\id 2TH - Minaveha NT [mvn] -Papua New Guinea 2008 (DBL 2017) 
\h 2 Tesalonika 
\toc1 Me Tesalonika Yai Leta Vꞌ‑inuana Paulo Wayahina 
\toc2 2 Tesalonika 
\toc3 2Te 
\mt2 Me  
\mt1 Tesalonika  
\mt2 Yai Leta  
\mt1 Vꞌ‑inuana  
\mt2 Paulo Wayahina  
\is1 Buki Taina Wayahina  
\ip Buki taina a tau ginuma vivane Paulo. Ka leta taina leta vꞌ‑inuana omo tau ekalesia wayahia meagai Tesalonika nihenina.  
\ip Tau ekalesia Tesalonika nihenina nuai vi‑tupatupa Tau Ito‑yavuha ya mavi‑havine wayahina. Tupwai tomotau ivonavona auyewana avaha omo iakwa. Ka Paulo ya nuanua leta taina wayahina vitupu‑nana na‑vo‑vi‑tunuhi. Paulo vo‑vi‑mahetei Yaubada awaehei naona aitam onoto na‑omo tanopia. Onoto‑nana Iesu a havia, ka tauna ya nuanua dewa goyona dewa ahiahina vane‑tawanei. Goyo‑nana ananina Iesu ya mavi‑havine eta‑naoi.  
\ip Paulo me Tesalonika vonei taui nau‑wawani yai vitumahana tunuhina inua‑vi‑avini. Ka aituhu inahe ivaniahei, taui nau‑wawani igwagwaheyei kadu itoha‑vi‑anai. Eha inuanua Yaubada dewa‑yaiyaiei, kate inahe‑naia yai vitumahana inau‑dadani. Ka kadu Paulo ya nuanua taui eha yai dewa ahiahina wayahina igenuana, kate tuta tepakaia wayahina idedewei.  
\c 1  
\s1 Nau‑kaiwa  
\m
\v 1 Yauke Paulo kadu Silasi ka Timoti ainua nui yami leta taina aginumi omomo itomi tau ekalesia meagai Tesalonika nihenina wayahimia. Itomi Amaka Yaubada nihenina kadu Kauvea Iesu Tau Ito‑yavuha nihenina.  
\v 2 Yama nuanua am‑venena awawaehina kadu nua gomagomanina ainua uvaniahei Amaka Yaubada kadu Kauvea Iesu Tau Ito‑yavuha wayahia.\x + \xo 1:2 \xt Rom 1:7.\x*   
\p
\v 3 Yaiai, itoai nau‑wawaniai tuta habuhabuna wayahina Yaubada anau‑kaiwei itomi wayahimi. Ka vona ahiahina, dewana dewa tunuhina. Iuna itomi yami vitumahana natanata, ka yami dewa‑vidovidoha taumi wayahimia kadue natanata.  
\v 4 Wayahina, mani tau ekalesia wayahia avona‑vanevane tupwana itomi yami dewa wayahi. Iuna vita kadu inahe habuhabuna uvaniahei, kate itomi utoha‑vi‑anaimi, kadu Yaubada uvitumahanei toyoina. Eha uta‑ihanua.\x + \xo 1:4 \xt 2Ko 7:4; 1Te 2:19.\x*   
\p
\v 5 Dewaia aitam pai dune vivane Yaubada dewa habuhabuna nau‑yanahi tunutunuhina. Tuta ataina wayahina inahe uvaniahei kadu uhidahida, ka Yaubada vonemi apaina inaheia ina‑iakwa, e ami pata ya pai veimea nihenina umaꞌ‑vavaha. Iuna tuta ataina wayahina tauna vo‑vi‑aiaimi.  
\v 6 Vona ahiahina, tuta tuta Yaubada dewa tunutunuhina dedewei. Wayahina, kanꞌ‑anamanei tuta tepakaia wayahina, tauna kadue dewa tunuhina na‑dewei. Tuta ataina wayahina tomotau tupwai ivitavitami, kate apaina tomotaui ai dewa‑yaiyai ivaniahei Yaubada wayahina yai dewana goyona wayahi.\x + \xo 1:6 \xt Rom 12:19.\x*  
\v 7 Ka kadu tauna na‑ivaitemi, ka itomi ami vita kadu itoai ama vita ibigabiga. Vi‑yawai‑nana kavaniahei tuta tepakaia wayahina. Tuta ataina wayahina Kauvea Iesu wahuma mamaei hivahivana. Kate apaina, Yaubada na‑si‑vinꞌ‑omanei kadudueyei. Ka tauna ya vinꞌ‑omana na‑omo dewa ainua wayahia, vivane ai ananata yabeyabena wayahina, ka kadu yanꞌ anelose bagibagi nui.\x + \xo 1:7 \xt 1Te 3:13.\x*  
\v 8 Ka aituhu aviyaivia Yaubada ivihahaiei, o aituhu aviyaivia eha yaka Kauvea Iesu Vaneana Ahiahina ivi‑ateteye, taui habuhabui ai dewa‑yaiyai ivaniahei ai‑nana nihenina kadue anelose‑naia wayahia.\x + \xo 1:8 \xt Isa 66:15.\x*  
\v 9 Ka taui ai dewa‑yaiyai‑nana vivane vita‑vovona‑vavaha, ka Kauvea kadu bou‑potai tauna matana wayahina, kadu bou‑potai tauna ya bagibagi kadu didigana wayahia. Eha ai pata idudueye.\x + \xo 1:9 \xt Isa 2:10.\x*  
\v 10 Ka dewaia ivinꞌ‑omo tuta tepakaia wayahina. Wahuma wayahina Kauvea na‑opu‑me tanopia, ka auyewana wayahina itoka tauna ya tomotau ahihikata kanꞌ‑awa‑davei kadu didigana kavo‑vi‑natei. Ka kadu itoka tau vitumahana habuhabuka nuaka ivenau‑tupatupa tauna wayahina, iuna tauna matakaia kadudueyei. Ka itomi kadu unau‑hohona, e nui kanꞌ‑awa‑davei, iuna itoai yama hae wayahimia uvitumahanei.\x + \xo 1:10 \xt Kol 3:4.\x*   
\p
\v 11 Dewaia habuhabui anuanuani. Wayahina, tuta tuta itoai aviama wayahimi. Nonova Yaubada honemi unꞌ‑omo tauna wayahina. Ka itoai aviama tauna eha vihahaiemi, kate avi dewa ahiahina yami nuanua udedewei, akanai aviama tauna ya bagibagi wayahina na‑ivaitemi ami pata dewaia deina. Ka aituhu avi dewa udedewei iuna Tau Ito‑yavuha uvitumahanei, aviama Yaubada na‑ivaitemi ami pata dewaia wayahia.\x + \xo 1:11 \xt Kol 1:9; 1Te 1:2-3.\x*  
\v 12 Dewaia wayahia aviama. Iuna yama nuanua yaka Kauvea Iesu ana wava usi‑nai, e didigana uvo‑vi‑natei deina, ka kadu itomi didigami uvaniahei tauna wayahina. Dewaia habuhabui ivinꞌ‑omo am‑venena awawaehina yaka Yaubada wayahina kadu Kauvea Iesu Tau Ito‑yavuha wayahina.   
\c 2  
\s1 Tau Goyogoyonata Wayahina  
\p
\v 1-2 Yaiai, tomotau tupwai ivonavona itoai aitam apa‑taputapu aboui, o mataeda aboui, o aitam leta aginuma, ka ivonavona apa‑taputapu‑nana nihenina, o mataedana nihenina, o kadi leta‑nana nihenina itoai avonei yaka Kauvea Iesu Tau Ito‑yavuha avaha mavi‑havine tanopia. Ka tomotau ivonavona tauna ya tomotau avaha inau‑hohona wayahina, ka auyewana avaha iakwa. Yaiai, vonaia habuhabui vona‑vitupu. Ka yama nuanua eha memeanina itomi unua‑vita vona‑vitupu‑naia wayahi.  
\v 3 Eha mani tomotau unꞌ‑awaehe yai vitupu tunina tunina wayahia inonomi. Iuna auyewana eha ana pata na‑omo a itoava mani dewa naona ivinꞌ‑omo wayahina. Ika, naona avi tomotau tuta‑nana wayahina imamaei, taui Dewa Vihaihai idedewei. Ka tuta aitamoata wayahina Yaubada aitam onoto na‑si‑vinꞌ‑omanei, ka Yaubada onotona vi‑wahani Tau Vihaihai, iuna tauna Yaubada ya veimea habuhabui vihahaiei. Ka Yaubada ya nuanua onoto‑nana wayahina vivane na‑vita‑vovona‑vavahi.\x + \xo 2:3 \xt 1Ti 4:1; 1Io 2:18; 4:3.\x*  
\v 4 Tauna yana dewa goyonata. Aituhu aviani tau maꞌ tanopi ivi‑wahani “Yaubada”, ka aituhu aviani iawa‑davedavei, akanai onoto‑nana ya nuanua tauna ana wava dewaia na‑vane‑tawanei. Tauna na‑nua‑panipani tauna ana heta vivane Yaubada. Wayahina, tauna Yaubada ya Manua Vito‑pota na‑nu nihenina, e tau maꞌ tanopi na‑mataedai, na‑vona, “Yauke taua Yaubada.”\x + \xo 2:4 \xt Dan 11:36; Ese 28:2.\x*   
\p
\v 5 Kaiwadi, itomi unuani o eha? Tuta nonova, tutana yami meagai nihenina nui kamamaei, yauke Paulo dewaia avo‑vi‑mahete‑havihavinemi.  
\v 6 Wayahina, aviani tuta ataina wayahina Tau Vihaihai‑nana ya vinꞌ‑omana bou‑potepotei, avaha dewana uanamanei. Tauna nau‑wawani tuta ataina wayahina hivahivana. Iuna Yaubada ya nuanua apaina, avi tuta tuta ahiahina wayahina, tauna onoto‑nana na‑si‑vinꞌ‑omanei.  
\v 7 Vona ahiahina, ataina tuta wayahina aitam bagibagi hivahivana avaha vi‑putu paipaisewa tanopia. Ka bagibagi‑nana omomo aitam nua wayahina, ka nua‑nana ya nuanua veimea habuhabui vihahaiei. Ka tuta ataina wayahina aitam koiaka nua‑nana ya bagibagi si‑vi‑mavinei a itoava aitam auyewa Yaubada vi‑nua‑dadani na‑omo wayahina. Ka auyewana wayahina, tau si‑vi‑mavine‑nana ya paisewa na‑iakwa, e tauna nua‑nana na‑yavuhi.  
\v 8 Na‑iakwa, e Yaubada Tau Vihaihai‑nana na‑si‑vinꞌ‑omanei, e tau maꞌ tanopi idudueyei. Ka Kauvea Iesu tauna ya vinꞌ‑omana anꞌ auyewa wayahina Tau Vihaihai‑nana ya pai veimea vitupuina na‑vita‑vovoni dewa ainua wayahia, vivane awana yawaina wayahina kadu ya vinꞌ‑omana didigana wayahina.\x + \xo 2:8 \xt Isa 11:4; SiV 19:15.\x*  
\v 9-10 Ka Tau Vihaihai‑nana ya vinꞌ‑omana omo Satana ya bagibagi wayahina, ka kadu omo Satana ya paisewa goyona wayahina. Ka avi tuta Tau Vihaihai‑nana na‑omo, tauna dewa‑bagibagi vitupui dedewei, ka iaiaya vitupui vevewanei, ka pai nua‑tupatupa habuhabui vevewanei, ka kadu dewa goyona habuhabui dedewei. Iuna tauna ya nuanua tau maꞌ tanopi na‑nonoi. Tomotaui nuai ianianiga, kate eha itꞌ‑anamane. Nuai ianianiga iuna eha yai nuanua vona tunutunuhina idewa‑vidovidohe. Wayahina, vona tunutunuhina ivihahaiei, e taui ai ito‑yavuha itutu‑haini deinake.\x + \xo 2:9-10 \xt SiV 13:11-13.\x*  
\v 11 Wayahina, Yaubada tomotaui nuai vo‑vi‑tupatupai, e taui vitupu ivitumahanei.  
\v 12 Taui idewa‑haiawa dewa goyona idedewei tanopia, kadu vona tunutunuhina ivihahaiei. Ka habuhabui dewa‑yaiyai‑vavaha ivaniahei Yaubada wayahina akanai.   
\p
\v 13 Yaiai, vona ahiahina, Kauvea dewa‑vidovidohemi, ka itoai nau‑wawaniai tuta tuta wayahina Yaubada anau‑kaiwei wayahimi. Iuna tuta naona wayahina Yaubada vi‑nua‑dadanemi ito‑yavuha uvaniahei dewa ainua wayahia, vivane Nuana Ahihinata ya paisewa wayahina, ka kadu yami vitumahana vona tunutunuhina wayahina. Nuana Ahihinata ya paisewa dewa goyona tanopia wayahia tana‑vewanimi, e vo‑vi‑aiaimi dewa ahiahina wayahina.\x + \xo 2:13 \xt 2Te 1:3; Epe 1:4.\x*  
\v 14 Ka dewaia wayahi Yaubada honemi Vaneana Ahiahina wayahina. Itoai vaneana anau‑waheyei wayahimia, e uvitumahanei. Ka Yaubada ya nuanua tauna yaka Kauvea Iesu Tau Ito‑yavuha didigana na‑vo‑patami uvaniahei, vivane didigami.  
\v 15 Wayahina, yaiai, nau‑wawanimi umimini toyoina, kadu nau‑wawanimi viwavenena avaha aviwavenemi unua‑vi‑avini. Eha unua‑pania. Nonova viwavenena tupwai unononi avonemi awai wayahia, ka viwavenena tupwai aginumi uaiaiavi yami leta nihenia.   
\p
\v 16-17 Ka yama nuanua wayahimi taina. Yaubada Amaka dewa‑vidovidoheka, kadu tauna yanꞌ ate‑nuanuai wayahina ate‑vatu maꞌ‑vavaha, kadu nua‑vaniaha ahiahina veneka. Yau nuanua yaka Kauvea Iesu Tau Ito‑yavuha ana heta kadu Yaubada Amaka ainua nuami ivo‑vi‑vatui, kadu yau nuanua ivo‑vi‑bagibagimi ami pata dewa ahiahina aitamoata aitamoata wayahi kadu vona ahiahina aitamoata aitamoata wayahi.   
\c 3  
\s1 Paulo Ya Nuanua Tau Ekalesia Iviama Tauna Yaiana Nui Wayahi  
\p
\v 1 Yaiai, yama vona pai nau‑yehata taina. Yama nuanua Yaubada uviamei itoai wayahiai, e Yaubada na‑ivaiteai yama paisewa wayahina. Iuna yama nuanua Kauvea vaneana anaunau‑waheyei, e mani tomotau ivo‑kwayavoni ivitumahanei kadu ivi‑ateteyei, itomi yami dewa tuta nonova wayahina aitamoata deina.  
\v 2 Ka kadu yama nuanua Yaubada uviamei, tauna na‑ito‑yavuhiai onoto goyogoyoi yai dewa wayahia. Iuna tomotau tupwai eha Vaneana Ahiahina ita‑vitumahane.   
\p
\v 3 Kate aka pata Kauvea kavitumahanei, iuna tuta tuta wayahina tauna yana vona ka yana dewa aitamoata. Ka tauna ya nuanua tuta tepakaia wayahina na‑vo‑vi‑bagibagimi kadu tauna ana pata Satana na‑bou‑potei wayahimia, e umamaei ahiahina.  
\v 4 Avitumahanemi aituhu aviani avaha aveimeyemi nau‑wawanimi udedewei, akanai tuta ataina wayahina itomi udedewei deina, kadu avitumahanemi apaina udedewei aitamoata deina. Kadu Kauvea avitumahanei na‑ivaitemi uvi‑ateteyei deinake.\x + \xo 3:4 \xt 2Ko 7:16; Gal 5:10.\x*   
\p
\v 5 Yama nuanua wayahimi Kauvea nuami na‑eta‑naoi dewa ainua uvaniahei, vivane Yaubada ya dewa‑vidovidoha kadu Tau Ito‑yavuha ya gwahea.   
\s1 Veimea Mamaei Kapaipaisewa  
\p
\v 6 Yaiai, yaka Kauvea Iesu Tau Ito‑yavuha a wavea aveimeyemi aituhu avi tau ekalesia iaupu‑tonetonene, o aituhu avi tau ekalesia yama viwavenena ivihahaiei, itomi utana‑tavunei akanai.\x + \xo 3:6 \xt Rom 16:17.\x*  
\v 7 Avaha uanamanei nau‑wawanimi itoai yama pai dune uvꞌ‑iunei. Unuani. Nonova nui kamamaei, itoai yama dewa medeina? Kaiwadi, itoai aupu‑tonetonene? Eha. Itoai eha paisewa ata‑vihahaie.\x + \xo 3:7 \xt Pili 3:17.\x*  
\v 8 Ka kadu avi tuta mani tomotau ai maꞌ aniania, akanai aninina avi‑maiei. Eha aitam tuta aniani atꞌ‑ani‑kavokavovo. Eha‑ohota. Ioyoma kadu auyewa wayahia itoai apaipaisewa kadu ahidahida. Iuna eha yama nuanua avitavitami.\x + \xo 3:8 \xt 1Te 2:9.\x*  
\v 9 Yama dewana deina, iuna yama nuanua yawaiai vi‑pai dune itomi wayahimi. Vona ahiahina, itoai ama pata aveimeyemi una‑ivaiteai. Kate dewana eha yama nuanua.\x + \xo 3:9 \xt 1Ko 9:4; 1Te 1:6.\x*  
\v 10 Ka tuta nonova wayahina, tutana nui kamamaei, ami veimea taina aveimeyemi, vivane,   
\b  
\qm1 “Aituhu aviyaivia paisewa ivihahaiei,  
\qm2 akanai eha nau‑wawanimi  
\qm3 taui ai maꞌ wayahina una‑ivaite.”  
\b  
\p
\v 11 Avaha vane anononi, tupwai wayahimia iaupu‑tonetonene. Taui eha ita‑paipaisewa, kate ivi‑tana‑pununu.\x + \xo 3:11 \xt 1Ti 5:13.\x*  
\v 12 Tomotaui aveimeyei kadu avo‑vi‑vatui Kauvea Iesu Tau Ito‑yavuha nihenina yai dewaia goyona wayahia igenuana, ka taui nau‑wawani ivi‑putu paisewa na patana ipaipaisewei, e taui ai maꞌ inau‑vevewanei deinake.\x + \xo 3:12 \xt 1Te 4:11.\x*   
\p
\v 13 Yaiai, yama nuanua wayahimi eha dewa tunutunuhina wayahi uaihanua.\x + \xo 3:13 \xt Gal 6:9.\x*  
\v 14 Aituhu aviyaivia yama viwavenena leta taina nihenina ivihahaiei, taui unau‑vi‑avini, kadu nau‑wawanimi utana‑tavunei a itoava taui ina‑ini‑yauyau wayahina.  
\v 15 Taui eha itomi ami havia, wayahina eha nau‑wawanimi manimaninimi udedewe, kate nau‑wawanimi unau‑vi‑avini vavaneimi deina.\x + \xo 3:15 \xt 1Te 5:14.\x*   
\s1 Vona Pai Nau‑yehata  
\p
\v 16 Yama nuanua wayahimi yama viama taina. Nua Gomagomanina a Kauvea aviamei tauna nꞌ‑awaehemi tuta tuta wayahina kadu dewa habuhabuna wayahina nua gomagomanina uvaniahei. Ka kadu Yaubada aviamei habuhabumi Kauvea nui umaꞌ‑vavaha.  
\v 17 Yauke Paulo anau‑kapoiemi leta taina nihenina yauke taua nimaua. Ika, aituhu avi leta aginumi, akanai anau‑kapoi nimaua deinake. Yauke yau iginuma taina: \sig PAULO\sig*.  
\v 18 Ka yau nuanua habuhabumi am‑venena awawaehina Kauvea Iesu Tau Ito‑yavuha wayahina uvaniahei, e wayahimia na‑maꞌ‑vavaha.  
\m Ana pata deina.  
\m \sig Yauke Paulo\sig*