱³kxa² yo³ha² so¹kxi²nẽ³na²hẽ³la². Nxe³nẽ³lhi¹jau³su² ũ³whxe³kxi²nẽ³na²hẽ³la².  
\v 10 Nxe³sxã³ ya³lu²kxi²nũ¹nhẽ³ta¹hxai²ti³ai¹ti²tu³wa². Nxe³ju³tan¹te²kxa³ya̱³kxai³lu² ya³lu²sxã³ sxa³ta̱³nxa² ka³te̱n³su² yxau³ta̱³nxa² ĩ²li³jut3su² kxan²ti³ kxã³nãu³a¹ ka³te̱n³su² yxau²sa²tẽ³ya³hain¹ki̱³tu¹wa².  
\v 11 Nxe³jut3su² ã³nxũ²kwa̱i³lxũ¹waun¹nyhu¹ah³lxi¹nha²kxai³ ã³non²ta³kxi²waun¹nyhu¹ah³lxi¹nha²kxai³ nxe³yah³lxin¹tai¹ti²tu³wa². Hĩ¹na² ã²la² kãi²non³jah¹lxi³hẽ¹la². 
\s1 Pau²lah³lai²na² ã³wa²su¹kxi³jau³su² 
\p  
\v 12 Txa²wã³tã̱³nãu³xãi³. Yxo²ĩ²yah³lxin¹kxa² a²hxi²kan¹txi³su² te²a² sa²nẽn¹kxi¹jah³lxi³hẽ¹la². A²nxe³te²a² kãin² hxi²nũ¹nu¹nx2ti³ha²kxai³ Txa²wã¹sũ̱³na² wãn³txa² wain³txi³ ĩ³tih³nxe³nx2ti³ha²kxai³ nxe³nx2tain¹to³hxai²na²hẽ³la². Nxe³nha¹jau³su² thãi³ti³la² e³kxi¹nx2ti³sĩ¹na¹wa².  
\v 13 A²nxe³te²a² wi¹lhen³txi³tain¹yah³lxi³hẽ¹la². Nũ̱³kxũn³sxã³ ĩ²ũ³nx2tai¹nha²kxai³ a³lxi¹tain¹yah³lxi³hẽ¹la². Hãu²non³sxã³ yxau²waun¹jah¹lxi³hẽ¹la². 
\p  
\v 14 Txa²wã³tã̱³nãu³xãi³. Wxa²yu³ta² ha³tih³ ĩ³nxa² a²nũ²ai²na² u̱³lha²kxai³ wxa²wa³ka³la² ĩ²ũ³nx2ti³kxe³su² en²kxai²nãn²tu̱³ ĩ³kwa̱i²kxi¹txain¹yah³lxi³hẽ¹la². Wxa²yu³ta² ha³tih³ ĩ³nxa² yu̱h³lxi³te²sa²kxai²nãn²tu̱³ ĩ³nxũ²kwa̱i³lxũ¹txi³txain¹yah³lxi³hẽ¹la². Ãh¹ a²ha³tih³ ĩ³nxa² nũ³kxũn³txi³ yxo²ĩ²xa³te²a² Sũ̱³na² wãn³txa² wain³jau³su² ĩ³tih³nxe³txain¹yah³lxi³hẽ¹la². Ya³nãn³ta³ki²la²sxã³ yxau²xai³la³nha¹jah³lxi³hẽ¹la².  
\v 15 Ko̱³nxe³ti³ o²la³kxi¹nx2tain¹kxan²ti³ te²yã¹nxe² ĩ³wa²lũ³xain¹yah³lxi³txa³hẽ¹la². Yxãn¹ta¹ wi¹lo²la³kxi²waun¹nha¹jah³lxi³hẽ¹la². A²nũ²a² ĩ²li³te²a² yxo²ha³kxa¹ te²yã¹nxe³txain¹yah³lxi³hẽ¹la². 
\p  
\v 16 Hãi¹sxã³ ka³li³sxã³ yxau²xai³jah¹lxi³hẽ¹la².  
\v 17 Ha³lo²a² ĩ²li³ju³ta² ĩ³ha¹txi¹nx2ti³kxe³su² Txa²wã¹sũ̱³na² ĩ³ye³kxi¹jah³lxi³to³hẽ¹la².  
\v 18 Yen³kxa² wi¹ta̱³nxa² ko̱³nxe³ta̱³nxa² nxe³te²a² wxã³kxan²ti³ Je³su² Kris²tu³jah¹la² wãn³txa² yxo²ĩ²ki̱³sa²kxai³ wi¹lxo³kxi¹tain¹yah³lxi³hẽ¹la². Nxe³ju³tai²li² Je³su² Kris²tu³jah¹la² Txa²wã¹hxi²kan¹ta² Si³yxau³jah¹lo²su² jah¹la² ã³nũ²kxi²sxã³ yxau³yah³lxi¹nha²kxai³ jau³xai²na² yxo²ha³kxa¹ sa²yxo²wet1sxã³ yxau²xai³lyah³lxi¹lxa². Nxe³ju³tai²li² Txa²wã¹sũ̱³na² a²ten³ju³tai²la¹wa². 
\p  
\v 19 Txa²wã¹sũ̱³na² Yãu³ka³jxah¹la² ĩ³ye³kxi¹nx2tain¹kxai²nãn²tu̱³ en²jau³su² ĩ³wa²lũ³xain¹yah³lxi³txa³hẽ¹la².  
\v 20 Wxa²yu³ta² ha³tih³ ĩ³nxai²na² ne³te³nah¹lxi¹: 
\p — Txa²wã¹sũ̱³na² wãn³txa² tah²yau³xa² yũ³nha¹wi¹. Nxe³nx2tain¹kxai²nãn²tu̱³ ĩ³kwa̱i²kxain¹yah³lxi³txa³hẽ¹la².  
\v 21 Wãn³txa² ne³ka¹jah³lxin¹jau³xa² yxo²ha³kxa¹ wi¹lha̱in³nha¹jah³lxi³sã²nhẽ³la², wain³jau³sxa³kxa²ya̱n³txi³sa³. Yah³lxin¹kxai²nãn²tu̱³ wãn³txa² wain³jau³xa² so¹lxi³ sa²so¹jah³lxi³hẽ¹la².  
\v 22 Yxãn¹ta¹ a²ko̱³nxe³ju³ta² yxo²ha³kxa¹ ã³na¹hxa³jah¹lxi³hẽ¹la². Yu³ka³na³ka³na³kxan²ti³ ko̱³nxe³ti³ kãi³yah³lxi³txa³hẽ¹la². 
\p  
\v 23 Nxe³jut3su² Txa²wã¹sũ̱³na² sa²kxai³lu² sa²hãu²no³tẽ³ju³ta² ũ³hũ¹nẽ³jah³lo²si²te²kxai³lu² wxa²ẽ¹nãu³ai²na² whãi²na¹ sa²wa²su¹tha²kxai³ a²ko̱³nxe³ju³ta² wxa²hxan³kxa²ti³nx2ti³ju³ta² nxe² yxau³yah³lxin¹ju³ta² ten³sa²sĩn¹nha²wa². Nxe³nx2ti³ha²kxai³ wxa²nũ²nãu³ai²na² whãi²na¹ wxa²ẽ¹nãu³ai²na² whãi²na¹ wi¹lhau³ko³txa²lxi³ju³ta² nxe² yxau³yah³lxin¹ju³ta² ten³sa²sĩn¹nha²wa². Hã²wxãn³txa³ Txa²wã¹hxi²kan¹ta² Si³yxau³jah¹la² Je³su² Kris²tu³jah¹la² a³ka³nxi²tãu³a² wi¹lĩ²nx2ti³tu¹wa². Hai³txi³ ko̱³nxe³ti³ kãi³yah³lxin¹ju³ta² a³ya³txi¹nx2ti³xa³lho³la².  
\v 24 Nxe³jut3su² Txa²wã¹sũ̱³na² wãn³txi³khai³su² ha²kxai³ ĩ²sxã³ ĩ³so¹nx2ti³ha²kxai³ sa²yxo²ã³nx2ti³xa³lho³la². 
\p  
\v 25 Txa²wã³tã̱³nãu³xãi³. Txa²wã¹sũ̱³na² e³kxi²yah³lxi³to³hin¹tãu³a² txa²wã¹ki̱³na¹xai²na² nxe³wãn²yah³lxi³txa³hẽ¹la². 
\p  
\v 26 Txa²wã¹sũ̱³na² wãn³txa² yxo²ĩ²yah³lxi¹nha²kxai³ ne³khauh²xi²nyhu¹ah³lxin¹kxai²nãn²tu̱³ ĩ³yxo²sai¹la³kxi²nha¹ju³ah³lxi³hẽ¹la². 
\p  
\v 27 Jã¹nxa¹jau³su² Sũ̱³na² wãn³txa² ũ³wha²li¹la³kxi¹nx2ta¹wa². Nxe³jau³xai²na² yxo²ĩ²ain¹tũ̱³ka̱³txa² a²yxo²ha³kxa¹ ĩ³hen³txi³tain¹yah³lxi³hẽ¹la². A²nxe³ju³tai²li² Txa²wã¹hxi²kan¹ta² Si³yxau³jah¹la² ĩ³kwa³na³kxi²nẽ³jau³su² na³la². 
\p  
\v 28 Nxe³na¹jut3su² Je³su² Kris²tu³jah¹lai²na² Txa²wã¹hxi²kan¹ta² Si³yxau³jah¹lo²su² ha²kxai³ thãi³ti³la² a³lxi¹nx2ti³ju³ta² ten³sa³nha²wa². Txai²li² Pau²lah³lo²na¹xai²li² ta³lu²na¹wa².