\id JHN - Muyuw NT [myw] -Papua New Guinea 1993 (web version -2014) 
\h Yon 
\toc1 YON 
\toc2 Yon 
\toc3 Yon 
\mt1 YON  
\c 1  
\s1 Livan imlavag gamag  
\p
\v 1 Wanamug gamag yagan Livan nises. Gamag towen yagan Livan waseg Yowbad nises. Gamag towen yagan Livan son Yowbad katanok-wan.   
\p
\v 2 Gamag towen yagan Livan son Yowbad wanamug nisesus.   
\p
\v 3 Gamag towen yagan Livan youda babaw ibubun. Peinan Livan towen waseg, mo Yowbad nibun youd meivek-wan.   
\p
\v 4 Mtowen taymovein youda babaw; mwamovan towen magina gamag ya̱kids dakamnats.  
\v 5 Kamnat towen imteil ven dadub waseg. Dadub nag iyakous kamnat towen. Igawa nises.   
\p
\v 6 Yowbad nikayeb gamag teitan, tabibapta̱ysein gamags, yagan Yon.  
\v 7 Yon neim; nawotet bikamtilakeids mo bitakines gamag towen ansinap kamnat, va̱gan kid babaw gamag mo bitasimounids waseg.   
\p
\v 8 Yon nag kamnat tatonen; misinaka ikamtilakeids bitakines mtowen kamnat tatonen.  
\v 9 Mtowen kamnat mounid, immiteil wasigeis gamag tatanok tatanok. E, mtowen bo neim ven watinow.   
\p
\v 10 Im watinow, ven towen nibubun; tage ven watinow nag ikakins mtowen.  
\v 11 Inekes inagamag, tage bo ipiyaves.   
\p
\v 12 Mwasanin gog bo itams waseg mtowen mo ita̱mes tasiyas, va̱gan bimlavags Yowbad nitun tasiyas, peinan isimounids mtowen Mesay waseg.   
\p
\v 13 Nag ikopwes tasiyas, gamag buyvis waseg; nag. Nag ikopwes tasiyas peinan gamag sivines. Nag ikopwes tasiyas gamag sikaleiwag waseg; nag. Yowbad nakaleiwag waseg.   
\p
\v 14 Livan towen im watinow, imlavag gimgilitoun, nisik davanuys. Nakakin mtowen singay takamnat, mamagina Taman Natun tatonen, singaya isiwa̱youb, ansinap mounid waseg.   
\p
\v 15 Yon nikatimlakem, niwkuwak, ilana, “Mtowen liva̱nen nalivan:  
\q1 ‘Igaw watibweloug teitan beim, bimug waseg yey.  
\q1 Yey ba̱bus, peinan tutan gunakabsilamaw waseg, mtowen igawa nises.’   
\p
\v 16 “Mtowen guyaw avakaein; singaya ivvagein issekeids; nasiwa̱youb ikatitimweis bo ivakaein.   
\p
\v 17 “Moses bo isekeids nakaleiwag; tage Yeisuw Kelis isiwyoubuds ansinap mounid waseg.   
\p
\v 18 “Ta-kweitan tut gamag ikin Yowbad, nag. Tage Yowbad nipwa̱kit Natun tatonen; mtowen nikatimlakeids Taman, mo takines.”   
\s1 Yon tabapta̱ysein gamags anilivan tonen  
\r (Matiw 3:1-12; Mak 1:1-8; Luk 3:1-17)  
\p
\v 19 Wankuyeim gamag mwasanin inekes Yon ikatugans waseg, mo ikatimop asilivan. Peinan min-Yudiy tammwayas tasiyas misikes Yelusalem ikayabes tanuwgwes lun, sisiyas mwasanin Livay delen nimtakavates Yowbad nabunatum. Ikayabes tasiyas, inekes Yon, ikatugans waseg, ilansa, “Kal ya̱koum?”   
\p
\v 20 Yon anilivan kamnat isek, ilana, “Yey nag Takatuneib Kelis, nag.”   
\p
\v 21 Mo ikatiga̱nes, ilansa, “Kal yak? Ilaytiy adok?”  
\p Ilana, “Nag.”  
\p Ilansa, “Adok ya̱koum palopit towen nakakayyamat?”  
\p Ilana, “Nag.”   
\p
\v 22 Mo idibakes, ilansa, “Kal yak? Liva̱neim aveiyag bukulivan, va̱gan bakanow bakasekes tasiyas nikayabemas nakam?”   
\p
\v 23 Iw to Yon, ilana, “Yey tawkuwak wanawoud va̱gan bukukidumwa̱lus daGuyaws inaked, ma̱wan palopit Isaya nilivnek.”   
\p
\v 24 Tasiyas Palisiy misikes Yelusalem, nikayabes gamag tasiyas nimeis ikatugans waseg Yon.   
\p
\v 25 E, vayuwein tasiyas mo ikatiga̱nes, ilansa, “Kukin ya̱koum nag Kelis ya̱koum, nag Ilaytiy ya̱koum, nag palopit towen ya̱koum, aveiyag wawun kubapta̱yses gamags?”   
\p
\v 26-27 Yon ikatimop asilivan, ilana, “Yey abaptays yevagam waseg. Tage wanuwein yakamiy teitan nises, nag kukwakins kavel; watibweloug mtowen beim, tage nag kadilokeig bakulul wamatan va̱gan kid bakablev nasandol, peinan mtowen singay iguyaw.”   
\p
\v 28 Ilivan ma̱wan Betaniy waseg, ven towen palata-dadan Yoldan. Ven towen waseg Yon nibapta̱yses gamags.   
\s1 Kukines La̱miy Yowbad silma̱nin  
\p
\v 29 Neiyam-nen Yon ikin Yeisuw im, ilana, “Kukines Yowbad a̱len la̱miy mtowen lun bulukwan, beimat silma̱nids ya̱kids, va̱gan biwidids adsinaps kalbaleb waseg.   
\p
\v 30 “Mtowen liva̱nen kweiboug nalivan, ‘Watibweloug teitan beim, mtowen bimug. Yey ba̱bus, peinan tutan gunakabsilamaw, towen igawa nises.’   
\p
\v 31 “E, yey nag bakakin kavel towen, tage nam abapta̱yseimiy min-Yisleil yakamiy yevagam waseg, va̱gan bukukwakins guyaw towen.”   
\p
\v 32-34 Wankuyeim liva̱nen Yeisuw Yon mo ilivan; ilana, “Akin Kululuwan Yowbad ibus walba̱lab im, magin ma̱wana bwabun, iton Yeisuw wakunun. O yey nag bakakin towen, tage towen nikayabeig nam silma̱nin babaptays yevagam waseg, towen nidibakeig, ‘Kukin kal Kululuwag beibus biton wakunun, mtowen tabapta̱ysein gamags Kululuwag Bwanabwein waseg.’ Yey bo akin, to adibakeimiy mtowen Yowbad Natun tatonen.”   
\s1 Yeisuw idawes navamul mwasanin va̱gan bikabwa̱kuns waseg  
\p
\v 35 Neiyam-nen Yon mo itamanaws sen inavamul asteiy, itowas.  
\v 36 Yon ikin Yeisuw ininoun, ilana, “Kukines Yowbad a̱len.”   
\p
\v 37 Navamul asteiy iliganes, mo ikabwa̱kuns Yeisuw waseg.   
\p
\v 38 Yeisuw itouvin, ikines tasiyas ikabwa̱kuns waseg, mo ilana, “Aveiyag sivinamiy?” Tasiyas gog, ilansa “O matovek, avanuy mukusik?” (Aga-Muyuw “matovek”, ages gog tasiyas “Labay”.)   
\p
\v 39 Ilana, “Kumeis taneis mo bukukines.” Siney mo ineis, ikines nakabmasis, ikaypuls sisiy, asibabaw imasis ven towen, peinan bo ikwayav.   
\p
\v 40 Yam towen asteiy tasiyas niliganes Yon anilivan, ikabwa̱kuns Yeisuw waseg. Teitan yagan Andiluw inuw tuwan yagan Saymon Pita nises.   
\p
\v 41 Nuwanaw in inineiv tuwan; iban mo ilana, “Saymon, bo kaban towen Mesay.” (Takativini gog yagan “Mesay” bein aga-Gilis “Kelis”.)   
\p
\v 42 Andiluw mo itok tuwan inekes Yeisuw. Yeisuw ikabunik, mo ilana, “Ya̱koum Saymon, Yon natun ya̱koum; badokeim Pita.” (Takativini gog bein aga-Muyuw, “Dakul”.)   
\s1 Idawes Pilip son Nataniyel  
\p
\v 43 Neiyam-nen Yeisuw sivinan bein Galiliy. In Galiliy mo iban Pilip, idibek, ilana, “Kwabkunig yey.”   
\p
\v 44 Andiluw son Pita siven Beteseid. To Pilip naven katanok-wan Beteseid.   
\p
\v 45 Pilip inek Nataniyel ilana, “Bo kaban Mesay; Moses nakaleiwag waseg nilel ilivnek mtowen beim bikatinabweids, o tasiyas palopits nileles ilivnakes liva̱nen towen waseg; mtowen gum-Nasalet, yagan Yeisuw, taman yagan Yosep.”   
\p
\v 46 Nataniyel ilana, “Adok na-ikadilok youd bwanabwein beim ven to Nasalet waseg. Adok nag.”  
\p Pilip ilana, “Kum, kukin.”   
\p
\v 47 Ineis; Yeisuw mo ikin Nataniyel imimeim, ilana, “Kukines taw towen ansinap bwein, nag bikatidev son, peinan gum-Yisleil mounid.”   
\p
\v 48 Nataniyel iligen anilivan, mo ilana, “Ama̱wan nukukwakin yey?” Yeisuw ikatimop anilivan, ilana, “Igaw Pilip bidaweim bukum, bo akineim mukusik yaveinun wangwanan.”   
\p
\v 49 Nataniyel ilana, “O guntovek, mounid ya̱koum Yowbad Natun ya̱koum; min-Yisleil ya̱kids imaking ya̱koum.”   
\p
\v 50-51 Yeisuw ikatimop anilivan, ilana, “Tayyaweid yak! Peinan adibakeim, alana, ‘Bo akineim yaveinun wangwanan’ mo kusimounid. Sinap towen kakit; igaw tawtoun bukukin. Mounid adibakeim igaw bukukin liba̱lab bikaliyow, Yowbad nataka̱yobs mo bimnamwens o bibweibus Mesay Gimgilitoun yey waseg.”   
\c 2  
\s1 Sagal veivay silma̱nin ven Ken  
\p
\v 1 Yam akweiy ikous, mina-Ken mwasanin mo isagals, veivay silma̱nin. Ken wawnuwan ven avakaein Galiliy. Yeisuw inan in Ken silma̱nin sagal towen.   
\p
\v 2 Bo idawes-vak Yeisuw, sen navamul, ineis sagal towen silma̱nin.   
\p
\v 3 Issagals ee... wayn bo ikous. Yeisuw inan mo idibek, ilana, “Asiwayn bo ikous.”   
\p
\v 4 Iw to Yeisuw, ilana, “Adok mukwaleiwag towen; yey gunakaleiwag igaw.”   
\p
\v 5 Yeisuw inan mo idibakes tanuwagan sagal navamuls, ilana, “Aveiyag Yeisuw bidibakeimiy, kadiloka bukuwteles.”   
\p
\v 6 Kunasoup nisesus kunanim kunatan, silma̱nin min-Yudiy biwidis nimes, kikeis; peinan asisinap ma̱wan. Kunasoup kavka̱vek, vakanes mamagina gamag vakaeinan.   
\p
\v 7 Yeisuw idibakes, ilana, “Kuvgwagwes kunasoup, yevagam waseg; mo ivgwagwes, in, ika̱lawt.”   
\p
\v 8 Yeisuw mo ilana, “Kunasoup waseg kukilis, kukwawes kunawes tanawagan sagal waseg,” mo iwteles ma̱wan.   
\p
\v 9-10 Tanuwagan sagal ikamkwen yevagam towen bo imlavag wayn; nag bikakin avanuy meinoy neim, tage tasiyas takilins yevagam ikakins; tanuwagan sagal mo idow taveivay va̱gan beim bilivans son. Ilana, “Gamag babaw sagal nakabsilamaw waseg isekes wayn singaya bwein, imwamoums ee... iyakousis, wankuyeim mo isekes kalamwey wayn; tage ya̱koum amsinap kweitan, wayn bwanabwein kwayus, sagal nakabiyokous waseg mo kusekem ka̱moum.”   
\p
\v 11 Nakabsilamaw mulin naman Yeisuw nivag towen, ven Ken wawnuwan Galiliy, waseg ikatimlakes natawtoun, navamul mo isimounids waseg.   
\p
\v 12 Sagal towen ikous, mo iyum ineis Kapaneyum son inan, siney budan, o navamul. Nag biveiyov tut nisesus Kapaneyum.   
\s1 Ikawsapes taggimwals Yowbad wanbunatum  
\r (Matiw 21:12-13; Mak 11:15-18; Luk 19:45-46)  
\p
\v 13 Min-Yudiy kakita bo bisagals, sagal towen yagan Kaltuwon. Mapun Yeisuw in Yelusalem.   
\p
\v 14 Isap Yowbad wanbunatum iba̱nes tasiyas tanuwgwes bulumakaw, o sip, o bwabun, nimeyes aleis va̱gan gamag babaw mo bigimwals wasigeis; sisiyas tasiyas takaweins money va̱gan bikatimapus dakul silma̱nin muloul Yowbad wanbunatum.   
\p
\v 15 Yeisuw ikow vatul, ivkek inanew va̱gan biwaway, mo ikawsapes, babaw isawls ineis watoulan. Ikawsapes aleis, ineis watoulan. Simoney itigabaw ininein wapwepway; siteibol ikatitan, ikalka̱louw ikanta̱nays.  
\v 16 Idibakes tanuwgwes bwabun, ilana, “Kukwawes, kunawes watoulan. Awoum kuva̱ges Tamag nabunatum magina abgimwal.”   
\p
\v 17 Navamul ikikines, mo inuwes Bukitab nilivnek mamagina,  
\q1 “Bo iseiw nuwag mubunatum.”   
\p
\v 18 Min-Yudiy mo ikatiga̱nes Yeisuw, ilansa, “Namam mulin aveiyag bukwatimlakem va̱gan bakakakin mukwaleiwag, wotet towen silma̱nin?”   
\p
\v 19 Yeisuw ikatimop asilivan, ilana, “Bukugulekwes bunatum towen, yam kweitoun mo bawlulavaw.”   
\p
\v 20 Min-Yudiy ilansa, “Bweilim sinawavas kweinim katanok iwlules Yowbad nabunatum towen. Adok nag kadilokeim bukuwlulavaw kweitoun yam waseg.”   
\p
\v 21 Tage Yeisuw nag ilivan liva̱nen Yowbad nabunatum, ikabebay silma̱nin won tatonen.   
\p
\v 22 Igaw tut wankuyeim mo ikanig, ikit vayuwein; ikous, navamul mo inuwes anilivan towen, mo isimounids Bukitab waseg, o isimounids Yeisuw anilivan waseg.   
\s1 Yeisuw ikakina ninous gamag babaws  
\p
\v 23 Igaw nises Yelusalem, sagal towen Kaltuwon waseg, babaw gamag ikikines naman mulin mo isimounids waseg.   
\p
\v 24-25 Tage Yeisuw nag isimounid wasigeis tasiyas, peinan ikakina gamag babaw asisinap. Nag kadilok teitan bikatimlek sinapun gamag, peinan ikakina gamag ninous.   
\c 3  
\s1 Yeisuw son Nikodimos  
\p
\v 1 Palisiy teitan yagan Nikodimos, guyawun ven Yudiy.  
\v 2 Mtowen inek Yeisuw, boug waseg, ilana. “Tamwey, kakakin Yowbad nikayabeim nukum kwatimlakem yakamey, peinan namam mulin kuvag mamagina Yowbad nawotet. Kukin nag Yowbad soum bilabeim, nag bukuwtel ma̱wan.”   
\p
\v 3 Yeisuw ilana, “Mounid anukweim, magat nag bikopweim vayuwein, nag bukukin Yowbad nakaleiwag, nag.”   
\p
\v 4 Iw to Nikodimos, ilana, “Adok nag kal bikopweig vayuwein! Ta-ma̱wan inag bikopweig vayuwein, peinan yey bo avakaein.”   
\p
\v 5 Yeisuw ilana, “Yowbad Kululuwan kadilokena bikopweim! Mounid anukweim, kukin Kululuwan Yowbad nag bikopweim yevagam waseg, ta-ma̱wan bukusiw wanuwan Yowbad nakaleiwag. Tage kukin Yowbad Kululuwan bikopweim, bweina bukusiw wanuwan nakaleiwag.   
\p
\v 6 “Gimgeilin inan bikop gimgeilin-wan; tage Kululuwan Yowbad bikop bo kululuwan-wan.   
\p
\v 7 “Awoum bisunasun nanoum agulivan towen, ‘Kadiloka bikopweimiy vayuwein.’   
\p
\v 8 “Yag ampalawen sivinan beitow, butkawan bukuligen, tage nag kukwakin avanuy meinoy neim, o bein avanuy. Ma̱wana tasiyas Yowbad Kululuwan ikopwes.”   
\p
\v 9 Nikodimos ikatimop anilivan, ilana, “Ama̱wan youd tasiyas?”   
\p
\v 10-11 Yeisuw idibek, “Adok min-Yisleil wasigeis, ya̱koum takatimlakein gamags, ya̱koum; tage nag kukwakin youd siyas, ne? Mounid anukweim, aveiyag nakakakin youd siyas kanukweimiy, o yakamiy gog nag kusimounids.   
\p
\v 12 “Peinan ta-kusimounids agulivan, sinapun ven watinow waseg, ta-ma̱wan bakatimlakeimiy sinapun liba̱lab!   
\p
\v 13 “Nag kadilok gamag beimwen bein walba̱lab. Misinak Gimgilitoun yey, bo alisow gunaven liba̱lab, a̱bus am watinow, kadilokeig ba̱yum ban walba̱lab.   
\p
\v 14-15 “Kweiboug wanawoud, Moses itamnow mwatet tanmunum, ma̱wan magin igaw mo bitamnaweigs yey, Gimgilitoun yey, va̱gan kal yak bukusimounid waseg yey mo bukuban mwamovam bises bisigeg.   
\s1 Mwamov bises bisigeg  
\p
\v 16 “Singay Yowbad isiwyoubus ven watinow gimgilis. Natun gog anmwa̱net bo itam, bo isek va̱gan bikatinabwes gamag. Kukin kal bisimounid towen waseg nag bigeg, nag; mwamovan son bises bisigeg.   
\p
\v 17 “Yowbad ikayeb natun neim ven watinow nag silma̱nin biyateles gamag babaw, nag; nikayeb neim va̱gan kid bikatinabwes gamag.   
\p
\v 18 “Kukin kal bisimounid waseg Yowbad Natun, nag biya̱tal; nag. Tapiyaveins gog Yowbad Natun siya̱tal nises, peinan nag isimounids waseg Yowbad Natun anmwa̱net-wan, o peinan yagan ipiyaves.   
\p
\v 19 “Silawun ya̱tal towen, peinan kamnat bo isap im ven watinow; tage gamag ipiyaves, sivines kid dadub, peinan siwotet kalbaleb.   
\p
\v 20 “Takalbalebs ipiyaves gog kamnat; nag bimeis kamnat waseg, peinan bo bimteil asisinap kalbaleb.   
\p
\v 21 “Towen gog nawotet mounid bo bimek kamnat waseg, mo bimteil nawotet bwanabwein, niwwtel Yowbad waseg.”   
\s1 Mtowen butun bivakaein; yey ba̱bus  
\p
\v 22 Wankuyeim Yeisuw sen navamul mo ineis wawnuwan ven Yudiy; misikes ven towen, ibibapta̱yses gamag.   
\p
\v 23 Yon gog misik ibibapta̱yses gamag ven yagan Aynon, walasin Selim, peinan ven towen yevagam avakaein nises. Gamags imimeis mo ibapta̱yses.   
\p
\v 24 Nag iyousis Yon va̱gan beisiw wa̱deil. Igaw.   
\p
\v 25 Yon navamul mwasanin mo ikamnimans sisiy gum-Yudiy teitan, idokes kalisiy sivka̱kay bwein va̱gan biwid gamag sikalbaleb.   
\p
\v 26 Mapuna inekes Yon, ilansa, “Tamwey, taw towen nukwatimlakem, kulana, ‘Yowbad a̱len towen,’ kweiboug soum nukusesus ven towen niweiw, Yoldan nimeim; tut towen bo neim ibapta̱yses gamags, o gamag babaw ininekes.”   
\p
\v 27 Yon ilana, “Tanuwagan liba̱lab takaleiwag inasiwa̱youb wasigeis ya̱kids va̱gan bitamwa̱saws. Towen anmwa̱net takaleiwag.   
\p
\v 28 “Yakamiy nukuliganes agulivan mamagina, ‘Yey nag Mesay Kelis; nag. Misinaka Yowbad nikayabeig amgwey mtowen Kelis.’   
\p
\v 29 “Mtowen, imwa̱saw ma̱wana taveivay, peinan taveivay ikow inakwav. Veiyon-vak imwa̱saw peinan ikin taveivay ikow inakwav. Yey ma̱wana veiyon towen, aligen aygan, amwa̱saw avakaein, mtowen Yeisuw silma̱nin.   
\p
\v 30 “Butun mtowen bo bivakaein; yey gog bo ba̱bus.”   
\s1 Mtowen meinoy neim walba̱lab  
\p
\v 31-32 Mtowen meinoy neim walba̱lab, singay imug. Tage min-pwepway ya̱kids mitanoys nitameis pwepway waseg, tallivans kid liva̱nen ven watinow.  
\p Mtowen meinoy neim walba̱lab singay imug; aveiyag wamatan nikin, o teigan waseg niligen, mo ikatimlakeids; tage babaw gamag ipiyaves anilivan.   
\p
\v 33 Kukin kal bo biligen anilivan, bisimounid, mamagina bo ikamtel Yowbad ansinap mounid.   
\p
\v 34 Mtowen Yowbad nikayeb neim, ikatimlakeids Yowbad ansinap, peinan singaya ikatpel Kululuwan isek towen.   
\p
\v 35 Taman Yowbad sivinan Natun, youda babaw nisiwa̱youb waseg.   
\p
\v 36 Kukin kal bisimounid waseg Natun, mwamovan bises bisigeg; togo tapiyavein Natun nag biban mwamovan, peinan Yowbad bikavvikun waseg.   
\c 4  
\s1 Yeisuw ilivans son nen-Samaliy  
\p
\v 1-3 Tasiyas Palisiy iliganes liva̱nen Yeisuw peinan ibapta̱yses gamag babaw mo imlavags navamul; o iliganes liva̱nen Yon ibapta̱yses gamag nag ibabaw; tage Yeisuw nag ibaptays, navamul gog ibapta̱yses gamags. Yeisuw ikakin ninous tasiyas Palisiy, mapuna ilisow Yoldan, inoun, vayuwein mo in Galiliy.   
\p
\v 4 Ked towen waseg kadiloka bikanapel Samaliy mo bein Galiliy.   
\p
\v 5 Isap gog min-Samaliy wasiven yagan Saykal, walasin pwepway towen Yekob nisek natun Yosep pwa̱mug-o.   
\p
\v 6 Yevagam towen kweiboug Yekob ikaviyeil. Yeisuw ininoun wa̱ked ee... mo isap, bo isoumat; isin wadadan yevagam.   
\p
\v 7-8 Navamul ineis waven bigimwals kan. Bo ya̱nay. Nen-Samaliy mo im beikil soup. Yeisuw idibek, ilana, “Soup kumey, ba̱moum.”   
\p
\v 9 Vin mana̱wen mo ilana, “Adok ya̱koum gum-Yudiy ya̱koum. Aveiyag wawun kunitoug soup waseg vinen-Samaliy yey?” (Peinan min-Yudiy isisina̱les min-Samaliy.)  
\v 10 Yeisuw ikatimop anilivan, ilana, “Magat bukukwakin Yowbad nasiwa̱youb, o magat bukukwakin kavel yey anitoug yevagam waseg yak, adok mo bukunitoug waseg yey va̱gan kid basekeim soup mwamov silma̱nin.”   
\p
\v 11-12 Vin idibek, ilana, “Ta-kweitan mukwayagweg nises. Ta-ma̱wan bukukil amsoup to kadiveiyov. Avanuy bukukil mo bukusekeig soup mwamov silma̱nin? Datoveks Yekob kweiboug guyaw avakaein, nikaviyeil yevagam towen, imwamoum, alen imwamoums, nitun tibun imwamoums ee... igawa kamwamoum yakamey. Tabta ya̱koum bukumgwey tamwey towen Yekob?”   
\p
\v 13-14 Yeisuw ilana, “Kalisiy beimoums soup towen, igaw vayuwein mo beivag asidak. Tage kukin kal beimoum soup towen yey basek, nag vayuwein beivag anadak; nag. Soup towen basek bimlavag mamagina yuwyeiwl bibwabwab wanuwan, silma̱nin mwamovan nag beikous.”   
\p
\v 15 Vin mana̱wen ilana, “O guyaw, soup towen kumey ba̱moum, va̱gan beikous agudak; awoum ge bamimeim bakilikil agusoup.”   
\p
\v 16 Yeisuw ilana, “Kun kudibek mumwan, kumeis amiteiy.”   
\p
\v 17-18 Vin mana̱wen ikatimop anilivan, ilana, “Ta-ivag gunamwan.”  
\p Yeisuw ilana, “Mounid amlivan. ‘Ta-ivag gunamwan.’ Adok mumwa̱nas asteinim; towen gog soum kusesus nag mumwan tonen, to amlivan mounid-wan.”   
\p
\v 19-20 Vin mana̱wen ilana, “O guyaw, akakin ya̱koum palopit ya̱koum. Tammwayas bo ikululs wamatan Yowbad koy towen waseg; min-Yudiy yakamiy kulansa, ‘Kadilokeids bitakululs Yelusalem waseg.’”   
\p
\v 21 Yeisuw ilana, “Kadiloka kusimounid agulivan towen. Igaw nag bitakulul wamatan Yowbad koy towen waseg, o Yelusalem waseg, peinan kweivaw kaleiwag bo bisap.   
\p
\v 22 “Yakamiy nag kukwakins aveiyag towen kukululs wamatan. Yakamey kakakin, peinan wawun katuneib nises wasigeis min-Yudiy yakamey.   
\p
\v 23 “Igaw kweivaw sinap bisilamaw. Mounid bo isilamaw tut towen waseg, peinan tasiyas ikululs mounid wamatan Yowbad, kululuwes waseg bikululs, sitapwa̱loul mounid. Peinan Tamads sivinan sinap towen, waseg gamag bitapwa̱louls bwein.   
\p
\v 24 “Yowbad kululuwan mav. Tasiyas gog sivines bikululs wamatan Yowbad, kadiloka kululuwes waseg bikululs, mounid-wan; awoum bikululs mav.”   
\p
\v 25 Vin mana̱wen mo idibek, ilana, “Akakin igaw Mesay beim, mtowen gamag mwasanin idokes Kelis. Igaw beim, mo bikatimlakeids youda babaw.”   
\p
\v 26 Yeisuw ilana, “Mesay yey, mtowen nukulivans soum.”   
\p
\v 27 Ilivan ma̱wan ikous, navamul mo iyums imeis; bo isunasun ninous peinan Yeisuw ilivans son kuda̱vin; (peinan min-Yudiy idokes nag kadilok taw bilivans son vin watapwan ven); tage nag teitan ilana, “Aveiyag sivinam?” o nag teitan ilana, “Aveiyag wawun kullivans soum mana̱wen vin?” nag. Ikika̱pays-wan.   
\p
\v 28-29 Vin gog mana̱wen bo ilisow nakunasoup, inoun in waven, idibakes gamags; ilana, “Kumeis taneis kukines gamag teitan nidibakeig agusinap babaw kweiboug navvag. Tabta mtowen Kelis?”   
\p
\v 30 Iliganes, mo ilisawes ven towen, inounas kid binekes Yeisuw.   
\p
\v 31 Tage navamul bo nisimkakins waseg Yeisuw va̱gan kid beikam kan to nimeyes.   
\p
\v 32 Togo Yeisuw ilana, “Yey kag nises. Yakamiy nag kukwakins.”   
\p
\v 33 Tasiyas ilansa, “Tabta kal-tan kan isek ikam?”   
\p
\v 34 Yeisuw ilana, “Yey kag nises. Bo bakanow Yowbad aygan, aveiyag sivinan, mo bayakous nawotet. To silma̱nin nikayabeig nam. Agusinap towen kag-wan.   
\p
\v 35-36 “Adok yakamiy kulansa, ‘Kweivas tibukon mo bitata̱yoys kan.’ Tage kukin bikiplal mitamiy mo bukukines kan bo iyebwel, peinan bo imatuw. Tatayaweins kan ikawes maysan wotet, o ita̱yoys anagin towen, gamag mwamoves nag beikous.  
\p Mapuna mo bimwa̱saws tasiyas tasapweins kan sisiyas tasiyas tatayaweins kan.   
\p
\v 37 “Livan towen mounid-wan, mamagina, ‘Tasapwein kan kweitan; tatayawein kan kweitan.’   
\p
\v 38 “Yey akayabeimiy va̱gan bukuta̱yoys bag towen. Mwasanin gamag niwteles bag, yakamiy nag; misinaka kuta̱yoys-wan; tage bo niwteles nanawan.”   
\p
\v 39 Ven towen Samaliy gimgilis babaw mo isimounids Yeisuw waseg, peinan vin anilivan, “Nidibakeig agusinap babaw kweiboug navvag.”   
\p
\v 40-42 Min-Samaliy tasiyas mo inekes Yeisuw, ilansa, “Kum kuyeiwas wamaven, amabwabwal ya̱koum.” Itam. Siney tasiyas nisesus akweiy yam, iliganes anilivan. Iliganes, singay babaw mo isimounids waseg; idibakes vin mana̱wen, ilansa, “Kaligen amlivan, kakit kasimounid; tage tut towen yakameyan-wan nakaligen anilivan, mo kakakin mounid mtowen takatinabweids ven watinow gimgilis ya̱kids.”   
\s1 Gabman natun Yeisuw ivag mo ibwein  
\r (Matiw 8:5-13; Luk 7:1-10)  
\p
\v 43 Yam akweiy ikous mo ilisawes; inoun in Galiliy.   
\p
\v 44 Yeisuw anilivan tonen mamagina, “Wanven tatonen nagamag nag biliganes palopit anilivan.”   
\p
\v 45 Tutan isap Galiliy mo ibwein ninous min-Galiliy, peinan bo ineis Yelusalem, sagal silma̱nin, bo ikines Yeisuw nawotet sagal towen waseg.   
\p
\v 46 Vayuwein mo in Ken, wawnuwan Galiliy, kweiboug nivag yevagam to mo imlavag wayn.  
\p Gabman nises, natun ikatoun ven Kapaneyum waseg; natun kuda̱taw.   
\p
\v 47 Gabman towen iligen Yeisuw bo ilisow Yudiy, meinoy neim Galiliy; mapuna inek Yeisuw, ilana, “Kum, biten, natug kuda̱taw kukin, bo ikatoun avakaein. Adok kakita bikanig. Kuvag beibwein.”   
\p
\v 48 Yeisuw ilana, “Magat bukukines wotet tawtoun, mamagina naman mulin Yowbad, mo bukusimounids. Kukin gog nag, bo nag.”   
\p
\v 49 Iw to Gabman, ilana, “Kum, kukin natug. Mata ge bikanig!”   
\p
\v 50 Yeisuw ilana, “Kuyum kun. Natum bo ibwein.” Gabman mo isimounid peinan Yeisuw anilivan; iyum in silma̱nin naven.   
\p
\v 51 Iwloubus ininoun ee... ilivatus natouwat mwasanin; bo nikatulags nimimeis, ilansa, “Natum bo ibwein.”   
\p
\v 52 Gabman ikatiga̱nes, ilana, “Asina̱vin mo ibwein?”  
\p Ilansa, “Nov, ya̱nay kansow, mo iloulun won. Ankatoun bo ikous.”   
\p
\v 53 Taman mo inuway nov ya̱nay anatut kansow, Yeisuw nilivan, “Kuyum kun. Natun bo ibwein”; mo isimounids sen nagamag asibabaw-wan.   
\p
\v 54 Tut towen Yeisuw nilisow Yudiy, meinoy neim Galiliy, naman mulin kwayuwein ivag, peinan Gabman natun towen ivag mo ibwein.   
\c 5  
\s1 Yevagam wadadan ivag teitan mo ibwein  
\p
\v 1 Kweitan tut wankuyeim, Yeisuw mo ikatulag in Yelusalem, min-Yudiy sisagal silma̱nin.  
\v 2 Yelusalem waseg, yevagam kweitan; yagan ag-Ibliw “Beteseid”, sip sikoukwed walasin. Tava̱lel bunanim wadadan yevagam.  
\v 3 Bunsiyas bunatum takatouns immasis, ikayamats beibwab yevagam. Takatouns tasiyas ikaw mites mwasanin, takagayals mwasanin, tasiyas ipams, takatounsa babaws-wan.  
\v 4 (-)   
\p
\v 5 Kuda̱taw teitan immasis, ankatoun nises bweilim sinwatoun kweinim kweitoun.  
\v 6 Yeisuw ikin taw towen, ikakin nagwa̱diven ankatoun nises, ilana, “Tab sivinam bukubwein?”   
\p
\v 7 Takatoun ilana, “O guyaw, ta-ma̱wan ba̱bwein. Igaw yevagam beibwab ta-kweitan gamag bilabeig va̱gan ba̱nuw waseg. Igaw bayokon banoun ban wayevagam, teitan gog bo imug in inuw.”   
\p
\v 8 Yeisuw ilana, “Kutamanaw, kukow musag, kunoun.”  
\v 9 Nuwanaw taw towen mo ibwein, ikow nasag, inoun.  
\p Yam towen Sa̱dad, min-Yudiy siSa̱bat, tapwa̱loul peinan.  
\v 10 Min-Yudiy ikines taw towen ikokew inasag, idibakes; ilansa, “Nagein Sa̱bat. Nag kadilok bukukow musag.”   
\p
\v 11 Ikatimop asilivan, ilana, “Teitan gamag niva̱geig mo a̱bwein mtowen bo idibakeig, ilana, ‘Kukow musag, kunoun.’”   
\p
\v 12 Ikatiga̱nes, ilansa, “Kavel taw towen nidibakeim ‘Kukow musag’?”  
\v 13 Togo nag bikakin, peinan Yeisuw bo inoun; gamag singay babaw ven towen.   
\p
\v 14 Wankuyeim Yeisuw mo iban taw towen Yowbad wanbunatum, idibek, ilana, “Ya̱koum bo kubwein amkwatoun waseg. Awoum amsinap kalbaleb kuvag vayuwein; mata kalbaleb singay avakaein mo bukulouvat geg.”   
\p
\v 15 Taw towen mo inoun inekes min-Yudiy tasiyas, ilana, “Mtowen Yeisuw iva̱geig mo a̱bwein.”  
\v 16 Mapuna ikamliwes Yeisuw, peinan wotet towen niwtel yam Sa̱bat waseg.   
\p
\v 17 Yeisuw ikatimop asilivan, ilana, “Tamag yam babaw iwwotet ee... nagein gog igawa iwotet. Yey bo ma̱wan, awwotet-wan.”   
\p
\v 18 Mapun min-Yudiy singaya sivines beiweiys Yeisuw, idokes ansinap akweiya kalbaleb; kweitan igulek Sa̱bat nakaleiwag; kwayuwein gog idok Yowbad Taman tatonen, mamagina idoki ansinap bo ikadilok tatonen.   
\s1 Yowbad Natun nakaleiwag tonen  
\p
\v 19 Iw to Yeisuw, ilana: “Yowbad Natun yey. Aw-wotet kadilokeig bawtel gunawotet tatoneig, ne? Tamag nawotet akin iwwtel. Aveiyag Tamag ivvag, Natun yey mo avag ma̱wan. Nag kweitan tobwag wotet bawtel, nag.  
\v 20 Tamag gog isiwa̱youb waseg Natun yey, nawotet babaw-wan aveiyag ivvag, mo ikatimlakeig Natun yey. Igaw singay tawtoun wotet mo bikatimlakeig Natun yey. Yakamiy bukukines, mo beisom ninoumiy.  
\v 21 Tamag ivag takanigs mo imovs vayuwein, ma̱wan-vak Natun yey asekes simwamov, kalisiy sivinag.   
\p
\v 22 “Tamag nag bikatukin bikaleiwag gamag sikalbaleb o sikamnabwein wasigeis. Kaleiwag towen bo isekeig Natun yey, va̱gan kid bakaleiwag gamag babaw wasigeis.  
\v 23 Gamag babaw ivna̱ses Tamag, peinan Yowbad. Bo isekeig Natun yey gunakaleiwag towen va̱gan kid gamag babaw mo bivna̱seigs yey, ma̱wan ivna̱ses Tamag. Kukin kal nag ivna̱seig yey, ma̱wan-vak nag ivnas Tamag, mtowen nikayabeig nam.   
\p
\v 24 “Mounid adibakeimiy, kal yak bukuligen aygag, o bukusimounid waseg towen nikayabeig nam, e, mwamovam bises bisigeg. Yowbad nag biyateleim, nag; peinan kanig bo kulisow, mwamovam bo kuban.   
\p
\v 25 “Mounid adibakeimiy, tut kadiyakus, nagein gog nises tut towen, tasiyas takanigs bo biliganes aygag, Yowbad Natun yey; e, kalisiy biliganes mo bimwamovs.  
\v 26 Tamag tonen tamwamov, ma̱wan-vak mwamovag tatoneig bo itam waseg Natun yey.  
\v 27 O peinan bo amlavag Gimgilitoun, bo isekeig gunakaleiwag va̱gan bamop gamag asisinap wasigeis.   
\p
\v 28-29 “Awoum bisunasun ninoumiy peinan agulivan towen. Igaw tasiyas wakaluwgwes nisesus, igaw biliganes aygag mo bisaps; tasiyas siwotet bwein beikits waseg mwamoves bo bisigagas; tasiyas siwotet kalbaleb beikits va̱gan kid bamop asisinap kalbaleb.   
\s1 Tasiyas ilivans liva̱nen Yeisuw  
\p
\v 30 “Nag kadilokeig aveiyag tatoneig bawtel; nag. Ma̱wan baligen, ma̱wan-vak bakaleiwag; o gunakaleiwag didumwal. Peinan nag bakaleiwag nanoug tatoneig; nag. Nanon gog towen nikayabeig nam bakaleiwag.  
\v 31 Kukin liva̱neig balivan, nag balivan mounid; nag.  
\v 32 Teitan gog liva̱neig nilivan; akakin geg mounid anilivan towen.   
\p
\v 33-34 “Nukukwayabes gamag mwasanin inekes Yon iliganes anilivan mounid, mo ikatpeles isekeimiy. Liva̱neig bo isekeimiy. Tage nag ivag sivinag gamag asilivan liva̱neig waseg billivans, nag. Livan towen bo adibakeimiy va̱gan kid Yowbad mo bikatinabweimiy.   
\p
\v 35 “Mtowen Yon mamagina wodam, mititeilin avakaein waseg nigidaged, o bo ivag sivinamiy kumwa̱saws tut nag biveiyov mititeilin towen waseg.  
\v 36 Liva̱neig Yon nilivan. Tage liva̱neig tawtoun nises waseg gunawotet, peinan gunawotet tawtoun. Wotet towen Tamag nisekeig bawtel beikous. Kukin kalisiy yakamiy bukukines gunawotet towen nawwtel mo bukukwakins Tamads nikayabeig nam.   
\p
\v 37-38 “Tamag tonen liva̱neig nilivan. Yakamiy gog nag kweitan tut kuliganes aygan, o nag kukines magin, nag. Aygan nag bises waninoumiy, peinan nag kusimounids waseg yey; Yowbad nikayabeig mo nam.  
\v 39 Bukitab waseg kunineivs amisinap; kudokes kid bukuba̱nes mwamovamiy towen bises bisegeg. Nag gog; liva̱neig yey nises Bukitab waseg.  
\v 40 Kuvinis Bukitab, tage nag sivinamiy bukumekeigs va̱gan kid mo basekeimiy mwamovamiy towen.   
\p
\v 41-42 “Nag ivag sivinag ven watinow gimgilis yakamiy bukuyakawaneigs, nag. Peinan akakina nag ivag misiwa̱youb waseg Yowbad.  
\v 43 Yey nam Tamag yagan waseg, mo kupiyaveigs. Magat teitan beim yagan tonen waseg, adok bukutams gamag towen waseg.   
\p
\v 44 “Ta-ma̱wan bukusimounids, peinan simsimiyas kuyakawaneimiy; tage nag ivag sivinamiy Yowbad anmwa̱net biyakawaneimiy.   
\p
\v 45 “Awoum kudokes bayateleimiy wamatan Tamag; nag. Towen Moses kunmises bilabeimiy, togo bo biyeteleimiy.  
\v 46 Kukin bukusimounids Moses waseg, mapuna bukusimounids waseg yey, peinan towen Moses liva̱neig yey nilel.  
\v 47 Peinan nag kusimounids Moses nakalelel waseg, ta-ma̱wan bukusimounids agulivan waseg.”   
\c 6  
\s1 Ivakamus gamags kweinim tawsan  
\r (Matiw 14:13-21; Mak 6:30-44; Luk 9:10-17)  
\p
\v 1 Yeisuw anilivan towen ikous mo inoun in palata-dadan yevagam avakaein yagan Galiliy, yagan kweitan Tibeliyas.  
\v 2 Singay babaw gamag ikikuns, peinan bo ikines naman mulin takatouns wasigeis, iva̱ges mo ibweins.  
\v 3 Ikatulags koy kweitan, siney navamul, mo isinis.  
\v 4 Bo kadiyakus tutan sagal, min-Yudiy sisagal, yagan Kaltuwon.   
\p
\v 5 Yeisuw mo itamnow matan, ikin singay gamag babaw bo nimeis, idibek Pilip, “Avanuy bitaymiyis kaeis tasiyas beikams?”  
\v 6 Ilivan ma̱wan va̱gan biyakwen Pilip. Yeisuw bo ikakin aveiyag mo bivag.   
\p
\v 7 Pilip ilana, “Bitaymiyis kan, lakatuy kina nag kadilok kakit gamag siyas katanok katanok beikams.”   
\p
\v 8-9 Inavamul teitan, Saymon Pita bwadan, yagan Andiluw, mo ilana, “Gwad towen nises, anbled kekel kweinim, in mwanay; na-ikadilok gamag siyas singay babaw.”   
\p
\v 10 Yeisuw ilana, “Kunukwes gamag babaw bisinis.” Ven towen awuyow babaw nisesus, mo isinis wakunuwatan awuyow, tawaw babaw, babiweis mamagina kweinim tawsan.   
\p
\v 11 Yeisuw ikow bled towen, ika̱lin nuwan Yowbad waseg, mo ikikivis, isisekes inavamul, ivvageins gamag babaw wasigeis, tasiyas isinis awuyow wakunuwatan. Asiyin ma̱wan, ma̱wan sivines mo isekes, ikams.   
\p
\v 12 Ikamuweips ikous, mo inukwes navamul, ilana, “Kusiyavis kan koubwag; awoum iyamkwen kan bises mav.”  
\v 13 Bled kweinim, gamag tasiyas kamkwam ikamwages, mo isiyavis; idagis wanuwan kaynad, bo ika̱lawt sinwatan kadiney kaynad.   
\p
\v 14 O gamag tasiyas ikines naman mulin Yeisuw mwana nivag, mo ilansa, “Adok mounid palopit towen nitakaymates bo neim.”  
\v 15 Yeisuw ikakin gamag tasiyas sivines kid bimeis mo biyousis, binawes va̱gan bimlavag siking, mo inoun anmwa̱net-wan, ikatulag vayuwein in wa̱koy.   
\s1 Inoun wakunuwatan yevagam  
\r (Matiw 14:22-27; Mak 6:45-52)  
\p
\v 16-17 Kwayav waseg inavamul iwloubus ineis wakawalaw, inibwis siwag, mo ikala̱vis bineis Kapaneyum, palata-dadan yevagam. Ibwages peinan bo idadub; tage Yeisuw ta-inekes.  
\v 18 Yag avakaein mo itow; kaysay ivag igegayous.   
\p
\v 19 Ikala̱vis ee... katanoka veit, mo ikines Yeisuw inoun wakunuwatan yevagam; bo isineikim, bo ivag aspwa̱yat.   
\p
\v 20 Iwa̱ge Yeisuw ilana, “Yey! Awoum kuweneigs!”  
\v 21 Sivines kid Yeisuw beitouw wa̱wag. Nuwanaw mo ita̱lags wasiven.   
\s1 Yeisuw kan mwamov silma̱nin  
\p
\v 22 Neiyam-nen gamag babaw igawa nisesus palata-dadan yevagam. Nov bo ikines katanoka wag wakawalaw; ta-kwayuwein nises; nag. Ikakins Yeisuw nag itouw sen navamul; siyas-wan itouws ikala̱vis.  
\v 23 Tage Tibeliyas wugwanen mwasanin mo ilugs kadilkusana ven towen Yeisuw nivakamus tasiyas, waseg kan towen ikalin nuwan Yowbad waseg.  
\v 24 Gamag tasiyas mo ikakins ven makaw; Yeisuw nag ises, navamul nag isesus. Mapuna itouws, ikala̱vis ineis Kapaneyum, mo inineivs Yeisuw.  
\v 25 Ininineivs mo iba̱nes Yeisuw wayevagam wanpalatan towen, ilansa, “Tamwey, asina̱vin nukum?”   
\p
\v 26 Yeisuw mo ikatimop ages, ilana, “Mounid adibakeimiy, nag kuneveigs peinan kukines namag mulin; nag. Bogo avakamumiy, kukwamuweips, to kuneveigs.   
\p
\v 27 “Awoum kuwwotets peinan kan towen bipsa̱pwas. Tage bweina kuwwotets peinan kan towen silma̱nin mwamovamiy nag beikous. Gimgilitoun yey basekeimiy kan towen. Tamag Yowbad bo ikatigikeig wotet towen silma̱nin.”   
\p
\v 28 Iliganes, mo ilansa, “Aveiyag bakavag va̱gan bakawtel Yowbad nawotet?”   
\p
\v 29 Iw to Yeisuw, ilana, “Yowbad nawotet mamagina bukusimounids waseg yey, peinan nikayabeig nam.”   
\p
\v 30-31 Tasiyas ilansa, “Namam mulin aveiyag bukuvag, va̱gan bakakin mo bakasimounid. Tamumwey pwamug-o wanawoud kaeis yagan mana; liva̱nen nises Bukitab waseg, mamagina, ‘Kaeis liba̱lab avanin issekes, ikamkwams.’ Tage ya̱koum, aw-wotet bukuwtel?”   
\p
\v 32 Yeisuw mo ilana, “Mounid adibakeimiy, Moses nag isekeimiy liba̱lab avanin; tage Tamag bisekeimiy liba̱lab avanin mounid-wan.  
\v 33 Kan towen meinoy neim walba̱lab va̱gan Yowbad bisekeimiy mwamovamiy, ven watinow gimgilis yakamiy.”   
\p
\v 34 Mapuna idibakes Yeisuw, ilansa, “O guyaw, kadiloka kussekem kan towen; tuta babaw bakakamkwam.”   
\p
\v 35 Yeisuw ilana, “Yey kan, mwamov silma̱nin; kal yak bukumekeig nag beivag amumoun; o kal yak bukusimounid waseg yey nag beivag amdak.   
\p
\v 36 “Kweiboug adibakeimiy, peinan nukukineigs tage nag kusimounids waseg yey.  
\v 37 Gamag tasiyas Tamag bissekeig mo bimmekeigs kid; o yey nag bapiyaves gamag tasiyas; nag.   
\p
\v 38 “Peinan yey bo alisow liba̱lab, a̱bus am ven watinow, silma̱nin bawotet nanon towen nikayabeig Tamag, nanoug tatoneig awoum.   
\p
\v 39 “Towen nikayabeig sivinan bisekeig gamag, o sivinan bikayus silma̱nin gungamag babaw tasiyas, nag tatanok bika̱bwag; o basekes mwamoves vayuwein, igaw nakabiyokous tut waseg.  
\v 40 Tamag nanon bo ma̱wan. Kal yak bukukin Natun yey, o bukusimounid waseg yey, mwamovam yak mo bises bisigeg. Igaw nakabiyokous tut waseg, mo bava̱geim bukukit vayuwein.”   
\p
\v 41-42 Yudiy gimgilis ivtokes livan Yeisuw, peinan ilana, “Yey liba̱lab avanin, a̱bus am watinow”; ilansa, “Adok towen Yosep natun, Yeisuw. Taman, inan takakins; aveiyag silawun anilivan, ‘A̱bus am watinow’?”   
\p
\v 43-44 Yeisuw ikatimop asilivan, ilana, “Awoum simsimiyas kuvtokays livan. Misinaka takayabeig Tamag bibiteil gamag, mo bimekeig; nag teitan bimekeig mav; nag. Tasiyas bimekeigs bava̱ges mo beikits vayuwein, igaw nakabiyokous tut waseg.   
\p
\v 45 “Palopit teitan nilivnek, anilivan nises Bukitab waseg mamagina,  
\p ‘Yowbad mo bikatimlakes tasiyas tababaws.’  
\m Mapuna tasiyas biliganes Tamag aygan, bimulis tasiyas, bikakins, mo bimekeigs, asibabaw-wan.  
\v 46 Nag teitan bikin Tamag magin; nag. Misinaka yey; peinan kweiboug soug Tamag nakases.   
\p
\v 47 “Mounid adibakeimiy, kal towen tasimounid, mwamovan tonen nag beikous.   
\p
\v 48 “Yey kan mwamov silma̱nin.  
\v 49-50 Tammwayas siyas tibudayas bo ikams kan yagan mana wanawoud; ikinka̱nigs. Tage kan towen liba̱lab avanin; bo neim watinow. Kukin kal beikam, nag bikanig; nag.   
\p
\v 51 “Yey liba̱lab avanin, mwamov silma̱nin; kal beikam waseg yey, mwamovan towen nag beikous. Kan towen woug tatoneig, bo basekeimiy ven watinow gimgilis silma̱nin mwamovamiy yakamiy.”   
\p
\v 52 Mapuna min-Yudiy mo ikamminimans sisiyas; mwasanin ilansa, “Ta-ma̱wan taw towen bisekeids won tatonen bitakams.”   
\p
\v 53 Iw to Yeisuw, ilana, “Mounid adibakeimiy, kukin nag bukukwams woug, Gimgilitoun yey, ta-ma̱wan bukumovs. Kukin nag bukumoums buya̱vig, nag bukumovs; nag.  
\v 54 Kukin kal beikam woug o beimoum buya̱vig, mwamovan tonen bises bisigeg; igaw nakabiyokous tut waseg, mo bavag gamag towen bitamanaw vayuwein.  
\v 55-56 Peinan woug kan tonen, buya̱vig soup tonen. Kukin kal beikam woug, o beimoum buya̱vig, soug towen bakases, o yey bases waseg gamag towen.   
\p
\v 57 “Tamag Tamwamov nikayabeig nam; Tamag mwamovan waseg a̱mov; ma̱wan-vak kavel bikamwig mo bimwamov waseg mwamovag.  
\v 58 Kan towen meinoy neim walba̱lab mounid yey; nag ma̱wan mana towen tammwayas ikamkwams, mo ikanigs; nag. Kukin kal bikamwig, mwamowan bises bisigeg.”   
\p
\v 59 Igaw ikatimlakay ven Kapaneyum waseg, ansinap towen igeiguy wanuwan sinagog.   
\s1 Liva̱nen mwamov bisigeg  
\p
\v 60 Navamul mwasinis ikatilutegs anilivan towen, ilansa, “Keikay sinap towen, ta-kal biligen.”   
\p
\v 61-62 Yeisuw ikakina wananon inavamul bo ivtokes livan, peinan anilivan keikay, mapuna idibakes, ilana, “Tabta igeg ninoumiy, sinap towen, ne? Magat bukukines Gimgilitoun yey ba̱yum ba̱mwen ban walba̱lab, adok singaya bisunasun ninoumiy.  
\v 63-64 Yowbad Kululuwan bisekeimiy mwamovamiy; ta-ma̱wan kalivimiy bilabeimiy; nag. Livan towen nasekeimiy, kululuwamiy o mwamovamiy silma̱nin; tage mwasanin yakamiy ta-kusimounids agulivan towen.” Peinan wanmugwana Yeisuw ikakin kalisiy bisimounids waseg, o kal bisilakod waseg.   
\p
\v 65 Ilana, “Peinan kweiboug adibakeimiy: Misinaka Tamag beitam wasigeis gamag kalisiy bimekeigs. Nag teitan bimekeig mav.”   
\p
\v 66 Ilivan mamagin, navamul mwasinis mo ipiyaves, ilisawes, inounas.  
\v 67 Yeisuw mo idibakes navamul sinawatan asteiy, ilana, “Sivinamiy-tan bukuneis yakamiy?”   
\p
\v 68-69 Iw to Saymon Pita, ilana, “O guyaw, bakalisaweim, kal mo bakanek? Ya̱koum waseg liva̱nen mwamovem bises bisigeg. Kasimounid o kakakin mounid ya̱koum Yowbad naMesay ya̱koum.”   
\p
\v 70-71 Yeisuw mo idibakes, ilana, “Bo adaweimiy, sinwatan amiteiy; tage Seitan nises waseg tatanok gamag.” Liva̱nen towen Yudas, taman yagan Saymon Iskaliyot; mtowen waseg bod towen, igaw mo bisilkod Yeisuw.   
\c 7  
\s1 Yeisuw budan nag isimounids  
\p
\v 1 Wankuyeim Yeisuw mo ininoun ven Galiliy waseg. Nag bininoun Yudiy waseg, peinan mwasanin Yudiy sivines kid bikatimates.  
\v 2-4 Kakita bisagals min-Yudiy sisagal towen waseg niwlules tava̱lel. Budan Yeisuw mo idibakes, ilansa, “Kunoun kun Yudiy, va̱gan kid muvamul mo bikines mukwawotet. Kukin kal bisesuna wanven bisowm nawotet, nag bivakaein butun tatonen. Yak ma̱wan, kukin bukutawtoun, kadiloka gamag babaw bikines miwotet.”  
\v 5 Budan-vak nag isimounids waseg, mo ilivans ma̱wan.   
\p
\v 6 Yeisuw ilana, “Yakamiy bukuneis yam babaw bwein-wan, tage yey nag; igaw tutag waseg mo banoun.  
\v 7 Ta-ma̱wan ven watinow gimgilis bikamliweimiy; tage bo ikamliweigs peinan bo akamtel asisinap kalbaleb.  
\v 8 Yakamiy kukwatulags kuneis sagal towen, yey bases. Igaw tutag beibwein, mo baw.”  
\v 9 Ilivan ikous, isesuna ven to Galiliy.   
\s1 Yeisuw Sagal Tava̱lel waseg  
\p
\v 10 Yeisuw budan ikatulags ineis sagal towen. Yeisuw anmwa̱net mo inoun iva̱pana nein, peinan nag sivinan gamag babaw bikakins.  
\v 11 Min-Yudiy ininineivs Yeisuw sagal towen waseg, ilansa, “Avanuy misikey?”   
\p
\v 12 Gamag babaw ikatimwa̱lags, liva̱nen Yeisuw illivans. Mwasanin ilansa, “Taw towen kamnat.” Mwasanin gog ilansa, “Nag, peinan ikatidavidav gamag wasigeis.”  
\v 13 Tage asilivan kweitan kweitan, nag bilivans kamnat waseg, ikagsowums, peinan iwenes min-Yudiy situwa̱veks.   
\p
\v 14 Watapwan sagal Yeisuw mo isiw in Yowbad wanbunatum, ikatimlakay.  
\v 15 Min-Yudiy mo isunasun ninous, ilansa, “Ama̱wan nikakin ansinap towen, peinan ta-iskul avakaein.”   
\p
\v 16-17 Yeisuw ikatimop asilivan, ilana, “Ta-agusinap tatoneig, nag. Towen nikayabeig nam, ansinap tonen. Kukin sivinam bukuwtel Yowbad nanon, mo bukukwakins avanuy meinoy neim sinap towen, takinew Yowbad waseg, o takinew agusinap tatoneig. Bukuwtel Yowbad nanon mo bukukwakin.   
\p
\v 18 “Kavel bilivan ansinap tatonen, sivinan kid bivakaein butun tatonen. Tage kukin kal bikanow natovek aygan, o sivinan butun natovek bivakaein, towen gamag kamnat, didumwal.   
\p
\v 19 “Adok Moses nisekeimiy Yowbad nakaleiwag; tage nag teitan yakamiy bivnas nakaleiwag towen? Wawun sivinamiy bukuweigs?”   
\p
\v 20 Iweis gamag babaw, ilansa, “Takabala̱wein ya̱koum! Nag kal beiweim! Adok Baloum bo iyousim.”   
\p
\v 21 Yeisuw ikatimop asilivan, ilana, “Nawtel gunawotet bwanabwein katanok, Sa̱bat waseg, mo igeg ninoumiy.  
\v 22 Tage yakamiy kubwabwes a̱pwaw momwan yam Sa̱bat waseg, peinan Moses nakaleiwag ma̱wan. (Nakabsilamaw sinap towen tammwayas wasigeis, wankuyeim Moses anatut igawa ikokews sinap towen.)   
\p
\v 23 “Peinan kubwabwes momwes Sa̱bat waseg, va̱gan nag bukugulekwes Moses nakaleiwag, aveiyag wawun kwavikuns takatoun navag neibwein Sa̱bat waseg?  
\v 24 Kakit kukwakins, kwaleiwags, kulansa, ‘Towen bwein; towen kalbaleb.’ Bo ibol mikaleiwag peinan nag kukwakins beibwein. Kadiloka kuneves silawun sinap va̱gan bukwaleiwags bwein.”   
\s1 Tabta mtowen Kelis-tan?  
\p
\v 25-27 Min-Yelusalem mwasanin iliganes anilivan, ilansa, “Adok gamag towen datuwa̱veks ininineivs mtowen, sivines kid bikatimates. Tut gog towen illivan wamnat, o nag ikatimapus aygan. Tabta mounid ikakins taw towen Mesay Kelis? Adok nag. Adok watinow gamag towen, peinan takakins avanuy meinoy neim; tage igaw Kelis beim, nag kal bikakin avanuy meinoy yay.”   
\p
\v 28 Igawa ikatimlakay Yowbad wanbunatum, aygan avakaein ilana, “Mounid kukwakins yey, o kukwakins avanuy ma̱noy nam; tage teitan nikayabeig mo nam. Yey gunakaleiwag nag. Mtowen ikaleiwag, mounid ansinap kamnat; tage nag kukwakins mtowen.  
\v 29 Yey akakin mtowen, peinan soug towen nakases, mo ikayabeig nam.”   
\p
\v 30 Iliganes anilivan towen, singaya igeg ninous, iyokons kid biyousis va̱gan biyateles, tage nag kadilokes peinan nag ilouvat Yeisuw inakanig tutan; igaw-wan.   
\p
\v 31 Singay babaw gamag ikatilutegs, mwasanin gog isimounids waseg, ilansa, “Igaw Kelis beim, tabta nawotet bitawtoun mo bitamap waseg towen nawotet? Adok nag.”   
\s1 Ikayabes siplismans va̱gan biyousis Yeisuw  
\p
\v 32 Gamag babaw liva̱nen Yeisuw ikatimwa̱lags ma̱wan; tasiyas Palisiy mo iliganes; mapuna tasiyas Palisiy sisiyas tanuwgwes lun situwa̱veks mo ikayabes siplismans va̱gan biyousis Yeisuw, ya̱tal silma̱nin.   
\p
\v 33-34 Yeisuw mo ilana, “Sigwey yakamiy basesun tut nag biveiyov, mo banek towen nikayabeig nam. Bukuneveigs, nag bukuba̱neigs; ta-ma̱wan bukuwekeigs; nag.”   
\p
\v 35-36 Min-Yudiy sisiyas mo illivans, ilansa, “Avanuy sivinan bein, mo ya̱kids nag bitaba̱nes. Adok sivinan binekes sidayas min-Yudiy tasiyas misikes sisiyas kadiveiyov ven gimgilis, mo bikatimlakay tobwag ven gimgilis wasigeis. Wawun anilivan towen, ‘Bukuneveigs, nag bukuba̱neigs, ta-ma̱wan bukuwekeigs’?”   
\s1 Soup bila̱tay mwamov silma̱nin  
\p
\v 37-38 Yam towen, nakabiyokous sagal waseg, Yeisuw mo itamanaw, aygan avakaein ilana, “Kal yak amdak, kadiloka kumekeig kumoum. Kukin bukusimounid waseg yey, ya̱koum liva̱nen Bukitab nises mamagina,  
\q1 ‘Lay kunus bila̱tays gamag towen wanuwan,  
\q1 soup towen beibwab mwamov silma̱nin.’”   
\p
\v 39 Anilivan towen, liva̱nen gog Yowbad Kululuwan, wasigeis tasiyas tasimounids waseg Yeisuw, peinan Yowbad mo bisek Kululuwan wasigeis tasiyas. Igaw Yeisuw bitawtoun avakaein, beiyum binek Taman, Kululuwan mo beibus bimekes gamag tasiyas tasimounids Yeisuw waseg.   
\s1 Gamag babaw ninous kweitan kweitan  
\p
\v 40-42 Gamag mwasanin iliganes anilivan towen, ilansa, “Adok mounid towen palopit towen takaymates bimug Mesay waseg.” Tage gamag mwasanin ilansa, “Mtowen Mesay tatonen.” Mwasanin gog ilansa, “Mesay Kelis nag beinoy Galiliy. Adok nag. Peinan liva̱nen nises Bukitab waseg, ilana, ‘Mesay natovek Deibid’ o ‘Mesay mo beinoy Betelem,’ Deibid naven tatonen.”   
\p
\v 43 Mapuna gamag babaw ilivis, mwasanin ninous kweitan, mwasanin ninous kweitan.  
\v 44 Mwasanin gog sivines biyousis Yeisuw, tage nag teitan iyous; nag.   
\s1 Takaleiwags ven Yelusalem ipiyaves Yeisuw  
\p
\v 45 Tasiyas plismans iyum inekes tanuwgwes lun situwa̱veks sisiyas tasiyas Palisiy. Situwa̱veks mo ikatiga̱nes, ilansa, “Aveiyag wawun nag kuyousis Yeisuw?”   
\p
\v 46 Iweis tasiyas plismans, ilansa, “Nag kweitan gamag anilivan ma̱wan taw towen anilivan.”   
\p
\v 47-49 Tasiyas Palisiy mo idibakes, ilansa, “Adok yakamiy-vak bo ikatidavimiy. Ta-kweitan guyaw isimounid waseg gamag towen; nag. Ta-kweitan Palisiy; nag. Tage tasiyas gamaga babaw, kaleiwag itagouwa̱wes, isiplaves kaleiwag, mapuna Yowbad bimop sikalbaleb.”   
\p
\v 50-51 Nikodimos sisiy tasiyas nisesus; kweiboug nilakwen Yeisuw; mtowen mo ilana, “Tab kadilok bitasilkodes taw towen? Adok nag. Dakaleiwags nises mamagina, wanmugwana bitakatiga̱nes gamag, va̱gan kid bitakakins ansinap o nawotet ama̱wan; ikous, mo bweina bitakaleiwags.”   
\p
\v 52 Iweis tasiyas, ilansa, “Adok ya̱koum-vak gum-Galiliy ya̱koum! Kunev Bukitab wanuwan; ta-kweitan palopit bisap Galiliy waseg.”   
\p
\v 53 Ikous, gamag tatanok tatanok mo inineis wasibwan tatineis.   
\c 8  
\s1 Na̱tan vin iyousis peinan ikanavaya mav  
\p
\v 1 Yeisuw mo ikatulag in wa̱koy yagan Oliv.  
\v 2 Walalayis mo iyum in Yowbad wanbunatum; gamag babaw mo inekes, isin, ikatimlakes.   
\p
\v 3 Takatimlakeins kaleiwag sisiyas Palisiy mwasanin mo imeyes na̱tan vin niba̱nes bo imasis son teitan taw; vin mana̱wen mo iseinis wanuwein.  
\v 4-5 Idibakes Yeisuw, ilansa, “Tamwey, vin mana̱wen bo igeg ansinap. Na-imasis son namwan; nakaban imasis son tobwag taw. Moses nakaleiwag mamagina, kadiloka bitaweiys dakul waseg vinay kalisiy ikanavaysa mav. Ya̱koum aveiyag bukulivan?”   
\p
\v 6 Ilivans ma̱wan va̱gan biyakwanes Yeisuw. Magat beibol anilivan, mo biyateles. Yeisuw gog istotow, naman waseg mo ilel wapwepway.  
\v 7 Igawa ivvaluts asilivan, ikatiga̱nes Yeisuw, kaleiwag towen silma̱nin. Mapuna itamanaw, ilana, “Kal yakamiy ta-ivag ansinap kalbaleb, wanmugwana dakul bignilov, babaw yakamiy wankuyeim mo bukulivelovs, beimat.”  
\v 8 Ilivan ikous, vayuwein mo istotow ilelel wapwepway.   
\p
\v 9 Iliganes anilivan, mo ininuways, tatanok tatanok mo inounas ineis, tamumwey imugwas, gamaga babaw wankuyeim. Ikous, asteiyun-wan nisesus son vin mana̱wen itamanaw wamatan.  
\v 10 Yeisuw mo itamnow matan, ilana, “Vin yak, avanuy tasiyas tayateleims? Tabta beiweims?”   
\p
\v 11 Ilana, “Nag, bo ineis, asibabaw-wan.”  
\p Yeisuw ilana, “Yey ma̱wan; nag bayateleim; nag ba̱weim. Kunoun kun. Awoum kuvgavaw amsinap towen kalbaleb.”   
\s1 Yeisuw ven watinow gimgilis sikamnat  
\p
\v 12 Vayuwein Yeisuw mo idibakes, ilana, “Yey ven watinow gimgilis sikamnat, yey. Kal yak bukwabkunig, dadub mo beikous muked waseg, peinan bo ivanoum mukwamnat, mwamovam silma̱nin.”   
\p
\v 13 Tasiyas Palisiy mo idibakes Yeisuw, ilansa, “Nag kasimounid amlivan, peinan liva̱neim tatoneim.”   
\p
\v 14 Iw to Yeisuw, ilana, “Liva̱neig towen alivan, bo mounid-wan; peinan akakin avanuy ma̱noy nam o avanuy ban; yakamiy gog nag kukwakins avanuy ma̱noy nam o avanuy ban.  
\v 15 Ven watinow sinapun waseg kukwaleiwags yakamiy; yey gog nag bakaleiwag wasigeis gamag mwasinis; nag.  
\v 16 Magat yey bakaleiwag, gunakaleiwag mounid-wan, peinan nag agmwa̱net bakaleiwag. Towen gog nikayabeig nam, Tamag, soug nakases. Mapuna makaleiwag mounid-wan.   
\p
\v 17 “Livan nises wamikaleiwag tatineimiy mamagina: Magat asteiy gamag asilivan bila̱tans katanok-wan, asilivan bo mounid.  
\v 18 Liva̱neig amateiy nakalivan, soug Tamag nikayabeig nam.”   
\p
\v 19 Tasiyas mo ilansa, “Avanuy Tamam?”  
\p Yeisuw gog ikatimop asilivan, ilana, “Yakamiy nag kukwakins yey, o nag kukwakins Tamag. Magat bukukwakins yey, mo bukukwakins Tamag.”  
\v 20 Igawa Yeisuw ikatimlakay Yowbad wanbunatum, anilivan towen nilivan money Buntuman wanuwan; tage nag kal iyous, peinan nag ilouvat tutan bikanig. Igaw-wan.   
\s1 Igaw ban ta-bukuwekeigs  
\p
\v 21 Vayuwein mo idibakes, ilana, “Bo banoun mo bukunineveigs, nag gog; bo bukumta̱mats son amisinap kalbaleb, peinan ta-ma̱wan bukuwekeigs.”   
\p
\v 22 Min-Yudiy tasiyas mo illivans, ilansa, “Adok bo tonena bikatimet peinan ilana, ‘Ven towen ban, ta-ma̱wan bukuwekeigs’?”   
\p
\v 23 Yeisuw gog idibakes, ilana, “Yakamiy watinow gimgilis yakamiy; yey gog wanakaew gimgeilin yey. Yakamiy miven towen watinow; yey gunaven kweitan.  
\v 24 Bo adibakeimiy bukumta̱mats son amisinap kalbaleb. Kukin nag bukusimounids yey Mesay yey, mo bukumta̱mats son amisinap kalbaleb.”   
\p
\v 25-26 Ilansa, “Kavel yak?”  
\p Yeisuw ilana, “Ma̱wan kweiboug nakatimlakeimiy. Kadilokeig livneimiy babaw balivan o bakaleiwag wasigeis yakamiy; nag gog, peinan towen nikayabeig nam ansinap towen mounid, anilivan tonen naligen, assekeimiy ven watinow gimgilis yakamiy.”  
\v 27 Yeisuw bo ilivan liva̱nen Taman, tage tasiyas nag ikakins.   
\p
\v 28 Yeisuw ilana, “Igaw wakamweilok bukutamnaweigs Gimgilitoun yey, mo bukukwakins yey Mesay yey, o nag alivan gunakaleiwag tatoneig. Peinan Tamag nikatimlakeig mo alivan ma̱wan anilivan tonen.  
\v 29 Towen nikayabeig nam; soug towen nakases. Nag bilisaweig agumwa̱net bases. Peinan tuta babaw gunawotet bo ikadilok nanon waseg.”   
\p
\v 30 Tasiyas ikatilutegs anilivan towen, tage mwasanina isimounids waseg.   
\s1 Sinap mounid bitokeim bukun wamnat  
\p
\v 31-32 Min-Yudiy mwasanin bo isimounids waseg Yeisuw, mo idibakes tasiyas ilana, “Kukin tut babaw bukwaninawes agulivan yey, gunavamul mounid yakamiy. E, mo bukukwakins sinap mounid, va̱gan kid bilikumiy bukuneis wamnat.”   
\p
\v 33 Ikatimapus aygan, ilansa, “Yakamey Ebelam delen yakamey. Nag kweitan tut nakases wa̱deil; nag. Aveiyag wawun amlivan, ‘Bilikumiy, bukuneis wamnat’?”   
\p
\v 34 Yeisuw ilana, “Mounid adibakeimiy, kal yak mukwawotet kalbaleb, mamagina tasiwun deil ya̱koum, peinan wanuwan dadub kuses.  
\v 35 Tasiwun deil nag ma̱wana tasiyas taginvens. Tage ven tanuwagan natun mo bises bisigeg.  
\v 36 Magat Natun bitokeim tasiwun deil ya̱koum mo bukun wamnat, bo mounid bukusesuna bukusigeg.   
\p
\v 37-38 “Yey akakin Ebelam tibun yakamiy, tage sivinamiy bukuweigs, peinan aygag nag isiw ninoumiy wanuwan. Adibakeimiy sinap towen igaw soug Tamag bo nakin, tage nag kuliganes. Yakamiy gog nukuliganes tibumiy anilivan, mo kuvva̱ges ma̱wan.”   
\s1 Yakamiy tibumiy Seitan  
\p
\v 39-41 Iweis tasiyas, ilansa, “Tibum Ebelam.”  
\p Yeisuw ilana, “Magat Ebelam tibun yakamiy, mo bukuwteles Ebelam nawotet. Tage sivinamiy bukuweigs yey, nasekeimiy livan mounid to naligen Yowbad waseg. Ebelam nag bivag ma̱wan. Yakamiy kuwteles tibumiy nawotet.”  
\p Iweis tasiyas, ilansa, “Inmayas nag ikanavays mav mo ikopwemas, nag. Yakamey tibum anmwa̱net Yowbad.”   
\p
\v 42 Yeisuw ilana, “Adok nag. Magat Yowbad tibumiy mo bukusiwyoubugs, peinan Yowbad waseg ma̱noy nam. Yey gunakaleiwag nag; mtowen nikayabeig nam.  
\v 43 Aveiyag wawun nag kukwakins agulivan? Adok peinan nag kadilokeimiy bukuliganes agulivan towen.   
\p
\v 44 “Yakamiy tibumiy Seitan; sivinamiy gog bukuwteles nanon tibumiy towen. Wanmugwana tawayin gamag towen; sinap mounid bo ipiyev, peinan ta-ivag ansinap mounid. Misikena tayyaweid towen, tuta babaw anilivan yaweid. Inada tayyaweid mtowen.   
\p
\v 45 “Yey gog, agulivan mounid, mapuna kupiyaves.  
\v 46 Kal yak ikadilokeim bukwavteg agusinap kalbaleb? Adok nag kavel. Kukin agulivan mounid, aveiyag wawun nag kusimounids waseg?  
\v 47 Tage Yowbad angamag bo biligen anilivan. Yakamiy gog nag, nag bukuliganes anilivan, peinan tobwag gamag yakamiy.”   
\s1 Yey amug Ebelam ikuyeim  
\p
\v 48 Min-Yudiy tasiyas ikatimapus aygan, ilansa, “Adok mounid amalivan, ‘Ya̱koum gum-Samaliy ya̱koum, Baloum bo iweim.’”   
\p
\v 49 Yeisuw ilana, “Nag. Nag iweig Baloum. Bo avnas Tamag Yowbad, tage yakamiy nag kuvna̱seigs yey.   
\p
\v 50 “Nag ivag sivinag yakawanag bivakaein, nag. Teitan gog sivinan yakawanag bivakaein; mtowen mo bikaleiwag.  
\v 51 Mounid adibakeimiy, kukin kal bivnas agulivan, nag bikanig, nag; bo bises bisigeg.”   
\p
\v 52-53 Min-Yudiy tasiyas mo idibakes, ilansa, “Tut towen mounid kakakin Baloum bo iweim; peinan amlivan, ‘Kukin kal bivnas agulivan, nag bikanig, nag; bo bises bisigeg.’ Datoveks Ebelam bo ikanig. Tasiyas palopits kweiboug bo ikinka̱nigs ikous. Tabta bukulisow Ebelam, ne? Towen nikanig. Tasiyas palopits nikanigs. Kal yak kudok mugwamag nag bikanigs?”   
\p
\v 54-55 Yeisuw ilana, “Magat bayakawaneig tatoneig, bo balivana makaw. Tage Tamag iyakawaneig, mtowen kudokes miYowbad. Tage nag kukwakins towen. Yey akakin. Kukin balivan, ‘Yey nag bakakin’ mo bamlavag tayyaweid ma̱wana yakamiy. Mounid akakin towen, akanow aygan.   
\p
\v 56 “Tabuds Ebelam imwa̱saw peinan iligen tutag bo bam. Mamagin ikineig, mo imwa̱saw avakaein silma̱nig.”  
\v 57 Min-Yudiy tasiyas mo idibakes, ilansa, “Ya̱koum ta-ivag ambweilim sinwanim, mo kulivan, ‘Bo akin Ebelam.’ Takabala̱wein yak!”   
\p
\v 58 Yeisuw ilana, “Mounid adibakeimiy, yey bo amug; Ebelam anatut wankuyeim.”   
\p
\v 59 Iliganes anilivan towen, mo ikawes dakul va̱gan kid beiweiys; tage Yeisuw ivalel gamag inoun, ilisow Yowbad nabunatum.   
\c 9  
\s1 Toukwaw ivag matan mo ikin  
\p
\v 1 Yeisuw inoun wa̱ked, ikin taw teitan, kweiboug-o inan ikop ikaw matan, o bo ivakaein igawa ikawkwaw matan.  
\v 2 Yeisuw inavamul ikatiga̱nes, ilansa, “Tamwey, aveiyag silawun ikaw matan? Silawun adok peinan taman, inan asisinap kalbaleb, o adok taw towen peinan ansinap kalbaleb?”   
\p
\v 3 Iw to Yeisuw, ilana, “Nawoum! Nag peinan taman, inan asisinap, o nag peinan ansinap towen kalbaleb mo ikaw matan, nag; tage silma̱nin Yowbad nawotet bikamat taw towen waseg, bo neikaw matan.  
\v 4 Tut towen mamagina wudayam, kadiloka bitawteles nawotet towen nikayabeig nam; igaw beiboug, nag teitan gamag biwotet.  
\v 5 Igawa nases ven watinow, gamag babaw sikamnat yey. Balisaweimiy mo bidadub ma̱wana boug.”   
\p
\v 6-7 Ilivan ma̱wan ikous mo igiw wapwepway, giwun iyik, ilasipisoup pwepway, ikatipiyek matan taw towen, mo idibek, ilana, “Kun kuwid matam yevagam yagan Silowam.” [Wawun yagan towen “Ka̱yob”.]  
\p Iw gog, iwid matan, iyum im, matan bo ibwein.  
\v 8 Taw towen naven gimgilis mo ikines, sisiyas gamag tasiyas kweiboug nikines taw towen ininitoug wa̱ked, mo ilansa, “Adok towen taninitoug, tuta babaw nissin towen.”  
\v 9 Mwasanin ilansa, “Mtowen!”  
\p Mwasanin gog ilansa, “Nag. Tobwag. Peinan magin ma̱wan towen.”  
\p Tage taw towen ilana, “Mounid yey!”   
\p
\v 10 Ikatiga̱nes, ilansa, “Ama̱wan nukuvkek mo ikiplal matam?”   
\p
\v 11 Ilana, “Taw yagan Yeisuw igiw wapwepway, ilasipisoup, ikatipiyek matag, ilana, ‘Kun yevagam yagan Silowam, kuwid matam.’ An awid yevagam towen waseg, mo ikiplal matag.”   
\p
\v 12 Ilansa, “Avanuy taw towen?”  
\p Ilana, “Seik-wan.”   
\s1 Tasiyas Palisiy sivines bikakins silawun wotet towen  
\p
\v 13-14 Gamag tasiyas mo itokes taw towen mwana neibwein matan, inawes tasiyas Palisiy wasigeis; peinan Sa̱bat waseg Yeisuw neigiw wapwepway, ikatipiyek matan, mo ikiplal.  
\v 15 Tasiyas Palisiy mo ikatiga̱nes taw towen, ilansa, “Ama̱wan nukuvkek mo ikiplal matam?”  
\p Ilana, “Gamag teitan ikow pwepway to bo ilasipisoup, ikatipiyek matag, awid, mo akin.”   
\p
\v 16 Palisiy mwasanin mo ilansa, “Towen nag Yowbad nagamag. Peinan nag ivnas yam Sa̱bat.”  
\p Mwasanin gog ilansa, “Ama̱wan takalbaleb biwtel naman mulin tawtoun, bwanabwein? Adok ta-ma̱wan.”  
\p Mapuna ilivis, peinan ninous kweitan kweitan.   
\p
\v 17 Vayuwein mo ikatiga̱nes taw towen, ilansa, “Taw towen nivag matam ibwein, ansinap ama̱wan? Aveiyag bukulivan ya̱koum?”  
\p Ilana, “Mtowen palopit.”   
\p
\v 18-19 Min-Yudiy situwa̱veks tasiyas nag isimounids towen toukwaw neibwein matan; idokes kid iyaweid. Mapuna idawes taman inan, imeis, ikatiga̱nes va̱gan bisimounids sinap towen waseg. Ikatiga̱nes, ilansa, “Tabta natun towen? Tabta ikaw matan igaw-o nukukop-yay? Ama̱wan nagein mo ikiplal matan?”   
\p
\v 20-21 Ilansa, “Mounid nitum towen; nakakop-yay-o neikaw matan; tage ama̱wan nagein mo ikiplal matan nag kakakin, o kal ivag matan ibwein nag kakakin. Kadiloka tonena bilivan, peinan bo ivakaein; bweina kwatiga̱nes.”   
\p
\v 22-23 Taman, inan asilivan ma̱wan, peinan iwenes min-Yudiy situwa̱veks. Bogo nanawana sikaleiwag va̱gan gamag nag bilivans mtowen Mesay Yeisuw. Bilivans ma̱wan mo bikayabes bineis watoulan sinagog; awoum ge bititapwa̱louls sisiyas. Situwa̱veks sikaleiwag ma̱wan, mapuna ivag aspwa̱yat, inan taman, ilansa, “Bo ivakaeina tonen, kwatiga̱nes.”   
\p
\v 24 Vayuwein mo idawes taw towen mwana neibwein matan, idibakes, ilansa, “Kadiloka kulivan mounid wamatan Yowbad, peinan yakamey kakakin takalbaleb mto Yeisuw.”   
\p
\v 25 Taw towen mo ilana, “Nag bakakin ansinap, kalbaleb, o nag, ama̱wan? Misinaka akakin kweiboug neikaw matag, nagein gog akinbunik.”   
\p
\v 26 Iweis tasiyas, ilansa, “Taw towen ama̱wan nivkek waseg yak? Ama̱wan nivag matam nikiplal?”   
\p
\v 27 Ikatimop asilivan, ilana, “Bo adibakeimiy, tage nag kuliganes. Aveiyag wawun bavgavaw agulivan towen? Tabta yakamiy sivinamiy bukumlavags navamul yakamiy?”   
\p
\v 28-29 Tasiyas gog mo iyages taw towen, ilansa, “Ya̱koum navamul ya̱koum; yakamey Moses navamul yakamey. Kakakin Yowbad nilivan waseg Moses; tage taw towen nag kakakin silawun ansinap.”   
\p
\v 30-31 Iwa̱ge towen ilana, “Weinadee...! Taw towen nivag matag ibwein; tage nag kukwakins silawun ansinap. Takakinsa Yowbad nag biligen takalbalebs, iligen gog takanaweins aygan; tasiyas gog bivna̱ses Yowbad nanon, Yowbad biligen sikanitoug tasiyas.  
\v 32-33 Pwa̱mug-o nag kal bivag va̱gan bikiplal matan towen nikop-yay waseg nikawkwaw matan. Magat nag Yowbad nagamag towen, ta-ma̱wan bivkek wotet silma̱nin.”   
\p
\v 34 Tasiyas mo ikatimapus aygan, ilansa, “Mounid kweiboug nikopweims-yay sinap kalbaleb waseg; awoum kwatimlakem yakamey.” Mo ikayabes, inoun, in watoulan.   
\s1 Tasiyas kululuwes ikaw  
\p
\v 35 Yeisuw iligen nikayabes taw towen, in watoulan tapwa̱loul. Ininineiv mo iban, idibek, ilana, “Tab kusimounid gimgilitoun Mesay waseg?”   
\p
\v 36 Ilana, “O guyaw, kwatimlakeig gimgilitoun towen, va̱gan basimounid waseg.”   
\p
\v 37 Iw to Yeisuw ilana, “Kukin mtowen, nukulivan soum.”   
\p
\v 38 Taw towen mo ilana, “O guyaw, yey asimounid”; mo ikulul wamatan.   
\p
\v 39 Yeisuw ilana, “Bo nam ven watinow silma̱nin kweitan kaleiwag; tasiyas toukwaws mo bikiplal mites, o tasiyas ikiplal mites mo bimlavags toukwaws.”   
\p
\v 40 Palisiy mwasanin sisiy Yeisuw nisesus, mo iliganes anilivan towen, idibakes, ilansa, “Adok nukulivan, kulana, ‘Toukwaw yakamiy.’”   
\p
\v 41 Iw to Yeisuw, ilana, “Magat toukwaw yakamiy, nag beivag amisinap kalbaleb; o peinan kulansa, ‘Kakakin-wan,’ to amisinap kalbaleb isesun-wan.   
\c 10  
\s1 Asikal mansiyas sip  
\p
\v 1-3 “Mounid adibakeimiy, kukin kavel bipiyev sip anakal awkwedan, tage inaked kweitan mo beisiw bein wanuwan, mounid tavveinaw mtowen. Tage towen beisiw wakoukwed waseg, adok mtowen tanuwagan alen sip. Takaymatein koukwed bikaliyow, alen mo bimgwayes binounas bineis.   
\p
\v 4 “Mansiyas babaw-wan isunaps ikous, mo imgwayes inounas. Mansiyas sip ibukunis peinan ikakins sitovek aygan.  
\v 5 Nag bikikuns tobwag gamag waseg; nag. Peinan nag bikakins aygan; bo bisawls bineis, bilisawes.”   
\p
\v 6 Yeisuw nakabebay towen, inganegs-wan, tage nag bikakins silawun.   
\s1 Yeisuw mamagina tamtakavatein alen ansinap go bwein-wan  
\p
\v 7 Vayuwein Yeisuw mo idibakes, ilana, “Mounid adibakeimiy yey koukwed silma̱nin sip beisiws bineis wanuwan.  
\v 8 Tasiyas tamtakavateins sip kweiboug tavveinaws tasiyas, tage sip nag iliganes ages.   
\p
\v 9 “Yey koukwed yey. Tasiyas beisiws waseg yey mo biba̱nes sikabmwamov; bisesus bwein; tuta babaw bimimeis, binineis, kaeis bwanabwein bikamkwams, simwamov silma̱nin.   
\p
\v 10 “Tasiyas tavveinaw imimeis va̱gan kid biveinaws, o biwaways, biyagages youd babaw. Yey gog nam mwamov silma̱nin, va̱gan kid bukumwamovsa singay.  
\v 11 Yey tamtakavatein aleig, agusinap bwein; bo batam mwamovag ba̱mat, silma̱nin aleig bimwamovs.   
\p
\v 12 “Kukin kal bisa̱yin va̱gan bimtakavatay sip mo maysan wotet bikow, tage gamag towen nag bivna̱ses beibwein, nag. Towen gog tanuwagan bivna̱ses beibwein. Kukin kal bisa̱yin silma̱nin wotet towen, igaw bikin bulawud awuk avakaein bo neim, mo bisawl, bilisawes mansiyas sip, peinan nag tanuwagan tatonen; bulawud awuk mo biyousis sip mwasanin, asibabaw bikatigayays.  
\v 13 Towen gog bisawl bein, peinan nag tanuwagan; bweina maysan bikow wotet, tage nag binuway va̱gan bivna̱ses bwein mansiyas sip.   
\p
\v 14 “Yey tamtakavatein aleig, agusinap bwein. Yey akakin aleig. Tasiyas ma̱wan ikakins yey.  
\v 15 Tamag ma̱wan ikakin yey; yey-vak akakin Tamag. Bo batam mwamovag aleig pines.  
\v 16 Aleig nisesus ven mwasanin asikal kweitan kweitan; kadiloka bameyes tasiyas, mo biliganes aygag. Wanuwan asikal katanok mo bisesus asibabaws-wan; agumwa̱neta yey mo bamtakavates.   
\p
\v 17 “Mapuna Tamag ikalin nuwan waseg yey, peinan bo atam mwamovag, va̱gan kid vayuwein mo baban.  
\v 18 Nag kal bikow mwamovag, nag; tatoneig bo atam. Kadilokeig mwamovag basem; kadilokeig bakow vayuwein. Peinan Tamag nakaleiwag waseg yey bo ma̱wan.”   
\p
\v 19 Min-Yudiy tasiyas niliganes aygan towen, mo ilivis, mwasinis ninous kweitan, mwasinis gog ninous kweitan.   
\p
\v 20 Mwasanin ilansa, “Baloum bo iweiy, to nikabala̱wein. Aveiyag wawun kuliganes aygan?”  
\v 21 Mwasanin gog ilansa, “Takabala̱wein aygan nag ma̱wan anilivan towen. Tabta takabala̱wein bivag toukwaw va̱gan bikiplal matan, ne?”   
\s1 Min-Yudiy mwasanin ipiyaves Yeisuw  
\p
\v 22 Tut towen bulbweilim, tutan sagal Yowbad nabunatum silma̱nin.  
\v 23 Yeisuw ininoun wanuwan bunkakit wanuwan Yowbad nabunatum waseg. Bunkakit bunawen idokes Solomon nakwa̱now.  
\v 24 Tasiyas min-Yudiy situwa̱veks ikines Yeisuw ininoun, mo ikatuyouns inekes, idibakes; ilansa, “Kweivin yam bikubukub nuwem? Magat ya̱koum Kelis, kadiloka amlivan kamnat kudibakem.”   
\p
\v 25-26 Yeisuw ikatimop asilivan, ilana, “Bo adibakeimiy, tage nag kusimounids. Gunawotet nawwtel Tamag yagan waseg bo bikatimlakeimiy kavel yey; tage yakamiy nag kusimounids, peinan yakamiy nag mamagina aleig yakamiy, magina tobwag sip yakamiy.   
\p
\v 27-28 “Aleig tatoneig iliganes aygag, o yey akakin tasiyas; tasiyas-vak ibukunigs. Basekes simwamov bises bisigeg; nag aveiyag biyagages; nag. Takwekway nag bikwayes tasiyas; nag. Sigwey tasiyas bakasigeg.   
\p
\v 29 “Tamag bo isekeig gungamag tasiyas. Nag kal towen takwekway kadilok bikwayes Tamag waseg, peinan Tamag Tatawtoun tonen.  
\v 30 Yey soug Tamag katanok-wan.”   
\p
\v 31 Vayuwein mo ikawes dakul, sivines kid beiweiys Yeisuw.   
\p
\v 32 Yeisuw mo idibakes, ilana, “Tamag bo isekeig gunawotet babaw bwanabwein, va̱gan bukukines; e, bo nukukines. Aw-wotet mapun bukuweigs dakul waseg?”   
\p
\v 33 Iweis tasiyas, ilansa, “Awoum baka̱weim wotet bwanabwein mapun. Tage peinan kullivana mav, mamagina yak Yowbad yak, makava gamag ya̱koum.”   
\p
\v 34 Yeisuw ikatimop asilivan, ilana, “Adok lelel nises mikaleiwag waseg mamagina, ‘Bo alivan: yakamiy Yowbad mwasanin yakamiy.’  
\v 35-36 Livneis tasiyas kweiboug Yowbad nisekes aygan wasigeis, mamagina yowbad mwasanin tasiyas; o ta-ma̱wan bitagidamis anilivan towen. Tage kudibakeigs, kulansa, ‘Kulivana mav,’ peinan agulivan ‘Yey Yowbad Natun yey.’ Mounid gog Tamag nikayabeig nam watinow, nawotet silma̱nin.   
\p
\v 37 “Kukin nag bawtel Tamag nawotet, bweina bukupiyaveigs.  
\v 38 Kukin gog bukupiyaveigs, tage bawtel Tamag nawotet, kadiloka bukukines gunawotet mo bukusimounids, va̱gan kid bukukwakins Tamag waseg yey nises, o yey Tamag waseg nases.”   
\p
\v 39 Vayuwein mo iyokons va̱gan biyousis Yeisuw, tage bo ilisawes, inoun in.   
\p
\v 40 Vayuwein mo in palata-dadan Yoldan, ven towen Yon nisilamaw nawotet kweiboug nibapta̱yses gamag; ven towen Yeisuw misik-yay.  
\v 41 Gamag babaw ininekes, ilansa, “Yon ta-ivag naman mulin tawtoun, tage anilivan babaw, liva̱nen Yeisuw, bo mounid-wan.”  
\v 42 Mapuna, ven towen waseg, namagleis gamag isimounids Yeisuw waseg.   
\c 11  
\s1 Lasalos ikanig  
\p
\v 1 Takatoun teitan, gum-Betaniy yagan Lasalos; nunet asteiy Meliy son Ma̱lid wanven towen.  
\v 2 Takatoun towen nunet Meliy naptumin Yeisuw kaken mul waseg, o natanabwein na̱wen kunun waseg.   
\p
\v 3 Vinay tasiyas mo ikayabes teitan binek Yeisuw va̱gan bidibek, ilana, “Guyaw, gamag towen kusiwa̱youb waseg, bo ikatoun.”   
\p
\v 4 Yeisuw iligen, mo ilivan, “Katoun towen nag silma̱nin kanig, nag; tage silma̱nin yakawanan Yowbad, va̱gan kid gamag mo bikavasis Yowbad Natun.”  
\v 5 Yeisuw nisisiwa̱youb wasigeis Ma̱lid son bwadan sisiy nusit Lasalos.   
\p
\v 6-7 Yeisuw niligen Lasalos ikatoun, mo isesuna ven towen akweiy yam. Wankuyeim mo idibakes navamul, ilana, “Kumeis, bitayums taneis Yudiy.”   
\p
\v 8 Iweis navamul, ilansa, “Tamwey, min-Yudiy bo iyokons sivines kid beiweims. Aveiyag wawun bukuyum bukun towen?”   
\p
\v 9-10 Yeisuw ikatimop asilivan, ilana, “Katanok yam wudayam ga̱boug, ya̱nay, kwayav. Kukin kal binoun wudayam waseg, nag bikatpines kaken kid bikalouw, nag; peinan ven nakamnat immiteil; tage kukin binoun boug waseg, adok bikalouw peinan ta-ivag nakamnat.”   
\p
\v 11 Livan towen ikous, mo idibakes, ilana, “Veiyouds towen Lasalos bo imasis; ban Yudiy bavgun.”   
\p
\v 12 Navamul idibakes, ilansa, “Kukin bimasis, mo beibwein.”  
\v 13 Idokes kid imasis kangagay; tage Yeisuw anilivan, “Bo imasis,” peinan bo ikanig.   
\p
\v 14-15 Yeisuw mo ilivan kamnat, ilana, “Lasalos bo ikanig. Nag ikanig wamatag, tage bo ibwein nanoug pinamiy yakamiy va̱gan bukusimounids waseg yey. Bo bitanekes mtowen. Magat kweiboug nakases soug towen, mo bikanig, adok nag bukusimounids beibwein.”   
\p
\v 16 Tomas, towen yagan kweitan Papap, mo idibakes siney, Yeisuw navamul tasiyas, ilana, “Kumeis, taneis; bitakanigs sods datoveks.”   
\s1 Yeisuw kabmwamov tonen  
\p
\v 17 Mtowen Lasalos bo ikanig, itakus, yam kweivas ikous, mo isap Yeisuw, iban bo itakus kweivas yam.   
\p
\v 18-19 Peinan Betaniy kadilakus Yelusalem, mamagina katanok veit, min-Yudiy kalamwey babaw nimeis, ilakwanes Ma̱lid son Meliy, ikalin nuwes, ivva̱lams nusit peinan.   
\p
\v 20 Mwasanin idibakes Ma̱lid ilansa, “Yeisuw bo isap,” iligen mana̱wen mo inoun, inek; Meliy gog igaw-wan wabunatum.  
\v 21-22 Ma̱lid iwekey Yeisuw, ilana, “E Guyaw, magat ya̱koum soum nagut bukusesus, adok nag bikanig; tage tut towen akakin aveiyag bukunitoug Yowbad waseg, mo bisekeim.”   
\p
\v 23 Yeisuw ilana, “Namut bo beikit vayuwein.”   
\p
\v 24 Ma̱lid ilana, “Akakin nagut beikit nakabiyokous tut waseg, peinan igaw nakabiyokous tut waseg, gamaga babaw mo bitakits vayuwein.”   
\p
\v 25-26 Yeisuw idibek, ilana, “Yey mikabeikit yey; yey mikabmwamov yey. Kukin kal yak bukusimounid waseg yey, kukin bukukwanig, mo bukumov. Tababaw yakamiy bukusimounids waseg yey, mo bukumwamovs, kusesus kusigagas. Tabta kusimounid sinap towen, ne?”   
\p
\v 27 Ilana, “O, mounid. Yey asimounid peinan ya̱koum Kelis, Yowbad Natun ya̱koum, mwana nukum ven watinow.”   
\s1 Yeisuw iva̱lam  
\p
\v 28 Ilivan ikous, mo iyum inek bwadan, katimwa̱lag idibek, ilana, “Datoveks bo isap, idaweim yak.”  
\v 29 Iligen, nuwanaw itamanaw inoun inek Yeisuw.   
\p
\v 30 Yeisuw ta-beim waven, igaw wa̱ked nises towen son Ma̱lid nilivatuy-yay.   
\p
\v 31 Min-Yudiy tasiyas sisiy Meliy nivva̱lams, ikines Meliy nuwanaw itamanaw inoun, idokes kid bein wakalawag va̱gan biva̱lam kid; mapuna ibukunis Meliy.   
\p
\v 32 Meliy iw Yeisuw misik-yay, ikin, mo ikulul avakaein wamatan Yeisuw, ilana, “E Guyaw, magat ya̱koum soug nagut bukusesus, adok nag bikanig.”   
\p
\v 33-34 Yeisuw ikin Meliy ivva̱lams sen min-Yudiy tasiyas nibukunis, singaya igeg nanon, ilana, “Takanig avanuy mukutakus-yay?”  
\p Ilansa, “Kum, kukin.”   
\p
\v 35 Yeisuw mo iva̱lam.  
\v 36 Min-Yudiy tasiyas ikines Yeisuw iva̱lam, ilansa, “Singaya ikalin nuwan takanig waseg.”  
\v 37 Mwasanin gog ilansa, “Towen nivag tasiyas toukwaws mo ikiplal mites, adok ikadilok bikatinob ankatoun waseg veiyon towen va̱gan nag bikanig.”   
\s1 Iyamov Lasalos  
\p
\v 38 Vayuwein mo igeg nanon Yeisuw, inoun in wakalawag. Alawag gog takunumwan, dakul avakaein wawadon.  
\v 39 Yeisuw ilana, “Kuyatpinis dakul towen.”  
\p Takanig nunet yagan Ma̱lid ilana, “E Guyaw, adok awoum; peinan bo ibog; kweivas yam nimsik wakalawag.”   
\p
\v 40 Yeisuw ilana, “Bo adibakeim, kukin bukusimounid waseg yey, mo bukukin Yowbad natawtoun.”   
\p
\v 41-42 Ilivan ikous, iyatpinis dakul, Yeisuw mo itamnow matan, ilana, “Tamag, kalin nuwag peinan nukuligen aygag. Akakin nukunganeg aygag yam babaw; tage bo alivan ma̱wan va̱gan tasiyas nitamanaws wadadag mo bisimounids kid ya̱koum nukwayabeig nam.”   
\p
\v 43 Initoug ikous, iwak, aygan avakaein ilana, “Lasalos, kume!”   
\p
\v 44 Takanig sona tibtabwan isunap, namana kaken bo iyawanis kweim waseg, o magin bo isimweilis kweim waseg.  
\p Yeisuw mo idibakes, ilana, “Kulikus won va̱gan binoun.”   
\s1 Sivines kid beiweiys Yeisuw  
\p
\v 45 Min-Yudiy tasiyas tavva̱lams sisiy Meliy bo ikines Yeisuw nawotet towen, mwasanin bo isimounids waseg.  
\v 46 Tage mwasanin inekes tasiyas Palisiy mo ikamteles Yeisuw nawotet towen.  
\v 47-48 Tanuwgwes lun situwa̱vek sisiyas tasiyas Palisiy mo idawes takaleiwags babaw bimeis, ilansa, “Aveiyag bitava̱ges, peinan taw towen nawotet singay tawtoun? Kadiloka bitabwabwes nawotet; kukin gog nag, gamag babaw mo bisimounids waseg, mo bigeg ninous Gabman tasiyas mina-Lom; adok bimeis biyagages davanuys towen, mo biyakousis gamag ya̱kids.”   
\p
\v 49-50 Teitan yagan Kayapas, bweilim towen nawotet tanuwgwes lun sitovek avakaein, towen mo ilana, “Adok tatagouwaws yakamiy. Adok nag kukwakinsa bo kadilok tatanok gamag bikanig, gamag babaw pines. Awoum biyagageids bod Yudiy ya̱kids.”   
\p
\v 51 Nag ansinap tonen anilivan towen; tage peinan bweilim towen nawotet tanuwgwes lun sitovek avakaein, mo ilivnek Yeisuw bikanig asibod peinan.  
\v 52 O nag kid bod Yudiy peinan, nag; Yeisuw gog bikanig pines Yowbad angamag vena babaw wasigeis, va̱gan kid mo bimlavags bod katanok.   
\p
\v 53 Yam towen, tasiyas mo isilamaws ininuways ama̱wan mo bikatimates Yeisuw.  
\v 54 Yeisuw nanon ilana, “Awoum vayuwein bikineigs min-Yudiy”; mapuna inoun in walasin makava nawoud, misikes ven Epleim sen navamul.   
\p
\v 55 Tut kayakus min-Yudiy mo bisagals Kaltuwon silma̱nin, vena babaw gimgilis ikatulags ineis Yelusalem sagal towen silma̱nin, sivines kid bikatinagesa tatineis Yowbad nawotet towen silma̱nin.  
\v 56 Tasiyas ineis Yelusalem, sivines kid bikines Yeisuw. Ititamanaws Yowbad wanbunatum, illivans mamagina, “Waninoumiy aveiyag? Towen Yeisuw beim sagal silma̱nin, ne?”   
\p
\v 57 Tanuwgwes lun situwa̱vek sisiyas tasiyas Palisiy bo isekes sikaleiwag, ilansa, “Kukin teitan gamag bikakin avanuy Yeisuw misik-yay, kadiloka bikatimlakem va̱gan bakayous.”   
\c 12  
\s1 Meliy iptum kaken Yeisuw, ven Betaniy waseg  
\p
\v 1 Yam kweinim katanok mo bisilamaws Sagal Kaltuwon, Yeisuw inoun in Lasalos wanven Betaniy, mtowen kweiboug nikanig Yeisuw ivag mo neikit.   
\p
\v 2 Yeisuw inekes, mo iva̱ges kan; Ma̱lid ikokew kan silma̱nin Yeisuw sen tawaw beikams. Lasalos siney tasiyas ikamkwams.  
\v 3 Meliy mo ikow kwavitanok tagon yagan nad, maysan singay avakaein, iptum kaken Yeisuw, wanaman mo ikow kunun tonen vayva̱yov, itanob Yeisuw kaken. Nad towen simsiman bo ika̱lawt bunatum.   
\p
\v 4-5 Navamul teitan Yudas Iskaliyot igaw bisilkod Yeisuw, mtowen mo ilivan, ilana, “Aveiyag wawun iyamkwen nad? Maysan towen kadiloka biyamiyis lakatutoun kina; money bitakow, bitavgen tasimavs wasigeis.”  
\v 6 Anilivan ma̱wan, nag sivinan bilabes tasiyas tasimavs; nag. E, peinan tavveinaw towen Yudas, nawotet imtakavatay simoney Yeisuw sen navamul, ivveinaw waseg.   
\p
\v 7-8 Yeisuw ikatimop anilivan, ilana, “Awoum kukwa̱nan waseg mana̱wen vin; nawotet towen silma̱nin gunakanig. Tasiyas tasimavs tuta babaw simiyas nukusesus, tage yey nag, igaw kakit mo balisaweimiy.”   
\s1 Sivines kid beiweiys Lasalos  
\p
\v 9 Min-Yudiy iliganes Yeisuw nises Betaniy, singay babaw tasiyas mo imeis, sivines kid bikines, o bikines-vak Lasalos, peinan nikanig, Yeisuw ivag mo ikit.   
\p
\v 10-11 Tanuwgwes lun situwa̱veks mo ininuways, ilansa, “Ama̱wan bitaweiys Lasalos, peinan min-Yudiy babaw Lasalos bo ikines mo ilisaweids, inekes Yeisuw, mo isimounids waseg.”   
\s1 Yeisuw isiw Yelusalem wanuwan  
\r (Matiw 21:1-11; Mak 11:1-11; Luk 19:28-40)  
\p
\v 12 Neiyam-nen gamag babaw tasiyas nikatuyouns nimeis Yelusalem silma̱nin sagal, mo iliganes Yeisuw bo neim.  
\v 13 Mapuna ikawes molay, inounas va̱gan kid binekes Yeisuw, iwkuwaks, ilansa, “Osana! Kalin nuwem ya̱koum, nukum Yowbad nawotet silma̱nin, min-Yisleil daguyaws ya̱koum.”   
\p
\v 14-15 Yeisuw iban donkiy, imwen wakunuwatan, inoun, ma̱wan Bukitab nilivnek mamagina,  
\q1 “Awoum beivag amipwa̱yat min-Sayon yakamiy!  
\q1 Kukines miking bo neim,  
\q1 Isin watapwan donkiy natun.”   
\p
\v 16 Misumkwey towen navamul na-ikakins Bukitab nilivnek Yeisuw nawotet towen; wankuyeim gog Yeisuw iyum in walba̱lab mo inuwes livan towen, liva̱nen Yeisuw nawotet peinan bo ikamat ma̱wana nilivnek.   
\p
\v 17-18 Gamag mwasanin nikines Yeisuw nidow takanig Lasalos igaw wakalawagan nises mo isap son mwamovan, gamag tasiyas mo ikamteles sinap towen wasigeis gamaga babaw sisiyas; mapuna inekes Yeisuw, peinan iliganes liva̱nen nawotet towen tawtoun.   
\p
\v 19 Tasiyas Palisiy iliganes gamag babaw ninekes Yeisuw; sisiyas mo illivans, ilansa, “Bo igak! Ama̱wan bukuvkakes? Gamag tababawsa ininekes mtowen Yeisuw.”   
\s1 Min-Gilis sivines bikines Yeisuw  
\p
\v 20 Min-Gilis mwasanin nimeis Yelusalem sagal towen silma̱nin, sivines kid bitapwa̱louls Yowbad waseg.  
\v 21 Yeisuw navamul Pilip nises Yelusalem, inaven Beteseid wawnuwan Galiliy, min-Gilis tasiyas mo inekes Pilip, ilansa, “Tamwey, sivinem bakakin Yeisuw.”   
\p
\v 22 Pilip in idibek Andiluw; Andiluw son Pilip ineis idibakes Yeisuw.   
\p
\v 23 Yeisuw mo idibakes tasiyas, ilana, “Gimgilitoun yey, bo neim tutag balivet yakawanag tatoneig.  
\v 24 Mounid adibakeimiy, kukin kaytul wit nag bein wapwepway bo bisesuna anmwa̱net; tage kukin bein wapwepway, bikanig mo beivag anagin babaw.   
\p
\v 25 “Kukin kal sivinan mwamovan, mo biyamkwen mwamovan tonen; tage bipiyev mwamovan ven watinow, mo biban mwamovan tonen bises bisigeg.   
\p
\v 26 “Kukin kal yak sivinam bukumlavag gunavamul, kadiloka bukwabkunig; mo soug yak bitases. Tamag bo bikalin nuwan ya̱koum, gunavamul ya̱koum.   
\s1 Igaw mo bitamnawes Yeisuw kaligweg waseg  
\p
\v 27 “Tut towen bo igeg nanoug. Tabta banitoug, balana, ‘Tamag, kwatinabweig; awoum tut towen bakanig.’ Adok nag, peinan wotet towen silma̱nin bo nam.  
\v 28 Tamag, kuvag va̱gan gamag babaw bikavasims, peinan yak Tatawtoun yak.”  
\p Walba̱lab aygan mo ikatilutegs, ilana, “Bo avag; igaw mo bavgavaw, yagag yakawanan peinan.”   
\p
\v 29 Gamag mwasanin nitomos idokes kid pala̱pal. Mwasanin gog ilansa, “Gum-liba̱lab nidibek Yeisuw, anelos adok.”   
\p
\v 30 Yeisuw ikatimop asilivan, ilana, “Aygan towen nag peinag yey; tage aygan towen pinamiy yakamiy.  
\v 31 Tut towen Tamag bo bimop sinap kalbaleb wadaban pwepway. Tanugwagan ven watinow towen Seitan, Tamag bo bikayeb.  
\v 32 Igaw bitamnaweigs wakaligweg mo babiteilis gamag babaw bimeis waseg yey.”  
\v 33 Yeisuw anilivan towen va̱gan bikatimlakes ama̱wan bikanig.   
\p
\v 34 Gamag babaw ikatimapus aygan, ilansa, “Kakakin Bukitab ilivnek Mesay bo bises bisigeg; aveiyag wawun amlivan ‘Kadiloka bitamnaweigs wakaligweg, gimgilitoun yey’? Gimgilitoun yak muwotet ama̱wan?”   
\p
\v 35 Iw to Yeisuw, ilana, “Tut nag biveiyov kamnat bises wasigeis yakamiy. Tut towen kadiloka bukunounas; igaw bidadub, ta-ma̱wan bukukwakins ked.  
\v 36 Igaw nases, mikamnat bo ivanoum; kadiloka kusimounids waseg, va̱gan bukumlavags gamag kamnat yakamiy.”  
\p Yeisuw ilivan ikous, mo inoun in, itoupan va̱gan nag biba̱nes.   
\s1 Min-Yudiy na-isimounids  
\p
\v 37-38 Tasiyas nikines Yeisuw nawotet singay tawtoun; tage nag isimounids mtowen Mesay; to nikamat palopit Isaya anilivan, kweiboug nilivnek mamagina:  
\q1 “E, Guyaw, kal bisimounid youd to nakalivan?  
\q1 Kalisiy bo ikines Yowbad natawtoun?”   
\p
\v 39-40 Mapun ta-ma̱wan bisimounids, peinan Isaya vayuwein nilivnek, ilana,  
\q1 “Bo ivag mites ikawkwaw,  
\q1 bo ivag tiges ikakon tasiyas;  
\q1 mata mites beikins;  
\q1 mata ninous bikakins;  
\q1 mo bikanavin ninous bimekeigs,  
\q1 va̱gan kid beibweins tasiyas.”   
\p
\v 41 Anilivan towen Isaya nilivnek, peinan matan isisawl, ikin Mesay natawtoun, liva̱nen mo ilivan.   
\p
\v 42-43 Min-Yudiy gog takaleiwags mwasanin isimounids waseg Yeisuw, tage nag bikamteles ninous, peinan iwenes tasiyas Palisiy, idokes bibwabwes sitapwa̱loul. Tasiyas nag ivna̱ses Yowbad, ivna̱ses gamag ninous; sivines kid gamag bikavasis, Yowbad nag.   
\s1 Gamag biya̱tals Yeisuw anilivan waseg  
\p
\v 44 Yeisuw iwak, aygan avakaein ilana, “Kukin kal bisimounid waseg yey, nag go isimounid waseg yey, tage isimounid waseg Towen nikayabeig nam.   
\p
\v 45 “Kukin gog kal bikineig, bikin-vak Towen nikayabeig nam.   
\p
\v 46-47 “Yey nam watinow silma̱nin mikamnat. Kal yak bukusimounid waseg yey, mo beikous mudadub. Kukin bukwatiligen aygag, tage nag bukuvnas aygag, yey nag bamop amsinap kalbaleb, nag. Peinan nag am watinow va̱gan bayateleimiy ven watinow gimgilis yakamiy, nag; nam gog va̱gan kid bakatinabweimiy.   
\p
\v 48 “Kukin bukupiyev aygag tatoneig, o bukupiyaveig yey, igaw nakabiyokous tut waseg, aygag kaka̱wen biyateleim, mo bukulivet mapun amsinap kalbaleb.   
\p
\v 49 “Yey nag alivan agulivan tatoneig, nag. Tamag bo ikaleiwag. Tamag gog nikayabeig, nam watinow, mo alivan, ma̱wan nakaleiwag tonen.   
\p
\v 50 “Yey akakin nakaleiwag towen silma̱nin mwamovamiy nag beikous. Tamag nakaleiwag waseg isekeig aygan, mo alivan ma̱wan.”   
\c 13  
\s1 Yeisuw iwik inavamul kikeis  
\p
\v 1 Igaw kakit mo beikams Sagal towen Kaltuwon. Yeisuw ikakin-wan tutan bo ilivet beinoy ven watinow, beiyum binek Taman. Tuta babaw issiwyoubus angamag tonen; nakabiyokous tutan Yeisuw watinow mo bikatimlakes nasiwa̱youb singay wasigeis tasiyas.   
\p
\v 2 Sagal towen ikamkwams sen navamul. Saymon natun Yudas Iskaliyot nises. Kweiboug Seitan nanon isek Yudas va̱gan kid bisilkod Yeisuw.   
\p
\v 3 Yeisuw ikakin-wan Taman bo itam youda babaw waseg. Ikakin meinoy neim Yowbad waseg, mo beiyum-vak binek Yowbad.  
\v 4-5 E, Yeisuw mo itamanaw, inis anakweim mwaynavakaein, taweil isikam, mo iligob soup in wanuwan abmavin, isilamaw biwkiwik navamul kikeis, bititanob taweil towen nisikam waseg.  
\v 6 Iwik kikeis mwasanin gamag ikous, mo inek Saymon Pita. Pita ilana, “Yak guyaw; awoum kuwik kakeig.”   
\p
\v 7 Yeisuw ilana, “Nag kukwakin silawun gunawotet towen; igaw mo bukukwakin.”   
\p
\v 8 Pita ilana, “Nag. Nag kweitan tut bukuwik kakeig.”  
\p Yeisuw ilana, “Kukin bukupiyev, nag veiyoug yak.”   
\p
\v 9 Saymon Pita ilana, “Gunguyaw yak, bweina kuwik kakeig son namag o kunug.”   
\p
\v 10 Yeisuw ikatimop aygan, ilana, “Deis. Kal yak bo kukwa̱kay ikous, misinaka bawik kakeim mo bigimagim woum meivek-wan. Yakamiy gimagim yakamiy, tage teitan yakamiy nag.”  
\v 11 Yeisuw ikakin kal bisilakod waseg, to ilana, “Teitan yakamiy nag.”   
\p
\v 12-14 Iwik kikeis ikous, ivaligev anakweim, isin wakaban, idibakes, ilana, “Tabta kukwakins gunawotet towen wasigeis yakamiy? Kudokeigs ‘Amatakatimlakay’ o ‘Maguyaw’; bwein ma̱wan, mounid-wan. Kukin yey amitakatimlakay o miguyaw yey bawik kikeimiy, kadiloka kulabes simsimiyas mamagina kuwkiwiks kikeimiy simsimiyas wasigeis.   
\p
\v 15 “Bo akatimlakeimiy agusinap wasigeis yakamiy; kadiloka kuva̱ges ma̱wan.  
\v 16 Mounid adibakeimiy nag kal bikaleiwag naguyaw waseg, o guyaw teitan nataka̱yob awoum bikaleiwag waseg natovek; awoum.  
\v 17 Magat bukukwakins sinap towen o bukuwteles ma̱wan, bo bukumwa̱saws yakamiy.   
\p
\v 18 “Nag alivan livneimiy tababaws yakamiy; nag. Bweina akakin kalisiy yakamiy nadaweimiy; tage teitan bisilkodeig, Bukitab nilivnek mamagina:  
\p ‘Towen bo asek kan ikamkwam, mo ipiyaveig.’   
\p
\v 19 “Bo alivnek youd towen, va̱gan igaw bikamat, mo bukusimounids waseg yey.   
\p
\v 20 “Mounid adibakeimiy, guntaka̱yob kal igaw beiw, kal yak bukatam waseg mtowen, mogo bukutam waseg yey; e, bukutam waseg yey, mogo bukutam waseg Tamag towen nikayabeig nam.”   
\s1 Yeisuw ilivnek peinan teitan bisilkod  
\r (Matiw 26:20-25; Mak 14:17-21; Luk 22:21-23)  
\p
\v 21 Anilivan towen ikous, singay igeg nanon Yeisuw; idibakes, ilana, “Mounid adibakeimiy teitan yakamiy igaw bisilkodeig!”  
\v 22 Navamul mites ikakins sisiyas wasigeis ikabunikays, idokes kavel.   
\p
\v 23 Yeisuw navamul yey, ases kadiykusan Yeisuw; peinan singay nisiwyoubug.  
\v 24 Saymon Pita iloukwam waseg yey va̱gan bakatigan Yeisuw, balana, “Kavel towen bisilkodeim?”  
\v 25 Mapun asineikim kadiykusan wavtakon Yeisuw, akatimwa̱lag, alana, “Tamwey, kavel towen?”   
\p
\v 26 Yeisuw ilana, “Mtowen, basouw kan towen mo basek.” E, ikow kan kakit, isow, isek Yudas, mtowen Saymon Iskaliyot natun.   
\p
\v 27 Yudas ikam kan towen, Seitan mo isiw wananon Yudas. Yeisuw mo idibek, ilana, “Muwotet towen nuwanaw kuwtel.”  
\v 28 Yakamey nakakamkwam nag kakakin silawun Yeisuw anilivan towen.   
\p
\v 29 O peinan Yudas tamtakavatein mamoney, mwasanin gog idokes Yeisuw nikayeb Yudas va̱gan biymiyis kan, sagal silma̱nin, o adok money mwasanin bikow bisiwa̱youb tasimavs wasigeis.  
\v 30 Yudas ikam kan towen ikous; nuwanaw mo isap in watoulan. Bo iboug tonen.   
\s1 Yeisuw nakaleiwag kweivaw  
\p
\v 31 Yudas inoun, Yeisuw mo ilana, “Bo isap tutan yakawanag Gimgilitoun yey, o gamag mo biyakawanes Tamag, gunawotet silma̱nin.  
\v 32 Nuwanaw gog, Tamag yakawanan mo bisekeig yakawanag yey.  
\v 33 Budag yakamiy, tut kadiyakus sigwey yakamiy bitasesus; igaw mo bukuneveigs; bukunineivs nag. Ma̱wan agulivan wasigeis min-Yudiy situwa̱veks, alana, ‘Banoun ban; ta-ma̱wan bukuwekeigs.’ E, nagein mo adibakeimiy ma̱wan.   
\p
\v 34 “Gunakaleiwag kweivaw asekeimiy, kadiloka bukusiwyoubus simsimiyas. Ma̱wan nasiwyoubumiy, kadiloka ma̱wan bukusiwyoubus simsimiyas.  
\v 35 Bukuva̱ges ma̱wan, gamag babaw mo bikakins gunavamul yakamiy, peinan misiwa̱youb simsimiyas wasigeis.”   
\s1 Ilivnek Pita bikayan  
\r (Matiw 26:31-35; Mak 14:27-31; Luk 22:31-34)  
\p
\v 36 Saymon Pita idibek Yeisuw, ilana, “Tamwey, ama-bukun?”  
\p Yeisuw ilana, “Tut towen banoun ban; ta-ma̱wan bukwabkunigs. Igaw tut wanakougwaw mo bukwabkunigs yey.”   
\p
\v 37 Pita ilana, “Tamwey, aveiyag wawun nagein na-ikadilokeig babkunim? Bo bakanig peinam yak.”   
\p
\v 38 Iw to Yeisuw, ilana, “Tabta bukukwanig peinan yey, ne? Mounid adibakeim, siva̱toun bukwaya̱neig, igaw ga̱boug waseg kolkolek mo beigel.”   
\c 14  
\s1 Yeisuw mamagina kidenen Taman  
\p
\v 1 Yeisuw ilana, “Awoum bikubukub nuwamiy yakamiy. Kusimounids waseg Yowbad; kadilok-vak bukusimounids waseg yey.   
\p
\v 2 “Tamag wanven bunatum babaw nisesus. Kukin gog nag, tabta badibakeimiy, ‘Ban bakatineg miven pinamiy yakamiy’? Tage peinan agulivan ma̱wan, bo mounid.   
\p
\v 3 “Ban bakatineg miven, igaw mo baw va̱gan kid bakaweimiy banaweimiy wagunaven, sigwey yakamiy mo bitasesus.  
\v 4 Kukwakins ked towen ba̱noy.”   
\p
\v 5 Tomas mo idibek Yeisuw, ilana, “Tamwey, nag bakakakin ama-bukun. Ta-ma̱wan bakakakin ked.”   
\p
\v 6 Yeisuw ilana, “Yey miked yey; yey mikamounid yey; yey mikabmwamov yey. Kukin kal sivinan binek Tamag, bweina beim waseg yey mo binek Tamag; ta-kweitan ked nises.  
\v 7 Magat bukukwakin yey, mo bukukwakin Tamag. Nagein gog kukwakins towen, peinan nukukines.”   
\p
\v 8 Pilip ilana, “Tamwey, kwatimlakem Tamam mo beitout ninom.”   
\p
\v 9 Iw to Yeisuw, ilana, “O Pilip, kadiveiyov tut sigwey yakamiy nitasesus, aveiyag wawun nag kukwakin yey? Kal yak kukineig yey, kukin-vak Tamag. Aveiyag wawun kulansa, ‘Kwatimlakem Tamam’?  
\v 10 Tabta kusimounids yey Tamag waseg nases, o Tamag waseg yey nises? Livan towen nasekeimiy, nag agulivan tatoneig; Tamag anilivan; Tamag gog waseg yey nises, iwotet.   
\p
\v 11 “Bweina bukusimounids yey waseg Tamag nases, o kusimounids-vak Tamag waseg yey nises. Kukin gog nag, kadiloka kusimounids peinan kukines gunakawotet.  
\v 12 Mounid adibakeimiy, kukin kal yak bukusimounid waseg yey, gunakawotet towen mo bukuwtel tawtoun waseg, son mukwawotet singaya tawtoun, peinan bo banek Tamag.   
\p
\v 13 “Aveiyag bukunitougs yagag waseg mo bawtel, va̱gan kid gamag babaw mo biyakawanes Tamag.  
\v 14 Kukin bukuntougigs yagag waseg, mo bawtel ma̱wan.   
\s1 Yowbad Kululuwan igaw mo beim  
\p
\v 15 “Kukin bukusiwyoubugs, kadiloka bukuvna̱ses gunakaleiwag.   
\p
\v 16 “Yey mo banitoug Tamag waseg va̱gan bisekeimiy Teitan bilabeimiy, mo bises bisigeg.  
\v 17 Kululuwan Mounid Towen, ansinap kamnat. Tamag nag bisekes Kululuwan Towen wasigeis gamag babaw; nag. Peinan tasiyas nag kadilok bikines o bikakins Kululuwan Towen. Yakamiy gog kukwakins, peinan wasigeis yakamiy Kululuwan Towen nukusesus simiy.   
\p
\v 18 “Nag makaw bukusesus yakamiy, peinan yey bo baw.  
\v 19 Igaw kakit mo balakanig wasigeis ven watinow gimgilis, tage yakamiy bukukineigs yey. Yey ba̱mov mapuna yakamiy bukumovs.   
\p
\v 20 “Igaw, yam towen waseg, mo bukukwakins yey Tamag waseg nases, o yakamiy waseg yey, o yey wasigeis yakamiy.   
\p
\v 21 “Kal yak bukuligen gunakaleiwag, o bukuvnas, mounid yak bukusiwyoubug. Kal yak bukusiwyoubug, Tamag mo bisiwyoubum yak; o yey mo basiwyoubum, tatoneiga bakamat waseg ya̱koum.”   
\p
\v 22 Yudas Iskaliyot valeyin yagan Yudas; mtowen idibek Yeisuw, ilana, “Tamwey, aveiyag wawun bukukwamat wasigeis yakamey, tage gamag babaw nag?”   
\p
\v 23 Iw to Yeisuw, ilana, “Kal yak bukusiwyoubug mo bukuvnas aygag; mapuna Tamag mo bisiwyoubum yak, soug Tamag bakawekeim yak mo bitasesus simey ya̱koum.  
\v 24 Kal yak bukupiyaveig mo bukupiyev aygag, Tamag aygan gog, nikatipel nisekeig agulivan, nikayabeig va̱gan kid basekeimiy aygan towen.   
\p
\v 25 “Agulivan towen nasekeimiy, igaw sigwey yakamiy nitasesus.  
\v 26 Igaw Teitan biwekeimiy bilabeimiy, mtowen Kululuwan Yowbad. Tamag bo bikayeb Kululuwan, gunakaleiwag waseg, biwekeimiy; Kululuwan Towen mo bikatimlakeimiy youda babaw wasigeis; e, bilabeimiy va̱gan nag bukunumlaves agulivan babaw.   
\p
\v 27 “Balisaweimiy, tage bweina beitaw nuwamiy; sinap bwein nasekeimiy va̱gan beitaw nuwamiy. Ven watinow sinapun nag bilabeimiy ma̱wan agusinap, nag. Awoum bikubukub nuwamiy; awoum beivag amipwa̱yat.   
\p
\v 28 “Nukuliganes agulivan mamagina: ‘Banoun ban, ba̱yum-vak baw.’ Magat bukusiwyoubugs bo bukumwa̱saws peinan yey banek Tamag, tage mtowen Tamag Tatawtoun singay.   
\p
\v 29 “Nagein gog bo alivnek. Igaw bikamat mamagina, mo bukusimounids waseg yey.  
\v 30 Igaw nag balivan avakaein wasigeis yakamiy. Peinan bo neim takalwagein asisinap ven watinow gimgilis; tage ta-ma̱wan bivkek waseg yey.   
\p
\v 31 “Yey awotet ma̱wan Tamag nikaliwageig, va̱gan kid gamaga babaw mo bikakins gunsiwa̱youb waseg Tamag.  
\p “Kutamanaws bo bitanounas.”   
\c 15  
\s1 Yeisuw kay mounid yagan gleip  
\p
\v 1 Kweitan livan Yeisuw nisekes ma̱wan: “Yey mamagina kay mounid; Tamag mamagina tawtelein bag.  
\v 2 Kukin yayageig nag beivag anagin, Tamag mo bilav yayag towen bilev. Kukin gog beivag anagin, mo bibob matan va̱gan anagin bibabaw.   
\p
\v 3 “Bo nasekeimiy agulivan, mapuna ivag amisinap kamnat.  
\v 4 Makava yayagein, kukin wawun nag, ta-ma̱wan beivag anagin. Kadiloka bisesus son wawun kay mo beivag anagin. O yakamiy ma̱wan. Kadiloka bitasesus simiy yey, o yey sigwey yakamiy, mo beivag angimiy; kukin bukusesusa makaw, bo nag.   
\p
\v 5 “Yey kay yey. Yakamiy yayageig yakamiy. Kal yak soug yey bitases, o yey soum yak, igaw beivag anagim bibabaw; tage ammwa̱net nag aveiyag bukuwtel.   
\p
\v 6 “Kukin kal bipiyaveig, mtowen mamagina yayageig ilaves in watoulan, bo biya̱lay, beimat. Igaw gamag mo bikawes, bigabus wa̱kov.  
\v 7 Kukin sigwey bitasesus, o gunakaleiwag simiy bukusesus, aveiyag sivinamiy, bweina bukunitougs silma̱nin, mo bukuba̱nes youd towen.   
\p
\v 8 “Magat gunavamul mounid yakamiy, mo bukuva̱ges angimiy bibabaw; mapuna gamag babaw mo bikavasis Tamag.  
\v 9 Tamag ikalpwa̱kit waseg yey, ma̱wan yey, akalpwa̱kit wasigeis yakamiy. Kadiloka kusesus son agusinap siwa̱youb.  
\v 10 Kukin bukuvna̱ses gunakaleiwag mo bukusesus son agusinap siwa̱youb. Ma̱wan yey, avnas Tamag nakaleiwag to nasesuna son towen ansinap siwa̱youb.   
\p
\v 11 “Bo asekeimiy agulivan towen, va̱gan kid gunakabmwa̱saw waseg bukusesus, o singay bivakaein mwa̱saw wasigeis yakamiy.  
\v 12 Gunakaleiwag towen: Kadiloka bukusiwyoubus simsimiyas. Peinan yey nasiwyoubumiy, kadiloka bukusiwyoubus simsimiyas bo ma̱wan.  
\v 13 Kukin kal singaya bisiwyoubus nubein, mo bitam mwamovan, bikanig pines tasiyas.   
\p
\v 14 “Magat bukwanawes aygag mo bukwanubeins waseg yey.  
\v 15 Kweiboug bo adokeimiy guntouwat yakamiy; tut gog towen nadokeimiy nubeig yakamiy. Kalisiy tasiyas tamwey natouwats nag bikakins tamwey nanon; tage yey bo aligen mo akakin Tamag nanon, bo nakatipel nasekeimiy yakamiy.  
\v 16 Nag kuvkakeigs mitovek yey; tage yey bo avkakeimiy nubeig yakamiy; bo akaleiwag va̱gan bukukwanawes aygag va̱gan kid angimiy bwanabwein bises bisigeg. Igaw aveiyag bukunitougs waseg Tamag, yagag yey waseg, Tamag mo bisekeimiy youd towen.   
\p
\v 17 “Gunakaleiwag towen: Kadiloka bukusiwyoubus simsimiyas.   
\s1 Ven watinow gimgilis sikameiliw  
\p
\v 18 “Magat ven watinow gimgilis bikamliweimiy, kadiloka bukunuways wanmugwana yey nikamliweigs.  
\v 19 Magat amisinap ma̱wana asisinap tasiyas, mo bisiwyoubumiy. Tage yakamiy amisinap kweitan. Bo nadaweimiy mo nukulisawes ven watinow asisinap, mapuna ven watinow gimgilis ikamliweimiy yakamiy.   
\p
\v 20 “Kadiloka bukunuwes agulivan nadibakeimiy mamagina, ‘Natouwat nag bimug waseg natovek; nag.’ Kukin bikamliweigs, mogo bikamliweimiy. Kukin bivna̱ses aygag, mogo bivna̱ses agamiy.  
\v 21 Ven watinow gimgilis biyagageimiy, peinan agugwamag yakamiy, o peinan nag ikakins Towen nikayabeig nam.  
\v 22 Magat basina̱les, o magat nag basekes aygag, mogo nag badok asisinap kalbaleb. Tage bo anekes, asekes aygag, igaw Yowbad mo bikamta̱nis peinan asisinap kalbaleb, ta-ma̱wan bikatimapus aygan; nag.  
\v 23 Kukin kal bikamliweig, mamagina bikamliw-vak Tamag.   
\p
\v 24 “Magat nag bikines gunawotet tawtoun, nag badok asisinap kalbaleb. Tage gunawotet singay tawtoun. Nag teitan nawotet tawtoun ma̱wana gunawotet tatoneig. Tage nikines gunawotet, mogo nikamliwemas soug Tamag.  
\v 25 Bo ikamliweigs va̱gan bikamat liva̱neig nises Bukitab kaleiwag waseg; nilivnek mamagina:  
\q1 ‘Bo ikamliweigs mav; silawun nag.’   
\p
\v 26-27 “Igaw bakayeb Teitan beiw bilabeimiy. Kululuwan Towen ansinap mounid, bo beinoy Tamag waseg biwekeimiy; liva̱neig mo bisekeimiy. O yakamiy gog liva̱neig bukusekes gamag babaw wasigeis, peinan sigwey yakamiy nitasesus nakabsilamaw gunawotet waseg ee... sigwey yakamiy tut towen.   
\c 16  
\p
\v 1-2 “Livan towen bo adibakeimiy va̱gan awoum bukupiyaveigs; igaw tasiyas bibwabwes mitapwa̱loul, sinagog waseg; o igaw kweitan tut wanakoug gamag mwasanin beiweimiy bukumta̱mats, o igaw biyagageimiy mo bidokes Yowbad bikalin nuwan tasiyas.   
\p
\v 3 “Siwotet towen biwteles, peinan nag bikakins Tamag, o nag bikakins yey.  
\v 4 Bo adibakeimiy sinap towen; igaw youd towen bikamat mo bukunuwes agulivan nadibakeimiy.  
\s1 Yowbad Kululuwan nawotet tonen  
\p “Wanmugwana nag adibakeimiy sinap towen, peinan igaw sigwey yakamiy nitasesus.  
\v 5 Tut gog towen bo banek Towen nikayabeig nam, tage nag kal yakamiy ikatiga̱neig ilana, ‘Ama-bukun?’  
\v 6 Peinan nadibakeimiy sinap towen, mo igeg amnamiy.   
\p
\v 7-8 “Mounid gog adibakeimiy, bweina balisaweimiy. Kukin nag balisaweimiy, nag bakayeb Teitan bilabeimiy; tage bo ban, mogo Towen beiw, mo bikatimlakeimiy ven towen gimgilis babaw yakamiy, va̱gan kid bukukwakins sinap kalbaleb, sinap bwein, o sinap kalbaleb mapun.   
\p
\v 9 “Mtowen bikatiboug nuwes kalisiy nag bisimounids waseg yey, mo bikakins asisinap kalbaleb.   
\p
\v 10 “Bikatimlakeimiy agusinap bwein peinan bo ba̱mwen banek Tamag, o igaw nag bukukineigs.   
\p
\v 11 “E, bikatimlakeimiy sinap kalbaleb mapun, peinan Tamag bo imop ansinap kalbaleb towen tanuwagan ven watinow.   
\p
\v 12 “Sinap babaw nisesus, igaw mo badibakeimiy, nagein gog ninoumiy igaw moumouvit.  
\v 13 Igaw beim Yowbad Kululuwan Mounid, mo bimgwayeimiy sinap babaw mounid waseg. Nanon tatonen nag bilivan, nag. Aveiyag biligen, mo bilivan ma̱wan; o bilivnek sinap wanakougwaw silma̱nin.   
\p
\v 14 “Mtowen bikow agusinap mo bikatimlakeimiy, va̱gan beivag yakawanag tatoneig.  
\v 15 Tamag navavag mamagina yey gunavavag, to nalivan, alana, ‘Mtowen bikow agusinap mo bikatimlakeimiy.’   
\s1 Moumouvit beikous mo bukumwa̱saws  
\p
\v 16 “Igaw kakit mo balisaweimiy; tut kakit wankuyeim mo bukukineigs vayuwein.”   
\p
\v 17 Navamul mwasanin sisiyas mo illivans, ilansa, “Aveiyag anilivan towen, ‘Igaw kakit mo balisaweimiy,’ o ‘Tut kakit wankuyeim mo bukukineigs vayuwein,’ o ‘Bo banek Tamag.’”  
\v 18 Ilansa, “Aveiyag wawun anilivan, ilana, ‘Igaw kakit’; tage nag takakins silawun.”   
\p
\v 19 Yeisuw gog ikakin aw-youd sivines bikatugwans waseg, to ilana, “Adok kuneves silawun agulivan towen, ‘Igaw kakit mo balisaweimiy’ o ‘Tut kakit wankuyeim mo bukukineigs vayuwein.’  
\v 20 Mounid adibakeimiy, bigeg ninoumiy, bukuva̱lams; tage gamag babaw bo bimwa̱saws. Mimouvit igaw mo bukwatilawos mwa̱saw.  
\v 21 Mamagina vin, tutan bitup, namouvit ivag; tage bitapouy naman, mo beikous namouvit, mo bimwa̱saw, peinan kweivaw gamag bo ikamat.   
\p
\v 22 “Yakamiy ma̱wan, tut towen mimouvit nises; igaw gog mo bawekeimiy, mo bukumwa̱saws bukusigagas. Ta-kal biyageg mimwa̱saw towen; nag.   
\p
\v 23 “Igaw yam towen waseg, nag bukunitougs waseg yey. Mounid adibakeimiy, igaw bukuntougis Tamag, yagag yey waseg, Tamag mo bisekeimiy.  
\v 24 Tut kweiboug nag kweitan youd kuntougis Tamag, yagag yey waseg; nag. Kadiloka bukunitougs va̱gan bukukwawes, mo bivakaein mimwa̱saw yakamiy.   
\s1 Bo atawtoun ven watinow nakaleiwag waseg  
\p
\v 25 “Gunakabebay waseg bo adibakeimiy. Igaw kweitan tut beim, mo beikous kabebay; kamnat gog mo basekeimiy liva̱nen Tamag.  
\v 26-27 Tut towen bukuntougis Tamag yagag yey waseg. Nag balivan, balana, ‘Banitoug Tamag waseg, pinamiy yakamiy’; nag. Tamag tonena nisiwyoubumiy, peinan nukusiwyoubugs yey, o nukusimounids ma̱noy nam Yowbad waseg.   
\p
\v 28 “Ma̱noy nam Tamag waseg, nam ven watinow; igaw mo balisow ven towen watinow, ba̱yum gog banek Tamag.”   
\p
\v 29-30 Navamul mo ilansa, “Tut gog towen amlivan kamnat. Mukwabebay bo ikous. Kakakin-wan ya̱koum kukwakin youd babaw; nag kadilok teitan bikatiga̱neim; mapuna kasimounid mukunoy Yowbad waseg nukum.”   
\p
\v 31 Iwa̱ge Yeisuw, ilana, “Tabta mounid bukukwakins, ne?  
\v 32 Igaw kweitan tut beim, adok tut towen bo isilamaw, bikatigayeimiy bukuneis wamiven tatineimiy, bukulisaweigs, agumwa̱net yey bases; tage amateiy soug Tamag bakases.   
\p
\v 33 “Sinap towen bo asekeimiy va̱gan bukusimounids waseg yey mo beitaw nuwamiy. Ven watinow mimouvit bukulivatus, tage awoum bigeg ninoumiy, peinan bo atawtoun ven watinow sinapun waseg.”   
\c 17  
\s1 Yeisuw nakanitoug  
\p
\v 1 Yeisuw anilivan towen ikous, mo itamnow matan, ikin liba̱lab, ilana, “Tamag, tutag bo neim. Kusekeig yakawanag, mo bavag gamag babaw biyakawaneims yak.   
\p
\v 2 “Bo nukutam agugwamag babaw va̱gan bayamoves mo bisigagas; o bo nukusekeig gunakaleiwag gamag babaw wasigeis.   
\p
\v 3 “Kalisiy bikakinsa ya̱koum mounid Yowbad ya̱koum, o nukukwayabeig Mesay Yeisuw yey, mo nam, tasiyas kalisiy bikakins ma̱wan mo beimovs bisigagas.   
\p
\v 4-5 “Gunawotet towen nukusekeig bo ayakous, va̱gan ven watinow gimgilis mo biyakawaneims. Tut gog towen kusekeig yakawanag tatoneig walba̱lab wamatam. Ma̱wan nitases nakabsilamaw tut waseg; e, vayuwein kusekeig yakawanag towen.   
\p
\v 6 “Ven watinow gimgilis tasiyas nukusekeig, bo akatimlakes amsinap ya̱koum. Amgwamag tasiyas nukusekeig agugwamag, o bo ikanawes aygam ya̱koum.  
\v 7 Nagein gog bo ikakinsa gunavavag tasiyas nukusekeig meinoy nimeis waseg ya̱koum.   
\p
\v 8 “Livan towen nukusekeig, bo akatipel asekes tasiyas, mo itams waseg. E, ikakins-wan ma̱noy nam waseg yak, o isimounids nukwayabeig nam.   
\p
\v 9 “Nag banitoug ven watinow gimgilis pines; nag. Misinaka banitoug pines tasiyas nukusekeig, peinan amgwamag tasiyas.  
\v 10 Agugwamag babaw mamagina amgwamag ya̱koum; o amgwamag mamagina agugwamag yey, o yakawanag peinan.   
\p
\v 11 “Tut towen balisow ven watinow, mo baw; tasiyas gog bisesus ven watinow. O Yowbad, kadiloka yagam waseg bukuvna̱ses gamag tasiyas nukusekeig. E, kuvna̱ses tasiyas va̱gan beivag ninous katanok-wan, ma̱wan nanoud ya̱kid katanok-wan.   
\p
\v 12 “Tutag watinow waseg, sigwey tasiyas bo amtakavates gamag tasiyas nukusekeig; yagam waseg nisesus bwein. Nag kal iyamkwaneig. Misinaka towen Bukitab nilivnek peinan bo bigeg; e, mtowen anmwa̱net iyamkwaneig.   
\p
\v 13 “Tut towen bo baw. Ven watinow waseg nasekes livan towen va̱gan bimwa̱saws avakaein, yey gunamwa̱saw avakaein waseg.   
\p
\v 14 “Bo asekes amlivan, ven watinow gimgilis mo ikamliwes tasiyas, peinan idokes tobwag gamag tasiyas; o yey ma̱wan, idokeigs tobwag gamag yey.   
\p
\v 15 “Awoum bantougim bukutokes va̱gan bilisawes ven watinow; nag. Misinaka kumtakavates, mata beivag asisinap kalbaleb.  
\v 16 Nag ven watinow gimgilis tasiyas; ma̱wan yey, yey nag gimgeilin ven watinow.  
\v 17 Kuva̱ges amgwamag bikamnat, amlivan mounid waseg.   
\p
\v 18 “Peinan nukwayabeig nam silma̱nin ven watinow, ma̱wan yey akayabes tasiyas bineis silma̱nin ven watinow gimgilis.  
\v 19 Yey akatkileig va̱gan balabes tasiyas, va̱gan kid tasiyas bisesus bwein, asisinap mounid waseg.   
\p
\v 20 “Antougim pines tasiyas, sisiyas tasiyas babaw biliganes asilivan mo bisimounids waseg yey.   
\p
\v 21 “Tama, anitoug va̱gan tasiyas babaw beivag ninous katanok-wan; ma̱wan yak waseg yey, o yey waseg yak, nanoud katanok-wan; o sivinag sidayas tasiyas beivag nanouds katanok-wan; ven watinow gimgilis mo bikakins nukwayabeig nam.   
\p
\v 22 “Sinap kamnat nukusekeig, bo akatipel asekes tasiyas, va̱gan beivag ninous katanok, ma̱wan ya̱kid aditeiy.   
\p
\v 23 “Yey sigwey tasiyas bakases, o ya̱koum soug yey; nakabiyokous waseg katanoka bod ya̱kids babaw; ven watinow gimgilis mo bikakins nukwayabeig nam, o bikakins kukwalpwa̱kit wasigeis tasiyas, ma̱wana waseg yey.   
\p
\v 24 “O Tama, sivinag tasiyas biwekeigs wadavanuys. Nakabsilamaw tut waseg nukusiwyoubug gunakamnat waseg. Sivinag tasiyas bikines gunakamnat wadavanuys waseg.   
\p
\v 25 “Ven watinow gimgilis na-ikakins yak, tadidumwal yak, tage yey akakina yak, o amgwamag tasiyas ikakinsa nukwayabeig nam.   
\p
\v 26 “Bo akatimlakes yagam o amsinap; igaw-vak mo bakatimlakes amsinap tatoneim, va̱gan kid siwa̱youb towen nukusiwyoubug mo binekes tasiyas, o yey-vak basesuna wasigeis tasiyas.”   
\c 18  
\s1 Iyousis Yeisuw  
\r (Matiw 26:47-56; Mak 14:43-50; Luk 22:47-53)  
\p
\v 1 Anilivan towen ikous, Yeisuw mo inounas sen navamuls, iwloubus, ikanapels lay Kidlon, ikatulags, ineis bigulen oliv, isinis.   
\p
\v 2 Yudas, towen tasilkodein Yeisuw, ikakina Yeisuw sen navamul inineis ven towen.  
\v 3 Mapuna Yudas mo imgwayes takannaviys sisiyas tanuwgwes lun situwa̱veks siplismans mwasanin, o Palisiy siplismans mwasanin; ikokews wodama, lampa, son naviy youdanen, inounas, ineis bag towen.   
\p
\v 4 Yeisuw ikakin youd babaw igaw bilivet, iwa̱ge ilana, “Kal kunineves?”   
\p
\v 5 Ilansa, “Gum-Nasalet yagan Yeisuw.”  
\p Yeisuw ilana, “Yey.” Yudas gog siney tasiyas nitomos, mtowen tasilkodein Yeisuw.   
\p
\v 6 E, iliganes Yeisuw anilivan, ilana, “Yey,” mo isineikiks, ikalka̱louws, immasis wapwepway.  
\v 7 Ikous, itamanaws, vayuwein Yeisuw mo ikatiga̱nes, ilana, “Kal kunineves?”  
\p Ilansa, “Gum-Nasalet yagan Yeisuw.”   
\p
\v 8 Iwa̱ge Yeisuw, ilana, “Bo adibakeimiy mtowen yey. Bukuyousigs yey, tabta bukuta̱mes tasiyas bineis wasiven; awoum kuyousis tasiyas.”  
\v 9 Yeisuw anilivan ma̱wan va̱gan bikamat livan towen Bukitab nilivnek mamagina:  
\q1 “Gamag tasiyas nukusekeig nag teitan  
\q1 iyamkwaneig, nag.”   
\p
\v 10 Saymon Pita mo ikow napulut tanmunum, iweiy tanuwgwes-lun sitovek natouwat teitan, yagan Malkos, ibob teigan wanaka̱tay.   
\p
\v 11 Yeisuw idibek Pita, ilana, “Kusem mupulut wakaban. Kadiloka ba̱moum kwa̱vig yayan Tamag nisekeig.”   
\s1 Yeisuw iya̱tal tanuwgwes lun sitovek avakaein wamatan  
\r (Matiw 26:57-58; Mak 14:53-54; Luk 22:54)  
\p
\v 12 Takannaviy babaw sisiy sitovek, sisiyas min-Yudiy siplismans, mo iyousis Yeisuw, iyawanis naman.  
\v 13 E, itokes Yeisuw inawes wanamug Anas wanbunatum, tamwey towen Kayapas yawan; bweilim towen Kayapas tanuwgwes lun sitovek avakaein.   
\p
\v 14 Mtowen Kayapas nidibakes min-Yudiy sitakaleiwag mamagina, “Kadiloka tatanok gamag bikanig peinads ya̱kids, bod Yudiy ya̱kids.” (Kukines Yon 11:50)   
\s1 Pita ikayan Yeisuw  
\r (Matiw 26:69-70; Mak 14:66-68; Luk 22:55-57)  
\p
\v 15-16 Saymon Pita mo ikabwa̱kuns Yeisuw waseg, son navamul teitan; mtowen veiyon tanuwgwes lun sitovek, mapuna isiws wanbunatum sen gamag tasiyas nitokes Yeisuw. Tage Pita itamanaw iton wamatan bunatum. Mtowen veiyon tanuwgwes lun sitovek avakaein mo inek vin mana̱wen ikayamat wakoukwed, ilivans son, mo ikaliyow koukwed va̱gan Pita beisiw beim.   
\p
\v 17 Vin mana̱wen mo idibek Pita, ilana, “Adok ya̱koum Yeisuw navamul teitan, ne?” Pita ilana, “Nag.”  
\v 18 Asiloulun; tasiyas tanuwgwes lun sitouwats sisiyas plismans mwasanin mo ivlakes kov, itamanaws ikammunuws kov walasin. Pita siney tasiyas ikammunuws.   
\s1 Tanuwgwes lun sitovek avakaein ikatigan Yeisuw  
\r (Matiw 26:59-66; Mak 14:55-64; Luk 22:66-71)  
\p
\v 19 Tanuwgwes lun sitovek avakaein mo ikatigan Yeisuw, ilana, “Kalisiy muvamul? O aw-sinap waseg nukumulis tasiyas?”   
\p
\v 20 Yeisuw ilana, “Agusinap bo alivan kamnat, gamag babaw wasigeis, Yowbad wanbunatum o sinagog wasigeis. Sitapwa̱loul waseg min-Yudiy babaw nikatilutegs agusinap nakatimlakay; nag kweitan sinap akatimwa̱lag o aka̱wum; nag.  
\v 21 Aveiyag wawun kwatiga̱neig yey? Kwatiga̱nes tanageins agulivan, tasiyas-nan; ikakinsa agulivan.”   
\p
\v 22 Yeisuw ilivan ikous, teitan plisman wadadan nitamanaw mo iweiy Yeisuw, naman waseg, ilana, “Awoum kwatimop tanuwgwes lun sitovek anilivan ma̱wan.”   
\p
\v 23 Yeisuw ilana, “Magat agulivan kalbaleb, kadiloka kwamtel aveiyag igeg. Kukin gog nag, aveiyag wawun nukuweig?”   
\p
\v 24 Yeisuw igawa iyawanis naman, Anas mo ikayeb va̱gan kid biya̱tal wamatan Kayapas, mtowen tanuwgwes lun sitovek avakaein.   
\s1 Vayuwein Pita mo ikayan Yeisuw  
\r (Matiw 26:71-75; Mak 14:69-72; Luk 22:58-62)  
\p
\v 25 Saymon Pita, igawa itamanaw ikammunuw kov; gamag mwasanin mo idibakes, ilansa, “Adok ya̱koum navamul teitan, ne?”  
\p Pita ilana, “Nag.”   
\p
\v 26 Tanuwgwes lun sitovek natouwat nises, mtowen veiyon towen Pita nibob teigan; ilana, “Adok bo akineim wa̱bag soum Yeisuw, ne?”   
\p
\v 27 Vayuwein Pita ikayan, ilana, “Nag.” Mo igel kolkolek.   
\s1 Iyateles Yeisuw wamatan Paylat  
\r (Matiw 27:1-2, 11-14; Mak 15:1-5; Luk 23:1-5)  
\p
\v 28 Iyateles Yeisuw wamatan Kayapas ee... walalayis. Ikous, mo inawes gabman avakaein wanbunatum bunavakaein. O peinan min-Yudiy ikatkakils sitapwa̱loul waseg, yam towen beikams Kaltuwon bulukwan la̱miy, nag kadilok beisiws gabman Lom wanbunatum wanuwan.  
\v 29 Mapuna Paylat isap in watoulan, idibakes, ilana, “Aveiyag wawun bukuyateles taw towen?”   
\p
\v 30 Ilansa, “Kukin nag takalbaleb towen, nag bakamey waseg ya̱koum.”   
\p
\v 31 Paylat ilana, “Mikaleiwag nises. Kunawes taw towen, kukwaleiwags waseg.”  
\p Iweis min-Yudiy, ilansa, “Nag ivag makaleiwag va̱gan baka̱weiy gamag.”   
\p
\v 32 Min-Yudiy asilivan towen waseg mo ikamat livan towen Yeisuw nilivnek, peinan ilivan, “Beiweigs waklos.”   
\p
\v 33 Paylat mo iyum in wanbunatum, ilana, “Kukines Yeisuw beim.” Im to Yeisuw; Paylat mo ikatigan; ilana, “Tabta ya̱koum min-Yudiy siking, ya̱koum; ne?”   
\p
\v 34 Iw to Yeisuw, ilana, “Sivinam bukukwakin, ne? O adok min-Yudiy bo idibakeims liva̱neig towen.”   
\p
\v 35 Paylat ikatimop anilivan, ilana, “Yey nag gum-Yudiy, yey. Ambod tasiyas tanuwgwes lun nimayeims waseg yey. Aveiyag mukwalbaleb?”   
\p
\v 36 Yeisuw ilana, “Ta-ivag gunakabkaleiwag ven watinow; nag. Magat gunakabkaleiwag ven watinow, gungamag mo bikanaviys va̱gan min-Yudiy nag biyousigs. Tage nag; gunakaleiwag kweitan-wan.”   
\p
\v 37 Paylat ilana, “Tabta king teitan ya̱koum, ne?”  
\p Yeisuw ilana, “Ma̱wana nukulivan. Inag nikopweig wotet towen silma̱nin. Mapuna bo nam ven watinow va̱gan bakatimlakay sinap mounid. Kalisiy asisinap mounid mo biliganes aygag.”   
\p
\v 38 Paylat ilana, “Aveiyag sinap mounid?”  
\s1 Min-Yudiy sivines beiweiys Yeisuw  
\r (Matiw 27:15-31; Mak 15:6-20; Luk 23:13-25)  
\p Paylat ilivan ikous, vayuwein mo inek min-Yudiy, idibakes, ilana, “Nag aban ansinap kalbaleb waseg taw towen.  
\v 39 Tage sagal towen Kaltuwon sinapun balik wa̱deil teitan baspuy bein wamnat. Sagal towen, kavel baspuy beiw? Takaleiwag yakamiy. Adok balik min-Yudiy miking baspuy beiw, ne?”   
\p
\v 40 Iwaks avakaein, ilansa, “Taw towen bises; tage Bala̱bas beim.” Mtowen Bala̱bas tavveinaw teitan.   
\c 19  
\p
\v 1 Paylat mo ikaliwages natakannaviys, vatul waseg iwaways wa̱won Yeisuw.  
\v 2-3 Iwaweiys Yeisuw ikous, tasiyas takannaviy mo isiwa̱kus anapay vatul kulikoul waseg, mamagina doudiw, isenas wakunun, ivaskomis kweim bwabwel waseg, ikululs wamatan, ilansa, “Kalin nuwem min-Yudiy siking ya̱koum”; isiba̱wes-wan; nimes waseg iwaweiys.   
\p
\v 4 Vayuwein Paylat mo in watoulan, idibakes min-Yudiy, ilana, “Kukines gamag towen namey wasigeis yakamiy; kadiloka kukwakins nag aban ansinap kalbaleb waseg.”   
\p
\v 5 Yeisuw mo isap, anapay kulikoul, anakweim bwabwel, Paylat mo idibakes, ilana, “Kukines gimgilitoun towen.”   
\p
\v 6 Tanuwgwes lun situwa̱vek sisiyas siplismans ikines Yeisuw, mo iwaks, ilansa, “Kwatimates waklos!”  
\p Paylat ilana, “Yakamiy kutokes, kunawes, kuweiys; yey nag; nag aban ansinap kalbaleb.”   
\p
\v 7 Tasiyas Yudiy gimgilis mo ilansa, “Peinan taw towen anilivan, ilana, ‘Yey Yowbad Natun yey,’ kadiloka bikanig. Makaleiwag ma̱wan.”   
\p
\v 8 Paylat iligen asilivan towen, singay ivag anpwa̱yat.   
\p
\v 9 Iyum in wanbunatum wanuwan, idibek Yeisuw, ilana, “Avanuy mukunoy nukum?” Tage nag ikatimop anilivan, isesuna ikika̱pay.   
\p
\v 10 Paylat mo ilivan, ilana, “Bo kukwa̱pway ne? Tabta kukwakin yey takaleiwag. Bakaleiwag balikum, o nag, bukukwanig waklos?”   
\p
\v 11 Iw to Yeisuw, ilana, “Misinaka Yowbad beitam aveiyag bukunuwakeig. Kukin gog nag, bo nag. Bukuweig, sinap towen kalbaleb, tage mtowen nimayeig waseg yak, ansinap towen singay kalbaleb.”   
\p
\v 12 Paylat iligen Yeisuw anilivan ikous, mo iyokon va̱gan bilik; tage min-Yudiy iwkuwaks, ilansa, “Kukin bukulik taw towen, Sisal mo bigeg nanon. Peinan taw towen anilivan, ilana, ‘Yey king yey,’ mamagina isilponay Sisal nakaleiwag waseg.”   
\p
\v 13 Paylat iligen asilivan, isin kabkaleiwag kabanen waseg, waven towen ag-Ibliw waseg idokes Gabat, peinan dakul babaw nisesus wavtakon ven, mo imey Yeisuw va̱gan bikaleiwag waseg.  
\v 14 Bo iya̱nay yam towen bikatunags silma̱nin Kaltuwon sigeilin nubweig. Paylat mo idibakes min-Yudiy, ilana, “Kukines miking.”   
\p
\v 15 Tasiyas gog iwkuwaks, ilansa, “Kunawes taw towen, kwatimates waklos.”  
\p Iw to Paylat, ilana, “Tabta ba̱weiy miking, ne?”  
\p Iweis tanuwgwes lun, ilansa, “Making anmwa̱net Sisal.”   
\p
\v 16 Wankuyeim Paylat mo itam Yeisuw va̱gan binawes beiweiys waklos.   
\s1 Ikatikavates Yeisuw waklos  
\r (Matiw 27:32-44; Mak 15:21-32; Luk 23:26-43)  
\p
\v 17 Itokes Yeisuw, isekes anklos va̱gan bikow binow ven to yagan Busabwes (Ag-Ibliw waseg idokes Golgot.)  
\v 18 Ven towen waseg mo ikatikavates Yeisuw, ikayagweg waklos. Asteiy ikatikavates ikayagwegs wasiklos, teitan palatan, teitan palatan, Yeisuw gog wanuwein.   
\p
\v 19-20 Paylat ilel liva̱nen, isen wakunuwatan klos, mamagina, “Gum-Nasalet Yeisuw, min-Yudiy siking.” Nileles gog ag-Ibliw waseg, aga-Lom waseg, o aga-Gilis waseg; min-Yudiy singay babaw ivinis, peinan ven towen kadilakus Yelusalem.  
\v 21 Min-Yudiy babaw mo ivnivins lelel towen: “Min-Yudiy siking,” mapuna tasiyas tanuwgwes lun situwa̱vek mo idibakes Paylat, ilansa, “Awoum kulel: Min-Yudiy siking. Tage kadiloka kulel: Taw towen anilivan, ilana, ‘Min-Yudiy siking yey.’”  
\v 22 Paylat ilana, “Nag; to nalel bo bisesuna, bisigeg.”   
\p
\v 23-24 Tasiyas takannaviy ikatikavates Yeisuw ikous, mo ikawes anakweim, ilagus kalguvas; katanok katanok mo ikawes asikweim. Anakweim mwaynavakaein mo iyousis, ilansa, “Awoum bitabwabwes maynawen kweim, peinan aniwniwoun katanok-wan; ta-ivag ankatuvas. Bitalaves youd kweitan, makav bikalouw bein wapwepway, takines kal nakabivatus biton, towen mo bikow anakweim. Sona bikow. Awoum bitabob.”  
\p E, iva̱ges ma̱wan va̱gan bikamat lelel towen Bukitab nilivnek mamagina.  
\q1 “Ilagus agukweim, ikokews asikweim;  
\q1 makava mo ilaves kweitan youd,  
\q1 idokes kal bikow agukweim tonen.”  
\p Mapuna takannaviys iva̱ges ma̱wan.   
\p
\v 25 Yeisuw anklos walasin itowas inan Meliy, son inan kweitan, sisiy Kilopas nakwav yagan Meliy, sisiy vinen-Magdal yagan Meliy.  
\v 26-27 Yeisuw ikines inan son navamul teitan nitatos, mtowen singay isiwa̱youb waseg, mo idibek inan, ilana, “Inag kukin natum towen.” Mo idibek navamul, ilana, “Kukin inam.” Navamul iligen, tut towen waseg mo itok ineis wanven, imlavag inan tonen.   
\s1 Yeisuw ikanig  
\r (Matiw 27:45-56; Mak 15:33-41; Luk 23:44-49)  
\p
\v 28 Wankuyeim Yeisuw mo ikakin nawotet bo ikous, ilana, “Agudak! Ta-ma̱wan!” (Peinan Bukitab kweiboug nilivnek mamagin.)  
\v 29 Kwavitan kwa̱vig wayn yayan nises; yotout ikawes, isenas wakwa̱vig, ibasis kaligweg yagan yisop wamatan, iyaseles, isekes Yeisuw, imoum.   
\p
\v 30 Wankuyeim, ilivan, ilana, “Bo ikous!” Itagud kayon, mo ikanig.   
\s1 Ibes viligan Yeisuw  
\p
\v 31 Yam towen iyouluks, ikatunags peinan nubweig Sa̱dad towen mamagina Sa̱bat, sagal Kaltuwon waseg; singay ikayuses mamagina siSa̱bat avakaein; mapuna min-Yudiy initougs waseg Paylat va̱gan takannaviys bikatupwes kikeis tasiyas ikayagwegs wasiklos, mo beimats, bikawes bilavewas. Awoum takanigs bikayagwegs ven walasin nubweig to Sa̱bat waseg.   
\p
\v 32-33 Mapuna takannaviy inekes teitan ikayagweg waklos, ikatupwes kaken, ikanig; ikous, mo inekes teitan ikatupwes kaken, ikanig; ikous mo inekes Yeisuw, ikines nanawan bo nikanig, to na-ikatupwes kaken, nag.  
\v 34 Misinaka takannaviy teitan ikow nakayal, ibes viligan, ila̱tay buyav son yevagam.   
\p
\v 35 Yey atamanaw towen akakin, agulivan mounid peinan bo akin wamatag; agulivan towen asekeimiy va̱gan kid bukusimounids yakamiy.  
\v 36-37 Kweiboug Bukitab nilivnek mamagina:  
\q1 “Awoum bikatup tatuwan tonen.”  
\m Kweitan livan nises:  
\q1 “Bo bikines towen nibasis.”  
\m E, takannaviy ivkakes ma̱wan va̱gan bikamat Bukitab liva̱nen Yeisuw silma̱nin.   
\s1 Itakus Yeisuw  
\r (Matiw 27:57-61; Mak 15:42-47; Luk 23:50-56)  
\p
\v 38 Gum-Alimatiy teitan yagan Yosep, kweiboug isimounid Yeisuw waseg, tage nag ika̱mat, peinan anpwa̱yat min-Yudiy situwa̱veks wasigeis. Towen Yosep nag sivinan Yeisuw won tasiyas takannaviys bilaves mav, to initoug waseg Paylat, mo itam Yeisuw won, isek; Yosep ikow inow.   
\p
\v 39-40 Nikodimos mo inek Yosep, kweiboug nikaypuls son Yeisuw, boug waseg. Nikodimos imey kaybuy singay avakaein va̱gan won Yeisuw nag beipwas, mouvitan magina sinwavas kilos; mul son alow nisesus wanuwan kaybuy towen. Kaybuy son itabwes won Yeisuw, iyawanis kweim pwapwa̱kaw waseg, ma̱wan asigulagul tasiyas min-Yudiy.   
\p
\v 41 Walasin ven towen neiweiys Yeisuw, bag kweitan nises, o bag wanuwan alawag kweivaw; kweiboug nag teitan takanig isenas, nag.   
\p
\v 42 Peinan kadiyakus siSa̱bat avakaein, o peinan alawag towen kadiyakus nises, to inawes Yeisuw, itakus.   
\c 20  
\s1 Yeisuw ikit vayuwein  
\r (Matiw 28:1-10; Mak 16:1-8; Luk 24:1-12)  
\p
\v 1 Wik kweivaw nakabsilamaw waseg, walalayis, kakit mo beikous dadub, vinen Magdal, yagan Meliy, in wakalawag, iban dakul bo iyatpinis wawadon, in wadadan.  
\v 2 Meliy isawl, inekes Pita son Yeisuw navamul towen singay isiwa̱youb waseg, idibek tasiyas, ilana, “DaGuyaws alawagan makaw. Bo ikawes, inawes; nag kakakin, seik avanuy misekeyas.”   
\p
\v 3 Pita iliganes anilivan, son Yeisuw navamul tayuwein, mo isaps bineis wakalawag.  
\v 4-5 Isisawls ee... son itamap, Pita ikuyeim.  
\p Towen nitamap in wakalawag itapop, ikin alawag wanuwan, tibutobwa mav; tage nag isiw wanuwan.   
\p
\v 6-7 Wankuyeim Saymon Pita inek, isiw in wanuwan, ikin tibutob palatan; ikin maynatan kweim niyawanis wakunun sinkatupum imasis palatan.  
\v 8 Towen nimug nein wakalawag mo isiw in, ikin, isimounid.  
\v 9 Peinan bo itagouwa̱wes Bukitab nilivnek Mesay beikit kanig waseg.  
\v 10 Tasiyas inavamul asteiy mo iyums ineis wasiven.   
\s1 Nen-Magdal yagan Meliy ikin Yeisuw  
\r (Mak 16:9-11)  
\p
\v 11-13 Meliy gog itamanaw wadadan alawag, ivva̱lam. Igawa ivva̱lam, itapop ikin wanuwan, ikines min-liba̱lab asteiy, asikweim pwapwa̱kaw, isinis nakabmasis Yeisuw, teitan wakunun, teitan wakaken; ikatiga̱nes Meliy, ilansa, “Aveiyag wawun kuvva̱lam?”  
\p Ilana, “Peinan guntovek bo inawes; nag bakakin seik avanuy misekeyas.”  
\v 14 Ilivan ikous, itouvin, ikin Yeisuw nitet; tage nag biwtus Yeisuw.   
\p
\v 15 Yeisuw ikatugan, ilana, “Vin ya̱koum, aveiyag wawun kuvva̱lam? Kal kuninineiv?”  
\p Wananon idoki towen tawtelein kid bag, ilana, “O tamwey, magat bo kukow, kunow, kadiloka kudibakeig avanuy mukusekey, yey mo ban bakow, bamey.”   
\p
\v 16 Yeisuw ilana, “Meliy!”  
\p Itouvin, iwtus, ilana, “O, guntovek!” (Ages tasiyas “Labonay”; aga-Muyuw gog “Guntovek.”)   
\p
\v 17 Iw to Yeisuw ilana, “Awoum kwabikon wa̱woug; awoum. Peinan nag anek Tamag; igaw wankuyeim mo ba̱mwen banek. Nagein kun kudibakes budag agulivan mamagina: ‘Yey bo ba̱mwen banek Tamag, Timamiy, mtowen gunaYowbad, miYowbad, daYowbads babaw ya̱kids.’”   
\p
\v 18 Vinen-Magdal mana̱wen Meliy mo inekes inavamul Yeisuw, ilana, “Bo akin datoveks”; mo ikamtel youd babaw to nilivan.   
\s1 Isap inavamul wasigeis  
\r (Matiw 28:16-20; Mak 16:14-18; Luk 24:36-49)  
\p
\v 19-20 Yam towen kwayav Sa̱bat, inavamul Yeisuw nisesus wasibunatum. Awkwedan bo ikatibog, peinan iwenes min-Yudiy situwa̱vek.  
\p Yeisuw mo isap, itoun wanuwein, ilana, “Beitay nuwamiy yakamiy!”; ikatimlakes naman, viligan.  
\p Bo ibwein ninous tasiyas, peinan ikines sitovek, bo imwa̱saws seikwan.   
\p
\v 21 Vayuwein gog mo ilivan, ilana, “Beitay nuwamiy yakamiy. Tamag nikayabeig, ma̱wan bo bakayabeimiy.”   
\p
\v 22-23 Ilivan ikous, ipwa̱yik wawous tasiyas, mo ilana, “Yowbad Kululuwan biwekeimiy. Kalisiy asisinap kalbaleb bukulavewas, bo bisiw bisigeg. Magat bukulivans bisesus wasigeis, bo bisesus.”   
\s1 Tomas nag isimounid  
\p
\v 24 Yeisuw nisap nilivan ma̱wan wasigeis inavamul tasiyas sinwatan; teitan gog Tomas nag ises wasigeis. Tomas yagan kweitan Papap.  
\v 25 Wankuyeim Tomas inekes tasiyas sinwatan, mo ilansa, “Bo nakakin datoveks.”  
\p Tomas gog idok kid iyaweids, ilana, “Magat bakin naman pwapwat mulin, bakawgil didig waseg, o viligan bwabwagan kayal bakawgil namag waseg, mo basimounid. Kukin gog nag, bo nag.”   
\p
\v 26-27 Yam kweinim kweitoun ikous, inavamul vayuwein ikatuyouns wasibunatum wanuwan nisesus; e, Tomas sisiy nisesus. Yeisuw isap, koukwed katibog kid, itoun wanuwein, ilana, “Beitay nuwamiy yakamiy.” Mo idibek Tomas, ilana, “Kukin namag, viligag; namam kwabkwen, mo kusimounid; awoum kusesuna mav.”   
\p
\v 28 Iwa̱ge Tomas ilana, “O guntovek, gunYowbad yak.”   
\p
\v 29 Yeisuw ilana, “Tayyaweid ya̱koum Tomas, kukineig mo kusimounid peinan bo a̱kit. Tasiyas gog nag ikineigs, o singaya ge isimounids waseg yey, bwanabwein tasiyas adok bimwa̱saws.”   
\s1 Silawun buk towen  
\p
\v 30 Yeisuw nawotet tawtoun singay babaw; navamul yakamey nakakin. Kweiyuy nalel nises wa̱buk towen; babaw nises.  
\v 31 Bo alel tasiyas va̱gan bukuvinis o bukuliganes, mo bukusimounids peinan Yeisuw Mesay, Yowbad natun tonen. Bukusimounids yagan waseg mwamovamiy mo bukuba̱nes.   
\c 21  
\s1 Yeisuw isap wasigeis navamul teinim teiy  
\p
\v 1 (1,14) Yeisuw ikit kanig waseg, sivay isap inavamul wasigeis; sivtounun mo isap mamagina:  
\p Yevagam katiboul wanawoud yagan Tibeliyas. Yeisuw inekes navamul wadadan yevagam towen.  
\v 2 Tasiyas katanok bod nisesus, Saymon Pita, Tomas (mtowen idudouws Papap), Nataniyel (mtowen naven Ken, wawnuwan Galiliy), sisiy Sebidiy nitun, sisiy Yeisuw navamul asteiy.   
\p
\v 3 Saymon Pita mo ilana, “Ban agileloud.”  
\p Tasiyas ilansa, “Simey yak bitaneis.”  
\p Inibwis siwag, ikala̱vis, igilelouds ee... iyam. Ta-kweitan in ikwanes. Makaw-wan.  
\v 4 Walalayis Yeisuw iton wakawalaw; tage navamul nag iwtusis.  
\v 5 Yeisuw idibakes, ilana, “Tawaw! Tabta amiyin?”  
\p Ilansa, “Nag. Makawan!”   
\p
\v 6 Yeisuw ilana, “Kweitan saw kulaves wamika̱tay, mo bukukwanes in.”  
\p Ilaves wot in, mo ikwanes asiyin; nag bikawes, peinan singay babaw. Ta-ma̱wan bidagis in wanuwan wag.   
\p
\v 7 Yeisuw navamul towen isiwa̱youb waseg, mo idibek Pita, ilana, “Mtowen datoveks.” Saymon Pita sona mwadoyan iwwotet, ikakin mtowen natovek, mo isikam anakweim, inuw wayevagam, igay.   
\p
\v 8 Yeisuw navamul tasiyas wa̱wag ikala̱vis ineis wanakaew, isilbiteilis wot peinan bo ika̱lawt in; nag bikadiveiyov mo ita̱lags.  
\v 9 Ineis wanakaew ikines kov son in bo ika̱men, son bled.   
\p
\v 10 Yeisuw idibakes, ilana, “In towen nukukwanes, kumeyes mwasanin.”  
\v 11 Saymon Pita mo itow in wa̱wag, iyous wot, ibiteil in wanakaew, bo ika̱lawt in kavka̱veks lakatutan sinwanim mwana̱toun. Tage nag ikayboulis wot; bwein-wan.   
\p
\v 12 Yeisuw idibakes, ilana, “Kumeis, kukwams.”  
\p Nag kal bikatugan, bilana, “Kavel yak?” Aspwa̱yat bikatiga̱nes. Ikakins gog sitovek towen.   
\p
\v 13 Yeisuw im, ikow bled, ivgen isekes; in-vak mo isekes ma̱wan; ikams.  
\v 14 (-)   
\s1 Kumtakavates aleig sip  
\p
\v 15 Ikams ikous, Yeisuw mo idibek Saymon Pita, ilana, “Yon natun yak. Tasiyas isiwyoubugs. Tabta ya̱koum singay bukusiwyoubug, ne?”  
\p Pita ilana, “Mounid; guntovek yak, kukwakin asiwyoubum.”  
\p Yeisuw ilana, “Kumtakavates aleig la̱miy.”   
\p
\v 16 Sivyuwein Yeisuw idibek Saymon, ilana, “Yon natun yak, tabta bukusiwyoubug, ne?”  
\p Pita ilana, “Mounid; guntovek yak, kukwakin asiwyoubum.”  
\p Yeisuw ilana, “Kumtakavates aleig sip.”   
\p
\v 17-18 Sivtounun Yeisuw idibek Saymon, ilana, “Yon natun yak, tabta bukusiwyoubug, ne?”  
\p Pita mo igeg nanon, peinan Yeisuw nilivan sivtounun, ilana, “Tabta kusiwyoubug?”; to ilana, “O guyaw, youd babaw kukwakin; kukwakina asiwyoubum.”  
\p Yeisuw ilana, “Kumtakavates aleig sip. Mounid adibakeim, igaw wagwa̱dim nukusikam amkweim, nukuninoun ampalawen sivinam. Igaw bukutovek namam bukudimwes, soum teitan biyawen amuwat, bivakabanim binaweim palatan nag ivag sivinam.”   
\p
\v 19 Yeisuw anilivan towen va̱gan bikamtel ama̱wan Pita bikanig, yakawanan Yowbad silma̱nin. Ikous, mo ilana, “Kwabkunig.”   
\s1 Yeisuw navamul towen singay isiwa̱youb waseg  
\p
\v 20 Pita itouvin ikin Yeisuw navamul teitan ikabwa̱kun waseg, mtowen singay isiwa̱youb waseg, o kamkwam waseg nisineikim kadiyakus wavtakon Yeisuw nikatimwa̱lag, ilana, “Tamwey, kal towen bisilkodeim?”  
\v 21 Pita ikin navamul towen, idibek Yeisuw, ilana, “Taw towen, aveiyag bilouvat?”   
\p
\v 22 Yeisuw ilana, “Kukin ba̱tam va̱gan mtowen bisesuna ee... mo ba̱yum bam, awoum bigeg nanoum. Misinaka kwabkunig.”   
\p
\v 23 Yeisuw nagamag iliganes livan towen, idokes kid taw towen nag bikanig; tage Yeisuw na-ilivan, “Mtowen nag bikanig”; nag. Misinaka ilana, “Kukin ba̱tam va̱gan mtowen bisesuna ee... mo ba̱yum bam.”   
\p
\v 24 Yeisuw navamul mtowen nikatimlakeids youd tasiyas, nilel nein wa̱buk; takakins-wan anilivan bo mounid.   
\p
\v 25 Wotet babaw Yeisuw niwtel. Kukin teitan bilel nawotet babaw bein wa̱buk, adok ven watinow mo bika̱lawt buk maynsiyas, tage igawa bilelel.