\id PHP  
\h FILIPENSES 
\toc1 JA NØKY MIDI JA PABLO TYANƗGAJX JA FILIPENSƗT JA̱A̱ꞌY 
\toc2 FILIPENSES 
\toc3 Fil. 
\mt1 JA NØKY MIDI JA PABLO TYANƗGAJX JA FILIPENSƗT JA̱A̱ꞌY 
\c 1  
\s1 Ku ja Pablo jap puxøjkjøtpy tnɨjayɨ pøn tjanchja̱ꞌwɨdɨp ja nwɨndsønꞌa̱jtɨm Jesucristo yjaꞌ jam Filipos ka̱jpxkøjxp 
\p  
\v 1 Pablo jøts ja Timoteo, øøts nwɨndsønꞌa̱jtɨm Jesucristo nwɨndsønꞌajtpy. Ɨxya̱mts meets ja nøky tuꞌuk ndanɨjayɨ nɨwɨneꞌen ja Dios Teety mjaꞌatyɨdɨ jam Filipos ka̱jpjotp, møøt ja wɨndsøndøjktɨ jøts ja møja̱a̱ꞌdyøjktɨ, nɨdukɨꞌɨyɨ wɨneꞌen møøt mꞌettɨ ja Jesucristo.  
\v 2 Pa̱a̱ttɨ kupøktɨ ja Dios Teety jøts ja nwɨndønꞌa̱jtɨm Jesucristo kyunuuꞌkxɨn jøts ja yjotkujkꞌa̱jtɨn. 
\s1 Ku ja Pablo tnɨꞌamɨdowɨ tnɨbøktsowɨ ja janchja̱ꞌwɨbɨtøjktɨ 
\p  
\v 3 Ejtp øts ja Dios Teety ndukmøja̱wɨ øy mee wɨna̱a̱k ojk nja̱ꞌmyech.  
\v 4 Ku øts Dios nꞌajotꞌaty amumjoojt øts ja Dios nꞌamɨdøy nbøktsøy jøts ja mbudøkɨyɨdɨt;  
\v 5 pø tuꞌugyɨxɨ adøm ja wɨnma̱a̱ꞌñ ɨxya̱mba̱a̱t nyikyøꞌøyɨndɨ midi ja Dios yjaꞌajɨp, nayɨdeꞌen sa̱ ja xpadøjkyɨꞌokwa̱ndøø.  
\v 6 Øts wa̱mp jøts ku ja Dios Teety tyikmɨwenɨ tyikajaꞌɨ yꞌadøꞌøtst ja myøkꞌa̱jtɨn midi ja tø mdukpadsoꞌonda̱ꞌa̱gyɨdɨ, kunɨm myeꞌent jadɨgojk ja nwɨndsønꞌa̱jtɨm Jesucristo.  
\v 7 Øwyɨnmaapy øts ɨdøꞌøn jaꞌagøjxp ku njanchoktɨ jøts ku nay ja Dios kyunuuꞌkxɨn xꞌadsɨna̱a̱jyɨdɨ. Nɨtanɨbyɨm øts ja yjaꞌ jøts wa̱ꞌa̱mbyɨm øts jøts ku ja tyɨyɨ yjanchɨ, øy øts ja tø njadyimyjagupuxøjktøkɨ uk øy øts wyɨnaty ja kudunktøjk ja wɨndsøndøjk njadyimyjawɨnguwa̱ꞌa̱gɨdɨ.  
\v 8 Pø Diosxɨ tnɨja̱ꞌwɨp wɨneꞌen mee njanchøky nayɨdeꞌen sa̱ nwɨndsønꞌa̱jtɨm Jesús xtsøjkyɨm.  
\v 9 Jadeꞌen øts ɨdøꞌøn nꞌamɨdøy nbøktsøy ja Dios jøts ku øy tsuj mnamyayɨdɨt ku ja tyɨɨbyɨ xwɨnmaꞌadyɨt, jøts ku ja ja̱ꞌgyukɨn xjagya̱ptɨt øy juunɨ.  
\v 10 Ku jadeꞌen xnɨja̱wɨdɨt jøts xpaduꞌundɨt midi øy midi tsuj, jadeꞌents xjagyaptɨt mꞌanmɨja̱ꞌwɨn øy wa̱ꞌa̱ts jøts nɨti pøky mgapa̱a̱dɨyɨdɨt ku myeꞌent ja Cristo.  
\v 11 Øy wa̱ꞌa̱ts wyɨmbɨdsøꞌømdɨt ja mdunk midi ja nwɨndsønꞌa̱jtɨm mdamɨdundɨp, jøts ja yjadeꞌembɨ ɨdøꞌøn ja Dios wyɨndsøꞌjkɨnja̱ꞌwɨp ja yjadeꞌembɨ ɨdøꞌøn ja myøja̱ꞌwɨp. 
\s1 Ja Cristo øts xjagyajp amuum jøts jaꞌ øts amuum xyikjujkyꞌa̱jtp øy yjuunɨꞌa̱tt 
\p  
\v 12 Mɨguꞌuktøjk, nɨmadowdɨ meets, øy øts ɨdøꞌøn yja̱wɨ njemjaty ndejaty, neꞌegɨ nabyudøkɨ ja yja̱wɨ tø tꞌukpa̱tnɨ, jɨnaxy ø neꞌegɨ nga̱jpxwa̱ꞌkxɨ ja Dios kyajpxy ja yꞌayuujk.  
\v 13 Tyumnɨja̱ꞌwɨdɨp ja tøjkꞌadɨnaabyɨ jaꞌadɨ, jøts nayɨdeꞌen øy pøn, ku øts jaꞌ nyiktagudsumɨ ku øts ja nwɨndsønꞌa̱jtɨm yjaꞌ nyikøꞌøyɨ.  
\v 14 Jøts ku jadeꞌen tø tꞌejxtɨ tnɨja̱wɨdɨ adøm ja nmɨguꞌuk pøn ya̱ꞌa̱jttɨp jøts ku øts ya̱jp tsumy nꞌity, neꞌegɨ jɨnaxy ja tø yjotmøkta̱ꞌa̱ktɨ jøts ja jadeꞌen tka̱jpxwa̱ꞌkxɨdɨ ja Dios kyajpxy ja yꞌayuujk. 
\p  
\v 15 Jats ya̱ pøn øyꞌa̱jtɨn tsujꞌa̱jtɨngøjxp tka̱jpxwa̱ꞌkxtɨp ja Cristo yjaꞌ, jats nayɨdeꞌen pøn wɨna̱a̱gɨn nugo tsepkøjxp taꞌajkɨngøjxp ttundɨp,  
\v 16 jøts ja kyøꞌøm jaꞌ tyikmøjtøkɨdɨ, jøts ja jaꞌayɨ nugo xja̱a̱ktsepnɨpøkwa̱ꞌa̱ndɨ ku øts ya̱p puxøjkjøtpy;  
\v 17 pønts ttundɨp yꞌøwyɨnma̱a̱ꞌngyøjxp, jaꞌagøjxp ja jadeꞌen ttundɨ ku øts ja xpaꞌayowdɨ, pø ñɨja̱ꞌwɨdɨpxɨ jøts ku ø nya̱mꞌaty, ku øts møk ja Dios yjaꞌ nyikyøꞌøyɨ.  
\v 18 Jøts ¿tiku øts nugo ndyimyaꞌaty ndyimdya̱jt? Wan pøn tyikyøꞌøy yꞌøwyɨnma̱a̱ꞌngyøjxp uk kyaꞌøwyɨnma̱a̱ꞌngyøjxp, pø nugo tum ja Cristo yjaꞌ tka̱jpxwa̱ꞌjkxɨdɨ; yøꞌ ø ndajotkujkꞌajtpy. 
\p Jøts ja̱a̱ktyimxyonda̱ꞌa̱kp øts yikxon,  
\v 19 pø nnɨja̱ꞌwɨpxɨ øts ku øts ya̱ꞌa̱t ayoꞌon tukɨꞌɨyɨ nmɨmada̱køxt, jaꞌagøjxp ku meets ja Dios xꞌajotꞌaty jøts meets xnɨꞌamɨdowɨ xnɨbøktsowɨ jøts ku øts nayɨdeꞌen xpudøkɨ ja Espíritu Santo.  
\v 20 Jaꞌats ø njøpꞌijxpy jøts øts ja kaꞌ ndatsøꞌødyuꞌunt, tuꞌuk amumjoojt øts ja nga̱jpxɨt ja yjaꞌ. Ɨxya̱m ɨdøꞌøn pya̱a̱tꞌatyɨ yja̱a̱ktyimñɨgaxøꞌøkt yikxon ja Cristo myøkꞌa̱jtɨn midi ø nyiktumpy, njajujkyꞌaty øts uk njaꞌøøky njadɨgøy øts, kaꞌ øts ja nwandijy.  
\v 21 Pø ja Cristoxɨ øts amuum xjagyajp, jaꞌats ø nmøkꞌajtpy. Njaꞌøøky øts, jɨnaxy øts ja øy xwɨmbɨdsøꞌømxɨt.  
\v 22 Pønɨ ja̱a̱kjujkyꞌa̱jtpts øts ya̱, nayꞌøyꞌa̱jtpts ja nayɨdeꞌen, jøts øts ja Dios yjaꞌ nja̱a̱kyikyøꞌøyɨt, jadeꞌents ø kaꞌap nnɨja̱wɨ pø midiꞌibɨ.  
\v 23 Tum jadeꞌen tum øy, midiꞌibɨ øts ngupøkp ngagupøkp: neꞌegɨ jadyimyjaꞌatsꞌookwa̱mp øts, jøts øts ja Cristo xemɨkøjxp nmøøtꞌejtnɨt, neꞌegɨ jadyimyjaꞌøyꞌa̱jtp ja jadeꞌen;  
\v 24 jaduꞌukts ja wɨnma̱a̱ꞌnmyɨ, neꞌegɨ jɨnaxy yja̱wɨ chøkyɨ jøts meets kaꞌap jadeꞌeñɨ nmajtstuꞌutt, ja̱a̱kjujkyꞌa̱jtp øts.  
\v 25 Patyts ø nwa̱ꞌa̱ñ jøts ku mee nja̱a̱kmøøtjaꞌa̱jt jøts nja̱a̱kpudøkɨdɨt jøts xajotkujkꞌa̱ttɨt ku tuꞌugyɨ janchja̱ꞌwɨngøjxp xyikmɨwenɨdɨt xyikajajɨdɨt ja Dios yjaꞌ.  
\v 26 Jadeꞌents meets nja̱a̱kmɨnabya̱a̱dɨt ja nwɨndsønꞌa̱jtɨm Jesucristo kyunuuꞌkxɨngøjxp amuum. 
\p  
\v 27 Yøꞌ mjadyimyꞌejxtɨp yø mdsɨna̱a̱ꞌyɨn, jadeꞌen xuꞌundɨt sa̱ ja nwɨndsønꞌa̱jtɨm yjaꞌ wya̱ꞌa̱ñ. Øy meets jam njaꞌatsꞌixy køꞌøm, uk øy øts jadyimyjama̱ jagam, jaꞌ ø ndsøjkpy jøts øts ejtp nnɨja̱wɨt jøts ku meets nɨꞌamukɨ mnabyudøkɨyɨdɨ, tuꞌugyɨ ja mwɨnma̱a̱ꞌñ xyikꞌettɨ, xem ya̱m nɨꞌijtyɨ xnɨwɨnmayɨdɨ janchja̱ꞌwɨngøjxp sa̱ yꞌøyɨt sa̱ tyuda̱ꞌa̱kt ja Dios yꞌøyajpxy ja yꞌøyꞌayuujk.  
\v 28 Nɨ xkatsøꞌøgɨdɨt pøn ja mdamɨdsepꞌa̱jtɨdɨp. Wa̱ꞌa̱ts yiknɨja̱wɨdɨ jøts ku ja wɨndɨgøy yja̱ttɨt; jøts meets, ja nɨtsoꞌokꞌa̱jtɨn mee mba̱a̱tp midi ja Dios yajkpy.  
\v 29 Nꞌøyja̱ꞌwɨndɨp ku nwɨndsønꞌa̱jtɨm njanchja̱ꞌwɨndɨ, jøts nayɨdeꞌen ku nguꞌayoꞌomba̱a̱jtɨndɨ.  
\v 30 Nay jaꞌ ayoꞌon mba̱a̱ttɨp midi ø tø nba̱a̱ty. Tuꞌugyɨ yø tum jadeꞌen nꞌadsɨna̱a̱ꞌyɨndɨ jøts mnɨja̱ꞌwɨdɨpts sa̱ øts ɨxya̱m nꞌayoꞌomba̱tꞌadɨꞌɨch. 
\c 2  
\s1 Ku Cristo yikꞌayowɨm yjaty jøts ku tyikꞌawa̱ꞌa̱ñ ja myøkꞌa̱jtɨn sa̱m kaꞌap pøn 
\p  
\v 1 Jøts pønɨ myikjotmøkta̱a̱jkɨdɨp ja Cristo, pønɨ mdajotkujkꞌa̱jtɨdɨp ja yꞌayoꞌejxɨn, pønɨ jap ja Espíritu Santo xmøødɨyɨdɨ, pønɨ mnɨja̱ꞌwɨdɨp sa̱ ja chojkɨn sa̱ ja pyaꞌayoꞌowɨn,  
\v 2 yikxonda̱ktɨk øts ku yikxon mdsøønɨdɨ mdanɨdɨ, tuꞌugyɨ tum jadeꞌen mnamyayɨdɨ nɨꞌamukɨ jøts tuꞌugyɨ mwɨnmaydɨ.  
\v 3 Kidi ti xundɨ mgøꞌømwɨnma̱a̱ꞌngyøjxp uk xyiktundɨ ja namyɨkaxɨ; yøꞌ øy, ku tuda̱ꞌa̱ky jøts møjꞌejxtɨ ja mmɨguꞌuk.  
\v 4 Kidi ja ngøꞌømjaꞌajɨp nugo ndyimyikmøjtøjkaꞌam, pø jaꞌaxɨ tsojkɨp sudso ja nmɨguꞌuk nbudøjkaꞌam. 
\p  
\v 5 Yikyøꞌødyɨ ja wɨnma̱a̱ꞌñ nayɨdeꞌen sa̱ ja nwɨndsønꞌa̱jtɨm Jesucristo.  
\v 6 Øy ja wyɨnaty amuum ja Diosꞌa̱jtɨn tjajagyepy, kaꞌap ja wya̱ꞌa̱ñ jøts ja kuwa̱nɨ tyimñayɨdeꞌen tmɨꞌaba̱a̱ty ja Dios Teety.  
\v 7 Ojts ja køꞌøm tjɨbiky midi ja wyɨnaty amuum yjaꞌajtpy jøts ja jadeꞌen ñabyɨkta̱ꞌa̱gyɨ sa̱ øy pøn tumbɨ ku ja ya̱ ña̱xwiiñꞌa̱jty.  
\v 8 Jøts ku ja jadeꞌen ja̱a̱ꞌyɨn myiiñ, ojts ja tkupikyꞌaty ku ja yjemjaty tyejaty. Ejtp øy tpaduñ jaba̱a̱t ku ja yꞌøꞌjky, øy tsaachꞌijxyɨm ja oꞌjkɨn yjayikmøøy jam kruskøjxp.  
\v 9 Jaꞌagøjxp ja Dios Teety ja ojts myøja̱wɨyɨ jøts ja yikmøjtøjkɨyøø, kaꞌap pøn myɨꞌaba̱a̱dyɨ øy yjapønɨ,  
\v 10 ku pøn myadoba̱a̱dɨt ja nwɨndsønꞌa̱jtɨm øy ma̱dsoo, nagyuxendya̱køxɨdɨp ja nɨꞌijtyɨ,  
\v 11 jøts ja nɨdukɨꞌɨyɨ tꞌejxka̱ptɨt jøts ja wya̱ꞌa̱ndɨt jøts ku jaꞌ wyɨndsønɨ ja Jesucristo, tum Dios yꞌøyꞌa̱jtɨngøjxp. 
\s1 Sa̱m ja ja̱j sa̱m ja tøøꞌkxpɨ jadeꞌen ja ja̱a̱ꞌdyɨ pøn ja Dios jaꞌa̱jtɨdɨp 
\p  
\v 12 Mɨguꞌuktøjktɨ, nayɨdeꞌen ndsøky jɨnaxy xmɨmadoꞌodɨt øy øts ya̱m jagam, sa̱m ø xmɨmadowdɨ ejtp ku meets jam yꞌijty møøt ndsøønɨ. Wɨndsøꞌøgɨ ja Dios, tuda̱ꞌa̱ky mnabyɨkta̱ꞌa̱gɨdɨt, jotmayꞌa̱ttɨ sudso ja nɨtsoojkɨn xpa̱a̱ttɨt.  
\v 13 Ku ja tsojkɨn xjagyaptɨ jøts mdunwa̱ꞌa̱ndɨ, ja Dios jadeꞌen myikwɨnma̱a̱jyɨdɨp, jøts nay jaꞌ mbudøkɨyɨdɨp ku ja xundɨ jadeꞌen sa̱ ja Dios mdamɨdsøkyɨdɨ øy tsuj. 
\p  
\v 14 Ejtnɨ xonɨ tukɨꞌɨyɨ xuꞌundɨt, kidi amɨkajpxy xpøktɨ,  
\v 15 jøts kaꞌap pøn mbøkyꞌejxɨdɨt, jaꞌ myikꞌawa̱ꞌa̱ndɨp jøts ku Dios mꞌuꞌnkꞌatyɨdɨ, øy wa̱ꞌa̱ts mja̱a̱ꞌyꞌa̱ttɨt ma̱ ja kaꞌøy ja̱a̱ꞌdyɨ ma̱ ja kawɨndɨy ja̱a̱ꞌdyɨ. Jadeꞌen meets jam mgaxøꞌøkt sa̱m ja xøøw tkuja̱jy tkudɨɨꞌkxy ma̱ koots,  
\v 16 jadeꞌenꞌampy ku ja Dios ja kyajpxy ja yꞌayuujk xyikyøꞌøyɨdɨt. Jøts ku ja Cristo myeꞌent jadɨgojk, møk mee ndaxonda̱ꞌa̱kt ku ø nnɨja̱wɨt ku ø kaꞌ nugo tø ñɨyikyøꞌøyɨ ja Dios yjaꞌ, kaꞌ ø nugo ja ndunk ñɨwɨndɨgøy.  
\v 17 Øy øts yø pøn xjadukuꞌoogɨ, jaꞌ ñamyayɨ ka̱ꞌpxp ja wɨndsøꞌjkɨn midi ja Dios yꞌity mmøødyɨp ku ja xjanchja̱wɨdɨ. Xonda̱kp øts jadeꞌen, nɨdukɨꞌɨyɨ nxonda̱a̱jkɨndɨt.  
\v 18 Jotkujkꞌa̱t mee nayɨdeꞌen, jaꞌagøjxp ku øts nayɨdeꞌen njotkujkꞌaty. 
\s1 Yikajxtɨp ja Timoteo møøt ja Epafrodito 
\p  
\v 19 Pønɨ wa̱mp ja nwɨndsønꞌa̱jtɨm Jesús, ngaxp øts tsojk ja Timoteo jøts ja mꞌatsꞌejxɨdɨt jøts ø njotkujkꞌa̱tt ku ja tmɨmeꞌent ja kajpxy ja ayuujk sa̱ meets jam.  
\v 20 Pø kaꞌaxɨ jaduꞌuk pøn nayɨdeꞌen wyɨnmay sa̱m ø nwɨnmayɨn, sa̱m mee njotmayꞌatyɨn jøts ja øyꞌa̱jtɨn xpa̱a̱ttɨt;  
\v 21 tum køꞌøm wɨnma̱a̱ꞌñxɨ pøngapøn yiktundɨp jøts kaꞌap ja nwɨndsønꞌa̱jtɨm Jesucristo yjaꞌ tꞌuktunkꞌa̱jtnɨyɨdɨ.  
\v 22 Tøts xnɨja̱wɨdɨ sa̱ Timoteo øy tyuñ, sa̱ øts ja møøt ja Dios kyajpxy ja yꞌayuujk nga̱jpxwa̱ꞌkxɨyɨ, jadeꞌen øts ja xpudøkɨ sa̱m ja ja̱a̱ꞌy ja yꞌuꞌnk pyudøkɨyɨ.  
\v 23 Jadeꞌents ø nwɨnmay pønɨ sa̱ øts yø njaꞌ yꞌukwɨnꞌøyɨ ngaxpts øts jaꞌ jøts mꞌatsꞌejxɨdɨt;  
\v 24 nꞌajotꞌajtpy øts Dios jøts meets køꞌøm tsojk nꞌatsꞌext. 
\p  
\v 25 Pa̱a̱tꞌa̱jtɨpts yja̱wɨ nayɨdeꞌen ndanɨgaxɨt ja Epafrodito, ja nmɨguꞌuk, pøn øts amuum møøt nduñ, pøn meets ojts xanɨguexy jøts øts ja xpudøkɨt ku ti jaty yꞌity kyaꞌity.  
\v 26 Mjanchꞌejxwa̱jnɨdɨp jaꞌ nɨwɨneꞌen mjamꞌa̱ttɨ, jøts mjanchjotmayꞌatyɨdɨ jaꞌagøjxp ku tø xnɨja̱wɨdɨ jøts ku yꞌity pyikyɨyɨ.  
\v 27 Tøts ja yjanchꞌatspikyɨyɨ, jawaanɨ ja tø kyaꞌøøky; tøts ja Dios yꞌayoꞌijxyɨ jøts øøts ja tø xpudøkɨ jøts ø nayɨdeꞌen kyajɨna̱xt ja njotmay, ti øts ya̱m ndaxømpy.  
\v 28 Jaꞌagøjxp meets ja ndyimdyanɨgaxwa̱ꞌa̱ñ jøts xaxonda̱ꞌa̱ktɨt ku jadɨgojk xpa̱a̱ttɨt xꞌejxtɨt jøts øts jadeꞌen kaꞌ nugo ndyimyjotmayꞌookt.  
\v 29 Taxonda̱ꞌa̱ktɨ ku ja jam yja̱ꞌa̱tt. Jadeꞌen pya̱a̱tꞌatyɨ tuꞌugyɨ ja Dios xjagyejpxɨndɨ pøn jaty nayɨdeꞌen tpadundɨp sa̱m ja Epafrodito, mɨnamyayɨdɨ yikxon;  
\v 30 jawaanɨ tø kyaꞌøøky ku tmɨduñ ja Cristo. Tø tmɨwanjaty yikꞌayowɨm ku øts ja pudøjkɨn xmøꞌøy, jøts meets ja ñamyayɨ mgudanɨyɨ øy mee mgaya̱ꞌaty. 
\c 3  
\s1 Ja tsɨna̱a̱ꞌyɨn midi tɨy janch 
\p  
\v 1 Mɨguꞌuktøjk, tajotkujkꞌa̱jtɨdɨ ja Dios kyunuuꞌkxɨn. Kaꞌ øts nꞌadsepja̱wɨ øy øts ya̱m jadɨgojk nja̱ꞌa̱t nay yøꞌ, tø ø nnɨja̱wɨ jøts ku meets yø xyiktuꞌunt.  
\v 2 Øyɨm mnayꞌejxꞌetɨdɨt, jam ja ja̱a̱ꞌy pøn ja wenk wɨnma̱a̱ꞌñ tyikyøꞌødyɨp, pøn ttundɨp ja kaꞌøybɨ, jaꞌ pøn ttaꞌødyøkɨwya̱ndɨp ja Dios ku ja ttsukɨ ñeꞌkx jøts ja ejxpajt jadeꞌen ñabyɨkta̱a̱jkxɨyɨdɨ.  
\v 3 Jadeꞌen neꞌegɨ tpa̱a̱ty, adøm ɨdøꞌøn nmøøtꞌa̱jtyɨndɨp ja ejxpajt jaꞌagøjxp ku adøm ja yjaꞌ tuꞌugyɨ nyikmøjtøjkaꞌandɨ, jøts ku ja Cristo Jesús ndaxonda̱a̱jkyɨndɨ, jøts kaꞌap nmɨꞌagɨjxyɨndɨ nmɨjotkɨjxyɨndɨ jaꞌayɨ midi kaxøꞌkp iiy jaꞌayɨ nɨkɨjxy.  
\v 4 Wa̱ꞌa̱mbɨmts øts ɨnet jøts ku ja nayɨdeꞌen yꞌøyɨ ku jadeꞌen ja nachukɨ ñaxy kostumbrɨ køjxp. Jawaanɨ kaꞌpxy øts ja neꞌegɨ ndyimñɨja̱wɨ jaꞌabɨ tsɨna̱a̱ꞌyɨn;  
\v 5 ku ngueꞌjxy kyɨduktujk xøøw øts ojts ja ejxpajt nyiktuꞌunxɨ, israelɨt ja̱a̱ꞌyxɨ øts; ja Benjamín øts ndeetyꞌamøjɨp, jøts hebreɨt etjotp ø ngueꞌexy, jøts nay jam øts ndeety nda̱a̱k choondɨ. Fariseotøjk øts yꞌijty møøt nnamyayɨ, nay ja Moisés øts yꞌijty nbaduujnɨp ja kyutujk;  
\v 6 møk øts ja nnɨtanɨ, jantyimdyøøp øts ja nja̱wɨ, jøts øts ja ja̱a̱ꞌy nbawɨdettɨ ndaguma̱tsɨwya̱ꞌa̱ndɨ pøn jaty ja Cristo tjanchja̱ꞌwɨdɨp. Kaꞌ øts yꞌijty pøn ja kutujk xawɨndsøꞌøy sa̱ ja tyikutuky, nadyijyɨ tnɨgajpxy midiꞌibɨ øy midiꞌibɨ tøøp.  
\v 7 Midiꞌits øts yꞌijty jadeꞌen nmøja̱ꞌwɨp, jadeꞌen øts yø ɨxya̱m nja̱ꞌwɨñɨ jøts ku kaꞌ ma̱ tyuñ, jaꞌagøjxp ku øts ja nwɨndsønꞌa̱jtɨm Jesucristo tø nnɨja̱ꞌwɨyɨ ja pyaꞌayoꞌowɨn.  
\v 8 Jøts pønɨ ti øts ja nja̱a̱kꞌøyja̱ꞌwɨp, tum kudɨgøøpy øts nja̱wɨ, ma̱ tꞌukmɨꞌaba̱a̱t ku ja nwɨndsønꞌa̱jtɨm Jesucristo nnɨja̱ꞌwant. Jaꞌagøjxp øts tukɨꞌɨyɨ tø nꞌɨxma̱jtskixy, a̱a̱yɨn pɨsta̱ꞌa̱gɨn ja tukɨꞌɨyɨ ñøjkxkøjxnɨ, jaꞌayɨ øts tuꞌugyɨ njøpꞌijxpy ja Cristo  
\v 9 jøts øts ja møøt nꞌett, kajaꞌagøjxpɨp ku øts ja kutujk kaꞌpxy nbaduñ, jadeꞌenꞌampy ku øts ja nwɨndsønꞌa̱jtɨm Jesucristo tyɨyꞌa̱jtɨn njanchja̱ꞌwɨyɨ jøts øts ja Dios Teety jadeꞌen tø xkupiky. Jaꞌats ja Dios kyupijkpy pøn ja janchja̱ꞌwɨyɨp.  
\v 10 Jaꞌ ø ndsøjkpy jøts øts yikxon ndyimñɨja̱wɨt sa̱ ja nwɨndsønꞌa̱jtɨm tyɨyꞌa̱jtɨn jøts øts ja myøkꞌa̱jtɨn ja xmoꞌot midi ja yjagyejpy ku ja ojts tmɨmajada̱ꞌa̱ky ja oꞌjkɨn ku yjujkpyɨjky xemɨkøjxp, njaꞌayøy ø nayɨdeꞌen, uk njadyimyjaꞌøøky ø nayɨdeꞌen sa̱ ja yꞌøꞌjky,  
\v 11 jøts øts jadeꞌen njøpꞌext ja jujkpyøjkɨn nayɨdeꞌen sa̱m ja yjujkpyɨjky. 
\s1 Jaꞌ njotmayꞌa̱jtɨmp sudso nba̱a̱jtɨnt ja øyꞌa̱jtɨn 
\p  
\v 12 Kaꞌ nwa̱ꞌa̱ñ jøts ku øts jadeꞌen tukɨꞌɨyɨ ngøjøꞌømɨtꞌa̱jtnɨ, uk kaꞌ nwa̱ꞌa̱ñ jøts ku øts tyimwya̱ꞌa̱tsnɨ tyimyꞌøynɨ; tuꞌugyɨts øts ja nbanøjkxꞌadɨꞌɨch, jøts njøpꞌijxpy øts ja nba̱a̱tt midi øts ja nwɨndsønꞌa̱jtɨm Jesucristo tø xanɨwa̱a̱dsowɨ patkɨꞌjyɨ.  
\v 13 Kaꞌ øts mɨguꞌuk nwa̱ꞌa̱ñ, jøts ku øts ja jadeꞌen tø ndyimbya̱tkixy tukɨꞌɨyɨ; nja̱ꞌdyɨgøøgyijxpy øts ɨxya̱m sa̱ jaty ø tø njaty ngubety ti jaty tø tyuñɨ, jaꞌ ø ndumpy jøts øts ja njotmayꞌaty midi mempnɨm kɨda̱kpnɨm,  
\v 14 jøts nja̱ꞌjtɨnt ma̱ pya̱a̱tꞌatyɨ ma̱ yjøpkixy jøts ja Dios ja yꞌøyꞌa̱jtɨn xukpa̱a̱jtɨnt jap tsa̱jpjøtpy midi ja xanɨwa̱a̱dsooꞌwaꞌamp, jøts adøm ja nyikmøꞌøyɨnt jaꞌagøjxp ku ja Cristo møøt nꞌijtyɨndɨ. 
\p  
\v 15 Wɨneꞌen ja Dios møk njanchja̱ꞌwaꞌandɨ, pa̱a̱tꞌa̱jtɨp jøts jadeꞌen tuꞌugyɨ nwɨnma̱a̱ꞌyɨndɨt. Pønɨ sa̱ts pøn wyɨnmay, jam pøn ja wenk wɨnma̱a̱ꞌñ tpa̱a̱ty, nay ja Diosts ja tuknɨja̱wɨyɨp midi tøøp.  
\v 16 Tuꞌugyɨts yø wɨnma̱a̱ꞌñ nbøjkɨndɨt, jøts yøꞌ ɨdøꞌøn nyiktuꞌunɨndɨp amuum sa̱m adøm yø tø nnɨja̱ꞌwaꞌant. 
\p  
\v 17 Paꞌejxtɨk øts, mɨguꞌuktøjk, jøts ejxtɨ nayɨdeꞌen pøn nay yøꞌøbɨ tyiktundɨp midi mee tø ndaꞌaneꞌemy.  
\v 18 Jaa may pøn ja nwɨndsønꞌa̱jtɨm Jesucristo yjaꞌ tkamøja̱wɨdɨp jøts ja wyɨnma̱a̱ꞌñ jaꞌ yiktundɨp jøts jadeꞌen chøønɨdɨ. Tø meets yø kawɨna̱a̱k ojk ndukmadøy, ɨxya̱ts øts jadɨgojk yikꞌayowɨm nnɨga̱jpxkojmɨ.  
\v 19 Kaꞌap ja wyɨndøꞌødɨt, wɨndɨgøy ja nøjkx yja̱ttɨ. Ja kyøꞌømwɨnma̱a̱ꞌñ sa̱ køꞌøm ttsoktɨ, jaꞌ yikmøjtøjkɨdɨp, jaꞌ ñamyayɨ diosꞌa̱jttɨp. Neꞌegɨ jɨnaxy ja ñadyamɨkexyɨdɨ midiꞌibɨk ɨdøꞌøn ja yja̱wɨ tyatsøꞌødyuꞌundɨp, jaꞌ nugo yjotmayꞌa̱jttɨp sa̱ jaty ti jaty ya̱ na̱xwiiñ.  
\v 20 Jaꞌ adøm amuum xkøjøꞌømɨtꞌa̱jtɨndɨp jap tsa̱jpjøtpy, jøts jaꞌ adøm njøpꞌijxyɨndɨp jøts ku ja jap choont ja nwɨndsønꞌa̱jtɨm Jesucristo pøn ja pøky ttuknɨtsoꞌokꞌa̱jtp.  
\v 21 Jaꞌ adøm xyikwɨmbejtɨndɨp xyiktɨga̱jtsɨndɨp jøts nayɨdeꞌen nja̱jtɨnt sa̱m ja køꞌøm amuum ja kunuuꞌkxyꞌa̱jtɨn tmøødɨ, jøts nay ja myøkꞌa̱jtɨn ja jadeꞌen yikꞌawampy ku jadeꞌen xuꞌunɨn, pø jaꞌaxɨ tukɨꞌɨyɨ tnɨtanaagyøjxp øy ti. 
\c 4  
\s1 Xonda̱kuna̱xtɨ ku Dios xjagyejpyɨndɨ 
\p  
\v 1 Njantyimyjaꞌatsꞌejxwa̱ndɨp mee mɨguꞌuktøjk, mee ndajotkujkꞌajtpy, meets jam Dios wyɨngujkp ndamajada̱ꞌa̱kp, jøts tuꞌugyɨ ja̱a̱ktyimyꞌajotꞌa̱ttɨ ja Dios. 
\p  
\v 2 Ngajpxñɨgajxɨdɨp øts ja Evodia jøts ja Síntique jøts ø møk nnøjmɨ, wan tnayja̱ꞌgyukɨyɨdɨ tka̱jpxꞌøyɨdɨ ti kaꞌøꞌxyɨdɨp jøts tuꞌugyɨ ja Dios yjaꞌ tyikyøꞌøyɨdɨt, pø tum jaꞌaxɨ køjøꞌømɨtꞌa̱jtɨdɨp.  
\v 3 Mets mɨguꞌuk, pudøkɨ yø Evodia møøt ja Síntique, jaꞌ øts ojts nga̱jpxwa̱ꞌkxɨ ja Dios kyajpxy ja yꞌayuujk møøt ja Clemente jøts møøt jaduꞌuktɨ pøn jaty øts ojts xmøøtundɨ. Wa̱ꞌa̱ts ja Dios ja ñɨja̱wɨyɨdɨ pøn jaty ti jaty ja xyøøwdɨ. 
\p  
\v 4 Ejtp ja Dios yjaꞌ xaxonda̱a̱jkɨdɨt. ¡Nja̱a̱ktyimñɨgajpxpy øts yikxon jøts mxonda̱ꞌa̱ktɨt!  
\v 5 Wan øy pøn mnɨja̱wɨyɨdɨ jøts ku mee tuda̱ꞌa̱ky mja̱a̱ꞌyꞌaty. Ja̱ꞌmyatsꞌettɨ ku tsojk ja nwɨndsønꞌa̱jtɨm myenɨt. 
\p  
\v 6 Kidi ti xꞌayoꞌonja̱wɨdɨ, tukmadowdɨ neꞌegɨ ja Dios ku ja xꞌajotꞌa̱ttɨt; jaꞌ mꞌamɨdoꞌodɨp mbøktsoꞌodɨp ti mgaꞌejtxɨdɨp, jøts tukmøja̱wɨdɨ tukunuuꞌkxyja̱wɨdɨ ku wyɨnaty myikmoꞌodɨ midi mꞌamɨdoodɨp.  
\v 7 Jøts ja mmoꞌojɨdɨt ja yꞌøyꞌa̱jtɨn ja tuda̱ꞌa̱kyꞌa̱jtɨn midi kaꞌap ti tmɨꞌaba̱a̱ty sa̱ adøm njanɨwɨnma̱a̱ꞌyam; jaꞌats tyikjotkujkꞌa̱tp ja mwɨnma̱a̱ꞌndyɨ jøts ja mꞌanmɨja̱ꞌwɨndɨ jøts ku ja nwɨndsønꞌa̱jtɨm Jesucristo møøt mꞌettɨ. 
\s1 Jaꞌ mwɨnmaꞌadyɨp midi øy 
\p  
\v 8 Yøꞌ, mɨguꞌuktøjk, mjotmayꞌa̱ttɨp midi tɨy midi janch, midi xpa̱a̱tꞌa̱jtɨndɨp, midi øy pɨdsømp, midi wa̱ꞌa̱ts, midi tsøkyɨm, midi øy agajpxy pɨdsømp o ma̱dsoo. Tum ja yꞌøybɨ mwɨnmaꞌadyɨp midi øñɨga̱jpxnɨ øñɨmadya̱knɨ. 
\p  
\v 9 Yiktundɨ midi tø ndukꞌɨxpøktɨ, sa̱ jaty tø nꞌanaꞌamdɨ, jadeꞌen xuꞌundɨt sa̱ øts ojts nwa̱ꞌa̱ñ jøts sa̱ øts ojts køꞌøm xꞌejxtɨ ku øts ja ojts nduñ: tundɨts jadeꞌen, wɨnets ja Dios nɨjuunɨ mgaꞌɨxma̱tsɨdɨt, ejtp ja yjotkujkꞌa̱jtɨn ja mmøøgyuna̱xɨyɨdɨt. 
\s1 Ku ja filipensɨt ja̱a̱ꞌy tmayꞌa̱ttɨ ja Pablo 
\p  
\v 10 Xyikxonda̱kp øts ja Dios jøts ku meets jadɨgojk xja̱ꞌmyech. Kidi jadeꞌenɨp ø ndijy jøts ku meets tø xtyimyja̱ꞌdyɨgøøñɨ, ja ku kaꞌ ñɨbɨdsømɨ juunɨ mee xpudøkɨt.  
\v 11 Nɨ kaꞌap ø nwa̱ꞌa̱ñ jøts ku øts ya̱m sa̱ ndyimyjaty. Tø øts yø nꞌejxa̱ndɨgøøñɨ. Yøꞌøyɨ ø ndajotkujkꞌajtpy midi nmøøtꞌajtpy.  
\v 12 Wa̱ꞌa̱ts ø nnɨja̱wɨ sa̱ yikꞌayowɨm nyikna̱jxɨnt, jøts nayɨdeꞌen sa̱ ngumeeñꞌa̱jtɨnt. Tø øts yø nyikyujy jøts øts øy midi ngawɨngudsøꞌøgɨt, øy ø ngay øy ø ngakay, uk øy ti yꞌity kyaꞌity.  
\v 13 Øy ø midi nwɨnguwa̱ꞌa̱gɨ, ja nwɨndsønꞌa̱jtɨm Jesucristo nmøkꞌajtpy, jaꞌ ø xkuwa̱mp.  
\v 14 Øyꞌa̱jtpts ku meets ja nꞌayoꞌon nayɨdeꞌen mnadyapa̱a̱dyɨdɨ jøts øts jadeꞌen xpudøkɨdɨ. 
\p  
\v 15 Mnayɨnɨja̱ꞌwɨdɨpts wɨneꞌen jam Filipo ka̱jpxkøjx mguga̱jpꞌa̱ttɨ, ku øts ja Dios kyajpxy ja yꞌayuujk ojts nga̱jpxwa̱ꞌkxꞌokwa̱jnɨ, ku øts ojts nnijkxy jam Macedonia ka̱jpkøjxp, pø meechɨxɨ ojts xanɨguexy ja pudøjkɨn midi ja Dios mdamɨyojxtɨp jaꞌagøjxp ku ja wyɨnaty ja myøkꞌa̱jtɨn tø xpa̱a̱jtɨyɨdɨ.  
\v 16 Jøts ku øts jam wyɨnaty Tesalónica ka̱jpkøjxp, nayɨ meetsxɨ ojts xanɨguexy ja meeñ majtsk ojk, jøts øts ja nyiktuꞌunt ti jaty ø kaꞌejtxɨp.  
\v 17 Kayøꞌøjɨp ø nugo njotmayꞌajtpy jøts øts ja nugo nꞌaxa̱jɨt øy ti; jaꞌ ø ndsøjkpy jøts meets yja̱a̱knɨpatt ja mjaꞌ jam Dios wyɨngujkp.  
\v 18 Tits ø kayikmøøpy, neꞌegɨ o ti tø nyikmøꞌøy. Tyimchaachjam yø kajaa midi yø Epafrodito tø xamɨgaxɨdɨ. Jøts jadeꞌen ja Dios yø tja̱wɨ kunuuꞌkxy, sa̱ ja poom pya̱ꞌa̱kxuuky, ja wɨndsøꞌjkɨn yø ñamyayɨ yikmøøpy.  
\v 19 Ja Dios pøn xjagyajpɨndɨp, jaꞌ mmoꞌojɨdɨp, jaꞌ tyikwɨmbetp tyiktɨga̱tsp pønɨ ti mgaꞌejtxɨdɨp. Ja nwɨndsønꞌa̱jtɨm Jesucristo møøt ja Dios Teety, jaꞌ tjagyajptɨp ja kunuuꞌkxɨn ja jotkujkꞌa̱jtɨn midi nɨjuunɨ nɨwɨndem kagudɨgøøpy.  
\v 20 ¡Xemɨkøjx Dios Teety møj janch ja kunuuꞌkxɨn tjagyepy! Jadeꞌen ɨdøꞌøn ja yja̱tt. 
\s1 Ku kya̱jpxꞌaba̱a̱dɨwya̱ꞌa̱ñ jøts ja ka̱jpxpooꞌkxɨn tꞌukya̱jknɨ 
\p  
\v 21 Nguejxpy øts ja ka̱jpxpooꞌkxɨn nwɨndsønꞌa̱jtɨm Jesucristo køjxp jøts xukmadoꞌodɨt nɨdukɨꞌɨyɨ pøn jaty ja Dios jagyajpɨdɨp. Ñayɨ kyajxmɨdɨp ja ka̱jpxpooꞌkxɨn jaꞌadɨ pøn jaty øts ya̱m nmøøttɨ.  
\v 22 Nɨdukɨꞌɨyɨ pøn ja Dios jaꞌa̱jtɨdɨp ya̱, jøts jaꞌadɨ pøn namya̱jyɨdɨp ma̱ ja romanɨt wɨndsøn ja tyøjk, nayɨ mdanɨgajxɨdɨp ja ka̱jpxpooꞌkxɨn jaꞌadɨ. 
\p  
\v 23 Ja nwɨndsønꞌa̱jtɨm Jesucristo mgunuuꞌkxɨdɨp nɨdukɨꞌɨyɨ. Tɨɨgyajpxy ɨdøꞌøn, jadeꞌen ɨdøꞌøn ja yja̱tt.