\id 3JN - Muyuw NT [myw] -Papua New Guinea 1993 (web version -2014) 
\h 3 Yon 
\toc1 3 YON 
\toc2 3 Yon 
\toc3 3 Yon 
\mt1 3 YON  
\ip Yon nakalelel kwatounun let towen-vak silawun sinap mounid.  
\c 1  
\s1 Nakabsilamaw  
\p
\v 1 Tamwey yey, gunalet neiw waseg ya̱koum Gayus. Kalin nuwag avakaein ya̱koum. E, peinan Yeisuw angamag ya̱koum, singay ikalin nuwag ya̱koum.   
\p
\v 2 Gwade, kululuwam tawtoun, mapuna aninitoug Yowbad waseg va̱gan bukumwa̱saw, o bukuses bwein.   
\p
\v 3 Bo amwa̱saw avakaein peinan sidayas nimeis, nisekeigs liva̱neim ya̱koum, peinan amsinap mounid, bwanabwein.   
\p
\v 4 E, baligen livneimiy nitug yakamiy, peinan sinap bwanabwein kuyyousis, mo bamwa̱saw avakaein.   
\s1 Mwasanin ilabeids; mwasanin gog isilbwadeids  
\p
\v 5 Gwade, igaw bukulabes sidayas, o ambwabwal tasiyas bukumtakavates, singay bwein muwotet towen.   
\p
\v 6 Tasiyas asilivan, ilansa, “Mtowen Gayus singay tasiwa̱youb wasigeis yakamey.” Asilivan ma̱wan nisekemas yakamey tayakelesiys. E, sidayas binounas, kadiloka bukutanes bwein, peinan takanaweins Yowbad aygan tasiyas.   
\p
\v 7 Tasiyas bo ilisawes siven silma̱nin Yowbad nawotet; tage nag ininitougs kaeis wasigeis siyas tadadubs, nag.   
\p
\v 8 Kadiloka bitalabes sidayas, idawotets katanok silma̱nin sinap bwanabwein.   
\p
\v 9 Sinap kweitan nalel wagunalet niwekeimiy tayakelesiys yakamiy, tage towen Diyotilep ikaypom kaleiwag, isilbwed gunakaleiwag.   
\p
\v 10 Igaw baw, mo bakamtel ansinap towen kalbaleb, o bakamtel anilivan towen makava ivtokeig livan. E, ansinap kwayuwein kalbaleb peinan nag itam sidayas tayekelesiys, o isilbwed siked tasiyas kalisiy sivines beitams tayekelesiys tasiyas wasigeis, mo ibob siyekelesiy ineis wamnat.   
\p
\v 11 Gwade, awoum kwabkun sinap kalbaleb; sinap bwanabwein kwabkun. Toubweins tasiyas Yowbad angamag; tage takalbalebs nag ikakins Yowbad.   
\p
\v 12 Dimitil ansinap bwein. Sidayas babaw iliva̱nes ma̱wan. Tasiyas asisinap mounid ilivans, ilansa, “Mtowen ansinap bwein.” Yey alivan ma̱wan, o kukwakins agulivan mounid.   
\s1 Taneim-o  
\p
\v 13-14 Sivinag sinap babaw badibakeim, tage nag balel mulet waseg; peinan adok nuwanaw baw, mo bitakaypul soug yak, bitalivan aditeiy.   
\p
\v 15 Kalin nuwag ya̱koum. Sidayas wamapalatan ikalin nuwes waseg yak. Agulivan siwa̱youb kusekes sidayas katanok katanok wasigeis. Taneim-o.  
\p Yey Yon.