\id LUK  
\h Luk 
\toc3 Luk 
\toc2 Luk 
\toc1 Malongolongona Kubaana mine Iesu Luk ei niage 
\mt1 Luk  
\mt2 Malongolongona Kubaana mine Iesu Luk ei niage  
\c 1  
\s1 Inade usino ne Tiopilus  
\p
\v 1 Bibi buo Tiopilus, lisa vanunua makuba sou tove a niagena mapamulina na golugolu vuso Salemo ei mapale balivua ne amiteu.  
\v 2 Sou ogomuli a inade ne sou a vanunua sou ite a golugolu odo a matane sou, soke na ilala a golugolu sou odo i palea. Sou a vanunua ie sou ino tomane a vanunua mina pipigona na inade mine Salemo, me sou bilii e amiteu a mapamulina ie.  
\v 3 Maido me eau tamai ea kale na niage a mapamulina ieli mea na sosove usino ne oo. Palapala eau gegemuale iiti a vuna golugolu vuso ie, me seidei eau niage bilesi moni, tomane a golugolu sou odo ei paleasi.  
\v 4 Maido me mane oo gi, o no muada iiti i maido, a inade sou matetengi e oo iedo, ei patotona vuso.   
\s1 Ioanes ni alaposa  
\p
\v 5 Ilala Herot ei muina a mapana mine Iudia, a prist tasa ino, aisana e Sekaraia. Ei a prist mine sou a abuna mine Abiia. Susuna ei a abuna mine Aron, ma aisane susuna e Elisabet.  
\v 6 Sulu bilesi sele na matane Salemo. Sulu ogomulimuli a binea vuso ma inade vuso mine Bibi Taula, me sulu ma isa oto a mamauna na matane ei.  
\v 7 Moni e sulu ma isa oto a bibaini, vuna Elisabet ei ma mapigogoi ete ni natua. Me sulu buo mamauosi.   
\p
\v 8 Na bai tasa sou a abuna mine Sekaraia sou goli a pipigona mina prist, me Sekaraia ei goli a pipigona prist na lagune Salemo.  
\v 9 Na inigogona mina pipigona prist iedo sou vileale Sekaraia na maisalosalona, me ei gali ulilo na luma mine Bibi Taula mina gunolina niabi a muo ei mangina.  
\v 10 Na ilala ei goli a niabi iodo, a abuna vanunua ma tavivine taula sou muina sala me sou kaka.   
\p
\v 11 A bineanea tasa mine Bibi Taula ei palea le Sekaraia mei magili na limana e gata na poso na niabi na muo ei isa a manginana.  
\v 12 Sekaraia ei ite a bineanea mei saga mei lae.  
\v 13 Moni a bineanea ei vei lei maido, “Sekaraia, oo ma laelae lou. Salemo ei longesi a kinaka minio. Susumu e Elisabet ei ni maalepose a bibaini. Me oo no tole a aisana e Ioanes.  
\v 14 Lilomu ni muina doana, me oo no mongemonge. Ma vanunua ma tavivine makuba ne sou mongemonge na ilala a bibaini dolo ni alaposa,  
\v 15 vuna ei ni isa a aisa buo na matane Bibi Taula. Ei ni ma ini ete a vain ma nanu sagaligali. Ilala ei saboa ino na tiane tinana, a Maolona Nunu ei ni vonu sele ne ei.  
\v 16 Ei ni toe a vanunua ma tavivine makuba mine Israel ne sou veteliu usino ne Salemo, Bibi Taula mine sou.  
\v 17 Ei ni guale a inigogona ma sagagalina mine Elaiia mei ni muga pala ane Bibi Taula. Ei ni toe selebanini pilu e tamatamane sou ne sou lilo tasa moni. Me ei ni toebilelesi a damutatalana mina vanua na saukikina inade, me ne sou guale a damutatalana doana tomane sou a bilesina vanunua. Ei ni masusulu a vanunua ne sou pipigo ane Bibi Taula.”   
\p
\v 18 Me Sekaraia ei vei ane bineanea maido, “Eau na muada a inade minio ieli matina? Eau buo sosouosi, me susugu tamai ei buo mamauosi.”   
\p
\v 19 Ma bineanea ei adeliu maido, “Eau e Gebriel, eau magiligili na lagune Salemo. Salemo oto ei peltase eau na vei lio mea maasi a malongona doana ieli usinani ne oo.  
\v 20 Io, oo longe. Oo ma silimuli ete a inade minau, maido me seidei asemu ni sobo, me oo no ma adeade oto mapigogoi na ilala a golugolu vuso do i palea. Inadegu ieli ei ni palea ivu na ilala Salemo ei tau.”   
\p
\v 21 Vanunua ma tavivine sou magitali e Sekaraia, sou damutatala papai sei golu i palea me ei muina tabaa lilo na luma mine Salemo.  
\v 22 Me mulimuli ei gali usala mei ma mapigogoi ete ni ade ane sou. Maido me sou damu, ei ite a golu sea sanii lilo na luma mine Salemo. Ei matailala ane sou a limana moni. Ma asena i sobo moni muina.   
\p
\v 23 Mulimuli, na ilala pipigona mine Sekaraia i pulu, ei veteliu usino na aubu minei.  
\v 24 Me mulimuli susuna e Elisabet ei saaavu, mei ovu moni muina mapigogoi a game lima. Elisabet ei vei maido,  
\v 25 “Bibi Taula ei dode eau mei goli a golu ieli ni palea le eau mina mapulina maelana minau na matane sou a vanunua ma tavivine.”   
\s1 Iesu ni alaposa  
\p
\v 26 Na game pantasanai mine Elisabet ei saaavu, Salemo ei peltase a bineanea e Gebriel usino na aubu tasa ne Galili, aisana e Nasaret.  
\v 27 Ei asu usino na tavine alaba tasa sou mavuni ni taulaiale a bibi tasa mina abuna mine Devit, aisana e Iosep. Aisana tavine alaba do e Maria.  
\v 28 Io Gebriel ei asu usino ne ei mei vei maido, “Oaso, tavine. Bibi Taula ei ino pilu e oo, mei maibalave oo mei toekube oo.”   
\p
\v 29 Maria ei longe a inade do mei saga mei damutale maido, “Ieli sei matana inade?”  
\v 30 Ma bineanea ei vei lei maido, “Maria, oo ma laelae lou. Salemo ei lilokuba sele ane oo.  
\v 31 Longe. Oo no tiana me oo no maalepose a bibaini. Me oo no tole ei e Iesu.  
\v 32 Ei ni a bibi buo. Me ne sou tole ei e Natune Salemo oata oto sele. Me Salemo ni tau ei a mapana tomane tubune ei e Devit.  
\v 33 Ei ni muina a mapana mine sou a abuna mine Iekop taliuliu. Ma pipigona mapana minei ei ni ma pulu oto.”   
\p
\v 34 Me Maria ei tagi e bineanea maido, “Golu ieli ni palea matina? Eau saboa ngolo pilu a bibi tasa.”   
\p
\v 35 Ma bineanea ei maliu a inade minei maido, “A Maolona Nunu ni asu usinani ne oo, ma sagagalina mine Salemo oata oto ei ni avisobe oo. Maido ma bibaini mulimuli oo no maalepose, ei ni muina a bilesina bibi mine Salemo, me ne sou tole ei e Natune Salemo.  
\v 36 Longe. Eisamu e Elisabet ei buosi, moni ei saaavuosi mei ni maalepose a bibaini. Lisa sou veivei ve ei ma mapigogoi ete ni natua. Moni seidei ei saaavuosi, ma gamena i pantasasi.  
\v 37 A golu tasa i ma mapigogoi ete ni loi e Salemo.”   
\p
\v 38 Me Maria ei vei maido, “Longe. Eau a tavine na pipigona mine Bibi Taula. Ei mapigogoi ni toe eau tomane oo vei.” Io bineanea ei ilisitase ei mei asu.   
\s1 Maria ei gagoale Elisabet  
\p
\v 39 Na ilala do Maria ei ilisi mei asu asi usino na aubu tasa ino na avena loena ne Iudia.  
\v 40 Me ei gali ulilo na luma mine Sekaraia mei vate oaso doana usino ne Elisabet.  
\v 41 Elisabet ei longe Maria i vate oaso doana, ma bibaini lilo na tiane Elisabet ei seu. Ma Maolona Nunu ei vonu ne Elisabet,  
\v 42 me ei tola mamau sele maido, “Salemo ei toekube sele oo mei bilii e oo a maibalavana ei vululusi a maibalavana ei bilii e sou a tavivine vuso sea. Ma bibaini lilo na tiamu iede, ei tamai ei guale a maibalavana mine Salemo.  
\v 43 Eau e sei me tinane Bibi Taula minau ei gagoale eau?  
\v 44 Longe. Ilala tagilagu ei longe a oaso kubaana minio, io a bibaini eili lilo na tiagu ei mongemonge mei seu.  
\v 45 Oo silimuliosi maido Bibi Taula ei ni toe tomane ei vei le oo, maido me ei ni maibalave e oo.”   
\s1 Inala mine Maria  
\p
\v 46 Maria ei vei maido,  
\q1 “Lilogu i beilange a aisane Bibi Taula.   
\q2
\v 47 Ma nunugu ei mongemonge e Salemo, ei a Buloina minau.   
\q1
\v 48 Eau a tavine na pipigona minei, eau a golu sabubu,  
\q2 moni ei ite eau mei dode eau.  
\q1 Seidei me mulimuli tamai a abuna vanunua ma tavivine vuso  
\q2 ne sou vei maido, Salemo i toekube sele eau.   
\q1
\v 49 Salemo ei isa a sagagalina buo,  
\q2 ei goli a golu buo sele mina buloine eau,  
\q2 ma aisane ei ni muina maolo.   
\q1
\v 50 Ei dodode a vanunua ma tavivine sou matano moni ne ei.  
\q2 Ei ni goli maido moni usino ne sou a vanunua ma tavivine seidei sou eili,  
\q2 me ne sou a vanunua ma tavivine sou palea mulimuli mapigogoi taliuliu taliuliu.   
\q1
\v 51 Limane ei goli a pipigona sagali.  
\q2 A vanunua sou damu i sou a munugana sele me sou beilange a aisane sou oto, ei ni taulele sou maisaba.   
\q1
\v 52 Ei taupui e sou a mapamapana,  
\q2 mei beilange a vanunua sou taupuipui e sou.   
\q1
\v 53 Ei bilii a golu doana papaina usino na vanunua sou vitolo ne sou masu sele.  
\q2 Moni a vanunua sou isa a golu papaina, ei taulele me sou asu sabubu.   
\q1
\v 54-55 Ei lilomuli a bibi na pipigona minei, e Israel, mei buloi e ei  
\q2 mei damutaletale a adegatunana ei goli le sou e eisusune eitou, mei ni dode taliuliu e Abraham ma abuabuna mine ei.”   
\p
\v 56 Maria ei malu pilu e Elisabet mapigogoi a game tolu, mulimuli ei veteliu usino na aubu minei.   
\s1 Elisabet ei maalepose e Ioanes  
\p
\v 57 Ilala i paleasi mine Elisabet ni maalepose a bibaini, me ei vasusiale a bibi baini.  
\v 58 Sou mina aubu mine Elisabet me sou a abuna minei sou longe a inade e Bibi Taula ei dode sele ei, me sou mongemonge pilu e ei.   
\p
\v 59 Na malada pantolunai sou asu usinani ne sou moge a bibaini. Sou kale ne sou bilii e ei a aisa e Sekaraia tomane a aisane tamana.  
\v 60 Moni e tinane bibaini ei vei, “Boa. Neitou tole a aisana e Ioanes.”   
\p
\v 61 Me sou vei lei, “Tasa mine sou a abuna mine amutou i ma isa oto a aisa maido.”   
\p
\v 62 Me sou goli a inade a limane sou me sou tagi e tamana ni bilii e sei aisa usino na bibaini.  
\v 63 Ei vei le sou ne sou guale a golu tasa ni niage i, mei niage a inade maido, “Aisana e Ioanes.” Me sou saga sele.  
\v 64 Ma tabaa oto a asene Sekaraia ei peo, mei mapigogoiosi ni ade lou. Io ei adeade mei beilange a aisane Salemo.  
\v 65 Me sou minei vuso, sou ite a golu sea sele i palea do, me sou lae. Ma inade mina golugolu vuso do ei vele maisaba na aububuna vuso na avena loeloena mine Iudia.  
\v 66 Vanunua vuso sou longe a inade do, sou damutala papai me sou tagu maido, “Mulimuli a bibaini ieli ni palea sei matana bibi?” Sou muada, sagagalina mine Bibi Taula ei ino pilu e ei.   
\s1 Inade na malongolongona mine Sekaraia  
\p
\v 67 Io a Maolona Nunu i vonu ne Sekaraia, tamane bibaini iodo, me ei goli a inade na malongolongona maido,   
\q1
\v 68 “Eitou beilange a aisane Salemo, Bibi Taula mine Israel. Ei asu usinani me ei buloi e eitou a vanunua ma tavivine minei mei gualeliu e eitou.   
\q2
\v 69 Na abuna mina bibi na pipigona minei e Devit, Bibi Taula ei mapale a bibi tasa sagali mina gualeliune eitou,\f + \fr 1:69 \ft Na laulau mina inade Grik ei a siili mina gualeliune eitou.\f*   
\q1
\v 70 tomane lisa otosi ei ade i na asene sou a profet maolo minei.   
\q2
\v 71 Ei vei ei ni gualeliu e eitou maino na limane sou a butu mine eitou me sou a vanunua sou lilogegelu sele ane eitou.   
\q1
\v 72 Ei damutatala a magilipiluna iedo lisa ei oto i goli.  
\q2 Mei dode sou e eisusune eitou mei buloi e sou.   
\q1
\v 73 Ei vei ivu uata ne eisune eitou, e Abraham.  
\q2 Me seidei ei kale ni goli le eitou tomane lisa ei vei.   
\q1
\v 74 Ei kale ni gualeliu e eitou maino na limane sou a butu,  
\q2 me neitou lapitole a pipigona minei, me ne eitou ma lae oto.   
\q1
\v 75 Maidolo ma ilala vuso eitou mauli, eitou mapigogoi neitou asu a inigogona vuso i bilesi na matane ei,  
\q2 me eitou mapigogoi neitou vonu a inigogona doadoana ei kale.   
\q1
\v 76 Me oo natugu, mulimuli ne sou tole oo a profet mine Salemo oata oto sele.  
\q2 Oo no muga pala ane Bibi Taula, mina masusuluna vea minei.   
\q1
\v 77-78 Oo no matetengi e sou a vanunua ma tavivine minei me ne sou muada,  
\q2 na dinodo buo minei, Salemo ei kale ni taulele a sinusu mine sou mei ni gualeliu e sou.  
\q1 Ei ni sosove a oaso mina langi usinani ne eitou,   
\q2
\v 79 mina silidaveina vanunua sou malu na tunuui me na nilaena minate.  
\q1 Me ei ni iteale kube a ubune eitou, me neitou asu na vea mina lilomeana.”   
\p
\v 80 Mulimuli a bibaini iedo ei palea buo, ma nununa i palea sagali. Me ei asu mei malu na avena a vanua boa mapigogoi na ilala ei palea muada na matane sou e Israel.   
\c 2  
\s1 Maria i maalepose Iesu  
\r (Mat 1:18-25)  
\p
\v 1 Na ilala dolo Sisar Ogastus ei tau a binea tasa usino ne sou ne sou niage a aisaisa ne sou a vanunua ma tavivine vuso lilo ne Rom.  
\v 2 Ieli a munugana ilala a vanunua mina niitealalena avena sou guale a aisane sou, me na ilala do Kurinius ei ino a munugana bibi ei iteale a avena buo ne Siria.  
\v 3 Maido ma vanunua ma tavivine vuso sou asu usino na vuna aubu mine sou mina niagena aisaisane sou.   
\p
\v 4 Iosep ei a mautu ne mapana e Devit. Maido me ei ilisitase Nasaret mina avena mine Galili, me ei asu usino na avena ne Iudia, na aubu mine Devit, sou tole e Betlehem.  
\v 5 Ei asu pilu e Maria, ne sou niage a aisane sulu. Me na ilala do Maria ei saaavu.  
\v 6 Sulu saboa ino ne Betlehem, ma ilala i sibitala mine Maria ni maalepose a bibaini.  
\v 7 Me ei maalepose a matalagu bibi baini minei. Me ei avisobe ei a malo, me ei mamavute ei lilo na taogo na gona inani mine sou a bulmakau, vuna maido a luma na mosi ei vonuosi. \fig Ei avisobe ei a malo mei mamavute ei lilo na taogo na gona inani mine sou a bulmakau (Luk 2:7)|alt="She wrapped him in cloths and placed him in a manger." src="CN01617B.tif" size="col" copy="© 1996 David C Cook. Used with permission." ref="2:7" \fig*   
\s1 Sou a bineanea sou maasi a inade usino ne sou a vanua na niitealalena sipsip  
\p
\v 8 Na avena do a vanunua sanii na itealena sipsip ino sala na aubu buobuo, me sou ulage a sipsip mine sou na lodo.  
\v 9 Ma bineanea mine Bibi Taula ei palea le sou, me a muada buo mine Bibi Taula ei lada saiili e sou, me sou lae sele.  
\v 10 Moni a bineanea ei vei le sou maido, “Amutou ma laelae lou. Longe. Eau maasi a malongona doana usinani ne amutou, ieli a malongona mina tinoena vanunua ma tavivine vuso ne sou mongemonge sele.  
\v 11 Seidei na aubu mine Devit, a tavine tasa ei maalepose a bibaini. Ma bibaini ei ni gualeliu e amutou vuso. Ei e Bibi Taula, me ei a bibi e Salemo ei matoale ni gualeliu e sou a vanunua ma tavivine minei.  
\v 12 Ne amutou ite a bibaini tasa sou avisobe ei a malo, me ei ngolo lilo na taogo na gona inani mina bulmakau.”   
\p
\v 13 Bineanea ei adesi, io ma tabaa oto a abuna bineanea mina langi sou palea me sou muina pilu a bineanea do. Me sou beilange a aisane Salemo maido,  
\v 14 “Beilange a aisane Salemo ei ino oata oto sele. Me na magamaga a lilone sou a vanunua ma tavivine ni muina mea. Salemo ni lilokuba ane sou.” \fig Beilange a aisane Salemo ei ino oata oto sele (Luk 2:14)|alt="Glory to God in the highest, and on earth peace, good will toward men." src="LK2-8-15.TIF" size="col" copy="© Global Recordings Network, globalrecordings.net." ref="2:14" \fig*   
\s1 Vanua na itealalena sipsip sou asu sou ite Iesu  
\p
\v 15 Sou a bineanea sou ilisitase sou me sou veteliuosi usino na langi, io sou a vanunua na niitealalena sipsip sou vei maido, “De, eitou asu usino ne Betlehem me neitou ite a golu ei palea do, tomane e Bibi Taula ei vei le eitou maido.”   
\p
\v 16 Io sou asu asi usino, me sou ite e Maria me Iosep, me a bibaini ei ngolo na taogo na gona inani mina bulmakau.  
\v 17 Sou itesi, me sou veipale a inade na golugolu a bineanea ei vei le sou a bibaini iodo.  
\v 18 Ma vanunua vuso sou longe a inade sou a vanua na itealalena sipsip sou vei, sou saga sele i.  
\v 19 Moni e Maria ei tau a inade vuso do na lilone ei, me ei damutale moni muina.  
\v 20 Ilala vanua na itealalena sipsip sou veteliuliu, sou masalai me toledadangi e Salemo a golugolu vuso sou longe me sou ite tomane a bineanea i veiosi le sou.   
\s1 Sou bilii e Iesu a aisana  
\p
\v 21 Na malada pantolunai sou moge ei, me sou tole a aisana e Iesu, tomane bineanea ei vate palesi a aisana do ilala ei saboa palea na tiane tinana.   
\s1 Simeon me Ana su ite a bibaini Iesu na luma mine Salemo  
\p
\v 22 Ilala i paleasi mine Iosep pilu e Maria ne su ogomuli a inigogona tomane a binea mine Moses ei vei, io sulu guale a bibaini usino ne Ierusalem mina biliine ei usino ne Bibi Taula.  
\v 23 Sulu kale ne su ogomuli a inade ino na binea mine Bibi Taula maido, “Sou a matalagu a bibi tinane sou ei maalepose, sou odo ne amutou bilii e Bibi Taula.”\f + \fr 2:23 \ft Gualeliuna 13:2, 12\f*  
\v 24 Su maasi tamai a manumanu ne su goli a niabi, tomane a binea mine Bibi Taula ei vei, “A kuau lua, ue a manu lua alaba.”\f + \fr 2:24 \ft Pipigona mina Prist 5:11\f*   
\p
\v 25 Na ilala do a bibi tasa ino ne Ierusalem, aisana e Simeon. Ei a bilesina bibi me ei a bibi mina totopatulialene Salemo. Ei magitali a bibina toemeana e Salemo ei vileale ni toekube a lilone sou e Israel. Ma Maolona Nunu ei ino ne Simeon.  
\v 26 Maolona Nunu ei veiosi le ei maido, ei ni ma mate oolo oto mapigogoi ei ite e Krais, Bibi Taula.  
\v 27 A Maolona Nunu ei mailisi ei me ei gali ulilo na luma mine Salemo. Me tamana me tinana su maasi e natune sulu e Iesu usinani mina gunolina inigogona do usino ne ei tomane a binea ei vei.  
\v 28 Me Simeon ei goe ei mei beilange a aisane Salemo maido,   
\q1
\v 29 “Bibi Taula, eau a bibi na pipigona minio, me seidei oo longo agu na manoa,  
\q2 ma lilogu ei ni mea muina, tomane lisa oo vei.   
\q1
\v 30 Matagu itesi a golu o goli mina gualeliuna vanunua ma tavivine vuso.   
\q1
\v 31 Oo masusulu a golu iede na matane sou a abuna vanunua ma tavivine vuso.   
\q1
\v 32 Ei a muada tasa, me ei ni bilii a muada usino na vanunua mine sou a abuna sea,  
\q2 me ei ni bilii a aisa buo usino ne sou e Israel, iede sou a abuna vanunua ma tavivine minio.”   
\p
\v 33 Tamane Iesu pilu e tinana su longe a inade Simeon ei goli usino ne ei iodo, me su saga i.  
\v 34 Me Simeon ei maibalave sou, me ei vei le Maria, tinana bibaini, maido, “Longe. Salemo ei vileale a bibaini ieli ni toe Israel makuba ne sou bosa, me ei ni toe makuba ne sou ilisi lou. Ei ni muina tomane a matailala tasa, ma vanunua makuba ne sou adegegeli e ei.  
\v 35 Maido ma damutatalana ovu mina vanunua makuba ei ni palea muada. Ma viso tasa ei ni ubi a buumu tamai.” \fig Matagu itesi a golu o goli na gualeliune sou a vanunua ma tavivine vuso (Luk 2:30)|alt="My eyes have seen your salvation." src="LK2-22-3.TIF" size="col" copy="© Global Recordings Network, globalrecordings.net" ref="2:30" \fig*   
\p
\v 36 A tavine profet tasa e Ana, ei e natune Panuel mina abuna ne Aser. Ei buo selesi. Lisa ei taulai, me ei muina a avala padilua pilu e suana.  
\v 37 Me mulimuli suana i mate, me ei buasu. Seidei a avalana i savulu pantolu timana iva. Ana ei ma asutasetase ete a luma mine Salemo. Ei vavaevae a inani me ei kaka moni a muina, me ei lapitole a pipigona mine Salemo na oaso me na lodo.  
\v 38 Na ilala do ei tamai ei asu agavuale a bibaini me ei toledadangi e Salemo. Me ei veimuade a inade na bibaini iedo na vanunua ma tavivine vuso sou magitali e Salemo ni gualeliu e sou mine Ierusalem.   
\s1 Iosep ei veteliu usino ne Nasaret  
\p
\v 39 Sou goliosi a golugolu vuso tomane a binea mine Bibi Taula ei vei, sou veteliu usino ne Nasaret mine Galili.  
\v 40 Ma bibaini ei palea buo me ei sagali. Ei isa a muadana doana makuba, ma dinodo mine Salemo ino muata ne ei.   
\s1 Bibi baini e Iesu ei gali ulilo na luma mine Salemo  
\p
\v 41 Na avalavala vuso tamane Iesu me tinana su asuasu usino ne Ierusalem mina niitena Malada buo na Asuleletasena.  
\v 42 Ilala Iesu a avalana i savulu tasa timana lua, sou ogomuli a inigogona mina malada buo do me sou asu usino ne Ierusalem.  
\v 43 Na ilala a malada buo mina kinaka do i pulu, sou veteliu usino na aubu. Moni a bibaini e Iesu ei saboa ino ne Ierusalem. Me tamana me tinana su ma muada oto i ve ei saboa ino ana.  
\v 44 Su damu ve ei veteliu pilu a vanunua ma tavivine sanii, me sulu asu a malada tasa vululu. Mulimuli su tilomuli e ei balivua na abuna mine sulu me sou e tamtamaine sulu.  
\v 45 Sulu tilotilo, moni su ma ite ete ei. Maido me sulu veteliu usino ne Ierusalem mina tilomuline ei.  
\v 46 Sulu tilotilo e ei mapigogoi a malada tolu, me mulimuli sulu ite ei ino lilo na luma mine Salemo. Ei ugu balivua ne sou a vanunua na matetengina. Ei longelonge a inade mine sou mei tagiliuliu e sou tamai.  
\v 47 Vanunua sou longe a inade minei, sou saga a muadana minei ma inade ei maliu le sou.  
\v 48 Sulu ite ei me su saga mamau sele. Me tinana i vei lei maido, “Natugu, posa matina oo goli a inigogona maido usinani ne amilu? Lilone amilu i mavaa sele me amilu tilotilo e oo.”   
\p
\v 49 Moni ei adeliu ane sulu maido, “Amulu tilomulimuli e eau ili? Nane amulu ma muada oto i, eau na muigu na luma mine Euma?”  
\v 50 Moni e sulu ma muada oto a malibuuna inade ei goli le sulu odo.   
\p
\v 51 Ei veteliu pilu e sulu, me sou sibitala ne Nasaret, me taliuliu ei ogomuli a inade mine sulu. Me tinana ei tau a inade vuso dolo na lilone ei me ei lapitole muina.  
\v 52 Ma muadana minei ma vovone ei palea buo. Me Salemo ei kale sele ei ma vanunua tamai sou kale ei. \fig Sou saga a muadana minei ma inade ei maliu le sou (Luk 2:47)|alt="Everyone who heard him was amazed at his understanding and his answers." src="DN00416b.tif" size="col" copy="Darwin Dunham © United Bible Societies, 1989." ref="2:47" \fig*   
\c 3  
\s1 Ioanes a bibi na maavuvutuna i malongo a inade  
\r (Mat 3:1-12; Mak 1:1-8; Ioa 1:19-28)  
\p
\v 1 Na avala savulu tasa timana lima mine Sisar Taiberius ei ino a mapana mine Rom, e Pontius Pailat ei ino munugana mina niitealena avena buo ne Iudia. Na ilala do Herot ei muge a avena mine Galili. Me tasine ei e Pilip ei muge a avena ne Ituria me Trakonitis, me Lisanias ei muge a avena ne Abilene.  
\v 2 Me Anas pilu e Kaiapas sulu a mapana prist. Na ilala do e Ioanes, natune Sekaraia, ei ino na avena a vanua boa, me Salemo i bilii a inade minei usino ne Ioanes.  
\v 3 Maido me Ioanes ei asu na avena vuso ino agavuale a nanu e Iordan, mei malongo a inade usino na vanunua ma tavivine ne sou sauvule a lilone sou me sou guale a maavuvutuna, me Salemo ni taulele a sinusu mine sou.  
\v 4 Golu odo i palea tomane a inade ino na laulau mina profet e Aisaia,  
\q1 “Na avena a vanua boa, a baligoluna bibi tasa ei tola maido,  
\q1 ‘Masusulu a vea mine Bibi Taula.  
\q2 Toebilelesi a vea minei.   
\q1
\v 5 A maluluna vuso ne sou onevoni, me a loeloe vuso ne sou kesileletase utano.  
\q2 Vea vuso i makoko ne sou toebilelesi.  
\q1 Ma vea vuso ei ma doana oto, ne sou toebilelesi iiti.   
\q2
\v 6 Ma vanunua ma tavivine vuso ne sou ite a pipigona e Salemo ei ni goli mina gualeliune eitou.’”\f + \fr 3:6 \ft Aisaia 40:3-5\f*   
\p
\v 7 Abuna vanunua ma tavivine makuba sou asu usinani mina gualena maavuvutuna maino ne Ioanes, me ei ade ane sou maido, “Amutou a natatuna aliusu mamau, Salemo ei sinoa ane amutou me ei ni toegegeli e amutou. Sei vei le amutou namutou oava me mu asuleletase a ilala pagu odo ei kale ni palea le amutou?  
\v 8 Maido me namutou maite sou a vuavuana sauvulena lilone amutou. Me umana ne amutou lange a inade ne amutou oto maido, ‘Abraham ei e eisune tamane amiteu.’ Eau vei le amutou, Salemo ei mapigogoi ni goli a vatu vuso ieli ni palea e natatune Abraham.  
\v 9 Uaba inosi na vuna obu, ma obu vuso sou ma vua kubakuba oto, iede ne sou tale me ne sou lange usino na oavi.”   
\p
\v 10 Vanunua ma tavivine sou longe a inade mine Ioanes, me sou tagi e ei maido, “Namiteu goli a sava?”   
\p
\v 11 Me ei maliu a inade usino ne sou maido, “Bibi ei isa a kinainai lua, ei ni bilii tasa usino na bibi ei ma isa oto i. Ma bibi ei isa a gona inani, ei tamai ni goli maido.”   
\p
\v 12 Vanunua sanii mina gualena takis sou tamai sou asu usinani ne sou guale a maavuvutuna. Me sou tagi e ei, “Magiligilina, namiteu goli a sava?”   
\p
\v 13 Me ei vei le sou maido, “Namutou guale bilesi savuluna vatu tomane a vanunua na niitealena avena sou vei le amutou, me amutou ma lapualale lei sanii lou.”   
\p
\v 14 Vanunua mina maubina sanii tamai sou tagi e ei, “Me ne amiteu goli a sava?” Me ei maliu a inade mine sou maido, “Amutou ma paaaliali lei a vatu mine sou. Me amutou ma goligoli lei a aualana vavasana ane sou mina lapualena vatu mine sou. Namutou damutale maido a mapane amutou ei mapigogoi e amutou.”   
\p
\v 15 Vanunua ma tavivine sou ite a golugolu odo ma lilone sou ilisi me sou damutatala papai maido, “Nane Ioanes ei a bibi e Krais?”  
\v 16 Maido me Ioanes ei maliu a inade usino ne sou maido, “Eau maavuvuti e amutou a nanu moni. Moni mulimuli a bibi tasa ni asu usinani, ma sagaline ei i vululusi a sagaligu. Eau ma doana bibi oto mapigogoi eau na lube a mota na ubupolo minei. Ei ni maavuvuti e amutou a Maolona Nunu ma oavi.  
\v 17 Ei ni asu usinani tomane a bibi ei lapitole a gona pakulina na limane ei mina taulelena noa vuso ino na vit minei. Me ei ni laipili a vit mina luma na vit. Moni a noana ei ni tuni na oavi ei ma matemate oto.”  
\v 18 Ioanes ei veipale a malongolongona kubaana usino ne sou a vanunua ma tavivine, mei veisui lei a inade makuba sea tamai mina niubina lilone sou.   
\s1 Herot i tau e Ioanes na luma na tunuui  
\p
\v 19 Ioanes ei adesinoa ane Herot a munugana niitealena avena na inigogona pagu ei goli le Herodias, ei e susune tasine Herot, me na inigogona sanii pagu lou Herot i goli tamai.  
\v 20 Me Herot ei adesui a inigogona pagu tasa lou muata na inigogona pagu vuso ei goli e sou iodo, ei tau e Ioanes na luma na tunuui.   
\s1 Ioanes i maavuvuti e Iesu  
\r (Mat 3:13-17; Mak 1:9-11)  
\p
\v 21 Ilala vanunua ma tavivine vuso sou guale a maavuvutuna, Iesu tamai ei guale. Ei guale a maavuvutuna me ei kaka, na ilala do a langi ei peo,  
\v 22 ma Maolona Nunu i sivo utano ne ei tomane a manu a kuau. Me maino na langi a tinola tasa i tola maido, “Oo e natugu. Eau kale sele oo. Lilogu ei mongemonge e oo.”   
\s1 Aisane sou a abuna mine tubutubune Iesu  
\r (Mat 1:1-17)  
\p
\v 23 Ilala Iesu ei soke a pipigona, avala ne ei tomane savulu tolu. Me sou a vanunua ma tavivine sou damu i ei e natune Iosep. Iosep ei e natune Heli,  
\v 24 me Heli ei e natune Matat, me Matat ei e natune Livai, me Livai ei e natune Melki, me Melki ei e natune Ianai, me Ianai ei e natune Iosep,  
\v 25 me Iosep ei e natune Matatias, me Matatias ei e natune Amos, me Amos ei e natune Nahum, me Nahum ei e natune Esli, me Esli ei e natune Nagai,  
\v 26 me Nagai ei e natune Mat, me Mat ei e natune Matatias, me Matatias ei e natune Semen, me Semen ei e natune Iosek, me Iosek ei e natune Ioda,  
\v 27 me Ioda ei e natune Ioanan, me Ioanan ei e natune Resa, me Resa ei e natune Serubabel, me Serubabel ei e natune Sealtiel, me Sealtiel ei e natune Neri,  
\v 28 me Neri ei e natune Melki, me Melki ei e natune Adi, me Adi ei e natune Kosam, me Kosam ei e natune Elmadam, me Elmadam ei e natune Er,  
\v 29 me Er ei e natune Iosua, me Iosua ei e natune Elieser, me Elieser ei e natune Iorim, me Iorim ei e natune Matat, me Matat ei e natune Livai,  
\v 30 me Livai ei e natune Simeon, me Simeon ei e natune Iuda, me Iuda ei e natune Iosep, me Iosep ei e natune Ionam, me Ionam ei e natune Eliakim,  
\v 31 me Eliakim ei e natune Melea, me Melea ei e natune Mena, me Mena ei e natune Matata, me Matata ei e natune Natan, me Natan ei e natune Devit,  
\v 32 me Devit ei e natune Iesi, me Iesi ei e natune Obet, me Obet ei e natune Boas, me Boas ei e natune Salmon, me Salmon ei e natune Nason,  
\v 33 me Nason ei e natune Aminadap, me Aminadap ei e natune Atmin, me Atmin ei e natune Arni, me Arni ei e natune Hesron, me Hesron ei e natune Peres, me Peres ei e natune Iuda,  
\v 34 me Iuda ei e natune Iekop, me Iekop ei e natune Aisak, me Aisak ei e natune Abraham, me Abraham ei e natune Tera, me Tera ei e natune Nahor,  
\v 35 me Nahor ei e natune Seruk, me Seruk ei e natune Reu, me Reu ei e natune Pelek, me Pelek ei e natune Eber, me Eber ei e natune Sela,  
\v 36 me Sela ei e natune Kainan, me Kainan ei e natune Arpaksat, me Arpaksat ei e natune Siem, me Siem ei e natune Noa, me Noa ei e natune Lamek,  
\v 37 me Lamek ei e natune Metusela, me Metusela ei e natune Enok, me Enok ei e natune Iaret, me Iaret ei e natune Mahalalel, me Mahalalel ei e natune Kenan,  
\v 38 me Kenan ei e natune Enos, me Enos ei e natune Set, me Set ei e natune Adam, me Adam ei e natune Salemo.   
\c 4  
\s1 Satan ei tove Iesu  
\r (Mat 4:1-11; Mak 1:12-13)  
\p
\v 1 Maolona Nunu ei vonu ne Iesu, me Iesu i veteliu maino ne Iordan. Ma Maolona Nunu i guale ei usino na avena a vanua boa.  
\v 2 Iesu ei muina na avena a vanua boa mapigogoi a malada savulu iva, me Satan i tove ei. Na ilala do Iesu ei ma aani oto me ei vitolo.   
\p
\v 3 Me Satan i vei lei maido, “Mane oo e Natune Salemo, o ade ana vatu ieli ni sauvule mei ni palea a ulalu.”   
\p
\v 4 Moni Iesu i maliu lei maido, “Laulau mine Salemo ei vei maido, ‘Vanunua ma tavivine sou ma mapigogoi ete ne sou mauli a ulalu moni.’\f + \fr 4:4 \ft Binea 8:3\f*”   
\p
\v 5 Me Satan i maasi e ei uata na loena, ma tabaa oto ei maite e Iesu a aveavena vuso na magamaga do.  
\v 6 Me Satan ei vei lei maido, “Eau na bilii e oo a sagalina vuso ieli me a aisa buo. Golugolu vuso ieli sou minauosi. Mane eau kale na bilii a bibi tasa, de eau na bilii e ei.  
\v 7 Mane oo totopatuliale eau, eau na bilii e oo a golugolu vuso ie.”   
\p
\v 8 Moni Iesu ei maliu lei maido, “Laulau mine Salemo ei vei maido, ‘Oo no totopatuliale Bibi Taula, Salemo minio, me oo no matano moni ne ei.’\f + \fr 4:8 \ft Binea 6:13\f*”   
\p
\v 9 Me Satan i maasi e Iesu usino ne Ierusalem me ei tau ei oata oto na luma mine Salemo. Me ei vei lei maido, “Mane oo e Natune Salemo, oo seu utano.  
\v 10 Vuna maido, Laulau mine Salemo ei vei maido,  
\q1 ‘Ei ni vei ane sou a bineanea minei  
\q2 ne sou ulage kube oo.   
\q1
\v 11 Me ne sou sie oo  
\q2 dae a vatu tasa ni ubi a ubumu.’\f + \fr 4:11 \ft Laulau na Inala 91:1\f*”   
\p
\v 12 Me Iesu ei maliu lei maido, “Laulau mine Salemo ei vei maido, ‘Oo no ma tovetove lei e Bibi Taula, Salemo minio.’\f + \fr 4:12 \ft Binea 6:16\f*”   
\p
\v 13 Tauluna Satan ei tove Iesu a matamatana tinovo do, ei ilisitase Iesu mei tilo a vea ni tove lei e Iesu.   
\s1 Iesu ei soke a pipigona ne Galili  
\r (Mat 4:12-17; Mak 1:14-15)  
\p
\v 14 Na sagagalina mina Maolona Nunu, Iesu ei veteliu usino na avena ne Galili. Me sou a vanunua ma tavivine ino na avena vuso do, sou longe a inade ve Iesu ei veteliu usino ne Galili.  
\v 15 Ei pipigo a matetengine sou a vanunua ma tavivine na luma na kinaka mine sou e Iuda. Ma vanunua ma tavivine vuso sou beilange a aisane ei.   
\s1 Sou e Nasaret sou lilotivula ane Iesu  
\r (Mat 13:53-58; Mak 6:1-6)  
\p
\v 16 Iesu ei asu usino ne Nasaret. Ei muina na aubu ei buo i. Maolona Malada mine sou e Iuda ei gali ulilo na luma na kinaka mine sou e Iuda. Ei magili ni gi,  
\v 17 me sou bilii e ei a laulau mina profet e Aisaia. Ei pee a laulau mei poge a avena do ei isa a inade maido,   
\q1
\v 18 “Maolona Nunu mine Bibi Taula ei eili pilu e eau,  
\q2 vuna Bibi Taula ei singi a wel na letegu  
\q2 na malongo a malongolongona kubaana usino ne sou a kapelabe.  
\q1 Me ei peltase eau na veipale a malamalana usino ne sou ino na luma na tunuui,  
\q2 me eau na toekube sou a mata ego ne sou gemu lou.  
\q1 Ei peltase eau usinani mina taulelena mavaana i palea maino mine sou sanii.   
\q2
\v 19 Me eau na veipale a dinodo mine Bibi Taula ei paleasi.”\f + \fr 4:19 \ft Aisaia 61:1-2\f*   
\p
\v 20 Iesu ei vivili a laulau me ei bilii liu a bibi mina niitealene sou a laulau me ei ugu. Vanunua ma tavivine vuso ino na luma na kinaka mine sou e Iuda sou gemualepute moni e Iesu.   
\p
\v 21 Io ei vei le sou maido, “Inade na Laulau mine Salemo amutou longesi ie, seidei ei palea ivu.” \fig Inade na laulau amutou longesi ie seidei ei palea ivu (Luk 4:21)|alt="Today this scripture is fulfilled in your hearing." src="LB00244B.TIF" size="col" copy="Louise Bass © The British & Foreign Bible Society, 1994." ref="4:21" \fig*   
\p
\v 22 Me sou beilange aisana me sou saga a inade doadoana minei. Moni sou vei, “Bibi ieli ei e natune Iosep, io? Ei goli a matana inade maido matina?”   
\p
\v 23 Me Iesu ei vei le sou maido, “Nane namutou vei le eau a inade do, ‘Bibi mina toekubena, oo no toekube a vovomu oto.’ Tomane namutou vei le eau, ‘Amiteu longesi a inade mina golugolu oo goli ne Kapenaum. Io seidei oo no goli nani na vuna aubu minio tamai.’”   
\p
\v 24 Me ei vei, “Eau vei ivu sele le amutou, vanunua sou ma tade ete a profet tasa na vuna aubu minei oto.  
\v 25 Eau vei ivu sele ane amutou, na ilala mine Elaiia a langi ei sobo vuso ma adavu ma pu oto mapigogoi na avala tolu ma game pantasa, me a vitolona taula i palea na magamaga vuso. Na ilala do a buasu papaina ino ne Israel.  
\v 26 Moni Salemo ei ma peltase ete Elaiia usino ne sou buasasu. Boa. Ei peltase ei usino na buasu tasa na aubu e Sarepat mina avena buo e Saidon.  
\v 27 Na ilala profet e Elisa, a vanunua papaina sou isa a sinobe a kolokolo ino ne Israel, moni sinobe mine sou ma pulu oto. Naman moni na avena buo mine Siria ei puiale.”   
\p
\v 28 Vanunua vuso ino na luma mina kinaka ne sou e Iuda sou longe a inade do, me sou lilotivula mamau sele.  
\v 29 Me sou ilisi me sou peltaselele Iesu usala na aubu buobuo. Me sou maasi e ei uatasi na loena tasa a aubu buobuo ino i, me sou kale ne sou lange ei utano na babangi iodo.  
\v 30 Moni ei ilisitase sou me ei asu balivua ne sou usinosi.   
\s1 Iesu ei taulele a nunu pagu na bibi tasa  
\r (Mak 1:21-28)  
\p
\v 31 Io Iesu i asu utano ne Kapenaum ne Galili. Me na Maolona Malada vuso ne sou e Iuda ei matetengitengi e sou.  
\v 32 Me sou saga mamau sele, vuna inade minei sagali.   
\p
\v 33 Bibi tasa ino na luma na kinaka mine sou e Iuda, a nunu pagu tasa ino ne ei. Me ei ngala vauta mamau sele maido,  
\v 34 “Ae, Iesu mine Nasaret, oo kale a sava ne amiteu? Oo asu usinani no toegegeline amiteu? Eau muada e oo. Oo a maolona bibi mine Salemo.”   
\p
\v 35 Moni e Iesu ei adesinoa ana nunu pagu odo me ei vei lei maido, “Oo vale mo asutase a bibi ie.” Ma nunu pagu odo ei goli a bibi iodo i bosa balivua ne sou me ei asutase a bibi iodo, me ei ma toegegeli etesi ei.   
\p
\v 36 Me sou vuso a vanunua ma tavivine sou saga, me sou maiadeade balivua ne sou oto maido, “Ede sei matana inade? Ei vei sagali ane sou a nunu pagu a aisa buo ma sagaline ei me sou ilisitase a bibi odo me sou asu.”  
\v 37 Ma mapamulina vuso mina golugolu Iesu ei goli i vele bubula na avena vuso.   
\s1 Iesu ei toekube maulune Pita  
\r (Mat 8:14-17; Mak 1:29-34)  
\p
\v 38 Iesu i ilisi mei asutase a luma na kinaka mine sou e Iuda, me ei gali ulilo na luma mine Saimon. Maulune Saimon ei isa a sinobe, ma vovo tuntunu. Me sou tagi e Iesu ni buloi e ei.  
\v 39 Io Iesu i magili agavuale ei me ei adesinoa ana sinobe na vovo tuntunu. Ma sinobe i bualetase ei, ma tabaa oto a tavine do i ilisi me ei masusulu a gona inani mine sou.   
\s1 Iesu ei toekube a vanunua ma tavivine papaina  
\p
\v 40 A oaso i solosolosi, sou maasi a vanunua sou isa a matamatana sinobe usino ne Iesu. Ei tau a limana muata ne sou a vanunua ma tavivine tastasa me ei toekube sou.  
\v 41 Ma nunu pagu tamai sou ilisitase a vanunua ma tavivine papaina me sou ngala maido, “Oo e Natune Salemo.” Moni ei adesinoa ane sou me ei madetase sou ne sou ma adeade lou, vuna sou muada, ei e Krais.   
\s1 Iesu ei gaga na aubu sanii  
\r (Mak 1:35-39)  
\p
\v 42 Na autupola siisii Iesu i ilisi mei asu usino na avena tasa a vanua boa. Me sou a vanunua ma tavivine sou tilomuli e ei, ilala sou poge ei, sou madeuti e ei ni ma asutasetase lei e sou.  
\v 43 Moni ei vei le sou maido, “Eau na veipale a malongolongona kubaana mina niitealalena mine Salemo ne sou a aubu sanii tamai. Salemo i peltase eau mina pipigona ie.”  
\v 44 Me ei malongo a inade na luma na kinaka mine sou e Iuda mina avena ne Iuda.   
\c 5  
\s1 Iesu i toleale a munugana disaipel  
\r (Mat 4:18-22; Mak 1:16-20)  
\p
\v 1 Ilala tasa Iesu ei magili na mado mina pou na nanu e Genesaret, ma vanunua ma tavivine papaina sou asuale ei mina nilongena inade mine Salemo, me sou magili saiili sele ei.  
\v 2 Me Iesu i ite a bot lua na mado, me a vanunua na gualena aia sou tautase a bot mine sou me sou loloiloi a vuo.  
\v 3 De Iesu ei sae na bot tasa, ei a bot mine Saimon. Me ei tagi e Saimon ni suitase a bot ni veletase sape a mado. Me Iesu i ugu na bot me ei matetengi a vanunua ma tavivine.   
\p
\v 4 Ei matetengi e sou pulu, ei vei le Saimon maido, “Vole usino balivua na nanu, me mu lange a vuo utano mina gualena aia.”   
\p
\v 5 Me Saimon vei maido, “Bibi buo, na lodo amiteu pipigo sagali sele mapigogoi malada, me amiteu ma poge ete a aia tasa. Moni eau na ogomuli a inademu me eau na lange a vuo.” \fig Sou vuoale a aia makuba ma vuo bisii moni mautu (Luk 5:5)|alt="“Because you say so,I will let down the net.” They caught such a large numger of fish that their nets began to break." src="LK5-1-11.TIF" size="col" copy="© Global Recordings Network, global recordings.net." ref="5:5" \fig*   
\p
\v 6 Sou goli maido me sou guale a aia papaina sele. Me a vuo bisii moni ni mautu.  
\v 7 Maidolo me sulu toleale tamtamaine sulu ino na bot tasa sea ne sou vole usinani mina buloine sou. Me sou vole maino sou totongi a aia na bot. Me a bot lua su vonu sele me bisii moni ne sulu palolo.   
\p
\v 8 Saimon Pita ei ite, mei totopatulu agavuale a ubune Iesu me ei vei, “Bibi Taula, o ilisitase eau. Eau a bibi na sinusu.”  
\v 9 Me ei pilu e tamtamaina sou saga gegelu sele a aia makuba sou guale.  
\v 10 Tamaine Saimon e Iemus pilu e Ioanes, natune Sebedi, sulu tamai su saga. Iesu ei vei le Saimon maido, “Oo ma laelae lou. Mulimuli oo no lapuale vanunua ma tavivine usinani minau.”  
\v 11 De sou vole ulilo me sou ontola me sou ilisitase a golugolu vuso mine sou me sou ogomuli e Iesu.   
\s1 Iesu ei toekube a bibi tasa ei isa a sinobe a kolokolo  
\r (Mat 8:1-4; Mak 1:40-45)  
\p
\v 12 Na ilala tasa Iesu ino na aubu buobuo tasa, ma bibi tasa ino, ei isa a sinobe a kolokolo i makuba sele na vovone ei. Ei ite Iesu, me ei totopatulu me ei tapute a laguna utano na magamaga me ei vei le Iesu maido, “Bibi Taula, mane o kale, oo mapigogoi no toekube eau na alaba.”   
\p
\v 13 Me Iesu i tau a limana ne ei mei vei lei maido, “Eau kale. Oo no palea alaba.” Ma tabaa oto sinobe a kolokolo i bualetase a bibi iedo, me ei alaba lou.   
\p
\v 14 Me Iesu ei vei sagali le ei maido, “Oo ma veivei lei ana bibi tasa a golu i palea le oo ie. O asu maite a vovomu usino na prist, me o goli a niabi tomane Moses ei vei.”   
\p
\v 15 Moni a mapamulina mina golu Iesu ei goli ei vele bubula sele. Maido ma vanunua papaina sou asu usinani mina nilongena inade minei, me mine ei ni taulele a sinobe mine sou.  
\v 16 Moni ilala sanii ei asu usino na avena a vanua boa me ei kaka.   
\s1 Iesu ei toekube a bibi tasa limana ma ubuna i pagu  
\r (Mat 9:1-8; Mak 2:1-12)  
\p
\v 17 Malada tasa Iesu ei matetengitengi a vanunua ma tavivine, sou e Parisi me sou a vanua na matetengina mina binea sou ino so ugu. Sou asu usinani maino ne Ierusalem ma aubu vuso ne Galili me Iudia. Ma sagagalina mine Bibi Taula ei ino ne Iesu, me ei toekube e sou a vanunua ma tavivine.  
\v 18 Ma vanua sanii sou tabule a bibi tasa na mavutavutana. Tuatuana bibi odo i mamate vuso. Sou kale ne sou tau e ei agavuale Iesu,  
\v 19 moni sou ma poge ete a vea na maasine ei usino, vuna mui boa. Maidolo me sou sae uata na mapa na luma me sou labevuselele a avena tasa mina mapa na luma, me sou volipui a bibi pilu a poso. Me sou tau e ei masae na lagune Iesu.   
\p
\v 20 Iesu ei ite a silimulina mine sou, me ei vei, “Tamaigu, eau taulelesi a sinusu vuso minio.”   
\p
\v 21 Sou a vanua na muadana binea me sou e Parisi sou soke a adepapaina maido, “Bibi iede ei e sei mei kale ni guale a muine Salemo mei goli a inade ie? Bibi tasa i ma mapigogoi ete ni taulele a sinusu. Salemo tasa moni ei mapigogoi.”   
\p
\v 22 Iesu ei muadasi a damutatalana mine sou, me ei adeliu ane sou maido, “Vuna matina amutou damutala papai na lilone amutou?  
\v 23 Mane eau vei ve, ‘Eau na taulele a sinusu vuso minio’ ue ‘O ilisi mo asu’, sei inade lua li i ma sana oto na vei?  
\v 24 Moni eau vei ane amutou maido, Natuna Bibi ei isa a sagagalina na taulelena sinusu na magamaga ie.” Me Iesu ei vei ana bibi a tuatuana i mate do maido, “Eau vei lio, o ilisi o guale a mavutavutana minio mo asu usino na luma minio.”  
\v 25 Ma tabaa oto bibi iodo i ilisi na matane sou a vanunua ma tavivine me ei guale a mavutavutana minei. Me ei beilange a aisane Salemo me ei asu usino na luma minei.  
\v 26 Me sou vuso a vanunua ma tavivine sou saga sele. Me sou beilange a aisane Salemo me sou lae sele me sou vei maido, “Seidei eitou ite a matana golu sea sele i palea.”   
\s1 Iesu i toleale Livai  
\r (Mat 9:9-13; Mak 2:13-17)  
\p
\v 27 Mulimuli Iesu i asu usino me ei ite a bibi tasa mina gualena takis ei ugu na luma na gualena vatu. Aisana bibi edo e Livai, me Iesu ei vei lei maido, “Oo ogomuli e eau.”  
\v 28 Me ei tautase a golugolu vuso me ei ilisi me ei ogomuli e Iesu.   
\p
\v 29 De Livai i masusulu a inani tasa buo ane Iesu na luma minei. A vanunua papaina mina gualena takis me sou a vanunua sanii tamai sou ugu me sou aani pilu e sulu.  
\v 30 Me sou e Parisi pilu e sou a vanua na muadana binea, sou ade papai ane sou a disaipel mine Iesu. Sou vei, “Posa matina amutou aaniani mu ininu pilu e sou a vanua na gualena takis me sou a vanua na gunolina sinusu?”   
\p
\v 31 Me Iesu i adeliu ane sou maido, “Sou a vanunua ma isa oto a sinobe, sou ma tolealale ete a bibi na toekubena. Sou a vanunua sou sobe moni sou tolealale a bibi na toekubena.  
\v 32 Eau ma asu oto usinani mina tolealena vanunua sou bilesi. Eau asu usinani mina tolealena vanua na sinusu ne sou sauvule a lilone sou.”   
\s1 Inigogona mina vavaena inani  
\p
\v 33 Ma vanunua sou vei le Iesu maido, “Ilala papaina sou a disaipel mine Ioanes sou vavae e sou a gona inani me sou kaka. Me sou a disaipel mine sou e Parisi tamai sou goligoli simaido. Moni sou a disaipel minio sou aaniani me sou ininu.”   
\p
\v 34 Me Iesu ei vei le sou maido, “Amutou mapigogoi namutou vavae a inani na ilala bibi na taulaina ei saboa ino pilu e amutou, io? Boa.  
\v 35 Na ilala sou guale a bibi iodo usinosi, de na ilala dolo ne sou vavae e sou a inani.”   
\p
\v 36 Iesu ei vei le sou a adetinovona tasa maido, “Bibi ei ma gualeale ete a maduna malo alaba maino na kinainai alaba me saisobe a masingena malo mumugu. Mane ei goli maido, ei ni toegegeli a kinainai alaba, me a maduna malo alaba iodo sou ma mapigogoi ete ni sai pili a kinainai mumugumugu.  
\v 37 Ma bibi tasa i ma singisingi ete a vain alaba na uliulina meme i mumugu. Mane ei goli maido, a vain alaba ni utisinge a uliulina meme ma vain ni singi. Ma uliulina meme ni masisinge vuso.  
\v 38 Maidolo me ne sou singi a vain alaba na uliulina meme alaba.  
\v 39 Ma bibi ei iniosi a vain mumugumugu, ei ma kale ete a vain alaba. Ei veivei ve, ‘Mumugumugu ei doana.’”   
\c 6  
\s1 Inigogona mina mavaluna pipigona na Maolona Malada mine sou e Iuda  
\r (Mat 12:1-8; Mak 2:23-28)  
\p
\v 1 Na Maolona Malada tasa mine sou e Iuda, Iesu i asu balivua mina mauma na vit. Me sou a disaipel minei sou logo a vuavuana vit, me sou loi a limane sou mina taulelena uliulina vit, me sou ani.  
\v 2 Moni sou e Parisi sanii sou vei maido, “A inigogona maidolo i umana a bibi ni goli na Maolona Malada, moni posa matina amutou goli?”   
\p
\v 3 Me Iesu ei adeliu ane sou maido, “Amutou ma gi ete a laulau Devit ei goli na ilala ei vitolo pilu e sou a abuna minei?  
\v 4 Devit i gali ulilo na luma mine Salemo me ei guale a ulalu odolo sou tautau muina na lagune Salemo, ulalu iedo ei maolo me prist moni ni ani, moni Devit ei ani mei bilii e sou a abuna minei tamai.”  
\v 5 Me Iesu ei vei lou ane sou maido, “Natuna Bibi ei a Tamana Maolona Malada.” \fig Natuna bibi ei a Tamana Maolona Malada (Luk 6:5)|alt="The Son of man is Lord of the Sabbath." src="MK2-23-2.TIF" size="col" copy="© Global Recordings Network, globalrecordings.net." ref="6:5" \fig*   
\s1 Na Maolona Malada ne sou e Iuda Iesu i toekube a bibi limana i mamau  
\r (Mat 12:9-14; Mak 3:1-6)  
\p
\v 6 Na Maolona Malada tasa lou mine sou e Iuda Iesu ei gali ulilo mina luma na kinaka ne sou me ei matetengitengi. Ma bibi tasa ino, limana e gata i matesi.  
\v 7 Sou a vanua na muadana binea me sou e Parisi sou ulage iiti e Iesu, nane ei ni toekube na Maolona Malada, vuna sou kale ne sou poge a vea mina vavasana ane Iesu.  
\v 8 Moni Iesu i muada a damutatalana mine sou, me ei vei ana bibi a limana matesi maido, “O ilisi mo magili nani na matane sou a vanunua.” Io bibi edo ei ilisi me ei magili.   
\p
\v 9 Me Iesu ei vei le sou maido, “Nane na Maolona Malada neitou goli a inigogona doana ue a inigogona pagu? Nane neitou toekube a vanunua ue toegegeli e sou? Eau tagi e amutou sei golu ei doana?”   
\p
\v 10 Me Iesu i gemuale sou a vanunua vuso, me ei vei ana bibi iedo maido, “Toebilelesi a limamu.” Bibi ei goli maido, me a limana i doana lou.  
\v 11 Moni sou Parisi sou lilotivula sele me sou maiademuli ne sou oto maido, “Neitou toematine e Iesu?”   
\s1 Iesu i matoale a aposel savulu tasa timana lua  
\r (Mat 10:1-4; Mak 3:13-19)  
\p
\v 12 Na ilala iedo Iesu ei asu uata na loena tasa ni kaka. Na lodo vuso do ei kaka.  
\v 13 Na autupola, ei toleale sou a disaipel minei usinani ne ei. Me ei matoale savulu tasa timana lua mei maaise sou a aposel.  
\v 14 E Saimon, me Iesu i maaise ei Pita. Me Andru, ei e tasine Saimon, me Iemus, Ioanes, Pilip, Batolomu,  
\v 15 Matiu, Tomas, Iemus ei e natune Alpius, me Saimon, sou toleale ei na abuna mine Selot,\f + \fr 6:15 \ft Selot ei a abuna tasa ne Israel i maubi pilu e Rom mina peltaselelene sou na magamaga mine Israel.\f*  
\v 16 me Iudas ei e natune Iemus, me Iudas Iskariot, ei tau e Iesu na limane sou so butuale ei.   
\s1 Iesu ei toekube a vanunua ma tavivine makuba  
\r (Mat 4:23-25)  
\p
\v 17 Iesu pilu e sou so sivo mei magili na tia pilu e sou abuna disaipel taula minei. Ma vanunua ma tavivine papaina sele sou maino ne Iudia, Ierusalem me na mado ne Tair me Saidon.  
\v 18 Sou asu usinani ne sou longe a inade minei, me ei toekube a vanunua sou sobe. Ma vanunua ma tavivine sou isa a nunu pagu i toegegeli e sou, Iesu i toekube sou tamai.  
\v 19 Ma vanunua ma tavivine vuso sou kale a tinauna limane sou ne ei, vuna maido ei isa a sagagalina na toekubekubena vanunua vuso.   
\s1 Kapelabena vanunua ne sou mongemonge  
\r (Mat 5:1-12)  
\p
\v 20 Me Iesu i gemuale sou a disaipel minei mei vei maido,  
\q1 “Amutou a kapelabena vanua, namutou mongemonge,  
\q2 vuna avena mina niitealalena mine Salemo ei mine amutou.   
\q1
\v 21 Amutou a abuna eili mu vitolo seidei, namutou mongemonge,  
\q2 vuna mulimuli namutou masu.  
\q1 Amutou a abuna seidei amutou tangitangi, namutou mongemonge,  
\q2 vuna mulimuli namutou polipoli.   
\q1
\v 22 Ne amutou mongemonge na ilala a vanunua ne sou ite amutou ogomuli e Natuna Bibi me ne sou lilogegelu sele ane amutou,  
\q2 me sou peltaselele amutou me sou lobe amutou, me sou damu ve amutou tomane a vanunua pagu.   
\p
\v 23 “Na ilala iedo namutou mongemonge sele me namutou seuseu. Mapa mine amutou i buo sele uata na langi. Eisusune sou tamai goliosi a inigogona tasa moni usino ne sou a profet.   
\q1
\v 24 “Moni e amutou a vanunua na vuvutina, mavaana buo ei ni palea le amutou.  
\q2 Amutou gualesi a golu mina toekubena lilone amutou.   
\q1
\v 25 Amutou seidei amutou aani me amutou masu, mavaana buo ei ni palea le amutou.  
\q2 Mulimuli namutou vitolo.  
\q1 Amutou vanunua seidei amutou polipoli, mavaana buo ei ni palea le amutou.  
\q2 Mulimuli namutou lilomomolu me mu tangi.   
\q1
\v 26 Ilala vanunua vuso sou ade kuba ane amutou, mavaana buo ei ni palea le amutou.  
\q2 Vuna eisusune sou tamai sou goliosi a inigogona tasa moni ane sou a aualana profet.   
\s1 Inigogona mina kinalene sou a butu  
\r (Mat 5:38-48, 7:12)  
\p
\v 27 “Eau vei le amutou a vanunua mu longe eau, namutou kale sou a butu mine amutou, me namutou goli a inigogona doana ne sou a vanunua sou lilogegelugelu ane amutou.  
\v 28 Amutou maibalave a vanunua sou adegegeli e amutou. Me namutou kake Salemo ane sou a vanunua sou toegegeli e amutou.  
\v 29 Mane a bibi tasa i sapegalegale a galemu tasa, o no sauvule tasa tamai usino ne ei. Mane a bibi tasa i lapuale a kinainai usalasala minio, muina ni guale a kinainai ulilolilo tamai.  
\v 30 Oo no bilii e sou a golugolu sou tagi e oo, me oo no ma tagiliuliu lou i.  
\v 31 Amutou goli usino ne sou tomane amutou kale ne sou goli usinani ne amutou.   
\p
\v 32 “Mane amutou kale moni a vanunua sou kale amutou, de amutou ma damudamu lou ve Salemo ei ni maibalave amutou. A vanua na sinusu sou tamai sou kale a vanunua sou kale sou.  
\v 33 Me mane amutou goli a inigogona doana usino na vanunua sou goli a inigogona doana usino ne amutou, de sei ni damu ve amutou vanunua ma tavivine doanana? Sou a vanua na sinusu tamai sou goli a inigogona tasa moni.  
\v 34 Me mane amutou bilii e sou a vanunua a ginau amutou damu sou mapigogoi ne sou maliu a ginau, io sei ni damu ve amutou vanunua doanana? Vanua na sinusu sou tamai sou bilii a ginau usino na vanua na sinusu, vuna sou damu ve abuna vanua do ne sou maliu a ginau ne sou.  
\v 35 Moni amutou namutou kale sou a butu mine amutou. Namutou goli a inigogona doana usino ne sou. Amutou magau e sou me amutou ma damudamu lou ve ne sou maliu a ginau usino ne amutou. Mapa mine amutou ni buo sele. Me ne amutou muina e natatune Salemo oata oto sele, vuna ei goligoli a inigogona doana tamai usino na vanunua sou ma toledadangi ete ei me ane sou a butu.  
\v 36 Namutou lilomuli e sou a vanunua ma tavivine, tomane Tamane amutou ei lilomulimuli e sou.   
\s1 Ma vilemulialale lei a vanunua  
\r (Mat 7:1-5)  
\p
\v 37 “Amutou ma vilemulialale lei a inigogona mine sou, me ne sou ma vilemuliale lei e amutou. Me amutou ma vavasa lou ana vanunua me ne sou ma vavasa lou ane amutou. Namutou lilotase a sinusu mina vanunua, me ne Salemo ni lilotase a sinusu mine amutou.  
\v 38 Namutou oabi a golugolu usino ne sou sea, me ne Salemo ni bilii e amutou a golugolu. Ei ni vileale doana sele usino ne amutou, mei ni onevoni sele, mei ni soetotole utano, mei ni mavoni sele mapigogoi a golugolu ni titigi, mei ni bilii e amutou. Tomane amutou vilemuliale a vanunua usino, na vilemulialena moni odo Salemo ni maliu le amutou.”   
\p
\v 39 Me Iesu i bilii a adetinovona tasa ane sou maido, “Nane mata ego tasa ei mapigogoi ni maite a mata ego tasa sea a vea? Boa. Sulu pilu ne su bosa na aova.  
\v 40 Bibaini na gualena matetengina ei ma vululusi ete a bibi na matetengina minei. Moni mane ei guale kubesi a matetengina, ei ni palea tasa moni tomane a bibi na matetengina minei.   
\p
\v 41 “Posa matina oo ite a molomolo baini ino na matane tamaimu, moni o ma muada oto a obu buo ino na matamu oto?  
\v 42 Mane oo ma ite ete a obu buo ino na matane oo oto, posa matina oo mapigogoi no vei le tamaimu maido, ‘Tamaigu, eau na taulele a molomolo ino na matane oo?’ O a bibi mina ade iototona, palapala oo no taulele a obu buo ino na matane oo oto. Mulimuli oo no mapigogoi no gemu iiti mo osetase a molomolo baini ino na matane tamaimu.   
\s1 Obu pagu ei vualale a vuana i pagu  
\r (Mat 7:17-20, 12:34-35)  
\p
\v 43 “Obu doana ei ma vualale ete a vuana pagupagu, tomane moni a obu pagu ei ma vualale ete a vuana i doana.  
\v 44 Vanunua sou muada a obu tastasa na ilala sou gegemuale a vuavua ne sou oto. A mota oloolo i ma vualale ete a fik. Me a obu oloolo i ma vualale ete a vain.  
\v 45 Tomane moni a bibi doana ei goligoli a inigogona doana na lilone ei. Moni a bibi pagu ei goligoli a inigogona pagu na lilone ei tamai. Vuna, matana damutatalana ei vonu lilo, iedele asena i veipalele.   
\s1 Inigogona mina mamagilina luma  
\r (Mat 7:24-27)  
\p
\v 46 “Vuna i matina amutou tole eau ‘Bibi Taula, Bibi Taula,’ moni amutou ma longemuli ete eau?  
\v 47 Eau na vei le amutou sei bibi i asuale eau mei longe a inadegu mei ogomuli e eau.  
\v 48 Bibi odo ei tomane a bibi tasa i kale ni tige a luma. Palapala ei pesi a lulu, mei tau a baobao i damsoe sele a vatu taula. Ma ilala a sali bulabula ei palea me ei iune a luma do, ei ma mapigogoi ete ni talolo utano, vuna bibi iedo ei tige a luma i doana me sagali.  
\v 49 Moni a bibi i longesi a inadegu me ei ma ogomuli ete, ei tomane a bibi tasa ei mamagili a luma na magamaga lealea moni. Mulimuli a sali bulabula i iune a luma do, me saga i ei tavuvu, me ei mamau vuso sele.”   
\c 7  
\s1 Iesu ei toekube a bibi na pipigona mina munuganuga na vanunua na maubina  
\r (Mat 8:5-13; Ioa 4:43-54)  
\p
\v 1 Iesu ei malongo ane sou a vanunua ma tavivine pulu, me ei gali ulilo ne Kapenaum.  
\v 2 Munuganuga tasa mina vanunua na maubina savulu sobo tasa ino, ei isa a bibi na pipigona tasa i sobe me bisii moni ei ni mate. Ei kale mamai a bibi na pipigona minei odo.  
\v 3 Ei longe a inade ve Iesu ino, io ei peltase a bibi buo mine sou e Iuda usino ne ei ne sou tagi e ei ni asu usinani me ei toekube a bibi na pipigona minei.  
\v 4 Sou sibitala le Iesu me sou vei sagali sele ane ei maido, “Mapigogoi oo no buloi ei.  
\v 5 Ei kale mamaimai sele amiteu Iuda me ei tige a luma na kinaka mine amiteu.”   
\p
\v 6 Io Iesu i asu pilu e sou. Ei sibitala agaviosi na luma, me munuganuga do ei peltase tamtamaina ne sou ade ane Iesu maido, “Bibi Taula, muina oo mangava mamau sele. Eau ma doana bibi oto mapigogoi oo no gali ulilo na luma minau.  
\v 7 Maido me eau ma damu oto ve eau mapigogoi na asu usino ne oo. Oo ade moni, ma bibi na pipigona minau ni kubaana lou.  
\v 8 Vuna maido, eau tamai ea ino matano na bibi ei isa a aisa mina niitealene eau. Me eau oto eau isa a vanunua na maubina ino matano ne eau. Me eau vei ane tasa, ‘Oo asu,’ io ei ni asu. Mane eau vei ane tasa lou sea, ‘Oo asu usinani,’ io ei ni asu usinani. Na ilala eau vei ana bibi na pipigona minau, ‘Oo goli a pipigona de,’ io ei ni goli.”   
\p
\v 9 Iesu ei longe a inade do, me ei saga sele. Me ei sauvule me ei vei ana abuna vanunua ma tavivine taula sou ogomuli e ei iodo maido, “Eau vei le amutou, lilo ne Israel eau ma ite ete a matana silimulina buo iedo.”  
\v 10 Ma vanunua ei peltase sou usino do, sou asu liu usinani na luma, me sou ite a bibi na pipigona ei kubasi.   
\s1 Iesu ei mailisiliu a bibi alaba na aubu e Nain  
\p
\v 11 Mulimuli sapa Iesu ei asu usino na aubu tasa aisana e Nain. Disaipel minei pilu a abuna vanunua ma tavivine taula sou asu pilu e ei.  
\v 12 Ei pea agavi na tema buo na aubu, me ei poge a vanunua sanii sou tabulebule a aitolana bibi tasa. Tinana bibi ei isa a natuna tasa moni iedo, me ei buasu. Ma abuna vanunua ma tavivine taula mina aubu do sou pilu a tavine do.  
\v 13 Iesu, Bibi Taula i ite a tavine do, me ei lilomuli sele ei, me ei vei ana tavine do maido, “Oo ma tangitangi lou.” \fig O ma tangitangi lou (Luk 7:13)|alt="When the Lord saw her, his heart went out to her. “Don't cry.”" src="DN00449b.tif" size="col" copy="Darwin Dunham © United Bible Societies, 1989." ref="7:13" \fig*   
\p
\v 14 Me ei asu agavi mei tau a limana na poso na minate. Ma vanunua sou tabulebule do sou magili, Iesu ei vei, “Bibi alaba, eau vei lio, oo ilisi.”  
\v 15 Me ei ilisi me ei ugu, me ei soke a inade. Me Iesu ei bilii liu e ei usino ne tinana.   
\p
\v 16 Maido ma vanunua ma tavivine vuso sou lae, me sou beilange a aisane Salemo. Me sou vei, “A profet buo ei paleasi balivua ne eitou. Salemo i asuosi usinani mina buloina vanunua ma tavivine minei.”  
\v 17 Maido ma mapamulina Iesu ei goli iedo i vele bubula lilo ne Iuda ma avena maisaba tamai.   
\s1 Ioanes mina maavuvutuna i peltase a disaipel lua usino ne Iesu  
\r (Mat 11:2-19)  
\p
\v 18 Disaipel mine Ioanes sou vei ane ei a golugolu vuso do Iesu ei goli.  
\v 19 Me Ioanes ei toleale a disaipel lua minei, me ei peltase sulu usino ne Bibi Taula. Me sulu tagi e ei maido, “Oo a bibi e Salemo ei peltase usinani, ue ne amiteu magitali e tasa sea?”   
\p
\v 20 Bibi lua do su sibitalasi ne Iesu, me su vei, “Ioanes mina maavuvutuna ei peltase amilu usinani ne oo, me ei kale ni tagi e oo maido, ‘Oo a bibi e Salemo ei peltase usinani, ue ne amiteu magitali e tasa sea?’”   
\p
\v 21 Na ilala do Iesu ei toekube a vanunua ma tavivine makuba sou isa a sinobe ma davutina, ma vanunua sou isa a nunu pagu ino ne sou. Me ei toekube e sou a mata ego ne sou gemu.  
\v 22 Me Iesu ei adeliu ane sulu, “Amulu asu mu vei le Ioanes a golugolu vuso amulu ite me amulu longe. Sou so mata ego sou gemu lou, me sou a ubune sou i mamau sou asu lou. Vanunua sou isa a sinobe a kolokolo i palea alaba lou, me sou a tagilane sou i sobo sou longe a inade. Vanunua sou matesi, sou ilisiliu, me sou a kapelabena sou longe a malongolongona kubaana.  
\v 23 Bibi ei ni mongemonge mane silimulina minei i ma bosa oto a pipigona eau goli.”   
\p
\v 24 Ilala a disaipel lua mine Ioanes su asuosi, Iesu ei vei ana vanunua ma tavivine e Ioanes, “Vuna matina amutou asu usino na avena a vanua boa? Amutou asu a niitena avivili ei une a tabua tasa?  
\v 25 Amutou asu mina niitena sei golu? Amutou asu mina niitena bibi tasa ei kai a kinainai doanana? Oite, vanunua sou kai a malasana kinainai me sou isa a golu doanana mina vovo, sou malumalu na luma mine sou a mapana.  
\v 26 Moni amutou asu a niitena sava? A profet tasa? Iede moni. Eau vei le amutou, ei vululusi vuse sou a profet sanii sea.  
\v 27 Na bibi moni iodo Laulau mine Salemo i vei maido,  
\q1 ‘Oite, eau na peltase a bineanea minau pala ane oo,  
\q2 ei ni masusulu a veamu.’\f + \fr 7:27 \ft Malakai 3:1\f*   
\p
\v 28 “Eau vei le amutou maido, bibi tasa boa ei vululusi e Ioanes, moni a bibi ei alabaini sele lilo na niitealalena mine Salemo, ei vululusi e Ioanes.   
\p
\v 29 “Vanunua ma tavivine pilu a vanua na gualena takis sou longesi a inade do, me sou vei ve, ‘Inigogona mine Salemo ei bilesi vuso.’ Sou vei maidolo, vuna sou gualesi a maavuvutuna maino ne Ioanes.  
\v 30 Moni sou e Parisi ma vanua na muadana binea sou lametase a vea doana mine Salemo, me sou ma guale ete a maavuvutuna ne Ioanes.   
\p
\v 31 “Maido me eau na goli sei matana adetinovona? Vanunua ma tavivine na ilala seidei sou tomane sei matana vanunua?  
\v 32 Sou tomane selebanini sou ugu na muina viepiluna me sou tola ane selebanini sanii sea maido,  
\q1 ‘Amiteu pusi a vivigo, moni amutou ma tilia oto.  
\q2 Me amiteu ala dododo, moni amutou ma tangi oto.’   
\p
\v 33 “Vuna Ioanes bibi na maavuvutuna ei maino, me ei ma ani ete a ulalu mei ma inini ete a vain, me amutou vei ve, ‘A nunu pagu ino ne ei.’  
\v 34 Natuna Bibi ei asu usinani, me ei aani me ei oinu, me amutou vei ve, ‘Oite, a bibi mina anipepeina sele, me a bibi mina niinuna vain mapapaina sele. Ei e tamaine sou a vanua na gualena takis me na vanua na sinusu.’  
\v 35 Amutou veivei simaido, moni a vanunua ma tavivine sou guale a muadana mine Salemo sou maite e eitou maido, muadana minei ei ivu sele.”   
\s1 Tavine tasa ei savei a ubune Iesu  
\p
\v 36 Parisi tasa ei kake Iesu ni aani pilu e ei, me Iesu i gali ulilo na luma mine Parisi mei ugu a inani.  
\v 37 Tavine tasa ei a tavine na sinusu na aubu buo. Ei muada ve Iesu ei aani na luma mine Parisi, maido ma tavine do ei lapitole a taogo a vatu ei isa a nanu manginangina doana ino i.  
\v 38 Me ei magili mamuli na ubune Iesu, mei tangitangi, matananuna i kokolo na ubune ei, mei saveitagase a aivuna letene ei, me ei gamumi a ubune ei, me ei singi a nanu manginangina na ubune ei.   
\p
\v 39 Parisi ei toleale Iesu usinani ne ei, ei ite do me ei vei le ei oto, “Mane a bibi ieli ei a profet, ei ni muada a inigogona mina tavine dolo i tau a limana ne ei, ei a tavine mina gunolina sinusu.”   
\p
\v 40 Iesu ei vei lei maido, “Saimon, eau isa a inade tasa eau kale na bilii e o.” Me Saimon ei vei, “Magiligilina, oo vei.”   
\p
\v 41 “Bibi lua isa a ginau na bibi tasa. Tasa ei isa a ginau savulusobo lima denarii, me tasa ei isa a ginau savulu lima denarii.  
\v 42 Sulu ma mapigogoi ete ne su maliu a ginau ma bibi iedolo ei taulele a ginau mine sulu. De sei mine sulu ni kale mamai e ei?”   
\p
\v 43 Saimon ei sie a inade maido, “Eau damutala maido bibi ei isa a ginau taula minei.” Me Iesu ei vei le ei, “Damutatalana minio i bilesi.”   
\p
\v 44 Me Iesu ei sauvule ei me ei gemuale a tavine do, me ei vei le Saimon maido, “Oo ite a tavine ie? Eau gali ulilo na luma minio, me oo ma bilii ete eau a nanu mina loloina ubugu. Moni a tavine ieli ei loloi a ubugu a matananu ne ei. Me ei saveitagase a aivune ei.  
\v 45 Oo ma gamumi ete eau. Moni na ilala eau gali ulilo, tavine ieli ei ma pulu oto a gamumina ubugu.  
\v 46 Oo ma guale ete a nanu manginangina mo singi na letegu. Moni a tavine li ei guale a nanu manginangina usinani me ei singi na ubugu.  
\v 47 Maido me eau vei lio, Salemo ei lilotase a sinusu papaina minei, vuna maido ei kale sele Salemo. Moni a bibi ei goli a sinusu baini me Salemo ei lilotase a sinusu minei, kinalene ei ni alabaini moni.” \fig Salemo ei lilotase a sinusu papaina minei, vuna maido ei kale sele Salemo (Luk 7:47)|alt="Whoever has been forgiven little loves little." src="ubsb-16a.TIF" size="col" copy="UBS New Reader Illustrations © United Bible Societies 2002" ref="7:47" \fig*   
\p
\v 48 Me ei vei ana tavine do maido, “Eau taulelesi a sinusu minio.”   
\p
\v 49 Vanunua sou aani pilu e ei sou soke a inade balivua ne sou oto maido, “Bibi ieli e sei me ei taulelele a sinusu?”   
\p
\v 50 Me Iesu vei ana tavine do maido, “Silimulina minio ei gualeliu e oo. Oo asu me a lilomu ni mea.”   
\c 8  
\s1 Tavivine sanii sou ogomuli e Iesu  
\p
\v 1 Mulimuli sapa Iesu ei gaga na aubu buobuo ma aubu banini mei veipale a malongolongona kubaana mina niitealalena mine Salemo. Ma disaipel minei savulu tasa timana lua sou asu pilu e ei.  
\v 2 Ma tavivine sanii, lisa Iesu ei taulele a nunu pagu mei toekube a sinobe mine sou sou tamai pilu e Iesu. Me Maria, sou tole ei Maria mina aubu Makdala, lisa Iesu ei taulele a nunu pagu padilua ne ei,  
\v 3 me Ioana ei e susune Kusa, ei a bibi na itealalena mina luma mine Herot, me Susana ma tavivine papaina sea sou buloi e sou a golugolu mine sou.   
\s1 Iesu ei adetinovo a bibi ei lange a vuana vit na mauma  
\r (Mat 13:1-9; Mak 4:1-9)  
\p
\v 4 De abuna vanunua ma tavivine maino na aubu buobuo tastasa sou viepilu me sou asu usinani ne Iesu, me ei bilii e sou a adetinovona tasa,  
\v 5 “Bibi tasa ei asu ni lange a vuavuana vit minei. Ma ilala ei langelange, sanii sou pu na vea. Me a vanunua sou soetole, ma manumanu na langi sou ani.  
\v 6 Me sanii sou pu na vatuvatu. Me a vit sou uusi, ma tabaa oto sou magolu, vuna ei ma isa oto a nanu.  
\v 7 Me sanii sou pu utano balivua na mota oloolo. Me a mota oloolo sou uusi pilu me sou avisobe a vit.  
\v 8 Me sanii sou pu utano na magamaga doana, me sou uusi, me sou vuale savulu sobo tasa.” Iesu ei veiosi me ei tola maido, “Bibi isa a tagilana ei ni longe.”   
\s1 Iesu ei veipale a masovana na adetinovona a vit  
\r (Mat 13:18-23; Mak 4:13-20)  
\p
\v 9 Sou a disaipel minei sou tagi e ei a malibuuna na adetinovona do.  
\v 10 Me ei vei le sou maido, “Salemo ei bilii e amutou a muadana vuna inade ovu mina niitealalena mine Salemo, moni a vanunua ma tavivine sanii sou longelonge moni a adetinovona. Maido me,  
\q1 ‘Ne sou gemugemu, moni sou ma iteilale ete,  
\q2 me ne sou longe, moni sou ma muada oto i.’\f + \fr 8:10 \ft Aisaia 6:9\f*   
\p
\v 11 “Vuna adetinovona ieli ei maido. Vuana vit ei a inade mine Salemo.  
\v 12 Vuana vit sanii sou pu na vea, sou tomane a vanunua ma tavivine sou longe, moni mulimuli e Satan ei asu mei taulele a inade ieli na lilone sou, maido me ne sou ma silimuli ete me Salemo ni ma gualeliu ete e sou.  
\v 13 Ma vuana vit sanii sou pu na vatu, sou tomane a vanunua sou longe me sou mongemonge, moni a aane sou boa. Maido me sou silimuli na ilala ei boto moni, me na ilala mina tinovo sou bosa.  
\v 14 Ma vuana vit sanii sou pu balivua na mota oloolo, sou tomane a vanunua sou longe, moni damutatalana mina golugolu na magamaga, ma vatu, ma munongena a golugolu mina magamaga sou avisobe a silimulina mine sou, me sou ma vua kuba oto.  
\v 15 Ma vuana vit sanii sou pu na magamaga doana, sou tomane a vanunua sou longe iiti a inade me sou tau a inade do na lilone sou i kubaana me doana, me sou lapitole, me sou magili sagali me sou vua.   
\s1 Vanunua sou ma tau oovi ete a sulu matano na taogo  
\r (Mak 4:21-25)  
\p
\v 16 “Vanunua sou vai a sulu, sou ma taboboliboli ete a taogo, me sou ma tau ete matano na poso. Boa. Moni sou tautau muata na poso na sulu, ve a vanunua sou gali ulilo ne sou ite a muada odo.  
\v 17 Golugolu vuso ino ovu, mulimuli ei ni palea, ma golugolu vuso a vanunua sou taboboli e sou, mulimuli ne sou muada, ma vanunua ne sou muada e sou.   
\p
\v 18 “Maido me amutou tilale namutou longe, mane a bibi tasa ei isa i a golu sanii, Salemo ei ni bilii sanii lou ne ei. Moni mane a bibi i ma isa oto a golugolu, Salemo ni taulele a golugolu ei damu ve ei isasi i.”   
\s1 Sei e tinane Iesu me tatasina?  
\r (Mat 12:46-50; Mak 3:31-35)  
\p
\v 19 Me tinana me tatasine Iesu sou asu usinani ne ei. Moni a vanunua ma tavivine papaina ino, maidolo sou ma mapigogoi ete ne sou asu viepilu e ei.  
\v 20 Me vanunua sanii sou vei le Iesu maido, “Tinamu pilu e tatasimu sou sala, me sou kale ne sou ite oo.”   
\p
\v 21 Moni ei maliu a inade usino ne sou maido, “Vanunua ma tavivine sou longe a inade mine Salemo me sou ogomuli, sou e eina me tatasigu.”   
\s1 Iesu ei ade, ma avivili buo i mate  
\r (Mat 8:23-27; Mak 4:35-41)  
\p
\v 22 Malada tasa Iesu ei sae na bot tasa pilu e sou a disaipel minei, me ei vei le sou maido, “Neitou asu usino na lili na pou na nanu maino.” Maido me sou asu.  
\v 23 Me sou volevole me Iesu ei ngolo. Ma avivili tasa buo i palea mina pou na nanu, ma nanu i sao mei vonu na bot me bisii moni ne sou palolo.   
\p
\v 24 Me sou asu sou toleluti ei, me sou vei maido, “Bibi Buo, Bibi Buo, bisii moni neitou palolo.” Me ei lutu me ei adesinoa ana avivili ma nanu taula do. Maido me a avivili mate, ma dasi i malilo.  
\v 25 Me ei vei ane sou maido, “Silimulina mine amutou ive?” Sou lae, me sou damutatala papai, me sou maiade balivua ne sou maido, “Bibi ieli ei e sei? Ei ade sagali ana avivili ma nanu, me sulu longemuli a inadene ei.”   
\s1 Iesu ei taulele a nunu pagu na bibi tasa  
\r (Mat 8:28-34; Mak 5:1-20)  
\p
\v 26 Iesu pilu e sou a disaipel sou sibitala na avena mine Gerasa. Aubu odo ino na lili maino ne Galili.  
\v 27 Iesu ei ontola na mado, ma bibi tasa mina aubu buobuo dolo i asuale ei, ei isa a nunu pagu, me na ilala tabaa sele ei ma lavalava oto, me ei ma malutola oto na luma tasa moni. Ei muina na avena minate.  
\v 28 Bibi iodo ei ite Iesu, me ei ngala me ei bosa agavuale a ubune Iesu, me ei tola vauta sele maido, “O kale no toematine e eau? Iesu, oo Natune Salemo oata oto sele. Eau tagi e oo, oo ma toegegeligeli lei e eau.”  
\v 29 Ei tola maido, vuna maido Iesu ei vei sagaliosi ana nunu pagu ni asutase a bibi iedo. Nunu pagu ei lapitole e ei na ilala tabaa, me sou papalepale ei a sen ma palasobo me sou ulage ei. Moni ei sagimauti a sen ma palasobo, ma nunu pagu odo i toe ei velevele usino na avena baa.   
\p
\v 30 Iesu ei tagi e ei maido, “Aisamu e sei?” Me ei vei, “Aisagu a vanunua na maubina,” vuna nunu pagu papaina i gali ulilo minei.  
\v 31 Ma nunu pagu sou odo sou maliu a inade usino ne Iesu maido, “Oo ma peltaselelele lei e amiteu usino na lulu a sinuana boa.”   
\p
\v 32 Ma abuna bolobolo taula tasa sou aaniani na loena tasa, me sou a nunu pagu sou nai sagali e Iesu, “O longo ane amiteu namiteu gali ulilo na bolobolo odo.” Io Iesu ei longo ane sou.  
\v 33 Ma nunu pagu sou veletase a bibi iedo me sou gali ulilo na bolobolo, ma abuna bolobolo do sou vele vauta sele utano na babangi. Me sou bosa mina pou na nanu, me sou pumutu.   
\p
\v 34 Sou a vanunua mina itealena bolo sou ite a golu odo, sou oava me sou vei a inade usino na aubu buobuo ma aubu banini.  
\v 35 Ma vanunua ma tavivine sou asu maino me sou ite sei golu ei palea, me sou asu usino ne Iesu, me sou ite a bibi iedo a nunu pagu sou veletasesi. Ei lavalava a malo ma damutatalana minei i muada, me ei ugu agavuale a ubune Iesu. Vanunua ma tavivine sou lae.  
\v 36 Me a vanunua sou ite a golu ei palea, sou mapamuli a golugolu Iesu ei goli usino na bibi iedo, lisa ei isa a nunu pagupagu, me seidei ei palea kubasi.  
\v 37 Ma abuna vanunua vuso mina aveavena ne Gerasa, sou tagi e ei ni ilisitase sou, vuna sou lae mamau sele. Maidolo me Iesu ei sae na bot mei veteliu.   
\p
\v 38 Moni a bibi sou a nunu pagu sou veletase ei odo, ei tagi e Iesu ni longo ei ni ogomuli e ei, moni e Iesu ei peltase ei mei vei lei maido,  
\v 39 “Oo asu liu usino na luma minio, me oo ademuada a golugolu vuso Salemo ei goli lio.” Ma bibi iedo ei asu, me ei veipale a golugolu vuso Iesu ei goli usino ne ei na aubu buobuo mine sou.   
\s1 Iesu ei mailisiliu a tavine baini tasa me ei toekube a tavine ei tuli a kinainai minei  
\r (Mat 9:18-26; Mak 5:21-43)  
\p
\v 40 Io Iesu ei veteliu, ma vanunua ma tavivine vuso sou mongemonge e ei, vuna sou ugutalitali e ei.  
\v 41 Ma bibi tasa ei sibitala, aisana e Iairus. Ei a munuganuga tasa mina luma na kinaka mine sou e Iuda. Ei totopatulu agavuale a ubune Iesu, me ei tagi e Iesu sagali ni asu usino na luma minei.  
\v 42 Ei isa a natuna tavine baini tasa moni, ma avalana i savulu tasa timana lua. Me bisii moni ei ni mate.  
\p De Iesu ei asu usino ne ei, ma abuna vanunua ma tavivine sou vaitole sele ei.  
\v 43 Ma tavine tasa ino, a dala i singi ne ei taliuliu me ei muina moni mapigogoi a avala savulu tasa timana lua. Moni a bibi tasa i ma mapigogoi ete ni toekube ei.  
\v 44 Tavine dolo ei asu na taulune Iesu, me ei pige a aisuna kinainai, me matasa moni dala i pulu.   
\p
\v 45 Me Iesu ei tagu maido, “Sei pige a kinainai minau?” Me sou vuso sou vei, “Eau boa. Eau boa.” Me Pita i vei, “Bibi Buo, abuna vanunua ma tavivine taula eili sou magili saiili e oo, me sou vaitole sele oo.”   
\p
\v 46 Moni Iesu i vei, “Tasa i pige eau. Eau muada a sagalina ei bualetasesi e eau.”   
\p
\v 47 Tavine do ei muadasi i, ei ma mapigogoi ete ni ovu, mei palili me totopatulu agavuale Iesu. Me na matane sou a vanunua ma tavivine vuso ei veimuade a vuna ei tau a limana ne Iesu, me ma tabaa oto sinobe minei bualesi.  
\v 48 Me Iesu ei vei ane ei maido, “Natugu, silimulina minio ei gualeliuosi oo. Oo asu ma lilomu ni mea moni.” \fig Natugu, silimulina minio ei toekube e oo. Oo asu ma lilomu ni mea moni (Luk 8:48)|alt="Daughter, your faith has healed you. Go in peace." src="LB00310B.TIF" size="col" copy="Louise Bass © The British & Foreign Bible Society, 1994." ref="8:48" \fig*   
\p
\v 49 Iesu ei saboa ino adeade, ma bibi tasa mina munuganuga mina luma na kinaka mine sou e Iuda ei divi maino na luma mine Iairus, mei vei lei, “Natumu ei matesi. Ma biliilii ase a mavaana na bibi na matetengina.”   
\p
\v 50 Me Iesu ei longe mei vei, “O ma laelae lou. Oo silimuli moni, me natumu ei ni kuba.”   
\p
\v 51 Iesu ei asu usino na luma, me ei ma longo oto ana a vanua ne sou gali ulilo na luma pilu e ei. Moni Pita, Ioanes, Iemus me tamana tavine baini odo me tinana sou gali ulilo pilu e ei.  
\v 52 Ma vanunua ma tavivine vuso, sou lilomuli sele e tavine baini odo me sou tangitangi. Moni e Iesu ei vei le sou maido, “Amutou ma tangitangi lou. Ei ma mate oto. Ei ngolo moni.”   
\p
\v 53 Me sou polivai sele ei, vuna maido sou muada i tavine baini ei matesi.  
\v 54 Moni Iesu ei lapitole a limana tavine baini odo me ei tole ei maido, “Tavine baini, o ilisi.”  
\v 55 Io nununa i veteliuale ei me ma tabaa oto ei ilisi. Me Iesu ei vei le sou ne sou bilii e ei a gona inani sanii.  
\v 56 Me tamana me tinana sulu saga sele. Moni e Iesu ei ade sagali ane sulu maido, “Ma veivei lei ana bibi tasa a golu i palea ie.”   
\c 9  
\s1 Iesu ei bilii a pipigona usino ne sou a aposel savulu tasa timana lua  
\r (Mat 10:5-15; Mak 6:7-13)  
\p
\v 1 Iesu ei toleale a disaipel minei savulu tasa timana lua, me ei bilii e sou a sagalina i buo ma aisa mina taulelena nunu pagu vuso me mina toekubena vanunua.  
\v 2 Me ei peltase sou usino mina malongona inade mina niitealalena mine Salemo, me mina toekubena vanunua sou sobe.  
\v 3 Me ei vei le sou maido, “Amutou ma gualeale lei a golu tasa na inasu ne amutou na vea. Amutou ma iudidi lei a too me a tanga me a ulalu me a vatu me a kinainai lua.  
\v 4 Mane amutou gali ulilo na luma tasa, de namutou muine amutou moni na luma do mapigogoi na ilala amutou kale namutou ilisitase.  
\v 5 Mane a bibi tasa ei ma guale ete amutou, io namutou ilisitase a aubu do. Me namutou labeveitaselele a molomolo na magamaga ino na ubune amutou, ne sou muada i, sou isa a mamauna na inigogona sou goli iodo.”  
\v 6 Io sou a disaipel sou asu maisabana aububuna. Me sou veipale a malongolongona kubaana me sou toekube a vanunua sou sobe na avena vuso.   
\s1 Herot ei kale ni muada Iesu ei e sei ivu  
\r (Mat 14:1-12; Mak 6:14-29)  
\p
\v 7 Mapana mina avene Iuda e Herot ei longe a inade na golugolu vuso Iesu ei goli, me ei damutala papai, vuna maido vanunua sanii sou adeade maido, “Ioanes ei ilisiliu na minate.”  
\v 8 Me sanii sou veivei ve, “Elaiia i palea.” Me sanii sou vei, “Tasa mine sou a profet lisa ei ilisiliu.”  
\v 9 Me Herot i vei maido, “Eau valiutiosi a loone Ioanes. Moni a bibi iede ei e sei me eau longe a pipigona sea sele ei goli?” Me ei kale ni ite Iesu.   
\s1 Iesu ei bilii a gona inani usino na vanunua savuluvulu lima (5,000)  
\r (Mat 14:13-21; Mak 6:30-44; Ioa 6:1-14)  
\p
\v 10 Me sou a aposel sou veteliu, me sou vei le Iesu a golugolu vuso sou goli. Me Iesu i guale sou, me sou ilisi me sou moni sou asu usino ne Betsaida.  
\v 11 Moni abuna vanunua ma tavivine sou muada ve Iesu i inosi, de sou ogomuli e ei, me ei mongemonge e sou so sibitala me ei ade ane sou a inade mina niitealalena mine Salemo, me ei toekube a vanunua ma tavivine sou isa a matamatana sinobe.   
\p
\v 12 Na lavilavi sele disaipel savulu tasa timana lua sou asuale ei me sou vei lei maido, “Oo peltase a vanunua ma tavivine usino na aububuna me na aveavena maisaba, ne sou poge a gona inani ma muina ngunolo. Avena ieli a vanua boa.”   
\p
\v 13 Moni e Iesu ei vei le sou a disaipel maido, “Amutou oto namutou bilii e sou a gona inani.” Me sou vei maido, “Amiteu ma isa oto. A ulalu lima ma aia lua moni eili. Nane namiteu oli a gona inani mina abuna vanunua ma tavivine vuso ie?”  
\v 14 Savulune sou mapigogoi savuluvulu lima (5,000).  
\p Me Iesu ei vei ane sou a disaipel minei maido, “Mu mauge sou tomane abuna savulu lima tastasa.”  
\v 15 Sou goli maido, ma vanunua ma tavivine vuso sou ugu.  
\v 16 Me Iesu i guale a ulalu lima dolo pilu a aia lua, me ei gemu uata na langi me ei toledadangi. Me ei lee me ei bilii e sou a disaipel ne sou soebule ane a vanunua ma tavivine.  
\v 17 Me sou vuso sou aani me sou masu. Me sou guale a matevuavua me sou totongi voni na tanga savulu tasa timana lua.   
\s1 Pita ei veipale Iesu ei e sei  
\r (Mat 16:13-19; Mak 8:27-29)  
\p
\v 18 Na ilala tasa Iesu vululu ei kaka, ma disaipel minei sou ino pilu e ei. Me ei tagi e sou maido, “Sou a vanunua ma tavivine sou veivei, eau e sei?”   
\p
\v 19 Me sou adeliu maido, “Ioanes bibi mina maavuvutuna, me sanii sou veivei, o Elaiia, me sanii sou vei, o tasa mine sou a profet lisa ei ilisiliu.”   
\p
\v 20 Me ei tagi e sou, “Me amutou oto vei, eau e sei?” Me Pita i maliu a inade maido, “Oo e Krais mine Salemo.”   
\s1 Iesu ei vei ei ni mate me ni ilisiliu  
\r (Mat 16:20-28; Mak 8:30-9:1)  
\p
\v 21 Iesu i ade sagali ana disaipel ne sou ma veivei lou ana bibi tasa ve ei e sei.  
\v 22 Me ei vei, “Natuna Bibi ei ni tabule a davutina makuba, me sou buobuo, me sou a munuganugana prist, ma vanua na muadana binea ne sou lametase me sou valipute ei. Me na malada tolunai ei ni ilisiliu.”   
\p
\v 23 Me ei ade ane sou maido, “Mane a bibi tasa ei kale ni ogomuli e eau, de ei ni taupui a masagana minei oto, me ei ni tabule a tauvaleuti minei na malada vuso, me ei ni ogomuli e eau.  
\v 24 Mane a bibi tasa i kale ni guale a maulina minei oto, maulina minei ni buale. Moni mane a bibi tasa i iabitase a maulina minei ane eau, ei ni guale a maulina minei.  
\v 25 Mane a bibi tasa i guale a golugolu vuso mina magamaga, moni mane ei oto i mamau me ei buale, de golugolu vuso do ni buloi e ei matina?  
\v 26 Mane a bibi tasa i maela e eau ma inade minau, ilala Natuna Bibi asu usinani pilu a muada minei, ma muada mine Tamana me sou a bineanea maolo ei ni maela tamai a bibi iedo.   
\p
\v 27 “Me eau vei ivu le amutou, vanunua sanii sou magili eili ie ne sou ma mate oto mapigogoi ne sou ite a niitealalena mine Salemo.”   
\s1 Vovone Iesu i palea sea sele  
\r (Mat 17:1-8; Mak 9:2-8)  
\p
\v 28 Malada pantolu mamuli ne Iesu ei vei a inade sou odo, ei guale Pita, Ioanes me Iemus, me sou asu uata na loena ni kaka.  
\v 29 Me ei kakaka ma laguna i palea sea sele, ma kinainai minei i palea kea sele, me ei lada mamau sele.  
\v 30 Me saga i a bibi lua su ade pilupilu e ei, sulu e Moses me Elaiia.  
\v 31 Sulu palea pilu a malasana mine Salemo me sulu adeade ve mulimuli Iesu ei ni mate ne Ierusalem.  
\v 32 Pita pilu a disaipel lua do sou ngolongolo. Moni ilala sou lutu, sou ite a muada i palea le Iesu ma bibi lua su magili pilu e Iesu odo.  
\v 33 Ma ilala sulu ne su ilisitase ei, de Pita i vei le Iesu maido, “Bibi Taula, eitou ugu nani ieli, ei kubaana. Ne amiteu tige a luma mina malolovina tolu, tasa minio, me tasa mine Moses, me tasa mine Elaiia.” Ei ma muada oto e sei matana inade ei ade.   
\p
\v 34 Ei saboa ino adeade, ma ausa tasa i palea mei avisobe sou me sou lae ilala sou ino lilo na ausa do.  
\v 35 Ma baligolu tasa malilo na ausa do i vei maido, “Iedele ei e natugu. Eau matoalesi e ei. Amutou longemuli e ei.”  
\v 36 Tauluna Inade do, sou ite Iesu vululu moni. Me sou ma vei oto ana bibi tasa a golu sou ite do.   
\s1 Iesu ei toekube a bibaini tasa i isa a nunu pagu  
\r (Mat 17:14-18; Mak 9:14-27)  
\p
\v 37 Na malada savulo sou sivo utano na loena, ma abuna vanunua ma tavivine taula sou poge e ei.  
\v 38 Ma bibi tasa balivua mine sou ei tola vauta maido, “Magiligilina, eau tagi sagali e oo no ite bibaini minau. Eau isa e natugu tasa moni sie.  
\v 39 A nunu tasa pagu i lapitole ei, me saga i ei ngala mamaumau sele me ei toe a vovone ei palili gegelu sele pilu a palapalana asena me ei toegegeli sele a vovone ei, me ei ma bualetase ete ei.  
\v 40 Me eau tagi sagali e sou a disaipel minio ne sou taulele a nunu odo. Moni sou ma mapigogoi ete.”   
\p
\v 41 Me Iesu i adeliu maido, “Amutou a vanunua ma tavivine amutou ma silimuli ete, damutatalana mine amutou ma bilesi oto. Mavisa eau na ugu pilu e amutou me eau tabule a mavaana mine amutou? Guale natumu mo maasi e ei usinani.”   
\p
\v 42 Ma ilala bibaini ei asu agavuale Iesu, nunu pagu odo i lange ei utano me ei toe ei palili mamau sele. Moni e Iesu i adesinoa ana nunu pagu odo, me ei toekube a bibaini me ei bilii liu e ei usino ne tamana.   
\s1 Maluanai Iesu ei vei ei ni mate  
\r (Mat 17:22-23; Mak 9:30-32)  
\p
\v 43 Ma vanunua ma tavivine vuso sou saga mamau sele a sagalina buo mine Salemo. Vanunua ma tavivine saboa ino sou saga papaipai a golugolu vuso Iesu ei goli, me Iesu ei vei le sou a disaipel minei maido,  
\v 44 “Amutou beli kube a tagilane amutou na inade ie. Ne sou tau e Natuna Bibi na limane sou a vanunua.”  
\v 45 Moni sou ma muada oto a vuna inade iedo. Vuna, inade do ei ovu ne sou, maido me sou ma muada kuba oto i. Me sou lae a tinagine ei a inade ei vei.   
\s1 Sei ei buo?  
\r (Mat 18:1-5; Mak 9:33-37)  
\p
\v 46 A inadena maisaukikina palea ne sou a disaipel, sei ei buo ane sou.  
\v 47 Me Iesu ei muada a damutatalana mine sou, me ei guale a bibaini tasa me ei mamagili ei agavuale ei.  
\v 48 Me ei vei le sou maido, “Mane a bibi tasa ei guale a bibaini ieli mina aisagu, ei guale e eau. Me a bibi ei guale e eau, ei guale e Euma i peltase eau. Sei bibi ei toe bisii e ei oto, ei ni buo ane amutou vuso.”   
\s1 Bibi ei ma butuale ete amutou, ei e tamaine amutou  
\r (Mak 9:38-40)  
\p
\v 49 Ioanes ei sie maido, “Bibi Buo, amiteu ite a bibi tasa ei taulele a nunu pagu na aisane oo me amiteu madetase ei, vuna ei ma ogomuli ete eitou.”   
\p
\v 50 Moni Iesu ei vei lei maido, “Amutou ma madetasetase lei e ei. Bibi ei ma butuale ete amutou, ei e tamaine amutou.”   
\s1 Sou Samaria sou ma longo oto ane Iesu ni asu usino na aubu ne sou  
\p
\v 51 Ilala Salemo ei ni guale Iesu usino na langi i agaviosi, me ei damutatala sagali sele ni asu usino ne Ierusalem.  
\v 52 Me ei peltase pale a vanunua sanii me sou asu ulilo na aubu tasa e Samaria ne sou masusulu a golugolu minei.  
\v 53 Moni a vanunua mina aubu odo sou muada i Iesu ei kale ni asu usino ne Ierusalem, maidolo me sou ma guale ete ei.  
\v 54 Disaipel lua, Iemus me Ioanes, su ite a inigogona mine sou, me sulu vei, “Bibi Taula, o kale ne amiteu toleale a oavi muata na langi ni tununi a vanunua vuso ie?”  
\v 55 Moni ei sauvule me ei sinoa ane sulu.  
\v 56 Me sou asu usino na aubu tasa sea.   
\s1 Iesu ei ade a inigogona mina ogomuline ei  
\r (Mat 8:19-22)  
\p
\v 57 Sou asu usino na vea, ma bibi tasa i vei ana maido, “Avena vuso oo asuale, eau na ogomuli e oo.”   
\p
\v 58 Me Iesu ei vei lei maido, “Busebuse aou sou isa a aova tano na magamaga, ma manumanu na langi sou isa a noa ne sou. Moni e Natuna Bibi ei ma isa oto a muina tinau na letena.”   
\p
\v 59 Me Iesu ei vei ana bibi tasa sea maido, “Oo ogomuli e eau.” Moni a bibi iodo i vei, “Bibi Taula, longo muga agu na asu na peilai pale e euma.”   
\p
\v 60 Me ei vei lei, “Umana. Vanunua sou matesi ne sou peilai liu e sou oto. Moni e oo, o asu mo malongo a niitealalena mine Salemo.”   
\p
\v 61 Bibi tasa sea i vei le ei maido, “Bibi Taula, eau na ogomuli e oo. Moni mapigogoi no longo agu na asu pala na langetase muge sou minau?”   
\p
\v 62 Me Iesu ei vei lei maido, “Bibi ei lapitole a inaunau, moni ei gemu liuliu, ei ma mapigogoi ete ni goli a pipigona mina niitealalena mine Salemo.”   
\c 10  
\s1 Iesu ei peltase a vanunua savulu padilua timana lua  
\p
\v 1 Tauluna malada sanii lou Bibi Taula i vileale a vanunua savulu padilua timana lua lou, me ei peltase sou tao lua lua muga pala ane ei usino na aububu vuso ei kale ni asu.  
\v 2 Me ei vei le sou maido, “Gona inani papaina i matutuasi na mauma, moni a vanunua na pipigona i ma makuba oto mina gualena, maidolo me namutou kake tamana mauma ei ni peltase a vanunua mina pipigona usino na mauma ne sou taupili a gona inani.  
\v 3 Amutou asu. Longe. Eau peltase amutou usino tomane a natatuna sipsip sou asu balivua na busebuse aou.  
\v 4 Namutou ma polopolo lou a maloputu na vatu ma bie ma ubupolo pilu e amutou. Me namutou ma veivei lei oaso doana ana vanunua ma tavivine na vea.   
\p
\v 5 “Mane amutou gali ulilo na luma tasa, de palapala ne amutou vei maido, ‘Lilomeana usino ne amutou.’  
\v 6 Mane a bibi tasa mina lilomeana ino na luma do, lilomeana mine amutou ni muina na bibi iedo. Moni mane a matana bibi maido boa, lilomeana mine amutou ni veteliu usino ne amutou.  
\v 7 Namutou muine amutou na luma iodo, me namutou aani me inu a golugolu sou bilii e amutou, vuna bibi na pipigona ei mapigogoi ni guale a mapa ne ei. Namutou ma asu maisabasaba lou na lumaluma.   
\p
\v 8 “Mane amutou gali ulilo na aubu tasa, me sou guale amutou, namutou ani a gona inani sou soebule e amutou.  
\v 9 Ne amutou toekube a vanunua sou sobe na aubu do, me namutou malongo ane sou maido, ‘Niitealalena mine Salemo i agaviosi usinani ne amutou.’  
\v 10 Moni mane amutou asu ulilo na aubu tasa, me sou ma guale ete amutou, io amutou asu magili na vea mina aubu do, me namutou vei maido,  
\v 11 ‘Amiteu saveitaselele a molomolo na magamaga mina aubu mine amutou i tabatotola na ubune amiteu. Moni namutou muada, niitealalena mine Salemo ei agaviosi.’  
\v 12 Eau vei le amutou, malada na mavaana ni palea na aubu ie, ei ni vululusi a mavaana i palea le sou e Sodom.   
\s1 Mavaana buo ei ni palea le sou a vanunua ma tavivine sou ma sauvule ete a lilone sou  
\p
\v 13 “Mavaana buo ei ni palea le amutou e Korasin, mavaana buo ei ni palea le amutou e Betsaida. Mane gona sinaganaga palea ne Tair me Saidon tomane eau goli balivua ne amutou, ne sou mapigogoiosi ne sou sauvule a lilone sou me sou kai a kinainai mina dinodo me sou ugu na kavou na oavi.  
\v 14 Moni na malada na vavasana mavaana ei palea ne amutou ei ni vululusi sele a mavaana ei palea le sou e Tair me Saidon.  
\v 15 Me amutou e Kapenaum, nane ne sou beilange amutou oata oto sele na langi, io? Boa. Ne amutou vele utano oto sele na aubu na tunuui.\f + \fr 10:15 \ft Na inade Grik ieli e \ft \+it Hades\+it*, malibuuna mine \+it Hades\+it* ei a aubu na davutina.\f*   
\p
\v 16 “Bibi ei longemuli a inade mine amutou, ei longemuli a inadegu. Ma bibi ei lametase amutou, ei lametase eau. Ma bibi ei lametase eau, ei lametase Salemo ei peltase eau.”   
\s1 Vanunua savulu padilua timana lua sou veteliu  
\p
\v 17 Vanunua savulu padilua timana lua sou veteliu pilu a munonge. Sou vei, “Bibi Taula, amiteu taulele a nunu pagu a aisamu me sou longemuli e amiteu.”   
\p
\v 18 Me Iesu ei vei ane sou maido, “Eau ite Satan ei pu muata na langi tomane a sima.  
\v 19 Longe. Eau biliiosi e amutou a sagagalina, me amutou mapigogoi namutou soetole a aliusu ma tumailu, me a sagagaline ei vuso mina butualene amutou. Me a golu tasa i ma mapigogoi ete ni toegegeli e amutou.  
\v 20 Moni ne amutou ma mongemonge oto e sou a nunu pagu sou longemuli e amutou. Boa. Amutou mongemonge moni e Salemo ei niagesi a aisane amutou na langi.”   
\s1 Iesu ei mongemonge me ei toledadangi e Salemo Tamana  
\r (Mat 11:25-27, 13:16-17)  
\p
\v 21 Na ilala iedo ei mongemonge a Maolona Nunu, me ei vei maido, “Eau toledadangi e oo, Ouma Bibi Taula mina langi ma magamaga, o tau oovi a golugolu sou ieli na vanunua sou isa a muadana buo ma damutatalana, me oo maite sou tomane selebanini moni. E, Ouma, o toe simaido na masagana minio.   
\p
\v 22 “Euma ei tauosi a golugolu vuso na limagu, ma bibi tasa i ma muada oto e Natuna, Tamana moni i muada e ei. Natuna pilu a vanunua Natuna i maite e sou e Tamana, sou moni sou muada e Tamana.”   
\p
\v 23 Me ei sauvule usino ne sou a disaipel minei me ei vei maido, “Vanunua sou ite a golugolu amutou iteite, ne sou guale a maibalavana.  
\v 24 Eau vei le amutou, lisa profet makuba me sou a mapana papaina sou kale ne sou ite a golugolu seidei amutou ite, moni sou ma ite ete. Me sou kale ne sou longe a inadenade amutou longelonge, moni sou ma longe ete.”   
\s1 Iesu ei mapamuli a bibi tasa doana mine Samaria  
\p
\v 25 De a bibi na muadana binea tasa ei ilisi ni tove e Iesu me ei tagi e ei maido, “Magiligilina, eau na goli a sava me eau na guale a maulina i doana taliuliu taliuliu?”   
\p
\v 26 Me ei vei lei maido, “Sei inade ino na binea? Oo gi matina?”   
\p
\v 27 Me ei adeliu maido, “‘Oo no kale Bibi Taula, Salemo minio a lilomu vuso, me a nunumu vuso, me a sagalimu vuso, me a damutatalana minio vuso tamai, me o no kale sele tamtamaimu tomane o kale oo oto.’\f + \fr 10:27 \ft Binea 6:5; Pipigona mina Prist 19:18\f*”   
\p
\v 28 Me Iesu ei vei lei maido, “Oo maliu a inade i bilesi. Oo toe simaido, me o no guale a maulina.”   
\p
\v 29 Moni ei kale ni maite ei oto ve ei a bilesina bibi, maido me ei tagi e Iesu maido, “Sei tamtamaigu sou agavuale eau?”   
\p
\v 30 Iesu ei adeliu maido, “Bibi tasa ei ilisitase Ierusalem mei asu utano ne Ieriko. Me a vanua na paaalina sou ovu na vea, me sou kaitase a kinainai minei me sou valibili e ei me sou guale a golugolu vuso minei, me ei tabulibuli na vea a muina, me bisii moni ei ni mate.  
\v 31 Me na ilala do, prist tasa ei ogomulimuli a vea do utano. Me ei ite a bibi iedo me ei pololeletase ei, me ei asu moni na aana vea usinosi.  
\v 32 Tomane moni e Livai tasa ei asu maino pea na avena do, me ei ite a bibi iedo, me ei pololeletase ei, me ei asu moni na aana vea usinosi.  
\v 33 Moni a bibi tasa mine Samaria ei asuasu na vea me ei poge a bibi iedo. Ei ite ei, me a lilona i momolu sele e ei.  
\v 34 Ei asu agavuale ei, me ei singi a wel ma vain na vatala minei me ei avisobe. Mei maugi e ei na donki minei oto. Me ei langetase ei usino na luma na mosi tasa me ei iteale kube ei.  
\v 35 Me maisavulo ei guale a denarii\f + \fr 10:35 \ft Denarii ei a vatu tomane a mapa na pipigona mina malada tasa.\f* lua mei bilii a tamana luma na mosi, mei vei lei maido, ‘Oo iteale a bibi ie. Mane oo oli a golugolu a vatu sanii lou minio mina itealene ei, de malada eau veteliu, eau na maliu usino minio.’ \fig Ei ite a bibi iedo mei pololeletase ei mei asu moni na aana vea maino usinosi (Luk 10:31)|alt="He saw the man, he passed by on the other side." src="CN01747B.TIF" size="col" copy="© 1996 David C Cook. Used with permission." ref="10:31" \fig*   
\p
\v 36 “Maidolo me oo damutale matina? Sei mine tao tolu iodo ei e tamaina ivu mina bibi sou valibili e ei iodo?”   
\p
\v 37 Me ei vei, “Bibi ei lilomuli ei iodo.” Me Iesu ei vei ana maido, “Oo asu mo goli simaido.”   
\s1 Iesu ei ino na luma mine Marta me Maria  
\p
\v 38 Me Iesu pilu e sou a disaipel sou asuasu usino, me Iesu ei asu ulilo na aubu tasa, me tavine tasa, aisana e Marta, ei guale Iesu usino na luma minei.  
\v 39 Marta ei isa e tasina tasa, aisana e Maria. Maria ei ugu agavuale a ubune Bibi Taula, me ei longe a inadenade minei.  
\v 40 Moni e Marta ei damutala papai a pipigona buo. Maido me ei asu usino ne Iesu me ei vei, “Bibi Taula, oo ma damutale ete ie? Tasigu ei iavetase eau me eau vululu moni eau pipigo. O vei le ei ni buloi e eau.”   
\p
\v 41 Moni e Bibi Taula ei maliu a inade maido, “Marta, Marta, oo damutatala papai me oo lilobuu a golugolu makuba.  
\v 42 Oo no damutale moni a golu tasa. Maria ei vileale a golu i doana, me a bibi tasa ni ma gualelele lei maino ne ei.” \fig Maria vileale a golu i doana (Luk 10:42)|alt="Mary has chosen what is better, and it will not be taken away from her." src="CN01750B.TIF" size="col" copy="© 1996 David C Cook. Used with permission." ref="10:42" \fig*   
\c 11  
\s1 Inigogona mina kinaka  
\r (Mat 6:9-15, 7:7-11)  
\p
\v 1 Me Iesu ei ino kaka na avena tasa, ei kaka pulosi, e tasa mine sou a disaipel i vei le ei maido, “Bibi Taula, o matetengi e amiteu a kinaka, tomane lisa Ioanes ei matetengi e sou a disaipel minei.”   
\p
\v 2 Me Iesu ei vei le sou maido, “Ilala amutou kaka, namutou vei maido,  
\q1 ‘Ouma,  
\q1 toe amiteu namiteu beilange a maolona aisamu.  
\q1 A niitealalena minio ei ni asu usinani.   
\q1
\v 3 Bilii e amiteu a gona inani seidei ie.   
\q1
\v 4 Lilotase a sinusunusu mine amiteu,  
\q2 tomane amiteu oto amiteu lilotase a sinusu sou goli le amiteu.  
\q1 Me o no ma itetase lei a tinovona ni palea le amiteu.’”   
\p
\v 5 Me Iesu ei vei ane sou maido, “Mane a bibi tasa balivua ne amutou ei isa e tamaina tasa, me na lodo punosa sele tamaina do i asu me ei vei le ei, ‘Tamaigu, eau kale no bilii e eau a ulalu tolu.  
\v 6 Tamaigu tasa ei asu na vea bulago sele me ei sibitala na luma minau, me eau a gona inani boa na bilii e ei.’  
\v 7 Nane a bibi lilo na luma do ei maliu a inade maido, ‘O no ma toemaisabesabe lei e eau. Tema ei kapiosi, me eau pilu e natatugu, amiteu ngolosi. Maido me eau ma mapigogoi ete na bilii e oo’?  
\v 8 Eau vei le amutou, tamana luma dolo ei ni ilisi mei ni bilii e tamaina a golugolu vuso ei boto i. Vuna ei bale moni a nilongene tamaina tola mapapaina, maidolo me ei lutu mei bilii e tamaina a golugolu. Ivu, ei ma damutale ete tomane ei kale ni buloi e tamaina mei goli maido. Boa.   
\p
\v 9 “Maido me eau vei le amutou, mu tagu me ei ni bilii e amutou. Mu tilo, me namutou ite. Mu lalaba, me ei ni pee a tema ane amutou.  
\v 10 Sei ei tagu, ei ni guale, me sei ei tilotilo, ei ni ite. Me sei ei lalaba, Salemo ni pee a tema ane ei.   
\p
\v 11 “Me amutou vanunua, sei bibi ni bilii e natuna a aliusu mane natuna ei tagu a aia?  
\v 12 Me mane natuna ei tagi e tamana ni bilii e ei a tolutolu, tamana ni bilii e ei a tumailu tasa pagu, io?  
\v 13 Amutou tamatamane selebanini, amutou goli a inigogona pagu makuba, moni amutou muada sele a bilii ne natatune amutou a golu doadoana. Maido me amutou muada sele ie, Tamane amutou na langi ei ni mongemonge a biliina Maolona Nunu na vanunua sou tagu i.”   
\s1 Sou vei ve Iesu ei pipigo pilu e Belsebul  
\r (Mat 12:22-30; Mak 3:20-27)  
\p
\v 14 Ei votetaselele a nunu pagu i goli a asena bibi tasa i sobo. Nunu pagu i asutasesi ei, io a bibi iedo i ade. Me a vanunua ma tavivine sou saga mamau.  
\v 15 Moni a vanua sanii sou vei, “Ei taulelele a nunu pagu a sagaline Belsebul, ei a munuganuga mine sou a nunu pagu.”  
\v 16 Ma vanunua sanii sou kale ne sou tove Iesu me sou tagi e ei ni goli a gona sinaga tasa maino na langi tomana matailalana pipigona mine Salemo.   
\p
\v 17 Moni Iesu ei muada a damutatalana mine sou, mei vei ane sou maido, “Mane a vanunua vuso mina avena buo tasa i mapola avena lua me sou maubi, avena buo do ni mamau. Mane tametatasi tamai sou maisinoa me sou maubi balivua ne sou oto, io tametatasina do ne sou mamau.  
\v 18 Me amutou vei maido, eau taulelele a nunu pagupagu a sagalina ne Belsebul, moni mane abuna mine Satan sou vilelue sou me sou maibutuala liu lilo ne sou oto, de ei ni iteale abuna minei matina?  
\v 19 Moni mane eau voteleletase a nunu pagupagu a sagalina ne Belsebul, de abuna mine amutou sou voteleletase sou a nunu pagu a sagalina mine sei? Maido me a inade mine amutou iede i ma bilesi oto.  
\v 20 Moni mane eau voteleletase a nunu pagupagu a sagalina mine Salemo, io namutou muada, niitealalena mine Salemo ei nanasi ne amutou.   
\p
\v 21 “Mane a bibi tasa sagali i lapitole a viso tasa lago ue sei golu mei ulagelage a luma minei, io a golugolu vuso minei ni muina kuba.  
\v 22 Moni mane a bibi tasa sagali mamau lou i asu mei maubi pilu a bibi iedo mei vululusi e ei, ei ni guale a lumusu vuso ma viso ue a golugolu na maubina i toe a bibi iedo i sagali, mei ni soebule a golugolu vuso minei iodo usino.   
\p
\v 23 “Bibi ei ma tamaigu oto, ei butualale eau. Me a bibi ei ma buloi ete eau a viepilina vanunua ma tavivine, ei vote maisabesabe sou.   
\s1 Nunu pagu ei veteliu lou  
\r (Mat 12:43-45)  
\p
\v 24 “Mane a nunu pagu i bualetasesi a bibi tasa, de nunu ieli ei vele maisabasaba na gona i tagasa ni poge a mui tasa ni manoa i. Moni ei ma ite ete a mui tasa i doana, io ei vei maido, ‘Eau na veteliu lou usino na luma lisa eau malu i iodo.’  
\v 25 Me ei asu mei ite a luma dolo, sou kakale me sou malolomesi.  
\v 26 Me ei ni asu guale a nunu pagu padilua sea sou vululusi lei e ei a gunolina inigogona pagu. Me ne sou gali ulilo me sou ugu na luma do. Palapala bibi iodo ei malu gegelu i, moni seidei minalu minei nado ni mamau gegelu sele lou.”   
\s1 Sei sou a vanua ne sou mongemonge sele?  
\p
\v 27 Na ilala Iesu i malongo a inade do, tavine tasa balivua ne sou ei tola maido, “Tavine i maalepose oo mei masusi e oo do, ei ni mongemonge.”   
\p
\v 28 Moni e Iesu ei vei, “Boa, vanunua ma tavivine sou longe a inade mine Salemo me sou ogomuli, ede ne sou mongemonge.”   
\s1 Vanua sanii sou tagi e Iesu ni goli a gona sinaga  
\r (Mat 12:38-42; Mak 8:12)  
\p
\v 29 A vanunua ma tavivine makuba sele lou, Iesu ei vei ane sou maido, “Sou a abuna vanunua ma tavivine mina ilala seidei ie, sou pagu. Sou kale a niitena gona sinaga mine Salemo. Moni ne sou ma ite ete a matailala tasa. Boa. Matailala tasa moni ne sou ite, ei a matailala mine Iona.  
\v 30 Iona i palea tomane a matailala Salemo i maite e sou e Ninive. Me tomane moni Natuna Bibi ei ni a matailala Salemo i maite e sou na ilala seidei ie.  
\v 31 Tavine a mapana mina avena malilo ni magili a vavasana mei ni veipale a inigogona pagu mina ilala seidei ie. Vuna maido, tavine a mapana do ei malu na sinua na magamaga ivu, moni ei asu usinani mina nilongene Solomon ei veipale a muadana doa minei. Moni a bibi tasa nana balivua ne amutou, ei vululusi ivu e Solomon.  
\v 32 Ilala Salemo i vavasa ane sou a vanunua ma tavivine, sou a vanua mine Ninive ne sou magili na vavasana pilu e sou a abuna vanunua ma tavivine mina ilala seidei ie. Vuna, sou e Ninive sou longe a inade ne Iona me sou sauvule a lilone sou. Moni a bibi tasa eili, ei vululusi ivu e Iona.   
\s1 Lada mina vovo  
\r (Mat 5:15, 6:22-23)  
\p
\v 33 “Vanunua sou vaisoe a lada sou ma tau oovi ete a lada do lilo na taogo. Boa. Sou tautau muata na poso, ma vanunua sou gali ulilo ne sou ite a muada iedo.  
\v 34 Matane oo ei a lada mina vovomu. Mane a matamu ei doana, de muada ei ni vonu na vovomu vuso. Moni mane a matamu ei pagu, io vovomu ni tunuui.  
\v 35 Maido me oo no ulago kuba, dae a muada ino lilo ne oo iedo ni tunuui.  
\v 36 Mane a vovomu vuso ei isa a muada, ma avena tasa ei ma tunuui oto, de vovomu do ni muada vuso, tomane a muada mina lada i ladevei e oo.”   
\s1 Sou Parisi me sou a vanua na muadana binea sou goligoli a inigogona pagu  
\r (Mat 23:1-36; Mak 12:38-40; Luk 20:45-47)  
\p
\v 37 Iesu ei pulu a malongona, me Parisi tasa i tagi e ei ni aani pilu e ei. Maido me Iesu i gali ulilo me ei ugu na poso na inani.  
\v 38 Moni Parisi iedo i ite Iesu ma loloi pale ete a limana, me ei saga.   
\p
\v 39 Moni e Bibi Taula i vei lei maido, “Amutou Parisi, amutou loloi kubekube sele a taogo na niinu ma taogo na aanina. Moni lilo, amutou vonu sele a inigogona mina lilimana ma matamatana inigogona pagu.  
\v 40 Amutou a vautana vanunua! Salemo ei mapale a vovo, ei mapale tamai a lilone sou.  
\v 41 Moni a golugolu ino lilona taogo, ede mu bilii a vanunua sou boto. Maido ma golugolu vuso mine amutou ni muina alaba sele na matane Salemo.   
\p
\v 42 “Moni amutou Parisi, mavaana buo ei ni palea le amutou. Gona inani banini vuso ma laulau na inani ue sei golu mina mauma, iedo amutou soebule a maduna i savulu tasa me mu oabi a maduna tasa usino ne Salemo. Moni amutou litatase a inigogona i bilesi ma inigogona mina kinalene Salemo. Puiale sele ne amutou sagali a gunolina inigogona ieli me amutou ma litatase lei a binea sanii tamai.   
\p
\v 43 “Amutou Parisi, mavaana buo ei ni palea le amutou. Amutou kale mamai a gualena munugana niugugu na luma mina kinaka ne amutou, me amutou kale mamai a vanunua ne sou vate oaso doana ane amutou na muina viepiluna.   
\p
\v 44 “Mavaana buo ei ni palea le amutou. Amutou tomane a muina minate ino ovu matano na magamaga, me vanunua sou asu muata, moni sou ma muada oto i.”   
\p
\v 45 A bibi tasa mina muadana binea ei vei ane Iesu maido, “Magiligilina, na inade o goli iodo oo salaitavole amiteu tamai.”   
\p
\v 46 Me Iesu i vei, “Amutou a vanua na muadana binea, mavaana buo ei ni palea le amutou. Amutou guale a golugolu sou mavaavaa sele mina tabulena, me amutou bilii e sou a vanunua. Moni amutou oto amutou ma tau sapesape ete a uune amutou tasa a golu sou mavaavaa do.   
\p
\v 47 “Mavaana buo ei ni palea le amutou. Amutou malolome a muina minate mina peilaine sou a profet, lisa tubutubune amutou sou valipute sou.  
\v 48 Maido me amutou mailongosi a inigogona tubutubune amutou oto sou valipute a profet, me amutou malolome a muina minate mine sou.   
\p
\v 49 “Maido me a bilesina damutatalana mine Salemo i vei maido, ‘Eau na peltase sou a profet me sou a aposel usino ne sou, me sou a vanunua ne sou toegegeli sanii mine sou, me ne sou valipute sanii ne sou.’  
\v 50 Mapa pagu mina daladala ne sou profet vuso i singi na Ilala na magamaga i soke, ei ni palea na abuna vanunua ma tavivine dolo seidei.  
\v 51 Daladala ne Abel me Sekaraia i mate balivua na posa na niabi ma luma mine Salemo. E, eau vei le amutou, mapa pagu ei ni palea na abuna vanunua ma tavivine dolo seidei.   
\p
\v 52 “Amutou a vanua na muadana binea, mavaana buo ei ni palea le amutou. Amutou taulelesi a ki mina tema ulilo na avena mina gualena muadana. Me amutou oto amutou ma gali ulilo oto, me amutou tabesobesobe a vea mine sou a vanunua ma tavivine sanii sou kale ne sou gali ulilo.”   
\p
\v 53 Ilala Iesu ei ilisitase sou, sou a vanua na muadana binea pilu e sou e Parisi sou lilogegelu ane ei me sou tagi e ei a matamatana tinagu.  
\v 54 Sou kale ne sou auala ane ei ni maliu a inade tasa i ma bilesi oto, i mapigogoi ne sou vavasa ane ei a inade do.   
\c 12  
\s1 Tilale a inigogona aualana mine sou e Parisi  
\r (Mat 10:26-27)  
\p
\v 1 Ilala do vanunua ma tavivine savuluvulu savulu makuba sou viepilu, i mapigogoi ne sou soetole maisabe a ubuubune sou sanii. Me Iesu ei ademuada pala ane sou a disaipel minei maido, “Tilale amutou a is mine sou e Parisi.  
\v 2 Golugolu vuso sou avisobe muina, ei ni palea na avena muada. Ma inade vuso i ovu, a vanunua vuso ne sou muada i.  
\v 3 Maido ma inade vuso amutou goli na tunuui, a vanunua ma tavivine vuso ne sou longe na oaso. Ma inade vuso amutou ade pakisikisi lilo na luma, ede ne sou magili oata na luma me sou ademuada.   
\s1 Bibi ni lae e Salemo moni  
\r (Mat 10:28-31)  
\p
\v 4 “Tamtamaigu, eau vei le amutou, ma laelae lou a vanunua sou valipute a vovo, me mulimuli ne sou ma mapigogoi ete ne sou goli a golu tasa lou.  
\v 5 Moni eau na maite e amutou sei namutou lae i, ede Salemo moni. Ei valiputepute a bibi, mei isa a sagagalina mina nilangena bibi iedo usino na aubu mina davutina.\f + \fr 12:5 \ft Na inade Grik ei e \ft \+it Gehenna\+it*, ieli a muina davutina, mulimuli sou a vanunua ma tavivine sou ma silimuli ete Iesu ne sou malu sinado.\f*   
\p
\v 6 “Vanunua sou masosove a manu banini lima a asarion\f + \fr 12:6 \ft Asarion ieli a vatu banini moni tomane a toea lima.\f* lua moni. Moni Salemo ei ma danivusevuse ete tasa mine sou a manu banini iodo.  
\v 7 Me tamai, Salemo ei giosi a aivu vuso na letene amutou. Maidolo me amutou ma laelae lou. Amutou vululusi a manu banini papaina.   
\s1 Neitou ma maelaela lou ve eitou eili a abuna mine Iesu  
\r (Mat 10:19-20, 32-33, 12:32)  
\p
\v 8 “Eau vei le amutou, mane a bibi ei veimuade na matana vanunua ve ei ino na abuna minau, io Natuna Bibi ei tamai ni veipale ane sou a bineanea mine Salemo maido ei a abuna minau.  
\v 9 Moni a bibi ei veipale ane sou a vanunua ve ei ma bibi oto na abuna minau, eau tamai na vei le sou a bineanea mine Salemo maido ei ma abuna minau oto.   
\p
\v 10 “Mane a bibi ei adegegelu ane Natuna Bibi, Salemo ni taulele a sinusu minei iodo. Moni mane a bibi ei adegegelu ana Maolona Nunu, Salemo ni ma mapigogoi ete ni taulele a sinusu minei.   
\p
\v 11 “Ma ilala sou lapuale amutou usino na luma na kinaka mine sou e Iuda me na vanunua buo ma vanunua sou isa a sagagalina, io namutou ma laelae lou me namutou vei, ‘Namiteu maliu a inade matina? Namiteu goli sei matana inade?’  
\v 12 Na ilala bilesi iodo a Maolona Nunu ni bilii e amutou a inade ne amutou ademuada i usino ne sou.”   
\s1 Adetinovo mina bibi na vuvutina  
\p
\v 13 A bibi tasa mina abuna vanunua ma tavivine dolo i vei lei maido, “Magiligilina, eau kale no vei ane tuagu ei ni soebule a golugolu vuso tamane amilu ei bilii e amilu ilala ei matesi.”   
\p
\v 14 Moni e Iesu ei tagi e ei, “Posa matina? Sei i matoale eau na palea a bibi mina vivilemulialena mine amulu, ue a bibi na soebulena golugolu mine amulu?”  
\v 15 Me ei vei ane sou a vanunua ma tavivine maido, “Amutou tilale. Dae ne amutou isu a gualena matamatana golugolu. Golu tasa boa mane oo oto o isa a golugolu papaina, moni oo ma guale ete a maulina a golugolu minio sou iede.”   
\p
\v 16 Me ei vei a adetinovona tasa ane sou maido, “Mauma mina bibi na vuvutina tasa i vuale a vuana papaina sele.  
\v 17 De bibi iedo ei damutale lilo minei maido, ‘Eau na goli a sava? Eau ma isa oto a mui na taupilipili a gona inani minau.’   
\p
\v 18 “Me ei vei, ‘Eau na goli maido. Eau na lope vuse a luma mina tinauna gona inani minau, me eau na tige a luma sou buobuo. Me eau na taupili a vit vuso ma golu doadoana vuso minau na luma odo.  
\v 19 Me eau na vei ane eau oto maido. Eau isa a golugolu makuba eili ni mapigogoi a avala makuba. De, manoa, aani, oinu me mongemonge moni.’”   
\p
\v 20 “Moni e Salemo i vei lei maido, ‘O vauta. Seidei na lodo ieli oo no mate. Ma golugolu vuso oo masusuliosi, iedele sei ni guale?’   
\p
\v 21 “Io, matana golu maido ei ni palea na vanunua sou taupilipili a golugolu papaina ane sou oto, moni sou kapelabe na matane Salemo.” \fig Maulina ei ma ino oto na golugolu papaina eitou isa i (Luk 12:16-21)|alt="Life does not consist in an abundance of possessions." src="Lk12.13.tif" size="col" copy="© Global Recordings Network, globalrecordings.net." ref="12:16-21" \fig*   
\s1 Amutou ma lilobuubuu lou me mu ma damutala papaipai lou  
\r (Mat 6:25-34)  
\p
\v 22 Io ei vei ane sou a disaipel minei, “Maido me eau vei le amutou, amutou ma damutala papaipai lou a maulina mine amutou, ‘Neitou ani a sava?’ Me amutou ma damutala papaipai lou a vovone amutou, ‘Neitou lavalava a sava?’  
\v 23 Vuna, maulina ei vululusi sele a gona inani, ma vovo ei vululusi sele a malo.  
\v 24 Amutou, damutale a koakoa. Sou ma danidani ete me sou ma taupilipili ete. Sou ma isa oto a luma mina tinauna gona inani ue a luma mina tinauna golugolu. Moni e Salemo ei biliilii e sou a gona inani. Me amutou vululusi sele a manumanu na matane Salemo.  
\v 25 Me sei mine amutou ei lilobuu, me ei ni mapigogoi ni adesui a matailala sanii lou na maulina minei? I ma mapigogoi sape ete.  
\v 26 Maido me mane amutou ma mapigogoi ete ne amutou goli a matana golu baini maido, io vuna matina amutou lilobuu papai a golugolu sanii?   
\p
\v 27 “Amutou gemuale kube sou a pupuna sou palea matina. Sou ma pipigopigo oto me sou ma sailiuliu oto ane sou. Moni eau vei le amutou, lisa Solomon i kai a kinainai malasa, moni a doadoana ma malasana mina pupuna sou ie, ei vululusi sele a malasana mine Solomon.  
\v 28 Mane Salemo i malolomelome a gulugulu, iedo seidei ieli, moni savulo vanua ne sou lange usino na oavi, Salemo ei ni malolome kube sele amutou. Amutou isa a silimulina i alabaini.  
\v 29 Maido me amutou ma lilobuubuu lou me mu ma damutala papaipai lou ne amutou ani a sava, me namutou ini a sava.  
\v 30 Vuna, abuna vanunua ma tavivine vuso mina magamaga sou tilotilo a golu ie, moni e Tamane amutou ei muadasi a golugolu amutou valagege i.  
\v 31 Moni, ne amutou guale pale a niitealalena mine Salemo, io ei ni bilii e amutou a golugolu amutou valagege i tamai.   
\s1 Inigogona mina viepilina golugolu doadoana  
\r (Mat 6:19-21)  
\p
\v 32 “Amutou a abuna sipsip bainini, moni amutou ma laelae lou. Tamane amutou ei mongemonge ni bilii a niitealalena minei usino ne amutou.  
\v 33 Masosove a golugolu amutou isa a i me mu oabi a vatu odo usino ne sou a vanunua sou boto a golugolu, inigogona ieli ei tomane a palakuluna vatu ane amutou i ma mamaumau oto, me mu tau a golugolu doana na langi, ei ni ma bualeale oto me sou a vanunua mina lilimana ne sou ma paaali ete, ma loto ma veveana ne sou ma toegegeli ete.  
\v 34 Malasolosolo na golugolu amutou isa ino na avena do, lilone amutou tamai ei ino sinado.   
\s1 Vanua na pipigona doana ne sou masusulu taliuliu  
\r (Mat 24:45-51)  
\p
\v 35 “Amutou mu palaai a malo mine amutou me mu vaisoe a lada,  
\v 36 tomane a vanua sou magitali a bibi buo mine sou i veteliu maino na aanina buo mina taulaina me ne sou pee asi a tema ane ei na ilala ei lalaba a tema.  
\v 37 A vanua na pipigona do ne sou guale a maibalavana na ilala a bibi buo i veteliu mei ni poge sou so ma ngolo oto. Eau vei patotona le amutou, a bibi buo ne sou ei ni suibote a malo me ei ni pale a palaai, me ei ni soebule a gona inani usino ne sou.  
\v 38 Me mane a bibi buo ei asu maino na lodo punosa sele, na matailala lua ue tolu, me ei ite a vanunua na pipigona sou ma ngolo oto, de vanunua na pipigona ne sou guale a maibalavana.   
\p
\v 39 “Amutou damutale. Mane a tamana luma ei muada pala i sei matailala a bibi mina lilimana ni asu, de ei ni ma mapigogoi ete ni itetase a bibi mina lilimana dolo ni utipee a luma minei me ei gali ulilo.  
\v 40 Amutou tamai amutou masusulu, vuna amutou ma muada oto sei ilala Natuna Bibi ei ni asu usinani.”   
\s1 Adetinovo mina bibi na pipigona doana ma bibi na pipigona pagu  
\p
\v 41 Pita i tagi e ei maido, “Bibi Taula, oo bilii a adetinovona ieli ne amiteu moni ue na vanunua vuso?”   
\p
\v 42 Me Bibi Taula i vei maido, “Sei bibi na itealena luma ei isa a damutatalana doana mei pipigo sagali? Bibi buo ei ni vileale ei a bibi na itealena a pipigona minei mina soebulena gona inani usino ne sou a vanua na pipigona minei na ilala bibi buo i tau.  
\v 43 Mane na ilala bibi buo minei i veteliu me ei ite ei goligoli a pipigona minei maido, bibi na itealena luma ieli ei ni guale a maibalavana.  
\v 44 Eau vei patotona sele, bibi buo ni matoale a bibi na pipigona iodo mina itealena golugolu vuso minei.  
\v 45 Moni mane a bibi na pipigona do i damutale a lilone ei, ‘Bibi buo minau ni ma mapigogoi ete ni sibitala asi,’ me ei soke a valibilina vanunua ma tavivine na pipigona sanii, mei aaniani mei ininu mei matalilili,  
\v 46 io a bibi buo ni veteliu na malada tasa bibi na pipigona iedo i ma masusulu oto mei ma muada oto i. Me a bibi buo ni toegegeli sele a bibi na pipigona do, mei ni mogegigini sele ei mei ni tau e ei pilu e sou a vanua sou ma silimuli ete na avena tasa.   
\p
\v 47 “Bibi na pipigona i muadasi a masagana mina bibi buo minei, moni ei ma masusulu ete a golu me ei ma goli ete a masagana mina bibi buo, iede bibi buo ni valibili vaute sele ei.  
\v 48 Moni ei ma muada oto a masagana mina bibi buo me ei goli a inigogona mapigogoi ni guale a butu, iede bibi buo ni tibi sape ei. Mane a bibi buo ei bilii e sou a vanunua na pipigona a golu makuba, ei ni tagi e sou ne sou maliu a golu papaina lou. Mane sou tau a golugolu makuba mina limana bibi tasa, io ne sou vei lei ni maliu a golu makuba lou.   
\s1 Iesu asu usinani mina vileluena a vanunua ma tavivine  
\r (Mat 10:34-36)  
\p
\v 49 “Eau asu usinani mina nilangena oavi na magamaga, me eau kale mamai a oavi iodo ni luluasi.  
\v 50 Eau isa a maavuvutuna tasa eau na guale. Me a lilogu i mavaa sele i mapigogoi a pipigona do ni pulu.  
\v 51 Amutou damu ve eau asu usinani mina bilii a lilomeana na magamaga. Boa, eau vei ane amutou, eau asu usinani mina vileluena abuabuna vanunua ma tavivine.  
\v 52 Ne seidei me mulimuli tamai tao lima na luma tasa, ne sou vilelue abuabuna lua. Tao tolu ne sou butuale tao lua, me tao lua do ne su butuale tao tolu.  
\v 53 Tamana ni butuale natune ei bibi, me natune ei bibi iodo ni butuale tamane ei. Me tinana ni butuale natune ei a tavine, me natune ei a tavine ni butuale tinana. Me eaana ni maibutuale a mauluna.”   
\s1 Vanunua sou ma muada oto a vuna golugolu sou odo i palealea  
\r (Mat 16:2-3)  
\p
\v 54 Iesu ei vei lei le sou a abuna vanunua ma tavivine papaina maido, “Amutou iteite a ausa ei palea na avena oaso i solosolo i, me saga i amutou vei ve, ‘Adavu ni pu.’ Me a adavu ni pu.  
\v 55 Me amutou iteite a avivili malilo, me amutou veivei ve, ‘Seidei ni tivula.’ Ei ni tivuvula.  
\v 56 Amutou a vanua na aualana, amutou vivilemulialale kube a golugolu ei palealea na magamaga me na langi. Moni posa matina amutou ma mapigogoi ete namutou vilemuliale a golugolu ei palealea na ilala seidei ie?   
\s1 Oo no toebilelesi a inade pilu a bibi ei kale ni vavasa ane oo  
\r (Mat 5:25-26)  
\p
\v 57 “Posa matina amutou oto amutou ma vilemuliale ete sei golu i bilesi?  
\v 58 Ilala oo asu pilu a bibi ei butuale oo, amulu saboa ino mu asuasu na vea, o tove no toebilelesi a inade pilu e ei. Dae ei ni lapuale oo usino na bibi na avelulusena ni tau e oo na limane papai, me papai ni tau e oo na luma na tunuui.  
\v 59 Eau vei le oo, o no ugu na luma na tunuui mapigogoi no lange a vatu vuso sou tau le oo. Mane oo ma lange ete, o no ma gali oto usala.”   
\c 13  
\s1 Bibi ei ma sauvule ete a lilona ei ni buale  
\p
\v 1 Ilala do, vanua sanii sou mapamuli ane Iesu e Pailat ei valipute a vanunua sanii ne Galili me sou singi a dalane sou muata na golu vivi na niabi ne sou usino ne salemo mine sou oto.  
\v 2 Me ei vei le sou maido, “Amutou damu i a vanunua mine Galili odo sou goli a sinusu makuba lou ane Galili sanii, me ieli a vuna golu pagu odo i sibitala le sou?  
\v 3 Boa. Eau vei le amutou, mane amutou ma sauvule ete a lilone amutou, a matana golu tasa moni ni palea ne amutou vuso.  
\v 4 Me a vanunua savulu tasa timana pantolu odo, lisa a luma lago mine Siloam ei pu muata ne sou me ei valipute sou, amutou damu a sinusu mine sou ei vululusi a sinusu mine sou a vanunua sanii sou malu ne Ierusalem?  
\v 5 Boa. Eau vei le amutou, mane amutou ma sauvule ete a lilone amutou, a matana golu tasa moni ni palea ne amutou vuso.”   
\s1 Adetinovona mina obu ei ma vua oto  
\p
\v 6 Me ei veipale a adetinovona tasa maido, “Bibi tasa ei dani a obu a fik tasa na mauma na vain minei, me ei asuale a obu odo ni gemu a vuana. Moni ei ma ite ete tasa ino.  
\v 7 Maido me ei vei ana bibi na pipigona na mauma maido, ‘Oite! Avala tolu pulosi eau asu usinani na gemu a vua na obu ieli, moni ei ma vua oto. Maido me o no tale a obu ie. Posa matina ei mapalipali sabubi a vi na magamaga ie?’   
\p
\v 8 “Me a bibi na pipigona ei maliu a inade minei maido, ‘Bibi buo, muine ei mapigogoi a avala tasa lou. Eau na eli a magamaga saiili na vuna me eau na tau a gulugulu ue taitaina bulmakau.  
\v 9 Nane ei ni mapigogoi ni vua na avala malau. Me mane boa, io oo no taletase.’”   
\s1 Na Maolona Malada Iesu ei toekube a tavine tasa  
\p
\v 10 Na Maolona Malada Iesu ei matetengi a vanunua ma tavivine lilo na luma na kinaka mine sou e Iuda tasa.  
\v 11 Ma tavine tasa ino, ei isa a nunu na sinobena i mapigogoi a avala savulu tasa timana pantolu. Ma lamana tavine do ei makoko, me ei ma mapigogoi ete ni magili bilesi.  
\v 12 Iesu ei ite ei me ei toleale ei, me ei vei lei maido, “Tavine, eau taulelesi a sinobe minio.”  
\v 13 Me ei tau a limana muata na tavine do, me saga i a tavine ei magili bilesi me ei beilange a aisane Salemo.   
\p
\v 14 Moni a munuganuga mina luma na kinaka mine sou e Iuda i sinoa ane Iesu ei toekube a tavine do na Maolona Malada mine sou. Maido me ei vei le sou a vanunua ma tavivine maido, “Malada pantasa ei a malada na pipigona. Maido mu asu usinani me mu toekube amutou na malada sou odo. Moni umana na Maolona Malada.”   
\p
\v 15 Io Bibi Taula ei maliu a inade usino ne ei maido, “Amutou a vanua na aualana. Na Maolona Malada amutou vuso amutou lubetase a bulmakau ma donki mine amutou mina luma na bulmakau, me amutou maasi e sou usino ne sou ini a nanu.  
\v 16 Moni a tavine ie, ei e natune Abraham tasa. Satan ei palesobe ei mapigogoi a avala savulu tasa timana pantolu. Mane eau kale na lubetase a golu i palesobe ei, eau ma mapigogoi ete na goli na Maolona Malada, io?”   
\p
\v 17 Ilala ei vei maido, vanunua sou butuale ei sou maela sele. Ma vanunua ma tavivine vuso sou mongemonge a golu vuso doana dolo ei goli.   
\s1 Adetinovona mina vuana mastet  
\r (Mat 13:31-32; Mak 4:30-32)  
\p
\v 18 Me ei ade maido, “Niitealalena mine Salemo ei tomane a sava? Eau na goli sei matana adetinovona?   
\p
\v 19 “Ei tomane a vua na obu tasa sou tole a mastet. Bibi tasa ei guale me ei dani na mauma minei. Me mulimuli ei uusi buo tomane a obu, ma manumanu na langi sou tau a noane ne sou na lalana.”   
\s1 Adetinovona mina is  
\r (Mat 13:33)  
\p
\v 20 Me Iesu ei vei lou maido, “Eau na goli sei adetinovona a niitealalena mine Salemo?  
\v 21 Ei tomane a is, tavine tasa i guale mei sauvule pilu a plaua lilo na taogo tasa buo.\f + \fr 13:21 \ft Bunuona ieli a lita savulu lua timana lua ue tomane a pound savulu pantasa.\f* Me mulimuli a plaua vuso i sosoge.”   
\s1 Amutou namutou gali ulilo na tema gavivili  
\r (Mat 7:13-14, 21-23)  
\p
\v 22 Me ei asu usino na aububuna buobuo ma aububuna banini tamai me ei matetengi a vanunua ma tavivine, me ei asu na vea usino ne Ierusalem.  
\v 23 Ma bibi tasa i vei lei maido, “Bibi Taula, nane Salemo ni gualeliu a vanunua sanii moni?” Me Iesu ei vei le sou maido,  
\v 24 “Amutou pipigo sagali mina ginali ulilo na tema gavivili. Eau vei le amutou, vanunua makuba sou kale ne sou gali ulilo, moni sou ma mapigogoi ete.  
\v 25 Ilala tamana luma i ilisi mei kapi a tema, ne mu magili sala me mu lalaba a tema me mu tola maido, ‘Bibi Taula, peeale amiteu.’ Me ei ni maliu a inade usino ne amutou, ‘Eau ma muada oto e amutou, amutou mine sei avena.’   
\p
\v 26 “Me namutou vei lei maido, ‘Amiteu aani me inu pilu e oo, me oo matetengi e amiteu na vea.’   
\p
\v 27 “Moni ei ni vei le amutou maido, ‘Eau ma muada oto e amutou, amutou a abuna mine sei avena. Amutou vuso a vanunua na inigogona pagu, amutou vuso mavulo.’   
\p
\v 28 “Ilala amutou ite Abraham, Aisak, Iekop me sou a profet vuso sou ino lilo na niitealalena mine Salemo, namutou tangi me mu gadokase sele a livone amutou, moni ne sou taulele amutou me namutou ugu sala.  
\v 29 Ma vanunua ma tavivine ne sou asu usinani na avena muange, ma avena matano, ma avena lilo, ma avena masae, ne sou aani mina niitealalena mine Salemo.  
\v 30 De longe. Vanunua sanii seidei sou mulisobo, ne sou palea a munugana. Ma vanunua sanii sou eili a munugana, ne sou mulisobo.”   
\s1 Iesu ei lilomuli e Ierusalem  
\r (Mat 23:37-39)  
\p
\v 31 Na ilala bilesi iodo e Parisi sanii sou asu, me sou vei le Iesu maido, “Oo no ilisitase a aubu ieli, vuna maido Herot ei kale ni valipute oo.”   
\p
\v 32 Me ei vei le sou maido, “Amutou asu mu vei ana, buse aou odo maido, ‘Seidei me savulo eau taulele a nunu pagu me eau toekube a vanunua sou sobe. Me na malada tolu eau na mapuli a pipigona minau.’  
\v 33 Moni seidei, savulo me maisavulo eau na asu usino. Vuna maido, ne sou ma valipute ete a profet sala ne Ierusalem.   
\p
\v 34 “Ierusalem, Ierusalem, oo valiputematemate sou a profet, me oo ubi e sou a vatu, sou a vanunua Salemo ei peltase sou usinani. Ilala makuba lou eau kale na viepili e natatumu, tomane a kuleko tina i viepilipili e natatuna matano na velevelena. Moni amutou ma kale ete.  
\v 35 Oite! Seidei aubu mine amutou ni mamau mei ni palea a mamau sele mei ni muina sabubu. Eau vei le amutou, namutou ma ite ete eau mapigogoi na ilala namutou vei maido, ‘Maibalave a bibi ieli ei asu usinani na aisane Bibi Taula.’”   
\c 14  
\s1 Iesu ei toekube a bibi tasa vovona i vovonu  
\p
\v 1 Na Maolona Malada tasa ne sou e Iuda Iesu ei asu aani na luma na munuganuga tasa ne sou e Parisi. Me sou ulago iiti sele e ei.  
\v 2 Ma bibi tasa ino masae ne Iesu, vovone ei i vovonu mamau sele.  
\v 3 Me ei tagi e sou a vanua na muadana binea me sou e Parisi maido, “Eitou mapigogoi neitou toekube a vanunua sou sobe na Maolona Malada ue boa?”  
\v 4 Moni sou vale moni, me ei guale a bibi iedo me ei toekube ei me ei peltase ei asu.   
\p
\v 5 Me ei ade ane sou maido, “Mane tasa mine amutou, natuna ue a bulmakau minei i pu utano na aova na nanu na Maolona Malada, nane ei ni lapuale asi a bibaini ue a bulmakau odo uata ue boa?”  
\v 6 Me sou ma mapigogoi ete ne sou maliu a inade do.   
\s1 Iesu ei vei, a bibi ei ni volipui e ei oto  
\p
\v 7 Ilala Iesu ei ite sou a mosi, sou kale ne sou ugu na munugana niugugu moni. Maido me ei vei a adetinovona tasa maido,  
\v 8 “Ilala a bibi tasa i toleale oo me o asu na inani buo na taulaina, oo no ma ugugu lou na munugana niugugu. Mane o no ma goli ete maido, ilala ei toleale a bibi tasa lou i isa a aisa buo lou ane oo,  
\v 9 ei ni vei ane oo, ‘Oo bilii a munugana niugugu iede usino na bibi iodo.’ Me o no maela mamau sele mo no asu ugu mamuli oto sele.  
\v 10 Moni mane a bibi tasa ei toleale oo, o no asu ugu mamuli oto sele. De a bibi i toleale oo odo ei ni asu usinani minio mei ni vei le oo, ‘Tamaigu, oo asu usinani mo ugu na munugana niugugu.’ Maido me oo no guale a aisa buo na matane sou a vanunua sou aani pilu e oo.  
\v 11 Bibi ei beilange a aisane ei oto, Salemo ni taupui e ei. Moni a bibi ei taupui e ei oto, Salemo ni beilange ei uata.”   
\s1 Neitou toekube a vanua sou ma mapigogoi ete ne sou maliu  
\p
\v 12 Iesu ei vei ana bibi iedo ei toleale ei, “Mane oo masusulu a inani buo, oo ma toleale lei e tamtamaimu me tatasimu me sou a abuna minio, me sou amutou a aubu tasa sou isa a vatu papai. Dae ne sou toleale oo me sou maliu a inani usino ne oo.  
\v 13 Mane oo goli a inani buo, oo no toleale sou a kapelabe ma vanunua vovone sou mamau ma vanunua sou asu tagapeo me sou mata ego.  
\v 14 Maido me oo no guale a maibalavana, vuna sou a matana vanunua do sou ma mapigogoi ete ne sou maliu a inani minio. Mulimuli na ilala sou a bilesina vanunua sou ilisiliu, Salemo ni maliu a inani iodo usino minio.”   
\s1 Adetinovo mina inani buo  
\r (Mat 22:1-10)  
\p
\v 15 Tasa mine sou a vanunua do ei aani pilu e Iesu, ei longe a inade do me ei vei lei maido, “Balavana ne sou a vanunua ma tavivine ne sou aani lilo na niitealalena mine Salemo.”   
\p
\v 16 Me ei vei lei maido, “Bibi tasa ei kale ni masusulu a inani buo, me ei toleale a vanunua makuba.  
\v 17 Me ei peltase a bibi na pipigona minei ni vei le sou lisa ei tolealesi sou a inani iodo, ‘Amutou asu usinani. Golugolu vuso i masusuluosi.’   
\p
\v 18 “Moni a vanunua vuso do sou vei ve sou ma mapigogoi ete ne sou asu. Bibi tasa ei vei maido, ‘Eau oliosi a mauma tasa mea na asu na oite. Maula, eau na ma asu oto.’   
\p
\v 19 “Me tasa lou i vei maido, ‘Eau oli a bulmakau savulu tasa mina pipigona mea kale na asu na tove sou. Maula, eau na ma asu oto.’   
\p
\v 20 “Me matolunai ei vei maido, ‘Eau taulai alaba. Maido me eau ma mapigogoi ete na asu.’   
\p
\v 21 “Io a bibi na pipigona ei maasi liu a inade vuso do usino na bibi buo minei. Ilala a tamana luma ei longe a inadenade do, ei lilotivula mei vei ana bibi na pipigona minei maido, ‘Oo asu asi usino na vea buobuo ma vea banini mina aubu buobuo ie, me oo guale sou a kapelabena me a vanunua vovone sou mamau me sou a mata ego me sou asu tagapeo, me oo maasi sou usinani minau.’   
\p
\v 22 “Me a bibi na pipigona ei vei, ‘Bibi buo, eau goliosi tomane o vei, moni a luma ei saboa vonu.’   
\p
\v 23 “Ma bibi buo ei vei ana bibi na pipigona maido, ‘Eau kale a luma minau ni vonu. Maido o asu na vea buobuo ma aububu banini na loeloe, me o ade sagali ane sou ne sou asu usinani.  
\v 24 Eau vei le amutou, sou vuso a vanunua lisa eau toleale sou odo, ne sou ma ani ete pilu e eau.’”   
\s1 Bibi ni damutala iiti pala me ei ogomuli e Iesu  
\p
\v 25 Abuna vanunua ma tavivine buo sou asu pilu e Iesu, me ei sauvule me ei vei ane sou maido,  
\v 26 “Mane a bibi ei asuale eau, moni ei ma butuale ete tamana me tinana me susuna me natatuna me tatasina me latavivine ne ei, me maulina minei oto tamai, ei ma mapigogoi ete ni muina a disaipel minau.  
\v 27 Me a bibi tasa ei ma tabule ete a tauvaleuti minei me ei ogomuli e eau, ei ma mapigogoi ete ni muina a disaipel minau tamai.   
\p
\v 28 “Mane tasa mine amutou ei kale ni tige a luma na ulagena tasa minei, ei ni ugu pala me ei ni damutale kube a mapa mina tinigena luma do. Ei kale ni muada, mapa do ni mapigogoi a mapulina luma do ue boa.  
\v 29 Mane ei tau moni a vuna mei ma mapigogoi ete ni mapalipali a luma do, io a vanunua vuso sou ite, ne sou soke a adepintolana ane ei.  
\v 30 Ne sou vei, ‘Bibi iedo ei soke a tinigena, moni ei ma mapigogoi ete ni mapuli.’   
\p
\v 31 “Ue mane a mapana tasa ei isa a vanunua na maubina i savuluvulu savulu tasa (10,000) ni asu ni maubi ana mapana tasa sea ei isa a vanunua na maubina i savuluvulu savulu lua (20,000), io mapana odo ei ni ugu pala me ei ni damutala iiti maido ei ni mapigogoi ni maubi ana mapana sea do ue boa?  
\v 32 Mane ei damutale ei ma mapigogoi ete, na ilala butu minei saboa ino bulago, ei ni peltase a vanunua usino ne ei me ei tagi e ei a inade mina valimatena maubina.  
\v 33 Maido me tomane moni mane tasa mine amutou i ma lametase ete a golugolu vuso minei, ei ma mapigogoi ete ni muina a disaipel minau.   
\s1 Iesu ei adetinovo a masi ei palea pagu  
\r (Mat 5:13; Mak 9:50)  
\p
\v 34 “Maido me masi ei doana. Moni mane a mamisina masi odo i buale, ma masi iodo ni doana lou matina?  
\v 35 Ei ma palea oto tomane a magamaga alaba i toe a mauma i doana, vanunua sou pitaselele usala. Bibi ei isa a tagilana ei ni longe a inade ie.”   
\c 15  
\s1 Adetinovo mina sipsip i buale  
\r (Mat 18:12-14)  
\p
\v 1 Sou a vanua na gualena takis me sou a vanua na sinusu sou asu agavuale Iesu mina nilongena inade minei.  
\v 2 Me sou Parisi ma vanua na muadana binea sou poi e ei me sou vei maido, “Bibi ieli ei maitamaina pilu a vanua na sinusu me ei aani pilupilu e sou.”   
\p
\v 3 Me Iesu i bilii e sou a adetinovona maido,  
\v 4 “Mane tasa mine amutou ei isa a sipsip savulu sobo tasa, me mane a sipsip tasa i buale, ei ni veletase a sipsip savulu ialasue timana ialasue na avena tasa, me ei ni asu ni tilomuli a sipsip tasa i buale do mapigogoi ei ni poge.  
\v 5 Ilala ei guale a sipsip, ei ni mamavute ei na baune ei mei ni mongemonge.  
\v 6 Ma ilala ei veteliu usinani na luma, ei ni toleale tamtamaina me sou so malu agavuale ei, mei ni vei ane sou maido, ‘Amutou mongemonge pilu e eau! Eau pogesi a sipsip minau tasa i buale do!’  
\v 7 Eau vei le amutou, tomane moni a munongena ni palea buo sele lou na langi mane a bibi na sinusu tasa i sauvule a lilona. A munongena do ei vululusi sele a munongena ne sou a vanunua savulu ialasue timana ialasue sou bilesiosi me sou ma isa oto a pipigona mina sauvulena lilone sou. \fig Ei ni asu tilomuli a sipsip tasa i buale do mapigogoi ei ni poge (Luk 15:4)|alt="He goes after the lost sheep until he finds it." src="GR-lllf08n.tif" size="col" copy="© Global Recordings Network, globalrecordings.net." ref="15:4" \fig*   
\s1 Adetinovo mina vatu i buale  
\p
\v 8 “Ue mane a tavine tasa ei isa a vatu drakma\f + \fr 15:8 \ft Drakma ei a vatu tomane a denarii. Ieli a mapa na pipigona mina malada tasa na ilala do. \f* savulu tasa, me tasa i buale. Ei ni suli a lada mei kakalo a luma mei gemu iiti mapigogoi ei ni poge.  
\v 9 Ilala ei pogesi, ei ni toleale tamtamaina me sou so malu na aubu tasa, me ei ni vei le sou, ‘Amutou mongemonge pilu e eau! Eau pogesi a vatu i buale do!’  
\v 10 Tomane moni, eau vei le amutou, a munongena ni palea balivua ne sou a bineanea mine Salemo ilala bibi na sinusu tasa ei sauvule a lilona.”   
\s1 Adetinovo mina bibi ei isa a natuna lua  
\p
\v 11 Ei ade lou maido, “Bibi tasa ei isa a natuna bibi lua.  
\v 12 Me natuna bisiisii i vei le tamana maido, ‘Ouma, eau kale oo no soebule le eau pilu e tuagu a golugolu minio, minau oo no bilii e eau seidei.’ Io tamana ei soebule a golugolu vuso minei usino ne sulu.   
\p
\v 13 “I ma tabaa oto, natuna bisiisii i viepili a golugolu vuso minei, me ei asu usino na avena tasa i bulago. Me ei mapalipali a vatu minei mina toe mongemongena vovone ei.  
\v 14 Na ilala vatu minei vuso i pulu, a vitolona taula i palea na avena do. Me ei ma isa oto a golu tasa.  
\v 15 Maido me ei asu mei malu pilu a bibi tasa na avena do. Ma bibi edo i peltase ei usino na gona minei ni iteale a bolobolo.  
\v 16 Me ei kale ni guale a uliulina bin bolobolo sou ani mina mavonina tiane ei, moni a bibi tasa i ma bilii ete ei a golu tasa.   
\p
\v 17 “Seidolo a damutatalana bilesi i palea ne ei, me ei vei maido, ‘Vanunua na pipigona mine euma sou isa a gona inani makuba sele. Moni eau eili eau mate sele a vitolona.  
\v 18 Eau na ilisi me eau na veteliu usino ne euma. Me eau na vei lei maido, “Ouma, eau goli a sinusu usino ne Salemo me oo.  
\v 19 Seidei eau ma mapigogoi ete no tole eau e natumu. O toe eau tomane a bibi na pipigona tasa minio.”’  
\v 20 Io ei ilisi mei asu usino ne tamana.  
\p “Ilala ei saboa ino bulago, tamana i ite ei mei lilomuli sele ei. Me tamana i vele usino mei bingtole e natuna mei gamumi e ei.   
\p
\v 21 “Me natuna i vei lei maido, ‘Ouma, eau goli a sinusu usino ne Salemo me oo. Me eau ma mapigogoi ete no tole eau e natumu.’   
\p
\v 22 “Moni e tamana i vei ana vanunua na pipigona minei maido, ‘Amutou guale asi a malasana kinainai me mu malavelave e ei. Me mu tau a maomao tasa na uuna. Me mu makai a ubupolo na ubune ei.  
\v 23 Me mu guale a natuna bulmakau a aina tubu odo me mu valipute. Neitou aani me neitou mongemonge.  
\v 24 Vuna maido, natugu ieli ei matesi, moni ei mauli lou. Ei bualesi, moni eitou poge lei e ei.’ Io sou soke a inanina buo, me sou mongemonge. \fig Ei bualesi moni seidei eitou poge lei e ei (Luk 15:24)|alt="He was lost and is found." src="CN01761B.TIF" size="col" copy="© 1996 David C Cook. Used with permission." ref="15:24" \fig*   
\p
\v 25 “Na ilala do natuna matalagu ei ino na mauma. Ilala ei veteliu, me ei sibitala agavuale a luma, me ei longe a tinangi na ude ma tilialiana.  
\v 26 Io ei toleale a bibi na pipigona tasa, me ei tagi e ei maido, ‘Ieli a sava?’  
\v 27 Ma bibi na pipigona i vei lei maido, ‘Tasimu i veteliuosi, me tamamu i valipute a natuna bulmakau a aina tubu, vuna maido tamamu ei ite natuna ei veteliu me ei puiale moni.’   
\p
\v 28 “Natuna matalagu i longe a inade do, ei sinoa mei ma kale ete ni gali ulilo na luma. Io tamana ei asu usala me ei bilii e ei a inade doana.  
\v 29 Moni ei maliu a inade mine tamana maido, ‘Oite. Avala papai sele eau vovo tivula sele a gunolina pipigona minio. Me eau ma saukikiki ete a inademu. Moni oo ma bilii ete eau a natuna meme tasa ve eau mongemonge pilu e tamtamaigu. Boa.  
\v 30 Moni e natumu iede, ei mapalipaliosi a golugolu vuso minio pilu e sou a sualolona tavivine. Na ilala ei veteliu, o valipute a natuna bulmakau a aina tubu ane ei.’   
\p
\v 31 “Me tamana i vei lei maido, ‘Natugu, taliuliu o ugugu pilu e eau. Ma golugolu vuso minau ei minio.  
\v 32 Moni eitou neitou maimonge, ma lilone eitou ni kubaana, vuna maido tasimu ie ei matesi, moni ei mauli lou. Ei bualesi, moni eitou poge lei e ei.’”   
\c 16  
\s1 Adetinovo mina bibi na itealalena pagu  
\p
\v 1 Iesu ei vei le sou a disaipel minei maido, “Bibi na vuvutina tasa ei isa a bibi na itealalena luma minei. Ma vanua sanii sou ubi a inade ana bibi na itealalena ve ei mapalipali sabubi a golugolu minei.  
\v 2 Maido me a bibi buo ei vei le a bibi na itealalena maido, ‘A inade ieli eau longe a inigogomu iede i matina? Oo no ademuade a golugolu minau ino na limamu. Vuna o no ma mapigogoi ete no muimu lou a itealalena.’   
\p
\v 3 “Io bibi na itealalena do ei vei le ei oto maido, ‘Eau na goli a sava? Bibi buo ei kale ni taulele eau na pipigona mina itealalena. Eau ma sagali oto na pesi a magamaga. Mea maela na tagi e sou a vanua sanii ne sou bilii e eau a vatu ma golugolu.  
\v 4 Moni eau muada a sava eau na goli, ilala bibi buo ei taulele eau a pipigona mina itealalena, vanua ne sou guale eau usino na luma mine sou.’   
\p
\v 5 “Me ei toleale sou a vanunua tastasa sou isa a ginau na bibi buo minei, mei tagi a bibi tasa ei sibitala pala, ‘Oo gau visa mina bibi buo minau?’   
\p
\v 6 “Me ei vei, ‘Taogo na bulu na oliv savulu sobo tasa.’ Ma bibi na itealalena i vei lei, ‘Oo guale a laulau ieli sou niage a ginau minio i, mo ugu asi mo niage savulu lima.’   
\p
\v 7 “Ma bibi na itealalena ei vei ana bibi tasa sea, ‘Ginau minio visa?’ Me ei vei, ‘Bie na vit savulu sobo tasa.’ Ma bibi na niitealalena i vei le ei, ‘Oo guale a laulau sou niage a ginau minio ie, me oo niage savulu pantolu.’   
\p
\v 8 “Me mulimuli, ilala bibi buo ei pogevuti a golu bibi na niitealalena ei goli iodo, ei masalai a bibi na itealalena pagu odo, vuna maido ei goli a inigogona tomane a bibi ei isa a damutatalana. Vanunua sou ogomulimuli a inigogona mina magamaga ieli sou muada sele a matamatana vea mina gunolina pipigona mine sou, me sou vululusi a vanunua sou ogomuli a inigogona mina muada.  
\v 9 Me eau vei le amutou, a vatu vanunua sou guale a inigogona pagu, namutou maitamaina a vatu iedo. Me mulimuli, ilala a vatu iedo ei pulu, ne sou guale amutou usino na lumaluma namutou muine amutou taliuliu taliuliu.   
\p
\v 10 “Mane a bibi tasa ei iteale kube a golugolu banini, ei ni iteale kube iiti a golugolu buobuo tamai. Me a bibi ei ma goli bilesi ete a golugolu banini, ei ni ma goli bilesi ete a golugolu buobuo.  
\v 11 Maido me mane amutou ma iteale kube ete a vatu mina magamaga ie, sei ni bilii e amutou a pipigona niitealalena golugolu ivu?  
\v 12 Me mane amutou ma iteale kube ete a golugolu mina vanunua sanii, sei ni bilii e amutou a golugolu mine amutou oto?   
\p
\v 13 “Bibi na pipigona tasa boa i mapigogoi ni buloi na bibi buo lua pilu. Ei ni kale tasa me ei ni lilogegelu ane tasa. Ei ni longemuli e tasa me ei ni lametase tasa. Amutou ma mapigogoi ete namutou muina matano ne Salemo me na vatu tamai.”   
\s1 Iesu ei adepalea a binea ma niitealalena mine Salemo  
\p
\v 14 Sou e Parisi sou kalekale sele a vatu, maido ma ilala sou longe a inadenade vuso iodo, sou adepintola ane ei.  
\v 15 Me ei ade ane sou maido, “Amutou toebuebue amutou oto masae na laguna vanunua. Moni e Salemo ei muada a lilone amutou. Golu a vanunua sou damu ve ei a golu doana ivu, iede a golu pagu ivu na matane Salemo.   
\p
\v 16 “A binea pilu e sou a profet sou muina mapigogoi a ilala mine Ioanes. Moni soke na ilala ieli, sou veipale a niitealalena mine Salemo, me a vanunua vuso sou sagali sele a ginalina ulilo na niitealalena mine Salemo.   
\p
\v 17 “Langi pilu a magamaga ne sulu buale, moni a malibuuna inade baini tasa mina binea ni ma buale oto.   
\p
\v 18 “Mane a bibi ei iavetase susuna me ei tavui a tavine tasa lou, ei goli a sualolona, me mane a bibi ei tavui a tavine tasa, lisa suana i iavetase ei, ei tamai goli a sualolona.   
\s1 Mapamulina mina bibi na vuvutina pilu e Lasarus  
\p
\v 19 “Bibi na vuvutina tasa ino, me taliuliu ei kai a doanana kinainai kasososo, me na malada taliuliu ei aniani a gona inani i doadoa.  
\v 20-21 Me agavuale a tema na luma mina bibi na vuvutina do, a kapelabena bibi ei ngolo a muina. Aisana e Lasarus, vovona tuutuu me ei kale ni ani a gona inani i pu utano na poso na inani mina bibi na vuvutina do, ma busebuse sou asu maino me sou damedame a tuutuu minei.   
\p
\v 22 “Io kapelabena bibi ei mate, me sou a bineanea sou maasi e ei usino na madalone Abraham. Ma bibi na vuvutina tamai ei mate, me sou peilai e ei.  
\v 23 Ei ino muina na aubu na davutina taula. Ei gemu uata me ei ite Abraham muina bulago sele, me Lasarus ei ino ne madalone ei.  
\v 24 Io bibi na vuvutina ei tola me ei vei maido, ‘Ouma Abraham, oo lilomuli e eau mo vei le Lasarus ni vui a uuna na nanu mei ni asu usinani ni tau a uuna na tabelegu ni maigi sapa. Eau eili na oavi ie me eau lai a davutina buo sele.’   
\p
\v 25 “Moni e Abraham i vei, ‘Natugu, oo no damutale. Ilala oo mauli, oo guale a golugolu vuso doana minio. Me Lasarus ei guale a golugolu vuso pagu. Moni seidei na aubu ie lilone ei i doana. Me oo guale a davutina pagu buo.  
\v 26 Ma golu tasa lou. Balivua mine amiteu me amutou a malulu taula tasa ino, maido ma vanunua eili sou kale ne sou seuti a malulu me sou asu usino ne amutou, sou ma mapigogoi ete. Me sou a vanunua maino, sou ma mapigogoi ete ne sou seuti me sou asu usinani ne amiteu.’   
\p
\v 27 “Me a bibi na vuvutina ei vei maido, ‘Mane maido, ouma, eau tagi e oo, mapigogoi no peltase ei ni asu usino na luma mine euma.  
\v 28 Eau isa e tatasigu lima, me ei ni vei le sou. Dae ne sou tamai asu usinani na aubu ieli mina gualena davutina taula.’   
\p
\v 29 “Moni e Abraham ei vei, ‘Sou isa a inade mine Moses me sou a profet. Ne sou longe a inade ne sou.’   
\p
\v 30 “Me a bibi na vuvutina ei vei, ‘Boa, ouma Abraham, moni mane a bibi tasa ei matesi me ei ilisiliu, me ei asu usino ne sou, ne sou sauvule a lilone sou.’   
\p
\v 31 “Me Abraham ei vei lei maido, ‘Mane sou ma longemulimuli ete a inade mine Moses me sou a profet, ne sou tamai ma longemuli ete a inade na bibi tasa i ilisiliu na minate.’”   
\c 17  
\s1 Inigogona pagu i toegegeligeli a silimulina  
\r (Mat 18:6-7, 21:22; Mak 9:42)  
\p
\v 1 Iesu ei vei le sou a disaipel minei maido, “Matamatana tinovena pagupagu ei ni palea ni goli a vanunua ma tavivine sou bosa a sinusu. Moni mavaana buo ei ni palea le a bibi ei toe a golu sou odo ni palea.  
\v 2 Mane ei toe tasa mine sou e selebanini iodo ni bosa a sinusu, io puiale a vanunua ne sou pale a vatu bubuli tasa buo na loone ei me ne sou lange ei utano na dasi. \fig A vatu bubuli buo (Luk 17:2)|alt="millstone" src="LB00130B.TIF" size="col" copy="Louise Bass © The British & Foreign Bible Society, 1994." ref="17:2" \fig*   
\p
\v 3 “Tilale kube amutou oto. Mane tamaimu ei goli a sinusu, oo no ade ane ei ni toebilelesi. Mane ei sauvule a lilona, oo no lilotase a sinusu minei.  
\v 4 Me mane ei goli a sinusu usino minio mapigogoi padiluanai na malada tasa, ma padiluanai ei veteliu usino minio me ei vei, ‘Eau sauvulesi a lilogu,’ io oo no lilotase a sinusu minei.”   
\s1 Adetinovo mina vuana mastet  
\p
\v 5 Sou a aposel sou vei le Bibi Taula maido, “Oo no toe a silimulina mine amiteu ni palea buo lou.”   
\p
\v 6 Me Bibi Taula ei vei le sou maido, “Mane amutou isa a silimulina tomane a vuana mastet alabaini sele, amutou mapigogoi namutou vei ana obu odo, ‘O ilisi pilu a aamu mo asu magili ino na dasi,’ ma obu ni longemuli a inade mine amutou.   
\s1 Inigogona mina bibi na pipigona  
\p
\v 7 “Mane a bibi tasa mine amutou ei vei ana bibi na pipigona ni asu ni valipole a magamaga ue ni asu mei iteale a sipsip, io ilala bibi na pipigona do ei veteliu, nane a bibi buo minei ni vei lei, ‘O asu asi usinani mo ugu a aanina’?  
\v 8 Boa. Moni a bibi buo ei ni vei ana bibi na pipigona maido, ‘Oo masusulu a gona inani minau, me oo pale a malo mo buloi e eau mapigogoi eau aani mea inu, mulimuli oo no aani mo oinu.’  
\v 9 Me nane a bibi buo ei ni vate kubaana usino na bibi na pipigona na ilala bibi na pipigona ei ogomuli a inade minei? Boa.  
\v 10 Maido me amutou tamai, ilala amutou goliosi a golugolu vuso tomane ei vei le amutou, amutou namutou vei, ‘Amiteu a vanunua na pipigona sabubu moni. Amiteu goli a pipigona mine amiteu moni.’”   
\s1 Iesu i toekube a vanunua savulu tasa sou isa a sinobe a kolokolo  
\p
\v 11 Iesu i asu usino ne Ierusalem, me ei asu balivua na avena mine Samaria me Galili.  
\v 12 Ei gali ulilo na aubu tasa, ma vanunua savulu tasa sou isa a sinobe a kolokolo sou asu me sou poge ei. Moni sou magili bulago  
\v 13 me sou tola vauta maido, “Iesu, bibi buo, oo no lilomuli e amiteu.”   
\p
\v 14 Iesu i ite sou, me ei vei le sou maido, “Amutou asu me mu maite a vovone amutou usino ne sou a prist.” Sou asu usino, ma vovone sou i palea alaba lou.   
\p
\v 15 Ma bibi tasa mine sou ei ite a vovona ei palea doanasi, me ei veteliu. Ei tolatola mei beilange a aisane Salemo.  
\v 16 Me ei totopatulu me ei tapute a laguna utano na magamaga agavuale a ubune Iesu, me ei toledadangi e Iesu. Me a bibi iedo ei maino ne Samaria.   
\p
\v 17 Iesu i maliu a inade maido, “A vanunua savulu tasa sou ma palea alaba oto, io? Moni a vanunua ialasue sou ive?  
\v 18 Nane a bibi tasa maino na abuna sea ieli moni i veteliu mei beilange a aisane Salemo, io?”  
\v 19 Me ei vei ana bibi iodo maido, “Oo ilisi mo asu. Silimulina minio i toekube oo.”   
\s1 Natuna Bibi ei ni palea muada  
\r (Mat 24:23-28, 37-41)  
\p
\v 20 Sou e Parisi sou tagi e Iesu maido, “Sei ilala a niitealalena mine Salemo ni palea?” Me ei maliu a inade mine sou maido, “A niitealalena mine Salemo ei ni ma palea oto ne sou ite a matane sou.  
\v 21 Me sou ma mapigogoi ete ne sou vei, ‘Oite, ei eili ie,’ ue ‘Ei ino nado.’ Oite! Niitealalena mine Salemo ei eiliosi balivua ne amutou.”   
\p
\v 22 Me ei vei le sou a disaipel maido, “Mulimuli a ilala ni palea, me namutou kale sele a niitena malada tasa mine Natuna Bibi. Moni namutou ma ite ete.  
\v 23 Me ne sou vei le amutou maido, ‘Oite, ei eili ie,’ ue ‘Oite, ei ino do.’ Moni namutou ma ogomulimuli lei e sou.  
\v 24 Amutou muada, ilala Natuna Bibi ei sibitala ei ni goli moni maido, tomane a muada na sima, ei sima valautu na langi na avena mainani me usino na avena maino.  
\v 25 Moni palapala ei ni tabule a davutina makuba, ma vanunua na ilala seidei ne sou lametase ei.   
\p
\v 26 “Matana inigogona sou goli na ilala mine Noa, ne sou goli a matana inigogona tasa do na ilala Natuna Bibi ei asu usinani.  
\v 27 Sou aaniani me sou ininu, me sou taulailai, i asu mapigogoi a ilala Noa ei gali ulilo na kuta. A sali buo ei palea, me ei toegegeli a vanunua ma tavivine vuso.   
\p
\v 28 “Na ilala mine Lot tamai. Sou aaniani, me sou ininu, me sou olioli me sou masosove, me sou danidani me sou tigetige a luma.  
\v 29 Moni a ilala Lot ei ilisitase Sodom, a oavi pilu a vatu loiloi i pu muata na langi tomane a adavu, me ei toegegeli e sou a vanunua ma tavivine vuso.   
\p
\v 30 “Io matana inigogona tasa moni ei ni palea na malada Natuna Bibi ei sibitala muada.  
\v 31 Na malada do mane a bibi tasa ei ino oata na mapana luma, ma golugolu minei ei lilo na luma, ei ni ma sivosivo lou ni guale a golugolu minei. Tomane moni, a bibi ei ino na mauma, ei ni ma veteliuliu lou usino na luma minei.  
\v 32 Amutou damutale e susune Lot.  
\v 33 Mane a bibi tasa i kale ni lapitole obi a maulina minei oto, io maulina minei ni buale. Moni mane a bibi tasa i iabitase a maulina minei, maulina minei ni muina kuba.  
\v 34 Eau vei le amutou, na lodo ie bibi lua ne sulu ngolo na poso tasa, Salemo ni guale tasa ne sulu me tasa ni muina.  
\v 35-36 Ilala tavine lua ne su sauvuvule a vit, Salemo ni guale tasa ne sulu me tasa ni muina.”   
\p
\v 37 Sou a disaipel sou tagi e ei maido, “Bibi Taula, golu sou ieli ni palea iva?” Me Iesu ei vei le sou maido, “Na avena a aitola i tabuli i, na avena iedo a loaaulu sou viepilupilu.”   
\c 18  
\s1 Adetinovo mina buasu i nai sagali a bibi na nilongena vavasana ni buloi e ei  
\p
\v 1 Iesu ei bilii e sou a adetinovona tasa mina matetengine sou ne sou kaka taliuliu, me ne sou ma balebale lou.  
\v 2 Ei vei maido, “Na aubu buobuo tasa, a bibi na nilongena vavasana tasa ino. Bibi iedo ei ma laelae oto e Salemo, me ei ma damutatale ete sou a vanunua.  
\v 3 Ma buasu tasa, ei ino na aubu buobuo do. Ei asu usino na bibi na nilongena vavasana do me ei vei le ei, ‘Oo no vilemuli iiti a inade a bibi i butuale e eau.’   
\p
\v 4 “A bibi odo ei longetase moni a inade na buasu, moni mulimuli ei oto damutale maido, ‘Eau ma lae oto e Salemo me eau ma damutale vaute ete sou a vanunua.  
\v 5 Moni buasu odo ei biliilii a mavaana usinani ne eau, maido me eau na buloi e ei a vilemulialena vavasana minei, dae ei ni asu taliuliu usinani minau me eau na bale.’”   
\p
\v 6 Ma Bibi Taula ei ade lou maido, “Amutou longe a inade mina bibi na nilongena vavasana ieli ei pagu.  
\v 7 Sou a vanunua ma tavivine Salemo ei vilealesi minei oto, me sou tagitagi e ei na maladalada vuso me na lodo vuso, nane Salemo ni ma buloi ete sou, io? Nane ei magitalitali mei ni ma buloi asi ete sou, io? Boa vuso sele.  
\v 8 Eau vei le amutou, ei ni buloi asi sele sou. Moni na ilala Natuna Bibi ei asu usinani, ei ni ite a silimulina ne sou a vanunua ma tavivine mina magamaga ue boa?”   
\s1 Adetinovona mina bibi lua sulu kake Salemo  
\p
\v 9 Iesu ei bilii a adetinovona usino na vanua sanii sou damutale ve sou a bilesi na vanua, me sou ite sou a vanunua sanii tomane a vanunua sabubu.  
\v 10 “Bibi lua sulu asu usino na luma mine Salemo ne su kaka. Tasa do ei e Parisi me tasa ei a bibi na gualena takis.  
\v 11 Parisi odo ei magili me na lilone ei oto ei kaka maido, ‘Salemo, eau toledadangi e oo. Eau ma tomane ete sou a vanunua mina paaalina me sou a vanunua pagu me sou a vanunua mina sualolona, ue tomane a bibi mina gualena takis ie.  
\v 12 Na wik tastasa eau vavaevae eau a gona inani malua. Ma golugolu vuso eau guale, eau soebule a maduna savulu tasa me eau bilii e oo a maduna tasa.’   
\p
\v 13 “Moni a bibi na gualena takis ei magili bulago, moni ei ma gemu oto uata na langi. Ei labe a madalona mei vei, ‘Salemo, oo no dode eau, eau a bibi na sinusu.’”   
\p
\v 14 Me Iesu i vei, “Eau vei le amutou, na ilala bibi na gualena takis iedo ei veteliu usino na luma minei, ei palea a bilesina bibi na matane Salemo. Moni e Parisi iedo ei boa. Vuna maido, vanunua vuso sou beilange a aisane sou oto, Salemo ei ni taupui e sou utano. Ma vanunua vuso sou taupui e sou utano oto, Salemo ei ni beilange a aisane sou.” \fig Vanunua sou taupui e sou, Salemo ei ni beilange a aisa ne sou (Luk 18:10-14)|alt="Those who humble themselves will be exalted." src="GR-lllf05n.tif" size="col" copy="© Global Recordings Network, globalrecordings.net." ref="18:10-14" \fig*   
\s1 Iesu ei vei ne sou litase selebanini usino ne ei  
\r (Mat 19:13-15; Mak 10:13-16)  
\p
\v 15 Sou maasi sou e selebanini usinani ne Iesu. Sou kale ei ni tau a limane ei muata ne sou. Me sou a disaipel sou ite, sou sinoa ane sou.  
\v 16 Io Iesu i toleale selebanini vuso, mei vei le sou, “Amutou litase selebanini ne sou asuale eau. Amutou ma madetasetase lei e sou, vuna niitealalena mine Salemo i mine sou tomane selebanini ie.  
\v 17 Eau ade patotona sele ane amutou, mane a bibi tasa i ma guale ete a niitealalena mine Salemo tomane selebanini sou gualeale, ei ma mapigogoi ete ni gali ulilo. Boa vuso sele.”   
\s1 Munuganuga ei isa a golugolu makuba ei ade pilu e Iesu  
\r (Mat 19:16-30; Mak 10:17-31)  
\p
\v 18 Munuganuga tasa ei tagi e Iesu maido, “Magiligilina doana, eau na goli a sava me ea mapigogoi na guale a maulina taliuliu taliuliu?”   
\p
\v 19 Me Iesu ei vei lei maido, “Vuna matina oo tole eau a doana bibi? Salemo tasa moni ei doana.  
\v 20 Oo muadasi a inadenade mina binea, ‘Amutou ma goligoli lei a sualolona, ma valiputepute lei a vanua, ma paaaliali lou, ma vavasa sabububu lou, tade tamatamane amutou me tinatinane amutou.’\f + \fr 18:20 \ft Gualeliuna 20:12-16; Binea 5:16-20\f*”   
\p
\v 21 Ma munuganuga ei vei maido, “Ilala eau saboa bibaini i asu mapigogoi seidei, eau ogomulimuli a binea vuso de.”   
\p
\v 22 Iesu ei longe a inade do me ei vei maido, “Oo saboa boto a golu tasa. A golugolu vuso o isa i, oo no masosove me oo no bilii e sou kapelabe. Oo goli maido, o no isa a golugolu doana sele na langi. Me o ogomuli e eau.”   
\p
\v 23 Moni a munuganuga ei longe a inade do, ma lilona i mavaa sele, vuna ei isa a golu makuba sele.  
\v 24 Ei ite a munuganuga mei vei maido, “Ginali na vanunua sou isa a golu makuba ulilo na niitealalena mine Salemo ei sana sele.  
\v 25 Kamel ei kale ni gali ulilo na salu na sinaina, ei ma sana oto tomane a bibi na vuvutina ei gali ulilo na niitealalena mine Salemo.”   
\p
\v 26 Vanunua sou longe a inade do me sou vei maido, “Mane i maido, sei mapigogoi ni guale a maulina taliuliu?”   
\p
\v 27 Me Iesu ei vei, “Golu a bibi ei ma mapigogoi ete ni goli, iede Salemo ei mapigogoi ni goli.”   
\p
\v 28 Me Pita ei vei maido, “Oite! Amiteu ilisitasesi a golugolu vuso mine amiteu, me amiteu ogomuli e oo.”   
\p
\v 29 Me ei vei le sou maido, “Eau ade patotona ane amutou, bibi ei ilisitase a luma, ue tamana me tinana, ue tatasina, ue susuna, ue natatuna ana niitealalena mine Salemo,  
\v 30 ilala ei saboa eili na magamaga ie, Salemo ei ni bilii e ei a golugolu makuba sele, me na ilala ei ni palea mulimuli, Salemo ei ni bilii e ei a maulina i doana taliuliu taliuliu.”   
\s1 Matolunai Iesu ei vei ei ni mate me ei ilisiliu  
\r (Mat 20:17-19; Mak 10:32-34)  
\p
\v 31 Iesu i guale a disaipel savulu tasa timana lua me ei vei le sou maido, “Oite! Seidei neitou asu usino ne Ierusalem. Ma inadenade vuso lisa sou a profet sou niage e Natuna Bibi ni palea ivu.  
\v 32 Maido ne sou bilii e ei usino na limane sou a vanua mina abuna sea. Me ne sou adepintola ane ei me ne sou toegegeli ei me ne sou apisosoli e ei.  
\v 33 Me ne sou tibi e ei me ne sou valipute ei. Moni na malada tolunai ei ni ilisiliu.”   
\p
\v 34 Moni a disaipel sou ma muada oto a vuna inade do. Vuna inade do i ovu sele ne sou, me sou ma muada oto a inade ei vei.   
\s1 Iesu ei toekube a bibi tasa matana ego  
\r (Mat 20:29-34; Mak 10:46-52)  
\p
\v 35 Iesu ei sibitala agavuale a aubu e Ieriko, ma bibi tasa matana ego ei ugu na vea me ei kakake a vatu.  
\v 36 Ei longe a abuna vanunua ma tavivine buo sou asu asu maino, mei tagi e sou maido, “A sava de?”  
\v 37 Me sou vei le ei, “Iesu mine Nasaret ei maino asuasu.”   
\p
\v 38 Matana ego do ei tola maido, “Iesu, oo Natune Devit, oo lilomuli e eau.”   
\p
\v 39 Vanunua sou muga pala sou sinoa ane ei ni vale. Moni ei tola vauta sele lou maido, “Oo Natune Devit, oo lilomuli e eau.” \fig Ieus, oo Natune Devit, oo lilomuli e eau! (Luk 18:39)|alt="Jesus, Son of David,have mercy on me!" src="CN01739B.tif" size="col" copy="© 1996 David C Cook. Used with permission." ref="18:39" \fig*   
\p
\v 40 Me ei magili mei ade ane sou ne sou maasi a bibi edo usinani ne ei. Mata ego do ei asu agaviosi usinani, me Iesu ei tagi e ei maido,  
\v 41 “Oo kale eau na goli le oo a sava?” Me ei vei, “Bibi Taula, eau kale na gemu.”   
\p
\v 42 Me Iesu ei vei lei, “Matamu ei ni kuba. Silimulina minio ei toekube oo.”  
\v 43 Ma tabaa oto ei gemugemu, mei ogomuli e Iesu mei beilange a aisane Salemo. Ma vanunua ma tavivine vuso sou ite a golu odo sou tamai sou beilange a aisane Salemo.   
\c 19  
\s1 Iesu ei asu usino na luma mine Sakius  
\p
\v 1 De Iesu ei asu ulilo ne Ieriko, mei kale ni ogomuli a vea usino.  
\v 2 Bibi tasa ino na aubu buo odo, aisana e Sakius. Ei a munuganuga mine sou a vanua na gualena takis, mei isa a vatu makuba.  
\v 3 Ei kale ni ite Iesu ve ei e sei matana bibi. Moni a abuna vanunua ma tavivine taula ino, me ei ma mapigogoi ete ni ite Iesu, vuna ei boto.  
\v 4 Io, ei vele pala usino mei sae uata na obu a fik tasa ni ite ei, vuna Iesu ni polo na vea do.   
\p
\v 5 Io Iesu ei sibitala na avena dolo mei gemu uata, ei vei ane ei maido, “Sakius, o sivo asi utano. Seidei eau na muigu ino na luma minio.”  
\v 6 Maido me ei sivo asi utano mei mongemonge sele, me ei guale Iesu usino na luma minei.   
\p
\v 7 Ma vanunua vuso sou ite, me sou ade papai maido, “Ei asu ugu na luma mina bibi na sinusu.”   
\p
\v 8 Me Sakius i magili mei vei le Bibi Taula maido, “Bibi Taula, oo longe. Seidei eau na soebule a golugolu vuso minau na avena ni lua mea bilii a avena tasa usino ne sou a kapelabena vanunua. Me mane eau auala ana bibi tasa mea paaali a golu tasa minei, de eau na maliu usino ne ei maiva vululu lou.”   
\p
\v 9 Me Iesu ei vei ane ei maido, “Seidei a gualeliuna mine Salemo ei paleasi na luma ie, bibi tamai ieli ei e natune Abraham.  
\v 10 Natuna Bibi ei asu usinani mina tilomulina ma gualeliuna vanunua sou buale.” \fig Natuna Bibi ei asu usinani mina tilomulina ma gualeliuna vanunua sou buale (Luk 19:10)|alt="The Son of Man came to seek and to save the lost." src="CN01776B.TIF" size="col" copy="© 1996 David C Cook. Used with permission." ref="19:10" \fig*   
\s1 Adetinovo mina vanunua na pipigona savulu tasa sou guale a vatu  
\r (Mat 25:14-30)  
\p
\v 11 Ilala vanunua ma tavivine sou longelonge, ei bilii e sou a adetinovona tasa lou tamai, vuna maido ei sibitala agaviosi ne Ierusalem, me sou damu ve saga i a niitealalena mine Salemo ni palea muada.  
\v 12 Maido me ei vei maido, “Bibi buo tasa doana ei asu usino na aubu tasa bulago ne sou tau e ei ni palea a mapana. Me mulimuli ei ni veteliu.  
\v 13 Ei toleale a vanua na pipigona minei savulu tasa, me ei soebule a vatu silva tastasa\f + \fr 19:13 \ft Na inade Grik ieli a \ft \+it minas\+it* me \+it minas\+it* tasa ei a mapa na pipigona mina bibi tasa na game tolu na ilala do.\f* usino ne sou. Me ei vei le sou maido, ‘Amutou pipigo a vuvutina i mapigogoi a ilala eau na veteliu.’   
\p
\v 14 “Moni e sou minei oto na aubu odo sou lilogegelu ane ei. Maido ma ilala ei asuosi sou peltase a vanunua mina maasina inade. Ne sou vei maido, ‘Amiteu ma kale ete na bibi iede ni palea a mapana mine amiteu.’   
\p
\v 15 “Moni sou tau e ei i palea a mapana, me mulimuli ei veteliu. Ei veteliuosi, de ei vei maido, ‘Toleale a vanunua na pipigona lisa eau bilii e sou a vatu odo. Eau kale na muada, vatu visa lou sou vuso tastasa guale lei muata na vatu eau bilii e sou.’   
\p
\v 16 “Io bibi tasa i muga pala, me ei vei, ‘Bibi taula, a vatu minio do eau pipigo a vuvutina i me eau guale a vatu savulu tasa lou muata ne ei.’  
\v 17 Me ei vei lei maido, ‘Oo a bibi na pipigona doana. Oo iteale kube a golu iedo ei alabaini sele, maidolo me oo no guale na sagalina mina niitealena aubu savulu tasa.’   
\p
\v 18 “De maluana bibi na pipigona ei asu maino, me ei vei, ‘A vatu minio iodo, bibi taula, eau guale a vatu lima lou.’  
\v 19 Ei vei le ei, ‘Oo no iteale aubu lima.’  
\v 20 Me a bibi na pipigona tasa lou i asu maino, me ei vei, ‘Bibi taula, oite! Vatu minio eili ie. Eau palesobe i a malo baini tasa.  
\v 21 Vuna maido, eau lae oo, oo a lilotivulana bibi, o guale a golu o ma tau ete, me o guale a gona inani o ma dani ete.’   
\p
\v 22 “Ei vei ana bibi na pipigona dolo maido, ‘Oo a bibi na pipigona pagu sele! Na inade minio oto eau na vavasa ane oo. Oo muadasi i maido, eau a lilotivulana bibi, me eau gualeale a golugolu eau ma tau ete me eau guale a gona inani eau ma dani ete.  
\v 23 De posa matina oo ma tau ete a vatu minau na luma na tinaunau na vatu, maido me na ilala eau veteliu eau mapigogoi na guale a vatu ieli pilu a gegena sanii lou?’  
\v 24 Me ei vei ana vanunua sou magili agavi, ‘Mu guale a vatu minei iede, me mu bilii a bibi ei isa a vatu savulu tasa lou.’  
\v 25 Me sou vei lei maido, ‘Bibi taula, ei isasi i a savulu tasa lou.’   
\p
\v 26 “‘Eau vei le amutou, vanunua vuso sou isa a golu sanii, eau na bilii i sanii lou. Moni mane a bibi tasa ei ma isa oto a golugolu, de golu banini ei isa i, ede eau na taulele ne ei.  
\v 27 Moni a vanunua sou butuale eau odo, sou ma kale ete eau na ugu a mapana mine sou, amutou guale sou usinani na, me mu valiputemate sou na matane eau.’”   
\p
\v 28 Iesu ei veiosi, me ei soke a inasu uata usino ne Ierusalem.   
\s1 Iesu ei gali ulilo ne Ierusalem tomane a mapana  
\r (Mat 21:1-11; Mak 11:1-11; Ioa 12:12-19)  
\p
\v 29 Iesu i sibitala agavuale a aubu e Betpage me Betani, na loena sou vate e Oliv, me ei peltase a disaipel lua,  
\v 30 me ei vei le sulu maido, “Amulu asu usino na aubu tasa maino, me namu ite a donki tasa sou paletole. Bibi tasa i saboa ugu ne ei. Lube a mota me mu maasi a donki usinani na.  
\v 31 Mane a bibi tasa i tagi e amulu maido, ‘Vuna matina amu lubetase a donki iede?’ De ne amulu maliu maido, ‘Bibi Taula ei isa a pipigona i.’”   
\p
\v 32 Iesu i peltase sulu usino, su ite a golugolu vuso ino tomane Iesu ei vei le sulu odo.  
\v 33 Sulu lubelube a mota mina donki iodo, me a tamatamana donki sou tagi e sulu maido, “Vuna matina amulu lubetatase a donki iede?”  
\v 34 Me sulu vei, “Bibi Taula ei isa a pipigona i.”   
\p
\v 35 Io sulu langetase a donki usinani ne Iesu. Me su tau a kinainai mine sulu muata na donki, me sou maugi e Iesu muata na donki.  
\v 36 Ilala ei asu, vanunua ma tavivine sou kaitase a kinainai mine sou me sou oave na vea.  
\v 37 Ma ilala ei asu agavualesi a vea i pantase a loena Oliv, a abuna disaipel taula sou soke a munongena. Me sou tola sagali, me sou beilange a aisane Salemo, vuna sou ite a gona sinaga vuso ei goliosi.  
\v 38 Sou tola maido, “Maibalave a mapana ieli i asu usinani na aisane Bibi Taula. Lilomeana ei ni ino na langi ma aisa buo mine Salemo ni oata oto sele.”\f + \fr 19:38 \ft Laulau na Inala 118:25-26, 148:1\f*   
\p
\v 39 Me Parisi sanii lilo na abuna vanunua do, sou vei le Iesu maido, “Magiligilina, oo madetase sou a disaipel minio a tinolana.”  
\v 40 Me ei maliu a inade maido, “Eau vei le amutou, mane sou ma tola oto, a vatuvatu ne sou tola.”   
\s1 Iesu ei tangisobe e Ierusalem  
\p
\v 41 Ma ilala Iesu i sibitala agavi, me ei ite a aubu buobuo, me ei tangisobe.  
\v 42 Ei vei maido, “Ierusalem, seidei na malada ieli oto eau kale oo no muada a golugolu i mapigogoi ni toe oo no kuba moni a muimu. Moni a golugolu sou odo ino ovu, me oo ma mapigogoi ete no ite.  
\v 43 Oo longe. Mulimuli a ilala tasa ni palea, me sou a butu minio ne sou taupilipili a magamaga i saiili a bigomu taula minio, me ne sou bigomusobe sele oo na avena vuso.  
\v 44 Me ne sou valipopole oo utano na magamaga pilu e natatumu lilo na bigomu minio. Me ne sou ma litase ete a vatu tasa i tabuli muata na vatu tasa sea, vuna maido oo ma muada oto a ilala Salemo i asuosi usinani na buloi ne oo.”   
\s1 Iesu i peltaselele a vanunua sou pipigo vuvutina lilo na luma mine Salemo  
\r (Mat 21:12-17; Mak 11:15-19; Ioa 2:13-22)  
\p
\v 45 Ilala Iesu ei gali ulilo na luma mine Salemo, ei soke a voteleletasena vanunua sou goligoli a pipigo na masosovena.  
\v 46 Ei vei le sou maido, “Laulau mine Salemo i vei maido, ‘Luma minau ei ni muina a luma mina kinaka.’\f + \fr 19:46 \ft Aisaia 56:7\f* Moni e amutou toe i a muina unovu mina vanunua na paaalina.”\f + \fr 19:46 \ft Ieremaia 7:11\f*   
\p
\v 47 Me na malada vuso ei matetengitengi a vanunua lilo na luma mine Salemo. Ma munugana prist, ma vanua na muadana binea, ma munuganuga na vanunua ma tavivine, sou tilo a vea mina valiputene ei.  
\v 48 Moni sou ma poge ete a vea tasa mina valiputene ei, vuna vanunua ma tavivine vuso sou sagali mamau sele a nilongena inade minei.   
\c 20  
\s1 Sou tagi e Iesu sei bilii e ei a sagagalina  
\r (Mat 21:23-27; Mak 11:27-33)  
\p
\v 1 Malada tasa Iesu i matetengi a vanunua ma tavivine lilo na luma mine Salemo, mei veipale a malongolongona kubaana. Ma munugana prist ma vanua na muadana binea pilu e sou a vanua buobuo sou asuale ei.  
\v 2 Me sou vei lei maido, “Oo vei le amiteu, oo guale a sagagalina iva me oo goli a golugolu sou ie? Me sei bilii e oo a sagagalina iede?”   
\p
\v 3 Me ei maliu a inade mine sou maido, “Eau tamai eau na tagi e amutou a golu tasa. Amutou vei le eau,  
\v 4 a maavuvutuna mine Ioanes, ei a golu mina aubu na langi, ue ei a golu mina vanunua moni?”   
\p
\v 5 Io sou maiademuli i balivua ne sou oto maido, “Mane eitou vei, ‘Ei a golu mina langi,’ ei ni vei, ‘Posa matina amutou ma silimuli ete ei?’  
\v 6 Me mane eitou vei, ‘Ei a golu mina vanunua moni,’ io vanunua vuso ne sou ubi e eitou a vatu, vuna maido sou silimuli sagali maido Ioanes ei a profet.”   
\p
\v 7 De, sou vei lei maido, “Amiteu ma muada oto sei bilii e ei sagagalina ie.”   
\p
\v 8 Me Iesu ei vei le sou maido, “Eau tamai eau na ma vei ete le amutou sei sagagalina eau goli a pipigona ie.”   
\s1 Adetinovona mina vanunua pagupagu sou iteale a mauma na vain  
\r (Mat 21:33-46; Mak 12:1-12)  
\p
\v 9 Iesu ei soke a adetinovona tasa lou usino ne sou a vanunua ma tavivine maido, “Bibi tasa i dani a mauma na vain. Me ei tau a mauma na vain iedo na vanunua sanii ne sou pipigo i. Me ei asu malu tabaa na aubu tasa i bulago.  
\v 10 De na ilala obuobu a vain sou vua, ei peltase a bibi na pipigona tasa usino na vanunua sou pipigo na mauma na vain. Ei kale ne sou bilii e ei a vuana sanii. Moni a vanunua sou pipigo na mauma na vain iedo sou valibili ei, me sou peltase sabubi liu e ei usino.  
\v 11 Me tamana mauma i peltase a bibi na pipigona tasa lou usino ne sou. Moni sou valibili tamai ei, me sou toemaele ei me sou peltase sabubi lei e ei.  
\v 12 Io ei peltase a bibi na pipigona matolunai usino. Moni sou toegegeli sele ei tamai, me sou peltase sabubi lei ei usala.   
\p
\v 13 “Maido me tamana mauma i vei, ‘Eau na goli a sava? Eau na peltase natugu a bibi, ede eau kale mamai sele. Nane mapigogoi ne sou longemuli ei.’   
\p
\v 14 “Moni a vanunua sou pipigo na mauma sou ite natuna, me sou maiademuli i balivua ne sou oto maido, ‘Bibi ieli ei ni guale a golugolu vuso mine tamana. Eitou valipute ei, me eitou oto neitou lapitole a golugolu vuso minei.’  
\v 15 Maidolo me sou lapualelele ei malilo na mauma usalasi, me sou valiputemate ei.  
\p “De tamana mauma mina vain ni toematine a vanunua do?  
\v 16 Ei ni asu maino mei ni toegegeli a vanunua sou pipigo na mauma iedo. Me ei ni bilii a mauma na vain iedo na vanunua sanii sea.” Vanunua sou longe a inade do, sou vei, “Ei ni ma palea oto maido.”   
\p
\v 17 Moni e Iesu i gemuale sou, mei vei, “Io, vuna matina sou niage a inade tasa na Laulau mine Salemo maido,  
\q1 ‘Vatu iedolo a vanunua na tinigena luma sou pitaselele,  
\q2 i palea a munugana vatu mina toesagalina inapu na luma’\f + \fr 20:17 \ft Laulau na Inala 118:22\f*?   
\m
\v 18 Vanunua vuso sou bosa muata na vatu odo, ne sou maloloto vuso. Mane a vatu odo ei pu muata na bibi tasa, vatu ni toegegeli vuse ei.”   
\p
\v 19 Sou a vanua na muadana binea me sou a prist sou muada i Iesu ei ubi a adetinovo iedolo usino ne sou. Maido me sou kale ne sou saavi e ei. Moni sou lae a vanunua ma tavivine, maido me na ilala iedo sou ilisi bula moni.   
\s1 Ne sou bilii a takis usino ne Sisar, ue boa?  
\r (Mat 22:15-22; Mak 12:13-17)  
\p
\v 20 Io sou a prist me sou a vanua na muadana binea sou ulage kukube Iesu. Me sou peltase a vanunua sanii ne sou usino mina itepaaaline ei. Sou a vanunua do sou ioto ve sou kale sele ne sou longe a inade minei. Sou kale ne sou masulitase ei ni goli a inade tasa i mapigogoi ne sou vavasa i ane ei, me ne sou tau e ei na limana munuganuga mina niitealena avena buo, me ei ni vavasa ane Iesu.  
\v 21 Sou tagi e ei maido, “Magiligilina, amiteu muada, o matetengitengi a vanunua a inade ivu, me oo goligoli a matana inade tasa moni usino na vanunua vuso, ivu sou so isa a aisa ue sou so ma isa oto a aisa. Na inade i patotona moni oo matetengitengi e sou a vanunua ma tavivine a inigogona mine Salemo.  
\v 22 De, o damutale matina? Neitou bilii a takis usino ne Sisar ue boa?”   
\p
\v 23 Moni Iesu i muadasi i a niioto sou goli iodo, maido me ei vei le sou,  
\v 24 “Maite e eau a vatu tasa. Nunu ma aisa ieli na vatu, ei mine sei?” Me sou vei, “Mine Sisar.”   
\p
\v 25 Me ei vei le sou maido, “Maido me golu mine Sisar, mu bilii e Sisar, ma golu mine Salemo, mu bilii e Salemo.”   
\p
\v 26 Maidolo me sou ma mapigogoi ete ne sou masulitase ei na inade tasa ei goli na matane sou a vanunua. Sou saga mamau sele a inade ei maliu le sou, me sou ma ade oto.   
\s1 Sou e Sadusi sou tagi e Iesu a ilisiliuna  
\r (Mat 22:23-33; Mak 12:18-27)  
\p
\v 27 Vanunua sanii mine Sadusi, sou veivei a ilisiliuna i boa, sou asuale Iesu.  
\v 28 Me sou tagi e ei maido, “Magiligilina, Moses ei niage a inade tasa ane eitou maido, mane a bibi tasa i taulai, me mulimuli ei mate me ei ma isa oto a natuna, de tasina ei ni guale susuna bibi iedo me ei ni natua, me a abuna mine tuana ni ma pulu oto.  
\v 29 De tametatasi padilua sou ino. Matalagu i tavui a tavine, me ei mate, me ei ma isa oto a natuna tasa.  
\v 30 Io maluanai ei tavui a tavine do,  
\v 31 me mulimuli tasina matolunai tavui ei. Tametatasi padilua vuso ieli, moni sou ma isa oto a bibaini tasa, me sou mate.  
\v 32 Me mulimuli tavine dolo tamai ei mate.  
\v 33 De mulimuli, ilala na ilisiliuna mina minate, tavine do ei ni e susune sei bilesi? Vuna tametatasi padilua sou tavui ei.”   
\p
\v 34 De Iesu ei vei le sou maido, “Vanunua ma tavivine mina ilala seidei ieli sou taulailai.  
\v 35 Moni a vanunua ma tavivine Salemo i vei mapigogoi ne sou ilisiliu lou mina minate, sou ma mapigogoi etesi ne sou taulai,  
\v 36 vuna maido sou ma mapigogoi etesi ne sou mate. Ne sou palea tomane a bineanea mine Salemo. Salemo i mailisiosi e sou na minate, maido me ne sou muine sou a natatune ei.  
\v 37 Moni Moses tamai ei maite eitou maido sou a vanunua sou matesi, sou ilisiliu na minate. Na mapamulina na obu baini ei lulu aani odo, ei vei maido, Bibi Taula, e Salemo mine Abraham me Aisak me mine Iekop.\f + \fr 20:37 \ft Gualeliuna 3:6\f*  
\v 38 Salemo ei ma Salemo oto mina vanunua sou matesi. Boa. Ei e Salemo mina vanunua ino sou mauli. Na matane ei vanunua ma tavivine vuso sou eili ie sou mauli.”   
\p
\v 39 Vanua na muadana binea sanii sou longe Iesu ei goli a inade iedo, me sou vei maido, “Magiligilina, inade minio ei patotona.”  
\v 40 Me sou lae a tinagine Iesu a golu tasa lou.   
\s1 Iesu i tagi e sou a vanunua ma tavivine a bibi Salemo i matoale  
\r (Mat 22:41-46; Mak 12:35-37)  
\p
\v 41 Io Iesu i tagi e sou a vanunua ma tavivine maido, “Posa matina sou veivei e Krais, ei e natune Devit?  
\v 42 Na Laulau na Inala, Devit oto i vei maido,  
\q1 “‘Bibi Taula i vei ane Bibi Taula minau maido,  
\q2 “O ugu na limagu e gata   
\q1
\v 43 mapigogoi eau tau e sou a butu minio matano ne oo.’\f + \fr 20:43 \ft Laulau na Inala 110:1\f*   
\m
\v 44 “Maido me, Devit oto i tole a bibi iedo Bibi Taula minei. De posa matina a bibi iedo ei e natune Devit?”   
\s1 Sou a vanua na muadana binea sou goligoli a inigogona pagu  
\r (Mat 23:1-36; Mak 12:38-40; Luk 11:37-54)  
\p
\v 45 Na ilala a vanunua ma tavivine vuso sou longelonge, Iesu ei vei le sou a disaipel minei maido,  
\v 46 “Amutou tilale amutou e sou a vanua na muadana binea. Sou kale mamaimai ne sou kai a kinainai lagolago, me sou asu maisabasaba, me sou kale mamaimai a vanunua ma tavivine ne sou vei oaso doana usino ne sou na muina viepiluna. Me sou kale mamaimai ne sou guale a munugana niugugu na luma mina viepiluna ne sou, me sou kale sele ne sou guale a munugana poso na niugu mina aanina buo.  
\v 47 Sou iotetatase sou a buasu mina paaalina golugolu mine sou, me sou aualala a gunolina kinaka i lago. Na ilala mina vavasana ne sou guale a mavaana buo mamau sele.”   
\c 21  
\s1 Buasu tasa ei bilii a niabi usino ne Salemo  
\r (Mak 12:41-44)  
\p
\v 1 Iesu i gemugemu, mei ite a vanunua na vuvutina sou asu maino, sou lange a vatu mine sou na taogo na vatu.  
\v 2 Mei ite a buasu tasa i kapelabe sele, ei lange a vatu banini lua na taogo do.  
\v 3 Me ei vei, “Eau vei ivu sele le amutou, buasu ieli, ei oabi a vatu i buo mamau sele ane sou a vanunua vuso sou oabi ie.  
\v 4 A vanunua ma tavivine vuso ieli sou isa a vatu makuba, me sou lange a avena moni usino na taogo. Moni a buasu ieli ei boto sele, moni ei lange a vatu vuso mina unolina gona inani minei.” \fig A kapelabena buasu ei lange a vatu makuba lou ane sou sanii (Luk 21:4)|alt="This poor widow has put in more than all the others." src="MK1241-4.TIF" size="col" copy="© Global Recordings Network, globalrecordings.net." ref="21:4" \fig*   
\s1 Iesu ei vei a luma mine Salemo ni mamau  
\r (Mat 24:1-2; Mak 13:1-2)  
\p
\v 5 Disaipel minei sanii sou masalai a luma mine Salemo, “Sou malolome iiti sele a luma ie a vatuvatu doadoana ma matamatana niabi doana.” Me Iesu i vei,  
\v 6 “A golugolu amutou ite ie, ilala ni palea, ma vatu tasa ei ni ma tabuli oto muata na vatu sea. Ne sou valipopole vuse me sou lange sou utano.”   
\s1 Iesu ei vei a mavaana papaina ni palea  
\r (Mat 24:3-14; Mak 13:3-13)  
\p
\v 7 Sou a disaipel sou tagi e Iesu maido, “Magiligilina, maido me sei ilala a golugolu sou odo ni palea? Sei matailala ni palea pala na ilala a golugolu sou odo i agaviosi ni palea?”   
\p
\v 8 Me ei vei, “Amutou tilale, dae ne sou auala ane amutou. Vuna maido, vanunua makuba ne sou asu usinani a aisagu me sou vei, ‘Eau moni eau a bibi iedo.’ ‘Ilala i agavigaviosi ni palea.’ Amutou ma asuasu lou a ogomuline sou.  
\v 9 Ma ilala amutou longe a maubina taula, amutou ma laelae lou. Golugolu sou odo ei ni palea pala, moni a punuluna malada ni ma sibitala asi oto.”   
\p
\v 10 Me ei vei lou ane sou maido, “Sou a vanunua mina abuna sanii ne sou mailisi a maubina ane sou a vanunua mina abuabuna sea. Me sou a abuna mina mapana sanii ne sou mailisi a maubina ana abuabuna mine sou a mapana sea.  
\v 11 Malugulugu buobuo me a vitolona taula ma sinobe buo ni palea na magamaga tastasa. Ma matamatana golu mina toenilaena ma matailala talala ni palea na langi.   
\p
\v 12 “Moni na ilala golugolu vuso iedo ei saboa palea, ne sou saavi e amutou me sou toegegeli e amutou. Mina aisagu ne sou tau e amutou lilo na luma na kinaka mine sou e Iuda me na luma na tunuui. Me ne sou maasi e amutou usino na lagune sou a mapamapana me sou a vanua na niitealalena aveavena.  
\v 13 Me ieli a vea doana tasa ne amutou veipale a malongolongona kubaana usino ne sou.  
\v 14 Maidolo me amutou ma masusulu lou pala i ne sei matana inade ne amutou maliu usino ne sou,  
\v 15 vuna maido eau oto na tau a inade na asene amutou, me eau na bilii e amutou a muadana doa. Ma abuna vuso sou kale ne sou vavasa ane amutou, moni ne sou ma mapigogoi ete ne sou saukiki ue sou taupui e amutou.  
\v 16 Sou tamatamane amutou me tinatinane amutou me sou tatasine amutou me sou a daladala tasa me sou tamtamaine amutou, ne sou bilii e amutou na limane sou a butu me ne sou valipute sanii mine amutou.  
\v 17 Ma vanunua vuso ne sou lilogegelu sele ane amutou, vuna moni a aisagu.  
\v 18 Moni a aivune amutou tasa na letene amutou i ma mapigogoi ete ni buale.  
\v 19 Namutou magili sagali, me ne amutou guale a maulina.   
\s1 Iesu ei vei ne Ierusalem ni mamau  
\r (Mat 24:15-21; Mak 13:14-19)  
\p
\v 20 “Ilala amutou ite a vanunua na maubina sou asu usinani me sou magili saiili e Ierusalem, ne amutou muada, ilala mina aubu buobuo ie ni mamau i agaviosi.  
\v 21 Na ilala do vanunua ma tavivine ino na avena mine Iudia ne sou oava usino na loeloena. Ma vanunua ino lilo ne Ierusalem ne sou ilisitase a aubu ie. Ma vanunua ino sala na aubu buobuo ne sou ma asuasu lou ulilo na aubu buobuo do.  
\v 22 Ilala iedo ei a ilala mine Salemo ni maliu a inigogona pagu, maido ma inade vuso ino na Laulau mine Salemo, ei ni palea ivu.  
\v 23 Maule sou a tavivine sou tiana ma tavivine sou masususi a mongomongo, vuna maido ilala do a mavaana buo sele ni palea na magamaga ieli, ma lilotivulana mine Salemo ni tabuli muata na abuna vanunua ma tavivine sou odo.  
\v 24 Sou a butu ne sou asu usinani me ne sou valipute sou. Me ne sou maasi e sou usino ne sou ugu na luma na tunuui na aubu buo vuso na magamaga. Ma vanunua mina abuna sea, ne sou soetotole Ierusalem i mapigogoi na ilala Salemo i matoale e sou a abuna vanua sea ne sou iteale Ierusalem ni pulu.   
\s1 Mulimuli e Natuna Bibi ni asu usinani  
\p
\v 25 “Na ilala do matamatana matailala ni palea na oaso, me na game me ne sou a mataidoido. Me na magamaga a abuna vanua vuso ne sou damutala papai me ne sou mamau sele, vuna ne sou longe a tagumuna buo i pusi na dasi.  
\v 26 Na ilala a vanunua sou damutatale a golugolu ni palea na magamaga, ne sou bosa a nilaena, vuna a golugolu sagali mina langi ni vuvule.  
\v 27 Me na ilala dolo vanunua ma tavivine ne sou ite e Natuna Bibi ino na ausa ni asu usinani pilu a sagagalina ma muada buo minei.  
\v 28 Ilala golugolu sou odo i sokesi ni palea, de namutou magili me mu beilange a letene amutou, vuna maido ilala mine Salemo i gualeliu e amutou i agaviosi.”   
\s1 Ne amutou guale a muadana na obu a fik  
\r (Mat 24:32-35; Mak 13:28-31)  
\p
\v 29 Ei vei le sou a adetinovona tasa. “Amutou gemuale a obu a fik ma obu sanii sea tamai.  
\v 30 Ilala amutou ite a laulau sou aputa alaba, de amutou muada, ilala mina oaso doana ei ni palea sie.  
\v 31 Tomane moni, ilala amutou ite a golugolu sou odo i palea, namutou muada a niitealalena mine Salemo i agaviosi.   
\p
\v 32 “Eau vei ivu sele le amutou, vanunua ma tavivine mina ilala ieli saboa sou mate, golugolu vuso do ne sou palea.  
\v 33 Langi pilu a magamaga ni buale, moni a inade minau ei ni ma buale oto.   
\s1 Disaipel ne sou tilale kube sou  
\p
\v 34 “Moni amutou tilale, dae ne amutou inu maisaba taliuliu me amutou matalilili me amutou damutale mamai a golugolu mina vovo. Na malada mine Bibi Taula do ni palea asi sele ne amutou tomane sou oso na vuo.  
\v 35 Vuna maido, malada iedo ni palea na vanunua ma tavivine vuso na avena vuso mina magamaga.  
\v 36 Ne amutou ulago kube e amutou me namutou kaka taliuliu ne amutou mapigogoi asuleletase a golu vuso do me ne amutou magili na matane Natuna Bibi.”   
\p
\v 37 Malada vuso Iesu i matetengitengi a vanunua ma tavivine na luma mine Salemo, me na lodo ei asu na loena dolo sou tole e Oliv mei manoa nado.  
\v 38 Ma vanunua ma tavivine vuso sou ilisi na autupola sele, me sou asuasu usino na luma mine Salemo mina nilongena inade minei.   
\c 22  
\s1 Iudas ei adegatuna ni bilii e Iesu na limane sou a vanua buobuo  
\r (Mat 26:1-5, 14-16; Mak 14:1-2, 10-11; Ioa 11:45-53)  
\p
\v 1 Malada Buo mina ulalu a is boa,\f + \fr 22:1 \ft Gualeliuna 12:15-20\f* iede sou tole a Malada na Asuleletasena,\f + \fr 22:1 \ft Gualeliuna 12:13, 21-28\f* ei agaviosi ni palea.  
\v 2 Ma munugana prist ma vanua na muadana binea, sou tilotilo a vea tasa ne sou valipute Iesu, vuna maido sou lae a vanunua ma tavivine.   
\p
\v 3 Me Satan ei gali ulilo ne Iudas, sou tole ei e Iskariot, ei e tasa mine sou a disaipel savulu tasa timana lua.  
\v 4 Me ei asu ade pilu a munugana prist ma munuganuga na ulagena luma mine Salemo. Ei kale ni tilo a vea tasa ni bilii e Iesu na limane sou.  
\v 5 Sou a vanunua do sou mongemonge, me sou longo ane Iudas ne sou bilii e ei a vatu sanii.  
\v 6 Me Iudas ei longo a inade ne sou, me ei tilotilo a vea tasa ni tau e Iesu na limane sou na ilala tasa sou a abuna vanunua ma tavivine buo sou ma ugu pilu oto e Iesu.   
\s1 Disaipel lua su masusulu a gona inani mina Malada na Asuleletasena  
\r (Mat 26:17-25; Mak 14:12-21; Ioa 13:21-30)  
\p
\v 7 Malada buo mina ulalu a is boa ei palea. Na malada do ne sou mapigogoi valipute a natuna sipsip na Malada na Asuleletasena.  
\v 8 Maido me Iesu ei peltase Pita me Ioanes, me ei vei le sulu maido, “Amulu asu mu masusulu a gona inani mine eitou na malada buo.”   
\p
\v 9 Me su tagi e ei, “Oo kale ne amilu asu me nami masusulu iva?”   
\p
\v 10 Me ei vei le sulu maido, “Amulu asu ulilo na aubu buobuo, me amulu ni poge a bibi tasa ei tabulebule a taogo na nanu buo na vea. Amulu ogomuli e ei ulilo mina luma ei gali ulilo iodo.  
\v 11 Me ne amulu vei le tamana luma do maido, ‘Bibi na matetengina ei tagi e oo, “Vilo ive ne eau pilu a disaipel minau namiteu ani a gona inani mina Malada na Asuleletasena?”’  
\v 12 Me ei ni maite e amulu a vilo tasa buo oata i isa a poso, niugugu ue sei golu lou. Amulu masusulu na vilo do.”   
\p
\v 13 Io su asu, me su poge a golugolu vuso ino tomane ei i vei le sulu. Me su masusulu a gona inani.   
\s1 Iesu ei bilii e sou a disaipel a ulalu ma vain  
\r (Mat 26:26-30; Mak 14:22-26; 1Ko 11:23-25)  
\p
\v 14 Ilala mina inani ei paleasi, me Iesu ei ugu, me sou a aposel sou pilu e ei.  
\v 15 Me ei vei le sou maido, “Eau kale sele na aani pilu e amutou na Malada na Asuleletasena, mulimuli eau na tabule a davutina.  
\v 16 Maido me eau vei le amutou, eau na ma ani ete lei a inani ieli mapigogoi na ilala a golu ieli ei palea ivu mina niitealalena mine Salemo.”   
\p
\v 17 Me ei guale a taogo na vain tasa mei toledadangi e Salemo mei vei, “Amutou guale ielili me mu soebule balivua ne amutou.  
\v 18 Eau vei le amutou, seidei me mulimuli tamai eau na ma ini ete a vain lou, mapigogoi na ilala a niitealalena mine Salemo ni palea.”   
\p
\v 19 Me ei guale a ulalu tasa me ei toledadangi me ei lee mei bilii e sou a disaipel. Me ei vei, “Ielili ei a mainigu, eau bilii e amutou. Amutou ne mu goli maido mina damutalene eau.”   
\p
\v 20 Ilala sou aani pulosi, ei guale a taogo na vain mei goli a inigogona tasa moni. Me ei vei maido, “Taogo na vain ielili ei a magilipiluna alaba eau goli a dalagu, iede eau singi ane amutou.  
\v 21 Moni mu ite, limane a bibi ei kale ni tau eau mina limane sou a butu odo, ei eili pilu e eau na poso ie.  
\v 22 Natuna Bibi ei ni ogomuli a vea ieli lisa e Salemo ei tauosi minei. Moni maule a bibi iedo ei usabutu ne eau.”  
\v 23 Disaipel sou soke a tinagu lilo ne sou oto maido, “Sei ni goli a inigogona maido?”   
\s1 Disaipel sou maisaukiki a inade ve sei ni muga  
\p
\v 24 A disaipel sou tamai sou maisaukiki a inade e sei ni muge sou.  
\v 25 Me Iesu ei vei le sou maido, “Sou a mapana mina aveavena buo sou iteale sou a sagagalina mine sou, ma vanunua sou vate sou a bibi mina gunolina inigogona kubaana usino ne sou.  
\v 26 Moni namutou ma goligoli lei maido. Bibi ei a munugana ne amutou, ei ni muina tomane a bibi ei mulisobo sele, me ei ni buloi e amutou tomane a bibi na pipigona.  
\v 27 Me sei ei a munugana? A bibi ei ugu a inani ue a bibi ei soebule a inani? Munugana ei a bibi i ugu me ei aani iodo. Moni eau eili balivua ne amutou tomane a bibi na pipigona mina buloine amutou.   
\p
\v 28 “Ilala golugolu vuso sou palea mina tinovene eau, amutou eili pilu e eau, me amutou ma veletase ete eau.  
\v 29 Maido me eau bilii e amutou a niitealalena mine Salemo tomane euma ei biliiosi eau a niitealalena minei.  
\v 30 Me na niitealalena mine Salemo namutou aani me mu oinu. Me namutou ugu na niugugu doana me namutou iteale sou a abuna savulu tasa timana lua mine Israel.   
\s1 Iesu ei vei e Pita ni lametase ei  
\r (Mat 26:31-35; Mak 14:27-31; Ioa 13:36-38)  
\p
\v 31 “Saimon, Saimon. Satan ei taguosi ve ei ni tove a silimulina minio, tomane a vanua sou kesilange a vit mina taulelena uliulina.  
\v 32 Moni eau kakasi mina buloine oo, a silimulina minio ni ma bosa oto. Me na ilala oo sauvule mo veteliu, oo no masagali e tamtamaimu.”   
\p
\v 33 Me Pita ei vei lei maido, “Bibi Taula, eau masusuluosi na asu pilu e oo na luma na tunuui me na mate tamai.”   
\p
\v 34 Me Iesu ei vei, “Eau vei lio, Pita. Seidei, ilala kuleko ei saboa tangi, oo no vei matolu maido oo ma muada oto e eau.”   
\s1 Iesu ei vei le sou a disaipel ne sou polo a palakulu na vatu ma bie ma viso  
\p
\v 35 Iesu ei vei le sou, “Ilala lisa eau peltase amutou, amutou ma polo oto a palakulu na vatu ma bie ma ubupolo pilu e amutou. Na ilala do amutou boto a golu tasa ue boa?” Me sou vei, “Boa.”   
\p
\v 36 Ei vei le sou maido, “Moni seidei bibi ei isa a palakulu na vatu, ei ni guale. Ma bie tamai. Me a bibi ei ma isa a oto a viso, ei ni masosove a kinainai lagolago minei me ei ni guale a vatu mei ni oli ane ei a viso tasa.  
\v 37 Vuna maido, Laulau mine Salemo ei isa a inade maido, ‘Vanunua ma tavivine sou ite ei tomane a bibi tasa pagu.’ Eau vei le amutou, vanunua ma tavivine ne sou goli a inigogona li usinani minau. Vuna, a golugolu vuso Laulau mine Salemo ei vei ni palea le eau, ei ni palea.”   
\p
\v 38 Me sou vei, “Bibi Taula, oo oite. Amiteu isa a viso lua eili ie.” Me ei vei le sou maido, “Ei mapigogoi.”   
\s1 Iesu ei kaka na loena e Oliv  
\r (Mat 26:36-46; Mak 14:32-42)  
\p
\v 39 Iesu ei veletase a aubu buobuo me ei asu usino na loena e Oliv, tomane ei goli taliuliu. Ma disaipel sou ogomuli e ei.  
\v 40 Ei sibitala na avena do mei vei le sou maido, “Namutou kaka ne amutou ma bosa oto a tinovo.”  
\v 41 Me ei ilisitase sou me ei asu bulago sapa, mapigogoi a nilovana a vatu sou lange. Me ei totopatulu me ei kaka maido,  
\v 42 “Ouma, mane oo kale, oo no taulele a taogo minau ie. Moni oo ma ogomulimuli lei a masagana minau. Oo no ogomuli moni a masagana minio.”  
\v 43 Ma bineanea tasa mina langi i asu usinani minei me ei toesagali e ei.  
\v 44 Iesu ei somiale a mavaana i mamau sele, me ei kaka sagali lou. Ma maonona i palea tomane a daladala me ei kokolo utano na magamaga.   
\p
\v 45 Ei kaka pulosi me ei magili me ei asu usino na disaipel minei. Me ei ite sou so ngolongolo, vuna maido sou lilomavaa sele.  
\v 46 Me ei vei le sou, “Amutou ngolo ili? Amutou ilisi mu kaka, dae ne amutou bosa a tinovo.”   
\s1 Iudas ei bilii e Iesu usino na limane sou a butu  
\r (Mat 26:47-56; Mak 14:43-50; Ioa 18:3-11)  
\p
\v 47 Iesu ei saboa ino adeade, a abuna vanua taula sou asu maino. Bibi iedo sou tole e Iudas, ei e tasa mine sou a savulu tasa timana lua. Ei asu muga agavuale Iesu ni gamumi e ei.  
\v 48 Moni e Iesu ei vei lei maido, “Iudas, oo no bilii e Natuna Bibi na limane sou a butu a gamumina?”   
\p
\v 49 Disaipel sou magili saiili e Iesu sou ite a golu i palea, me sou vei, “Bibi Taula, oo kale namiteu uti e sou a viso?”  
\v 50 Me tasa mine sou ei valiuti a tulina ne gata mina bibi na pipigona mina mapana prist do, me a tulina ei pu utano.   
\p
\v 51 Moni e Iesu ei ite me ei vei, “Litase a inigogona ie.” Me ei tau a limana mina tulina bibi iedo, ma ei toekube ei.   
\p
\v 52 Me Iesu ei vei usino na munugana prist ma munuganuga na ulagena luma mine Salemo me sou a vanua buobuo, sou asu usinani mina lapitole ei. “Amutou guale a viso ma obu, me amutou asu usinani tomane namutou saavi a bibina paaalina, io?  
\v 53 Malada taliuliu eau ino pilu e amutou lilo na luma mine Salemo, moni e amutou ma tau ete a limane amutou ne eau. Moni a ilala seidei ieli ei a ilala mine amutou, me a sagagalina mina tunuui ei muga.”   
\s1 Pita i vei, ei ma muada oto e Iesu  
\r (Mat 26:57-58; Mak 14:53-54, 66-72; Ioa 18:12-18, 25-27)  
\p
\v 54 Me sou saavi e Iesu me sou maasi e ei ulilo na luma mina mapana prist. Me Pita ei ogomuli e ei bulago sapa.  
\v 55 Vanunua sou tomi a oavi lilo na bigomu na luma do, me sou ugu pilu. Me Pita ei ugu balivua ne sou.  
\v 56 A tavine na pipigona tasa ei ite ei ugu agavuale a oavi, me ei gegemuale ei me ei vei, “Bibi tamai ieli ei muina pilu e Iesu.”   
\p
\v 57 Moni e Pita ei vei maido, “Boa. Tavine, eau ma muada oto e ei.”   
\p
\v 58 Mulimuli sapa lou bibi tasa ei ite ei me ei vei, “Oo tamai oo a bibi na abuna mine sou.” Moni e Pita ei vei, “Bibi, eau boa.”   
\p
\v 59 Me tauluna a matailala tasa i pulosi, ma bibi tasa sea ei ade sagali maido, “Ivu sele, a bibi tamai ieli ei muina pilu e ei. Vuna ei a bibi mine Galili.”   
\p
\v 60 Moni e Pita ei vei, “Bibi, eau ma muada oto a inade oo vei.” Ei saboa ino adeade, saga i a kuleko i tangi.  
\v 61 Me Bibi Taula ei sauvule ei me ei gemuale Pita. Me Pita i damutale a inade Bibi Taula ei vei le ei, “Seidei, ilala kuleko ei saboa tangi, oo no vei matolu maido oo ma muada oto e eau.”  
\v 62 Me Pita ei gali usala me ei papaduale sele a tinangi.   
\s1 Sou polivai e Iesu me sou tibi e ei  
\r (Mat 26:67-68; Mak 14:65)  
\p
\v 63 Vanunua sou lapitole e Iesu me sou adepintola ane ei me sou tibi e ei.  
\v 64 Sou papalesobe a matane ei me sou tagi e ei maido, “Oo veipale seidei. Bibi ei tibi e oo, ei e sei?”  
\v 65 Me sou adepintola papaina ane ei.   
\s1 Sou vavasa ane Iesu na matane sou a vanua na toebilelesina inade  
\r (Mat 26:59-66; Mak 14:55-64; Ioa 18:19-24)  
\p
\v 66 Ilala oaso i tala, sou a vanua buobuo me sou a munugana prist ma vanua na muadana binea sou maiviepilu e sou. Me sou guale Iesu usino na vilo na vanunua na toebilesina inade.  
\v 67 Sou vei, “Mane oo e Krais, vei le amiteu.” Me ei vei le sou, “Mane eau vei le amutou, namutou ma silimuli ete.  
\v 68 Me mane eau tagi e amutou, ne amutou ma maliu ete.  
\v 69 Moni seidei ma ilala vuso mulimuli, Natuna Bibi ei ni ugu na lima gata mine Salemo i isa a sagalina buo.”   
\p
\v 70 Ma vanunua vuso sou tagi e ei, “Maidolo me oo e Natune Salemo, io?” Me ei vei le sou, “Tomane moni amutou veiosi maido.”   
\p
\v 71 Me sou vei, “Sei ademuadana tasa lou neitou kale? Vuna eitou oto longesi a inadena na asene ei oto.”   
\c 23  
\s1 Sou vavasa ane Iesu na matane Pailat  
\r (Mat 27:1-2, 11-14; Mak 15:1-5; Ioa 18:28-38)  
\p
\v 1 Me sou vuso mina vanua buobuo do sou ilisi me sou maasi e Iesu usino ne Pailat.  
\v 2 Sou soke a vavasana ane ei, me sou vei maido, “Amiteu ite a bibi ieli ei toemaisabe a inigogona mina vanunua ma tavivine mine amiteu. Ei madetase amiteu a nilangena takis usino ne Sisar. Me ei vei ve ei oto ei e Krais, a mapana.”   
\p
\v 3 Me Pailat ei tagi e Iesu maido, “Oo a mapana mine sou e Iuda, io?” Me Iesu ei sie maido, “Tomane moni oo veiosi iede.”  
\v 4 Me Pailat ei vei le sou a munugana prist me sou a abuna vanunua ma tavivine maido, “Eau ma poge ete a sinusu tasa mina bibi ie.”   
\p
\v 5 Moni sou ade sagali lou maido, “Ei asu maisaba mina avena vuso ne Iuda, me ei matetengitengi a vanunua ma tavivine me ei mailisi maisabesabe a lilone sou soke na avena ne Galili asu usinani.”   
\s1 Sou vavasa ane Iesu na matane Herot  
\p
\v 6 Me Pailat ei longe a inade iedo, me ei tagi e sou maido, “Bibi ieli ei tau Galili, io?”  
\v 7 Ilala Pailat ei muada i maido Iesu ei maino na avena magamaga Herot ei iteale, maido ei peltase Iesu usino ne Herot. Na ilala dolo Herot tamai ei ino ne Ierusalem.   
\p
\v 8 Herot ei ite Iesu, ei mongemonge sele. Vuna tabaa sele ei kale ni ite ei. Ei kale ni ite Iesu ni goli a gona sinaga tasa.  
\v 9 Maido me Herot ei tagi e Iesu a inade makuba. Moni Iesu ei ma maliu ete a inade tasa usino ne ei.  
\v 10 Ma munugana prist ma vanua na muadana binea sou asu maino me sou magili me sou vavasa sagali sele ane ei.  
\v 11 Io Herot pilu a vanunua na maubina minei sou adegegeli e Iesu, me sou adepintola ane ei. Sou guale a kinainai tasa malasa, me sou makai e ei, me sou peltase ei usino lou ne Pailat.  
\v 12 Na ilala do sulu maitamaina pilu, lisa su maibutualala.   
\s1 Pailat ei vei ne sou gati e Iesu na tauvaleuti  
\r (Mat 27:15-26; Mak 15:6-15; Ioa 18:39-19:16)  
\p
\v 13 Pailat ei tole sou a munugana prist me sou a munuganuga pilu a vanunua ma tavivine.  
\v 14 Mei vei ane sou maido, “Amutou maasi a bibi ieli usinani minau, me amutou vei ve ei toemaisabe a inigogona mina vanunua ma tavivine. Mu ite! Na matane amutou eau tagi kube e ei a golugolu ie, eau ma poge ete a sinusu tasa amutou vavasa ana bibi ie.  
\v 15 Me Herot tamai, ei isa damutatalana tasa moni, me ei peltase a bibi ieli usinani ne eitou. Oite! Bibi ieli ei ma goli ete a sinusu tasa mapigogoi eau na vei ei ni mate.  
\v 16-17 Maido me eau na tibi e ei me na litase ei.”   
\p
\v 18 Io sou tola vauta maido, “Valipute a bibi iede! Litase Barabas usinani ne amiteu!”  
\v 19 Barabas ei a bibi tasa ei mailisi a maubina ana vanunua na itealena lilo na aubu buobuo, me ei valipute a bibi, me sou tau ei na luma na tunuui.   
\p
\v 20 Io Pailat ei vei lei a inade usino ne sou, vuna ei kale ni litase Iesu.  
\v 21 Moni sou tola maido, “Gati ei na tauvaleuti! Gati ei na tauvaleuti!”   
\p
\v 22 Matolunai ei vei le sou, “Vuna matina? Ei goli sei matana sinusu? Eau ma poge ete a sinusu tasa minei mapigogoi na vei ei ni mate. Maido me eau na tibi e ei me na litase ei.”   
\p
\v 23 Moni sou tola vauta lou ane ei ni gati e Iesu na tauvaleuti. Ma baligolune sou i vululusi sele.  
\v 24 Maido me Pailat ei longemuli a inade mine sou, me ei longo e Iesu ni mate.  
\v 25 Pailat ogomuli a inade ne sou, me Pailat litase a bibi ei mailisi a maubina ana vanunua na itealena aubu mei valipute a bibi me sou tau e ei na luma na tunuui. Me Pailat ei ogomuli a masagana mine sou mei bilii e Iesu usino na limane sou.   
\s1 Sou gati e Iesu na tauvaleuti  
\r (Mat 27:32-44; Mak 15:21-32; Ioa 19:17-27)  
\p
\v 26 Ma ilala sou maasi e Iesu, sou lapitole a bibi tasa aisana e Saimon i asuasu maino na avena mine Sairini. Me sou tau a tauvaleuti ne ei ni tabule me ei ogomuli e Iesu.   
\p
\v 27 Ma abuna vanunua ma tavivine sou ogomuli e ei, ma tavivine papaina sou tangi me sou ala dododo ane ei.  
\v 28 Moni Iesu ei sauvule ei me ei vei le sou maido, “Tavivine mine Ierusalem, amutou ma tangisobesobe le eau. Amutou tangisobe e amutou oto ma natatune amutou.  
\v 29 Longe! A ilala tasa ni palea me ne sou vei maido, ‘Tavivine sou ma mapigogoi ete ne sou tiana, me sou ma vasusu oto, ma sou ma masusi ete, ne sou mongemonge.’  
\v 30 Na ilala dolo ne sou vei ana loeloena maido,  
\q1 ‘Amutou tapopo muata ne amiteu.’  
\q2 Me sou vei ana lolo maido, ‘Amutou avisobe e amiteu.’\f + \fr 23:30 \ft Hosea 10:8\f*   
\m
\v 31 Mane sou goli a matana inigogona maido ilala a obu i esaesa, ne sou toe sei inigogona ilala a obu i magolu?”   
\p
\v 32 Me sou maasi tamai a bibi lua su goli a inigogona pagu. Ne sou valipute sulu pilu e Iesu.  
\v 33 Sou divi na gona tasa, aisana e sigou. Me na aubu odo sou gati e Iesu na tauvaleuti. Me sou gati tamai a bibi lua pagu odo. Tasa ino na lima gata ne Iesu, me tasa ino na lima meli ne Iesu.  
\v 34 Me Iesu ei vei, “Ouma, oo no lilotase a sinusu mine sou. Sou ma muada oto a golu sou goli ie.” Me sou soebule a kinainai me sou mailaba e sei ni guale tastasa.   
\p
\v 35 Vanunua ma tavivine sou magili me sou gemugemu, moni sou a munuganuga sou adepintola ane Iesu maido, “Mane ei e Krais mine Salemo me Salemo i vileale ei, ei ni buloi liu ei oto tomane ei buloi a vanunua sanii.”   
\p
\v 36 Vanunua na maubina tamai sou adepintola ane ei. Sou asu agavuale ei me sou bilii e ei a nanu a viniga.  
\v 37 Me sou vei maido, “Mane oo a mapana mine sou e Iuda, oo no gualeliu e oo oto.”   
\p
\v 38 Me sou niage a inade tasa muata ne Iesu. “BIBI IELI EI A MAPANA MINE SOU E IUDA.”   
\p
\v 39 Tasa mina bibi lua pagu sou gati e sulu pilu e Iesu odo, ei adepintola ane Iesu maido, “Mane oo a Krais, oo gualeliu e oo oto pilu e amilu tamai.”   
\p
\v 40 Moni e tamaina ei longe a inade do, me ei sinoa ane ei me ei vei maido, “Oo tamai oo guale a mavaana tasa moni tomane ei, moni oo ma lae oto e Salemo, io?  
\v 41 Ei bilesi neitau guale a mavaana na sinusu eitau goli. Moni a bibi ieli, ei ma goli ete a sinusu tasa.”   
\p
\v 42 Me ei vei maido, “Iesu, oo damutale eau na ilala oo asu ulilo na niitealalena minio.”   
\p
\v 43 Me Iesu ei vei lei maido, “Eau vei ivu sele ane oo, seidei oo no muina pilu e eau na aubu na munonge.”   
\s1 Iesu i mate  
\r (Mat 27:45-56; Mak 15:33-41; Ioa 19:28-30)  
\p
\v 44 Io ei tomanesi a matailala savulu tasa timana lua. Na ilala do oaso i lodoalo ma tunuui i avisobe a magamaga vuso, i asu mapigogoi a matailala tolu na lavilavi.  
\v 45 Ma malo taula ino kulukulu lilo na luma mine Salemo, ei masinge vuso, me ei palea maduna lua.  
\v 46 Me Iesu i tola vauta lou maido, “Ouma, eau tau a nunugu mina limamu.” Ei vei maido, me ei mate.   
\p
\v 47 Munuganuga mina vanua na maubina savulu sobo tasa ei ite a golu ie i palea, ei beilange a aisane Salemo. Me ei vei maido, “Patotona sele, ei a bilesina bibi.”  
\v 48 Ma vanunua ma tavivine vuso sou maleleilei iodo, sou ite a golugolu i palea me sou labe a madalone sou, me sou asu liu usino na luma mine sou.  
\v 49 Me tamtamaine Iesu vuso pilu a tavivine ne Galili sanii sou magili bulago sapa, me sou ite a golugolu vuso i palea.   
\s1 Sou tau a aitolane Iesu na aova na vatu  
\r (Mat 27:57-61; Mak 15:42-47; Ioa 19:38-42)  
\p
\v 50 Me a bibi tasa ino aisana e Iosep. Ei tasa mine sou a vanunua na avelulusena inade. Ei a bilesina bibi.  
\v 51 Ei ma ogomuli ete a damutatalana ma inigogona mine sou. Ei a bibi maino ne Arimatea mine e Iuda. Ei magitalitali a niitealalena mine Salemo.  
\v 52 Bibi iedo ei asu usino ne Pailat mei tagi e ei ni bilii e ei a aitolane Iesu.  
\v 53 Io ei guale a aitolane Iesu utano, mei avisobe ei a malo keakea, mei tau na muina minate, iede a aova tasa na vatu a vanunua sou goli me saboa sou tau a aitolana bibi tasa.  
\v 54 Iedolo a malada mina masusuluna. Me bisii moni a Maolona Malada ni palea.   
\p
\v 55 Me tavivine sou veletase Galili me asu usinani pilu e Iesu, sou ogomuli e Iosep me sou ite a muina minate. Me sou ite e Iosep i tau a aitolane Iesu matina.  
\v 56 Tavivine sou asu liu me sou masusulu a bunu sanii ma nanu i isa a manginana doana. Me na Maolona Malada sou manoa tomane a binea i vei.   
\c 24  
\s1 Iesu ei ilisiliu  
\r (Mat 28:1-10; Mak 16:1-8; Ioa 20:1-10)  
\p
\v 1 Na munugana malada na wik, na autupola siisii, tavivine sou asu usino na muina minate. Sou guale a golu ei isa a manginana doana sou masusuliosi.  
\v 2 Sou ite a vatu sou bulilele na muina minate.  
\v 3 Me sou gali ulilo, moni sou ma ite ete a aitolane Bibi Taula Iesu.  
\v 4 Me sou damutatala papai a golu ie. Na ilala do sou ite a bibi lua su magili agavi, kinainai mine sulu i lada mamau sele.  
\v 5 Io sou lae sele me sou lagu motudu. Moni a bibi lua do su vei le sou maido, “Posa matina amutou tilomuli a bibi i isa a maulina na muina minate?  
\v 6 Ei ma eili otosi na. Ei ilisiosi. Namutou damutale a inade ei bilii e amutou odo na ilala ei saboa ino ne Galili.  
\v 7 Ei vei le amutou maido, ne sou bilii e Natuna Bibi na limane sou a vanua na sinusu, me ne sou gati e ei na tauvaleuti, me na malada tolu ei ni ilisiliu lou.”  
\v 8 Me sou damutale a inade mine Iesu  
\v 9 me sou ilisitase a muina minate me sou veteliu. Me sou vei le sou a disaipel savulu tasa timana tasa ma vanunua ma tavivine sanii a golugolu vuso do.  
\v 10 Tavivine sou bilii a inade do usino ne sou a aposel, ede Maria mina aubu Makdala me Ioana me Maria, ei e tinane Iemus, ma tavivine sanii sou ino pilu e sou.  
\v 11 Moni e sou damu i a tavivine sou goli a inade sabubu moni. Me sou ma silimuli ete a inade mine sou.  
\v 12 Moni e Pita ei ilisi mei vele usino na muina minate. Me ei motudu mei ielo ulilo, me ei ite a malomalo moni ino. Io ei veteliu mei damutala papai a golu i palea do. \fig Posa matina amutou tilomuli a bibi ei mauli balivua ne sou sou matesi? (Luk 24.5)|alt="Why do you look for the living among the dead?" src="CN01853B.tif" size="col" copy="© 1996 David C Cook. Used with permission." ref="24:5" \fig*   
\s1 Iesu ei palea le a disaipel lua na vea usino ne Emeus  
\r (Mak 16:12-13)  
\p
\v 13 Na malada moni iodo, disaipel lua su asu usino na aubu tasa sou vate e Emeus. Aubu odo ino bulago ane Ierusalem mapigogoi a kilomita savulu tasa timana tasa.  
\v 14 Me sulu maiadeade a golu vuso do i palea.  
\v 15 Ilala sulu adeade a inade me su tagutagu, Iesu oto ei palea agavi me ei asu pilu e sulu.  
\v 16 Moni a golu tasa ei taboboli a matane sulu, me sulu ma iteilale ete ei.   
\p
\v 17 Me ei tagi e sulu maido, “Amulu asuasu me mu maiveimulimuli a sava?” Me sulu magili me sulu lagu dododo sele.  
\v 18 Me tasa mine sulu, aisana e Kliopas, ei adeliu maido, “Vanunua papaina mina aubu seasea seidei ieli sou ino ne Ierusalem. Nane oo moni o ma muada oto a golugolu i palea nado na ilala ie?”  
\v 19 Me Iesu ei tagi e sulu, “Sei golu?”  
\p Me sulu vei lei maido, “Amiteu adeade e Iesu maino ne Nasaret. Ei a profet, me ei goli a pipigona sagali ma inadenade sagali na matane Salemo me na matana vanunua vuso.  
\v 20 Me sou a munugana prist ma munuganuga mine eitou sou tau e ei na limane sou a vanua na niitealena binea. Me sou maiademuli a valiputene ei, me sou gati ei na tauvaleuti.  
\v 21 Palapala amiteu silimuli a bibi ieli Salemo i vileale ei mina gualeliune amiteu e Israel. Ma inade tasa tamai lou, seidei ei a malada matolunai na tauluna golugolu sou odo i palea.  
\v 22 Ma tavivine sanii mina abuna mine amiteu, na autupola siisii sele, sou asu usino na muina minate me sou toe amiteu te saga sele.  
\v 23 Sou ma ite ete a aitolane Iesu, me sou veteliu me sou vei maido, ‘Amiteu ite sou a bineanea mine Salemo me sou vei le amiteu maido, “Ei ino mauli.”’  
\v 24 Me sanii mina abuna mine amiteu tamai sou asu usino na muina minate, me sou ite a golugolu muina tomana tavivine sou vei. Moni sou ma ite ete e Iesu.”   
\p
\v 25 Me Iesu ei vei le sulu maido, “Amulu, vauta! Lilone amulu i ma ilisi asi oto a silimulina inade vuso sou a profet sou vei.  
\v 26 Nane Krais ei ni guale pale a davutina me mulimuli ei ni guale a aisa buo sele maino ne Salemo, io?”  
\v 27 Me ei soke a inade mine Moses me mina profet vuso, me ei matetengi e sulu a vuna avena inade vuso na Laulau mine Salemo ei ade e ei oto.   
\p
\v 28 Sou asu usino me sou sibitala agavuale a aubu sulu kale ne su asuale. Me Iesu ei toe tomane ei kale ni asu sapa lou usino.  
\v 29 Moni e sulu tale ei me su vei, “Oo muimu pilu e amilu. Oaso ei solosolosi, me bisii moni ei ni lodo.” Maidolo me ei gali ulilo me ei ugu pilu e sulu.   
\p
\v 30 Ilala sou aani, Iesu ei pilu e sulu. Me ei guale a ulalu me ei toledadangi e Salemo, me ei lee, me ei bilii e sulu.  
\v 31 Ma tabaa oto matane sulu i peo, me sulu iteilale ei. Moni ei bualetase sulu.  
\v 32 Me sulu maiadeliu ane sulu oto maido, “Ilala eitau asu na vea, ei bilii e eitau a inade, me ei veipale a vuna damutatalana mina Laulau mine Salemo ane eitau, lilone eitau ei pansae sele.” \fig Ilala ei veipale a vuna inade mina Laulau mine Salemo ane eitau, lilone eitau ei pansae sele, io? (Luk 24:32)|alt="Were not our hearts burning within us while he talked with us on the road and opened the Scripture to us?" src="CN01859B.tif" size="col" copy="© 1996 David C Cook. Used with permission." ref="24:32" \fig*   
\p
\v 33 Ilala simoni iedo sulu ilisi me su veteliu usino ne Ierusalem. Me sulu poge a disaipel savulu tasa timana tasa pilu e tamtamaine sou sanii, sou viepilu.  
\v 34 Me sou vei, “Patotona sele Bibi Taula ei ilisiliu! Saimon ei itesi ei!”  
\v 35 Io sulu mapamuli ane sou a golugolu vuso ei palea le sulu na vea. Me sulu vei, “Ilala ei lee a ulalu, amilu iteilale ei.”   
\s1 Disaipel sou ite Iesu  
\r (Mat 28:16-20; Mak 16:14-18; Ioa 20:19-23; Apo 1:6-8)  
\p
\v 36 Sou a disaipel saboa ino sou adeade, me Iesu oto ei magili balivua mine sou. Me ei vei le sou maido, “Lilone amutou ei ni muina mea.”   
\p
\v 37 Moni sou saga sele me sou lae. Sou damu ve sou ite a kanunu tasa.  
\v 38 Me ei vei le sou maido, “Posa matina amutou saga mamau? Posa matina amutou damutatala papai lilo na lilone amutou?  
\v 39 Mu ite a limagu ma ubugu. Eau oto eau eili. Pige a vovone eau me mu ite. Kanunu sou ma isa oto a mainine sou ma tuatuane sou. Moni amutou ite e eau, eau isa i.”   
\p
\v 40 Ei vei maido, me ei maite sou a limana ma ubuna.  
\v 41 Sou mongemonge sele, moni saboa sou silimuli. Me sou damutatala papai. Me ei vei le sou maido, “Amutou isa a gona inani sanii eili?”  
\v 42 Me sou bilii e ei a maduna aia sou anonesi,  
\v 43 me ei guale me ei ani masae ne sou.   
\p
\v 44 Me ei vei le sou maido, “Ilala eau saboa ino pilu e amutou, eau veiosi le amutou maido, golugolu vuso lisa sou niage e eau na binea mine Moses me na laulau mine sou a profet me na Laulau na Inala, golugolu vuso ieli ei ni palea ivu.”   
\p
\v 45 Me ei pee a lilone sou ne sou damutale kube a vuna inade na Laulau mine Salemo.  
\v 46 Mei vei le sou maido, “Laulau mine Salemo ei isa a inade maido, Krais ei ni tabule a davutina, me na malada tolu ei ni ilisiliu na minate.  
\v 47 Me na aisane ei ne sou veipale a inade vuso usino ne Ierusalem i asu pea na aveavena vuso, ne sou sauvule a lilone sou me Salemo ei ni lilotase a sinusu mine sou,  
\v 48 me namutou veipale a inade mina golugolu ieli ei paleasi.  
\v 49 Mu ite! Eau na peltase a golu lisa euma ei adegatuna usino ne amutou. Namutou muine amutou na aubu buobuo ieli mapigogoi a ilala amutou guale a sagagalina maino na langi.”   
\s1 Salemo ei gualeliu e Iesu uata na langi  
\r (Mak 16:19-20; Apo 1:9-11)  
\p
\v 50 Io Iesu ei maasi sou a disaipel usino ne Betani. Me ei beilange a limane ei me ei maibalave sou.  
\v 51 Na ilala ei maibalavelave sou, ei ilisitase sou, me Salemo ei guale ei uata na langi.  
\v 52 Me sou totopatulu me sou kaka ane ei. Me sou mongemonge sele me sou veteliu usino ne Ierusalem.  
\v 53 Me taliuliu sou muine sou na luma mine Salemo me sou beilangelange a aisane Salemo. \fig Salemo ei guale ei uata na langi (Luk 24:51)|alt="He was taken up into heaven." src="CN01883B.TIF" size="col" copy="© 1996 David C Cook. Used with permission." ref="24:51" \fig*