\id 1CO - Nambikuára NT [nab] (Brazil) -2011 bd 
\h 1 Korĩntios 
\toc1 1 Korĩntios 
\toc2 1 Korĩntios 
\toc3 1 Co 
\mt1 1 Korĩntios 
\c 1  
\p  
\v 1 Pau²lah³lo²na¹xai²na² ũ³wha²li¹la¹txã³nxa² ũ³hũ¹nx2ta¹tu¹wa². A²kxã³nxa² Txa²wã¹sũ̱³na² hi²sen³su² ĩ³sa²si¹hã³ũ¹sa¹nx2ti³na²hẽ³la². Ĩ³sa²si¹hã³ũ¹sa¹nx2ti³ha²kxai³ Je³su² Kris²tu³jah¹lai²na² wãn³txai³tã² ĩ³hen³txi³jah¹lo²sa¹wa². Txa²wã¹sũ̱³na² a²ten³jau³su² ha²kxai³ hxi²kan¹txi³lot3sa³na²hẽ³la². Sos³tẽ²yah³lo²su² txa²wã¹lon³yah³lo²su² yxau³ya³sain¹nũn³na³la².  
\v 2 Ko³rĩn²to²thĩ³na² yxau³yah³lxin¹tũ̱³ka̱³txi³ ĩ³nxa² Je³su²jah³lai²na² wãn³txa² yxo²ĩ²sxã³ yxau²xai³tũ̱³ka̱³txi³ ĩ³nxa² ain³kxi²sah¹lxi³hẽ¹la². Je³su² Kris²tu³jah¹la² sa²kxai³lu² txa²wã¹ẽ¹nãu³ai²na² sa²wa²su¹txa²lxi³ha²kxai³ ko̱³nxe³thin¹yah³lxin¹ju³ta² ã³wa²sut1sxã³ yxau³yah³lxi¹lxa². Yxo²ĩ²yah³lxi³si¹nx2ti³nũn³jau³su² ĩ³kaix1so¹nx2ti³nũn³na²hẽ³la². Te²yã¹nxe³sxã³ ha³lo²a² ĩ²li³thĩ³na² yxau³yah³lxin¹tũ̱³ka̱³txi³ ĩ³nxai²na² Je³su² Kris²tu³jah¹la² Txa²wã¹hxi²kan¹ta² Si³yxau³jah¹lo²su² ha²kxai³ ã³non²ta³kxi¹nx2ti³si¹jau³su² ĩ³ye³kxi²yah³lxin¹te² ĩ³nxa² ũ³wha²li¹lhxũ¹nx2ta¹wa². Ain³kxi²sah¹lxi³hẽ¹la². 
\p  
\v 3 Nxa¹ha²kxai³ Txa²wã¹sũ̱³na² Si³yxau³tãu³a² Txa²wã¹wĩ³nu²su² nxe³te²nãn²tu̱³ Je³su² Kris²tu³jah¹la² Txa²wã¹hxi²kan¹ta² Si³yxau³jah¹lo²su² nxe³te²nãn²tu̱³ nxe³ya³sxã³ kãin² thãi³ti³la² a³lxi²nx2ti³si¹hi² wxa²nxũ²kwa̱i³nãu³a² ã³nhãu²no³txa²lxi³si¹hi² nxe³nx2ti³si¹ha¹jau³su² ten³sa³nha²wa². 
\s1 Txa²wã¹sũ̱³na² wi¹lhin¹sxã³ ĩ²nẽ³jau³su² 
\p  
\v 4 Txa²wã¹sũ̱³nu²kxai³lu² kãin² thãi³ti³la² a³lxi¹nx2ti³ha²kxai³ Je³su² Kris²tu³jah¹la² ã³nũ²nxi²sxã³ yxau³yah³lxi¹lxa².  
\v 5 Nxe³yah³lxin¹ju³tan¹te²kxa³ya̱³lhu² Txa²wã¹sũ̱³na² wãn³txa² wain³txi³ a³la³kxah¹lxi¹nha²kxai³ wxi²kan¹txi³ ĩ³tih³nxe³nyhu¹ah³lxi¹nha²kxai³ nxe³yah³lxi³ta¹hi¹nhẽ¹la². Jã¹xah³lxin¹ju³tai²na² Txa²wã¹sũ̱³na² sa²nẽn¹kxi²to³ha¹wa².  
\v 6 Txa²wã¹sũ̱³na² wãn³txa² e³kxi¹nx2ta¹jau³xai³tã² Kris²tu³jah¹la² wi¹lhin¹ti³hi¹txa²ti³jau³xai³tã² ya²la³la¹ kãi³ũh¹nx2ti³tai¹ti²tu³wa².  
\v 7 Nxe³sxã³ Je³su² Kris²tu³jah¹la² Txa²wã¹hxi²kan¹ta² Si³yxau³jah¹lo²su² ha²kxai³ a³ka³nxi²ju³ta³nũ³a² wahx3yah³lxin¹tãu³a² wxa²ẽ¹nãu³ai²na² yen³kxa² wi¹te²a² wã³ko³txa²lxi³xa³hẽ³la². A²yxo²ha³kxa¹ ũ³hũ¹nx2ti³na²hẽ³la².  
\v 8 Nxe³hĩ¹nãn¹te²tu̱³ a³ka³nxi²nxa³ta̱³lxa¹ ã³nxũ²kwa̱i³lxũ¹nxa²lxi³tu¹wa². ónxũ²kwa̱i³lxũ¹nxa²lxi³ha²kxai³ kxãn³ton³tãu³a¹ Je³su² Kris²tu³jah¹la² Txa²wã¹hxi²kan¹ta² Si³yxau³jah¹lo²su² ha²kxai³ a³ka³nxi²tãu³a¹ ko̱³nxe³ti³ kãi³yah³lxin¹ju³ta² wxã̱i³ti³nx2ti³xa³lho³la², Sũ̱³na² wãn³txa² kan²txi³ yxo²ĩ²yah³lxi¹nha²kxai³la².  
\v 9 Txa²wã¹sũ̱³na² wãn³txai²li² ya²la³lai²la¹wa². Wãn³txa² e³kxai²nãn²tu̱³ ya²la³tu̱³ ĩ³yũt1se³tu¹wa². A²nxe³jah¹la² hi²sen³su² ĩ³kaix1so¹nx2ti³ha²kxai³ Je³su² Kris²tu³jah¹la² Txa²wã¹hxi²kan¹ta² Si³yxau³jah¹lo²su² ha²kxai³ yxo²ĩ²yah³lxi¹lxa². Wxa²ẽ¹nãu³ai²na² ã³nũ²kxi¹nx2ti³sxã³ yxau²xai³lah³lxi¹lxa². A²nxe³jah¹lai²na² sa²kxai³lu² Txa²wã¹sũ̱³na² Ta²hai²la¹wa². 
\s1 Yxo²ĩ²tũ̱³ka̱³txa² ã³nhai²ta³lxi³ yxau²xai³jau³su² 
\p  
\v 10 Txa²wã³tã̱³nãu³xãi³. Ĩ³ye³kxi¹nx2ta¹tu¹wa². Wi¹lain³kxi²sah¹lxi³hẽ¹la². Je³su² Kris²tu³jah¹la² Txa²wã¹hxi²kan¹ta² Si³yxau³jah¹lo²su² ha²kxai³ nxe³te²na² a²wãn³txa² ĩ³yau¹ũ¹nx2ta¹tu¹wa². Ĩ³ye³ĩ³yi²lhon¹ta³kxi²sxã³ ã³nhai²ta³lxi³yah³lxi³txa³hẽ¹la². Hãi¹sxã³ wxa²ẽ¹nãn¹jau³xa² yxau³ka³na³ka³nat3sxã³ a̱in³nha¹jah³lxi³hẽ¹la². Ã̱³lxa²txi³ a̱in³waun¹txi³nyhu¹ah³lxi³txa³hẽ¹la². Ko̱³nxe³ti³ ĩ³yĩ¹li²waun¹nyhu¹ah³lxi³txa³hẽ¹la².  
\v 11 Txa²wã³tã̱³nãu³xãi³. Klo³e²yah³la² a²sa³wi³ha³lxa² ĩ³hen³txi³sain¹na²hẽ³la². Ĩ³ye³ĩ³yi²lhon¹ta³kxi²sxã³ ĩ³hait2ta³lxi³nyhu¹ah³lxi³ta¹hi¹nhẽ¹la².  
\v 12 Nxe³yah³lxin¹jau³xa²sa¹, wxa²ha³tih³xan¹tũ̱³ka̱³txi³ ĩ³nxa² a²wãn³txi³kxai³lu¹: 
\p — Txai²li² Pau²lah³lai²na² wãn³txa² sa²yxo²we¹jah¹lo²sa¹wi¹. Yxah³lxi¹nha²kxai³: 
\p — A³po²lah³lai²na² wãn³txa² sa²yxo²we¹jah¹lo²sa¹wi¹. Yxah³lxi¹nha²kxai³: 
\p — Txai²kxai³ Pe²jah³lai²na² wãn³txa² sa²yxo²we¹jah¹lo²sa¹wi¹. Yxah³lxi¹nha²kxai³: 
\p — Yxãn¹ta¹ txai²li² Kris²tu³jah¹lai²na² wãn³txa² sa²yxo²we¹jah¹lo²sa¹wi¹. Yxah³lxi¹nha²kxai³ yah³lxi³ta¹hi¹nhẽ¹la². Yau³xã̱³lxa³txi³ e³xai³yah³lxi³ta¹hi¹nhẽ¹la².  
\v 13 Nxe³yah³lxi¹nha²kxai³ Kris²tu³jah¹la²kxai³lu² ĩ³hait2ta³lxi²xai³hĩ̱³te²la¹xa³? Pau²lah³lo¹na² sa²kxai³lu² ĩ³hxi²kĩ¹la³kxi²nũ¹nx2tain¹te²la¹xã³? Pau²lah³la² ĩ³lxa² yxo²ĩ²yah³lxi¹nha²kxai³ ĩ̱³yau³xa² ũ³hũ̱¹kxi²sa²sai¹nx2tain¹thai¹la²? Hai³txi³ ti³he¹nx2nxa³wa². 
\p  
\v 14 Ĩ̱³yau³xa² ũ³hũ̱¹kxi²sa²sai¹nx2ti³xa³tai¹ti²tu³wa². Yxãn¹ta¹ Kris³po²ah³la² so¹lxi³ Kai²ah³la² so¹lxi³ tẽ³sxã³ ũ³hũ̱¹kxi²sa²sai¹ai¹na¹tai¹ti²tu³wa². Nxe³na¹jut3su² Txa²wã¹sũ̱³na² sa²nẽn¹kxi²na¹wa².  
\v 15 Nxe³ha²kxai³ hxi²kan¹txi³ e³yah²lxa³lxa². E³yah²lxan³te³nah¹lxi¹: 
\p — Pau²lah³lai²na² a²ĩ³lxa² yxo²ĩ²a¹ha²kxai³ ĩ̱³yau³xa² ũ³hũ̱¹kxi²sa²sai¹sa³na²hẽ³li¹. Yah³lxin¹jau³su², hxi²kan¹txi³ e³yah²lxan³tho³la².  
\v 16 Jã¹nxa¹jut3su² Es³te²fa³na²sah³la² nũ̱³ka̱³txa² tẽ³sxã³ ĩ̱³yau³xa² ũ³hũ̱¹kxi²sa²sai¹ain¹nũ³na¹tai¹tu³wa². A²nũ²a² ã̱³xa² ũ³hũ̱¹kxi²sa²sai¹nũ³na¹te²ta²hẽ³ku² nxa¹nha²wa². Yxãn¹ta¹ hãix1te²sĩ³lxi³nha³la². Te²na² so¹lxin³na³la².  
\v 17 A²nũ²a² tẽ³sxã³ ĩ̱³yau³xa² ũ³hũ̱¹kxi²sa²sai¹si¹sain¹jau³su² ĩ³sa²si¹hã³sai¹nxa³hẽ³la². Yxãn¹ta¹ Txa²wã¹sũ̱³na² wãn³txa² wi¹jau³xa² ĩ³yau¹ũ³nx2ti³si¹sain¹jau³su² ĩ³sa²si¹hã³sain¹na²hẽ³la². A²nũ²a² a²hoh³lxi³su² jau³khai³xa² e³nxa³hẽ³la². Kris²tu³jah¹la² ya³lu²kxi³nẽ³jau³xai³tã² hi³sa³ka³txa² ĩ³hxi²kĩ¹la³kxain¹ju³ta² so¹lxi³ e³a¹tai¹ti²tu³wa². Nxe³yãn¹ta¹ Je³su²jah³la² ya³lu²kxi²nẽ³jau³xai³tã² e³nxa³ke³la³te²kxai³ kwa²toh³lxi³jau³su² hĩ̱³nx2na³la². 
\s1 Txa²wã¹sũ̱³na² wãn³txa² wã³nxĩ¹ni² a²hoh³lxi³si² nxe³jau³su² 
\p  
\v 18 Nxe³yãn¹ta¹ Kris²tu³jah¹la² ya³lu²kxi²nẽ³ju³ta² hi³sa³ka³txa² ĩ³hxi²kĩ¹la³kxain¹ju³ta² nxe³jau³xai²na² te³nai¹nxa³te²na² yũ²na³la². óla² a²ẽ¹nãu³ai²na² ya³lu²ju³ta³nũ³a² ã³la² yũ²na³la², Kris²tu³jah¹lai²na² wãn³txa² yxo²ĩ²ai¹nxa³ha²kxai³la². Nxe³yãn¹ta¹ txa²wã¹ki̱³na¹xai²na² kwa²toh³lxi³jau³sxa³wa². Nxe³nxa²ha¹te¹ Kris²tu³jah¹lai²na² wãn³txa² yxo²ĩ²ki̱³sa²kxai³ txa²wã¹ẽ¹nãu³ai²na² ka³te̱³na² wi¹tãu³a¹ ã²la² ũ³hũ¹nẽ³na³la². Wãn³txa² wã³nxĩn¹jau³su² na³la².  
\v 19 Kxã³kxai³ Txa²wã¹sũ̱³na² ũ³wha²li¹jau³su² nxe³te³nah¹lxi¹: 
\q1 — A²nũ²a² a²hoh³lxi³si²ju³khai³xa² ã³na¹a¹tu¹wi¹. Te²yã¹nxe³sxã³ a²nũ²a² wain³txi³ wã²nxũ̱¹ha̱in³nhain¹ju³khai³xa² ã³na¹nũ³na¹tu¹wi¹. 
\m Nxe³ta¹hxai²hẽ¹la². Je³su² Kris²tu³jah¹la² ya³lu²kxi²nũ¹nhẽ³ju³ta² te³nai¹nxa³ha²kxai³ nxe² ũ³wha²li¹ta¹hxai²hẽ¹la². 
\p  
\v 20 Jã¹nxe³ju³kxai³lu² a²nũ²a² wãn³txa² a²hoh³lxi³su² te²na² kãi²nxa³ha²kxai³ ha³te̱h³nxã³nxa² ũ³wha²li¹txã³nxai³tã² ĩ³yau¹ũ³te²su² te²na² kãi²nxa³ha²kxai³ a²nũ²a² a²hoh³lxi³su² ha²kxai³ ĩ³ye³ĩ³yi²lhon¹ta³kxi²nyhu¹te²su² te²na² kãi²nxa³ha²kxai³ nxe²na³la². Txa²wã¹sũ̱³na² yen³nãu³a¹: 
\p — Kwa²toh³lxi³jau³xai²la¹wi¹, yuh³xai²nãn¹jau³xa²su¹. Txa²wã¹sũ̱³na² nxẽn³ta²wa². 
\p  
\v 21 Nxe³ha²kxai³ yuh³xai²nãn¹te²a² a²hoh³lxi³su² ju³ta² so¹lxi³ yũ³kxai²nãn²tu̱³ hxi²kan¹txi³ Txa²wã¹sũ̱³na² ĩ²hĩ̱³ki̱³sxa³wa². Nxe³yãn¹ta¹ Txa²wã¹sũ̱³na² wãn³txa² yxo²ĩ²te²su² te²a² so¹lxi³ a²ẽ¹na² sa²hau³ko³tain¹na³la². Txa²wã¹sũ̱³na² wãn³txa² ĩ³yau¹ũ³sĩ¹na¹jau³xa² a²nũ²a² ã̱³xa² kwa²toh³lxi³jau³hũ̱³ye²kxan²ti³ a²ẽ¹na² sa²hau³ko³tũ¹nhẽ³jau³xai²la¹wa². Nxe³ju³ta² so¹lxi³ Txa²wã¹sũ̱³na² ten³te²ju²hẽ³la².  
\v 22 Jã¹nxe³sxã³ Ju³te²an¹te²su² te²a² sa²kxai³lu² wã³nxĩn¹sxã³ kãi³ju³ta² so¹lxi³ te³nai¹nha²kxai³ Kre²ka² nũ̱³ka̱³txe²nãn¹te²su² te²a² sa²kxai³lu² a²hoh³lxi³sa²ju³ta² so¹lxi³ te³nai¹nha²kxai³ nxain¹na³la².  
\v 23 Nxain¹kxan²ti³ Je³su² Kris²tu³jah¹lo²su² te²kxai³lu² hi³sa³ka³txa² ĩ³hxi²kĩ¹la³kxain¹sxã³ ya³lu²kxi²nẽ³tai¹ti²tu³wa². Nxe³jau³xai²na² so¹lxi³ ĩ³yau¹ũ³nx2ti³jah¹lo²sa¹wa². Jã¹nxe³jau³xai²na² Ju³te²an¹te²su² te²a² ain³kxi²nha²kxai²nãn²tu̱³ ĩ³xa̱n³tai¹nha²kxai³ Ju³te²an¹te²sxa³te²a² ain³kxi²nha²kxai²nãn²tu̱³ kwa²toh³lxi³jau³su² yai¹nha²kxai³ nxe³yain¹na³la².  
\v 24 Nxe³kxan²ti³ a²nũ²a² ĩ²li³te²su² te²a² Txa²wã¹sũ̱³na² ĩ²sxã³ ĩ³so¹tu¹wa². Ju³te²an¹te²su² te²la³ ta̱³nxa² Ju³te²an¹te²sxa³te²su² te²la³ ta̱³nxa² Txa²wã¹sũ̱³na² hi²sen³su² ĩ²sxã³ ĩ³so¹tu¹wa². Nxe³te²nãn²tu̱³ Kris²tu³jah¹lo²su² te²kxai³lu² Txa²wã¹sũ̱³na² a²wã³nxĩn¹ye²kxe³la³ ha²kxai³ Txa²wã¹sũ̱³na² a²hoh³lxi³ye²kxe³la³ ha²kxai³ nxe²na³la². Kris²tu³jah¹lo²su² na³la².  
\v 25 Nxe³sxã³ a²nũ²a² yuh³xai²nãn¹te²a² a²hoh³lxi³su² ju³ta² jũ¹nxe² a²hoh³lxi³su² na³la². Nxe³yãn¹ta¹ Txa²wã¹sũ̱³na² wãn³txa² kwa²toh³lxi³jau³su² ki³lxo³yxah³lxin¹jau³xai²na² ã²la² ã³sen³sai¹sxã³ a²hoh³lxi³su² jau³xai²la¹wa². Te²yã¹nxe³sxã³ a²nũ²a² a²nũ³kxũn³ju³ta² jũ¹nxa² yũ²na³la². Nxe³yãn¹ta¹ Txa²wã¹sũ̱³na² kũ³we²ki²la² nũ³kxũ³nxa³ki³lxo³xa³lhin¹kxan²ti³ ã²la² ã³sen³sai¹sxã³ nũ³kxũn³khaix1nx2na³la². 
\p  
\v 26 Txa²wã³tã̱³nãu³xãi³. Ain³kxi²sah¹lxi³hẽ¹la². Txa²wã¹sũ̱³na² ĩ²sxã³ ĩ³so¹nx2ti³hĩ¹nai³tã² ĩ²xi²nha¹jah³lxi³hẽ¹la². Nxe³hĩ¹nai³tã² yuh³xai²nãn¹te²a² a²hoh³lxi³su² te² ĩ³nxa² ka³lxa¹yah³lxa³nha²kxai³ hxi²kan¹khai¹nxe³te² ĩ³nxa² ka³lxa¹yah³lxa³nha²kxai³ a²nũ²a² kãin² sa²nẽn¹kxi¹nx2ti³xa³ha²kxai³ nxe³nx2ti³tai¹ti²tu³wa².  
\v 27 Te²yã¹nxe³sxã³ yuh³xai²nãn¹te²a² a²hoh³lxi³su² te²a² kãin² yũ³yah²lxa³lxa². Nxe³yah²lxan³kxan²ti³ Txa²wã¹sũ̱³na² a²hoh³lxi³su² ju³ta² ne³ti³hi¹txa²lxi³ha²kxai³ ã³sen³sai¹ain¹yah³lxi¹lxa². Te²yã¹nxũn³sxã³ yuh³xai²nãn¹te²a² a²nũ̱³kxũn³ju³ta² kãin² yũ³yah²lxa³lxa². Nxe³yah²lxan³kxan²ti³ Txa²wã¹sũ̱³na² a²nũ³kxũ̱n³ju³ta² ĩ³nũ³kxũn³ti³nx2ti³ha²kxai³ ã³sen³sai¹ain¹yah³lxi¹lxa². Nxe³yah³lxin¹ju³tan¹te²kxa³ya̱³lhu² ãu²lxa²to³tain¹yah³lxin¹tu¹wa².  
\v 28 A²nũ²a² hxi²ka¹nxa³jah¹lo²hũ̱³jah¹la² Txa²wã¹sũ̱³na² ĩ²sxã³ ĩ³so¹ain¹na²hẽ³la². Ko̱³te²hũ̱³te²a² ĩ²sxã³ ĩ³so¹ain¹na²hẽ³la². Nxe³ha²kxai³ yuh³xai²nãn¹te²su² te²a² kãin²ki³lxo³nha²ju³ta² ã³na¹la³kxi²nha²ti³hi¹tu¹wa².  
\v 29 Jã¹nxe³jut3su² ha²kxai³ Txa²wã¹sũ̱³na² yen³nãu³a¹ hxi²kan¹txi³ yxo²kãin²txi³ e³te²sxa³yu²hẽ³la².  
\v 30 Txa²wã¹sũ̱³na² hi²sen³su² ka³te̱³na² wi¹tãu³la³ ũ³hũ¹nx2ti³na³la². Nxe³sxã³ Je³su² Kris²tu³jah¹la² ã³nũ²kxi²wxe³nũ¹nx2ti³na³la². Kris²tu³jah¹lai²na² sa²kxai³lu² txa²wã¹ki̱³na¹xai²na² a²hoh³lxi³su² nũ¹nhẽ³na³la². Kris²tu³jah¹lo²kxai³lu² yxo²ĩ²ki̱³sa²kxai³ Txa²wã¹sũ̱³nu²su² te²kxai³lu² wain³te²lo³tẽ³na³la². Nxe³ha²kxai³ wi¹lhin¹sxã³ yxau²xai³ti³hi¹tẽ³na³la². Ko̱³nxe³ti³ kãi³ki̱³kxa² yo³ha² ã³wa²su¹kxi²nẽ³sxã³ yxau³ya³nhẽ³na³la².  
\v 31 Nxe³ju³tai²li² Txa²wã¹sũ̱³na² ũ³wha²li¹txã³nxai³tã² nxe³te³nah¹lxi¹: 
\p — A²nũ²a² ĩ²li³te²a² wã²nxũ̱h¹ yxo²kãin²e³kxai²nãn²tu̱³ wai³nxa³wi¹. Yxãn¹ta¹ Txa²wã¹sũ̱³na² ĩ³hau³ko³tũ¹nhẽ³ju³ta² so¹lxi³ yxo²kãin²e³kxai²nãn²tu̱³ wain³na³li¹. Nxe³ta¹hxai²hẽ¹la². 
\c 2  
\s1 Je³su²jah³la² ya³lu²kxi²nẽ³jau³su² 
\p  
\v 1 Txa²wã³tã̱³nãu³xãi³. A²wi¹lhĩ¹nai³tã² Txa²wã¹sũ̱³na² wãn³txa² ĩ³yau¹ũ³nx2ti³te³lhxã³ wxã³na¹hĩ¹nai³tã² wãn³txa² wa³lxe³jau³su² e³kxi¹nx2ti³nxa³ha²kxai³ nxe³nx2ta¹tai¹ti²tu³wa².  
\v 2 Nxe³yãn¹ta¹ Je³su² Kris²tu³jah¹lai²na² wãn³txa² so¹lxi³ ĩ³yau¹ũ³nx2ta¹ju³ta² ten³sa³hẽ¹la². Hi³sa³ka³txa² ĩ³hxi²kĩ¹la³kxai¹nha²kxai³ ya³lu²kxi²nẽ³ju³ta² so¹lxi³ ĩ³yau¹ũ³nx2ta¹tai¹ti²tu³wa². Yau³xã̱³xa² yxo²ha³kxa¹ nxe³wã²na³a¹tai¹ti²tu³wa².  
\v 3 Nxe³nx2ta¹hĩ¹nai³tã² ya³lo³txi³na¹ju³ta² yũ³sa²nxa³ha²kxai³ yuh³lxi³sa²sxã³ ka³ta̱³ta̱³sa³ha²kxai³ sa³tai¹ti²tu³wa², Sũ̱³na² wãn³txai²na² wain³txi³ ĩ³yau¹ũ³nx2ti³nxa³kxa²ya̱n³txi³sa³.  
\v 4 Txa²wãn³txa² e³kxi¹nx2ta¹jau³su² wa³lxe³txa³ha²kxai³ yuh³xai²nãn¹te²a² a²hoh³lxi³su² jau³xa² e³kxi¹nx2ti³nxa³ha²kxai³ nxe²nx2ta¹tai¹ti²tu³wa². Hãi¹sxã³ Txa²wã¹sũ̱³na² Yãu³ka³jxah¹la² ĩ³hxi²kat1sa²jau³su² wxi²kan¹txi³ ĩ³yau¹ũ³nx2ta¹tai¹ti²tu³wa². Nxe³nx2ta¹ju³tan¹te²kxa³ya̱³lhu² Kris²tu³jah¹la²kxai³ yxo²ĩ²yah³lxin¹tai¹ti²tu³wa².  
\v 5 Nxe³sxã³ yxo²ĩ²yah³lxin¹ju³ta² hai³txi³ a²nũ²a² a²hoh³lxi³su² khai³xan¹jau³xa² hxi²kan¹txi³ ã³nhxi²wxe³nũh¹ki̱³sxa³wa². Txa²wã¹sũ̱³na² wãn³txa² wã³nxi̱n¹jau³khai³xai²la¹wa². Nxe³jau³xai²na² so¹lxi³ ã³nhxi²wxe³nũh¹ki̱³tã³la². 
\s1 Txa²wã¹sũ̱³na² wãn³txa² a²hoh³lxi³su² jau³su² 
\p  
\v 6 Nxa²ha¹te¹ Txa²wã¹sũ̱³na² wãn³txa² ã³ne³wxe³te²su² te²a² kãi²non³te²na² so¹lxi³ wãn³txa² a²hoh³lxi³su² jau³xa² ĩ³yau¹ũ³ai¹na¹wa². Yuh³xai²nãn¹te²a² a²hoh³lxi³su² jau³xa² e³nxa³ha²kxai³ yuh³xai²nãn¹te³a³ hxi²kan¹te²na² wãn³txa² a²hoh³lxi³su² jau³xai²li² e³nxa³ha²kxai³ te²sa¹wa². A²nxe³jau³xai²na² yxo²ha³kxa¹ ye³jen¹na² ã³wa²sut1sxã³ ne³ki³son³tu¹wa².  
\v 7 Txa²wã¹sũ̱³na² a²hoh³lxi³su² jau³xa² so¹lxi³ e³a¹wa². A²nũ²khai³xa² ko̱³nhain¹jau³sxa³wa². A²wi¹lhĩ¹nu¹tai²nãn²tu̱³ txa²wã¹ha³lo²a² yũ²nxa³hĩ¹nũ¹tai²nãn²tu̱³ Txa²wã¹sũ̱³na² hi²sen³kxai³lu² a²ẽ¹nãn¹jau³kxai³ e³te³nah¹lxi¹: 
\p — A²nũ²ai²na² sa²kxai³lu² Txa²ki³lha³lxa² yxo²ĩ²te²na² sa²kxai³lu² wi¹lhin¹ti³hi¹tai¹na¹tũ¹xã¹. Txa²ki³lha³lxai²na² sa²kxai³lu² ĩ³hxi²kĩ¹la³kxi²sxã³ su²lhã³ain¹tũ¹xã¹. Nxain¹kxai²nãn²tu̱³ ko̱³nxe³ti³ kãi³ain¹ju³ta² sa²wa²su¹kxai¹na¹tũ¹xã¹. Txa²wẽ³sa² yã¹xain¹tũ¹xã¹. Txa²wã¹sũ̱³na² a²ẽ¹nãn¹jau³kxai³lu² nxe³ta¹hxai²hẽ¹la². Nxe² kãi³jau³nũ³a² Txa²wã¹sũ̱³nu²kxai³lu² a³la³kxi²ta¹hxai²hẽ¹la².  
\v 8 Yuh³xai²nãn¹te²a² a²hxi²kan¹ti³nãu³xai²na² Txa²wã¹sũ̱³na² a²hoh³lxi³su² jau³xa² a³la³kxain¹jau³sxa³wa². A³la³kxain¹ke³la³te²kxai³ Txa²wã¹hxi²kan¹ta² Si³yxau³jah¹la² Txa²wã¹sũ̱³na² Tah²si²ha²kxai³ tẽ³sxã³ hi³sa³ka³txa² ĩ³hxi²kĩ¹la³kxai¹nhĩ̱³nx2nxa³wa².  
\v 9 Jã¹nxe³jut3su² Txa²wã¹sũ̱³na² ũ³wha²li¹txã³nxai³tãn¹jau³xa² e³te³nah¹lxi¹: 
\q1 — Txa²wã¹sũ̱³na² a³lxi²ki̱³te²nãu¹xai²na² Txa²wã¹sũ̱³na² hxi²ki³kxai³lu² yen³kxa² wi¹te²a² ãu¹la³kxi²nẽ³na²hẽ³li¹. A²nxe³te²na² txa²wã¹ye³na² ĩ²ki̱³sxa³ha²kxai³ txa²wã¹ne³nxẽ³na² ain³kxi²nha²ki̱³sxa³ha²kxai³ txa²wã¹ẽ¹nãu³a² a³la³kxi²ki̱³sxa³ha²kxai³ ki̱³sxa³ju³tai²la¹wi¹. Wi¹ju³ta³nũ³a² so¹lxi³ yũ³nẽ³tu¹wi¹. 
\m Nxe³ta¹hxai²ti³ai¹ti²tu³wa². 
\p  
\v 10 Nxe³ha²kxai³ Txa²wã¹sũ̱³na² wã²nxũ̱h¹ a̱u³txi³ e³kxi²nha²jau³khai³xa² ĩ³yau¹ũ¹nhẽ³na³la². Txa²wã¹sũ̱³na² Yãu³ka³jxah¹la² hi²sen³su² ĩ³yau¹ũ¹nhẽ³jah¹lai²la¹wa². A²hoh³lxi³su² khaix1jah¹lai²la¹wa². Txa²wã¹sũ̱³na² a̱u³txi³ e³kxi²nha²jau³khai³xa² ĩ³yau¹ũ¹nhẽ³na³la².  
\v 11 Nxa²ha¹te¹ a²nũ²a² ka³na³ka³na³te²a² wã²nxũ̱h¹ e³kxi²nha²jau³xa² hxi²kan¹txi³ a²nũ²a² ã̱³xa² e³kxi²nha²ye²nyhu¹in¹jau³xa² ain³kxi²nyhu¹ki̱³te²sxa³yu²hẽ³la². Wãn³txa² wã²nxũh¹ e³kxi²nha²jah¹la² so¹lxi³ a³la³kxi²te²ju²hẽ³la². Te²yã¹nxe³sxã³ Txa²wã¹sũ̱³na² wã²nxũ̱h¹ e³kxi²nha²jau³xa² a²nũ²a² ã̱³xa² a³la³kxi²hĩ̱³ki̱³sxa³wa². Txa²wã¹sũ̱³na² Yãu³ka³jxah¹la² so¹lxi³ Txa²wã¹sũ̱³na² e³kxi²nha²jau³xa² a³la³kxi²hĩ̱³nx2na³la².  
\v 12 Nxe³ha²kxai³ Txa²wã¹sũ̱³na² hi²sen³su² A²yãu³ka³txi³khai³xa² nxũ²kwa̱i³yxau³nẽ³ye²si¹jau³nũ³su² ũ³hũ¹nẽ³na²hẽ³la². Hai³txi³ yuh³xan¹te²a² yãu³ka³txi³la³ ko̱³nxe³te²la³ ũ³hũ¹nẽ³lxa³hẽ³la². Yxãn¹ta¹ Txa²wã¹sũ̱³na² Yãu³ka³txa² ĩ³sa²si¹hã³ũh¹nẽ³kxah³lai²na² ũ³hũ¹nẽ³na²hẽ³la². Nxe³lha²kxai³ Txa²wã¹sũ̱³na² wãn³txa² ã³ne³wxe³nũh¹ki̱³tã³la². Txa²wã¹sũ̱³na² wi¹lhin¹sxã³ ĩ²nẽ³jau³nũ³su² ã³ne³wxe³nũh¹ki̱³tã³la². 
\p  
\v 13 Jã¹nxe³jau³su² wãn³txai²li² ĩ³yau¹ũ³nx2ta¹jau³xai²na² Txa²wã¹sũ̱³na² Yãu³ka³jxah¹la² ĩ³yau¹ũ¹sa²jau³xa² so¹lxi³ ĩ³yau¹ũ¹nx2ta¹wa². Hai³txi³ a²nũ²a² kwa² a²hoh³lxi³su² ki³lxo³te²a² wãn³txi³sxa³wa². Oh³nãn¹jau³xa² so¹lxi³ Txa²wã¹sũ̱³na² wãn³txa² so¹lxi³ tẽ³sxã³ ĩ³yau¹ũ³nx2ta¹wa².  
\v 14 Yxãn¹ta¹ a²nũ²ai²li² Txa²wã¹sũ̱³na² Yãu³ka³jxah¹la² nxũ²kwa̱i³yxau²nxa³jah¹la² sa²kxai³lu² hxi²kan¹txi³ Txa²wã¹sũ̱³na² wãn³txa² ã³ne³wxe³te²sxa³yu²hẽ³la². Hãi¹nxe³sxã³: 
\p — Kwa²toh³lxi³jau³syex1nx2na³li¹. Nxe³nyhu¹te²ju²hẽ³la². Txa²wã¹sũ̱³na² Yãu³ka³txai²na² nxũ²kwa̱i³yxau³jah¹la² so¹lxi³ oh³xai²nãn¹jau³xa² a³la³kxi²te²ju²hẽ³la².  
\v 15 Nxe³yãn¹ta¹ Txa²wã¹sũ̱³na² Yãu³ka³jxah¹la² nxũ²kwa̱i³yxau³jah¹la² sa²kxai³lu² ĩ²li³ju³ta² wi¹ta̱³nxa² wi¹lxa³ta̱³nxa² a³ya³txi²te²ju²hẽ³la². Yxãn¹ta¹ yuh³xai²nãn¹jau³xa² so¹lxi³ ain³kxi²jah¹la² sa²kxai³lu² ha³lo²a² wi¹ta̱³nxa² wi¹lxa³ta̱³nxa² hxi²kan¹txi³ a³ya³txi²te²sxa³yu²hẽ³la².  
\v 16 Nxe³jau³xai²li² Txa²wã¹sũ̱³na² ũ³wha²li¹txã³nxai³tãn¹jau³xa² e³te³nah¹lxi¹: 
\q1 — Txa²wã¹sũ̱³na² wã²nxũ̱h¹ e³kxi²nha²jau³xa² a³la³kxi²nũ¹te²la³ yũ³ki̱³te²sxa³yu²hẽ³li¹. A²nũ²a² Txa²wã¹sũ̱³na² ĩ³tih³nxe³ki̱³ju³ta² yũ³te²sxa³yu²hẽ³li¹. 
\m Nxe³ta¹hxai²hẽ¹la². Nxe³yãn¹ta¹ wã²nxũ̱h¹ Kris²tu³jah¹lai²na² a̱in³nha²jau³xa² so¹lxi³ ũ³hũ¹nẽ³na³la². 
\c 3  
\s1 Txa²wã¹sũ̱³na² wa³ka³la² kãi³ki̱³tã³la². 
\p  
\v 1 Txa²wã³tã̱³nãu³xãi³. Ain³kxi²sah¹lxi³hẽ¹la². Wẽ³ha³lxa² yã¹yxah³lxi¹lxa². Je³su²jah³lai²na² wãn³txa² kwẽn¹ta² yxo²ĩ² ã³si³wxe³jah¹la² yã¹yxah³lxi¹lxa². Yuh³xai²nãn¹ta² wãn³txa² so¹lxi³ ain³kxi²yah³lxi¹lxa². Wxa²ẽ¹nãu³ai²na² hxi²kan¹yah³lxa³nha²kxai³ hxi²kan¹txi³ wãn³txa² hxi²kan¹jau³la³ ĩ³yau¹ũ¹nx2ti³nxa³hẽ³la².  
\v 2 Wẽ³sai²na² a²su³su³yau³xa² so¹lxi³ i³te²ju²hẽ³la². Yain³txi³khai³xa² hxi²kan¹txi³ ĩ³yain³te²sxa³yu²hẽ³la². Jã¹nxe³jut3sũ̱³nxe²yah³lxi¹lxa². Txa²wã¹sũ̱³na² wãn³txa² kwẽn¹tai²na¹ yxo²ĩ² ã³si³wxe³te²yã¹yxah³lxi¹lxa². Txa²wã¹sũ̱³na² wãn³txa² wxi²kan¹jau³khai³xa² hxi²kan¹txi³ ã³ne³wxe³yah²lxa³lxa².  
\v 3 Yuh³xai²nãn¹jah¹la² yã¹nxe² yxau³yah³lxi¹lxa². Wxa²nũ̱³ka̱³txi³ ĩ³nxai²na² ĩ³ka³tã̱³nxe³nyhu¹ah³lxi¹nha²kxai³ kwa² wãn³txa² ĩ³ye³sxã³ ĩ³yi²yi²lhon¹ta³kxa¹ah³lxi¹nha²kxai³ nxe³yah³lxi³ta¹hi¹nhẽ¹la². Nxe³yah³lxi¹nha²kxai³ yuh³xai²nãn¹jah¹la² yã¹yxah³lxi¹lxa². Yuh³xai²nãn¹jah¹la² yã¹nxe² kãi³yah³lxi¹lxa².  
\v 4 Wxa²nũ̱³ka̱³txai²na² ĩ²li³te²a² e³lah³lxin¹te³nah¹lxi¹: 
\p — Pau²lah³lai²na² wãn³txa² so¹lxi³ sa²yxo²we¹jah¹lo²sa¹wi¹. Nxe² e³i², ãh¹ ĩ²li³te²a² e³lah³lxin¹te³nah¹lxi¹: 
\p — Txai²li² A³po²lah³lai²na² wãn³txa² so¹lxi³ sa²yxo²we¹jah¹lo²sa¹wi¹. Nxe² e³i², nxe³yah³lxin¹kxai²nãn²tu̱³ yuh³xai²nãn¹jah¹la² yã¹nxe² kãi³yah³lxi³hĩ̱³nxa¹lxa². 
\p  
\v 5 Nxe³ha²kxai³ A³po²lah³lai²li² hxi²kan¹jah¹lo²sxa³wa². Te²yã¹nxe³sxã³ txai²li² Pau²lah³lo²na¹xai²li² hxi²kan¹jah¹lo²su²nũ³nxa³wa². Hãi¹sxã³ Txa²wã¹sũ̱³na² a²sa³wi³ha³lxi³su² sĩ¹na¹wa². Txa²wã¹sũ̱³na² wãn³txa² ĩ³yau¹ũ¹nx2ti³sĩ¹na¹ha²kxai³ yxo²ĩ² ã³si³wxe³yah³lxin¹tai¹ti²tu³wa². Txa²wã¹sũ̱³nai²li² ĩ³kwa³na³sa²sĩ¹nha²kxai³ ju¹tai²li² ĩ³yau¹ũ²xai³nxa²lxi³sĩ¹na¹wa².  
\v 6 Hai³sxai²na² wa³kon³ki̱³ju³ta² yã¹nx2na³la². Hai³sxai²na² ũ³whĩ̱¹ki̱³jut3sũ³nxe² Txa²wã¹sũ̱³na² wãn³txa² ĩ³tih³nxe³nx2ta¹tai¹ti²tu³wa². Yain³ta³ne³kxa² ĩ̱³yau³xa² ũ³wha̱³kxi²ki̱³jut3sũ³nxe² A³po²lah³lai²kxai³ Txa²wã¹sũ̱³na² wãn³txa² ĩ³yau¹ũ¹nx2ti³ta¹hẽ¹la². Nxe³nx2ti³ha²kxai³ Txa²wã¹sũ̱³na² hi²sen³kxai³lu² yain³ta³ne³kxai²na² ĩ³wi¹we¹kxa² yã¹nxe² a²nũ² ĩ³nxai²na² yxo²ĩ²si¹nx2ti³na³la².  
\v 7 Nxe³yãn¹ta¹ ki¹ai²na² ũ³whĩ̱¹jah¹lai²li² hai³txi³ hxi²kan¹jah¹lo²sxa³ha²kxai³ ka³lũ̱³ju³ta³nũ³a² ĩ̱³yau³xa² ũ³wha̱³kxi²jah¹lai²li² hai³txi³ hxi²kan¹jah¹lo²sxa³ha²kxai³ nxe³te²ju²hẽ³la². Nxe³yãn¹ta¹ Txa²wã¹sũ̱³nai²na² so¹lxi³ yain³ta³ki³ai²na² ka³lũ̱³ti³hi¹tha²kxai³ wi¹wen¹ti³hit1tha²kxai³ nxe³te²ju²hẽ³la². Nxe³jah¹la² so¹lxi³ hxi²kan¹sa²sai¹jah¹lai²la¹wa².  
\v 8 Nxe³ha²kxai³ ũ³whĩ̱¹kxi²jah¹lo²su² ta̱³nxa² ĩ̱³yau³xa² ũ³wha̱³kxi²jah¹lo²su² ta̱³nxa² ã³sen³sai¹nyhu¹ki̱³ju³ta³la³ yũ³ai¹nxa³wa². A²hxi²kan¹ju³ta² hau³kon³yah³na³la². Wi¹kãi³xa² ai³ya³ha²kxai³ Txa²wã¹sũ̱³na² ũ³yho³hxi²te²ju²hẽ³la².  
\v 9 Jã¹nxe³nha¹ha²kxai³ Txa²wã¹sũ̱³na² wa³ka³li³lot3sa²tũ̱³ka̱³txi³si²nha¹wa². Nxe³ha²kxai³ wxãi²na² Txa²wã¹sũ̱³na² hai³sxa² yã¹xah³lxi¹lxa². Nxe³nx2ta¹ti²tu³wa². Te²yã¹nxe³nũn³sxã³ Txa²wã¹sũ̱³na² sxi²ha² yã¹yxah³lxi³nũ³ni¹lxa².  
\v 10 Sxi²ha² txah³lxa³kxa² a̱u³txi³ ã³kat1ta³ka³ta³nũ³su² ũ³wha¹kxi²ju³ta²yã¹nxe²na³la², Kris²tu³jah¹la²sa². A̱u³txi³ ã³ka³ti³si¹hin¹jau³su² ũ³si³ya³ki̱³kxai²nãn²tu̱³ sxi²ha² hai³txi³ ã³ya³hxi²sxã³ ã³kho³te²sxa³yu²hẽ³la². Jã¹nxe³jut3sũ̱³nxe² khãuh³lxa³txon³nyhah¹lxin¹kxa²ya̱n³txi³su² Kris²tu³jah¹lai²na² wãn³txa² yxo²ĩ²ah³lxi³si¹nx2ta¹jau³su² ĩ³yau¹ũ¹nx2ti³to³ha¹tai¹ti²tu³wa². Txa²wã¹sũ̱³na² hi²sen³kxai³lu² yxo²ĩ²xa³te²nãu³xa² ĩ³yau¹ũ³si¹hai¹na¹jau³su² ĩ³hxi²kat1sain¹na²hẽ³la². Jã¹nxe³kxe³su² Kris²tu³jah¹lai²na² wãn³txan²tu̱³ ĩ³hen³txi³ki̱³kxe³su² sxi²ha² a̱u³txi³nãu³xa² yã¹nx2na³la². Txai²yã¹nxe³sxã³ a²nũ²a² ã̱³xa² wi¹lĩ³sxa³kat3sũ̱³na³la². A²nxe³te²na² sxi²ha² txon³tũ̱³ka̱³txa² yã¹nxain¹na³la². Wain³txi³ ĩ³tih³nxe³txai¹lxa².  
\v 11 Jã¹nxe³ju³kxai³lu² Txa²wã¹sũ̱³na² hi²sen³kxai³lu² Je³su² Kris²tu³jah¹la² ĩ³sa²si¹hã³ũ¹nhẽ³na²hẽ³la². Ĩ³sa²si¹hã³sxã³ ĩ³ye³kxi²nẽ³te³nah¹lxi¹: 
\p — Txa²ki³lha³lxa² so¹lxi³ yxo²ĩ²sa²tẽ³jah¹lxi³hẽ¹li¹. A²nũ²a² ã̱³xai²na² yxo²ĩ²ah³lxi³txa³hẽ¹li¹. Nxe³nẽ³lain¹na²hẽ³la². A²nxe³jah¹la² sxi²ha² txah³lxa³ki³a² a̱u³txi³ ũ³si³ya³kxi²ki̱³ka³ta² yã¹nxe² Txa²wã¹sũ̱³na² A²ki³lha³lxa² ũ³whxe³ũ¹nhẽ³na²hẽ³la². Nxe³ju³tan¹te²kxa³ya̱³lhu² yxo²ĩ²ki̱³kxai²nãn²tu̱³ en²nẽ³nxa³lho³la².  
\v 12 Nxe³tũ̱³ka̱³txai²na² sxi²ha² ton³tũ̱³ka̱³txa² yã¹nxain¹na³la². Jã¹nxe³nũ²la² a²nũ²a² ĩ²li³te²a² ou²ro²ki³su² ta̱³nxa² pra²ta²ki³su² ta̱³nxa² txah³lxa³kxa² a³lxi²ki³a² ĩ²li³ki³su² ta̱³nxa² nxe³ki³a² tẽ³sxã³ sxi²ha² wi¹thĩ³na² txo³nai¹nhĩ̱³nx2na³la². A²nxe³thĩ³nai²na² wãn²ju³ta³la³ yũ³hĩ̱³nx2nxa³wa². Jã¹nxe³jut3sũ̱³nxe² ĩ³tih³nxe³nx2ti³tũ̱³ka̱³txa²kxai³ wain³jau³su² ĩ³tih³nxe³nx2ti³kxai²nãn²tu̱³ sxi²ha² wã²nxa³thĩ³na² ton³tũ̱³ka̱³txa² yã¹nxain¹na³la². Te²yã¹nxũn³jut3su² a²nũ²a² ã̱³xa² hi³sa³kat3su² ta̱³nxa² wa̱i³nhxãn³sxu² ta̱³nxa² si³sa³nxãn³su² ta̱³nxa² nxe³sxã³ tẽ³nũ²la² sxi²ha² txo³nai¹nhĩ̱³nx2na³la². A²nxe³thĩ³nai²na² wãn²ju³ta² yũ³hĩ̱³nx2na³la². Jã¹nxe³jut3sũ̱³nxe² ĩ³tih³nxe³nx2ti³tũ̱³ka̱³txa² wai³nxa³jau³su² ĩ³tih³nxe³nx2ti³kxai²nãn²tu̱³ sxi²ha² wãn²thĩ³na² ton³tũ̱³ka̱³txa² yã¹nxai¹nhĩ̱³nx2na³la².  
\v 13 Nxain¹kxai²nãn²tu̱³ kxã³non³tãu³a¹ Kris²tu³jah¹la² a³ka³nxi²sxã³ wxã³tãu³a¹ txa²wã¹wa³ka³li³yu³ta² ĩ²te³lhxã³ wxã³tãu³a¹ kãi³ki̱³ju³ta² ĩ²nẽ³lain¹tu¹wa². Kãi³ki̱³ju³ta² wi¹ta̱³nxa² wi¹lxa³ta̱³nxa² e³lxah¹ ĩ²nẽ³lain¹tu¹wa². Ĩ²nẽ³lhxã³ a³ya³txi²sxã³ ĩ³yĩ¹li²nẽ³tu¹wa². Ĩ³yĩ¹li²nẽ³ju³ta² ha³nxe²a² yã¹nxe³hĩ̱³nx2na³la². Kãi³ki̱³ju³ta² ha³nxe²a² yan³sxã³ wãn²ki̱³kxa² yã¹nxe³sxã³ Kris²tu³jah¹lai²na² ĩ²nẽ³lhãn²sxã³ ĩ³yĩ¹li²nẽ³lain¹tu¹wa².  
\v 14 A²nxe³jah¹la² sxi²ha² txon³thĩ³na² wã²na³kxi²ti³hi¹txa³jah¹lo²su² kxai²nãn²tu̱³ wi¹wi¹nxe² ũ³yho³hi²nyhain¹tu¹wa².  
\v 15 Nxe³yãn¹ta¹ sxi²ha² ũ³txo³nain¹ju³ta² wã²nhxan³kxai²nãn²tu̱³ ũ³yho³hi²kxe³nũ³a² tĩ̱¹kxi²hĩ̱³nx2na³la². Nxe³ha²kxai³ sxi²ha² ũ³ton³jah¹la² sa²kxai³lu² ha³nxe²a² wãn²kxi²kxai²nãn²tu̱³ a²nũ²a² so¹lxi³ ih³hĩ̱³nx2na³la². Nxe³kxa² yã¹nxe² Txa²wã¹sũ̱³na² wa³ka³li³yu³ta² wi¹kãi³xa³te²su² te²a² a²yo³ha² yũ³hĩ̱³nx2nxa³wa².  
\v 16 Nxe³yãn¹ta¹ wxa²nũ̱³ka̱³txi³ ĩ³nxai²na² Je³su²jah³lai²na² wãn³txa² yxo²ĩ²yah³lxin¹te² ĩ³nxai²na² Txa²wã¹sũ̱³na² sxi²ha² yã¹xah³lxi¹lxa². Txa²wã¹sũ̱³na² Yãu³ka³txa² nxu²kwa̱i³yxau³nx2ti³na³la².  
\v 17 Jã¹nxe³jut3su² Txa²wã¹sũ̱³na² sxi²ha² yxo²ha³kxa¹ wi¹lhin¹khai¹nx2na³la². Wxa²nũ̱³ka̱³txi³ ĩ³nxai²na² Txa²wã¹sũ̱³na² sxi²su² yã¹xah³lxi¹lxa². Nxe³ha²kxai³ Txa²wã¹sũ̱³na² sxi²ha² sa²nai¹te³lhxã³ a²nũ²a² nxe³ke³la³te²kxai³ a²nxe³te²a² sa²kxai³lu² Txa²wã¹sũ̱³na² hi²sen³su² ko̱³nxe³ti³ ĩ³yĩ¹li²tu¹wa². 
\p  
\v 18 Nxa²ha¹te¹ wxa²ẽ¹nãu³ai²na² ĩ³ki³ha¹kxi²nha²yah³lxi³txa³hẽ¹la². Wxa²nũ̱³ka̱³txi³ ĩ³nxai²na² wãn³txi³kai³lu¹, e³yah³lxin¹te³nah¹lxi¹: 
\p — Txai²na² a²nũ²a² a²hoh³lxi³sa²ju³ta² yũ³na¹nha¹. Nxa¹ha²kxai³ a²hoh³lxi³sa¹nha¹. Wxa²ẽ¹nãn¹jau³xa² yah³lxin¹kxai²nãn²tu̱³ hai³txi³ a²hoh³lxi³syah¹lxi³hĩ̱³nx2nxa³lxa². Oh³xai²nãn¹ta² a²hoh³lxi³su² jah¹la² so¹lxi³ a²hoh³lxi³khai³lxa³ hĩ̱³nx2na³la². 
\p — Nxe³jau³xai²na² kwa²toh³lxi³jau³xai²la¹wi¹. Yuh³xai²nãn¹te²su² te²a² nxe³nx2tai¹nha³ta²wa².  
\v 19 Nxe³sxã³ yuh³xai²nãn¹te²a² a²hoh³lxi³su² jau³xai²na² sa²kxai³lu² Txa²wã¹sũ̱³na² ye³ĩ²tãu³a² kwa²toh³lxi³jau³su² na³la². Nxe³sxã³ Txa²wã¹sũ̱³na² ũ³wha²li¹txã³nxai³tãn¹jau³xa² e³te³nah¹lxi¹: 
\p — Yuh³xai²nãn¹te²a² a²hoh³lxi³su² te²su² te²a² ku³kuh³nxe² e³te²ju²hẽ³li¹. Nxe³te²na² Txa²wã¹sũ̱³nu²su² hi²sen³su² kwa²to³toh³lxi³jau³xai²la¹wi¹. Nxe² ĩ³yĩ¹li²jah¹lai²la¹wi¹. Nxe³ta¹hxai²hẽ¹la².  
\v 20 Te²yã¹nxe³te³nah¹lxi¹: 
\p — Yuh³xai²nãn¹te²a² a²hoh³lxi³su² ju³ta² hai³txi³ wã³nxĩn¹te²sxa³yu²hẽ³li¹. Kwa²hãi¹nxe² toh³lxi³jut3su² te²ju²hẽ³li¹. Txa²wã¹hxi²kan¹ta² Si³yxau³jah¹lai²na² so¹lxi³ ju¹tai²li² wi¹la³la³kxi²te²ju²hẽ³li¹. Nxe³ta¹hxai²hẽ¹la².  
\v 21 Nxe³ha²kxai³ yuh³xai²nãn¹te²a² a²hoh³lxi³su² jah¹la² ã³si³tẽ³kxi²te² ĩ³nxai²na² yxo²kãin²txi³ ãu²la²ti³ e³yah³lxi³txa³hẽ¹la². Txa²wã¹sũ̱³na² hi²sen³kxai³lu² yen³kxa² yxo²ha³kxa¹ ũ³hũ¹nẽ³kxai²la¹wa².  
\v 22 Pau²lah³lo²na¹xai²na², A³po²lah³la², Pe²jah³la², nxe³sĩn¹sxã³ hxi²nũ¹nxa²lxi³si¹sa²sĩn¹jau³su² Txa²wã¹sũ̱³na² ũ³hũ¹nxa²sah¹lxi³sĩn¹na³la². Wi¹lhin¹nxa²lxi³si¹sĩn¹jau³su² Txa²wã¹sũ̱³nu²su² te²kxai³lu² txa²wã¹ha³lo²a² ũ³hũ¹nxa²lxi³na³la². Ka³te̱³na² wi¹tãu³a² ũ³hũ¹nxa²lxi³na³la². Ya³lu²yah³lxin¹kxan²ti³ wi¹lha²hau³ko³tũh¹nxa²lxi³tu¹wa². Yen³kxa² tau³ton³kxi¹nx2ti³kxa² Txa²wã¹sũ̱³nu²su² te²kxai³lu² ũ³hũ¹nxa²lxi³tu¹wa². Ha³lo²a² hãi¹nxe³ti³xa¹ ũ³hũ¹nxa²lxi³tu¹wa².  
\v 23 Nxe³nxa²ha¹te¹ Kris²tu³jah¹lai²na² sa²kxai³lu² Wxa²hxi²kan¹txa² Si³yxau³jah¹lai²la¹wa². Jã¹nxũn³sxã³ Kris²tu³jah¹lai²na² sa²kxai³lu² Txa²wã¹sũ̱³na² Ta²hai²la¹wa². 
\c 4  
\s1 Kris²tu³jah¹la² ĩ³sa²si¹hã³sa²sĩn¹jau³su². 
\p  
\v 1 A³po²lah³la² txai²na² nxe³sxã³ Kris²tu³jah¹la² ĩ³sa²si¹hã³sa²sĩn¹na²hẽ³la². Txa²wã¹sũ̱³na² wãn³txu¹tai²na² hãi³jau³xu¹tai²na² ĩ³yau¹ũ³sain¹sĩn¹jau³xa² ĩ³hen³txi³jah¹lo²su² sĩ¹na¹wa².  
\v 2 Nxe³na¹kxa²yã¹nxe³te²he³la³kxi³ ĩ³nxai²na² sa²kxai³lu²: 
\p — Txa²wã¹sũ̱³na² wãn³txa² a²yxo²ha³kxa¹ sa²wai³wait3sxã³ wi¹kãi³xa²xai³txai¹lxi¹. Nxe³te²ju²hẽ³la².  
\v 3 Jã¹nxa¹jut3su² a²nũ²ai²li² ĩ²sa²sxã³ ĩ³yĩ¹li²sa²ju³ta³nũ³a² hxi²waun³txin²nxa³lho³la². Wxãi²la³ ta̱³nxa² a²nũ²a² hxi²kan¹te²la³ ta̱³nxa² ĩ³yĩ¹li²sa²ju³ta³nũ³a² hxi²waun³txin²nxa³lho³la². Kãi³a¹ju³khai³su² kxan²ti³ ĩ²nha²sxã³ ĩ³yĩ¹li²nha²ye²sa²nxa³lho³la².  
\v 4 Txa²ẽ¹nãu³ai²na² ko̱³nxe³ti³ kãi³a¹ju³ta² txai²na² ĩ²nha²nxa³nha²wa². Wã²nxũ̱h¹lxi³txi³ wi¹lhin¹ti³hi¹nha²ju³ta³la³ te²txã³wa². Txa²wã¹hxi²kan¹ta² Si³yxau³jah¹lai²na² so¹lxi³ ĩ²sa²sxã³ ĩ³yĩ¹li²sa²ju³ta³nũ³su² hxi²ka¹nhĩ̱³nx2na³la².  
\v 5 Jã¹nxe³sxã³ a²nũ²ai²li² ko̱³nxe³ti³ ĩ²yĩ¹li²hain¹yah³lxi³txa³hẽ¹la². Ha³lo²a² ã³nhau³ko³txã³wa². Nxe³ta¹ Txa²wã¹hxi²kan¹ta² Si³yxau³jah¹lai²na² a³ka³nxi²ju³ta² wah³nxe³jah³lxi³hẽ¹la². A³ka³nxi²hĩ¹na¹ a²nũ²a² hãi³jau³xa² a²ẽ¹na² a̱u³txi³ hãi³jau³xa² yxo²ha³kxa¹ ĩ³yau¹ũ¹nhẽ³tu¹wa². A²ẽ¹na² ko̱³nxe³ti³ kãi³so¹nhain¹ju³ta² yxo²ha³kxa¹ ĩ³ko²ko²txa²ne¹nhẽ³tu¹wa². Jã¹nxe³sxã³ Txa²wã¹sũ̱³na² hi²sen³kxai³lu² a²nũ²ki̱³na¹xai²na² sa²nẽn¹kxi²xai³nẽ³tu¹wa². 
\p  
\v 6 Txa²wã³tã̱³nãu³xãi³. Wain³txi³ ĩ³yau¹ũ¹nx2ta¹jau³su² txai²na² Pau²lah³lo²na¹xai²na² A³po²lah³lai²na² kãi³a¹jau³hũ̱³jau³sye¹nx2ti³na³la². Wxa²hxi²kan¹jah¹lo²nãu³xa² txai²la³ ta̱³nxa² A³po²lah³lai²la³ ta̱³nxa² ĩ²li³te²a² hxi²kan¹te²su² te²la³ ta̱³nxa² ã³kãi³xai³ju³tai²na² so¹lxi³ sa²nẽn¹kxi²xai³txai¹yah³lxi³hẽ¹la². Nxe³yãn¹ta¹ a²nũ²a² ã̱³xa² ã³kãi³nũn³ju³tai²na² ã³kãi³so¹ain¹sxã³ sa²nẽn¹kxain¹yah³lxi³txa³hẽ¹la². A²nũ²a² ã̱³xa² ha³ya³kxa³lxi³su² hi¹ain¹jau³su² ĩ³kã̱u³kxain¹yah³lxi³txa³hẽ¹la².  
\v 7 Ĩh¹te²a² hxi²ka² sa²sen³sai¹sxã³ hxi²kan¹te²lo³txa²lxi³te²la¹xã³? Txa²wã¹sũ̱³na² hi²sen³su² yen³kxa² yxo²ha³kxa¹ ũ³hũ¹nx2ti³xa³lhai¹la²? Nxe³ha²kxai³ ĩh¹nxe³kxa²ya̱n³ti³ta̱³ nũh¹ so¹kxi²ki³lxo³nyhah¹lxin¹te²la¹xã³? Yxo²kãin² e³yah³lxin¹kxan²ti³ Txa²wã¹sũ̱³na² hxi²ki³kxai³lu² yen³kxa² yxo²ha³kxa¹ ũ³hũ¹nx2ti³jah¹lai²la¹wa². 
\p  
\v 8 Nxe³sxã³ wxa²ẽ¹nãn¹jau³kxai³lu¹: 
\p — Yen³kxa² yxo²ha³kxa¹ yũ³sĩ¹na¹xã¹. Yen³kxih³khaix1sĩ¹na¹xã¹. Ha³lo²a² wa³kxẽn³sa²sĩ¹na¹xã¹. Yxãn¹ta¹ wxa²nũ̱³ka̱³txai²li² yah³lxi³sĩ¹nxã³xã¹. Yah³lxin¹jau³su² ya²la³tu̱³ ha³lo²a² wa³kxẽn³ti³nãu³su² yah³lxin¹ke³la³te²kxai³ ha³lo²a² yxo²ha³kxa¹ hau³ko³ja³syah¹lxi³si¹hĩ̱³nx2na³la². Yxãn¹ta¹ yxah²lxa³lxa².  
\v 9 Je³su²jah³la² ĩ³kaix1so¹sain¹sĩn¹nha²wa². Nxe³kxan²ti³ ã³si³wxẽ̱³not3sa²sĩn¹ta²nũ³nha²wa². A²nũ²a² su²lhã³tũ̱³ka̱³txi³ hũ̱³sa²sĩn¹nha²wa². Ĩ²sa²sãn²sĩn¹sxã³ ko̱³nxe³ti³ kãi³tũ̱³ka̱³txa² yã¹nxa² su²lhã³te³lhxã³ sa²sĩn¹ta²nũ³nha²wa². Oh³xan¹tũ̱³ka̱³txa² ĩ²i², yuh³xan¹tũ̱³ka̱³txa² ĩ²i², nxe²sain¹sĩn¹nha²wa².  
\v 10 Nxe³ha²kxai³lu¹ Kris²tu³jah¹la² wãn³txa² sa²yxo²we¹tha²kxai³ kwa²toh³lxi³jau³su² e³e¹nx2ti³sĩ¹na¹wa². Wxãi²na² Kris²tu³jah¹la² ã³nũ²kxi¹nx2ti³ha²kxai³ a²hoh³lxi³su² khai¹yxe²yah³lxi³nhi¹lxa². Hxi²tha²on³sa²sĩn¹kxan²ti³ nũ³kxũn³khaix1ye²yah³lxi³nhĩ¹lxa². Ko̱³te³kxi²sain¹sĩn¹kxan²ti³ wxãi²na² sa²nẽn¹kxi¹nx2tain¹sĩn¹na³la².  
\v 11 Ye³ka³lxa¹txi³ he³ja³lu²sa²to³sĩ¹nha²kxai³ ya̱³lxu²ja³lu²sa²to³sĩ¹nha²kxai³ sa²sĩn¹toh³na³la². Wãn²txa²sa²to³sĩ¹nha²kxai³ kãin² waix1sain¹to³sĩ¹nha²kxai³ nxe³sain¹te²sa²sĩ¹na¹wa². Hai³txi³ txa²sxi²khai³lxa³ yũ³sa²sĩ¹nxa³wa².  
\v 12 Txa²yain³txa² so¹kxi²te³lhxã³ kãin² wa³kon³nha¹wa². Yxo²xũn³txi³ ĩ³ye³kxi²sain¹sĩn¹kxan²ti³ wi¹lhit1sxã³ ĩ³yĩ¹li²hain¹nha¹wa². Nũ̱³kxũn³txi³ khãuh³lxa³txi³sain¹sĩn¹kxan²ti³ ya³nãn³ta³ki²la²sxã³ yxau²xai³sĩ¹na¹wa².  
\v 13 Ko̱³te³kxi²sain¹sĩn¹kxan²ti³ wãn³txa² wi¹jau³xa² ĩ³wa²lũ³xain¹nha¹wa². A²kuh³lxa³txi³su¹ syex1tain¹sĩn¹na³la². Nxe³hĩ¹nãn¹te²tu̱³ sxi²ha² a²nxa³ti³ju³ta² ha³lo²a² sa²tã³kxi³te²jai¹ti²tu³wa². Jã¹nxe³jut3sũ̱³nxe² nxe³sain¹sĩn¹na³la². 
\p  
\v 14 Jã¹nxa¹jau³su² ũ³wha²li¹la³kxi¹nx2ti³sĩ¹na¹tãu³a² ãu²lxa²to³txa²lxa¹ju³ta² ten³sa²nxa³nha²wa². Hãi¹sxã³ txa²wẽ³ha³lxi³hũ̱³nxe² a³lxi²na¹kxa² yã¹nxe³sxã³ ĩ³tih³nxe³nx2ti³te³lhxã³ nxe³nx2ti³nha¹wa².  
\v 15 Ĩ³tih³nxe³nx2ti³jah¹la²nãu³xa² ka³lxa¹txi³ yũ³yah³lxin¹kxan²ti³ a²wĩ³nu²khai³xa² ka³na³ka³nat3sxã³ yũ³nx2ti³hĩ̱³nx2na³la². A²nxe³te²a² wxa²wĩ³nu²khai³hũ̱³na¹wa². Je³su²jah³lai²na² wãn³txa² wi¹jau³xa² a²wi¹lhĩ¹na² ĩ³yau¹ũ¹nx2ta¹tai¹ti²tu³wa². Nxe³nx2ta¹ha²kxai³ nxe³hĩ¹nãn¹te²tu̱³ Kris²tu³jah¹la² ã³nũ²kxi²sxã³ yxau²xai³yah³lxi¹lxa². Jã¹nxe³nx2ta¹ha²kxai³ wxa²wĩ³nu²khai³hũ̱³na¹wa².  
\v 16 Nxe³na¹ha²kxai³ wi¹kãi³a¹kxa² yã¹nxe² kãi³jah³lxi³hẽ¹la².  
\v 17 Jã¹nxa¹jut3su² Ti³mo²jah³la² ĩ³sa²si¹hã³ũh¹nx2ta¹tu¹wa². A²kxã³nxa² Txa²wã¹hxi²kan¹ta² Si³yxau³jah¹lai²na² wãn³txa² ĩ³tih³nxe³na¹ha²kxai³ yxo²ĩ² ã³si³wxe³na²hẽ³la² Ti³mo²jah³la²sa³. Nxe³ha²kxai³ a³lxi²na¹wa². Txa²wẽ³sa² yã¹nx2na³la². Sa²wai³wait3sxã³ wi¹kãi³jah¹lai²la¹wa². A²nxe³jah¹lai²na² sa²kxai³lu² Je³su² Kris²tu³jah¹lai²na² wãn³txa² wain³txi³ sa²yxo²wet1sa²tẽ³si¹nx2ti³jau³su² ĩ³yau¹ũ³nx2ti³tu¹wa². A²nxe³jau³xai²na² Je³su² Kris²tu³jah¹la² ka³te̱³na² wi¹tãu³su² ũ³hũ¹nx2ti³si¹jau³su² ĩ³yau¹ũ³xi¹nx2ti³tu¹wa². Nxe³jau³jau¹xai²na² Je³su²jah³lai²na² wãn³txa² yxo²ĩ²tũ̱³ka̱³txi³nãu³xa² yxo²ha³kxa¹ ĩ³yau¹ũ³hain¹to³ha¹wa². 
\p  
\v 18 Yxãn¹ta¹: 
\p — Pau²lah³la² wa̱³li²nxa³lho³na¹. Wxa²nũ̱³ka̱³txa² ha³tih³nũ̱³ka̱³txa² wxa²ẽ¹nãu³ai²na² e³kãi²non³sxã³ ĩ³ye³yah³lxi³ta¹hĩ¹nhẽ¹la².  
\v 19 Txa²wã¹hxi²kan¹ta² Si³yxau³jah¹la² a²ten³jau³su² kxai²nãn²tu̱³ wa³su³txi³ wa̱³li²na¹tu¹wa². Wa̱³li²na¹kxai²nãn³tu̱³ yxo²kãin²ne³te² ĩ³nxa² ĩ²nxa²lxa¹tu¹wa². Wxa²wãn³txa² ain³kxi¹nxa²lxa¹tu¹wa². Jã¹nxe² wã³nxĩn¹sxã³ kãi³yah³lxin¹ju³ta² ĩ²nxa²lxi³nũ³na¹tu¹wa².  
\v 20 Txa²wã¹sũ̱³na² wã³nxĩn¹ta² Si³yxau³jah¹lai²la¹wa². Nxe³sxã³ Kris²tu³jah¹la² ã³nũ²nxi²sxã³ yxau²xai³ki̱³kxai²nãn²tu̱³: 
\p — Txa²wã¹sũ̱³nu²su² Txa²hxi²kan¹jah¹lai²la¹wi¹. Nxe² e³kxi²ki̱³kxai²nãn²tu̱³ ã³ya²la³la¹ Txa²wã¹sũ̱³na² wã³nxĩn¹sxã³ ã³si³tẽ³kxi²nẽ³na³la². Yxãn¹ta¹ Je³su²jah³la² ã³nũ²nxi²sxã³ yxau²xai³ki̱³sxa³kxai²nãn²tu̱³: 
\p — Txa²wã¹sũ̱³nu²su² Txa²hxi²kan¹jah¹lai²la¹wi¹. Nxe²e³kxi²ki̱³kxan²ti³ kwa² wãn³txi³su² hĩ̱³nx2na³la².  
\v 21 Nxe³ha²kxai³ ju¹tai²li² nũ¹hĩ²jah¹lxi³hẽ¹la². Wa̱³li²na¹tãu³a² ĩ³kwa̱i²kxi²sxã³ ĩ³wai³si¹nx2ta¹jau³su² ta̱³nxa² txa²ẽ¹nãu³ai²na² thãi³ti³la² a³lxi²si¹nx2ta¹jau³su² ta̱³nxa² nũ¹hĩ²jah¹lxi³hẽ¹la². 
\c 5  
\s1 Yxo²ĩ²tũ̱³ka̱³txi³nãu³xai²na² ko̱³nxe³thi¹nain¹jau³su². 
\p  
\v 1 Nxa²ha¹te¹ wxa²nũ̱³ka̱³txi³ ĩ³nxa² ko̱³nxe³thin¹khaix1te²a² yũ³yah³lxi³ta¹hi¹lxa². Ko̱³nxe³khaix1ju³tai²la¹wa². Hai³txi³ Ju³te²a² nũ̱³ka̱³txi³su² te²a² ta̱³nxa² Ju³te²a² nũ̱³ka̱³txi³sxa³te²su² te²a² ta̱³nxa² te²yã¹nxe² kãi³ain¹te²sxa³yu²hẽ³la². Wxa²wĩ³na² sxe³xa³ka³lxi³khai³xa² tẽ³sxã³ so¹yah³lxi³ta¹hi¹nhẽ¹la².  
\v 2 Nxe³kxan²ti³nũ¹ yxo²kãin²e³yah³lxi³ta¹hi¹nhẽ¹la². Hai³txi³ ĩ³ãin²ta³kxah¹lxi³ta¹hxã³nhẽ¹la². Jah¹lai²li² ĩ³sa²ha³lo²sa²tã³ah³lxi³ta¹hxã³nhẽ¹la².  
\v 3 Nxe³yãn¹ta¹ txai²li² nxũ²kwa̱i³ye³lot3sxã³ yxaun²nxa³tai¹ti²tu³wa². Yxãn¹ta¹ txa²ẽ¹nãu³ai²na² ĩ²nx2ta¹wa². Nxe³ha²kxai³ wxa²yen³nãu³a² yxau³na¹kxe³hũ̱³nxe² ko̱³nxe³ti³ ĩ³yĩ¹li²hai¹na¹wa². Ko̱³nxe³thin¹sxã³ kãi³jah¹la² ã²la² ko̱³nxe³ti³ ĩ³yĩ¹li²hai¹na¹wa². Je³su²jah³la² Txa²wã¹hxi²kan¹ta² Si³yxau³jah¹lo²su² ha²kxai³ ĩ³ye³kxi²sa²jau³xa² ĩ³ye³kxi¹nx2ta¹wa².  
\v 4 Nxe³ha²kxai³ ã³yã³nũ²kxi¹jxah³lxi³hẽ¹la². óyã³nũ²kxah³lxin¹kxai²nãn³tu̱³ txa²ẽ¹nãu³ai²na² ã³nũ³kxi¹nx2ti³nũ³na¹tu¹wa². Je³su²jah³la² Txa²wã¹hxi²kan¹ta² Si³yxau³jah¹lo²su² ha²kxai³ a²wã³nxĩn¹ju³khai³xa² ã³si³tẽ³kxi²nẽ³tu¹wa².  
\v 5 A²nxe³jah¹lai²na² sa²kxai³lu² ko̱³nxe³thin¹sxã³ kãi³jah¹lai²na² sa²kxai³lu² ĩ³ye³kxi¹jah³lxi³hẽ¹la². Ĩ³ye³kxah²lxin¹te³nah¹lxi¹: 
\p — Ko̱³nxe³ti³ kãi³i¹nhẽ³li¹. Sa³ta³na²jah¹la² a²wa³kxẽn³sye¹txai¹li¹. Yah³lxin¹jau³su² ĩ³ye³kxi¹jah³lxi³hẽ¹la². Ko̱³nxe³ti³ kãi³jah¹lo²kxai³lu² Txa²wã¹sũ̱³na² ã³yxo²o³tũ¹si¹yhah³lxin¹jau³su² ĩ³ye³kxi¹jah³lxi³hẽ¹la². Nxe³kxai²nãn²tu̱³ a²nũ²khai³xa² ã³kho³kxan²ti³ Je³su²jah³la² Txa²wã¹hxi²kan¹ta² Si³yxau³jah¹la² a³ka³nxi²sxã³ wxã³hĩ¹na¹ a²wi¹tãu³khai³xa² ã³wa²sut1sxã³ yxau³tu¹wa². 
\p  
\v 6 Jã¹nxe³jut3su² yxo²kãin²txi³ e³lah³lxin¹ju³ta² wai³nxa³wa². Te²yã¹nxe³jau³su² txa²wã¹yah³la²nãu³xa² e³lain¹te³nah¹lxi¹: 
\p — Yain³tũ̱³xa² ĩ³wa¹kxi²ki³a² jũ¹nxa² so¹lxi³ ũ³sa²wi¹ki̱³kxai²nãn²tu̱³ ye³jen¹na² tũ̱¹xai²na² yxo²ha³kxa¹ ĩ³wat1te²ju²hẽ³li¹. Txa²wã¹yah³la²nãu³a² nẽ³lai¹nhxai²tai¹ti²tu³wa².  
\v 7 Nxe³ha²kxai³ ko̱³nxe³ti³ kãi³ju³tai³tã² a²wĩ³na² sxe³xa² so¹kxi²ju³tai³ jã¹nx2na³la². Ĩ³wa¹kxi²ki³a² yã¹nx2na³la². Jã¹nxe³sxã³ ko̱³nxe³ti³ kãi³ju³ta² ĩ³wa¹kxi²ki³hũ̱³nxe² ã³na¹jah¹lxi³hẽ¹la². Yxah³lxin¹kxai²nãn²tu̱³ wxa²ẽ¹nãu³ai²na² ã³nhxan³ka²ti³nx2ti³hĩ̱³nx2na³la². Nxe³sxã³ yain³tũ̱³xa² tah²nũ³xa² yã¹yxah³lxi³hĩ̱³nxa¹lxa². Nxe³kxai²nãn²tu̱³ ko̱³nxe³ti³ kãi³ju³ta² ĩ³wa¹kxi²ki³hũ̱³nxe² yũ³yah³lxi³hĩ̱³nx2nxa³lxa². A²kxã³nxa² Txa²wã¹sũ̱³na² sa²kxai³lu² txa²wã¹yah³la²nãu³xu¹tai²na² e³kxi²te³nah¹lxi¹: 
\p — Wxa²ko̱³nxe³ti³ kãi³yah³lxin¹ju³ta² yũ³yah³lxi¹nha²kxai³ o³ve²a² wẽ³sa² tẽ³sxã³ su²lhã³jah¹lxi³hẽ¹li¹. Yah³lxin¹kxai²nãn²tu̱³ ko̱³nxe³ti³ kãi³yah³lxin¹ju³ta² ne³wã²na³kxi¹nx2ta¹tu¹wi¹. Nxe³ta¹hxai²ti³ai¹ti²tu³wa². Te²yã¹nxe³ju³kxai³lu² Kris²tu³jah¹la² hi²sen³kxai³lu² o³ve²a² wẽ³sa² su²lhã³yah³lxin¹kxa² yã¹nx2na³la². òla² ya³lu²kxi²nẽ³ta¹hxai²ti³ai¹ti²tu³wa².  
\v 8 Jã¹nxe³hĩ¹nãn¹te²tu̱³ Kris²tu³jah¹la² ya³lu²kxi²nẽ³ju³ta² ĩ²xi²ki̱³je³na² Pas²kwa² yain³txa² yain³ki̱³tu¹wa². Yain³ki̱³tãu³a¹ hai³txi³ ĩ³wa¹kxi²ki³a² yain³ki̱³sxa³lho³la². Hãi¹sxã³ yain³txa² tah²nũ̱³xa² ĩ³wa¹kxi²ki³la³ yũ²nxa³tũ̱³xa² so¹lxi³ yai³nhĩ̱³ki̱³tã³la². Jã¹nxe³kxe³hũ̱³nxe² ko̱³nxe³ti³ kãi³ki̱³ju³tai²na² a²nũ²a² ã̱³xa² ko̱³nxe³ti³ a̱in³kxain¹ki̱³ju³ta² ã³na¹ki̱³sa²kxai³ ko̱³nxe³ti³ kãi³ki̱³ju³ta² ã³na¹ki̱³sa²kxai³ nxe³ki̱³tu¹wa². Nxe³sxã³ wi¹lhin¹ju³ta² so¹lxi³ kãi³ki̱³sa²kxai³ ya²la³lyu³ta² so¹lxi³ kãi³ki̱³sa²kxai³ nxe³ki̱³tu¹wa². Nxe³ju³ta² so¹lxi³ ten³ya³sah¹lxi³hẽ¹la². 
\p  
\v 9 Jã¹nxa¹ju³kxai³lu² wãn³txa² ũ³wha²li¹la³kxi¹nx2ta¹hĩ¹nai³tã² e³kxi¹nx2ta¹tai¹ti²tu³wa². A²nũ²a² ko̱³nxe³thin¹te²a² ã³na¹sxã³ a³li³si¹nxa²lxa¹jau³su² kwa³na³nx2ta¹tai¹ti²tu³wa².  
\v 10 Yxãn¹ta¹ ha³lo²a² yuh³xai²nãn¹ta²ko³xai²na² hin¹yah³lxin¹tãu³a² a²nũ²a² ko̱³nxe³ti³ kãi³te²su² te²a² ha³ten¹jah³lxin¹ju³ta² ten³sa²nxa³nha²wa². A²nũ²ã̱³xa² yen³kxa² yxo²kwa̱in³jah¹lo²su² ta̱³nxa² a²nũ²a² ã̱³xa² ã³ke³tũ¹sxã³ yen³kxa² so¹kxi²jah¹lo²su² ta̱³nxa² txah³lxa³kxa² Txa²wã¹sũ̱³nu²su² ki³lxo³sxã³ ten³ju³ta³lot3jah¹lo²su² ta̱³nxa² nxe³ju³ta² kãi³sxã³ ha³ten¹jah³lxin¹ju³ta² kwa³na³nxa²lxi³nxa³hẽ³la². Nxe³tũ̱³ka̱³txa² yxo²ha³kxa¹ ha³ten¹jah³lxin¹ke³la³te²kxai³ yuh³xai²nãn¹ta³ko³xa² a³li³yah²lxi³hĩ̱³nxa¹lxa².  
\v 11 Nxe³yãn¹ta¹ a²nũ²a² nxe²e³kxi²te³nah¹lxi¹: 
\p — Txai²li² Je³su²jah³lai²na² wãn³txa² yxo²ĩ²jah¹lo²sa¹wi¹. Nxe³jau³su² ko̱³nxe³thin¹sxã³ o²la³kxi²ta̱³nxa² a²nũ²xã̱³xa² yen³kxa² kãin² yxo²kwa̱in³ta̱³nxa² txah³lxa³kxai²li² tẽ³sxã³ txa²wã¹sũ̱³nu²su² ki³lxo³sxã³ sa²yxo²we¹ta̱³nxa² a²nũ²a² ã̱³xa² ĩ³wa³ka³si³nyhu¹te²la³ ta̱³nxa² ĩ³na²jau³xa² ũ̱n³jau³xa² ĩ³na²sxã³ wen¹ta̱³nxa² a²nũ²a² ã̱³xa² ã³xa² ã³ke³tũ¹sxã³ yen³kxa² so¹kxi²ta̱³nxa² nxe³sxã³ nxe³te²he³la³ka² Txa²wã¹sũ̱³na² wãn³txa² yxo²ĩ²te²a² so¹lxi³ a³li³si¹jah³lxi³hẽ¹la². Ĩ³yain³kxi²ti³hex1nyhu¹ah³lxi³txa³hẽ¹la². 
\p  
\v 12-13 Nxe³na¹jut3su² a²nũ²a² ã̱³xai²li² yxo²ĩ²xa³te²a² ko̱³nxe³ti³ ĩ³yĩ¹li²hai¹na¹ju³ta² hxi²kan¹sa²nxa³nha²wa². Txa²wã¹sũ̱³na² hi²sen³kxai³lu² ko̱³nxe³ti³ ĩ³yĩ¹li²hain¹tu¹wa². Yxãn¹ta¹ wxa²nũ̱³ka̱³txi³ ĩ³nxai²na² Je³su²jah³lai²na² wãn³txa² yxo²ĩ²tũ̱³ka̱³txi³ ĩ³nxa² ko̱³nxe³ti³ ĩ³yĩ¹li²waun¹nyhu¹ah³lxi¹lxa². Nxe³yah³lxi¹nha²kxai³ a²nũ²ai³ta³lxi³ ko̱³nxe³ti³ kãi³jah¹lai¹ta³lxi³ ã³na¹sxã³ wxa²li³ti³hi¹jah¹lxi³hẽ¹la². 
\c 6  
\s1 Yxo²ĩ²tũ̱³ka̱³txa² ã³nhe¹kxi²nyhu¹ain¹jau³su². 
\p  
\v 1 Nxa²ha¹te¹ Je³su²jah³lai²na² wãn³txa² yxo²ĩ²tũ̱³ka̱³txi³ ĩ³nxai²na² ã³nhe¹kxi²nyhu¹ah³lxin¹kxai²nãn²tu̱³ Je³su²jah³lai²na² wãn³txa² te³nai¹nxa³tũ̱³ka̱³txa² a²hxi²kan¹jah¹la² ĩ³hen³txain¹yah³lxi³txa³hẽ¹la². Txa²wã¹sũ̱³na² sa³wi³ha³lxi³ ĩ³nxai²na² wxa²hxi²kan¹jah¹la² so¹lxi³ ĩ³yau¹ũ¹nha¹jah³lxi³hẽ¹la².  
\v 2 Nxe³ha²kxai³ kxãn³ton³tãu³a¹ yan¹nãu³a¹ Txa²wã¹sũ̱³na² sa³wi³ha³lxa² Je³su²jah³lai²na² wãn³txa² yxo²ĩ²tũ̱³ka̱³txa² sa²kxai³lu² yuh³xai²nãn¹ta³ nũ̱³ka̱³txi³nãu³xa² yxo²ha³kxa¹ kãi³ain¹ju³tai²li² wi¹ta̱³nxa² ko̱³ta̱³nxa² a³ya³txi²yah³lxin¹tu¹wa². Nxe³ju³tai²li² a³la³kxi²yah²lxan³ta²lu¹wa². Nxe³yah³lxi¹nha²kxai³ ha³lo²a² kãi²nxa³ju³ta² hxi²kan¹txi³ a³ya³tain¹yah³lxi³hĩ̱³nx2nxa³lxa².  
\v 3 Kxãn³nãu³a¹ oh³xan¹tũ̱³ka̱³txa² kãi³ain¹ju³ta³nũ³a² a³ya³txi²nũ¹hain¹nũn³ki̱³tu¹wa². Nxe³ha²kxai³ hĩ¹na² yxau²xai³ki̱³ju³tai²na² kãi³ki̱³ju³ta² hxi²kan¹txi³ a³ya³txi²yah³lxi³hĩ̱³nxa¹lxa².  
\v 4 Jã¹nxe³jut3su² Txa²wã¹sũ̱³na² yxo²ĩ²xa³tũ̱³ka̱³txai²na² a²hxi²kan¹jah³la² yen³kxa² toh³lxa³ta² wãn³txa² toh³lxa³ta² ĩ³hau³ko³txa²lxi³si¹hah³lxin¹jau³su² ĩ³ye³kxai¹yah³lxin¹kxai²nãn²tu̱³ wai³nxa³wa². Je³su²jah³lai²na² wãn³txa² yxo²ĩ²sxã³ yxau²xai³tũ̱³ka̱³txi³ ĩ³nxai²na² a²hxi²kan¹te²su² te²a² so¹lxi³ ĩ³hau³ko³txa²lxi³si¹hah³lxin¹jau³su² ĩ³ye³kxain¹yah³lxi³hẽ¹la².  
\v 5 Ãu²lxa²tot3sah²lxin¹nha²wa². Wxa²nũ̱³ka̱³txi³ ĩ³nxai²na² a²hoh³lxi³su² jah¹lo²su² yũ³nx2ti³xa³te²la¹xã³? Yen³kxa² toh³lxa³ta² wãn³txa² toh³lxi³jau³xa² ĩ³hau³ko³te²la³ yũ³nx2ti³xa³te²la¹xã³?  
\v 6 Yũ³te²jai¹ti²tu³wa². Nxe³kxan²ti³ Txa²wã¹sũ̱³na² wãn³txa² ko̱³nxe²nxa³jah¹la² ĩ³yau¹ũ³hain¹yah³lxi¹nha²kxai³ yxãn¹ta¹ Txa²wã¹sũ̱³na² wãn³txa² ain³kxi²jah¹la² ĩ³yau¹ũ³hain¹yah³lxa³nha²kxai³ nxe³yah³lxi³ta¹hi¹nhẽ¹la². Nxe³ju³tai²li² wai³nxa³wa². 
\p  
\v 7 Nxe³yah³lxi¹nha²kxai³ Txa²wã¹sũ̱³na² wãn³txa² ã³ne³wih¹nxa²lxi³xa³wa². Nxe³ha²kxai³ ko̱³nxe³ti³ kãi³nxa²lxain¹ju³ta³nũ³a² ta̱³nxa² yen³kxa² kãi³kxi²nxa²lxain¹ju³ta³nũ³a² ta̱³nxa² nxe³ju³ta² ko̱³nha²sxã³ en³yah³lxa³lxa², wi¹ju³ta² so¹lxi³ kãi³yah³lxin¹kxan²ti³na². Nxe³yãn¹ta¹ ã³nhe²kxi²yah³lxi¹nha²kxai³ wxa²hxi²kan¹jah¹la² yen³nãu³a² ĩ³ye³sxã³ ĩ³yi²yi²lhon¹ta³kxi²nyhu¹ah³lxi³ta¹hi¹nhẽ¹la².  
\v 8 Yxãn¹ta¹ ti³hex1yah³lxa³lxa². Nxe³yah²lxan³kxa²ha³tih³xan²tu̱³ ko̱³nxe³ti³ o²la³kxi²nyhu¹i², yen³kxa² kãi³kxi²nyhu¹i² yxah³lxi³ta¹hi¹nhẽ¹la². Wxa²nũ̱³ka̱³txi³su² kxan²ti³ nxe² kãi³nyhu¹yah³lxi³ta¹hi¹nhẽ¹la².  
\v 9-10 Wai³nxa³ju³ta² kãi³te²su² te²na² sa²kxai³lu² Txa²wã¹sũ̱³na² ha³lo²ai²li² hxi²kan¹txi³ ã³wih¹te²sxa³yu²hẽ³la². óke³tũ¹nyhah¹lxi³txa³hẽ¹la². Kuh³lxa³thin¹sxã³ o²la³kxi²nxe³jah¹lo²su² ta̱³nxa² txah³lxa³kxa² Txa²wã¹sũ̱³na² ki³lxot3sxã³ ten³ju³ta³lot3nxe³jah¹lo²su² ta̱³nxa² txu¹su² in³txa² ã̱³xo²la³kxi²ta¹ka³lxu³su² ta̱³nxa² in³txa² txu¹ha² ã̱³xũ³whĩ¹ta³kxi²nyhu¹jah¹lo²su² ta̱³nxa² in³txah²lxi³ in³txah²lxi³ yxo²kwa̱in³sxã³ o²la³kxi²nyhu¹te²su² ta̱³nxa² txu¹ha²lxi³ txu¹ha²lxi³ yxo²kwa̱in³sxã³ o²la³kxi²nyhu¹te²su² ta̱³nxa² yen³kxa² kãi³jah¹lo²su² ta̱³nxa² a²nũ²a² ã̱³xa² yen³kxa² kãin² yxo²kwa̱in³jah¹lo²su² ta̱³nxa² ĩ³na²jau³xa² ũ̱n³jau³xa² ĩ³na²sxã³ wen¹jah¹lo²su² ta̱³nxa² a²nũ²a² ã̱³xa² ĩ³wa³ka³si³nxe³nyhu¹jah¹lo²su² ta̱³nxa² a²nũ²a² ã̱³xa² ã³ke³tũ¹sxã³ yen³kxa² kãi³so¹kxi²nxe³jah³lo²su² ta̱³nxa² nxe² kãi³in¹tũ̱³ka̱³txa² yxo²ha³kxa¹ hai³txi³ Txa²wã¹sũ̱³na² yxau³ju³ta² ã³wxe³kxi²hĩ̱³ki̱³sxa³wa².  
\v 11 Wxa²nũ̱³ka̱³txi³ ĩ³nxai²na² ĩ²li³te²su² te² ĩ³nxa² kxãn³kxai³ te²yã¹yxah³lxin¹tai¹ti²tu³wa². Nxe³yãn¹ta¹ ko̱³nxe³ti³ kãi³yah³lxin¹ju³ta² sa²wa²su¹kxi¹nx2ti³na²hẽ³la². Txa²wã¹sũ̱³na² so¹lxi³ sa²yxo²we¹tũ̱³ka̱³txi³sah¹lxi¹lxa². Je³su² Kris²tu³jah¹la² Txa²wã¹hxi²kan¹ta² Si³yxau³jah¹lo²su² ha²kxai³ ya³lu²kxi²nẽ³lha²kxai³ wi¹lhin¹te²lo³txa²lxi³na³la². Txa²wã¹sũ̱³na² Yãu³ka³txa² nxũ²kwa̱i³yxau³nx2ti³ha²kxai³ wi¹lhin¹te²lo³txa²lxi³na³la². 
\s1 Txa²wã¹nũ²ai²na² wain³txi³ kãi³ki̱³jau³su² 
\p  
\v 12 Nxa²ha¹te¹ wxa²nũ̱³ka̱³txi³ ĩ³nxai²na² ĩ²li³te²su² te² ĩ³nxa² wãn³txi³kxai³lu¹, e³kxi²yah³lxin¹te³nah¹lxi¹: 
\p — “Ĩ²li³ju³ta² kãi³ti³ten³sa³nha¹.” Na¹kxai²nãn²tu̱³ hxi²kan¹txi³ kãi³hĩ̱³na¹wi¹. Nĩn¹jau³su² kxai²nãn²tu̱³ wain³na³la². Yxãn¹ta¹ yu³ka³na³ka³na³ju³ta² so¹lxi³ wi¹lhin¹nũ¹nhẽ³te²ju²hẽ³la². Te²yã¹nxe³yah³lxi³nũ³nĩn¹te³nah¹lxi¹: 
\p — “Ĩ²li³ju³ta² kãi³ti³ten³sa³nha¹.” Na¹kxai²nãn²tu̱³ hxi²kan¹txi³ kãi³hĩ̱³na¹wi¹. Na¹jau³su². Wain³na³la². Yxãn¹ta¹ ju¹tai²li² a¹thũn³jut3su² ju³ta² a²wa³kxẽn³sa¹ju³ta² ten³te²txã³wa².  
\v 13 Ĩ²li³jah¹lai²na² wãn³txi³kxai³lu¹ e³kxi²te³nah¹lxi¹: 
\p — Yain³txa² so¹lxi³ yain³weh³na²ki̱³ta³yxo²ka³nũ³su² te²ju²hẽ³li¹. Nxe³ha²kxai³ txa²wã¹yxo²kxai²li² yain³txa² so¹lxi³ yain³weh³na²ki̱³te²ju²hẽ³li¹. Yxãn¹ta¹ yan¹ye³jen¹nãu³a¹ txa²wã¹yxo²kxai²li² ne³ki³son³ti³hit1sa²kxai³ yain³txa² ne³ki³son¹ti³hit1sa²kxai³ nxe³tu¹wa², Txa²wã¹sũ̱³na² hxi²ka²sa³. A²wi¹lhĩ¹nu¹tai²na² Txa²wã¹sũ̱³na² hi²sen³kxai³lu² a²nũ²a² we¹ta¹hxai²ti³ai¹ti²tu³wa². A²nxe³te²a² ko̱³nxe³thin¹sxã³ o²la³kxi²ki̱³ju³ta³nũ³a² sa²yxo²wet1si¹ki̱³jau³nũ³a² so¹lxi³ we¹txa³ha²kxai³ hãi¹sxã³ Txa²wã¹hxi²kan¹ta² Si³yxau³jah¹la² sa²yxo²wet1si¹ki̱³jau³nũ³a² we¹tha²kxai³ nxe³ta¹hxai²ti³ai¹ti²tu³wa². Nxe³hĩ¹nu¹tai²nãn¹ju³ta² so¹lxi³ yxau²xai³ki̱³tã³la². Nxe³ha²kxai³ wain³txi³ sa²yxo²wet1si¹ki̱³jau³nũ³a² Txa²wã¹hxi²kan¹ta² Si³yxau³jah¹la² ĩ³hxi²ka¹tũh¹sa²tẽ³nẽ³na³la².  
\v 14 Jã¹nxe³jut3su² Txa²wã¹sũ̱³na² hi²sen³kxai³lu² Kris²tu³jah¹la² Txa²wã¹hxi²kan¹ta² Si³yxau³jah¹lo²su² ha²kxai³ a²nxe³jah¹lo²su² jah¹lo²kxai³lu² ka³te̱n³su² ĩ³sa²yxau³xi²si¹ta¹hxai²ti³ai¹ti²tu³wa². Jã¹nxe³jut3su² kxãn¹non³tãu³a¹ wã³nxĩ¹ni² hxi²ka¹ni² nxe³ha²kxai³ ka³te̱n³su² ĩ³sa²yxau³ti³hi¹tẽ³nũn³tu¹wa². 
\p  
\v 15 Txa²wã¹nũ²khai³ki̱³na¹xai²na² whãi²na¹ Kris²tu³jah¹la² hi²sen³su² a²wa³kxẽn³ta²nẽ³na³la². Nxe³te²jai¹ti²tu³wa². Nxe³ha²kxai³ txa²wã¹nũ²khai³ki̱³na¹xai²na² a²ĩ³lxi³te²su² te²a² tẽ³sxã³ tu¹ha² ko̱³nxe³thin¹ta¹ka³lxa² o²la³kxi²ki̱³ke³la³te²kxai³ ko̱³nxe³ju³ta² a²wa³kxẽn³ti³hi¹tẽ³hĩ̱³nx2na³la². Ju¹tai²li² wain³ti³he¹nx2nxa³wa².  
\v 16 Jã¹nxũn³sxã³ ko̱³nxe³thin¹ta¹ka³lxa² ũ³whĩn¹ti³ki̱³kxai²nãn²tu̱³ nxẽn¹ta¹ka³lxu³su² ta¹ka³lxa² ko̱³nxe³thin¹ta¹ka³lxa² a²nũ²a² ã³nũ²kxi²sxã³ yu³ka³na³ka³na³ju³ta³nũ³su² kãi³hĩ̱³ki̱³tã³la². Jã¹nxe³jut3su² Txa²wã¹sũ̱³na² ũ³wha²li¹txã³nxa² nxe³te³nah¹lxi¹: 
\p — Ũ³whĩn¹ta³kxi²ki̱³kxai²nãn²tu̱³ ã³nũ²kxi²sxã³ wxa²nũ²a²nãu³a² yu³ka³na³ka³na³ju³ta³nũ³su² kãi³hĩ̱³ki̱³tã³li¹. Nxe³ta¹hxai²hẽ¹la².  
\v 17 Te²yã¹nxe³jut3su² Kris²tu³jah¹la² Txa²wã¹hxi²kan¹ta² Si³yxau³jah¹lo²su² ha²kxai³ yxo²ĩ²sxã³ ã³yã³nũ²kxi²ki̱³kxai²nãn²tu̱³ Txa²wã¹sũ̱³na² yen³nãu³a¹ nũ¹ka³na³ka³nat3ja³nhẽ³na³la². 
\p  
\v 18 Nxe³ha²kxai³ kuh³lxa³thin¹sxã³ o²la³kxin¹ju³ta² u²lã³na¹sxã³ ã³waix3jah¹lxi³hẽ¹la². Ko̱³nxe³ti³ kãi³ju³ta² ĩ²li³ju³ta² kãi³ki̱³kxai²nãn²tu̱³ txa²wã¹nũ²khai³xa² hai³txi³ ã³kãi³ti³hi¹tẽ³te²su² jut3su² nxa³wa². Yxãn¹ta¹ txu¹ha² ta̱³nxa² in³txa² ta̱³nxa² ã̱³xa² ũ³whĩn¹ta³kxi²ju³ta² o²la³kxi²ki̱³kxai²nãn²tu̱³ txa²wã¹nũ²khai³xa² kuh³lxa³thin¹sxã³ kãi³ju³ta² ã³kãi³ti³hi¹nha²ki̱³tã³la².  
\v 19 Txa²wã¹nũ²khai³xa² sa²kxai³lu² Txa²wã¹sũ̱³na² Yãu³ka³jxah¹la² nxũ²kwa̱i³yxau³nẽ³jah¹la² a²yxau³ju³khai³su² ta¹hxai²ti³ai¹ti²tu³wa². Txa²wã¹sũ̱³na² hi²sen³su² sa²si¹hã³ũ¹nhẽ³jah¹lo²su² ta¹hxai²ti³ai¹ti²tu³wa². Txa²wã¹nũ²khai³xa² nxũh¹ wa³kxẽn³ta³kxi²sxa³wa².  
\v 20 Txa²wã¹sũ̱³na² so¹kxi²nẽ³ta¹hxai²ti³ai¹ti²tu³wa². A²yo³ha² ũ³yho³hi²sxã³ so¹kxi²nẽ³ta¹hxai²ti³ai¹ti²tu³wa². Nxe³nẽ³lha²kxai³ Txa²wã¹sũ̱³na² ĩ³kãin²ti³hit1jah¹lxi³hẽ¹la². Wxa²nũ²khai³xa² hãi¹nxe³ti³xa¹ sa²nẽn¹kxi¹jah³lxi³hẽ¹la². 
\c 7  
\s1 A²nũ²a² so¹nyhu¹ju³ta² ĩ³tih³nxe³jau³su² 
\p  
\v 1 Ju¹ta³la³ nxe³ha²kxai³ ĩ³wã̱³txi³sah¹lxin¹jau³xa²sa¹. Ĩ³yau¹ũ³nx2ta¹tu¹wa². Ain³kxi²sah¹lxi³hẽ¹la². Jah¹lai²li² wxa²ha³tih³ ĩ³nxai²nãn¹jah¹la² nũh¹yxau³ju³ta² wi¹na³la². Txu¹ha² so²nxa³kxan²ti³ wi¹na³la².  
\v 2 Nxe³yãn¹ta¹ kuh³lxa³thin¹sxã³ kãi³ju³ta² yũ³khaix1te²jai¹ti²ti¹. Txu¹ha² so²nxa³ta¹ka³lxu²su² ũ³whĩn¹ta³kxi²nyhu¹kxi³ju³ta² yũ³khaix1te²jai¹ti²ti¹. Nxe³ha²kxai³ in³txi³nãu³xa² hãi¹nxe³ti³xa¹ a²txu¹khai³xa² so²xai³ju³ta² wain³na³la². Te²yã¹nxe³sxã³ tu¹txi³nãu³xa² hãi¹nxe³ti³xa¹ a²in³txi³khai³xa² yũ²xai³ju³ta² wain³na³la².  
\v 3 Nxe³sxã³ a²wẽ³sãi¹yah³lai²na² sa²kxai³lu² a²sxe³khai³xa² sxe³xi²kxi³ju³ta² wain³na³la². Te²yã¹nxe³sxã³ a²sxe³xa³ka³lxai²na² sa²kxai³lu² a²in³txi³khai³xa² in³txi³nhĩn³ju³ta² wain³na³la². Nxe²kãi³nyhu¹kxi³ju³ta² wain³na³la².  
\v 4 A²sxe³xai²na² sa²kxai³lu² a²nũ²khai³xa² a²wa³kxẽn³na³ka³lxu³sxa³wa². Yxãn¹ta¹ a²wẽ³sãi¹yah³lai²na² sa²kxai³lu² a²wa³kxẽn³yah³lai²la¹wa². Te²yã¹nxe³sxã³ a²wẽ³sãi¹yah³lai²na² sa²kxai³lu² a²nũ²khai³xa² a²wa³kxẽn³yah³lo²sxa³wa². Yxãn¹ta¹ a²sxe³xa³ka³lxai²na² sa²kxai³lu² a²wa³kxẽ³na³ka³lxai²la¹wa². A²wa³kxẽn³su²nyhu¹ki̱³tã³la².  
\v 5 Wxa²nũ²khai³xa³ a³lxi²nha¹ja³hẽ¹la². Hãi¹sxã³ Txa²wã¹sũ̱³na² nũh¹e³kxi³ti³ten³nxa²kxai²nãn²tu̱³ nxe³hĩ¹na¹ so¹lxi³ ã³nha¹ja³hẽ¹la². Txa²wã¹sũ̱³na² nũh¹e³kxi²ta³lu²nĩn¹nũ²la² ã³nũ²kxi²xi¹nha¹ja³hẽ¹la². Jã¹nxe³ wĩ̱¹ti³nyha¹to³hin¹kxai³ jã¹nxe³ja³hẽ¹la². A²nũ²kxi²xi²ya³hxan³kxai²nãn²tu̱³ Sa³ta³na²jah¹lo²su² hi²sen³kxai³lu² txu¹ha² ã̱³xa² ũ³whĩn¹ti³sih¹nxa²ha³ta²wa², wxa²nũ²khai³xa² hxi²kan¹txi³ ã³wa³kxẽn³txa³ya³hxa³nha²kxai³la². 
\p  
\v 6 Nxe³jau³xai²li² kwa³na³nxa²lxi³jau³sxa³wa². Hãi¹sxã³ kwa²ĩ³tih³nxe³nx2ti³jau³xai²la¹wa².  
\v 7 Txa²ẽ¹nãn¹jau³la³: 
\p — A²nũ²a² yxo²ha³kxa¹ nũh¹yxau³na¹kxa² yã¹nxe³sxã³ yxau³ain¹kxai²nãn²tu̱³ wi¹na³na¹. Nxe³na¹tah¹lxa¹ Txa²wã¹sũ̱³na² sa²kxai³lu² a²nũ²a² ha³tih³xa² so¹nyhu¹ju³ta² ĩ³hxi²ka¹tai¹nha²kxai³ a²nũ²a² ã¹jã¹nxe² ã̱³sa²nũn³te²a² nũh¹yxau³ju³ta² ĩ³hxi²ka¹tain¹nũ³nha²kxai³ nxe³nẽ³na³la². 
\p  
\v 8 Nxa²ha¹te¹ nũh¹yxau³te²su² te²na² wha³te̱³sa³ka³lxi³su² te²na² nxe³sxã³ txai²yã¹nxe³sxã³ nũh¹yxau³ain¹kxai²nãn²tu̱³ ã²la² wi¹na³la².  
\v 9 Yxãn¹ta¹ wxa²nũ²khai³xa² hxi²kan¹txi³ ã³wa³kxẽn³txi³nxa³kxai²nãn²tu̱³ txu¹ha² a²yxo²kwa̱in³nxa²te²la³: 
\p — Te²na² ten³khaix1sa³nha¹. Nxẽn¹te²la³ yũ²nxã³ka³tu̱³: 
\p — Hãi¹sxã³ ta¹ka³lxa² te³ni² ã̱³ta¹ka³lxa² te³ni² nxe² hu³ nxe²xai³na¹nhã¹. Nxẽn¹kxai²nãn²tu̱³ wa³su¹txi³ wxa²txu¹khai¹xa² so¹sẽ¹la². 
\p  
\v 10 Nxa²ha¹te¹ a²nũ²a² ã²la² so¹nyhain¹te²su² te²a² wãn³txa² e³kxai¹na¹ju³ta² yũ³nũn³na³la². Txa²wã¹hxi²kan¹ta² Si³yxau³jah¹lai²na² wãn³txai²la¹wa². Wãn³txi³khai¹xai²la¹wa². Txu¹ha² in³txa² so¹ta¹ka³lxa² sa²kxai³lu² in³txa² ã³ju³ta² wai³nxa³wa².  
\v 11 Nxe³yãn¹ta¹ in³txa² ã³na¹in¹kxai²nãn²tu̱³ in³txa² ã̱³xa² so¹txa³hẽ¹na². Yxãn¹ta¹: 
\p — Ãh¹ in³txa² ã̱³xa² so¹na¹tũ¹xã¹. Nxẽn¹kxai²nãn²tu̱³ in³txa² a²kxã³nxa² tẽ³sxã³ ã³na¹in¹kxah³la² so¹lxi³ hãu²not3sxã³ ãh¹so¹xi¹sẽ¹na². Te²yã¹nxũn³kxe³hũ̱³nxe² in³txi³ ĩ³nxai²na² sa²kxai³lu² wxa²sxe³khai³xa² ã³na¹txa³hẽ¹la². 
\p  
\v 12 Nxa²ha¹te¹ a²nũ²a² ã̱³xai²na² Txa²wã¹sũ̱³na² wãn³txa² e³kxai¹na¹jau³xa² yũ²nxa³wa². Txa²ẽ¹nãn¹jau³xai²na² so¹lxi³ wã²nxũ̱h¹a̱in³nha¹jau³xai²na² so¹lxi³ e³kxi²na¹tu¹wa². A²sxe³xa³ka³lxu³sxu¹nxa²te²a² sa²kxai³lu² Txa²wã¹sũ̱³na² wãn³txa² yxo²ĩ²xa³kxan²ti³ a³lxi²sa²na³na¹ nxẽn¹kxai²nãn²tu̱³ kwa²a³na¹txa³hẽ¹la². Yxau³ya³nxa²ju³ta² ten³kxai²nãn²tu̱³ ã³na¹txa³hẽ¹la², ta¹ka³lxai²na²sa².  
\v 13 Te²yã¹nxe³sxã³ a²wẽ³sãi¹yah³lo²su¹nxa²te²a² sa²kxai³lu² Txa²wã¹sũ̱³na² wãn³txa² yxo²ĩ²xa³kxan²ti³ a³lxi²sa²na³na¹ nxẽn¹kxai²nãn²tu̱³ yxau³ya³nxa²ju³ta² ten³kxai²nãn²tu̱³ ã³na¹txa³hẽ¹na², jah¹lai²na²sa³.  
\v 14 Te²yã¹nxe³sxã³ in³txa² yxo²ĩ²xa³jah¹lai²na² sa²kxai³lu² a²sxe³xa³ka³lxa² yxo²ĩ² ã³si³wxe³kxai²nãn²tu̱³ a²so¹nyha¹ju³tai³tã² wain³ti³hit1te²ju²hẽ³la², Txa²wã¹sũ̱³na²sa³. Te²yã¹nxũn³sxã³ txu¹ha² yxo²ĩ²xa³ta¹ka³lxai²na² sa²kxai³lu² a²wẽ³sãi¹yah³la² yxo²ĩ² ã³si³wxe³kxai²nãn²tu̱³ a²so¹nyha¹ju³tai³tã² wain³ti³hit1te²ju²hẽ³la², Txa²wã¹sũ̱³na²sa³. Nxe³ju³tan¹te²kxa³ya̱³lhu² a²wẽ³ha³lxi³khai³xa² a²kuh³lxa³thi¹nai¹nxa³lho³la².  
\v 15 Nxe³yãn¹ta¹ yxo²ĩ²xa³te²su² te²na² sa²kxai³lu² yxau³kxi²nyha¹ju³ta² te³nxa³kxai²nãn²tu̱³ a³li³ju³ta² wain³na³la². Nxe³ju³tai²na² yxo²ĩ²sxã³ yxau³te²na² sa²kxai³lu² a²wẽ³sãi¹yah³lo²su² ta̱³nxa² a²sxe³xa³ka³lxu³su² ta̱³nxa² txa²wã³tã̱³su² ha²kxai³ a²ẽ¹nãu³a² ã³wa²su¹kxi²nha²sxã³ yxau³hĩ̱³nx2na³la². Hãu²non³txi³sxã³ yxau³ki̱³ju³ta² Txa²wã¹sũ̱³na² ten³na³la².  
\v 16 Nxe³sxã³ yxo²ĩ²xa³te²su² te²ai³ta³lxi³ ain³kxi¹nxa²ha²kxai³ yan¹nãu³a¹ yxo²ĩ² ã³si³wxe³nũn³ta̱³nxa² nxe³ki̱³tu¹wa². Nxe³sxã³ a²sxe³xa² yxo²ĩ²ta³ka³lxu³ ĩ³nxai²na² wxa²wẽ³sãi¹ah³la² yxo²ĩ²xa³jah¹lai¹tã² ain³kxi¹nxa²kxai²nãn²tu̱³ yan¹nãu³a¹ yxo²ĩ² ã³si³wxe³ta̱³nxa² nxe³ki̱³tũ¹xã². Jã¹nxũn³sxã³ a²wẽ³sãi¹a² yxo²ĩ²jah¹lo² ĩ³nxai²na² wxa²sxe³xa³ka³lxai¹tã² yxo²ĩ²xa³ta¹ka³lxai¹tã² ain³kxi¹nxa²kxai²nãn²tu̱³ yan¹nãu³a¹ yxo²ĩ² ã³si³wxe³ta̱³nxa² nxe³ki̱³tu¹wa². 
\s1 Txa²wã¹sũ̱³na² wãn³txa² sa²yxo²wet1sxã³ yxau²xai³ki̱³jau³su² 
\p  
\v 17 Kris²tu³jah¹la² Txa²wã¹hxi²kan¹ta² Si³yxau³jah¹lo²su² ha²kxai³ ĩ³hxi²ka¹txa²lxi³ju³ta² ũ³hũ²xai³nx2ti³na²hẽ³la². Nxe³sxã³ Txa²wã¹sũ̱³na² tĩh³na² ai³si¹nx2ti³jau³su² nxe³nxa²lxi³tĩh³na² ã³si³tẽ³xai³jah¹lxi³hẽ¹la². Nxe³jau³jau¹xai²na² Txa²wã¹sũ̱³na² wãn³txa² yxo²ĩ²tũ̱³ka̱³txi³nãu³xa² yxo²ha³kxa¹ nxe² ĩ³yau¹ũ³hain¹to³ha¹wa².  
\v 18 In³txai²na² Txa²wã¹sũ̱³na² tĩh³na² ai²ãn³si³wxe³hĩ¹nai³tã² Ju³te²a² yah³la²nãu³u¹tai²na² wãn³txu¹tai²na² sa²yxo²wet1si¹hain¹jau³su² ã²la² ũ³sa³si³tũ³ko¹kxã¹kxai²nãn²tu̱³ ĩ³ki³we²nxi²si¹jau³su² ã³ten³txa³hẽ¹la². Te²yã¹nxe³sxã³ Txa²wã¹sũ̱³na² tĩh³na² ai²ãn³si³wxe³hĩ¹nai³tã² ũ³sa³si³tũ³ko¹kxã¹ju³ta² ã²la² kãi³xa³kxai²nãn²tu̱³ ũ³sa³si³tũ³ko¹kxã¹ju³ta² ã³ten³txa³hẽ¹la².  
\v 19 Nxe³ha²kxai³ ũ³sa³si³tũ³ko¹kxã¹ju³ta² Ju³te²a² nũ̱³ka̱³txa² o²la³kxai¹nhxai²kxai³ jãx1ju³ta² we¹ta̱³nxa² we¹txa³ta̱³nxa² nxẽn¹kxai²nãn²tu̱³ hai³txi³ Txa²wã¹sũ̱³na² a²yen³nãu³a² kãi²nxa³wa². Txa²wã¹sũ̱³na² wãn³txa² kwa³na³nẽ³jau³xu¹tai²na² sa²yxo²we¹ki̱³ju³ta² so¹lxi³ kãi²na³la².  
\v 20 Nxe³yah³lxin¹ju³tai³ta²sa¹ kxã³nxai³tã² Txa²wã¹sũ̱³na² wãn³txa² sa²yxo²we¹jah²lxa³nhĩ¹nai³tã² hi¹nho³ah³lxi³hxain¹kxai³ jã¹nxe³jah³lxi³hẽ¹la².  
\v 21 A²kxã³nxai³tã² kwa²wa³ka³li³lot3sxã³ wa³kon³yah³lxin¹kxai²nãn²tu̱³ hxi²waun³jah³lxi³txa³hẽ¹la². óna¹sxã³ o²la³kxah¹lxi³txa³hẽ¹la². Yxãn¹ta¹ ã³wa²sut1sxã³ yxau³ah³lxin¹ju³ta³nũ³a² ĩ³hxi²kan¹ya³nx2tain¹kxai²nãn²tu̱³ ĩ³wet1sa²so¹jah³lxi³hẽ¹la².  
\v 22 Nxe³sxã³ kwa²wa³ka³li³lo³te²su² te²a² Txa²wã¹sũ̱³na² wãn³txa² yxo²ĩ² ã³si³wxe³kxai²nãn²tu̱³ nxe³hĩ¹nãn¹te²tu̱³ a²ẽ¹nãu³ai²na² ã³wa²sut1sxã³ yxau³hĩ̱³nx2na³la². Te²yã¹nxe³sxã³ a²nũ²a² ã̱³xa² ã³wa²sut1sxã³ yxau³jah¹lai²na² sa²kxai³lu² Kris²tu³jah¹lai²na² wãn³txa² yxo²ĩ² ã³si³wxe³kxai²nãn²tu̱³ Kris²tu³jah¹la² kwa²wa³ka³li³lot3sxã³ o²la³kxi²jah¹la² yã¹nx2na³la².  
\v 23 Kxã³nxai³tã² Txa²wã¹sũ̱³na² hi²sen³su² a²ki³lha³lxai²li² sa²si¹hã³ũ¹nhẽ³lhxã³ kãin² a³lxi²nẽ³sxã³ so¹kxi²nẽ³tai¹ti²tu¹wa². Txa²wã¹hxi²kan¹ta² Si³yxau³jah¹lai²la¹wa². Nxe³ha²kxai³ a²nũ²a² yuh³xai²nãn¹jah¹la² kwa² wa³ka³li³lot3ju³ta² ã³ya³wa̱²lah³lxi³txa³hẽ¹la².  
\v 24 Txa²wã³tã̱³nãu³xãi³. Txa²wã¹sũ̱³na² Si³yxau³jah¹la² ĩ²sxã³ ĩ³so¹nx2ti³jah¹lai²la¹wa². A²kxã³nxa² ĩ³so¹nx2ti³hĩ¹nai³tã² hi¹nho³ah³lxi³hxain¹kxai³ jã¹nxe² hi¹nho³jah¹lxi³hẽ¹la². Txa²wã¹sũ̱³na² yen³nãu³a¹ ã¹hi¹nho³jxah¹lxi³hẽ¹la². 
\s1 A²nũ²a² nũh¹yxau²xai³jau³su² 
\p  
\v 25 Nxa²ha¹te¹ txu¹ha² nũh¹lxi³ ta¹ka³lxai²na²sa¹. Txa²wã¹sũ̱³na² e³kxi²sai¹nxa³wa². Txa²ẽ¹nãn¹jau³xa² so¹lxi³ e³kxi¹nx2ta¹tu¹wa². Txa²wã¹sũ̱³nai²li² wi¹lhin¹sxã³ thãi³ti³la² sa²hau³kot3sa³ha²kxai³ txa²wãn³txa² e³kxi¹nx2ta¹jau³nũ³a² yxo²ĩ²sah¹lxi³hẽ¹la². 
\p  
\v 26 Ha³lo²a² yxau³ki̱³tãu³a¹ kan²khai¹nxe³sxã³ wa³lxe³tã³la². Khãuh³lxa³ti³nha²khaix1ki̱³ju³ta² yũ³te²tu³wa². Nxe³ha²kxai³ in³txa² nũh¹yxau³kxai²nãn²tu̱³ hai³txi³ txu¹ha² so²nxa³kxai²nãn²tu̱³ ã²la² wi¹na³la².  
\v 27 A²sxe³xa² hĩ¹na² yũ³kxai²nãn²tu̱³ ta¹ka³lxa² ã³txa³hẽ¹la². Yxãn¹ta¹ yũ²nxã³kxai²nãn²tu̱³ txu¹ha² so¹txa³hẽ¹la².  
\v 28 Nxe³yãn¹ta¹: 
\p — Txu¹txa²sa³nha¹. So¹na¹tũ¹xã¹. Nxĩn¹kxai²nãn²tu̱³ hai³txi³ ko̱³nxe³ti³ kãi³hĩ̱³nx2nxã³lxa². Te²yã¹nxe² nũh¹lxi³ta¹ka³lxa² in³txa² so¹kxai²nãn²tu̱³ hai³txi³ ko̱³nxe³ti³ kãi³hĩ̱³nx2nxa³wa². Ha³lo²a² kan²ton³kxi²nẽ³lha²kxai³ a²nũ²a² so¹nyhu¹kxi³te²a² khãuh³lxa³ti³nha²ha³ta²wa². Jã¹nxe³nx2ti³kxa²ya̱n³ti³su² ã³wa²su¹kxi¹nx2ti³si¹ha¹jau³su² ye³nx2ta¹wa². 
\p  
\v 29 Txa²wã³tã̱³nãu³xãi³. E³kxi¹nx2ta¹tu¹wa². Ha³lo²a² yuh³xan¹ko³xai²na² yxau³ki̱³ju³ta² hai³txi³ a³lu²xa³wa². Ye³jen¹na² txa²wã¹ha³lo²a² ne³ki³son³tu¹wa². Nxe³ha²kxai³ nxe³hĩ¹na² txuh¹xi³jah¹la² txu¹txa²kxa² yã¹nxe³jut3sũ̱³nxe² yxau³ain¹tu¹wa².  
\v 30 Te²yã¹nxe³sxã³ ĩ³ãin²ta³kxi²nh²te²su² te²a² ãin²ta³kxi²nh²nxa³jah¹la² yã¹txe²hũ̱³nxe² yxau³ha²kxai³ ka³lih³jah¹lo²su² te²a² ka³lih³xa³jah¹la² yã¹txe²hũ̱³nxe² te²yã¹nxũn³sxã³ yxau³ha²kxai³ nxe² yxau³ain¹tu¹wa². Te²yã¹nxe³sxã³ yen³kxa² so¹kxi²te²su² te²a² yen³kxa² yũ²nxa³jah¹la² yã¹txe²hũ̱³nxe² yxau³ain¹tu¹wa².  
\v 31 Yuh³xan¹ta¹ yen³kxa² kãin² o²la³kxi²kxan²ti³ hai³txi³ wi¹lxon³kxai¹nxa³lho³la². Nxe³ju³tai²na² yxo²ha³kxa¹ yuh³xai²nãn¹ju³ta² so¹lxi³ yxo²ĩ²ki̱³kxai²nãn²tu̱³ ye³jen¹na² tĩ¹kxi²nẽ³tu¹wa². Oh³xai²nãn¹ju³ta² so¹lxi³ yxo²ĩ²ki̱³kxai²nãn²tu̱³ hai³txi³ tĩ¹kxi²nẽ³lxa³lho³la². 
\p  
\v 32 Jã¹nxe³jut3su² ha³lo²a² ĩ²li³ju³ta² o²la³kxah¹lxin¹kxai²nãn²tu̱³ hxi²waun³txi³yah³lxi³txa³hẽ¹la². In³txai²li² txu¹txa²jah¹lai²na² sa²kxai³lu² Txa²wã¹sũ̱³na² wãn³txa² sa²yxo²we¹ju³ta² hãi¹nxe² o²la³kxi²hĩ̱³nx2na³la². Ĩ³ka³li³kxi²si¹jau³xa² so¹lxi³ te³nhĩ̱³nx2na³la².  
\v 33 Yxãn¹ta¹ txu¹hxi²jah¹lai²na² sa²kxai³lu² yuh³xan¹ta² yen³kxa² o²la³kxi²te²ju²hẽ³la². A²sxe³xa² ka³li¹txi³ju³ta² so¹lxi³ te³nhĩ̱³nx2na³la².  
\v 34 Nxe³ha²kxai³ tĩh³na² ha¹lon³txi²na³la². Nxa²ha¹te¹ txu¹ti³nãu³xa² yã¹nxe² ai³hĩ̱³nx2na³la². In³txi³txa²ta¹ka³lxa² a³ka³lxon¹ta¹ka³lxu³su² ta̱³nxa² wãi²ta¹ka³lxu³su² ta̱³nxa² te²yã¹nxe² ai³nhĩ̱³nx2na³la². Txa²wã¹sũ̱³na² wãn³txa² sa²yxo²wet1si¹jau³su² te³nain¹na³la². A²nũ²a² whãi²na¹ a²ẽ¹nãn¹jau³xa² whãi²na¹ Txa²wã¹sũ̱³na² a²yan³txi³nũ³a² so¹lxi³ o²la³kxai¹nhĩ̱³nx2na³la². Yxãn¹ta¹ in³txi³ta¹ka³lxa² a²wẽ³sãi¹yah³la² ka²li¹txi³te³lhxã³ o²la³kxi²te²ju²hẽ³la². 
\p  
\v 35 Jã¹nxa¹jau³su² ã³non²ta³kxi¹nxa²lxi³te³lhxã³ e³kxi¹nx2ta¹wa². Hai³txi³ ĩ³wã̱³txa¹lxi³nxa³lho³la². Hãi¹sxã³ wain³kxa²ti³ o²la³kxi²yah³lxin¹ju³ta³nũ³a² ten³sa³nha²wa². Wxa²sĩ̱³nxũ̱³nxa²lxi³ju³ta² hãi¹nxe³ti³xã¹ Txa²wã¹sũ̱³na² ĩ³ka³li³hũ¹hah³lxin¹ju³ta² ten³sa³nha²wa². 
\p  
\v 36 Nxe³yãn¹ta¹ txu¹txa²jah¹lai²na² a²ẽ¹nãn¹jau³kxai³lu¹, e³kxi²nha²te³nah¹lxi¹: 
\p — Txu¹hai²li² so¹na¹tũ¹xã¹. Ta¹ka³lxai²li² kxãn³su² nũh¹sxa³ju³ta² wai³nxa³xã¹. Ta¹ka³lxa² yxo²kwa̱in³khaix1sa³nha¹. Nxe³kxai²nãn²tu̱³ so¹ain¹ju³ta² wain³na³la². Ko̱³nxe³ti³ kãi³ai¹nxa³wa².  
\v 37 Nxa²ha¹te¹ jah¹lai²li² txu¹ha² so¹ju³ta² te³nxa³jau³su² nxe³te³nah¹lxi¹: 
\p — Txu¹hai²li² kãin² yxo²kwa̱in³sa²nxa³nhã¹. Nũh¹yxau³na¹tũ¹xã¹. Nxa¹kxan²ti³ kuh³lxa³thin¹sxã³ o²la³kxi²nuh¹nxa³lho³na¹. Ain¹jau³su² kxai²nãn²tu̱³ txu¹ha² so²nxa³ju³ta³nũ³a² wain³nũn³na³la². Nũh¹yxau³ju³ta² wain³nũn³na³la².  
\v 38 Jã¹nxe³nũn³sxã³ in³txai²li² txu¹ha² so¹jah¹lai²li² wain³txi³ o²la³kxi²te²ju²hẽ³la². Jã¹nxũn³sxã³ txu¹lha³ so²nxa³jah¹lai²na² sa²kxai³lu² ã²la² wain³txi³ o²la³kxi²te²ju²hẽ³la². 
\p  
\v 39 Txu¹ta³ka³lxai²na² sa²kxai³lu² a²wẽ³sãi¹yah³la² ka³te̱n³su² hin¹kxai²nãn²tu̱³ hxi²kan¹txi³ in³txa² ã̱³xa² so²nxa³lho³la². Ko̱³nxe³ti³ kãi³hĩ̱³nx2na³la². Yxãn¹ta¹ a²wẽ³sãi¹yah³la² ya³lu²kxi²kxai²nãn²tu̱³ ã³wa²sut1sxã³ yxau³hĩ̱³nx2na³la². Nxe³hĩ¹na² in³txa² ã̱³xa² so¹ti³ten³kxai²nãn²tu̱³ hxi²kan¹ta¹ka³lxu³su² hĩ̱³nx2na³la². Ta¹ka³lxai²li² Txa²wã¹sũ̱³na² wãn³txa² yxo²ĩ²ta¹ka³lxu³su² ha²kxai³ in³txi³nũ³a² te²yã¹nxe² Txa²wã¹sũ̱³na² wãn³txa² yxo²ĩ²jah¹la² so¹lxi³ so¹ju³ta²nũ³a² wain³na³la².  
\v 40 Yxãn¹ta¹ txa²ẽ¹nãn¹jau³la³ ta¹ka³lxai²li² nũh¹yxau³kxai²nãn²tu̱³ ã²la² ka³lih³hĩ̱³nx2na³la². Nxe³jau³jau¹xi³na² txa²ẽ¹nãn¹jau³xai²la¹wa². Yxãn¹ta¹ Txa²wã¹sũ̱³na² Yãu³ka³jxah¹la² nxũ²kwa̱i³yxau³sa³ha²kxai³ Txa²wã¹sũ̱³na² wãn³txain²txi²na³la². 
\c 8  
\s1 Txa²wã¹sũ̱³na² ki³lxo³kxa² yain³txa² ũ³yhe³wxe³kxi³jau³su² 
\p  
\v 1 Ju¹ta³la² nxe³ha²kxai³ yain³txa² a¹thũn³te²su² Txa²wã¹sũ̱³nu²su² ki³lxo³ka³txa² ũ³yhe³wxe³te²ju²hẽ³la². Nxe³ju³ta² ĩ³yau¹ũ¹nx2ta¹tu¹wa². Wãn³txa² tĩ³yau³u¹tai²li¹. Nxe³hxai²na²hẽ³la². Nxe³te³nah¹lxi¹: 
\p — Txa²wã¹ki̱³na¹xai²li² a³la³kxi²ki̱³tã³li¹. Nxe³hxai²na²hẽ³la². Nxe³ju³ta² a³la³kxi²ki̱³ju³tai²li² txa²wã¹ẽ¹nãu³ai²na² yxo²kãin²txi³ ĩ³ye³kxi²nha²ki̱³te²ju²hẽ³la². Nxe³na¹ta¹ a³lxi²waun¹nyhu¹ki̱³kxai²nãn²tu̱³ ĩ³nxũ²kwa̱i³lxũ¹waun¹nyhu¹hĩ̱³ki̱³tã³la².  
\v 2 A²nũ²a² ĩ²li³te²su² te²a² a²ẽ¹nãn¹jau³kxai³lu¹ e³kxi²nha²te³nah¹lxi¹: 
\p — A²hoh³lxi³sa¹xã¹. Jau³su² kxan²ti³ hai³txi³ a²hoh³lxi³su² ju³ta² kãi²nxa³wa². A²hoh³lxi³su²kxi³ju³ta² ã²la² kãin² ta̱u³ton³na³la².  
\v 3 Yxãn¹ta¹ Txa²wã¹sũ̱³na² a³lxi²ki̱³kxai²nãn²tu̱³ Txa²wã¹sũ̱³nu²kxai³lu² ĩ²nẽ³te²la¹wa². Nxe³sxã³ Txa²wã¹sũ̱³na² a²ẽ¹nãn¹jau³kxai³lu¹ e³kxi²nha²te³nah¹lxi¹: 
\p — Jah¹lai²li² a³lxi²san³tã¹. Nxe³ha²kxai³ Txa²ya̱³lxai²la¹xã¹. Nxe³jau³su² Txa²wã¹sũ̱³na² nxe³tu¹wa². \fig |src="CO01475B.TIF" size="span" copy="© 1978 David C. Cook Publishing Co." ref="1 Korintios 8.3" \fig* 
\p  
\v 4 Jã¹nxe³jut3su² Txa²wã¹sũ̱³na²su² ki³lxo³nxe³kxah³la² so¹lxi³ hai³txi³ ka³te̱n³yah³lo²sxa³wa². Txa²wã¹sũ̱³na² Si³yxau³kah³lo²khai³xa² ka³te̱n³yah³la² ka³na³ka³na³tã³la².  
\v 5 Txa²wã¹sũ̱³na² Si³yxau³jah¹la² ã̱³xa² yũ³te²sxa³jai¹ti²tu³wa². Txa²wã¹sũ̱³nu²su² ki³lxo³ain¹kxah³lai²na² yũ², txa²wã¹hxi²kan¹ti³su² te²na² yũ² nxe³te²ju²hẽ³la². Oh³nãu³nũ¹ka³na¹ yũ² yuh³xai²na² yũ² nxe³te²ju²hẽ³la². Ka³lxa¹txi³ yũ³te²ju²hẽ³la².  
\v 6 Yxãn¹ta¹ Txa²wã¹sũ̱³nu²khai³su² ka³na³ka³na³tã³la². Txa²wã¹sũ̱³na² Si³yxau³tãu³a² hi²sen³kxai³lu² txa²wã¹ha³lo²a² whãi²na¹ ĩ³yũt1sxã³ kwa³na³jah¹lo²su² ta¹hxai²ti³ai¹ti²tu³wa². A²nxe³jah¹lai²li² sa²yxo²wet1si¹ki̱³jau³su² yxau³nũh¹ki̱³tã³la². Te²yã¹nxe³sxã³ Txa²wã¹hxi²kan¹ta² Si³yxau³jah¹la² Je³su² Kris²tu³jah¹lo²su² ha²kxai³ ka³na³ka³na³tã³la². Yen³kxa² whãi²na¹ wet1jah¹lo²su² ta¹hxai²ti³ai¹ti²tu³wa². A²nxe³jah¹lai²li² ka³te̱³na² wi¹tãu³la³ ũ³hũ¹nhẽ³lha²kxai³ ka³te̱n³su² ti³hi¹tẽ³jah¹lai²la¹wa². 
\p  
\v 7 Nxe³ha²kxai³ wxa²nũ̱³ka̱³txa² yxo²ĩ²yah³lxin¹te² ĩ³nxai²na² a²ha³tih³xai²na² jũ¹nxa² so¹lxi³ a³la³kxah¹lxi¹lxa². A²kxã³nxai³tã² Sũ̱³na²ki³lxo³nxe³ka³txa² so¹lxi³ sa²yxo²we¹jah³lxi³hxai¹nhẽ³la², yu̱h³lxah³lxi¹nha²kxai³la¹. Nxe³sxã³ yain³txi³su² sũ̱³na²ki³lxo³nxe³ka³txa² ũ³hũ¹yah³lxin¹te² yain³txa² yu̱h³lxah³lxin¹jau³su² ĩ³yain³yah³lxi³ta¹hxã³nhẽ¹la². Jã¹yxah³lxi¹lxa². Nxe³sxã³ ĩ³ye³yah³lxin¹te³nah¹lxi¹: 
\p — Yain³txi³su² Sũ̱³na²ki³lxo³nxe³ka³txa² ũ³hũ¹ain¹kxa² yain³ki̱³kxai²nãn²tu̱³ wai³nhĩ̱³nx2nxa³i¹. Yah³lxin¹jau³su² nxe³yah³lxi³ta¹hi¹nhẽ¹la².  
\v 8 Wi¹lĩ²yũ¹nhẽ³ju³ta³la³ yũ²nxa³wa². Yain³ki̱³ju³txain²txi³ yain³ki̱³sxa³ju³tain²txi³ Txa²wã¹sũ̱³na² yen³nãu³a¹ hau³hau³kon³ye²na³la². Yain³ki̱³sxa³kxai²nãn²tu̱³ ko̱³nxe³ju³ta² ĩ²ũ¹nhẽ³lxa³lho³la². Te²yã¹nxe³sxã³ a²yain³kxi²ki̱³kxai²nãn²tu̱³ wi¹lĩ²yũ¹nhẽ³nũ³nxa³lho³la². Ĩ²li³ju³tai²na¹ hau³hau³kon³na³la². 
\p  
\v 9 Nxe³ha²kxai³la¹ wi¹la³ a³la³kxi²ki̱³kxan²ti³nũ¹ txa²wã³tã̱³nãu³ ĩ³nxa² a²ẽ¹na² a³la³kxi²nxa³te²a² ĩ²jah¹lxi³hẽ¹la². Ya³lo³txi²sxã³ yain³yah³lxin¹kxai²nãn²tu̱³ a²ẽ¹na² a³la³kxi²nxa³te²na² sa²kxai³lu² Txa²wã¹sũ̱³na² wãn³txa² a³la³kxi²nxa³ha²kxai³ ko̱³nxe³ti³ kãi³yain¹kxa²ya̱n³txi³su² nxe³ya³nx2ta¹wa².  
\v 10 Te²yã¹nxũn³sxã³ a³la³kxi²te² ĩ³nxai²na² txa²wã¹sũ̱³na²su² ki³lxo³te² sxi²ha² ĩ³yain³te³lhxã³ ã³wih¹yah³lxin¹kxai²nãn²tu̱³ a²ẽ¹na² a³la³kxi²nxa³te²na² sa²kxai³lu² a²wãn³txi³kxai³lu¹ a²ẽ¹na² e³kxi²nha²te³nah¹lxi¹: 
\p — Jah¹lai²li² txa²wã¹sũ̱³nu²sa²ki³lxo³te² sxi²ha² ã³wih¹na³na¹. ówih¹sxã³ yain³na³na¹. Nxe³ye²ha²kxai³ te²yã¹nxe² kãi³nũ³na¹tũ¹xã¹, ko̱³nxe³ti³ kãi³a¹kxan²ti³nã¹. Nxe² e³kxi²nha²hĩ̱³nx2na³la².  
\v 11 Nxe³kxai²nãn²tu̱³ jah¹lai²li² a²ẽ¹na² a³la³kxi²nxa³jah¹la² sa²kxai³lu² wã̱³txi³nũ¹hĩ̱³nx2na³la². Je³su²jah³lai²na² wãn³txa² wã̱³txi³ha²kxai³ jau¹xai²na² yxo²ĩ²xa³lho³la². Nxe³kxai²nãn²tu̱³ ã²la² a³la³kxi²te² ĩ²nxai²na² wxã̱i³ti³thin¹te²lah³lxi³hĩ̱³nxa¹lxa², Je³su²jah¹la² hi²sen³kxai³lu² a²ẽ¹na² sa²hau³ko³te³lhxã³ ya³lu²kxa²nu¹hain¹kxan²ti³na².  
\v 12 Nxe³yah³lxin¹kxai²nãn²tu̱³ a³la³kxi²nxa³jah¹la² wxa²wã³tã̱³su² jah¹lan²tu̱³ ko̱³nxe³ti³ kãi³ti³hi¹tain¹yah³lxi³hĩ̱³nxa¹lxa². Nxe³sxã³ Kris²tu³jah¹la² ko̱³nxe³ti³ kãi³si¹yhah³lxi³nũ³nhĩ̱³nxa¹lxa².  
\v 13 Jã¹nxa¹jut3su² ka³yxuh³xa² sĩ̱³na² ĩ³so¹jĩ²na¹ju³tan¹te²kxa³ya̱³lhu² kãin² a³la³kxi²nxa³jah¹la² kãi³a¹kxe³su² ĩ²sai¹nha²kxai³ wã̱³txi³sxã³ ko̱³nxe³ti³ kãi³si¹hai¹na¹kxa²ya̱n³txi³su² ka³yxuh³xa² sĩ̱³na² ĩ³so¹jĩ²xin²nxa³lho³la². Nxe³hĩ̱³na¹wa². 
\c 9  
\s1 Txa²wã¹sũ̱³na² ĩ³kaix1so¹te²su² yxau²xai³kxi³jau³su² 
\p  
\v 1 Nxa²ha¹te¹ ã³wa²sut1sxã³ yxau³na¹wa². Je³su²jah³lai²na² ĩ³kaix1so¹sa²jah¹lo²su² na¹wa². Je³su²jah³lai²na² Txa²wã¹hxi²kan¹ta² Si³yxau³jah¹lo²su² ha²kxai³ txa²yen³khai¹xai²na² wi¹wi¹nxe² ĩ²jah¹lo²su² te²sa¹wa². Je³su²jah³lai²na² wãn³txa² yxo²ĩ²yah³lxin¹ju³ta³nũ³su² kãin² o²la³kxi²nũh¹nx2ta¹tai¹ti²tu³wa².  
\v 2 Je³su²jah³lai²na² ĩ³kaix1so¹sa²ju³ta² a²nũ²a² ã̱³xa² yxo²ĩ²yũ¹sai¹nxa³wa². Nxe³sain¹kxan²ti³ wxãi²na² yxo²ĩ²yũ¹sah¹lxi¹lxa². Txa²hxi²kan¹ta² Si³yxau³jah¹la² Kris²tu³jah¹lo²su² te²a² ĩ³yau¹ũ¹nx2ti³jah¹lo²su² te²sa¹jai¹ti²tu¹wa². 
\p  
\v 3 Nxe³sxã³ yxo²ĩ²sai¹nxa³te²na² ĩ³wã̱³txi³sain¹kxai²nãn²tu̱³ nxe² ĩ³wa²lũ³xai¹na¹wa².  
\v 4 Jã¹nxe³sxã³ wa³ko³na¹tãu³a² yain³txi³su² ta̱³nxa² ĩ³na²kxi²jau³su² ta̱³nxa² ũ³hũh¹sain¹kxai²nãn²tu̱³ sa²so¹kxai¹na¹ju³ta² wain³na³la². Hxi²ka¹nhĩ̱³na¹wa².  
\v 5 Te²yã¹nxe³sxã³ txu¹ha² Txa²wã¹sũ̱³na² wãn³txa² yxo²ĩ²ta¹ka³lxa² so¹na¹tũ¹xã¹. Nxa¹kxai²nãn²tu̱³ wain³na³la². U²lxi³ hai³kxa² ai³li² kan²txi³ tẽ³i² nxe³na¹ju³ta² wain³na³la². Txa²wã¹sũ̱³na² ĩ³kaix1so¹tũ̱³ka̱³txa² te²yã¹nxe² kãi³i² Je³su²jah³lai²na² Txa²wã¹hxi²kan¹ta² Si³yxau³jah¹lai²na² a²lon³ti³nãu³xa² te²yã¹nxe² kãi³ai¹ni² Pe²jah³lo¹na² te²yã¹nxe² kãi³i² nxain¹te²ju²hẽ³la². Te²yã¹nxe² kãi³a¹ju³ta² hxi²kan¹nũn³na¹wa².  
\v 6 Nxe³sxã³ Bar³na³be²ah³la² txai²na² Txa²wã¹sũ̱³na² wãn³txa² o²la³kxi²nũh¹nx2ti³ya³ha¹tãu³a² ũ³yho³hi²si¹sah¹lxi³nhĩn¹jau³nũ³su² kwa³na³sih¹nxa²lxa¹jau³su² wai³nhĩ̱³nx2na³la².  
\v 7 Te²u¹jã¹nxe³jut3su² so³ta²to² nũ̱³ka̱³txa² wa³ko³nain¹kxai²nãn²tu̱³ nũh¹wa³kon³sxã³ yain³txa² so¹kxain¹te²sxa³yu²hẽ³la². Yxãn¹ta¹ o²la³kxain¹kxa² yo³ha² ũ³yho³hi²hain¹te²jai¹ti²tu³wa². Te²yã¹nxe³sxã³ hai³sxa² ũ³whĩ̱¹jah¹lai²na² sa²kxai³lu² a²hai³sxa³khai³xa² yain³txa² ka³to³kxa² ĩ³yain³te²jai¹ti²tu³wa². Te²yã¹nxũn³sxã³ po¹na² wa³kxẽn³yah³la² sa²kxai³lu² po¹na² a²su³su³yau³xa² wxa²wxi̱¹so¹sxã³ ĩ³na²te²jai¹ti²tu³wa². Te²u¹jã¹nxe³nũ³nhĩ̱³na¹wa². 
\p  
\v 8 Nxe³nxa²ha¹te¹ ũ³wha²li¹txã³nxu¹tai²nãn¹jau³xa² te²yã¹nxe² e³kxi²nẽ³ta¹hxai²ti³ai¹ti²tu³wa².  
\v 9 Nxe³sxã³ Moi³se²ah³lo²nu¹tai²na² ũ³wha²li¹txã³nxu¹tai²nãn¹jau³xa² e³te³nah¹lxi¹: 
\p — Po¹nai²na² yũ¹te²a² yain³txa³ki³a² ti̱³ka³la³sxã³ ti̱³ha̱u³si¹hin¹jau³su² ã³ki³hain³kxi²xai³tãu³a² nxẽn¹tãu³a² po¹na² yxo²a² sa²yxo²tai³txa³hẽ¹li¹. Ĩ³yain³ti³ten³kxai²nãn²tu̱³ ĩ³yain³tai²li¹. Nxe³ta¹hxai²hẽ¹la². Nxe³jau³xu¹tai²na² sa²kxai³lu² po¹na² ũ³yhai¹ki̱³ju³ta² so¹lxi³ e³kxi²hĩ̱³nẽ³te²la¹xã³?  
\v 10 Ti³he¹nx2nxa³wa². Wa³kon³ki̱³kxa² yo³ha² ĩ³hau³ko³tũ¹nhẽ³te³lhxã³ nxe² ĩ³tih³nxe³nẽ³lain¹te²jai¹ti²ti¹. Hai³sxa² ũ³whĩ̱¹jah¹lai²na² sa²kxai³lu² yain³txa² ki³kan¹ju³ta³nũ³a² wah³nxe³ha²kxai³ yain³txa² ki³kan¹ki³a² wa²ni²lho¹jah¹la² wah³nxe³ha²kxai³ nxe³te²jai¹ti²ti¹. Wa²ni²lho¹hxa³tãu³a¹ yain³txa² wã²nhũ¹nyhu¹si¹nyhain¹jau³nũ³su² wah³nxain¹te²jai¹ti²tu³wa².  
\v 11 Jã¹nxa¹jut3su² wxa²ẽ¹nãu³ai²na² wãn³txa² wi¹jau³xa² ĩ³tih³nxe³nx2ti³nha¹ha²kxai³ wxa²yen³kxi³khai³xa² wã²nhũh¹sah¹lxi³nhĩn¹ju³ta² wain³na³la².  
\v 12 Txa²wã¹sũ̱³na² wãn³txa² ĩ³hen³txi³tũ̱³ka̱³txai²na² sa²kxai³lu² a²yxo²ha³kxa¹ nxe²kãi³ũ¹hain¹yah³lxin¹nũ²hẽ³la². Te²yã¹nxũn³sĩ¹na¹wa². Sa²sen³so¹sain¹sĩ¹nxa³wa². Yen³kxa² wã²nhũ¹nyhu¹ah³lxin¹kxa² so¹kxi¹nx2ti³sĩ¹na¹ju³ta² wai³nhĩ̱³nx2na³la². Yxãn¹ta¹ wain³kxan²ti³ hai³txi³ wxa²yen³kxa² ten³sĩn¹te²txã³wa². Kris²tu³jah¹lai²na² wãn³txa² wi¹jau³xa² ĩ³wã̱³wã̱³txi³yah³lxin¹kxa²ya̱n³txi³su² txa²hxi²ka² wa³kon³sĩ¹na¹tai¹ti²tu³wa².  
\v 13 Te²yã¹nxe³ju³kxai³lu¹ a²nũ²a² ĩ²li³te²a² ka³yxuh³xa² tẽ³sxã³ wxã³nũ²la² Txa²wã¹sũ̱³na² ũ³hũ¹te³lhxã³ nxain¹kxai²nãn²tu̱³ txah³lxa³kxa² a²ne³ka³na²nhãu³a² a²wã³kxi³kxai³ ũh³wxe² a²wã³kxi³kxai³ sa²so² nxe³sxã³ yai³nain¹te²jai¹ti²tu³wa². Te²yã¹nxe³sxã³ Txa²wã¹sũ̱³na² sxi²ha² hau³ko³tũ̱³ka̱³txa² wa³ko³nain¹tãu³a² yain³kxi³kxai³ yãx1te²a² yai³nain¹te²jai¹ti²tu³wa².  
\v 14 Nxe³kxa² yã¹nxe³sxã³ Txa²wã¹sũ̱³na² wãn³txa² ĩ³yau¹ũ³tũ̱³ka̱³txai²na² sa²kxai³lu² ain³kxi²tũ̱³ka̱³txa² hxi²ka² ũ³yhai¹txain¹te²ju²hẽ³la². 
\p  
\v 15 Jã¹nxa¹ju³kxai³lu¹ te²yã¹nxe² hxi²ka¹na¹kxan²ti³nũ¹ ten³sa²nxa³hẽ¹la². Hai³txi³ a²hĩ¹na¹ ten³sa²nxa³lho³la². He³ja³lu²sa²te³lhxã³ sa³kxan²ti³ yain³txa² ĩ³yai³nxũ³nxa²lxi³te²txã³wa². Jã¹nxe³sxã³ wxa²yen³kxa² wã²nhũh¹sah¹lxin¹ju³ta² ten³sa²nxa³nha²wa². Txa²wã¹sũ̱³na² hi²sen³su² yen³kxa² ten³sa²kxa² ta̱³nxa² yain³txa² yai¹na¹kxa² ta̱³nxa² ĩ³hau³ko³tũh¹sain¹na²hẽ³la². Jãx1sain¹tu¹wa². Nxe³ju³ta² so¹lxi³ te³na¹jau³su² yxo²kãin²txi³ ĩ³hen³txi³na¹tu¹wa².  
\v 16 Txa²wã¹sũ̱³na² wãn³txa² wi¹jau³xa² ĩ³yau¹ũ³hai¹na¹ju³ta² ten³jau³su² ĩ³sa²si¹hã³sa³na²hẽ³la². Ĩ³sa²si¹hã³sa³ha²kxai³ nxe³ju³tan¹te²kxa³ya̱³lhu² ju¹tai²li² o²la³kxi²na¹wa². Nxe³na¹ju³ta² o²la³kxi²na¹ha²kxai³ yxo²kãin²txi³ kwait1te²txã³wa². Yxãn¹ta¹ ju¹tai²li² ĩ³hen³txain¹nxa³kxai²nãn²tũ³ Txa²wã¹sũ̱³na² ko̱³ton³kxi³sa²kxa²ya̱n³txi³su² nxa¹nha²wa².  
\v 17 Te²yã¹nxe³ju³kxai³lu¹: 
\p — Txa²wã¹sũ̱³na² wãn³txa² wã²nxũ̱h¹lxi³ ĩ³hen³txi³na¹tũ¹xã¹. Na¹ke³la³te²kxai³ ĩ³hen³txi³na¹kxa² yo³ha² yũ³sa³hĩ̱³nx2na³la². Nxe³na¹ta¹ Txa²wã¹sũ̱³na² kwa³na³sa³na²hẽ³la². Nxe³sa³ha²kxai³ te³na¹jut3su² ta̱³nxa² ten³nxa³jut3su² ta̱³nxa² yũ²nxa³wa². Sa²wai³wait3sxã³ sa²yxo²we¹tai¹na¹ju³ta² so¹lxi³ yũ²na³la².  
\v 18 Nxe³na¹jut3su² yã¹te²ta̱³ ũ³yho³hi²sa²te³ji¹wa²? Wãn³txai²li² ĩ³hen³txi³na¹tãu³a¹ a²yo³ha² ten³nxa³ju³ta² ka³lih³kxi²sa³tu¹wa². Ju¹tai²na² so¹lxi³ ten³sa³nha²wa². Wã²nxũ̱h¹ ĩ³hen³txi³na¹wa². Ũ³yho³hi²sa²si¹yhah¹lxin¹jau³su² hxi²kan¹txi³ kwa³na³nx2ta¹kxan²ti³ wxa²yen³kxa² ten³te²txã³wa². 
\p  
\v 19 ówa²sut1sxã³ yxau³jah¹lo²sa¹wa². Ũ³yho³hi²sa²jah¹lo²la³ yũ³sa²nxa³ha²kxai³ sa²yxo²we¹ta¹ju³ta³la³ yũ³sa²nxa³nha²wa². Nxe³yãn¹ta¹ a²nũ²a² ĩ²li³te²su² te²a² Kris²tu³jah¹lai²na² wãn³txa² ĩ³yau¹ũ³te³lhxã³ nxa¹wa². Nxe³sxã³ wã²nxũ̱h¹ wi¹lhit1sxã³ kwa²wa³ka³li³yu³ta³lo³tũ¹ha¹tu¹wa².  
\v 20 Jã¹nxa¹ju³kxai³lu² Kris²tu³jah¹lai²na² wãn³txa² sa²yxo²we¹ta¹ha²kxai³ ã³wa²sut1sxã³ yxau³na¹wa². Hai³txi³ Ju³te²a² nũ̱³ka̱³txai²na² yxau²xai³lain¹ju³ta³la³ a²wa³kxẽn³tot3sai¹nxa³ha²kxai³ Moi³se²ah³lu¹tai²na² kwa³na³jau³xu¹tai²na² a²wa³kxẽn³tot3sa²nxa³ha²kxai³ nxe³jah¹lo²sa¹wa². Nxe³te²sa¹kxan²ti³ Ju³te²an¹ta² sxi²nhãu³a² yxau²xai³la¹kxai²nãn²tu̱³ Ju³te²an¹tũ̱³ka̱³txa² yxau²xai³kxa²yã¹nxe² yxau²xai³la¹wa². Nxa¹ju³tan¹te²kxa³ya̱³lhu² Je³su²jah¹lai²na² wãn³txa² yxo²ĩ² ã³si³wxe³ain¹tu¹wa². Te²yã¹nxe³sxã³ Moi³se²ah³lo²nu¹tai²na² wãn³txa² sa²yxo²we¹jah¹lai²na² sxi²nhau³a² yxau²xai³la¹kxai²nãn²tu̱³ nxe³jah¹lu¹ta² yã¹nxe² yxau²xai³la¹wa², Je³su²jah³lai²na² wãn³txa² yxo²ĩ²si¹hain¹jau³sa³.  
\v 21 Te²yã¹nxe³sxã³ Ju³te²a² nũ̱³ka̱³txi³sxa³te²nãu³xa² a²sxi²nhãu³a² yxau²xai³la¹kxai²nãn²tu̱³ Moi³se²ah³lo²nu¹tai²na² kwa³na³jau³xu¹tai²na² nxe³wã²na³a¹wa², Kris²tu³jah¹lai²na² wãn³txa² sa²yxo²wet1si¹hai¹na¹jau³sa³. Jã¹nxa¹jut3su² Txa²wã¹sũ̱³na² kwa³na³jau³xa² sa²yxo²ã³nxa³hẽ³la². Nxe³yãn¹ta¹ Kris²tu³jah¹lai²na² kwa³na³jau³xa² sa²yxo²we¹ta¹jau³lo³na¹wa².  
\v 22 A²nũ²a² a²ẽ¹nãu³a² a³la³kxi²nxa³te²a² yxau³kxai¹na¹kxai²nãn²tu̱³ ã²la² kãin² a³la³kxi²na¹jau³xai²na² yxo²kãin²txi³ ĩ³yau¹ũ³hai¹na¹ju³ta² yũ²nxa³wa². Nxe²nxa³ju³ta²sa¹: 
\p — Toh³li³jau³su² e³i¹lxi¹. A³la³kxi¹nxa³lxi¹. Nxa¹jau³la³ e³sa²nxa³nha²wa². Nxe³na¹ju³kxai³lu² a²nũ²a² ĩ²li³te²su² te²a² hxi²kan¹txi³ ĩ³yan³ta³kxi²sxã³ yxau³nũ¹ha¹kxai²nãn²tu̱³ nxe²kãi³ũ¹ha¹wa². Kris²tu³jah¹lai²na² wãn³txa² yxo²ĩ²ain¹jau³nũ³a² so¹lxi³ ten³sa³nha²wa². 
\p  
\v 23 A²nũ²a² a²yxo²ha³kxa¹ Kris²tu³jah¹lai²na² wãn³txa² ain³kxi²si¹hai¹na¹jau³su² nxe²kãi³a¹wa². Nxe³sxã³ ain³kxain¹kxai²nãn²tu̱³ ĩ³ka³li³kxi²nũ¹sain¹na³la².  
\v 24 Nxa²ha¹te¹ a²nũ²a² kwa²wa³ni³lon³sxã³ ã³naun³ti¹hain¹kxai²nãn²tu̱³ ka³na³ka³nat3sxã³ ne³ka³ta²xi²te²an²tu̱³ a²yo³ha² so¹kxi²te²ju²hẽ³la², a²yxo²ha³kxa¹ ã³naun³ti¹hain¹kxan²ti³na². Ne³ka³ta²xi²jah¹la² so¹lxi³ yãn¹txi³ nũ̱³kxũn³txi³ ã³ni³ha²kxai³ a²yo³ha² so¹kxi²te²ju²hẽ³la². Ju¹ta² yã¹nxe³jut3sũ̱³nxe² nxũ²kwa̱i³lxũ¹txi³ Je³su²jah³lai²na² wãn³txa² sa²yxo²we¹jah³lxi³hẽ¹la².  
\v 25 Kwa²wa³ni³lon³kxi²te²su² te²a² a²yo³ha² ũ³nhe³hẽ¹nha²ka³lo³a² so¹te³lhxã³ ne³ka³ta²ain¹te²ju²hẽ³la². Ũ³nhe³hẽ¹nha²ka³lo³a² so¹te³lhxã³ ain¹kxai²nãn²tu̱³ a²nũ²khai³nãu³ai²na² nũ³kxũn³txi³ a³wa³ni³lon³sai³nhain¹sãn²te²ju²hẽ³la². Ain¹kxai²nãn²tu̱³ ũ³nhe³hẽ¹nha²ka³lo³a² so¹hĩ̱³nx2na³la². ùnxe³ka³lo³a² wa³su³txi³ khon³kxi²te²ju²hẽ³la². Yxãn¹ta¹ Kris²tu³jah¹lai²na² wãn³txa² wain³txi³ sa²yxo²wet1sxã³ yxau³kxi²ki̱³kxai²nãn²tu̱³ kxãn¹nãu³a¹ oh³nãu³a¹ yxau³ki̱³tãu³a¹ ũ³yho³hi²nẽ³tu¹wa². A²nxe³nẽ³te²a² khon³kxi²ti³he¹nxe³lxa³lho³la².  
\v 26 Nxe³te²yo³ha² so¹kxi²te³lhxã³ nũ³kxũn¹txi³ ã³nih³jut3sũ̱³nxe² o²la³kxi²na¹wa². Jã¹nxũn³sxã³ a²nũ²a² ha¹li¹ ã³wa³ni̱³lon³sxã³ ã³nhe¹lain¹te²ju²hẽ³la². Nxe³ya³kxai²nãn²tu̱³ a²nxe³jah¹lo²su² jah¹la² nũ³kxũn³jah¹la² a²hxi²kan¹jah¹lo²su² hĩ̱³nx2na³la². Yxãn¹ta¹ nũ³kxũn³yah³xa³kxai²nãn²tu̱³ hxi²kan¹txi³sya¹hĩ̱³nx2nxa³wa². Jã¹nxe³jut3sũ̱³nxe² Txa²wã¹sũ̱³na² wãn³txai²li² ĩ³yau¹ũ³a¹jau³xai²li² nũ̱³kxũn³sxã³ o²la³kxi²na¹wa².  
\v 27 Nxe³na¹ju³ta² txa²nũ²nãu³khai³xai²na² sa²yxo²we¹nha²si¹sa²jau³su² txa²nũ²khai³xa² wxa²ka³to³nha² yxau²xai³nha¹wa². Nxe³ha²kxai³ kxã³nãu³a¹ Je³su²jah³la² yen³nãu³a¹ wãn³txa² wi¹jau³xa² ĩ³yau¹ũ³ta³lu²na¹tãu³a¹ txa²nũ²nãu³khai³xa² wxa²ka³to³nha² yxau²xai³na¹ju³tai³tã² wi¹lĩ²sa²nxa³kxa²ya̱n³txi³su² nxe² o²la³kxi²na¹wa². 
\c 10  
\s1 Sũ̱³na² ki³lxo³ka³txa² sa²yxo²we¹jau³su² 
\p  
\v 1 Nxa²ha¹te¹ txa²wã³tã̱³nãu³xãi³. Txa²wã¹yah³la²nãu³xu¹tai²na² ĩ²xi²nha¹jah³lxi³hẽ¹la². Moi³se²ah³lo²nu¹tai²na² ã³tẽ³sxã³ ai³tũ̱³ka̱³txu¹txai²na² ĩ²xi²nha¹jah³lxi³hẽ¹la². E³ji²ta²ko³xa² a³li³ai¹nhĩ¹nu¹tai²na² a³lan²ta² Txa²wã¹sũ̱³na² hi²sen³su² o³sĩ̱³na² ĩ³sa²si¹hã³ũ¹ha²kxai³ ã³tĩ¹kxa² ai³nu¹hain¹ta¹hxai²hẽ¹la². Nxe³ain¹tãu³a² ĩ̱³ye³na² kah³je³na² ya̱u³son¹kxai¹nha²kxai³ hxi²kan¹txi³ yxo²ha³ti³lhi³ain¹ta¹hxai²nxa³hẽ¹la². Ai¹nha²kxai³ Txa²wã¹sũ̱³na² sa²kxai³lu² wã³nxĩn¹sxã³ o²la³kxi²sxã³ ĩ̱³ye³na² nxũ²kwa̱i³ye³la²tĩh³na¹ jã¹tĩh³na¹ a²yu³kxa² ai³tĩh³na²nũ³a² sa²we¹ta¹hxai²hẽ¹la². A²nxe³tĩh³na² te²tĩh³na² we¹tũ²la² Moi³se²ah³lo²nu¹tai²na² a²nũ̱³ka̱³txai²na² yxo²ha³kxa¹ ĩ³ha³la³te²ti³hi¹tĩh³na¹ aun³ta² yxo²ha³ti³lhi³yah³lxi³ta¹hxai²hẽ¹la².  
\v 2 Ai¹nha²kxai³ a²yxo²ha³kxa¹ Moi³se²ah³lo²nu¹tai²na² yxo²ĩ²ai¹nha²kxai³ a²nũ̱³ka̱³txi³khai³su² so¹nain¹ta¹hxai²hẽ¹la². A²yxo²ha³kxa¹ ã³nũ²nxi² o³sĩ̱³nai²na² ã³tĩ¹kxa² ai³ai¹nha²kxai³ ĩ̱³ye³na² nxũ²kwa̱i³ye³la³tĩh³na² yxo²ha³ti³lhi³ai¹nha²kxai³ nxain¹ta¹hxai²hẽ¹la².  
\v 3 Ai¹nha²kxai³ a²yxo²ha³kxa¹ yain³tũ̱³xa² oh³nãu³a² ĩ³sa²si¹hã³tũ³xa² yai³nain¹ta¹hxai²hẽ¹la².  
\v 4 A²yxo²ha³kxa¹ ĩ̱³yau³xa² wã³nxĩn¹jau³xa² na²ain¹ta¹hxai²hẽ¹la². A²kxã¹nxa¹ ĩ̱³yau³xa² yũ²nxa³ko³xa² ã³nxai³ai¹nha²kxai³ Txa²wã¹sũ̱³na² hi²sen³su² Moi³se²ah³lo²nu¹tai²na² ĩ³kwa³na³ha²kxai³ hi³sa³ka³txa² hxi²tẽ³nha²sxã³ txah³lxa³kxa² ĩ³su²ta¹hxai²hẽ¹la². Ĩ³su²lha²kxai³ ĩ̱³yau³xa² ha³li³ ã³si³wxe³ye²ta¹hxai²hẽ¹la². Ha³li³ye¹nxa²ha¹te¹ Moi³se²ah³la² nũ̱³ka̱³txi³nu¹tai²na² a²yxo²ha³kxa¹ na²ain¹ta¹hxai²hẽ¹la². Jã¹nxain¹jut3su² Tah³lxa³kxi³nũ¹tai²li² wã³nxĩn¹ka³txa³nũ¹tai²li² ã³si³tẽ³kxain¹ta¹hxai²hẽ¹la². Nxe³ta³ka³txa³nu¹tai²li² Kris²tu³jah¹lo²su² ta¹hxai²hẽ¹la².  
\v 5 Nxe²xai³ain¹kxan²ti³ a²ka³lxa¹txi³su² nũn³tãu³a² hai³txi³ Txa²wã¹sũ̱³na² ĩ³wi¹lxo³kxi²sxã³ ĩ³ka³li³kxai¹nxa³ju³tan¹te²kxa³ya̱³lhu² ha³lo²a² ĩ²ai¹nxa³ko³nãu³a² ya³lun¹ti²hxa³nain¹ta¹hxai²hẽ¹la², a²nũ²a² hxi²kan¹ta³nũ̱³ka̱³txa²sa². 
\p  
\v 6 A²nxe³jau³jau¹xai²na² ĩ³yau¹ũ³nhẽ³jau³xai²la¹wa². Ko̱³nxe³ti³ kãi³sxã³ yxo²kwa̱i³nain¹kai³ jã¹nxe³ki̱³kxa²ya̱n³ti³su² ĩ³yau¹ũ³nhẽ³jau³xai²la¹wa².  
\v 7 Te²yã¹nxe² txa²wã¹sũ̱³nu²su² ki³lxo³ka³txa² sa²yxo²we¹tain¹ku¹jã¹xah³lxi³txa³hẽ¹la². A²kxã³nxa¹ sa²yxo²we¹tain¹ku¹jã¹xah³lxi³txa³hẽ¹la². Nxe³jau³xai²li² Txa²wã¹sũ̱³na² ũ³wha²li¹txã³nxai³tãn¹jau³xa² e³te³nah¹lxi¹: 
\p — A²nũ²a² ã³wxe³ain¹sãn²nũ²la² txa²wã¹sũ̱³nu²su² ki³lxo³ka³txa² yain³txa² yai³ni² ĩ³na²kxi²jau³xa² ĩ³na² ain¹ta¹hxai²hẽ¹li¹. Nxe³nũ²la² ĩ³sa²yxau³nũ²la² kuh³lxa³thin¹sxã³ ko̱³txi³ wa³ni̱³lo³nain¹ta¹hxai²hẽ¹li¹. Nxe³ta¹hxai²hẽ¹la².  
\v 8 Te²u¹jã¹nxe² kuh³lxa³thin¹sxã³ ko̱³txi³ o²la³kxi²yah³lxi³txa³hẽ¹la². A²kxã³nhxĩ¹nu¹tai²na² kuh³lxa³thin¹sxã³ ko̱³txi³ o²la³kxi³nyhain¹ta¹hxai²ti³ai¹ti²tu³wa². Kuh³lxa³thin¹sxã³ ko̱³txi³ o²la³kxi²nyhai¹nha²kxai³ ye³ka³na³ka³nat3sxã³ a³la²ni²hĩ¹na¹ a²hĩn¹so¹lxi³ a²nũ²a²nãu³xa² ka³lxa¹khai¹nxe³kxan²ti³ 23.000 nxe³tũ̱³ka̱³txa² ya²lun¹txain¹ta¹hxai²hẽ¹la².  
\v 9 Txa²wã¹sũ̱³na² hxi²ye¹ta³lxi³yah³lxi³txa³hẽ¹la². Nxe³ju³tan¹jau³xa² e³yah³lxi³txa³hẽ¹la². Te³nah¹lxi¹: 
\p — Ko̱³nxe³ti³ kãi³a¹kxan²ti³ Txa²wã¹sũ̱³nai²li² hai³txi³ ko̱³nxe³ti³ kãi³a¹kxa² yo³ha² ũ³hũ¹sa²nxa³lho³na¹. Yah³lxin¹jau³la³ e³yah³lxi³txa³hẽ¹la². A²kxã³nxu¹tai²na² nxe²kãi³ain¹ta¹hxai²ti³ai¹ti²tu³wa². Nxe²kãi³ai¹nha²kxai³ Txa²wã¹sũ̱³na² hi²sen³kxai³lu² txih³xa² wĩ̱x1te²a² ĩ³sa²si¹hã³ũ¹hai¹nha²kxai³ ka³lxa¹txi³ ĩ³lxa²ya²lu¹ta³lxain¹ta¹hxai²ti³ai¹ti²tu³wa².  
\v 10 Txa²wã¹sũ̱³na² kãi³ũ¹nhẽ³ju³ta² yxo²xũ̱n¹txi³ ĩ³kwa̱i²txa³lxi³yah³lxi³txa³hẽ¹la². A²kxã³nxu¹tai²na² Txa²wã¹sũ̱³na² ĩ³kwa̱i²txa³lxi³yai¹nha²kxai³ Txa²wã¹sũ̱³na² hi²sen³kxai³lu² oh³xan¹jah¹la² sa²si¹hã³ha²kxai³ a³ka³nxi²sxã³ a²nũ²a² ka³lxa¹txi³ ĩ³ya²lu¹ta³lxi³ta¹hxai²ti³ai¹ti²tu³wa². 
\p  
\v 11 Nxe³ju¹tai²na² yxo²ha³kxa¹ ũ³yhe³ka¹tẽ³ju³ta² ta¹hxai²hẽ¹la². Nxe³hĩ¹nãn¹te²tu̱³ jau³jau¹xu¹tai²na² ĩ²ki̱³kxai²nãn²tu̱³ ĩ³tih³nxe³nẽ³jau³xai²la¹wa². Txa²wã¹ha³lo²a² yuh³xan¹ko³ko¹xai²na² ne³ki³son³ju³ta³nũ³su² ya̱u³son³na³la². 
\p  
\v 12 Jã¹nxe³jut3su² ĩ²li³te²a² a²wãn³txi³kxai³lu¹ a²ẽ¹na² e³kxi²nha²te³nah¹lxi¹: 
\p — A³la³kxi²khaix1na¹xã¹. Hai³txi³ ko̱³nxe³ti³ kãi³nxa³lho³nã¹ txai²lã¹. Nxe³kxai²nãn²tu̱³ wi¹lĩ²nha²khai¹nxe³jah¹lxi³hẽ¹la². Ko̱³nxe³ti³ ã³ni²lhxã³ ã³wi¹hã³sxã³ ko̱³nxe³ti³ kãi³yah³lxi¹nha³ta²wa².  
\v 13 Ko̱³nxe³ti³ kãi³si¹yhah³lxin¹jau³su² a²nũ²a² yxo²ha³kxa¹ kãi³sain³te²ju²hẽ³la². Nxe² ko̱³nxe³ti³ kãi³sain³si¹nxa²lxi³tãu³a² Txa²wã¹sũ̱³na² sa²kxai³lu² ne³wã²na³nx2ti³xa²lho³la². E³kxi¹nx2ti³jau³xa² sa²yxo²ã³nha²nxa³sxã³ kãi³ũh¹nx2ti³tu¹wa². Nxe³ha²kxai³ ĩ³nxũ²kwa̱i³lxũ¹nx2ti³tu¹wa². Nxe³nx2ti³ju³tan¹te²kxa³ya̱³lhu² ko̱³nxe³ti³ kãi³sain³si¹nx2ti³ju³ta³la³ a²ta³a² hxi²ka² hxi²tha³txa¹lxi³xa³lho³la². Hãi¹sxã³ nũ³kxũn³txi³ ã³sen³sai¹ah³lxin¹tu¹wa². 
\p  
\v 14 Jã¹nxe³jut3su² a³lxi¹nx2ta¹wa². Ka³lih³kxi²la²nha² thãi³ti³la²sxã³ e³kxi¹nx2ta¹tu¹wa². Ain³kxi²sah¹lxi³hẽ¹la². Txa²wã¹sũ̱³nu²su² ki³lxo³te²su² sa²nẽn¹kxi²yah³lxi³txa³hẽ¹la². ójxah¹lxi³hẽ¹la².  
\v 15 A³la³kxah¹lxi¹nha²kxai³ e³la¹ ĩ³ye³kxi¹nx2ta¹wa². Nxe³sxã³ e³kxi¹nx2ta¹jau³xai²li² wã²nxũ̱h¹ ĩ²nha¹jah³lxi³hẽ¹la².  
\v 16 Je³su² Kris²tu³jah¹la² ya³lu²kxi²nẽ³lhĩ¹nai³tãn¹jau³xa² ĩ²xi²nha¹jah³lxi³hẽ¹la². A²sa³wi³ha³lxa² ĩ³kaix1sxã³ ã³yã³nũ²kxi²sãn²nũ²la² yain³jau³xa² na²sxã³ sa²ni²lhon¹ta³kxi²xai³ain¹na²hẽ³la². Nxe³ki̱³jau³xa² yã¹nxe² na²sxã³ sa²ni²lhon¹ta³kxi²xai³ki̱³tãu³a² Kris²tu³jah¹la² a²ti³ha²yau³xa² ha³li³ũ¹nhẽ³ju³tai³tã² ĩ²xi²ki̱³tã³la². Te²yã¹nxũn³sxã³ yain³tũ̱³xa² yain³yah³lxi³na²hẽ³la². Yain³tũ̱³xa² yã¹nxe² yain³ki̱³te³na¹ Kris²tu³jah¹la² ya³lu²kxa²nu¹nhẽ³ju³ta² ĩ²xi²ki̱³tã³la².  
\v 17 Txa²wã¹ki̱³na¹xai²na² ka³lxa¹ki̱³kxan²ti³ tũ̱¹xai²na² yain³tũ̱³xa² nũ̱³ka³na³ka³nat3sxã³ yain³ki̱³tã³la². Te²yã¹nxe³kxe³hũ̱³nxe² Kris²tu³jah¹la² yxo²ĩ²ki̱³tũ̱³ka̱³txi³ki̱³na¹xa² ka³na³ka³na³ki̱³tã³la². A²nũ²a² ka³na³ka³na³kxa² yã¹nxe² ki̱³tã³la². 
\p  
\v 18 Nxa²ha¹te¹ Ju³te²a² nũ̱³ka̱³txa² ĩ²xi²nha¹jah³lxi³hẽ¹la². Yain³txi³nũ̱³su² tũ̱³xa² Txa²wã¹sũ̱³na² ũ³hũ¹ain¹tũ̱³xa² tẽ³sxã³ yai³nain¹ta¹hxai²ti³ai¹ti²tu³wa². Txah³lxa³kxa³txa² ũ³nhe³hẽt1tain¹sãn²nũ²la² hã²wxãn³txa³ yai³nain¹ta¹hxai²ti³ai¹ti²tu³wa². Nxe³ki̱³sa²kxai³ yai³nain¹te³na¹ a²yxo²ha³kxa¹ ã³nũ²nxi²sxã³ Txa²wã¹sũ̱³na² sa²nẽn¹kxain¹ta¹hxai²ti³ai¹ti²tu³wa².  
\v 19 Jã¹nxe³jut3su² Txa²wã¹sũ̱³nu²su² ki³lxo³ka³txa² yain³txa² ũ³hũ¹ki̱³kxai²nãn²tu̱³ wã³nxĩn¹ki̱³ju³ta² kãi³hĩ̱³ki̱³te²la¹xã³?  
\v 20 Hai³txi³ ti³he¹nx2nxa³wa². Hãi¹sxã³ Txa²wã¹sũ̱³na² yxo²ĩ²ai¹nxa³tũ̱³ka̱³txai²na² sa²kxai³lu² Txa²wã¹sũ̱³nu²su² ki³lxo³ka³txa² yain³txa² ũ³hũ¹sxã³ sa²nẽn¹kxi²kxai²nãn²tu̱³ ko̱³nxe³te²a² yãu³ka³txa² ũ³hũ¹nyhai¹nhĩ̱³nx2na³la². Hai³txi³ Txa²wã¹sũ̱³na² wi¹tãu³la³ ũ³hũ¹nyhai¹nhĩ̱³nx2nxa³wa². Jã¹nxe³jut3su² ha²kxai³ ko̱³nxe³te²a² yãu³ka³txa² o²la³kxi²nu¹nyhah³lxin¹ju³ta² ten³ti³hex1sa²nxa³nha²wa².  
\v 21 Txa²wã¹sũ̱³na² na²jau³xai²na² sa²kxai³lu² Txa²wã¹hxi²kan¹ta² Si³yxau³jah¹la² ya³lu²kxi²nũ¹nhẽ³ju³tai³tã² ĩ²xi²ki̱³jau³xai²na² sa²kxai³lu² ĩ³na²sxã³ sa²ni²lhon¹ta³kxah³lxin¹kxai²nãn²tu̱³ ko̱³nxe³te²a² yãu³ka³txa² na²jau³xa² ĩ³na²sxã³ sa²ni²lhon¹ta³kxah³lxin¹ju³ta² wai³nxa³wa². Yau³ha¹li¹ ĩ³na²yah³lxin¹kxai²nãn²tu̱³ wai³nxa³wa². Te²yã¹nxe³sxã³ Txa²wã¹sũ̱³na² yain³tũ̱³xai²na² sa²kxai³lu² Txa²wã¹hxi²kan¹ta² Si³yxau³jah¹la² ya³lu²kxi²nũ¹nhẽ³ju³tai³tã² ĩ²xi²ki̱³jau³xai²na² sa²kxai³lu² yain³yah³lxin¹kxai²nãn²tu̱³ ko̱³nxe³te²a² yãu³ka³txa² yain³tũ̱³xa² yain³yah³lxi³nũ³nĩn¹kxai²nãn²tu̱³ wai³nxa³wa². Ko̱³nxe³te²a² yãu³ka³txa² yain³tũ̱³xa² yain³yah³lxin¹ju³ta² wai³nxa³wa². Tũ̱³ha¹li¹ yain³yah³lxin¹kxai²nãn²tu̱³ wai³nxa³wa².  
\v 22 Txa²wã¹hxi²kan¹ta² Si³yxau³jah¹la² ĩ³xa̱n³ta³kxi²nẽ³ju³ta² ten³yah³lxin¹ta¹ji¹wa²? Txa²wã¹hxi²kan¹ta² Si³yxau³jah¹la² nũ³kxũn³te²jai¹ti²tu³wa². Nxe³to³ta¹ nũ³kxũn³sxã³ ã³sen³sai¹yah³lxi³hĩ̱³nxãn¹ji¹wa²? Hai³txi³ ti³he¹yxah³lxi³hĩ̱²nxa³lxa². 
\s1 A³lxi²waun¹nyhu¹sxã³ kãi³nyhu¹ki̱³jau³su² 
\p  
\v 23 Nxa²ha¹te¹ wxa²ha³tih³ ĩ³nxa² nxe²e³kxah¹lxin¹te³nah¹lxi¹: 
\p — “Ĩ²li³ju³ta² kãi³a¹tũ¹xã¹.” Nxa¹kxai²nãn²tu̱³ hxi²kan¹txi³ kãi³hĩ̱³na¹wi¹. Yah³lxin¹jau³xa² wain³na³la². Yxãn¹ta¹ wi¹lye²nxa³kxai²nãn²tu̱³ wai³nxa³wa². ónxũ²kwa̱i³lxũ¹waun¹nyhu¹xa³kxai²nãn²tu̱³ wai³nxa³wa².  
\v 24 Te²yã¹nxe³sxã³ wxa²ten³yah³lxin¹ju³khai³xa² so¹lxi³ ã³no²la³kxi²nyhah¹lxi³txa³hẽ¹la². Wxa²wã³tã̱³xai²na² a²ten³ju³ta² ã³no²la³kxi²nũ¹txain¹yah³lxi³nũ³nhẽ¹la². 
\p  
\v 25 Nxe³sxã³ nxe²kãi³jah¹lxi³hẽ¹la². Ka³yxuh³xa² sĩ̱³na² sxi²ha² so¹kxi²nyhu¹kxi³thĩ³na² ai³yah³lxin¹kxai²nãn²tu̱³ ka³yxuh³xa² ĩ²li³thĩ³na² ten³yah³lxin¹kxa² so¹kxi¹txain¹yah³lxi³hẽ¹la². Ko̱³nxe³te²a² yãu³ka³txa² ĩ³yain³jau³nũ³la³ ĩ³wã̱³txain¹yah³lxi³txa³hẽ¹la². Ĩ³wã̱³txain¹yah³lxan³ka³tu̱³ e³kxi²nha²yah³lxan³ka³tu̱³ hãi¹sxã³ wã²nhĩt1jah³lxi³hẽ¹la².  
\v 26 Nxe³ju³tai²li² Txa²wã¹sũ̱³na² ũ³wha²li¹txã³nxai³tã² nxe³te³nah¹lxi¹: 
\p — Txa²wã¹ha³lo²a² yxo²ha³kxa¹ yen³kxai²na² yxo²ha³kxa¹ Txa²wã¹hxi²kan¹ta² Si³yxau³jah¹la² a²wa³kxẽn³txa²na³li¹. Nxe³ta¹hxai²hẽ¹la². 
\p  
\v 27 Nxe³ha²kxai³ Txa²wã¹sũ̱³na² wãn³txa² yxo²ĩ²xa³te²a² ĩ³yain³te³lhxã³ ka²la¹txa³lxi³kxai²nãn²tu̱³: 
\p — Ai³sxã³ yain³kxi²ti³ten³sa³nha¹. Yxah³lxin¹kxai²nãn²tu̱³ yain³txa² ũ³hũ¹nx2ti³kxa² hãi¹sxã³ yain³jah¹lxi³hẽ¹la². Kãin² a³la³kxi²nxa³jah¹la² yain³txa² ĩ³wã̱³txi¹nũ¹hain¹yah³lxi³txa³hẽ¹la².  
\v 28 Nxe³yãn¹ta¹ kãin² a³la³kxi²nxa³jah¹lo²su² te²su² te²a² ĩ³ye³kxi¹nx2ti³te³nah¹lxi¹: 
\p — Yain³txai²li² sũ̱³nu²su² ki³lxo³jah¹lai²na² yain³txai²la¹wi¹. Nxe³nx2tain¹kxai²nãn²tu̱³ yain³yah³lxi³txa³hẽ¹la². E³kxi¹nx2ti³jah¹la² a³la³kxi²nxa³ha²kxai³ ko̱³nxe³ti³ kãi³si¹hain¹yah³lxin¹kxa²ya̱n³ti³su² yain³yah³lxi³txa³hẽ¹la².  
\v 29 Wxa²ẽ¹nãu³ai²na² a³la³kxi²khai¹xah³lxi¹nha²kxai³ yxãn¹ta¹ jah¹la² a³la³kxi²nxa³ha²kxai³ hãi¹nxa¹jah¹lxi³hẽ¹la². Nxa²ha¹te¹ wxa²ha³tih³ ĩ³nxai²na² wãn³txi³kxai³lu¹ ĩ³wa²lũ³xi²sah¹lxin¹te³nah¹lxi¹: 
\p — Ju¹tai²li² ten³sa²nxa³nhai¹. A³la³kxi²nxa³jah¹lai²li² o²la³kxi²na¹kxe³su² ĩ³kãi²nxa³tot3si¹hai¹na¹kxai²nãn²tu̱³ wi¹lxa³wi¹. Ten³sa²nxa³nhai¹.  
\v 30 Yain³txai²li² Txa²wã¹sũ̱³na² sa²nẽn¹kxi²nu¹sãn²nũ²la² wi¹lhit1sxã³ yai³na¹kxai²nãn²tu̱³ jah¹lai²li² a³la³kxi²nxa³jah¹la² ĩ³kwa̱i²kxi²sain¹ju³ta² wai³nxa³wi¹. Nxẽn¹jau³su² ha²kxai³, 
\p  
\v 31 Txa²wã¹sũ̱³na² sa²nẽn¹kxi¹jah³lxi³hẽ¹la². Ĩ²li³ju³ta² kãi³yah³lxin¹ju³ta² yain³txa² yain³ta̱³nxa² ĩ³na²jau³xa² ĩ³na²ta̱³nxa² ĩ²li³ju³ta² kãi³yah³lxin¹kxai²nãn²tu̱³ Txa²wã¹sũ̱³na² wxi²kin³ti³ton³ti³hi¹tai¹yah³lxi³hẽ¹la².  
\v 32 A²nũ²a² ko̱³nxe³ti³ kãi³ti³hi¹tain¹yah³lxi³txa³hẽ¹la². Ju³te²an¹te²su² ta̱³nxa² Ju³te²an¹te²sxa³te²su² ta̱³nxa² Je³su²jah³lai²na² wãn³txa² yxo²ĩ²sxã³ yxau²xai³tũ̱³ka̱³txi³su² ta̱³nxa² ĩ²li³te²hũ̱³te²a² ko̱³nxe³ti³ kãi³ti³hi¹tain¹yah³lxi³txa³hẽ¹la².  
\v 33 Txai²yã¹nxe² kãi³jah³lxi³hẽ¹la². A²nũ²a² yxo³ha³kxa¹ a³la³kxain¹kxa² yã¹nxe² kãi³ũ¹hai¹na¹wa². Hai³txi³ wã²nxũ̱h¹ kãi³nxa³wa². Ko̱³nxe³ti³ kãi³yah³lxin¹ju³ta² ã³wa²sut1sxã³ yxau³si¹nx2ta¹jau³su² kãi³na¹wa². 
\c 11  
\p  
\v 1 Nxa²ha²kxai³ kãi³a¹kxa² yã¹nxe² kãi³jah¹lxi³hẽ¹la². Txai²li² Kris²tu³jah¹la² kãi³kxa² yã¹nxe² kãi³jah¹lo²su² te²sa¹wa². 
\s1 Txu¹ha² wain³txi³ kãi³jau³su² 
\p  
\v 2 Ju¹ta³la³ nxa²ha²kxai³ wi¹lxo³kxi²sah¹lxi¹lxa². Wãn³txa² ĩ³yau¹ũ¹nx2ta¹jau³xai³tã² yxo²ha³kxa¹ sa²yxo²wet1sah¹lxi³ta¹hi¹nhẽ¹la². Nxe³wã²na³yah³lxi³ta¹hxã³nhẽ¹la². Nxe³ju³tai²li² sa²nẽn¹kxi¹nx2ta¹wa².  
\v 3 Yau³ã̱³xa² ĩ³yau¹ũ¹nx2ta¹tu¹wa². Ĩ³yau¹ũ¹nx2ta¹jau³xa²sa¹, a²hxi²kan¹te² in³txi³nãu³xa² Kris²tu³jah¹lai²la²na³la². Te²yã¹nxe³sxã³ txu¹hai²na² a²hxi²kan¹txan²tu̱³ a²wẽ³sãi¹yah³lai²la²na³la². Te²yã¹nxũn³sxã³ Kris²tu³jah¹la² a²hxi²kan¹txan²tu̱³ Txa²wã¹sũ̱³nai²la²na³la².  
\v 4 Nxe³ha²kxai³ in³txai²na² sa²kxai³lu² Txa²wã¹sũ̱³na² ĩ³ye³kxi²kxai²nãn²tu̱³ ũ³nhe³hẽ¹nha²ka³lo³a² sa²ne³sai¹nha²sãn²sxã³ ĩ³ye³kxi²hĩ̱³nx2na³la². Te²yã¹nxe³sxã³ Txa²wã¹sũ̱³na² wãn³txa² ĩ³yau¹ũ¹te³lhxã³ jah¹lo²su² kxai²nãn²tu̱³ ũ³nhe³hẽ¹nha²ka³lo³a² sa²ne³sai¹nha²sãn²sxã³ ĩ³yau¹ũ¹hĩ̱³nx2na³la². Nxe³sxã³ sa²ne³sai¹nhã²nxa³kxai²nãn²tu̱³ Kris²tu³jah¹la² a²ĩ³lxa² ko̱³te²lo³tai¹nhĩ̱³nx2na³la².  
\v 5 Te²yã¹nxe³ju³ta² txu¹hai²li² Txa²wã¹sũ̱³na² ĩ³ye³kxi²kxai²nãn²tu̱³ ũ³nhe³hẽ¹nha²ka³lo³a² yũ²nxa³kxai²nãn²tu̱³ a²wẽ³sãi¹yah³la² a²ĩ³lxa² ko̱³te²lo³te²ju²hẽ³la². Te²yã¹nxe³sxã³ Txa²wã¹sũ̱³na² wãn³txa² ĩ³yau¹ũ¹te³lhxã³ txu¹ha³ka³lxu³su² kxai²nãn²tu̱³ ũ³nhe³hẽ¹nha²ka³lo³a² yũ²nxa³kxai²nãn²tu̱³ a²wẽ³sãi¹yah³la² a²ĩ³lxa² ko̱³te²lo³te²ju²hẽ³la². Nxe³ta¹ka³lxai²na² ũ³nhe³hẽ¹nha²ka³lo³a² yũ²nxa³ta¹ka³lxa² ũ³nhe³ko¹lhxa³nha²ta¹ka³lxa² yã¹nxe³te²ju²hẽ³la². Ju¹tai²li² wai³nxa³wa².  
\v 6 Nxe³yãn¹ta¹: 
\p — Ũ³nhe³hẽ¹nha²ka³lo³a² ten³sa²nxa³nha¹. Ta¹ka³lxu²su² kxãi²nãn²tu̱³ ũ³nhe³ko¹la³kxi¹txai¹nhẽ³la². A²wẽ³sãi¹yah³la² a²ĩ³lxa² ko̱³te²lo³te²ju²hẽ³la². Yxãn¹ta¹ ũ³nhe³ko¹lhxa³ki̱³nha²ju³ta² ta̱³nxa² kwa²hãi¹nxe² ũ³nhe³ko¹kxe³su² ta̱³nxa² te³nai¹nxa³jau³su² ũ³nhe³tĩ¹kxi²txai¹nhẽ³la².  
\v 7 In³txai²na² sa²kxai³lu² hai³txi³ ũ³nhe³hẽ¹nha²te²sxa³yu²hẽ³la². A²wi¹lhĩ¹nu¹tai²na² Txa²wã¹sũ̱³na² yã¹nxe² in³txa² we¹ta¹hxai²hẽ¹la². Nxe³ha²kxai³ Txa²wã¹sũ̱³na² a²nũ²a²nãu³xai²na² yxo²ha³kxa¹ Txa²wã¹hxi²kan¹tai²la¹wa². Te²yã¹nxe³sxã³ in³txai²na² sa²kxai³lu² txu¹ha² a²hxi²kan¹jah¹lo²su² te²ju²hẽ³la². Txa²wã¹sũ̱³na² wxi²kin³ti³ton³ju³khai³xa² wã²nã³ũ¹jah¹lai²la¹wa². Txu¹ha² sa²kxai³lu² in³txa² wxi²kin³ti³ton³ju³khai³xa² wã²nã³ũ¹ta¹ka²lxai²la¹wa².  
\v 8 A²wi¹lhĩ¹nu¹tai²kxai³lu² Txa²wã¹sũ̱³na² hi²sen³su² in³txa² we¹ta¹hxai²hẽ¹la². Wet1sãn²nũ²la² in³txa² a²nxi̱³ta² tẽ³sxã³ txu¹ha² we¹ta¹hxai²ti³ai¹ti²tu³wa².  
\v 9 In³txi³nũ¹ta² nũh¹yxau³ki̱³nũ³a² te³nxa³ha²kxai³ txu¹ha² we¹tũn³ta¹hxai²hẽ¹la².  
\v 10 Nxe³ha²kxai³ oh³xan¹tũ̱³ka̱³txa² ĩ²nẽ³lai¹nha²kxai³ txu¹hai²na² sa²kxai³lu² ũ³nhe³hẽ¹nha²ka³lo³a² ũh³nhe³tĩ̱¹nha²te²ju²hẽ³la².  
\v 11 Jã¹nxe³jut3su² Kris²tu³jah¹la² tĩh³na² ã³nxai³ki̱³ju³ta² txu¹hai²na² sa²kxai³lu² in³txai²li² ã³sxã³ nũh¹xai³ju³ta² hxi²kan¹te²sxa³jai¹ti²tu³wa². Te²yã¹nxe³sxã³ in³txai²na² sa²kxai³lu² txu¹hai²li² ã³sxã³ nũh¹xai³ju³ta² hxi²kan¹nũn³te²sxa³jai¹ti²tu³wa².  
\v 12 A²wi¹lhĩ¹nu¹ta²kxai³lu² Txa²wã¹sũ̱³na² hi²sen³su² in³txai²li² wet1sãn²nũ²la² in³txai²na² a²nxi̱³ta² tẽ³sxã³ a²txu¹ha³ka³lxa² we¹ta¹hxai²ti¹ai¹ti²tu³wa². Nxe³hĩ¹nãn¹te²tu̱³ in³txa² wẽ³sai²na² sa²kxai³lu² txu¹ha² ẽ¹nãu³a¹ yxau³ni²sxã³ a³li³lah¹sxã³ txon¹te²jai¹ti²tu³wa². Nxe³ha²kxai³ yen³kxa² yxo²ha³kxa¹ Txa²wã¹sũ̱³na² we¹jah¹lo²su² ta¹hxai²ti³ai¹ti²tu³wa². 
\p  
\v 13 Jã¹nxe³jut3su² txu¹hai²li² Txa²wã¹sũ̱³na² e³kxi²tãu³a² ne³hẽ¹nha²ka³lo²a² yũ²nxa³kxai²nãn²tu̱³ wai³nxa³wa². Te²yã¹nxũn³sxã³ ũ³nhe³ko¹la³kxi²nha²sãn²sxã³ Txa²wã¹sũ̱³na² e³kxi²kxai²nãn²tu̱³ wain³nũn³nxa³wa². Ju¹tai²li² wã²nxũ̱h¹ a̱in³nha¹jah³lxi³hẽ¹la².  
\v 14 In³txai²li² a²ne³kĩ̱³sxa² a³lu²kxai²nãn²tu̱³ ãu²li²jut3su² te²ju²hẽ³la².  
\v 15 Yxãn¹ta¹ txu¹hai²na² sa²kxai³lu² a²ne³kĩ̱³sxa² a³lu²kxai²nãn²tu̱³ ĩ³wi¹lxo³kxi²te²ju²hẽ³la². A²ne³kĩ̱³sxai²li² ũ³nhe³tĩ̱¹kxi²nha²ha²kxai³la².  
\v 16 Jã¹nxe³ju³tai²li² ĩ³kwa̱i²kwa̱i²kxi²ta²yah³lxin¹kxai²nãn²tu̱³ hai³txi³ wain³txi³ kãi³yah²lxa³lxa². Sxi²ta² hãi¹nxe³ti³xa¹ jau¹xai²na² so¹lxi³ ĩ³yau¹ũ¹nxa²lxa¹wa². Txa²wã¹sũ̱³na² yxo²ĩ²tũ̱³ka̱³txi³nãu³xai²na² yxo²ha³kxa¹ nxe² ĩ³yau¹ũ¹hai¹nhxai²na¹hẽ³la². 
\s1 Je³su²jah³la² ya³lu²kxi²nũ¹nhẽ³ju³tai³tã² ĩ²xi²jau³su² 
\p  
\v 17 Nxe³ha²kxai³ yu³tã̱³xai²li² e³kxi¹nx2ta¹tu¹wa². Nxe³ju³tai²li² wi¹kãi³yah²lxa³lxa². Txa²wã¹sũ̱³na² wãn³txa² ain³kxi²te³lhxã³ ã³yã³nũ²kxah¹lxin¹tãu³a¹ sa²nẽn¹kxi¹nx2ta¹ju³ta² hxi²kan¹sa²nxa³nha²wa². Ko̱³thi¹non³yah³lxi¹lxa².  
\v 18 Nxe³sxã³ Je³su²jah³lai²na² wãn³txa² yxo²ĩ²sxã³ yxau²xai³yah³lxin¹tũ̱³ka̱³txi³ ĩ³nxai²na² ã³yã³nũ²kxah¹lxin¹te³na¹ a²ha³tih³nãu³ ĩ³nxa² ĩ³ye³ĩ³yi²lho¹kxi²nyhu¹ah³lxi³ta¹hi¹nhẽ¹la². Kwa²wãn³txi³sxa³nũ²nha²wa². Wãn³txi³khai³su²nũ²nha²wa².  
\v 19 Ha³na³ka³lxi³ a̱in³nha²ki̱³ju³ta² yũ²xai³ki̱³te²ju²hẽ³la². Yũ²xai³ki̱³sa²kxai³ a²nũ²a² a²hoh³lxi³su² te²su² te²a² e³la¹ a³la³kxi²nũn³ye²ki̱³tu¹wa².  
\v 20 Jã¹nxe³jut3su² ĩ³yain³kxi²te³lhxã³ ã³yã³nũ²kxah³lxin¹kxai²nãn²tu̱³ hai³txi³ Txa²wã¹hxi²kan¹ta² Si³yxau³jah¹la² ya³lu²kxi²nũ¹nhẽ³ju³tai³tã² ĩ²xi²kxi³jut3sxa³wa². Ha³na³ka³lxin³na³la².  
\v 21 Nxe³ha²kxai³ yain³te³lhxã³ yah³lxin¹tãu³a² ha³na³ka³lxi³ yai³nxa²xai³yah³lxi³ta¹hi¹nhẽ¹la². Wah³nxũ¹hah³lxa³lxa². Hãi¹sxã³ a²yain³txi³khai³xa² wa³su³txi³ yai³nxa²xai³yah³lxi³ta¹hi¹nhẽ¹la². Nxe³yah³lxin¹sxã³ a²ha³tih³ ĩ³nxa² sa²kxai³lu² heh³hi² yxah³lxi¹nha²kxai³ a²ha³tih³ ĩ³nxa² sa²kxai³lu² ĩ³na²jau³xa² ĩ³na²sxã³ wen¹yah¹lxi¹nha²kxai³ nxe³yah³lxi³ta¹hi¹nhẽ¹la².  
\v 22 Wxa²sxi²khai³xa² yain³txi³su² ta̱³nxa² ĩ³na²kxi³jau³su² ta̱³nxa² yũ³nxa²lxi³ta²lu¹wa². Nxe³sxã³ nxe² o²la³kxi²yah³lxin¹kxai²nãn²tu̱³ Je³su²jah³lai²na² wãn³txa² yxo²ĩ²sxã³ yxau²xai³tũ̱³ka̱³txa² ko̱³nxe³ti³ kãi³ũ¹hah³lxi¹nhẽ³la². Te²yã¹nxe³sxã³ a²nũ²a² yain³kxi³txa²te²a² wxã³te²su² te²a² yai³nhxa³je²yah³lxi¹nha²kxai³ ãu²li²to³tain¹yah³lxi¹lxa². Nxe²kãi³yah³lxi¹nha²kxai³ hxi²kan¹txi³ wi¹le³kxi¹nx2ti³nxa³lho³la². 
\p  
\v 23 Jã¹nxa¹jut3su² ĩ³yau¹ũ³ye¹nx2ta¹jau³xai³tã² Txa²wã¹sũ̱³na² ĩ³tih³nxe³sa²jau³xai²la¹wa². Nxe³te³nah¹lxi¹, Je³su²jah¹la² Txa²wã¹hxi²kan¹ta² Si³yxau³jah¹lo²su² ha²kxai³ txa²wã¹ha³lo²a² yxau³hĩ¹nai³tã² nxe³ta¹hxai²hẽ¹la². Ju³ta²sah³lai¹tã² ĩ³ko̱x1ko̱¹son²kxi²te³lhxã³ ka³nxah³hi²nxa³ta̱³lxa¹ Je³su²jah¹la² yain³tũ̱³xa² hxi²tẽ³nha²sãn²nũ²la²,  
\v 24 Txa²wã¹sũ̱³na² ĩ³wi¹lxon³kxi²si¹jau³xa² e³kxi²ta¹hxai²hẽ¹la². Nxe³nũ²la² yain³tũ̱³xai²li² wã²nãu²lxi²sxã³ ũ³hũ²xai³te³nah¹lxi¹, a²sa³wi³ha³lxa² e³kxi²te³nah¹lxi¹: 
\p — Tũ̱¹xai²li² Txa²nũ²a² yã¹nx2na³li¹. Ya³lu²kxi²nũh¹nx2ta¹tu¹wi¹. Yain³tũ̱³xai²na² yain³yah³lxi¹nhĩ¹na¹ ya³lu²kxi¹nx2ta¹ju³ta² ĩ²xi²sa²sxã³ yain³jah¹lxi³to³hẽ¹li¹. Nxe³nyhain¹ta¹hxai²hẽ¹la².  
\v 25 Te²yã¹nxũn³sxã³ yain³ta³lu²nain¹sãn²nũ²la² a²ko²pẽ³na² ĩ³na²tẽ³nai²li² hxi²tẽ³nha²te³nah¹lxi¹: 
\p — Txa²ko²pẽ³na² ĩ³na²na¹jau³xai²li² Txa²ti³ha²yau³xa² yã¹nx2na³li¹. Wãn³txa² tah²yau³xa² ĩ³ye³kxi¹nx2ta¹jau³xai³ jã¹nxe² kãi³ũh¹nx2ta¹jau³nũ³ai²la¹wi¹. A²nũ²a² ko̱³nxe³ti³ kãi³ju³ta² ã³wa²sut1si¹ha¹jau³nũ³su² Txa²ti³ha²yau³xa² ha³li³hxan³sa³tu¹wi¹. Nxe³sxã³ jau³jau¹xai²na² ĩ³na²yah³lxi³to³hin¹kxai²nãn²tu̱³ ãh¹ ĩ²xi²sa²si¹nx2ti³jau³su² yain³jau³xai²li² ya³lu²kxi²nũh¹nx2ta¹kxa² ĩ²xi²sah¹lxin¹jau³xai²li² ĩ³na²ũh¹sah¹lxi³to³hẽ¹li¹.  
\v 26 Nxe³sxã³ te²yã¹nxe² yain³tũ̱³xai²li² ya³lu²kxi²nũh¹nx2ta¹ju³ta² ĩ²xi²sa²sxã³ yain³tũ̱³xai²li² ĩ³yai³ni² ĩ³na²jau³xai²li² ya³lu²kxi²nũh¹nx2ta¹ju³ta² ĩ²xi²sa²sxã³ ĩ³na²jau³xai²li² ĩ³na² nxe³yah³lxi³to³hi¹nhĩ¹na¹ wxa²ẽ¹na² sa²hau³ko³tũh¹nx2ta¹ju³ta² ĩ³hen³txi³yah³lxi³to³hin¹tu¹wi¹. A³ka³nxi²sxã³ wa̱³li²nxa³ta̱³lxa¹ jã¹nxe³jah³lxi³to³hẽ¹li¹. Je³su²jah³la² nxe³nyhain¹ta¹hxai²hẽ¹la². 
\p  
\v 27 Te²yã¹nxe³sxã³ a²nũ²a² ĩ²li³te²su² te²a² Txa²wã¹hxi²kan¹ta² Si³yxau³jah¹lai²na² yain³tũ̱³xai²li² ya³lu²kxi²nũ¹nhẽ³ju³ta² ĩ²xi²sa²sxã³ yain³ki̱³tũ̱³xai²li² yah³son³sxã³ yai³ni² ĩ³na²jau³xai²li² ya³lu²kxi²nũ¹nhẽ³ju³ta² ĩ²xi²sa²sxã³ ĩ³na²ki̱³jau³xai²li² yah³son³sxã³ ĩ²na² nxe³jah¹lo²su² jah¹la² a²hi²ki³te²lxa²na³la². Kris²tu³jah¹la² Txa²wã¹hxi²kan¹ta² Si³yxau³jah¹lo²su² ha²kxai³ a²ti³ha²yau³xa² ko̱³nxe³ti³ kãi³ũ¹hi² a²nũ²khai³xa² ko̱³nxe³ti³ kãi³ũ¹hi² nxe² kãi³jah¹lo²su² hĩ̱³nx2na³la². Nxe³sxã³ Kris²tu³jah¹la² ya³lu²kxi²nũ¹nhẽ³ju³ta² ko̱³nxe³ti³ e³kxi²jau³su² hĩ̱³nx2na³la².  
\v 28 Nxe³ha²kxai³ yain³tũ̱³xai²li² ya³lu²kxi²nũ¹nhẽ³ju³ta² ĩ²xi²sa²sxã³ yain³ki̱³tũ̱³xai²li² ĩ³yain³yah³lxan³ta̱³lxa¹ ĩ³na²jau³xai²li² ya³lu²kxi²nũ¹nhẽ³ju³ta² ĩ²xi²sa²sxã³ ĩ³na²ki̱³jau³xai²li² ĩ³na²yah³lxan³ta̱³lxa¹ wxa²ẽ¹nãu³xai²na² wã²nxũ̱h¹ a̱in³nha¹jah³lxi³hẽ¹la², kwa²to³toh³lxi³ e³kxi²nyhah¹lxin¹kxa²ya̱n³ti³su².  
\v 29 Nxe³sxã³ ĩ³yai³ni² ĩ³na² yxah³lxin¹tãu³a² Txa²wã¹hxi²kan¹ta² Si³yxau³jah¹lai²na² kãi³ũ¹nhẽ³ju³ta² ãh¹ a̱in³nyhah²lxan³kxai²nãn²tu̱³ a²hi²ki³te²la³ yah³lxi³hĩ̱³nxa¹lxa². Nxe³yah³lxin¹ju³tan¹te²kxa³ya̱³lhu² Txa²wã¹sũ̱³na² hi²sen³kxai³lu² ko̱³nxe³ti³ ĩ³yĩ¹li¹nx2ti³ju³ta² yũ³tu¹wa².  
\v 30 Te²yã¹nxe² kãi³yah³lxi³to³hi¹nha²kxai³ wxa²ha³tih³ ĩ³nxai²na² ĩ³ton³nxa²lxi³i² hai²la³kxi²nxa²lxi³i² nxe³nx2ti³kxa²yã¹nxũn³sxã³ nũ̱³ka̱³txi³ ã̱³tũ̱³ka̱³txi³ ĩ³nxa² ya²lun¹ta³kxi²nx2tain¹na³la².  
\v 31 Nxe³ha²kxai³ a̱in³nyhah¹lxin¹jau³khai³xa² ĩ²xai³nha¹jah³lxi³sã²nhẽ³la². Nxe³sxã³ ĩ²nyhah¹lxi³sã²nĩn¹kxai²nãn²tu̱³ Txa²wã¹sũ̱³na² ko̱³nxe³ti³ ĩ³yĩ¹li²nxa²lxi³ju³ta³nũ³lo³nyhah¹lxi³hĩ̱³nx2nxã³lxa².  
\v 32 Nxe³yãn¹ta¹ Txa²wã¹sũ̱³nai²li² hĩ¹na² ko̱³nxe³ti³ ĩ³yĩ¹li²nhẽ³ju³ta³lon³kxai²nãn²tu̱³ ĩ³wai¹te³kxai²nãn²tu̱³ kxãn³nãu³a¹ a³ka³nxi²sxã³ wa̱³li²tãu³a¹ a²nũ²a² ko̱³nxe³thin¹te²su² te²a² ko̱³nxe³ti³ ĩ³yĩ¹li²hain¹tu¹wa². Nxai¹nhĩ¹na¹ te²yã¹nxe³nẽ³lxa³lho³la². 
\p  
\v 33 Jã¹nxe³jut3su² Txa²wã¹sũ̱³na² yain³ki̱³tũ̱³xai²li² ya³lu²kxi²nũ¹nhẽ³ju³ta² ĩ²xi²sa²sxã³ yain³ki̱³tũ̱³xai²li² ĩ³yai³ni² ĩ³na²ki̱³jau³xai²li² ya³lu²kxi²nũ¹nhẽ³ju³ta² ĩ²xi²sa²sxã³ ĩ³na²ki̱³jau³xai²li² ĩ³na² nxe³ki̱³te³lhxã³ ã³nũ²kxi²yah³lxi¹nhĩ¹na¹ wah³nxe³nha¹jah³lxi³hẽ¹la².  
\v 34 Nxe³yãn¹ta¹ wxa²ha³tih³ ĩ³nxai²na²: 
\p — Heh³khaix1sa³nha¹. Yah³lxin¹kxai²nãn²tu̱³ wxa²sxi²khai³xa² yain³jah¹lxi³sã²nhẽ³la². Nxe³yah³lxin¹ka³tu̱³ wxã³sxã³ ã³yã³nũ²kxi²yah³lxin¹sxã³ Txa²wã¹sũ̱³na² yain³tũ̱³xai²li² ya³lu²kxi²nũ¹nhẽ³ju³ta² ĩ²xi²sa²sxã³ yain³ki̱³tũ̱³xai²li² ĩ³yai³ni² ĩ³na²jau³xai²li² ya³lu²kxi²nũ¹nhẽ³ju³ta² ĩ²xi²sa²sxã³ ĩ³na²ki̱³jau³xai²li² ĩ³na² nxe³jah³lxi³hẽ¹la², Txa²wã¹sũ̱³na² ko̱³nxe³ti³ ĩ³yĩ¹li¹nx2ti³kxa²ya̱n³txi³sa². Nxa²ha¹te¹ wãn³txa² yau³ã̱³xa² yũ³nũn³na¹wa². Yxãn¹ta¹ hãi¹nxa¹a¹tu¹wa². Wxã³na¹tãu³a¹ ĩ³yau¹ũ¹nx2ta¹tu¹wa². 
\c 12  
\s1 Txa²wã¹sũ̱³na² Yãu³ka³jxah¹la² ĩ³hxi²ka¹tũ¹nhẽ³jau³su² 
\p  
\v 1 Txa²wã³tã̱³nãu³xãi³. Txa²wã¹sũ̱³na² Yãu³ka³jxah¹la² ĩ³hxi²ka¹tẽ³ju³ta² ũ³hũ¹ne³kxa² ĩ³yau¹ũ³nx2ta¹tu¹wa². A³la³kxi²si¹nx2ta¹jau³su² ĩ³tih³nxe³nx2ta¹tu¹wa².  
\v 2 Ĩ³yau¹ũ³nx2ta¹jau³xa²sa¹, a²kxã³nhxĩ¹nai³tã² Txa²wã¹sũ̱³na² wãn³txa² yxo²ĩ²yah²lxa³nhĩ¹nai³tã² txah³lxa³kxa² sũ̱³nu²su² ki³lxo³jah³la² so¹lxi³ sa²yxo²we¹jah³lxin¹jah¹lo²lo³jah³lxi³to³hin¹tai¹ti²tu³wa², hxi²kan¹txi³ e³kxi¹nx2ti³xa³kxan²ti³na². Tĩh³na² ko̱³nxe³ tĩh³na² so¹lxi³ ã³nxai³yah³lxin¹tĩh³na²lot3txa²lxi³sa²ki³lxo³jah³lxi³to³hin¹tai¹ti²tu³wa².  
\v 3 Nxe³ha²kxai³ a²nũ²a² ĩ²li³te²su² te²a² ĩ³ye³te³nah¹lxi¹: 
\p — Je³su²jah³lai²li² ko̱³nxe³ti³hin¹na³li¹. A²ta³ai²la¹wi¹. Nxe³jah¹lo²su² kxai²nãn²tu̱³ hai³txi³ Txa²wã¹sũ̱³na² Yãu³ka³jxah¹la² nxũ²kwa̱i³yxau²nxa³wa². Yxãn¹ta¹ ĩ³ye³kxi²te³nah¹lxi¹: 
\p — Je³su²jah³la² a²hxi²kan¹ti³su² jah¹lai²la¹wi¹. Nxe²e³jah¹lo²su² kxai²nãn²tu̱³ Txa²wã¹sũ̱³na² Yãu³ka³jxah¹la² so¹lxi³ ĩ³tih³nxe³jah¹lo²su² hĩ̱³nx2na³la². 
\p  
\v 4 Ĩ³tih³nh³nxe³kxai²nãn²tu̱³ ĩ³hxi²ka¹tẽ³ju³ta² ĩ³la³kxi²te²lo³tũ¹nhẽ³ju³ta² yxo²ha³kxa¹ yau³ka³lxa²na³la². Yxãn¹ta¹ ka³lxa¹kxan²ti³ Txa²wã¹sũ̱³na² Yãu³ka³jxah¹la² a²ĩ³yau¹ũ³nẽ³jah¹la² ka³na³ka³na³tã³la².  
\v 5 Te²yã¹nxe³sxã³ txa²wã³tã̱³nãu³xa² ã³nhĩ²nũ¹nũ³si¹ki̱³jau³su² Txa²wã¹sũ̱³na² ĩ³la³kxi²te²lo³tũ¹nhẽ³kxa² nxe³ju³ta² ka³lxa²na³la². Yxãn¹ta¹ Txa²wã¹hxi²kan¹ta² Si³yxau³jah¹la² ka³na³ka³na³jah¹lai²la¹wa².  
\v 6 Te²yã¹nxũn³sxã³ Txa²wã¹sũ̱³na² ĩ³hxi²kat1si¹nhẽ³jut3su² ĩ³la³kxi²te²lo³tũ¹nhẽ³kxa² ka³lxa²na³la². Yxãn¹ta¹ Txa²wã¹sũ̱³na² ĩ³hxi²kat1tẽ³jah¹la² ka³na³ka³na³tã³la².  
\v 7 Nxe³sxã³ yxo²ĩ²te²ki̱³na¹xai²na² ĩ³hxi²nũn¹si¹nhẽ³jau³su² Txa²wã¹sũ̱³na² Yãu³ka³txa² ũ³yhe³ka¹tũh¹xai³nẽ³na³la². Ĩ³hxi²ka¹txa²xai³nẽ³ju³ta² ũ³yhe³ka¹tũh¹xai³nẽ³na³la².  
\v 8 Txa²wã¹sũ̱³na² Yãu³ka³jxah¹la² hi²sen³su² wxa²nũ̱³ka̱³txai²na² ĩ²li³te² ĩ³nxa² a²hoh³lxi³su² ju³ta² ĩ³hxi²ka¹ta²lxi³ha²kxai³ ãh¹ ĩ²li³te² ĩ³nxa² Txa²wã¹sũ̱³na² Yãu³ka³jxah¹lain²txi³ wa³lxe³jau³nũ³a² a³la³kxah¹lxin¹ju³ta² ĩ³hxi²ka¹ta²lxi³ha²kxai³,  
\v 9 Ãh¹ ĩ²li³te² ĩ³nxa² Txa²wã¹sũ̱³na² Yãu³ka³jxah¹lain²txi³ yxo²ĩ²yah³lxin¹jut3su² ĩ³hxi²ka¹ta²lxi³ha²kxai³ ãh¹ ĩ²li³te² ĩ³nxa² ĩ³ta³ka³txa² wã³nxĩn¹sxã³ we²txi²kxi³ju³ta² ĩ³hxi²ka¹ta²lxi³ha²kxai³,  
\v 10 Ãh¹ ĩ²li³te² ĩ³nxa² Txa²wã¹sũ̱³na² Yãu³ka³jxah¹lain²txi³ wã³nxĩn¹khai¹nxe³sxã³ kãi³ju³ta² ĩ³hxi²ka¹ta²lxi³ha²kxai³ ãh¹ ĩ²li³te² ĩ³nxa² Txa²wã¹sũ̱³na² Yãu³ka³jxah¹lain²txi³ Txa²wã¹sũ̱³na² wãn³txa² wi¹jau³xa² ĩ³yau¹ũ³nxa²lxi³ju³ta² ĩ³hxi²ka¹ta²lxi³ha²kxai³ ãh¹ ĩ²li³te² ĩ³nxa² ĩ³hxi²ka¹ta²lxi³ju³ta²su¹ a²nũ²a² ĩ³li³te²na² kãi³ju³ta² ĩ²kxai²nãn²tu̱³ Txa²wã¹sũ̱³na² Yãu³ka³jxah¹la² ĩ³hxi²kat1si¹jut3su² ta̱³nxa² ko̱³nxe³te² yãu³ka³txa² ĩ³hxi²kat1si¹jut3su² ta̱³nxa² wain³txi³ a³ya³txi²ju³ta³nũ³a² ĩ³hxi²ka¹ta²lxi³ha²kxai³ ãh¹ ĩ²li³te² ĩ³nxa² Txa²wã¹sũ̱³na² Yãu³ka³jxah¹lain²txi³ wãn³txa² yau³ã̱³lxa³ti³ a²nũ²a² ĩ³yau¹ũ³xa³jau³su² e³si¹jau³su² ĩ³hxi²ka¹ta²lxi³ha²kxai³ ãh¹ ĩ²li³te² ĩ³nxa² wãn³txa² yau³ã̱³xa² a²si³yxau³tãu³khai³xa² ĩ³yau¹ũ³ju³ta² ĩ³hxi²ka¹ta²lxi³ha²kxai³ nxe²xai³hĩ̱³nx2na³la².  
\v 11 Txa²wã¹sũ̱³na² Yãu³ka³jxah¹la² ka³na³ka³na³jah¹lo²su² kxan²ti³ nxe² ĩ³hxi²ka²ta²xai³nẽ³na³la². Nxũh¹ ĩ²sxã³ a²ten³jut3su² ju³ta² ha³na³ka³lxi³ ĩ³hxi²ka²ta²xai³nẽ³na³la². 
\s1 Kris²tu³jah¹la² a²nũ²khai³xa² sa²we¹nyhu¹si¹nhẽ³jau³su² 
\p  
\v 12-13 Jã¹nxe³jut3su² txa²wã¹nũ²khai³xa² ka³na³ka³na³tã³la². Ka³na³ka³na³kxan²ti³ txa²wã¹kãi²ne³kxi²nẽ³tãu³ai²na² ka³lxan¹ta³kxi²nẽ³na³la². Te²yã¹nxe³sxã³ txa²wã¹kãi²ne³kxi²nẽ³tãu³ai²na² ka³lxan¹ta³kxi²nẽ³kxan²ti³ txa²wã¹nũ²khai³xa² ka³na³ka³na³tã³la². Te²yã¹nxe³jut3sũ̱³na³la². Txa²wã¹nũ̱³ka̱³txi³ki³nãu¹xa² Ju³te²a²jah¹la² yũ³ha²kxai² Ju²te²a² nũ̱³ka̱³txi³sxa³te²a² yũ³ha²kxai³ a²wa³kxẽn³yah³lo²lo³nha²sxã³ yxau²xai³te²a² yũ³ha²kxai³ ã³wa²sut1sxã³ yxau³te²a² yũ³ha²kxai³ nxe³ki̱³tã³la². Nxe³sxã³ Txa²wã¹sũ̱³na² Yãu³ka³jxah¹lain²txi³ ũ³hũ¹nhãn²nẽ³na³la². Nxe³ha²kxai³ a²nũ²ki̱³na¹xai²na² ka³na³ka³nat3sxã³ sa²we¹nyhu¹si¹nha²nẽ³na³la². Nxe³te²hũ̱³sxã³ Kris²tu³jah¹la² a²nũ²khai³xa² sa²we¹nyhu¹si¹nha²nẽ³na³la². Nxe³sxã³ Txa²wã¹sũ̱³na² Yãu³ka³jxah¹la² nxũ²kwa̱i³yxau²xai³nẽ³na³la², yxo²ĩ²te²ki̱³nãu¹xai²na²sa³. Jã¹nxe³sxã³ yxo²ĩ²tũ̱³ka̱³txi³ki̱³na¹xai²na² a²nũ²a² ka³lxa¹ki̱³tã³la². Yxãn¹ta¹ Txa²wã¹sũ̱³na² Yãu³ka³jxah¹la² hi²sen³su² a²nũ²a² ka³na³ka³na³ti³hi¹tẽ³na³la². 
\p  
\v 14 Te²yã¹nxe³sxã³ txa²wã¹nũ²nãu³khai³xa² ka³na³ka³na³tẽ³lxa³wa². Ka³lxan¹ta³kxi²nẽ³na³la².  
\v 15 Nxa²ha¹te¹ txa²wã¹yu̱³kxi³su² e³te³an¹jau³kxai³lu¹ e³te³nah¹lxi¹: 
\p — Txa²wã¹hxi²ki³su² te²txã³wi¹. Nxe²nxa³ha²kxai³ hai³txi³ txa²wã¹nũ²nãu³khai³xai²na² hai³txi³ te²txã³wi¹. Nxe²e³kxan²ti³ txa²wã¹nũ²nãu³khai³xai²na² ã³nhai²ta³lxã¹kxi²nẽ³lhĩ̱³nx2nxa³wa².  
\v 16 Te²yã¹nxe³sxã³ txa²wã¹ne³nxẽn³su² e³te³an¹jau³kxai³lu¹ e³te³nah¹lxi¹: 
\p — Txa²wã¹yen³su² te²txã³wi¹. Nxe²nxa³ha²kxai³ hai³txi³ txa²wã¹nũ²nãu³khai³xai²na² hai³txi³ te²txã³wi¹. Nxe²e³kxan²ti³ txa²wã¹nũ²nãu³khai³xa² ã³nhai²ta³lxã¹kxi²nẽ³lhĩ̱³nx2nxa³wa².  
\v 17 Txa²wã¹nũ²ai²na² whãi²na¹ txa²wã¹ye³na² so¹lxi³kxai²nãn²tu̱³ ĩh¹nxet3sxã³ ain³kxi²nha²hĩ̱³ki̱³te²la¹xã³? Te²yã¹nxe³sxã³ Txa²wã¹nũ²nãu³ai²na² whãi²na¹ a²ne³nxẽ³na² so¹lxi³kxai²nãn²tu̱³ ĩh¹nxet3sxã³ ĩ³nxũn³sain³nha²hĩ̱³ki̱³te²la¹xã³?  
\v 18 Nxe³ha²kxai³la¹ Txa²wã¹sũ̱³na² hi²sen³su² txa²wã¹nũ²nãu³ai²li² ĩ²li³te²nãu³ai²na² ha³na³ka³lxi³ we¹ta²lxi³kxi²nẽ³lha²kxai³ Txa²wã¹sũ̱³na² a²ten³ju³ta² sa²we¹ta³lxi³kxi²nẽ³nĩn²ta²wa².  
\v 19 Txa²wã¹nũ²nãu³ai²li² ka³lxan¹ta³kxi²nẽ³lxa³ke³la³te²kxai³ txa²wã¹nũ²a² yũ³nẽ³lhĩ̱³nx2nxa³wa².  
\v 20 Nxe³yãn¹ta¹ txa²wã¹nũ²nãu³ai²na² ka³lxan¹ta³kxi²nẽ³kxan²ti³ txa²wã¹nũ²nãu³a² ka³na³ka³na³tẽ³na³la². 
\p  
\v 21 Nxa²ha¹te¹ txa²wã¹yen³nãu³a² e³te²sxa³yu²hẽ³la². E³sxã³ txa²wã¹hxi²ka² ain³kxi²ti³an¹jau³kxai³lu¹: 
\p — Txai²na² a²ye³na¹xai²na² hxi²kan¹khai¹nxa¹ha²kxai³ wxãi²na² a²hxi²kxah³lho³ ĩ³nxai²na² hxi²ka¹nxa³lxi¹. Nxe³ha²kxai³ ten³nxa²hxa³nhai¹. Nxe² e³te²sxa³yu²hẽ³la². Te²yã¹nxe³jut3su² txa²wã¹ne³ki³su² e³te²sxa³yu²hẽ³la². E³sxã³ txa²wã¹yu³kxa² ain³kxi²ti³an¹jau³kxai³lu¹: 
\p — Txai²na² a²ne³ki³na¹xai²na² hxi²kan¹khai¹nxa¹ha²kxai³ wxãi²na² a²yu³kxah³lo² ĩ³nxai²na² ten³nxa²hxa³nhai¹. Nxe² e³te²sxa³yu²hẽ³la².  
\v 22 Nxe³yãn¹ta¹ ya²la³tu̱³ txa²wã¹nũ²nãu³khai³xai²na² ĩ²li³te²a² sĩ̱³nxũ̱n³nxa³ju³ta² ũ³whi²lã³nhã¹kxai²nãn²tu̱³ hxi²kan¹ti³ ã³yat1sxã³ yxau²xai³lhĩ̱³ki̱³sxa³wa².  
\v 23 Nxe³sxã³ txa²wã¹nũ²nãu³khai³xa² ĩ²li³te²a² jũ¹nxe² ã̱³lxi³kxe³su² kxan²ti³ wã²la²ka³lo³a² ũ³whi²kxi²nha²sxã³ ũ³tĩ¹kxi²nha²ki̱³te²ju²hẽ³la². Ĩ²li³te²nãu³a² wi¹nẽ³lxa³kxai²nãn²tu̱³ ã²la² wi¹lĩ²nha²ki̱³tã³la².  
\v 24 Txa²wã¹nũ²nãu³ai²na² ĩ²li³te²a² wi¹nẽ³te²su² ã²la² wi¹lha²kxai³ ĩ²li³ju³ta² wã²nxũ̱h¹ hau³ko³nha²hĩ̱³nx2na³la². Nxe³ki̱³ju³tai²li² txa²wã¹nũ²nãu³a² hau³ko³nhã²nxa³ju³ta² so¹lxi³ wi¹wi¹nxe² hau³ko³nha²hĩ̱³ki̱³tã³la². Nxe³kxi³ju³tai²na² Txa²wã¹sũ̱³na² hi²sen³su² txa²wã¹nũ²nãu³khai³xa² nxe² we²ta³lxi³kxi²nẽ³ta¹hxai²hẽ¹la².  
\v 25 Nxe³nha²ki̱³sa²kxai³ txa²wã¹nũ²nãu³khai³xa² hai³txi³ ã³nhai²ta³lxã¹nha²hĩ̱³ki̱³sxa³wa². Hãi¹nxe³sxã³ txa²wã¹nũ²nãu³a² yxo²ha³kxa¹ wi¹lo²la³kxi²waun¹nyhe²hĩ̱³ki̱³tã³la². Hai³txi³ ã³nhai²ta³lxi²te²ten³txi³ o²la³kxi²hĩ̱³ki̱³sxa³wa².  
\v 26 Nxe³nxa²ha¹te¹ txa²wã¹nũ²nãu³a² sĩ̱³nĩ³ton³nẽ³nha²kxai²nãn²tu̱³ a²nũ²a²nãu³ai²na² a²sĩ̱³na² whãi²na¹ khãuh³lxa³tẽ³nha²hĩ̱³ki̱³tã³la². Txa²wã¹nũ²nãu³a² ĩ²li³te²a² ĩ³wi¹lain³kxi²nha²kxai²nãn²tu̱³ a²nũ²a²nãu³ai²na² a²sĩ̱³na² whãi²na¹ ĩ³wi¹lain³kxi²nha²hĩ̱³ki̱³tã³la². 
\p  
\v 27 Jã¹nxe³jut3su² txa²wã¹nũ²khai³xa² a²sĩ̱³na² yã¹nxe² wxãi² ĩ³nxai²na² sa²kxai³lu² Kris²tu³jah¹la² a²sĩ̱³na² yãx1yah³lxi¹lxa². Kris²tu³jah¹la² a²nũ²nãu³khai³xa² ĩ²li³te²a² yã¹ yxah³lxi¹lxa².  
\v 28 Jã¹nxe³sxã³ Txa²wã¹sũ̱³na² hi²sen³su² yxo²ĩ²ũh¹tũ̱³ka̱³txa² wain³txi³ ĩ³hau³ko³ta³wxe³na²hẽ³la². A²wi¹lhĩ¹nãn¹te²a²su² a²hxi²kan¹te²la³je³na² sa²kxai³lu² Txa²wã¹sũ̱³na² ĩ²sxã³ sa²so¹tũ̱³ka̱³txa² ũh³wxe³na²hẽ³la². óta³lo³hẽ¹tũ̱³ka̱³txa² Txa²wã¹sũ̱³na² wãn³txa² ĩ³hen³txi³tũ̱³ka̱³txi³la³ ũh³wxe³na²hẽ³la². Ãh¹ã³ta³lo³hẽ¹tũ̱³ka̱³txi³nãu³a² yxo²ĩ²tũ̱³ka̱³txi³nãu³xa² ĩ³yau¹ũ³te²nãu³xa² ũh³wxe³na²hẽ³la². Ãh¹ã³ta³lo³hẽ¹tũ̱³ka̱³txi³nãu³a² wã³nxĩn¹sxã³ o²la³kxi²te²su² te²na² ũh³wxe² ãh¹ ã³ta³lo³hẽ¹tũ̱³ka̱³txi³nãu³a² ĩ³ta³ka³txa² we²txi²si¹kxi³nũ³su² te²a² ũh³wxe², Ãh¹ ã³ta³lo³hẽ¹tũ̱³ka̱³txi³nãu³a² a²nũ²a² ã³non²ta³kxi²te²su² te²a² ũh³wxe², ãh¹ ã³ta³lo³hẽ¹tũ̱³ka̱³txi³nãu³a² hxi²kan¹txi³ a²nũ²a² hau³ko³te²su² te²a² ũh³wxe² a²ne³ki³san¹tũ̱³ka̱³txan²tu̱³ hxi²kan¹txi³ a²nũ²a² wãn³txa² ya̱u³xã̱³lxa³txi³ e³te²su² te²a² ũh³wxe² nxe²xai³na²hẽ³la².  
\v 29 Nxe³ha²kxai³ Txa²wã¹sũ̱³na² ĩ²sxã³ ĩ³sa²so¹nẽ³tũ̱³ka̱³txi³su² ka³lxa¹nẽ³lxa³ha²kxai³, Txa²wã¹sũ̱³na² wãn³txa² ĩ³hen³txi³tũ̱³ka̱³txi³su² ka³lxa¹nẽ³lxa³ha²kxai³ yxo²ĩ²tũ̱³ka̱³txa² ĩ³yau¹ũ³hain¹tũ̱³ka̱³txi³su² ka³lxa¹nẽ³lxa³ha²kxai³, wã³nxĩn¹sxã³ o²la³kxi²tũ̱³ka̱³txi³su² ka³lxa¹nẽ³lxa³ha²kxai³,  
\v 30 Ĩ³ta³ka³txa² we³txi²si¹tũ̱³ka̱³txi³su² ka³lxa¹nẽ³lxa³ha²kxai³, wãn³txa² yau³ã̱³lxa³ti³ e³kxi²tũ̱³ka̱³txi³su² ka³lxa¹nẽ³lxa³ha²kxai³, yau³ã̱³lxa³ti³ wãn³txi³la³ a²si³yxau³tãu³khai³xa³ ĩ³yau¹ũ¹tũ̱³ka̱³txi³su³ ka³lxa¹nẽ³lxa³ha²kxai³ nxe³ki̱³tã³la².  
\v 31 Nxe³ki̱³sa²kxai³lu¹ ha³lo²a² wi¹ju³tai²na¹ ã²la² hxi²kan¹kxi²ju³tai²na¹ ã³ten³jah¹lxi³hẽ¹la². Nxa²ha¹te¹ tĩh³na² ã²la² wi¹tĩh³na² ĩ³yau¹ũ¹nx2ta¹tu¹wa². 
\c 13  
\s1 Txa²wã¹ẽ¹nãu³ai²na² a³lxi²nha²kxi³jau³su² 
\p  
\v 1 Ĩ³yau¹ũ¹nx2ta¹jau³xa²sa¹, a²nũ²a² nũ̱³ka̱³txi³nãu³xai²na² wãn³txa² yxo²ha³kxa¹ hxi²kan¹txi³ ĩ³ye³kxi²na¹ha²kxai³ na¹kxa²yu³su² oh³xan¹te²nãu³xai²na² wãn³txa² yxo²ha³kxa¹ hxi²kan¹txi³ ĩ³ye³kxi²na¹ha²kxai³ nxe³na¹kxan²ti³ txa²ẽ¹nãu³ai²na² a³lxi²waun¹nyhu¹ju³ta³la³ yũ³sa²nxa³ke³la³te²kxai³ txa²wãn³txa² e³a¹jau³xai²na² kwa²wãn³txa² toh³lxi³jau³su² hĩ̱³nx2na³la². Kwa³thi³la³ka³txa² ĩ³su²ki̱³sa²kxai³ kwa²nxon³nẽ³te²jai¹ti²tu³wa². Jã¹nxe³hĩ̱³na¹wa².  
\v 2 Te²yã¹nxe³sxã³ Txa²wã¹sũ̱³na² wãn³txa² hxi²kan¹txi³ ĩ³hen³txi³na¹ha²kxai³, yen³kxa² yxo²ha³kxa¹ a²hoh³lxi³sa¹ha²kxai³, wãn³txa² hãi³jau³xa² hxi²kan¹txi³ ĩ²a¹ha²kxai³, nũ̱³kxũn³txi³ Txa²wã¹sũ̱³na² wãn³txa² yxo²ĩ²a¹ha²kxai³ wã³la³ka³txa² sa²ya²ta³wxe³si¹ha¹jau³su² hxi²ka¹na¹ha²kxai³, ju¹tai²na² yxo²ha³kxa¹ hxi²ka¹na¹kxan²ti³ yxãn¹ta¹ txa²ẽ¹nãu³ai²na² a³lxi²waun¹nyhu¹ki̱³ju³ta³la³ yũ³sa²nxa³ke³la³te²kxai³ hai³txi³ a²hxi²kan¹jah¹lo²su² hĩ̱³nxãn²nxa³wa².  
\v 3 Te²yã¹nxũn³sxã³ txa²yen³kxi³khai³xa² wã²nhũ²hxa³tai¹na¹ha²kxai³ na¹kxa²yu³su² ai³lhxã³ Je³su²jah³la² ĩ³lxa² kan²txi³ yxo²ĩ²a¹kxe³su² txa²nũ²a²nãu³khai³xa² ha³nxe²khai³ wã²kxi²sai¹nha²kxai³ nxe³sain¹kxan²ti³ txa²ẽ¹nãu³ai²na² a³lxi²waun¹nyhu¹ki̱³ju³ta³la³ yũ³sa²nxa³ke³la³te²kxai³ Txa²wã¹sũ̱³na² yen³nãu³a² hai³txi³ kãin²sa²hĩ̱³nx2nxa³wa². 
\p  
\v 4 A²nũ²a² a³lxi²waun¹nyhu¹ki̱³kxai²nãn²tu̱³ ya³nãn³ta³ki²la²sxã³ kãi³ũ¹nyhu¹ki̱³te²ju²hẽ³la². Thãi³ti³la²sxã³ kãi³ũ¹nyhu¹ki̱³te²ju²hẽ³la². A²nũ²a² yen³kxa² kwa²to³toh³lxi³ yxo²kwa̱in³nũ¹nyhu¹ki̱³te²sxa³yu²hẽ³la². Yxo²kãin² e³kxi²ki̱³te²sxa³yu²hẽ³la². A²ẽ¹nãu³ai²na² ĩ³kãin²txi³nha²sxã³ ĩ³ye³kxi²ki̱³te²sxa³yu²hẽ³la².  
\v 5 A²nũ²a² a³lxi²waun¹nyhu¹ki̱³kxai²nãn²tu̱³ wi¹lo²la³kxi²nũ¹hain¹tãu³a² ai¹nhĩ¹na¹ a²nũ²a² yxo²ha³kxa¹ ã³sen³sai¹sxã³ a²hoh³lxi³sa²sxã³ o²la³kxi² nxe³ki³lxo³nha²ki̱³te²sxa³yu²hẽ³la². Yã³ni̱³li³nũ¹nhẽ³ju³ta² so¹lxi³ ten³nha²ki̱³te²sxa³yu²hẽ³la². Kwa²hi²ye¹ta³lxi³nha²ki̱³te²sxa³yu²hẽ³la². A²nũ²a² ko̱³nxe³ti³ o²la³kxi²nũ¹nhẽ³kxan²ti³ hai³txi³ yxa̱ih²kxi²nhũ¹ki̱³te²sxa³yu²hẽ³la².  
\v 6 A²nũ²a² ã̱³xa² ko̱³nxe³ti³ kãi³kxai²nãn²tu̱³ ĩ³ka³li³kxi²ki̱³te²sxa³yu²hẽ³la². Hãi¹sxã³ ya²la³lhi²ju³ta² wi¹kãi³kxai²nãn²tu̱³ ĩ³ka³li³ki̱³te²ju²hẽ³la².  
\v 7 A³lxi²waun¹nyhu¹ki̱³kxai²nãn²tu̱³ ko̱³to²la³kxi²nũ¹nhẽ³kxan²ti³ ya³nãn³ta³ki²la²sxã³ yxau³ki̱³te²ju³hẽ³la². A²nũ²a² a³lxi²waun¹nyhu¹ki̱³kxai²nãn²tu̱³ wain³txi³ yxo²ĩ²nyhu¹ki̱³te²ju²hẽ³la². Wi¹kãi³ju³ta² wah³nxe³kxi²nũ¹hain¹ki̱³te²ju²hẽ³la². Ko̱n³ton³kxi²nẽ³kxan²ti³ nxũ²kwa̱i³lxũ¹txi³ yxau²xai³ki̱³te²ju²hẽ³la². 
\p  
\v 8 A³lxi²waun¹nyhu¹ki̱³ju³ta² ne³ki³so³nxa³lho³la². Yxãn¹ta¹ Txa²wã¹sũ̱³na² wãn³txa² ĩ³yau¹ũ¹ki̱³ju³ta² ne³ki³son³tu¹wa². Wãn³txa² yau³ã̱³lxa³ti³ e³kxi²ki̱³jau³su² ĩ³hxi²ka¹ti³hi¹tẽ³ju³ta² ye³jen¹na² ne³ki³son³tu¹wa². A²hoh³lxi³su² ki̱³ju³ta² ye³jen¹na² ne³ki³son³nũn³tu¹wa².  
\v 9 Nxe³sxã³ hĩ¹nai²li² ũ³hũ¹nhẽ³ju³ta² a²hoh³lxi³si¹nhẽ³jut3su² ta̱³nxa² Txa²wã¹sũ̱³na² wãn³txa² ĩ³yau¹ũ¹hain¹ki̱³jut3su² ta̱³nxa² nxe³ju³ta² jũ¹nxa² so¹lxi³ yũ³nũ¹nhẽ³na³la².  
\v 10 Nxe³ta¹ yan¹nãu³a¹ Kris²tu³jah¹la² a³ka³nxi²sxã³ wa̱³li²tãu³a¹ jũ¹nxa² so¹lxi³ yũ³nũ¹ki̱³ju³ta² ne³ki³son³tu¹wa². 
\p  
\v 11 Txai²na² txa²wẽ³sĩ¹nai³tã² wẽ³sa² o²la³kxi²ju³ta² so¹lxi³ kãi³hxai²na¹hẽ³la². Wẽ³sa² e³jau³xa² so¹lxi³ e³a¹ha²kxai³ wẽ³sa² o²la³kxi²ju³ta² so¹lxi³ o²la³kxi²na¹ha²kxai³ wẽ³sa² wã²nxũ̱¹ha̱in³nha¹jau³xa² so¹lxi³ e³a¹ha²kxai³ nxe³nhxai²na¹hẽ³la². Nxe³yãn¹ta¹ in³txi³lo³na¹hĩ¹nai²na¹ hxi²kan¹to³na¹hĩ¹nãn¹te²tu̱³ wẽn³sxũ̱³na¹ju³ta³la³ ã³na¹a¹hẽ³la². Nxe³te²sa¹wa².  
\v 12 Es³pe²ya²ka³lo³a² ĩ²nha²ki̱³kxai²nãn²tu̱³ txa²wã¹yãu³ka³txa² ku³kuh³nxe² ĩ²hĩ̱³ki̱³tã³la². Yxãn¹ta¹ yan¹nãu³a¹ a²nũ²khai³xa² ĩ²ki̱³kxai²nãn²tu̱³ hai³txi³ ku³kuh³nxa² ĩ²ki̱³sxa³lho³la². Jã¹nxe³jut3sũ̱³nxe² wain³txi³ ĩ²ki̱³tu¹wa². Te²yã¹nxũn³sxã³ hĩ¹nai²li² jũ¹nxe² ã³ye³wxe³ki̱³tã³la². Yxãn¹ta¹ yan¹nãu³a¹ kãin² ã³ye³wxe³ki̱³tu¹wa². Txa²wã¹sũ̱³na² ĩ²nẽ³kxa² yã¹nxe³sxã³ ĩ²ki̱³tu¹wa². 
\p  
\v 13 Jã¹nxe³jut3su² ha³lo²a² yu³ta² yu³tha¹li¹ ka³na³ki¹ hxi²kan¹te²la³ yũ²na³la². Yxo²ĩ²ki̱³ju³ta² yũ³ha²kxai³ Kris²tu³jah¹la² wa̱³li²je³na³wa³kxa² wahx3nxe³ki̱³ju³ta² yũ³ha²kxai³ a²nũ²a² a³lxi²waun¹nyhu¹ki̱³ju³ta² yũ³ha²kxai³ nxe³te²ju²hẽ³la². Nxe³ju³ta² ha³kxa¹ a³lxi²waun¹nyhu¹ki̱³ju³ta² ã²la² hxi²kan¹sxã³ ã³sen³sai¹ki̱³ju³ta³la³ te²ju²hẽ³la². 
\c 14  
\s1 Txa²wã¹sũ̱³na² Yãu³ka³jxah¹la² ĩ³hxi²ka¹tũ¹nhẽ³jau³su² 
\p  
\v 1 A³lxi²waun¹nyhu¹ah³lxin¹ju³ta² ã³ten³jah¹lxi³hẽ¹la². Txa²wã¹sũ̱³na² Yãu³ka³jxah¹lai²na² hxi²kan¹te²lo³tũ¹nhẽ³ju³ta² yxo²kwa̱in³jah¹lxi³hẽ¹la². Txa²wã¹sũ̱³na² wãn³txa² ĩ³hen³txa³kxain¹yah³lxin¹ju³ta² yxo²kwa̱in³khai¹nxe³jah¹lxi³hẽ¹la².  
\v 2 Nxe³sxã³ wãn³txa² yau³ã̱³lxi³ti³ e³yah³lxin¹kxai²nãn²tu̱³ Txa²wã¹sũ̱³na² ne³nxẽ³na² so¹lxi³ ain³kxi²sxã³ ã³ne³wxe³hĩ̱³nx2na³la². A²nũ²a² hai³txi³ ain³kxi²nha²hĩ̱³ki̱³sxa³wa². Hxi²kan¹txi³ ã³ne³wxe³te²sxa³yu²hẽ³la². Txa²wã¹sũ̱³na² Yãu³ka³jxah¹la² ĩ³hxi²kat1sxã³ ya²la³lyau³xan²tu̱³ hãi³wã²nxĩn¹jau³xan²tu̱³ e³kxi²te²ju²hẽ³la².  
\v 3 Yxãn³ta¹ Txa²wã¹sũ̱³na² wãn³txa² ĩ³yau¹ũ³ki̱³kxai²nãn²tu̱³ a²nũ²a² hãi¹nxe³ti³xa¹ ain³kxain¹jau³su² hĩ̱³nx2na³la². ónon²ta³kxi²jau³su² ha²kxai³, ĩ³nxũ²kwa̱i³lxũ¹jau³su² ha²kxai³, sa²ye³kwẽ²kxi²jau³su² ha²kxai³ nxe³hĩ̱³nx2na³la².  
\v 4 Te²yã¹nxe³sxã³ wãn³txa² yau³ã̱³lxa³ti³ e³jah¹lai²na² sa²kxai³lu² nũ¹hxi²kan¹ti³lon³te²ju²hẽ³la². Jã¹nxe³sxã³ Txa²wã¹sũ̱³na² wãn³txa² ĩ³yau¹ũ¹jah¹lai²na² sa²kxai³lu² yxo²ĩ²tũ̱³ka̱³txa² hãi¹nxe³ti³xa¹ a²hxi²kan¹nũh¹nũ³nyhai¹nhĩ̱³nx2na³la². 
\p  
\v 5 Wxa²nũ̱³ka̱³txa² yxo²ha³kxa¹ wãn³txa² yau³ã̱³lxa³ti² e³yah³lxin¹ju³ta³nũ³a² te³nhĩ̱³na¹wa². Yxãn¹ta¹ Txa²wã¹sũ̱³na² wãn³txa² ĩ³yau¹ũ¹yhah³lxin¹ju³ta² ten³khaix1sa³nha²wa². Nxe³sxã³ wãn³txa² yau³ã̱³lxa³ti² e³yah³lxin¹kxai²nãn²tu̱³ wi¹lhĩ̱³nx2na³la². Yxãn¹ta¹ Txa²wã¹sũ̱³na² wãn³txa² ĩ³yau¹ũ³yah³lxin¹kxai²nãn²tu̱³ ã²la² wi¹khaix1jau³la³ hĩ̱³nx2na³la². Jã¹nxe³jut3su² yau³ã̱³lxa³ti² e³kxi²sxã³ ain³kxah³lxin¹kxai²nãn²tu̱³ wãn³txai²li² a²si³yxau³tãu³khai³xa² ĩ³yau¹ũ¹nx2ti³jah¹la² yũ³kxai²nãn²tu̱³ wi¹na³la². Yxãn¹ta¹ yũ²nxa³kxai²nãn²tu̱³ hxi²kan¹txi³ a³la³kxah¹lxi³hĩ̱³nx2nxã³lxa².  
\v 6 Nxa²ha¹te¹ txa²wã³tã̱³nãu³xa² yã¹yxah³lxi¹lxa². Nxe³sxã³ wxã³sĩ²nx2ta¹tãu³a¹ wãn³txa² yau³ã̱³lxa³ti² jau³jau¹xai²na² so¹lxi³ e³kxi¹nx2ta¹kxai²nãn²tu̱³ hxi²kan¹ti³ ã³non²ta³kxi¹nx2ti³nxa³lho³la². Yxãn¹ta¹ Txa²wã¹sũ̱³na² wãn³txa² ĩ³yau¹ũ¹nx2ta¹jau³su² ta̱³nxa² a²hoh³lxi³sa²jau³su² ta̱³nxa² wãn³txa² wi¹jau³su² ĩ³hen³txi³nx2ta¹jau³su² ta̱³nxa² nxe³nx2ta¹kxai²nãn²tu̱³ ĩ³hxi²ka¹txa²lxi³hĩ̱³na¹wa². 
\p  
\v 7 Nxa²ha¹te¹ yau³tã̱³xa²sa¹, yen³kxa² ka³te̱³nxa³te²na²sa¹, wãi²lhũ̱³ka³txa² ta̱³nxa² ar²pa²kax3su² ta̱³nxa² hain³kxai²nãn²tu̱³ wain³txi³ wxa²hai³nxa³kxai²nãn²tu̱³ a²nũ²a² ã̱³xa² ain³kxi²nẽ³jah¹la² hxi²kan¹ti³ a²si³yxau³tãu³khai³xa² ain³kxai¹nhĩ̱³nx2nxa³wa².  
\v 8 Te²yã¹nxũn³sxã³ kwa³jan³ta² so³ta²to² nũ̱³ka̱³txa² he¹li³te³lhxã³ ai³ain¹te²ju²hẽ³la². Nxe³te³na¹ wãi²lhũ̱³ka³txa² trũ³be²ta²kax3su¹ nxe³ka³txa² tẽ³sxã³ ĩ³hain³te²ju²hẽ³la². Wi¹lhain³kxai²nãn²tu̱³ a²si³yxau³tãu³a² ã³ne³wxe³ha²kxai³ he¹lain¹te²ju²hẽ³la². Yxãn¹ta¹ wain³txi³ hai³nxa³kxai²nãn²tu̱³ ko̱³nhai¹nxa³ha²kxai³ hãi¹sxã³ he¹lai¹nxa³ka³tu̱³ yxau³ain¹te²ju²hẽ³la².  
\v 9 Te²yã¹nxe³jut3su² wãn³txa² yau³ã̱³lxa³ti³ e³yah³lxin¹kxai²nãn²tu̱³ a²si³yxau³tãu³a² ã³ne³wxe²nxa³kxai²nãn²tu̱³ hai³txi³ wi³ti³he¹nxẽ²nxa³wa². Wxa²wãn³txa² ha³lo²a² kwa² he¹sa³tĩ¹hĩ̱³nx2na³la².  
\v 10 Yuh³xan¹ko³xai²na² whãi²na¹ a²nũ²a² nũ̱³ka̱³txi³nãu³xa² ka³lxa¹khai¹xain¹na³la². Wãn³txai²li² yau³ã̱³lxa³ti³ e³xi²xai³ain¹te²ju²hẽ³la². E³xi²xai³ha²kxai³ a²si³yxau³tãu³a² ha³na³ka³lxi³ nxe² ai³te²ju²hẽ³la².  
\v 11 Nxe³sxã³ e³jau³xai²na² ã³ne³wxe³sa²nxa³kxai²nãn²tu̱³ ã̱³lxin³tã¹. Ai¹nhĩ̱³na¹wa². Te²yã¹nxũn³sxã³ txa²wãn³txa² e³a¹jau³xa² ã³ne³wxe³ai¹nxa³kxai²nãn²tu̱³ ã̱³lxin³tai¹. Sai¹nhĩ̱³nx2na³la². Jã¹nxũn³sxã³ ã³ne³wxe³ai¹nhĩ̱³nx2nxa³wa².  
\v 12 Jã¹nxe³jut3su² Txa²wã¹sũ̱³na² Yãu³ka³jxah¹la² ĩ³hxi²ka¹tẽ³ju³ta² ten³yah³lxi¹nha²kxai³ ã²la² wi¹ju³ta² ã³ten³jah¹lxi³hẽ¹la². Yxo²ĩ²tũ̱³ka̱³txai²na² ã³nxũ²kwa̱i³lxũ¹sxã³ a²hi²ka¹txa²lxain¹ju³ta² ten³jah¹lxi³hẽ¹la². 
\p  
\v 13 Nxe³yãn¹ta¹ wãn³txa² yau³ã̱³xa² hxi²kan¹txi³ e³te² ĩ³nxa² Txa²wã¹sũ̱³na² ĩ³wã̱³txi¹jah³lxi³hẽ¹la². Wãn³txai²li² a²si³yxau³tãu³a² ĩ³wã̱³txi¹jah³lxi³hẽ¹la², ĩ³yau¹ũ³nxa²lxi³si¹yhah³lxin¹jau³nũ³sa³.  
\v 14 Wãn³txa² yau³ã̱³xa² e³sxã³ Txa²wã¹sũ̱³na² e³kxi²na¹kxai²nãn²tu̱³ txa²yãu³ka³txa² so¹lxi³ e³kxi²hĩ̱³nx2na³la². Hai³txi³ txai²na² a²hoh³lxi³sa¹ju³ta³la³.  
\v 15 Nxe³jut3su² ha²kxai³ ĩh¹nxe² kãi³a¹lhon³ku² nxa¹nha²wa². Yau³ha¹li¹ e³a¹tu¹wa². Txa²yãu³ka³txai²na² wãn³txa² yau³ã̱³xa² e³i² txa²ẽ¹nãu³ai²na² wãn³txi³khai³xa² e³i² na¹tu¹wa². Te²yã¹nxe³sxã³ txa²yãu³ka³txai²na² hain³jau³xa² yau³ã̱³xa² hai³ni² txa²ẽ¹nãu³ai²na² hain³jau³khai³xa² hai³ni² na¹tu¹wa².  
\v 16 Ĩ³wi¹lxon³kxah¹lxin¹jau³xai²li² Txa²wã¹sũ̱³na² ĩ³ye³kxah¹lxin¹tãu³a¹ a²yãu³ka³txi³khai³xa² e³kxi²kxai²nãn²tu̱³ wãn³txa² yau³ã̱³xa² so¹lxi³ e³kxi²kxai²nãn²tu̱³ a²nũ²a² a³la³kxi²nxa³te²a² wxã³sxã³ ã³yã³nũ²kxi¹nx2ti³kxai²nãn²tu̱³ e³kxi²jau³xai²li² hxi²kan¹ti³ ã³ne³wxe³ai¹nhĩ̱³nx2nxa³wa². Hxi²kan¹txi³ ã³ye³yxo²nũ¹nxa²lxi³jau³la³ e³ya³nx2ti³xa³lho³la². Hai³txi³ ã³ne³to³ti³he¹nxai¹nhĩ̱³nx2nxa³wa².  
\v 17 Ĩ³wi¹lxon³kxah¹lxin¹jau³xai²li² wi¹khaix1kxan²ti³ a²nũ²a² a³la³kxi²nxa³te²a² hai³txi³ ĩ³nxũ²kwa̱i³lxũ¹hĩ̱³nx2nxa³wa², ã³ne³wxe³ai¹nxa³ha²kxai³la².  
\v 18 Txai²na² sa²kxai³lu² wãn³txa² yau³ã̱³lxi³jau³xa² ã²la² yxau³ka³lxa¹txi³ e³khai¹nxa¹wa². Nxe³na¹ju³tai²li² Txa²wã¹sũ̱³na² ĩ³wi¹lxo³kxi²na¹wa².  
\v 19 Nxe³na¹kxan²ti³ yxo²ĩ²ki̱³tũ̱³ka̱³txi³nãu³xai²na² ã³yã³nũ²kxi²ki̱³tãu³a¹ txa²wãn³txi³khai³xa² wãn³txa² ã³ne³wxe³ain¹jau³xai²na² yau³ha¹li¹ yau³ha¹li¹ ka³na³ki¹ ĩ³yau¹ũ³na¹kxai²nãn²tu̱³ wi¹lhĩ̱³nx2na³la². Yxãn¹ta¹ wãn³txa² yau³ã̱³lxi³ jau³jau¹xai²li² wãn³txa² ã³ne³wxe³ai¹nxa³jau³xa² yau³ka³lxa¹txi³ ĩ³yau¹ũ³ai¹na¹kxai²nãn²tu̱³ wai³nhĩ̱³nx2nxa³wa². Nxe³ha²kxai³ ã³ne³wxe³ain¹jau³xai²li² ã²la² te³nhĩ̱³na¹wa². 
\p  
\v 20 Txa²wã³tã̱³nãu³xãi³. Ĩ³kãi²non³nyhah¹lxin¹ju³tan¹te²kxa³ya̱³lhu² wãn³txa² yau³ã̱³xa² e³yah³lxin¹kxai²nãn²tu̱³ wẽ³son³txi³sxã³ hain³nyhah¹lxi³hĩ̱³nxa¹lxa². Jã¹nxe³yah³lxi³txa³hẽ¹la². Wxi²kan¹sxã³ hain³nyhah¹lxin¹kxai²nãn²tu̱³ wãn³txa² e³yah³lxin¹jau³nũ³a² ã³ne³wxe³ain¹tu¹wa².  
\v 21 Nxe³sxã³ Txa²wã¹sũ̱³na² ũ³wha²li¹txã³nxai³tã² nxe³te³nah¹lxi¹: 
\q1 — Txa²wã¹hxi²kan¹jah¹la² e³na²hẽ³li¹. E³te³nah¹lxi¹: “Txa²nũ̱³ka̱³txi³khai³xa² ĩ³hen³txi³na¹tu¹wi¹. A²nũ²a² ã̱³xa² wãn³txa² ĩ³ye³kxai¹na¹tu¹wi¹. Nxe³ai¹na¹kxan²ti³ ã³ne³to³sai¹nhĩ̱³nx2nxa³wi¹.” Txa²wã¹hxi²kan¹jah¹la² nxe³na²hẽ³li¹. 
\m Txa²wã¹sũ̱³na² ũ³wha²li¹txã³nxai³tã² nxe³ta¹hxai²hẽ¹la². 
\p  
\v 22 Jã¹nxe³jut3su² wãn³txa² yau³ã̱³lxa³ti³ e³kxi²kxai²nãn²tu̱³ yxo²ĩ²xa³te²a² ĩ²yau¹ũ³jau³su² hĩ̱³nx2na³la². Yxo²ĩ²te²a² ĩ³yau¹ũ³jau³sxa³wa². Yxãn¹ta¹ Txa²wã¹sũ̱³na² wãn³txa² ĩ³hen³txi³kxai²nãn²tu̱³ yxo²ĩ²tũ̱³ka̱³txa² ĩ³yau¹ũ³jau³su² hĩ̱³nx2na³la². Yxo²ĩ²xa³te²na² ĩ³yau¹ũ³jau³sxa³wa².  
\v 23 Nxe³ha²kxai³ ĩ²jah¹lxi³hẽ¹la². Yxo²ĩ²tũ̱³ka̱³txi³ ĩ³nxa² ã³yã³nũ²kxi²yah³lxin¹tãu³a² a²nũ²ai²na² a³la³kxi²nxa³te²su² ta̱³nxa² yxo²ĩ²xa³te²su² ta̱³nxa² wxã³sxã³ ã³yã³nũ²kxi¹nx2ti³hĩ̱³nx2na³la². Nxe³kxai²nãn²tu̱³ wãn³txa² yau³ã̱³lxa³ti³ e³yah³lxin¹kxai²nãn²tu̱³ jah¹lai²na² sa²kxai³lu² ã³ne³wxe²nxa³jau³su² nxe³te³nah¹lxi¹: 
\p — Tũ̱³ka̱³txai²na² wen¹tũ̱³ka̱³txi³sin²tã¹. Nxai¹nhĩ̱³nx2na³la².  
\v 24 Yxãn¹ta¹ hãi¹sxã³ Txa²wã¹sũ̱³na² wãn³txa² ĩ³hen³txi³nyhu¹ah³lxin¹kxai²nãn²tu̱³ yxo²ĩ²xa³te²la³ ta̱³nxa² a³la³kxi²nxa³te²su² ta̱³nxa² ã³yã³nũ²kxi¹nx2ti³hĩ̱³nx2na³la². Nxe³kxai²nãn²tu̱³ Txa²wã¹sũ̱³na² wãn³txa² ain³kxi¹nx2tain¹kxai²nãn²tu̱³ a²ko̱³nxe³ti³ kãi³nha²ju³ta² ĩ²nha²sxã³ ã³yxo²o³tũ¹hain¹tu¹wa². Txa²wã¹sũ̱³na² wãn³txa² ain³kxi¹nx2tai¹nha²kxai³ ã³yxo²o³tũ¹hain¹tu¹wa².  
\v 25 A²ẽ¹na² a̱in³nha²jau³xa² Txa²wã¹sũ̱³na² hi²sen³su² e³lxah²lxi³ye²tu¹wa². Nxe³sxã³ ã³ka³ti³wxe³sxã³ Txa²wã¹sũ̱³na² sa²nẽn¹kxi²tu¹wa². Sa²nẽn¹kxi²te³nah¹lxi¹: 
\p — Ya²la³tu̱³ Txa²wã¹sũ̱³na² yxau³a³nhẽ³lin²tai¹. Nxe³tu¹wa². 
\s1 Yxo²ĩ²sxã³ yxau²xai³lain¹tũ̱³ka̱³txa² wain³txi³ o²la³kxain¹jau³su² 
\p  
\v 26 Txa²wã³tã̱³nãu³xãi³. Ĩ³ye³kxi¹nx2ta¹tu¹wa². Ĩ³ye³kxi¹nx2ta¹te³nah¹lxi¹, yxo²ĩ²tũ̱³ka̱³txi³ ĩ³nxa² ã³yã³nũ²kxi²yah³lxin¹kxai²nãn²tu̱³ a²nxũ²kwa̱i³lxũ¹nyhu¹ah³lxin¹ju³ta² so¹lxi³ o²la³kxi¹jah³lxi³hẽ¹la². Ka³na³ki³ hain³jau³xa² yũ³yah³lxi¹nha²kxai³ ka³na³ki² ĩ³yau¹ũ¹nyhah¹lxin¹jau³xa² yũ³yah³lxi¹nha²kxai³ ãh¹ ka³na³ki² Txa²wã¹sũ̱³na² wãn³txa² tah²yau³xa² yũ³yah³lxi¹nha²kxai³ ka³na³ki² wãn³txa² yau³ã̱³lxa³ti³ e³te²a² yũ³yah³lxi¹nha²kxai³ ka³na³ki² yau³ã̱³lxi³jau³xa² a²si³yxau³tãu³a² ĩ³yau¹ũ³ju³ta² hxi²kan¹te²a² yũ³yah³lxi¹nha²kxai³ nxe³jah³lxi³sxã³ ã³nxũ²kwa̱i³lxũ¹nyhah¹lxin¹ju³ta² kãi³jah³lxi³hẽ¹la².  
\v 27 Nxe³sxã³ ka³na³ki² wãn³txa² yau³ã̱³lxa³ti² e³ti³ten³nxa²lxi³kxai²nãn²tu̱³ ha¹lin¹ta̱³nxa² ha¹li¹ ka³na³ki¹ ta̱³nxa² jau¹xai²na² so¹lxi³ e³xai³jah¹lxi³hẽ¹la². Nxe² e³xai³yah³lxin¹ka³tu̱³ wãn³txa² jau¹xai²na² a²si³yxau³tãu³a² ĩ³yau¹ũ³txain¹yah³lxi³hẽ¹la².  
\v 28 Yxãn¹ta¹ ĩ³yau¹ũ¹nx2ti³jah¹la² yũ²nxa³kxai²nãn²tu̱³ ko̱n³ton³jah¹lxi³hẽ¹la². Nxe³sxã³ wxa²ẽ¹nãu³ai²na² so¹lxi³ Txa²wã¹sũ̱³na² e³kxi¹jah³lxi³hẽ¹la².  
\v 29 Te²yã¹nxe³sxã³ ha¹li¹ ta̱³nxa² ha¹li¹ ka³na³ku² te² ĩ³nxa² Txa²wã¹sũ̱³na² wãn³txa² ĩ³yau¹ũ¹nx2ti³jau³xa² yũ³kxai²nãn²tu̱³ a²wã³kxi³ ĩ³nxai²na² sa²kxai³lu² ka³nahx2sxã³ yxau³sxã³ ain³kxi¹txai¹yah³lxi³hẽ¹la². Ya²la³tu̱³ jau³su² ta̱³nxa² ki³han³jau³su² ta̱³nxa² a³ya³txi²yah³lxin¹tu¹wa².  
\v 30 ówxe³te²a² ĩ²li³te² ĩ³nxa² Txa²wã¹sũ̱³na² wãn³txa² kwẽn¹ta² ain³kxi²nha²kxai²nãn²tu̱³ a²wi¹lhĩ¹na² e³jah¹la² sa²kxai³lu² ã³na¹sxã³ ã³wxe³sẽ¹la². Nxẽ¹kxai²nãn²tu̱³ kwẽn¹ta² wxã³jah¹la² ĩ³ye³ ã³si³wxe³txai²la².  
\v 31 Wxãi² ĩ³nxa² yxo²ha³kxa¹ Txa²wã¹sũ̱³na² wãn³txa² ĩ³yau¹ũ³nyhu¹sxã³ ĩ³yi²lho¹kxa² ai³jah³lxi³hẽ¹la². Nxe³yah³lxin¹kxai²nãn²tu̱³ Txa²wã¹sũ̱³na² wãn³txai²li² ã³ne³wxe³yah³lxin¹tu¹wa². Yxah³lxi¹nha²kxai³ ã³nxũ²kwa̱i³lxũ¹nyhah¹lxin¹tu¹wa².  
\v 32 Txa²wã¹sũ̱³na² wãn³txa² ĩ³yau¹ũ¹yah³lxin¹kxai²nãn²tu̱³ wã²nxũ̱h¹ ĩ²nha¹yah³lxi³sxã³ wain³txi³ hau³hau³kot3sxã³ ĩ³yau¹ũ¹nha¹jah³lxi³hẽ¹la².  
\v 33 Nxe³sxã³ Txa²wã¹sũ̱³na² hi²sen³kxai³lu² ĩ²sxã³ ĩ³kaix1so¹nẽ³te²jai¹ti²tu³wa². Ku³kuh³nxa² kãi³ki̱³ju³ta² te³nxa³wa², Txa²wã¹sũ̱³na²sa³. Wain³txi³ hau³ko³ki̱³ju³ta² ten³na³la². Je³su²jah³lai²na² wãn³txa² yxo²ĩ²sxã³ yxau²xai³tũ̱³ka̱³txi³nãu³xai²na² yxo²ha³kxa¹ ĩ³yau¹ũ¹hai¹nhxai²na¹hẽ³la².  
\v 34 Txa²wã¹sũ̱³na² sa²nẽn¹kxi²te³lhxã³ ã³yã³nũ²kxi²yah³lxin¹kxai²nãn²tu̱³ txu¹ti³nãu³xai²na² ka³nahx2nxe³sxã³ yxau³sxã³ ain³kxi²si¹hai¹na¹jau³su² kwa³na³ai¹na¹wa². E³xa² yxau³ain¹kxai²nãn²tu̱³ wai³nxa³wa². Nxe³jau³xai²na² Txa²wã¹sũ̱³na² ũ³wha²li¹txã³nxai³tã² nxe² ĩ³yau¹ũ³nẽ³ta¹hxai²hẽ¹la².  
\v 35 Nxe³sxã³ wãn³txa² wã̱³txi³jau³su² yũ³kxai²nãn²tu̱³ a²sxi²nhãu³a² a²wẽ³sãi¹yah³lai²li² ĩ³wã̱³txi³txai¹la². Jã¹nxe³sxã³ yxo²ĩ²yah³lxin¹tũ̱³ka̱³txi³ ĩ³nxai²na² ã³yã³nũ²kxah³lxin¹tãu³a¹ txu¹ha³ ĩ³ye³ye¹nx2ti³ju³ta² wai³nxa³wa². 
\p  
\v 36 Yxãn¹ta¹ wxa²nũ̱³ka̱³txi³ ĩ³nxai²na² so¹lxi³ Txa²wã¹sũ̱³na² wãn³txa² yũ³nxa²lxi³ji¹wa²? Wxa²nũ̱³ka̱³txi³nãu³ ĩ³nxai²na² so¹lxi³ ĩ³tih³nxe³nx2ti³te²la¹xã³? Hai³txi³ ti³he¹nx2nxa³wa².  
\v 37 Nxe³ha²kxai³: 
\p — Txa²wã¹sũ̱³na² wãn³txa² ĩ³hen³txi³jah¹lo²sa¹xã¹. Wã³nxĩn¹khai¹nxe³ju³ta² txai²na² so¹lxi³ ũ³hũ¹sa²na³nã¹. Yxah³lxin¹kxai²nãn²tu̱³ txa²wãn³txa² ain³kxi²khaix1sah¹lxi³hẽ¹la². Txa²wã¹sũ̱³na² kwa³na³nẽ³jau³xa² ũ³hũ¹sa³ha²kxai³ ũ³wha²li¹lye¹nx2ta¹wa².  
\v 38 Yxãn¹ta¹ txa²wãn³txa² ain³kxi²sa²nxa³jah¹lo²su² yũ³kxai²nãn²tu̱³ a²nxe³jah¹lai²na² wãn³txa² ain³kxah¹lxi³txa³hẽ¹la². 
\p  
\v 39 Jã¹nxe³jut3su² Txa²wã¹sũ̱³na² wãn³txa² ĩ³yau¹ũ¹ju³ta² ã³ten³khai¹nxe³jah³lxi³hẽ¹la². Yxãn¹ta¹ wãn³txa² yau³ã̱³lxa³ti³ e³jah¹la² ĩ³kwa̱i²kxah¹lxi³txa³hẽ¹la², Txa²wã¹sũ̱³na² wãn³txi³su² nũ¹kxan²ti³na².  
\v 40 Jã¹nxe³ha²kxai³ kãi³yah³lxin¹ju³ta² ĩ²li³ju³ta² hau³hau³kot3sxã³ o²la³kxi¹jah³lxi³hẽ¹la². Ku³kuh³nxe² o²la³kxi²yah³lxi³txa³hẽ¹la². 
\c 15  
\s1 Kris²tu³jah¹la² ka³te̱n³su² ĩ³sa²yxau³xi²jau³su² 
\p  
\v 1 Nxa²ha¹te¹ txa²wã³tã̱³nãu³xãi³. Ain³kxi²sah¹lxi³hẽ¹la². Txa²wã¹sũ̱³na² wãn³txa² e³kxi¹nx2ta¹jau³xai³tã² ain³kxi¹jah³lxi³hẽ¹la². Nxe³jau³xai³tã² a̱in³so¹yah³lxin¹jau³xai³ta³lxi³ yxo²ĩ²ah³lxin¹jau³xai³txa³lxi²na³la².  
\v 2 A²nxe³jau³xai²li² ĩ³yau¹ũ¹nx2ta¹jau³xai³tã² Txa²wã¹sũ̱³na² wãn³txa² wi¹jau³xai²la¹wa². Nxe³sxã³ ain³kxi²sxã³ yxo²ĩ²yah³lxi¹nha²kxai³ wxa²ẽ¹nãu³ai²na² sa²hau³ko³tũh¹nx2ti³na²hẽ³la². Nxũ²kwa̱i³lxũ¹txi³ yxau³yah³lxin¹kxai²nãn²tu̱³ sa²hau³ko³nha²sxã³ yxau³yah³lxin¹tu¹wa². Yxãn¹ta¹ jau¹xai²na² yxo²ĩ²yah²lxan³kxai²nãn²tu̱³ wxa²ẽ¹nãu³ai²na² sa²ha³ko³txa²lxi³ju³ta³la³ yũ²nxa³wa². 
\p  
\v 3 Nxe³sxã³ wãn³txai³tã² Txa²wã¹sũ̱³na² ũ³hũ¹sa²jau³xain²ti³ ĩ³hen³txi³nx2ta¹jau³xain²txi²na³la². Nxe³jau³xai²na² wxi²kan¹jau³xai²la¹wa². Kris²tu³jah¹la² ya³lu²kxi²nẽ³lha²kxai³ txa²wã¹ko̱³nxe³ti³ kãi³ki̱³ju³ta² sa²wa²su¹tũ¹nhẽ³te³lhxã³ ta¹hxai²hẽ¹la². Nxe³jau³xai²na² Txa²wã¹sũ̱³na² ũ³wha²li¹txã³nxai³tã² nxe³ta¹hxai²hẽ¹la².  
\v 4 Jã¹nxe³sxã³ ya³lu²kxi²nẽ³nũ²la² sa²nĩ̱³kxain¹ta¹hxai²ti³ai¹ti²tu³wa². Hã²wxãn³txi³nũ² ye³ha¹li¹ ka³na³ki¹ a³lan²ni²ka³tu̱³ Txa²wã¹sũ̱³na² hi²sen³su² ka³te̱n³su² ĩ³sa²yxau³xi²si¹ta¹hxai²hẽ¹la². Nxe³hĩ¹nãn¹te²tu̱³ ka³te̱n³su² yxau²xai³nha²wa². Txa²wã¹sũ̱³na² ũ³wha²li¹txã³nxai³tã² nxe³ta¹hxai²hẽ¹la².  
\v 5 Nxe³ha²kxai³ Pe²jah³la² ã³yũ²txi²xi² a²to²se³ nũ̱³ka̱³txa² ã³yũ²txi²xi² nxe³ta¹hxai³hẽ¹la².  
\v 6 Nxe³ka³tu̱³ yxo²ĩ²tũ̱³ka̱³txa² ka³lxa¹txi³ 500 nxe² a²nũ²a² ka³lxa¹txi³ ã³sã²nũt1sxã³ ã³yũ²tain¹ta¹hxai²hẽ¹la². Nxe³tũ̱³ka̱³txa² yxo²ha³kxa¹ ka³te̱n³ti³ hi¹nain¹nha²wa². Yxãn¹ta¹ ĩ²li²te²su² te²a¹ ya³lu²ain¹nha²wa².  
\v 7 Nxe³ha²kxai³ Ti³a²kah³lai¹tã² ĩ²nũn³ta¹hẽ¹la². Ãh¹ jã¹nxe² yan¹nãu³a¹ ĩ³kaix1so¹tũ̱³ka̱³txa² yxo²ha³kxa¹ ĩ²ain¹nũn³ta¹hẽ¹la². 
\p  
\v 8 A²ne³ki³sa³nãu³a¹ txai²li² ĩ²nũ³na¹hẽ³la². Wẽ³sa² yxau³ni¹te²a² wa³su³txi³ a³li³lah¹te²sxa³jai¹ti²tu³wa². Jã¹nxe² a²ne³ki³sa³nãu³a¹ Je³su²jah³la² wã²nã³ũ¹sa³jah¹lo²sa¹wa².  
\v 9 Ĩ³kaix1so¹sa²nũn³jah¹lo²sa¹wa². Txai²na² kãin²sa²nxa³jah¹lo²sa¹wa². Nxe³ha²kxai³ ĩ³kaix1so¹tũ̱³ka̱³txa² yxo²ha³kxa¹ ã³sen³sai¹sain¹nha²wa². Kxã³nhxĩ¹nãu³ai³tã² Je³su²jah³lai²na² wãn³txa² yxo²ĩ²tũ̱³ka̱³txa² khãuh³lxa³txai¹na¹hẽ³la². Nxe³na¹ju³ta²: 
\p — Wain³txa²na³nã¹. Txa²ẽ¹nãn¹jau³xa² te²sa¹wa².  
\v 10 Nxe³yãn¹ta¹ Txa²wã¹sũ̱³na² sa²kxai³lu² kãin² thãi³ti³la² a³lxi²sa²ha²kxai³ txa²ẽ¹nãu³a² sa²hau³kot3sa³ha²kxai³ ĩ³hxi²kat1sa³na²hẽ³la². Ĩ³hxi²kat1sa²ju³ta² kwa²hãi¹nxe² ĩ³hxi²kat1sa²nxa³hẽ³la². Nxe³sa²nxa³ju³tan¹te²kxa³ya̱³lhu² ya³lo³txi²sxã³ o²la³kxi²na¹ju³ta² ĩ³kaix1so¹tũ̱³ka̱³txa² yxo²ha³kxa¹ txa²wã¹wa³ka³li³yu³ta² ã³sen³sai¹ai¹na¹hẽ³la². Nxe³na¹kxan²ti³ nxũ¹txai²na² txa²nũ³kxũ̱³na¹ju³ta³la³ o²la³kxi²te²txã³wa². Txa²wã¹sũ̱³na² ĩ³hxi²kat1sa²ju³ta² so¹lxi³ o²la³kxi²jah¹lo²sa¹wa².  
\v 11 Jã¹nxe³jut3su² txai²la³ ta̱³nxa² tũ̱¹ka̱³txai²la³ ta̱³nxa² ĩ³hen³txi³nx2ti³nha¹jau³xa² kwa²hãi¹nxũh¹hĩ̱³nx2na³la². Ĩ³hen³txi³jah¹la² ĩ²li³te²a¹ kwa²hãi¹nxũ¹hĩ̱³nx2na³la². Nxe³yãn¹ta¹ ĩ³hen³txi³nx2ti³jau³xai³tã² yxo²ĩ²yah³lxin¹jau³xa² nxe³jau³xai²na² so¹lxi³ ka³lih³kxi²na¹jau³xai²la¹wa². Ain³kxah¹lxi¹nha²kxai³ yxo²ĩ²yah¹lxi³hxai¹nhẽ³la². 
\s1 Yxo²ĩ²tũ̱³ka̱³txi³ki̱³na¹xai²na² ka³te̱n³su² ĩ³sa²yxau³si¹nhẽ³nũ³jau³su² 
\p  
\v 12 Nxa²ha¹te¹ Txa²wã¹sũ̱³na² hi²sen³kxai³lu² Kris²tu³jah¹la² ka³te̱n³su² ĩ³sa²yxau³xi²si¹jau³xa² ĩ³hen³txi³nx2ta¹tai¹ti²tu³wa². Nxe³nx2ta¹ha²kxai³ ĩh¹nxe³kxa²ya̱n³ti³ta̱³ ĩ²li³te² ĩ³nxai²na¹ e³yah³lxin¹thai¹la²? E³yah³lxin¹te³nah¹lxi¹: 
\p — A²nũ²a² ya³lu²kxai²nãn²tu̱³ hai³txi³ ka³te̱n³su² ĩ³sa²yxau³xi²ju³ta² yũ²nxa³lho³li¹. Nxe³yah³lxi³ta¹hi¹nhẽ¹la².  
\v 13 Nxe³yãn¹ta¹ ka³te̱n³su² ĩ³sa²yxau³xi²ju³ta² yũ²nxa³ke³la³te²kxai³ Kris²tu³jah¹la² hai³txi³ ka³te̱n³su² ĩ³sa²yxau³xi²hĩ̱²nxa³wa².  
\v 14 Yxãn¹ta¹ Te²yã¹nxe³sxã³ Kris²tu³jah¹la² ka³te̱n³su² ĩ³sa²yxau³xi²nxa³ke³la³te²kxai³ ĩ³yau¹ũ¹nx2ta¹jau³su² yũ³hĩ̱³nx2nxa³wa². Te²yã¹nxũn³sxã³ wãn³txa² yxo²ĩ²yah³lxin¹jau³xa² yũ³nũ³nhĩ̱³nx2nxa³wa².  
\v 15 Jã¹nxe³ju³tan¹te²kxa³ya̱³lhu² nxe³ke³la³te²kxai³la¹ txa²wã¹wãn³txa² ĩ³ye³kxi²ki̱³te³nah¹lxi¹: 
\p — Txa²wã¹sũ̱³na² ki³han³jah¹lai²la¹wi¹. Nxe³hĩ̱³ki̱³tã³la². Nxe³sxã³ Txa²wã¹sũ̱³na² hi²sen³su² Kris²tu³jah¹la² ka³te̱n³su² ĩ³sa²yxau³xi²si¹ju³ta³ ĩ³hen³txi³sĩ¹na¹ha²kxai³ txa²wã¹wãn³txa² ĩ³ye³kxi²ki̱³te³nah¹lxi¹: 
\p — Txa²wã¹sũ̱³na² ki³han³jah¹lai²la¹wi¹. Nxe³hĩ̱³ki̱³tã³la². Jã¹nxũn³sxã³ a²nũ²a² ya²lun¹ti³te²nãu³xai³tã² ya²la³tu̱³ ka³te̱n³su² ĩ³sa²yxau³xi²ti³hi¹tai¹nxa³ke³la³te²kxai³ Txa²wã¹sũ̱³na² hi²sen³kxai³lu² Kris²tu³jah¹la² hai³txi³ ka³te̱n³su² ĩ³sa²yxau³xi²ti³hit1sĩ̱³nx2nxa³wa².  
\v 16 Jã¹nxe³sxã³ ya²lun¹ti³ te²nãu³xa² ka³te̱n³su² ĩ³sa²yxau³xain¹si¹hxa³ke³la³te²kxai³ Txa²wã¹sũ̱³na² hi²sen³kxai³lu² Kris²tu³jah¹la² ka³te̱n³su² ĩ³sa²yxau³xi²nũn³si¹hĩ̱³nx2nxa³wa².  
\v 17 Nxe³sxã³ Txa²wã¹sũ̱³na² hi²sen³kxai³lu² Kris²tu³jah¹la² ka³te̱n³su² ĩ³sa²yxau³xi²si¹hxa³ke³la³te²kxai³ Je³su²jah³lai²na² wãn³txa² yxo²ĩ²yah³lxin¹jau³xa² kwa²to³toh³lxi³jau³su² hĩ̱³nx2na³la². Kwa³to³toh³lxi³jau³su² ke³la³te²kxai³ ko̱³nxe³ti³ kãi³yah³lxin¹ju³ta² kan²txi³ ĩ³sxã³ yxau²xai³lyah³lxi³hĩ̱³nxa¹lxa². Hai³txi³ wxa²ẽ¹nai²na² sa²wa²su¹txa²lxi³hĩ̱³nx2nxa³wa².  
\v 18 Jã¹nxe³ke³la³te²kxai³ Kris²tu³jah¹lai²na² wãn³txa² yxo²ĩ²tũ̱³ka̱³txa² ã²la² ya³lu²te²nãu³xa² a²ko̱³nxe³ju³ta² ãh¹yũ³ai¹nhĩ̱³nx2na³la². Hai³txi³ wxa²wa²su¹tai¹nhĩ̱³nx2nxa³wa².  
\v 19 Nxe³sxã³ ka³te̱³na² hin¹ki̱³tãu³a² so¹lxi³ Kris²tu³jah¹lai²na² hxi²ka² sa²hau³kot3sa²tẽ³ũ¹nhẽ³ke³la³te²kxai³ ya³lu²ki̱³sĩ¹na¹ sa²hau³ko³tũ¹nhẽ³ju³tai²li² yũ³nẽ³lhĩ̱³nx2nxa³wa². Nxe³ke³la³te²kxai³la¹ ĩ³ãin²ta³kxi²nha²khaix1nxe³tũ̱³ka̱³txi³su² hĩ̱³ki̱³tã³la². 
\p  
\v 20 Nxe³yãn¹ta¹ ya²la³tu̱³ Txa²wã¹sũ̱³na² hi²sen³kxai³lu² Kris²tu³jah¹la² ka³te̱n³su² ĩ³sa²yxau³xi²ti³hi¹ta¹hxai³hẽ¹la². Wãn³txi³khai¹xai²la¹wa². Nxe³sxã³ ka³te̱n³su² ĩ³sa²yxau³xi²si¹ha²kxai³ ya²lun¹ti²tũ̱³ka̱³txa² yxo²ha³kxa¹ ka³te̱n³su² ĩ³sa²yxau³xi²si¹hain¹nũn³tu¹wa².  
\v 21-22 Nxe³sxã³ kxã³nhxĩ¹nu¹tai²na² in³txa² ka³na³ka³na³jah¹la² A³tãu²ah³lo²su² ha²kxai³ nxe³jah¹la² so¹lxi³ ko̱³nxe³ti³ kãi³ha²kxai³ ya³lu²ta¹hxai²ti³ai¹ti²tu³wa². Nxe³hĩ¹nãn¹te²tu̱³ a²nũ²a² yxo²ha³kxa¹ ya³lu²nẽ³ju³ta³nũ³a² yũ³ki̱³tã³la². Te²yã¹nxe³ju³ta² a²nũ²a² ka³na³ka³na³jah¹la² Kris²tu³jah¹lo²su² ha²kxai³ nxe³jah¹la² so¹lxi³ Txa²wã¹sũ̱³na² hi²sen³kxai³lu² ka³te̱n³su² ĩ³sa²yxau³xi²si¹ta¹hxai²ti³ai¹ti²tu³wa². Nxe³hĩ¹nãn¹te²tu̱³ a²nũ²a² yxo²ha³kxa¹ ka³te̱n³su² ĩ³sa²yxau³xi²ti³hi¹tẽ³ju³ta³nũ³a² yũ³ki̱³tã³la².  
\v 23 Jã¹nxe³ju³tan¹te²kxa³ya̱³lhu² ka³te̱n³su² ĩ³sa²yxau³xi²ki̱³tu¹wa². Yxãn¹ta¹ Kris²tu³jah¹la² txã² ka³te̱n³su² ĩ³sa²yxau³xi²tai¹ti²tu³wa². Nxe³sãn²ka³tu̱³ hã²wxãn³txa³ a³ka³nxi²sxã³ wa̱³li²tãu³a¹ yxo²ĩ²tũ̱³ka̱³txi³ki̱³na¹xai²na² sa²kxai³lu² ã³ta³lo³hẽt1sxã³ ka³te̱n³su² ĩ³sa²yxau³xi²ti³hi¹tẽ³tu¹wa².  
\v 24 Nxe³te²ka³kxa¹ ne³ki³son³ju³ta² wxã³tu¹wa². Nxe³sxã³ Kris²tu³jah¹la² hi²sen³su² yuh³xai²nãn¹ta² wa³kxẽn³ti³nãu³xa² ã³na¹ai¹nha²kxai³ a²hxi²kan¹ti³nãu³xai²na² ã³na¹ai¹nha²kxai³ nũ̱³kxũn³txi³ o²la³kxi²jah¹la² ã³na¹ai¹nha²kxai³ nxe³sãn²nũ²la² Txa²wã¹sũ̱³na² Txa²wã¹wĩ³na² Si³yxau³jah¹lo²su² ha²kxai³ nxe³jah¹la² hxi²ka² ũh³wxe³ain¹tu¹wa².  
\v 25 Jã¹nxe³sxã³ Txa²wã¹sũ̱³na² sa²kxai³lu² a²ko̱¹ko̱¹nũ̱³ka̱³txa² ã³na¹xa³ta̱³lxa¹ Kris²tu³jah¹la² hxi²ka² ũh³wxe³ai¹nxa³ta̱³lxa¹ Kris²tu³jah¹la² hxi²ki³kxai³lu² ĩ³kwa³na³ain¹tu¹wa².  
\v 26 Nxe³sxã³ a²ko̱¹ko̱¹nũ̱³ka̱³txa² a²ne³ki³son³sxã³ yu³lu²nẽ³ju³ta³nũ³a² ne³ki³so³tu¹wa², Txa²wã¹sũ̱³na² hxi²ka²sa².  
\v 27 Nxe³sxã³ Txa²wã¹sũ̱³na² ũ³wha²li¹txã³nxai³tã² nxe³te³nah¹lxi¹: 
\p — Txa²wã¹sũ̱³na² hi²sen³su² yen³kxa² yxo²ha³kxa¹ ã³na¹sxã³ wa³ka³ti³lot3sxã³ Kris²tu³jah¹la² hxi²ka² ũh³wxe³ain¹na²hẽ³li¹. Nxe³ta¹hxai²hẽ¹la². Nxe³jau³su² ha²kxai³ yen³kxa² yxo²ha³kxa²su¹ jau³jau¹xai²na² ũh³wxe³ain¹jau³su² hai³txi³ Kris²tu³jah¹la² hxi²ki³kxai³lu² Txa²wã¹sũ̱³na² wa³ka³ti³lo³txa³lho³la². Nxe³ju³ta² sa²kxai³lu² Txa²wã¹sũ̱³na² Kris²tu³jah¹la² a²hxi²kan¹ti³sa²ye²na³la².  
\v 28 Nxe³nũ²la² yen³kxa² yxo²ha³kxa¹ Kris²tu³jah¹la² hi²sen³su² a²wa³kxẽn³su² hĩ¹na¹ Txa²wã¹sũ̱³na² kwa³na³kxi²ju³ta³nũ³a² wã²nxũ̱h¹ ũh³wxe³nũh¹tu¹wa². Hã²wxãn³txa³ Txa²wã¹sũ̱³na² hi²sen³su² yen³kxa² yxo²ha³kxa¹ kwa³na³tãu³lon³tu¹wa². A²nxe³jah¹la² sa²kxai³lu² a²kxã³nxa² yen³kxai²na² yxo²ha³kxa¹ Kris²tu³jah¹la² hxi²ka² ũh³wxe³jah¹lai²la¹wa². 
\p  
\v 29 Nxa²ha¹te¹ a²nũ²a² sa²kxai³lu² ya³lu²te²a² ĩ̱³yau³xa² ũ³hũ¹kxi²sa²sai¹xi²nũh¹kxai²nãn²tu̱³ ĩh¹nxet3sĩ̱³te²la¹xã³? Ĩh¹nxe³kxa²ya̱n³ti³ta̱³nhĩ¹te²la¹xã³? Ka³te̱n³su² ĩ³sa²yxau³xi²ju³ta² yũ²nxa³ke³la³te²kxai³ ĩh¹nxe³kxa²ya̱n³ti³ta̱³ ya³lu²te²a² ĩ̱³yau³xa² ũ³hũ¹kxi²sa²sai¹xi²nũh¹hĩ̱³te²la¹xã³? Kwa²hãi¹nxe³hĩ̱³nx2na³la².  
\v 30 Te²yã¹nxe³sxã³ ka³te̱n³su² ĩ³sa²yxau³xi²ju³ta³nũ³a² yũ²nxa³ke³la³te²kxai³ ĩh¹nxe³kxa²ya̱n³ti³ta̱³ ye³khãuh³lxi²sin¹to³hĩ̱³te²la¹xã³? Kwa²hãi¹nxe³hĩ̱³nx2na³la².  
\v 31 A³lan²ta² hãi¹nxe³ti³xa¹ ĩ³ya²lu¹te³lhxã³ khãuh³lxa³txi³sai¹nhxai²kxai³ jã¹nxe³sxã³ khãuh³lxa³txi³sain¹nha²wa². Ya²la³lyau³xai²la¹wa². Nxe³sxã³ Je³su² Kris²tu³jah¹la² Txa²wã¹hxi²kan¹ta² Si³yxau³jah¹lo²su² ha²kxai² nxe³jah¹lai²na² wãn³txa² yxo²ĩ²yah³lxi¹nha²kxai³ ã²la² a³la³kxi²ti³lon³yah³lxi¹nha²kxai³ ka³lih³khaix1sa³nha²wa². Jau¹xai²na² ya²la³tu̱³jau³su² nũn³na³la².  
\v 32 E²fe³so³thĩ³na² yxau³na¹tãu³a² kãin² o²la³kxi²na¹wa². Ya²na¹la² ũ̱n³txi³su² te²a² a²nũ³kxũ̱n³ju³ta² yã¹nxe³sxã³ Txa²wã¹sũ̱³na² wãn³txa² ya³lo³txi²sxã³ ĩ³hen³txai¹na¹wa². E²fe³so³ nũ̱³ka̱³txai²li² txa²wãn³txa² te³nai¹nxa³kxan²ti³ ya³lot3sxã³ o²la³kxi²na¹wa². Yuh³xai²nãn¹txe² yen³kxa² a²yo³ha² hãi¹sxã³ so¹kxi²na¹ju³ta² ten³na¹ke³la³te²kxai³ ĩh¹nxe³kxa²ya̱n³ti³ju³ta² khãuh³lxa³txi³nha²hĩ̱³na¹te²la¹xa³? Ka³te̱n³su² ĩ³sa²yxau³xi²ju³ta² ya²la³tu̱³ yũ²nxa³ke³la³te²kxai³ wãn³txa² tĩn³yau³xai³tã² sa²yxo²wet1sxã³ kãi³hĩ̱³ki̱³tã³la². Nxe³ju³tai³tãn¹jau³xa² nxe³te³nah¹lxi¹: 
\p — Hĩ¹na² kãin² yain³ya³sah¹lxi³wxi¹. Kãin² ĩ³na¹a³sah¹lxi³wxi¹. Kwa² wa³ni̱³lon³ya³sah¹lxi³wxi¹. Nxe³ha²kxai³ ka³nxa³ha²ta³a² ya³lu²ki̱³ju³ta³nũ³a² yũ³tu¹wi¹. Nxe³hxai²na²hẽ³la². 
\p  
\v 33 Nxe³sxã³ ã³ke³tũ¹nyhah¹lxi³txa³hẽ¹la². Wxa²ya̱³la³nãu³xa² yxau²xai³lya³hai¹nĩn¹te²nãu³xa² kuh³lxa³thin¹sxã³ kãi³ain¹kxai²nãn²tu̱³ wxa²ẽ¹nãu³ai²na² ko̱³nxa³thin¹kãi²no³nxa²lxi³ha³ta²wa².  
\v 34 Hxi²ka¹ka¹nha²sxã³ a³la³kxi¹jxah³lxi³hẽ¹la². Wain³ju³ta² so¹lxi³ kãi³jah¹lxi³hẽ¹la². Ko̱³nxe³ti³ kãi³yah³lxin¹ju³ta² o²la³kxi²yah³lxi³ta̱³lxa². Ãu²lxa²to³nha²lxi³si¹nx2ta¹jau³su² nxe³ye¹nx2ta¹wa². Wxa²nũ̱³ka̱³txi³nãu³xa² Txa²wã¹sũ̱³na² wãn³txa² yxo²ĩ²xa³te²a² yũ³yah³lxi¹lxa². 
\s1 Txa²wã¹nũ²nãu³ai²na² ka³te̱n³su² ĩ³sa²yxau³xi²jut3su² 
\p  
\v 35 Nxa²ha¹te¹ a²nũ²a² ĩ³wã̱³txi³nx2ti³te³an¹jau³kxai³lu¹ ĩ³ye³kxi²te³nah¹lxi¹: 
\p — Txa²wã¹nũ²nãu³ai²na² ĩh¹nxe³sxã³ ka³te̱n³su² ĩ³sa²yxau³xi²te³ji¹wi¹? Txa²wã¹nũ²nãu³ai²na² ĩh¹nxe³khaix1nxe³sxã³ txa²wã¹nũ²nãu³ai²la³te³ji¹wi¹? Nxe² ĩ³wã̱³txi¹nx2tai¹nhĩ̱³nx2na³la².  
\v 36 Toh³la² e³yah³lxi³txa³hẽ¹la². Yain³ta³ki³a² ũ³whĩ̱¹ki̱³kxai²nãn²tu̱³ ye³jen¹na² ya³lu²te²jai¹ti²tu³wa². Nxe² ya³lu²sãn²nũ²la² ka³lũ̱³xi²te²jai¹ti²tu³wa². Jã¹nxe³tu¹wa².  
\v 37 Nxe³sxã³ ũ³whĩ̱¹ki̱³ki³ai²li² a²ki³a² so¹lxi³ ũ³whĩ̱¹ki̱³te²ju²hẽ³la². Tri²ka²ki³a² ta̱³nxa² ĩ²li³ki³a¹ ũ³whĩ̱¹ki̱³te³ju²hẽ³la². A²nxe³ta³ne³kxa² wi¹wen¹ta³nẽ³ka³nũ³a² hai³txi³ ũ³whĩ̱¹ki̱³te²sxa³yu²hẽ³la². Wi¹we¹nxa³ta³ne³ka³nũ³a² ũ³whĩ̱¹ki̱³te²ju²hẽ³la².  
\v 38 Jã¹nxe³sxã³ ki¹ai²li² ũ³whĩ̱¹ki̱³ki³ai²na² sa²kxai³lu² Txa²wã¹sũ̱³na² hi²sen³su² a²nũ²khai³xa² ten³ju³ta³nũ³a² sa²wet1sxã³ ũ³hũ²xai³te²ju²hẽ³la². Nxe³sxã³ ki¹ai²na² yxo²ha³kxa¹ ki³ka³na³ka² a²nũ²khai³xa² ũ³hũ²xai³te²ju²hẽ³la². 
\p  
\v 39 Ka³te̱n³su² yxo²ha³kxa¹ a²sĩ̱³na² ha³na³ka³lxi³nxa² ai³te²ju²hẽ³la². In³txa² a²sĩ̱n³su² ha³na³ka³lxi³nha²kxai³ ka³yxuh³xa² a²sĩ̱n³su² ha³na³ka³lxi³nha²kxai³ a̱i³ka² a²sĩ̱n³su² ha³na³ka³lxi³nha²kxai³ a̱i³na² a²sĩ̱n³su² ha³na³ka³lxi³nha²kxai³ nxe³te²jai¹ti²tu³wa². 
\p  
\v 40 Te²yã¹nxe³sxã³ oh³xan¹te²a² a²nũ²khai³xa² ha³na³ka³lxi³nha²kxai³ yuh³xan¹te²a² a²nũ²khai³xa² ha³na³ka³lxi³nha²kxai³ nxe³te²jai¹ti²tu³wa². Nxe³sxã³ oh³xan¹te²a² a²ha²tai²na¹ ha³na³ka³lxi² ye³yan³txi³ha²kxai³ yuh³xan¹te²a² a²ha²tai²na¹ ha³na³ka³lxi³ ye³yan³txi³ha²kxai³ nxe³te²jai¹ti²tu³wa².  
\v 41 U³je³na³ka² a²ha²te¹ju³ta² ha³na³ka³lxi³nxa² ai³ha²kxai³ i³la³kxa² a²ha²te¹ju³ta² ha³na³ka³lxi³nxa² ai³ha²kxai³ hi³ka²ta³a² a²ha²te¹ju³ta² ha³na³ka³lxi³nxa² ai³ha²kxai³ nxe³te²jai¹ti²tu³wa². Hi³ka²ta³nãu³xai²li² te²yã¹nxe³sxã³ a²ha²te¹ju³ta² ha³na³ka³lxi³nxa² ai³nũn³te²jai¹ti²tu³wa². 
\p  
\v 42 Jã¹nxe³sxã³ te²yã¹nxũn³ki̱³tu¹wa². Ya³lu²te²a² ka³te̱n³su² ĩ³sa²yxau³xi²tãu³a¹ ã̱³lxa³txi³ ĩ³sa²yxau³xi²tu¹wa². A²nũ²a² sa²nĩ̱³kxi²ki̱³kxai²nãn²tu̱³ khon³hxan³te²ju²hẽ³la². Yxãn¹ta¹ ka³te̱n³su² ĩ³sa²yxau³xi²tãu³a¹ hai³txi³ khon³hxan³ju³ta³la³ yũ²nxa³lho³la².  
\v 43 Sa²nĩ̱³kxi²ki̱³tãu³a² a²nũ²khai³xa² ko̱³nxe³ha²kxai³ nũ³kxũ³nxa³ha²kxai³ te²jai¹ti²tu³wa². Yxãn¹ta¹ ka³te̱n³su² ĩ³sa²yxau³xi²hĩ¹na¹ wi¹lha²kxai³ nũ³kxũ³nha²kxai³ nxe³ki̱³tu¹wa².  
\v 44 Sa²nĩ̱³kxi²ki̱³tãu³a² a²nũ²a² yuh³xan¹te²a² sa²nĩ̱³kxi²hĩ̱³ki̱³tã³la². Yxãn¹ta¹ ka³te̱n³su² ĩ³sa²yxau³xi²hĩ¹na¹ a²nũ²a² oh³xan¹te²su² ĩ³sa²yxau³xi²tu¹wa². Nxe³sxã³ yuh³xan¹te²nũ²nãu³a² yũ³kxai²nãn²tu̱³ yan¹nãu³a¹ oh³xan¹te²nũ²nãu³a² ã̱³lxi³ton³tu¹wa².  
\v 45 Nxe³sxã³ Txa²wã¹sũ̱³na² ũ³wha²li¹txã³nxai³tãn¹jau³xa² e³te³nah¹lxi¹: 
\p — A²wi¹lhĩ¹nãn¹jah¹lai²na² A³tãu²ah³lo²su² ha²kxai³ a²nũ²khai³xa² ka³te̱n³su² sa²we¹ta¹hxai²ti³ai¹ti²tu¹wi¹. Yxãn¹ta¹ ã³ta³lo³hẽ¹tãu³a¹ ye³jen¹nũ³nãn¹jah¹la² Kris²tu³jah¹lo²su² ha²kxai³ a²ka³te̱n³yu³ta² ã²la² yũ³jah¹lai²la¹wi¹. A²nũ²a² ĩ³ka³te̱n³su² ti³hi¹jah¹lai²la¹wi¹. Oh³xan¹te²a² wxã³jah¹lai²la¹wi¹. Nxe³ta¹hxai²hẽ¹la².  
\v 46 Nxe³sxã³ oh³xai²nãn¹jah¹la² ne³ka³ta²sxã³ wxã³ta¹hxai²nxa³ti³ai¹ti²tu³wa². Yuh³xai³nãn¹jah¹lo²nu¹tai²na² ne³ka³ta²sxã³ wxã³ta¹hxai²ti³ai¹ti²tu³wa². óta³lo³hẽ¹jah¹la² oh³xai³nãn¹jah¹la² wxã³ta¹hxai²ti³ai¹ti²tu³wa².  
\v 47 A²wi¹lhi¹nãn¹jah¹lo²nu¹tai²na²su² A³tãu²ah³lo²nu¹tai²na²su² kĩ̱h³nũ̱³khai³xa² Txa²wã¹sũ̱³na² hi²sen³su² we¹ta¹hxai²ti³ai¹ti²tu³wa². óta³lo³hẽ¹jah¹la² oh³xa² wxã³jah¹lo²su² ta¹hxai²ti³ai¹ti²tu³wa².  
\v 48 Te²yã¹nxe³sxã³ yuh³xai²nãn¹tũ̱³ka̱³txa² yxo²ha³kxa¹ kĩ̱h³nũ̱³xa² sa²we¹jah¹lu¹jã¹nxe³ hĩ̱³nx2na³la². Yxãn¹ta¹ oh³xai²nãn¹tũ̱³ka̱³txai²na² sa²kxai³lu² oh³xa² wxã³jah¹lu¹jã¹nxe³ hĩ̱³nx2na³la².  
\v 49 Jã¹nxe³jut3su² hĩ¹nai²na² yuh³xai²nãn¹jah¹lu¹jã¹txe²su² ki̱³tã³la². Yxãn¹ta¹ kxã³nãu³a¹ oh³xai²nãn¹jah¹la² yã¹txe²su² ki̱³tu¹wa². 
\p  
\v 50 Txa²wã³tã̱³nãu³xãi³. Nxe³jau³xai²na² ĩ³yau¹ũ¹nx2ti³jau³xai²la¹wa². A²nũ²khai³xa² txa²wã¹sĩ̱n³su² txa²wã¹txi³ha²yau³su² txa²wã¹nũ²su² ha²kxai³ nxe² hxi²kan¹txi³ Txa²wã¹sũ̱³na² yxau³ju³khai³xa² ã³wih¹ki̱³sxa³lho³la². Nxe³sxã³ yuh³xai²nãn¹te²a² sa²kxai³lu² khon³hxan³ju³ta² yũ³ha²kxai³ hxi²kan¹txi³ oh³nãn¹te²lo³nxa³lho³la². 
\p  
\v 51 Ain³kxi²khai¹nxe³sah¹lxi³hẽ¹la². Wãn³txa² hãi³jau³xai³tã² ĩ³yau¹ũ¹nx2ta¹tu¹wa². Txa²wã¹nũ̱³ka̱³txi³ki̱³na¹xai²na² a²wã³kxi³kxai³ ya³lu²ki̱³ju³ta³nũ³a² yũ³nẽ³lha²kxai³ a²wã³kxi³kxai³ ya³lu²ki̱³ju³ta³nũ³la³ yũ³ki̱³sxa³ha²kxai³ nxe³ki̱³tu¹wa². Nxe³yãn¹ta¹ txa²wã¹nũ²nãu³ai²na² yxo²ha³kxa¹ ã̱³lxa³ton³ki̱³tu¹wa². Ã̱³lxa³ti³hi¹tẽ³tu¹wa², Txa²wã¹sũ̱³na² hxi²ka²sa³.  
\v 52 Wa³su¹txi³ ye³ka³tẽ³ki̱³kxa² yã¹nxe³sxã³ ã̱³lxa³ton³ki̱³tu¹wa². Trũ³be²ta²ka³txa² wãi²la² hũ̱³ka³txa² ne³ki³san¹ka³txa² wxa²no²la³kxain¹tãu³a¹ ã̱³lxa³ton³ki̱³tu¹wa². Nxe³tãu³a² ya³lun¹ti³tũ̱³ka̱³txa² yxo²ha³kxa¹ ka³te̱n³su² ĩ³sa²yxau³xi²si¹hain¹tu¹wa². Ka³te̱n³su² ĩ³sa²yxau³xi²ti³hi¹tai¹nha²kxai³ kho³nhxan³ju³ta³la³ yũ²nxa³lho³la². Nxe³sxã³ yxo²ha³kxa¹ ã̱³lxa²ton³ya³nhẽ³lain¹tu¹wa².  
\v 53 Jã¹nxe³ha²kxai³ khon³hxan³te²ki̱³nãu¹xa² yxau²xai³ki̱³tãu³a² ya³lu²ki̱³ju³ta³nũ³a² yũ³nẽ³na³la². Yxãn¹ta¹ hã²wxãn³txa³ khon³hxan³kxi²nẽ³lxa³ju³ta² ã̱³lxa³ton³ki̱³tu¹wa². Nxe³kxai²nãn²tu̱³ ya³lu²ki̱³ju³ta³nũ³la³ yũ³nẽ³lxa³lho³la².  
\v 54 Jã¹nxe³sxã³ txa²wã¹nũ²ki̱³nãu¹khai³xai²na² khon³hxan³te²ki̱³nãu¹xai²na² ã³nã̱³lxi³to³tu¹wa². Txa²wã¹nũ²ki̱³nãu¹khai³xai²na² khon³hxan³te²sxa³ki̱³nãu¹xai²na² wen¹ki̱³tu¹wa². Te²yã¹nxe³sxã³ a²nũ²ki̱³nãu¹khai³xai²na² ya³lu²te²ki̱³nãu¹xa² ã³nã̱³lxi³to³tu¹wa². A²nũ²ki̱³nãu¹khai³xai²na² ya³lu²nxa³te²ki̱³nãu¹xa² wen¹ki̱³tu¹wa². Nxe³hĩ¹na¹ Txa²wã¹sũ̱³na² ũ³wha²li¹txã³nxai³tã² e³lxah²lxi³tu¹wa². Nxe³jau³xai²na²sa¹: 
\q1 — Ya³lu²ki̱³ju³ta² hxan³sxã³ ne³ki³son³na³li¹. Ko̱³nxe³ki̱³ju³ta² ã³wa²sut1sxã³ yxau³ki̱³tã³li¹. 
\m Sũ̱³na² ũ³wha²li¹txã³nxai³tã² nxe³ta¹hxai²hẽ¹la².  
\v 55 Nxe³nẽ³lha²kxai³ ya³lu²ti³hit1sa²jah¹lãi³. Ĩh¹nũ¹la³ta̱³ kwã³non³nha¹ju³ta³la³ sĩn¹te²la¹xã³? Ĩh¹nũ¹la³ta̱³ khãuh³lxa³ti³sa²nhĩn¹tãu³la³sĩn¹te²la¹xã³? 
\p  
\v 56 Ko̱³nxe³ti³ kãi³ki̱³ju³tan¹te²kxa²ya̱³lhu² ya³lu²ju³ta³nũ³a² yũ³nẽ³na²hẽ³la². Nxe³nẽ³ju³tan¹te²kxa³ya̱³lhu² Txa²wã¹sũ̱³na² ũ³wha²li¹txã³nxai³tã² ko̱³nxe³ti³ ĩ³yĩ¹li²nẽ³na²hẽ³la². Nxe³nẽ³kxan²ti³ ya³lu²ki̱³ju³tai³kai³ ne³ki³son³na³la². Te²yã¹nxe³sxã³ ko̱³nxe³ti³ ĩ³yĩ¹li²nẽ³ju³tai³kai³ ne³ki³son³na³la².  
\v 57 Je³su² Kris²tu³jah¹la² Txa²wã¹hxi²kan¹ta² Si³yxau³jah¹lo²su² ha²kxai³ ĩ³hxi²ka¹tũ¹nhẽ³ju³tan¹te²kxa³ya̱³lhu² ã³wa²sut1sxã³ yxau³ki̱³tã³la². Nxe³ju³tai²li² Txa²wã¹sũ̱³na² sa²nẽn¹kxi²ki̱³tã³la². 
\p  
\v 58 Jã¹nxe³jut3su² txa²wã³tã̱³syah³lxi¹nha²kxai³ ain³kxi²sah¹lxi³hẽ¹la². Ka³te̱n³su² ĩ³sa²yxau³xi²si¹nhẽ³ju³ta³nu³a² ya²la³tu̱³ yũ³nẽ³lha²kxai³ Txa²wã¹sũ̱³na² wãn³txa² yxo²ĩ²jah³lxi³hẽ¹la². Wxi²kan¹nũn³jah³lxi³hẽ¹la². Txa²wã¹sũ̱³na² ĩ³ye³kxi¹nx2ti³ju³ta² so¹lxi³ ya³lo³txi²sxã³ o²la³kxi¹jah³lxi³hẽ¹la². Yxah³lxin¹kxai²nãn²tu̱³ wi¹lo²la³kxah¹lxin¹kxai²nãn²tu̱³ kxã³nãu³a¹ wi¹lo²la³kxah¹lxin¹kxa² yo³ha² ũ³yhoh³xi¹nx2ti³tu¹wa². Ju¹tai²li² ã²la² ĩ²yah³lxin¹tai¹ti²tu³wa². 
\c 16  
\s1 Txa²wã¹yen³kxa² wã²nhũ¹nyhu¹ki̱³jau³su² 
\p  
\v 1 Ju¹ta³la³ nxe³ha²kxai³ yxo²ĩ²tũ̱³ka̱³txai²na² Ju³te²a²ko³xa² yxau³te²nũ̱³ka̱³txa² sa²kxai³lu² yen³kxa² so¹kxi²txã³nxa² wã²nhũ¹ain¹yah³lxin¹ju³ta² ĩ³yau¹ũ¹nx2ta¹tu¹wa². Yxo²ĩ²tũ̱³ka̱³txi³nãu³xa² Ka³la²si²a² ko³xan¹te²nãu³xa² yxo²ha³kxa¹ ĩ³yau¹ũ¹hai¹nhxai²na¹kxai³, jã¹nxe³nx2ta¹tu¹wa².  
\v 2 To³mĩn²ko³ nxe³hĩn¹ta² yxo²ha³kxa¹ ã³nũn¹yah³lxin¹tau³a¹ yen³kxa² so¹kxi²txã³nxa² wã²nhũh¹yah³lxin¹ta³nxã³nxũ³a² wxa²hau³kot3sxã³ ũ³wha¹jah¹lxi³hẽ¹la². Ta³nxã¹nxai²li² yũ³yah³lxin¹kxa² a²wã³kxi³kxai³ ũ³wha¹i² a²wã³kxi³kxai³ sa²so² nxe³jah³lxi³hẽ¹la². Yxah³lxin¹kxai²nãn²tu̱³ ye³jen¹na² wxã³na¹tãu³a¹ ta³nxã¹nxai²li² ũ³wha¹ta³lun²yah³lxi³hĩ̱³nxa¹lxa².  
\v 3 Na¹kxai²nãn²tu̱³ hã²wxãn³txa³ wxã³na¹ka³tu̱³ ta³nxã¹nxai²li² ĩ³sa²si¹hã¹ũ¹ha¹tu¹wa². Ha³te̱h³nxã³nxa² ĩ³yau¹ũ³jau³xa² ũ³wha²li¹lã¹ka³tu̱³ wxa²nũ̱³ka̱³txi³ ĩ³nxa² ĩ²li³te²a² ĩ²sxã³ ĩ³sa²so¹ah³lxin¹jah¹la² hxi²ka² ĩ³sa²si¹hã³ũ¹ha¹tu¹wa². Nxe³ha²kxai³ Je³ru³sa³lẽ²thĩ³na² yxo²ĩ²sxã³ yxau³te²ki³nãu¹xa² ai³yah³lxin¹ka³tu̱³ ũ³hũ¹ain¹yah³lxin¹tu¹wa².  
\v 4 Nxe³yah³lxin¹kxai²nãn²tu̱³ hxi²ka¹na¹kxai²nãn²tu̱³ ai³nũ³na¹tu¹wa². Nxe³na¹kxai²nãn²tu̱³ ã³si³tẽ³kxi²sain¹tu¹wa². 
\s1 Pau²lah³la²: “Nxe³na¹tũ¹xã¹.” Jau³su² 
\p  
\v 5 Nxa²ha¹te¹ wxã³sxã³ ĩ²nx2ta¹tu¹wa². Ma³se³to²na²ko³xa² ai³lha²thet3sãn²sxã³ hã²wxãn³txa³ wxã³na¹tu¹wa².  
\v 6 Nxa¹kxai²nãn²tu̱³ jũ¹nxa² kan²txi³ yxau³ya³nx2ta¹ju³ta² ten³sa³nha²wa². Kwẽ³kon³tãu³a¹ yxau³ya³nx2ta¹ju³ta² ten³sa³nha²wa². Nxa¹kxai²nãn²tu̱³ ã³nxai³na¹ju³ta³nũ³a² hxi²kan¹txi³ ã³non²ta³kxi²sah¹lxi³hĩ̱³nxa¹lxa².  
\v 7 Kwa²a³nĩ²ã³wa³to¹ta²lxa¹ju³ta² ten³sa²nxa³nha²wa². Txa²wã¹sũ̱³nai²li² ten³kxai²nãn²tu̱³ kan²txi³ yxau³ya¹nx2ta¹ju³ta² ten³sa³nha²wa². 
\p  
\v 8 Ti¹ai²li² E²fe³so³thĩ³na² ãh¹yxau³na¹tu¹wa². Pẽn³ta³kos²ta² ti³wa³ka² ti¹a¹ ãh¹yxau³na¹tu¹wa².  
\v 9 Nxe³sxã³ txa²wa³ka³la² kãi²non³na³la². Txa²wãn³txa² wi¹lain³kxi²sain¹te²a² yũ³khai¹nx2na³la². Yxãn¹ta¹ ten³sai¹nxa³te²a² kãin²yũ³nũn³na³la². 
\p  
\v 10 Nxa²ha¹te¹ Ti³mo²jah³la² ne³ka³ta² wxã³kxai²nãn²tu̱³ wi¹lhit1sxã³ yxau³ya³nx3ti³ju³ta³nũ³a² hau³ko³jah¹lxi³hẽ¹la². Nxe³sxã³ jah¹lai²na² sa²kxai³lu² txai²yã¹nxe³sxã³ Txa²wã¹sũ̱³na² wa³ka³li³yu³ta² o²la³kxi²nũn³na³la².  
\v 11 Ko̱³te³si¹hain¹yah³lxan³jau³su² ĩ²txai¹yah³lxi³hẽ¹la². Nxe³yãn¹ta¹ wa̱³li²ju³ta³nũ³a² hau³kot3sxã³ ã³non²ta³kxi¹txai¹yah³lxi³hẽ¹la², wi¹lhin¹sxã³ wxã³si¹yhah³lxin¹jau³sa². Nxe³ha²kxai³ jah¹lai²li² a²lon³ti³tãu³xa² tẽ³lxi²sxã³ ĩ³xain¹ju³ta² kãin² wahx3nxai¹na¹wa². 
\p  
\v 12 Nxa²ha¹te¹ A³po²lah³la²sa¹. Jah¹lai²na² a²lon³ti³tãu³xa² ã³si³tẽ³lxi³sxã³ wxã³sĩ²nx2ti³si¹hai¹na¹jau³su² e³kxain¹to³ha¹hẽ³la². Nxe³ta¹ ha³lo²ai²li² wai³nxa³ha²kxai³ hãi¹sxã³ yxau³nha²wa². Yan¹nãu³a¹ hxi²kan¹kxai²nãn²tu̱³ wxã³sĩ²nxa²lxi³tu¹wa². 
\s1 Pau²lah³lai²na² a²wãn³txa² a²ne³ki³sot3jau³su² 
\p  
\v 13 Nxa²ha¹te¹ a³la³kxi²sxã³ ĩ²yxau³jah¹lxi³hẽ¹la². Nxũ²kwa̱i³lxũ¹txi³ yxo²ĩ²sxã³ yxau³jah¹lxi³hẽ¹la². Txa²wã¹sũ̱³na² wãn³txa² ya³lo³txi¹jah³lxi³hẽ¹la². Sa²yxo²ã³yah³lxi³txa³hẽ¹la².  
\v 14 A³lxi²waun¹nyhu¹sxã³ kãi³jah³lxi³hẽ¹la². 
\p  
\v 15-16 Es³te²fa³na²sah³la² a²yu³ta² whãi²na¹ ĩ²yah³lxin¹tai¹ti²tu³wa². A²nxe³jah¹la² a²wi¹lhĩ¹na² Kre²si²a²ko³xa² yxau²xai³lain¹tai¹ti²tu³wa². Nxe³hĩ¹nai³tã² Txa²wã¹sũ̱³na² yxo²ĩ²te²a² yũ²nxa³hĩ¹nai³tã² jah¹lai²na² a²yu³tai²li² yxo²ĩ² ã³si³wxe³ain¹na²hẽ³la². Nxe³hĩ¹nãn¹te²tu̱³ Txa²wã¹sũ̱³na² a²wa³ka³li³yu³ta² so¹lxi³ o²la³kxai¹nhxai²na²hẽ³la². Nxe³jah¹lai²na² ĩ³tih³nxe³nx2ti³jau³xai²na² sa²yxo²wet1sxã³ yxau³jah¹lxi³hẽ¹la². A²nũ²a² ã³non²ta³kxi²waun¹nyhu¹ki̱³ju³ta² yã¹nxe³jah³lxi³hẽ¹la². 
\p  
\v 17 Es³te²fa³na²sah³la² Fo³tu³na²to²jah¹la² A³ka³i²ko²jah¹la² nxe³sxã³ wxã³ya³sai¹nha²kxai³ wi¹lxo³kxi²sai¹nhẽ¹la². Kãin² ã³non²ta³kxi²sain¹na²hẽ³la². Ul²yxau³yah³lxi¹nha²kxai³ hxi²kan¹txi³ ã³hxi²nũn¹sah²lxa³nha²kxai³ ã³non²ta³kxi²sain¹na²hẽ³la².  
\v 18 Kãin² ã³nxũ²kwa̱i³lxũ¹sain¹na²hẽ³la². Nxe³nx2tain¹kxaix3 jãx1sain¹na²hẽ³la². Nxe³tũ̱³ka̱³txa² yã¹tũ̱³ka̱³txa² sa²nẽn¹kxain¹ki̱³ju³ta² wain³na³la². 
\p  
\v 19 Nxa²ha¹te¹ A²si³a³ko³an¹tũ̱³ka̱³txa² yxo²ĩ²te²ki̱³nãu³xa² sa²kxai³lu² wi¹yxau³si¹nx2tain¹jau³su² ĩ³sa²si¹hã³ũh¹nx2tain¹na³la². A³kwi²lah³la² Pri³si²la³ka³lxa² yxo²ĩ²tũ̱³ka̱³txa² a²sxi²hai²na² ã³nũ¹nain¹tũ̱³ka̱³txa² a²yxo²ha³kxa¹ Txa²wã¹sũ̱³na² wi¹lhin¹sxã³ ĩ²si¹nx3tain¹jau³su² ĩ³sa²si¹hã³ũh¹nx2tain¹na³la².  
\v 20 Txa²wã³tã̱³nãu³xai²li² ti¹na² yxau³te²a² a²yxo²ha³kxa¹ te²yã¹nxe³jau³xa² ĩ³sa²si¹hã³nx2tain¹nũn³na³la². Txa²wã¹sũ̱³na² wãn³txa² yxo²ĩ²yah³lxi¹nha²kxai³ ĩ³yxo²sai¹la³kxi²nha¹ju³ah³lxi³hẽ¹la². 
\p  
\v 21 Jã¹nxe³na¹jau³su² txa²hxi²ka² ũ³wha²li¹lye¹nx2ta¹wa². Txai²li² Pau²lah³lo²su² nxa¹wa². 
\p  
\v 22 Wxa²nũ̱³ka̱³txi³ ĩ³nxa² ĩ²li³te²a² sa²kxai³lu² Txa²wã¹sũ̱³na² a³lxi²nxa³kxai²nãn²tu̱³ ko̱³nxe³ti³ ĩ³yĩ¹li²ũ¹jah¹lai²la¹wa². Txa²wã¹hxi²kan¹ta² Si³yxau³jah¹lai²na² a³ka³nxi²sxã³ wa̱³li²ju³ta³nũ³a² ya̱u³son³na³la². 
\p  
\v 23 Je³su²jah³la² Txa²wã¹hxi²kan¹ta² Si³yxau³jah¹lo²su² ha²kxai³ kãin² thãi³ti³la² a³lxi¹nx2ti³si¹jau³nũ³su² ten³sa³nha²wa². 
\p  
\v 24 Jã¹nxa¹jut3su² Je³su² Kris²tu³jah¹la² a²sa³wi³ha³lxi³su² ki̱³sa²kxai³ a³lxi¹nx2ta¹wa². Jã¹nxa¹jau³su² txai²li² Pau²lah³lo²na¹xai²na² ta³lu²na¹wa².