\id 1TI  
\h 1 TIMOTEE 
\toc1 Myʉtuꞌukpʉ Neky Diꞌibʉ Pa̱a̱blʉ Tyuknigajx Ja Timotee 
\toc2 1 TIMOTEE 
\toc3 1 Ti. 
\mt1 Myʉtuꞌukpʉ Neky Diꞌibʉ Pa̱a̱blʉ Tyuknigajx Ja Timotee 
\c 1  
\p  
\v 1 Ʉj Pa̱a̱blʉ, Jesukristʉ ꞌyapóstʉlʉ, es kéxyʉts nmiñ ma̱ Dios yʉ nYajnitsokpʉꞌa̱jtʉm esʉ Nindsʉnꞌa̱jtʉm Jesukristʉ, diꞌibʉ ndukjotkujkꞌa̱jtʉm,  
\v 2 nduknigejxypyʉts mijʉ tya̱dʉ neky, Timotee. Dʉꞌʉnʉts mij njawʉ éxtʉmdsʉ nꞌuꞌunk, jaꞌa ko ʉjts mij tʉ ndukmʉbeky ja Kristʉ. Waꞌan ja Dios Teety esʉ Nindsʉnꞌa̱jtʉm Jesukristʉ mguniꞌxyʉty es mmoꞌoyʉty ja paꞌꞌayoꞌon esʉ agujkꞌa̱jt jotkujkꞌa̱jtʉn. 
\s1 Kyaj yajkupʉ́kʉt ja ʉxpʉjkʉn diꞌibʉ kyaj tyʉyꞌa̱jtʉnʉty 
\p  
\v 3 Kom tʉ nduknipeky kots oj nnejxy Masedoñʉ ña̱a̱xóty, wʉꞌʉm Éfesʉ ka̱jpnóty es xyꞌanʉʉmʉdʉ tadʉ ja̱ꞌa̱yʉty es kʉdiibʉ yaꞌʉxpʉ́kʉt diꞌibʉ kyaj tyʉyꞌa̱jtʉnʉty,  
\v 4 es anʉʉmʉdʉ ko kyaj tmʉjpʉjta̱ꞌa̱gʉt ja ꞌyaptʉjkʉ madyaꞌaky esʉ wiinkpʉ jekymyadyaꞌaky, mʉt ko tʉgekyʉ tya̱a̱dʉ jeꞌeyʉ dyajtʉgóy ja tiempʉ es kyaj xytyuꞌunxʉm ni madsoo, es ni xykyapudʉjkʉm es nguydyuꞌunʉm mʉt ja mʉbʉjkʉn diꞌibʉ ja Dios tʉ xytyuknipʉjkʉm. 
\p  
\v 5 Jaꞌagyʉjxmʉ tya̱dʉ anaꞌamʉn es nixim niyam nnaydsyojkʉm mʉt ja wa̱ꞌa̱ts a̱a̱ wa̱ꞌa̱ts jot es mʉʉt ja tʉyꞌa̱jtʉnbʉ mʉbʉjkʉn.  
\v 6 Na̱a̱gʉty tʉ tmʉduꞌudʉgóydyʉ tya̱dʉ ʉxpʉjkʉn es tʉ ñaygyʉyákyʉty mʉt ja nanʉgoobʉ kajxy madyaꞌaky.  
\v 7 Byeen jyatukꞌʉxpʉka̱ꞌa̱ndʉ ja Diosʉ ꞌyanaꞌamʉn, per ni tkajaygyúkʉdʉ diꞌibʉ myadyáktʉp es ni diꞌibʉ tukꞌʉxpʉjktʉp éxtʉmxyʉp jyatʉyꞌa̱jtʉnmʉʉdʉty. 
\p  
\v 8 Nnija̱ꞌa̱m ko oyʉ tadʉ anaꞌamʉn ko nyajtuꞌunʉm éxtʉm pyaadyʉty.  
\v 9 Nnija̱ꞌa̱m nandʉꞌʉn ko ni tuꞌugʉ anaꞌamʉn kyayajpʉjtaꞌaky mʉt ja diꞌibʉ tyuundʉp ja oybyʉ. Tadʉ anaꞌamʉn jaꞌa dʉꞌʉn mʉt ja diꞌibʉ niyeꞌepy yujkꞌyeꞌepy, diꞌibʉ kyaj ꞌyʉygyupeky kyajxykyupéky, diꞌibʉ axʉk ja̱ꞌa̱yʉty, diꞌibʉ pojpʉ ja̱ꞌa̱yʉty, diꞌibʉ kyajpʉ Dios tmʉjꞌíxy, diꞌibʉ kyaj ttuñʉ kwentʉ Diosʉ ꞌyʉxpʉjkʉn, diꞌibʉ yajja̱ꞌa̱yꞌoꞌktʉp, es extʉ diꞌibʉ yaꞌoꞌktʉp ja tya̱a̱k tyeedyʉty,  
\v 10 diꞌibʉ mʉꞌinduundʉp, diꞌibʉ yedyʉjkʉty tyuundʉp tsoydyuꞌun mʉʉtpʉ ak yʉꞌʉjʉty, diꞌibʉ tyoꞌktʉp ja ja̱ꞌa̱y, diꞌibʉ andáktʉp, diꞌibʉ Dios tyukka̱jxpejtypy mʉt ja andakʉngyʉjxm, es diꞌibʉ oytyiity wiink tyiimpy kʉdiinʉm éxtʉm ja tʉyꞌa̱jtʉnbʉ ʉxpʉjkʉn.  
\v 11 Jaꞌa nꞌandijpyʉts ja oybyʉ ayuk diꞌibʉ mʉjꞌa̱jtʉn mʉʉtpʉ esʉ Diosʉ kuniꞌxypyʉ xytyuknipʉjkʉts es nga̱jxwa̱ꞌxʉdʉts. 
\s1 Pa̱a̱blʉ Dios tja̱ꞌa̱ygyʉdaꞌaky ko pyaꞌꞌayóyʉty 
\p  
\v 12 Nja̱ꞌa̱ygyʉdákypyʉts ja Nindsʉnꞌa̱jtʉm Jesukristʉ mʉt kots tʉ xymyoꞌoy ja madakʉn mʉdʉdsʉ nduunk, es mʉt kots tʉ xywyinꞌixy es tʉ xypyʉjtaꞌagyʉts es ndúnʉdʉts ja tyuunk,  
\v 13 es dʉꞌʉnʉts tʉ xytyuknipeky óyʉts ʉj jawyíñʉp ngamʉjꞌijxy mʉdʉdsʉ nꞌayuk, es óyʉts oj njajʉna̱ꞌa̱ñ tsa̱a̱tsykyʉbéty mʉt yʉꞌʉ, es nbajʉdijtyʉts ja jyaꞌay. Perʉ Dios myʉda̱jt ja paꞌꞌayoꞌon mʉt ʉj, jaꞌa ko kyajnʉmdsʉ naty nmʉbeky ja Jesukristʉ es kyajtsʉ naty nnijawʉ tiidsʉ dʉꞌʉn ndiimpy.  
\v 14 Pa̱a̱ty ja Nindsʉnꞌa̱jtʉmʉ myayꞌa̱jtʉn oy jyantsymyʉ́jʉty mʉt ʉj, tiꞌigyʉ mʉt ja mʉbʉjkʉn es ja tsojkʉn diꞌibʉ nandʉꞌʉn nmʉda̱jtʉm mʉt ko nꞌijtʉm tiꞌigyʉ mʉdʉ Jesukristʉ. 
\p  
\v 15 Byeen tyʉyꞌa̱jtʉnʉty, es nidʉgekyʉ tmʉbʉ́ktʉt, ko Jesukristʉ myiiñ naxwiiñ es dyajnitsoꞌoga̱ꞌa̱ñ ja pojpʉ ja̱ꞌa̱yʉty, es ma̱ dʉꞌʉmbʉ pyekyjyaꞌayʉty nik niꞌigʉ axʉʉk ʉj.  
\v 16 Per pa̱a̱dyʉ Dios tmʉda̱jty ja paꞌꞌayoꞌon mʉt ʉj, esʉ Jesukristʉ dyaꞌíxʉdʉt ja myaꞌxtujkʉn mʉj wiin ma̱ ʉj. Es dʉꞌʉnʉts xyajtúñʉts éxtʉmʉ diꞌibʉ niꞌigʉ tmʉdaty ja pyojpʉ, éxtʉmʉ ijxpajtʉn mʉt ja diꞌibʉty óknʉmʉ naty myʉbʉkándʉp yʉꞌʉ, es tjaꞌaꞌáttʉt ja jikyꞌa̱jtʉnʉ winʉ xʉʉ winʉ tiempʉ.  
\v 17 Nꞌawda̱jtʉm ja Dios, rey winʉ xʉʉ winʉ tiempʉ, diꞌibʉ myʉda̱jtypy ja windsʉꞌkʉn esʉ mʉjꞌa̱jtʉn, yʉꞌʉ tuꞌuk Diosꞌa̱jtp, diꞌibʉ kyaj yaꞌixy es diꞌibʉ nina̱ꞌa̱ kyaꞌeeky. Waꞌan dʉꞌʉnʉty. 
\p  
\v 18 Uꞌunk Timotee, diꞌibʉ tya̱a̱dʉ nduknipejkypy, tiꞌigyʉ yʉꞌʉ éxtʉm ja mʉguꞌuk mnimaydyákʉdʉ ja Diosʉ jyaꞌa jawyíñʉp. Pa̱a̱ty mʉt yʉꞌʉ mba̱a̱t amumduꞌuk jot xyꞌaktimmʉdúñ ja Dios nʉꞌʉnʉ mmʉja̱a̱.  
\v 19 Mʉdat dʉꞌʉñʉm ja mʉbʉjkʉn amumduꞌuk jot es mʉdat ja mjot mwinma̱ꞌa̱ñ wa̱ꞌa̱ts. Na̱a̱gʉty kyaj tpʉjktʉjkʉdʉ ko ja Dios jyawinma̱ꞌa̱ñmyoꞌoya̱ꞌa̱nʉdʉ. Pa̱a̱ty ñayyajwinma̱ꞌa̱ñdyʉgooyʉdʉ es tmastuttʉ ja mʉbʉjkʉn ma̱ Kristʉ.  
\v 20 Dʉꞌʉn jya̱jttʉ ja Imeneeʉ esʉ Alejandrʉ. Pa̱a̱ty es tnijáwʉdʉt jatuk xʉʉ es kyaj tmʉꞌꞌʉdʉgoy tmʉga̱jxtʉgóyʉt ja Dios, ndukkʉdʉjkʉts ja mʉjkuꞌugópk Satanás. 
\c 2  
\s1 Pa̱a̱blʉ ttuknipeky ja Timotee es kya̱jxta̱ꞌa̱gʉt 
\p  
\v 1 Tim jʉjpꞌám nmʉnuꞌxtáktʉp esʉ ja̱ꞌa̱y tniꞌamdówʉdʉt, tniga̱jxta̱a̱gʉdʉt nidʉgekyʉ ja̱ꞌa̱yʉty, es tja̱ꞌa̱ygyʉda̱ꞌa̱ktʉt ja Dios jaꞌagyʉjxmʉty,  
\v 2 nidʉgekyʉ réyʉty es nidʉgekyʉ justísʉty, es dʉꞌʉn mba̱a̱t njikyꞌa̱jtʉm yajxón es ni pʉ́n mʉʉt ngatsiptuꞌunʉm, es nduꞌunʉm ja oybyʉ es njikyꞌa̱jtʉm éxtʉm ja Dios ttseky.  
\v 3 Tya̱a̱dʉ dʉꞌʉn oy, es yʉꞌʉ dʉꞌʉn ꞌyoyjya̱ꞌa̱p ja Dios yʉ nYajnitsokpʉꞌa̱jtʉm,  
\v 4 pes yʉꞌʉ tsyejpy es nidʉgekyʉ yajnitsoꞌogʉdʉt es nandʉꞌʉn tjaygyúkʉdʉt diꞌibʉ dʉn tʉyꞌa̱jtʉn.  
\v 5 Jaꞌa ko ta tiꞌigyʉ jeꞌeyʉ Dios, es nan tiꞌigyʉ jeꞌeyʉ diꞌibʉ ʉdsa̱jtʉm xykyudʉnaabyʉꞌa̱jtʉm ma̱ Dios, yʉ ja̱ꞌa̱y Jesukristʉ,  
\v 6 nayya̱jkʉ ma̱ ꞌyeꞌky, es dʉꞌʉn tkʉbejty tkumʉdooy ja ñitsokʉn nidʉgekyʉ naxwíñʉdʉ ja̱ꞌa̱yʉty. Esʉ tya̱a̱dʉ jayaꞌijx ma̱ ja tiempʉ yajtuknibʉjtákʉ.  
\v 7 Mʉdʉ tya̱a̱dʉts ʉj oj nyajpʉjtaꞌaky ja Diosʉ ꞌyayuk ka̱jxwa̱ꞌxpʉ esʉ apóstʉlʉ, es ndukniꞌíxʉdʉts ja tʉyꞌa̱jtʉn es ja mʉbʉjkʉn mʉt ja diꞌibʉ kyaj ꞌyisraelítʉty. Tʉyꞌa̱jtʉnʉts njʉna̱ꞌa̱ñ, kyajts nꞌandaꞌaky. 
\p  
\v 8 Ndsejpyʉts esʉ ja̱ꞌa̱y oytyim ma̱a̱ty kya̱jxta̱ꞌa̱ktʉt, dyajpʉdʉꞌʉktʉt ja kyʉꞌʉjʉty mʉt ja wa̱ꞌa̱ts a̱a̱ wa̱ꞌa̱ts jot, kyaj ñayyajjotꞌambʉ́kʉdʉt es kyaj tsyiptúnʉt nixim niyam.  
\v 9 Esʉ toxytyʉjk ñaywyítʉdʉt yajxón adʉyʉ, es kyaj ñayñiwook ñaygyʉxwoogʉdʉt es ñayyajmʉjpʉdsʉ́mʉdʉt, es ni jeꞌeyʉ kyanayyaꞌoydyʉ́kʉdʉt mʉt ja oorʉ o perlʉ, es ni mʉt ja wyitʉ tsooxʉtypyʉ.  
\v 10 Waꞌan ttundʉ ja oybyʉ tuunk diꞌibʉ pátʉp ttúndʉt nidʉgekyʉ toxytyʉjkʉty diꞌibʉ myʉduundʉp ja Dios.  
\v 11 Waꞌan yʉ toxytyʉjkʉty amoñʉ es yuunk naxypy tmʉdooꞌíty ja ʉwij ka̱jxwíjʉn.  
\v 12 Kyajts ʉj nyajkutíky es ja toxytyʉjk yaꞌʉxpʉ́kʉt o ja yedyʉjk tꞌanaꞌamʉt. Waꞌan amoñʉ tꞌamʉdoonáxy,  
\v 13 mʉt ko Dios dyajkojy jawyiin ja Adán es óknʉmʉ Eevʉ.  
\v 14 Yʉ Adán kyaj oj yajwinꞌʉʉñ, jaꞌa dʉꞌʉn ja ñʉdoꞌoxy diꞌibʉ yajwinꞌʉꞌʉn, es ko oj yajwinꞌʉʉñ, net oj pyekykyaꞌay.  
\v 15 Per ja toxytyʉjk jyotkujkꞌáttʉt ko tpadundʉ ja uꞌunkta̱a̱kꞌa̱jtʉn, ko tmʉdattʉ ja mʉbʉjkʉn, es ko tpadundʉ yajxón mʉt ja tsojkʉn, ja wa̱ꞌa̱tsꞌa̱jtʉn es ja tudaꞌakyꞌa̱jtʉn. 
\c 3  
\s1 Wiꞌix tyúndʉt ja mʉbʉjkpʉtʉjkʉ kywentʉꞌa̱jtpʉty 
\p  
\v 1 Tʉyꞌa̱jtʉnʉꞌʉ tya̱dʉ ayuk: Pʉn ja pʉ́n ttseky es tyúnʉt ja mʉbʉjkpʉtʉjk kwentʉꞌa̱jtpʉ, oyʉ tadʉ tuunk diꞌibʉ tsyejpy.  
\v 2 Diꞌibʉ kwentʉꞌa̱jtp ma̱ mʉbʉjkpʉtʉjk ñaymyúkʉdʉ, jikyꞌátʉp wa̱ꞌa̱ts es éxtʉm kyaj mba̱a̱t yajpekymyoꞌoy, diꞌibʉ myʉda̱jtypy tiꞌigyʉ ñʉdoꞌoxy, diꞌibʉ jikyꞌa̱jtp tudaꞌaky es ñayꞌaguwítsʉty, diꞌibʉ naymyayꞌa̱jt naywyindsʉꞌkʉp, diꞌibʉ oyña̱ꞌa̱jʉty ꞌyaxá̱jʉp ja ja̱ꞌa̱y yajxón ma̱ ja tyʉjk, diꞌibʉ mba̱a̱t yaꞌʉxpeky,  
\v 3 diꞌibʉ kyaj myʉꞌiiky, diꞌibʉ kyaj tsyiptʉjkʉty, diꞌibʉ oyjyaꞌay, diꞌibʉ tudaꞌaky amumduꞌuk jot, diꞌibʉ kyaj myeeñꞌoogʉty,  
\v 4 diꞌibʉ yajxón anaꞌamp ma̱ tyʉjk es dʉꞌʉn tmoꞌoyʉt ja ijxpajtʉnʉ ꞌyuꞌunk ꞌyʉna̱ꞌk es myʉmʉdówʉdʉt es wyindsʉꞌʉgʉdʉt;  
\v 5 pes pʉn tuꞌuk kyaj tjaty ꞌyanaꞌamʉt ma̱ yʉ kyʉꞌʉmdʉjk, ¿wiꞌix mba̱a̱t tkwentʉꞌaty ja myʉmʉbʉjkpʉty ma̱ ñaymyúkʉdʉ?  
\v 6 Kyaj tyúnʉt mʉbʉjkpʉtʉjk kwentʉꞌa̱jtpʉ diꞌibʉ na̱a̱mnʉm tmʉmʉbʉjktsooñ ja Dios, mʉt kooxyʉp dʉꞌʉmbʉ tsojk nʉjx ñapʉdsemy mʉj kʉjxm es tsojk nʉjx ñajaty éxtʉm ja mʉjkuꞌugópk oj yajka̱jxpéky.  
\v 7 Nandʉꞌʉn koonʉm tsyékyʉty es ñaywyindsʉꞌʉgʉdʉt ma̱ yʉ diꞌibʉ kyaj yʉꞌʉdyʉ Diosʉ myʉduumbʉ, kʉdiibʉ pʉ́n kyawindsʉꞌʉgʉdʉt es ja mʉjkuꞌugópk yajpekykya̱ꞌa̱dʉt. 
\s1 Wiꞌix tyúndʉt diꞌibʉ pyudʉjkʉdʉp ja mʉbʉjkpʉtʉjkʉ kywentʉꞌa̱jtpʉty 
\p  
\v 8 Es nandʉꞌʉn diꞌibáty pyudʉjkʉdʉp ja mʉbʉjkpʉtʉjkʉ kywentʉꞌa̱jtpʉty, yʉꞌʉ diꞌibʉ naymyayꞌa̱jt naywyindsʉꞌkʉp, diꞌibʉ kyaj kyoꞌoyꞌʉ́y kyoꞌoygyajxy, diꞌibʉ kyaj myʉꞌiiky myʉmiꞌigyʉty, diꞌibʉ kyaj myeeñꞌoogʉty.  
\v 9 Nandʉꞌʉn koonʉm tsyékyʉty es tmʉꞌoꞌktʉ́wʉt ja tʉyꞌa̱jtʉn diꞌibʉ Dios tʉ dyaꞌíxyʉty diꞌibʉ nmʉbʉjkʉm, es myʉdátʉt wa̱ꞌa̱ts ja jyot wyinma̱ꞌa̱ñ,  
\v 10 es jawyiin yaꞌijxmátsy; es pʉn kyaj tmʉdaty ja pyeky, waꞌan ttuñ ma̱ ja mʉbʉjkpʉtʉjk ñaymyúkʉdʉ.  
\v 11 Es nandʉꞌʉn koonʉm ja ñʉdoꞌoxyʉty ñaymyayꞌát ñaywyindsʉꞌʉgʉdʉ, kyaj ꞌyabiꞌtsꞌáttʉt, es ʉygyupʉk kyajxykyupʉ́ktʉt.  
\v 12 Pes tuꞌuk diꞌibʉ pyudʉjkʉp ja mʉbʉjkpʉtʉjkʉ kywentʉꞌa̱jtpʉ, yʉꞌʉ túnʉp diꞌibʉ myʉda̱jtypy tuꞌuk jeꞌeyʉ ñʉdoꞌoxy es diꞌibʉ jyajtypy tꞌanaꞌamʉt ja ꞌyuꞌunk ꞌyʉna̱ꞌk ma̱ yʉ jyʉʉn tyʉjk.  
\v 13 Mʉt ko yʉ pudʉjkʉbʉty diꞌibʉ yajxón tuundʉp, pátʉdʉp tuꞌugʉ windsʉꞌkʉn es dʉꞌʉn amumduꞌuk jot tmadya̱ꞌa̱ktʉt ja mʉbʉjkʉn diꞌibʉ myʉda̱jtypy ma̱ Jesukristʉ. 
\s1 Wiꞌixʉ Dios dyaꞌíxyʉty ja tʉyꞌa̱jtʉn 
\p  
\v 14 Tim tsojk nʉjx nguꞌixa̱ꞌa̱ndʉ, per tyam nduknigaxtʉ ma̱ tya̱dʉ neky ja̱a̱ybyéty,  
\v 15 es pʉn akwʉꞌʉmʉpts, mnijáwʉp wiꞌix mnayyaꞌítyʉty ma̱ Diosʉ jyaꞌayʉty, pʉ́nʉty myʉbʉjktʉp ja Diosʉ jiikypyʉ es dyaꞌittʉ ja tʉyꞌa̱jtʉn. Es ja tʉyꞌa̱jtʉn, dʉꞌʉn yʉꞌʉ éxtʉm tuꞌugʉ pila̱a̱r diꞌibʉ pyattʉnaapy ja tʉjkniꞌx, es nandʉꞌʉn éxtʉm ma̱ tsondaꞌaky ja tʉjk.  
\v 16 Tʉyꞌa̱jtʉnʉꞌʉ ko niꞌigʉ mʉj ja Diosʉ jyaꞌa diꞌibʉ ijty kyaj yajnijáwʉ: 
\q1 Miin ja̱jt ja Kristʉ mʉdʉ ja̱ꞌa̱yʉ ñiniꞌx, 
\q1 yaꞌijxʉ ja Espíritʉ Santʉ ko wa̱ꞌa̱ts yʉꞌʉ, 
\q1 ijxʉdʉ ja ánklʉsʉty, 
\q1 yajnimaydyák ma̱ naxwíñʉdʉ ja̱ꞌa̱yʉty, 
\q1 mʉbʉjkʉdʉ ja̱ꞌa̱y ya̱ naxwiiñ, 
\q1 yaꞌꞌaxa̱jʉ jam tsa̱jpótm. 
\c 4  
\s1 Diꞌibʉ myatstúttup ja mʉbʉjkʉn 
\p  
\v 1 Per ja Espíritʉ Santʉ xytyuknija̱ꞌa̱m wa̱ꞌa̱tstiꞌknʉ ko ma̱ naty ja tiempʉ ttimpatnʉ ma̱ jyʉmbita̱ꞌa̱ñ Nindsʉnꞌa̱jtʉm, na̱a̱gʉty ñikaꞌagándʉp ja myʉbʉjkʉnʉty es tpanʉjxa̱ꞌa̱ñ ja ʉxpʉjkʉn diꞌibʉ miimp ma̱ ja kaꞌoybyʉ diꞌibʉ winꞌʉꞌʉndʉp.  
\v 2 Jaꞌa myʉmʉdowándʉp ja ja̱ꞌa̱y diꞌibʉ nayꞌandíjʉdʉp jyikyꞌattʉ tʉyꞌa̱jtʉn mʉʉt, diꞌibʉ kyaj tnakyjyáwʉdʉ es ꞌyaxʉʉgʉty ko pyekytyundʉ, éxtʉmxyʉp tʉ tyooydyʉgooyñʉ jyot wyinma̱ꞌa̱ñ mʉt tuꞌugʉ pujxnʉ jantsy ambʉ.  
\v 3 Tya̱dʉ winꞌʉꞌʉmbʉ kyaj tkupʉktʉ es pʉ́n pyʉk ꞌyuugʉt, es nandʉꞌʉn jyʉna̱ꞌa̱ndʉ ko taa jeꞌxy diꞌibʉ kyaj yajjʉꞌxʉt, oy ja Dios tjapʉjtákyʉ tya̱dʉ jeꞌxy es tjʉꞌxʉt ja myʉbʉjkpʉty es diꞌibáty ñija̱ꞌa̱dʉp ja tʉyꞌa̱jtʉn, es tja̱ꞌa̱ygyʉda̱ꞌa̱ktʉt ja Dios.  
\v 4 Pes tʉgekyʉ diꞌibʉ Dios pyʉjták, oy yʉꞌʉ es kyaj ʉdsa̱jtʉm nꞌʉxtíjʉm ni tii pʉn nꞌaxá̱jʉm es nja̱ꞌa̱ygyʉdákʉm ja Dios,  
\v 5 mʉt ko dʉꞌʉn ja Diosʉ ꞌyayuk es ja ka̱jxtákʉn pyʉjtákypy wa̱ꞌa̱ts. 
\s1 Jesukristʉ ꞌyoymyʉduumbʉ 
\p  
\v 6 Pʉn mdukꞌʉxpejkypyʉ tya̱a̱dʉ ja nmʉguꞌukꞌa̱jtʉm, mijtsʉ dʉꞌʉn tuꞌugʉ oybyʉ myʉduumbʉ Jesukristʉ, es mꞌuts mjotkʉda̱ꞌa̱gʉp mʉt ja mʉbʉjkʉn es mʉt ja oybyʉ ʉxpʉjkʉn diꞌibʉ mbadiimpy.  
\v 7 Per katʉ xytyuñʉ kwentʉ lyokʉ winma̱ꞌa̱ñʉty es diꞌibʉ jeky myadyáktʉp nan nʉgoobʉ. Nik naybyʉjta̱ꞌa̱gʉdʉ amumduꞌuk jot xymyʉdúnʉt ja Dios.  
\v 8 Pes jeꞌeyʉ waanʉ ttukꞌoyꞌaty ja niniꞌx kʉba̱jk ko nyajꞌyúngʉm, per diꞌibʉ sitʉy waanʉ niꞌigʉ ndukꞌoyꞌa̱jtʉm ko nꞌawda̱jtʉm ja Dios es nmʉduꞌunʉm. Taadʉ dʉꞌʉn tsobatp ma̱ tya̱dʉ jikyꞌa̱jtʉn diꞌibʉ tyam es nandʉꞌʉn ma̱ tadʉ jikyꞌa̱jtʉn diꞌibʉ miimp.  
\v 9 Tya̱a̱dʉ dʉꞌʉn jantsy tʉyꞌa̱jtʉnʉꞌʉ, es nidʉgekyʉ tmʉbʉ́ktʉt.  
\v 10 Tya̱a̱dʉkyʉjxmʉ dʉꞌʉn nduꞌunʉm ja delijensʉ es nmʉmadákʉm, mʉt ko tʉ nnaygyʉya̱jkʉm ma̱ Diosʉ jiikypyʉ, diꞌibʉ tʉ ttuknibʉjta̱a̱gʉ ja nitsokʉn mʉt nidʉgekyʉ ja̱ꞌa̱yʉty, es waanʉ niꞌigʉ diꞌibʉ myʉbʉjktʉp. 
\p  
\v 11 Ka̱jxwa̱ꞌx es yaꞌʉxpʉk tʉgekyʉ tya̱a̱dʉ.  
\v 12 Exkʉm pʉ́n mdukxiꞌigʉdʉ mʉt ko mwimbuꞌudsʉtyñʉm; jaꞌa dʉꞌʉn myákʉp ja ijxpajtʉn mʉt ja diꞌibáty myʉbʉjktʉp ja Jesukristʉ, éxtʉm mij ja mꞌayuk, éxtʉm mnayyaꞌítyʉty mʉt ja tsojkʉn, éxtʉm mnayyaꞌítyʉty ma̱ ja mʉbʉjkʉn, es extʉm ja mjikyꞌaty wa̱ꞌa̱ts.  
\v 13 Ma̱a̱nʉmts ʉj ngaja̱ꞌty, tukwinguga̱jxʉdʉ es ka̱jxwa̱ꞌx ja Diosʉ jyaaybyajtʉn, es xyaꞌʉxpʉktʉ.  
\v 14 Yajtún ja madakʉn diꞌibʉ Dios mmooyʉ ko ja mʉjja̱ꞌa̱ydyʉjkʉty dyajnáxtʉ ja Diosʉ ꞌyayuk, tpʉjtáktʉ ja kyʉꞌʉ ma̱ mij es mgunuꞌxʉ. 
\p  
\v 15 Tyam yajtún tʉgekyʉ diꞌibʉ Dios mmooyʉ, es dʉꞌʉn tʉgekyʉ mba̱a̱t tꞌixtʉ ko mij xyajmʉj xyajmáyʉ ko xytyuñ éxtʉm ja Dios ttseky.  
\v 16 Kwentʉꞌat ja mjikyꞌa̱jtʉn es ja mꞌʉxpʉjkʉn. Dʉꞌʉñʉmʉ dʉꞌʉn xytyúnʉt, es dʉꞌʉn nʉjx mnitseꞌeky es nandʉꞌʉn diꞌibáty mmʉmʉdoojʉdʉp. 
\c 5  
\s1 Wiꞌixʉ Timotee jyaꞌayꞌátʉt ma̱ ja mʉbʉjkpʉtʉjk 
\p  
\v 1 Katʉ xyꞌooy xyaꞌaxy ja mʉjja̱ꞌa̱y yedyʉjkʉty; niꞌigʉ xykya̱jxwíjʉt éxtʉmxyʉp yʉꞌʉ xytyeetyꞌáty. Mʉdat yajxón yʉ ʉna̱ꞌktʉjkʉty éxtʉmxyʉp xymyʉgaꞌaxꞌáty.  
\v 2 Mʉdat yajxón yʉ mʉjja̱ꞌa̱ydyoxytyʉjkʉty éxtʉmʉ mda̱a̱guꞌunk, esʉ ʉna̱ꞌktoxytyʉjkʉty éxtʉmʉ mmʉgaꞌaxʉn, mʉt winʉ oyjyot. 
\p  
\v 3 Pudʉkʉ ja kuꞌekytyoꞌoxyʉty diꞌibʉ dʉn sitʉy tʉgoyꞌa̱jtxʉdʉp.  
\v 4 Pʉn jaa kuꞌekytyoꞌoxy diꞌibʉ myʉdajtypy ja ꞌyuꞌunk o ꞌyok, tadʉ uꞌunk ok yʉꞌʉ dʉn jawyiin pyudʉ́kʉp ja tya̱a̱k o ja ñanitʉ, es dʉꞌʉn tkuydyúnʉt éxtʉm pyaadyʉty mʉt nandʉꞌʉn ja fyamilyʉ, dyaꞌíxʉt ko tmayꞌa̱jnjáwʉ tʉgekyʉ diꞌibʉ tya̱a̱k tyeety tyuundʉ mʉt yʉꞌʉgyʉjxmʉty, mʉt ko dʉꞌʉnʉ dʉn ttseky ja Dios.  
\v 5 Ja kuꞌekytyoꞌoxy diꞌibʉ sitʉy tʉ wyeꞌemy kujm aduꞌuk, yʉꞌʉyʉ ꞌya̱a̱ꞌa̱jty jyotꞌa̱jtypy ja Dios, kyaj tmʉbeꞌxy es kya̱jxta̱ꞌa̱gʉt es tꞌamdow tpʉjktsówʉt ja Dios xʉʉñ koots.  
\v 6 Per ja kuꞌekytyoꞌoxy diꞌibʉ winma̱ꞌa̱ñdyʉgeepy es jeꞌeyʉ tyʉkʉ xik xoombʉ, dʉꞌʉnʉꞌʉ éxtʉmʉ oꞌkpʉ oy jyajikyꞌátyñʉm.  
\v 7 Tukꞌanaꞌam tʉgekyʉ tya̱a̱dʉ nandʉꞌʉn, kʉdiibʉ tii yajtukpekyꞌíxtʉt.  
\v 8 Pes pʉn ja pʉ́n kyaj ñaydyukjotmaydyúñʉty ja myʉguꞌuktʉjkʉty, o waanʉ niꞌigʉ yʉ kyʉꞌʉm familyʉ, tʉʉ dʉn tꞌʉxtijy ja mʉbʉjkʉn es waanʉ axʉʉk yʉꞌʉ wyeꞌemy kʉdiinʉm ja diꞌibʉ kyaj tmʉbeky, jaꞌa ko yʉꞌʉ jotmaydyuunʉp ja myʉguꞌugʉty. 
\p  
\v 9 Yʉꞌʉyʉ mgujáyʉp ja kuꞌekytyoꞌoxy diꞌibʉ tʉ tyʉgʉꞌpxna̱jxnʉ jyʉmʉjt es diꞌibʉ tʉ pyeky tʉgok jeꞌeyʉ,  
\v 10 diꞌibʉ oy yajnija̱ꞌa̱p ko tʉ ꞌyoyjyaꞌayꞌáty, ko tʉ yajxón tnʉꞌʉmoꞌoy ttuꞌumoꞌoy ja ꞌyuꞌunk ꞌyʉna̱ꞌk, ko tsuj tʉ tmʉdaty ja jyabya̱a̱t jyabyeꞌxy ma̱ ja tyʉjk, ko tʉ ttekypyujy ja Diosʉ jyaꞌayʉty, ko tʉ tpudʉkʉ diꞌibʉ ayoo jottʉgooydyʉp, jaꞌa ko oydyiꞌibʉty ti tʉ ttuñ ja oybyʉ. 
\p  
\v 11 Per katʉ xykyupeky yajkujáyʉt ja kuꞌekytyoꞌoxyʉ kujk ʉna̱ꞌkpʉ es dyákʉt ja naybyudʉkʉ. Mʉt ko wyinma̱ꞌa̱ñ myínʉt es pyʉka̱ꞌa̱ndʉt jatʉgok, ta nʉjx tmastuꞌuttʉ wiꞌix tmʉdúnʉt ja Kristʉ,  
\v 12 es dʉꞌʉn ñayyajpekykya̱ꞌa̱dʉ mʉt ko kyaj Kristʉ tꞌokmʉdunánʉdʉ éxtʉm tʉ ñaywya̱nda̱ꞌa̱gʉdʉ.  
\v 13 Waanʉ niꞌigʉ jyʉdittʉ wyinjʉʉn wyindʉjk, oytyiity ttuktʉk ttukka̱jxʉdʉ es nʉgoo ñakumadya̱a̱gʉdʉ. Ta jyʉmbijnʉdʉ nuux; es kyaj ñuuxʉty jeꞌeyʉ, nandʉꞌʉn ꞌyabiꞌtsꞌáttʉ, nʉgoo oytyiity tnamadya̱ꞌa̱ktʉ diꞌibʉ kyaj pyaadyʉty es tmadya̱ꞌa̱ktʉt.  
\v 14 Pa̱a̱ty ndsejpyʉts esʉ kuꞌekytyoꞌoxy diꞌibʉ kujk ʉna̱ꞌkpʉ pyʉ́kʉt, es tmʉdátʉt ja ꞌyuꞌunk ꞌyʉna̱ꞌkʉty, es tꞌaꞌuꞌuñ tꞌadsʉʉnʉt ja jyʉʉn tyʉjk, kʉdiibʉ tluga̱a̱rmoꞌoyʉt ja nmʉdsipꞌa̱jtʉm es ñibiꞌtsꞌʉ́w ñibiꞌtska̱jxʉdʉt.  
\v 15 Pes na̱a̱gʉty ja kuꞌekytyoꞌoxyʉ dʉꞌʉmbʉ éxtʉmʉ taadʉ tʉ wyinma̱ꞌa̱ñdyʉgóydyʉ. Pa̱a̱ty ñaydyukpawitsy ñaydyukpaboꞌodyʉty ja kaꞌoybyʉ. 
\p  
\v 16 Pʉn jaa toxytyʉjk diꞌibʉ myʉbejkypy ja Jesús es tmʉdaty ma̱ tyʉjk kuꞌekytyoꞌoxy, waꞌan kʉꞌʉm tpudʉkʉ, es kyaj tnaꞌíxʉt es jyatyimꞌyajpudʉ́kʉt ma̱ ja mʉbʉjkpʉtʉjk; pes dʉꞌʉn mba̱a̱t ja mʉbʉjkpʉtʉjk tpudʉ́kʉdʉ ja kuꞌekytyoꞌoxy diꞌibʉ sitʉy ni tii tkamʉdaty tkajaygyepy. 
\p  
\v 17 Yʉ mʉjja̱ꞌa̱yʉty diꞌibʉ tuundʉp ma̱jatyʉ mʉbʉjkpʉtʉjk ñaymyúkʉdʉ, pátʉp ja windsʉꞌkʉn esʉ pudʉjkʉn, es waanʉ niꞌigʉ pʉ́nʉty kya̱jxwa̱ꞌxtʉp esʉ ja̱ꞌa̱y ttukꞌixtʉ ja Diosʉ ꞌyayuk.  
\v 18 Pes ja Diosʉ jyaaybyajtʉn jyʉnaꞌañ: “Katʉ xypyʉjtaꞌaky ja ꞌyajiidsʉ noviiʉ ma̱ twindeeñ ja triigʉ.” Es nandʉꞌʉn jatuk peky jyʉnaꞌañ: “Yʉ mʉduumbʉ pátʉp yʉ myʉjuꞌuñ.” 
\p  
\v 19 Es ja mʉjja̱ꞌa̱yʉty diꞌibʉ tuundʉp ma̱ ja mʉbʉjkpʉtʉjk ñaymyúkʉdʉ, katʉ xykyupeky es yajniꞌʉʉnʉt pʉn kyaj kyʉxeꞌeky majtsk o tʉgʉʉk diꞌibʉ ñika̱jxpáttʉp.  
\v 20 Per pʉn tʉyꞌa̱jtʉn ko tmʉdaty ja peky oypyʉ́nʉty, winꞌoo mayjyaꞌayóty ma̱ mʉbʉjkpʉtʉjk ñaymyúkʉdʉ, es dʉꞌʉn ja wiingátypyʉ tpʉ́ktʉdʉ kwentʉ kʉdiibʉ dʉꞌʉn nandʉꞌʉn ꞌyadʉꞌʉtstʉt. 
\p  
\v 21 ꞌYijxypy myʉdeepy ja Dios esʉ Nindsʉnꞌa̱jtʉm Jesukristʉ mʉt ja ꞌyánklʉsʉdyʉ wyinwitsypyʉ, ko nduknipekyʉ tya̱dʉ ʉxpʉjkʉn es xypyadúnʉt dʉꞌʉñʉm mʉt ja oyjyotkyʉjxm, es kyaj winꞌixy wingexy.  
\v 22 Ko xywyinꞌixa̱ꞌa̱nʉt na̱a̱k diꞌibʉ anaꞌamʉp ma̱ mʉbʉjkpʉtʉjk ñaymyúkʉdʉ, jawyiin xyꞌíxʉt wiꞌix jyikyꞌaty, dʉꞌʉn éxtʉm nga̱jxwijy, mʉt ko pʉn mbʉjtákypy tuꞌuk diꞌibʉ axʉʉk jikyꞌa̱jtp, nan mmʉda̱jtypyʉ dʉꞌʉn ja peky. Exkʉm mbekykya̱ꞌa̱. 
\p  
\v 23 Es mʉt ko jana̱a̱m jatsojk mjotpékyʉty, kʉdii xyñakyꞌuugʉt yʉꞌʉyʉ wa̱ꞌa̱ts nʉʉ, uuk nandʉꞌʉn oynʉꞌʉnʉnʉ vinʉ éxtʉmʉ jottsooy. 
\p  
\v 24 Pes yʉ ja̱ꞌa̱yʉdyʉ pyojpʉ na̱a̱gʉty byeen tyimnigʉxeꞌegyʉty es ñija̱ꞌa̱dʉp ja ja̱ꞌa̱y ko yajtukkumʉdowándʉp, per na̱a̱gʉty ja ja̱ꞌa̱yʉdyʉ pyojpʉty jaanʉm yaꞌixy óknʉm.  
\v 25 Nandʉꞌʉn oy kyʉxeꞌeky ko ja oybyʉ yajtúñ; es diꞌibáty kyaj ꞌyóyʉty, kyaj mba̱a̱t wyeꞌemy ayuꞌudsyʉ. 
\c 6  
\p  
\v 1 Nidʉgekyʉ diꞌibʉ poꞌoduumbʉꞌa̱jttʉp, yajxón tmayꞌat twindsʉꞌʉgʉdʉt ja wyindsʉ́nʉty, kʉdiibʉ yajmʉgoyꞌʉ́w yajmʉgoygya̱jxʉt ja Dios es ja nꞌʉxpʉjkʉnꞌa̱jtʉm.  
\v 2 Es pʉn yʉ poꞌoduumbʉ yʉꞌʉ wyindsʉnꞌa̱jttʉp ja Dios mʉduumbʉty, niꞌigʉ waanʉ oy tmʉdúnʉt mʉt ko tmʉmʉbʉjkpʉꞌáttʉ. Tukꞌʉxpʉk es ka̱jxwa̱ꞌxʉ dʉꞌʉn. 
\s1 Tʉyꞌa̱jtʉnbʉ namyʉdunʉ 
\p  
\v 3 Pʉn ja pʉ́n dyaꞌʉxpeky diꞌibʉ kyaj ꞌyóyʉty es kyaj ñejxy tiꞌigyʉ mʉt ja Nindsʉnꞌa̱jtʉm Jesukristʉ ꞌyʉxpʉjkʉnʉ oybyʉ diꞌibʉ nga̱jxwa̱ꞌxʉm,  
\v 4 taadʉ naymyʉjpʉjtákʉp es ni ti tjaygyukʉ. Yʉꞌʉyʉ dʉꞌʉn wyinma̱ꞌa̱ñꞌajtypy tmadya̱ꞌa̱ga̱ꞌa̱ñ yʉ axʉk winma̱ꞌa̱ñ. Es ma̱ yʉ tya̱a̱dʉ myiñ ja naywyinnaxʉja̱ꞌa̱k, naymyʉdsipꞌa̱jtʉk, kanaydyukmʉꞌijxʉk tii, naydyukwinꞌijx naydyukjʉjpꞌijxʉk tii,  
\v 5 esʉ yajnaydsyiꞌk yajnaygyojxʉk, kyaj jyotxaamdʉ. Tadʉ ja̱ꞌa̱yʉty kyaj ꞌyóyʉty ja jyot wyinma̱ꞌa̱ñ es kyaj tnijawʉ ja tʉyꞌa̱jtʉn, jyʉna̱ꞌa̱ndʉ ko yʉ nꞌʉxpʉjkʉnꞌa̱jtʉm yʉꞌʉ dʉꞌʉn ma̱ yajganaraty ja oyꞌa̱jtʉn. Mastuꞌudʉ tadʉ diꞌibʉ dʉꞌʉnʉ wyinma̱ꞌa̱ñ.  
\v 6 Tʉyꞌa̱jtʉnʉꞌʉ ko diꞌibʉ nmʉbʉjkʉm, yʉꞌʉ dʉꞌʉn yajkypy ja oyꞌa̱jtʉn ko ja̱ꞌa̱y ttukjotkʉdaꞌaky diꞌibʉ myʉda̱jtypy.  
\v 7 Pes ni ti oj ngamʉmiꞌinʉm naxwiiñ, es nan ni ti ngamʉnʉjxa̱ꞌa̱nʉm ko nꞌoꞌkʉm.  
\v 8 Per pʉn ya̱a̱ nmʉda̱jtʉm ja ka̱ꞌa̱y ukʉn es ja wit nijam, mʉt yʉꞌʉyʉ tya̱dʉ njotkujkꞌa̱jtʉm.  
\v 9 Perʉ diꞌibʉ wyinma̱ꞌa̱ñꞌajtypy ñayyajmʉkja̱ꞌa̱ydya̱ꞌa̱ga̱ꞌa̱ñʉty, kyaj tsyípʉty kya̱ꞌa̱t pekyoty. Jaꞌa myʉda̱jtypy maylyokʉ winma̱ꞌa̱ñ es diꞌibʉ ja̱ꞌa̱y yajpekytyuunʉp, es dʉꞌʉn dyajnʉjxʉt es dyajtʉgóyʉt.  
\v 10 Jaꞌa ko ja̱ꞌa̱y tꞌadsoktʉ meeñ, yʉꞌʉ dʉꞌʉn yajmiimpy oytyim diꞌibʉ axʉkꞌa̱jtʉnʉty; es ta na̱a̱k, mʉt ko ꞌyadsoktʉ, tʉ tmastuꞌuttʉ ja Nindsʉnꞌa̱jtʉm Jesukristʉ es nʉgoo ñayyaꞌꞌayówʉdʉ ma̱ jyikyꞌattʉ. 
\s1 Timotee yaꞌꞌanma̱a̱y es amumduꞌuk jot tpanʉjxʉt ja mʉbʉjkʉn 
\p  
\v 11 Per mij Timotee, Dios mꞌuꞌunkꞌa̱jtʉp, kukaꞌak tʉgekyʉ tya̱dʉ axʉkꞌa̱jtʉn. Jikyꞌat mʉt ja tʉyꞌa̱jtʉn es éxtʉmʉ Dios ttseky, mʉdʉ mʉbʉjkʉn, mʉdʉ tsojkʉn, mʉdʉ maꞌxtujkʉn, mʉdʉ yuunkꞌa̱jt naxypyʉꞌa̱jtʉn.  
\v 12 Panʉjx tʉgekyʉ amumduꞌuk jot ja mʉbʉjkʉn, es windumbʉk ja jikyꞌa̱jtʉnʉ winʉ xʉʉ winʉ tiempʉ, pesʉ tya̱a̱dʉ dʉꞌʉn ja Dios mdukniwoojʉdʉ es tʉ mnayyajnideꞌxyʉty mʉt ja mmʉbʉjkʉn mayjyaꞌaywyindúm.  
\v 13 Dios, diꞌibʉ myeepy ja jikyꞌa̱jtʉn tʉgekyʉ diꞌibʉ jaa ijtp, esʉ Jesukristʉ, diꞌibʉ kya̱jxtudák oy Ponsyʉ Pilatʉ wyindum, jaꞌa ñija̱ꞌa̱dʉp ko tyam nduknipeky  
\v 14 es xykyuydyúnʉt diꞌibʉ nduknipejkypy. Katʉ xywyijtstʉgátsy es kʉdiibʉ myajpekyꞌíxʉt, es tun dʉꞌʉn extʉ ko myínʉt ja Nindsʉnꞌa̱jtʉm Jesukristʉ,  
\v 15 ko dʉꞌʉn jyat kyʉbátʉt éxtʉm ttuknibʉjtákʉ ja Dios, diꞌibʉ tiꞌigyʉ kuniꞌxy Diosꞌa̱jtp, Reyꞌa̱jtp ma̱ réyʉty es Windsʉnꞌa̱jtp ma̱ windsʉ́nʉty,  
\v 16 diꞌibʉ tuꞌuk kyaj ꞌyeeky, diꞌibʉ jikyꞌa̱jtp ma̱ ja ja̱jʉn ma̱ ni pʉ́n mba̱a̱t kyamʉwingóñʉty, ni tuꞌugʉ ja̱ꞌa̱y kyaꞌíxyʉty, es ni mba̱a̱t tkaꞌixy. ¡Mayꞌa̱jt windsʉꞌkʉn es mʉkꞌa̱jtʉn mʉʉt ja Dios winʉ xʉʉ winʉ tiempʉ ꞌyítʉt! Waꞌan dʉꞌʉnʉty. 
\p  
\v 17 Ʉwij ka̱jxwij ja mʉkja̱ꞌa̱ydyʉjkʉty ko katʉ nʉgoo myʉj pya̱a̱dʉdʉ es kyaj jeꞌeyʉ tjotmoꞌoyʉt ja mʉkja̱ꞌa̱yꞌát, mʉt ko kʉjx na̱jxpʉꞌʉ. Waꞌan niꞌigʉ tpʉjtaꞌaky ja wyinma̱ꞌa̱ñ ma̱ Dios, diꞌibʉ jikyꞌa̱jtp es xymyoꞌoyʉm tʉgekyʉ mʉjwiin kyajaa es njotkujkꞌa̱jtʉm.  
\v 18 Tukꞌanaꞌamdʉ es ttúndʉt diꞌibʉ dʉꞌʉn oy. Waꞌan nayyajmʉkja̱ꞌa̱ydya̱ꞌa̱gʉdʉ mʉt ja oybyʉ tuunk, es dyajwa̱ꞌxa̱ꞌa̱nʉt diꞌibʉ myʉda̱jt jyaygyajptʉp.  
\v 19 Es ko dʉꞌʉn ttúnʉt, ñapatypy éxtʉm ttukjʉjpꞌíxy ja jyikyꞌa̱jtʉn diꞌibʉ miimp óknʉm, es dʉꞌʉn ꞌyaxá̱jʉp ja jikyꞌa̱jtʉn diꞌibʉ tʉyꞌa̱jtʉnbʉ. 
\p  
\v 20 Timotee, padún ja ʉxpʉjkʉn diꞌibʉ tʉ xyꞌaxa̱jʉ. Katʉ xymyʉdoogúkʉ yʉ naxwíñʉdʉ ja̱ꞌa̱yʉ lyokʉ winma̱ꞌa̱ñ, ni diꞌibʉ myadyakmujktʉp diꞌibʉ nʉgoobʉ tyijtʉp wijyꞌa̱jtʉn.  
\v 21 Pes na̱a̱gʉty diꞌibʉ pyanʉjxtʉbʉ tya̱dʉ winma̱ꞌa̱ñ, tʉ tmastuꞌuttʉ ja mʉbʉjkʉn. 
\p Waꞌan Dios mgunuꞌxʉdʉ nidʉgékyʉty.