\id PHP - MYKuniT
\ide UTF-8
\h FILIPE SHƐƐN
\toc1 Tudunmɔɔ Pɔli ya sɛmɛ wemu tun Filipe shɛɛn mu ge
\toc2 Filipe Shɛɛn
\toc3 Flp.
\mt1 Filipe Shɛɛn
\mt2 Tudunmɔɔ Pɔli ya sɛmɛ wemu tun Filipe shɛɛn mu ge
\is1 Jɔgɔ yɛ mu we sɛmɛ we dʼa tun wɛ?
\ip Filipe shɛɛn wo egilizi wu mu Pɔli ya we sɛmɛ we tun Masedɔni fiige ki ni. Kaso ni wu bi bye Oromɛ kulo li ni na we sɛmɛ we ka. Egilizii piimu nɔhɔ Pɔli ya shan Erɔpu fiige ki ni ge, Filipe shɛɛn wo egilizi we wu ɲɛ pu bɛɛri nizhiimɛ.
\ip Na Pɔli yaha wu ɲara shuun wuu li na, wu ni Silasi ni Timote ni, a pʼi nɔ Filipe kulo li ni. Shi wemu wu bi bye wà ni wee ɲɛ Yawutuu-i ge, wee wʼa bi ɲɛhɛ, bani Yawutuu niɲɛhɛmɛɛ bi bye wà wɛ. Filipe kulo li bi bye Oromɛ shɛɛn sɔrɔsii tatɛɛngbɔhɔ.
\ip Ma funŋɔ bi ɲɛ ma di Filipe shɛɛn wo egilizi wu keree cɛ, Kapyegee Kitabu wu wo koogoo 16 wu kalaa.
\is1 We sɛmɛ we kakana ɲuŋɔ
\ip Kashiinɛ, Pɔli funŋɔ bye wu Filipe shɛɛn wo egilizi wu nʼa daa fɛɛ pu shaari pu yakanya yi wuu na wee mu (Filipe Shɛɛn 4:10-20). Li shuun wuu, Pɔli bi logo na waagi wu ɲɛ Filipe nʼa daa fɛɛ pu tɛ ni. (Filipe Shɛɛn 4:2). Wu funŋɔ ki bye wʼi pu yɛri.
\is1 Sɛmɛ wu kafila ɲugbɔyɔ
\imi \bd Filipe Shɛɛn 1:1-11\bd* Pɔli ya pu shaari na baraga taha Kilɛ na.
\imi \bd Filipe Shɛɛn 1:12-26\bd* Pɔli ya lowaa lemu ta na wu yaha kaso wu ni Oromɛ ni ge.
\imi \bd Filipe Shɛɛn 1:27—2:4\bd* Pɔli ya Filipe shɛɛn yɛri niginre keree na.
\imi \bd Filipe Shɛɛn 2:5-18\bd* Yesu ya wuyɛ tirige tirigegana lemu na ge.
\imi \bd Filipe Shɛɛn 2:19-30\bd* Pɔli labyeɲii Timote ni Epafuroditi keree.
\imi \bd Filipe Shɛɛn 3\bd* Pɔli ya pu sɔnmi kapyebyii niguuyo yi keree na.
\imi \bd Filipe Shɛɛn 4\bd* Pɔli ya pu shaari na yɛrɛ kan pu mu sanha.
\c 1
\s1 Pɔli ya fò kan Filipe shɛɛn mu
\p
\v 1 Nɛ Pɔli ni Timote, wèe piimu pu ɲɛ Yesu Kirisa wo kapyebyii ge, wèe pʼa we sɛmɛ we tun Kilɛ wo fɛfɛɛrɛ sipyii pu bɛɛri mu, piimu bɛɛri pu ɲɛ Filipe kulo li ni Yesu Kirisa wo kariɲɛɛgɛ ki ni ge, ni ɲɛ egilizi wu ɲahagbaa fɛɛ ni pu tɛgɛvɛɛ pu bɛ.
\p Wèe ya yi shaari: 
\v 2 Wù To Kilɛ ni wù Kafɔɔ Yesu Kirisa wu niimɛ tirige yi na, pʼi ɲaɲiŋɛ bɛ kan yi mu.
\s1 Pɔli ya Kilɛ ɲɛɛri Filipe kulo li nʼa daa fɛɛ pu mu
\p
\v 3 Nɛ bu na funŋɔ kɔn ni yee kaa ni tuun bɛɛri ni, nɛ ma Kilɛ shaari. 
\v 4 Nɛ ba da Kilɛ ɲɛɛri yee mu tuun bɛɛri ni, nɛ ma kee ɲɛrɛgɛ ki pye ni fundanga ni. 
\v 5 Bani yee ya pye nɛ tɛgɛvɛɛ Kilɛ wo Jozaama pu yɛrɛ li kapyeŋɛɛ ki na, na co fo ki ɲɔ kɔnduun na, fo na pa nɔ nimɛ na. 
\v 6 Nɛ li cɛ nakaara baa jo Kilɛ wemu wʼa kii kapyeŋɛɛ nizaaŋaa kii ɲɔ kɔn yee ni ge, wee na ba gori yaha ki na fo na shɛ ki ɲɔ fa Yesu Kirisa cabaŋa. 
\v 7 Lʼa yaa nɛ wʼa na funŋɔ shaa lee shagana li na ni yee bɛɛri kaa ni, bani yee kaa ya waha nɛ mu fo xuuni. Na nɛ yaha kaso wu ni nɛ na Kilɛ wo Jozaama pu yogo yu, na pu can wu shɛɛ, yee ya pinnɛ ni nɛ ni wee labye we na. Wu niimɛ wu baraga ni Kilɛ ya wee kaa le nɛ keŋɛ ni. 
\v 8 Kilɛ yɛ pyaa wa lee wo sɛɛri na jo yee bɛɛri kaa ya dan nɛ ni fo xuuni, ba wèe ya dan Yesu Kirisa ni taangana lemu na wɛ.
\p
\v 9 Kaa lemu na nɛ Kilɛ ɲɛɛri yee mu ge, lee li wa mɛ, jo la lʼa faraa yee wo taanɲɛɛgɛ ki na, yi bɛ di lajɛ, ni fungɔngɔ fɛɛrɛ ta xuuni, 
\v 10 kɔnhɔ yʼi já kasaaŋaa ni kakuuŋɔɔ cɛ shɔɔnri kiyɛ ni. Lee funŋɔ ni yi na ba bye sipyitiimɛɛ, jaagi baa fɛɛ, fo na shɛ nɔ Yesu Kirisa cabaŋa ki na. 
\v 11 Yi na ba kapyegee nizaaŋaa niɲɛhɛŋɛɛ pyi Yesu Kirisa baraga ni. Lee li wa masɔŋɔ, ni pɛɛŋɛ tɛri Kilɛ na.
\s1 Pɔli kaso wu keree
\p
\v 12 Na cebooloo, na funŋɔ ki wa yʼi li cɛ na jo ɲaa wemu bɛɛri wʼa nɔ nɛ na ge, wee bɛɛri ya pye kaɲuŋɔ na shɛ ni Kilɛ wo Jozaama pu ni ɲaha na can can na. 
\v 13 Bani kiiri wu takɔngɔ ki ɲahagbaa fɛɛ pu fara tɛyɛ yi saya bɛɛri na naha, pu bɛɛri ya li cɛ na Kirisa kaa jo wuu na pʼa nɛ pɔ, na nɛ le kaso ni. 
\v 14 Lee funŋɔ ni wù cebooloo nʼa daa fɛɛ niɲɛhɛmɛɛ ya Kafɔɔ pye pu \w tadaŋa\w*. Nɛ na le kaso ni, lee wuu na la ya fara pu lowaa li na. A pʼi ganha na Kilɛ Kafila wu yu sipyii pu mu ali pu ya fyagi bɛ wɛ.
\p
\v 15 Ayiwa, sipyii pii kunni wa Kirisa kaa yu ni ɲɛpɛɛn ni bɛganhara ni. Ga pii bɛ di wa Kirisa wu kaa yu ni fungɔnsaaŋa ni. 
\v 16 Taanɲɛɛgɛ funŋɔ ni pee wa kee kapyeŋɛɛ ki pyi, bani pʼa li cɛ na Kilɛ wʼa nɛ teŋɛ, kɔnhɔ nɛ da \w Kilɛ Jozaama\w* pu can wu shɛɛ sipyii pu na naha. 
\v 17 Ga pusamaa kunni, pee wa Kirisa kaa yu na ta nɛ wo kapyeŋɛɛ ki ɲɛpɛɛn di ɲɛ pu ni. Fungɔnkuuyo yi ɲɛ pu mu. Pʼa giin na pee ba lee pyi, na lee li da la fara nɛ kanhama na kaso wu ni.
\p
\v 18 Na ta lee la shishiin di ɲɛ kaa nɛ mu wɛ. Fungɔnkuuŋɔ ya pye pu mu la, fungɔnsaaŋa la; pyegana bɛɛri na lʼa pye ge, Kirisa kaa bu já na yu na xɔ sipyii pu mu, lee ya nɛ funŋɔ taan. Kee fundanga ke, la di faraa kee na bɛ, 
\v 19 bani yee wo ɲɛrɛgɛ ki fanha ni, ni Yesu Kirisa wo Munaa li wo dɛgɛ wu baraga ni, nɛ li cɛ jo kee keree kii bɛɛri na ba bye kaɲuŋɔ na na ɲuŋɔ wolo. 
\v 20 Lemu nɛ zigee ni na zɔ wu bɛɛri ni ge, lee li wa nɛ tadaŋa. Li kunni wa da ba bye na mu shiige kajii bada wɛ. Lee li wa mɛ na Kirisa pɛlɛ tuun bɛɛri ni. Lʼa na gbo la, lʼa na yaha la, lee li wa. 
\v 21 Bani nɛ wo koŋɔ ki katiinnɛ ɲuŋɔ ki wa mɛ, na taha Kirisa fɛni. Xu bɛ di ɲɛ nɛ mu kuduun wa. 
\v 22 Ga nɛ di bu bye sanha koŋɔ puga, nɛ na já da kapyeŋɛɛ pyi sanha kiimu ɲɛ ni kuduun ni ge. Wee tuun wu ni, ɲiifɛɛrɛ ni xu ni, nɛ cɛ kabaŋa kekɛ nʼa da lɔ wɛ. 
\v 23 Nɛ fungɔngɔ wa ki shuun wu bɛɛri na. Nɛ na xu, na shɛ bye ni Kirisa ni, lee la ki wa nɛ na, kuduun nigbɔ wu wa lee ni. 
\v 24 Ga nɛ yaa na kori naha koŋɔ puga yee wuu na, lee wo kaɲɔɔ lʼa pɛlɛ bɛ sanha. 
\v 25 Nakaara wa lee ni wɛ, nɛ na ba gori koŋɔ puga, na tuun wa bɛ pye yi tàan, kɔnhɔ yi da se ɲaha na nʼa daa wu ni, yi fundanga ki bɛ di bɛlɛ. 
\v 26 Lee funŋɔ ni, nɛ ba ba guri shɛ yee yíri, lee na ba bye kaɲuŋɔ fo ki nigbɔhɔ, yee na fundanga ta Yesu Kirisa wo kariɲɛɛgɛ ki ni, nɛ wuu na.
\p
\v 27 Ga yee kunni pʼa ɲaari yʼa sahaŋi ni Kirisa wo Jozaama pu ni. Nɛ já shɛ foro yi na la, nɛ shiin ya já shɛ foro yi na-ɛ la, kɔnhɔ nɛ wa nuri na yʼa nʼa daa wu co ni keye shuun ni, na bye ɲɔmɛɛ nigin na, ni fungɔngɔ nigin. Yʼi yi fanha ki pye nigin, yi da kapyeŋɛɛ pyi, kɔnhɔ sipyii pu da Kilɛ Jozaama pu nuri, pʼi dà Yesu na. 
\v 28 Yi ganha bu da yi pɛɛn pu yaha pu fyaara leŋɛ yi ni leŋɛgana la shishiin na wɛ. Pee wo kapyegee kʼa li shɛɛ na pee na ba gyɛɛgi, yee wo kapyegee kʼi li shɛɛ na yee na ba shɔ. Kilɛ ni lee ya foro. 
\v 29 Nʼa ye yu bani Kilɛ ya ta niimɛ kan wèe mu, kɔnhɔ wèe di dà yɛ nigin Kirisa na-ɛ dɛ! Wʼa niimɛ kan wèe mu, kɔnhɔ wèe di da kanhama bɛ ɲaa wu mɛgɛ ki wuu na. 
\v 30 Yʼa tee na ɲa toro, na yi nuri bɛ sanha na zhaanra nɛ leni ni Yesu Kirisa wo pɛɛn pu ni. Tee zhaanra te tuugo yee bɛ ya leni nimɛ!
\c 2
\s1 Yi yiyɛ tirige ba Yesu Kirisa ya pye wɛ
\p
\v 1 Ayiwa, loɲinɛ bi daa Kirisa ni, samɔhɔrɔ bi daa wu taanɲɛɛgɛ ki ni, kariɲɛɛgɛ bi daa \w Fɛfɛɛrɛ Munaa\w* li ni, ɲiɲaara ni ɲubeŋɛ bi ɲɛ, 
\v 2 wee tuun wu ni, yi yi fungɔnyɔ yi pye nigin, yʼi bɛ taanɲɛɛgɛ funŋɔ ni, yʼi bye ba shɛn nigin ɲɛ wɛ, yʼi bye ni fungɔngɔ nigin ni. Lee bu bye, nɛ zɔ wu na zii vɛrɛ can can na. 
\v 3 Yi ganha ba kaa la shishiin pyi ni ɲɛpɛɛn ni, kelee yafogoyo wɛ. Ga yʼa yiyɛ tirige, yi da sipyii pusamaa pɔrɔŋɔ yiyɛ na. 
\v 4 Yi ganha ba keree pyi yiyɛ pyaa yɛ wo kuduun kaa na wɛ, ga keree kiimu wo kaɲɔɔ lʼa da bye yi bɛɛri nigin nigin wu na ge, yʼa kee pyi.
\p
\v 5 Fungɔngɔ kemu kʼa bi bye Yesu Kirisa mu ge, yʼi zhi kee fungɔnnuŋɔ kʼi bye yi bɛ mu:
\b
\q1
\v 6 Wu ɲɛ Kilɛ pyegana na,
\q2 wu ni Kilɛ ɲɛ nigin.
\q1 Ga wʼi ya ta lee pye
\q2 wu tɔɔgɔ tasinŋɛ nago kanna
\q2 wu wuyɛ taanna ni Kilɛ ni fanha bɛ na wɛ.
\q1
\v 7 Ga wʼa kee bɛɛri yaha wà,
\q2 na wuyɛ pye ba bulo ɲɛ wɛ.
\q1 Wʼa pa bye sipyiyawyii,
\q2 na wuyɛ yaha ba sipyii pusamaa ɲɛ wɛ,
\q2
\v 8 na doroo sipyii torogana na.
\q1 Wʼa wuyɛ tirige,
\q2 na Kilɛ ɲɔmɛɛ co,
\q1 fo na shɛ wu pye wʼa jé xu ni,
\q2 korikoritige ki wo xu wu kunni.
\q1
\v 9 Lee wuu na Kilɛ ya wu ɲuŋɔ yirige fo xuuni,
\q2 na mɛgɛ kan wu mu,
\q1 mɛgɛ kemu kʼa pɛlɛ
\q2 mɛyɛ yi bɛɛri na ge,
\q1
\v 10 kɔnhɔ Yesu mɛgɛ bu yiri,
\q2 munaa yara bɛɛri li ɲɛ fugba we ni ge,
\q1 ni ɲiŋɛ ke na ge,
\q2 ni ɲiŋɛ ke nɔhɔdaan ge,
\q3 yee bɛɛri di nuguro sin yʼi wu pɛlɛ.
\q1
\v 11 Sipyii pu bɛɛri di yere li na,
\q2 pʼi da li yu pu ɲɔyɔ ni
\q1 na Kafɔɔ wu ɲɛ Yesu Kirisa.
\q2 Lee na ba nɔɔrɔ taha To Kilɛ na.
\s1 Nʼa daa fɛɛ ya yaa na ɲí koŋɔ ke na ba wɔrɔɔ ɲɛ wɛ
\p
\v 12 Ayiwa na taanɲiinɛɛ, yʼa na ɲɔmɛɛ co tuun bɛɛri ni, tuun wemu ni nɛ bye yee niŋɛ ni ge. Na na yaha nʼa lii nimɛ yi na, yʼa la faraa tee ɲɔmɛɛcoro ti na. Yʼa yi ɲuwuuro ti keree ki fiinŋɛ ni Kilɛ ɲìi fyaara ni, yʼi da baraga tɛri wu na! 
\v 13 Bani Kilɛ yɛ pyaa kʼa da yee tɛgɛ, na yee pye yee ya sɔɔ wu ɲidaan na, na já na wu pyi bɛ.
\p
\v 14 Lee wuu na, yʼa yi keree ki bɛɛri pyi nakaara ni ŋmunu-ŋmunumɔ baa, 
\v 15 kɔnhɔ yʼi já pye fɛɛfɛɛ, jaagi ganha bu da yi na wɛ. Yʼi bye Kilɛ wo nagoo, tanahaŋa ganha bu da yi na ke koŋɔ ke wo sipyikuuyo naŋmahara wuu pii tɛ ni wɛ. Yi da ɲí ɲí pu tɛ ni ba wɔrɔɔ ma ɲí mɛ fugba we ni wɛ. 
\v 16 \w Kilɛ Jozaama\w* pe pu wa ɲìi sicuumɔ can wo pu kaan ge, yi da pee kaa yu pu mu. Lee bu bye, yi na ba na ɲuŋɔ yirige Kirisa cabaŋa. Lee li da ba li shɛ bɛ sanha na nɛ wo kanhama pe, ni nɛ wo labye wu ya ta pye kaɲɔɔ baa wɛ. 
\v 17 Yee ya labye wemu pye Kilɛ mu ge, wee ya pye yee wo saraga, yee ya dà Kilɛ na, lee na yee ya kee wolo. Ali li ɲɛhɛ yaha nago nɛ wo shishan pe pu fara kee saraga ki na, lee kɔri ɲɛ ali pu ɲɛhɛ nɛ gbo na fara kee na, nɛ na funŋɔ pinnɛ daan ni yee ni fo xuuni. 
\v 18 Yee bɛ ya yaa yee pu funŋɔ taan lee na, yʼi binnɛ funŋɔ taan ni nɛ bɛ ni!
\s1 Timote ni Epafuroditi ya labye wemu pye ge
\p
\v 19 Kafɔɔ Yesu bu sɔɔ na li koo yaha, jɛri tapyege ni nʼa da Timote tun zhɛ wà yi mu. Keree kiimu ki wa yi yíri ge, wu shɛ kee ɲaha cɛ wu pa jo na mu, lee na nɛ bɛ wo fungɔngɔ ki teŋɛ. 
\v 20 Bani sipya watii wa naha nɛ mu wemu ya wu funŋɔ shaa can can na ni yee keree ni wɛ. 
\v 21 Pu samaa bɛɛri wa na pu funyɔ shaa ni puyɛ pyaa keree ni. Pu ya pu funyɔ shaa ni Yesu Kirisa kaa ni wɛ. 
\v 22 Ga yeeyɛ pyaa bɛ ya li cɛ na Timote ya wuyɛ shɛ kapyebye nizaama. Wʼa wuyɛ kan Kilɛ wo Jozaama pu mu, na kapyeŋɛɛ pyi ni nɛ ni ba to ni wu ja ɲɛ wɛ. 
\v 23 Lee wuu na, nɛ wo keree ki na ba yaha kabaŋa kemu na ge, nɛ ba kee cɛ bɛ, wee nʼa da dun yi mu. 
\v 24 Nɛ dà li na Kafɔɔ wo saama pu gbɔɔrɔ ni jo lʼa da mɔ nige nɛyɛ pyaa bɛ di shɛ yi yíri wɛ.
\p
\v 25 Ga nɛ li ta jo li na bɔrɔ na fɛnhɛ Epafuroditi kuruŋɔ tun yi mu. Nɛ ceboro wu ɲɛ wii, na nɔhɔ pye na kapyebyeɲii. Wʼa wu wo fanha ki fara nɛ wogo ki na wèe na Kilɛ wo Jozaama pu yu. Nɛ mago ɲɛ yaŋmuyɔ yemu na ge, wee yee ya tun wʼa pa yee kan nɛ mu. 
\v 26 Wu funŋɔ bye wu yee bɛɛri ɲa tɔvuyo na, bani wu fungɔngɔ kʼa wuregi na li kaɲuŋɔ pye wu ceefuuro ti kaa ya nɔ yee na. 
\v 27 Can wu ɲɛ wii, wʼa sii yá xuuni fo na taxuyo shaa. Ga, a Kilɛ di ɲuŋɔ ɲaari wu na. Wu ya ta ɲuŋɔ ɲaari wee yɛ nigin na wɛ, ga nɛ bɛ na wʼa ɲuŋɔ ɲaari. Lee bɛ wɛ, nɛ wo ɲatanhaŋa ki saŋa bi da bɛlɛ. 
\v 28 Lee wuu na, nʼa da wu tun yi mu tɔvuyo na, kɔnhɔ yʼi shɛ wu ɲa yi funyɔ di daan, la di foro nayɛ pyaa bɛ wo ɲatanhaŋa ki ni. 
\v 29 Wu bu nɔ yi na, yi wu ɲuŋɔ círi ni fundanga ni Kafɔɔ wuu na. Pii sipyii pii shi na yee ya yaa na baraga tɛri. 
\v 30 Yee da bi bye naha nɛ yíri, kapyeŋɛɛ kiimu yee bi da já bye nɛ mu ge, kee kapyeŋɛɛ ki wuu na wʼa wuyɛ kan fo na taxuyo shaa.
\c 3
\s1 Dii sipya di da já bye sipyitiimɛ Kilɛ ɲaha tàan wɛ
\p
\v 1 Ayiwa, nimɛ na cebooloo, yʼa fundanga pyi Kafɔɔ wo kariɲɛɛgɛ ki ni. Nɛ keree kiimu ka na kan yi mu ge, na kuri na kee ninuŋɔɔ ka na kan yee mu sanha, lee ya waha nɛ mu wɛ, bani lee lʼa da yee mara yaha kozaana ni. 
\v 2 Yʼa yiyɛ kasɛri kapyebyii niguuyo ye na, pʼa kolo ba puun ɲɛ wɛ. Pee ya giin na sipya bu cekɔɔnrɔ pye na lee li da ma pye mʼa ɲɛri Kilɛ wo sipya. Can bɛ wɛ! 
\v 3 Wèe nʼa daa fɛɛ, wèe pu ɲɛ Kilɛ wo sipyii puyɛ pyaa pyaa, wèe piimu pʼa Kilɛ pɛlɛ \w Kilɛ Munaa\w* baraga ni, na wù wo ɲuyirige ki taa Yesu Kirisa wo kariɲɛɛgɛ ki ni ge. Wèe ya ta sipyii wo kashangaa pye wù \w tadaŋa\w* wɛ.
\p
\v 4 Lee bɛ wɛ, nɛyɛ pyaa bɛ bi da já jo nɛ kashangaa pye na tadaŋa, jo nɛ na já lee pye na ɲuwuuro ta. Sipya wekɛ wu da já jo na wee ya kii keree kii pye wu tadaŋa na toro nɛ tàan wɛ? 
\v 5 Nɛ cekɔɔnrɔ pye fo na cazege caŋa gbarataanri wogo na. \w Izirayɛli\w* shi shɛn nɛ ɲɛ, na foro Bɛnzhamɛ wo shi wu ni. Heburu yɛ pyaa pyaa nɛ sii. \w Farizhɛɛn\w* pu ni nɛ bɛ ɲɛ, pee piimu pʼa Kilɛ tudunmɔɔ Musa wo saliya wu koo ɲaari ge. 
\v 6 Ma bu jo luu, lee bye na ni wee saliya wu wo keree shizhaa na, fo di na ɲaari na nʼa daa fɛɛ pu kana. Ma bu jo saliya wu keree ɲaarigana, sipya wa shishiin bye wemu na já zɔ taha nɛ na saliya wu keree ki ɲaarigana wuu na wɛ.
\p
\v 7 Ga kee keree kiimu bɛɛri ki bye nɛ na ki wii kuduun wogoo ge, nɛ kee bɛɛri ta nimɛ ɲuŋɔ baa keree Kirisa wuu na. 
\v 8 Lee na laha wà, nɛyɛ pyaa kii wa yaŋmuyɔ ye bɛɛri wii ɲuŋɔ baa woyo le kagbɔɔ le wuu na. Na Kafɔɔ Yesu Kirisa cɛ, lee ɲɔhɔ ɲɛ wɛ. Wee wuu na nɛ sɔɔ na na keŋɛ wolo keree bɛɛri ni, na ganha na keree bɛɛri wii yakokaya wiimɛ ni, kɔnhɔ di já Kirisa wo kariɲɛɛgɛ ki ta, 
\v 9 di gori yaha kee kariɲɛɛgɛ ke ni. Na saliya wo koo ɲaari li ɲaarigana na, pee tiimɛ pe wa lee kaan wɛ. Ga na dà Yesu Kirisa na, pee tiimɛ pe pʼa lee kaan. Ma bu dà Kirisa na lee funŋɔ ni Kilɛ da ma jate sipyitiimɛ. 
\v 10 Lemu fɛni nɛ ɲɛ ge, lee li wa mɛ: Na Kirisa cɛ; sefɛɛrɛ temu tʼa wu ɲɛ na yeege xu ni ge, na tee bɛ shi cɛ; kanhama pemu wʼa soro ge, na pee bɛ shi cɛ; na wu xu wu bɛ tuugo shi cɛ, kɔnhɔ di binnɛ bye ni wu ni shiizhan. 
\v 11 Lee bu bye, na bɛ na diin ni li ni jo na bɛ na ba ɲɛ na foro xu ni.
\s1 Na nʼa daa wu koo ɲaari fo na shɛ nɔ wu kuduun wu na
\p
\v 12 Li wa nago kanna nɛ wa paa fo na shɛ nɔ na ɲɔ tafaŋa xuu ni, na na wo tafɛrɛ ti kuduun ta-ɛ dɛ! Lee bɛ wɛ. Ga ali niɲaa we bɛ ni, nɛ la le nayɛ ni na wo tafɛrɛ ti na, kɔnhɔ di ba ti kuduun ta, bani lee kaa na Kirisa ya nɛ sha co. Lemu bɛɛri Kirisa ya zhaa na mu, ni wʼa lemu bɛɛri gbegele yaha na ɲaha na ge, di da kee bɛɛri pyi. 
\v 13 Na cebooloo, li wa nɛ funŋɔ ni nago kanna nɛ nɔ na wo tafɛrɛ ti tɛhɛnɛ na, na ti kuduun bɛ ta na xɔ-ɛ dɛ! Ga kaa nigin li wa nɛ funŋɔ ni. Keree kiimu bɛɛri ki wa nɛ kadugo yíri ge, nɛ na funŋɔ wɔ kee bɛɛri na, lemu li wa nɛ ɲahagbaa na ge, na ganha na na se wu bɛɛri pyi, na lee shaa. 
\v 14 Lee wuu na, nʼa da la le nayɛ ni, di ɲaha tii ni na wo tafɛrɛ ti ni fo di zhɛ nɔ ti kuduun wu na, wee wemu kaa na Kilɛ ya wù yiri Yesu Kirisa baraga ni ge.
\p
\v 15 Ayiwa, wèe piimu bɛɛri pʼa fanha ta nʼa daa wu ni ge, ke fungɔngɔ ke kʼa yaa na pye wèe mu, ga fungɔngɔ katii bu da yee mu, Kilɛ yɛ pyaa na ba can wu shɛ yee na. 
\v 16 Ga Kilɛ ya can wemu shɛ na xɔ wù na ge, wʼà se ɲaha na lee koo li ni.
\p
\v 17 Na cebooloo, koo lemu nɛ ɲaari ge, nɛ funŋɔ ki wa yee bɛ di da lee ɲaari. Piimu bɛɛri pu wa ɲaari na sahaŋi ni lee koo li ni ge, yi da pee bɛ wii, yi da se pee fɛni! 
\v 18 Bani shɛnɲɛhɛmɛɛ pii wa wà, Kirisa wo korikoritige ki wo jomɔ pu wo yɛrɛ li tɔn pʼa pɛn pu mu. Nɛ yee jo toro yee mu tɔɔɲii niɲɛhɛŋɛɛ ni, ga na mɛsuwo wʼa kuri na yi yu yi mu sanha. 
\v 19 Pee sipyii pii wo taxɔgɔ ki wa gyɛɛgi, bani yalige nidiige kemu kʼa jin pu yacɛrɛɛ ni ge, pʼa kee funŋɔ lɔ Kilɛ na. Keree kiimu kʼa yaa ki pye pu mu shiige keree ge, a pʼi ganha na puyɛ pɛlɛ ni kee ni. Pu funzhakeree kʼa tiiŋɛ ke koŋɔ ke wo yaŋmuyɔ ye na. 
\v 20 Ga wèe kunni, wèe wo to puga ki wa fugba we ni. Wèe bɛ di wa wù Shɔvɔɔ, wù Kafɔɔ Yesu Kirisa sigee. Fugba we ni wʼa da ba yìri na pa. 
\v 21 Fanhaxhɔɔrɔ ceepuuro te ti wa wèe mu ge, wu na ba tee ɲɛri na pye nivɔrɔ, na ti pye nɔɔrɔ wuuro ba wuyɛ pyaa wuuro ti ɲɛ wɛ. Sefɛɛrɛ te ti wa wu mu ge, tee tʼa wu pye wʼa já yaŋmuyɔ yi bɛɛri tirige, na yi yaha wu wo fanha ki nɔhɔdaan.
\c 4
\s1 Pɔli ya funŋɔ shagazaana li wo yɛrɛ li kan nʼa daa fɛɛ pu mu
\p
\v 1 Ayiwa, na cebooloo na taanɲiinɛɛ. Na funŋɔ ki wa di yi ɲa sanha. Nɛ wo fundanga ki kaɲuŋɔ ki ɲɛ yere. Yee shiin pu wa nɛ ɲuŋɔ yirige. Na taanɲiinɛɛ yi la le yiyɛ ni yʼi gori yaha Kafɔɔ wo kariɲɛɛgɛ ki ni!
\p
\v 2 Na ceboroshaa shuun we: Evodi ni Sɛntisi ni, nɛ wʼa pu ɲɛɛri na pu bɛ nigin na, pʼi gori yaha shiizhan Kafɔɔ wo kariɲɛɛgɛ ki ni. 
\v 3 Mu bɛ, na kapyebyeɲii ɲɔmɛɛ fɔɔ, nɛ wʼa ma ɲɛɛri jo ma na ceboroshaa shuun wu ɲɛɛri, kɔnhɔ pʼi bɛ nigin na. Bani pee pʼa la le puyɛ ni, na nɛ tɛgɛ Kilɛ wo Jozaama pu jo wu na, ni Kilema, ni na kapyebyeɲii pusamaa. Pee wo mɛyɛ yʼa ka Ɲìi Sicuumɔ pu wo sɛmɛ wu ni.
\p
\v 4 Na cebooloo, yee na ɲɛ ni Kafɔɔ ni kariɲɛɛgɛ ni, yʼa fundanga pyi tuun bɛɛri ni kee kariɲɛɛgɛ ke ni! Nʼa da yi jo daha sanha, yi sii yʼa fundanga pyi! 
\v 5 Yʼi zhi sipyii bɛɛri di yi cɛ ni ɲubeŋɛ ni, bani Kafɔɔ taapana lʼa tɛɛŋɛ. 
\v 6 Yi ganha ba yi funyɔ shaa ni kaa la shishiin ni wɛ; ga yaaga bɛɛri kaa lʼa yi ta ge, yi kee ɲɛɛri Kilɛ mu! Yi ki kaa ɲɛɛri yi waha! Yi da fò kaan wu mu! 
\v 7 Yi ba lee pyi, Kilɛ wo ɲaɲiŋɛ ke kʼa ye sipyii wo fungɔngɔ fɛɛrɛ ti bɛɛri na ge, kee na ba yi zɔlɔɔ pee, ni yi fungɔnyɔ yi mara yaha Yesu Kirisa wo kariɲɛɛgɛ ki ni.
\p
\v 8 Ayiwa, nimɛ na cebooloo, kaa kaa li ɲɛ can ge, pɛɛŋɛ ya daa kaa lemu bɛɛri ni ge, kaa kaa lʼa tii ge, kaa kaa li ɲɛ fɛɛfɛɛ ge, kaa kaa lʼa ɲɔ ge, kaa kaa lʼa dan Kilɛ ni ge, kaa lemu bɛɛri lʼa sii pye kacenɛ fo lʼa yaa ni masɔŋɔ ni ge, nɛ funŋɔ ki wa kee keree kii wo bye funŋɔ di yi zɔlɔɔ pu ɲi. 
\v 9 Nʼa yi taanni lemu ni, a yʼi lemu ta ge, ni yʼa lemu logo na ɲɔ na, na lemu ɲa di na byi ge, yi bɛ pʼa kee shi pyi! Yi ba lee pyi, Kilɛ we wʼa ɲaɲiŋɛ kaan ge, wee na ba bye ni yi ni.
\s1 Pɔli ya Filipe shɛɛn shaari pu boɲa wu wuu na
\p
\v 10 Nɛ funŋɔ ya taan xuuni, bani yee ya li shɛ sanha na yee wa yi funyɔ shaa ni nɛ kaa ni. Kee fungɔngɔ ke bi sii pye yee mu, ga yee bi sanha pyegana ta ki na wɛ. 
\v 11 Li wa nago kanna nɛ wo labaara tʼa nɛ pye nɛ na ye yu wɛ, bani nɛ bu lemu bɛɛri ta, lʼa cɛ̀rɛ la, lʼa ɲɛhɛ la, nɛ wa ma funŋɔ taan lee wuu na, bani nɛ tee kee bɛɛri na. 
\v 12 Na pye la baa fɔɔ, nɛ lee shi cɛ, na pye dafɔɔ bɛ, nɛ lee bɛ shi cɛ. Xuu xuu ni nɛ toro ge, wʼa waha wahagana tuugo bɛɛri na la; nɛ ta li la, nɛ shiin ya ta li-i la; nɛ yaŋmuyɔ niɲɛhɛyɛ ta la, nɛ shiin ya yafiin bɛ ta-ɛ la, nɛ tee kee bɛɛri na. 
\v 13 Nɛ jani kii keree kii bɛɛri na Kirisa baraga ni. Wee wʼa fanha kaan nɛ mu.
\p
\v 14 Lee bɛ na, yʼa kasaana pye, yi ma na tɛgɛ na kanhama pu tuun ni. 
\v 15 Na cebooloo Filipe shɛɛn, yeeyɛ pyaa ya li cɛ na fo tuun wekɛ tɛhɛnɛ na nɛ Kilɛ wo Jozaama pu kapyeŋɛɛ ki ɲɔ kɔn, nɛ yiriduun wu ni Masedɔni fiige ki ni ge, ni yee wo nʼa daa fɛɛ pu yɛ bɛ wɛ, egilizii pii shishiin ya pinnɛ ni nɛ ni, na nɛ wo kapyeŋɛɛ ki kuduun ta, lee kadugo na, na pu keŋɛ yaŋmuyɔ taga nɛ tɛgɛ wɛ. Yee yɛ pʼa lee pye. 
\v 16 Ali na nɛ yaha Tesaloniki kulo li ni, yee ya nɛ mago yaŋmuyɔ torogo nɛ mu tɔɔɲii niɲɛhɛŋɛɛ ni. 
\v 17 Yaŋmuyɔ yemu yee ya kan nɛ mu ge, li wa nago kanna yee ya nɛ zhaa wɛ. Le nɛ zhaa ge, lee li wa mɛ jo yi wo kapyegee nizaaŋaa kii ki ɲɛhɛ; Kilɛ na ba kuduun kan yi mu lee na. 
\v 18 Yʼa yaŋmuyɔ yemu bɛɛri torogo na mu ge, nɛ yi bɛɛri ta. Epafuroditi ya pa yi kan nɛ mu. Nʼa pye nimɛ la fɔɔ, nʼa ta nimɛ fo na doro. Yee yakanya yʼa pye ba nudanga saraga ɲɛ wɛ, saraga kemu na Kilɛ ya sɔɔ ge, ki kaa bɛ dʼa taan wu ni. 
\v 19 Nɛ wo Kilɛ wu bɛ na ba yi wo cɔnrɔmɔ keree ki bɛɛri yàa. Bani yaŋmuyɔ yi bɛɛri yi ɲɛ wu mu wu nɔɔrɔ wu ni, wʼi giin wu yi kan yi mu Yesu Kirisa wo kariɲɛɛgɛ ki funŋɔ ni.
\p
\v 20 Wʼà wu To Kilɛ wu sɔni, wù da wu pɛlɛ tuun bɛɛri ni. \w Amiina\w*.
\s1 Pɔli ya fò wemu pye kurogo ki na ge
\p
\v 21 Piimu bɛɛri pu ɲɛ fɛfɛɛrɛ sipyii Yesu Kirisa wo kariɲɛɛgɛ ki funŋɔ ni ge, yi pee bɛɛri shaari. Cebooloo piimu bɛɛri pu wa naha ni nɛ ni ge, pee bɛɛri ya yi shaari. 
\v 22 Fɛfɛɛrɛ sipyii piimu bɛɛri pu wa naha ge, pee bɛɛri ya yi shaari. Nʼa daa fɛɛ piimu pu wa kapyeŋɛɛ pyi saannaa ɲuŋɔfɔɔ Sezari kaban ki ni ge, pee ya pu wo fò waa.
\p
\v 23 Kafɔɔ Yesu Kirisa wo niimɛ we wu kori yaha yi bɛɛri mu.