\id 1TH - Muyuw NT [myw] -Papua New Guinea 1993 (web version -2014) 1:1-10) 13-SEP-90 
\h 1 Tesalonik 
\toc1 1 TESALONIK 
\toc2 1 Tesalonik 
\toc3 1 Tes 
\mt1 1 TESALONIK  
\ip Kweiboug Pawl ita̱vin, in Tesalonik, ikatimlakes sinapun Kelis, mo ilisawes, inoun. Wankuyeim gog mo ikayeb Timotiy, bein biguyes; ikous, mo iyum inek Pawl, ilana, “Min-Tesalonik isimounids bwein, issiwa̱youbs.” Mapuna Pawl ikalin nuwan, ilel silet towen, waseg ikatimlakes o iguyes silma̱nin Yeisuw inaked.  
\c 1  
\s1 Nakabsilamaw  
\p
\v 1 Yey Pawl sigwey Saylos son Timotiy, malet niwekeimiy min-Tesalonik yakamiy nukuyekelesiys Tamads Yowbad waseg, o daGuyaws Yeisuw Kelis waseg. Yowbad bo bisiwyoubumiy, mo beitaw nuwamiy.   
\s1 Min-Tesalonik asisinap bwanabwein  
\p
\v 2-3 Tut babaw ikalin nuwem daGuyaws waseg, peinan amisinap bwanabwein. Kaninitoug daGuyaws Yowbad waseg, kaninuweimiy, kakavvatag yigamiy, peinan nukusimounids Yeisuw waseg, o miwotet waseg sona siwa̱youb, o kunmises va̱gan daGuyaws Yeisuw Kelis bikatinabweimiy. E, amisinap ma̱wan bwanabwein, Tamads Yowbad wamatan.   
\p
\v 4 E sigwey, kakakin-wan Yowbad bo isiwyoubumiy mapuna mo ikatigikeimiy angamag yakamiy.   
\p
\v 5 Kweiboug nukuliganes amalivan bwanabwein peinan nakakatimlakeimiy liva̱nen Yeisuw. Nag kukwatilutegs mav, nag. Tage Kululuwan Yowbad waseg livan towen, mapuna itawtoun wasigeis yakamiy, o yakamey singay kasimounid waseg. O nukukines amasinap igaw simayas yakamiy nitasesus, mo nukutakayasis.   
\p
\v 6 Abamiy singaya kalbaleb, tage Kululuwan Yowbad nilabeimiy mo kumwa̱saws, nukutakayasis amasinap yakamey, ma̱wan daGuyaws bo kutakayasis, peinan anilivan bo kutimakes.   
\p
\v 7 Amisinap bwanabwein, mamagina sikabtaka̱yas yakamiy, tasiyas tayekelesiys ven Masidoniy waseg, o ven Akay waseg.   
\p
\v 8 E, nukusimounids Yowbad waseg, bulagan amisinap bwanabwein mo inekes ven babaw gimgilis, mo iliganes liva̱nen daGuyaws Yeisuw, tasiyas min-Masidoniy sisiyas min-Akay. Mapuna nag ivag sivinem bakalivan bulagan misimounid, peinan bo ikakins nanawan.   
\p
\v 9-10 Tasiyas gog livneimiy isekemas yakamey, peinan kweiboug nakasap wasigeis yakamiy mo nukuliganes agem, nukupiyaves tobwag yowbad, o nukutams Yowbad mounid waseg, va̱gan Tamwamov Towen kukwanawes aygan, o bukukwayamats Natun tonen igaw beinoy walba̱lab beim. Mtowen Yeisuw, igaw kanig waseg Yowbad niyakit, mo itamanaw vayuwein va̱gan kid bikatinabweids. Awoum igaw Yowbad bikamta̱nids adsinaps kalbaleb silma̱nin.   
\c 2  
\s1 Pawl nawotet ven Tesalonik waseg  
\p
\v 1 Sigwey, kuninuways kweiboug nag kawekeimiy mav, peinan anagin mawotet nakaban wasigeis yakamiy.   
\p
\v 2 Deisin-wan min-Pilipay bo iyagagemas, amamwasin, tage nag ka̱gwey; kakapwapout-wan. DaGuyaws bo ilabem mo kadibakeimiy liva̱nen Yowbad, va̱gan bukumwa̱saws kid. Deisin-wan gamag mwasanin isibwademas, tage bo kageiguy.   
\p
\v 3 Mageiguy waseg nag kayaweid; nag sinapun geinawl, nag. Amalivan waseg nag bakakatidaveimiy, nag.   
\p
\v 4 Tage peinan Yowbad itam nanon, idoki kadiloka bisekem liva̱nen bwanabwein, mapuna kageiguy. Nag va̱gan gamag bikalin nuwes; nag. Tage sivinem Yowbad bikalin nuwan. Peinan Yowbad ikakin aveiyag wanuwads nises.   
\p
\v 5 Kuninuways amalivan; nag ka̱teiy ninoumiy amalivan kamnag waseg; nag. Nag tayyaweid yakamey; nag. Nag amalivan kamnag va̱gan bakakwey mivavag; nag. Yowbad ikakin amalivan mounid.   
\p
\v 6-7 Nag ivag sivinem gamag bikavasimas; nag. Takinew yakamiy, o ven mwasanin gimgilis; nag. Tage bweina bakalivan aveiyag bukusekemas, peinan takaweins liva̱nen Kelis yakamey. Nag gog, yakamey tamma̱num wasigeis yakamiy. Amasinap ma̱wana vin na̱tan bituyes nitun, o bivna̱ses beibwein.   
\p
\v 8 E, nakakalpwa̱kit wasigeis yakamiy; sivinem kid liva̱nen Yowbad bakasekeimiy mo bitamsamwas simayas yakamiy, peinan singay sivinem yakamiy. Atem meivak-wan nakatam pinamiy yakamiy.   
\p
\v 9 Sigwey, kuninuways kweiboug mawotet avakaein wamiven nakases, kawwotet iboug ee... iyam, kaem silma̱nin. Nakasekeimiy bwanabwein liva̱nen Yowbad, tage awoum beivag mimouvit silma̱nin kaem.   
\p
\v 10 Kukwakins-wan, o Yowbad-vak ikakin, igaw simayas yakamiy nitasesus, amasinap bwanabwein, didumwal; nag kayagageimiy tayekelesiys yakamiy; nag.   
\p
\v 11-12 Kuninuways nakaguyeimiy tatanok tatanok yakamiy, ma̱wana timamiy yakamey; sivinem bakalabeimiy o bakakimtuweimiy va̱gan amisinap beibwein mo bikalin nuwan Yowbad. Peinan bo ikatigikeids silma̱nin nakaleiwag son nakamnat.   
\p
\v 13-14 Sigwey, tut babaw ikalin nuwem Yowbad waseg, peinan liva̱nen Yowbad nakalivan nukuliganes, nag mamagina gamag asilivan; nag. Peinan kukwakinsa Yowbad anilivan tatonen. Nukuliganes liva̱nen Yowbad, kuninuways mo nukusimounids waseg. Kusimounids mo nukutakayasis tasiyas tayekelesiys. E, nukutakayasis asisinap min-Yudiy tasiyas niyakelesiys Yeisuw Kelis waseg, peinan miven gimgilis bo iyagageimiy yakamiy, ma̱wan-vak Yudiy gimgilis niyagages Yowbad angamag tasiyas.   
\p
\v 15-16 Min-Yudiy kweiboug neiweiys tasiyas palopits, wankuyeim-vak daGuyaws Yeisuw neiweiys. Wankuyeim mo ikayabemas yakamey. Yowbad igeg nanon wasigeis min-Yudiy tasiyas, peinan tasilabods. E, sivines bisilbwadem; mata ge bakasekeimiy liva̱nen Yeisuw, tobwag ven gimgilis yakamiy, mo Yowbad bikatinabweimiy. Singay ikatimweis asisinap kalbaleb mo ivakaein. Nakabiyokous waseg, Yowbad ankavikun mo ilivatus tasiyas.   
\s1 Pawl sivinan vayuwein binekes tasiyas  
\p
\v 17 Sigwey, nakalisaweimiy tut kadiyakus waseg, tage nuwaneimiy singaya wasigeis yakamey nises. Sivinem kid vayuwein bakaw kalakwaneimiy.   
\p
\v 18 Yey Pawl tut babaw ayyokon, bo nag. Peinan Seitan bo isilbwed maked.   
\p
\v 19-20 Nuwaneimiy singaya wasigeis yakamey nises. Igaw daGuyaws Yeisuw beiyum beim, nag kalisiy wasigeis bakamwa̱saw; misinaka yakamiy. E, kannamis va̱gan igaw avei-tut Yeisuw beiyum beim, mo beimwan wom wasigeis yakamiy.   
\c 3  
\p
\v 1-2 Singaya nuwaneimiy, kawna̱mat waseg, kalana, “Kadiloka Timotiy takayabes binekes. Bweina aditeiy bitases Atens.” Mtowen Timotiy neiw, bwadads mtowen; simey kakanow aygan Yowbad, kageiguy bwanabwein liva̱nen Kelis. Nakakayeb Timotiy neiw va̱gan bikimtuweimiy bukutawtouns o bukusimounids beibwein Kelis waseg.   
\p
\v 3 Deisina gamag bo iyagageimiy, tage Timotiy beiw biguyeimiy; mata ge bukukwalouws. Kukwakinsa tut towen bo bigeg a̱bads.   
\p
\v 4 Kweiboug wamiven nitasesus simayas yakamiy, nakalivan kalana, “Igaw abamiy bigeg.” Nagein kukines bo ikamat anagin.   
\p
\v 5 Akakina abamiy igeg, singaya nuwaneimiy waseg yey nises. Ta-ma̱wan beitout nanoug o bakaptuleig; nag. Mapuna mo akayeb Timotiy, beiw ilakwaneimiy, va̱gan bulagan misimounid bimey bidibakeig. Peinan agupwa̱yat waseg mtowen takatsilakay; adoki bikatsilakeimiy mo biyageg gunawotet wasigeis yakamiy.   
\p
\v 6 Misiya̱mun Timotiy neiw, neiyum gog neim, mo imey bulgamiy ilana, “Min-Tesalonik tasiwa̱youbs, isimounids bwein waseg daGuyaws, tut babaw ininuweids-wan, sivines kid bukunekes bukulakwanes.” Yakamey-vak ninom bo ma̱wan-wan, sivinem bakawekeimiy bakalakwaneimiy.   
\p
\v 7 Kaligen bulgamiy yakamiy, mo itout ninom. Tage abem bo igeg, tage deisa kamwa̱saw-wan, peinan nukusimounids daGuyaws waseg.   
\p
\v 8 Kukin bukutoukums waseg mo beimwan wom.   
\p
\v 9 Ta-ma̱wan bakavkek bakaya̱kawn Yowbad waseg, mamwa̱saw singay avakaein wamatan Yowbad pinamiy yakamiy.   
\p
\v 10 Yam babaw o boug babaw singaya kaninitoug pinamiy yakamiy, kalana, “O Guyaw, sivinem bakakin migis tasiyas. Kukin nag isimounids bwein, bakakimtuwes mo bitawtouns.”   
\p
\v 11 Sivinag Tamads Yowbad son daGuyaws Yeisuw bikaliyow gunaked mo baw.   
\p
\v 12 Anitoug waseg, alana, “Kwatimweis sisiwa̱youb bivakaein wasigeis sisiyas, o wasigeis gamag meivek-wan, ma̱wana yakamey masiwa̱youb wasigeis tasiyas.   
\p
\v 13 “Igaw maGuyaw Yeisuw beiyum beim siney tasiyas angamag min-liba̱lab, mo tasiyas bitamanaws wamatam ya̱koum, Yowbad Timem, sona ates gimagim-nen, asisinap tawtoun, kamnat.” Gunanitoug pinamiy yakamiy ma̱wan.   
\c 4  
\s1 Adsinaps beibwein mo bikalin nuwan Yowbad  
\p
\v 1 Sigwey, kweitan livan-vak nises, waseg baguyeimiy daGuyaws Yeisuw peinan. Kweiboug nakakatimlakeimiy mo kukwakins amisinap bwanabwein, waseg Yowbad ikalin nuwan. Nagein amisinap ma̱wan, tage kadiloka kwatimweisis amisinap bwanabwein bivakaein.   
\p
\v 2-3 Kukwakins-wan daGuyaws Yeisuw nakaleiwag bo nakasekeimiy. Peinan Yowbad sivinan bikayuseimiy silma̱nin veivay mounid. Awoum kwaninavaysa mav; awoum.   
\p
\v 4 Tatanok tatanok yakamiy kadiloka bukuninuways veivay mounid, amisinap kamnat waseg mo bukuvays.   
\p
\v 5 Vikeiy awoum bikalawageimiy mo bukugeinawls ma̱wana tasiyas tadadubs, peinan nag ikakins Yowbad.   
\p
\v 6 Awoum teitan yakamiy bigeinawl mo biyageg son nakaveivay. DaGuyaws mo bimop asisinap tasiyas takalbalebs. Kweiboug bo kakatiboug nuwamiy, mageiguy tawtoun waseg.   
\p
\v 7 Yowbad nag ikatigikeids makava kanavay silma̱nin, nag; tage silma̱nin sinap kamnat.   
\p
\v 8 Kaleiwag towen nag teitan gamag nakaleiwag, tage Yowbad nakaleiwag. Mata ge bukusiplaves, peinan tavganein Kululuwan Bwanabwein.   
\p
\v 9 Awoum liva̱nen siwa̱youb balel va̱gan bukusiwyoubus simiyas, peinan Yowbad bo ikatimlakeimiy. Nanawana bo kukwakins.   
\p
\v 10 Nukusiwyoubus tasiyas tayekelesiys babaw ven avakaein Masidoniy waseg. Kaguyeimiy va̱gan kwatimweisis misiwa̱youb bivakaein.   
\p
\v 11 Kadiloka bukuyokons va̱gan bukusesus niwal waseg. Amisinap tatineimiy kuninuways. Awoum kwatpunugis simiyas, va̱gan miwotet tatineimiy bukuwteles. Kweiboug nadibakeimiy ma̱wan.   
\p
\v 12 Awoum bukumlavags ma̱wana tabgumat yakamiy; igaw mo bukunekes simiyas bukusibukways kaeis bisekeimiy bukukwams kid. Bukuva̱ges ma̱wan, tasiyas nag iyekelesiys bikineimiy mo bikayuweimiy. Awoum!   
\s1 DaGuyaws beiyum beim  
\p
\v 13 Sigwey, awoum bukutagouwaws silma̱nin tasiyas takanka̱nigs. Babaw gamag nag isimounids beikits vayuwein, mapuna ninous singaya moumouvit kanig waseg. Tage yakamiy awoum beivag ninoumiy ma̱wan.   
\p
\v 14 Tasimounids peinan Yeisuw ikanig mo ikit vayuwein. Tasiyas-vak Yeisuw angamag nikanka̱nigs, Yowbad mo biyakitus, bitokes bimeyes sisiy Yeisuw.   
\p
\v 15 Mounid daGuyaws anilivan kadibakeimiy, kukin son mwamovads bitasesus, igaw daGuyaws beiyum beim, tasiyas kweiboug nikanka̱nigs mo bimgwayeids. Ya̱kids nag bitamgwayes tasiyas; nag.   
\p
\v 16-17 DaGuyaws gog beiwak, tasiyas anelos sitovek-vak beiwak, bwa̱gig-nen liba̱lab biyikis, daGuyaws beibus beim, mo tasiyas nikanigs Yeisuw waseg wanmugwana beikits, wankuyeim mo ya̱kids tamwamovs ya̱kids. Sidayas tasiyas mo bikaweids bitaneis wanakaew, mo bitanekes daGuyaws lov wanuwan, sods mtowen mo bitasesus bitasigagas.   
\p
\v 18 Sinap towen waseg kugeiguys simiyas wasigeis va̱gan amnamiy beibwein.   
\c 5  
\p
\v 1 Sigwey, nag kadilok balel sinap va̱gan bukukwakins avei-tut nakabiyokous ven watinow, peinan nanawana bo kukwakins.   
\p
\v 2 Bo kukwakins bwein tutan daGuyaws beiyum beim mo bilabuboleids ma̱wana tavveinaw watapwan boug bisap.   
\p
\v 3 Gamag bilivans, bilansa, “Tut towen tasesusa bwein,” simouvit gog waseg nuwanaw mo bisiblutes biyagages, ma̱wana gidaged bisiblutes vinay igaw bitapouy nimes. Ta-ma̱wan bivkakes.   
\p
\v 4 Sigwey, nag mamagina tadadubs yakamiy, yam towen nag bilabuboleimiy ma̱wana tavveinaw; nag.   
\p
\v 5 Yakamiy kamnat gimgeilin yakamiy; peinan nag dadub gimgeilin ya̱kids. Wuda̱yam waseg bitanoun.   
\p
\v 6 Awoum bitammasis ma̱wana gamag mwasanin; tage kadiloka bitala̱lals va̱gan nanouds bidumwal.   
\p
\v 7 Tasiyas gog tammasis boug waseg immasis, o tasiyas tamwamoums boug waseg imwamoums, ikabala̱weins.   
\p
\v 8 Tage ya̱kids tanounas wuda̱yam waseg, kadiloka nanouds bidumwal, mo bitasimounids o bitasiwa̱youbs beibwein, kululuwads ankawlawal silma̱nin; o bitanmises Yowbad va̱gan bikatinabweids, nanouds ankawlawal silma̱nin.   
\p
\v 9 Peinan Yowbad nakaleiwag, awoum bikamta̱nids; tage Yowbad nikatigikeids va̱gan bikatinabweids daGuyaws Yeisuw Kelis waseg.   
\p
\v 10 Yeisuw bo ikanig peinads ya̱kids, sivinan kid siney ya̱kids bitamwamovs, takinew bitasesus ven watinow, o takinew bitakanigs.   
\p
\v 11 Mapuna kuguyes va̱gan bukwatimweisis simiyas sinap bwein waseg, ma̱wana tut towen nukuvva̱ges.   
\s1 Nakabiyokous anilivan  
\p
\v 12 Sigwey, kadiloka bukuvna̱ses tasiyas mitamumugwas, peinan igeiguys wasigeis yakamiy, daGuyaws inawotet silma̱nin.   
\p
\v 13 Kadiloka bukugoulus tasiyas, siwa̱youb waseg, peinan siwotet bwanabwein. Kadiloka niwal waninoumiy bises.   
\p
\v 14 Sigwey, kadiloka bukuguyes tasiyas tabgumats. Kukimtuwes tasiyas tawnayuws mo bitawtouns. Kulabes tasiyas kalisiy nag isimounids bwein. Kwaptuleimiy babaw gamag wasigeis.   
\p
\v 15 Kukin kal biyagageim, awoum kumop ansinap. Bweina tut babaw bukusiwa̱youbs simsimiyas wasigeis, o babaw gamag wasigeis.   
\p
\v 16 Tut babaw kummwa̱saws-wan.   
\p
\v 17 Awoum kuyeiwas nitoug waseg Yowbad.   
\p
\v 18 Bikalin nuwamiy youd babaw silma̱nin. Yowbad nanon ma̱wan, peinan Yeisuw Kelis angamag ya̱kids.   
\p
\v 19 Awoum kusiwmates Yowbad Kululuwan.   
\p
\v 20-22 Awoum kupiyaves sigeiguy tasiyas palopits, tage kuninuways beibwein, mo kwatukins, sinap kalbaleb kulavewas, sinap bwanabwein kuyousis beibwein.   
\p
\v 23 Sivinag Yowbad tonena bikatimweis kululuwamiy mo beitaw nuwamiy, peinan ikayus kululuwamiy, mwamovamiy, woumiy meivek-wan, va̱gan bukusesus bwein, amisinap kamnat-wan, tutan daGuyaws Yeisuw Kelis mo bisap vayuwein.   
\p
\v 24 Mtowen nikatigikeids angamag ya̱kids bitikum, bivag wasigeis yakamiy ma̱wana nilivan.   
\p
\v 25 Sigwey, kadiloka bukunitougs pinem yakamey.   
\p
\v 26 Bikalin nuwamiy, bukumulouls simiyas, peinan meivek yakamiy tayekelesiys yakamiy.   
\p
\v 27 DaGuyaws yagan waseg adibakeimiy, kadiloka bukuvinis let towen, tayekelesiys babaw biliganes.   
\p
\v 28 DaGuyaws Yeisuw Kelis bisiwyoubumiy.  
\p Yey Pawl.