\id 1PE - Minaveha NT [mvn] -Papua New Guinea 2008 (DBL 2017) 
\h 1 Pita 
\toc1 Pita Ya Iginuma Naona 
\toc2 1 Pita 
\toc3 1Pi 
\mt1 Pita  
\mt2 Ya Iginuma  
\mt1 Naona  
\is1 Buki Taina Wayahina  
\ip Buki taina a tau ginuma vivane Pita, Iesu a tau hae ananina aitam, ka Aniduru vaneina. Pita kadu aitam buki ginumi \bk Awaeha Vovouna\bk* taina nihenina.  
\ip Ka leta taina nihenina Pita yana ipupu habuhabuna inahe wayahina kana‑iavi. Inahe nihenina dewa aitonu kadueyei. (1) Inahe wayahina Kauvea ya nuanua kaivaitei. (2) Inahe ivaiteka yaka vitumahana kavo‑patei mani tomotau wayahia. (3) Inahe wayahina nau‑dadana kavaniahei, ka dewana yaka vitumahana vo‑vi‑natei.  
\ip Pita tau ekalesia vonei Iesu aniga taui wayahi, ka mini‑havine wayahi, ka kadu tuta tepakaia wayahina tauna na‑mavi‑havine wayahi. Ka dewaia tanoi wayahi, taui nau‑wawani idewa‑haiawa ai inahe niwania. Iuna yai nua‑vaniaha nui ipotapota auyewana wayahina. Ka avaha ianamanei avi tuta Iesu na‑mavi‑havine, taui ai nau‑pata ahiahina kadu nau‑iaiava ivaniahei tauna wayahina.  
\ip Ka Pita ya nuanua, itoka tau ekalesia yawaika ahiahina mani tomotau kaviwavenei, tauka vivane Tau Ito‑yavuha ya tomotau.  
\c 1  
\s1 Nau‑kaiwa  
\m
\v 1 Yauke Pita, Iesu Tau Ito‑yavuha a tau hae ananina aitam. Ka yami leta taina omomo wayahiua. Itomi vivane Yaubada ya tomotau, ka nonova aka havia ivo‑tahomi uneine papani tunina tunina wayahia, vivane Ponitusi, ka Galatia, ka Kapadosia, ka Asia, ka kadu Bitinia. Ka tuta ataina wayahina papani‑naia nihenia umamaei.  
\v 2 Nonova Yaubada Amaka dewa habuhabuna mai‑anamanei. Wayahina, tauna vi‑nua‑dadanemi Iesu Tau Ito‑yavuha yana vona uvi‑ateteyei. Kadu tauna Nuana Ahihinata vi‑tunei omo wayahimia, e tauna Yaubada ya paisewa nuami nihenina na‑nau‑yehai. Akaka, Nuana Ahihinata ivaitemi Iesu dayahina unꞌ‑awaehei yami goyona nꞌ‑epa‑yavunei. Wayahina, anau‑kaiwemi, ka yau nuanua Yaubada am‑venena awawaehina kadu nua gomagomanina na‑venemi inatanata nihenimia.\x + \xo 1:2 \xt Rom 8:29; 2Te 2:13.\x*   
\s1 Vitumahana Iesu Tau Ito‑yavuha Wayahina  
\p
\v 3 Nau‑wawanika Yaubada, yaka Kauvea Iesu Tau Ito‑yavuha Amana, kanꞌ‑awa‑vidovidohei! Iuna tauna ate‑nuanuaieka ananina. Ka tauna Iesu anigea si‑vi‑mini‑havinei, e ya bagibagi kadueyei deinake. Dewana wayahina ate‑nuanuai kavaniahei tauna wayahina, vivane yaka tupua vovouna. Ka ataina, yaka nua‑vaniaha nui kapotapota a itoava tauna na‑si‑vi‑mini‑havineka aitamoata deina wayahina.  
\v 4 Ka tanoi wahuma wayahina kaikaiwabo ahihinata imamaei, vivane yana gabu imaꞌ‑vavaha. Tauna bou‑vidovidohei wayahimi, ka eha ana pata kaikaiwaboi idavudavuna, ka eha ana pata ina‑iakwa.\x + \xo 1:4 \xt Kol 1:12.\x*  
\v 5 Ka itomi Yaubada uvitumahanei, ka ya bagibagi ana pata goyona na‑bou‑potei wayahimia tuta ataina a itoava auyewa pai nau‑yehata wayahina. Ka auyewa pai nau‑yehata wayahina, Yaubada yaka ito‑yavuha na‑si‑vinꞌ‑omanei kadueyei kadu kavaniahei.\x + \xo 1:5 \xt Ioni 10:28; 17:11.\x*  
\v 6 Wayahina, dewaia wayahi udewa‑haiawa ananina. Kate vona ahiahina, tuta nonova a itoava tuta ataina wayahina, inahe habuhabuna uvaniahei nau‑dadana tunina tunina wayahia. Ka avonemi, inahe‑naia uvaniahei yaka tuta tanopia kutakutana ana heta nihenina.\x + \xo 1:6 \xt 1Pi 5:10; Iam 1:2.\x*  
\v 7 Nau‑dadanaia tanoi habuhabui ivinꞌ‑omo, iuna Yaubada awaehei deina. Tauna ya nuanua habuhabuka aka pata yami vitumahana kadueyei eha vitupu, kate vitumahana‑hoina. Itoka tomotau yaka dewa vivane goula\em V\em* kabou‑anai, ka aviani nihenina eha goula\em V\em* nꞌ‑anai na‑iakwa, ka goulata ana heta na‑maei. Vona ahiahina, goulata patana ananina, kate udu! Auyewa pai nau‑yehata wayahina goula\em V\em* habuhabuna na‑iakwa. Kate auyewana wayahina yami vitumahana Iesu wayahina eha na‑iakwa. Wayahina, eha aitam patana mamae ana pata yami vitumahana wayahina. Yaubada ya nuanua auyewana wayahina, Iesu Tau Ito‑yavuha ya mavi‑havine kadueyei, e auyewana wayahina Yaubada nꞌ‑awa‑davedaveka, nꞌ‑awa‑vidovidoheka, kadu didigaka na‑veneka.\x + \xo 1:7 \xt V.T 17:3; Sek 13:9; Mal 3:3; Iam 1:3.\x*  
\v 8 Itomi eha Iesu matamia uta‑dueye, ka dewana eha aitam aviani wayahimia, akanai tauna udewa‑vidovidohei. Ka ataina tuta wayahina, kadue eha matamia uta‑dudueye, ka akanai, tauna uvitumahanei, ka yami dewa‑haiawa tauna wayahina ananina. Ka eha ana pata vona wayahia dewa‑haiawana kavo‑vi‑mahete mani tomotau wayahia. Ka dewa‑haiawana didigaka omaneka kavaniahei.\x + \xo 1:8 \xt Ioni 20:29; 2Ko 5:7.\x*  
\v 9 Udewa‑haiawa deinake, iuna avaha uvitumahanei, kadu nuami a ito‑yavuha avaha vi‑putu, ka avaha uanamanei, apaina kadu ito‑yavuha‑nana a pai nau‑yehata uvaniahei.   
\p
\v 10 Ito‑yavuha‑nana vivane dewa ani‑vainena. Nonova tau apa‑taputapu habuhabui inaunau‑nene‑wayohe ito‑yavuha‑nana anꞌ anamana ivaniahe, inꞌ‑anamane ahiahina. Ka taui habuhabui iginumi, e apaina am‑venena awawaehina Yaubada wayahina uvaniahei.\x + \xo 1:10 \xt Mat 13:16-17.\x*  
\v 11 Taui iginumi deinake, iuna Tau Ito‑yavuha Nuana taui nihenia mamaei, ka Nuana mai‑viwavenei, apaina Tau Ito‑yavuha nau‑wawani inahe habuhabuna na‑vaniahei tanopia, ka kadu mai‑viwavenei, inahe‑naia na‑iakwa, e tauna didigana na‑vaniahei. Kate taui eha itꞌ‑anamane‑vidoha avi tuta wayahina dewaia inꞌ‑omo, ka eha itꞌ‑anamane‑vidoha koiaka wayahina ivinꞌ‑omo, kate taui yai nuanua dewaia inꞌ‑anamanei.\x + \xo 1:11 \xt Sam 22; Isa 53; Luk 24:26-27.\x*  
\v 12 Ka tau apa‑taputapu‑naia ivi‑tau paisewa kadu dewaia iginuginumi, ka Yaubada viwavenei eha taui ai heta wayahi idedewe, kate ivi‑tau paisewa itomi wayahimi kadu wayahimia iginuginuma. Nonova dewaia iapa‑taputapuei, ka tuta ataina wayahina dewaia avaha ivinꞌ‑omo. Ka Yaubada tauna Nuana Ahihinata ya bagibagi wahuma wayahina tupwai tomotau venei, e taui Vaneana Ahiahina inaunau‑waheyei wayahimia. Ka vona ahiahina, anelose wahuma imamaei, kadu yai nuanua ananina dewaia inꞌ‑anamanei.   
\s1 Dewa Ahihinata  
\p
\v 13 Wayahina, nau‑wawanimi nuami uvo‑vi‑aiaia, uvo‑vi‑vatui, kadu yawaimi uveimeyei ahiahina, Yaubada ya nuanua wayahimi deina. Kadu nau‑wawanimi utoha‑vi‑anaimi, ka yami nua‑vaniaha nui upotapota a itoava Iesu Tau Ito‑yavuha na‑mavi‑havine wayahina. Ka auyewana wayahina tauna am‑venena awawaehina na‑venemi matana.  
\v 14 Nonova itomi mwagemwagemi, kadu yami nuanua vivane goyogoyona. Kate ataina nau‑wawanimi dewaia uni‑tawanei, ka Yaubada ya nuanua wayahimi uvi‑muniei, uaupu‑moimoiha. Udedewei tevana tunutunuhi amai yana vona iupu‑moimoihei deina.\x + \xo 1:14 \xt Rom 12:2; Epe 2:3; 4:17-18.\x*  
\v 15 Ka tauna hone‑taitainimi vivane ahihinata. Wayahina, nau‑wawanimi itomi kadue ahihimiata yami dewa habuhabuna nihenina.  
\v 16 Nau‑wawanimi udedewei deina, iuna Iginuma nihenina Yaubada ivona,  
\b  
\q1 “Itomi nau‑wawanimi ahihimiata,  
\q2 iuna Yauke Taua ahihiuata.”\x + \xo 1:16 \xt Lev 11:44-45; Mat 5:48.\x*   
\b  
\p
\v 17 Apaina Yaubada onoto ka vavine aitamoata aitamoata yai dewa kadu tauna ya nuanua wayahi na‑bou‑viwavei, na‑nau‑yanahi, e ai nau‑pata vi‑nua‑dadani, dewa‑haiawa o kadi dewa‑yaiyai. Ka ataina tuta wayahina Amaka wayahina uviama. Wayahina, nau‑wawanimi dewa‑yaiyai‑nana umatamatautei, kadu yawaimi uvo‑vi‑aiaia ahiahina. Iuna tanopi taina eha yami pai maꞌ‑vavaha. Nau‑wawanimi baina tanopia umamaei tau bwanibwani deina. Wayahina, dewa goyona uvihahaiei.\x + \xo 1:17 \xt Rom 2:11; SiV 2:23.\x*  
\v 18 Nonova yami tupua‑nenenehi yai dewa awakabina. Ka ataina dewaia iviwavenemi uvi‑muniei. Ka Yaubada vi‑maiemi, iuna ya nuanua dewaia uni‑tawanei. Ka patana eha kina goula\em V\em* o kadi kina siliva\em V\em*. Eha. Apaina guguaia ina‑iakwa.  
\v 19 Kate patana ani‑vainena vivane yaka Tau Ito‑yavuha dayahina. Ka tauna Yaubada yana vona vi‑muniei tunutunuhina, aitam lami\em V\em* a tau dune‑vi‑avina vi‑muniei deina. Eha yana dewa goyona, kadue eha aitam aviani goyona tauna nihenina ta‑mamae. Tauna ahihinata.\x + \xo 1:19 \xt Dew 20:28; Ebe 9:12-14.\x*  
\v 20 Tuta naona wayahina, Yaubada eha tanopi ta‑vevewane, kate tauna avaha Tau Ito‑yavuha mai‑vi‑nua‑dadanei paisewana vitana tanoi wayahina. Ka Yaubada tauna ya vi‑nua‑dadana tanoi hivehivei a itoava tuta ataina wayahina. Ka ataina, tuta a pai nau‑yehata wayahina, tauna si‑vinꞌ‑omanei wayahimi.\x + \xo 1:20 \xt 2Ti 1:9-10; Epe 1:4.\x*  
\v 21 Ka avaha Iesu yana dewa ai nahenahea uanamanei, Yaubada uvitumahanei. Ka Yaubada yaka Tau Ito‑yavuha anigea si‑vi‑mini‑havinei, kadu didigana ananina venei. Wayahina, Yaubada uvitumahanei, kadu ataina tuta yami nua‑vaniaha nui upotapota kadu utoha‑vi‑anaimi, e apaina ami nau‑pata ahiahina uvaniahei.\x + \xo 1:21 \xt Ioni 14:6; Rom 5:1-2.\x*   
\p
\v 22 Ka avaha Yaubada yana vona tunutunuhina uvi‑muniei, ka yawaimi uvo‑vi‑aiaia ahihimiata deinake. Wayahina, ataina ami pata tau ekalesia aitamoata aitamoata udune‑nuanuaiei ahiahina. Wayahina, nau‑wawanimi nuami habuhabuna wayahina udewa‑vidovidohemi, dewa tunutunuhina deina.\x + \xo 1:22 \xt Ioni 13:34; Rom 12:10.\x*  
\v 23 Iuna itomi avaha utupua‑havine Yaubada yana vona wayahina. Ka yana vona vivane yawayawaina kadu maꞌ‑vavaha. Kadu tauna maꞌ‑vavaha, eha yami tupua‑nenenehi aninigai deina. Ka ataina Yaubada vivane Amami.  
\v 24 Ka Iginuma voneka deina, ivona,  
\b  
\q1 “Tomotau habuhabui yawai wetau yawaina deina,  
\q2 ka yai kaikaiwabo wetau sisina deina.  
\q1 Iuna apaina, tuta eha ani‑hoina na‑iakwa wayahina,  
\q2 wetau ina‑pwavu, ka sisina inau‑moewa.\x + \xo 1:24 \xt Isa 40:6-8.\x*   
\q3
\v 25 Kate Kauvea yana vona maꞌ‑vavaha.”\f a \fr 1:25 \ft Me Girisi yai vo‑vina \+sls Awaeha Tutuaina\+sls* nihenina Isaia 40:6-8 ivona deinake. Kate me Isiraeli yai \+sls Awaeha Tutuaina\+sls* nihenina ivona tunina.\f*  
\b  
\m Ka nonova Yaubada ya tau paisewa vonana maꞌ‑vavaha inau‑waheyei wayahimia, e unononi, vivane Vaneana Ahiahina.   
\c 2  
\s1 Ohona Yawayawaina  
\p
\v 1 Wayahina, nau‑wawanimi yami nua‑goyo kadu yami vitupu ubou‑ohoi, ka nau‑wawanimi yami vi‑bwanou kadu yami apa‑goyogoyo uvihahaiei.\x + \xo 2:1 \xt Epe 4:22; Iam 1:21.\x*  
\v 2 Meameai vovoui tuta tuta wayahina nunu nuanuai. Ka itomi nau‑wawanimi yami dewa meameai yai dewa deina, vivane tuta tuta wayahina Yaubada yana vona tunutunuhina nuanuami nunu deinake. Ka aituhu unononi, ubagibagi, e apaina ito‑yavuha uvaniahei.  
\v 3 Vona ahiahina, avaha yaka Kauvea yana vona unim‑dadani, ka avaha uanamanei vonana dibidibina, iuna tauna ahiahina.\x + \xo 2:3 \xt Sam 34:8.\x*   
\p
\v 4 Kadu nau‑wawanimi unꞌ‑omo Tau Ito‑yavuha wayahina, iuna tauna ohona yawayawaina. Nonova tau maꞌ tanopi ivihahaiei, iuna tauna eha aitam aviani ananina taui mataia. Kate tauna ananina Yaubada matana, kadu Yaubada tauna vi‑nua‑dadanei, e ana wava bou‑vaneyei wava habuhabui wayahia.  
\v 5 Kadu ataina tuta itomi yoana yawayawaina deina, ka Yaubada ya nuanua nꞌ‑epami, e ohona yawayawaina nui Manua Tapanono na‑yonei. Ka itomi avaha uvi‑tau vi‑nomu Yaubada wayahina. Akaka, nau‑wawanimi nuami wayahina vi‑nomu ahihinata uvi‑nomui Yaubada wayahina, tauna ya nuanua wayahimi deina. Ka Iesu Tau Ito‑yavuha na‑ivaitemi uvi‑nomu ahiahina deina.\x + \xo 2:5 \xt Epe 2:21-22; SiV 1:6.\x*  
\v 6 Ka Iginuma nihenina ivona deina,  
\b  
\q1 “Udueyei! Ohona ahiahina avi‑nua‑dadani,  
\q2 ka avi‑au‑mini meagai Sioni\em V\em* nihenina.  
\q1 Ka aituhu aviyaivia ohonana ivitumahanei,  
\q2 ataina a itoava auyewa pai nau‑yehata wayahina,  
\q3 taui eha ina‑ini‑yauyau.”\x + \xo 2:6 \xt Isa 28:16; Epe 2:20.\x*   
\b  
\p
\v 7 Ka aituhu aviyaivia wayahimia ohona tanoi uvitumahanei, akanai, ohonana ahiahina ana noe. Ka aituhu aviyaivia eha ita‑vitumahane, taui wayahi Iginuma vo‑vi‑maheteka, ivona,  
\b  
\q1 “Nonova tau yona ohonana ivihahaiei,  
\q2 kate Yaubada ohonana bou‑vaneyei hetana,  
\q3 e mani ohona na‑veimeyei.”\x + \xo 2:7 \xt Sam 118:22.\x*   
\b  
\m
\v 8 Ka kadu ivona,  
\b  
\q1 “Ohona taina vivane tomotau yai pai tupa,  
\q2 aitam hanu wayahina ivi‑tupainei deina.”  
\b  
\m Apaina tauna wayahina ivi‑tupainei ina‑peu, iuna eha yana vona ita‑vitumahane. Ka nonova Yaubada avaha vi‑nua‑dadani aituhu aviyaivia ivihahaiei, akanai ivi‑tupainei deina.\x + \xo 2:8 \xt Isa 8:14.\x*   
\p
\v 9 Kate itomi eha taui deina, iuna itomi uvitumahanei. Yaubada yaka kini\em V\em* vi‑nua‑dadanemi uvi‑tau vi‑nomu tauna wayahina. Ka itomi tau vitumahana habuhabumi yoko ahihimiata. Nonova tauna papani novanovana wayahina honemi, unꞌ‑omo. Ka ya nuanua ya maheta ahihi‑vainena nihenina umamaei. Ka nau‑wawanimi ya dewana ahiahina tanoi uapa‑vidovidohei kadu dewaia uhaeyei.\x + \xo 2:9 \xt V.V 7:6; 14:2; Isa 9:2; Tit 2:14; Dew 26:18; Epe 5:8.\x*  
\v 10 Vona ahiahina,  
\b  
\q1 “Tuta nonova wayahina  
\q2 itomi eha aitam yoko,  
\q1 kate ataina tuta  
\q2 itomi avaha Yaubada yana yoko.  
\q1 Ka nonova kadue Yaubada yanꞌ ate‑nuanuai  
\q2 eha wayahimia,  
\q3 kate ataina avaha uvaniahei.”\x + \xo 2:10 \xt Ose 2:23.\x*   
\b  
\p
\v 11 Yaiau, avaha avonemi, itomi tau bwanibwani tanopi taina hetana deina, iuna tanopi taina eha yami pai maꞌ pai nau‑yehata. Yami pai maꞌ‑vavaha vivane wahuma. Wayahina ahaeyemi, nau‑wawanimi yami nuanua goyona aitamoata aitamoata uvihahaiei. Iuna nuanuaia goyona ami havia, ka nuami ivi‑nauei.\x + \xo 2:11 \xt Gal 5:17, 24.\x*  
\v 12 Ka itomi nau‑wawanimi dewa ahiahina udewa‑nubunubui tau maꞌ tanopi mataia. Taui eha Yaubada itꞌ‑anamane, wayahina iapa‑goyogoyoemi. Ka aituhu yami dewa ahiahina idudueyei, akanai, yami dewaia na‑haeyei yai nuanua bwagona. Ka apaina, Tau Ito‑yavuha na‑mavi‑havine, na‑nau‑vi‑tauka, ka auyewana wayahina tau maꞌ tanopi nau‑wawani ihaeyemi tunuhina Yaubada matana, ka tauna didigana ivo‑vi‑natei deina.\x + \xo 2:12 \xt Mat 5:16.\x*   
\p
\v 13 Ka yaka Kauvea ya nuanua wayahimi nau‑wawanimi tau veimea habuhabui tanopia udewa‑didigunei. Wayahina, Sisa\em V\em* ya veimea habuhabui uvi‑muniei, iuna tauna tau veimea ananina.\x + \xo 2:13 \xt Tit 3:1.\x*  
\v 14 Kadu tau veimea mata‑genai yai veimea uvi‑muniei deina, iuna Sisa\em V\em* vi‑tunei iomo, e aituhu aviyaivia veimea‑naia itana‑bwegebwegei, akanai tau veimea mata‑genai idewa‑yaiyaiei. Kadu aituhu aviyaivia yai dewa tunutunuhina, akanai tau veimea mata‑genai iapꞌ‑ahihiei.  
\v 15 Nau‑wawanimi udewei deina, iuna Yaubada ya nuanua wayahimi dewa ahiahina udewa‑nubunubui. Ka aituhu aviyaivia mwagemwagei ivona‑kavokavovo wayahimi, apaina yami dewa ahiahina idudueyei, ka eha kadu aviani wayahimi ina‑vone.\x + \xo 2:15 \xt 1Pi 3:16.\x*  
\v 16 Yaubada avaha ito‑yavuhimi yami goyona wayahia Iesu yana dewa wayahina. Ka ataina veimea tutuaina eha ana pata na‑ito‑yavuhimi. Kate udu! Eha nau‑wawanimi una‑vona, “Itoai avaha ito‑yavuha avaniahei. Wayahina, aviani yama nuanua, akanai adedewei deina.” Kadu eha nau‑wawanimi yami dewa goyona ubwae deinake. Kate tuta tuta wayahina yawaimi unꞌ‑awaehei Yaubada ya nuanua wayahina, ka eha dewa goyona udedewe.  
\v 17 Kadu nau‑wawanimi tomotau habuhabui udewa‑didigunei, ka yaiami taui Iesu a tau vitumahana udewa‑vidovidohei. Kadu nau‑wawanimi Yaubada umatamatautei, kadu yami kini\em V\em* udewa‑didigunei.\x + \xo 2:17 \xt Rom 12:10.\x*   
\p
\v 18 Ka aituhu aviyaivia wayahimia vivane tau paisewa‑kavokavovo,\f a \fr 2:18 \ft Dimdim movia tau paisewa‑kavokavovo ivi‑wahani \+sls sileva\+sls*. (Edu \+sls sileva\+sls* \fqa Vona nihenina.)\f* nau‑wawanimi yami babada udewa‑didigunei, ka aviani ami veimea taui wayahia, akanai uvi‑muniei. Ka eha babadai ahiahina ai heta wayahia, kate aituhu taui ami veimea toyoina ivenevenemi, akanai kadu taui uvi‑muniei ahiahina.\x + \xo 2:18 \xt Epe 6:5.\x*  
\v 19 Aituhu yaka Yaubada unuani, apaina eha aitam yami dewa goyona. Kate aituhu yami babada inua‑goyo, ka aituhu idewa‑yaiyaiemi, itomi Yaubada uvo‑vi‑dewa‑haiawi yami dewa ahiahina wayahina.  
\v 20 Kate aituhu goyona udedewei, ka aituhu inua‑goyo, idewa‑yaiyaiemi, yami dewa tanoi eha aitam aviani ahiahina Yaubada matana. Kate aituhu dewa ahiahina udedewei, ka aituhu inahe uvaniahei dewaia wayahia, dewana vivane dewa ahiahina Yaubada matana.\x + \xo 2:20 \xt 1Pi 3:14, 17.\x*  
\v 21 Ka etawana vitana tanoi wayahina Yaubada honemi uvenavenau, iuna Tau Ito‑yavuha inahe vaniahei wayahimi, ka yana dewa vivane pai dune wayahimi, ka Yaubada ya nuanua pai dune‑nana uvꞌ‑iunei.\x + \xo 2:21 \xt Mat 16:24; Ioni 13:15.\x*   
\p
\v 22 Iginuma nihenina tauna wayahina ivona,  
\b  
\q1 “Eha aitam dewa goyona ta‑dewe,  
\q2 ka eha aitam vitupu ta‑vinꞌ‑omo  
\q3 awana wayahina.”\x + \xo 2:22 \xt Isa 53:9.\x*   
\b  
\m
\v 23 Ka tutana tomotau iapa‑goyogoyoei, tauna eha kadu wayahia ta‑nau‑pata apa‑goyogoyona wayahina. Ka tutana inahe ananina vaniahei, eha ta‑nua‑goyoe, ka eha ta‑bwanate. Kate tauna yawaina awaehei Yaubada wayahina, ka kadu tuta tuta wayahina vitumahanei Yaubada ya nau‑yanahi tunutunuhina, eha aitam tuta bwagona.\x + \xo 2:23 \xt Isa 53:7; 1Pi 3:9.\x*  
\v 24 Vona ahiahina, yaka Tau Ito‑yavuha ana heta ininina nihenina yaka goyona a dewa‑yaiyai vaniahei ai nahenahea. Ka ya nuanua dewa goyona habuhabui kani‑tawanei, e dewa tunutunuhina nui kamamaei. Nau‑wawanika kadedewei deinake, iuna tomotau tauna ininina ivo‑himwani, akaka, itoka kavidoha a nipaha wayahia.\x + \xo 2:24 \xt Isa 53:5-6; Rom 6:11.\x*  
\v 25 Vona ahiahina, itomi vahitau sipi\em V\em* deina. Ka nonova uni‑tupatupa, kate ataina avaha yami Tau Ito‑yavuha wayahina umavi‑havinei. Ka tauna vivane nuami a tau dune‑vi‑avina.\x + \xo 2:25 \xt Ese 34:5-6; Mat 9:36; Ioni 10:14; Ebe 13:20-21.\x*   
\c 3  
\s1 Tau Tavine Vaivine Ai Veimea  
\p
\v 1 Ka aituhu aviyaivia wayahimia tau tavine vaivinemi, nau‑wawanimi yami nua‑opu nui yami onoto yai vona uvi‑ateteyei, tau paisewa‑kavokavovo yai babada ivi‑ateteyei deina. Kadu ataina tuta wayahina, aituhu aviyaivia wayahimia yami onoto eha Yaubada yana vona ivitumahane, aituhu taui eha yami vona inononi, kate aituhu yami dewa ahiahina idudueyei, apaina kadi ivi‑putu Yaubada ivitumahanei.\x + \xo 3:1 \xt Epe 5:22.\x*  
\v 2 Ka aituhu yami dewa ahiahina idudueyei, ka aituhu yawaimi tunutunuhina idudueyei, akanai inꞌ‑anamanei yami vitumahana vivane tunutunuhina kadu ahiahina.  
\v 3 Eha nau‑wawanimi yami nuanua ananina ininimi uvaivani, o apanami udedewe ahiahina, o kadi ahekwasi goula\em V\em* uweteweteni, o kadi kwama ahiahina uweteweteni deina.\x + \xo 3:3 \xt 1Ti 2:9.\x*  
\v 4 Kate itomi nau‑wawanimi yami nuanua ananina nuami uvaivani. Aituhu nuami udewa‑vidovidohei yami nua‑opu wayahina, ka aituhu nihenimia nua gomagomanina mamaei, vaivana tanoi eha na‑iakwa, kadue dewa tanoi dewa ananina Yaubada matana.  
\v 5 Tuta nonova wayahina avi tau tapanono vaivinei Yaubada ivitumahanei, taui ai vaivana nuai nihenia, vivane ivaivani dewa bigana wayahina kadu nua‑opu wayahina. Ka kadu taui awawai idewa‑didiguna‑neiei.  
\v 6 Nonova Sara awai Abaraham movina iaupu‑moimoihei deina, ka iawaehei tauna ai tau veimea. Ka aituhu itomi dewa tunutunuhina uvi‑muniei, ka aituhu eha matauta uawaehe yawaimi na‑veimeye, akanai, itomi yawaimi ahiahina Yaubada matana, Sara yawai deina.\x + \xo 3:6 \xt Nao 18:12.\x*   
\s1 Tau Tavine Ononotoi Ai Veimea  
\p
\v 7 Kadu aituhu aviyaivia wayahimia tau tavine ononotomi, itomi nau‑wawanimi yami vavine unuani taui ihanuai, kadu nau‑wawanimi uapa‑vidovidohei, ka udune‑vi‑avini ahiahina. Iuna itomi yami vavine nui yawai‑vavaha Yaubada wayahina uvaniahei. Tauna am‑venena awawaehina tanoi venemi deina. Ka aituhu eha yami vavine udune‑vi‑avini ahiahina, apaina Yaubada eha yami viama na‑nau‑pata ahiahina.\x + \xo 3:7 \xt Epe 5:25.\x*   
\s1 Tau Ekalesia Habuhabui Ai Veimea  
\p
\v 8 Ka yau vona a pai nau‑yehata habuhabumi wayahimia, nau‑wawanimi una‑ivaitemi umamaei ahiahina, kadu yami dune‑nuanuai nui udewa‑vidovidohemi aitamoata aitamoata. Kadu nau‑wawanimi unua‑opu kadu unꞌ‑ate‑nuanuaiemi.  
\v 9 Ka aituhu yaiami tupwai idewa‑goyomi, eha nau‑wawanimi ai nau‑pata wayahina udewa‑goyoi. O aituhu itana‑wavinimi, eha nau‑wawanimi ai nau‑pata wayahina utana‑wavini. Kate nau‑wawanimi uapa‑vidovidohei. Ika, dewana Yaubada ya nuanua wayahika, iuna ya nuanua wayahika ahiahina kavaniahei.  
\v 10 Ka Iginuma nihenina ivona deinake, ivona,  
\b  
\q1 “Aituhu koiaka tauna ya nuanua  
\q2 dewa‑haiawa na‑vaniahei  
\q3 auyewa habuhabuna wayahia,  
\q1 akanai tauna nau‑wawani  
\q2 vona‑kavokavovo kadu vitupu  
\q3 ainua na‑bou‑ohoi.\x + \xo 3:10 \xt Sam 34:12-16.\x*   
\q1
\v 11 Ka kadu nau‑wawani  
\q2 dewa goyogoyoi vihahaiei,  
\q1 ka dewa ahiahina dedewei  
\q2 mani tomotau wayahia,  
\q1 ka kadu nau‑wawani  
\q2 bebebewa bagibagina  
\q3 nua gomagomanina wayahina.   
\q1
\v 12 Iuna tuta habuhabuna wayahina  
\q2 yaka Kauvea tau ahiahi habuhabui  
\q3 dune‑vi‑avini,  
\q1 kadu yai viama nononi ahiahina,  
\q2 kate tau goyogoyoi vihahaiei.”   
\b  
\p
\v 13 Aituhu yami nuanua ananina ahiahina udedewei, koiaka ya nuanua vi‑goyomi? Eha tomotau habuhabui.  
\v 14 Ka aituhu aitam koiaka mamaei, ka aituhu ya nuanua vi‑goyomi, eha dewana unuani ananina. Iuna aituhu dewa ahiahina udedewei, ka aituhu inahe uvaniahei dewaia wayahi, akanai Yaubada nau‑iaiavami. Ka Iginuma voneka deina, ivona,  
\b  
\q1 “Eha nau‑wawanimi umatamatauta  
\q2 mani tomotau imatamatauta deina!  
\q3 Eha yai vona panina umatamataute.”\x + \xo 3:14 \xt Isa 8:12-13; Mat 5:10; 1Pi 2:20; 4:14.\x*   
\b  
\m
\v 15 Kate nuami nihenina nau‑wawanimi yami Kauvea Tau Ito‑yavuha uvitumahanei, kadu udewa‑didigunei. Ka aituhu koiaka vi‑tanaiemi, na‑vona, “Aviani iuna yami nua‑vaniaha nui upotapota deina? Uvo‑vi‑maheteu anꞌ‑anamanei.” Ka nau‑wawanimi uvo‑vi‑aiaimi, e yami vona‑nau‑pata ahiahina umai‑nuani. Ka eha yami nua‑goyo nui uvona‑nau‑pata, kate yami vona bigana wayahina uvo‑vi‑mahetei.   
\p
\v 16 Ka avi dewa avaha uanamanei dewa tunutunuhina Yaubada matana, tuta habuhabuna wayahina nau‑wawanimi dewaia udedewei. Ka munia, ami ayaunena hadahadanina mamaei deina. Ka aituhu aviyaivia ivona‑goyoemi, iuna itomi Tau Ito‑yavuha a tau vi‑muni‑waiwai, akanai, apaina yami dewa ahiahina inuani, ka ina‑ini‑yauyau yai vona‑kavokavovo wayahia.\x + \xo 3:16 \xt 1Pi 2:12.\x*  
\v 17 Unuani, aituhu Yaubada ya nuanua inahe uvaniahei, nau‑wawanimi inahena uvaniahei iuna dewa ahiahina udedewei, ka eha nau‑wawanimi inahena uvaniahei iuna dewa goyona udedewei.  
\v 18 Pai dune avenemi. Vona ahiahina, yaka Tau Ito‑yavuha kadu inahe vaniahei tanopia. Tauna yana dewa tunutunuhina ana noe, kate itoka yaka dewa bwagobwagona. Tauna itoka tau goyogoyoka habuhabuka yaka goyona a nau‑pata epei ininina ai nahenahea. Tauna dewei deina, iuna ya nuanua na‑omaneka Yaubada wayahina. Tuta aitamoata‑hoina wayahina ininina aniga. Vona ahiahina, tomotau ininina inau‑vi‑anigi, kate ya mini‑havine munia, tauna nuana kadu ininina imaꞌ‑vavaha.   
\p
\v 19-20 Nonova Noa ya tutea, tau maꞌ tanopi goyogoyoi imamaei. Ka tutana Noa wae yoneyonei, Yaubada potapota‑wayohe tomotaui yai nua‑vinana wayahina. Noa naunau‑wahei, kate taui ya nau‑wahena ivihahaiei. Ka munia, diwaya ani‑vainena omoi, ka tomotau ai yau 8 ai heta wae‑nana nihenina ito‑yavuha ivaniahei daudau‑nana wayahina. Ka tomotaui habuhabui igavivina diwaya nihenina, ka Yaubada nuai yohoyohoni aitam papani wayahina, e taui manua yohona nihenina imamaei deina. Ka Iesu yanꞌ aniga munia, nuana iopu, omo tomotau‑naia nuai wayahia, e nau‑wahe‑havinei.\x + \xo 3:19-20 \xt Nao 6–7.\x*   
\p
\v 21 Nonova daudau‑nana wayahina Noa yana yoko ito‑yavuha ivaniahei. Wayahina, ataina tuta wayahina kana‑vona daudau‑nana aitam pai dune aka bapitaiso wayahina. Iuna tuta ataina wayahina daudaua kavi‑bapitaiso, ka dewana wayahina tomotau kaviwavenei avaha yaka goyona wayahia kanua‑vinana, e aka ayaunena wayahina Yaubada kavi‑muni‑waiwaiei. Ka bapitaiso‑nana eha ininika a pai toa. Eha. Bapitaiso‑nana aka ayaunena a pai toa. Nonova Iesu Tau Ito‑yavuha avaha mini‑havine anigea. Ka itoka kavitumahanei apaina Yaubada na‑si‑vi‑mini‑havineka aitamoata deina. Wayahina, kavi‑bapitaiso, ka aka ayaunena nihenina kanamanei yawaika avaha vidoha Yaubada matana.  
\v 22 Ka Iesu avaha ivane wahuma, ka tuta ataina wayahina Yaubada ateina mamaei. Ka tauna tau maꞌ wahuma habuhabui veimeyei, vivane anelose habuhabui, ka wahuma a tau veimea habuhabui, ka kadu wahuma a tau bagibagi habuhabui.   
\c 4  
\p
\v 1 Tutana Tau Ito‑yavuha vi‑tomotau tanopia, tauna inahe ininina vaniahei. Wayahina, nau‑wawanimi unuanua ana pata inahe kadu uvaniahei deinake. Ka aituhu unuanua deina, uvo‑vi‑aiaimi kadu uvo‑vi‑vatumi auyewa vitai wayahia. Kadu nau‑wawanimi dewa taina unuani. Aituhu aviyaivia inahe ininia ivaniahei, taui nihenia goyona a bagibagi na‑opu.\x + \xo 4:1 \xt Rom 6:2, 7.\x*  
\v 2 Ka aituhu yawaimi nihenina inahe uvaniahei deina, akanai, aituhu avi tuta inahe‑naia ina‑iakwa, akaka eha yami nuanua tuta tuta wayahina goyona udedewe, kate yami nuanua ananina Yaubada ya nuanua udedewei.  
\v 3 Nonova, tuta tuta wayahina, dewa goyona udewa‑nubunubui. Ka ataina tau maꞌ tanopi habuhabui, taui eha Yaubada itꞌ‑anamane, idedewei deina. Yai nuanua ikenekenene, ka kadu dewa maimaiovina habuhabuna idedewei, ka kadu daudau bagibagina inimnim ivi‑kwavakwava, ka kadu ipatipati\f a \fr 4:3 \ft Vona taina omo dimdim movia. (Edu \+sls pati\+sls* \fqa Vona nihenina.)\f*, ka pati‑naia\em V\em* nihenia mani tomotau nui idaudauva, eha awawai nui, ka kadu gugua iawa‑davedavei, o yaubada vitupu iawa‑davedavei. Ka Yaubada‑hoina dewai habuhabui nau‑nikonikoiei.\x + \xo 4:3 \xt Epe 2:2-3.\x*  
\v 4 Ataina idedewei deina, kadu nuai ivi‑tupatupa wayahimi, iuna dewaia goyona uvihahaiei, kadu tuta ataina eha nui uta‑dedewe. Wayahina, iapa‑goyogoyoemi.  
\v 5 Kate apaina, taui nau‑wawani Yaubada matana imimini, e yai dewa goyo‑naia ivo‑vi‑mahetei. Ka ai dewa‑yaiyai ivaniahei tauna wayahina. Iuna tauna ya nuanua mamaei, e tomotau yawayawai kadu tomotau aninigai na‑nau‑yanahi, e ai nau‑pata vi‑nua‑dadani. Aituhu yai dewa ahiahi, e ai nau‑pata ahiahina ivaniahei. O aituhu yai dewa goyogoyoi, e ai nau‑pata goyona ivaniahei.\x + \xo 4:5 \xt Dew 10:42.\x*  
\v 6 Dewana wayahina, Iesu iopu omo taui aninigai tanoi wayahia, e Vaneana Ahiahina nau‑waheyei wayahia. Taui yai dewa tanopia goyona, ka nonova Yaubada nau‑yanahi‑neiei. Ka taui ai dewa‑yaiyai avaha ivaniahei dewaia wayahi, ka inini avaha ianiga iakwa. Kate Yaubada ya nuanua apaina nuai ividoha, e imaꞌ‑vavaha Yaubada deinake.   
\p
\v 7 Ka tuta ataina wayahina avaha dewa habuhabuna tanopi taina wayahina a pai nau‑yehata vi‑maupwani. Wayahina, nau‑wawanimi unuanua tunutunuhina kadu nau‑wawanimi yawaimi uveimeyei ahiahina. Aituhu udedewei deina, ami pata uviama ahiahina. Aituhu eha udedewe deina, eha ami pata uviama bagibagina.\x + \xo 4:7 \xt Rom 13:11-12.\x*  
\v 8 Kadu nau‑wawanimi ananina udewa‑vidovidohemi ahiahina kadu bagibagina. Iuna dewa‑vidovidoha dewa habuhabuna vane‑tawanei, kadu dewa‑vidovidoha ana pata goyona habuhabui na‑nua‑tavuni.\x + \xo 4:8 \xt 1Pi 1:22.\x*  
\v 9 Ka aituhu avi tuta yaiami uhonei inau‑hohona yami manua wayahia, akanai, nau‑wawanimi yami dewa‑haiawa nui udedewei, ka eha yami nua‑vita nui.\x + \xo 4:9 \xt Ebe 13:2.\x*   
\p
\v 10 Yaubada avaha aitamoata aitamoata wayahimia am‑venena‑kavovo tunina tunina venemi, ka nau‑wawanimi am‑vene‑naia wayahia una‑ivaitemi. Ka itomi Yaubada yanꞌ am‑venena awawaehina wayahimia uveimeyei tunuhina deina.\x + \xo 4:10 \xt Rom 12:6-8.\x*  
\v 11 Ka aituhu koiaka wayahimia haehae, tauna nau‑wawani haehae Yaubada ana heta haehae deina, ka tauna yana vona nau‑wawani Yaubada ana heta ya vonana deinake. Ka aituhu koiaka wayahimia yaiana ivaitei, tauna nau‑wawani aituhu avi bagibagi Yaubada nꞌ‑awaehei, akanai, bagibagi‑nana wayahina yaiana na‑ivaitei ahiahina. Iuna yama nuanua ananina dewa habuhabuna wayahina Yaubada anꞌ awa‑dava na‑nata yaka Kauvea Iesu Tau Ito‑yavuha wayahina. Yau viama vivane tauna didigana kadu ya bagibagi imaꞌ‑vavaha. Ana pata deina.   
\p
\v 12 Ka yaiau, eha nau‑wawanimi unua‑tupatupa pai vito‑nubu vitai habuhabui wayahia. Avaha nau‑dadanaia tanoi uvaniahei. Ka eha unuanua vivane nau‑dadanaia ivinꞌ‑omo‑kavovo wayahimia.  
\v 13 Kate nau‑wawanimi udewa‑haiawa vitaia wayahina. Iuna nonova Iesu Tau Ito‑yavuha vita vaniahei, ka ataina kadu itomi uvaniahei deinake. Ka munia, avi auyewa tauna didigana na‑omo kadueyei, auyewana wayahina udewa‑haiawa ananina.\x + \xo 4:13 \xt Dew 5:41; Iam 1:2; 1Pi 1:6-7.\x*   
\p
\v 14 Ka aituhu tomotau imana‑giboemi yami vitumahana Tau Ito‑yavuha wayahina, nau‑wawanimi udewa‑haiawa dewana wayahina. Iuna Didiga Nuana kadu Yaubada Nuana itomi nui umamaei.\x + \xo 4:14 \xt 1Pi 2:20.\x*  
\v 15 Ka aituhu inahe uvaniahei, eha nau‑wawanimi inahena uvaniahe iuna goyona udedewe tau nau‑vi‑aniga deina, o kadi tau vainau deina, o kadi tau dewa‑kavokavovo deina. Taui yai dewaia wayahi ai dewa‑yaiyai ivaniahei akanai, ka dewana tunuhina.  
\v 16 Kate aituhu uvi‑Kirisitiani\em V\em*, ka aituhu inahe uvaniahei yami dewaia ahiahina wayahia, eha una‑ini‑yauyau inahena wayahina, kate nau‑wawanimi Yaubada unꞌ‑awa‑davedavei, iuna itomi Iesu ya tomotau.  
\v 17 Unononi. Nau‑yanahi ana tuta avaha vi‑maupwani, ka Yaubada tomotau habuhabuka na‑nau‑yanahika. Ka dewana vi‑putu itoka tau ekalesia wayahikaia, vivane Yaubada ya tomotau wayahikaia. Ka unuani. Nau‑yanahina vi‑putu itoka tau ekalesia wayahikaia, ka itoka aka nau‑pata kavaniahei akanai. Kate aituhu nau‑yanahi vitana itoka tau ekalesia wayahika, auyewana wayahina taui Yaubada Vaneana Ahiahina ivihahaiei medeina? Kaiwadi, taui ai dewa‑yaiyai ani‑vainena ivaniahei, a?  
\v 18 Ka Iginuma nihenina ivona deina, ivona,  
\b  
\q1 “Eha memeanina tau tunutunuhi  
\q2 yai ito‑yavuha ivaniahei.  
\q1 Ka aituhu taui wayahi deina,  
\q2 medeina tau gawagawami ivaniahei,  
\q3 o kadi medeina tau goyogoyoi ivaniahei?”\x + \xo 4:18 \xt V.T 11:31.\x*   
\b  
\p
\v 19 Wayahina, aituhu aviyaivia inahe ivaniahei iuna Yaubada ya nuanua ivaniahei deina, akanai, taui nau‑wawani nuai kadu yawai ainua inꞌ‑awaehei Yaubada ai tau vevewana wayahina. Iuna tuta habuhabuna wayahina tauna yana vona ka yana dewa aitamoata. Wayahina, taui nau‑wawani dewa ahiahina idewa‑nubunubui, eha ibou‑oho.   
\c 5  
\s1 Pita Yana Vona Tau Dune‑vi‑avina Wayahi  
\p
\v 1 Yauke tau ekalesia ai tau dune‑vi‑avina aitam, ka nonova yaka Tau Ito‑yavuha ana inahe mataua adudueyei. Ka apaina, avi tuta wayahina tauna didigana si‑vinꞌ‑omanei kadueyei, yauke kadue didigau avaniahei tauna wayahina. Ka yau vona taina itomi tau ekalesia ai tau dune‑vi‑avina wayahimia.  
\v 2 Itomi ananimi nau‑wawanimi Yaubada yana sipi\em V\em* udune‑vi‑avini ahiahina. Kadu aituhu yami nuanua nui paisewana udedewei, dewana ahiahina. Iuna Yaubada ya nuanua wayahimi udedewei deina. Ka aituhu yami nua‑vita nui udedewei, iuna ami veimea mamaei udedewei, dewana eha ahiahina. O aituhu yami nuanua ananina kina uvaniahei ami nau‑pata wayahina, e unua‑tania, dewana eha ahiahina. Kate aituhu yami nuanua ananina vavaneimi una‑ivaitei, nuanuana ahiahina.\x + \xo 5:2 \xt Ioni 21:15-17; Dew 20:28.\x*   
\p
\v 3 Yaubada tauna yana sipi\em V\em* tanoi awaehemi udune‑vi‑avini tanopia. Wayahina, eha nau‑wawanimi yami nua‑vane nui yawai uveimeyei. Kate nau‑wawanimi dewa ahiahina udewa‑nubunubui, e yawaimi ivi‑pai dune ahiahina wayahi deinake.\x + \xo 5:3 \xt 2Ko 1:24; Pili 3:17; Tit 2:7.\x*  
\v 4 Ka apaina, avi tuta wayahina yaka Tau Dune‑vi‑avina Ananina na‑omo kadueyei, akanai, auyewana wayahina kadu itomi ami nau‑pata ahiahina uvaniahei tauna wayahina, vivane didigami maꞌ‑vavaha.   
\s1 Pita Yana Vona Tubuao Wayahi  
\p
\v 5 Kadu itomi tau ekalesia ka tubuao, itomi nau‑wawanimi ononotoi anani uvi‑ateteyei, kadu yai vona uvi‑muniei deina. Ka habuhabumi nau‑wawanimi unua‑opu, ka kadu aitamoata aitamoata wayahimia una‑ivaitemi. Iuna Iginuma haeyeka deina, ivona,  
\b  
\q1 “Yaubada tau nua‑vane vito‑potai,  
\q2 kate tau nua‑opu nꞌ‑ate‑nuanuaiei.”\x + \xo 5:5 \xt V.T 3:34; Epe 5:21; Iam 4:6.\x*   
\b  
\p
\v 6 Wayahina, nau‑wawanimi unua‑opu Yaubada matana, iuna tauna bagibagi‑vainena, ka apaina, avi tuta ahiahina ya nuanua wayahina, tauna nimana wayahina na‑si‑naimi, kadu didigami na‑venemi.\x + \xo 5:6 \xt Mat 23:12; Luk 14:11; Iam 4:10.\x*  
\v 7 Ka aituhu avi tuta ami vita imamaei, akanai, vitai habuhabui wayahi Yaubada uviamei, ka tauna yami viama na‑nononi, iuna tauna dune‑nuanuaiemi.\x + \xo 5:7 \xt Mat 6:25-30.\x*   
\p
\v 8 Kadue nau‑wawanimi aitamoata aitamoata wayahimia yawaimi udune‑vi‑avini ahiahina, iuna ami havia ananina ana wava Satana mamaei, ka tauna aitam vahitau udaudana ana wava lioni\em V\em* deina, vivane manimaninina. Ka tuta habuhabuna wayahina tutu‑vivivina ka movina ananina tana‑gaugau, ka nau‑mwanehimi, nꞌ‑animi.\x + \xo 5:8 \xt 1Te 5:6.\x*  
\v 9 Ka itomi nau‑wawanimi umimini toyoina, ka Satana unau‑voi‑onei. Ka yami vitumahana bagibagina wayahina utoha‑vi‑anaimi, iuna avaha uanamanei, vavaneika Iesu a tau vitumahana papani habuhabui wayahia kadu vita‑naia ivaniahe aitamoata deinake.\x + \xo 5:9 \xt Epe 6:11-13; Iam 4:7.\x*   
\p
\v 10 Ka apaina, avaha utoha‑vi‑anaimi tuta kutakutana wayahina, Yaubada ana heta na‑bou‑vidohemi, kadu na‑vo‑vi‑toyoimi, ka kadu na‑vo‑vi‑bagibagimi. Ka munia, ami pata umimini‑vavaha ahiahina tauna matana. Am‑venena awawaehina habuhabuna vinꞌ‑omo tauna wayahina. Ka unuani, Yaubada avaha honeka Tau Ito‑yavuha wayahina kanꞌ‑omo, e Yaubada tauna didigana maꞌ‑vavaha na‑vo‑pataka.  
\v 11 Wayahina, yau viama bagibagi‑vavaha tauna wayahina mamaei. Ana pata deina.   
\p
\v 12 Yami leta kutakutana taina aginumi, iuna yau nuanua yau vonaia wayahina unꞌ‑ate‑vatu, kadu yau nuanua unꞌ‑anamanei am‑venena awawaehina tanoi vivane am‑venena awawaehi‑hoina Yaubada wayahina kavaniahei. Wayahina, nau‑wawanimi umimini toyoina kadu uvitumahanei ahiahina.  
\p Ka Silasi aitam tau ekalesia ahiahina, ka ya vitumahana eha vitupu, ka tauna ivaiteu yami leta taina aginumi.\x + \xo 5:12 \xt Dew 15:22, 37-40; 12:2, 25; 13:13.\x*   
\p
\v 13 Ka kadu tau ekalesia papani taina Babiloni\f a \fr 5:13 \ft Tau sinasinapui ivoneka \+sls Babiloni\+sls* aitam vona baimina \fqa meagai Rom wayahina. Kadu buki Si‑vinꞌ‑omana nihenina itomani \sls Babiloni\sls* deinake, ka tomotau tupwai ivitumahanei anꞌ anamana vivane \fqa Rom.\f* nihenina inau‑kaiwemi. Yaubada taui vi‑nua‑dadanei, itomi vi‑nua‑dadanemi aitamoata deina. Kadu natu Marika nau‑kaiwemi.\x + \xo 5:13 \xt 2Ti 4:11; Dew 12:2.\x*   
\p
\v 14 Kadu aitamoata aitamoata wayahimia nau‑wawanimi unau‑kaiwemi mao ahihinata wayahina, e yami dewa‑vidovidoha uviwavenemi deina.  
\p Ka yauke yau viama Yaubada wayahina taina, aituhu aviyaivia yaka Tau Ito‑yavuha idewa‑vidovidohei, akanai, nua gomagomanina Yaubada wayahina ivaniahei.  
\m Ana pata deina.  
\m \sig Yauke Pita\sig*