\id 1JN - Minaveha NT [mvn] -Papua New Guinea 2008 (DBL 2017) 
\h 1 Ioni 
\toc1 Ioni Ya Iginuma Naona 
\toc2 1 Ioni 
\toc3 1Io 
\mt1 Ioni  
\mt2 Ya Iginuma  
\mt1 Naona  
\is1 Buki Taina Wayahina  
\ip Tomotau habuhabui ivitumahana buki taina a tau ginuma Sebedi natuna ana wava Ioni, Iesu a tau hae ananina aitam. Tauna mani buki kadu mani leta ginumi \bk Awaeha Vovouna\bk* taina nihenina.  
\ip Ka pai mini leta taina nihenina aitonu. (1) Ioni ya nuanua itoka tau ekalesia Yaubada kadu tauna Natu‑hoina Iesu Tau Ito‑yavuha nui kavi‑yaianei. (2) Ka ya nuanua itoka tau ekalesia mani tau ekalesia kadune‑nuanuaiei kadu kadewa‑vidovidohei. (3) Ka ya nuanua itoka tau ekalesia nau‑vi‑avinika leta taina wayahina tau viwavenena vitupu wayahi.  
\ip Ioni avaha anamanei viwavenena vitupu ana pata tau ekalesia yai vi‑yaiana Yaubada wayahina kadu Iesu wayahina vi‑goyoi. Ka kadu anamanei viwavenena vitupu dewa goyona nꞌ‑awaehei na‑nu ekalesia nihenina.  
\ip Tau viwavenena vitupu ivonavona tanopi taina goyona, ka aituhu aviyaivia tanopi taina wayahina ini‑awana, dewa goyona vinꞌ‑omo dewaia wayahina. Tau vitupu‑naia iawaehei Iesu ahihinata. Wayahina, ivitumahana eha ana pata Iesu vi‑tomotau itoka tomotau deina. Ka aituhu deina, tauna vi‑gawama tanopia. Ka kadu aituhu tauna vi‑tomotau, ana pata nꞌ‑aniga. Kate taui eha ivitumahana tauna aniga. Ka kadu tau vitupu‑naia ivonavona eha ana pata ininika ito‑yavuha ivaniahei, kate nuaka ana heta ana pata ito‑yavuha ivaniahei. Ka aituhu deina, aviani tomotau yai nuanua idedewei inini nihenina, vivane kenene o mani dewa goyona, dewaia eha aitam aviani. Iuna ininika eha aitam aviani Yaubada matana.  
\ip Ioni anamanei viwavenena tanoi vitupu. Vona ahiahina, Iesu vi‑tomotau, itoka tomotau deina. Ka kadu tauna yanꞌ aniga dewa ananina. Aituhu eha yanꞌ aniga, akanai eha ana pata tauna aniga wayahina na‑mini‑havine!  
\ip Ioni ya nuanua itoka tau ekalesia habuhabuka Yaubada kadewa‑vidovidohei, ka kadu tauka nau‑wawanika mani tau ekalesia kadewa‑vidovidohei.  
\c 1  
\s1 Yawai Ana Vona  
\m
\v 1 Tuta naona a itoava tuta ataina wayahina, Yawai ana Vona maꞌ‑vavaha. Vonana wayahina aginuginumi wayahimia. Tauna avaha tanihaia anononi, kadu mataia adueyei. Tauna avaha adune‑vi‑anai, kadu onotona nimaia avo‑dadani, ka dewaia avaha anamane‑yehai, akanai ataina ahaehaeyei.\x + \xo 1:1 \xt Ioni 1:1.\x*  
\v 2 Iuna tauna avaha omoi, ka itoai avaha adueyei, kadu ataina ahaehaeyei wayahimia. Nonova Yawai‑vavaha ka Amana ainua imamaei, ka munia omo wayahiaia, adueyei. Ka tuta ataina wayahina tauna anaunau‑waheyei wayahimia.\x + \xo 1:2 \xt Ioni 1:14.\x*  
\v 3 Ka itoai avaha tauna yana dewa adueyei kadue anononi, ka ataina wayahimia ahaehaeyei, e yama nuanua vivane itomi nui kavi‑yaiana. Iuna itoai avaha Amaka kadue tauna Natu‑hoina Iesu, Tau Ito‑yavuha, nui avi‑yaiana.  
\v 4 Wayahina yami leta taina aginuginumi, una‑iavi, e unꞌ‑anamanei adewa‑haiawa‑iaua.\x + \xo 1:4 \xt Ioni 16:24.\x*   
\s1 Yaubada Maheta‑hoina  
\p
\v 5 Ka aitam mataeda Yaubada Natu‑hoina wayahina anononi, e ataina amataedami. Ka mataedana taina. Yaubada vivane maheta‑hoina, ka eha aitam aviani novanovanina tauna nihenina.\x + \xo 1:5 \xt 1Ti 6:16; Iam 1:17.\x*  
\v 6 Aituhu novanovanina a papania emamaei, ka aituhu evonavona, “Avaha Yaubada nui avi‑niana,” akanai wamke yam vonana vivane vona vitupu, ka eha dewa tunuhina ededewe.\x + \xo 1:6 \xt 1Io 2:4.\x*  
\v 7 Kate Yaubada maheta a papania mamaei. Wayahina, aituhu maheta a papania tauna nui kamamaei, ana pata habuhabuka kavi‑yaiana ahiahina, kadu Yaubada Natu‑hoina, vivane Iesu, tauna dayahina hadahadanika yaka goyona aitamoata aitamoata wayahina.   
\p
\v 8 Aituhu evonavona, “Yauke ahiahiu. Eha aitam dewa goyona ata‑dewe,” akanai vonana wayahina taum enonom, ka vona tunutunuhina eha ta‑mamae nihenima.\x + \xo 1:8 \xt Sam 32:5; V.T 28:13.\x*  
\v 9 Ka aituhu yaka goyona kahaehaeyei ahiahina, kadu aituhu kanua‑vinana dewaia wayahia, akanai Yaubada dewaia goyona aitamoata aitamoata wayahia na‑nua‑piahika, kadu yaka goyona habuhabuna na‑nosi‑yavuneyeka. Iuna tuta tuta tauna yana vona ka yana dewa aitamoata, ka nonova tauna ya vona‑dabadaba boui vivane dewei deina.  
\v 10 Aituhu evonavona, “Eha aitam tuta goyona ata‑dewe,” vonana anꞌ anamana vivane, “Yaubada vivane tau vitupu.” Aituhu ededewei deina, Yaubada yana vona eha aitam pai vi‑ai yawaim nihenina.   
\c 2  
\s1 Iesu, Yaka Tau Ito‑yavuha  
\p
\v 1 Natunatu, adune‑nuanuaiemi, ka yami leta taina aginumi omomo wayahimia. Iuna yau nuanua dewa goyona uvihahaiei. Kate aituhu aviyaivia wayahikaia Yaubada ya veimea itana‑bwegei, akanai taui nau‑wawani inuani yaka tau ivaita mamaei. Tauna Iesu, yaka Tau Ito‑yavuha, kadu Tau Tunutunuhina. Kadu tauna Amaka matana ipuipupu‑tana‑pota wayahika.\x + \xo 2:1 \xt Ebe 7:25-26; 9:24.\x*  
\v 2 Iesu awaeha tomotau tauna inau‑vi‑anigi. Ka dewana wayahina tauna yaka goyona a dewa‑yaiyai epei. Tauna vivane pai vi‑nomu a vahitau deina. Ka tauna yanꞌ aniga wayahina yaka goyona wayahi Yaubada nau‑patei. Ka nau‑patana ana pata itoka yaka goyona wayahi, kadu ana pata tau maꞌ tanopi habuhabui yai goyona wayahi.\x + \xo 2:2 \xt Ioni 1:29; Kol 1:20; 1Io 4:10.\x*   
\p
\v 3 Ka aituhu Yaubada ya veimea kavi‑ateteyei, akanai aka pata kanꞌ‑anamaneka vivane avaha tauna kanamane‑vidohei deina.  
\v 4 Kate aituhu aviyaivia ivonavona, “Yauke Yaubada a niam,” ka aituhu eha Yaubada ya veimea idedewe, akanai taui tau vitupu, ka vona tunutunuhina eha ta‑mamae taui nihenia.  
\v 5 Kate aituhu aviyaivia Yaubada yana vona ivi‑ateteyei, akanai apaina taui Yaubada ya dewa‑vidovidoha inꞌ‑anamane‑yehai. Ka medeina aka pata kanꞌ‑anamanei itoka Yaubada nihenina kamamaei?\x + \xo 2:5 \xt Ioni 14:21, 23.\x*  
\v 6 Aituhu aviyaivia ivonavona, “Yauke Yaubada nihenina amamaei,” akanai taui nau‑wawani Iesu yana dewa idedewei aitamoata deina.   
\s1 Veimea Vovouna Wayahina  
\p
\v 7 Yaiau, adewa‑vidovidohemi, ka ataina ami veimea aginumi wayahimia, kate veimeana eha vovouna, kate tutuaina. Tuta naona a itoava tuta ataina wayahina, veimeana wayahimia mamaei. Ka veimeana tutuaina taina avaha unononi, kadu avaha uanamanei.\x + \xo 2:7 \xt Ioni 13:34; 2Io 5-6.\x*  
\v 8 Ka kadu ataina veimeana aginumi wayahimia, akanai kana‑vona vivane veimea vovouna. Ka veimeana kadueyei vivane tunuhina Iesu nihenina, kadu tunuhina itomi nihenimia. Iuna maheta maꞌ‑vavaha avaha vanavana, ka ataina tuta novanovana novonovo.\x + \xo 2:8 \xt Rom 13:12; Ioni 1:9.\x*   
\s1 Aituhu Kadewa‑vidovidoheka, Maheta Nihenina Kamamaei Deina  
\p
\v 9 Aituhu aviyaivia ivonavona, “Maheta niheniua mamaei,” kate aituhu taui vavanei inau‑nikonikoiei, akanai taui yai vona vitupu. Iuna nonova a itoava tuta ataina wayahina, taui novanovanina nihenina imamaei.\x + \xo 2:9 \xt 1Io 4:20.\x*  
\v 10 Ka aituhu aviyaivia mahetana nihenina imamaei, taui vavanei idewa‑vidovidohei. Wayahina, eha aitam aviani goyona taui nihenia, e munia vi‑pai vito‑paine.\x + \xo 2:10 \xt Rom 14:13.\x*  
\v 11 Kate aituhu aviyaivia vavanei inau‑nikonikoiei, taui novanovana nihenina imamaei, kadu taui novanovana nihenina ini‑awana. Ka taui eha itꞌ‑anamane aveta baina ineine, iuna novanovana matai bou‑potepotei.\x + \xo 2:11 \xt Ioni 12:35.\x*   
\p
\v 12 Itomi natunatu yaka vitumahana nihenina, kadu adune‑nuanuaiemi. Ataina aginuginumi wayahimia, iuna Yaubada avaha yami goyona habuhabuna nua‑piahi‑neiei Iesu a wavea, iuna tauna ya paisewa wayahina.  
\v 13 Ka itomi ananimi, ataina aginuginumi wayahimia, iuna itomi avaha tauna uanamanei, ka tuta naona a itoava tuta ataina wayahina tauna maꞌ‑vavaha. Kadu itomi tupunata, ataina aginuginumi wayahimia, iuna avaha Tau Goyogoyona ubagibagi‑tawanei, tauna kadu ana wava Satana.   
\p
\v 14 Itomi natunatu, avaha aginumi wayahimia, iuna avaha Amaka uanamanei. Ka itomi ananimi, avaha aginumi wayahimia, iuna avaha tauna uanamanei, e tuta naona a itoava tuta ataina wayahina tauna maꞌ‑vavaha. Kadu itomi tupunata, avaha aginumi wayahimia, iuna itomi bagibagimi, ka Yaubada yana vona nihenimia mamaei, ka kadu avaha Tau Goyogoyona ubagibagi‑tawanei.   
\p
\v 15 Eha unꞌ‑awaehe tanopi taina nuami nꞌ‑epe. Iuna aituhu gugua baina tanopia nuami nꞌ‑epei, o kadi aituhu tanopi ana dewa nuami nꞌ‑epei, apaina Amaka uvi‑nua‑pania, kadu eha ami pata Yaubada udewa‑vidovidohe.\x + \xo 2:15 \xt Rom 8:7.\x*  
\v 16 Avonemi deina, iuna tanopi ana dewa habuhabui eha Yaubada wayahina ita‑vinꞌ‑omo, kate ivinꞌ‑omo tau maꞌ tanopi wayahia. Ka tanopi a dewaia vivane tau goyogoyona ai nua‑hivahivana, kadu yai nuanua gugua baina tanopia wayahi, kadu yai nua‑vane yai gugua wayahi, kadu yai nua‑vane taui yai dewa wayahi.\x + \xo 2:16 \xt Rom 13:14.\x*  
\v 17 Tanopi taina, kadu tau maꞌ tanopi yai nuanua gugua baina tanopia wayahi eha imaꞌ‑vavaha, ka ainua imaimaiova. Ka aituhu aviyaivia Yaubada ya nuanua idewa‑nubunubui, akanai taui yawai‑vavaha ivaniahei.\x + \xo 2:17 \xt Mat 7:21.\x*   
\s1 Yaka Tau Ito‑yavuha A Havia Ananina  
\p
\v 18 Natunatu, adune‑nuanuaiemi. Ka tuta pai nau‑yehata tanopi wayahina avaha omo! Ka nonova mataeda unononi vivane yaka Tau Ito‑yavuha a Havia Ananina na‑omo. Ka ataina yaka Tau Ito‑yavuha a havia habuhabui avaha iomo tanopia, imamaei, kadue itoka kadudueyei. Wayahina, kanamane‑vidohei ataina vivane tuta pai nau‑yehata tanopi wayahina.\x + \xo 2:18 \xt Mat 24:5, 24; 2Io 7.\x*  
\v 19 Nonova haviaia itoka nui kamamaei, kate taui ini‑tawaneka. Aituhu taui tau vitumahana‑hoi, akanai taui nau‑wawani ataina nui kamamae. Kate avaha yai nae kadueyei. Wayahina, ataina avaha kanamanei taui tau vitupu.\x + \xo 2:19 \xt Dew 20:30.\x*   
\p
\v 20 Kate itomi eha taui deina. Iuna Iesu avaha Nuana Ahihinata ito‑iwahi wayahimia. Wayahina, tauna nihenimia mamaei, ka habuhabumi avaha nua‑uya tunutunuhina uanamanei.\x + \xo 2:20 \xt 1Ko 2:15; 2Ko 1:21; 2Io 2.\x*  
\v 21 Ka itomi eha mwagemwagemi. Iuna itomi avaha nua‑uya tunutunuhina uanamanei. Ka kadu avaha uanamanei vitupu eha aitam tuta vinꞌ‑omo dewa tunutunuhina wayahina. Wayahina, yami leta taina aginumi omomo wayahimia.   
\p
\v 22 Ka aviyaivia tau vitupu? Tau vitupu Iesu ivi‑ebuei, kadu ivonavona, “Iesu eha yaka Tau Ito‑yavuha.” Aituhu aviyaivia ivonavona deina, taui Tau Ito‑yavuha a havia. Iuna taui Amaka kadu tauna Natu‑hoina ainua ivihahaiei.\x + \xo 2:22 \xt 1Io 4:3; 2Io 7.\x*  
\v 23 Ka aituhu aviyaivia ivonavona, “Yauke Yaubada anamanei,” kate aituhu taui tauna Natu‑hoina ivihahaiei, akanai taui kadu eha Amana itꞌ‑anamane, ka kadu Amana ivihahaiei deina. Kate aituhu aviyaivia iawaehei Natu‑hoina vivane yaka Tau Ito‑yavuha, akanai Iesu taui nihenia mamaei, kadue Amana kadu taui nihenia mamaei.\x + \xo 2:23 \xt Ioni 5:23; 1Io 4:15; 5:1.\x*   
\p
\v 24 Itomi udune‑vivinimi ahiahina! Kadu avi nua‑uya naona unononi ka ataina avaha uvitumahanei, akanai nau‑wawanimi nua‑uyana unua‑vi‑anai, ka nihenimia upoyꞌ‑avini. Aituhu nua‑uyana nihenimia mamaei, itomi Amaka kadu tauna Natu‑hoina nui umaꞌ‑vavaha.  
\v 25 Nonova Iesu ya vona‑dabadabana veneka, vivane yawai‑vavaha kavaniahei.   
\p
\v 26 Yami leta taina aginumi wayahimia, iuna yau nuanua taui inono‑dadanimi unꞌ‑anamanei.  
\v 27 Kate taumi eha tau nono‑naia deina. Iesu avaha Nuana Ahihinata ito‑iwahi wayahimia. Ka aituhu Nuana Ahihinata nihenimia mamaei, akanai itomi eha nau‑wawanimi aitam koiaka unꞌ‑awaehe na‑viwavenemi. Iuna Nuana Ahihinata nua‑uya habuhabuna viwavenemi, ka tauna ya nua‑uya tunutunuhina, eha vitupu. Wayahina, nau‑wawanimi tauna ya viwavenena habuhabuna uvi‑muni‑waiwaiei, e yaka Tau Ito‑yavuha nihenina umamaei deina.\x + \xo 2:27 \xt Ioni 16:13.\x*   
\p
\v 28 Ika, natunatu, itoka nau‑wawanika Tau Ito‑yavuha nihenina kamamaei. Aituhu kadedewei deina, avi tuta tauna na‑mavi‑havine, akanai itoka eha yaka matauta nui, kadu eha kana‑ini‑yauyau tauna matana. Kate tauna ya mavi‑havine ana tuta wayahina, itoka aka pata kanꞌ‑ate‑vatu kadu kadewa‑haiawa matana.  
\v 29 Ka avaha uanamanei, yaka Tau Ito‑yavuha tunutunuhina. Ka kadu nau‑wawanimi unꞌ‑anamanei aituhu aviyaivia dewa ahiahina idedewei, akanai taui Yaubada natunatuna.\x + \xo 2:29 \xt 1Io 3:10.\x*   
\c 3  
\s1 Yaubada Natunatuna  
\p
\v 1 Udu! Amaka dewa‑vidovidoheka, ka tauna ya dewa‑vidovidoha wayahika ani‑vainena! Tauna avaha wayahika ivona, “Taui natunatu”. Wayahina, akanai, itoka vivane natunatuna. Vona ahiahina, tau maꞌ tanopi eha ai pata yaka dewa wayahia inua‑hau. Iuna taui eha Yaubada itꞌ‑anamane.\x + \xo 3:1 \xt Ioni 1:12-13; 16:3.\x*  
\v 2 Yaiau, adewa‑vidovidohemi, ka vona ahiahina itoka avaha Yaubada natunatuna. Ka ataina tuta eha katꞌ‑anamane‑vidoha tuta munia itoka medeina. Kate avaha kanamanei avi tuta Iesu na‑mavi‑havine, akanai auyewana wayahina tauna matakaia kadueyei, kadu auyewana wayahina itoka aka dune ka tauna ana dune aitamoata deina.\x + \xo 3:2 \xt 2Ko 3:18.\x*  
\v 3 Ka aituhu aviyaivia yai nua‑vaniaha nui Tau Ito‑yavuha ipotepotei, akanai tuta tuta taui yawai inau‑vunavunahi ahihinata, Iesu yawaina ahihinata deina.   
\p
\v 4 Kate aituhu aviyaivia dewa goyona idedewei, vona ahiahina, taui Yaubada ya veimea iawa‑viaohei. Iuna dewa goyona anꞌ anamana vivane tomotau yai nuanua Yaubada ya veimea itana‑bwegebwegei.  
\v 5 Ka avaha uanamanei, yaka Tau Ito‑yavuha omo tanopia, iuna ya nuanua yaka dewa goyona habuhabuna nꞌ‑epa‑yavune‑neiei, kadu avaha uanamanei tauna nihenina eha aitam aviani goyona.\x + \xo 3:5 \xt Ioni 1:29; 1Pi 2:22-24; 1Io 2:2.\x*  
\v 6 Wayahina, aituhu aviyaivia Iesu nihenina imamaei, tuta tuta taui eha goyona ita‑dewa‑nubunubu. Kate aituhu aviyaivia goyona idewa‑nubunubui, eha aitam tuta taui Iesu ita‑dueye, kadu eha aitam tuta taui tauna itꞌ‑anamane.   
\p
\v 7 Natunatu, adune‑nuanuaiemi. Eha nau‑wawanimi tomotau unꞌ‑awaehe inonomi viwavenena vitupu wayahina. Aituhu aviyaivia yai dewa tunutunuhina, akanai taui tau tunutunuhina, yaka Tau Ito‑yavuha tau tunutunuhina deina.  
\v 8 Aituhu aviyaivia dewa goyona idewa‑nubunubui, taui Satana yana yoko. Iuna tuta naona a itoava tuta ataina wayahina, Satana dewa goyona dedewei. Wayahina, Yaubada Natu‑hoina omo tanopia, ka ya nuanua tauna Satana yana dewa habuhabuna na‑vita‑vovoni.\x + \xo 3:8 \xt Ioni 8:44.\x*   
\p
\v 9 Aituhu aviyaivia yai tupua vovouna vinꞌ‑omo Yaubada wayahina, akanai taui eha goyona ita‑dewa‑nubunubu. Iuna Yaubada Nuana taui nihenia mamaei. Wayahina, taui eha ai pata goyona idewa‑nubunubu. Iuna taui amai vivane Yaubada.\x + \xo 3:9 \xt 1Io 5:18.\x*  
\v 10 Wayahina aka pata Yaubada natunatuna kadu Satana natunatuna kanꞌ‑anamane‑vidohei. Aituhu aviyaivia dewa tunutunuhina ivihahaiei, akanai taui eha Yaubada natunatuna. O kadi deina, aituhu aviyaivia eha vavanei idewa‑vidovidohe, taui eha Yaubada natunatuna.   
\s1 Kadewa‑vidovidoheka  
\p
\v 11 Ka tuta naona a itoava tuta ataina wayahina, mataeda taina unononi, e Yaubada ya nuanua aitamoata aitamoata wayahikaia nau‑wawanika yaiaka kadewa‑vidovidohei.\x + \xo 3:11 \xt Ioni 13:34.\x*  
\v 12 Ka eha nau‑wawanika itoka yaka dewa onoto ana wava Kaini yana dewa deina. Tauna Satana natuna, wayahina tauna vaneina vunui, nau‑vi‑anigi. Ka aviani wayahina tauna vaneina vunui? Kaini tauna vaneina vunui, iuna vaneina yana dewa ahiahina, kate tauna yana dewa goyona. Wayahina, Kaini tauna vaneina vi‑bwanouei.\x + \xo 3:12 \xt Nao 4:8.\x*   
\p
\v 13 Vavaneiu, aituhu tau maꞌ tanopi inau‑nikonikoiemi, eha nau‑wawanimi nuami venau‑tamatamana dewana wayahina.\x + \xo 3:13 \xt Ioni 5:18-19.\x*  
\v 14 Itoka kanamanei ahiahina avaha aniga a papani kani‑tawanei, kadu avaha yawai‑vavaha a papani wayahina kaubo‑tamane. Ka medeina kanamanei deina? Iuna itoka yaiaka kadewa‑vidovidohei. Aituhu aviyaivia eha yaiai idewa‑vidovidohe, akanai taui aniga a papani nihenina imamaei.\x + \xo 3:14 \xt Ioni 5:24.\x*  
\v 15 Ka aituhu aviyaivia vavanei inau‑nikonikoiei, akanai taui tau nau‑vi‑aniga. Ka avaha uanamanei, eha ana pata yawai‑vavaha mamae aitam tau nau‑vi‑aniga nihenina.\x + \xo 3:15 \xt SiV 21:8.\x*  
\v 16 Iesu yaka Tau Ito‑yavuha tauna yawaina awaehei, e tauna aniga wayahika. Ka dewana wayahina avaha dewa‑vidovidoha anꞌ anamana kanꞌ‑anamanei. Wayahina, itoka nau‑wawanika kadu yawaika kawaehei kanꞌ‑aniga vavaneika wayahi!\x + \xo 3:16 \xt Ioni 13:1; Gal 1:4.\x*  
\v 17 Ka aituhu avi tau kaikaiwabo ai niam yana maꞌ vitana, kadu aituhu tau kaikaiwabo‑naia eha idune‑nuanuaiei, medeina Yaubada ya dewa‑vidovidoha taui nuai nihenia mamae? Eha ana pata.\x + \xo 3:17 \xt V.V 15:7.\x*  
\v 18 Natunatu, adune‑nuanuaiemi. Ka itoka nau‑wawanika vavaneika kadewa‑vidovidohei yaka dewa wayahina, kate eha vonata wayahina.\x + \xo 3:18 \xt Iam 2:15-16.\x*   
\s1 Ate‑vatu Yaubada Matana  
\p
\v 19 Aituhu vavaneika kadewa‑vidovidohei, akanai kanꞌ‑anamanei vona tunutunuhina kavi‑muni‑waiwaiei. Wayahina, avi tuta Yaubada matana kamimini, eha nau‑wawanika kamatamatauta. Itoka aka pata aka heta kanꞌ‑ate‑vatuka, ka kadu nuaka nihenina kanꞌ‑awa‑vidovidoheka.  
\v 20 Ka aituhu avi tuta yaka dewa goyona kanuani, ka aituhu nuaka dewaia goyona wayahina ihaehaeyeka, ka aituhu nuaka iyapoyapoka deina, akanai nau‑wawanika kanuani Yaubada nuaka bagibagi‑tawanei, ka kadu tauna avaha yaka dewa aitamoata aitamoata anamane‑yehai.   
\p
\v 21 Yaiau, adune‑nuanuaiemi. Ka aituhu nuaka eha iyapoyapoka, akanai aka pata kanꞌ‑ate‑vatuka Yaubada matana, kadu aka pata kavi‑maupwani kaviama wayahina.\x + \xo 3:21 \xt Ebe 4:16.\x*  
\v 22 Ka aituhu aviani wayahina kaviama Yaubada wayahina, akanai tauna na‑veneka. Iuna tauna ya veimea kavi‑ateteyei, kadu itoka yaka dewa ahiahina tauna matana vo‑vi‑dewa‑haiawi.  
\v 23 Ka tauna ya veimea ananina ainua deina. Itoka nau‑wawanika Natu‑hoina, Iesu Tau Ito‑yavuha, kavitumahanei, ka kadu itoka nau‑wawanika mani tomotau kadewa‑vidovidohei, Yaubada avaha veimeyeka deina.\x + \xo 3:23 \xt Ioni 6:29; 13:34.\x*  
\v 24 Ka aituhu aviyaivia ya veimea ivi‑ateteyei, taui Yaubada nihenina imamaei, kadu tauna taui nihenia mamaei. Ka avaha kanamanei tauna nihenikaia mamaei. Iuna tauna Nuana Ahihinata avaha veneka, e tauna wayahikaia mamaei.\x + \xo 3:24 \xt 1Io 4:13.\x*   
\c 4  
\s1 Nau‑wawanika Nua Kanau‑dadani  
\p
\v 1 Yaiau, adune‑nuanuaiemi, ka avonemi, tau nau‑wahe tupwai ivonavona Nuana Ahihinata nihenia mamaei, kadue taui ivonemi tauna ya bagibagi wayahina inaunau‑wahe wayahimia. Kate eha nau‑wawanimi tau nau‑wahe aitamoata aitamoata uvitumahane. Eha. Ka itomi nau‑wawanimi naona tau nau‑wahe aitamoata aitamoata unau‑dadani avi nua nihenina mamaei unꞌ‑anamanei. Aituhu nua‑nana Yaubada wayahina, akanai taui yai nau‑wahe unononi. Kate aituhu nua‑nana eha Yaubada wayahina, akanai taui yai nau‑wahe uvihahaiei. Iuna tau nau‑wahe vitupu habuhabui avaha iyavuyavuta tanopia.\x + \xo 4:1 \xt Mat 7:15; 1Io 2:18; 2Io 7; 1Te 5:21.\x*  
\v 2 Ka itoka aka pata nua tunina tunina katana‑vewani taina deina. Aituhu aviyaivia inau‑wahe, ivonavona, “Iesu yaka Tau Ito‑yavuha avaha vi‑tomotau (itoka tomotau deina), kadu avaha omo tanopia,” tau nau‑wahe‑naia nihenia Nuana Ahihinata Yaubada wayahina mamaei.\x + \xo 4:2 \xt 1Ko 12:3.\x*  
\v 3 Ka aituhu aviyaivia inau‑wahe, ivonavona, “Iesu eha ta‑vi‑tomotau,” tau nau‑wahe‑naia nihenia Nuana Ahihinata Yaubada wayahina eha ta‑mamae. Kate taui nihenia Tau Ito‑yavuha a Havia nuana mamaei. Nonova unononi vivane nua‑nana na‑omo, ka ataina kadueyei nua‑nana avaha omo tanopia ka mamaei.\x + \xo 4:3 \xt 1Io 2:18.\x*   
\p
\v 4 Natunatu, adune‑nuanuaiemi. Ka itomi Yaubada yana yoko, kadu avaha tau nau‑wahe vitupu ubagibagi‑tawanei. Iuna Nuana Ahihinata nihenimia mamaei, ka tauna bagibagi‑vainena. Tau Ito‑yavuha a havia nuana tau maꞌ tanopi nihenia mamaei, kadu tauna bagibagina, kate ya bagibagi eha ani‑vainena. Nuana Ahihinata tauna bagibagi‑tawanei.\x + \xo 4:4 \xt Mat 12:29; 1Io 5:4-5.\x*  
\v 5 Ka tau nau‑wahe‑naia vitupu inaunau‑wahe tanopi ana dewa wayahina, kadu tau maꞌ tanopi yai nau‑wahena tanoi inononi.\x + \xo 4:5 \xt Ioni 8:47; 15:19.\x*  
\v 6 Kate itoai Yaubada natunatuna. Wayahina, aituhu aviyaivia Yaubada ianamanei, akanai taui yama nau‑wahe inononi. Ka aituhu aviyaivia eha Yaubada natunatuna, taui eha yama nau‑wahe ita‑nononi. Wayahina, aka pata Nuana Tunutunuhina kadu nuana goyona katana‑vewani kanꞌ‑anamanei deina.   
\s1 Yaubada Vivane Dewa‑vidovidoha‑hoina  
\p
\v 7 Vavaneiu adewa‑vidovidohemi. Ka itoka nau‑wawanika mani tomotau kadewa‑vidovidohei, iuna dewa‑vidovidoha Yaubada wayahina vinꞌ‑omo. Ka aituhu aviyaivia idewa‑vidovidoha, akanai taui avaha yai tupua vovouna Yaubada wayahina ivaniahei, kadu taui Yaubada ianamanei ahiahina.  
\v 8 Iuna Yaubada vivane dewa‑vidovidoha‑hoina. Ka aituhu aviyaivia eha idewa‑vidovidoha, taui eha Yaubada itꞌ‑anamane.  
\v 9 Ka Yaubada avaha tauna ya dewa‑vidovidoha wayahika si‑vinꞌ‑omanei kadueyei. Tauna Natu‑hoina vi‑tunei omo tanopia, iuna Yaubada ya nuanua itoka yawai‑vavaha kavaniahei Natu‑hoina wayahina.\x + \xo 4:9 \xt Ioni 3:16.\x*  
\v 10 Ka dewa‑vidovidoha‑hoina taina. Nonova itoka eha Yaubada kata‑dewa‑vidovidohe. Eha‑ohota. Kate Yaubada tauka dewa‑vidovidoheka. Wayahina, tauna Natu‑hoina vi‑tunei omo tanopia, ka vi‑nomuei yaka dewa goyona habuhabuna a nau‑pata wayahi.\x + \xo 4:10 \xt Rom 5:8-10; 1Io 2:2.\x*   
\p
\v 11 Yaiau, adewa‑vidovidohemi. Ka Yaubada dewa‑vidovidoheka ananina deina. Wayahina, itoka nau‑wawanika mani tomotau kadewa‑vidovidohei.  
\v 12 Eha aitam koiaka tau maꞌ tanopi wayahia Yaubada ita‑dueye. Ka aituhu itoka mani tomotau kadewa‑vidovidohei, akanai Yaubada nihenikaia mamaei, kadu tauna ya dewa‑vidovidoha natanata nihenikaia.\x + \xo 4:12 \xt Ioni 1:18.\x*   
\p
\v 13 Ka Yaubada avaha Nuana veneai. Wayahina, itoai tau hae ananiai avaha anamane‑yehai, itoai tauna nihenina amamaei, kadu tauna itoai niheniaia mamaei.\x + \xo 4:13 \xt 2Ko 1:22; 1Io 3:24.\x*  
\v 14 Ka itoai avaha Yaubada Natu‑hoina adueyei mataia. Wayahina, tauna ahaehaeyei tomotau wayahia. Ka Yaubada tauna Natu‑hoina vi‑tunei omo tanopia, e Natu‑hoina vivane tau maꞌ tanopi ai Tau Ito‑yavuha.  
\v 15 Ka aituhu aviyaivia iawaehei Iesu vivane Yaubada Natu‑hoina, akanai Yaubada taui nihenia mamaei, kadu taui Yaubada nihenina imamaei.  
\v 16 Wayahina, itoai avaha Yaubada ya dewa‑vidovidoha tauai wayahiai anamanei, ka kadu avaha avitumahanei.  
\p Yaubada vivane dewa‑vidovidoha‑hoina, ka aituhu aviyaivia dewa‑vidovidoha nihenina imamaei, akanai taui Yaubada nihenina imamaei, kadu Yaubada taui nihenia mamaei.  
\v 17 Wayahina, Yaubada ya dewa‑vidovidoha natanata nihenikaia deina, ka apaina, nau‑yanahi anꞌ auyewa wayahina, eha kamatamatauta, kate kanꞌ‑ate‑vatuka. Ika, ate‑vatuna kavaniahei, iuna itoka yawaika tanopia Iesu yawaina aitamoata deina.  
\v 18 Matauta eha ana pata vinꞌ‑omo dewa‑vidovidoha wayahina. Iuna dewa‑vidovidoha bagibagi‑vainena, ka dewa‑vidovidoha matauta vo‑tahoi. Matauta vinꞌ‑omo dewa‑yaiyai wayahina. Ka aituhu aviyaivia imatamatauta, taui nihenia dewa‑vidovidoha a paisewa eha ta‑nau‑yehai.   
\p
\v 19 Ka tuta ataina wayahina aitamoata aitamoata wayahikaia kadewa‑vidovidoheka, iuna naona Yaubada dewa‑vidovidoheka.  
\v 20 Ka aituhu aviyaivia ivonavona, “Yauke Yaubada adewa‑vidovidohei,” kate aituhu taui vavanei inau‑nikonikoiei, akanai taui tau vitupu. Iuna aituhu aviyaivia eha ai pata vavanei idewa‑vidovidohe, medeina taui ai pata Yaubada idewa‑vidovidohe? Eha ai pata, iuna vavanei avaha idueyei. Wayahina, memeanina idewa‑vidovidohei. Kate eha Yaubada ita‑dueye, wayahina vitana idewa‑vidovidohei.  
\v 21 Ka Yaubada avaha aka veimea taina veneka. Aituhu aviyaivia Yaubada idewa‑vidovidohei, akanai taui nau‑wawani kadu vavanei idewa‑vidovidohei aitamoata deina.\x + \xo 4:21 \xt Mar 12:29-31.\x*   
\c 5  
\s1 Tanopi Kabagibagi‑tawanei  
\p
\v 1 Aituhu aviyaivia ivitumahanei Iesu vivane Tau Ito‑yavuha, akanai taui avaha yai tupua vovouna Yaubada wayahina ivaniahei. Ka aituhu aviyaivia Amaka idewa‑vidovidohei, akanai taui kadu tauna natunatuna idewa‑vidovidohei aitamoata deina.\x + \xo 5:1 \xt 1Io 4:15.\x*  
\v 2 Aituhu Yaubada kadewa‑vidovidohei, akanai itoka kadu ya veimea kavi‑ateteyei. Wayahina, kanꞌ‑anamanei Yaubada natunatuna kadewa‑vidovidohei deina.  
\v 3 Iuna dewa‑vidovidoha Yaubada wayahina anꞌ anamana tauna ya veimea kavi‑ateteyei. Ka aka veimea tauna wayahina eha ita‑vitaka.\x + \xo 5:3 \xt Ioni 14:15, 23-24.\x*  
\v 4 Iuna aituhu aviyaivia avaha yai tupua vovouna Yaubada wayahina ivaniahei, akanai taui tanopi ana dewa ibagibagi‑tawanei. Ka medeina ibagibagi‑tawanei? Taui yai bagibagi vinꞌ‑omo yai vitumahana wayahina.  
\v 5 Ka aviyaivia ai pata tanopi ana dewa ibagibagi‑tawanei? Ai heta taui ivitumahanei Iesu vivane Yaubada Natu‑hoina.   
\s1 Hae Iesu Wayahina  
\p
\v 6 Ka Iesu Tau Ito‑yavuha avaha omo wayahikaia. Tauna omo daudau wayahina, ka kadue tauna omo dayaha wayahina. Tauna eha ta‑omo daudau‑nana ana heta wayahina. Kate tauna omo daudau‑nana dayahina ainua wayahia. Ka kadu Nuana Ahihinata tauna Iesu haehaeyei, iuna Nuana Ahihinata tunutunuhi‑hoina.\x + \xo 5:6 \xt Ioni 1:29-34.\x*  
\v 7 Wayahina, kadueyei dewa aitonu Iesu ihaehaeyei vivane tauna Yaubada Natu‑hoina.  
\v 8 Dewaia aitonu vivane Nuana Ahihinata, kadu daudau‑nana, kadu dayahina. Ka aitonu iawaehei aitamoata.\x + \xo 5:8 \xt Ioni 15:26.\x*  
\v 9 Aituhu tomotau yai hae kavitumahanei, akanai nau‑wawanika Yaubada yana hae Natu‑hoina wayahina kavitumahanei. Iuna tauna yana hae bagibagi‑vainena.\x + \xo 5:9 \xt Ioni 5:32-37.\x*   
\p
\v 10 Wayahina, aituhu aviyaivia Yaubada Natu‑hoina ivitumahanei, akanai Yaubada ya hae‑nana taui nuai nihenia mamaei. Kate aituhu aviyaivia eha Yaubada ita‑vitumahane, taui yai dewa wayahina ivonavona, “Yaubada tau vitupu.” Iuna taui avaha Yaubada yana hae Natu‑hoina wayahina ivihahaiei.\x + \xo 5:10 \xt Ioni 5:36-40; Gal 4:6.\x*  
\v 11 Ka ya hae‑nana taina. Yaubada avaha yawai‑vavaha veneka, ka yawai‑vavaha tanoi kavaniahei Natu‑hoina nihenina.  
\v 12 Ka aituhu aviyaivia Yaubada Natu‑hoina nihenina imamaei, taui avaha yawai‑vavaha ivaniahei. Kate aituhu aviyaivia eha Yaubada Natu‑hoina nihenina ita‑mamae, taui eha yawai‑vavaha ita‑vaniahe.\x + \xo 5:12 \xt Ioni 3:36.\x*   
\s1 Aviani Yawai‑vavaha Wayahina Kanꞌ‑anamanei?  
\p
\v 13 Ka taumi avaha Yaubada Natu‑hoina ana wava uvitumahanei. Wayahina, yauke vonaia aginumi omomo wayahimia. Ka yau nuanua una‑iavi, unꞌ‑anamane vivane avaha yawai‑vavaha uvaniahei.\x + \xo 5:13 \xt Ioni 20:31.\x*  
\v 14 Ka nau‑wawanika yaka dewa‑haiawa nui kanꞌ‑ate‑vatu Yaubada matana. Aituhu tauna ya nuanua kadu itoka yaka nuanua aitamoata, avaha kanamanei aviani wayahina kaviama, akanai tauna yaka viama na‑nononi, nꞌ‑awaeheka.\x + \xo 5:14 \xt Ioni 14:13-14; 1Io 3:21-22.\x*  
\v 15 Tuta tuta tauna yaka viama habuhabui nononi, ka avaha kanamanei aviani wayahina kaviamei, akanai tauna nꞌ‑awaeheka. Iuna itoka yaka nuanua kadu tauna ya nuanua vivane aitamoata.   
\p
\v 16 Aituhu aitam wayahimia vaneimi yana dewa goyona udueyei, ka aituhu dewa‑yaiyai goyo‑nana wayahina eha aniga, akanai nau‑wawanimi uviama Yaubada wayahina, e Yaubada vaneimi na‑nua‑piahi, e apaina vaneimi yawaina na‑vaniahe‑havinei. Aituhu taui dewa goyona idewei ai dewa‑yaiyai eha aniga, akanai, viama‑nana ana pata.  
\p Ka aitam dewa goyona maꞌ‑vavaha mamaei, ka dewa‑yaiyai goyo‑nana wayahina vivane aniga. Eha nau‑wawaniu aveimeyemi dewana goyona wayahina uviama.\x + \xo 5:16 \xt Mat 12:31.\x*  
\v 17 Vona ahiahina, aituhu Yaubada ya veimea katana‑bwegei, dewa‑naia aitamoata aitamoata vivane dewa goyona. Ka dewa‑yaiyai dewa goyona tupwai wayahia eha aniga.   
\p
\v 18 Ka kanamanei aituhu aviyaivia avaha yai tupua vovouna Yaubada wayahina ivaniahei, taui eha ai pata tuta tuta goyona idewa‑nubunubu. Iuna Yaubada Natu‑hoina dune‑vivini‑neiei. Wayahina, Tau Goyo‑nana eha ana pata na‑vo‑dadani‑neie, ka tauna eha ana pata taui yawai vi‑goyo.\x + \xo 5:18 \xt 1Io 3:9.\x*   
\p
\v 19 Kadu kanamanei vivane itoka Yaubada natunatuna, ka vona‑vavaha, aituhu aviyaivia tanopi ana dewa idedewei, taui habuhabui ai tau veimea vivane Satana.   
\p
\v 20 Ka kadu kanamanei Yaubada Natu‑hoina avaha omo wayahikaia, ka tauna avaha nua‑uya veneka. Ka nua‑uyana wayahina avaha Yaubada‑hoina kanamanei. Wayahina, itoka yawaika Yaubada‑hoina nihenina mamaei, kadu yawaika Yaubada Natu‑hoina nihenina mamaei. Tauna vivane Yaubada‑hoina kadu yawai‑vavaha.   
\p
\v 21 Natunatu, udune‑vivinimi! Tuta tuta nau‑wawanimi mani yaubada vitupu uvihahaiei.  
\m Ana pata deina.  
\m \sig Yauke Ioni\sig*