\id 1TI - Muyuw NT [myw] -Papua New Guinea 1993 (web version -2014) 1:1-20) 26-SEP-90 
\h 1 Timotiy 
\toc1 1 TIMOTIY 
\toc2 1 Timotiy 
\toc3 1 Tim 
\mt1 1 TIMOTIY  
\ip Kweiboug Pawl isek Timotiy nawotet va̱gan bimtakavates tayekelesiys tasiyas ven Epesos waseg nisesus. Nalet towen ilel inek Timotiy va̱gan bivin mo bikakin ama̱wan bivkek biwotet bwein tayekelesiys pines.  
\c 1  
\s1 Kalin nuwag  
\p
\v 1-2 Kalin nuwag ya̱koum Timotiy. Nukusimounid daGuyaws waseg, mapuna natug mounid ya̱koum. Yey Pawl alel mulet neiw. Mtowen takatinabweids Yowbad nisekeig gunawotet va̱gan bakokew liva̱nen Yeisuw Kelis. Kelis-vak nisekeig gunawotet towen. Mtowen Kelis waseg tanmises va̱gan bilabeids:  
\p Tamads Yowbad son daGuyaws Yeisuw Kelis bisiwyoubum, asteiy son Taman binok nuwes ya̱koum, mo beitaw nuwam.   
\s1 Kadiloka kupiyev livan yaweid  
\p
\v 3-4 Kweiboug gunakaleiwag bo asekeim, mo a̱noy an Masidoniy, alana, “Kusesun ven towen Epesos va̱gan bukuguyes gamag mwasanin kugidamis sikatimlakay kalbaleb; kudibakes, kulana, ‘Awoum bukutaleiliws o bukuta̱kuds sona mikamniman; awoum. Makava taleiliw nag bikatimweisimiy sinapun Yowbad waseg, nag.’”   
\p
\v 5 Tage makaleiwag wasigeis yakamiy va̱gan bigimagim ateimiy, o ninoumiy bikamnat, o bukusimounids beibwein, mo sinap yagan siwa̱youb biton wasigeis yakamiy.   
\p
\v 6 Gamag mwasanin bo iyamkwanes sinap towen, inoyes kweitan ked, livan makaw illivans.   
\p
\v 7 Idokes takatimlakeins Yowbad nakaleiwag tasiyas tatineis, mapuna tawtoun waseg illivans; tage nag ikakins silawun asilivan, o na-ikakins kaleiwag towen.   
\p
\v 8 Takakins Yowbad nakaleiwag bwanabwein, magat bitavna̱ses nakaleiwag towen.   
\p
\v 9-10 Tage nag isen nakaleiwag toubweins pines, nag; nakaleiwag towen pines tasiyas tapiyaveins kaleiwag, o takapidabs, tapiyaveins tapwa̱loul, takalbalebs, takallokays, tawayins timsiyas o insiyas, o takatimateins gamag, tassubwans, o tayablebeins pwa̱daw, o tabakeweins gamag, o tayyaweids, o tasiyas itabudabods mav, o aveiyag waseg bibwabwes sinap bwanabwein, o bibwabwes liva̱nen bwanabwein daYowbads.   
\p
\v 11 E, daYowbads waseg kamnat son mwa̱saw, mtowen nikayabeig va̱gan liva̱nen bakokew gamag babaw wasigeis.   
\s1 Kalin nuwag Yeisuw peinan  
\p
\v 12 Kalin nuwag daGuyaws Yeisuw Kelis waseg, peinan guntawtoun nisekeig silma̱nin nawotet towen, o peinan idokeig tatoukum yey mo isekeig gunawotet.   
\p
\v 13 Kweiboug agusinap kweitan bo ayeg Yeisuw yagan, mo akamliwes inagamag, ayagages. Tage deisina inok nuwan yey, peinan tatagouwaw yey, nag asimounid waseg.   
\p
\v 14 Nasiwa̱youb-vak mo isiwyoubug singay, va̱gan basimounid mo basiwa̱youb Yeisuw Kelis waseg.   
\p
\v 15-16 Livan towen mounid; kadiloka tasimounids waseg. Peinan Yeisuw Kelis neim wadaban pwepway va̱gan kid bikatinabweids takalbalebs ya̱kids. Yey gog bo amug takalbalebs babaw wasigeis; tage bo inok nuwan yey, va̱gan Yeisuw Kelis bikatimlakay nakapatul avakaein waseg singay takalbaleb yey, takalbalebs babaw mo bikakins, o bisimounids Yeisuw waseg, mo biba̱nes mwamoves nag beikous.   
\p
\v 17 Tut nag beikous bikalin nuwads Yowbad, bitayakawanes, nakaleiwag tonen isigeg, Yowbad Towen nag takines, tage isigeg-wan, Yowbad anmwa̱net-wan. Eimen.   
\p
\v 18 Natug yak Timotiy, kweiboug tasiyas palopits nilivnakes muwotet, nagein akalawageim, kadiloka bukuwteles asilivan ma̱wan, mo bukutawtouns wotet towen waseg.   
\p
\v 19-20 Kadiloka kusimounid bwein, o kununuway sinap bwein waseg. Gamag mwasanin bo ipiyaves sinap bwanabwein mo ikalouws kid; asteiy tasiyas Aymenay son Alekisan, bo asekes Seitan waseg va̱gan bika̱kin mites; awoum ge biyages Yeisuw.   
\c 2  
\s1 Nitoug Yowbad waseg  
\p
\v 1 Nakabsilamaw sinap bwanabwein, nitoug. Kadiloka tut babaw kuninitougs pines sidayas; kadiloka kugilagels Yowbad waseg va̱gan mo bilabes gamag babaw; nitoug waseg kadiloka bikalin nuwamiy peinan Yowbad ilabes tasiyas.   
\p
\v 2 Kadiloka tanitougs pines tasiyas king sisiyas takaleiwags babaw, va̱gan bimtakavateids mo bitasesus bwein, mamagina niwal waseg, o bitavna̱ses Yowbad nakaleiwag beibwein, adsinaps bwanabwein waseg.   
\p
\v 3-4 Yowbad sivinan adsinaps ma̱wan. Mtowen ikatinabweids, o sivinan kid bikatinabwes gamag babaw, o sivinan gamag babaw bikakins sinap mounid.   
\p
\v 5-6 Sivinan bitakakins kid Yowbad anmwa̱net. Tayuwein-vak anmwa̱net bilabeids va̱gan Yowbad bikalin nuwan wasigeis ya̱kids; mtowen gimgilitoun Yeisuw Kelis, won tatonen itam ikanig va̱gan biymiyiseids ya̱kids. Tutan bo ikadilok mo ikamtel Yowbad nakaleiwag towen, klos waseg nikanig.   
\p
\v 7 Mapuna bo isekeig gunwotet va̱gan bakokew liva̱nen Kelis, bakatimlakes tobwag ven gimgilis sinap mounid va̱gan bisimounids waseg. Nag bayaweid, nag. Mounid Yowbad nisekeig gunawotet towen.   
\p
\v 8 Sivinag tawaw ven babaw bininitougs Yowbad waseg. Awoum bikameiliws o bikamnimans; awoum. Bweina bitamnawes nimes mo binitougs sinap bwanabwein waseg.   
\p
\v 9-10 Vinay kadiloka bisikams dibes bwanabwein, awoum bunadog bibasis bibabaw; awoum ta̱kas singay bitoumis bibabaw; awoum botobot babaw bisenas wakayous; awoum dob bitoumis bein wanakaew. Deisa bisiwa̱youbs son siwotet bwanabwein biwteles. Sinap towen bwanabwein tapwa̱loul silma̱nin.   
\p
\v 11 Tapwa̱loul waseg kadiloka vinay bikka̱pays-wan, biliganes livan.   
\p
\v 12 Nag ba̱tam vinay bikatimlakes tawaw o bikaleiwags wasigeis; awoum. Kadiloka bika̱pays-wan.   
\p
\v 13 Peinan Yowbad wanmugwana ibun Adam; Iv wankuyeim.   
\p
\v 14 O Seitan nag ikatidev Adam; nag. Ikatidev gog kuda̱vin; ansinap mo ivag kalbaleb.   
\p
\v 15 Tage vin kavel bisimounid Yeisuw waseg, o bisiwa̱youb, nag bikalimwa̱saw, tage ansinap kamnat, Yowbad mo bikatinob vin mana̱wen, inakopway waseg.   
\c 3  
\s1 Tayekelesiys sitovek ansinap  
\p
\v 1 Livan towen mounid: Kukin kal beitam nanon va̱gan bimlavag tayekelesiys sitovek teitan, bwein-wan, peinan wotet towen bwanabwein.   
\p
\v 2 Tage kadiloka beivag ansinap kamnat; nakwav anmwa̱net; takkapatul; tavvnasein kaleiwag; awoum biwliy Yowbad nawotet waseg; kadiloka bivna̱ses anbwabwal beibwein; o bikatimlakay sinapun Yowbad.   
\p
\v 3 Awoum bimwamoum bikabala̱wein; awoum bikammeiliw, tage biyama̱num wasigeis gamag; awoum bikamniman; awoum bikaya̱pam youd babaw silma̱nin.   
\p
\v 4-5 Kadiloka nakaleiwag bivag beibwein inagamag wasigeis; kadiloka nitun bivna̱ses times, bigoulus o bibkunis anilivan. (Kukin nag bikaleiwag beibwein inagamag wasigeis, ta-ma̱wan bimtakavates Yowbad natayekelesiys, nag.)   
\p
\v 6 Awoum teitan taw teivaw niyekelesiy kuyamwenes, va̱gan nuwanaw mo bitovek tayekelesiys wasigeis; awoum. Adok mo bikaypom sinap, bikalouw; ma̱wan Seitan nikaypom kweiboug mo ikalouw.   
\p
\v 7 Kadiloka tayekelesiys sitovek beivag ansinap bwanabwein wamtes tasiyas watoulan; awoum tasiyas bivtokes livan mamagin beikon Seitan inasik waseg mo bikalouw.   
\s1 Tasiyas tulals asisinap  
\p
\v 8 Kadilok tasiyas tulals beivag asisinap bwanabwein; awoum biwliyes Yowbad nawotet waseg; awoum binuwanaw wudous; awoum kutukut bimwamoums bikabala̱weins; awoum bikaypamwes youd babaw.   
\p
\v 9 Kadiloka biyyousis sinapun Yeisuw, ninous kamnat waseg.   
\p
\v 10 Wanmugwana kuyakwanes mitulals; magat asisinap beibwein mo kuyamwenes bimlavags tulals.   
\p
\v 11 Kadiloka sikwavas beivag asisinap kamnat, bwanabwein; awoum bika̱kat wudous; awoum bimwamoums mananan; kadiloka bitoukums wotet babaw waseg.   
\p
\v 12 Tasiyas tulals awoum biwosals; kadiloka beibwein sikaleiwag wasigeis nitsiyas sisiyas sigamag.   
\p
\v 13 Tasiyas tulals kalisiy bitoukums siwotet waseg mo beibwein bulges gamag babaw wasigeis, o bikapwapouts bwanabwein peinan inmises Yeisuw Kelis bilabes.   
\s1 Sinapun datapwa̱louls kweiboug ikawum-wan  
\p
\v 14 Mulet towen nalel, neiw; tage sivinag nuwanaw baw.   
\p
\v 15 Kukin gog bayouviy peinan gunaked nag, kuvin let towen va̱gan mo bukukwakin kaleiwag silma̱nin Yowbad nabunatum, mtowen Tamwamov, o nabunatum ya̱kids tayekelesiys babaw. Yowbad mtowen dakakols. Sol imlavag sinap mounid kakol wakunuwatan.   
\p
\v 16 Tage mounid sinapun datapwa̱louls singay avakaein.  
\q1 Wawun datapwa̱louls gimgilitoun towen,  
\q1 Kululuwan waseg mo itawtoun wamtes tasiyas min-liba̱lab.  
\q1 Liva̱nen towen ven babaw niliganes.  
\q1 Gamag babaw isimounids waseg, mo iyum, in walba̱lab.   
\c 4  
\s1 Igaw gamag mwasanin bipiyaves sinap bwanabwein  
\p
\v 1-2 Yowbad Kululuwan anilivan kamnat, ikatimlakeids, va̱gan bitakakins nakabiyokous tut waseg, gamag mwasanin mo bipiyaves tapwa̱loul bwanabwein, mo biliganes Seitan anilivan yaweid, son-vak asilivan tasiyas bwagaws kweitan kweitan. Takatimlakeins livnes tasiyas singaya tayyaweids, takatidavins gamag; asisinap kalbaleb, tage nag igeg ninous.   
\p
\v 3 Ilansa, “Awoum kuveivays” o “Awoum kukwams kan towen.” Tage kusimounids o kukwakins sinapun Yowbad, peinan ibun kan babaw; sivinan kid bitakams, mo bikalin nuwads waseg.   
\p
\v 4-5 E, Yowbad nibun kan babaw, mapun babaw bwein. Awoum tapiyev; awoum. Tage bweina bitanitougs Yowbad waseg, anilivan bitanuways, bikalin nuwads kads peinan, wankuyeim mo bikimtuw wouds bitawtoun.   
\s1 Yowbad natouwat bwanabwein  
\p
\v 6 Magat bukkwatimlakes tayekelesiys sinap towen, mounida Yeisuw Kelis natouwat bwanabwein yak; peinan liva̱nen Yeisuw Kelis nukuligen, livan towen bwanabwein, bikatimweis amisinap beibwein.   
\p
\v 7 Tage makava taleiliw awoum kuligen. Nag Yowbad antaleiliw ma̱wan va̱gan gog bukuligen. Kadiloka bukutoukum va̱gan kululuwam bitawtoun sinapun Yowbad waseg.   
\p
\v 8 Wouds bitavna̱ses mo bitamwa̱saws yagada mwa̱saw; tage kululuwads bitavna̱ses mo bitamwa̱saws avakaein, tut towen o tut beim walba̱lab.   
\p
\v 9 Livan towen mounid. Kadilok gamag babaw bitimakes.   
\p
\v 10 Nitatawtouns singay silma̱nin wotet towen tawteles, peinan tanamis waseg Tamwamov Yowbad va̱gan bilabeids, peinan towen takatinabwein gamag babaw. Mounid ikatinabweids ya̱kids, peinan tasimounids waseg.   
\p
\v 11 Kadiloka kuguyes gamag va̱gan bikakins sinap towen.   
\p
\v 12 Awoum bikasigumims peinan tawlat yak; tage beivag amsinap beibwein, amlivan bwein, muwotet bwein, kusiwa̱youb beibwein, kusimounid, amsinap kamnat waseg, va̱gan tayekelesiys bikines amsinap mo bitakayasis.   
\p
\v 13 Bweina bukutoukum tapwa̱loul waseg. Kutitoukum ee... igaw mo baw. Bukitab kuvnivin va̱gan gamag biliganes, kuguyes, kwatimlakes.   
\p
\v 14 Bweina bukuvnas Yowbad nasiwa̱youb Kululuwan Towen nisekeim yak, ma̱wan kweiboug tasiyas mituwa̱veks nisenas nimes wa̱woum mo ilivnakes Yowbad nasiwa̱youb waseg yak.   
\p
\v 15 E, Yowbad bo isiwyoubum va̱gan kid bukuwotet beibwein. Kadiloka kutoukum va̱gan gamag babaw bikineims, bilansa, “Taw towen bo itawtoun Yowbad nawotet waseg.”   
\p
\v 16 Kuvna̱seim yak va̱gan amsinap bidumwal o mukwatimlakay beibwein, Yowbad mo bikatinabweimiy simwey tasiyas tanageins amlivan.   
\c 5  
\s1 Sinapun siwa̱youb gamag wasigeis  
\p
\v 1-2 Awoum kukwa̱nes tamumwey, tage kuyyowal ma̱wana timom wasigeis; o tawbwats ma̱wana budam; nummwey ma̱wana inom; vinabwats ma̱wana nimut, amsinap bikamnat wasigeis.   
\p
\v 3 Kumtakavates siyas nakwabs gewa̱gews, ta-ivag tawlisiyas.   
\p
\v 4 Tage kukin nakwab nitun sam o tibun sam, kadiloka bisiwyoubus nakwab mana̱wen bikatimapus nasiwa̱youb kweiboug wasigeis tasiyas. Sinap towen bwanabwein wamatan Yowbad.   
\p
\v 5 Tage nakwab na̱wen naguwa̱gew, anmwa̱net bises, binnimis Yowbad anmwa̱net bileb, yam babaw o boug babaw bininitoug waseg o biyowal waseg.   
\p
\v 6 Kukin gog nakwab bikalimwa̱saw-wan, o bikamkwam-wan, mamagina takanig, kululuwan mana̱wen.   
\p
\v 7 Kaleiwag towen kuguyes va̱gan kid asisinap bikamnat.   
\p
\v 8 Kadilok gamag tatanok tatanok bimtakavates asigamag. Kukin teitan gamag nag bimtakavates tasiyas wanbunatum nisesus, mtowen mamagina tapiyavein Yowbad nakaleiwag. Tasiyas igaw dadub nag ivag asisinap ma̱wan, peinan singay kalbaleb.   
\p
\v 9-10 Magat vin bises, namwan anmwa̱net nikanig, o ansinap siwa̱youb, peinan nituyes gamagal, o nimtakavates anbwabwal, o nivna̱ses tasiyas tayekelesiys, o nilabes tasiyas abes igeg wasigeis, o nawotet babaw bwanabwein, igaw anbweilim sinawanim sinawatan, bweina kutam va̱gan tayekelesiys bimtakavates mana̱wen vin.   
\p
\v 11 Tage nakwabs tasiyas igaw vinabwats awoum, peinan igaw ninous bibabaw o binumlaves Kelis, mo bivevaws.   
\p
\v 12 Kweiboug ika̱touts asilivan waseg Kelis, wankuyeim mo biwidis; kalbaleb asisinap ma̱wan.   
\p
\v 13 E, adok mo bikatudabs mav, bunatum babaw bikikeipuls, liva̱nen gamag babaw billivans, mamagina nabugmatuws tasiyas, kakat wudous.   
\p
\v 14 Adok nakwab tasiyas vinabwats kadilok bivevaws, bituyes nitsiyas, bimtakavates siven. Awoum tayekelesiy na̱tan beivay ansinap kalbaleb, mo tasiyas nikamliweids bikines, mo biyyageids; awoum.   
\p
\v 15 Adok nakwab mwasanin bo ikalouws, inoyes Seitan inaked.   
\p
\v 16 Kal vin iyekelesiy, o taliven nakwabs nisesus, kadiloka bimtakavates tasiyas. Awoum wotet avakaein wasigeis tayekelesiys babaw, peinan tayekelesiys bimtakavates nakwabs tasiyas naguwa̱gews.   
\p
\v 17 Kuvna̱ses beibwein tasiyas takalleiwags wasigeis tayekelesiys yakamiy. Tasiyas igguyeimiy Yowbad anilivan waseg, o ikatimlakeimiy sinapun Yowbad, kadiloka kumtakavates beibwein.   
\p
\v 18 Livan nises Bukitab waseg mamagina,  
\q1 “Bulumakaw iwwotet wit, bweina beikam wit waseg.”  
\p Livan kwayuwein nises,  
\q1 “Tawwotet, bweina bikow maysan wotet.”   
\p
\v 19 Awoum gamag makava biyateles wasigeis tayekelesiys situwa̱veks; awoum. Kukin gamag asteiy o asteitoun bikakins sitovek ansinap kalbaleb, asilivan mounid bilivans mo bukuligen va̱gan biyateles tamwey towen.   
\p
\v 20 Kuguyes tasiyas takalbalebs wamtes gamag babaw, gamag babaw mo biwenes sinap kalbaleb.   
\p
\v 21 Adibakeim yak wamatan Yowbad, o wamatan Yeisuw Kelis, o wamtes min-liba̱lab tasiyas Yowbad nagamag, kaleiwag siyas nalel let towen waseg tamtakavatein ya̱koum. Kaleiwag tasiyas kuvkek bimlavag katanok-wan. Awoum teitan gamag kusiwyoub mo son kuyageg; awoum.   
\p
\v 22 Awoum nuwanawa bukusek nawotet tayekelesiy teitan va̱gan bimlavag mamagina misinal; adok bukutagouwaw ansinap kalbaleb nises, gamag mwasanin mo bidokes bukuleb towen ansinap kalbaleb, o bidokeims-vak takalbaleb ya̱koum. Kuvnas amsinap tatoneim beibwein.   
\p
\v 23 Awoum yevagam mav kumwamoum, tage wayn kakit kumwamoum nuwam peinan, o peinan amlel nises wa̱woum.   
\p
\v 24 Gamag mwasanin tawtusis-wan asisinap kalbaleb, mapun nuwanaw bilivatus kalbaleb. Tage mwasanin gamag asisinap kalbaleb ikawumes, tut wanakougwaw mo bilivatus kalbaleb.   
\p
\v 25 Sinap bwanabwein ma̱wan, babaw gamag bikinbunikes; kukin gog bisowmes, igaw wankuyeim mo bikamat.   
\c 6  
\p
\v 1 Tasiyas tawwotet, kukin beitams situwa̱veks siwotet waseg, kadiloka bivna̱ses, bikaninaways ages. Kukin gog nag, adok tasiyas watoulan mo biyages datapwa̱louls o daYowbads waseg.   
\p
\v 2 O kukin tasiyas situwa̱veks biyekelesiys mo bimlavags mamagina tuwsiyas, awoum tasiyas tawwotet bikatudabs peinan situwa̱vek niyakelesiys; awoum. Tage bweina bitoukumsa singay, peinan situwa̱veks sisiyas nisimounids waseg Yeisuw mapuna bisiwyoubus tasiyas situwa̱veks.  
\s1 Kadiloka bukumtibabeits  
\p Kaleiwag tasiyas kuguyes o kukwatimlakay tayekelesiys wasigeis.   
\p
\v 3-5 Kukin kal nakatimlakay kweitan, o bipiyev bwanabwein liva̱nen daGuyaws Yeisuw Kelis, o bipiyev katimlakay silma̱nin sinap bwanabwein; mtowen takaypamwein sinap tage nag ikakin sinap tatonen; ansinap igeg peinan sivinan kamniman, livan babaw wasigeis. Gamag tasiyas asisinap ma̱wan, singaya takammnimans, bikameiliws, bikavikuns, biyagays, bitilikons; e, tuta babaw mo bikammnimans sisiyas wasigeis, peinan ninous kalbaleb, o peinan ipiyaves sinap mounid, idokes kid sinapun tapwa̱loul biyousis mo bikawes siwliyoug babaw va̱gan kid bimwa̱saws.   
\p
\v 6 Nag gog. Tage tayekelesiys tasiyas tamtibabeits, asisinap bwanabwein, mo bimwa̱saws kid.   
\p
\v 7 Peinan nitasaps wadaban pwepway dawliyougs nag; igaw bitalisawes ven towen, nag kweitan youd bitakawes, nag.   
\p
\v 8 Tage tut nagein, kukin sam kads son adakweims, bweina beitout nanouds.   
\p
\v 9 Tasiyas gog sivines sivavag bibabaw, Seitan biyakwanes mo beikons anasik. Tasiyas ninous nag, beivag asivikeiy vavag kalbaleb waseg. Asivikeiy bikalawages mo biyagages.   
\p
\v 10 Kukin kalisiy sivines siwliyoug bibabaw, mo inoyes ninous silma̱nin youd babaw singaya kalbaleb. Peinan gamag mwasanin sivines siwliyoug bibabaw mo bipiyaves sinapun Yowbad, o simouvit babaw mo ilivatus.   
\p
\v 11 Tage Yowbad angamag ya̱koum, sinap towen kupiyev. Kuyyokon va̱gan beivag amsinap didumwal, kamnat, bukusimounid Yowbad waseg, bukusiwa̱youb, bukukwapatul, bukumma̱num simwey wasigeis.   
\p
\v 12 Kutawtoun va̱gan bukunamis beibwein mo bukutakayway; kuyous mwamovam nag beikous, peinan tut kweiboug nukukwa̱mat musimounid wamtes gamag babaw, mo Yowbad ikatigikeim silma̱nin mwamovam nag beikous.   
\p
\v 13-14 Wamatan Yowbad mtowen tayamouvein youd babaw, o wamatan Yeisuw Kelis, (towen wamatan Ponitiy Paylat liva̱nen Yowbad nilivan bwein), e, wamtes tasiyas asteiy adibakeim yak kuvvnas Yowbad nakaleiwag beibwein; awoum kakit bika̱bwag. Kadiloka kuvvnas nakaleiwag ee... mo bisap vayuwein daGuyaws Yeisuw Kelis.   
\p
\v 15-16 Peinan tutan bikadilok Yowbad waseg mo bispuy Yeisuw bimekeids. Takaleiwag bwanabwein, mtowen anmwa̱net Yowbad, king babaw siking towen, o guyawaw siguyaw; mtowen anmwa̱net isigeg-wan, naven nag takikines peinan singaya kamnat; kweiboug ta-kweitan gamag bikin magin, o nagein gog ta-kal bikin, naguyaw o natawtoun isigeg-wan. Eimen.   
\p
\v 17-19 Kudibakes tasiyas guyawaw ven watinow, kulana, “Awoum kwaypamwes sinap yakamiy; awoum bukunnamis waseg mivavag va̱gan kid bilabeimiy; awoum. Tage kadiloka kunmises Yowbad, towen tavvagein youd babaw va̱gan bitamwa̱saws waseg. Kadiloka kusiwa̱youbs; miwotet bwanabwein bibabaw; kuvvageins mivavag, va̱gan kid maysan tawtoun igaw mo bukulivatus, towen mwamovamiy mounid-wan.”   
\p
\v 20-21 O Timotiy, towen nukukow, kuvnas beibwein. Livan mwasanin gamag idokes sinap; nag gog, kalbaleb. Awoum. Kulavew! Peinan tasiyas asilivan nag ilatanes, o gamag mwasanin niyousis waseg, mo iyamkwanes sinamis Yowbad waseg.  
\p Yowbad bisiwyoubum yak.  
\p Yey Pawl.