\id 1JN - MYKuniT
\ide UTF-8
\h 1 YOHANA
\toc1 Yohana ya sɛmɛ nizhiimɛ wemu ka ga
\toc2 1 Yohana
\toc3 1Yoh.
\mt1 1 Yohana
\mt2 Yohana ya sɛmɛ nizhiimɛ wemu ka ge
\is1 Jɔgɔ wu ɲɛ Yohana wɛ?
\ip Tudunmɔɔ Yohana wʼa we sɛmɛ we ka. Wee ninumɔ wʼa Yohana wo Kilɛ Jozaama pu wo sɛmɛ wu bɛ ka, ni Yohana wo sɛmɛ nizhiimɛ we, ni shuun wo we, ni taanri wo we, ni Kashɛɛ Kitabu wu bɛ.
\ip Yohana ya ta wu mɛgɛ ka pii sɛmɛɛ taanri we na wɛ. Wʼa wuyɛ pyi na «egilizi nɔhɔlɛ».
\ip Yohana ya ta we sɛmɛ we ka egilizi nigin mɛgɛ na wɛ, ga Azi fiige ki egilizii pu mu wʼa wu tun. Yohana bi kapyeŋɛɛ pyi wu wo caŋa ɲii li xɔduun wu ni Efese kulo le, ni li kabanugo kulogoo ki ni. Wee xuu we niɲaa wo wu ɲɛ Turuki fiige ki niŋɛ ki ni.
\is1 We sɛmɛ we kakana ɲuŋɔ
\ip Wuyɛ mɛgɛ Kilɛ Kafila yɛrɛ li ɲɛ we sɛmɛ we. Kafila ɲugbɔyɔ taanri wu ɲɛ wu ni:
\ipi \bd 1\bd* Nʼa daa fɛɛ ya yaa na taha can koro li fɛni, na pu nʼa daa wu taha Yesu na.
\imi \bd 2\bd* Yi taan ni yiyɛ ni, yi da ɲaari kpɛɛngɛ ni.
\imi \bd 3\bd* Yi da yiyɛ kasɛri karamɔgɔ-kafinɛjuu pii na.
\is1 Sɛmɛ wu kafila ɲugbɔyɔ
\ipi \bd 1 Yohana 1:1—2:17\bd* Na ɲaari kpɛɛngɛ ni.
\imi \bd 1 Yohana 2:18-29\bd* Jɔgɔ wu ɲɛ Kirisa wo pɛn wu wɛ?
\imi \bd 1 Yohana 3—4\bd* Taanɲɛɛgɛ keree.
\imi \bd 1 Yohana 5:1-12\bd* Sɛɛrɛɛ pʼa yemu jo Yesu shizhaa na ge.
\imi \bd 1 Yohana 5:13-21\bd* Ɲìi sicuumɔ tadaŋa nakaara baa wogo.
\c 1
\s1 Ɲìi sicuumɔ nixhɔbaama jomɔ
\p
\v 1 Wemu wu ɲɛ ɲìi sicuumɔ jomɔ pu ge, wee wo keree wèe wa gani yi mu, wemu wʼa bye wà yani koŋɔ ki yàa ge. Wèe ya wu jomɔ pu logo, na wu ɲa wù ɲìi ki na. Wèe ya wu sɛɛri xuuni, a wù keye bɛ di gbɔn wu na. 
\v 2 Pee ɲìi sicuumɔ pʼa puyɛ shɛ, wèe ya pu ɲa, na pu sɛɛri keree pye. Ɲìi sicuumɔ nixhɔbaama pe pu bye Kilɛ tàan na puyɛ shɛ wù na ge, pee kaa wʼà yu yi mu. 
\v 3 Wʼà lemu ɲa, na lemu logo ge, lee wʼà yu yi mu, kɔnhɔ yi bɛ di jé wù wo kariɲɛɛgɛ ki ni. Wèe kunni wa jé To Kilɛ ni wu Ja Yesu Kirisa wo kariɲɛɛgɛ ki ni. 
\v 4 Wèe ya kii keree kii ka na ki tun yi mu, kɔnhɔ wù fundanga ki ɲɔ di fa.
\s1 Kilɛ ɲɛ kpɛɛngɛ; wʼà ɲaari kee ni
\p
\v 5 Wʼà jomɔ pemu logo Yesu Kirisa mu di jo yi mu ge, pee pu wa pe na Kilɛ ɲɛ kpɛɛngɛ, nibiige yafiin wa wu ni wɛ. 
\v 6 Wù bu jo na Kilɛ wo kariɲɛɛgɛ ki ni wù ɲɛ, na ta wù ɲaari gbee nibiige ni, kafinɛyɛ wʼà yu, wù ɲɛ can ɲuŋɔ ni wɛ. 
\v 7 Ga wù ba ɲaari kpɛɛngɛ ni, ma na jo ba Kilɛ wa kpɛɛngɛ ni mɛ wɛ, wee tuun wu ni wʼà pye wùyɛ kariɲii, wu Ja Yesu wu shishan pu na wù pye fɛɛfɛɛ na wù jurumu wu bɛɛri laha wù na.
\s1 Wù wù tɔɔgɔ wolo jurumu ni fɛɛfɛɛ
\p
\v 8 Wù bu jo na wù ya jurumu pyi wɛ, wuyɛ wʼa biinŋɛ can ɲɛ wù funyɔ ni wɛ. 
\v 9 Ga wù bu yere wù jurumu wu na, Kilɛ ya tii na ɲɛ ɲɔmɛɛ fɔɔ. Lee funŋɔ ni wu na wù jurumu wu \w yafa\w* wù mu. Wʼà kakuuŋɔɔ tuuyo yemu bɛɛri pye ge, wu na wù pye fɛɛfɛɛ na yeege kee bɛɛri ni. 
\v 10 Wù bu jo na wù ya ta na jurumu pyi wɛ, wʼà Kilɛ pye kafinɛjo, wu jomɔ pu ɲɛ wù funŋɔ ni wɛ.
\c 2
\s1 Kirisa ɲɛ wèe tɛgɛvɔɔ
\p
\v 1 Na nagoo, nʼa da kii keree kii ka di ki tun yi mu, kɔnhɔ yi ganha ba jurumu pyi wɛ. Ga wa bu jurumu pye, Tɛgɛvɔɔ wa wù mu wù To Kilɛ wu kabanugo, wee ɲɛ Yesu Kirisa, wee wemu wʼa tii ge. 
\v 2 Wʼa pye wèe jurumu wu wo footɔnɔ. Wèe wo wu yɛ bɛ wɛ, ga koŋɔ ke bɛɛri wo jurumu foo wʼa tɔ.
\s1 Wʼà yaa na Kilɛ wo ɲɔmɛhɛɛ ki co
\p
\v 3 Wù bu Kilɛ ɲɔmɛhɛɛ ki co, wù na li cɛ lee na na wʼà wu cɛ. 
\v 4 Wa ba yu na wee ya Kilɛ cɛ, na ta wu ya wu ɲɔmɛhɛɛ coni wɛ. Weefɔɔ ɲɛ kafinɛjo, can ɲɛ wu funŋɔ ni wɛ. 
\v 5 Ga wemu wʼa wu kafila wu coni ge, Kilɛ wo taanɲɛɛgɛ ke nivaŋa ki wa weefɔɔ funŋɔ ni see na. Lee na wʼà li cɛni na wèe ɲɛ wu kariɲɛɛgɛ ki ni. 
\v 6 Wemu wʼa yu na wee ɲɛ Kirisa wo kariɲɛɛgɛ ki ni ge, weefɔɔ ya yaa wʼa ɲaari ba Kirisa yɛ pyaa ya ɲaari wɛ.
\s1 Kariɲɛɛgɛ ɲɔmɛɛ nivonɔ keree
\p
\v 7 Na ɲimɛɛ, di wa ta kariɲɛɛgɛ ɲɔmɛɛfonɔ ka na tun yi mu wɛ, ga ɲɔmɛɛ nilɛɛ li wa, yʼa lemu ta fo yi nʼa daa wu ɲɔ kɔnduun wu ni ge. Yʼa jomɔ pemu logo xɔ ge, pee pu wa lee ɲɔmɛɛ nilɛɛ le. 
\v 8 Ga lee bɛ na, le nʼa ka na tun yi mu ge, lee ɲɛ ba ɲɔmɛɛfonɔ ɲɛ wɛ. Li can wʼa ɲa Yesu Kirisa wo torogana li funŋɔ ni, na ɲaa yee bɛ wo torogana li funŋɔ ni. Bani womɔ keree kii nidorogo ki wa, kpɛɛngɛ can wogo ki wa ɲí na xɔ. 
\v 9 We wʼa yu na kpɛɛngɛ ki ni wee ɲɛ, na makɔŋɔ yaha wu ni wu ceboro tɛ ni ge, womɔ ni weefɔɔ ɲɛ sanha. 
\v 10 Wemu ceboro kaa lʼa dan wu ni ge, weefɔɔ wu ɲɛ kpɛɛngɛ ki ni. Na wu yaha kpɛɛngɛ ki ni, kaa la shishiin da ga já wu pye wu watii ɲuŋɔ kyɛɛgi wɛ. 
\v 11 Ga we wʼa wu ceboro kɔ ge, womɔ ni weefɔɔ ɲɛ, womɔ ni wʼa ɲaari. Wu ya wu tashɛgɛ cɛ wɛ, bani womɔ pʼa wu pye fyɛn.
\s1 Yi ganha bu yi ɲaha le ke koŋɔ ke yaŋmuyɔ ni wɛ
\p
\v 12 Na nagoo, nʼa we sɛmɛ we tunni yi mu, bani yi jurumu wʼa \w yafa\w* yi mu Yesu wo mɛgɛ ki gbɔɔrɔ ni. 
\v 13 Nɔhɔlɛɛ, nʼa we sɛmɛ we tunni yi mu, bani we wu wa wà na ta koŋɔ sanha ɲɔ kɔn wɛ ge, yʼa wee cɛ. Lɛvɛɛ, nʼa we sɛmɛ we tunni yi mu, bani yʼa se ta Shitaanni na. Na nagoo, nʼa we sɛmɛ we tun yi mu, bani yʼa To Kilɛ cɛ. 
\v 14 Nɔhɔlɛɛ, nʼa we sɛmɛ we tun yi mu, bani we wu ɲɛ wà na ta koŋɔ sanha ɲɔ kɔn wɛ ge, yʼa wee cɛ. Lɛvɛɛ, nʼa we sɛmɛ we tun yi mu, bani yi fanha kʼa ɲɛhɛ, Kilɛ jomɔ pʼa kori yaha yi funyɔ ni, yʼa se ta Shitaanni na.
\p
\v 15 Yi ganha bu koŋɔ yaha ki taan yi mu wɛ, yi ganha bu yi ɲaha le koŋɔ yaaga ke ka nigin bɛ ni wɛ. Koŋɔ bu daan wemu mu, To Kilɛ taanɲɛɛgɛ ɲɛ weefɔɔ funŋɔ ni bada wɛ. 
\v 16 Bani keree kii bɛɛri ki ɲɛ koŋɔ ke ni ge: ceepuuro lakuuŋɔ ɲidaan keree, ni koŋɔ yaŋmuyɔ wo ɲɛpɛɛn, ni koŋɔ wo mayɛ shɛ keree, lee la shishiin wa foro To Kilɛ ni wɛ fo koŋɔ. 
\v 17 Koŋɔ kunni wa doro ni ki ɲidaan wu bɛ, ga we wʼa Kilɛ ɲidaan pyi ge, wee na ba gori yaha ɲìi na gbee.
\s1 Wʼà wuyɛ kasɛri Kirisa wo pɛɛn pu na
\p
\v 18 Na nagoo, koŋɔ ki taaxɔɔ lʼa tɛɛŋɛ. Yʼa yi logo na Kirisa wo Pɛn wu da ba ba. Wa nimɛ, Kirisa wo pɛɛn niɲɛhɛmɛɛ wa puyɛ shɛɛ na xɔ. Lee na wʼà li cɛ na koŋɔ ki taaxɔɔ lʼa tɛɛŋɛ. 
\v 19 Wèe wo kariɲɛɛgɛ ki ni pʼa foro, ga pu bi ta pye ni wèe ni nigin can can na wɛ. Pu da bi sii pye ni wèe ni nigin, pu bi da gori wèe ni. Ga pu voro wʼa li shɛɛ na pee bye ni wèe ni fungɔnnuyɔ na bada wɛ.
\p
\v 20 Ga yee wa ba pee ɲɛ wɛ, bani \w Fɛfɛɛrɛ Munaa\w* fanha ni yee ya sindirinɛ ta, kɔnhɔ yʼi can wu cɛ. 
\v 21 Nɛ ta sɛmɛ wu tun yi mu yi can cɛbaara na wɛ. Ga nʼa wu tun yi mu bani yʼa can cɛ, na nɔhɔ li cɛ sanha na kafinɛgɛ ka shishiin ya foro can ni wɛ. 
\v 22 Jɔgɔ wu ɲɛ kafinɛjo wɛ? Wemu wʼa go na Yesu ɲɛ Kirisa wɛ, koŋɔ Shɔvɔɔ we-e ge, weefɔɔ wi. Weefɔɔ wu ɲɛ Kirisa wo Pɛn we. Wʼa zhege To Kilɛ ni wu Ja wu ni. 
\v 23 Wemu wʼa she Jafɔɔ wu ni ge, weefɔɔ ya she Tofɔɔ wu bɛ ni. Wemu wʼa sɔɔ Jafɔɔ wu na ge, weefɔɔ ya sɔɔ Tofɔɔ wu bɛ na. 
\v 24 Wʼà yi kalaa jomɔ pemu ni fo yi nʼa daa wu ɲɔkɔɔnrɔ ti ni ge, yi la le yiyɛ ni pee di gori yi funyɔ ni. Lee bu bye, yi bɛ na gori yaha Jafɔɔ we, ni Tofɔɔ wu wo kariɲɛɛgɛ ki ni. 
\v 25 Kirisa ya ɲɔmɛɛ lɔ na wu na ba lekɛ kan wu mu ge, lee li wa ɲìi sicuumɔ nixhɔbaama.
\p
\v 26 Pii pʼa giin pii yi ɲuyɔ kyɛɛgi ge, pee wuu na nʼa ye ka, na yi tun yi mu. 
\v 27 Yee kunni, Yesu ya Fɛfɛɛrɛ Munaa kan yee mu, lee wa kori yee funyɔ ni, sipya wa shishiin kaɲɔɔ wa nige yi na na wʼa yi kalaa wɛ. Fɛfɛɛrɛ Munaa li wa yi kalaa keree bɛɛri ni, li kalaa wu wa can, kafinɛyɛ wa wu ni bada wɛ. Lee wuu na yi Fɛfɛɛrɛ Munaa li wo kalaa wu co, yʼi gori yaha Kirisa wo kariɲɛɛgɛ ki ni. 
\v 28 Na nagoo, yi kori yaha Kirisa wo kariɲɛɛgɛ ki ni, kɔnhɔ wu ba wuyɛ shɛ, wù lowagaa wuu di da, wù ganha da ba zhiige wu ɲaha tàan wu cabaŋa na wɛ. 
\v 29 Yʼa li cɛ na Kirisa ya tii, lee wuu na wʼà yaa na li cɛ na sipyaa sipya wa tiimɛ keree pyi ge, Kilɛ pya wu ɲɛ weefɔɔ.
\c 3
\s1 Kilɛ nagoo
\p
\v 1 Wèe kaa ya dan To Kilɛ ni fo xuuni, fo wʼa wèe pye wu nagoo. Can wu ɲɛ wii, wèe ya pye wu nagoo. Koŋɔ sipyii ya ta Kilɛ cɛ wɛ, lee lʼa pu pye pu ya cɛ nago Kilɛ nagoo wèe ɲɛ wɛ. 
\v 2 Na taanɲii, nimɛ wù ɲɛ Kilɛ nagoo. Wù na ba bye lemu ge, lee wa sanha zhɛ wɛ. Ga wʼà li cɛ na Yesu Kirisa ba wuyɛ shɛ, wù na ba bye ba wu ɲɛ wɛ, bani wù na ba wu kemɛ ɲa ba wu ɲɛ wɛ. 
\v 3 Kee \w tadaŋa\w* ki wa sipya wemu bɛɛri mu Yesu Kirisa na ge, weefɔɔ na wuyɛ pye fɛɛfɛɛ ba Kirisa ɲɛ mɛ fɛɛfɛɛ wɛ.
\p
\v 4 Sipyaa sipya wʼa jurumu pyi ge, Kilɛ wo saliya wu mʼa gyɛɛgi. Bani na jurumu pye, lee kɔri ɲɛ Kilɛ wo saliya wu mʼa kyɛɛgi. 
\v 5 Yʼa li cɛ na Yesu ya pa wu ba jurumu laha sipyii na. Jurumu wa shishiin bye wu na wɛ. 
\v 6 Sipyaa sipya wʼa kori yaha wu kariɲɛɛgɛ ki ni ge, weefɔɔ ya gbara wu kori yaha jurumu ni wɛ. Ga wemu wʼa kori yaha na jurumu pyi ge, weefɔɔ ya wu ɲa wɛ, ali wu ya wu cɛ bɛ wɛ.
\p
\v 7 Na nɔhɔpiire, wa shishiin ganha bu yi piinŋɛ wɛ. We wʼa tiimɛ keree pyi ge, weefɔɔ nidiige ki wa, ma na jo ba Yesu Kirisa yɛ pyaa ya tii tiigana lemu na wɛ. 
\v 8 Wemu bu gori yaha na jurumu pyi, Shitaanni ni weefɔɔ ya foro, bani Shitaanni wʼa jurumu pyi na lɔ fo taashiinɛ li ni. Lee wuu na Kilɛ Ja wʼa pa, kɔnhɔ wu Shitaanni wo kapyegee ki kyɛɛgi. 
\v 9 Sipyaa sipya wu ɲɛ Kilɛ wo pya wa ge, wee ya gbara wu kori yaha jurumu ni wɛ, bani Kilɛ wo sefɛɛrɛ ti ma bye wu ni. Lee wuu na wu da já gori yaha jurumu ni wɛ, bani Kilɛ wo pya wu ɲɛ wii. 
\v 10 Le na Kilɛ nagoo ni Shitaanni nagoo ya jɛni na wo puyɛ ni: Wemu ya tiimɛ keree pyi wɛ, wee ya foro Kilɛ ni wɛ, wemu bɛ ceboro kaa ya taan wu mu wɛ, wee bɛ wɛ.
\s1 Wʼà yaa na taan ni wùyɛ ni
\p
\v 11 Jomɔ pe yʼa logo fo taashiinɛ li ni ge, pee pu wa pe: Wʼà yaa na taan ni wùyɛ ni. 
\v 12 Wù ganha bu bye \w Kayɛn\w* shi wɛ, Shitaanni ni wee ya foro, wʼa wu cuun gbo. Ɲaha na wʼa wu gbo wɛ? Bani wuyɛ pyaa kapyegee ki bi kolo, na ta cuunvɔɔ wu wo kapyegee di bi tii. 
\v 13 Na cebooloo, koŋɔ sipyii bu yi kɔ, lee ganha bu yi fo wɛ. 
\v 14 Wʼà li cɛ na wʼà foro xu ni na jé ɲìi sicuumɔ ni, bani wù cebooloo pu kaa ya dan wù ni. Wemu wu ɲɛ wu cebooloo kaa ya dan wu ni-i ge, wee ya kori yaha xu ni. 
\v 15 Sipyaa sipya wʼa wu ceboro kɔ ge, wee ɲɛ sipyii gbovɔɔ. Yʼa li cɛ na ɲìi sicuumɔ nixhɔbaama wa goroo sipyii gbovɔɔ wa shishiin funŋɔ ni bada wɛ.
\p
\v 16 Le na wʼà taanɲɛɛgɛ cɛni, bani Yesu Kirisa ya wu munaa kan, kɔnhɔ wu wèe ɲuŋɔ wolo. Wèe bɛ ya yaa na wù munahaa kan wù cebooloo wuu na. 
\v 17 Ke koŋɔ ke naafuu ɲɛ wemu mu ge, weefɔɔ bu wu ceboro funmɔ wo ɲa, na bye wu ya ɲuŋɔ ɲaari wu na wɛ, dii Kilɛ tanɲɛɛgɛ di da já bye weefɔɔ funŋɔ ni wɛ? 
\v 18 Na nɔhɔpiire, wù taanɲɛɛgɛ ganha da bye ɲɔsɛɛkpɔnyɔ, ni ɲɔtanga jomɔ yɛ wɛ, ga wù kapyegee kʼa yaa na li shɛɛ na can wu ɲɛ wù taanɲɛɛgɛ ke.
\s1 Wù wù logoo waha, wù fulo Kilɛ na
\p
\v 19 Wù ba lee pyi, lee na wù da ba li cɛ na wù ɲɛ can wu wuu. Wù na já wù hakilee pu teŋɛ Kilɛ ɲaha tàan. 
\v 20 Ali wù zɔlɔɔ pu ɲɛhɛ ba wù jaagi bɛ, wù na já wù hakilee pu teŋɛ, bani Kilɛ ya keree bɛɛri cɛ, wu dʼa pɛlɛ bɛ wèe zɔlɔɔ pu na.
\p
\v 21 Na taanɲii, wèe zɔlɔɔ pu bu bye pu ya já wèe jaagi nige wɛ, lee ya li shɛɛ na wèe ya lowagaa ta, na fulo Kilɛ na. 
\v 22 Wù bu yaaga bɛɛri ɲɛɛri wu mu, wù na kee ta, bani wʼà wu ɲɔmɛɛ coni, na wu ɲidaan keree pyi. 
\v 23 Wu ɲɔmɛɛjuu li le, na wèe pu dà wu Ja Yesu Kirisa mɛgɛ ki na, wù daan ni wùyɛ ni, ba wʼa yi jo wù mu wɛ. 
\v 24 Wemu wʼa wu ɲɔmɛɛ coni ge, weefɔɔ ya jé Kilɛ wo kariɲɛɛgɛ ki ni, a Kilɛ bɛ di bye ni weefɔɔ ni kariɲɛɛgɛ ni. Kilɛ ya wu Munaa li kan wèe mu, lee na wèe ya li cɛ na Kilɛ ɲɛ ni wèe ni kariɲɛɛgɛ ni.
\c 4
\s1 Kilɛ Munaa ni kafinɛjo munaa
\p
\v 1 Ayiwa, na taanɲiinɛɛ yi ganha ba daa munahaa bɛɛri kafila na wɛ, ga yi fɛnhɛ ki suguri ki bi foro Kilɛ ni, bani kafinɛjuu piimu pʼa puyɛ pyi Kilɛ tudunmɔɔ ge, pee niɲɛhɛmɛɛ ya foro koŋɔ na. 
\v 2 Le na yi da ba \w Kilɛ Munaa\w* cɛ: Munaa lemu lʼa sɔɔ li na na sipya yɛ pyaa Yesu Kirisa ya pa bye ge, lee lʼa foro Kilɛ ni. 
\v 3 Ga munaa lemu ya ta sɔɔ yee na Kirisa shizhaa na-ɛ ge, lee ya foro Kilɛ ni wɛ, lee ɲɛ Yesu Kirisa wo Pɛn wu wuu le. Yʼa yi logo xɔ na wu na ba ba koŋɔ ke na. Ga nimɛ, wuyɛ pyaa bɛ wa na xɔ koŋɔ ki na. 
\v 4 Na nɔhɔpiire, yee kunni ɲɛ Kilɛ wuu, lee wuu na yee ya se ta pee kafinɛjuu pu na. Bani Kilɛ Munaa le li wa yee funyɔ ni ge, lee ya ye koŋɔ sipyii pu wuu li na. 
\v 5 Pee kafinɛjuu pii ɲɛ ke koŋɔ ke wuu. Lee wuu na pu kafila wu ɲaha ya tii ke koŋɔ ke yaŋmuyɔ ye yɛ shizhaa na, a ke koŋɔ ke sipyii di ganha na pu jomɔ nuri. 
\v 6 Ga wèe kunni ɲɛ Kilɛ wuu. Sipyaa sipya wʼa Kilɛ cɛ ge, weefɔɔ na da wèe jomɔ pu nuri. Ga sipya wemu ɲɛ Kilɛ wo wɛ, weefɔɔ ya wèe jomɔ pu nuri wɛ. Ayiwa, lee na yʼa da can Munaa li wo sipyii pu cɛ na shɔɔnri kafinɛjo munaa li wo sipyii pu ni.
\s1 Kilɛ ya wu keree bɛɛri pyi ni taanɲɛɛgɛ ni
\p
\v 7 Ayiwa, na taanɲiinɛɛ, wù taan ni wùyɛ ni, bani Kilɛ ni taanɲɛɛgɛ ya foro. See see taanɲɛɛgɛ ɲɛ sipya wemu funŋɔ ni ge, wee wu ɲɛ Kilɛ pya. Wee wʼa Kilɛ cɛ. 
\v 8 See see taanɲɛɛgɛ ɲɛ sipya wemu funŋɔ ni wɛ, wee ya Kilɛ cɛ wɛ, bani ma bu jo Kilɛ, mʼa jo taanɲɛɛgɛ. 
\v 9 To Kilɛ ya wu taanɲɛɛgɛ ki shɛ shɛgana lemu na ge, lee li wa mɛ. Wʼa wu Ja nigin pe wu tun na pa koŋɔ na, kɔnhɔ wu ɲìi sicuumɔ kan wèe mu. 
\v 10 Lemu lʼa Kilɛ wo taanɲɛɛgɛ ki shɛɛ wù na ge, lee li wa mɛ: Li wa nago wèe yíri taanɲɛɛgɛ kʼa fɛnhɛ yìri na ɲaha tii Kilɛ na-ɛ dɛ! Ga wèe pʼa fɛnhɛ taan Kilɛ mu, a wu wu Ja nigin pe wu kan na pye saraga, kɔnhɔ wù jurumu wu \w yafa\w* wù mu wee gbɔɔrɔ ni.
\p
\v 11 Ayiwa, na taanɲiinɛɛ, ba ni wèe kaa ya taan fo xuuni Kilɛ mu lee taangana li na, wèe bɛ ya yaa na taan ni wùyɛ ni dɛ! 
\v 12 Sipya wa shishiin sanha Kilɛ ɲa ɲa wɛ. Ga taanɲɛɛgɛ bu bye wèe tɛ ni, wèe ni Kilɛ na bye kariɲɛɛgɛ ni. Wu taanɲɛɛgɛ ki bɛ na ganha na bɛlɛ wù funyɔ ni, fo na ba wù zɔlɔɔ pu ɲi. 
\v 13 To Kilɛ ya wu Munaa li kan wèe mu, lee na wèe ya li cɛ na jo wèe wa ni wu ni kariɲɛɛgɛ ni, wu bɛ di ɲɛ ni wù ni kariɲɛɛgɛ ni. 
\v 14 Wèeyɛ pyaa ya wu ɲa ɲii na, lee funŋɔ ni, na yi yu bɛ na Kilɛ ya wu Ja wu tun na pa koŋɔ na, kɔnhɔ wu ba koŋɔ sipyii shɔ. 
\v 15 Sipyaa sipya wʼa sɔɔ li na na Kilɛ Ja wu ɲɛ Yesu ge, Kilɛ na gori yaha ni weefɔɔ ni kariɲɛɛgɛ ni, weefɔɔ bɛ na gori yaha ni Kilɛ ni kariɲɛɛgɛ ni. 
\v 16 Wèe kaa ya dan Kilɛ ni taangana lemu na ge, wèe ya lee cɛ, na dà bɛ li na.
\p Bani ma bu jo Kilɛ, mʼa jo taanɲɛɛgɛ. Wemu wʼa kori yaha taanɲɛɛgɛ na ge, wee wʼa kori yaha ni Kilɛ ni kariɲɛɛgɛ ni, a Kilɛ bɛ di gori yaha ni weefɔɔ ni kariɲɛɛgɛ ni. 
\v 17 Kilɛ wo taanɲɛɛgɛ ki ba bɛlɛ wù funyɔ ni, fo na ba wù zɔlɔɔ pu ɲi, wee tuun wu ni caŋa kemu Kilɛ da ba kiiri wu kɔn ge, fyaara ta shishiin da ba bye wù ni kee caŋa wɛ. Bani ba Yesu Kirisa ɲɛ wɛ, mu wèe bɛ wo ɲaarigana li wa koŋɔ puga ni. 
\v 18 Taanɲɛɛgɛ ɲɛ sipya wemu zɔ ni ge, weefɔɔ ya fyagi wɛ. See see taanɲɛɛgɛ ya fyaara bɛɛri kɔri, bani sipya ya kakuuyo yemu pyi ge, yee wo jaagi kanhama pu ma wu pye wu na fyagi. Lee wuu na, sipya wemu wʼa fyagi ge, weefɔɔ zɔ wu bɛɛri ya ɲi see see taanɲɛɛgɛ na wɛ. 
\v 19 Wèe kaa lʼa fɛnhɛ taan To Kilɛ mu, lee wuu na wu kaa ya dan wèe bɛ ni. 
\v 20 Wa bu jo na Kilɛ kaa ya dan wee ni, na ta wu ceboro makɔŋɔ di ɲɛ wu funŋɔ ni, weefɔɔ ɲɛ kafinɛjo. Bani ma ceboro wemu mu ya ɲaa ɲiga bɛɛri ge, wee kaa bye li ya dan mu ni wɛ, Kilɛ wemu wu ɲɛ mu ya wee ɲaa-i ge, dii wee kaa di da já da dan ma ni wɛ? 
\v 21 Yesu Kirisa yɛ pyaa bɛ yɛrɛ ya le ɲɔmɛɛ le jo wèe mu na sipyaa sipya wʼa jo na Kilɛ kaa ya dan ma ni ge, ma cebooloo pu bɛ kaa ya yaa na dan ma ni.
\c 5
\s1 Sipya ya yaa na sɔɔ Kilɛ wo nijoyo yi na
\p
\v 1 Sipyaa sipya wʼa dà li na na Shɔvɔɔ wu ɲɛ Yesu ge, weefɔɔ ɲɛ Kilɛ wo pya. Tofɔɔ kaa ba dan ma ni, wu nagoo bɛ kaa ya yaa na dan ma ni. 
\v 2 To Kilɛ kaa ba dan wèe ni, a wù ganha na wu ɲɔmɛɛjogoo ki bɛ coni, lee na wèe da li cɛ na wu nagoo pu kaa ya dan wèe ni. 
\v 3 Wù bu jo na Kilɛ ya dan wù ni, wʼà yaa na wu ɲɔmɛhɛɛ ki coni. Wu ɲɔmɛhɛɛ ki ya yaa ki pye wù mu tuguro wɛ. 
\v 4 Bani piimu bɛɛri pu ɲɛ Kilɛ wo nagoo pu ge, pee bɛɛri ya se ta ke koŋɔ ke na. Nʼa daa wemu wu wa wèe mu ge, wee wʼa wèe pye wèe ya já na se taa ke koŋɔ ke na. 
\v 5 Sipyaa sipya wʼa dà li na na Kilɛ Ja wu ɲɛ Yesu ge, ni wee wa yɛ bɛ wɛ, jɔgɔ wu da já se ta ke koŋɔ ke na wɛ?
\p
\v 6 Yesu Kirisa ya pa koŋɔ na lɔhɔ ni shishan baraga ni. Wu ya ta da lɔhɔ wo \w batizeli\w* wu yɛ na-ɛ dɛ! Ga, wʼa wu shishan bɛ kan pʼa wo, na xhu. \w Kilɛ Munaa\w* li wa lee wo sɛɛri, bani lee lʼa can wu shɛɛ sipyii pu na. 
\v 7 Lee funŋɔ ni, sɛɛrɛɛ taanri wu ɲɛ wà na li shɛɛ sipyii pu na na Kilɛ Ja wu ɲɛ Yesu. 
\v 8 Pee sɛɛrɛɛ taanri wu ɲɛ: Kilɛ Munaa ya can wu shɛɛ; lɔhɔ ni shishan, yee bɛ di wu shɛɛ. Ayiwa, yee taanri we ya bɛ ɲɔmɛɛ na Yesu shizhaa na. 
\v 9 Sipyii ya yemu yu ge, wèe ya sɔɔ yee na, na ta yemu Kilɛ ya yu ge, yee dʼa ye na kanha sipyii wo nijoyo yi na. Kilɛ yɛ pyaa kʼa fiin jo wu Ja wu shizhaa na. 
\v 10 Sipya bɛɛri wʼa dà Kilɛ Ja wu na ge, weefɔɔ ya sɔɔ li na wu funŋɔ ni na kii keree kii ɲɛ can. Sipya wemu ya dà Kilɛ wo nijoyo yi na wɛ, weefɔɔ ya Kilɛ yaha ba kafinɛjo ɲɛ wɛ. Bani wufɔɔ ya ta dà Kilɛ wo nijoyo yi na wu Ja wu shizhaa na wɛ. 
\v 11 Yemu Kilɛ ya jo wèe mu ge, yee yi wa mɛ na Kilɛ ya ɲìi sicuumɔ nixhɔbaama kan wèe mu. Pee ɲìi sicuumɔ pe ya daa wu Ja wu gbɔɔrɔ ni. 
\v 12 Ayiwa, wee Ja wu ɲɛ sipya wemu mu ge, ɲìi sicuumɔ pu wa weefɔɔ mu. Kilɛ Ja wu ɲɛ wemu mu wɛ, ɲìi sicuumɔ ɲɛ weefɔɔ mu bada wɛ.
\s1 Tadaŋa kemu ki wa nʼa daa fɛɛ pu mu ge
\p
\v 13 Ayiwa, yee piimu pʼa dà Kilɛ Ja wu na ge, nɛ we sɛmɛ we tun yi mu, kɔnhɔ yʼi li cɛ na yee ya ɲìi sicuumɔ nixhɔbaama pu ta na xɔ. 
\v 14 Ayiwa, lowaa lemu wa wèe mu Kilɛ ɲaha tàan ge, lee li wa le: Wèe bu yaaga ka ɲɛɛri wu mu na saha ni wu ɲidaan ni, wu na wèe ɲɛrɛgɛ ki logo. 
\v 15 Wù bi ta wʼà li cɛ na wʼa wù ɲɛrɛgɛ nuri, wèe ya li cɛ na yaaga bɛɛri wèe ya ɲɛɛri wu mu ge, wèe ya kee ta xɔ.
\p
\v 16 Jurumu wemu wu ɲɛ wu da já sipya munaa kyɛɛgi ɲiga na-ɛ ge, ma ceboro bu wee jurumu wa pye, Kilɛ ɲɛɛri wu mu kɔnhɔ Kilɛ di ɲìi sicuumɔ kan wu mu. Piimu wo jurumu wu ɲɛ wu da já pu munahaa kyɛɛgi ɲiga na-ɛ ge, pee yɛ kaa di wa byi. Ga jurumu wa ɲɛ wà wemu na já sipya munaa kyɛɛgi ɲiga na ge, di wa go yi Kilɛ ɲɛɛri wee wa wuu na wɛ. 
\v 17 Tiibaara bɛɛri ti ɲɛ jurumu, can wu ɲɛ wii. Ga jurumu wa ɲɛ wà wee wa da já sipya munaa kyɛɛgi ɲiga na wɛ.
\p
\v 18 Wèe ya li cɛ na jo sipya bɛɛri wu ɲɛ Kilɛ wo pya wa ge, weefɔɔ ya goroo gbee jurumu na na byi wɛ. Bani Kilɛ Ja wu ma wufɔɔ mara, lee wuu na Shitaanni da já se ta wu na wɛ. 
\v 19 Wèe ya li cɛ na jo wèe ɲɛ Kilɛ wo nagoo, ga koŋɔ ke sipyii di ɲɛ Shitaanni wo fanha ke nɔhɔ ni. 
\v 20 Ga wèe ya li cɛ bɛ na jo Kilɛ Ja wʼa pa, na ba fungɔngɔ fɛɛrɛ kan wèe mu, kɔnhɔ wèe di see see Kilɛ wuyɛ pyaa tii cɛ. Wèe na ɲɛ Kilɛ Ja wu kariɲɛɛgɛ ki ni, lee ya wèe pye see see Kilɛ wuyɛ pyaa wuu. Wee Ja we wu ɲɛ see see Kilɛ wuyɛ pyaa, ni ɲìi sicuumɔ nixhɔbaama.
\p
\v 21 Ayiwa na nɔhɔpiire, yʼa yiyɛ kasɛri yapɛrɛgaanra na!